G’AˬK’EHˇ

G’AˬK’EHˇ

¹ Tawˇpiˇluˆ-oˇ, ngaˬ neh bo ̭-euˬ sahˬ bo ̭ yaw beh ta ̭ la ̭ k’oeˇ, Yeˬsuˇ gaˇ mˇ dahˬ beh ngeh neh aˬ yaw ̭ neh k’aˇ mˇ k’aˇ shaˇ, k’aˇ mehˬ k’aˇ tsoˆ ya ̭-euˬ gaˇ kawˆ deuˬ bo ̭ taˬ-euˬ ma. ² Aˬ yaw ̭-ahˇ mˬ k’oeˇ taˆ bi ciˬ daˆ k’o ̭ g’eh ngeh nah-ahˇ keuˆ ni bo ̭ taˬ-euˬ ma. Aˬ yaw ̭-ahˇ mˬ k’oeˇ taˆ maˬ bi ciˬ k’o ̭ daˆ k’o ̭ le ̭ mi naˆ-ehˇ, aˬ yaw ̭-euˬ g’aˬ k’ehˇ bi geu ̭-eu g’aˇ duˬ aˬ yaw ̭ neh tseˇ doˆ-euˬ tsawˇ haˬ deuˬ-ahˇ, Muiˬ-eu shawˇ-eu Yaw sahˇ Miˬyehˇ-euˬ baoˬ-ahˇ g’oe-eu la ̭ k’oeˇ aˬ yaw ̭ mehˬ ya ̭ tsoˆ ya ̭-euˬ meh. ³ Aˬ yaw ̭ aˬ diˇ aˬ maˇ deh ̭ lu ̭-eu gaˇ kawˆ noeˬ bahˬ k’aˇ maˬ bi za-eu g’aˇ duˬ, aˬ yaw ̭ shiˇ g’aˬ naˇ k’ah, aˇ yamˬ oeˬ tseˇ nah la ̭ k’oeˇ aˬ yaw ̭ ma ̭ jawˇ gaˇ g’awˬ mya poˆ doˆ le-euˬ meh. Aˬ yaw ̭ ma ̭ aˬ yaw ̭-ahˇ mawˇ-awˇ, Miˬyehˇ Miˇk’ahˬ gaˇ kawˆ aˬ yaw ̭ ma ̭-ahˇ aˬ yaw ̭ ja mehˬ-euˬ meh. ⁴ Aˬ yaw ̭ ma ̭ tiˬ gaˇ uiˬ leˇ-awˇ jawˇ ngeh, aˬ yaw ̭ heu lo ̭-ehˇ dawˬ bi ̭ ya ̭-euˬ meh. "Ngaˬ Da neh naw ma ̭-ahˇ bi ̭ ma lehˇ saˇ jaˇ dzaˬ taˬ-euˬ jeˬ pyeu ̭-eu, ngaˬ neh naw ma ̭-ahˇ ehˇ nehˬ taˬ-euˬ jeˬ-ahˇ maˬ za k’oeˇ keuˆ ni, Yeˬluˇsaˬlehˬ meuˬ-ahˇ neh maˬ doˆ-iˇ ni dawˬ tawˬ-awˬ. ⁵ Yoˇhaˬ-aˬ, iˇ cu ̭ la ̭ k’oeˇ iˇ cu ̭ shawˇ nehˬ-euˬ meh. Ehˇ k’aw ̭, g’awˬ myahˇ maˬ g’eh-ehˇ, Miˬ yehˇ naw ma ̭-ahˇ Yaw sahˇ Miˬyehˇ la ̭ k’oeˇ iˇ cu ̭ shawˇ nehˬ la ̭ teh ̭-a." ⁶ Zaˬ lahˇ deuˬ tiˬ gaˇ uiˬ leˇ-awˇ Yeˬsuˇ-ahˇ ya tahˬ dzoeˇ ngeh heu lo ̭-ehˇ naˇ haˬ-euˬ meh. "Sahˬpaˬ-oˇ, nymˬ-mˇ poˆ jawˇ Miˇ k’ahˬ heu k’ahˬ Iˇsaˬleˬlaˆ tsawˇ jeuˬ-ahˇ nawˇ bi ̭ k’o ̭-eu lehˇ g’eh-eu ma loˇ." ⁷ Aˬ yaw ̭ ma ̭-ahˇ Yeˬsuˇ ehˇ nehˬ-eu, "Aˇ yamˬ aˇ law-ahˇ ngaˬ Da-euˬ baoˬ neh to ̭ taˬ g’aˬ jiˇ-euˬ meh. Naw ma ̭ siˬ nya-eu maˬ loˬ-a. ⁸ Ehˇ k’aw ̭, Muiˬ-eu shawˇ-eu Yaw sahˇ Miˬyehˇ naw ma ̭ k’oeˇ taˆ oe keuˆ ngeh, naw ma ̭ baoˬ za-awˇ, Yeˬluˇsaˬlehˬ meuˬ la ̭ k’oeˇ maˬ ehˇ, Yuˇdaˆ miˇ k’ahˬ hawˇ-eu Saˬmaˬliˆ miˇ k’ahˬ doe ni maˬ ehˇ, mˬ dzeˇ miˇdzeˇ keuˆ ni maˬ ehˇ, naw ma ̭ ngaˬ-euˬ g’aˇ duˬ saˇ kiˇ kamˬ-eu tsawˇ haˬ pyeu ̭ laˇ teh ̭-a." ⁹ Aˬ yaw ̭ k’oeˇ lo ̭-ehˇ ehˇ g’aˬ-awˇ, aˬ yaw ̭ ma ̭ haw haw-ehˇ jawˇ ngeh, mˬ k’oeˇ taˆ bi ciˬ daˆ k’o ̭ le ̭-euˬ meh. Mˬ dmˇ aˬ yaw ̭-ahˇ tsahˇ kaˬ le-awˇ, aˬ yaw ̭ ma ̭ aˬ yaw ̭-ahˇ maˬ mawˇ nya-a. ¹⁰ A yaw ̭ ma ̭ aˬ yaw ̭ mˬ-ahˇ g’o ̭ daˆ leˇ gaˇ haw tsoˆ-awˇ jawˇ ngeh, mehˬ tsoeˬ pyuˇ deuˬ ni dm lu ̭-eu tsawˇ haˬ nyiˬ g’aˬ aˬ yaw ̭ ma ̭-euˬ dawˬ peh ja pyuˬ ni yaw ̭ le-euˬ meh. ¹¹ Aˬ yaw ̭ nya ̭-ehˇ-eu, "Gaˬliˬlehˇ tsawˇ haˬ deuˬ-oˇ, aˬ jeˬ miˇ neh naw ma ̭ heu gaˇ yaw ̭-awˇ mˬ-ahˇ haw haw-ehˇ jawˇ te. Naw ma ̭ jawˇ gaˇ neh mˬ-ahˇ bi ciˬ k’o ̭ daˆ le ̭-euˬ Yeˬsuˇ heu g’aˬ-aˬ, naw ma ̭-euˬ mehˬ shi k’aˇ g’o ̭ daˆ leˇ-euˬ lo ̭-ehˇ tiˬ poˆ paˇ g’o ̭ ka le meh." ¹² K’oeˇ naˇ, g’aˬ k’ehˇ k’oeˇ deuˬ Saˬloˬ Gawˬ jawˬ-ahˇ neh Yeˬluˇsaˬlehˬ meuˬ-ahˇ g’o ̭-iˇ-euˬ meh. Gawˬ jawˬ k’oeˇ jawˬ-aˬ, Yeˬluˇsaˬlehˬ meuˬ-ahˇ neh oeˬ yaˇ oeˬ tseˇ lmˇ kaˬ-eu teh ̭ meh. ¹³ Aˬ yaw ̭ ma ̭ meuˬ-ahˇ g’o ̭-iˇ-awˇ, nymˇ la ̭ taˆ tiˆ-ahˇ jaˆ-eu aˬ yaw ̭ ma ̭ ya ̭-eu lawˆ-ahˇ g’o ̭ uˇ leˇ-euˬ meh. Aˬ yaw ̭ ma ̭-aˬ, Beˬtuˆluˆ, Yoˇhaˬ, Yaˬkoˆ hawˇ-eu Aˬdehˬlehˬ, Piˇliˇpuˆ, Toˇmaˆ, Baˬtawˇlaˬmehˇ, Ma ̭tehˬ, Aˬlaˬpehˇ-euˬ aˬ li Yaˬkoˆ, Siˇmoˬ Zeˬloˆ, Yaˬkoˆ-euˬ aˬ li Yuˇdaˆ, heu deuˬ meh. ¹⁴ Aˬ yaw ̭ ma ̭-aˬ, zaˬ miˬ zaˬ deuˬ hawˇ-eu, Yeˬsuˇ-euˬ aˬ ma Maˬliˇ hawˇ-eu Yeˬsuˇ-euˬ aˬ nyiˇ deuˬ nehˬ-ehˇ tiˬ kawˆ lo ̭-ehˇ, tiˬ k’ehˬ maˬ taˬ ni uiˬ leˇ-awˇ guiˬ lahˬ shaˇ-eu meh. ¹⁵ G’awˬ myahˇ maˬ g’eh-ehˇ, jah-eu tsawˇ haˬ deuˬ tiˬ yaˇ nyiˬ tseˇ g’aˬ uiˬ leˇ-awˇ jawˇ gaˇ, Beˬtuˆluˆ tuˇ laˇ-awˇ, heu lo ̭-ehˇ ehˇ-eu meh. ¹⁶ "Aˬ yui ̭ aˬ nyiˇ deuˬ-oˇ, Yeˬsuˇ-ahˇ nyeh ̭-euˬ tsawˇ haˬ deuˬ-ahˇ gaˇ ma sheuˬ mehˬ nehˬ-euˬ g’a pyeu ̭-eu Yuˇdaˆ-euˬ gaˇ kawˆ, Muiˬ-eu shawˇ-eu Yaw sahˇ Miˬyehˇ neh Daˬbiˇ-ahˇ g’oe-awˇ ehˇ taˬ-euˬ Jaˇli ̭ dawˬ kawˬ k’oeˇ byah laˇ-euˬ meh. ¹⁷ Yuˇdaˆ-aˬ, aˬ dui-euˬ aˇ muˇ la ̭ k’oeˇ uˇ-eu tsawˇ haˬ tiˬ g’aˬ meh. Aˬ jeˬ miˇ neh ehˇ naˇ, aˬ dui nehˬ-ehˇ gaˇ mˇ-eu g’aˇ duˬ aˬ yaw ̭-ahˇ tseˇ doˆ taˬ-euˬ meh." ¹⁸ (Haiˬ dui dui-eu gaˇ k’oeˇ mˇ-awˇ za-euˬ pyuˇ neh, miˇ tsaˬ tiˬ tsahˇ Yuˇdaˆ zeuˇ-awˇ, miˇ tsaˬ k’oeˇ tsahˇ-ahˇ aˬ yaw ̭ uˬ duˬ tahˬ poˆ-ehˇ ga seh ̭-euˬ meh. Aˬ yaw ̭-euˬ u maˆ ga paˆ-awˇ, baw uˇ baw ma dawˬ tawˆ lu ̭ doˆ le jiˇ-euˬ meh. ¹⁹ Yeˬluˇsaˬlehˬ meuˬ la ̭ k’oeˇ k’aˇ jawˇ-eu tsawˇ haˬ dawˬ tawˆ lu ̭, gaˇ kawˆ k’oeˇ gaˬ jiˇ-euˬ meh. K’oeˇ miˇ neh, miˇ tsaˬ k’oeˇ tsahˇ-ahˇ aˬ yaw ̭ ma ̭-euˬ dawˬ-ahˇ neh Aˬkeˬdaˬmaˬ lehˇ kuˇ-eu meh. Dawˬ tsui ̭-aˬ, ’Shiˬ doˆ-euˬ miˇ tsaˬ’ lehˇ ehˇ maw ̭-eu meh. ²⁰ "Ja ceuˬ-eu sahˬ bo ̭ la ̭ k’oeˇ heu lo ̭-ehˇ bo ̭ taˬ-euˬ meh. ’Aˬ yaw ̭-euˬ nymˇ ngeh ̭-iˇ jiˇ-awˇ, tsawˇ haˬ maˬ jawˇ ni jaˆ lu ̭-uˇ’ lehˇ bo ̭ taˬ-euˬ meh. ’Aˬ yaw ̭ mˇ-euˬ gaˇ-ahˇ mˇ-eu, dah zaˇ tiˬ g’aˬ doˆ le lu ̭-uˇ’ lehˇ k’aw ̭ bo ̭ taˬ-euˬ meh. ²¹ "K’oeˇ miˇ neh, Sahˬpaˬ Yeˬsuˇ g’o ̭ deh ̭ laˇ-euˬ gaˇ kawˆ saˇ kiˇ kamˬ-eu g’aˇ duˬ, aˬ dui nehˬ-ehˇ tsawˇ haˬ tiˬ g’aˬ ya bi lahˬ laˇ meh. Tsawˇ haˬ k’oeˇ g’aˬ-aˬ, Yoˇhaˬ iˇ cu ̭ shawˇ-eu gaˇ kawˆ mehˬ ngeh neh aˇ dahˬ beh-awˇ, Yeˬsuˇ-ahˇ mˬ-ahˇ ciˬ daˆ k’o ̭ le ̭-euˬ aˇ yamˬ-ahˇ keuˆ ni, Sahˬpaˬ Yeˬsuˇ aˬ dui nehˬ-ehˇ k’aˇ cah ta ̭-euˬ aˇ yamˬ la ̭ k’oeˇ, aˬ dui-euˬ aˇ muˇ-ahˇ uˇ-awˇ cah ta ̭-euˬ tsawˇ haˬ tiˬ g’aˬ ya bi pyeu ̭ meh." ²³ K’oeˇ ngeh, aˬ yaw ̭ ma ̭ tsawˇ haˬ nyiˬ g’aˬ-ahˇ shaˇ noeˬ-euˬ meh. Yaw beh g’aˬ-aˬ, tsawˇ myahˇ myahˇ maˇ Yuˇtuˬ lehˇ myahˇ-awˇ, Baˬsaˬbaˆ lehˇ k’aw ̭ kuˇ-eu Yoˇsehˆ meh. Nyiˬ g’aˬ tiˬ g’aˬ-aˬ, Maˬtiˇ meh. ²⁴ K’oeˇ naˇ, a yaw ̭ ma ̭ heu lo ̭-ehˇ guiˬ lahˬ shaˇ-euˬ meh. "SahˬpaˬMiˬyehˇ-oˇ, tsawˇ haˬ yawˬ g’aˬ na lu ̭-euˬ nui noeˬ nui duˇ-ahˇ nawˇ siˬ nya-eu meh. Yuˇdaˆ-aˬ, yawˬ paw yawˬ ciˬ pyawˇ-awˇ, aˬ yaw ̭-ahˇ geuˇ-eu jawˇ duˬ-ahˇ le dzeuˇ-euˬ meh. K’oeˇ miˇ neh, Yuˇdaˆ-euˬ dah zaˇ g’aˬ k’ehˇ geu ̭-awˇ gaˇ mˇ-eu g’aˇ duˬ, tsawˇ haˬ heu nyiˬ g’aˬ la ̭ k’oeˇ nawˬ neh tseˇ doˆ-euˬ g’aˬ nga ma ̭-ahˇ mehˬ nehˬ la ̭-awˬ." ²⁶ K’oeˇ naˇ, aˬ yaw ̭ nya ̭-euˬ tsawˇ myahˇ bo ̭ ahˇ-awˇ, maˬ haw ni beuˬ ngeh, Maˬtiˇ-ahˇ zaˬ leˇ-euˬ meh. K’oeˇ miˇ neh, Maˬtiˇ-ahˇ g’aˬ k’ehˇ tseˇ ti ̭ g’aˬ nehˬ-ehˇ bi gaw ̭ leˇ-euˬ meh.

