2 KORINTUS

¹ Surat sian si Paulus, rasul ni Kristus Jesus markite-hite hagiot ni Debata, dohot sian donganta si Timoteus, manopotkon parlagutan ni Debata na di Korintus, dohot sude dongan sahaporsayaan na di Akaya. ² Asi ni roha ma di hamu dohot hasonangan sian Debata Amanta dohot sian Tuhanta Jesus Kristus! ³ Pinuji ma Debata Ama ni Tuhanta Jesus Kristus. Ia ma Ama na sun denggan rohaNa jana Ia do Debata na mangalehen pangapoion ni roha tu jolma manusia. ⁴ Diapoi Ia do rohanami di bagasan sasudena hasusaan na hami bolus, anso tarapoi hami muse ma roha ni halak na di bagasan hasusaan markite-hite gogo na hami jagit i sian Debata. ⁵ Angka hasusaan na nitaon ni Kristus i pe, madung bahat hami taon. Hara ni i do umbaen na mur togu rohanami markite-hite Kristus. ⁶ Muda hami taon hasusaan, laho patoguhon rohamunu do i, anso malua hamu. Muda mur togu rohanami, gabe dohot do hamu dipatogu jana gabe sobar hamu di bagasan angka hasusaan songon na hami taon i. ⁷ Nada jungada ganggu rohanami taringot tu na hami arop sian hamu, angke hami boto do, na dohot do hamu susa rap dohot hami. Jana hara ni i ma umbaen na gabe dohot hamu dipatogu. ⁸ Hamu ale angka dongan! Giotnami sugari diboto hamu ma nian hasusaan na hami taon di Luat Asia. Madokdoktu do hasusaan na hami tanggung i manyompiti rohanami, jana nada adong be arop ni rohanami tarbaen mangolu; ⁹ songon na dung mate niuhuman do pangkilalaannami. Tapi anso ulang marpangunsandean tu dirinami sandiri do hami umbaen na tarjadi songon i, tapi anso tu Debata na pangolu halak na mate i ma. ¹⁰ Ia do na palua hami sian parmaraan godang na giot mamatehon i. Jana laing paluaonNia do hami tu angka ari na giot ro, angke tuSia do hami mararop ni roha. ¹¹ Dibaen dohot do hamu mangurupi hami markite-hite tangiangmunu, anso bahat halak mandok tarimakasi hara ni pasupasu na hami jagit markite-hite bahat ni tangiangmunu tu hami. ¹² Anggo na pagodang rohanami on do: Dipapos taroktoknami do rohanami taringot tu sude na hami karejohon di tano on -- lumobi na marpardomuan tu hamu -- sian roha na ias jana na polin na sian Debata do hami baen i sudena, nada sian habisuhon ni portibi, tapi sian asi ni roha ni Debata do. ¹³ Anggo na hami suratkon tu hamu, hum angka na tarsise dohot na haastuan hamu sajo do. Saonnari nada haastuan hamu hami satangkas-tangkasna, tapi laing arop do rohangku muse gabe tangkas botoonmunu taringot tu hami. ¹⁴ Jadi muda ro Tuhan Jesus muse, moga ma hamu hara ni hami songon moga ni rohanami di hamu. ¹⁵ Hara ni pos ni roha na songon i ma di mulana i gabe hupasada rohangku laho manopot hamu anso dapotan pasupasu hamu dua lompit. ¹⁶ Giot topotonku do hamu nian laho kehe au tu Makedonia jana maradian muse ma au di hamu on laho mulak, anso tarurupi hamu au patoruskon pardalananku laho tu Judea. ¹⁷ Tapi nada tulus songon i; antong, na patuduhon na so hot ma he pikiranku disi? Di na mambaen sangkap i, marguru tu giot-giotku sajo dehe au lakna mambaen i, santongkin, "Olo", santongkin nari, "Inda"? ¹⁸ Husumpahon ma tu Debata na sintong i, anggo janjingki tu hamu nada, "Olo" sanga "Inda". ¹⁹ Harana anggo Jesus Kristus, Anak Ni Debata na nijamitahon ni si Silvanus, si Timoteus dohot au sandiri tu hamu nada halak na "Olo" sanga "Inda". Hum alus na "Olo" sajo do diSia. ²⁰ Angke markite-hite Ia madung didok Debata, "Olo" taringot tu sude na dung nijanjihonNia. Hara ni i ma umbaen na tardok hita, "Amen" tu Debata hara ni Jesus Kristus. Anso nipasangap ma Debata. ²¹ Debata sandiri do na mambaen hami dohot hamu gabe togu marsada dohot Kristus; laing Ia muse do na mamiahi hita. ²² Domu tusi, madung dilehen Ia tu hita tanda paboa na Ia nampuna hita jana dilehen Ia maringanan TondiNia di bagasan rohanta na gabe jaminan ni sasudena na nipasingkopNia i di hita. ²³ Tapi hupio do Debata gabe saksingku disi -- harana diboto Ia do isi ni rohangku dibaen na so tulus pe au kehe tu Korintus, hara ni na so ra do au paarsak rohamunu. ²⁴ Nada pola hupaksahon sanga na aha tu hamu taringot tu sihaporsayaanmunu, harana na dung porsaya situtu do hamu. Hum na rap markarejo do au dohot hamu anso mur marjop ni roha hamu.

¹ Jadi hara ni i madung huputuskon na so ro be au manopotkon hamu anggo na gabe mangarsahi rohamunu. ² Harana muda marsak hamu hara ni au, gabe ise muse be na mangapoi au, anggo inda halak na hupaarsak i? ³ Hara ni i do umbaen na husuratkon songon i tu hamu. Nada ra au ro manopot hamu anso marsak, harana hamu do na sapatutna angkon pajop rohangku. Harana pos do rohangku, muda marjop ni roha au, dohot do hamu sude marjop ni roha. ⁴ Di bagasan arsak dohot dokdok ni pangkilalaan jana mardongan ilu do au mambaen surat on tu hamu. Hudok pe songon i nada anso marsak hamu, tapi anso diboto hamu do holong ni rohangku maradopkon hamu. ⁵ Muda adong sanga ise na dung mambaen arsak ni roha on sudena, nada tu au dibaen ia songon i, tapi tu hamu sude do -- anso ulang marlobian na hudok i -- sanga tu deba sian hamu. ⁶ Anggo tu halak na songon i pangalahona, tuk ma holau uhuman na dung somal na nidalankonmunu i baen hamu tu halakna i. ⁷ Saonnari angkon ampunanmunu ma ia jana sosoanmunu mangulahi anso ulang mamarsaktu ia gabe mandele. ⁸ Hara ni i, hupangido tu hamu, anso patuduhon hamu tu halakna i paboa na tutu do holong rohamunu mida ia. ⁹ Hubaen pe surat i tu hamu, laho manguji rohamunu do au sanga na tongtong do hamu ra mangoloi angka sipaingotku. ¹⁰ Muda diampuni hamu halak na marsala tu hamu, au pe huampuni ma halakna i. Harana, sanga ise na huampuni -- muda adong ma siampunan -- di adopan ni Kristus do i huampuni laho padenggankon hamu. ¹¹ Hubaen pe songon i, anso ulang adong do dalan di Sibolis i laho mangarajai hita, angke taboto do angka sangkap ni Sibolis. ¹² Dung lalu au di Troas, laho manjamitahon Jamita Na Denggan taringot tu Kristus i do nian maksudku. Madung tarbuka muse dalan dibaen Tuhan i di au laho markarejo di inganan i. ¹³ Tapi inda sonang huhilala, hara ni na so marsuo au dohot donganta si Titus disi. Gabe huparmisihon noma tu halak kota i lalu kehe au tu Makedonia. ¹⁴ Tapi tarimakasi ma di Debata, tongtong do diuluhon Ia hami mangihutkon uduran ni hamonangan ni Kristus. Dipake Debata do hami anso songon uap na huskus jamita taringot tu Kristus i. ¹⁵ Dibaen songon uap na huskus ni Kristus do hami adop Debata di tonga-tonga ni angka na dapotan haluaan, bope di tonga-tonga ni angka na giot kehe tu hamagoan i. ¹⁶ Anggo di halak na giot kehe tu hamagoan, sarupa tu uap ni bangke na mamatehon do hami; tapi anggo di angka na nipalua, songon uap na maroban tu hangoluan do hami. Antong, ise ma na tama tu karejo on? ¹⁷ Nada songon halak na asing anggo hami, na mambaen jamita na sian Debata i songon barang sigadison sajo. Polin do tujuannami, harana Debata do na marsuru hami markarejo. Jana diida Debata sandiri do hami songon naposo ni Kristus pasahat jamita i.

