LOˇMAˆ SAHˬ BO ̭

LOˇMAˆ SAHˬ BO ̭

¹ Ngaˇ-aˬ, Yeˬsuˇ Ka liˬ-euˬ zaˬ k’aˆ Pawˇluˆ ma. Miˬyehˇ-euˬ Laˬ k’aˬ cehˇ-eu Guiˬ lahˬ dawˬ mehˬ-eu g’aˇ duˬ, Miˬyehˇ neh tseˇ doˆ-awˇ kuˇ-euˬ g’aˬ k’ehˇ tiˬ g’aˬ pyeu ̭-eu ma. ² Jaˇli ̭ la ̭ k’oeˇ bo ̭ taˬ-euˬ lo ̭-ehˇ, Miˬyehˇ aˬ yaw ̭-euˬ g’aˇ duˬ ngehˬ dah-eu deuˬ-ahˇ g’oe-eu la ̭ k’oeˇ, Laˬ k’aˬ cehˇ-eu Guiˬ lahˬ dawˬ bi keuˆ le ma lehˇ, aˇ hu ba neh saˇ jaˇ dzaˬ taˬ-euˬ jaˆ-eu meh. ³ K’oeˇ-aˬ, aˬ yaw ̭-euˬ Zaˬmaˇ pyeu ̭-eu aˬ dui-euˬ Sahˬpaˬ Yeˬsuˇ Ka li gaˇ kawˆ meh. Tsawˇ haˬ zaˬ-ahˇ ta ̭-eu paw neh sawˇ le ̭ naˇ, aˬ yaw ̭-aˬ, Daˬbiˇ-euˬ zaˬ deuˬ uˆ deuˬ la ̭ k’oeˇ deh ̭ le-euˬ meh. ⁴ Miˬyehˇ-ahˇ ta ̭-eu paw neh sawˇ le ̭ naˇ, aˬ yaw ̭-aˬ, Miˬyehˇ-euˬ Zaˬmaˇ pyeu ̭-eu gaˇ kawˆ, huiˬ dui dui-eu baoˬ la ̭ k’oeˇ aˬ dui-ahˇ bi mawˇ la ̭-euˬ meh. Aˬ yaw ̭ shiˇ g’aˬ-euˬ gaˇ Miˬyehˇ neh paˇ bi g’o ̭ deh ̭ laˇ-eu la ̭ k’oeˇ bi mawˇ la ̭-euˬ meh. ⁵ Tsawˇ jeuˬ dawˬ tawˆ lu ̭ jah laˇ-awˇ naˇ haˬ geu ̭ ni sheuˬ g’eh-eu g’aˇ duˬ, Ka li-euˬ g’aˬ k’ehˇ bi geu ̭-eu lehˇ, Ka li-ahˇ g’oe-awˇ Miˬyehˇ ngaˬ-ahˇ aˬ kawˬ-aˬ bi ̭ la ̭-euˬ meh. ⁶ K’oeˇ-euˬ la ̭ k’oeˇ, Yeˬsuˇ Ka li-ahˇ ta ̭-eu tsawˇ haˬ bi pyeu ̭ laˇ-eu lehˇ Miˬyehˇ neh kuˇ doˆ-euˬ naw ma ̭ Loˇmaˆ meuˬ-ahˇ jawˇ-eu tsawˇ haˬ deuˬ k’aw ̭ ahˇ-eu meh. ⁷ K’oeˇ miˇ neh, Miˬyehˇ-euˬ tsawˇ haˬ bi pyeu ̭ laˇ-eu lehˇ kuˇ doˆ taˬ-euˬ, aˬ yaw ̭ gaˬ-eu naw ma ̭ Loˇmaˆ meuˬ-ahˇ k’aˇ jawˇ-eu tsawˇ haˬ deuˬ-ahˇ, ngaˇ sahˬ bo ̭ bo ̭ ahˇ la ̭-euˬ ma. Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka liˬeuˬ guiˬ lahˬ yaw dzahˇ hawˇ-eu nui saˇ o ̭-eu jeˬ, naw ma ̭ k’oeˇ taˆ keuˆ le lu ̭-uˇ. ⁸ Yeˬsuˇ Ka li-ahˇ g’oe-awˇ, naw ma ̭-euˬ g’aˇ duˬ Miˬyehˇ-ahˇ guiˬ lahˬ huiˬ-eu dawˬ huˬ teˇ ngehˬ-eu ma. Aˬ jeˬ miˇ neh ehˇ naˇ, naw ma ̭ jah-eu gaˇ kawˆ, miˇ k’ahˬ dawˬ tawˆ lu ̭ gaˬ byah jiˇ-euˬ meh. ⁹ Ngaˇ ehˇ-eu dawˬ heu deuˬ tsaˬ-eu gaˇ kawˆ saˇ kiˇ-aˬ, Miˬyehˇ meh. Aˬ jeˬ miˇ neh ehˇ naˇ, ngaˇ nui ma keuˆ dui dui-awˇ aˬ yaw ̭-euˬ Zaˬmaˇ gaˇ kawˆ Laˬ k’aˬ cehˇ-eu Guiˬ lahˬ dawˬ mehˬ-eu la ̭ k’oeˇ aˬ yaw ̭-euˬ gaˇ mˇ lu ̭-eu ma. Ngaˇ naw ma ̭-ahˇ noeˬ keuˆ lu ̭ meh lehˇ Miˬyehˇ siˬ nya meh. ¹⁰ Ngaˇ guiˬ lahˬ k’aˇ shaˇ ngeh, naw ma ̭ jawˇ gaˇ dawˬ deh g’a keuˆ laˇ nya ni g’awˬ shaˬ gaˬ-awˇ gaˇ ma bi dahˇ laˇ la ̭ lehˇ, Miˬyehˇ-ahˇ shaˇ-eu ma. ¹¹ Naw ma ̭-ahˇ ngaˇ mawˇ maw ̭ dui dui nya. Sa ̭ laˇ paw-euˬ guiˬ lahˬ bi ̭ ta ̭ yuˇ ta ̭-eu la ̭ k’oeˇ, naw ma ̭ g’aˬ ahˇ dzehˬ laˇ ni mˇ maw ̭ dui dui nya. ¹² Ngaˇ ehˇ maw ̭-eu-aˬ, ngaˬ-euˬ jah-eu jeˬ baˬ da neh naw ma ̭ g’aˬ ahˇ dzehˬ laˇ-eu uˬ ta ̭, naw ma ̭-euˬ jah-eu jeˬ baˬ da neh ngaˇ g’aˬ ahˇ dzehˬ laˇ-awˇ, nyiˬ paw lu ̭ guiˬ lahˬ baw-eu jeˬ-ahˇ ehˇ maw ̭-eu ma. ¹³ Aˬ yui ̭ aˬ nyiˇ Ka li zaˬ deuˬ-oˇ, naw ma ̭ jawˇ gaˇ laˇ-eu g’aˇ duˬ ngaˇ g’awˬ mya poˆ lehˬ hmˬ-euˬ gaˇ naw ma ̭ noeˬ mawˇ-eu tsaˬ meh. Ehˇ k’aw ̭, tiˬ poˆ tiˬ jeˬ g’eu tehˬ-eu jaˆ-eu miˇ neh, maˬ laˇ doˆ nya nya. Nui gaˇ jawˇ-eu aˬ cawˬ tsawˇ jeuˬ deuˬ-ahˇ ngaˬ neh mehˬ-awˇ, jah-eu tsawˇ haˬ bi pyeu ̭ laˇ-euˬ lo ̭-ehˇ, naw ma ̭ jawˇ gaˇ k’aw ̭, jah-eu tsawˇ haˬ bi pyeu ̭ laˇ ni ngaˇ mehˬ laˇ maw ̭ miˇ-a. ¹⁴ Aˬ jeˬ miˇ neh ehˇ naˇ, meuˬ-ahˇ jawˇ-eu aˇ tiˆ goˇ-eu tsawˇ haˬ deuˬ-ahˇ maˬ ehˇ, pu-ahˇ jawˇ-eu teˬ dui dui-eu tsawˇ haˬ deuˬ-ahˇ maˬ ehˇ, zaˬ siˬ tsawˇ gahˇ maˬ ahˇ-eu tsawˇ haˬ deuˬ-ahˇ maˬ ehˇ, tsawˇ jeuˬ dawˬ tawˆ lu ̭-ahˇ dawˬ mehˬ mehˬ-eu g’aˇ duˬ ngaˇ dziˇ dzoˆ na ̭-eu ma. ¹⁵ K’oeˇ miˇ neh, naw ma ̭ Loˇmaˆ meuˬ-ahˇ jawˇ-eu tsawˇ haˬ deuˬ-ahˇ k’aw ̭, ngaˇ dawˬ mehˬ mehˬ maw ̭ dui dui-eu ma. ¹⁶ Laˬ k’aˬ cehˇ-eu Guiˬ lahˬ dawˬ-ahˇ ngaˇ nui ma huiˬ dui dui lu ̭ ma. Laˬ k’aˬ cehˇ-eu Guiˬ lahˬ dawˬ-aˬ, jah-eu tsawˇ haˬ dawˬ tawˆ lu ̭-ahˇ ka k’o ̭ nehˬ-eu Miˬyehˇ-euˬ baoˬ pyeu ̭-eu meh. Yuˇdaˆ tsawˇ haˬ-ahˇ neh dahˬ beh-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ keuˆ ni ka k’o ̭-eu meh. ¹⁷ Tsawˇ haˬ zaˬ aˬ yaw ̭-ahˇ tsaˬ laˇ tsahˇ laˇ ni Miˬyehˇ aˬ joˆ-ehˇ jahˇ-eu gaˇ kawˆ, La k’aˬ cehˇ-eu Guiˬ lahˬ dawˬ la ̭ k’oeˇ pah mehˬ taˬ-euˬ meh. Miˬyehˇ neh k’aˇ mˇ-euˬ jeˬ dawˬ tawˆ lu ̭, tsawˇ haˬ zaˬ jah-eu baˬ da neh teh ̭-ehˇ keuˆ le nya-eu meh. "Jah-eu miˇ neh Miˬyehˇ-ahˇ tsaˬ lehˇ tsahˇ leˇ-eu tsawˇ haˬ-aˬ, sa ̭ laˇ deh ̭-eu jeˬ za teh ̭-a" lehˇ, Jaˇli ̭ la ̭ k’oeˇ ehˇ taˬ-euˬ meh. ¹⁸ Yaw tsaˬ yaw dawˇ jeˬ-ahˇ aˬ cawˬ maˬ mawˇ nya ni laˆ tsoeˬ-eu tsawˇ haˬ zaˬ-euˬ iˬ baˇ hawˇ-eu yaw haiˬ jeˬ mˇ gaˇ, Miˬyehˇ nui ma pehˇ-eu la ̭ k’oeˇ tsawˇ haˬ zaˬ-ahˇ yaˇ k’aˬ daˇ-eu gaˇ kawˆ, mˬ-ahˇ neh pah mehˬ le ̭-euˬ meh. ¹⁹ Miˬyehˇ-euˬ gaˇ kawˆ aˬ yaw ̭ ma ̭ bya cehˆ ni siˬ duˬ mawˇ duˬ nya paˬ-ehˇ Miˬyehˇ neh pah mehˬ taˬ-euˬ k’aw ̭, aˬ yaw ̭ ma ̭ k’oeˇ lo ̭-ehˇ g’eh-eu miˇ neh, aˬ yaw ̭ yaˇ k’aˬ daˇ-eu meh. ²⁰ Miˬyehˇ mˬ beh miˇ beh ngeh tiˬ nah neh, maˬ haw mawˇ nya-eu jeˬ pyeu ̭-eu aˬ yaw ̭-euˬ la ̭ k’oeˇ ahˇ-eu baoˬ hawˇ-eu, aˬ yaw ̭ mˬ maˬ maˬ byaˆ zaˇ ziˇ Miˬyehˇ pyeu ̭-eu gaˇ kawˆ, bya cehˆ ni siˬ duˬ mawˇ duˬ laˇ-euˬ meh. Aˬ yaw ̭ neh mˇ taˬ-euˬ gaˇ-ahˇ haw-awˇ, k’oeˇ lo ̭-ehˇ siˬ duˬ nya-eu meh. K’oeˇ miˇ neh, aˬ yaw ̭ ma ̭ maˬ pyehˇ dzeuˇ nya-a. ²¹ Aˬ yaw ̭ ma ̭ Miˬyehˇ-ahˇ siˬ nya-eu k’aw ̭, taˬ huiˬ taˬ mahˇ nehˬ geuˇ-eu lo ̭-ehˇ maˬ taˬ huiˬ maˬ taˬ mahˇ-eu uˬ ta ̭, aˬ yaw ̭-euˬ guiˬ lahˬ-ahˇ maˬ siˬ nya-a. Aˬ yaw ̭ ma ̭ tiˬ jeˬ-iˬ maˬ noeˬ doˆ nya-ehˇ, nui ma k’ehˬ bahˬ zahˇ tsui ni jaˆ-eu meh. ²² Yaw gahˇ ma lehˇ yawˬ haˇ yawˬ ha ehˇ k’aw ̭, aˬ dzawˬ aˇ gah-ahˇ duˇ-eu meh. ²³ Shiˇ-eu maˬ baw-eu Miˬyehˇ-ahˇ uˬ duˬ maˬ tahˬ ni, shiˇ nya-eu jeˬ-ahˇ duˇ leˇ ni tehˆ taˬ-euˬ mawˇ kawˇ pyeu ̭-eu, tsawˇ haˬ mawˇ kawˇ, aˇ jiˇ mawˇ kawˇ, oeˬ kuiˇ oeˬ la ̭ tso ̭-eu jeˬ zaˬ mawˇ kawˇ, miˇ tsa joe joe-ehˇ cah-eu jeˬ-euˬ mawˇ kawˇ, heu deuˬ-ahˇ uˬ duˬ tahˬ-eu meh. ²⁴ K’oeˇ miˇ neh, Miˬyehˇ neh tsawˇ haˬ k’oeˇ deuˬ-ahˇ aˬ yaw ̭ ma ̭ nui k’ahˇ jaˆ-eu jaw ̭ dui dui-eu jeˬ la ̭ k’oeˇ a dzeh nehˬ-awˇ, aˬ yaw ̭ ma ̭ tiˬ g’aˬ tiˇ g’aˬ sha ̭ dawˇ dui dui paˬ-ehˇ g’eh-eu jeˬ mˇ ta ̭-eu meh. ²⁵ Miˬyehˇ-euˬ gaˇ kawˆ tsaˬ-eu dawˇ-eu jeˬ yuˇ-awˇ, maˬ tsaˬ maˬ dawˇ-eu jaˬ myaw ̭ myaw ̭-eu jeˬ-ahˇ paˇ geu ̭-euˬ meh. Beh-euˬ yaw sahˇ g’aˬ pyeu ̭-eu Miˬyehˇ-ahˇ uˬ duˬ maˬ tahˬ ni, aˬ yaw ̭ neh beh taˬ-euˬ jeˬ-ahˇ uˬ duˬ tahˬ-eu meh. Beh-euˬ yaw sahˇ g’aˬ-ahˇ mˬ maˬ maˬ byaˆ zaˇ ziˇ ja ceuˬ lu ̭-uˇ. Aˬ miˬ. ²⁶ Aˬ yaw ̭ ma ̭ k’oeˇ lo ̭-ehˇ deh ̭-eu baˬ da neh, sha ̭ dawˇ dui dui paˬ-ehˇ g’eh-eu k’aˬ miˬ sheu-eu jeˬ la ̭ k’oeˇ, Miˬyehˇ neh aˬ yaw ̭ ma ̭-ahˇ a dzeh nehˬ-euˬ meh. Zaˬ miˬ zaˬ deuˬ-ahˇ keuˆ ni, zaˬ miˬ zaˬ cawˬ cawˬ k’aˬ miˬ sheu ta ̭ gaˇ deh ̭ keuˆ-euˬ meh. ²⁷ K’oeˇ lo ̭-ehˇ duˇ ni, k’aˬ dzeˇ zaˬ deuˬ k’aw ̭, zaˬ miˬ zaˬ deuˬ-ahˇ nui k’ahˇ maˬ jaˆ-ehˇ, k’aˬ dzeˇ zaˬ cawˬ cawˬ k’aˬ miˬ sheu ta ̭ maw ̭-eu nui k’ahˇ-ahˇ maˬ g’aˬ leˇ ni pyeu ̭ laˇ taˬ-euˬ meh. K’aˬ dzeˇ zaˬ cawˬ cawˬ sha ̭ dawˇ dui dui paˬ-ehˇ g’eh-eu jeˬ jahˇ-eu la ̭ k’oeˇ, aˬ yaw ̭ ma ̭ k’oeˇ taˆ o ̭-eu geuˇ-eu k’ehˬ-eu k’aˆ-eu jeˬ keuˆ le ni yawˬ haˇ yawˬ ha mˇ-euˬ meh. ²⁸ Miˬyehˇ gaˇ kawˆ dawˇ coe ni siˬ nya taˬ paˬ-ehˇ g’eh-eu jeˬ-ahˇ aˬ yaw ̭ ma ̭ maˬ shaˇ noeˬ-eu baˬ da neh, aˬ yaw ̭ ma ̭ maˬ mˇ k’mˬ-eu jeˬ mˇ ni, bahˬ dui jaw ̭ dui dui-eu jeˬ mˇ-eu nui ma jaˆ gaˇ, Miˬyehˇ neh aˬ yaw ̭ ma ̭-ahˇ a dzeh nehˬ-euˬ meh. ²⁹ Aˬ yaw ̭ ma ̭ la ̭ k’oeˇ maˬ muiˬ maˬ jaˬ-eu jeˬ, yaw haiˬ jeˬ, mehˇ juiˇ juiˇ-eu jeˬ, yaw doeˇ jahˇ-eu jeˬ, heu deuˬ tiˬ byah ni ahˇ-eu meh. Aˬ yaw ̭ ma ̭ la ̭ k’oeˇ, myaˆ naˆ-eu, seh ̭ maw ̭-eu, diˬ maw ̭ ceh maw ̭-eu, mehˇ shuiˇ shuiˇ-eu, aˬ cawˬ-ahˇ noeˬ doeˇ-eu, heu deuˬ tiˬ byah ni ahˇ-eu meh. Aˬ cawˬ gaˇ kawˆ maˬ ngeuˇ-eu jeˬ ja k’oeˬ-eu meh. ³⁰ Tiˬ g’aˬ tiˇ g’aˬ ja bu ja doeˇ-eu, Miˬyehˇ-ahˇ muiˇ-eu, aˬ cawˬ-ahˇ ngehˬ coeˬ ehˇ coeˬ-eu, yawˬ haˇ yawˬ ha taˬ huiˬ-eu, k’ahˬ sehˇ jehˆ-eu, yaw haiˬ jeˬ mˇ-eu g’aˇ duˬ k’aˆ k’aˆ ni shaˇ noeˬ-eu, aˬ da aˬ ma ehˇ dawˬ maˬ naˇ haˬ-eu, heu deuˬ k’aw ̭ ahˇ-eu meh. ³¹ Noeˬ siˬ nya-eu nui ma maˬ ahˇ-a. Saˇ jaˇ maˬ zi ̭-a. K’oeˇ uˬ ta ̭, aˬ cawˬ-ahˇ g’awˬ shaˬ gaˬ-eu maˬ siˬ nya-a. ³² K’oeˇ lo ̭-ehˇ deh ̭-eu tsawˇ haˬ deuˬ shiˇ-eu geuˇ meh lehˇ, Miˬyehˇ-euˬ zahˇ dawˬ k’o ̭ dawˬ la ̭ k’oeˇ ehˇ tsehˆ taˬ-euˬ aˬ yaw ̭ ma ̭ siˬ nya meh. Ehˇ k’aw ̭, aˬ yaw ̭ ma ̭ k’oeˇ lo ̭-ehˇ mˇ-eu maˬ byehˇ-eu uˬ ta ̭, k’oeˇ lo ̭-ehˇ mˇ caw-eu tsawˇ haˬ deuˬ-ahˇ nui ma tsaˬ-eu meh.

¹ Cawˬ deuˬ-oˇ, naw ma ̭ aˬ cawˬ-ahˇ yaw lehˬ poˆ te loˇ. Nawˇ aˬ joˆ-ehˇ g’eh-eu tsawˇ haˬ ma lehˇ yawˬ haˇ yawˬ ha noeˬ k’aw ̭, yaw lehˬ maˬ ahˇ-eu tsawˇ haˬ maˬ ngeuˇ-a. Yawˬ ha aˬ cawˬ k’aˇ deh ̭-eu lo ̭-ehˇ deh ̭-awˇ, aˬ cawˬ-ahˇ yaw lehˬ poˆ te lehˇ ngeuˇ naˇ, yawˬ haˇ yawˬ ha yaw lehˬ poˆ gaˇ duˇ-eu teh ̭ meh. ² K’oeˇ lo ̭-ehˇ deh ̭-eu tsawˇ haˬ deuˬ-ahˇ Miˬyehˇ yaˇ k’aˬ daˇ nehˬ-eu-aˬ, tsaˬ-eu meh lehˇ aˬ dui siˬ nya ma. ³ Ehˇ k’aw ̭, aˬ cawˬ mˇ-euˬ yaw lehˬ nga lehˇ nawˇ noeˬ-eu jeˬ-ahˇ yawˬ ha paˇ mˇ lu ̭-eu meh. Miˬyehˇ yaˇ k’aˬ daˇ-eu jeˬ-ahˇ buˬ-iˇ nya ma lehˇ duˇ te loˇ. ⁴ Maˬ ngeuˇ naˇ, aˬ yaw ̭-euˬ huiˬ dui dui-eu g’awˬ shaˬ gaˬ-eu jeˬ, oˇ coeˇ-eu jeˬ, nui ma mahˇ-eu jeˬ, heu deuˬ-ahˇ nawˇ yehˬ bawˬ sehˇ lu-ehˇ g’eh te loˇ. Miˬyehˇ g’awˬ shaˬ gaˬ-eu jeˬ ahˇ meh lehˇ nawˇ siˬ duˬ meh. Aˬ jeˬ miˇ neh ehˇ naˇ, nawˇ iˬ baˇ noeˬ poˆ laˇ ni aˬ yaw ̭ leh jeh lu ̭-eu meh. ⁵ Ehˇ k’aw ̭, nawˇ nui ma g’ahˇ dui dui-awˇ, naˬ bawˇ tuˇ-eu miˇ neh, Miˬyehˇ nui ma pehˇ-eu jeˬ hawˇ-eu dawˇ coe ni yaˇ k’aˬ daˇ-eu jeˬ pah mehˬ le ngeh Nah, k’oeˇ naˆ maˬ tseˇ g’eh-eu k’ehˬ-eu k’aˆ-eu jeˬ nawˬ-euˬ k’oeˇ taˆ keuˆ le ni yawˬ haˇ yawˬ ha mˇ lu ̭ gaˇ duˇ-eu meh. ⁶ Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ yawˬ g’aˬ na lu ̭-ahˇ yawˬ ha neh k’aˇ mˇ taˬ-euˬ lo ̭-ehˇ geuˇ ni daˇ teh ̭-a. ⁷ Tsawˇ haˬ tiˬ paˆ na deuˬ-aˬ, yaw muiˬ jeˬ-ahˇ maˬ tsehˆ leˇ ni mˇ-eu la ̭ k’oeˇ, yaw sheh ̭ k’ahˬ sehˇ hawˇ-eu taˬ huiˬ taˬ mahˇ nehˬ-eu jeˬ-ahˇ maˬ ehˇ, mˬ maˬ maˬ byaˆ zaˇ ziˇ maˬ shiˇ ni ya deh ̭-eu jeˬ-ahˇ maˬ ehˇ, poˆ lu ̭-eu meh. K’oeˇ lo ̭-ehˇ g’eh-eu tsawˇ haˬ deuˬ-ahˇ mˬ maˬ maˬ byaˆ zaˇ ziˇ deh ̭-eu jeˬ Miˬyehˇ bi ̭ nehˬ teh ̭-a. ⁸ Tsawˇ haˬ tiˬ paˆ na deuˬ-aˬ, smˇ k’aˆ k’aˆ-awˇ, yaw tsaˬ yaw dawˇ jeˬ-ahˇ maˬ geu ̭-ehˇ, maˬ tsaˬ maˬ dawˇ-eu jeˬ-euˬ mehˬ nah iˇ-eu meh. K’oeˇ lo ̭-ehˇ g’eh-eu tsawˇ haˬ deuˬ k’oeˇ taˆ Miˬyehˇ nui ma pehˇ-eu jeˬ tahˬ daˆ nehˬ teh ̭-a. ⁹ Yuˇdaˆ tsawˇ haˬ deuˬ-ahˇ neh aˇ dahˬ beh-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ keuˆ ni, maˬ muiˬ-eu jeˬ k’aˇ mˇ-eu tsawˇ haˬ dawˬ tawˆ lu ̭, k’ehˬ-eu k’aˆ-eu jeˬ hawˇ-eu shaˬ zahˬ na ̭ dui dui-eu jeˬ-ahˇ ya daˬ teh ̭-a. ¹⁰ Ehˇ k’aw ̭, Yuˇdaˆ tsawˇ haˬ deuˬ-ahˇ neh aˇ dahˬ beh-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ keuˆ ni, yaw muiˬ jeˬ k’aˇ mˇ-eu tsawˇ haˬ dawˬ tawˆ lu ̭-ahˇ, yaw sheh ̭ k’ahˬ sehˇ hawˇ-eu taˬ huiˬ taˬ mahˇ nehˬ-eu jeˬ maˬ ehˇ, nui saˇ o ̭-eu jeˬ maˬ ehˇ, Miˬyehˇ bi ̭ nehˬ teh ̭-a. ¹¹ Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ yawˬ g’aˬ na lu ̭-ahˇ myaˆ pyawˬ huiˬ nyiˇ maˬ tseˇ ni yaˇ k’aˬ daˇ teh ̭-a. ¹² Yuˇdaˆ tsawˇ haˬ maˬ ngeuˇ-eu deuˬ-aˬ, Moˇseˬ neh bi ̭-euˬ Zahˇ dawˬ k’o ̭ dawˬ maˬ jaˆ-a. Aˬ yaw ̭ ma ̭ Zahˇ dawˬ k’o ̭ dawˬ-ahˇ maˬ ta ̭-ehˇ iˬ baˇ mˇ naˇ, Zahˇ dawˬ k’o ̭ dawˬ-ahˇ maˬ ta ̭-ehˇ ya luˬ ya seˇ-iˇ teh ̭-a. Yuˇdaˆ tsawˇ haˬ deuˬ-aˬ, Zahˇ dawˬ k’o ̭ dawˬ jaˆ-eu miˇ neh, iˬ baˇ mˇ naˇ, Zahˇ dawˬ k’o ̭ dawˬ la ̭ k’oeˇ k’aˇ ehˇ taˬ-euˬ lo ̭-ehˇ yaˇ k’aˬ daˇ nehˬ gaˇ ya daˬ teh ̭-a. ¹³ Aˬ jeˬ miˇ neh ehˇ naˇ, tsawˇ haˬ zaˬ-aˬ, Zahˇ dawˬ k’o ̭ dawˬ-ahˇ ya gaˬ-euˬ baˬ da neh teh ̭-ehˇ Miˬyehˇ-ahˇ tsaˬ leˇ tsahˇ leˇ-eu maˬ ngeuˇ-a. Zahˇ dawˬ k’o ̭ dawˬ la ̭ k’oeˇ ehˇ taˬ-euˬ lo ̭-ehˇ mˇ-awˇ neh teh ̭-ehˇ Miˬyehˇ-ahˇ tsaˬ leˇ tsahˇ leˇ nya-eu meh. ¹⁴ Yuˇdaˆ tsawˇ haˬ maˬ ngeuˇ-eu deuˬ-aˬ, Moˇseˬ neh bi ̭-euˬ Zahˇ dawˬ k’o ̭ dawˬ maˬ jaˆ-a. Ehˇ k’aw ̭, aˬ yaw ̭ ma ̭ noeˬ siˬ nya-awˇ Zahˇ dawˬ k’o ̭ dawˬ la ̭ k’oeˇ ehˇ taˬ-euˬ lo ̭-ehˇ deh ̭ tsaˬ nya naˇ, aˬ yaw ̭ ma ̭-euˬ noeˬ siˬ nya-eu nui ma-aˬ, aˬ yaw ̭ ma ̭-euˬ zahˇ dawˬ k’o ̭ dawˬ pyeu ̭-eu meh. ¹⁵ Aˬ yaw ̭ ma ̭ deh ̭-euˬ jawˇ-euˬ k’oeˇ-aˬ, aˬ yaw ̭ ma ̭-euˬ nui ma la ̭ k’oeˇ Zahˇ dawˬ k’o ̭ dawˬ bo ̭ ahˇ taˬ-euˬ gaˇ duˇ-eu gaˇ kawˆ saˇ kiˇ kamˬ lu ̭-eu meh. Aˬ yaw ̭ ma ̭-euˬ nui ma la ̭ k’oeˇ Zahˇ dawˬ k’o dawˬ bo ̭ ahˇ taˬ-euˬ gaˇ duˇ-eu gaˇ kawˆ, aˬ yaw ̭ ma ̭-euˬ noeˬ siˬ nya-eu nui ma k’oeˇ siˬ k’aw ̭, saˇ kiˇ kamˬ lu ̭-eu meh. Aˬ jeˬ miˇ neh ehˇ naˇ, tiˬ poˆ na aˬ yaw ̭ ma ̭ neh mˇ-euˬ tsaˬ meh lehˇ aˬ yaw ̭ ma ̭-euˬ nui noeˬ k’oeˇ aˬ yaw ̭ ma ̭-ahˇ ehˇ nehˬ-awˇ, tiˬ poˆ na maˬ tsaˬ-a lehˇ aˬ yaw ̭ ma ̭-ahˇ pyehˇ lu ̭ meh. ¹⁶ K’oeˇ miˇ neh, ngaˇ mehˬ lu ̭-eu Laˬ k’aˬ cehˇ-eu Guiˬ lahˬ dawˬ heu ehˇ maw ̭-eu-aˬ, tsawˇ haˬ zaˬ-euˬ nui ma la ̭ k’oeˇ za ̭ taˬ-euˬ nui noeˬ k’oeˇ-ahˇ, Yeˬsuˇ Ka li-ahˇ g’oe-awˇ Miˬyehˇ yaˇ k’aˬ daˇ ngeh Nah, k’oeˇ lo ̭-ehˇ daˇ teh ̭-a. ¹⁷ Nawˬ-euˬ gaˇ kawˆ aˬ joˆ-ehˇ ehˇ paˬ nga. Nawˇ Yuˇdaˆ tsawˇ haˬ ma lehˇ nawˇ yawˬ haˇ yawˬ ha ehˇ-eu meh. Zahˇ dawˬ k’o ̭ dawˬ-ahˇ g’oe lu ̭-awˇ, Miˬyehˇ-euˬ tsawˇ haˬ ma lehˇ k’ahˬ sehˇ jehˆ-eu meh. ¹⁸ Miˬyehˇ bi mˇ maw ̭-eu jeˬ-ahˇ nawˇ siˬ nya-awˇ, yaw muiˬ jeˬ-ahˇ aˬ joˆ-ehˇ ya tseˇ geu ̭-eu gaˇ kawˆ Zahˇ dawˬ k’o ̭ dawˬ la ̭ k’oeˇ mehˬ taˬ-euˬ nawˇ siˬ nya meh. ¹⁹ Nawˇ-aˬ, myaˆ beh ̭-ahˇ gaˇ ma sheuˬ mehˬ-eu tsawˇ haˬ pyeu ̭-awˇ, yaw zahˇ la ̭ k’oeˇ jawˇ-eu tsawˇ haˬ deuˬ g’aˇ duˬ yaw sheh ̭ pyeu ̭-eu ma lehˇ, yawˬ haˇ yawˬ ha sawˇ taˬ-euˬ meh. ²⁰ Aˬ dzawˬ aˇ gah deuˬ-ahˇ mehˬ paˇ tsoˆ paˇ-eu tsawˇ haˬ pyeu ̭-awˇ, maˬ siˬ maˬ nya-eu tsawˇ haˬ deuˬ-ahˇ mehˬ nehˬ tsoˆ nehˬ-eu tsawˇ haˬ ma lehˇ nawˇ sawˇ taˬ-euˬ meh. Zaˬ siˬ tsawˇ gahˇ hawˇ-eu yaw tsaˬ yaw dawˇ dawˬ tawˆ lu ̭ Zahˇ dawˬ k’o ̭ dawˬ la ̭ k’oeˇ ahˇ jiˇ ma lehˇ nawˇ jah duˬ taˬ-euˬ meh. ²¹ Nawˇ aˬ cawˬ-ahˇ mehˬ-eu tsoˆ-eu jeˬ maˇ-iˬ, aˬ jeˬ miˇ neh yawˬ haˇ yawˬ ha maˬ mehˬ maˬ tsoˆ te. Smˇ k’oeˬ taˬ k’oeˬ lehˇ aˬ cawˬ-ahˇ dawˬ mehˬ mehˬ-awˇ, yawˬ ha g’aˬ smˇ k’oeˬ k’oeˬ lu ̭ te loˇ. ²² Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ lehˇ nawˇ ehˇ-awˇ, yawˬ ha g’aˬ bahˬ lu ̭ muˆ lu ̭ te loˇ. Nawˇ tahˬ pahˬ aˬ ma mawˇ kawˇ-ahˇ nui daˆ daˆ k’aw ̭, tahˬ paˬ aˬ ma nymˇ la ̭ k’oeˇ jaˆ-eu myawˬ gahˬ deuˬ k’oeˬ lu ̭ te loˇ. ²³ Nawˇ Miˬyehˇ-euˬ zahˇ dawˬ k’o ̭ dawˬ jaˆ ma lehˇ k’ahˬ sehˇ jehˆ-eu k’aw ̭, zahˇ dawˬ k’o ̭ dawˬ-ahˇ mˇ bahˬ mˇ bahˬ-ehˇ, Miˬyehˇ-euˬ myaˆ pyawˬ naˇ mehˇ cawˆ ni jahˇ lu ̭ te loˇ. ²⁴ "Naw ma ̭ Yuˇdaˆ tsawˇ haˬ deuˬ baˬ da neh, Yuˇdaˆ tsawˇ haˬ maˬ ngeuˇ-eu deuˬ Miˬyehˇ-euˬ tsawˇ myahˇ cawˆ ni ngehˬ lu ̭ tmˇ lu ̭ meh" lehˇ, Jaˇli ̭ la ̭ k’oeˇ ehˇ taˬ-euˬ meh. ²⁵ Zahˇ dawˬ k’o ̭ dawˬ-ahˇ naw ma ̭ naˇ haˬ geu ̭ naˇ, baˆ k’oˆ mehˬ dzaˬ yehˬ-euˬ gaˇ dahˇ tsoeˬ teh ̭-a. Ehˇ k’aw ̭, Zahˇ dawˬ k’o ̭ dawˬ-ahˇ naw ma ̭ maˬ naˇ haˬ geu ̭ naˇ, baˆ k’oˆ mehˬ dzaˬ yehˬ-euˬ k’aw ̭, maˬ yehˬ-euˬ gaˇ duˇ teh ̭-a. ²⁶ Baˆ k’oˆ mehˬ dzaˬ maˬ yehˬ-euˬ aˬ cawˬ tsawˇ jeuˬ k’aw ̭ Zahˇ dawˬ k’o ̭ dawˬ-ahˇ naˇ haˬ geu ̭ naˇ, maˬ yehˬ-euˬ k’aw ̭, yehˬ-euˬ lo ̭-ehˇ Miˬyehˇ maˬ sawˇ nehˬ-aˇ loˇ. ²⁷ Naw ma ̭ Yuˇdaˆ tsawˇ haˬ deuˬ-ahˇ aˬ cawˬ iˬ baˇ taˬ teh ̭-a. Aˬ jeˬ miˇ neh ehˇ naˇ, naw ma ̭ Zahˇ dawˬ k’o ̭ dawˬ bo ̭ doˆ taˬ-euˬ jaˆ-awˇ baˆ k’oˆ mehˬ dzaˬ yehˬ-euˬ k’aw ̭, Zahˇ dawˬ k’o ̭ dawˬ mehˬ nah maˬ caw teh-a. Aˬ cawˬ tsawˇ jeuˬ k’oeˇ deuˬ-aˬ, shiˬ shaˬ jiˇ baˆ k’oˆ mehˬ dzaˬ maˬ yehˬ-euˬ k’aw ̭, Zahˇ dawˬ k’o ̭ dawˬ-ahˇ naˇ haˬ geu ̭-eu meh. ²⁸ Shiˬ shaˬ jiˇ baˆ k’oˆ mehˬ dzaˬ teh ̭-ehˇ yehˬ-awˇ, maˇ maˇ ni g’eh-eu baˆ k’oˆ mehˬ dzaˬ maˬ yehˬ-euˬ tsawˇ haˬ-aˬ, Yuˇdaˆ tsawˇ haˬ maˇ maˇ ni maˬ ngeuˇ-a. La ̭ nyiˇ paw teh ̭-ehˇ Yuˇdaˆ tsawˇ haˬ pyeu ̭-eu meh. ²⁹ La ̭ k’oeˇ paw keuˆ ni Yuˇdaˆ tsawˇ haˬ pyeu ̭-eu g’aˬ-aˬ, Yuˇdaˆ tsawˇ haˬ maˇ maˇ ni meh. Aˬ yaw ̭-aˬ, nui ma la ̭ k’oeˇ baˆ k’oˆ mehˬ dzaˬ yehˬ-euˬ tsawˇ haˬ meh. K’oeˇ-aˬ Miˬyehˇ-euˬ Yaw sahˇ neh mˇ-euˬ jeˬ pyeu ̭-eu meh. Bo ̭ doˆ taˬ-euˬ Zahˇ dawˬ k’o ̭ dawˬ neh mˇ-euˬ jeˬ maˬ ngeuˇ-a. K’oeˇ lo ̭-ehˇg’eh-eu tsawˇ haˬ-ahˇ ja ceuˬ-eu g’aˬ-aˬ, Miˬyehˇ meh. Tsawˇ haˬ zaˬ maˬ ja ceuˬ-a.

