MATEUS

MATEUS

¹ Songon on ma tarombo ni angka ompu na umpompar Jesus Kristus, pomparan ni si Daud, pomparan ni si Abraham. Sian si Abraham lalu tu si Daud dapot ma angka goar na di toru on: ² Abraham, Ishak, Jakob, Juda dohot angka kahanggina, ³ si Peres dohot si Zerah (inangna margoar si Tamar), si Hesron, si Ram, ⁴ si Aminadab, si Nahason, si Salmon; ⁵ si Boas (inangna margoar si Rahab), si Obed (inangna margoar si Rut), si Isai dohot Raja Daud. ⁶ Sian si Daud lopus tu na tarbuang halak Israel tu Babel dapot ma angka goar-goar na di toru on: Si Salomo (anak ni si Daud, sian dongan saripe ni si Uria hian), ⁷ si Rehabeam, si Abia, si Asa, ⁸ si Josapat, si Joram, si Usia, ⁹ si Jotam, si Ahas, si Hiskia, ¹⁰ si Manase, si Amon, si Josia, ¹¹ si Jekhonya dohot angka kahanggina. ¹² Sian hatiha habuangan ni bangso Israel tu Babel lopus tu hasosorang ni Jesus dapot ma angka goar na di toru on: Si Jekhonya, si Sealtiel, si Zerubabel, ¹³ si Abihud, si Elyakim, ¹⁴ si Asor, si Zadok, si Akhim, si Eliud, ¹⁵ si Eleasar, si Matan, si Jakob, ¹⁶ si Josep halaklahi ni si Maria, na manubuhon Jesus, na nigoaran muse Kristus. ¹⁷ Jadi mamungka sian si Abraham lopus tu si Daud, adong ma opat bolas sundut. Sian si Daud lopus tu hatiha na tarbuang halak Israel tu Babel, opat bolas sundut muse. Jana sian habuangan ni halak Israel tu Babel lopus tu hasosorang ni Kristus, laing opat bolas sundut. ¹⁸ Songon on ma baritana taringot tu hasosorang ni Jesus Kristus. Dompak martunangan dope si Maria dohot si Josep, hape na dung denggan do pamatangnia. I ma sian kuaso ni Tondi Parbadia. Hum na martunangan dope halahi hatiha i, nada marbagas dope. ¹⁹ Halak na burju do si Josep tunangannia i. Jadi giot antahonnia ma parhataan na tu si Maria. Giot sipsip do ninna rohania baenonnia songon i, angke inda jop rohania laho pailahon si Maria di jolo ni halak na bahat. ²⁰ Hatiha manimbangi pangalaho i dope si Josep, marnipi ma ia. Diida ia ma di nipinia i, ro ma sada surusuruan mandok tusia, "Ale Josep, anak ni si Daud, ulang ho mabiar mambuat si Maria gabe dadaborumu. Harana, sian kuaso ni Tondi Parbadia do na di pamatangna i. ²¹ Sorang ma sian ia sada anak halaklahi, angkon Jesus do baenonmu goar ni Dakdanak i. Harana, giot paluaonNia ma bangsoNa sian angka dosa ni halahi be." ²² Tulus pe songon i sudena, anso laing tulus do muse sanga aha na nidok ni Tuhan marhite panurirangNa, na mandok songon on, ²³ "Denggan ma pamatang ni sada bujing-bujing, sorang ma sian ia sada anak halaklahi. Digoari ma Dakdanak i Immanuel." (Di hata Ibrani, Immanuel astuanna "Debata do rap dohot hita".) ²⁴ Dung ngot si Josep, dipatulus ia ma na nidok ni surusuruan ni Tuhan tusia. Dibuat ia ma si Maria gabe dadaborunia. ²⁵ Tapi salolot di pamatang ni si Maria Dakdanak i, inda unjung rap modom si Josep dohot si Maria. Jadi dung sorang Dakdanak i, dibaen si Josep ma goarna Jesus.

¹ Di kota Betlehem do hasosorang ni Jesus, i ma kota na di Luat Judea. Si Herodes do raja ni luat i di hatiha i. Jadi ro ma di hatiha i piga-piga halak angka parilmu bintang sian Habincaran tu Jerusalem. ² Disapai halahi ma, "Di dia do Dakdanak na sorang i, i ma na gabe Raja ni halak Jahudi i? Na hami ida do bintangNa bincar di sabola Habincaran, jadi na giot marsomba tuSia do umbaen na ro hami." ³ Dung tarbege tu Raja Herodes barita i, tarsonggot situtu ma ia. Laing songon i dohot sude halak na di Jerusalem. ⁴ Disuru ia ma angka kapala ni malim dohot angka Siboto Surat anso marlagut. Dung i disapai ia ma tu halahi sanga na di dia Kristus i giot sorang. ⁵ Dialusi halahi ma, "Di kota Betlehem do, i ma na di Luat Judea. Harana songon on do disuratkon panurirang, ⁶ ’Anggo ho ale Betlehem na di Luat Juda, inda bagi na ummenek ho sian angka kota na tarbonggal di Juda. Angke sian ho do ro sahalak Uluan, na manguluhon bangsongKu Israel.’ " ⁷ Dung dapot Raja Herodes hatorangan i, disuru ia ma parilmu bintang na sian Habincaran i marsuo dohot ia di na buni. Dung i disapai ia ma halahi satangkas-tangkasna sanga sadihari do mamungka tarida bintang i. ⁸ Dung i disuru ia ma halahi kehe tu Betlehem dung ditonai ia songon on, "Kehe ma hamu, tangkasi hamu ma satorang-torangna taringot tu Dakdanak i. Jadi dung marsuo hamu dohot Dakdanak i, paboa hamu ma tu au, anso dohot muse au ro marsomba tuSia." ⁹ Dung dibege halahi na nidok ni Raja Herodes i, kehe ma, halahi. Di tonga dalan i, diida halahi ma mangulahi bintang i, i ma bintang na niida ni halahi di Habincaran. Mardalan ma bintang i di jolo ni halahi lopus maradian di inganan ni Dakdanak i. ¹⁰ Jop situtu ma roha ni halahi dung marnida bintang i. ¹¹ Masuk ma halahi tu bara i, diida halahi ma Dakdanak i dohot si Maria inangNia i. Dung i dibuat halahi ma panyimpanan ni silua ni halahi, marsomba ma halahi pasahatkon silua, angka sere, hamonyan dohot miak na huskus. ¹² Laho mulak halahi tu kotana, inda sian dalan na parjolo i be dibolus halahi. Angke ro do Debata paingotkon halahi markite-hite nipi, anso ulang be mangulahi halahi mandapotkon si Herodes. ¹³ Dung kehe parilmu bintang i, diida si Josep ma sahalak surusuruan di bagasan nipinia. Didok surusuruan i ma tusia, "Jongjong ma ho, boan ma Dakdanak i dohot inangNa i mangungsi tu tano Mesir. Disi ma hamu maringanan lopus ro Au mangulahi mangkatai dohot ho. Harana ditahi roha ni si Herodes do manjalahi Dakdanak i laho mamunusa!" ¹⁴ Tarsunggul ma si Josep, dioban ma Dakdanak i dohot inangNa i mangungsi tu tano Mesir, laing borngin i. ¹⁵ Disi ma halahi maringanan lopus mate si Herodes. Songon i ma tarjadi anso laing tulus hata ni Tuhan markite-hite panurirang na mandok, "Sian tano Mesir do Hupio anakKi." ¹⁶ Dung diboto si Herodes na dung dipaoto-oto ni parilmu bintang na sian Habincaran i ia, gabe muruk sajo ma ia. Diparuar ia ma parenta anso dibunu sude dakdanak halaklahi na marumur dua taon tu toru na adong di kota Betlehem dohot na humaliang i. Dipahombar ma i tu hatorangan na nitangkasannia sian angka parilmu bintang i. ¹⁷ Tarjadi ma na dung didok ni Panurirang Jeremia songon on: ¹⁸ "Tarbege ma sora di kota Rama i ma sora ni andung dohot na tangis hara ni parkancitan. Ditangisi si Rahel do angka dakdanaknia; nada ra ia niapoan angke ma mate sude dakdanaknia." ¹⁹ Dung mate si Herodes, diida si Josep ma mangulahi sahalak surusuruan di bagasan nipinia. ²⁰ Didok surusuruan i ma, "Jongjong ma ho! Buat ma Dakdanak i dohot inangNa i, oban ma halahi mulak tu tano Israel. Harana, ma mate angka halak na giot mamunu Dakdanak i." ²¹ Jongjong ma si Josep, dioban ia ma Dakdanak i dohot si Maria mulak tu tano Israel. ²² Tapi tarbege muse ma di si Josep, si Arkhelaus anak ni si Herodes i do hape manggonti amangnia gabe raja di Luat Judea, gabe mabiar ma ia kehe tusi. Tapi hara ni na dung dapotan sipaingot ia sian Tuhan di nipinia, gabe tu Luat Galilea ma ia kehe. ²³ Disi ma ia maringanan di sada kota na margoar Nasaret. Markite na songon i ma tulus na nidok ni angka panurirang, na mandok, "Nigoaran ma Ia halak Nasaret."

¹ Dompahi, tarida ma si Johannes Pandidi di halongonan na di tano Juda. Disi ma ia mamungka marjamita. ² "Pauba hamu ma rohamunu", ning ia, "harana inda pola lolot be, pungkaon ni Debata ma padalankon pangarajaionNia!" ³ Si Johannes on ma na nidok ni Panurirang Jesaya di angka hatania on, "Adong ma sada halak na pio-pio di halongonan, ’Pauli hamu ma dalan ni Tuhan; pahornop hamu ma dalan na giot bolusonNia.’ " ⁴ Sian imbulu ni unto do dibaen pakean na nipake ni si Johannes on. Bobatnia sian bobak. Siapor dohot aer ni loba do panganonnia. ⁵ Marroan ma halak Jerusalem, dohot angka halak Judea na asing i dohot halak na donok tu Batang aek Jordan manopot si Johannes. ⁶ Dioku halahi ma angka dosa ni halahi, gabe dididihon si Johannes ma halahi di Batang aek Jordan i. ⁷ Bahat muse do halak Parise dohot Saduse na marroan tu si Johannes, anso tardidi. Dung diida ia halahi marroan, didok ia ma tu halahi, "Hamu angka pomparan ni ulok! Ise do mandok tu hamu, na bisa pasimbilon dirimunu sian muruk ni Debata na giot ro i? ⁸ Baen hamu ma pangalaho na pataridahon na dung muba rohamunu, sian angka dosamunu. ⁹ Dung i ulang didok rohamunu, tarpatigor hamu dirimunu muda didok hamu, ’Ompungnami do si Abraham.’ Au ma mandok di hamu, sian batu i pe tarbaen Debata do pomparan di si Abraham! ¹⁰ Madung singkop kampak laho manaba hayu di uratna i. Sude hayu na so denggan parbatuna, sitabaon ma i, jana niambungkon tu api. ¹¹ Anggo au, aek do hudidihon tu hamu. I ma pataridahon na dung muba rohamunu sian angka dosamunu. Tapi anggo na giot ro i di pudingku, Tondi Na Badia dohot api do didihononNia tu hamu. Gumodang dope Ia sian au. Hum mambuka tali ni sipatuNia pe tehe nada tuk dope au. ¹² DitanganNia do anduri laho mamiari. PiaranNia ma emena i tu talobat, tapi anggo lapung tutungonNia ma tu api na so ra mintop." ¹³ Jadi di hatiha i ro ma Jesus sian Galilea tu Batang aek Jordan mandapotkon si Johannes, anso dididihon si Johannes Ia. ¹⁴ Tapi ditulak si Johannes do pangidoanNia i. Ning ia ma, "Au do na patut didihononMu! Jana biasi Ho ro tu au?" ¹⁵ Tapi dialusi Jesus ma, "Padiar ma songon i! Harana patut do oloanta sude aturan na nihalomohon ni Debata." Jadi dididihon si Johannes ma Jesus. ¹⁶ Dung sidung dididihon, manigor ruar ma Jesus sian batang aek i. Ompot ma mungkap langit, diida Jesus ma Tondi Ni Debata mijur songon darapati, songgop tuSia. ¹⁷ Dung i tarbege ma sora sian langit na mandok, "On do AnakKu Na Huhaholongi, jop do rohangKu mida Ia."

¹ Dung i ditogu Tondi i ma Jesus tu halongonan, anso diuji Sibolis Ia. ² Opat pulu ari opat pulu borngin honokna nada mangan Jesus. Gabe male ma Ia. ³ Ro ma Sibolis i didok ma tuSia, "Muda Anak Ni Debata do Ho, dokkon ma tu angka batu on anso gabe roti." ⁴ Dialusi Jesus ma, "Adong do tarsurat songon on: Nada hum sian roti sajo hangoluan ni jolma, tapi sian sude hata na nidok ni Debata do." ⁵ Dung i dioban Sibolis i ma Jesus tu Kota Na Badia. Dibaen ma Ia tu bungkulan ni Bagas Ni Debata. ⁶ Dung i didok Sibolis i ma tuSia, "Muda na tutu ma Ho Anak Ni Debata, ambur ma tu toru, harana angke adong do tarsurat songon on, ’Suruon ni Debata ma angka surusuruanNia manjago Ho, tarehonon ni halahi ma tanganna manjagit Ho ulang tombom patMu tu batu.’ " ⁷ Dialusi Jesus ma, "Tapi laing tarsurat do, ’Ulang uji Tuhan Debatamu.’ " ⁸ Dung i dioban Sibolis ma Jesus mangulahi tu sada dolok na gincat situtu. Dipatidahon Sibolis i ma tuSia sian i sude harajaan na di portibi on dohot sude hasangapanna. ⁹ Dung i ninna Sibolis i ma mandok Jesus, "Sudena i hulehen pe di Ho, muda ra Ho unduk marsomba tu au." ¹⁰ Dialusi Jesus ma, "Morot ma ho, Sibolis! Angke tarsurat do, ’Sombaonmu do Tuhan Debatamu, hum Ia sajo do oloanmu!’ " ¹¹ Ujungna, ditinggalkon Sibolis i ma Jesus, marroan muse ma manigor angka surusuruan laho mangoloi Ia. ¹² Jadi dung dibege Jesus na dung tarhurung si Johannes, dipadao Ia ma diriNia tu Galilea. ¹³ Ditadingkon Ia ma kota Nasaret, kehe ma Ia maringanan tu kota Kapernaum. I ma sada kota di topi ni Dano Galilea na masuk tu Luat Zebulon dohot Naftali. ¹⁴ Hara ni na nibaen ni Jesus songon i, gabe tulus ma na nidok ni Panurirang Jesaya na mandok, ¹⁵ "Tano Zebulon dohot Naftali, i ma dalan laho tu laut, di ipar ni Batang aek Jordan, Galilea i ma inganan ni na so halak Jahudi! ¹⁶ Halak na maringanan di bagasan hagolapan madung marnida sondang na godang! Madung bincar sinondang na torang! Di halak na maringanan di luat na nilinggoman ni hamatean!" ¹⁷ Sian i ma dipungka Jesus marjamita mandokkon, "Pauba hamu ma rohamunu, dibaen madung donok Harajaan Ni Banua Ginjang." ¹⁸ Dompak mardalan Jesus di topi ni Dano Galilea, diida Ia ma dua halak parihan. Markaha-maranggi do halahi na dua. I ma si Simon (na margoar muse si Petrus) dohot angginia si Andreas. Hatiha manangkup ihan do halahi, angke marihan do karejo ni halahi. ¹⁹ Didok Jesus ma tu halahi, "Beta, ihutkon hamu Au, baenonKu ma hamu sijala jolma." ²⁰ Manigor ditinggalkon halahi ma jala ni halahi i, diihutkon halahi ma Jesus. ²¹ Didatdati Jesus ma na mardalan i. Diida Ia ma dua halak nari na markaha-maranggi, i ma si Jakobus dohot si Johannes anak ni si Zebedeus. Na topet rap do halahi dohot amang ni halahi paturehon jala di bagasan parau i. Dipiohon Jesus muse ma halahi. ²² Laing manigor ditinggalkon halahi ma parau dohot amang ni halahi i diihutkon halahi ma Jesus. ²³ Dung i dibolus Jesus ma sude Luat Galilea. Mangajari ma Ia di angka bagas paribadatan ni halahi. Dijamitahon Ia ma Jamita Na Denggan taringot tu Harajaan Ni Debata. Dipamalum Ia ma angka na marnyae dohot halak na markahurangan. ²⁴ Tarbonggal do Jesus lalu tu tano Siria sude, gabe bahat ma marroan halak tuSia. Diparobani halak ma angka na marnyae dohot halak na marragam rupa hasusaanna. Adong ma i na hona begu, adong na solpoton, adong na pangpangon. Sude halahi dipamalum Jesus. ²⁵ Bahat sajo do halahi na mangihutkon Jesus di hatiha i -- adong na ro sian Galilea, adong ma i na ro sian Luat Dekapolis (artina Sampulu Kota), adong na sian Jerusalem dohot sian Judea. Adong dope na ro sian luat na di ipar ni Batang aek Jordan.

¹ Dung diida Jesus bahat ni halak i, manangkok ma Ia tu sada dolok. Juguk ma Ia disi. Dung i marroan ma anak siseanNia i tu lambungNia. ² Dipungka Ia ma mangajari halahi. ³ "Martua ma angka na dangol di tondina, dibaen di halahi do Harajaan Ni Banua Ginjang! ⁴ Martua ma halak na marsak roha; angke na giot apoan do roha ni halahi. ⁵ Martua ma angka na lambok roha; dibaen teanon ni halahi do portibi on. ⁶ Martua ma angka na male dohot na manguas mida hatigoran, angke na giot pabutongon do halahi muse. ⁷ Martua ma angka na marasi ni roha, dibaen dapotan asi ni roha do muse halahi. ⁸ Martua ma halak na ias rohana, angke halahi ma na giot marnida Debata. ⁹ Martua ma angka na mambaen dame, dibaen nigoar do halahi anak ni Debata. ¹⁰ Martua ma angka na diayak-ayak hara ni hatigoran i, dibaen di halahi do Harajaan Ni Banua Ginjang. ¹¹ Martua ma hamu muda diincahi jana diayak-ayak halak hamu, jana dipardok halahi ragam-ragam na jat na so tutu adop hamu hara ni Au. ¹² Jop ma rohamunu jana marolop-olop ma hamu, angke godang do upamunu di banua ginjang, dibaen laing songon i do diayak-ayak halahi angka panurirang na jumolo sian hamu." ¹³ "Hamu do sira ni portibi on. Muda hambar sira i, tarpaancim dope he i? Nada adong be guna ni i. Siambungkononkon noma i anso didege-dege halak. ¹⁴ Hamu do sondang ni portibi on. Nada tarbunihon sada kota na di ginjang dolok. ¹⁵ Nada adong halak na manutung lampu, dung i ditutupi ia dohot belek. Tu inganan ni lampu do i dibaen halak, anso torang sude idaon ni halak na di bagas i. ¹⁶ Sugari angkon songon i ma nian torangna sinondangmunu di jolo ni halak. Anso diida halak parangemunu na denggan i. Gabe dohot ma halahi mamuji Amangmunu na di banua ginjang i." ¹⁷ "Ulang ninna rohamunu, na giot mansoadahon angka Tona ni ugamo Jahudi na niajarkon ni si Musa dohot panurirang-panurirang i, umbaen na ro Au. Nada na giot mangagohon i umbaen na ro Au, tapi na giot mambaen sanggam do. ¹⁸ Ingot ma! Salolot adong langit dohot tano on, satitik sanga sahurup na menek pe nada tola nisesa sian Tona i, lopus tulus sudena i! ¹⁹ Hara ni i, sanga ise na mangalanggar sada sian angka Tona i, sanga na ummenekna i pe, dung i diajari ia muse halak na asing mambaen songon i, gabe na ummenek do sisongon i di bagasan Harajaan Ni Banua Ginjang. Tapi sabalikna, sanga ise na padalankon angka aturan i, dung i diajari ia muse halak na asing mambaen songon i, halak na godang do sisongon i di bagasan Harajaan Ni Banua Ginjang. ²⁰ Jadi Hudok ma tu hamu: Muda nada sumurung hatigoranmu sian hatigoran ni angka Parise dohot Siboto Surat, nada tarbaen hamu masuk tu Harajaan Ni Banua Ginjang." ²¹ "Madung dibege hamu do na diajarkon tu angka na tobang-tobang i: Ulang ho mamunu. Sanga ise na mamunu, angkon hona uhum. ²² Tapi anggo saonnari Au mandok di hamu, sanga ise na marmilas ni roha tu donganna, angkon diuhumi do; barang ise na mandok tu donganna, ’Raka’ (artina ’Si soada’), hona uhum di jolo ni Mahkamah Ugamo; dung i barang ise na mandok tu donganna, ’Si naoto’, tama ma ia diambungkon tu api naroko. ²³ Hara ni i, muda kehe ho di sada hatiha marsomba laho pasahatkon haulmu tu Debata, hape taringot ho tu sada donganmu na marhancit ni roha tu ho; ²⁴ muda songon i ma pangalahona, tinggalkon ma jolo haulmi, kehe ma ho mardame dohot ia. Dung i pe anso tola ho mulak pasahatkon haulmi tu Debata. ²⁵ Sugari adong ma halak na mangaduhon ho tu paruhuman, jolo mardame ma ho tusia salolot tarbaen dope. Harana nada lalu dope tu sidang. Anggo so jolo diusahohon ho do pardamean, pasahaton ni bayo i ma ho tu panguhum. Pasahaton ni panguhum i muse ma ho tu soridadu. Baru ma dipamasuk soridadu i ho tu hurungan. ²⁶ Situtu do na Hudok tu ho: Nada tarbaen ho ruar sian hurungan i, anggo so jolo margarar sude utangmi." ²⁷ "Madung dibege hamu do pangajaran na mandok songon on: Ulang ho markarosuan. ²⁸ Tapi anggo saonnari Hudok tu hamu: Muda adong halak na midaan dadaboru, gabe impol rohania, na dung markarosuan do ia dohot anak boru i di bagasan rohania. ²⁹ Muda mardosa ho hara ni matamu siamun i, pulsikkon ma i anso ambungkon! Gumonan do mago deba parkokas ni pamatangmi ulang pado sudena niambungkon tu narako. ³⁰ Muda hara ni tangan siamunmi do ho mardosa, gotapkon lalu ambungkon sian i! Gumonan do mago sabariba tanganmi, ulang pado sude pamatangmi masuk tu narako." ³¹ "Adong muse do pangajaran songon on: Ganop halak na manyirangkon dadaboruna, angkon lehenonnia do surat sirang tusia. ³² Tapi anggo saonnari Au mandok di hamu: Sanga ise na manyirangkon dadaboruna, asing ni na manyimbil dadaborunia i, bayo i do na mambaen gabe markarosuan dadaborunia i, muda marbagas ma anakboru i. Bayo na mambuat anakboru na songon i pe dohot do i markarosuan." ³³ "Dibege hamu do poda na adong di angka ompunta: ulang porso janjimu. Sanga aha na nijanjihonmu mardongan sumpa tu Debata, angkon patulusonmu do i. ³⁴ Tapi saonnari Au mandok tu hamu: Bagi na bia pe, ulang ho marsumpa. Ulang ho marsumpa markite-hite langit. Harana inganan hasangapan ni Debata do langit. ³⁵ Sanga markite-hite tano on. Harana sidege-degean ni pat ni Debata do tano on. Sanga markite-hite Jerusalem, angke kota ni Debata do i. ³⁶ Ulang ho muse marsumpa markite-hite ulumu, harana nada adong kuasomu mambaen bontar sanga mambaen lomlom sada pe sian obukmi. ³⁷ Dok sajo ma ’Olo’ sanga ’Nada’ -- muda tamba sian i, sian Sibolis do i ro." ³⁸ "Dibege hamu do adong muse pangajaran songon on: Mata do gonti ni mata, ipon do gonti ni ipon. ³⁹ Tapi saonnari Au mandok di hamu: Ulang ma alo hamu halak na mambaen na so denggan tu hamu. Tapi sabalikna do! Muda ditampeleng halak hurummu siamun, laing tarehon ma ditampeleng ia hurummu siambirang i. ⁴⁰ Muda diaduhon halak hamu tu paruhum laho mambuat bajumu, lehenkon muse ma dohot baju jubami disia. ⁴¹ Muda adong halak na mamaksa hamu mardalan mandongani ia sakilometer daona, dongani ma ia mardalan dua kilometer. ⁴² Muda adong halak na mangido bagi aha tu ho, lehen sajo ma songon i. Ulang pola tulak halak na giot manginjam sanga aha sian ho." ⁴³ "Madung dibege hamu taringot tu pangajaran on: Haholongi ma donganmu, goyak ma rohamu mida alomu. ⁴⁴ Tapi saonnari Au mandok di hamu: Haholongi ma alomu jana tangiangkon ma halak na mamparkanciti ho, ⁴⁵ anso gabe dakdanak ni Amangmunu na di banua ginjang i hamu. Harana dipabincar Debata do mataniari tu halak na burju dohot tu halak na jahat pe. Diparo Ia do udan tu halak na tigor dohot tu halak na geduk roha. ⁴⁶ Harana, muda hum halak na manghaholongi hamu do dihaholongi hamu, aha labo ni i di hamu? Nada he laing songon i do dikarejohon angka sitagi pajak i? ⁴⁷ Muda hum donganmunu do dijalang hamu, aha ma pola surungmunu disi? ⁴⁸ Angkon sanggam do hamu -- sarupa dohot Amangmunu na di banua ginjang i, sanggam."

