TIˇTUˆ

¹ Miˬyehˇ-euˬ zaˬ k’aˆ hawˇ-eu Yeˬsuˇ Ka li-euˬ g’aˬ k’ehˇ pyeu ̭-eu ngaˇ Pawˇluˆ heu lo ̭-ehˇ sahˬ bo ̭ bo ̭ ahˇ le ̭-eu ma. Miˬyehˇ neh tseˇ doˆ-euˬ tsawˇ haˬ deuˬ-euˬ jah-eu jeˬ-ahˇ caw dehˬ caw toˆ nehˬ-awˇ, aˬ dui-euˬ uˬ duˬ tahˬ-eu zahˇ sahˇ k’o ̭ heu neh mehˬ taˬ tsoˆ taˬ-euˬ yaw tsaˬ yaw dawˇ jeˬ-ahˇ siˬ nya laˇ ni sheuˬ g’eh nehˬ-eu g’aˇ duˬ, ngaˬ-ahˇ tseˇ doˆ-awˇ k’ehˇ g’eh le ̭-euˬ meh. ² K’oeˇ-aˬ, mˬ maˬ maˬ byaˆ zaˇ ziˇ deh ̭-eu jeˬ-ahˇ noeˬ tmˬ-eu jeˬ k’oeˇ taˆ dawˬ pehˬ taˬ taˬ-euˬ meh. Jaˬ myaw ̭ maˬ myaw ̭-eu Miˬyehˇ-aˬ, aˇ yamˬ-ahˇ maˬ beh mi naˆ-ehˇ, deh ̭-eu jeˬ k’oeˇ aˬ dui-ahˇ bi ̭ ma lehˇ saˇ jaˇ dzaˬ taˬ-euˬ meh. ³ K’oeˇ naˇ, aˇ yamˬ aˇ law tsaˬ laˇ ngeh, aˬ yaw ̭-euˬ guiˬ lahˬ dawˬ la ̭ k’oeˇ deh ̭-eu jeˬ k’oeˇ pah mehˬ nehˬ la ̭-euˬ meh. Gaˇ kawˆ k’oeˇ ja mehˬ-eu g’aˇ duˬ ngaˬ-ahˇ a nehˬ la ̭ taˬ-euˬ lo ̭-ehˇ, aˬ dui-euˬ Ka k’o ̭-eu g’aˬ pyeu ̭-eu Miˬyehˇ neh dawˬ k’aˇ bi ̭ la ̭-euˬ lo ̭-ehˇ ngaˇ mehˬ lu ̭-eu ma. ⁴ Jah-eu jeˬ la ̭ k’oeˇ ngaˬ nehˬ-ehˇ tiˬ gaˇ ta ̭-eu ngaˬ li-ahˇ duˇ-eu Tiˇtuˆ jawˇ gaˇ sahˬ bo ̭ bo ̭ ahˇ la ̭-eu ma. Aˬ da Miˬyehˇ hawˇ-eu aˬ dui-euˬ Ka k’o ̭-eu g’aˬ pyeu ̭-eu Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ o ̭-eu jeˬ, nawˬ-euˬ k’oeˇ taˆ jaˆ lu ̭-uˇ. ⁵ Maˬ mˇ luiˆ dah-euˬ gaˇ deuˬ mˇ luiˆ-eu g’aˇ duˬ maˬ ehˇ, iˇ jaw lahˇ la ̭ k’oeˇ jaˆ-eu meuˬ yawˬ meuˬ na lu ̭ la ̭ k’oeˇ Ka li zaˬ aˇ muˇ-ahˇ sheuˬ g’eh nehˬ-eu aˬ yui ̭ aˬ tsu deuˬ tseˇ doˆ nehˬ-eu g’aˇ duˬ maˬ ehˇ, Gaˬlaˬdeˬ iˇ jaw lahˇ la ̭ k’oeˇ nawˬ-ahˇ ngaˇ bi