IBRANI

IBRANI

¹ Madung jotjot jana marragam dalanna dibaen Debata laho mangkatai tu angka ompunta markite-hite angka panurirang. ² Tapi di hatiha na parpudi on madung mangkatai Ia tu hita markite-hite AnakNia, na dung ditontuhon do Ia gabe sipanean ni sasude na adong. Marhite Ia madung ditompa Debata hasiangan on. ³ Ia do sinondang hasangapan ni Debata, jana Ia do gambaran ni Debata sandiri dohot na mangasahon sasude markite-hite hataNia na gok kuaso. Dung sidung dipaias Ia jolma sian angka dosa ni halahi, juguk ma Ia di siamun ni Na Sun Margogo i di banua ginjang. ⁴ Dao dope gumincat hasangapan na nijagit ni Anak i sian surusuruan, harana goar na nilehen ni Debata pe tuSia dao do sumangap ulang pado goar na nilehen tu surusuruan. ⁵ Na so jungada do didok Debata tu sada surusuruan, "AnakKu do Ho; Sadari on ma Au gabe AmangMu." Na so jungada muse do didok Debata songon on sanga na tu surusuruan dia pe, "Gabe AmangNia ma Au, jana Ia ma gabe AnakKu." ⁶ Tapi di na nisuru ni Debata AnakNia siangkaan i tu portibi on, didok Ia do, "Sude surusuruan ni Debata angkon manyomba tuSia." ⁷ Anggo taringot tu angka surusuruan, didok Debata songon on, "Dibaen Debata do angka surusuruanNia gabe alogo, jana angka pangoloiNia gabe jilam ni api." ⁸ Hape anggo tu Anak i didok Debata do, "Ho do Debata, jana hot do salolot-lolotna hasangapanMu songon Raja! Pangarajaion na tigor do pangarajaionMu. ⁹ Hatigoran do giot ni rohaMu jana magigi do Ho di na sala; i ma dalanna umbaen na nipili ni Debata Ho, i ma DebataMu jana dipasonang rohaMu dohot hasangapan na sumurung sian angka donganMu." ¹⁰ Didok Debata dope, "Ho do Tuhan di mulana na manompa portibi, jana dohot tanganMu sandiri dijadihon Ho langit i. ¹¹ No giot salpu do sudena i, jana mumut songon pakean; tapi anggo Ho, mian do tongtong. ¹² LompitonMu ma hasiangan on songon pangalompit ni pakean, jana gontionMu ma i dohot na asing. Hape anggo Ho laing songon i do tongtong, jana umurMu pe nada marujung." ¹³ Nada jungada didok Debata songon on tu angka surusuruanNia, "Juguk ma Ho di siamunKu, lopus Hubaen angka musuMu gabe si degean ni patMu." ¹⁴ Antong, aha noma satutuna angka surusuruan ni Debata i? Angka tondi na mangoloi Debata do i jana na nisuru ni Debata laho mangurupi sanga ise halak na giot manjagit haluaan na nijanjihon ni Debata.

¹ Hara ni i ma umbaen na porlu hita mur manat tu angka na hita bege, anso ulang mayup hita. ² Harana muda dung togu angka na nihatahon ni angka panurirang i, jana ganop pangalosion dohot panggagaion manjagit pamaloson na hombar tu pangalahona, ³ songon dia ma he tarbaen hita malua, anggo so taparrohahon do haluaan na songon i godangna? Tuhan i do na mangkatahonna di mulana i, jana na nioban dohot dipatontu tu hita markite-hite angka na umbegena. ⁴ Tamba ni i, dohot do Debata pagomoskon hasaksian ni angka halahi di na nibaenNia ragam-ragam ni hahomangan bope angka pangalaho na luar biasa bope dohot na mambagi-bagihon angka hamaloan hapunjungan na sian Tondi Parbadia marguru tu hagiot ni Debata sandiri. ⁵ Anggo angka surusuruan nada dohot manjagit kuaso ni Debata, giot mamarenta di portibi na imbaru na giot ro i, i ma portibi na tahatai on saonnari. ⁶ Tapi adong do sada bagian sian Buku Na Badia i manyuratkon songon on, "Aha ma he jolma ale Debata, umbaen na pola ra Ho marningotsa? Hum jolma humani do jolma i, hape diparrohahon Ho do i! ⁷ Santongkin dipasurut Ho ia sian surusuruan i, dung i ditukuhon Ho hasangapan, dohot hamuliaan tusia, ⁸ jana dibaen Ho ia gabe pangarajai ni sasudena." Antong muda didok, Debata manjadihon jolma gabe "pangarajai ni sasudena," astuan ni i, nada adong be sanga aha na so di toru ni kuaso ni jolma. Haru songon i pe nada adong be taida saonnari jolma na markuaso di ginjang ni sasudena. ⁹ Tapi anggo Jesus madung taida mangarajai! Dibaen do Ia santongkin tumoruk saotik sian surusuruan anso tarbaen Ia mate laho manghopkop sude jolma hara ni denggan ni roha ni Debata. Taida do saonnari dilehen diSia juguhan na marmulia jana na sangap hara ni na dung manaon parkancitan Ia lopus mate. ¹⁰ Madung sapatutna nian baenon ni Debata na manompa jana na pangolu sasudena -- Jesus gabe sanggam hara ni parkancitanNa i. Jadi hara ni i tarpiohon Jesus do bahat halak anso dohot nipasangap rap dohot Ia. Angke Ia do na mambaen dalan di halahi anso tola dohot nipalua. ¹¹ Dibaen sian Sada do haroroan ni sude halahi, bope Ia na pabadiahon, bope halahi na niparbadiai, hara ni i do nada maila Ia manggoari halahi kahanggi. ¹² Ning Ia ma, "PaboaonKu ma tu angka kahanggingKu taringot tu Ho. PujionKu ma Ho di tonga-tonga ni parlagutan." ¹³ Didok Jesus dope, "Tu Debata noma Au mararop ni roha." Jana didok Jesus muse dope, "Dison do Au rap dohot angka dakdanak na nilehen ni Debata di Au." ¹⁴ Angke anggo angka halak na nidokNia i dakdanakNia, i ma angka mudar dohot sibuk, gabe sarupa ma Jesus sandiri dohot halahi jana mangolu songon pangalaho ni jolma sarupa dohot halahi. Songon i pe pambaenNia, anso ditaluhon Ia do Sibolis i na maniop kuaso ni hamatean i. ¹⁵ Jadi songon i ma dalanna dibaen Ia laho paluahon angka jolma na niparhatoban ni biar mida hamatean i sapanjang mangolu. ¹⁶ Jadi torang do, nada na manyarihon surusuruan Ia, tapi pomparan ni si Abraham do na disarihonNia songon na nidok ni surat i di Buku Na Badia i. ¹⁷ Jadi astuanna, angkon sarupa do Ia dohot halahi di sude pangalaho. Jadi dung songon i tarbaen Ia ma diriNia gabe Malim Godang ni halahi, na burju jana na maribo ni roha di na nioloanNia Debata laho manyesa angka dosa ni halahi. ¹⁸ Dohot dalan na songon i, haurupan Ia ma sanga ise halak na hona pandugaan, harana Ia sandiri pe madung jungada hona pandugaan jana manaon parkancitan.

