2 PETRUS

¹ Sian si Simon Petrus, naposo jana rasul ni Jesus Kristus, tu angka na rap dohot hami manjagit haporsayaan i markite-hite hatigoran ni Debatanta dohot Sipalua hita, Jesus Kristus. ² Mur martamba ma di hamu asi ni roha dohot hasonangan markite-hite parbinotoan taringot tu Debata dohot Tuhanta Jesus. ³ Dipio Debata do hita anso dohot hita mangkilalahon hagodanganNa dohot mandai hadengganan ni rohaNia. Mardongan kuasoNia sandiri bope sian na taboto taringot tuSia sandiri, dilehen Debata na mamiohon hita i do tu hita sanga aha na porlu anso mangolu hita songon halak na maribadat tu Debata. ⁴ Songon i ma dalanna dibaen Debata mangalehen tu hita angka pasupasu na godang jana na arga na dung nijanjihonNia hian. Hara ni angka pasupasu i tarbaen ma hamu malua sian angka hagiot na jat na adong di portibi on, jana maruli ma hamu di angka bako ni Debata. ⁵ Antong hara ni i, haburjuhon hamu ma markarejo jana tambahon hamu ma di bagasan haporsayaanmunu haburjuon, jana di bagasan haburjuon parbinotoan. ⁶ Jana di bagasan parbinotoan i tambahon hamu ma hatomanan, di bagasan hatomanan hapohoman, jana di bagasan papohoman hadaulatan tu Debata. ⁷ Di bagasan hadaulatan tu Debata ditambahon ma holong ni roha mida dongan, jana di bagasan holong ni roha mida dongan di tambahon ma holong ni roha mida sude halak. ⁸ Angka pangalaho na songon i ma na porlu di hamu. Muda tibu magodang angka bako na songon i di dirimunu, gabe mur marjop ni roha ma hamu jana mur marguna mamake parbinotoanmunu taringot tu Jesus Kristus Tuhanta i. ⁹ Tapi anggo halak na so marpangalaho na songon i, gabe sompit do parnidaan ni i, nada adong diida ia jana lupa do ia na nisesa angka dosania na salpu i. ¹⁰ Hara ni i hamu ale angka dongan, mur haburjuhon hamu ma markarejo anso mur togu pamioon ni Debata dohot panodoonNia tu hamu. Muda dipatulus hamu songon i, nada jadi be madabu hamu. ¹¹ Jadi muda songon i, lehenonNa ma di hamu hak na gok anso gabe anggota ni Harajaan Na Manongtong, i ma Harajaan Ni Tuhan dohot Sipalua hita, i ma Jesus Kristus na mamarenta salolot ni lolotna. ¹² Hara ni i, angkon laing pupuonku do paingotkon na songon i tu hamu, haru pe nian madung tangkas i di hamu jana na dung situtu hamu porsaya tu hatigoran na sian Debata na nijagitmunu i. ¹³ Salolot mangolu au, na patut do huhilala manyungguli hamu taringot tusi. ¹⁴ Angke huboto do, nada pola honok be marujung ma ngolungku, harana madung tangkas dipaboa Tuhanta Jesus Kristus tu au. ¹⁵ Jana angkon husitutui noma markarejo anso laing adong dalan di hamu marningot angka i mangulahi muda dung jumolo au. ¹⁶ Di na hami patorang sanga songon dia hasangapan ni Tuhanta Jesus Kristus di haroroNia tu hamu, nada sian turi-turian na dibaen ni jolma hami baen hatorangan i. Na dung hami ida do dohot matanami sandiri hasangapan ni Kristus i. ¹⁷ Dohot do hami disi di na nilehen ni Debata Ama i diSia hamuliaan dohot hasangapan i. Tarbege do di hatiha i sora sian Na Sun Marmulia i mandok songon on, "On do Anak haholonganKu; jop do rohangKu mida Ia!" ¹⁸ Hami bege sandiri do sora i ro sian banua ginjang hatiha i di na rap hami dohot Ia di ginjang ni dolok na badia i. ¹⁹ I do umbaen na mur pos rohanami di barita ni Debata na nipaboa ni angka panurirang i. Denggan sajo do sugari dohot hamu mamparate-atehon barita i, angke songon lampu na marsinondang di inganan na golap do barita i jana marsinondang ma i songon sinondang ni bintang di andostorang di bagasan rohamunu. ²⁰ Tapi na ummarga angkon ingotonmunu do on: Barita na sian Debata taringot tu angka na giot tarjadi sanoli on, nada adong hasurirangon marguru tu pandapotniba sandiri. ²¹ Angke nada adong halak na tarbaen paboahon barita na sian Debata taringot tu angka na giot tarjadi saulahon, anggo sian dirina sandiri. Tondi Parbadia sandiri do na mangajari halahi paboahon barita na sian Debata i.

