EPESUS

EPESUS

¹ Sian si Paulus, rasul ni Kristus Jesus, markite-hite hagiot ni Debata, tu angka halak na badia na di Epesus dohot tu angka na porsaya di Kristus Jesus. ² Asi ni roha dohot hasonangan ma di hamu, sian Debata Amanta dohot sian Tuhan Jesus Kristus. ³ Pinuji ma Debata, Ama ni Tuhanta Jesus Kristus! Dipasupasu Ia do hita dohot sude ragam-ragam ni pasupasu partondion sian banua ginjang, hara ni na dung mardomu i hita dohot Kristus. ⁴ Dompak so dijadihon dope portibi on, madung ditodo Debata hian hita markite-hite Kristus anso gabe Debata sandiri nampuna hita jana na so martihas di adopanNia. Hara ni holong ni roha ni Debata, ⁵ madung ditontuhon Ia humani do na giot baenonNia hita gabe dakdanakNia sandiri markite-hite Jesus Kristus. Jana songon i hian ma na giot baenonNia. ⁶ Pinuji ma Debata hara ni hadengganan ni rohaNia na songon i godang na nipabotohonNia tu hita mardapot-dapot markite-hite Anak haholonganNia i. ⁷ Angke di bagasan Ia, dapotan haluaan do hita markite-hite mudarNia, i ma hasesaan ni dosa mangihutkon godang ni asi ni rohaNia, ⁸ na dung dilehen Ia di hita markite-hite ragam ni habisuhon dohot parbinotoan. ⁹ Sian rohaNia sandiri dipaboa Debata do tu hita rahasia ni sangkapNia. I ma sangkap na dung nitontuhonNia humani sian mulana, angkon markite-hite Kristus do i pasidungonNia. ¹⁰ Isi ni sangkap i, on do: Anso sada sudena na nitompa i, na adong di banua ginjang sanga na di portibi on dohot Kristus na gabe uluna. Jana salosehonon ni Debata ma i muda dung dumpang hatihana. ¹¹ Debata do mangkarejohon sasudena hombar tu hagiotNia dohot haputusanNia sandiri. Sian mula ni mulana madung ditodo Ia hian hita hara ni por ni rohaNia anso markite-hite Kristus gabe halakNia hita, ¹² boti anso hita na dung parjolo mararop ni roha tu Kristus i, mangolu laho mamuji Debata hara ni hagodanganNia i! ¹³ Laing songon i muse do hamu -- hara ni na dung nibegemunu hata hasintongan i, i ma Jamita Na Denggan haluaanmunu i -- di bagasan Ia, dung porsaya hamu, madung dimeteraihon hamu markite-hite Tondi Parbadia na nijanjihonNia i. ¹⁴ Tondi i ma na gabe jaminan paboa na jagitonta ma sanga aha na nijanjihon ni Debata tu halakNia. Jana on ma na papos rohanta paboa na angkon paluaon ni Debata ma angka halakNia. Sipujion do Debata hara ni hagodanganNia i! ¹⁵ Hara ni i, mamungka sian na dung hubege hamu porsaya tu Tuhan Jesus, jana dihaholongi hamu do sude halak na porsaya, ¹⁶ nada marnamantak au mandok tarimakasi tu Debata hara ni hamu sude. Sai tongtong do hugoari hamu muda hatiha martangiang au. ¹⁷ Hupangido anso dilehen Debata ni Tuhanta Jesus Kristus, i ma Debata na sangap i, TondiNia tu hamu. Gabe marbisuk do hamu baenon ni Tondi i, jana patandahononNia ma Debata tu hamu anso ditanda hamu Ia. ¹⁸ Hupangidohon anso torang mata ni rohamunu dibaen Ia, anso diastui hamu sanga aha na patut aropon ni rohamunu sian Debata na mamiohon hamu, bope hamoraon ni hasangapan, siteanon na nitontuhonNia di angka halak na porsaya. ¹⁹ Jana na godang do kuasoNia di hita angka na dung porsaya mangihutkon kuaso hagogoonNia na togu i, ²⁰ na nipakeNia di na pangoluhon Kristus mangulahi sian hamatean jana dilehen Debata diSia pangkat na pargincat situtu rap dohot Debata di banua ginjang. ²¹ Dao dope gumincat pangkat ni Kristus i, sian pangkat ni sasudena pamarenta, sian sasude na markuaso, sian sude pamimpin, sian sude angka tuan dohot sian sanga ise pe na dung maruli pangkat na gincat; na adong di hatiha on sanga di hatiha na giot ro. ²² Ditaluhon Debata do sasudena tu toru ni kuaso ni Kristus, jana dibaen Ia do Kristus gabe ulu ni sasudena na adong di parlagutan ni Tuhan. ²³ Pamatang ni Kristus do parlagutan i. Hara ni pamatang i, gabe sanggam ma parlagutan i hara ni Ia na mambaen sasudena gabe sanggam.

