GAˬLAˬTIˆ

GAˬLAˬTIˆ

¹ G’aˬ k’ehˇ bi geu ̭-eu g’aˇ duˬ tsawˇ haˬ zaˬ neh kuˇ-euˬ maˬ ngeuˇ-ehˇ, tsawˇ haˬ zaˬ neh g’aˬ k’ehˇ ka nehˬ-euˬ k’aw ̭ maˬ ngeuˇ ni, Yeˬsuˇ Ka li hawˇ-eu aˬ yaw ̭-ahˇ bi g’o ̭ deh ̭ laˇ-euˬ Aˬda Miˬyehˇ neh kuˇ-euˬ g’aˬ pyeu ̭-eu ngaˇ Pawˇluˆ hawˇ-eu ² heu gaˇ k’aˇ jawˇ-eu aˬ yui ̭ aˬ nyiˇ Ka li zaˬ dawˬ tawˆ lu ̭, Gaˬlaˬtiˆ miˇ k’ahˬ-ahˇ jawˇ-eu Ka li zaˬ aˇ muˇ deuˬ jawˇ gaˇ dawˬ cawˬ puˬ ahˇ le ̭-eu ma. ³ Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ o ̭-eu jeˬ, naw ma ̭ k’oeˇ taˆ keuˆ le lu ̭-uˇ. ⁴ Haiˬ dui dui-eu ziˇ heu ziˇ-ahˇ aˬ dui ya buˬ-iˇ ni aˬ dui-euˬ Aˬda Miˬyehˇ nui ma tsaˬ-eu lo ̭-ehˇ, aˬ dui-euˬ iˬ baˇ aˇ poeˬ Ka li aˬ yaw ̭-euˬ g’awˇ mawˇ lawˇ nehˬ-euˬ meh. ⁵ Mˬ maˬ maˬ byaˆ zaˇ ziˇ Miˬyehˇ yaw sheh ̭ k’ahˬ sehˇ huiˬ lu ̭-uˇ. Aˬ miˬ. ⁶ Ka li-euˬ guiˬ lahˬ yaw dzahˇ la ̭ k’oeˇ naw ma ̭-ahˇ kuˇ-euˬ g’aˬ-ahˇ naw ma ̭ yaw awˇ la ̭-ehˇ byehˇ dzeh-awˇ, Laˬ k’aˬ cehˇ-eu Guiˬ lahˬ dawˬ yawˬ hmˬ yawˬ-ahˇ ha geu ̭-eu kawˇ dui dui gaˇ ngaˇ zahˬ dui dui leˇ nya. ⁷ Maˇ maˇ ni ehˇ naˇ, Laˬ k’aˬ cehˇ-eu Guiˬ lahˬ dawˬ yawˬ hmˬ yawˬ maˬ jaˆ-a. Ehˇ k’aw ̭, naw ma ̭-ahˇ laˆ bahˬ-awˇ Ka li-euˬ Laˬ k’aˬ cehˇ-eu Guiˬ lahˬ dawˬ-ahˇ yuˇ pyawˆ maw ̭-eu tsawˇ haˬ tiˬ deuˬ jawˇ-eu miˇ neh, ngaˇ heu lo ̭-ehˇ ehˇ-eu ma. ⁸ Nga ma ̭ maˬ ehˇ, mˬ taˆ g’aˬ k’ehˇ-ahˇ keuˆ ni maˬ ehˇ, nga ma ̭ neh naw ma ̭-ahˇ mehˬ-euˬ Laˬ k’aˬ cehˇ-eu Guiˬ lahˬ dawˬ heu-ahˇ beu gaˇ-eu Laˬ k’aˬ cehˇ-eu Guiˬ lahˬ dawˬ yawˬ hmˬ yawˬ mehˬ naˇ, k’aˇ mehˬ-euˬ g’aˬ k’oeˇ taˆ yaˬ k’ehˇ yaˬ-eu jeˬ keuˆ le lu ̭-uˇ. ⁹ Yaw beh nga ma ̭ neh ehˇ dzeuˇ-euˬ dawˬ-ahˇ nymˬ-mˇ ngaˇ paˇ ehˇ poˆ-eu ma. Tsawˇ haˬ tiˬ g’aˬ na, naw ma ̭ neh ha geu ̭ dzeuˇ-euˬ Laˬ k’aˬ cehˇ-eu Guiˬ lahˬ dawˬ-ahˇ beu gaˇ-eu Laˬ k’aˬ cehˇ-eu Guiˬ lahˬ dawˬ yawˬ hmˬ yawˬ mehˬ laˇ naˇ, aˬ yaw ̭ k’oeˇ taˆ yaˬ k’ehˇ yaˬ-eu jeˬ keuˆ le lu ̭-uˇ. ¹⁰ Tsawˇ haˬ zaˬ ngaˬ-ahˇ nui ma tsaˬ ni ngaˇ mˇ lu ̭-eu nga loˇ. Maˬ ngeuˇ. Miˬyehˇ nui ma tsaˬ-eu jeˬ-ahˇ ngaˇ maw ̭-eu ma. Tsawˇ haˬ zaˬ nui k’ahˇ shiˇ-eu jeˬ-ahˇ ngaˇ leh jeh lu ̭-eu nga loˇ. K’oeˇ lo ̭-ehˇ mˇ naˇ, ngaˇ Ka li-euˬ zaˬ k’aˆ maˬ paˇ ngeuˇ-aˇ. ¹¹ Aˬ yui ̭ a ̭ nyiˇ Ka li zaˬ deuˬ-oˇ, ngaˇ mehˬ lu ̭-eu Laˬ k’aˬ cehˇ-eu Guiˬ lahˬ dawˬ heu-aˬ, tsawˇ haˬ zaˬ jawˇ gaˇ neh doˆ le-euˬ maˬ ngeuˇ-eu naw ma ̭ bi siˬ nya maw ̭ miˇ-a. ¹² Tsawˇ haˬ zaˬ neh mehˬ nehˬ la ̭-euˬ k’aw ̭ maˬ ngeuˇ-a. Yeˬsuˇ Ka li neh ngaˬ-ahˇ pah mehˬ nehˬ la ̭-euˬ meh. ¹³ Ngaˇ Yuˇdaˆ tsawˇ haˬ uˬ duˬ tahˬ-eu zahˇ sahˇ k’o ̭ tawˬ lu ̭ ngeh aˬ joˆ-ehˇ deh ̭ ya ̭-euˬ gaˇ kawˆ naw ma ̭-ahˇ ja mehˬ g’aˬ-euˬ ma. Miˬyehˇ-euˬ Ka li zaˬ aˇ muˇ-ahˇ g’awˬ shaˬ maˬ gaˬ ni k’ehˬ nehˬ k’aˆ nehˬ-awˇ, ngaˇ k’aˇ g’eh nya gaˇ keuˆ ni laˆ cawˆ-eu jeˬ mˇ-euˬ ma. ¹⁴ Ngaˬ nehˬ-ehˇ aˇ k’o ̭ tiˬ kawˆ lo ̭-ehˇ jaˆ-eu Yuˇdaˆ tsawˇ haˬ deuˬ naˆ maˬ tseˇ, Yuˇdaˆ tsawˇ haˬ uˬ duˬ tahˬ-eu zahˇ sahˇ k’o ̭-ahˇ ngaˇ caw teh-euˬ ma. Aˬ dui-euˬ aˬ poeˬ aˬ bawˇ deuˬ neh tawˬ ka le ̭-euˬ deuˬ-ahˇ, aˬ yaw ̭ ma ̭ naˆ maˬ tseˇ ngaˇ nui ma keuˆ dui dui-euˬ ma. ¹⁵ Ehˇ k’aw ̭, ngaˇ maˬ deh ̭ doˆ le mi naˆ-ehˇ Miˬyehˇ g’awˬ shaˬ gaˬ-eu jeˬ neh ngaˬ-ahˇ tseˇ doˆ g’aˬ-awˇ, aˬ yaw ̭-euˬ gaˇ bi mˇ-eu g’aˇ duˬ ngaˬ-ahˇ kuˇ-euˬ meh. ¹⁶ Aˬ yaw ̭-euˬ gaˇ kawˆ Yuˇdaˆ tsawˇ haˬ deuˬ-ahˇ bi mehˬ-eu g’aˇ duˬ, aˬ yaw ̭-euˬ Zaˬmaˇ neh ngaˬ-ahˇ pah mehˬ nehˬ la ̭-euˬ meh. Tsawˇ haˬ zaˬ tiˬ g’aˬ-ahˇ-iˬ, ngaˇ nui noeˬ nui duˇ maˬ shaˇ haw-aˬ. ¹⁷ Yeˬluˇsaˬlehˬ meuˬ-ahˇ ngaˬ-euˬ aˬ hu neh g’aˬ k’ehˇ geu ̭ lu ̭-eu deuˬ jawˇ gaˇ k’aw ̭, ngaˇ maˬ iˇ haw-aˬ. Tiˬ poˆ teh ̭-ehˇ Aˬleˬbyaˇ miˇ k’ahˬ-ahˇ iˇ-awˇ, Daˬmaˬsehˇ meuˬ-ahˇ g’o ̭ laˇ-euˬ ma. ¹⁸ Aˇ nah ba smˇ k’o ̭ g’eh-awˇ neh hawˇ-eu Yeˬluˇsaˬlehˬ meuˬ-ahˇ ngaˇ iˇ-awˇ, Beˬtuˆluˆ jawˇ gaˇ dawˬ deh g’a leˇ-euˬ ma. Aˬ yaw ̭ nehˬ-ehˇ tseˇ ngaˬ nah byah ni ngaˇ jawˇ-euˬ ma. ¹⁹ Sahˬpaˬ Yeˬsuˇ-euˬ aˬ nyiˇ Yaˬkoˆ maˬ ngeuˇ naˇ, g’aˬ k’ehˇ tiˬ g’aˬ-iˬ ngaˇ maˬ mawˇ-aˬ. ²⁰ Ngaˇ bo ̭ lu ̭-eu heu-aˬ, jaˬ myaw ̭ myaw ̭-eu maˬ ngeuˇ. Miˬyehˇ-euˬ mehˬ shi bo ̭-eu jeˬ pyeu ̭-eu ma. ²¹ K’oeˇ naˇ, Suˇliˆ miˇ k’ahˬ hawˇ-eu Giˇliˇciˆ miˇ k’ahˬ-ahˇ ngaˇ le-euˬ ma. ²² K’oeˇ ngeh keuˆ ni-aˬ, Yuˇdaˆ miˇ k’ahˬ-ahˇ jawˇ-eu Ka li zaˬ aˇ muˇ deuˬ ngaˬ-ahˇ tsawˇ tsaˬ maˬ tsoˆ nya-a siˬ. ²³ "Aˬ dui ma ̭-ahˇ k’ehˬ nehˬ k’aˆ nehˬ la ̭-euˬ tsawˇ haˬ k’oeˇ g’aˬ, yaw beh aˬ yaw ̭ laˆ cawˆ-eu lehˇ leh jeh-euˬ jah-eu heu-euˬ gaˇ kawˆ dawˬ mehˬ mehˬ lu ̭ meh jeˇ" lehˇ, aˬ cawˬ ja-eu ya gaˬ-euˬ teh ̭-a siˬ. ²⁴ K’oeˇ sawˇ miˇ tsa hawˇ-eu, ngaˬ-euˬ baˬ da neh Miˬyehˇ-euˬ yaw sheh ̭ k’ahˬ sehˇ-ahˇ aˬ yaw ̭ ma ̭ ja ceuˬ laˇ-euˬ meh.