¹ Najolo di tonga-tonga ni bangso ni Debata, ro do angka panurirang pargabus. Laing songon i muse do di tonga-tongamunu, marroan ma angka guru pargabus. Baritahonon ni halahi ma angka pangajaran na so tutu, na pasegohon. Jana diporso halahi do Parkuaso na dung marhancit laho paluahon halahi. Jadi na mangalap magona do halahi disi, na tibu mandondoni halahi sandiri. ² Haru pe songon i laing bahat do halak na mangihutkon parngoluon ni angka guru pargabus na nirajaan ni angka hagiot na so denggan i. Jana parange ni angka guru pargabus i ma na mambaen gabe bahat halak pabilehon Dalan Na Tigor i na nilehen ni Debata. ³ Hara ni na ahut tu dirina, caritohonon ni angka guru pargabus i ma tu hamu angka carito na nibaen ni halahi sandiri anso dapotan untung halahi sian hamu. Tapi anggo panguhuman laho manguhum halahi madung tibu dipasingkop jana hamagoan na dung ditontuhon pe tu halahi madung paintehon tu halahi. ⁴ Haru angka surusuruan na mardosa pe nada dipatola Debata malua sian uhuman, tapi ambungkonon do i tu narako. Pamasuhon do halahi tu inganan na golap anso tarhurung disi lopus tu Ari Paruhuman. ⁵ Songon i muse do dohot tu portibi nahinan; nada patolaon ni Debata malua sian uhuman. Disuru Debata do aek na oto tu portibi on na niinganan ni angka jolma na so ra porsaya tu Debata di hatiha i. Hum si Noak rap dohot sipitu halak nari sajo ma na malua, hara ni na nipaboania barita taringot tu ngolu na tumbuk di roha ni Debata. ⁶ Laing songon i muse do pangalaho ni Luat Sodom dohot Gomora. Hona uhum do luat i dibaen Debata jana ditutung dohot api anso gabe tiruan tu angka na giot masa maradopkon angka jolma na so ra mangkaporsayai Debata. ⁷ Tapi dipalua do anggo si Lot, hara ni na niihutkonnia hagiot ni Debata jana ia pe na dung sun ma marsaknia dibaen parange ni angka jolma na so ra mangihutkon angka parenta ni Debata. ⁸ Di tonga-tonga ni angka jolma na songon i, tarhapit do pangkilalaan ni si Lot na mangolu i, angke ganop ari do diida jana dibege ia angka parange na jat sian halahi. ⁹ Jadi anggo taringot tu angka halak na mangihutkon hagiot ni Tuhan, diboto Tuhan do sanga na bia dalanna baenonNia laho paluahon halahi sian angka ujian na masa tu halahi. Jana taringot tu angka jolma na jahat pe, diboto Tuhan do manabunihon halahi anso hona siksa di Ari Paruhuman, ¹⁰ lumobi ma i angka jolma na mangoloi angka hagiot na pahodarkon dirina, jana mangincahi harajaan ni Tuhan i. Puluk-puluk do angka guru pargabus i jana ginjang-ginjang do roha ni halahi; nada pola alang roha ni halahi mangalayasi Na Sangap i. ¹¹ Haru angka surusuruan na gumogo jana na umbahat i kuasona ulang guru-guru pargabus i, nada dituhas halahi angka mahluk na sangap na di banua ginjang i di jolo ni