1 OWAN

¹ In kanyam piyagsolat sa kanyo panawen sa Agiplaong Agpamaboway. Sa parakayan kay siyo datiyan wa agkaboway. Kanyam ngiitan siyo, kanyam din arengeyan, riyoris, kanyam din yaatang. ² Piyapangkit in Boway. Kalbas kanyam ngiitan, matang kanyam piyagbarita sa kanyo. Kanyam piyagpatoldo sa kanyo in Boway idapo kalobosan. Siyo in sarig in Amang, kalbas lomwas sa kanyam. ³ Kanyam piyagpaalam sa kanyo in kanyam ngiitan, osai arengeyan, matang kamo miyagem sa kanyam barkadaan, osai in Amang osai in kansiyo Bodang IsoKiristo. ⁴ Anda kanyam piyagsolat, matang kitam agkaanggay wano gayed. ⁵ Anda in barita kanyam arengeyan sa Bodang Diyos, kanyam wakay piyagpatoldo sa kanyo. In Diyos in tinglaw. Sa kansiyo idapono lened. ⁶ No kantam piyagsabi kitam agyanggat sa kansiyo, kamay no kantam ogali kagwali lened, na kitam bosliyen. Yewed betek in kantam ogali. ⁷ Kamay no kantam ogali kagwali rawa, kataw daan siyo sa rawa, na kitam osai waget ka barkadaan. Osai in boo kantam mga daet liimes wa in daya Isos in Bodang Diyos. ⁸ No kantam piyagsabi kitam idapo daet, na bomaribid in kantam remrem, kitam yewed wano betek. ⁹ No kantam piyagsabi in kantam mga daet, na in Diyos batay agpangwat in kansiyo pangako. Kansiyo batay liibangaw in boo kantam daet. Kataw betek in kansiyo ogali. ¹⁰ No kantam piyagsabi kitam idapo batang agpangwat daet, na kitam aglaban sa Diyos keyen, Siyo bosliyen. Na idapo daan sa kantam in kansiyo agiplaong.

¹ Laki kangay mga bodang, kaya anda kangay piyagsolat sa kanyo, matang kamo ayaw agpangwat daet. Kamay no siyo agpangwat daet, na kitam apo IsoKiristo in idapo daet. Kitam kansiyo piyagpandalangin sa kansiyo Amang, ² angkataw siyo in aglibangaw sa kantam mga daet. Yewed waget sa kantam, kadayo din in daet sa boo mga mangyan. ³ No kitam agpangwat in kansiyo mga otos, na totoo ngani kantam atawanan in Diyos. ⁴ No siyo agsabi keyen, Siyo kangay atawanan, kamay aglaban sa kansiyo mga otos, na siyo bosliyen, na yewed wano betek siyo. ⁵ Kamay in agpaniwala sa kansiyo mga agiplaong, na siyo totoo ngani agkabeet sa Diyos. Kataw ina kantam atawanan kitam sa kansiyo wa. ⁶ No siyo agsabi keyen, Ako sa Diyos wa, na kailangan siyo agogali kataw in mga ogali IsoKiristo. ⁷ Laki mga belag, yewed bayo wakay pag otos in kangay piyagsolat sa kanyo, dayem in datiyan daan otos, in kanyo atawanan ibat daan sa parakayan. Ina in agiplaong piyatoldo sa kanyo. ⁸ Kamay maal din piyagawit bayo pag otos in kangay piyagsolat, kataw agkaidapo wa in lened, osai agrawa wa in tinglaw gayed. In kay Kiristo mga ogali in agpapangkit ina in betek pag otos, osai in kanyo mga ogali. ⁹ In agsabi keyen, Ako sa rawa, kamay agkabais daan sa kansiyo belag, na siyo sa lened daan. ¹⁰ Kamay in agpakayawte sa kansiyo belag, na siyo agpamataw sa rawa. Na siyo idapo ogali makasalangbed sa mga mangyan. ¹¹ Kamay no siyo agkabais daan sa kansiyo belag, na siyo sa lened daan. Na siyo agipanaw sa lened. Yewed atawanan no sa nakay wa agtaboy, angkataw