JAKOBUS

JAKOBUS

¹ Tabe ma sian au, si Jakobus, naposo ni Debata dohot Tuhan Jesus Kristus, tu na dua bolas marga i, na di parserahan. ² Hamu angka dongan! Muda manaon pandugaan na marragam-ragam hamu, etong hamu ma i songon sada hauntungan. ³ Angke muda laing tong do porsaya hamu tu Tuhan di na mamolus pandugaan i gabe diparo i ma hasobaron di hamu. ⁴ Jagohon hamu ma anso ulang mantak di tonga dalan hasobaronmunu i, tapi mur martumbur ma i lopus magodang hamu jana sanggam bope na so markahurangan hamu di sasudena. ⁵ Muda adong sanga ise sian hamu na hurang marroha, dipangido ia ma habisuhon sian Debata, gabe lehenon ni Debata ma disia habisuhon. Angke tu ganop halak do Debata mangalehen jana mardongan ibo ni roha. ⁶ Tapi angkon porsaya do sanga ise na mangido i; ulang ganggu rohana. Angke tarsongon ombak ni laut na nionjar tu siamun siambirang do anggo halak na ganggu roha. ⁷ Ulang dipikir halak na songon i jagitonnia bagi aha sian Tuhan i. ⁸ Anggo halak na mardua roha, nada tontu di bagasan sude pardalananna. ⁹ Sanga ise halak Kristen na pogos, jop ma rohania muda dipagincat Debata ia. ¹⁰ Jana halak Kristen na kayo, laing marjop ni roha ma muda dipatutoru Debata ia. Angke na giot mago do sanga ise na kayo songon bunga ni duhut. ¹¹ Muda dung bincar mataniari di panyoro ni milasna i, gabe malos ma duhut i, marurus ma bungana i jana mago muse ma dohot hajegesonna i. Laing songon i ma halak na kayo; magopu ma ia di na mandalankon karejona i. ¹² Martua do sanga ise na sobar di na manaon pandugaan. Angke muda dung disalpui ia pandugaan i, manjagit upa ma ia, i ma hangoluan na nijanjihon ni Debata tu angka na mangkaholongi Debata. ¹³ Muda adong sanga ise na hona ujian na songon i, ulang ma didokkon ia, "Sian Debata do haroroan ni ujian i," angke nada tarbaen hona uji Debata baenon ni hajahatan jana nada diuji Debata sanga na ise pe. ¹⁴ Tapi ganop halak digoda do marhite hagiotna sandiri na jahat i. ¹⁵ Dung i muda dioloi ia hagiotnia na jahat i, gabe tubu ma dosa; dung mardosa, gabe hamatean noma na ro. ¹⁶ Ulang hamu tarpaoto-oto, ale angka dongan! ¹⁷ Ganop silehen-lehen na denggan jana na sanggam sian banua ginjang i do ro; na nipaijur ni Debata na manompa sasudena na torang di langit i do sudena i. Ia do Debata na so muba-uba, jana nada mandao muse Ia sian hita, gabe adong do tading halinuNa humaliang hita. ¹⁸ Hara ni giot ni rohaNia sandiri, dibaen Ia do hita gabe dakdanakNia markite-hite hataNia na tigor i, anso dapotan inganan na dumenggan hita sian sasudena na nitompaNia. ¹⁹ Denggan ma parrohahon hamu on, hamu ale angka dongan na nihaholongan! Ganop halak angkon hipas do manangihon, tapi lambat ma mandok hata, jana maol ma laho muruk. ²⁰ Harana nada tarbaen hamuruhon ni jolma mangkarejohon hatigoran ni Debata. ²¹ Antong hara ni i, ambungkon hamu ma sude hasomalan na hodar dohot na jat. Jagit hamu ma di bagasan toruk ni roha Hata na nisuan ni Debata di bagasan rohamunu, angke margogo do Hata i laho paluahon hamu. ²² Patulus hamu ma sanga aha na nidok ni Debata, ulang ma hum na manangihon sajo, angke na paoto-oto dirimunu sandiri do hamu muda songon i. ²³ Sanga ise na manangihon hata ni Debata hape nada dipatulus ia, songon halak na mangaligi bohina sandiri do i di sormin. ²⁴ Dung denggan diparate-atehon ia, kehe ma ia jana torus lupa ma ia sanga na songon dia tompa ni bohinia i. ²⁵ Sanggam do tona i jana margogo do i laho mambaen jolma gabe mardeka. Jana sanga ise na manangkasi dohot na mamparrohahon dohot denggan bope na patuluskon angka parenta i, jana nada hum na manangihon sajo jana mangkalupahonsa, martua ma halakna i di sude pangalaho na nibaennia. ²⁶ Muda adong sanga ise na mangkilala dirina halak na burju marugamo, hape nada dijagohon ia dilania, na paoto-otohon dirinia do ia disi; nada adong guna ni ibadatnia i. ²⁷ Haburjuon marugamo na ias jana na so martihas diadopan ni Debata Amanta, on do: Manyarihon na so marama so marina dohot angka na mabalu na mardangol; dohot na manjagohon dirina sandiri anso ulang sego dibaen portibi on.

