1 KORINTO

¹ Ako Pablo in agpasolat, osai Tostinis kantam belag. Ako biyerya in Diyos matang ako katiwala Kiristo Isos agbarita. ² Kami agsolat sa barkadaan mga bodang Diyos sa Korinto, sa mga iidang Diyos, kansiyo piyabokod, piyaagem kay Kiristo Isos, sarig din in boo mga iidang sa boo kobat, in boo agpandalangin kay IsoKiristo, Kapwan kantam boo. ³ Kamo kangay piyagpandalangin matang in Diyos kantam Amang, osai IsoKiristo kantam Kapwan agpakaanggay, osai agpakapya wa gayed sa kanyo remrem. ⁴ Baatte ako agkaanggay sa Diyos panawen sa kansiyo mga piyagtaboy sa kanyo. Kiristo Isos in agbaba agtaboy. ⁵ - ⁶ Kaya atawanan totoo in barita panawen kay Kiristo, angkataw ngiitan miyalis wa in kanyo mga ogali. Kataw kamo piyaagem wa sa kansiyo, kamo piyakan kabaloyan kamayba nakay pag kabaloyan, kamayba sa agiplaong, kamayba sa atawanan. ⁷ Anggan kamo apo in boo piyagtaboy in Betek pag Abyan, in kitam agpanaya kay anggan IsoKiristo kantam Kapwan batay wakay atai ngiitan. ⁸ Kitam kansiyo piyagpakaeyat anggan dogayan matang kitam idapo lebag sa galem sa kabetek agrateng wakay IsoKiristo kantam Kapwan. ⁹ In betek pag Diyos in agberya sa kantam matang piyaagem wa sa kansiyo bodang, IsoKiristo kantam Kapwan. ¹⁰ Laki mga belag, ako siyogo rsoKiristo kantam Kapwan agsabi wa gayed sa kanyo keyen, Ayaw agpaylabanan. Maybelagan wa kamo boo. Osai wageten in kanyo remrem, osai in kanyo beet. ¹¹ Laki mga belag, ako biyaritaan kay Kolowi mga kamalay keyen, Kamo agpalawayan. ¹² In beet kangay siyabi baatte sa kanyo osai wakay in piyagsabi. In osai keyen, Ako kay Pablo. In osai keyen, Ako kay Apolos. In osai keyen, Ako kay Pidro. In osai keyen, Ako kay Kiristo. ¹³ Nakay, kanyo lames remrem Kiristo agkadodo? Kanyo lames remrem ako Pablo in piyako sa kodos panawen sa kanyo? In kamo biyaotismowan nakay, sa ngaran lames Pablo? ¹⁴ Ako agkaanggay sa Diyos, kataw ako idapo biyaotismowan sa kanyo, no yewed Kirispo osai Gayo. ¹⁵ Matang kamayba osai waget yewed mayadi agsabi keyen siyo biyaotismowan sa ngaran Pablo. ¹⁶ A, apo kay mana kangay wa biyaotismowan, in balayan Istipanas. No yewed ina, na ako idapo atawanan roma mangyan kangay biyaotismowan. ¹⁷ Ako siyogo Kiristo agpatoldo in Maal pag Barita. Ako yewed siyogo agbaotismo. Ako agpatoldo ngani, kamay yewed kataw in agiplaong mga katawanan, in mga agkasadapan sa kobat. In kangay piyagpatoldo toloy atawanan matang yewed maidapo in kabaloyan in katayan Kiristo sa kodos. ¹⁸ Sa remrem in mga agitaboy sa toyongan, idapo kabolowan in piyagpatoldo keyen, Kiristo matay sa kodos. Dayem sa kantam agbangen, sa mga piyagpamaboway, in Kiristo matay sa kodos, ina in kabaloyan Diyos agpamaboway. ¹⁹ Angkataw keyen in Agisolat, Kangay batay piyagsida in atawanan in mga katawan. Osai kangay batay piyagpaidapo kabolowan in atawanan in mga katawan. ²⁰ Na idapo wa kabolowan in mga katawan. Idapo wa kabolowan in mga batang agadar. Idapo wa kabolowan in mga agmatiwid atai sa kobat. In piyapangkit Diyos in atawanan atai sa kobat idapo kabolowan. ²¹ Sa maal pag remrem Diyos no in mangyan siyo wakayte agadar na siyo idbatay katagbo sa Diyos. Dayem in beet Diyos batay piyagpamaboway in mga agpasandig sa kansiyo panawen sa Maal pag Barita. Ina kanyam piyagpamatoldo, kamayba idapo kabolowan sa remrem in mga agpasandig sa kobat. ²² In mga Odyo dayo maniwala no idapo ngiitan makasoyo pag panawen. In mga agbangen Girigo na agkaamag sa mga atawanan. ²³ Kamay in kanyam agbangen piyagpatoldo in Kiristo piyako sa kodos. Sa remrem mga Odyo ina daeten wano. Sa remrem mga yewed Odyo ina idapo kabolowan. ²⁴ Kamay sa mga biyerya Diyos, kamayba Odyo kamayba Girigo, Kiristo in kabaloyan Diyos agpamaboway. Siyo in remrem Diyos. ²⁵ In remrem Diyos, kamayba idapo kabolowan sa pangkit mangyan, na labi kalakoy sa boo remrem mga mangyan. In kabaloyan Diyos, kamayba idapo kabolowan sa pangkit mangyan, na labi kalakoy sa boo kabaloyan mga mangyan. ²⁶ Mga belag, remremen in kanyo kalakoyen tangona in kamo biyerya Diyos. Sa pangkit mga mangyan kamo karowan in yewed katawan, karowan in idapo kabaloyan, karowan in kalakoyte waget. ²⁷ Iidang Diyos in mga idapo atawanan atai sa kobat matang piyarikoy in mga katawan. Osai iidang Diyos in mga idapo kabaloyan atai sa kobat matang piyarikoy in mga apo kabaloyan. ²⁸ Iidang Diyos in mga kalakoyte, in mga piyagpaidapo kabolowan atai sa kobat matang piyagpaidapo kabolowan in mga piyagpakalakoy atai sa kobat. ²⁹ Matang kamayba nakay pag mangyan yewed mayadi agpakalakonaw sa pangkit Diyos. ³⁰ Kitam kansiyo piyaagem kay Kiristo Isos. Kiristo Isos in paywaraan Diyos agtaboy kansiyo remrem sa kantam. Panawen sa kansiyo kitam idapo wa daet, kitam piyabokod, osai piyaboway. ³¹ Kataw ina in siyabi sa Agisolat keyen, No apo agpakalakoy, na in Kapwan in pakalakonawen.

¹ Mga belag, in ako pataboy sa kanyo kangay wa piyalowas in batang piyagbetang pag remrem Diyos. Kamay in kangay mga agiplaong yewed malayem, yewed maidap atawanan. ² Angkataw in ako pataboy sa kanyo in kangay remrem ako idapo batay piyagpatoldo sa kanyo no yewed in IsoKiristo in piyako sa kodos. ³ Ako idapo eyat in ako sa kanyo. Ako agkalimo, agtagelgey. ⁴ Ako agbarita agpatoldo sa kanyo, yewed sa masadap pag mga agiplaong batang sa atawanan mangyan, no yewed in kabaloyan in Betek pag Abyan in agpatonay sa barita. ⁵ Matang in kamo agpasandig kay Kiristo kamo agpasandig sa kabaloyan Diyos, yewed sa atawanan mangyan. ⁶ Kamay sa mga gorangen wa sa agpaniwala kami agpatoldo in atawanan. Kamay yewed in atawanan atai sa kobat, kamayba in mga koyay atai sa kobat. Ina pag mga koyay agkaidapo. ⁷ In kanyam piyagpatoldo in remrem Diyos, in batang piyagbetang sa mga mangyan. In ikkay mibaloy in kobat, ina in kansiyo remrem siyandata matang kitam batay piyakalakonaw. ⁸ In mga koyay atai sa kobat, kamayba osai waget yewed katawan ina pag remrem Diyos. No kansiro atawanan na idbatay wa nges kansiro piyako sa kodos in lakonaw lakoy pag Kapwan. ⁹ Kataw tai in siyabi in Agisolat keyen, Yewed kay ngiitan mata, ikkay arengeyan talinga, ikkay riyemrem mangyan in siyandata Diyos batay piyagtaboy sa mga agmaal sa kansiyo. ¹⁰ Kamay ina piyalowas wa Diyos sa kantam, piyalowas in kansiyo Abyan. In Abyan katawan in boote, kamayba in idbatay atawanan pag remrem Diyos. ¹¹ Idapo batay katawan in remrem osai ka mangyan, no yewed in kansiyo daan abyan. Na kataw din ina idapo batay katawan in remrem Diyos, no yewed in Abyan waget Diyos. ¹² In tiyaboy sa kantam yewed in remrem agpasandig sa atawanan mangyan, dayem in Abyan Diyos, matang kantam atawanan in kansiyo mga piyagtaboy sa kantam. ¹³ In kanyam mga piyagsabi batang sa Abyan Diyos, yewed batang sa atawanan mangyan. Na in mga atawanan in Abyan in kanyam piyagpatoldo sa mga apo in Abyan Diyos. ¹⁴ No in mangyan idapo in Abyan Diyos, na siyo dayo komwa in mga piyagtaboy in Abyan Diyos. Ina pag mga piyagtaboy kansiyo piyagidapo kabolowan, yewed kansiyo atawanan. Angkataw in mga apo in Abyan Diyos, ina waget in katawan. ¹⁵ In mga mangyan piyagbalayan in Abyan Diyos katawan in kalakoyen kamayba nakay. Kamay idapo batay katawan in kalakoyen ina pag mangyan. ¹⁶ Kataw tai in Agisolat keyen, Idapo batay katawan in remrem in Kapwan. Idapo batay kapatoldo sa kansiyo. Kamay in remrem Kiristo agbalay wa daan sa kantam galem.