¹ Yuˇdaˆ tsawˇ haˬ deuˬ-aˬ, Yuˇdaˆ tsawˇ haˬ maˬ ngeuˇ-eu deuˬ naˆ maˬ tseˇ huiˬ dzehˬ mahˇ dzehˬ ta loˇ. Baˆ k’oˆ mehˬ dzaˬ yehˬ-euˬ-aˬ, guiˬ lahˬ baw dzehˬ ta loˇ. ² Ngeuˇ meh. Yawˬ jeˬ na lu ̭ la ̭ k’oeˇ guiˬ lahˬ baw dzehˬ meh. Miˬyehˇ-euˬ dawˬ Yuˇdaˆ tsawˇ haˬ deuˬ-ahˇ jeˬ huˬ a nehˬ-euˬ meh. ³ Ehˇ k’aw ̭, aˬ yaw ̭ ma ̭ tiˬ paˆ na deuˬ Miˬyehˇ-euˬ dawˬ-ahˇ saˇ jaˇ maˬ zi ̭ naˇ, aˬ joˆ-ehˇ paˇ jahˇ nmˇ. Aˬ yaw ̭ ma ̭ k’oeˇ lo ̭-ehˇ g’eh-euˬ baˬ da neh Miˬyehˇ saˇ jaˇ maˬ zi ̭ nga lehˇ aˬ dui ehˇ nmˇ loˇ. ⁴ Maˬ ngeuˇ-a. Tsawˇ haˬ zaˬ yawˬ g’aˬ na lu ̭ jaˬ myaw ̭ myaw ̭ k’aw ̭, Miˬyehˇ yaw tsaˬ yaw dawˇ meh. Jaˇ li ̭ la ̭ k’oeˇ heu lo ̭-ehˇ ehˇ taˬ-euˬ meh. "Nawˬ neh ngehˬ-euˬ tmˇ-euˬ la ̭ k’oeˇ, yaw tsaˬ yaw dawˇ ya bi mawˇ meh. Nawˬ-ahˇ aˬ cawˬ yaˇ k’aˬ daˇ ngeh, aˬ myah lu ̭ nawˇ g’aˬ leˇ teh ̭-a." ⁵ Aˬ dui yaw lehˬ jeˬ mˇ-euˬ k’oeˇ-aˬ, Miˬyehˇ yaw tsaˬ jeˬ mˇ-eu gaˇ kawˆ bi mawˇ shawˇ dzehˬ laˇ-eu g’aˇ duˬ pyeu ̭-eu ngeuˇ naˇ, aˬ dui aˬ joˆ-ehˇ ehˇ nmˇ. Miˬyehˇ aˬ dui-ahˇ k’ehˬ nehˬ k’aˆ nehˬ la ̭ ngeh, aˬ yaw ̭ yaw lehˬ jeˬ mˇ-eu meh lehˇ aˬ dui ehˇ nmˇ loˇ. (Heu-aˬ, tsawˇ haˬ zaˬ naˇ haˬ tseˇ maw ̭-eu dawˬ tiˬ dawˬ meh.) ⁶ K’oeˇ lo ̭-ehˇ maˬ ngeuˇ-a. Miˬyehˇ maˬ tsaˬ maˬ dawˇ naˇ, miˇ tsaˬ zaˬ-ahˇ aˬ yaw ̭ aˬ joˆ-ehˇ yaˇ k’aˬ daˇ nya nmˇ. ⁷ Ehˇ k’aw ̭, ngaˬ-euˬ yaw lehˬ k’oeˇ-aˬ, Miˬyehˇ tsaˬ-eu dawˇ-eu gaˇ kawˆ bi mawˇ shawˇ dzehˬ laˇ-eu g’aˇ duˬ hawˇ-eu aˬ yaw ̭-euˬ yaw sheh ̭ k’ahˬ sehˇ g’aˇ duˬ pyeu ̭-eu ngeuˇ naˇ, aˬ dui aˬ joˆ-ehˇ ehˇ nmˇ. K’oeˇ lo ̭-ehˇ ngeuˇ meh lehˇ ehˇ naˇ, ngaˬ-ahˇ iˬ baˇ zaˬ lehˇ aˬ joˆ-ehˇ sawˇ nya ta. ⁸ Toˆ-ehˇ ngeuˇ naˇ, "Yaw muiˬ jeˬ doˆ laˇ ni maˬ muiˬ-eu jeˬ mˇ kaˇ-euˇ" lehˇ ehˇ-eu maˬ tsaˬ-a loˇ. Tsawˇ haˬ tiˬ paˆ na deuˬ ngaˇ k’oeˇ lo ̭-ehˇ ehˇ-eu meh lehˇ ehˇ-awˇ, ngaˬ-euˬ yaw lehˬ poˆ poˆ-ehˇ ngaˬ-ahˇ ja doeˇ-eu meh. K’oeˇ lo ̭-ehˇ ehˇ-eu tsawˇ haˬ deuˬ-aˬ, k’ehˬ-eu k’aˆ-eu jeˬ-ahˇ ya daˬ teh ̭-a. ⁹ Toˆ-ehˇ maˇ-iˬ, aˬ dui Yuˇdaˆ tsawˇ haˬ deuˬ-aˬ, Yuˇdaˆ tsawˇ haˬ maˬ ngeuˇ-eu deuˬ naˆ maˬ tseˇ muiˬ dzehˬ ta loˇ. Maˬ ngeuˇ-a. Yuˇdaˆ tsawˇ haˬ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, dawˬ tawˆ lu ̭ iˬ baˇ-euˬ baoˬ uˬ moˆ tiˬ kawˆ lo ̭-ehˇ jawˇ lu ̭-eu meh lehˇ ngaˇ ehˇ dzeuˇ g’aˬ-euˬ ma. ¹⁰ Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "Yaw tsaˬ yaw dawˇ poˆ-eu tsawˇ haˬ, tiˬ g’aˬ-iˬ maˬ jawˇ-a. ¹¹ Noeˬ siˬ noeˬ mawˇ nya-eu tsawˇ haˬ, tiˬ g’aˬ-iˬ maˬ jawˇ-a. Miˬyehˇ-ahˇ shaˇ poˆ-eu tsawˇ haˬ, tiˬ g’aˬ-iˬ maˬ jawˇ-a. ¹² Dawˬ tawˆ lu ̭ Miˬyehˇ-ahˇ byehˇ-awˇ, gaˇ bahˬ iˇ jiˇ-euˬ meh. Yaw muiˬ jeˬ-ahˇ mˇ-eu tsawˇ haˬ, tiˬ g’aˬ-iˬ maˬ jawˇ-a. ¹³ K’aˬ meh lmˬ bymˇ duˬ k’ahˬ pyeu ̭-awˇ, mehˬ laˇ jaˬ myaw ̭ mehˇ shuiˇ k’mˇ-awˇ, mehˬ luˬ aˇ lawˇ do ̭-ahˇ duˇ meh. ¹⁴ Yaˬ k’ehˇ yaˬ-awˇ dawˬ doeˇ ngehˬ-eu, k’aˬ meh tiˬ byah myuˇ taˬ-euˬ meh. ¹⁵ Aˬ cawˬ-euˬ shiˬ laˆ yoeˇ leˇ-eu, kuiˇ to ̭ ciˬ-eu kawˇ dui dui meh. ¹⁶ Yaw ̭ ma ̭ iˇ-eu gaˇ ma kahˇ li, yaw cawˆ jeˬ byaˆ dzeh ya ̭-eu meh. ¹⁷ Bi tsaˬ bi zoeˇ leˇ-eu gaˇ ma, aˬ gaˇ jaˆ-eu maˬ siˬ nya-a. ¹⁸ Aˬ yaw ̭ ma ̭-euˬ myaˆ nuiˆ la ̭ k’oeˇ, Miˬyehˇ-ahˇ guˆ-eu maˬ ahˇ-a." ¹⁹ Zahˇ dawˬ k’o ̭ dawˬ la ̭ k’oeˇ k’aˇ bo ̭ taˬ-euˬ jeˬ-aˬ, Zahˇ dawˬ k’o ̭ dawˬ mehˬ nah k’aˇ caw teh-eu tsawˇ haˬ deuˬ-ahˇ ta ̭-eu dawˬ meh lehˇ aˬ dui siˬ nya-eu ma. Tsawˇ haˬ zaˬ dawˬ tawˆ lu ̭ dehˬ leh ̭ k’aˇ maˬ bi za ni Miˬyehˇ yaˇ k’aˬ daˇ gaˇ bi keuˆ leˇ-eu g’aˇ duˬ bo ̭ taˬ-euˬ jeˬ pyeu ̭-eu meh. ²⁰ Aˬ jeˬ miˇ neh ehˇ naˇ, Zahˇ dawˬ k’o ̭ dawˬ mehˬ nah caw teh-eu baˬ da neh Miˬyehˇ-ahˇ tsaˬ leˇ tsahˇ leˇ g’aˬ-euˬ tsawˇ haˬ maˬ pyeu ̭ laˇ nya-a siˬ. Zahˇ dawˬ k’o dawˬ-aˬ, tsawˇ haˬ zaˬ-ahˇ yawˬ ha iˬ baˇ mˇ-euˬ gaˇ kawˆ bi siˬ leˇ-eu g’aˇ duˬ teh ̭ meh. ²¹ Tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ nya ni Miˬyehˇ aˬ joˆ-ehˇ mˇ-euˬ gaˇ kawˆ, nymˬ-mˇ pah mehˬ nehˬ la ̭-euˬ meh. Moˇseˬ-euˬ Zahˇ dawˬ k’o ̭ dawˬ hawˇ-eu Miˬyehˇ g’aˇ duˬ ngehˬ dah-eu tsawˇ haˬ deuˬ-aˬ, gaˇ kawˆ k’oeˇ-euˬ saˇ kiˇ pyeu ̭-eu meh. Ehˇ k’aw ̭, tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ-eu jeˬ-aˬ, zahˇ dawˬ k’o ̭ dawˬ-ahˇ tiˬ paw ̭-iˬ maˬ ta ̭-a. ²² Aˬ yaw ̭ ma ̭ Yeˬsuˇ Ka li-ahˇ jah-eu baˬ da neh Miˬyehˇ-ahˇ tsaˬ leˇ tsahˇ leˇ-eu tsawˇ haˬ bi pyeu ̭ laˇ-euˬ meh. Ka li-ahˇ k’aˇ jah-eu tsawˇ haˬ dawˬ tawˆ lu ̭-ahˇ, tsawˇ jeuˬ maˬ tseˇ paˆ ni, Miˬyehˇ k’oeˇ lo ̭-ehˇ jahˇ nehˬ-euˬ meh. ²³ Aˬ jeˬ miˇ neh ehˇ naˇ, tsawˇ haˬ dawˬ tawˆ lu ̭ iˬ baˇ mˇ-awˇ, Miˬyehˇ ka k’o ̭-eu jeˬ-ahˇ gaˇ mahˇ kaˬ-iˇ-euˬ meh. ²⁴ Ehˇ k’aw ̭, Miˬyehˇ g’awˬ shaˬ gaˬ-eu jeˬ yaw ̭ ngeh ̭-ehˇ bi ̭ le ̭-awˇ, tsawˇ haˬ zaˬ-ahˇ bi buˬ bi law-iˇ-eu g’aˬ pyeu ̭-eu Yeˬsuˇ Ka li baˬ da neh, dawˬ tawˆ lu ̭ Miˬyehˇ-ahˇ tsaˬ leˇ tsahˇ leˇ ni jahˇ-euˬ meh. ²⁵ Aˬ yaw ̭ shiˇ dah-euˬ baˬ da neh tsawˇ haˬ zaˬ deuˬ aˬ yaw ̭-ahˇ jah-eu la ̭ k’oeˇ Miˬyehˇ iˬ baˇ pyehˬ nehˬ-eu jeˬ-ahˇ za nya ni, Miˬyehˇ neh aˬ yaw ̭-ahˇ tsawˇ haˬ zaˬ deuˬ g’aˇ duˬ bi ̭ le ̭-euˬ meh. K’oeˇ-aˬ, Miˬyehˇ-euˬ yaw tsaˬ yaw dawˇ jeˬ bi mawˇ ni mˇ-euˬ jeˬ pyeu ̭-eu meh. Dzeuˇ laˇ ngeh aˬ yaw ̭ nui ma g’awˬ mahˇ ni taˬ-awˇ, tsawˇ haˬ zaˬ-euˬ iˬ baˇ-ahˇ haw dzeuˇ nehˬ-euˬ meh. ²⁶ Ehˇ k’aw ̭, nymˬ-mˇ-aˬ, aˬ yaw ̭-euˬ yaw tsaˬ yaw dawˇ jeˬ bi mawˇ leˇ-eu g’aˇ duˬ aˬ yaw ̭ mˇ lu ̭-eu miˇ neh, tsawˇ haˬ zaˬ-euˬ iˬ baˇ-ahˇ aˬ yaw ̭ maˬ paˇ haw dzeuˇ meh. K’oeˇ lo ̭-ehˇ mˇ-eu la ̭ k’oeˇ, Miˬyehˇ aˬ yaw ̭ tsaˬ-eu dawˇ-eu g’aˬ pyeu ̭-eu gaˇ kawˆ hawˇ-eu, Yeˬsuˇ-ahˇ k’aˇ jah-eu tsawˇ haˬ yawˬ g’aˬ na lu ̭ Miˬyehˇ-ahˇ tsaˬ leˇ tsahˇ leˇ-eu tsawˇ haˬ bi pyeu ̭ laˇ-eu gaˇ kawˆ bi siˬ bi mawˇ la ̭-euˬ meh. ²⁷ Toˆ-ehˇ ngeuˇ naˇ, aˬ dui nui ma huiˬ k’aˇ aˬ gaˇ paˇ za ta. Tiˬ gaˇ-iˬ maˬ paˇ za meh. Aˬ jeˬ miˇ neh ehˇ naˇ, Zahˇ dawˬ k’o ̭ dawˬ mehˬ nah caw teh-eu baˬ da neh Miˬyehˇ-ahˇ tsaˬ leˇ tsahˇ leˇ-eu tsawˇ haˬ pyeu ̭ laˇ nya-eu maˬ ngeuˇ-a. Jah-eu baˬ da neh teh ̭-ehˇ pyeu ̭ laˇ nya-eu meh. ²⁸ Tsawˇ haˬ tiˬ g’aˬ Miˬyehˇ-ahˇ tsaˬ leˇ tsahˇ leˇ-eu k’oeˇ-aˬ, Zahˇ dawˬ k’o ̭ dawˬ mehˬ nah caw teh-eu baˬ da neh maˬ ngeuˇ-ehˇ, jah-eu baˬ da neh meh lehˇ aˬ dui tuˆ tehˬ taˬ-euˬ ma. ²⁹ Maˬ ngeuˇ naˇ, Miˬyehˇ-aˬ, Yuˇdaˆ tsawˇ haˬ deuˬ-euˬ Miˬyehˇ teh ̭-a loˇ. Aˬ cawˬ tsawˇ jeuˬ-euˬ Miˬyehˇ maˬ ngeuˇ-a loˇ. Ngeuˇ meh. Yuˇdaˆ tsawˇ haˬ maˬ ngeuˇ-eu deuˬ-euˬ Miˬyehˇ k’aw ̭ ngeuˇ meh. ³⁰ Tsawˇ jeuˬ dawˬ tawˆ lu ̭ g’aˇ duˬ Miˬyehˇ tiˬ g’aˬ teh ̭ meh. K’oeˇ miˇ neh, baˆ k’oˆ mehˬ dzaˬ yehˬ-euˬ Yuˇdaˆ tsawˇ haˬ-ahˇ maˬ ehˇ, baˆ k’oˆ mehˬ dzaˬ maˬ yehˬ-euˬ aˬ cawˬ tsawˇ jeuˬ-ahˇ maˬ ehˇ, jah-eu tiˬ jeˬ baˬ da neh teh ̭-ehˇ aˬ yaw ̭-ahˇ tsaˬ laˇ tsahˇ laˇ nya ni jahˇ teh ̭-a. ³¹ Heu lo ̭-ehˇ ehˇ-eu baˬ da neh Zahˇ dawˬ k’o ̭ dawˬ-ahˇ aˬ dui byehˇ dzeh-eu ma lehˇ ehˇ maw ̭ ta loˇ. Maˬ ngeuˇ. Maˬ byehˇ dzeh-eu uˬ ta ̭, zi ̭ dah ni tuˆ tehˬ taˬ-eu ma.

¹ Aˬ dui tsawˇ jeuˬ-euˬ aˬ da yaw dzahˇ g’aˬ pyeu ̭-eu Aˬbyaˬhaˬ gaˇ kawˆ aˬ joˆ-ehˇ ehˇ nmˇ. ² Aˬ yaw ̭ neh mˇ-euˬ shaˇ-euˬ jeˬ baˬ da neh aˬ yaw ̭ Miˬyehˇ-ahˇ tsaˬ leˇ tsahˇ leˇ nya-euˬ ngeuˇ law nmˇ-aˬ, aˬ yaw ̭ nui ma huiˬ k’aˇ za teh ̭-a. Ehˇ k’aw ̭, Miˬyehˇ k’oeˇ lo ̭-ehˇ maˬ sawˇ-a. ³ Jaˇli ̭ la ̭ k’oeˇ bo ̭ taˬ-euˬ, "Aˬbyaˬhaˬ Miˬyehˇ-ahˇ jah-awˇ, jah-eu k’oeˇ hmˬ baˬ da neh aˬ yaw ̭-ahˇ yaw tsaˬ yaw dawˇ tsawˇ haˬ meh lehˇ Miˬyehˇ ha geu ̭ nehˬ-euˬ meh." ⁴ Gaˇ mˇ-eu tsawˇ haˬ-aˬ, g’aˬ gaˇ poeˬ za-eu meh. K’oeˇ-aˬ, la ̭ sawˬ za-euˬ lehˇ maˬ sawˇ nya-a. Aˬ yaw ̭ neh mˇ za-euˬ jeˬ pyeu ̭-eu meh. ⁵ Ehˇ k’aw ̭, mˇ-eu shaˇ-eu jeˬ-ahˇ maˬ g’oe-ehˇ, jah-eu jeˬ-ahˇ g’oe-eu la ̭ k’oeˇ, iˬ baˇ ahˇ-eu tsawˇ haˬ-ahˇ iˬ baˇ maˬ ahˇ-a lehˇ daˇ tsehˆ nya-eu g’aˬ pyeu ̭-eu Miˬyehˇ-ahˇ jah-eu tsawˇ haˬ-ahˇ, jah-eu jeˬ baˬ da neh Miˬyehˇ-ahˇ tsaˬ leˇ tsahˇ leˇ-euˬ tsawˇ haˬ lehˇ Miˬyehˇ sawˇ-eu meh. ⁶ Yawˬ ha neh mˇ-euˬ yaw muiˬ yaw doeˇ-ahˇ Miˬyehˇ maˬ haw ni, yaw tsaˬ yaw dawˇ tsawˇ haˬ lehˇ bi ha geu ̭-euˬ g’aˬ-aˬ, guiˬ lahˬ huiˬ dui dui-eu meh lehˇ Daˬbiˇ neh ehˇ-euˬ dawˬ k’oeˇ dawˬ, heu gaˇ ehˇ maw ̭-eu meh. Daˬbiˇ ehˇ-eu, ⁷ "Yaw lehˬ yaw ca ngehˇ jiˇ nehˬ-awˇ, iˬ baˇ pyehˬ nehˬ-euˬ tsawˇ haˬ deuˬ, aˇ naˆ ni guiˬ lahˬ huiˬ-eu nga. ⁸ Yawˬ ha-euˬ iˬ baˇ dawˬ tawˆ lu ̭, Sahˬpaˬ Miˬyehˇ pyehˬ nehˬ-euˬ g’aˬ, aˇ naˆ ni guiˬ lahˬ huiˬ-eu nga." ⁹ Daˬbiˇ ehˇ-eu guiˬ lahˬ huiˬ-eu gaˇ kawˆ heu, baˆ k’oˆ mehˬ dzaˬ yehˬ-euˬ deuˬ-ahˇ teh ̭-ehˇ ta ̭ ta loˇ. Maˬ ngeuˇ-a. Baˆ k’oˆ mehˬ dzaˬ maˬ yehˬ-euˬ deuˬ-ahˇ k’aw ̭ ta ̭-eu meh. "Aˬbyaˬhaˬ Miˬyehˇ-ahˇ jah-awˇ, aˬ yaw ̭-euˬ jah-eu jeˬ baˬ da neh aˬ yaw ̭-ahˇ yaw tsaˬ yaw dawˇ tsawˇ haˬ lehˇ Miˬyehˇ ha geu ̭ nehˬ-euˬ meh" lehˇ ehˇ taˬ-euˬ Jaˇli ̭ dawˬ k’oeˇ dawˬ aˬ dui ehˇ dzeuˇ g’aˬ-euˬ ma. ¹⁰ K’oeˇ lo ̭-ehˇ pyeu ̭ laˇ-euˬ k’oeˇ aˬ geu ngeh yamˬ-ahˇ-a. Baˆ k’oˆ mehˬ dzaˬ maˬ yehˬ mi naˆ-ehˇ pyeu ̭ laˇ taˬ loˇ. Yehˬ g’aˬ miˇ tsa pyeu ̭ laˇ taˬ loˇ. K’oeˇ-aˬ, Aˬbyaˬhaˬ aˬ yaw ̭ baˆ k’oˆ mehˬ dzaˬ maˬ yehˬ mi naˆ-ehˇ pyeu ̭ laˇ-euˬ gaˇ kawˆ meh. Yehˬ g’aˬ miˇ tsa pyeu ̭ laˇ-euˬ gaˇ kawˆ maˬ ngeuˇ-a. ¹¹ Aˇ nah ba hawˇ-eu aˬ yaw ̭ baˆ k’oˆ mehˬ dzaˬ yehˬ-euˬ meh. Aˬ yaw ̭ baˆ k’oˆ mehˬ dzaˬ maˬ yehˬ mi naˆ-ehˇ Miˬyehˇ neh aˬ yaw ̭-ahˇ yaw tsaˬ yaw dawˇ tsawˇ haˬ lehˇ ha geu ̭ nehˬ la ̭ g’aˬ-euˬ gaˇ kawˆ bi siˬ bi mawˇ-eu g’aˇ duˬ, baˆ k’oˆ mehˬ dzaˬ yehˬ-eu zahˇ jahˇ-euˬ jeˬ pyeu ̭-eu meh. K’oeˇ miˇ neh, baˆ k’oˆ mehˬ dzaˬ maˬ yehˬ-euˬ k’aw ̭, Miˬyehˇ-ahˇ jah-awˇ Miˬyehˇ neh yaw tsaˬ yaw dawˇ tsawˇ haˬ meh lehˇ k’aˇ sawˇ taˬ-euˬ tsawˇ haˬ dawˬ tawˆ lu ̭-euˬ guiˬ lahˬ sa ̭ laˇ paw aˬ da yaw dzahˇ g’aˬ-aˬ, Aˬbyaˬhaˬ meh. ¹² Baˆ k’oˆ mehˬ dzaˬ yehˬ-euˬ uˬ ta ̭, aˇ hu Aˬbyaˬhaˬ aˬ yaw ̭ baˆ k’oˆ mehˬ dzaˬ maˬ yehˬ mi naˆ-ehˇ k’aˇ deh ̭ ya ̭-euˬ lo ̭-ehˇ jah jah-ehˇ deh ̭-eu deuˬ-euˬ aˬ da yaw dzahˇ g’aˬ k’aw ̭, Aˬbyaˬhaˬ aˬ yaw ̭ meh. ¹³ Miˇ tsaˬ heu dawˬ tawˆ lu ̭ Aˬbyaˬhaˬ hawˇ-eu aˬ yaw ̭-euˬ zaˬ deuˬ uˆ deuˬ-ahˇ bi ̭ ma lehˇ Miˬyehˇ saˇ jaˇ dzaˬ ngeh, Aˬbyaˬhaˬ Zahˇ dawˬ k’o ̭ dawˬ mehˬ nah caw teh-eu miˇ neh dzaˬ-euˬ maˬ ngeuˇ-a. Ehˇ k’aw ̭, aˬ yaw ̭ jah-awˇ, Miˬyehˇ neh yaw tsaˬ yaw dawˇ tsawˇ haˬ lehˇ bi ha geu ̭-euˬ miˇ neh meh. ¹⁴ Miˬyehˇ neh saˇ jaˇ dzaˬ taˬ-euˬ jeˬ-aˬ, Zahˇ dawˬ k’o ̭ dawˬ mehˬ nah caw teh-eu tsawˇ haˬ deuˬ-ahˇ bi ̭-eu g’aˇ duˬ ngeuˇ naˇ, tsawˇ haˬ zaˬ-euˬ jah-eu jeˬ gaˇ dahˇ maˬ tsoeˬ-eu uˬ ta ̭, Miˬyehˇ-euˬ saˇ jaˇ k’aw ̭ yaw ̭ ngeh ̭ meh. ¹⁵ Zahˇ dawˬ k’o ̭ dawˬ-aˬ, Miˬyehˇ nui ma pehˇ-eu jeˬ bi keuˆ le-eu meh. Ehˇ k’aw ̭, zahˇ dawˬ k’o ̭ dawˬ maˬ jaˆ gaˇ-aˬ, zahˇ dawˬ k’o ̭ dawˬ-ahˇ mˇ bahˬ-eu jeˬ k’aw ̭ maˬ jaˆ-aˇ. ¹⁶ K’oeˇ miˇ neh, Miˬyehˇ-euˬ saˇ jaˇ k’oeˇ hmˬ Zahˇ dawˬ k’o ̭ dawˬ mehˬ nah caw teh-eu deuˬ-ahˇ teh ̭-ehˇ maˬ ta ̭-ehˇ, Aˬbyaˬhaˬ lo ̭-ehˇ jah-eu tsawˇ haˬ deuˬ-ahˇ k’aw ̭ ta ̭ leˇ ni, Aˬbyaˬhaˬ-euˬ zaˬ deuˬ uˆ deuˬ dawˬ tawˆ lu ̭-ahˇ yaw ̭ ngeh ̭-ehˇ bi ̭ nehˬ-euˬ jeˬ pyeu ̭-eu g’aˇ duˬ, jah-eu jeˬ-ahˇ ta ̭-eu saˇ jaˇ bi pyeu ̭-euˬ meh. Aˬ jeˬ miˇ neh ehˇ naˇ, Aˬbyaˬhaˬ-aˬ, guiˬ lahˬ sa ̭ laˇ paw aˬ dui dawˬ tawˆ lu ̭-euˬ aˬ da yaw dzahˇ g’aˬ pyeu ̭-eu meh. ¹⁷ "Ngaˇ nawˬ-ahˇ tsawˇ jeuˬ g’awˬ mya jeuˬ-euˬ aˬ da yaw dzahˇ g’aˬ bi pyeu ̭ laˇ ma" lehˇ, Jaˇli ̭ la ̭ k’oeˇ aˬ yaw ̭-ahˇ ehˇ taˬ-euˬ meh. Dawˬ ma saˇ jaˇ k’oeˇ-aˬ, Aˬbyaˬhaˬ jah-eu Miˬyehˇ-euˬ mehˬ shi yaw muiˬ meh. Shiˇ-euˬ tsawˇ haˬ-ahˇ bi g’o ̭ deh ̭ laˇ nya-awˇ, maˬ jaˆ haw maˬ mawˇ haw-euˬ jeˬ-ahˇ dawˬ bi ̭-awˇ bi jaˆ laˇ nya-eu Miˬyehˇ-ahˇ Aˬbyaˬhaˬ jah-euˬ meh. ¹⁸ Aˬbyaˬhaˬ-aˬ, noeˬ tmˬ k’aˇ maˬ paˇ za-euˬ k’aw ̭, jah-awˇ noeˬ tmˬ-euˬ meh. K’oeˇ miˇ neh, "tsawˇ jeuˬ g’awˬ mya jeuˬ-euˬ aˬ da" pyeu ̭ laˇ-euˬ meh. "Nawˬ-euˬ zaˬ nawˬ-euˬ uˆ deuˬ mˬ taˆ aˬ guiˇ lo ̭-ehˇ jeuˬ le o le teh ̭-a" lehˇ, Jaˇli ̭ la ̭ k’oeˇ aˬ yaw ̭-ahˇ ehˇ taˬ-euˬ meh. ¹⁹ Aˬ yaw ̭-ahˇ k’oeˇ lo ̭-ehˇ ehˇ nehˬ ngeh, aˬ yaw ̭-euˬ aˇ k’o ̭ tiˬ yaˇ dawˬ peh tah tehˬ leˇ taˬ-euˬ meh. Aˬ yaw ̭-euˬ aˬ lmˬ g’awˇ mawˇ gaˇ kawˆ shaˇ noeˬ ngeh, shiˇ g’aˬ-euˬ lo ̭-ehˇ duˇ-awˇ, aˬ yaw ̭-euˬ nymˇ dahˬ Saˬlaˇ zaˬ ciˬ zaˬ cu maˬ paˇ mˇ nya-euˬ k’aw ̭, aˬ yaw ̭ jah-eu k’oeˇ hmˬ g’aˬ tiˬ paw ̭-iˬ maˬ baˬ-iˇ-a. ²⁰ Aˬ yaw ̭ jah-eu g’aˬ maˬ baˬ-iˇ-ehˇ, Miˬyehˇ-euˬ saˇ jaˇ-ahˇ poˆ poˆ laˆ laˆ-ehˇ maˬ noeˬ-a. Jah-eu baˬ da neh nui ma g’aˬ k’aˆ laˇ-awˇ, Miˬyehˇ-ahˇ ja ceuˬ-euˬ meh. ²¹ Miˬyehˇ-aˬ, saˇ jaˇ k’aˇ dzaˬ taˬ-euˬ lo ̭-ehˇ mˇ byah nya meh lehˇ aˬ yaw ̭ ziˬ dah ni jah-euˬ meh. ²² K’oeˇ miˇ neh, Aˬbyaˬhaˬ-aˬ, jah-eu jeˬ baˬ da neh "Miˬyehˇ neh yaw tsaˬ yaw dawˇ tsawˇ haˬ lehˇ bi ha geu ̭-euˬ meh." ²³ "Aˬ yaw ̭-ahˇ yaw tsaˬ yaw dawˇ tsawˇ haˬ lehˇ ha geu ̭-euˬ meh" lehˇ ehˇ-eu dawˬ heu dawˬ-aˬ, aˬ yaw ̭ g’aˇ duˬ teh ̭-ehˇ bo ̭ taˬ-euˬ maˬ ngeuˇ-a. ²⁴ Sahˬpaˬ Yeˬsuˇ-ahˇ shiˇ-euˬ gaˇ paˇ bi g’o ̭ deh ̭ laˇ-euˬ Miˬyehˇ-ahˇ jah-awˇ, yaw tsaˬ yaw dawˇ tsawˇ haˬ lehˇ bi sawˇ-eu lehˇ g’eh-eu aˬ dui-euˬ g’aˇ duˬ k’aw ̭ bo ̭ taˬ-euˬ jeˬ pyeu ̭-eu meh. ²⁵ Aˬ dui-euˬ iˬ baˇ baˬ da neh aˬ yaw ̭-ahˇ seh ̭-eu g’aˇ duˬ bi a nehˬ-awˇ, aˬ dui Miˬyehˇ-ahˇ tsaˬ leˇ tsahˇ leˇ nya ni aˬ yaw ̭-ahˇ bi g’o ̭ deh ̭ laˇ-euˬ meh.

