2 PIDRO

¹ Ako Simon Pidro, in sogowan osai katiwala IsoKiristo, in agsolat sa kanyo sa mga kataw daan kami piyakan paniwala batang kay IsoKiristo kantam Diyos osai Agpamaboway, panawen sa kansiyo maal pag remrem. ² Kamo pakayawteen wano gayed in Diyos, osai pakapyaen gayed in remrem panawen kamo katawan sa kansiyo osai kay Isos, kantam Kapwan. ³ Panawen sa kansiyo kabaloyan kitam piyakan Diyos in boo kantam piyagkailangan matang kitam kabaloy agogali in maal sa Diyos. Ina panawen sa kitam katawan kay Isos in omidang sa kantam matang piyakan bagiyan in kansiyo kalakoyen osai kansiyo kaalenen. ⁴ Kataw ina kansiyo wa tiyaboy sa kantam in kansiyo lakonaw osai makaamag pag mga piyangako matang kitam kapanlili sa daet pag mga panawen atai pag kobat panawen sa mga daet pag piyagkabeet in bilog kadogay kitam apo bagiyan sa kalakoyen Diyos. ⁵ Panawen ina kantam pilitanen padagdagen sa kantam paniwala in agpangwat maal, sa agpangwat maal padagdagen in katawanan, ⁶ sa katawanan padagdagen in agsakop sa kantam remrem, sa agsakop sa kantam remrem padagdagen in agbanta, sa agbanta padagdagen in betek pag mga panawen, ⁷ sa betek pag panawen padagdagen in agpabelag, sa agpabelag padagdagen in agpakayawte. ⁸ Angkataw no ina boo kantam piyagogali, kantam piyagpaistobo, na batay ngani apo kabolowan, apo pakinabang in kitam katawan kay IsoKiristo kantam Kapwan. ⁹ No siyo idapo ina pag mga ogali, na siyo yewed kangitan sa adayonaw, beleg wa in kansiyo remrem, siyo idwa katawan keyen in kansiyo mga daet liibangaw wa Diyos. ¹⁰ Na, laki mga belag, kantam pakaeyaten in agalapet asin pag mga ogali, matang kantam ngani atawanan in kitam iidang Diyos kansiyo biyerya. No kataw ngani ina, na kitam idbatay mibaribid. ¹¹ Na kitam batay ngani piyabelag sa idapo kalobosan pag sakopan IsoKiristo kantam Kapwan Agpamaboway. ¹² Kamayba kanyo wa atawanan ina pag boo, osai marigen wa in kanyo paniwala sa betek in piyatoldo wa sa kanyo, kamayba kataw ina, ina baatte kangay batay piyagsabi wakay. ¹³ In kangay remrem anggan ako agkaboway kay, in maal ina kangay piyagawitawit sa kanyo, ¹⁴ angkataw kangay wa atawanan ako idbatay wa dogay atai pag boway. Ina in siyabi sa kangay in kantam Kapwan IsoKiristo. ¹⁵ Na kangay batay piyagpangwat in boo kangay abaloyan matang kamayba ako matay wa, ina kanyo kay din piyagremrem. ¹⁶ In kami agbarita sa kanyo panawen sa kabaloyan IsoKiristo in kantam Kapwan, in siyo lomwas wakay, ina yewed batang waget sa mga panggisoden piyangwat mangyan. Dayem kanyam wa gayed ngiitan in kansiyo kalakoyen, ¹⁷ in siyo piyakamaal in Diyos Amang osai piyakalakonaw. Apo agiplaong batang sa Diyos lakoy keyen, Ina in kangay piyagpakayawte pag Bodang, in kangay piyagkaanggayan. ¹⁸ Kanyam arengeyan ina pag agiplaongan batang sa langit in kami kansiyo piyaanggat ista sa boksor iidang Diyos. ¹⁹ Matang labi kay kami agpakarigen agpaniwala sa siyabi in mga poropita. In maal kamo din agalapet asin pag siyabi, angkataw ina kagwali tinglaw agrawa sa lened anggan maboka wa in Ibeng in Kapwan, in tagorabas agrawa sa kantam remrem. ²⁰ Labi kay sa boo, kailangan kantam atawanan no sa kantam waget kabaloyan na idapo batay kabaloy agpaliwanag kamayba sa nakay pag siyabi in mga poropita sa mga Agisolat. ²¹ Angkataw in siyabi in mga poropita yewed agrakay sa remrem mangyan. No yewed in mga agsolat piyagpatoldo in Betek pag Abyan, matang in galem kansiro siyabi batang sa Diyos.