¹ Hara ni i ale angka dongan na badia, na dohot taruli di pio-pio na sian banua ginjang, ligi hamu ma rasul dohot Malim Godang na taoku i, i ma Kristus Jesus. ² Haposan do Jesus di Debata na mamili Ia tu karejo i, laing songon haburjuon ni si Musa najolo mandalankon karejonia di tonga-tonga ni bagasNia. ³ Tapi patutna do Jesus maruli hasangapan na gumodang ulang si Musa. Harana angkon laing sumangap do halak na malo pajongjongkon bagas ulang bagas na nipajongjongnia i sandiri. ⁴ Angke sude bagas adong do na pajongjongkonsa, tapi na pajongjongkon sasudena, i ma Debata. ⁵ Si Musa pe nian burju do ia songon pangoloi di tonga-tonga ni bagas ni Debata jana dipaboa ia do angka na giot ro. ⁶ Tapi anggo Kristus, songon anak do di bagasNia. Jana hita do bagas i muda tongtong marmomos jana marpos ni roha paboa na jagitonta do sanga aha na niarop ni rohanta. ⁷ Hara ni i songon na nidok ni Tondi Parbadia, "Muda dibege hamu sadarion sora ni Debata, ⁸ ulang pajogal hamu rohamunu songon tangkang ni ompungmunu i, di na mangalo halahi tu Debata, jana diuji halahi Debata di parhorsihan i. ⁹ ’Diuji ompungmunu i do Au disi, jana diuji halahi Au, hape nian madung diida halahi sandiri sasudena na Hubaen opat pulu taon honokna.’ ¹⁰ I do umbaen na goyak rohangKu mida halahi jana Hudok ma, ’Na tongtong do halahi lilu, jana losok mangoloi angka parenta na Hudok.’ ¹¹ Muruk do Au jana Husumpahon, ’Na so tola masuk halahi tu inganan na giot lehenonKu tu halahi gabe paradiananna!’ " ¹² Hamu angka dongan, manat ma hamu anso ulang jabat adong sian hamu sahalak pe na songon i jahatna jana na so porsaya tu Jesus, gabe marbalik mangkudukkon Debata na mangolu i! ¹³ Jadi, anso ulang adong sanga ise sian hamu na hona tipu dibaen dosa, na mambaen gabe mangalo tu Debata, angkon marsipaingotan do hamu sama hamu ganop ari salolot mangolu hita di hatiha na nidok "Sadari on" di Buku Na Badia i. ¹⁴ Sapartohapan do hita on sudena rap dohot Kristus; asal ma togu tatiop lopus tu ujungna, sanga aha na tahaporsayai di mulana i. ¹⁵ On ma na tarsurat di Buku Na Badia i, "Muda dibege hamu sadari on sora ni Debata, ulang ma pajogal hamu rohamunu, songon jogal ni roha ni ompungmunu i di na mangalo halahi tu Debata." ¹⁶ Antong, ise dehe halakna i, na umbege sora ni Debata, gabe mangalo halahi tuSia? Nada he sudena halak na niuluhon ni si Musa i haruar sian Mesir? ¹⁷ Jana ise dehe na nimuruhan pola opat pulu taon honokna? Nada he angka na mardosa na marmatean di parhorsihan i lakna? ¹⁸ Ise dehe na nidok ni Debata di na nisumpahonNia, "Na so tola halahi masuk tu inganan paradianan na giot lehenonKu di halahi?" Nada he laing angka halak na mangalo i do tu Debata? ¹⁹ Saonnari madung taboto, na so dilehen di halahi inganan paradianan i, hara ni na so porsaya halahi tu Debata!

¹ Antong, laing adong dope janji ni Debata na giot lehenonNia dope di hita i ma paradianan. Jadi jago ma hita anso ulang jabat adong sahalak pe sian hamu na so tola masuk tu paradianan na nijanjihonNa i. ² Harana madung dipaboa tu hita Jamita Na Denggan i laing songon na tu halahi. Hape anggo di halahi nada marguna jamita i. Angke di na nibege ni halahi jamita i, nada dijagit halahi i mardongan haporsayaan tu Debata. ³ Tapi anggo taringot tu hita na mangkaporsayai Debata, dilehen do paradianan, i ma na nijanjihon ni Debata i. Jana sauduran do i tu na nidok ni Debata songon on, "Muruk do Au jana Husumpahon do, na so tola halahi masuk tu inganan na giot lehenonKu hian tu halahi gabe inganan paradianan!" Didok Debata dope songon i haru pe madung sidung karejoNia mamungka sian na manompa portibi on. ⁴ Harana anggo taringot tu ari papituhon, adong do tarsurat di Buku Na Badia i songon on, "Maradian do Debata di ari papituhon i sian sude parkarejoanNia." ⁵ Taringot tusi pe laing adong do tarsurat songon on, "Nada tola halahi masuk tu inganan na giot lehenonKu hian paradianan ni halahi." ⁶ Jadi halahi na parjolo umbege barita taringot tu Jamita Na Denggan i nada dilehen inganan paradianan hara ni na so porsaya halahi. Antong madung torang sian i, adong dope angka halak na asing na nipatola manjagit inganan paradianan i sian Debata. ⁷ Harana madung ditontuhon Debata sada ari na asing, i ma na nigoaran "Sadari on". Dung adong piga-piga taon, dipaboa Debata ma taringot tusi markite-hite si Daud, i ma di ayat sinangkinan i, "Muda dibege hamu sadari on sora ni Debata, ulang ma pajogal hamu rohamunu." ⁸ Sugari na dung dioban si Josua angka jolma i masuk tu inganan na giot lehenon ni Debata gabe paradianan ni halahi, tontu nada pola taringotan ni Debata be sada ari na asing. ⁹ Jadi anggo di halak ni Debata laing adong dope janji anso maradian songon Debata na maradian di ari papituhon i. ¹⁰ Angke sanga ise halak na dung masuk tu inganan na gabe paradiananNia, maradian muse ma ia sian karejonia, songon Debata na maradian muse sian karejoNa. ¹¹ Hara ni i ringgas ma hita anso dohot hita masuk tu inganan paradianan i. Ulang jabat adong sahalak pe sian hita na madabu hara ni na mangihutkon tiruan na binaen ni na so porsaya i. ¹² Hata na mangolu jana na margogo do hata ni Debata; tumajom dope i sian podang sidua baba. Disirang ia do tondi dohot hosa, utok-utok dohot holi-holi, jana markuaso do i manguhumi pikiran dohot parrohahon ni ate-ate. ¹³ Umpe sada sian na nitompa i na buni, na so niida ni Debata. Talak do sudena jana patar di joloNia. Jana angkon lehenonta do tuSia partanggungjawabanta. ¹⁴ Hara ni i do dibaen na angkon togu tioponta haporsayaanta i. Angke adong do Malim Godang na sangap di hita, na dung masuk lalu tu jolo ni Debata -- i ma Jesus Anak Ni Debata. ¹⁵ Angke anggo Malim Godang i nada malim na so dohot mangkilala angka hagaleanta. Ma pola hona uji Ia di sude ragam ni pangalaho, laing songon hita; hum i tutu, nada mardosa Ia! ¹⁶ Hara ni i, pos ma rohanta ulang pola mabiar be hita mandapotkon habangsa parasinirohaan, anso tajagit ibo ni roha dohot dumpangan asi ni roha, na gabe pangurupi di hatiha na dung ditontuhon i.

¹ Sudena Malim Godang, na nipili do i sian tonga-tonga ni dongan jolma, jana dipajongjong markarejo songon wakil ni jolma di adopan ni Debata anso dihaulkon ia angka silehen-lehen dohot angka haul hara ni dosa. ² Laing gale do Malim Godang i di ragam-ragam ni pangalaho, tapi haru songon i pe laing tarbaen ia muse dope marlambok ni roha maradopkon angka halak na so umboto sanga aha jana na lilu pardalananna. ³ Boti hara ni hagaleannia sandiri, angkon laing haulkononnia do haul, nada hum hara ni angka dosa ni bangso i, tapi dohot do hara ni dosania sandiri. ⁴ Nada adong sahalak pe na mambuat hasangapan i tu dirina sandiri, tapi na nipio ni Debata do ia dikarejo i, songon na masa tu si Harun. ⁵ Laing songon i do Kristus. Nada na nipasangapNia diriNa sandiri markite na gabe Malim Godang, tapi na nipasangap ni na mandok tuSia: "AnakKu do Ho! Sadari on ma Au gabe AmangMu." ⁶ Di na asing didok Debata muse do, "Gabe Malim ma Ho salolot-lolotna, mangihutkon horong ni Malim Melkisedek." ⁷ Hatiha di ngolu ni Jesus di tano on, mangangguk godang do Ia tangis martangiang dohot pasahatkon angka pangidoanNia tu Debata, na margogo paluahon Ia sian hamatean. Boti hara ni na mangoloi Ia tu Debata mardongan sangap na gok, gabe ditangihon Debata do pangidoanNia i. ⁸ Haru pe Anak Ia, laing na nipabangkit ni Debata do Ia. ⁹ Jadi dung sanggam Ia, gabe Ia ma haroroan ni haluaan na manongtong di sude halak na burju mangoloi Ia. ¹⁰ Jana na nipabangkit ni Debata do Ia gabe Malim Godang, mangihutkon aturan ni si Melkisedek. ¹¹ Taringot tusi, bahat do sipaboaonnami tu hamu, tapi maol do pajojorkonsa hara ni lambatna anso mangarti hamu. ¹² Satutuna nian, madung hatihana gabe guru hamu, hape angkon laing porlu dope hamu marsiajar tu halak na asing taringot tu ojahan ni angka pangajaran ni Debata. Laing na so tarpangan hamu dope panganon na pir; angkon laing minum susu sajo dope hamu. ¹³ Sanga ise na laing manyusu, tontu nada diastui ia dope ajaran taringot tu na tigor, harana dakdanak dope ia. ¹⁴ Anggo panganon na pir, tu halak na dung magodang do i, harana madung malo ia paasingkon sanga dia na denggan dohot mandok sanga dia na jat.