¹ Jah-eu jeˬ baˬ da neh nymˬ-mˇ aˬ dui Miˬyehˇ-ahˇ tsaˬ leˇ tsahˇ leˇg’aˬ-euˬ miˇ neh, aˬ dui-euˬ Sahˬpaˬ Yeˬsuˇ Ka li baˬ da neh Miˬyehˇ-ahˇ tsaˬ leˇ dzoeˇ leˇ-euˬ ma. ² Aˬ dui Ka li-ahˇ jah-eu miˇ neh, nymˬ-mˇ aˬ dui deh ̭ lu ̭ jawˇ lu ̭-eu Miˬyehˇ-euˬ g’awˬ shaˬ gaˬ-eu guiˬ lahˬ la ̭ k’oeˇ, aˬ yaw ̭ aˬ dui-ahˇ sheuˬ ahˇ nehˬ la ̭-euˬ meh. Miˬyehˇ aˬ dui-ahˇ yaw sheh ̭ k’ahˬ sehˇ bi ̭ la ̭ gaˇ noeˬ tmˬ-awˇ, aˬ dui nui ma huiˬ k’aˇ za-eu ma. ³ Shaˬ-eu zahˬ-eu jeˬ-ahˇ ya daˬ-eu jeˬ jaˆ-eu miˇ neh k’aw ̭, aˬ dui nui ma huiˬ k’aˇ za-eu ma. Aˬ jeˬ miˇ neh ehˇ naˇ, k’oeˇ baˬ da neh aˬ dui daˬ coeˇ oˇ coeˇ laˇ teh ̭-a lehˇ siˬ nya ma. ⁴ Aˬ dui daˬ coeˇ oˇ coeˇ-eu baˬ da neh, lawˬ haw-eu jeˬ-ahˇ g’aˬ leˇ-euˬ tsawˇ haˬ deuˬ lehˇ, Miˬyehˇ aˬ dui-ahˇ sawˇ nehˬ la ̭ teh ̭-a. Aˬ yaw ̭ k’oeˇ lo ̭-ehˇ sawˇ nehˬ la ̭-eu baˬ da neh, noeˬ tmˬ-eu jeˬ jaˆ laˇ teh ̭-a. ⁵ K’oeˇ lo ̭-ehˇ noeˬ tmˬ-eu jeˬ jaˆ laˇ-euˬ baˬ da neh, nui ma cawˆ k’aˇ maˬ paˇ za meh. Aˬ jeˬ miˇ neh ehˇ naˇ, Miˬyehˇ neh aˬ dui-ahˇ bi ̭ la ̭-euˬ la ̭ sawˬ pyeu ̭-eu Muiˬ-eu Shawˇ-eu Yaw sahˇ Miˬyehˇ-ahˇ g’oe-eu la ̭ k’oeˇ, Miˬyehˇ-euˬ g’oeˇ-eu gaˬ-eu jeˬ aˬ dui-euˬ nui maˬ la ̭ k’oeˇ shehˆ ahˇ nehˬ la ̭-euˬ ba da neh meh. ⁶ Aˬ dui la ̭ jeuˬ shaˇ k’aˇ maˬ za-ehˇ shaˬ lu ̭ ngeh, Miˬyehˇ neh tseˇ doˆ taˬ-euˬ aˇ yamˬ-ahˇ, haiˬ-eu tsawˇ haˬ deuˬ pyeu ̭ lu ̭-eu aˬ dui-euˬ g’aˇ duˬ Ka li shiˇ dah-euˬ meh. ⁷ Yaw tsaˬ yaw dawˇ tsawˇ haˬ tiˬ g’aˬ na g’aˇ duˬ shiˇ dah-eu ehˇ-eu k’aw ̭, yaw awˬ maˬ ngeuˇ-a. Aˬ cawˬ g’aˇ duˬ muiˬ-eu tsawˇ haˬ tiˬ g’aˬ na-euˬ g’aˇ duˬ law nmˇ-aˬ, shiˇ dah nehˬ maw ̭-eu tsawˇ haˬ jawˇ law hawˇ maˬ siˬ. ⁸ Ehˇ k’aw ̭, Miˬyehˇ-aˬ, aˬ dui iˬ baˇ zaˬ pyeu ̭ lu ̭ ngeh, aˬ dui-euˬ g’aˇ duˬ Ka li-ahˇ bi kamˇ shiˇ-eu la ̭ k’oeˇ, aˬ dui-ahˇ aˇ naˆ ni gaˬ-eu gaˇ kawˆ bi mawˇ duˬ la ̭-eu meh. ⁹ Miˬyehˇ-ahˇ aˬ dui tsaˬ leˇ tsahˇ leˇ nya ni aˬ yaw ̭ shiˇ dah coeˇ gaˇ keuˆ-eu-aˬ, k’oeˇ naˆ maˬ tseˇ, Miˬyehˇ nui ma pehˇ-eu jeˬ-ahˇ aˬ dui maˬ ya daˬ ni aˬ yaw ̭ maˬ ka k’o ̭ nehˬ la ̭-aˇ loˇ. ¹⁰ Aˬ dui-aˬ, Miˬyehˇ-ahˇ muiˇ-euˬ tsawˇ haˬ ma. Ehˇ k’aw ̭, aˬ yaw ̭-euˬ Zaˬmaˇ bi shiˇ dah-eu la ̭ k’oeˇ aˬ dui aˬ yaw ̭-ahˇ cawˬ cawˬ ta ̭ nya ni aˬ yaw ̭ jahˇ-awˇ, nymˬ-mˇ aˬ dui Miˬyehˇ nehˬ-ehˇ cawˬ cawˬ ta ̭ lu ̭ gaˇ keuˆ-eu-aˬ, Ka li deh ̭-eu baˬ da neh aˬ dui-ahˇ k’oeˇ naˆ maˬ tseˇ maˬ ka k’o ̭ nehˬ la ̭-aˇ loˇ. ¹¹ Ehˇ k’aw ̭, k’oeˇ naˆ teh ̭-ehˇ maˬ ngeuˇ-a siˬ. Aˬ dui Miˬyehˇ-ahˇ cawˬ cawˬ ta ̭ nya laˇ ni mˇ-euˬ g’aˬ pyeu ̭-eu Sahˬpaˬ Yeˬsuˇ Ka li-ahˇ g’oe-eu la ̭ k’oeˇ, Miˬyehˇ neh aˬ dui-ahˇ mˇ nehˬ la ̭-euˬ jeˬ-ahˇ aˬ dui laˬ k’aˬ cehˇ dui dui-eu ma. ¹² Tsawˇ haˬ tiˬ g’aˬ baˬ da neh miˇ tsaˬ k’oeˇ taˆ iˬ baˇ keuˆ le-awˇ, iˬ baˇ k’oeˇ baˬ da neh shiˇ-eu jeˬ keuˆ le-euˬ meh. Shiˇ-eu jeˬ k’oeˇ, tsawˇ haˬ zaˬ dawˬ tawˆ lu ̭ k’oeˇ taˆ keuˆ le-euˬ meh. Aˬ jeˬ miˇ neh ehˇ ehˇ naˇ, tsawˇ haˬ zaˬ yawˬ g’aˬ na lu ̭ iˬ baˇ mˇ-euˬ meh. ¹³ Zahˇ dawˬ k’o ̭ dawˬ maˬ bi ̭ le ̭ mi naˆ-ehˇ, miˇ tsaˬ k’oeˇ taˆ iˬ baˇjaˆ taˬ-euˬ meh. Ehˇ k’aw ̭, zahˇ dawˬ k’o ̭ dawˬ maˬ jaˆ gaˇ-aˬ, iˬ baˇ-ahˇ iˬ baˇ lehˇ maˬ sawˇ-aˬ. ¹⁴ Aˬdaˬ-euˬ ziˇ-ahˇ neh Moˇseˬ-euˬ ziˇ-ahˇ keuˆ ni, shiˇ-eu jeˬ uˆ lahˇ-euˬ meh. Aˬdaˬ neh mˇ-euˬ iˬ baˇ pyeu ̭-eu Miˬyehˇ ehˇ dawˬ leuˇ-eu jeˬ-ahˇ maˬ mˇ-euˬ deuˬ k’oeˇ taˆ k’aw ̭, shiˇ-eu jeˬ uˆ lahˇ-euˬ meh. Aˬdaˬ k’oeˇ g’aˬ-aˬ, aˬ kaˇ oe-eu g’aˬ-ahˇ duˇ leˇ-eu meh. ¹⁵ Ehˇ k’aw ̭, tsawˇ haˬ k’oeˇ nyiˬ g’aˬ beu gaˇ duˬ jaˆ-eu meh. Aˬ jeˬ miˇ neh ehˇ naˇ, Miˬyehˇ neh yaw ̭ ngeh ̭-ehˇ bi ̭ la ̭-euˬ la ̭ sawˬ k’oeˇ-aˬ, Aˬdaˬ neh iˬ baˇ mˇ-euˬ gaˇ maˬ duˇ leˇ-a. Tsawˇ haˬ k’oeˇ tiˬ g’aˬ-euˬ iˬ baˇ baˬ da neh tsawˇ haˬ g’awˬ mya ni ya shiˇ-euˬ ngeuˇ meh. Ehˇ k’aw ̭, Miˬyehˇ-euˬ guiˬ lahˬ yaw dzahˇ g’aˬ k’aˆ dzehˬ-awˇ, Yeˬsuˇ Ka li lehˇ kuˇ-eu tsawˇ haˬ tiˬ g’aˬ-ahˇ g’oe-eu la ̭ k’oeˇ tsawˇ haˬ g’awˬ mya ni-ahˇ yaw ̭ ngeh ̭-ehˇ bi ̭ nehˬ-euˬ meh. ¹⁶ Miˬyehˇ neh yaw ̭ ngeh ̭-ehˇ bi ̭-euˬ la ̭ sawˬ k’oeˇ-aˬ, tsawˇ haˬ zaˬ iˬ baˇ mˇ-eu jeˬ-ahˇ beu gaˇ-eu meh. Iˬ baˇ mˇ-eu k’oeˇ-aˬ, tiˬ poˆ teh ̭-ehˇ mˇ-euˬ k’aw ̭, "Iˬ baˇ ahˇ meh" lehˇ yaˇ k’aˬ daˇ nehˬ gaˇ ya daˬ-eu meh. Ehˇ k’aw ̭, Miˬyehˇ neh yaw ̭ ngeh ̭-ehˇ bi ̭-euˬ la ̭ sawˬ k’oeˇ-aˬ, iˬ baˇ g’awˬ mya poˆ mˇ g’aˬ-euˬ k’aw ̭, "Iˬ baˇ maˬ ahˇ-a" lehˇ, maˬ geuˇ gaˇ keuˆ ni daˇ nehˬ nya-eu meh. ¹⁷ Tsawˇ haˬ tiˬ g’aˬ iˬ baˇ mˇ-euˬ miˇ neh, tsawˇ haˬ k’oeˇ g’aˬ baˬ da neh miˇ tsaˬ k’oeˇtaˆ shiˇ-eu jeˬ uˆ lahˇ le-euˬ meh. Ehˇ k’aw ̭, Yeˬsuˇ Ka li lehˇ kuˇ-eu tsawˇ haˬ tiˬ g’aˬ neh mˇ-euˬ jeˬ-aˬ, k’oeˇ naˆ maˬ tseˇ g’aˬ k’aˆ dzehˬ-eu meh. Huiˬ dui myaˬ dui dui-eu Miˬyehˇ-euˬ guiˬ lahˬ hawˇ-eu, Miˬyehˇ-ahˇ tsaˬ leˇ tsahˇ leˇ-eu jeˬ yaw ̭ ngeh ̭-ehˇ za taˬ-euˬ tsawˇ haˬ dawˬ tawˆ lu ̭, Yeˬsuˇ Ka li baˬ da neh yaw deh ̭-ehˇ ya uˆ lahˇ teh ̭-a. ¹⁸ Tsawˇ haˬ zaˬ tiˬ g’aˬ neh mˇ-euˬ iˬ baˇ baˬ da neh tsawˇ haˬ zaˬ dawˬ dawˆ lu ̭ yaˇ k’aˬ daˇ nehˬ gaˇ ya daˬ-eu lo ̭-ehˇ, tsawˇ haˬ zaˬ tiˬ g’aˬ neh mˇ-euˬ yaw tsaˬ yaw dawˇ jeˬ baˬ da neh tsawˇ haˬ zaˬ dawˬ tawˆ lu ̭-ahˇ bi buˬ bi law-iˇ-awˇ, yaw deh ̭ bi deh ̭-eu meh. ¹⁹ Tsawˇ haˬ zaˬ tiˬ g’aˬ maˬ naˇ haˬ geu ̭-euˬ baˬ da neh tsawˇ haˬ zaˬ dawˬ tawˆ lu ̭ iˬ baˇ zaˬ pyeu ̭-iˇ-euˬ lo ̭-ehˇ, tsawˇ haˬ tiˬ g’aˬ naˇ haˬ geu ̭-euˬ baˬ da neh tsawˇ haˬ zaˬ dawˬ tawˆ lu ̭ Miˬyehˇ-ahˇ tsaˬ leˇ tsahˇ leˇ teh ̭-a. ²⁰ Zahˇ dawˬ k’o ̭ dawˬ bi ̭ le ̭-euˬ-aˬ, yaw lehˬ mˇ-eu bi myaˬ laˇ-eu g’aˇ duˬ meh. Ehˇ k’aw ̭, iˬ baˇ k’aˇ myaˬ laˇ gaˇ Miˬyehˇ-euˬ guiˬ lahˬ k’oeˇ myaˆ maˬ tseˇ myaˬ laˇ lu ̭-eu meh. ²¹ K’oeˇ miˇ neh, iˬ baˇ-aˬ, shiˇ-eu jeˬ-ahˇ g’oe-awˇ uˆ lahˇ-eu lo ̭-ehˇ, Miˬyehˇ-euˬ guiˬ lahˬ-aˬ, yaw tsaˬ yaw dawˇ jeˬ-ahˇ g’oe-awˇ uˆ lahˇ-eu la ̭ koeˇ, aˬ dui-euˬ Sahˬpaˬ Yeˬsuˇ Ka li-ahˇ g’oe-awˇ mˬ maˬ maˬ byaˆ zaˇ ziˇ deh ̭ gaˇ sheuˬ g’eh la ̭-euˬ meh.

¹ Aˬ dui aˬ joˆ-ehˇ ehˇ nmˇ. Miˬyehˇ-euˬ guiˬ lahˬ bi huiˬ bi myaˬ laˇ-eu g’aˇ duˬ, iˬ baˇ la ̭ k’oeˇ aˬ dui deh ̭ daˆ g’eh-eu loˇ. ² K’oeˇ lo ̭-ehˇ maˬ ngeuˇ-a. Iˬ baˇ mˇ-eu jeˬ-ahˇ ta ̭ leˇ-awˇ, aˬ dui shiˇ dzeuˇ g’aˬ-euˬ gaˇ duˇ-eu-aˬ, iˬ baˇ la ̭ k’oeˇ aˬ duiˬ aˬ joˆ-ehˇ paˇ deh ̭ daˆ g’eh le ̭ nya nmˇ. ³ Aˬ dui Yeˬsu-ahˇ ta ̭ nya ni iˇ cu ̭ shawˇ-euˬ k’oeˇ-aˬ, aˬ yaw ̭ nehˬ-ehˇ tiˬ kawˆ lo ̭-ehˇ shiˇ-eu g’aˇ duˬ shawˇ-eu jeˬ pyeu ̭-eu meh lehˇ naw ma ̭ siˬ duˬ lu ̭ meh. ⁴ Aˬ dui iˇ cu ̭ shawˇ-euˬ baˬ da neh aˬ yaw ̭ nehˬ-ehˇ tiˬ kawˆ lo ̭-ehˇ bi ba ̭ pahˬ-awˇ, a yaw ̭ shiˇ-euˬ gaˇ ta ̭-eu ma. K’oeˇ-aˬ, Aˬda Miˬyehˇ-euˬ yaw sheh ̭ k’ahˬ sehˇ huiˬ-eu baoˬ neh Ka li-ahˇ bi g’o ̭ deh ̭ laˇ-euˬ lo ̭-ehˇ, aˬ dui k’aw ̭ yaw shui ̭ deh ̭ paˇ nya-eu g’aˇ duˬ pyeu ̭-eu ma. ⁵ Aˬ yaw ̭ lo ̭-ehˇ shiˇ-euˬ la ̭ k’oeˇ aˬ dui aˬ yaw ̭-ahˇ ta ̭ leˇ g’aˬ-euˬ-aˬ, aˬ yaw ̭ lo ̭-ehˇ paˇ g’o ̭ deh ̭ laˇ-eu la ̭ k’oeˇ aˬ dui aˬ yaw ̭-ahˇ paˇ ya ta ̭ leˇ teh ̭-a. ⁶ Aˬ dui-euˬ iˬ baˇ mˇ-eu nui ma yaw oeˇ siˬ-euˬ baoˬ-ahˇ laˆ cawˆ-awˇ, iˬ baˇ-euˬ zaˬ k’aˆ maˬ paˇ ya geu ̭-eu g’aˇ duˬ aˬ dui yaw deh ̭ deh ̭-eu yaw oeˇ hmˬ Ka li nehˬ-ehˇ la ̭ ya ̭ k’oeˇ taˆ kamˇ shiˇ g’aˬ-euˬ ma lehˇ aˬ dui siˬ nya ma. ⁷ Aˬ jeˬ miˇ neh ehˇ naˇ, tsawˇ haˬ tiˬ g’aˬ shiˇ ngeh, iˬ baˇ-euˬ baoˬ-ahˇ buˬ-iˇ law-iˇ-eu meh. ⁸ Aˬ dui Ka li nehˬ-ehˇ shiˇ-euˬ miˇ neh, aˬ yaw ̭ nehˬ-ehˇ ya deh ̭ ma lehˇ aˬ dui jah-eu ma. ⁹ Aˬ jeˬ miˇ neh ehˇ naˇ, Ka li-ahˇ shiˇ-euˬ gaˇ paˇ bi g’o ̭ deh ̭ laˇ g’aˬ-euˬ-aˬ, tiˬ jawˇ-iˬ maˬ paˇ shiˇ-ehˇ, shiˇ-eu jeˬ aˬ yaw ̭-ahˇ maˬ paˇ uˆ lahˇ nya meh lehˇ aˬ dui siˬ nya ma. ¹⁰ Aˬ yaw ̭ shiˇ-euˬ miˇ neh, iˬ baˇ-euˬ baoˬ aˬ yaw ̭-ahˇ maˬ paˇ g’aˬ leˇ meh. Nymˬ-mˇ aˬ yaw ̭ deh ̭ lu ̭-eu-aˬ, Miˬyehˇ-euˬ g’aˇ duˬ meh. ¹¹ K’oeˇ lo ̭-ehˇ duˇ ni, naw ma ̭ k’aw ̭ iˬ baˇ-ahˇ k’aˇ ta ̭-eu yawˬ jeˬ na lu ̭ la ̭ k’oeˇ shiˇ g’aˬ-awˇ, Yeˬsuˇ Ka li baˬ da neh Miˬyehˇ-euˬ g’aˇ duˬ deh ̭ lu ̭-eu ma lehˇ yawˬ haˇ yawˬ ha noeˬ-awˬ. ¹² Naw ma ̭-euˬ shiˬ shaˬ jiˇ nui k’ahˇ mehˬ nah maˬ ya caw teh ni, shiˇ nya-eu naw ma ̭-euˬ shiˬ shaˬ jiˇ g’awˇ mawˇ-ahˇ iˬ baˇ neh taˬ paˇ bi uˆ lahˇ. ¹³ Maˬ muiˬ-eu jeˬ mˇ gaˇ zmˬ-eu keu ka bi pyeu ̭-eu g’aˇ duˬ naw ma ̭-euˬ g’awˇ mawˇ tiˬ pyehˬ teh ̭-ehˇ k’aw ̭ iˬ baˇ-euˬ baoˬ-ahˇ maˬ a nehˬ ni, shiˇ-euˬ gaˇ paˇ g’o ̭ deh ̭ laˇ-euˬ tsawˇ haˬ lo ̭-ehˇ naw ma ̭-euˬ nui ma g’awˇ mawˇ dawˬ tawˆ lu ̭ Miˬyehˇ-ahˇ a nehˬ jiˇ-awˇ, yaw tsaˬ yaw dawˇ jeˬ g’aˇ duˬ zmˬ-eu keu ka bi pyeu ̭-awˬ. ¹⁴ Iˬ baˇ neh naw ma ̭-ahˇ taˬ paˇ bi uˆ lahˇ. Aˬ jeˬ miˇ neh ehˇ naˇ, zahˇ dawˬ k’o ̭ dawˬ uˬ moˆ naw ma ̭ maˬ paˇ jawˇ-ehˇ, Miˬyehˇ-euˬ guiˬ lahˬ yaw dzahˇ uˬ moˆ jawˇ lu ̭-eu meh. ¹⁵ Toˆ-ehˇ ngeuˇ naˇ, aˬ joˆ-ehˇ jahˇ nmˇ. Aˬ dui zahˇ dawˬ k’o ̭ dawˬ uˬ moˆ maˬ jawˇ-ehˇ Miˬyehˇ-euˬ guiˬ lahˬ yaw dzahˇ uˬ moˆ jawˇ lu ̭-eu miˇ neh iˬ baˇ mˇ-eu la. Maˬ ngeuˇ-a. ¹⁶ Tsawˇ haˬ tiˬ g’aˬ na-euˬ myawˬ k’ehˇ g’oˆ nehˬ-eu g’aˇ duˬ zaˬ k’aˆ geu ̭-eu lehˇ yawˬ ha-euˬ g’awˇ mawˇ a nehˬ g’aˬ shaw naˇ, yawˬ ha myawˬ k’ehˇ g’oˆ nehˬ-eu baw leˬ k’oeˇ g’aˬ-euˬ zaˬ k’aˆ pyeu ̭ tsehˆ tsehˆ-euˬ meh lehˇ naw ma ̭ siˬ duˬ lu ̭ meh. Iˬ baˇ-euˬ ehˇ dawˬ naˇ haˬ naˇ, shiˇ gaˇ ya keuˆ teh ̭-a. Miˬyehˇ-euˬ ehˇ dawˬ naˇ haˬ naˇ, aˬ yaw ̭-ahˇ tsaˬ leˇ tsahˇ leˇ gaˇ ya keuˆ teh ̭-a. ¹⁷ Ehˇ k’aw ̭, Miˬyehˇ-euˬ guiˬ lahˬ yaw dzahˇ-ahˇ ja ceuˬ-eu tsaˬ meh. Aˬ jeˬ miˇ neh ehˇ naˇ, dzeuˇ laˇ ngeh naw ma ̭ iˬ baˇ-euˬ zaˬ k’aˆ pyeu ̭-euˬ k’aw ̭, naw ma ̭-ahˇ mehˬ nehˬ tsoˆ nehˬ-euˬ la ̭ k’oeˇ ya mawˇ taˬ-euˬ yaw tsaˬ yaw dawˇ jeˬ-ahˇ nui ma la ̭ k’oeˇ keuˆ ni naw ma ̭ naˇ haˬ geu ̭-euˬ meh. ¹⁸ Naw ma ̭-ahˇ iˬ baˇ la ̭ k’oeˇ bi buˬ bi law-iˇ-awˇ, yaw tsaˬ yaw dawˇ jeˬ-euˬ zaˬ k’aˆ bi pyeu ̭ laˇ-euˬ meh. ¹⁹ Naw ma ̭ g’oˆ siˬ g’oˆ shaw nya-eu paw dzeˇ g’aˬ baˬ-eu miˇ neh, yawˬ nah na lu ̭ ngehˬ lu ̭-eu dawˬ deuˬ-ahˇ zmˬ-awˇ ngaˇ ehˇ-eu ma. Dzeuˇ laˇ ngeh, maˬ tsaˬ maˬ dawˇ-eu la ̭ k’oeˇ k’aˬ miˬ sheu-eu jeˬ hawˇ-eu maˬ muiˬ maˬ jaˬ-eu jeˬ-euˬ zaˬ k’aˆ geu ̭-eu la ̭ k’oeˇ, maˬ tsaˬ maˬ dawˇ-eu jeˬ-ahˇ mˇ-eu g’aˇ duˬ naw ma ̭-euˬ nui ma g’awˇ mawˇ dawˬ tawˆ lu ̭ a nehˬ-euˬ meh. K’oeˇ lo ̭-ehˇ duˇ ni, nymˬ-mˇ poˆ jawˇ-aˬ, yaw tsaˬ yaw dawˇ jeˬ-euˬ zaˬ k’aˆ geu ̭-eu la ̭ k’oeˇ yaw muiˬ yaw shawˇ jeˬ-ahˇ mˇ-eu g’aˇ duˬ, nui ma g’awˇ mawˇ dawˬ tawˆ lu ̭ a nehˬ-awˬ. ²⁰ Naw ma ̭ iˬ baˇ-euˬ zaˬ k’aˆ geu ̭ lu ̭ ngeh, yaw tsaˬ yaw dawˇ jeˬ-euˬ uˬ moˆ maˬ jawˇ-aˬ. ²¹ Nymˬ-mˇ naw ma ̭ nui daˆ daˆ lu ̭-eu gaˇ k’oeˇ deuˬ-ahˇ naw ma ̭ mˇ-euˬ miˇ neh aˬ jeˬ za ta. Shiˇ-eu jeˬ-ahˇ za-eu teh ̭ meh. ²² Ehˇ k’aw ̭, nymˬ-mˇ naw ma ̭-ahˇ iˬ baˇ la ̭ k’oeˇ bi buˬ-iˇ-awˇ, Miˬyehˇ-euˬ zaˬ k’aˆ bi pyeu ̭ laˇ-euˬ meh. Heu poˆ jawˇ naw ma ̭ aˬ jeˬ za ta. Naw ma ̭-euˬ nui ma g’awˇ mawˇ dawˬ tawˆ lu ̭ aˬ yaw ̭-ahˇ a nehˬ g’aˬ-euˬ miˇ neh mˬ maˬ maˬ byaˆ zaˇ ziˇ deh ̭-eu jeˬ-ahˇ za-eu meh. ²³ Aˬ jeˬ miˇ neh ehˇ naˇ, iˬ baˇ-euˬ aˇ poeˬ-aˬ, shiˇ-eu jeˬ pyeu ̭-eu meh. Ehˇ k’aw ̭, Miˬyehˇ neh yaw ̭ ngeh ̭-ehˇ bi ̭ nehˬ la ̭-euˬ la ̭ sawˬ-aˬ, aˬ dui-euˬ Sahˬpaˬ Yeˬsuˇ Ka li la ̭ k’oeˇ mˬ maˬ maˬ byaˆ zaˇ ziˇ deh ̭-eu jeˬ pyeu ̭-eu meh.