¹ Adong he songon na mamuji-muji diri hami idaon mangulahi? Betak na porlu do di hami surat pujian maradopkon hamu, sanga sian hamu, songon angka halak na deba na mamorluhon songon i? ² Hamu sandiri do surat pujiannami na tarsurat di bagasan rohanami jana na bisa botoon dohot siseon ni sude halak. ³ Idaon ni halahi sandiri do i paboa na songon surat ni Kristus hamu na nisuratkon markite-hite hami. Nada dohot tinta dibaen surat i, tapi dohot Tondi Parbadia na mangolu i do; nada di ginjang ni batu tulis muse, tapi di ate-ate ni jolma do. ⁴ Hami dok pe songon i, hara ni pos ni rohanami do maradopkon Debata markite-hite Kristus. ⁵ Nada adong sanga aha anggo di bagasan dirinami sipangasahonon na mambaen hami sanggup mambaen karejo on, na nilehen ni Debata do hamaloon i di hami. ⁶ Ia do na mambaen hami sanggup gabe pangoloi di sada parjanjian na imbaru; i ma parjanjian na marguru tu Tondi Parbadia, nada marguru tu angka aturan na tarsurat. Angke mamatehon do anggo na tarsurat i, hape na sian Tondi Parbadia i, na pangoluhon do. ⁷ Dompak na manotopkon parjanjian na mamatehon i dohot na manyuratkon i di batu, marsinondang do hagodangan ni Debata marnyala-nyala. Hara ni torangna jabat inda tartontang halak Israel be bohi ni si Musa, haru pe madung mamungka mondap nian sinondang i di hatiha i. Antong, salangkan pamungkaan ni parjanjian na mamatehon i dirasmihon dohot sinondang na songon i torangna, ⁸ mur ma di na mamungka parjanjian na nilehen ni Tondi i, dao dope tumorang disi. ⁹ Angke muda marhasangapan tohonan na tu hamagoan, mur sumangapan dope hasangapan ni parjanjian ni hatigoran i. ¹⁰ Tola ma nidok, sanga aha na marsinondang hian najolo nada marsinondang be hara ni torangna na saonnari on. ¹¹ Harana muda marsangap do na giot mago i, tontu dao dope tumorang na manongtong i didongani hasangapan. ¹² Harana sisongon i do na niarop ni rohanami, gabe puluk ma hami mangkatahon na songon i. ¹³ Nada songon si Musa hami na manggupgupi bohinia anso ulang diida halak Israel sinondang na sian Tuhan i, na mur mondap jana na mago sian bohinia. ¹⁴ Madung digupgupi roha ni halahi. Jana lopus tu sadari on pe laing targupgup dope roha ni halahi dibaen panggupgupina i muda disise halahi angka buku taringot tu parjanjian na honok. Angkon marhasadaon dohot Kristus do, anso tarungkap halak panggupgupi i. ¹⁵ Saonnari pe muda disise halahi angka buku ni si Musa laing ditutupi panggupgupna i dope roha ni halahi. ¹⁶ Tapi muda ro mangulahi sanga ise mandapotkon Tuhan, nibuat do panggupgupi i sian bohi ni halakna i. ¹⁷ Harana Tuhan i do Tondi i. Jadi barang di dia pe Tondi Ni Tuhan i, disi do adong haluaan. ¹⁸ Saonnari nada nigupgupan be bohinta. Songon sormin na nisondangan dohot hatiuran ni Tuhan Jesus do hita. Jadi hara ni i, torus do hita dipauba anso gabe songon Ia, mur honok, mur marsinondang do hita hara ni hatiuran na sian Tondi Ni Tuhanta i.

¹ Na niurupan ni Debata do hami mangkarejohon karejo on. Na nilehenNia do karejo on di hami. Hara ni i ma umbaen na so mandele hami. ² Nada hami baen dalan na so ture. Nada ra hami markarejo mamake akal-akal sanga na pabalik-balikkon pandohan ni Debata. Torus torang do hami paboa sanga na aha na nipangido ni roha ni Debata. Jadi, marguru tu sada-sada halak ma laho manimbangi hami di bagasan taroktokna be di adopan ni Debata. ³ Muda na laing so diastui dope Jamita Na Denggan na hami jamitahon i, hum angka jolma na giot tu hamagoan sajo noma na so mangastui i. ⁴ Na nigupgupan ni Debata na mangarajai portibi on do roha ni halahi na so porsaya i. I do na manyundati halahi anso ulang dohot halahi marnida sinondang na sian Jamita Na Denggan i, i ma taringot tu hasangapan ni Kristus i na gabe songon gambaran ni Debata. ⁵ Anggo Jamita na hami pasahat i nada barita taringot tu dirinami sandiri i. Barita taringot tu Jesus Kristus do i; paboahon na tutu do Ia Tuhan jana hami ma angka naposomunu hara ni Ia. ⁶ Debata do mandok, "Bincar ma na torang sian na golap." Laing Debata na sada i muse do na pabincarkon sinondang i di bagasan rohanta, anso gabe torang rohanta laho mangastui hamuliaon ni Debata na marsinondang di bohi ni Jesus. ⁷ Tapi hami paoban-oban do arta partondion na jeges i di bagasan dirinami na so mararga on, i ma na nibaen sian tano. Jadi muda songon i, torang ma anggo hagodangan ni kuaso i marguru di Debata do, nada marguru di hami. ⁸ Sian sasudena do marrongoman angka na pasusahon i, hape laing inda tarhapit hami. Sompit do hami hilala, hape inda jabat mandele hami. ⁹ Bahat na mangkosomi hami, hape inda jungada tarpunjung hami. Jana haru pe jotjot hami nibalbalan, tapi nada mate hami. ¹⁰ Sai tongtong do hami oban hamatean ni Jesus di pamatang nami anso tangkas muse hangoluan ni Jesus di pamatang nami. ¹¹ Salolot mangolu hami, sai tongtong do mangondam hamatean i tu hami hara ni Jesus, anso tarpataridahon muse ngolu ni Jesus di pamatangnami na ra mate on. ¹² Jadi sian i, anggo hamatean i hape laing na manggogo do mambaen dalanna di bagasan dirinami, hape anggo di hamu hangoluan do na manggogo. ¹³ Adong do tarsurat songon on, "Porsaya au, gabe hara ni i do mangkobari au." Jadi, hara ni haporsayaan na songon i do mandok hata hami, angke porsaya do hami antong. ¹⁴ Pos do rohanami di Debata na pangoluhon Tuhan Jesus mangulahi, laing pangoluonNia muse do hami dohot Jesus, jana obanonNia hamu rap dohot hami tu joloNia. ¹⁵ Mardomu tu na hasaya di hamu do sudena i. Angke muda mur bahat halak mandai holong ni roha ni Debata, mur bahat muse do tangiang tarimakasi na nipasahat tu Debata; jadi muda songon i, marsangap ma Debata. ¹⁶ Hara ni i ma umbaen na so mandele hami. Haru pe mur sego hajolmaonnami parduru on, tapi anggo hajolmaon parbagasan i mur dipaimbaru do sian ari tu ari. ¹⁷ Jana anggo hasusaan na so sadia on na hami taon santongkin, lehenon ni i do di hami hasangapan na so tarsuhat jana na manongtong. Dao dope gumodang hasangapan i sugari nipartimbangkon tu hasusaan i sandiri. ¹⁸ Angke anggo rohanami, tu angka pangalaho na so tarida do hami tujuhon, nada tu angka na tarida. Anggo na tarida, hum santongkin do i tahan, tapi anggo na so tarida i manongtong do i salolot-lolotna.

¹ Angke hita boto do, muda dibungkar bandar na taingani na saonnari, i ma pamatang na sian tano on, adong do di hita sada bagas na sian Debata, na so dipature ni tangan ni jolma, na salolot ni lolotna di banua ginjang. ² Holsoan do hita anggo di bagasan bandarta na saonnari on, hara ni lungun ni rohanta tu bagasta na sian banua ginjang i anso dipapakehon ma i tu hita. ³ Harana muda marpamatang na imbaru do hita, nada tardapot hita di na so marpamatang. ⁴ Salolot di bandar on hita maringanan, sai holsoan do hita hara ni dokdok ni pananggunganta. Nada hara ni na por rohanta malua sian pamatangta na sian tano on, tapi hara ni na lungun do rohanta laho manyolukkon pamatang na sian banua ginjang i tu na parjolo i anso dibondut hangoluan i pamatangta na ra mate on. ⁵ Debata sandiri do na pasingkopkon hita tusi jana dilehen Ia do TondiNia tu hita gabe jaminanna. ⁶ Gabe pos do tongtong rohanami hara ni i. Hami boto do, salolot di bagasan pamatangta on hita tinggal, laing di duru ni bagas ni Tuhan dope hita. ⁷ Harana anggo ngolunta marojahan di haporsayaan do, nada marojahan tu na tarida, ⁸ hara ni i do umbaen na sobar rohanami. Jopan do rohanami sugari malua nian sian bagasan pamatang on, anso tarbaen hami sainganan dohot Tuhan. ⁹ Hara ni i manggogo ma hami parayakkon hasonangan ni rohaNia, sanga dompak di bagasnami on dope hami, sanga pe dung lalu di sadu. ¹⁰ Harana angkon jongjong do hita sude di jolo ni panguhuman ni Kristus i, jana ganop be angkon manjagit balos satontang tu pambaenanna be taran mangolu, pangalaho na denggan sanga na jat. ¹¹ Hami boto do tangkas, sanga songon dia na nidok mangkabiari Debata; i do umbaen na manggogo hami papos roha ni halak na asing. Tangkas sajo do hami ditanda Debata, jana pos muse do rohangku torang muse au di bagasan rohamunu. ¹² Jadi dison nada na dipangido rohanami anso pujionmunu hami. Hum na mangalehen alasan na denggan do hami tu hamu anso godang rohamunu hara ni hami, anso diboto hamu sanga na bia laho mangalusi halak na sai pajolohon angka pangalaho na tarida sian balian hape nada pajolohon angka na adong di bagasan roha. ¹³ Muda songon na hurang roha ma hami tutu idaon, hara ni haporluan ni Debata do i. Jana muda torang do rohanami idaon, mardomu tu haporluanmunu ma i. ¹⁴ Holong ni roha ni Kristus do na mangarajai hami. Jana hami boto do: Muda mate sada halak humopkop halak sudena, paboa na dung mate do sudena halahi. ¹⁵ Mangkopkop sasudena jolma do mate Kristus, anso ulang tu dirina be mangolu angka jolma i, tapi tu Kristus noma, na dung mate jana na nipangolu i mangulahi hara ni haporluan ni halahi. ¹⁶ Jadi hara ni i, nada marguru tu parsuhatan ni jolma be hami manimbang halak. Najolo jungada do hami parsuhatkon parsuhatan ni jolma tu Kristus, tapi anggo saonnari nada be. ¹⁷ Sanga ise na dung marsada dohot Kristus, madung gabe na nitompa na imbaru. Madung salpu na honok i -- madung gabe imbaru sasudena. ¹⁸ Debata do mambaen i sude, anso mardenggan hita dohot Debata markite-hite Kristus. Dung i disuru Ia muse ma hita palaluhon Jamita Na Denggan i anso laing dohot muse halak na asing mardenggan dohot diriNa. ¹⁹ Markite-hite Kristus dibaen Debata do lopus mardenggan nian jolma na satano on dohot Debata. Nada dijujur Debata be angka hasalaan na nibaen ni jolma i tuSia, jana hami madung disuru Debata pabolkaskon barita pardengganan i. ²⁰ Partonaan ni Kristus do hami. Mandok hata pe hami tu hamu, songon na Debata sandiri do na mangkobari tu hamu. Mangasahon goar ni Kristus gomos ma hami pangido tu hamu, sai ra ma hamu dipadenggan dohot Debata. ²¹ Nada mardosa Kristus i, hape gabe dosa do Ia dibaen Debata jana dipaporsankon do tuSia dosanta i, anso tajagit hatigoran ni Debata hara ni hasadaonta dohot Kristus i.

