EˇPEˇSU

EˇPEˇSU

¹ Miˬyehˇ nui ma tsaˬ-eu miˇ neh Yeˬsuˇ Ka li-euˬ g’aˬ k’ehˇ ya geu ̭ lu ̭-eu ngaˇ Pawˇluˆ, Yeˬsuˇ Ka li la ̭ k’oeˇ saˇ jaˇ zi ̭-eu Eˇpeˇsu meuˬ-ahˇ jawˇ-eu Miˬyehˇ-euˬ tsawˇ haˬ deuˬ jawˇ gaˇ sahˬ bo ̭ bo ̭ ahˇ le ̭-eu ma. ² Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ o ̭-eu jeˬ, naw ma ̭ k’oeˇ taˆ keuˆ le lu ̭-uˇ. ³ Aˬ dui-euˬ Sahˬpaˬ Yeˬsuˇ Ka liˬeuˬ Aˬda pyeu ̭-eu Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Aˬ jeˬ miˇ neh ehˇ naˇ, mˬ taˆ miˇ k’ahˬ-ahˇ jaˆ-eu sa ̭ laˇ paw-euˬ guiˬ lahˬ yawˬ jeˬ na lu ̭, Yeˬsuˇ Ka li la ̭ k’oeˇ aˬ dui-ahˇ aˬ yaw ̭ bi ̭ la ̭-euˬ meh. ⁴ Miˬyehˇ-euˬ mehˬ shi aˬ dui muiˬ-awˇ shawˇ-awˇ, iˬ baˇ taˬ k’aˇ maˬ bi za-eu g’aˇ duˬ, miˇ tsaˬ tahˬ k’awˇ heu maˬ beh mi naˆ-ehˇ Yeˬsuˇ Ka li la ̭ k’oeˇ Miˬyehˇ neh aˬ dui-ahˇ tseˇ doˆ taˬ-euˬ meh. ⁵ Miˬyehˇ aˬ dui-ahˇ gaˬ-eu miˇ neh, Yeˬsuˇ Ka li-ahˇ g’oe-awˇ aˬ dui-ahˇ aˬ yaw ̭-euˬ zaˬ deuˬ bi pyeu ̭ laˇ-eu g’aˇ duˬ noeˬ tsehˆ taˬ-euˬ meh. K’oeˇ lo ̭-ehˇ bi pyeu ̭ laˇ-eu g’aˇ duˬ aˬ yaw ̭ laˬ k’aˬ cehˇ-awˇ noeˬ tmˬ taˬ-euˬ meh. ⁶ Aˬ yaw ̭-euˬ huiˬ dui muiˬ dui dui-eu g’awˬ shaˬ gaˬ-eu guiˬ lahˬ k’oeˇ, aˬ yaw ̭ gaˬ dui dui-eu aˬ yaw ̭-euˬ Zaˬmaˇ la ̭ k’oeˇ aˬ dui-ahˇ bi ̭ la ̭-euˬ miˇ neh, Miˬyehˇ-ahˇ ja ceuˬ kaˇ-euˇ. ⁷ Aˬ jeˬ miˇ neh ehˇ naˇ, Ka li kamˇ shiˇ-euˬ baˬ da neh aˬ dui ya buˬ-iˇ-awˇ, aˬ dui-euˬ iˬ baˇ-ahˇ pyehˬ nehˬ la ̭-euˬ meh. Miˬyehˇ g’awˬ shaˬ gaˬ-eu guiˬ lahˬ k’oeˇ aˇ naˆ ni huiˬ-eu nga. ⁸ Aˬ yaw ̭ aˬ dui-ahˇ k’oeˇ myaˆ myaˆ-ehˇ bi ̭ nehˬ la ̭-euˬ meh. Miˬyehˇ-aˬ, aˬ yaw ̭-euˬ zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ-ahˇ g’oe-eu la ̭ k’oeˇ, ⁹ aˬ yaw ̭ neh noeˬ tmˬ taˬ-euˬ lo ̭-ehˇ Yeˬsuˇ Ka li-ahˇ g’oe-awˇ mˇ byah-eu g’aˇ duˬ lehˬ hmˬ taˬ-euˬ za ̭ taˬ-euˬ jeˬ, aˬ dui-ahˇ bi siˬ bi mawˇ la ̭-euˬ meh. ¹⁰ Aˇ yamˬ tsaˬ laˇ ngeh mˇ byah-eu g’aˇ duˬ Miˬyehˇ neh noeˬ tsehˆ-awˇ lehˬ hmˬ taˬ-euˬ gaˇ kawˆ k’oeˇ-aˬ, yawˬ jeˬ na lu ̭-euˬ uˬ duˬ pyeu ̭-eu Ka li-ahˇ mˬ hawˇ-eu miˇ k’oeˇ taˆ k’aˇ beh taˬ-euˬ jeˬ dawˬ tawˆ lu ̭ bi gaw ̭ bi bawˆ leˇ-eu g’aˇ duˬ pyeu ̭-eu meh. ¹¹ Dawˬ tawˆ lu ̭ Miˬyehˇ neh noeˬ tsehˆ-awˇ lehˬ hmˬ taˬ-euˬ lo ̭-ehˇ pyeu ̭ laˇ-euˬ meh. Aˇ dahˬ beh ngeh neh Miˬyehˇ noeˬ tsehˆ-awˇ lehˬ hmˬ taˬ-euˬ jaˆ-eu miˇ neh, Ka li la ̭ k’oeˇ aˬ yaw ̭-euˬ tsawˇ haˬ bi pyeu ̭ laˇ-eu g’aˇ duˬ aˬ dui -ahˇ tseˇ doˆ-euˬ meh. ¹² K’oeˇ miˇ neh, Ka li-ahˇ noeˬ tmˬ beh beh-euˬ deuˬ pyeu ̭-eu nga ma ̭-aˬ, Miˬyehˇ-euˬ yaw sheh ̭ k’ahˬ sehˇ-ahˇ ja ceuˬ-eu ma. ¹³ Naw ma ̭ k’aw ̭, naw ma ̭ jawˇ gaˇ ka k’o ̭-eu jeˬ bi keuˆ le-euˬ Laˬ k’aˬ cehˇ-eu Guiˬ lahˬ dawˬ pyeu ̭-eu yaw tsaˬ yaw dawˇ dawˬ-ahˇ ya gaˬ-awˇ, Miˬyehˇ-euˬ tsawˇ haˬ pyeu ̭ laˇ-euˬ meh. Naw ma ̭ Ka li-ahˇ jah-awˇ, Miˬyehˇ neh saˇ jaˇ dzaˬ taˬ-euˬ lo ̭-ehˇ Muiˬ-eu Shawˇ-eu Yaw sahˇ Miˬyehˇ bi oe-eu la ̭ k’oeˇ, aˬ yaw ̭-euˬ tsawˇ haˬ bi pyeu ̭ tsehˆ-eu g’aˇ duˬ naw ma ̭-ahˇ jmˬ diˬ taˬ-euˬ meh. ¹⁴ Yaw sahˇ Miˬyehˇ-aˬ, Miˬyehˇ neh aˬ yaw ̭-euˬ tsawˇ haˬ deuˬ-ahˇ saˇ jaˇ dzaˬ taˬ-euˬ jeˬ-ahˇ aˬ dui aˬ diˇ za-eu gaˇ kawˆ saˇ kiˇ pyeu ̭-awˇ, Miˬyehˇ aˬ yaw ̭-euˬ tsawˇ haˬ deuˬ-ahˇ tiˬ byah tiˬ lo ̭ bi buˬ bi law-iˇ teh ̭-a lehˇ aˬ dui-ahˇ bi siˬ duˬ la ̭-euˬ jeˬ pyeu ̭-eu meh. Aˬ yaw ̭-euˬ yaw sheh ̭ k’ahˬ sehˇ-ahˇ ja ceuˬ kaˇ-euˇ. ¹⁵ Heu baˬ da neh, sahˬ paˬ Yeˬsuˇ-ahˇ naw ma ̭ jah-eu gaˇ kawˆ hawˇ-eu Miˬyehˇ-euˬ tsawˇ haˬ dawˬ tawˆ lu ̭-ahˇ naw ma ̭ gaˬ-eu gaˇ kawˆ ngaˇ ya gaˬ ngeh, ¹⁶ naw ma ̭ g’aˇ duˬ Miˬyehˇ-euˬ guiˬ lahˬ-ahˇ maˬ naˬ leˇ ni ja ceuˬ lu ̭ ma. Ngaˇ guiˬ lahˬ shaˇ ngeh naw ma ̭ g’aˇ duˬ shaˇ-eu ma. ¹⁷ Naw ma ̭-ahˇ Yaw sahˇ Miˬyehˇ bi ̭ nehˬ-eu g’aˇ duˬ, baoˬ yaw sheh ̭ k’ahˬ sehˇ huiˬ-eu Aˬda pyeu ̭-eu aˬ duiˬ-euˬ Sahˬpaˬ Yeˬsuˇ Ka li-euˬ Miˬyehˇ-ahˇ ngaˇ shaˇ-eu ma. Naw ma ̭ Miˬyehˇ-ahˇ siˬ nya laˇ ni, yaw sahˇ Miˬyehˇ naw ma ̭-ahˇ zaˬ siˬ tsawˇ gahˇ bi ahˇ laˇ-awˇ, Miˬyehˇ gaˇ kawˆ pah mehˬ nehˬ la ̭ teh ̭-a. ¹⁸ Miˬyehˇ naw ma ̭-ahˇ kuˇ-euˬ miˇ neh naw ma ̭ aˬ jeˬ-ahˇ noeˬ tmˬ k’aˇ za-eu gaˇ kawˆ maˬ ehˇ, aˬ yaw ̭ neh aˬ yaw ̭-euˬ tsawˇ haˬ deuˬ-ahˇ bi ̭-eu lehˇ saˇ jaˇ dzaˬ taˬ-euˬ guiˬ lahˬ k’oeˇ deuˬ aˇ naˆ ni zahˬ leˇ paˬ-ehˇ g’eh-eu gaˇ kawˆ maˬ ehˇ, naw ma ̭ siˬ nya laˇ ni, naw ma ̭-euˬ nui ma-ahˇ pah nehˬ-awˇ aˬ yaw ̭-euˬ yaw sheh ̭-ahˇ bi mawˇ-eu g’aˇ duˬ shaˇ-eu ma. ¹⁹ Jah-eu tsawˇ haˬ pyeu ̭-eu aˬ dui-euˬ la ̭ k’oeˇ gaˇ mˇ lu ̭-eu aˬ yaw ̭-euˬ baoˬ aˇ naˆ ni huiˬ-eu gaˇ kawˆ naw ma ̭ siˬ nya laˇ ni shaˇ-eu ma. A dui la ̭ k’oeˇ gaˇ mˇ lu ̭-eu baoˬ k’oeˇ-aˬ, g’aˬ k’aˆ dui dui-eu baoˬ pyeu ̭-eu meh. ²⁰ Baoˬ k’oeˇ neh Ka li-ahˇ shiˇ-euˬ gaˇ bi g’o ̭ deh ̭ laˇ-awˇ, mˬ k’oeˇ taˆ miˇ k’ahˬ-ahˇ aˬ yaw ̭-euˬ aˇ maˇ paw bi nuiˇ-euˬ meh. ²¹ Mˬ k’oeˇ taˆ uˆ lahˇ lu ̭-eu deuˬ pyeu ̭-eu, uˆ lahˇ-eu deuˬ, sahˬ paˬ sahˬ ma deuˬ, baoˬ deuˬ hawˇ-eu, miˇ k’ah-ahˇ haw-eu pyaˆ-eu deuˬ dawˬ tawˆ lu ̭ k’oeˇ taˆ Ka li uˆ lahˇ-eu meh. Heu ziˇ maˬ ehˇ, aˬ kaˇ kaˇ ziˇ maˬ ehˇ, k’aˇ bi ̭ taˬ-euˬ tsawˇ myahˇ dawˬ tawˆ lu ̭ k’oeˇ taˆ huiˬ dzehˬ-eu tsawˇ myahˇ aˬ yaw ̭ jaˆ-eu meh. ²² Dawˬ tawˆ lu ̭ Miˬyehˇ neh Ka li-euˬ aˬ kuiˇ pehˬ zaˬ uˬ moˆ bi jaˆ-awˇ, Ka li zaˬ aˇ muˇ-euˬ g’aˇ duˬ aˬ yaw ̭-ahˇ dawˬ tawˆ lu ̭ k’oeˇ taˆ uˬ duˬ bi geu ̭-euˬ meh. ²³ Ka li zaˬ aˇ muˇ-aˬ, Ka li tiˬ byah ni jawˇ-eu Ka li-euˬ g’awˇ mawˇ meh. Ka li-aˬ, yawˬ jeˬ na lu ̭-ahˇ yawˬ gaˇ na lu ̭ bi byah laˇ-eu g’aˬ meh.