piyagbeleg wa lened. ¹² Mga bodang, ako agsolat sa kanyo, angkataw panawen kay Kiristo liibangaw wa in kanyo mga daet. ¹³ Mga koyay, ako agsolat sa kanyo, angkataw kanyo atawanan siyo in sa parakayan kay datiyan wa agkaboway. Mga begle, ako agsolat sa kanyo angkataw kanyo wa diyaeg in kapwan daet. ¹⁴ Mga bodang, kamo kangay piyagsolatan, angkataw kanyo atawanan in Diyos Amang. Mga koyay, kamo kangay piyagsolatan, angkataw kanyo atawanan siyo in sa parakayan kay datiyan wa agkaboway. Mga begle, kamo kangay piyagsolatan, angkataw kamo maeyat, in agiplaong Diyos kanyo piyagalapet, osai kanyo wa diyaeg in kapwan daet. ¹⁵ Kamo ayaw agkabeet sa kobat, kamayba nakay pag sangkap sa kobat. In agkabeet sa kobat yewed daan agkabeet sa Amang, ¹⁶ angkataw in boo atai sa kobat, kataw in mga daet pag piyagkaamag in bilog, osai in mga daet pag makapangkit, osai din in agpakabwat remrem, in mga kataw ina yewed batang sa Amang, dayem sa kobat daan. ¹⁷ In kobat agkalobos wa, kadayo in boo asin makaamag. Kamay in agpamangwat in beet Diyos batay agkaboway idapo kalobosan. ¹⁸ Laki mga bodang, bangen wa in kalobosan kobat. Kataw in piyatoldo sa kanyo, agrateng in agpakagwali Kiristo. Ngona daan karowan wa in lomwas agpakagwali Kiristo, matang kantam atawanan bangen wa in kalobosan. ¹⁹ Kamayba ina pag mga mangyan datiyan agyanggat sa kantam, siro yewed gayed sa kantam. No siro sa kantam daan, na siro baywi daan nges sa kantam. Kamay siro panaw, matang atawanan wa gayed siro boo yewed sa kantam. ²⁰ Kamay kamo piyakan Kiristo in Betek pag Abyan. Panawen ina kamo boo katawan wa in betek. ²¹ Kaya ako agsolat sa kanyo angkataw kanyo atawanan in betek, yewed panawen sa yewed kanyo atawanan. Kanyo din atawanan idapo bosliyen batang sa betek. ²² In bosliyen, siyo in agsabi keyen Isos yewed in Kiristo, in piyangako Diyos, in Agpamaboway. Na siyo in agpakagwali Kiristo, in dayo wano katawan sa Amang kadayo sa Bodang. ²³ No siyo yewed katawan sa Bodang na siyo yewed din katawan sa Amang. Kamayba nakay in agsabi in Bodang in Kiristo, na sa kansiyo wa din in Amang. ²⁴ In piyatoldo sa kanyo ibat sa parakayan kanyo alapeten sa kanyo remrem. No kanyo piyagalapet sa kanyo remrem in piyatoldo sa kanyo ibat sa parakayan, na kamo batay agpamataw sa Bodang osai sa Amang. ²⁵ In piyangako Kiristo sa kantam boway idapo kalobosan. ²⁶ Ina kangay piyagsolat sa kanyo panawen sa mga beet aglibangaw sa kanyo. ²⁷ In Abyan tiyaboy wa Kiristo sa kantam. Anggan siyo agpamataw daan sa kanyo, kamo idwa kailangan piyatoldo kamayba nakay. Angkataw in Abyan in agpatoldo sa kanyo in boote. In kansiyo piyagpatoldo betek, yewed baribid. Na kataw daan in piyatoldo in Abyan, kamo ayaw panaw kay Kiristo. ²⁸ Laki mga bodang, kitam mamataw sa kansiyo, matang no siyo rateng wa, na asin pag ibeng kitam apyaan in remrem, yewed din arikoyan kitam sa kansiyo. ²⁹ Kataw kanyo atawanan betek in Kiristo, na kanyo din nges atawanan in boo agpangwat betek, ina in mga bodang Diyos.

