2 TESSALONIKA

¹ Sian si Paulus, Silvanus dohot si Timoteus tu parlagutan ni halak Tessalonika na di bagasan Debata Amanta, dohot Tuhan Jesus Kristus. ² Asi ni roha dohot hasonangan ma di hamu, sian Debata, Amanta, dohot Tuhan Jesus Kristus. ³ Angkon sai tongtong do hami mandok tarimakasi tu Debata hara ni hamu ale angka dongan. Jana songon i do na patut baenonnami, angke mur porsaya do hamu tu Kristus jana mur marsihaholongan do hamu sude sama hamu. ⁴ Hara ni i do umbaen na hami puji hamu di tonga-tonga ni sude angka parlagutan ni Debata. Sian godang ni rohanami, hami paboa do sanga na bia togu ni rohamunu dohot haporsayaanmunu tu Kristus i di tonga-tonga ni siksaan dohot parkancitan na nitaonmunu. ⁵ Dison ma tarida sanga na bia tigorna Uhum Ni Debata: Manaon parkancitan do hamu hara ni Harajaan Ni Debata, jadi etongon ma hamu songon halak na patut masuk tusi. ⁶ Patupaon ni Debata do angka pangalaho na tigor. BaloskononNia ma sitaonon tu halak na mambaen sitaonon tu hamu. ⁷ Jana tu hamu angka na manjagit sitaonon saonnari -- laing songon i muse tu hami -- lehenon ni Debata ma halumbangan muda dung tarida Tuhan Jesus mijur sian banua ginjang rap dohot angka surusuruanNia na markuaso i ⁸ bope dohot api na marnyala-nyala. Laho manguhumi halak na so mananda Debata, dohot angka na so mangoloi Jamita Na Denggan taringot tu Jesus Tuhanta i do umbaen na mijur Ia. ⁹ Uhumon ma halahi tu hamagoan na salolot-lolotna, dao sian adopan ni Tuhan i bope sian hasangapan ni hagogoanNia. ¹⁰ Muda dung ro Ia di ari i giot pasangapon di tonga-tonga ni halak nabadiaNia, jana gabe hahomangan ma Ia di sude halak na porsaya, harana madung di haporsayai hamu hasaksian na hami boan i. ¹¹ Hara ni i ma dibaen na tongtong hami tangiangkon hamu. Hami tangiangkon do anso nian halak na tumbuk hamu di pamioon ni Debata. Sai diurupi Debata ma hamu hara ni kuasoNa i, anso tarpatulus hamu sudena na denggan na nihalungunkonmunu hombar tu haporsayaan i. Laing hami tangiangkon do, anso nian hara ni kuaso ni Debata, laing dipaujung Ia ma angka karejo na nikarejohonmunu hombar tu haporsayaanmunu i. ¹² Jadi muda songon i, marsangap ma goar ni Tuhanta Jesus Kristus di bagasan hamu, jana hamu di bagasan Ia, mangihutkon asi ni roha ni Debatanta dohot Tuhan Jesus Kristus.

¹ Taringot tu haroro ni Tuhanta Jesus Kristus, bope taringot tu hita na giot palagutonNia anso rap dohot Ia, on ma na hupangido dohot gomos sian hamu: ² Ulang ma manigor ganggu sanga tarsonggot rohamunu hara ni angka barita na mandok, na dung ro Ari Ni Tuhan i. Betak sian na hasusuran do haroro ni barita i sanga na nidok halak sajo do; sanga betak na adong do halak na mandok jungada hami suratkon songon i di suratnami. ³ Sanga na bia pe i, ulang jabat tartipu hamu dibaen halak. Angke painte so dapot Ari i, angkon jolo masa do na songon on: Bahat ma halak marbalik sian Kristus, jana tangkas ma tarida Jolma Na Jahat na dung ditontuhon hian tu api narako. ⁴ Sian ginjang ni rohana, mangalo ma ia jana pagincat diri di ginjang ni sude na nisomba ni jolma, sanga pe sude na nipardebata ni jolma. Salang Bagas Ni Debata pe juguhannia do jana baenonnia ma boa-boa tu halak na bahat sudena, mandok ia sandiri do Debata. ⁵ Adong he na so niingotmunu be na dung hupaboa sudena i tu hamu dompak rap au dohot hamu? ⁶ Tapi anggo saonnari laing adong dope na mangambat ia; jana diboto hamu do sanga na aha i. Sanoli on di hadudumpang ni hatiha na dung nitontuhon, tangkas ma tarida i. ⁷ Madung mamungka markarejo kuaso ni hajahatan na buni i masuk manyisip-nyisipi, tapi laing adong dope pangambati. Jadi muda dung morot pangambati i, ⁸ disi pe anso tarida Jolma Na Jahat i. Jadi bunuon ni Tuhan Jesus ma Jolma Na Jahat i dohot hosa na sian pamangan ni Tuhan Jesus sandiri. Jana roncohononNia ma i dohot sinondang ni haroroNia. ⁹ Sian parkarejoan ni Sibolis, tarida ma Jolma Na Jahat i di bagasan kuasonia na godang. Baenonnia ma angka tanda hahomangan marragam rupa dohot angka pangalaho na luar biasa mardongan sipaoto-oto. ¹⁰ Pakeonnia ma sude bisuk na jahat laho paliluhon angka jolma na giot tu hamagoan. Uhumon ma halahi hara ni na so ra manjagit jana nada ringkot roha ni halahi di barita na sintong i na sian Debata, na tuk nian paluahon halahi. ¹¹ Hara ni i ma umbaen na niparo ni Debata tu halahi sada hagogoon laho paliluhon halahi, lopus porsaya halahi di gabus i. ¹² Jadi gabe hona uhum ma sudena halak na mangkagioti dosa dohot na so porsaya tu na tutu i. ¹³ Hamu angka dongan na nihaholongan ni Tuhan! Angkon sai tongtong do mandok tarimakasi hami tu Debata hara ni hamu, angke sian mulana madung dipili Debata hian hamu gabe halak sipaluaon. Sian parkarejoan ni Tondi Parbadia, di tonga-tongamunu do sudena i tarjadi laho mambaen hamu gabe halak na ias di Debata, boti hara ni haporsayaanmunu tu jamita na tutu i na sian Debata. ¹⁴ Anso tusi ma dibaen hamu na nipiohon ni Debata markite-hite Jamita Na Denggan na hami jamitahon i tu hamu. Dipiohon Debata pe hamu, anso laing dohot do hamu nian marsangap rap dohot Tuhanta Jesus Kristus. ¹⁵ Antong hamu ale angka dongan, sai tongtong ma hamu burju jana togu marsitiopan tu pangajaran na dung hami pasahat tu hamu markite-hite hata bope dohot suratnami. ¹⁶ - ¹⁷ Sai diapoi jana dipatogu Tuhanta Jesus Kristus sandiri bope Debata Amanta i ma rohamunu, anso tarpatulus jana tarjamitahon hamu sanga aha na denggan. Angke dihaholongi Debata Amanta i do hita, jadi hara ni denggan ni rohaNia, diapoi Ia do rohanta dohot apo-apo na manongtong jana dilehen Ia do tu hita arop ni roha na denggan.