¹ Dzeuˇ laˇ ngeh naw ma ̭ Miˬyehˇ-euˬ dawˬ-ahˇ maˬ naˇ haˬ-ehˇ iˬ baˇ mˇ-euˬ miˇ neh, guiˬ lahˬ sa ̭ laˇ paw shiˇ-euˬ gaˇ duˇ-eu meh. ² K’oeˇ ngeh, miˇ tsaˬ heu-ahˇ ta ̭-eu maˬ muiˬ maˬ jaˬ-eu jeˬ mehˬ nah naw ma ̭ caw teh-awˇ, mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ-euˬ mehˬ nah caw teh-euˬ meh. Yaw sahˇ k’oeˇ-aˬ, nymˬ-mˇ Miˬyehˇ-euˬ dawˬ-ahˇ maˬ naˇ haˬ-eu deuˬ-ahˇ uˆ lahˇ lu ̭-eu meh. ³ Aˬ dui dawˬ tawˆ lu ̭ k’aw ̭, aˬ yaw ̭ ma ̭ lo ̭-ehˇ shiˬ shaˬ jiˇ-euˬ nui k’ahˇ mehˬ nah deh ̭ dzeuˇ ya ̭-awˇ, aˬ dui-euˬ nui ma g’awˇ mawˇ k’aˇ loˆ laˇ-euˬ jeˬ mˇ-euˬ ma. Aˬ dui-aˬ, miˇ tsaˬ zaˬ k’aˇ ngeuˇ-eu ngeuˇ-awˇ, Miˬyehˇ nui ma pehˇ-eu jeˬ-ahˇ ya daˬ-eu yaw duˬ baw-euˬ ma. ⁴ Ehˇ k’aw ̭, Miˬyehˇ g’awˬ shaˬ gaˬ-eu jeˬ myaˬ dui dui-awˇ, aˬ yaw ̭-euˬ g’oeˇ-eu gaˬ-eu jeˬ huiˬ dui dui-eu meh. ⁵ K’oeˇ miˇ neh, aˬ dui Miˬyehˇ-euˬ ehˇ dawˬ maˬ naˇ haˬ-ehˇ guiˬ lahˬ sa ̭ laˇ paw shiˇ lu ̭ ngeh, aˬ yaw ̭ aˬ dui-ahˇ Ka li nehˬ-ehˇ bi deh ̭ la ̭-euˬ meh. Naw ma ̭ ka k’o ̭-eu jeˬ za-euˬ k’oeˇ-aˬ, Miˬyehˇ g’awˬ shaˬ gaˬ-eu guiˬ lahˬ baˬ da neh meh. ⁶ Mˬ k’oeˇ taˆ jaˆ-eu miˇ k’ahˬ-ahˇ Yeˬsuˇ Ka li nehˬ-ehˇ aˬ dui ya uˆ lahˇ ni, Miˬyehˇ neh aˬ dui-ahˇ Ka li nehˬ-ehˇ bi g’o ̭ deh ̭ laˇ-euˬ meh. ⁷ Yeˬsuˇ Ka li la ̭ k’oeˇ Miˬyehˇ neh aˬ dui-ahˇ bi mawˇ la ̭-euˬ g’oeˇ-eu gaˬ-eu jeˬ la ̭ k’oeˇ ahˇ-eu maˬ ehˇ jiˇ coeˇ ni huiˬ-eu aˬ yaw ̭-euˬ guiˬ lahˬ yaw dzahˇ-ahˇ, aˬ kaˇ kaˇ ziˇ keuˆ ni a myah lu ̭ bi siˬ bi mawˇ-eu g’aˇ duˬ, Miˬyehˇ k’oeˇ lo ̭-ehˇ mˇ-euˬ jeˬ pyeu ̭-eu meh. ⁸ Aˬ jeˬ miˇ neh ehˇ naˇ, naw ma ̭ jah-eu la ̭ k’oeˇ Miˬyehˇ-euˬ guiˬ lahˬ yaw dzahˇ baˬ da neh ka k’o ̭-eu jeˬ za-euˬ meh. Naw ma ̭ leh jeh-awˇ mˇ-eu baˬ da neh za-euˬ maˬ ngeuˇ-a. Miˬyehˇ neh bi ̭-euˬ la ̭ sawˬ pyeu ̭-eu meh. ⁹ Naw ma ̭ mˇ-euˬ shaˇ-euˬ baˬ da neh za-euˬ maˬ ngeuˇ-a. K’oeˇ lo ̭-ehˇ ngeuˇ law nmˇ-aˬ, tsawˇ haˬ aˬ geu g’aˬ maˬ kaˬ, k’ahˬ sehˇ jehˆ k’aˇ za teh ̭-a. ¹⁰ Nymˬ-mˇ aˬ dui k’aˇ ngeuˇ-eu lo ̭-ehˇ Miˬyehˇ neh aˬ dui-ahˇ beh taˬ-euˬ meh. Aˬ yaw ̭ neh aˬ dui-ahˇ bi mˇ-eu lehˇ lehˬ hmˬ taˬ-euˬ yaw muiˬ jeˬ-ahˇ aˬ dui mˇ nya ni, Yeˬsuˇ Ka li la ̭ k’oeˇ aˬ dui-ahˇ beh taˬ-euˬ meh. ¹¹ K’oeˇ miˇ neh, deh ̭ le ngeh neh Yuˇdaˆ tsawˇ haˬ maˬ ngeuˇ-eu naw ma ̭-ahˇ, Yuˇdaˆ tsawˇ haˬ deuˬ neh "baˆ k’oˆ mehˬ dzaˬ maˬ yehˬ-euˬ tsawˇ haˬ" lehˇ bi kuˇ-awˇ, Yuˇdaˆ tsawˇ haˬ deuˬ yawˬ haˇ yawˬ ha "baˆ k’oˆ mehˬ dzaˬ yehˬ-euˬ tsawˇ haˬ deuˬ" lehˇ kuˇ-euˬ gaˇ taˬ ngehˇ. (Dawˬ k’oeˇ dawˬ-aˬ, tsawˇ haˬ zaˬ neh shiˬ shaˬ jiˇ g’awˇ mawˇ-ahˇ mˇ-euˬ jeˬ-ahˇ ehˇ maw ̭-eu meh.) ¹² K’oeˇ ngeh, naw ma ̭ Ka li-ahˇ maˬ ta ̭ leˇ-aˬ siˬ. Naw ma ̭-aˬ, aˬ cawˬ tsawˇ jeuˬ lo ̭-ehˇ pyeu ̭-awˇ, Miˬyehˇ neh tseˇ doˆ-euˬ tsawˇ jeuˬ la ̭ k’oeˇ maˬ ahˇ-a. Naw ma ̭-aˬ, Miˬyehˇ neh aˬ yaw ̭-euˬ tsawˇ haˬ deuˬ-ahˇ dzaˬ-euˬ dawˬ ma saˇ jaˇ-ahˇ maˬ ya ta ̭-ehˇ, miˇ tsaˬ heu k’oeˇ taˆ noeˬ tmˬ duˬ maˬ jaˆ-eu uˬ ta ̭, Miˬyehˇ maˬ baw ni deh ̭ ya ̭-euˬ meh. ¹³ Ehˇ k’aw ̭, nymˬ-mˇ-aˬ, Ka li shiˇ dah-euˬ baˬ da neh, gaˇ mahˇ kaˬ-eu tsawˇ haˬ pyeu ̭-eu naw ma ̭ Yeˬsuˇ Ka li la ̭ k’oeˇ dawˬ peh peh laˇ-euˬ meh. ¹⁴ Ehˇ k’aw ̭, tsaˬ leˇ dzoeˇ leˇ-eu jeˬ-ahˇ Ka li yuˇ le ̭-awˇ, Yuˇdaˆ tsawˇ haˬ hawˇ-eu aˬ cawˬ tsawˇ jeuˬ ta ̭ leˇ dzoeˇ leˇ nya ni aˬ yaw ̭ mˇ-euˬ meh. Tiˬ jeuˬ tiˇ jeuˬ muiˇ-eu kaˇ pyawˇ lawˆ kaˬ-ahˇ aˬ yaw ̭-euˬ g’awˇ mawˇ neh deh pyaˆ dzeh-euˬ meh. ¹⁵ Tsawˇ jeuˬ heu nyiˬ jeuˬ-ahˇ aˬ yaw ̭ la ̭ k’oeˇ tsawˇ jeuˬ yaw shui ̭ tiˬ jeuˬ teh ̭-ehˇ bi pyeu ̭ laˇ-eu g’aˇ duˬ, Yuˇdaˆ tsawˇ haˬ-euˬ Zahˇ dawˬ k’o ̭ dawˬ hawˇ-eu zahˇ sahˇ k’o ̭ deuˬ-ahˇ aˬ yaw ̭ laˆ byoˆ-euˬ meh. K’oeˇ lo ̭-ehˇ mˇ-awˇ, tsaˬ leˇ dzoeˇ leˇ-eu jeˬ bi keuˆ le-euˬ meh. ¹⁶ Ka li la ̭ ya ̭ k’oeˇ taˆ kamˇ shiˇ-awˇ, tiˬ jeuˬ tiˇ jeuˬ muiˇ-eu nui ma-ahˇ laˆ cawˆ-euˬ meh. La ̭ ya ̭ baˬ da neh tsawˇ jeuˬ nyiˬ jeuˬ-ahˇ tiˬ jeuˬ teh ̭-ehˇ bi pyeu ̭ laˇ-awˇ, tiˬ gm-ehˇ Miˬyehˇ jawˇ gaˇ sheuˬ k’o ̭ la ̭-euˬ meh. ¹⁷ Ka li oe-awˇ Miˬyehˇ-ahˇ gaˇ mahˇ kaˬ-eu naw ma ̭-ahˇ maˬ ehˇ, Miˬyehˇ-ahˇ peh-eu Yuˇdaˆ tsawˇ haˬ deuˬ-ahˇ maˬ ehˇ, tsaˬ leˇ dzoeˇ leˇ-eu Laˬ k’aˬ cehˇ-eu Guiˬ lahˬ dawˬ mehˬ le-euˬ meh. ¹⁸ Yuˇdaˆ tsawˇ haˬ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, aˬ dui dawˬ tawˆ lu ̭ nui ma tiˬ siˬ teh ̭-ehˇ taˬ-awˇ Miˬyehˇ jawˇ gaˇ jiˆ uˇ laˇ nya-eu heu-aˬ, Ka li baˬ da neh meh. ¹⁹ K’oeˇ miˇ neh, Yuˇdaˆ tsawˇ haˬ maˬ ngeuˇ-eu naw ma ̭-aˬ, boeˇ miˬ siˬ k’aˬ-ahˇ duˇ-eu aˬ cawˬ tsawˇ jeuˬ maˬ paˇ ngeuˇ meh. Miˬyehˇ-euˬ tsawˇ haˬ deuˬ nehˬ-ehˇ miˇ k’ahˬ aˬ yaw ̭ tiˬ k’ahˬ-ahˇ ta ̭-eu miˇ k’ahˬ zaˬ deuˬ pyeu ̭ laˇ-awˇ, Miˬyehˇ-euˬ nymˇ k’ahˬ zaˬ deuˬ pyeu ̭ laˇ-euˬ meh. ²⁰ Naw ma ̭ k’aw ̭, g’aˬ k’ehˇ deuˬ hawˇ-eu Miˬyehˇ g’aˇ duˬ ngehˬ dah-eu deuˬ neh gawˬ dahˬ beh taˬ-euˬ gaˇ gawˬ tsa ̭ daˆ le ̭-euˬ nymˇ pyeu ̭-awˇ, Yeˬsuˇ Ka li-aˬ, la ̭ coeˇ lo zi ̭ pyeu ̭-eu meh. ²¹ Aˬ yaw ̭-aˬ, nymˇ nymˇ lah-ehˇ tiˬ gaˇ g’eu taw ̭-awˇ, Sahˬpaˬ Miˬyehˇ-ahˇ a nehˬ-euˬ muiˬ-eu shawˇ-eu uˬ duˬ tahˬ nymˇ bi pyeu ̭ laˇ-euˬ k’aˬ lo tsaˬ byaˆ k’oeˇ siˬ pyeu ̭-eu meh. ²² Yaw sahˇ Miˬyehˇ-ahˇ g’oe-eu la ̭ k’oeˇ Miˬyehˇ jawˇ-eu jawˇ duˬ pyeu ̭ laˇ ni, naw ma ̭-ahˇ k’aw ̭ aˬ cawˬ nehˬ-ehˇ tiˬ kawˆ lo ̭-ehˇ Ka li la ̭ k’oeˇ bi gawˬ ahˇ lu ̭-eu meh.

¹ K’oeˇ baˬ da neh, naw ma ̭-euˬ g’aˇ duˬ Yeˬsuˇ Ka li-euˬ gaˇ mˇ-euˬ miˇ neh tawˬ-ahˇ ya uˇ-euˬ g’aˬ pyeu ̭-eu ngaˇ Pawˇluˆ, Miˬyehˇ-ahˇ guiˬ lahˬ shaˇ-eu ma. ² Miˬyehˇ g’awˬ shaˬ gaˬ-eu guiˬ lahˬ baˬ da neh naw ma ̭ g’aˇ duˬ muiˬ ni gaˇ heu hmˬ ngaˬ-ahˇ bi mˇ la ̭-euˬ gaˇ kawˆ, naw ma ̭ ya gaˬ duˬ taˬ-euˬ meh. ³ Miˬyehˇ-aˬ, aˬ yaw ̭ neh za ̭ taˬ-euˬ jeˬ ngaˬ-ahˇ pah mehˬ nehˬ la ̭-euˬ meh. Gaˇ kawˆ heu ngaˇ yaw nymˇ nymˇ-ehˇ bo ̭ taˬ-euˬ ma. ⁴ Naw ma ̭ gui haw ngeh, Ka li-euˬ gaˇ kawˆ za ̭ taˬ-euˬ jeˬ-ahˇ ngaˇ aˬ joˆ-ehˇ g’oˆ shaw taˬ-euˬ gaˇ kawˆ ya siˬ teh ̭-a. ⁵ Dzeuˇ laˇ ngeh, za ̭ taˬ-euˬ gaˇ kawˆ heu tsawˇ haˬ zaˬ-ahˇ maˬ bi siˬ-aˬ. Ehˇ k’aw ̭ nymˬ-mˇ-aˬ, Yaw sahˇ Miˬyehˇ-ahˇ g’oe-eu la ̭ k’oeˇ aˬ yaw ̭-euˬ muiˬ-eu shawˇ-eu g’aˬ k’ehˇ deuˬ hawˇ-eu Miˬyehˇ g’aˇ duˬ ngehˬ dah-eu deuˬ-ahˇ Miˬyehˇ pah mehˬ nehˬ-euˬ meh. ⁶ Za ̭ taˬ-euˬ k’oeˇ-aˬ, heu lo ̭-ehˇ meh. Laˬ k’aˬ cehˇ-eu guiˬ lahˬ dawˬ baˬ da neh, Yuˇdaˆ tsawˇ haˬ maˬ ngeuˇ-eu deuˬ k’aw ̭ Yuˇdaˆ tsawˇ haˬ deuˬ nehˬ-ehˇ tiˬ kawˆ lo ̭-ehˇ Miˬyehˇ-euˬ guiˬ lahˬ jeˬ biˇ o ̭-eu meh. Nyiˬ deuˬ lu ̭ g’awˇ mawˇ tiˬ mawˇ-ahˇ teh ̭-ehˇ ta ̭-eu aˇ sehˇ deuˬ pyeu ̭-awˇ, Yeˬsuˇ Ka li-ahˇ g’oe-awˇ Miˬyehˇ neh saˇ jaˇ dzaˬ taˬ-euˬ jeˬ tiˬ kawˆ lo ̭-ehˇ za-euˬ meh. ⁷ Laˬ k’aˬ cehˇ-eu Guiˬ lahˬ dawˬ mehˬ-eu gaˇ heu hmˬ-ahˇ mˇ-eu-aˬ, Miˬyehˇ neh la ̭ sawˬ bi ̭ la ̭-euˬ tiˬ jeˬ meh. Aˬ yaw ̭-euˬ baoˬ gaˇ mˇ-eu la ̭ k’oe, k’oeˇ lo ̭-ehˇ bi ̭ la ̭-euˬ meh. ⁸ Miˬyehˇ-euˬ tsawˇ haˬ deuˬ la ̭ k’oeˇ aˬ cawˬ ta ̭-ehˇ nyiˇ teˬ dzehˬ-eu g’aˬ ngaˇ ma. Ehˇ k’aw ̭, maˬ ehˇ jiˇ coeˇ gaˇ keuˆ ni byah dui ku ̭ dui dui-eu Ka li-euˬ guiˬ lahˬ gaˇ kawˆ aˬ cawˬ tsawˇ jeuˬ-ahˇ mehˬ-eu g’aˬ bi geu ̭ la ̭-euˬ meh. ⁹ K’oeˇ-aˬ, Miˬyehˇ neh lehˬ hmˬ taˬ-euˬ za ̭ taˬ-euˬ jeˬ-ahˇ tsawˇ haˬ dawˬ tawˆ lu ̭ bi mawˇ-eu g’aˇ duˬ meh. Dawˬ tawˆ lu ̭-ahˇ beh-euˬ Miˬyehˇ-aˬ, aˬ yaw ̭ neh za ̭ taˬ-euˬ jeˬ-ahˇ aˇ hu ba neh iˬ nah keuˆ ni dehˬ kaˬ taˬ-euˬ meh. ¹⁰ K’oeˇ lo ̭-ehˇ dehˬ kaˬ taˬ-euˬ k’oeˇ-aˬ, nymˬ-mˇ-euˬ aˇ yamˬ-ahˇ Ka li zaˬ aˇ muˇ-ahˇ g’oe-eu la ̭ k’oeˇ, mˬ k’oeˇ taˆ uˆ lahˇ lu ̭-eu mˬ taˆ g’aˬ k’ehˇ deuˬ hawˇ-eu baoˬ jaˆ-eu deuˬ-ahˇ Miˬyehˇ-euˬ zaˬ siˬ tsawˇ gahˇ g’awˬ mya jeˬ bi siˬ bi mawˇ-eu g’aˇ duˬ pyeu ̭-eu meh. ¹¹ Miˬyehˇ k’oeˇ lo ̭-ehˇ mˇ-eu k’oeˇ-aˬ, aˬ yaw ̭ neh mˬ maˬ maˬ byaˆ zaˇ ziˇ noeˬ tsehˆ taˬ-euˬ jeˬ pyeu ̭-awˇ, aˬ dui-euˬ Sahˬpaˬ Yeˬsuˇ Ka li la ̭ k’oeˇ bi byah laˇ-euˬ jeˬ pyeu ̭-eu meh. ¹² Ka liˬ-euˬ la ̭ k’oeˇ hawˇ-eu aˬ yaw ̭-ahˇ jah-eu la ̭ k’oeˇ aˬ dui nui ma zi ̭ dah ni taˬ-awˇ, Miˬyehˇ jawˇ gaˇ k’aˬ duˬ ni le uˇ peuˬ-eu ma. ¹³ K’oeˇ miˇ neh, naw ma ̭ nui ma taˬ baˬ lehˇ ngaˇ shaˇ-eu ma. Aˬ jeˬ miˇ neh ehˇ naˇ, ngaˇ ya daˬ lu ̭-eu heu-aˬ, naw ma ̭-euˬ g’aˇ duˬ ma. Naw ma ̭-euˬ yaw