PIˇLIˇPIˆ
11 Yeˬsuˇ Ka li-euˬ zaˬ k’aˆ pyeu ̭-eu Pawˇluˆ hawˇ-eu Tiˆmoˇseˬ nga nya ̭, Yeˬsuˇ Ka li la ̭ k’oeˇ Piˇliˇpiˆ meuˬ-ahˇ jawˇ lu ̭-eu Ka li zaˬ aˇ muˇ-ahˇ sheuˬ g’eh-eu deuˬ, caw dehˬ caw toˆ-eu deuˬ hawˇ-eu, Miˬyehˇ-euˬ tsawˇ haˬ dawˬ tawˆ lu ̭-ahˇ sahˬ bo ̭ bo ̭ ahˇ la ̭-eu ma. 2 Aˬ dui-euˬ Aˬ da Miˬyehˇ hawˇ-eu Sahˬpaˬ Yeˬsuˇ Ka li-euˬ g’awˬ shaˬ gaˬ-eu guiˬ lahˬ yaw dzahˇ hawˇ-eu nui saˇ o ̭-eu jeˬ, naw ma ̭ k’oeˇ taˆ jaˆ lu ̭-uˇ. 3 Naw ma ̭-ahˇ ngaˇ k’aˇ noeˬ mawˇ ngeh, naw ma ̭ g’aˇ duˬ ngaˬ-euˬ Miˬyehˇ-euˬ guiˬ lahˬ-ahˇ ja ceuˬ-eu ma. 4 Naw ma ̭ dawˬ tawˆ lu ̭ g’aˇ duˬ ngaˇ guiˬ lahˬ k’aˇ shaˇ ngeh, laˬ k’aˬ cehˇ-eu la ̭ k’oeˇ shaˇ-eu ma. 5 Aˬ jeˬ miˇ neh ehˇ naˇ, Laˬ k’aˬ cehˇ-eu Guiˬ lahˬ dawˬ mehˬ-eu gaˇ la ̭ k’oeˇ, aˇ dahˬ beh ngeh neh iˬ nah keuˆ ni naw ma ̭ ngaˬ-ahˇ caw ba nehˬ la ̭-euˬ meh. 6 Muiˬ-eu gaˇ heu hmˬ-ahˇ naw ma ̭ la ̭ k’oeˇ aˇ dahˬ beh le-euˬ g’aˬ pyeu ̭-eu Miˬyehˇ-aˬ, gaˇ heu hmˬ mˇ jiˇ-eu aˇ nah pyeu ̭-eu Yeˬsuˇ Ka li za ̭ le-eu Aˇ nah-ahˇ keuˆ ni mˇ daˆ g’eh le ̭ teh ̭-a lehˇ ngaˇ jah duˬ taˬ-euˬ ma. 7 Ngaˬ-euˬ nui ma la ̭ k’oeˇ naw ma ̭-ahˇ aˬ myah lu ̭ noeˬ keuˆ lu ̭-eu ma. Naw ma ̭-euˬ gaˇ kawˆ ngaˬ-euˬ nui ma la ̭ k’oeˇ heu lo ̭-ehˇ noeˬ mawˇ lu ̭-eu heu-aˬ, tsaˬ dui dui-eu ma. Aˬ jeˬ miˇ neh ehˇ naˇ, nymˬ-mˇ ngaˇ tawˬ-ahˇ uˇ lu ̭ ngeh maˬ ehˇ, maˬ ya uˇ leˇ mi naˆ-ehˇ, Laˬ k’aˬ cehˇ-eu Guiˬ lahˬ dawˬ heu zi ̭ dah ni bi pyeu ̭ laˇ-eu g’aˇ duˬ yaˇ k’aˬ daˇ-eu deuˬ mehˬ shi ja leˇ ngeh maˬ ehˇ, Miˬyehˇ neh ngaˬ-ahˇ bi mˇ la ̭-euˬ muiˬ-eu gaˇ heu hmˬ la ̭ k’oeˇ naw ma ̭ ngaˬ-ahˇ aˬ myah lu ̭ caw ba nehˬ la ̭-euˬ meh. 8 Ngaˇ naw ma ̭-ahˇ gaˬ dui dui-eu heu-aˬ, Yeˬsuˇ Ka li-euˬ nui ma-ahˇ neh doˆ le-euˬ g’oeˇ-eu gaˬ-eu jeˬ neh gaˬ-eu ma lehˇ ngaˇ ehˇ-eu heu tsaˬ-eu gaˇ kawˆ, Miˬyehˇ ngaˬ-euˬ g’aˇ duˬ saˇ kiˇ pyeu ̭-eu ma. 9 Naw ma ̭-euˬ g’oeˇ-eu gaˬ-eu jeˬ tiˬ jawˇ saˇ-iˬ tiˬ jawˇ huiˬ laˇ mahˇ laˇ-eu la ̭ k’oeˇ, yaw tsaˬ yaw dawˇ jeˬ-ahˇ siˬ duˬ mawˇ duˬ nya laˇ-awˇ, yaw muiˬ yaw doeˇ tseˇ paˆ geu ̭ nya laˇ ni ngaˇ guiˬ lahˬ shaˇ-eu ma. 10 Dawˬ tawˆ lu ̭ la ̭ k’oeˇ muiˬ dzehˬ-eu jeˬ-ahˇ naw ma ̭ tseˇ geu ̭ nya laˇ ni shaˇ lu ̭-eu ma. K’oeˇ miˇ neh, Ka li za ̭ le-eu Aˇ nah-ahˇ naw ma ̭ la ̭ k’oeˇ maˬ muiˬ-eu jeˬ maˬ paˇ ahˇ-ehˇ, iˬ baˇ taˬ k’aˇ maˬ za ni pyeu ̭ laˇ teh ̭-a. 11 Miˬyehˇ-euˬ yaw sheh ̭ k’ahˬ sehˇ-ahˇ aˬ cawˬ taˬ huiˬ-awˇ Miˬyehˇ-ahˇ ja ceuˬ laˇ gaˇ keuˆ ni Yeˬsuˇ Ka li teh ̭-ehˇ jahˇ nehˬ nya-eu maˇ maˇ ni muiˬ-eu jeˬ k’oeˇ, naw ma ̭ yaw deh ̭ deh ̭-eu la ̭ k’oeˇ byah laˇ teh ̭-a. 12 Aˬ yui ̭ aˬ nyiˇ Ka li zaˬ deuˬ-oˇ, ngaˇ ya daˬ lu ̭-eu heu-aˬ, Laˬ k’aˬ cehˇ-eu Guiˬ lahˬ dawˬ bi gaˬ doe-iˇ-eu g’aˇ duˬ gaˇ dahˇ tsoeˬ-eu gaˇ kawˆ naw ma ̭ bi siˬ nya maw ̭ miˇ-a. 13 K’oeˇ lo ̭-ehˇ pyeu ̭ laˇ-euˬ miˇ neh, sahˬ paˬ-euˬ hawˇ nymˇ-ahˇ lo ̭ piˇ-eu yehˇ dawˬ tawˆ lu ̭ hawˇ-eu heu gaˇ k’aˇ jawˇ-eu tsawˇ haˬ dawˬ tawˆ lu ̭, ngaˇ Ka li-euˬ zaˬ k’aˆ geu ̭-eu miˇ neh tawˬ-ahˇ ya uˇ lu ̭-eu meh lehˇ siˬ nya meh. 14 Ngaˇ tawˬ-ahˇ uˇ-eu baˬ da neh aˬ yui ̭ aˬ nyiˇ Ka li zaˬ deuˬ myaˬ tiˬ paˆ Sahˬpaˬ Yeˬsuˇ la ̭ k’oeˇ nui ma zi ̭ dzehˬ laˇ-awˇ, guˆ-eu nui ma tiˬ jawˇ-iˬ maˬ ahˇ ni Miˬyehˇ dawˬ kawˬ mehˬ-eu g’aˇ duˬ nui ma k’aˬ dzehˬ laˇ-euˬ meh. 15 Maˇ maˇ ni ehˇ naˇ, tiˬ paˆ na deuˬ-aˬ, aˬ cawˬ-ahˇ myaˆ naˆ-awˇ ceh dzaˬ maw ̭-eu nui ma ahˇ-eu miˇ neh Ka li gaˇ kawˆ mehˬ-eu jeˬ pyeu ̭-eu meh. Ehˇ k’aw ̭, tiˬ paˆ na deuˬ-aˬ, maˇ maˇ ni nui ma keuˆ-eu la ̭ k’oeˇ mehˬ-eu meh. 16 K’oeˇ deuˬ-aˬ, g’oeˇ-eu gaˬ-eu la ̭ k’oeˇ mˇ-eu meh. Aˬ jeˬ miˇ neh ehˇ naˇ, Laˬ k’aˬ cehˇ-eu Guiˬ lahˬ dawˬ mehˬ-eu heu maˇ maˇ ni tsaˬ-eu jeˬ pyeu ̭-eu gaˇ kawˆ bi doˆ laˇ ni mˇ-eu g’aˇ duˬ, Miˬyehˇ ngaˬ-ahˇ k’ehˇ-euˬ meh lehˇ aˬ yaw ̭ ma ̭ siˬ nya meh. 17 Yawˬ deuˬ yawˬ-aˬ, nui ma dawˇ coe ni taˬ-awˇ Ka li gaˇ kawˆ mehˬ-eu maˬ ngeuˇ-a. Yawˬ ha g’aˇ duˬ shaˇ noeˬ-awˇ mˇ-eu teh ̭ meh. Ngaˇ heu gaˇ tawˬ-ahˇ uˇ lu ̭ ngeh aˬ yaw ̭ ma ̭ ngaˬ-ahˇ heu naˆ maˬ tseˇ laˆ shaˬ nehˬ la ̭ maw ̭-eu meh. 18 Ehˇ k’aw ̭, tiˬ jeˬ-iˬ maˬ ngeuˇ-aˇ. Nui ma dawˇ coe ni taˬ-awˇ mehˬ-eu maˬ kaˬ, nui ma la ̭ g’o ̭ baw-awˇ mehˬ-eu maˬ kaˬ, Ka li gaˇ kawˆ k’aˇ mehˬ nya-eu lo ̭-ehˇ mehˬ naˇ, ngaˇ laˬ k’aˬ cehˇ ma. 19 Aˬ jeˬ miˇ neh ehˇ naˇ, naw ma ̭ guiˬ lahˬ shaˇ nehˬ la ̭-euˬ baˬ da neh maˬ ehˇ, Yeˬsuˇ Ka li-euˬ Yaw sahˇ Miˬyehˇ caw ba nehˬla ̭-eu baˬ da neh maˬ ehˇ, tawˬ heu la ̭ k’oeˇ neh ngaˇ ya buˬ-iˇ-eu yaw duˬ baw ma lehˇ siˬ duˬ taˬ-euˬ ma. 20 Ngaˇ geu ̭ maw ̭ dui dui-awˇ noeˬ tmˬ taˬ-euˬ jeˬ-aˬ, ngaˇ mˇ paˬ-ehˇ g’eh-eu gaˇ deuˬ-ahˇ aˬ myah lu ̭ mˇ-eu uˬ ta ̭, hehˬ nymˬ-mˇ ngaˇ deh ̭-eu maˬ ehˇ, shiˇ-eu maˬ ehˇ, k’aˇ mˇ k’aˇ shaˇ-eu jeˬ dawˬ tawˆ lu ̭ la ̭ k’oeˇ Ka li-ahˇ aˬ cawˬ yaw zeu baw laˇ-eu g’aˇ duˬ nui ma k’aˬ duˬ ni taˬ nya-eu jeˬ-ahˇ geu ̭ maw ̭-eu ma. 21 Tsawˇ haˬ zaˬ yaw deh ̭ deh ̭-eu aˬ jeˬ g’aˇ duˬ-a. Ngaˇ deh ̭ lu ̭-eu-aˬ, Ka li g’aˇ duˬ ma. Shiˇ naˇ, ngaˬ-euˬ g’aˇ duˬ jiˇ jeuˬ ma. 22 Ehˇ k’aw ̭, ngaˇ mehˬ hu paw ya deh ̭ daˆ le ̭ lawˬ naˇ, gaˇ dahˇ tsoeˬ-eu gaˇ g’awˬ mya jeˬ mˇ nya-eu ma. K’oeˇ miˇ neh, deh ̭-eu hawˇ-eu shiˇ-eu heu nyiˬ jeˬ-ahˇ ngaˇ tseˇ geu ̭ tsaˬ maˬ siˬ nya. 23 Heu nyiˬ jeˬ lu ̭ ngaˬ-ahˇ g’eu taw taˬ-euˬ meh. Ngaˇ geu ̭ maw ̭-eu-aˬ, miˇ tsaˬ k’oeˇ taˆ deh ̭-eu heu-ahˇ byehˇ dzeh ya ̭-awˇ Ka li nehˬ-ehˇ jawˇ leˇ maw ̭-eu k’oeˇ hmˬ ma. Aˬ jeˬ miˇ neh ehˇ naˇ, k’oeˇ-aˬ, ngaˬ-euˬ g’aˇ duˬ muiˬ dzehˬ-eu meh. 24 Ehˇ k’aw ̭, naw ma ̭ g’aˇ duˬ shaˇ noeˬ le ̭ naˇ, ngaˇ deh ̭-eu muiˬ dzehˬ meh. 25 Ngaˇ k’oeˇ lo ̭-ehˇ jah duˬ taˬ-euˬ miˇ neh, ngaˇ ya deh ̭ meh lehˇ ngaˇ siˬ nya ma. Naw ma ̭ huiˬ laˇ mahˇ laˇ lu ̭-eu jeˬ g’aˬ bi k’aˆ dzehˬ laˇ-awˇ, jah-eu jeˬ la ̭ k’oeˇ laˬ k’aˬ ya cehˇ ni, naw ma ̭ dawˬ tawˆ lu ̭ nehˬ-ehˇ ngaˇ deh ̭ daˆ le ̭ ma. 26 K’oeˇ miˇ neh, ngaˇ naw ma ̭ jawˇ gaˇ paˇ laˇ keuˆ ngeh, ngaˬ neh mˇ-euˬ shaˬ-euˬ jeˬ baˬ da neh, Yeˬsuˇ Ka li la ̭ k’oeˇ naw ma ̭ yaw deh ̭ deh ̭-eu jeˬ yaw beh naˆ maˬ tseˇ kahˬ sehˇ jehˆ k’aˇ za teh ̭-a. 27 Huiˬ-eu tiˬ jeˬ-aˬ, ngaˇ naw ma ̭-ahˇ haw keuˆ laˇ-eu maˬ kaˬ, maˬ haw keuˆ laˇ-eu maˬ kaˬ, naw ma ̭ nui ma tiˬ siˬ teh ̭-ehˇ taˬ-awˇ zi ̭ dah ni jawˇ lu ̭-eu gaˇ kawˆ hawˇ-eu, La k’aˬ cehˇ-eu Guiˬ lahˬ dawˬ-ahˇ ta ̭-eu jah-eu jeˬ g’aˇ duˬ naw ma ̭ nui ma gm-awˇ deuˆ ceh ceh lu ̭-eu gaˇ kawˆ-ahˇ ngaˇ ya gaˬ ni, Ka li-euˬ Laˬ k’aˬ cehˇ-eu Guiˬ lahˬ dawˬ-ahˇ tsaˬ ni deh ̭ g’eh jawˇ g’eh-awˬ. 28 Naw ma ̭ ya shaˬ ya zahˬ ni mˇ lu ̭-eu tsawˇ haˬ deuˬ-ahˇ taˬ guˆ. Aˬ myah lu ̭ nui ma k’aˬ duˬ ni jawˇ-awˬ. K’oeˇ lo ̭-ehˇ jawˇ naˇ, naw ma ̭ g’aˬ leˇ-awˇ aˬ yaw ̭ ma ̭ smˬ-iˇ-eu yaw duˬ baw-eu ngaˇ lehˇ siˬ duˬ leˇ teh ̭-a. Naw ma ̭ g’aˬ leˇ nya ni mˇ-eu g’aˬ-aˬ, Miˬyehˇ meh. 29 Aˬ jeˬ miˇ neh ehˇ naˇ, Ka li neh naw ma ̭-ahˇ bi ̭ taˬ-euˬ muiˬ dui dui-eu guiˬ lahˬ k’oeˇ-aˬ, aˬ yaw ̭-ahˇ jah-eu jeˬ teh ̭-ehˇ maˬ ngeuˇ-ehˇ, aˬ yaw ̭ g’aˇ duˬ shaˬ zahˬ ya mˇ-eu jeˬ k’aw ̭ ahˇ-eu meh. 30 Nymˬ-mˇ naw ma ̭ ngaˬ nehˬ-ehˇ tiˬ kawˆ lo ̭-ehˇ guiˇ deuˆ leˇ nya meh. Guiˇ heu-aˬ, dzeuˇ laˇ ngeh ngaˇ deuˆ lu ̭-eu naw ma ̭ mawˇ-euˬ k’oeˇ meh. Nymˬ-mˇ k’aw ̭, naw ma ̭ ya gaˬ-euˬ lo ̭-ehˇ, guiˇ k’oeˇ ngaˇ deuˆ lu ̭ te siˬ.
21 Naw ma ̭ Ka li la ̭ k’oeˇ deh ̭-eu baˬ da neh, g’aˬ k’aˆ laˇ-awˇ, aˬ yaw ̭-euˬ g’oeˇ-eu gaˬ-eu jeˬ naw ma ̭-ahˇ nui saˇ bi za-eu meh. Naw ma ̭ Ka li-euˬ Yaw sahˇ Miˬyehˇ nehˬ-ehˇ cawˬ cawˬ-eu baˬ da neh, tiˬ g’aˬ tiˇ g’aˬ g’awˬ shaˬ gaˬ nya laˇ-awˇ, tiˬ g’aˬ g’aˇ duˬ tiˬ g’aˬ shaˇ noeˬ nya laˇ-eu meh. 2 K’oeˇ miˇ neh, ngaˇ laˬ k’aˬ cehˇ-eu jeˬ byah laˇ ni, naw ma ̭ nui noeˬ tiˬ gaˇ ta ̭-awˇ, g’oeˇ-eu gaˬ-eu jeˬ tiˬ kawˆ lo ̭-ehˇ ahˇ-awˇ, nui ma tiˬ siˬ teh ̭-ehˇ taˬ-eu g’aˇ duˬ, ngaˇ naw ma ̭-ahˇ shaˇ-eu ma. 3 Yawˬ ha-euˬ nui k’ahˇ g’aˇ duˬ teh ̭-ehˇ shaˇ noeˬ-eu jeˬ maˬ ehˇ, yawˬ ha-ahˇ aˬ cawˬ bi noeˬ huiˬ-eu g’aˇ duˬ k’ahˬ sehˇ jehˆ-eu jeˬ maˬ ehˇ, tiˬ paw ̭-iˬ taˬ mˇ. Ehˇ k’aw ̭, tiˬ g’aˬ tiˇ g’aˬ nui ma nahˬ yu ni taˬ-awˬ. Aˬ cawˬ naˆ maˬ tseˇ maˬ gaˇ ma lehˇ noeˬ-eu nui ma taˬ bi ahˇ. 4 Yawˬ ha g’aˇ duˬ teh ̭-ehˇ maˬ shaˇ noeˬ ni, aˬ cawˬ g’aˇ duˬ shaˇ noeˬ-awˬ. 5 Yeˬsuˇ Ka li lo ̭-ehˇ nui ma taˬ-awˬ. 6 Aˬ yaw ̭ Miˬyehˇ-ahˇ duˇ-eu k’aw ̭, Miˬyehˇ nehˬ-ehˇ tiˬ kawˆ ma lehˇ, yawˬ haˇ yawˬ ha maˬ tsaˬ geu ̭-a. 7 Dawˬ tawˆ lu ̭ byehˇ dzeh ya ̭ jiˇ-awˇ, zaˬ k’aˆ tiˬ g’aˬ lo ̭-ehˇ oe-awˇ, tsawˇ haˬ lo ̭-ehˇ deh ̭ le-euˬ meh. 8 Yawˬ ha-ahˇ taˬ nyiˇ dui dui-awˇ, la ̭ ya ̭ k’oeˇ taˆ shiˇ gaˇ keuˆ ni, Miˬyehˇ ehˇ dawˬ naˇ haˬ-euˬ meh. 9 K’oeˇ miˇ neh aˬ yaw ̭-ahˇ Miˬyehˇ, huiˬ dui dui-eu tsawˇ myahˇ bi ̭-awˇ, goˇ dui dui gaˇ ciˬ nuiˇ-euˬ meh. 10 Mˬ miˇ hawˇ-eu miˇ oˆ keuˆ ni, pawˬ tsui ̭ dawˬ tawˆ pawˬ dmˬ dmˬ-awˇ, Yeˬsuˇ tsawˇ myahˇ ciˬ huiˬ teh ̭-a. 11 Aˬda Miˬyehˇ k’ahˬ sehˇ jaˆ ni, Yeˬsuˇ Ka li Sahˬpaˬ meh lehˇ, mehˬ luˬ k’aˇ tso ̭-eu guˇ teh ̭-a. 12 K’oeˇ miˇ neh ngaˇ gaˬ-eu cawˬ deuˬ-oˇ, ngaˇ naw ma ̭ nehˬ-ehˇ jawˇ ngeh ngaˬ-euˬ dawˬ-ahˇ naw ma ̭ aˬ myah lu ̭ naˇ haˬ geu ̭-euˬ meh. Nymˬ-mˇ ngaˇ naw ma ̭ nehˬ-ehˇ maˬ jawˇ ngeh k’aw ̭, ngaˬ-euˬ dawˬ-ahˇ k’oeˇ naˆ maˬ tseˇ naˇ haˬ geu ̭-awˬ. Naw ma ̭ ka k’o ̭-eu jeˬ-ahˇ za nya ni, Miˬyehˇ-ahˇ guˆ-awˇ yaw dzuˬ dzuˬ-eu la ̭ k’oeˇ leh jeh dui dui-awˬ. 13 Aˬ jeˬ miˇ neh ehˇ naˇ, naw ma ̭ nui ma keuˆ ni maˬ ehˇ, Miˬyehˇ-euˬ nui k’ahˇ mˇ nya ni maˬ ehˇ, naw ma ̭ la ̭ k’oeˇ Miˬyehˇ aˬ myah lu ̭ gaˇ mˇ lu ̭ meh. 14 K’aˇ mˇ k’aˇ shaˇ-eu jeˬ la ̭ k’oeˇ, tiˬ g’aˬ tiˇ g’aˬ dawˬ g’o ̭ maˬ doˆ-ehˇ, tsawˇ pyehˇ maˬ pyehˇ ni mˇ-awˬ. 15 K’oeˇ lo ̭-ehˇ mˇ naˇ, iˬ baˇ mˇ-awˇ bahˬ-eu muˆ-eu tsawˇ haˬ deuˬ jawˇ-eu miˇ tsaˬ heu k’oeˇ taˆ, naw ma ̭-aˬ, iˬ baˇ taˬ k’aˇ maˬ za ni muiˬ dui dui-eu Miˬyehˇ-euˬ zaˬ deuˬ pyeu ̭ laˇ teh ̭-a. Mˬ k’oeˇ taˆ tsehˬ-eu aˬ guiˇ lo ̭-ehˇ aˬ yaw ̭ ma ̭-ahˇ yaw sheh ̭ bya nehˬ-awˬ. 16 Sa ̭ laˇ bi deh ̭-eu dawˬ aˬ yaw ̭ ma ̭-ahˇ bi ̭-awˬ. K’oeˇ lo ̭-ehˇ mˇ naˇ, Ka li za ̭ le-eu Aˇ nah-ahˇ naw ma ̭ g’aˇ duˬ ngaˇ k’ahˬ sehˇ jehˆ k’aˇ za teh ̭-a. Aˬ jeˬ miˇ neh ehˇ naˇ, k’oeˇ-aˬ, ngaˬ neh leh jeh-awˇ mˇ-euˬ gaˇ heu yaw ̭ ngeh ̭ maˬ ngeuˇ-eu gaˇ kawˆ bya cehˆ ni bi doˆ laˇ teh ̭-a. 17 Naw ma ̭-euˬ jah-eu jeˬ Miˬyehˇ-ahˇ lawˇ nehˬ-euˬ k’oeˇ taˆ, ngaˬ-euˬ shiˬ ya shehˆ daˆ nehˬ law hawˇ k’aw ̭, ngaˇ nui k’ahˇ shiˇ-awˇ, naw ma ̭ dawˬ tawˆ lu ̭ nehˬ-ehˇ tiˬ kawˆ lo ̭-ehˇ laˬ k’aˬ caw cehˇ-eu ma. 18 K’oeˇ gaˇ duˇ ni, naw ma ̭ k’aw ̭ nui k’ahˇ shiˇ-awˇ ngaˬ nehˬ-ehˇ laˬ k’aˬ caw cehˇ-eu tsaˬ meh. 19 Naw ma ̭-euˬ gaˇ kawˆ ya gaˬ-awˇ ngaˬ-euˬ nui ma g’aˬ tiˬ tiˆ paˇ ahˇ laˇ ni, Sahˬpaˬ Yeˬsuˇ nui ma tsaˬ naˇ g’awˬ myahˇ maˬ g’eh-ehˇ Tiˆmoˇseˬ-ahˇ naw ma ̭ jawˇ gaˇ bi laˇ ma lehˇ ngaˇ noeˬ tmˬ taˬ-euˬ ma. 20 Ngaˬ nehˬ-ehˇ nui ma tiˬ gaˇ ta ̭-awˇ, naw ma ̭ g’aˇ duˬ maˇ maˇ ni nui ma keuˆ-eu aˬ yaw ̭ tiˬ g’aˬ jawˇ-eu teh ̭ meh. 21 Yawˬ g’aˬ na lu ̭ yawˬ ha g’aˇ duˬ shaˇ noeˬ-eu teh ̭ meh. Yeˬsuˇ Ka li g’aˇ duˬ maˬ shaˇ noeˬ-a. 22 Aˬ yaw ̭ aˇ naˆ ni gaˇ dahˇ tsoeˬ-eu gaˇ kawˆ maˬ ehˇ, Laˬ k’aˬ cehˇ-eu Guiˬ lahˬ dawˬ g’aˇ duˬ aˬ yaw ̭ ngaˬ nehˬ-ehˇ aˬ da hawˇ-eu zaˬ lo ̭-ehˇ mˇ daˆ shaˇ daˆ la ̭-euˬ gaˇ kawˆ maˬ ehˇ, naw ma ̭ siˬ nya meh. 23 Ngaˬ-ahˇ aˬ cawˬ aˬ joˆ-ehˇ daˇ tsehˆ nehˬ la ̭-eu gaˇ kawˆ duˬ laˇ-eu nehˬ-ehˇ, aˬ yaw ̭-ahˇ naw ma ̭ jawˇ gaˇ yaw kawˇ-ehˇ bi laˇ ma lehˇ noeˬ taˬ-euˬ ma. 24 Sahˬpaˬ Yeˬsuˇ nui ma tsaˬ naˇ, g’awˬ myahˇ maˬ g’eh-ehˇ ngaˬ-euˬ g’awˇ mawˇ k’aw ̭ naw ma ̭ jawˇ gaˇ laˇ keuˆ nya-eu duˇ lehˇ jah-eu ma. 25 Laˬ k’aˬ cehˇ-eu Guiˬ lahˬ dawˬ g’aˇ duˬ, ngaˬ nehˬ-ehˇ mˇ caw shaˇ caw-awˇ guiˇ deuˆ caw lu ̭-eu tsawˇ haˬ tiˬ g’aˬ pyeu ̭-eu ngaˇ loˬ-eu jeˬ-ahˇ bi caw ba-eu lehˇ naw ma ̭ neh k’ehˇ g’eh le ̭-euˬ aˬ dui-euˬ aˬ nyiˇ Iˬbaˬpawˬdiˇ-ahˇ k’aw ̭, naw ma ̭ jawˇ gaˇ ya bi laˇ meh lehˇ ngaˇ noeˬ-eu ma. 26 Aˬ yaw ̭ naw ma ̭ yawˬ g’aˬ na lu ̭-ahˇ g’o ̭ haw mawˇ laˇ maw ̭ dui dui meh. Aˬ yaw ̭ naˇ-eu gaˇ kawˆ naw ma ̭ jawˇ gaˇ gaˬ keuˆ leˇ-euˬ miˇ neh nui ma tiˬ paw ̭-iˬ maˬ saˇ-a. 27 Aˬ yaw ̭ shiˇ taw tehˬ ni naˇ dui dui-euˬ meh. Ehˇ k’aw ̭, Miˬyehˇ aˬ yaw ̭-ahˇ g’awˬ shaˬ gaˬ nehˬ-euˬ meh. Aˬyaw ̭-ahˇ teh ̭-ehˇ maˬ ngeuˇ ni, ngaˬ-ahˇ k’aw ̭ g’awˬ shaˬ gaˬ nehˬ la ̭-awˇ, aˬ yaw ̭ baˬ da neh ngaˬ-euˬ nui ma shaˬ zahˬ maˬ ya na ̭ dzehˬ-iˇ ni bi dzeuˇ-iˇ la ̭-euˬ meh. 28 K’oeˇ miˇ neh, naw ma ̭ aˬ yaw ̭-ahˇ ya mawˇ-awˇ laˬ k’aˬ paˇ ya cehˇ ni maˬ ehˇ, ngaˇ nui noeˬ shaˬ lu ̭-eu pyaˇ laˇ ni maˬ ehˇ, aˬ yaw ̭-ahˇ naw ma ̭ jawˇ gaˇ yaw kawˇ-ehˇ bi laˇ maw ̭ dui dui-eu ma. 29 Sahˬpaˬ Yeˬsuˇ la ̭ k’oeˇ aˬ yui ̭ aˬ nyiˇ tiˬ g’aˬ lo ̭-ehˇ aˬ yaw ̭-ahˇ laˬ k’aˬ tiˬ cehˇ ha nehˬ-awˬ. Aˬ yaw ̭ lo ̭-ehˇ g’eh-eu tsawˇ haˬ deuˬ-ahˇ yaw zeu baw-eu tsaˬ meh. 30 Aˬ jeˬ miˇ neh ehˇ naˇ, naw ma ̭ maˬ caw ba nehˬ la ̭ nya-eu jeˬ aˬ yaw ̭ ngaˬ-ahˇ caw ba-eu g’aˇ duˬ, Ka li-euˬ gaˇ mˇ-eu la ̭ k’oeˇ shiˇ taw tehˬ ni aˬ yaw ̭ leh jeh dui dui-euˬ meh.
31 Aˬ yui ̭ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu lo ̭-ehˇ ehˇ maw ̭-eu ma. Sahˬpaˬ Yeˬsuˇ la ̭ k’oeˇ laˬ k’aˬ cehˇ-awˬ. Bo ̭ dzeuˇ ya ̭-euˬ jeˬ-ahˇ paˇ bo ̭ poˆ-eu g’aˇ duˬ ngaˇ nymˇ gawˬ maˬ gawˬ. K’oeˇ-aˬ, naw ma ̭ guˆ k’aˇ za-eu jeˬ bi teˬ-iˇ-eu g’aˇ duˬ ma. 2 Yaw haiˬ jeˬ mˇ-eu tsawˇ haˬ k’oeˇ deuˬ-ahˇ yahˇ-awˬ. Aˬ kuiˬ k’oeˇ deuˬ-ahˇ yahˇ-awˬ. Yawˬ ha-euˬ g’awˇ mawˇ-ahˇ yehˬ-eu pyehˆ-eu tsawˇ haˬ k’oeˇ deuˬ-ahˇ yahˇ-awˬ. 3 Dawˇ coe ni ya ehˇ naˇ, maˇ maˇ ni baˆ k’oˆ mehˬ dzaˬ yehˬ-euˬ tsawˇ haˬ deuˬ-aˬ, aˬ yaw ̭ ma ̭ maˬ ngeuˇ-a. Aˬ dui ma ̭ ma. Aˬ jeˬ miˇ neh ehˇ naˇ, Yaw sahˇ Miˬyehˇ-ahˇ g’oe-eu la ̭ k’oeˇ Miˬyehˇ-ahˇ aˬ dui u duˬ tahˬ-awˇ, Yeˬsuˇ Ka li la ̭ k’oeˇ yaw deh ̭ deh ̭-eu jeˬ-ahˇ aˬ dui laˬ k’aˬ cehˇ-eu ma. La ̭ nyiˇ paw mˇ mawˇ nya-eu zahˇ sahˇ k’o ̭ deuˬ-ahˇ aˬ dui g’oe-eu maˬ ngeuˇ. 4 Ngaˇ k’aw ̭, k’oeˇ lo ̭-ehˇ g’eh-eu deuˬ-ahˇ g’oe maw ̭ naˇ g’oe nya ma. La ̭ nyiˇ paw mˇ mawˇ nya-eu zahˇ sahˇ k’o ̭ deuˬ-ahˇ g’oe nya ma lehˇ aˬ cawˬ noeˬ-eu ngeuˇ naˇ, ngaˇ-aˬ, k’oeˇ naˆ maˬ tseˇ noeˬ nya-eu gaˇ ma dahˇ ma. 5 Ngaˇ-aˬ, deh ̭ le-awˇ tiˬ jaw byah laˇ ngeh neh baˆ k’oˆ mehˬ dzaˬ bi yehˬ-euˬ tsawˇ haˬ ma. Iˇsaˬleˬlaˆ tsawˇ jeuˬ la ̭ k’oeˇ ahˇ-eu Beˬyaˬmiˬ tsawˇ jeuˬ tiˬ g’aˬ ma. Maˇ maˇ ni shawˇ jehˆ ni g’eh-eu Heˬbyehˇ tsawˇ haˬ ma. Yuˇdaˆ tsawˇ haˬ-euˬ Zahˇ dawˬ k’o ̭ dawˬ mehˬ nah caw teh-eu paw dzeˇ neh paˇ ehˇ le ̭ naˇ, ngaˇ-aˬ, Paˬliˬsehˇ tiˬ g’aˬ ma. 6 Miˬyehˇ-euˬ nui k’ahˇ mˇ byah maw ̭ dui dui-eu miˇ neh Ka li zaˬ aˇ muˇ-ahˇ k’ehˬ nehˬ k’aˆ nehˬ haw-euˬ tsawˇ haˬ ma. Zahˇ dawˬ k’o ̭ dawˬ-ahˇ mˇ byah-eu baˬ da neh tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ nya lawˬ naˇ, ngaˇ-aˬ, ehˇ k’aˇ maˬ za ni mˇ byah-euˬ tsawˇ haˬ tiˬ g’aˬ ma. 7 Ehˇ k’aw ̭, ngaˬ-euˬ g’aˇ duˬ jiˇ jeuˬ ahˇ ma lehˇ ngaˬ neh k’aˇ sawˇ taˬ-euˬ k’oeˇ deuˬ dawˬ tawˆ lu ̭, Ka li-euˬ g’aˇ duˬ smˬ-eu jeˬ pyeu ̭ law hawˇ ngaˬ lehˇ, nymˬ-mˇ sawˇ duˬ g’aˬ-euˬ ma. 8 K’oeˇ naˆ ni teh ̭-ehˇ maˬ ngeuˇ-a siˬ. Gaˇ dahˇ tsoeˬ dzehˬ-eu jeˬ pyeu ̭-eu ngaˬ-euˬ Sahˬpaˬ Yeˬsuˇ Ka li-ahˇ siˬ nya-eu jeˬ-ahˇ shaˇ cehˆ haw ngeh, ngaˬ neh k’aˇ mˇ dzeuˇ-euˬ yawˬ jeˬ na lu ̭ maˇ maˇ ni smˬ dui dui-eu jeˬ teh ̭ law hawˇ ngaˬ lehˇ sawˇ duˬ g’aˬ-euˬ ma. Ka li-ahˇ ngaˇ geu ̭ maw ̭ dzehˬ-eu miˇ neh, ngaˬ neh k’aˇ mˇ k’aˇ shaˇ dzeuˇ ya ̭-euˬ jeˬ dawˬ tawˆ lu ̭ bi smˬ-iˇ jiˇ-euˬ ma. Ka li-ahˇ ngaˇ za nya ni, k’oeˇ deuˬ dawˬ tawˆ lu ̭-ahˇ yaˆ dzeh-euˬ jaˆ guˬ jaˆ meuˬ lo ̭-ehˇ teh ̭-ehˇ sawˇ-euˬ ma. 9 A yaw ̭ la ̭ k’oeˇ tiˬ byah tiˬ lo ̭ ya jawˇ ni, ngaˇ k’oeˇ lo ̭-ehˇ sawˇ-euˬ ma. Zahˇ dawˬ k’o ̭ dawˬ-ahˇ mˇ byah-eu baˬ da neh za nya meh lehˇ sawˇ taˬ-euˬ ngaˬ neh mˇ za-euˬ Miˬyehˇ-ahˇ tsaˬ leˇ tsahˇ leˇ-eu k’oeˇ hmˬ tiˬ paw ̭-iˬ maˬ paˇ ahˇ ma. Nymˬ-mˇ ngaˇ za taˬ-euˬ Miˬyehˇ-ahˇ tsaˬ leˇ tsahˇ leˇ-eu heu-aˬ, ngaˇ Ka li-ahˇ jah-eu baˬ da neh za taˬ-euˬ ma. Heu-aˬ, jah-eu k’oeˇ taˆ Miˬyehˇ neh bi ̭ nehˬ la ̭-euˬ Miˬyehˇ-ahˇ tsaˬ leˇ tsahˇ leˇ-eu jeˬ pyeu ̭-eu meh. 10 Ngaˇ geu ̭ maw ̭-eu jeˬ-aˬ, Ka li-ahˇ siˬ nya-awˇ g’o ̭ deh ̭ laˇ-euˬ Ka li neh mˇ ya ̭-euˬ jeˬ-ahˇ mˇ nya laˇ maw ̭-eu tiˬ jeˬ, aˬ yaw ̭ k’aˇ ya daˬ-euˬ lo ̭-ehˇ daˬ-awˇ aˬ yaw ̭ k’aˇ shiˇ-euˬ lo ̭-ehˇ shiˇ maw ̭-eu tiˬ jeˬ, 11 shiˇ-eu jeˬ la ̭ k’oeˇ Miˬyehˇ ngaˬ-ahˇ bi g’o ̭ deh ̭ laˇ teh ̭-a lehˇ noeˬ tmˬ-eu tiˬ jeˬ, heu teh ̭ ma. 12 Ngaˇ heu lo ̭-ehˇ ehˇ-eu-aˬ, nymˬ-mˇ za g’aˬ-euˬ ma lehˇ ehˇ-eu maˬ ngeuˇ. Byah laˇ g’aˬ-euˬ ma lehˇ ehˇ-eu k’aw ̭ maˬ ngeuˇ. Yeˬsuˇ Ka li neh ngaˬ-ahˇ aˬ yaw ̭-euˬ tsawˇ haˬ bi pyeu ̭ laˇ-euˬ lo ̭-ehˇ, la ̭ sawˬ k’oeˇ-ahˇ ngaˇ za nya ni leh jeh lu ̭-eu ma. 13 Aˬ yui ̭ aˬ nyiˇ Ka li zaˬ deuˬ-oˇ, la ̭ sawˬ k’oeˇ-ahˇ za g’aˬ-euˬ ma lehˇ ngaˇ maˬ noeˬ. Ehˇ k’aw ̭, ngaˇ mˇ lu ̭-eu tiˬ jeˬ-aˬ, naˇ k’ah paw mˇ dzeuˇ ya ̭-euˬ jeˬ-ahˇ ngehˇ dzeh ya ̭-awˇ, mehˬ hu paw mˇ paˬ-ehˇ jaˆ lu ̭-eu jeˬ-ahˇ miˇ leˇ ni leh jeh lu ̭-eu ma. 14 K’oeˇ miˇ neh, la ̭ sawˬ za nya-eu g’aˇ duˬ cehˆ keuˆ duˬ-ahˇ dawˇ coe ni cehˆ g’eh lu ̭-eu ma. Cehˆ keuˆ duˬ k’oeˇ-aˬ, mˬ k’oeˇ taˆ ya jawˇ ni Yeˬsuˇ Ka li-ahˇ g’oe-eu la ̭ k’oeˇ Miˬyehˇ aˬ dui-ahˇ kuˇ lu ̭-eu k’oeˇ meh. 15 Guiˬ lahˬ sa ̭ laˇ paw tsawˇ k’aˆ k’aˆ laˇ-euˬ aˬ dui dawˬ tawˆ lu ̭, k’oeˇ lo ̭-ehˇ nui ma taˬ-eu tsaˬ meh. Ehˇ k’aw ̭, naw ma ̭ tiˬ paˆ na deuˬ nui ma taˬ-eu yawˬ jeˬ yawˬ jaˆ naˇ, naw ma ̭-ahˇ geuˇ-eu lo ̭-ehˇ g’oˆ shaw nya ni Miˬyehˇ caw ba nehˬ la ̭ teh ̭-a. 16 Aˬ geu g’aˬ aˬ joˆ-ehˇ nui ma taˬ k’aw ̭, aˬ dui neh caw teh g’eh la ̭-euˬ zahˇ sahˇ k’o ̭ heu hmˬ-ahˇ teh ̭-ehˇ caw teh-awˇ, ti kawˆ lo ̭-ehˇ mˇ daˆ shaˇ daˆ le ̭ kaˇ-euˇ. 17 Aˬ yui ̭ aˬ nyiˇ Ka li zaˬ deuˬ-oˇ, ngaˇ yaw deh ̭ deh ̭ gaˇ dzaw geu ̭-awˬ. Naw ma ̭ bi caw teh-eu g’aˇ duˬ nga ma ̭ neh mehˬ taˬ ya ̭-euˬ jeˬ-ahˇ caw teh lu ̭-eu tsawˇ haˬ deuˬ-ahˇ haw geu ̭-awˬ. 18 Ngaˇ naw ma ̭-ahˇ g’awˬ mya poˆ ehˇ dzeuˇ-euˬ dawˬ k’oeˇ dawˬ-ahˇ, nymˬ-mˇ myaˆ biˇ doˆ-eu la ̭ k’oeˇ tiˬ poˆ paˇ ehˇ poˆ-eu ma. Tsawˇ haˬ g’awˬ mya g’aˬ, Ka li kamˇ shiˇ-euˬ la ̭ ya ̭-ahˇ muiˇ-eu jeˬ-ehˇ yaw deh ̭ deh ̭ lu ̭ meh lehˇ ngaˇ paˇ ehˇ poˆ-eu ma. 19 Aˬ yaw ̭ ma ̭-aˬ, shiˬ buiˇ lah ma-ahˇ aˇ saˬ ya saˬ-iˇ meh. Aˬ jeˬ miˇ neh ehˇ naˇ, aˬ yaw ̭ ma ̭-euˬ shiˬ shaˬ jiˇ nui k’ahˇ-aˬ, aˬ yaw ̭ ma ̭-euˬ miˬyehˇ meh. Aˬ yaw ̭ ma ̭-aˬ, yawˬ ha sha ̭ dawˇ paˬ-ehˇ g’eh-eu jeˬ-ahˇ maˬ sha ̭ dawˇ ni jahˇ g’eh haw-awˇ, miˇ tsaˬ shiˬ shaˬ jiˇ-ahˇ ta ̭-eu jeˬ teh ̭-ehˇ shaˇ noeˬ lu ̭-eu meh. 20 Aˬ dui-aˬ, mˬ taˆ miˇ k’ahˬ zaˬ deuˬ pyeu ̭-awˇ, aˬ dui-euˬ Ka k’o ̭-eu g’aˬ pyeu ̭-eu Sahˬpaˬ Yeˬsuˇ Ka li mˬ k’oeˇ taˆ neh za ̭ ka le gaˇ nui ma keuˆ-awˇ dawˬ lu ̭-eu tsawˇ haˬ deuˬ ma. 21 K’aˇ jawˇ k’aˇ jaˆ-eu jeˬ dawˬ tawˆ lu ̭, aˬ yaw ̭ uˆ lahˇ-eu uˬ moˆ bi jawˇ ni jahˇ nya-eu aˬ yaw ̭-euˬ baoˬ k’oeˇ-ahˇ g’oe-awˇ, bu ̭-iˇ cehˇ-iˇ nya-eu aˬ dui-euˬ g’awˇ mawˇ heu-ahˇ, yaw sheh ̭ k’ahˬ sehˇ byah-eu aˬ yaw ̭-euˬ g’awˇ mawˇ-ahˇ duˇ leˇ ni beˬ paˇ nehˬ la ̭ teh ̭-a.
41 K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, ngaˇ naw ma ̭-ahˇ gaˬ dui dui-awˇ, noeˬ mawˇ dui dui lu ̭ ma. Naw ma ̭ baˬ da neh ngaˇ laˬ k’aˬ cehˇ dui dui-awˇ, naw ma ̭ gaˇ kawˆ ngaˇ k’ahˬ sehˇ jehˆ lu ̭ ma. Ngaˇ gaˬ-eu aˬ yui ̭ aˬ nyiˇ deuˬ-oˇ, Sahˬpaˬ Yeˬsuˇ la ̭ k’oeˇ, k’oeˇ lo ̭-ehˇ zi ̭ dah ni deh ̭-awˬ. 2 Iˇbawˇdiˇ hawˇ-eu Suˇtuˆ-oˇ, Sahˬpaˬ Yeˬsuˇ la ̭ k’oeˇ nui ma tiˬ gaˇ ta ̭-awˬ lehˇ naw nya ̭-ahˇ ngaˇ shaˇ-eu ma. 3 Saˇ jaˇ zi ̭-eu ngaˬ-euˬ gaˇ mˇ cawˬ deuˬ k’aw ̭, zaˬ miˬ zaˬ heu nyiˬ g’aˬ-ahˇ ngehˬ bi g’eh maw ̭ miˇ-a. Aˬ jeˬ miˇ neh ehˇ naˇ, zaˬ miˬ zaˬ heu nyiˬ g’aˬ-aˬ, Laˬ k’aˬ cehˇ-eu Guiˬ lahˬ dawˬ gaˬ doe-iˇ ni, ngaˬ-euˬ gaˇ mˇ cawˬ Gaˬleˬmeˬ hawˇ-eu ngaˬ nehˬ-ehˇ gaˇ k’aˇ mˇ-euˬ deuˬ dawˬ tawˆ lu ̭ nehˬ-ehˇ tiˬ kawˆ lo ̭-ehˇ leh jeh dui dui-euˬ meh. Miˬyehˇ-euˬ deh ̭-eu sahˬ bo ̭ la ̭ k’oeˇ tsawˇ haˬ heu deuˬ-euˬ tsawˇ myahˇ ahˇ meh. 4 Aˬ myah lu ̭ Sahˬpaˬ Yeˬsuˇ la ̭ k’oeˇ laˬ k’aˬ cehˇ-awˬ. Ngaˇ tiˬ poˆ paˇ ehˇ ma. Laˬ k’aˬ cehˇ-awˬ. 5 Tiˬ g’aˬ tiˇ g’aˬ nui ma nahˬ yu ni taˬ-awˬ. Sahˬpaˬ Yeˬsuˇ za ̭ le-eu aˇ yamˬ keuˆ le shawˬ-iˬ meh. 6 Tiˬ jeˬ-ahˇ-iˬ k’ahˬ taˬ lahˇ. Ehˇ k’aw ̭, naw ma ̭ guiˬ lahˬ k’aˇ shaˇ ngeh, naw ma ̭ loˬ-eu jeˬ Miˬyehˇ-ahˇ shaˇ-awˬ. Aˬ myah lu ̭ aˬ yaw ̭-ahˇ guiˬ lahˬ huiˬ-eu nui ma ahˇ-eu la ̭ k’oeˇ shaˇ-awˬ. 7 Yeˬsuˇ Ka li la ̭ k’oeˇ naw ma ̭ nui saˇ o ̭-eu jeˬ za nya ni, tsawˇ haˬ zaˬ maˬ noeˬ doˆ coeˇ-eu Miˬyehˇ-euˬ nui saˇ o ̭-eu jeˬ naw ma ̭-ahˇ caw ba teh ̭-a. 8 Aˬ yui ̭ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu lo ̭-ehˇ ehˇ-eu ma. Yaw muiˬ jeˬ hawˇ-eu ja ceuˬ paˬ-ehˇ g’eh-eu jeˬ pyeu ̭-eu, tsaˬ-eu dawˇ-eu jeˬ, aˬ cawˬ yaw zeu baw paˬ-ehˇ g’eh-eu jeˬ, aˬ cawˬ-ahˇ deh ̭ tsaˬ deh ̭ tsahˇ-eu jeˬ, muiˬ-eu shawˇ-eu jeˬ, aˬ cawˬ haw gaˬ paˬ-ehˇ g’eh-eu jeˬ, aˬ cawˬ taˬ huiˬ taˬ mahˇ paˬ-ehˇ g’eh-eu jeˬ, heu deuˬ naw ma ̭ la ̭ k’oeˇ bi ahˇ-awˬ. 9 Ngaˬ neh ngehˬ-euˬ tmˇ-euˬ hawˇ-eu mˇ-euˬ shaˇ-euˬ jeˬ la ̭ k’oeˇ naw ma ̭ neh haw geu ̭ taˬ-euˬ jeˬ mˇ doˆ shaˇ doˆ la ̭-awˬ. Aˬ dui-ahˇ nui saˇ o ̭-eu jeˬ bi ̭ la ̭-eu g’aˬ pyeu ̭-eu Miˬyehˇ naw ma ̭ nehˬ-ehˇ jawˇ teh ̭-a. 10 Aˇ yamˬ ui cuiˆ myahˇ laˇ ngeh naw ma ̭ ngaˬ-ahˇ nui ma keuˆ gaˇ paˇ ya mawˇ-euˬ miˇ neh, Sahˬpaˬ Yeˬsuˇ la ̭ k’oeˇ ngaˇ laˬ k’aˬ cehˇ dui dui-eu ma. Naw ma ̭ ngaˬ-ahˇ nui ma maˬ keuˆ-eu maˬ ngeuˇ-a. Naw ma ̭ g’aˇ duˬ aˇ yamˬ maˬ laˆ yeh ̭ nya-eu miˇ neh meh lehˇ ngaˇ siˬ nya ma. 11 Naw ma ̭ ngaˬ-ahˇ byehˇ dzeh nehˬla ̭-euˬ meh lehˇ noeˬ-eu baˬ da neh ngaˇ heu lo ̭-ehˇ ehˇ-eu maˬ ngeuˇ. Aˬ jeˬ miˇ neh ehˇ naˇ, ngaˇ-aˬ, yawˬ ha k’aˇ jaˆ-eu myaˆ ni teh ̭-ehˇ k’aw ̭ deh ̭ nya jawˇ nya laˇ-euˬ tsawˇ haˬ ma. 12 Iˇ shaˬ iˇ taw lo ̭-ehˇ k’aw ̭ jawˇ nya-awˇ, smˇ muiˬ smˇ baw lo ̭-ehˇ k’aw ̭ jawˇ nya ma. Aˬ joˆ-ehˇ g’eh-eu jawˇ duˬ-ahˇ maˬ ehˇ, aˬ joˆ-ehˇ g’eh-eu aˇ yamˬ-ahˇ maˬ ehˇ, meh ̭-eu shu ̭-eu maˬ kaˬ, ya dzaˬ ya dawˇ dehˆ-eu maˬ kaˬ, g’awˬ mya ni jaˆ-eu maˬ kaˬ, ui cuiˆ teh ̭-ehˇ jaˆ-eu maˬ kaˬ, nui k’ahˇ shiˇ-awˇ deh ̭ nya ni za ̭ taˬ-euˬ jeˬ-ahˇ ngaˇ za-euˬ ma. 13 Aˬ geu jeˬ keuˆ le-eu maˬ kaˬ, Ka li neh ngaˬ-ahˇ bi ̭ la ̭-euˬ baoˬ-ahˇ g’oe-awˇ ciˬ daˬ coeˇ ma. 14 Ehˇ k’aw ̭, naw ma ̭ ngaˬ-ahˇ g’awˬ shaˬ gaˬ dui dui-awˇ ngaˬ-euˬ shaˬ zahˬ caw pi nehˬ la ̭-euˬ meh. 15 K’oeˇ ngeh, ngaˇ Laˬ k’aˬ cehˇ-eu Guiˬ lahˬ dawˬ mehˬ dahˬ beh ngeh, Maˬgeˬdawˇniˆ miˇ k’ahˬ-ahˇ neh ngaˇ g’o ̭ ka le gaˇ caw ba nehˬ la ̭-euˬ-aˬ, naw ma ̭-euˬ Ka li zaˬ aˇ muˇ tiˬ muˇ teh ̭ meh. Ngaˬ nehˬ-ehˇ jeˬ ma ta ̭-eu tsawˇ haˬ-aˬ, naw ma ̭ teh ̭ meh. 16 Teˇsaˬloˇ ni meuˬ-ahˇ ngaˇ pyuˇ loˬ ngeh, naw ma ̭ ngaˬ-ahˇ pyuˇ tiˬ poˆ nyiˬ poˆ dawˆ ahˇ nehˬ la ̭-euˬ meh. 17 Ngaˇ pyuˇ daˬ za gaˇ teh ̭-ehˇ shaˇ noeˬ-eu maˬ ngeuˇ. Naw ma ̭-euˬ jeˬ ma-ahˇ jiˇ jeuˬ ahˇ dzehˬ laˇ ni k’aw ̭ shaˇ noeˬ-eu ma. 18 Naw ma ̭ neh k’aˇ bi ̭ la ̭-euˬ yawˬ jeˬ na lu ̭ g’aˇ duˬ, guiˬ lahˬ huiˬ-eu dawˬ tsa ̭ ahˇ la ̭-eu ma. Ngaˇ loˬ-eu myaˆ maˬ tseˇ naw ma ̭ ngaˬ-ahˇ bi ̭ laˬ-euˬ meh. Naw ma ̭ neh bi ̭ la ̭-euˬ la ̭ sawˬ deuˬ-ahˇ Iˇbaˬpawˬdiˇ neh hehˇ keuˆ nehˬ le ̭-euˬ miˇ neh, ngaˇ k’aˇ loˬ-eu jeˬ nymˬ-mˇ byah miˇ-a. La ̭ sawˬ heu deuˬ-aˬ, Miˬyehˇ nui k’ahˇ shiˇ-awˇ ha geu ̭-euˬ saw dui dui-eu lawˇ-eu jeˬ pyeu ̭-eu meh. 19 Naw ma ̭ k’aˇ loˬ-eu jeˬ la ̭ k’oeˇ, Yeˬsuˇ Ka li-ahˇ g’oe-awˇ Miˬyehˇ-euˬ baw le za le-eu guiˬ lahˬ bi ̭ nehˬ la ̭ teh ̭-a. 20 Aˬ dui-euˬ Aˬda Miˬyehˇ mˬ maˬ maˬ byaˆ zaˇ ziˇ yaw sheh ̭ k’ahˬ sehˇ huiˬ lu ̭-uˇ. Aˬ miˬ. 21 Yeˬsuˇ Ka li-ahˇ ta ̭-eu Miˬyehˇ-euˬ tsawˇ haˬ yawˬ g’aˬ na lu ̭-ahˇ dawˬ cawˬ puˬ ahˇ la ̭-eu ma. Ngaˬ nehˬ-ehˇ jawˇ-eu aˬ yui ̭ aˬ nyiˇ Ka li zaˬ deuˬ k’aw ̭, naw ma ̭-ahˇ dawˬ cawˬ puˬ ahˇ la ̭-euˬ meh. 22 Heu gaˇ k’aˇ jawˇ-eu Miˬyehˇ-euˬ tsawˇ haˬ deuˬ naw ma ̭-ahˇ dawˬ cawˬ puˬ ahˇ la ̭-euˬ meh. K’oeˇ naˆ maˬ tseˇ, sahˬ paˬ Gehˇsaˬ-euˬ hawˇ nymˇ-ahˇ gaˇ mˇ lu ̭-eu deuˬ kaw ̭, naw ma ̭-ahˇ dawˬ cawˬ puˬ ahˇ la ̭-euˬ meh. 23 Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw ma ̭ dawˬ tawˆ lu ̭ k’oeˇ taˆ jaˆ lu ̭-uˇ.