2 KORINTO

¹ Ako Pablo in agsolat osai Timotiyo kantam belag. Ako katiwala Kiristo. Ina in beet Diyos. Kami agsolat sa barkadaan mga bodang Diyos sa bayan Korinto, kadayo sa mga iidang Diyos sa boo kobat Akaya. ² Kamo pakayawteen osai pakapyaen in Diyos kantam Amang osai IsoKiristo kantam Kapwan. ³ Kantam pakalakonawen in Diyos, in Amang Kiristo Isos kantam Kapwan. Siyo in mabait pag Amang. Siyo in Diyos in agpakaeyat remrem. ⁴ Sa boo kantam kaidapan siyo in agpakaeyat kantam remrem, matang kitam kabaloy agpakaeyat remrem sa mga mangyan piyagpaidapan, panawen kantam remrem piyakaeyat Diyos. ⁵ No nangkalakoy in kaidapan kanyam diyalan in kami agyanggat kay Kiristo, na kalakoy din ina in kanyam eyat remrem batang kay Kiristo. ⁶ No kami piyagpaidapan na ina matang piyakaeyat kanyo remrem, osai matang kamo piyaboway. Kalbas no piyakaeyat in kanyam remrem na ina matang piyakaeyat din in kanyo remrem matang kamo kabaloy agtiis sa mga kaidapan kataw daan in kanyam piyagtiis. ⁷ Na maeyat in kanyam remrem sa kanyo, angkataw kanyam atawanan kataw kamo agyanggat sa kanyam sa kaidapan na piyakaeyat din in kanyo remrem kataw kanyam. ⁸ Mga belag, kanyam piyagbarita sa kanyo in mga kaidapan kanyam diyalan in kami sa Asya. In kalobaen idwa mayadi, anggan kanyam remrem tomag idbatay wa boway. ⁹ Kami keyen kami batay wa matay. Kamay ina mibaloy matang ayaw kami agpasandig sa sadiri kabaloyan, dayem sa Diyos, kataw siyo in agpamaboway wakay sa mga matay. ¹⁰ Ina pag betek kami kansiyo piyaboway sa batay wa piyagbono. Kamay anggan ngona kami piyagpaboway daan. Kanyam din atawanan gayed kami kansiyo kay batay piyagpaboway, ¹¹ angkataw kamo agpandalangin agtolong sa kanyam. No kataw ina, aronaw in agpandalangin sa kanyam, na aronaw din in batay agkaanggay sa Diyos paka kansiyo wa siyagot in mga pandalangin, kami kansiyo tiyolong. ¹² Anda in kanyam piyagkaanggay, angkataw sa kanyam galem kami katawan in kanyam mga ogali idapo agibetang sa boo mangyan, yewed bosliyen, na labi kay sa kanyo. Ina yewed waget sa kanyam atawanan, dayem batang daan sa Diyos. ¹³ - ¹⁴ Na sa kanyam mga solat ayaw agpamangkit kay galem labi kay sa kanyo ngiitan. Ngona in kanyam ogali ikkay gayed kanyo atawanan. Kamay kangay beet dogayan kanyo gayed atawanan. Matang sa kabetek agrateng in Kapwan Isos kami kanyo piyakalakonaw, kataw daan kamo kanyam piyagpakalakonaw. ¹⁵ Panawen ina in kangay atawanan sa kanyo, na in kangay nges taite remrem ako tokaw domalan sa kanyo, matang nges kitam makadowai agpalkaanggayan. ¹⁶ Kangay nges beet domalan sa kanyo in ako agtaboy atai sa kobat Masidonya. Kalbas in ako agoli domalan wakay sa kanyo, matang ako kanyo wakay tiyolong sa agipanaw agtaboy sa Odiya. ¹⁷ Ngona in idwa domalan sa kanyo karam kanyo remrem ako bosliyen, agalisalis in kangay remrem, kataw in piyagpangwat in mga yewed agpaniwala, kamayba aon kamay yewed. ¹⁸ Kataw in Diyos yewed bosliyen na kataw din ina ako, yewed bosliyen in kangay mga agiplaong sa kanyo. No aon na aon wa daan ngani. ¹⁹ Angkataw IsoKiristo in Bodang Diyos in piyatoldo sa kanyo kami Silbano osai Timotiyo, siyo yewed aon kadogay yewed. Dayem siyo palagi aon. ²⁰ Angkataw kay IsoKiristo kitam kabel in boo mga pangako Diyos. Panawen sa kansiyo kitam kasabi keyen, Ina wa ngani, matang in Diyos piyagmaal. ²¹ In Diyos in agparigen sa kanyam paniwala, anggan sa kanyo, kataw kitam agpaagem kay Kiristo. Siyo daan din in omidang sa kantam. ²² Kitam kansiyo tiyandaan osai piyakan kansiyo Abyan sa kantam galem matang kantam atawanan batay kay din mibaloy in boo kansiyo mga pangako. ²³ In Diyos katawan sa kangay galem. Siyo katawan totoo ngani kaya ako taite idwa domalan sa Korinto, angkataw kamo daan kangay piyagpanremrem. ²⁴ Yewed kanyam beet agpoon sa kanyo paniwala. Kataw marigen wa kamo asin. Dayem kanyam beet agtolong sa kanyo matang kamo agkaanggay.

