1 PIDRO

¹ Ako Pidro in agsolat, osai ka katiwala IsoKiristo. Ako agsolat sa mga iidang Diyos, mga malsowayan, agpakamalay waget sa mga kobat Ponto, Galasya, Kapadosya, Asya, osai Bitinya. ² Tangona kay kitam iidang in Diyos Amang, ina in kansiyo remrem, matang kitam piyangwat in Betek pag Abyan bodang Diyos, matang din kitam agpaniwala kay IsoKiristo, osai matang kiyowa wa in kantam mga daet panawen siyo biyono. In kangay pandalangin kamo pakayawteen lakoy Diyos osai pakaanggayen. ³ Kitam wa agkaanggay sa Diyos sa Amang kantam Kapwan IsoKiristo. Panawen in Diyos maloba agpakayawte sa kantam kitam piyakan bayo wakay pag boway panawen IsoKiristo batang matay piyaboway wakay. Panawen asin pag bayo pag boway kantam gayed atawanan ⁴ kitam batay kabel in lakonaw pag siyandata Diyos sa kansiyo mga iidang. Ina kansiyo piyagbetang sa langit matang idbatay mabolok, idbatay masida, idbatay din maidapo. ⁵ Panawen kitam agpaniwala kitam piyagalapet in kabaloyan Diyos, anggan kantam kay piyagpanaya in kitam piyaboway wa gayedte. Ina batay piyalowas Diyos sa kalobosan pag ibeng. ⁶ Kitam agkaanggay asin pag boo, kamaybawa ngona karam kitam batay kay domalan kadogayte sa aronaw mga kaidapan. ⁷ Kaya kitam batay diyalan mga kaidapan, matang atawanan no marigen in kantam paniwala. In ginto agkasida, piyagpadalan sa baya, matang atawanan no maalno wa. Na in kantam paniwala piyagmaal labi kay kaloba in ginto, kailangan din ina kataw ginto piyagtepeng matang atawanan no idapo agiyagem daet, matang kitam batay piyagpamaal in Diyos, batay piyagpakalakoy, osai batay piyagpakabwat sa Ibeng IsoKiristo lomwas. ⁸ Kamaybawa yewed kanyo ngiitan siyo kanyo piyagbeet. Kamaybawa anggan ngona idbatang kay din ngiitan kamo agpasandig wa sa kansiyo. Panawen asin kitam agkaanggay wano gayed, in kalakoyen ina pag kaanggayan anggan idbatay asabi. ⁹ Kaya kitam agkaanggay angkataw kitam piyagpakan in raweg kantam paniwala, na ina in kitam piyagpaboway. ¹⁰ In mga poropita in agbarita tangona panawen ina pag piyagtaboy sa kantam, siro agpamangkit wano in padalan Diyos, batay agpaboway sa mga agpaniwala. ¹¹ Agpilit siro katawan no nangkadogay in kabetek ina, osai no nangkataw ina batay mibaloy, in piyatoldo in Abyan Kiristo in agbalay sa kansiro galem, in siyo tangona kay agsabi sa kansiro in mga kaidapan batay diyalan Kiristo, osai in kalakoyen in mga batay mibaloy sa paori. ¹² Piyaalam Diyos asin pag mga poropita ina pag kansiro piyagpalowas idapo batay pakinabang sa kansiro agbangen, no yewed sa kantam. In kansiro piyalowas piyaliwanag wakay ngona sa kanyo in mga agpatoldo in Maal pag Barita. Siro piyakan kabaloyan agpatoldo in Betek pag Abyan. Kamaybawa in mga angil sa langit siro beet katawan ina pag boo mga piyatoldo. ¹³ Na sandataen in kantam mga remrem, pakarigenen in kantam paniwala, agpanaya gayed sa maal pag batay tiyaboy sa kantam paka lomwas IsoKiristo. ¹⁴ Kataw kitam mga bodang Diyos, na kitam maniwala sa kansiyo, ayaw sa mga daeten kantam piyagkabeet, kataw tangona