¹ Mga belag, yewed kay mayadi ako agpatoldo sa kanyo kataw in ako agpatoldo sa mga piyagbalayan in Abyan Diyos. Kailangan kamo kangay piyagpatoldo kataw in agpatoldo sa mga agpanremrem waget sa bilog, kataw sa mga bodangte kay sa agpaniwala kay Kiristo. ² Kamo kangay piyagpakan soso, yewed in baaw gayed, angkataw kamo ikkay kabaloy agkoman. Anggan ngona kamo ikkay kabaloy, ³ angkataw kamo agpanremrem kay sa bilog waget. Kaya atawanan kamo agpanremrem kay sa bilog waget, angkataw kamo agpanagiri kay, agpalawayan kay, ogali waget daan mangyan. ⁴ In kamo agkataw ina, in osai keyen, Ako kay Pablo, in osai wakay keyen, Ako kay Apolos, na in kanyo ogali ogali kay daan mangyan. ⁵ Nakay in tongkolin Apolos? Nakay in tongkolin Pablo? Kami sogowan waget Diyos, kansiyo siyogo matang kamo yaakay maniwala kay Kiristo. Baatte osai sa kanyam agpangwat in panawen tiyaboy Diyos sa kanyam. ⁶ Ako in agtogda asin, Apolos in aglalos asin, kamay in Diyos in agpaistobo sa togda. ⁷ Kalakoyte in agtogda, osai in aglalos. In Diyos agbangen in lakonaw, siyo in agpaistobo. ⁸ In agtogda osai in aglalos tanan agpanawen. In baatte osai batay piyagbayadan sibay sa kansiyo panawen. ⁹ Kami tanan agpaytolong sa panawen Diyos. Kamo in agay Diyos. Kamo din in balay piyagpangwat Diyos. ¹⁰ Kataw ako piyakan Diyos kabaloyan agtadyok, ako in agarigi. Osai wakay ka mangyan in agpangwat. Kamay in baatte agpangwat anda pag balay na pakarigenen. ¹¹ Yewed mayadi piyabalay in roma wakay pag arigi, no yewed in piyabalay wa Diyos, in IsoKiristo. ¹² In mga agpangwat apo agpabalay ginto, pilak, marigen pag bato. Apo wakay agpabalay yangaw, garasen, lalosen. ¹³ In baatte agpangwat, in karigenen kansiyo piyangwat batay atawanan sa Ibeng Agtepeng, angkataw batay piyadalan sa baya. Ina pag Ibeng in panawen in baatte osai piyagtepeng sa baya, no nakay in marigen, no nakay in matebed. ¹⁴ No kansiyo piyaiskapet sa arigi agaway, yewed matebed, na batay piyagbayadan siyo. ¹⁵ Kamay no matebed, na siyo idapo wa batay bayad. Kamay siyo gayed piyaboway daan, kamay idapo piyagbaba kataw domalagan waget sa baya. ¹⁶ Kailangan kanyo atawanan kamo pag barkadaan balay lakoy Diyos, in kanyo galem pagbalayan kansiyo Abyan. ¹⁷ No in mangyan agsida sa balay lakoy Diyos, na siyo batay piyarosaan Diyos, angkataw piyagpabokod sa Diyos in kansiyo lakoy balay. Kitam in kansiyo balay lakoy. ¹⁸ Kamayba nakay ayaw agpabaribiden in remrem. No kansiyo remrem siyo katawan wa in atai sa kobat, na kailangan siyo keyen in kansiyo atawanan idapo kabolowan, matang siyo batay katawan wa ngani. ¹⁹ Angkataw in atawanan atai sa kobat idapo kabolowan sa pangkit Diyos. Keyen in Agisolat, In mga katawan batay piyagkabel Diyos sa kansiro daan salaod. ²⁰ Osai wakay keyen, Atawanan in Kapwan idapo kabolowan in piyagremrem in mga katawan. ²¹ Na ayaw agpakalakoyen in panawen mangyan. Kanyo in boo, ²² osai Pablo, kadayo Apolos, osai Pidro, osai in kobat, in boway, in katayan, kadayo din ngona pag betek, kadayo in agrateng kay. Kanyo in boote. ²³ Kalbas kamo kay Kiristo, Kiristo sa Diyos.

¹ Kami kay Kiristo mga sogowan, mga agpalowas in batang piyagbetang pag remrem Diyos. Kataw ina in remremen kamo sa kanyam. ² In sogowan kailangan maniwala sa agsogo sa kansiyo. ³ Idapo kabolowan sa kangay no nakay in kanyo remrem sa kangay. Kalobante nangkataw in remrem in mga koyay sa kangay. Kamayba ako, no ako agremrem sa kangay sadiri, na idapo din kabolowan. ⁴ Kamayba ako idapo atawanan daet sa kangay galem, karam ako apo din daet. Wara in Kapwan in agpangkit sa kangay, no ako maal, no ako daet. ⁵ Kantam panayaen in Kapwan. Anggan ikkay kabetek kitam ayaw kay agremrem sa panawen in kapwa mangyan. In Kapwan in batay agpalowas in mga agitago sa lened. Siyo batay agpapangkit in mga remrem piyagtago mga mangyan. Ina pag betek in Diyos batay agmaal sa baatte mangyan kalakoy wa daan in piyangwat in mangyan. ⁶ Laki mga belag, kami Apolos kangay karai piyangwat alimbawa, matang kamo apo pakinabang, matang kanyo atawanan in piyagsabi keyen ayaw aglampas sa Agisolat. Matang ayaw agpanremrem keyen, Ina pag mangyan kalakoyte, ina wakay lakonaw. ⁷ Nakay ina, kamo lakonaw kay sa amat? Ina in kanyo kalakoyen tiyaboy waget Diyos sa kanyo. Na no tiyaboy waget sa kanyo, yewed kanyo wakayte piyangwat, nakay batang kamo mayabang kay kataw ina? ⁸ Nakay ina, kamo mana bosog wa? Nakay ina, kamo mayaman wa, kabel wa in boote? Nakay ina, kamo agpansakop wa sa boote? Kami yewed. Dayem nges kamo agpansakop wa ngani, matang kami sarig din agpansakop. ⁹ Kataw in mga abel sa gira piyaggoyod sa paoriyan in kapitan, na kami tomag in mga sogowan agbarita kataw ina kalakoyte sa boo, batay wa piyagbono. Kami tomag piyagpapangkit Diyos sa boo mangyan matang kami piyagpatawaan mga angil, mga mangyan. ¹⁰ Tomag sa kanyo pangkit kami idapo bait panawen kami kay Kiristo, kamay kamo katawan wa gayed panawen kay Kiristo. Tomag sa kanyo pangkit kami idapo eyat, kami kalakoyte, kamay kamo maeyat, kamo lakonaw. ¹¹ Anggan ngona kami agkayawes, agkainem, idapo damit. Kami piyagbogbog, kami idapo pagoliyan. ¹² Kami wakayte in aganap boway. In mga agpamanes sa kanyam, kanyam piyagpandalangin. No kami piyagpangwatan daet, na kami agpakeyen wate. ¹³ Kamayba kami piyaglibak, na mabait kami agsagot. Anggan ngona kami piyagidapo kabolowan, kami kataw waget mga lokkaan piyagbenglay waget. ¹⁴ Kaya ina kangay piyagsolat, yewed matang kamo arikoyan. Ako agpatoldo sa kanyo kataw kangayte mga bodang piyagpakayawte. ¹⁵ Kamayba nangkaro ka mangyan in agpatoldo sa kanyo in agpaniwala kay Kiristo, ako waget in kanyo amang sa paniwala. Kamo kangay mga bodang sa paniwala kay Kiristo Isos, angkataw ako in agbaba sa kanyo in Maal pag Barita. ¹⁶ Ako agpatoldo sa kanyo keyen kamo agtolad sa kangay. ¹⁷ Ina in dailan kaya Timotiyo kangay piyagsogo sa kanyo. Siyo kangay piyagmaal pag bodang sa paniwala sa Kapwan, siyo yewed aglimbang, siyo batay agpatoldo wakay sa kanyo in kangay mga ogali sa paniwala kay Kiristo, kataw daan in kangay piyagpatoldo sa boo mga barkadaan mga bodang Diyos kamayba saano. ¹⁸ In amat sa kanyo agpakabwat remrem, kataw siro keyen ako idbatay wa asin pataboy. ¹⁹ Kamay kadogayte wa ako batay wakay asin no in Kapwan beet. Na kangay batay piyagpangkit ina pag mga agpakabwat remrem, idwaget sa kansiro mga agiplaong, no yewed sa kansiro mga piyagpangwat, no ngani siro apo kabaloyan. ²⁰ Angkataw kaya kitam katawan no in mangyan sakop sa Diyos, piyagngitan sa kansiyo mga ogali, yewed waget sa kansiyo mga piyagsabi. ²¹ In ako batay asin nakay agbangen in kanyo beet? Osai ako agbaba pamogbog, osai ako mabait, agpakayawte sa kanyo?

¹ Apo agbarita sa kangay keyen apo wa lakoy sa kanyo agpangwat daet. Kamayba in mga yewed agpaniwala idbatay agpangwat in kataw ina pag daet. Osai ka kaliyakiyan miskapet wakay sa kansiyo inang pangoman. ² Kalbas kamo agpakabwat kay remrem. In maal nges kamo agrongkot, in maal nges ina pag agpangwat kataw ina kanyo biyoyaw sa barkadaan mga bodang Diyos. ³ - ⁴ Kamayba in kangay bilog idapo asin, na ako agremrem daan din sa kanyo. Na kataw daan ako asin, sa kabaloyan Isos kantam Kapwan kangay wa atawanan in padalan asin pag agpangwat kaloba ina. Kamo matipon wa, ako agremrem daan din sa kanyo. Kalbas sa kabaloyan daan Isos kantam Kapwan, ⁵ ina pag mangyan kanyo taboyen sa dimonyo, matang siida in kansiyo bilog, matang nges piyaboway kansiyo abyan dogayan sa Kabetek agrateng in Kapwan. ⁶ Yewed maal in kamo agpakabwat remrem. Kanyo atawanan in piyagsabi keyen, Kamayba kalakoyte waget in piyaagem pamaistobo tinapay na mistobo in boo tikmel. ⁷ Na benglayen wa in dogay wa pag pamaistobo, in daet pag ogali, matang kamo malinis. Na kamo kataw in bayo wakay tikmel, idapo pamaistobo. Kataw ngani ina kamo, angkataw biyono wa Kiristo kataw in bodang topa piyagbono sa piyasta piyagawit Paskowa. ⁸ Na kitam wa mamiyasta, kamay ayaw wa in tinapay apo dogay wa pag pamaistobo, in daet remem, daet pag ogali. Dayem in tinapay idapo pamaistobo, in malinis pag remrem, in betek pag ogali. ⁹ Kangay siyabi sa taite pag solat keyen, Ayaw agpanyanggat sa mga agpanggaraw. ¹⁰ In kangay beet siyabi yewed sa yewed agpaniwala pag mga agpanggaraw, mga solangan, mga agpanakaw, mga agsamba sa yewed Diyos. Angkataw kamayba saano sa boo kobat apo mga yewed agpaniwala. ¹¹ Dayem in beet kangay siyabi ayaw agpanyanggat sa agsabi siyo agpaniwala kay Kiristo, kamay siyo agpanggaraw daan, no yewed solangan, no yewed agsamba sa yewed Diyos, no yewed aglibak, no yewed agpanlasing, no yewed agpanakaw. Ayaw agpamabelag sa kataw ina pag mga mangyan. ¹² - ¹³ Ako yewed koyay agparosa sa mga yewed agpaniwala. Diyos agbangen in batay agparosa sa kansiro. Kamay kitam in mga koyay in agparosa sa mga agiyagem sa kantam barkadaan. Kataw in Agisolat keyen, Kanyo boyawen sa kanyo barkadaan in aleleng pag mangyan.