¹ Tseˇ oeˬ k’o ̭ paˇ g’eh-awˇ, Baˬnaˬ baˆ nga nya ̭ Tiˇtuˆ sheuˬ-awˇ Yeˬluˇsaˬlehˬ meuˬ-ahˇ paˇ iˇ-euˬ ma. ² Miˬyehˇ ngaˬ-ahˇ pah mehˬ nehˬ la ̭-euˬ miˇ neh iˇ-euˬ ma. Aˬ yui ̭ aˬ tsu deuˬ nehˬ-ehˇ ciˬ cuˇ ni tahˬ dzoeˇ-awˇ, Yuˇdaˆ tsawˇ haˬ maˬ ngeuˇ-eu deuˬ-ahˇ Laˬ k’aˬ cehˇ-eu Guiˬ lahˬ dawˬ mehˬ-euˬ gaˇ kawˆ ngaˇ dzawˇ nehˬ-euˬ ma. Ngaˬ neh mˇ dzeuˇ ya ̭-euˬ jeˬ hawˇ-eu nymˬ-mˇ mˇ lu ̭-eu jeˬ yaw ̭ ngeh ̭-ehˇ maˬ bi pyeu ̭-iˇ maw ̭-eu miˇ neh, k’oeˇ lo ̭-ehˇ dzawˇ nehˬ-euˬ ma. ³ Ngaˬ-euˬ gaˇ mˇ cawˬ Tiˇtuˆ-aˬ, Heˬlaˬsaˇ tsawˇ haˬ pyeu ̭-eu meh. Ehˇ k’aw ̭, aˬ yaw ̭-ahˇ baˆ k’oˆ mehˬ dzaˬ ya yehˬ meh lehˇ maˬ bi ka tiˇ-aˬ. ⁴ Tiˬ paˆ na deuˬ-aˬ, aˬ yaw ̭-ahˇ baˆ k’oˆ mehˬ dzaˬ bi yehˬ maw ̭-eu meh. Tsawˇ haˬ k’oeˇ deuˬ Ka li-ahˇ jah-eu tsawˇ haˬ jahˇ geu ̭-awˇ, nga ma ̭-euˬ aˇ muˇ la ̭ k’oeˇ uˇ k’oeˬ laˇ-awˇ, Yeˬsuˇ Ka li la ̭ k’oeˇ nga ma ̭ Zahˇ dawˬ k’o ̭ dawˬ dawˬ tawˆ lu ̭-ahˇ maˬ caw teh ni mˇ nya shaˇ nya-eu a kawˬ-aˬ za taˬ-euˬ gaˇ kawˆ-ahˇ k’oeˬ sho haw laˇ-euˬ meh. Aˬ yaw ̭ ma ̭-aˬ, nga ma ̭-ahˇ Zahˇ dawˬ k’o ̭ dawˬ-euˬ zaˬ k’aˆ bi geu ̭ maw ̭-eu meh. ⁵ Ehˇ k’aw ̭, Laˬ k’aˬ cehˇ-eu Guiˬ lahˬ dawˬ-euˬ yaw tsaˬ yaw dawˇ jeˬ naw ma ̭ nehˬ-ehˇ zi ̭ dah ni jaˆ nya ni, aˬ yaw ̭ ma ̭-euˬ ehˇ dawˬ nga ma ̭ tiˬ paw ̭-iˬ maˬ geu ̭ nehˬ-aˬ. ⁶ Aˬ yui ̭ aˬ tsu bi geu ̭ taˬ-euˬ tsawˇ haˬ k’oeˇ deuˬ k’aw ̭, ngaˬ-euˬ g’aˇ duˬ teh ̭ law nmˇ-aˬ teu naˆ naˆ-ehˇ beu gaˇ meh lehˇ maˬ noeˬ nya. Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ zaˬ-ahˇ la ̭ nyiˇ paw teh ̭-ehˇ haw-awˇ daˇ-eu maˬ ngeuˇ-a. Ngaˇ ehˇ-eu aˬ yui ̭ aˬ tsu k’oeˇ deuˬ-aˬ, ngaˬ-ahˇ nui noeˬ nui duˇ yaw shui ̭ tiˬ jeˬ-iˬ maˬ bi ̭ lahˬ la ̭-aˬ. ⁷ K’oeˇ uˬ ta ̭, Yuˇdaˆ tsawˇ haˬ deuˬ-ahˇ Laˬ k’aˬ cehˇ-eu Guiˬ lahˬ dawˬ mehˬ-eu g’aˇ duˬ Beˬtuˆluˆ-ahˇ Miˬyehˇ neh gaˇ bi ̭ taˬ-euˬ lo ̭-ehˇ, aˬ cawˬ tsawˇ jeuˬ-ahˇ Laˬ k’aˬ cehˇ-eu Guiˬ lahˬ dawˬ mehˬ-eu g’aˇ duˬ Miˬyehˇ neh ngaˬ-ahˇ gaˇ bi ̭ taˬ-euˬ meh lehˇ aˬ yaw ̭ ma ̭ haw mawˇ-eu meh. ⁸ Aˬ jeˬ miˇ neh ehˇ naˇ, Beˬtuˆluˆ-ahˇ Yuˇdaˆ tsawˇ haˬ deuˬ g’aˇ duˬ g’aˬ k’ehˇ bi geu ̭-euˬ lo ̭-ehˇ, ngaˬ-ahˇ k’aw ̭ aˬ cawˬ tsawˇ jeuˬ g’aˇ duˬ g’aˬ k’ehˇ bi geu ̭-eu lehˇ Miˬyehˇ-euˬ baoˬ neh k’ehˇ taˬ-euˬ meh. ⁹ Aˬ yui ̭ aˬ tsu geu ̭ luˬ-eu deuˬ pyeu ̭-eu, Yaˬkoˆ, Beˬtuˆluˆ, Yoˇhaˬ aˬ ha ma ̭ k’aw ̭, Miˬyehˇ neh ngaˬ-ahˇ huiˬ-eu gaˇ heu hmˬ bi mˇ-euˬ meh lehˇ jah-eu meh. K’oeˇ miˇ neh, Baˬnaˬbaˆ nga nya ̭-ahˇ la ̭ tsa ̭ tsa ̭-awˇ mˇ cawˬ shaˇ cawˬ lo ̭-ehˇ ha geu ̭ nehˬ la ̭-euˬ meh. Baˬnaˬbaˆ nga nya ̭-aˬ, aˬ cawˬ tsawˇ jeuˬ jawˇ gaˇ mˇ leˇ-awˇ, aˬ yaw ̭ ma ̭-aˬ, Yuˇdaˆ tsawˇ haˬ deuˬ jawˇ gaˇ gaˇ mˇ-eu g’aˇ duˬ yawˬ g’aˬ na lu ̭ nui ma tsaˬ-euˬ ma. ¹⁰ Aˬ yaw ̭ ma ̭ shaˇ-eu-aˬ, aˬ yaw ̭ ma ̭ aˇ muˇ la ̭ k’oeˇ shaˬ-eu zahˬ-eu tsawˇ haˬ deuˬ-ahˇ noeˬ keuˆ nehˬ la ̭ lehˇ shaˇ-eu teh ̭ meh. Gaˇ kawˆ k’oeˇ hmˬ-ahˇ ngaˇ mˇ-eu nui ma keuˆ dui dui lu ̭ ma. ¹¹ Ehˇ k’aw ̭, Aˬdiˇawˬ meuˬ-ahˇ Beˬtuˆluˆ laˇ keuˆ ngeh, aˬ yaw ̭ neh mˇ-euˬ maˬ tsaˬ-eu miˇ neh, aˬ cawˬ mehˬ shi aˬ yaw ̭-ahˇ ngaˇ dehˬ-euˬ ma. ¹² Yaˬkoˆ neh k’ehˇ g’eh la ̭-euˬ tsawˇ haˬ deuˬ maˬ laˇ keuˆ siˬ k’oeˇ-aˬ, aˬ cawˬ tsawˇ jeuˬ Ka li zaˬ deuˬ nehˬ-ehˇ Beˬtuˆluˆ dzaˬ ta ̭ dawˇ ta ̭-euˬ meh. Ehˇ k’aw ̭, tsawˇ haˬ k’oeˇ deuˬ laˇ keuˆ ngeh jawˇ, aˬ cawˬ tsawˇ jeuˬ nehˬ-ehˇ maˬ dzaˬ maˬ dawˇ ta ̭ ni pyeu ̭-iˇ-euˬ meh. Aˬ jeˬ miˇ neh ehˇ naˇ, Yuˇdaˆ tsawˇ haˬ maˬ ngeuˇ-eu deuˬ-ahˇ k’aw ̭ baˆ k’oˆ mehˬ dzaˬ bi yehˬ maw ̭-eu nui ma ahˇ-eu tsawˇ haˬ k’oeˇ deuˬ-ahˇ aˬ yaw ̭ guˆ-eu meh. ¹³ Yuˇ daˆ tsawˇ haˬ Ka li zaˬ nui deuˬ k’aw ̭, nui ma baˬ-iˇ jiˇ-awˇ, Beˬtuˆluˆ k’aˇ mˇ-eu mehˬ nah caw teh-euˬ meh. Baˬnaˬbaˆ-ahˇ keuˆ ni k’oeˇ lo ̭-ehˇ pyeu ̭-iˇ taˬ-euˬ meh. ¹⁴ Laˬ k’aˬ cehˇ-eu Guiˬ lahˬ dawˬ-euˬ yaw tsaˬ yaw dawˇ jeˬ-ahˇ tsaˬ ni aˬ yaw ̭ ma ̭ maˬ cah-eu miˇ neh, aˬ yaw ̭ ma ̭ dawˬ tawˆ lu ̭-euˬ mehˬ shi Beˬtuˆluˆ-ahˇ ngaˇ heu lo ̭-ehˇ ehˇ nehˬ-euˬ ma. "Nawˇ-aˬ, Yuˇdaˆ tsawˇ haˬ pyeu ̭-eu k’aw ̭, Yuˇdaˆ tsawˇ haˬ lo ̭-ehˇ maˬ deh ̭ ni, aˬ cawˬ tsawˇ jeuˬ lo ̭-ehˇ deh ̭-eu meh. Toˆ-ehˇ ngeuˇ naˇ, aˬ cawˬ tsawˇ jeuˬ deuˬ Yuˇdaˆ tsawˇ haˬ lo ̭-ehˇ deh ̭ ni nawˇ aˬ joˆ-ehˇ sheuˬ pyawˇ nya nmˇ." ¹⁵ Aˬ dui ma ̭-aˬ, deh ̭ le ngeh neh maˇ maˇ ni Yuˇdaˆ tsawˇ haˬ ma. Aˬ yaw ̭ ma ̭ ehˇ-eu lo ̭-ehˇ, "aˬ cawˬ tsawˇ jeuˬ iˬ baˇ zaˬ deuˬ" maˬ ngeuˇ. ¹⁶ Ehˇ k’aw ̭, tsawˇ haˬ tiˬ g’aˬ-aˬ, Zahˇ dawˬ k’o ̭ dawˬ-ahˇ mˇ byah-eu miˇ neh maˬ ngeuˇ-ehˇ, Yeˬsuˇ Ka li-ahˇ jah-eu baˬ da neh teh ̭-ehˇ Miˬyehˇ-ahˇ tsaˬ leˇ tsahˇ leˇ nya-eu meh lehˇ aˬ dui siˬ nya ma. Aˬ jeˬ miˇ neh ehˇ naˇ, Zahˇ dawˬ k’o ̭ dawˬ-ahˇ mˇ byah-awˇ Miˬyehˇ-ahˇ tsaˬ leˇ tsahˇ leˇ nya-eu tsawˇ haˬ tiˬ g’aˬ-iˬ maˬ jawˇ-a. ¹⁷ Toˆ-ehˇ ngeuˇ naˇ, Ka li la ̭ k’oeˇ Miˬyehˇ-ahˇ aˬ dui tsaˬ leˇ tsahˇ leˇ nya ni leh jeh lu ̭ ngeh, aˬ dui k’aw ̭ Yuˇdaˆ tsawˇ haˬ maˬ ngeuˇ-eu deuˬ naˆ ni iˬ baˇ zaˬ pyeu ̭ lu ̭-eu ngeuˇ naˇ, Ka li-aˬ iˬ baˇ-euˬ g’aˇ duˬ mˇ lu ̭ shaˇ lu ̭ ta loˇ. Maˬ ngeuˇ-a. ¹⁸ Ngaˬ neh deh pyaˆ-euˬ Zahˇ dawˬ k’o ̭ dawˬ-ahˇ ngaˇ paˇ gawˬ muiˬ naˇ, ngaˇ-aˬ, Zahˇ dawˬ k’o ̭ dawˬ-ahˇ mˇ bahˬ-euˬ tsawˇ haˬ tiˬ g’aˬ meh. ¹⁹ Ehˇ k’aw ̭ ngaˇ-aˬ, Zahˇ dawˬ k’o ̭ dawˬ-ahˇ ta ̭ leˇ-awˇ shiˇ g’aˬ-euˬ tsawˇ haˬ ma. Miˬyehˇ-euˬ g’aˇ duˬ deh ̭ nya ni Zahˇ dawˬ k’o ̭ dawˬ neh bi seh ̭-euˬ tsawˇ haˬ ma. Ngaˇ-aˬ, Ka li nehˬ-ehˇ la ̭ ya ̭ k’oeˇ taˆ kamˇ shiˇ g’aˬ-euˬ ma. ²⁰ K’oeˇ miˇ neh, ngaˇ deh ̭ lu ̭-eu heu-aˬ, ngaˇ maˬ paˇ ngeuˇ ma. Ka li ngaˬ-euˬ la ̭ k’oeˇ deh ̭ lu ̭-eu jeˬ pyeu ̭-eu ma. Nymˬ-mˇ ngaˇ yaw deh ̭ deh ̭ lu ̭-eu heu-aˬ, ngaˬ-ahˇ gaˬ-awˇ ngaˬ-euˬ g’aˇ duˬ g’awˇ mawˇ damˬ nehˬ le-euˬ Miˬyehˇ-euˬ Zaˬmaˇ-ahˇ jah-eu jeˬ la ̭ k’oeˇ deh ̭ lu ̭-eu ma. ²¹ Miˬyehˇ g’awˬ shaˬ gaˬ-eu guiˬ lahˬ-ahˇ ngaˇ maˬ byehˇ dzeh. Ehˇ k’aw ̭, Zahˇ dawˬ k’o ̭ dawˬ baˬ da neh tsawˇ haˬ zaˬ Miˬyehˇ-ahˇ tsaˬ leˇ tsahˇ leˇ nya meh lehˇ ngeuˇ naˇ, Ka li shiˇ-euˬ-aˬ, tiˬ jeˬ-iˬ gaˇ dahˇ maˬ tsoeˬ gaˇ duˇ meh.

¹ Gaˬlaˬtiˆ miˇ k’ahˬ-ahˇ jawˇ-eu dawˇ ga deuˬ-oˇ. Aˬ suˇ g’aˬ neh naw ma ̭-ahˇ mehˇ shuiˇ paˇ bi shuiˇ tawˆ teˬ. Yeˬsuˇ Ka li la ̭ ya ̭ k’oeˇ taˆ kamˇ shiˇ-euˬ gaˇ kawˆ naw ma ̭-euˬ myaˆ k’eh yaw duˬ duˬ-ehˇ dzawˇ nehˬ g’aˬ-euˬ maˬ ngeuˇ-a loˇ. ² Zahˇ dawˬ k’o ̭ dawˬ-ahˇ mˇ byah-eu baˬ da neh Miˬyehˇ-euˬ Yaw sahˇ za teˬ loˇ. Maˬ ngeuˇ naˇ, Laˬ k’aˬ cehˇ-eu Guiˬ lahˬ dawˬ-ahˇ ya gaˬ-awˇ jah-euˬ baˬ da neh za teˬ loˇ lehˇ, ngaˬ-ahˇ ehˇ nehˬ la ̭ sheˇ. ³ Naw ma ̭ aˇ naˆ naˆ-ehˇ dawˇ ga ga te. Miˬyehˇ-euˬ Yaw sahˇ-ahˇ g’oe-awˇ naw ma ̭ neh aˇ dahˬ beh taˬ-euˬ jeˬ-ahˇ, yawˬ ha-euˬ baoˬ-ahˇ g’oe-awˇ aˇ saˬ saˬ-eu g’eh te loˇ. ⁴ Naw ma ̭ neh k’aˇ puˬ k’aˇ mawˇ dzeuˇ ya ̭-euˬ dawˬ tawˆ lu ̭ yaw ̭ ngeh ̭-a loˇ. Yaw ̭ ngeh ̭ maˬ ngeuˇ-a. ⁵ Miˬyehˇ neh naw ma ̭-ahˇ Yaw sahˇ Miˬyehˇ bi ̭ nehˬ le ̭-awˇ zahˬ leˇ paˬ-ehˇ g’eh-eu jeˬ mˇ mehˬ-euˬ k’oeˇ, naw ma ̭ Zahˇ dawˬ k’o ̭ dawˬ-ahˇ mˇ byah-euˬ miˇ neh-a loˇ. Laˬ k’aˬ cehˇ-eu Guiˬ lahˬ dawˬ-ahˇ ya gaˬ-awˇ jah-euˬ miˇ neh-a loˇ. ⁶ Aˬbyaˬhaˬ neh ya puˬ ya mawˇ haw-euˬ jeˬ-ahˇ shaˇ noeˬ haw sheˇ. "Aˬ yaw ̭ Miˬyehˇ-ahˇ jah-awˇ, aˬ yaw ̭-euˬ jah-eu jeˬ baˬ da neh Miˬyehˇ aˬ yaw ̭-ahˇ yaw tsaˬ yaw dawˇ tsawˇ haˬ lehˇ ha geu ̭ nehˬ-euˬ meh" lehˇ, Jaˇli ̭ la ̭ k’oeˇ ehˇ taˬ-euˬ meh. ⁷ K’oeˇ miˇ neh, maˇ maˇ ni Aˬbyaˬhaˬ-euˬ zaˬ deuˬ uˆ deuˬ-aˬ, jah-eu jeˬ ahˇ-eu tsawˇ haˬ deuˬ meh lehˇ naw ma ̭ siˬ duˬ-eu tsaˬ meh. ⁸ Yuˇdaˆ tsawˇ haˬ maˬ ngeuˇ-eu deuˬ k’aw ̭ jah-eu baˬ da neh Miˬyehˇ-ahˇ tsaˬ leˇ tsahˇ leˇ nya ni Miˬyehˇ jahˇ teh ̭-a lehˇ, Jaˇli ̭ la ̭ k’oeˇ aˇ hu ba neh ehˇ taˬ-euˬ jaˆ-eu meh. K’oeˇ miˇ neh, Jaˇ li ̭ dawˬ kawˬ k’oeˇ Aˬbyaˬhaˬ-ahˇ Laˬ k’aˬ cehˇ-eu Guiˬ lahˬ dawˬ mehˬ-eu la ̭ k’oeˇ, "Nawˬ-ahˇ g’oe-awˇ tsawˇ jeuˬ dawˬ tawˆ lu ̭-ahˇ Miˬyehˇ guiˬ lahˬ bi ̭ teh ̭-a" lehˇ ehˇ taˬ-euˬ meh. ⁹ Aˬbyaˬhaˬ jah-euˬ baˬ da neh guiˬ lahˬ za-euˬ meh. K’oeˇ lo ̭-ehˇ duˇ ni, aˬ yaw ̭ lo ̭-ehˇ k’aˇ jah-eu tsawˇ haˬ dawˬ tawˆ lu ̭ guiˬ lahˬ za-eu meh. ¹⁰ Zahˇ dawˬ k’o ̭ dawˬ-ahˇ mˇ byah gaˇ g’oe g’oe-ehˇ deh ̭-eu tsawˇ haˬ deuˬ-aˬ, yaˬ k’ehˇ yaˬ-eu jeˬ-ahˇ ya daˬ-eu