in kantam mga piyagpangwat in kitam yewed kay katawan in Maal pag Barita panawen sa kansiyo. ¹⁵ Maal wano in Diyos in omidang sa kantam, na kailangan din kitam maal wano in boo kantam mga ogali, ¹⁶ angkataw in sa Agisolat keyen, In Diyos keyen, Kamo agpakamaal wano kataw ako maal wano. ¹⁷ In Diyos yewed agpangidang. In kansiyo remrem sa baatte mangyan sibay sa piyangwat in mangyan. No kitam agpandalangin na siyo kantam piyagawit Amang, na kantam pagmaalen siyo anggan kitam agkaboway kay. ¹⁸ Kanyo atawanan in piyabayad matang kitam piyalpas sa idapo kabolowan pag mga ogali batang sa kantam mga kakoyayan. In piyabayad yewed mga agkasida, mga agkaidapo kabolowan kataw kowarta, ¹⁹ dayem in lakonaw lakoy pag boway Kiristo, in biyono kataw bodang topa idapo daet, idapo rames. ²⁰ Ikkay piyangwat in kobat siyo iidang wa Diyos asin pag panawen, kalbas ngona sa kalobosan pag mga ibeng siyo piyalowas wa panawen sa kantam. ²¹ Panawen kay Kiristo kitam agpasandig sa Diyos in agpaboway wakay sa kansiyo osai agpakalakonaw sa kansiyo. Matang kitam agpaniwala osai agpasandig sa Diyos. ²² Ngona kitam malinis wa panawen kitam agpaniwala sa Maal pag Barita osai kitam agpaybelagan wa. Na maybelagan wa gayed in kantam boo remrem. ²³ Angkataw kitam bayo wakay biyodang. In kantam Amang yewed kataw mangyan agkatay, siyo idbatay matay. Kitam biyodang panawen sa idapo kalobosan pag agiplaong Diyos in agkaboway. ²⁴ Kataw in sa mga Agisolat keyen, In boo mangyan kataw lalosen, In kansiro kamaalen kataw in mga betakan sa kobat. In lalosen agkalayo, in mga betakan agpangalabo, ²⁵ Kamay in agiplaong in Kapwan baywi daan anggan idapo kalobosan. Ina in Maal pag Barita in piyatoldo sa kanyo.

¹ Na ngani, baliwanen wa in boo kanyo daet. Ayaw agsabi baribid, ayaw agpakagwali waget, ayaw agpanagiri, ayaw aglibak. ² Kataw in bodang bayo biyoslot agkabeet wano sa soso, na kamo kataw daan din ina kamo agkabeet in maalen pag pamangnen sa abyan, matang kamo mistobo sa kanyo paniwala anggan piyaboway wa gayed. ³ Angkataw kanyo wa tiyepeng, kanyo atawanan in Kapwan mabait. ⁴ Na kamo pasabangen sa Kapwan, siyo kataw bato agkaboway, piyaidapo wa kabolowan mangyan, kamay iidang Diyos, kansiyo piyagmaal wano. ⁵ Kamo din kagwali mga bato agkaboway, na paalapet sa Abyan Diyos piyagkailangan sa balay lakoy Diyos kansiyo piyagtadyok. Asin pag balay kitam mga sasirdoti iidang Diyos, matang agtaboy sa kansiyo in mga piyagpatoldo kansiyo Abyan, mga makaanggay panawen kay IsoKiristo. ⁶ Angkataw in siyabi Diyos sa mga Agisolat keyen, Kamo mangkit, kangay piyagpabalay sa bayan lakoy Siyon in osai ka bato panrigen sa sokol, kangay iidang, kangay piyagmaal wano. In agpasandig sa kansiyo idbatay arikoyan. ⁷ Na ngani siyo piyagmaal wano kitam in mga agpasandig sa kansiyo. Kamay sa mga yewed agpasandig sa kansiyo na in mga Agisolat keyen din, In bato piyaidapo kabolowan in mga agtadyok balay, siyo in mibaloy in lakonaw sa boo. ⁸ Keyen wakay in mga Agisolat, Ina osai ka bato makasolpo, matang in mga