¹ No sa kanyo barkadaan apo tayari sa paniwala agpalaway, nakay batang kamo agpaosay sa mga koyay yewed agpaniwala? Nakay batang yewed sa mga iidang Diyos pag mga koyay? ² Kailangan kanyo atawanan kitam in mga iidang Diyos batay agosay sa boo mangyan. No kitam batay agosay sa boo mangyan, na nakay batang kamo yewed kabaloy agosay sa mga kataw ina kalakoyte? ³ Kitam dogayan agosay sa mga angil. Na no kitam kabaloy agosay sa mga angil, na labi kay kitam kabaloy atai waget in sa kobat mga osap. ⁴ No kamo apo osap, kamo lames batay kay agpaosay sa mga koyay yewed sa barkadaan mga bodang Diyos? ⁵ Kailangan kamo agkarikoy. Tiyak apo asin sa kanyo katawan agosay sa mga tayariyan sa agpaniwala. ⁶ Kamo tayariyan, no agpalsisombongan, nakay batang ina kanyo piyagpaosay sa mga yewed agpaniwala? ⁷ In kamo agpalawayan, ina agsida sa kanyo agpaysarigan agpaniwala. In maal kay kamo agbanta wate no kamo piyagapi, no kamo piyagpadaya. ⁸ Kamay kamo kay in agpangapi, in agpamadaya, kamayba sa kanyo daan belag sa agpaniwala. ⁹ Kailangan kanyo atawanan in mga agpamangwat daet idbatay sa sakopan Diyos. Ayaw agpabaribiden in kanyo remrem. In mga agpanggaraw, in mga agsamba sa yewed Diyos, in mga agpanaban, in mga bakla, ¹⁰ in mga agpanakaw, mga solangan, mga agpanlasing, mga agpanlibak, mga agpangapi, in kataw ina pag mga mangyan idbatay sa sakopan Diyos. ¹¹ Kitam tangona in amat kataw ina. Kamay ngona kitam liinis wa, kitam tiyalaga wa sa Diyos, kitam piyangwat wa idapo daet, sa kabaloyan IsoKiristo in Kapwan, osai in Abyan Diyos. ¹² Apo mangyan batay agsabi keyen, Idapo piyagayaw sa kangay kamayba nakayte. Na tomag betek in kansiyo siyabi, kamay in roma daeten sa kantam. Maal din ako agsabi keyen, Idapo piyagayaw sa kangay. Kamay ako idbatay pasakop sa kamayba nakay pag ogali. ¹³ Apo batay keyen, In boyon pagsoroyan pamangnen, pamangnen piyagsoroy sa boyon. Betek ina pag siyabi, kamay kadayo in boyon, kadayo in pamangnen, na dogayan batay siida in Diyos. In bilog mangyan piyangwat yewed matang agpanggaraw, dayem matang agpangwat in beet in Kapwan. Na in Kapwan in baala sa kantam bilog. ¹⁴ Isos in Kapwan piyaboway wakay tagoli Diyos. Na kitam batay din kataw ina piyaboway wakay tagoli kansiyo kabaloyan. ¹⁵ Kailangan kanyo atawanan kitam mga sangkap sa bilog Kiristo. Na nakay, maal lames kiyowa in sangkap Kiristo, kalbas piyaagem sa agpanggaraw pag kagbaiyan? Yewed wano mayadi. ¹⁶ Kailangan kanyo atawanan in agiskapet sa kataw ina pag kagbaiyan, siro mibaloy wa osai waget ka bilog. Kataw siyabi sa Agisolat keyen, Siro dowai mibaloy wa osai waget. ¹⁷ Kamay in agiskapet sa Kapwan, na siro mibaloy wa osai waget ka abyan, osai in Kapwan. ¹⁸ Kitam ayaw agpanggaraw. In agpanggaraw, kansiyo daan bilog in piyagpangwatan daet, kamay in boo roma mga daet, idwa sa kansiyo bilog. ¹⁹ Kailangan kanyo atawanan in kantam bilog balay in Betek pag Abyan. Siyo in tiyaboy Diyos sa kantam. Siyo agbalay sa kantam galem. Na idwa kitam in kapwan kantam bilog. Diyos in kapwan. ²⁰ Kitam kansiyo biili, biyayadan wa. Na kailangan paglakonawen kantam bilog in Diyos.

¹ In kanyo mga tanong sa solat kangay wa piyagsagot. In maal sa kaliyakiyan in ayaw wa mamangkit babai. ² Kamay panawen asin sa Korinto aronaw in agpanggaraw, na in maal in baatte kaliyakiyan apo babai, osai baatte kagbaiyan apo lalaki. ³ In lalaki ayaw agpakabwat sa kansiyo bilog, in babai ayaw din agpakabwat sa kansiyo bilog. ⁴ Angkataw in babai idwa kapwan sa kansiyo bilog, in lalaki wa in kapwan. Kataw din ina, in lalaki idwa kapwan sa kansiyo bilog, in babai wa in kapwan. ⁵ Ayaw dayo. Dayem apo polongan keyen, Ayaw kay, kita agpandalangin kay, no nangkadogay. Kalbas apo wakay, matang yewed malabo sa sokso dimonyo angkataw yewed katiis. ⁶ In kangay piyagsabi ako agpatoldo waget sa kanyo. Ako yewed agayaw agpamangkit. ⁷ No sa kangay, in maal nges kamo boo agtolad din sa kangay. Kamay in baatte osai apo kabaloyan batang sa Diyos. Yewed tikkatawan in mga kabaloyan. ⁸ Sa mga wakay idapo lalaki, idapo babai, kadayo sa mga balo anda in kangay piyagsabi keyen, In maal kay nges ayaw mamangkit, kataw ako. ⁹ Kamay no kamo yewed katiis, na pakasal wa. Osai in pakasal, osai in maloba agamag, in maal in pakasal agbangen. ¹⁰ Sa mga apo wa lalaki, apo wa babai anda in kangay bilin, kamay yewed waget kangay, no yewed in Kapwan. In babai ayaw agbaliwan sa kansiyo lalaki. ¹¹ Kamay no siyo agbaliwan, na ayaw agpamangkit wakay osai, no yewed miskapet wakay sa lalaki. Osai in lalaki ayaw din agpasoway sa kansiyo babai. ¹² Ako wa in agsabi sa mga amat, yewed in kantam Kapwan, keyen no osai ka agpaniwala, in babai yewed agpaniwala, kalbas in babai agkabeet daan sa lalaki, na in agpaniwala agbangen ayaw agpasoway. ¹³ No in lalaki yewed agpaniwala, in babai wakay agpaniwala, kalbas in lalaki agkabeet daan sa kansiyo, na in agpaniwala agbangen ayaw agpasoway. ¹⁴ Angkataw in lalaki yewed agpaniwala piyagtanggap din Diyos panawen sa babai agpaniwala. Osai in babai yewed agpaniwala piyagtanggap din Diyos panawen sa lalaki agpaniwala. No yewed kataw ina, na in kansiro mga bodang daeten sa pangkit Diyos. Kamay siro piyagtanggap ngani Diyos, panawen sa lalaki agpaniwala. No yewed kataw ina, na in kansiro mga bodang daeten sa pangkit Diyos. Kamay siro piyagtanggap ngani Diyos, panawen sa osai ka koyay agpaniwala. ¹⁵ Kamay no in taybalang, in yewed agbangen agpaniwala dayo wa sa agpaniwala, na siyo pabaliwan wa. No kataw ina in agpaniwala, kamayba lalaki, kamayba babai, agipalpas wa. Angkataw in beet Diyos kitam apyaan in boway. ¹⁶ Kitam idbatay katawan. No agpaniwala in babai, karam siyo in padalan matang piyaboway in lalaki. No agpaniwala in lalaki, karam siyo in padalan matang piyaboway in babai. ¹⁷ In baatte mangyan, no nangkataw siyo in siyo biyerya Diyos, na ayaw agalisen, angkataw ina in tiyaboy Diyos sa kansiyo. Ina pag bilin in kangay piyagpatoldo sa boo mga barkadaan mga bodang Diyos. ¹⁸ No siyo datiyan toli in siyo biyerya Diyos, na ayaw agalisen. No siyo datiyan yewed toli in siyo biyerya Diyos, na ayaw wa agpatoli. ¹⁹ Idapo kabolowan kamayba tiyoli, kamayba yewed tiyoli. In apo kabolowan in agpaniwala sa mga Batas Diyos. ²⁰ In baatte osai, no nangkataw siyo in siyo biyerya Diyos, na ayaw agalisen. ²¹ No siyo sogowan alapet in siyo biyerya Diyos, na ayaw siyo agpanremrem asin, kamay no siyo batay piyagpalpas, na papalpas wa. ²² Angkataw no siyo sogowan alapet in siyo biyerya Diyos, na kansiyo abyan piyalpas wa in Kapwan. Dayem no siyo agipalpas in siyo biyerya Kiristo, na siyo sogowan alapet Kiristo. ²³ Kitam biili Diyos, biyayadan wa. Ayaw agpasakop sa mangyan. ²⁴ Na laki mga belag, no nangkataw in kamo biyerya Diyos, na kamo agaway kay kataw ina, agyanggat sa Diyos. ²⁵ Panawen sa mga idapo babai, idapo lalaki, ako idapo bilin batang sa Kapwan. Kamay kangay batay piyagsabi in kangay remrem. Kalbas maal ako piyaniwalaan angkataw ako piyangwat maal panawen in Kapwan agpakayawte sa kangay. ²⁶ Panawen ngona betek aronaw kaidapan, kangay remrem in maal in mangyan, no nangkataw siyo na ayaw agalisen. ²⁷ No taybalang wa, na ayaw agpalsoway. In idapo babai ayaw agpamangkit babai. ²⁸ Kamay no siyo mamangkit babai ina yewed daet. No in daraga mamangkit lalaki ina yewed din daet. Kamay siro apo batay kaidapan anda pag boway. In kangay beet kamo ayaw apo kaidapan. ²⁹ Laki mga belag, in kangay beet siyabi keyen, Bangente wa in kalobosan kobat. Matang ibat ngona in apo babai ayaw agsalagen kansiyo babai sa panawen Diyos. ³⁰ Ayaw agpanremremen in mga makarongkot. In mga makaanggay ayaw din agpanremremen. Ayaw din agpanremremen in mga sangkap. ³¹ Ayaw agkasadapan sa boote atai sa kobat, angkataw in boo kobat osai in boote atai sa kobat agkalobos. ³² In kangay beet kamo idapo piyagkariyaban atai. In idapo babai yewed aglimbang sa panawen in Kapwan, angkataw siyo beet makaanggay sa Kapwan. ³³ Kamay in apo babai piyaglimbang in mga atai sa kobat, no nakay in batay makaanggay sa kansiyo babai, ³⁴ matang piyagbaslag in kansiyo remrem. Kataw din in daraga, osai in kagbaiyan idapo lalaki. Siyo maeyat agpanawen sa Kapwan, angkataw siyo beet boo sa Kapwan in panawen, kadayo in kansiyo bilog, kadayo in kansiyo remrem. Kamay in apo lalaki agpanremrem sa mga nakayte atai sa kobat, angkataw in kansiyo beet in lalaki agkaanggay sa kansiyo. ³⁵ Kaya ina kangay piyagsabi sa kanyo, matang kamo piyagtolong, yewed matang piyagpaidapan. In kangay beet maalen kanyo boway, boo wa gayed sa Kapwan agpanawen. ³⁶ No apo maypolong keyen batay taybalang, kalbas tagoli wakay maypolong keyen ayaw wa taybalang kita, kadogay miyalis wakay in remrem in kaliyakiyan keyen siyo idwa agpangwat in maal sa kansiyo batay babai, siyo maloba wa agamag, matang kailangan siro taybalang wa, na dali wa, ina yewed daet. ³⁷ Kamay no in kaliyakiyan sa kansiyo remrem keyen siyo idbatay wa pakasal ina maal, no marigen in kansiyo remrem, no yewed piilit, osai no siyo kabaloy agempet sa kansiyo bilog. ³⁸ Maal in agpakasal, kamay labi kay maal in agempet sa kansiyo bilog, yewed wa agpakasal. ³⁹ In babai agiskapet kay sa kansiyo lalaki, anggan yewed kay matay in lalaki. No matay wa in lalaki, na in babai mipalpas wa, maal wa siyo mamangkit wakay lalaki, kamayba nakay in kansiyo beet, kamay ayaw sa yewed agpaniwala sa Kapwan. ⁴⁰ Kamay sa kangay remrem siyo labi kay agkaanggay no siyo idwa mamangkit wakay lalaki. Osai in kangay remrem in Abyan Diyos agbalay din sa kangay in ako agsabi kataw ina.

