MARKUS

MARKUS

¹ Songon on do Jamita Na Denggan taringot tu Jesus Kristus, Anak Ni Debata. ² Na mamungka do Jamita Na Denggan i songon na nisuratkon ni Panurirang Jesaya na mandok: "Ligi ma, Husuru do suruanKu manjoloi Ho, paradeonnia ma dalan di Ho. ³ Adong ma halak na pio-pio di halongonan, ’Pauli hamu ma dalan di Tuhan. Pahornop hamu ma dalan na giot sibolusonNia.’ " ⁴ Songon na tarsurat i, laing songon i ma haidaan si Johannes di halongonan i. Dididihon ia do halak jana dipabolkas ia ma jamita na sian Debata. "Pauba hamu ma rohamunu sian angka dosamunu, dung i angkon nipandidihon do hamu anso diampuni Debata dosamunu," ning si Johannes. ⁵ Markehean ma halak sian Judea dohot sian Jerusalem laho manangihon si Johannes. Dioku halahi ma dosa ni halahi, dung i dididihon si Johannes ma halahi di Batang aek Jordan. ⁶ Sian imbulu ni unto do pakean na nipake ni si Johannes. Bobak do bobatnia. Siapor dohot aer ni loba do panganonnia. ⁷ Dibaritahon ia ma songon on, "Saulahon dung salpu au, ro ma Sahalak na gumodang sian au. Hum unduk pe dijoloNia laho mangkarhari tali ni sipatuNia inda tumbuk dope au. ⁸ Aek do hupake mandidi hamu, tapi anggo Ia didionNia ma hamu dohot Tondi Parbadia." ⁹ Jadi ro ma hatiha i Jesus sian Nasaret na di Luat Galilea, dung i dididi si Johannes ma Ia di Batang aek Jordan. ¹⁰ Disi haruar Jesus sian batang aek i, diida Ia ma mungkap langit i. Dung i mijur ma Tondi Parbadia tuSia songon sada darapati. ¹¹ Dung i tarbege ma sada sora sian langit mandok, "Ho do Anak haholongan ni rohangKu. Tu Ho ma Jop ni rohangKu." ¹² Dung i torus ma dioban Tondi i Jesus kehe tu halongonan. ¹³ Opat pulu ari ma Ia disi, diuji Sibolis i. Angka binatang riar pe adong do na rap dohot Ia disi, jana ro do angka surusuruan mangoloi Ia. ¹⁴ Dung tarhurung si Johannes, kehe ma Jesus tu Galilea. Dijamitahon Ia ma disi Jamita Na Denggan na sian Debata. ¹⁵ Ning Ia ma, "Ma dapot hatihana, pungkaon ni Debata ma padalankon pangarajaionNia. Pauba hamu ma rohamunu sian angka dosamunu. Haporsayai hamu ma Jamita Na Denggan na sian Debata!" ¹⁶ Jadi dompak mardalan Jesus manopi-nopi Dano Galilea, diida Ia ma dua halak parihan, i ma si Simon dohot anggina si Andreas. Topet do halahi manjala ihan di dano i. ¹⁷ Didok Jesus ma tu halahi, "Ihutkon ma Au! Anso Hubaen hamu sipanjala jolma." ¹⁸ Jadi, torus ditinggalkon halahi ma jala ni halahi i, kehe mangihutkon Jesus. ¹⁹ Dung mardalan Jesus saotik nari, diida Ia ma si Jakobus, anak ni si Zebedeus dohot anggina si Johannes, hatiha mambubuli jala ni halahi di parau i. ²⁰ Manigor dipio Jesus ma halahi, jadi ditinggalkon halahi ma si Zebedeus ama ni halahi rap dohot halak na diupaan i, dung i diihutkon halahi ma Ia. ²¹ Dung i lalu ma halahi tu kota Kapernaum. Di Ari Sabatna i, masuk ma Jesus tu bagas paribadatan jana mamungka ma Ia mangajari. ²² Homang-homang ma halak na manangihon pangajarNia i. Marsahala idaon Ia na mangajar i. Inda songon angka Siboto Surat i. ²³ Jadi hatiha i ro ma sahalak na nisonggopan ni tondi na jahat masuk tu bagas paribadatan i. Marsurak ma ia, ²⁴ "Na giot mambaen bia do Ho tu hami, o Jesus halak Nasaret? Betak na giot mamatehon hami do Ho? Hutanda do sanga ise Ho: Suruan na badia ni Debata do Ho!" ²⁵ Disonggakkon Jesus ma tondi i. Ninna Jesus ma, "Sip, morot ho sian ia!" ²⁶ Diparambalkon tondi na jahat i ma na marnyae i gogo-gogo, dung i haruar ma ia sian i huhut marsurak. ²⁷ Homang ma roha ni halahi sude jabat marsipandohonan halahi sama halahi, "Aha dehe na masa on? Pangajaran na imbaru do on! Marsahala do Ia jana margogo paorot angka tondi na jahat, jana mangoloi do tuSia!" ²⁸ Gabe manigor tarbonggal ma barita taringot tuSia tu sude Luat Galilea. ²⁹ Kehe ma Jesus dohot angka anak siseanNia i, torus ma halahi tu bagas ni si Simon dohot si Andreas. Dohot do si Jakobus dohot si Johannes rap dohot halahi. ³⁰ Topet do hatiha marun di podoman nantulang ni si Simon. Jadi dung masuk Jesus dohot angka anak siseanNia tu bagas i, dipaboa ma tu Jesus taringot tu na marun i. ³¹ Didapotkon Jesus ma nantulang ni si Simon i. Ditogu Ia ma tanganna i laho mangurupi jongjong. Mago ma arun i, ia pe markobas ma paturehon panganan ni halahi. ³² Potang arina i dung lusut mataniari, diparobani halak ma tu Jesus sude halak na marnyae dohot angka na hona setan. ³³ Marrongoman ma na sakota i di jolo ni bagas i. ³⁴ Gabe dipamalum Jesus ma disi marragam-ragam nyae, dipaorot Ia ma angka setan. Umpe dipatola Ia mandok hata setan i. Harana ditanda angka setan i do Ia. ³⁵ Ancogotna i taran golap dope ari, ngot ma Jesus. Kehe ma Ia tu balian tu inganan na lungun. Martangiang ma Ia disi. ³⁶ Gabe dijalak-jalahi si Simon dohot angka donganna ma Ia. ³⁷ Dung marsuo halahi dohot Ia didok halahi ma, "Ma sude halak manjalahi Guru i." ³⁸ Tapi dialusi Jesus ma, "Beta ma tatoruskon pardalananta tu angka kota na humaliang on. Harana, tusi pe angkon jamitahononKu do Jamita Na Denggan i, na sian Debata. Angke hara ni i do umbaen na ro Au." ³⁹ Gabe diebati Jesus ma sude Galilea. Dipararat Ia ma Jamita Na Denggan i di angka bagas paribadatan jana mangusir angka begu. ⁴⁰ Dung i ro ma sahalak na puruon tu Jesus, tungkap ma ia di joloNia mangido, jana didokkon ia ma, "Muda ra Guru i, tarbaen Guru i do pamalum au." ⁴¹ Ibo ma roha ni Jesus mida bayo i. Gabe dipahortang Ia ma tanganNia manjamasa. Didok Ia ma, "Ra do Au. Antong malum ma ho!" ⁴² Manigor mago ma nyaenia i, malum ma dihilala ia. ⁴³ Dung i disuru Jesus ma mulak bayo i dung jolo digogohon Ia, ⁴⁴ "Bagi na bia pe nada tola paboaonmu pangalaho on sanga na tu ise pe. Torus tu malim ma ho kehe, pangido ma anso dipareso ia ho. Jadi dung dipareso ia ho, lehen ma haulmu tu Debata mangihutkon sapanjang aturan na nipasahat ni si Musa. I ma tandana na dung malum ho." ⁴⁵ Jadi kehe ma bayo i. Tapi dipupu ia ma na paboa-boahon barita i tu jae tu julu, gabe nada tarbaen Jesus be torang masuk tu kota i. Di balian noma Ia di inganan na lungun-lungun i. Tapi haru songon i pe, laing marroan do halak mandapotkon Ia sanga na sian dia i.

¹ Dung adong piga-piga ari, mangulahi ma Jesus tu Kapernaum. Tarboto ma tu halak hape na dung di bagasan bagas do Ia. ² Marroan ma bahat halak. Marrongoman halahi sude disi lopus gabe so adong be na hasiatan. Lalu tu pintu i pe sompit sude halak. Dung i dipabolkas Jesus ma tu halahi barita na sian Debata. ³ Hatiha mangkobari Jesus, ro ma opat halak tuSia maroban sada halak na onyangon. ⁴ Tapi hara ni bahat ni jolma i, gabe nada tarbaen siopat halak i be maroban na onyangon i donok tu Jesus. Jadi, dibungkar halahi ma tarup ni bagas i di ginjang ni juguhan ni Jesus. Dung i, ditantan halahi ma na onyangon i, di lagena i. ⁵ Dung diida Jesus marsitutu do haporsayaan ni halahi, didok Ia ma tu na onyangon i, "Ale anakKu, madung sesa sude dosami!" ⁶ Jadi adong ma sanga piga-piga halak angka Siboto Surat na topet juguk disi. Mulai ma halahi marpikir-pikir di bagasan roha ni halahi, ⁷ "Na puluk ma antong bayo on mangincahi Debata songon i! Ise ma he na tarbaen manyesa dosa, anggo so Debata sandiri?" ning roha ni halahi. ⁸ Manigor diboto Jesus do pikiran ni halahi i. Didok Ia ma tu halahi, "Biasi songon i pikiranmunu? ⁹ Dia do gumonan mandok tu na onyangon on, ’Madung disesa sude dosamu’ sanga mandok, ’Jongjong ma ho, oban lagemi, mardalan ho?’ ¹⁰ Anso Hupatidahon di hamu bahaso na markuaso do Anak Ni Jolma i, laho manyesa dosa di ginjang tano on." Didok Jesus ma tu na onyangon i, ¹¹ "Au mandok tu ho, jongjong ma ho, oban ma lagemi, mulak ma ho!" ¹² Di jolo ni halak na bahat i, jongjong ma manigor halak na onyangon i, dioban ia lagenia i kehe ma ia mardalan. Homang-homang ma sude halak na disi i, dipuji halahi ma Debata. Didok halahi ma, "Inda unjung dope hami ida tarjadi na songon on!" ¹³ Mangulahi ma Jesus tu topi ni Dano Galilea. Marroan ma bahat halak mandapotkon Ia. Diajari Ia ma halahi. ¹⁴ Hatiha na mardalan i Ia disi, tarpaida Ia ma sahalak sipanjagit pajak na margoar si Levi anak ni si Alfeus. Topet do hatiha juguk si Levi di kantornia. Didok Jesus ma tusia, "Ihutkon ma Au!" Jongjong ma ia, gabe diihutkon Jesus. ¹⁵ Dung i dijamu si Levi ma Jesus di bagasnia. Bahat do angka sipanjagit pajak dohot angka jolma na so ture dietong roha ni halak, na rap dohot Jesus di hatiha i. Bahat sian halahi na mangan rap dohot Jesus dohot angka anak siseanNia i. ¹⁶ Jadi adong ma deba angka Siboto Surat na sian halak Parise na marnida Jesus, hatiha na mangan i Ia rap dohot angka sipanjagit pajak i songon i dohot halak na so ture i. Jadi disapai halahi ma angka anak siseanNia i, "Biasi mangan Jesus rap dohot angka sipanjagit pajak dohot angka halak na so ture?" ¹⁷ Dibege Jesus do sapa-sapa ni halahi i. Gabe dialusi Ia ma, "So na porlu doktor di halak na torkis. Hum di halak na marnyae do i. Ro pe Au, nada bagi na giot mamiohon angka halak na burju, tapi mamiohon halak pardosa do," ning Ia. ¹⁸ Di sada hatiha topet puaso angka anak sisean ni si Johannes Pandidi dohot halak Parise. Jadi adong ma halak na ro tu Jesus manyapai, "Biasi puaso angka anak sisean ni si Johannes Pandidi dohot angka na mangihutkon halak Parise? Hape anggo angka anak siseanMu inda puaso?" ¹⁹ Dialusi Jesus ma, "Tarbaen dehe na so mangan angka tamu di pesta parbagason? Sapanjang rap bayo pangoli i dohot halahi, tontu mangan halahi. ²⁰ Tapi adong do hatihana dibuat bayo pangoli i sian halahi. Anggo i, baru ma nada mangan be halahi. ²¹ Nada adong halak mambaen abit na imbaru gabe pandungkap tu abit na buruk. Muda songon i dibaen ia, sibakkonon ni pandungkap na imbaru i do abit na buruk i. Mur bidang ma parsibakna i. ²² Laing songon i muse do, nada diusehon halak anggur na imbaru tu inganan na buruk. Muda dibaen songon i, puntarkonon ni anggur i do ingananna i. Ujungna gabe dua-dua rap so marguna. Anggo anggur na imbaru angkon tu inganan ni anggur na imbaru do baenon." ²³ Di na sanoli topet Ari Sabat, mamolus ma Jesus di kobun ni halak. Jadi hatiha na mardalan i Ia, digotili angka anak siseanNia na dohot i ma burir ni gandum i. ²⁴ Gabe didok halak Parise ma tuSia, "Ligi ma! Biasi dilanggar angka anak siseanMi Tona ni ugamonta? Dipambaeni halahi do na so tola baenon di Ari Sabat!" ²⁵ - ²⁶ Dialusi Jesus ma, "Na so jungada do disise hamu na nibaen ni si Daud, di hatiha ni si Abyatar gabe Malim Godang. Di na male ia rap dohot parangannia i taran so adong panganon ni halahi. Masuk do ia tu Bagas Ni Debata, dipangankon ia ma roti na dung dihaulkon tu Debata, dilehen ia muse dope di parangannia i. Hape mangihutkon ugamonta, hum malim do na tola mangankon roti i." ²⁷ Didok Jesus dope muse, "Dibaen pe Ari Sabat i, na porlu di jolma do i. Nada jolma i dibaen porlu di Ari Sabat. ²⁸ Antong, markuaso do Anak Ni Jolma i di ginjang ni Ari Sabat."

