1 TIMOTEUS

¹ Sian si Paulus, rasul ni Kristus Jesus, markite-hite tona ni Debata Sipalua hita dohot Kristus Jesus arop ni rohanta i. ² Tu si Timoteus anakku situtu di bagasan haporsayaan. Asi ni roha dohot hasonangan ma di ho sian Debata Amanta dohot sian Kristus Jesus Tuhanta i. ³ Giotku laing maringanan di Epesus ma ho tongtong. Nian madung tangkas hian i hudok tu ho dompak na kehe au tu Makedonia. Husuru pe ho anso laing tongtong di Epesus, hara ni na huboto do adong disi piga-piga halak na pararatkon ajaran na so tutu. Jadi angkon antahanmu do halahi. ⁴ Paingot ma halahi, anso ulang sai kehe be roha ni halahi tu angka turi-turian bope angka barita ni asal mula na so marnasidung. Hum parohon partangkangan sajo do i jana nada mambaen maju sangkap ni Debata na bisa taboto hum sian haporsayaan sajo. ⁵ Anggo tujuan ni sipaingot i, i ma laho manyungguli holong ni roha na polin sian roha na ias dohot haporsayaan na tutu situtu. ⁶ Adong do deba halak, na so songon i be ngoluna. Lilu do halahi di angka hata na so marguna. ⁷ Sai giot Siboto Surat do halahi, hape nada diastui halahi angka hata na nipardokkonan ni halahi bope angka pangalaho na nipajojor ni halahi sian situtu ni rohana. ⁸ Taboto do anggo Tona ni ugamo i, na denggan do i muda nidalankon dohot denggan. ⁹ Angkon laing ingoton do, dibaen pe angka Tona ni ugamo i, nada na giot di halak na burju, tapi na giot tu halak pangalanggar Tona do i, tu angka na jahat, tu halak na so mananda Tuhan, tu halak pardosa, tu halak na so marugamo, tu parroha portibi, tu halak sibunu simatobangna, tu angka sibunu jolma, ¹⁰ tu angka halak na rorang, pandalus-dalus, panyamun, pargabus, tu angka saksi pargabus, dohot tu halak na maralo pangalahona tu ajaran na tutu. ¹¹ Anggo pangajaran i, i ma na tarsurat di Jamita Na Denggan i na dung dipasahat tu au di bagasan pos ni roha, i ma Jamita Na Denggan na sian Debata na sangap i. ¹² Mandok tarimakasi do au tu Jesus Kristus Tuhanta i, na mangalehen gogo di au laho mangoloi Ia jana na mangetong au gabe songon sada halak haposan maniop karejo i. ¹³ Najolo, madung hupalayas Ia, huparkanciti jana hupabile. Tapi haru songon i pe asi do roha ni Debata mida au, angke nada porsaya dope au hatiha i, gabe nada huboto sanga aha na hubaen i. ¹⁴ Hape asi ni roha ni Tuhanta i madung dipasupasuhon marlobi-lobi tu au. Dilehen Ia do i marhite haporsayaan dohot holong ni roha di bagasan Kristus Jesus. ¹⁵ Hata na tutu do pandohan on, na patut jagiton jana sihaporsayaan -- : "Ro pe Kristus Jesus tu portibi on na giot paluahon halak pardosa do." Jana sian sude halahi, au ma na umbahat dosana. ¹⁶ Tapi laing hara ni i muse ma dihaholongi Debata au, anso laing tarpatuduhon Jesus Kristus hasobaronNia maradopkon au halak pardosa on. Jana gabe tiruan ma on di angka na giot porsaya muse tuSia jana na manjagit hangoluan na so mantak. ¹⁷ Debata do Raja ni sude hatiha, patut nipasangap jana pujion tongtong, angke Ia do na manongtong, na so tarida jana sasadaSa! Amen. ¹⁸ Pos do rohangku pasahatkon karejo on tu ho, ale Timoteus anakku, hombar tu na nisurirangkon taringot tu ho, anso dipargogoi panurirangon i ho mangkarejohon pambaenan na denggan, ¹⁹ marhite haporsayaan dohot roha na ias. Adong do deba halak na so parduli di sora ni taroktokna, jadi gabe mago do haporsayaan ni halahi. ²⁰ I ma songon si Himeneus dohot si Aleksander. Ma hupasahat halahi na dua tu Sibolis, anso jora halahi mangincahi.