¹ Panawen sa ablasen in batang wa piyasola, totoo in piyagsabi keyen kitam boo katawan. Kamay in agsabi siyo katawan wa ina bosliyen. Kamay in agpakayawte agpakarigen sa paniwala. ² In agremrem siyo katawan wa, siyo yewed kay katawan in kailangan kansiyo atawanan. ³ Kamay in agkabeet sa Diyos, in Diyos katawan sa kansiyo. ⁴ Panawen sa ablasen batang wa piyasola, kitam katawan idapo kabolowan in mga yewed Diyos. Osai waget in Diyos. ⁵ Kamayba apo mga piyagawit Diyos sa kobat, osai sa langit, kamayba aronaw ina pag mga piyagawit Diyos, osai piyagawit kapwan, ⁶ na sa kantam atawanan osai waget ngani in Diyos. Siyo in Amang in agpangwat in boote, matang kitam kansiyo sangkap. Osai osai waget in Kapwan, siyo IsoKiristo, siyo in paywaraan agpangwat in boote, siyo in paywaraan agpakan boway sa kantam. ⁷ Kamay yewed boo katawan ina. In amat tangona sanay sa agpandalangin sa mga mamaw. Na anggan ngona, no siro agpamangan in batang wa piyasola, kansiro remrem ina pag agkoman ablasen agiyagem kay daan sa agpandalangin sa mga mamaw. Siro keyen siro agpangwat daet, angkataw korang kay in kansiro atawanan, magolo in kansiro remrem. ⁸ Kaya in Diyos agkaanggay sa kantam yewed panawen sa pamangnen agbangen. In remrem Diyos sa kantam idbatay agiyalis kamayba kitam mamangan, kamayba yewed. ⁹ Kamay kitam agingat. Maal kitam mamangan, kamay no ina makadaet sa kalakoyte kay sa agpaniwala, matang siyo mamangan din, agpangwat daet sa kansiyo remrem, na ayaw kitam mamangan. ¹⁰ No kitam in katawan, mamangan sa betek agpansola, kalbas kitam ngiitan in kalakoyte sa agpaniwala, na karam siyo aakayan agkoman sa ablasen piyasola. ¹¹ Na no kataw ina kitam in mga katawan, na panawen sa kantam piyangwat batay masida in paniwala in kalakoyte kay sa paniwala. Siyo kantam ariyan, in Kiristo matay panawen sa kansiyo. ¹² No kataw ina na kitam agpangwat daet kay Kiristo, angkataw kantam belag kalakoyte kay sa paniwala kantam yaakay sa daet, kantam siida in kansiyo paniwala. ¹³ Na no kangay belag agpangwat daet panawen sa pamangnen, na ako idbatay wa daan gayed mamangan ina pag ablasen, matang siyo idwa din agpangwat daet.

¹ Ako agipalpas, ako sogowan agpamarita, ako batang kangitan kay Isos kantam Kapwan. Kamo in raweg kangay panawen sa Kapwan. ² Kamayba in roma dayo maniwala ako katiwala Kiristo, kailangan kamo agbangen maniwala ako ngani katiwala Kiristo. Kaya kamo agpaniwala sa Kapwan angkataw ako katiwala Kiristo. ³ Anda in kangay sagot sa mga agbotog sa kangay. ⁴ Nakay ina, ako lames piyagayaw agayay pamangnen, agayay sapa sa mga barkadaan mga bodang Diyos? ⁵ Nakay ina, ako piyagayaw agpaanggat babai agpaniwala, kataw Pidro, kataw in roma mga katiwala Kiristo, kataw in mga belag in Kapwan? ⁶ Nakay, kami waget dokalaki Birnabi in yewed mayadi agempet agpamangkit pamangnen? ⁷ Nakay, no siyo sondalo, siyo yewed piyagbayadan? Nakay, no siyo agtogda obas, siyo yewed agpamangan in galem? Nakay, no siyo agalapet baka, siyo yewed agkoman in gatas? ⁸ Anda in kangay piyagsabi yewed batang waget sa ogali mangyan. Anda daan din in piyagsabi in mga Batas Diyos. ⁹ Angkataw in mga Batas Diyos siyolat Mowisis keyen, Ayaw agboksongen in bibi baka sa betek siyo piyagparoyos. Kaya siyabi Diyos, yewed sa agpakayawte waget sa baka, ¹⁰ no yewed anggan din sa mangyan. Ina siyolat panawen sa kantam, angkataw kaya in mangyan agarado, osai agroyos, siyo batay din apo bagiyan sa galem. ¹¹ Kami agasik sa kanyo in piyagkailangan kanyo abyan. Na nakay batang yewed mayadi kami agani sa kanyo in piyagkailangan kanyam bilog? ¹² No in amat maal agkowa batang sa kanyo, na kami labi kay maal agkowa. Kamayba maal kami agkowa, na kami yewed. Kami agbanta wa sa boote, matang yewed yeeleg in Maal pag Barita Kiristo. ¹³ In mga agpanawen sa balay lakoy Diyos, piyagpakan pamangnen sa balay Diyos. Osai in mga agbono sa mga ayop piyagtaboy sa Diyos, no biyono wa na apo din bagiyan ablasen. ¹⁴ Na kataw daan ina in mga agpatoldo in Maal pag Barita. In bilin in Kapwan kailangan in mga agtanggap sa Maal pag Barita agtaboy pamangnen sa mga agpatoldo. ¹⁵ Kamay kamayba ako maal agayay, yewed kangay piyagkowa kamayba nakay. Anda kangay solat, ako yewed agayay tolong. Kamayba ako agkatay wa, ako idbatay agayay kamayba kay nakay, matang idapo batay kasabi keyen kaya ako agbarita ako agpamangkit waget bayad. ¹⁶ Yewed mayadi ako agyabang panawen sa ako agpatoldo in Maal pag Barita. Ako siyogo agpatoldo. No ako idwa agpatoldo in Maal pag Barita na magolo wano in kangay remrem. ¹⁷ No ako wakayte agpanawen, na ako batay agpamangkit bayad. Kamay kaya ako agpanawen ako siyogo Diyos, anda pag panawen in piyatoldo sa kangay. ¹⁸ Na in ako agpatoldo in Maal pag Barita, no ako idwa agayay bayad, na anggayan in kangay galem. Na ina wa in bayad, in ako idwa agpangkowa kamayba nakay in maal kangay piyagkowa. ¹⁹ Ako agipalpas, ako yewed sakop kamayba sa nakay pag mangyan. Kamay ako agpasakop wa sa boo mangyan, matang aronaw in kangay yaakay kay Kiristo. ²⁰ Sa betek ako sarig in mga Odyo, ako agtolad sa Odyo, matang siro kangay maakay kay Kiristo. Kamayba ako yewed sakop sa mga Batas Mowisis, kangay piyagogali in mga Batas Mowisis, no betek sarig in mga sakop asin, matang siro kangay maakay. ²¹ No betek sarig in mga yewed Odyo, mga yewed sakop sa mga Batas Mowisis, ako agtolad wa sa yewed Odyo, yewed sakop asin, matang siro maakay din ako. Kamay ako agpaniwala daan sa mga Batas Diyos, angkataw ako agpaniwala sa mga bilin Kiristo. ²² No betek sarig in mga idapo eyat ako kataw in idapo eyat, matang siro kangay maakay. Na ako agtolad sa boo mangyan, matang apo piyaboway, kamayba nakay pag padalan. ²³ Ina boo kangay piyagpangwat panawen sa Maal pag Barita, matang ako apo din bagiyan sa piyagtaboy in Maal pag Barita. ²⁴ Kamo katawan no apo labanan siro boo agdalagan, kamay osai waget in mandaeg, siyo waget in piyakan bayad. Na pakalakasen in agdalagan matang kamo kabel in bayad. ²⁵ In boo mga agsanay batay agdalagan, agayaw sa kansiro sadiri mga beet, matang kabel bayad kamayba osai waget ka sarikaw isagte wakay masida. Kamay in kantam piyagkaamag bayad sarikaw idbatay masida anggan idapo kalobosan. ²⁶ Ako ageyat agdalagan, agtaboy sa batay kangay pagratengan. Ako ageyat agsontok, yewed waget agparaktis. ²⁷ Kangay piyagpaidapan in kangay bilog, kangay piyagsakop, karam ako batang agpatoldo sa mga roma, ako agbangen piyagayaw wa lomaban.

