HALUMBAAN

HALUMBAAN

¹ On ma halumbaan ni Jesus Kristus, na nilehen ni Debata diSia anso dipatidahon Ia i tu angka naposoNia taringot tu angka na giot masa. Jana madung dipatangkas jana ditongos Ia i markite-hite surusuruanNia tu naposoNia si Johannes. ² Dipaboa si Johannes ma sudena na niidania i, i ma taringot tu jamita na sian Debata na nipasahat ni Jesus Kristus. ³ Martua ma na mambasahon dohot na manangihon angka hata panurirangon on, jana na mangoloi angka na tarsurat di bagasanna, angke madung donok hatihana. ⁴ Sian si Johannes tu parlagutan na pitu i, na di tano Asia. Asi ni roha ma di hamu dohot hasonangan sian Ia, na adong saonnari, na dung adong hian, jana na giot ro, dohot sian tondi na pitu i, na di jolo ni habangsaNia, ⁵ dohot sian Jesus Kristus saksi na bonar roha i. Ia do na parjolo dipangolu mangulahi sian hamatean jana Ia muse ma parkuaso di ginjang ni angka raja na di tano on. Dihaholongi Jesus do hita jana hara ni hamateanNia i dipalua Ia do hita sian angka dosanta. ⁶ Madung dibaen Ia do hita gabe sada harajaan anso laing gabe malim hita na markarejo di Debata AmaNa i. DiSia ma hasangapan dohot kuaso ro disalolot ni lolotna. Amen! ⁷ Ligi da, na ro ma Ia dihaliangi ombun! Idaon ni sude halak ma Ia, dohot halahi na maniham Ia. Mangangguhi ma sasudena bangso na di tano on manangisi dirina be hara ni Ia. Olo, tutu do na songon i! Amen! ⁸ "Au do na parjolo dohot na parpudi," ninna Tuhan Debata, na adong, na dung adong, jana na giot ro, Parkuaso Na Sumurung i. ⁹ Si Johannes do au, kahanggi bope donganmunu saparjuangan na topet manaon parkancitan, di harajaan dohot di pohom ni roha paintehon Jesus. Na tarbuang do au di pulo Patmos hara ni na pararatkon jamita na sian Debata na nipasahat ni Jesus. ¹⁰ Di ari ni Tuhan i, digohi Tondi Parbadia do au, dung i hubege ma sada sora na gogo -- songon sora ni sarune -- mandok hata sian pudingku. ¹¹ Didok sora i do, "Suratkon ma sanga aha na niidamu jana tongoskon ma buku i tu parlagutan na pitu on: Epesus, Smirna, Pergamus, Tiatira, Sardis, Piladelpia dohot Laodikea." ¹² Manaili ma au adop pudi laho mangaligi sanga ise na mandok hata i tu au. Manigor huida ma pitu parlampuan na nibaen sian sere. ¹³ Di holang-kolang ni angka parlampuan i jongjong ma sada songon Anak Ni Jolma do idaon rupana. Mamake baju juba na ginjang do Ia lalu tu patNa i. Adong di andoraNa i sere dialitkon Ia. ¹⁴ ObukNa i songon bontar ni hapur, songon bontar ni hapas. MataNa songon api na hagaraanna; ¹⁵ patNa i songon gurasa ni tumbaga na nitutung. SoraNa songon sora ni sampuran na godang. ¹⁶ Ditiop tangan siamunna i ma pitu bintang jana ruar ma sada podang na tajom sidua baba sian pamanganNa i. BohiNa i torang songon sinondang ni mataniari di hatiha hamilasanna. ¹⁷ Di na mangaligi au tuSia, tungkap ma au tu joloNia songon halak na dung mate. Tapi dibaen Ia ma tu au tangan siamunNia didok Ia ma, "Ulang ho mabiar! Au do Na Parjolo dohot Na Parpudi. ¹⁸ Au do Na Mangolu i! Madung mate hian Au, tapi ligi ma, na mangolu do Au salolot-lolotna. Guru di Au do hamatean dohot inganan ni angka jolma na dung mate. ¹⁹ Antong, suratkon ma sanga aha na niidamu, i ma angka na adong saonnari dohot angka na giot tarjadi tu pudi on. ²⁰ On ma arti ni rahasia ni bintang na pitu na niidamu di tangan siamunKon dohot astuan ni parlampuan na pitu na nibaen sian sere i. Bintang na pitu i, i ma angka surusuruan ni parlagutan na pitu i, jana parlampuan na pitu i, i ma parlagutan na pitu i."

¹ "Tu surusuruan ni parlagutan na di Epesus, songon on ma suratkon: On ma barita sian na maniop bintang na pitu i di tangan siamunNia jana na mardalan pahae-pahulu di holang-kolang ni parlampuan sere na pitu i. Pitu parlampuan sere (2:1) ² Huboto do sanga aha na nibaenmunu: Madung disitutui hamu karejo jana sobar sajo do hamu. Huboto do na so dilehen hamu rohamunu tu angka halak parjahat. Jana madung diuji hamu angka halak na mangoku dirina rasul, hape na so tutu do, gabe tardapot do halahi pargabus dibaen hamu. ³ Huboto do na sobar hamu dohot na manaon parkancitan hara ni goarKu, hape laing nada pola mandele hamu. ⁴ Tapi anggo pangalaho na sada on nada sonang rohangKu mida hamu: Nada songon di mulana i be holong ni rohamunu. ⁵ Hara ni i, ingot hamu ma sanga na dung sadia dao hamu madabu. Pauba hamu ma rohamunu, dung i ulahi hamu ma patuluskon pambaenanmunu na di mulana i. Anggo inda, ro ma Au jana umpatonKu ma parlampuanmunu i sian jongjonganna i -- muda nada muba rohamunu. ⁶ Tapi haru songon i pe, laing adong dope na denggan di hamu; i ma: Dohot do hamu mangkagigihon pambaenan ni halak na mangihutkon si Nikolaus, na Huhagigihon i. ⁷ Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangankon parbatu ni hayu hangoluan, na di Pirdaus." ⁸ "Tu surusuruan ni parlagutan na di Smirna, songon on ma suratkon: On ma na nidok ni Na Parjolo dohot Na Parpudi -- i ma na dung mate jana na mulak mangolu i. ⁹ Huboto do hasusaanmunu; na pogos do hamu -- tapi anggo satutuna na mora do hamu! Huboto do angka adu-aduan na nituhaskon ni angka na manggoari dirina halak Jahudi, hape nian nada tutu; parlagutan ni sibolis do halahi! ¹⁰ Ulang ho mabiar taringot tu na giot taononmu. Ligi ma dabuon ni sibolis ma deba sian hamu tu bagasan hurungan, anso niuji hamu, jana manaon parkancitan ma hamu salolot sampulu ari. Sai bonar ma rohamunu lopus tu hamatean i, dung i lehenonKu ma di ho tuku hangoluan. ¹¹ Ditangihon na marpinggol i ma na nidok ni Tondi i tu angka parlagutan i! Di na monang i do lehenonKu mangan sian manna na buni, jana lehenonKu ma disia batu na bontar." ¹² "Tu surusuruan ni parlagutan na di Pergamus, suratkon ma songon on: On ma barita sian na maniop podang na tajom na marmata dua i. ¹³ Huboto do sanga di dia hamu maringanan. Di inganan ni kuaso ni Sibolis i do ingananmunu. Burju do hamu tu Au. Dompak na dibunu i pe si Antipas saksingKu na burju i di tonga-tongamunu di markas ni Sibolis i, disi pe nada disoadahon hamu paboa na porsaya hamu di Au. ¹⁴ Tapi haru songon i pe, laing adong do piga-piga pangalaho na so dihagioti ni rohangKu di hamu: Adong deba sian hamu na mangihutkon pangajaran ni si Bileam. Diajari si Bileam do si Balak paoto-otohon halak Israel anso mambaen dosa, i ma na mangankon pelean na nihaulkon tu gana-ganaan dohot mambaen pangalaho na markarosuan. ¹⁵ Laing songon i muse, adong deba sian hamu na mangihutkon pangajaran ni si Nikolaus. ¹⁶ Antong, pauba hamu ma rohamunu sian angka dosamunu i! Muda inda songon i, ro ma Au santongkin nari mandapotkon hamu jana poranganKu ma angka halakna i dohot podang na di pamanganKon. ¹⁷ Ditangihon na marpinggol i ma na nidok ni Tondi i tu angka parlagutan i. Di na monang i do lehenonKu mangan sian manna na buni, jana lehenonKu ma disia batu na bontar. Niuhir do di batu i sada goar na imbaru na so binoto ni sanga ise pe asing sian halak na manjagit i." ¹⁸ "Tu surusuruan ni parlagutan na di Tiatira songon on ma suratkon: On ma barita na sian Anak Ni Debata, na marnyala-nyala i mataNa songon api, dohot patNa na margurasa i songon tumbaga na marlinu. ¹⁹ Huboto do sude pambaenanmunu dohot holong ni rohamunu dohot pangoloionmunu dohot haporsayaanmunu dohot pohom ni rohamunu. Na umbahat do pambaenanmunu na parpudi on sian na parjolo i. ²⁰ Tapi anggo taringot tu pangalaho na sada on, nada jop rohangKu mida hamu: Dilehen hamu do rohamunu tu si Isebel dadaboru na mangoku dirina i suruan ni Debata. Madung miduk sian angka naposongKu na niajarannia dohot na nipaoto-otonia anso markamainan dohot mangankon sipanganon na nihaulkon tu gana-ganaan. ²¹ Jana madung Hulehen tusia hatiha anso dipauba ia ma rohania sian na markarosuan i; tapi nada dipauba ia rohania. ²² Ligi ma Hudabu ma ia rap dohot donganna na markamainan i, tu podoman ni parkancitan na godang, muda so dipauba halahi rohana sian pambaenanna i. ²³ Angka halak na mangihutkon ia pe angkon Hubunu do anso laing torang diboto angka parlagutan i paboa na Au do na tuk mandodo pikiran dohot roha ni jolma. BaloskononKu ma tu hamu marguru tu pambaenanmunu be. ²⁴ Tapi anggo tu hamu na asing i na di Tiatira angka na so mangihutkon pangajaran na jahat i jana na so mamparsiajari angka parbinotoan ni Sibolis i, Hudokkon ma tu hamu, nada pola tambaanKu be boban na padokdokkon hamu. ²⁵ Tapi tiop hamu ma na adong di hamu lopus ro Au. ²⁶ Jana barang ise na monang jana na mangkarejohon karejongKu lopus tu ujungna, lehenonKu ma kuaso tu halahi, maradopkon angka bangso. ²⁷ Jana mamarenta ma ia tu halahi dohot tungkot bosi; dohot mangabiskon bangso i songon na manapor-napor hudon tano -- dos songon na Hujagit sian Damang. ²⁸ Jagiton ni halahi ma bintang sidongdong sian Au. ²⁹ Ditangihon na marpinggol i ma na nidok ni Tondi i tu angka parlagutan i!"

