1 TIMOTIYO

¹ Ako Pablo in agsolat, ako katiwala Kiristo Isos panawen ako iidang Diyos in Agpamaboway sa kantam, iidang din Kiristo Isos in kantam piyagpasandigan. ² Ako agsolat kay Timotiyo, sa kangay wa gayed bodang sa paniwala. Laki Timotiyo, in kangay pandalangin kao pabelagen, pakayawteen, osai pakaanggayen in Diyos kantam Amang, osai Kiristo Isos kantam Kapwan. ³ Kaimo remremen, in ako batay wa sa Masidonya, kangay bilin sa kaimo kao mataw sa Ipiso, angkataw apo asin mga mangyan agpatoldo in baribid pag adar. Na kao mataw ngani asin agayaw sa kansiro. ⁴ Siro kaimo patoldowen keyen benglayen wa in mga panggisoden osai in maaba pag mga listaan mga kakoyayan. In mga kataw ina in parakayan agpaylabanan, ina yewed makatolong sa kantam agpangwat in remrem Diyos, in batay atawanan panawen sa agpasandig sa kansiyo. ⁵ Kaya ako agbilin kataw ina matang kitam agpakayawte batang sa maalno pag remrem, idapo daet, batang din sa agpasandig gayed kay Kiristo. ⁶ In kalaati agbenglay wa ina pag panawen, matang siro toloy wa sa mga idapo kabolowan pag panggisoden. ⁷ Kansiro beet agpatoldo in mga Batas Diyos, kamay yewed kansiro atawanan in kansiro mga piyagsabi, in kansiro mga piyagpangaas piyagpatoldo. ⁸ Kanta atawanan maal in mga Batas, kamay kailangan alapeten sa maal pag padalan. ⁹ Kanta remremen, kaya piyangwat in mga Batas yewed batay sa mga maalno pag mangyan, dayem batay sa mga dayo sa batas, mga daeten pag mangyan, mga dayo sa Diyos, mga aleleng, mga aglibak sa Diyos, mga yewed agsamba, mga agpamono sa kansiro mga koyay, mga agpamono mangyan. ¹⁰ In mga Batas piyangwat ngani batay sa mga agpanggaraw, mga bakla, mga kamomogot, mga agpansabi baribid, mga agpamabintang, kamayba nakay pag aglaban sa betek pag piyagpatoldo. ¹¹ Ina pag piyagpatoldo sa Maalno pag Barita batang sa Diyos in pakalakonawen osai pagmaalen in boo. Ina piyaalapet sa kangay matang piyabarita. ¹² Ako agkaanggay kay Kiristo Isos kantam Kapwan, in agtaboy sa kangay in kabaloyan atai pag panawen. In kangay piyagkaanggayan kansiyo remrem ako yewed aglimbang matang ako kansiyo iidang kansiyo sogowan. ¹³ Ako iidang kamayba ako tangona aglibak sa kansiyo, siyo kangay piyagpaidapan, piyagpangwatan daet. Kamay ako piyakayawte in Diyos angkataw yewed kangay atawanan in kangay piyagpangwat in ako yewed kay agpasandig sa kansiyo. ¹⁴ Kamay lakonaw in agpakayawte in Kapwan sa kangay, anggan ako piyakan kabaloyan agpasandig sa kansiyo, osai agpakayawte sa mga roma, kataw din in boo piyaagem kay Kiristo Isos. ¹⁵ Kiristo Isos atai pataboy sa kobat matang agpaboway sa mga agpamangwat daet. Ina pag siyabi totoo ngani, maal paniwalaanen in boo. Tangona ako in apo daet labi kay sa boo mangyan. ¹⁶ Kamay ako piyakayawte in Diyos anggan Kiristo Isos agaway kay agpakayawte sa kangay kamayba in kangay daet lakonaw sa boo. Ina osai ka alimbawa sa mga batay agpasandig sa kansiyo, mga batay piyakan boway idapo kalobosan. ¹⁷ Pagmaalen osai paglakonawen anggan idapo kalobosan in Diyos. Siyo osai waget, Poon lakoy idapo kalobosan, idbatay matay, osai yewed piyagngitan. Ina wa ngani. ¹⁸ Laki kangay bodang Timotiyo, anda pag boo kangay piyagpabilin sa kaimo panawen sa mga siyabi tangona in mga poropita panawen sa kaimo. Ayaw alibangawan ina pag mga siyabi matang kao apo eyat aglaban, ¹⁹ agpaniwala daan, osai maalno in remrem. Apo mga mangyan yewed maniwala sa kansiro maalno pag remrem, matang toloy wa masida in kansiro paniwala. ²⁰ Kataw ina Iminyo osai Aliyanro. Siro kangay wa tiyaboy kay Katanas matang patoldowen ayaw aglibak sa Diyos.

