ROM

ROM

¹ Sian si Paulus, naposo ni Kristus Jesus, na dipio gabe rasul jana disuru laho mambaritahon Jamita Na Denggan na sian Debata. ² I ma na nijanjihon ni Debata najolo markite-hite panurirangNia, songon na tarsurat i di Buku Na Badia. ³ Jamita Na Denggan taringot tu Anak Ni Debata i, i ma Tuhanta Jesus Kristus na sorang sian pomparan ni si Daud mangihutkon hajolmaon, ⁴ tapi mangihutkon hadebataon tangkas do ia Anak Ni Debata na gok hagogoan. Tanda sajo do i botoon markite-hite hangongotNia sian na mate i. ⁵ Markite-hite Ia do hami jagit asi ni roha dohot karejo ni rasul laho manogu-nogu angka bangso anso porsaya halahi jana mangoloi goarNia. ⁶ Hamu pe dohot do di tonga-tonga ni halahi, hamu na dung nipio ni Jesus Kristus. ⁷ Tu hamu sude na di Rom, na nihaholongan ni Debata, na nipio jana dibaen gabe halak na badia: Asi ni roha ma di hamu dohot hasonangan na sian Debata Amanta dohot sian Tuhan Jesus Kristus. ⁸ Jumolo ma hudok tarimakasi tu Debatangku markite-hite Jesus Kristus hara ni hamu sudena; harana madung tarbonggal haporsayaanmunu tu sude portibi on. ⁹ Dibaen saksingku do Debata, na huoloi di bagasan tondingku markite-hite Jamita Na Denggan taringot tu AnakNia, jana tongtong do huingot hamu di bagasan tangiangku. ¹⁰ Tongtong do hupangidohon di bagasan tangiangku, sugari dipaloas Debata ma au nian ro tu hamu on. ¹¹ Harana sai malungun do au marsuo dohot hamu anso tarlehen au nian di hamu silehen-lehen partondion laho patoguhon hamu. ¹² Astuanna na hudok i, dibaen na dung rap porsaya do hita, gabe tarbaen hita ma rap marsipatoguan roha. ¹³ Hamu ale angka dongan! Por do rohangku nian sugari tibu diboto hamu na dung jotjot sai giot ro au mandapotkon hamu, hape sai tongtong dope adong halanganna. Por do rohangku sugari laing dohot ma nian di tonga-tongamunu adong guna ni karejongku, songon na hubaen di tonga-tonga ni angka bangso na asing na dung marsuha di angka inganan na asing. ¹⁴ Angke utangku do i maradopkon sude ragam ni angka bangso, sanga pe tu bangso na maju bope tu bangso na riar dope, tu halak na sikola bope tu halak na buta hurup. ¹⁵ Hara ni i ma umbaen na por sajo rohangku mamaritahon Jamita Na Denggan i dohot tu hamu angka dongan na maringanan di Rom on. ¹⁶ Dibaen nada maila au hara ni Jamita Na Denggan i, angke i do hagogoon ni Debata na markarejo laho paluahon sudena halak na porsaya; na parjolo i ma halak Jahudi, dung i muse angka bangso na asing. ¹⁷ Harana di bagasan ni i dipapatar do hatigoran ni Debata, na sian haporsayaan tu haporsayaan, songon na dung tarsurat, "Halak na tigor sian haporsayaanna, i do na giot mangolu." ¹⁸ Dipapatar Debata do sian banua ginjang rimas ni rohaNia maradopkon sude dosa dohot hajahatan ni jolma, angke diambati hageduhon i do jolma laho mananda ajaran na tutu taringot tu Debata. ¹⁹ Dibaen anggo parbinotoan taringot tu Debata madung tangkas di halahi, angke madung dipatangkas Debata i di halahi. ²⁰ Mamungka sian na manjadihon tano on Debata, anggo angka pangalaho ni Debata na so tarida i, i ma bako Hadebataan dohot hagogoanNia na manongtong i, anggo i tangkas do tarastui jolma markite-hite sude na nitompa i. Jadi nada tarbaen jolma i be marsidalian hara ni na so marbinoto. ²¹ Ditanda jolma do nian Debata, hape nada ra jolma i pasangapkon Ia songon Debata, jana nada ra halahi mandok tarimakasi tuSia. Tu angka na so marguna do dipikiri halahi; gabe manggolap ma roha ni halahi. ²² Dipikir halahi gabe na bisuk, hape gabe na oto do halahi. ²³ Dipasambar halahi do hasangapan ni Debata na so muba-uba, tu gambaran na tudos tu jolma na muba-uba, angka unggas, binatang siopat pat dohot angka binatang na manjurur. ²⁴ Jadi gabe dipadiar Debata noma halahi dirajai hagiot ni roha ni halahi laho mambaen na jat, gabe dipambaeni halahi ma angka pangalaho na pabilehon pamatang ni halahi sama halahi. ²⁵ Dipasambar halahi ma hasintongan ni Debata tu gabus, jana nada be Panompa i, tapi angka na nitompa i noma tehe disomba jana dioloi halahi. Hape nian angkon na Manompa i do sipujion salolot-lolotna! Amen. ²⁶ Jadi hara ni na songon i dibaen jolma i, gabe dipadiar Debata noma halahi mangihutkon hagiot na pailahon i. Angka dadaboru nada markagiot be di halaklahi songon na somal di hajolmaon; tu donganna dadaboru noma dihagioti rohana. ²⁷ Halaklahi pe laing songon i muse; nada be tu dadaboru roha ni halahi songon na patut, tapi halaklahi noma marsiangkupan. Dibaen halaklahi ma pangalaho na pailahon maradopkon donganna halaklahi, jadi dijagit halahi do upa na hombar tu haliluan ni halahi di bagasan dirina be. ²⁸ Jadi hara ni na so diporluhon halahi laho mananda Debata, laing songon i ma dipasahat Debata halahi tu parrohaon na so hasaya, mambaen na so tupa. ²⁹ Hum na jat noma sude na manggohi roha ni halahi: Hageduhan, ahut tu diri, gutgut dohot dongki; hum na giot mamunu manggohi roha ni halahi, marbadai, paoto-otohon dohot na jingar. Pahata-hata halak, ³⁰ manilakoi halak na asing; angka na mangapasi Debata, mangasahon hagogoanna sajo, jungkat ni roha, mamuji dirina, angka na mangajarkon hajahatan, na so mangoloi natorasna; ³¹ na so marroha, na so setia, na so maribo ni roha. ³² Diboto halahi do nian angkon mate hona uhum do halak na songon i mangihutkon uhum na sian Debata, tapi haru songon i pe laing dipambaeni halahi do pangalaho na songon i; jana jop muse do roha ni halahi muda adong sanga ise na mambaen songon i.

¹ Hara ni i, ale jolma na manguhumi, nada adong sidalianmu; muda diuhumi ho na asing, dirimu do diuhumi ho; angke taran manguhumi ho, laing dikarejohon ho do songon i. ² Tapi taboto do mangihutkon hasintongan do uhuman ni Debata angka na mambaen si songon i. ³ Jana ho, ale jolma, na manguhumi halak na mambaen na songon i, tapi laing dohot do ho mangkarejohon na songon i, adong he dipikir ho tarbaen ho malua sian uhuman ni Debata? ⁴ Sanga na marlayas ni roha do ho di godang ni denggan basaNia, lambok dohot burju ni rohaNia? Nada he diboto ho, denggan basa ni Debata do maroban ho tu haubaan ni roha? ⁵ Tapi hara ni jogal ni rohamu na so ra muba, ditamba ho do rimas tu dirimu sandiri di ari haririmas dohot hapataran ni uhuman ni Debata na tigor i. ⁶ Harana baloskononNia do tu sude halak hombar tu pambaenanna be. ⁷ Lehenon ni Debata ma ngolu na manongtong tu sude na mangkaburjuhon na denggan, hasangapan na sanggam jana na manongtong i. ⁸ Tapi haririmas dohot hamumuruk do di halak na manjalahi haporluon di dirina sandiri, na so mangoloi hasintongan i, tapi na mangoloi tu hageduhan. ⁹ Ganop halak na sai mambaen na jahat, markancit ma disi jana mangae; tarlobi-lobi tu halak Jahudi, songon i muse halak Junani. ¹⁰ Tapi anggo halak na sai mambaen na denggan, lehenon ni Debata ma hasangapan dohot hamuliaon bope hasonangan; talobi-lobi tu halak Jahudi, songon i muse tu halak Junani. ¹¹ Harana, nada siida bohi Debata. ¹² Angke sanga sadia na mardosa na so mamboto Tona Ni Debata, mago ma halahi di ruar ni Tona i; jana sanga sadia na mardosa na mamboto Tona i, markite Tona i do angkon di uhum halahi. ¹³ Harana, nada hara ni na mamboto Tona i umbaen na tigor sada-sada halak adop Debata, tapi na patuluskon na nidok ni Tona i do na tardok tigor. ¹⁴ Anggo bangso na asing, nada diboto halahi Tona i. Tapi muda dipatulus halahi na nidok di bagasan Tona i sian roha ni halahi sandiri, jadi roha ni halahi sandiri ma na gabe tona ni halahi, haru pe nada diboto halahi dope Tona Ni Debata. ¹⁵ Pangalaho ni halahi ma na patuduhon paboa na dung tarsurat di ate-ate ni halahi angka aturan i. Dohot muse do taroktok ni halahi manyaksihon i, angke halahi sandiri pe jotjot do huhul dipasala sanga ditudu roha ni halahi. ¹⁶ Laing songon i ma na giot masa di ari na nitontuhon i. Anggo di ari i hombar tu Jamita Na Denggan na hujamitahon i -- uhuman ni Debata ma markite-hite Jesus Kristus sude sibunian ni roha ni jolma. ¹⁷ Jadi saonnari, bia noma taringot tu hamu angka halak Jahudi on? Didok hamu, halak Jahudi hamu, na maniop Tona i jana na marjop ni roha di bagasan Debata; ¹⁸ na umboto hagiotNia, jana na umboto na denggan dohot na so denggan, hara ni na diajar di bagasan Tona i. ¹⁹ Dihaposi rohamunu do sitogu na mapitung hamu jana sinondang do hamu di halak na maringanan di na golap; ²⁰ guru ni halak na oto ma hamu, jana pangajari ni angka na menek. Dihaposi rohamunu do, na diboto hamu do rumang ni sude parbinotoan dohot hasintongan sian Tona i. ²¹ Diajari hamu do halak na asing; antong biasi nada diajari hamu dirimunu sandiri? Diajari hamu do halak anso ulang manangko, hape panangko do apala hamu sandiri. ²² Diajari hamu anso ulang markarosuan halak na asing, hape apala ho sandiri markarosuan! Goyak rohamunu mida gana-ganaan, hape dibuat hamu sandiri angka barang-barang sian inganan ni gana-ganaan i. ²³ Ginjang do rohamunu hara ni na adong di hamu Tona i hape marbile do Debata markite-hite hamu na so patuluskon Tona i. ²⁴ Songon na tarsurat, "Hara ni hamu do umbaen na marlayas goar ni Debata di tonga-tonga ni angka bangso na asing." ²⁵ Sugari na burju hamu mangoloi Tona i, marguna muse do na marsunat i hamu. Tapi anggo dilanggar hamu do aturan i gabe nada adong be guna ni sunat i. ²⁶ Sugari adong halak na asing na so marsunat, mandalani angka pangidoan ni Tona i, inda he dietong Debata i songon halak na dung nisunat? ²⁷ Jana salahonon ni angka na so marsunat humani i ma hamu halak Jahudi, angke haru pe adong tarsurat aturan di hamu jana marsunat do hamu, hape dilanggar hamu do aturan i. Anggo halahi nada nisunat, hape halahi do na mangoloi aturan i. ²⁸ Harana anggo halak Jahudi na tutu, nada hum na niida ni mata sajo halahi Jahudi; jana halak na tutu-situtu marsunat, nada hum na tarida di pamatangna sajo na marsunat. ²⁹ Sabalikna do. Anggo halak Jahudi na tutu, i ma halak na marroha Jahudi; jana sunat na tutu, i ma sunat na di roha i na nibaen ni Tondi i, nada na nibaen marguru tu Tona na tarsurat i sajo. Sian Debata do ro pamujian tu halak na songon i nada sian jolma.