¹ "Tu surusuruan ni parlagutan na di Sardis, songon on suratkon: On ma barita sian na martondi na pitu na sian Debata dohot nampuna bintang na pitu i. Huboto do sanga aha na dung dikarejohon hamu. Nidok hamu na mangolu, hape na mate do! ² Hara ni i, ngot ma hamu jana pargogoi hamu ma sanga aha na tading dope di hamu dompak so jabat mate sude. Angke nada adong dapot Au hum sada pe pambaenanmunu na sanggam di adopan ni DebatangKu. ³ Jadi angkon ingotonmunu do mangulahi sanga aha na niajarkon tu hamu najolo, songon i muse dohot na nijagitmunu. I ma dalankon hamu jana pauba hamu ma rohamunu sian angka dosamunu. Anggo nada ngot hamu, ro ma Au songon panangko mandapotkon hamu; jana nada botoonmunu sanga sadihari Au ro. ⁴ Tapi adong dope deba sian hamu na di Sardis on na manjagohon pakeanna anso laing tongtong ias. Rap mardalan ma halahi dohot Au marpakean na bontar, angke tama do songon i halahi. ⁵ Angke pakean na songon i ma bontarna na giot pakeon ni angka halak na monang. Nada sesaonKu be goar ni halahi sian buku hangoluan, tapi okuonKu ma halahi di adopan ni Damang dohot di adopan ni angka surusuruanNia paboa na Au nampuna halahi. ⁶ Ditangihon na marpinggol i ma na nidok ni Tondi i tu angka parlagutan i!" ⁷ "Tu surusuruan ni parlagutan na di Piladelpia, songon on ma suratkon: On ma barita sian Na Badia jana Na Tigor i. I ma sitiop kunci ni si Daud; muda dibuka Ia, nada adong sahalak pe na tarbaen manutupsa, jana muda ditutup Ia nada tarbuka sanga ise be i. ⁸ Huboto do sanga aha na nibaenmunu. Haru so sadia pe gogomunu, tapi laing dioloi hamu do pangajaranKu jana unduk do hamu tu Au. Madung Hubuka sada pintu na godang di hamu na so tartutup sanga ise pe. ⁹ Ligi ma! Huboan ma tu hamu angka halak sian punguan ni Sibolis, angka na manggoari dirina halak Jahudi, hape nada tutu nian, pargabus do halahi. Baenonku ma halahi marsinggang di jolo ni patmu, jana botoon ni halahi ma na holong do rohangKu mida hamu. ¹⁰ Hara ni na dung nioloanmunu parentangKu anso sobar hamu, Au pe jagohononKu ma hamu anso laing horas torkis hamu mamolus hasusaan na giot masa tu sude portibi on. I ma na giot tarjadi laho manguji sasude jolma na satano on. ¹¹ Ligi ma! Tibu do Au ro! Tiop ma na adong di ho, anso ulang adong na mambuat tukumi. ¹² Sanga ise na monang, baenonKu ma gabe songon tiang partunggul di bagas na badia inganan ni DebatangKu, jana nada morot-morot be ia sian inganan i. SuratkononKu ma tu halahi sandiri goar ni DebatangKu dohot goar ni kota ni DebatangKu -- i ma Jerusalem na imbaru na giot mijur sian banua ginjang. Laing suratkononKu ma dohot goarKu na imbaru tu diri ni halahi. ¹³ Ditangihon na marpinggol i ma na nidok ni Tondi i tu angka parlagutan i!" ¹⁴ "Tu surusuruan ni parlagutan na di Laodikea songon on ma surat on! On ma barita sian si Amen, Saksi na setia jana na bonar i, mula ni sude na nitompa ni Debata. ¹⁵ Huboto do sanga aha na dung dibaen hamu; nada ngali hamu jana nada milas. Sugari sura ngali ma ho nian; sanga na milas. ¹⁶ Tapi na danggol danggol sisilon do hamu; milas dohonon nada, ngali pe nada. I ma dalanna umbaen na giot utahononKu hamu sian pamanganKu. ¹⁷ Didok hamu, ’Madung mamora hami jana tuk sude; sada pe nada adong be na hurangnami.’ Hape umpe diboto hamu sanga songon dia dangolmunu dohot parkancitanmunu! Na pogos do hamu, marsaemara jana na mapitung. ¹⁸ Jadi Hupaingot ma hamu anso tobusi hamu ma sian Au sere, i ma sere na polin, anso tutu hamu gabe mamora. Laing dohot ma pakean na bontar tobusi hamu sian Au anso marpakean hamu, ulang diida halak be hamu di pangalahomunu na marsaemara jana na pailahon i. Jana tobusi hamu muse ma ubat ni matamunu i anso marnida hamu. ¹⁹ Sanga ise halak na Huhaholongi, i do na Humuruhi dohot na Husambok. Hara ni i, angkon marsitutu ma hamu jana pauba hamu ma rohamunu. ²⁰ Ligi ma! Jongjong do Au di jolo ni pintu manektek. Muda adong halak na umbege sorangKi, gabe dibuka ia pintu i, masuk ma Au mandapotkon ia; mangan ma Au rap dohot ia jana ia rap dohot Au. ²¹ Di na monang i ma lehenonKu anso juguk ia rap dohot Au di habangsangKi, laing songon Au na monang jana na juguk rap dohot Damang di habangsaNia i. ²² Ditangihon na marpinggol i ma na nidok ni Tondi i tu angka parlagutan i!"

¹ Dung salpu i, huligi ma, mungkap do sada pintu di banua ginjang, jana mangkuling ma sora na dung hubege mangkatai dohot au di mulana i, songon sora ni sarune, ninna ma, "Manaek ma ho tuson jana patidahononKu ma tu ho sanga aha na giot tulus dung salpu on." ² Manigor digohi Tondi Parbadia ma au. Huida ma di banua ginjang i sada habangsa. Adong do halak na juguk di habangsa i. ³ Marsinondang do bohi ni na juguk i, songon intan Jaspis dohot Sardes idaon. Adong muse do halibutongan humaliang habangsa i songon zamrud. ⁴ Adong ma dua pulu opat habangsa na asing martingko mangkaliangi habangsa i. Juguk ma disi dua pulu opat angka pangituai marpakean na bontar, jana martuku sere. ⁵ Mangaronggur ma habangsa i jana marsinondang songon sinondang ni hilap na marnyala-nyala. Jana adong muse do pitu lampu na gara di jolo ni habangsa i; i ma Tondi Parbadia na pitu i. ⁶ Jana laing adong muse dope di jolo ni habangsa i tarsongon laut sorminan, lan songon kristal. Adong muse do opat mahluk humaliang habangsa na di tonga-tonga i, na marmata sian jolo dohot sian pudi. ⁷ Songon singa do idaon tompa ni mahluk na parjolo i. Na paduahon, songon anak ni lombu. Na patoluhon i, songon bohi ni jolma do idaon. Na paopatkon i, songon halihi na habang do idaon. ⁸ Mahluk na opat i, onom be habongna jana sap sudena dohot mata. Nada mantak mahluk na opat i marende arian na borngin, "Na badia, na badia, na badia do Tuhan Debata Parkuaso Na Sumurung i; na adong, na dung adong, jana na giot ro!" ⁹ Diendehon mahluk siopat-opat i ma angka logu ni ende na pasangapkon jana na marmulia dohot na mandok tarimakasi tu na juguk di habangsa i, i ma na mangolu i salolot-lolotna. Jana di na marende i angka mahluk i, ¹⁰ manungkap ma pangituai na dua pulu opat i di jolo ni na juguk di habangsa i, marsomba tuSia na mangolu i salolot-lolotna. Dung i dipayakkon halahi ma tuku ni halahi i tu jolo ni habangsa i jana ninna halahi ma, ¹¹ "Ale Tuhan, jana Debatanami, na tama do Ho manjagit puji-pujian, hasangapan, dohot kuaso, angke ditompa Ho do sandok jana markite-hite rohaMu do adong sudena i jana nitompa."

¹ Dung i huida ma di siamun ni na juguk di ginjang ni habangsa i sada pustaha na marsurat di bagasan dohot di luar, jana na nicap dohot pitu cap. ² Dung i huida ma sada surusuruan na gogo, marsurak-surak gogo sorana, ning ia ma, "Ise ma he na patut mambuka cap on laho mangungkap buku on?" ³ Hape nada adong sahalak pe na sanggup mangungkap karotes na nibalun i laho mangaligi tu bagasanna, bope na di banua ginjang bope na di tano dohot na di toru ni tano dope. ⁴ Gabe tangis ma au panguncombopon hara ni na so adong halak na sanggup mangungkap balunan ni karotes i jana mangaligi tu bagasanna. ⁵ Dung i adong ma sahalak sian angka pangituai i na mandok tu au, "Ulang ho tangis! Ligi ma! Madung monang singa na sian horong ni si Juda i, i ma pomparan ni si Daud. Tama do Ia mambuka cap na pitu i dohot mangungkap gulungan ni buku i." ⁶ Dung i huida ma sada Anak Ni Biri-biri jongjong di tonga-tonga ni habangsa i, dihaliangi mahluk na mangolu siopat-opat i dohot sude angka pangituai i. Songon na dung hona sambol do idaon Anak Ni Biri-biri i. Pitu tandukna jana pitu dohot matana: i ma tondi na pitu na sian Debata na nisuruNa tu sude portibi on. ⁷ Dung i ro ma Anak Ni Biri-biri i tu jolo jana dibuat Ia ma buku na nibalun i sian tangan siamun ni na juguk di habangsa i. ⁸ Jadi taran songon i dope, manungkap ma mahluk na opat i dohot pangituai sidua pulu opat halak i di joloNia. Marsitiop hasapina do pangituai na dua pulu opat halak i dohot mangkuk sere na marisi hamonyan, i ma angka tangiang ni halak na badia. ⁹ Dung i diendehon halahi ma sada logu na imbaru: "Hum Ho sajo do na patut mambuat buku on dohot mambuka angka capna i. Angke madung hona bunu Ho, jana hara ni hamamateMi madung ditobus Ho jolma tu Debata sian sandok marga, hata, negara, dohot bangso. ¹⁰ Madung dibaen Ho halahi gabe sada bangso pinompar ni raja, anso laing gabe malim muse ma halahi na mangoloi Debatanta, jana mamarenta di ginjang ni tano on." ¹¹ Dung i manaili ma au mangulahi. Hubege ma sora ni surusuruan na marribu-ribu dohot na marjuta-juta bahatna! Jongjong ma halahi humaliang habangsa i dohot humaliang mahluk siopat-opat i dohot angka pangituai i. ¹² Dung i digogoi halahi ma sora ni halahi marende, "Anak Ni Biri-biri na dung nisambol i, Ia do na markuaso; na mora na bisuk jana na gogo; na patut nipasangap, nipagodang jana nipuji-puji!" ¹³ Dung i hubege ma sasude mahluk na di langit, na di tano dohot na di bagasan laut -- pendekna sudena mahluk na adong di portibi on -- mangendehon, "Na juguk di habangsa i dohot Anak Ni Biri-biri i na tarpuji dohot sipasangapon jana na godang bope na markuaso salolot-lolotna!" ¹⁴ Dung i mangalusi ma mahluk siopat-opat i, "Amen" ning halahi. Jana manungkap ma angka pangituai i laho marsomba.