meh. Aˬ jeˬ miˇ neh ehˇ naˇ, "Zahˇ dawˬ k’o ̭ dawˬ sahˬ bo ̭ la ̭ k’oeˇ k’aˇ bo ̭ taˬ-euˬ yawˬ jeˬ na lu ̭-ahˇ aˬ myah lu ̭ maˬ byehˇ ni maˬ caw teh geu ̭-eu tsawˇ haˬ-aˬ, Miˬyehˇ neh yaˬ k’ehˇ yaˬ-euˬ jeˬ-ahˇ ya daˬ meh" lehˇ, Jaˇli ̭ la ̭ k’oeˇ ehˇ taˬ-euˬ meh. ¹¹ Nymˬ-mˇ poˆ jawˇ-aˬ, tsawˇ haˬ tiˬ g’aˬ-iˬ Zahˇ dawˬ k’o ̭ dawˬ-ahˇ g’oe-eu la ̭ k’oeˇ Miˬyehˇ-ahˇ maˬ tsaˬ maˬ tsahˇ leˇ nya-a lehˇ siˬ duˬ laˇ taˬ-euˬ meh. Aˬ jeˬ miˇ neh ehˇ naˇ, "Jah-eu baˬ da neh Miˬyehˇ-ahˇ tsaˬ leˇ tsahˇ leˇ-euˬ tsawˇ haˬ teh ̭-ehˇ ya deh ̭-eu meh" lehˇ, Jaˇli ̭ la ̭ k’oeˇ ehˇ taˬ-euˬ meh. ¹² Ehˇ k’aw ̭, Zahˇ dawˬ k’o ̭ dawˬ-aˬ, jah-eu jeˬ-ahˇ tiˬ paw ̭-iˬ maˬ ta ̭-a. Aˬ jeˬ miˇ neh ehˇ naˇ, "Zahˇ Dawˬ k’o ̭ dawˬ la ̭ k’oeˇ k’aˇ ehˇ taˬ-euˬ yawˬ jeˬ na lu ̭ mˇ byah-eu tsawˇ haˬ ya deh ̭ meh" lehˇ, Jaˇli ̭ la ̭ k’oeˇ ehˇ taˬ-euˬ meh. ¹³ Ehˇ k’aw ̭, aˬ dui g’aˇ duˬ yaˬ k’ehˇ yaˬ-eu jeˬ-ahˇ Ka li daˬ-awˇ, Zahˇ dawˬ k’o ̭ dawˬ neh aˬ dui k’oeˇ taˆ bi keuˆ le-euˬ yaˬ k’ehˇ yaˬ-eu jeˬ la ̭ k’oeˇ aˬ yaw ̭ aˬ dui-ahˇ ka k’o ̭ nehˬ la ̭-euˬ meh. Aˬ jeˬ miˇ neh ehˇ naˇ, "Aˇ bawˇ k’oeˇ taˆ k’aˇ pa ̭ g’eu seh ̭-euˬ tsawˇ haˬ-aˬ, Miˬyehˇ neh yaˬ k’ehˇ yaˬ nehˬ-euˬ jeˬ-ahˇ ya daˬ-euˬ tsawˇ haˬ meh" lehˇ, Jaˇ li ̭ la ̭ k’oeˇ ehˇ taˬ-euˬ meh. ¹⁴ Miˬyehˇ neh Aˬbyaˬhaˬ-ahˇ saˇ jaˇ dzaˬ taˬ-euˬ guiˬ lahˬ yaw dzahˇ k’oeˇ, Yeˬsuˇ Ka li-ahˇ g’oe-awˇ Yuˇdaˆ tsawˇ haˬ maˬ ngeuˇ-eu deuˬ-ahˇ bi ̭ nehˬ nya ni, Ka li k’oeˇ lo ̭-ehˇ kamˇ shiˇ-euˬ meh. K’oeˇ-aˬ, Miˬyehˇ neh aˬ dui-ahˇ bi ̭ ma lehˇ saˇ jaˇ dzaˬ taˬ-euˬ Yaw sahˇ Miˬyehˇ-ahˇ, jah-eu jeˬ ba da neh aˬ dui za nya ni mˇ-euˬ jeˬ pyeu ̭-eu meh. ¹⁵ Aˬ yui ̭ aˬ nyiˇ Ka li zaˬ deuˬ-oˇ, yawˬ nah na lu ̭ ya puˬ ya mawˇ lu ̭-eu gaˇ kawˆ yaw jeˬ ma jeˬ tiˬ hmˬ ngaˇ ehˇ-eu ma. Tsawˇ haˬ nyiˬ g’aˬ yaw kaˬ gaˇ kawˆ tiˬ jeˬ na-ahˇ ta ̭ leˇ-awˇ saˇ jaˇ dzaˬ-eu la ̭ k’oeˇ sahˬ bo ̭ bo ̭ tsehˆ g’aˬ naˇ, tiˬ g’aˬ-iˬ maˬ paˇ laˆ pyaˆ nya-eu uˬ ta ̭, dawˬ tiˬ dawˬ-iˬ maˬ paˇ dawˆ lahˬ nya meh. ¹⁶ Miˬyehˇ-aˬ, Aˬbyaˬhaˬ hawˇ-eu aˬ yaw ̭-euˬ zaˬ-ahˇ saˇ jaˇ dzaˬ-euˬ meh. Jaˇli ̭ la ̭ k’oeˇ Aˬbyaˬhaˬ-euˬ "zaˬ deuˬ uˆ deuˬ" lehˇ maˬ ehˇ taˬ-aˬ. K’oeˇ miˇ neh tsawˇ haˬ g’awˬ mya ni-ahˇ saˇ jaˇ dzaˬ-euˬ lehˇ ehˇ maw ̭-eu maˬ ngeuˇ-a. Aˬbyaˬhaˬ-euˬ "zaˬ" lehˇ, tiˬ g’aˬ-ahˇ teh ̭-ehˇ ehˇ taˬ-euˬ meh. Ka li tiˬ g’aˬ-ahˇ teh ̭-ehˇ saˇ jaˇ dzaˬ-euˬ gaˇ ehˇ maw ̭-eu meh. ¹⁷ Ngaˇ ehˇ maw ̭-eu-aˬ, heu lo ̭-ehˇ ma. Aˬbyaˬhaˬ nehˬ-ehˇ Miˬyehˇ dawˬ ma saˇ jaˇ dzaˬ-euˬ meh. K’oeˇ sawˇ miˇ tsa oeˬ yaˇ smˬ tseˇ k’o ̭ g’eh-awˇ neh hawˇ-eu bi ̭ le ̭-euˬ Zahˇ dawˬ k’o ̭ dawˬ k’oeˇ-aˬ, Miˬyehˇ neh dzaˬ taˬ-euˬ saˇ jaˇ k’oeˇ-ahˇ maˬ laˆ pyaˆ nya-a. ¹⁸ Miˬyehˇ neh bi ̭-euˬ jeˬ biˇ-aˬ, Zahˇ dawˬ k’o ̭ dawˬ-ahˇ ta ̭-eu jeˬ pyeu ̭-eu ngeuˇ naˇ, aˬ yaw ̭ neh saˇ jaˇ dzaˬ taˬ-eu gaˇ ta ̭ leˇ-eu jeˬ maˬ paˇ ngeuˇ meh. Ehˇ k’aw ̭, Miˬyehˇ neh dzaˬ taˬ-euˬ saˇ jaˇ baˬ da neh jeˬ biˇ k’oeˇ Aˬbyaˬhaˬ-ahˇ Miˬyehˇ bi ̭-euˬ meh. ¹⁹ Toˆ-ehˇ ngeuˇ naˇ, Zahˇ dawˬ k’o ̭ dawˬ k’oeˇ aˬ jeˬ-euˬ g’aˇ duˬ pyeu ̭ ta. K’oeˇ-aˬ, mˇ lehˬ-euˬ jeˬ-ahˇ bi siˬ nya-eu g’aˇ duˬ bi ̭ lahˬ la ̭-euˬ jeˬ pyeu ̭-awˇ, Miˬyehˇ neh saˇ jaˇ dzaˬ taˬ-euˬ g’aˬ pyeu ̭-eu Aˬbyaˬhaˬ-euˬ zaˬ k’oeˇ g’aˬ oe keuˆ ngeh keuˆ ni bi zmˬ-eu g’aˇ duˬ bi ̭ taˬ-euˬ jeˬ pyeu ̭-eu meh. Zahˇ dawˬ k’o ̭ dawˬ-aˬ, mˬ taˆ g’aˬ k’ehˇ neh hehˇ ka le ̭-awˇ, tsawˇ kaˬ tiˬ g’aˬ-ahˇ neh tiˬ tiˆ bi ̭ nehˬ le-euˬ jeˬ pyeu ̭-eu meh. ²⁰ Ehˇ k’aw ̭, tiˬ g’aˬ-ahˇ teh ̭-ehˇ ta ̭-eu jeˬ ngeuˇ naˇ, tsawˇ kaˬ maˬ loˬ-a. Miˬyehˇ-aˬ, tiˬ g’aˬ teh ̭ meh. ²¹ Toˆ-ehˇ ngeuˇ naˇ, Zahˇ dawˬ k’o ̭ dawˬ k’oeˇ Miˬyehˇ neh dzaˬ taˬ-euˬ saˇ jaˇ-ahˇ laˆ cawˆ ta loˇ. Maˬ ngeuˇ-a. Aˬ jeˬ miˇ neh ehˇ naˇ, deh ̭-eu jeˬ bi ̭ la ̭ nya-eu zahˇ dawˬ k’o ̭ dawˬ-ahˇ tsawˇ haˬ zaˬ deuˬ za taˬ-euˬ ngeuˇ naˇ, zahˇ dawˬ k’o ̭ dawˬ k’oeˇ-ahˇ mˇ byah-eu la ̭ k’oeˇ Miˬyehˇ-ahˇ tsaˬ leˇ tsahˇ leˇ nya teh ̭-a. ²² Ehˇ k’aw ̭, miˇ tsaˬ heu dawˬ tawˆ lu ̭ iˬ baˇ uˆ lahˇ-eu uˬ moˆ jawˇ lu ̭-eu meh lehˇ Jaˇli ̭ la ̭ k’oeˇ ehˇ taˬ-euˬ meh. K’oeˇ miˇ neh, Yeˬsuˇ Ka li-ahˇ jah-eu deuˬ-ahˇ bi ̭ ma lehˇ ehˇ taˬ-euˬ la ̭ sawˬ k’oeˇ-aˬ, jah-eu tsawˇ haˬ deuˬ-ahˇ bi ̭-euˬ meh. ²³ Ehˇ k’aw ̭, jah-eu jeˬ maˬ keuˆ le nmˇ kaˬ, keuˆ le lu ̭-eu jah-eu jeˬ k’oeˇ-ahˇ maˬ pah mehˬ nehˬ la ̭ k’oeˇ keuˆ ni, Zahˇ dawˬ k’o ̭ dawˬ neh aˬ dui-ahˇ piˬ lahˇ taˬ-euˬ meh. ²⁴ Jah-eu jeˬ baˬ da neh Miˬyehˇ-ahˇ aˬ dui bi tsaˬ bi dzoeˇ leˇ nya-eu g’aˇ duˬ Ka li maˬ oe keuˆ k’oeˇ keuˆ ni, Zahˇ dawˬ k’o ̭ dawˬ k’oeˇ aˬ dui-ahˇ haw piˇ tawˬ-euˬ meh. ²⁵ Nymˬ-mˇ-aˬ, jah-eu jeˬ-euˬ aˇ yamˬ keuˆ le-euˬ miˇ neh, Zahˇ dawˬ k’o ̭ dawˬ k’oeˇ aˬ dui-ahˇ maˬ paˇ haw piˇ meh. ²⁶ Jah-eu jeˬ baˬ da neh, naw ma ̭ dawˬ tawˆ lu ̭ Yeˬsuˇ Ka li la ̭ k’oeˇ Miˬyehˇ-euˬ zaˬ pyeu ̭-eu meh. ²⁷ Naw ma ̭ Ka li la ̭ k’oeˇ iˇ cu ̭ k’aˇ shawˇ-euˬ deuˬ-aˬ, mehˬ tsoeˬ dm-eu lo ̭-ehˇ Ka li-ahˇ dm taˬ-euˬ gaˇ duˇ meh. ²⁸ K’oeˇ miˇ neh, Yuˇdaˆ tsawˇ haˬ hawˇ-eu Yuˇdaˆ tsawˇ haˬ maˬ ngeuˇ-eu deuˬ maˬ ehˇ, zaˬ k’aˆ hawˇ-eu buˬ-iˇ-euˬ tsawˇ haˬ maˬ ehˇ, k’aˬ dzeˇ zaˬ hawˇ-eu zaˬ miˬ zaˬ maˬ ehˇ, tiˬ paw ̭-iˬ maˬ paˇ beu meh. Aˬ jeˬ miˇ neh ehˇ naˇ, Yeˬsuˇ Ka li la ̭ k’oeˇ, naw ma ̭ dawˬ tawˆ lu ̭ tiˬ kawˆ meh. ²⁹ Naw ma ̭ Ka li-euˬ tsawˇ haˬ ngeuˇ naˇ, Aˬbyaˬhaˬ-euˬ zaˬ deuˬ uˆ deuˬ lehˇ sawˇ nya-eu miˇ neh, Miˬyehˇ neh saˇ jaˇ dzaˬ taˬ-euˬ jeˬ biˇ za teh ̭-a.

¹ Ngaˇ ehˇ maw ̭-eu-aˬ, heu lo ̭-ehˇ ma. Aˬ da-euˬ jeˬ biˇ o ̭-eu aˬ li tiˬ g’aˬ-aˬ, yawˬ jeˬ na lu ̭ aˬ yaw ̭-euˬ pyeu ̭-eu k’aw ̭, aˬ yaw ̭ zaˬ yaw nyiˇ pyeu ̭ ngeh, zaˬ k’aˆ tiˬ g’aˬ lo ̭-ehˇ ya deh ̭ tawˬ-eu meh. ² Aˬ da g’aˬ neh ehˇ taˬ-euˬ aˇ yamˬ maˬ keuˆ laˇ k’oeˇ keuˆ ni, aˬ yaw ̭-ahˇ bo saˆ-eu deuˬ hawˇ-eu aˬ yaw ̭-euˬ gaˇ mˇ dah nehˬ-eu deuˬ ya bi jawˇ-eu meh. ³ K’oeˇ lo ̭-ehˇ duˇ ni, aˬ dui guiˬ lahˬ sa ̭ laˇ paw tsawˇ k’aˆ maˬ k’aˆ laˇ k’oeˇ keuˆ ni, boeˬ boeˬ luˆ luˆ-ahˇ uˆ lahˇ lu ̭-eu yaw sahˇ deuˬ-euˬ la ̭ oˆ zaˬ k’aˆ ya geu ̭-eu meh. ⁴ Ehˇ k’aw ̭, aˇ yamˬ tsaˬ laˇ ngeh jawˇ, Miˬyehˇ neh aˬ yaw ̭-euˬ Zaˬmaˇ-ahˇ bi oe-euˬ meh. Zaˬ miˬ zaˬ-euˬ uˬ maˆ la ̭ k’oeˇ neh deh ̭ doˆ le-awˇ, Yuˇdaˆ tsawˇ haˬ-euˬ Zahˇ dawˬ k’o ̭ dawˬ uˬ moˆ jawˇ-euˬ meh. ⁵ Aˬ dui Miˬyehˇ-euˬ za pyeu ̭ laˇ nya ni, Zahˇ dawˬ k’o ̭ dawˬ uˬ moˆ deh ̭ lu ̭-eu tsawˇ haˬ deuˬ-ahˇ ka k’o ̭-eu g’aˇ duˬ, aˬ yaw ̭ k’oeˇ lo ̭-ehˇ deh ̭ le-euˬ meh. ⁶ Naw ma ̭ Miˬyehˇ-euˬ zaˬ pyeu ̭-eu gaˇ kawˆ bi siˬ bi mawˇ-eu g’aˇ duˬ, "Aˬ da-oˇ, ngaˬ Da-oˇ" lehˇ aˬ dui-ahˇ bi guˇ la ̭-euˬ aˬ yaw ̭-euˬ Zaˬmaˇ-euˬ Yaw sahˇ k’oeˇ, aˬ dui-euˬ nui ma la ̭ k’oeˇ Miˬyehˇ neh bi uˇ le-euˬ meh. ⁷ K’oeˇ Miˇ neh, naw ma ̭-aˬ, zaˬ k’aˆ maˬ paˇ ngeuˇ meh. Aˬ li pyeu ̭ laˇ-euˬ meh. Aˬ li pyeu ̭-eu miˇ neh, Miˬyehˇ-euˬ jeˬ biˇ o ̭-eu tsawˇ haˬ meh. ⁸ Dzeuˇ laˇ ngeh, naw ma ̭ Miˬyehˇ-ahˇ maˬ siˬ nya k’oeˇ keuˆ ni, Miˬyehˇ maˬ ngeuˇ-eu yaw sahˇ deuˬ-euˬ zaˬ k’aˆ geu ̭-euˬ meh. ⁹ Nymˬ-mˇ poˆ jawˇ-aˬ, naw ma ̭ Miˬyehˇ-ahˇ siˬ nya laˇ-euˬ meh. Maˬ ngeuˇ naˇ, Miˬyehˇ naw ma ̭-ahˇ siˬ nya-euˬ meh lehˇ k’aw ̭ ehˇ-awˬ. G’aˬ baˬ dui dui-awˇ tiˬ jeˬ-iˬ maˬ jahˇ nya-eu yaw sahˇ k’oeˇ deuˬ jawˇ paw naw ma ̭ aˬ joˆ-ehˇ paˇ g’o ̭ pyawˇ-iˇ maw ̭-eu nya. Aˬ jeˬ miˇ neh aˬ yaw ̭ ma ̭-euˬ zaˬ k’aˆ paˇ geu ̭ poˆ maw ̭-eu nya. ¹⁰ Aˇ nah aˇ yamˬ, aˇ k’o ̭ aˇ la to ̭-awˇ taˬ huiˬ-eu la ̭ k’oeˇ, naw ma ̭ lah-eu daw-eu meh. ¹¹ Naw ma ̭ g’aˇ duˬ ngaˬ neh k’aˇ mˇ k’aˇ shaˇ-euˬ jeˬ yaw ̭ ngeh ̭-ehˇ pyeu ̭ jiˇ gaˇ k’ahˬ lahˇ dui dui nya. ¹² Aˬ yui ̭ aˬ nyiˇ Ka li zaˬ deuˬ-oˇ, ngaˇ naw ma ̭ lo ̭-ehˇ pyeu ̭ laˇ-euˬ miˇ neh, naw ma ̭ ngaˬ lo ̭-ehˇ pyeu ̭ laˇ-awˬ lehˇ shaˇ-eu ma. Naw ma ̭ neh ngaˬ-ahˇ mˇ lehˬ taˬ-euˬ tiˬ jeˬ-iˬ maˬ jaˆ-a. ¹³ Ngaˇ naw ma ̭-ahˇ Laˬ k’aˬ cehˇ-eu Guiˬ lahˬ dawˬ mehˬ beh beh ngeh poˆ, aˬ jeˬ miˇ neh mehˬ-euˬ gaˇ kawˆ-ahˇ paˇ noeˬ mawˇ haw sheˇ. Ngaˇ naˇ-eu miˇ neh mehˬ-euˬ maˬ ngeuˇ-a loˇ. ¹⁴ Ngaˇ naˇ-eu baˬ da neh naw ma ̭ ya shaˬ dui dui-euˬ k’aw ̭, naw ma ̭ ngaˬ-ahˇ maˬ byehˇ dzeh nehˬ la ̭-euˬ uˬ ta ̭, yehˬ bawˬ-ehˇ maˬ g’eh nehˬ la ̭-aˬ. Mˬ taˆ g’aˬ k’ehˇ-ahˇ ha-eu lo ̭-ehˇ ha nehˬ la ̭-euˬ meh. Yeˬsuˇ Ka li-ahˇ ha-eu lo ̭-ehˇ ha nehˬ la ̭-euˬ meh. ¹⁵ K’oeˇ ngeh naw ma ̭ laˬ k’aˬ cehˇ dui dui-euˬ meh. Nymˬ-mˇ aˬ jeˬ paˇ pyeu ̭-iˇ teˬ. K’oeˇ ngeh naw ma ̭-euˬ myaˆ nuiˆ k’eu ̭ doˆ-awˇ ngaˬ-ahˇ dawˆ tso ̭ nehˬ la ̭ nya law nmˇ-aˬ, naw ma ̭ k’oeˇ lo ̭-ehˇ dawˆ tso ̭ nehˬ la ̭ maw ̭-eu nui ma ahˇ meh lehˇ ngaˇ ehˇ tsehˆ nya ma. ¹⁶ Nymˬ-mˇ ngaˇ naw ma ̭-ahˇ yaw tsaˬ yaw dawˇ jeˬ ehˇ nehˬ-euˬ miˇ neh, ngaˇ naw ma ̭-ahˇ muiˇ-eu tsawˇ haˬ pyeu ̭ shaw taˬ loˇ. ¹⁷ Tsawˇ haˬ k’oeˇ deuˬ naw ma ̭ g’aˇ duˬ nui ma keuˆ gaˇ duˇ-eu meh. Ehˇ k’aw ̭, nui maˬ la ̭ k’oeˇ k’oeˇ lo ̭-ehˇ maˬ ngeuˇ-a. Naw ma ̭ hawˇ-eu aˬ yaw ̭ ma ̭ tiˬ gaˇ ta ̭ leˇ nya ni, naw ma ̭ ngaˬ nehˬ-ehˇ g’awˬ-iˇ gaˇ aˬ yaw ̭ ma ̭ geu ̭ maw ̭-eu meh. ¹⁸ Ngaˇ naw ma ̭ nehˬ-ehˇ jawˇ ngeh teh ̭-ehˇ maˬ ngeuˇ ni, yawˬ jawˇ na lu ̭ yaw muiˬ jeˬ-ahˇ naw ma ̭ nui ma keuˆ naˇ, muiˬ dui dui teh ̭-a. ¹⁹ Ngaˇ gaˬ-eu ngaˬ-euˬ zaˬ deuˬ-oˇ, Ka li-euˬ aˇ g’ehˇ naw ma ̭ la ̭ k’oeˇ ahˇ laˇ ni, zaˬ baw lu ̭-eu aˬ ma tiˬ g’aˬ uˬ maˆ naˇ-eu shaˬ-eu lo ̭-ehˇ naw ma ̭ g’aˇ duˬ ngaˇ shaˬ zahˬ mˇ-eu maˬ tsehˆ leˇ nya. ²⁰ Nymˬ-mˇ ngaˇ naw ma ̭ nehˬ-ehˇ jawˇ maw ̭ dui dui nya. Ngaˇ nui ma yawˬ siˬ yawˬ paˇ-awˇ, naw ma ̭-ahˇ nahˬ yu ni mehˬ maw ̭ tsoˆ maw ̭ dui dui nya. Naw ma ̭ g’aˇ duˬ ngaˇ k’ahˬ lahˇ dui dui nya. ²¹ Naw ma ̭ la ̭ k’oeˇ, Zahˇ dawˬ k’o ̭ dawˬ uˬ moˆ jawˇ maw ̭-eu deuˬ-ahˇ ngaˇ heu lo ̭-ehˇ naˇ haˬ maw ̭-eu ma. Zahˇ dawˬ k’o ̭ dawˬ naw ma ̭-ahˇ aˬ joˆ-ehˇ ehˇ lu ̭-eu naw ma ̭-ahˇ gaˬ laˇ miˇ-a loˇ. ²² Zahˇ dawˬ k’o ̭ dawˬ la ̭ k’oeˇ ehˇ taˬ-euˬ-aˬ, Aˬbyaˬhaˬ aˬ li nyiˬ li jawˇ-eu meh. Tiˬ li-aˬ, zaˬ k’aˆ pyeu ̭-eu miˬ zaˬ g’aˬ o neh deh ̭ le-awˇ, tiˬ li-aˬ, zaˬ k’aˆ maˬ ngeuˇ-eu miˬ zaˬ g’aˬ o neh deh ̭ le-euˬ meh. ²³ Zaˬ k’aˆ g’aˬ o neh deh ̭ le-euˬ aˬ li k’oeˇ li-aˬ, aˬ cawˬ k’aˇ deh ̭ le-euˬ lo ̭-ehˇ deh ̭ le-euˬ meh. Ehˇ k’aw ̭, zaˬ k’aˆ maˬ ngeuˇ-eu g’aˬ o neh deh ̭ le-euˬ k’oeˇ li-aˬ, Miˬyehˇ neh saˇ jaˇ dzaˬ taˬ-euˬ baˬ da neh deh ̭ le-euˬ meh. ²⁴ Gaˇ kawˆ heu-aˬ, dawˬ tsui ̭ na ̭-awˇ dzaw geu ̭ paˬ-ehˇ g’eh-eu gaˇ kawˆ tiˬ hmˬ meh. Zaˬ miˬ zaˬ k’oeˇ nyiˬ g’aˬ-aˬ, dawˬ ma saˇ jaˇ nyiˬ jeˬ-ahˇ ehˇ maw ̭-eu meh. Zaˬ k’aˆ bi geu ̭-eu zaˬ deuˬ baw-euˬ g’aˬ-aˬ, Haˬgaˬlaˇ meh. Aˬ yaw ̭-aˬ, Siˇnaˆ gawˬ jawˬ-ahˇ dzaˬ-euˬ dawˬ ma saˇ jaˇ-euˬ dah zaˇ pyeu ̭-eu meh. ²⁵ Aˬleˬbyaˇ miˇ k’ahˬ-ahˇ jaˆ-eu Siˇnaˆ gawˬ jawˬ-euˬ dah zaˇ pyeu ̭-eu Haˬgaˬlaˇ-aˬ, iˬ nah jaˆ lu ̭-eu Yeˬluˇsaˬlehˬ meuˬ k’oeˇ meh. Meuˬ k’oeˇ meuˬ hawˇ-eu k’oeˇ gaˇ jawˇ-eu tsawˇ haˬ dawˬ tawˆ lu ̭, zaˬ k’aˆ pyeu ̭ lu ̭-eu meh. ²⁶ Ehˇ k’aw ̭, mˬ taˆ-euˬ Yeˬluˇsaˬlehˬ meuˬ-aˬ, buˬ-iˇ-euˬ meuˬ pyeu ̭-eu meh. Meuˬ k’oeˇ meuˬ-aˬ, aˬ dui-euˬ aˬ ma pyeu ̭-eu meh. ²⁷ Aˬ jeˬ miˇ neh ehˇ naˇ, Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "Zaˬ maˬ jawˇ-eu aˬ ma deuˬ-oˇ, naw ma ̭ laˬ k’aˬ cehˇ dui dui-awˬ. Zaˬ baw-eu uˬ maˆ naˇ naˇ-ehˇ, maˬ shaˬ haw-euˬ aˬ ma deuˬ-oˇ, laˬ k’aˬ cehˇ-awˇ guˇ dui dui-awˬ. Aˬ jeˬ miˇ neh ehˇ naˇ, k’aˬ dzeˇ zaˬ neh bi k’o ̭-euˬ deuˬ, k’aˬ dzeˇ zaˬ baw-eu deuˬ maˬ tseˇ, zaˬ g’awˬ mya ni jawˇ le teh ̭-a." ²⁸ Aˬ yui ̭ aˬ nyiˇ Ka li zaˬ deuˬ-oˇ, naw ma ̭-aˬ, Iˇtsaˆ lo ̭-ehˇ Miˬyehˇ neh saˇ jaˇ dzaˬ taˬ-euˬ miˇ neh deh ̭ le-euˬ Miˬyehˇ-euˬ zaˬ deuˬ pyeu ̭-eu meh. ²⁹ K’oeˇ ngeh yamˬ-ahˇ, aˬ cawˬ k’aˇ deh ̭ le-eu lo ̭-ehˇ deh ̭ le-euˬ g’aˬ-aˬ, Miˬyehˇ-euˬ Yaw sahˇ baˬ da neh deh ̭ le-euˬ g’aˬ-ahˇ k’ehˬ-euˬ meh. Nymˬ-mˇ k’aw ̭, k’oeˇ lo ̭-ehˇ pyeu ̭ lu ̭-eu meh. ³⁰ Ehˇ k’aw ̭, Jaˇli ̭ la ̭ k’oeˇ ehˇ taˬ-euˬ heu lo ̭-ehˇ jaˆ-eu meh. "Zaˬ miˬ zaˬ zaˬ k’aˆ k’oeˇ g’aˬ hawˇ-eu aˬ yaw ̭-euˬ aˬ li-ahˇ teh dzeh-awˬ. Aˬ jeˬ miˇ neh ehˇ naˇ, zaˬ miˬ zaˬ zaˬ k’aˆ o neh deh ̭ le-euˬ aˬ li-aˬ, zaˬ k’aˆ maˬ ngeuˇ-eu zaˬ miˬ zaˬ g’aˬ o neh deh ̭ le-euˬ aˬ li lo ̭-ehˇ jeˬ biˇ maˬ o ̭-a." ³¹ Aˬ yui ̭ aˬ nyiˇ Ka li zaˬ deuˬ-oˇ, aˬ dui-aˬ, zaˬ miˬ zaˬ zaˬ k’aˆ o neh deh ̭ le-euˬ zaˬ deuˬ maˬ ngeuˇ. Zaˬ k’aˆ maˬ ngeuˇ-eu zaˬ miˬ zaˬ g’aˬ o neh deh ̭ le-euˬ zaˬ deuˬ ma.