sheh ̭ k’ahˬ sehˇ g’aˇ duˬ daˬ lu ̭-eu ma. ¹⁴ K’oeˇ baˬ da neh, Aˬda-euˬ mehˬ shi ngaˇ pawˬ tsui ̭ pawˬ dmˬ dmˬ-awˇ guiˬ lahˬ shaˇ-eu ma. ¹⁵ Mˬ k’oeˇ taˆ k’aˇ jawˇ-eu tsawˇ paˬ tsawˇ ca deuˬ hawˇ-eu miˇ tsaˬ k’oeˇ taˆ k’aˇ jawˇ-eu tsawˇ jeuˬ tsawˇ ca dawˬ tawˆ lu ̭, aˬ yaw ̭ neh tsawˇ myahˇ bi ̭ taˬ-euˬ meh. ¹⁶ Naw ma ̭-euˬ nui ma la ̭ k’oeˇ g’aˬ bi ahˇ laˇ ni, Yaw sahˇ Miˬyehˇ-ahˇ g’oe-eu la ̭ k’oeˇ aˬ yaw ̭-euˬ byah dui ku ̭ dui dui-eu yaw sheh ̭ k’ahˬ sehˇ-euˬ baoˬ naw ma ̭-ahˇ bi ̭-eu g’aˇ duˬ Miˬyehˇ-ahˇ ngaˇ shaˇ-eu ma. ¹⁷ Naw ma ̭ jah-eu baˬ da neh naw ma ̭ la ̭ k’oeˇ Ka li jawˇ le ni ngaˇ guiˬ lahˬ shaˇ-eu ma. Naw ma ̭ g’oeˇ-eu gaˬ-eu jeˬ-ahˇ dawˬ pehˬ taˬ ni ngaˇ guiˬ lahˬ shaˇ-eu ma. ¹⁸ Ka li-euˬ g’oeˇ-eu gaˬ-eu jeˬ aˇ naˆ ni huiˬ, aˇ naˆ ni mahˇ-awˇ, aˇ naˆ ni na ̭, aˇ naˆ ni goˇ-eu gaˇ kawˆ, Miˬyehˇ-euˬ tsawˇ haˬ dawˬ tawˆ lu ̭ tiˬ kawˆ lo ̭-ehˇ naw ma ̭ g’oˆ shaw nya-eu baoˬ ahˇ laˇ ni ngaˇ shaˇ-eu ma. ¹⁹ Aˬ yaw ̭-euˬ g’oeˇ-eu gaˬ-eu jeˬ-aˬ, tiˬ byah tiˬ lo ̭ maˬ siˬ duˬ nya-eu jeˬ pyeu ̭-eu k’aw ̭, g’oeˇ-eu gaˬ-eu k’oeˇ-ahˇ naw ma ̭ siˬ nya laˇ-awˇ, Miˬyehˇ la ̭ k’oeˇ byah lu ̭-eu jeˬ naw ma ̭ la ̭ k’oeˇ byah laˇ lu ̭-uˇ. ²⁰ Aˬ dui maˬ noeˬ keuˆ maˬ shaˇ keuˆ nya gaˇ keuˆ ni, aˬ dui la ̭ k’oeˇ gaˇ mˇ lu ̭-eu aˬ yaw ̭-euˬ baoˬ-ahˇ g’oe-awˇ bi ̭ byah nehˬ la ̭ nya-eu g’aˬ pyeu ̭-eu ²¹ Miˬyehˇ-ahˇ, Ka li zaˬ aˇ muˇ la ̭ k’oeˇ maˬ ehˇ, Yeˬsuˇ ka li la ̭ k’oeˇ maˬ ehˇ, mˬ maˬ maˬ byaˆ zaˇ ziˇ aˬ myah lu ̭ yaw sheh ̭ k’ahˬ sehˇ huiˬ lu ̭-uˇ. Aˬ miˬ.

¹ Sahˬpaˬ Yeˬsuˇ-euˬ gaˇ mˇ-eu miˇ neh tawˬ-ahˇ ya uˇ-euˬ tsawˇ haˬ pyeu ̭-eu ngaˇ, naw ma ̭-ahˇ heu lo ̭-ehˇ shaˇ-eu ma. Miˬyehˇ naw ma ̭-ahˇ kuˇ ngeh aˬ yaw ̭ neh noeˬ taˬ-euˬ aˇ tiˆ k’oeˇ tiˆ-ahˇ deh ̭ keuˆ-awˬ. ² Aˬ myah lu ̭ nui nahˬ nui yu ahˇ-awˇ la ̭ o ̭ aw ̭-eu la ̭ k’oeˇ, nui ma g’awˬ mahˇ ni taˬ-awˬ. Goeˇ-eu gaˬ-eu la ̭ k’oeˇ tiˬ g’aˬ tiˇ g’aˬ oˇ-awˬ. ³ Naw ma ̭-ahˇ tsaˬ leˇ dzoeˇ leˇ-eu jeˬ neh gahˇ dzahˬ-eu la ̭ k’oeˇ, Yaw sahˇ Miˬyehˇ neh bi ̭-euˬ nui ma tiˬ siˬ teh ̭-ehˇ taˬ-eu jeˬ-ahˇ k’aˇ g’eh nya-eu lo ̭-ehˇ jeˬ hmˬ geu ̭-awˬ. ⁴ Miˬyehˇ naw ma ̭-ahˇ kuˇ-euˬ k’oeˇ noeˬ tmˬ duˬ tiˬ jeˬ teh ̭-ehˇ jaˆ-eu lo ̭-ehˇ, g’awˇ mawˇ tiˬ mawˇ teh ̭-ehˇ baw-awˇ, Yaw sahˇ Miˬyehˇ tiˬ g’aˬ teh ̭-ehˇ jawˇ-eu meh. ⁵ Sahˬpaˬ Miˬyehˇ tiˬ g’aˬ teh ̭-ehˇ jawˇ-awˇ, jah-eu tiˬ jeˬ teh ̭-ehˇ jaˆ-awˇ, iˇ cu ̭ shawˇ-eu tiˬ jeˬ teh ̭-ehˇ jaˆ-eu meh. ⁶ Tsawˇ jeuˬ dawˬ tawˆ lu ̭-euˬ Aˬda pyeu ̭-eu Miˬyehˇ tiˬ g’aˬ teh ̭-awˇ jawˇ-eu meh. Aˬ yaw ̭-aˬ, dawˬ tawˆ lu ̭ k’oeˇ taˆ Sahˬpaˬ pyeu ̭-awˇ, dawˬ tawˆ lu ̭ la ̭ k’oeˇ gaˇ mˇ-awˇ, dawˬ tawˆ lu ̭ la ̭ k’oeˇ jawˇ-eu meh. ⁷ Aˬ dui yawˬ g’aˬ na lu ̭ aˬ cawˬ-ahˇ maˬ duˇ-eu la ̭ sawˬ za taˬ-euˬ ma. K’oeˇ-aˬ, yawˬ ha-ahˇ k’aˇ geuˇ-eu lo ̭-ehˇ Ka li neh bi ̭ la ̭-euˬ meh. ⁸ Jaˇli ̭ la ̭ k’oeˇ heu lo ̭-ehˇ ehˇ taˬ-euˬ jaˆ-eu meh. "Aˬ yaw ̭ yaw goˇ-ahˇ daˆ leˇ ngeh, tsawˇ haˬ g’awˬ mya ni nyeh ̭ g’eh-awˇ, miˇ tsaˬ tsawˇ haˬ zaˬ-ahˇ, la ̭ sawˬ bi ̭ nehˬ-euˬ meh." ⁹ "Aˬ yaw ̭ daˆ leˇ-euˬ" lehˇ ehˇ-eu k’oeˇ, aˬ jeˬ-ahˇ ehˇ maw ̭ ta. Heu lo ̭-ehˇ ehˇ maw ̭-eu meh. Yaw beh miˇ tsaˬ heu-euˬ na ̭ dui dui-eu tsahˇ-ahˇ aˬ yaw ̭ oe ka-euˬ meh. ¹⁰ Za ̭ ka le-euˬ g’aˬ hawˇ-eu, mˬ miˇ dawˬ taw ̭ lu ̭-ahˇ jawˇ byah jiˇ-eu g’aˇ duˬ mˬ le dzeuˇ gaˇ keuˆ ni g’o ̭ daˇ leˇ-euˬ g’aˬ-aˬ, aˬ yaw ̭ tiˬ g’aˬ meh. ¹¹ "Miˇ tsaˬ zaˬ-ahˇ la ̭ sawˬ biˬ-euˬ" g’aˬ-aˬ, aˬ yaw ̭ meh. Tiˬ paˆ na deuˬ-ahˇ g’aˬ k’ehˇ bi geu ̭-awˇ, tiˬ paˆ na deuˬ-ahˇ Miˬyehˇ g’aˇ duˬ ngehˬ dah-eu tsawˇ haˬ bi geu ̭-eu g’aˇ duˬ maˬ ehˇ, tiˬ paˆ na deuˬ-ahˇ Laˬ k’aˬ cehˇ-eu Guiˬ lahˬ dawˬ mehˬ-eu tsawˇ haˬ bi geu ̭-eu g’aˇ duˬ maˬ ehˇ, tiˬ paˆ na deuˬ-ahˇ Ka li zaˬ aˇ muˇ-ahˇ sheuˬ g’eh-eu saˬ laˬ bi geu ̭-eu g’aˇ duˬ maˬ ehˇ, mehˬ-eu tsoˆ-eu saˬ laˬ bi geu ̭-eu g’aˇ duˬ maˬ ehˇ, aˬ yaw ̭ la ̭ sawˬ bi ̭-euˬ meh. ¹² Ka li-euˬ g’awˇ mawˇ huiˬ laˇ mahˇ laˇ ni Miˬyehˇ-euˬ gaˇ bi mˇ-eu g’aˇ duˬ, Miˬyehˇ-euˬ tsawˇ haˬ dawˬ tawˆ lu ̭-ahˇ lehˬ hmˬ laˆ saˆ dah nehˬ-eu lehˇ aˬ yaw ̭ k’oeˇ lo ̭-ehˇ la ̭ sawˬ bi ̭-euˬ meh. ¹³ Aˬ dui dawˬ tawˆ lu ̭, jah-eu jeˬ la ̭ k’oeˇ maˬ ehˇ, Miˬyehˇ-euˬ Zaˬmaˇ-ahˇ siˬ nya-eu jeˬ la ̭ k’oeˇ maˬ ehˇ, nui ma tiˬ siˬ teh ̭-ehˇ taˬ nya laˇ teh ̭-a. Jah-eu jeˬ la ̭ k’oeˇ aˬ dui tsawˇ k’aˆ k’aˆ laˇ-awˇ, Ka li byah-eu lo ̭-ehˇ aˬ dui k’aw ̭ byah laˇ teh ̭-a. ¹⁴ K’oeˇ ngeh jawˇ aˬ dui-aˬ, jah-eu jeˬ la ̭ k’oeˇ zaˬ lo ̭-ehˇ maˬ paˇ pyeu ̭-ehˇ, aˬ cawˬ-ahˇ tsawˇ gahˇ gahˇ-awˇ gaˇ ma sheuˬ bahˬ nehˬ-eu tsawˇ haˬ deuˬ-euˬ mehˇ shuiˇ jaˬ lehˇ baw laˇ ngeh, aˬ dui-ahˇ maˬ baw poˆ maˬ baw laˆ nya-aˇ. ¹⁵ G’oeˇ-eu gaˬ-eu nui ma ahˇ-eu la ̭ k’oeˇ yaw tsaˬ yaw dawˇ jeˬ ngehˬ-awˇ, aˬ dui-euˬ uˬ duˬ pyeu ̭-eu Ka li la ̭ k’oeˇ yawˬ jeˬ na lu ̭ ya bi huiˬ ya bi mahˇ laˇ teh ̭-a. ¹⁶ Uˬ duˬ k’oeˇ siˬ uˆ lahˇ-eu uˬ moˆ g’awˇ mawˇ aˇ sehˇ dawˬ tawˆ lu ̭ tiˬ gaˇ tsaˬ leˇ-awˇ, uˬ duˬ-ahˇ g’aˬ yuˇ taˬ-euˬ yoeˬ tsui ̭ yoeˬ la ̭ deuˬ neh tiˬ sehˇ tiˇ sehˇ tso ̭ tsa ̭ jiˇ taˬ-euˬ meh. Aˇ sehˇ aˬ yaw ̭ sehˇ yaw ̭ yawˬ ha-euˬ gaˇ mˇ ngeh, g’awˇ mawˇ mawˇ lah-ehˇ huiˬ laˇ-awˇ, g’oeˇ-eu gaˬ-eu jeˬ la ̭ k’oeˇ g’aˬ k’aˆ dzehˬ laˇ-eu meh. ¹⁷ Lawˇ ci ̭ zaˬ lo ̭-ehˇ taˬ paˇ deh ̭ lehˇ, Sahˬ paˬ Yeˬsuˇ-euˬ tsawˇ myahˇ uˬ moˆ ngaˇ naw ma ̭-ahˇ yaw k’aˆ k’aˆ-ehˇ ehˇ-eu ma. Aˬ yaw ̭ ma ̭-euˬ nui noeˬ gaˇ dahˇ maˬ tsoeˬ-a. ¹⁸ Aˬ yaw ̭ ma ̭-euˬ nui ma zahˇ tsui ni g’eh-eu meh. Aˬ yaw ̭ ma ̭ tiˬ jeˬ-iˬ maˬ siˬ nya-eu uˬ ta ̭, nui ma g’ahˇ-eu miˇ neh, Miˬyehˇ neh bi ̭-euˬ yaw deh ̭ deh ̭-eu jeˬ-ahˇ tiˬ paw ̭-iˬ maˬ ta ̭-a. ¹⁹ Aˬ yaw ̭ ma ̭ sha ̭ dawˇ nya-eu nui ma byoˆ-iˇ jiˇ-awˇ, maˬ tsaˬ maˬ dawˇ-eu la ̭ k’oeˇ k’aˬ miˬ sheu-eu jeˬ mˇ-eu g’aˇ duˬ g’awˇ mawˇ a nehˬ g’aˬ-awˇ, jaw ̭ dui dui-eu jeˬ dawˬ tawˆ lu ̭-ahˇ nui k’ahˇ tiˬ shiˇ mˇ-eu meh. ²⁰ Naw ma ̭ Ka li-ahˇ dzaw geu ̭-euˬ-aˬ, k’oeˇ lo ̭-ehˇ mˇ-eu g’aˇ duˬ maˬ ngeuˇ-a. ²¹ Naw ma ̭ aˬ yaw ̭ gaˇ Kawˆ ya gaˬ duˬ g’aˬ-awˇ, aˬ yaw ̭-euˬ mehˬ nah caw teh-eu tsawˇ haˬ pyeu ̭-eu lo ̭-ehˇ, Yeˬsuˇ la ̭ k’oeˇ ahˇ-eu yaw tsaˬ yaw dawˇ jeˬ gaˇ kawˆ aˬ cawˬ naw ma ̭-ahˇ mehˬ g’aˬ-euˬ meh. ²² Nawˬ-ahˇ gaˇ ma bi deh ̭ bahˬ-eu jeˬ-ahˇ mˇ maw ̭-eu nui k’ahˇ jaˆ ni nawˬ-ahˇ mehˇ shuiˇ shuiˇ-eu yaw deh ̭ deh ̭-eu yaw oeˇ k’oeˇ hmˬ-ahˇ lehˆ dzeh-awˬ. ²³ Guiˬ lahˬ sa ̭ laˇ paw naw ma ̭-euˬ nui ma yaw shui ̭ bi paˇ laˇ-awˬ. ²⁴ Maˇ maˇ ni g’eh-eu yaw tsaˬ yaw dawˇ hawˇ-eu yaw muiˬ yaw shawˇ la ̭ k’oeˇ Miˬyehˇ-euˬ aˇ g’eh-ahˇ duˇ leˇ ni beh taˬ-euˬ yaw deh ̭ deh ̭-eu yaw shui ̭ jeˬ-ahˇ dm-awˬ. ²⁵ K’oeˇ miˇ neh, jaˬ myaw ̭ taˬ paˇ myaw ̭. Ka li zaˬ cawˬ cawˬ yawˬ g’aˬ na lu ̭ yaw tsaˬ yaw dawˇ jeˬ ngehˬ-awˬ tmˇ-awˬ. Aˬ jeˬ miˇ neh ehˇ naˇ, aˬ dui dawˬ tawˆ lu ̭ Ka li-euˬ g’awˇ mawˇ la ̭ k’oeˇ tiˬ gaˇ ta ̭-eu ma. ²⁶ Naw ma ̭ nui ma pehˇ laˇ ngeh, iˬ baˇ mˇ gaˇ maˬ bi keuˆ leˇ-eu u ̭ ta ̭, nahˇ ma ga ahˇ ngeh keuˆ ni nui ma pehˇ-eu jeˬ taˬ bi pyeu ̭. ²⁷ Neh ̭ sahˬ paˬ neh muˇ juˇ taˬ bi juˇ g’aˬ. ²⁸ Smˇ k’oeˬ k’oeˬ-eu tsawˇ haˬ maˬ k’oeˬ ni byehˇ-awˇ, yawˬ ha deh ̭ nya jawˇ nya-eu uˬ ta ̭ shaˬ zaˬ zahˬ zaˬ deuˬ-ahˇ caw ba nya ni, yaw sui yaw dawˇ la ̭ k’oeˇ pyuˇ poˆ-eu g’aˇ duˬ gaˇ mˇ-awˬ. ²⁹ Aˬ cawˬ-ahˇ bi coeˬ leˇ-eu dawˬ taˬ ngehˬ. Ehˇ k’aw ̭, nawˬ neh ngehˬ-euˬ dawˬ aˬ cawˬ g’aˇ duˬ muiˬ ni, loˬ-eu jeˬ-ahˇ caw ba nya-awˇ bi huiˬ bi mahˇ laˇ nya-eu gaˇ dahˇ tsoeˬ-eu dawˬ ngehˬ-awˬ. ³⁰ Miˬyehˇ-euˬ Muiˬ-eu Shawˇ-eu Yaw sahˇ-ahˇ bi noeˬ shaˬ-eu jeˬ taˬ mˇ. Aˬ jeˬ miˇ neh ehˇ naˇ, ka k’o ̭-eu aˇ nah keuˆ le ngeh naw ma ̭ Miˬyehˇ-euˬ tsawˇ haˬ pyeu ̭-eu duˬ laˇ ni, Yaw sahˇ Miˬyehˇ la ̭ k’oeˇ naw ma ̭-ahˇ jmˬ diˬ taˬ-euˬ meh. ³¹ Aˬ cawˬ-ahˇ nui ma naˇ-eu jeˬ maˬ ehˇ, nui ma nymˇ-eu jeˬ maˬ ehˇ, nui ma pehˇ-eu jeˬ maˬ ehˇ, byehˇ dzeh jiˇ-awˬ. Aˬ cawˬ-ahˇ guˇ guˇ-ehˇ ceh-awˇ yaˬ k’ehˇ yaˬ-eu jeˬ hawˇ-eu, aˬ cawˬ-ahˇ bye-eu jeˬ taˬ paˇ mˇ. ³² Ka li la ̭ k’oeˇ Miˬyehˇ naw ma ̭-ahˇ iˬ baˇ pyehˬ nehˬ la ̭-euˬ lo ̭-ehˇ, naw ma ̭ k’aw ̭ nui nahˬ nui yu ahˇ-eu la ̭ k’oeˇ tiˬ g’aˬ tiˇ g’aˬ g’awˬ shaˬ gaˬ-awˇ iˬ baˇ pyehˬ-awˬ.