¹ "Ingot hamu ma! Unang baen hamu na niwajibkon ni ugamo di jolo ni na bahat, anso diida halak hamu. Muda songon i do dibaen hamu, nada lehenon di hamu upa na sian Amangmunu na di banua ginjang i." ² "Jadi muda dilehen hamu silehenon, ulang paboa-boa hamu i songon na nibaen ni angka halak pangalancap. Anggo halahi, tagi do mambaen na songon i di angka bagas paribadatan dohot di angka dalan godang, anso dipuji halak halahi. Ingot hamu ma! Madung dijagit halahi hian upa ni halahi. ³ Tapi anggo hamu muda mangalehen silehenon, ulang pabotohon tu tangan siambirangmi na nilehen ni tangan siamunmi. ⁴ Indangkon pola adong halak na umbotoan i. Diida Amangmunu na di banua ginjang i do sanga aha na nibaenmunu di na so pamotoan ni halak. Jadi, lehenonNia ma upana di hamu." ⁵ "Muda martangiang hamu, ulang ma songon halak pangalancap. Na ringgasan halahi jongjong martangiang di angka bagas paribadatan dohot di sirpang-sirpang ni dalan, anso diida halak. Ingot hamu ma! Madung dijagit halahi upa ni halahi. ⁶ Tapi muda martangiang ho, masuk ma tu bilik, kunci ma pintuna i. Disi ma ho martangiang tu Amangmu na so tarida i. Diida Ia do sanga aha na nibaenmu di na so pamotoan ni halak. LehenonNia ma upa ni i tu ho. ⁷ Muda martangiang ho, ulang pola maradu ginjang songon na nibaen ni halak na so mananda Tuhan. Ninna roha ni halahi, gabe ditangihon ma tangiang ni halahi hara ni ginjangna. ⁸ Ulang songon i hamu. Diboto Amangmunu do na porlu di hamu, dompak so mangido dope hamu. ⁹ Jadi songon on ma dok hamu muda martangiang hamu, ’Ale, Amangnami na di banua ginjang: Pinarbadia ma goarMu, ¹⁰ ro ma HarajaanMu tulus ma rohaMu di tano on, songon di banua ginjang. ¹¹ Lehen ma di hami panganonnami na porlu sadari on, ¹² sesa ma angka dosanami, songon hami manyesa dosa ni angka na mardosa tu hami, ¹³ jana ulang pamasuk hami tu bagasan pandugaan, tapi palua ma hami sian pangago i.’ [Ho do Raja na markuaso jana na marsangap salolot-lolotna.] ¹⁴ Muda disesa hamu halak na marsala tu hamu, sesaon ni Amangmunu na di banua ginjang i muse ma salamunu. ¹⁵ Tapi muda nada disesa hamu sala ni halak na asing, Amangmunu na di banua ginjang i pe na da ra Ia manyesa salamunu." ¹⁶ "Dung i muda puaso hamu, ulang ma markaremut bohimunu songon halak pangalancap. Mardalani ma halahi, gale-gale idaon. Hape anso diboto halak do na puaso halahi. Ingot hamu ma! Madung dijagit halahi do sude upa ni halahi. ¹⁷ Tapi anggo hamu, muda puaso, paias ma bohimunu, marsuri hamu. ¹⁸ Anso ulang pola diboto halak na puaso hamu. Tuk ma Amangmunu na so tarida i na umbotosa. Diida Ia do na nibaenmunu i haru pe so diboto halak na asing. Dung i lehenonNia ma upana tu hamu." ¹⁹ "Ulang ma palagut arta hamu di portibi on. Harana anggo di portibi on adong do ngitngit dohot harat na manyegohon arta i. Dung i muse tarbungkar jana tartangko panangko do i. ²⁰ Di banua ginjang ma palagut hamu arta. Harana anggo di banua ginjang i nada tarbaen ngitngit dohot harat manyegohonsa. Panangko pe nada tarbaensa mambungkar dohot manangko. ²¹ Harana sanga di dia inganan ni artamu, disi do dohot rohamu!" ²² "Mata i do songon lampu di pamatang. Muda torang matamu, gabe torang do sude pamatangmu. ²³ Tapi muda rambon do matamu, gabe golap sajo ma sude pamatangmu. Jadi muda golap do torang na di bagasan dirimi, golap gulita noma i." ²⁴ "Nada adong sahalak pe na tarbaen mangoloi dua tuan sanoli mangoloi. Muda dibaen ia songon i, goyak ma rohania tu na sada, holong ma rohania tu na sada nari. Sanga burju ma ia tu tuan na sada, tapi na sada nari inda diantureskon. Songon i muse do hamu. Nada tarbaen hamu markarejo tu Debata dohot markarejo tu arta sanoli mangkarejohon. ²⁵ Hara ni i, Hudok ma tu hamu! Ulang pola sak rohamunu taringot tu ngolumunu. Sanga aha ma panganon dohot inumonmunu, jala ulang pola sak rohamunu taringot tu pamatangmunu, sanga aha sipakeonmunu. Inda he ummarga hosa sian panganon? Inda he ummarga pamatang sian pakean? ²⁶ Ligi hamu ma jolo angka unggas na habang i pahae-pahulu. Nada manyabur same halahi, nada manyabi, nada adong palagutkon suha ni saba halahi tu talobat. Tapi haru pe songon i, dipahan Amangmunu na di banua ginjang i do halahi. Nada he dao dope ummarga hamu sian angka unggas i? ²⁷ Ise ma sian hamu na tarbaen paginjangkon umurna, hum saotik pe, hara ni sak ni rohania lakna? ²⁸ Biasi pola angkon sai lomos rohamunu taringot tu pakean? Pamanat hamu ma jolo bunga-bunga na di padang-padang i. Nada markarejo halahi, nada martonun. ²⁹ Tapi Hudok ma tu hamu, si Salomo na kayo i pe nada jabat dipake ia pakean na jeges songon bunga-bunga i! ³⁰ Songon i ma jegesna dihobasi Debata angka duhut na di padang-padang i, i ma na tubu sadari on, tapi ancogot ambungkononkon ma i, dung i nitutung. Muda dihobasi Debata do ruput i songon i, mur ma hamu! Tapi, magaletu do haporsayaanmunu! ³¹ Ulang ma lomos rohamunu! Jana ulang ma dokkon hamu, ’Aha ma naron panganonnami’, sanga, ’Aha ma naron inumonnami’, sanga, ’Aha ma naron pakeannami?’ ³² Halak na so mananda Tuhan do na tongtong manggogo manjalahi na songon i. Hape nian diboto Amangmunu na di banua ginjang i do, sude na porlu di hamu. ³³ Sai jumolo ma jalahi hamu Harajaan Ni Debata dohot hatigoranNa, jadi lehenonNia ma di hamu sasude na songon i. ³⁴ Hara ni i ulang pola lomos rohamunu taringot tu ancogot, angke disarihon ari ancogot i do na hasaya disia. Marsiporsan hasusaanna be do angka ari i."

¹ "Ulang uhumi hamu halak, anso ulang diuhumi hamu. ² Harana songon uhum na niuhumkonmunu, songon i do niuhuman hamu muse; jana parsuhatan na nisuhatkonmunu i do niparsuhatkon tu hamu muse. ³ Biasi ma he angkon sai paligi-ligionmunu bancir-bancir na sansilbak di mata ni donganmu, hape hayu na sabalok na di matamu umpe diparrohahon ho? ⁴ Patut ma he puluk ho mandok tu donganmu, ’Dia tuson anso huendat bancir-bancir i sian bagasan matami,’ hape di bagasan matamu sandiri adong dope na sabalok na godang? ⁵ O pangalancap! Paruar ma jolo balok na di matami sandiri, baru pe anso tangkas ho mangaligi. Dung i tarparuar ho ma bancir-bancir na di mata ni halak na asing. ⁶ Ulang lehen hamu barang na badia tu anjing. Harana muda dilehen hamu i, marbalik ma anjing i laho manyarbut hamu. Dung i ulang lehen hamu berlian tu babi, angke dilonca-lonca babi i sajo do i." ⁷ "Pangido hamu ma, gabe manjagit ma hamu. Jalahi hamu ma, gabe dapotan ma hamu. Tuktuhi hamu ma pintu, gabe dibuka ma pintu i di hamu. ⁸ Harana, angkon manjagit do halak na torus mangido. Angkon dapotan do halak na torus manjalahi. Jana na torus manuktuk pintu, angkon dibuka do pintu i disia. ⁹ Adong dehe sahalak sian hamu na mangalehen batu tu anakna muda dipangido anakna i roti? ¹⁰ Sanga na mangalehen ulok, muda mangido ihan anakna i? ¹¹ Haru songon i pe jahatmunu, laing diboto hamu do mangalehen na denggan tu dakdanakmunu, mur Amangmunu na di banua ginjang i ma. Tontu lehenonNia do angka na denggan i di halak na mangido tuSia! ¹² Baen ma tu halak na asing, sanga aha por ni rohamu baenon ni halahi tu hamu. Songon i ma impola ni angka Tona dohot hata ni angka panurirang." ¹³ "Sian pintu na sompit i ma hamu masuk! Harana anggo pintu na godang jana na bidang i, pintu tu narako do i! Na bahatan do halak mamolus sian i. ¹⁴ Tapi anggo pintu na sompit dohot dalan na hohot i, i ma pamolusan ni halak tu hangoluan. Hum saotik sajo do halak na dapotan i." ¹⁵ "Jago-jago ma hamu tu angka panurirang pargabus. Songon biri-biri do idaon haroro ni halahi tu hamu, tapi anggo di bagasan satutuna songon sorigala panyoro do halahi. ¹⁶ Sian parbatuna do tandaonmunu halahi. Bisa dehe lakna halak mamutik batu ni anggur sian tonga-tonga ni sihupi, sanga gala-gala sian tada-tada? ¹⁷ Laing songon i do hayu na jeges marbatuhon na jeges, jana muda suan-suanan na so jeges, jatjat do parbatu ni i. ¹⁸ Muda suan-suanan na jeges, nada marbatuhon na jatjat. Suan-suanan na so jeges, nada marbatuhon na denggan. ¹⁹ Sude suan-suanan na so denggan marbatu, tabaon do i anso nitutung. ²⁰ Jadi sian parbatu ni halahi do tandaonmunu halahi." ²¹ "Nada sude halak na mamiohon Au, ’Tuhan, Tuhan’, giot masuk tu Harajaan Ni Banua Ginjang. Tapi hum halak na patuluskon hagiot ni Damang na di banua ginjang i do. ²² Di ari parpudi bahat ma halak na mandok tu Au, ’Tuhan, Tuhan, nada he mangasahon goarMu do hami manyurirangi? Nada he laing mangasahon goar ni Tuhan i do hami paorot angka setan, jana hami baen angka tanda hahomangan?’ ²³ Tapi anggo alusKu songon on ma, ’Nada Hutanda hamu! Morot ma hamu sian Au, angka na jahat do hamu!’ " ²⁴ "Antong, sarupa ma tu halak na pistar na pajongjong bagasna di ginjang ni batu, sanga ise na manangihon bope na patuluskon angka hata nangkinan i. ²⁵ Haru ro pe udan, magodang dohot aek, ro muse alogo na gogo manondong bagas i, nada ra rumpak bagas i angke di ginjang batu do i dipajongjong. ²⁶ Dung i, halak na umbege hatangKu, tapi nada dipatulus ia, sarupa ma i tu halak na bodo na pajongjong bagasna di ginjang ni horsik. ²⁷ Muda ro udan, magodang ma aek, ro muse ma alogo na gogo manondong bagas i, marumpak ma bagas i. Hebat sajo ma hasegoanna." ²⁸ Dung sidung Jesus mangajarkon hataNa sinangkinan i, homang-homang ma roha ni halahi na umbege pangajaranNia i. ²⁹ Harana nada songon pangajari ni angka Siboto Surat ni halahi i pangajar ni Jesus, tapi marsahala do.

¹ Dung mijur Jesus sian dolok i, bahat do halak mangihutkon Ia. ² Jadi ro ma sada halak na huliton. Manungkap ma ia marsomba tu Jesus. Didok ia ma, "O, Tuan! Sugari ra Ho, tarpamalum Ho do au." ³ Disurduhon Jesus ma tanganNia laho manjama bayo i. Didok Jesus ma tusia, "Ra do Au, malum ma ho!" Santongkin i mago ma nyaena i jana manigor malum. ⁴ Dung i didok Jesus ma tusia, "Ingot ma! Ulang caritohon na masa on sanga na tu ise pe. Tapi kehe ma ho manopot malim, patidahon ma dirimu. Jadi lehen ma haulmu hombar tu na nidok ni si Musa, anso diboto halak na dung malum ho!" ⁵ Di na masuk Jesus tu kota Kapernaum, ro ma sada halak tentara na marpangkat mandapotkon Jesus mangido tolong tuSia. ⁶ "O, Tuan," ninna tentara na pangkat i, "marnyae do naposongku di bagas. Modom sajo do di podoman. Onyangon hancit sajo." ⁷ "Denggan," ninna Jesus, "Ro pe Au pamalum ia." ⁸ "Inda pola ale Tuan," ninna tentara na pangkat i, "Mabiletu do au manjagit Tuan i di bagasku, hum sahata sajo pe dokkon, manigor malum ma nyae ni naposongki. ⁹ Harana au pe, angkon oloanku do hata ni kapalangku. Ditoru ni pangkatku pe adong do angka tentara, angkon oloan ni halahi do na hudok. Muda hudok tu na sada, ’Kehe ho!’, kehe do ia. Husuru na asing, ’Ro tuson!’ ro do ia. Huparenta do naposongku, ’Songon on baen!’ dibaen ia do i." ¹⁰ Dung dibege Jesus hata ni tentara na pangkat i, homang ma rohaNia. Gabe didok Ia ma tu halahi na mangihutkon Ia, "Tangihon hamu ma jolo! Nada unjung dope Au marsuo dohot haporsayaan na songon on godangna di tonga-tonga ni halak Israel. ¹¹ Tapi ingot hamu ma na Hudok on! Bahat do halak na giot ro sian Habincaran dohot sian Hasundutan anso rap marpesta marjop ni roha dohot si Abraham, si Ishak dohot si Jakob di bagasan Harajaan Ni Banua Ginjang. ¹² Hape anggo na patut hian gabe parsidohot di Harajaan i, ambungkononkon ma tu hagolapan di balian. Tangis-tangis ma halahi disi jana patungaripon." ¹³ Dung i didok Jesus ma tu tentara na pangkat i, "Mulak ma ho, sanga aha na ni haporsayaanmi, tulus ma i." Santongkin i, manigor malum ma nyae ni naposonia i. ¹⁴ Kehe ma Jesus tu bagas ni si Petrus. Diida ia ma disi nantulang ni si Petrus topet marun. ¹⁵ Dijama Jesus ma tanganna i, manigor mago ma arunna i. Jongjong ma ia laho mangoloi Jesus. ¹⁶ Dung marayak potang, dioban halak ma tu Jesus bahat angka na hona setan. Dohot hata sajo do diusir Jesus angka begu i, dipamalum Ia muse ma sude halak na marnyae i. ¹⁷ Di na nibaen ni Jesus sudena i gabe hasongtian ma na nidok ni Panurirang Jesaya na mandok songon on, "Diporsan Ia do sude pardangolanta, dipamalum Ia do sude nyaenta." ¹⁸ Jadi dung diida Jesus bahat halak humaliang Ia, disuru Ia ma kehe halahi marparau tu ipar ni dano i. ¹⁹ Jadi ro ma sada Siboto Surat tuSia mandok, "Ale, Guru! Rap noma au dohot Ho, sanga tu dia pe Guru i kehe!" ²⁰ Dialusi Jesus ma, "Marliang do sorigala, marasar do angka unggas, tapi anggo Anak Ni Jolma i, i ma suruan ni Debata, nada adong inganan hapayahan ni uluNia." ²¹ Dung i ro ma sada halak siseanNia na asing mandok, "Ale Tuhan, loas ma jolo au mulak tu huta manguburkon damang," ninna. ²² Tapi dialusi Jesus ma, "Ihutkon ma Au, jana padiar ma halak na mate manguburkon na matena sandiri," ning Ia. ²³ Masuk ma Jesus tu parau rap dohot anak siseanNia i. ²⁴ Tompu ma ro alogo na lobi gogo di dano i gabe ditondong ombak ma parau i. Topet do hatiha modom Jesus di na ro alogo i. ²⁵ Jadi disungguli anak siseanNia i ma Ia. Ninna halahi ma, "Ale, Tuhan! Palua ma hita, marmara ma hita!" ²⁶ Ninna Jesus ma tu halahi, "Ale hamu na menek haporsayaan, biasi he mabiar hamu?" Dung i jongjong ma Jesus manyonggak alogo dohot ombak i. Gabe so ma manigor alogo i. ²⁷ Homang ma roha ni halahi sude na disi. Didok halahi, "Halak na bia dehe Ia on, alogo dohot ombak pe tunduk do tuSia!" ²⁸ Lalu ma Jesus tu ipar ni dano i, i ma di Luat Gadara. Jadi ro ma dua halak na hona setan mangalo-alo Ia. Jana manggasa-gasa ma idaon na dua i sian liang ni kuburan na disi. Nada adong halak na puluk mamolus sian i. ²⁹ Jadi marsurak ma halahi na dua ninna halahi ma, "O, Anak Ni Debata, na giot bia do baenonMu hami? Betak na giot siksaonMu ma hami? Na he nada dope dapot hatihana?" ³⁰ Nada sadia dao sian i, adong ma sahulanan babi na topet mangugei. ³¹ Jadi dipangido setan i ma tu Jesus, "Muda na giot paorotonMu do hami, tu angka babi i ma suru hami masuk." ³² "Kehe ma ni tusi!" ninna Jesus. Jadi kehe ma setan i sian bayo na dua i, lalu masuk ma tu angka babi i. Gabe mangamburi ma babi i sian rahis-rahis i lalu tu dano i, gabe mate mogap. ³³ Marlojong ma angka parmahan babi i tu kota laho paboahon na masa i dohot taringot tu bayo na dua na hona setan i. ³⁴ Jadi ro ma halak kota i mandapotkon Jesus. Jadi dung diida halahi Ia, gomos ma dipangido halahi anso kehe Jesus sian luat ni halahi i.

¹ Marparau ma Jesus laho manaripari dano i, giot mulak tu hutaNia. ² Jadi ro ma halak maroban sada bayo na onyangon payak di podomanna. Di na niida ni Jesus godang ni haporsayaan ni halahi, ning Ia ma tu na onyangon i, "Papos ma rohamu, amang! Madung nisesa dosamu." ³ Jadi i ma dihata-hatai deba Siboto Surat na adong disi. Angka ninna halahi ma di bagasan rohana, "Na mangalayasi Debata do Bayo on!" ⁴ Diboto Jesus do na nipikiran ni halahi i gabe didok Ia ma, "Biasi he dipikiri hamu na jat di bagasan rohamunu lakna? ⁵ Dia do ummura dohonon ’Madung nisesa dosamu?’, ulang pado mandok, ’Jongjong ma ho, anso mardalan?’ ⁶ Giot patidahononKu tu hamu na markuaso do di tano on Anak Ni Jolma i laho manyesa dosa." Dung i didok Jesus ma tu na onyangon i, "Jongjong ma ho, oban podomanmi, kehe ma ho mulak!" ⁷ Jongjong ma bayo i, mulak ma ia tu bagasnia. ⁸ Jadi mabiar ma halak na midaan i, gabe dipuji halahi ma Debata hara ni kuaso na songon i godang, na dung dilehen Debata di jolma. ⁹ Jadi kehe ma Jesus sian i. Jadi taran mardalan Ia, diida Ia ma sada bayo na margoar si Mateus juguk di kantor pajakna. Dipiohon Jesus ma bayo i, "Beta ma, ihutkon Au!" Jongjong ma si Mateus mangihutkon Jesus. ¹⁰ Jadi hatiha mangan Jesus di bagas ni si Mateus i, marroan ma angka panjagit pajak dohot angka pardosa. Dohot ma halahi mangan rap dohot Jesus dohot angka anak siseanNia i. ¹¹ Diida halak Parise ma halahi na mangan i. Jadi disapai halahi ma anak siseanNia i, ninna halahi ma, "Biasi ma he mangan Gurumunu i rap dohot panjagit pajak dohot angka pardosa?" ¹² Dibege Jesus do na nisapaan ni halahi i gabe dialusi Ia ma, "Inda adong guna ni pangubati di na torkis. Di na marnyae do i. ¹³ Patangkas hamu ma jolo sanga aha do astuan ni hata on: ’Mida asi ni roha do jop rohangKu, nada mida haul.’ Harana nada na giot mamiohon halak sibaen na tigor umbaen na ro Au, tapi na mamiohon pardosa do." ¹⁴ Dung i ro ma anak sisean ni si Johannes Pandidi manyapai Jesus. Ninna halahi ma, "Biasi muda hami dohot angka Parise jotjot puaso, hape anggo anak siseanMu nada unjung puaso?" ¹⁵ Dialusi Jesus ma, "Bia do ninna rohamunu? Adong ma he ninna rohamunu tamu na marsak hatiha pesta mangupa na marbagas, salolot rap dohot halahi bayo pangoli i? Tapi muda dung dapot hatihana dibuat bayo pangoli i sian halahi, baru pe anso puaso halahi. ¹⁶ Nada didungkapkon halak abit na imbaru tu abit na buruk, harana, gabe disibak pandungkap i do abit na buruk i gabe mur bidang ma na masibak i. ¹⁷ Songon i muse do, nada adong halak na mangusehon anggur na imbaru tu inganan na buruk harana gabe masibak do inganan na buruk i, gabe sabur anggur i. Boti ingananna i pe gabe sego. Muda anggur na imbaru angkon tu inganan na imbaru do i baenon. Anso rap jeges dua-duana." ¹⁸ Dompak mangkata-hatai dope Jesus dohot anak sisean ni si Johannes i, ro ma sahalak pamimpin ni bagas paribadatan. Marsomba ma bayo i mandok hata tu Jesus, "On dope mate borungku, tapi ro ma jolo Ho manjamasa, anso mangolu ia." ¹⁹ Jongjong ma Jesus, rap kehe dohot bayo i. Dohot muse ma anak siseanNia i. ²⁰ Jadi laing ihut muse ma manigor sada anak boru na marnyae dua bolas taon sai ro pantang ni bulanna. Dipadonok ia ma tu Jesus laho manjama ujung ni baju juba ni Jesus. ²¹ Harana didok rohania, "Hum tarjama au pe baju jubaNia, malum ma huhilala." ²² Tapi manaili ma Jesus tu pudi, diida Ia ma anak boru i. Didok Ia ma, "Pos ma rohamu inang! Madung dipalua haporsayaanmi ho!" Santongkin i manigor malum ma nyae ni anak boru i. ²³ Dung i dipatorus Jesus ma tu bagas ni pamimpin ni bagas paribadatan i. Dung lalu Jesus di bagas i jana diida Ia angka na marsuling jana jolma na gaor, ²⁴ didok Ia ma, "Ruar ma jolo hamu sude! Inda na mate dakdanak on. Na modom do i." Dipartatai halahi ma Jesus. ²⁵ Dung dipaorot Jesus halahi, masuk ma Jesus tu bilik inganan ni dakdanak i, digolom Ia ma tanganna i. Jadi jongjong ma dakdanak i. ²⁶ Jadi tarbonggal ma barita na masa i di na saluat i. ²⁷ Di na kehe Jesus sian i, ro ma dua halak na mapitung mangihutkon Ia. Pio-pio ma halahi, "O, anak ni si Daud, ibo ma rohaMu mida hami!" ²⁸ Di na masuk Jesus tu sada bagas, manigor ro ma na mapitung na dua i mandapotkon Ia. Jadi ninna Jesus ma manyapai halahi, "Porsaya dehe hamu, tarpamalum Au hamu?" "Porsaya do hami Tuhan!" ninna halahi. ²⁹ Gabe dijama Jesus ma mata ni halahi, didok ma, "Tulus ma di hamu marguru tu haporsayaanmunu!" ³⁰ Gabe marnida ma mata ni halahi. Jadi dipaingot ma halahi, tangkas digogohon Ia anso ulang dipaboa-boa halahi pangalaho i sanga na tu ise pe. ³¹ Tapi kehe ma halahi paboa-boahon taringot tu Jesus di na saluat i. ³² Dung kehe halahi, ro ma halak maroban sada halak na ngungu na hona setan. ³³ Hum dipaorot Jesus setan i manigor tarbaen ia ma mangkobari mangulahi. Homang ma roha ni halak na disi i. Angke didok halahi ma, "Na so unjung dope hami ida na songon on di Israel on!" ³⁴ Tapi anggo halak Parise songon on do didok halahi, "Kapala ni angka setan do mangalehen kuaso diSia laho paorotkon angka setan i." ³⁵ Songon i ma Jesus mardalani sian kota na sada tu kota na asing, sian huta na sada tu huta na asing. Mangajari ma Ia di angka bagas paribadatan. Dibaritahon Ia ma Jamita Na Denggan taringot tu Harajaan Ni Debata. Dipamalum Ia ma ragam-ragam ni nyae dohot sitaonon ni halak na mardangol. ³⁶ Di na niida ni Jesus halak na bahat i, ibo ma rohaNia marnida halahi, angke lebak boti gale do halahi idaon songon biri-biri na so marparmahan. ³⁷ Gabe ninna Jesus ma tu angka anak siseanNia i, "Bahat do na giot sabion, hape hum saotik do panyabi. ³⁸ Hara ni i pangido hamu ma tu nampuna sabion i, anso disuru Ia halak laho manyabi sabion i."