Tuhan. ¹² Hape anggo angka guru pargabus i, songon binatang na so marakal do halahi, na tubu sian bakona, anso nitangkup jana nisambol. Inda marpikir halahi; na nionjar ni bakona sajo do na nibaen ni halahi, gabe incak-incak sajo ma didok halahi laho mangalo sude angka na so niastuan ni halahi. Hara ni angka parange ni halahi sandiri, angkon magete halahi songon binatang panyoro. ¹³ Songon balos ni pambaenan ni halahi na jahat i, angkon mardangol ma halahi. Anggo pangalaho na pasonangkon roha ni halahi, i ma na mambaen sanga aha sajo di arian na papuaskon hagiot ni pamatang ni halahi. Muda juguk halahi rap dohot dongan di parpestaan, gabe jatjat do goar ni dongan baenon ni halahi jana marlayas, angke mabuk do halahi di sude parange ni halahi na so denggan. ¹⁴ Angke na so marnaloja do halahi mambaen dosa, jana mangaligi dadaboru ma giot ni halahi dohot mata na sai giot markamainan. Jana sanga ise na gale haporsayaanna, hona jorgong ma i baenon ni halahi. Madung somal roha ni halahi di angka hagiot na so denggan. Angka jolma na hona bura do halahi! ¹⁵ Gabe lilu do halahi hara ni na so ra halahi mangihutkon dalan na tingkos. Dalan na nibolus ni si Bileam anak ni si Beor nahinan, i do diihutkon halahi. Na sai por sajo do roha ni si Bileam mida upa ni pambaenan na jat. ¹⁶ Tapi manjagit sipaingot na pir do ia hara ni hajahatannia i, di na mandok hata songon jolma halodenia na so malo mangkobari i laho mangantak haotoan ni panurirang i. ¹⁷ Songon mual na mate do angka guru pargabus i jana songon ombun na niombus ni halingsungsung. Madung diparade Debata do di halahi inganan na golap marimpot-impot. ¹⁸ Sian angka pangkobarion ni halahi na mardongan lancap jana na rumar i dipake halahi ma hagiot na jat laho mangaronjomkon halak sanga ise na baru malua sian angka na mardalan dihaliluon di ngoluna. ¹⁹ Dijanjihon angka guru pargabus i ma haluaan di halahi, hape halahi sandiri pe na niparhatoban ni angka hasomalan na mangagohon jolma do -- angke sanga ise na nitaluhon ni sanga aha, hatoban ni na manaluhon i do i. ²⁰ Muda dung ditanda sanga ise Tuhan i dohot Sipaluanta, Jesus Kristus i, jana hara ni i madung malua ia sian angka na marpardomuan tu portibi on na manyegohon parange ni jolma, hape tarjorat muse ia mangulahi jana ditaluhon angka pangalaho ni portibi on, ujungna gabe jumatjat dope na masa tusia ulang pado na parjolo i. ²¹ Na gumonan hian do indangkon jungada ditanda angka jolma na songon i dalan na tigor na sian Debata i, ulang pado ditanda halahi hape dung salpu i nada ra halahi mangoloi angka parenta na nilehen ni Debata tu halahi. ²² Sude na nibaen ni halahi tudos do tu pandohan on, "Mulak do anjing mangan uta-utana," dohot, "Mulak marluntak do babi diparguluanna."