¹ Jadi on ma na hupaingot, anso parjolo nipasahat simora-mora, tangiang dohot mangidohon tu Debata bope mandok tarimakasi tuSia hara ni sude jolma; ² hara ni angka raja dohot hara ni sude halak na maniop kuaso. Tapangidohon ma anso tarbaen hita mangolu marsonang-sonang di Debata mardongan pangalaho na tama. ³ Denggan do tangiang na songon i, angke jop do roha ni Debata Sipalua hita, di na songon i. ⁴ GiotNia ulang so nipalua halak sudena jana rap umboto di na sintong, ⁵ harana hum sada sajo do Debata jana sada muse do panonga-nongai ni Debata dohot jolma, i ma jolma Jesus Kristus. ⁶ Madung dipasahat Ia diriNia gabe partobus humopkop sudena, anso disaksihon di hatiha na nitontuhon Debata. ⁷ Jana hara ni i ma umbaen na nisuruNia au mandapotkon angka halak na so Jahudi laho manjamitahon tu halahi barita taringot tu haporsayaan ni halak Kristen na tutu. Tutu do na hudokkon on, nada margabus au disi. ⁸ Sanga na di dia pe angkon martangiang do angka halaklahi tu Debata sian roha na ias jana ulang mardongan muruk dohot salisi. ⁹ Laing songon i taringot tu angka dadaboru, giotku nian mangias ma halahi songon na somal jana mamake pakean na sopan. Ulang ma dibaen parsuri na lobi sanga mamake angka barang sere sanga berlian, sanga pe angka pakean sigodang arga. ¹⁰ Gumonan ma angka pangalaho na denggan dibaen halahi pakeanna songon na patut di angka dadaboru na marsomba tu Debata. ¹¹ Angkon pasomal-somalon ni angka dadaboru do dirina hohom jana pangoloi na burju di angka pangajaran. ¹² Nada hupatola angka dadaboru mangajari sanga pe mamarenta halaklahi; angkon hohom do halahi. ¹³ Angke si Adam do parjolo ditompa, dung i pe anso si Hawa. ¹⁴ Jana nada si Adam na dipaoto-oto, tapi dadaboru i do, gabe mangalaosi parenta ni Debata. ¹⁵ Haru songon i pe, paluaon do angka dadaboru hara ni na manubuhon angka dakdanak, asal ma tongtong porsaya, tongtong marholong ni roha jana habadiaan mardongan hapantunon.