¹ Mga belag, in kangay beet kanyo atawanan, in mibaloy tangona naw sa kantam mga kakoyayan in siro agyanggat kay Mowisis, in siro agipanaw, siro boo piyagkanlongan in libo, siro boo motol sa Dagat Mapola. ² Kataw ina siro boo kagwali biyaotismowan sa libo, osai sa dagat, angkataw siro boo agyanggat kay Mowisis. ³ Siro boo mamangan in pamangnen batang sa Diyos. ⁴ Siro boo minem sa sapa batang sa Diyos, kataw siro minem sapa batang sa Bato in agyanggat sa kansiro. Kiristo kagwali ina pag Bato. ⁵ Kamayba kataw ina, siro aronaw in yewed makaanggay sa Diyos, matang siro mangatay sa moyod, mangibolalang. ⁶ Ina pag mga mibaloy, ina agpamatoldo sa kantam, matang ayaw kitam kataw siro agkabeet sa mga daet. ⁷ Ayaw agsamba sa mga yewed Diyos kataw in kalaati sa kansiro. Siyabi in Agisolat keyen, Tomokkaw in mga mangyan matang malpamangan, matang malpamarik. Paka lasing siro maypanggaraw. ⁸ Na ayaw kitam manggaraw kataw in kalaati sa kansiro, kalbas dalwampo tolo ka libo osai waget ka ibeng matay. ⁹ Ayaw kantam pagtepengen in Kapwan kataw in kalaati sa kansiro, kalbas siro matay piyangayat mga olay. ¹⁰ Ayaw kitam agsolang kataw in kalaati sa kansiro, kalbas siro biyono in Angil in siyogo matang agpamono. ¹¹ Ina boo mibaloy sa kansiro matang agpatoldo sa kantam, boo siyolat matang kitam piyatoldo. Kitam ngona in mga aratengan in mga kalobosan pag mga dagon. ¹² Na in agremrem siyo marigen, na agingat, karam siyo malabo. ¹³ Kitam idbatang kay piyagtepeng lampas sa tepeng boo mangyan. In Diyos maal, siyo idbatay pomayag kitam piyagtepeng labi kay sa kantam abaloyan. Dayem sa kabetek piyagtepeng kitam piyagpakan kabaloyan matang kitam mandaeg. ¹⁴ Na ngani, kangay mga belag piyagmaal, ayaw agpansola. ¹⁵ Kataw tai in kangay piyagsabi sa kanyo, angkataw kamo apo remrem. Kanyo remremen in kangay piyagsabi. ¹⁶ Sa yapon in Kapwan, in kantam piyaginem, in kantam piyagpasalamat, no kitam aginem asin na kitam agpalbagiyan sa daya Kiristo. In pamangnen kantam piyagbagi na kitam agpalbagiyan sa kansiyo bilog. ¹⁷ Kataw osai waget ka bilog in pamangnen, na kitam asin agpalbagiyan, kamayba kitam karowan, na osai waget ka bilog, kataw kitam agpalbagiyan sa osai waget ka bilog pamangnen. ¹⁸ Kanyo remremen in mga kasokponan Israil, in mga agpalpamangan sa mga tiyaboy sa Diyos mibaloy wa osai waget osai in Diyos. ¹⁹ Na nakay in galem kangay piyagsabi? Apo lames kabolowan in mga mamaw? Idapo. Apo lames kabolowan in ablasen batang piyasola? Idapo. ²⁰ In beet kangay siyabi keyen, in piyasola in mga yewed agpaniwala, kansiro piyagtaboy sa mga mamaw, yewed sa Diyos. Ako dayo kamo paagem sa mga mamaw. ²¹ Yewed mayadi kitam manginem osai sa yapon in Kapwan osai sa batang wa piyasola. Yewed mayadi kitam mamangan osai sa pamangnen in Kapwan, osai sa pamangnen in mga mamaw. ²² Nakay, kantam lames beet in Kapwan agkagalit? Sa kanyo lames remrem kitam kapandaeg sa Diyos? ²³ Apo mga agpaniwala keyen idapo piyagayaw kamayba nakay. Kamay in kalaati yewed maal, in kalaati yewed agpaistobo paniwala. ²⁴ Baatte mangyan ayaw agpatokawen in kansiyo sadiri mga piyagkailangan, no yewed in sa mga roma. ²⁵ Kalobante kitam mamangan in ablasen piyagpabili. Ayaw waget agtanong no saano batang, karam batang piyasola, na batay magolo in kantam remrem. ²⁶ Kataw in Agisolat keyen, In kobat, Diyos in Kapwan, in boo atai sa kobat, Diyos in Kapwan. ²⁷ No kitam piyagberya in yewed agpaniwala sa betek apo piyagkoman, kalbas kitam beet ista pataboy, na kantam komanen kamayba nakay in tiyaboy sa kantam. Ayaw waget agtanong no saano batang, karam batang piyasola, na batay magolo in kantam remrem. ²⁸ Kamay no apo agsabi sa kantam keyen, Anda pag ablasen batang piyasola, na ina ayaw agkomanen, panawen sa agsabi sa kantam, matang yewed magolo in remrem. ²⁹ In beet siyabi in kansiyo agbangen remrem, yewed kantam agbangen. Apo yangon agmatiwid keyen, Nakay batang ako piyagayaw mamangan panawen waget sa remrem in roma? ³⁰ Keyen kay, No ako agpasalamat sa Diyos panawen sa ablasen na nakay batang ako piyagsabiyan in roma panawen sa ablasen kangay piyasalamat? ³¹ Na kangay sagot keyen, No kitam agpamangan, aginem, kamayba nakayte in kantam panawen, na in boo pangwaten gayed maal sa pangkit mga mangyan, matang siro batay agmaal sa Diyos. ³² Kitam agingat sa kantam mga ogali, matang yewed atoksowan in roma, kamayba mga Odyo, kamayba mga yewed Odyo, kamayba mga paagem sa barkadaan mga bodang Diyos. ³³ Kataw daan ako, sa boote kangay ogali ako agpilit agpakaanggay sa boo mangyan. Kangay mga piyagkailangan yewed piyagpatokaw, dayem in sa mga roma piyagkailangan, matang siro din nges batay piyaboway.

¹ Ako kanyo toladen, kataw daan ako agtolad kay Kiristo. ² Maal ngani kamo, ako yewed kanyo anaweyan, osai kanyo piyagpangwat in mga ogali kangay piyatoldo sa kanyo. ³ Kangay piyagpatoldo sa kanyo Kiristo sakop sa Diyos, in mga kaliyakiyan sakop kay Kiristo, in babai sakop sa kansiyo lalaki. ⁴ Na in kaliyakiyan no siyo agsambalilo in betek siyo agpandalangin, osai in betek agpaliwanag in agiplaong Diyos, na siyo agpaidapo kabolowan kay Kiristo. ⁵ Kamay in kagbaiyan no yewed agsorbong in siyo agpandalangin, osai in betek agpaliwanag in agiplaong Diyos, na siyo agpaidapo kabolowan sa kansiyo lalaki. Ina makarikoy kataw daan no biyolog wa gayed in olo. ⁶ No in kagbaiyan dayo agsorbong na gopiten wa gayed in kansiyo abok. Na in maal in kagbaiyan agsorbong, angkataw makarikoy no giyopit wa in abok, malalaanen wa in olo. ⁷ In kaliyakiyan ayaw agtakleb kansiyo olo, angkataw siyo anino Diyos, anino in kalakoyen Diyos. Kamay in mga kagbaiyan anino in kalakoyen in mga kaliyakiyan. ⁸ Angkataw in kaliyakiyan yewed piyangwat batang sa kagbaiyan, dayem in kagbaiyan piyangwat batang sa kaliyakiyan. ⁹ Osai din in kaliyakiyan piyangwat yewed panawen sa kagbaiyan, dayem in kagbaiyan piyangwat panawen sa kaliyakiyan. ¹⁰ Maal sa mga angil no in kagbaiyan agsorbong matang piyagngitan siyo sakop sa kansiyo lalaki. ¹¹ Kamaybawa, sa piyangwat Diyos in mga kagbaiyan kailangan apo mga kaliyakiyan, osai in mga kaliyakiyan kailangan apo mga kagbaiyan. ¹² Kataw in kagbaiyan piyangwat batang sa kaliyakiyan, in kaliyakiyan piyagboslot kagbaiyan. In boote batang sa Diyos. ¹³ Amba remremen, maal lames in kagbaiyan agpandalangin sa Diyos yewed agsorbong? ¹⁴ In boo piyangwat Diyos agpamatoldo sa kantam kailangan in kaliyakiyan agkarikoy no maaba in kansiyo abok. ¹⁵ Kamay sa kagbaiyan no maaba in abok ina makaanggay. Kaya siyo piyakan abok matang pansorbong. ¹⁶ Kamay no siyo batay kay aglaban asin, na ako idapo piyagsabi no yewed keyen, Kataw ina ngani in kantam ogali sa agsamba, kadayo in mga barkadaan mga bodang Diyos. ¹⁷ Ngona ako batay wa agpatoldo sa kanyo panawen sa kanyo mga tipon. Ina yewed makaanggay sa kangay. Kanyo mga tipon agpakamaal nges, bago daeten daan. ¹⁸ In tokaw, ako karengey barita keyen kanyo tipon agpalsowayan. Ako agpaniwala karam ina totoo. ¹⁹ Karam kailangan kay kamo agpalsowayan matang atawanan no nakay pag mga mangyan in maal. ²⁰ In kanyo tipon, in kanyo piyagkoman pamangnen idwa yapon in Kapwan, ²¹ angkataw kamo baatte osai agkalaliyan agkoman kansiyo biyaba pamangnen, in roma agkayawes, in kalaati wakay aglasing. ²² Nakay ina, kamo idapo balay matang kamo mamangan kay ista, minem kay ista? Kanyo piyagidapo kabolowan in barkadaan mga bodang Diyos, kanyo piyagpakarikoy in mga maidap. Kanyo lames beet ako agmaal sa kanyo? Ako idwa mayadi agkaanggay sa kanyo. Kamo idwa ngani kangay piyagkaanggayan. ²³ Batang sa Kapwan ina pag ogali in kangay piyatoldo sa kanyo. In bayapon in Kapwan Isos batay wa piyadakep sa mga agkabono sa kansiyo, kansiyo kiyowa in tinapay. ²⁴ Kalbas agpasalamat, kalbas kansiyo piyandodo. Siyo keyen, Anda in kangay bilog piyagtaboy panawen sa kanyo, anda kanyo komanen matang kamo manremrem sa kangay. ²⁵ Kataw din in sa pagpangineman. Kalbas wa siro mamangan in yapon, kansiyo din kiyowa in pagpangineman, keyen, In galem anda pag pangineman in bayo wakay pag kasondowan Diyos. Kangay daya in aglobos. Baatte kamo atai minem kamo manremrem sa kangay. ²⁶ Angkataw baatte kamo mamangan kataw anda, aginem kataw anda, na in katayan in Kapwan kanyo piyagpatoldo sa mga mangyan anggan siyo atai wakay rateng. ²⁷ Na no siyo mamangan in pamangnen, osai minem sa pagpangineman in Kapwan, kamay siyo apo daet yewed kay biyenglay, na siyo agpangwat wa daet sa bilog in Kapwan, osai sa daya in Kapwan. ²⁸ Na baatte mangyan in tokaw manremrem no apo daet sa galem, tokaw benglayen, kalbas bayo mamangan in pamangnen osai minem sa pagpangineman. ²⁹ Angkataw in mamangan osai minem, kamay yewed kansiyo piyagmaal in bilog in Kapwan, na siyo agayay wa parosa. ³⁰ Ina in dailan kaya aronaw apo maskit sa kanyo, aronaw idapo eyat, apo din mga matay. ³¹ Kamay no kitam tokaw manremrem no apo daet, kadogay agbenglay, na kitam idbatay piyarosa in Kapwan. ³² Kamay no kitam piyagparosa in Kapwan, na kitam kansiyo piyagpatoldo, matang kitam dogayan idbatay wa piyarosa sarig in mga yewed agpaniwala. ³³ Na, mga belag, no kamo agkatipon batay malpamangan na kamo agpanaya sa mga roma. ³⁴ Matang yewed mibaloy daet in kanyo tipon, matang kamo idbatay piyarosa in Kapwan. No siyo agkayawes na sa balay wa in mamangan. No ako asina wa rateng na in mga roma yewed kay maayos kangay wakay piyagpakapya.