¹ Aˬ yui ̭ aˬ nyiˇ Ka li zaˬ deuˬ-oˇ, nymˬ-mˇ ngaˇ ehˇ-eu lehˇ g’eh-eu gaˇ kawˆ heu-ahˇ naw ma ̭ g’oˆ shaw nya teh ̭-a. Aˬ jeˬ miˇ neh ehˇ naˇ, naw ma ̭ dawˬ tawˆ lu ̭ zahˇ dawˬ k’o ̭ dawˬ gaˇ kawˆ siˬ nya meh. Zahˇ dawˬ k’o ̭ dawˬ-aˬ, tsawˇ haˬ zaˬ maˬ shiˇ-ehˇ k’aˇ deh ̭ k’oeˇ keuˆ ni teh ̭-ehˇ uˆ lahˇ-eu meh. ² Yaw jeˬ ma jeˬ ja ngeh, dahˬ dzaˬ-iˇ-euˬ zaˬ miˬ zaˬ tiˬ g’aˬ-aˬ, yawˬ ha-euˬ k’aˬ dzeˇ zaˬ k’oeˇ g’aˬ maˬ shiˇ-ehˇ k’aˇ deh ̭ k’oeˇ keuˆ ni aˬ yaw ̭-euˬ miˬ zaˬ pyeu ̭-eu meh lehˇ zahˇ dawˬ k’o ̭ dawˬ ehˇ-eu meh. Ehˇ kaw ̭, k’aˬ dzeˇ zaˬ g’aˬ shiˇ dzeuˇ ngeh jawˇ, zaˬ miˬ zaˬ koeˇ g’aˬ aˬ yaw ̭-euˬ miˬ zaˬ meh lehˇ zahˇ dawˬ k’o ̭ dawˬ maˬ paˇ ehˇ nya meh. ³ K’oeˇ miˇ neh, yawˬ ha-euˬ k’aˬ dzeˇ zaˬ maˬ shiˇ mi naˆ-ehˇ aˬ cawˬ nehˬ-ehˇ jawˇ naˇ, aˬ cawˬ-euˬ miˬ sawˇ yo zaˬ-ahˇ bahˬ-euˬ tsawˇ haˬ lehˇ bi myahˇ teh ̭-a. Ehˇ k’aw ̭, yawˬ ha-euˬ k’aˬ dzeˇ zaˬ shiˇ dzeuˇ ngeh jawˇ, k’aˬ dzeˇ zaˬ maˬ paˇ baw-euˬ miˇ neh, yawˬ g’aˬ yawˬ-ahˇ dahˬ dzaˬ paˇ-iˇ k’aw ̭, bahˬ-eu muˆ-eu lehˇ maˬ paˇ sawˇ nya meh. ⁴ Aˬ yui ̭ aˬ nyiˇ Ka li zaˬ deuˬ-oˇ, naw ma ̭ k’aw ̭ k’oeˇ gaˇ duˇ leˇ-eu meh. Zahˇ dawˬ k’o ̭ dawˬ-ahˇ ta ̭ leˇ-eu jeˬ la ̭ k’oeˇ, naw ma ̭ shiˇ dzeuˇ jiˇ-euˬ gaˇ duˇ-eu meh. Aˬ jeˬ miˇ neh ehˇ naˇ, naw ma ̭ Yeˬsuˇ Ka liˬ-euˬ g’awˇ mawˇ-ahˇ ta ̭ leˇ g’aˬ-euˬ meh. Miˬyehˇ-euˬ gaˇ la ̭ k’oeˇ aˬ dui gaˇ dahˇ tsoeˬ-eu tsawˇ haˬ pyeu ̭ laˇ ni, naw ma ̭-aˬ, shiˇ dzeuˇ-euˬ gaˇ Miˬyehˇ neh paˇ bi g’o ̭ deh ̭ laˇ-euˬ tsawˇ haˬ pyeu ̭ laˇ-euˬ meh. ⁵ Aˬ jeˬ miˇ neh ehˇ naˇ, aˬ dui shiˬ shaˬ jiˇ-euˬ nui noeˬ deh ̭ lu ̭ ngeh, Zahˇ dawˬ k’o ̭ dawˬ baˬ da neh iˬ baˇ mˇ maw ̭-eu nui k’ahˇ aˬ duiˬ-euˬ g’awˇ mawˇ la ̭ k’oeˇ gaˇ mˇ lu ̭-awˇ, aˬ dui k’aˇ mˇ k’aˇ shaˇ-euˬ yawˬ jeˬ na lu ̭ shiˇ-eu jeˬ-ahˇ aˇ saˬ saˬ leˇ-eu meh. ⁶ Ehˇ k’aw ̭, nymˬ-mˇ poˆ jawˇ-aˬ, Zahˇ dawˬ k’o ̭ dawˬ uˬ moˆ aˬ dui buˬ-iˇ law-iˇ g’aˬ-euˬ ma. Aˬ jeˬ miˇ neh ehˇ naˇ, dzeuˇ laˇ ngeh aˬ dui-ahˇ pa ̭ taw ̭ taˬ-euˬ jeˬ-ahˇ aˬ dui shiˇ dzeuˇ-euˬ ma. Bo ̭ doˆ taˬ-euˬ zahˇ dawˬ k’o ̭ dawˬ-ahˇ ta ̭-eu gaˇ ma yaw oeˇ-ahˇ g’oe-awˇ Miˬyehˇ-euˬ gaˇ-ahˇ aˬ dui mˇ lu ̭-eu maˬ ngeuˇ. Yaw sahˇ Miˬyehˇ-ahˇ ta ̭-eu gaˇ ma yaw shui ̭-ahˇ g’oe-awˇ mˇ lu ̭-eu ma. ⁷ Toˆ-ehˇ ngeuˇ naˇ, Zahˇ dawˬ k’o ̭ dawˬ k’oeˇ aˬ yawˇ yaw ̭ iˬ baˇ ahˇ meh lehˇ aˬ dui ehˇ nmˇ loˇ. Maˬ ngeuˇ-a. Ehˇ k’aw ̭, Zahˇ dawˬ k’o ̭ dawˬ jaˆ-eu baˬ da neh iˬ baˇ ehˇ-eu aˬ jeˬ-a lehˇ aˬ dui siˬ nya laˇ-euˬ ma. "Aˬ cawˬ-euˬ myawˬ-ahˇ mehˇ juiˇ taˬ juiˇ" lehˇ Zahˇ dawˬ k’o ̭ dawˬ la ̭ k’oeˇ maˬ ehˇ taˬ law nmˇ-aˬ, k’oeˇ lo ̭-ehˇ mehˇ juiˇ juiˇ-eu jeˬ-ahˇ ngaˇ maˬ siˬ nya-aˇ. ⁸ Ehˇ k’aw ̭, zahˇ dawˬ k’o ̭ dawˬ k’oeˇ dawˬ jaˆ-eu baˬ da neh, ngaˬ-euˬ nui ma la ̭ k’oeˇ mehˇ juiˇ juiˇ-eu g’awˬ mya jeˬ pyeu ̭ doˆ laˇ ni iˬ baˇ ngaˬ-ahˇ kawˆ noeˬ nehˬ la ̭ nya-eu meh. ⁹ Zahˇ dawˬ k’o ̭ dawˬ k’oeˇ dawˬ maˬ jaˆ law nmˇ-aˬ, iˬ baˇ ehˇ-eu jeˬ yaw shiˇ-ahˇ duˇ teh ̭-a. Maˬ muiˬ-eu jeˬ maˬ ya mˇ ni zahˇ dawˬ k’o ̭ dawˬ k’oeˇ dawˬ ngaˬ-ahˇ maˬ laˆ tsoeˬ le k’oeˇ keuˆ ni-aˬ, ngaˇ yaw deh ̭ ma. Ehˇ k’aw ̭, zahˇ dawˬ k’o ̭ dawˬ k’oeˇ dawˬ oe keuˆ ngeh, iˬ baˇ deh ̭ doˆ laˇ-awˇ, ¹⁰ ngaˇ shiˇ-euˬ gaˇ duˇ miˇ-a. Deh ̭-eu jeˬ bi keuˆ le-eu g’aˇ duˬ pyeu ̭-eu zahˇ dawˬ k’o ̭ dawˬ k’oeˇ dawˬ-aˬ, shiˇ-eu jeˬ bi keuˆ le gaˇ duˇ miˇ-a. ¹¹ Aˬ jeˬ miˇ neh ehˇ naˇ, iˬ baˇ k’oeˇ zahˇ dawˬ k’o ̭ dawˬ-ahˇ g’oe-eu la ̭ k’oeˇ ngaˬ-ahˇ jaˬ myaw ̭ myaw ̭-awˇ seh ̭ nehˬ la ̭-euˬ meh. ¹² K’oeˇ miˇ neh, Zahˇ dawˬ k’o ̭ dawˬ-aˬ yaw muiˬ yaw shawˇ meh. Yawˬ dawˬ na lu ̭ yaw shawˇ meh. Yaw dawˇ meh. Yaw muiˬ meh. ¹³ Toˆ-ehˇ maˇ-iˬ, muiˬ-eu jaˬ-eu jeˬ k’oeˇ neh ngaˬ-euˬ k’oeˇ taˆ shiˇ-eu jeˬ bi keuˆ le-euˬ ta loˇ. Maˬ ngeuˇ-a. K’oeˇ lo ̭-ehˇ jahˇ nehˬ la ̭-euˬ k’oeˇ-aˬ, iˬ baˇ neh meh. Aˬ yaw ̭ maˇ maˇ ni iˬ baˇ pyeu ̭-eu gaˇ kawˆ bya cehˆ ni bi mawˇ duˬ laˇ-eu g’aˇ duˬ, yaw muiˬ jeˬ-ahˇ g’oe-awˇ ngaˬ-euˬ k’oeˇ taˆ shiˇ-eu jeˬ bi keuˆ le-euˬ meh. K’oeˇ miˇ neh, zahˇ dawˬ k’o ̭ dawˬ baˬ da neh iˬ baˇ k’oeˇ yaw beh naˆ maˬ tseˇ doeˇ dzehˬ-eu mawˇ duˬ laˇ-eu meh. ¹⁴ Zahˇ dawˬ k’o ̭ dawˬ-aˬ, guiˬ lahˬ sa ̭ laˬ-ahˇ ta ̭ leˇ-eu jeˬ meh lehˇ aˬ dui siˬ nya ma. Ehˇ k’aw ̭, ngaˇ-aˬ, iˬ baˇ-euˬ zaˬ k’aˆ geu ̭-eu lehˇ bi ahˬ ahˇ taˬ-euˬ shiˬ shaˬ jiˇ pi lu ̭-eu tsawˇ haˬ zaˬ ma. ¹⁵ Ngaˇ mˇ lu ̭-eu jeˬ-ahˇ ngaˇ maˬ siˬ nya nya. Aˬ jeˬ miˇ neh ehˇ naˇ, yawˬ ha mˇ maw ̭-eu jeˬ-ahˇ maˬ mˇ ni, yawˬ ha maˬ mˇ nahˇ-eu jeˬ-ahˇ mˇ-eu nya. ¹⁶ Ngaˇ mˇ lu ̭-eu jeˬ-aˬ, ngaˇ maˬ mˇ maw ̭-eu jeˬ pyeu ̭-eu miˇ neh, Zahˇ dawˬ k’o ̭ dawˬ tsaˬ meh lehˇ ngaˇ ehˇ lu ̭ gaˇ duˇ-eu meh. ¹⁷ K’oeˇ miˇ neh, k’oeˇ lo ̭-ehˇ mˇ-euˬ k’oeˇ-aˬ, ngaˬ neh mˇ-euˬ jeˬ maˬ paˇ ngeuˇ meh. Ngaˬ-euˬ la ̭ k’oeˇ jawˇ lu ̭-eu iˬ baˇ neh mˇ-euˬ jeˬ pyeu ̭-eu meh. ¹⁸ Shiˬ shaˬ jiˇ-euˬ nui noeˬ pi lu ̭-eu ngaˬ-euˬ g’awˇ mawˇ heu la ̭ k’oeˇ yaw muiˬ jeˬ maˬ ahˇ nya lehˇ ngaˇ siˬ nya ma. Aˬ jeˬ miˇ neh ehˇ naˇ, yaw muiˬ jeˬ mˇ maw ̭-eu nui ma ahˇ lu ̭ k’aw ̭, k’oeˇ lo ̭-ehˇ maˬ mˇ nya nya. ¹⁹ Yawˬ ha mˇ maw ̭-eu yaw muiˬ jeˬ-ahˇ maˬ mˇ ni, yawˬ ha maˬ mˇ nahˇ-eu maˬ muiˬ-eu jeˬ-ahˇ teh ̭-ehˇ mˇ m-ehˇ jawˇ-eu nya. ²⁰ Ngaˇ-aˬ, yawˬ ha maˬ mˇ maw ̭-eu jeˬ-ahˇ mˇ-eu ngeuˇ naˇ, k’oeˇ lo ̭-ehˇ mˇ-euˬ k’oeˇ-aˬ, ngaˬ neh mˇ-euˬ jeˬ maˬ paˇ ngeuˇ meh. Ngaˬ-euˬ la ̭ k’oeˇ jawˇ-eu iˬ baˇ neh mˇ-euˬ jeˬ pyeu ̭-eu meh. ²¹ K’oeˇ miˇ neh, yaw muiˬ jeˬ-ahˇ ngaˇ mˇ maw ̭ ngeh, maˬ muiˬ-eu jeˬ-ahˇ teh ̭-ehˇ ngaˇ tseˇ geu ̭ ni zahˇ tiˬ zahˇ ngaˬ-euˬ la ̭ k’oeˇ gaˇ mˇ lu ̭-eu nya lehˇ ngaˇ ya siˬ-euˬ ma. ²² Ngaˬ-euˬ g’awˇ mawˇ la ̭ k’oeˇ mawˇ-aˬ, Miˬyehˇ-euˬ zahˇ dawˬ k’o ̭ dawˬ-ahˇ laˬ k’aˬ cehˇ miˇ-a. ²³ Ehˇ k’aw ̭, ngaˬ-euˬ g’awˇ mawˇ la ̭ k’oeˇ yawˬ zahˇ yawˬ gaˇ mˇ lu ̭ gaˇ ngaˇ mawˇ-euˬ ma. Zahˇ k’oeˇ zahˇ-aˬ, ngaˇ nui ma tsaˬ-eu zahˇ dawˬ k’o ̭ dawˬ-ahˇ deuˆ ceh ceh lu ̭-eu meh. Zahˇ k’oeˇ zahˇ neh ngaˬ-ahˇ pa ̭ cu ̭-awˇ, ngaˬ-euˬ g’awˇ mawˇ la ̭ k’oeˇ gaˇ mˇ lu ̭-eu iˬ baˇ-euˬ zahˇ sahˇ k’o ̭ uˬ moˆ bi jawˇ la ̭-euˬ meh. ²⁴ Ngaˬ-ahˇ shaˬ zahˬ na ̭ dui dui nya. Ngaˬ-ahˇ shiˇ gaˇ sheuˬ g’eh lu ̭-eu ngaˬ-euˬ g’awˇ mawˇ heu mawˇ la ̭ k’oeˇ ngaˬ-ahˇ ka k’o ̭ nehˬ la ̭-eu aˬ suˇ g’aˬ jawˇ ta. Miˬyehˇ jawˇ meh. ²⁵ Aˬ dui-euˬ Sahˬpaˬ Yeˬsuˇ Ka li-ahˇ g’oe-awˇ aˬ dui-ahˇ ka k’o ̭ nehˬ la ̭-euˬ Miˬyehˇ-euˬ guiˬ lahˇ-ahˇ ja ceuˬ kaˇ-euˇ. Ngaˇ heu lo ̭-ehˇ shaˬ lu ̭-eu ma. Ngaˬ-euˬ nui ma teh ̭-ehˇ Miˬyehˇ-euˬ zahˇ dawˬ k’o ̭ dawˬ mehˬ nah caw teh nya-awˇ, ngaˬ-euˬ shiˬ shaˬ jiˇ-aˬ, iˬ baˇ-euˬ zahˇ sahˇ k’o ̭ mehˬ nah caw teh lu ̭-eu ma.

¹ K’oeˇ miˇ neh, Yeˬsuˇ Ka li la ̭ k’oeˇ jawˇ lu ̭-eu tsawˇ haˬ deuˬ-aˬ, nymˬ-mˇ yaˇ k’aˬ daˇ nehˬ-eu jeˬ-ahˇ maˬ ya daˬ-a. ² Aˬ jeˬ miˇ neh ehˇ naˇ, aˬ dui-ahˇ Yeˬsuˇ Ka li la ̭ k’oeˇ bi deh ̭ la ̭-euˬ Yaw sahˇ Miˬyehˇ-euˬ baoˬ-aˬ, iˬ baˇ hawˇ-eu shiˇ-eu jeˬ-euˬ zahˇ sahˇ k’o ̭ uˬ moˆ aˬ dui-ahˇ bi buˬ-iˇ la ̭-euˬ meh. ³ Shiˬ shaˬ jiˇ-euˬ nui noeˬ g’aˬ baˬ-eu miˇ neh, Zahˇ dawˬ k’o ̭ dawˬ neh maˬ mˇ byah nya-euˬ jeˬ-ahˇ Miˬyehˇ mˇ byah-euˬ meh. Iˬ baˇ-ahˇ bi sha dzeh-eu g’aˇ duˬ, aˬ yaw ̭-euˬ Zaˬmaˇ-ahˇ iˬ baˇ ahˇ-eu tsawˇ haˬ zaˬ-euˬ shiˬ shaˬ jiˇ g’awˇ mawˇ pi-awˇ bi oe-euˬ la ̭ k’oeˇ, shiˬ shaˬ jiˇ nui noeˬ la ̭ k’oeˇ ahˇ-eu iˬ baˇ-ahˇ yaˇ k’aˬ bi daˇ le-euˬ meh. ⁴ Shiˬ shaˬ jiˇ nui noeˬ mehˬ nah maˬ caw teh-ehˇ, Yaw sahˇ Miˬyehˇ mehˬ nah caw teh-awˇ deh ̭ lu ̭-eu aˬ dui-euˬ la ̭ k’oeˇ, Zahˇ dawˬ k’o ̭ dawˬ la ̭ k’oeˇ ehˇ taˬ-euˬ yaw tsaˬ yaw dawˇ jeˬ nui k’ahˇ tiˬ shiˇ byah laˇ nya ni, Miˬyehˇ k’oeˇ lo ̭-ehˇ mˇ-euˬ meh. ⁵ Shiˬ shaˬ jiˇ-euˬ nui noeˬ neh k’aˇ bi deh ̭-euˬ lo ̭-ehˇ deh ̭-eu tsawˇ haˬ deuˬ-aˬ, shiˬ shaˬ jiˇ-euˬ nui k’ahˇ neh bi uˆ lahˇ-euˬ tsawˇ haˬ deuˬ pyeu ̭-eu meh. Yaw sahˇ Miˬyehˇ neh k’aˇ bi deh ̭-euˬ lo ̭-ehˇ deh ̭-eu tsawˇ haˬ deuˬ-aˬ, Yaw sahˇ Miˬyehˇ-euˬ nui k’ahˇ neh bi uˆ lahˇ-euˬ tsawˇ haˬ deuˬ pyeu ̭-eu meh. ⁶ Shiˬ shaˬ jiˇ-euˬ nui noeˬ neh bi uˆ lahˇ-euˬ jeˬ-aˬ, shiˇ-eu jeˬ-ahˇ aˇ saˬ saˬ leˇ-eu meh. Yaw sahˇ Miˬyehˇ neh bi uˆ lahˇ-euˬ tsawˇ haˬ deuˬ-aˬ, deh ̭-eu jeˬ hawˇ-eu nui saˇ o ̭-eu jeˬ-ahˇ aˇ saˬ saˬ leˇ-eu meh. ⁷ Tsawˇ haˬ ti g’aˬ yawˬ ha-euˬ shiˬ shaˬ jiˇ nui noeˬ neh bi uˆ lahˇ shaw naˇ, Miˬyehˇ-ahˇ muiˇ-eu tsawˇ haˬ pyeu ̭ laˇ-eu meh. Aˬ jeˬ miˇ neh ehˇ naˇ, Miˬyehˇ-euˬ zahˇ dawˬ k’o ̭ dawˬ-ahˇ aˬ yaw ̭ maˬ caw teh-a. Caw teh-eu g’aˇ duˬ maˇ maˇ ni maˬ g’eh nya-a. ⁸ Yawˬ ha-euˬ shiˬ shaˬ jiˇ nui noeˬ ehˇ dawˬ naˇ haˬ-eu tsawˇ haˬ-aˬ, Miˬyehˇ nui k’ahˇ shiˇ-eu tsawˇ haˬ maˬ pyeu ̭ laˇ nya-a. ⁹ Nui ma la ̭ k’oeˇ Miˬyehˇ-euˬ Yaw sahˇ maˇ maˇ ni jawˇ naˇ, yawˬ ha-euˬ shiˬ shaˬ jiˇ nui noeˬ neh k’aˇ bi deh ̭-euˬ lo ̭-ehˇ maˬ deh ̭ ni, Yaw sahˇ Miˬyehˇ-euˬ ehˇ dawˬ naˇ haˬ-awˇ deh ̭ teh ̭-a. Yawˬ ha la ̭ k’oeˇ Ka liˬ-euˬ Yaw sahˇ maˬ jawˇ-eu tsawˇ haˬ aˬ geu g’aˬ maˬ kaˬ, aˬ yaw ̭-ahˇ maˬ ta ̭-a. ¹⁰ Ehˇ k’aw ̭, naw ma ̭ la ̭ k’oeˇ Ka li jawˇ naˇ, iˬ baˇ baˬ da neh naw ma ̭-euˬ g’awˇ mawˇ shiˇ-euˬ k’aw ̭, yaw tsaˬ yaw dawˇ jeˬ ba da neh naw ma ̭-euˬ sa ̭ laˇ deh ̭ lu ̭-eu meh. ¹¹ Yeˬsuˇ-ahˇ shiˇ-euˬ gaˇ bi g’o ̭ deh ̭ laˇ-euˬ Miˬyehˇ-euˬ Yaw sahˇ k’oeˇ naw ma ̭-euˬ la ̭ k’oeˇ jawˇ naˇ, Ka li-ahˇ shiˇ-euˬ gaˇ bi g’o ̭ deh ̭ laˇ-euˬ k’oeˇ g’aˬ naw ma ̭-euˬ la ̭ k’oeˇjawˇ-eu aˬ yaw ̭-euˬ Yaw sahˇ Miˬyehˇ-ahˇ g’oe-awˇ, shiˇ nya-eu naw ma ̭-euˬ g’awˇ mawˇ-ahˇ deh ̭-eu jeˬ bi ̭ nehˬ la ̭ teh ̭-a. ¹² K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, aˬ dui-aˬ, dziˇ dzoˆ na ̭-eu tsawˇ haˬ ma. Ehˇ k’aw ̭, shiˬ shaˬ jiˇ-euˬ nui k’ahˇ mˇ-eu g’aˇ duˬ na ̭-eu maˬ ngeuˇ. ¹³ Aˬ jeˬ miˇ neh ehˇ naˇ, shiˬ shaˬ jiˇ nui noeˬ mehˬ nah naw ma ̭ deh ̭ g’eh naˇ, ya shiˇ teh ̭-a. Ehˇ k’aw ̭, Yaw sahˇ miˬyehˇ-ahˇ g’oe-eu la ̭ k’oeˇ iˬ baˇ mˇ-eu nui ma-ahˇ laˆ seh ̭ naˇ, ya deh ̭ teh ̭-a. ¹⁴ Miˬyehˇ-euˬ Yaw sahˇ sheuˬ g’eh-eu mehˬ nah deh ̭ g’eh-eu tsawˇ haˬ deuˬ-aˬ, Miˬyehˇ-euˬ zaˬ meh. ¹⁵ Aˬ jeˬ miˇ neh ehˇ naˇ, Miˬyehˇ neh naw ma ̭-ahˇ bi ̭-euˬ Yaw sahˇ Miˬyehˇ-aˬ, naw ma ̭-ahˇ zaˬ k’aˆ maˬ bi geu ̭-eu uˬ ta ̭, naw ma ̭ guˆ-iˇ ni maˬ jahˇ-a. Naw ma ̭ Miˬyehˇ-euˬ zaˬ pyeu ̭ laˇ ni jahˇ-eu meh. Yaw sahˇ Miˬyehˇ-euˬ baoˬ-ahˇ g’oe-eu la ̭ k’oeˇ Miˬyehˇ-ahˇ "Aˬda-oˇ, ngaˬ Da-oˇ" lehˇ aˬ dui kuˇ-eu ma. ¹⁶ Aˬ dui Miˬyehˇ-euˬ zaˬ pyeu ̭-eu gaˇ kawˆ, Yaw sahˇ Miˬyehˇ hawˇ-eu aˬ dui-euˬ sa ̭ laˇ tiˬ kawˆ lo ̭-ehˇ saˇ kiˇ kamˬ-eu meh. ¹⁷ Aˬ dui-aˬ, aˬ yaw ̭-euˬ zaˬ pyeu ̭-eu miˇ neh, aˬ yaw ̭-euˬ jeˬ biˇ o ̭-eu tsawˇ haˬ ma. Miˬyehˇ neh Ka li-ahˇ bi ̭-eu lehˇ lehˬ hmˬ taˬ-euˬ jeˬ biˇ k’aw ̭, Ka li nehˬ-ehˇ tiˬ kawˆ lo ̭-ehˇ aˬ duiˬ za ma. Aˬ jeˬ miˇ neh ehˇ naˇ, k’ehˬ-eu k’aˆ-eu jeˬ-ahˇ Ka li nehˬ-ehˇ tiˬ kawˆ lo ̭-ehˇ aˬ dui daˬ naˇ, aˬ yaw ̭ nehˬ-ehˇ tiˬ kawˆ lo ̭-ehˇ yaw sheh ̭ k’ahˬ sehˇ za teh ̭-a. ¹⁸ Heu ziˇ la ̭ k’oeˇ aˬ dui ya daˬ lu ̭-eu heu-aˬ, aˬ kaˇ aˬ dui-ahˇ bi ̭ la ̭-eu yaw sheh ̭ k’ahˬ sehˇ-ahˇ shaˇ cehˆ haw naˇ, tiˬ paw ̭-iˬ ehˇ nya ̭ maˬ nyeuˆ-aˇ lehˇ ngaˇ noeˬ duˬ taˬ-euˬ ma. ¹⁹ Miˬyehˇ neh aˬ yaw ̭-euˬ zaˬ deuˬ pah mehˬ nehˬ la ̭ gaˇ, k’aˇ beh taˬ-euˬ jeˬ dawˬ tawˆ lu ̭ noeˬ tmˬ dui dui-eu la ̭ k’oeˇ lo ̭ lu ̭-eu meh. ²⁰ K’aˇ beh taˬ-euˬ yawˬ jeˬ na lu ̭, laˆ cawˆ-eu jeˬ-ahˇ ya daˬ-eu meh. Ehˇ k’aw ̭, aˬ yawˇ yaw ̭ k’oeˇ lo ̭-ehˇ ya daˬ-eu maˬ ngeuˇ-a. Miˬyehˇ nui ma tsaˬ-eu miˇ neh k’oeˇ lo ̭-ehˇ pyeu ̭ lu ̭-eu meh. Ehˇ k’aw ̭, noeˬ tmˬ duˬ heu lo ̭-ehˇ jaˆ-a siˬ. ²¹ K’aˇ beh taˬ-euˬ yawˬ jeˬ na lu ̭ peuˬ-iˇ cawˆ-iˇ-eu jeˬ-euˬ baoˬ uˬ moˆ zaˬ k’aˆ maˬ ya geu ̭ ni dzeuˇ-iˇ-awˇ, Miˬyehˇ-euˬ zaˬ deuˬ nehˬ-ehˇ tiˬ kawˆ lo ̭-ehˇ yaw sheh ̭ k’ahˬ sehˇ huiˬ-eu buˬ-iˇ law-iˇ-eu jeˬ-ahˇ za-eu aˇ nah keuˆ le teh ̭-a. ²² K’aˇ beh taˬ-euˬ yawˬ jeˬ na lu ̭ iˬ nah keuˆ ni shaˬ zahˬ na ̭-awˇ, zaˬ baw ngeh naˇ-eu miˇ neh mahˇ-eu lo ̭-ehˇ ya mahˇ lu ̭-eu aˬ dui siˬ nya-eu ma. ²³ Beh taˬ-euˬ jeˬ teh ̭-ehˇ k’oeˇ lo ̭-ehˇ mahˇ lu ̭-eu maˬ ngeuˇ-a. Miˬyehˇ neh bi ̭ le ̭-euˬ la ̭ sawˬ za beh beh-euˬ deuˬ pyeu ̭-eu Yaw sahˇ Miˬyehˇ za-euˬ aˬ dui ma ̭ k’aw ̭, aˬ dui-ahˇ aˬ yaw ̭-euˬ zaˬ bi pyeu ̭ laˇ-awˇ, aˬ dui-euˬ nui ma g’awˇ mawˇ dawˬ tawˆ lu ̭ bi buˬ-iˇnehˬ la ̭-eu g’aˇ duˬ Miˬyehˇ-ahˇ lo ̭ lu ̭ ngeh, nui ma la ̭ k’oeˇ mahˇ mahˇ-ehˇ shaˬ lu ̭-eu ma. ²⁴ A dui-euˬ noeˬ tmˬ-eu jeˬ baˬ da neh, ka k’o ̭-eu jeˬ za-euˬ ma. Noeˬ tmˬ-eu jeˬ-ahˇ ya mawˇ g’aˬ shaw naˇ, k’oeˇ-aˬ, noeˬ tmˬ-eu jeˬ maˬ paˇ ngeuˇ meh. Ya mawˇ lu ̭-eu jeˬ-ahˇ noeˬ tmˬ-eu aˬ suˇ g’aˬ jawˇ ta. ²⁵ Ehˇ k’aw ̭, maˬ mawˇ-euˬ jeˬ-ahˇ aˬ dui noeˬ tmˬ-eu ngeuˇ naˇ, nui ma g’awˬ mahˇ ni taˬ-awˇ ya dawˬ meh. ²⁶ K’oeˇ gaˇ duˇ ni, aˬ dui g’aˬ baˬ-eu miˇ neh Yaw sahˇ Miˬyehˇ caw ba le-euˬ meh. Aˬ dui guiˬ lahˬ aˬ joˆ-ehˇ ya shaˇ-eu gaˇ kawˆ aˬ dui maˬ siˬ nya-eu miˇ neh, Yaw sahˇ Miˬyehˇ aˬ dui-euˬ dah zaˇ k’aˬ meh neh maˬ ja mehˬ nya-eu jeˬ mahˇ mahˇ-ehˇ Miˬyehˇ-ahˇ shaˇ-eu meh. ²⁷ Tsawˇ haˬ zaˬ-euˬ nui ma-ahˇ haw mawˇ nya-eu Miˬyehˇ-aˬ, Yaw sahˇ Miˬyehˇ noeˬ lu ̭-eu jeˬ-ahˇ siˬ nya-eu meh. Aˬ jeˬ miˇ neh ehˇ naˇ, Yaw sahˇ Miˬyehˇ-aˬ, Miˬyehˇ-euˬ tsawˇ haˬ deuˬ-euˬ dah zaˇ, Miˬyehˇ-euˬ nui ma-ahˇ tsaˬ ni guiˬ lahˬ shaˇ-eu meh. ²⁸ Miˬyehˇ-euˬ nui k’ahˇ mˇ-eu g’aˇ duˬ kuˇ doˆ taˬ-euˬ aˬ yaw ̭-ahˇ gaˬ-eu tsawˇ haˬ deuˬ g’aˇ duˬ, yawˬ jeˬ na lu ̭ la ̭ k’oeˇ yaw muiˬ jeˬ doˆ laˇ ni Miˬyehˇ mˇ lu ̭ meh lehˇ aˬ dui siˬ nya ma. ²⁹ Miˬyehˇ-euˬ Zaˬmaˇ-aˬ, mehˇ nmˇ g’awˬ mya ni la ̭ k’oeˇ aˬ yui ̭ yui ̭ saˬ g’aˬ lo ̭-ehˇ pyeu ̭ laˇ-awˇ, Miˬyehˇ neh tseˇ doˆ g’aˬ-euˬ tsawˇ haˬ deuˬ Zaˬmaˇ-ahˇ duˇ laˇ ni Miˬyehˇ neh sheuˬ ceuˆ doˆ taˬ-euˬ meh. ³⁰ Aˬ yaw ̭ neh sheuˬ ceuˆ doˆ taˬ-euˬ tsawˇ haˬ deuˬ-ahˇ aˬ yaw ̭ kuˇ-euˬ meh. Aˬ yaw ̭ neh kuˇ-euˬ tsawˇ haˬ deuˬ aˬ yaw ̭-ahˇ tsaˬ leˇ tsahˇ leˇ nya ni aˬ yaw ̭ jahˇ-euˬ meh. Aˬ yaw ̭-ahˇ tsaˬ leˇ tsahˇ leˇ g’aˬ-euˬ tsawˇ haˬ deuˬ-ahˇ aˬ yaw ̭-euˬ yaw sheh ̭ k’ahˬ sehˇ bi ̭ nehˬ-euˬ meh. ³¹ Gaˇ kawˆ heu-ahˇ ta ̭ leˇ-awˇ, aˬ dui aˬ joˆ-ehˇ ehˇ nmˇ. Miˬyehˇ aˬ dui jawˇ paw pyawˬ naˇ, aˬ dui-ahˇ aˬ suˇ g’aˬ paˇ ciˬ daˬ laˇ peuˬ nmˇ. ³² Yawˬ ha-euˬ Zaˬmaˇ-ahˇ keuˆ ni ciˇ k’o ̭ maˬ k’o ̭ ni aˬ dui dawˬ tawˆ lu ̭ g’aˇ duˬ bi ̭ nehˬ le ̭-euˬ Miˬyehˇ-aˬ, aˬ yaw ̭ k’aˇ jaˆ-eu jeˬ dawˬ tawˆ lu ̭ aˬ dui-ahˇ maˬ bi ̭ la ̭-aˇ loˇ. ³³ Miˬyehˇ neh tseˇ doˆ-euˬ tsawˇ haˬ deuˬ iˬ baˇ maˬ ahˇ-a lehˇ Miˬyehˇ neh ehˇ tsehˆ g’aˬ-euˬ-aˬ, aˬ suˇ g’aˬ paˇ teh ngehˬ leˇ-eu jawˇ nmˇ. ³⁴ Toˆ-ehˇ ngeuˇ naˇ, aˬ yaw ̭ ma ̭ iˬ baˇ ahˇ meh lehˇ aˬ suˇ g’aˬ paˇ ehˇ nmˇ. Tiˬ g’aˬ-iˬ maˬ paˇ ehˇ-aˇ. Shiˇ g’aˬ-euˬ gaˇ Miˬyehˇ neh paˇ bi g’o ̭ deh ̭ laˇ-awˇ, Miˬyehˇ-euˬ aˇ maˇ paw jawˇ-awˇ aˬ dui-euˬ g’aˇ duˬ Miˬyehˇ-ahˇ shaˇ lu ̭-eu g’aˬ pyeu ̭-eu Yeˬsuˇ Ka li k’aw ̭, k’oeˇ lo ̭-ehˇ maˬ ehˇ-aˇ. ³⁵ Yeˬsuˇ Ka liˬ-euˬ g’oeˇ-eu gaˬ-eu jeˬ-ahˇ aˬ dui ya g’awˬ-iˇ ni, aˬ geu jeˬ laˆ pyaˆ laˇ nya ta. Shaˬ zahˬ mˇ-eu jeˬ loˇ. Noeˬ dui noeˬ duiˇ-eu jeˬ loˇ. K’ehˬ-eu k’aˆ-eu jeˬ loˇ. Meh ̭-eu shu ̭-eu jeˬ loˇ. Iˇ shaˬ shaˬ-eu jeˬ loˇ. Guˆ-eu gaˆ-eu jeˬ loˇ. Miˬ zaˬ mi cehˇ loˇ. ³⁶ Jaˇli ̭ la ̭ k’oeˇ heu lo ̭-ehˇ ehˇ taˬ-euˬ jaˆ-eu meh. "Nawˬ-euˬ ba da neh seh ̭ laˇ gaˇ, nah ga ni nga ma ̭ daˬ-euˬ ma. Seh ̭-eu lehˇ g’eh-eu yawˇ lo ̭-ehˇ, nga ma ̭-ahˇ jahˇ nehˬ la ̭-euˬ meh." ³⁷ Maˬ ngeuˇ. Aˬ dui-ahˇ gaˬ-eu g’aˬ baˬ da neh k’oeˇ deuˬ dawˬ tawˆ lu ̭-ahˇ aˬ dui yaw muiˬ paˬ-ehˇ g’aˬ leˇ-euˬ ma. ³⁸ Aˬ jeˬ miˇ neh ehˇ naˇ, aˬ yaw ̭-euˬ g’oeˇ-eu gaˬ-eu jeˬ-ahˇ aˬ dui ya g’awˬ-iˇ ni tiˬ jeˬ-iˬ maˬlaˆ pyaˆ laˇ nya-aˇ lehˇ ngaˇ siˬ duˬ taˬ-euˬ ma. Shiˇ-eu jeˬ maˬ ehˇ, deh ̭-eu jeˬ maˬ ehˇ, mˬ taˆ g’aˬ k’ehˇ deuˬ maˬ ehˇ, mˬ k’oeˇ taˆ uˆ lahˇ lu ̭-eu deuˬ maˬ ehˇ, mˬ taˆ-euˬ baoˬ deuˬ maˬ ehˇ, heu ziˇ maˬ ehˇ, aˬ kaˇ kaˇ ziˇ maˬ ehˇ, ³⁹ Mˬ taˆ miˇ k’ahˬ maˬ ehˇ, miˇ oˆ miˇ k’ahˬ maˬ ehˇ, tiˬ jeˬ-iˬ maˬ laˆ pyaˆ laˇ nya-a. K’aˇ beh taˬ-euˬ jeˬ dawˬ tawˆ lu ̭ la ̭ k’oeˇ, Miˬyehˇ-euˬ g’oeˇ-eu gaˬ-eu jeˬ-ahˇ aˬ dui ya g’awˬ-iˇ ni laˆ pyaˆ laˇ nya-eu tiˬ jeˬ-iˬ maˬ jaˆ-a. G’oeˇ-eu gaˬ-eu k’oeˇ-aˬ, aˬ dui-euˬ Sahˬpaˬ Yeˬsuˇ Ka li baˬ da neh aˬ dui-euˬ pyeu ̭ tsehˆ tsehˆ-euˬ ma.