¹ Antong, aha dehe hasurungan ni halak Jahudi sanga aha guna ni sunat? ² Tontu bahat do i. Parjolo, harana halahi do hasahatan ni angka hata ni Debata. ³ Tapi bia ma i, anggo adong do deba halak Jahudi na so setia? Sanga hara ni i ma he dalanna gabe nada setia Debata? ⁴ Dao ma i! Angke anggo Debata sai sintong do tongtong, haru pe pargabus sude jolma. Songon na tarsurat i, "Anso tutu Ho tigor di bagasan angka hataMu, jana monang muda diuhumi Ho." ⁵ Tapi muda mur tarida na tigor Debata hara ni na tabaen na so tigor, aha ma na tardok hita? Na geduk ma he lakna Debata muda diparo Ia rimasNia? (Mangihutkon hata ni jolma do na hudok i.) ⁶ Bagi na bia pe, nada! Angke sugari inda tigor Debata, bia ma he baenonNia manguhumi portibi on? ⁷ Tapi, anggo hara ni gabusku, mur tangkas hasintongan ni Debata, jana dipasangap Ia, biasi dope di uhumi au songon halak pardosa? ⁸ Jana biasi inda tola hita mandok, "Tole ma tabaen na jat, anso ro na denggan sian i?" Tutu nian, adong do halak na pabilehon hami, paboa na dung hudok songon i. Anggo halak na songon i satutuna patut do uhumon ni Debata. ⁹ Jadi bia do na dumenggan dope hita hara ni halak Jahudi i hita, ulang pado halak na asing? Satutuna, nada! Madung tapajojor nangkin, sanga na halak Jahudi, sanga na halak na asing pe, sude do hita di toru ni kuaso ni dosa. ¹⁰ Songon na tarsurat i, "Nada adong na tigor, sahalak pe nada. ¹¹ Umpe sahalak na mangastui jana umpe adong sahalak na manjalahi Debata. ¹² Madung lilu sude jolma, nada adong be guna ni halahi. Umpe sahalak na mambaen na denggan; sahalak pe nada adong! ¹³ Songon kuburan na talak noma aru-aru ni halahi. Mabaor sipaoto-oto sian dila ni halahi, jana bibir ni halahi marbisa songon ulok. ¹⁴ Gok bura do pamangan ni halahi dohot gutgut. ¹⁵ Sai songon na mopop do pangalangka ni halahi muda giot manduruskon mudar. ¹⁶ Tanda do hasesego dohot tilako di angka dalan ni halahi, ¹⁷ jana nada ditanda halahi dalan hasonangan. ¹⁸ Nada adong biar mida Debata di halahi." ¹⁹ Tapi taboto do sude na tarsurat di Buku Tona dilehen do tu halahi na mangolu di toru ni Tona, anso nada adong sanga na ise be marsidalian jana sude portibi on hona uhuman ni Debata. ²⁰ Harana umpe sahalak na tigor di adopanNia hara ni na mangkarejohon Tona, dibaen markite-hite Tona i do ditanda jolma dosa. ²¹ Tapi anggo saonnari nada markite-hite Tona i, madung dipapatar hatigoran ni Debata, songon na nisaksihon ni Tona i dohot angka panurirang, ²² i ma hatigoran ni Debata markite-hite haporsayaan di Jesus Kristus, tu sude halak na porsaya. Harana nada adong imbarna: ²³ madung mardosa sude jolma jana agoan hamuliaan ni Debata. ²⁴ Jana nipatigor do halahi songon silehen-lehen hara ni asi ni rohaNia markite-hite haluaan na di bagasan Kristus Jesus. ²⁵ Jesus Kristus do na nipatumbuk ni Debata, gabe haul pardengganan markite-hite haporsayaan di mudarNia anso dipatidahon Ia hatigoranNia, angke dipadiar Ia do dosa i di hatiha hasobaranNia. ²⁶ Jadi dipatidahon Ia do hatigoranNia di hatiha on, anso tarida na tigor do Ia, jana patigorkon halak na porsaya tu Jesus. ²⁷ Antong anggo songon i, aha ma he dalanna giot margincat ni roha? Nada adong. Hara ni aha do? Hara ni pambaenan do? Nada! Tapi hara ni haporsayaan do! ²⁸ Antong songon on noma etongon ni rohanta: Markite-hite haporsayaan do jolma i dipatigor, nada hara ni na mangkarejohon Tona i. ²⁹ Sanga hum Debata ni halak Jahudi do Ia lakna? Nada he Debata ni bangso na asing do muse? Olo, laing Debata ni bangso na asing do Ia. ³⁰ Angke na sasada i do Debata, na patigorkon angka na marsunat markite-hite haporsayaan, laing songon i angka na so marsunat markite-hite haporsayaan. ³¹ Muda songon i, na mangagohon Tona i do lakna hami markite-hite haporsayaan i? Dao ma i! Tapi hami pajongjong do Tona i.

¹ Antong, aha ma tardok hita taringot tu ompunta si Abraham? Aha ma he na dumpang di hajolmaonnia lakna? ² Angke muda dipatigor do si Abraham hara ni pambaenannia, jadi adong ma dalannia giot marginjang ni roha, tapi nada di adopan ni Debata. ³ Tarsurat do di Buku Na Badia i, "Porsaya do si Abraham tu Debata, jana dietong ma i disia gabe hatigoran." ⁴ Muda adong halak na markarejo, nada nietong upania i gabe songon silehen-lehen, harana bagiannia hian do i. ⁵ Tapi muda adong halak na so markarejo, hape porsaya tuSia na patigorkon halak pardosa, diparetongkon ma haporsayaannia i gabe hatigoran. ⁶ Songon na nidok ni si Daud taringot tu hatuaan ni halak, na dapotan hatigoran sian Debata nada hara ni pambaenanna, ⁷ "Martua ma angka na dung nisesa pangalaosionna, jana na nitutupan angka dosana! ⁸ Martua do halak na so nietong ni Tuhan be dosana!" ⁹ Adong dehe hata martua i hum tu halak na marsunat sanga dohot do tu halak na so marsunat? Harana madung hami dokkon, na dietong do tu si Abraham haporsayaan gabe hatigoran. ¹⁰ Tapi songon dia do nietong i? Dung marsunat do ia, sanga taran so marsunat dope? Nada dung marsunat, tapi taran so marsunat dope. ¹¹ Dijagit ia do tanda sunat i songon cap ni hatigoran markite-hite haporsayaan na nipatuduhonnia taran so disunat dope ia. Markite na songon i ma ia gabe ompu ni sude na porsaya na so marsunat, anso diparetongkon ma hatigoran i tu halahi. ¹² Dohot do ia gabe ompu ni angka na marsunat, i ma na so hum marsunat sajo, tapi na mardalan muse mangihutkon indege ni haporsayaan ni si Abraham, ompunta i, taran so marsunat dope ia. ¹³ Dijanjihon Debata do tu si Abraham dohot tu pomparannia, gabe nampuna ni si Abraham ma tano on. Marjanji pe Debata songon i, nada hara ni si Abraham na mangoloi Tona i, tapi hara ni na porsaya do ia gabe dijagit ma ia songon halak na tigor. ¹⁴ Angke sugari halak na burju mangoloi Tona i sajo do na giot maruli di na nijanjihon ni Debata i, nada adong gunana haporsayaan i, jana hum hata-hata sajo do janji i. ¹⁵ Dibaen anggo Tona i manubuhon rimas ni roha; angke barang di dia nada adong Tona, nada adong disi pangalaosion. ¹⁶ Hara ni i, janji i marondolan tu haporsayaan, anso mangihutkon asi ni roha, gabe marpanginonai ma janji i tu sude pomparan ni si Abraham, nada hum di halak na mangolu sian Tona i, tapi dohot do di halak na mangolu sian haporsayaan ni si Abraham. Ompu ni hita sude do ia, ¹⁷ songon na tarsurat i, "Madung Hupabangkit ho gabe ompu ni bahat bangso." Songon i ma porsaya si Abraham tu Debata, i ma Debata na pangoluhon halak na mate; jana na mambaen na so adong hian gabe adong hum markite-hite hataNia sajo. ¹⁸ Porsaya do si Abraham jana mararop ni roha, haru pe so adong ojahan laho mararop ni roha, anso gabe "Ompu ni bahat bangso" ia, songon na nidok, "Songon i ma bahat ni pomparanmu sogot." ¹⁹ Nada gabe gale haporsayaannia, haru pe diboto ia bahaso madung mansai gale pamatangnia, angke madung saratus taon ne ma umurna; jana bortian ni si Sara pe madung tartutup. ²⁰ Laing tongtong do ia porsaya jana nada ganggu rohania di janji ni Debata i. Mur dipargogoi haporsayaannia i muse dope ia laho pasangapkon Debata. ²¹ Pos situtu do rohania paboa na tuk do gogo ni Debata patuluskon sanga aha na nijanjihonNia i. ²² Hara ni i muse ma dietong angka na songon i disia gabe hatigoran. ²³ Nada hum tu si Abraham sajo didok, "Madung dietong i disia," ²⁴ tapi dohot do tu hita. Hita pe dohot do etongonNia, harana porsaya do hita tuSia na dung pangoluhon Jesus Tuhanta i sian halak na mate, ²⁵ i ma Jesus na dung dipasahat hara ni angka pangalaosionta, jana na nipangolu salaho tu hatigoranta.