¹ Sa kangay mga bilin in lakonaw kailangan in mga agpaniwala agpandalangin, agayay osai agkaanggay sa Diyos panawen sa boo mangyan. ² Dalanginen din in mga poon lakoy kadayo in boo apo tongkolin, matang kitam apyaan, agkaanggay in boway, agmaal sa Diyos osai mabait. ³ Ina in maalno, makaanggay sa Diyos in Agpamaboway sa kantam, ⁴ angkataw kansiyo beet piyaboway in boo mga mangyan, katawan in totoo. ⁵ Angkataw osai waget in Diyos. Osai waget din in paywaraan sa Diyos osai sa mga mangyan, siyo in mangyan Kiristo Isos. ⁶ Kansiyo tiyaboy kansiyo boway matang palpasen in boo mangyan. Ina mibaloy sa kabetek, matang atawanan in beet Diyos agpamaboway sa mga mangyan. ⁷ Kaya ako iidang katiwala, matang agbarita sa mga yewed Odyo, agpamatoldo sa kansiro in betek pag agpaniwala. Totoo in kangay piyagsabi, yewed baribid. ⁸ Sa boo betek agsamba, in kangay beet in mga kaliyakiyan in tokaw agpandalangin, kailangan siro maal pag mangyan, idapo remrem daet, yewed din agkagalit sa kansiro mga belag. ⁹ In mga wakay kagbaiyan, kailangan siro ayaw agpamaalno agkasolokan, kadayo in damit, kadayo in abok. Ayaw siro agpakabwat sa mga kasangkapan kansiro bilog. ¹⁰ Dayem in kansiro pamaalno in maalno pag ogali. Ina in betek sa mga kagbaiyan agpaniwala sa Diyos. ¹¹ Sa betek agsamba kailangan in mga kagbaiyan agadar, ayaw aglalae, dayem agpakabwatte gayed. ¹² Kangay piyagayaw in mga kagbaiyan agpatoldo, agpakabwat sa mga kaliyakiyan. Ayaw siro aglalae. ¹³ Angkataw Adan in tokaw piyangwat, kadogay Iba. ¹⁴ Yewed Adan, no yewed Iba in piyadaya, kalbas yewed maniwala sa Diyos. ¹⁵ Kamay in kagbaiyan batay piyagpaboway panawen sa agpamodang no siyo agogali agpakabwatte in remrem agpaniwala, agpakayawte, osai agpamangwat maal.

¹ Totoo in piyagsabi keyen, In mangyan agkabeet agpapoon sa barkadaan mga bodang Diyos, na lakonaw pag panawen in kansiyo piyagremrem. ² Na kailangan in agpapoon idapo piyagngitan daet sa kansiyo, kailangan din osai waget in babai, osai katawan agsakop sa kansiyo remrem, yewed galiten, maalen in ogali, agpabelag sa mga mangyan, osai katawan agpatoldo. ³ Kailangan din siyo yewed agpanlasing, yewed matapang, yewed agpagolo, dayem mabait, osai yewed agpanremrem waget sa mga sangkap. ⁴ Kailangan siyo katawan agpapoon sa kansiyo talnakiyan, piyagmaal osai piyagpaniwalaan kansiyo mga bodang. ⁵ Angkataw no siyo yewed kabaloy agpapoon sa kansiyo talnakiyan na nangkataw siyo batay kabaloy agpapoon sa barkadaan mga bodang Diyos? ⁶ Kailangan siyo dogay wa agpaniwala. No yewed na karam siyo batay agpakabwat kataw in diyablo, na batay piyarosa din kataw in diyablo. ⁷ Kailangan din siyo piyagmaal in mga yewed agpaniwala, matang siyo idbatay piyaidapo kabolowan, idbatay abel in diyablo. ⁸ Kadayo in mga katolong sa barkadaan kailangan siro mga maalen in ogali, yewed bosliyen, yewed agpanlasing, yewed agkabeet sa mga sangkap. ⁹ Kailangan siro yewed piyagbaslag in remrem, agpaniwala gayed sa adar piyalowas wa. ¹⁰ Kailangan atawanan in kansiro ogali, kadayo no idapo ngiitan daet sa kansiro, na bayo siro pangwaten wa mga katolong. ¹¹ Kadayo in kagbaiyan pag mga katolong sa barkadaan, kailangan din siro maalno in ogali, yewed agpanlibak, dayem katawan agsakop sa kansiro remrem osai mabait. ¹² Kailangan din in katolong osai waget in babai, katawan agpakoyay sa kansiyo talnakiyan, piyagpaniwalaan kansiyo mga bodang. ¹³ In mga katolong yewed aglimbang sa panawen na siro batay piyagmaal in boo, kalbas batay ngani piyagparengey in siro agpatoldo panawen sa agpasandig kay Kiristo Isos. ¹⁴ In kangay beet idwa dogay ako rateng wakay sa kaimo. Kamay anda pag mga bilin kangay piyagsolat sa kaimo, ¹⁵ matang no ako yewed toloy rateng, na kaimo din atawanan in maal ogaliyen in mga bodang Diyos in agkaboway, ina in kansiyo mga mangyan, in mga agalapet, mga agatang sa betek pag paniwala. ¹⁶ Totoo ngani lakonaw lakoy in batang piyagbetang piyalowas wa, in kantam piyagpaniwalaan keyen, Kiristo ngiitan mibaloy wa mangyan, siyo piyapangkit in Abyan Diyos betek, siyo ngiitan mga angil. Siyo piyabarita sa boo mangyan, siyo piyaniwalaan sa boo kobat, siyo piyaonaik wakay sa langit.

