1 PETRUS

¹ Sian si Petrus rasul ni Jesus Kristus, tu angka halak na ro, na marserak di Pontus, Galatia, Kapadokia, Asia dohot Bitinia, i ma angka halak na nipili, ² mangihutkon sangkap ni Debata Ama jana na niparbadiai ni Tondi, anso mangoloi Jesus Kristus jana manjagit pamispion ni mudarNia. Mur martamba ma asi ni roha dohot hasonangan di hamu. ³ Mandok tarimakasi ma hita tu Debata bope Ama ni Tuhanta Jesus Kristus! Hara ni denggan ni rohaNia, dibaen Ia do hita gabe jolma na imbaru na maruli arop ni roha na tongtong mangolu, angke madung dipangolu Kristus mangulahi sian hamatean. ⁴ Hara ni i do umbaen na mararop ni roha hita maruli di pasupasu na nipasingkop ni Debata di halakNia, i ma angka pasupasu na nipasingkopNia di banua ginjang, gabe nada ra sego, sanga busuk, sanga manyocang. ⁵ Di hamu do i sudena, hara ni na dung porsaya hamu tu Debata. Gabe dijago kuaso ni Debata ma hamu anso dohot hamu manjagit haluaan na dung singkop giot pabotohonon di hatiha parpudi. ⁶ Hara ni i angkon marjop ni roha do hamu, haru pe saonnari angkon laing marsak hamu santongkin hara ni na manaon angka pandugaan hamu. ⁷ Sudena i na laho patandahon haporsayaanmunu do tu Tuhan, paboa na tutu do haporsayaanmunu i sanga nada. Sere na ra sego pe angkon laing tutungon do i tu api. Dao dope ummarga haporsayaanmunu i ulang pado sere, jadi angkon laing diuji dope i anso gabe pita. Jadi gabe pujion ma hamu jana pasangapon bope dipatuginjang di haroro ni Jesus Kristus mangulahi tu tano on. ⁸ Dihaholongi hamu do Ia haru pe nada jungada diida hamu Ia najolo. Jana dihaporsayai hamu do Ia haru pe saonnari nada diida hamu Ia. Dipapuji-puji hamu do Debata mardongan jop ni roha godang na so tarpajojor dohot hata. ⁹ Dibaen dapot hamu do parbatu ni haporsayaanmunu i, i ma haluaan ni tondimu. ¹⁰ Haluaan on do na nitangkasan dohot na nisihiran ni angka panurirang na paboahon hian taringot tu pasupasu i na giot lehenon ni Debata tu hamu. ¹¹ Ditangkasi halahi do sanga na bia dohot andigan hamamasa ni na nidok ni Tondi Ni Kristus i, na adong di bagasan halahi. Dipaboa Tondi i hian do hatiha i tu halahi taringot tu angka parkancitan na angkon taonon ni Kristus dohot taringot tu hagodanganNia na giot ro dung salpu parkancitanNia i. ¹² Dipaboa Debata do tu angka panurirang i sasudena na nibaen ni halahi i laho mangoloi hamu do, jana nada na mangoloi halahi sandiri; i ma taringot tu angka na nibegemunu saonnari sian angka na manjamitahon Jamita Na Denggan. Mardongan kuaso ni Tondi Parbadia na nitongosNia sian banua ginjang do dipasahat halahi na songon i tu hamu. Salang angka surusuruan pe por do rohana mamboto barita na nipaboa ni halahi i. ¹³ Hara ni i hobas ma hamu. Jonggor ma hamu jana mararop ni roha situtu di pasupasu na giot lehenonNa tu hamu di haroro ni Jesus Kristus muse. ¹⁴ Songon dakdanak na mangoloi poda ma hamu, jana ulang be mangoloi hagiotmunu najolo i ngolumunu, i ma dompak so ditanda hamu Debata. ¹⁵ Tapi, angkon badia ma hamu di sasudena na nibaenmunu, laing songon Debata na badia i na mamiohon hamu. ¹⁶ Di Buku Na Badia i tarsurat do, "Angkon badia do hamu, angke Au pe na badia do." ¹⁷ Didok hamu Amang tu Debata dompak martangiang hamu. Antong, Debata i do na mandabuhon uhuman tu jolma marguru tu pambaenanna be so pola mangaligi bohi. Hara ni i, salolot di tano on hamu, pagodang hamu ma Debata di ngolumunu. ¹⁸ Angkon botoonmunu do sanga aha na dung digarari laho paluahon hamu sian ngolu na so marguna i na nipateankon ni angka ompungmunu tu hamu. Nada barang na ra sego songon perak sanga sere dibaen panggararna, ¹⁹ tapi na lobi arga do dibaen; i ma diri ni Kristus sandiri, na gabe songon biri-biri na nihaulkon tu Debata na so martihas sanga marhahurangan. ²⁰ Na dung nipili ni Debata do Kristus i dompak so ditompa dope tano on. Jana di angka ari marayak ujung ni jaman on, ro do Ia tu portibi on laho paluahon hamu. ²¹ Markite-hite Ia do porsaya hamu tu Debata na pangoluhon Ia mangulahi sian hamatean dohot na pasangapkon Ia. Jadi Debata do na nihaporsayaanmunu jana laing tu Debata muse ma hamu mararop ni roha. ²² Hara ni na nioloanmunu ajaran na sian Debata, gabe dipaias hamu dirimunu jana holong do rohamunu mida angka halak na porsaya tu Kristus. Antong, marsihaholongan ma hamu sama hamu sian sandok rohana be. ²³ Angke markite-hite hata ni Debata na mangolu jana na manongtong i, madung gabe jolma na imbaru hamu dibaen, i ma na so sorang sian jolma, tapi sian Ama na manongtong i do. ²⁴ Tarsurat do di Buku Na Badia i songon on, "Tarsongon duhut-duhut do sude jolma, jana songon bunga ni duhut i do hasangapanna. Malos ma duhut i, marurus muse ma bungana i; ²⁵ tapi anggo hata ni Debata hot do salolot-lolotna." Jamita na Denggan do hata na dung dijamitahon i tu hamu.

¹ Antong, ambungkon hamu ma sian dirimunu sandok na jat; ulang be hamu margabus jana ulang be mangalancap. Ulang mangiburu jana ulang mandok hata na jat hamu taringot tu dongan. ² Songon dakdanak na baru sorang na sai manguas di susu na polin, laing songon i ma hamu manguas tongtong di susu na polin sian Hata Ni Debata; anso mur magodang hamu jana dipalua. ³ Tarsurat do di Buku Na Badia i songon on, "Madung dihilala hamu sanga songon dia hadengganan ni Tuhan i." ⁴ Antong, dapotkon hamu ma Ia. Songon batu na mangolu do i, i ma batu na niambungkon ni jolma hara ni na so marguna didok rohana; hape batu i do na mararga situtu anggo di Debata. ⁵ Songon angka batu na mangolu do hamu. Antong ra ma hamu dipake laho pajongjong bagas ni Debata di pangalaho partondion. Jadi gabe angka malim na badia ma hamu jana na mangalehen haul tu Debata markite-hite Jesus Kristus, i ma haul partondion jana na tumbuk di roha ni Debata. ⁶ Harana tarsurat do di Buku Na Badia i songon on, "Madung Hupili sada batu na arga, na Hupayakkon di Sion gabe batu parsuhi; jana sanga ise na porsaya tuSia nada pailaon." ⁷ Na arga situtu do batu i di hamu na porsaya. Tapi anggo di halak na so porsaya, tulus ma na nidok ni Buku Na Badia i na mandok, "Batu na niambungkon ni angka tukang i, madung gabe batu parsuhi. Batu i ma na mambaen halak tartuktuk, batu na mambaen halahi gabe tinggang." ⁸ Tartuktuk pe halahi, hara ni na so dioloi halahi do hata ni