¹ Kangay remrem ayaw kay asin pataboy sa kanyo matang kamo idbatay wa kangay piyakarongkot. ² Angkataw no kamo kangay piyakarongkot, na idapo wa batay agpakaanggay sa kangay, angkataw kamo kangay wa piyakarongkot. ³ Ina in dailan kaya ako agsolat taite sa kanyo. Matang no ako asina wa, na ako idbatay wa agkarongkot sa kanyo. Kamo nges in agpakaanggay sa kangay. Angkataw in kangay atawanan, in makaanggay sa kangay, na makaanggay din sa kanyo boo. ⁴ In ako agsolat sa kanyo, in kangay remrem maloba wano gayed agrongkot. Ako agpanangis wa gayed. Kaya kamo kangay siyolatan yewed matang agpakarongkot sa kanyo, dayem matang kanyo atawanan ako agpakayawte wano sa kanyo. ⁵ In taite agpangwat lakoy daet agpakarongkot, na yewed ako agbangen in piyakarongkot, no yewed kamo boo. Kamay ako idbatay aglampas sa betek, yewed yangon kamo boo in piyakarongkot. ⁶ Kamay karowan sa kanyo in agparosa sa kansiyo. Na ina sibay wa. ⁷ Ngona kanyo libangawen in kansiyo daet. Pakaeyaten in kansiyo remrem, matang idbatay mistobo in kansiyo rongkot anggan omempet wa gayed sa paniwala. ⁸ Kangay gayed beet sa kanyo, papangkiten sa kansiyo siyo kanyo kay gayed piyagpakayawte. ⁹ In osai kay ka dailan kaya ako agsolat sa kanyo, matang kangay atawanan no kanyo piyagpaniwalaan in boo kangay piyatoldo sa kanyo. ¹⁰ No kanyo wa liibangaw in piyangwat daet kamayba nakay pag mangyan, na kangay wa din liibangaw. In daet kangay liibangaw, no ngani apo, na kaya kangay liibangaw panawen sa kanyo sa adap Kiristo, ¹¹ matang kitam yewed diyaeg Katanas. Angkataw kitam katawan in kansiyo mga padalan. ¹² Paka ako rateng sa Torowas, matang agpatoldo in Maal pag Barita Kiristo, kangay ngiitan in mga mangyan siyandata wa in Kapwan matang ako ista agpanawen. ¹³ Kamay ako agkariyaban nangkataw yewed kangay ngiitan kantam belag Titos. Kalbas ako panaw asin pag mga mangyan, pataboy wa sa Masidonya. ¹⁴ Kamay ako agkaanggay sa Diyos. Panawen kitam piyaagem kay Kiristo kitam palagi piyagpaanggat Diyos sa parada Kiristo in siyo mandaeg. Kitam sangkap Diyos matang agparateng in barita Kiristo sa boo kobat, kagwali mala masadap. ¹⁵ Kitam kagwali mala masadap, piyagtaboy Kiristo sa Diyos. Aarekan din in mga piyagpaboway, anggan din in mga agitaboy sa toyongan. ¹⁶ Sa mga agitaboy sa toyongan mala daet, mala makakatay. Dayem sa mga piyagpaboway na mala masadap, mala agtaboy boway. Nakay lames in apo kabaloyan kapangwat kalakoy ina pag panawen? ¹⁷ Kami yewed kataw in roma agpabili waget in barita Diyos. Kami dayem siyogo Diyos. Sa kansiyo pangkit kami agbarita kansiyo mga agiplaong idapo piyaagem. Kami sogowan ngani Kiristo.

¹ In beet siyabi ina yewed kanyam wakay piyagpakalakonaw in kanyam sadiri. Kami yewed kataw in mga roma kailangan agbaba solat agpakalakonaw. Kami lames kailangan agayay sa kanyo solat agpakalakonaw? ² Yewed, angkataw kamo wa daan in kanyam solat agpakalakonaw, agisolat sa kanyam remrem, matang ngiitan mabasa in boo. ³ Piyagngitan kamo solat Kiristo, piyababa sa kanyam. Ina agisolat yewed tinta dayem in Abyan Diyos in agkaboway, osai yewed sa mga dalapi, dayem sa remrem mangyan. ⁴ Kaya kami agpangaas kasabi kataw ina angkataw kami agpasandig sa Diyos panawen kay Kiristo. ⁵ Yewed kanyam asabi kami wakayte apo kabaloyan asin pag panawen. In boo kanyam kabaloyan batang sa Diyos. ⁶ Siyo in agtaboy sa kanyam kabaloyan matang sogowan sa bayo polong. Idwa batang sa Agisolat pag mga Batas dayem sa Abyan. Angkataw in Agisolat pag Batas agbono. Kamay in Abyan agpamaboway. ⁷ In mga Batas makakatay tiyogit sa mga dalapi. In betek ina tiyaboy ngiitan in rawa Diyos sa mata Mowisis, kamay yewed dogay in makasolap. In mga kasokponan Israil yewed kapangkit. Na no kalakoy ina in rawa in panawen sa Batas, ⁸ na labi kay lakonaw in panawen sa Abyan. ⁹ No agrawa lakoy in mga Batas in agsabi keyen in mga mangyan piyagparosa, piyagbono, na labi kay agrawa in agsabi keyen in mga mangyan piyagpangwat Diyos betek. ¹⁰ Angkataw in datiyan agrawa idapo wa, panawen diyaeg wa in lakonaw pag rawa. ¹¹ No in agkalobos maloba agrawa, na labi kay maloba agrawa in idapo batay kalobosan. ¹² Panawen kantam atawanan ina kantam remrem maeyat. ¹³ Kitam yewed kataw Mowisis agsorbong mata matang yewed piyagngitan in mga bodang Israil in kaidapo in rawa. ¹⁴ Kataw marigen kansiro remrem. Kataw anggan ngona baywi ina pag sorbong no siro agbasa in datiyan kasondowan. Ina pag sorbong agkakowa waget no in mangyan paagem wa kay Kiristo. ¹⁵ Anggan ngona baatte siro agbasa sa mga aklat Mowisis piyagsorbong kay in kansiro remrem. ¹⁶ Kamay no in mangyan patobang sa Kapwan na piyagkowa wa in sorbong, kataw in Agisolat panawen kay Mowisis keyen, In siyo patobang sa Kapwan piyagkowa in sorbong. ¹⁷ In piyagsabi asin Kapwan, na in beet siyabi in Abyan. No saano in Abyan in Kapwan na asin agipalpas in mga mangyan. ¹⁸ Ngona makowa wa in sorbong sa kantam mata. Kitam boo kagwali aninowan sa kalakoyen in Kapwan. Kitam baatte piyagalis piyagpangwat kataw daan in Kapwan, baatte agistobo in kantam kalakoyen batang sa Kapwan, batang sa Abyan.