¹ Ngaˇ dawˇ coe ni ehˇ-eu ma. Ka li-euˬ tsawˇ haˬ pyeu ̭-eu miˇ neh jaˬ myaw ̭ maˬ myaw ̭. Muiˬ-eu Shawˇ-eu Yaw sahˇ Miˬyehˇ uˆ lahˇ-eu ngaˬ-euˬ siˬ nya-eu nui ma k’aw ̭, ngaˇ jaˬ myaw ̭ maˬ myaw ̭-a lehˇ ngaˬ-ahˇ maˇ jawˆ ni ehˇ nehˬ la ̭-eu meh. ² Ngaˇ aˇ naˆ ni noeˬ shaˬ lu ̭-eu nga. Ngaˬ-euˬ shiˬ shaˬ pyeu ̭-eu ngaˬ-euˬ tsawˇ haˬ deuˬ g’aˇ duˬ, ngaˬ-euˬ nui ma la ̭ k’oeˇ maˬ tsehˆ leˇ ni shaˬ zahˬ aˇ naˆ ni ya mˇ lu ̭-eu nga. ³ Aˬ yaw ̭ ma ̭-euˬ g’aˇ duˬ Miˬyehˇ yaˬ k’ehˇ yaˬ nehˬ la ̭-eu jeˬ-ahˇ ngaˇ daˬ-awˇ, Ka li-ahˇ g’awˬ tsehˆ ya tsehˆ k’aw ̭ nui k’ahˇ shiˇ ma. ⁴ Aˬ yaw ̭ ma ̭ Miˬyehˇ-euˬ tsawˇ haˬ meh. Aˬ yaw ̭ ma ̭-ahˇ aˬ yaw ̭-euˬ zaˬ bi geu ̭-awˇ, aˬ yaw ̭-euˬ yaw sheh ̭ k’ahˬ sehˇ pah mehˬ nehˬ-euˬ meh. Aˬ yaw ̭ ma ̭ nehˬ-ehˇ aˬ yaw ̭ dawˬ ma saˇ jaˇ dzaˬ-awˇ, Zahˇ dawˬ k’o ̭ dawˬ bi ̭ nehˬ-euˬ meh. Aˬ yaw ̭ ma ̭ Miˬyehˇ-ahˇ dawˇ coe ni uˬ duˬ tahˬ-eu gaˇ kawˆ siˬ nya meh. Miˬyehˇ-euˬ saˇ jaˇ za-euˬ tsawˇ haˬ pyeu ̭-eu meh. ⁵ Aˬ yaw ̭ ma ̭-aˬ, tsawˇ myahˇ doˆ dui dui-eu Heˬbyehˇ tsawˇ haˬ aˬ poeˬ aˬ bawˇ k’oeˇ deuˬ o neh jeuˬ le o le-euˬ tsawˇ haˬ deuˬ meh. Yeˬsuˇ Ka li k’aw ̭, tsui ̭ ta ̭ gaˇ neh sawˇ le ̭ naˇ, aˬ yaw ̭ ma ̭-euˬ tsawˇ jeuˬ pyeu ̭-eu meh. Dawˬ tawˆ k’oeˇ taˆ uˆ lahˇ-eu Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ lu ̭-uˇ. Aˬ miˬ. ⁶ Miˬyehˇ neh saˇ jaˇ dzaˬ taˬ-euˬ lo ̭-ehˇ maˬ pyeu ̭ laˇ-aˬ lehˇ ngaˇ ehˇ-eu maˬ ngeuˇ. Miˬyehˇ neh saˇ jaˇ dzaˬ taˬ-euˬ lo ̭-ehˇ aˬ diˇ pyeu ̭ laˇ taˬ-euˬ meh. Aˬ jeˬ miˇ neh ehˇ naˇ, Miˬyehˇ neh tseˇ doˆ-euˬ tsawˇ haˬ deuˬ la ̭ k’oeˇ, Iˇsaˬleˬlaˆ tsawˇ haˬ deuˬ teh ̭-ehˇ maˬ ngeuˇ ni, aˬ cawˬ tsawˇ jeuˬ k’aw ̭ ahˇ-eu meh. ⁷ Aˬbyaˬhaˬ o neh k’aˇ jeuˬ k’aˇ o le-euˬ dawˬ tawˆ lu ̭, Miˬyehˇ-euˬ zaˬ maˇ maˇ ni maˬ ngeuˇ-a. "Iˇtsaˆ o neh jeuˬ le o le-euˬ zaˬ deuˬ-ahˇ teh ̭-ehˇ nawˬ-euˬ zaˬ lehˇ sawˇ nehˬ ma" lehˇ, Aˬbyaˬhaˬ-ahˇ Miˬyehˇ ehˇ nehˬ-euˬ meh. ⁸ Ehˇ maw ̭-eu dawˬ tsui ̭-aˬ, k’aˇ deh ̭ doˆ le-euˬ zaˬ deuˬ Miˬyehˇ-euˬ zaˬ maˇ maˇ ni maˬ ngeuˇ-a. Ehˇ k’aw ̭, Miˬyehˇ neh saˇ jaˇ dzaˬ-awˇ bi deh ̭ doˆ le-euˬ Aˬbyaˬhaˬ-euˬ zaˬ deuˬ uˆ deuˬ-aˬ, maˇ maˇ ni g’eh-eu Miˬyehˇ-euˬ zaˬ deuˬ uˆ deuˬ meh. ⁹ A jeˬ miˇ neh ehˇ naˇ, Miˬyehˇ saˇ jaˇ dzaˬ ngeh, "Aˇ yamˬ tsaˬ laˇ ngeh ngaˇ tiˬ poˆ paˇ oe ma. K’oeˇ ngeh, Saˬlaˇ aˬ li tiˬ li ciˬ teh ̭-a" lehˇ ehˇ-awˇ dzaˬ-euˬ meh. ¹⁰ K’oeˇ uˬ ta ̭, Leˬbehˇka ̭-euˬ aˬ li nyiˬ li lu ̭, aˬ da Iˇtsaˆ tiˬ g’aˬ-euˬ zaˬ teh ̭ meh. ¹¹ Miˬyehˇ neh noeˬ taˬ-euˬ jeˬ maˬ ya bi tsehˆ-iˇ ni, aˬ li k’oeˇ nyiˬ li la ̭ k’oeˇ tiˬ li-ahˇ tseˇ doˆ-eu g’aˇ duˬ Miˬyehˇ lehˬ hmˬ taˬ-euˬ miˇ neh, "Aˬ yui ̭ g’aˬ-aˬ, aˬ nyiˇ g’aˬ-euˬ zaˬ k’aˆ ya geu ̭ teh ̭-a" lehˇ, Leˬbehˇka ̭-ahˇ ehˇ nehˬ-euˬ meh. Aˬ yaw ̭ nya ̭ nmˇ maˬ deh ̭ le mi naˆ-ehˇ, k’oeˇ lo ̭-ehˇ ehˇ taˬ-euˬ meh. Aˬ nya ̭ nmˇ yaw muiˬ yaw doeˇ tiˬ jeˬ-iˬ maˬ mˇ nya laˇ mi naˆ-ehˇ ehˇ taˬ-euˬ dawˬ pyeu ̭-eu meh. K’oeˇ miˇ neh, Miˬyehˇ neh tseˇ doˆ-euˬ lehˇ ehˇ-eu-aˬ, aˬ yaw ̭ kuˇ maw ̭-eu g’aˬ-ahˇ kuˇ gaˇ ehˇ-eu meh. Aˬ nya ̭ nmˇ neh mˇ-euˬ yaw muiˬ yaw doeˇ-ahˇ tiˬ jeˬ-iˬ maˬ ta ̭-a. ¹³ "Yaˬkoˆ-ahˇ ngaˇ noeˬ dzoeˇ-awˇ, Iˇsawˇ-ahˇ maˬ noeˬ dzoeˇ nya" lehˇ, Jaˇli ̭ la ̭ k’oeˇ ehˇ taˬ-euˬ meh. ¹⁴ Toˆ-ehˇ ngeuˇ naˇ, Miˬyehˇ maˬ tsaˬ maˬ dawˇ nga lehˇ aˬ dui ehˇ nmˇ loˇ. Maˬ ngeuˇ-a. ¹⁵ Aˬ jeˬ miˇ neh ehˇ naˇ, "Ngaˇ g’awˬ shaˬ gaˬ maw ̭-eu tsawˇ haˬ-ahˇ g’awˬ shaˬ gaˬ-awˇ, ngaˇ ngehˬ g’eh nehˬ maw ̭-eu tsawˇ haˬ-ahˇ ngehˬ g’eh-eu ma" lehˇ, Moˇseˬ-ahˇ aˬ yaw ̭ ehˇ nehˬ-euˬ meh. ¹⁶ K’oeˇ miˇ neh, yawˬ jeˬ na lu ̭ tsawˇ haˬ zaˬ-euˬ nui k’ahˇ hawˇ-eu tsawˇ haˬ zaˬ neh mˇ-euˬ shaˇ-euˬ k’oeˇ taˆ pyeu ̭ laˇ-eu maˬ ngeuˇ-a. Miˬyehˇ g’awˬ shaˬ gaˬ-eu uˬ moˆ pyeu ̭ laˇ-eu teh ̭ meh. ¹⁷ Jaˇli ̭ la ̭ k’oeˇ Iˇjiˇtuˆ sahˬ paˬ-ahˇ heu lo ̭-ehˇ ehˇ nehˬ taˬ-euˬ jaˆ-eu meh. "Miˇ tsaˬ heu dawˬ tawˆ lu ̭ k’oeˇ taˆ ngaˬ-euˬ baoˬ bi mawˇ-awˇ, ngaˬ-euˬ tsawˇ myahˇ bi huiˬ byah-iˇ-eu g’aˇ duˬ nawˬ-ahˇ zmˬ-eu lehˇ sahˬ paˬ ka nehˬ taˬ-euˬ ma." ¹⁸ K’oeˇ miˇ neh, Miˬyehˇ-aˬ, aˬ yaw ̭ g’awˬ shaˬ gaˬ maw ̭-eu tsawˇ haˬ-ahˇ g’aw shaˬ gaˬ-awˇ, aˬ yaw ̭ nui ma bi g’ahˇ maw ̭-eu tsawˇ haˬ-ahˇ nui ma bi g’ahˇ-eu meh. ¹⁹ Toˆ-ehˇ ngeuˇ naˇ, Miˬyehˇ-euˬ nui noeˬ-ahˇ tiˬ g’aˬ-iˬ maˬ laˆ tsoeˬ nya-eu-aˬ, tsawˇ haˬ zaˬ-ahˇ Miˬyehˇ aˬ jeˬ iˬ baˇ taˬ k’aˇ paˇ za ta" lehˇ naw ma ̭ tiˬ g’aˬ na ngaˬ-ahˇ naˇ haˬ maw ̭ teh ̭-a. ²⁰ Ehˇ k’aw ̭, cawˬ-oˇ, Miˬyehˇ-ahˇ dawˬ poˆ poˆ leˇ paˬ-ehˇ nawˇ aˬ suˇ g’aˬ te. "Nawˇ ngaˬ-ahˇ aˬ jeˬ miˇ neh heu lo ̭-ehˇ tehˆ nehˬ la ̭ te" lehˇ, oeˬ lahˬ tehˆ-eu tsawˇ haˬ-ahˇ miˇ tsaˬ oeˬ lahˬ dawˬ poˆ poˆ leˇ nya ta loˇ. ²¹ Oeˬ lahˬ tehˆ-eu tsawˇ haˬ miˇ tsaˬ shaˬ jehˆ yuˇ-awˇ, yawˬ ha k’aˇ tehˆ maw ̭-eu lo ̭-ehˇ maˬ tehˆ nya ta loˇ. Shaˬ jehˆ aˬ yaw ̭ tiˬ k’oˇ-ahˇ teh ̭-ehˇ miˇ tsaˬ nyiˬ tsuˆ tsuˆ doˆ-awˇ, aˬ yaw ̭ neh k’aˇ noeˬ-euˬ lo ̭-ehˇ, bawˬ-iˬ g’eh ngeh zmˬ-eu g’aˇ duˬ muiˬ-eu oeˬ lahˬ hawˇ-eu, nui gaˇ zmˬ-eu g’aˇ duˬ yaw k’aˆ-ehˇ maˬ muiˬ-eu oeˬ lahˬ maˬ tehˆ beu nya ta loˇ. ²² Miˬyehˇ neh mˇ-euˬ jeˬ k’aw ̭, k’oeˇ lo ̭-ehˇ duˇ-eu meh. Aˬ yaw ̭-euˬ nui ma pehˇ-eu jeˬ bi mawˇ maw ̭-awˇ, aˬ yaw ̭-euˬ baoˬ bi siˬ nya maw ̭-eu meh. Ehˇ k’aw ̭, aˬ yaw ̭ nui ma pehˇ-awˇ laˆ cawˆ nehˬ-eu lehˇ g’eh-eu miˇ tsaˬ oeˬ lahˬ deuˬ-ahˇ aˬ yaw ̭ oˇ dui dui-eu meh. ²³ Aˬ yaw ̭-euˬ yaw sheh ̭ k’ahˬ sehˇ bi ̭ nehˬ la ̭-eu lehˇ lehˬ hmˬ taˬ-euˬ aˬ yaw ̭ g’awˬ shaˬ gaˬ-eu aˬ dui ma ̭ k’oeˇ taˆ shehˆ daˆ nehˬ la ̭-euˬ yaw sheh ̭ k’ahˬ sehˇ k’oeˇ k’aw ̭, aˬ yaw ̭ bi mawˇ maw ̭-eu meh. ²⁴ Aˬ dui-aˬ, aˬ yaw ̭ neh kuˇ doˆ taˬ-euˬ tsawˇ haˬ deuˬ pyeu ̭-eu ma. Yuˇdaˆ tsawˇ haˬ deuˬ la ̭ k’oeˇ teh ̭-ehˇ kuˇ doˆ nehˬ la ̭-euˬ maˬ ngeuˇ-a. Yuˇdaˆ tsawˇ haˬ maˬ ngeuˇ-eu deuˬ-ahˇ k’aw ̭ kuˇ doˆ nehˬ la ̭-euˬ meh. ²⁵ Hawˇseˬ sahˬ bo ̭ la ̭ k’oeˇ aˬ yaw ̭ heu lo ̭-ehˇ ehˇ taˬ-euˬ meh. "Ngaˬ-euˬ tsawˇ haˬ maˬ ngeuˇ-eu k’aw ̭, ’Ngaˬ-euˬ tsawˇ haˬ’ lehˇ ngaˇ kuˇ ma. Ngaˬ neh maˬ gaˬ-euˬ tsawˇ jeuˬ-ahˇ, ’Ngaˇ gaˬ-eu deuˬ’ lehˇ ngaˇ kuˇ ma. ²⁶ ’Naw ma ̭ nga-euˬ tsawˇ maˬ ngeuˇ’ lehˇ, ngaˇ ehˇ-euˬ jawˇ duˬ nyiˬ paˆ-ehˇ, ’Dehˬ lu ̭-eu Miˬyehˇ-euˬ zaˬ’ lehˇ, aˬ yaw ̭ ma ̭-ahˇ bi kuˇ paˇ ma." ²⁷ Iˇsaˬ leˬ laˇ tsawˇ jeuˬ gaˇ kawˆ Iˇsaˬyaˇ neh heu lo ̭-ehˇ ehˇ taˬ-euˬ meh. "Iˇsaˬleˬlaˆ tsawˇ haˬ deuˬ iˬ ma laˆ shaˆ lawˇ deh-ahˇ jaˆ-eu k’aˇ shui ̭ lo ̭-ehˇ mya ̭ k’aw ̭, ka k’o ̭-eu jeˬ za-eu tsawˇ haˬ cuiˆ dui dui teh ̭-a. ²⁸ Aˬ jeˬ miˇ neh ehˇ naˇ, miˇ tsaˬ dawˬ tawˆ lu ̭-ahˇ Miˬyehˇ yaw kawˇ-ehˇ tiˬ saˬ tiˬ li yaˇ k’aˬ daˇ nehˬ teh ̭-a." ²⁹ Na ̭ ngeh neh Iˇsaˬyaˇ neh ehˇ taˬ-euˬ heu lo ̭-ehˇ jaˆ-eu meh. "Baoˬ huiˬ-eu Sahˬpaˬ Miˬyehˇ neh, tsui ̭ maˬ bi dahˬ-iˇ-eu g’aˇ duˬ, zaˬ maˬ bi dzeuˇ-iˇ law nmˇ-aˬ, Sawˇdoˬ, Gawˇmawˇlaˆ meuˬ lo ̭-ehˇ, aˬ dui byoˆ-iˇ jiˇ-euˬ teh ̭-a." ³⁰ Aˬ dui heu lo ̭-ehˇ ehˇ nya meh. Miˬyehˇ-ahˇ tsaˬ leˇ tsahˇ leˇ nya ni maˬ leh jeh-euˬ Yuˇdaˆ tsawˇ haˬ maˬ ngeuˇ-eu k’oeˇ deuˬ k’aw ̭, jah-eu baˬ da neh Miˬyehˇ-ahˇ tsaˬ leˇ tsahˇ leˇ-eu tsawˇ haˬ pyeu ̭ laˇ-euˬ meh. ³¹ Ehˇ k’aw ̭, Iˇsaˬleˬlaˆ tsawˇ haˬ deuˬ-aˬ, yawˬ ha Miˬyehˇ-ahˇ tsaˬ leˇ tsahˇ leˇ nya ni jahˇ nehˬ la ̭ nya-eu zahˇ dawˬ k’o ̭ dawˬ-ahˇ poˆ lu ̭ k’aw ̭, maˬ poˆ mawˇ nya-ehˇ shaˬ lu ̭ meh. ³² Aˬ jeˬ miˇ neh maˬ poˆ mawˇ nya ta lehˇ ehˇ ngeh, jah-eu jeˬ-ahˇ aˬ yaw ̭ ma ̭ maˬ g’oe-ehˇ, yawˬ ha neh mˇ-euˬ shaˇ-euˬ jeˬ-ahˇ teh ̭-ehˇ g’oe-eu miˇ neh meh. K’oeˇ miˇ neh, "tsawˇ haˬ zaˬ sahˬ ti ̭ ti ̭-eu k’aˬ lo"-ahˇ aˬ yaw ̭ ma ̭ sahˬ ti ̭ ti ̭-euˬ meh. ³³ Jaˇli ̭ la ̭ k’oeˇ ehˇ taˬ-euˬ, "Haw yawˬ, tsawˇ haˬ bi coˬ-iˇ-eu, tsawˇ haˬ sahˬ ti ̭ ti ̭ duˬ k’aˬ lo, Ziˇoˬ meuˬ-ahˇ ngaˇ bi jaˆ ma. Ehˇ k’aw ̭, aˬ yaw ̭-ahˇ jah-eu deuˬ daˬ ga-awˇ maˬ ya sha ̭ dawˇ-aˇ."