¹ Tangona apo sa mga kasokponan Israil mga agbosli pag mga poropita. Kalbas sa kanyo din apo batay mibaloy agbosli pag mga agpatoldo. Siro batay agpadaya in siro agpatoldo in mga yewed betek, mga makasida sa kanyo paniwala. Siro batay agpaawak sa Kapwan in agpaboway sa kansiro, na kagwali siro wa daan in agayay parosa toloy rateng. ² Aronaw in batay aakayan sa kansiro daeten pag mga ogali, kalbas panawen ina in amat wakay din batay agpaidapo kabolowan sa betek pag piyagpatoldo. ³ Ina pag mga agpatoldo solangan matang sa kansiro bosliyen pag panggisoden kamo kansiro batay piyadaya matang abel kanyo sangkap. Dogay wa sandata in kansiro batay parosa. Yewed agesek in Diyos in batay agbono sa kansiro. ⁴ Kamayba in mga angil in agpangwat daet, in kansiro daet yewed liibangaw in Diyos. Siro kansiyo piyangaw sa lened sa toyongan matang ista agpanaya sa Ibeng batay Agparosa. ⁵ Kadayo in daeten pag mga mangyan tangona sa kabetek Nowi, yewed din kansiyo liibangaw in kansiro mga daet, no yewed in boo kobat biyongkalos. Idapo piyaboway no yewed Nowi waget in agpatoldo panawen sa maalno pag ogali. Siro in boo talnaki walo in piyaboway. ⁶ Kadayo din in bayan Sodoma osai Gomora piyarosa Diyos panawen sa kansiro mga daet. Siro tiyebed anggan mibaloy boris matang alimbawa sa mga agpamangwat daet no nakay in batay mibaloy sa kansiro. ⁷ Kamay Lot kansiyo piyaboway angkataw siyo maal pag mangyan. Maloba wa agkaidapan in kansiyo remrem sa makarikoy pag mga piyagpangwat ina pag daeten pag mga mangyan. ⁸ Ibengibeng in siyo agpamataw asin sa kansiro in remrem ina pag betek pag mangyan maidap wano panawen asin pag mga daet kansiyo piyagparengey osai piyagngitan. ⁹ Na no kataw ina in mibaloy tangona asin pag mga agpamangwat daet, na kantam atawanan in Kapwan apo ngani padalan agpaboway sa mga betek sa kansiyo no siro piyagpaidapan. Osai siyo apo din padalan agparosa sa mga daeten, in siro piyagdamay kay anggan sa Ibeng batay Agparosa gayed. ¹⁰ Ina in batay ngani mibaloy labi kay sa mga agpamangwat in daet pag mga piyagkabeet kansiro bilog, osai dayo maniwala sa Diyos. Ina pag agbosli pag mga agpatoldo, siro idapo rikoy osai agpalalo, siro agpangaas agsabi daet sa mga taga langit. ¹¹ Kamay in mga angil siro maeyat kay sa mga agbosli osai apo kabaloyan, kamay in siro agpaadap sa Kapwan siro yewed agpanlibak asin pag mga agbosli. ¹² Idapo bait ina pag mga mangyan, kagwali mga ayop layas kaya biyodang matang kabelen, bonowen. Kadayo in mga yewed kansiro atawanan piyagsabiyan daet, na kataw in mga ayop layas siro batay din piyagbono. ¹³ Siro agpaidap sa mga roma, na in bayad siro batay din piyagpaidapan. Siro agkasadapan agpangwat in mga makarikoy kamayba ibeng, matang mibaloy in mga daet pag piyagkabeet kansiro bilog. Kalbas siro agpalanglang kay sa kanyo anggan siro agkasadapan agpadaya sa kanyo. ¹⁴ Siro idapo piyagpamangkit no yewed palagi waget agbabai, idbatay siyawaan agpangwat daet. Siro agpaakay agpangwat daet sa mga masasa in remrem. Siro biyasa wano agpangagaw. Panawen asin pag boo siro siyompa wa Diyos. ¹⁵ Siro pabaribid wa sa betek pag dalan, malibangaw wa, kansiro giisod in dalan Balaam in kay Bosor bodang, agpangwat daet angkataw agkabeet sa bayad. ¹⁶ Kamay Balaam siyabiyan in kansiyo asno. Kamayba ina yewed katawan agiplaong, ina miplaong kataw mangyan matang Balaam piyaempet sa kansiyo idapo bait pag panawen. ¹⁷ Ina pag mga agbosli pag agpatoldo kagwali malbeng maikat wa, kataw libo maboksi piyagbaba waget kowaya. In Diyos apo wa siyandata pangawan sa kansiro sa galem wa gayed lened. ¹⁸ Agpakabwat in kansiro agiplaong, kamay idapo kabolowan in piyagsabi. Kansiro piyagpaen in mga daet pag piyagkabeet in bayo kay pasoway sa mga agogali daet, matang siro moli wakay sa daet. ¹⁹ Kansiro mga yaakay kansiro piyangakowan keyen, Kamo idbatay wa siyakop kamayba nakay, bago siro sakop daan sa mga daet pag ogali. Angkataw in mangyan sakop kamayba sa nakay in mandaeg sa kansiyo. ²⁰ In mga mangyan agpasandig wa kay IsoKiristo kantam Kapwan osai Agpamaboway, na siro kabaliwan wa sa mga daet atai sa kobat. Kamay no siro beet wakay sa tangona kansiro pag mga daet, kalbas siro diyaeg wa asin, na in batay parosa sa kansiro maloba wano gayed. ²¹ In maal kay nges in siro idwa katawan in betek pag dalan. Kamay siro katawan in betek pag dalan, kalbas mipaoli wakay, paawak wa sa maal wano pag otos tiyaboy Diyos sa kansiro. ²² Na panawen sa kansiro, agibetek ngani in piyagsabi keyen, Kiyoman wakay in tito in kansiyo wa siyoka. Kadayo in osai ka piyagsabi keyen, In beyek kamayba piyaligo agoli wakay daan sa lebleban.

