GALATIA

GALATIA

¹ - ² Sian Rasul Paulus, dohot sian sude dongan na rap dohot au, tu angka parlagutan na di Galatia. Gabe rasul pe au, nada hara ni na nibaen ni jolma sanga markite-hite jolma, tapi markite-hite Jesus Kristus dohot Debata Ama na dung pangoluhon Ia mangulahi sian hamatean. ³ Asi ni roha ma di hamu dohot hasonangan, sian Debata Amanta dohot sian Tuhan Jesus Kristus, ⁴ na dung mangalehen diriNa hara ni dosanta, laho paluahon hita sian hajahatan saonnari, mangihutkon hagiot ni Debata Amanta i. ⁵ Hamuliaon ma di Debata salolot ni lolotna! Amen. ⁶ Homang do rohangku hara ni hamu! Hara ni haburjuon ni roha ni Kristus do umbaen na dipio Debata hamu, hape manigor dihudukkon hamu do Debata, gabe kehe hamu mangihutkon ’jamita na denggan,’ na asing sian Jamita Na Denggan na sian Debata i. ⁷ Anggo satutuna nada adong "jamita na denggan na asing". Umbaen na hudok pe songon i hara ni na adong do halak marroan parundut pikiranmunu jana na giot mamutar-balikkon Jamita Na Denggan taringot tu Kristus i. ⁸ Sanga ise na manjamitahon ’jamita na denggan’ na asing sian Jamita Na Denggan na hami jamitahon i, sai diburai Debata ma i -- haru pe sian hami haroro ni i sanga pe sian sada surusuruan na sian banua ginjang! ⁹ Songon na hudok nabaruon, hudok muse saonnari: Sanga ise na manjamitahon tu hamu ’jamita na denggan’ na asing sian Jamita Na Denggan na dung dijagit hamu sian hami, buraan ni Debata ma halakna i. ¹⁰ Adong he anso jop do roha ni jolma mida au? Dao ma i! Na pajopkon roha ni Debata do na huparayak. Adong he na giot mambuat roha au tu jolma anso jop roha ni halak mida au? Sugari laing hubaen dope antong songon i na so tutu do au naposo ni Kristus. ¹¹ Angkon botoonmunu do ale dongan, anggo Jamita Na Denggan na hujamitahon i nada sian jolma haroro ni i. ¹² Nada sian jolma hujagit jamita i, jana nada adong sahalak pe na mangajarkon i tu au. Jesus Kristus sandiri do na patangkaskon i tu au. ¹³ Tontu dibege hamu hian do taringot tu ngolungku na salpu i dompak di hajahudian au. Diboto hamu do sanga na bia kejamna hubaen tu parlagutan ni Debata, jana bia karasna au laho manyarsarkonsa. ¹⁴ Anggo taringot tu na mandalankon haporsayaan Jahudi do, husalpui dope sude halak Jahudi na sangoncap dohot au. Marsitutu do au anggo taringot tu angka pangalaho na mardomu tu adat ni angka ompungku. ¹⁵ Tapi hara ni denggan ni roha ni Debata, dipili Ia do au dompak so sorang jana dipiohon Ia do au laho mangoloi Ia. ¹⁶ Dipatidahon Debata do AnakNia i tu au jana markite-hite au anso nijamitahon Jamita Na Denggan taringot tu AnakNa i tu halak na so Jahudi. Nada pola mangido tahi au sanga na tu ise disi. ¹⁷ Nada pola kehe muse au tu Jerusalem mandapotkon angka na dung parjolo rasul ulang au. Tapi tu tano Arab do au kehe, sian i mulak au tu Damaskus mangulahi. ¹⁸ Tolu taon dung muba rohangku baru ma anso manangkok au tu Jerusalem anso marsitandaan dohot si Petrus. Lima bolas ari rap hami disi. ¹⁹ Anggo dohot angka rasul na asing i nada marsuo au. Hum si Jakobus anggi ni Tuhan i sajo do. ²⁰ Tutu do na husuratkon on. Nada margabus au. Di jolo ni Tuhan ma au na mandokkon on! ²¹ Dung i kehe ma au tu angka luat na di Siria dohot na di Kilikia. ²² Lopus tu hatiha i, anggo angka parlagutan ni halak Kristen na di Judea do, nada tangkas dope ditanda halahi au. ²³ Hum hara ni na nibege ni halahi do didok halak, "Bayo na manyiksa hami i na jolo, dijamitahon ia do saonnari haporsayaan na giot abisannia na salpu i." ²⁴ Gabe dipuji halahi do Debata hara ni au.