mangyan maligan. Kaya siro asolpo angkataw yewed kansiro piyaniwalaan in agiplaong Diyos. In siro malabo, ina in siyandata Diyos sa kansiro. ⁹ Kamay kitam in osai ka tiribo iidang Diyos, mga piyangwat sasirdoti in Diyos in Poon lakoy, mga mangyan tiyalaga sa Diyos, kansiyo gayed mga bodang. Kitam kansiyo iidang matang agsabi in kansiyo mga makasoyo wano pag panawen. Siyo din in agberya sa kantam batang sa lened pataboy sa kansiyo makaanggay wano pag rawa ibeng. ¹⁰ Tangona kitam yewed bodang Diyos, kamay ngona kansiyo ngani mga bodang. Tangona yewed kantam atawanan in Diyos agpakayawte, kamay ngona kantam ngani atawanan kitam kansiyo piyagpakayawte. ¹¹ Mga belag kangay piyagmaal, kataw kitam mga agpakamalay waget atai sa kobat, na kangay piyagayaw in agpangwat in mga daeten pag piyagkabeet kanyo bilog, in mga aglaban sa kanyo abyan. ¹² Kamo agogali in maalno sa pangkit in mga yewed agpaniwala matang kamaybawa ngona kamo kansiro piyagbintangan in mga daeten, na dogayan sa Ibeng in Diyos agrateng siro batay agpakalakoy sa kansiyo, panawen sa kansiro ngani ngiitan in kanyo maalno pag panawen. ¹³ Kitam pasakop sa boo mga apo kabaloyan piyangwat mangyan, matang kitam makaanggay sa Kapwan. Pasakop sa poon lakoy in mabwat pag apo kabaloyan sa kobat, ¹⁴ osai sa mga gobirnador kansiyo sogo matang agparosa sa mga agpamangwat daet, osai agpakalakoy sa mga agpangwat maalno. ¹⁵ Angkataw in beet in Diyos kitam agpangwat maal matang in mga mangyan idapo katawanan in aglibak sa kantam idapo wa batay masabi. ¹⁶ Kitam yewed sakop sa mangyan, kamay ina ayaw agpangwaten dailan sa agpangwat daet, no yewed kitam agogali sakop sa Diyos. ¹⁷ Kantam pagmaalen in boo mga mangyan, pagbelagen in mga belag kay Kiristo, agogali kitam in agkalimo sa Diyos, pagmaalen in poon lakoy. ¹⁸ Kamo in mga sogowan in piyagalapet, kamo agmaal sa kanyo mga kapwan, maniwala sa kansiro, yewed waget sa mga mabait, kadayo sa mga matapang. ¹⁹ No in mangyan, piyagparosa kamayba siyo idapo piyangwat daet, kamay panawen siyo agremrem sa Diyos siyo yewed aglaban sa parosa, na in Diyos agkaanggay sa kansiyo. ²⁰ Kamay no siyo agpangwat daet na betek in parosa, na kamayba siyo yewed aglaban sa parosa, idapo pakinabang sa Diyos. Kamay no kamo agpangwat maal kalbas yewed aglaban sa parosa na ina maal sa pangkit Diyos. ²¹ Ina in osai ka dailan kaya kitam iidang Diyos. Angkataw Kiristo agbanta sa kaidapan panawen sa kantam, na kitam kansiyo piyakan alimbawa matang kantam pagtoladan. ²² Kiristo idapo piyangwat daet, idapo din siyabi baribid. ²³ In siyo piyagidapo kabolowan siyo yewed gomanti. In siyo piyaidapan siyo yewed aglaban agsabi daet, dayem siyo paalapet sa Diyos in betek pag agparosa. ²⁴ In Kiristo matay sa kodos kansiyo biyaba in kantam mga daet matang biyono wa in kantam beet agpangwat daet, kamay piyaboway in kantam beet agpangwat maal. Panawen sa kansiyo mga sogat kitam piyakapya. ²⁵ Angkataw kitam kataw in mga topa malibangaw, kamay ngona tiipon wakay in Pastor, in Agalapet sa kantam.

