1 TESSALONIKA

¹ Sian si Paulus, Silvanus dohot si Timoteus tu parlagutan ni halak Tessalonika na di bagasan Debata Ama dohot Tuhan Jesus Kristus. Asi ni roha dohot hasonangan ma di hamu! ² Sai tongtong do hami mandok tarimakasi tu Debata hara ni hamu sudena, jana sai hami ingot do hamu di bagasan angka tangiangnami. ³ Muda hatiha mangadop hami tu Debata Amanta i, sai tongtong do hami ingot hamu, i ma karejo na nipatupamunu hara ni haporsayaanmunu tu Kristus, bope holong ni rohamunu maradopkon dongan na asing jabat disarihon hamu halahi dohot arop ni rohamunu na togu maradopkon Tuhanta Jesus Kristus. ⁴ Hami boto do ale angka dongan, na tutu holong roha ni Debata tu hamu jana madung dipili Ia hamu anso gabe Ia nampuna hamu. ⁵ Angke di na manjamitahon Jamita Na Denggan i hami tu hamu, nada hum hata-hata sajo na hami jamitahon i, tapi mardongan kuaso na sian Tondi Parbadia do. Jana pos situtu do rohamunu na tutu do Jamita Na Denggan i. Diboto hamu do sanga na bia ngolunami laho manyarihon hamu dompak di tonga-tongamunu hami. ⁶ Madung gabe ditiru hamu tiruannami dohot tiruan ni Tuhan i. Haru pe markancit situtu hamu, laing dijagit hamu do hata i mardongan jop ni roha. Tondi Parbadia do na mangalehen jop ni rohamunu i. ⁷ Di na songon i, gabe tiruan do hamu tu sude angka na porsaya na adong di Makedonia dohot na di Akaya on. ⁸ Angke mamungka sian hamu do rarat barita taringot tu Tuhan Jesus tu Makedonia dohot Akaya. Jana nada hum i sajo; barita ni haporsayaanmunu pe tu Debata, madung tarbonggal sun tu dia, gabe nada adong be pola na porlu sidokkononnami. ⁹ Halahi sandiri do mamaritahon sanga na bia panjagitmunu di hami dompak na ro i hami manopot hamu. Dicaritohon halahi do sanga na bia panadingkonmunu di angka gana-ganaanmunu dohot haroromunu mandapotkon Debata na mangolu jana na tutu i laho marsomba tuSia. ¹⁰ Laing di hatahon halahi do sanga na bia ngolngolna pangkilalaanmunu painte-intehon haroro ni Anak Ni Debata sian banua ginjang; i ma Jesus na dung dipangolu Debata sian hamatean i. Laing Jesus i do na paluahon hita sian rimas ni Debata na giot ro i.

¹ Hamu ale angka dongan! Tangkas do diboto hamu nada sayang boti haroronami mandapotkon hamu. ² Diboto hamu do dompak so ro hami mandapotkon hamu tu Tessalonika, na dung jolo marhancit do hami jana marlayas di Pilippi. Hape madung dilehen Debata do tu hami habaranion laho manjamitahon Jamita na Denggan na sian Debata i tu hamu haru bahat pe paraloan tu hami. ³ Harana nada tu na paliluhon anggo sipaingotnami maradopkon hamu; nada muse adong disi maksudnami na so ias sanga na giot mangakal-akali. ⁴ Nada! Nada na giot pasonang-sonang roha ni jolma hami manghatai. Na giot pasonang roha ni Debata do hami muda manghatai. Debata do na dung manguji rohanami jana na dung mangangkat hami laho manjamitahon Jamita Na Denggan i. ⁵ Tangkas do diboto hamu na so jungada hami pake hata lancap sanga na hami tipu hamu anso dapotan untung hami. Debata ma saksina! ⁶ Jana nada jungada hami jalahi pujian sian jolma -- sanga sian hamu bope sian halak na asing. Songon rasul ni Kristus anggo satutuna, tola sajo do pangidoonnami sanga aha na porlu sian hamu. ⁷ Tapi lambok do pambaennami tu hamu, songon sada ina na marorot dohot na pature-turehon dakdanaknia. ⁸ Songon i do hami, di bagasan holong ni rohanami na situtu di hamu, nada hum Jamita Na Denggan i, tapi dohot do ngolunami sandiri hami lehen di hamu. ⁹ Tontu laing tangkas dope diingot hamu ale angka dongan, na marsitutu be do hami markarejo. Karejo do hami arian na borngin anso ulang susa hami baen sanga ise sian hamu salolot na mamaritahon Jamita Na Denggan na sian Debata i hami tu hamu. ¹⁰ Hamu do saksinami, songon i dohot Debata, na ias, tigor, jana na so martihas do pangalahonami adop hamu na porsaya. ¹¹ Diboto hamu do, songon sada ama maradopkon angka dakdanakna do pambaennami maradopkon hamu. ¹² Hami paingot, hami sosoi jana hami jujui do hamu anso mangolu hamu mangihutkon na tumbuk di roha ni