¹ Hamu angka dongan! Songon halak na porsaya tu Tuhan Jesus Kristus, Tuhan Na Sumangap i, ulang ma hara ni angka pangalaho na tarida baen hamu mangaligi bohi ni halak. ² Angke muda adong sada halak na martintin sere dohot na marpakean na jeges ro tu parpunguanmunu, dung i ro muse ma sada halak na pogos na mamake pakean na mardungkap, ³ gabe sumangapan ma hamu tu bayo na marpakean na jeges i. Dokkononmunu ma tusia, "Di karosi na jumegesna on ma tuan i juguk." Hape anggo tu bayo na pogos i dokkononmunu ma, "Disadu ma ho jongjong," sanga "Dilante on ma da pajuguk." ⁴ Muda songon i dibaen hamu, nada he na mardia imbar do dibaen hamu sama hamu jana manguhumi hamu di bagasan pikiran na jahat? ⁵ Hamu angka dongan na nihaholongan, tangihon hamu ma! Angka halak na pogos ninna roha ni portibi on, i do na dipili Debata anso gabe halak na mora di haporsayaanna tu Tuhan. Halahi do na maruli di Harajaan Ni Debata na nijanjihonNa i tu angka halak na mangkaholongi Ia. ⁶ Hape anggo hamu, mur dipabile hamu do halak na pogos haru pe nian angka halak na mora i do mamisat hamu dohot na manyarat hamu tu paruhuman! ⁷ Nada he halahi do na pabilehon Goar na sangap na marhite i hamu gabe nampuna ni Debata! ⁸ Na denggan ma na nibaenmunu muda dipatulus hamu tona na gumodang tarsurat di Buku Na Badia i na mandok, "Haholongi ma donganmu jolma songon pangkaholongimu di dirimu sandiri." ⁹ Tapi muda mardia imbar do dibaen hamu halak, na mambaen dosa do hamu songon i, jana marhite Tona i, tangkasma bahaso na dung mangalaosi hamu disi. ¹⁰ Harana sanga ise na mangkarejohon sude Tona i, tapi nada dikarejohon ia sada sian i, na marsala do ia maradopkon sasudena i. ¹¹ Angke Ia do na mandok, "Ulang ho markarosuan," laing Ia muse do na mandok, "Ulang ho mamunu." Jadi muda nada markarosuan ho, hape mamunu jolma, laing na mangalanggar Tona i do hamu disi. ¹² Jadi muda mangkobari hamu sanga patupahon bagi aha, angkon hilalaonmunu do, hamu sandiri pe laing halak siuhumon do mangihutkon Tona Ni Debata na mambaen jolma gabe mardeka. ¹³ Angke sanga ise halak na so maribo ni roha tu halak na asing, sidabuon do uhuman tusi so pola mardongan ibo ni roha. Tapi gumogo dope ibo ni roha ulang uhuman! ¹⁴ Hamu angka dongan! Aha ma gunana didok halak, "Porsaya do au," anggo so dipatidahon ia do sian pambaenannia na tutu ia porsaya? Tarpalua haporsayaan na songon i ma he ia lakna? ¹⁵ Sugari adong sada dongan Kristen na mangkaporluhon pakean jana na so tuk panganonnia siganop ari. ¹⁶ Aha ma gunana didok hamu, "Marjop ni roha ma ho mamake pakean na las jana mangan ma ho lopus butong!" -- anggo so dilehen hamu do tusia na nihaporluhonnia i? ¹⁷ Laing songon i ma muda porsaya hita hape nada tapatuduhon dohot pambaenan, na mate do haporsayaanta i. ¹⁸ Tapi sugari adong na mandok, "Haporsayaan do di ho, pambaenan i di au. Antong patidahon ma di au haporsayaanmu na so mardongan pambaenan, jana hupatidahon di ho sian pambaenan do haporsayaanki." ¹⁹ Nada he porsaya do ho hum sada do Debata? Denggan do i! Tapi setan i pe porsaya do jana humitir halahi hara ni biarna! ²⁰ Ale jolma na oto, saonnari ra dehe ho mamparkatutui bahaso na mate do haporsayaan na so mardongan pambaenan? ²¹ Ligi hamu ma ompunta si Abraham. Denggan ia dijagit Debata, hara ni pambaenannia do, i ma di na nihaulkonnia si Ishak anaknia i tu Debata di inganan parkaulan ni haul. ²² Dison tarida ma, angkon nipatuduhon do haporsayaan i dohot pambaenan anso gabe sanggam. ²³ Hombar do