¹ Aˬ dui buˬ-iˇ-euˬ tsawˇ haˬ pyeu ̭ laˇ ni, Ka li neh aˬ dui-ahˇ bi buˬ-iˇ la ̭-euˬ meh. K’oeˇ miˇ neh, buˬ-iˇ-euˬ tsawˇ haˬ lo ̭-ehˇ zi ̭ dah ni jawˇ-awˬ. Zaˬ k’aˆ taˬ paˇ geu ̭. ² Ngaˇ Pawˇluˆ heu lo ̭-ehˇ ehˇ-eu ma. Naw ma ̭ baˆ k’oˆ mehˬ dzaˬ yehˬ naˇ, naw ma ̭ g’aˇ duˬ Ka li gaˇ dahˇ maˬ paˇ tsoeˬ meh. ³ Ngaˇ tiˬ poˆ paˇ ehˇ nehˬ nyaˇ. Baˆ k’oˆ mehˬ dzaˬ k’aˇ yehˬ-euˬ tsawˇ haˬ-aˬ, Zahˇ dawˬ k’o ̭ dawˬ dawˬ tawˆ lu ̭-ahˇ ya mˇ byah meh. ⁴ Naw ma ̭ Zahˇ dawˬ k’o ̭ dawˬ-ahˇ mˇ byah-eu la ̭ k’oeˇ Miˬyehˇ-ahˇ tsaˬ leˇ tsahˇ leˇ ni leh jeh-eu tsawˇ haˬ deuˬ-aˬ, Ka li-ahˇ maˬ paˇ ta ̭-ehˇ, Miˬyehˇ g’awˬ shaˬ gaˬ-eu guiˬ lahˬ-euˬ la ̭ nyiˇ paw jawˇ-eu tsawˇ haˬ deuˬ pyeu ̭-eu meh. ⁵ Nga ma ̭ law nmˇ-aˬ, nga ma ̭-euˬ jah-eu jeˬ la ̭ k’oeˇ Yaw sahˇ Miˬyehˇ-euˬ baoˬ gaˇ mˇ-eu baˬ da neh Miˬyehˇ-ahˇ tsaˬ leˇ tsahˇ leˇ nya gaˇ noeˬ tmˬ k’aˇ za ma. ⁶ Aˬ jeˬ miˇ neh ehˇ naˇ, Yeˬsuˇ Ka li la ̭ k’oeˇ jawˇ-eu tsawˇ haˬ deuˬ g’aˇ duˬ, baˆ k’oˆ mehˬ dzaˬ yehˬ-euˬ hawˇ-eu maˬ yehˬ-euˬ tiˬ paw ̭-iˬ beu gaˇ duˬ maˬ jaˆ-a. G’oeˇ-eu gaˬ-eu jeˬ mˇ doˆ shaˇ doˆ la ̭ nya-eu jah-eu k’oeˇ tiˬ jeˬ teh ̭-ehˇ gaˇ dahˇ tsoeˬ-eu jeˬ pyeu ̭-eu meh. ⁷ Dzeuˇ laˇ ngeh naw ma ̭ yaw muiˬ paˬ-ehˇ mˇ lu ̭ shaˇ lu ̭-eu meh. Yaw tsaˬ yaw dawˇ jeˬ-ahˇ naw ma ̭ maˬ naˇ haˬ geu ̭ ni aˬ suˇ g’aˬ laˆ tsoeˬ-euˬ ta. ⁸ K’oeˇ-aˬ, naw ma ̭-ahˇ kuˇ-euˬ g’aˬ pyeu ̭-eu Miˬyehˇ neh mˇ-euˬ jeˬ maˬ ngeuˇ-a. ⁹ "Cehˇ meu tiˬ tsmˇ tsmˇ lah-ehˇ bi poˬ laˇ-eu g’aˇ duˬ dehˬ tseˬ ui cuiˆ teh ̭-ehˇ ya dawˆ-eu meh" lehˇ ehˇ taˬ-euˬ meh. ¹⁰ Ehˇ k’aw ̭, naw ma ̭-ahˇ ngaˇ jah coeˇ-eu nui ma ahˇ te siˬ. Aˬ dui-aˬ, Sahˬpaˬ Yeˬsuˇ la ̭ k’oeˇ jawˇ lu ̭-eu miˇ neh, ngaˇ jah-eu jeˬ-ahˇ naw ma ̭ maˬ jah ni yawˬ paw yawˬ maˬ iˇ pyawˇ-aˇ lehˇ ngaˇ siˬ nya ma. Ehˇ k’aw ̭, naw ma ̭-ahˇ laˆ shaˬ-eu tsawˇ haˬ aˬ geu g’aˬ maˬ kaˬ, Miˬyehˇ neh k’ehˬ nehˬ k’aˆ nehˬ-euˬ jeˬ-ahˇ ya daˬ teh ̭-a. ¹¹ Ehˇ k’aw ̭ aˬ yui ̭ aˬ nyiˇ Ka li zaˬ deuˬ-oˇ, baˆ k’oˆ mehˬ dzaˬ ya yehˬ meh lehˇ ngaˇ mehˬ-euˬ law nmˇ-aˬ, k’ehˬ-eu k’aˆ-eu jeˬ-ahˇ ya daˬ nmˇ loˇ. Ngaˇ k’oeˇ lo ̭-ehˇ mehˬ-euˬ law nmˇ-aˬ, Ka li-euˬ la ̭ ya ̭ gaˇ kawˆ mehˬ-eu jeˬ-ahˇ ta ̭ leˇ-awˇ aˬ cawˬ sahˬ ti ̭ ti ̭ paˬ-ehˇ g’eh-eu jeˬ maˬ paˇ jaˆ-aˇ. ¹² Naw ma ̭-ahˇ laˆ shaˬ-eu tsawˇ haˬ k’oeˇ deuˬ bi iˇ byoˆ jiˇ maw ̭ miˇ-a. Aˬ yaw ̭ ma ̭ yawˬ haˇ yawˬ ha shaw ̭ lu ̭-uˇ. ¹³ Aˬ yui ̭ aˬ nyiˇ Ka li zaˬ deuˬ-oˇ, naw ma ̭-aˬ, bi buˬ-iˇ-eu g’aˇ duˬ kuˇ doˆ g’aˬ-euˬ tsawˇ haˬ meh. Ehˇ k’aw ̭, buˬ-iˇ-euˬ k’oeˇ-aˬ, naw ma ̭-euˬ shiˬ shaˬ jiˇ nui loˆ mˇ-eu g’aˇ duˬ taˬ bi pyeu ̭. G’oeˇ-eu gaˬ-eu la ̭ k’oeˇ tiˬ g’aˬ tiˇ g’aˬ ngehˬ g’eh-awˬ. ¹⁴ Aˬ jeˬ miˇ neh ehˇ naˇ, Zahˇ dawˬ k’o ̭ dawˬ dawˬ tawˆ lu ̭, "Yawˬ haˇ yawˬ ha gaˬ-eu lo ̭-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ" lehˇ ehˇ-eu dawˬ k’oeˇ dawˬ la ̭ k’oeˇ byah laˇ jiˇ-euˬ meh. ¹⁵ Ehˇ k’aw ̭, naw ma ̭ bawˇ tsahˬ jeˬ zaˬ yaw haiˬ deuˬ lo ̭-ehˇ tiˬ g’aˬ tiˇ g’aˬ coeˬ leˇ naˇ leˇ-eu jeˬ jahˇ lu ̭ naˇ, haw taˬ-awˬ, tiˬ g’aˬ tiˇ g’aˬ puiˆ byoˆ le ̭ teh ̭-a. ¹⁶ Ngaˇ ehˇ maw ̭-eu-aˬ, heu lo ̭-ehˇ ma. Yaw sahˇ Miˬyehˇ sheuˬ g’eh-eu mehˬ nah caw teh-awˬ. Shiˬ shaˬ jiˇ nui k’ahˇ mehˬ nah taˬ iˇ. ¹⁷ Aˬ jeˬ miˇ neh ehˇ naˇ, shiˬ shaˬ jiˇ nui k’ahˇ-aˬ, Yaw sahˇ Miˬyehˇ-ahˇ maˬ tsaˬ leˇ-ehˇ, Yaw sahˇ Miˬyehˇ k’aw ̭, shiˬ shaˬ jiˇ nui k’ahˇ-ahˇ maˬ tsaˬ leˇ-a. Heu nyiˬ jeˬ-aˬ, tiˬ jeˬ tiˇ jeˬ muiˇ-eu miˇ neh, naw ma ̭ yawˬ ha mˇ maw ̭-eu jeˬ maˬ mˇ nya-a. ¹⁸ Yaw sahˇ Miˬyehˇ sheuˬ g’eh-eu mehˬ nah naw ma ̭ caw teh naˇ, Zahˇ dawˬ k’o ̭ dawˬ-euˬ uˬ moˆ naw ma ̭ maˬ paˇ jawˇ meh. ¹⁹ Shiˬ shaˬ jiˇ nui k’ahˇ neh mˇ-euˬ gaˇ deuˬ-aˬ, heu lo ̭-ehˇ bya cehˆ ni mawˇ laˇ-eu meh. K’aˬ miˬ sheu-eu, maˬ muiˬ maˬ shawˇ-eu, maˬ tsaˬ maˬ dawˇ-eu la ̭ k’oeˇ yu ̭ ta ̭ joe ta ̭-eu, ²⁰ tahˬ pahˬ aˬ ma mawˇ kawˇ-ahˇ uˬ duˬ tahˬ-eu, maw loˬ ja maw-ahˇ g’oe-eu, tiˬ g’aˬ tiˇ g’aˬ muiˇ-eu, daw ̭-eu ceh-eu, mehˇ juiˇ juiˇ-eu, nui ma pehˇ-eu, yawˬ ha g’aˇ duˬ teh ̭-ehˇ shaˇ noeˬ-eu, g’awˬ-iˇ g’ehˇ-iˇ-eu, aˇ muˇ muˇ paˆ-eu nui ma ahˇ-eu, ²¹ myaˆ naˆ-eu, dzaˬ yeh ̭ dawˇ yeh ̭-eu, maˬ tsaˬ maˬ dawˇ-eu bawˬ-iˬ g’eh-eu, heu lo ̭-ehˇ g’eh-eu deuˬ mˇ doˆ la ̭-eu meh. K’oeˇ lo ̭-ehˇ deh ̭-eu tsawˇ haˬ deuˬ-aˬ, Miˬyehˇ Miˇ k’ahˬ-ahˇ maˬ ya uˇ lehˇ-a lehˇ dzeuˇ laˇ ngeh ngaˬ neh naw ma ̭-ahˇ ehˇ-euˬ lo ̭-ehˇ, nymˬ-mˇ k’aw ̭ tiˬ poˆ paˇ ehˇ-eu ma. ²² Ehˇ k’aw ̭, Yaw sahˇ Miˬyehˇ la ̭ k’oeˇ siˬ le-eu aˇ siˬ deuˬ-aˬ, g’oeˇ-eu gaˬ-eu, laˬ k’aˬ cehˇ-eu, nui saˇ o ̭-eu, nui ma g’awˬ mahˇ ni taˬ-eu, g’awˬ shaˬ gaˬ-eu nui ma ahˇ-eu, yaw muiˬ jeˬ mˇ-eu, saˇ jaˇ zi ̭-eu, ²³ nui nahˬ nui yu ahˇ-eu, yawˬ ha-euˬ nui ma-ahˇ g’aˬ leˇ-eu, heu deuˬ meh. Heu deuˬ-ahˇ laˆ tsoeˬ-eu zahˇ dawˬ k’o ̭ dawˬ tiˬ dawˬ-iˬ maˬ jaˆ-a. ²⁴ Yeˬsuˇ Ka li-ahˇ ta ̭-eu tsawˇ haˬ deuˬ-aˬ, shiˬ shaˬ jiˇ nui k’ahˇ hawˇ-eu shiˬ shaˬ jiˇ-euˬ nui noeˬ nui loˆ dawˬ tawˆ lu ̭-ahˇ laˆ seh ̭ jiˇ-euˬ meh. ²⁵ Aˬ dui Yaw sahˇ Miˬyehˇ-ahˇ g’oe-awˇ deh ̭ lu ̭-eu ngeuˇ naˇ, Yaw sahˇ Miˬyehˇ-ahˇ g’oe-awˇ mehˬ hu paw cah g’eh kaˇ-euˇ. ²⁶ Nui ma huiˬ-eu jeˬ, tiˬ g’aˬ tiˇ g’aˬ ceh cawˬ cawˬ-eu jeˬ hawˇ-eu, tiˬ g’aˬ tiˇ g’aˬ myaˆ naˆ-eu jeˬ-ahˇ byehˇ dzeh jiˇ kaˇ-euˇ.