Debata, na mamiohon hamu tu bagasan Harajaan bope hasangapanNia. ¹³ Adong dope sada nari pangalaho na mambaen hami angkon tongtong mandok tarimakasi tu Debata. I ma, hara ni panjagitmunu di jamita na sian Debata dompak hami jamitahon tu hamu. Nada songon jamita na sian jolma i dijagit hamu tapi songon jamita na sian Debata do. Jana na sian Debata do i tutu! Na markarejo do hata ni Debata di bagasan dirimunu na mangkaporsayai Kristus. ¹⁴ Jana hamu pe angka dongan, madung ditiru hamu angka parlagutan ni Debata, arta ni Kristus na di Judea. Hamu pe madung ditaon hamu parkancitan sian dongan sabangsomunu sandiri laing songon na nitaon ni angka parlagutan ni Debata na di Judea sian angka halak Jahudi. ¹⁵ Halak Jahudi i do na mamunu Tuhan Jesus dohot angka panurirang, hami pe diparkanciti halahi muse do. Sai torus do dialo halahi Debata jana gabe musu ni sude jolma do halahi! ¹⁶ Dilarang halahi muse dope hami manjamitahon barita haluaan i tu angka bangso na asing. Jadi di na songon i, laing dipupu halak Jahudi do patamba-tamba dosana gabe mur martimbun lalu tu langit. Jana ujungna saonnari dondonan ni rimas ni Debata ma halahi! ¹⁷ Tapi hamu angka dongan, dung marsirang hami santongkin sian hamu -- holip sian mata tapi nada lupa sian roha -- mur malungun do hami mida hamu jana sai hami usahohon do anso marsuo mangulahi dohot hamu! ¹⁸ Adong do maksudnami manopot hamu; jana au sandiri si Paulus madung piga-piga noli hucubo, tapi disundati Sibolis do hami. ¹⁹ Ise dope lakna arop ni rohanami bagi hajojop ni rohanami dohot tuku hasangapannami di adopan ni Jesus Tuhanta i, hatiha haroroNia? Nada he hamu do i? ²⁰ Angke hamu do tutu na gabe hagodangan ni roha dohot na pajopkon rohanami!

¹ Hara ni na so tartaon hami be, jadi gumonan noma ninna rohanami hum hami sajo tinggal di Atena, ² jadi hami suru ma si Timoteus donganta i. Dongan saparkarejoan di Debata do ia na markarejo manjamitahon Jamita Na Denggan taringot tu Kristus i. Hami suru do si Timoteus manopot hamu, anso dipatogu ia rohamunu jana disosoi ia anso mur togu haporsayaanmunu, ³ anso ulang adong sahalak pe sian hamu na dumaol-daol hara ni angka parkancitan on. Hamu sandiri pe diboto hamunu do na nitontuhon ni Debata hian do angka parkancitan i gabe bagianta. ⁴ Dompak rap hami dohot hamu, madung hami paboa hian di hamu na angkon taononta parkancitan. Jana madung tulus do i; hamu pe diboto hamu do i. ⁵ Jadi dung so tartaon be lungunna, gabe husuru ma si Timoteus, anso huboto sanga na bia pangalaho ni haporsayaanmunu. Songon na ganggu do rohangku betak na nigoda ni tukang goda i do hamu, gabe sayang sude halojaonnami i. ⁶ Saonnari madung mulak si Timoteus jana madung dipalalu ia barita jop ni roha taringot tu haporsayaan dohot holong ni rohamunu. Pandoknia tu hami, denggan do parningotanmunu taringot tu hami di bagasan rohamunu. Jana por do rohamunu sugari mida hami, laing songon por ni rohanami sugari mida hamu. ⁷ Hara ni i do hamu ale angka dongan, umbaen na tarapul rohanami umbege baritamunu di bagasan sude ragam ni hasusaan dohot parkancitannami. Dipagodang haporsayaanmunu do rohanami, ⁸ gabe mangolu ma pangkilalaannami saonnari, asal ma sai tongtong hamu mangkaporsayai Tuhan i. ⁹ Nada tuk pamangannami laho pajojorkon sanga na bia godang ni hatarimakasionnami tu Debata hara ni sude hamogaan na hami jagit di jolo ni Debata hara ni hamu. ¹⁰ Arian na borngin hami pangidohon do sian sude rohanami, anso tarbaen hami nian marsuo bohi dohot hamu laho manggohi sanga aha na hurang di haporsayaanmunu. ¹¹ Sai dipabulus Debata Amanta i sandiri dohot Tuhanta Jesus ma nian dalan di hami anso marsuo dohot hamu! ¹² Sai dipabahat, jana dipalobi Tuhanta ma holong ni roha di hamu sama hamu, bope mida ganop halak, laing songon hami mida hamu. ¹³ Jadi muda songon i, tarbaen Tuhan ma patoguhon rohamunu, anso gabe badia hamu jana nada adong sigorahonon di adopan ni Debata Amanta, di haroro ni Tuhanta Jesus rap dohot sudena halak na gabe nampunaNia.