¹ Naw ma ̭-aˬ, Miˬyehˇ gaˬ dui dui-eu zaˬ deuˬ pyeu ̭-eu lo ̭-ehˇ, aˬ yaw ̭-ahˇ duˇ laˇ ni leh jeh-awˬ. ² Ka li aˬ dui-ahˇ gaˬ-eu miˇ neh, Miˬyehˇ nui k’ahˇ shiˇ-eu saw dui dui-eu lawˇ-eu jeˬ lo ̭-ehˇ aˬ yaw ̭-euˬ g’awˇ mawˇ aˬ dui g’aˇ duˬ lawˇ nehˬ-euˬ gaˇ duˇ ni, g’oeˇ-eu gaˬ-eu jeˬ la ̭ k’oeˇ deh ̭ g’eh-awˬ. ³ Naw ma ̭-aˬ, Miˬyehˇ-euˬ tsawˇ haˬ pyeu ̭-eu miˇ neh, maˬ tsaˬ maˬ dawˇ-eu jeˬ la ̭ k’oeˇ k’aˬ miˬ sheu-eu, jaw ̭ dui dui-eu jeˬ mˇ-eu, aˬ cawˬ-euˬ myawˬ-ahˇ mehˇ juiˇ juiˇ-eu, heu lo ̭-ehˇ g’eh-eu gaˇ kawˆ deuˬ-ahˇ mˇ-eu taˬ ehˇ siˬ. Ja-eu k’aw ̭ maˬ tsaˬ-a. ⁴ Jaw ̭ dui dui-eu dawˬ, gaˇ dahˇ maˬ tsoeˬ-eu dawˬ hawˇ-eu, yaw jaw ̭ jeˬ gaˇ kawˆ ceh ̭ leh ̭ ka niˇ g’a-eu dawˬ heu deuˬ-ahˇ naw ma ̭ tiˬ paw ̭-iˬ ngehˬ-eu maˬ tsaˬ-a. ⁵ Maˬ tsaˬ maˬ dawˇ-eu la ̭ k’oeˇ k’aˬ miˬ sheu-eu tsawˇ haˬ, jaw ̭ dui dui-eu jeˬ mˇ-eu tsawˇ haˬ hawˇ-eu, aˬ cawˬ-euˬ myawˬ-ahˇ mehˇ juiˇ juiˇ-eu tsawˇ haˬ-aˬ, Ka li-euˬ miˇk’ahˬ hawˇ-eu Miˬyehˇ Miˇk’ahˬ-ahˇ maˬ ya uˇ leˇ-a lehˇ naw ma ̭ siˬ duˬ-awˬ. (Aˬ cawˬ-euˬ myawˬ-ahˇ mehˇ juiˇ juiˇ-eu tsawˇ haˬ-aˬ, pyuˇ shuiˇ myawˬ gahˬ-ahˇ uˬ duˬ tahˬ gaˇ duˇ-eu meh.) ⁶ Gaˇ dahˇ maˬ tsoeˬ-eu dawˬ neh tsawˇ haˬ tiˬ g’aˬ-iˬ naw ma ̭-ahˇ mehˇ shuiˇ taˬ bi shuiˇ tawˆ. Aˬ jeˬ miˇ neh ehˇ naˇ, k’oeˇ lo ̭-ehˇ g’eh-eu jeˬ baˬ da neh Miˬyehˇ ehˇ dawˬ maˬ naˇ haˬ-eu deuˬ k’oeˇtaˆ Miˬyehˇ nui ma pehˇ-eu jeˬ keuˆ le teh ̭-a. ⁷ K’oeˇ miˇ neh, k’oeˇ lo ̭-ehˇ g’eh-eu tsawˇ haˬ deuˬ-ahˇ g’awˬ tsehˆ tsehˆ-awˬ. ⁸ Naw ma ̭ k’aw ̭, yaw zahˇ la ̭ k’oeˇ deh ̭ haw-euˬ tsawˇ haˬ deuˬ meh. Ehˇ k’aw ̭, Sahˬpaˬ Yeˬsuˇ-euˬ tsawˇ haˬ pyeu ̭ laˇ g’aˬ-euˬ miˇ neh, yaw sheh ̭ la ̭ k’oeˇ naw ma ̭ jawˇ lu ̭-eu meh. K’oeˇ miˇ neh, yaw sheh ̭-euˬ zaˬ deuˬ lo ̭-ehˇ deh ̭ g’eh-awˬ. ⁹ Aˬ jeˬ miˇ neh ehˇ naˇ, yaw muiˬ yawˬ jeˬ na lu ̭, yaw tsaˬ yaw dawˇ yawˬ jeˬ na lu ̭ hawˇ-eu, maˇ jawˆ ni g’eh-eu yawˬ jeˬ na lu ̭, yaw sheh ̭ la ̭ k’oeˇ neh doˆ le-euˬ teh ̭ meh. ¹⁰ Sahˬpaˬ Yeˬsuˇ nui ma tsaˬ-eu jeˬ-ahˇ mˇ nya laˇ ni leh jeh-awˬ. ¹¹ A cawˬ mˇ lu ̭-eu yaw zahˇ-ahˇ ta ̭ leˇ-eu gaˇ dahˇ maˬ tsoeˬ-eu jeˬ-ahˇ tiˬ paw ̭-iˬ maˬ mˇ ni, yaw sheh ̭ la ̭ k’oeˇ yuˇ doˆ la ̭-awˬ. ¹² (Aˬ yaw ̭ ma ̭ baˇ za ̭-ahˇ mˇ k’oeˬ k’oeˬ lu ̭-eu gaˇ k’oeˇ deuˬ-ahˇ ja doˆ-eu teh ̭-ehˇ k’aw ̭ sha ̭ dawˇ dui dui paˬ-ehˇ g’eh-eu meh.) ¹³ Dawˬ tawˆ lu ̭ yaw sheh ̭ la ̭ k’oeˇ yuˇ doˆ la ̭ jiˇ ngeh, aˬ yaw ̭ ma ̭ aˬ joˆ-ehˇ g’eh-eu tsawˇ haˬ pyeu ̭-eu bya cehˆ ni mawˇ duˬ laˇ teh ̭-a. ¹⁴ Aˬ jeˬ miˇ neh ehˇ naˇ, bya cehˆ ni bi mawˇ duˬ laˇ-eu yawˬ jeˬ na lu ̭ yaw sheh ̭ pyeu ̭-eu meh. K’oeˇ miˇ neh, heu lo ̭-ehˇ ehˇ taˬ-euˬ jaˆ-eu meh. "Yu ̭ k’aˆ taˬ-euˬ deuˬ noeˬ laˇ-awˇ, shiˇ-euˬ g’o ̭ deh ̭ laˇ-awˬ. Ka li yaw sheh ̭ bi ̭ la ̭ teh ̭-a." lehˇ ehˇ taˬ-euˬ jaˆ-eu meh. ¹⁵ K’oeˇ miˇ neh, naw ma ̭ aˬ joˆ-ehˇ deh ̭ lu ̭-eu gaˇ kawˆ yahˇ-awˬ. Zaˬ siˬ tsawˇ gahˇ maˬ ahˇ-eu tsawˇ haˬ lo ̭-ehˇ taˬ deh ̭. Zaˬ siˬ tsawˇ gahˇ ahˇ-eu tsawˇ haˬ lo ̭-ehˇ deh ̭-awˬ. ¹⁶ Naw ma ̭ za-euˬ muiˬ-eu aˇ yamˬ-ahˇ gaˇ dahˇ tsoeˬ ni zmˬ-awˬ. Aˬ jeˬ miˇ neh ehˇ naˇ, aˇ nah aˇ yamˬ heu yamˬ-aˬ, haiˬ-eu aˇ yamˬ pyeu ̭-eu meh. ¹⁷ Dawˇ ga maˬ paˇ ga ni, Sahˬpaˬ Yeˬsuˇ naw ma ̭-ahˇ bi mˇ maw ̭-eu jeˬ-ahˇ siˬ nya-awˬ. ¹⁸ Jiˇ baˬ taˬ dawˇ yeh ̭. K’oeˇ-aˬ, naw ma ̭-ahˇ bi cawˆ-iˇ-eu teh ̭ meh. Ehˇ k’aw ̭, Yaw sahˇ Miˬyehˇ naw ma ̭ la ̭ k’oeˇ bi byah laˇ-awˬ. ¹⁹ Ja ceuˬ-eu sahˬ bo ̭ gaˇ kawˆ, Miˬyehˇ-ahˇ ja ceuˬ-eu caˇ dawˬ gaˇ kawˆ hawˇ-eu, guiˬ lahˬ sa ̭ laˇ paw-euˬ caˇ dawˬ gaˇ kawˆ tiˬ g’aˬ tiˇ g’aˬ ja uˇ-awˬ. Nui ma la ̭ k’oeˇ Sahˬpaˬ Yeˬsuˇ-ahˇ ja ceuˬ-awˇ, ja ceuˬ-eu caˇ dawˬ deuˬ-ahˇ caˇ-awˬ. ²⁰ A dui-euˬ Sahˬpaˬ Yeˬsuˇ Ka li-euˬ tsawˇ myahˇ la ̭ k’oeˇ yawˬ jeˬ na lu ̭ g’aˇ duˬ Aˬda Miˬyehˇ-euˬ guiˬ lahˬ-ahˇ ja ceuˬ-awˬ. ²¹ Ka li-ahˇ yaw zeu baw-eu la ̭ k’oeˇ, tiˬ g’aˬ-euˬ la ̭ oˆ tiˬ g’aˬ yaw muiˬ-ehˇ jawˇ-awˬ. ²² Miˬ zaˬ deuˬ-oˇ, Sahˬpaˬ Yeˬsuˇ-euˬ ehˇ dawˬ naˇ haˬ-eu lo ̭-ehˇ, yawˬ ha k’aˬ dzeˇ zaˬ-euˬ ehˇ dawˬ naˇ haˬ-awˬ. ²³ Aˬ jeˬ miˇ neh ehˇ naˇ, Ka li zaˬ aˇ muˇ k’oeˇ taˆ Ka li uˆ lahˇ-eu baoˬ jaˆ-eu lo ̭-ehˇ, miˬ zaˬ k’oeˇ taˆ k’aˬ dzeˇ zaˬ uˆ lahˇ-eu baoˬ jaˆ meh. Ka li-aˬ, Ka li zaˬ aˇ muˇ pyeu ̭-eu aˬ yaw ̭-euˬ g’awˇ mawˇ-ahˇ Ka k’o ̭-eu yaw sahˇ pyeu ̭-eu meh. ²⁴ K’oeˇ miˇ neh, Ka li-euˬ dawˬ-ahˇ Ka li zaˬ aˇ muˇ tiˬ byah ni naˇ haˬ geu ̭-eu lo ̭-ehˇ, k’aˬ dzeˇ zaˬ-euˬ dawˬ-ahˇ miˬ zaˬ g’aˬ tiˬ byah ni ya naˇ haˬ geu ̭-eu meh. ²⁵ K’aˬ dzeˇ zaˬ deuˬ-oˇ, Ka li zaˬ aˇ muˇ-ahˇ Ka li gaˬ-eu miˇ neh g’awˇ mawˇ lawˇ nehˬ-euˬ gaˇ duˇ ni, yawˬ ha-euˬ miˬ zaˬ-ahˇ gaˬ-awˬ. ²⁶ Aˬ yaw ̭-euˬ g’awˇ mawˇ lawˇ nehˬ-euˬ k’oeˇ-aˬ, Ka li zaˬ aˇ muˇ-ahˇ aˬ yaw ̭-euˬ dawˬ neh iˇ cu ̭ la ̭ k’oeˇ tsiˬ shawˇ-awˇ, Miˬyehˇ-ahˇ a nehˬ-eu g’aˇ duˬ pyeu ̭-eu meh. ²⁷ Iˇ cu ̭ neh tsiˬ shawˇ-euˬ k’oeˇ-aˬ, maˇ byaw ̭ maˇ naˇ maˬ baw-ehˇ, ehˇ k’aˇ maˬ za-eu uˬ ta ̭, shawˇ jehˆ ni g’eh-awˇ iˬ baˇ taˬ k’aˇ maˬ za-eu aˇ g’ehˇ muiˬ dui dui-eu Ka li zaˬ aˇ muˇ-ahˇ, aˬ yaw ̭-euˬ bi pyeu ̭ laˇ-eu g’aˇ duˬ mˇ-euˬ jeˬ pyeu ̭-eu meh. ²⁸ K’aˬ dzeˇ zaˬ deuˬ-aˬ, yawˬ ha-euˬ g’awˇ mawˇ-ahˇ gaˬ-eu lo ̭-ehˇ, yawˬ haˬ-euˬ miˬ zaˬ-ahˇ gaˬ-eu tsaˬ meh. Yawˬ ha-euˬ miˬ zaˬ-ahˇ gaˬ-eu k’aˬ dzeˇ zaˬ-aˬ, yawˬ haˇ yawˬ ha gaˬ gaˇ duˇ-eu meh. ²⁹ Tsawˇ haˬ tiˬ g’aˬ-iˬ yawˬ ha-euˬ g’awˇ mawˇ-ahˇ yawˬ ha maˬ bye-a. Ka li zaˬ aˇ muˇ-ahˇ Ka li bi dzaˬ bi dawˇ-awˇ bo saˆ-eu lo ̭-ehˇ, tsawˇ haˬ yawˬ g’aˬ na lu ̭ yawˬ haˬ-euˬ g’awˇ mawˇ-ahˇ yawˬ ha bi dzaˬ bi dawˇ-awˇ bo saˆ-eu meh. ³⁰ Aˬ dui-aˬ, Ka li-euˬ g’awˇ mawˇ-ahˇ tso ̭-eu aˇ sehˇ deuˬ pyeu ̭-eu ma. ³¹ "K’oeˇ miˇ neh, k’aˬ dzeˇ zaˬ-aˬ, yawˬ ha-euˬ aˬ da aˬ ma-ahˇ g’awˬ-iˇ-awˇ, yawˬ haˬ-euˬ miˬ zaˬ-ahˇ deh ̭ ta ̭-eu la ̭ k’oeˇ, nyiˬ g’aˬ-euˬ tiˬ shiˬ tiˬ shaˬ teh ̭-ehˇ pyeu ̭ laˇ-euˬ meh" lehˇ, Jaˇli ̭ la ̭ k’oeˇ ehˇ taˬ-euˬ meh. ³² Jaˇli ̭ aˇ deuˆ heu deuˆ la ̭ k’oeˇ, na ̭ dui dui-eu za ̭ taˬ-euˬ jeˬ pah mehˬ lu ̭-eu meh. K’oeˇ-aˬ, Ka li hawˇ-eu Ka li zaˬ aˇ muˇ-ahˇ ehˇ maw ̭-eu meh lehˇ ngaˇ g’oˆ shaw-eu ma. ³³ Jaˇli ̭ heu deuˆ naw ma ̭-ahˇ k’aw ̭ ta ̭ leˇ-eu meh. K’aˬ dzeˇ zaˬ yawˬ g’aˬ na lu ̭ yawˬ ha-euˬ g’awˇ mawˇ-ahˇ gaˬ-eu lo ̭-ehˇ yawˬ ha-euˬ miˬ zaˬ-ahˇ ya gaˬ-awˇ, miˬ zaˬ yawˬ g’aˬ na lu ̭ yawˬ ha-euˬ k’aˬ dzeˇ zaˬ-ahˇ yaw zeu ya baw-eu meh.