¹ Hara ni i, tapadiar ma jolo ojahan na parjolo sian ajaran taringot tu Kristus, jana taparayak ma hasanggapan i. Ulang be taulahi mambaen ojahan taringot tu hamubaan ni roha sian pambaenan na so hasaya, jana ojahan haporsayaan tu Debata, ² i ma parsiajaran parmulaan taringot tu pandidion sanga taringot tu na mamayakkon tangan tu halak; sanga pe taringot tu na mulak mangolu sian hamatean bope uhuman na so ra mantak. ³ Jana i do na giot sibaenonta, muda dipaloas Debata. ⁴ Nabaruon madung maringanan halahi di sinondang na sian Debata, jana madung didai halahi hatonggian ni angka pasupasu na sian banua ginjang. Halahi pe madung manjagit Tondi Parbadia. ⁵ Sian pangalaman ni halahi pe diboto halahi do na denggan do hata ni Debata i, jana madung dihilala halahi angka tanda ni kuaso na giot ro i. ⁶ Hape marbalik do roha ni halahi! Bia dope baenon manogu halahi mangulahi anso muba sian angka dosa ni halahi i. Angke na mamparsilangkon Anak Ni Debata i do halahi mangulahi jana mambaen halak na bahat anso dohot mangalayasi Ia. ⁷ Anggo tano na mangincop udan na sai madabu tusia, ditubuhon i do angka suan-suanan na marguna di halak na mangkarejohonsa, dipasupasu Debata do tano i. ⁸ Tapi anggo angka duri dohot angka duhut do na tubu sian tano i, nada adong guna ni tano sisongon i, jana buraan ma i muse jana ujungna nitutungan lopus abis. ⁹ Tapi hamu angka dongan na nihaholongan, haru pe hami dok songon i, anggo taringot tu hamu pos do rohanami adong do angka na dumenggan ditiop hamu satontang tu haluaanmunu. ¹⁰ Nada Debata na so tigor. Nada halupahononNia sanga aha na denggan na nibaenmunu tuSia. Sai na ingotonNia do holong ni roha na nipatuduhonmunu tuSia di bagasan pangurupionmunu na nipasahatmunu maradopkon angka dongan Kristen na asing i. Jana lopus saonnari pe laing dilehen hamu do pangurupion i. ¹¹ Giotnami nian sugari laing ringgas ma hamu, lopus dijagit hamu na niarop ni rohamunu i. ¹² Nada por rohanami gabe losok hamu. Anggo giotnami, mangolu ma hamu songon halak na manjagit sanga aha na nijanjihon ni Debata hara ni haporsayaanmunu tuSia dohot hasobaranmunu paintehonsa. ¹³ Di na marjanji Debata tu si Abraham, marsumpa do Ia tu diriNia sandiri, harana nada adong na gumincat sian Ia. ¹⁴ Didok Ia, "Sasintongna, pasupasuonKu ma ho jana baenonKu ma bahat pomparanmu." ¹⁵ Jadi hara ni sobarna si Abraham paintehon, gabe dijagit ia do na nijanjihon ni Debata tusia. ¹⁶ Harana anggo jolma, marsumpa do i marhite halak na gumodang sian ia. Jadi sumpa i ma hasidungan ni sude parbadaan jana pate ma i di halahi. ¹⁷ Anggo giot ni Debata ulang so pos sajo roha ni halak na giot manjagit na nijanjihonNia, na so ubaon ni Debata be sangkapNia i. Hara ni i ma umbaen na nitambaan ni Debata dohot sumpa tu janjiNia i. ¹⁸ Dua pangalaho na so ra muba; nada margabus Debata di janji dohot sumpaNia! Hara ni i, hita angka na marlinggom tu Debata, adong do di hita jaminan na togu anso tongtong mararop ni roha tu na nipasingkop di hita di hatiha na giot ro. ¹⁹ Arop ni rohanta i ma na gabe sitiopan na togu jana na pasonangkon rohanta di ngolu on, na dung masuk lalu tu pudi ni tire i. ²⁰ Madung ditotas Jesus dalan sibolusonta tusi, jana madung masuk Ia tusi songon Malim Godang di hita salolot-lolotna, di bagasan horong ni Malim Melkisedek.

¹ Raja sian Salem do si Melkisedek on jana malim ni Debata Na Gumincat i. Hatiha mulak si Abraham sian parporangan di na nitaluhonnia angka raja, ro ma si Melkisedek mangalo-alo jana mamasumasu ia. ² Dung i dilehen si Abraham ma tu si Melkisedek saparsampulu ni sude na dapotnia sian parporangan i. (Goar Melkisedek astuanna na parjolo, "Raja Na Adil"; jana hara ni raja sian Salem ia, gabe "Raja Hasonangan" ma astuan ni goarnia.) ³ Na so marama, na so marina do ia, na so martarombo, na so marmula ni ari, jana na so marujung di ngoluna, tapi sobok do ia dohot Anak Ni Debata. Na gabe malim do ia ro di salolot ni salolotna. ⁴ Jadi madung taida dison sanga songon dia godang ni si Melkisedek hara ni sangapnia, salang si Abraham na umpompar bangsonta laing manggarar do tusia saparsampulu ni na dapotnia sian parporangan i. ⁵ Di Tona ni ugamo Jahudi ditontuhon do, ganop halak Israel angkon manggarar do saparsampulu ni sude sinadonganna tu pomparan ni si Levi na gabe angka malim -- astuanna laing tu kahanggi ni halahi sandiri do. Hape pomparan ni si Abraham muse do halak Israel. ⁶ Nada pomparan ni si Levi si Melkisedek, hape laing manjagit do ia saparsampulu bagian sian sinadongan ni si Abraham, jana dipasupasu ia muse si Abraham haru na dung dipasahat angka janji na nilehen ni Debata tu si Abraham sandiri. ⁷ Jadi sanga na bia pe nada tarsoadahon be i, na tumoruk do halak na nipasupasu ulang pado na mamasumasu i. ⁸ Jana na ra mate do halahi, na manjagit saparsampuluan, tapi anggo Ia dilehen do hasaksian, paboa na mangolu do Ia. ⁹ Jadi tardok muse do, si Levi sandiri pe -- di na dohot pomparannia manjagit panggararan ni na saparsampulu bagian i sian halak Israel dohot do manggarar sisaparsampulu bagian i tu si Melkisedek markite-hite si Abraham, di na manggarari si Abraham tu si Melkisedek. ¹⁰ Dibaen di bagasan pamatang ni ompunia dope ia, dompak di aloalo si Melkisedek ompunia i. ¹¹ Antong, sugari sura madung ro hasanggaman i markite-hite hamalimon ni halak levi -- angke di toru hamalimon ni halahi do dijagit halak na bahat Tona i -- aha dope he gunana dipabangkit Malim Godang mangihutkon aturan ni si Melkisedek, jana nada nidok mangihutkon aturan ni si Harun? Sada Malim Godang sian Marga Levi (7:11) ¹² Antong muda muba-uba do hamalimon ni malim, Tona i pe angkon dohot do muba. ¹³ Tuhanta i do na nidok dison. Tapi Ia pe sian marga na asing do, jana na so adong dope jungada sian na samarga on na mangoloi di jolo ni parkaulan i. ¹⁴ Sude do halak mamboto i, na sian Marga Juda do anggo asal ni Tuhanta i; jana si Musa pe nada jungada didok ia marga on muda hatiha manaringoti angka malim ia. ¹⁵ Mur tangkas dope na nitaringotan on, di na ro sada malim na sarupa dohot si Melkisedek. ¹⁶ Na dipajongjong gabe Malim so pola marojahan tu angka aturan na nibaen ni jolma, tapi na marojahan tu ngolu na manongtong. ¹⁷ Angke taringot tuSia didok, "Malim do Ho ro di salolot ni lolotna, mangihutkon aturan ni si Melkisedek." ¹⁸ Nisoadahon do angka tona na jolo i, hara ni na so margogo dohot hara ni na so hasaya. ¹⁹ Dibaen nada adong na ni paujung ni Tona na sanggam i, hara ni i do nipabangkit arop ni roha na dumenggan, markite-hite i do tarpadonok hita tu Debata. ²⁰ Boti muse, nada tulus i, ia so markite-hite sumpa, tutu dibaen do halahi gabe Malim nada markite-hite sumpa. ²¹ Tapi anggo Ia mamake sumpa do i di na niangkat Ia gabe Malim, di na nidok ni Debata tuSia, "Madung marsumpa Tuhan, jana na so ubaonNia be di na nidokNia i, ’Ho do Malim salolot-lolotna.’ " ²² Jadi dao do dumenggan pamudun ni janji na nibaen ni Jesus i. ²³ Adong dope sada nari: Bahat do anggo angka malim na asing i, angke marmatean do halahi gabe nada tarbaen be manoruskon jabatanna i. ²⁴ Tapi anggo Jesus mangolu do salolot-lolotna, jadi nada pinda be tu halak na asing jabatanNia i. ²⁵ Jadi hara ni i sanga andigan pe tarbaen Jesus do paluahon sanga ise halak na ro tu Debata markite-hite Ia. Tarbaen Jesus pe songon i hara ni na mangolu do Ia sapanjangna laho pasahatkon tu Debata angka pangidoan ni halahi. ²⁶ Jadi Jesus i do Malim Godang na porlu di hita. Na badia do Ia; nada adong dapot disi hasalaan sanga dosa aha pe. Madung disirang Ia sian angka jolma pardosa jana dipanaek lopus tu inganan na gumincat sian langit. ²⁷ Nada songon angka Malim Godang na asing i Ia, angkon jolo manghaulkon haul hara ni angka dosana sandiri, dung i hara ni angka dosa ni bangso i. Holan sanoli sajo do Jesus manghaulkon haul, i ma di na nihaulkonNia diriNia sandiri gabe haul. ²⁸ Angka halak na so sanggam do na niangkat ni angka Tona ni ugamo Jahudi gabe Malim Godang. Tapi di pudi ni angka Tona i, dibaen Debata ma janji mardongan sumpa, diangkat Ia do gabe Malim Godang, Anak na sanggam i ro di salolot-lolotna.

¹ Impola ni sude na tahatai on, songon on ma: Adong do di hita Malim Godang na songon i, na juguk di siamun ni habangsa ni Debata Na Gumodang i di banua ginjang. ² Dikarejohon Ia do karejoNia songon Malim Godang di Bilik Na Sun Badia, i ma di Bandar na manongtong i, na nipajongjong ni Tuhan, nada na nibaen ni jolma. ³ Sude Malim Godang, niangkat do i laho manghaulkon na nisombahon sanga haul, tu Debata, laing songon i muse do Malim Godangta i; angkon adong do diSia sanga na aha sihaulkononNia. ⁴ Sugari laing di tano on Ia, nada tarbaen Ia gabe malim, harana madung adong angka malim na manghaulkon haul na nipangido ni angka Tona ni ugamo Jahudi. ⁵ Anggo angka karejo na nibaen ni halahi hara ni hamalimon ni halahi i, satutuna tarsongon sada tudosan dohot gambaran ni na di banua ginjang do i. Ma pola dipaboa Debata i najolo tu si Musa, di na laho pajongjongkon bandar i si Musa. Didok Debata do songon on tu si Musa, "Ingot ma! Angkon baenonmu do sudena i mangihutkon tiruan na nipatuduhon tu ho di ginjang ni dolok i." ⁶ Tapi saonnari madung dijagit Jesus karejo na dao sumurung. Angke dumenggan dope pamudun ni janji na nibaen antara ni Debata dohot jolma markite-hite Jesus na songon Pandomuina, angke na marojahan tu janji na dumenggan dope i. ⁷ Sugari sura nada adong hurangna pamudun ni janji na parjolo i, gabe nada pola porlu be pudunon janji na paduahon. ⁸ Hape madung tardapot Debata hasalaan i di bangsoNa i, gabe didok Debata ma, "Ingot hamu ma, na ro ma hatihana, baenonKu ma janji na imbaru dohot bangsongKu Israel, dohot tu Marga Juda. ⁹ Nada sarupa janji i tu janji na Hubaen dohot ompung ni halahi di na Hutogu halahi haruar sian Mesir. Nada togu ditiop halahi janji na Hubaen dohot halahi, hara ni i ma umbaen na so Hupardulihon halahi. ¹⁰ Tapi saonnari, on ma janji na Hubaen dohot Israel tu angka ari na giot ro: SuankononKu ma angka tona tu bagasan pikiran ni halahi, jana suratkononKu tu ate-ate ni halahi. Debata ni halahi noma Au, jana halahi ma gabe bangsongKu. ¹¹ Sahalak pe nada pola porlu halahi mangajari donganna sabangso, sanga paboahon tu donganna, ’Tanda ma Debata.’ Angke sudena halahi, sian na menekna lopus tu na gumodang, tandaonna ma Au. ¹² SesaonKu ma angka hasalaan ni halahi, jana halupahononKu ma angka dosa ni halahi." ¹³ Jadi di na nidokNia sada ihot-ihot ni janji na imbaru, gabe nada hasaya be dibaen Debata ihot-ihot ni janji na parjolo i; jana sanga aha na so hasaya angkon manigor mago ma i.

¹ Adong do aturan ni ibadat sian ihot-ihot ni janji na parjolo i jana adong muse do inganan paribadatan na nibaen ni jolma. ² Dipajongjong do sada bandar, bagian parjolona i nigoaran do i Inganan Na Badia. Adong ma disi parlampuan, jana adong muse ma meja dohot roti na nihaulkon tu Debata. ³ Dibagasanna i muse, i ma na di balik ni tire na paduahon, adong ma sada bilik na nigoaran Bilik Na Sun Badia. ⁴ Di balik ni i adong do sada inganan na nibaen sian sere laho manutung hamonyan jana adong muse Poti Parjanjian na nilampis sudena dohot sere. Di bagasan poti i adong do sada mangkuk sere na marisi manna, tungkot ni si Harun na dung martunas dohot duangkoping batu tulis panyuratan ni Tona Na Sampulu i na sian Debata. ⁵ Di ginjang ni poti i adong ma dua kerub na manggambarkon na disi do Debata. Mangerbang ma habong ni kerub i di ginjang inganan pamispisan ni mudar, tanda ni hasesaan ni dosa i. Tapi nada tarpatorang sudena i pasada-sada saonnari. ⁶ Songon i ma dibaen pangaturna sude. Ganop ari angkon masuk ma angka malim i tu bagasan bilik na parjolo i laho mandalankon karejo ni halahi. ⁷ Anggo na masuk tu bilik parbagasan ni bandar i hum Malim Godang i sajo do. I pe, hum sanoli sataon do i tola. I pe angkon mamboan mudar do ia patuluskon i, i ma sisombahononkon tu Debata hara ni ia sandiri dohot hara ni angka dosa na nibaen ni bangsonia i sian na so pamotoanna. ⁸ Sian Tona i, tangkas ma diajari Tondi Parbadia hita, salolot laing jongjong dope bandar bagian na di jolo i, na so tarbuka dope dalan masuk di hita tu Bilik Na Sun Badia i. ⁹ Hatiha sisaonnari on ma na nigambarkon ni i; astuanna, anggo angka haul sanga haul pahan-pahanan na nihaulkon i tu Debata, nada tarbaen i paias roha ni halak na manghaulkon i gabe sanggam. ¹⁰ Harana anggo angka upacara na songon i na marpardomuan tu sipanganon sajo do i dohot siinumon bope angka ragam-ragam ni upacara na mambaen ias. Hum angka Tona na tarida do na mardalan i lopus tu hatihana sanga andigan baenon ni Debata haimbaruan. ¹¹ Tapi madung ro Kristus gabe Malim Godang ni angka na denggan na giot ro i. Bandar ingananNia mandalankon tugas songon Malim Godang, i ma bandar na sumurung jana na sumanggam. Nada na nibaen ni jolma; astuanna, nada na sian portibi on. ¹² Hum sanoli sajo do Kristus masuk tu Bilik Na Sun Badia na di bandar i ro di salolot-lolotna. Anggo di hatiha i nada maroban mudar ni hambeng jantan Ia sanga mudar ni anak ni lombu sihaulkonon; hum mudarNia sandiri do dioban Ia jana i ma dalanna dibaen Ia paluahon hita salolot-lolotna. ¹³ Anggo mudar ni hambeng jantan dohot mudar ni lombu jantan bope tiranggong ni haul anak ni lombu i, dipispiskon tu angka halak na hodar do i -- mangihutkon Tona ni ugamo; anso ias halahi. Antong, muda tarpaias mudar i do halahi sian hahodaran na nidok ni ugamo, ¹⁴ mur ma mudar ni Kristus! Markite-hite Tondi na manongtong, dihaulkon Kristus do diriNia sandiri tu Debata gabe haul na sanggam. Dipaias mudarNia i do taroktokta sian angka karejo na so marguna, anso tarbaen hita dohot mangoloi karejo na so marguna, anso tarbaen hita dohot mangoloi Debata na mangolu i. ¹⁵ Jadi hara ni i do dibaen Debata sada janji na imbaru markite-hite Kristus, anso maruli pasupasu na so ra mantak angka halak na nipiohon ni Debata, i ma pasupasu na dung nijanjihon ni Debata. Tulus pe sudena i hara ni na dung adong do na mate, i ma Kristus; jana dipalua hamamateNia i ma halak sian angka hasalaan na nibaen ni halahi dompak margogo janji na parjolo i. ¹⁶ Muda adong surat ni tean-teanan, angkon laing adong do tanda paboa na dung marujung ngolu ni na mambaen surat i. ¹⁷ Angke nada marlaku dope sada surat tean-teanan anggo laing mangolu dope na mambaen surat i. Angkon jolo mate do halakna i anso marlaku suratna i. ¹⁸ Hara ni i do umbaen na nirasmihon dohot mudar janji na parjolo i. ¹⁹ Jolo dipaboa si Musa do sude angka Tona na sian Debata tu bangso Israel sude. Baru ma dibuat ia mudar ni anak ni lombu dohot mudar ni hambeng jantan i, dicampur ia ma i dohot aek, dung i dipispiskon ia ma tu Buku Tona na sian Debata dohot tu sude bangso Israel. Ruput hisop dohot imbulu ni biri-biri na rara tobang do dibaen ia pamispisna. ²⁰ Hatiha na mamispiskon i si Musa didok ia ma, "On ma mudar na pahotkon pamudun ni janji na sian Debata, na angkon sioloanmunu." ²¹ Dung i dipispiskon ia muse ma laing songon nangkin mudar i tu bandar i dohot tu angka panjamaan na nipake marsomba tu Debata. ²² Tutu nian, anggo mangihutkon Tona ni ugamo Jahudi bolas nidok, sasudena sanga aha pe angkon nipaias dohot mudar do; jadi nada tarsesa dosa anggo so adong mudar na niduruskon. ²³ Angka songon i ma dalanna paiaskon angka barang na manggambarkon pangalaho na di banua ginjang. Tapi anggo taringot tu angka na di banua ginjang i sandiri porlu dope angka haul na dumenggan sian angka gambaran i. ²⁴ Harana anggo Bilik Na Sun Badia na nipature ni jolma i hum na manggambarkon Inganan Na Badia na satutuna i do i. Banua Ginjang i do na nimasuhan ni Kristus; disi ma Ia saonnari mangadop tu Debata laho manyarihon hita. ²⁵ Ganop taon do Malim Godang ni halak Jahudi masuk tu Bilik Na Sun Badia na di Bagas Ni Debata, maroban mudar ni sada pahan-pahanan. Tapi anggo Kristus nada marpupu Ia manghaulkon diriNia. Malim Godang di Bilik Na Sun Badia (9:25) ²⁶ Harana muda songon i do, gabe marpupu do Ia manaon parkancitan mamungka sian dung ditompa portibi on. Hape anggo satutuna, saonnari di hatiha na giot marujung on, hum sanoli sajo do Ia ro laho manyesa dosa markite-hite na mangalehen diriNa sandiri. ²⁷ Madung ditotopkon Debata hian, sanoli sajo do mate jolma, dung i diadili Debata noma. ²⁸ Laing songon i do Kristus i, hum sanoli sajo do Ia nihaulkon songon haul laho manyesa dosa ni bahat halak. Ro dope Ia nian paduanolihon tapi nada mamorsan dosa be; na giot paluahon angka jolma na paintehon haroroNia noma.

¹ Dibaen hum halinu ni angka haluaan na giot ro i do na di bagasan Tona i, nada anggo haluaan i sandiri. Hara ni i nada tarbaen Tona i markite-hite angka haul na tongtong dihaulkon ganop taon padenggankon singkop angka na ro tu Debata. ² Sugari na dung tutu situtu ias sian dosa angka halak na marsomba i tu Debata, nada adong be di halahi pangkilalaan na mardosa jana mantak noma halak manghaulkon haul. ³ Hape anggo satutuna, haul na nihaulkon i ganop taon, na pasingotkon jolma i do taringot tu angka dosa ni halahi, ⁴ harana anggo mudar ni lombu dohot mudar ni hambeng i sandiri nada tarbaen i manyesa dosa. ⁵ Hara ni i do di na ro Kristus tu tano on didok Ia tu Debata, "Nada pola dihagioti rohaMu haul dohot haul silehen-lehen; tapi madung diparade Ho sada pamatang di Au. ⁶ Nada dihalomohon rohaMu haul sian pahan-pahanan na nitutung gabe haul sanga angka haul na nisombahon laho manyesa dosa. ⁷ Dung i Hudok ma, ’Dison do Au, o Debata! Ro do Au laho patuluskon hagiotMu songon na tarsurat i di Buku Na Badia taringot tu Au sandiri.’ " ⁸ Mula-mula didok Kristus, "Nada pola dihagioti Ho haul dohot haul silehen-lehen; nada dihalomohon rohaMu haul sian pahan-pahanan na nitutung gabe haul dohot haul na nisombahon panyesa ni dosa." Didok Kristus do songon i haru pe sasude angka haul i nisombahon mangihutkon Tona ni ugamo Jahudi. ⁹ Dung i didok Kristus dope, "Dison do Au, o Debata! Ro do Au laho patuluskon hagiotMu." Jadi hara ni i, disoadahon Debata ma angka haul na honok i jana digonti Ia ma i dohot Kristus gabe haul na imbaru. ¹⁰ Madung dipatulus Jesus Kristus sanga aha na nidok ni Debata baenonNia. Hara ni i ma umbaen na nipaias hita sudena sian dosa markite-hite haul i, i ma Jesus sandiri -- na nihaulkon sanoli sajo ro di salolot-lolotna. ¹¹ Sasude Malim Ni Jahudi angkon mandalankon karejo hamalimon ganop ari, jana marpupu ia manghaulkon angka haul na sarupa. Hape dosa aha pe nada adong tarsesa angka haul i. ¹² Tapi anggo Ia, dung dihaulkon Ia haul na sada i, hara ni dosa, juguk ma Ia salolot-lolotna di siamun ni Debata. ¹³ Jadi saonnari, hum na paintehon sajo do Ia, lopus nipayakkon musuNia sudena gabe sidegean ni patNia. ¹⁴ Jadi sian haul na sada i, gabe sanggam ma dibaen Kristus sudena halak na nipaias sian dosana salolot-lolotna. ¹⁵ Taringot tusi pe dohot do Tondi Parbadia mandok tu hita, ¹⁶ " ’On ma janji na giot baenonKu dohot halahi tu ari na giot ro,’ ninna Tuhan i, ’SuratkononKu ma angka TonangKu tu bagasan roha ni halahi, jana suankononKu ma i tu pikiran ni halahi.’ ¹⁷ ’HalupahononKu ma angka dosa dohot hajahatan ni halahi.’ " ¹⁸ Jadi madung disesa angka dosa i dohot hajahatan i, gabe nada pola be haulkonon haul laho manyesa dosa. ¹⁹ Antong saonnari hamu angka dongan, hara ni mudar ni Jesus i, madung bisa hita masuk tu Bilik Na Sun Badia i. ²⁰ Madung dibuka Ia dalan na imbaru, jana na mangolu do hita markite-hite tire i, i ma pamatang ni Jesus sandiri. ²¹ Jana adong do di hita sada Malim Godang di Bagas Ni Debata. ²² Antong hara ni i, tapadonok ma tu Debata mardongan roha na bulus dohot haporsayaan na tutu tu Debata; bope dohot roha na dung dipaias sian pangkilalaan na sala, bope dohot pamatang na dung nipaias dohot aek na lan. ²³ Togu ma hita marsitiopan tu arop ni rohanta na dung taoku i angke haposan do Debata, patulusonNia do janjiNia. ²⁴ Jana marsipamanatan ma hita sama hita anso tarbaen hita marsiparinggasan patupahon angka na denggan dohot patuduhon holong marsihaholongan. ²⁵ Ulang ma tatinggalkon parlagutanta i, songon na nibaen ni na deba. Angkon mur umburju ma nian hita marsipaingotan sama hita, angke taboto do, ro ne ma Tuhan i. ²⁶ Harana anggo dung dipasahat do tu hita jamita na sian Debata, hape laing tapupu do tasangajo mambaen dosa, gabe nada adong sada haul pe na tarbaen manyesa dosanta. ²⁷ Hum na manjagit pangadilan ni Debata sajo noma hita dohot manjagit hagugurgur ni muruk ni Debata na mangabiskon sanga ise halak na mangalo Debata! ²⁸ Sanga ise na so burju mangoloi angka Tona Ni Debata na nipasahat ni si Musa, nimatehon sajo do i nada adong ampunan, muda tardapot ia marsala disaksihon dua sanga tolu halak. ²⁹ Haru tu halak na songon i, i ma borat ni uhumanna, mur bia muse dope ulaning borat ni uhuman tu angka jolma na songon on: Na mangalayasi Anak Ni Debata, halak na marnayang ni roha mida hamamate ni Kristus na songon jaminan ni janji ni Debata na mangkaholongi Ia. Hilala hamu ma sanga bia dokdok ni uhuman tu angka jolma sisongon i! ³⁰ Angke taboto do sanga ise na mandok songon on, "Au do nampuna pamaloson, Au do na giot mambaen pamaloson!" Jana na mandok muse, "Uhuman ni Tuhan ma bangsoNa." ³¹ Na jorbut situtu do muda madabu hita tu tangan ni Debata Na Mangolu i! ³² Ingot hamu ma sanga na bia pangalahomunu di hatiha na salpu. Anggo di hatiha i, dung ditorangi sinondang ni Debata hamu, bahat do parhancitan ditaon hamu; haru songon i pe laing marsitutu do hamu marjuang. ³³ Huhul hona incak do hamu jana gabe sitontonan di jolo ni halak na bahat. Huhul laing dohot do hamu manaon dohot halahi na manaon songon i, ³⁴ jana dohot do hamu mangkilalahon pardangolan ni angka halak na tarhurung. Jana di na hona rampas sude sinadonganmunu, jop do rohamunu manjagit sasudena i, angke diboto hamu do, laing adong dope di hamu na dao dumenggan na tahan salolot-lolotna. ³⁵ Jadi hara ni i, ulang mandele hamu, angke muda togu do haporsayaanmunu, adong do upa na godang disi! ³⁶ Porlu do sobar hamu, jana muda dung dipatulus hamu hagiot ni Debata, jagitonmunu ma janji i. ³⁷ Angke tarsurat do, "Santongkin nari sajo noma, ro ne ma Ia na giot ro i hian; nada palambat-lambatonNia haroroNia. ³⁸ Jana halakKu na tigor roha i, mangolu do hara ni haporsayaanna, tapi muda adong sian halahi na sumurut, nada jop be rohangKu mida i." ³⁹ Anggo hita nada halak na sumurut sanga na lilu hita. Tapi halak na porsaya do hita jana na dung nipalua.

¹ Haporsayaan i ma jojahan ni roha taringot tu angka na niarop ni roha dohot hapastian taringot tu na so niida dope. ² Hara ni na porsaya, gabe jop do roha ni Debata mida angka jolma narobi. ³ Hara ni haporsayaan, gabe mangarti hita bahaso hata na nidok ni Debata do manjadihon hasiangan on; jadi sanga aha na tarida, sian na so tarida do i tarjadi. ⁴ Hara ni na porsaya, gabe dihaulkon si Abel do tu Debata haul na dumenggan ulang pado haul na nihaulkon ni si Kain. Hara ni haporsayaannia i, dijagit Debata do si Abel gabe songon halak na dumenggan; angke tangkas do i tarida di na nijagit ni Debata na nihaulkonnia i. Madung mate nian si Abel, tapi hara ni haporsayaannia i, gabe mangkobari dope ia lopus tu sadari on. ⁵ Hara ni na porsaya, gabe nada mate si Henokh, tapi dipanaekkon do ia jana dioban tu Debata. Sahalak pe nada adong tarbaen marsuo dohot ia, angke madung diangkat Debata ia. Di Buku Na Badia i tarsurat do na nipasonang ni si Henokh roha ni Debata dompak so diangkat ia. ⁶ Muda so marhaporsayaan sanga ise pe nada tarbaen pasonang roha ni Debata. Angke sanga ise na ro tu Debata angkon porsaya do ia na tutu adong Debata jana lehenon ni Debata do upa tu angka na manjalahi Ia. ⁷ Hara ni na porsaya, gabe dijagit si Noak do barita na nilehen ni Debata tusia taringot tu angka na giot masa muse, na so haidaan dope tanda-tandana. Laing hara ni i muse ma, gabe dioloi si Noak Debata, gabe dipauli ia sada parau na paluahon ia muse rap dohot pangisi ni bagasnia. Jadi gabe dipasala ma portibi on, hape anggo si Noak sandiri didok Debata ma gabe halak na burju hara ni haporsayaannia. ⁸ Hara ni na porsaya, gabe dioloi si Abraham Debata, di na nipio ni Debata ia jana disuru anso kehe tu luat na nijanjihon ni Debata tusia. Dung i kehe do si Abraham so pola diboto ia sanga na giot tudia ia kehe. ⁹ Mardongan haporsayaan tu Debata, songon halak na ro do si Abraham di luat na nijanjihon ni Debata i tusia. Maringanan ma si Abraham disi di bagasan bandar. Laing songon i do si Ishak dohot si Jakob na dung dohot manjagit janji i sian Debata. ¹⁰ Angke tarpainte-inte do si Abraham anso tinggal ia di kota na giot baenon jana na nipauli ni Debata di ginjang ni ojahan na togu. ¹¹ Hara ni na porsaya, gabe maruli pomparan si Abraham dohot si Sara, haru pe na dung matobangtu si Abraham boti si Sara pe na so maruntungan. Pos do roha ni si Abraham laing na gohan ni Debata do janjiNia. ¹² Haru pe di hatiha i songon na so adong be idaon same na mangolu sian si Abraham, hape hum sian ia sandiri sajo do martubuan bahat pomparannia, na so taretong bahatna -- songon bahat ni bintang na di langit dohot horsik na di topi ni laut. ¹³ Di bagasan haporsayaan i, madung mate halahi sude. Nada dijagit halahi dopena janji i, tapi di tatap halahi do i sian na dao. Jadi pos jana jop do roha ni halahi marnidasa, jana dioku halahi do, bahaso pangaranto dohot paisolat do halahi di tano on. ¹⁴ Sanga ise na mandok songon i, tangkas do dipatuduhon halahi, na manjalahi luat na gabe inganan na hot do halahi. ¹⁵ Nada luat na nitinggalkon ni halahi be na nipasari-sari ni halahi. Sugari songon i, jotjot do tarbaen halahi mulak mangulahi tu luat i. ¹⁶ Hape anggo saonnari, luat na dumenggan do na nijalahan ni halahi, i ma banua ginjang. Hara ni i ma umbaen na so pola ila roha ni Debata nigoaran Ia Debata ni halahi, angke madung dipasingkop Debata sada kota di halahi. ¹⁷ - ¹⁸ Laing hara ni na porsaya, di na niuji ni Debata si Abraham, dipasahat si Abraham do si Ishak anakna i nihaulkon gabe haul. Haru pe madung dilehen tu si Abraham anak na nijanjihon ni Debata i; jana haru pe na dung didok Debata taringot tu dakdanak i, "Sian si Ishak on ma jagitonmu pomparan na Hujanjihon i tu ho," haru songon i pe laing