Debata. Songon i ma panontuhon ni Debata taringot tu halahi. ⁹ Tapi anggo hamu, bangso na Hupili do hamu, angka harajaan hamalimon, bangso na badia, bangso hapunjungan ni Debata. Ia do na mamiohon hamu haruar sian hagolapan anso masuk tu bagasan sinondangNia na tumorang i, anso pararatonmunu barita taringot tu angka pambaenanNia na godang i. ¹⁰ Na jolo, nada bangso ni Debata hamu, hape anggo saonnari bangso ni Debata do hamu. Najolo, nada dihaholongi Debata hamu, hape anggo saonnari didai hamu do asi ni rohaNia. ¹¹ Hamu angka dongan na nihaholongan! Halak na asing do hamu jana pangaranto di tano on. Hara ni i gomos hupangido tu hamu anso ulang ihutkon hamu hagiot ni jolma na sai marporang mangalo tondi. ¹² Angkon denggan do pangalahomunu di tonga-tonga ni angka halak na so porsaya tu Kristus, jadi haru pe diincahi halahi hamu songon halak na jahat, gabe idaon ni halahi ma angka pambaenanmunu na denggan i, jana gabe pujion ni halahi ma Debata di haroro ni Debata tu portibi on. ¹³ Hara ni Tuhan, oloi hamu ma sudena pamarenta na adong di portibi on; sanga pe tu Kesar na gabe sitiop kuaso na guminjang; ¹⁴ sanga pe gubernur na nitodo ni Kesar i manguhumi halak sibaen na jahat, dohot na manghormati halak sibaen na denggan. ¹⁵ Anggo giot ni Debata, huntam hamu ma pamangan ni halak na oto pangkataina markite-hite angka pambaenanmunu na denggan i. ¹⁶ Mardalan ma hamu di ngolu on songon halak na mardeka tapi ulang antong pake hamu ngolumunu na mardeka i laho manutup-nutupi hajahatan, tapi songon angka naposo ni Tuhan ma hamu na mangolu i. ¹⁷ Pantun ma hamu tu sude halak, haholongi hamu ma donganmunu sahaporsayaan tu Kristus. Habiari hamu ma Debata jana pasangap ma Kesar i. ¹⁸ Hamu angka dongan na gabe pangoloi, unduk ma hamu mangoloi tuanmunu sasangap-sangapna; ulang hum tu halahi angka na denggan roha dohot tu na burju, tapi angkon dohot do tu halahi na jorbong i. ¹⁹ Pasupasuon ni Debata do halak na sobar manaon pambaenan na so tigor -- hara ni partinandaannia di hagiot ni Debata. ²⁰ Harana aha ma he hasurunganna muda sobar hamu manjagit uhuman na patut tanggungonmunu hara ni hasalaanmunu? Tapi muda sobar hamu manjagit sitaonon na ro tu hamu hara ni na nibaenmunu na denggan, anggo i, pasupasuon ni Debata ma hamu. ²¹ Hara ni i do umbaen na nipio ni Debata hamu. Angke Kristus sandiri pe madung ditaon Ia parkancitan hara ni hamu jana markite-hite i dilehen Ia ma di hamu tiruan anso diihutkon hamu indegeNia. ²² Nada jungada Ia mambaen dosa jana sahalak pe nada adong jungada umbege Ia margabus. ²³ Di na hona incak Ia, nada mangincahi Ia mambaloskon. Dompak na niparkancitan i Ia, nada mangondam Ia; tapi dipasahat Ia do parkaroNia i tu Debata, Panguhum na tigor i. ²⁴ Kristus sandiri do mamorsan angka dosanta i di pamatangNia sandiri di ginjang ni hayu parsilang i, anso tola hita malua sian kuaso ni dosa jana tola hita mangihutkon hagiot ni Debata. Angke bugang ni Kristus i do na paluahon hamu. ²⁵ Najolo, songon biri-biri na lilu do hamu hape anggo saonnari madung dioban hamu mangulahi mangihutkon Kristus, Parmahan jana na marmahani hamu.