¹ Aˬ yui ̭ aˬ nyiˇ Ka li zaˬ deuˬ-oˇ, ngaˬ-euˬ nui ma la ̭ k’oeˇ ngaˬ-euˬ tsawˇ jeuˬ ka k’o ̭-eu jeˬ bi za maw ̭ dui dui nya. Aˬ yaw ̭ ma ̭ g’aˇ duˬ ngaˇ guiˬ lahˬ shaˇ dui dui lu ̭ ma. ² Aˬ yaw ̭ ma ̭ Miˬyehˇ nui ma tsaˬ ni mˇ maw ̭ dui dui meh. Ehˇ k’aw ̭, aˬ yaw ̭ ma ̭ mˇ-eu k’oeˇ gaˇ ma maˬ tsaˬ-a. ³ Tsawˇ haˬ zaˬ aˬ yaw ̭-ahˇ tsaˬ leˇ tsahˇ leˇ nya ni Miˬyehˇ neh shaˇ dahˇ taˬ-euˬ gaˇ ma-ahˇ aˬ yaw ̭ ma ̭ maˬ siˬ nya-ehˇ, yawˬ haˇ yawˬ ha gaˇ ma tiˬ kahˇ shaˇ dahˇ-eu lehˇ leh jeh-eu meh. K’oeˇ miˇ neh, tsawˇ haˬ zaˬ aˬ yaw ̭-ahˇ tsaˬ leˇ tsahˇ leˇ ni Miˬyehˇ neh shaˇ dahˇ-euˬ gaˇ ma-ahˇ aˬ yaw ̭ ma ̭ maˬ ha geu ̭-a. ⁴ Jah-eu tsawˇ haˬ yawˬ g’aˬ na lu ̭ Miˬyehˇ-ahˇ tsaˬ leˇ tsahˇ leˇ nya ni, Ka li neh Zahˇ dawˬ k’o ̭ dawˬ-ahˇ aˇ saˬ bi saˬ-euˬ meh. ⁵ Zahˇ dawˬ k’o ̭ dawˬ-ahˇ g’oe-eu baˬ da neh Miˬyehˇ-ahˇ tsaˬ leˇ tsahˇ leˇ-eu gaˇ kawˆ-ahˇ ta ̭ leˇ-awˇ, "Zahˇ dawˬ k’o ̭ dawˬ la ̭ k’oeˇ ehˇ taˬ-euˬ dawˬ deuˬ-ahˇ naˇ haˬ geu ̭-eu tsawˇ haˬ ya deh ̭ teh ̭-a" lehˇ, Moˇseˬ neh bo ̭ taˬ-euˬ jaˆ-eu meh. ⁶ Ehˇ k’aw ̭, jah-eu baˬ da neh Miˬyehˇ-ahˇ tsaˬ leˇ tsahˇ leˇ-eu gaˇ kawˆ Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "Mˬ k’oeˇ taˆ aˬ suˇ g’aˬ daˆ leˇ nmˇ lehˇ yawˬ haˇ yawˬ ha taˬ naˇ haˬ." (K’oeˇ-aˬ, Ka li-ahˇ sheuˬ ka laˬ leˇ gaˇ ehˇ maw ̭-eu meh.) ⁷ "Shiˇ-eu miˇ oˆ k’ahˬ-ahˇ aˬ suˇ g’aˬ za ̭ ka-iˇ nmˇ lehˇ k’aw ̭, yawˬ haˇ yawˬ ha taˬ naˇ haˬ." (K’oeˇ-aˬ, Ka li-ahˇ shiˇ-eu miˇ k’ahˬ-ahˇ neh sheuˬ doˆ laˬ-iˇ gaˇ ehˇ maw ̭-eu meh.) ⁸ Ehˇ maw ̭-eu dawˬ tsui ̭-aˬ, heu lo ̭-ehˇ meh. "Miˬyehˇ-euˬ dawˬ kawˬ-aˬ, naw ma ̭-euˬ dawˬ peh jaˆ-eu meh. Naw ma ̭-euˬ mehˬ luˬ k’oeˇ taˆ jaˆ-awˇ, naw ma ̭-euˬ nui ma la ̭ k’oeˇ ahˇ-eu meh." K’oeˇ-aˬ, aˬ dui ma ̭ dawˬ mehˬ mehˬ lu ̭-eu jah-eu gaˇ kawˆ k’oeˇ meh. ⁹ Yeˬsuˇ-aˬ Sahˬpaˬ meh lehˇ saˇ kiˇ kamˬ-awˇ, Miˬyehˇ neh aˬ yaw ̭-ahˇ shiˇ-euˬ gaˇ bi g’o ̭ deh ̭ laˇ-euˬ meh lehˇ nawˇ jah naˇ, ka k’o ̭-eu jeˬ za teh ̭-a. ¹⁰ Aˬ jeˬ miˇ neh ehˇ naˇ, aˬ dui jah-eu miˇ neh Miˬyehˇ-ahˇ tsaˬ leˇ tsahˇ leˇ-awˇ, aˬ dui saˇ kiˇ kamˬ-euˬ miˇ neh ka k’o ̭ eu jeˬ za-euˬ ma. ¹¹ "Aˬ yaw ̭-ahˇ k’aˇ jah-eu tsawˇ haˬ deuˬ daˬ ga-awˇ maˬ ya sha ̭ dawˇ-aˇ" lehˇ, Jaˇli ̭ la ̭ k’oeˇ ehˇ taˬ-euˬ meh. ¹² Yuˇdaˆ tsawˇ haˬ hawˇ-eu Yuˇdaˆ tsawˇ haˬ maˬ ngeuˇ-eu deuˬ maˬ tseˇ paˆ ni, dawˬ tawˆ lu ̭ ahˇ leˇ jiˇ-eu meh. Miˬyehˇ-aˬ, dawˬ tawˆ lu ̭-euˬ Sahˬpaˬ pyeu ̭-awˇ, aˬ yaw ̭-ahˇ k’aˇ kuˇ-eu tsawˇ haˬ-ahˇ guiˬ lahˬ tiˬ byah ni bi ̭ nehˬ-eu meh. ¹³ "Sahˬpaˬ Miˬyehˇ-euˬ tsawˇ myahˇ-ahˇ kuˇ-awˇ la ̭ jeuˬ k’aˇ shaˇ-eu tsawˇ haˬ-ahˇ aˬ yaw ̭ ka k’o ̭ nehˬ teh ̭-a." ¹⁴ Ehˇ k’aw ̭, aˬ yaw ̭ ma ̭ maˬ jah naˇ, aˬ yaw ̭-ahˇ aˬ joˆ-ehˇ kuˇ-awˇ la ̭ jeuˬ shaˇ nmˇ. Aˬ yaw ̭-euˬ gaˇ kawˆ maˬ ya gaˬ haw naˇ, aˬ joˆ-ehˇ jah nmˇ. Mehˬ nehˬ-iˇ-eu g’aˬ ma jawˇ naˇ, aˬ joˆ-ehˇ ya gaˬ haw nmˇ. ¹⁵ Mehˬ nehˬ-iˇ-eu tsawˇ haˬ maˬ k’ehˇ g’eh naˇ, aˬ joˆ-ehˇ bi mehˬ nehˬ-iˇ nmˇ. K’oeˇ miˇ neh, "Laˬ k’aˬ cehˇ-eu Guiˬ lahˬ dawˬ mehˬ-eu tsawˇ haˬ deuˬ-euˬ kuiˇ to ̭ aˇ naˆ ni haw muiˬ-eu nga" lehˇ, Jaˇli ̭ la ̭ k’oeˇ ehˇ taˬ-euˬ meh. ¹⁶ Ehˇ k’aw ̭, tsawˇ haˬ yawˬ g’aˬ na lu ̭ Laˬ k’aˬ cehˇ-eu Guiˬ lahˬ dawˬ-ahˇ ha geu ̭-eu maˬ ngeuˇ-a. "Sahˬpaˬ Miˬyehˇ-oˇ, nga ma ̭ neh mehˬ-euˬ dawˬ-ahˇ aˬ suˇ g’aˬ naˇ haˬ geu ̭-eu jawˇ nmˇ" lehˇ, Iˇsaˬyaˇ neh ehˇ-euˬ dawˬ jaˆ-eu meh.` ¹⁷ Dawˬ tawˆ lu ̭ ehˇ le ̭ naˇ, jah-eu k’oeˇ-aˬ, Miˬyehˇ dawˬ kawˬ ya gaˬ-euˬ miˇ neh jah-awˇ, Miˬyehˇ dawˬ kawˬ ya gaˬ-euˬ k’oeˇ-aˬ, Ka liˬ-euˬ dawˬ baˬ da neh ya gaˬ-euˬ jeˬ pyeu ̭-eu meh. ¹⁸ Ehˇ k’aw ̭, "Aˬ yaw ̭ ma ̭ Miˬyehˇ dawˬ kawˬ maˬ ya gaˬ-aˬ lehˇ ehˇ-eu ngeuˇ meh loˇ" lehˇ ngaˇ naˇ haˬ maw ̭-eu ma. Aˬ yaw ̭ ma ̭ Miˬyehˇ dawˬ kawˬ ya gaˬ-euˬ yaw duˬ baw meh. Aˬ jeˬ miˇ neh ehˇ naˇ, Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "A yaw ̭ ma ̭ neh mehˬ nehˬ-euˬ dawˬ, miˇ tsaˬ tahˬ k’awˇ gaˬ byah-iˇ-awˇ, mˬ dzeˇ miˇ dzeˇ gaˬ keuˆ-euˬ meh." ¹⁹ "Iˇsaˬleˬlaˆ tsawˇ haˬ deuˬ maˬ g’oˆ shaw-aˬ loˇ" lehˇ ngaˇ paˇ naˇ haˬ maw ̭-eu ma. Dawˬ heu dawˬ-ahˇ ehˇ k’o ̭ beh beh-euˬ g’aˬ Moˇseˬ meh. Aˬ yaw ̭ ehˇ taˬ-euˬ heu lo ̭-ehˇ jaˆ-eu meh. "Aˬ cawˬ tsawˇ jeuˬ-ahˇ ngaˇ zmˬ-awˇ, naw ma ̭ myaˆ naˆ ni ngaˇ jahˇ ma. Dzawˬ-eu tsawˇ jeuˬ-ahˇ ngaˇ g’oe-awˇ, naw ma ̭ nui ma pehˇ ni jahˇ ma." ²⁰ Iˇsaˬyaˇ neh k’oeˇ naˆ maˬ tseˇ paˇ ehˇ taˬ-euˬ jaˆ-eu meh. "Ngaˬ-ahˇ maˬ poˆ-euˬ tsawˇ haˬ deuˬ. ngaˬ-ahˇ ya mawˇ duˬ g’aˬ-euˬ meh. Ngaˬ-ahˇ maˬ shaˇ caw-eu deuˬ-ahˇ, ngaˇ iˇ dzoeˇ-awˇ bi mawˇ-euˬ ma." ²¹ Ehˇ k’aw ̭, Iˇsaˬleˬlaˆ tawˇ jeuˬ gaˇ kawˆ aˬ yaw ̭ heu lo ̭-ehˇ ehˇ taˬ-euˬ meh. "Ngaˬ-euˬ ehˇ dawˬ maˬ naˇ haˬ-ehˇ ngaˬ-ahˇ puiˬ lu ̭-eu tsawˇ jeuˬ-ahˇ ha geu ̭-eu g’aˇ duˬ, ngaˬ-euˬ aˬ la ̭ nah ga-ehˇ cawˬ ja taˬ-euˬ ma."

¹ "Miˬyehˇ aˬ yaw ̭-euˬ tsawˇ haˬ deuˬ-ahˇ byehˇ dzeh taˬ loˇ" lehˇ ngaˇ naˇ haˬ maw ̭-eu ma. Maˬ ngeuˇ-a. Ngaˇ k’aw ̭, Iˇsaˬleˬlaˆ tsawˇ haˬ ma. Aˬbyaˬhaˬ-euˬ zaˬ deuˬ uˆ deuˬ pyeu ̭-eu Beˬyaˬmiˬ tsawˇ jeuˬ ma. ² Aˇ dahˬ beh ngeh neh aˬ yaw ̭ neh tseˇ doˆ taˬ-euˬ tsawˇ jeuˬ-ahˇ aˬ yaw ̭ maˬ byehˇ dzeh-a. Eˇliˇyaˆ neh Iˇsaˬleˬlaˆ tsawˇ haˬ deuˬ-euˬ yaw lehˬ Miˬyehˇ-ahˇ ehˇ nehˬ-euˬ gaˇ kawˆ Jaˇli ̭ la ̭ k’oeˇ heu lo ̭-ehˇ bo ̭ taˬ-euˬ naw ma ̭ siˬ nya meh. ³ "Sahˬpaˬ Miˬyehˇ-oˇ, nawˬ-euˬ g’aˇ duˬ ngehˬ dah-eu tsawˇ haˬ deuˬ-ahˇ aˬ yaw ̭ ma ̭ seh ̭-awˇ, nawˬ-euˬ lawˇ duˬ deuˬ-ahˇ aˬ yaw ̭ ma ̭ deh pyaˆ-euˬ meh. Ngaˇ tiˬ g’aˬ teh ̭-ehˇ dzeuˇ-iˇ-awˇ, ngaˬ-ahˇ k’aw ̭ aˬ yaw ̭ ma ̭ seh ̭-eu lehˇ leh jeh lu ̭ meh" ⁴ Miˬyehˇ aˬ yaw ̭-ahˇ aˬ joˆ-ehˇ ehˇ k’o ̭ nehˬ-euˬ ta. "Maˬ ngeuˇ-eu miˬyehˇ pyeu ̭-eu Baˬlaˇ miˬ yehˇ-ahˇ pawˬ tsui ̭ pawˬ dmˬ dmˬ-awˇ uˬ duˬ maˬ tahˬ-euˬ tsawˇ haˬ shi ̭ heˇ g’aˬ ngaˬ-euˬ g’aˇ duˬ bi dzeˇ-euˬ ma" lehˇ ehˇ k’o ̭ nehˬ-euˬ meh. ⁵ Nymˬ-mˇ k’aw ̭, k’oeˇ gaˇ duˇ-eu meh. Miˬyehˇ g’awˬ shaˬ gaˬ-awˇ tseˇ doˆ taˬ-euˬ tsawˇ haˬ ui cuiˆ dzeˇ-eu meh. ⁶ Tseˇ doˆ-euˬ k’oeˇ-aˬ, aˬ yaw ̭ g’awˬ shaˬ gaˬ-eu baˬ da neh meh. Aˬ yaw ̭ ma ̭ neh mˇ-euˬ gaˇ baˬ da neh maˬ ngeuˇ-a. Tsawˇ haˬ zaˬ neh mˇ-euˬ gaˇ baˬ da neh tseˇ doˆ-euˬ ngeuˇ naˇ, aˬ yaw ̭ g’awˬ shaˬ gaˬ-eu jeˬ-aˬ, maˇ maˇ ni g’eh-eu g’awˬ shaˬ gaˬ-eu jeˬ maˬ ngeuˇ-a. ⁷ Toˆ-ehˇ ngeuˇ naˇ, aˬ joˆ-ehˇ ehˇ nmˇ. Iˇsaˬleˬlaˆ tsawˇ haˬ deuˬ-aˬ, yawˬ ha poˆ lu ̭-eu jeˬ-ahˇ maˬ poˆ mawˇ-aˬ. Miˬyehˇ neh tseˇ doˆ-euˬ deuˬ pyeu ̭-eu tsawˇ haˬ ui cuiˆ teh ̭-ehˇ k’oeˇ-ahˇ poˆ mawˇ-euˬ meh. K’oeˇ deuˬ-ahˇ dzeuˇ naˇ, tsawˇ haˬ dawˬ tawˆ lu ̭ Miˬyehˇ kuˇ gaˇ maˬ gaˬ leˇ ni naˬ bawˬ bawˬ jiˇ-euˬ meh. ⁸ Jaˇli ̭ la ̭ k’oeˇ heu lo ̭ehˇ ehˇ taˬ-euˬ meh. "Aˬ yaw ̭ ma ̭-euˬ nui ma g’ahˇ-awˇ, naˬ bawˬ bawˬ-awˇ myaˆ beh ̭ beh ̭ ni, Miˬyehˇ neh jahˇ nehˬ-euˬ miˇ neh, iˬ nah keuˆ ni maˬ mawˇ nya-a." ⁹ Daˬbiˇ neh ehˇ taˬ-euˬ heu lo ̭-ehˇ jaˆ-eu meh. "Aˬ yaw ̭ ma ̭ yaw bui bui lu ̭ ngeh, lahˇ ju neh bi k’mˇ pa ̭ lu ̭-uˇ. Aˬ yaw ̭ ma ̭ coˬ-iˇ-eu la ̭ k’oeˇ, aˬ cawˬ k’ehˬ gaˇ ya daˬ lu ̭-uˇ. ¹⁰ A ̭ yaw ̭ ma ̭ myaˆ beh ̭ beh ̭-iˇ-awˇ, maˬ mawˇ nya ni pyeu ̭-iˇ lu ̭-uˇ. Shaˬ zahˬ pi-eu maˬ g’aˬ leˇ-ehˇ, daˇ tsui ̭ k’o ̭-iˇ-awˇ shaˬ lu ̭-uˇ." ¹¹ "Yuˇdaˆ tsawˇ haˬ deuˬ sahˬ ti ̭ ti ̭ ngeh, coˬ dzeh-iˇ-awˇ maˬ paˇ tuˇ laˇ nya ni pyeu ̭-iˇ taˬ loˇ" lehˇ ngaˇ naˇ haˬ maw ̭-eu ma. Maˬ ngeuˇ-a. Aˬ yaw ̭ ma ̭ iˬ baˇ mˇ-euˬ baˬ da neh, aˬ yaw ̭ ma ̭ myaˆ bi naˆ-eu g’aˇ duˬ Yuˇdaˆ tsawˇ haˬ maˬ ngeuˇ-eu deuˬ k’oeˇ taˆ ka k’o ̭-eu jeˬ bi keuˆ le-euˬ meh. ¹² Yuˇdaˆ tsawˇ haˬ deuˬ iˬ baˇ mˇ-euˬ miˇ neh miˇ tsaˬ zaˬ deuˬ yaw muiˬ g’awˬ mya jeˬ siˬ nya laˇ-awˇ, aˬ yaw ̭ ma ̭ guiˬ lahˬ sa ̭ laˇ paw iˇ shaˬ shaˬ-euˬ k’oeˇ-aˬ, aˬ cawˬ tsawˇ jeuˬ guiˬ lahˬ g’awˬ mya ni za-euˬ meh. ¹³ Nymˬ-mˇ poˆ jawˇ-aˬ, naw ma ̭ Yuˇdaˆ tsawˇ haˬ maˬ ngeuˇ-eu deuˬ-ahˇ ngaˇ ehˇ lu ̭-eu ma. Ngaˇ-aˬ, Yuˇdaˆ tsawˇ haˬ maˬ ngeuˇ-eu deuˬ g’aˇ duˬ gaˇ mˇ-eu g’aˬ k’ehˇ k’aˇ geu ̭ lu ̭ k’oeˇ keuˆ ni, ngaˬ-euˬ gaˇ-ahˇ ngaˇ taˬ huiˬ dui dui-eu ma. ¹⁴ Ngaˇ k’oeˇ lo ̭-ehˇ mˇ-eu miˇ neh ngaˬ-euˬ tsawˇ jeuˬ ngaˬ-ahˇ myaˆ naˆ-eu la ̭ k’oeˇ, aˬ yaw ̭ ma ̭ tiˬ paˆ na deuˬ-ahˇ Miˬyehˇ ka k’o ̭ nehˬ-eu duˇ. ¹⁵ Aˬ yaw ̭ ma ̭-ahˇ Miˬyehˇ byehˇ dzeh nehˬ ngeh, Miˬyehˇ-ahˇ muiˇ-euˬ aˬ cawˬ tsawˇ jeuˬ k’oeˇ deuˬ Miˬyehˇ-ahˇ cawˬ cawˬ ta ̭ nya-eu tsawˇ haˬ bi pyeu ̭ laˇ-euˬ-aˬ, aˬ yaw ̭ ma ̭-ahˇ ha geu ̭ nehˬ ngeh jawˇ aˬ joˆ-ehˇ paˇ pyeu ̭ laˇ nmˇ. Shiˇ-euˬ tsawˇ haˬ paˇ bi g’o ̭ deh ̭ laˇ-euˬ gaˇ duˇ teh ̭-a. ¹⁶ Kaˬ muˇ jahˇ beh beh-euˬ siˬ Miˬyehˇ-ahˇ bi ̭ naˇ, kaˬ muˇ tiˬ tsmˇ tsmˇ lah-ehˇ Miˬyehˇ-ahˇ damˬ nehˬ-euˬ jeˬ pyeu ̭-eu meh. Aˇ bawˇ tiˬ bawˇ-euˬ duˬ ciˇ Miˬyehˇ-ahˇ damˬ nehˬ naˇ, uˬ la ̭ deuˬ k’aw ̭ Miˬyehˇ-euˬ pyeu ̭-eu meh. ¹⁷ Tsawˇ haˬ zaˬ neh ka taˬ-euˬ saˬ loˬ aˇ bawˇ-euˬ uˬ la ̭ tiˬ paˆ na deuˬ deuˆ tsehˆ dzeh-awˇ, bawˇ tsahˬ-ahˇ deh ̭-eu saˬ loˬ aˇ bawˇ-euˬ uˬ la ̭ yuˇ-awˇ paˇ tsa ̭ nehˬ-euˬ meh. Naw ma ̭ Yuˇdaˆ tsawˇ haˬ maˬ ngeuˇ-eu deuˬ-aˬ, bawˇ tsahˬ-ahˇ deh ̭-eu saˬ loˬ aˇ bawˇ-ahˇ duˇ-eu meh. Ehˇ k’aw ̭, Yuˇdaˆ tsawˇ haˬ-euˬ guiˬ lahˬ sa ̭ laˇ paw g’aˬ k’aˆ dui dui-eu jeˬ-ahˇ nymˬ-mˇ naw ma ̭ za lu ̭-eu meh. ¹⁸ K’oeˇ lo ̭-ehˇ ngeuˇ naˇ, bi deuˆ tsehˆ dzeh-euˬ uˬ la ̭-ahˇ duˇ-eu tsawˇ haˬ deuˬ-ahˇ naw ma ̭ yehˬ bawˬ sehˇ lu-ehˇ maˬ ya ehˇ-a. Naw ma ̭ a jeˬ k’ahˬ sehˇ jehˆ k’aˇ paˇ za ta. Naw ma ̭-aˬ, uˬ la ̭ teh ̭ meh. Duˬ ciˇ k’oeˇ naw ma ̭-ahˇ g’oe-eu maˬ ngeuˇ-a. Naw ma ̭ duˬ ciˇ-ahˇ g’oe lu ̭-eu meh. ¹⁹ "Ngeuˇ teh ̭-a. Ehˇ k’aw ̭, nga ma ̭ tsa ̭ leˇ k’aˇ za ni uˬ la ̭ tiˬ paˆ na deuˬ bi deuˆ tsehˆ dzeh-euˬ maˬ ngeuˇ-a loˇ" lehˇ naw ma ̭ ehˇ maw ̭ teh ̭-a. ²⁰ Naw ma ̭ ehˇ-eu tsaˬ meh. Aˬ yaw ̭ ma ̭-aˬ, maˬ jah-eu miˇ neh bi deuˆ tsehˆ dzeh-euˬ meh. Naw ma ̭-aˬ, jah-eu miˇ neh zi ̭ lu ̭ meh. Ehˇ k’aw ̭, nui ma taˬ huiˬ. Yahˇ yahˇ-ehˇ deh ̭-awˬ. ²¹ Aˇ bawˇ aˬ yaw ̭-ahˇ tso ̭ doˆ laˇ-euˬ uˬ la ̭-ahˇ duˇ-eu Yuˇdaˆ tsawˇ haˬ deuˬ-ahˇ keuˆ ni aˬ yaw ̭ maˬ taˬ nehˬ-eu-aˬ, naw ma ̭-ahˇ taˬ nehˬ la ̭ teh ̭-a lehˇ duˇ te loˇ. ²² Miˬyehˇ g’awˬ shaˬ gaˬ-eu jeˬ hawˇ-eu zuiˆ-eu jeˬ heu nyiˬ hmˬ-ahˇ, heu gaˇ aˬ dui ya mawˇ-euˬ ma. Iˬ baˇ mˇ-eu tsawˇ haˬ deuˬ-ahˇ aˬ yaw ̭ zuiˆ-awˇ, aˬ yaw ̭ g’awˬ shaˬ haw gaˬ paˬ-ehˇ k’aˇ deh ̭ k’oeˇ keuˆ ni naw ma ̭-ahˇ aˬ yaw ̭ g’awˬ shaˬ gaˬ teh ̭-a. Ehˇ k’aw ̭, aˬ yaw ̭ g’awˬ shaˬ gaˬ paˬ-ehˇ maˬ deh ̭ naˇ, naw ma ̭-ahˇ k’aw ̭ deuˆ tsehˆ dzeh teh ̭-a. ²³ Yuˇdaˆ tsawˇ haˬ deuˬ maˬ jah-eu nui ma k’oeˇ siˬ-ahˇ byehˇ dzeh naˇ, aˬ yaw ̭ ma ̭-euˬ jawˇ duˬ-ahˇ paˇ laˆ tsa ̭ k’o ̭ nehˬ teh ̭-a. Aˬ jeˬ miˇ neh ehˇ naˇ, Miˬyehˇ k’oeˇ lo ̭-ehˇ jahˇ nya-eu baoˬ jaˆ-eu meh. ²⁴ Bawˇ tsahˬ-ahˇ deh ̭-eu saˬ loˬ aˇ bawˇ-euˬ uˬ la ̭ pyeu ̭-eu Yuˇdaˆ tsawˇ haˬ maˬ ngeuˇ-eu naw ma ̭-ahˇ deuˆ tsehˆ la ̭-awˇ, tsawˇ haˬ neh ka taˬ-euˬ saˬ loˬ aˇ bawˇ-ahˇ tsa ̭ nehˬ-eu jeˬ pyeu ̭-eu, tiˬ jawˇ-iˬ maˬ gaˬ haw-euˬ jeˬ-ahˇ Miˬyehˇ mˇ nya-eu-aˬ, ka taˬ-euˬ saˬ loˬ aˇ bawˇ-euˬ uˬ la ̭ pyeu ̭-eu Yuˇdaˆ tsawˇ haˬ deuˬ-ahˇ aˬ yaw ̭ yaw oeˇ k’oeˇ bawˇ-ahˇ paˇ tsa ̭ k’o ̭ nehˬ-eu k’oeˇ-aˬ, Miˬyehˇ g’aˇ duˬ awˬ dui dui teh ̭-a. ²⁵ Aˬ yui ̭ aˬ nyiˇ Ka li zaˬ deuˬ-oˇ, naw ma ̭ yawˬ haˇ yawˬ ha zaˬ siˬ tsawˇ gahˇ ahˇ ma lehˇ maˬ ya noeˬ ni, za ̭ taˬ-euˬ yaw tsaˬ yaw dawˇ tiˬ jeˬ naw ma ̭-ahˇ ngaˇ ehˇ nehˬ maw ̭ miˇ-a. Iˇsaˬleˬlaˆ tsawˇ haˬ deuˬ nui ma g’ahˇ-eu k’oeˇ-aˬ, g’awˬ myahˇ ni maˬ gmˬ-aˇ. Aˬ cawˬ tsawˇ jeuˬ aˇ myaˆ g’aˬ bi laˇ byah-eu lehˇ Miˬyehˇ neh noeˬ taˬ-euˬ lo ̭-ehˇ laˇ byah ngeh keuˆ ni gmˬ-eu teh ̭ meh. ²⁶ K’oeˇ ngeh jawˇ, Iˇsaˬleˬlaˆ tsawˇ haˬ dawˬ tawˆ lu ̭ ka k’o ̭-eu jeˬ za teh ̭-a. Jaˇli ̭ la ̭ k’oeˇ heu lo ̭-ehˇ ehˇ taˬ-euˬ jaˆ-eu meh. "Ka k’o ̭ le-eu yaw sahˇ k’oeˇ g’aˬ, Ziˇoˬ gawˬ jawˬ-ahˇ neh oe-awˇ, Yaˬkoˆ-euˬ zaˬ deuˬ uˆ deuˬ-euˬ, maˬ muiˬ maˬ jaˬ-eu yaw haiˬ jeˬ, dawˬ tawˆ lu ̭ yuˇ dzeh nehˬ teh ̭-a. ²⁷ Aˬ yaw ̭ ma ̭-euˬ iˬ baˇ-ahˇ ngaˇ, yuˇ dzeh nehˬ g’aˬ jiˇ ngeh tiˬ jawˇ, ngaˬ-euˬ dawˬ ma saˇ jaˇ heu hmˬ, aˬ yaw ̭ ma ̭ nehˬ-ehˇ ngaˇ dzaˬ ma." ²⁸ Yuˇdaˆ tsawˇ haˬ deuˬ-aˬ, Laˬ k’aˬ cehˇ-eu Guiˬ lahˬ dawˬ heu-ahˇ maˬ ha geu ̭-eu paw dzeˇ neh ehˇ le ̭ naˇ, naw ma ̭ Yuˇdaˆ tsawˇ haˬ maˬ ngeuˇ-eu deuˬ-euˬ dah zaˇ Miˬyehˇ-ahˇ muiˇ-eu tsawˇ haˬ pyeu ̭ laˇ-euˬ meh. Ehˇ k’aw ̭, Miˬyehˇ neh tseˇ doˆ-euˬ paw dzeˇ neh paˇ ehˇ le ̭ naˇ, aˬ yaw ̭ ma ̭-euˬ aˬ poeˬ aˬ bawˇ deuˬ-euˬ myaˆ pyawˬ naˇ mehˇ baˬ da neh Miˬyehˇ-euˬ nui gaˬ-ahˇ za taˬ-euˬ tsawˇ haˬ pyeu ̭-eu meh. ²⁹ Aˬ jeˬ miˇ neh ehˇ naˇ, Miˬyehˇ-aˬ, yawˬ ha neh tseˇ doˆ-awˇ guiˬ lahˬ bi ̭ taˬ-euˬ tsawˇ haˬ deuˬ k’oeˇ taˆ nui ma maˬ poˆ maˬ paˇ laˇ-a. ³⁰ Yuˇdaˆ tsawˇ haˬ maˬ ngeuˇ-eu naw ma ̭ deuˬ-aˬ, dzeuˇ laˇ ngeh Miˬyehˇ-euˬ ehˇ dawˬ maˬ naˇ haˬ-aˬ. Ehˇ k’aw ̭, nymˬ-mˇ-aˬ, Yuˇdaˆ tsawˇ haˬ deuˬ Miˬyehˇ-euˬ ehˇ dawˬ maˬ naˇ haˬ-eu miˇ neh, Miˬyehˇ-euˬ g’awˬ shaˬ gaˬ-eu jeˬ-ahˇ naw ma ̭ za-euˬ meh. ³¹ K’oeˇ gaˇ duˇ ni, naw ma ̭ Miˬyehˇ-euˬ g’awˬ shaˬ gaˬ-eu jeˬ-ahˇ za-euˬ lo ̭-ehˇ, aˬ yaw ̭ ma ̭ k’aw ̭ Miˬyehˇ-euˬ g’awˬ shaˬ gaˬ-eu jeˬ-ahˇ za nya-eu g’aˇ duˬ, nymˬ-mˇ aˬ yaw ma ̭ Miˬyehˇ-euˬ ehˇ dawˬ-ahˇ maˬ naˇ haˬ-eu jeˬ pyeu ̭-eu meh. ³² Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ zaˬ dawˬ tawˆ lu ̭-ahˇ aˬ yaw ̭-euˬ g’awˬ shaˬ gaˬ-eu jeˬ bi ̭ nehˬ maw ̭-eu miˇ neh aˬ yaw ̭ ma ̭ dawˬ tawˆ lu ̭-ahˇ ehˇ dawˬ maˬ naˇ haˬ geu ̭-eu jeˬ-euˬ uˬ moˆ pa ̭ taw ̭-awˇ bi jawˇ-euˬ meh. ³³ Miˬyehˇ-euˬ guiˬ lahˬ aˇ naˆ ni huiˬ-eu nga. Aˬ yaw ̭-euˬ zaˬ siˬ nui gahˇ aˇ naˆ ni na ̭-eu nga. Aˬ yaw ̭ neh noeˬ tsehˆ-euˬ jeˬ-ahˇ tsawˇ haˬ tiˬ g’aˬ-iˬ maˬ siˬ nya-ehˇ, aˬ yaw ̭ aˬ jeˬ miˇ neh k’oeˇ lo ̭-ehˇ mˇ-eu gaˇ kawˆ-ahˇ tsawˇ haˬ tiˬ g’aˬ-iˬ maˬ g’oˆ shaw nya-a. ³⁴ Jaˇli ̭ la ̭ k’oeˇ ehˇ taˬ-euˬ, "Sahˬpaˬ Miˬyehˇ-euˬ nui noeˬ-ahˇ, aˬ suˇ g’aˬ siˬ nya-eu jawˇ ta. Aˬ yaw ̭-ahˇ ja noeˬ ja duˇ-eu, aˬ suˇ g’aˬ mˇ nya-eu jawˇ ta. ³⁵ Miˬyehˇ dziˇ dzoˆ bi tsoeˬ paˬ-ehˇ, aˬ suˇ g’aˬ paˇ nehˬ-euˬ jaˆ ta." ³⁶ K’aˇ jawˇ k’aˇ jaˆ-eu jeˬ dawˬ tawˆ lu ̭ aˬ yaw ̭ neh beh taˬ-euˬ meh. Dawˬ tawˆ lu ̭ aˬ yaw ̭ baˬ da neh jaˆ lu ̭ jawˇ lu ̭-awˇ, aˬ yaw ̭-euˬ g’aˇ duˬ jaˆ lu ̭ jawˇ lu ̭-eu teh ̭ meh. Mˬ maˬ maˬ byaˆ zaˇ ziˇ Miˬyehˇ-ahˇ ciˬ huiˬ ciˬ mahˇ kaˇ-euˇ. Aˬ miˬ.