¹ Hara ni i, hita na nipatigor markite-hite haporsayaan, mangolu do hita di bagasan hasonangan dohot Debata markite-hite Tuhanta Jesus Kristus. ² Markite haporsayaan tuSia muse do hita dapotan dalan masuk tu asi ni roha ni Debata. Di bagasan asi ni roha i do hita mangolu, jana marmoga-moga di bagasan arop ni roha tu hamuliaan ni Debata! ³ Tapi nada hum i sajo, di bagasan pardangolan pe laing marmoga-moga ma hita, angke madung taboto gabe mur sobar do halak dibaen pardangolan, ⁴ jana hasobaron parohon tahan uji, jana tahan uji parohon arop ni roha. ⁵ Nada pailaon be hita hara ni arop ni roha na songon on, harana madung digohi Debata rohanta i dohot holong ni rohaNia. Markite-hite Tondi Parbadia do dibaen Debata songon i, i ma Tondi na nilehenNia tu hita. ⁶ Dibaen di hatiha hagaleonta, madung mate Kristus humopkop hita angka na durako, di hatiha na dung ditontuhon ni Debata. ⁷ Humopkop halak na tigor pe, maol do jolma ra mate. Anggo humopkop halak na burju betak adong dope jolma na puluk mate. ⁸ Hape dipatidahon Debata do holong ni rohaNia mida hita, di na mate i Kristus humopkop hita dompak pardosa dope hita. ⁹ Tarlumobi, hara ni na dung dipatigor hita saonnari di bagasan mudarNia, pasti do hita dipalua sian rimas ni Debata. ¹⁰ Harana muda hatiha musu dope hita, dipadame hita dohot Debata markite hamamate ni AnakNia, tarlumobi hita na saonnari na dung dipadame, pasti do angkon dipalua markite ngoluNia. ¹¹ Tapi nada hum i sajo. Marmoga-moga muse ma hita di bagasan Debata, markite-hite Tuhanta Jesus Kristus, harana markite-hite Ia madung hita jagit saonnari pardamean i. ¹² Hara ni sada halak do dosa i masuk tu portibi on, jana hara ni dosa i ro muse ma hamatean. Jadi gabe lalu ma hamatean i mangalangkoti tu sasudena jolma manusia, harana madung mardosa sudena. ¹³ Dibaen dompak so adong dope Tona madung adong hian dosa i di portibi on. Tapi nada nietong dosa i, muda so adong Tona i. ¹⁴ Tapi haru songon i pe madung dirajai hamatean i sudena jolma manusia mamungka sian si Adam lopus tu hatiha ni si Musa, laing dohot do angka halak na so mangalaosi sanga aha pe songon na nibaen ni si Adam i. Gambaran ni jolma na giot ro i do si Adam. ¹⁵ Tapi silehen-lehen ni Debata nada sarupa dohot pangalaosion ni si Adam. Hara ni pangalaosion ni sisada halak i gabe bahat mate jolma dibaensa. Hape dao gumodang dope akibat ni asi ni roha ni Debata dohot silehen-lehenNia na dung diusehon Ia tu bahat halak hara ni Sada Halak, i ma Jesus Kristus. ¹⁶ Jana silehen-lehen i nada tudos tu dosa ni sada halak. Harana panguhuman tu sada pangalaosion i madung parohon uhuman, tapi silehen-lehen asi ni roha taringot tu bahat pangalaosion i, parohon hatigoran. ¹⁷ Hara ni pangalaosion ni sada halak, gabe mangarajai ma hamatean i rarat sian halak na sada i. Hape dao dope gumodang akibat ni na nibaen ni Sada Halak na asing i, i ma Jesus Kristus, maradopkon bahat halak, na manjagit asi ni roha dohot silehen-lehen hatigoran i. Angkon mangolu jana mangarajai halahi markite-hite Kristus i. ¹⁸ Jadi songon markite-hite sada pangalaosion sude halak manjagit uhuman, laing songon i muse ma markite-hite sada pambaenan na tigor gabe sude halak manjagit hatigoran tu hangoluan. ¹⁹ Jana hara ni sada halak na so mangoloi gabe bahat halak mardosa; songon i muse ma, markite-hite pangoloion ni sada halak, bahat halak gabe tigor. ²⁰ Tapi ditambahon do Tona i, anso gabe mur bahat pangalaosion; jana di dia dosa martamba bahat disi ma asi ni roha mur bahat, ²¹ anso songon dosa na mangarajai di bagasan hamatean, songon i muse mangarajai asi ni roha markite-hite hatigoran tu ngolu na manongtong, markite-hite Jesus Kristus Tuhanta i.

¹ Antong anggo songon i, aha ma na tardok hita? Angkon tadatdati ma he mambaen dosa anso mur martamba asi ni roha i? ² Tontu nada songon i! Madung mate hita taringot tu dosa i, jadi bia ma hita bisa dope mangolu di bagasanna? ³ Sanga nada he diboto hamu hita sude na dung tardidi di bagasan Kristus Jesus, laing na dung tardidi di bagasan hamateanNia? ⁴ Di pandidion i, madung ditanom hita rap dohot Ia, di bagasan hamatean do hita disi rap dohot Ia, anso songon Kristus na mulak mangolu i sian hamatean dibaen Ama na sangap i, laing songon i muse ma hita tarbaen mandalani ngolu na imbaru. ⁵ Harana muda dung sada do hita di bagasan hamateanNia, hita pe gabe sada do di bagasan hangongotNia. ⁶ Dibaen madung taboto, madung diparsilangkon hajolmaonta na honok i, anso mago gogo ni dosa na disi jana ulang diparhatoban dosa i be hita. Hayu parsilang di ginjang ni dolok (6:6) ⁷ Angke barang ise na mate di bagasan Kristus, madung malua ia sian dosa. ⁸ Jadi muda dung mate hita rap dohot Kristus, tahaporsayai muse ma na mangolu do hita rap dohot Ia. ⁹ Angke taboto do, madung dipangolu anggo Kristus sian hamatean jana nada mate be Ia mangulahi; nada markuaso be hamatean i tuSia. ¹⁰ Angke hamateanNia, i ma hamatean maradopkon dosa, hum sanoli do tu salolot ni lolotna; jana hangoluanNia i, i ma hangoluan tu Debata. ¹¹ Hamu pe angkon etongonmunu do dirimunu na dung mate maradopkon dosa, jana mangolu hamu di Debata markite-hite Kristus Jesus. ¹² Antong ulang be paloas hamu dosa i mangarajai pamatangmunu na ra mate i, anso ulang dioloi hamu be hagiotna na jahat i. ¹³ Sada muse, ulang be pasahat hamu goar-goaran ni pamatangmunu tu kuaso ni dosa gabe parkokas laho mambaen angka na jahat. Tapi tu Debata ma pasahat hamu dirimunu songon halak na dung nipapinda sian hamatean tu hangoluan. Jana pasahat hamu ma sude goar-goaran ni pamatangmunu i tu Debata gabe parkokas laho mambaen angka na tigor. ¹⁴ Nada be dosa i mangarajai hamu, angke nada be di toru ni Tona hamu mangolu tapi madung di toru ni asi ni roha. ¹⁵ Antong, bia noma ujungna? Tola dope hita mardosa, hara ni na so ditoru ni Tona be hita, tapi madung ditoru ni asi ni roha? Nada songon i! ¹⁶ Diboto hamu dehe muda dipasahat hamu dirimunu tu sada-sada halak laho mangkarejohon hagiotnia, na gabe hatoban ni halak na nioloanmunu i do hamu -- sanga hatoban ni dosa na maroban hamu tu hamatean sanga hatoban na mangoloi Debata na maroban hamu tu hatigoran? ¹⁷ Tapi tarimakasi ma di Debata! Harana hatoban ni dosa do hamu najolo hape anggo saonnari sian sandok rohamunu dioloi hamu impola ni pangajaran na sintong na dung nipasahat tu hamu. ¹⁸ Madung dipalua hamu sian dosa jana gabe hatoban ni hatigoran. ¹⁹ Mangihutkon hasomalan ni jolma do mangkatai au dohot hamu, anso ummura astuanmunu. Songon na dipasahatmunu na jolo goar-goaran ni pamatangmunu tu na mangoloi hahodaran dohot hajahatan na maroban hamu tu hahodaron, laing songon i saonnari pasahat hamu ma goar-goaran ni pamatangmunu gabe hatoban ni hatigoran, jana anso gabe badia ma hamu. ²⁰ Dompak diparhatoban dosa i hamu, nada dirajai hatigoran i hamu. ²¹ Antong, parbatu aha ma na dapot hamu sian i? Sudena i mambaen hamu maila saonnari, angke hamatean do ujung ni i. ²² Tapi anggo saonnari, dung dipalua hamu sian dosa jana madung gabe naposo ni Debata hamu, dapotan parbatu anso gabe badia ma hamu, jana ngolu na manongtong do ujungna i. ²³ Angke hamatean do upa ni dosa; tapi silehen-lehen ni Debata i ma ngolu na manongtong di bagasan Kristus Jesus, Tuhanta i.