¹ Mga belag, panawen sa mga piyagtaboy in Betek pag Abyan. Kangay beet kanyo atawanan anda. ² Kamo katawan in kamo ikkay agpaniwala kamo piyaakay sa yewed betek, kamo agsamba sa mga yewed Diyos, mga yewed kaiplaong. ³ In kangay beet kamo katawan, no siyo piyagpatoldo in Betek pag Abyan, na siyo idbatay kasabi keyen, Isos pamanesen. Osai in mangyan idbatay kasabi keyen, Isos in Kapwan, no siyo yewed piyagpatoldo in Betek pag Abyan. ⁴ Osai waget in Abyan, kamay karowan in kansiyo piyagtaboy. ⁵ Karowan in padalan agtolong kamay osai waget ka Kapwan in agsogo. ⁶ Karowan din in mga kabaloyan agpanawen, kamay osai waget in Diyos in agpakan kabaloyan sa boo mga agpanawen. ⁷ Kaya atawanan in Abyan agbalay sa baatte osai, angkataw siyo apo tiyaboy sa baatte osai matang piyagtolong in boo. ⁸ In osai piyakan in Abyan in kabaloyan agsabi in beet Diyos. In osai wakay piyakan ina daan pag Abyan in atawanan batang sa Diyos. ⁹ Ina daan pag Abyan in agtaboy sa osai in lakonaw pag agpaniwala. Kalbas sa osai wakay tiyaboy in kabaloyan agpaoraw mga maskit. ¹⁰ In osai piyagpakan in Abyan in kabaloyan agpangwat in mga makasoyo. In osai piyagpakan in kabaloyan agsabi in batang sa Diyos. In osai wakay piyagpakan in atawanan no nakay pag kabaloyan in batang sa Abyan, no nakay din in batang sa mga mamaw. In osai piyagpakan kabaloyan miplaong sa makasoyo pag mga agiplaong. In osai wakay piyagpakan kabaloyan agpaaling ina pag mga agiplaong. ¹¹ Ina pag boo osai waget ka Abyan in agtaboy. Baatte mangyan piyagpakan kabaloyan no nakay pag kabaloyan in tiyaboy in Abyan. ¹² Kiristo kagwali osai waget ka bilog, karowan ngaro in sangkap. Kamayba karowan in kabaloyan sangkap osai waget in bilog. ¹³ Na kitam kataw din ina. Kamayba Odyo, kamayba yewed, kamayba sogowan piyagalapet, kamayba idapo kapwan, kitam boo biyaotismowan osai waget ka Abyan, matang mibaloy wa osai waget ka bilog. Kitam boo piyainem sa osai waget ka Abyan. ¹⁴ In bilog karowan in sangkap, yewed osai waget. ¹⁵ No in siyabi in bitis keyen, Kataw ako yewed bakwaw ako yewed sa bilog, kamay siyo sa bilog daan, aon? ¹⁶ No siyabi in talinga keyen, Kataw ako yewed mata ako yewed sa bilog, kamay siyo sa bilog daan, aon? ¹⁷ No mata waget in bilog na siyo idbatay karengey. No in bilog talinga waget na siyo idbatay kaarek. ¹⁸ Kamay piyangwat in Diyos in boo mga sangkap sa bilog no nangkataw in kansiyo beet. ¹⁹ No siyo osai waget ka sangkap, na ikkay bilog ina. ²⁰ Kamay kataw ngani ina, karowan in sangkap kamay osai waget ka bilog. ²¹ Na yewed mayadi in mata miplaong sa bakwaw keyen, Kao yewed kangay piyagkailangan. Yewed mayadi in olo miplaong sa bitis keyen, Kao yewed kangay piyagkailangan. ²² Dayem in tomag idapo eyat pag mga sangkap piyagkailangan gayed ngani. ²³ Osai in mga yewed piyagpakalakonaw agbangen, ina kantam piyagpakayawte labi kay. In mga makarikoy agbangen kantam piyagalapet labi kay sa mga yewed makarikoy. ²⁴ Yewed kailangan agpangwat kataw ina sa mga maalen wa. In Diyos in agpangwat in kantam mga bilog kataw ina. Matang piyagmaal in mga yewed maalen. ²⁵ Matang in bilog idapo agpalawayan. Boo daan agpaytolongan. ²⁶ No in osai ka agbangen apo maskit, na maskit din in boo bilog. No in osai piyagmaal, na in boo bilog agkaanggay. ²⁷ Kitam boo osai waget ka bilog, kay Kiristo bilog. Baatte osai sa kantam, na sangkap sa bilog Kiristo. ²⁸ Na sa barkadaan mga bodang Diyos kansiyo tiyaboy mga apo kabaloyan. In lakonaw in mga sogowan agpamarita. Kadogay in mga poropita. Kadogay in mga agpatoldo in agiplaong Diyos. Tiyaboy din in mga kabaloy agpangwat mga makasoyo, osai in mga kabaloy agpaoraw sa mga maskit, anggan in mga agtolong, in mga agpakoyay, anggan din in mga kabaloy miplaong sa makasoyo pag mga agiplaong. ²⁹ Yewed in boo mga katiwala Isos. Yewed in boo agsabi in batang sa Diyos. Yewed in boo agpatoldo in agiplaong Diyos. Yewed in boo kapangwat in mga makasoyo. ³⁰ Yewed in boo kabaloy agpaoraw sa mga maskit. Yewed in boo kaiplaong sa makasoyo pag mga agiplaong. Yewed in boo kapaaling ina pag mga agiplaong. ³¹ Kamay ayayen gayed in mga lakonaw pag kabaloyan piyagtaboy in Abyan. Kamay ngona kangay wa batay piyagpatoldo sa kanyo in maalen sa boo.

¹ Kamayba kitam kaiplaong sa mga agiplaong mangyan osai sa agiplaong mga angil, kamay no kitam yewed agpakayawte, na in kantam agiplaong kagwali waget agana batingting, no yewed takleb kaldido agkaykaling. ² Kamayba kitam apo kabaloyan agporopita, kamayba kitam katawan in boo mga datiyan piyagbetang Diyos, osai in boo mga atawanan, kamayba kitam apo lakonaw pag paniwala anggan kabaloy agpapanaw in mga boksor, kamay no kitam yewed agpakayawte na kitam idapo kabolowan. ³ Kamayba kantam piyagtaboy sa mga maidap in boo kantam sangkap. Kamayba tiyaboy din in kantam bilog piyagpasonog anggan matay. Kamay no kitam yewed agpakayawte na kitam idapo pakinabang asin. ⁴ In agpakayawte na agbanta, osai mabait. In agpakayawte na idbatay agpanagiri, idbatay mayabang, idbatay agpakalakonaw. ⁵ In agpakayawte apo daan rikoy, osai idbatay agayaw, yewed din galiten, idbatay din manremrem daet. ⁶ In agpakayawte yewed agkaanggay sa daet. Dayem sa betek, na siyo agkaanggay. ⁷ In agpakayawte idbatay agempet. Siyo agpaniwala daan, agpanaya, agtiis anggan sa kalobosan. ⁸ Agkalobos in agsabi in batang sa Diyos. Agkalobos in kabaloyan miplaong sa makasoyo pag mga agiplaong. Agkaidapo in mga atawanan. Kamay in agpakayawte idapo kalobosan. ⁹ Angkataw kantam atawanan ikkay sibay. In kitam agpatoldo in agiplaong Diyos ikkay din sibay. ¹⁰ Kamay paka sibay wa gayed, na biyaliwan wa in yewed sibay. ¹¹ In kitam bodang kay, in kantam agiplaong, in kantam mga remrem, osai in kantam atawanan, boo daan kataw bodang. Kamay paka kitam gorangen wa kantam wa biyenglay in ogali bodang. ¹² In kantam piyagngitan ngona yewed mapawa, kagwali sa marames pag aninowan. Kamay dogayan kitam batay agroris wa gayed sa Diyos agpatobang. Ngona ikkay sibay in kantam atawanan, kamay dogayan sibay wa gayed in atawanan. Kataw daan ngona kitam atawanan gayed Diyos. ¹³ Agaway in agpaniwala, in agpanaya, osai in agpakayawte. Kamay asin pag tolo in agpakayawte agbangen in lakonaw.

