2 OWAN

¹ Ako in Koyay in agsolat. Ako agsolat sa Inang iidang Diyos, osai sa kansiyo mga bodang, in kangay wano gayed piyagpakayawte. Yewed waget ako, dayem in boo katawan in betek. ² Angkataw in betek agpamataw sa kantam. Ina sa kantam anggan idapo kalobosan. ³ Kitam pakaanggayen, osai pakayawteen, osai din pakapyaen in Diyos Amang osai IsoKiristo, kansiyo Bodang, panawen siyo betek, osai agpakayawte. ⁴ Ako agkaanggay wano gayed in kangay ngiitan in amat kaimo mga bodang agpamangwat in betek, kataw daan in yootos in Diyos Amang sa kantam. ⁵ Laki Inang, ngona ako apo piyagayay sa kaimo. Kitarn boo malsipakayawtean. Ina yewed bayo wakay pag otos in kangay piyagsolat sa kaimo, dayem in datiyan daan pag otos sa kantam, ibat kay sa parakayan. ⁶ In mga otos Diyos kantam pangwaten. Ina in kalabowan in agpakayawte. In otos piyatoldo sa kanyo tangona daan keyen, Kanyo ogaliyen in agpakayawte. ⁷ Angkataw karowan wa in mga agpamadaya agipanawan atai sa kobat. Siro dayo maniwala keyen IsoKiristo mibaloy mangyan. In mga kataw ina agpamadaya, osai agpakagwali Kiristo. ⁸ Na kamo agingat, matang ayaw maidapo in kanyam piyanawen, dayem kanyo abel in boo bayad. ⁹ In yewed agaway sa piyatoldo Kiristo, no yewed agdagdag kay, na yewed piyagbalayan Diyos. Kamay no siyo agaway sa piyatoldo Kiristo, na piyagbalayan in Amang, osai in Bodang. ¹⁰ Kamayba nakay in rateng sa kanyo, yewed anda in piyagpatoldo, na ayaw kanyo agpaonaiken sa balay, ayawno miplaong sa kansiyo. ¹¹ Angkataw in agiplaong sa kansiyo agiyagem wa sa kansiyo mga daet pag panawen. ¹² Karowan kay nges in kangay batay piyagsabi sa kanyo, kamay idwa piyagsolat. Kamay ako beet asin pataboy, matang kapanggisodan gayed sa kanyo. Matang kitam labi kay agkaanggay. ¹³ In mga bodang kaimo belag kagbaiyan iidang din Diyos, siro keyen, Kamo kagwali wa nakay?