i tu ayat na mandok, "Porsaya do si Abraham tu Debata, jana dietong ma i disia gabe hatigoran." Hara ni i ma umbaen na nigoaran si Abraham, "Ale-ale ni Debata." ²⁴ Tangkas ma saonnari, anso denggan dijagit Debata jolma laing hara ni pambaenan na nikarejohon ni jolma i do, jana nada hum hara ni haporsayaan sajo. ²⁵ Laing songon i do si Rahab boru jalang i. Nada he dapotan hatigoran do ia marhite pambaenanna di na nijagitnia angka pamata-matai jana diurupi ia halahi palua dirina sian dalan na asing? ²⁶ Harana pamatang na so martondi, pamatang na mate do i, laing songon i do haporsayaan na so mardongan pambaenan, na mate do i.

¹ Hamu ale angka dongan! Ulang ma bahat sian hamu na marpor ni roha gabe guru. Nada he diboto hamu do anggo hita na gabe guru angkon umborat do uhumanna sian angka halak na asing i. ² Jotjot do hita sudena mambaen hasalaan. Sanga ise na so jungada mambaen hasalaan di angka hatana, halak na sanggam do i, na margogo mangarajai dirina. ³ Muda tabaen kokang tu pamangan ni kudo anso diihutkon ia hagiotta, gabe tarbaen hita ma marroha-roha paegol-egolkon pamatang ni kudo i. Kokang di pamangan ni kudo (3:3) ⁴ Laing tarbaen do kapal songon tudosanna. Haru pe barang na lobi godang sada kapal jana na nigulotkon ni alogo na gogo situtu, hape na niatur ni sada amudi na menek do i na nitontuhon ni juaro mudina i. ⁵ Laing songon i ma dilanta i; haru pe menek sajo dilanta i, hape tarbaen ia do manggodang diri taringot tu angka pangalaho na godang. Ligi hamu ma, salang harangan godang tarsurbu do i hara ni api na menek. ⁶ Songon api do dila i. Asar ni hajahatan do dila i di pamatangta na pararatkon hajahatan tu sude dirinta. Markite-hite api na sian narako i, dipamosok ia ma sude ngolunta. ⁷ Sude ragam ni binatang na manjurur dohot angka ihan, tarpajinak do sude jana madung dipajinak jolma. ⁸ Tapi anggo dila ni jolma umpe sahalak na tarbaen pajinakonsa. Jahat do dila i jana nada tarrajai; jana gok rasun na mamatehon. ⁹ Tarpake do i laho mandok tarimakasi tu Debata, Amanta, hape laing tarpake muse do i mamurai dongan jolma na nitompa mangihutkon rupa ni Debata. ¹⁰ Sian pamangan na sada i haruar do angka hata pasupasu jana dohot muse angka hata bura. Nada tola songon i hamu ale angka dongan! ¹¹ Adong dehe mual ni aek na gabe haroroan ni aek na tonggi dohot aek na paet sian mual na sada i? ¹² Tarbaen ma he lakna, hamu angka dongan, hayu ara marbatuhon zetun sanga bona ni anggur marbatuhon hayu ara? Mual ni aek na ancim, nada tarbaen i parohon aek na tabo. ¹³ Muda adong do sian hamu na marroha jana na burju, dipatuduhon ia ma i dohot ngolu na denggan bope dohot pambaenan na denggan mardongan hatoruhon ni roha dohot habisuhon. ¹⁴ Tapi muda mangiburu hamu, markancit ni roha, muruk jana manyarihon dirina sajo, ulang ma hamu manggodang jana ulang hamu margabus mangalo hasintongan i. ¹⁵ Nada habisuhon na ro sian banua ginjang anggo habisuhon na songon i, sian portibi on do i, sian hagiot ni jolma, karejo ni setan do i! ¹⁶ Muda masa pangiburuon dohot na manyarihon dirina be, masa muse ma disi hagaoron dohot sude ragam-ragam ni na jat. ¹⁷ Tapi sanga ise na maruli habisuhon na ro sian ginjang, na parjolo: Na ias do i, dung i pardame, na burju dohot na ra mangoloi. Gok do i dohot ibo ni roha bope na pataridahon angka parange na denggan. Nada ganggu rohana jana nada mangalancap. ¹⁸ Tutu ma tarida hadengganan i na songon parbatu ni same ni dame na nisuan ni halak na mangkaholongi dame!