¹ Di na sadari dipiohon Jesus ma anak siseanNia na dua bolas halak i anso marlagut. Dung i dilehen Ia ma kuaso di halahi laho mangusir angka setan dohot pamalum ragam-ragam ni nyae dohot sude pamalum na cacat. ² Angka on ma goar ni halahi na dua bolas i: Parjolo si Simon (na margoar muse si Petrus) dohot anggina si Andreas, dung i si Jakobus dohot anggina si Johannes, i ma anak ni si Zebedeus. ³ Dung i muse si Pilipus, si Bartolomeus, si Tomas, si Mateus panjagit pajak i, dung i si Jakobus anak ni si Alfeus, si Tadeus; ⁴ dohot si Simon halak Zelot, baru si Judas Iskariot, i ma na manjehehon Ia. ⁵ Disuruhon Jesus ma rasul na dua bolas halak i dung jolo ditonai Ia halahi songon on, "Ulang kehe hamu tu huta ni halak na asing, dohot tu kota ni halak Samaria. ⁶ Tapi topot hamu ma angka biri-biri na mago sian pomparan ni Israel. ⁷ Kehe ma hamu manjamita, dok hamu ma: Madung donok Harajaan Ni Banua Ginjang. ⁸ Pamalum hamu ma angka na marnyae. Pangolu hamu ma angka na mate. Paias hamu ma angka na puruon. Paorot hamu ma angka na hona setan. Sude kuaso i inda na nigararan umbaen na nijagitmunu i. Jadi laing songon i ma, lehen hamu ma i, ulang pola pangido hamu gararna. ⁹ Ulang maroban sere, sanga perak sanga tumbaga hamu di hohosmunu. ¹⁰ Indangkon pola maroban kantongan hamu sanga abit duangkibung, sanga sipatu sanga tungkot. Harana, angkon mangan do halak na markarejo. ¹¹ Jadi muda lalu do hamu tu sada kota sanga huta, jalahi hamu ma manigor disi sanga ise na ra manjagit hamu. Disi ma hamu manompang lopus kehe hamu sian i." ¹² Muda masuk hamu tu bagas i jalang hamu ma halahi. Dok hamu ma, "Horas ma di hamu!" ¹³ Muda dijagit halak na di bagas i do hamu, lohot ma tu halahi hata horas-horasmunu i, tapi muda nada tumbuk mulak ma tu hamu hata horas-horasmunu i. ¹⁴ Muda adong bagas sanga kota na so ra manjagit hamu sanga na so ra manangihon jamitamunu, tinggalkon hamu ma i. Hirpaskon hamu ma abuan ni patmunu i tu halahi. ¹⁵ Satutuna ma na hudok on! "Numayang do taonon ni isi ni tano Sodom dohot Gomora di ari panguhuman i, ulang kota na songon i!" ¹⁶ "Parrohahon hamu ma na Hudok on! Husuru do hamu songon biri-biri tu tonga-tonga ni sorigala. Jadi angkon manat do hamu songon ulok tapi ias ma rohamunu songon darapati. ¹⁷ Jago-jago ma hamu harana adong do halak na giot manangkup hamu laho maroban hamu pajongjongon di rapot pangadilan ni ugamo. Loncingon ni halahi ma hamu di angka bagas paribadatan. ¹⁸ Boanon ni halahi ma hamu tu jolo ni angka parkuaso dohot tu jolo ni raja-raja hara ni na mangihutkon Au. Jana i ma hatiha hadenggananna di hamu laho manyaksihon Au tu halahi dohot tu halak na so mananda Debata dope. ¹⁹ Tapi muda dioban hamu anso niadilan, ulang sak rohamunu taringot tu hata sidohononmunu sanga taringot tu pangkataimunu bagi na tarbia. Harana, sanga aha pe na giot sidokkononmunu disi, jolo paboaon do i tu hamu. ²⁰ Nada hamu na giot mangkatai disi, Tondi ni Ama na di banua ginjang i do, tapi markite-hite hamu. ²¹ Masa ma disi marsitangkup kahanggina anso dibunu. Laing songon i ma baenon ni ama-ama tu dakdanakna. Dakdanak pe mangalo do tu simatobangna, dipabunuhon angka anakna ma halahi. ²² Goyak ma roha ni halak sude mida hamu hara ni Au. Tapi na torus tahan lopus tu ujungna, i do na giot paluaon. ²³ Muda diparkanciti halahi hamu di sada kota kehe ma hamu tu kota na asing. Hupaboa hian ma di hamu: Inda sidung dope tohapmunu dikarejohon hamu di sude kota na adong di Israel, hape ma ro Anak Ni Jolma i. ²⁴ Nada gumodang anak sisean sian guruna jana inda gumodang pangoloi sian tuanna. ²⁵ Muda sarupa sada sisean dohot guruna jana sada naposo dohot tuanna, sapatutna madung tuk songon i di halahi. Muda digoari halahi nampuna bagas i si Beelsebul, mur ma halak na sabagas i. Goar na jumatjat noma dokkonon ni halahi." ²⁶ "Nada adong bagi aha na buni, na so patar muse, nada adong na simo, na so binoto sogot. ²⁷ Sanga aha na Hudok tu hamu di na golap, hobarkon hamu ma i di arian raya. Sanga aha na Huhusipkon tu pinggolmunu, jamitahon hamu ma i sian bungkulan ni bagas! ²⁸ Ulang pola mabiar hamu mida halahi sibunu pamatang tapi na so margogo mamunu tondi. Tapi habiari hamu ma Debata na markuaso mamunu pamatang dohot tondi di api narako. ²⁹ Nada he nigadis dua amporik arga sasen? Tapi haru songon i pe, inda adong na madabu i tu tano anggo so jolo dipaloas Amangmunu i. ³⁰ Salang obuk na di ulumunu i pe na dung nietong do sudena i. ³¹ Jadi hara ni i, ulang mabiar hamu! Ummarga do hamu ulang pado amporik i." ³² "Sanga ise na mangoku Au di jolo ni halak, paboa na mangihutkon Au do ia, Au pe okuonKu ma ia di jolo ni Damang na di banua ginjang i. ³³ Tapi sanga ise na mamorso Au di jolo ni halak, i ma na so paboahon na mangihutkon Au do ia, Au pe porsoonKu ma ia di jolo ni Damang na di banua ginjang i." ³⁴ "Ulang ninna rohamunu na maroban pardamean Au tu portibi on. Nada pardamean na Huoban, tapi paraloan do. ³⁵ Umbaen na ro pe Au na giot manyirang anakna do sian amangna, boruna sian inangna, parumaen sian namboruna. ³⁶ Jana alo ni halak, i ma donganna sabagas. ³⁷ Halak na humolongan rohana mida amangna sanga inangna ulang mida Au, nada tumbuk halak sisongon i di Au. Songon i muse halak na humolongan rohana mida anakna sanga boruna ulang mida Au, nada tumbuk halak sisongon i gabe siihutkon Au. ³⁸ Dung i, halak na so ra mamorsan silangna laho mangihutkon Au, nada tumbuk halak sisongon i di Au. ³⁹ Sanga ise na giot pajolohon haporluan ni ngoluna sandiri, angkon magoan ngolu. Tapi halak na magoan ngolu hara ni Au, halak sisongon i do na dapotan ngolu." ⁴⁰ "Na manjagit hamu, Au do na nijagitna. Halak na manjagit Au, dijagit ia muse do na marsuru Au. ⁴¹ Barang ise na manjagit sada panurirang songon sada panurirang, dapotan upa ni panurirang do, jana barang ise manjagit halak na tigor songon sada halak na tigor, dapotan upa ni na tigor roha do. ⁴² Sanga ise na mangalehen minum, hum samangkuk aek ngali pe tu sahalak sian angka na menek on hara ni siihutkon Au halahi, angkon dapotan balos do halahi. Songon i ma satutuna!"

¹ Jadi dung ditonai Jesus angka anak siseanNia na dua bolas i, kehe ma Ia sian i. Mangajari ma Ia paboahon jamita taringot tu Debata di angka kota na donok-donok disi. ² Dibege si Johannes Pandidi na tarhurung i do taringot tu pambaenan ni Jesus Kristus. Gabe disuruhon ia ma angka anak siseannia laho manyapai Jesus songon on, ³ "Hamu do lakna Amang na dijanjihon na giot ro i, sanga halak na asing dope sipainteonnami?" ⁴ Dialusi Jesus ma, "Mulak ma hamu, paboa hamu ma tu si Johannes sude na nibege dohot na niidamunu. ⁵ Marnida na mapitung, mardalan na onyangon, malum na huliton, marbinege na maingol, mulak mangolu na mate, dung i dipaboa do Jamita Na Denggan sian Debata tu halak na pogos. ⁶ Martua do halak na so mandele hara ni Au!" ⁷ Dung mulak angka anak sisean ni si Johannes i, ditaringoti Jesus ma tu halak na bahat i salaho tu si Johannes. Ning Ia: "Na giot mangaligi aha do hamu di na kehe tu halongonan? Sanggar na niombus ni alogo do? ⁸ Aha do satutuna na giot ligionmunu? Halak na marpakean na jeges do? Anggo angka na marbaju na jeges di bagas godang do i! ⁹ Antong biasi kehe hamu tu halongonan? Mangaligi panurirang do? Na tutu ma i! Hudok ma di hamu, lobi-lobi sian panurirang dope si Johannes! ¹⁰ Harana taringot tusia adong do tarsurat songon on, ’On ma suruanKu’ ninna Debata, ’Parjolo do ia Husuru sian Ho, laho manotas dalanMu.’ ¹¹ Ingot hamu ma! Inda adong be jolma na gumodang di tano on sian si Johannes Pandidi. Tapi haru pe songon i, halak na ummenek di Harajaan Ni Banua Ginjang laing gumodang dope i sian si Johannes. ¹² Sian na mamungka si Johannes marjamita lalu tu sadari on, matua dialo halak do Harajaan Ni Banua Ginjang i jana giot manggomgomisa. ¹³ Sude Tona na nilehen ni si Musa dohot angka panurirang sian narobi lalu tu haroro ni si Johannes, sudena i na paboahon taringot tu angka na giot tarjadi do. ¹⁴ Jadi muda giot porsaya do hamu di sude barita ni halahi i, angkon botoonmunu do, ia ma si Elia na giot ro i. ¹⁵ Jadi muda na adong do pinggolmunu laho manangihon, tangihon hamu ma! ¹⁶ Saonnari, tar tu aha ma ulaning Hupatudos halak na adong saonnari? Tudos tu dakdanak na juguk di poken marsipio-pioan. ¹⁷ ’Madung martulila hami di hamu, tapi nada ra hamu manortor! Madung mangandungi hami, hape nada ra tangis hamu!’ ¹⁸ Ro ma si Johannes -- nada mangan, nada minum ia, hape didok halak ia ’na hona setan!’ ¹⁹ Madung ro Anak Ni Jolma i -- na mangan dohot na minum, jadi didok halahi, ’Ligi ma jolo Bayo i! Na songkalan, hum na minum, didongan-dongani Ia angka sijagit pajak dohot angka pardosa.’ Tapi haru pe songon i, na bisuk do Debata. Tarida do habisuhonNia i sian angka pambaenanNia." ²⁰ Gabe mamungka ma ditilakoi Jesus angka kota ingananNia mambaen tanda hahomangan na umbahat. Hara ni na so ra angka halak kota i paubahon rohana sian angka dosana. ²¹ "Marjaya situtu ma ho Khorasim, marjaya ma dohot ho ale Betsaida. Sugari di halak Tirus dohot Sidon dibaen tanda hahomangan na nibaen di tonga-tongamunu, ma pola markutondo halahi marsak, marsibaen sirabun tu pamatangna be pataridahon na dung muba roha ni halahi sian angka dosana. ²² Tapi Hudok ma tu hamu, ’Numayang do uhuman na tu kota Tirus dohot Sidon di ari panguhuman i, ulang pado tu hamu!’ ²³ Dohot ho, kota Kapernaum! Giot pagincaton ma ho lakna lalu tu banua ginjang? Nada! Tu narako do ho ambungkononkon! Sugari sura di kota Sodom dibaen angka tanda hahomangan na nibaen ditonga-tongami, laing adong dope kota i lopus sadari on! ²⁴ Tapi Hudok ma tu hamu, ’Numayang do uhuman na tu tano Sodom di ari panguhuman i, ulang pado tu ho!’ " ²⁵ Jadi didok Jesus ma hatiha i, "Ale, Amang, Tuhan ni langit dohot tano! Tarimakasi ma Hudok tu Ho dibaen dibunihon Ho do i sude di halak na malo dohot na pistar. Hum tu halak na so pola pistar do dipatidahon Ho i. ²⁶ Olo, Amang, dibaen na songon i do hagiot ni rohaMu." ²⁷ "Madung dipasahat Damang do tu Au, sandok na adong. Nada adong na mananda Anak i asing sian Damang. Nada adong muse na mananda Ama i asing sian Anak i, dohot tu halak na ra Jesus papatarkonsa." ²⁸ "Ro ma hamu tu Au, sude hamu na loja jana na sorat bobanna, Hupasonang pe hamu! ²⁹ Ihutkon hamu ma na Hudok, marsiajar ma hamu tu Au! Angke na lambok do Au jana na serep marroha, jadi togar ma tondimunu. ³⁰ Angke na pasonangkon do hudahudangKu, jana nayang do boban na Hupaboankon tu hamu."

¹ Topet di Ari Sabat mamolus ma sanoli Jesus di ladang gandum. Malean ma angka anak siseanNia i. Digotili halahi ma burir ni gandumi, lalu diguguti halahi ma i. ² Jadi dung diida angka halak Parise songon i, didok halahi ma tu Jesus, "Ligi ma, dibaen anak siseanMu do na so tola karejohonon di Ari Sabat." ³ Dialusi Jesus ma, "Na so jungada dehe disise hamu taringot tu karejo ni si Daud dompak male ia dohot dongannia sauduran i? ⁴ Masuk do ia tu Bagas Ni Debata. Dipambuati ia dohot dongannia i roti na nihaulkon tu Debata. Na so tola hian do ia bope dongannia mangankon i. Hum malim do na tola mangankon i. ⁵ Sanga na so unjung dope disise hamu di Buku Tona, taringot tu pangalaosion ni angka malim di Ari Sabat di bagasan Bagas Ni Debata i, hape nada marsala halahi? ⁶ Tapi Hudok ma tu hamu, ’Dison adong do sada na gumodang sian Bagas Ni Debata i.’ ⁷ Tapi sugari diboto hamu sanga dia do astuan ni hata on: ’Asi ni roha do giotKu, nada anggo na nihaulkon, tontu nada pola uhumonmunu halak na so marsala. ⁸ Angke Anak Ni Jolma i do Tuhan ni Ari Sabat.’ " ⁹ Jadi kehe ma Jesus sian i, tu sada bagas paribadatan ni halahi. ¹⁰ Adong ma disi sada halak na mate tanganna sabariba. Jadi disapai halak na manjalak-jalahi hasalaan ni Jesus ma Ia, "Atehe tola do pamalumon halak di hatiha Ari Sabat?" ¹¹ Dialusi Jesus ma, "Sugari ma rupani adong sada biri-birimunu, madabu ma biri-biri i tu godung na bagas topet di Ari Sabat, inda he paruaron ni nampuna i biri-biri i sian godung i? ¹² On pe, ummarga dope jolma sian biri-biri! Anggo songon i, tola do tolongon halak di Ari Sabat." ¹³ Dung i didok Jesus ma tu partangan na mate sabariba i, "Pahortang ma tanganmi." Jadi dipahortang ia ma antong! Gabe malum ma manigor, sarupa dohot tangannia na sabariba nari. ¹⁴ Ditinggalkon halak Parise i ma inganan i, martahi ma halahi giot mamunu Jesus. ¹⁵ Diboto Jesus do na jahat roha ni halak Parise i maradopkon Ia. Dipamalum Ia ma sanga ise sian halahi na marnyae. ¹⁶ Tapi dilarang Ia ma, anso ulang dipaboa-boa halahi sanga na tu ise taringot tu sude na nibaenNia i. ¹⁷ Jadi tulus ma na nidok ni Debata marhite Panurirang Jesaya, na mandok, ¹⁸ "Ligi ma suruanKu na Hutodo i, haholongan ni roha na pajopkon rohangKu. TuSia ma lehenonKu tondingKu, dung i jamitahononNia ma tona tu angka bangso. ¹⁹ Nada martangkangi Ia sanga marsurahi, nada adong halak na umbege soraNia di angka dalan. ²⁰ Nada diponggolkon Ia arong na gale-gale i, nada intopanNia sumbu na medep-edep. Angkon gogohononNia do lopus jongjong hatigoran, ²¹ jana mararop ni roha tuSia ma sude angka bangso." ²² Dung i adong ma halak na maroban sahalak na mapitung boti na ngungu muse tu Jesus. Na hona setan do bayo i. Dipamalum Jesus ma ia gabe tarbaen ma mangkatai jana marnida mangulahi. ²³ Homang ma roha ni halahi sude didokkon halahi ma, "On do ulaning pomparan ni si Daud i?" ²⁴ Dung dibege halak Parise songon i, ninna halahi ma, "Nada dipaisir Ia angka setan ia so markite-hite si Beelsebul kapala ni setan i." ²⁵ Diboto Jesus do pikiran ni halak Parise i. Gabe didokkon Ia ma tu halahi, "Sanga na harajaan dia pe, nada tarbaen lolot jongjong, muda sai marsalisi do halahi sama halahi. Muda adong sada kota sanga bagas na marsalisi sanga marbadai na sada tu na sada nari gabe masarsar do i. ²⁶ Antong, muda dipaisir Sibolis i donganna, jana marsalisi halahi sama halahi, songon dia dehe tarbaen togu harajaanna lakna? ²⁷ Didok hamu, hara ni na nilehen ni kapala ni angka setan i do kuaso di Au umbaen na Huusir setan. Antong anggo songon i, sian ise muse do dapotan kuaso angka halak na mangihutkon hamu laho mangusir angka setan i? Angka donganmunu i do na pataridahon na tutu hamu sala! ²⁸ Tondi Ni Debata do na mangalehen kuaso anggo di Au laho mangusir setan. I ma tandana madung ro Harajaan Ni Debata tu hamu. ²⁹ Bia ma pambaen ni halak masuk tu bagas ni sada halak na gogo laho mangarampas sinadongannia? Inda he jolo diihoti ia do halak na gogo i? Dung diihoti ia pe baru anso tarrampas ia sinadonganna i. ³⁰ Na so mandongani Au tontu alongKu. Dung i halak na so dohot palagutkon rap dohot Au, tontu na paserakkon do i! ³¹ Hara ni i, Hudok ma tu hamu, sude dosa dohot hata na jat na nipardok ni halak, tarsesa do i! Tapi anggo hata na mangincahi Tondi Parbadia nada tarsesa i! ³² Halak na mandok hata laho mangalo Anak Ni Jolma, tarsesa do i. Tapi anggo halak na mandok hatana laho mangalo Tondi Parbadia, bagi na bia pe nada tarsesa be i, bope di portibi on sanga pe di ari na giot ro!" ³³ "Muda didok hamu na denggan sada hayu, denggan ma antong parbatuna i, jana muda didok hamu sada hayu na jat, jat muse ma parbatuna. Harana, sian parbatuna do tandaon sanga denggan sanga na so denggan hayu. ³⁴ O hamu pomparan ni ulok, songon dia dehe tarbaen hamu mandok angka na denggan, angke na jahat do hamu? Angke, sanga aha na manggohi roha, matua i do hobarkonon ni pamangan! ³⁵ Muda denggan sada-sada halak, na denggan muse do diparuar ia sian rohania na denggan i. Muda adong halak na jahat, laing na jahat muse do paruaronnia sian rohania na jahat i. ³⁶ Tapi Hudok ma tu hamu, ’Angkon dialusi halak i do sogot di ari panguhuman i taringot tu sude hata na so hasaya, na ruar sian pamangan ni halahi. ³⁷ Angke mangihutkon hatamu do ho nipatigor, jana mangihutkon hatamu do ho diuhumi." ³⁸ Dung i marroan ma angka Siboto Surat dohot halak Parise mandok tuSia, "O Guru, por do rohanami marnida anso dibaen Guru i jolo hahomangan." ³⁹ "Pomparan ni na jahat jana na so setia on mangido sada tanda hahomangan, tapi nada lehenon di hamu tanda hahomangan, asing sian tanda hahomangan na tu Panurirang Junus. ⁴⁰ Tolu ari tolu borngin Panurirang Junus di bagasan butuha ni ihan na godang i. Songon i muse ma Anak Ni Jolma i, di bagasan tano. ⁴¹ Saulahon di Ari Paruhuman i, jongjong ma halak Ninive adop bangso on, mandabu uhuman tu halahi. Harana anggo halahi, marsipauba rohana be do dung marjamita si Junus tu halahi! Hape gumodangan dope nian na dison i sian si Junus! ⁴² Saulahon di Ari Paruhuman i, jongjong do raja dadaboru na sian Selatan i adop bangso on, mandabu uhuman tu halahi. Harana, songon i ma daona na mardalan i ia, ma pola sian ujung ni tano on, laho manangihon pangajaran ni si Salomo na bisuk i sajo do. Hape gumodang dope na dison i sian si Salomo!" ⁴³ "Muda ditadingkon tondi na hodar pamatang ni sada halak, mardalani ma tondi i manjalahi inganan na mahiang laho maradian. Tapi nada adong dapot ia paradianan. ⁴⁴ Gabe didokkon ia ma, ’Gumonan ma au mulak tu bagas na hutinggalkon i.’ Jadi dung lalu ia tusi, didapot ia ma rumar bagas i, ias taratur sude. ⁴⁵ Dipiohon ia ma pitu nari tondi na asing na jumahat sian ia. Dung i masuk ma halahi tu pamatang ni jolma i, disi ma halahi maringanan. Gabe mur jumahat ma pangalaho ni halakna i sian na parjolo i. Songon i muse ma na masa tu na sasundut na jahat on." ⁴⁶ Dompak na mangkobari Jesus dohot halak na bahat i, ro ma inangNia rap dohot angka kahanggiNa, giot mangkobari dohot Ia. Tapi hara ni na so tarbaen dope laing di ruar ma halahi jongjong. ⁴⁷ Dung i dipaboa sahalak sian na bahat i ma tu Jesus, ning ia, "Di ruar do halak inang dohot kahanggi ni Guru i, giot mangkobari dohot Guru i." ⁴⁸ Dung i dialusi Jesus ma, "Ise he inangKu? Ise ma he kahanggingKu?" ⁴⁹ Laing ditudu Ia ma tu angka anak siseanNia i, ning Ia, "Ligi hamu ma, halak on do dainang dohot kahanggingKu. ⁵⁰ Halak na patuluskon na nipangido ni roha ni Damang na di banua ginjang i, i do kahanggingKu, i do ibotongKu, i do dainang."