¹ Hamu ale angka dongan! Siboto Tona do hamu sude. Jadi nada he diboto hamu na markuaso do Tona i tu jolma hum sapanjang mangolu ia? ² Umpamana, tunduk do sada dadaboru tu halaklahinia mangihutkon Tona salolot mangolu dope halaklahinia i. Tapi muda mate do halaklahinia i, malua ma ia sian ihot-ihot ni Tona na mangihoti ia tu halaklahinia i. ³ Muda rap ia dohot bayo na asing taran di ngolu ni halaklahinia i, gabe margoar ma anakboru i siparkarosuan. Tapi anggo dung jumolo halaklahinia i, madung malua ia sian Tona i. Jadi muda marbagas ia mangulahi tu halaklahi na asing, nada dohonon be ia siparkarosuan. ⁴ Hara ni i do ale angka donganku, hamu pe madung mate maradopkon Tona markite-hite pamatang ni Kristus, anso gabe nampuna ni halak na asing hamu, i ma nampuna ni na dung dipangolu sian halak na mate, anso marparbatu hita di Debata. ⁵ Angke taran mangolu di bagasan bako ni jolma dope hita, margogo do hagiot ni dosa na ro markite-hite Tona i, na markarejo di bagasan goar-goaran ni pamatangta i, mamparbatuhon hamatean. ⁶ Tapi anggo saonnari madung dipalua hita sian Tona i na maniopi hita, angke madung mate hita disia, gabe mangoloi do hita di bagasan haimbaruan mangihutkon Tondi, jana nada di bagasan habuburuk ni surat i. ⁷ Antong, aha ma na tardok hita? Dosa dehe lakna Tona i? Nada! Tapi Tona i do na patandahon tu au taringot tu dosa. Nada huboto hian sanga na aha impol ni roha i, sugari nada didok Tona i, "Ulang impol rohamu." ⁸ Hara ni angka parenta i, gabe sai dipasunggul-sunggul dosa i ma di bagasan rohangku ragam-ragam ni hagiot; angke sugari nada adong hian angka Tona i, dosa i pe mate do. ⁹ Najolo mangolu do au di na so hutanda Tona i. Tapi dung ro angka parenta i, tarsunggul ma dosa i ¹⁰ jana mate ma au. Jadi parenta i na nitontuhon hian laho pangoluhon, hape gabe mamatehon do tu au. ¹¹ Harana di bagasan parenta i, dapotan inganan do dosa i giot paoto-otohon au jana markite-hite parenta i dibunu ia au. ¹² Jadi badia do Tona i, parenta i pe badia do, tigor jana denggan. ¹³ Muda songon i, gabe hamatean do lakna na denggan i di au? Nada! Tapi anso torang, bahaso ia do dosa, jana dosa mampargunahon na denggan parohon hamatean tu au, anso markite parenta i, dosa i mur torang muse songon dosa. ¹⁴ Angke madung taboto, partondion do Tona i, tapi anggo au pardagingon do, na targadis gabe hatoban ni dosa. ¹⁵ Harana au sandiri pe nada huastui na hukarejohon; sanga aha por ni rohangku na giot sibaenonku, hape nada hukarejohon; angka na huhagigihon do na hukarejohon. ¹⁶ Antong, muda hukarejohon do na maralo tu hagiotku, i ma tandana na huoku paboa na denggan do angka Tona i. ¹⁷ Jadi anggo satutuna nada au be na mangkarejohon i, tapi dosa na maringanan di bagasan au do. ¹⁸ Huboto do nian, na so adong sanga aha pe na denggan di bagasan diringku; i ma di bagasan bako na adong di au songon jolma na somal. Adong do nian hagiot ni roha di au, tapi nada mambaen na denggan. ¹⁹ Nada hukarejohon na denggan haru pe por do nian rohangku mangkarejohonsa; balikna do angka pangalaho na jahat do hukarejohon, na so giot ni rohangku. ²⁰ Muda hukarejohon na so giot ni rohangku, artina, nada au be na mangkarejohon na songon i, tapi dosa na mangingani au i do. ²¹ Jadi dapot au Tona songon on: Muda huparhagiot mambaen na denggan, na jahat i do ro tu au. ²² Anggo di bagasan, jop do rohangku adop Tona Ni Debata; ²³ tapi tangkas muse do huboto bahaso adong dope tona na asing di bagasan goar-goaran ni pamatangku na maralo tu na nidok ni tona na nioku ni taroktokki. Hara ni i ma umbaen na tarrahut au tu tona ni dosa na adong di bagasan goar-goaran ni pamatangku. ²⁴ Jolma na lebak do au. Ise ma he na giot palua au sian pamatang hamatean on? ²⁵ Tarimakasi ma di Debata, markite-hite Jesus Kristus Tuhanta i! Jadi na mangoloi Tona Ni Debata do au mangihutkon rohangku, tapi na mangoloi tona ni dosa do au mangihutkon bako ni hajolmaon.

¹ Saonnari nada adong be siuhumon di halak na mangolu di bagasan Kristus Jesus. ² Harana madung dipalua bako ni Tondi na pangoluhon i au sian bako ni dosa na mamatehon i. Tona Ni Tondi na mangalehen ngolu madung paluahon hamu di bagasan Kristus Jesus sian tona ni dosa dohot hamatean. ³ Sanga aha na so tarpatupa Tona i, hara ni bako ni hajolmaonta na gale, madung dibaen Debata. Madung ditaluhon Debata do kuaso ni dosa na di bagasan bako ni jolma i, i ma markite-hite na marsuru AnakNia sandiri, na ro di bagasan pangalaho na sarupa dohot jolma pardosa, laho manyesa dosa. ⁴ Dibaen Debata pe songon i, anso tardalankon do tuntutan na tigor sian na nidok ni Tona i di bagasan dirinta, na mangolu mangihutkon Tondi Ni Debata jana na so mangihutkon bako ni jolma. ⁵ Anggo halak na mangolu marguru tu bako ni hajolmaonna, sai na tumbuk tu hagiot ni bako ni jolma do dipasari-sari i. Tapi anggo halak na mangolu mangihutkon Tondi Ni Debata, sai jop ni roha ni Tondi i do dipasari-sari halahi. ⁶ Muda bako ni jolma do manggohi rohaniba, hamatean ma ujungna. Tapi muda Tondi Ni Debata do manggohi rohaniba, mandapot hangoluan ma iba jana hasonangan sian Tondi Ni Debata. ⁷ Marsialoan do bako ni jolma tu Debata; angke na so ra do i mangoloi Tona Ni Debata, boti nada tolapsa muse. ⁸ Halak na mangolu mangihutkon bako ni jolma, nada tarbaensa pasonang roha ni Debata. ⁹ Tapi anggo hamu ale angka dongan, nada mangihutkon bako ni jolma hamu mangolu. Mangihutkon Tondi do hamu mangolu, muda tutu Tondi Ni Debata mangingani dirimunu. Sanga ise na so maruli Tondi Ni Kristus, nada Kristus nampuna ia. ¹⁰ Tapi muda dung nipatigor hamu jana mangolu Kristus di bagasan dirimunu, jadi Tondi i ma gabe hangoluanmunu, haru pe angkon mate pamatangmunu hara ni dosa. ¹¹ Muda Tondi Ni Debata na pangoluhon Jesus sian hamatean i do mangolu di bagasan dirimunu, jadi pangoluonNia muse ma pamatangmunu na ra mate i, songon Kristus na nipangoluNia sian hamatean i, markite-hite TondiNia na mangolu i di bagasan hamu. ¹² Hara ni i ma hamu ale angka dongan, gabe adong tanggung jawabta; tapi nada tanggung jawab maradopkon bako ni jolma; nada pola porlu hita mangolu mangihutkon hagiot ni bako i. ¹³ Harana, muda mangihutkon bako ni jolma do hamu mangolu, ujungna angkon mate ma hamu; tapi anggo mardongan kuaso ni Tondi Parbadia do, matehononmunu ma torus angka pangalahomunu na mardosa i, gabe mangolu ma hamu. ¹⁴ Sanga ise na nitogu-togu ni Tondi Ni Debata, i do dakdanak ni Debata. ¹⁵ Harana anggo Tondi na nijagitmunu i ale angka dongan, nada dibaen i hamu gabe hatoban, anso gabe mangulahi mabiar hamu. Sabalikna do, gabe angka dakdanak ni Debata do hamu dibaen. Jana hara ni pangonjar ni kuaso ni Tondi i, pio-pio ma hita tu Debata mandok, "Abba, ale Amang!" ¹⁶ Rap manyaksihon do Tondi Ni Debata dohot tondinta laho patangkaskon na tutu hita dakdanak ni Debata. ¹⁷ Antong, muda dakdanak ni Debata hita, gabe panean ma hita na giot manjagit angka pasupasu na nipasingkop ni Debata di angka dakdanakNia. Rap manjagit ma hita dohot Kristus sanga aha na dung nipasingkop ni Debata. Angke muda manaon na hancit hita rap dohot Kristus, laing dipasangap muse ma hita rap dohot Ia. ¹⁸ Sude sitaonon na tabolus saonnari, anggo ning rohangku, nada tarpatudos dope i tu hasangapan na giot papataron i di hita. ¹⁹ Hara ni lungunna, sasudena na nitompa i painte-intehon do sanga andigan hatihana patidahonon ni Debata hasangapan ni angka dakdanakNia i. ²⁰ Harana madung dipatunduk sude na nitompa i tu na so hasaya, nada nian hara ni por ni rohana, tapi hara ni hagiot ni Debata na patundukkon i do. Tapi laing adong dope arop ni roha on: ²¹ Di sada hatiha paluaon do na nitompa on sian kuaso na manyegohonsa jana laing dohot do paluaon bope pasangapon rap dohot angka dakdanak ni Debata. ²² Taboto do, lopus tu hatiha on, rap manaon do na nitompa i hara ni pardangolanna, songon ina na manaon na hancit di na giot sorang dakdanakna. ²³ Tapi nada hum i sajo, dohot do hita manjagit patumonaan ni Tondi i, humolos muse do hita di bagasan rohanta huhut painte-intehon hadakdanahan i, i ma haluaan ni pamatangta. ²⁴ Angke madung dipalua hita, haru pe laing di bagasan arop ni roha. Tapi muda dung taida na niarop ni rohanta i, nada arop ni roha be na songon i. Harana, ise ma he na sai mararop ni roha tu na dung niidana? ²⁵ Tapi muda mararop ni roha do hita tu na so taida dope, gabe sobar ma hita painte-intehonsa. ²⁶ Laing songon i do Tondi Ni Debata, na ro do i mangurupi hita di hagaleanta. Angke anggo hita nada taboto sanga na tarbia sapatutna hita martangiang. Tapi Tondi i sandiri do mangadop tu Debata laho mangidohon di hita sian lungun ni roha na so tarhatahon jabat nada tuk hata pajojorkonsa. ²⁷ Debata na mandodo angka roha mamboto hagiot ni Tondi i; dibaen diondihon Ia do angka halak na badia mangihutkon hagiot ni rohaNia. ²⁸ Taboto do, Debata do na mangatur sasudena, anso gabe manjalak tu dengganna di angka halak na mangkaholongi Ia jana na nipiohonNia hombar tu sangkapNia. ²⁹ Angka na nipiliNia, madung ditontuhon muse do halahi sian mulana anso sarupa songon tiruan ni AnakNia, anso Anak i ma gabe siangkaan ni bahat kahanggi. ³⁰ Jana halahi na nitontuhonNia sian mulana, laing dipio Ia muse ma i. Jana halahi na nipioNia i laing dipatigor Ia muse ma i. Jana na nipatigorNia i, halahi muse ma na nipasangapNia. ³¹ Aha ma he tardok hita taringot tu sudena i? Muda Debata donganta, ise ma he tarbaen mangalo hita? ³² Ia na so mangolani anakNia sandiri, tapi dipasahat Ia do anakNa i hara ni hita sude; nada he lehenonNia muse tu hita sasudena na asing i rap dohot AnakNa i? ³³ Ise ma he giot mangaduhon angka na nipili ni Debata? Debata do na patigorkon! ³⁴ Ise dope na tarbaen manguhumi hita? Kristus Jesus do mangondihon hita! Ia ma na dung mate, lobi sian i dope, Ia ma na dung dipangolu mangulahi sian hamatean jana di siamun ni Debata do Ia maringanan. ³⁵ Ise ma he na ra manyirang hita sian holong ni roha ni Kristus i? Parkancitan, sanga hagogotan, sanga pangayak-ayakan, sanga tangkuraparon, sanga parsaemaraan, sanga parmaraan, sanga podang lakna? ³⁶ Songon na tarsurat i, "Hara ni Ho di bagasan parmaraan do hami sasadari, nietong do hami songon biri-biri sisambolon." ³⁷ Tapi di bagasan sasudena i, na monang situtu do hita markite-hite Ia na dung mangkaholongi hita! ³⁸ Harana marpos ni roha situtu do au, bahaso hamatean bope hangoluan, sanga surusuruan bope angka parkuaso; sanga na adong saonnari bope na giot ro, sanga angka hagogoan, ³⁹ sanga angka pangalaho na di ginjang bope na di toru, sanga pe angka na asing na nitompa, nada tarbaen manyirang hita sian holong ni roha ni Debata, na di bagasan Kristus Jesus Tuhanta i.

¹ Tutu do na hudok di bagasan Kristus, nada margabus au, disaksihon taroktokki do songon i markite-hite Tondi Parbadia. ² Marsak sajo do au jana magopu ate-atengku ³ hara ni angka kahanggingku dongan sabangsongku. Harana, rade do au sandiri diburai Debata jana sirang sian Kristus hara ni halahi. ⁴ Harana halak Israel do halahi, halahi madung dibaen gabe dakdanak, jana madung manjagit hasangapan, angka tona, ugamo dohot angka janji. ⁵ Pomparan ni angka ompunta i do halahi, jana hajolmaon ni Kristus i pe sian bangso ni halahi do asalna. Gumincat dope Ia sian sasudena. Tarpuji ma Debata ro di salolot-lolotna! Amen. ⁶ Tapi anggo hata ni Debata nada sundat. Angke nada sasude na topak sian Israel, tutu halak Israel. ⁷ Nada sude pomparan ni si Abraham, tutu dakdanak ni si Abraham. Angke didok Debata do tu si Abraham, "Hum pomparan ni si Ishak sajo do sigoaron pomparanmu." ⁸ Jadi sian i, anggo pomparan ni si Abraham na gabe dakdanak ni Debata, hum pomparannia na sorang hara ni janji ni Debata sajo do; jadi nada sude pomparannia i. ⁹ Angke songon on do janji ni Debata, "Di hatiha na dung ditontuhon, mulak ma Au ro jana adong ma sada anak halaklahi ni si Sara." ¹⁰ Tapi nada hum i: Adong do dua halak anak ni si Ribka sian sada ama, i ma si Ishak ompunta i. ¹¹ Angke taran so sorang dope angka dakdanak i, jana nada podo dibaen halahi bagi aha na denggan sanga na jat, anso togu sangkap ni Debata mangihutkon pamilionNia, nada sian pambaenan tapi markite-hite pamioonNia do, ¹² madung didokkon tu si Ribka, "Oloan ni na gumodang i do na ummenek i." ¹³ Songon na tarsurat i, "Holong do rohangKu mida si Jakob, tapi na goyak do rohangKu mida si Esau." ¹⁴ Antong bia ma ujungna dokkononta? Na so tigor do Debata? Anggo i, pasti do tigor Debata! ¹⁵ Angke didok Debata do tu si Musa, "PatuduhononKu ma denggan ni rohangKu sanga na tu ise giot patuduhononKu denggan ni rohangKi, jana patuduhononKu ma asi ni rohangKu sanga tu ise giotku patuduhononKu asi ni rohangKi." ¹⁶ Antong nada marguru tu hagiot ni jolma, sanga pambaenan ni jolma, tapi tu holong ni roha ni Debata do. ¹⁷ Angke Buku Na Badia i mandok tu raja ni Mesir, "Hubaen pe ho gabe raja, na adong do sada maksudKu, i ma laho patuduhon kuasongKu markite-hite ho jana mambaen tarbonggal goarKu di portibi on sudena." ¹⁸ Jadi, maribo ni roha do Ia tu sada-sada halak, muda por rohaNia mambaen songon i. Jana dipapir Ia do roha ni sada-sada halak, muda giot baenonNia songon i. ¹⁹ Saonnari giot dokkononmunu ma tu au, "Muda songon i, aha dope na dipasalaNia? Angke ise dehe na mangalo hagiotNia?" ²⁰ Ise ma he hamu ale jolma, umbaen na dialo hamunu Debata? Bisa ma he na ditopa mandok tu na manopana, "Biasi dehe ditopa ho au gabe songon i?" ²¹ Nada he markuaso sitopa hudon i di tano liatnia, mambaen sian nasa ragam tano i sada hudon na sangap, bope sada na bile? ²² Laing tarsongon i muse ma pambaen ni Debata. Por rohaNia palalu rimasNia dohot patuduhon kuasoNia. Haru pe songon i laing dipahapal Ia do sobarNia maradopkon halak siuhuman hara ni na pamilaskon rohaNia. ²³ Por muse do roha ni Debata patuduhon tu hita hasangapanNia na marlobi-lobi na niusehonNia tu hita angka na nihaholonganNia. Madung dihobasi Ia hian hita laho manjagit hasangapanNia i, ²⁴ tarmasuk hita na dung nipioNia, nada hum sian halak Jahudi, tapi dohot do sian angka bangso na asing. ²⁵ Angke didok Debata do di buku ni Panurirang Hosea, "Angka halak na so bangsongKu, goaranKu ma ’BangsongKu’. Bangso na so Huhaholongi, goaranKu ma ’Haholongan ni rohangKu’. ²⁶ Jana sanga didia inganan na nidok ni halak, ’Nada bangsongKu hamu,’ apala disi ma angka jolma i goaran angka dakdanak ni Debata na mangolu i." ²⁷ Torang do didok Panurirang Jesaya taringot tu halak Israel, "Haru pe sabahat ni horsik na di topi ni laut bilangan ni bangso Israel, hum saotik do i sipaluaon; ²⁸ harana manigor ma dabuhonon ni Tuhan uhuman tu pangisi ni portibi on." ²⁹ Didok si Jesaya muse dope songon on, "Sugari sura inda ditadingkon Debata Na Markuaso i angka pomparan di hita, angkon songon Sodom dohot Gomora hita." ³⁰ Antong aha ma dohononta saonnari? On do: Angka bangso na asing na so manjalahi hatigoran, madung dapotan hatigoran, i ma hatigoran hara ni haporsayaan. ³¹ Tapi, anggo Israel na manjalahi tona na parohon hatigoran, nada jabat lalu tu tona i. ³² Biasi nada? Dibaen nada hara ni haporsayaan halahi mangkarejohonna, tapi hara ni pambaenan do. Tartuktuk do halahi di batu partuktuhan. ³³ Songon na tarsurat i, "Ligi da, Hupayakkon do di Sion sada batu partuktuhan dohot sada batu pardandian, jana barang ise na porsaya diSia, nada dipaila be."

¹ Ale angka dongan, anggo pangidoan ni rohangku dohot tangiangku tu Debata anso dipalua halahi nian. ² Dibaen husaksihon do taringot tu halahi, na ringgas do halahi di Debata, tapi nada dohot roha na mangastui. ³ Dibaen hara ni na so ditanda halahi do hatigoran ni Debata jana hara ni na nipajongjong halahi hatigoran di dirina sandiri, jadi nada unduk halahi di hatigoran ni Debata. ⁴ Dibaen Kristus do hasidungan ni Tona i, jadi dapotan hatigoran ma sude halak na porsaya. ⁵ Disuratkon si Musa do taringot tu hatigoran na ro sian Tona i, "Halak na mangkarejohon Tona i, mangolu do markite-hite i." ⁶ Tapi songon on do didokkon hatigoran hara ni haporsayaan, "Indangkon pola dok di bagasan rohamu, ’Ise ma he na giot manaek tu banua ginjang?’ (astuanna, paijurkon Jesus), ⁷ sanga, ’Ise ma he na giot mijur tu inganan ni halak na mate?’ (astuanna, mangalap Kristus ngot sian na mate)." ⁸ Tapi aha do na nidok ni i? On do, "Na donok do Hata i tu ho, i ma di bagasan pamanganmu dohot di bagasan rohamu." ⁹ Angke sugari dioku ho markite-hite pamanganmu, "Ia do Tuhan," jana porsaya ho di bagasan rohamu, na dung dipangolu Debata Jesus sian hamatean, malua ma ho. ¹⁰ Harana marhite roha do halak porsaya jana dipatigor. Jana marhite pamanganna do halak mangoku, gabe dipalua. ¹¹ Di Buku Na Badia i tarsurat do, "Sanga ise na porsaya tuSia nada pailaon." ¹² Harana nada adong imbarna halak Jahudi bope halak na asing, harana sada do Tuhan ni sasude jolma. Dilehen Ia do pasupasuNa tu halak na mangido tolong tuSia. ¹³ Angke, "Sude halak na mamiohon goar ni Tuhan, i do na giot dipalua." ¹⁴ Tapi bia ma parpio ni halak tuSia anggo so porsaya dope halahi tuSia? Jana bia ma pangkaporsayai ni halahi di Tuhan i anggo so jolo dibege halahi taringot tuSia? Jana bia ma baenon ni halahi umbege taringot tuSia, anggo so adong halak na manjamitahonsa? ¹⁵ Tapi songon dia ma he halahi manjamitahon, muda nada disuru? Songon na tarsurat i, "Denggan na i haroro ni sioban Barita Na Denggan i!" ¹⁶ Tapi nada sudena halak manjagit Jamita Na Denggan i. Angke didok si Jesaya do, "O Tuhan, ise ma he na mangkaporsayai na hami baritahon i?" ¹⁷ Jadi sian parbinegean do ro haporsayaan, jana parbinegean i markite-hite hata ni Kristus. ¹⁸ Tapi husapai ma: Nada he dibege halahi do i? Madung dibege halahi do i, "Angke madung lalu do sora ni halahi tu sandok tano on, jana hata ni halahi madung tu liat portibi on." ¹⁹ Tapi husapai ma: Adong dehe diantoi Israel i? Na parjolo didok si Musa, "Hubaen do hamu gabe mangiburu tu na so bangsongKu jana Hubaen do rimas ni rohamunu hara ni bangso na hurang roha i." ²⁰ Umpuluk do si Jesaya mandok, "Madung padumpang dohot Au angka halak na so manjalahi Au; jana madung Hupatidahon diringKu tu halak na so marsapa taringot tu Au." ²¹ Tapi anggo taringot tu halak Israel didok ia do, "Songon on ma pandok ni Debata, ’Husurduhon do tanganKu sasadari tu sada bangso sijogal roha jana na tangkang.’ "