¹ Atawanan in piyagsabi in Abyan Diyos keyen, Sa kalobosan pag mga ibeng apo mga mangyan batay agbenglay in paniwala, batay paagem sa agpadaya pag mga mamaw, osai sa kansiro baribid pag piyagpatoldo. ² Ina piyagpatoldo in mga bosliyen pag mga mangyan. In kansiro mga remrem miyarkaan wa in kansiro kapwan, na ina in diyablo. ³ Kansiro piyagayaw agpamangkit babai agpamangkit lalaki, osai in kalaati mga pamangnen. Bago in mga pamangnen piyangwat Diyos, maal kiyoman in mga agpaniwala, in mga katawan in betek osai agpandalangin agkaanggay sa Diyos. ⁴ In boo mga piyangwat Diyos maal. Yewed kailangan piyagayaw, dayem maal kiyoman, agkaanggay sa Diyos. ⁵ Angkataw ina maal sa Diyos panawen sa kansiyo agiplaong in agpangwat, osai panawen sa pandalangin. ⁶ Kao batay maalno pag sogowan Kiristo Isos no anda pag mga bilin kaimo piyagpatoldo sa mga belag. Osai baatte kaimo piyagpatoldo, ina agpaistobo din sa kaimo paniwala sa maal pag adar kantam piyagpaniwalaan, kaimo datiyan piyaggisod. ⁷ Osai ayaw agalapeten in idapo kabolowan pag mga panggisoden, dayem agpilit agogali maalno. ⁸ No kitam ageyat na batay mistobo in eyat kantam bilog, kamay labi kay lakonaw in pakinabang agpilit agogali maalno, angkataw ina apo pakinabang yewed waget ngona pag boway, dayem kadayo sa agrateng pag boway. ⁹ Ina pag siyabi totoo ngani, maal paniwalaanen. ¹⁰ Kaya kitam agpilit ageyat agpanawen, angkataw kitam agpasandig sa Diyos in agkaboway, in Agpamaboway sa boo, labi kay sa mga agpaniwala. ¹¹ Ina pag mga bilin kaimo patoldowen. ¹² Kao bodang kay, kamay ayaw kao agpaidapowen kabolowan panawen ina. No yewed sa boo kaimo agiplaong osai sa kaimo mga ogali kailangan kao agpakayawte, agpaniwala, idapo daet, matang kao maalno pag toladan in mga agpaniwala. ¹³ Kao agpilit agbasa in mga Agisolat sa kabetek agsamba, osai agpaliwanag osai agpatoldo, anggan ako rateng. ¹⁴ Alapeten in kabaloyan in tiyaboy tangona in Diyos sa kaimo, sa kabetek miplaong in mga poropita in kao yaatang piyandalangin in mga koyay sa barkadaan mga bodang Diyos. ¹⁵ In kangay mga bilin kaimo ngani pangwaten. Ayaw aglimbang asin matang piyagngitan in boo agistobo in kaimo kaalnowen. ¹⁶ Kao agingat sa kaimo mga ogali, osai sa kaimo piyagpatoldo. Ayaw agempet agpangwat in kangay mga bilin, matang kao pabowayen kadayo in mga agparengey sa kaimo.