¹ K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, Miˬyehˇ-euˬ huiˬ dui myaˬ dui dui-eu g’awˬ shaˬ gaˬ-eu jeˬ baˬ da neh naw ma ̭-ahˇ ngaˇ heu lo ̭-ehˇ shaˇ-eu ma. Deh ̭ lu ̭-eu lawˇ-eu jeˬ lo ̭-ehˇ, naw ma ̭-euˬ g’awˇ mawˇ Miˬyehˇ-ahˇ damˬ nehˬ-awˬ. Aˬ yaw ̭-euˬ gaˇ mˇ-eu g’aˇ duˬ a nehˬ-awˇ, aˬ yaw ̭ nui ma tsaˬ ni deh ̭-awˬ. Heu-aˬ, naw ma ̭ mˇ paˬ-ehˇ g’eh-eu maˇ maˇ ni g’eh-eu uˬ duˬ tahˬ-eu jeˬ pyeu ̭-eu meh. ² Miˇ tsaˬ zaˬ deuˬ deh ̭-eu lo ̭-ehˇ maˬ deh ̭ ni, naw ma ̭-euˬ nui ma poˆ laˆ laˆ doˆ-awˇ, naw ma ̭-euˬ la ̭ k’oeˇ paw Miˬyehˇ neh yaw shui ̭ bi jahˇ paˇ-awˬ. K’oeˇ lo ̭-ehˇ jahˇ naˇ, Miˬyehˇ-euˬ nui k’ahˇ-ahˇ naw ma ̭ siˬ nya laˇ teh ̭-a. Muiˬ-eu jeˬ, aˬ yaw ̭ nui ma tsaˬ-eu jeˬ hawˇ-eu, byah dui dui-eu jeˬ-ahˇ naw ma ̭ siˬ nya laˇ teh ̭-a. ³ Miˬyehˇ neh ngaˬ-ahˇ g’awˬ shaˬ gaˬ-eu la ̭ k’oeˇ bi ̭ la ̭-euˬ la ̭ sawˬ baˬ da neh, naw ma ̭ yawˬ g’aˬ na lu ̭-ahˇ ngaˇ heu lo ̭-ehˇ ehˇ-eu ma. Naw ma ̭ yawˬ haˇ yawˬ ha aˇ dzehˬ dzeuˇ ni taˬ noeˬ huiˬ. Tsaˬ tsaˬ ni teh ̭-ehˇ noeˬ-awˬ. Miˬyehˇ neh bi ̭ la ̭-euˬ jah-eu jeˬ aˇ myaˆ ni ahˇ-eu nya lehˇ shaˇ sawˇ-awˇ, yawˬ haˇ yawˬ ha siˬ nya-awˬ. ⁴ Aˬ dui-euˬ g’awˇ mawˇ-ahˇ aˇ sehˇ g’awˬ mya ni tso ̭-eu meh. Aˇ sehˇ k’oeˇ deuˬ yawˬ ha yawˬ gaˇ tawˬ lu ̭-eu meh. ⁵ K’oeˇ gaˇ duˇ ni, aˬ dui-aˬ, maˬ duˇ leˇ-eu tsawˇ haˬ g’awˬ mya jeˬ pyeu ̭-eu k’aw ̭, Ka li nehˬ-ehˇ ta ̭ lu ̭-eu g’awˇ mawˇ tiˬ mawˇ teh ̭-ehˇ pyeu ̭-awˇ, g’awˇ mawˇ tiˬ mawˇ-ahˇ teh ̭-ehˇ maˬ duˇ leˇ-eu aˇ sehˇ g’awˬ mya jeˬ tso ̭ taw ̭ taˬ-euˬ lo ̭-ehˇ, aˬ dui tiˬ g’aˬ tiˇ g’aˬ tso ̭ taw ̭ taˬ-euˬ ma. ⁶ Miˬyehˇ neh bi ̭ la ̭-euˬ guiˬ lahˬ maˬ duˇ leˇ-eu lo ̭-ehˇ, aˬ dui za taˬ-euˬ maˬ duˇ leˇ-eu la ̭ sawˬ deuˬ-ahˇ, k’aˇ za taˬ-euˬ lo ̭-ehˇ aˬ dui zmˬ kaˇ-euˇ. Aˬ cawˬ-ahˇ Miˬyehˇ dawˬ kawˬ mehˬ-eu g’aˇ duˬ la ̭ sawˬ za-euˬ ngeuˇ naˇ, aˬ dui jah g’aˬ k’aˇ k’aˆ-eu naˆ ni mˇ-eu tsaˬ meh. ⁷ Jah-eu aˇ muˇ-euˬ gaˇ mˇ-eu g’aˇ duˬ la ̭ sawˬ za-euˬ ngeuˇ naˇ, mˇ-eu tsaˬ meh. Mehˬ-eu tsoˆ-eu g’aˇ duˬ la ̭ sawˬ za-euˬ ngeuˇ naˇ, mehˬ-eu tsaˬ meh. ⁸ Aˬ cawˬ-ahˇ g’aˬ bi ̭-eu g’aˇ duˬ la ̭ sawˬ za-euˬ ngeuˇ naˇ, g’aˬ bi ̭-eu tsaˬ meh. Aˬ cawˬ-ahˇ bi ̭ nehˬ damˬ nehˬ-eu la ̭ sawˬ za-euˬ ngeuˇ naˇ, nui ma keuˆ-eu la ̭ k’oeˇ bi ̭ nehˬ-eu tsaˬ meh. Aˬ cawˬ k’oeˇ taˆ aˬ yui ̭ aˬ tsu geu ̭-awˇ uˆ lahˇ-eu la ̭ sawˬ za-euˬ ngeuˇ naˇ, leh jeh dui dui-awˇ mˇ-eu tsaˬ meh. Aˬ cawˬ-ahˇ g’awˬ shaˬ gaˬ nehˬ-eu la ̭ sawˬ za-euˬ ngeuˇ naˇ, laˬ k’aˬ tiˬ cehˇ gaˬ nehˬ-eu tsaˬ meh. ⁹ G’oeˇ-eu gaˬ-eu jeˬ-aˬ, maˇ maˇ ni gaˬ-eu jeˬ ya bi pyeu ̭ meh. Maˬ muiˬ maˬ jaˬ-eu jeˬ-ahˇ muiˇ-awˇ, muiˬ-eu jaˬ-eu jeˬ-ahˇ zi ̭ dah ni tuˆ tehˬ taˬ-awˬ. ¹⁰ Ka li la ̭ k’oeˇ aˬ yui ̭ aˬ nyiˇ lo ̭-ehˇ tiˬ g’aˬ tiˇ g’aˬ gaˬ-awˇ, tiˬ g’aˬ tiˇ g’aˬ yaw zeu baw-eu nui ma ahˇ-awˬ. ¹¹ Yaw doeˇ maˬ doeˇ ni mˇ dui dui-awˬ. Nui ma keuˆ dui dui-eu la ̭ k’oeˇ Miˬyehˇ gaˇ mˇ-awˬ. ¹² Noeˬ tmˬ-eu la ̭ k’oeˇ laˬ k’aˬ cehˇ-awˬ. Shaˬ-eu zahˬ-eu jeˬ la ̭ k’oeˇ nui ma g’awˬ mahˇ ni taˬ-awˬ. Aˬ myah lu ̭ guiˬ lahˬ shaˇ-awˬ. ¹³ Nawˇ k’aˇ jaˆ-eu jeˬ nawˬ-euˬ cawˬ Ka li zaˬ deuˬ-ahˇ caw ba nehˬ-awˇ, daˬ yah-ahˇ yaw muiˬ-ehˇ ha-awˬ. ¹⁴ Nawˬ-ahˇ k’ehˬ laˇ k’aˆ laˇ-eu tsawˇ haˬ deuˬ-ahˇ Miˬyehˇ guiˬ lahˬ bi ̭ nehˬ ni shaˇ-awˬ. Yaˬ k’ehˇ maˬ yaˬ nehˬ ni guiˬ lahˬ bi ̭ nehˬ-eu g’aˇ duˬ shaˇ-awˬ. ¹⁵ Laˬ k’aˬ cehˇ-eu tsawˇ haˬ deuˬ nehˬ-ehˇ laˬ k’aˬ caw cehˇ-awˇ, ngoeˇ-eu tsawˇ haˬ deuˬ nehˬ-ehˇ caw ngoeˇ-awˬ. ¹⁶ Tsawˇ haˬ yawˬ g’aˬ na lu ̭ k’oeˇ taˆ nui ma tiˬ kawˆ lo ̭-ehˇ taˬ-awˬ. Huiˬ maw ̭ mahˇ maw ̭-eu nui ma taˬ bi ahˇ. Tsawˇ teˬ zaˬ deuˬ-ahˇ k’aw ̭ cawˬ cawˬ-awˬ. Yawˬ haˇ yawˬ ha zaˬ siˬ tsawˇ gahˇ ahˇ ma lehˇ taˬ noeˬ. ¹⁷ Aˬ cawˬ yaw doeˇ jahˇ laˇ ngeh, yaw doeˇ taˬ jahˇ k’o ̭ nehˬ. Tsawˇ haˬ yawˬ g’aˬ na lu ̭ neh yaw muiˬ meh lehˇ noeˬ-euˬ jeˬ-ahˇ mˇ-awˬ. ¹⁸ Tsawˇ haˬ yawˬ g’aˬ na lu ̭ nehˬ-ehˇ tsaˬ leˇ ni, yawˬ ha k’aˇ g’eh nya-eu lo ̭-ehˇ leh jeh-awˇ deh ̭-awˬ. ¹⁹ Aˬ yui ̭ aˬ nyiˇ Ka li zaˬ deuˬ-oˇ, aˬ cawˬ-ahˇ la ̭ poˆ tiˬ jawˇ-iˬ taˬ poˆ. Miˬyehˇ yaˇ k’aˬ daˇ lu ̭-uˇ. Aˬ jeˬ miˇ neh ehˇ naˇ, Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "La ̭ poˆ poˆ-eu jeˬ-aˬ, ngaˬ-ahˇ ta ̭-eu jeˬ pyeu ̭-eu ma. Ngaˇ jahˇ k’o ̭ nehˬ ma lehˇ Sahˬpaˬ Miˬyehˇ ehˇ-eu meh." ²⁰ Ehˇ k’aw ̭, Jaˇli ̭ la ̭ k’oeˇ heu lo ̭-ehˇ paˇ ehˇ taˬ-euˬ meh. "Nawˬ-ahˇ muiˇ-eu tsawˇ haˬ hawˬ meh ̭ naˇ, bi dzaˬ-awˬ. Iˇ cu ̭ meh naˇ, bi dawˇ-awˬ. K’oeˇ-aˬ, aˬ yaw ̭ ya sha ̭ dawˇ dui dui-awˇ noeˬ poˆ leˇ ni jahˇ nehˬ gaˇ duˇ-eu meh." ²¹ Yaw haiˬ jeˬ neh naw ma ̭-ahˇ taˬ bi g’aˬ leˇ. Ehˇ k’aw ̭, yaw muiˬ jeˬ mˇ-awˇ yaw haiˬ jeˬ-ahˇ bi g’aˬ leˇ-awˬ.

¹ Tsawˇ haˬ yawˬ g’aˬ na lu ̭ miˇ k’ahˬ sahˬ paˬ uˆ lahˇ-eu uˬ moˆ ya jawˇ meh. Aˬ jeˬ miˇ neh ehˇ naˇ, Miˬyehˇ neh maˬ bi ̭-euˬ gaˇ, uˆ lahˇ-eu baoˬ maˬ jaˆ nya-a. Sahˬ paˬ sahˬ ma deuˬ-aˬ, Miˬyehˇ neh baoˬ bi ̭-awˇ bi uˆ lahˇ-euˬ deuˬ pyeu ̭-eu meh. ² Uˆ lahˇ lu ̭-eu sahˬ paˬ sahˬ ma deuˬ-ahˇ k’aˇ puiˬ-eu tsawˇ haˬ-aˬ, Miˬyehˇ neh mˇ taˬ-euˬ jeˬ-ahˇ puiˬ gaˇ duˇ-eu meh. K’oeˇ lo ̭-ehˇ k’aˇ puiˬ-eu tsawˇ haˬ aˬ geu g’aˬ maˬ kaˬ, yawˬ haˇ yawˬ ha yaˇ k’aˬ daˇ gaˇ duˇ-eu meh. ³ Yaw muiˬ jeˬ mˇ-eu tsawˇ haˬ deuˬ-aˬ, uˆ lahˇ lu ̭-eu sahˬ paˬ sahˬ ma-ahˇ maˬ ya guˆ-a. Maˬ muiˬ-eu jeˬ mˇ-eu tsawˇ haˬ deuˬ teh ̭-ehˇ ya guˆ-eu meh. Sahˬ paˬ sahˬ ma-ahˇ guˆ k’aˇ maˬ za ni deh ̭ maw ̭-eu nya loˇ. Yaw muiˬ jeˬ mˇ-awˬ. Sahˬ paˬ sahˬ ma ja ceuˬ nehˬ la ̭ teh ̭-a. ⁴ Aˬ jeˬ miˇ neh ehˇ naˇ, sahˬ paˬ sahˬ ma-aˬ, nawˬ-euˬ g’aˇ duˬ muiˬ ni Miˬyehˇ neh k’ehˇ taˬ-euˬ tsawˇ haˬ pyeu ̭-eu meh. Ehˇ k’aw ̭, nawˇ maˬ muiˬ-eu jeˬ mˇ naˇ, sahˬ paˬ sahˬ ma-ahˇ guˆ-awˬ. Aˬ yaw ̭ nawˬ-ahˇ k’ehˬ-eu yaw duˬ baw meh. Aˬ jeˬ miˇ neh ehˇ naˇ, maˬ muiˬ-eu jeˬ mˇ-eu tsawˇ haˬ deuˬ k’oeˇ taˆ Miˬyehˇ-euˬ k’ehˬ-eu k’aˆ-eu jeˬ bi keuˆ le-eu g’aˇ duˬ, Miˬyehˇ neh aˬ yaw ̭-ahˇ k’ehˇ taˬ-euˬ meh. ⁵ K’oeˇ miˇ neh, Miˬyehˇ-euˬ k’ehˬ-eu k’aˆ-eu jeˬ-ahˇ guˆ-eu baˬ da neh teh ̭-ehˇ maˬ ngeuˇ ni, k’oeˇ lo ̭-ehˇ deh ̭-eu jawˇ-eu tsaˬ meh lehˇ naw ma ̭-euˬ nui ma siˬ nya-eu la ̭ k’oeˇ sahˬ paˬ sahˬ ma deuˬ uˆ lahˇ-eu uˬ moˆ yaw muiˬ paˬ-ehˇ jawˇ-awˬ. ⁶ K’oeˇ baˬ da neh, naw ma ̭ kawˬ ya doˆ nehˬ-eu meh. Aˬ jeˬ miˇ neh ehˇ naˇ, aˬ yaw ̭ ma ̭ yawˬ ha-euˬ gaˇ mˇ-eu k’oeˇ-aˬ, Miˬyehˇ-euˬ g’aˇ duˬ mˇ lu ̭-eu jeˬ pyeu ̭-eu meh. ⁷ Toˆ-ehˇ ngeuˇ naˇ, aˬ yaw ̭ ma ̭-ahˇ k’aˇ bi ̭ paˬ-ehˇ g’eh-eu jeˬ bi ̭-awˬ. Kawˬ k’aˇ doˆ nehˬ paˬ-ehˇ g’eh-eu jeˬ dawˬ tawˆ lu ̭ doˆ nehˬ-awˇ, aˬ yaw ̭ ma ̭ dawˬ tawˆ lu ̭-ahˇ yaw zeu baw-eu la ̭ k’oeˇ taˬ huiˬ taˬ mahˇ nehˬ-awˬ. ⁸ Tiˬ g’aˬ tiˇ g’aˬ g’oeˇ-eu gaˬ-eu dziˇ dzoˆ maˬ ngeuˇ naˇ, nui jeˬ dziˇ dzoˆ taˬ bi daˆ. K’oeˇ lo ̭-ehˇ mˇ naˇ, Zahˇ dawˬ k’o ̭ dawˬ-ahˇ naˇ haˬ geu ̭ gaˇ duˇ-eu meh. ⁹ "Aˬ cawˬ-euˬ miˬ zaˬ yo zaˬ-ahˇ taˬ bahˬ taˬ muˆ. Tsawˇ haˬ taˬ seh ̭. Smˇ k’oeˬ taˬ k’oeˬ. Aˬ cawˬ-euˬ myawˬ-ahˇ mehˇ juiˇ taˬ juiˇ" lehˇ ehˇ taˬ-euˬ zahˇ dawˬ k’o ̭ dawˬ heu deuˬ uˬ ta ̭, zahˇ dawˬ k’o ̭ dawˬ nui deuˬ dawˬ tawˆ lu ̭, "Yawˬ haˇ yawˬ ha gaˬ-eu lo ̭-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ" lehˇ ehˇ-eu dawˬ heu dawˬ la ̭ k’oeˇ ahˇ jiˇ-eu meh. ¹⁰ Nawˇ tsawˇ haˬ tiˬ g’aˬ na-ahˇ gaˬ shaw naˇ, aˬ yaw ̭-ahˇ coeˬ leˇ ciˆ leˇ-eu jeˬ maˬ mˇ-aˇ. K’oeˇ miˇ neh, g’oeˇ-eu gaˬ-eu jeˬ-aˬ, Zahˇ dawˬ k’o ̭ dawˬ-ahˇ mˇ byah-eu meh. ¹¹ Naw ma ̭ k’oeˇ lo ̭-ehˇ ya mˇ meh. Aˬ jeˬ miˇ neh ehˇ naˇ, yu ̭ k’aˆ taˬ-euˬ noeˬ laˇ-eu aˇ yamˬ tsaˬ laˇ-euˬ meh lehˇ naw ma ̭ siˬ nya meh. Miˬyehˇ aˬ dui-ahˇ ka k’o ̭-eu aˇ yamˬ-aˬ, aˬ dui jah dahˬ beh ngeh naˆ maˬ tseˇ nymˬ-mˇ peh dzehˬ laˇ-euˬ meh. ¹² Uˬ ci ̭ buˬ-iˇ-awˇ nah g’ahˇ keuˆ le-eu dawˬ peh peh laˇ-euˬ meh. Yaw zahˇ-ahˇ ta ̭-eu gaˇ deuˬ aˬ dui maˬ mˇ ni naˬ leˇ-awˇ, yaw bya la ̭ k’oeˇ deuˆ ceh ceh-eu keu ka deuˬ-ahˇ dm kaˇ-euˇ. ¹³ Nah g’ahˇ yaw bya-ahˇ deh ̭-eu tsawˇ haˬ deuˬ lo ̭-ehˇ, yaw muiˬ muiˬ-ehˇ deh ̭ g’eh kaˇ-euˇ. Dzaˬ yeh ̭ dawˇ yeh ̭ dzaˬ boˆ dawˇ boˆ-eu jeˬ, aˬ cawˬ-euˬ miˬ zaˬ yo zaˬ-ahˇ bahˬ-eu jeˬ, k’aˬ miˬ sheu-eu jeˬ, iˬ dehˬ iˬ ceh hawˇ-eu myaˆ naˆ-eu jeˬ, heu deuˬ-ahˇ byehˇ dzeh ya ̭-awˇ deh ̭ daˆ jawˇ daˆ g’eh kaˇ-euˇ. ¹⁴ Aˬ dui-euˬ guiˇ deuˆ-eu keu ka pyeu ̭-eu Yeˬsuˇ Ka li-ahˇ dm-awˇ, shiˬ shaˬ jiˇ-euˬ nui loˆ maˬ paˇ poˆ ni, shiˬ shaˬ jiˇ nui k’ahˇ jaˆ-eu jeˬ-ahˇ byehˇ dzeh ya ̭ jiˇ kaˇ-euˇ.

¹ Jah-eu g’aˬ baˬ-eu tsawˇ haˬ-ahˇ ha geu ̭-awˬ. Ehˇ k’aw ̭, aˬ yaw ̭ neh noeˬ taˬ-euˬ jeˬ-ahˇ tsawˇ pyehˇ taˬ pyehˇ. ² Jah-eu tsawˇ haˬ tiˬ g’aˬ na yawˬ jeˬ na lu ̭ dzaˬ nya ma lehˇ noeˬ-eu meh. Ehˇ k’aw ̭, jah-eu g’aˬ baˬ-eu tsawˇ haˬ-aˬ, shaˬ jiˇ maˬ dzaˬ ni g’awˬ pa ̭ g’awˬ nyoeˇ teh ̭-ehˇ dzaˬ-eu meh. ³ Yawˬ jeˬ na lu ̭ dzaˬ-eu tsawˇ haˬ-aˬ, maˬ dzaˬ-eu tsawˇ haˬ-ahˇ taˬ nyiˇ-eu maˬ tsaˬ-a. Yawˬ jeˬ na lu ̭ maˬ dzaˬ-eu g’aˬ k’aw ̭, dzaˬ-eu g’aˬ-ahˇ iˬ baˇ poˆ-eu maˬ tsaˬ-a. Aˬ jeˬ miˇ neh ehˇ naˇ, aˬ yaw ̭-ahˇ Miˬyehˇ ha geu ̭ taˬ-euˬ meh. ⁴ Aˬ cawˬ-euˬ zaˬ k’aˆ-ahˇ yaw lehˬ poˆ paˬ-ehˇ nawˇ aˬ suˇ g’aˬ te. Aˬ yaw ̭ tsaˬ-eu lehˬ-eu gaˇ kawˆ, aˬ yaw ̭-euˬ baw leˬ g’aˬ ngehˬ teh ̭-a. Aˬ yaw ̭-aˬ tsaˬ-eu tsawˇ haˬ pyeu ̭ teh ̭-a. Aˬ jeˬ miˇ neh ehˇ naˇ, aˬ yaw ̭ tsaˬ ni Sahˬpaˬ Miˬyehˇ jahˇ nya-eu meh. ⁵ Tsawˇ haˬ tiˬ g’aˬ na, aˇ nah nui deuˬ naˆ maˬ tseˇ huiˬ-eu aˇ nah jaˆ meh lehˇ noeˬ-awˇ, tiˬ g’aˬ na, aˇ nah dawˬ tawˆ lu ̭ tiˬ kawˆ meh lehˇ noeˬ-eu meh. Aˬ geu g’aˬ maˬ kaˬ, yawˬ ha neh tsaˬ ma lehˇ noeˬ-euˬ jeˬ-ahˇ zi ̭ dah ni tuˆ tehˬ-eu tsaˬ meh. ⁶ Aˇ nah tiˬ nah na-ahˇ lah-eu daw-eu tsawˇ haˬ-aˬ, Sahˬpaˬ Miˬyehˇ-ahˇ taˬ huiˬ-eu la ̭ k’oeˇ lah-eu daw-eu meh. Yawˬ jeˬ na lu ̭ dzaˬ-eu tsawˇ haˬ k’aw ̭, Sahˬpaˬ Miˬyehˇ-ahˇ taˬ huiˬ-eu la ̭ k’oeˇ dzaˬ-eu meh. Aˬ jeˬ miˇ neh ehˇ naˇ, aˬ yaw ̭ Sahˬpaˬ Miˬyehˇ-euˬ guiˬ lahˬ-ahˇ ja ceuˬ-awˇ dzaˬ-eu meh. Yawˬ jeˬ na lu ̭ maˬ dzaˬ-eu tsawˇ haˬ k’aw ̭, Sahˬpaˬ Miˬyehˇ-ahˇ taˬ huiˬ-eu miˇ neh maˬ dzaˬ-eu meh. K’oeˇ-euˬ g’aˇ duˬ Sahˬpaˬ miˬyehˇ-euˬ guiˬ lahˬ-ahˇ aˬ yaw ̭ ja ceuˬ-eu meh. ⁷ Aˬ dui tiˬ g’aˬ-iˬ yawˬ ha g’aˇ duˬ teh ̭-ehˇ deh ̭-eu maˬ ngeuˇ. Tiˬ g’aˬ-iˬ yawˬ ha g’aˇ duˬ teh ̭-ehˇ shiˇ-eu k’aw ̭ maˬ ngeuˇ. ⁸ Aˬ dui ya deh ̭ naˇ, Sahˬpaˬ Miˬyehˇ g’aˇ duˬ deh ̭-eu jeˬ pyeu ̭-awˇ, ya shiˇ naˇ, Sahˬpaˬ Miˬyehˇ g’aˇ duˬ shiˇ-eu jeˬ pyeu ̭-eu ma. K’oeˇ miˇ neh aˬ dui-aˬ, deh ̭-eu maˬ ehˇ, shiˇ-eu maˬ ehˇ, Sahˬpaˬ Miˬyehˇ-euˬ pyeu ̭-eu ma. ⁹ Aˬ jeˬ miˇ neh ehˇ naˇ, deh ̭ lu ̭-eu deuˬ hawˇ-eu shiˇ-euˬ deuˬ dawˬ tawˆ lu ̭ k’oeˇ taˆ Sahˬpaˬ geu ̭-awˇ uˆ lahˇ-eu g’aˇ duˬ, Ka li shiˇ-awˇ g’o ̭ deh ̭ laˇ g’aˬ-euˬ meh. ¹⁰ Toˆ-ehˇ ngeuˇ naˇ, naw ma ̭ shaˬ jiˇ maˬ dzaˬ ni g’awˬ pa ̭ g’awˬ nyoeˇ teh ̭-ehˇ dzaˬ-eu tsawˇ haˬ deuˬ yawˬ ha-euˬ cawˬ Ka li zaˬ deuˬ-ahˇ aˬ jeˬ miˇ neh iˬ baˇ poˆ te. K’oeˇ lo ̭-ehˇ duˇ ni, naw ma ̭ yawˬ jeˬ na lu ̭ dzaˬ-eu tsawˇ haˬ deuˬ k’aw ̭, yawˬ ha-euˬ cawˬ Ka li zaˬ deuˬ-ahˇ aˬ jeˬ miˇ neh taˬ nyiˇ te. Aˬ dui dawˬ tawˆ lu ̭ Miˬyehˇ mehˬ shi yaw ̭ leˇ-awˇ yaˇ k’aˬ ya bi daˇ meh. ¹¹ Jaˇli ̭ la ̭ k’oeˇ ehˇ taˬ-euˬ, "Sahˬpaˬ Miˬyehˇ ehˇ-eu, Deh ̭-eu Miˬyehˇ pyeu ̭-eu ngaˬ-ahˇ, yawˬ g’aˬ na lu ̭ pawˬ dmˬ dmˬ-awˇ, ngaˇ maˇ maˇ ni Miˬyehˇ meh lehˇ, saˇ kiˇ kamˬ-eu dawˬ ngehˬ teh ̭-a." ¹² Aˬ dui yawˬ g’aˬ na lu ̭, yawˬ ha neh k’aˇ mˇ k’aˇ shaˇ-euˬ jeˬ Miˬyehˇ-ahˇ ya ja doˆ nehˬ teh ̭-a. ¹³ K’oeˇ miˇ neh, aˬ dui tiˬ g’aˬ tiˇ g’aˬ iˬ baˇ poˆ-eu jeˬ-ahˇ byehˇ dzeh kaˇ-euˇ. Yawˬ ha-euˬ cawˬ Ka li zaˬ deuˬ sahˬ ti ̭ ti ̭-awˇ iˬ baˇ la ̭ k’oeˇ bi coˬ ahˇ-eu g’aˇ duˬ tiˬ jeˬ-iˬ maˬ mˇ lehˇ, naw ma ̭ noeˬ tsehˆ-eu tsaˬ meh. ¹⁴ Ngaˇ Sahˬpaˬ Yeˬsuˇ nehˬ-ehˇ ta ̭-eu la ̭ k’oeˇ dzaˬ-eu dawˇ-eu jeˬ-aˬ, maˬ muiˬ maˬ shawˇ-eu tiˬ jeˬ-iˬ maˬ jaˆ-aˇ lehˇ jah duˬ taˬ-euˬ ma. Ehˇ k’aw ̭, tsawˇ haˬ tiˬ g’aˬ na, dzaˬ dzaˬ dawˇ dawˇ tiˬ jeˬ na maˬ shawˇ-a lehˇ jah-eu ngeuˇ naˇ, dzaˬ dzaˬ dawˇ dawˇ k’oeˇ aˬ yaw ̭ g’aˇ duˬ maˬ shawˇ-eu jeˬ pyeu ̭ laˇ-euˬ meh. ¹⁵ Nawˬ neh dzaˬ-euˬ dzaˇ tiˬ jeˬ paˬ baˬ da neh nawˬ-euˬ cawˬ Ka li zaˬ tiˬ g’aˬ na nui ma maˬ saˇ duˬ jaˆ naˇ, nawˇ g’oeˇ-eu gaˬ-eu la ̭ k’oeˇ deh ̭-eu maˬ paˇ ngeuˇ meh. Ka li shiˇ dah-awˇ ka k’o ̭ nehˬ-euˬ tsawˇ haˬ-ahˇ nawˬ neh dzaˬ-euˬ dzaˬ dzaˬ dawˇ dawˇ neh maˬ ya laˆ cawˆ-a. ¹⁶ Nawˬ neh yaw muiˬ meh lehˇ noeˬ-euˬ jeˬ aˬ cawˬ ja doeˇ duˬ taˬ bi pyeu ̭. ¹⁷ Aˬ jeˬ miˇ neh ehˇ naˇ, Miˬyehˇ Miˇk’ahˬ-aˬ, dzaˬ-eu dawˇ-eu jeˬ maˬ ngeuˇ-a. K’oeˇ-aˬ, yaw tsaˬ yaw dawˇ jeˬ, Miˬyehˇ la ̭ k’oeˇ nui saˇ o ̭-eu jeˬ hawˇ-eu, Muiˬ-eu Shawˇ-eu Yaw sahˇ Miˬyehˇ neh bi ̭-euˬ laˬ k’aˬ cehˇ-eu jeˬ pyeu ̭-eu meh. ¹⁸ Ka li g’aˇ duˬ k’oeˇ lo ̭-ehˇ mˇ-eu tsawˇ haˬ-ahˇ Miˬyehˇ nui ma tsaˬ-awˇ, tsawˇ haˬ zaˬ k’aw ̭ nui k’ahˇ shiˇ-eu meh. ¹⁹ K’oeˇ miˇ neh, tiˬ g’aˬ tiˇ g’aˬ tsaˬ leˇ dzoeˇ leˇ-eu jeˬ hawˇ-eu, tiˬ g’aˬ tiˇ g’aˬ caw dehˬ caw toˆ-eu jeˬ-ahˇ aˬ dui noeˬ tsoˆ taˬ-eu tsaˬ meh. ²⁰ Dzaˬ dzaˬ dawˇ dawˇ baˬ da neh Miˬyehˇ neh mˇ taˬ-euˬ jeˬ-ahˇ taˬ laˆ cawˆ. Dzaˬ-eu jeˬ dawˬ tawˆ lu ̭ yaw shawˇ meh. Ehˇ k’aw ̭, aˬ cawˬ g’aˇ duˬ iˬ baˇ bi doˆ laˇ-eu jeˬ-ahˇ dzaˬ-eu maˬ tsaˬ-a. ²¹ Shaˬ jiˇ dzaˬ-eu, jiˇ baˬ dawˇ-eu, yawˬ ha-euˬ cawˬ Ka li zaˬ tiˬ g’aˬ na iˬ baˇ mˇ ni jahˇ-eu, heu lo ̭-ehˇ g’eh-eu deuˬ-ahˇ yahˇ-eu muiˬ meh. ²² Gaˇ kawˆ heu-ahˇ ta ̭ leˇ-awˇ, yawˬ ha neh k’aˇ jah duˬ taˬ-euˬ jeˬ yawˬ ha hawˇ-eu Miˬyehˇ yaw kaˬ-ahˇ jaˆ-eu meh. Yawˬ ha neh tsaˬ ma lehˇ noeˬ-euˬ jeˬ k’aˬ duˬ ni mˇ-eu tsawˇ haˬ-aˬ, laˬ k’aˬ cehˇ-eu jeˬ o ̭-eu meh. ²³ Ehˇ k’aw ̭, yawˬ ha dzaˬ-eu jeˬ-ahˇ yawˬ ha-euˬ nui ma la ̭ k’oeˇ maˬ shaw naˇ, jah-eu la ̭ k’oeˇ mˇ-eu maˬ ngeuˇ-eu miˇ neh Miˬyehˇ yaˇ k’aˬ daˇ gaˇ ya daˬ teh ̭-a. Maˬ jah-eu la ̭ k’oeˇ k’aˇ mˇ-euˬ yawˬ jeˬ na lu ̭ iˬ baˇ meh.