¹ Dung adong opat bolas taon, manangkok ma au mangulahi tu Jerusalem dohot si Barnabas, jana hami oban muse ma si Titus. ² Huompoti pe kehe tu Jerusalem, hara ni na dung dipatidahon Debata do tu au paboa na angkon kehe au. Jadi di sada pangkataion na buni, jolo mangkobari do au dohot angka halak na idaon songon pamimpin na disi, hupajojor ma tu halahi Jamita Na Denggan na hujamitahon i tu angka halak na so Jahudi. Harana, nada por rohangku gabe sayang boti angka na huhalojahon na salpu i dohot na saonnari. ³ Halak Junani do nian anggo si Titus donganki, tapi nada nipaksa ia anso mangihutkon paraturan ni sunat, ⁴ haru pe bahat angka pangalancap na marsuru ia mambaen songon i. Angka halak na manyisip-nyisipi do i tu hita jana dipaula-ula halahi ma songon na donganta halahi. Disisipi halahi ma masuk tu hita laho manangkasi sanga na bia pangalaho ni haluaan na adong di hita hara ni hasadaonta dohot Kristus Jesus. Na giot paulakkon hita do halahi tu pangalaho na parjolo, i ma na gabe hatoban muse, ⁵ tapi nada ra hami mundur jana tunduk santongkin pe tu halahi, harana hami jago do anso polin Jamita Na Denggan i di hamu. ⁶ Nian, nada pola adong be angka pangalaho na imbaru ditambai angka halak na tarpandang i -- anggo di au nada adong imbar ni i sanga halak na tarpandang halahi sanga nada, harana Debata pe nada siida bohi ni jolma Ia. ⁷ Hape dioku angka halak na tarpandang i do, na nipasahat ni Debata do au laho manjamitahon Jamita Na Denggan i tu angka halak na so Jahudi dos dohot si Petrus na nisuruNa laho manjamitahon Jamita Na Denggan i tu halak Jahudi. ⁸ Harana, Debata na mambaen si Petrus i sanggup gabe rasul tu halak Jahudi, madung dilehen Ia muse do tu au hamaloan anso gabe rasul tu bangso na asing. ⁹ Si Jakobus pe, si Petrus, si Johannes, na gabe songon partunggul di parlagutan i, dioku halahi do na dung dilehen Debata do tu au hak na sada on. Dung i dijalang halahi do si Barnabas dohot au songon tanda ni parale-aleonnami. Jadi satahi ma halahi dohot hami, di tonga-tonga ni angka bangso na so Jahudi ma hami markarejo, jana halahi ma markarejo di tonga-tonga ni halak Jahudi. ¹⁰ Hum on sajo ma i pangidoan ni halahi: Anso hami parrohahon halak na pogos. Jana pangalaho na songon i muse ma jop ni rohangku. ¹¹ Tapi sanoli dompak na ro si Petrus tu Antiokia, hualo do ia dohot tangkas, hara ni na sala pangalahonia. ¹² Mula-mulana sajuguhan ia mangan rap dohot angka dongan na so Jahudi. Hape dung ro angka halak na nisuru ni si Jakobus, dipadao ia ma dirinia sian angka dongan na so Jahudi i. Gabe nada ra be ia mangan rap dohot halahi. Hara ni na mabiar ia maradopkon angka halak na sai mangkagioti anso sude jolma marsunat. ¹³ Dohot muse ma angka halak Jahudi na asing i mangalancap songon pangalaho ni si Petrus i; gabe tarela-ela muse ma salang si Barnabas laho mangalancap-lancap songon halahi i. ¹⁴ Disi huida na so sadalan be parobankon ni halahi tu hasintongan ni Jamita Na Denggan i, manigor hudok ma tu si Petrus di jolo ni sude halak na adong disi, "Muda na halak Jahudi do ho, hape ngolumu songon na so halak Jahudi, bia ma