¹ Ayaw agpansabiyanen in mga kaliyakiyan mga koyay wa, no yewed patoldowen maal kataw in kaimo amang. In kasalokoyan pag mga kaliyakiyan pagawiten belag. ² In mga kagbaiyan mga koyay wa kaimo pagawiten inang, in kasalokoyan pag mga kagbaiyan kaimo pagawiten din belag. Kamay in kaimo ogali sa kansiro ayaw tomag agkapangwat daet. ³ Tolongen in mga kagbaiyan balo in idapo agalapet. ⁴ Kamay no in osai ka kagbaiyan balo apo mga bodang, no yewed apo mga popo, na siro agbangen in kailangan agalapet sa kansiro mga koyaywate, agremrem sa mga piyanaboy tangona in siro pangkalakoyte kay, angkataw ina in makaanggay sa Diyos. ⁵ In kagbaiyan balo, in idapo agalapet, na sa Diyos waget siyo agpasandig, yewed aglimbang agpandalangin, ibeng osai yabi agpangayay tolong sa kansiyo. ⁶ Kamay no in kagbaiyan balo daeten wa in ogali, na siyo kamayba agkaboway kay, kagwali wa matay. ⁷ Ina pag mga bilin kaimo patoldowen sa kansiro matang siro idbatay agpangwat daet. ⁸ Kamayba nakay in yewed agalapet sa kansiyo mga kabelagan, labi kay sa kansiyo mga koyay, mga bodang, na kansiyo wa biyaliwan in paniwala, in kansiyo daet lakonaw kay sa mga yewed agpaniwala. ⁹ In paagemen sa listaan mga kagbaiyan balo alapeten in barkadaan, in mga waget kakoyay wa animnapo ka dagon, makaosai waget siyo batang apo lalaki, ¹⁰ atawanan siyo mabait pag mangyan, in agalapet maal sa mga bodang, osai in agpabelag sa mga taga adayonaw, kadayo in agtolong kamayba nakay in piyagkailangan in mga iidang Diyos kadayo sa amat kay pag mga apo kailangan, osai in ageyat agpangwat in boote maal. ¹¹ - ¹² Ayaw agpaagemen sa listaan in mga balo bodang kay, angkataw kailangan siyo mangako kay Kiristo keyen siyo idbatay wakay mamangkit lalaki. Na no siyo mamangkit wakay lalaki na siida wa in kansiyo pangako kay Kiristo na siyo batay piyagparosa. ¹³ Osai din siyo batay wa mibaloy bibelen, agpamalayan. Labi kay daet siyo batay agpanlibak, mga agpanlado sa idwakay kansiyo panawen, agiplaongan waget kamayba nangkataw. ¹⁴ Na no sa kangay, maal kay siro mamangkit wakay lalaki, mamodang, agalapet sa kansiro talnakiyan, matang in mga agkagalit sa kantam idapo batay ngiitan daet sa barkadaan mga bodang Diyos. ¹⁵ Angkataw apo wa mga balo bomaribid wa, paagem wa kay Katanas. ¹⁶ In mga kagbaiyan agpaniwala, no siro apo kagbaiyan balo sa kansiro kabelagan, na kailangan siro wa in agalapet sa kansiyo, ayaw agpaalapeten sa barkadaan mga bodang Diyos, matang in barkadaan katolong sa mga balo idapo wa ngani agalapet sa kansiro. ¹⁷ In mga koyay sa barkadaan mga bodang Diyos, no siro maal pag agpakoyay, labi kay no siro in mga agpabarita, agpatoldo in agiplaong Diyos, na siro pakanen lakonaw. ¹⁸ Angkataw in mga Agisolat keyen, Ayaw agboksongen in bibi in baka anggan piyagparoyosan kay. Agisolat din keyen, In agpanawen pakanen bayad. ¹⁹ In bintang sa osai ka koyay sa barkadaan ayaw agtanggapen no osai waget in agsabi. ²⁰ In mga agpamangwat ngani daet pagsabiyanen paparengeyen in boo, matang alimowan in kalaati. ²¹ Kao kangay piyagpabilinan sa pangkit Diyos osai Kiristo Isos, anggan in kansiyo mga angil, kaimo ngani pangwaten ina pag mga bilin. Kao ayaw agpangidang, ayaw apo piyagpaagem. ²² Kamayba nakay pag mangyan ayaw toloy agpakanen kabaloyan sa barkadaan mga bodang Diyos. Kao agingat, karam kao mipaagem sa daet in amat mangyan. Kao agpilit ayaw apo daet. ²³ Ayaw waget sapa in kaimo inemen. Dayem minem dinte alak panawen sa kaimo boyon, angkataw kao mapret apo maskit. ²⁴ Apo mga mangyan piyagngitan in daet ikkay rateng piyagosap. Kamay in amat wakay, in kansiro mga daet, yewed kay piyagngitan anggan isag kay. ²⁵ Kataw daan din ina apo mga maal pag panawen toloy piyagngitan. Kamay kamayba yewed toloy ngiitan ina batay ngiitan dogayan.