¹ Kaya maeyat in kanyam remrem, angkataw in Diyos agpakayawte sa kanyam, kami kansiyo iidang asin pag panawen. ² Kami idwa agpangwat in mga makarikoy pag panawen, mga ogali piyagbetang. Kami yewed agpadaya, yewed kanyam piyagsongi in Agiplaong Diyos. Dayem in betek in kanyam piyagpatoldo sa boo mangyan, matang in boo kangitan kami agpangwat maal sa pangkit Diyos. ³ No apo kay tabon in Maal pag Barita kanyam piyagpatoldo, na in mga waget agitaboy sa toyongan in idbatay kangitan. ⁴ Kaya siro yewed agpaniwala, angkataw kansiro remrem biyeleg in piyagpaniwalaan atai sa kobat, matang yewed kansiro ngiitan in rawa in Maal pag Barita panawen sa kalakoyen Kiristo. Siyo kataw daan in Diyos. ⁵ Kiristo Isos in Kapwan in kanyam piyagpatoldo, yewed in kanyam sadiri. Kami kanyo waget sogowan panawen kay Kiristo. ⁶ Angkataw in Diyos tangona in agsabi keyen, Batang sa lened agrawa wa. Na siyo daan in agrawa sa kanyam mga remrem, matang kanyam atawanan in kalakoyen Diyos agrawa sa mata Kiristo. ⁷ Kami in piyakan ina pag kayamanan, in atawanan sa kalakoyen Diyos, kami kagwali waget mga keden, matang atawanan in kabaloyan lakonaw sa boo ina batang sa Diyos, yewed sa kanyam. ⁸ Kami palagi piyagpaidapan kamay idbatay diyaeg, piyagbaslag in remrem kamay yewed abyatan kanyam remrem, ⁹ piyagpangwatan daet kamay yewed piyagbaliwan idapo belag, piyagpakaskitan kamay yewed matay. ¹⁰ Kami kataw daan Isos palagi agkatay in kanyam bilog, matang in kansiyo boway piyagngitan din sa kanyam bilog. ¹¹ Anggan agkaboway kay baatte kami piyagkabono panawen kay Isos, matang in boway Isos piyagngitan sa kanyam agkatay pag bilog. ¹² Na kami baatte piyagbono kamay panawen ina kamo piyagpaboway Kiristo. ¹³ Piyagsabi sa mga Agisolat keyen, Kaya ako agiplaong angkataw ako agpaniwala. Kataw din ina in kanyam paniwala. Kaya kami agiplaong angkataw kami agpaniwala. ¹⁴ Angkataw kantam atawanan in Diyos in agpaboway wakay sa Kapwan Isos, siyo daan in batay agpaboway wakay sa kanyam, sarig Isos. Siyo din in batay agbaba kantam boo sa kansiyo bangen. ¹⁵ In boo kanyam kaidapan panawen sa kanyo. Matang karowan kay in batay katawan siro piyagpakayawte Diyos, na karowan in agkaanggay, agpakalakonaw sa kansiyo. ¹⁶ Kaya maeyat in kanyam remrem, angkataw kamayba agkaidapo eyat in bilog, in abyan palagi piyagpaistobo in eyat. ¹⁷ No piyagpaytikkalakoy osai in kanyam kadogayte pag mga kaidapante ngona osai in kapalit dogayan kaanggayan, na labi kay lakonaw in kaanggayan agbangen anggan idapo kalobosan. ¹⁸ Na yewed mga piyagngitan in kanyam piyagpanremrem, dayem in mga yewed piyagngitan. Angkataw kadogayte waget in mga piyagngitan, kamay idapo kalobosan in mga yewed piyagngitan.

¹ Angkataw kantam atawanan paka mabinlayan wa in dampa in kantam ngona piyagbalayan in kantam bilog, na kitam apo wakay bilog sa langit, pagbalayan piyangwat Diyos, yewed mangyan. Ina idbatay mabinlayan anggan dogayan. ² Atai pag balay kitam agdaing, beet wano malkoyog sa kantam balay sa langit. ³ Matang no malkoyog wa kitam idbatay ngiitan idapo bilog. ⁴ No kitam agpamataw kay atai pag dampa, in bilog atai sa kobat, na kitam agdaing, agkabiyatan. Yewed sa beet idapo wa anda pag bilog, dayem sa beet ina piyalitan wa in sa langit pag bilog. No kataw ina wa, na anda pag bilog in agkatay piyalitan wa boway idapo kalobosan. ⁵ In Diyos wa daan in agsandata sa kantam matang miyalis kataw ina. Osai piyagtaboy sa kantam in kansiyo Abyan, matang kantam atawanan batay din piyagtaboy in boo kansiyo mga pangako. ⁶ Na palagi maeyat in kanyam remrem. Kanyam atawanan no kitam atai kay pag balay, atai pag bilog, na kitam idapo kay sa balay in Kapwan. ⁷ Angkataw kitam agkaboway panawen sa agpasandig sa Diyos, yewed panawen sa mga piyagngitan. ⁸ Maeyat in kanyam remrem. Kanyam beet biyaliwan wa anda pag bilog, agpamataw wa sa bangen in Kapwan. ⁹ Kamay labi kay sa boo in kanyam beet kami makaanggay sa Kapwan kamayba kami saano, kamayba atai, kamayba sa langit. ¹⁰ Angkataw kitam boo batay piyaadap kay Kiristo, matang piyagpakan bayad sa kantam mga panawen in kitam agkaboway kay sa kobat, kamayba maalno, kamayba daeten pag panawen. ¹¹ Kaya kami agpilit agpaanggat sa mga mangyan matang moli wakay sa Diyos, angkataw kami katawan in beet siyabi agkalimo sa Kapwan osai agmaal sa kansiyo. In Diyos katawan in boo kanyam remrem. Osai kanyam beet kami kanyo wa din gayed atawanan. ¹² Ina kangay piyagsabi yewed matang agpakalakonaw sa kanyam sadiri, dayem matang kamo piyakan dailan agkaanggay sa kanyam. Osai matang kamo apo wa sagot sa agpakalakonaw sa bilog mangyan yewed sa kansiyo galem. ¹³ No tomag masida wa in kanyam remrem na panawen sa Diyos. Kamay no maalno in remrem, na matang kamo piyagtolong. ¹⁴ Kaya kami agkataw ina angkataw kami piyagpapoon in Kiristo agpakayawte sa kantam. Kataw sa kanyam remrem no in osai matay panawen sa boo mangyan, na in boo matay miyanggat sa kansiyo. ¹⁵ Siyo matay panawen sa boo mangyan matang in mga agkaboway ngona idwa agpangwat in kansiro datiyan piyagkabeet, dayem in piyagkabeet in Kapwan, angkataw siyo in matay panawen sa kansiro kalbas tagoli wakay boway. ¹⁶ Na ngona in kanyam remrem sa mangyan yewed sa bilog. Tangona kataw ina in kanyam remrem kay Kiristo, kamay ngona idwa. ¹⁷ Kataw no in osai ka mangyan paagem wa kay Kiristo, na siyo bayo piyangwat. In boo mga tangona kalbas wa. Maanda in boo bayo wakay. ¹⁸ Ina pag boo in Diyos in agpangwat. Panawen kay Kiristo kitam kansiyo wa piyabelag, yewed wa kaaway. Osai kami kansiyo iidang matang paoliyen sa kansiyo in mga mangyan. ¹⁹ In kangay beet siyabi, in boo mangyan piyagpabodang Diyos panawen kay Kiristo. Kansiyo wa liibangaw in kansiro mga daet. Osai kansiyo tiyaboy sa kanyam ina pag barita in siyo agpabodang, siyo aglibangaw daet. ²⁰ Na kami siyogo Kiristo. Kagwali in Diyos wa din agpilit sa kanyo, kami in sogowan keyen, Kamo moli wakay sa Diyos. ²¹ Kiristo idapo batang daet. Kamay piyababa sa kansiyo in kantam daet, matang kitam mipaagem sa kansiyo, betek sa pangkit Diyos.