pamaksamu di angka dongan na so marsunat anso mangolu songon halak Jahudi?" ¹⁵ Nian halak Jahudi do hami sian hasosorangnami, jana nada sian bangso na asing na indohan "na mardosa i". ¹⁶ Haru songon i pe hami boto do hum hara ni na mangkaporsayai Jesus Kristus sajo do tarbaen mardenggan mangulahi jolma dohot Debata, jana nada hara ni na mandalankon angka Tona. Hami haporsayai muse do Jesus Kristus, anso mardenggan hami mangulahi tu Debata hara ni haporsayaannami i tu Jesus Kristus; jana nada hara ni na mandalankon angka Tona. Angke anggo hara ni na mandalankon Tona do, sahalak pe nada tarbaen mardenggan mangulahi tu Debata. ¹⁷ Hara ni hasadaonta dohot Kristus, diarop rohanta do anso gabe mardenggan hita mangulahi tu Debata. Tapi haru pe na dung songon i pangalahona angkon laing tardapot do hami "angka pardosa" songon angka jolma na so Jahudi. Adong he ulaning Kristus i do na manjujui hami anso mardosa? Nada songon i! ¹⁸ Angke muda hupajongjong mangulahi na dung hurumpakkon, disi ma hupatuduhon paboa na dung mangalanggar au. ¹⁹ Tapi anggo taringot tu Tona, na mate do au -- dimatehon Tona i sandiri -- anso tarbaen mangolu au di Debata. Madung diparsilangkon au rap dohot Kristus. ²⁰ Anggo na mangolu saonnari on, nada au be i, tapi Kristus noma na mangolu di bagasan diringku. Anggo ngolu ni pamatangkon saonnari, na mangolu sian na mangkaporsayai Anak Ni Debata na manghaholongi au noma i, jana na mangalehen diriNa manghopkop au. ²¹ Nada huambungkon silehen-lehen ni Debata. Muda gabe denggan do mangulahi parsambungan ni Debata dohot jolma hara ni na nidalankon ni halahi Tona i, antong nada adong be gunana mate Kristus.

¹ Hamu ale angka halak Galatia na oto! Ise dehe na mangula-ulai hamu? Madung hupajojor taringot tu hamamate ni Kristus di parsilang i satorang-torangna. ² Paboa hamu ma jolo tu au pangalaho na sada on: Adong he hara ni na mandalankon Tona do umbaen na nijagitmunu Tondi Parbadia nabaruon, sanga hara ni na umbege Jamita Na Denggan na sian Debata dohot hara ni na porsaya tu Kristus do? ³ Biasi gabe songon i otomunu! Ngolumunu na imbaru, madung dipungka hamu i markite-hite Tondi Parbadia, na bia do umbaen na giot paujungonmunu i saonnari markite-hite usahomunu sandiri? ⁴ Antong, parcuma noma he sude na nitaonmunu i? Tontu nada! ⁵ Dipasingkop Debata do TondiNa tu hamu jana dibaen do angka hahomangan di tonga-tongamunu. Adong he hara ni na mandalankon Tona umbaen na nipatupa ni Debata songon i, sanga hara ni na umbege Jamita Na Denggan i dohot hara ni na mangkaporsayai Kristus do? ⁶ Anggo i tudos tu na tarsurat di Buku Na Badia i do, na manaringoti si Abraham, songon on didok, "Dihaporsayai si Abraham do Debata, jana hara ni haporsayaannia i, dietong roha ni Debata ma ia songon sada halak na mardenggan tuSia mangulahi." ⁷ Jadi angkon tangkas do botoonmunu, sanga ise na mangolu di bagasan haporsayaan, i do angka pomparan ni si Abraham. ⁸ Madung diida Buku Na Badia i hian do na dung dilehen Debata dalan anso mardenggan mangulahi angka halak na so Jahudi dohot Debata, muda porsaya halahi tu Debata. Tu si Abraham do parjolo dipaboa Jamita Na Denggan i, di bagasan janji on, "Markite-hite ho, pasupasuon ni Debata ma sandok bangso na di ginjang tano on." ⁹ Porsaya do si Abraham disi, gabe dipasupasu ia. Laing songon i muse do sanga ise na porsaya, pasupasuon ma rap dohot si Abraham. ¹⁰ Sanga ise halak na marguru tu Tona, na mangolu di toru ni bura do halahi sudena. Angke tarsurat do di Buku Na Badia i, "Sanga ise na so burju mandalankon sasudena parenta na tarsurat di Tona i, buraan ni Debata ma halakna i!" ¹¹ Sahalak pe nada adong na nipatigor di adopan ni Debata markite na mandalankon Tona i. Dibaen, "Hara ni haporsayaanna do mangolu angka na tigor roha i." ¹² Tapi anggo angka Tona na nidok nangkin, nada marlahanan tu haporsayaan i. Tapi, "Barang ise na mangkarejohonna, mangolu do ia dibaen i." ¹³ Madung ditobus Kristus hita sian bura ni Tona i, markite-hite na gabe bura hara ni hita, angke tarsurat do, "Na hona bura do sanga ise na hona gantung di hayu parsilang." ¹⁴ Dibaen Kristus Jesus pe songon i anso laing dilehen do tu angka bangso na asing pasupasu na nijanjihon ni Debata tu si Abraham i. Dung i hita na porsaya tu Debata, tola ma manjagit Tondi na nijanjihon ni Debata i. ¹⁵ Hamu ale angka dongan! Hubaen ma tudosanna jolo sian na masa siganop ari di hita. Muda adong sanga ise na mambaen parjanjian, jana madung disahkon janji i, jadi sanga ise pe nada tarbaensa be manyundati janji i bagi manamba-nambai sanga aha pe tusi. ¹⁶ Dibaen Debata do angka janjiNia i tu si Abraham dohot tu angka pomparannia. Nada adong tarsurat di Buku Na Badia i na mandok, "dohot tu angka pomparan ni si Abraham," astuanna bahat bilangan ni halakna. Anggo na tarsurat disi, songon on do, "dohot tu pomparanmu", artina hum sahalak sajo do, i ma Kristus. ¹⁷ Na hudok disi on do: Madung jolo dibaen jana disahkon parjanjian ni Debata. Anggo Tona i na ro dung opat ratus tolu pulu taon, nada tarbaen i be manyundati sanga aha na dung sah hian dibaen, anso gabe sundat janji ni Debata i. ¹⁸ Harana muda marguru tu Tona do bagabaga ni Debata na tu si Abraham dohot tu pomparannia i, antong nada marguru tu na nibagahon ni Debata be i. Hape hum hara ni na dung dijanjihon Debata do tu si Abraham umbaen na nilehen ni Debata i tusia. ¹⁹ Anggo songon i do hape, aha do gunana nilehen Tona i? Anggo alus ni i, songon on do: Songon tamba-tamba do Tona i dilehen laho patuduhon tu jolma sanga aha na margoar dosa. Intap ni haroro ni sahalak sian pomparan ni si Abraham sajo do mardalan anggo Tona i, i ma na dipaboa hian di bagasan janji ni Debata tu si Abraham i. Na nipasahat ni angka surusuruan do Tona i tu jolma markite-hite sada halak. ²⁰ Angkon adong do dua pihak, anso porlu adong sahalak na gabe songon panonga-nongai. Hape anggo Debata nada porlu adong diSia na songon panonga-nongai harana langsung do Debata sandiri mangkarejohonsa. ²¹ Muda songon i, na maralo dehe Tona i tu janji ni Debata? Nada! Harana sugari sura tarbaen Tona i mangalehen hangoluan tu jolma, antong tarbaen do mangulahi mardenggan jolma dohot Debata hara ni Tona i. ²² Hape di bagasan Buku Na Badia i tarsurat do