¹ Tangiangkon hamu ma hami anso torus rarat barita na sian Tuhan i, jana denggan nian dijagit halak songon na dung tulus tu hamu na salpu i. ² Tangiangkon hamu muse ma anso laing malua hami sian angka halak na jahat dohot na so ture. Angke nada sudena halak ra mangkaporsayai jamita na sian Tuhan i. ³ Tapi haposan do anggo Tuhan i. PatoguonNia do hamu jana jagohononNa sian na jahat. ⁴ Jana pos situtu do rohanami tu Tuhan taringot tu hamu, paboa na nipatulusmunu do sanga aha na hami dokkon tu hamu, jana pupuonmunu do patupahon i. ⁵ Sai dituturi Tuhan ma rohamunu tu holong roha ni Debata dohot tu hasobaron na nilehen ni Kristus. ⁶ Mangasahon kuaso ni Tuhan Jesus Kristus hami paingot ma hamu ale angka dongan, paholang hamu ma dirimunu sian angka dongan na losok, jana na so manangihon pangajaran na hami ajarkon tu hamu. ⁷ Hamu pe diboto hamu do, sanga na bia sapatutna baenonmunu maniru hami. Nada jungada losok hami dompak di tonga-tongamunu. ⁸ Nada hami pangan sipanganon ni halak anggo inda hami garari. Tapi arian na borngin do hami markarejo anso ulang adong na susa sanga ise pe sian hamu hami baen. ⁹ Nada na so marhak hami mangido anso diurupi hamu hami, tapi anso gabe tiruan na denggan do hami di hamu anso ihutkononmunu. ¹⁰ Dompak rap dope hami dohot hamu, anggo aturan on madung hami paboa tu hamu, "Sanga ise na so ra karejo, indangkon ia mangan." ¹¹ Hami dok pe songon i, hara ni na adong do hami bege angka halak na losok deba sian hamu. Hum na manganto-antoi karejo ni halak do halahi, hape umpe adong karejo na nibaen ni halahi. ¹² Mangasahon kuaso ni Tuhan Jesus Kristus, hami sosohon tu angka halak sisongon i jana hami paingotkon tu halahi, anso burju halahi markarejo, marsijalahi balanjona be ma halahi. ¹³ Tapi anggo hamu ale angka dongan, ulang ma nian loja hamu mambaen na denggan. ¹⁴ Betak adong na so ra mangihutkon na hami dok di bagasan surat on, tanda hamu ma halak na songon i jana ulang pardongan hamu halahi anso maila. ¹⁵ Tapi ulang ma songon musu baen hamu halak sisongon i; laing paingot hamu ma halahi songon kahanggi. ¹⁶ Tuhan i do haroroan ni hasonanganta. Sai tongtong ma dilehen Ia hasonangan di hamu markite-hite dalan na marragam. Sai didongani Tuhan ma hamu sudena. ¹⁷ Tabe sian au, si Paulus. Na nisurat ni tanganku sandiri do on. Songon on ma tandana disude angka suratku. ¹⁸ Asi ni roha ni Jesus Kristus, Tuhanta, i ma na mandongani hamu sude.