¹ Dung i huida ma dibuka Anak Ni Biri-biri i cap na parjolo sian angka cap na pitu i. Dung i hubege ma sada sian mahluk na opat i mandok, "Ro ma ho!" ning ia. Songon sora ni ronggur noma begeon sorana i. ² Jadi hupamanat ma, gabe huida ma sada kudo na bontar. Ditiop na manengget kudo i do sada sior jana dilehen ma tusia sada tuku. Ruar ma ia songon sada halak parmonang, na maju laho mambuat hamonangan i. ³ Dung i dibuka Anak Ni Biri-biri i ma cap na paduahon jana hubege ma didok mahluk na paduahon i, "Ro ma ho!" ning ia. ⁴ Dung i ruar ma sada nari kudo na asing. Na rara sun do tompa ni kudo i. Dilehen ma kuaso tu na manengget kudo i laho mangagohon hadameon sian portibi on, anso marsimatean jolma i na sada tu na asing. Dilehen muse ma tusia sada podang na godang. ⁵ Dung i dibuka Anak Ni Biri-biri i ma cap na patoluhon. Jana hubege ma mahluk na mangolu na patoluhon i mandok, "Ro ma ho!" ning ia. Hupamanat ma, gabe huida ma sada kudo na lomlom. Ditiop na manengget i ma sada timbangan di tangannia. ⁶ Jadi hubege ma tarsongon sora na pio-pio sian tonga-tonga ni mahluk siopat-opat i. Ninna sora i ma, "Satuhul eme argana sabahat ni upa sadari jana tolu tuhul jaung pe argana tong sabahat ni upa sadari. Tapi ulang nisego-sego angka miak dohot anggur!" ⁷ Dung i dibuka Anak Ni Biri-biri i ma cap na paopatkon. Jana hubege ma didok mahluk na mangolu na paopatkon i, "Ro ma ho!" ning ia. ⁸ Hupamanat ma, gabe haidaan ma sada kudo na langan tompana, Hamatean do goar ni na manengget i. Dipaihut-ihut Harajaan Hamatean ma ia donok sian pudi. Dipasahat ma saparopat ni tano on tu kuaso ni halahi, anso tarbaen halahi mamunu markite-hite porang, hamamasa ni haleon, markite-hite nyae dohot markite-hite angka binatang panyoro na di tano on. ⁹ Dung i dibuka Anak Ni Biri-biri i ma cap na palimahon. Dung i huida ma di toru ni meja parhaulan i, adong angka tondi ni angka halak na mate hona bunu hara ni haporsayaan ni halahi tu jamita na sian Debata dohot hara ni haburjuon ni halahi pararatkon jamita i. ¹⁰ Jana pio-pio ma halahi marsora na gogo ninna ma, "Ale Tuhan, na badia jana na sintong! Sadia honok nari dope anso diuhumi, jana dibaloskon Ho mudarnami tu angka na maringanan di tano on?" ¹¹ Dung i dilehen ma tu halahi sada be baju juba na bontar. Dung i disuru ma halahi maradian santongkin nari, painte gok bilangan ni angka aleale ni halahi saparjuangan dohot angka dongan ni halahi na hona bunu songon halahi. ¹² Dung i huida ma dibuka Anak Ni Biri-biri i cap na paonomkon. Ro ma lalo na gogo situtu. Mangalomlom ma mataniari songon goni jana bulan pe gabe rara ma songon mudar. ¹³ Mangkadabu ma angka bintang sian langit an tu tano on songon parrurus ni batu ni gala-gala na so matobang dope sian bonana na nihutur ni alogo na gogo. ¹⁴ Mago ma langit i songon karotes na nibalun jana marmorotan ma angka dolok dohot pulo sian ingananna hian. ¹⁵ Dung i martabuni be ma angka raja na di tano on, angka halak na godang, angka panglima ni angka parporang, angka halak na marsinadongan dohot angka na markuaso dohot angka halak na asing i, bope hatoban dohot na mardeka marmasuhan ma tu bagasan angka liang dohot tu holang-kolang ni angka batu na di dolok. ¹⁶ Marsurak ma halahi tu angka dolok i dohot tu angka batu i, "Dondoni ma hami! Linggomi ma hami anso ulang hami ida bohi ni na juguk di habangsa i jana ulang hona muruk hami dibaen Anak Ni Biri-biri i! ¹⁷ Dibaen madung ro ari haririmas ni halahi, ise ma he na tarbaen manaon i lakna? Jana umpe adong sahalak na tarbaen manahan di jolo ni halahi!"

¹ Dung i huida ma opat surusuruan jongjong di suhi-suhi na opat ni tano on manahan angin na opat i di tano on anso ulang mangombus di darat, di laut sanga tu bona ni hayu aha pe. ² Dung i huida ma sahalak surusuruan na asing ruar muse sian Habincaran. Dioban ia do sada cap sian Debata na mangolu i. Gogo ma sora ni surusuruan i mamiohon surusuruan na opat i na manjagit kuaso sian Debata laho manyegohon darat dohot laut i. ³ Didok surusuruan na sada i ma, "Ulang jolo segohon hamu darat i sanga laut i, sanga hayu-hayu i sapanjang so hami lehen tanda cap di bohi ni angka naposo ni Debatanta." ⁴ Jadi hubege do bilangan ni angka na ni cap i, 144.000 halak sian sude marga ni halak Israel i ⁵ sian ganop marga dibuat ma 12.000 halak. I ma sian marga-marga: Juda, Ruben, Gat, ⁶ Aser, Naftali, Manase, ⁷ Simeon, Levi, Isakar, ⁸ Zebulon, Josep, Benyamin. ⁹ Dung i manaili muse dope au, gabe huida ma jolma na marlagut na lobi bahatna -- sahalak pe nada adong tarbaensa mangetong i! I ma angka jolma sian ganop bangso, marga, negara dohot bahasa. Mamake baju juba na bontar ma halahi, maniop mare-mare di tanganna be, jongjong ma halahi sude adop habangsa i dohot adop Anak Ni Biri-biri i. ¹⁰ Marsora na gogo ma halahi pio-pio, "Haluaan ma di Debatanami na juguk di habangsa i, dohot di Anak Ni Biri-biri i!" ¹¹ Jadi jongjong ma angka surusuruan i humaliang habangsa i dohot humaliang angka pangituai i dohot humaliang mahluk na opat i. Manungkap ma angka surusuruan i di jolo ni habangsa i manyomba Debata. ¹² Pio-pio ma halahi, "Amen! Puji-pujian dohot hasangapan, dohot habisuhon dohot hatarimakasion dohot hagogoon ma di Debatanta salolot ni lolotna! Amen!" ¹³ Ro ma sahalak sian pangituai i manyapai tu au, "Ise do angka halak na mamake baju juba na bontar on jana sian dia dehe halahi ro?" ¹⁴ Jadi hualusi ma, "Tuanku, ho do na umbotosa." Dung i didok ia ma tu au, "Halak on ma angka na malua sian hasusaan na godang i. Madung dibasu halahi baju juba ni halahi jana bontar dibaen mudar ni Anak Ni Biri-biri i. ¹⁵ I ma umbaen na tola halahi jongjong di adopan ni habangsa ni Debata jana mangoloi Ia arian na borngin di bagasan Bagas Na Badia. Jana rap ma Ia na juguk di habangsa i dohot halahi laho mangondihon halahi. ¹⁶ Nada be male halahi sanga manguas; nada taonon ni halahi mataniari sanga las ni ari, ¹⁷ angke Anak Ni Biri-biri na di tonga-tonga ni habangsa i noma na marmahani halahi. ToguonNia ma halahi tu mual ni aek haroroan ni hangoluan. Jana apusan ni Debata ma sude ilu-ilu sian mata ni halahi."

¹ Di na niungkap ni Anak Ni Biri-biri i cap na papituhon i, gabe mamolngit ma banua ginjang i hira-hira satonga jom. ² Dung i huida ma dilehen pitu sarune tu surusuruan na pitu na jongjong i di jolo ni Debata. ³ Ro ma sada surusuruan na asing na maroban pardupaan sere, jongjong di jolo ni meja inganan ni haul i. Madung dilehen tusia bahat sajo hamonyan sibaenon tu angka tangiang ni sudena halak na badia jana sihaulkonon di meja parhaulan na adong ni jolo ni habangsa i. ⁴ Rap dohot angka tangiang ni halak na badia, martimbual ma timus ni hamonyan na nitutung i manaek sian tangan ni surusuruan i tu adopan ni Debata. ⁵ Dung i dibuat surusuruan i ma pardupaan i jana dibaen ia ma banggar na gara tusi sian meja parkaulan i, didanggurkon ia ma i tu tano on. Mangkuling ma ronggur, ro ma hilap na sumiksak jana ro ma lalo. ⁶ Dung i markobas ma surusuruan na pitu i na maniop sarune i laho mamalu sarune i. ⁷ Diombus surusuruan na parjolo i ma sarunenia gabe songon na niduruskon ma pardoras ni udan es dohot udan api na marcampur mudar tu portibi on. Abis ma mosok sapartolu ni portibi on; songon i muse sapartolu sian angka hayu-hayu dohot duhut-duhut na rata. Sarune (8:7) ⁸ Dung i diombus surusuruan na paduahon i ma sarunenia gabe adong ma na lobi godang tarsongon dolok na gara idaon madabu tu laut. Muba ma sapartolu laut i gabe mudar, ⁹ jana mate ma sapartolu sian sude angka na nitompa di bagasan laut; laing abis muse ma sapartolu sian sude kapal. ¹⁰ Dung i diombus surusuruan na patoluhon i ma sarunenia, gabe madabu ma sian langit sada bintang na godang na gara songon palito, didondoni ia ma sapartolu sian angka batang aek dohot angka mual ni aek. ¹¹ ("Si Paet" do goar ni bintang i.) Gabe paet ma sapartolu aek i, jana gabe mate ma bahat halak hara ni na manginum aek na muba i gabe paet. ¹² Dung i diombus surusuruan na paopatkon i ma sarunenia. Gabe hona ma sapartolu mataniari i, sapartolu bulan dohot sapartolu sian angka bintang gabe mago ma sapartolu gogo ni sinondang ni halahi. Laing songon i muse sapartolu sian arian dohot sapartolu sian borngin gabe manggolap situtu. ¹³ Dung i hupamanat ma, gabe huida ma sada unggas rajawali na habang di ginjang an. Dung i mangkuling ma unggas i, "Marjaya! Marjaya! Marjaya ma sudena halak na di tano on muda tarbege surusuruan na tolu nari i mangombus sarunenia i sanoli on!"

¹ Dung i diombus surusuruan na palimahon i ma sarunenia, jana huida ma sada bintang madabu sian langit tu portibi on. Dilehen do di bintang i kunci ni rura hamatean. ² Gabe diungkap bintang i ma rura ni hamatean i, gabe ruar ma sian bagasan songon timus ni purunan na godang. Gabe manggolap ma awang-awang i dohot mataniari dibaen timus na sian rura i. ³ Gabe marroan ma angka siapor sian timus i mijur tu portibi on. Dilehen do tu halahi kuaso songon kuaso ni angka hala. ⁴ Diantahi do halahi manyegohon duhut-duhut sanga hayu sanga suan-suanan na asing pe. Hum angka jolma na so martanda cap na sian Debata di bohina i sajo do na tola serangon ni halahi. ⁵ Nada dipatola angka siapor i mamatehon angka jolma i, hum na mamparkanciti halahi do dipatola lima bulan honokna. Songon hancit ni na nidoit ni hala do hancit ni parkancitan na nibaen ni angka siapor i. ⁶ Anggo na lima bulan i maradu mate ma nian giot ni jolma i, hape nada tarbaen halahi mate; por roha ni halahi nian anso mate, hape dao do hamatean i sian halahi. ⁷ Songon dia ma kudo na giot tu porang idaon angka siapor i. Di angka uluna i adong ma idaon songon tuku na sian sere. Songon bohi ni jolma do idaon tompana. ⁸ Obukna pe songon obuk ni dadaboru jana iponna i songon ipon ni singa. ⁹ Andorana i martutup do idaon songon baju bosi. Sora ni habongna i songon sora ni kareta kudo na bahat na topet mangaroro hatiha marporang. ¹⁰ Adong do lailaina dohot corotna songon hala. Jana di lailaina i do hagogoon ni halahi laho mamparkanciti jolma i di bagasan na lima bulan i. ¹¹ Adong do rajana na mamarenta halahi, jana rajana i ma na martanggung jawab taringot tu rura hamatean i. Si Abadon ma goarna di hata Ibrani; jana hata Junani didok Apolion (astuanna "Panyego-nyego"). ¹² Madung salpu hamamago na parjolo i. Dung i adong dope dua nari hamamago na giot ro. ¹³ Dung i diombus surusuruan na paonomkon ma sarunenia. Gabe hubege ma sada sora na ruar sian na opat tanduk ni parkaulan sere di adopan ni Debata. ¹⁴ Mangkuling ma sora i tu surusuruan paonomkon na maniop sarune i, "Palua ma surusuruan na opat i na hona tambat di Batang aek Efrat i!" ¹⁵ Dipalua ma surusuruan na opat i. Madung dihobasi hian halahi laho mamunu sapartolu sian sude jolma manusia di jom, ari, bulan dohot taon na dung ditontuhon i hian. ¹⁶ Dipaboa do tu au, anggo bahat ni angka parangan na markudo i adong do dua ratus juta bahatna. ¹⁷ Jana di boa-boa na nilehenna i tu au, huida do angka kudo i dohot angka halak na manenggetsa. Mamake baju bosi na rara sun, na rata langit dohot na gorsing songon barerang do angka na manengget kudo i. Songon ulu ni singa do ulu ni angka kudo i jana ruar do api, timus dohot barerang sian pamanganna i. ¹⁸ Hona bunu ma sapartolu sian jolma dibaen parmaraan na tolu i; i ma api, timus dohot barerang na ruar sian pamangan ni angka kudo i. ¹⁹ Di pamangan ni angka kudo i do hagogoan ni halahi dohot di lailaina i. Songon ulok do angka lailaina i, adong do ulu ni halahi jana marhite ulu i ma diparkanciti halahi angka jolma i. ²⁰ Hape laing so ra dope jolma na so hona bunu i pauba rohana sian sasude na nibaen ni halahi sandiri. Laing na so mantak do halahi marsomba tu angka begu dohot tu angka gana-ganaan sere, perak, tumbaga, batu dohot hayu na so marnida sanga marbinege, sanga pe mardalan. ²¹ Laing so muba dope roha ni halahi sian na mamunu jolma, na padalankon hadatuon, sian markarosuan dohot sian na manangko.