¹ Laing di na sadari i, kehe ma Jesus sian bagas i tu topi ni dano. Disi ma Ia juguk. ² Na bahatan halak marlagut mangkaliangi Ia. Gabe masuk ma Ia tu parau, disi noma Ia juguk. Tapi anggo halak na bahat i di topi-topi ma marjongjongan. ³ Diajarkon Jesus ma tu halahi marragam-ragam pangalaho. Mardongan umpama do dibaen Ia na mangajari i. "Adong ma sada halak partani, na kehe giot manyabur same." Songon i ma dipungka Jesus caritoNia i. ⁴ "Jadi dompak na manyabur same i ia, adong ma na mangkadabu tu topi ni dalan i, gabe ro ma unggas, dipangan ma i. ⁵ Adong muse ma na madabu tu tano na marbatu-batu, saotik sajo tanona. Manigor tubu do i hara ni na saotik i tanona. ⁶ Tapi dung manaek mataniari, rahar ma i lalu mate hara ni pejet ni uratna i. ⁷ Adong muse ma na madabu tu antara ni duri-duri. Mur magodang ma duri-duri i gabe tarhapit ma same i. ⁸ Tapi adong muse do antong same i na madabu tu tano na napu. Marbatu ma anggo i. Adong na saratus lompit parbatuna. Adong na onom pulu lompit, adong na tolu pulu lompit. ⁹ Sanga ise na marpinggol, ditangihon ia ma!" ¹⁰ Dung i ro ma anak siseanNia i manyapai tu Jesus, "Biasi mamake umpama Guru i muda mandok hata tu halak na bahat i?" ¹¹ Dialusi Jesus ma, "Harana, tu hamu do por roha ni Debata paboahon sitabunian ni harajaanNia. Anggo tu na asing i, nada. ¹² Tu halak na maradong mur ditambai, anso mur bahat sajo. Tapi anggo tu halak na so maradong, dibuat muse noma sian ia na saotik i. ¹³ Hara ni i do umbaen na mamake umpama Au muda mandok hata tu halak na bahat. Angke haru pe marnida halahi, hape laing songon na so marnida do. Marbinege do halahi, hape songon halak na so marbinege do, jana nada mangastui! ¹⁴ Tarjadi ma tu halahi na nidok ni Panurirang Jesaya na mandok, ’Sai giot manangihon do nian hamu jana manangihon, hape so diastui hamu. Sai giot mangaligi do nian hamu dohot matamunu jana mangaligi, hape so diida hamu. ¹⁵ Harana, ma jogal roha ni halak on, ma gabe maingol pinggol ni halahi, dipapitpit halahi muse do mata ni halahi. Tarjadi pe i anso unang marnida do mata ni halahi, jana anso ulang marbinege pinggol ni halahi, jana anso ulang mangastui roha ni halahi, anso ulang ro halahi tu Au, jana gabe pamalumonKu ma halahi.’ " ¹⁶ "Tapi martua ma matamu hara ni na marnida jana pinggolmu hara ni na marbinege. ¹⁷ Tutu do na Hudok on! Harana bahat do panurirang na jolo dohot halak na burju mangoloi Debata malungun marnida na niidamunu saonnari, hape inda habolasan halahi laho marnidasa. Malungun do halahi manangihon na nibegemunu saonnari, hape inda sanga tarbaen halahi laho manangihon." ¹⁸ "Tangihon hamu ma astuan ni umpama taringot tu panyabur i. ¹⁹ Sanga ise na mambege jamita taringot tu Harajaan Ni Banua Ginjang, tapi nada diastui ia, sarupa ma i dohot same na nisaburkon tu dalan i. Ro ma Sibolis parjahat i mangarampas na nisaburkon tu roha ni halahi. ²⁰ Same na nisaburkon tu inganan na marbatu-batu i, i ma tarsongon halak na manigor marjop ni roha manjagit jamita i hatiha dibege ia. ²¹ Tapi nada pola sadia gomos di bagasan roha ni halahi, gabe inda sadia honok tahan. Muda ro hasusaan dohot pangayak-ayahan hara ni jamita i, manigor marbalik ma halahi. ²² Same na madabu tu tonga-tonga ni duri i, i ma tarsongon halak na mambege jamita i, tapi humolos ma halahi hara ni ngolu ni halahi. Sai giot marlobi-lobi do ngolu ni halahi. Jadi tarhapit ma jamita i di bagasan roha ni halahi, gabe nada marbatu. ²³ Dung i anggo same na disabur tu tano na napu i, i ma tarsongon halak na umbege jamita i, tangkas diastui ia. Ramos ma parbatuna. Adong ma i na saratus lompit bahatna. Adong na onom pulu lompit bahatna. Adong na tolu pulu lompit bahatna sian same na parjolo i." ²⁴ Dung i dipaboa Jesus ma sada hari umpama tu halak na bahat i songon on, "Anggo Harajaan Ni Banua Ginjang tudos do i tu sada halak partani na manyabur same na denggan di ladangnia. ²⁵ Jadi di sada borngin, dung marmodoman sude halak, ro alo ni partani i manyabur simareme-eme di tonga-tonga ni eme i. Dung i kehe ia. ²⁶ Dung mur magodang eme i, marayak boltok ma, tarida ma dohot simareme-eme i. ²⁷ Dung i ro ma angka parkarejo na niupaan disi mandok tu nampuna ladang i, ’O, Tuan! Nada he same na denggan na nisuanmu tu ladangmi? Sian dia dehe ro simareme-eme i?’ ²⁸ Dialusi parladang i ma, ’Alongki do mambaen i!’ Dung i disapai angka na niupaan i dope tu parladang i, ’O, Tuan! Hami baboi ma simareme-eme i?’ ning halahi. ²⁹ ’Indangkon,’ ning ia mangalusi. ’Harana muda dibaboi hamu naron simareme-eme i, gabe tarumpat ma dohot eme i. ³⁰ Padiar ma songon i rap tubu simareme-eme i dohot eme i lopus tu sabion on. Anggo disi saulahon hudokkon pe tu angka na manyabi i, palagut hamu ma sude duhut-duhut. Rahuti hamu anso nitutungan. Dung i palagut hamu ma eme i anso nipasimpan tu talobat.’ " ³¹ Dicaritohon Jesus ma sada nari umpama tu halak na bahat i, "Anggo Harajaan Ni Banua Ginjang tarsongon batu ni sabi do i. Dibuat halak ma i, disuan ia di ladangnia. ³² Na menehan do anggo batu ni sabi. Tapi muda dung tubu i, tardok, ia ma na gumodang sian sude na margoar simarata na dayuk bonana. Gabe songon hayu ma i. Marroan ma angka unggas marasar di dangkana i." ³³ Adong dope umpama na asing dicaritohon Jesus tu halak na bahat i. "Anggo Harajaan Ni Banua Ginjang tarsongon ragi do i. Dibuat anak boru i ma ragi i, dicampurkon ia ma tu topung tolu tabung, lopus kombang sude!" ³⁴ Marumpama do Jesus mangajarkon i sude tu halak na bahat i, nada adong na niajarkonNia ia so marhite umpama. ³⁵ Jadi hara ni na songon i, tulus ma tarjadi hata ni panurirang, na mandok songon on, "Marumpama do Au muda mangkatai dohot halahi; giot paboaonKu angka pangalaho na so habotoan dope mamungka sian hajajadi ni portibi on." ³⁶ Dung i ditinggalkon Jesus ma halak na bahat i. Mulak ma Ia. Dung i ro ma anak siseanNia i mandapotkon Ia laho manyapai, "Paboa ma tu hami, sanga aha do astuan ni umpama taringot tu simareme-eme na di ladang i." ³⁷ Dipatorang Jesus ma, "Anggo na nidok na manyabur same na denggan i, i ma Anak Ni Jolma i. ³⁸ Portibi on ma ladang i. Anggo same na denggan i, i ma angka halak na dung gabe parsidohot di Harajaan i. Simareme-eme i, i ma angka halak na mangoloi si Jahat i. ³⁹ Alo ni na manyabur simareme-eme i, i ma Sibolis. Sabion i ma ajal ni hasiangan. Angka panyabi i, i ma angka surusuruan. ⁴⁰ Songon simareme-eme na nipalagut i na nitutung di bagasan api, laing songon i muse ma di ari na parpudi. ⁴¹ Ro ma Anak Ni Jolma i, suruhononNia ma angka surusuruanNia palagutkon sian tonga-tonga ni bangsoNia sude halak na mambaen mardosa halak na asing dohot sude halak na mambaen na jahat. ⁴² Ambungkononkon ma halahi sude tu purunan ni api. Disi ma halahi mangangguhi jana patungaripon. ⁴³ Tapi anggo halak na patuluskon na nipangido ni roha ni Debata, marsinondang ma halahi songon mataniari di bagasan Harajaan Ni Ama ni halahi. Sanga ise na marpinggol ditangihon ia ma!" ⁴⁴ "Anggo Harajaan Ni Banua Ginjang, tarsongon arta na arga do i, na tanom di bagasan ladang. Jadi dapot sada halak ma i. Ditabunihon ia ma mangulahi tu bagasan ladang i. Jadi hara ni jop ni rohania, digadis ia ma sude sinadongannia. Mulak ma ia, ditobusi ia ma ladang i." ⁴⁵ "Anggo Harajaan Ni Banua Ginjang tarsongon parjagal muse do i, na manjalahi simata sigodang arga. ⁴⁶ Disi marsuo ia dohot sangkamata simata na jeges situtu, manigor kehe ma ia manggadis nasa na adong disia, anso ditobusi ia simata na sangkamata i." ⁴⁷ "Anggo Harajaan Ni Banua Ginjang laing tarsongon jala na nisampakkon tu laut do i. Gabe dapot ma marragam-ragam ihan. ⁴⁸ Dung gok jala i, disarat parihan i ma i tu darat. Jadi juguk ma halahi mamili i angka ihan i: Muda na denggan, dipamasuk ma i tu ingananna tapi na so denggan diambungkon halahi. ⁴⁹ Songon i ma pangalahona di ari na parpudi. Marroan ma angka surusuruan manyirang halak parjahat sian halak na patuluskon na nipangido ni roha ni Debata. ⁵⁰ Dung i diambungkon ma halak na jahat i tu purunan ni api. Disi ma halahi mangangguhi jana patungaripon." ⁵¹ "Mangarti do hamu sudena i?" ninna Jesus manyapai. "Madung!" ning halahi mangalusi. ⁵² Dung i ninna Jesus ma, "Hara ni i ma, sude Siboto Surat na dung mangguruhon Harajaan Ni Banua Ginjang i, gabe tarsongon sada halak tuan di sada bagas do i, na paruarkon sian panyimpananna sude barang-barangnia sigodang arga, na imbaru dohot na dung honok." ⁵³ Dung sidung dicaritohon Jesus sude angka umpama i, kehe ma Ia sian inganan i. ⁵⁴ Mulak ma Ia tu huta hagodanganNia. Jadi kehe ma Ia mangajari di bagas paribadatan na disi. Homang-homang ma sude halak na manangihon i, hara ni tabona. Didok halahi ma, "Sian dia do dapot Ia hamaloon na songon i? Dung i sian dia do dapot Ia hagogoonNia mambaen angka hahomangan i? ⁵⁵ Nada he anak ni tukang hayu i do Ia? Nada he si Maria do inangNia; dohot si Jakobus, si Josep, si Simon dohot si Judas do angka anggiNia? ⁵⁶ Nada he di kota on do angka ibotoNia rap dohot hita? Sian dia do dapot Ia sudena i?" ⁵⁷ Gabe nada ra halahi manjagit Jesus. Gabe didok Jesus ma tu halahi, "Jadi anggo panurirang, sanga di dia pe dipasangap halak do i. Tapi nada sangap ia anggo di huta hagodangan dohot di bagasnia sandiri." ⁵⁸ Hara ni i, gabe nada bahat hahomangan dibaen Jesus disi. Hara ni na so porsaya i halahi.

¹ Jadi hatiha i tarbege ma tu si Herodes, gubernur ni Galilea taringot tu Jesus. ² Didokkon ia ma tu angka pagawenia i, "Pasti na dung mulak mangolu do si Johannes on! I do umbaen na adong hagogoon na songon i diSia." ³ Tutu do i, na nipatangkupkon ni si Herodes do si Johannes. Diihoti, dipamasuk tu hurungan. Hara ni si Herodias dadaboru ni si Pilipus angginia sandiri. ⁴ Harana jungada do didok si Johannes tu si Herodes, "Nada tola buatonmu si Herodias! Nada denggan i!" ⁵ Jadi, giot bunuon ni si Herodes ma si Johannes, tapi mabiar ia mida halak. Harana, dietong roha ni halak do si Johannes songon panurirang. ⁶ Jadi hatiha marpesta ulang tahun ia, manortor ma boru ni si Herodias di jolo ni halak na ro i. Jop sajo ma roha ni si Herodes marnida na manortor i. ⁷ Gabe dijanjihon ia ma tu anakboru i, pola marsumpa ia, sanga aha pangidoannia, lehenon ma disia. ⁸ Jadi diirang-irangi inangna ma anakboru i gabe didok ia ma pangidoannia, "Lehen ma di au ulu ni si Johannes Pandidi di ginjang talam on!" ⁹ Marsak ma roha ni si Herodes umbege pangidoan i. Tapi hara ni janjinia nangkin dijolo ni halak na ro i, gabe diparentahon ia ma anso nioloan pangidoan ni anakboru i. ¹⁰ Disuru ia ma halak tu hurungan laho manggotap ulu ni si Johannes. ¹¹ Dung i dioban ma ulu ni si Johannes i masuk, dibaen ma i tu talam laho mangalehen tu anak boru i. Dung i dipasahat anakboru i muse ma tu inangnia i. ¹² Dung i dibuat angka anak sisean ni si Johannes ma bangkenia i laho mananomsa. Kehe ma halahi paboahon pangalaho i tu Jesus. ¹³ Jadi dung dibege Jesus barita ni si Johannes, kehe ma sasada Ia marparau. Dipatorus Ia ma tu sada inganan na lungun. Tapi diboto halak do sanga na tudia Ia kehe. Jadi marroan ma halahi sian kota ni halahi be mandapoti Jesus. Mardalan pat noma halahi sude. ¹⁴ Jadi di na mijur Jesus sian parau i, diida Ia ma halak na bahat i. Gabe ibo ma rohaNia mida halahi. Dipamalum Ia ma sanga ise na marnyae sian halahi. ¹⁵ Jadi dung andospotang marroan ma anak siseanNia i. Didok halahi ma tuSia, "Potang ne ma ari, hape na lungunan dison. Sugari, dumenggan ma disuruhon Guru i halahi marsitobusi panganonna be tu angka huta i." ¹⁶ "Indangkon sai kehe halahi, angkon lehenonmunu do halahi mangan!" ¹⁷ "Tapi hum lima roti dohot dua ihan do adong di hami," ninna halahi mangalusi Jesus. ¹⁸ "Boan hamu ma i tuson," ninna Jesus. ¹⁹ Dung i disuruhon Ia ma halak na bahat i marjuguhan di duhut-duhut i. Dung i dibuat Ia ma roti na lima i dohot ihan na dua i. Manatap ma Ia adop langit, mandok tarimakasi tu Debata. Dipasupasu Ia ma roti i, dung i dilehen Ia ma tu anak siseanNia i anso dibagi-bagihon tu halak na bahat i. ²⁰ Mangan ma halahi lopus butong be. Dung i dipalagut anak sisean i ma teba-teba ni roti dohot ihan i. Adong ma dua bolas ampang bahatna. ²¹ Adong do lima ribu halak na mangan i, nada nietong dope angka dadaboru dohot angka dakdanak disi. ²² Dung i disuru Jesus ma angka anak siseanNia i marparau anso parjolo halahi taripar tu bariba, jana disuru Ia ma halak na bahat i mulak. ²³ Dung marmulahan halak na bahat i, manangkok ma Jesus sada Ia tu sada dolok laho martangiang. Ma samon hatiha i, laing disi dope Jesus, hum sasada Ia sajo. ²⁴ Parau na nitompang ni angka anak siseanNia i pe ma dao di tonga-tonga ni dano i. Hara ni na maralo haba-haba tu pardalan ni parau i, gabe diompas-ompaskon ombak i ma parau i. ²⁵ Jadi hatiha martahuak manuk, ro ma Jesus mardalan di ginjang aek i mandapotkon halahi. ²⁶ Jadi dung diida angka anak siseanNia i Ia mardalan di ginjang ni aek i, gabe mabiar ma halahi. "Begu!" ninna halahi mangangguhi. ²⁷ Tapi manigor digora Jesus ma mangalusi, "Pasonang hamu ma! Au do i. Ulang mabiar hamu!" ²⁸ Dung i didok si Petrus ma, "O, Tuhan, muda tutu Ho do i, suruhon ma anso ro au tu Ho mardalan di ginjang ni aek i." ²⁹ "Ro ma ho!" ninna Jesus mangalusi. Jadi mijur ma si Petrus sian parau i, mardalan ma ia di ginjang ni aek i mandapotkon Jesus. ³⁰ Tapi di na mardalan i ro ma dihilala ia alogo na gogo di dano i, mabiar ma ia, dung i mamungka ma bonom. "Tolong Tuhan!" ninna si Petrus. ³¹ Jadi manigor disurduhon Jesus ma tanganNia manangkup si Petrus. Dung i ninna Jesus ma, "Na hurang porsaya do ho, Petrus. Biasi pola ganggu rohamu?" ³² Dung i gabe rap manaek ma halahi na dua tu parau i. Alogo i pe so ma. ³³ Gabe unduk ma angka anak siseanNia na di parau i marsomba tu Jesus. "Tutu do Anak Ni Debata Ho, Tuhan!" ninna halahi. ³⁴ Dung lalu halahi tu bariba ni dano i, mandarat ma halahi di Genesaret. ³⁵ Hum ditanda halak na disi i Jesus do na ro i, manigor dipaboa halahi ma tu sude luat na humaliang i. Gabe diparobani halak ma angka na marnyae tu Jesus. ³⁶ Angka dipangido halahi ma, sugari tola halahi hum manjama ujung ni baju jubaNia i sajo pe. Gabe malum do sude na manjama baju jubaNia.

¹ Di sada hatiha adong ma ro angka halak Parise dohot angka Siboto Surat sian Jerusalem mandapotkon Jesus. Disapai halahi ma Jesus songon on, ² "Biasi ma dilanggar angka anak siseanMu adat dohot uhum na nipasahat ni angka ompunta sijolo-jolo tubu i? Nada jolo marbasu tangan halahi laho mangan songon adat na somal!" ³ Dialusi Jesus ma, "Jadi muda hamu, biasi dilanggar hamu parenta ni Debata, hum hara ni na tunduk hamu mangoloi adat hasomalan ni ompungmunu? ⁴ Harana didok Debata do, ’Pantun ma ho tu amangmu dohot tu inangmu.’ ’Sanga ise na mandok hata na so ture tu amangna sanga tu inangna, angkon mate do i niuhuman.’ " ⁵ Tapi didok hamu, "Muda didok sada halak tu simatobangna: ’Sanga aha na aturan patut baenonku laho paturehon ho, madung huhaulkon i tu Debata,’ ⁶ hara ni i nada diwajibkon be pasangaponnia simatobangnia i. Hum hara ni adat hasomalan ni ompungmunu, gabe so mararga be hata ni Debata dibaen hamu. ⁷ O hamu angka pangalancap! Tutu do na nidok ni si Jesaya hian taringot tu hamu, di na nidoknia, ⁸ ’Dipasangap bangso on do Au hum di pamangan sajo, hape anggo roha ni halahi dao do sian Au, songon i ma pandok ni Debata. ⁹ Inda adong gunana disomba halahi Au, harana angka aturan ni jolma do diajarhon halahi!’ " ¹⁰ Dung i dipio Jesus ma halahi jana didok Ia ma tu halahi. Didok Ia ma tu halahi, "Tangihon hamu ma jolo! Tangkas parrohahon hamu! ¹¹ Nada na masuk tu pamangan na pahodarhon jolma, tapi na haruar sian pamangan i do na pahodarhon." ¹² Dung i gabe didok anak siseanNia i ma tuSia, "Diboto Guru i dehe na goyak roha ni halak Parise i, umbege hata na nidok ni Guru i?" ¹³ Dialusi Jesus ma, "Sude suan-suanan na so nisuan ni Damang na di banua ginjang i, angkon niumpat dohot urat-uratna. ¹⁴ Padiar hamu ma halahi. Angke panogu na mapitung do halahi, na manogu na mapitung. Muda di togu na mapitung halak na mapitung, madabu do halahi na dua tu lubang i." ¹⁵ Didok si Petrus ma, "Patorang ma jolo tu hami astuan ni umpama i, Guru!" ¹⁶ Dialusi Jesus ma, "Laing na so mangarti dope hamu lakna? ¹⁷ Inda he diboto hamu? Sude na masuk tu pamangan ni sada-sada halak, tu butuha do kehe ni i. Dung i ruar ma i mangulahi. ¹⁸ Tapi anggo na ruar sian pamangan ni halak, i ma na ro sian rohana. I do na pahodarkon ia. ¹⁹ Harana sian roha i do haroroan ni angka pikiran na jat, gabe mamunu jolma, mangalangkup, mambaen na so ture, manangko, margabus, dohot na manilakoi. ²⁰ Angka sisongon i ma na pahodar jolma. Tapi anggo na mangan so jolo marbasu, inda gabe hodar halak dibaen i!" ²¹ Sian i kehe ma Jesus tu luat na marbalokkon kota Tirus dohot Sidon. ²² Jadi ro ma sahalak boru Kanaan sian luat i mandapotkon Jesus. Pio-pio ma ia, "O, Tuhan anak ni si Daud, ibo ma rohaMu mida au! Hona setan borungku. Ma hancit sajo!" ²³ Umpe sahata dialusi Jesus. Jadi ning halahi ma, "Paorot ma da anak boru i Guru. Hum na manggaori sajo do ia di pudinta!" ²⁴ Dialusi Jesus ma, "Hum tu angka biri-biri na lilu sian tonga-tonga ni Israel do Au disuru." ²⁵ Tapi haru pe na dung didok Jesus songon i, laing ro do anak boru i tu Jesus. Marsomba-somba ia mandok hatania, "O, Tuhan, urupi ma au," ning ia. ²⁶ Tapi dialusi Jesus ma, "Dia ma denggan nibuat panganon ni dakdanak gabe niambungkon tu anjing." ²⁷ "Tutu do nian, Tuhan," ninna anak boru i mangalusi, "tapi laing dipangan anjing do teba-teba na mardabuan sian meja ni morana i." ²⁸ Gabe didok Jesus ma tusia, "Godangna i haporsayaanmi, da inang! Tulus ma di ho sanga aha na nihalungunkonmi!" Laing di na santongkin i, malum ma manigor borunia i. ²⁹ Ditinggalkon Jesus ma inganan i, mardalan ma Ia manopi-nopi Dano Galilea. Dung i manangkok ma Ia tu sada dolok-dolok, juguk ma Ia disi. ³⁰ Marroan ma bahat halak mandapotkon Ia maroban angka na timpang, na mapitung, na onyangon, na ngungu dohot angka na marnyae na asing. Dipayakkon halahi ma angka na marnyae i di lambung pat ni Jesus. Gabe dipamalum Jesus ma halahi. ³¹ Homang ma roha ni halak na bahat na disi i, di na niida ni halahi gabe malo mangakatai na ngungu, malum na timpang, gabe mardalan na onyangon, tarbaen marnida na mapitung. Dipuji halahi ma Debata ni halak Israel. ³² Dung i dipiohon Jesus ma angka anak siseanNia i, didok Ia ma tu halahi, "Ibo do rohangKu mida halak na bahat on. Tolu ari ma halahi dison rap dohot Au. Hape so adong be sanga na aha panganon ni halahi. Nada tarpadiar Au halahi mulak anggo so jolo mangan. Gale-gale halahi naron di dalan i hara ni na tangkuraparon." ³³ Gabe disapai anak siseanNia i ma tuSia, "Di dia ma dapot hita sipanganon di halongonan on di halak na songon on bahatna?" ³⁴ "Piga adong roti di hamu?" ninna Jesus manyapai. "Pitu", ning halahi. "Dung i ihan na menek-menek saotik." ³⁵ Jadi disuru Jesus ma anso marjuguhan halak na bahat i di tano i. ³⁶ Dung i dibuat Ia ma roti na pitu i dohot ihan i. Didok Ia tarimakasi, diponggoli Ia ma roti i dohot ihan i, dileheni Ia ma tu angka anak siseanNia i. Dibagi-bagihon halahi ma tu halak na bahat i. ³⁷ Mangan ma halahi sude, lopus butong be. Dung sidung na mangan i, dipalagut ma teba-teba ni roti dohot ihan i. Marlagut ma sude gok pitu ampang. ³⁸ Hum halaklahi sajo, adong ma opat ribu halak bahat ni bilangan ni na mangan i. Inda dohot dope dietong disi, angka bagian dadaboru dohot angka dakdanak. ³⁹ Dung i disuru Jesus ma halahi marmulahan. Tapi anggo Jesus, marparau ma sada Ia, laho kehe tu Luat Magadan.

¹ Ro ma halak Parise dohot halak Saduse mandapotkon Jesus. Na giot manjalak-jalahi hasalaan ni Jesus do roha ni halahi. Dipangido halahi ma anso dipataridahon Ia sada tanda sian banua ginjang. ² Tapi dialusi Ia ma halahi, "Muda lusut mataniari, didok hamu, ’Ah, denggan do ari on, angke rara do langit.’ ³ Dung manyogot didok hamu ma, ’Ah, ro do udan annon, harana rara do langit boti holom.’ Anggo manjujur ari sian na mangaligi langit malo do hamu, hape anggo manjujur na masa di hatiha on, nada malo hamu!" ⁴ "Songon on ma jahatna dohot durakona na giot mangido tanda? Hum sada tanda pe nada patuduhonon tu hamu, asing sian tanda na tu si Junus." Dung didokkon Jesus songon i, ditinggalkon Ia ma halahi, lalu kehe Ia. ⁵ Hatiha taripar angka anak sisean ni Jesus i, lupa do halahi maroban roti. ⁶ Didok Jesus ma tu halahi, "Manat-manat jana jamot ma hamu adop ragi ni angka Parise dohot Saduse i." ⁷ Marpikir-pikir ma halahi, marsipandohan ma angka anak sisean ni Jesus i na sada tu na asing, "Hara ni na so taoban i do roti, umbaen na nidokNia songon i." ⁸ Diboto Jesus do sanga aha na nihataan ni halahi i. Gabe didok Ia ma, "Biasi taringot tu na so maroban roti dihatai hamu? Na hurang porsaya do hamu! ⁹ Na so mangarti dope hamu? Adong he na so diingot hamu be roti na lima i, tu na lima ribu halak i? Piga ampang lobi-lobi ni roti na nipalagutmunu i? ¹⁰ Bia muse dope dohot roti na pitu i di siopat ribu halak i? Na so diingot hamu be dohot i? Piga ampang lobi-lobi na nipalagutmunu i? ¹¹ Biasi jabat songon i nada mangarti hamu, na so taringot tu roti do na Hudok? Manat-manat ma hamu mida ragi ni halak Parise dohot Saduse!" ¹² Ujungna gabe diboto halahi ma astuan ni na nidokNia i. Disuru Jesus pe halahi manat-manat nada na mandok taringot tu ragi na nipake laho mambaen roti. Tapi taringot tu pangajaran ni halak Parise dohot Saduse do. ¹³ Hum lalu Jesus tu luat na mardonokkon Kaisarea Pilippi. Disapai Ia ma disi angka anak siseanNia i, "Ise dehe didok halak, Anak Ni Jolma i?" ¹⁴ Dialusi halahi ma, "Adong na mandok, si Johannes Pandidi. Deba mandok si Elia. Na asing mandok, si Jeremia sanga sahalak sian angka panurirang i." ¹⁵ "Tapi mangihutkon pandapotmunu sandiri, ise do Au?" ¹⁶ Mangalusi ma si Simon Petrus, "Ho ma ibana Kristus, Anak Ni Debata Na Mangolu i." ¹⁷ "Na martua do ho ale Simon anak ni si Junus!" ninna Jesus, "Harana nada jolma be na paboahon pangalaho i tu ho, tapi Damang na di banua ginjang i do. ¹⁸ Au pe Hudok ma tu ho, ’Si Petrus’ do ho (artina ’Batu na pir’). Di ginjang ni batu on ma pajongjongKu parlagutanKu na so tartaluhon; sanga na hamatean pe na ro i! ¹⁹ LehenonKu ma di ho kunci ni Harajaan Ni Banua Ginjang. Sanga aha na nilarangmu di ginjang tano on laing larangon ma i lopus tu banua ginjang. Sanga aha na nidokmu tigor di ginjang tano on, laing na tigor ma i lalu tu banua ginjang." ²⁰ Dung i ditonai Ia ma angka anak siseanNia i anso ulang dipaboa-boa halahi sanga na tu ise pe, paboa na Ia do Kristus i. ²¹ Mamungka sian i marsitangkas ma Jesus paboahon tu angka anak siseanNia i. Angkon kehe Ia tu Jerusalem jana angkon parkancitan ni angka pamimpin dohot angka Sintua Ni Malim dohot Siboto Surat Jahudi ma Ia disi. Angkon bunuon Ia, tapi mulak mangolu ma Ia di ari patoluhon! ²² Dung i ditogu si Petrus ma Jesus tu duru laho manggorahon Ia. Didok si Petrus, "Sai dipadao Debata ma na songon i sian Ho, Tuhan! Sai ulang ma tulus pangalaho na songon i tu Ho!" ²³ Tapi humusor ma Jesus manaili tu si Petrus, didok Ia ma, "Morot ho sian on, Sibolis! Gabe batu partuktuhan do ho di Au. Pikiran ni jolma do pikiranmi! Inda pikiran ni Debata na songon i!" ²⁴ Dung i didok Jesus ma tu anak siseanNia i, "Muda adong halak na giot mangihutkon Au, angkon dihalupahon ia do dirina sandiri, dung i diporsan ia ma silangna dung i pe anso diihutkon Au. ²⁵ Harana anggo halak na paluahon ngoluna, angkon gabe agoan ngolu. Tapi halak na agoan ngoluna hara ni Au, gabe dapotan hangoluan do. ²⁶ Aha ma he labo ni halak, muda ia nampuna sude na satano on, anggo mago do sian ia ngolunia? Targonti ma he ngolu i sanga na dohot aha? ²⁷ Ro ne ma Anak Ni Jolma i, mardongan hasangapan ni AmangNia rap dohot angka surusuruanNia. Anggo disi, baloskononNia ma tu ganop jolma hombar tu pambaenan ni halahi be. ²⁸ Hudok ma tu hamu: Sasintongna sian tonga-tongamunu na adong dison, adong do na so giot mate anggo so jolo diida ia Anak Ni Jolma i ro songon raja di bagasan harajaanNia."