¹ Laki mga belag kangay piyagmaal, anda in kadowai kangay solat sa kanyo. Tanan kangay solat kangay beet pabeteken in kanyo remrem. ² In kangay beet kamo baatte agremrem sa mga siyabi tangona in maal wano pag mga poropita, osai in otos kantam Kapwan osai Agpamaboway, in piyatoldo sa kanyo in mga katiwala siyogo sa kanyo. ³ In kailangan kanyo tokaw atawanan, ngona sa kalobosan pag mga ibeng kamo batay piyaglibak osai piyagpatawaan in mga mangyan agogali in marames pag mga piyagkabeet kansiro bilog. ⁴ Siro batay keyen, Sa nakay in Kiristo in mangako keyen siyo batay rateng? Baina, idapo kay anggan ngona. In kantam mga koyay mangatay wa, kamay sogod piyangwat in kobat in boote kataw daan, idapo agiyalis. ⁵ Siro dayo manremrem keyen in Diyos in agpangwat tangona daan naw in langit osai in kobat sa kabaloyan kansiyo agiplaong. In kobat piyangwat batang sapa, sa kagwaraan sapa. ⁶ Sa sapa din, sa bongkalos lakoy tangona, siida in boote sa tokaw pag kobat. ⁷ Sa kabaloyan din in agiplaong Diyos in ngona pag langit osai kobat baywi kay kansiyo piyagalapet anggan sa Ibeng batay Agparosa. Asin pag Ibeng siro batay piyagtebed, osai batay piyagparosa in mga agpamangwat daet. ⁸ Laki mga belag kangay piyagmaal, kamo ayaw alibangawan anda. Sa Kapwan in osai ka ibeng kagwali osai ka libo ka dagon, in osai ka libo ka dagon kagwali osai waget ka ibeng. ⁹ Idbatay piyalimbang in Kapwan in kansiyo piyangako, kataw in piyagremrem in kalaati mangyan. Dayem siyo agpanaya sa kanyo, angkataw siyo dayo apo maidapo. In kansiyo beet in boo mangyan agbenglay in kansiro mga daet. ¹⁰ Kamay in batay rateng in Ibeng in Kapwan kataw in agrateng in agpanakaw. Asin pag Ibeng in langit toloy batay mapasaw apo lakoy agaleng makapangirabot. Batay matebed in ibeng, bolan, kadayo mga magirem. Kadayo in kobat osai in boo sa kobat batay masonog wa gayed. ¹¹ - ¹² Kataw kataw ina in batay mibaloy dogayan sa kalobosan, na anggan kitam agpanaya kay sa Ibeng Diyos, kailangan kitam pasakop wa gayed sa kansiyo, agpamangwat in kansiyo beet. Ayaw aglimbang kitam agpanawen matang idwa dogay rateng ina pag Ibeng. In langit batay matebed, in boote batay matonaw sa kaibengen asin pag Ibeng. ¹³ Kamay kitam agpanaya sa pangako Diyos in bayo wakay pag langit, bayo wakay pag kobat in piyagbalayan in boo betek. ¹⁴ Na ngani, mga belag kangay piyagmaal, anggan kitam agpanaya kay sa batay mibaloy, kantam piliten agogali in maal, idapo daet, matang apyaan sa adap Diyos. ¹⁵ Remremen kaya in kantam Kapwan yewed kay agparosa matang kitam piyakan kay kabetek matang pabowayen. Ina daan in siyabi kantam belag Pablo kantam piyagmaal in siyo agsolat sa kanyo, piyagalapet in katawanan tiyaboy Diyos sa kansiyo. ¹⁶ Sa boo kansiyo mga solat ina daan in baatte kansiyo piyagsabi. Apo din mga siyabi sa kansiyo mga solat maidap atawanan in beet siyabi, kalbas yewed betek in paliwanag in mga yewed katawan osai in mga yewed marigen in paniwala. Kataw daan din ina in kansiro piyagpangwat sa kalaati kay pag mga Agisolat, na siro batay piyagparosa. ¹⁷ Ngona mga belag kangay piyagmaal, kanyo wa atawanan in mga batay mibaloy, na kailangan kamo agingat karam kamo piyabaribid in mga mangyan agpamangwat daet, karam kamo malabo sa kanyo marigen pag pagiskapetan. ¹⁸ Pagpilitanen kamo agistobo sa kanyo atawanan sa agpakayawte in Diyos osai sa kanyo atawanan kay IsoKiristo kantam Kapwan osai Agpamaboway. Siyo pakalakonawen ngona anggan idapo kalobosan. Ina wa ngani.