¹ Tapi songon dongan saparkarejoan do hami podai hamu, gomos ma hami pangido tu hamu, ulang ma parsayang hamu hadengganan ni roha ni Debata i. ² Didok Debata do di Buku Na Badia i, "Di hatiha na nipatumbuk, madung Hutangihon pio-piomu, jana di ari haluaan madung Huurupi ho." Tangkas ingot hamu! Saonnari ma hatiha na nipatumbuk i. Saonnari ma arina, ari haluaan. ³ Nada jungada hami baen batu partuktuhan tu sanga ise pe, anso ulang targora tohonannami i. ⁴ Tapi di bagasan sasudena pangalahonami, hami patuduhon do na tutu do hami pangoloi ni Debata. Sude hasusaan na marragam rupa, sobar do hami manaonkon i: ⁵ hona loncing do hami, dihurung dohot didege halak; loja hami markarejo, jotjot inda modom jana inda adong sipanganon. ⁶ Hami patuduhon do na tutu hami pangoloi ni Debata di habuluson ni rohanami, di parbinotoan di hasobaron dohot di denggan ni rohanami. Di bagasan Tondi Parbadia dohot sian holong ni roha na ias, ⁷ di na manjamitahon jamita na sintong dohot kuaso ni Debata, markite-hite sinjata hatigoran i do hami mangaroro sanga martahan. ⁸ Diparsangapi halak do hami, tapi laing adong do na palayas-layaskon; dipuji do hami tapi laing adong na pabilehon. Haru tigor pe hami, laing didok do hami pargabus. ⁹ Halak na so ditanda do hami ninna, hape sude do halak mananda hami. Na dung mate do hami ning roha ni halak, hape laing mangolu do satutuna. Haru pe hona loncing hami, hape nada jabat mate. ¹⁰ Haru pe dipaarsak rohanami, hape sai marjop ni roha do hami. Anggo idaon pogos do hami, hape bahat do halak gabe maradong hami baen. Anggo idaon na so adong do sanga na ahanami, tapi anggo satutuna sasudena do adong di hami. ¹¹ Hamu ale dongan, na nihaholongan na di Korintus! Madung situlduk mata ni horbo hami tu hamu. Madung hami pajojor sudena na adong di bagasan rohanami. ¹² Talak do andoranami maradopkon hamu, tapi hum hamu do na pasompit rohamunu maradopkon hami. ¹³ Saonnari anso marsibalosan hita, songon na tu anakku ma hatangkon, buka hamu ma rohamunu maradopkon hami. ¹⁴ Ulang ma hamu rap sapasangan dohot angka halak na so porsaya. Dia ma he tarbaen marsada hatigoran dohot hageduhan, sanga dia ma lakna pardonganan ni hatorangan dohot hagolapan? ¹⁵ Nada tarbaen saroha Kristus dohot Sibolis. Sarupa ma he sada halak na porsaya dohot sada halak na so porsaya? ¹⁶ Aha ma he pardomuan ni Bagas Ni Debata dohot bagas ni gana-ganaan? Bagas Ni Debata na mangolu i do hita on, Debata sandiri pe didok Ia do, "Maringanan ma Au di tonga-tonga ni halahi, jana mangolu rap dohot halahi. Au ma gabe Debata ni halahi, jana gabe bangsongKu ma halahi. ¹⁷ Hara ni i, morot ma hamu sian angka halak na so mananda Debata i, jana marsirang ma hamu sian halahi. Sandok, ulang ma marpardomuan hamu tu na hodar, dung i jagitonKu ma hamu. ¹⁸ Au ma gabe Ama di hamu, jana gabe anak dohot boru ma hamu di Au, ninna Tuhan Na Markuaso i."

¹ Antong hamu ale dongan na nihaholongan! Tu hita do dibaen angka janji i sudena. Tapaias ma dirinta sian sasude na pahodarkon pamatang dohot rohanta. Tahabiari ma Debata, anso sanggam tarbaen hita mangolu mamunjung tu Debata. ² Jagit hamu ma hami denggan mangulahi di bagasan rohamunu. Sanga na tu ise pe nada adong salanami, jana nada adong halak na rugi hami baen. Sanga sian ise pe nada jungada mambuat untung hami. ³ Hudok pe songon i, nada na giot pasalahon hamu au. Angke songon na hudok nabaruon, solkot sajo do hamu anggo di rohanami, jana dongan sahangoluan sahamatean do rohangku maradopkon hamu! ⁴ Pos situtu do rohangku di hamu. Moga situtu do pangkilalaanku hara ni hamu. Haru pe bahat hasusaan hami taon, tarapul situtu do rohangku hara ni hamu. Jop sajo do rohangku! ⁵ Di na lalu pe hami tu Makedonia, laing so marnamantak do hasusaan sian hami. Dihaliangi hasusaan do hami; parsalisian sian pihak na asing dohot biar ni roha sian hami sandiri. ⁶ Tapi tuani ma, sai dipagodang Debata do roha ni halak na menek roha; dipatogar Ia do rohanami markite-hite haroro ni si Titus. ⁷ Nada hum hara ni haroro ni si Titus umbaen na tarapul rohanami, tapi dohot do hara ni boa-boania na tarapul ia sandiri hara ni hamu. Pandoknia tu hami: Na lungun sajo do rohamunu marsuo dohot au; na manyosal situtu rohamunu jana saonnari sian sonang ni rohamunu giot urupanmunu ma au. Angka i ma na mambaen mur tamba jop ni rohangku. ⁸ Haru pe gabe marsak hamu hara ni suratki, nada manyosal au na hubaen i surat i. Tutu nian songon na manyosal do au dung huida gabe marsak hamu -- haru pe nian hum parsantongkinan arsak ni rohamunu i. ⁹ Tapi anggo saonnari jop do rohangku nada hara ni na gabe marsak i hamu, tapi hara ni na dung muba do pangalahomunu hara ni arsak ni rohamunu i. Denggan do tutu di Debata arsak ni rohamunu na songon i. Jadi, nada rugi hamu hami baen. ¹⁰ Angke anggo hamarsahan na tumbuk tu roha ni Debata do, parohon haubaan ni roha na paluahon do i. Jana nada manyosal halak sisongon i. Tapi anggo hamamarsak na sian tano on, arsak na mamatehon do i. ¹¹ Ligi hamu ma jolo antong sanga aha do na ro sian hamamarsak na sian Debata i! Gabe diparayak hamu ma laho padenggankon na gaor. I ma suhana! Gabe magigi hamu mida dosa, gabe mabiar hamu, malungun hamu, gabe marsitutu, gabe ra hamu manguhum na sala! Di bagasan sudena parsoalan on madung dipatuduhon hamu na so marsala hamu. ¹² Jadi haru pe madung hubaen surat i tu hamu, nada hara ni halak na sala i nibaen surat i. Nada muse hara ni angka na dung marnyae dibaen hasalaan i. Hubaen pe surat i anso diboto hamu sandiri do di jolo ni Debata sanga na bia tangkasna diparrohahon hamu hami. ¹³ I do mambaen gabe tarapul rohanami. Jana nada hum tarapul, mur jop dope rohanami marnida jop ni roha ni si Titus; madung diapoi hamu sudena ia. ¹⁴ Hupuji-puji hian do hamu tusia, tuani ma inda pola dipaila hamu au. Tutu do sude na dung hami paboa i tu hamu. Songon i muse sanga na aha na hami puji-puji i hamu tu si Titus, hape tutu muse do. ¹⁵ Gabe mur tamba do holong ni rohania tu hamu, angke sai diingot ia do sanga na tarbia pangoloimunu sudena di panogu-noguonnia jana sanga na tarbia panjagitmunu disia mardongan biar dohot hitir. ¹⁶ I noma jop ni rohangku, hara ni na dung tutu pos rohangku di hamu.