rade dope si Abraham pasahatkon anaknia na sasada i. ¹⁹ Angke dihilala si Abraham, tarbaen Debata do pangoluhon angka na mate. Jadi bolas didok, madung dijagit si Abraham mangulahi si Ishak sian hamatean. ²⁰ Hara ni na porsaya, dijanjihon si Ishak do pasupasu tu si Jakob dohot si Esau di hatiha na giot ro. ²¹ Hara ni na porsaya, di na giot mate si Jakob -- disandehon ia ma tu pangkal ni tungkotnia i jana disomba ia Debata -- dilehen ia ma pasupasu tu dakdanak ni si Josep. ²² Hara ni haporsayaan, di na giot mate si Josep, dibaritahon ia do taringot tu haruruar ni halak Israel. Laing ditonahon ia hian do sibaenon taringot tu holi-holinia. ²³ Hara ni na porsaya, gabe ditabunihon natorasna do si Musa tolu bulan honokna dung sorang ia. Diida halahi na denggan do dakdanak i jana nada mabiar halahi mangalo parenta ni raja. ²⁴ Hara ni haporsayaanna, dung magodang si Musa, nada ra ia nigoar anak ni boru ni raja ni Mesir. ²⁵ Gumonan do dihilala ia markancit rap dohot bangso ni Debata ulang pado santongkin mandai hasonangan sian ngolu na mardosa. ²⁶ Dihilala si Musa dao dope ummarga maruli incak-incak hara ni Kristus na nijanjihon ni Debata i ulang pado manjagit sasude arta ni tano Mesir; harana upa di ari na giot ro do na nipainte ni si Musa. ²⁷ Hara ni haporsayaanna, gabe ditadingkon si Musa do tano Mesir so pola mabiar ia mida raja i na topet muruk marsitutu. Torus ditustus ia do dalannia songon na dung niidania Debata na so tarida i. ²⁸ Hara ni haporsayaannia, dipatupa si Musa do Paskah jana dibaen ia parenta, angkon pispiskonon ni halak Israel mudar di pintu ni bagas ni halahi anso ulang dimatehon angka anak siangkaan ni halahi. ²⁹ Hara ni haporsayaan, gabe tartaripari halak Israel do Laut Rara songon na mamolus di tano na mahiang, hape anggo halak Mesir dibondut laut i do di na nicubo ni halahi manyiborang muse. ³⁰ Hara ni haporsayaanna, dung dihaliangi halak Israel tembok ni Jeriko pitu ari honokna gabe matolbak do tembok i. ³¹ Laing hara ni haporsayaan, gabe nada dohot si Rahab dadaboru jalang i mate rap dohot angka na mangalo Debata; angke denggan do dibaen ia manjagit angka pamata-matai ni halak Israel. ³² Antong, dia dope dokkononku? Tarpaboa au do sudena i tapi nada tuk hatiha di au. Na so hupaboa dope si Gidion, si Barak, si Simson, si Jefta, si Daud, si Samuel dohot angka panurirang i. ³³ Hara ni haporsayaanna, ditaluhon halahi do angka harajaan. Na tigor do na nibaen ni halahi, gabe dijagit halahi ma na nijanjihon ni Debata. Dihuntam halahi do baba ni angka singa. ³⁴ Diintopi halahi do api na godang. Malua do halahi marlojong sian baba ni podang. Gale do nian halahi, tapi gabe margogo; mur margogo dope tehe di parporangan, lopus tartaluhon halahi angka parangan ni bangso na asing. ³⁵ Hara ni haporsayaanna gabe dijagit angka dadaboru do angka na matena na mulak mangolu. Tapi adong muse do na mangalehen dirina disiksa lopus mate, jana manjua do halahi nipalua, hara ni na giot maruli halahi di hangongot na dumenggan. ³⁶ Adong ma deba na niincahan, na diparkanciti, dirante jana dipamasuk tu hurungan. ³⁷ Didanggur do halahi dohot batu lopus mate, dilobong do halahi dohot gargaji, dimatehon dohot podang. Madang-adang halahi mamake baju sian bobak ni biri-biri sanga bobak ni hambeng; marpogos do halahi, diparkanciti jana disiksa. ³⁸ Inganan na so tama do portibi on di halahi. Di parhorsihan dohot di dolok-dolok i do halahi madang-adang, jana di bagasan angka liang dohot di angka rigat ni tano i do halahi maringanan. ³⁹ Na godang do hamonangan na dapot ni sudena halahi hara ni haporsayaanna i! Tapi haru songon i pe laing na so nijagit ni halahi dope anggo na nijanjihon ni Debata, ⁴⁰ angke adong dope sangkap ni Debata na dumenggan salaho tu hita. Angkon rap do dohot hita anso gabe sanggam halahi.

¹ Jadi anggo taringot tu hita, bahat sajo do humaliang hita angka saksi! Hara ni i, sasudena na padokdok hita bope dosa na sai lohot tu hita, tatalgangi ma sudena sian hita. Jana marsitutu ma hita manyalpui parlumbaan na di jolonta. ² Tu Jesus ma tatatap, na manogu-nogu hita di bagasan haporsayaan, jana na maroban haporsayaanta i tu hasanggaman. Ditaonkon Ia do mate di hayu parsilang gonti ni jop ni roha na dung diparade diSia, jana juguk do Ia nuaeng di siamun ni habangsa ni Debata. ³ Ingot hamu ma Ia na manaon sai bahat hata partangkangon sian angka pardosa, anso ulang gale hamu, jana ulang mandele rohamunu. ⁴ Angke di paraloanmunu mangalo dosa i, nada jabat dope lopus tiris mudarmunu. ⁵ Jana madung lupa hamu di sipaingot na mandok tu hamu songon tu dakdanak, "Ale dakdanakku, ulang menek rohamu mida pangajaran ni Tuhan i; jana ulang mandele muda dipaingot Ia ho. ⁶ Angke diajari Tuhan i do sanga ise halak na nihaholonganNia, jana diloncing Ia do ganop na niokuNia dakdanakNia." ⁷ Angkon songon pangajaran ni sada ama tu dakdanakna do panjagitmunu muda ro loncing-loncing ni Debata. Adong ma he lakna dakdanak na so jungada diajar amangna? ⁸ Anggo na so dohot do hamu diajar songon pangajarina di sude dakdanaknia, anak gampang do hamu muda songon i, nada anakna kandung. ⁹ Di tano on, adong do amanta. Diajari amanta be do hita, jana tapasangap do amanta. Antong mur ma hape maradopkon Amanta na di banua ginjang i, tontu angkon mur umoloan ma hita tuSia anso mangolu hita. ¹⁰ Marhatiha do pangajaran ni natorasta na di tano on tu hita, hombar tu na denggan na niboto ni halahi. Tapi anggo Debata, diajari do hita laho padenggankon hita, anso gabe badia hita rap dohot Ia. ¹¹ Tutu nian dompak hona ajar hita, nada sonang rohanta manjagit pangajaran i, hum na pahancit roha sajo do i nihilala. Hape dung salpu i, dilehen do di halahi parbatu ni hatigoran, na mangalehen hasonangan. ¹² Hara ni i, pargogoi hamu ma tanganmunu na gale dohot patmunu na humitir-hitir i mardalan! ¹³ Di dalan na hornop ma hamu mardalan, anso ulang tarbalingsu patmunu, tapi mur tu malumna ma. ¹⁴ Usahahon hamu ma anso mardame-dame hamu tu sude halak jana manggogo ma hamu anso hum di Tuhan ngolumunu, harana sahalak pe nada adong na tarbaen mida Tuhan anggo inda songon i pardalan ni ngoluna. ¹⁵ Jagohon hamu ma anso ulang adong sanga ise na morot sian asi ni roha ni Debata; anso ulang adong na gabe duri dohot sihupi di tonga-tongamunu na parohon hasusaan jana na mambaen sego halak na bahat. ¹⁶ Jagohon hamu ma anso ulang adong na gabe siparkamainan sanga na so mangargahon angka pangalaho na badia songon na nibaen ni si Esau. Digadis ia haknia songon anak siangkaan, hum hara ni samangkuk