¹ Beˬdeˬgoˇdeˬ aˇ nah keuˆ le ngeh, jah-eu tsawˇ haˬ dawˬ tawˆ lu ̭, tiˬ gaˇ uiˬ leˇ-awˇ jawˇ-euˬ meh. ² Ja pyuˬ ni, jaˬ lehˇ lehˇ ma baw-eu lo ̭-ehˇ mˬ k’oeˇ taˆ teˇ saˇ mahˇ doˆ laˇ-awˇ, aˬ yaw ̭ ma ̭ nuiˇ lu ̭-eu nymˇ nymˇ lah-ehˇ teˇ saˇ k’oeˇ byah-iˇ-euˬ meh. ³ K’oeˇ ngeh, miˬ dzaˬ miˬ lmˇ-ahˇ duˇ-eu mehˬ laˇ deuˬ-ahˇ aˬ yaw ̭ ma ̭ ya mawˇ-euˬ meh. Mehˬ laˇ k’oeˇ deuˬ oe k’awˬ g’eh-awˇ, k’oeˇ gaˇ k’aˇ jawˇ-eu tsawˇ haˬ yawˬ g’aˬ na lu ̭-ahˇ toeˬ ciˆ-euˬ meh. ⁴ Aˬ yaw ̭ ma ̭ dawˬ tawˆ lu ̭-ahˇ Muiˬ-eu shawˇ-eu Yaw sahˇ Miˬyehˇ byah laˇ-awˇ, Yaw sahˇ Miˬyehˇ neh bi ngehˬ bi tmˇ-euˬ lo ̭-ehˇ, dawˬ g’awˬ mya jeˬ ngehˬ-euˬ meh. ⁵ K’oeˇ ngeh, miˇ tsaˬ k’oeˇ taˆ jaˆ-eu miˇ k’ahˬ yawˬ k’ahˬ na lu ̭-ahˇ neh uiˬ laˇ taˬ-euˬ Miˬyehˇ-ahˇ yaw zeu baw dui dui-eu Yuˇdaˆ tsawˇ haˬ deuˬ, Yeˬluˇsaˬlehˬ meuˬ la ̭ k’oeˇ jawˇ lu ̭-eu meh. ⁶ Teˇ saˇ k’oeˇ ya gaˬ ngeh, tsawˇ haˬ k’oeˇ deuˬ baˬ ma ̭ puˇ jeˬ-ehˇ uiˬ le bymˇ le-euˬ meh. Jah-eu tsawˇ haˬ k’oeˇ deuˬ ngehˬ lu ̭-eu dawˬ k’oeˇ, aˬ yaw ̭ ma ̭ yawˬ g’aˬ na lu ̭-ahˇ yawˬ ha tsawˇ jeuˬ-euˬ dawˬ lo ̭-ehˇ gaˬ le-eu miˇ neh, aˬ yaw ̭ ma ̭ zahˬ leˇ-euˬ meh. ⁷ Aˬ yaw ̭ ma ̭ zahˬ dui dui leˇ-eu la ̭ k’oeˇ, heu lo ̭-ehˇ ehˇ-eu meh. "Dawˬ heu lo ̭-ehˇ ngehˬ lu ̭-eu tsawˇ haˬ heu deuˬ Gaˬliˬlehˇ tsawˇ haˬ deuˬ ngaˇ. ⁸ Toˆ-ehˇ ngeuˇ naˇ, aˬ dui yawˬ g’aˬ na lu ̭-ahˇ yawˬ ha tsawˇ jeuˬ-euˬ dawˬ-ahˇ neh aˬ joˆ-ehˇ gaˬ le-eu nga. ⁹ Aˬ dui ma ̭-aˬ, Baˬtiˇ miˇk’ahˬ, Meˬdiˇ miˇk’ahˬ, Eˇlamˬ miˇ k’ahˬ, Maˬsoˬpoˬtaˬmiˇ miˇ k’ahˬ, Yuˇdaˆ miˇ k’ahˬ, Gaˬbaˬdawˇciˆ miˇ k’ahˬ, Boˬtuˆ miˆ k’ahˬ, Aˬshaˆ miˇ k’ahˬ, ¹⁰ Puˬgiˇ miˇ k’ahˬ, Paˬbuˇliˇ miˇ k’ahˬ, Iˇjiˇtuˆ miˇ k’ahˬ, Kuˇleˬniˬ miˇ k’ahˬ dawˬ peh jaˆ-eu Liˆbyaˇ miˇ k’ahˬ, heu deuˬ doe ni tiˬ paw tiˬ g’aˬ-ehˇ jawˇ-eu tsawˇ haˬ deuˬ ma. Aˬ dui tiˬ paˆ na deuˬ-aˬ, Loˇmaˆ meuˬ-ahˇ jawˇ-eu oe taˬ-euˬ ma. ¹¹ Yuˇdaˆ tsawˇ jeuˬ maˬ ehˇ, Yuˇdaˆ tsawˇ haˬ pyeu ̭ laˇ-euˬ aˬ cawˬ tsawˇ jeuˬ deuˬ maˬ ehˇ, aˬ dui la ̭ k’oeˇ ahˇ-eu ma. Tiˬ paˆ na deuˬ-aˬ Gaˬlaˬdeˬ miˇ k’ahˬ hawˇ-eu Aˬleˬbyaˇ miˇ k’ahˬ-ahˇ jawˇ-eu ma. Ehˇ k’aw ̭, Miˬyehˇ neh mˇ-euˬ huiˬ-eu gaˇ deuˬ gaˇ kawˆ aˬ yaw ̭ ma ̭ ngehˬ-eu k’oeˇ, aˬ dui dawˬ tawˆ lu ̭ yawˬ ha tsawˇ jeuˬ-euˬ dawˬ-ahˇ neh ya gaˬ-euˬ ma." ¹² Aˬ yaw ̭ ma ̭ noeˬ maˬ doˆ-ehˇ zahˬ leˇ tsoˆ leˇ jiˇ-awˇ, "Aˬ joˆ-ehˇ maˇ diˇ g’eh-eu nga teu" lehˇ, tiˬ g’aˬ tiˇ g’aˬ ehˇ-eu meh. ¹³ Ehˇ k’aw ̭, tiˬ paˆ na deuˬ-aˬ, jah-eu tsawˇ haˬ k’oeˇ deuˬ-ahˇ ceh ̭ leh ̭ ka-eu la ̭ k’oeˇ, "Aˬ ga ̭ dzaˇ uiˇ yaw shui ̭ dawˇ yeh ̭-euˬ miˇ neh g’eh-eu nga" lehˇ ja uiˇ niˇ g’a-eu meh. ¹⁴ K’oeˇ ngeh, Beˬtuˆluˆ-aˬ, g’aˬ k’ehˇ tseˇ nyi ̭ g’aˬ nehˬ-ehˇ yaw ̭-awˇ, teˇ saˇ yaw k’aˆ k’aˆ-ehˇ guˇ-awˇ, tsawˇ haˬ aˇ ma ̭-ahˇ heu lo ̭-ehˇ ehˇ nehˬ-euˬ meh. "Aˬ yui ̭ aˬ nyiˇ Yuˇdaˆ tsawˇ haˬ deuˬ hawˇ-eu Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-oˇ, gaˇ kawˆ heu ngaˇ ja gaˇ tiˬ poˆ naˇ haˬ sheˇ. ¹⁵ Naw ma ̭ noeˬ-eu lo ̭-ehˇ, tsawˇ haˬ heu deuˬ aˬ ga ̭ dzaˇ uiˇ yaw shui ̭ dawˇ yeh ̭-euˬ maˬ ngeuˇ-a. Aˬ jeˬ miˇ neh ehˇ naˇ, nymˬ-mˇ uˬ shawˬ paw naˬ liˬ g’oeˬ la ̭ keuˆ laˇ-euˬ teh ̭-a siˬ. ¹⁶ Gaˇ kawˆ heu-aˬ, Miˬyehˇ g’aˇ duˬ ngeh dah-eu Yawˇlaˆ neh ehˇ taˬ-euˬ lo ̭-ehˇ pyeu ̭ laˇ-euˬ meh. Yawˇlaˆ neh ehˇ taˬ-euˬ dawˬ-aˬ, heu lo ̭-ehˇ meh. ¹⁷ ’Miˬyehˇ neh ehˇ taˬ-euˬ dawˬ-aˬ, Aˇ saˬ saˬ-eu aˇ nah keuˆ ngeh, tsawˇ haˬ yawˬ g’aˬ na lu ̭ k’oeˇ taˆ, ngaˬ-euˬ Yaw sahˇ shehˆ daˆ nehˬ ma. Naw ma ̭-euˬ aˬ buˇ aˬ li deuˬ, ngaˬ-euˬ g’aˇ duˬ ngehˬ dah teh ̭-a. Naw ma ̭-euˬ tsawˇ haˬ zaˬ guˬ deuˬ, Yaw