GAWˇLAWˇSEHˇ

GAWˇLAWˇSEHˇ

¹ Miˬyehˇ nui ma tsaˬ-eu miˇ neh Yeˬsuˇ Ka li-euˬ g’aˬ k’ehˇ geu ̭ lu ̭-eu ngaˇ Pawˇluˆ hawˇ-eu, aˬ dui-euˬ aˬ nyiˇ Tiˆmoˇseˬ nga nya ̭, ² Yeˬsuˇ Ka li la ̭ k’oeˇ saˇ jaˇ zi ̭-eu aˬ yui ̭ aˬ nyiˇ Ka li zaˬ deuˬ pyeu ̭-eu Gawˇlawˇsehˇ meuˬ-ahˇ jawˇ-eu Miˬyehˇ-euˬ tsawˇ haˬ deuˬ jawˇ gaˇ sahˬ bo ̭ bo ̭ ahˇ la ̭-eu ma. Aˬ dui-euˬ Aˬda Miˬyehˇ-euˬ guiˬ lahˬ yaw dzahˇ hawˇ-eu nui saˇ o ̭-eu jeˬ, naw ma ̭ k’oeˇ taˆ jaˆ lu ̭-uˇ. ³ Naw ma ̭ g’aˇ duˬ nga ma ̭ guiˬ lahˬ k’aˇ shaˇ ngeh, aˬ dui-euˬ Sahˬpaˬ Yeˬsuˇ Ka li-euˬ Aˬda Miˬyehˇ-euˬ guiˬ lahˬ-ahˇ ja ceuˬ-eu ma. ⁴ Aˬ jeˬ miˇ neh ehˇ naˇ, naw ma ̭ Yeˬsuˇ Ka li-ahˇ jah lu ̭-eu gaˇ kawˆ hawˇ-eu, Miˬyehˇ-euˬ tsawˇ haˬ dawˬ tawˆ lu ̭-ahˇ naw ma ̭ g’oeˇ lu ̭ gaˬ lu ̭-eu gaˇ kawˆ nga ma ̭ ya gaˬ-euˬ ma. ⁵ Maˇ jawˆ ni g’eh-eu Miˬyehˇ-euˬ dawˬ kawˬ pyeu ̭-eu Laˬ k’aˬ cehˇ-eu Guiˬ lahˬ dawˬ naw ma ̭-ahˇ mehˬ beh beh laˇ ngeh, k’oeˇ gaˇ ta ̭ leˇ-eu noeˬ tmˬ-eu jeˬ gaˇ kawˆ naw ma ̭ ya gaˬ-euˬ meh. Naw ma ̭ jah-eu k’oeˇ hawˇ-eu g’oeˇ-eu gaˬ-eu k’oeˇ-aˬ, naw ma ̭ noeˬ tmˬ-eu k’oeˇ-euˬ la ̭ k’oeˇ neh doˆ laˇ-euˬ meh. Naw ma ̭ noeˬ tmˬ-eu k’oeˇ-ahˇ, naw ma ̭ g’aˇ duˬ Miˬyehˇ neh mˬ k’oeˇ taˆ jeˬ hmˬ taˬ-euˬ meh. ⁶ Miˬyehˇ-euˬ guiˬ lahˬ yaw dzahˇ gaˇ kawˆ naw ma ̭ gaˬ dahˬ beh-awˇ yaw muiˬ paˬ-ehˇ ya siˬ duˬ ngeh nah neh naw ma ̭ k’oeˇ taˆ muiˬ-eu guiˬ lahˬ g’awˬ mya jeˬ keuˆ le lu ̭-eu lo ̭-ehˇ, Laˬ k’aˬ cehˇ-eu Guiˬ lahˬ dawˬ-aˬ, tsawˇ haˬ zaˬ k’oeˇ taˆ muiˬ-eu guiˬ lahˬ g’awˬ mya jeˬ maˬ tsehˆ leˇ ni bi keuˆ le lu ̭-awˇ, miˇ k’ahˬ doe ni gaˬ byah-iˇ lu ̭-eu meh. ⁷ Nga ma ̭-euˬ dah zaˇ Ka li-euˬ gaˇ-ahˇ saˇ jaˇ zi ̭-awˇ mˇ lu ̭-eu gaˇ mˇ cawˬ Iˇbaˬpaˬlaˇ neh Miˬyehˇ g’awˬ shaˬ gaˬ-eu guiˬ lahˬ yaw dzahˇ gaˇ kawˆ naw ma ̭-ahˇ mehˬ nehˬ-euˬ meh. ⁸ Yaw sahˇ Miˬyehˇ neh naw ma ̭-ahˇ bi ̭-euˬ g’oeˇ-eu gaˬ-eu jeˬ gaˇ kawˆ, nga ma ̭-ahˇ aˬ yaw ̭ dzawˇ nehˬ la ̭-euˬ meh. ⁹ K’oeˇ miˇ neh, naw ma ̭-euˬ gaˇ kawˆ ya gaˬ-euˬ tiˬ nah neh, naw ma ̭ g’aˇ duˬ nga ma ̭ guiˬ lahˬ maˬ tsehˆ leˇ ni shaˇ lu ̭-eu ma. Yaw sahˇ Miˬyehˇ neh bi ̭-euˬ zaˬ siˬ tsawˇ gahˇ hawˇ-eu noeˬ siˬ noeˬ mawˇ nya-eu jeˬ la ̭ k’oeˇ, Miˬyehˇ-euˬ nui k’ahˇ-ahˇ siˬ nya-eu jeˬ naw ma ̭ la ̭ k’oeˇ byah laˇ ni shaˇ lu ̭-eu ma. ¹⁰ K’oeˇ miˇ neh, Sahˬpaˬ Yeˬsuˇ bi deh ̭ maw ̭-eu lo ̭-ehˇ naw ma ̭ deh ̭ nya laˇ-awˇ, aˬ yaw ̭ nui k’ahˇ shiˇ-eu jeˬ-ahˇ naw ma ̭ aˬ myah lu ̭ mˇ nya laˇ teh ̭-a. Naw ma ̭ yaw deh ̭ deh ̭-eu la ̭ k’oeˇ yaw muiˬ jeˬ g’awˬ mya ni doˆ laˇ-awˇ, Miˬyehˇ-ahˇ siˬ nya dzehˬ laˇ teh ̭-a. ¹¹ Yawˬ jeˬ na lu ̭-ahˇ naw ma ̭ nui ma g’awˬ mahˇ ni taˬ-awˇ daˬ coeˇ ni, aˬ yaw ̭-euˬ yaw sheh ̭ k’ahˬ sehˇ huiˬ-eu baoˬ-ahˇ neh doˆ le-euˬ g’aˬ baˬ da neh naw ma ̭ g’aˬ k’aˆ laˇ lu ̭-uˇ. Yaw sheh ̭-euˬ miˇ k’ahˬ la ̭ k’oeˇ aˬ yaw ̭-euˬ tsawˇ haˬ deuˬ bi jawˇ-eu g’aˇ duˬ lehˬ hmˬ taˬ-euˬ jawˇ duˬ-ahˇ naw ma ̭ jawˇ leˇ nya ni jahˇ nehˬ la ̭-euˬ Aˬda Miˬyehˇ-euˬ guiˬ lahˬ-ahˇ, laˬ k’aˬ tiˬ cehˇ ja ceuˬ-awˬ. ¹³ Yaw zahˇ-euˬ baoˬ la ̭ k’oeˇ aˬ yaw ̭ aˬ dui-ahˇ ka k’o ̭ nehˬ la ̭-awˇ, aˬ yaw ̭-euˬ Zaˬmaˇ-euˬ miˇ k’ahˬ la ̭ k’oeˇ aˬ dui-ahˇ sheuˬ ahˇ nehˬ la ̭-euˬ meh. ¹⁴ Aˬ yaw ̭ neh aˬ dui-ahˇ bi buˬ-iˇ la ̭-euˬ meh. K’oeˇ-aˬ, aˬ dui-ahˇ iˬ baˇ pyehˬ nehˬ la ̭-euˬ jeˬ pyeu ̭-eu meh. ¹⁵ Tsawˇ haˬ zaˬ deuˬ Ka li-ahˇ mawˇ nya-eu meh. Ka li-aˬ, maˬ mawˇ nya-eu Miˬyehˇ-ahˇ duˇ-eu meh. Ka liˬ-aˬ, k’aˇ beh taˬ-euˬ jeˬ dawˬ tawˆ lu ̭ k’oeˇ taˆ huiˬ dzehˬ mahˇ dzehˬ-eu deh ̭ beh beh le-euˬ g’aˬ meh. ¹⁶ Aˬ jeˬ miˇ neh ehˇ naˇ, mˬ hawˇ-eu miˇ k’oeˇ taˆ k’aˇ jaˆ k’aˇ jawˇ-eu jeˬ dawˬ tawˆ lu ̭ maˬ ehˇ, mawˇ nya-eu jeˬ hawˇ-eu maˬ mawˇ nya-eu jeˬ maˬ ehˇ, mˬ hawˇ-eu miˇ yawˬ kaˬ-ahˇ uˆ lahˇ-eu yaw sahˇ deuˬ pyeu ̭-eu baoˬ deuˬ hawˇ-eu sahˬ paˬ sahˬ ma dawˬ tawˆ lu ̭ maˬ ehˇ, Ka li-ahˇ g’oe-awˇ Miˬyehˇ neh beh taˬ-euˬ meh. k’aˇ jawˇ k’aˇ jaˆ-eu jeˬ dawˬ tawˆ lu ̭ aˬ yaw ̭-ahˇ g’oe-eu la ̭ k’oeˇ beh taˬ-awˇ, aˬ yaw ̭-euˬ g’aˇ duˬ beh taˬ-euˬ meh. ¹⁷ Tiˬ jeˬ-iˬ maˬ beh mi naˆ-ehˇ Ka li deh ̭ lu ̭ jawˇ lu ̭-awˇ, yawˬ jeˬ na lu ̭ aˬ yaw ̭-euˬ la ̭ k’oeˇ jawˇ duˬ dah-eu meh. ¹⁸ Aˬ yaw ̭-aˬ, aˬ yaw ̭-euˬ g’awˇ mawˇ pyeu ̭-eu Ka li zaˬ aˇ muˇ-euˬ uˬ duˬ pyeu ̭-awˇ, g’awˇ mawˇ k’oeˇ-ahˇ yaw deh ̭ bi deh ̭-eu g’aˬ pyeu ̭-eu meh. K’aˇ jawˇ k’aˇ jaˆ-eu jeˬ dawˬ tawˆ lu ̭ k’oeˇ taˆ aˬ yaw ̭ huiˬ dzehˬ mahˇ dzeh ni, shiˇ-euˬ gaˇ g’o ̭ deh ̭ laˇ-euˬ deh ̭ beh beh le-euˬ g’aˬ pyeu ̭-eu meh. ¹⁹ Aˬ yaw ̭-euˬ la ̭ k’oeˇ Miˬyehˇ-euˬ shehˆ dzeu ̭ aˇ g’ehˇ tiˬ byah ni bi ahˇ-eu g’aˇ duˬ, Miˬyehˇ neh noeˬ tsehˆ taˬ-euˬ meh. ²⁰ Aˬ yaw ̭-ahˇ g’oe-awˇ mˬ hawˇ-eu miˇ k’oeˇ taˆ k’aˇ jawˇ k’aˇ jaˆ-eu jeˬ dawˬ tawˆ lu ̭ Miˬyehˇ jawˇ gaˇ sheuˬ k’o ̭ la ̭-eu g’aˇ duˬ, Miˬyehˇ neh noeˬ tsehˆ taˬ-euˬ meh. Aˬ yaw ̭-ahˇ la ̭ ya ̭ k’oeˇ taˆ lawˇ nehˬ-eu la ̭ k’oeˇ tsawˇ haˬ zaˬ Miˬyehˇ-ahˇ tsaˬ laˇ tsahˇ laˇ nya ni jahˇ-awˇ, mˬ k’oeˇ taˆ hawˇ-eu miˇ tsaˬ k’oeˇ taˆ k’aˇ jawˇ k’aˇ jaˆ-eu jeˬ dawˬ tawˆ lu ̭ Miˬyehˇ jawˇ gaˇ bi sheuˬ k’o ̭ la ̭-euˬ meh. ²¹ Yaw beh naw ma ̭ yaw haiˬ jeˬ noeˬ-euˬ mˇ-euˬ miˇ neh Miˬyehˇ nehˬ-ehˇ gaˇ mahˇ kaˬ lu ̭-awˇ, Miˬyehˇ-ahˇ muiˇ-eu tsawˇ haˬ deuˬ pyeu ̭ ya ̭-euˬ meh. ²² Ehˇ k’aw ̭, naw ma ̭-ahˇ muiˬ-eu shawˇ-eu la ̭ k’oeˇ iˬ baˇ taˬ k’aˇ maˬ za ni Miˬyehˇ mehˬ shi bi sheuˬ keuˆ g’eh-eu g’aˇ duˬ, aˬ yaw ̭-euˬ Zaˬmaˇ-euˬ shiˬ shaˬ jiˇ g’awˇ mawˇ bi shiˇ dah-eu la ̭ k’oeˇ, naw ma ̭ Miˬyehˇ-ahˇ tsaˬ leˇ dzoeˇ leˇ nya ni Miˬyehˇ jahˇ-euˬ meh. ²³ Naw ma ̭ jah-eu jeˬ la ̭ k’oeˇ zi ̭ dah ni ya deh ̭ daˆ g’eh-awˇ, Laˬ k’aˬ cehˇ-eu Guiˬ lahˬ dawˬ ya gaˬ ngeh za taˬ-euˬ noeˬ tmˬ-eu jeˬ poˆ poˆ laˆ laˆ-ehˇ maˬ ya bi g’eh-a. Ngaˇ Pawˇluˆ zaˬ k’aˆ geu ̭ lu ̭-eu heu-aˬ, miˇ tsaˬ k’oeˇ taˆ k’aˇ jawˇ-eu tsawˇ haˬ yawˬ g’aˬ na lu ̭-ahˇ mehˬ nehˬ-euˬ Laˬ k’aˬ cehˇ-eu Guiˬ lahˬ dawˬ heu-euˬ g’aˇ duˬ ma. ²⁴ Nymˬ-mˇ naw ma ̭ g’aˇ duˬ ngaˇ ya daˬ lu ̭-eu heu-ahˇ, ngaˇ laˬ k’aˬ cehˇ ma. Aˬ jeˬ miˇ neh ehˇ naˇ, ngaˬ-euˬ shiˬ shaˬ jiˇ g’awˇ mawˇ heu lo ̭-ehˇ ya daˬ lu ̭-eu heu-aˬ, Ka li aˬ yaw ̭-euˬ g’awˇ mawˇ pyeu ̭-eu Ka li zaˬ aˇ muˇ g’aˇ duˬ aˬ yaw ̭ ya daˬ-euˬ k’oeˇ maˬ byah laˇ jiˇ-ehˇ jaˆ ya ̭-euˬ deuˬ bi byah laˇ-eu