¹ Aˬ dui jah-eu g’aˬ k’aˆ-eu tsawˇ haˬ deuˬ-aˬ, g’aˬ baˬ-eu deuˬ-euˬ k’aˆ behˆ caw pi nehˬ-eu tsaˬ meh. Aˬ dui g’aˇ duˬ muiˬ ni mˇ-eu ma tsaˬ-a. ² Aˬ dui-euˬ cawˬ Ka li zaˬ deuˬ jah-eu la ̭ k’oeˇ huiˬ laˇ mahˇ laˇ nya ni, aˬ dui yawˬ g’aˬ na lu ̭ aˬ yaw ̭ ma ̭ g’aˇ duˬ muiˬ ni mˇ-eu tsaˬ meh. ³ Aˬ jeˬ miˇ neh ehˇ naˇ, Ka li-aˬ, aˬ yaw ̭ g’aˇ duˬ muiˬ ni deh ̭-euˬ maˬ ngeuˇ-a. "Naw ma ̭-ahˇ ja bu ja doeˇ-eu deuˬ-euˬ dawˬ doeˇ ngaˇ daˬ-euˬ ma" lehˇ Jaˇli ̭ la ̭ k’oeˇ bo ̭ taˬ-euˬ meh. ⁴ Jaˇli ̭ la ̭ k’oeˇ k’aˇ bo ̭ taˬ-euˬ yawˬ jeˬ na lu ̭, aˬ dui-ahˇ bi mehˬ bi tsoˆ-eu g’aˇ duˬ bo ̭ taˬ-euˬ meh. Aˬ dui nui ma g’awˬ mahˇ ni taˬ nya laˇ-eu g’aˇ duˬ mehˬ nehˬ tsoˆ nehˬ la ̭-awˇ, aˬ dui-euˬ nui ma-ahˇ g’aˬ bi ̭ lahˬ nehˬ la ̭-eu la ̭ k’oeˇ noeˬ tmˬ k’aˇ za laˇ ni bo ̭ taˬ-euˬ jeˬ pyeu ̭-eu meh. ⁵ Yeˬsuˇ Ka li-ahˇ dzaw geu ̭-eu la ̭ k’oeˇ naw ma ̭ nui ma tiˬ siˬ teh ̭-ehˇ taˬ-awˇ deh ̭ nya ni, nui ma g’awˬ mahˇ ni taˬ-eu jeˬ bi ̭ la ̭-awˇ nui ma-ahˇ g’aˬ bi ̭ lahˬ nehˬ la ̭-eu g’aˬ pyeu ̭-eu Miˬyehˇ naw ma ̭-ahˇ caw ba lu ̭-uˇ. ⁶ K’oeˇ miˇ neh, naw ma ̭ dawˬ tawˆ lu ̭ teˇ saˇ tiˬ saˇ teh ̭-ehˇ aˬ dui-euˬ Sahˬpaˬ Yeˬsuˇ ka liˬ-euˬ Aˬda Miˬyehˇ-ahˇ ja ceuˬ nya lu ̭-uˇ. ⁷ Ka li naw ma ̭-ahˇ ha geu ̭-euˬ lo ̭-ehˇ, Miˬyehˇ-euˬ yaw sheh ̭ k’ahˬ sehˇ-ahˇ aˬ cawˬ ya mawˇ ni naw ma ̭ tiˬ g’aˬ tiˇ g’aˬ ha geu ̭-awˬ. ⁸ Miˬyehˇ saˇ jaˇ zi ̭-eu gaˇ kawˆ bi siˬ bi mawˇ-eu g’aˇ duˬ hawˇ-eu, aˬ yaw ̭ neh aˬ poeˬ aˬ bawˇ deuˬ-ahˇ saˇ jaˇ dzaˬ taˬ-euˬ bi byah laˇ-eu lehˇ, Yuˇdaˆ tsawˇ haˬ deuˬ g’aˇ duˬ Ka li mˇ le-euˬ meh. ⁹ K’oeˇ teh ̭-ehˇ maˬ ngeuˇ ni, Miˬyehˇ g’awˬ shaˬ gaˬ-eu jeˬ baˬ da neh Yuˇdaˆ tsawˇ haˬ maˬ ngeuˇ-eu deuˬ k’aw ̭ Miˬyehˇ-ahˇ ja ceuˬ nya laˇ ni mˇ le-euˬ jeˬ k’aw ̭ pyeu ̭-eu meh. Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "K’oeˇ miˇ neh nawˬ-euˬ tsawˇ myahˇ-ahˇ, aˬ cawˬ tsawˇ jeuˬ tsahˬ-ahˇ jawˇ-awˇ, ja ceuˬ-eu caˇ dawˬ ngaˇ caˇ ma." ¹⁰ Heu lo ̭-ehˇ paˇ ehˇ taˬ-euˬ jaˆ-eu meh. "Miˬyehˇ-euˬ tsawˇ haˬ deuˬ nehˬ-ehˇ, aˬ cawˬ tsawˇ jeuˬ laˬ k’aˬ cehˇ-awˬ." ¹¹ Heu lo ̭-ehˇ k’aw ̭ paˇ ehˇ taˬ-euˬ meh. "Aˬ cawˬ tsawˇ jeuˬ tsawˇ ca deuˬ k’aw ̭, Sahˬpaˬ Miˬyehˇ-ahˇ ja ceuˬ-awˬ. Tsawˇ jeuˬ dawˬ tawˆ lu ̭ ja ceuˬ-awˬ." ¹² Iˇsaˬyaˇ neh paˇ ehˇ taˬ-euˬ, "Yeˬshehˇ-euˬ tsui ̭ toeˬ oe le ̭ gaˇ, aˬ cawˬ tsawˇ jeuˬ-ahˇ uˆ lahˇ-eu, tsawˇ haˬ tiˬ g’aˬ doˆ le teh ̭-a. Aˬ yaw ̭ la ̭ k’oeˇ aˬ cawˬ tsawˇ jeuˬ, noeˬ tmˬ k’aˇ bi za laˇ teh ̭-a." ¹³ Muiˬ-eu Shawˇ-eu Yaw sahˇ Miˬyehˇ-euˬ baoˬ baˬ da neh naw ma ̭-euˬ noeˬ tmˬ-eu jeˬ huiˬ laˇ mahˇ laˇ nya ni, naw ma ̭ Miˬyehˇ-ahˇ jah-eu jeˬ-ahˇ g’oe-awˇ, noeˬ tmˬ-eu jeˬ-euˬ dawˬ pehˬ duˬ puˇ pyeu ̭-eu Miˬyehˇ naw ma ̭-ahˇ laˬ k’aˬ cehˇ nui saˇ za-eu jeˬ bi byah laˇ lu ̭-uˇ. ¹⁴ Aˬ yui ̭ aˬ nyiˇ Ka li zaˬ deuˬ-oˇ, naw ma ̭ yaw muiˬ jeˬ tiˬ byah ni ahˇ-awˇ, aˬ joˆ-ehˇ ya mˇ ya shaˇ-eu dawˬ tawˆ lu ̭ siˬ nya-eu uˬ ta ̭, tiˬ g’aˬ tiˇ g’aˬ mehˬ nehˬ tsoˆ nehˬ nya meh lehˇ ngaˇ siˬ duˬ-awˇ nui k’ahˇ shiˇ-eu ma. ¹⁵ Ehˇ k’aw ̭, yaw beh ngaˇ naw ma ̭-ahˇ ehˇ-euˬ gaˇ kawˆ deuˬ-ahˇ sahˬ bo ̭ heu ta ̭ la ̭ k’oeˇ k’aˬ duˬ ni bo ̭-eu ma. Miˬyehˇ neh ngaˬ-ahˇ aˬ yaw ̭-euˬ zaˬ k’aˆ bi geu ̭-eu g’aˇ duˬ taˬ huiˬ nehˬ la ̭-euˬ baˬ da neh, ngaˇ heu lo ̭-ehˇ k’aˬ duˬ ni bo ̭-euˬ ma. ¹⁶ Yuˇdaˆ tsawˇ haˬ maˬ ngeuˇ-eu deuˬ-euˬ g’aˇ duˬ gaˇ bi mˇ-eu lehˇ, ngaˬ-ahˇ Yeˬsuˇ Ka li-euˬ zaˬ k’aˆ bi geu ̭ la ̭-euˬ meh. Miˬyehˇ-euˬ Laˬ k’a cehˇ-eu Guiˬ lahˬ dawˬ mehˬ-eu gaˇ-ahˇ ta ̭ leˇ-awˇ, piˇ ma tiˬ g’aˬ lo ̭-ehˇ ngaˇ gaˇ mˇ lu ̭-eu ma. Yuˇdaˆ tsawˇ haˬ maˬ ngeuˇ-eu deuˬ-ahˇ Miˬyehˇ-ahˇ lawˇ nehˬ-euˬ jeˬ lo ̭-ehˇ Miˬyehˇ ha geu ̭ nya ni, Muiˬ-eu Shawˇ-eu Yaw sahˇ Miˬyehˇ neh Miˬyehˇ-ahˇ damˬ nehˬ-euˬ jeˬ lo ̭-ehˇ bi pyeu ̭-eu g’aˇ duˬ, piˇ ma tiˬ g’aˬ lo ̭-ehˇ ngaˇ mˇ lu ̭-eu ma. ¹⁷ Ngaˇ Yeˬsuˇ Ka li-ahˇ nui ma ta ̭-eu miˇ neh, Miˬyehˇ-euˬ gaˇ mˇ lu ̭-eu heu k’ahˬ sehˇ jehˆ k’aˇ za ma. ¹⁸ Yuˇdaˆ tsawˇ haˬ maˬ ngeuˇ-eu deuˬ Miˬyehˇ-euˬ ehˇ dawˬ naˇ haˬ laˇ ni sheuˬ g’eh-eu g’aˇ duˬ, Ka li neh ngaˬ-ahˇ g’oe-awˇ mˇ taˬ-euˬ gaˇ kawˆ heu-ahˇ teh ̭-ehˇ k’aˬ duˬ ni ngehˬ-eu tmˇ-eu ma. Aˬ yaw ̭ k’oeˇ lo ̭-ehˇ mˇ-euˬ k’oeˇ-aˬ, ngehˬ-eu hawˇ-eu mˇ-eu nyiˬ jeˬ lu ̭-ahˇ g’oe-awˇ mˇ-euˬ meh. ¹⁹ Zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu jeˬ mˇ nya-eu baoˬ hawˇ-eu, Muiˬ-eu Shawˇ-eu Yaw sahˇ Miˬyehˇ-euˬ baoˬ-ahˇ g’oe-awˇ mˇ-euˬ jeˬ pyeu ̭-eu meh. Yeˬluˇsaˬlehˬ meuˬ-ahˇ neh Iˇluˇliˆ miˇ k’ahˬ-ahˇ keuˆ ni iˇ-euˬ gaˇ pehˇ kahˇ li, Ka li-euˬ gaˇ kawˆ Laˬ k’aˬ cehˇ-eu Guiˬ lahˬ dawˬ mehˬ doe-euˬ ma. ²⁰ Ngaˬ-euˬ nui k’ahˇ-aˬ, a cawˬ neh dawˬ pehˬ gawˬ g’aˬ taˬ-euˬ gaˇ gawˬ tsa ̭ daˆ le ̭-eu jeˬ maˬ mˇ ni, Ka li gaˇ kawˆ maˬ gaˬ haw-euˬ jawˇ duˬ-ahˇ iˇ-awˇ Laˬ k’aˬ cehˇ-eu Guiˬ lahˬ dawˬ mehˬ-eu jeˬ-ahˇ nui ma keuˆ dzehˬ-eu ma. ²¹ Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "Aˬ yaw ̭ gaˇ kawˆ maˬ gaˬ-euˬ deuˬ, aˬ yaw ̭-ahˇ ya mawˇ haw teh ̭-a. Aˬ yaw ̭-euˬ dawˬ maˬ gaˬ-euˬ deuˬ, ya gaˬ-awˇ g’oˆ shaw geu ̭ teh ̭-a." ²² Ngaˇ naw ma ̭ jawˇ gaˇ laˇ-eu lehˇ g’awˬ mya poˆ g’eh-euˬ k’aw ̭, maˬ laˇ doˆ nya-aˬ. ²³ Nymˬ-mˇ poˆ jawˇ-aˬ, miˇ k’ahˬ heu k’ahˬ-ahˇ ngaˇ gaˇ mˇ luiˆ g’aˬ-euˬ ma. Ngaˇ naw ma ̭ jawˇ gaˇ laˇ maw ̭-eu g’awˬ mya k’o ̭ g’awˬ mya la keuˆ laˇ-euˬ ma. ²⁴ Nymˬ-mˇ poˆ-aˬ, naw ma ̭ jawˇ gaˇ laˇ keuˆ ma lehˇ noeˬ tmˬ taˬ-euˬ ma. Saˬbeˬ miˇ k’ahˬ-ahˇ le ba jawˬ-ehˇ naw ma ̭ jawˇ gaˇ laˇ naˬ-awˇ, naw ma ̭ nehˬ-ehˇ tiˬ k’ehˬ jawˇ g’aˬ naˇ, naw ma ̭ neh bi caw ba-awˇ Saˬbeˬ miˇ k’ahˬ-ahˇ le ma lehˇ noeˬ taˬ-euˬ ma. ²⁵ Ehˇ k’aw ̭, nymˬ-mˇ k’a tseuˆ ni-aˬ, Miˬyehˇ-euˬ tsawˇ haˬ deuˬ-ahˇ caw mˇ caw shaˇ nehˬ-eu g’aˇ duˬ Yeˬluˇsaˬlehˬ meuˬ-ahˇ iˇ-eu lehˇ g’eh-eu ma. ²⁶ Aˬ jeˬ miˇ neh ehˇ naˇ, Yeˬluˇsaˬlehˬ meuˬ-ahˇjawˇ-eu Miˬyehˇ-euˬ tsawˇ haˬ deuˬ la ̭ k’oeˇ shaˬ-eu zahˬ-eu deuˬ-ahˇ caw ba nehˬ-eu g’aˇ duˬ, Maˬgeˬdawˇniˆ miˇ k’ahˬ hawˇ-eu Aˬgaˬyaˇ miˇ k’ahˬ-ahˇ jawˇ-eu Ka li zaˬ aˇ muˇ deuˬ pyuˇ daˬ bi ̭ nehˬ-eu lehˇ noeˬ tsehˆ taˬ-euˬ meh. ²⁷ K’oeˇ lo ̭-ehˇ noeˬ tsehˆ-euˬ k’oeˇ-aˬ, aˬ yaw ̭ ma ̭ yawˬ haˇ yawˬ ha noeˬ siˬ-awˇ noeˬ tsehˆ-euˬ jeˬ pyeu ̭-eu meh. Ehˇ k’aw ̭, maˇ maˇ ni ehˇ le ̭ naˇ, aˬ yaw ̭ ma ̭ k’oeˇ deuˬ-ahˇ ya caw ba-eu k’aˆ behˆ jaˆ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ neh Yuˇdaˆ tsawˇ haˬ maˬ ngeuˇ-eu deuˬ-ahˇ sa ̭ laˇ paw-euˬ guiˬ lah caw ba nehˬ-euˬ-aˬ, Yuˇdaˆ tsawˇ haˬ maˬ ngeuˇ-eu deuˬ k’aw ̭ Yuˇdaˆ tsawˇ haˬ deuˬ-ahˇ shiˬ shaˬ jiˇ paw-euˬ guiˬ lahˬ caw ba nehˬ paˬ-ehˇ g’eh-eu meh. ²⁸ Ngaˇ gaˇ heu hmˬ mˇ luiˆ g’aˬ-awˇ aˬ yaw ̭ ma ̭ g’aˇ duˬ k’aˇ laˆ uiˬ taˬ-euˬ pyuˇ daˬ dawˬ tawˆ lu ̭ aˬ yaw ̭ ma ̭-euˬ aˬ la ̭ la ̭ k’oeˇ a nehˬ ya ̭ g’aˬ naˇ, Saˬbeˬ miˇk’ahˬ-ahˇ le ba jawˬ-ehˇ naw ma ̭ jawˇ gaˇ laˇ ma. ²⁹ Ngaˇ naw ma ̭ jawˇ gaˇ laˇ ngeh, Ka li-euˬ guiˬ lahˬ yaw dzahˇ tiˬ byah ni ahˇ-eu la ̭ k’oeˇ laˇ ma. ³⁰ Aˬ yui ̭ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li hawˇ-eu Yaw sahˇ Miˬyehˇ neh bi ̭ le ̭-euˬ g’oeˇ-eu gaˬ-eu jeˬ baˬ da neh ngaˇ naw ma ̭-ahˇ heu lo ̭-ehˇ shaˇ-eu ma. Ngaˬ-euˬ g’aˇ duˬ ngaˬ nehˬ-ehˇ Miˬyehˇ-ahˇ guiˬ lahˬ caw shaˇ nehˬ la ̭-awˬ. ³¹ Yuˇdaˆ miˇ k’ahˬ la ̭ k’oeˇ jawˇ-eu Ka li-ahˇ maˬ jah-eu tsawˇ haˬ k’oeˇ deuˬ ngaˬ-ahˇ maˬ ya laˆ coeˬ laˆ ciˆ ni maˬ ehˇ, Yeˬluˇsaˬlehˬ meuˬ la ̭ k’oeˇ ngaˬ neh mˇ nehˬ shaˇ nehˬ-euˬ jeˬ-ahˇ Miˬyehˇ-euˬ tsawˇ haˬ deuˬ laˬ k’aˬ tiˬ cehˇ ha geu ̭ nehˬ la ̭ ni maˬ ehˇ, guiˬ lahˬ caw shaˇ nehˬ la ̭-awˬ. ³² Miˬyehˇ nui ma tsaˬ naˇ, ngaˇ naw ma ̭ jawˇ gaˇ laˬ k’aˬ tiˬ cehˇ ya laˇ keuˆ-awˇ, naw ma ̭ nehˬ-ehˇ jawˇ-awˇ laˬ k’aˬ cehˇ-eu la ̭ k’oeˇ g’aˬ doeˇ naˬ dah nya ni guiˬ lahˬ caw shaˇ nehˬ la ̭-awˬ. ³³ Aˬ dui-ahˇ nui saˇ o ̭-eu jeˬ bi ̭ nehˬ la ̭-eu Miˬyehˇ naw ma ̭ yawˬ g’aˬ na lu ̭ nehˬ-ehˇ jawˇ lu ̭-uˇ. Aˬ miˬ.

¹ Geˬjeˬ meuˬ-ahˇ jawˇ-eu Ka li zaˬ aˇ muˇ-ahˇ caw mˇ caw shaˇ lu ̭-eu g’aˬ pyeu ̭-eu aˬ dui-euˬ dmˇ ma Piˇbeˬ-aˬ, muiˬ-eu tsawˇ haˬ tiˬ g’aˬ meh lehˇ naw ma ̭-ahˇ ngaˇ tsa ̭ ahˇ la ̭-eu ma. ² Miˬyehˇ-euˬ tsawˇ haˬ deuˬ ya mˇ-eu lo ̭-ehˇ Sahˬpaˬ Miˬyehˇ-euˬ tsawˇ myahˇ uˬ moˆ aˬ yaw ̭-ahˇ ha geu ̭-awˇ, aˬ yaw ̭ k’aˇ loˬ-eu jeˬ tiˬ poˆ caw ba nehˬ-awˬ. Aˬ jeˬ miˇ neh ehˇ naˇ, aˬ yaw ̭-aˬ, aˬ cawˬ-ahˇ caw ba nehˬ nya dui dui-awˇ, ngaˬ-ahˇ k’aw ̭ caw ba nehˬ la ̭-euˬ meh. ³ Yeˬsuˇ Ka li-euˬ gaˇ la ̭ k’oeˇ mˇ cawˬ shaˇ cawˬ pyeu ̭-eu Biˇgiˇla hawˇ-eu Aˬguˇla aˬ nya ̭ dzeˇ zaˬ-ahˇ noeˬ mawˇ lu ̭ ma lehˇ ngaˇ dawˬ cawˬ puˬ ahˇ la ̭-eu ma. ⁴ Aˬ yaw ̭ nya ̭ dzeˇ zaˬ ngaˬ-euˬ g’aˇ duˬ g’awˇ mawˇ shiˇ dah tsaˇ-i caw ba nehˬ la ̭-euˬ meh. Ngaˇ aˬ yaw ̭ nya ̭ dzeˇ zaˬ-ahˇ guiˬ lahˬ huiˬ dui dui-eu ma. Ngaˇ teh ̭-ehˇ maˬ ngeuˇ ni, Yuˇdaˆ tsawˇ haˬ maˬ ngeuˇ-eu Ka li zaˬ aˇ muˇ dawˬ tawˆ lu ̭ k’aw ̭, aˬ nya ̭ dzeˇ zaˬ-ahˇ guiˬ lahˬ huiˬ lu ̭ meh. ⁵ Aˬ nya ̭ dzeˇ zaˬ-euˬ nymˇ-ahˇ tahˬ dzoeˇ lu ̭-eu Ka li zaˬ aˇ muˇ-ahˇ k’aw ̭ noeˬ mawˇ lu ̭ ma. ⁶ Aˬshaˆ miˇ k’ahˬ la ̭ k’oeˇ Ka li zaˬ pyeu ̭ beh beh laˇ-euˬ g’aˬ pyeu ̭-eu, ngaˇ g’oeˇ dui dui-eu Eˇbehˇnehˇ-ahˇ k’aw ̭ noeˬ mawˇ lu ̭ ma. ⁷ Naw ma ̭ g’aˇ duˬ leh jeh dui dui-eu la ̭ k’oeˇ gaˇ mˇ lu ̭-eu Maˬliˇ-ahˇ k’aw ̭ noeˬ mawˇ lu ̭ ma. Ngaˬ nehˬ-ehˇ tiˬ kawˆ lo ̭-ehˇ tawˬ-ahˇ uˇ-euˬ aˬ yui ̭ aˬ nyiˇ Yuˇdaˆ tsawˇ haˬ pyeu ̭-eu Aˬdawˇniˆ hawˇ-eu Yuˇniˆ aˬ nya ̭-ahˇ k’aw ̭ noeˬ mawˇ lu ̭ ma. Aˬ yaw ̭ nya ̭-aˬ, tsawˇ myahˇ doˆ-eu g’aˬ k’ehˇ pyeu ̭-awˇ, ngaˬ-euˬ mehˬ hu neh Ka li zaˬ pyeu ̭ laˇ-euˬ meh. ⁸ Sahˬpaˬ Miˬyehˇ la ̭ k’oeˇ ngaˇ g’oeˇ dui dui-eu Aˬbaˬliˇ-ahˇ k’aw ̭ noeˬ mawˇ lu ̭ ma. ⁹ Ka li-euˬ gaˇ la ̭ k’oeˇ mˇ cawˬ shaˇ cawˬ pyeu ̭-eu Uˇlaˬbaˬ hawˇ-eu, ngaˇ g’oeˇ dui dui-eu Saˬdaˬkuˇ-ahˇ k’aw ̭ noeˬ mawˇ lu ̭ ma. ¹⁰ Ka li-ahˇ saˇ jaˇ zi ̭-eu gaˇ kawˆ k’aˬ duˬ ni mˇ mehˬ-euˬ g’aˬ pyeu ̭-eu Aˬbeˇleˇ-ahˇ k’aw ̭ noeˬ mawˇ lu ̭ ma. Aˬliˇtawˇbuˆ-euˬ nymˇ k’ahˬ zaˬ deuˬ-ahˇ k’aw ̭ noeˬ mawˇ lu ̭ ma. ¹¹ Aˬ yui ̭ aˬ nyiˇ Yuˇdaˆ tsawˇ haˬ pyeu ̭-eu Heˬloˇdiˇoˬ hawˇ-eu Naˬgiˬsuˇ-euˬ nymˇ jiˇ-ahˇ ta ̭-eu aˬ yui ̭ aˬ nyiˇ Ka li zaˬ deuˬ-ahˇ k’aw ̭ noeˬ mawˇ lu ̭ ma. ¹² Sahˬpaˬ Miˬyehˇ-euˬ gaˇ mˇ lu ̭-eu Daˬluˇpehˇnaˆ hawˇ-eu Daˬluˇpawˇsaˆ aˬ nya ̭-ahˇ maˬ ehˇ, Sahˬpaˬ Miˬyehˇ-euˬ gaˇ mˇ dui dui-euˬ g’aˬ pyeu ̭-eu ngaˇ g’oeˇ dui dui-eu cawˬ Beˬlaˬsiˇ-ahˇ maˬ ehˇ, noeˬ mawˇ lu ̭ ma. ¹³ Sahˬpaˬ Miˬyehˇ-euˬ gaˇ mˇ-eu ja ceuˬ dui dui paˬ-ehˇ g’eh-eu Luˇpuˇ hawˇ-eu, aˬ myah lu ̭ ngaˬ-ahˇ aˬ yaw ̭-euˬ aˬ li tiˬ g’aˬ lo ̭-ehˇ caw ba nehˬ la ̭-euˬ aˬ yaw ̭-euˬ aˬ ma-ahˇ k’aw ̭ noeˬ mawˇ lu ̭ ma. ¹⁴ Aˬsoˬgaˬleˇ, Paˬleˬgoˬ, Heˬlaˬmeuˬ, Baˇlawˇdaˇ, Heˬlaˬmaˇ aˬ ha ma ̭ hawˇ-eu aˬ yaw ̭ ma ̭ nehˬ-ehˇ k’aˇ jawˇ-eu aˬ yui ̭ aˬ nyiˇ Ka li zaˬ deuˬ-ahˇ k’aw ̭ noeˬ mawˇ lu ̭ ma. ¹⁵ Piˇlawˇluˇ hawˇ-eu Yuˇliˆ aˬ nya ̭-ahˇ maˬ ehˇ, Neˬluˇ hawˇ-eu a yaw ̭-euˬ dmˇ ma-ahˇ maˬ ehˇ, Awˇloˬpaˇ-ahˇ maˬ ehˇ, aˬ yaw ̭ ma ̭ nehˬ-ehˇ k’aˇ jawˇ-eu Miˬyehˇ-euˬ tsawˇ haˬ deuˬ-ahˇ maˬ ehˇ, noeˬ mawˇ lu ̭ ma. ¹⁶ Ka li zaˬ-euˬ g’oeˇ-eu gaˬ-eu jeˬ la ̭ k’oeˇ tiˬ g’aˬ tiˇ g’aˬ mehˬ cuˇ cuˇ-awˇ ha geu ̭-awˬ. Ka li-euˬ aˇ muˇ dawˬ tawˆ lu ̭, naw ma ̭-ahˇ noeˬ mawˇ-eu dawˬ tsa ̭ ahˇ la ̭-eu ma. ¹⁷ Aˬ yui ̭ aˬ nyiˇ Ka li zaˬ deuˬ-oˇ, ngaˇ naw ma ̭-ahˇ heu lo ̭-ehˇ shaˇ-eu ma. Aˇ ma ̭ aˇ muˇ paˆ-iˇ ni jahˇ-awˇ, jah-eu tsawˇ haˬ deuˬ-ahˇ gaˇ ma sheuˬ bahˬ-eu la ̭ k’oeˇ, naw ma ̭-ahˇ mehˬ taˬ tsoˆ taˬ-euˬ jeˬ-ahˇ maˬ duˇ-eu yawˬ jeˬ yawˬ mehˬ-eu tsoˆ-eu tsawˇ haˬ deuˬ-ahˇ yahˇ-awˬ. ¹⁸ Aˬ jeˬ miˇ neh ehˇ naˇ, k’oeˇ lo ̭-ehˇ mˇ-eu tsawˇ haˬ deuˬ-aˬ, aˬ dui-euˬ Sahˬpaˬ Yeˬsuˇ Ka li-euˬ gaˇ mˇ-eu maˬ ngeuˇ-a. Yawˬ ha-euˬ uˬ maˆ g’aˇ duˬ shaˇ noeˬ-awˇ mehˇ shuiˇ shuiˇ-eu la ̭ k’oeˇ iˬ baˇ maˬ ahˇ-eu tsawˇ haˬ deuˬ-ahˇ sheuˬ bahˬ-eu meh. ¹⁹ Naw ma ̭ Laˬ k’aˬ cehˇ-eu Guiˬ lahˬ dawˬ-ahˇ zi ̭ dah ni tuˆ tehˬ taˬ-euˬ gaˇ kawˆ aˬ cawˬ siˬ nya jiˇ meh. K’oeˇ miˇ neh, naw ma ̭ g’aˇ duˬ ngaˇ laˬ k’aˬ cehˇ dui dui-eu ma. Naw ma ̭ la ̭ k’oeˇ yaw muiˬ jeˬ-ahˇ tseˇ paˆ geu ̭ nya-eu nui gahˇ bi ahˇ maw ̭-awˇ, maˬ muiˬ-eu jeˬ-ahˇ maˬ mˇ-eu shawˇ jehˆ ni g’eh-eu tsawˇ haˬ bi pyeu ̭ maw ̭ miˇ-a. ²⁰ Aˬ dui nui saˇ o ̭ duˬ pyeu ̭-eu Miˬyehˇ-aˬ, g’awˬ myahˇ maˬ g’eh-ehˇ neh ̭ Saˬdaˬ-ahˇ laˆ cawˆ-awˇ naw ma ̭-euˬ aˬ kuiˇ pehˬ zaˬ uˬ moˆ bi jawˇ teh ̭-a. Aˬ dui-euˬ Sahˬpaˬ Yeˬsuˇ-euˬ guiˬ lahˬ yaw dzahˇ naw ma ̭ k’oeˇ taˆ jaˆ lu ̭-uˇ. ²¹ Ngaˬ-euˬ gaˇ mˇ cawˬ pyeu ̭-eu Tiˆmoˇseˬ g’eh, naw ma ̭-ahˇ noeˬ mawˇ lu ̭ miˇ-a lehˇ tsa ̭ ahˇ la ̭-euˬ meh. K’oeˇ lo ̭-ehˇ duˇ ni, ngaˬ-eu cawˬ Yuˇdaˆ tsawˇ haˬ deuˬ pyeu ̭-eu Luˇgiˇ, Yaˬsoˬ, Sawˇsiˇpaˬtaˆ aˬ ha smˇ g’aˬ k’aw ̭, naw ma ̭-ahˇ noeˬ mawˇ miˇ-a lehˇ tsa ̭ ahˇ la ̭-euˬ meh. ²² Pawˇluˆ neh k’aˇ ehˇ-euˬ lo ̭-ehˇ sahˬ bo ̭ heu ta ̭ bo ̭ doˆ nehˬ-euˬ g’aˬ pyeu ̭-eu ngaˇ Deˬlaˬtiˇ k’aw ̭, naw ma ̭-ahˇ noeˬ mawˇ miˇ-a lehˇ dawˬ cawˬ puˬ ahˇ la ̭-eu ma. ²³ Ka li zaˬ aˇ muˇ tahˬ dzoeˇ duˬ pyeu ̭-eu ngaˇ jawˇ naˬ lu ̭-eu nymˇ heu nymˇ-euˬ nymˇ sahˇ Gaˬyuˇ k’aw ̭, naw ma ̭-ahˇ noeˬ mawˇ lu ̭ ma lehˇ tsa ̭ ahˇ la ̭-euˬ meh. Meuˬ-euˬ pyuˇ jeˬ hmˬ-eu gaˇ mˇ-eu g’aˬ pyeu ̭-eu Eˇlaˬduˇ hawˇ-eu aˬ dui-euˬ aˬ yui ̭ aˬ nyiˇ Gawˬtu k’aw ̭, naw ma ̭-ahˇ noeˬ mawˇ lu ̭-eu gaˇ kawˆ tsa ̭ ahˇ la ̭-euˬ meh. ²⁵ Miˬyehˇ-euˬ yaw sheh ̭ k’ahˬ sehˇ huiˬ dui dui gaˇ ja ceuˬ kaˇ-euˇ. Aˬ jeˬ miˇ neh ehˇ naˇ, ngaˬ neh Yeˬsuˇ Ka li gaˇ kawˆ Laˬ k’aˬ cehˇ-eu Guiˬ lahˬ dawˬ mehˬ-euˬ lo ̭-ehˇ maˬ ehˇ, aˇ hu-euˬ ziˇ-ahˇ neh za ̭ taˬ-euˬ yaw tsaˬ yaw dawˇ jeˬ pah mehˬ nehˬ la ̭-euˬ lo ̭-ehˇ maˬ ehˇ, jah-eu la ̭ k’oeˇ naw ma ̭ zi ̭ dah ni yaw ̭ nya ni aˬ yaw ̭ jahˇ-euˬ meh. ²⁶ Ehˇ k’aw ̭, nymˬ-mˇ poˆ jawˇ-aˬ, Miˬyehˇ g’aˇ duˬ ngehˬ dah-eu deuˬ neh bo ̭-euˬ sahˬ bo ̭ deuˬ la ̭ k’oeˇ, za ̭ taˬ-euˬ yaw tsaˬ yaw dawˇ k’oeˇ bya cehˆ ni pah dzeh taˬ-euˬ meh. K’oeˇ uˬ ta ̭, tsawˇ haˬ zaˬ dawˬ tawˆ lu ̭ jah-awˇ naˇ haˬ geu ̭ nya ni, mˬ maˬ maˬ byaˆ zaˇ ziˇ deh ̭-eu Miˬyehˇ neh bi ̭-euˬ dawˬ la ̭ k’oeˇ, tsawˇ jeuˬ dawˬ tawˆ lu ̭-ahˇ yaw tsaˬ yaw dawˇ k’oeˇ bi siˬ bi mawˇ-euˬ meh. ²⁷ Yeˬsuˇ Ka li la ̭ k’oeˇ Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ kaˇ-euˇ. Aˬ yaw ̭ tiˬ g’aˬ teh ̭-ehˇ zaˬ siˬ tsawˇ gahˇ dawˬ tawˆ lu ̭ ahˇ-awˇ, yaw sheh ̭ k’ahˬ sehˇ huiˬ dui dui-eu meh. Aˬ miˬ.