¹ Dung i muse ale angka dongan, ihutkon hamu ma pangajaran na nijagitmunu sian hami sanga bia na patut ngolumunu laho pasonangkon roha ni Debata. Tutu nian saonnari pe madung songon i ngolumunu. Tapi saonnari mangasahon kuaso ni Tuhan Jesus gomos hami pangido jana hami sosoi hamu anso mur marsitutu hamu mangkaburjuhon i! ² Harana madung diboto hamu angka sipaingot na hami lehen i di hamu mangasahon Tuhan Jesus. ³ Angka na songon on ma na nipangido ni roha ni Debata sian hamu: Angkon badia do ngolumunu dipangido roha ni Debata jana nada tola marharorangon. ⁴ Ganop halaklahi sian hamu angkon malo ma mangaririt sada dadaboru na gabe dongan saripena dohot dalan na badia jana na pantun. ⁵ Ulang ma hara ni na mangoloi hagiot ni sibukna songon na nibaen ni angka halak na so mananda Debata. ⁶ Taringot tuson, ulang ma adong na mambaen sala tu donganna sanga na paoto-otohon. Na salpu i madung tangkas hami ondolkon di na hami paboa tu hamu, angkon uhuman ni Debata do angka halak na songon i pangalahona. ⁷ Dipio Debata pe hita, nada anso hodar ngolunta, tapi anso badia do ngolunta i. ⁸ Hara ni i, sanga ise na manulak pangajaran on nada jolma be na nitulakna, tapi na manulak Debata na mangalehen TondiNa na badia i do tu hamu. ⁹ Nada pola porlu be suratkononnami tu hamu anggo taringot tu na manghaholongi dongan sahaporsayaan sanga na bia baenonmunu. Hamu sandiri pe madung diajari Debata anso marsihaholongan. ¹⁰ Jana taringot tuson madung dipatuduhon hamu i maradopkon angka dongan Kristen na di Makedonia sudena. Tapi hamu ale angka dongan, gomos hami pangido tu hamu, anso laing mur tu dengganna dope i nian. ¹¹ Usahohon ma anso sonang hamu, ulang pola anto-antoi hamu parsoalan ni halak na asing. Marsijalahi ngoluna ma hamu mamake tanganna be, songon na dung hami dok na salpu i tu hamu. Dua halak na topet markarejo (4:11) ¹² Muda songon i dibaen hamu, nada pola marguru tu halak na asing be ngolumunu, jana pasangapon ni halak na so porsaya tu Kristus ma hamu. ¹³ Hamu angka dongan, giotnami sugari diboto hamu ma nian pangalaho na satutuna taringot tu angka na dung monding; anso ulang marsak hamu songon halak na so mararop ni roha. ¹⁴ Tahaporsayai do, anggo Jesus madung mate jana mulak mangolu. Hara ni i ma umbaen na gabe tahaporsayai, obanon ni Debata muse do sude angka na monding i na porsaya tu Jesus anso rap dohot Ia. ¹⁵ Taringot tusi, songon on do na niajarkon ni Tuhan sipasahatonnami tu hamu: Anggo di haroro ni Tuhan Jesus, hita angka na mangolu dope, nada tarbaen manjoloi angka na dung parjolo monding i. ¹⁶ Saulahon di na mijur Tuhan Jesus sandiri sian banua ginjang, pio-pio ma kapala ni surusuruan i marsora na gogo jana dipalu ma sarune ni Debata songon boa-boana. Jadi angka halak na dung porsaya tu Kristus dompak di ngoluna be, pangoluon ma halahi parjolo. ¹⁷ Dung i anggo hita na mangolu dope di hatiha i, rap diangkat ma hita dohot halahi tu bagasan ombun lopus marsuo dohot Jesus di awang-awang i. Jadi rap noma hita tongtong dohot Tuhan i salolot-lolotna. ¹⁸ Antong marsipatoguan roha ma hamu, mardongan angka pandohan on.