¹ Hamu ale angka dongan! Giotnami nian, laing porlu do botoonmunu sanga na bia asi ni roha ni Debata maradopkon angka parlagutan na di Makedonia. ² Na dung hona uji do halahi di angka hasusaan na borat situtu. Tapi di tonga-tonga ni hasusaan i pe laing marjop ni roha do halahi jana miduk do silehen-lehen ni halahi laho mangurupi halak na asing, haru pogos sajo pe halahi, tapi na mora do halahi di asi ni roha. ³ Huida sandiri do dipasahat halahi intap na adong, deba lobi sian i dope tehe. Indangkon pola adong na marsuru, ⁴ gomos do dipangido jana dinungnungi halahi hami, anso dohot halahi mangalehen silehen-lehen tu angka dongan sahaporsayaan. ⁵ Dilehen halahi pe i, nada hara ni na hami hirim i sian halahi, tapi hara ni na jolo dipasahat halahi do dirina tu Tuhan, dung i tu hami muse, angke i do jop ni roha ni Debata. ⁶ Hara ni i do umbaen na gomos hami sosoi si Titus -- anso laing didatdati ia karejo na denggan i di tonga-tongamunu, songon na dung dipungkana hian. ⁷ Burju do hamu di sude pangalaho. Denggan do hamu di na mangkaporsayai, di na paboahon pandapot, di parbinotoan, di ragam-ragam ni karejo, dohot di bagasan holong ni rohamunu maradopkon hami. Jadi hara ni i, angkon laing umburju muse ma hamu nian di karejo na denggan on. ⁸ Nada songon parenta husosohon i tu hamu. Tapi na patuduhon haburjuon ni angka dongan na asing do mangalehen sumbangan laho mangurupi halak. Au pe giot ujionku do sanga na intap ni dia holong ni rohamunu. ⁹ Angke tangkas do diboto hamu, holong situtu do roha ni Jesus Kristus Tuhanta i maradopkon hita. Na mora do Ia nian, tapi gabe marpogos do Ia hara ni hamu, anso mamora hamu hara ni hapogosonNia i. ¹⁰ Anggo pandapotku, madung sapatutna hamu pasidungkon sanga aha tohap na nipungkamunu di taon na salpu i. Harana hamu sandiri do mamungka tohap i. Jana pikiran laho mambaen karejo na songon i pe sian hamu do haroro ni i. ¹¹ Tapi anggo saonnari patulus hamu ma parkarejoan i anso songon jop ni rohamunu mangoloi dompak i, laing songon i ma lehen hamu saonnari intap ni na adong di hamu. ¹² Muda ringgas do rohamunu marsilehen-lehen, jagiton ni Debata do silehen-lehenmunu i marguru tu sinadonganmunu, nada marguru tu na soadamunu. ¹³ Tapi nada hudok songon i anso sonang halak na asing jana anso markancit hamu. Angkon dos do sude. ¹⁴ Tapi hara ni na tuk do di hamu saonnari jadi patut do hamu paudutkon hahurangan ni halahi. Muda markahurangan hamu bagi andigan, hape di halahi hatiha tuk, tontu halahi ma mangurupi hamu. Jadi rap marsiolo-oloan ma dua-duana. ¹⁵ Di Buku Na Badia i tarsurat do, "Sanga na ise na bahat pangomoanna, nada marlobi-lobi, jana halak na otik pangomoanna, nada marhahurangan." ¹⁶ Tarimakasi do hami dok tu Debata hara ni na dung mangalehen ringgas ni roha tu si Titus gabe songon hami laho mangurupi hamu! ¹⁷ Angke nada hum pangidoannami na nioloan ni si Titus, tapi songon i ma ringgasnia laho mangurupi hamu, jabat sian giotnia sandiri diputuskon ia kehe manopot hamu. ¹⁸ Laing hami suru do rap dohot si Titus sahalak donganta na tarpuji di sude parlagutan i hara ni parkarejoanna manjamitahon Jamita Na Denggan i na sian Debata. ¹⁹ Tamba ni i muse, madung dohot donganta i dipili jana diputuskon angka parlagutan i laho mandongani hami di angka pardalanannami. Harana giot mardalani do hami laho pasahatkon sumbangan i, anso marsangap Tuhan i jana anso diida hamu na rade do hami laho mangurupi. ²⁰ Hami jagohon do anso ulang adong halak na manyalahon hami mardomu tu na pasahat sumbangan na sabahat on. ²¹ Angkon tigor do hami markarejo, nada hum di jolo ni Tuhan, tapi dohot do di jolo ni jolma. ²² Laing hami suruhon do sahalak donganta na asing rap dohot si Titus donganta i. Madung jotjot ia hami uji jana tongtong do sai ra ia mangurupi. Tarlobi-lobi saonnari, ringgas do rohania laho mangurupi hamu hara ni godang ni arop ni rohania di hamu. ²³ Anggo taringot tu si Titus, ale-alengku do i, donganku saparkarejoan laho mangurupi hamu. Jana taringot tu angka dongan na asing i na rap kehe dohot ia, angka utusan ni parlagutan i do halahi -- gabe sada puji-pujian di Kristus i. ²⁴ On pe patidahon hamu ma holong ni rohamunu maradopkon halahi jana sanga aha na hami taringoti gabe pujian salaho tu hamu, sai tutu ma nian songon i.