¹ Laing songon i ma hamu ale angka ina, angkon oloanmunu do halaklahimunu, jadi muda adong sian halahi na so porsaya di hata ni Debata, nada pola porlu dohononmunu sanga na aha pe tu halahi, parangemunu i ma na mambaen halahi gabe porsaya, ² hara ni na niida ni halahi parangemunu na ias jana pantun. ³ Ulang ma hum sian duru hajegesonmunu isarana songon parsuri ni obukmunu sanga pamake ni barang sere, sanga pamake ni baju. ⁴ Tapi na sian roha ma nian hajegesonmunu; umpamana halambohon dohot hadameon ni pangalaho; i do hajegeson na manongtong na mararga situtu di parnidaan ni Debata. ⁵ Songon i do dalanna dibaen angka dadaboru na badia na mararop ni roha tu Debata, laho pajegeskon diri ni halahi, i ma mangoloi halaklahina. ⁶ Si Sara pe laing songon i do. Pangoloi situtu do ia tu si Abraham jana "Tuan" do dipio ia si Abraham. Saonnari angka boru ni si Sara ma hamu, muda dibaen hamu angka na denggan jana nada pola mabiar hamu mida bagi aha pe. ⁷ Bope hamu angka ama, mardongan bisuk ma hamu maradopkon dadaborumunu jana mardongan roha na torang, ingot hamu ma halak na gale do halahi. Sangap ma baen hamu halahi, angke rap na giot hasahatan ni ngolu na tutu na sian Debata do halahi dohot hamu. Di ngolu na songon i, nada adong be na mangambati tangiangmunu maradopkon Tuhan. ⁸ Songon on ma panyimpulina: Angkon saroha do hamu jana sapangkilalaan. Marsihaholongan ma hamu na sada tu na asing songon na markahamaranggi. Jana marsiasi-asian ma hamu jana martoruk ni roha na sada tu na asing. ⁹ Ulang ma baloskon hamu hajahatan alo ni hajahatan, sanga hata na panyaor-nyaorkon; tapi pasupasu ma pangidohon hamu balos ni i sian Debata tu halahi. Angke anso manjagit pasupasu do hamu umbaen na nipiohon ni Debata hamu. ¹⁰ Di Buku Na Badia i tarsurat do songon on, "Sanga ise na giot maruli hangoluan jana na giot mandai angka ari na denggan, angkon jagohononna do dilana anso ulang dohot mangkobari angka na jat jana ulang mandok hata gabus bibirna. ¹¹ Angkon mandao do ia sian na jahat jana dipatulus ia ma na denggan; marsitutu ma ia parayakkon hadameon. ¹² Angke sai disarihon Tuhan do angka halak na mangihutkon hagiot ni roha ni Debata, jana sai na tangihonon ni Tuhan do angka tangiang ni halahi; tapi dialo Tuhan i do angka halak na mambaen hajahatan." ¹³ Ise ma he ra mambaen na jahat tu hamu anggo sai jop do rohamunu mambaen na denggan? ¹⁴ Tapi haru pe angkon manaon hamu hara ni na mambaen angka pangalaho na denggan, na maruntung do hamu disi! Ulang hamu mabiar sanga na mida ise pe jana ulang hamu tarsonggot. ¹⁵ Tapi di bagasan rohamunu, parbadia i hamu ma Kristus songon Tuhan! Jana angkon singkop do hamu tongtong laho mangalusi sanga ise na manyapai hamu taringot tu pos ni rohamunu di angka na niarop ni rohamunu sian Tuhan. ¹⁶ Tapi mardongan lambok ni roha dohot hapantunon ma baen hamu i sudena. Jana angkon ias do taroktokmunu, anso maila sandiri sanga ise na manilakoi hamu hara ni na denggan pardalananmunu songon siihutkon Kristus. ¹⁷ Gumonan dope manaon parkancitan hamu hara ni na mambaen na denggan -- muda na tumbuk ma i tu roha ni Debata -- ulang pado manaon hara ni na mambaen na jahat. ¹⁸ Angke sanoli sajo do mate Kristus hara ni dosanta ro di salolot-lolotna -- i ma sada halak na so marsala, na mate humopkop halak parsala, anso tartogu Ia hamu mandapotkon Debata. Nibunu do Ia mangihutkon sibuk tapi nipangolu mangulahi mangihutkon tondi. ¹⁹ Di pangalaho na songon i ma Ia kehe paboahon jamita na sian Debata tu angka tondi na hona hurung: ²⁰ i ma tondi ni angka halak na so mangoloi tu Debata hatiha i salolot paulihon paraunia i si Noak. Hape hum halak na di parau i sajo do -- salapan halak do sudena -- na malua sian aek na oto i. ²¹ Antong, na masa i ma na gabe gambaran ni pandidion sisaonnari on na paluahon hamu. Nada karejo na giot paiaskon angka na hodar di pamatangniba pandidion i, tapi songon janjimunu do i tu Debata sian taroktok na denggan. Gabe dipalua pandidion i ma hamu hara ni na dung mulak mangolu Jesus Kristus mangulahi sian hamatean, ²² jana madung manaek Ia tu banua ginjang. Saonnari markuaso ma Ia rap dohot Debata jana mamarenta tu sude surusuruan, tu sude parkuaso dohot tu sude angka hagogoon di pangalaho partondion.