¹ Dung i kehe ma Jesus mangulahi tu bagas paribadatan. Adong ma disi sahalak na mate tanganna sabariba. ² Topet muse adong disi halak na giot manjalahi hasalaan ni Jesus, anso taraduhon halahi Ia. Jadi torus ma sai diparate-atehon halahi Jesus sanga na ra do Ia pamalumkon hatiha Ari Sabat. ³ Didok Jesus ma tu na mate i tanganna sabariba, "Di tonga-tonga on ma ho jongjong." ⁴ Jadi disapai Ia ma angka halak na disi i, "Mangihutkon ugamonta, aha do na tola baenonta di Ari Sabat? Mambaen na denggan do sanga mambaen na jahat? Manolong halak do sanga mangago halak?" Tapi sip sajo do halahi. ⁵ Marsak ma Jesus hara ni pir ni roha ni halahi. Jadi muruk ma Jesus marnida halahi na humaliang i, didok Ia ma tu bayo i, "Pahortang ma tanganmi!" Dipahortang ia ma tangannia i dung i gabe malum ma. ⁶ Marmorotan ma angka halak Parise i, ditinggalkon halahi ma bagas paribadatan i. Manigor marpokat ma halahi dohot angka halak na saroha dohot si Herodes laho mamunu Jesus. ⁷ Mandao ma Jesus dohot angka anak siseanNia tu Dano Galilea. Tapi bahat sajo do halak sian Galilea na kehe mangihutkon Jesus. ⁸ Bahat muse do na ro sian Judea, sian Jerusalem, sian Luat Idumea dohot angka na sian ipar ni Batang aek Jordan dohot sian kota Tirus dohot Sidon. Marroan ma halahi tu Jesus hara ni na dung dibege halahi sude taringot tu angka pambaenanNia. ⁹ Hara ni bahat ni jolma i, gabe disuru Jesus ma angka anak siseanNia paradehon parau diSia, anso ulang mur disosak halak na bahat i Ia. ¹⁰ Ma songon i bahatna dipamalum Ia halak, jana sanga ise na adong nyaena marsiadu ma laho manjama Ia. ¹¹ Angka halak na hona setan pe muda marsuo dohot Ia, angkon manigor manungkap marsomba-somba di joloNia mangangguhi, "Anak Ni Debata do Ho!" ninna be. ¹² Tapi dipaksa Jesus do anso ulang dipaboa-boa tu halak, sanga ise Ia. ¹³ Dung i manangkok ma Jesus tu sada dolok, dipiohon Ia ma sanga ise na giot sipioonNia. Marroan ma halahi, ¹⁴ dipili Ia ma dua bolas halak sian halahi. Digoari Ia ma halahi angka rasul, "Au do mamili hamu, anso rap hamu dohot Au." Songon i ma pandok ni Jesus tu halahi. "SuruonKu ma hamu laho paboahon Jamita Na Denggan na sian Debata, ¹⁵ jana dapotan kuaso ma hamu laho mangusir angka setan." ¹⁶ Angka on ma goar-goar ni halahi na dua bolas, na nitodo ni Jesus i: Si Simon (na nigoar ni Jesus si Petrus). ¹⁷ Si Jakobus dohot angginia si Johannes, i ma angka anak ni si Zebedeus. (Digoari Jesus do halahi na dua na markaha-maranggi on, Boanerges. Boanerges astuanna "halak na songon ronggur".) ¹⁸ Si Andreas, si Pilipus, si Bartolomeus, si Mateus, si Tomas, si Jakobus anak ni si Alfeus, si Tadeus, si Simon sian Kana, ¹⁹ dohot si Judas Iskariot na manjehehon Jesus. ²⁰ Dung i masuk ma Jesus tu sada bagas. Tapi laing marlagut dope halak na bahat i, jabat inda sanga mangan Jesus rap dohot angka anak siseanNia i. ²¹ Jadi tarbege ma tu sisolkotNia na masa i, gabe ro ma halahi laho mangalap Ia. Harana didok halahi, "Ma rintik Ia!" ²² Didok angka Siboto Surat na sian Jerusalem i ma, "Na susur do sibolis tuSia!" Adong muse na mandok, "Kapala ni setan i do na mangalehen kuaso tuSia laho mangusir setan i." ²³ Dung i dipiohon Jesus ma halak na bahat i, dicaritohon Ia ma piga-piga umpama tu halahi. "Bia ma pangusir ni Sibolis di Sibolis? ²⁴ Muda so adong hasadaon di sada harajaan, sai marbadai rayat sama rayat disi, na giot maronco ma harajaan i. ²⁵ Laing songon i muse do, muda so adong hasadaon di tonga-tonga ni na sabagas, sai marmusu na sada tu na sada nari, sego ma na sabagas i. ²⁶ Songon i muse ma di bagasan harajaan ni Sibolis i. Muda masa parbolat-bolatan dohot parbadaan disi, paboa na so pola honok be kuaso ni i. Angkon mago noma i. ²⁷ Nada tarbaen halak masuk tu bagas ni na gogo laho mangarampas sinadonganna i anggo so jolo ditambat ia na gogo i. Dung i pe, baru tarrampas ia sude sinadonganna i. ²⁸ Tutu do na Hudok on! Sude dosa na nibaen ni jolma dohot sude hata na jahat na nipardokkonan, tarsesa do i. ²⁹ Tapi anggo na mangalayasi Tondi Parbadia, bagi na bia pe, nada tarsesa i! Angke dosa na manongtong do dosa na nibaennia i." ³⁰ Hara ni na nidok ni halak do, adong tondi ni setan di bagasan Jesus umbaen na nidokNia songon i. ³¹ Dung i ro ma inang ni Jesus dohot angka kahanggiNia. Dipainte halahi ma di ruar dung disuru halahi halak na asing mamiohon Jesus. ³² Jadi topet hatiha i bahat halak na mangarongomi Jesus. Didok halahi ma tuSia, "Di ruar do inanta dohot angka angginta. Giot marsuo dohot Ho." ³³ Dialusi Jesus ma, "Ise dehe Dainang? Ise ma he lakna kahanggingKu?" ³⁴ Dung i diligi Ia ma tu angka na marjuguhan i na humaliang Ia, ning Ia ma, "On do Dainang dohot angka kahanggingKu! ³⁵ Halak na mambaen lomo ni roha ni Damang, angka i do kahanggingKu dohot ibotongKu dohot Dainang."

¹ Mangajari ma Jesus mangulahi di topi ni Dano Galilea. Na bahatan halak mangarongomi Ia. Hara ni bahat ni jolma i, kehe ma Ia juguk di bagasan sada parau na di aek i. Di topi ma marjongjongan halak na bahat i. ² Bahat do na niajarkon ni Jesus tu halahi mardongan umpama. Angka songon on ma na niajarkonNia i, ³ "Tangihon hamu ma! Adong ma sada halak na kehe manyabur same. ⁴ Jadi hatiha na manyabur i ia, adong ma same i na madabu tu topi-topi ni dalan i. Jadi marroan ma angka unggas abis ma dipapangani angka same i. ⁵ Adong muse ma same i na madabu tu tano na marbatu-batu, na so sadia tanona jana sigop sajo do tubu eme i, ⁶ tapi dung mamungka manaek mataniari, gabe malos ma suan-suanan na baru tubu i lopus mahiang. Harana, nada jabat bagas dope uratna boti hara ni na so sadia i tanona. ⁷ Adong muse ma same i na madabu tu tonga-tonga ni duri-duri. Mur magodang ma angka duri i, mur tarhapit ma same na dung tubu i gabe nada ra marbatu. ⁸ Tapi adong muse do na madabu tu tano na napu. Martubuan ma same i, lopus magodang lalu marbatu ramos. Adong na tolu pulu lompit suhana, adong na onom pulu, adong muse dope na saratus lompit." ⁹ Dung sidung dipaboa Jesus umpama i, didok Ia ma, "Sanga ise na marpinggol laho marbinege, ditangihon ia ma!" ¹⁰ Hatiha punjung Jesus, marroan ma tuSia angka na dung umbege pangajaranNia i rap dohot angka anak siseanNia i. Dipangido halahi ma anso dipatorang Ia astuan ni umpama sinangkinan i. ¹¹ Dung i didok Jesus ma tu halahi, "Anggo tu hamu madung dilehen do mangartihon simo-simo ni Harajaan Ni Debata, tapi anggo tu halak na asing sian hamu, markite-hite umpama do i nipaboa. ¹² Dibaen Debata pe songon i, anso ’Torus do bolnang halahi mangaligi, tapi umpe diidasa, torus do halahi manangihon, tapi umpe mangarti, angke sugari diida jana diastui halahi gabe ro ma halahi tu Debata dung i gabe ampunan ni Debata ma halahi.’ " ¹³ Dung i didok Jesus ma tu halahi, "Anggo inda diastui hamu be umpama sinangkin, bia muse ma pangastuimunu di angka umpama na asing? ¹⁴ Si panyabur i, i do na manyaburkon hata i. ¹⁵ Huhul mardabuan di topi-topi ni dalan do hata i, tarsongon i ma angka halak na manangihon hata i. Disi dibege halahi manigor jalop ma ro Sibolis i mambuat hata na dung nisabur i di roha ni halahi. ¹⁶ Same na nisabur tu inganan na marbatu-batu i, tarsongon i ma angka na mambege hata i, manigor sonang roha ni halahi manjagitsa. ¹⁷ Tapi nada jabat bagas dope di roha ni halahi, gabe nada tahan honok disi. Muda masa hasusaan sanga siksaan hara ni hata i, manigor marbalik ma halahi. ¹⁸ Same na madabu tu tonga ni duri-duri, i ma tarsongon halak na manangihon hata i, ¹⁹ tapi disegohon pangkilalaan na humolos ma taringot tu ngolu ni halahi. Sai giot maradong. Marragam ma hagiot na mangganggui roha ni halahi. Gabe mate ma hata i na sian Debata, inda marguna be di roha ni halahi. ²⁰ Same na nisabur di tano na napu i, i ma tarsongon angka na manangihon hata i, jana laing dijagit rohana. Tarida ma parbatuna. Adong na tolu pulu lompit, adong muse na onom pulu lompit. Jana adong ma na sampe saratus lompit suhana." ²¹ Dipaudut Jesus ma mangulahi hataNia, "Unjung dehe halak pagara lampu dung i ditutupi dohot ampang sanga dipayakkon ia di toru ni podoman? Inda he di inganan ni lampu do dipayakkon ia i? ²² Nada he paruaron do muse barang na nisimpan? Nada he angkon tarboto do muse sudena rahasia? ²³ Barang ise na marpinggol laho marbinege, ditangihon ia ma!" ²⁴ Didok Jesus dope muse. "Parrohahon hamu ma sanga aha na nibegemunu on! Muda bahat do dikarejohon hamu, laing bahat muse ma lehenon ni Debata di hamu. Lobi dope sian na nihalojahonmunu. Tapi muda otik do dikarejohon hamu, otik muse ma jagitonmunu. ²⁵ Angke, tu halak na maradong, lehenon dope disia umbahat. Tapi anggo sian halak na so mardiha-diha, hum sisaotik nari na tinggal i disia, dibuat muse dope i sian ia." ²⁶ Dipaudut Jesus ma mangulahi pangkataionNia i, "Harajaan Ni Debata, tarumpamahon do i songon sada halak na manyabur same di ladangna. ²⁷ Modom ma ia borngin, ngot ma ia arian. Jadi disi ma same i martumbur lopus magodang. Tapi sanga na tarbia partumburna dohot parsimburna magodang same i, nada diboto ia. ²⁸ Gogo ni tano i sandiri do na mambaen i tubu. Parjolo ro pusukna, dung i burirna lalu tu batuna. ²⁹ Jadi dung masak eme i, aha dope, dipungka bayo i ma manyabisa. Harana ma dapot hatihana manyabi." ³⁰ "Tar tu aha ma antong umpamahononta Harajaan Ni Debata?" ninna Jesus manyapai halahi. "Aha ma tabaen tiruan laho patorangkonsa? ³¹ Anggo Harajaan Ni Debata tarsongon batu ni sabi do i na disaburkon tu tano, i ma boni na ummenek sian sude boni na adong di tano on. ³² Dung disuan batuna i di tano, tubu ma i jana gabe gumodang sian sude suan-suanan na targoar simarata. Songon i ma rumbun ni angka dangkana i jabat marroan angka unggas jana tarbaensa marasar di toru ni angka dangkana i." ³³ Songon i ma dibaen Jesus pabolkaskon jamita na sian Debata tu angka jolma i mamake angka umpama na songon i, na mura astuan ni halak. ³⁴ Sai marumpama do Jesus muda mangajari Ia tu halak na bahat i. Tapi anggo Ia dohot angka siseanNia i sajo, dipatorang Ia do sude tu halahi. ³⁵ Laing andospotangna i didok Jesus ma tu angka anak siseanNia i, "Beta ma marparau hita tu ipar an." ³⁶ Gabe marmasuhan ma angka anak siseanNia i tu parau i angke madung parjolo Jesus masuk tu bagasan. Tinggal ma halak na bahat i di darat, di topi ni dano i. Kehe ma halahi na marparau i. Tapi laing adong do disi parau na asing. ³⁷ Nada sadia honok, ro ma haba-haba na gogo. Disosak angka ombak ma parau i, mamungka ma masuk aek tu bagasan, jabat giot gok ne ma parau i. ³⁸ Tapi anggo Jesus modom do di podoman na di buritan ni parau i. Disungguli angka anak siseanNia i ma Ia. Didok halahi ma, "O, Guru! Na so parduli be Guru i di hita? Mate ma hita on!" ³⁹ Ngot ma Jesus, digorahon ia ma alogo i. Didok Ia ma, "So ma ho, pasonang ma!" Jadi so ma alogo i, manigor sonang sajo ma sude. ⁴⁰ Dung i didok Jesus ma tu angka anak siseanNia i, "Biasi mabiar hamu? Adong he laing na so porsaya dope hamu?" ⁴¹ Gabe mabiar be ma angka anak siseanNia i. Marsipandohonan ma halahi sama halahi, "Ise do satutuna bayo on? Alogo dohot ombak pe mangoloi do tu parentaNia!"

¹ Dung i lalu ma Jesus rap dohot angka anak siseanNia i tu ipar ni Dano Galilea, i ma tu Gerasa. ² Disi mijur Jesus sian parau i manigor dialo-alo sada bayo na ruar sian liang ni angka kuburan ma Ia. ³ Na nisonggopan ni tondi na jahat do bayo i. Hum na di liang ni kuburan do ia tinggal. Inda tartambat be, dohot rante bosi pe inda bisa. ⁴ Ma jotjot dibayangkon ia, dirante patna i dohot tanganna i tapi marpupu do digotapkon ia rante i. Bosi na di patnia i pe ditipulkon ia. Songon i ma gogona gabe umpe sahalak tarbaen patunduk ia. ⁵ Arian na borngin do ia malat-alat di kuburan i dohot di dolok-dolok i jana marsurahi, dibalbali ia pamatangnia i dohot batu. ⁶ Jadi dung diida ia sian na dao ro Jesus, manigor marlojongi ma ia mangalo-alo Jesus marsomba di joloNia. ⁷ Gogo ma didokkon ia, "Jesus, Anak Ni Debata Na Gumincat! Na giot mambaen bia do Ho tu au? Mangasahon Debata, mangido au, ulang ma parkanciti au!" ( ⁸ Umbaen na nidok ni bayo i pe songon i, hara ni na dung nidok ni Jesus do tusia, "Ho tondi na jahat, morot ma ho sian bayo on!") ⁹ Dung i disapai Jesus ma tusia, "Ise dehe goarmu?" Dialusi bayo i, " ’Legiun’ do goarku, harana na bahatan do hami on!" ¹⁰ Dung i gomos ma dipangido ia, anso ulang disuru Jesus angka setan i morot sian inganan na humaliang disi. ¹¹ Jadi bahat do babi na topet mangugei manjalahi panganonna disi di robean ni dolok i. ¹² Dipangidohon setan i ma anso dipaloas Jesus halahi masuk tu bagasan angka babi i. ¹³ Gabe dipaloas Jesus ma. Jadi ruar ma angka setan i sian bayo i, masuk ma halahi tu babi i. Gabe mangambur ma babi na sahulanan i sian rahis-rahis i tu dano, gabe marmogapan. Adong ma hira-hira dua ribu sude babi i. ¹⁴ Marlojong ma na marmahan babi i paboahon barita i tu kota dohot tu halak na humaliang i. Gabe marroan ma halak mangaligi na masa i. ¹⁵ Didapotkon halahi ma Jesus, diida halahi ma dohot bayo nangkin na nisonggopan ni setan i juguk disi. Ma marpakean ia, pikirannia pe ma denggan. Gabe mabiar ma halahi sude. ¹⁶ Dicaritohon angka na marnida na masa i ma sasude na tarjadi tu bayo i dohot tu babi na sahulanan i. ¹⁷ Jadi hara ni i, gabe dipangido halahi ma anso kehe Jesus sian luat i. ¹⁸ Hatiha masuk Jesus tu parau, dipangidohon bayo na nisonggopan ni setan nangkin ma, anso dipatola ia rap dohot Jesus nian. ¹⁹ Hape inda dipatola Jesus. Didokkon Jesus dope tusia, "Mulak ma ho tu tonga-tonga ni angka sisolkotmu. Paboa ma tu halahi taringot tu sude na nibaen ni Tuhan tu ho dohot sude hadengganan na nibaenNia tu ho!" ²⁰ Jadi kehe ma bayo i. Dipungka ia ma paboahon di Luat Sisampulu Kota, sude sanga aha na nibaen ni Jesus tusia. Homang ma roha ni halak sude na mambegesa. ²¹ Mangulahi ma Jesus manaripari dano i. Dung di topi dano i, bahat ma halak mangarongomi Jesus. ²² Ro ma sahalak na margoar si Jairus, i ma sada pamimpin ni bagas paribadatan na di kota i. Dung diida ia Jesus, tungkap ma ia marsomba tu Jesus, ²³ mangidohon dohot gomos anso ro jolo Jesus pamalum anaknia. Didok ia ma tu Jesus, "Marnyae do borungku. Tolong ma jolo ro Ho mamayakkon tanganMu tusia anso malum ia, jana ulang mate!" ²⁴ Kehe ma Jesus rap dohot si Jairus. Na bahatan halak mangihutkon Ia jabat hona sosak Ia dibaen halahi. ²⁵ Adong muse ma disi sada anak boru na dung dua bolas taon marnyae hara ni na sai torus ro pantang ni abitna. ²⁶ Ma bahat nian angka pangubati na mangubati ia, hartonia pe ma bahat abis hara ni i. Hape inda ra malum, mur martamba noma nyae i. ²⁷ Ma bahat dibege anak boru i taringot tu Jesus. Jadi ro ma ia di tonga-tonga ni halak na ribur i masuk laho padonokkon tu Jesus sian pudi. ²⁸ Harana ninna rohania, "Muda tarjama au naron pakeanNia sajo pe angkon malum ma huhilala!" ²⁹ Dijama ia ma baju juba ni Jesus, manigor mantak ma na marmudar i. Inda adong be dihilala ia nyae di pamatangnia i. ³⁰ Laing di hatiha i taraso ma di Jesus, adong gogo na haruar sian pamatangNia. Manaili ma Ia di tonga-tonga ni halak na bahat i manyapai, "Ise nangkin manjama pakeanKu?" ³¹ Dialusi anak siseanNia i ma, "Diida Ho sandiri do songon on ma ribur jolma na marsisosahan hape disapai Ho dope sanga ise na manjama Ho i?" ³² Tapi laing torus ma diligi-ligi Jesus manjalahi sanga ise halakna na manjama i. ³³ Diboto anak boru i ma sanga aha na masa tusia. Humitir ma ia mabiar sajo. Ro ma ia marsomba-somba tu Jesus, dipaboa ia ma sude. ³⁴ Gabe didok Jesus ma tu anak boru i, "Ale anakKu, haporsayaanmi do na paluahon ho. Kehe ma ho di bagasan hahorasan, jana malum ma dihilala ho!" ³⁵ Taran mangkobari dope Jesus, ro ma angka suruan sian bagas ni si Jairus, mandok tu si Jairus, "Ma jumolo boru ni tuan i." "Aha dope gunana lojaan Guru i?" ³⁶ Nada pola ditangihon Jesus na nipardokkonan ni halahi i, didok Ia dope tu si Jairus, "Ulang pola sak rohamu, tapi porsaya sajo ma!" ³⁷ Ditoruskon Jesus ma mardalan. Tapi inda dipatola Ia sanga ise mangihutkon Ia asing ni si Petrus, si Jakobus dohot si Johannes anggi ni si Jakobus i. ³⁸ Ujungna lalu ma halahi di bagas ni si Jairus pamimpin ni bagas paribadatan i. Diida Jesus ma, ma gaor disi, dibege Ia ma angka na tangis dohot na mangandungi. ³⁹ Masuk ma Jesus tu bagasan didok Ia ma tu halahi, "Biasi gaor, jana martangisan hamu? Nada na mate dakdanak i, na modom sajo do i!" ⁴⁰ Dipartatai halahi ma Jesus. Jadi disuru Jesus ma halahi haruar sude. Dipiohon Jesus ma simatobang ni dakdanak i dohot anak siseanNia na tolu halak i anso masuk tu bilik ni dakdanak i. ⁴¹ Digolom Jesus ma tangan ni dakdanak i, "Talita kum," ning Ia. Talita kum astuanna: "O, Inang, Hudok ma di ho, ngot ma ho!" ⁴² Manigor ngot ma anak boru i, mardalan-dalan ma ia disi. Marumur dua bolas taon ma ia. Gabe homang ma roha ni halak na marnida i sude! ⁴³ Tapi gomos ma dipaingot Jesus halahi sude anso ulang dipaboa-boa pangalaho na masa i sanga na tu ise pe. Dung i disuru Ia ma anso dilehen halahi mangan dakdanak i.