¹ Hamu angka dongan! Sanga sadihari pe taonna sanga ombasna, anggo i indangkon pola hami suratkon di hamu. ² Angke hamu sandiri pe tangkas do i diboto hamu, songon haroro ni panangko borngin do anggo haroro ni Ari Ni Tuhan i. ³ Muda hatiha didok halak, "Dame do sude jana marsonang-sonang," jadi disi ma ompot didondoni hamagoan halahi! Nada tarbaen halahi be malua. Songon hancit ni pangkilalaan ni sada ina na giot hipas do hamamasa ni i. ⁴ Tapi anggo hamu angka dongan, nada di hagolapan hamu maringanan; na mambaen hamu gabe tarsonggot do baenon ari i songon na nisonggot ni panangko. ⁵ Halak na mangolu di hatorangan do hamu sudena; jana angka halak arian do hamu. Nada angka halak na sian borngin hita, sanga angka halak ni hagolapan. ⁶ Hara ni i, nada tola tarpodom hita songon angka halak na asing i. Angkon tongtong do hita jonggor jana rohanta pe angkon torang. ⁷ Anggo halak na modom, borngin do ia modom. Halak na mabuk, laing borngin do ia mabuk. ⁸ Tapi anggo hita on, angka halak na sian arian do, jadi angkon torang do rohanta. Angkon pakeonta do haporsayaan dohot holong ni roha songon baju bosi tu parporangan. Jana kupia bajanta, i ma arop ni rohanta di haluaanta i. ⁹ Dipili Debata pe hita nada anso hona rimas ni rohaNia, tapi anso dapot hita do haluaan markite-hite Tuhanta Jesus Kristus. ¹⁰ Hara ni hita do umbaen na mate Jesus, anso tarbaen mangolu hita rap dohot Ia muda ro Ia muse -- sanga na laing mangolu hita disi sanga pe na dung mate. ¹¹ Hara ni i, marsipaingotan ma hamu jana marsipatoguan di haporsayaan, laing songon na nibaenmunu saonnari. ¹² Pangidoannami tu hamu ale angka dongan, parsangapi hamu ma angka dongan na loja markarejo di tonga-tongamunu; i ma angka dongan na dung nitodo ni Tuhan i mamimpin dohot paingot hamu. ¹³ Patuduhon hamu ma sangap na sagodang-godangna tu halahi. Haholongi hamu ma halahi marningot karejo na nibaen ni halahi. Sai mardame ma hamu na sada tu na asing. ¹⁴ Laing hami pangido dope, hamu ale angka dongan, anso gorahon hamu angka halak na so maraturan. Apoi hamu ma angka na menek roha; urupi hamu ma angka na gale jana sobar ma hamu maradopkon halak sudena. ¹⁵ Jagohon hamu ma anso ulang adong sanga ise na mambaloskon hajahatan dohot hajahatan. Usahohon hamu ma anso tarbaen hamu na denggan sama hamu bope tu halak sudena. ¹⁶ Sai marjop ni roha ma hamu tongtong, ¹⁷ jana tongtong martangiang. ¹⁸ Di sude pangalaho na masa, tongtong ma hamu mandok tarimakasi, angke na songon i do dipangido roha ni Debata sian hamu songon angka na mangolu marsada dohot Jesus Kristus. ¹⁹ Ulang intopi hamu Tondi i. ²⁰ Ulang nayang rohamunu di angka panyurirangon, ²¹ tapi tangkasi hamu ma sasudena, jana togu ma tiop hamu na denggan i. ²² Mandao ma hamu sian sandok hajahatan. ²³ Debata pardame i ma paiaskon hamu sasudena, dipaburju Ia ma hamu anso hum tuSia sajo ngolumunu. Sai dijagohon Debata ma nian hamu sudena, di tondi, di roha bope pamatangmunu, anso ulang targora lopus tu ari haroro ni Tuhanta Jesus Kristus mangulahi. ²⁴ Haposan do Debata na mamiohon hamu, patulusonNia do songon i tu hamu. ²⁵ Tangiangkon hamu ma hami, ale angka dongan! ²⁶ Palalu hamu ma tabe tu sude angka dongan markite umma na badia. ²⁷ Mangasahon goar ni Tuhan Jesus, gomos nipangido tu hamu, anso laing sisehon hamu surat on tu sudena angka dongan sahaporsayaan. ²⁸ Asi ni roha ni Jesus Kristus, Tuhanta, i ma na mandongani hamu.