¹ Na kitam agpakaeyat agpakayawte kataw ina. Kalbas ayayen din in mga kabaloyan piyagtaboy in Betek pag Abyan, labi kay in agpatoldo in agiplaong Diyos. ² In agiplaong sa makasoyo pag agiplaong, na siyo agpanggisodan sa Diyos, yewed sa mangyan. Angkataw in boo mangyan yewed katawan in kansiyo piyagsabi. Siyo piyagpakan kabaloyan in Betek pag Abyan matang agsabi in mga piyagbetang kay. ³ Dayem in agsabi in batang sa Diyos, na siyo agiplaong sa mga mangyan, agpaistobo sa kansiro paniwala, agpakaeyat in remrem, osai agayat. ⁴ In agiplaong sa makasoyo pag agiplaong agpaistobo waget sa kansiyo sadiri paniwala. Dayem in agpatoldo in agiplaong Diyos na ina agpaistobo sa paniwala in barkadaan mga bodang Diyos. ⁵ Maal sa kangay no kamo boo agiplaong sa makasoyo pag mga agiplaong. Kamay labi kay maal no kamo boo apo kabaloyan agpatoldo in agiplaong Diyos. In agpatoldo in agiplaong Diyos labi kay kalakoy sa agiplaong sa makasoyo pag mga agiplaong. Dayem apo agpaaling in kansiyo siyabi matang agpaistobo in paniwala in barkadaan mga bodang Diyos. ⁶ Na mga belag, kamayba ako pataboy sa kanyo, no ako agiplaong waget sa makasoyo pag mga agiplaong, na kamo idapo pakinabang sa kangay. Dayem no ako agpatoldo sa kanyo in piyagpapangkit Diyos sa kangay, in kangay mga atawanan, no yewed in agiplaong Diyos, no yewed in mga adar, na kamo apo pakinabang. ⁷ Alimbawa, kamayba in mga idapo payeng pag mga piyagpagana kataw in bangsi, kataw in gitara, no in agpagana yewed sanay, na kitam idbatay katawan in baren. ⁸ In agpagana bodyong no yewed sanay na in mga sondalo idbatay karengey, idbatay agsandata aggira. ⁹ Na kataw daan ina. No kitam agiplaong sa makasoyo pag agiplaong in idbatay atawanan, na idapo batay katawan in kantam piyagsabi. In kantam mga agiplaong idapo kabolowan, kowaya waget. ¹⁰ Karowan in mga agiplaong sa kobat. Baatte osai apo kabolowan. ¹¹ Kamay no ako yewed katawan in kansiyo agiplaong na idapo kabolowan kami agpanggisodan. ¹² Kataw kanyo piyagbeet in mga piyagtaboy in Betek pag Abyan, na pakalakoyen in mga kabaloyan agpaistobo paniwala sa barkadaan mga bodang Diyos. ¹³ Na no siyo agiplaong sa makasoyo pag agiplaong na kansiyo ayayen din in kabaloyan agpaaling in kansiyo siyabi. ¹⁴ No kitam agpandalangin sa makasoyo pag agiplaong na kantam abyan agpandalangin, kamay in kantam remrem yewed. ¹⁵ Na nakay in maal? In maal agpandalangin in kantam abyan, kamay kadayo din in kantam remrem agpangwat agpandalangin. Agbaren in kantam abyan kamay kadayo in kantam remrem agpangwat agbaren din. ¹⁶ No in kantam abyan waget in agkaanggay sa Diyos, kalbas in roma mangyan, no siyo yewed piyakan ina pag kabaloyan, na siyo idbatay katawan in kantam piyagsabi, na siyo idbatay kasabi keyen, Ina wa ngani. ¹⁷ Kamayba maal din ina pag agkaanggay sa Diyos, kamay ina yewed agtolong, yewed agpaistobo sa roma paniwa la. ¹⁸ Ako agkaanggay sa Diyos kataw ako kaiplaong sa makasoyo pag mga agiplaong labi kay sa kanyo boo. ¹⁹ Kamay sa agsamba ako dayo agsabi osai ka laksa ka agiplaong sa yewed atawanan pag agiplaong. In labi kay kangay beet ako agsabi lima waget ka agiplaong in atawanan in karowan, matang agpatoldo sa mga roma. ²⁰ Mga belag, ayaw kataw mga bodangte in remrem. Kailangan kamo mibaloy kataw mga bodangte idapo katawan agpangwat daet. Kamay mibaloy wa koyay in remrem. ²¹ Siyabi sa Agisolat keyen, Siyabi in Kapwan keyen, Ako batay agsogo mga mangyan apo roma pag mga agiplaong atai pag mga mangyan. Kamayba kataw ina siro idbatay kay din agparengey sa kangay agiplaong. Ina in siyabi in Kapwan. ²² No kataw ina, no kitam agiplaong sa makasoyo pag mga agiplaong, na ina yewed tolong sa mga agpaniwala agbangen. Kamay ina agpapangkit sa mga yewed agpaniwala agbangen keyen kitam apo in Abyan. Dayem no kitam agpatoldo in agiplaong Diyos na karam ina yewed tolong sa mga yewed agpaniwala agbangen. Kamay ina agpapangkit sa mga agpaniwala agbangen keyen kitam apo in Abyan. ²³ Sa agsamba, no kitam boo agiplaong sa makasoyo pag mga agiplaong, kalbas apo rateng asin mga mangyan idapo kataw ina pag kabaloyan, kamayba mga yewed agpaniwala, na siro batay keyen kitam idapo bait. ²⁴ Dayem no kitam boo agpatoldo in agiplaong Diyos, kalbas apo rateng osai ka yewed agpaniwala, no yewed mangyan idapo kataw ina pag kabaloyan, na panawen sa boo siyabi kansiyo batay atawanan siyo apo daet, atawanan siyo daet sa pangkit Diyos. ²⁵ In kansiyo mga piyagtago remrem piyagngitan wa, na siyo batay agpaereng, agdaing sa Diyos. Siyo batay agsabi keyen in Diyos atai ngani sa kantam. ²⁶ Mga belag, anda in galem kangay piyagsabi. Sa kantam samba apo agbaren, apo agpatoldo, apo agbarita in remrem Diyos, apo agiplaongan sa makasoyo pag agiplaong, osai apo din agpaaling ina pag mga agiplaong. In boote kantam pangwaten maal matang agpaistobo paniwala sa barkadaan mga bodang Diyos. ²⁷ No apo agiplaong sa makasoyo pag agiplaong, na dowai waget no yewed tolo, maykalbasan. Kalbas kailangan apo din agpaaling in kansiro siyabi. ²⁸ Kamay no sa samba idapo batay agpaaling na ayaw miplaong sa makasoyo pag agiplaong. Miplaong waget sa Diyos sa galem kansiyo remrem. ²⁹ Miplaong in dowai no yewed tolo ka agpatoldo in agiplaong Diyos. In mga roma manremrem sa kansiro piyagsabi no betek, no yewed. ³⁰ Kadogay no osai wakay ka asin agtokkaw agpanremrem sa piyagsabi toloy apo din agiplaong Diyos batay piyatoldo, na omempet wa in osai. ³¹ Angkataw kitam boo maal agpatoldo in agiplaong Diyos, kamay ayaw agpalkaktekan, matang boo katawan, osai boo maeyat in remrem. ³² In piyakan kabaloyan agpatoldo in agiplaong Diyos kailangan katawan agempet agiplaongan. ³³ Angkataw in Diyos yewed agkaanggay sa aglalae, no yewed sa agkapyaan. Kataw tai in kailangan sa boo mga barkadaan mga bodang Diyos. ³⁴ In mga kagbaiyan ayaw agiplaong sa agsamba. Siro piyagayaw agiplaong. Kailangan siro pasakop, kataw in siyabi sa mga batas mga Odyo. ³⁵ No in kagbaiyan apo tanong, na ayaw kay agpalowasen anggan rateng sa balay, bayo agtanong sa kansiyo lalaki. Angkataw makarikoy no in kagbaiyan miplaong sa agsamba. ³⁶ Karam kanyo remrem in agiplaong Diyos batang sa kanyo, kamo waget in aratengan in agiplaong Diyos. ³⁷ No kansiyo remrem siyo siyogo Diyos, apo kabaloyan tiyaboy in Betek pag Abyan, na kailangan siyo maniwala anda in kangay piyagsolat bilin ngani Kiristo. ³⁸ No siyo dayo maniwala asin, na kamo ayaw din maniwala sa kansiyo. ³⁹ Na, mga belag, kantam ayayen in kabaloyan agpatoldo in agiplaong Diyos. Kamay ayaw agayawen in agiplaong sa makasoyo pag mga agiplaong. ⁴⁰ Kamay kailangan agkapyaan, ayaw magolo in boo kantam panawen.