¹ Hata na tutu do on, "Sanga ise na marhagiot gabe pamimpin ni parlagutan, patuduhon por ni rohania do ia tu sada karejo sigodang arga." ² Hara ni i, sanga ise na gabe pamimpin ni parlagutan, angkon halak na so martilako ma; angkon sada sajo do dadaborunia; bisa mangorom dirina, na malo jana na maraturan; angkon jop do rohana manjagit tamu di bagasna; jana ringgas mangajari halak; ³ ulang parmabuk sanga na parbada. Tapi angkon halak na lambok do jana pardame. Ulang halak na sai mangarohahon hepeng. ⁴ Angkon malo do mangatur rumahtanggana sadenggan-dengganna, dohot mangajari dakdanakna mangoloi jana pantun tusia. ⁵ Angke muda so malo halakna i mangatur rumahtanggana sandiri, tarbia ma he baenonnia mangatur parlagutan ni Debata? ⁶ Nada tola halak na baru masuk Kristen gabe pamimpin ni parlagutan angke gabe ginjang do rohania, jadi gabe hona bura ni Sibolis ia. ⁷ Angkon na denggan do goarna di tonga-tonga ni halak na bahat; angke anggo nada songon i, dipalayas halak do ia, gabe madabu ma ia tu sambil ni Sibolis baenon ni i. ⁸ Sanga ise halak na mangurupi di parlagutan angkon laing halak na burju jana na tigor ma, nada tola parmabuk sanga halak na sai marroha hepeng. ⁹ Angkon togu do rohana maniop pangajaran ni haporsayaan i di bagasan roha na ias. Angkon sian roha na ias do halahi patuluskon i sude. ¹⁰ Angkon jolo niuji ma halahi nian, jadi muda torang do na so adong tilako ni halahi sanga na aha, i pe anso tola halahi mangurupi di parlagutan i. ¹¹ Dadaboru ni halahi pe angkon halak na denggan roha do, ulang ma halak na ringgas mangkata-hatai hahurangan ni halak na asing. Angkon taroromsa do dirina jana haposan di sude pangalaho. ¹² Sanga ise na mangurupi di parlagutan, angkon laing sada halak sajo do dadaborunia. Angkon malo do ia mangatur angka dakdanakna dohot rumahtanggana sadenggan-dengganna. ¹³ Sanga ise angka na mangurupi di parlagutan i mur dipasangap halak do i jana mur puluk ma ia mangkobari tu halak, taringot tu haporsayaan ni halahi maradopkon Kristus. ¹⁴ Ning rohangku, santongkin nari ro ma au mandapotkon ho. Haru pe songon i, laing hubaen do surat on tu ho, ¹⁵ betak sai tarlambat au anso diboto ho hian sanga na bia sapatutna hita mangolu songon halak na sabagas dohot Debata, i ma parlagutan ni Debata na mangolu. Parlagutan i ma na songon tiang partunggul ni hasintongan ni Debata. ¹⁶ Sada halak pe nada tarbaen mansoadahon sanga na bia godang ni rahasia ni ugamonta: Dipataridahon Ia do diriNia gabe jolma, jana dipatigor di bagasan Tondi, na patidahon diriNia tu angka surusuruan. Dipatubegehon do baritaNa di tonga-tonga ni angka bangso, jana sihaposan do Ia di tano on. Saonnari madung nipanaek Ia tu banua ginjang.