¹ Dung i huida ma sahalak surusuruan na asing mijur sian banua ginjang. Na gogo sun do surusuruan i. Dibalut ombun do ia jana halibutongan di ginjang ni ulunia. Songon mataniari do bohina i jana patna i songon tiang api. ² Adong ma di tanganna i sada balunan buku na menek na ungkap. Patnia siamun i mandege laut, jana patnia siambirang i mandege darat. ³ Jadi marsurak ma ia sagogona songon singa na marngaur. Dung marsurak ia, mangkuling ma pitu ronggur na manghutur. ⁴ Disi mangkuling ronggur na pitu i, giot suratkononku ma nian, hape hubege ma manigor sada sora sian banua ginjang na mandok, "Angkon rahasiahononmu do sanga aha na nidok ni ronggur na pitu i; ulang suratkon i!" ⁵ Dung i surusuruan na huida mandegehon patna tu laut dohot tu darat i, diangkat ia ma tangannia siamun tu langit. ⁶ Marsumpa ma ia mangasahon goar ni Debata na mangolu i salolot-lolotna, na manompa langit, tano dohot laut bope sasudena na adong di langit, di tano dohot na di laut i. Didok surusuruan i ma, "Nada palambaton be hatihana! ⁷ Tapi di na niombus ni surusuruan papituhon i sarunenia, patuluson ni Debata ma sangkaNia i na so nipabotohon dope, hombar tu boa-boaNia tu angka naposoNia, i ma angka panurirang." ⁸ Dung i mangkobari muse ma mangulahi tu au sora na dung mangkobari i tu au sian banua ginjang i. Ning ia ma, "Kehe ma ho mambuat balunan ni buku na talak i na di tangan ni surusuruan na mandege laut dohot darat i." ⁹ Jadi kehe ma au mandapotkon surusuruan i jana hupangido ma anso dilehen ia balunan ni buku na menek i tu au. Didok ia ma tu au, "Jomput jana pangan ma on. Gabe paet ma i di bagasan butuhamu, tapi anggo di pamanganmu tonggi do songon aer ni loba." ¹⁰ Hubuat ma balunan na menek i sian tangannia jana hupangan. Songon tonggi ni aer ni loba ma antong daina anggo di pamanganniba, hape dung hubondut, gabe paet ma dung di butuhangku. ¹¹ Dung i ning ia ma tu au, "Angkon mangulahi do ho manyurirangi tu bahat marga, dohot bangso, dohot bahasa dohot angka raja."

¹ Dung i dilehen ma di au sada bulu suhat-suhat tarsongon tungkot, jadi diparentahon ma, "Kehe ma ho mangukur Bagas Na Badia ni Debata dohot meja inganan parkaulan i. Etong ma sanga sadia bahat halak na maribadat di bagasan. ² Tapi anggo alamanna i ulang pola suhat, angke anggo alaman ni Bagas Na Badia i madung dipasahat i tu angka jolma na so mananda Tuhan. Lonca-loncaon ni halahi ma Kota Na Badia i opat pulu dua bulan honokna. ³ SuruhononKu ma dua halak sangsingKu anso manyurirangi jana marpakean arsak ni roha, salolot saribu dua ratus onompulu ari." ⁴ Anggo saksi na dua i, i ma duakambona hayu zetun dohot dua parlampuan na adong di jolo ni Tuhan ni sude na nitompa on. ⁵ Muda adong halak na mancubo-cubo mambaen na jahat tu halahi, gabe ruar ma api sian pamangan ni halahi laho mangaluntak angka musu ni halahi i. Jadi songon i ma dalanna gabe tarbunu sude sanga ise na giot mambaen susa tu halahi. ⁶ Markuaso do halahi manutup langit anso ulang ro udan salolot manyurirangi halahi. Laing markuaso do halahi di angka mual ni aek laho mambaen aekna i gabe mudar. Jana laing markuaso muse do halahi mangalibas tano on markite-hite angka ragam ni bala, sanga na andigan giot ni halahi. ⁷ Dung sidung dipaboa halahi jamita ni halahi i, ro ma binatang na ruar sian rura hamatean i mangalo halahi. Taluhononnia ma halahi jana bunuonnia. ⁸ Jana payak ma bangke ni halahi di dalan godang na di kota na godang i, mangihutkon partondion digoar do i kota Sodom dohot Mesir, jana disi do Tuhan diparsilangkon halahi. ⁹ Paligi-ligion ni halak ma sude, sian ganop marga, ganop bangso, ganop bahasa dohot negara bangke ni halahi tolu satonga ari honokna jana nada dipatola tanomon angka bangke i. ¹⁰ Marjop ni roha ma halak na mangingani tano on hara ni parmate ni saksi na dua halak i. Marpesta ma halahi jana marsitongosan silua, angke madung bahat hasusaan na ro tu jolma manusia dibaen panurirang sidua halak i. ¹¹ Dung tolu satonga ari, ro ma hosa hangoluan sian Debata jana masuk tu bagasan panurirang sidua halak i. Halahi pe jongjong ma, jadi gabe mabiar ma sudena halak na marnida halahi. ¹² Dung i dibege panurirang sidua halak i ma sora na gogo mamio halahi sian banua ginjang, "Beta ma, manaek ma tuson!" ninna. Laing di jolo ni mata ni angka musu ni halahi i, manaek ma halahi tu banua ginjang, dibalut ombun i. ¹³ Jadi ro ma lalo na gogo hatiha i di tano on. Maronco ma saparsampulu ni kota i jana mate ma dibunu lalo i pitu ribu halak. Angka halak na asing i na so mate dibunu lalo i, gabe mabiar situtu ma; jadi gabe dipuji halahi ma hagodangan ni Debata di banua ginjang i. ¹⁴ Madung salpu parmaraan na paduahon. Tapi ligi ma! Manigor ro dope santongkin nari parmaraan na patoluhon. ¹⁵ Dung i diombus surusuruan papituhon i ma sarunenia, gabe adong ma sora na gogo situtu di banua ginjang na marsurahi mandok, "Anggo kuaso laho mamarenta portibi on saonnari madung di bagasan tangan ni Tuhanta dohot Kristus na nijanjihon i. Mamarenta noma Ia salolot-lolotna!" ¹⁶ Angka pamimpin sidua pulu opat halak na juguk di habangsa ni halahi na di jolo ni Debata i pe, manungkap ma jana marsomba tu Debata. ¹⁷ Ninna halahi ma, "Debata Na Markuaso do Tuhan, mandok tarimakasi do hami tu Ho, ale Tuhan Debata Parkuaso Na Sumurung, na adong dohot na dung adong, dibaen madung dipake Ho kuasoMu na godang i, jana madung dipungka Ho pamarentaanMu. ¹⁸ Madung muruk do angka bangso, tapi madung ro haririmasMu, dohot hatiha anso ni uhum halak na mate i. Dung i anso dilehen Ho upa di angka naposoMu, i ma angka panurirang, di angka na badia dohot angka na manghabiari goarMu, angka na menek dohot na magodang, jana segohononMu ma angka na manyego-nyego tano on." ¹⁹ Gabe marbuka ma Bagas Na Badia ni Debata di banua ginjang jana tarida ma poti inganan ni surat parjanjian na di bagasan Bagas Na Badia i. Manigor ro ma hilap na sumiksak dohot sora ni ronggur na mangkutur jana na matuoror. Ro ma lalo jana madabu ma ambolas na lobi por.

¹ Jadi tarida ma di langit hahomangan godang jana na luar biasa. Adong ma sahalak dadaboru na mamake mataniari songon pakeanna, dohot bulan di toru ni patnia. Adong ma di ulunia i sada tuku na nibaen sian dua bolas bintang. ² Hatiha denggan ma topet pamatang ni anak boru i, jadi hara ni na dung giot dapot hatihana laho sorang anaknia gabe mangangguhi ma ia hara ni hancitna. ³ Dung i tarida muse ma tanda na asing di langit. Adong ma sada ulok naga na rara na lobi godang, pitu uluna jana sampulu tandukna. Jana pitu tuku di ginjang ni uluna. ⁴ Disarat ia ma dohot lailainia i sapartolu sian angka bintang na di langit i, disampakkon ia ma i tu tano on. Jongjong ma naga i di jolo ni anak boru na giot manubuhon dakdanakNa i anso manigor dipolgak ia Dakdanak i disi sorang. ⁵ Dung i di sorangkon ia ma sada Dakdanak halaklahi, i ma na giot mamarenta angka bangso sudena dohot tungkot bosi. Tapi dirampas ma Dakdanak i sian anak boru i, dioban ma tu Debata dohot tu jolo ni habangsaNa. ⁶ Gabe marlojong ma dadaboru i tu parhorsihan, i ma inganan na nipasingkop ni Debata disia. Di inganan i noma ia dipauli 1260 ari honokna. ⁷ Dung i masa ma parporangan di banua ginjang. Marporang ma si Mikael rap dohot angka surusuruannia mangalo naga i. Jana naga i pe antong mangalo ma rap dohot angka surusuruannia. ⁸ Tapi ditaluhon do naga i. Nada dipatola be ia dohot angka surusuruannia i maringanan di banua ginjang. ⁹ Diambungkon ma naga i tu ruar! I ma ulok na tobang i na margoar Sibolis sanga Setan, na paoto-otohon sude portibi on. Diambungkon ma ia tu tano on rap dohot sude surusuruannia i. ¹⁰ Dung i hubege ma sada sora na gogo sian banua ginjang na mandok, "Saonnari madung ro hatiha haluaan dohot kuaso dohot pamarentaon ni Debatanta, dohot hakuasoonNia na nimiahanNia. Harana madung di danggurkon tu toru angka na mangaduhon angka donganta i, na mangaduhon halahi arian dohot borngin di adopan ni Debatanta. ¹¹ Madung ditaluhon angka donganta i ia dohot mudar ni Anak Ni Biri-biri i bope dohot hasaksian ni halahi. Angke nada dihaholongi halahi hosa ni halahi lopus tu hamatean. ¹² Hara ni i, angkon marjop ni roha godang ma banua ginjang dohot sudena na maringanan disi! Tapi marjaya ma anggo tano dohot laut, dibaen madung mijur tu ho Sibolis di hagigilap ni rimasna, harana madung diboto ia santongkin nari noma hatihania." ¹³ Di na tarboto tu naga i na dung dibuang ia tu tano on, diompot ia ma mangkojar dadaboru na baru manubuhon Dakdanak i. ¹⁴ Hape madung dilehen di dadaboru i dua habong ni rajawali na godang situtu anso tarbaen ia habang tu inganannia di parhorsihan jana anso malua ia sian serangan ni naga i. Di parhorsihan i ma ia dipauli-uli sada hatiha, dua hatiha, dohot satonga hatiha. ¹⁵ Gabe dibursikkon naga i ma aek na bahatan sian pamangannia tu dadaboru i laho mangayupsa. ¹⁶ Tapi diurupi tano on ma ia; diungkap tano i ma babana jana diincop ia ma aek na ruar sian baba ni naga i. ¹⁷ Mur gilap ma naga i tu dadaboru i, gabe kehe ma ia mangaroro na asing pinompar ni dadaboru i, i ma sasude halak na marmomosi tona ni Debata dohot angka na maniop hasaksian ni Jesus Kristus. ¹⁸ Dung i jongjong ma naga i di topi ni laut.

¹ Dung i huida ma sada binatang ruar sian laut. Adong do sampulu tandukna jana pitu uluna. Adong muse ma tuku sada be di uluna i jana tarsurat ma di uluna i sude sada goar pangincahion. ² Tarsongon babiat do rupa ni binatang i, patna songon pat ni gompul jana babana i songon baba ni singa. Dung i dilehen naga na huida parjolo i ma tu binatang i gogona sandiri, dohot habangsa dohot kuasonia na godang i. ³ Sada sian uluna na pitu i songon na jungada do banga bugangna idaon, tapi madung malum bugangna i. Diihutkon portibi on ma sude binatang i mardongan pangkilalaan na homang-komang. ⁴ Jana disomba halahi ma naga i hara ni na dung nilehennia i kuasonia tu binatang i. Laing dohot muse do binatang i disomba halahi. Didok halahi ma, "Ise dehe na sarupa songon binatang i? Ise dehe na tarbaen mamorangi ia?" ⁵ Dipatola do binatang i pajojorkon angka ginjang ni rohana dohot pangincahion. Dipatola do ia mamarenta opat pulu dua bulan honokna. ⁶ Dung i diungkap ia ma pamangannia mangincahi Debata, bope mangincahi goarNia dohot bandar parmiananNia dohot angka na maringanan di banua ginjang. ⁷ Dipatola muse do ia mangalo tu halak na badia bope manaluhon halahi. Jana dipasahat do tusia mangkuasoi sude marga, negara, bahasa dohot bangso. ⁸ Sombaon ni sude jolma na mangolu di ginjang tano on ma binatang i, i ma angka halak na so tarsurat goarna di buku hangoluan ni Anak Ni Biri-biri na dung disambol i, mamungka sian panompaon ni portibi on. ⁹ Barang ise na marpinggol, ditangihon ia ma! ¹⁰ "Sanga ise na angkon hurungon, angkon laing hurungkonon do. Jana sanga ise na mamunu dohot podang, pasti bunuon dohot podang. Hara ni i ma da umbaen na angkon sobar jana setia tongtong anggo halak na badia." ¹¹ Dung i huida ma sada binatang ro sian darat. Dua tandukna songon tanduk ni Anak Ni Biri-biri. Sorana songon sora ni naga. ¹² Dipake ia do kuaso na godang sian binatang na parjolo i. Dipaksa ia ma portibi on dohot sudena na maringanan disi anso marsomba tu binatang na parjolo i, i ma na dung malum i bugangna na banga i. ¹³ Dibaen ia ma angka tanda hahomangan na godang. Dibaen ia ma mijur api sian langit tu tano di jolo ni sudena jolma. ¹⁴ Dipatola do ia mambaen angka hahomangan; jana dipaoto-oto ia do sude jolma na mangolu di tano on hara ni angka hahomangan na nibaennia i di jolo ni binatang na parjolo i. Jana disuru ia ma halahi sudena pajongjong sada patung laho mamparsangapi binatang na mabugang dibaen podang i, hape laing mangolu. ¹⁵ Dipatola do binatang i mangombuskon hosa hangoluan tu bagasan patung i, anso gabe malo mangkobari patung i dohot mamunu sudena halak na so ra marsomba tusia. ¹⁶ Dipaksa binatang i ma sudena halak, na menek sanga na magodang, na mora sanga na pogos, hatoban sanga na mardeka anso manjagit tanda di tangan siamun ni halahi dohot di bohi ni halahi. ¹⁷ Sahalak pe nada tarbaen manobusi sanga manggadis bagi aha anggo nada adong disia tanda i, i ma goar ni binatang i sandiri sanga nomor ni goarnia. ¹⁸ Anggo dison porlu ma adong bisuk. Sanga ise na marbisuk, taretong ia ma arti ni bilangan ni binatang i, harana goar ni sada jolma do bilangan i. Anggo bilanganna i 666 do.

¹ Dung i hupamanat ma, jadi tarida ma Anak Ni Biri-biri i jongjong di Dolok Sion. Adong do 144.000 halak na rap dohot Ia, tarsurat do di bohi ni halahi sude goar ni Anak Ni Biri-biri i dohot goar ni AmangNia. ² Jadi hubege ma sada sora na mardorom sian langit songon sora ni sampuran na godang dohot songon sora ni ronggur na godang na matuoror. Habegean ma sora i songon sora ni musik sian angka parhasapi na topet mamiltik hasapina. ³ Di jolo ni habangsa i dohot mahluk na opat i dohot di angka pamimpin na humaliang habangsa i diendehon angka halak si 144.000 i ma sada ende na imbaru. Nada tarparsiajari sanga ise pe ende i asing sian halak na 144.000 i. Angka halak na nipalua do halahi sian tano on. ⁴ Angka halak na manjagohon dirina do halahi, jana nada dipahodar halahi diri ni halahi markite-hite dadaboru; ias do halahi songon bujing-bujing. Dipaihut-ihut halahi do Anak Ni Biri-biri i sanga na tudia Ia kehe. Sian sudena jolma manusia, halahi ma na dung nipalua anso haulkononkon songon patumonaan ni haul tu Debata dohot tu Anak Ni Biri-biri i. ⁵ Nada jungada halahi margabus; jana nada adong saotik pe tihas ni halahi. ⁶ Dung i huida ma sada surusuruan na asing habang gincat di langit. Dioban surusuruan i do barita taringot tu Jamita Na Denggan na manongtong i sipalaluon tu jolma na di tano on; i ma tu sude bangso, marga, bahasa dohot negara. ⁷ Marsurak ma surusuruan i gogo sajo, "Habiari ma Debata jana puji ma hagodanganNia! Angke madung dapot hatihana dabuhonon ni Debata uhuman tu jolma. Somba hamu ma na manjadihon langit, tano, laut dohot angka mual ni aek i!" ⁸ Ihut ma surusuruan na paduahon tu surusuruan na parjolo i jana marsurak ma ia, "Madung madabu ia! Ma madabu kota Babel na godang i! Madung gabe mabuk sude bangso dibaen ia rap dohot aek ni anggur -- i ma anggur na ro sian hagiotnia na jorngang i!" ⁹ Ro ma surusuruan na patoluhon ihut tu surusuruan na dua i marsurak ma ia gogo, ning ia ma, "Sanga ise na manyomba binatang i dohot patungna i dohot halak na maruli tanda ni binatang i di bohina dohot di tanganna, ¹⁰ painumon ma tu halahi anggur na badia, i ma anggur haririmasNia na niusehonNia tu ingananna, na so niurahan saotik pe! Hona parkancitan ma halahi di bagasan api dohot barerang di jolo ni angka surusuruan ni Debata dohot di jolo ni Anak Ni Biri-biri i. ¹¹ Martimbual ma timus ni api parkancitan ni angka jolma i salolot-lolotna. Nada marnamantak be hona parkancitan halahi arian dohot borngin, i ma angka halak na manyomba binatang i dohot patungna i, dohot sasudena halak na maruli tanda goar ni binatang i." ¹² Na porlu dison i ma hasobaran ni angka halak na badia, jana na mangihutkon parenta ni Debata dohot marhaporsayaan tu Jesus. ¹³ Dung i hubege ma sada sora sian banua ginjang mandok, "Suratkon ma on: Martua do sanga ise halak na mate di bagasan Tuhan mamungka sian hatiha on!" "Na tutu ma i!" ning Tondi i. "Maradian ma halahi sian karejo na dokdok jana daion ni halahi ma suha ni pangoloion ni halahi na sai tongtong mangihut di halahi." ¹⁴ Dung i huparrohahon ma, gabe huida ma ombun na bontar. Juguk ma di ombun i songon Anak Ni Jolma do idaon rupaNa. Adong do di uluNa i sada tuku sere jana di tanganNa i sada sasabi na tajom. ¹⁵ Dung i ruar ma sahalak surusuruan na asing sian Bagas Na Badia. Digogoi ia ma sorania marsurak tu na juguk di ginjang ni ombun i, "Paruar ma sasabiMi jana sabi ma saonnari, harana madung dapot hatihana sabion; madung tarsabi tano on!" ¹⁶ Manigor ro ma na juguk di ginjang ni ombun i maroban sasabiNa tu tano i, gabe dipungka ma sabion di tano i. ¹⁷ Dung i huida muse ma sahalak nari surusuruan na asing ruar sian Bagas Na Badia di banua ginjang. Ia pe laing maniop sasabi na tajom do. ¹⁸ Dung salpu i, ro muse ma sian parkaulan i sahalak surusuruan na asing, sirajai api. Gogo ma sorania marsurak tu surusuruan na maniop sasabi na tajom i, "Paruar ma sasabi jana horoti ma angka batu ni anggur na di bagasan kobun anggur na di tano i, harana madung malamun angka batuna i!" ¹⁹ Jadi dipadalan ia ma manigor sasabinia i tu tano i jana disabi ia ma angka batu ni anggur i sian bonana, dipamasuk ia ma i tu panggilingan ni anggur haririmas ni Debata na marsigorgor i. ²⁰ Di balian ni kota do digiling angka anggur i jana mardalan ma mudar na doras sian panggilingan i tolu ratus kilometer daona jana dua meter bagasna.