¹ Zaˬ deuˬ-oˇ, Sahˬpaˬ Yeˬsuˇ la ̭ k’oeˇ yawˬ ha-euˬ aˬ da aˬ ma ehˇ dawˬ naˇ haˬ-awˬ. Naw ma ̭ k’oeˇ lo ̭-ehˇ mˇ-eu tsaˬ dui dui meh. ² "Nawˬ da nawˬ ma-ahˇ yaw zeu baw-awˬ" lehˇ ehˇ-eu zahˇ dawˬ k’o ̭ dawˬ heu dawˬ-aˬ, naˇ haˬ geu ̭-eu tsawˇ haˬ deuˬ-ahˇ Miˬyehˇ guiˬ lahˬ bi ̭-eu g’aˇ duˬ saˇ jaˇ dzaˬ taˬ-euˬ zahˇ dawˬ k’o ̭ dawˬ yaw beh dawˬ meh. ³ "K’oeˇ lo ̭-ehˇ yaw zeu baw naˇ, nawˇ yawˬ jeˬ na lu ̭ la ̭ k’oeˇ baw le za le-awˇ, miˇ tsaˬ k’oeˇ taˆ deh ̭ ngeh ziˇ baw ziˇ za teh ̭-a." ⁴ Aˬ da aˬ ma deuˬ-oˇ, naw ma ̭-euˬ zaˬ deuˬ nui ma pehˇ ni taˬ jahˇ. Sahˬpaˬ Yeˬsuˇ-euˬ zahˇ sahˇ k’o ̭ mehˬ nehˬ tsoˆ nehˬ-awˇ, bo saˆ huiˬ-awˬ. ⁵ Zaˬ k’aˆ deuˬ-oˇ, miˇ tsaˬ zaˬ pyeu ̭-eu naw ma ̭-euˬ baw leˬ deuˬ-ahˇ guˆ-awˇ yaw dzuˬ dzuˬ-eu la ̭ koeˇ, ehˇ dawˬ naˇ haˬ geu ̭-awˬ. Ka li-euˬ gaˇ mˇ gaˇ duˇ ni, aˬ yaw ̭ ma ̭ k’aˇ k’ehˇ-eu jeˬ-ahˇ mˇ-awˬ. ⁶ Baw leˬ haw lu ̭ ngeh teh ̭-ehˇ myaˆ pyawˬ naˇ mehˇ za ni mˇ-eu jeˬ taˬ bi pyeu ̭. Ehˇ k’aw ̭, Ka li-euˬ zaˬ k’aˆ lo ̭-ehˇ Miˬyehˇ nui k’ahˇ shiˇ-eu jeˬ-ahˇ nui ma keuˆ-awˇ mˇ-awˬ. ⁷ Naw ma ̭ zaˬ k’aˆ geu ̭-awˇ ya mˇ lu ̭-eu gaˇ deuˬ-ahˇ, tsawˇ haˬ zaˬ-euˬ gaˇ mˇ nehˬ-eu lo ̭-ehˇ teh ̭-ehˇ maˬ ngeuˇ ni, Sahˬpaˬ Yeˬsuˇ-euˬ gaˇ mˇ nehˬ-eu lo ̭-ehˇ laˬ k’aˬ tiˬ cehˇ mˇ-awˬ. ⁸ Zaˬ k’aˆ maˬ ehˇ, zaˬ k’aˆ maˬ ngeuˇ-eu deuˬ maˬ ehˇ, yawˬ ha neh k’aˇ mˇ-euˬ muiˬ-eu gaˇ g’aˇ duˬ Sahˬpaˬ Yeˬsuˇ la ̭ sawˬ bi ̭ nehˬ la ̭ teh ̭-a lehˇ siˬ duˬ-awˬ. ⁹ Baw leˬ deuˬ-oˇ, k’oeˇ lo ̭-ehˇ duˇ ni, naw ma ̭ k’aw ̭ zaˬ k’aˆ deuˬ g’aˇ duˬ shaˇ noeˬ nehˬ-awˬ. Aˬ yaw ̭ ma ̭-ahˇ guˆ tsiˬ taˬ nyeh ̭. Naw ma ̭ maˬ ehˇ, naw ma ̭-euˬ zaˬ k’aˆ deuˬ maˬ ehˇ, dawˬ tawˆ lu ̭ tiˬ kawˆ lo ̭-ehˇ mˬ k’oeˇ taˆ jawˇ-eu Baw leˬ k’oeˇ g’aˬ-euˬ zaˬ k’aˆ pyeu ̭-eu ma lehˇ siˬ nya-awˬ. Aˬ yaw ̭-aˬ, yawˬ g’aˬ na lu ̭-ahˇ myaˆ pyawˬ huiˬ nyiˇ maˬ tseˇ-ehˇ tiˬ kawˆ di ni yaˇ k’aˬ daˇ-eu meh. ¹⁰ Aˇ saˬ saˬ-eu dawˬ heu lo ̭-ehˇ ehˇ-eu ma. Sahˬpaˬ Yeˬsuˇ-euˬ huiˬ-eu baoˬ-ahˇ g’oe-awˇ, aˬ yaw ̭ la ̭ k’oeˇ g’aˬ ahˇ laˇ-awˬ. ¹¹ Neh ̭ sahˬ paˬ tsawˇ gahˇ gahˇ laˇ gaˇ naw ma ̭ g’aˬ leˇ nya ni, Miˬyehˇ neh bi ̭ la ̭-euˬ guiˇ deuˆ-eu keu ka dawˬ tawˆ lu ̭-ahˇ dm-awˬ. ¹² Aˬ jeˬ miˇ neh ehˇ naˇ, tsawˇ haˬ zaˬ-ahˇ aˬ dui deuˆ ceh ceh lu ̭-eu maˬ ngeuˇ. Maˬ mawˇ nya-eu haiˬ dui dui-eu mˬ taˆ-euˬ yaw sahˇ pyeu ̭-eu uˆ lahˇ-eu deuˬ-ahˇ maˬ ehˇ, baoˬ deuˬ-ahˇ maˬ ehˇ, zahˇ tsui ni g’eh-eu ziˇ heu ziˇ-ahˇ dzoeˬ lu ̭-eu mˬ hawˇ-eu miˇ yaw kaˬ-ahˇ jawˇ-eu deuˬ-ahˇ maˬ ehˇ, aˬ dui deuˆ ceh ceh lu ̭-eu ma. ¹³ Haiˬ-eu aˇ nah aˇ yamˬ k’oeˇ keuˆ le ngeh, muiˇ-eu deuˬ deuˆ le gaˇ naw ma ̭ ciˬ daˬ coeˇ-awˇ, aˇ saˬ deuˆ saˬ ngeh keuˆ ni tiˬ to ̭-iˬ maˬ jiˆ k’o ̭-iˇ ni zi ̭ dah ni yaw ̭ tehˬ coeˇ-eu g’aˇ duˬ, Miˬyehˇ-euˬ guiˇ deuˆ-eu keu ka dawˬ tawˆ lu ̭-ahˇ nymˬ-mˇ dm-awˬ. ¹⁴ K’oeˇ miˇ neh, yaw sui yaw dawˇ jeˬ jo ̭ pa ̭ pa ̭-awˇ, yaw tsaˬ yaw dawˇ jeˬ k’ahˬ-ahˇ dehˬ kaˬ-awˇ yaw ̭-awˬ. ¹⁵ Biˬ tsaˬ bi dzoeˇ leˇ-eu Laˬ k’aˬ cehˇ-eu Guiˬ lahˬ dawˬ sehˬ nawˆ nawˆ-awˬ. ¹⁶ K’oeˇ uˬ ta ̭, Haiˬ dui dui-eu G’aˬ neh beuˆ g’eh la ̭-euˬ miˬ dzaˬ do ̭-eu kaˆ myaˬ deuˬ bi miˆ-iˇ-eu g’aˇ duˬ, jah-eu jeˬ pyeu ̭-eu dehˬ daˬ duˬ-ahˇ aˬ myah lu ̭ zi ̭ dah ni tuˆ tehˬ taˬ-awˬ. ¹⁷ Ka k’o ̭-eu jeˬ pyeu ̭-eu shmˇ uˬ k’oˆ k’oˆ-awˇ, Yaw sahˇ Miˬyehˇ neh bi ̭ la ̭-euˬ mi cehˇ pyeu ̭-eu Miˬyehˇ-euˬ dawˬ kawˬ-ahˇ tuˆ tehˬ taˬ-awˬ. ¹⁸ Miˬyehˇ caw ba la ̭ ni guiˬ lahˬ shaˇ-awˇ, k’oeˇ deuˬ dawˬ tawˆ lu ̭-ahˇ mˇ g’eh-awˬ. Yaw sahˇ Miˬyehˇ sheuˬ g’eh-eu la ̭ k’oeˇ aˬ myah lu ̭ guiˬ lahˬ shaˇ-awˬ. Maˬ ya smˬ-iˇ ni aˬ myah lu ̭ yaw beuˇ beuˇ-ehˇ jawˇ-awˬ. Miˬyehˇ-euˬ tsawˇ haˬ dawˬ tawˆ lu ̭ g’aˇ duˬ aˬ myah lu ̭ guiˬ lahˬ shaˇ-awˬ. ¹⁹ Laˬ k’aˬ cehˇ-eu Guiˬ lahˬ dawˬ gaˇ kawˆ za ̭ taˬ-euˬ jeˬ-ahˇ aˬ cawˬ siˬ nya laˇ ni k’aˬ duˬ ni dawˬ ngehˬ nya-eu g’aˇ duˬ, ngaˇ dawˬ ngehˬ-eu lehˇ k’aˇ g’eh ngeh Miˬyehˇ-euˬ dawˬ ngaˬ-ahˇ bi ̭ la ̭ ni ngaˬ-euˬ g’aˇ duˬ k’aw ̭ aˬ myah lu ̭ guiˬ lahˬ shaˇ-awˬ. ²⁰ Nymˬ-mˇ ngaˇ tawˬ-ahˇ uˇ lu ̭-eu k’aw ̭, Laˬ k’aˬ cehˇ-eu Guiˬ lahˬ dawˬ heu-euˬ g’aˇ duˬ Sahˬpaˬ Yeˬsuˇ-euˬ dah zaˇ ngehˬ zaˬ tmˇ zaˬ pyeu ̭-eu ma. Laˬ k’aˬ cehˇ-eu Guiˬ lahˬ dawˬ g’aˇ duˬ ngehˬ paˬ tmˇ paˬ-ehˇ g’eh-eu jeˬ-ahˇ ngaˇ k’aˬ duˬ ni ngehˬ nya tmˇ nya ni guiˬ lahˬ shaˇ nehˬ la ̭-awˬ. ²¹ Ngaˇ aˬ joˆ-ehˇ mˇ lu ̭ shaˇ lu ̭-eu gaˇ kawˆ naw ma ̭ ya siˬ ni, aˬ dui-euˬ aˬ nyiˇ Duˇjiˇ naw ma ̭-ahˇ ja mehˬ jiˇ nehˬ la ̭ teh ̭-a. Aˬ yaw ̭-aˬ, Sahˬpaˬ Yeˬsuˇ-euˬ gaˇ mˇ-eu saˇ jaˇ zi ̭-eu zaˬ k’aˆ tiˬ g’aˬ pyeu ̭-eu meh. ²² K’oeˇ miˇ neh, nga ma ̭ dawˬ tawˆ lu ̭ aˬ joˆ-ehˇ mˇ lu ̭ shaˇ lu ̭-eu gaˇ kawˆ bi ja mehˬ le-awˇ naw ma ̭-ahˇ g’aˬ bi bi ̭ le-eu g’aˇ duˬ, aˬ yaw ̭-ahˇ ngaˇ k’ehˇ g’eh le ̭-eu ma. ²³ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ nui saˇ o ̭-eu jeˬ maˬ ehˇ, g’oeˇ-eu gaˬ-eu jeˬ maˬ ehˇ, jah-eu jeˬ maˬ ehˇ, aˬ yui ̭ aˬ nyiˇ Ka li zaˬ dawˬ tawˆ lu ̭ k’oeˇ taˆ jaˆ lu ̭-uˇ. ²⁴ Aˬ dui-euˬ Sahˬpaˬ Yeˬsuˇ ka li-ahˇ tiˬ jawˇ-iˬ maˬ piˬ maˬ byoˆ-iˇ nya-eu g’oeˇ-eu gaˬ-eu jeˬ neh k’aˇ gaˬ-eu tsawˇ haˬ dawˬ tawˆ lu ̭ k’oeˇ taˆ, Miˬyehˇ g’awˬ shaˬ gaˬ-eu guiˬ lahˬ yaw dzahˇ jaˆ lu ̭-uˇ.