bahaso sasudena jolma manusia madung di toru ni kuaso ni dosa. Jadi hara ni haporsayaan tu Jesus Kristus sajo noma tarlehen tu jolma na nijanjihon i, i ma tu halak na porsaya i. ²³ Salolot so ro dope haporsayaan i, laing torus ma hita dijagoi Tona i; songon na dihurung do hita painte so dipatangkas haporsayaan i. ²⁴ Songon parorot na mamodai hita do Tona i lopus lalu tu Kristus, na patigorkon hita markite-hite haporsayaanta i. ²⁵ Saonnari dibaen madung dapot hatihana tarbaen jolma mangkaporsayai Kristus, gabe nada be paroroton ni angka Tona i hita. ²⁶ Jadi hara ni na nihaporsayaanmunu Kristus Jesus, gabe marsada ma hamu dohot Ia; jadi gabe dakdanak ni Debata muse ma hamu sude. ²⁷ Angke, sude hamu na dung nipandidihon di bagasan Jesus madung diparabit hamu Kristus i. ²⁸ Anggo taringot tuson, nada adong be dibaen mardia imbar halak Jahudi sanga angka halak Junani, hatoban dohot na mardeka, halaklahi dohot dadaboru. Gabe sada do hamu sudena hara ni Kristus Jesus. ²⁹ Muda nampuna ni Kristus do hamu, gabe pomparan ni si Abraham ma hamu. Marhak do hamu manjagit sanga aha na dung nijanjihon ni Debata.

¹ Astuanna i ma: Salolot so magodang dope panean i, saotik pe nada adong imbarnia dohot sada hatoban, haru pe ia sandiri do nian nampuna sude arta i. ² Tapi adong do halak na manjago i dohot na mangurus sude haporluannia lopus dapot hatiha na nitontuhon ni amangnia i. ³ Laing songon i ma hita: Salolot so impas godang dope hita, hita pe laing diparhatoban angka tondi na mangarajai portibi on do. ⁴ Tapi dung dapot hatiha hadenggananna, disuru Debata ma AnakNia i tu portibi on. Na sorang sian sada dadaboru do AnakNa i jana na mangolu di toru ni Tona i. ⁵ Anso laing tartobus Ia muse angka jolma na mangolu di toru ni angka Tona i. Boti anso laing dohot ma hita diangkat Debata gabe dakdanakNia. ⁶ Dibaen dakdanak ni Debata do hamu, disuru Debata muse ma Tondi Ni AnakNia i masuk tu bagasan rohanta, i ma Tondi na pio-pio, "Abba, ale Amang." ⁷ Jadi, nada hatoban be hamu, tapi anak do. Jana dibaen dakdanak ni Debata do hamu, gabe hamu ma panean ni sude sinadongan di Debata. ⁸ Najolo nada ditanda hamu dope Debata, jadi hara ni i ma umbaen na gabe hatoban hamu di angka kuaso na nidok ni halak songon debata hape nian nada tutu Debata. ⁹ Tapi saonnari madung ditanda hamu Debata sanga sumintong dope muda nidok, madung ditanda Debata hamu. Biasi dope laing ra hamu mulak mangulahi mandapotkon angka tondi ni portibi on na gale jana na pogos i? Biasi laing ra dope hamu diparhatoban angka tondi i mangulahi? ¹⁰ Manjujur-jujur ari hamu, dohot bulan, dohot hatiha na denggan, dohot taon. ¹¹ Songon na gamang do au, betak na parcuma do halolojangki dibaen hamu! ¹² Hamu ale angka dongan! Gomos hupangido tu hamu, gabe songon au ma hamu nian. Harana au pe madung sarupa dohot hamu. Nada adong na sala dibaen hamu tu au. ¹³ Tontu laing diingot hamu do sanga na bia pangalahongku di na hujamitahon tu hamu Jamita Na Denggan i di mulana. I ma hara ni na marnyae au. ¹⁴ Anggo disi nada pola magigi hamu mida au, haru pe gabe songon cobaan na godang pangalaho ni pamatangku