¹ Na mate do hamu najolo hara ni na nilaosimunu angka parenta ni Debata jana mardosai hamu. ² Angka hasomalan ni portibi on do dipaolo-oloi hamu hatiha i; astuanna, tunduk tu angka parkuaso ni harajaan na di awang-awang i do hamu, i ma tondi na laing mangela-ela roha ni angka halak na so ra tunduk tu Debata saonnari. ³ Anggo najolo sarupa hian do hita sudena dohot halahi; mangolu do hita paolo-oloi bako ni hajolmaonta harana sanga aha na pasonangkon pamatangta dohot pikiranta na jahat i, i do na tabaen. Anggo hatiha i, hita pe halak na hona rimas ni Debata muse do, laing songon halak na asing i. ⁴ Tapi na godang do denggan ni roha ni Debata! Songon i ma holong ni rohaNia tu hita. ⁵ Jadi hatiha mate hita di partondionta, hara ni pangalaosionta dipangolu Ia hita mangulahi rap dohot Kristus. Jadi hum hara ni asi ni roha do umbaen na dipalua hamu. ⁶ Hara ni na mardomu i hita dohot Kristus Jesus dipangolu Debata ma hita mangulahi rap dohot Ia, anso laing rap muse ma hita dohot Ia di banua ginjang. ⁷ Dibaen Debata pe na songon i, anso diida jolma i do sanga na bia godangna hadengganon ni rohaNia di hatiha na giot ro, i ma na nipatidahonNia tu hita markite-hite Kristus Jesus. ⁸ Angke hara ni asi ni roha do malua hamu markite-hite haporsayaan, nada hara ni gogomunu sandiri, tapi silehen-lehen ni Debata do i; ⁹ nada sian angka suha ni pambaenanmunu, anso ulang adong sanga ise pe mamuji dirina. ¹⁰ Na nitompa ni Debata do hita on, jana markite-hite Jesus Kristus dipauli Debata hita anso tabaen angka pangalaho na denggan na nipasingkopNia humani di hita. ¹¹ Ingot hamu ma sanga na bia hamu najolo: "Angka na so marsunat" do hamu didok halak Jahudi na mandok dirina angka na marsunat (na nidokna, i ma na dung maruli tanda na nibaen ni jolma di pamatang ni halahi). ¹² Nada mardomu hamu dohot Kristus hatiha i, halak na asing do hamu na so tarmasuk halak Israel. Nada masuk hamu tu na manjagit janji na nibaen ni Debata dohot bangsoNia i. Nada adong sanga aha arop ni rohamunu na mangolu i di tano on jana nada marsomba tu Debata na sintong hamu. ¹³ Hape anggo saonnari, hara ni na dung mardomu hamu dohot Kristus Jesus, na dao hian hamu najolo, madung dipasolkot hamatean ni Kristus i. ¹⁴ Angke Kristus sandiri do na padamehon hita. Dipadomu Ia do angka halak Jahudi dohot angka halak na so Jahudi gabe sada bangso. Parbadaan na songon bolat-bolat na manyirang halahi madung disego-sego Kristus dohot hamamateNia i sandiri. ¹⁵ Angka Tona ni ugamo Jahudi dohot angka parentana i bope angka paraturanna i madung disesa Kristus i sudena anso gabe sada bangso na dua i hian, gabe sada bangso na imbaru, na mardomu dohot Kristus. Songon i ma dalanna dibaen Jesus laho mambaen pardamean i. ¹⁶ Hara ni hamamateNia di parsilang i dipasada Kristus ma bangso na dua i jana dipadame Ia ma halahi tu Debata. Gabe mago ma parbadaan i. ¹⁷ Jadi madung ro Ia manjamitahon hasonangan markite-hite, Jamita Na Denggan i di hamu angka na dao, dohot di angka na donok. ¹⁸ Markite-hite Kristus tarbaen ma hita sudena solkot tu Ama i -- sanga na halak Jahudi sanga pe angka na so Jahudi. ¹⁹ Hara ni i, nada etongon be hamu halak na asing sanga halak na dao. Anggo saonnari rap anggota noma hamu dohot angka na porsaya i. Dongan pangisi ni Bagas Ni Debata do hamu. ²⁰ Hamu pe di ginjang ni ojahan na nipayakkon ni angka rasul dohot angka panurirang do hamu dipajongjong, jana Jesus Kristus ma baen batu parsuhi. ²¹ Ia do na padomu-domuhon sudena parsusun ni bangunan i gabe Bagas Ni Debata na badia, na gabe hapunjungan ni Tuhan. ²² Di na mardomu i dohot Kristus, na nipajongjong do hamu rap dohot halak na asing gabe sada Bagas Ni Debata; maringanan do Debata disi dohot TondiNia.

¹ I ma dalanna umbaen na tarhurung au si Paulus hara ni Jesus Kristus, laho manyarihon haporluanmunu angka dongan na so bangso Jahudi. ² Ninna rohangku madung dibege hamu i, hara ni denggan ni roha ni Debata madung dilehen Ia tu au karejo on hara ni haporluanmunu. ³ Diungkap Debata do rahasia ni sangkapNia jana dipajojor Ia i tu au. (Taringot tuson madung husuratkon i saotik nangkin di ginjang, ⁴ jana muda disise hamu i, botoonmunu ma rahasia taringot tu Kristus i songon na huboto i.) ⁵ Anggo najolo na so unjung do dipaboa-boa rahasia i tu jolma, tapi anggo saonnari madung dipatangkas Tondi i tu angka rasul bope tu angka panurirangNia na badia i. ⁶ On ma rahasia i: Hara ni Jamita Na Denggan i tola ma dohot halak na so Jahudi manjagit angka pasupasu sian Debata; gabe rap anggota ni sada pamatang ma halahi, jana tola ma dohot manjagit sanga aha na nijanjihon ni Debata markite-hite Jesus Kristus. ⁷ Dilehen Debata do tu au karejo na gabe hapunjunganku, i ma karejo laho manjamitahon Jamita Na Denggan i. Hujagit do karejo i markite-hite kuaso ni Debata, na marsitutu markarejo di bagasan diringku. ⁸ Sian sudena na margoar halak na porsaya, au ma i tardok na umbile. Hape laing dipasahat Debata do tu au hasurungan on: I ma, anso hujamitahon Jamita Na Denggan on tu angka halak na so Jahudi paboa na adong do bahat sajo sinadongan na so ra abis di Kristus; ⁹ dohot muse, anso marhite sian au botoon ni halak ma sudena sanga na bia Debata na manompa langit dohot tano on patuluskon sangkap na nirahasiahonNia i sian narobi, tu portibi on. ¹⁰ On do maksud ni Debata disi: anso saonnari, sude na maniop kuaso di awang-awang i mamboto hamaloon ni Debata di sude ragam rupa ni pangalaho markite-hite parlagutan i. ¹¹ Mardomu tu sangkapNia na so ra muba i do sudena i dibaen Debata na nipatulusNia markite-hite Jesus Kristus Tuhanta i. ¹² Dohot dalan mangkaporsayai Kristus bope hara ni na mardomu dohot Ia, dipatola ma hita laho mandonohi Debata mardongan haporsayaan na gok. ¹³ Jadi pangidoanku: Ulang pola ganggu be rohamunu mamikirkon sanga aha pe na hutaon hara ni hamu; laho patamahon na tu hamu do sudena i. ¹⁴ Hara ni i ma umbaen na marsinggang au di adopan ni Ama i. ¹⁵ Sian Ia do manjagit goar sudena ripe na di tano on dohot na di banua ginjang. ¹⁶ Hutangiangkon do anso lomo nian roha ni Debata na sun marmulia i laho patoguhon rohamunu dohot TondiNia i. ¹⁷ Hara ni na porsaya i hamu tu Kristus, sai maringanan ma nian Kristus di bagasan rohamunu, jana mur togu ma ngolumunu hara ni holong ni roha na dung marurat di bagasan hamu. ¹⁸ Hutangiangkon do anso rap dohot halak na porsaya, tarsuhat hamu nian sanga na sadia bidangna dohot ginjangna dohot gincatna bope bagasna holong ni roha ni Kristus i, ¹⁹ na so tarastui sabagas-bagasna anggo marsuhat tu pikiran ni jolma. Sai ditanda hamu ma nian holong ni roha ni Kristus i, anso gok hamu dohot hadirion ni Debata na sanggam i. ²⁰ Markite-hite kuaso ni Debata na marsitutu i markarejo di bagasan dirinta, tarpatupa Debata do dao umbahat dope sian angka na hita pangido dohot na tapikirkon. ²¹ Sai dipasangap parlagutan i ma nian Debata marsundut-sundut markite-hite Jesus Kristus. Tarpuji ma Debata salolot-lolotna! Amen.