¹ Laki mga belag, remremen wakay in kangay piyatoldo sa kanyo, in Maal pag Barita in kanyo piyaniwalaan, in kanyo piyagpasandigan. ² In Maal pag Barita in kangay piyatoldo sa kanyo, no kamo marigen in agiskapet asin, no yewed bosliyen in kanyo paniwala, na ina in agpaboway sa kanyo, ³ Lakonaw in kangay yaadar sa roma. Kalbas kangay wakay piyatoldo sa kanyo keyen Kiristo matay panawen sa kantam mga daet, kataw in siyabi sa Agisolat. ⁴ Siyo liyebeng. Siyo piyaboway wakay sa katolo ka ibeng. Ina din in siyabi sa Agisolat. ⁵ Kalbas siyo papangkit kay Pidro, osai sa kansiyo Labing Dowai ka katiwala. ⁶ Kalbas siyo papangkit din sa labi kay 500 ka belag agpaltiponan. In kalaati matay wa, kamay in karowan kay sa kansiro agkaboway kay anggan ngona. ⁷ Kalbas siyo papangkit din kay Santiyago, kalbas sa boo kansiyo mga katiwala. ⁸ Sa kalobosan siyo papangkit din sa kangay. Ako kagwali bodang miboslot yewed sa kabetek. ⁹ Sa boo mga katiwala ako in kalakoyte, yewed sibay piyagawit katiwala angkataw kangay piyaidapan in barkadaan mga bodang Diyos. ¹⁰ Kamay kaya ako mibaloy wa katiwala, ako piyakayawte in Diyos. Kalbas in siyo agpakayawte sa kangay apo din kabolowan, angkataw ako agpanawen labi kalakoy sa boo mga katiwala. Kamay yewed sa kangay kabaloyan, dayem in Diyos in agtolong sa kangay. ¹¹ Na kamayba ako, kamayba siro, ina daan in kanyam piyagpatoldo, ina in kanyo piyagpasandigan. ¹² No in kanyam piyagpatoldo keyen, Kiristo piyaboway wakay na nakay batang sa kanyo in kalaati keyen yewed batay boway wakay in mga matay? ¹³ No totoo idbatay boway wakay in mga matay, na in beet siyabi yewed wa din boway wakay in Kiristo. ¹⁴ Kamay no Kiristo yewed piyaboway wakay, na idapo kabolowan in kanyam piyagpatoldo, idapo din kabolowan in kantam paniwala. ¹⁵ No Kiristo yewed piyaboway wakay, na kami baribid pag mga sogowan Diyos, angkataw siyabi kami keyen, Kiristo piyaboway wakay Diyos. Kamay ina yewed totoo no ngani yewed batay wakay boway in mga matay. ¹⁶ No idbatay boway wakay in mga matay, na yewed din boway wakay in Kiristo. ¹⁷ No yewed piyaboway wakay in Kiristo, na idapo kabolowan in kantam paniwala, osai yewed liibangaw in kantam mga daet. ¹⁸ Osai no Kiristo yewed boway wakay, na in matay wa pag mga agpaniwala idbatay din boway wakay. ¹⁹ No in kabolowan agpasandig kay Kiristo ngona waget pag boway, na kitam ayawte wano labi kay sa boo mga mangyan. ²⁰ Kamay angkataw totoo wa ngani Kiristo piyaboway wakay, na kantam atawanan tiyak batay wakay piyaboway in matay wa pag mga agpaniwala. ²¹ Kataw romateng in katayan panawen osai ka mangyan, na kataw daan din ina romateng in boway wakay panawen din osai ka mangyan. ²² Angkataw kaya in boo mangyan agkatay, panawen kitam boo batang kay Adan. Na kataw daan din in boo mga agpaniwala batay wakay boway, panawen piyaagem kay Kiristo. ²³ Kamay baatte osai apo kabetek piyagpaboway wakay. Kiristo in tokaw. Kalbas sa kabetek siyo agrateng wakay na batay wakay din piyaboway in mga piyaagem wa kay Kiristo. ²⁴ In boo mga sakopan, anggan in boo mga agpansakop kamayba mamaw kamayba mangyan, boo wanote batay diyaeg Kiristo. Kalbas ina pag kansiyo siyakop kansiyo batay tiyaboy sa Diyos Amang. Ina wa in kalobosan kobat. ²⁵ Angkataw kailangan Kiristo agpansakop anggan in boo kansiyo mga kalaban diyaeg wa Diyos, kalbas boo wa piyasakop kay Kiristo. ²⁶ Katayan in paori sa boo mga kalaban piyagbono. ²⁷ In Agisolat keyen, Piyasakop Diyos sa kansiyo in boote. Kamay in Diyos agbangen yewed sakop. Siyo agbangen in agpatoldo kay Kiristo keyen, In boote sakop sa kaimo. ²⁸ Paka in boote piyasakop wa kay Kiristo, na siyo in Bodang, siyo batay din pasakop sa Diyos in agtaboy in boote sa kansiyo. Matang in boote kamayba nakay, boo wa sakop sa Diyos. ²⁹ No totoo yewed piyagpaboway wakay in mga matay, na nakay batang kamo agpabaotismo panawen sa mga matay wa? Idapo kabolowan in kamo agpabaotismo panawen sa mga matay wa. ³⁰ Osai kami. No yewed piyagpaboway wakay in mga matay, na nakay batang kami agaway kay agbarita? Maanda, palagi kami piyagpaidapan kay. ³¹ Mga belag, ibengibeng ako batay nges piyagbono. Betek wano ina in kangay piyagsabi, angkataw ako agpakayawte sa kanyo panawen kay Kiristo Isos kantam Kapwan. ³² No ngona waget ako agkaboway, idbatay wa boway wakay, na nakay in kabolowan in ako lomaban sa matapang pag mga mangyan kagwali matapang pag ayop atai sa Ipiso? No kitam idbatay wakay boway, na kitam wa maniwala sa piyagsabi mga mangyan keyen kitam pakalakoyen in komanen, minem wa lakoy, angkataw goribas kitam agkatay wa. ³³ Ayaw bomaribid in remrem. Apo piyagsabi keyen no siyo agyanggat sa mga aleleng pag mangyan na batay biyenglay in kansiyo maal pag ogali. ³⁴ Na kitam agpakabait. Benglayen wa in kantam mga daet. In kalaati sa kanyo yewed katawan sa Diyos. Kangay piyagsabi ina matang kamo arikoyan. ³⁵ Apo yangon batay agtanong keyen nangkataw in batay wakay piyagpaboway in mga matay? Kataw nakay dogayan in bilog ina? ³⁶ Ina pag agtanong idapo bait. Angkataw in bini tiyogda idbatay boway anggan yewed kay matay in bini. ³⁷ Osai in bini tiyogda, osai wakay in lomwas. In tiyogda beter, kamayba nakay pag bini, kalbas in lomwas bolos. ³⁸ No nakay pag poon in remrem Diyos na ina in kansiyo piyagtaboy sa bini. No nakay pag bini in tiyogda na ina daan in batay poon. ³⁹ In mga agkaboway yewed tikkatawan in galem. Osai wakay in bilog mangyan, osai wakay in bilog ayop, osai wakay in sa bantog, osai wakay in sa isda. ⁴⁰ - ⁴¹ Kataw din ina sa langit. Osai wakay in rawa in ibeng, osai wakay in rawa in bolan, in rawa in mga magirem osai wakay din. Baatte magirem osai wakay in kaalenen. Apo bilog panlangit. Apo din bilog pangkobat. Tanan daan maalen, kamay osai wakay in panlangit, osai wakay in pangkobat. ⁴² Kataw din ina in boway wakay. In bilog in piyaglebeng agkabolok, kamay in bilog boway wakay kamayba nangkadogay idbatay wa agkabolok. ⁴³ In liyebeng daeten pag bilog, idapo eyat. Kamay in boway wakay maalen, maeyat. ⁴⁴ Pangkobat pag bilog in piyaglebeng. Panlangit pag bilog in piyagpaboway wakay. No apo bilog pangkobat, na apo din bilog panlangit. ⁴⁵ In siyabi sa Agisolat keyen, In tokaw pag Adan, siyo mangyan piyangwat agkaboway. Kamay in paori pag Adan Isos, siyo Abyan in agpamaboway. ⁴⁶ Yewed tokaw in panlangit. In pangkobat agbangen in tokaw, kalbas in panlangit. ⁴⁷ In tokaw pag Adan batang sa diya, kataw piyangwat batang bogabo. Kamay Isos in kadowai ka Adan, siyo batang sa langit. ⁴⁸ In mga pangkobat kataw daan Adan batang sa diya. In mga panlangit kataw daan Isos batang sa langit. ⁴⁹ Ngona kitam kataw in mangyan batang sa diya, na kitam kataw daan din dogayan in mangyan batang sa langit. ⁵⁰ Mga belag, in beet kangay siyabi, in bilog ener osai daya, ina yewed wano mayadi piyarateng sa sakopan Diyos. In bilog pangkobat agkabolok, idapo batay boway idapo kalobosan. ⁵¹ Parengeyen in piyagbetang kangay wa piyagpalowas. Kitam idbatay boo matay. Kamay kitam boo batay miyalis, ⁵² malkaktekan, kadogayte mamempenek waget, sa kabetek in kalobosan pag agana in bodyong. In bodyong batay magana, kalbas in mga agpaniwala batang matay piyagpaboway wakay, idbatay wa matay. Kitam boo batay miyalis. ⁵³ Anda pag bilog in agkabolok batay miyalis idbatay wa mabolok. In agkatay pag bilog batay miyalis idbatay wa matay. ⁵⁴ Anda pag bilog agkatay, agkabolok. Paka miyalis wa idbatay wa matay, idbatay wa mabolok, na batay wa mibaloy in Agisolat keyen, Idapo wa in katayan, diyaeg wa gayed. ⁵⁵ Osai keyen, Ngona, katayan idwa kapandaeg, katayan idapo wa kabaloyan agbono. ⁵⁶ Kaya katayan kabaloy agbono angkataw apo daet pag ogali in mangyan. In kabaloyan daet batang sa mga Batas Diyos. ⁵⁷ Kitam agkaanggay sa Diyos in agpakan sa kantam kabaloyan matang kapandaeg. Kantam Kapwan IsoKiristo in agpanonton in kabaloyan. ⁵⁸ Na, mga belag, kitam agpakarigen. Ayaw aglimbang. Agpakaeyat sa panawen in Kapwan. Angkataw kantam atawanan apo ngani kabolowan in kantam panawen sa Kapwan.

¹ Panawen sa tolong sa mga belag sa Odiya, kanyo pangwaten kataw in kangay piyatoldo sa mga barkadaan mga bodang Diyos sa Galasya. ² Baatte ibeng Linggo kanyo pasowayen kowarta, no nangkalakoy in abaloyan in baatte osai. Ina tiponen matang no ako asina rateng idwa kailangan mangayay. ³ Kanyo idangen in mga mangyan in batay agbaba in kanyo tolong sa Irosalim. Paka ako rateng, siro kangay piyakan mga solat agsabi no nakay siro. ⁴ No kailangan ako batay din ista, na siro kangay piyagpaanggat. ⁵ No ako kadalan wa sa Masidonya, na ako batay asin sa kanyo. Ako batay domalan sa Masidonya. ⁶ Ako batay dogay kayte agpamataw sa kanyo, karam anggan kalbas wa in pangodan. Kalbas no batay wakay panaw, na ako patolong sa kanyo. Kamay ako ikkay katawan no saano ako batay pataboy. ⁷ Ako dayo domalan waget sa kanyo. In kangay beet dogay kayte, no ina in beet in Kapwan. ⁸ Kamay ako agpamataw kay atai sa Ipiso anggan sa ibeng Pintikostis. ⁹ Angkataw lakonaw kay in batay mapangwat atai sa panawen Diyos, kamayba aronaw in aglaban. ¹⁰ No rateng sa kanyo Timotiyo na pabelagen gayed maal, angkataw siyo kataw daan din ako agpangwat in panawen in Kapwan. ¹¹ Na siyo ayaw kanyo agpaidapowen kabolowan. Dayem tolongen, matang siyo agkaanggay kaoli atai sa kangay. Angkataw kami in mga belag agpanaya sa kansiyo. ¹² Panawen sa kantam belag Apolos. Siyo kangay nges piyagpilit asin pataboy sa kanyo sarig in mga belag. Kamay siyo ikkay kapataboy. No siyo katokor wa na siyo batay asin pataboy. ¹³ Kitam agingat. Agpakarigen in kantam paniwala. Ayaw agkalimo. Agpakaeyat remrem. ¹⁴ Sa boo kantam ogali kitam agpakayawte. ¹⁵ Mga belag, kanyo atawanan in mga kamalay Istipanas. Siro in tokaw pag mga maniwala kay Kiristo sa Akaya. Kalbas siro ageyat agtolong sa mga bodang Diyos. Na in kangay bilin sa kanyo, mga belag, ¹⁶ kamo pasakop sa mga kataw ina, kadayo sa kansiro mga sarig ageyat agpanawen. ¹⁷ Ako agkaanggay sa rateng kora Istipanas, Portonato, osai Akayko. Siro agtolong sa kangay sa kabetek kamo yewed katolong. ¹⁸ Ako kansiro wakay piyakaeyat remrem. Kataw daan din siro agpakaeyat sa kanyo remrem. Pagmaalen in kataw ina pag mga mangyan. ¹⁹ In mga barkadaan mga bodang Diyos sa Asya keyen, Kataw nakay wa kamo? Kadayo taybalang Akwila osai Pirisila keyen, osai in mga belag agsamba sa kansiro balay, angkataw kamo boo mga belag sa agpaniwala sa Kapwan. ²⁰ In boo belag atai keyen din, Nakay, idapo kamay nakay sa kanyo? Kamo malkaanggayan no kamo maltagbowan, angkataw kamo tayariyan. ²¹ Ako Pablo wa in agsolat anda pag keyen, Kataw nakay wa kamo? ²² Kamayba nakay in yewed agmaal sa Kapwan na pasowayen wa sa Diyos. Laki kanyam Kapwan, aywawa. ²³ Kamo pakaanggayen in Kapwan Isos. ²⁴ Ako agpakayawte sa kanyo boo panawen kay Kiristo Isos.