hatiha i di hamu. Songon surusuruan ni Debata do au di panjagitmunu sanga songon na manjagit Kristus Jesus sandiri. ¹⁵ I noma jop ni rohamunu hatiha i. Hape saonnari, ma di dia hamogaanmunu i? Huoku do anggo di hatiha i salang mangholuk matamunu sandiri rade do hamu anso lehenonmunu di au sugari tarbaen songon i. ¹⁶ Adong he na gabe musumunu do au dietong hamu saonnari hara ni na mandok na tutu au tu hamu? ¹⁷ Anggo angka halak na asing i marsiadu be do i laho manjalahi hamu, tapi nada na denggan maksud ni halahi. Na giot manggotap parsambunganmunu sajo do sian hami anggo giot ni halahi, anso ra hamu marsiadu mangihutkon halahi. ¹⁸ Tutu denggan do nian pangalaho na marsiadu muda di pangalaho na denggan, asal ma tongtong songon i, ulang hum hatiha di tonga-tongamunu au. ¹⁹ Angka dakdanakku na huhaholongi! Saonnari mangulahi do au markancit hara ni hamu. Songon sada ina na manaon na hancit di na laho manubuhon dakdanakna do huhilala saonnari. Angkon laing i do hilalaonku salolot so marrupa dope angka bako ni Kristus di bagasan dirimunu. ²⁰ Lungun sajo do rohangku saonnari sugari di tonga-tongamunu ma au nian anso tarbaen au mandok hata dohot sora na asing tu hamu, angke nada huboto be sanga na bia baenonku tu hamu! ²¹ Tangihon hamu ma jolo na hudok on, hamu angka na giot mangolu di toru ni kuaso ni Tona! Adong he na so jungada do dibege hamu Buku Tona i. ²² Didok disi, adong do dua halak anak ni si Abraham: Inang ni dakdanak na sada, hatoban do, jana inang ni dakdanak na sada nari, i ma na mardeka. ²³ Dakdanak na marina hatoban i, na somal do parsorangna, i ma mangihutkon hagiot ni jolma. Tapi anggo dakdanak na marinahon na mardeka i, na sorang hara ni na nijanjihon ni Debata do i. ²⁴ On ma jolo songon tudosanna. Ina-ina na dua i tarsongon dua parjanjian ma i: Na sada marharoroan sian Dolok Sinai -- i ma si Hagar; angka dakdanaknia pe sorang ma i songon hatoban. ²⁵ Jadi si Hagar ma Dolok Sinai na di tano Arab, jana sarupa do i dohot Jerusalem na saonnari, harana mangolu di bagasan parhatobanan do ia rap dohot angka dakdanaknia. ²⁶ Tapi anggo Jerusalem na di banua ginjang i, i ma boru na mardeka, jana i ma ina di hita. ²⁷ Angke tarsurat do di Buku Na Badia i, "Marjop ni roha ma ho ale ina na so maruntungan na so jungada manubuhon dakdanak! Marmoga-moga ma ho jana marsurak-surak, ale ho na so jungada mangae manubuhon anak! Harana dadaboru na nitadingkon ni halaklahina umbahat dope dapotsa dakdanak ulang pado dadaboru na rap dohot halaklahina." ²⁸ Hamu angka dongan! Hamu sandiri pe dakdanak ni Debata do, na sorang hara ni janji ni Debata; tarsongon si Ishak do hamu. ²⁹ Anggo hatiha i, sai diparkanciti anak na tubu songon na somal i do anak na sorang hara ni kuaso ni Tondi Parbadia i. Saonnari pe laing songon i do. ³⁰ Tapi bia do tarsurat di Buku Na Badia i? Songon on do tarsurat anggo disi: "Paorot ma boru hatoban i rap dohot anakna i, angke nada tola anak ni boru hatoban i sapanganan rap dohot anak na sian boru na mardeka i." ³¹ Jadi anggo hita, nada angka dakdanak ni sada boru hatoban, dakdanak ni boru na mardeka do hita.