¹ Hara ni i ma -- au sada halak na tarhurung, na nihurungkon hara ni na mangoloi Tuhan i -- gomos hupangido tu hamu: Dalani hamu ma ngolumunu marguru tu parobananmunu songon halak na dung dipiohon Debata. ² Angkon martoruk ni roha do hamunu, lambok jana sobar. Patuduhon hamu ma holong ni rohamunu di na marsiurupan na sada tu na asing. ³ Marsitutu ma hamu parayakkon anso tongtong denggan mardalan hasadaon na nitompa ni Tondi Parbadia i, hara ni ngolumunu na mardame. ⁴ Hum sada sajo do pamatang i jana sada do Tondi. Laing songon i muse do hamu dipiohon tu sada arop ni roha na sarupa. ⁵ Hum sada sajo do Tuhan, sada haporsayaan, sada pandidion, ⁶ jana sada sajo do Debata na gabe Ama di sude jolma. Ia do Tuhan ni sude na nitompa i, na markarejo markite-hite sasudena jana na markuaso di bagasan sasudena. ⁷ Dilehen do tu hita be pasupasu marguru tu pangalehen ni Kristus i. ⁸ Di Buku Na Badia i tarsurat do, "Dompak na manaek i Ia tu inganan na gumincat, dioban Ia do bahat na tartaban; jana diparbagihon Ia do angka silehen-lehen tu jolma." ⁹ Jadi muda didok "manaek Ia" astuanna na dung mijur hian do Ia lopus tu inganan na partoru situtu di tano on. ¹⁰ Jana na mijur i, laing Ia muse do na manaek lopus tu inganan na dao gumincat sian langit ni langit an, jabat gabe gok sasudena langit dohot tano on hara ni haroroNia. ¹¹ Ia do "na mambagi-bagihon angka silehen-lehen tu jolma," tu na deba dilehen Ia silehen-lehenNia anso gabe rasul, tu na asing anso gabe panurirang; tu na deba nari muse anso gabe parjamita di Jamita Na Denggan i, jana tu na asing muse dilehen Ia silehen-lehenNia anso gabe panjago ni parlagutan dohot angka guru. ¹² Dibaen Ia sasudena i anso singkop do sudena halak na porsaya laho mangoloi Tuhan bope laho mambangun pamatang ni Kristus i. ¹³ Jadi muda dung songon i gabe sada ma hita sudena hara ni haporsayaan na sada i dohot hara ni pangastuion na sarupa taringot tu Anak Ni Debata i. Jana gabe halak na impas godang ma hita mur honok mur tu sanggamna songon Kristus i. ¹⁴ Jadi nada be dakdanak hita na so marhatontuan jana na taroban-oban tu jae tu julu baenon ni angka pangajaran na marragam rupa na sian halak na bisuk. Lilu do halak dibaen halahi hara ni malo-malo ni halahi. ¹⁵ Ulang songon i! Tapi angkon pabotohononta do na sintong hara ni holong ni roha, anso mur honok mur tu sanggamna hita di sude pangalaho songon Kristus na gabe Uluanta i. ¹⁶ Muda Ia do uluan na mamimpin hita, sude angka bagian ni pamatang i maraturan do sude parsusun ni i, na nipadomu-domu ni angka ruasna be na sada tu na asing. Jadi muda denggan do marsikarejohon karejona be angka anggota i songon na sapatutna, gabe mur magodang ma sude pamatang i jana mur margogo markite-hite holong ni roha. ¹⁷ Jadi husaksihon di bagasan goar ni Tuhan, on do na giot dokkononku dohot patangkasonku: Ulang be songon halak na so mananda Debata ngolumunu na mamikirkon angka na so haru binoto. ¹⁸ Madung manggolap pikiran ni halahi. Umpe ditanda halahi be hangoluan na nilehen ni Debata, angke nada adong be parbinotoan di halahi sanga aha taringot tu Debata. Halak si jogal roha do