¹ Kanyo remremen in kalakoyen in agpakayawte in Amang sa kantam, in kitam piyagawit mga bodang Diyos. Kitam ngani bodang wa gayed Diyos. Kaya in mga mangyan yewed katawan sa kantam, angkataw siro yewed katawan sa Diyos. ² Laki mga belag, ngona kitam mga bodang wa Diyos, kamay ikkay atawanan no kitam dogayan kagwali nakay. Kamay kantam atawanan no Kiristo rateng wakay na kitam batay kataw daan siyo, angkataw kantam batay piyagngitan gayed no kataw nakay siyo. ³ Na in agpasandig sa kansiyo, na siyo agpangwat maal kataw daan Kiristo, angkataw Kiristo maal. ⁴ In beet siyabi daet in aglaban sa mga otos Diyos. Na in aglaban sa mga otos Diyos na ina in agpangwat daet. ⁵ Kanyo atawanan atai pataboy in Kiristo matang kansiyo kowaen in daet mga mangyan. Siyo idapo daet. ⁶ No siyo agpamataw kay Kiristo na siyo idbatay wa agpamangwat daet. In agpamangwat kay daet idbatang kangitan, osai idbatang din katawan sa kansiyo. ⁷ Laki mga bodang, ayaw aakayan sa mga agpatoldo baribid, kamayba kay nakay. No siyo agpamangwat in betek, na siyo betek, kataw Kiristo. ⁸ Kamay in agpamangwat kay daet na siyo sarig in diyablo, angkataw sa parakayan kay in diyablo agpamangwat wa daan daet. In Bodang Diyos atai pataboy matang sidaen in mga piyangwat diyablo. ⁹ No siyo bodang wa Diyos, na siyo idbatay wa agpamangwat daet, angkataw bayo wa in kansiyo boway batang sa Diyos. Siyo idbatay wa kapamangwat kay daet, angkataw Diyos in kansiyo Amang. ¹⁰ Atai atawanan no nakay in bodang Diyos, no nakay din in bodang diyablo. In kamayba nakay in yewed agpangwat in betek, yewed din agpakayawte sa kansiyo belag, na siyo yewed bodang Diyos. ¹¹ In piyatoldo sa kanyo ibat kay sa parakayan keyen, Kitam malsipakayawtean. ¹² Ayaw kitam kataw Kain. Siyo bodang diyablo, siyo agbono kansiyo ariyan. Kaya kansiyo biyono, angkataw daeten in kansiyo mga panawen, kamay betek in mga panawen kansiyo ariyan. ¹³ Ayaw kamo agsoyo, mga belag, no kamo piyagkabaisan in mga mangyan. ¹⁴ Kaya kantam atawanan kitam kiyowa wa sa katayan, piyataboy wa sa bayo pag boway, angkataw kantam piyagpakayawte in mga belag. Kamay in yewed agpakayawte baywi kay sa katayan. ¹⁵ In agkabais sa kansiyo belag, na siyo kagwali agbono wa mangyan. Kamay kanyo atawanan in agbono mangyan idapo in boway idapo kalobosan. ¹⁶ Tiyaboy wa Kiristo in kansiyo boway anggan sa katayan panawen sa kantam. Asin kantam atawanan no nangkataw ngani in agpakayawte. Na kailangan din kantam taboyen in kantam boway anggan sa katayan panawen sa mga belag. ¹⁷ No siyo in apo, kamay kansiyo atawanan kansiyo belag idapo, kalbas siyo dayo agtaboy, na yewed mayadi siyo agsabi keyen, siyo agkabeet sa Diyos. ¹⁸ Laki mga bodang, kitam agpakayawte, ayaw bosliyen pag agiplaong, dayem in betek pag panawen. ¹⁹ No kataw ina na kitam katawan kitam sa betek wa agbangen, osai agkapyaan wa in kantam remrem sa adap Diyos, ²⁰ no betek magolo in kantam remrem. Angkataw in Diyos labi kay kalakoy in kantam remrem, nangkataw kansiyo atawanan in boote. ²¹ Laki mga belag, no yewed agkagolo in kantam remrem, na kitam apyaan omadap sa Diyos. ²² Osai kitam piyagpakan kamayba nakay in kantam piyagayay sa kansiyo, nangkataw kitam agpaniwala sa kansiyo mga otos, osai piyagpangwat in mga makaanggay sa kansiyo. ²³ In kansiyo otos keyen kitam pasandig sa kansiyo Bodang IsoKiristo, osai malsipakayawtean kataw in otos Kiristo sa kantam. ²⁴ No siyo agpaniwala sa mga otos Diyos, na siyo agpamataw sa Diyos, osai in Diyos agpamataw sa kansiyo. Kaya kantam atawanan in Diyos agpamataw sa kantam, panawen sa Abyan kansiyo tiyaboy sa kantam.