¹ Anggo salaho tu bantuan na nitongos i tu angka dongan sahaporsayaan, indangkon pola be mambaen surat au tu hamu. ² Angke huboto do na ringgas hamu mangurupi jana hupuji do hamu tu angka dongan na di Makedonia. Hudok do tu halahi, na dung singkop hamu di Akaya on laho mangalehen pangurupion mamungka sian taon na salpu i. Hara ni situtu ni rohamunu i, madung gabe marsitutu muse bahatan sian halahi. ³ Saonnari husuru muse do si Titus dohot dongannia dua halak manopot hamu, anso ulang hum hata-hata sajo pamujinami i taringot tu hamu. Jadi, hobasi hamu hian ma, harana ma hudok tu halahi paboa na dung singkop dibaen hamu sude. ⁴ Harana betak na adong do halak Makedonia rap dohot au sanolion muda ro au mandapotkon hamu. Jadi anggo pola do tardapot halahi hamu laing nada singkop, na pailahon noma i tu hami. Harana ma sanga hami dok, na pos do rohanami tu hamu! Hamu pe tontu gabe maila ma. ⁵ I ma umbaen na porlu huhilala marsuru angka donganta on mandapotkon hamu parjolo laho paturehon angka pangurupion na nijanjihonmunu i. Jadi muda ro au sanoli on, madung singkop nian sude silehen-lehenmunu i. Jadi tarida ma na sian burju ni rohamunu do na mangalehen i, nada hara ni na tarpaksa. ⁶ Timbang hamu ma jolo! Anggo halak na manyuan same saotik, otik muse do suha ni i buatonna. Tapi anggo halak na manyuan bahat same, laing bahat ma muse buatonna suha sian i. ⁷ Angkon marguru tu na nionjar ni rohana be ma mangalehen. Ulang pola hara ni na alang-alangan sanga hara ni na tarpaksa, angke dihaholongi Debata do sanga ise na mangalehen sian jop ni roha. ⁸ Bisa do Debata mangalehen pasupasu mardapot-dapot tu hamu, anso laing singkop sibaenonmunu; marlobian dope tehe tarbaen hamu mangkarejohon na denggan. ⁹ Adong do tarsurat, "Dibagi-bagi Ia do, dilehen Ia tu angka na pogos; hatigoranNia manongtong ro di salolot ni lolotna." ¹⁰ Debata do na pasingkop same di si panyabur dohot roti sipanganon. Laing Ia muse do na pabahatkon suha ni suan-suananmunu, parbatu ni hatigoranmunu. ¹¹ Dipamora do hamu taringot tu sudena i gabe basa ma hamu marsilehen-lehen, anso patubuhon hatarimakasion ni halak tu Debata hara ni angka silehen-lehenmunu i markite-hite hami. ¹² Harana nada hum na manggohi hahurangan ni angka dongan sahaporsayaan sajo be pambaenanmunu na denggan i, tapi gabe mandok bahat tarimakasi ma halak tu Debata hara ni i. ¹³ Hara ni hadengganan na dipataridahonmunu, gabe bahat halak pasangapkon Debata, angke diida halahi ma antong burju ni rohamunu maradopkon Jamita Na Denggan i na patorangkon Jesus Kristus na niihutkonmunu i. Mardomu muse hara ni habasaonmunu laho mambagi-bagihon sanga aha na adongmunu tu halahi bope tu sude halak na asing. ¹⁴ Halahi pe dioban do hamu di tangiangna, jana lungun do rohana di hamu hara ni na marningot asi ni roha na sumurung na sian Debata tu hamu. ¹⁵ Sai mandok tarimakasi ma hita tu Debata hara ni silehen-lehenNia na so tarsuhat i!

¹ Saonnari, au si Paulus, hupaingot ma hamu markite-hite lambok ni roha dohot habasaron ni Kristus. Anggo ninna halak na parbiar do au di tonga-tongamunu taran marsuo bohi tu bohi, tapi puluk do au muda dao sian hamu. Antong, hara ni halambohon bope hadengganan ni roha ni Kristus, ² gomos hupangido tu hamu, ulang pola baen hamu parbonciran anso karas au maradopkon hamu muda ro au sanoli on. Angkon pir do baenonku hata anggo tu angka na mandok, anggo hami hum na manjalak-jalahi na di portibi on sajo do karejonami. ³ Tutu nian laing di portibi on dope hami maringanan, tapi nada sinjata na nipake ni portibi on hami pake na marjuang i. ⁴ Nada hami pake angka sinjata ni portibi on di bagasan paraloannami tapi angka sinjata ni Debata na markuaso i do. Sinjata i do hami baen manaluhon angka partahanan ni jolma. Hami alusi do sude angka parsoalan ⁵ jana hami parrumpakkon do angka benteng haginjangon ni roha na nipajongjong laho mangalo na tutu salaho tu Debata. Hami tangkupi do roha ni angka halak jana hami baen halahi unduk mangoloi Kristus. ⁶ Jana muda dung patu hamu sian sandok roha, madung singkop hami laho manguhumi sude halak na so unduk dope. ⁷ Angkon botoonmunu sugari pangalaho na satutuna. Muda dihaposi roha ni sada halak do nampuna ni Kristus ia, dipareso ia ma mangulahi dirinia jana diboto ia ma, hami pe laing nampuna ni Kristus do songon ia. ⁸ Nada pola ila rohangku muda jotjot pe hupaboa-boa kuaso na nilehen ni Tuhan di hami, harana na giot mambangun hamu do i umbaen na dilehen, nada na giot manyegohon. ⁹ Nada por rohangku, laho mambiar-biari hamu di angka suratku. ¹⁰ Dokkonon ni halahi ma, "Pir jana marsahala do angka surat ni si Paulus i, hape muda hatiha di tonga-tonganta, gale-gale do ia idaon jana hatania pe so binoto sanga aha astuanna!" ¹¹ Anggo angka halak sisongon i angkon botoonna ma, muda ro hami saulahon, angkon songon na hami dok di angka suratnami i do baenonnami tu halahi. ¹² Harana nada puluk hami patudoskon sanga mambaen dirinami sarupa dohot angka halak na mangetong dirina halak na godang. Na oto do halak na mambaen ukuranna sandiri jana na mangukur dirina sandiri mangihutkon ukuran i. ¹³ Anggo hami nada songon i. Muda pe manggodang diri hami, nada jabat manyalpui ukurannami. Intap ni batas-batas ni karejo na nitontuhon ni Debata do hami ingani. Hamu pe tarmasuk di batas-batas i do. ¹⁴ Jadi, haru hami dapotkon pe hamu laho maroban Jamita Na Denggan taringot tu Kristus tu hamu, nada hami salpui dope batas ni karejonami disi, angke laing di bagasan batas i dope hamu. ¹⁵ Astuanna na hami dok disi, nada pagodang diri hami hara ni karejo ni halak na asing na di ruar ni batas na nitontuhon ni Debata di hami. Tapi sai mur martamba ma haporsayaanmunu, anso mur bidang tohap sikarejohonnami di tonga-tongamunu, haru pe laing tong dope di bagasan batas na nitontuhon ni Debata tu hami. ¹⁶ Jadi laing tarjamitahon hami muse ma Jamita Na Denggan i di angka luat na asing so pola pagodang diri hara ni karejo na dung nikarejohon di inganan parkarejoan ni dongan na asing. ¹⁷ Di Buku Na Badia i tarsurat do, "Sanga ise na giot manggodang hara ni bagi aha, manggodang ma dibagasan Tuhan i. Tapi barang ise na marmoga, di bagasan Tuhan i ma ia marmoga." ¹⁸ Dibaen nada haposan dope na mamuji dirina, tapi na nipuji ni Tuhan i do.