g’aˇ duˬ caw ba gaˇ duˇ-eu ma. ²⁵ Ngaˇ-aˬ, Ka li zaˬ aˇ muˇ-euˬ zaˬ k’aˆ geu ̭-eu g’aˇ duˬ Miˬyehˇ neh k’ehˇ taˬ-euˬ tsawˇ haˬ ma. Naw ma ̭ g’aˇ duˬ muiˬ ni aˬ yaw ̭ ngaˬ-ahˇ gaˇ heu hmˬ bi mˇ la ̭-euˬ meh. Gaˇ heu-aˬ, aˬ yaw ̭-euˬ dawˬ tiˬ byah tiˬ lo ̭ ja mehˬ-eu g’aˇ duˬ pyeu ̭-eu meh. ²⁶ Aˬ yaw ̭-euˬ dawˬ k’oeˇ-aˬ, aˇ hu ba neh miˇ tsaˬ zaˬ dawˬ tawˆ lu ̭ g’aˇ duˬ za ̭ taˬ-euˬ jeˬ pyeu ̭-eu k’aw ̭, nym-mˇ aˬ yaw ̭-euˬ tsawˇ haˬ deuˬ-ahˇ pah mehˬ nehˬ-euˬ meh. ²⁷ Miˬyehˇ-aˬ, aˬ yaw ̭-euˬ tsawˇ haˬ dawˬ tawˆ lu ̭ g’aˇ duˬ aˬ yaw ̭ neh za ̭ taˬ-euˬ jeˬ k’oeˇ aˇ naˆ ni yaw sheh ̭ k’ahˬ sehˇ byah-awˇ, aˇ naˆ ni zahˬ leˇ paˬ-ehˇ g’eh-eu gaˇ kawˆ, aˬ yaw ̭-euˬ tsawˇ haˬ deuˬ-ahˇ bi siˬ bi mawˇ-eu lehˇ lehˬ hmˬ taˬ-euˬ meh. Za ̭ taˬ-euˬ k’oeˇ-aˬ, naw ma ̭ la ̭ k’oeˇ Ka li jawˇ-eu k’oeˇ meh. K’oeˇ-aˬ, Miˬyehˇ zahˬ leˇ paˬ-ehˇ g’eh-eu g’aˬ pyeu ̭-eu lo ̭-ehˇ, naw ma ̭ k’aw ̭ bi pyeu ̭ laˇ-eu g’aˇ duˬ ehˇ maw ̭-euˬ meh. ²⁸ K’oeˇ miˇ neh, tsawˇ haˬ yawˬ g’aˬ na lu ̭-ahˇ Ka li gaˇ kawˆ nga ma ̭ mehˬ-eu ma. Yawˬ g’aˬ na lu ̭-ahˇ Ka li la ̭ k’oeˇ tsawˇ k’aˆ k’aˆ laˇ-euˬ tsawˇ haˬ lo ̭-ehˇ Miˬyehˇ mehˬ shi sheuˬ ha nehˬ leˇ nya-eu g’aˇ duˬ, aˬ yaw ̭ ma ̭ ya mˇ-eu jeˬ hawˇ-eu ya yahˇ-eu jeˬ-ahˇ k’aˇ siˬ k’aˇ nya-eu lo ̭-ehˇ mehˬ-eu ma. ²⁹ Ngaˬ-euˬ la ̭ k’oeˇ gaˇ mˇ lu ̭-eu Ka li neh bi ̭ la ̭-euˬ huiˬ dui dui-eu g’aˬ-ahˇ g’oe-eu la ̭ k’oeˇ, k’oeˇ lo ̭-ehˇ mˇ nya ni shaˬ shaˬ-ehˇ leh jeh lu ̭-eu ma.

¹ Naw ma ̭-euˬ g’aˇ duˬ maˬ ehˇ, Lawˬdiˬciˆ meuˬ-ahˇ jawˇ-eu tsawˇ haˬ deuˬ g’aˇ duˬ maˬ ehˇ, ngaˬ-ahˇ maˬ mawˇ haw-euˬ tsawˇ haˬ dawˬ tawˆ lu ̭ g’aˇ duˬ maˬ ehˇ, ngaˇ aˇ naˆ ni leh jeh-awˇ gaˇ mˇ lu ̭-eu gaˇ kawˆ naw ma ̭-ahˇ bi siˬ maw ̭ miˇ-a. ² Aˬ yaw ̭ ma ̭-euˬ nui ma k’aˬ duˬ ni pyeu ̭ laˇ-awˇ, g’oeˇ-eu gaˬ-eu jeˬ la ̭ k’oeˇ nui ma tiˬ siˬ teh ̭-ehˇ taˬ nya laˇ-awˇ, yaw muiˬ paˬ-ehˇ g’oˆ siˬ g’oˆ shaw nya-eu baˬ da neh yaw duˬ yaw ciˇ baw laˇ ni, ngaˇ k’oeˇ lo ̭-ehˇ mˇ lu ̭-eu ma. K’oeˇ lo ̭-ehˇ mˇ-eu baˬ da neh, Miˬyehˇ neh za ̭ taˬ-eu jeˬ pyeu ̭-eu Ka li-ahˇ aˬ yaw ̭ ma ̭ siˬ nya laˇ teh ̭-a. ³ Aˬ yaw ̭-aˬ, za ̭ taˬ-euˬ pyuˇ pahˬ shuiˇ pahˬ-ahˇ duˇ-eu Miˬyehˇ-euˬ zaˬ siˬ tsawˇ gahˇ deuˬ-ahˇ pah dzeh-eu mawˬ taw ̭ kahˬ pyeu ̭-eu meh. ⁴ Tsawˇ haˬ tiˬ g’aˬ naw ma ̭ mehˬ shi aˇ naˆ ni muiˬ gaˇ duˇ k’aw ̭, naw ma ̭-ahˇ mehˇ shuiˇ shuiˇ tawˆ-awˇ gaˇ ma taˬ bi sheuˬ bahˬ lehˇ ngaˇ ehˇ-eu ma. ⁵ Ngaˬ-euˬ g’awˇ mawˇ naw ma ̭ nehˬ-ehˇ maˬ jawˇ k’aw ̭, ngaˬ-euˬ nui ma naw ma ̭ nehˬ-ehˇ jawˇ lu ̭-awˇ, naw ma ̭ Ka li-ahˇ jah-eu jeˬ la ̭ k’oeˇ tiˬ kawˆ lo ̭-ehˇ zi ̭ dah ni jawˇ lu ̭ gaˇ ya mawˇ-eu miˇ neh, laˬ k’aˬ cehˇ dui dui nya. ⁶ Naw ma ̭-aˬ, Yeˬsuˇ Ka li-ahˇ naw ma ̭-euˬ Sahˬpaˬ lo ̭-ehˇ ha geu ̭ g’aˬ-euˬ miˇ neh, aˬ yaw ̭-euˬ la ̭ k’oeˇ deh ̭ g’eh-awˬ. ⁷ Naw ma ̭-ahˇ mehˬ nehˬ tsoˆ nehˬ taˬ-euˬ lo ̭-ehˇ, aˬ yaw ̭ la ̭ k’oeˇ ciˇ ka bi na ̭-awˇ, naw ma ̭ yaw deh ̭ deh ̭-eu jeˬ aˬ yaw ̭ k’oeˇ taˆ gawˬ daˆ le ̭-awˇ, jah-eu jeˬ la ̭ k’oeˇ g’aˬ k’aˆ dzehˬ laˇ-awˇ, Miˬyehˇ guiˬ lahˬ-ahˇ ja ceuˬ-eu jeˬ tiˬ byah ni bi