1 TISALONIKA

¹ Kami kora Pablo, Silas osai Timotiyo in agsolat sa kanyo sa barkadaan mga bodang Diyos sa Tisalonika, sa mga iidang Diyos Amang osai IsoKiristo in Kapwan sa boo. Kanyam pandalangin kamo pakayawteen lakoy osai pakanen apyaan pag remrem. ² Kami baatte agkaanggay sa Diyos panawen sa kanyo boo. Kamo baatte kanyam piyagawit sa kanyam mga pandalangin. ³ Kami agkaanggay sa Diyos kantam Amang angkataw in kamo agpaniwala kay Kiristo piyagngitan sa kanyo mga maal pag panawen, osai in kamo agpakayawte sa mga amat, anggan kamo idbatay atorayan agtolong, osai in kamo yewed aglimbang agpanaya sa kantam Kapwan IsoKiristo. ⁴ Laki mga belag, kamo piyagpakayawte Diyos. Kanyam atawanan kamo kansiyo iidang. ⁵ In kami asin sa kanyo, in kami agpatoldo in Maal pag Barita ina yewed waget sa mga agiplaong, dayem kadayo sa kabaloyan in Betek pag Abyan. Osai kanyam atawanan ina pag Barita totoo ngani. In kami asin kanyo ngiitan in kanyam mga ogali makamaal sa kanyo. ⁶ Kalbas kamo tomolad wa sa kanyam osai sa Kapwan. Kamayba kamo piyagpaidapan panawen sa Barita, ina kanyo tiyanggap agkaanggay. Ina pag kaanggayan batang sa Betek pag Abyan. ⁷ Matang kamo pagtoladan wa in boo mga agpasandig kay Kiristo sa Masidonya osai Akaya. ⁸ Angkataw ibat sa kanyo in barita in Kapwan omarabang idwaget sa Masidonya osai Akaya, dayem sa boo kobat piyagbarita in kanyo paniwala sa Diyos, anggan kami idwa kailangan agsabi sa mga roma panawen ina. ⁹ Angkataw in mga wakay mangyan in agbarita in kami kanyo wa gayed piyabelag, osai din in kamo agbenglay wa in mga yewed Diyos, matang kamo agpasandig wa osai agpaniwala sa totoo agkaboway pag Diyos. ¹⁰ Siro agbarita kay din in kamo agpanaya sa kansiyo Bodang batang sa langit. Siyo Isos in tagoli wakay piyaboway, kalbas batay wakay atai matang kitam din kansiyo piyaboway sa parosa batay agrateng.

¹ Laki mga belag, kanyo atawanan in kami mamataw sa kanyo apo ngani kabolowan. ² Kamo katawan kamayba wa kami batang piyaglibak piyagpaidapan sa Pilipos, kanyam remrem piyakaeyat wakay Diyos matang piyatoldo din sa kanyo in Maal pag Barita Diyos kamaybawa aronaw in aglaban. ³ Kaya kami agbarita yewed panawen kami baribid, yewed din batang sa marames pag remrem. Kami idapo din beet agpadaya. ⁴ Dayem kaya kami agbarita panawen in remrem Diyos kami kansiyo piyaalapetan in Maal pag Barita. Kaya kami agpatoldo yewed mangyan in kanyam beet anggayan, dayem Diyos agbangen angkataw kansiyo piyagpangkit in kantam mga remrem. ⁵ Atawanan Diyos, kanyo din atawanan, in kanyam mga agiplaong yewed kagwali waget aglakonaw sa kanyo, idapo din piyagtago agsolang sa kanyam agiplaong. ⁶ Yewed kanyam beet in kami paglakonawen mangyan, kamayba kamo, kamayba nakay. ⁷ Kamaybawa kami mga katiwala Kiristo, maal nges kami mangayay sa kanyo, kamay yewed kataw ina. Dayem kami agpakayawte daan sa kanyo, kataw in inang agpakayawte wano sa kansiyo mga bodangte. ⁸ In kalobaen kami agpakayawte sa kanyo, anggan kami sandata agtaboy sa kanyo yewed waget in Maal pag Barita Diyos, no yewed kadayo in kanyam boway panawen kamo kanyam wano piyagmaal. ⁹ Laki mga belag, kanyo kay daan atawanan in kami sa kanyo kami ageyat agpanawen. Kamayba ibeng kamayba yabi kami aganap boway matang in kami agpatoldo in Maal pag Barita Diyos kami yewed mabyat sa kanyo. ¹⁰ Kamo kangitan sa kanyam, kadayo in Diyos, maal wano in kami agpabelag sa kanyo sa mga agpaniwala, kami betek ngani, yewed daeten. ¹¹ Kataw in kanyo atawanan kanyam piyagalapet in baatte osai sa kanyo kataw in amang agalapet sa kansiyo mga bodang. ¹² Kamo kanyam piyatoldo, piyakaeyat in remrem, piyaakayan gayed agogali sibay sa Diyos in omidang sa kantam matang kitam piyaagem sa kansiyo sakopan sa kansiyo din kalakoyen. ¹³ Anda kay din in osai ka baatte kanyam piyagkaanggay sa Diyos, in kamo karengey in agiplaong Diyos kanyam piyatoldo, ina kanyo piyaniwalaan yewed kataw agiplaong waget mangyan, no yewed kataw ngani agiplaong Diyos, angkataw ina ngani in totoo. Kalbas in kabaloyan ina piyagngitan sa kanyo mga ogali, sa kanyo pag mga agpaniwala sa Diyos. ¹⁴ Laki mga belag, in mga mibaloy sa kanyo kataw daan in mga mibaloy sa mga barkadaan mga bodang Diyos taga Odiya, sa mga taga ista in agiyagem kay Kiristo Isos. Kamo piyaidapan kanyo mga kabelagan kataw daan din siro piyaidapan in mga Odyo. ¹⁵ Ina daan pag mga Odyo in agbono kay Isos in Kapwan sa boo, kadayo sa mga poropita. Siro din in agboyaw sa kanyam. Siro yewed makaanggay sa Diyos, osai siro mga aglaban sa boo mangyan. ¹⁶ In kami agpatoldo in Maal pag Barita sa mga yewed Odyo matang siro din piyaboway, kami maloba wa gayed piyagayaw ina pag mga Odyo. Kataw ina kansiro wa gayed piyaistobo in kansiro mga daet, kalbas ngona sa kalobosan piyalowas wa Diyos in kansiyo galit sa kansiro. ¹⁷ Laki mga belag, paka kami panaw wa sa kanyo, kamayba kamo idwa kanyam piyagngitan kamo baatte kanyam piyagremrem. Yewed kayte dogay kami panaw, kami toloy wakay agkalowayan wano sa kanyo, beet wakay maltagbowan. ¹⁸ Kami beet wakay pataboy sa kanyo. Ako Pablo, makakarowan nges batay moli asin, kamay kami baatte piyageleg Katanas. ¹⁹ Paka rateng wakay Isos in kantam Kapwan, kamo waget in kanyam piyagasaan in batay makaanggay sa kanyam sa adap Isos. Kamo waget in kanyam piyaglakonaw pag tanda keyen apo kabolowan in kanyam panawen. ²⁰ Kamo ngani in agpakalakonaw sa kanyam, in kanyam kaanggayan.

¹ - ² Paka kami idwa gayed katiis sa agkalowayan, kanyam remrem Timotiyo kanyam wa sogowen sa kanyo, kami pabaliwan wa sa Atinas. Timotiyo kantam belag, kanyam sarig sa panawen Diyos. Kaya siyo kanyam siyogo matang kamo piyakarigen sa agpasandig kay Kiristo, osai piyakaeyat in kanyo remrem, ³ matang kamo idapo piyagbaslag in remrem panawen sa mga kaidapan. Kamo katawan wa din kitam piyagpadalan Diyos sa mga kataw ina. ⁴ Angkataw tangona kay in kami asina sa kanyo, kanyam wa daan piyagsabi keyen kitam batay piyagpaidapan. Kalbas ngona kanyo atawanan ina wa ngani in mibaloy. ⁵ Ina in dailan kaya Timotiyo kangay siyogo sa kanyo, angkataw ako idwa katiis. Ako beet wano katawan no kataw nakay in kamo agpasandig sa Kapwan. Ako agkariyaban karam kamo piyaakayan wa diyablo sa daet, kadogay maidapo wa kabolowan in kanyam piyanawen. ⁶ Kamay ngona Timotiyo atai wakay rateng apo piyagbaba barita. Maalen wano kono in kamo agpaniwala, osai in kamo agpakayawte. Kansiyo din siyabi in kamo palagi agkaanggay sa kanyam, kamo maloba wano agkalowayan sa kanyam kaloba daan in kami agkalowayan sa kanyo. ⁷ Na laki mga belag, kamaybawa kami abyatan sa mga kaidapan sa mga makariyaban, ngona apyaan wakay in kanyam remrem panawen sa kanyo agpaniwala. ⁸ Kami abowayan wakay panawen kamo agaway kay marigen in agpasandig sa kantam Kapwan. ⁹ In kami agkaanggay sa kanyo in kalakoyen anggan idapo wa batay asabi in kami agkaanggay sa Diyos. ¹⁰ Boo ibeng kadayo yabi kami maloba agayay sa Diyos kitam maltagbowan wakay asin, matang kanyam wa gayed mataboy no nakay in idapo kay sa kanyo paniwala. ¹¹ Kanyam pandalangin sa Diyos kantam Amang osai sa kantam Kapwan Isos keyen, Kami pakanen wa ngani dalan agtaboy sa kanyo. ¹² Osai paistobowen wa ngani in Kapwan anggan paarabangen in kamo agpakayawte sa osai osai, anggan sa boo mangyan, kataw daan in kami agpakayawte sa kanyo. ¹³ Osai kansiyo ngani pakaeyaten in kanyo remrem, matang paka agrateng wakay in kantam Kapwan Isos, agyanggat in boo kansiyo mga iidang, kamo idapo baribid, maal wano sa pangkit Diyos kantam Amang.