¹ Laki mga belag, ayaw kamo toloy maniwala sa baatte agsabi siyo apo in Abyan Diyos. Dayem tokaw kanyo tepengen in mangyan matang atawanan no batang ngani sa Diyos in kansiyo remrem. Angkataw aronaw wa bosliyen pag agpamarita in lomwas sa mga mangyan. ² No siyo in agpamarita keyen IsoKiristo mibaloy mangyan, na siyo piyagbalayan in Abyan batang sa Diyos. Ina in padalan matang kanyo atawanan no siyo piyagbalayan in Abyan Diyos. ³ Kamay no siyo yewed kataw ina in agbarita panawen kay Isos, na siyo yewed piyagbalayan in Abyan batang sa Diyos. Dayem in kansiyo remrem batang sa agpakagwali Kiristo. Piyatoldo wa sa kanyo siyo batay rateng. Ngona atai wa daan sa kobat. ⁴ Laki mga bodang, kamo sa Diyos wa agbangen. Kanyo wa diyaeg in mga bosliyen pag agpamarita, angkataw in Abyan agbalay sa kanyo. In kansiyo kabaloyan labi kay kalakoy sa remrem in agbalay sa mga taga kobat. ⁵ In mga bosliyen pag agpamarita sa kobat agbangen, matang in kansiro piyagpatoldo batang sa kobat. Osai in mga agparengey sa kansiro sa kobat din agbangen. ⁶ Kamay kitam sa Diyos agbangen. Kamayba nakay in katawan sa Diyos na agparengey sa kantam. Kamay in yewed sa Diyos yewed agparengey sa kantam. Kataw ina kantam atawanan in betek pag remrem, osai in baribid pag remrem. ⁷ Laki mga belag, kitam malsipakayawtean, angkataw in agpakayawte batang sa Diyos. No siyo agpakayawte na siyo bodang Diyos, osai katawan sa Diyos. ⁸ In yewed agpakayawte yewed katawan sa Diyos, angkataw in ogali Diyos palagi agpakayawte. ⁹ Piyapangkit Diyos in siyo agpakayawte sa kantam, in siyo agsogo in kansiyo osai waget ka Bodang sa kobat, matang siyo in padalan kitam piyaboway. ¹⁰ In agpakayawte kataw tai, yewed sa kitam in agkabeet sa Diyos, dayem kitam in kansiyo piyakayawte, osai kansiyo siyogo kansiyo Bodang, matang siyo in aglibangaw sa kantam mga daet. ¹¹ Laki mga belag, kataw kalakoy ina in Diyos agpakayawte sa kantam, na kailangan kitam malsipakayawtean. ¹² Kamayba nangkadogay idapo mangyan batang kangitan sa Diyos. Kamay no kitam agpalsipakayawtean na siyo agbalay sa kantam. Osai in siyo agpakayawte mibaloy wa gayed sa kantam galem. ¹³ Kaya kantam atawanan kitam agpamataw sa Diyos, kalbas siyo wakay agbangen agpamataw sa kantam, angkataw kitam piyakan in kansiyo Abyan. ¹⁴ Kanyam ngiitan osai piyagpaalam keyen siyogo in Amang in kansiyo Bodang matang agpamaboway sa boo mangyan. ¹⁵ In agbarita keyen, Isos in Bodang Diyos, na agpamataw sa Diyos. Osai in Diyos wakay agbangen agpamataw sa kansiyo. ¹⁶ Osai kantam atawanan in Diyos agpakayawte sa kantam. Ina in kantam piyagpasandigan. In ogali Diyos palagi agpakayawte. In yewed agempet agpakayawte na agpamataw sa Diyos, osai in Diyos wakay agbangen agpamataw sa kansiyo. ¹⁷ No yewed kantam piyagkalimowan in Ibeng Agparosa, na mibaloy wa gayed sa kantam galem in agpakayawte, angkataw kitam kataw wa Kiristo, kamayba atai daan sa kobat. ¹⁸ In agpakayawte gayed idapo agiyagem agkalimo, angkataw in agpakayawte gayed idbatay wa agkalimo. Kamayba nakay in agkalimo, na ikkay mibaloy gayed sa kansiyo galem in agpakayawte. Angkataw kaya siyo agkalimo panawen sa parosa. ¹⁹ Kaya kitam agpakayawte, angkataw in Diyos in tokaw agpakayawte sa kantam. ²⁰ In agsabi keyen, Ako agkabeet sa Diyos, kamay agkabais daan sa kansiyo belag, na siyo bosliyen. No siyo yewed agpakayawte sa kansiyo belag piyagngitan, na siyo idbatay agkabeet sa Diyos in yewed kansiyo piyagngitan. ²¹ In otos Kiristo sa kantam keyen, In agkabeet sa Diyos kailangan din agpakayawte sa kansiyo belag.