¹ Mulak ma Jesus rap dohot angka anak siseanNia, tu huta hagodanganNia. ² Mamungka ma Ia mangajari di Ari Sabat di bagas paribadatan. Bahat do halak na ro disi. Jadi hatiha na mangajari i Jesus, homang ma roha ni halahi. Didok halahi ma, "Sian dia do diboto Ia sudena i? Hamaloon na bia do na diSia i? Na bia do umbaen na malo Ia mambaen hahomangan i? Bagian parbagasan di bagas paribadatan (6:2) ³ Na he tukang hayu do Ia, i ma anak ni si Maria i? Angka si Jakobus, si Joses, si Judas dohot si Simon na he anggiNia do i? Jana nada he rap dohot hita do angka ibotoNia i?" Hara ni i ma umbaen na so ra halahi manjagit Ia. ⁴ Dung i didok Jesus ma tu halahi, "Sude do panurirang dipasangap sanga na di dia pe, asing sian di huta hagodanganna dohot di tonga-tonga ni kahanggina dohot sisolkotna sandiri." ⁵ Jadi inda tarbaen Jesus disi hahomangan. Hum piga-piga halak do na nipamalumNia na marnyae dung diampehon Ia tanganNia tu halahi. ⁶ Homang ma rohaNia hara ni na so ra i halahi porsaya. Dung i gabe kehe ma Jesus tu angka huta na donok-donok disi mangajari halak. ⁷ Dipiohon Ia ma anak siseanNia na dua bolas i, disuruhon Ia ma halahi mardua-dua. Dilehen Ia muse ma kuaso di halahi mangusir angka setan. ⁸ Ditonai Ia hian ma halahi, "Ulang oban hamu bagi aha na hasaya di pardalanan asing ni sada tungkot. Ulang maroban roti sanga huncang ni sidoka sanga pe hepeng di bobat. ⁹ Marsipatu hamu, tapi ulang pola mardua baju." ¹⁰ Dung i laing ditonai Jesus dope tehe, "Muda dijagit hamu di sada bagas, laing di bagas i ma hamu lopus kehe hamu sian kota i. ¹¹ Tapi muda lalu hamu tu sada inganan hape inda ra halak na disi i manjagit hamu dohot manangihon hamu, morot ma hamu sian inganan i. Paspaskon hamu ma abuan na di palakpak ni patmunu i gabe songon parningotan di halahi!" ¹² Anak sisean na dua bolas i pe, kehe ma. Dijamitahon halahi ma angkon tinggalkonon ni halak do angka dosana. ¹³ Bahat do angka setan diayak halahi. Laing bahat muse do na marnyae dimiahi halahi gabe malum. ¹⁴ Lalu do angka barita na songon i tu Raja Herodes. Harana ma tarbonggal do goar ni Jesus sanga na di dia. Adong halak na mandok, "Madung mulak mangolu si Johannes Pandidi sian na mate. I do umbaen na margogo Ia mambaen angka tanda hahomangan i." ¹⁵ Tapi angka na asing mandok si Elia do Ia, deba nari mandok, "Panurirang do Ia, sarupa dohot angka panurirang narobi." ¹⁶ Hatiha dibege si Herodes barita i didok ia ma, "Aropku si Johannes Pandidi na husuru ponggol uluna i do on. Mulak mangolu ia mangulahi!" ¹⁷ Angke si Herodes sandiri do marsuru halak manangkup si Johannes anso dipamasuk tu hurungan. Hara ni si Herodias anggi borunia ma dibaen ia songon i. Angke ma dibuat ia si Herodias haru pe dadaboru ni angginia si Pilipus do i. ¹⁸ Jadi taringot tusi ma, marpupu digorahon si Johannes si Herodes. Ning ia, "Mardosa do ho muda dibuat ho dadaboru ni anggimu!" ¹⁹ Hara ni i ma umbaen na gabe hosom roha ni si Herodias mida si Johannes. Tapi inda tarbaen ia na di rohania i, angke sai disundati si Herodes. ²⁰ Anggo si Herodes disuruhon ia do anso denggan dijagoi ngolu ni si Johannes. Harana, mabiar do ia mida si Johannes. Angke diboto ia na tigor do si Johannes on, i ma suruan ni Debata. Tutu do nian, muda mangkobari si Johannes, sai tabo do dihilala si Herodes manangihon haru pe gabe marhusari sajo rohania hara ni i. ²¹ Ujungna dapot si Herodias ma ari na tumbuk, i ma di ari parningotan hatutubu ni si Herodes. Dibaen raja i ma pesta di angka kapala ni parpangkat na di harajaan i dohot angka komandan dohot di angka harajaon, hatobangon ni halak na di Galilea. ²² Manortor ma di pesta i boru ni si Herodias. Sonang sajo ma roha ni raja i dohot angka tamu i dibaen panortorna i. Gabe didok raja i ma tu bujing-bujing i, "Pangido ma sanga aha por ni rohamu. Hulehen pe i di ho!" ²³ Marsumpa ma si Herodes tu anak boru i, ning ia, "Marjanji ma au, lehenonku ma di ho sanga aha na nipangidomu. Sugari harajaanku pe dipangido ho satonga, lehenonku ma i!" ²⁴ Dung i haruar ma anak boru i manyapai inangnia i, "Ate he inang! Aha do na dumenggan sipangidoonku?" ning ia. Dialusi inangnia i ma, "Ulu ni si Johannes Pandidi i ma pangido." ²⁵ Manigor mangulahi ma anak boru i mandapotkon raja i mandok, "Hupangido ma di raja i anso dilehen di au manigor saonnari ulu ni si Johannes Pandidi, dibaen di ginjang ni sada talam!" ²⁶ Marsak situtu ma raja i mambege pangidoan i. Tapi inda tarjua ia be pangidoan i hara ni na dung tarsung marsumpa ia dijolo ni angka tamunia i. ²⁷ Jadi manigor disuru ia ma sahalak pangawalnia mangalap ulu ni si Johannes Pandidi. Kehe ma tentara i tu hurungan. Digotapkon ia ma ulu ni si Johannes i. ²⁸ Dung i dioban ia ma uluna i di ginjang talam laho pasahatkon tu anak boru i. Dilehen anak boru i muse ma tu inangnia i. ²⁹ Dung diboto angka anak sisean ni si Johannes taringot tu pangalaho i, kehe ma halahi mangalap bangke ni si Johannes i, anso dikuburkon halahi. ³⁰ Jadi marmulahan ma angka rasul na nisuru ni Jesus i. Marlagut ma halahi rap dohot Jesus. Dipaboa halahi ma tuSia sudena na nibaen ni halahi dohot na niajarkon ni halahi. ³¹ Salaku na bahatan halak na ro jana na kehe. Hum mangan pe inda jabat tarbaen Jesus dohot angka anak siseanNia i. Didokkon Jesus ma tu angka anak siseanNia i, "Beta ma hita, tu inganan na lungun, hita sajo disi jolo, anso tarbaen maradian santongkin." ³² Halahi pe kehe ma marparau tu inganan na lungun. ³³ Tapi sanga do bahat halak marnida halahi kehe sian inganan i, jana ditanda halak do halahi. Diboto halahi muse do sanga na giot tu dia halahi. Gabe markehean ma halak kota na humaliang i sude marlojongi sian darat laho manjoloi Jesus dohot angka anak siseanNia i. ³⁴ Jadi dung mijur Jesus sian parau i, diida Ia ma, hape ma disi halak na bahat i. Ibo ma rohaNia mida halahi angke songon biri-biri na so diparmahani do halahi diida Ia. Ia pe antong mamungka ma mangajari halahi. Bahat do na niajarkonNia tu halahi. ³⁵ Dung potang ari ro ma anak siseanNia i mandok tu Jesus, "Ma potang ari, hape lungun do inganan on. ³⁶ Dumenggan ma sugari disuru halak on kehe tu angka pagaran sanga huta na humaliang on anso marsitobusi panganonna be halahi." ³⁷ Tapi dialusi Jesus ma, "Angkon lehenonmunu do halahi mangan!" "Jadi angkon kehe noma hami manobusi roti arga dua ratus hepeng perak baen panganon ni halahi sude?" ninna anak sisean ni Jesus i. ³⁸ Jadi ninna Jesus ma tu halahi, "Piga kibung dehe roti adong di hamu? Ligi hamu ma jolo." Dung diligi halahi, didok halahi ma, "Lima roti dohot dua ihan." ³⁹ Dung i disuru Jesus ma marjuguhan sude halak na bahat i marturpuk-turpuk di ruput na mangarata i. ⁴⁰ Jadi marjuguhan ma halahi taratur marturpuk-turpuk. Adong na saratus halak santurpuk, adong muse na lima pulu halak. ⁴¹ Dung i dibuat Jesus ma roti na lima i dohot ihan na dua i. Mandorgak ma Ia adop langit mandok tarimakasi tu Debata. Dung i diponggoli Ia ma roti i diparleheni Ia ma tu angka anak siseanNia i anso dibagi-bagi tu halak na bahat i. Dohot ihan na dua i pe dibagi-bagi Ia muse ma di halahi sude. ⁴² Mangan ma halahi sude lopus butong be. ⁴³ Dung sidung halahi na mangan i, dipalagut anak siseanNia i ma lobi-lobi ni roti dohot ihan i, adong ma gok dua bolas ampang sude. ⁴⁴ Hira-hira lima ribu halak ma hum halaklahi sajo na mangan roti i. ⁴⁵ Diompoti Jesus ma marsuru angka anak siseanNia i kehe marparau parjolo sian Ia tu Betsaida na di ipar ni dano i, jana disuru Ia ma halak na bahat i marmulahan. ⁴⁶ Dung dipakehe Ia angka anak siseanNia i, manangkok ma Ia tu dolok i laho martangiang. ⁴⁷ Jadi dung borngin, ma lalu parau i di tonga-tonga ni dano i, hape laing di darat dope Jesus. ⁴⁸ Diida Jesus ma halahi loja sajo mandayung parau i hara ni haroro ni alogo na maralo tu pardalan ni parau i. Jadi gabe ro ma Jesus mandapotkon halahi dompak samon dope ari, mardalan di ginjang ni aek i. Tar dipaula-ula Ia ma songon na giot manyalpui halahi. ⁴⁹ Tapi dung diida halahi Ia na mardalan di ginjang aek i, diambang halahi begu do Ia. ⁵⁰ Gabe manyongkir ma halahi hara ni biarna. Harana sude do halahi marnida Ia, jana sude rap tarsonggot. Tapi manigor dipangkulingkon Jesus ma halahi, "Ulang hamu mabiar! Au do i. ⁵¹ Dung i masuk ma Ia tu parau i, alogo i pe so ma. Laing homang sajo ma roha ni angka anak sisean ni Jesus i. ⁵² Inda diastui halahi dope taringot tu roti na lima i na gabe hahomangan. Na maolan halahi anso mangarti. ⁵³ Jadi dung taripar halahi, bolkas ma halahi tu Luat Genesaret. ⁵⁴ Disi haruar halahi sian parau i manigor ditanda halak do Jesus. ⁵⁵ Manigor marsilojongkon lojongna be do halahi na humaliang luat i. Mamungka ma halahi maroban angka na marnyae di podomanna be mandapotkon Jesus. Sanga na di dia pe Jesus dibege halahi, dioban halahi be ma angka na marnyae tusi. ⁵⁶ Sanga na tu dia pe Ia kehe, tu angka kota, angka huta, sai marroan do halak marobani angka na marnyae. Gomos ma dipangido halahi anso dipatola Ia angka na marnyae i, hum manjama rambu ni baju ni Jesus. Jadi sude na manjama i, malum do.