¹ Saonnari madung bebas hita, hara ni na dung dipalua Kristus hita! Hara ni i partahankon hamu ma habebasonmunu i jana ulang be ra hamu mangulahi diparhatoban. ² Ingot ma, muda dipangido hamu sunaton hamu, na so adong do sanga aha guna ni Kristus di hamu. Au sandiri si Paulus do na mandok on. ³ Sanoli nari hupaingot sanga ise na mangido marsunat, angkon dalankononna do sudena Tona i. ⁴ Muda sian na mandalankon Tona do diusahahon hamu mardenggan dohot Debata, gabe digotapkon hamu ma parsambunganmunu sian Kristus. Di balian ni hadengganan ni roha ni Debata noma hamu mangolu. ⁵ Hara ni Tondi dohot haporsayaanta, arop do rohanta di hatigoran i. ⁶ Angke muda dung marsada hita dohot Kristus Jesus, nada pola parsoalan be na mangihutkon paraturan ni sunat sanga na so mangihutkon aturan i. Manghaporsayai Kristus sajo noma na porlu, jana tarida ma i di bagasan holong ni rohanta maradopkon halak na asing. ⁷ Madung denggan nian najolo marjuang hamu! Ise dehe na mangantahi hamu anso ulang dipatulus hamu na tigor? ⁸ Inda Debata na manjajang hamu mambaen songon i! ⁹ "Gabe kombang do sude adonan i hara ni ragi na saotik sajo." ¹⁰ Haru songon i pe laing pos do rohangku na so marsalisi pandirianmunu, hara ni na dung marsada hita dohot Tuhan i. Jana laing pos do rohangku, sanga na ise pe na manggaori pikiranmunu, angkon uhumon ni Debata do i. ¹¹ Salaho tu au hamu ale angka dongan! Biasi sai gabe diayak-ayak au, muda laing hujamitahon na porlu dope paraturan ni sunat i? Angke muda hujamitahon dope songon i, tontu nada pola sihagigian be jamita taringot tu silang ni Kristus i. ¹² Gumonan dope angka halak na manggaori pikiranmunu i, manigor diharuarkon. ¹³ Na dung dipiohon do hamu angka dongan anso gabe halak na bebas. Tapi ulang ma hara ni na bebas hamu gabe dalan laho mangoloi giot-giotmunu na sai mardosa i. Tapi marsioloan ma hamu sama hamu hara ni holong ni roha. ¹⁴ Angke sude Tona i dipasada do di bagasan sada parenta na mandok, "Angkon haholonganmu do donganmu jolma songon pangkaholongimu di dirimu sandiri." ¹⁵ Tapi muda marsisarbutan jana marsipanganan hamu sama hamu, jago ma hamu anso ulang marsipasudean. ¹⁶ Na hudok songon on: Mangolu ma hamu marguru tu na niajarkon ni Tondi i, anso ulang dipaolo-oloi hamu be bakomunu humani na jat i. ¹⁷ Harana maralo do bakomunu na jat i tu hagiot ni Tondi Parbadia jana maralo muse do hagiot ni Tondi Parbadia tu bakomunu humani na jat i. Marsialoan do na dua i, gabe inda tarpatulus hamu be sanga aha por ni rohamunu. ¹⁸ Tapi muda Tondi Parbadia do manogu hamu, tontu inda dirajai Tona be hamu. ¹⁹ Tangkas do karejo na nibaen ni bako humani na jat i di bagasan angka pangalaho on: Na markarosuan, harorangan, hahodaron; ²⁰ na manyomba gana-ganaan, sihir, parbadaan, parsalisian, mamikirkon diri sandiri, tahi-tahi na jat, pamola-mola, ²¹ gutgut; marmabuk-mabuk, marpesta-pesta dohot angka na asing. Salaho tusi sudena, hupaingot ma hamu songon sipaingotku na parjolo i, anggo halak sisongon i nada maruli tean-teanan i sian Harajaan Ni Debata. ²² Tapi anggo parbatu ni Tondi i, on do: Holong ni roha, jop ni roha, hasonangan, lambok ni roha, habasaran, lidang ni roha, hatomanan, ²³ martoruk ni roha jana tarrajaisa dirina. Nada adong uhum na mangalo angka aturan i. ²⁴ Angka halak na dung gabe nampuna ni Kristus Jesus, madung dimatehon halahi do bakona humani na jat i. ²⁵ Madung dilehen Tondi Parbadia tu hita hangoluan na imbaru, hara ni i marguru tu Tondi i ma pardalan ni ngolunta. ²⁶ Ulang ma hita manjalahi pamujion ni diri na so hasaya, mangalap-alapi bada dohot na marsiiburuan roha, na sada tu na asing.