¹ Hamu angka dongan na nihaholongan! On ma suratku na paduahon tu hamu. Di suratki na dua i, giot sunggulanku do rohamunu na denggan i. ² Husosoi hamu anso diingot hamu mangulahi angka hata na nidok ni angka panurirang ni Debata nahinan, dohot parenta ni Tuhan, Kristus na nipasahat tu hamu markite-hite angka rasul. ³ Parjolo angkon diboto hamu, di ari na parpudi marroan ma angka jolma na mardalan mangihutkon giot-giot ni rohana sandiri. Incahan ni halahi ma hamu ⁴ dokkonon ni halahi ma songon on, "Di dia do janji taringot tu haroroNia i? Madung pola marmatean angka ompunta, hape laing songon-songon i sajo do sandok na adong mamungka sian mula ni tano on!" ⁵ Sangajo na so ra do halahi umbotosa paboa na nitompa ni Debata do langit dohot tano on narobi markite-hite hata ni Debata; tano on pe sian aek do ditompa jana mardongan aek; ⁶ jana laing dohot aek i muse, diabiskon Debata portibi si narobi i, i ma dohot aek na oto. ⁷ Tapi anggo langit dohot tano na saonnari on, i ma na giot abiskonon dohot api saulahon, dipauli-uli Debata dope i laing markite-hite hataNia anso nisimpan lopus dapot hatihana niuhuman jana nimatehon sudena angka jolma na so porsaya tu Debata. ⁸ Tapi na saragam on nada tola lupa hamu: anggo di parnidaan ni Debata nada adong asing ni na sadari dohot na saribu taon -- sarupa do i dua-dua. ⁹ Nada tarlambat Debata mangalehen sanga aha na nijanjihonNia songon na nipikiran ni deba halak. Tapi sobar do Ia paadop-adop hamu, angke sahalak pe nada dihagioti Ia mago. GiotNia ulang so muba nian sude roha ni jolma sian angka dosana be. ¹⁰ Tapi anggo Ari haroro ni Tuhan na padua nolihon i, songon haroro ni panangko do i. Anggo di Ari i mago ma langit mardongan sora na gogo, jana mosok ma sude angka na adong di langit jana mago muse ma tano on dohot sude isina. ¹¹ Antong, anggo na giot segohonon do sudena i, angkon gabe na badia ma ngolumunu jana marpangoloion tu Debata, ¹² salolot painte-intehon jana na patibuhon haroro ni Ari Ni Debata i hamu. Abis ma mosok sudena di Ari i sandok langit i, jana hara ni milasna gabe malala ma gabe songon aek sandok na adong di langit i. ¹³ Tapi na painte-intehon na nijanjihon ni Debata do hita, i ma langit na imbaru dohot tano na imbaru. Disi ma dapot na tigor salolot-lolotna. ¹⁴ Hara ni i hamu angka dongan na nihaholongan, di na painte-intehon Ari i hamu, situtui hamu ma mangkarejohon anso ulang mardosa be hamu jana martihas di jolo ni Debata. Jana ulang so denggan pardomuanmunu tu Debata. ¹⁵ Etong hamu ma hasobaron ni Tuhanta i na mangalehen dalan tu hita anso dohot hita malua. Taringot tusi pe, nada he madung dibaen si Paulus surat tu hamu? Mardongan habisuhon na nilehen ni Debata do dibaen ia surat i. ¹⁶ Di sude suratnia i, sai dipaboa si Paulus do taringot tusi. Tutu nian, adong do piga-piga pangalaho na maol astuan di bagasan suratnia i. Jana angka halak na so togu haporsayaanna dohot na so angarti di surat ni si Paulus i, gabe dipabalik-balik halahi do na nisuratkon ni si Paulus i. Deba sian na tarsurat di Buku Na Badia i laing songon i do dibaen halahi. Pangalaho ni halahi do mambaen mago halahi. ¹⁷ Tapi anggo hamu angka dongan na nihaholongan, madung diboto hamu taringot tusi. Hara ni i, jonggor ma hamu, anso ulang jabat tarela-ela hamu tu haliluon ni angka halak na so mananda parenta ni Debata, anso ulang madabu hamu sian ojahanmunu i. ¹⁸ Sai mur pangkilalahon hamu ma hadengganan ni roha ni Tuhan, Sipaluanta i, i ma Jesus Kristus, jana sai mur tangkas ma nian ditanda hamu Ia. Tarpuji ma Ia saonnari bope ro di salolot-lolotna. Amen.