¹ Dung i huida ma di langit sada tanda hahomangan jana na godang situtu. Adong ma pitu surusuruan dohot pitu mara, bala na parpudi. On ma na parpudi situtu dipalalu Debata haririmasNia. ² Dung i huida ma tarsongon laut kaco na marcampur api idaon. Huida muse ma angka halak na dung monang mangalo binatang i dohot patung i dohot angka na monang mangalo halak na martanda nomor goarna. Jongjong ma angka halak na monang i di topi ni laut kaco i marsitiop hasapi na nilehen ni Debata tu halahi. ³ Jana diendehon halahi ma ende ni si Musa, naposo ni Debata i dohot ende ni Anak Ni Biri-biri i. Songon on ma ende ni halahi i, "Na godang jana hahomangan do angka pambaenanMu ale Tuhan, Debata Parkuaso Na Sumurung. Na tigor jana na sintong do sude dalanMu, ale Raja ni sude bangso. ⁴ Ise dope he na so mabiar mida Ho, Tuhan, jana ise dope he na so ra pasangapkon goarMu? Hum Ho sajo do na badia. Marroan ma angka bangso sudena manyomba Ho dibaen madung diida sasude halak angka panguhumanMu na tigor i." ⁵ Dung i huida ma marbuka Bagas Na Badia -- bandar hasaksian -- di banua ginjang. ⁶ Manigor ruar ma pitu surusuruan -- i ma na mangurus mara na pitu i -- sian bagasan Bagas Na Badia i. Sian abit linen do pakean ni halahi, ias jana marnyirlak-nyirlak. Jana adong do panutup ni andora ni halahi na nibaen sian sere. ⁷ Dung i ro ma sada sian mahluk na opat i mangalehen tu surusuruan na pitu i, pitu sambong sere na bubung marisi haririmas ni Debata, -- Debata na mangolu i salolot-lolotna. ⁸ Jadi gok ma antong Bagas Na Badia i dohot timus sian hasangapan dohot sian hara ni kuasoNia. Jana salolot so sidung dope mara na pitu i dibaen surusuruan na pitu i, sahalak pe nada dipatola masuk tu bagasan Bagas Na Badia i.

¹ Dung i hubege ma sada sora na gogo sian Bagas Na Badia i. Didok sora i ma tu surusuruan na pitu i, "Kehe ma hamu, duruskon hamu ma haririmas ni Debata isi ni sambong na pitu i tu tano!" ² Kehe ma manigor surusuruan na parjolo jana diduruskon ia ma isi ni sambongnia i tu tano. Gabe baro-baroon ma sudena sanga ise halak na maruli tanda ni binatang i dohot halak na manyomba patungna i. ³ Dung i ro ma surusuruan na paduahon, diduruskon ia ma isi ni sambongnia i tu laut. Gabe songon mudar ni jolma na mate ma aek laut i, marmatean ma sanga aha na mangolu di bagasan laut i. ⁴ Dung i ro ma surusuruan na patoluhon mangusehon isi ni sambongnia tu angka batang aek dohot tu angka mual, gabe mudar ma sude aekna i. ⁵ Hubege ma surusuruan na mangarajai aek mandok, "Na tigor do Ho, na adong saonnari, jana na adong hian, jana na badia do Ho, na dung mandabuhon uhuman on. ⁶ Dibaen madung diusehon halahi mudar ni angka halak na badia dohot angka panurirang i. Madung dilehen Ho mudar gabe inumon ni halahi tama do na songon i di halahi!" ⁷ Hubege ma sada sora sian inganan parkaulan i. Didok sora i ma, "Sintong jana tigor do sudena haputusan na nibaenMi, ale Tuhan Debata Parkuaso Na Sumurung." ⁸ Dung i diduruskon surusuruan na paopatkon i ma isi ni sambongnia tu mataniari, jana dilehen ma kuaso disia manutung jolma i markite-hite api. ⁹ Mosok ma jolma hara ni sun ni milasna i, gabe diburai halahi ma Debata na mangarajai angka mara i. Haru songon i pe, laing nada ra halahi pauba rohana sian angka dosa ni halahi jana nada ra halahi mamuji hasangapan ni Debata. ¹⁰ Dung i diusehon surusuruan na palimahon i ma isi ni sambongnia i tu habangsa ni binatang i. Gabe manggolap ma sudena harajaan ni binatang i, gabe disarbut halahi ma dilana hara ni na hancitan. ¹¹ Diburai halahi ma Debata na di banua ginjang hara ni na hancitan dohot hara ni na baro-baroon i halahi. Hape laing nada ra halahi pauba rohana sian angka pambaenan ni halahi. ¹² Dung i diduruskon surusuruan na paonomkon i ma isi ni sambongnia i tu Batang aek Efrat na godang i. Gabe mahiang ma batang aek i, lopus tardalani angka raja na sian Habincaran. ¹³ Dung i huida ma haruar sian pamangan ni naga i dohot sian binatang i dohot sian pamangan ni panurirang pargabus i tolu tondi na roncam na marrupahon tohuk. ¹⁴ Angka i ma tondi ni setan na mambaen angka tanda hahomangan. Kehe ma tondi na tolu i mandapotkon angka raja na satano on jana dipalagut ma halahi sudena laho marporang di ari na godang ni Debata Parkuaso Na Sumurung i. ¹⁵ "Ligi ma! Ro ma Au songon parro ni panangko! Martua do sanga ise na tongtong jonggor jana na manjagohon pakeanna, anso ulang salang-salang ia mardalan, jana anso ulang tarida hailaannia!" ¹⁶ Dung i dipalagut tondi na tolu i ma angka raja i tu inganan na nigoaran di hata Ibrani, Armagedon. ¹⁷ Dung i diduruskon surusuruan na papituhon i ma isi ni sambongnia i tu awang-awang. Jadi tarbege ma sada sora na gogo sian habangsa na di bagasan Bagas Na Badia i. Ninna sora i ma, "Madung tulus i!" ¹⁸ Jadi ro ma hilap na sumiksak dohot sora ni ronggur na mangkutur, jana mangalalo ma tano i gogo sajo. Na so unjung dope masa lalo na songon i mamungka sian panompaon ni jolma. On dope lalo na gumogo! ¹⁹ Dung i mabola ma kota na godang i gabe tolu bagian; jana marrumpahan ma angka kota ni halak na so mananda Debata. Jadi gabe taringot ma Debata tu kota Babel na godang i, giot lehenon ma tusia panginuman na gok anggur haririmas dohot hamumurukNia. ²⁰ Marmagoan ma angka pulo dohot angka dolok pe limpot ma. ²¹ Mardabuan ma udan es na boratna lima-lima pulu kilogram, sian langit mandondoni jolma, jana diburai jolma i ma Debata hara ni parmaraan udan es i, angke na godang situtu do parmaraan i.

¹ Dung i ro ma sada sian surusuruan na pitu i na maniop sambong na pitu i, mangkobari dohot au ninna ma, "Beta, anso hupatidahon tu ho sanga na bia baenon manguhumi panggampang godang i, na juguk di ginjang ni aek na bahat. ² Na markamainan do angka raja ni portibi on dohot panggampang godang i jana gabe mabuk do halak na mangingani tano on hara ni na minum anggur ni panggampang i." ³ Di bagasan Tondi dioban ia ma au tu parhorsihan. Huida ma disi sahalak dadaboru na juguk manengget sada binatang na rara songon hasumba. Gok dohot goar pangincahion. Pitu ulu ni binatang i jana sampulu tandukna. ⁴ Marbaju na ungu do dadaboru i dohot na rara tobang jana na nipambaeni dohot angka sere, simata dohot berlian. Adong do di tanganna i sada sambong sere bubung dohot angka pangalaho hagigian jana na hodar, na sian parkarosuanonna i. ⁵ Tarsurat do di bohina i sada goar rahasia. Anggo goar i, i ma "Babel Na Godang i, ina ni sandok panggampang dohot angka parbuatan na so ture di portibi on." ⁶ Jadi huida ma mabuk dadaboru i dibaen mudar ni angka na badia dohot sian mudar ni angka saksi ni Jesus. Dung huida dadaboru i, gabe homang-komang ma au. ⁷ Jadi didok surusuruan i ma tu au, "Biasi homang-komang ho? Hupaboa pe tu ho rahasia ni anak boru i dohot rahasia ni binatang na nitenggetnia i, i ma binatang na marulu pitu jana na martanduk sampulu i. ⁸ Anggo binatang na dung niidami madung adong do i, tapi nada adong, na giot manaek ma ia sian rura hamatean anso kehe ma ia tu hamagoan. Jadi homang ma roha ni angka na maringanan di tano on, i ma angka na so tarsurat goarna di buku hangoluan sian mula-mula ni hasiangan on, muda diida halahi binatang i na dung adong, tapi nada adong, jana na giot ro muse. ⁹ Na porlu dison i ma bisuk dohot pangastuion: Ulu na pitu i, i ma pitu dolok, i ma na nijuguhan ni dadaboru i. ¹⁰ Tardok muse pitu raja do i. Lima madung madabu, na sada madung adong, na sada nari nada adong dope; tapi muda dung ro ia, satongkin do i tola tinggal. ¹¹ Jana binatang na jungada i mangolu tapi na so adong i be saonnari, ia sandiri do raja na pasalapankon jana bope songon i sada sian na pitu i kehe ma tu hamagoan i. ¹² Tanduk na sampulu na niidami, i ma sampulu raja na so mamungka dope mamarenta. Tapi lehenon do kuaso tu halahi anso mamarenta halahi songon raja rap dohot binatang i sajom lolotna. ¹³ Sarupa do tujuan ni raja na sampulu halak on; rap na giot pasahatkon gogona dohot kuasona do halahi tu binatang i. ¹⁴ Na giot marporang do halahi mangalo Anak Ni Biri-biri i. Tapi taluhonon ni Anak Ni Biri-biri i ma halahi, angke Ia do Tuhan ni angka tuan jana Raja ni angka raja. Dung i monang ma na rap dohot Ia, i ma angka na nipiohon dohot na nipili dohot na setia." ¹⁵ Dung i didok ia ma tu au, "Sude aek i, na niidamu juguhan ni panggampang i, i ma angka bangso dohot halak na bahat, angka marga dohot bahasa. ¹⁶ Tanduk na sampulu na niidami dohot binatang i, margoyak ni roha ma mida panggampang i. Baenon ni halahi ma ia lungun-lungunan jana salang-salang. Panganon ni halahi ma sibukna jana pangabison ni halahi ma ia dohot api. ¹⁷ Angke na dung digorakkon Debata do roha ni halahi laho patuluskon sangkap ni Debata. Dibaen Debata ma halahi satahi laho pasahatkon kuaso ni halahi tu binatang i, anso binatang i noma torus mamarenta lopus tarjadi sude na nidok ni Debata. ¹⁸ Dadaboru na niidami, i ma kota na godang i, na mamarenta angka raja di portibi on."