¹ Dibaen madung manaon parkancitan Kristus mangihutkon parsibuhon, hamu pe angkon laing papironmunu do rohamunu dohot parngoluan na songon i. Angke sanga ise na manaon mangihutkon pangkilalaan parsibuhon, nada ra be i mambaen dosa. ² Hara ni i, salolot mangolu hamu di tano on tu pudi on, ihutkon hamu ma hagiot ni Debata, ulang be mangihut di hagiot ni jolma hamu. ³ Tuk ma hatiha na salpu i di na nibaenmunu sanga aha por ni roha ni angka jolma na so mananda Debata. Nada denggan ngolumunu i. Giot-giot ni sibuk do na niihutkonmunu, na mabuk, na marpesta-pesta, na minum-minum dohot na marsomba gana-ganaan, i ma sada parange na niantahan ni Debata. ⁴ Saonnari gabe homang ma roha ni angka halak na so mananda Tuhan i hara ni na so dohot be hamu mandohoti ngolu na so denggan i songon halahi. Hara ni i ma umbaen na nitilakoan ni halahi hamu. ⁵ Tapi angkon lehenon ni halahi do saulahon partanggung jawaban tu Debata na dung singkop laho manguhumi halak na mangolu dohot halak na dung mate. ⁶ Hara ni i muse ma umbaen na nijamitahon muse Jamita Na Denggan i tu angka jolma na dung mate. Anso niuhum halahi haru pe na dung mamolus hamatean halahi -- laing songon jolma na asing i sasudena -- harana anggo di pangalaho partondion laing na mangolu do halahi sian hangoluan ni Debata sandiri. ⁷ Na giot dapot ne ma ujung ni sasudena. Hara ni i, rajai hamu ma dirimunu jana torang ma rohamunu anso tarbaen hamu martangiang. ⁸ Tapi na umporlu sian sasudena i, marsihaholongan ma hamu sama hamu, angke muda marsihaholongan hamu gabe bahat ma dosa disesa. ⁹ Marsijagitan ma hamu na sada tu na asing di bagasna be, so pola humolos. ¹⁰ Ganop be do hamu angka dongan manjagit silehen-lehen na paasing-asing sian Debata. Jadi hara ni i, songon parkobas na denggan di angka silehen-lehen ni Debata i, pake hamu ma angka silehen-lehen i anso marguna tu haporluanmunu sama hamu. ¹¹ Sanga ise na marjamita, barita na sian Debata ma dijamitahon; sanga ise na mangurupi halak na asing, mangasahon gogo na sian Debata ma ia mangurupi, anso tarpasangap Debata markite-hite Jesus Kristus di bagasan sasudena i. Ia do na markuaso jana na patut pasangapon salolot-lolotna. Angkon songon i ma na sapatutna. Amen. ¹² Angka dongan na hihaholongan! Hancit do ditaon hamu saonnari hara ni na hona uji. Tapi ulang pola homang rohamunu, muda adong masa tu hamu sada pangalaho na luar biasa. ¹³ Angkon mur sonang do rohamunu angke dohot do hamu manaon parkancitan rap dohot Kristus. Jadi saulahon muda dung dipataridahon hasangapan ni Kristus i tu sude jolma, marsurak-surak ma hamu disi. ¹⁴ Na maruntung do hamu muda dipabile halak hamu songon sada siihutkon Kristus. I ma tandana paboahon na maruli Tondi na sangap hamu, i ma Tondi Parbadia. ¹⁵ Ulang ma adong sahalak pe sian hamu na manaon parkancitan hara ni na mamunu, sanga manangko sanga mambaen na jat, sanga hara ni na manggunturi. ¹⁶ Tapi muda manaon parkancitan hamu hara ni na Kristen hamu, ulang ma maila hamu hara ni i. Mandok tarimakasi ma hamu tu Debata hara ni na dipanggoarkon tu hamu goar ni Kristus sandiri. ¹⁷ Madung dapot hatihana, Debata manguhumi portibi on. Jana halak ni Debata sandiri do parjolo niuhuman. Antong, muda sian hita ma pungkaon ni Debata, tarbia muse noma ulaning na masa tu angka halak na so mangkaporsayai Jamita Na Denggan na sian Debata? ¹⁸ Tarsurat do di Buku Na Badia i songon on, "Jadi muda maol do angka halak na denggan i paluaon, bia muse noma ulaning na masa tu angka halak pardosa na so mananda Tuhan i!" ¹⁹ Hara ni i, muda adong sanga ise halak na manaon parkancitan hara ni hagiot ni Debata, angkon laing tigor ma ngolu ni halak na songon i jana dipasahat halahi ma diri ni halahi tu Sipanompa i. Sai patulusonNa do na nijanjihonNia.