halahi umbaen na songon i. ¹⁹ Nada adong be hahaila di halahi, gabe dipaolo-oloi halahi do hagiot ni pamatangna jana marroha-roha ma halahi marharorangon. ²⁰ Tapi anggo Kristus na nitandamunu i, nada songon i! ²¹ Madung dibege hamu taringot tuSia! Jana hamu angka na mangihutkon Ia, nada he madung niajaran hamu taringot tu hasintongan na adong diSia! ²² Ambungkon hamu ma bakomunu na honok i, na mur sego dibaen angka hagiotna na mangaliluhon i. ²³ Sugari angkon nipaimbaru ma nian sasudena rohamunu. ²⁴ Sugari nian angkon marbako na imbaru ma ngolumunu na nitompa mangihutkon rupa ni Debata; i ma bako na sintong, na tigor dohot na badia. ²⁵ Hara ni i, angkon burju do hamu sudena na sada tu na asing. Ulang be marsipaoto-otoan, angke rap anggota ni pamatang ni Kristus do hita sudena. ²⁶ Muda muruk hamu, ulang oloi hamu gabe jabat mardosa hara ni na muruk i. Ulang ma muruk hamu sasadari. ²⁷ Ulang lehen hamu hatiha di Sibolis i. ²⁸ Angka panangko, ulang be manangko. Tapi gumonan ma ia markarejo anso dapot ia balanjonia markite-hite dalan na tigor jana anso tarurupi ia halak na hurangan. ²⁹ Muda mandok hata hamu, ulang ma pake hamu angka hata na so ture. Angka pandohan na manogu dohot na mangurupi tu dongan na asing ma pake hamu. Angka pandohan na songon i do na padenggankon tu angka dongan na umbegesa. ³⁰ Ulang ma pahancit hamu roha ni Tondi Parbadia ni Debata. Madung dimeteraihon Tondi i hamu tu ari haluaan i. ³¹ Salpuhon hamu ma sandok hancit ni roha, hosom dohot muruk. Ulang be manyonggahi hamu sanga panyaor-nyaorkon, ulang be adong na margoyak ni roha sanga pangkilalaan na sarupa dohot i. ³² Tapi gumonan ma burju jana lambok hamu sama hamu, bope na marsisesaan sala songon panyesa ni Debata di dosamunu markite-hite Kristus.

¹ Dakdanak na nihaholongan ni Debata do hamu ale angka dongan. Hara ni i, tiru hamu ma Debata. ² Angkon mardai holong ni roha ma nian ngolumunu, laing songon pangkaholongi ni Kristus di hita. Dihaulkon Ia do diriNia hara ni hita, gabe songon silehen-lehen dohot haul na huskus na pasonangkon roha ni Debata. ³ Bangso ni Debata do hamu! Jadi anggo angka na rorang dohot angka parange na so tupa bope na ahut tu diri, nada tama be adong di tonga-tongamunu -- hum tarbortik pe indangkon adong. ⁴ Bope mancaritohon angka carito na rorang bope mandok hata na hodar, sanga pe margonjak-gonjak na so patut, nada patut adong di hamu. Tapi gumonan ma hamu mandok tarimakasi tu Debata. ⁵ Ingot hamu ma on tangkas: Sanga ise na rorang pangalahona, sanga na so ture, sanga na sai ahut tu diri (sarupa tu na marsomba gana-ganaan do pangalaho na songon i), nada tarbaen halak na songon i gabe anggota ni bangso ni Kristus dohot Debata. ⁶ Ulang jabat tarpaoto-oto hamu dibaen angka pangkataion na rumar. Angke angka pangalaho na songon on ma mambaen muruk Debata tu angka halak na so ra mangoloi Ia. ⁷ Jadi, inda tola mardongan hamu dohot angka jolma sisongon i. ⁸ Hamu sandiri pe di hagolapan hian do najolo. Anggo saonnari madung gabe na torang hamu di bagasan Tuhan i. Hara ni i, mangolu ma hamu songon angka dakdanak ni hatorangan i. ⁹ Angke sian