¹ Na kataw kami mga katolong sa panawen Diyos, kami agpilit sa kanyo, ayaw aglimbang agpasandig sa kansiyo, angkataw kitam kansiyo piyagpakayawte. ² Kataw keyen in Diyos, Sa makaanggay pag kabetek kao kangay piyarengey. Sa kabetek agpamaboway kao kangay tiyolong. Maanda, ngona wa in makaanggay pag kabetek. Maanda, ngona wa in kabetek agpamaboway. ³ Kami yewed agpangwat makabais kamayba kay nakay, matang idapo batay ngiitan daet sa kanyam panawen. ⁴ Dayem in boo kanyam panawen piyagngitan kami sogowan Diyos. Kataw kami agbanta gayed sa mga golo, sa aronaw mga kaidapan, ⁵ kami piyagbogbog, biilanggo, siyonggaban mga mangyan, kami agpanawen anggan, yewed agesek, yewed mamangan. ⁶ Kaya piyagngitan kami sogowan Diyos panawen maalno in kanyam ogali, panawen kanyam atawanan, kami yewed aglimbang, kami mabait, panawen din in Betek pag Abyan, osai panawen kami agpakayawte gayed, ⁷ panawen yewed bosliyen in kanyam agiplaong, osai panawen in kabaloyan Diyos. In kanyam betek pag mga ogali, in kanyam panlaban osai pansangga. ⁸ Apo betek kami piyagmaal, apo betek piyagidapo kabolowan. Apo betek piyagpamalowasan, apo betek piyagpakalakonaw. Kamayba kami piyangawit bosliyen betek in kanyam piyagsabi. ⁹ Kagwali kami yewed atawanan kamay atawanan daan. Kamayba kami piyagparosa kamay idbatay matay. ¹⁰ Kamayba agrongkot kami agkaanggay daan. Tomag maidap kamay agpakayaman daan sa karowan. Kagwali idapo wano, kamay kanyam daan in boote. ¹¹ Mga belag sa Korinto, kami idapono piyagtago sa kanyo. Piyalowas wa sa kanyo in boo kanyam remrem. ¹² Kamo kanyam wano gayed piyagmaal, kamay kamo agkabagyaan sa kanyam. ¹³ Kamo kangay bodang, ako agiplaong sa kanyo. Kataw ako agpakayawte sa kanyo, na kamo din agpakayawte sa kangay. ¹⁴ Ayaw kamo agyanggat sa mga yewed agpaniwala. In maal osai in daet yewed mayadi piyalagem. Kataw in rawa osai in lened yewed mayadi osai waget. ¹⁵ Yewed mayadi maybelag Kiristo osai Dimonyo. In agpaniwala yewed mayadi paagem sa yewed agpaniwala. ¹⁶ Yewed mayadi in mga yewed Diyos agbalay sa balay lakoy Diyos. Kitam in balay in agkaboway pag Diyos. Siyo wa daan in agsabi keyen, Ako batay agpamataw sa kangay mga mangyan, agbalay sa kansiro. Ako in batay kansiro Diyos. Siro in batay kangay mga mangyan. ¹⁷ Keyen in Kapwan, Na kamo pasoway wa, ayaw agpasabangen sa kansiro. Ayaw mangatang kamayba sa nakay pag marames. Na ako batay agkaanggay sa kanyo. ¹⁸ Kamo batay mibaloy kangay mga bodang. Ako batay wa in kanyo amang. Ina in siyabi in Kapwan, in Apo Kabaloyan.

¹ Mga belag piyagmaal, kataw ina boo piyangako sa kantam, na kantam benglayen in boo agpakarames sa kantam bilog, osai sa abyan. Kitam agkalimo sa Diyos osai agmaal sa kansiyo, agpilit agogali maal anggan boo wa gayed sa Diyos in kantam sadiri. ² Kamo pabelag wa sa kanyam. Kami idapo piyangwat daet, idapo piyaakay sa daet, idapo piyadaya kamayba wa kay nakay. ³ Kaya ina kangay siyabi yewed sa kamo piyagpadaet. Dayem kataw in kangay karai siyabi kamo kangay wano piyagpakayawte, in kangay boway agiyagem sa kanyo kamayba anggan sa katayan. ⁴ Lakonaw in kangay tiwala sa kanyo, palagi kamo kangay piyaglakonaw. Kamayba kami aronaw kaidapan maeyat in kangay remrem, agkaanggay wano gayed panawen sa kanyo. ⁵ Kamayba kami rateng wa sa Masidonya kami yewed daan apyaan, palagi piyagpaidapan. Agkagolo kamayba saano agbangen. In kanyam remrem palagi agkariyaban. ⁶ Kamay in Diyos agpamaeyat sa mga agkabyatan remrem. In rateng Titos piyaeyat din in kanyam remrem. ⁷ In makaeyat sa kanyam yewed waget in rateng siyo, no yewed kadayo in barita in kanyo piyangwat maal sa kansiyo. Kansiyo siyabi kamo agkalowayan wano sa kangay, kamo agrongkot kono sa mibaloy, kamo agpakayawte sa kangay, matang ako anggayan wa gayed. ⁸ Kamayba in kangay taite solat makaparongkot sa kanyo, yewed kangay piyagpadaet ina. Kamay ako agrongkot dinte angkataw in kangay solat makaparongkot sa kanyo, kamay ina kadogayte waget. ⁹ Ako agkaanggay yewed sa kamo agrongkot, dayem biyenglay wa in kanyo daet panawen sa kanyo rongkot. Kaya in kanyam solat yewed mibaloy daet sa kanyo, angkataw in kataw ina pag rongkot batang sa Diyos. ¹⁰ Angkataw in rongkot batang sa Diyos agpaalis in remrem matang biyenglay in daet matang piyaboway. Na yewed makapanremrem in kataw ina pag rongkot. Kamay in rongkot kataw in mga agpasandig sa kobat, in raweg ina katayan. ¹¹ Kanyo remremen in raweg in kanyo rongkot batang sa Diyos. Baina, kamo agpilit omiwas. Kamo agkagalit, agkalimo. Kamo agkalowayan sa kangay, agistobo in kanyo paniwala. Kamo sandata agparosa sa agpangwat daet. Na piyagngitan wa ngani asin pag mibaloy kamo idapo piyangwat daet. ¹² In Diyos katawan, in kangay taite solat yewed panawen sa agpangwat daet, yewed din sa piyangwatan daet, dayem matang lomwas wa sa kanyo in kalakoyen in kanyo pakayawte sa kanyam. ¹³ Na in kanyo piyangwat agpakaeyat gayed sa kanyam remrem. Yewed waget sa piyakaeyat kanyam remrem, kami anggayan wano din sa kaanggayan Titos sa kanyo, angkataw kansiyo remrem kanyo piyakaeyat. ¹⁴ Matang ako yewed arikoyan in kamo kangay piyaglakonaw sa kansiyo. Kataw boo betek in kanyam siyabi sa kanyo, na kataw daan ina kay Titos ngiitan boo betek in kanyam siyabi sa kansiyo panawen sa kanyo. ¹⁵ Siyo agremrem sa kanyo in kamo agpaniwala, in siyo kanyo tiyanggap maal, in kamo agpasakop sa kansiyo, agkalimo, agmaal sa kansiyo. Baatte siyo agremrem kataw ina na agistobo in agpakayawte sa kanyo. ¹⁶ Ako agkaanggay angkataw lakonaw wa in kangay tiwala sa kanyo.