¹ Nipangido anso diparrohahon angka sintua jolo on. Songon donganmunu pamimpin, hubaen surat on bope donganmunu na manyaksihon sandiri parkancitan ni Kristus, jana na giot dohot pasangapon muda dung dipataridahon hasangapan ni Kristus tu hita jolma. Gomos pangidoanku ² anso parmahani hamu punguan ni biri-biri ni Debata na nipasahat tu hamu. Sonang ma rohamunu marmahani halahi songon na nihagiotan ni Debata, ulang ma borat rohamunu. Jana ulang ma hum hara ni na giot manjalahi labo baen hamu, tapi hara ni situtu ni rohamunu ma mangoloi. Mamparmahani biri-biri (5:2) ³ Ulang ma songon pambaen ni halak na markuaso baen hamu maradopkon halak na nipasahat tu hamu, tapi gabe tiruan na denggan ma hamu di halahi. ⁴ Jadi muda ro Parmahan Bolon i, jagitonmunu ma tuku hamuliaon na so ra malos. ⁵ Laing songon i ma hamu angka na poso! Oloi hamu ma angka halak na matobang. Angkon sude do hamu patoruk dirina jana marsioloan di bagasan haserepon ni roha. Harana tarsurat do di Buku Na Badia i songon on, "Dialo Debata do halak siginjang roha, tapi dihaholongi Ia do halak na serep roha." ⁶ Hara ni i paserep hamu ma rohamunu di bagasan kuaso ni Debata, anso dipagincat Ia hamu muda dung dapot di hatihana. ⁷ Pasahat hamu ma sudena holos ni rohamunu tu Debata, angke diparrohahon Ia do hamu. ⁸ Angkon hobas do hamu jana jonggor! Angke Sibolis do musumunu. Songon singa do i na res pahae res pahulu na mangorong soroanna. ⁹ Alo hamu ma i, jana ulang ma ganggu haporsayaanmunu tu Kristus i, harana diboto hamunu do, angka donganmunu pe di portibi on na rap sahaporsayaan tu Kristus i, laing manaon parkancitan do songon hamu. ¹⁰ Tapi dung ditaon hamu santongkin parkancitan i, Debata sandiri noma mambaen hamu gabe sanggam. PajongjongonNia ma hamu jana patoguonNia dohot parjugukmunu pe pahotonNia muse ma. Angke Debata parroha na sun denggan do Ia, na mamiohon hamu anso dohot mangkilala hasangapanNia na manongtong i markite-hite Kristus. ¹¹ Ia do na markuaso salolot ni lolotna! Amen. ¹² Na niurupan ni si Silas do au mambaen surat na pendek on tu hamu; huetong do ia sada dongan Kristen na burju. Hubaen pe surat on tu hamu na giot manyosoi hamu do dohot paposkon rohamunu, taringot tu asi ni roha ni Debata na sintong. Togu ma hamu marsitiopan tu asi ni roha i. ¹³ Manongos tabe do tu hamu angka dongan saparlagutan na di Babilon; songon i muse anak haholonganku si Markus. ¹⁴ Marsijalangan ma hamu sama hamu mamake umma na badia. Sai dilehen Debata ma hasonangan di hamu angka dongan sasudena na gabe arta ni Kristus.