¹ Marsapa ma au: Adong he na dung diambungkon Debata bangsoNia i sandiri? Tontu inda! Au sandiri pe halak Israel do, pomparan ni si Abraham jana sian Marga Benyamin. ² Nada! Nada diambungkon Debata bangso na nipiliNia i sian mulana. Diboto hamu do ale angka dongan na tarsurat di Buku Na Badia i taringot tu si Elia, di na niaduhonNia pangalaho ni halak Israel tu Debata. Didok si Elia, ³ "O Tuhan, madung dibunu halak angka panurirangMi jana madung dironcohon halahi angka inganan parkaulan tu Ho. Hum sasada au sajo noma na tinggal, au pe giot bunuon ni halahi ma." ⁴ Tapi bia do alus ni Debata tusia? "Hutinggalkon dope pitu ribu halak di Au, na so unjung marsomba tu Baal." ⁵ Laing songon i ma saonnari dihatiha on, adong do na gabe teba-teba mangihutkon pamilion ni asi ni roha. ⁶ Tapi hara ni asi ni roha do, nada be sian pambaenan; sugari nada songon i nada asi ni roha be dohonon asi ni roha i. ⁷ Antong songon dia noma? Na nijalahan ni halak Israel nada dapot halahi i, tapi angka na nipili i do dapotansa; jana anggo na asing i madung pir songon batu. ⁸ Songon na tarsurat, "Lopus tu ari sadari on madung dilehen Debata di halahi tondi parpodom, mata na so marnida dohot pinggol na so marbinege." ⁹ Si Daud pe didok ia do, "Sai gabe jaring dohot sambil ma meja ni halahi, jana gabe partuktuhan dohot pamaloson di halahi! ¹⁰ Padiar ma manggolap parnidaan ni halahi anso ulang marnida be halahi; jana padiar ma puhung halahi ro di salolot-lolotna." ¹¹ Jadi marsapa ma au: Na tartuktuk dehe halahi jana angkon tinggang? Nada! Tapi markite-hite pangalaosion ni halahi, dapotan haluaan ma angka bangso na asing, anso gabe mangiburu halak Israel. ¹² Angke muda pangalaosion ni halahi gabe hamoraon di portibi on, jana hahurangan ni halahi gabe hamoraon di angka bangso na asing, mur noma di hamamasuk ni halahi sudena. ¹³ Hudok ma tu hamu, ale angka bangso na so Jahudi. Rasul ni angka bangso na so Jahudi do au, jana huetong do i gabe hasangapan ni pangoloionku. ¹⁴ Anggo ninna rohangku tarbaen au do mangiburu roha ni dongan sabangsongki, anso tarpalua nanggo apala deba nian sian halahi. ¹⁵ Dibaen muda panulakon ni halahi gabe pardengganan tu portibi on, nada he gabe songon hangoluan sian na mate ma i, muda dung tulus halahi dijagit? ¹⁶ Muda badia patumonaan i, na badia do muse sude sipanganon i; jana muda badia urat i, na badia do muse dangkana. ¹⁷ Diponggolkon deba sian dangka ni hayu i, jana nilohotkon ma ho na dibuat sian hayu harangan i tu inganan ni halahi gontina, anso martohap ho di urat dohot di miak ni hayu zetun i. ¹⁸ Hara ni i, ulang ma ginjang rohamu maradopkon angka dangka i! Muda ginjang rohamu, ingot ma; nada ho na manogang urat i, tapi na ditogang ni urat i do ho. ¹⁹ Betak giot dokkononmu do, "Adong do angka dangka na diponggolkon, anso au manggontihon halahi." ²⁰ Tutu do nian songon i. Tapi diambungkon pe halahi, hara ni na so porsaya do halahi, jana dijagit pe ho hara ni na porsaya do ho. Jadi ulang pola gabe ginjang rohamu hara ni i; gari ada angkon mabiar do ho. ²¹ Dibaen muda nada di haholongi Debata angka dangka na humani i, Ia pe nada mangkaholongi ho! ²² Jadi sian i tarida hita ma sanga na bia denggan ni roha ni Debata dohot pir ni rohaNia. Pir do tindakanNia anggo tu halak pardosa, tapi anggo tu ho denggan do rohaNia -- asal ma laing sian hadengganan ni rohaNia ho mangolu. Anggo inda songon i, ho pe ambungkononNa do muse. ²³ Jana taringot tu halak Jahudi pe, sugari mantak halahi na so ra porsaya i, dilohotkon do halahi muse, angke tuk do gogo ni Debata mangalohotkon halahi mangulahi. ²⁴ Hamu na so halak Jahudi sarupa do hamu tu dangka ni zetun harangan i. Antong, salang hamu tarlohotkon do tu batang ni zetun na polin i na so sarupa hian dohot batangmunu sandiri, mur ma halak Jahudi na nipartudoskon tu angka dangka ni zetun na polin i, tontu ummura dope baenon ni Debata laho mangalohotkon halahi mangulahi tu bona ni zetun ni halahi sandiri. ²⁵ Hara ni i ale angka dongan, ulang ma didok rohamunu na dung pistar hamu, giotku nian botoonmunu ma hasimoon on. Madung songgop hatangkangon tu bangso Israel, lopus gok masuk bilangan ni angka bangso na asing. ²⁶ Jana i do gabe dalan, anso malua sandok bangso Israel, hombar tu na tarsurat i, "Ro ma sian Sion Sipalua i, sesaonNia ma hajahatan sian pomparan ni si Jakob. ²⁷ Jana on ma parjanjianKu maradopkon halahi, muda Husesa angka dosa ni halahi." ²⁸ Mangihutkon Jamita Na Denggan i, musu do halahi hara ni hamu, tapi mangihutkon pamilion i haholongan do halahi hara ni angka ompu i. ²⁹ Dibaen nada disolsoli Debata rohaNia, taringot tu na nilehen dohot na nipiohonNia. ³⁰ Najolo nada mangoloi Debata hamu. Hape saonnari madung dapotan asi ni roha do hamu, hara ni na so ra halak Jahudi mangoloi. ³¹ Laing tarsongon i do bope halak Jahudi. Saonnari nada ra halahi mangoloi, tapi markite asi ni roha na tu hamu, halahi pe dapotan asi ni roha. ³² Harana na dung dipadiar Debata do sude jolma na ditano on dirajai hatangkangan, anso tarpatidahon Ia asi ni rohaNia tu halahi sudena. ³³ Bagasna i antong hamoraon, habisuhon dohot parbinotoan ni Debata! Na so tardodo do angka haputusanNia, jana nada tarastui angka dalanNia. ³⁴ "Ise ma he mangastui pikiran ni Tuhan? Ise ma he na tarbaen mangalehen sipaingot tuSia? ³⁵ Ise ma halak na jungada mangalehen bagi aha tuSia, jana gabe tarbaensa martunggu balosna?" ³⁶ Angke sian Ia, jana markite-hite Ia, jana tuSia do sudena na adong. DiSia ma hasangapan ro di salolot ni lolotna! Amen.

¹ Hara ni i ale angka dongan, hupaingot ma hamu markite-hite ibo ni roha ni Debata, anso dipasahat hamu dirimunu gabe haul na mangolu, na badia jana na tumbuk di roha ni Debata, i ma na gabe hangoluanmunu na sapatutna. ² Ulang pahombar hamu dirimunu tu hasiangan on, tapi pauba hamu ma dirimunu markite-hite haimbaruon ni rohamunu anso tartimbang hamu sanga dia do hagiot ni Debata: Na denggan, na tumbuk jana na sanggam. ³ Markite-hite asi ni roha na nilehen di au, hupaingot ma hamu ganup marsada-sada ulang ma dipikiri hamu taringot tu hamu lobi sian na patut, tapi intap ni na patut ma parrohaonmunu, mangihutkon haporsayaan na diturpukkon ni Debata tu hamunu. ⁴ Songon pamatangta on, bahat do goar-goaranna, tapi nada dos karejo ni sude goar-goaran i. ⁵ Laing songon i do hita. Haru pe bahat hita, laing sada pamatang do hita di bagasan Kristus, tapi laing goar-goaran do na sada tu na asing. ⁶ Laing songon i ma hita manjagit silehen-lehen na marasing-asing mangihutkon asi ni roha na dung dilehen tu hita. Halak na manjagit silehen-lehen anso manyurirangi, angkon karejohonon ma i mangihutkon haporsayaannia. ⁷ Halak na mangurupi halak na asing, angkon marsitutu ma nian mangurupi halak. Halak na mangajari, tutu ma na mangajari i. ⁸ Halak na laho paingotkon dongan, angkon marsitutu ma paingotkon halak na asing. Halak na marsilehen-lehen na adong disia, angkon sian burju ni roha na patut ma i dibaen. Halak na mamimpin, angkon dihaburjuhon ma na mamimpin i. Halak na maribo ni roha tu na asing, angkon sian jop ni rohana do i baenonna. ⁹ Ulang mangalancap-lancap holong ni roha i! Magigi ma hamu mida na jahat, parayak hamu ma na denggan. ¹⁰ Tangkas ma hamu antong marsihaholongan sama hamu songon halak na martinadohon, jana marsijolo-joloan ma hamu marsipasangapan. ¹¹ Ulang ma nian sumurut hariringgasmunu i, marsigorgor ma tondimu laho mangoloi Tuhan i. ¹² Jop ma rohamunu mararop roha tu Tuhan i, sobar ma hamu muda ro hasusaan, jana haburjuhon hamu ma na martangiang. ¹³ Urupi hamu ma na patukkon haporluan ni angka halak na porsaya tu Debata jana sonang ma rohamunu manjagit haroro ni halahi tu bagasmunu. ¹⁴ Pasupasu hamu ma sanga ise na mamparkanciti hamu, pasupasu hamu ma jana ulang burai hamu. ¹⁵ Marjop ni roha ma hamu dohot angka na marjop ni roha, jana tangis ma hamu dohot angka na tangis. ¹⁶ Saroha ma hamu sama hamu, ulang jalahi hagodangan, tapi patoruk ma rohamunu tu haserepon, ulang ma etong hamu na pistar do hamu. ¹⁷ Muda jat dibaen halak tu hamu, ulang pola baloskon hamu i dohot na jat. Baen hamu ma aha na denggan tu sude halak. ¹⁸ Intap ni na tarbaen, mardame ma ngolumunu tu halak sudena. ¹⁹ Hamu ale angka dongan na nihaholongan! Ulang ma hamu sandiri na mambaen pambaloson, tapi lehen ma inganan tu hamumuruk ni Debata. Angke tarsurat do, "Au do mambaen pambaloson," ninna Tuhan. ²⁰ Hara ni i, muda male musumunu, lehen ma ia mangan; jana muda manguas ia, lehen muse ma ia minum. Angke muda songon i dibaen hamu, gabe ila ma rohania dibaen hamu. ²¹ Ulang ma padiar hamu dirimunu ditaluhon na jat i, tapi taluhon hamu ma hajahatan i markite-hite hadengganan.