ahˇ-awˬ. ⁸ Tsawˇ haˬ zaˬ-euˬ zaˬ siˬ tsawˇ gahˇ-ahˇ g’oe-awˇ mehˇ shuiˇ shuiˇ lu ̭-eu gaˇ dahˇ maˬ tsoeˬ-eu jaˬ myaw ̭ k’oeˇ deuˬ-euˬ zaˬ k’aˆ maˬ ya geu ̭ ni yahˇ-awˬ. K’oeˇ-aˬ, Yeˬsuˇ Ka li la ̭ k’oeˇ doˆ le-euˬ jeˬ maˬ ngeuˇ-a. Mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ deuˬ-euˬ la ̭-ahˇ neh, tsawˇ haˬ zaˬ neh tiˬ ziˇ saˇ-iˬ tiˬ ziˇ tawˬ ka le ̭-euˬ mehˬ-eu tsoˆ-eu jeˬ pyeu ̭-eu meh. ⁹ Miˬyehˇ la ̭ k’oeˇ k’aˇ ahˇ-eu jeˬ dawˬ tawˆ lu ̭, Ka li la ̭ k’oeˇ tiˬ byah ni ahˇ-eu meh. ¹⁰ Naw ma ̭-ahˇ aˬ yaw ̭ la ̭ k’oeˇ tiˬ byah tiˬ lo ̭ ya jawˇ-eu jeˬ bi ̭ taˬ-euˬ meh. Mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ deuˬ hawˇ-eu baoˬ deuˬ k’oeˇ taˆ aˬ yaw ̭ huiˬ dzehˬ-eu meh. ¹¹ Ka li la ̭ k’oeˇ naw ma ̭ baˆ k’oˆ mehˬ dzaˬ yehˬ g’aˬ-euˬ meh. K’oeˇ-aˬ, tsawˇ haˬ zaˬ neh baˆ k’oˆ mehˬ dzaˬ yehˬ-euˬ gaˇ maˬ duˇ-a. Ka li la ̭ k’oeˇ baˆ k’oˆ mehˬ dzaˬ yehˬ-euˬ k’oeˇ-aˬ, iˬ baˇ ahˇ-eu g’awˇ mawˇ heu-euˬ la ̭ k’oeˇ neh bi buˬ-iˇ nya-eu baoˬ ahˇ-eu meh. ¹² A jeˬ miˇ neh ehˇ naˇ, naw ma ̭ iˇ cu ̭ shawˇ ngeh Ka li nehˬ-ehˇ tiˬ kawˆ lo ̭-ehˇ bi ba ̭ pahˬ-awˇ, tiˬ kawˆ lo ̭-ehˇ paˇ g’o ̭ deh ̭ laˇ-euˬ jeˬ pyeu ̭-eu meh. Ka li-ahˇ bi g’o ̭ deh ̭ laˇ-euˬ Miˬyehˇ-euˬ deh ̭ lu ̭-eu baoˬ-ahˇ naw ma ̭ jah-eu la ̭ k’oeˇ g’o ̭ deh ̭ laˇ-euˬ jeˬ pyeu ̭-eu meh. ¹³ Yaw beh naw ma ̭ Yuˇdaˆ tsawˇ haˬ maˬ ngeuˇ-eu uˬ ta ̭, Zahˇ dawˬ k’o ̭ dawˬ maˬ jaˆ-eu baˬ da neh maˬ ehˇ, naw ma ̭-euˬ iˬ baˇ baˬ da neh maˬ ehˇ, sa ̭ laˇ shiˇ taˬ-euˬ gaˇ duˇ-eu meh. Ehˇ k’aw ̭, nymˬ-mˇ-aˬ, Miˬyehˇ neh naw ma ̭-ahˇ Ka li nehˬ-ehˇ bi deh ̭ laˇ-euˬ meh. Aˬ dui-euˬ iˬ baˇ dawˬ tawˆ lu ̭-ahˇ Miˬyehˇ pyehˬ nehˬ la ̭-euˬ meh. ¹⁴ Aˬ dui-euˬ dziˇ dzoˆ bo ̭ ahˇ taˬ-euˬ sahˬ g’aˬ hawˇ-eu dziˇ dzoˆ ya tsoeˬ-eu zahˇ sahˇ k’o ̭ dawˬ tawˆ lu ̭-ahˇ la ̭ ya ̭ k’oeˇ taˆ ta ̭ tehˬ-awˇ, aˬ duiˬ-euˬ dziˇ dzoˆ aˬ yaw ̭ laˆ byoˆ nehˬ la ̭-euˬ meh. ¹⁵ La ̭ ya ̭ k’oeˇ-euˬ k’oeˇ taˆ, mˬ hawˇ-eu miˇ yaw kaˬ-ahˇ uˆ lahˇ lu ̭-eu yaw sahˇ deuˬ hawˇ-eu baoˬ deuˬ-euˬ aˬ la ̭ la ̭ k’oeˇ, Ka li yawˬ haˇ yawˬ ha bi buˬ-iˇ-euˬ meh. Aˬ yaw ̭ g’aˬ leˇ-euˬ bawˬ-iˬ g’eh ngeh miˇ k’ahˬ zaˬ deuˬ bi haw-eu g’aˇ duˬ, aˬ yaw ̭ ma ̭-ahˇ pa ̭-awˇ tsahˇ tsahˇ-ehˇ cah-euˬ meh. ¹⁶ K’oeˇ miˇ neh, naw ma ̭ dzaˬ-eu dawˇ-eu gaˇ kawˆ maˬ ehˇ, nah lah lah-eu gaˇ kawˆ maˬ ehˇ, la loˆ la tsehˆ lah-eu gaˇ kawˆ maˬ ehˇ, Jawˇ nah tawˬ-eu gaˇ kawˆ maˬ ehˇ, tsawˇ haˬ tiˬ g’aˬ neh-iˬ naw ma ̭ g’aˇ duˬ zahˇ sahˇ k’o ̭ taˬ bi taˬ. ¹⁷ Heu deuˬ dawˬ tawˆ Lu ̭ aˬ kaˇ pyeu ̭ laˇ-eu gaˇ kawˆ-euˬ aˇ baˇ naˇ shmˇ loˆ ni teh ̭ meh. Maˇ maˇ ni g’eh-eu jeˬ-aˬ, Ka li meh. ¹⁸ Tsawˇ haˬ tiˬ paˆ na deuˬ yawˬ ha aˬ cawˬ-ahˇ maˬ duˇ-eu yaw sahˇ la ̭ k’oeˇ ya siˬ ya mawˇ-eu jeˬ za taˬ-euˬ miˇ neh, aˬ cawˬ naˆ maˬ tseˇ huiˬ dzehˬ mahˇ dzehˬ ma lehˇ ehˇ-awˇ, yawˬ ha-euˬ g’awˇ mawˇ-ahˇ taˬ nyiˇ-eu gaˇ kawˆ maˬ tsaˬ-eu jeˬ-ehˇ mehˬ-awˇ, mˬ taˆ g’aˬ k’ehˇ-ahˇ uˬ duˬ ya tahˬ meh lehˇ ehˇ-eu meh. K’oeˇ lo ̭-ehˇ g’eh-eu tsawˇ haˬ deuˬ neh naw ma ̭ za paˬ-ehˇ g’eh-eu la ̭ sawˬ deuˬ maˬ ya bi yuˇ doˆ geu ̭ ni