¹ Sugari ra ma hamu sobar di hatoonku na saotik i, arop do rohangku hasobarkononmunu au. ² Malungun do au di hamu, songon dihalungunkon Debata sandiri hamu. Tarsongon bujing-bujing na ias dope hamu, na hupatunangkon tu sada bayo, i ma Kristus. ³ Tapi songon na ganggu do rohangku, betak na hona goda do hamu jana nada setia be hamu tu Kristus, sarupa dohot si Hawa narobi na hona goda dibaen habisuhon ni ulok i. ⁴ Harana sai jop do rohamunu manjagit sanga ise na ro mandapotkon hamu jana mangajarkon Jesus na asing -- nada Jesus na hami ajarkon i tu hamu. Jana dijagiti hamu do "Tondi" dohot "Jamita Na Denggan" na tangkas sajo marasing sian Tondi Parbadia dohot sian Jamita Na Denggan na dung nijagitmunu sian hami. ⁵ Nada bagi na tumoruk au huhilala martimbangkon "angka rasulmunu" na luar biasa i! ⁶ Betak na oto pe au mandok hata, tapi anggo taringot tu parbinotoan taringot tu Debata do nada halak na oto au. Hami pataridahon do sudena i tu hamu di sude pangalaho. ⁷ Na mardosa ma he au di na hupatutoru diringku laho patuginjangkon hamu, hara ni na hujamitahon Jamita Na Denggan na sian Debata di hamu songon sada silehen-lehen? ⁸ Jadi huhorus do parlagutan na asing jana hurugii baen balanjongku anso markarejo au di hamu! ⁹ Haru hurangan pe au di hatiha i, nada adong sanga ise pe sian hamu na gabe susa hubaen. Sanga aha na porlu di au, angka dongan na sian Makedonia do pasingkopkon. Tongtong do hujago sadenggan-dengganna anso ulang jabat hususai sanga ise pe sian hamu sanga na bia pe pangalahona jana sai hujagohon do anso laing tongtong songon i. ¹⁰ Nada haantahan be anggo godang ni rohangkon sanga di dia pe di Akaya, angke pangajaran na tutu na sian Kristus i do na hutiop. ¹¹ Biasi hudok songon i? Adong he ulaning na so holong rohangku mida hamu? Debata ma na umboto holong ni rohangku! ¹² Sanga aha na hukarejohon saonnari, pupuonku do mambaen i, lopus inda tarbaen "angka rasul" na asing i be pagodang diri bope mandok na sarupa karejonami dohot halahi. ¹³ Angka rasul na so tutu do i. Angka parkarejo na paoto-oto halak do i na pasuman-sumankon songon rasul ni Kristus. ¹⁴ Inda pola homang roha mida pambaenan na songon i, angke haru Sibolis i pe dipasuman-suman halahi do surusuruan ni hatorangan i! ¹⁵ Jadi nada pola homang be roha muda dipasuman-suman angka pangoloi ni Sibolis i songon angka pangoloi na mambaen hatigoran. Anggo ujungna jagiton ni halahi do na hombar tu sude pangalaho ni halahi. ¹⁶ Hudok saulak nari: Ulang adong sanga ise na jabat marpikir di bagasan rohana mandok na oto au. Tapi muda laing dipikir hamu na oto au, antong anju hamu ma au na oto on muda pagodang diri au saotik. ¹⁷ Jadi saonnari paboaonku ma pamujionku di diringku, tapi nada na nisuru ni Tuhan i au mandok i. Songon jolma na oto do au na mandok on. ¹⁸ Bahat do nian halak na pagodang diri hara ni angka pangalaho na di tano on, jadi au pe por do rohangku mamuji diringku saotik. ¹⁹ Sobar do hamu paalo-alo halak na oto, hara ni malomunu dihilala hamu! ²⁰ Muda diparhatoban halak hamu, sanga muda dipaksa halak jana dibuat untung sian hamu, jana sai gumincat dirina dihilala sian hamu, jana ra manampeleng hamu, sobar do hamu disi. ²¹ Songon na ila do rohangku mandok na magaletu hami laho mambaen songon i. Tapi muda adong halak na puluk pagodang diri, au pe puluk do mambaen songon i. (Songon halak na oto do au mandok on.) ²² Adong he halak Ibrani halahi? Au pe halak Ibrani do. Adong he halak Israel halahi? Au pe halak Israel do. Adong he pomparan ni si Abraham halahi? Au pe songon i do! ²³ Angka naposo ni Kristus dehe halahi? Aropku songon halak na dung lalaen do au, tapi hape dao dumenggan dope au songon pangoloi ulang pado halahi sudena! Marsitutuan dope au karejo, jumotjot dope au tarhurung ulang halahi, umbahat dope parkancitan na hutaon jana jotjot do au giot mate. ²⁴ Mapola lima noli au diparhanciti halak Jahudi, dohot sambok-sambok tolu pulu sambilan noli. ²⁵ Tolu noli au diloncingi halak Rom; jungada muse dope au didangguri dohot batu. Tolu noli hubolus parmaraan di na harom kapalnami di laut, jana sanoli mayup-ayup au di laut dua pulu opat jom honokna. ²⁶ Jotjot do au mamolus pardalanan na gok parmaraan: aek magodang, mangadopi panyamun, parmaraan sian halak Jahudi dohot sian na so Jahudi, parmaraan di kota, parmaraan di halongonan, di laut dohot parmaraan sian halak na mandok dirina Kristen hape inda. ²⁷ Mapukpuk holi-holingku, songon na so jungada mida ari na torang na markarejo i, jotjot mangkar mata au, na so mangan na so minum, huhul marpuaso do au, ngalian hara ni na hurang pakean jana nada adong bagas inganan. ²⁸ Tamba ni i sudena, sai huarsakkon do ganop ari sude angka na masa di parlagutan i. ²⁹ Muda adong na gale, nada he gabe dohot do au gale? Muda adong na madabu tu dosa, nada he magopu do ate-atengku? ³⁰ Muda angkon pagodang diri au, hara ni hagaleanku noma pagodang diri au. ³¹ Debata, i ma Ama ni Tuhanta Jesus Kristus, na tarpuji ro di salolot ni lolotna do na umboto na so margabus au. ³² Dompak di Damaskus au, adong do sada halak gubernur di kota i na mamarenta di toru ni kuaso ni Raja Aretas. Disuru ia ma angka tentara manjago kota i laho manangkup au. ³³ Tapi ditantan ma au tu toru di bagasan sada karanjang sian lubang-lubang na di dinding i. Songon i ma umbaen na malua au sian i.