¹ Dung salpu i, huida ma sada surusuruan na asing mijur sian banua ginjang. Na godang do kuasonia jana gabe torang ma tano on sudena hara ni sahalania. ² Marsora na gogo ma ia marsurak, "Madung madabu dadaboru i! Madung madabu Babel Na Godang i! Gabe inganan ni tondi na jahat dohot partabunian ni angka tondi na hodar noma i saonnari. Angka unggas na hodar jana na nihagigihon ni halak noma na mangolu di bagasan. ³ Madung diinum sasude bangso anggur sian hagiotnia na rorang i. Mambaen harorangon do angka raja dohot ia jana gabe maradong be ma angka saudagar na satano on hara ni hagiotna na so tarordahon i." ⁴ Jadi hubege ma sada sora na asing sian banua ginjang mandok, "Ruar ma hamu angka bangsongKu! Ruar ma hamu sian bagasan! Ulang ihutkon hamu angka dosana i, jana ulang dohot hamu mananggung uhumanna i! ⁵ Angke martamba-tamba do dosania sungkot ro di langit, jana dipaingot-ingot Debata do angka dosana i. ⁶ Baen hamu ma tusia balos ni na nibaennia i tu hamu; dua noli lompit baloskon hamu sandok na nibaennia. Isi hamu ma mangkukna i dohot siinumon na dua noli lompit korasna sian siinumon na niparade di hamu. ⁷ Lehen hamu ma tusia parkancitan dohot pardangolan sabahat ni hasangapan dohot sinadongan na dung dirasoinia. Harana didok ia do di bagasan rohania, ’Au do ratu na mamarenta! Nada na mabalu au, nada daionku hamarsahan!’ ⁸ Hara ni na songon i ma gabe angkon hona bala ia tompu di sada ari -- nyae, hamarsahan dohot tangkuraparon. Tutungon ma ia tu api angke na sun do kuaso ni Tuhan Debata i na mangadili ia." ⁹ Jadi ditangisi jana diandungi angka raja ni tano on ma ia, i ma angka na markarosuan jana na marharorangan rap dohot ia, muda diida halahi timus ni panutunganna i. ¹⁰ Jana jongjong ma halahi sian na dao hara ni biar ni roha di parkancitan i, jana didok halahi ma, "Marjaya; marjaya ma kota na godang i -- kota Babel na gogo! Di bagasan sajom do ro panguhumanmu!" ¹¹ Angka saudagar na satano on pe tangis jana marsiluluton ma hara ni dadaboru i angke nada adong be hum sahalak pe na manobusi angka barang jagalan ni halahi i. Angka barang jagalan (18:11) ¹² Angka barang-barang sere dohot perak, dohot batu intan dohot simata dohot abit na alus dohot abit ungu dohot surto dohot abit hasumba dohot ragam-ragam ni hayu na huskus dohot ragam-ragam ni panjamaan sian gading dohot rupa-rupa ni parkokas sian hayu na arga dohot sian tumbaga, sian bosi, dohot pualam, ¹³ hulim, parmasak, pulungan ni ubat-ubat, mur dohot hamonyan; anggur dohot miak, topung dohot gandum; lombu dohot biri-biri, kudo dohot kareta, angka hatoban dohot jolma. ¹⁴ Jana didokkon halahi ma, "Madung mago angka parbatu na ni hagioti ni rohamu, jana sude sinadonganmu dohot hatongamonmu, madung mago sian ho, jana nada dapot ho be i sanga andigan." ¹⁵ Jongjong sian na dao ma angka saudagar na dung mamora hara ni na marjagal di kota i, angke mabiar do halahi hona parkancitan ni kota i. Tangis ma halahi jana marsiluluton, ¹⁶ Jana didokkon halahi ma, "Marjaya, marjaya ma kota na godang i, na marpakean linen na alus, dohot abit ungu dohot abit na rara, na nitabur dohot sere dohot batu intan dohot simata! ¹⁷ Di bagasan sajom do nipasego hamoraan na sai godang i!" Sude juaromudi ni kapal, angka pasisir dohot angka na karejo di kapal dohot sudena halak na mangomo sian laut, jongjong ma sian na dao, ¹⁸ jana marsurak dung diida halahi timus na marbual-bual sian api na manyurbu kota i. Didok halahi, "Nada adong jungada kota na asing songon kota na godang on!" ¹⁹ Dung i disampakkon halahi ma abuan tu ulu ni halahi di na pio-pio, tangis jana mangandungi halahi, ninna halahi ma, "Marjaya, marjaya ma kota na godang i, angke markite-hite sinadongannia gabe mamora sude angka nampuna kapal di laut! Di bagasan sajom do ia abis!" ²⁰ Marjop ni roha ma hara ni ia, ale banua ginjang, dohot hamu halak na badia, angka rasul dohot angka panurirang, harana madung diuhumi Debata ia hara ni pambaenannia maradopkon hamu! ²¹ Dung salpu i, ro ma sada surusuruan na gogo, diangkat ia ma sada batu -- sagodang ni batu panggilingan -- diambungkon ia ma i tu laut jana didok ia ma, "Songon on ma gogona baenon mangambungkon kota Babel na tarbonggal i lopus nada dapot be mangulahi. ²² Nada habegean be sian ho sora ni musik ni parhasapi, dohot angka parende, sian parsuling dohot sian pangombus sarune! Sahalak pe nada dapot be halak na malo disi jana sora ni batu panggilingan pe nada adong be habegean. ²³ Dung i nada be manyondangi sinondang ni palito di bagasan ho, nada tarbege be sora ni bayo pangoli, bagi sora ni boru na nioli di bagasan ho, dibaen angka halak na godang do na jolo angka parjagalmi, jana markite-hite hadatuonmu madung lilu sude bangso." ²⁴ Jana di bagasanna adong do mudar ni angka panurirang dohot angka halak na badia dohot mudar ni sude halak na nibunu di tano on.

¹ Dung i hubege ma sora na gogo sian halak na ribur, na marsurahi sian banua ginjang, mandok, "Haleluya! Haluaan dohot hasangapan dohot hagogoan ma di Debatanta. ² Dibaen na sintong jana na tigor do angka uhumNia, angke diuhumi Ia do panggampang godang i, na manyegohon tano on markite-hite panggampangonnia i, jana Ia do na mambaloskon mudar ni angka naposoNia tu panggampang i." ³ Dung i didok halahi ma na padua nolihon, "Haleluya! Olo, martimbual ma timusna salolot ni lolotna." ⁴ Jadi gabe manungkap ma pamimpin sidua pulu opat halak i dohot mahluk siopat-opat na humaliang habangsa i jana marsomba ma halahi tu Debata na juguk di habangsa i. Ninna halahi ma, "Amen! Haleluya!" ⁵ Jadi tarbege ma sian habangsa i hata na mandok, "Puji ma Debatanta, ale hamu angka naposoNia, hamu angka na mabiar mida Ia, bope na menek, bope na magodang!" ⁶ Dung i hubege do songon sora ni jolma na bahat situtu; songon sora ni aek na godang dohot songon sora ni ronggur na gogo na mandok, "Haleluya! Harana Tuhan Debatanta Parkuaso Na Sumurung i madung gabe Raja. ⁷ Beta ma marjop ni roha hita jana marmoga-moga; jana tapasangap ma Ia! Angke madung dapot arina marbagas Anak Ni Biri-biri i jana boru i pe madung singkop na giot marbagas i. ⁸ Madung dilehen abit linen na alus na marnyala na bontar jana na ias di angka halak na badia." ⁹ Dung i didok ia ma tu au, "Suratkon ma on: ’Martua do sanga ise halak na dung niontang tu pesta parbagason ni Anak Ni Biri-biri i.’ " Dung i didok surusuruan i muse dope tambana, "On ma angka hata na sintong na sian Debata." ¹⁰ Tungkap ma au di jolo ni surusuruan i giot marsomba tusia, tapi ning ia ma mandok tu au, "Ulang! Ulang pola marsomba ho tu au, Debata ma somba! Harana au pe laing naposo do songon ho jana sarupa dohot angka donganmu na marhasaksian taringot tu Jesus." Somba ma Debata, angke anggo hasaksian taringot tu Jesus, i ma tondi hasurirangon. ¹¹ Dung i huida ma mungkap banua ginjang, haruar ma sada kudo na bontar, jana na juguk di ginjangna i margoar, "Na Setia dohot Na Sintong," jana markite-hite hatigoran do Ia manguhumi dohot marporang. ¹² Songon jilam ni api do mataNa jana bahat do tuku dipake Ia di uluNia i. Adong do sada goar na niuhir di diriNia; jana hum Ia sajo do na umboto astuan ni goar i. ¹³ Jana niabitan do Ia dohot abit na nironjomkon tu bagasan mudar, jana nidok ma goarNia, "Hata ni Debata." ¹⁴ Diihutkon angka parangan na sian banua ginjang ma Ia, rap markudo na bontar jana marpakean linen na bontar saksak. ¹⁵ Ruar ma sian pamanganNia i sada podang na tajom, jana podang i ma baenonNia manaluhon angka bangso jana parentaonNia ma halahi dohot tungkot bosi. PoroonNia ma anggur di panggilingan ni anggur haririmas ni Debata Parkuaso Na Sumurung i. ¹⁶ Tarsurat do di baju jubaNia dohot di hae-haeNia i goar on, "Raja ni sasude raja jana Tuan ni sude tuan." ¹⁷ Dung i huida ma sahalak surusuruan jongjong di ginjang ni mataniari. Marsurak ma ia gogo tu sude unggas na habang di awang-awang, "Beta ma marlagut anso tatopot pesta godang na nipatupa ni Debata! ¹⁸ Pangan hamu ma juhut ni angka raja, juhut ni angka panglima dohot juhut ni angka na gogo, juhut ni na manengget kudo dohot juhut ni angka kudona i dohot juhut ni sude jolma manusia na menek bope na magodang, hatoban sanga na mardeka!" ¹⁹ Dung i huida ma binatang i, dohot angka raja ni tano on bope parangan ni halahi marlagut laho marporang mangalo na Manengget kudo na bontar i dohot paranganNia. ²⁰ Gabe tartangkup ma binatang i rap dohot panurirang pargabus na pabaen-baen angka tanda hahomangan di jolo ni binatang i. (Angka tanda hahomangan i do dibaen binatang i paoto-otohon angka jolma na mamake tanda ni binatang i dohot angka jolma na manyomba patung ni binatang i.) Jadi didanggurkon ma binatang i dohot panurirang pargabus i mangolu-ngolu tu bagasan laut api na gara-gara dohot barerang. ²¹ Jana hona bunu ma angka na asing na tinggal dope dibaen podang na ruar sian pamangan ni na Manengget kudo na bontar i. Jadi marroan ma angka unggas, dipapangani ma juhut ni halahi na hona bunu i.

¹ Dung i huida ma sahalak surusuruan mijur sian banua ginjang. Ditangannia tiop dibaen ia kunci ni rura hamatean dohot sada rante na godang. ² Dung i ditangkup ia ma naga, ulok na tobang i -- i ma Sibolis dohot Setan i -- jana dirante ia ma i saribu taon honokna. ³ Dung i diambungkon surusuruan i ma naga i tu rura hamatean, dikunci ia ma rura i jana dicap ia anso ulang tarbaen naga i be paoto-otohon angka bangso salolot so abis na saribu taon i. Dung salpu i, paluaon dope ia santongkin. ⁴ Dung i huida ma angka habangsa dohot angka halak na juguk di habangsa i; dilehen ma kuaso tu halahi laho mandabu uhuman. Huida muse dope angka tondi ni halak na hona ponggol uluna hara ni hasaksian taringot tu Jesus dohot hara ni hata ni Debata. Halak on ma na so jungada ra manyomba binatang i bope patungna i. Tanda ni binatang i pe nada jungada dijagit halahi di bohi sanga pe di tangan ni halahi. Gabe mangolu ma halahi mangulahi jana mamarenta ma halahi songon raja rap dohot Kristus di na saribu taon i. ⁵ On ma na parjolo dipangolu mangulahi angka halak na mate. (Tapi angka halak na mate na asing i nada dipangolu anggo di na saribu taon i.) ⁶ Martua jana na badia do, na taruli di hangongot na parjolo i. Nada markuaso be hamatean na paduahon i tu halahi. Gabe angka malim ni Debata ma halahi dohot malim ni Kristus; jana mamarenta ma halahi rap dohot Ia saribu taon honokna. ⁷ Dung salpu hatiha sisaribu taon i, paluaon ma Sibolis i sian hurunganna i, ⁸ jana kehe ma i giot paoto-otohon angka bangso na marserak di sude portibi on, i ma si Gog dohot si Magog. Nada taretong sanga na sadia bahat ni halahi na giot palaguton ni Sibolis i laho marporang. ⁹ Jadi manangkok ma halahi tu portibi on marsitopot dalanna, dihobuk halahi ma parbandaran ni angka halak na badia dohot kota na nihaholongan ni Debata. Hape mijur ma api sian langit mangabisi halahi. ¹⁰ Dung i didanggurkon ma Sibolis na paoto-otohon halahi i tu bagasan api na marcampur dohot barerang. Disi do inganan ni binatang i dohot panurirang pargabus na nibuang najolo i. Diparkanciti ma halahi disi arian na borngin nada marnamantak ro di salolot-lolotna. ¹¹ Dung i huida ma sada habangsa na godang, jana na bontar. Huida muse do Ia na juguk di habangsa i. Mago ma langit dohot tano sian joloNia lopus nada haidaan. ¹² Jana huida ma angka halak na mate, na menek dohot na magodang rap jongjong di jolo ni habangsa i. Dibuka ma dohot angka buku, dung i dibuka muse ma sada buku na asing, i ma buku hangoluan. Jana di hatiha i ma didabu uhuman tu angka halak na dung mate, satongtang tu pambaenan ni halahi di hatiha na salpu marguru tu na tarsurat di bagasan angka buku i. ¹³ Dung i dilehen laut i ma angka halak na mate na adong di bagasanna, bope hamatean i, bope harajaan banua toru mangalehen angka halak na mate na adong di bagasanna, jana diuhumi ma halahi hombar tu pambaenanna be. ¹⁴ Dung i didanggurkon ma hamatean dohot harajaan banua toru i tu bagasan laut api. (Laut api on ma hamatean na paduahon.) ¹⁵ Sanga ise halak na so adong goarna tarsurat di bagasan buku hangoluan i, diambungkon ma tu bagasan laut api i.