¹ Torang do didok Tondi i anggo tu angka hatiha na giot ro, marbalik ma deba halak sian haporsayaan i. Angka tondi na mangaliluhon noma oloan ni halahi, jana pangajaran ni angka setan noma ihutkononna, ² markite-hite lancap-lancap ni angka na manghobarkon gabus, angka na martihas di taroktokna. ³ Diajari halahi do halak anso ulang mambuat boru dohot mamantangkon angka sipanganon. Hape nian na nijadihon ni Debata do angka sipanganon i anso mardongan tarimakasi tu Debata, dipangan angka na porsaya tu Kristus dohot na dung mananda hasintongan ni Debata, angka sipanganon i. ⁴ Denggan do sasudena sanga aha na nijadihon ni Debata, sada pe sian i nada tama etongon na so hasaya muda dung nijagit i mardongan hatarimakasion tu Debata. ⁵ Angke pasupasu na sian Debata do dohot tangiang na nipasahat tu Debata mambaen gabe marguna angka sipanganon i. ⁶ Muda diajarkon ho sudena i tu angka dongan na porsaya, gabe pangoloi na denggan ma ho markarejo di Jesus Kristus. Jana angkon pupuonmu do padenggan rohamu hombar tu Hata Ni Debata na tahaporsayai i dohot angka pangajaran na sintong na dung diihutkon ho sahonokna on. ⁷ Padao ma ho sian angka turi-turian na so ture. Gumonan ma pasomal-somal dirimu marhadaulaton tu Debata. ⁸ Pangoromon ni pamatang, saotik do guna ni i, tapi anggo latihan ni roha, i ma na marguna tu sude pangalaho, angke dijamin i do ngolunta di tano on lopus tu ari parpudi. ⁹ Denggan do on sude nijagit jana tutu situtu nihaporsayaan. ¹⁰ Hara ni i ma dibaen na manggogo hita jana marsitutu na karejo i, hara ni sude arop ni rohanta tu Debata na mangolu i; Ia do Sipalua ni jolma sasudena, lumobi ma i angka halak na porsaya. ¹¹ Ajarkon ma sudena i jana suru ma halak sudena mangoloi i. ¹² Ulang ma padiar sahalak pe marlayas ni roha tu ho hara ni na poso i dope ho. Tapi angkon gabe tiruan na denggan ma ho di angka halak na porsaya, di bagasan pangakataionmu, pangalahomu, holong ni rohamu, haporsayaanmu dohot di haiason ni ngolumu. ¹³ Jadi laing haburjuhon ma manyise Buku Na Badia i tu halak, dohot manyosoi bope mangajari halahi lopus ro au. ¹⁴ Ulang lalap ho mamake hasurungan na adong di ho, na nijagitmu dompak na niampehon ni angka pamimpin ni parlagutan tangan ni halahi tu ulumu. ¹⁵ Situtui ma mangkarejohon i sudena anso sudena halak marnida hamajuanmu. ¹⁶ Jagohon ma dirimu jana jagohon muse ma dohot pangajaranmu. Burju ma ho patuluskon i sudena, angke muda songon i, dipalua ho do dirimu sandiri bope angka halak na manangihon ho.

¹ Ulang songgahi halak na matobang, tapi paingot ma ia songon amanta sandiri. Angka na poso baen ma songon kahanggimu, ² jana angka dadaboru na matobang, songon inanta sandiri. Tu angka bujing-bujing, angkon ias sun do baenonmu pangalahomu, songon tu ibotomu sandiri. ³ Parsangapi ma angka na mabalu na tarpunjung. ⁴ Tapi muda adong sahalak ina na mabalu, adong dakdanakna sanga pahompuna, tu angka dakdanakna i ma dohot angka pahompuna i parjolo lehenonmu hata na denggan, mandok, angkon halahi sandiri do paresohon halahi na sabagas, bope laho mambalos pambaenan ni simatobangna dohot ompungna, angke apala i ma na pajop roha ni Debata. ⁵ Na mabalu boti na tarpunjung, jana na so adong sanga na ise na paturehonsa, hum tu Debata ma mararop roha dadaboru na songon i. Martangiang ma ia arian na borngin tu Debata mangido pangurupion. ⁶ Tapi na mabalu na giot mangolu marsonang-sonang, madung mate do i haru pe laing mangolu. ⁷ Paboa ma na hudok on tu halahi, anso ulang martilako