¹ Aˬ yui ̭ aˬ nyiˇ Ka li zaˬ deuˬ-oˇ, tsawˇ haˬ tiˬ g’aˬ na mˇ lehˬ naˇ, naw ma ̭ la ̭ k’oeˇ guiˬ lahˬ sa ̭ laˇ paw g’aˬ k’aˆ-eu deuˬ aˬ yaw ̭-ahˇ ciˬ tuˇ nehˬ-eu tsaˬ meh. Ehˇ k’aw ̭, nui nahˬ nui yu ahˇ-eu la ̭ k’oeˇ ciˬ tuˇ nehˬ-awˬ. Yawˬ ha k’aw ̭, muˇ juˇ juˇ-eu mehˬ nah maˬ ya caw teh g’eh ni yahˇ-awˬ. ² Tiˬ g’aˬ tiˇ g’aˬ k’aˆ behˆ caw pi-eu la ̭ k’oeˇ, Ka li-euˬ zahˇ dawˬ k’o ̭ dawˬ-ahˇ mˇ byah-awˬ. ³ Tsawˇ haˬ tiˬ g’aˬ na, tiˬ jeˬ-iˬ maˬ mˇ maˬ shaˇ nya k’aw ̭ maˬ gaˇ ma lehˇ noeˬ naˇ, yawˬ haˇ yawˬ ha jaˬ myaw ̭ myaw ̭ gaˇ duˇ-eu meh. ⁴ Yawˬ g’aˬ na lu ̭ yawˬ ha aˬ joˆ-ehˇ mˇ lu ̭ shaˇ lu ̭-eu gaˇ kawˆ shaˇ noeˬ-eu tsaˬ meh. Yawˬ ha yaw muiˬ jeˬ mˇ-euˬ miˇ neh k’ahˬ sehˇ jehˆ maw ̭ naˇ, aˬ cawˬ neh mˇ taˬ-euˬ jeˬ-ahˇ ciˬ cehˆ maˬ cehˆ ni jehˆ-eu tsaˬ meh. ⁵ Aˬ jeˬ miˇ neh ehˇ naˇ, tsawˇ haˬ yawˬ g’aˬ na lu ̭ yawˬ ha ya pi-eu k’aˆ behˆ yawˬ ha jaˆ meh. ⁶ Miˬyehˇ dawˬ kawˬ dzaw lu ̭-eu tsawˇ haˬ-aˬ, yawˬ ha k’aˇ jaˆ-eu yaw muiˬ jeˬ dawˬ tawˆ lu ̭ yawˬ ha-ahˇ mehˬ nehˬ la ̭-eu g’aˬ-ahˇ biˇ nehˬ-eu tsaˬ meh. ⁷ Naw ma ̭ taˬ noeˬ lehˬ. Tsawˇ haˬ tiˬ g’aˬ-iˬ Miˬyehˇ-ahˇ maˬ myaw ̭ dzeuˇ nya-a. Yawˬ ha neh k’aˇ sehˬ-euˬ jeˬ yawˬ ha ya yehˬ-eu meh. ⁸ Shiˬ shaˬ jiˇ nui k’ahˇ-ahˇ ta ̭-eu siˬ yoeˬ sehˬ naˇ, shiˇ-eu jeˬ ya yehˬ teh ̭-a. Yaw sahˇ Miˬyehˇ-ahˇ ta ̭-eu siˬ yoeˬ sehˬ naˇ, mˬ maˬ maˬ byaˆ zaˇ ziˇ deh ̭-eu jeˬ ya yehˬ teh ̭-a. ⁹ K’oeˇ miˇ neh, g’aˬ byehˆ maˬ byehˆ ni yaw muiˬ jeˬ mˇ kaˇ-euˇ. Aˬ dui nui ma maˬ cawˆ naˇ, aˇ yamˬ keuˆ laˇ ngeh ya yehˬ teh ̭-a. ¹⁰ K’oeˇ miˇ neh, k’aˇ yeh ̭ laˇ ngeh tsawˇ haˬ yawˬ g’aˬ na lu ̭-ahˇ yaw muiˬ jeˬ mˇ nehˬ kaˇ-euˇ. Jah-eu jeˬ la ̭ k’oeˇ aˬ dui-euˬ aˬ yui ̭ aˬ nyiˇ pyeu ̭-eu deuˬ-ahˇ, aˬ cawˬ-ahˇ naˆ maˬ tseˇ yaw muiˬ jeˬ mˇ nehˬ kaˇ-euˇ. ¹¹ Ngaˬ-euˬ aˬ la ̭ neh naw ma ̭-ahˇ bo ̭ nehˬ-euˬ sahˬ bo ̭ aˇ mawˇ heu deuˬ aˇ naˆ ni huiˬ gaˇ haw sheˇ. ¹² Naw ma ̭-ahˇ baˆ k’oˆ mehˬ dzaˬ bi yehˬ-eu lehˇ ciˬ tehˬ lu ̭-eu tsawˇ haˬ k’oeˇ deuˬ-aˬ, la ̭ nyiˇ paw teh ̭-ehˇ yaw muiˬ jahˇ geu ̭-awˇ, k’ahˬ sehˇ jehˆ-eu tsawˇ haˬ deuˬ meh. Ka li-euˬ la ̭ ya ̭ baˬ da neh k’ehˬ-eu k’aˆ-eu jeˬ-ahˇ maˬ ya daˬ ni, aˬ yaw ̭ ma ̭ k’oeˇ lo ̭-ehˇ mˇ nya-eu jeˬ pyeu ̭-eu meh. ¹³ Baˆ k’oˆ mehˬ dzaˬ yehˬ-euˬ tsawˇ haˬ deuˬ k’aw ̭, Zahˇ dawˬ k’o ̭ dawˬ mehˬ nah maˬ caw teh-a. Shiˬ shaˬ jiˇ g’awˇ mawˇ-ahˇ ta ̭-eu zahˇ heu hmˬ-ahˇ naw ma ̭ mˇ ni aˬ yaw ̭ ma ̭ jahˇ nya ma lehˇ k’ahˬ sehˇ jehˆ maw ̭-eu miˇ neh, naw ma ̭-ahˇ baˆ k’oˆ mehˬ dzaˬ bi yehˬ maw ̭-eu meh. ¹⁴ Ngaˇ teh ̭ law nmˇ-aˬ, aˬ dui-euˬ Sahˬpaˬ Yeˬsuˇ Ka li-euˬ la ̭ ya ̭ gaˇ kawˆ teh ̭-ehˇ k’ahˬ sehˇ jehˆ ma. La ̭ ya ̭ baˬ da neh, miˇ tsaˬ heu-ahˇ ta ̭-eu jeˬ ngaˬ-euˬ g’aˇ duˬ yaw shiˇ-ahˇ duˇ-awˇ, ngaˇ k’aw ̭ miˇ tsaˬ-ahˇ ta ̭-eu jeˬ-euˬ g’aˇ duˬ yaw shiˇ-ahˇ duˇ-eu ma. ¹⁵ Baˆ k’oˆ mehˬ dzaˬ yehˬ-euˬ maˬ ehˇ, maˬ yehˬ-euˬ maˬ ehˇ, huiˬ-eu gaˇ kawˆ maˬ ngeuˇ-a. Tsawˇ haˬ yaw shui ̭ pyeu ̭ laˇ-eu teh ̭-ehˇ huiˬ dui dui-eu gaˇ kawˆ pyeu ̭-eu meh., ¹⁶ Yaw deh ̭ deh ̭ ngeh zahˇ sahˇ k’o ̭ heu hmˬ mehˬ nah k’aˇ caw teh-eu tsawˇ haˬ deuˬ k’oeˇ taˆ, nui saˇ o ̭-eu jeˬ hawˇ-eu Miˬyehˇ-euˬ g’awˬ shaˬ gaˬ-eu guiˬ lahˬ jaˆ lu ̭-uˇ. Aˬ yaw ̭ ma ̭ hawˇ-eu Miˬyehˇ-euˬ tsawˇ haˬ dawˬ tawˆ lu ̭ k’oeˇ taˆ jaˆ lu ̭-uˇ. ¹⁷ Aˇ saˬ saˬ-eu dawˬ heu lo ̭-ehˇ ehˇ-eu ma. Iˬ nah ta ̭ naˇ, tsawˇ haˬ tiˬ g’aˬ-iˬ ngaˬ-ahˇ taˬ paˇ laˆ suˬ saˬ nehˬ la ̭. Aˬ jeˬ miˇ neh ehˇ naˇ, ngaˬ-euˬ g’awˇ mawˇ k’oeˇ taˆ daˬ lu ̭-eu aˬ cawˬ neh bi k’ehˬ-euˬ maˇ byaw ̭ heu deuˬ-aˬ, ngaˇ Yeˬsuˇ-euˬ zaˬ k’aˆ meh lehˇ saˇ kiˇ kamˬ lu ̭ meh. ¹⁸ Aˬ yui ̭ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw ma ̭ k’oeˇ taˆ jaˆ lu ̭-uˇ. Aˬ miˬ.