jawˇ ya ̭-euˬ ma. ⁶ Ka li zaˬ aˇ muˇ-ahˇ sheuˬ g’eh-eu tsawˇ haˬ-aˬ, iˬ baˇ taˬ k’aˇ maˬ za-eu tsawˇ haˬ ya bi pyeu ̭ meh. Miˬ zaˬ tiˬ g’aˬ teh ̭-ehˇ ya bi baw-awˇ, aˬ yaw ̭-euˬ zaˬ deuˬ k’aw ̭ Ka li-ahˇ jah-eu tsawˇ haˬ ya bi pyeu ̭ meh. Ehˇ dawˬ maˬ naˇ haˬ-eu aˬ dzawˬ aˇ gah gah-eu zaˬ deuˬ maˬ ya bi pyeu ̭-a. ⁷ Ka li zaˬ aˇ muˇ-ahˇ sheuˬ g’eh-eu tsawˇ haˬ deuˬ-aˬ, Miˬyehˇ-euˬ gaˇ-ahˇ haw-eu pyaˆ-eu tsawˇ haˬ pyeu ̭-eu miˇ neh, iˬ baˇ taˬ k’aˇ maˬ ya bi za-a. Yawˬ ha-euˬ nui noeˬ geu ̭-eu, nui ma nymˇ-eu, aˬ ga ̭ dzaˇ uiˇ dawˇ yeh ̭-eu, aˬ cawˬ-ahˇ daw ̭-eu ceh-eu, pyuˇ-ahˇ mehˇ juiˇ juiˇ-eu, heu lo ̭-ehˇ g’eh-eu tsawˇ haˬ maˬ ya bi pyeu ̭-a. ⁸ Daˬ yah-ahˇ yaw muiˬ-ehˇ ha-awˇ, muiˬ-eu jaˬ-eu jeˬ-ahˇ gaˬ-eu tsawˇ haˬ ya bi pyeu ̭ meh. Nui ma taˬ nya-eu, nui ma dawˇ-eu, muiˬ-eu shawˇ-eu, yawˬ ha-euˬ nui ma-ahˇ g’aˬ leˇ-eu, heu lo ̭-ehˇ g’eh-eu tsawˇ haˬ ya bi pyeu ̭ meh. ⁹ Jah-eu jeˬ-ahˇ tsaˬ-eu jah coeˇ paˬ-ehˇ g’eh-eu Miˬyehˇ dawˬ kawˬ-ahˇ zi ̭ dah ni ya tuˆ tehˬ taˬ-eu meh. K’oeˇ lo ̭-ehˇ tuˆ tehˬ taˬ-eu la ̭ k’oeˇ, maˇ maˇ ni tsaˬ-eu jeˬ mehˬ-awˇ aˬ cawˬ-ahˇ g’aˬ bi ̭ nehˬ nya-eu uˬ ta ̭, maˬ naˇ haˬ geu ̭-eu tsawˇ haˬ deuˬ-ahˇ aˬ yaw ̭ ma ̭-euˬ yaw lehˬ mawˇ leˇ ni toeˬ mehˬ nya-eu tsawˇ haˬ ya bi pyeu ̭ meh. ¹⁰ Aˬ jeˬ miˇ neh ehˇ naˇ, ehˇ dawˬ maˬ naˇ haˬ-eu uˬ ta ̭, gaˇ dahˇ maˬ tsoeˬ-eu jeˬ ja-eu la ̭ k’oeˇ aˬ cawˬ-ahˇ mehˇ shuiˇ shuiˇ-awˇ tsahˇ pyawˇ-eu tsawˇ haˬ g’awˬ mya ni jawˇ-eu meh. K’oeˇ lo ̭-ehˇ g’eh-eu tsawˇ haˬ deuˬ-aˬ, k’aˆ k’aˆ ni Yuˇdaˆ tsawˇ haˬ-euˬ zahˇ sahˇ k’o ̭ tawˬ-awˇ Ka li zaˬ pyeu ̭ laˇ-euˬ k’oeˇ deuˬ meh. ¹¹ Aˬ yaw ̭ maˬ-ahˇ k’oeˇ lo ̭-ehˇ maˬ bi ja ni ya laˆ tsoeˬ meh. Aˬ jeˬ miˇ neh ehˇ naˇ, aˬ yaw ̭ ma ̭ sha ̭ dawˇ-eu maˬ baw ni pyuˇ poˆ-awˇ, maˬ mehˬ k’mˬ-eu jeˬ mehˬ-eu la ̭ k’oeˇ nymˇ jiˇ jiˇ lah ni laˆ cawˆ-eu meh. ¹² "Gaˬlaˬdeˬ iˇ jaw lahˇ-ahˇ jawˇ-eu tsawˇ haˬ deuˬ-aˬ, jaˬ myaw ̭ myaw ̭-eu, jeˬ zaˬ yaw haiˬ lo ̭-ehˇ deh ̭-eu, yaw doeˇ doeˇ-awˇ dzaˬ yeh ̭ dawˇ yeh ̭ dzaˬ boˆ dawˇ boˆ boˆ-eu, heu lo ̭-ehˇ g’eh-eu tsawˇ haˬ teh ̭ meh" lehˇ, Miˬyehˇ g’aˇ duˬ ngehˬ dah-eu aˬ yaw ̭ ma ̭-euˬ tsawˇ haˬ tiˬ g’aˬ neh ehˇ taˬ-euˬ dawˬ jaˆ-eu meh. ¹³ K’oeˇ lo ̭-ehˇ ehˇ taˬ-euˬ k’oeˇ tsaˬ-eu meh. K’oeˇ miˇ neh, aˬ yaw ̭ ma ̭ jah-eu zi ̭ laˇ nya ni yaw k’aˆ k’aˆ-ehˇ dehˬ-awˇ mehˬ nehˬ-awˬ. ¹⁴ Yuˇdaˆ tsawˇ haˬ-euˬ aˬ poeˬ dawˬ oeˇ deuˬ hawˇ-eu, yaw tsaˬ yaw dawˇ jeˬ-ahˇ byehˇ dzeh-euˬ tsawˇ haˬ deuˬ-euˬ zahˇ dawˬ k’o ̭ dawˬ deuˬ-ahˇ aˬ yaw ̭ ma ̭ byehˇ dzeh nya ni, k’oeˇ lo ̭-ehˇ mehˬ nehˬ-awˬ. ¹⁵ Shawˇ jehˆ ni g’eh-eu tsawˇ haˬ deuˬ g’aˇ duˬ, yawˬ jeˬ na lu ̭ yaw shawˇ meh. Ehˇ k’aw ̭, maˬ jah-eu jaw ̭-eu tsawˇ haˬ deuˬ g’aˇ duˬ-aˬ, yaw shawˇ tiˬ jeˬ-iˬ maˬ jaˆ-a. Aˬ jeˬ miˇ neh ehˇ naˇ, aˬ yaw ̭ ma ̭-euˬ nui ma maˬ ehˇ, noeˬ siˬ nya-eu jeˬ maˬ ehˇ, dawˬ tawˆ lu ̭ yaw jaw ̭ meh. ¹⁶ Aˬ yaw ̭ ma ̭ Miˬyehˇ-ahˇ siˬ nya ma lehˇ ehˇ-eu k’aw ̭, aˬ yaw ̭ ma ̭ mˇ-eu shaˇ-eu k’oeˇ lo ̭-ehˇ maˬ ngeuˇ-a. Aˬ yaw ̭ ma ̭-aˬ, bye dui dui laˇ paˬ-ehˇ g’eh-eu, ehˇ dawˬ maˬ naˇ haˬ-eu tsawˇ haˬ deuˬ pyeu ̭-awˇ, yaw muiˬ jeˬ mˇ-eu tiˬ paw ̭-iˬ maˬ geuˇ-a.