¹ Laki mga belag, kanyo abel sa kanyam in mga ogali maal kantam alapeten, in makaanggay sa Diyos. Kalbas ina wa ngani in kanyo piyagalapet mga ogali. Na ngona sa kabaloyan Isos in Kapwan, kami agbilin kay keyen baatte kanyo paistobowen in kataw ina pag mga ogali. ² Kanyo wa daan atawanan in mga bilin kanyam tiyaboy sa kanyo sa kabaloyan Isos in Kapwan. ³ In beet Diyos kitam mga maal wano, idapo wano agpanggaraw. ⁴ Kailangan in baatte osai katawan agsakop sa kansiyo remrem. Ina alapeten sa maalno, ayaw agalapeten sa marames. ⁵ Ayaw kamayba nangkataw waget inbeet kansiyo bilog, kataw in ogali in mga yewed agpaniwala, idapo katawan sa Diyos. ⁶ Na asin pag panawen ayaw agpangwat daet sa roma mangyan, ayaw agpandaeg, angkataw piyagparosa in Kapwan in mga agpamangwat kataw ina pag mga daet. Ina datiyan wa kanyam piyagsabi, maloba piyagbilin sa kanyo. ⁷ Angkataw kaya kitam biyerya Diyos yewed matang agpangwat in marames pag ogali dayem matang agogali makaanggay sa Diyos. ⁸ No kamayba nakay in aglaban asin pag piyagpatoldo na yewed in mangyan in piyaglabanan dayem in Diyos in agtaboy sa kantam in kansiyo Betek pag Abyan. ⁹ Yewed wa kailangan kami agsolat sa kanyo panawen sa agpakayawte sa mga belag agpaniwala sa Kapwan, angkataw kamo piyatoldo wa daan in Diyos agpaybelagan. ¹⁰ Kataw ngani ina in kanyo piyagpangwat sa boo mga belag sa boo kobat Masidonya. Kamay, mga belag, in kanyam ngani piyagsabi sa kanyo paistobowen kay ina pag agpakayawte. ¹¹ Kamo agpilit agpanawen sa kanyo daan panawen, pakaeyaten in bakwaw, matang kamo apo pamangnen, kataw taite in kanyam bilin sa kanyo. ¹² Matang kamo batay piyagmaal in mga yewed kay agpaniwala, osai kamo idbatay agpangayay sa mga roma kamayba nakayte. ¹³ Laki mga belag, kanyam beet kanyo kay atawanan in panawen sa mga matay wa, matang kamo idbatay agrongkot kataw in amat mga mangyan idapo piyagpanaya. ¹⁴ Kitam agpaniwala Isos matay kadogay boway wakay, na kitam maniwala din batay wakay din piyaboway Diyos in boo mga agpasandig kay Isos mga matay wa, matang piyaanggat sa kansiyo. ¹⁵ In kanyam ngona piyagsabi sa kanyo piyatoldo daan in Kapwan. Kitam in mga agkaboway kay anggan agrateng in Kapwan, kitam idbatay tokaw sa mga matay wa. ¹⁶ Ina pag betek batay apo lakoy mango agsogo, in agiplaong in poon mga angil, osai in agana in bodyong Diyos. Kalbas aglompot wa in Kapwan batang sa langit. In tokaw batay piyaboway in mga agpasandig kay Kiristo mga matay wa. ¹⁷ Kalbas kitam in mga agkaboway kay kansiyo batay piyagtipon sa libo sarig in mga piyaboway wa, matang tomagbo sa Kapwan sa kiwang. No kataw ina kitam asina wa sa Kapwan anggan idapo kalobosan. ¹⁸ Na ngani ina pag barita kantam alapeten agpakaeyat remrem sa baatte osai.