sahˇ mehˬ-eu jeˬ ya mawˇ-awˇ, naw ma ̭-euˬ tsawˇ mawˬ tsawˇ k’aˆ deuˬ, yu ̭ maˆ g’awˬ mya jeˬ maˆ teh ̭-a. ¹⁸ Aˇ nah aˇ yamˬ k’oeˇ keuˆ le ngeh, ngaˬ-euˬ zaˬ k’aˆ deuˬ-euˬ k’oeˇ taˆ, zaˬ miˬ zaˬ yo maˬ tseˇ paˆ ni, ngaˬ-euˬ Yaw sahˇ shehˆ daˆ nehˬ-awˇ, ngaˬ-euˬ g’aˇ duˬ bi ngehˬ dah ma. ¹⁹ Mˬ maˬ mˬ taˆ yaw goˇ k’oeˇ gaˇ, k’aˆ jeˬ-ehˇ g’eh-eu mˇ mehˬ-awˇ, La ̭ oˆ miˇ maˬ heu k’oeˇ taˆ k’aw ̭, zahˬ leˇ-eu jeˬ ngaˇ jahˇ mehˬ ma. Shiˬ doˆ-awˇ miˬ dzaˬ puiˆ teh ̭-a. Uˬ k’oeˬ naˆ u ̭ ni jaˆ teh ̭-a. ²⁰ Yaw sheh ̭ k’ahˬ sehˇ huiˬ dui dui-eu, SahˬpaˬMiˬyehˇ-euˬ aˇ nah k’oeˇ, miˇ k’oeˇ taˆ maˬ keuˆ le nmˇ kaˬ, nahˇ ma zahˇ tsui ni pyeu ̭-iˇ-awˇ, ba la shiˬ neˇ neˇ-iˇ teh ̭-a. ²¹ K’oeˇ ngeh, ’Caw ba nehˬ la ̭-awˬ’ lehˇ, SahˬpaˬMiˬyehˇ-ahˇ kuˇ-eu deuˬ, ka k’o ̭ nehˬ-eu jeˬ za teh ̭-a.’ ²² "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ-oˇ, ngaˇ ehˇ gaˇ yaw muiˬ paˬ-ehˇ naˇ haˬ sheˇ. Naˬzaˬlehˇ tsawˇ haˬ Yeˬsuˇ-aˬ, maˇ maˇ ni Miˬyehˇ neh bi oe-euˬ g’aˬ pyeu ̭-eu gaˇ kawˆ, aˬ yaw ̭-ahˇ g’oe-eu la ̭ k’oeˇ Miˬyehˇ neh mˇ-euˬ zahˬ leˇ paˬ-ehˇ g’eh-eu gaˇ k’oeˇ deuˬ saˇ kiˇ kamˬ lu ̭ meh. Gaˇ kawˆ k’oeˇ deuˬ naw ma ̭-euˬ mehˬ shi pyeu ̭ dzeuˇ ya ̭-euˬ miˇ neh, naw ma ̭ yaw muiˬ paˬ-ehˇ siˬ duˬ meh. ²³ Miˬyehˇ-aˬ, yaw beh neh aˬ yaw ̭ neh lehˬ hmˬ taˬ-euˬ lo ̭-ehˇ, Yeˬsuˇ-ahˇ naw ma ̭-euˬ aˬ la ̭ la ̭ k’oeˇ a nehˬ-eu g’aˇ duˬ, na ̭ ngeh neh noeˬ tsehˆ taˬ g’aˬ-euˬ meh. K’oeˇ naˇ, iˬ baˇ mˇ-eu tsawˇ haˬ deuˬ neh la ̭ ya ̭ k’oeˇ taˆ bi ta ̭ tehˬ-eu la ̭ k’oeˇ, naw ma ̭ aˬ yaw ̭-ahˇ seh ̭-euˬ meh. ²⁴ Ehˇ k’aw ̭, aˬ yaw ̭-ahˇ Miˬyehˇ neh paˇ bi g’o ̭ deh ̭ laˇ-eu la ̭ k’oeˇ, shiˇ-eu jeˬ-euˬ baoˬ uˬ moˆ bi dzeuˇ-iˇ-euˬ meh. Aˬ jeˬ miˇ neh ehˇ naˇ, shiˇ-eu jeˬ aˬ yaw ̭-ahˇ maˬ pa ̭ taw ̭ nya-a. ²⁵ Aˬ yaw ̭-euˬ gaˇ kawˆ Daˬbiˇ neh heu lo ̭-ehˇ ehˇ taˬ-euˬ jaˆ-eu meh. ’Ngaˬ-euˬ mehˬ shi yawˬ jawˇ na lu ̭, SahˬpaˬMiˬyehˇ-ahˇ mawˇ lu ̭ ma. Ngaˬ-euˬ dawˬ peh aˬ yaw ̭ jawˇ-awˇ, ngaˇ k’ahˬ lahˇ duˬ maˬ paˇ jaˆ ma. ²⁶ Ngaˬ-euˬ nui ma nui saˇ za-awˇ, laˬ k’aˬ tiˬ cehˇ dawˬ ngehˬ-eu ma. Shiˬ shaˬ g’awˇ mawˇ maˬ gmˬ-eu k’aw ̭, noeˬ tmˬ taˬ-euˬ zi ̭ dah jaˆ ma. ²⁷ Aˬ jeˬ miˇ neh ehˇ naˇ, shiˇ-eu jeˬ-euˬ miˇ k’ahˬ la ̭ k’oeˇ, nawˇ ngaˬ-ahˇ maˬ byehˇ dzeh ya ̭-aˇ. Saˇ jaˇ zi ̭-eu zaˬ k’aˆ-ahˇ nawˇ, lmˬ bymˇ-ahˇ maˬ bi bu ̭ shoˆ-aˇ. ²⁸ Deh ̭-eu gaˇ ma nawˇ mehˬ la ̭-awˇ, nawˇ ngaˬ nehˬ-ehˇ jawˇ-eu miˇ neh, ngaˇ laˬ k’aˬ cehˇ-eu jeˬ byah ma.’ ²⁹ "A yui ̭ aˬ nyiˇ deuˬ-oˇ, tsawˇ myahˇ doˆ dui dui-eu aˬ dui-euˬ aˬ poeˬ sahˬ paˬ Daˬbiˇ gaˇ kawˆ, ngaˇ naw ma ̭-ahˇ k’aˬ duˬ ni ehˇ nehˬ nyaˇ. Aˬ yaw ̭ shiˇ-awˇ, aˬ yaw ̭-ahˇ ba ̭ pahˬ-euˬ lmˬ bymˇ iˬ nah keuˆ ni aˬ dui ma ̭ jawˇ gaˇ jaˆ lu ̭ meh. ³⁰ Aˬ yaw ̭-aˬ, Miˬyehˇ g’aˇ duˬ ngehˬ dah-eu tiˬ g’aˬ pyeu ̭-awˇ, Miˬyehˇ neh aˬ yaw ̭-ahˇ saˇ jaˇ dzaˬ taˬ-euˬ jeˬ-ahˇ aˬ yaw ̭ siˬ nya meh. Daˬbiˇ-euˬ zaˬ deuˬ uˆ deuˬ la ̭ k’oeˇ, Daˬbiˇ-ahˇ duˇ-eu sahˬ paˬ tiˬ g’aˬ bi doˆ laˇ ma lehˇ, Miˬyehˇ saˇ jaˇ dzaˬ taˬ-euˬ meh. ³¹ Mehˬ hu paw Miˬyehˇ aˬ joˆ-ehˇ jahˇ-eu lehˇ lehˬ hmˬ taˬ-euˬ gaˇ kawˆ Daˬ biˇ haw mawˇ-euˬ miˇ neh, Ka li g’o ̭ deh ̭ laˇ-eu gaˇ kawˆ-ahˇ aˬ yaw ̭ heu lo ̭-ehˇ ehˇ taˬ-euˬ meh. ’Shiˇ-eu jeˬ-euˬ miˇ k’ahˬ la ̭ k’oeˇ, aˬ yaw ̭-ahˇ maˬ byehˇ dzeh ya ̭-ehˇ, lmˬ bymˇ-ahˇ maˬ bi bu ̭ shoˆ-aˬ.’ ³² Yeˬsuˇ heu g’aˬ-ahˇ Miˬyehˇ neh bi g’o ̭ deh ̭ laˇ-euˬ meh. Gaˇ kawˆ heu aˬ diˇ aˬ maˇ pyeu ̭ laˇ-euˬ aˬ dui yawˬ g’aˬ na lu ̭ siˬ duˬ mawˇ duˬ-euˬ saˇ kiˇ pyeu ̭-eu ma. ³³ Aˬ yaw ̭-euˬ Aˬda pyeu ̭-eu Miˬyehˇ-euˬ aˇ maˇ paw aˬ yaw ̭-ahˇ ciˬ huiˬ ciˬ mahˇ keuˆ nehˬ-awˇ, Miˬyehˇ neh saˇ jaˇ dzaˬ taˬ-euˬ jaˆ-eu lo ̭-ehˇ, Yaw sahˇ Miˬyehˇ za-euˬ meh. Nymˬ-mˇ naw ma ̭ ya gaˬ ya mawˇ lu ̭-eu heu-aˬ, a yaw ̭ neh Yaw sahˇ Miˬyehˇ shehˆ daˆ nehˬ la ̭-euˬ jeˬ pyeu ̭-eu meh. ³⁴ Mˬ k’oeˇ taˆ daˆ g’o ̭ leˇ-euˬ g’aˬ-aˬ, Daˬbiˇ maˬ ngeuˇ-a. Daˬbiˇ aˬ yaw ̭ neh ehˇ taˬ-euˬ heu lo ̭-ehˇ jaˆ-eu meh. ’SahˬpaˬMiˬyehˇ neh heu lo ̭-ehˇ, ngaˬ-euˬ Sahˬpaˬ-ahˇ ehˇ-euˬ meh. Ngaˬ-euˬ aˇ maˇ paw nuiˇ laˇ-awˬ. ³⁵ Nawˬ-ahˇ muiˇ-eu tsawˇ haˬ deuˬ-ahˇ, nawˇ aˬ kuiˇ bi cawˬ daˆ-eu lehˇ, nawˬ-euˬ aˬ kuiˇ pehˬ zaˬ uˬ moˆ, ngaˇ nyeh ̭ taˬ ngeh keuˆ ni nuiˇ-awˬ.’ ³⁶ "K’oeˇ miˇ neh, Iˇsaˬleˬlaˆ tsawˇ haˬ dawˬ tawˆ lu ̭ heu lo ̭-ehˇ ya siˬ duˬ meh. Naw ma ̭ neh la ̭ ya ̭ k’oeˇ taˆ ta ̭ seh ̭-euˬ Yeˬsuˇ heu g’aˬ-aˬ, Miˬyehˇ neh Sahˬpaˬ hawˇ-eu Ka li bi pyeu ̭ laˇ-euˬ g’aˬ meh." ³⁷ Beˬtuˆluˆ k’oeˇ lo ̭-ehˇ ehˇ gaˇ tsawˇ haˬ k’oeˇ deuˬ ya gaˬ ngeh, aˬ yaw ̭ ma ̭-euˬ nui ma-ahˇ zaw dui dui leˇ-awˇ, Beˬtuˆluˆ hawˇ-eu g’aˬ k’ehˇ k’oeˇ deuˬ-ahˇ ehˇ-eu, "Aˬ yui ̭ aˬ nyiˇ deuˬ-oˇ, nga ma ̭ aˬ joˆ-ehˇ jahˇ paˬ nga." ³⁸ Aˬ yaw ̭ ma ̭-ahˇ Beˬtuˆluˆ ehˇ nehˬ-eu, "Naw ma ̭ yawˬ g’aˬ na lu ̭ yawˬ ha-euˬ iˬ baˇ noeˬ poˆ-awˇ, Yeˬsuˇ Ka li-euˬ tsawˇ myahˇ uˬ moˆ iˇ cu ̭ shawˇ-awˬ. K’oeˇ lo ̭-ehˇ jahˇ naˇ, Miˬyehˇ naw ma ̭-ahˇ iˬ baˇ pyehˬ nehˬ la ̭-awˇ, Miˬyehˇ neh bi ̭ le ̭-euˬ Muiˬ-eu shawˇ-eu Yaw sahˇ Miˬyehˇ-ahˇ naw ma ̭ za teh ̭-a. ³⁹ Aˬ jeˬ miˇ neh ehˇ naˇ, Muiˬ-eu shawˇ-eu Yaw sahˇ Miˬyehˇ bi ̭ ma lehˇ Miˬyehˇ neh saˇ jaˇ dzaˬ taˬ-euˬ k’oeˇ-aˬ, naw ma ̭ hawˇ-eu naw ma ̭-euˬ zaˬ deuˬ-ahˇ dzaˬ taˬ-euˬ saˇ jaˇ pyeu ̭-eu meh. K’oeˇ uˬ ta ̭, gaˇ mahˇ kaˬ gaˇ jawˇ-eu tsawˇ haˬ dawˬ tawˆ lu ̭ hawˇ-eu aˬ dui-euˬ Miˬyehˇ pyeu ̭-eu SahˬpaˬMiˬyehˇ neh aˬ yaw ̭ jawˇ gaˇ k’aˇ kuˇ taˬ-euˬ deuˬ dawˬ tawˆ lu ̭-ahˇ dzaˬ-euˬ saˇ jaˇ k’aw ̭ pyeu ̭-eu meh." ⁴⁰ Beˬtuˆluˆ-aˬ, aˬ yaw ̭ ma ̭-ahˇ g’awˬ mya jeˬ ja ja-ehˇ mehˬ nehˬ-awˇ heu lo ̭ ehˇ g’aˬ bi ̭ nehˬ-euˬ meh. "Ziˇ heu ziˇ-ahˇ deh ̭-eu haiˬ-eu tsawˇ haˬ heu deuˬ k’oeˇ taˆ keuˆ le-eu lehˇ g’eh-eu k’ehˬ-eu k’aˆ-eu jeˬ la ̭ k’oeˇ, naw ma ̭ ya buˬ-iˇ ni leh jeh-awˬ." ⁴¹ Aˬ yaw ̭ dawˬ mehˬ mehˬ gaˇ tsawˇ haˬ g’awˬ mya ni jah laˇ-awˇ, iˇ cu ̭ bi shawˇ-euˬ meh. K’oeˇ ngeh nah teh ̭-ehˇ, aˬ yaw ̭ ma ̭-euˬ aˇ muˇ-ahˇ tsawˇ haˬ smˬ heˇ g’aˬ lahˬ laˇ-euˬ meh. ⁴² Aˬ yaw ̭ ma ̭-aˬ, g’aˬ k’ehˇ deuˬ neh mehˬ nehˬ-euˬ jeˬ-ahˇ yaw muiˬ paˬ-ehˇ dzaw geu ̭-awˇ, tiˬ g’aˬ tiˇ g’aˬ cawˬ yaw muiˬ-ehˇ cawˬ ta ̭-eu la ̭ k’oeˇ, tiˬ kawˆ lo ̭-ehˇ dzaˬ ta ̭ dawˇ ta ̭-awˇ guiˬ lahˬ shaˇ ta ̭-euˬ meh. ⁴³ G’aˬ k’ehˇ deuˬ-ahˇ g’oe-awˇ, zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu g’awˬ mya jeˬ Miˬyehˇ jahˇ-euˬ meh. Tsawˇ haˬ yawˬ g’aˬ na lu ̭ zahˬ leˇ-awˇ guˆ-euˬ meh. ⁴⁴ Jah-eu tsawˇ haˬ dawˬ tawˆ lu ̭ tiˬ kawˆ lo ̭-ehˇ deh ̭ ta ̭-eu la ̭ k’oeˇ, k’aˇ jaˆ-eu jeˬ dawˬ tawˆ lu ̭ tiˬ kawˆ lo ̭-ehˇ geu ̭-awˇ zmˬ-euˬ meh. ⁴⁵ Aˬ yaw ̭ ma ̭ yawˬ ha-euˬ myawˬ gahˬ ahˬ dzeh-awˇ, za-euˬ pyuˇ k’oeˇ aˬ yaw ̭ g’aˬ yaw ̭ k’aˇ loˬ-eu lo ̭-ehˇ biˇ geu ̭-euˬ meh. ⁴⁶ Aˬ yaw ̭ nah yaw ̭ Uˬ duˬ tahˬ nymˇ nymˇ ma la ̭ k’oeˇ tahˬ dzoeˇ-awˇ, aˬ yaw ̭ ma ̭-euˬ nymˇ la ̭ k’oeˇ laˬ k’aˬ cehˇ-awˇ nui gaˬ shaˬ coeˇ byah-eu la ̭ k’oeˇ dzaˬ ta ̭ dawˇ ta ̭-euˬ meh. ⁴⁷ K’oeˇ lo ̭-ehˇ jahˇ lu ̭ ngeh, Miˬyehˇ-euˬ guiˬ lahˬ-ahˇ ja ceuˬ-awˇ, tsawˇ haˬ dawˬ tawˆ lu ̭ aˬ yaw ̭ ma ̭-ahˇ nui k’ahˇ shiˇ dui dui-euˬ meh. Ka k’o ̭-eu jeˬ za-euˬ tsawˇ haˬ deuˬ, tiˬ nah saˇ-iˬ tiˬ nah aˬ yaw ̭ ma ̭-euˬ aˇ muˇ la ̭ k’oeˇ bi lahˬ laˇ ni SahˬpaˬMiˬyehˇ mˇ lu ̭-eu meh.