¹ Jadi huida ma sada langit na imbaru dohot tano na imbaru. Mago ma langit na parjolo dohot tano na parjolo i jana laut pe, mago ma. ² Gabe huida ma Kota Na Badia i, i ma Jerusalem na imbaru, na mijur sian banua ginjang sian Debata. Madung jolo nihobasan kota i songon boru na giot marbagas laho mandapotkon halaklahina. ³ Dung i hubege ma sada sora na gogo sian habangsa i mandok, "Ligi ma, bandar ni Debata adong di tonga-tonga ni jolma, jana maringanan ma Ia di tonga-tonga ni halahi. Gabe Ia noma Debata ni halahi, jana halahi ma gabe bangsoNia. ⁴ ApusanNia ma sasude ilu sian mata ni halahi. Nada adong be anggo hamatean; hamarsahan, partangisan sanga parkancitan pe nada adong be. Madung salpu angka pangalaho na honok i." ⁵ Didok na juguk na di ginjang ni habangsa i ma, "Ligi ma, Hupaimbaru do sasudena!" Jana mangkuling ma Ia muse, "Suratkon ma, angke na tutu jana na sintong do sude hata on." ⁶ Dung i didok Ia ma tu au, "Sasudena i madung tarjadi, Au do Na Parjolo dohot Na Parpudi, Bonana dohot Ujungna. Halak na manguas Hulehen do minum sian mual hangoluan i. ⁷ Sanga ise halak na monang, jagitonnia ma sudena on sian Au. Au ma gabe Debatana jana ia ma gabe anakKu. ⁸ Tapi anggo angka parbiar, angka na so tontu, angka na so ture, sibunu jolma, angka na rogon, angka pardatu-datu, angka na manyomba gana-ganaan dohot sudena pargabus, laut api do inganan ni halahi dohot barerang na gara-gara, i ma hamatean na paduahon i." ⁹ Ro ma tu au sahalak sian surusuruan na pitu i na maniop angka sambong na bubung marisi bala na parpudi i, ning ia ma tu au, "Beta anso hupatidahon tu ho dadaboru ni Anak Ni Biribiri i, i ma boru sipabagason i." ¹⁰ Jadi digohi Tondi Parbadia ma au, jana dioban surusuruan i ma au tu puncut ni dolok na lobi gincat. Dipatidahon ia ma tu au Jerusalem, Kota Na Badia i. Na mijur do huta i sian banua ginjang, sian Debata ¹¹ mardongan hasangapan dohot hagodangan ni Debata. Marsilo-silo do kota i idaon songon batu simata na umjeges, songon batu simata jaspis ias songon kristal. ¹² Godang jana gincat do tiangna i, marhorbangan dua bolas jana dijagoi dua bolas halak surusuruan. Tarsurat do di angka pintu ni horbangan i goar ni marga ni halak Israel na dua bolas i. ¹³ Tolu pintu horbangan na mangadop tu ganop arah; tolu adop Habincaran, tolu adop Selatan, tolu adop Utara jana tolu sabola Hasundutan. ¹⁴ Di ginjang ni dua bolas batu ojahan do dipajongjong tembok ni kota i. Tarsurat do angka goar ni rasul ni Anak Ni Biri-biri i, i ma sidua bolas halak i di angka batu ojahan i. ¹⁵ Adong do di tangan ni surusuruan donganku mangkobari i sada tungkot sere baen suhat-suhat laho mangukur kota i, marsuhat horbanganna dohot tembokna i. ¹⁶ Maropat suhi do kota i -- sarupa ginjangna dohot bidangna. Jadi disuhat surusuruan i ma kota i dohot tungkot parsuhat i; dapot ma ginjangna 2415 kilometer; bidangna dohot gincatna sarupa tu ginjangna i. ¹⁷ Dompak na marsuhat tembokna i surusuruan i, dapot ma gincatna 60 meter. Suhat-suhat ni jolma do na nipake ni surusuruan i. ¹⁸ Sian batu intan jaspis do dibaen tembok ni kota i, jana kota i sandiri sian sere na polin do dibaen, lan songon sormin na tiur. ¹⁹ Di angka batu ojahan ni kota i dipambaeni do sude rupa-rupa ni batu intan. Batu ojahan na parjolo dibaen do sian batu intan jaspis, na paduahon sian batu nilam, patoluhon sian batu jakut, paopatkon sian batu zamrud, ²⁰ palimahon sian batu intan sardonik, paonomkon sian batu intan sardes, na papituhon sian batu intan krisolit, pasalapankon sian batu beril, pasambilankon sian batu intan topas, pasampuluhon sian batu intan krisopras, pasabolaskon sian batu intan hiasin, na padua bolaskon sian batu intan ametis. ²¹ Mutiara do horbangan na dua bolas i, ganop pintu sada mutiara ma i. Dalan godang na di kota i, sian sere na polin do dibaen, lan songon kaco na ias. ²² Nada huida Bagas Na Badia di bagasan kota i, angke Tuhan Debata Parkuaso Na Sumurung i sandiri do Bagas Na Badia, songon i muse Anak Ni Biri-biri i. ²³ Nada pola porlu sondangan ni mataniari sanga bulan kota i, angke sinondang ni Debata do manyondangisa jana Anak Ni Biri-biri i ma lampuna. ²⁴ Jadi mardalani di sinondang i noma angka bangso, jana angka raja na ditano on marsiboan hamoraonna ma tuSia. ²⁵ Jana angka pintu horbangan ni kota i nada ditutup be arian, harana nada adong be disi borngin. ²⁶ Obanon ma sude hasangapan dohot hamoraon ni angka bangso tu bagasan kota i. ²⁷ Tapi sanga ise halak na mangkarejohon angka pangalaho sihailahononkon, dohot angka pargabus, nada dipatola masuk tu bagasan -- pendekna sandok na hodar, nada tola dioban masuk tu bagasan. Anggo na dipatola masuk tu bagasan, hum angka halak na tarsurat do goarna di bagasan buku hangoluan ni Anak Ni Biri-biri i.

¹ Dipatidahon surusuruan i muse dope tu au batang aek na lan sajo songon kristal jana mangalehen ngolu do aekna i. Sian habangsa ni Debata do mardalan batang aek i dohot sian Anak Ni Biri-biri i, ² torus ma i tu angka dalan godang na di kota i. Ditopi ni batang aek i paipar-ipar adong ma bona ni hayu haroroan ni hangoluan, na marbatu ganop taon dua bolas noli, i ma sanoli sabulan. Bulungna i, dibaen do laho pamalumkon angka bangso. ³ Jadi nada adong be disi na niburaan, angke habangsa ni Debata dohot Anak Ni Biri-biri i do di bagasan kota i, jana angka naposoNia mangoloi noma tuSia, ⁴ jana ligion ni halahi ma bohiNa i. Suratkonon ma goar ni Debata di bohi ni halahi. ⁵ Nada porlu be di halahi lampu sanga sinondang ni mataniari, angke nada adong be ro borngin disi boti hara ni na nisondangan ni Tuhan Debata do halahi. Gabe mamarenta ma halahi songon raja ro di salolot-lolotna. ⁶ Jadi didok surusuruan i ma tu au, "Tutu do sude pandohan on jana sihaposan, Tuhan Debata na mangalehen TondiNia tu angka panurirang i, i do na marsuru surusuruanNia laho patuduhon tu angka naposoNia sanga aha na angkon masa santongkin nari." ⁷ "Ligi ma! Tibu do au ro! Martua ma sanga ise halak na marmomos angka sipaingot sian hasurirangon na di bagasan buku on!" ⁸ Au si Johannes, madung hubege jana huida i sudena. Dung sidung hubege jana huida, tungkap ma au di jolo ni surusuruan na patidahon sasudena i tu au, giot marsomba ma nian au tusia, ⁹ hape ning ia ma tu au, "Ulang! Ulang ho marsomba tu au! Debata ma somba! Angke laing naposo muse do au sarupa dohot ho, dohot songon angka donganmu panurirang dohot sudena halak na marmomos angka hata na di bagasan buku on!" ¹⁰ Dung i ning ia ma mangulahi, "Ulang rahasiahon angka sipaingot na sian hasurirangon na di bagasan buku on, angke dapot ma hatihana anso tarjadi sudena on. ¹¹ Barang ise na mambaen hageduhan, dipupu ia ma mambaen hageduhan i, jana barang ise na hodar dipahodar ia ma dirina; dung i barang ise na tigor roha, dipupu ia ma mambaen hatigoran, jana barang ise na badia, diparbadiai ia ma dirina." ¹² "Ligi ma! Ro ma Au maroban upa laho mamaloskon tu ganop halak hombar tu pambaenanna. ¹³ Au do Alpa dohot Omega, Na Parjolo dohot Na Parpudi, Bonana dohot Ujungna." ¹⁴ Martua do sanga ise halak na paiaskon baju jubana lopus ias. Halahi do na tola mangankon batu ni hayu hangoluan dohot na tola mandalani masuk tu kota i sian harbanganna i. ¹⁵ Tapi sanga ise halak na mambaen habilean, angka na marhadatuon, angka halak na mambaen rorang, angka halak sibunu jolma, angka halak na marsomba gana-ganaan, dohot angka halak pargabus di hatana sanga markite-hite pambaenanna, di balian ni kota i do anggo inganan ni angka halak sisongon i. ¹⁶ "Au, Jesus, madung Hutongos surusuruanKu tu hamunu anso dipaboa ia taringot tu pangalaho on laho manyarihon angka parlagutan i. Pomparan ni si Daud do Au; Au ma bintang sidongdong na torang i." ¹⁷ Didok Tondi i dohot Boru Oroan i ma, "Beta ma!" Jana ganop halak na umbege on angkon laing dohot ma mandok, "Beta ma!" Sanga ise na manguas, ro ma ia! Jana sanga ise na marpor ni roha, dibuat ma aek na mangalehen hangoluan i so pola mangalehen bagi aha panggararna! ¹⁸ Ganop na umbege angka hata sian halumbaan na di bagasan buku on, au si Johannes hupaingotkon songon on: Sanga ise na manambai sanga aha tu angka hata na sian halumbaan on, tambaan ni Debata ma uhuman tu halakna i dohot angka bala na nigambarkon di bagasan buku on. ¹⁹ Jana sanga ise na mangurahi sanga aha sian angka sipaingot na sian halumbaan on, buaton ni Debata ma bagiannia sian hayu hangoluan dohot sian Kota Na Badia, songon na tarsurat di bagasan buku on. ²⁰ Didok na manyaksihon sudena on do, "Olo, tibu ma Au ro!" Amen! Ro ma Ho, ale Tuhan Jesus! ²¹ Asi ni roha ni Tuhan Jesus ma na mandongani hamu sudena! Amen.