¹ Dung onom ari, dioban Jesus ma si Petrus dohot si Jakobus dohot angginia si Johannes tu puncut ni sada dolok na gincat. Hum halahi sajo do disi. ² Gabe muba ma tompa ni Jesus di jolo ni halahi: Gabe torang songon mataniari bohiNia i. PakeanNia pe gabe marsinondang songon hatorangan. ³ Dung i diida halahi ma si Musa dohot si Elia mangkobari dohot Jesus. ⁴ Dung i didok si Petrus ma tu Jesus, "Tuhan, tabona i hita dison! Anggo ra do Ho Tuhan, hupajongjong ma dison tolu undung-undung. Sada ma i di Ho, sada di si Musa, sadanari di si Elia." ⁵ Dompak na mandok hata i si Petrus, dihaliangi ombun na torang situtu ma halahi. Dung i adong ma sada sora sian ombun i na mandok, "On ma AnakKu na Huhaholongi, na pasonangkon rohangKu. Tangihon hamu ma Ia!" ⁶ Dung dibege anak sisean ni Jesus i sora i, mabiar sajo ma halahi jabat tungkap be tu tano i. ⁷ Tapi ro ma Jesus manjama halahi, ning Ia ma, "Jongjong ma hamu, ulang hamu mabiar!" ⁸ Hatiha mangaligi halahi, inda diida halahi be sanga ise, hum Jesus sajo noma. ⁹ Hatiha manuat halahi sian dolok i, dipaingot Jesus ma halahi, "Salolot so dipangot sian na mate dope Anak Ni Jolma i, ulang paboa-boa hamu sanga na tu ise pe sanga aha na niidamunu nangkin." ¹⁰ Disapai angka anak siseanNia i ma Jesus, "Biasi didok angka Siboto Surat, angkon parjolo ro si Elia?" ¹¹ Dialusi Jesus ma, "Tutu do i! Jumolo do ro si Elia laho pasingkopkon sasudena. ¹² Tapi Hudok ma di hamu, madung ro nian si Elia, tapi nada ditanda halak ia. Gabe roha-roha ni halak ma mambaen sanga aha tusia. Laing songon i muse ma Anak Ni Jolma i manaon parhancitan sian halahi." ¹³ Ujungna mangarti ma angka anak sisean ni Jesus i, hape taringot tu si Johannes Pandidi do na nidok ni Jesus tu halahi. ¹⁴ Dung diulahi halahi mandapotkon halak na bahat i, ro ma sada bayo marsomba di jolo ni Jesus. ¹⁵ Didok ia ma hatania, "Ibo ma jolo rohaMu mida anakku! Solpoton do ia jana marhancit situtu. Muda hatiha di panombona i jotjot madabu ia tu api sanga tu aek. ¹⁶ Madung huoban ia tu angka anak siseanMi, tapi inda tarpamalum halahi ia." ¹⁷ Dialusi Jesus ma, "O hamu angka angkatan na so porsaya jana na lilu, angkon sadia honok Au rap dohot hamu? Angkon sadia honok nari Au sobar paida-ida hamu? Oban ma tuson dakdanak i!" ¹⁸ Gabe dipaorot Jesus ma setan i sian dakdanak i. Morot ma setan i, gabe manigor malum ma dihilala dakdanak i. ¹⁹ Dung i didapotkon angka anak siseanNia i ma Jesus hatiha sada Ia sajo. Disapai halahi ma tuSia, "Biasi nada tarpaorot hami setan i?" ninna halahi. ²⁰ Dialusi Jesus ma, "Angke hurang porsaya hamu. Ingot hamu ma! Sugari sagodang ni batu ni sabi pe adong haporsayaanmunu, tardok hamu do tu dolok on, ’Morot ma ho sian on tu sadu!’ angkon pinda do dolok i. Jana nada adong sanga aha pe na so tarpatupa hamu! [ ²¹ Tapi anggo setan na songon on, tangiang dohot puaso sajo do tarbaen paruarkon i.]" ²² Hatiha marlagut sude anak sisean ni Jesus di Galilea didok Jesus ma tu halahi, "Inda pola sadia honok nari, pasahaton ma Anak Ni Jolma i tu kuaso ni hajolmaon. ²³ Bunuon ni halahi ma Ia, tapi mulak mangolu do Ia di ari patoluhon." Gabe marsak sajo ma angka siseanNia i. ²⁴ Jadi dung lalu Jesus rap dohot angka anak siseanNia i tu Kapernaum, ro ma tu si Petrus angka sijagit pajak ni Bagas Ni Debata manyapai ia, "Manggarar pajak na dua dirham i dehe Gurumunu i sanga nada?" ²⁵ Dialusi si Petrus ma, "Manggarar!" Jadi dung mulak si Petrus, inda didok ia dope sanga na aha manigor didok Jesus ma tusia, "O, Simon! Bia do ninna rohamu? Ise do sigarar pajak sanga bea tu angka raja na di tano on? Rayat i do sanga halak na asing?" ²⁶ "Halak na asing ma antong," ning si Petrus, "Anggo songon i, bebasma rayatna i. ²⁷ Tapi anso ulang pola gabe batu partuktuhan di halahi, kehe ma ho jolo mangkail tu dano. Buat ma ihan na parjolo dapot i. Dapot ho ma di baba ni ihan i hepeng satuk ni panggarar ni pajak sian hita na dua. Buat ma hepeng i, gararkon ma tu halahi. I ma pajak sian hita tu Bagas Ni Debata."

¹ Jadi ro ma sanoli angka anak sisean ni Jesus tuSia manyapai, "Ise do tardok na gumodang di Harajaan Ni Banua Ginjang?" ² Dipiohon Jesus ma sada dakdanak na menek. Disuru Ia ma dakdanak i jongjong di jolo ni halahi. ³ Sasintongna do na Hudok on tu hamu, "Muda so muba rohamunu jana mulak songon dakdanak on, nada tarbaen hamu masuk tu Harajaan Ni Banua Ginjang. ⁴ Anggo halak na gumodang di Harajaan Ni Banua Ginjang, i ma halak na patorukkon dirina gabe songon dakdanak on. ⁵ Dung i halak na manjagit dakdanak na songon on di bagasan goarKu, laing na manjagit Au do halak na songon i." ⁶ "Sanga ise na mambaen gabe so porsaya be angka na menek on tu Au, gumonan ma ditambatkon losung batu tu rungkung ni halak sisongon i, anso nibonomkon i tu laut na bagas. ⁷ Marjaya do portibi on hara ni angka pangalaho na di bagasanna, i ma na mambaen halak gabe mardosa. Tutu angkon sai tongtong do adong na songon i. Tapi marjaya ma halak na gabe parbonciranna! ⁸ Muda hara ni tanganmu sanga hara ni patmu mardosa ho, ponggolkon ma i, ambungkon ma tanganmi sanga patmi. Gumonan ma ho mangolu rap dohot tangan sabariba sanga pat sabariba, ulang pado martangan ho dua-dua sanga laing marpat ho dua-dua, hape ho sandiri niambungkon tu api na so ra mintop. ⁹ Dung i muda hara ni matamu do ho gabe mardosa, pulsikkon ma i ambungkon matami. Gumonan do mangolu ho sada mata ulang pado disampakkon ho tu api narako laing disi matami na dua i." ¹⁰ "Ingot hamu ma, ulang dipalayas hamu sahalak sian angka na menek on. Harana Hudok ma tu hamu: Adong do surusuruan ni halahi di banua ginjang na sai mangaligi bohi ni Damang na di banua ginjang." [ ¹¹ Harana, laho paluahon halak na lilu do umbaen na ro Anak Ni Jolma i!] ¹² "Bia do antong ninna rohamunu? Sugari adong ma sada halak nampuna biri-biri saratus. Dung i lilu ma sada sian biri-biri i. Bia ma baenon ni nampuna i? Tontu ditinggalkon ia ma jolo na sambilan pulu sambilan i di dolok i, gabe kehe ma ia manjalahi na lilu na sada i. Na he songon i do? ¹³ Hudok ma tu hamu, muda dung dapot ia na sada i, tontu jumop ma rohania hara ni biri-biri na sada i ulang pado mida na sambilan pulu sambilan nari angka na so lilu i. ¹⁴ Laing songon i muse ma Amangmunu na di banua ginjang i, nada por rohaNia muda adong na lilu sahalak pe sian angka na menek on." ¹⁵ "Muda mardosa kahanggimu tu ho, topotkon ma ia. Paboa tangkas salania i. Sip-sip ma langkahon tusia anso hum hamu na dua sajo. Muda ditangihon ia na nidokmi, madung dapot ho ia mangulahi. ¹⁶ Tapi muda inda ditangihon ia, oban ma sahalak sanga dua halak nari, anso gomos angka hata ni dua sanga tolu halak saksi i. ¹⁷ Muda laing inda ditangihon ia sipaingot ni halahi i, paboa ma di tonga-tonga ni parlagutan. Muda laing inda ditangihon ia be sipaingot ni parlagutan i, etong hamu ma i songon halak na so mananda Tuhan. Sanga songon sada halak sitagi pajak." ¹⁸ "Ingot hamu on! Sanga aha na nitambatmunu di tano on, laing na tambat muse ma i di banua ginjang. Dung i sanga aha na nipaluamunu di tano on, laing na nipalua muse ma i di banua ginjang." ¹⁹ Ingot hamu muse ma on! Muda adong dua halak sian hamu di tano on na saroha manangiangkon sanga aha pe, tulus do tangiang i baenon ni Damang na di banua ginjang i. ²⁰ Angke sanga di dia rap marlagut dua sanga tolu halak di bagasan goarKu, disi do Au rap dohot halahi. ²¹ Dung i ro ma si Petrus tu Jesus manyapai, "O, Tuhan! Muda mardosa dongan tu iba, intap ni piga noli do iba mangampuni ia? Tuk ma pitu noli?" ²² Dialusi Jesus ma, "Ingot ma! Nada hum pitu noli sajo. Tapi pitu pulu noli pitu! ²³ Harana anggo Harajaan Ni Banua Ginjang tarsongon sada raja na giot pasalosehon angka utang ni naposonia do i. ²⁴ Dung dipungka ia na maretong dioban ma mangadop tusia sahalak naposonia i. Marutang ma naposonia i marjuta-juta, ²⁵ nada targararsa be utangna i. Jadi didok raja i ma anso nigadis bayo i rap dohot sude halahi na sabagas dohot sude sinadongannia laho manggarar utangnia i. ²⁶ Hara ni i, gabe manungkap ma bayo i tu pat ni raja i mangidohon, ’Tuannami, palapang ma jolo rohamu mida au. Hugarar pe sudena utangki,’ ning ia. ²⁷ Ibo ma roha ni raja i midasa. Gabe dipalua raja i ma ia. Disesa ma sude utangnia i." ²⁸ "Tapi di na kehe i haruar naposo i, marsuo ma ia dohot dongannia, rap naposo do halahi. Adong utang ni dongannia i tusia sanga na piga pulu ribu. Hape ditangkup ia ma manigor dongannia i lalu dipingkok ia jana didok ia ma tu dongannia i, ’Garar sude utangmi tu au,’ ning ia. ²⁹ Gabe manungkap ma dongannia i tusia marsomba-somba, ’Sobar ma ho jolo dongan,’ ning ia. ’Hugarar pe sude!’ ³⁰ Tapi inda diterge ia pangidoan ni dongannia i. Dipahurungkon ia muse dope dongannia i lopus digarar ia sude utangna i. ³¹ Jadi dung diida angka naposo na asing i na masa i, hancit ma roha ni halahi. Diaduhon halahi ma tu raja i. ³² Gabe dipiohon raja i ma naposo na jahat i, didok ma tusia, ’Naposo na jahat! Ma husalosehon sude utangmu hara ni na marsomba-somba ho tu au. ³³ Rap naposo do hamu, inda he patut maribo ni roha ho tu angka donganmu, songon na hubaen i tu ho?’ ³⁴ Milas sajo ma roha ni raja i dipamasuk ia ma naposo na jahat i tu hurungan. Angkon disi ma ia lopus digarar ia sude utangnia i." ³⁵ Laho paujungkon caritoNia i Jesus, didok Ia ma, "Songon i muse ma baenon ni Damang na di banua ginjang i tu hamu, anggo inda ias rohamunu mangampuni donganmunu."

¹ Dung sidung didok Jesus i sude, ditadingkon Ia ma Galilea, kehe ma Ia tu Luat Judea sabola ipar ni Batang aek Jordan. ² Bahat do halak mangihutkon Ia. Dipamalum Ia do sude halahi disi. ³ Jadi ro ma da halak Parise laho manjalak-jalahi hasalaanNia. Disapai halak Parise i ma Ia, "Diisinkon Tona ni ugamonta dehe manyirangkon boru roha-rohaniba sajo?" ⁴ Dialusi Jesus ma, "Na so disise hamu dehe, anggo di mulana i halaklahi dohot dadaboru do halahi ditompa Ia? ⁵ Dung i didok Ia ma, ’Hara ni i angkon tinggalkonon ni halaklahi ma inangna dohot amangna gabe marsada dohot daboruna anso gabe sada na dua i.’ ⁶ Jadi nada dua halak be halahi tapi sada noma. Hara ni i do umbaen na so tola sirangon ni jolma, na dung nipadomu ni Debata." ⁷ Dung i disapai halak Parise i ma mangulahi tuSia, "Antong anggo songon i, biasi disuru si Musa halak mangalehen surat sirang tu dadaboru na giot sirangkonon? Na he na manyirangkon dadaboruna do muda na songon i?" ⁸ Dialusi Jesus ma, "Dipatola si Musa pe hamu manyirangkon dadaborumunu, hara ni na mamaoltu do hamu ajaron. Tapi anggo di mulana nada songon i. ⁹ Jadi, tangihon hamu ma on: Halak na manyirangkon dadaboruna, anggo so hara ni na manyimbil dadaborunia i, hape dibuat ia muse boru na asing, na markarosuan do sisongon i." ¹⁰ Gabe didok anak siseanNia i ma tu Jesus, "Anggo gabe songon i noma halak na marsaripe, gumonan ma indangkon sai mambuat boru." ¹¹ Dialusi Jesus ma, "Inda sude halak ra manjagit hata na songon i, hum angka na dung dipasupasu sajo do. ¹² Harana adong do halak na so bisa marripe, angke songon i hian do halahi sian mulai sorang. Adong muse do halak na so marripe hara ni na nibaen ni halak songon i. Dung i adong muse do halak na so marripe hara ni por ni rohania sandiri jana hara ni Harajaan Ni Banua Ginjang. Sanga ise na sanggup manjagit pangajaran on, halahi sajo ma manjagitsa." ¹³ Adong ma angka na maroban dakdanak tu Jesus anso diampehon Ia tanganNia tu ulu ni angka dakdanak i manangiangkon halahi. Tapi digorahon anak siseanNia i ma halahi. ¹⁴ Gabe didok Jesus ma tu anak siseanNia i, "Padiar hamu ma marroan dakdanak i tu Au! Ulang larang hamu halahi. Harana angka halak sisongon on do na gabe anggota di Harajaan Ni Banua Ginjang." ¹⁵ Jadi diampehon Jesus ma tanganNia tu ulu ni angka dakdanak i, dung i kehe ma Ia sian i. ¹⁶ Di na sadari ro ma sada bayo mandapotkon Jesus, "O, Guru!" ning ia, "Na denggan dia do sibaenonku anso dapot au hangoluan na so mantak?" ¹⁷ Dialusi Jesus ma, "Biasi tu Au ho manyapai sanga aha na denggan? Hum sada do na denggan, i ma Debata. Muda lungun rohamu dapotan hangoluan na so mantak, angkon oloanmu do angka parenta ni Debata." ¹⁸ "Parenta na dia ma i?" ning bayo i manyapai. Dialusi Jesus ma, "Ulang ho mamunu, ulang ho markarosuan, ulang ho manangko; ulang ho margabus. ¹⁹ Pasangap ma amangmu dohot inangmu. Dung i haholongi ma donganmu jolma songon pangkaholongimu di dirimu sandiri." ²⁰ "Anggo parenta na songon i do, madung hupatulus do i," ning doli-doli i, "Aha dope na porlu?" ²¹ Didok Jesus ma tusia, "Muda por rohamu gabe sun denggan ho, kehe ma ho manggadis sude sinadonganmu. Lehen ma hepengna i tu angka na pogos, dung i dapot ho ma arta di banua ginjang. Dung i ro ma ho tuson ihutkon ma Au!" ²² Dung dibege doli-doli i hata nangkinan i, kehe ma ia mardongan arsak. Angke halak na kayo do ia. ²³ Jadi didok Jesus ma tu angka anak siseanNia i, "Hudok ma di hamu, na maolan do halak na kayo laho masuk tu Harajaan Ni Banua Ginjang. ²⁴ Jana Hupaboa muse dope on di hamu; ummuraan dope unto mamolus sian lubang ni jait, ulang pado halak na kayo laho masuk tu Harajaan Ni Debata." ²⁵ Jadi dung dibege angka anak siseanNia i angka hata na nidokNia i, gabe homang ma roha ni halahi. "Anggo songon i, ise noma na bisa dipalua?" ninna halahi. ²⁶ Diligi Jesus ma halahi, ning Ia ma, "Anggo di jolma, na so tarbaen do i! Tapi anggo di Debata nada adong na so tarbaen!" ²⁷ Jadi didok si Petrus ma, "Ligi ma, ma hami tinggalkon sasudena laho mangihutkon Ho. Gabe aha ma sijagitonnami?" ²⁸ Dialusi Jesus ma halahi, "Hudok ma tu hamu, satutuna di hatiha panompaon muse, di hatiha juguk Anak Ni Jolma i, di habangsa hamuliaonNa, hamu angka na mangihutkon Au, giot juguk di ginjang di habangsa na dua bolas i laho manguhumi Israel na dua bolas marga i. ²⁹ Angke sanga ise na maninggalkon bagasna, sanga kahanggina, sanga ibotona, sanga pe inangna dohot amangna, sanga dakdanakna, sanga sabana hara ni Au, saratus lompit ma jagiton ni halahi mangulahi. Nilehen muse dope disia hangoluan na so mantak. ³⁰ Tapi bahat do na aturan parjolo hape gabe parpudi. Bahat muse do na aturan parpudi hape gabe parjolo."

¹ "Anggo Harajaan Ni Banua Ginjang, tarsongon sada halak nampuna kobun anggur do i. Manyogot-nyogot i kehe ma ia manjalahi halak na giot markarejo di kobun anggurnia i. ² Jadi dung sada rohania manggarar upa ni parkarejo i sada hepeng perak sadari, disuruhon ia ma halahi markarejo di kobun anggurnia i. ³ Dung pukul sambilan manyogot i, kehe ma mangulahi nampuna kobun i, diligi ia ma sanga na piga-piga halak na ngongong marsoan songon i di balerong. ⁴ Jadi didok ia ma tu halahi, ’Dohot ma hamu kehe markarejo di kobun anggurki. Hulehen pe upa na patut di hamu.’ ⁵ Markehean ma halahi. Di pukul dua bolas kotu i, laing songon i muse di pukul tolu andospotang, kehe muse ma nampuna kobun i, laing songon i muse dibaen ia. ⁶ Dung hira-hira pukul lima andospotang, kehe muse ma ia. Diligi ia muse, hape laing adong dope halak na jongjong sajo songon i inda adong karejona. Gabe disapai ia ma halahi, ’Biasi he jongjong sajo hamu dison sasadari so adong na niampalmunu?’ ⁷ Dialusi halahi ma, ’Inda adong sahalak pe na mangalehen karejo di hami.’ ’Anggo songon i, dohot ma hamu markarejo di kobun anggurki,’ ninna nampuna kobun i. ⁸ Jadi dung potang ari didok nampuna kobun i ma tu mandurna i. ’Piohon ma angka na karejo i, garar ma upa ni halahi mamungka sian na parpudi ro lopus tu na parjolo ro.’ ⁹ Dung i ro ma angka na masuk karejo pukul lima andospotang i. Sada be ma hepeng perak dijagit halahi. ¹⁰ Dung i ro ma muse na markarejo mamungka sian manyogot. Ninna roha ni halahi umbahat ma jagiton ni halahi. Hape laing sada hepeng perak muse do dijagit halahi. ¹¹ Hatiha na manjagit hepeng i halahi, mungut-ungut ma halahi tu nampuna kobun i. ¹² Didok halahi ma, ’Angka dongan parkarejo na parpudi ro, hum sajom sajo do halahi karejo, jana hami sadari maningting di las ni ari i, hape sarupa ma panggararan dibaen tuan i tu halahi dohot tu hami!’ ¹³ Dialusi nampuna kobun i ma tu sahalak sian halahi, ’Ah dongan, nada adong hubaen na so patut tu hamu. Na he na dung jolo dioloi ho do, sada hepeng perak upa ni halak na markarejo sadari? ¹⁴ Buat upami! Kehe ma ho! Por do rohangku mangalehen tu halak na parpudi ro i upa na sarupa dohot na hulehen di ho. ¹⁵ Na so tola do lakna hubaen roha-rohangku tu sinadonganku? Sanga na pis do matamu muda burju au tu halak na asing?’ " ¹⁶ Dung i didok Jesus ma mangulahi, "Songon i muse ma angka halak na parpudi, gabe parjolo. Halak na parjolo hian gabe parpudi." ¹⁷ Di tonga dalan, hatiha kehe Jesus tu Jerusalem, dipiohon Ia ma anak siseanNia sidua bolas halak i marlagut. Dung i didok Ia ma tu halahi, ¹⁸ "Tangihon hamu ma jolo na Hudok on! Saonnari na giot tu Jerusalem ma hita. Dung lalu disi, pasahaton ma Anak Ni Jolma i tu angka Sintua Ni Malim dohot angka Siboto Surat. Dabuon ni halahi ma uhuman tuSia, angkon mate bunuon, ¹⁹ dung i pasahaton ni halahi ma Ia tu halak na asing, na so bangso Jahudi. Palayason ni halahi ma Ia, diparkanciti dung i parsilangkonon ni halahi ma Ia. Tapi dipangolu do Ia mangulahi di ari patoluhon." ²⁰ Dung i ro ma inang ni si Zebedeus rap dohot angka dakdanaknia tu Jesus. Unduk ma ia manyomba Jesus laho mangido sanga aha. ²¹ "Giot aha di ho inang?" ninna Jesus manyapai. Dialusi ina-ina i ma, "Sugari nian muda dung gabe Raja Ho anso juguk anakku na dua on, sada di siamunMu jana sada di siambirangMu," ning ia. ²² "Na so diboto hamu do na nipangidomunu," ning Jesus tu halahi. "Tarinum hamu ma lakna panginuman na giot inumonKi?" "Tarinum hami do i," ninna halahi. ²³ Didok Jesus ma, "Inumonmunu do nian panginumanKi. Tapi anggo na manontuhon sanga ise na juguk di siambirangKu sanga di siamunKu, inda marguru di Au i. Anggo inganan i, di halak na dung dipatupa ni Damang hian do i." ²⁴ Dung tarboto tu anak sisean na sampulu nari pangalaho i muruk ma halahi tu na martinadohon sidua halak i. ²⁵ Gabe dipio Jesus ma halahi sude lalu mandok hata ma Ia, "Diboto hamu do taringot tu angka pamimpin ni bangso na asing na mambaen roha-rohana tu rayatna. Diparhanciti angka na marpangkat-pangkat i do rayat i. ²⁶ Tapi anggo hamu, nada tama songon i. Muda adong sian hamu na giot godang, angkon gabe pangoloimunu do ia. ²⁷ Muda adong na giot sipajoloon sian hamu, angkon gabe naposomunu do ia. ²⁸ Sarupa dohot Anak Ni Jolma i muse; nada na giot paolo-oloan umbaen na ro Ia, tapi na giot mangoloi do, jana dilehen Ia dope hosaNia laho paluahon bahat halak." ²⁹ Jadi di na laho kehe halahi sian Jeriko, bahat do halak mangihutkon Jesus. ³⁰ Adong ma di topi dalan i dua halak na mapitung juguk-juguk. Dung diboto halahi Jesus do na mamolus i, marsurak ma halahi, "O, Tuhan, Anak Ni si Daud, ibo ma rohaMu mida hami!" ning halahi. ³¹ Dimuruhi halak na bahat i ma halahi, anso sip. Tapi mur marsurahi do halahi, "O, Tuhan, Anak Ni si Daud, ibo ma rohaMu mida hami!" ³² Dung i maradian ma Jesus, dipiohon Ia ma halahi. "Aha giot baenonKu di hamu dipangido rohamunu?" ninna Jesus manyapai. ³³ Dialusi halahi ma, "Sugari marnida ma hami, Tuhan!" ³⁴ Ibo ma roha ni Jesus mida halahi, gabe dijama Ia ma mata ni halahi i. Manigor marnida ma halahi. Halahi pe antong dohot ma mangihutkon Jesus.

