TITUS

TITUS

¹ Sian si Paulus, naposo ni Debata, bope rasul ni Jesus Kristus, na nipili do au jana na nisuru laho manyarihon angka na nipili ni Debata anso mur togu di haporsayaanna. Angkon togu-toguonku do halahi laho mananda hasintongan na niajarkon ni ugamonta, ² marguru tu arop ni roha di hangoluan na so mantak i. Harana na dung dijanjihon Debata hian do i dompak so dijadihon dope portibi on -- jana nada tarbaen Debata margabus. ³ Topet di hatihana, dipataridahon Debata do ngolu i di bagasan barita i jana hupaboa do i hara ni parenta ni Debatanta Sipalua i. ⁴ Tu si Titus, anakku, mangihutkon haporsayaanta. Asi ni roha dohot hasonangan ma di ho, sian Debata Ama dohot Kristus Jesus, Sipalua hita. ⁵ Hutinggalkon pe ho na salpu i di Kreta anso tarpasidung ho do angka na porlu dope sikarejohonon. Boti anso diangkat ho angka sintua di ganop kota. Jadi paingot-ingot ma na hudok on: ⁶ Muda sintua sagiotna ulang ma halak na targora; angkon sada sajo do dadaboruna; angkon na marhaporsayaan ma angka dakdanakna jana ulang ma angka anak padiar sanga dakdanak na so taratur. ⁷ Harana na mangurus karejo ni Debata do sada halak sintua jadi nada tola halak na targora. Nada tola ginjang rohana sanga na parmuruk, sanga na parmabuk, sanga na kasar, sanga na sai mangarohahon hepeng. ⁸ Angkon jop do rohana manjagit tamu di bagasna, na mangkagioti pangalaho na denggan, na malo mangorom dirina, na jujur, ias jana maraturan. ⁹ Angkon halak na togu marsitiopan tu hata na tutu, i ma jamita sihaporsayaan songon na niajarkon i tusia. Jadi dohot dalan na songon i malo ma ia paingot halak hombar tu pangajaran na sintong jana malo ma ia manudu hasalaan ni halak na mangalo tusia. ¹⁰ Harana bahat do halak na so ra mangoloi, lumobi na marugamo Jahudi hian; dipalilu-lilu halahi do halak na asing markite-hite hata-hata ni halahi na so marguna. ¹¹ Angkon dijait do giotna pamangan ni jolma sisongon i, harana madung bahat angka bagas ni halak na gabe gaor sudena hara ni angka pangajaran na so patut na nibaen ni halahi. Na manjalahi untung na so patut do antong halahi di karejona i! ¹² Jungada do adong panurirang ni halahi sandiri na marasal sian Kreta mandok: "Anggo halak Kreta angka pargabus do i, binatang panyoro, na songkal jana na losok." ¹³ Tutu do hasaksian on. Hara ni i ma umbaen na angkon paingotonmu halahi, anso sai porsaya halahi di bagasan dalan na tigor; ¹⁴ jana anso ulang marguru tu angka turiturian ni halak Jahudi dohot tu angka aturan na nibaen ni halak na marbalik sian hasintongan i. ¹⁵ Ias do sude sanga aha pe anggo di halak na ias. Tapi anggo di halak na hodar pikiranna jana na so porsaya tu Debata, sada pe nada adong na ias, angke madung hodar pikiran ni halahi dohot taroktokna! ¹⁶ Pandok ni halahi, ditanda halahi do Debata, hape anggo sian parange ni halahi nada tarida na songon i. Jahat do roha ni halahi jana nada marpangoloion. Sada pe nada adong tarpatupa halahi na denggan.

¹ Tapi anggo ho Titus, ajarkon ma pangajaran na denggan. ² Paingot ma angka ama na tumobang anso marroha jana malo mangorom dirina; anso denggan dihaporsayai halahi Debata, denggan marsihaholongan jana sobar di sitaonon jana benget. ³ Songon i muse angka dadaboru na matobang laing apoi halahi anso ias parange ni halahi songon na patut di angka halak na badia. Nada tola pajatjaton ni halahi goar ni halak, jana nada tola diparhatoban anggur. Angkon pangalaho na denggan do ajarkonon ni halahi, ⁴ anso diajari halahi angka ina na umposo mangkaholongi halaklahina dohot angka dakdanakna, ⁵ anso malo mangarajai dirina, anso ias dohot anso gabe ina na denggan di rumahtanggana na mangoloi tu halaklahina. Jadi muda songon i, nada tarincahi halak be jamita na sian Debata. ⁶ Paingot muse ma angka na poso anso malo mangarajai dirina. ⁷ Jana ho sandiri pe, angkon patuduhononmu do parange na denggan na gabe tiruan di sude pangalaho. Muda mangajari ho, angkon tigor do baenonmu. ⁸ Angka pandohan na tabo ma pake, na so tarincahi halak, anso maila angka halak na mangalo ho angke sada pe nada adong na hurang denggan dapot halahi sihataanna taringot tu hita. ⁹ Angka hatoban angkon mangoloi do tu tuanna, jana di sude pangalaho angkon pasonangon ni halahi ma roha ni tuanna. Nada tola halahi mangalo na nidok, ¹⁰ sanga manangko. Angkon patuduhonon ni halahi do na tongtong halahi denggan jana burju; anso dipuji halak pangajaran taringot tu Debatanta Sipalua i hara ni pambaenan ni halahi. ¹¹ Harana madung dilehen Debata asi ni rohaNia laho paluahon jolma sudena. ¹² Na mangajari hita do hadengganan ni roha ni Debata i anso ulang be maralo ngolunta tu hagiot ni Debata jana nada be mangihutkon hagiot ni portibi on; diajari do hita anso malo hita mangarajai dirinta, tigor jana manghaholongi Debata. ¹³ Saonnari na painte-intehon Ari na niarop ni rohanta i do hita. Anggo di Ari i, idaon ni portibi on ma hasangapan ni Jesus Kristus, i ma Debata Na Gumodang i jana Jesus Kristus Sipalua hita. ¹⁴ Madung dihaulkon Ia diriNia hara ni hita laho paluahon hita sian hajahatan sudena, jana dibaen Ia hita gabe bangso hapunjunganNia, jana na ringgas mambaen na denggan. ¹⁵ Ajarkon ma sudena i, jana paingot ma halahi jana gorahon ma angka na umbege jamitamu sian sude gogomu. Ulang ma adong na marlayas ni roha tu ho.

¹ Paingot ma sudena ruasmu anso tunduk halahi tu angka pamimpin dohot na markuaso di negara, jana mangoloi dohot na patuluskon sandok na denggan. ² Dok tu halahi anso ulang adong na manilakoi sanga ise pe, tapi gumonan ma halahi basar jana burju. Marlambok ni roha ma halahi maradopkon halak sudena. ³ Angke hita pe oto do najolo, nada mangoloi jana nada tigor. Dirajai angka hagiot dohot por ni roha na marragam rupa do hita. Na mangolu di angka hajahatan dohot gutgut dohot na marsihosoman hian do hita. ⁴ Tapi madung dipatuduhon Debata Sipalua hita, holong dohot denggan ni rohaNa tu hita. ⁵ Dipalua Ia do hita, nada hara ni na tabaen sanga aha na denggan, tapi hara ni ibo ni rohaNia sandiri do tu hita. Dipalua Ia do hita markite-hite Tondi Parbadia na mangalehen hasosorang na imbaru dohot ngolu na imbaru marhite na paiaskon hita. ⁶ Diduruskon Debata do TondiNia i tu hita markite-hite Jesus Kristus i, di hita, ⁷ anso mardenggan hita mangulahi tu Debata hara ni ibo ni roha ni Jesus jana tola ma hita maruli hangoluan na so mantak na sai tapainte-inte i. ⁸ Tutu do sasudena sanga aha na hudok on. Jadi giotku, gomos ma dokkon taringot tu angka na hudok on, anso marsitutu angka na porsaya tu Debata patuluskon angka karejo na denggan na marguna tu sude halak. ⁹ Padao ma ho sian angka partongkaran na so marguna dohot sian parsoalan ni angka tarombo. Ulang dohot-dohoti angka partangkangan dohot parbadaan taringot tu angka Tona ni ugamo. Inda adong guna ni i sude jana nada adong muse untungna. ¹⁰ Sanga ise na patubu bada di parlagutan i angkon paingotonmu do sanoli sanga dua noli; dung i indangkon be sai mardomu ho dohot halakna i. ¹¹ Jadi botoonmu ma na dung manyimbil do dalan ni halak na songon i jana dipabotohon angka dosana i ma na marsala ia. ¹² Disi husuru si Artemas sanga si Tikikus manopot ho, usahohon ma manigor anso sigop ho ro mandapotkon au tu Nikopolis, harana giot disi do au ninna rohangku salolot musim ngali. ¹³ Laing haburjuhon ma jolo mangurupi si Zenas siboto tona i, dohot si Apollos; anso tarbaen halahi kehe so pola hurang sanga aha. ¹⁴ Angkon marsiajar do angka ruasta i patupahon angka na denggan anso tarbaen manggohi angka na porlu situtu; ulang jabat gabe halak na so marguna ngolu ni halahi. ¹⁵ Sude angka dongan na dison na rap dohot au, manongos tabe do di ho. Palalu ma tabenami tu angka donganta na sahaporsayaan tu Kristus. Sai dipasupasu Debata ma hamu sudena.