na torang i do haroroan ni sasude ragam ni parange na denggan jana na bonar di panatapan ni Debata. ¹⁰ Usahohon hamu ma mananda sanga aha na pasonang roha ni Tuhan. ¹¹ Ulang dohoti hamu angka jolma na mambaen parange na golap angka na so marguna. Gumonanan do gorahon hamu angka na songon i. ( ¹² Angke anggo angka na nibaen ni halahi di na buni, maila ma iba mangkobari i.) ¹³ Sasudena muda dung dipatangkas di na torang, angkon laing tangkas do i tarida. ¹⁴ Jana sasudena na tarida tangkas, na torang do i. Hara ni i do umbaen na didok, "Ngot ma ho na modom i, jana jongjong ma ho sian hamatean! Giot marsinondang ma Kristus di ginjangmu." ¹⁵ Hara ni i, pamanat hamu ma dohot denggan pardalan ni ngolumunu. Ulang songon halak na oto ngolumunu, songon halak na marroha ma hamu. ¹⁶ Parkasayahon hamu ma sude hatiha na denggan na adong di hamu, angka na jahat do na masa di hatiha on. ¹⁷ Ulang hamu maoto, tapi sihiri hamu ma sanga aha giot ni Tuhan i sibaenonmunu. ¹⁸ Ulang mabuk hamu dibaen anggur, harana mambaen sego do i tu hamu. Tapi gumonan ma gok Tondi Parbadia hamu. ¹⁹ Pake hamu ma sian hata ni Masmur, angka ende puji-pujian tu Tuhan dohot angka ende partondion di angka pangkobarionmunu. Marjop ni roha ma hamu jana ria marende mamuji-muji Tuhan i. ²⁰ Mandok tarimakasi ma hamu tu Debata Ama i markite-hite Jesus Kristus Tuhanta i, sanga hara ni aha pe. ²¹ Dung i marsiolo-oloan ma hamu di bagasan biar ni roha mida Debata. ²² Hamu angka dadaboru, oloi hamu ma halaklahimunu be songon pangoloimunu tu Tuhan. ²³ Angke halaklahi i do uluan ni dadaboru i, laing songon Kristus na gabe uluan ni parlagutan i, jana laing Ia muse do paluahon pamatang i. ²⁴ Laing songon parlagutan i na tunduk tu Kristus, songon i muse ma dadaboru i angkon tunduk tu halaklahina di sude pangalaho. ²⁵ Hamu angka halaklahi, haholongi hamu ma dadaborumunu be, laing songon pangkaholongi ni Kristus di parlagutan i jana dilehen Ia do gabe haul diriNia hara ni parlagutan i. ²⁶ Dibaen Kristus do songon i anso tarpaias Ia parlagutan i dohot ajaranNia bope markite-hite aek pandidion, anso tarpasahat Ia muse parlagutan i tu Debata. ²⁷ Jadi songon i ma dibaen Ia anso marsangap parlagutan i jongjong jana polin di adopanNia, nada martihas sanga markerut. ²⁸ Laing songon i ma halaklahi i angkon mangkaholongi dadaboruna songon pamatangnia sandiri. Sanga ise na mangkaholongi dadaboruna, i do na mangkaholongi dirina sandiri. ( ²⁹ Dia ma jungada magigi halak mida pamatangna sandiri. Tapi dipature-ture ia do i jana dijagohon ia laing songon Kristus pature-turehon angka parlagutan i; ³⁰ angke goar-goaran ni pamatang ni Kristus do hita.) ³¹ Di Buku Na Badia i tarsurat do, "Hara ni i do umbaen ditadingkon halaklahi amangna dohot inangna laho parayakkon dadaboruna, jadi gabe sada ma halahi na dua." ³² Bagas do na nidok ni hata i. Tapi domu tu parsambungan ni Kristus dohot parlagutan i do na hudok disi. ³³ Tapi laing adong do hahonaan ni ayat i tu hamu: Dihaholongi ganop halaklahi ma dadaboruna, songon dia ma rupani dirinia sandiri dadaboruna i, jana ganop dadaboru angkon pasangapkon halaklahina.