¹ Adong ma sapunguan halak Parise dohot piga-piga halak Siboto Surat ro sian Jerusalem mandapotkon Jesus. ² Ma diida halahi anak sisean ni Jesus, nada ias dope tanganna hape ma mangan. Inda jolo marbasu tangan halahi songon na nidok ni angka aturan ni halak Parise. ³ Anggo halak Parise dohot sude halak Jahudi tongtong do halahi mangihutkon adat dohot hasomalan na nipungka ni ompu ni halahi. Na so ra do halahi mangan anggo so jolo marbasu tangan hombar tu aturan-aturan na tontu. ⁴ Muda mulak halahi sian poken, nada mangan halahi muda so jolo mambasu dirina. Bahat dope angka aturan na sian ompu ni halahi na laing togu ditiop halahi, umpamana songon na mamasu galas, gendi dohot parkokas-parkokas na sian tumbaga. ⁵ Jadi gabe disapai angka halak Parise dohot Siboto Surat i ma Jesus, "Hara ni aha dehe dibaen na so diihutkon angka anak siseanMi adat dohot hasomalan na nilehen ni angka ompunta sijolo-jolo tubu i? Biasi manigor marmanganan halahi so jolo ias tanganna?" ⁶ Dialusi Jesus ma, "Tutu do na nidok ni si Jesaya hian di bukunia i taringot tu halak sipangalancap songon hamu on. Nada he ma didok ia do songon on: ’Songon on didok Debata, Hum di pamanganna do angka jolma on pasangap Au, hape anggo roha ni halahi dao do sian Au. ⁷ Parcuma do halahi marsomba tu Au, harana diajarkon halahi do aturan ni jolma songon aturan na sian Au!’ ⁸ Dipasiding hamu do angka parenta ni Debata, hape anggo angka aturan ni jolma togu sajo ditiop hamu." ⁹ Dung i didok Jesus dope, "Na maloan hamu pasidingkon na nidok ni Debata anso tarbaen hamu patuluskon podamunu sandiri. ¹⁰ Na he ma didok si Musa hian do, ’Pasangap ma amangmu dohot inangmu,’ jana ’Sanga ise na palayaskon amangna dohot inangna, angkon mate ma niuhuman i.’ ¹¹ Tapi anggo hamu songon on do diajarkon hamu: Muda adong sada-sada halak na mandok tu amangna dohot tu inangna: Aha na adong di au, na patut baenonku tu ho, madung huhaulkon i tu Debata. ¹² Gabe malua ma ia sian na patut baenonnia tu amangna dohot tu inangna. ¹³ Jadi hara ni angka aturan na nilehenmunu tu halak na bahat, gabe inda mardalan be angka aturan na nidok ni Debata dibaen hamu. Na bahatan dope angka na songon i dipambaeni hamu." ¹⁴ Dung i dipiohon Jesus ma sanoli nari halak na bahat i. Didok Ia ma tu halahi, "Hamu sude, tangihon hamu ma na Hudok on! Astui hamu ma! ¹⁵ Inda gabe hodar halak hara ni na masuk sian duru tu bagasan halahi. Tapi hara ni na haruar sian sada-sada halak do na mambaen ia hodar. [ ¹⁶ Sanga ise na marpinggol laho marbinege, ditangihon ia ma.]" ¹⁷ Jadi dung ditadingkon Jesus halak na bahat i masuk ma Ia tu bagas. Disapai angka anak siseanNia i ma sanga aha astuan ni pandohan nangkin. ¹⁸ Didok Jesus ma tu halahi, "Na sarupa do bodomunu hape dohot halak na asing i? Nada he diboto hamu sude na masuk sian duru tu bagasan ni sada-sada halak inda gabe pahodarkon halahi i? ¹⁹ Angke inda tu bagasan roha na masuk i, tapi tu butuha do. Dung i ambung ma sian pamatang." (Jadi sian pangkataion i didok Jesus, halal do sude sipanganon.) ²⁰ Dung i didok Jesus dope mangulahi, "Na ruar sian sada-sada halak do na pahodarkon ia. ²¹ Angke sian bagasan ni sada-sada halak, i ma na sian rohania, marroan angka pikiran na jahat na mambaen ia gabe mambaen na rogon, manangko, mamunu, ²² na markarosuan, ahut tu diri dohot sude hajahatan; na paoto-otohon, na so maraturan, gutgut, manilakoi halak, ginjang ni roha dohot na so tarajar. ²³ Sude na songon i na ruar sian bagasan diri ni jolma, jana angka sisongon i ma na pahodarkon ia." ²⁴ Dung ditinggalkon Jesus inganan i, kehe ma Ia tu luat na donok tu kota Tirus. Masuk ma Ia tu sada bagas. Tapi inda por rohaNia diboto halak, na disi Ia. Tapi bagi na bia pe inda tarbaen Ia manabunihon diriNia tu halak. ²⁵ Adong ma sahalak ina-ina disi. Hona setan borunia. Dibege ina-ina i ma taringot tu Jesus. Jadi ro ma ia mandapotkon Jesus marsomba tu joloNia. ²⁶ Satutuna nada bagi halak Jahudi ina-ina i. Halak Siro Penisia do. Manigor dipangidohon ia ma tu Jesus, anso dipaorot Jesus setan i sian pamatang ni borunia i. ²⁷ Tapi dialusi Jesus ma, "Angkon parjolo do dakdanak nilehen mangan. Harana inda patut nibuat indahan ni dakdanak gabe nilehen di anjing," ning Ia. ²⁸ "Tutu do i Tuhan," ning ina-ina i, "Salang sopa-sopa ni panganan ni dakdanak i pe dipangan angka anjing i do di toru ni meja i!" ²⁹ Dung i ninna Jesus ma tusia, "Hara ni haporsayaanmu, mulak ma ho! Madung haruar setan i sian dakdanakmi!" ³⁰ Mulak ma ina-ina i. Dung lalu di bagas, didapot ia ma borunia hatiha modom di podomanna i. Ma tutu morot setan i sian borunia i. ³¹ Dung i ditinggalkon Jesus ma Luat Tirus mangulahi, dipatorus Ia ma pardalananNia sian Sidon laho tu Dano Galilea. Mangaliati ma Ia sian Luat Sisampulu Kota. ³² Dioban halak ma disi tuSia sada halak na maingol na so malo muse mangkatai. Dipangidohon halahi ma anso dipayakkon Jesus tanganNia tu ginjang ni bayo i. ³³ Dioban Jesus ma bayo i punjung sian halak na bahat i. Dibaen Jesus ma tanganNia tu pinggol ni bayo i. Dung i marsitijur ma Jesus, dijama Ia ma dila ni bayo i. ³⁴ Dung i manatap ma Jesus adop langit marhosa na ginjang, didok Ia ma tu bayo i, "Efata," astuanna, "Mungkap ma ho!" ³⁵ Mungkap ma pinggol ni bayo i, dilania i pe gabe harkar ma, mamungka ma malo ia mangkobari. ³⁶ Dung i dirarang Jesus ma halahi sude anso ulang dipaboa pangalaho i sanga na tu ise pe. Tapi mur dirarang Jesus, mur dipaboa-boa halahi do. ³⁷ Sude halak na mambege carito i gabe homang-homang. Ninna halahi ma, "Na hebat ma sude na nibaenNia i! Tarbaen Ia marbinege na maingol, na haldang gabe mangkobari!"

¹ Nada sadia honok dung i, ro ma sapunguan halak marlagut. Hara ni na so adong panganon ni halahi dipiohon Jesus ma angka anak siseanNia i, didok Ia ma tu halahi, ² "Ibo do rohangKu mida halak on. Ma pola tolu ari halahi dison rap dohot Au, hape saonnari so adong be panganon ni halahi. ³ Muda Husuru halahi mulak male-malean, tangkuraparon ma halahi naron di dalan i. Hape adong do i na ro sian huta na dao." ⁴ Dialusi angka anak siseanNia ma, "Sai dao hita di padang-padang on, sian dia ma tarpatuk panganon di halak na songon on bahatna?" ⁵ "Sadia adong roti di hamu?" ninna Jesus manyapai. "Pitu do," ninna halahi. ⁶ Dung i disuru Jesus ma halak na bahat i anso marjuguhan di tano i. Dibuat Ia ma roti na pitu i didok Ia ma tarimakasi tu Debata. Dung i diponggoli Ia ma roti na pitu i anso diparbagihon tu angka halak i. Dioloi anak siseanNia i ma songon i. ⁷ Dapot halahi muse ma sanga na piga ihan na menek-menek. Laing didok Jesus ma tarimakasi hara ni ihan i. Disuru Ia muse ma anak siseanNia i mambagi-bagi ihan i. ⁸ Jadi mangan ma halahi lopus butong. Dung i dipalagut halahi ma teba-teba i gok pitu ampang. ⁹ Adong ma na mangan i hira-hira opat ribu halak. Dung i disuru Jesus ma halahi mulak, ¹⁰ tapi anggo Ia dohot angka anak siseanNia i torus kehe ma halahi marparau tu Dalmanuta. ¹¹ Marroan ma angka Parise mandapotkon Jesus. Dipungka halahi ma marsoal dohot Ia laho manjalahi hasalaanNia. Dipangido halahi ma anso dibaen Jesus jolo hahomangan songon tanda bahaso na tutu jop roha ni Debata diSia. ¹² Humolos ma Ia, ning Ia ma, "Biasi angkon sai pangidoon ni halak sisaonnari on anso Hubaen tanda hahomangan? Inda! Na so ra do Au mangalehen tanda na songon i di halahi!" ¹³ Ditinggalkon Ia ma halahi, kehe ma Ia masuk tu parau i, torus manyiborangi dano i. ¹⁴ Lupa anak sisean ni Jesus maroban roti. Gabe hum sangkibung roti do adong di halahi na di bagasan parau i. ¹⁵ "Manat-manat ma hamu maradopkon ragi ni halak Parise dohot ragi ni si Herodes," ninna Jesus tu halahi. ¹⁶ Gabe i ma sihataan ni angka anak siseanNia i. Didok halahi, "Hara ni na so taoban i do roti umbaen na nidokNia songon i." ¹⁷ Diboto Jesus ma na nihataan ni halahi i. Gabe disapai Ia ma halahi, "Biasi na so maroban roti dihatai hamu? Na so diboto hamu dope, jana laing na so mangarti dope hamu? Na dung bia do majal ni pikiranmunu? ¹⁸ Na he adong do matamunu! Biasi inda marnida hamu? Na he adong do dohot pinggolmunu! Biasi inda marbinege hamu? Na so diingot hamu be ¹⁹ roti na lima i na Huponggoli di silima ribu halak i? Piga ampang nari na lobi i disi?" "Dua bolas ampang," ninna halahi. ²⁰ "Dung i di na Huponggoli roti na pitu i di siopat ribu halak i, piga ampang nari teba-teba na nipalagutmunu i?" "Pitu ampang," ninna halahi mangalusi. ²¹ "Antong, laing na so mangarti dope hamu?" ninna Jesus mangulahi. ²² Lalu ma halahi tu Betsaida. Dioban halak ma disi sahalak na mapitung tu Jesus. Dipangidohon halahi ma anso dijama Ia nian na mapitung i. ²³ Gabe ditiop Jesus ma tangan ni na mapitung i, dung i ditogu Ia ma tu balian ni kota i. Dung i ditijuri Jesus ma mata ni na mapitung i, dipayakkon Ia ma tanganNia tu ginjang ni uluna i. Disapai Ia ma tu bayo i, "Ma adong he diida ho sanga aha saonnari?" ²⁴ Diligi bayo i ma adop jolo, didok ia ma, "Olo, adong huida jolma tapi songon hayu na mardalan-dalan do." ²⁵ Dung i dipayakkon Jesus ma mangulahi tanganNia tu mata ni bayo i, jadi tutu ma bayo i marnida, jana madung malum, jadi bisa ma ia marnida dohot torang. ²⁶ Manigor disuru Ia ma bayo i mulak dung didok Ia, "Ulang mulak ho tu kota." ²⁷ Mardalan ma Jesus rap dohot angka anak siseanNia i di angka huta na humaliang Kaisarea Pilippi. Di tonga dalan i disapai Jesus ma halahi, "Ise do Au didok halak?" ²⁸ Jadi dialusi halahi ma, "Adong na mandok, si Johannes Pandidi do Ho. Adong muse na mandok si Elia. Tapi deba nari mandok, sahalak sian angka panurirang i do Ho." ²⁹ "Tapi mangihutkon pandapotmunu sandiri, tarbia do antong?" ninna Jesus manyapai. "Ise do Au mangihutkon pandokmunu?" Dialusi si Petrus ma, "Kristus do Ho!" ³⁰ Dung i dipaingot Ia ma halahi, anso ulang dipaboa-boa halahi sanga na tu ise pe taringot tu diriNia. ³¹ Dung i dipungka Jesus ma mangajarkon tu angka anak siseanNia paboahon angkon bahat parkancitan taonon ni Anak Ni Jolma i. Dialo angka pamimpin dohot angka sintua ni malim dohot angka Siboto Surat i ma Ia. Bunuon ni halahi ma Ia, tapi dung tolu ari, mulak mangolu ma Ia mangulahi. ³² Torang sajo dipaboa Jesus tu anak siseanNia i sude taringot tusi. Dung i dipiohon si Petrus ma Jesus hum Ia sajo laho paingot Ia. ³³ Tapi dihudukkon Jesus ma si Petrus, tu anak siseanNia na asing i ma diligi Ia. Dimuruhi Ia ma si Petrus, ning Ia, "Morot ho sian on, Sibolis do ho! Inda pikiran ni Debata pikiranmi, pikiran ni jolma do i!" ³⁴ Dung i dipiohon Jesus ma halak na bahat na disi rap dohot angka anak siseanNia i. Didok Ia ma tu halahi, "Muda adong sanga ise na giot mangihutkon Au, angkon disoadahon ia do dirina. Dung i diporsan ia ma parsilangnia baru pe anso diihutkon ia Au. ³⁵ Angke anggo halak na giot mampartahankon ngoluna, gabe agoan ngolu do. Tapi anggo halak na mangalehen ngoluna hara ni Au dohot hara ni Jamita Na Denggan i na sian Debata, i do na paluahonsa. ³⁶ Aha ma he labona di halak, muda gabe ia puna sudena tano on hape mago tondinia? Aha muse ma labonia disi! ³⁷ Sanga na aha pe inda tarlehen jolma laho manobus tondina muda dung jabat mago. ³⁸ Angke sanga ise na maila hara ni Au dohot hatangKu di tonga-tonga ni halak na so setia dohot pardosa, maila muse ma Anak Ni Jolma i mida ia muda ro Ia di bagasan hasangapan ni AmangNia rap dohot surusuruanNia na badia i."

¹ "Satutuna do na Hudok on tu hamu," ninna Jesus, "Adong do sanga na piga halak na dison on na so jabat mate, anggo so jolo diida halahi Harajaan Ni Debata di bagasan kuaso!" ² Dung adong onom ari, dipiohon Jesus ma si Petrus, si Jakobus dohot si Johannes. Dioban Ia ma halahi rap dohot Ia mamunjung tu sada dolok na gincat. Maruba ma disi diida halahi tompa ni Jesus gabe marsinondang. ³ PakeanNia i pe gabe bontar sajo marlinang-linang. Nada adong sahalak pe di tano on na malo mangalantang lopus songon i bontarna. ⁴ Dung i diida angka siseanNia ma mangkobar-kobari Jesus rap dohot si Elia dohot si Musa. ⁵ Gabe didok si Petrus ma tu Jesus, "Tabona i hita na dison on, Guru! Bia hami baen ma tolu undung-undung dison, sada ma di Ho, sada di si Musa, sada nari muse di si Elia." ⁶ Satutuna, na so diboto si Petrus do sanga aha na giot dohononnia, hara ni na dung santak biar ni roha ni halahi. ⁷ Dung i ro ma ombun mangkolipi halahi, jana tarbege muse ma sora sian ombun i mandok, "On ma AnakKu, na Huhaholongi, tangihon ma Ia!" ⁸ Manigor dipamanat halahi ma humaliang halahi. Hape umpe sahalak pe na disi rap dohot halahi asing ni Jesus sandiri. ⁹ Dung i manuat ma halahi sian dolok i. Dompak na manuat i halahi didok Jesus ma songon on tu halahi, "Anggo so mulak mangolu dope Anak Ni Jolma i sian hamatean, ulang paboa hamu sanga na tu ise pe sude na niidamunu nangkin." ¹⁰ Dioloi halahi do na nidok ni Jesus i. Tapi anggo halahi sama halahi sajo mamungka ma dihata-hatai halahi sanga aha maksud ni Jesus di na nidokNia nangkin, "Mulak mangolu sian hamatean." ¹¹ Dung i disapai halahi ma tu Jesus, "Biasi didok angka Siboto Surat i angkon jolo ro do si Elia?" ¹² Dialusi Jesus ma, "Tutu do i nian, angkon jolo ro do si Elia laho paradehon nasa na porlu. Tapi tarbia ma pangalahona taringot tu Anak Ni Jolma i? Biasi tarsurat di Buku Na Badia i angkon bahat taononNia parkancitan jana dipalayas halak Ia? ¹³ Hudok ma di hamu! Satutuna, ma ro anggo si Elia tapi roha-roha ni halak do dipambaeni tusia. Jadi tutu do na tarsurat di Buku Na Badia i taringot tu si Elia sandiri." ¹⁴ Jadi dung rap halahi dohot anak sisean na asing i, ma bahat diida halahi halak disi. Martongkari topet angka Siboto Surat dohot angka anak siseanNia i. ¹⁵ Disi diida halahi Jesus, homang ma roha ni halahi. Manigor marlojong ma halahi mangalo-alo Ia. ¹⁶ "Aha ma na nihataanmunu dohot angka Siboto Surat i?" ninna Jesus manyapai angka siseanNia i. ¹⁷ Adong ma sahalak sian halak na bahat i mangalusi, "Songon on do ning Guru i. Na maroban anakku do au tu Guru i. Na hona setan do anggo anakki gabe ngungu. ¹⁸ Muda hatiha manombo dibaen setan i, dipartombomkon ma songon i pamatangna i tu tano i. Margubo-gubo ma pamanganna i, patutaktak ma iponnia i gabe jogal ma sude pamatangna i. Hupangidohon do nian anso dipaorot angka anak siseanMon setan i, tapi inda tarpaorot halahi." ¹⁹ Dung i didok Jesus ma tu halahi, "O hamu angka pomparan na so porsaya, angkon sadia honok nari Au rap dohot hamu? Intap ni andigan angkon sobar Au paida-ida hamu? Oban ma dakdanak i tuson!" ²⁰ Dung i dioban halahi ma dakdanak i tu Jesus. Hum diida setan i Jesus, manigor martoltolan ma pamatang ni dakdanak i dibaen setan i gabe tinggang ma margiling-giling di tano i. Margubo ma pamanganna i. ²¹ Dung i disapai Jesus ma amangna i, "Ma sadia honok dung songon on dakdanak on?" "Mulai sian na menek do!" ning amangna i. ²² "Ma jotjot dicubo setan i laho mamatehon ia. Sai ditinggangkon setan i ia tu api dohot tu aek. Tapi anggo tartolong Ho do, laing ibo ma jolo rohaMu mida hami. Urupi ma jolo hami!" ²³ "Dialusi Jesus ma: "Didok ho: Anggo tartolong Ho? Nada adong na so tarbaen di halak na porsaya!" ²⁴ Manigor mangangguk ma ama-ama i, "Porsaya do au. Urupi ma au na hurang porsaya on!" ²⁵ Dung diida Jesus, ma mamungka mur ribur halak, dipaorot Ia ma setan i haruar. Ning Ia ma, "Ho tondi na mambaen maingol jana na mambaen ngungu, Hudok tu ho, haruar ma ho sian dakdanak on, ulang be masuk ho tusia sanga andigan!" ²⁶ Mangarar ma setan i, dipatoltol ia ma pamatang ni dakdanak i, haruar ma ia sian dakdanak i. Songon tompa ni bangke noma idaon dakdanak i jabat didok halahi sude, "Ma mate i!" ²⁷ Tapi ditogu Jesus ma tanganna i laho pajongjong ia. Jadi jongjong ma dakdanak i. ²⁸ Jadi dung di bagas Jesus, disapai angka siseanNia i ma tuSia, "Hara ni aha do ulaning umbaen na so tarpaorot hami setan i?" ²⁹ Dialusi Jesus ma, "Nada tarpaorot setan na songon i, bagi na bia pe dibaen dalanna, hum tangiang do na bisa paorot i." ³⁰ Jadi kehe ma Jesus rap dohot angka siseanNia i maninggalkon inganan i dipatorus halahi ma mardalan mamolus sian Galilea. Ninna roha ni Jesus, ulang nian diboto halak sanga na di dia Ia, ³¹ hara ni na mangajari anak siseanNia do Ia, jana didok Ia ma tu halahi, "Anggo Anak Ni Jolma i angkon pasahaton ma tu kuaso ni jolma. Bunuon ni halahi ma Ia, tapi mulak mangolu ma Ia dung tolu ari muse!" ³² Nada diastui angka sisean ni Jesus i na niajarkonNia i, tapi mabiar halahi marsapa tuSia. ³³ Lalu ma halahi di Kapernaum. Dung masuk tu bagas, disapai Jesus ma angka siseanNia i, "Aha do na diparsoalkonmunu nangkin di tonga dalan i?" ³⁴ Tapi nada dialusi halahi. Harana di tonga dalan i ma martangkangi halahi, taringot tu sanga ise na gumodang sian halahi. ³⁵ Juguk ma Jesus. Jadi dipiohon Ia ma anak siseanNia na dua bolas halak i. Didok Ia ma tu halahi, "Sanga ise na giot parjolo, angkon ia ma parpudi jana na gabe pangoloi ni sude halak." ³⁶ Dung i dipio Jesus ma sada dakdanak na menek. Disuru Ia ma jongjong dakdanak i di jolo ni halahi sude. Dihaol Jesus ma dakdanak i jana didok Ia ma tu angka siseanNia i, ³⁷ "Sanga ise na manjagit dakdanak na songon on hara ni Au, na manjagit Au do i. Dung i, sanga ise na manjagit Au, nada Au sajo na nijagitnia disi tapi dohot muse do dijagit ia Debata na marsuru Au." ³⁸ Dung i didok si Johannes ma tu Jesus, "Guru, adong hami ida sada halak na paorot setan mamake goarMu. Hami antahi do halahi harana nada bagi na tarmasuk donganta ia." ³⁹ Tapi didok Jesus ma, "Ulang pola antahi hamu ia. Angke anggo halak na baru mambaen hahomangan mamake goarKu, inda ra ia manigor santongkin i mangkobari na jat taringot tu Au. ⁴⁰ Anggo halak na so maralo do tu hita, donganta do i. ⁴¹ Satutuna do! Sanga ise na mangalehen hamu minum hum hara ni na gabe siihutkon Kristus i hamu, angkon jagitonnia do upania." ⁴² "Sanga ise na mambaen gabe nada porsaya be tu Au sada sian angka halak na menek on, gumonan ma ditambatkon losung batu tu rungkung ni halak sisongon i anso niambungkon i tu laut. ⁴³ Muda hara ni tanganmu do gabe mambaen so tama ho masuk tu hangoluan i, gotapkon ma tanganmi! Gumonan do ho mangolu so martangan sabariba, ulang pado mardua tangan ho masuk tu narako, api na manongtong i. [ ⁴⁴ Anggo disi nada ra mintop api, binga pe disi nada ra mate.] ⁴⁵ Dung i, muda hara ni patmu do mambaen ho mardosa, gotapkon ma patmi! Gumonan ma ho mangolu rap dohot Debata na so marpat sabariba, ulang pado mardua pat ho diambungkon tu narako. [ ⁴⁶ Anggo disi nada ra mintop api, binga pe disi nada ra mate.] ⁴⁷ Muda hara ni matamu do gabe mardosa ho, pulsikkon ma mata i! Gumonan ma ho masuk tu Harajaan Ni Debata marmata sada sajo, ulang pado diambungkon ho marmata dua tu narako. ⁴⁸ Nada ra mintop api disi jana binga pe nada mate. ⁴⁹ Ganop halak sipapitaon do dohot api, songon haul na nipaias dohot sira. ⁵⁰ Jeges do sira i, tapi muda hambar daina, bia ma baenon paancimkon sira i? Antong, sai gabe songon sira ma hamu -- rap mardame-dame ma hamu sama hamu."