¹ Sian dia dehe asal ni sude parbadaan dohot partangkangan na masa di hamu? Nada he sian angka hagiotmunu na sai giot torus marporang di bagasan dirimunu anso dapotan hasonangan portibi do asal ni i? ² Por do rohamunu, hape nada dapot hamunu, gabe ra ma hamu mamunu! Mangiburu do hamu, hape umpe dapot hamu na nijalahanmunu i gabe martangkangi ma hamu lopus marbada. Umpe bagi aha dapot hamu, angke nada tu Debata hamu mangido. ³ Tarsung pe dipangido hamu, hape laing nada dapotan hamu, angke madung sala tujuan ni pangidoanmunu i; na laho pasonang-sonangkon dirimunu sajo do na nipangidomunu i. ⁴ Angka jolma na so tigor do hamu! Diboto hamu dehe, muda mardongan hamu dohot portibi on na gabe musu ni Debata do hamu? ⁵ Ulang ma didok rohamunu na so marguna na nidok ni Buku Na Badia i, "Madung dibaen Debata sada tondi na malungun situtu maringanan di bagasan hita." ⁶ Haru songon i pe, gumogo dope asi ni roha ni Debata na nilehenNa i di hita ulang pado hagiot ni rohanta i. Hara ni i do umbaen na laing tarsurat di Buku Na Badia i muse, "Dialo Debata do halak siginjang roha, tapi asi do rohaNia anggo tu halak na toruk roha." ⁷ Antong, oloi hamu ma Debata jana alo hamu ma Sibolis i, anggo i marlojongi ma Sibolis i sian hamu. ⁸ Pasolkot hamu ma tu Debata, jana Debata pe padonohonNa ma tu hamu. Hamu dongan na mardosa, paias hamu ma tanganmunu! Hamu na mardua roha, paias hamu ma rohamunu. ⁹ Angkon tutu ma hamu manyosal jana tangis dohot mangandungi; angkon gabe muba ma partatamunu gabe partangisan dohot hajojop ni rohamunu gabe hamarsahan! ¹⁰ Patoruk hamu ma dirimunu di jolo ni Tuhan, gabe patuginjangon ni Tuhan i ma hamu. ¹¹ Hamu angka dongan, ulang ma hamu marsitilakoan sanga marsipasalaan. Sanga ise na manilakoi sanga na pasalahon donganna Kristen, na manilakoi dohot na manyalahon angka Tona Ni Debata do i. Jana muda disalahon hamu angka Tona Ni Debata, na so diihutkon hamu be angka Tona i tapi gabe panguhum noma hamu disi. ¹² Hape nian, hum sada do na marhak mamarenta jolma dohot manguhumisa. I ma Debata na margogo paluahon dohot pangabiskon. Jadi, ise ma hamu lakna umbaen na jabat ra hamu pasala halak na asing, laing jolma na somal songon hamu. ¹³ Hamu angka dongan na mandok, "Sadari on sanga ancogot na giot kehe do hami tu kota adu i jana disi ma hami maringanan sataon honokna anso marjagal jana manjalahi hepeng disi, ¹⁴ hape nada diboto hamu sanga aha na giot masa ancogot di ngolumunu. Aha ma he hosamunu i? Na songon timus sajo do ho, tarida santongkin sajo, dung i manigor mago." ¹⁵ Angkon songon on do nian dokkononmunu, "Muda ibo roha ni Tuhan, mangolu ma hami jana baenonnami ma songon on sanga songon an." ¹⁶ Hape saonnari gabe marginjang ni roha do hamu jana mamburas. Sala do sudena buras na songon i. ¹⁷ Jadi hara ni i, mardosa do sanga ise na umboto na denggan sipatupaonnia nian, hape nada dipatulus ia.

¹ Hamu angka halak na mora! Tangihon hamu ma sipaingotkon. Tangis ma hamu jana mangandungi, harana manaon parkancitan ma hamu! ² Madung busuk sinadonganmunu i. Madung dipangan ngitngit pakeanmunu i. ³ Madung haraton sere dohot perakmunu i; haratna i ma na gabe saksi mangalo hamu jana panganonna ma pamatangmunu songon api. Madung dipalagut hamu arta marayak ari na parpudi. ⁴ Nada digarar hamu upa ni angka halak na markarejo di ladangmunu. Saonnari bege hamu ma hoi-hoi ni halahi! Angka halak na palagutkon suha ni ladangmunu, marsurak do halahi mangido tolong jana lalu do angguk ni halahi i tu simanangi ni Debata, Tuhan Na Markuaso i. ⁵ Marlobi-lobi do ngolumunu di tano on jana didai hamu na sonang. Tarsongon na pamokmok-mokmokkon diri do hamu laho sambolon. ⁶ Diuhum jana dibunu hamu do angka halak na so marsala, hape nada mangalo halahi tu hamu. ⁷ Antong sobar ma hamu angka dongan lopus ro Tuhanta i. Ligi hamu ma sobar ni angka partani i paintehon lopus dilehen tanonia i suha na mararga disia. Sobar do ia paintehon udan di musim gugur dohot udan di musim bunga. ⁸ Hamu pe angkon laing sobar do jana margodang ni roha, harana madung donok ari haroro ni Tuhan i. ⁹ Ulang mungut-ungut hamu jana marsipasalaan anso ulang diuhumi Debata hamu. Ingot! Ro ma panguhum i. ¹⁰ Ligi hamu ma angka panurirang na mandok hata mangasahon goar ni Tuhan. Sobar do halahi jana tahan manaon parkancitan. Jadi, halahi ma baen hamu gabe tiruan. ¹¹ Hara ni sobarna halahi gabe dohonon ma halahi na martua. Diboto hamu do sanga na bia hasobaron ni si Job, jana diboto hamu do sanga na bia di ujungna dipasupasu Tuhan ia. Angke parasi roha na sumurung do Tuhan jana na denggan roha. ¹² Anggo na ummarga hamu angka dongan, on do: Ulang hamu marsumpa sanga pe maradopkon langit bope tu tano on sanga maradopkon bagi aha pe tehe. Dok sajo ma "Olo" muda olo, jana "Nada" muda nada, anso ulang didabu Debata uhuman tu ho. ¹³ Muda topet adong na susa sian hamu, martangiang ma ia. Muda adong na marjop ni roha, marende ma ia mamuji Debata. ¹⁴ Muda adong na marnyae, dipiohon ia ma angka sintua i. Ditangiangkon angka pamimpin i ma halak na marnyae i jana diapuskon ma miak mangasahon goar ni Tuhan. ¹⁵ Tangiang na nipasahat tu Tuhan mardongan pos ni roha, tarbaen do i pamalumkon halak na marnyae. Pamalumon ni Tuhan ma i jana sesaonNia ma angka dosa na nibaennia. ¹⁶ Hara ni i, marsioku dosana ma hamu jana marsitangiangan anso dipamalum hamu. Na margogo situtu do tangiang ni halak na mangihutkon hagiot ni Debata. ¹⁷ Si Elia pe laing jolma humani do, sarupa dohot hita. Marsitutu do ia martangiang anso ulang ro udan, jana nada ro udan tolu satonga taon honokna. ¹⁸ Dung i ditangiangkon ia mangulahi, jadi dipaijur langit i ma udan gabe diparlehen tano i ma mangulahi angka parbatuna. ¹⁹ Hamu angka dongan! Muda adong barang ise na lilu sian hatigoran i, dung i adong barang ise na paulakkon rohania, ²⁰ boto hamu ma on: Sanga ise na manogu halak pardosa marbalik sian dalanna na sala i, na nipaluania do halakna i sian hamatean jana ditutupi ia ma bahat dosa.