yahˇ-awˬ. K’oeˇ lo ̭-ehˇ g’eh-eu tsawˇ haˬ-aˬ, miˇ tsaˬ zaˬ deuˬ noeˬ-eu lo ̭-ehˇ noeˬ-awˇ, hawˬ haˇ yawˬ ha nui ma huiˬ lu ̭ meh. Ehˇ k’aw ̭, aˬ yaw ̭ ma ̭ k’oeˇ lo ̭-ehˇ nui ma huiˬ-eu-aˬ, yaw ̭ ngeh ̭ meh. ¹⁹ Aˬ yaw ̭ ma ̭-aˬ, Ka li zaˬ aˇ muˇ-euˬ uˬ duˬ pyeu ̭-eu Ka li-ahˇ maˬ paˇ tso ̭ ta ̭ ni byehˇ-euˬ meh. Uˬ duˬ pyeu ̭-eu Ka li uˆ lahˇ-eu uˬ moˆ g’awˇ mawˇ mawˇ lah-ehˇ g’aˬ tiˬ byah ni ahˇ-awˇ, yoeˬ tsui ̭ yoeˬ la ̭ hawˇ-eu shaˬ guˬ shaˬ caˆ deuˬ neh tiˬ gaˇ g’eu taw ̭ jiˇ taˬ-euˬ miˇ neh, Miˬyehˇ nui ma tsaˬ-eu lo ̭-ehˇ huiˬ laˇ-eu meh. ²⁰ Naw ma ̭ Ka li nehˬ-ehˇ shiˇ-awˇ, mˬ hawˇ-eu miˇ yaw kaˬ-ahˇ uˆ lahˇ lu ̭-eu yaw sahˇ deuˬ-euˬ la ̭-ahˇ ya buˬ ya law-iˇ-euˬ meh. Toˆ-ehˇ ngeuˇ naˇ, aˬ jeˬ miˇ neh naw ma ̭ miˇ tsaˬ heu-ahˇ ta ̭-eu tsawˇ haˬ lo ̭-ehˇ deh ̭ te. Aˬ jeˬ miˇ neh naw ma ̭ zahˇ sahˇ k’o ̭ heu deuˬ-ahˇ caw teh-awˇ, ²¹ "Dzaˇ heu jeˬ-ahˇ taˬ yuˇ," "Dzaˇ heu jeˬ-ahˇ taˬ myeu ̭ haw," "Dzaˇ k’oeˇ jeˬ-ahˇ toeˬ-eu teh ̭-ehˇ k’aw ̭ taˬ toeˬ ciˆ" lehˇ ehˇ gaˇ naw ma ̭ naˇ haˬ te. ²² Zahˇ sahˇ k’o ̭ k’oeˇ deuˬ-aˬ, tiˬ poˆ zmˬ shaw naˇ gaˇ dahˇ tiˬ paw ̭-iˬ maˬ paˇ tsoeˬ-eu jeˬ lo ̭-ehˇ teh ̭ meh. K’oeˇ-aˬ, tsawˇ haˬ zaˬ neh taˬ taˬ-euˬ mehˬ-eu tsoˆ-eu zahˇ sahˇ k’o ̭ teh ̭ meh. ²³ Tsawˇ haˬ zaˬ deuˬ mˬ taˆ g’aˬ k’ehˇ-ahˇ uˬ duˬ ya tahˬ meh lehˇ aˬ yaw ̭ ma ̭ ehˇ-eu, yawˬ haˇ yawˬ ha taˬ nyiˇ-eu jahˇ geu ̭-eu, guiˬ lahˬ sa ̭ laˇ paw nui ma keuˆ dui dui-eu jahˇ geu ̭-eu, yawˬ ha-euˬ g’awˇ mawˇ-ahˇ yawˬ ha k’ehˬ-eu, heu deuˬ-ahˇ haw naˇ, zahˇ sahˇ k’o ̭ k’oeˇ deuˬ taˬ-euˬ tsawˇ haˬ deuˬ zaˬ siˬ tsawˇ gahˇ ahˇ ngaˇ lehˇ noeˬ paˬ-ehˇ g’eh-eu meh. Ehˇ k’aw ̭, zahˇ sahˇ K’o ̭ k’oeˇ deuˬ-aˬ, shiˬ shaˬ jiˇ-euˬ nui k’ahˇ-ahˇ zuiˆ g’aˬ nya-eu zahˇ sahˇ k’o ̭ maˬ ngeuˇ-a.

¹ Naw ma ̭-ahˇ Ka li nehˬ-ehˇ bi g’o ̭ deh ̭ laˇ-euˬ meh. K’oeˇ miˇ neh, mˬ k’oeˇ taˆ Miˬyehˇ neh naw ma ̭ g’aˇ duˬ lehˬ hmˬ taˬ-euˬ jeˬ-ahˇ nui k’ahˇ jaˆ-awˬ. K’oeˇ gaˇ, Miˬyehˇ-euˬ aˇ maˇ paw jaˆ-eu dzoeˬ dzaˬ nuiˇ mahˬ k’oeˇ taˆ Ka li nuiˇ lu ̭-eu meh. ² Mˬ k’oeˇ taˆ jaˆ-eu jeˬ-ahˇ naw ma ̭-euˬ nui ma noeˬ tsoˆ taˬ-awˬ. Miˇ tsaˬ k’oeˇ taˆ jaˆ-eu jeˬ-ahˇ taˬ noeˬ tsoˆ taˬ. ³ Aˬ jeˬ miˇ neh ehˇ naˇ, naw ma ̭ shiˇ-euˬ tsawˇ haˬ pyeu ̭-awˇ, naw ma ̭ maˇ maˇ ni ya deh ̭-eu jeˬ-aˬ, Ka li deh ̭-eu jeˬ nehˬ-ehˇ tiˬ kawˆ lo ̭-ehˇ Miˬyehˇ la ̭ k’oeˇ za ̭ taˬ-awˇ jaˆ-a siˬ. ⁴ Maˇ maˇ ni g’eh-eu naw ma ̭-euˬ deh ̭-eu jeˬ-aˬ, Ka li-euˬ gaˇ mˇ-eu g’aˇ duˬ pyeu ̭-awˇ, aˬ yaw ̭ miˇ tsaˬ k’oeˇ taˆ doˆ le ngeh naw ma ̭ k’aw ̭ aˬ yaw ̭ nehˬ-ehˇ doˆ le-awˇ, aˬ yaw ̭ yaw sheh ̭ k’ahˬ sehˇ ahˇ-eu lo ̭-ehˇ naw ma ̭ k’aw ̭ yaw sheh ̭ k’ahˬ sehˇ ahˇ teh ̭-a. ⁵ Naw ma ̭ la ̭ k’oeˇ gaˇ mˇ lu ̭-eu jeˬ pyeu ̭-eu, miˇ tsaˬ shiˬ shaˬ jiˇ-ahˇ nui k’ahˇ jaˆ-eu la ̭ k’oeˇ jaw ̭ dui dui-eu k’aˬ miˬ sheu-eu g’awˬ mya jeˬ mˇ-eu, yaw haiˬ jeˬ mˇ-eu, nui k’ahˇ huiˬ-eu, heu deuˬ-ahˇ naw ma ̭ ya laˆ seh ̭ jiˇ meh. (Nui k’ahˇ huiˬ-eu jeˬ-aˬ, tahˬ pahˬ aˬ ma mawˇ kawˇ-ahˇ uˬ duˬ tahˬ gaˇ duˇ-eu meh.) ⁶ K’oeˇ lo ̭-ehˇ mˇ-awˇ Miˬyehˇ ehˇ dawˬ maˬ naˇ haˬ-eu deuˬ k’oeˇ taˆ Miˬyehˇ nui ma pehˇ-eu jeˬ keuˆ le teh ̭-a. ⁷ Dzeuˇ laˇ ngeh, nui k’ahˇ k’oeˇ deuˬ naw ma ̭-ahˇ uˆ g’aˬ taˬ ngeh, naw ma ̭ k’oeˇ lo ̭-ehˇ deh ̭ dzeuˇ jawˇ dzeuˇ ya ̭-euˬ meh. ⁸ Nui ma pehˇ-eu, nui ma daˆ-eu, aˬ cawˬ-ahˇ yaw doeˇ jahˇ maw ̭-eu, heu deuˬ-ahˇ naw ma ̭ nymˬ-mˇ byehˇ tsehˆ tsehˆ-awˬ. Aˬ cawˬ-ahˇ dawˬ doeˇ ngehˬ daˆ-eu jeˬ hawˇ-eu jaw ̭ dui dui-eu dawˬ ngehˬ-eu jeˬ, naw ma ̭-euˬ k’aˬ meh-ahˇ taˬ paˇ bi doˆ laˇ. ⁹ Tiˬ g’aˬ tiˇ g’aˬ jaˬ myaw ̭ taˬ paˇ myaw ̭. Aˬ jeˬ miˇ neh ehˇ naˇ, nui ma yaw oeˇ hawˇ-eu mˇ-eu shaˇ-eu yaw oeˇ jeˬ-ahˇ naw ma ̭ lehˆ dzeh g’aˬ-euˬ meh. ¹⁰ Nui ma yaw shui ̭-ahˇ naw ma ̭ dm paˇ g’aˬ-euˬ meh. Heu-aˬ, Beh-euˬ yaw sahˇ pyeu ̭-eu Miˬyehˇ-ahˇ naw ma ̭ tiˬ byah tiˬ lo ̭ bi siˬ nya laˇ-eu g’aˇ duˬ, aˬ yaw ̭-euˬ aˇ g’ehˇ-ahˇ duˇ laˇ ni aˬ myah lu ̭ yaw shui ̭ bi paˇ laˇ lu ̭-eu tsawˇ haˬ yaw shui ̭ pyeu ̭-eu meh. ¹¹ K’oeˇ miˇ neh, Yuˇdaˆ tsawˇ haˬ maˬ ngeuˇ-eu deuˬ hawˇ-eu Yuˇdaˆ tsawˇ haˬ yaw kaˬ maˬ ehˇ, baˆ k’oˆ mehˬ dzaˬ yehˬ-euˬ deuˬ hawˇ-eu maˬ yehˬ-euˬ deuˬ yaw kaˬ maˬ ehˇ, yawˬ k’ahˬ yaw miˇ yawˬ-ahˇ-euˬ tsawˇ haˬ deuˬ maˬ ehˇ, zahˇ sahˇ k’o ̭ maˬ baw-eu tsawˇ haˬ deuˬ maˬ ehˇ, zaˬ k’aˆ maˬ ehˇ, zaˬ k’aˆ maˬ ngeuˇ-eu deuˬ maˬ ehˇ, beu gaˇ duˬ tiˬ paw ̭-iˬ maˬ paˇ jaˆ meh. Dawˬ tawˆ lu ̭ Ka li-ahˇ uˬ duˬ duˬ leˇ-awˇ, dawˬ tawˆ lu ̭ Ka li la ̭ k’oeˇ jawˇ-eu meh. ¹² Naw ma ̭-aˬ, Miˬyehˇ-euˬ tsawˇ haˬ meh. Aˬ yaw ̭ naw ma ̭-ahˇ gaˬ-awˇ, aˬ yaw ̭-euˬ tsawˇ haˬ bi pyeu ̭ laˇ-eu g’aˇ duˬ tseˇ doˆ taˬ-euˬ meh. K’oeˇ miˇ neh, aˬ cawˬ-ahˇ g’awˬ shaˬ gaˬ-eu, aˬ cawˬ-ahˇ ngehˬ g’eh maw ̭-eu, yawˬ haˇ yawˬ ha taˬ nyiˇ-eu, nui nahˬ nui yu ahˇ-eu, nui ma g’awˬ mahˇ ni taˬ-eu, heu deuˬ-ahˇ naw ma ̭ dm tsahˬ taˬ-awˬ. ¹³ Tiˬ g’aˬ tiˇ g’aˬ oˇ-awˬ. Iˬ baˇ taˬ k’aˇ za laˇ ngeh, tiˬ g’aˬ tiˇ g’aˬ iˬ baˇ pyehˬ-awˬ. Sahˬpaˬ Yeˬsuˇ naw ma ̭-ahˇ iˬ baˇ pyehˬ nehˬ la ̭-euˬ lo ̭-ehˇ, tiˬ g’aˬ tiˇ g’aˬ iˬ baˇ pyehˬ-awˬ. ¹⁴ Heu deuˬ dawˬ tawˆ lu ̭ mˇ-euˬ k’oeˇ taˆ g’oeˇ-eu gaˬ-eu jeˬ bi jaˆ-awˬ. G’oeˇ-eu gaˬ-eu jeˬ-aˬ, dawˬ tawˆ lu ̭ tiˬ gaˇ ta ̭ leˇ jiˇ ni gahˇ dzahˬ-eu meh. ¹⁵ Ka li neh bi ̭-euˬ tsaˬ leˇ dzoeˇ leˇ-eu jeˬ k’oeˇ-aˬ, naw ma ̭ tiˬ jeˬ paˬ mˇ-eu lehˇ noeˬ tsehˆ ngeh naw ma ̭-ahˇ gaˇ ma sheuˬ mehˬ-eu g’aˇ duˬ pyeu ̭-eu meh. Aˬ jeˬ miˇ neh ehˇ naˇ, naw ma ̭ k’oeˇ lo ̭-ehˇ tsaˬ leˇ dzoeˇ leˇ-awˇ g’awˇ mawˇ tiˬ mawˇ teh ̭-ehˇ pyeu ̭ laˇ-eu g’aˇ duˬ, Miˬyehˇ neh naw ma ̭-ahˇ kuˇ taˬ-euˬ meh. Naw ma ̭ Miˬyehˇ-euˬ guiˬ lahˬ-ahˇ ngehˇ-eu maˬ tsaˬ-a. ¹⁶ Byah dui dui-eu Ka li-euˬ dawˬ k’oeˇ, naw ma ̭-euˬ nui ma la ̭ k’oeˇ bi ahˇ-eu tsaˬ meh. Zaˬ siˬ tsawˇ gahˇ dawˬ tawˆ lu ̭ zmˬ-awˇ tiˬ g’aˬ tiˇ g’aˬ mehˬ-awˬ tsoˆ-awˬ. Jaˇli ̭ la ̭ k’oeˇ ahˇ-eu ja ceuˬ-eu caˇdawˬ deuˬ, Yeˬsuˇ gaˇ kawˆ caˇ-eu caˇ dawˬ deuˬ hawˇ-eu, guiˬ lahˬ sa ̭ laˇ paw ta ̭ leˇ-eu caˇ dawˬ deuˬ caˇ caˇ-ehˇ, nui ma la ̭ k’oeˇ Miˬyehˇ-euˬ guiˬ lahˬ-ahˇ ja ceuˬ-awˬ. ¹⁷ Naw ma ̭ k’aˇ mˇ k’aˇ shaˇ k’aˇ ngehˬ k’aˇ tmˇ-eu jeˬ la ̭ k’oeˇ, Sahˬ paˬ Yeˬsuˇ-euˬ tsawˇ myahˇ uˬ moˆ Aˬ da Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ mˇ-awˬ. ¹⁸ Miˬ zaˬ deuˬ-oˇ, yawˬ ha-euˬ k’aˬ dzeˇ zaˬ uˆ lahˇ-eu uˬ moˆ deh ̭-awˬ. Aˬ jeˬ miˇ neh ehˇ naˇ, naw ma ̭ Ka li zaˬ pyeu ̭-eu miˇ neh k’oeˇ lo ̭-ehˇ deh ̭-eu tsaˬ meh. ¹⁹ K’aˬ dzeˇ zaˬ deuˬ-oˇ, yawˬ ha-euˬ miˬ zaˬ-ahˇ gaˬ-awˬ. Yehˬ bawˬ sehˇ lu-ehˇ taˬ g’eh. ²⁰ Zaˬ deuˬ-oˇ, naw ma ̭ Ka li zaˬ pyeu ̭-eu lo ̭-ehˇ, yawˬ ha-euˬ aˬ ma aˬ da ehˇ dawˬ-ahˇ yawˬ jawˇ na lu ̭ naˇ haˬ geu ̭-awˬ. Aˬ jeˬ miˇ neh ehˇ naˇ, k’oeˇ lo ̭-ehˇ mˇ gaˇ Miˬyehˇ nui ma tsaˬ-eu meh. ²¹ Aˬ da aˬ ma deuˬ-oˇ, yawˬ ha-euˬ zaˬ deuˬ nui ma pehˇ ni taˬ jahˇ. K’oeˇ lo ̭-ehˇ jahˇ nehˬ naˇ, yawˬ jeˬ na lu ̭ la ̭ k’oeˇ aˬ yaw ̭ ma ̭ nui ma baˬ-iˇ teh ̭-a. ²² Zaˬ k’aˆ deuˬ-oˇ, yawˬ jeˬ na lu ̭ la ̭ k’oeˇ yawˬ ha-euˬ baw leˬ ehˇ dawˬ naˇ haˬ-awˬ. Baw leˬ deuˬ neh bi ja ceuˬ-eu lehˇ baw leˬ mawˇ gaˇ teh ̭-ehˇ dawˬ g’oˆ g’oˆ-eu jeˬ maˬ bi pyeu ̭ ni, Sahˬpaˬ Yeˬsuˇ-ahˇ yaw zeu baw-eu miˇ neh nui ma la ̭ k’oeˇ keuˆ ni dawˬ g’oˆ g’oˆ-eu jeˬ bi pyeu ̭-awˬ. ²³ Aˬ geu jeˬ mˇ-eu maˬ kaˬ, tsawˇ haˬ zaˬ g’aˇ duˬ mˇ-eu lo ̭-ehˇ maˬ ngeuˇ ni, Sahˬpaˬ Yeˬsuˇ g’aˇ duˬ mˇ-eu lo ̭-ehˇ nui ma keuˆ-awˇ mˇ-awˬ. ²⁴ Sahˬpaˬ Yeˬsuˇ neh aˬ yaw ̭-euˬ tsawˇ haˬ deuˬ g’aˇ duˬ lehˬ hmˬ taˬ-euˬ la ̭ sawˬ-ahˇ naw ma ̭ za teh ̭-a lehˇ nui ma la ̭ k’oeˇ noeˬ taˬ-awˬ. Aˬ jeˬ miˇ neh ehˇ naˇ, naw ma ̭ gaˇ mˇ nehˬ lu ̭-eu Baw leˬ maˇ maˇ ni g’eh-eu g’aˬ-aˬ, Ka li meh. ²⁵ Maˬ muiˬ-eu jeˬ mˇ-eu tsawˇ haˬ-aˬ, yawˬ ha neh k’aˇ mˇ-euˬ lo ̭-ehˇ k’ehˬ nehˬ k’aˆ nehˬ gaˇ ya daˬ teh ̭-a. Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬzaˬ-ahˇ myaˆ pyawˬ huiˬ nyiˇ maˬ tseˇ ni yaˇ k’aˬ daˇ-eu meh.

¹ Baw leˬ deuˬ-oˇ, yawˬ ha-euˬ zaˬ k’aˆ deuˬ-ahˇ yawˬ tsaˬ yaw dawˇ dawˇ-ehˇ haw nehˬ-awˬ. Naw ma ̭ k’aw ̭, mˬ k’oeˇ taˆ naw ma ̭-euˬ Baw leˬ jawˇ ma lehˇ nui ma la ̭ k’oeˇ noeˬ taˬ-awˬ. ² Aˬ myah lu ̭ maˬ tsehˆ leˇ ni guiˬ lahˬ shaˇ-awˬ. Naw ma ̭ guiˬ lahˬ shaˇ ngeh, Miˬyehˇ-euˬ guiˬ lahˬ-ahˇ ja ceuˬ ja ceuˬ-ehˇ, yaw beuˇ beuˇ-ehˇ shaˇ-awˬ. ³ Ka li-euˬ gaˇ kawˆ za ̭ taˬ-euˬ jeˬ-ahˇ ta ̭-eu Miˬyehˇ dawˬ kawˬ nga ma ̭ mehˬ ngeh, laˆ tsoeˬ-eu jeˬ maˬ jaˆ-ehˇ ya mehˬ ni Miˬyehˇ caw ba nehˬ la ̭-eu g’aˇ duˬ noeˬ keuˆ-awˇ guiˬ lahˬ shaˇ nehˬ la ̭-awˬ. Aˬ jeˬ miˇ neh ehˇ naˇ, ngaˇ Miˬyehˇ dawˬ kawˬ mehˬ-euˬ miˇ neh nymˬ-mˇ tawˬ-ahˇ ya uˇ lu ̭-eu ma. ⁴ K’oeˇ miˇ neh, ngaˇ ya ngehˬ paˬ-ehˇ g’eh-eu dawˬ k’oeˇ deuˬ-ahˇ, aˬ cawˬ g’oˆ shaw nya ni shawˇ jehˆ ni mehˬ nehˬ nya-eu g’aˇ duˬ guiˬ lahˬ caw shaˇ nehˬ la ̭-awˬ. ⁵ Ka li-ahˇ maˬ jah-eu tsawˇ haˬ deuˬ-euˬ mehˬ shi zaˬ siˬ tsawˇ gahˇ ahˇ-eu tsawˇ haˬ lo ̭-ehˇ deh ̭-awˬ. Aˇ yamˬ k’aˇ tsaˬ laˇ ngeh, yawˬ ha jah-eu tsawˇ haˬ pyeu ̭-eu gaˇ kawˆ aˬ cawˬ-ahˇ bi siˬ bi mawˇ-awˬ. ⁶ Naw ma ̭ neh ngehˬ-euˬ dawˬ deuˬ-aˬ, aˬ cawˬ-euˬ nui ma-ahˇ laˆ saˆ-awˇ, aˬ cawˬ naˇ haˬ maw ̭-eu dawˬ deuˬ bi pyeu ̭-awˬ. K’oeˇ uˬ ta ̭, tsawˇ haˬ yawˬ g’aˬ na lu ̭-ahˇ dawˬ yaw muiˬ aˬ joˆ-ehˇ ya ngehˬ cawˬ k’o ̭ nehˬ-eu gaˇ kawˆ siˬ nya-eu tsaˬ meh. ⁷ Ngaˬ-euˬ gaˇ kawˆ daw ̭ tawˆ lu ̭, Sahˬpaˬ Yeˬsuˇ-euˬ gaˇ la ̭ k’oeˇ saˇ jaˇ zi ̭-eu gaˇ mˇ cawˬ pyeu ̭-eu aˬ dui-euˬ aˬ nyiˇ Duˇjiˇ naw ma ̭-ahˇ dzawˇ nehˬ la ̭ teh ̭-a. ⁸ K’oeˇ miˇ neh, aˬ yaw ̭-ahˇ naw ma ̭ jawˇ gaˇ ngaˇ k’ehˇ g’eh la ̭-eu ma. Nga ma ̭ aˬ joˆ-ehˇ deh ̭ lu ̭ jawˇ lu ̭-eu gaˇ kawˆ naw ma ̭-ahˇ bi dzawˇ mehˬ-awˇ, naw ma ̭ la ̭ k’aˬ bi cehˇ-eu g’aˇ duˬ k’ehˇ g’eh la ̭-eu ma. ⁹ Nga ma ̭ gaˬ dui dui-awˇ jah coeˇ-eu naw ma ̭-euˬ aˇ muˇ zaˬ tiˬ g’aˬ pyeu ̭-eu aˬ nyiˇ Awˬneˬsiˬmuˇ-ahˇ k’aw ̭, aˬ yaw ̭ nehˬ-ehˇ bi laˇ caw-eu ma. Heu gaˇ k’aˇ pyeu ̭ lu ̭-eu yawˬ jeˬ na lu ̭ aˬ nya ̭ dzawˇ nehˬ la ̭ tehˬ-a. ¹⁰ Ngaˬ nehˬ-ehˇ tiˬ kawˆ lo ̭-ehˇ tawˬ-ahˇ uˇ lu ̭-eu Aˬliˬdaˬguˇ naw ma ̭-ahˇ dawˬ cawˬ puˬ ahˇ la ̭-euˬ meh. K’oeˇ lo ̭-ehˇ duˇ ni, Baˬnaˬbaˇ-euˬ aˬ yui ̭ aˬ nyiˇ tsaˬ-eu Maˬkuˆ k’aw ̭, naw ma ̭-ahˇ dawˬ cawˬ puˬ ahˇ la ̭-euˬ meh. ( Maˬkuˆ laˇ naˇ, aˬ joˆ-ehˇ ya ha nehˬ-eu gaˇ kawˆ naw ma ̭-ahˇ mehˬ nehˬ g’aˬ-euˬ ma.) ¹¹ Yuˇtuˬ lehˇ k’aw ̭ kuˇ-eu Yawˇshuˆ k’oeˇ g’aˬ k’aw ̭, naw ma ̭-ahˇ dawˬ cawˬ puˬ ahˇ la ̭-euˬ meh. Yuˇdaˆ tsawˇ haˬ la ̭ k’oeˇ Ka li zaˬ pyeu ̭ laˇ-awˇ ngaˬ nehˬ-ehˇ tiˬ kawˆ lo ̭-ehˇ Miˬyehˇ Miˇk’ahˬ g’aˇ duˬ mˇ lu ̭-eu heu smˇ g’aˬ jawˇ-eu teh ̭ ma. Aˬ yaw ̭ ma ̭ ngaˬ-ahˇ caw mˇ caw shaˇ nehˬ la ̭ dui dui-euˬ meh. ¹² Naw ma ̭-euˬ aˇ muˇ zaˬ tiˬ g’aˬ pyeu ̭-eu Yeˬsuˇ Ka li-euˬ gaˇ mˇ lu ̭-eu Iˇbaˬpaˬlaˇ k’aw ̭, naw ma ̭-ahˇ dawˬ cawˬ puˬ ahˇ la ̭-euˬ meh. Naw ma ̭ g’aˇ duˬ aˬ yaw ̭ aˬ myah lu ̭ guiˬ lahˬ shaˇ dui dui lu ̭ meh. Naw ma ̭ jah-eu la ̭ k’oeˇ zi ̭ dah ni yaw ̭ nya-eu g’aˇ duˬ maˬ ehˇ, Ka li-ahˇ jah-eu paw ehˇ k’aˇ maˬ za ni bi byah laˇ-eu g’aˇ duˬ maˬ ehˇ, Miˬyehˇ-euˬ nui k’ahˇ-ahˇ tiˬ byah tiˬ lo ̭ bi caw teh-eu g’aˇ duˬ maˬ ehˇ, aˬ yaw ̭ Miˬyehˇ-ahˇ guiˬ lahˬ shaˇ-eu maˬ tsehˆ leˇ-a. ¹³ Naw ma ̭ g’aˇ duˬ maˬ ehˇ, Lawˬdiˬciˆ meuˬ-ahˇ jawˇ-eu tsawˇ haˬ deuˬ g’aˇ duˬ maˬ ehˇ, Heˬlaˬbawˇliˇ meuˬ-ahˇ jawˇ-eu tsawˇ haˬ deuˬ g’aˇ duˬ maˬ ehˇ, aˬ yaw ̭ aˇ naˆ ni leh jeh-awˇ gaˇ mˇ lu ̭-eu gaˇ kawˆ ngaˇ saˇ kiˇ kamˬ peuˬ ma. ¹⁴ Naˇ gawˇ laˆ saˆ-eu tsawˇ haˬ tiˬ g’aˬ pyeu ̭-eu aˬ dui zawˇ gaˬ-eu saˬ laˬ g’oˬ Luˇka ̭ hawˇ-eu Deˬmaˆ k’aw ̭, naw ma ̭-ahˇ dawˬ cawˬ puˬ ahˇ la ̭-euˬ meh. ¹⁵ Lawˬdiˬciˆ meuˬ-ahˇ jawˇ-eu aˬ yui ̭ aˬ nyiˇ Ka li zaˬ deuˬ-ahˇ maˬ ehˇ, Noˬpaˇ hawˇ-eu aˬ yaw ̭-euˬ nymˇ-ahˇ tahˬ dzoeˇ-awˇ guiˬ lahˬ shaˇ-eu Ka li zaˬ aˇ muˇ-ahˇ maˬ ehˇ, nga ma ̭ noeˬ mawˇ dui dui lu ̭-eu gaˇ kawˆ tiˬ poˆ tsa ̭ gaˬ nehˬ-awˬ. ¹⁶ Sahˬ bo ̭ heu ta ̭-ahˇ naw ma ̭ gui haw g’aˬ ngeh, Lawˬdiˬciˆ meuˬ-ahˇ jawˇ-eu Ka li zaˬ aˇ muˇ-ahˇ k’aw ̭, maˬ byehˇ ni tiˬ poˆ bi gui haw-awˬ. K’oeˇ lo ̭-ehˇ duˇ ni, Lawˬdiˬciˆ meuˬ-ahˇ jawˇ-eu aˬ yui ̭ aˬ nyiˇ Ka li zaˬ deuˬ neh sha ha le-euˬ sahˬ bo ̭-ahˇ k’aw ̭, maˬ byehˇ ni gui haw-awˬ. ¹⁷ Aˬgiˇpuˆ-ahˇ k’aw ̭, "Sahˬpaˬ Yeˬsuˇ-euˬ gaˇ la ̭ k’oeˇ nawˇ mˇ-eu gaˇ deuˬ-ahˇ yaw muiˬ paˬ-ehˇ mˇ luiˆ jiˇ-awˬ" lehˇ tiˬ poˆ tsa ̭ gaˬ nehˬ-awˬ. ¹⁸ Pawˇluˆ naw ma ̭-ahˇ dawˬ cawˬ puˬ ahˇ la ̭-eu ma lehˇ ngaˬ-euˬ aˬ la ̭ neh bo ̭-euˬ ma. Ngaˇ shmˇ caˆ daˬ lu ̭ gaˇ taˬ ngehˇ de. Miˬyehˇ-euˬ guiˬ lahˬ yaw dzahˇ naw ma ̭ k’oeˇ taˆ jaˆ lu ̭-uˇ.