¹ Dung i morot ma Jesus sian i, kehe ma Ia tu Luat Judea dohot tu luat na di bariba ni Batang aek Jordan. Marroan ma mangulahi halak na bahat marrongom humaliang Jesus. Dung i diajari Jesus ma halahi songon na somal. ² Jadi ro muse ma halak Parise tusi laho manjalahi hasalaan ni Jesus. Dibaen halahi ma sapa-sapa ni halahi on, "Dokkon ma jolo di hami, tola do halak manyirangkon dadaboruna?" ³ Dialusi Jesus ma dohot sapa-sapa muse. Ning Ia ma, "Aha do ditonahon si Musa tu hamu?" ⁴ "Anggo si Musa, dipatola ia do manyirangkon dadaboru, asal ma jolo dibaen surat sirangna," ninna halahi mangalusi. ⁵ "Disurat si Musa pe tona i hara ni maolna do hamu ajaran," ninna Jesus tu halahi. ⁶ "Tapi anggo di mulana di na manompa jolma Debata didok do, ’Halaklahi dohot dadaboru do halahi dibaen Debata. ⁷ Hara ni i ma umbaen na nitinggalkon ni halaklahi amangna dohot inangna, kehe ma ia marsada dohot dadaborunia i, ⁸ anso gabe sada na dua i.’ Antong inda dua be halahi. Tapi sada noma. ⁹ Hara ni i ma umbaen na so tola sirangon ni jolma halak na dung dipadomu ni Debata!" ¹⁰ Jadi dung mulak halahi tu bagas, disapai angka siseanNia i ma tuSia taringot tusi. ¹¹ Didok Jesus ma tu halahi, "Sanga ise halaklahi na manyirangkon dadaboruna gabe marbagas ia dohot dadaboru na asing, na markarosuan do ia maradopkon dadaborunia i. ¹² Laing songon i muse do dadaboru na maninggalkon halaklahina gabe marbagas ia tu halaklahi na asing, ia pe na markarosuan do i." ¹³ Jadi adong ma na maroban angka dakdanak mandapotkon Jesus anso dipasupasu Ia angka dakdanak i. Tapi dimuruhi angka sisean ni Jesus i ma halahi. ¹⁴ Jadi marnida i muruk ma Jesus didok Ia ma tu angka anak siseanNia i, "Padiar hamu ma marroan angka dakdanak i tu Au! Ulang rarang hamu halahi. Angka halak sisongon i do na gabe nampuna Harajaan Ni Debata. ¹⁵ Tutu do na Hudok on! Sanga ise na so manjagit Harajaan Ni Debata songon panjagit ni sada dakdanak, inda tarbaen halahi gabe anggota ni Harajaan Ni Debata i." ¹⁶ Dung didok Jesus songon i, dihaol Ia ma angka dakdanak i, diampehon Ia ma tanganNia jana dipasupasu Ia ma halahi. ¹⁷ Jadi laho patoruskon pardalananNia Jesus, ro ma sada bayo marlojong-lojong mandapotkon Ia. Marsomba ma bayo i di jolo ni Jesus manyapai, "O Guru na burju, angkon aha do sibaenonku anso dohot au manean ngolu na so mantak i?" ¹⁸ "Biasi didok ho Au na burju? Nada adong sahalak pe na burju, asing sian Debata sandiri. ¹⁹ Tontu diboto ho do tona ni Debata na mandok, ’Ulang ho mamunu, ulang markarosuan, ulang manangko, ulang margabus, ulang paoto-otohon, pasangap ma amangmu dohot inangmu!’ " ²⁰ "Anggo i do, sian naposo dope au madung hudalankon do sude tona i." ²¹ Dipanotnoti Jesus ma bayo i hara ni holong ni rohaNia midasa. Didok Ia ma, "Hum sada nari noma pangalaho na porlu di ho. Kehe ma ho manggadis sude sinadonganmu. Lehen ma hepengna i tu angka halak na pogos, dung i gabe adong ma dapot ho arta na di banua ginjang. Dung i ro ma ho mangihutkon Au!" ²² Umbege hata ni Jesus na songon i marsak ma pangkilalaan ni bayo i. Ditinggalkon ia ma inganan i kehe ia, marsak sajo rohania angke na kayo situtu do ia. ²³ Dung i dipanotnoti Jesus ma angka siseanNia i didok Ia ma tu halahi, "Na maol do anggo halak na kayo masuk tu Harajaan Ni Debata!" ²⁴ Homang ma roha ni angka siseanNia i umbege na nidok ni Jesus i. Hape didok Jesus muse, "Hamu angka dakdanakKu! Tutu do i, na maol do laho masuk tu Harajaan Ni Debata! ²⁵ Ummura dope unto masuk tu lubang ni jait ulang pado halak na kayo masuk tu Harajaan Ni Debata." ²⁶ Tarsonggot ma angka sisean ni Jesus i umbege hata na nidokNia i. Gabe marsisapa-sapaan ma halahi sama halahi, "Anggo songon i do, ise noma na tarbaen malua?" ²⁷ Jadi dipanotnoti Jesus ma halahi sude, dialusi Ia ma, "Anggo di jolma do, inda tarbaen i. Tapi anggo di Debata tarbaen do i. Angke nada adong sanga aha pe na so tarbaen Debata." ²⁸ Dung i didok si Petrus ma, "Madung hami tinggalkon sasudena jana hami ihutkon Ho." ²⁹ "Tutu do i," ninna Jesus, "antong ingot hamu ma on: Halak na dung maninggalkon dongan saripena, sanga kahanggina sanga ibotona, sanga inangna bope amangna, sanga dakdanakna, sanga pe sabana, hara ni Au dohot hara ni Jamita Na Denggan na sian Debata, ³⁰ jagiton ni halahi ma umbahat sian di hatiha saonnari. Dapot ia ma saratus noli umbahat bagas, kahanggi, iboto, dakdanak, saba dohot ladang, dohot parkancitan. Dung i di hatiha na giot ro jagiton ni halahi ma hangoluan na so mantak. ³¹ Tapi bahat do halak na parjolo saonnari gabe parpudi, jana bahat do na parpudi saonnari gabe parjolo." ³² Hatiha di tonga dalan Jesus rap dohot angka siseanNia i laho tu Jerusalem. Di jolo ni angka anak siseanNia i ma Jesus mardalan. Madung songon na adong biar ni angka siseanNia i, jana angka halak na mangihutkon i pe sian pudi madung mabiar. Dung i dipio Jesus ma angka siseanNia i sajo laho paboahon tu halahi sanga aha na giot masa tuSia. ³³ "Tangihon hamu ma, saonnari manangkok ma hita tu Jerusalem. Pasahaton ma disi Anak Ni Jolma tu angka sintua ni malim dohot angka Siboto Surat. Dabuhonon ni halahi ma uhuman mate tuSia. Dung i pasahaton ni halahi ma Ia tu tangan ni angka halak na so Jahudi. ³⁴ Incahan ni halahi ma Ia, tijuranna, loncinganna baru ma dibunu. Tapi dung tolu ari, mulak mangolu ma Ia mangulahi." ³⁵ Jadi ro ma si Jakobus dohot si Johannes, i ma angka anak ni si Zebedeus mandapotkon Jesus, "Gurunami! Pangidoan ni rohanami patulusonMu ma na hami pangido sian Ho!" ³⁶ "Aha ma por ni rohamunu sibaenonKu di hamu?" ninna Jesus manyapai. ³⁷ Dialusi halahi ma, "Muda dung lalu Ho saulahon juguk marsangap di karosi harajaan i di Harajaan Ni Debata, sugari nian patola ma hami rap juguk dohot Ho. Sahalak di siamun, dung i sahalak nari di siambirangMu." ³⁸ Tapi didok Jesus ma, "So diboto hamu sanga aha na nipangidomunu. Tarinum hamu ma lakna siinumon parkancitan na giot inumonKi? Tolap hamu do lakna masuk tu sitaonon na giot sitaononKi?" ³⁹ "Tarbaen hami do i," ning halahi. Dung i didok Jesus ma mangulahi tu halahi, "Tutu do i nian angkon inumonmunu do siinumon parkancitan na giot inumonKi, jana angkon masuk do hamu tu bagasan sitaonon na giot taononKi. ⁴⁰ Tapi anggo na manontuhon sanga ise na juguk di siamunKu sanga di siambirangKu, inda marguru di Au i. Debata do na manontuhon sanga na ise do na juguk disi." ⁴¹ Jadi dung tarboto pangalaho i tu anak sisean na sampulu halak nari, dimuruhi halahi ma si Jakobus dohot si Johannes. ⁴² Jadi, gabe dipalagut Jesus ma halahi sude. Didok Ia ma tu halahi, "Diboto hamu do angka na nidok pamarenta ni angka bangso, na mamarenta rayatna marhite tangan bosi, jana angka parkuasona mandalankon karejona marhite hakejamon. ⁴³ Tapi anggo hamu, nada tola songon i! Sanga ise na giot godang sian hamu, angkon gabe pangoloimunu ma ia. ⁴⁴ Dung i halak na giot sumangap di tonga-tongamunu, angkon gabe pangoloi ma ia di hamu sude. ⁴⁵ Angke Anak Ni Jolma i pe, nada na giot dioloi Ia umbaen na ro. Tapi na giot mangoloi do, dohot mangalehen hosaNia gabe dalan laho paluahon bahat halak." ⁴⁶ Lalu ma halahi di Jeriko. Jadi dung laho kehe Jesus rap dohot angka anak siseanNia i, songon i dohot halak na bahat i, adong ma sada halak na mapitung juguk di topi dalan i mangido-ido. Si Bartimeus do goarna, i ma anak ni si Timeus. ⁴⁷ Jadi dung dibege ia Jesus halak Nasaret i do na mamolus i, marsurak ma ia, "O Jesus Anak ni si Daud! Ibo ma rohaMu mida au!" ⁴⁸ Digorahon halak ma ia anso sip. Tapi mur dipagogo ia dope marsurahi, "O, Anak ni si Daud, ibo rohaMu di au!" ⁴⁹ Gabe maradian ma Jesus, didok Ia ma, "Piohon hamu jolo ia." Jadi dipiohon halak ma bayo na mapitung i. Didok halahi ma tusia, "Patogu ma rohamu! Madung dipio Jesus ho. Jongjong ma ho!" ⁵⁰ Dung i ditalduskon ia ma gobak-gobaknia i, diompoti ia ma jongjong, kehe ma ia mandapotkon Jesus. ⁵¹ "Aha do lakna dipangido rohamu baenonKu tu ho?" ninna Jesus manyapai ia. Dialusi bayo na mapitung i ma, "Marnida ma nian au, Guru!" ⁵² "Kehe ma ho," ninna Jesus. "Madung dipamalum haporsayaanmi ho." Manigor marnida ma bayo i. Lalu diihutkon ia ma Jesus di dalan i.

¹ Jadi dung marayak Jerusalem, kehe ma halahi tu kota Betpage dohot tu kota Betania na di pat ni Dolok Zetun. Disuru Jesus ma dua halak siseanNia i anso parjolo sian Ia. Kota Betania (11:1) ² "Kehe ma hamu tu huta na di jolo an," ninna Jesus tu halahi. "Disi masuk hamu tu huta i manigor tarpaida hamu ma tambat sada anak ni halode na so unjung dope dilombut halak. Harkari hamu ma halode i, dung i oban hamu ma tuson. ³ Ompot adong halak na manyapai hamu sanga hara ni aha umbaen diharkari hamu halode i, dok hamu ma, ’Na porlu di Tuhan i do. Manigor disuru oban ia do i tuson.’ " ⁴ Jadi kehe ma anak sisean na dua i, dapot halahi ma tambat sada anak ni halode di topi ni dalan haroroan tu huta i. Diharkari halahi ma talina i. ⁵ Jadi disapai halak na marjongjongan i ma halahi, "Na mahua do hamu! Biasi diharkari hamu tali ni halode i?" ⁶ Dialusi halahi ma songon pandok ni Jesus nangkin tu halahi. Gabe dipadiar angka halak na disi i ma, dioban halahi halode i. ⁷ Dung lalu tu jolo ni Jesus, dilapihi halahi ma tangguru ni halode i dohot pakean ni halahi, jana dilombut Jesus ma. ⁸ Jadi bahat ma halak marsipahembang abitna di dalan i, adong muse ma na manyerakkon angka ranting-ranting ni hayu di tonga dalan i, i ma na niparrampingkon ni halahi sian kobun-kobun i. ⁹ Angka na mardalan di jolo dohot na sian pudi, sude ma halahi marsurak-surak, "Hosana! Dipasupasu ma Ia na ro di bagasan goar ni Tuhan! ¹⁰ Dipasupasu ma HarajaanNia na giot ro i, i ma harajaan ni si Daud ompunta i! Hosana di Inganan Na Gumincat i!" ¹¹ Dung i lalu ma Jesus tu Jerusalem, masuk ma Ia tu Bagas Ni Debata. Dipareso Ia ma disi humaliang. Dung i kehe ma Ia tu Betania rap dohot siseanNia na dua bolas i, harana ma golap ari. ¹² Ancogotna i dung kehe halahi sian Betania malean ma Jesus. ¹³ Sian na dao dope diida Ia ma sangkambona gala-gala, sarmak bulungna i. Jadi kehe ma Ia mangaligi gala-gala i betak na adong batuna. Hape dung lalu Ia tu bonana i, hum bulungna sajo do. Angke nada musim marbatu gala-gala hatiha i. ¹⁴ Dung i didok Jesus ma tu gala-gala i, "Mamungka saonnari, umpe sahalak na mangankon batu ni gala-gala sian ho salolot ni lolotna!" Dibege angka anak sisean i ma pandohan i. ¹⁵ Jadi lalu ma halahi tu Jerusalem. Masuk ma Jesus tu Bagas Ni Debata. Dipaorot Ia ma disi angka halak na marjagal di inganan i. Angka meja ni panukar-nukar hepeng dohot angka bangku-bangku ni parjagal darapati dipartunggalingkon Ia sude. ¹⁶ Sahalak pe nada dipatola Ia maroban sanga aha pe mamolus sian alaman ni Bagas Ni Debata i. ¹⁷ Dung i mangajar ma Jesus tu halak na disi i. Didok Ia ma, "Nada he tarsurat do di Buku Na Badia songon on: Didok Debata do, ’Digoari ma BagasKu inganan partangiangan ni sude bangso?’ Hape gabe dibaen hamu do i gabe liang ni panyamun!" ¹⁸ Dibege angka sintua ni malim rap dohot angka Siboto Surat do na nidokNia i. Gabe mamungka ma dijalahi halahi dalan laho mamunu Jesus. Tapi mabiar do halahi mida Ia, angke sude halak na bahat na disi i mangkilala, tabo pangajaranNia i. ¹⁹ Potangna i kehe ma Jesus rap dohot angka siseanNia sian kota i. ²⁰ Manyogotna i di na mamolus halahi sian lambung ni gala-gala i, diida halahi ma hape madung mate gala-gala i lopus tu uratna i. ²¹ Jadi diingot si Petrus ma sanga aha na nidok ni Jesus tu hayu i. Gabe didok si Petrus ma tu Jesus, "Diligi Guru i ma jolo! Ma pungguron gala-gala na niburaanMi!" ²² Dialusi Jesus ma, "Ingot hamu ma! Muda porsaya hamu tu Debata ²³ tardok hamu do tu dolok an, ’Morot ma ho, jana ambung ma ho tu laut!’ gabe tulus ma songon i di hamu, asal ma ulang ganggu rohamunu. Dung i pos ma rohamunu angkon tutu situtu tulus na nidokmunu i. ²⁴ Antong ingot hamu ma! Muda martangiang hamu mangido sanga na aha pe, pos ma rohamunu na dung dilehen Debata do na nipangidomunu i. ²⁵ Dung i muda martangiang hamu, hape inda sonang rohamu mida sada halak, angkon jolo sesaonmu hasalaan ni halakna i anso disesa Amangmunu na di banua ginjang i muse dosamunu." [ ²⁶ Anggo so ra do hamu manyesa hasalaan ni halak na asing, Amangmunu na di banua ginjang i pe nada ra Ia manyesa angka dosamunu.] ²⁷ Mangulahi ma halahi tu Jerusalem. Hatiha mardalan-dalan Jesus di bagasan Bagas Ni Debata, ro ma mandapotkon Ia angka sintua ni malim, angka Siboto Surat dohot angka bagian hatobangon ni halak Jahudi. ²⁸ Disapai halahi ma Jesus, "Markite-hite kuaso dia do lakna dibaen Ho patupahon angka na songon on? Ise do na mangalehen kuaso di Ho laho mambaen songon i?" ²⁹ Dialusi Jesus ma, "Adong sada sapaanKu tu hamu. Muda dialusi hamu annon sapa-sapangKon, baru pe anso Hupaboa tu hamu taringot tu kuasongKu mambaen songon i. ³⁰ Paboa hamu ma jolo tu Au, ise do na mangalehen kuaso tu si Johannes Pandidi laho mandidihon halak. Sian banua ginjang do sanga sian jolma?" ³¹ Jadi marpokat ma halahi. "Muda tadok, ’Sian banua ginjang’ gabe dohononNia ma tu hita, ’Biasi inda porsaya hamu di si Johannes?’ ³² Tapi songon na so tardok do, ’Sian Jolma.’ " Harana, mabiar do halahi mida halak na bahat, angke panurirang do si Johannes dietong roha ni halak na bahat i. ³³ "Inda hami boto!" gabe ninna halahi ma mangalusi. Dung i didok Jesus ma tu halahi, "Antong anggo songon i, Au pe inda ra paboahon tu hamu sanga na sian ise kuasongKu mambaen songon i."

¹ Dung i dipungka Jesus ma marumpama laho mandok hata tu angka sintua ni malim i dohot angka Siboto Surat bope tu angka hatobangon ni halak Jahudi i. Ning Ia ma, "Adong ma sada bayo na markobun anggur. Dihandang ia ma kobun anggurnia i humaliang. Dung i dihuar ia ma pamoroan ni anggur i, dipajongjong ia muse ma sada tuhu-tuhu inganan ni panjago. Dung i dipabolahon ia ma kobun anggurnia i, ia pe kehe ma tu luat na asing. Tuhu-tuhu inganan ni panjago di kobun anggur (12:1) ² Jadi dung dapot hatihana mamutik batu ni anggur i, disuruhon nampuna i ma sahalak naposonia mandapotkon angka na markarejo i laho manjagit bagiannia sian suha ni kobun i. ³ Tapi ditangkup angka halak na markarejo kobun i ma naposo i. Dibalbali halahi ma ia, dung i disuru halahi ma mulak umpe maroban bagi-aha. ⁴ Gabe disuru nampuna kobun i ma sahalak nari naposonia na asing. Tapi dipotuk angka na markarejo i ma ulu ni naposo i. Jana dipaila halahi. ⁵ Disuru nampuna kobun i ma mangulahi sahalak naposonia na asing. Tapi dibunu halahi ma naposonia i. Laing songon i ma pambaen ni halahi tu angka naposo na asing i muse. Adong ma na dibalbali ni halahi, adong na dibunu. ⁶ Ise noma na tarsuru nampunaan i? Hum sahalak sajo noma, i ma anaknia sandiri haholongan ni rohania i. Jadi ujungna laing disuru ia ma anaknia i mandapotkon angka na markarejo i. ’Tontu argahonon ni halahi do anakki,’ ning rohania. ⁷ Tapi marsipandohonan ma angka na markarejo i sama halahi, ’On ma halakna na giot manean i. Tabunu ma on dison anso di hita sude siteanonnia i!’ ⁸ Jadi ditangkup halahi ma anaknia i lalu dibunu halahi ma. Diambungkon halahi ma bangkena i tu balian ni kobun i." ⁹ Dung i disapai Jesus ma, "Antong, aha noma sibaenon ni nampuna kobun i? Ro ma ia laho mangabiskon angka na mamola i, anso dipasahat ia kobunnia i tu angka pamola na asing. ¹⁰ Tontu ma disise hamu ayat on di Buku Na Badia i, ’Batu na niambungkon ni pande bagas, madung gabe batu parsuhi. ¹¹ I ma na nibaen ni Tuhan; sada tanda hahomangan di matanta!’ " ¹² Jadi sude angka pangituai ni halak Jahudi na umbege umpama nangkin, rap manjalahi dalan ma laho manangkup Jesus. Harana diboto halahi do, halahi sandiri do na nidok ni Jesus di umpamana i. Tapi mabiar do halahi di halak na bahat i, gabe ditinggalkon halahi ma Jesus. ¹³ Disuru ma sanga na piga halak Parise dohot angka anggota ni si Herodes laho manjalahi hasalaan ni Jesus marhite angka sapa-sapa. ¹⁴ Didapotkon halahi ma Jesus. Didok halahi ma, "Guru, hami boto do, halak na tigor do Ho. Nada parduli Ho sanga na bia pikiran ni halak tu Ho. Hum na marojahan tu hasintongan do diajarkon Ho, taringot tu sanga aha hagiot ni Debata. Harana inda meol-eol rohaMu sanga na bia pe didok halak. Antong, paboa ma jolo tu hami, ’Muda tagarar pajakta tu Kesar ni halak Rom, sala dehe i tu ugamonta sanga nada? Angkon gararonta dehe pajak i sanga nada?’ " ¹⁵ Diboto Jesus do na mangakali halahi. Dialusi Ia ma, "Biasi pola diuji hamu Au? Patidahon hamu ma jolo tu Au hepeng perak i sada." ¹⁶ Dilehen halahi ma sada hepeng perak i. Dung i disapai Jesus ma, "Gambar dohot surat ni ise do on?" "Kesar i!" ning halahi mangalusi. ¹⁷ "Antong anggo songon i do, pasahat hamu ma mangulahi tu Kesar sanga aha nampuna ni Kesar i. Laing pasahat hamu ma mangulahi tu Debata sanga aha nampuna ni Debata!" Jadi homang ma roha ni halahi umbege Ia. ¹⁸ Adong ma sanga na piga halak sian halak Saduse ro mandapotkon Jesus. (Mangihutkon pandapot ni halak on, anggo jolma nada be mulak mangolu muda dung mate.) ¹⁹ "Guru, ditonahon si Musa do tu hita: ’Muda mate sada bayo maninggalkon sada dadaboru ia, tapi nada jabat maruntungan halahi, angkon gabe patugincaton ni anggi ni na mate i ma na mabalu i anso mardakdanak ia. I ma na gabe pomparan di na mate i.’ ²⁰ Jadi jungada ma adong pitu halak na martinadohon. Mambuat boru ma siangkaan i tapi mate ma ia so jolo adong dope untungannia. ²¹ Jadi dipatugincat na paduahon i ma angkangna na mabalu i, tapi ia pe laing mate do so jolo adong dakdanak. Laing songon i ma na masa tu na patoluhon i, ²² dohot tu na paopatkon lopus tu na papituhon i. Sude halahi madung rap marbagas tu anak boru i, marmatean be do halahi so jolo adong dakdanakna. Ujungna mate muse ma anak boru i. ²³ Jadi mulak mangolu ma halahi sude saulahon di ari parpudi, gabe dadaboru ni ise do anak boru i? Harana, halaklahi na pitu i madung mardadaboruhon ia!" ²⁴ Dialusi Jesus ma, "Madung lilu hamu hara ni na so diastui hamu Buku Na Badia i dohot kuaso ni Debata. ²⁵ Angke anggo dung mulak mangolu do mangulahi angka na mate i, nada marbagas be halahi. Songon ngolu ni surusuruan noma halahi di banua ginjang i. ²⁶ Dung i anggo taringot tu angka na mate i na dipangolu mangulahi, adong he na so jungada dope disise hamu di buku ni si Musa taringot tu ramba na gor i? Di angka ayat i adong do tarsurat na nidok ni Debata tu si Musa songon on, ’Au do Debata ni si Abraham, Debata ni si Ishak dohot Debata ni si Jakob.’ ²⁷ Tapi anggo Debata, nada Debata ni na mate; Debata ni na mangolu do. Na lilu do hamu!" ²⁸ Jadi ro ma sahalak Siboto Surat manangihon pangkataion ni Jesus dohot halak Saduse i. Denggan do pangalusi ni Jesus diida ia maradopkon angka halak Saduse i. Dung i disapai ia ma tu Jesus, "Sian sude angka tona na adong, tona dia do na ummarga?" ²⁹ Dialusi Jesus ma, "Anggo tona na ummarga, i ma: ’Tangihon hamu ma, hamu halak Israel! Tuhan Debatanta, i ma Tuhan na sada. ³⁰ Angkon haholonganmu do Tuhan Debatamu sian sude tondi dohot pamatangmu dohot sude pikiranmu dohot sian sude gogo na adong di ho.’ ³¹ Jana na paduahon na ummarga i ma: ’Angkon holong do rohamunu di halak na asing songon panghaholongimu di dirimu sandiri.’ Nada adong be tona na ummarga asing sian na dua i." ³² Dung i didok Siboto Surat i ma mandok tu Jesus, "Inda adong hurangna alus ni Guru i! Tutu do na nidokMi: Hum sada Debata sajo do Debata, nada adong be Debata na asing. ³³ Dung i, angkon holong do roha ni jolma mida Debata sian sude rohana, dohot sian sude pikiranna dohot sian sude na adong disia. Dung i muse angkon holong do roha di halak na asing songon na mangkaholongi diri niba sandiri. Dumengganan dope na songon i ulang pado na manghaulkon pahan-pahanan sanga angka haul na asing tu Debata di ginjang ni inganan parkaulan i." ³⁴ Diida Jesus, ma denggan sajo do alus ni Siboto Surat i. Didok Jesus ma tusia, "Saotik nari noma anso gabe anggota di Harajaan Ni Debata ho." Dung i inda adong be halak na puluk manyapai tu Jesus. ³⁵ Jadi dompak na mangajari i Jesus di Bagas Ni Debata, disapai Ia ma, "Bia do pandok ni angka Siboto Surat i paboa na pinompar ni si Daud do Kristus i? ³⁶ Si Daud sandiri, marhite panuturi ni Tondi Parbadia mandok: ’Madung didok Tuhan i do tu Tuanku: Juguk ma Ho di siamunKu lopus Hubaen sude angka musuMu tunduk tu Ho.’ ³⁷ Si Daud sandiri mamiohon Ia ’Tuanku’: Jadi tarbia ma parjadina gabe pomparan ni si Daud muse Ia?" Tabo dihilala halak na marroan i tu Bagas Ni Debata umbege Jesus na mangajar i. ³⁸ Didok Ia disi, "Jamot ma hamu adop angka Siboto Surat i. Na torus do halahi mardalan-dalan mamake baju na ginjang. Na jopan do muse roha ni halahi muda ditabi halak di poken. ³⁹ Ulang so di juluan halahi juguk muda ro tu bagas paribadatan dohot di angka pesta. ⁴⁰ Angka na mabalu dipaoto-oto halahi muse laho mambuat bagasna i. Ginjang-ginjang dibaen halahi hata ni tangiang ni halahi laho manutup-nutupi hajahatan ni halahi i. Na boratan do saulahon uhuman tu halahi!" ⁴¹ Dung i juguk ma Jesus satongtang ni poti ni hepeng na di Bagas Ni Debata. Diparrohahon Ia ma angka halak na pamasukkon hepengna tu poti i. Bahat do halak na maradong pamasukkon hepengna bahat-bahat. ⁴² Ro muse ma sada ina na mabalu boti pogos muse. Dipamasuk ia ma dua hepeng tumbaga. I ma tukaran ni hepeng na ummenek argana. ⁴³ Dung i dipio Jesus ma angka siseanNia i didok Ia ma tu halahi, "Parrohahon hamu ma jolo on: Umbahat do hepeng na nipamasuk ni ina na mabalu i sian na nipamasuk ni sude angka halak na asing i. ⁴⁴ Angke sian halobian ni halahi do na dilehen i, tapi anggo na mabalu i, sian hahuranganna do, sude na adong disia, i ma na porlu tu hangoluannia."