sipanganon. ¹⁷ Diboto hamu do, por do rohania, hape ditulak do ia, angke nada adong be hatiha disia giot paubahon roha, haru pe marilu-ilu matana manjalahi. ¹⁸ Nada pola diadopi hamu songon na masa tu halak Israel najolo. Anggo halahi diadopi halahi do na bolas nijama, i ma Dolok Sinai dohot api na marnyala-nyala i; diadopi halahi do hagolapan, haholomon bope halingsungsung; ¹⁹ saringar ni sarune dohot sora na lobi gogo. Di na nibege ni halak Israel sora i, gogo do pangidoan ni halahi anso ulang be nian mangkuling sora i tu halahi. ²⁰ Angke nada tahan halahi pabege-bege parenta na nipalalu ni sora i. Angke didok sora i do, "Sasudena na mandonohi dolok on, nada marimbar sanga na binatang sanga na ise pe tehe, angkon dangguran do dohot batu lopus mate." ²¹ Sanga aha na niida ni halak Israel i, i noma sogenna jabat didok si Musa, "Mabiar do au jana humitir!" ²² Tapi anggo hamu, Dolok Sion noma na niadopanmunu bope Kota Ni Debata na mangolu, i ma Jerusalem na di banua ginjang dohot surusuruanNa na marribu-ribu. ²³ Sada parsuoan godang do na niadopanmunu -- parsuoan ni angka anak siangkaan ni Debata na dung disuratkon goarna di banua ginjang. Debata do na niadopanmunu, Panguhum ni sude jolma manusia. Adopanmunu do angka tondi ni halak na burju na dung dipasanggam. ²⁴ Diadopi hamu do Jesus pandomui na mambaen janji na imbaru i; diadopi hamu do mudar pamispison na gabe jaminan ni angka na dao dumenggan sian na nijamin ni mudar ni si Abel. ²⁵ Antong, jago ma hamu anso ulang jabat layas rohamunu tuSia na mandok hata i. Salangkan halahi na so manangihon na palalu hata ni Debata di portibi on nada tarbaen marlojong, mur ma hita on na umbege hata na nidokNia sian banua ginjang. Muda nada ra hita manangihonsa, bia dope pambaenna malua hita sian Ia! ²⁶ Mangaronggur do ditano on soraNia hatiha i. Tapi saonnari madung marjanji Ia, "Mangaronggur dope baenonKu sanoli nari, nada hum tano on, tapi dohot do langit." ²⁷ Pandohan "sanoli nari" patuduhon bahaso pasidingon do sasudena na dung nitompa i jana na ra humutur i, anso tinggal ma hum na so ra humutur i. ²⁸ Hara ni na dung tajagit harajaan na so tarhutur i, beta ma tadok tarimakasi jana mangoloi tu Debata mangihutkon angka tona na tama tuSia, mardongan sangap dohot biar. ²⁹ Angke songon api na mangabiskon do tutu anggo Debatanta i.

¹ Tongtong ma jagohon hamu holong maradopkon dongan! ² Ulang pola gamang hamu manjagit dongan na so haru tangkas dope ditanda hamu. Angke di na patupahon na songon i sian na so pamotoan, madung dijagit ia surusuruan di bagasnia. ³ Ingot hamu ma angka halak na tarhurung, laing songon na dohot hamu tarhurung rap dohot halahi. Dohot angka na manaon pambaenan na so patut, ingot hamu ma halahi songon na dohot hamu manaonkon na songon i. ⁴ Dipatuduhon ganop halak ma sangap di parsaripeonna, hara ni i angkon burju do na mardongan saripe tu donganna saripe i. Halak na markamainan dohot na mambaen na so ture adilan ni Debata do i. ⁵ Ulang dirajai hepeng ngolumunu, tapi hasonangkon hamu ma intap ni na adong di hamu. Angke madung didok Debata, "Nada padiaronKu ho jana nada tadingkononKu ho." ⁶ Hara ni i gabe puluk ma hita mandok, "Tuhan do Pangurupi di au, nada mabiar au. Aha ma he na tarbaen jolma tu au lakna?" ⁷ Ulang hamu lupa tu angka pamimpinmunu na dung pasahatkon jamita na sian Debata tu hamu. Paligi-ligi hamu ma sanga songon dia pardalan ni ngolu ni halahi lopus mate jana haporsayai hamu ma Debata songon pangkaporsayai ni halahi di Debata. ⁸ Tongtong do sarupa anggo Jesus Kristus, najolo, saonnari jana ro di salolot-lolotna. ⁹ Ulang ma padiar-diar hamu angka pangajaran na marragam-rupa i mangaliluhon hamu. Angkon denggan ni roha ni Debata do na patogu rohanta, i do na denggan; ulang ma angka paraturan ni sipanganon. Angke angka halak najolo na mangihutkon paraturan i nada adong pola gunana dapot halahi. ¹⁰ Adong do di hita sada inganan laho pasahat haul tu Debata. Jana angka malim na markarejo mangoloi di bagasan bandar i, nada dipatola halahi mangankon haul na adong di ginjang ni parkaulan i. ¹¹ Anggo mudar ni pahan-pahanan na nihaulkon i gabe haul laho manyesa dosa, dioban Malim Godang do i tu Bilik Na Sun Badia di bagasan bandar i; tapi anggo bangke ni pahan-pahanan i sandiri di duru ni bandar i do nitutungan. ¹² Hara ni i ma umbaen na di ruar ni horbangan ni kota Jesus mate laho paiaskon bangsoNa sian dosa markite-hite mudarNia i sandiri. ¹³ Hara ni i, beta ma tadapotkon Ia di ruar ni bandar i jana dohot ma hita niincahan rap dohot Ia. ¹⁴ Nada adong inganan na hot di hita anggo di tano on; inganan tu hatiha na giot ro do na tajalahi. ¹⁵ Hara ni i, sai tapuji-puji ma Debata markite-hite Jesus; i ma haul haluaan tuSia, na tahaulkon sian pandohan na tapajojor dohot pamanganta laho pasangapkon goarNia. ¹⁶ Ulang lupa hamu mambaen na denggan bope na marsiurup-urupan, angke na songon on do haul na pasonangkon roha ni Debata. ¹⁷ Ihutkon hamu ma angka parenta na sian pamimpinmunu jana oloi hamu ma na nidok ni halahi. Angke tongtong do diparrohahon halahi tondimunu jana angkon martanggung jawab do halahi tu Debata. Muda dioloi hamu do halahi, tarbaen halahi ma markarejo di bagasan sonang ni roha; muda inda songon i, humolos ma halahi na karejo i, jana nada adong ro labo sian na songon i di hamu. ¹⁸ Torus ma tangiangkon hamunu hami. Pos do rohanami na denggan do taroktoknami, angke sai ra do hami patuluskon na tigor. ¹⁹ Tarlobi gomos hupangidohon, anso laing tangiangkon hamu ma au. Tangiangkon hamu ma anso tumibu dioban Debata au mangulahi tu tonga-tongamunu. ²⁰ Madung dipangolu Debata Tuhanta Jesus sian hamatean. Hara ni hamamateNia i, gabe Parmahan Bolon ma Ia saonnari di hita na gabe songon biri-biriNia. Laing songon jaminan muse do hamamateNia i taringot tu janji na so ra muba na sian Debata. ²¹ Sai dipasingkop Debata mual ni hasonangan i ma hamu di sasude na denggan i na porlu di hamu laho patuluskon hagiot ni rohaNia. Sai dibaen Debata ma di hita sanga aha giot ni rohaNia markite-hite Jesus Kristus. Tarpuji ma Jesus salolot-lolotna! Amen. ²² Hupaingot ma hamu ale dongan, jagit hamu ma hata sipaingot i, angke saotik do isi ni suratkon tu hamu. ²³ Boto hamu ma si Timoteus donganta i madung malua ia sian hurungan. Muda dung di inganankon ia, obanonku do ia muda ro au manopot hamu sanoli on. ²⁴ Palalu hamu ma tabengku tu sude angka pamimpinmunu dohot tu sude halak na badia. Laing jagit hamu ma tabe ni angka dongan na di Italia. ²⁵ Asi ni roha ma mandongani hamu sude.