¹ Dung donok halahi tu Jerusalem, lalu ma halahi tu Betpage na di lambung ni Dolok Zetun. Disuru Jesus ma dua halak siseanNia i parjolo. ² "Kehe ma hamu tu huta na di jolomunu an," ninna Jesus mandok halahi na dua, "Manigor idaonmunu ma disi tambat sada halode dohot anakna. Harkari hamu ma sian panambatanna i, oban hamu tuson. ³ Muda adong halak na mandok sanga aha tu hamu, dok sajo ma tusia, ’Porlu di Tuhan i,’ manigor paloasonNia do halode i obanonmunu." ⁴ Umbaen na songon i pe i, anso laing tulus do na nidok ni panurirang, na mandok songon on, ⁵ "Dokkon ma tu boru Sion, Ligi ma, ma ro Rajamu manopot ho saonnari. Na serep roha do Ia, jana mangalombut halode, sada halode jara-jara." ⁶ Jadi kehe ma anak siseanNia na dua i patuluskon songon na nidok ni Jesus tu halahi. ⁷ Dioban halahi ma halode i dohot anakna i. Dipalanoi halahi ma halode na dua i dohot angka baju ni halahi. Dilombut Jesus ma tanggurungna i. ⁸ Marsipahembang angka abitna ma halak na bahat na disi di dalan i. Adong ma deba na mambuat angka ranting-ranting ni hayu, diserakkon halahi ma i di tonga dalan i. ⁹ Mamungka ma marsurahi halak na mardalan di jolo dohot na di pudi ni Jesus. Ninna halahi ma, "Hosana ma di Anak Ni si Daud! Dipasupasu ma Ia na ro di bagasan goar ni Tuhan! Puji ma Debata Na Gumincat i!" ¹⁰ Jadi di na masuk Jesus tu Jerusalem gaor ma na sakota i sude. "Ise dehe on?" ninna halahi ma. ¹¹ "On ma ibana panurirang Jesus na sian Nasaret na di Galilea," ninna angka na mangudurkon Jesus. ¹² Dung i masuk ma Jesus tu alaman ni Bagas Ni Debata. Dipaorot Ia ma sude angka na marjagal disi. Diparbalikkon Ia ma sude meja ni angka panukar hepeng dohot bangku-bangku ni parjagal darapati. ¹³ Didok Ia ma tu halahi, "Adong do tarsurat songon on, ’Angkon bagas partangiangan do goaron BagasKon.’ Hape gabe bagas ni panyamunan do dibaen hamu bagas on." ¹⁴ Marroan ma angka na mapitung dohot na onyangon tu jolo ni Jesus di Bagas Ni Debata i. Sude halahi dipamalum Jesus. ¹⁵ Tapi muruk-muruk ma angka kapala ni malim dohot angka Siboto Surat Jahudi marnida angka hahomangan na masa i na nipatupa ni Jesus. Muruk muse ma halahi patangi-tangi angka dakdanak na marsurahi dohot na pio-pio di Bagas Ni Debata i, "Hosana ma di Anak Ni si Daud!" ¹⁶ Didok halahi ma tu Jesus, "Na so dibege Ho do na nidok ni halahi i?" "Olo, Hubege do," ninna Jesus mangalusi, "Na so unjung do dibaca hamu hata na mandok: ’Dakdanak dohot na baru sorang pe na dung Huajari do mandok hata puji-pujian na sun denggan’?" ¹⁷ Dung i kehe ma Jesus, ditadingkon Ia ma halahi. Kehe ma Ia tu kota Betania disi ma Ia marborngin. ¹⁸ Ancogotna i manyogot-nyogot dope di tonga dalan i laho mangulahi ro Ia tu kota i, malean ma Jesus. ¹⁹ Diida Ia ma di topi dalan i sada hayu gala-gala. Kehe ma Ia tu gala-gala i, hape umpe sangkamata batuna pe nada adong diida Ia, hum bulungna sajo do. Gabe didok Jesus ma tu hayu i, "Nada tola be ho marbatu salolotna!" Manigor malos ma bona ni gala-gala i. ²⁰ Homang sajo roha ni anak siseanNia i marnida na masa i. "Na tarbia ma parjadina manigor mate sude bona ni gala-gala on?" ning halahi manyapai. ²¹ "Satutuna, Hudok ma tu hamu, anggo porsaya do hamu jana inda adong ganggu ni roha, tarbaen hamu do songon na Hubaen i tu bona ni gala-gala i. Inda hum i sajo, salangkan tu dolok an pe tardokkon hamu do, ’Morot ma ho, ambung ma ho tu laut.’ Tulus do i! ²² Sanga aha pe pangidoanmunu di bagasan tangiangmunu, jagitonmunu do i, asal ma porsaya hamu." ²³ Dung i mangulahi ma Jesus tu Bagas Ni Debata. Masuk ma Ia mangajari disi. Jadi hatiha na mangajar i Ia, marroan ma angka kapala-kapala ni malim dohot angka na tobang-tobang ni halak Jahudi manyapai tuSia, "Marhite kuaso dia do dipambaeni Ho sudena on? Ise do na mangalehen kuaso i tu Ho?" ²⁴ Dialusi Jesus ma, "Au pe Hubaen jolo sada sapa-sapa tu hamu. Muda dung dialusi hamu naron sapa-sapa on, disi pe anso Hupaboa tu hamu, sanga na sian ise Hujagit kuaso laho mambaen songon i. ²⁵ Sian ise do dijagit si Johannes kuasonia laho mandidihon? Sian Debata do sanga sian jolma?" Jadi marpikir ma halahi di bagasan rohana mandok, "Muda tadokkon, ’Sian Debata’, gabe dohononNia ma tu hita: ’Anggo songon i biasi inda porsaya hamu tu si Johannes?’ ²⁶ Tapi muda tadok, ’Sian jolma’, angkon hilalaonta do pangkilalaan ni halak na bahat muse. Harana sude halak marpandapot, sada panurirang do si Johannes." ²⁷ "Inda hami boto," gabe ninna halahi ma mangalusi. Dung i ninna Jesus ma tu halahi, "Anggo songon i do, Au pe inda ra paboahon tu hamu sanga sian ise Hujagit kuaso laho mambaen sisongon i." ²⁸ Saonnari bia do ninna rohamunu taringot tu umpama on, "Adong ma sada ama, dua anaknia. Jadi didok ia ma tu anaknia siangkaan i, ’Kehe ma ho jolo amang markarejo sadari on di kobun anggurta i.’ ²⁹ Jadi dialusi anaknia i ma, ’Inda ra au,’ ning ia. Tapi maruba muse ma roha ni anaknia i gabe kehe ma ia tu kobun anggur i. ³⁰ Dung i kehe ma amangna i tu anaknia paduahon i mandokkon hata songon na parjolo i. Dialusi anaknia na paduahon i ma, ’Olo amang,’ ning ia. Hape inda kehe ia. ³¹ Antong, ise do sian anaknia na dua i na mangoloi na nidok ni amangna?" "Siangkaan i ma antong," ning halahi. Gabe didok Jesus ma tu halahi, "Satutuna Hudok ma tu hamu: Jumolo do angka sijagit pajak dohot angka anak boru siparkarosuan gabe anggota ni Harajaan Ni Debata ulang pado hamu. ³² Haru madung ro si Johannes Pandidi paboahon dalan na tutu tu hamu, hape nada ra hamu manghaporsayai na nidoknia. Hape anggo angka sijagit pajak dohot angka anak boru siparkarosuan, ma pola porsaya disia. Haru pe na dung diida hamu sudena i, hape laing so dipauba hamu dope rohamunu manghaporsayai ia." ³³ "Tangihon hamu ma jolo umpama na sada nari on," ninna Jesus. "Adong ma sahalak partano na bidang nampuna kobun anggur, dihandang ia ma sude humaliang kobun i, dihuar ia ma lubang inganan pamoroan ni anggur, dibaen ia muse ma tuhu-tuhu inganan ni na manjago. Dung i dipabolahon ia ma kobun anggurnia i tu angka pamola, kehe ma ia mardalanan tu luat na asing. ³⁴ Dung dapot hatihana mamutik batu ni anggur i, disuruhon partano na bidang i ma angka naposonia mandapotkon angka na mamola kobun i laho manjagit bolaanna. ³⁵ Tapi ditangkupi angka na mamola kobun i ma angka naposo ni partano na bidang i: Na sada dibalbali, na sada nari dibunu halahi, angka na asing i pe didangguri halahi do dohot batu. ³⁶ Disuru partano na bidang i muse ma angka naposonia na asing, umbahat sian na parjolo i. Tapi laing sarupa do pambaen ni angka pamola i tu angka naposo i. ³⁷ Ujungna disuru partano na bidang i ma anaknia sandiri mandapotkon halahi. ’Tontu mabiar ma halahi mida anakki,’ ninna rohania. ³⁸ Tapi dung diida angka na mamola kobun i anak ni partano na bidang i martahi ma halahi, ’Ah! Ma ro anak ni partano na bidang i. Aha dope, tabunu ma i anso di hita sude tean-teananna i!’ ³⁹ Ditangkup halahi ma anak ni partano na bidang i, disarat halahi ma tu duru ni kobun i, dibunu halahi ma disi." ⁴⁰ "Bia do, muda ro nampuna kobun anggur i mulak, aha ma baenonnia tu angka na mamola i?" ⁴¹ Dialusi halahi ma, "Tontu bunuonnia ma sude angka parjahat i, dung i tu halak na asing noma dipabolahon ia kobun anggurnia i. Tu halak na ra mangalehen bolaan ni tano i tusia muda dapot hatihana," ning halahi. ⁴² Dung i ninna Jesus ma tu halahi, "Na so unjung dope tarsise hamu surat na di Buku Na Badia i? ’Batu na niambungkon ni pande bagas i madung gabe batu parsuhi. Songon i ma pambaen ni Tuhan; sada pambaenan hahomangan di matanta.’ " ⁴³ "Hara ni i Hudok ma tu hamu: Buaton do Harajaan Ni Debata sian hamu jana nilehen ma i tu sada bangso na marbatuhon parbatu ni Harajaan i. [ ⁴⁴ Sanga ise na madabu tu batu i, angkon gabe masarsar. Jana sanga ise na didondoni batu i, angkon magopu gabe abu.]" ⁴⁵ Dung dibege angka kapala ni malim dohot angka halak Parise angka umpama ni Jesus i, diboto halahi ma, halahi do hape na nidok ni Jesus disi. ⁴⁶ Gabe dijalahi halahi ma dalan laho manangkup Ia. Tapi mabiar muse do halahi marnida halak na bahat, angke panurirang do Jesus dietong halahi.

¹ Dung i didok Jesus ma mangulahi umpama. ² Didok Ia ma, "Anggo Harajaan Ni Banua Ginjang tarsongon sada raja na mambaen horja parbagason ni anakna do i. ³ Disuruhon raja i ma angka naposona laho mangalap angka halak na niontangnia tu horja i. Hape inda ra ro angka na niontangna i. ⁴ Dung i disuru raja i ma angka naposonia na asing. Ditonai raja i ma halahi: ’Paboa hamu ma tu angka na niontang i: Madung singkop horja ni anakki. Angka lombu jantan dohot angka pahan-pahanan na jumeges madung nisambolan. Madung rade sude. Ro be ma hamu tu horja parbagason i!’ ⁵ Hape inda ditangihon halak na niontang i soso-soso i. Tapi marmorotan do halahi tu karejona. Adong na kehe tu ladangna, na deba tu parusahoanna; ⁶ na asing i ditangkup halahi muse dope angka naposo ni raja i. Dung dibalbali, dibunu ma halahi. ⁷ Dung dibege raja i na songon i, muruk sajo ma ia. Gabe disuruhon ia ma tentarania mambunu angka sibunu jolma i dohot manyurbu kota ni halahi. ⁸ Dung i dipio ia ma angka naposonia didok ia ma, ’Ma rade horja parbagason i hape inda tumbuk angka na niontang i. ⁹ Saonnari, kehe ma hamu tu angka dalan godang. Sanga na sadia bahat halak na marsuo dohot hamu disi, ontang hamu ma halahi tu horja haroan boru on.’ ¹⁰ Gabe kehe ma antong angka naposonia i. Tu angka dalan godang ma halahi kehe palagutkon halak sude na marsuo dohot halahi disi. Halak na burju dohot na jahat pe. Gabe gok ma bagas parhorjaan i dibaen angka tamu i. ¹¹ Dung i masuk ma raja i mangaligi angka tamu i. Diida raja i ma sahalak na ro i na so marabit horja. ¹² Gabe disapai raja i ma tu bayo i, ’O, Dongan! Tar bia do parmasukmu tuson, biasi nada marabit pesta ho?’ Tarhohom ma bayo i. ¹³ Gabe didok raja i ma tu angka naposonia, ’Tambat ma pat ni bayo on dohot tanganna i, dung i ambungkon hamu tu balian tu inganan na golap i. Disi ma ia tangis jana patungaripon.’ " ¹⁴ Dung i dipaujung Jesus ma umpama i markite-hite pandohan, "Bahat do nian na niontang tapi hum saotik do na tarpili." ¹⁵ Dung i kehe ma halak Parise i anso rap martahi manjalahi dalan sanga na bia baenon anso tardapot halahi Jesus di hasalaanna muda disapai halahi. ¹⁶ Disuruhon halahi ma angka anak sisean ni halahi rap dohot piga-piga halak anggota ni si Herodes. Jadi disuru dokkon halahi ma tu halak na nisuruhon ni halahi i mandok tu Jesus songon on, "Hami boto halak na tigor roha do Guru i. Marsitangkas do diajarkon Ho hagiot ni Debata tu jolma. Nada mabiar Ho sanga na tu ise pe halakna. Angke antong inda siida bohi Ho. ¹⁷ Jadi hara ni i, paboa ma jolo taringot tuson: Tola dehe mangihutkon Tona ni ugamo Jahudi manggarar pajak tu Kesar Rom sanga nada?" ¹⁸ Diboto Jesus do na jahat roha ni halahi, jadi didok Ia ma, "Pangalancap do hamu! Biasi ma jalak-jalahanmunu hasalaanKu? ¹⁹ Patidahon hamu ma jolo tu Au hepeng na nilehenmunu manggarar pajak!" Jadi dilehen halahi ma sada hepeng perak tuSia. ²⁰ Dung i disapai Jesus ma tu halahi, "Gambaran ni bohi ni ise do i? Goar ni ise do na tarsurat disi?" ²¹ "Kesar i," ning halahi mangalusi. Dung i didok Jesus ma tu halahi, "Antong garari hamu ma tu Kesar i sanga aha nampuna ni Kesar i, jana garar muse ma tu Debata sanga aha nampuna ni Debata." ²² Jadi dung dibege halahi hatorangan i, homang ma roha ni halahi. Gabe ditinggalkon halahi ma Jesus. ²³ Laing di na sadari i, ro ma halak Saduse mandapotkon Jesus. Halahi ma na mandok, na so mulak mangolu halak na dung mate, jana disapai halahi ma Ia, ²⁴ "Guru," ninna halahi, "Anggo si Musa mangajarkon songon on do: Muda mate sada bayo na so adong dope anakna, angkon patugincaton ni anggina do dadaboru na nitinggalkonnia i anso adong na mangalehen pomparan di bayo na dung mate i. ²⁵ Jadi, adong ma di hami on pitu halak na martinadohon. Mambuat boru ma siangkaan i. Tapi mate ma ia so mardakdanak. Gabe tinggal ma dadaborunia i di na nitadohonnia i. ²⁶ Tapi mate muse ma angginia i laing so mardakdanak. Laing songon i ma na patoluhon i marudut lopus tu na papituhon. ²⁷ Ujungna mate muse ma dohot dadaboru i. ²⁸ Di bagasan pangalaho na songon on, muda dapot ma hatihana pangoluon mangulahi angka na mate i saulahon, gabe dadaboru ni ise ma dadaboru i? Harana halahi na pitu madung mamake ia." ²⁹ Dialusi Jesus ma, "Lilu do hamu! I ma tandana na so diboto hamu Buku Na Badia i. Kuaso ni Debata pe inda diboto hamu. ³⁰ Angke muda dung dipangolu mangulahi angka na dung mate, nada marbagas be halahi mangulahi. Tapi songon parngoluon ni angka surusuruan noma ngolu ni halahi di banua ginjang. ³¹ Na so unjung dope disise hamu na nidok ni Debata taringot tu halak na mate na nipangolu mangulahi? Didok Debata do, ³² ’Au do Debata ni si Abraham, Debata ni si Ishak dohot Debata ni si Jakob.’ Inda Debata ni halak na mate anggo Debata, Debata ni halak na mangolu do Ia!" ³³ Dung dibege halak na bahat i hatorangan ni Jesus i, gabe homang ma roha ni halahi hara ni pangajaranNia i. ³⁴ Jadi dung tarboto tu halak Parise, na dung tarhohom halak Saduse dibaen Jesus, gabe marlagut ma halahi. ³⁵ Jadi ro ma sahalak sian halahi Siboto Surat mancubo-cubo manjalahi hasalaan ni Jesus markite-hite sapa-sapa. ³⁶ "Guru, parenta dia dehe na ummarga sian sude Tona i?" ³⁷ Dialusi Jesus ma, "Angkon haholonganmu do Tuhan Debatamu sian sude ate-atemu, dohot sian sude rohamu dohot sian sude pikiranmu. ³⁸ I ma tona na parjolo jana na gumodang! ³⁹ Tona na ummarga na paduahon, sarupa dohot tona na parjolo nangkin: Angkon haholonganmu do donganmu jolma songon pangkaholongimu di dirimu sandiri. ⁴⁰ Sude Tona ni ugamo na nilehen ni si Musa dohot angka panurirang, marharoroan sian tona na dua on do i." ⁴¹ Hatiha na marlagut i dope angka halak Parise i disapai Jesus ma halahi, ⁴² "Bia do mangihutkon pandapotmunu taringot tu Kristus i? Pomparan ni ise ma Ia?" "Pomparan ni si Daud," ninna halahi. ⁴³ "Antong anggo songon i, hara ni aha do umbaen na disosoi Tondi i si Daud laho manggoari Ia songon Tuanna? Angke didok si Daud, ⁴⁴ ’Madung didok Tuhan i do tu Tuanku: Juguk ma Ho di siamunKu, lopus Hubaen sude angka musuMu tunduk tu Ho.’ ⁴⁵ Jadi muda didok si Daud ’Tuan’, Kristus i, tarbia muse ma parjadi ni i pomparan ni si Daud Ia?" ⁴⁶ Umpe sahalak na bisa mangalusi Jesus. Mamungka sian na sadari i, nada adong be na puluk manyapai sanga aha tuSia.

¹ Dung i didok Jesus ma hata tu halak na bahat i rap dohot tu angka anak siseanNia i. ² "Juguk do angka Siboto Surat dohot halak Parise, di juguhan ni si Musa. ³ Hara ni i, angkon oloanmu jana ihutkononmunu do sude na nisuruhon ni halahi baenonmunu. Tapi ulang baen hamu songon na nibaen ni halahi. Harana nada didalankon halahi na niajarkon ni halahi. ⁴ Angka karejo na maol-maol do disuru halahi baenon. Disuru halahi ma halak na asing mangoloi parenta ni halahi na borat-borat, hape halahi sandiri inda dohot padalankonsa. ⁵ Sude pambaenan ni halahi, hum anso diida jolma sajo do. Sangajo do dipake halahi angka tali ni abit sumbayang na bidang-bidang dohot rambu ni baju juba ni halahi! ⁶ Hum na giot di juluan do halahi muda masa pesta. Disi karosi na jumeges di angka bagas paribadatan, ulang so disi halahi juguk. ⁷ Na jopan roha ni halahi ditabi halak di poken, muda didok halak tu halahi ’Gurunami’. ⁸ Tapi anggo hamu, indangkon sai ra hamu dipiohon halak ’Gurunami’, angke hum sada do Gurumunu jana markahamaranggi do hamu sude. ⁹ Dung i indangkon piohon hamu halak na di tano on, ’Amang’ harana hum sada do Amangmunu, i ma Damang na di banua ginjang i. ¹⁰ Dung i muse, ulang ra hamu dipio halak ’Kapala’, harana hum sada do Kapalamunu i ma Kristus na nijanjihon ni Debata i. ¹¹ Halak na sumangap sian hamu angkon gabe pangoloimunu do. ¹² Halak na patugincat dirina angkon dipatoruk. Dung i halak na patoruk dirina angkon patugincaton." ¹³ "Marjaya ma hamu angka Siboto Surat dohot halak Parise! Angka pangalancap do hamu. Disundati hamu do halak na markagiot gabe rayat di Harajaan Ni Banua Ginjang. Hamu sandiri so ra gabe rayat ni Harajaan i. Muda adong halak na giot masuk tusi, hape dihalang-halangi hamu. [ ¹⁴ Marjaya ma hamu angka Siboto Surat dohot hamu halak Parise: Pangalancap do hamu! Dijalahi hamu do akal laho paoto-otohon dohot mambuat bagas ni angka ina na mabalu. Tar dibaen-baen hamu ma martangiang ginjang-ginjang laho manutup-nutupi i. I ma umbaen na angkon umborat uhuman tu hamu!] ¹⁵ Marjaya ma hamu angka Siboto Surat dohot halak Parise! Angka pangalancap do hamu! Kehe do hamu taripar laut tu na dao laho mangelek-elek sada halak anso masuk mangihutkon ugamomunu. Dung diihutkon ia ugamomunu i, hape na giot pamasuhonmunu do ia tu narako, dua noli lompit jahatna sian hamu sandiri! ¹⁶ Marjaya ma angka pamimpin na mapitung! Diajarkon hamu ma songon on, ’Muda marsumpa halak mangasahon Bagas Ni Debata, gabe inda tarihot ia tu sumpania i, tapi muda marsumpa ia mangasahon sere na di Bagas Ni Debata i, gabe tarihot ma ia tu sumpania i.’ ¹⁷ Na oto do hamu, angka na mapitung ma antong! Dia do ummarga sere i ulang pado Bagas Ni Debata na paiaskon sere i? ¹⁸ Diajarkon hamu dope songon on, ’Muda marsumpa halak mangasahon sisombahononkon na di ginjang ni langgatan parkaulan i, gabe tarihot ma ia tu sumpania i.’ ¹⁹ Na santak ma antong pitungmunu! Dia do na ummarga? Na nisombahon i do sanga inganan parkaulan i na mambaen ias na nisombahon i? ²⁰ Hara ni i, muda marsumpa halak mangasahon inganan parkaulan i sanga mangasahon sude na nisombahon na adong di ginjangna i, na marsumpa mangasahon inganan ni haul do i dohot mangasahon sudena haul na di ginjangna i do i. ²¹ Sanga muda marsumpa halak mangasahon Bagas Ni Debata, sarupa do i dohot na marsumpa mangasahon Debata na maringanan disi. ²² Dung i muda adong halak marsumpa mangasahon langit sarupa do i na marsumpa mangasahon habangsa ni Debata, sanga pe mangasahon Debata na juguk di habangsa i. ²³ Marjaya ma hamu angka Siboto Surat dohot angka Parise! Pangalancap do hamu! Dilehen hamu do parpuluan ni pulungan ni bulung-bulung ni parmasak dohot silalat dohot jintan tu Tuhan. Hape anggo angka pangalaho na ummarga sian angka tona i, umpamana rupani: Hatigoran, asi ni roha, haburjuon, nada diterge hamu be. Angkon i do nian parjolo baenonmunu so pola mangkalupahon na asing-asing i muse. ²⁴ Angka pamimpin na mapitung do hamu! Lanok na di panginumanmunu do disaring hamu hape unto dibondut hamu! ²⁵ Marjaya ma hamu angka Siboto Surat dohot halak Parise! Pangalancap do hamu! Dibasui sian duru angka mangkuk dohot pingganmunu, hape anggo sian bagasan sun do dursunna dibaen angka na dapot hamu markite-hite gogo dohot gabus. ²⁶ Hamu angka Parise na mapitung! Jolo basu ma mangkukmu dohot pingganmu sian bagasan anso ias muse sian duru! ²⁷ Marjaya ma hamu angka Siboto Surat dohot angka Parise! Pangalancap do hamu! Songon kuburan na nikapur do hamu. Jeges idaon sian duru hape holi-holi ni jolma na marbusuhan do gok di bagasan. ²⁸ Laing songon i ma hamu. Anggo idaon nian sian duru, denggan ma hamu tu halak. Hape anggo di bagasan na so labo do hamu, gok pangalaosion." ²⁹ "Marjaya ma hamu angka Siboto Surat dohot halak Parise! Pangalancap do hamu! Jeges-jeges dibaen hamu kuburan ni angka panurirang i, digorgai hamu angka tugu parningotan di halak na denggan ngoluna. ³⁰ Didok hamu muse ma, ’Sugari mangolu hami di hatiha ni angka ompunami na jolo, nada pola dohotannami halahi mambunu angka panurirang i.’ ³¹ Jadi, dioku hamu sandiri do, pomparan ni angka sibunu panurirang hamu! ³² Antong anggo songon i, toruskon hamu ma pasidungkon dosa na nipungka ni angka ompungmunu i! ³³ O hamu angka ulok, panipu do hamu! Tar bia be baenonmunu paluahon dirimunu sian uhuman na di narako i? ³⁴ Antong hara ni i parrohahon hamu ma jolo, tongosonKu ma angka panurirang tu hamu dohot halak na marroha dohot angka Siboto Surat. Angkon bunuonmunu deba sian halahi. Deba nari parsilangkononmunu. Adong ma i balbalonmunu di bagas paribadatan, kojar-kojaronmunu sian kota na sada tu kota na asing. ³⁵ Ujungna madabu ma tu hamu uhuman hara ni na nibunumunu sude angka na so marsala i mamungka sian pamunuon na tu si Abel na so marsala i lalu tu pamunuon na tu si Zakaria anak ni si Berekia na giot bunuonmunu di holang-kolang ni bilik na badia dohot inganan ni haul na di Bagas Ni Debata i. ³⁶ Tutu do na Hudok on: Angkon tanggungon ni angka halak na saonnari on ma i sudena!" ³⁷ "Jerusalem, Jerusalem! Dibunu ho do angka panurirang, didangguri ho do dohot batu angka na nisuru ni Debata tu ho! Ma pola piga noli dihalungunkon rohangKu laho manghaol sude halak na mangingani ho songon pambaen ni inang ni manuk manggobak angka anakna di toru ni habongna, hape nada ra hamu! ³⁸ Anggo on angkon tinggalkonon ma angka bagasmu, gabe mamolngit. ³⁹ Au mandok tu ho: Mamungka sian on nada idaonmu be Au lopus didok hamu, ’Sai dilehen Debata ma pasupasu di na ro mangasahon goar ni Tuhan.’ "