halahi. ⁸ Muda halak na so paturehon koum sisolkotna, lumobi donganna samudar, na mamorso haporsayaanna do halak na songon i; jumatjat dope i sian halak na so porsaya. ⁹ Angka na mabalu sipamasuhon tu goar-goar ni na mabalu, tuk ma angka na mabalu na manggohi Tona na songon on: Angkon na marumur di ginjang ni onom pulu taon, hum sanoli sajo do marbagas nahinan; ¹⁰ tarbarita ia songon sada ina na dung mambaen pangalaho na denggan; isarana: Denggan dipagodang-godang ia angka dakdanaknia, sonang rohana manjagit angka tamu di bagasna, tata bohina manyambut angka na porsaya, dohot na mangurupi halak na susa -- pendekna madung dibaen ia sian situtu ni rohana sude ragam ni karejo na denggan. ¹¹ Ulang pamasuk tu panyuratan ni goar-goar i angka ina na mabalu na poso dope. Angke muda manggogo roha ni halahi mangoloi hagiot ni sibukna, sirang ma halahi sian Kristus, ujungna marbagas ma halahi. ¹² Jadi gabe sala do halahi hara ni na nilanggar ni halahi i janjinia najolo tu Kristus i. ¹³ Boti muse hum pasude-sude hatiha noma i, puas-pais halahi manaek mijur tu bagas ni halak, jana na jumatjat dope, marsiajar disi ma halahi pahata-hata halak dohot na mangantoi karejo ni halak dohot na mangkata-hatai na so sihataan. ¹⁴ Hara ni i ma dibaen na dumenggan hudok marbagas mangulahi angka na mabalu na poso dope. Denggan ma i mardakdanak halahi dohot na mangurus rumahtanggana anso ulang adong tarbaen angka musunta i dalan pajatjat-jatjatkon goarta. ¹⁵ Angke adong do na mabalu i na dung lilu mangihutkon setan. ¹⁶ Tapi muda adong sada halak Kristen na adong koumna na mabalu, angkon urupan ni dongan Kristen i ma angka na mabalu i; ulang pola dipainte-inte angkon sai parlagutan mananggung halahi. Jadi muda songon i tarbaen parlagutan i ma mangurupi angka na mabalu na so markoum sisolkot. ¹⁷ Angka sintua na denggan markarejo songon pamimpin, patut do lehenon dua noli lompit sangap tu halahi, lumobi angka na ringgas marjamita dohot mangajari. ¹⁸ Harana di Buku Na Badia i tarsurat do, "Ulang ma dihuntam pamangan ni lombu na mardege eme," sada muse, "Dapotan upa do na loja." ¹⁹ Muda adong sada pangaduan maradopkon sada halak sintua, ulang jagit muda so adong dua bagi tolu halak saksi. ²⁰ Sanga ise na mardosa, angkon paingoton do di jolo ni sude parlagutan i anso mabiar na asing i. ²¹ Gomos pangidoanku tu ho di adopan ni Debata, dohot Jesus Kristus bope angka surusuruan todoan, anso diihutkon ho angka na hudok on so pola mardongan biar ni roha maradopkon sanga ise pe jana nada mamihak-mihak. ²² Ulang mamopoptu ho mangampehon tangan laho mangangkat sada-sada halak gabe pangoloi ni Tuhan. Muda mardosa halak, ulang ho dohot-dohotan di dosa i. Jagohon ma dirimu anso tongtong polin. ²³ Ulang be hum aek sajo inum; laing inum ma saotik anggur padenggankon butuhamu, harana ma jotjot ho na marnyae-nyae i. ²⁴ Dosa ni deba halak, inda diadili dope madung tangkas tarboto. Tapi dosa ni na deba, dung niadilan pe anso tarboto. ²⁵ Songon i muse do angka pambaenan na denggan manigor habotoan do i. Salang na maol i pe anso haidaan, nada tarbunihon i tongtong.