¹ Kamo in mga babai, kamo pasakop sa kanyo mga lalaki, matang no siro yewed kay agpaniwala sa agiplaong Diyos na siro batay din aakayan in kanyo maalno pag ogali. Idwa kailangan kamo agpatoldo sa kansiro. ² Sibay wa in kansiro piyagngitan in kanyo mga ogali mabait, panawen sa kamo agmaal sa Diyos. ³ In kanyo kamaalnowen ayaw agpapangkiten sa bilog, kataw in mga agpakapya abok, agisoroy in mga sangkap sa bilog, osai in mga maalno pag damit. ⁴ Dayem in kamaalnowen sa galem, in mabait osai apyaan pag remrem. Ina idbatay miyalis, ina in makaanggay sa pangkit Diyos. ⁵ In mga kagbaiyan tangona in mga agpasandig sa Diyos, kataw ina in kansiro yaalapet kamaalnowen. Siro agpasakop sa kansiro mga lalaki. ⁶ Kataw wa daan Sara, siyo maniwala kay Abraam, kansiyo piyagawit kapwan in kansiyo lalaki. Na kamo agiyagem sa kansiyo mga bodang no kanyo panawen maalno, idapo piyagkariyaban kamayba nakay. ⁷ Kamo wakay in mga lalaki, pagalapeten maal in kanyo mga babai. Siro pagmaalen angkataw siro kalakoyte in eyat, osai kataw daan din kamo batay piyagpaboway gayed in Diyos. No kamo kataw ina, na idapo batay agsalag sa kanyo mga pandalangin. ⁸ Sa kalobosan kangay piyagsabi sa kanyo, kitam boo malageman in remrem, malsiyayonan, agpaybelagan, agpakayawte osai ayaw mabwat in remrem. ⁹ Ayaw agpangganti. Ayaw agpamanes sa mga agpamanes sa kantam, dayem dalanginen siro keyen pakayawteen. Angkataw ina in dailan kaya kitam iidang Diyos, matang kitam kansiyo piyagpakayawte. ¹⁰ Kataw in siyabi sa mga Agisolat keyen, In agkabeet agkasadapan sa boway, agkabeet agkaanggay, na ayaw agsabi daet, in kansiyo bibi ayaw agsabi baribid. ¹¹ Baliwanen wa in daet, agpangwat wa in maalno, agpilit agpabelag sa roma. ¹² Angkataw in Kapwan agkaanggay sa mga agpangwat in betek, kansiyo piyagparengey in kansiro pandalangin. Kamay siyo agkagalit sa mga agpamangwat daet. ¹³ No kantam boo remrem beet agpangwat maal, na idapo batay agpangwat daet sa kantam. ¹⁴ Kamay no kitam piyagpaidapan sa agpangwat maal, na agkaanggay kay din kitam. Ayaw agkalimo sa kansiro mga agpamalimlimo, ayaw agkariyaban. ¹⁵ Pagmaalen in Kiristo sa kantam remrem, kataw siyo in kantam Kapwan. Kailangan kitam palagi agsandata agpatoldo sa mga agtanong no nakay in kantam pagpasandigan. ¹⁶ Kamay in agpatoldo kitam mabait, osai ayaw agpaidapowen kabolowan in kantam piyagpatoldo. Kailangan in kantam ogali maalno matang yewed magolo in kantam remrem, osai matang batay arikoyan in mga aglibak sa kantam, mga agsabi daeten in kantam maalno pag ogali in kitam agyanggat kay Kiristo. ¹⁷ Osai in piyagpaidapan panawen sa agpangwat daet, osai in piyagpaidapan panawen sa agpangwat maal, na in maal agbangen in kitam piyagpaidapan panawen sa agpangwat maal, no ina in beet Diyos. ¹⁸ Angkataw panawen sa kantam mga daet Kiristo matay, makaosai waget na sibay anggan idapo kalobosan. Siyo idapo daet, kamay siyo matay panawen sa mga apo daet, matang kitam kansiyo piyaanggat sa Diyos. In kansiyo bilog biyono mga mangyan, kamay in siyo piyaboway wakay in Abyan Diyos, na in kansiyo bilog idbatay wa mabono. ¹⁹ In abyan Kiristo pataboy sa mga abyan piyagbilanggo, agpatoldo sa kansiro. ²⁰ Siro in mga abyan in mga mangyan in kabetek Nowi, in mga yewed maniwala sa Diyos in siyo agpanaya gayed sa kansiro, anggan Nowi agpangwat in bangka lakoy, matang nges siro agbenglay kansiro daet. Korang in mga mangyan sa bangka, walo waget, in piyaboway sa bongkalos. ²¹ Ina pag sapa rarawan baotismo in agpaboway ngona sa kantam. In baotismo yewed agogas lebag sa bilog, dayem ina tanda in kantam maalno pag remrem agpangako sa Diyos. Kaya kitam piyagpaboway panawen IsoKiristo wakay piyaboway. ²² Siyo monaik sa langit, kalbas ngona agtokkaw sa pamalang agbangen Diyos, agpapoon sa mga angil ista, osai sa mga apo kabaloyan agpakoyay sa kiwang.