¹ Kamayba nakay in agpaniwala keyen, Isos in Kiristo, in piyangako Diyos, in agpamaboway, na siyo bodang Diyos. In agpakayawte sa osai ka amang, na agpakayawte din sa mga bodang. ² Kaya kantam atawanan kitam agpakayawte sa mga bodang Diyos, angkataw kitam agkabeet sa Diyos, osai agpaniwala sa kansiyo mga otos, ³ angkataw in beet siyabi in agkabeet sa Diyos in agpaniwala sa kansiyo mga otos. In kansiyo mga otos yewed maidap, ⁴ - ⁵ angkataw in baatte bodang Diyos kabaloy agpandaeg sa mga daet pag ogali atai sa kobat. Kaya kitam kabaloy kapandaeg panawen kitam agpaniwala Isos in Bodang Diyos. In agpaniwala kataw ina in kapandaeg sa mga daet pag ogali atai sa kobat. ⁶ In IsoKiristo atai pataboy sa kobat, siyo biyaotismowan, osai siyo biyono sa kodos. In siyo biyaotismowan, ina sa sapa. In siyo matay, mabobo in kansiyo daya. In Abyan in agpatonay keyen, betek ina pag dowai, angkataw in Abyan in betek. ⁷ Na tolo wa in agpatonay, ⁸ in Abyan, osai in sapa, osai din in daya. Ina pag tolo tikkatawan in piyagpatonay. ⁹ No kitam agpaniwala sa patonay mangyan, na labi kay maal piyaniwalaan in patonay Diyos, in kansiyo patonay panawen sa kansiyo Bodang. ¹⁰ In agpasandig sa Bodang Diyos, apo in Abyan agpatonay sa kansiyo galem. Kamay in dayo maniwala sa Diyos, na siyo aglaban sa Diyos keyen siyo bosliyen. Ina panawen siyo yewed agpaniwala sa patonay Diyos panawen sa kansiyo Bodang. ¹¹ In patonay keyen tiyaboy wa Diyos sa kantam in boway idapo kalobosan, in boway batay kiyowa sa kansiyo Bodang. ¹² In piyagbalayan in Bodang Diyos, apo boway idapo kalobosan, kamay in yewed piyagbalayan in Bodang, na idapo boway. ¹³ Kaya anda kangay piyagsolat sa kanyo matang kanyo atawanan kamo in mga agpasandig sa Bodang Diyos apo boway idapo kalobosan. ¹⁴ Kitam yewed agkarikoy pasabangen sa kansiyo, angkataw kantam atawanan no in kantam piyagayay kataw daan in kansiyo beet na kitam piyagparengey. ¹⁵ No kantam atawanan kitam kansiyo piyagparengey na kantam din atawanan kansiyo piyagtaboy in kantam piyagayay sa kansiyo. ¹⁶ No siyo in kangitan sa kansiyo belag kapangwat daet yewed makakatay sa kansiyo abyan, na pandalanginen ina pag belag, na siyo batay piyaboway. Ina sa mga belag in daet yewed makakatay sa kansiyo abyan. Apo daet makakatay sa abyan, kamay yewed kangay piyagsabi kanyo pandalanginen in agpangwat ina. ¹⁷ In boo yewed betek pag panawen, ina daet. Kamay apo daet yewed makakatay sa abyan. ¹⁸ Kantam atawanan in mga bodang Diyos yewed wa agpangwat daet, angkataw siro piyagalapet IsoKiristo, siro yewed mayadi piyaglado in kapwan daet. ¹⁹ Kantam atawanan kitam sa Diyos agbangen, kamayba in boo sa kobat agbangen sakop diyablo. ²⁰ Kantam atawanan atai pataboy in Bodang Diyos. Kitam kansiyo piyakan maal pag remrem, matang kantam atawanan in betek pag Diyos, osai kitam sa kansiyo wa, sa betek, osai sa kansiyo Bodang IsoKiristo. Siyo in betek pag Diyos. Siyo in boway idapo kalobosan. ²¹ Laki mga bodang, ayaw agpasabangen sa mga yewed Diyos.