¹ Ditinggalkon Jesus ma Bagas Ni Debata i. Marroan muse ma mandapotkon ia angka anak siseanNia patuduhon hajegeson ni Bagas Ni Debata i. ² Dung i didok Jesus ma tu halahi, "Parrohahon hamu ma sudena i, harana sada batu pe nada tola tinggal susun di ingananna hian. Angkon hona gargar sude." ³ Dung i kehe ma Jesus juguk di Dolok Zetun. Jadi hatiha na juguk i Ia, marroan ma angka anak siseanNia laho mangkatai dohot Ia sajo. "Paboa ma jolo tu hami sanga andigan do tarjadi sudena i," ninna halahi manyapai Ia. "Dung i muse, aha ma tandana paboa na giot dapot ma haroroMu dohot hasidungan ni portibi on?" ⁴ Dialusi Jesus ma, "Angkon manat do hamu. Ulang jabat dipaoto-oto halak hamu. ⁵ Angke bahat do halak na ro mamake goarKu, jana dokkonon ni halahi ma, ’Au do Kristus!’ Paoto-otoon ni halahi ma bahat halak. ⁶ Begeonmunu ma angka sora ni porang dohot barita ni angka porang. Tapi ulang gabe mabiar hamu. Harana angkon tarjadi do songon i. Tapi nada podo hatihana ro ari na parpudi. ⁷ Marporang ma bangso na sada maralohon bangso na asing. Sanga di dia pe, masa ma haleon potir dohot lalo. ⁸ Pamungkaan dope sudena i, songon pangkilalaan na hancit na nihilala ni ina na giot manubuhon anakna. ⁹ Dung i ditangkupi ma hamu, dipasahat ma tu parkancitan anso dibunu. Goyak ma roha ni halak na satano on mida hamu hara ni goarKu. ¹⁰ Jadi anggo disi, bahat ma halak na so burju be tu Au. ¹¹ Bahat muse ma marroan angka panurirang pargabus. Paoto-otoon ni halahi ma bahat halak. ¹² Mangararati ma hajahatan, gabe bahat ma halak inda marholong ni roha be. ¹³ Tapi sanga ise na tahan lopus tu ujungna, gabe paluaon ma ia. ¹⁴ Dung i muse, Jamita Na Denggan taringot tu Harajaan Ni Debata, dijamitahon ma i tu portibi on sude, anso sude halak umbegesa. Dung i pe anso ro ari na parpudi." ¹⁵ "Idaonmunu ma masa hajahatan na manyegohon tarjadi di inganan na badia on, songon na nidok ni Panurirang Daniel. (Sanga ise na manyise i: Diparate-atehon ma artina!) ¹⁶ Muda tulus ma i, angkon marlojongi ma halak na di Judea tu dolok-dolok an. ¹⁷ Sanga ise na di ginjang tarup ni bagas ulang be ia mijur mambuat barang-barangnia tu bagas i. ¹⁸ Halak na topet di padang, ulang be mulak laho mambuat abitnia. ¹⁹ Marjaya ma angka ina na topet denggan pamatangna dohot na topet pasusuhon anakna di hatiha i! ²⁰ Tangiangkon hamu ma tu Debata anso ulang topet di ari nonat sanga di Ari Sabat hamu maporus! ²¹ Angke disi ma masa hasusaan na lobi godang na so unjung masa dope mamungka sian mula-mula ni portibi on lopus tu sadari on. Dung salpu i, nada masa muse be na songon i. ²² Tapi madung dipapendek Debata hatihana i. Sugari nada, umpe sahalak jolma na tarbaen tahan. Tapi hara ni bangsoNia i, gabe dipapendek Debata do hatihana i. ²³ Dung i muse, muda adong sanga ise halak na mandok tu hamu, ’Ligi hamu, dison do Kristus!’ sanga, ’Disadu do Ia!’, -- ulang haporsayai hamu i. ²⁴ Harana, marroan do disi angka kristus pargabus dohot angka panurirang pargabus. Patupaon ni halahi ma angka pambaenan na luar biasa dohot angka na pahomang roha laho paoto-otohon halak. Sugari tarbaensa, dohot bangso ni Debata i pe giot paoto-otoon ni halahi muse do. ²⁵ Hara ni i, ingot hamu ma i! Madung jolo Hupaboa hian i tu hamu, taran so tarjadi dope. ²⁶ Muda didok halak tu hamu, ’Ligi hamu ma, disadu do Ia di halongonan an!’ Ulang hamu kehe tusi. Sanga pe muda didok halahi, ’Beta ma taligi, martabuni do Ia dison!’ Ulang haporsayai. ²⁷ Angke songon sondang ni hilap na sumiksak sian Habincaran marsinondang lalu tu Hasundutan, songon i ma parro ni Anak Ni Jolma i sogot." ²⁸ "Sanga di dia adong bangke, marrongom do disi angka unggas sipangan bangke." ²⁹ "Nada sadia honok dung ro hasusaan di hatiha i, gabe golap ma mataniari, bulan i pe nada marsinondang be. Mardabuan ma angka bintang sian langit, marsursaran ma sude angka hagogoon na di parlangitan i. ³⁰ Dung i pe anso tarida tanda ni Anak Ni Jolma i di langit. Anggo disi tangis ma sude bangso na satano on, marsak. Diida halahi ma Anak Ni Jolma i ro di bagasan ombun mardongan kuaso dohot hasangapan godang. ³¹ Dipalu ma tarompet na godang, suruon ni Anak Ni Jolma i ma angka surusuruanNia tu panjuru na opat i di tano on palagutkon bangsoNia, sian topi ni langit na sada lalu tu topi ni langit na sada nari." ³² "Marguru ma hamu sian bona ni gala-gala. Muda rata rantingna i boti loyok, ruar muse ma angka pusukna, botoonmunu ma na giot dapot ne ma musim panas. ³³ Laing songon i muse ma muda diida hamu tarjadi angka tanda-tanda i, gabe botoonmunu ma na dung donok sajo noma hatihana. ³⁴ Ingot hamu ma! Dompak so mate dope halak na mangolu sisaonnari on, tulus ma sudena i. ³⁵ Anggo langit dohot tano on mago do, tapi anggo hatangKi angkon hot do salolot-lolotna." ³⁶ "Umpe sahalak umboto sanga andigan do arina dohot jomna. Angka surusuruan na di banua ginjang i pe nada diboto halahi i. Anak i sandiri pe nada diboto Ia. Hum Damang sajo do na umboto i. ³⁷ Songon di hatiha ni si Noak, songon i ma saulahon pangalahona, muda ro Anak Ni Jolma i. ³⁸ Taran so ro banjir na godang i, mangan minum do halak, marbagas dohot pabagaskon lopus tu ari parmasuk ni si Noak tu kapal i. ³⁹ Jadi di na nitondong ni banjir i halahi sude, disi pe anso tarhalak halahi taringot tu na masa i. Laing songon i muse ma na giot masa, muda ro Anak Ni Jolma i. ⁴⁰ Di hatiha i adong ma dua halak markarejo di saba: Sahalak dioban, na sahalak nari ditinggalkon. ⁴¹ Adong muse dua dadaboru na manduda. Sahalak dioban, tapi na sada nari ditinggalkon. ⁴² Hara ni i, jonggor ma hamu, angke nada diboto hamu sanga andigan haroro ni Tuhanmunu. ⁴³ Ingot hamu ma na Hudok on! Sugari diboto nampuna bagas, sanga tar andigan giot ro panangko, nada ra ia modom. Dung i nada padiaronnia masuk panangko i tu bagasan. ⁴⁴ Hara ni i, angkon tongtong do hamu hobas. Angke ro ma Anak Ni Jolma i, di hatiha na so pamotoanmunu do Ia ro." ⁴⁵ "Antong ise ma naposo na burju jana na marroha, na niangkat ni tuanna gabe kapala ni sude naposonia na asing i; anso dilehen ia mangan angka naposonia i di hatihana? ⁴⁶ Martua ma sada naposo na topet mangkarejohon karejona diharoro ni tuanna. ⁴⁷ Tutu do, pasahaton ni tuan i ma tu naposonia i sude sinadonganna. ⁴⁸ Tapi muda jahat do naposo i, didok ia di bagasan rohania, ⁴⁹ ’Honok dope anso mulak tuanki,’ gabe dipungka ia ma mambalbali angka naposo na asing i, jana angka mangan dohot minum-minum ia dohot halak na asing. ⁵⁰ Ro ma tuannia i di ari na so diambangnia, dohot di jom na so diboto ni naposo i. ⁵¹ Tontu balbalon ni tuan i ma i so mangantarai, sarupahonon ni tuan i muse ma ia tu halak pangalancap. Disi ma adong andung-andung dohot na patungaripon."

¹ "Muda ro Anak Ni Jolma i songon Tuhan, tarsongon umpama on do pangalahona: Sampulu halak bujing-bujing pandongani ni bayo pangoli na mambuat lampu laho kehe mangalo-alo bayo pangoli i. ² Lima halak ma i na oto, na lima nari na marroha. ³ Dioban si lima halak na oto i ma lampu tapi nada dioban halahi miak managam na hurang. ⁴ Dioban si lima halak na marroha i ma lampu ni halahi tapi laing dioban halahi do miak managam betak sai hurang. ⁵ Honok ma bayo pangoli i anso ro, gabe mamungka ma mondohondok bujing-bujing i lopus tarpodom be. ⁶ Dung tonga borngin, tarbege ma sora na pio-pio, ’Ma ro bayo pangoli i! Beta ma taalo-alo!’ ninna. ⁷ Ngot ma bujing-bujing na sampulu i marsipagara lampuna be. ⁸ Didok bujing-bujing na oto i ma tu na marroha i, ’Lehen hamu ma di hami saotik miakmunu i, ma giot mintop lampunami.’ ⁹ ’Inda tola!’ ninna bujing-bujing na marroha i mangalusi, ’Harana gabe sude do hita annon hurangan miak. Tu kode ma tobusi hamu!’ ¹⁰ Gabe kehe ma bujing-bujing na oto i manobusi miak. Jadi taran na kehe i halahi, lalu muse ma bayo pangoli i. Masuk ma bujing-bujing na marroha i rap dohot bayo pangoli i tu bagas parpestaan i. Ditutup ma pintu i! ¹¹ Dung i lalu ma angka bujing-bujing na oto i. Pio-pio ma halahi, ’Tuan, tuan, buka ma jolo pintu on anso masuk hami.’ ¹² Tapi dialusi bayo pangoli i ma, ’Inda hutanda hamu!’ " ¹³ Jadi dipaujung Jesus ma umpamaNia i, ning Ia ma, "Hara ni i, jonggor ma hamu, angke nada diboto hamu arina sanga hatihana." ¹⁴ "Muda ro Anak Ni Jolma i songon Tuhan, tarsongon sada bayo na giot kehe mardalanan tu na dao do pangalahona. Dipiohon ia ma angka naposonia, laho pasahatkon sinadongannia tu halahi. ¹⁵ Dipasahat ia ma tu halahi hombar tu hamaloonna be. Tu na sada dilehen ia lima ribu hepeng perak. Tu na sada nari dilehen ia dua ribu hepeng perak. Dung i tu na sahalak nari dilehen ia saribu hepeng perak. Dung i kehe ma ia. ¹⁶ Jadi kehe ma manigor naposo na manjagit lima ribu i, marjagal. Gabe maruntung muse ma ia lima ribu hepeng perak. ¹⁷ Laing songon i muse ma na manjagit dua ribu hepeng perak i, maruntung ma ia dua ribu hepeng perak. ¹⁸ Tapi anggo na manjagit na saribu i kehe ma ia mangkuar lubang di tano. Dionjapkon ia ma hepeng ni tuannia i tusi." ¹⁹ "Dung honok, mulak ma tuan ni halahi i jana dipungka ia ma mambaen paretongan tu halahi. ²⁰ Masuk ma naposo na maniop silima ribu hepeng perak i pasahatkon sampulu ribu hepeng perak tu tuanna i. ’Tuan,’ ning ia, ’lima ribu hepeng perak do na nipasahat ni tuan i tu au, saonnari diligi tuan i ma, maruntung do au lima ribu hepeng perak.’ ²¹ ’Ma denggan i,’ ning tuan i, ’ho ma ibana naposo na burju jana na denggan. Angke haposan do ho di na otik, hulehen ma pos ni rohangku tu ho taringot tu na umbahat. Dohot ma ho masuk marsonang-sonang rap dohot au!’ ²² Dung i masuk muse ma naposo na manjagit sidua ribu hepeng perak i. ’Tuan,’ ning ia, ’dua ribu hepeng perak do na nipasahat ni tuan i tu au. Diligi tuan i ma saonnari. Maruntung do au dua ribu nari.’ ²³ ’Denggan ma i,’ ning tuan i, ’ho ma ibana naposo na denggan jana na burju. Dibaen haposan do ho di na otik, laing pasahaton ma pos ni roha tu ho taringot tu na bahat. Masuk ma ho anso dohot marsonang-sonang rap dohot au!’ ²⁴ Dung i masuk ma naposo na manjagit sisaribu hepeng perak i. Didok ia ma, ’Tuan, hutanda do halak na mangasahon gogo do tuan i. Dibuat tuan i do suha sian na so nisuan ni tuan i, dung i dibuat tuan i do suha sian na so nisabur ni tuan i. ²⁵ Mabiar do au, gabe hubunihon hepeng ni tuan i di bagasan tano. On pe, indon ma hepeng ni tuan i.’ ²⁶ ’Ho ma naposo na jahat jana na losok!’ ning tuan i. ’Inda he diboto ho, hubuat do parbatu sian na so husuan, dung i hubuat do suha sian na so husabur? ²⁷ Anggo songon i, sapatutna angkon lehenonmu do hepengki tu halak na padalan hepeng. Jadi muda mulak au, anso tarjagit au ma mangulahi hepengki dohot bungana. ²⁸ Jadi hara ni i buat ma hepeng i sian ia, lehen ma i tu halak na manjagit sampulu ribu hepeng perak i. ²⁹ Angke tu halak na maradong umbahat dope lehenon, lopus marlobi-lobi ia. Tapi anggo halak na so maradong, na adong saotik na disia i, nibuat muse ma i sian ia. ³⁰ Ambungkonon ma naposo na so hasaya i tu hagolapan parbalian. Disi ma ia tangis patungaripon!’ " ³¹ "Muda ro Anak Ni Jolma i gabe Raja mardongan angka surusuruanNia, juguk ma Ia di habangsa ni hamuliaonNa. ³² Sude halak na satano on dipalagut ma di joloNia. Dung i sirangonNa ma halahi gabe dua punguan songon panyirang ni hambeng sian biri-biri. ³³ Palaguton ma biri-biri sabola siamunNia, hambeng sabola siambirangNia. ³⁴ Dung i dohonon ni Raja i ma hata tu angka na di siamunNia i, ’Ro ma hamu angka na nipasupasu ni Damang. Masuk ma hamu tu bagasan harajaan na dung diparade di hamu mamungka sian na manompa portibi on. ³⁵ Angke taran malean Au, dilehen hamu do Au mangan. Dompak manguas Au, dilehen hamu do Au minum. Di na tarpunjung Au, dijagit hamu do Au di bagasmunu. ³⁶ Di na so marpakean Au, diparabiti hamu do Au. Marnyae Au, diligi hamu do Au, di hatiha na tarhurung Au ro do hamu mangaligi Au.’ ³⁷ Gabe didok halahi na patuluskon lomo ni roha ni Debata ma, ’Sadihari ma he hami ida Ho Tuhan male gabe hami lehen Ho mangan, sanga manguas gabe hami painum Ho Tuhan? ³⁸ Andigan ma hami ida Ho ale Tuhan songon halak dagang di sada inganan, gabe hami jagit Ho di bagasnami? Andigan ma na so marpakean Ho Tuhan gabe hami lehen pakean di ho? ³⁹ Andigan ma hami ida Ho Tuhan marnyae sanga tarhurung, gabe hami ligi Ho?’ ⁴⁰ Alusan ni Raja i ma, ’Ingot hamu ma on: Hatiha dibaen hamu songon i tu sada halak sian angka kahanggingKu na umdangol i, etongon na tu Au do i dibaen hamu!’ ⁴¹ Dung i didok Raja i ma tu halak na di siambirangNia i, ’Morot ma hamu sian on, hamu angka na hona bura! Masuk ma hamu tu api na so ra mintop na niparade di Sibolis dohot di angka surusuruanna! ⁴² Angke di hatiha male Au nada dilehen hamu Au mangan. Hatiha manguas Au nada dilehen hamu Au minum. ⁴³ Hatiha tarpunjung Au di sada-sada inganan, nada dijagit hamu Au di bagasmunu. Hatiha so marpakean Au, nada dilehen hamu pakeanKu. Marnyae Au dohot hatiha tarhurung, nada diligi hamu Au.’ ⁴⁴ Dung i dohonon ni halahi ma tuSia, ’Andigan lakna hami ida Ho ale Tuhan male-malean sanga manguas, sanga tarpunjung di sada inganan, sanga na so marpakean, sanga marnyae, sanga tarhurung, jana nada hami urupi Ho Tuhan?’ ⁴⁵ Alusan ni Raja i ma, ’Tangkas ma jolo tangihon hamu: Di na so ra hamu mangurupi sahalak sian na umdangol on, etongon na so ra do hamu mangurupi Au.’ ⁴⁶ Hara ni i uhumon ma angka halak sisongon i dohot uhuman na manongtong. Hape anggo halak na mambaen lomo ni roha ni Debata mangolu ma halahi jana marjop ni roha dohot Debata."