¹ In mga alapet sogowan, pakalakonawen in kansiro mga kapwan, matang idbatay piyaglibak in Diyos osai in kantam piyagpatoldo. ² No in kansiro kapwan agpaniwala na ayaw agpaidapowen kabolowan panawen siro tayari sa agpaniwala. Dayem pakaeyaten in agpaniwala sa kansiro angkataw in piyagtolong kansiro piyagmaal panawen siyo agpasandig din kay Kiristo. Anda in kaimo mga pakalakonawen sa kaimo piyagpatoldo. ³ Kamayba nakay pag mangyan no osai wakay in piyagpatoldo, idwakay kataw in siyabi kantam Kapwan IsoKiristo, osai idwakay kataw in mga adar makamaal sa kantam mga ogali, ⁴ na siyo agbosli, idapo atawanan. Siyo agkasadapan waget agmatiwidan agpaylabanan sa mga agiplaong. Kadogay siro agpanagiri, agpalawayan, agpanlibak, agpamabintang, ⁵ osai agpalsisagotan. In mga kataw ina yewed katawan agremrem, yewed katawan in betek. Kansiro remrem in agsamba padalan waget agpayaman. ⁶ Kamay ngani lakonaw din in batay abel in agsamba no siyo yewed solangan. ⁷ In kitam biyodang kitam idapono biyaba kamayba nakay, kalbas no kitam dogayan matay na idapo din batay biyaba. ⁸ Na kitam agkaanggay wa no kitam apo piyagkoman, osai apo piyagsoroy. ⁹ Kamay in mga agkabeet aronaw sangkap, siro batay piyagtepeng. Siro piyagsalaod kansiro daeten pag mga piyagkabeet, in agbenglay sa kansiro sa toyongan. ¹⁰ Angkataw in agkabeet sa mga sangkap osai ka pagrakayan in boo daet. Panawen sa agkabeet sa mga sangkap apo mga mangyan batang nges agpaniwala kamay ngona malibangaw, kalbas in kansiro remrem siyaldak wa aronaw mga kaidapan. ¹¹ Kamay kao wakay, kao sogowan Diyos, ayaw paagem asin pag mga daet. Kao agpilit agogali in betek, in maalno, in agpasandig kay Kiristo, in agpakayawte, in agbanta, osai in mabait. ¹² Kataw in mga begle ageyat matang mibaloy koyay, na kao ageyat agpaniwala, matang kao kabel in boway idapo kalobosan. Ina in piyangako Diyos, in siyo agberya sa kaimo, in kaimo piyatotoo in kaimo paniwala sa pangkit in karowan. ¹³ Sa pangkit Diyos in agtaboy boway sa boote, osai sa pangkit Kiristo Isos in agpatotoo maalno in siyo piyagtanong Ponsiyo Pilato, ¹⁴ kao kangay piyagpabilinan, kaimo alapeten in kaimo tongkolin, ayaw somala, ayaw apo daet, anggan rateng in kantam Kapwan IsoKiristo, ¹⁵ sa kabetek siyo piyalowas Diyos in pagmaalen in boo, in Poon lakoy apo kabaloyan, in Mabwat kay sa boo mga poon, in Kapwan in boote. ¹⁶ Siyo waget in idapo katayan, agbalay sa rawa makasolap wano gayed. Idapo batang kangitan sa kansiyo, anggan ngona idapo batang kangitan. Siyo in pagmaalen, osai in apo kabaloyan anggan idapo kalobosan. Ina wa ngani. ¹⁷ Kaimo sabiyen sa mga aronaw sangkap ayaw siro agpakabwat, ayaw siro agpasandig sa mga sangkap agkaidapo, no yewed sa Diyos in agtaboy lakoy in boote matang kitam agkaanggay. ¹⁸ Siro kaimo patoldowen agpangwat in maalno, agpayaman sa maalno pag panawen, yewed ayawan, dayem agpanaboy sa mga roma. ¹⁹ Kataw ina siro agtipon in sangkap sa dogayan pag boway,osai batay kabel in totoo pag boway. ²⁰ Laki Timotiyo, kaimo ngani alapeten in piyaalapet Diyos sa kaimo. Ayaw agpaagem sa mga agpanggisoden yewed makaanggay sa Diyos, osai sa mga matiwid piyagawit katawanan kamay yewed totoo. ²¹ Apo mga agpaniwala asin pag mga matiwidan, kalbas malibangaw sa paniwala. Kamo pakayawteen in Diyos.