¹ Panawen Kiristo domalan sa kaidapan sa bilog, na kadayo din kitam agpakaeyat remrem kataw siyo, angkataw in agbanta sa kaidapan sa bilog dayo wa agpamangwat daet. ² Na in mga dagon batay kay kantam piyagdalan atai sa kobat taboyen sa agpangwat in makaanggay sa Diyos ayaw sa agpangwat in piyagkaamag waget kantam remrem. ³ Sibay wa in mga dagon kantam diyalan sa agpangwat in mga piyagkasadapan in mga yewed agpaniwala sa Diyos, kataw in agpanggaraw, in mga daeten pag piyagkabeet kantam bilog, in agpanlasing, in makarikoy pag agpalkaanggayan, agpalpamarik, osai in makasoka pag agsamba sa mga yewed Diyos. ⁴ Kalbas in mga yewed agpaniwala sa Diyos agsoyo no nakay batang kitam ngona idwa agyanggat sa kansiro agpamangwat kamayba nakayte pag mga daeten pag ogali, kalbas kitam kansiro piyaglibak. ⁵ Kamay panawen ina siro batay piyagbotog Diyos in batay wa agosap sa mga agkaboway kadayo sa mga matay. ⁶ In Maal pag Barita piyatoldo din sa mga matay matang in kansiro abyan maal din agkaboway kataw in Diyos agkaboway kamayba kansiro bilog matay kataw in boo mangyan. ⁷ Bangen wa in kalobosan in boote. Kailangan kitam ayaw aglimbang agremrem maalno, matang kabaloy agpandalangin. ⁸ Labi kay sa boo, agpakayawte wano sa osai osai, angkataw in agpakayawte sa roma aglibangaw sa kansiro mga daet kamayba karowan. ⁹ Pakanen esekan in mga belag sa agpaniwala, ayaw mabyat in remrem. ¹⁰ Kailangan kitam maalno pag paalapetan in mga boote piyagtaboy in Diyos. Na no nakay in tiyaboy Diyos sa baatte osai, na ina kantam alapeten sa agtolong sa mga roma. ¹¹ No kao in agpatoldo, na in kaimo patoldowen in agiplaong Diyos. No kao in agtolong na kaimo alapeten in kabaloyan piyagtaboy Diyos, matang sa boote siyo batay piyagmaal panawen kay IsoKiristo. Sa kansiyo in kabaloyan osai in kalakoyen anggan idapo kalobosan. Ina wa ngani. ¹² Mga belag kangay piyagmaal, ayaw agsoyo sa maloba pag kaidapan kantam piyagdalan keyen, anda osai wakay. Ina matang kitam piyagtepeng. ¹³ Dayem kitam agkaanggay angkataw kitam piyagpaanggat sa kaidapan Kiristo. Kalbas paka siyo rateng wakay, lomwas wa in kansiyo kalakoyen, na kitam batay agkaanggay wano gayed. ¹⁴ No kamo piyaglibak panawen kamo agyanggat kay Kiristo na kamo agkaanggay, angkataw in beet siyabi ina in lakonaw pag Abyan, in Abyan Diyos agbalay sa kantam. ¹⁵ Ayaw kitam agbono mangyan, agpanakaw, agpangwat kamayba nakay pag daet, agpanlado sa idwakay kantam panawen, matang kitam idbatay piyarosaan. ¹⁶ Kamay no kitam piyagparosaan panawen kitam agiyagem kay Kiristo na ayaw wa agkarikoy. Dayem kitam agkaanggay sa Diyos panawen piyagngitan kitam agiyagem kay Kiristo. ¹⁷ Rateng wa in kabetek agosap. In tokaw piyagosap in mga bodang Diyos. No kitam in tokaw piyagosap na labi kay lakonaw in batay parosa sa mga yewed maniwala sa Maalno pag Barita Diyos. ¹⁸ Kataw in siyabi sa mga Agisolat keyen, No in maal pag mga mangyan apo piyagdalan mga kaidapan in siro piyagpaboway, na labi kay lakonaw in mga kaidapan sa mga agpamangwat daet, mga yewed agremrem sa Diyos. ¹⁹ Na in mga mangyan piyagpaidapan panawen sa agpaniwala sa beet Diyos, kailangan siro agaway kay agpangwat maal, osai paalapet sa Agpangwat sa kantam. Siyo idbatay somala sa kansiyo pangako.