¹ Hamu angka dakdanak! Dibaen siihutkon Kristus do hamu, oloi hamu ma simatobangmunu, angke songon i do na patut baenonmunu. ² "Pasangap ma amangmu dohot inangmu," i do parenta na parjolo na nilehen mardongan janji; ³ songon na nidok on, "Anso martua ho jana ginjang umurmu di tano on." ⁴ Hamu angka dongan na dung mardakdanak! Ulang ma baen hamu na so patut tu dakdanakmunu anso ulang gabe muruk halahi. Tapi gumonan do ajari hamu halahi di aturan dohot pangajaran ni Tuhan. ⁵ Hamu angka dongan na gabe hatoban! Oloi hamu ma parenta ni tuanmunu na di tano on. Mardongan sangap dohot biar ni roha jana burju ma baen hamu i songon na mangoloi Tuhan i sandiri. ⁶ Ulang ma hum hatiha dijagoi baen hamu songon i; jana ulang ma hum na giot mambuat roha ni jolma sajo. Tapi angkon gabe songon naposo ni Kristus do hamu na mangoloi hagiot ni Debata sian sandok roha. ⁷ Karejohon hamu ma karejomunu i, jana angkon marjop ni roha do hamu mambaen i songon na patupahon tu Tuhan, jana nada hum tu jolma sajo. ⁸ Angkon ingotonmunu do, angkon jagiton ni ganop halak na denggan roha do, sanga na hatoban sanga na anak mardeka, balos ni angka na denggan na nibaenna sian Tuhan i. ⁹ Hamu dongan na gabe tuan! Angkon laing songon i do hamu maradopkon angka hatobanmunu. Antak hamu ma na mamake ondam-ondam. Angkon ingotonmunu do, rap satuan do hamu dohot angka hatobanmunu i, i ma tu Tuhan na di banua ginjang i. Nada mardia imbar halak diSia. ¹⁰ Ujungna, sai margogo ma hamu markite-hite gogo na nijagitmunu sian kuaso ni Tuhan, angke madung sada hamu dohot Tuhan i. ¹¹ Pake hamu ma sude sinjata na nilehen ni Debata tu hamu, anso tarbaen hamu martahan mangalo angka dalan na buni na sian Sibolis i. ¹² Angke nada marporang hita mangalo jolma, tapi na laho mangalo gogo ni angka setan na markuaso di hatiha na jahat on do. Angka tondi na jahat na mangkuasoi awang-awang i do na taalo. ¹³ Hara ni i, saonnari pake hamu ma sasudena sinjata na sian Debata anso muda dapot hatihana ro na jahat i, margogo ma hamu mangalo angka serangan ni musu i. Jana anso lopus tu ujungna dung sidung parjuangan i, laing horas torkis hamu. ¹⁴ Tongtong ma hamu hobas! Pake hamu ma hasintongan songon bobatmunu, dohot hatigoran na songon baju bosimunu. ¹⁵ Haburjuon manjamitahon Jamita Na Denggan taringot tu hasonangan i, angkon i ma nian na gabe songon sipatumunu. ¹⁶ Sanga sadihari, paoban-oban hamu ma haporsayaanmunu na gabe parincemunu; haintopan hamu do sudena bisa ni angka na marapi sian na jahat i. ¹⁷ Jagit hamu ma haluaan na gabe songon kupia baja di hamu, dohot hata ni Debata na songon podang na sian Tondi Parbadia. ¹⁸ Mardongan tangiang mangido tolong tu Debata ma patulus hamu sudena i. Ulang hamu lupa martangiang ganop adong hatihana sanga hombar tu panogu-noguon ni Tondi Parbadia di hamu. Tongtong ma jonggor hamu. Tongtong ma martangiang hamu, manangiangkon sudena halak na porsaya. ¹⁹ Jana laing tangiangkon hamu ma dohot au, anso dilehen Debata di au hata na mardai muda hatiha mangkobari au. Boti anso puluk au pajojorkon rahasia ni Jamita Na Denggan i tu angka jolma. ²⁰ Gabe utusan do au hara ni Jamita Na Denggan i jana di hurungan saonnari. Tangiangkon hamu ma anso puluk au mangkobari taringot tu Jamita Na Denggan i, songon na patut sidohononku. ²¹ Donganta pangoloi na burju di angka parkarejoan ni Tuhan i, i ma si Tikikus, ia ma paboahon tu hamu sudena pangalaho taringot tu au anso diboto hamu na masa tu au dohot karejongku. ²² Hara ni i ma umbaen na husuru ia mandapotkon hamu laho paboahon sanga na bia hami tu hamu sudena laho mangapoi rohamunu. ²³ Sai dilehen Debata Ama, dohot Tuhan Jesus Kristus ma hasonangan dohot holong mardongan haporsayaan tu sude parlagutan i. ²⁴ Sai dipasupasu Debata ma hamu angka dongan sudena na mangkaholongi Tuhanta Jesus Kristus mardongan holong ni roha na so muba-uba.