¹ Laki mga belag, idwa kailangan kami agsolat sa kanyo no nangkadogay gayed betek in batay mibaloy in mga ina. ² Angkataw kanyo wa daan gayed atawanan in Kapwan batay agrateng sa Ibeng yewed piyagpanaya, kataw in tolisan agrateng sa yabi. ³ Sa kabetek in mga mangyan keyen, Apyaan wa, idapo wa batay mibaloy, na siro toloy wa batay piyaidapan wano maloba. Kataw in kagbaiyan bonting, bayo katawan piyagpaidapan wa, siro idbatay mipalpas. ⁴ Kamay mga belag, kitam idwa sa lened, na asin pag ibeng kitam idbatay ariyaban kataw in mangyan riyatengan tolisan. ⁵ Kitam boo sa ibeng agbangen, sa rawa. Kitam yewed sa yabi, yewed sa lened. ⁶ Na ayaw kitam agesek kataw in mga roma, dayem kitam agipolaw, agpakabait. ⁷ Angkataw sa yabi agbangen in mga mangyan agesek. Sa yabi din in mga agbarik aglasing. ⁸ Kamay kitam agbangen sa ibeng, na kitam agpakabait. Kailangan kitam agpasandig sa Diyos, agpakayawte sa mga mangyan. Ina kagwali bengbeng sa kantam bilog. Kailangan kitam agpanaya sa kitam batay piyaboway. Ina kagwali bengbeng sa olo. ⁹ Kitam iidang Diyos yewed matang kitam batay piyarosa, dayem matang kitam kansiyo piyaboway. In kantam Kapwan IsoKiristo in agpaboway. ¹⁰ Siyo matay panawen sa kantam, matang kamayba kitam agkaboway kay in siyo agrateng, kamayba kitam matay wa, na kitam kansiyo batay piyaanggat agkaboway. ¹¹ Na kitam agpakaeyat ngani remrem sa osai osai, maytolongan, kataw daan in kanyo ngona piyagpangwat. ¹² Mga belag, in kanyam piyagsabi sa kanyo, kanyo pagmaalen in mga agpanawen sa kanyo, siro mga iidang Diyos agpapoon osai agpatoldo sa kanyo. ¹³ Panawen sa kansiro panawen, siro kanyo ngani pagmaalen, pakayawteen. Kamo maybelagan. ¹⁴ Osai mga belag, in kanyam mga bilin kanyo patoldowen in mga bibelen, pakaeyaten in mainaen in remrem, tolongen in mga idwa kabaloy, pakayawteen in boo. ¹⁵ In mga piyagpangwatan daet kanyo patoldowen keyen ayaw agganti. Kami agpilit agpangwat in maal sa baatte osai kadayo sa boo mangyan. ¹⁶ Baatte kamo agkaanggay. ¹⁷ Ayaw aglimbang agpandalangin. ¹⁸ Kamayba nakay in mibaloy na kamo agkaanggay sa Diyos angkataw in agkaanggay in beet Diyos sa kantam, sa mga agiyagem kay Kiristo Isos. ¹⁹ Ayaw mandaeg sa Abyan Diyos. ²⁰ Ayaw agidapowen kabolowan in piyagsabi batang sa Diyos. ²¹ Kanyo remremen in boo, alapeten in maal. ²² Ayaw agpangwat kamayba nakay pag daet. ²³ In Diyos in agpakapya, na in kanyam pandalangin kamo kansiyo pangwaten maal wano gayed, osai kamo kansiyo alapeten, in kanyo abyan, kanyo remrem, kadayo kanyo bilog boo idapo daet anggan pataboy atai in kantam Kapwan IsoKiristo. ²⁴ In omidang sa kantam, siyo idbatay somala. Ina batay ngani kansiyo piyagpangwat. ²⁵ Mga belag, kami kanyo din dalanginen. ²⁶ Kamo in boo mga belag malkaanggayan agpanggisodan. ²⁷ Sa pangkit in Kapwan kamo kangay piyagpabilinan basaen anda pag solat sa boo mga belag. ²⁸ Kamo pakayawteen in kantam Kapwan IsoKiristo.