¹ Mga belag, ako beet kamo katawan in barita in piyangwat Diyos in siyo agpakayawte sa mga barkadaan kansiyo mga bodang sa Masidonya. ² Kamayba siro piyagsobok mga maloba pag kaidapan siro agkaanggay daan no, anggan kamayba wa siro maidap siro agtaboy daan lakoy. ³ Siro wakayte agtaboy, yewed waget in kansiro abaloyan no yewed labi kay sa kansiro abaloyan. Kaya ako katawan, ⁴ angkataw siro agpilit sa kangay keyen, Kami din pasaliyen sa agtolong sa mga belag sa Odiya. ⁵ Kalbas in tiyaboy labi kay kalakoy sa kanyam piyagremrem. Kansiro tokaw tiyaboy sa Kapwan in boo sa kansiro sadiri. Kalbas panawen sa beet Diyos, ina tiyaboy din sa kanyam. ⁶ Angkataw Titos in datiyan agpapoon ina pag panawen agtolong, na siyo kangay siyogo agpapoon din sa kanyo agbangen anggan mibaloy wa. ⁷ Kamo lakonaw in paniwala, in atawanan. Kamo kabaloy agiplaong, osai ageyat agpanawen, osai agpakayawte sa kanyam. Na kamo agpilit din agtaboy lakonaw pag tolong sa mga belag sa Odiya. ⁸ Kamo yewed kangay piyagpilit. Kaya kangay piyagbarita sa kanyo in piyagpangwat in kalaati in siro agtolong, matang atawanan no kamo apo din agpakayawte gayed. ⁹ Angkataw kanyo atawanan in kalakoyen in agpakayawte IsoKiristo kantam Kapwan. Kamayba siyo mayaman, siyo agpakaidap panawen sa kantam, matang panawen sa kansiyo kaidapan kitam kansiyo piyayaman. ¹⁰ Anda in kangay bilin panawen asin. Kadagon kamo in tokaw agkatolong osai agtaboy. Na ngona lobosen wa ina in kanyo piyarakay. ¹¹ Angkataw kamo agkaanggay agparakay, na ayaw wa aglimbangen anggan lobos. Agtaboy kamo no nangkalakoy in kanyo abaloyan. ¹² Angkataw no kitam beet agtaboy, na piyagtanggap Diyos kamayba nangkalakoy in kantam abaloyan. Yewed kansiyo piyagayay in idapo sa kantam. ¹³ Yewed kangay beet siyabi kamo piyagpaidapan matang in amat apyaan. ¹⁴ Dayem in beet tikkatawan in boo. Ngona pag betek kamo apo. Na in maal kanyo tolongen in mga agkaidapan. Na no dogayan kamo agbangen in agkaidapan, kalbas siro wakay agbangen in apo, na siro wakay in batay agtolong sa kanyo. Kataw ina kamo boo tikkatawan. ¹⁵ Na mibaloy wa sa kanyo in Agisolat keyen, In agporot aronaw idbatay siyobraan. In agporot wakay kalakoyte idbatay kiyorang. ¹⁶ Ako agkaanggay sa Diyos angkataw siyo agpanawen sa remrem Titos in siyo agpakayawte wano sa kanyo, kataw daan kami. ¹⁷ Yewed waget sa kanyam siyabi, dayem siyo wakayte beet asin pataboy angkataw siyo beet wano agtolong sa kanyo. ¹⁸ In osai ka belag atawanan sa boo mga barkadaan mga bodang Diyos panawen siyo agpatoldo in Maal pag Barita, siyo kanyam piyagpasarig sa kansiyo. ¹⁹ Yewed waget in siyo atawanan, siyo iidang din in mga barkadaan mga bodang Diyos matang kanyam sarig agbaba anda pag tolong in kanyam piyagpapoonan. In kataw ina pag panawen agpalakonaw sa Kapwan, osai agpapangkit in kanyam pakayawte sa mga bodang Diyos. ²⁰ Anda pag tolong lakoy kanyam piyagalapet gayed maal matang idapo kapadaet sa kanyam. ²¹ Kami agpilit agpangwat in betek, yewed waget sa pangkit Kapwan, kadayo din sa pangkit mangyan. ²² Matang kanyam kay piyagpaanggat in osai kay ka belag. Siyo makakarowan kanyam tiyepeng kamay baatte kanyam ngiitan siyo agkabeet wano agtolong. Kalbas ngona labi kay siyo agkatolong wano, angkataw lakonaw wano in kansiyo tiwala sa kanyo. ²³ Ina pag Titos, siyo in kangay belag, kami agpaytolong agtolong sa kanyo. Ina wakay dayem in mga belag in kansiyo sarig, siro sogowan in mga barkadaan. Boo kansiro ogali aglakonaw kay Kiristo. ²⁴ Na kamo agpabelag gayed sa kansiro, matang in mga barkadaan mga bodang Diyos kangitan kamo agpakayawte, osai betek in kami aglakonaw sa kanyo.

¹ Idwa kailangan ako agsolat sa kanyo panawen asin pag tolong sa mga bodang Diyos. ² Angkataw ako katawan kamo beet agtolong. Kamo kangay piyaglakonaw sa mga taga Masidonya. Kadagon kay in kangay siyabi sa kansiro kamo in mga taga Akaya beet wa agtolong. Kalbas siro aronaw in aakayan agtolong sa kanyo pakayawte. ³ Kamay anda pag mga belag kangay piyagpatokaw asin matang ngiitan totoo in boo kangay siyabi panawen sa kanyo, kamo sandata wa daan ngani kataw in kangay siyabi. ⁴ No in taga Masidonya apo miyanggat sa kangay, kalbas kansiro ngiitan kamo yewed kay sandata na kami batay arikoyan, kadayo din kamo panawen kami batang agpakalakonaw sa kanyo. ⁵ Ina in dailan kaya anda pag mga belag kangay piilit piyagpatokaw, matang agtolong sa kanyo agimis in kanyo piyangako tolong. No isag ako rateng masandata wa na ngiitan wa ngani in kamo wakayte agtaboy yewed piyagpilit. ⁶ Amba, kanyo remremen. In agasik kalakoyte, na kalakoyte din in batay abel. In agasik wakay dayem lakonaw, na lakonaw din in batay abel. ⁷ In baatte mangyan agtaboy no nangkalakoy in kansiyo remrem. Ayaw mabyat sa remrem, yewed sa piyagpilit waget pag agtaboy. Angkataw in agkaanggay pag agtaboy in makaanggay sa Diyos. ⁸ In Diyos kabaloy agpakarowan sa kantam anggan lampas kay sa kantam piyagkailangan. Matang kitam baatte katolong sa mga maidap. ⁹ Angkataw in Agisolat keyen, In Diyos agtaboy sa mga maidap anggan agbongsod. Siyo mabait wano anggan idapo kalobosan. ¹⁰ In Diyos agtaboy in bini piyagasik, osai pamangnen. Na siyo daan din in batay agtaboy sa kanyo in kagwali bini osai in batay agpaistobo matang lakonaw in galem in lakonaw kanyo piyagtaboy. ¹¹ Kamo kansiyo batay piyagpayaman sa boote, matang kamo labi kay batay katolong sa karowan. Na in galem ina pag agtolong in karowan in batay agkaanggay sa Diyos panawen sa kanyo tolong kanyam piyagbaba sa kansiro. ¹² Angkataw anda pag kantam tolong sa mga bodang Diyos, yewed waget matang siro apyaan, dayem panawen asin aronaw wano in agkaanggay sa Diyos. ¹³ In kanyo piyagtaboy lakonaw, ina tanda kanyo paniwala sa Maal pag Barita Kiristo yewed waget sa agiplaong dayem piyagngitan wa daan sa kanyo panawen. Siro agkaanggay wano sa Diyos panawen sa kanyo tiyaboy sa boo, osai panawen sa kanyo paniwala. ¹⁴ Kalbas kamo kansiro batay piyagpanremrem piyagpandalangin, angkataw kansiro ngiitan in Diyos agpakayawte din sa kanyo. ¹⁵ Kitam wa agkaanggay sa Diyos sa kansiyo lakoy tiyaboy sa kantam. In kalakoyen ina lakonaw lakoy, idapo wa batay kalakoy ina.