¹ Ehˇ k’aw ̭, nawˇ-aˬ, tsaˬ-eu muiˬ-eu jah-eu jeˬ-ahˇ tsaˬ leˇ-eu jeˬ ya mehˬ ya tsoˆ meh. ² Tsawˇ mawˬ tsawˇ k’aˆ deuˬ-ahˇ, nui ma taˬ nya ni maˬ ehˇ, aˬ cawˬ yaw zeu baw paˬ-ehˇ deh ̭ nya ni maˬ ehˇ, yawˬ ha-euˬ nui ma-ahˇ g’aˬ leˇ ni maˬ ehˇ, tsaˬ-eu muiˬ-eu jah-eu jeˬ ahˇ laˇ ni maˬ ehˇ, g’oeˇ-eu gaˬ-eu jeˬ ahˇ laˇ ni maˬ ehˇ, daˬ coeˇ oˇ coeˇ-eu nui ma ahˇ laˇ ni maˬ ehˇ, mehˬ nehˬ-awˬ. ³ K’oeˇ lo ̭-ehˇ duˇ ni, tsawˇ k’aˆ k’aˆ laˇ-euˬ zaˬ miˬ zaˬ deuˬ-ahˇ k’aw ̭, muiˬ-eu shawˇ-eu zaˬ miˬ zaˬ deuˬ lo ̭-ehˇ deh ̭ nya jawˇ nya ni mehˬ nehˬ-awˬ. A cawˬ gaˇ kawˆ ja bu ja doeˇ-eu tsawˇ haˬ hawˇ-eu aˬ ga ̭ dzaˇ uiˇ-euˬ zaˬ k’aˆ maˬ ya bi pyeu ̭ ni, yaw muiˬ jeˬ mehˬ-eu tsoˆ-eu tsawˇ haˬ ya bi pyeu ̭ meh. ⁴ Aˬ yaw ̭ ma ̭-aˬ, aˇ k’o ̭ maˬ k’awˆ laˇ-euˬ zaˬ miˬ zaˬ deuˬ yawˬ ha-euˬ k’aˬ dzeˇ zaˬ hawˇ-eu zaˬ deuˬ-ahˇ gaˬ nya laˇ ni mehˬ-eu tsoˆ-eu tsawˇ haˬ ya bi pyeu ̭ meh. ⁵ Aˇ k’o ̭ maˬ k’awˆ laˇ-euˬ zaˬ miˬ zaˬ k’oeˇ deuˬ yawˬ ha-euˬ nui ma-ahˇ g’aˬ leˇ-awˇ, muiˬ-eu nymˇ sahˇ aˬ ma deuˬ pyeu ̭ laˇ-eu la ̭ k’oeˇ k’aˬ dzeˇ zaˬ-euˬ la ̭ o ̭ aw ̭ nya laˇ-eu miˇ neh, Miˬyehˇ-euˬ guiˬ lah dawˬ-ahˇ aˬ cawˬ ja bu ja doeˇ k’aˇ maˬ za-ehˇ pyeu ̭ laˇ ni aˬ yaw ̭ ma ̭ ya mehˬ ya tsoˆ-eu meh. ⁶ K’oeˇ lo ̭-ehˇ duˇ ni, aˇ k’o ̭ maˬ k’awˆ laˇ-euˬ aˬ da da k’aˇ deuˬ-ahˇ k’aw ̭, yawˬ ha-euˬ nui ma-ahˇ g’aˬ leˇ nya ni g’aˬ bi ̭ nehˬ-awˬ. ⁷ Yawˬ jeˬ na lu ̭ la ̭ k’oeˇ, nawˬ-ahˇ aˬ cawˬ yaw muiˬ jeˬ dzaw geu ̭ paˬ-ehˇ deh ̭ mehˬ jawˇ mehˬ nehˬ-awˬ. Nawˇ mehˬ nehˬ tsoˆ nehˬ ngeh, nui ma keuˆ-eu la ̭ k’oeˇ dawˇ coe ni mehˬ nehˬ-awˬ. ⁸ Nawˬ-ahˇ muiˇ-eu tsawˇ haˬ deuˬ aˬ dui-ahˇ ja bu ja doeˇ k’aˇ maˬ za ni bi sha ̭ dawˇ-iˇ pa-ehˇ, yaw lehˬ maˬ poˆ doˆ nya-eu tsaˬ-eu muiˬ-eu dawˬ deuˬ zmˬ-awˇ mehˬ-awˬ tsoˆ-awˬ. ⁹ Zaˬ k’aˆ deuˬ yawˬ ha-euˬ baw leˬ ehˇ dawˬ naˇ haˬ-awˇ, yawˬ jeˬ na lu ̭ la ̭ k’oeˇ baw leˬ deuˬ nui k’ahˇ shiˇ ni ya deh ̭-awˇ, dawˬ poˆ maˬ ya poˆ-a lehˇ mehˬ nehˬ-awˬ. ¹⁰ K’oeˇ uˬ ta ̭, baw leˬ deuˬ-euˬ myawˬ maˬ ya k’oeˬ-eu u ̭ ta ̭, aˬ myah lu ̭ muiˬ-awˇ saˇ jaˇ zi ̭-eu gaˆ kawˆ ya deh ̭ mehˬ nehˬ meh lehˇ mehˬ nehˬ-awˬ. Aˬ yaw ̭ ma ̭ k’aˇ mˇ k’aˇ shaˇ-eu jeˬ la ̭ k’oeˇ, aˬ dui-euˬ Ka k’o ̭-eu g’aˬ pyeu ̭-eu Miˬyehˇ-euˬ gaˇ kawˆ mehˬ-eu tsoˆ-eu heu aˇ naˆ ni muiˬ-eu jeˬ pyeu ̭-eu gaˇ kawˆ aˬ cawˬ mawˇ nya ni, k’oeˇ lo ̭-ehˇ mehˬ nehˬ tsoˆ nehˬ-awˬ. ¹¹ Aˬ jeˬ miˇ neh ehˇ naˇ, tsawˇ haˬ zaˬ dawˬ tawˆ lu ̭-ahˇ ka k’o ̭-eu g’aˇ duˬ, Miˬyehˇ aˬ yaw ̭-euˬ guiˬ lahˬ yaw dzahˇ pah mehˬ la ̭-euˬ meh. ¹² Guiˬ lahˬ yaw dzahˇ k’oeˇ aˬ dui-ahˇ heu lo ̭-ehˇ mehˬ nehˬ tsoˆ nehˬ la ̭-euˬ meh. Miˬyehˇ-ahˇ yaw zeu maˬ baw-eu yaw deh ̭ deh ̭-eu jeˬ hawˇ-eu shiˬ shaˬ jiˇ-euˬ nui noeˬ nui loˆ-ahˇ byehˇ dzeh-eu g’aˇ duˬ maˬ ehˇ, miˇ tsaˬ heu k’oeˇ taˆ deh ̭ ngeh yawˬ ha-euˬ nui ma-ahˇ g’aˬ leˇ-awˇ, nui ma yaw dawˇ dawˇ-ehˇ deh ̭-eu la ̭ k’oeˇ Miˬyehˇ-ahˇ yaw zeu baw-awˇ, ¹³ aˬ dui-euˬ huiˬ dui dui-eu Miˬyehˇ hawˇ-eu Ka k’o ̭-eu g’aˬ pyeu ̭-eu Yeˬsuˇ Ka li-euˬ yaw sheh ̭ k’ahˬ sehˇ doˆ le-eu Aˇ nah k’oeˇ nah-ahˇ noeˬ tmˬ-awˇ dawˬ-eu g’aˇ duˬ mehˬ nehˬ la ̭-euˬ meh. ¹⁴ Maˬ muiˬ maˬ jaˬ-eu jeˬ dawˬ tawˆ lu ̭ la ̭ k’oeˇ aˬ dui-ahˇ aˬ yaw ̭ ka k’o ̭-awˇ, aˬ yaw ̭-ahˇ teh ̭-ehˇ ta ̭-eu muiˬ-eu shawˇ-eu tsawˇ haˬ hawˇ-eu, yaw muiˬ jeˬ mˇ maw ̭-eu nui ma ahˇ-eu tsawˇ haˬ bi pyeu ̭ laˇ-eu g’aˇ duˬ, aˬ yaw ̭-euˬ g’awˇ mawˇ aˬ dui-ahˇ bi ̭ nehˬ la ̭-euˬ meh. ¹⁵ Gaˇ kawˆ heu deuˬ mehˬ nehˬ tsoˆ nehˬ-awˬ. G’aˬ bi ̭ ngeh maˬ ehˇ, dehˬ dehˬ-ehˇ mehˬ paˇ tsoˆ paˇ ngeh maˬ ehˇ, baoˬ tiˬ byah ni zmˬ-awˬ. Aˬ cawˬ tiˬ g’aˬ-iˬ nawˬ-ahˇ ta bi taˬ nyiˇ.