¹ Angkon sude do halak mangoloi pamarenta, angke nada adong pamarenta na so manjagit kuasona sian Debata. Jana pamarenta na adong pe, sian parenta ni Debata do i. ² Hara ni i, muda adong halak na mangalo pamarenta, sarupa dohot na mangalo tu hatontuan ni Debata do i. Jana siuhumon do halak na songon i. ³ Harana anggo halak na mambaen na denggan, inda pola mabiar ia tu pamarenta. Hum halak sibaen na jahat do na angkon mabiar. Muda por rohamunu anso ulang pola mabiar hamu mida pamarenta, angkon denggan do pangalahomunu, gabe sipujion ma hamu. ⁴ Angke pangoloi ni Debata do pamarenta, na markarejo parohon na denggan tu hamu. Tapi muda dibaen hamu na jat, angkon gabe mabiar ma hamu tu pamarenta, harana nada sayang boti pamarenta i maroban podangna. Suruan ni Debata do i mandabu uhum tu halak na mambaen na jahat. ⁵ Hara ni i patut ma unduk rohanta, nada hum hara ni rimas ni Debata, tapi na dionjar ni taroktok i do. ⁶ Laing hara ni i ma, umbaen na angkon gararonmunu pajak, angke songon parkarejo ni Debata do pamarenta laho mandalankon karejo sisongon i. ⁷ Garari hamu ma tu sude halak sanga aha na patut sigararonmunu: Garar hamu ma pajak di na patut manggarar pajak hamu, garari hamu bea di na patut manggarar bea. Habiari hamu ma na patut sihabiaran jana parsangapi hamu ma na patut sipasangapon. ⁸ Ulang marutang hamu bagi aha tu sanga ise pe, di balik ni utang holong ni roha na sada tu na asing. Harana sanga ise halak na mangkaholongi dongan jolma, madung dipatulus halahi Tona i. ⁹ Angke adong do tarsurat: Ulang markarosuan; ulang mamunu jolma; ulang manangko; ulang impol rohamu di sanga aha pe nampuna ni halak na asing; sudena i bope dohot angka aturan na asing i, nirahut do gabe sada aturan sajo, i ma na mandok, "Haholongi ma donganmu jolma songon pangkaholongimu di dirimu sandiri." ¹⁰ Sanga ise na mangkaholongi donganna jolma, nada baenonna be na jahat tu halahi. Jadi sanga ise na markolong ni roha, i ma halak na dung patuluskon Tona i. ¹¹ Tamba ni sudena i, sude do hamu umbotosa taringot tu hatiha on, on ma hatiha na tama anso tarsunggul hita sian na modom. Angke madung dumonok saonnari hatihana di hita anso malua, sian dompak di na mamungka hita porsaya. ¹² Salpu ne ma borngin; jana torang ma ari santongkin nari. Antong, taantak ma angka pangalaho na golap. Tapasingkop ma dirinta dohot sinjata na torang. ¹³ Angkon pantun do hita songon na somal dibaen halak di ari na torang, ulang ma marpesta godang marlobi-lobi, sanga mabuk. Ulang rorang, sanga marpangalaho na so ture. Ulang marbada-badai, sanga mangiburu. ¹⁴ Padiar hamu ma Tuhan Jesus Kristus manontuhon sanga aha sibaenonmunu. Jana ulang be dioloi hamu bakomunu na mardosa i laho papuaskon hagiot ni sibuk.

¹ Jagit hamu ma halak na gale dope haporsayaanna, ulang ma uhumi hamu pandapot ni halahi. ² Adong do halak na mandok, tola panganonna sanga aha sajo pe. Tapi adong muse do halak na gale dope haporsayaanna; hum angka sayur simarata sajo ma dihilala ia na tola panganonnia. ³ Sanga ise na so marimbar panganonna, ulang pola gabe layas rohania mida halak na marimbar sipanganonna; jana halak na marimbar sipanganonna, ulang ma antong disalahon ia angka na mangankon sasudena, angke salang Debata madung manjagit ia. ⁴ Tarbia ma he hajolmaonmu umbaen na jabat diuhumi ho naposo ni halak na asing? Sanga na tungkap naposo i sanga na jongjong, inda he urusan ni tuannia i do i? Jana denggan do ia jongjong angke marguru di Tuhan do mambaen ia jongjong. ⁵ Adong do halak na mangetong sada-sada ari dumenggan ulang angka ari na asing, hape na deba mangkilala sarupa do sudena angka ari i. Padiar ma songon i marsitontuhon pandirianna be angka jolma i. ⁶ Halak na mangkilala umporlu sada-sada ari, laho pasangap Tuhan i do dibaen halahi songon i. Halak na mangankon sanga aha sajo, laho pasangap Tuhan i do i, angke mandok tarimakasi do ia tu Debata hara ni sipanganon i. Laing songon i muse do halak na marimbar sipanganonna; halahi pe dipasangap halahi do Tuhan i jana mandok tarimakasi do halahi tu Debata. ⁷ Sahalak pe nada adong sian hita na mangolu hum di dirina sajo; jana sahalak pe nada adong sian hita na mate di dirina sajo. ⁸ Muda mangolu hita, di Tuhan i do hita mangolu. Jana muda mate pe hita, laing di Tuhan i muse do hita mate. Antong, sanga mangolu sanga na mate, Tuhan i do nampuna hita. ⁹ Madung mate Kristus, jana mulak mangolu. Hara ni i ma umbaen na gabe Tuhan Ia di halak na mangolu dohot muse di angka na dung mate. ¹⁰ Antong, hamu ale angka dongan! Aha ma gunana muda dipasala hamu dongan sahaporsayaanmunu? Jana aha pola gunana lakna muda layas rohamunu mida halahi? Sasudena hita on, angkon mangadop tu Debata anso diuhumi. ¹¹ Angke tarsurat do, "Na mangolu do Au," ninna Tuhan i, "jadi sude halak angkon marsinggang di jolongKu; jana okuon ni ganop halak ma, Au do Debata." ¹² Jadi angkon patorangonta be do tu jolo ni Debata sudena angka karejo na tapambaeni i. ¹³ Hara ni i ulang marsiuhuman hita sama hita! Gumonan ma ulang tabaen sanga aha na maroban donganta gabe madabu sanga tartuktuk. ¹⁴ Huboto do jana porsaya do au di bagasan Tuhan Jesus, na so adong sanga aha na hodar sian dirina humani; tapi gabe hodar ma i di sada-sada halak, muda hodar i dihilala ia. ¹⁵ Tapi muda hara ni sanga aha na nipanganmunu, gabe hancit roha ni donganmu sahaporsayaan, jadi nada marojahan tu holong ni roha be hamu disi. Muda na dung mate Kristus hara ni sada-sada halak, ulang ma padiar hamu sego halahi patunda ni na nipanganmunu. ¹⁶ Antong angka na denggan na di hamu, ulang ma padiar hamu dilayasi halak. ¹⁷ Harana anggo di Harajaan Ni Debata, nada sipanganon sanga siinumon na porlu disi, tapi hatigoran dohot hadamean dohot jop ni roha na nilehen ni Tondi Parbadia do. ¹⁸ Sanga ise na mangoloi Kristus songon i, i ma halak na pasonang roha ni Debata jana diargahon angka dongan na asing. ¹⁹ Jadi hara ni i, siparayahanta do tongtong angka pangalaho na mambaen hasosonang jana na marsipadengganan. ²⁰ Ulang ma hara ni angka sipanganon, gabe disego-sego hamu na nikarejohon ni Debata. Tutu do, ias do sude sipanganon; tapi muda patunda ni na nipanganmunu do gabe mardosa halak na asing, hamu do na sala disi. ²¹ Gumonan ma indangkon sai nipangan juhut sanga niinum anggur sanga aha sajo pe tehe, muda patunda ni i do tartuktuk dongan na asing. ²² Anggo haporsayaanmi, urusanmu sandiri ma i tu Debata. Sanga ise na manimbang dirina nada marsala di na nietong ni rohana dirina tigor, martua do halak sisongon i. ²³ Tapi sanga ise halak na ganggu rohana laho mangankon sanga aha, hape laing dipangan ia muse sipanganon i, hona uhum do, angke nada markite-hite haporsayaan dikarejohon. Angka na so tubu sian haporsayaan, dosa do i.