¹ Ngona ako Pablo waget in agsolat. In kalaati sa kanyo keyen ako dowagen no sa bangen, kamay matapang no sa adayonaw. Na panawen in Kiristo mabait, yewed matapang, ako apo piyagayay. ² In kangay piyagayay sa kanyo, no ako rateng na ako ayaw agpatapangen. Ako tiyak ngani batay matapang sa mga agpansabi in kangay panawen kataw waget in panawen in mga yewed kay kay Kiristo. ³ Kamayba kami sa bilog daan, in kanyam aglaban yewed waget agalapet sa kanyam sadiri bilog. ⁴ In kanyam mga panlaban yewed kataw in panlaban mangyan, dayem in mga panlaban Diyos, apo kabaloyan agsida sa mga marigen pag saogan. Kanyam piyagpaidapo in mga yewed betek pag matiwid. ⁵ Kanyam piyagpaempet in boo mga dailan mangyan in piyaglakonaw siro, panawen siro dayo katawan sa Diyos. Osai kanyam piyagkabel in baatte remrem matang piyagpasakop kay Kiristo. ⁶ Kalbas paka kamo pasakop wa gayed, na kangay wa batay piyagparosa in baatte yewed agpaniwala. ⁷ Kanyo piyagpanremrem in mga piyagngitan sa bilog. No in mangyan agremrem siyo kay Kiristo, na remremen din ako kataw din siyo kay Kiristo. ⁸ Ako piyakan in Kapwan kabaloyan sa kanyo, yewed matang agsida sa kanyo paniwala, dayem matang agpaistobo. Na kamayba kangay piyaglakonaw ina pag kabaloyan ako idbatay agkarikoy. ⁹ Kamo ayaw manremrem keyen in kangay mga solat sa kanyo panlimlimo waget. ¹⁰ Apo keyen in kangay kono mga solat galeman osai matapang, kamay no ako kono agiplaongan sa kanyo na tomag in kangay bilog mainaente, kadayo in agiplaong idapo kono kabolowan. ¹¹ Na in mangyan agpansabi kataw ina, kailangan siro katawan no nakay in kangay piyagsabi sa solat ngona in ako adayonaw, na no ako rateng wa na kataw daan ina in kangay batay piyagpangwat. ¹² Kami idbatay mangaas agpatikkalakoy, agpatikkabwat sa mga agpakalakonaw. Siro idapo bait, angkataw siro wakayte agpatikkalakoy sa kansiro sadiri. Siro daan in toladan kansiro sadiri. ¹³ Kamay in kami aglakonaw, kami idbatay aglampas sa kabaloyan tiyaboy Diyos sa kanyam. Anggan kamo in piyatoldo Diyos sa kanyam. ¹⁴ Kami in tokaw rateng sa kanyo agbaba in Maal pag Barita panawen kay Kiristo. Na no kami aglakonaw sa kanyo kami yewed aglampas sa kalakoyen piyatoldo Diyos sa kanyam. ¹⁵ Yewed kanyam piyagamin in panawen in amat. Kami yewed agpakalakonaw panawen asin matang kami yewed aglampas sa kabaloyan tiyaboy Diyos sa kanyam. In kanyam pagasa batay mistobo in kanyo paniwala, matang agistobo din in kanyam panawen sa kanyo, kamay idbatay lampas sa piyatoldo Diyos sa kanyam. ¹⁶ Na no kataw ina kami batay kapatoldo in Maal pag Barita sa mga kobat ista kay naw agbangen. Na kami idbatay agpakalakonaw sa panawen in amat sa kansiro agbangen patoldowan. ¹⁷ Keyen in Agisolat, No siyo beet agpakalakonaw, na in panawen in Kapwan in pakalakonawen. ¹⁸ Idapo kabolowan in agmaal sa sadiri. Dayem in makabolowan in piyagmaal in Kapwan.

¹ Dayem nges kamo agbanta sa kangay batay siyabi badyate idapo bait. Amba mamarengey wa ngani sa kangay piyagsabi. ² Kamo kangay piyagpanagiriyan kataw in panagiri Diyos. Kamo kataw osai ka daraga kangay piyangako batay piyagpakasal kay Kiristo. Siyo waget in kaliyakiyan maal batay lalaki. ³ Kamay ako agkariyaban karam kanyo remrem batay wa mipadaet, batay wa agpanremrem sa roma, idwa Kiristo in piyagkabeet gayed. Kataw Iba piyabaribid in olay. ⁴ Angkataw no apo agrateng agbarita sa kanyo osai wakay ka Isos, idwa in kanyam biyarita, na kanyo piyagkaanggay piyagparengey. Kalbas kanyo wa piyagtanggap in osai wakay ka abyan idwa in kanyo tiyanggap sa kanyam, kanyo wa piyagpaniwala in osai wakay ka adar, idwa in kanyam piyatoldo sa kanyo. ⁵ Kamay in kangay remrem ako kalakoy daan ina pag mga agpamarita kanyo piyaglakonaw. ⁶ Kamayba yewed makaparengey in kangay agiplaong, kamay sa boote padalan baatte kangay piyapangkit sa kanyo in lakonaw kangay atawanan. ⁷ Karam ako somala in ako agpakaidap matang kamo piyalakonaw, in ako yewed mangayay kabayadan sa kanyo in ako agpatoldo sa kanyo in Maal pag Barita batang sa Diyos. ⁸ Tangona in ako agpatoldo sa kanyo, in amat pag mga barkadaan mga bodang Diyos in agtaboy sa kangay. Kagwali siro kangay piyagagawan matang waget kamo piyagtolong. ⁹ In ako sa kanyo, kamayba nakay pag betek ako akorangan ako yewed manlepes kamayba wa kay nakay. Angkataw in mga belag batang sa Masidonya in agtaboy in kangay mga piyagkailangan. Ibat sa parakayan ako agpilit yewed agpaidap sa kanyo kamayba nangkataw. Kamayba wa nangkadogay kamo idbatay kangay piyagpaidapan. ¹⁰ Angkataw idapo baribid in Kiristo in agbalay sa kangay, na totoo ngani ako idbatay daan manlepes sa boo kobat Akaya, matang idapo batay kapaempet sa kangay piyaglakonaw. ¹¹ Kangay piyagsabi ina, yewed panawen ako yewed agpakayawte sa kanyo. In Diyos katawan kamo kangay wano piyagpakayawte. ¹² Ako idbatay agalis in kangay ogali sa kangay panawen. Matang ina pag mga agyabang agpamarita yewed mayadi agsabi keyen in kansiro ogali sa panawen kataw daan in kanyam piyagpangwat. ¹³ Siro baribid pag mga agpamarita. Siro agpadaya waget, agpakagwali waget mga katiwala Kiristo. ¹⁴ Ina idbatay makasoyo, angkataw kamayba Katanas agpakagwali daan angil agrawa. ¹⁵ Na yewed makasoyo no kansiyo mga sogowan agpakagwali betek pag sogowan. Kamay dogayan in kansiro parosa kalakoy daan sa kansiro mga piyangwat daet. ¹⁶ Datiyan kangay piyagsabi keyen ayaw kanyo agremremen ako idapo bait. Kamay no kataw ina ngani in kanyo remrem, na maal din matang ako maal kay agyabang kataw ina idapo bait. ¹⁷ In kangay piyagsabi agkayabangan waget kagwali idapo bait. Anda yewed batang sa Kapwan. ¹⁸ Kataw aronaw mangyan in agyabang sa mga atai sa kobat, na ako din batay agyabang. ¹⁹ Baina, kanyo remrem kamo katawan sa boote, na kamo katawan din agtiis sa mga idapo bait. ²⁰ Baina ngani kamayba kamo piyagsakop, piyaglingig osai piyagbantalaan, piyagidapo kabolowan, piyagsampek, baina, ina pag boo kanyo piyagbanta. ²¹ No kataw ina ngani in kanyo beet, na kami somala, angkataw kami idbatay kabaloy agpangwat kataw ina. Ako agaway kay sa idapo bait. Kamayba nakay in piyaglakonaw in amat, na ako kapalakonaw din asin. ²² No siro mga Ibriyo, na ako din. No siro mga kasokponan Israil, na ako din. No siro kasokponan Abraam, na kadayo din ako. ²³ In ako agiplaong kataw tai ako agpakagwali idapo ngani bait, kamay no siro sogowan Kiristo, na ako labi kay kataw in sa kansiro. Baina, sa karowen panawen ako idwa gayed katokor. Ako makakarowan wa piiriso, makakarowan wa biyogbog, makakarowan din batay wa nges biyono. ²⁴ Ako makalima wa biyogbog mga Odyo, baatte tatlompot siyam ka bogbog. ²⁵ Makatolo wa ako piyanggaroti. Makaosai ako piyamenglayan bato. Ako makatolo karanas sa aleggeban mapor. In makaosai boo yabi boo ibeng ako agilotang sa dagat. ²⁶ In ako mapret agipanawan aronaw makalimo in kangay diyalan, kataw in mga sapa lakoy bongkalos, osai mga tolisan, kataw in galit mga Odyo, kadayo in sa mga yewed Odyo, osai din in mga makalimo sa bayan, osai in sa mga kobat waget, osai sa dagat, in mga makalimo sa mga agpakagwali waget belag. ²⁷ Ako batang ageyat wano anggan wa agpanromir, yewed katokor agesek. Ako batang wa maloba agkayawes, agkainem. Mapret ako piyagdimla angkataw idapo kowaan benang. ²⁸ Yewed waget ina. Kamayba in mga barkadaan mga bodang Diyos kangay din piyagkariyaban ibengibeng. ²⁹ No apo mainaen na ako agkabiyatan. No apo yaakay agempet sa agpaniwala, na ako maloba agkaibengan. ³⁰ No kailangan ako agpayabang, na in ako mainaen, ina in kangay piyaglakonaw. ³¹ Ako yewed agsabi baribid. Ina atawanan in Diyos in Amang Isos kantam Kapwan. In kansiyo ngaran pagmaalen anggan idapo kalobosan. ³² In ako sa bayan Damasko, in gobirnador sakop sa poon lakoy Aritas agpangwat damay sa mga sakbawan bayan matang nges ako diyakep. ³³ Kamay ako siyoroy sa galang lakoy, kalbas piyalooy sa awak agbangen alabat lakoy bato, matang ako mipalpas wa.