¹ Dung sidung diajarkon Jesus sude taringot tusi, didok Ia ma tu angka anak siseanNia i, ² "Diboto hamu do, dua ari nari dapot ma Pesta Paskah. Pasahaton ma Anak Ni Jolma i anso diparsilangkon!" ³ Jadi marlagut ma disi angka Sintua Ni Malim dohot angka hatobangon ni halak Jahudi di inganan ni si Kayafas Malim Godang i. ⁴ Martahi ma halahi laho manangkup Jesus anso dibunu halahi Ia. ⁵ "Tapi, ulang ma hatiha pesta i dibaen, harana gabe masa annon hagaoron di tonga-tonga ni rayat i." ⁶ Hatiha di Betania Jesus, i ma di bagas ni si Simon na huliton na hinan, ⁷ ro ma sada anak boru mandapotkon Jesus. Dioban ia do sada botol na marisi miak na huskus, boti sigodang arga. Jadi hatiha juguk Jesus mangan, diduruskon anak boru i ma miak na huskus i tu ulu ni Jesus. ⁸ Gabe muruk ma angka anak sisean ni Jesus marnidasa. "Aha ma angkon sai niparsayang on sude?" ninna halahi. ⁹ "Targadis do miak na huskus on arga sajo, nilehen hepengna i tu halak na pogos!" ¹⁰ Diboto Jesus do pikiran ni halahi, gabe ning Ia ma tu halahi, "Biasi pola arsahanmunu anak boru on? Na denggan do na nibaennia i tu Au. ¹¹ Tongtong do adong na pogos rap dohot hamu, tapi anggo Au nada tongtong rap dohot hamu. ¹² Di na niduruskonnia miak na huskus i tu Au, na paradehon Au noma i tu hatatanomKu. ¹³ Ingot hamu ma! Sanga na di dia di tano on dipararat Jamita Na Denggan na sian Debata i, angkon dicaritohon muse ma pambaenan ni anak boru on baen parningotan tusia." ¹⁴ Dung i kehe ma sahalak sian anak sisean ni Jesus na dua bolas i, i ma na margoar si Judas Iskariot mandapotkon angka Sintua Ni Malim. ¹⁵ Didok ia ma tu halahi, "Aha ma lehenonmunu di au muda hupasahat Jesus tu hamu?" Dung i dietong halahi ma tolu pulu hepeng perak. Dilehenkon halahi ma hepeng i tusia. ¹⁶ Mamungka sian i, dijalahi si Judas ma hatiha na topet laho pasahatkon Jesus. ¹⁷ Ari parjolo dung dapot hatihana Parningotan Ni Roti Na So Marragi, ro ma angka anak siseanNia i mandapotkon Jesus. Disapai halahi ma tuSia, "Di dia do dipangido rohamu Tuhan mangankon sipanganon Paskah i? Anso hami parade." ¹⁸ Dialusi Jesus ma, "Kehe ma hamu tu kota manopot sada halak disi. Dokkon hamu ma tusia, ’Ninna Guru i, ma dapot hatihana di Au. Giot di bagasmon do Au marpaskah rap dohot angka anak siseanKu.’ " ¹⁹ Dioloi angka anak siseanNia i ma songon na nisuruhon ni Jesus tu halahi. Kehe ma halahi paradehon panganon Paskah i. ²⁰ Dung borngin, juguk ma Jesus rap dohot angka anak siseanNia i mangan. ²¹ Jadi hatiha na mangan i halahi mandok hata ma Jesus, "Tangihon hamu jolo: Sahalak sian hamu giot manghianat tu Au." ²² Dung dibege angka anak siseanNia na nidokNia i, gabe marsak sajo ma halahi. Marsisapai ma halahi tu Jesus, "Na he nada Au na nidokMu Tuhan?" ²³ Dialusi Jesus ma, "Na manyornopkon tanganna tu mangkuk rap dohot Au, i ma ibana na giot manghianat i tu Au. ²⁴ Tutu nian, angkon kehe do Anak Ni Jolma i songon na dung tarsurat hian di Buku Na Badia i paboa na angkon mate Ia. Tapi marjaya ma halakna i na manghianat tu Anak Ni Jolma i! Sugari gumonan hian do indangkon sai jungada ia sorang!" ²⁵ Dung i didok si Judas panghianat i ma, "Tontu nada au na nidok ni Guru i?" Dialusi Jesus ma, "Madung didok ho i!" ²⁶ Hatiha na mangan i halahi dibuat Jesus ma roti. Dipasahat Ia ma tangiang mandok tarimakasi. Dung i dilehen Ia ma roti i tu angka anak siseanNia i, didok Ia ma dohot hataNa, "Jagit, jana pangan hamu ma, on ma pamatangKu." ²⁷ Dung i, dibuat Ia ma sada panginuman ni anggur, didok Ia ma tarimakasi tu Debata. Dung i dilehen Ia ma panginuman i tu angka anak siseanNia i, didok Ia ma dohot hataNa, "Sude ma hamu minum sian on. ²⁸ Angke on ma mudarKu na gabe jaminan ni parjanjian ni Debata. Niduruskon do mudarKon hara ni bahat halak, gabe hasesaan ni dosa. ²⁹ Ingot hamu ma: Nada inumonKu be parbatu ni hayu anggur lopus tu sada hatiha inumonKu ma anggur na imbaru rap dohot hamu muda dung dipajongjong Damang HarajaanNia." ³⁰ Dung diendehon halahi sada ende puji-pujian. Halahi pe kehe ma tu Dolok Zetun. ³¹ Dipaboa Jesus ma tu angka anak siseanNia i, "Borngin on mandao be ma hamu sude, tinggalkononmunu ma Au. Harana tarsurat do di Buku Na Badia i, ’BunuonKu ma parmahan i gabe marserak ma sude pahan-pahanan.’ ³² Tapi dung dipangolu Au mangulahi, parjolo ma Au kehe tu Galilea ulang hamu." ³³ Didok si Petrus ma tu Jesus, "Haru sude pe halahi maninggalkon Ho Tuhan, anggo au bagi na bia pe nada hutinggalkon Ho!" ³⁴ Dung i ninna Jesus ma tusia, "Tangihon jolo: Borngin on taran so martahuak manuk dope, ma tolu noli dokkononmu na so ditanda ho Au." ³⁵ Dialusi si Petrus ma, "Sugari pe angkon tarpaksa mate au rap dohot Ho Tuhan, nada na dohononku na so hutanda Ho Tuhan!" Songon i ma dipandok sude anak sisean na asing i. ³⁶ Dung i lalu ma Jesus rap dohot angka anak siseanNia i tu sada inganan na margoar Getsemane. Didok Ia disi tu halahi, "Dison ma jolo hamu juguk painte martangiang Au santongkin." ³⁷ Dung i dipiohon Ia ma anso dohot si Petrus rap dohot anak ni si Zebedeus na dua i kehe rap dohot Ia. Mamungka ma idaon marsak Ia disi, susa sajo. ³⁸ Didok Ia ma tu anak siseanNia i, "Marsak sajo do Au, songon na giot mate Huhilala. Dison ma jolo hamu, anso dohot hamu marjonggor rap dohot Au." ³⁹ Dung i kehe ma Jesus tar dumao saotik, tungkap ma Ia tu tano laho martangiang, "O Amang," ning Ia, "Anggo tarbaen do, padao ma sian Au parkancitan na angkon jagitonKu. Tapi ulang ma hagiotKu na tulus, baen ma songon na dihagiotiMu." ⁴⁰ Dung i mulak ma Jesus mandapotkon anak siseanNia na tolu i. Ma tarpodom halahi didapot Ia. Didok Ia ma tu si Petrus, "Na he tarbaen hamu jonggor rap dohot Au, hum sajom pe? ⁴¹ Jonggor ma hamu, martangiang bage hamu anso ulang talu hamu dibaen pandugaan i. Denggan do nian anggo roha ni jolma, tapi gale do pamatang." ⁴² Jadi kehe ma Jesus padua-nolihon laho martangiang. Didok Ia ma, "Muda na angkon taononKu ma parkancitan on ale Amang jana nada tarbaen so taononKu, rohaMu ma na tulus." ⁴³ Dung i mangulahi ma Jesus ro. Didapot Ia, ma laing modom do angka anak siseanNia i. Songon na so tarbuka be mata ni halahi hara ni nonona dihilala halahi. ⁴⁴ Jadi ditadingkon Jesus ma halahi sanoli nari. Kehe ma Ia martangiang patolu-nolihon. Sarupa do tangiangNia i dohot sinangkinan i. ⁴⁵ Dung i didapotkon Ia ma mangulahi angka anak siseanNia i didok Ia ma tu halahi, "Modom ma hamu huhut maradian. Ligi hamu ma, ma dapot hatihana laho pasahatkon Anak Ni Jolma i tu angka halak pardosa. ⁴⁶ Ngot ma hamu anso kehe hita. Ligi ma! Ma indi halak na manghianat i tu Au!" ⁴⁷ Mangkatai dope Jesus, ro ma si Judas, i ma sahalak sian anak siseanNia na dua bolas i. Ro muse ma rap dohot ia bahat halak maroban podang dohot potuk-potuk. I ma angka na nisuru ni angka kapala ni malim dohot angka hatobangon ni halak Jahudi. ⁴⁸ Ma dipaboa panghianat i hian tu halahi tandana, "Sanga ise na huumma, i ma Ia. Tangkup hamu ma!" ⁴⁹ Disi lalu tu inganan i, manigor didapotkon si Judas ma Jesus. Ning ia ma, "Horas ma di Guru i!" Diumma ia muse ma Jesus. ⁵⁰ Dialusi Jesus ma, "Ale dongan, hara ni i dehe ho ro tuson?" Dung i ro ma tu jolo halak na bahat i, ditangkup halahi ma Jesus. ⁵¹ Ro ma sahalak sian anak sisean ni Jesus na disi i, manyintak podangnia. Ditampul ia ma naposo ni Malim Godang i dohot podangnia i. Ramping pinggol i. ⁵² Didok Jesus ma tu anak siseanNia i, "Pasarung podangmi. Sude halak na mangasahon podang angkon mate do baenon ni podang. ⁵³ Ninna rohamu lakna na so tarpangido Au partolongan tu Damang, jana tarsuru Damang do manigor lobi sian dua bolas legion surusuruan? ⁵⁴ Tapi muda songon i, dia ma tulus tarjadi na nipaboa ni Buku Na Badia i hian, na angkon tarjadi songon na masa sadari on?" ⁵⁵ Dung i didok Jesus ma tu halak na bahat i, "Ro hamu laho manangkup Au maroban podang dohot potuk-potuk. Halak na jahat dehe Au lakna? Ganop ari do Au mangajari di Bagas Ni Debata hape nada ditangkup hamu Au! ⁵⁶ Tutu do nian, angkon tarjadi do sude na masa on anso tulus muse sanga aha na nisuratkon ni angka panurirang di Buku Na Badia i." Dung i markehean ma sude anak sisean ni Jesus i maninggalkon Ia. ⁵⁷ Dioban angka na manangkup i ma Jesus tu bagas ni Malim Godang na margoar si Kayafas. Marlagut ma disi angka Siboto Surat ni halak Jahudi dohot angka hatobangon ni halahi. ⁵⁸ Jadi diihutkon si Petrus ma hatiha i Jesus sian na dao lopus lalu tu alaman ni bagas ni Malim Godang i. Masuk ma si Petrus tu alaman i, disi ma ia juguk rap dohot angka panjago i. Sanga songon dia ujungna anso diboto ia. ⁵⁹ Dijalahi angka kapala ni malim i ma dohot sude parrapot i angka hasaksian na so tutu laho mangalo Jesus anso adong dalanna baenon ni halahi mamunu Ia. ⁶⁰ Tapi nada dapot halahi bagi aha haru pe ma bahat na jongjong angka saksi i. Ujungna adong ma dua halak jongjong tu jolo. ⁶¹ Didok halahi ma, "Didok bayo on do, ’Tarumpakkon Au do Bagas Ni Debata, tapi di bagasan tolu ari tar pajongjong Au mangulahi.’ " ⁶² Dung i jongjong ma Malim Godang i mandok hata tu Jesus, "Na so ra do Ho mangalusi sude na ni tuhaskon i tu Ho?" ⁶³ Tapi sip sajo do Jesus. Dung i diulahi Malim Godang i ma mandok hata tuSia, "Saonnari mangasahon Debata na mangolu i hupangido tu Ho sumpahon ma tu hami, tutu do Ho Anak Ni Debata Kristus i?" ⁶⁴ Dialusi Jesus ma, "Tutu. Tapi ingot hamu ma: Mamungka saonnari idaonmunu ma Anak Ni Jolma i juguk di siamun ni Na Markuaso i. Dung i ro ma Ia di ginjang ombun na di langit an!" ⁶⁵ Dung i disibakkon Malim Godang i ma pakeanNia. Didok Ia ma, "Mangalayasi do on! Inda porlu be saksi. Ma dibege hamu sudena hataNia na mangalayasi i. ⁶⁶ Saonnari bia ma pandapotmunu?" Dialusi halahi ma, "Angkon ni pamate ma Ia." ⁶⁷ Dung i ditijuri halahi ma bohi ni Jesus, dibalbali ma Ia. Adong muse ma na manampeleng Ia, ⁶⁸ jana mandok tuSia, "Cubo ma jolo paboa tu hami, ale Kristus! Ise ma na manampeleng Ho i?" ⁶⁹ Juguk-juguk ma si Petrus di ruar, di alaman i. Jadi ro ma sahalak anak boru naposo ni Malim Godang i mandok tu si Petrus, "Dohot do ho dongan ni Jesus halak Galilea i." ⁷⁰ Tapi diporso si Petrus ma di jolo ni halahi sude. "Inda huastui na nidokmi," ning si Petrus mangalusi, ⁷¹ lalu kehe ia tu horbangan ni alaman i. Jadi ro muse ma sada nari naposo dadaboru, diida ia ma si Petrus, gabe didok ia ma tu angka halak na disi i, "Dohot do bayo indon dongan ni Jesus na sian Nasaret i." ⁷² Diulahi si Petrus ma mamorso jabat marsumpa-sumpa ia, "Bagi na bia pe inda hutanda bayo i!" ning si Petrus. ⁷³ Inda sadia honok, ro ma angka halak na marjongjongan disi mandok tu si Petrus, "Tutu do, ho ma sahalak sian halahi. Tanda do sian pangkulingmu." ⁷⁴ Gabe marsumpa-sumpa ma si Petrus, "Sai mate au muda tutu hutanda bayo i!" ning ia. Manigor martahuak ma manuk. ⁷⁵ Jana taringot ma tu roha ni si Petrus hata ni Jesus tusia, "Dompak so martahuak manuk, madung diporso ho Au tolu noli." Kehe ma si Petrus tu balian tangis panguncombopon.

¹ Dung torang arina i martahi ma sude angka Sintua Ni Malim dohot angka hatobangon ni halak Jahudi manontuhon sanga na bia baenon ni halahi mamunu Jesus. ² Ditambat halahi ma Ia. Dioban ma laho pasahatkon Ia tu si Latus. I ma gubernur ni Harajaan Rom. ³ Jadi dung diida si Judas panghianat i, na giot hona uhum noma Jesus gabe manyosal ma ia, dipaulak ma hepeng na tolu pulu perak i tu angka Sintua Ni Malim dohot tu angka hatobangon ni halak Jahudi i. ⁴ Ning ia ma, "Ma mardosa au, manghianat au tu halak na so marsala gabe didabu uhum mamatehon Ia!" Didok halahi ma mangalusi, "Ahana ma i di hami? Urusanmu do i!" ⁵ Gabe disampakkon ia ma hepeng perak i tu Bagas Ni Debata, dung i kehe ma ia manyingkot. ⁶ Dipamuai angka Sintua Ni Malim i ma hepeng i, didok halahi, "Hepeng ni mudar do on. Anggo mangihutkon aturan ni ugamo, nada tola pamasuhon hepeng on tu poti ni haul na di Bagas Ni Debata." ⁷ Dung saroha halahi, dipake halahi ma hepeng i manobusi tano. I ma na margoar Tano Ni Sitopa Hudon. Dipake ma tano i gabe tanoman ni halak dagang. ⁸ I ma umbaen na margoar tano i lopus tu sadari on "Tano Mudar". ⁹ Jadi hara ni i, tulus ma na nidok ni Panurirang Jeremia. Songon on pandoknia, "Dijagit halahi ma hepeng na tolu pulu perak i. I ma bilangan ni hepeng na niolohon ni halak Israel gabe panggararna. ¹⁰ Dipake halahi ma hepeng i panobusi ni tano ni sitopa hudon songon na nitonahon ni Tuhan tu au." ¹¹ Jongjong ma Jesus di adopan ni si Latus, gubernur ni luat i. Disapai si Latus ma, "Raja ni halak Jahudi dehe Ho?" "Olo, tutu ma songon na nidokmi," ninna Jesus mangalusi. ¹² Tapi anggo di na pajojor pangaduan i angka Sintua Ni Malim dohot angka hatobangon ni halak Jahudi i taringot tu Jesus, sangkababa hata pe nada adong dialusi Jesus. ¹³ Gabe ninna si Latus ma tuSia, "Na so dibege Ho dehe sude pangaduan ni halahi i tu Ho?" ¹⁴ Saotik pe nada dialusi Jesus. Gabe homang ma roha ni gubernur i mida Ia. ¹⁵ Ganop Pesta Paskah dipasomal gubernur i do paluahon sahalak na hona uhum sanga ise na nipangido ni roha ni halak na bahat. ¹⁶ Jadi adong ma hatiha i sahalak di hurungan, na tarbarita jahatna, si Barabbas goarna. ¹⁷ Jadi hatiha marlagut sude halak na bahat i, disapai si Latus ma halahi, "Ise do dipangido rohamunu paluaonku di hamu? Si Barabbas do sanga Jesus na nigoaran Kristus?" ¹⁸ Didok gubernur i pe songon i hara ni na dung diboto ia do, na late do roha ni halahi umbaen na dipasahat halahi Jesus tusia. ¹⁹ Taran juguk si Latus di inganan panguhuman i, ditonahon dadaborunia ma tusia, "Indangkon sai antoi parkaro ni bayo na so marsala i. Harana jatjat do nipingku saborngin on hara ni Ia." ²⁰ Tapi torus ma dijajang-jajang angka Sintua Ni Malim dohot angka hatobangon ni halak Jahudi i halak na bahat mangido tu si Latus anso si Barabbas dipalua. Tapi anggo Jesus nibunu ma. ²¹ Dung i disapai gubernur i ma mangulahi halahi, "Ise ma sian na dua halak i paluaonku di hamu?" "Si Barabbas," ninna halahi mangalusi. ²² "Antong, aha ma baenonku tu Jesus na margoar Kristus i?" ninna si Latus manyapai halahi. "Parsilangkon ma i!" ninna halahi mangalusi. ²³ "Aha ma hajahatanNia?" ning si Latus. Tapi mur gogo ma halahi marsurak, "Parsilangkon i!" ²⁴ Diida si Latus ma na so marguna be hatania i sude. Aropku mur mambaen gaor ma halahi laho mangalo, ning rohania. Ujungna dibuat ia ma aek. Dibasu ia ma tangannia di jolo ni halak na bahat i. Didok ia ma hatania, "Inda ahana di au muda mate halak na tigor on! Sahat di hamu ma i!" ²⁵ Dialusi halak na bahat i ma sude, "Padiar ma manginona tu hami dohot tu pomparannami mudarna i!" ²⁶ Gabe dipalua si Latus ma si Barabbas di halahi. Dipaloncingkon ia ma Jesus, dipasahat ia ma anso niparsilangkon! ²⁷ Dung i dioban angka parajurit ni si Latus i ma Jesus masuk tu bagas paruhuman ni gubernur i. Marlagut ma tentara i sudena manghaliangi Jesus. ²⁸ Dibuka halahi ma pakean ni Jesus, digontihon halahi ma dohot baju juba na ungu. ²⁹ Didandan halahi ma duri-duri gabe tuku, dipamasuk halahi ma i tu ulu ni Jesus. Dilehen halahi ma sada tungkot tu tanganNia. Marsomba ma halahi di joloNia palayas-layaskon. "Santabi ma di Ho ale Raja ni halak Jahudi!" ³⁰ Dung i ditijuri halahi ma Ia, dibuat ma tungkot i sian tanganNia dilipatkon halahi ma tu uluNia. ³¹ Dung sidung halahi na palayas-layaskon i, dibuka halahi ma mangulahi baju juba i. Dibaen halahi ma mangulahi bajuNia i hian. Dung i dioban halahi ma Ia tu balian anso niparsilangkon. ³² Dompak di tonga dalan i halahi, marsuo ma dohot sada bayo halak Kirene na margoar si Simon. Dipaksa halahi ma bayo i mamorsan silang ni Jesus i. ³³ Dung i lalu ma halahi tu sada inganan na margoar Golgota, astuanna "Partangkurahan". ³⁴ Dilehen halahi ma disi Jesus manginum anggur na marcampur pogu. Tapi dung didai Jesus anggur i, inda giot Ia manginumsa. ³⁵ Dung i diparsilangkon halahi ma Ia. Mardadu ma halahi laho mambagi-bagi abitNia i. ³⁶ Dung i marjuguhan ma halahi disi manjagoi Ia. ³⁷ Dilohotkon halahi ma di ginjang uluNia surat paboahon hasalaanNia. Songon on ma hatana, "Indon ma Jesus Raja ni halak Jahudi". ³⁸ Laing di hatiha i muse, adong dope dua halak nari panyamun diparsilangkon halahi rap dohot Jesus. Sada di siamun, sada nari di siambirangNia. ³⁹ Mopeng-openg ma ulu ni halak na mamolus disi mangincahi Jesus. ⁴⁰ Ninna halahi ma, "Heh! Ho ma na giot mangarumpakkon Bagas Ni Debata, giot pajongjongonMu ma i di bagasan tolu ari! Muda na tutu ma Ho Anak Ni Debata, antong palua ma diriMu sandiri! Mijur ma Ho sian silang i!" ⁴¹ Mangincahi ma tu Jesus sude angka Sintua Ni Malim dohot sude angka Siboto Surat ni Jahudi i dohot sude hatobangon ni halak Jahudi. ⁴² "Halak na asing dipaluasa hape Ia sandiri so tarpaluasa! Raja Ni Israel ma Ia ning Ia, anggo mijur ma Ia saonnari sian silang i. Anso porsaya hami diSia. ⁴³ Dihaposi Ia do Debata, antong i ma paluahon Ia nuaeng muda na jop do roha ni Debata tuSia! Angke didok Ia do: Anak Ni Debata do Au." ⁴⁴ Angka panyamun na diparsilangkon rap dohot Ia, mangincahi ma songon i tuSia. ⁴⁵ Mamungka kotu, tolu jom honokna, golap ma sude luat i. ⁴⁶ Dung pukul tolu andospotang, gogo ma sora ni Jesus ning Ia ma, "Eli, Eli, lama sabakhtani?" astuanna, "O, DebatangKu, DebatangKu, biasi ditinggalkon Ho Au?" ⁴⁷ Bahat do halak na marjongjongan disi mambege na nidokNia i. Gabe didok halahi ma, "Na mamiohon si Elia do i!" ⁴⁸ Dung i marlojong ma sahalak sian halahi mambuat lumut. Dironjomkon ia ma lumut i tu anggur na mancom. Jadi dilohotkon ia ma lumut i tu ujung ni tolong laho mangalehen tu Jesus anso diinum Ia. ⁴⁹ Tapi didok na deba ma, "Padiar ma songon i. Tapainte ma sanga na ro si Elia paluahon Ia!" ⁵⁰ Dung i mangulahi ma pio-pio Jesus. Dung i tos ma hosaNia. ⁵¹ Dung i manigor masibak ma tire na di Bagas Ni Debata bola dua sian ginjang lalu tu toru. Humutur ma tano i, mangkabola ma angka dolok batu. ⁵² Marmungkapan ma angka kuburan. Bahat halak ni Debata na dung mate mulak mangolu. ⁵³ Dung mulak mangolu Jesus sian hamatean, marruaran ma halahi sian kuburan i masuk tu Kota Na Badia. Bahat do halak na midaan halahi. ⁵⁴ Mabiar ma komandan i rap dohot angka parajurit i na manjagoi Jesus dung diida halahi lalo i dohot sude na masa i. Didok halahi ma, "Tutu do Ia on Anak Ni Debata!" ⁵⁵ Laing adong do disi angka dadaboru na manatap-natap sian na dao. Halahi ma angka dadaboru na dohot mamungka sian Galilea mangihutkon Jesus laho mangurupi Ia. ⁵⁶ I ma angka si Maria Magdalena, si Maria inang ni si Jakobus dohot si Josep dohot inang ni dakdanak ni si Zebedeus. ⁵⁷ Dung potang ari ro ma sada halak na mora sian Arimatea na margoar si Josep. Laing anak sisean ni Jesus do ia. ⁵⁸ Didapotkon ia ma si Latus mangido bangke ni Jesus i. Gabe diparentahon si Latus ma anso dipasahat tusia bangke ni Jesus i. ⁵⁹ Dung i dibuat si Josep ma bangke i. Dibalut ia ma dohot kopen na nibaen sian abit linen na ias. ⁶⁰ Dipayakkon si Josep ma bangke ni Jesus i di bagasan kuburan, ia puna sandiri. Na baru dituhil dope i, i ma di sada dolok batu. Digulang ia ma sada batu na godang tu baba ni kuburan i, kehe ma ia. ⁶¹ Anggo si Maria Magdalena dohot si Maria na asing i laing juguk do halahi disi paadop-adop kuburan i. ⁶² Ancogotna i, na mangihut tu ari parkobasan i kehe ma angka Sintua Ni Malim dohot angka Parise mangadop tu si Latus. ⁶³ Didok halahi ma, "On dope anso hami ingot tuan, taran mangolu pargabus i unjung do didok Ia songon on, ’Dung tolu ari, mulak mangolu ma Au mangulahi.’ ⁶⁴ Jadi hara ni i, suru ma halak manjago kuburan i tangkas lalu tu ari patoluhon. Anggo inda songon i, ro ma angka anak siseanNia i manangkosa gabe dohonon ni halahi ma tu halak, ’Ma mulak mangolu Ia mangulahi.’ Gabe gumodang dope gabus na parpudi on sian na parjolo." ⁶⁵ "Antong palagut ma angka tentara na manjagoi," ning si Latus tu halahi, "anso kehe halahi manjagoi kuburan i sajago-jagona." ⁶⁶ Jadi kehe ma halahi tu kuburan i. Disegel halahi ma batu panutupna i. Dung i disuru halahi ma angka tentara na manjagoi disi.

¹ Dung salpu Ari Sabat, andostorang ni Ari Mingguna i kehe ma si Maria Magdalena dohot si Maria na asing mangaligi kuburan i. ² Jadi tompu ma masa lalo na gogo. Na mijur do sada surusuruan sian banua ginjang manggulang batu panutup ni tanoman i. Dung i juguk ma ia diginjang batu i. ³ Songon hilap do idaon bohi ni surusuruan i. Pakeanna i pe bontar songon hapas. ⁴ Hara ni biarna angka tentara na manjagoi i, lopus hitir-hitir halahi. Langan be bohi i songon bangke. ⁵ Didok surusuruan i ma tu angka dadaboru i, "Ulang hamu mabiar! Huboto do na manjalahi Jesus na diparsilangkon i do hamu. ⁶ Nada dison be Ia. Madung ngot Ia songon na nidokNia hian tu hamu. Ligi hamu ma inganan hapayahanNa. ⁷ Ompoti hamu ma saonnari kehe paboahon tu angka anak siseanNia. ’Madung mulak mangolu Ia mangulahi. Dijoloi Ia ma hamu tu Galilea. Disi ma Ia idaonmunu!’ Ingot hamu ma na hudok on tu hamu." ⁸ Diompoti dadaboru i ma maninggalkon kuburan i. Mabiar marcampur jop ni roha, dilojongi halahi ma laho paboahon pangalaho i tu angka anak sisean ni Jesus. ⁹ Jadi ompot ma ro Jesus mandapotkon dadaboru i. Didok ma tu halahi, "Horas ma di hamu!" Dipadonok halahi ma tuSia, dihaol halahi ma patna i. Disomba halahi ma Ia! ¹⁰ Jadi didok Jesus ma tu halahi, "Ulang hamu mabiar, kehe ma hamu, baritahon hamu ma i tu angka kahanggingKu anso kehe halahi tu Galilea, disi ma diida halahi Au." ¹¹ Dung kehe dadaboru i, kehe muse ma deba angka tentara na manjago kuburan i tu kota paboahon sude na masa i tu angka Sintua Ni Malim. ¹² Martahi ma angka Sintua Ni Malim i dohot angka bagian hatobangon ni halak Jahudi. Putus ma tahi ni halahi, lehenon ni halahi ma hepeng sanga na sadia tu tentara panjago i. ¹³ Didok halahi ma tu tentara i, "Angkon dokkononmunu ma na ro angka anak siseanNia i borngin-borngin hatiha modom hamu, manangko bangkeNia i. ¹⁴ Jadi muda diboto gubernur i pangalaho i, hami elek pe ia anso ulang pola adong sanga aha na manyusahon hamu." ¹⁵ Jadi dijagit tentara i ma hepeng i, dibaen halahi ma songon na nidok ni angka Sintua Ni Malim i dohot hatobangon ni halak Jahudi i. Lopus tu sadari on sar ma barita i di tonga-tonga ni halak Jahudi. ¹⁶ Kehe ma anak siseanNia na sabolas i tu Galilea. Manangkok ma halahi tu dolok na nipaboa ni Jesus hian tu halahi. ¹⁷ Dung i diida halahi ma Jesus disi, tungkap ma halahi manyomba Ia. Tapi adong dope deba sian halahi na ganggu dope rohana. ¹⁸ Gabe dipadonok Jesus ma tu halahi, didok Ia ma hata, "Sude kuaso na di banua ginjang dohot di tano on, madung dipasahat tu Au. ¹⁹ Jadi hara ni i, kehe ma hamu tu sude bangso, baen hamu ma halahi gabe halak na mangihutkon Au. Didi hamu ma halahi di bagasan goar ni Ama, goar ni Anak dohot goar ni Tondi Parbadia. ²⁰ Laing ajari hamu ma halahi anso burju mangoloi sude na Huparentahon tu hamu. Botoonmunu ma. Au ma tongtong rap dohot hamu lopus tu hasidungan ni tano on."