¹ Anggo hita na margogo, angkon manaon hagaleon ni angka na so margogo do. Ulang ma tajalahi hasonangan ni dirinta sandiri. ² Gumonan do hita manjalahi hasonangan ni dongan, laho parayakkon hadenggananna jana paulihonsa. ³ Harana, Kristus pe nada hasonanganNia sajo dipikirkon Ia. Songon na tarsurat, "Sude incak-incak na tu hamu, gabe tu Au do madabu." ⁴ Harana sanga aha na dung tarsurat na jolo, gabe parsiajaran do i di hita, anso togu hita di panghirimon i, markite-hite hapohomon dohot pangapoion sian Buku Na Badia i. ⁵ Debata do mual ni hapohoman dohot pangapoion. Sai dilehen Ia ma di hamu hasadaon mangihutkon hagiot ni Kristus Jesus, ⁶ anso saroha jana sahata ma hamu mamuji-muji Debata, Ama ni Tuhanta Jesus Kristus. ⁷ Antong marsijagitan ma hamu sama hamu, songon panjagit ni Kristus di hamu sude laho pasangapkon Debata. ⁸ Tapi on do na hudok, na gabe pangoloi ni halak Jahudi do Kristus, hara ni hasintongan ni Debata, anso dipatogu Ia janji na dung nilehenNia di angka ompunta. ⁹ Angke bangso na asing pe dibaen Ia do pasangap Debata hara ni asi ni rohaNia, songon na tarsurat di Buku Na Badia i, "Hara ni i giot pasangaponku noma Ho di tonga-tonga ni angka bangso. jana mangendehon puji-pujian di goarMu." ¹⁰ Adong muse do tarsurat songon on, "Marjop ni roha ma hamu ale angka bangso na asing, rap dohot bangsoNia." ¹¹ Dohot on dope, "Puji hamu ma Debata, hamu ale angka bangso sudena, sai puji hamu ma Ia, o hamu sude jolma manusia!" ¹² Jana didok si Jesaya dope songon on, "Ro ma sada halak sian pomparan ni si Isai, parentaonNia ma angka bangso; mararop ni roha tuSia angka bangso i." ¹³ Debata do arop ni rohamunu. Sai digohi Ia ma rohamunu dohot jop ni roha bope dohot hasonangan di bagasan haporsayaanmunu tuSia, anso mur mararop roha hamu tu Debata baenon ni gogo ni Tondi Parbadia. ¹⁴ Hamu ale angka dongan! Pos do rohangku angkon bahat do angka pangalaho na denggan di hamu. Sasude do diboto hamu jana tarbaen hamu muse do marsiajar-ajaran na sada tu na sada nari. ¹⁵ Tapi haru songon i pe hupulukkon do rohangku mambaen surat tu hamu, songon na paingotkon hamu hara ni asi ni roha na nilehen ni Debata tu au. ¹⁶ Madung dibaen Ia do au gabe pangoloi ni Kristus Jesus, suruanNia mandapotkon angka bangso na asing. Jana hubaen do au gabe songon malim, manjamitahon Jamita Na Denggan na sian Debata anso gabe haul na tumbuk tu roha ni Debata angka halak na asing i. Sai gabe haul hapunjungan ma di Debata halahi baenon ni Tondi Parbadia. ¹⁷ Hara ni i tola do au mamuji diringku di bagasan Jesus Kristus taringot tu Debata. ¹⁸ Angke nada puluk au mangkobari taringot tu bagi aha pe, asing ni na dikarejohon ni Kristus markite-hite au, anso hupatunduk angka bangso na asing tu pangoloion, markite-hite hata dohot pambaenan, ¹⁹ na nidonganan ni angka tanda hahomangan na sian gogo ni Tondi Parbadia do sudena i. Madung sudena hubaritahon Jamita Na Denggan sian Kristus i tu angka jolma, mamungka sian Jerusalem lopus tu Ilirikum. ²⁰ Tapi on do na huharinggaskon, anso hujamitahon Jamita Na Denggan, barang di dia na so tarbarita dope goar ni Kristus i, anso ulang hupajongjong bagas di ginjang ni ojahan na nipayakkon ni halak. ²¹ Tapi songon na tarsurat i, "Angka na so jungada dope manjagit barita taringot tuSia, idaonna ma; jana halak na so jungada manangihon dope, astuan ni halahi ma." ²² Hara ni i do umbaen na jotjot au sundat manopot hamu angka dongan. ²³ Tapi anggo saonnari madung sidung karejongku di angka luat i. Madung martaon-taon honokna sai por rohangku manopot hamu nian. ²⁴ Jadi muda mardalan au tu Spanyol, disi ma au ro tu hamu dibaen arop do rohangku idaonku ma hamu, di na mamolus i au, anso didongani hamu ma au tusi, dung jop rohangku marsuo dohot hamu. ²⁵ Tapi anggo saonnari giot tu Jerusalem dope au pasahatkon pangurupion tu angka dongan sahaporsayaan na disi. ²⁶ Harana madung saroha angka parlagutan na di Makedonia dohot na di Akaya laho mangalehen pangurupion tu angka dongan na pogos sian tonga-tonga ni dongan sahaporsayaan. ²⁷ Denggan do na dung diputuskon ni halahi, jana utang do i di halahi. Harana muda taruli angka bangso di arta partondion sian halak Jahudi, jadi patut do ditolongi angka bangso na asing i halak Jahudi i taringot tu arta na di portibi on. ²⁸ Muda dung sidung hubaen karejongkon, jana hupasahat pangurupion na nipalagut i tu halahi na di Jerusalem, kehe ma au tu Luat Spanyol mamolus sian kotamunu on. ²⁹ Huboto do muda ro au, angkon boanonku do angka pasupasu na sian Kristus di hamu. ³⁰ Hara ni Tuhanta Jesus Kristus dohot hara ni holong ni roha na nilehen ni Tondi i, gomos ma hupangido tu hamu angka dongan, anso dohot ma nian hamu marsitutu martangiang rap dohot au tu Debata taringot tu au. ³¹ Anso malua au sian angka na so porsaya na adong di Judea, jana anso tumbuk tu roha ni halak na porsaya na di Jerusalem karejongki. ³² Jadi hara ni i, muda tumbuk di roha ni Debata, tarbaen au ma ro mandapotkon hamu angka dongan di bagasan jop ni roha. Jana dapotan apo-apo ma au di tonga-tongamunu. ³³ Sai di dongani Debata pardenggan basa i ma hamu angka dongan sudena. Amen.

¹ Hupasahat ma ibotonta si Poibe na mangurupi na saidanna i di parlagutan na di Kenkrea. ² Jagit hamu ma ia di bagasan Tuhan i, songon na tama di angka halak na badia, anso ditolongi hamu ia di sude karejonia muda porlu, harana bahat do diurupi ia angka dongan bope au sandiri. ³ Palalu hamu ma tabengku tu si Priskila dohot si Akuila, i ma angka donganku saparkarejoan di bagasan Kristus Jesus. ⁴ Madung martaru hosa halahi humopkop ngolungku, nada hum au sajo na mandok tarimakasi tapi dohot do sude parlagutan na sian bangso na so Jahudi. ⁵ Laing pabolkas hamu ma tabengku tu parlagutan na marpungu di bagas ni halahi i. Tabe tu haholongan ni rohangku si Epenetus. Ia ma na parjolo porsaya tu Kristus di Luat Asia. ⁶ Tabengku muse tu si Maria. Songon i ma lojana dihilala ia na markarejo i di hamu. ⁷ Laing pasahat hamu ma tabengku tu si Andronikus dohot tu si Junias. Dongan samargangku do halahi na dua jana unjung do halahi rap tarhurung dohot au. Dompak so porsaya dope au tu Kristus, madung parjolo halahi porsaya. Tarbonggal do halahi di tonga-tonga ni angka rasul. ⁸ Tabe tu si Ampliatus na huhaholongi di bagasan Tuhan i. ⁹ Paboa hamu ma tabengku tu si Urbanus, donganta saparkarejoan na rap dohot hita di bagasan Kristus i. Dohot tu si Stakus na huhaholongi i. ¹⁰ Tabe tu si Apelles, na polin di bagasan Kristus i. Tabengku muse tu dongan sabagas ni si Aristobulus, ¹¹ dohot tu si Herodion. Samarga do i dohot au. Dohot tabe tu angka dongan sabagas ni si Narkisus, na rap porsaya tu Tuhan. ¹² Tabengku tu si Tripena dohot si Triposa na marsitutu karejo mangoloi Tuhan, dohot tu si Persis na nihaholongan. Ia pe madung marsitutu karejo mangoloi Tuhan i. ¹³ Tabe tu si Rufus dohot inanta i, na gabe songon dainang do i di au sandiri. Halak na tarpuji do si Rufus, na nipili ni Tuhan. ¹⁴ Palalu ma tabengku tu si Asinkritus, si Plegon, si Hermes, si Patrobas, si Hermas dohot tu sude angka dongan na rap dohot halahi. ¹⁵ Tabe tu si Pilologus dohot si Julia; tu si Nereus bope tu ibotonia i; tu si Olimpas dohot tu sude angka na porsaya na rap dohot halahi. ¹⁶ Marsijalangan ma hamu sama hamu sian ias ni roha songon tu dongan Kristen. Palalu tabe do tu hamu, angka parlagutan ni Kristus. ¹⁷ Tapi hupaingot ma hamu, ale dongan, pardimata hamu ma angka na mangalo pangajaran na niguruhonmunu i, jana na mambaen parsalisian dohot pardandian. Padao hamu ma sian halahi. ¹⁸ Harana anggo halak sisongon i nada tu Kristus Tuhanta i halahi markarejo, tapi laho palalu na di roha ni halahi sajo do. Markite-hite hata na lambok jana na tabo begeon, dipaoto-oto halahi do angka halak na bulus roha. ¹⁹ Angke diboto halak do sudena taringot tu pangoloionmunu, jadi jop do rohangku hara ni hamu jana di pangido rohangku, anso pistar hamu tu na denggan, tapi ias maradopkon hajahatan. ²⁰ Tapi tibu ma diropukkon Debata mual ni hasonangan i, Sibolis i tu toru ni patmunu! Sai didongani asi ni roha ni Tuhanta Jesus Kristus ma hamu. Sai tongtong ma hamu dipasupasu Jesus Kristus Tuhanta i! ²¹ Si Timoteus donganki pe palalu tabe do tu hamu angka dongan sahaporsayaan. Songon i dohot sian si Lukius, si Jason dohot si Sosipater donganku samarga. ²² Anggo na mambaen surat on, au do si Tertius. Laing pasahat tabe ma au di hamu angka dongan di bagasan Tuhanta i. ²³ Manongos tabe do si Gayus tu hamu angka dongan. Di bagasnia do au manompang jana laing di bagasnia do hami margareja. Si Erastus kapala ni sitiop hepeng ni pamarenta ni kota i pe laing manongos tabe do tu hamu. Songon i si Kuartus donganta i. [ ²⁴ Sai dipasupasu Tuhanta Jesus Kristus ma hamu angka dongan sudena. Amen.] ²⁵ Debata do na tarbaen patogu rohamunu mangihutkon Jamita Na Denggan na hujamitahon i, i ma taringot tu Tuhan Jesus Kristus, jana mangihutkon hasimoon na dung dipapatar, dung jolo ditabunihon sian na robi. ²⁶ Madung dipatidahon do saonnari hasimoon i markite-hite surat ni angka panurirang i, mangihutkon parenta ni Debata na salolot ni lolotna, jana dipabotohon i di sude bangso, anso porsaya halahi sude jana mangoloi tu Debata. ²⁷ Hum sasada Ia sajo do Debata na sun pistar. Sai marsangap situtu ma Ia salolot-lolotna markite-hite Jesus Kristus i! Amen.