¹ Angka halak Kristen na gabe hatoban, angkon etongon ni halahi do na patut nihormatan tuan ni halahi i anso ulang tarpajatjat halak Debata sanga pe pangajaranta. ² Angka hatoban na martuan tu halak Kristen, nada tola pamenehonna tuanna i hara ni na rap Kristen i. Sugari nian, angkon mur jeges dope pangoloi ni halahi tu tuanna i, angke rap dongan sahaporsayaan na nihaholongan ni halahi do tuan na nioloan i di bagasan na denggan. Sudena on, angkon ajarkononmu do jana paingotkononmu tu halak sudena. ³ Adong do halak na mangajarkon asing sian i jana na so satujuan muse tu pangajaran na sintong na sian Tuhanta Jesus Kristus. Nada satuju muse halahi tu pangajaran ni ugamonta. ⁴ Angka siginjang roha do i, hape nian so adong na binotona sanga aha! Na tagi-tagi marsoal dohot martongkari do i taringot tu angka pandohan, na mambaen anyok ni roha, hasisirang, marsitilakoan, manuhas na so ture, ⁵ dohot parsalisian na so marujung. Na dung puntol do pikiran ni halak na songon i jana sala. Diambang halahi tarbaen ma dapotan untung sian ugamo. ⁶ Tutu nian dilehen hadaulaton i do bahat untung muda sonang roha ni halak di sinadonganna. ⁷ Angke nada adong sanga aha pe na taoban tu portibi on. Jana nada taroban hita muse sanga aha haruar sian portibi on! ⁸ Jadi muda adong sipanganon dohot sipakeon, sai pe tuk ma i. ⁹ Tapi sanga ise angka halak na giot kayo, targoda jana hona jorgong ma i dibaen hagiot na oto na marragam rupa boti na manyegohon. Angka hagiot na songon i ma na mangalantuk dohot na mangagohon halak. ¹⁰ Angke sian holong ni roha tu hepeng do haroroan ni sude ragam ni hajahatan. Adong do deba halak na sai mangkojar hepeng jana na so mangihut be tu ajaran ni Kristen, lopus gabe didondoni pardangolan halahi, mambaen gabe marsak roha ni halahi. ¹¹ Tapi anggo ho, halak ni Debata do ho, jadi angkon mandao do ho sian i sudena. Parayak ma anso halak na bonar ho di parnidaan ni Debata, jana na mangoloi tu Debata boti na porsaya tu Kristus, na marholong ni roha, sobar dohot marlambok ni roha. ¹² Situtui ma mamorangkon na nihaporsayaanmi jana sai parayak ma ngolu na so mantak i. Angke tusi do ho dipiohon Debata di na niokumu di jolo ni halak na bahat paboa na porsaya ho tu Kristus. ¹³ Jana saonnari pe, di jolo ni Debata na mangalehen hosa tu sasudena dohot di jolo ni Jesus Kristus na mangalehen hasaksian na tutu di jolo ni si Pontius Pilatus, hutonahon ma tu ho songon on: ¹⁴ Patulus ma sude na hutonahon i tu ho sian roha na ias jana ulang targora, lopus tu haroro ni Tuhanta Jesus Kristus mangulahi. ¹⁵ Tontuhonon ni Debata sandiri do di hatiha hadenggananNa anggo haroroNa i. Hum Ia do Parkuaso; na sangap, Raja ni sasudena raja jana Tuhan ni sasudena tuan. ¹⁶ Hum Ia sajo do na so tarkuasoi hamatean; di bagasan sinondang na so hadonohan sanga ise pe. Nada adong sahalak jolma pe na jungada marnida Ia, sanga na tarbaen marnida Ia. Angkon lehenon ma nian tuSia sangap dohot kuaso salolot-lolotna! Amen. ¹⁷ Tu angka halak na kayo di tano on, paingot ma halahi anso ulang manyombong jana anso ulang mararop ni roha halahi tu angka barang-barang na ra salpu -- songon sinadongan rupani. Angkon mararop ni roha tu Debata do halahi, i ma Debata na mangalehen sasudena tu hita marlobi-lobi anso sonang hita. ¹⁸ Paingot ma halahi laho patuduhon hadengganan, laho patupahon bahat pangalaho na denggan, habasaon dohot haburjuon mangalehen. ¹⁹ Songon i ma baenon ni halahi dalanna laho palagutkon arta na gabe poko na denggan tu ari pangapudian ni halahi. Jadi muda songon i, maruli ma halahi ngolu na manongtong i ma ngolu na satutuna i. ²⁰ Sasude pos ni roha na nilehen di ho, denggan ma jagohon i sude Timoteus! Padao ma ho sian angka pangkataion na so marguna. Laing padao ma ho sian partangkangan taringot tu angka pangalaho na didok roha ni halak "Parbinotoan," hape sian dalan na lilu. ²¹ Harana adong do halak na mandohoti mangajarkon na songon i hape madung manyimbil sian angka ajaran ni Kristen na nihaporsayaan ni halahi na salpu i. Sai dibasa-basahon Debata ma asi ni rohana i tu hamu.