¹ Sahˬ paˬ sahˬ ma deuˬ hawˇ-eu uˆ lahˇ-eu deuˬ-euˬ la ̭ oˆ yaw muiˬ-ehˇ jawˇ-awˇ, aˬ yaw ̭ ma ̭-euˬ ehˇ dawˬ naˇ haˬ-eu la ̭ k’oeˇ, yaw muiˬ jeˬ dawˬ tawˆ lu ̭-ahˇ mˇ-eu lehˇ lehˬ hmˬ taˬ-eu g’aˇ duˬ nawˬ-euˬ tsawˇ haˬ deuˬ maˬ ya ngehˇ ni ja noeˬ nehˬ-awˬ. ² Aˬ cawˬ-ahˇ ja bu ja doeˇ-eu jeˬ maˬ mˇ-ehˇ, tsaˬ leˇ dzoeˇ leˇ-eu la ̭ k’oeˇ cawˬ cawˬ ta ̭-eu uˬ ta ̭, tsawˇ haˬ yawˬ g’aˬ na lu ̭ k’oeˇ taˆ nui ma nahˬ yu ni taˬ-awˬ lehˇ aˬ yaw ̭ ma ̭-ahˇ ehˇ nehˬ-awˬ. ³ Aˬ jeˬ miˇ neh ehˇ naˇ, aˬ dui k’aw ̭ dzeuˇ laˇ ngeh aˬ dzawˬ aˇ gah gah-awˇ, ehˇ dawˬ maˬ naˇ haˬ-euˬ uˬ ta ̭, yaw lehˬ yaw ca jeˬ-ahˇ mˇ-euˬ ma. Shiˬ shaˬ jiˇ-euˬ nui noeˬ nui loˆ hawˇ-eu byawˬ g’a mo g’a-eu g’awˬ mya jeˬ-euˬ zaˬ k’aˆ geu ̭ dzeuˇ ya ̭-euˬ ma. Aˬ cawˬ-ahˇ myaˆ naˆ-euˬ uˬ ta ̭, coeˬ-eu ciˆ-eu jeˬ mˇ dzeuˇ ya ̭-euˬ tsawˇ haˬ deuˬ pyeu ̭-eu ma. Aˬ cawˬ aˬ dui-ahˇ bye-awˇ, aˬ dui k’aw ̭ aˬ cawˬ-ahˇ bye-euˬ ma. ⁴ Ehˇ k’aw ̭, aˬ dui-euˬ Ka k’o ̭-eu g’aˬ pyeu ̭-eu Miˬyehˇ-euˬ g’awˬ shaˬ gaˬ-eu jeˬ hawˇ-eu g’oeˇ-eu gaˬ-eu jeˬ aˬ dui-ahˇ pah mehˬ nehˬ la ̭ ngeh, aˬ yaw ̭ aˬ dui-ahˇ ka k’o ̭ nehˬ la ̭-euˬ meh. ⁵ Aˬ dui-ahˇ ka k’o ̭ nehˬ la ̭-euˬ k’oeˇ-aˬ, aˬ dui yaw muiˬ jeˬ mˇ-euˬ miˇ neh maˬ ngeuˇ-ehˇ, aˬ yaw ̭-euˬ g’awˬ shaˬ gaˬ-eu jeˬ baˬ da neh Muiˬ-eu shawˇ-eu Yaw sahˇ-ahˇ g’oe-awˇ ka k’o ̭ nehˬ la ̭-euˬ jeˬ pyeu ̭-eu meh. Yaw sahˇ Miˬyehˇ aˬ dui-ahˇ yaw shui ̭ bi deh ̭ paˇ la ̭-awˇ, aˬ dui-euˬ iˬ baˇ tsiˬ shawˇ nehˬ la ̭-eu la ̭ k’oeˇ, deh ̭-eu yaw shui ̭ bi ̭ la ̭-euˬ meh. ⁶ Miˬyehˇ-aˬ, aˬ dui-euˬ Ka k’o ̭-eu g’aˬ pyeu ̭-eu Yeˬsuˇ Ka li-ahˇ g’oe-eu la ̭ k’oeˇ, aˬ dui-euˬ k’oeˇ taˆ Muiˬ-eu shawˇ-eu Yaw sahˇ Miˬyehˇ tiˬ byah tiˬ lo ̭ shehˆ daˆ nehˬ la ̭-euˬ meh. ⁷ Miˬyehˇ-euˬ guiˬ lahˬ yaw dzahˇ baˬ da neh, aˬ dui Miˬyehˇ-ahˇ tsaˬ leˇ tsahˇ leˇ-awˇ, aˬ dui noeˬ tmˬ taˬ-euˬ mˬ maˬ maˬ byaˆ zaˇ ziˇ deh ̭-eu jeˬ-ahˇ za nya ni, k’oeˇ lo ̭-ehˇ shehˆ daˆ nehˬ la ̭-euˬ jeˬ pyeu ̭-eu meh. ⁸ Heu-aˬ, tsaˬ dui dui-eu dawˬ pyeu ̭-eu meh. Miˬyehˇ-ahˇ jah-eu tsawˇ haˬ deuˬ, tsawˇ haˬ yawˬ g’aˬ na lu ̭ g’aˇ duˬ muiˬ-awˇ, gaˇ dahˇ tsoeˬ-eu jeˬ pyeu ̭-eu aˬ cawˬ g’aˇ duˬ yaw muiˬ jeˬ mˇ nehˬ-eu jeˬ-ahˇ shaˇ noeˬ-awˇ leh jeh laˇ ni, gaˇ kawˆ heu deuˬ-ahˇ nawˇ yaw k’aˆ k’aˆ-ehˇ bi mehˬ maw ̭-eu ma. ⁹ Ehˇ k’aw ̭, gaˇ dahˇ maˬ tsoeˬ-eu jeˬ-ahˇ tsawˇ pyehˇ pyehˇ-eu, tsui ̭ gui gui-ehˇ pyehˇ-eu, ceh dzaˬ-eu, Zahˇdawˬ k’o ̭ dawˬ gaˇ kawˆ ja dzaˬ-eu, heu deuˬ-ahˇ yahˇ-awˬ. Heu-aˬ, gaˇ dahˇ maˬ tsoeˬ-eu uˬ ta ̭, guiˬ lahˬ maˬ baw-a. ¹⁰ Aˇ muˇ biˇ paˆ-eu lehˇ leh jeh-eu tsawˇ haˬ-ahˇ, k’aˇ teˬ-eu nyiˬ poˆ keuˆ ni mehˬ nehˬ-awˇ, maˬ naˇ haˬ geu ̭ naˇ, byehˇ tsehˆ tsehˆ-awˬ. ¹¹ K’oeˇ Lo ̭-ehˇ g’eh-eu tsawˇ haˬ-aˬ, bahˬ dui dui meh lehˇ nawˇ siˬ nya meh. Aˬ yaw ̭-euˬ iˬ baˇ-aˬ, aˬ yaw ̭ lehˬ-eu gaˇ kawˆ saˇ kiˇmeh. ¹² Aˬdeˬmaˇ hawˇ-eu Diˇjiˇ aˬ nya ̭ tiˬ g’aˬ-ahˇ ngaˇ k’ehˇ g’eh le ̭ naˇ, Niˇgawˇbaˬliˇ meuˬ-ahˇ leh jeh-awˇ laˇ keuˆ-awˬ. Aˬ jeˬ miˇ neh ehˇ naˇ, tsahˬ gaˆ yamˬ-ahˇ ngaˇ k’oeˇ gaˇ jawˇ-eu g’aˇ duˬ noeˬ tsehˆ taˬ-euˬ ma. ¹³ Zahˇ dawˬ k’o ̭ dawˬ siˬ nya dui dui-eu Seˬnaˇ hawˇ-eu Aˬpawˇluˆ aˬ nya ̭ gaˇ ma doˆ-iˇ nya ni k’aˇ g’eh nya-eu lo ̭-ehˇ caw ba nehˬ-awˇ, aˬ yaw ̭ nya ̭ k’aˇ loˬ-eu jeˬ tiˬ poˆ haw nehˬ-awˬ. ¹⁴ Maˇ maˇ ni loˬ gaˇ caw ba nehˬ nya-eu g’aˇ duˬ, aˬ dui-euˬ tsawˇ haˬ deuˬyaw muiˬ jeˬ-ahˇ mˇ nya laˇ ni bi leh jeh-eu loˬ meh. Gaˇ dahˇ maˬ tsoeˬ ni maˬ ya bi deh ̭-a. ¹⁵ Ngaˬ nehˬ-ehˇ jawˇ-eu tsawˇ haˬ dawˬ tawˆ lu ̭ nawˬ-ahˇ dawˬ cawˬ puˬ ahˇ le ̭-euˬ meh. Nga ma ̭ dawˬ cawˬ puˬ ahˇ le ̭-euˬ meh lehˇ, Ka li-ahˇ jah-eu cawˬ deuˬ-ahˇ tiˬ poˆ tsa ̭ gaˬ nehˬ-awˬ. Miˬyehˇ-euˬ guiˬ lahˬ yaw dzahˇ naw ma ̭ dawˬ tawˆ lu ̭ k’oeˇ taˆ jaˆ lu ̭-uˇ.