¹ Angkon manggodang do au, haru pe sudena i nada marguna, tapi giot palaluonku do parnidaan dohot halumbaan na hujagit sian Tuhan. ² Hutanda do sada halak Kristen na niangkat tu banua ginjang tingkat patoluhon, opat bolas taon na salpu. (Nada huboto tangkasna sanga na tutu pamatangna i diangkat, sanga na hum parnidaan sajo i -- Debata ma na umbotosa.) ³ Huboto do taringot tusia, tapi nada huboto sanga na pamatangna i do diangkat betak na hum parnidaan sajo do i, Debata ma na umbotosa. ⁴ Huboto do basa dipatuginjang ia lopus tu Pirdaus, jana dibege ia ma hata na so tarpajojor, na so tola hatahonon ni jolma. ⁵ I ma halakna na giot pujionki, nada au sandiri. Anggo au do, hum angka pangalaho na paboa-boahon hagaleanku ma na hupuji diringku. ⁶ Sugari ra au mamuji diringku, nada songon parkata-hata na rumar au; na tutu do dohononku. Tapi huorom do diringku, angke nada por rohangku, anso unang adong halak na mamparetongkon tu au lobi sian na niidana hubaen sanga na dung dibege ia hudok. ⁷ Tapi ulang maginjangtu rohangku hara ni angka parnidaan na luar biasa i, gabe dilehen do saragam nyae di pamatangku na gabe songon parkokas ni Sibolis. Gabe manyonggot rohangku do nyae i, anso ulang ginjang do rohangku umbaen na dilehen i. ⁸ Tolu noli ma hutangiangkon tu Tuhan taringot tusi. Hupangido, sugari dibuat ma nyae i sian pamatangku. ⁹ Hape dialusi Tuhan ma, "Tuk ma asi ni rohangKu mida ho, harana di bagasan hagaleon do kuasongKu gabe singkop." Hara ni i ma umbaen na sai por rohangku mamuji hagaleanku, angke muda gale au, topet ma disi huhilala diondihon hagogoan ni Kristus au. ¹⁰ Jadi gabe jop do rohangku hara ni angka hagaleanki. Jop do rohangku muda adong na mangalayasi au, muda taruli hasusaan, muda dipakojar-kojar halak au, bope muda hubolus hasusaan hara ni Kristus. Angke muda gale au, hape apala disi ma gabe margogo au. ¹¹ Satutuna, ma gabe songon halak na oto au hubaen, tapi hamu do mambaen au gabe songon i. Sapatutna angkon hamu do nian mamuji au. Angke haru songon jolma na so mararti pe au, nada bagi talu au maradopkon "angka rasulmunu" na luar biasa i! ¹² Sasudena na pataridahon paboa au do rasul na tutu, madung dikarejohon di tonga-tongamunu di bagasan hasobaron ni roha markite-hite tanda hahomangan dohot kuaso. ¹³ Taringot tu aha ma he na hurang nipardulihon hamu, muda nipartimbangkon tu angka parlagutan na asing, asing ni sasada on, i ma bahaso au sandiri nada gabe boban tu hamunu. Anju hamu ma au di hasalaanki! ¹⁴ Saonnari, patolu noli on ma rade au laho manopot hamu. Jana nada pola susaanku hamu, angke nada sinadonganmunu i na giot di au, tapi dirimunu i do. Harana nada tama muda dakdanakna manjalahi ngolu ni simatobangna, tapi simatobangna do manjalahi balanjo ni angka dakdanakna. ¹⁵ Jadi hara ni i sudena, sian jop ni rohangku ra do au mangalehen sasudena hara ni hamu, haru diringku sandiri pe ra do au pasahatkon i tu hamu. Muda songon i ma holong ni rohangku tu hamu, tama dope he laing hurang holong ni rohamunu mida au? ¹⁶ Antong padiar hamu ma songon i, indangkon pola jungada hususai hamu. Hape laing adong muse do na mandok, na mangakal-akali au, bahaso na umbahat untung dapot au sian hamu hara ni dalan na mangakal-akal i. ¹⁷ Adong he dapotan untung au sian hamu lakna markite-hite angka halak na husuru i mandapotkon hamu? ¹⁸ Madung husuru si Titus manopot hamu, jana husuru muse do dongan Kristen na deba nari kehe rap dohot ia. Adong dehe untung dibuat si Titus sian hamu lakna? Hape rap markarejo do au dohot ia, sarupa do rohanami, pambaenannami pe sarupa do! ¹⁹ Betak na dipikir rohamunu do na laho mangabarahon dirinami sandiri hami maradopkon hamu sahonokna on. Di adopan ni Debata dohot Kristus hami dokkon ma: Sasudena i dikarejohon laho patoguhon haporsayaanmunu. ²⁰ Sak do rohangku, muda ro au mandapotkon hamu saulahon, nada songon na nipangido ni rohangki dapotonku hamu, jana hamu pe nada songon na nipangido ni rohamunu i dapotonmunu au. Ulang so adong pe na marbadai, marsibunuan, na milas rohana, na marsipalua dirina, marsitilakoan, na pamilas-milas roha ni donganna, na ginjang roha, jana tarjadi hagaoran. ²¹ Songon na biar do rohangku, betak sai dipatoruk Debata au di jolomunu muda hutopot hamu. Sak muse do rohangku, bahat sian hamu na mardosa hian nabaruon, patangiskon au hara ni na laing so ra muba jana laing so mantak halahi marpangalaho na so ture, na hodar dohot na so tama.

¹ Patolu-nolihonon ma ro au mandapotkon hamu. Di Buku Na Badia i adong do tarsurat, "Sanga na parkaro aha pe na niaduhon, angkon adong do dua sanga tolu saksi na patorangkon, baru pe anso sah parkaro i." ² Madung hupaingot hian sanga ise di hatiha na salpu na mambaen dosa bope sude angka na asing i, i ma di na padua-nolihon ro au mandapotkon hamu. Saonnari dompak padao-dao au sian hamu, hupaingot hamu mangulahi, muda ro au mangulahi sahalak pe nada adong na so hona uhum sian halahi. ³ Anggo disi idaonmunu ma buktina paboa na tutu do mandok hata Kristus markite-hite au. Muda baenon ni Kristus tindakan tu hamu, nada gale-gale baenonNia, tapi patidahononNia ma kuasoNia di tonga-tongamunu. ⁴ Nian anggo dompak na niparsilangkon i Ia, gale do Ia tutu, hape anggo saonnari mangolu do Ia hara ni kuaso ni Debata. Hami pe gale do di bagasan Ia, tapi angkon mangolu do hami rap dohot Ia salaho tu hamu hara ni kuaso ni Debata. ⁵ Uji hamu ma dirimunu sanga na togu do haporsayaanmunu! Tangkasi hamu ma dirimunu sanga na so porsaya hamu di dirimunu paboa na tutu do Jesus Kristus maringanan di bagasan hamu! Harana muda nada songon i nada tahan hamu niuji. ⁶ Sugari angkon botoonmunu ma nian, anggo hami nada halak na so tahan hona uji. ⁷ Hami tangiangkon do tu Debata anso diurupi Ia nian hamu ulang mambaen na jat. Nada na giot paboa-boahon na malo hami mandalankon tugasnami, tapi anso dikarejohon hamu do sanga aha na denggan sibaenonmunu -- haru pe idaon songon na gagal hami, nada pola bia i! ⁸ Angke nada tarbaen hami sanga aha pe na maralo tu hagiot ni Debata. Angkon patulusonnami do hagiotNia. ⁹ Jop do rohanami muda gale hami, jana hamu margogo. Laing hami tangiangkon do anso gabe sanggam hamu nian. ¹⁰ Jadi hara ni i ma umbaen na hutongos surat on, dompak so lalu dope au di tonga-tongamunu. Jadi muda ro au saulahon, indangkon pola nian hubaen pambaenan na karas mamake kuaso na nilehen ni Tuhan i tu au, harana dilehen pe kuaso i tu au na laho paturehon hamu do, nada na laho manyegohon. ¹¹ Ujungna hamu ale angka dongan! Sai marjop ni roha ma hamu jana margogo parayakkon na sanggam. Jagit hamu ma sude sipaingotki. Sai saroha ma hamu jana mardame-dame. Donganan ni Debata parholong jana pardame i ma hamu. ¹² Marsijalangan ma hamu di bagasan umma na badia. Manongos tabe do tu hamu, sude dongan sahaporsayaan. ¹³ Sai dipasupasu Tuhan Jesus Kristus ma hamu tongtong jana sai dihaholongi Debata ma hamu. Jana sai tongtong ma didongani Tondi Parbadia hamu sudena!