¹ Ngona ako apo piyagsabi sa mga koyay agpapoon sa kanyo. Ako din osai ka koyay kataw kamo. Kangay ngiitan in mga kaidapan Kiristo, osai batay din piyakan bagiyan sa kanyo kalakoyen batay wa piyapangkit. ² Kanyo alapeten in barkadaan piyaalapet Diyos sa kanyo. Kamo agpapoon sa kansiro maalno in remrem agkaanggay, ayaw sa pilit waget, angkataw ina in beet Diyos. Pangwaten in kanyo tongkolin yewed amagen sa mga kowarta no yewed sa beet agtolong. ³ Ayaw matapang in agpapoon sa mga piyaalapet sa kanyo, dayem mabait, matang toladan in mga agpaniwala. ⁴ Kalbas paka rateng wa in Mabwat pag Agalapet, na kamo batay piyakan in makasolap pag sarikaw idbatay maidapo in rawa anggan idapo kalobosan. ⁵ Kamo wakay in mga kasalokoyan pag mga mangyan, kamo pasakop sa mga koyay. Kitam boo agpakabwatte remrem agpaytolongan, angkataw siyabi sa Agisolat keyen, In Diyos agkadaetan sa mga agpakabwat, kamay kansiyo piyagpakayawte in mga agpakabwatte remrem. ⁶ Na kitam agpakabwatte, pasakop sa kabaloyan Diyos, matang dogayan sa kabetek kitam kansiyo batay piyakabwat. ⁷ In boo kantam mga piyagkariyaban taboyen sa Diyos angkataw siyo agalapet sa kantam. ⁸ Kailangan kitam sandata wa agdamay kamayba nangkadogay, angkataw in kantam kalaban in diyablo agipanawan kagwali matapang pag ayop agana lakoy agkakoman mangyan. ⁹ Siyo kantam labananen. Kantam pakarigenen in agpasandig sa Diyos angkataw in kantam atawanan yewed waget kitam in piyagdalan in kataw ina pag kaidapan, dayem in boo kantam mga belag sa boo kobat. ¹⁰ Paka kitam kadalan wa ina pag kadogayte pag kaidapan, na in Diyos, in agpakayawte wano gayed sa kantam, siyo batay agpakapya sa kantam, agpakarigen, agpakaeyat sa kantam remrem. Siyo din in omidang sa kantam matang kitam sarig Kiristo batay piyakan bagiyan sa kansiyo idapo kalobosan pag kalakoyen. ¹¹ Sa kansiyo in kabaloyan anggan idapo kalobosan. Ina wa ngani. ¹² Silas in tomolong sa kangay agsolat. Siyo maal pag belag sa kangay. Andate pag siyolat matang pakaeyaten in kanyo mga remrem, osai agparigen keyen ina pag boo in piyagtaboy ngani Diyos. Na kitam agpakarigen in agpasandig sa kansiyo piyagtaboy. ¹³ In barkadaan mga bodang Diyos sa bayan Babilonya keyen, Kamo nangkataw wa? Kadayo Markos in kangay bodang sa agpaniwala. ¹⁴ No kamo agkatipon na malkaanggayan. In kangay pandalangin kamo in boo mga agyanggat kay Kiristo kansiyo pakanen in apyaan pag remrem.