¹ Kailangan ako agyabang kay kamayba idapo batay abel pakinabang. Ngona in kangay piyagkagisod sa kanyo in mga piyapangkit in Kapwan sa kangay in sa mga betek ako agkaanapen. ² Osai ka betek agkaanapen, ibat ina anggan ngona labing opat wa ka dagon in diyalan, ako osai ka mangyan piyaagem kay Kiristo biyagit, biyaba anggan sa katolo ka langit. Saken no in bilog wa daan, no yewed. Ako yewed katawan. In Diyos waget in katawan. ³ Kangay ngani atawanan ako biyaba sa alamanan Diyos. Yewed kangay atawanan no ako agkaanapen no in bilog wa daan. Saken. In Diyos waget in katawan ina. ⁴ Ista ako karengey in mga idbatay wano masabi sa mga agiplaong mangyan. Kamay piyagayaw din piyagsabi. ⁵ In kataw ina maal piyaglakonaw. Kamay ako idbatay agpakalakonaw, dayem in ako mainaen, ina in kangay piyagpakalakonaw. ⁶ Kamaybawa ako agkapayabang, na kalobante din, angkataw totoo in kangay piyagsabi. Kamay ako idbatay wa agpayabang, matang in mga mangyan ayaw agpalakonaw sa kangay dayem sa kansiro waget ngiitan osai arengeyan sa kangay mga ogali. ⁷ Ako piyakan maskit sa bilog, matang ako idbatay maloba agpakabwat remrem sa mga makasoyo pag piyapangkit lakoy Diyos sa kangay. Ina pag maskit sogowan Katanas agpaidap sa kangay matang ako ayaw agpalalo. ⁸ Makatolo ako mandalangin sa Kapwan keyen, Paorawen. ⁹ Kamay in Kapwan keyen, Sibay wa sa kaimo in ako agpakayawte sa kaimo, angkataw in kangay kabaloyan labi kay piyagngitan no kao mainaen. Matang labi kay kangay piyaglakonaw piyagkaanggayan in ako mainaen, matang in kabaloyan Kiristo in agpakaeyat sa kangay. ¹⁰ Na panawen kay Kiristo, maal din sa kangay no ako mainaen, no piyagidapo kabolowan, no piyagpaidapan, no piyagpangwatan daet. Ina pag boo piyagtiis angkataw no betek ako mainaen na ako piyagpakaeyat. ¹¹ Ako kagwali idapo bait. Kamay ako kanyo piilit agkataw ina. Bago in maal nges kamo in agmaal sa kangay. Angkataw kamayba ako idapo kabolowan ako kalakoy daan ina pag mga agpamarita kanyo piyagmaal. ¹² Baina ako yewed aglimbang agpangwat sa kanyo mga makasoyo lakoy pag panawen. Na ina in tanda sa kanyo ako ngani siyogo agpamarita. ¹³ Nakay in kangay piyangwat sa amat mga barkadaan mga bodang Diyos in yewed kangay piyangwat sa kanyo? Idapo, no yewed ina waget in ako yewed mangayay tolong sa kanyo. No in kataw ina daeten sa kanyo na ako agdaing wa. ¹⁴ Ngona wa in katolo ako batay asin sa kanyo. Kamay kamayba ngona ako idbatay daan mangayay sa kanyo. Kamo waget in kangay piyagkabeet, yewed in kanyo mga sangkap. Yewed in mga bodang agbangen in agalapet sa mga koyay, dayem in mga koyay agbangen in agalapet sa mga bodang. ¹⁵ Ako agkaanggay kamayba piyaggastos in boo sa kangay. Kamayba kangay boway piyagtaboy din matang kamo apo pakinabang. Panawen kalakoy ina in ako agpakayawte sa kanyo nakay, ako idwa gayed kanyo piyagpakayawte? ¹⁶ Kanyo atawanan ako idbatang mangayay kamayba kay nakay. Kamay in amat agsabi keyen ako agpansalaod waget agpamadaya sa kanyo. ¹⁷ Nakay batang siro kataw ina? Kanyo lames remrem in ako agsogo mangyan sa kanyo kamo kangay waget piyagbantalaan? ¹⁸ Ako agpilit kay Titos asin pataboy. Osai kangay piyakan sarig osai ka belag. Nakay, kamo yaapi Titos? Yewed mana lames tikkataw in kanyam remrem kadayo in kanyam mga ogali? ¹⁹ Kanyo lames remrem kanyam piyagsagotan in kanyam sadiri? Yewed. Sa pangkit Diyos kami agiplaong kataw kami kay Kiristo. Laki mga belag, in kanyam beet in boo kanyam pagpanawen agpaistobo wa sa kanyo paniwala. ²⁰ In kangay piyagkalimo no ako rateng wa asin karam ako apo ngiitan sa kanyo yewed kangay piyagkabeet. Osai din kamo apo ngiitan sa kangay yewed din kanyo piyagkabeet. Karam kamo apo agpalawayan, apo mga agpanagiri, mga daet remrem, mga madamot, ayawan, mga agpanlibak, mga agpalsipatoldo, mga agpakabwat remrem, mga agpamangwat golo. ²¹ In kangay kay piyagkalimo no ako rateng asina, no apo kay mga agpamangwat daet, mga agpanggaraw, osai mga makarikoy pag panawen, yewed kay kanyo biyenglay, no kataw ina na ako batay manangis panawen sa kanyo. Osai din ako batay piyagrikoy Diyos sa kanyo pangkit.

¹ Ngona in katolo ako asin pataboy. In Agisolat keyen, In kamayba nakay pag sombong ayaw agpaniwalaen no idapo agpatotoo dowai no yewed tolo ka mangyan. ² In tagoli wakay tangona ako asin sa kanyo kangay siyabi sa mga agpamangwat daet keyen ako batay wa daan agparosa. Kalbas ngona in ako adayonaw kay sa kanyo na kangay tagoli wakay piyagsabi sa kansiro, kadayo sa mga roma kay keyen, No ako asina wakay na ako batay wa daan ngani agparosa. ³ Kaya ako agkataw ina matang kanyo ngani ngiitan Kiristo in agsogo sa kangay agiplaong sa kanyo. Siyo apo kabaloyan lakoy agpanawen sa kanyo, yewed mainaen. ⁴ Kamayba tangona siyo mainaen piyako sa kodos, kamay ngona siyo agkaboway sa kabaloyan Diyos. Na panawen kami agiyagem kay Kiristo kami din mainaen. Kamay ngona in kami agiyagem ngani sa kansiyo kami din agkaboway sa kabaloyan Diyos matang agpapoon sa kanyo. ⁵ Pangkiten gayed in kanyo ogali, no kamo agpaniwala ngani. Amba, kanyo remremen in kanyo sadiri. No kamo yewed agpakagwali waget agpaniwala na kamo batay katawan IsoKiristo agbalay wa sa kanyo galem. ⁶ In kangay pagasa kamo batay katawan kami siyogo ngani Diyos. ⁷ In kanyam pandalangin sa Diyos kamo ayaw agpangwat daet. Kaya kataw ina kanyam pandalangin, yewed matang kami piyagmaal, dayem matang kamo agpamangwat maal kamayba kami tomag piyagdaeg. ⁸ Angkataw kami yewed mayadi aglaban sa betek. Dayem agalapet sa betek. ⁹ Kami agkaanggay no kami mainaen no kamo agbangen maeyat. In kanyam pandalangin in boo kanyo ogali idapo wa agiyagem, mibaloy wa gayed boo betek. ¹⁰ Kaya anda in kangay siyolat ngona in ako adayonaw kay, matang no ako rateng wa asin na idwa kailangan agparosa sa kanyo sa kabaloyan tiyaboy in Kapwan sa kangay. Anda pag kabaloyan tiyaboy in Kapwan yewed matang agpasida sa kanyo dayem agpaistobo sa kanyo paniwala. ¹¹ Laki mga belag, anggan atai waget. Anda wa in kalobosan. Kamo agpilit agogali boo betek. Kamo manremrem, kanyo pangwaten in kangay mga siyabi. Kamo malsangayonan, osai maybelagan. Na in Diyos agpakayawte osai agtaboy kabaloyan agpaybelagan, siyo batay agbalay sa kanyo. ¹² Kamo malkaanggayan no kamo maltagbowan. In boo mga bodang Diyos keyen, Kataw nakay wa kamo? ¹³ Kamo boo pabelagen IsoKiristo kantam Kapwan. Kamo boo pakayawteen in Diyos. Osai kamo boo palagemanen in Betek pag Abyan.