¹ Hamu ale angka dongan! Muda tardapot sanga ise mambaen dosa, angkon hamu na sai mangolu mangihutkon Tondi Parbadia i ma paulakkon halahi mangulahi tu dalan na sintong. Tapi angkon mardongan halambohon do hamu patupahon na songon i, jana jamot ma hamu anso ulang jabat hamu hona pandugaan muse. ² Marsiurupan ma hamu mamorsan boban na dokdok i, songon i ma baen hamu patuluskon parenta ni Kristus i. ³ Muda adong na mamikir dirina halak na gabar ia hape nian sisoada do, na manggabusi dirina do ia songon i. ⁴ Marsipareso pangalahona be ma ganop halak sanga na ture do sanga nada. Baru pe anso tola ia marmoga-moga di bagasan rohania hara ni angka pangalaho na denggan na nibaennia i. Indangkon pola sai dipatudos-tudos tu pambaenan ni halak na asing. ⁵ Harana angkon marsiporsan bobanna be do na mangolu i. ⁶ Sanga ise na manjagit pangajaran sian Hata i angkon bagionna do tu guruna sandok na denggan na adong disia. ⁷ Ulang hamu ra dipaoto-oto! Nada sipargonjakkonon Debata! Sanga aha nisuan angkon laing i do sabion. ⁸ Muda disuan halak sanga aha hombar tu bakona humani na jat i, angkon sabionna ma hamamago sian bakonia i. Tapi muda marguru tu panogu-noguon ni Tondi Parbadia ia manyuan, sabionnia ma ngolu na so mantak sian Tondi Parbadia. ⁹ Hara ni i, ulang ma loja hita mambaen angka na denggan; angke muda inda marnaloja hita mambaen angka pangalaho na songon i angkon sabionta do suha ni i di hadudumpang ni hatihana. ¹⁰ Jadi salolot adong dope hatiha di hita, angkon sangahononta do mambaen na denggan tu sude halak, lumobi tu angka donganta sahaporsayaan. ¹¹ Tangkas ma jolo parrohahon hamu bagian na husurat dison, i ma di bagasan angka surat na godang on! ¹² Halak na giot patujolohon dirina di angka pangalaho na tarida, halahi do na mamaksa hamu mangihutkon paraturan ni sunat. Tapi dibaen halahi pe songon i, hum anso ulang dimusui halak Jahudi do halahi hara ni silang ni Kristus i. ¹³ Angka halak na mangihutkon paraturan ni sunat i pe, nada didalankon halahi aturan i. Hape giot ni halahi angkon marsunat ma hamu, anso tarbaen halahi mamuji diri paboa na niihutkonmunu paraturan i. ¹⁴ Tapi anggo au sanga na bia pe nada ra au mamuji-muji sanga aha, asing sian silang ni Tuhanta Jesus Kristus i. Angke hara ni silangNa i madung mate au maradopkon portibi on, jana portibi on pe, madung mate di au. ¹⁵ Disunat sanga na so disunat, inda adong arti ni i, tapi halak na nitompa gabe imbaru, i sajo do na mararti. ¹⁶ Di angka na mangolu songon pandiriankon, dohot di sude halak ni Debata, arop do rohangku lehenon ni Debata hasonangan dohot ibo ni rohaNia. ¹⁷ Dung i muse, ulang be adong nian na mangarsahi au, angke adong do di pamatangku tihas angka tanda na paboahon siihutkon Kristus au. ¹⁸ Sai didongani denggan ni roha ni Kristus ma tondimunu, ale angka dongan. Amen.