¹ Dung i kehe ma Jesus sian Bagas Ni Debata i. Jadi adong ma sahalak sian angka siseanNia i na mandok tuSia, "Guru, ligima togu ni angka batu i jana jeges ni angka bangunan i!" ² Dialusi Jesus ma, "Angka bagas na godang-godang i dehe na niidamu? Umpe sada batu sian angka bagas i sude na tola tarsusun di ingananna humani. Angkon disargehon sude." ³ Dung lalu halahi tu Dolok Zetun, juguk ma Jesus di sada juguhan na topet paadop-adop dohot Bagas Ni Debata. Dung i ro ma si Petrus, si Jakobus, si Johannes dohot si Andreas giot mangkatai dohot Ia. ⁴ "Paboa ma jolo di hami, sanga na andigan ma tulus sudena i! Angka aha ma tandana paboahon na giot dapot hatihana masa sudena i?" ⁵ "Angkon jonggor do hamu anso ulang jabat ditipu halak, ninna Jesus. ⁶ Bahat do halak marroan mamake goarKu. Dohonon ni halahi ma, ’Au do ibana!’ Gabe hona tipu ma bahat halak. ⁷ Muda dibege hamu sora ni na marporang dohot angka barita ni porang, ulang mabiar hamu. Angkon masa do sisongon i. Tapi nada podo hasidunganna. ⁸ Marporang ma bangso na sada mangalo bangso na asing, bope sada harajaan dohot harajaan na asing. Masa ma lalo sanga na di dia dohot haleon potir. Tapi sasudena i parmulaan ni parhancitan marayak jaman na imbaru do. ⁹ Angkon jamot do hamu, angke tangkupon do hamu, obanon tu rapot ugamo. Dibalbali halahi ma hamu di angka bagas paribadatan. Obanon ma hamu mangadop tu jolo ni angka parkuaso dohot raja-raja hara ni Au. Anso gabe hasaksian ma i taringot tu goarKu di halahi sude. ¹⁰ Angke anggo Jamita Na Denggan i na sian Debata angkon jolo dijamitahon do tu sude bangso. ¹¹ Jadi muda tartangkup hamu dioban tu paruhuman, ulang pola sak rohamunu taringot tu sidohononmunu. Muda dung dapot hatihana mandok hata hamu, dok hamu ma disi sanga aha na nipaboa tu hamu. Harana nada hatamunu sandiri sidohononmunu. Sian Tondi Parbadia do sude marroan hata sidohononmunu i. ¹² Jadi pasahaton ni halak ma kahanggina sandiri anso dibunu. Songon i muse ma baenon ni ama tu dakdanakna. Angka dakdanakna pe tuhason ni halahi ma amang ni halahi dohot inangna anso dibunu. ¹³ Sude ma halak margoyak ni roha mida hamu hara ni Au. Tapi sanga ise na tahan lopus tu ujungna, i do na dapotan haluaon." ¹⁴ "Muda diida hamu ’Hajahatan Na Mangaroncohon’ jongjong di inganan na so patut. (Sanga ise na mamasa on: Astui hamu ma sanga aha na nidok on!) Angka halak na di Judea di hatiha i, gumonan ma marlojong tu dolok. ¹⁵ Sanga ise na topet di tarup ni bagas, indangkon sai mijur ia mambuat sanga aha sian bagas i. ¹⁶ Sanga ise na topet di ladang, indangkon be sai mulak ia mangalap abitna. ¹⁷ Marjaya ma di hatiha i angka ina na topet denggan pamatangna sanga na topet patagukkon. ¹⁸ Tangiangkon hamu ma tu Debata anso ulang di musim ngali ni ari hamamasa ni i. ¹⁹ Harana anggo di hatiha i masa ma hasusaan na godang situtu na so unjung masa dope i di tano on dung ditompa Debata tano on lopus tu sadari on, jana nada masa be songon i tu pudi on. ²⁰ Sugari na so dipapendek Debata na masa i, umpe sahalak na tarbaen malua. Tapi hara ni halak na nitodoNia i, gabe dipapendek Debata ma na masa i." ²¹ "Jadi muda adong halak na mandok tu hamu di hatiha i, ’Beta taligi, ma dison Kristus i!’ sanga ’Ma disadu Ia!’ -- ulang ma hamu porsaya tu halahi. ²² Harana marroan do angka kristus pargabus dohot angka panurirang pargabus. Baenon ni halahi ma angka tanda hahomangan dohot angka na ganjil-ganjil laho paoto-otohon angka halak ni Debata. Salang sugari tarbaen dohot tu angka na ditodo i dope. ²³ Antong jonggor ma hamu! Madung Hupaboa hian sudena i tu hamu dompak so tulus dope." ²⁴ "Dung salpu hasusaan i, manggolap ma mataniari. Bulan i pe nada marsinondang be. ²⁵ Mardabuan ma angka bintang sian langit i, gabe sursar ma sude angka pangalaho ni parlangitan. ²⁶ Jadi tarida ma disi Anak Ni Jolma i ro di bagasan ombun mardongan kuaso dohot hasangapan. ²⁷ SuruhononNia ma angka surusuruanNia laho palagutkon bangso na nipiliNia sian na opat panjuru ni tano on, sian angka ujung ni tano lalu tu angka ujung ni langit." ²⁸ "Denggan ma baen hamu parsipodaan sian bona ni gala-gala. Muda rata angka dangkana i boti loyok, mulai ma i martunas, gabe diboto hamu ma na giot dapot ne ma logo ni ari. ²⁹ Songon i muse ma muda diida hamu angka pangalaho sinangkinan i tarjadi, gabe botoonmunu ma na dung dapot harorona. ³⁰ Situtu do na Hudok on tu hamu! Sude na Hupardokkoni nangkin angkon sanga dope idaon ni angka halak na mangolu saonnari on. ³¹ Sego pe langit dohot tano on, tapi anggo na Hudokkon i inda na mago i." ³² "Tapi haru pe songon i, nada adong sahalak pe na umboto sadihari hatihana. Angka surusuruan na di banua ginjang i pe dohot Anak i pe nada diboto i. Hum Ama i sajo do na umboto i. ³³ Jadi angkon jonggor do hamu tongtong, angke nada diboto hamu sanga andigan hatihana. ³⁴ Tarsongon sada halak na kehe tu na dao maninggalkon bagasna do pangalaho ni i. Dipasahat ia ma tu angka naposonia laho mangurus bagasnia. Dipasahat ma karejona be. Tu sijago pintu ditonahon ia hian do anso tangkas ia na manjagoi i. ³⁵ Hara ni i angkon jonggor ma hamu angke nada diboto hamu sanga na andigan nampuna bagas i mulak. Sanga na andospotang, betak na tonga borngin, ra do andostorang sanga di hananaek ni mataniari. ³⁶ Jadi muda ompot ia ro, ulang sanga tardapot ia hamu hatiha tarpodom. ³⁷ Sude na Hudok on tu hamu, laing Hupaboa do tu halak sudena: Jonggor ma hamu!"

¹ Dua ari nari noma anso Ari Pesta Paskah -- dohot Roti Na So Marragi. Manjalak-jalahi dalan ma angka sintua ni malim dohot angka Siboto Surat laho manangkup Jesus sip-sip anso dibunu halahi Ia. ² "Tapi ulang ma di ari pesta on tabaen, anso ulang masa hagaoron," ninna halahi. ³ Hatiha di Betania Jesus, di bagas ni si Simon na huliton i hian do Ia. Dompak mangan Jesus disi, ro ma sada dadaboru mandapotkon Ia maroban sada botol pualam na marisi miak na huskus. Sigodang arga do miak na huskus i, i ma na nitanak ni halak sian urat-urat na huskus. Ditaporkon anak boru i ma botol i laho mangusehon miak na huskus i tu ulu ni Jesus. Angka barang na dibaen sian pualam (14:3) ⁴ Jadi adong ma halak na disi i muruk-muruk. Didok halahi ma sama halahi, "Aha ma he gunana diparsayang miak na huskus i? ⁵ Harana sugari nigadis miak i, ma mararga i lobi tolu ratus hepeng perak. Madung tarlehen hepengna i tu angka halak na pogos!" Gabe dimuruhi halahi ma anak boru i. ⁶ Tapi didok Jesus ma, "Padiar hamu ma songon i! Biasi diarsahi hamu ia? Na denggan do na nibaennia tu Au. Sipujion do ia disi. ⁷ Anggo halak na pogos tongtong do adong di tonga-tongamunu. Sanga sadihari anggo na ra do hamu, tarurupi hamu do halahi. Tapi anggo Au nada tongtong di lambungmunu. ⁸ Anggo anak boru on, ma dibaen ia intap ni na lobas gogonia. Dompak so dapot dope hatihana ma dihobasi ia hian Au dohot miak na huskus i tu hatiha hatatanomKu. ⁹ Tutu do na Hudok on tu hamu! Sanga na di dia pe di tano on dibaritahon Jamita Na Denggan na sian Debata, angkon dibaritahon muse ma na nibaen ni anak boru on gabe songon parningotan tusia." ¹⁰ Si Judas Iskariot, i ma sahalak sian sisean ni Jesus sidua bolas halak i. Kehe ma ia mandapotkon angka sintua ni malim laho manghianati Jesus. ¹¹ Jadi dung dibege halahi na songon i jop ma roha ni halahi. Marjanji ma halahi mangalehen hepeng tu si Judas. Si Judas pe antong dipungka ia ma manjalahi dalan laho manghianat tu Jesus. ¹² Ari parjolo di Ari Pesta Ni Roti Na So Marragi, didapotkon angka siseanNia i ma Jesus. Somalna di na sadari i ma disambol halak biri-biri Paskah. Jadi disapai angka siseanNia i ma Jesus, "Di dia do dipangido rohaMu paradeonnami panganon Paskah di Ho?" ¹³ Dung i disuru Jesus ma dua halak sian halahi. "Kehe ma hamu tu kota, marsuo ma hamu annon disi rap dohot sada bayo na maroban gunci. Ihutkon hamu ma bayo i ¹⁴ sanga tu bagas dia ia masuk. Dok hamu ma tu nampuna bagas i songon on, ’Disapai Guru i, sanga na di dia do ingananNia rap dohot angka siseanNia mangankon sipanganon Paskah i.’ ¹⁵ Patuduhononnia ma tu hamu sada bilik na bidang di loteng parginjang di bagas i. Ma taratur hian disi singkop dohot angka juguhanna. Parade hamu ma sude disi di hita." ¹⁶ Dung i kehe ma siseanNia sidua halak i tu kota. Dapot halahi ma songon na nidok ni Jesus tu halahi. Diparade halahi ma panganon Paskah i. ¹⁷ Jadi dung potang ari, ro ma Jesus rap dohot anak siseanNia na dua bolas halak i. ¹⁸ Jadi hatiha na mangan i halahi di meja na disi didok Jesus ma, "Tangihon hamu ma on! Sahalak sian hamu na rap mangan dohot Au saonnari giot manghianat tu Au." ¹⁹ Gabe marsak ma angka anak sisean ni Jesus i. Pasada-sada ma halahi marsapa tu Jesus, "Tontu nada au na nidok ni Guru i, atehe?" ninna halahi. ²⁰ Dialusi Jesus ma, "Anggo halakna, sahalak sian hamu na dua bolas on. Na mangan sapinggan dohot Au, i ma ibana. ²¹ Tutu do nian, angkon mate do Anak Ni Jolma i songon na dung tarsurat hian di Buku Na Badia i. Tapi na jorbut do hamamago ni halak na manghianat tu Anak Ni Jolma i! Dumenggan hian do sugari indangkon sai jungada ia sorang!" ²² Jadi hatiha na mangan i halahi, dibuat Jesus ma roti, didok Ia ma tarimakasi tu Debata. Diponggoli Ia ma roti i, dung i dilehen Ia ma tu angka siseanNia i, didok Ia hataNa, "Pangan hamu ma, on ma pamatangKu." ²³ Jadi dung sidung i dibuat Ia muse ma sada panginuman ni anggur. Didok Ia ma tarimakasi tu Debata, dilehen Ia muse ma panginuman i tu angka siseanNia i. Dung i sude ma halahi manginum anggur i. ²⁴ Dung i didok Jesus ma tu halahi, "On ma mudarKu, na niduruskon di halak na bahat, i ma mudar na mambaen tulus parjanjian ni Debata. ²⁵ Tutu do na Hudok di hamu, inda inumonKu be anggur on. Tapi saulahon inumonKu ma anggur na imbaru muda dung dipajongjong Damang HarajaanNia." ²⁶ Dung i diendehon halahi ma sada ende puji-pujian. Torus kehe ma halahi tu Dolok Zetun. ²⁷ Dung i didok Jesus ma tu halahi, "Ganggu ma haporsayaanmunu sude. Angke adong do tarsurat di Buku Na Badia i, ’BunuonKu ma parmahan i, gabe marserak ma angka biri-birina.’ ²⁸ Tapi dung dipangolu mangulahi, kehe ma Au tu Galilea manjoloani hamu." ²⁹ "Nada!" ning si Petrus, "Haru sude pe halahi maninggalkon Ho anggo au bagi na bia pe inda." ³⁰ "Tutu do na Hudok on, laing di borngin on painte so tahuak manuk padua nolihon, ma tolu noli diporso ho na so nitandamu Au," ninna Jesus. ³¹ Ninna si Petrus dope manggogohon mangulahi, "Haru pe angkon gabe mate au rap dohot Ho, bagi na bia pe nada parsoonku Ho!" Jadi sude ma anak siseanNia na asing i mangihut mandok songon i. ³² Lalu ma halahi tu sada inganan na margoar Getsemane. Didok Jesus ma disi tu angka anak siseanNia i, "Dison ma hamu juguk anso kehe Au martangiang santongkin." ³³ Dung i dipiohon Jesus ma si Petrus, si Jakobus dohot si Johannes kehe rap dohot Ia. Mamungka ma digohi biar dohot gamang rohaNia. ³⁴ Dung i didok Ia ma, "Marsak sajo do rohangKu, songon na giot mate pangkilalaanKu. Dison ma hamu jolo, jonggor ma hamu!" ³⁵ Dipadao Jesus ma kehe saotik, manungkap ma Ia tu tano laho martangiang. Dipangido Ia di bagasan tangiang sugari tarbaen indangkon sai ditaon Ia parkancitan i. ³⁶ Didok Ia ma, "Abba, o Amang, inda adong na so tarpatupa Ho ale Amang. Buat ma parkancitan on sian Au. Tapi, ulang ma marguru tu lomo ni rohangKu tapi lomo ni rohaMu ma Amang." ³⁷ Dung i mulak ma Jesus, hape didapot Ia ma tarpodom anak siseanNia i. Dung i didok Ia ma tu si Petrus, "O, Simon! Na tarpodom do ho? Hum sajom sajo pe inda tarbaen ho be jonggor?" ³⁸ Dung i didok Jesus ma tu halahi, "Jonggor ma hamu, tangiangkon hamu ma anso ulang talu hamu di ujian i. Tutu do nian sai giot mambaen na sintong do anggo tondimunu tapi nada margogo hamu patuluskonsa hara ni bako ni jolma na gale i." ³⁹ Kehe ma Jesus sanoli nari martangiang, laing hata ni tangiangNia sinangkinan i do didokkon Ia. ⁴⁰ Dung i mangulahi ma didapotkon Ia angka anak siseanNia i. Laing tarpodom do halahi didapot Ia. Dokdok sajo mata ni halahi na mondok-ondok i. Gabe so diboto halahi be sanga aha sidohonon ni halahi tu Jesus. ⁴¹ Dung i ro ma Ia patolunolihon, jana didokkon Ia ma tu halahi, "Modom ma hamu santongkin nari jana maradian. Tuk ma i, madung ro hatiha i. Ligi ma nipasahat ma Anak Ni Jolma tu tangan ni halak pardosa. ⁴² Ngot ma hamu anso kehe hita. Ligi ma madung ro indi na manghianat i tu Au!" ⁴³ Jadi taran mandok hata dope Jesus, ompot ma si Judas ro. Sahalak sian sisean ni Jesus na dua bolas i do si Judas on. Ro muse do rap dohot ia halak na bahat marsioban podangna dohot umban-umban. I ma angka na nisuruhon ni angka sintua ni malim, angka Siboto Surat dohot hatobangon ni halak Jahudi. ⁴⁴ Madung dipaboa panghianat i hian sanga aha tandana tu halahi. "Sanga ise na huumma, i ma ibana halakna. Tangkup hamu ma manigor, togu oban hamu." ⁴⁵ Jadi hatiha na ro i si Judas, manigor didapotkon ia ma Jesus, didok ia ma, "Gurunami!" dung i diumma ia ma Jesus. ⁴⁶ Dung i ditangkup angka halak na bahat na rap dohot si Judas i ma Jesus, dirante halahi ma Ia. ⁴⁷ Tapi adong ma sahalak na disi i, manyintak podangnia ditampul ia ma pinggol ni naposo ni Malim Godang i lopus ramping. ⁴⁸ Didok Jesus ma tu halahi, "Adong he parjahat Au umbaen na maroban umban-umban hamu ro laho manangkup Au? ⁴⁹ Ganop ari do Au mangajari di Bagas Ni Debata di jolomunu hape inda ditangkup hamu Au. Tapi angkon songon i do anso tulus na tarsurat di bagasan Buku Na Badia i." ⁵⁰ Kehe ma sude martabuni anak siseanNia i. ⁵¹ Adong ma sahalak doli-doli na paihut-ihut Jesus, na mamake sada abit lenan sajo di pamatangnia i. Jadi giot ditangkup halak ma ia, ⁵² tapi disarsarkon ia ma abitnia i, kehe ia marlojongi marsaemara. ⁵³ Dioban ma Jesus tu bagas ni Malim Godang. Madung marlagut hian disi angka sintua ni malim, hatobangon ni halak Jahudi dohot angka Siboto Surat. ⁵⁴ Sian na dao dipaihut-ihut si Petrus ma Jesus lopus tu alaman ni bagas ni Malim Godang i. Disi ma ia marsisudu rap dohot angka na mangawal i. ⁵⁵ Sude angka sintua ni malim dohot angka parrapot godang i, sude ma manggogo be laho padapotkon hasalaan ni Jesus anso bisa didabuhon halahi uhuman mamatehon Ia. Hape inda adong bagi aha dapot halahi. ⁵⁶ Sude saksi na nipiohon i, hum gabus do bahat dipardokkoni halahi taringot tu Jesus. Hasaksian ni halahi i pe marsialoan ma i na sada tu na asing. ⁵⁷ Dung i jongjong ma deba nari saksi na asing na mangalehen hatorangan na so tutu taringot tu Jesus. ⁵⁸ Didok halahi, "Hami bege do didok bayo on, ’Hurumpakkon ma Bagas Ni Debata na nibaen ni jolma on, dung tolu ari Hupajongjong ma mangulahi Bagas Ni Debata na so nibaen ni jolma.’ " ⁵⁹ Tapi taringot tusi pe laing marsialoan do hatorangan ni angka saksi i na sada tu na asing. ⁶⁰ Dung i jongjong ma Malim Godang i di jolo ni halahi sude manyapai Jesus, "Na so taralusi Ho dehe hum sandok hata, sude angka na nipardokkoni ni halak i manuhas Ho?" ⁶¹ Sip sajo Jesus. Sandok inda dialusi Ia. Dung i disapai Malim Godang i ma tuSia sanoli nari, "Tutu dehe Ho Kristus Anak Ni Na Tarpuji i?" ⁶² "Olo!" ninna Jesus. "Sude hamu angkon marnida Anak Ni Jolma i juguk di siamun ni Na Markuaso i. Dung i idaonmunu ma Ia ro di bagasan ombun sian langit an!" ⁶³ Manigor disibakkon Malim Godang i ma pakeannia i. Didok ia ma, "Inda pola porlu be saksi. ⁶⁴ Madung sude hamu sandiri umbege hataNia na jahat i. Saonnari, aha ma haputusanna?" Sude halahi mamutuskon bahaso marsala Jesus. Patut mate uhumon. ⁶⁵ Jadi adong ma deba na mamungka manijuri Jesus. Adong muse ma na manutup mataNia, dung i dibalbali ma Ia. Didok ma tuSia, "Cubo ma jolo paboa sanga ise na mamukul Ho?" Angka pangawal i pe dohot do mambalbali Jesus. ⁶⁶ Dompak na di alaman i si Petrus ro ma tusi sahalak anak boru, i ma naposo ni Malim Godang i. ⁶⁷ Jadi dung diida ia si Petrus na marsisudu di lambung api i dipamanat ia ma bohi ni si Petrus. Didok ia ma, "Na he dohot do ho dongan ni Jesus halak Nasaret i?" ⁶⁸ Tapi diporso si Petrus do. "Nada huboto jana nada mangarti au na nidokmi." Dung i jongjong ma si Petrus tu horbangan ni bagas ni Malim Godang i. Jadi martahuak ma manuk disi. ⁶⁹ Dung i diida naposo sinangkinan i ma mangulahi si Petrus disi, didok ia ma tu angka halak na disi, "Tutu do bayo on sahalak sian angka dongan ni Jesus i!" ⁷⁰ Tapi laing diporso si Petrus do mangulahi. Inda sadia honok dung i, didok angka halak na disi i ma mangulahi tu si Petrus, "Tutu do ho sahalak sian halahi. Angke halak Galilea do ho!" ⁷¹ Si Petrus pe marsumpa-sumpa ma ia. Didok ia, "Sai mate ma au muda tutu hutanda bayo na nidokmunu i!" ⁷² Martahuak muse ma manuk disi paduanolihon. Diingot si Petrus muse ma na jungada didok Jesus tusia, "Dompak so martahuak manuk paduanolihon dope ma tolu noli didok ho, na so ditanda ho Au." Dung i kehe ma si Petrus sian i tangis panguncombopon.

¹ Jadi sogot dope diompoti parrapot Godang i ma sude, dohot angka sintua ni malim, bagian hatobangon ni halak Jahudi dohot angka Siboto Surat mambaen partahian. Dirante halahi ma Jesus, dung i dioban ma Ia tu si Latus laho pasahatkon Ia tu si Latus. ² Disapai si Latus ma Jesus, "Tutu do Ho Raja ni halak Jahudi?" ning ia. "Olo, tutu do songon na nidokmi," ninna Jesus mangalusi. ³ Bahat ma tuhas-tuhas na nipardokkonan ni sintua ni malim i salaho tu Jesus. ⁴ Dung i disapai si Latus ma Jesus mangulahi, "Na so ra dehe Ho mangalusi? Ligi ma, sai bahat angka pangaduan ni halahi taringot tu Ho." ⁵ Tapi sanga na bia pe inda ra be Jesus mangalusi. Gabe homang ma roha ni si Latus. ⁶ Ganop Ari Pesta Paskah, dihasomalkon si Latus do paluahon sada halak na tarhurung hombar tu pangidoan ni halak na bahat. ⁷ Adong do sada bayo di hurungan, na tarhurung rap dohot angka donganna pamberontak, i ma na mamunu jolma laho mambaen gaor, na margoar si Barabbas. ⁸ Marroan ma halak mandapotkon si Latus laho mangidohon tusia anso dipalua ia ma sahalak na tarhurung, songon na somal. ⁹ Disapai si Latus ma halahi, "Ra do hamu muda hupalua Raja ni halak Jahudi i di hamu?" ¹⁰ Angke diboto si Latus do tangkas, hum hara ni gutgut do umbaen na dipasahat ni angka sintua ni malim i Jesus. ¹¹ Tapi dijajang angka sintua ni malim i ma halak na bahat i anso si Barabbas dipangido halahi tu si Latus. ¹² Dung i mandok hata ma si Latus tu halak na bahat i, "Antong anggo songon i, aha ma sibaenonku tu bayo na nigoaranmunu on, Raja Ni Halak Jahudi?" ¹³ Marsurak ma halahi, "Parsilangkon ma Ia!" ¹⁴ "Aha ma salaNia lakna?" ning si Latus manyapai. Tapi mur gogo ma halahi marsurak, "Parsilangkon ma Ia!" ¹⁵ Gabe dipalua si Latus ma si Barabbas di halahi laho pasonangkon roha ni halahi. Dung i disuru ia ma halak mangaloncing Jesus, dipasahat ia ma anso diparsilangkon. ¹⁶ Dioban angka tentara i ma Jesus tu emper ni bagas godang inganan ni gubernur. Dung i dipio ma marlagut sude pasukan i. Sahalak tentara Rom (15:16) ¹⁷ Dipamasuk halahi ma baju juba na ungu tu Jesus. Dibaen halahi muse ma tuku sian ranting-ranting na marduri, dipamasuk halahi ma i tu ulu ni Jesus. ¹⁸ Dung i ditabi halahi ma Ia, "Daulat i, Raja ni halak Jahudi!" ninna halahi. ¹⁹ Dilibaskon halahi ma bulu tu ulu ni Jesus, ditijuri halahi ma Ia. Dung i marsomba ma halahi di joloNia. ²⁰ Dung sidung diincahi halahi Jesus, dibuka halahi ma juba na ungu i dibaen halahi ma mangulahi bajuNia humani. Dioban ma Ia tu balian anso diparsilangkon. ²¹ Di tonga dalan i dipaksa halahi ma sada halak maroban hayu parsilang ni Jesus i. Na ro sian huta-huta do bayo i topet giot tu kota. (Si Simon goarna, i ma halak Kirene. Amang ni si Aleksander dohot si Rufus.) ²² Dioban ma Jesus tu sada inganan na margoar Golgota astuanna "Partangkurahan". ²³ Dilehen halahi ma diSia anggur na marcampur mur tapi nada giot Ia manginum i. ²⁴ Ujungna diparsilangkon halahi ma Ia. Dibagi-bagi halahi ma pakeanNa i. Diundi halahi ma laho manontuhon sanga na dia bagianna be. ²⁵ Pukul sambilan manyogot diparsilangkon halahi ma Jesus. ²⁶ Di ginjang ni parsilang i disuratkon do hasalaan na dituhaskon tuSia. On ma na disuratkon disi, "Raja Ni Halak Jahudi." ²⁷ Diparsilangkon halahi muse do rap dohot Jesus dua halak panyamun. Sada di siamunNia, na sada nari di siambirangNia. [ ²⁸ Jadi di bagasan ni i tulus ma tarjadi na tarsurat di Buku Na Badia i na mandok: "Nietong ma Ia sarupa tu halak na jahat."] ²⁹ Sude halak na mamolus sian i, marsiincahi ma tu Jesus, mangalayasi. Mopeng-openg be ma ulu ni halahi mandok, "O, ale Ho na giot mangarumpakkon Bagas Ni Debata jana na giot pajongjongkonna di bagasan tolu ari, ³⁰ mijur ma Ho sian parsilang i, palua ma diriMu!" ³¹ Laing songon i ma angka sintua ni malim i dohot angka Siboto Surat na disi, marsiincahi ma tu Jesus. Didok halahi ma sama halahi, "Anggo halak na asing dipalua Ia, hape anggo diriNia sandiri so tarpaluasa! ³² Anggo na tutu ma Ia raja ni Israel, Kristus i, mijur ma Ia sugari sian i. Anso porsaya hami diSia!" Halak na diparsilangkon i pe rap dohot Jesus laing mangincahi do tuSia. ³³ Dung tonga ari gabe golap ma sude luat i tolu jom honokna. ³⁴ Di pukul tolu andospotang i mangangguk ma Jesus marsora na gogo, "Eloi, Eloi, lama sabakhtani?" astuanna, "O DebatangKu, DebatangKu biasi ditinggalkon Ho Au?" ³⁵ Didok halak na umbege angguk-angguk i ma, "Ligi ma, dipio Ia si Elia!" ³⁶ Adong ma sahalak sian halahi mangompoti mambuat lumut. Disornomkon ma lumut i tu anggur na mancom i. Dibaen ia ma lumut i tu ujung ni bulu, disurduhon ia ma tu pamangan ni Jesus. Didok ia ma, "Painte! Taligi ma jolo sanga na ro do si Elia paijurkon Ia sian parsilang i." ³⁷ Dung i mangangguk ma Jesus dohot sora na gogo, jana tos ma hosaNia. ³⁸ Masibak ma tire na gantung di bagasan Bagas Ni Debata sian ginjang lopus tu toru. ³⁹ Dipanotnoti komandan na jongjong di jolo ni parsilang i do sanga tarbia pangangguk ni Jesus dohot parmateNia i. Didok komandan i ma, "Tutu do bayo on Anak Ni Debata!" ⁴⁰ Adong muse do disi angka dadaboru na mangaligi Ia sian na dao. I ma si Salome, si Maria Magdalena dohot si Maria inang ni si Jakobus na poso dohot si Joses. ⁴¹ Halahi ma angka dadaboru na mangihut-ihut dohot na mangurupi Jesus taran di Galilea Ia, jana bahat dope angka dadaboru na asing disi na ro rap dohot Jesus tu Jerusalem. ⁴² - ⁴³ Jadi dung potang ari ro ma si Josep na sian Arimatea. Halak na diparsangapi do ia di Rapot Godang ni Ugamo. Laing na tarpainte-inte ma ia sanga andigan do pungkaon ni Debata PangarajaionNa. Ari parkobasan do topet sadari i (i ma ari na mandapotkon Ari Sabat). Jadi dihabaranihon si Josep ma mangadop tu si Latus laho mangido bangke ni Jesus. ⁴⁴ Homang ma roha ni si Latus umbege, na dung mate Jesus. Disuru ia ma sahalak laho marpio komandan i anso disapai ia sanga na dung honok Jesus mate. ⁴⁵ Dung dibege ia hatorangan ni komandan i, diisinkon ia ma si Josep laho mambuat bangke ni Jesus i. ⁴⁶ Dung i ditobusi si Josep ma kopenna linen na halus. Dung dipaijur ia bangke ni Jesus i dibalut ia ma dohot kopen nangkinan i. Dung i dipamasuk ia ma bangke ni Jesus i tu bagasan sada kuburan na imbaru na nituhil di sada dolok batu. Dung i digulang ia ma sada batu na godang tu baba ni tanoman i, panutupna. ⁴⁷ Jadi anggo si Maria Magdalena dohot si Maria inang ni si Joses laing dipardimata halahi do sanga na di dia do dibaen Jesus.

¹ Dung salpu Ari Sabat kehe ma si Maria Magdalena, si Maria inang ni si Jakobus dohot si Salome manobusi ramu-ramuan na huskus silapuhononkon tu bangke ni Jesus. ² Andostorang dope ari parjolo di minggu i kehe ma halahi tu kuburan i. I dope giot bincar mataniari. ³ - ⁴ Di tonga dalan i dihatai halahi ma sama halahi, "Ise ma donganta manggulang batu panutup ni kuburan i? Harana na godangan do i." Tapi dung lalu disi, diida halahi ma, hape ma magulang batu i. ⁵ Dung i masuk ma halahi tu bagasan kuburan i. Di bagasan, sabola siamun, diida halahi ma juguk sada doli-doli. Mamake baju juba na bontar bayo i, gabe tarsonggot ma halahi. ⁶ Didok doli-doli i ma, "Ulang mabiar hamu! Huboto do na manjalahi Jesus halak Nasaret na diparsilangkon i do hamu. Inda dison be Ia. Madung dipangolu Ia mangulahi! Ligi hamu ma, disindi hian do bangkeNia dipayakkon. ⁷ Jadi saonnari, kehe ma hamu paboahon barita on tu angka siseanNia i dohot tu si Petrus. Paboa hamu ma, ’JoloananNia ma hamu tu Galilea. Disi ma idaonmunu Ia songon na dung dipaboaNia i hian.’ " ⁸ Dung i ruar ma halahi sian tanoman i, manigor dilojongi halahi ma hara ni songgotna dohot biarna. Nada adong dipaboa halahi sanga na tu ise pe, hara ni biarna halahi. UJUNG NI SURATAN NI SI MARKUS MANGIHUTKON PUSTAHA NA PARJOLO [ ⁹ Dung mulak mangolu Jesus, di Ari Minggu manyogot disi ma parjolo dipatidahon Ia diriNia tu si Maria Magdalena. (Sian si Maria on ma unjung dipaorot Ia pitu setan.) ¹⁰ Jadi kehe ma si Maria Magdalena paboahon tu angka ale-ale ni Jesus. Topet ma hatiha tangis halahi marsak. ¹¹ Tapi dung dibege halahi carito ni si Maria na mangolu do Jesus jana si Maria sandiri madung marnida Jesus, inda porsaya halahi. ¹² Dung i dipataridahon Jesus ma diriNia tu anak siseanNia dua halak di bagasan pangalaho na asing. I ma na tarjadi dompak mardalan halahi na dua tu sada huta. ¹³ Jadi mulak ma halahi laho paboahon i tu angka na asing i. Tapi halahi pe laing inda ra porsaya. ¹⁴ Ujungna dipataridahon Jesus ma diriNia tu angka siseanNia na sabolas halak i, hatiha mangan halahi. Digorahon Ia ma halahi hara ni na so pos i roha ni halahi dohot hara ni na so ra i halahi porsaya di na nidok ni angka na dung tangkas midaan, na tutu do Jesus mangolu. ¹⁵ Dung i didokkon Jesus ma tu halahi, "Kehe ma hamu tu sude portibi on. Baritahon hamu ma Jamita Na Denggan na sian Debata i tu sudena jolma. ¹⁶ Malua ma angka na porsaya jana na nididi. Tapi anggo halak na so ra porsaya hona uhum do. ¹⁷ Anggo tu angka na porsaya lehenon ma angka tanda-tanda ni kuaso sisongon on: Usiron ni halahi ma angka setan mamake goarKu. Mangkobari ma halahi dohot hata na so binoto ni halahi. ¹⁸ Muda ditiop halahi ulok sanga tarinum halahi rasun, inda pola bagi mahua halahi. Muda diampehon halahi tanganna tu ginjang ni halak na marnyae, gabe malum ma dilala halahi." ¹⁹ Dung sidung Jesus mandok hata tu halahi, manaek ma Jesus tu banua ginjang. Juguk ma Ia disi, di siamun ni Debata. ²⁰ Dung i kehe ma angka siseanNia i pararatkon barita na sian Debata i. Tuhan i pe dohot do markarejo rap dohot halahi laho mangurupi parjamitaon ni halahi. Laing dipatupa Tuhan i muse ma angka tanda ni kuaso dohot angka hahomangan sanga na di dia dibaritahon halahi jamita na sian Debata i.] UJUNG NA ASING SIAN PUSTAHA NA HONOK [ (v 9) Kehe ma dadaboru i mandapotkon si Petrus rap dohot angka dongannia i, manigor dipaboa halahi ma bope hum saotik, sude na nipaboa ni doli-doli i tu halahi. (v 10) Tapi dung salpu i, Jesus sandiri do marsuru angka siseanNia i, anso kehe halahi sian Habincaran tu Hasundutan paboahon barita na badia jana na manongtong i salaho tu haluaan na so ra mantak i.]