¹ Tiˬ nah-aˬ, guiˬ lahˬ shaˇ yamˬ pyeu ̭-eu uˬ ci ̭ uˬ taw paw naˬ liˬ smˇ la ̭ k’oeˇ yamˬ-ahˇ, Beˬtuˆluˆ hawˇ-eu Yoˇhaˬ aˬ nya ̭ Uˬ duˬ tahˬ nymˇ nymˇ ma-ahˇ le-euˬ meh. ² Haw muiˬ dui dui-eu Lahˇ k’ehˬ lehˇ kuˇ-eu lahˇ k’ehˬ k’oeˇ k’ehˬ-ahˇ, deh ̭ le ngeh neh aˬ kuiˇ yaw cawˆ tiˬ g’aˬ jawˇ-eu meh. Uˬ duˬ tahˬ nymˇ nymˇ ma-ahˇ k’aˇ laˇ-eu tsawˇ haˬ deuˬ-ahˇ pyuˇ bi shaˇ-eu g’aˇ duˬ, yawˬ nah na lu ̭ aˬ yaw ̭-ahˇ lahˇ k’ehˬ k’oeˇ k’ehˬ-ahˇ ba ̭ taˬ laˇ-eu meh. ³ Beˬtuˆluˆ hawˇ-eu Yoˇhaˬ aˬ nya ̭ uˇ leˇ-eu lehˇ g’eh gaˇ aˬ yaw ̭ ya mawˇ ngeh, tiˬ jeˬ paˬ bi ̭ la ̭ lehˇ shaˇ-euˬ meh. ⁴ Beˬtuˆluˆ hawˇ-eu Yoˇhaˬ aˬ nya ̭ tsawˇ haˬ k’oeˇ g’aˬ-ahˇ haw tsoˆ taˬ-awˇ, "Nga nya ̭-ahˇ haw sheˇ" lehˇ, Beˬtuˆluˆ ehˇ nehˬ-euˬ meh. ⁵ Aˬ yaw ̭ nya ̭ tiˬ jeˬ paˬ bi ̭ la ̭ teh ̭-a lehˇ noeˬ-awˇ, aˬ yaw ̭ haw tsoˆ taˬ-euˬ meh. ⁶ Ehˇ k’aw ̭, Beˬtuˆluˆ ehˇ-eu, "Ngaˇ pyuˇ maˬ ahˇ. Ehˇ k’aw ̭, ngaˇ ahˇ-eu jeˬ nawˬ-ahˇ bi ̭ ma. Naˬzaˬlehˇ tsawˇ haˬ Yeˬsuˇ Ka li-euˬ tsawˇ myahˇ uˬ moˆ tuˇ-awˇ gaˇ ma cah g’eh-awˬ lehˇ, ngaˇ nawˬ-ahˇ dawˬ bi ̭-eu ma." ⁷ K’oeˇ lo ̭-ehˇ ehˇ g’aˬ-awˇ, tsawˇ haˬ k’oeˇ g’aˬ-euˬ aˇ maˇ la ̭-ahˇ nyeh ̭ tehˬ-awˇ tsahˇ tuˇ nehˬ-euˬ meh. Ja pyuˬ ni tsawˇ haˬ k’oeˇ g’aˬ-euˬ aˬ kuiˇ pehˬ zaˬ hawˇ-eu kuiˇ myaˆ puˇ g’aˬ ahˇ laˇ-euˬ meh. ⁸ Aˬ yaw ̭ tsawˬ diˇ laˇ-awˇ, gawˬ yaw ̭ yaw ̭-awˇ gaˇ ma cah-euˬ meh. K’oeˇ naˇ, aˬ yaw ̭ tsawˬ tsawˬ-ehˇ cah-awˇ, Miˬyehˇ-ahˇ ja ceuˬ-eu la ̭ k’oeˇ, aˬ yaw ̭ nya ̭ nehˬ-ehˇ Uˬ duˬ tahˬ nymˇ nymˇ ma-ahˇ le-euˬ meh ⁹ Aˬ yaw ̭ gaˇ ma cah-awˇ Miˬyehˇ-ahˇ ja ceuˬ lu ̭ gaˇ, k’oeˇ gaˇ jawˇ-eu tsawˇ haˬ deuˬ ya mawˇ-euˬ meh. ¹⁰ Aˬ yaw ̭-aˬ, Haw muiˬ dui dui-eu Lahˇ k’ehˬ-ahˇ nuiˇ-awˇ shaˇ dzaˬ shaˇ dawˇ lu ̭-eu k’oeˇ g’aˬ pyeu ̭-eu gaˇ kawˆ aˬ yaw ̭ ma ̭ haw siˬ ngeh, aˬ yaw ̭ k’oeˇ lo ̭-ehˇ pyeu ̭ laˇ-euˬ gaˇ zahˬ dui dui leˇ-euˬ meh. ¹¹ Sawˇlaˬmoˬ-euˬ guiˇ ga ceuˬ lehˇ kuˇ-eu tsahˇ-ahˇ, tsawˇ haˬ k’oeˇ g’aˬ Beˬtuˆluˆ hawˇ-eu Yoˇhaˬ-ahˇ g’eu tehˬ-awˇ jawˇ ngeh, aˬ cawˬ zahˬ leˇ-awˇ cehˆ g’eh la ̭-euˬ meh. ¹² Cehˆ g’eh la ̭-euˬ tsawˇ haˬ k’oeˇ deuˬ-ahˇ Beˬtuˆluˆ mawˇ ngeh, heu lo ̭-ehˇ ehˇ nehˬ-euˬ meh. "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ-oˇ, aˬ jeˬ miˇ neh gaˇ kawˆ heu-ahˇ zahˬ leˇ-awˇ nga nya ̭-ahˇ haw te. Nga nya ̭-euˬ baoˬ hawˇ-eu nga nya ̭ muiˬ-eu shawˇ-eu baˬ da neh tsawˇ haˬ heu g’aˬ gaˇ ma cah nya laˇ ni jahˇ nehˬ nya-eu ngaˇ lehˇ naw ma ̭ noeˬ te loˇ. ¹³ Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ pyeu ̭-eu aˬ dui ma ̭-euˬ aˬ poeˬ aˬ bawˇ deuˬ-euˬ Miˬyehˇ neh, a yaw ̭-euˬ Zaˬ k’aˆ Yeˬsuˇ-ahˇ muiˬ-eu shawˇ-eu yaw sheh ̭ k’ahˬ sehˇ bi ̭ nehˬ-euˬ meh. Ehˇ k’aw ̭, aˬ yaw ̭-ahˇ miˇ k’ahˬ sahˬ paˬ sahˬ ma deuˬ-euˬ aˬ la ̭ la ̭ k’oeˇ naw ma ̭ a nehˬ-awˇ, aˬ yaw ̭-ahˇ pyehˬ nehˬ-eu g’aˇ duˬ sahˬ paˬ Piˇlaˆ noeˬ tsehˆ g’aˬ-euˬ k’aw ̭, sahˬ paˬ Piˇlaˆ mehˬ shi aˬ yaw ̭-ahˇ naw ma ̭ iˬ baˆ poˆ-euˬ meh. ¹⁴ Aˬ yaw ̭-aˬ, muiˬ-eu shawˇ-eu yaw tsaˬ yaw dawˇ tsawˇ haˬ meh. Ehˇ k’aw ̭, naw ma ̭ aˬ yaw ̭-ahˇ byehˇ dzeh-awˇ, aˬ yaw ̭-euˬ dah zaˇ aˬ cawˬ-ahˇ seh ̭-euˬ tsawˇ haˬ tiˬ g’aˬ-ahˇ pyehˬ nehˬ-awˬ lehˇ, sahˬ paˬ Piˇlaˆ-ahˇ naw ma ̭ shaˇ-euˬ meh. ¹⁵ Deh ̭-eu gaˇ ma sheuˬ mehˬ-eu g’aˬ-ahˇ naw ma ̭ seh ̭-euˬ meh. Ehˇk’aw ̭, Miˬyehˇ neh aˬ yaw ̭-ahˇ paˇ bi g’o ̭ deh ̭ laˇ-euˬ meh. Nga nya ̭ siˬ duˬ mawˇ duˬ-euˬ ma. ¹⁶ Kuiˇ cawˆ heu g’aˬ aˬ yaw ̭ tsawˇ myahˇ-euˬ baoˬ baˬ da neh g’aˬ paˇ ahˇ laˇ-euˬ meh. Naw ma ̭ ya siˬ ya mawˇ-euˬ gaˇ kawˆ heu-aˬ, aˬ yaw ̭-euˬ tsawˇ myahˇ-ahˇ jah-eu jeˬ baˬ da neh pyeu ̭ laˇ-euˬ meh. Naw ma ̭ mawˇ lu ̭-eu lo ̭-ehˇ, tsawˇ haˬ heu g’aˬ muiˬ laˇ-euˬ-aˬ, Yeˬsuˇ-ahˇ jah-eu jeˬ baˬ da neh meh. ¹⁷ "Aˬ yui ̭ aˬ nyiˇ deuˬ-oˇ, naw ma ̭ hawˇ-eu naw ma ̭-euˬ aˬ yui ̭ aˬ tsu deuˬ neh Yeˬsuˇ-ahˇ jahˇ nehˬ-euˬ heu-aˬ, naw ma ̭ maˬ siˬ nya-eu miˇ neh meh lehˇ ngaˇ siˬ duˬ ma. ¹⁸ K’ehˬ-eu k’aˆ-eu jeˬ-ahˇ Ka li ya daˬ-euˬ gaˇ kawˆ, Miˬyehˇ g’aˇ duˬ ngehˬ dah-eu deuˬ-ahˇ g’oe-awˇ aˇ hu ba neh Miˬyehˇ neh ehˇ taˬ-euˬ jaˆ-eu lo ̭-ehˇ, dawˬ k’oeˇ dawˬ byah laˇ ni Miˬyehˇ heu lo ̭-ehˇ bi pyeu ̭ laˇ-euˬ meh. ¹⁹ Naw ma ̭-euˬ iˬ baˇ bi pyehˬ nehˬ-eu g’aˇ duˬ, iˬ baˇ noeˬ poˆ-awˇ Miˬyehˇ jawˇ paw g’o ̭ k’o ̭ laˇ-awˬ. Naw ma ̭ k’oeˇ lo ̭-ehˇ jahˇ naˇ, ²⁰ guiˬ lahˬ sa ̭ laˇ g’aˬ byah-eu aˇ yamˬ Sahˬpaˬ Miˬyehˇ bi ̭ le ̭-awˇ, naw ma ̭ g’aˇ duˬ Miˬyehˇ neh tseˇ doˆ taˬ-euˬ Ka li pyeu ̭-eu Yeˬsuˇ-ahˇ, aˬ yaw ̭ pyehˬ g’eh le ̭ teh ̭-a. ²¹ Muiˬ-eu shawˇ-eu Yaw sahˇ Miˬyehˇ g’aˇ duˬ ngehˬ dah-eu deuˬ-ahˇ g’oe-awˇ yawˬ jeˬ na lu ̭ yaw shui ̭ beˬ paˇ jiˇ-eu aˇ yamˬ maˬ keuˆ laˇ k’oeˇ keuˆ ni, mˬ k’oeˇ taˆ aˬ yaw ̭ ya jawˇ tawˬ meh. ²² Aˬ jeˬ miˇ neh ehˇ naˇ, Moˇseˬ neh heu lo ̭-ehˇ ehˇ taˬ-euˬ jaˆ-eu meh. ’Naw ma ̭-euˬ Miˬyehˇ pyeu ̭-eu SahˬpaˬMiˬyehˇ-aˬ, ngaˬ-ahˇ k’ehˇ g’eh le ̭-euˬ lo ̭-ehˇ, naw ma ̭ jawˇ gaˇ Miˬyehˇ g’aˇ duˬ ngeh dah-eu tiˬ g’aˬ k’ehˇ g’eh le ̭ teh ̭-a. Aˬ yaw ̭-aˬ, naw ma ̭-euˬ aˇ jeuˬ aˇ ca pyeu ̭-awˇ, aˬ yaw ̭ k’aˇ ehˇ-eu jeˬ naw ma ̭ ya naˇ haˬ geu ̭ teh ̭-a. ²³ Miˬyehˇ g’aˇ duˬ ngehˬ dah-eu k’oeˇ g’aˬ-euˬ ehˇ dawˬ maˬ k’aˇ naˇ haˬ-eu aˬ geu g’aˬ maˬ kaˬ, Miˬyehˇ-euˬ tsawˇ haˬ la ̭ k’oeˇ bi sawˇ dzeh-awˇ, laˆ luˬ laˆ seˇ nehˬ gaˇ ya daˬ teh ̭-a’ lehˇ ehˇ taˬ-euˬ meh. ²⁴ Saˬmeuˬlaˆ-euˬ ziˇ-ahˇ neh naˇ, Miˬyehˇ g’aˇ duˬ k’aˇ ngehˬ dah ka le ̭-euˬ yawˬ g’aˬ na lu ̭, iˬ nah aˇ yamˬ heu la ̭ k’oeˇ pyeu ̭ laˇ lu ̭-eu gaˇ kawˆ ehˇ taˬ ya ̭-euˬ jaˆ-eu meh. ²⁵ Miˬyehˇ neh aˬ yaw ̭ g’aˇ duˬ ngehˬ dah-eu deuˬ-ahˇ g’oe-awˇ saˇ jaˇ dzaˬ taˬ-euˬ-aˬ, naw ma ̭ g’aˇ duˬ pyeu ̭-awˇ, naw ma ̭-euˬ aˬ poeˬ aˬ bawˇ deuˬ hawˇ-eu Miˬyehˇ yaw kaˬ dzaˬ taˬ-euˬ dawˬ ma saˇ jaˇ k’oeˇ, naw ma ̭-ahˇ k’aw ̭ ta ̭-eu meh. Miˬyehˇ neh Aˬbyaˬhaˬ-ahˇ ’Nawˬ-euˬ zaˬ nawˬ-euˬ uˆ deuˬ-ahˇ g’oe-awˇ, miˇ tsaˬ k’oeˇ taˆ k’aˇ jawˇ-eu tsawˇ jeuˬ dawˬ tawˆ lu ̭-ahˇ ngaˇ guiˬ lahˬ bi ̭ ma lehˇ ehˇ nehˬ-euˬ dawˬ k’oeˇ dawˬ, naw ma ̭-ahˇ k’aw ̭ ehˇ maw ̭-eu meh. ²⁶ K’oeˇ miˇ neh, naw ma ̭ yawˬ g’aˬ na lu ̭ maˬ muiˬ maˬ jaˬ-eu jeˬ la ̭ k’oeˇ maˬ paˇ deh ̭ ni iˬ baˇ bi noeˬ poˆ-awˇ guiˬ lahˬ bi ̭-eu g’aˇ duˬ, Miˬyehˇ aˬ yaw ̭-euˬ Zaˬ k’aˆ-ahˇ tseˇ doˆ-awˇ, naw ma ̭ jawˇ gaˇ jeˬ huˬ pyehˬ g’eh le ̭-euˬ meh."

¹ Beˬtuˆluˆ hawˇ-eu Yoˇhaˬ aˬ nya ̭ tsawˇ haˬ k’oeˇ deuˬ-ahˇ dawˬ ngehˬ ngehˬ lu ̭ ngeh, piˇ ma deuˬ, Uˬduˬ tahˬ nymˇ nymˇ ma-ahˇ lo ̭ piˇ-eu deuˬ k’oeˇ taˆ uˆ lahˇ-eu yawˬ huiˬ yaw mahˇ deuˬ hawˇ-eu, Saˬduˬgehˇ deuˬ laˇ keuˆ-euˬ meh. ² Aˬ yaw ̭ nya ̭ Yeˬsuˇ shiˇ-awˇ Miˬyehˇ neh paˇ bi g’o ̭ deh ̭ laˇ-euˬ gaˇ kawˆ mehˬ-awˇ, shiˇ-euˬ tsawˇ haˬ deuˬ-ahˇ paˇ bi g’o ̭ deh ̭ laˇ nya meh lehˇ ehˇ maw ̭-eu miˇ neh, aˬ yaw ̭ ma ̭ nui ma tiˬ paw ̭-iˬ maˬ tsaˬ-a. ³ K’oeˇ miˇ neh, aˬ yaw ̭ nya ̭-ahˇ nyeh ̭-awˇ, k’oeˇ ngeh nah uˬ ci ̭ ci ̭ le shaw-iˬ-eu miˇ neh. yawˬ nah yawˬ-ahˇ keuˆ ni pa ̭ kuˆ-ahˇ dawˆ-euˬ meh. ⁴ Ehˇ k’aw ̭, dawˬ mehˬ mehˬ gaˇ ya gaˬ-euˬ tsawˇ haˬ g’awˬ mya ni jah laˇ-awˇ, jah-eu tsawˇ haˬ ngaˬ heˇ g’aˬ byah laˇ-euˬ meh. ⁵ Yawˬ nah yawˬ-ahˇ, Yuˇdaˆ tsawˇ haˬ aˬ yui ̭ aˬ tsu deuˬ, tsawˇ mawˬ tsawˇ k’aˆ deuˬ hawˇ-eu, Zahˇ dawˬ k’o ̭ dawˬ mehˬ-eu saˬ laˬ deuˬ, Yeˬluˇsaˬlehˬ meu la ̭ k’oeˇ uiˬ laˇ-euˬ meh. ⁶ Piˇ ma Yaw huiˬ g’aˬ pyeu ̭-eu Aˬna hawˇ-eu Gaˬyaˬpaˇ, Yoˇhaˬ, Aˬleˬsaˬduˇ hawˇ-eu, Piˇ ma Yaw huiˬ g’aˬ-euˬ aˬ yui ̭ aˬ nyiˇ deuˬ-ahˇ aˬ yaw ̭ ma ̭ tahˬ dzoeˇ-euˬ meh. ⁷ G’aˬ k’ehˇ k’oeˇ nyiˬ g’aˬ-ahˇ aˬ yaw ̭ ma ̭-euˬ mehˬ shi bi yaw ̭-awˇ, "Aˬ geu jeˬ baoˬ hawˇ-eu aˬ suˇ g’aˬ-euˬ tsawˇ myahˇ-ahˇ g’oe-awˇ naw nya ̭ teu lo ̭-ehˇ mˇ te" lehˇ naˇ haˬ-euˬ meh. ⁸ K’oeˇ ngeh, Beˬtuˆluˆ-aˬ, Muiˬ-eu shawˇ-eu Yaw sahˇ Miˬyehˇ aˬ yaw ̭ la ̭ k’oeˇ tiˬ byah ni ahˇ-awˇ, aˬ yaw ̭ ma ̭-ahˇ heu lo ̭-ehˇ ehˇ k’o ̭ nehˬ-euˬ meh. "Miˇ k’ahˬ za-euˬ aˬ yui ̭ aˬ tsu deuˬ hawˇ-eu tsawˇ mawˬ tsawˇ k’aˆ deuˬ-oˇ, ⁹ aˬ kuiˇ yaw cawˆ heu g’aˬ-ahˇ mˇ nehˬ-euˬ muiˬ-eu gaˇ hawˇ-eu, aˬ yaw ̭ aˬ joˆ-ehˇ taˬ leˇ-euˬ gaˇ kawˆ nga nya ̭-ahˇ naˇ haˬ te lehˇ ngeuˇ naˇ, ¹⁰ naw ma ̭ neh la ̭ ya ̭ k’oeˇ taˆ ta ̭ seh ̭ nehˬ-awˇ, Miˬyehˇ neh bi g’o ̭ deh ̭ laˇ-euˬ Naˬzaˬlehˇ tsawˇ haˬ Yeˬsuˇ Ka li-euˬ tsawˇ myahˇ baoˬ baˬ da neh, nymˬ-mˇ naw ma ̭ mehˬ shi yaw ̭ lu ̭-eu tsawˇ haˬ heu g’aˬ muiˬ laˇ-euˬ meh lehˇ naw ma ̭ dawˬ tawˆ lu ̭ siˬ duˬ-eu uˬ ta ̭, Iˇsaˬleˬlaˆ tsawˇ haˬ dawˬ tawˆ lu ̭ siˬ duˬ-eu tsaˬ meh. ¹¹ Jaˇli ̭ la ̭ k’oeˇ, ’Naw ma ̭ nymˇ tsoˆ gaˇ maˬ geu ̭-ehˇ, ba ̭ dzeh taˬ-euˬ k’aˬ lo k’oeˇ siˬ, k’aˬ lo dawˬ tawˆ maˬ tseˇ poeˬ-eu, la ̭ coeˇ lo zi ̭ pyeu ̭ laˇ-euˬ meh.’ lehˇ ehˇ taˬ-euˬ k’oeˇ-aˬ, Yeˬsuˇ-ahˇ ehˇ maw ̭-eu meh. ¹² Aˬ yaw ̭ maˬ ngeuˇ naˇ, aˬ dui-ahˇ ka k’o ̭ nya-eu tiˬ g’aˬ-iˬ maˬ jawˇ-a. Aˬ jeˬ miˇ neh ehˇ naˇ, mˬ heu siˬ-euˬ uˬ moˆ aˬ yaw ̭-euˬ tsawˇ myahˇ maˬ ngeuˇ naˇ, aˬ dui-ahˇ ka k’o ̭ nya ni tsawˇ myahˇ yawˬ myahˇ yawˬ bi ̭ taˬ-euˬ maˬ jaˆ-a." ¹³ Beˬtuˆluˆ hawˇ-eu Yoˇhaˬ aˬ nya ̭ zaˬ siˬ tsawˇ gahˇ maˬ ya dzaw haw-euˬ dahˇ taˆ zaˬ pyeu ̭ k’aw ̭, k’oeˇ lo ̭-ehˇ k’aˬ duˬ ni ngehˬ gaˇ tmˇ gaˇ, Ba ̭ dzah aˇ muˇ la ̭ k’oeˇ uˇ-eu aˬ yui ̭ aˬ tsu deuˬ zahˬ leˇ-euˬ meh. K’oeˇ mi neh, aˬ yaw ̭ nya ̭ Yeˬsuˇ nehˬ-ehˇ jawˇ haw-euˬ tsawˇ haˬ pyeu ̭-eu ngaˇ lehˇ aˬ yaw ̭ ma ̭ siˬ duˬ-euˬ meh. ¹⁴ Ehˇ k’aw ̭, aˬ kuiˇ muiˬ laˇ-euˬ tsawˇ ha k’oeˇ g’aˬ aˬ yaw ̭ nya ̭-euˬ dawˬ peh yaw ̭ lu ̭-eu miˇ neh, aˬ yaw ̭ ma ̭ tiˬ jeˬ-iˬ maˬ ehˇ nya-a. ¹⁵ K’oeˇ ngeh, aˬ yaw ̭ nya ̭-ahˇ Ba ̭ dzah dzah lu ̭-eu nymˇ la ̭ nyiˇ bi doˆ-iˇ-awˇ, aˬ yaw ̭ ma ̭ teh ̭-ehˇ bawˬ dzaˬ-euˬ meh. ¹⁶ Aˬ yaw ̭ ma ̭ ehˇ-eu, "Tsawˇ haˬ heu nyiˬ g’aˬ-ahˇ aˬ joˆ-ehˇ jahˇ nehˬ paˬ nga. Tsawˇ haˬ zaˬ maˬ mˇ nya-eu zahˬ leˇ paˬ-ehˇ g’eh-eu gaˇ heu hmˬ aˬ yaw ̭ nya ̭ neh mˇ-euˬ meh lehˇ Yeˬluˇsaˬlehˬ meuˬ meuˬ lah ni siˬ nya-euˬ miˇ neh, aˬ dui tsawˇ pyehˇ maˬ paˇ pyehˇ nya ngaˇ. ¹⁷ Ehˇ k’aw ̭, nui gaˇ jawˇ-eu miˇ k’ahˬ zaˬ deuˬ jawˇ gaˇ maˬ bi gaˬ keuˆ-iˇ-eu g’aˇ duˬ, Yeˬsuˇ-euˬ tsawˇ myahˇ uˬ moˆ aˬ cawˬ-ahˇ dawˬ tiˬ jawˇ-iˬ taˬ paˇ ngehˬ cawˬ lehˇ, aˬ yaw ̭ nya ̭-ahˇ yaw k’aˆ k’aˆ-ehˇ mehˬ nehˬ kaˇ-euˇ." ¹⁸ K’oeˇ naˇ, aˬ yaw ̭ nya ̭-ahˇ la ̭ k’oeˇ paˇ kuˇ ahˇ-awˇ ehˇ nehˬ-eu, "Aˬ kaˇ naˇ, Yeˬsuˇ-euˬ tsawˇ myahˇ uˬ moˆ dawˬ mehˬ mehˬ-eu maˬ ehˇ, mehˬ-eu tsoˆ-eu maˬ ehˇ, naw nya ̭ tiˬ jawˇ-iˬ taˬ paˇ mˇ." ¹⁹ Ehˇ k’aw ̭, Beˬtuˆluˆ hawˇ-eu Yoˇhaˬ aˬ nya ̭ ehˇ-eu, "Naw ma ̭-euˬ ehˇ dawˬ naˇ haˬ-eu hawˇ-eu Miˬyehˇ-euˬ ehˇ dawˬ naˇ haˬ-eu heu nyiˬ jeˬ, Miˬyehˇ mehˬ shi aˬ geu jeˬ tsaˬ dzehˬ ta lehˇ naw ma ̭ shaˇnoeˬ haw sheˇ. ²⁰ Nga nya ̭ law nmˇ-aˬ, nga nya ̭ neh k’aˇ ya gaˬ k’aˇ ya mawˇ-euˬ gaˇ kawˆ heu maˬ ja-ehˇ maˬ jawˇ coeˇ nya." ²¹ K’oeˇ ngeh, Ba ̭ dzah-ahˇ uiˬ laˇ-euˬ aˬ yui ̭ aˬ tsu deuˬ aˬ yaw ̭ nya ̭-ahˇ yaw k’aˆ k’aˆ-ehˇ mehˬ-eu la ̭ k’oeˇ, guˆ tsiˬ nyeh ̭-awˇ pyehˬ nehˬ-euˬ meh. Tsawˇ haˬ k’oeˇ g’aˬ aˬ kuiˇ yaw cawˆ muiˬ laˇ-euˬ gaˇ tsawˇ haˬ dawˬ tawˆ lu ̭ Miˬyehˇ-ahˇ ja ceuˬ lu ̭-eu miˇ neh, aˬ yui ̭ aˬ tsu k’oeˇ deuˬ aˬ yaw ̭ nya ̭-ahˇ maˬ k’ehˬ maˬ k’aˆ nehˬ peuˬ-a. ²² Zahˬ leˇ paˬ-ehˇ g’eh-eu jeˬ la ̭ k’oeˇ naˇ gawˇ taˬ leˇ-euˬ tsawˇ haˬ k’oeˇ g’aˬ-aˬ, aˇ k’o ̭ oeˬ tseˇ dzehˬ-iˇ-euˬ meh. ²³ Beˬtuˆluˆ hawˇ-eu Yoˇhaˬ-ahˇ pyehˬ k’o ̭ nehˬ ngeh, aˬ yaw ̭ nya ̭-euˬ aˇ muˇ jawˇ gaˇ g’o ̭-iˇ-awˇ, Piˇ ma Yaw huiˬ g’aˬ hawˇ-eu tsawˇ mawˬ tsawˇ k’aˆ deuˬ neh aˬ yaw ̭ nya ̭-ahˇ ehˇ-euˬ dawˬ deuˬ dzawˇ nehˬ-euˬ meh. ²⁴ Aˬ yaw ̭ nya ̭ dzawˇ mehˬ gaˇ jah-eu tsawˇ haˬ deuˬ ya gaˬ ngeh, tiˬ kawˆ lo ̭-ehˇ Miˬyehˇ-ahˇ heu lo ̭-ehˇ guiˬ lahˬ shaˇ-euˬ meh. "Mˬ hawˇ-eu miˇ-ahˇ maˬ ehˇ, iˬ ma laˆ shaˆ hawˇ-eu k’aˇ deh ̭ k’aˇ jawˇ-eu jeˬ dawˬ tawˆ lu ̭-ahˇ maˬ ehˇ, beh-euˬ yaw sahˇ pyeu ̭-eu Dawˬ tawˆ k’oeˇ taˆ uˆ lahˇ-eu SahˬpaˬMiˬyehˇ-oˇ, ²⁵ muiˬ-eu shawˇ-eu Yaw sahˇ Miˬyehˇ-ahˇ g’oe-eu la ̭ k’oeˇ, nawˬ-euˬ zaˬ k’aˆ pyeu ̭-eu nga ma ̭-euˬ aˬ poeˬ Daˬbiˇ heu lo ̭-ehˇ ngehˬ nya tmˇ nya ni nawˇ jahˇ-euˬ meh. ’Aˬ jeˬ miˇ neh lawˇ ci ̭ zaˬ deuˬ, teu naˆ naˆ-ehˇ nui ma pehˇ ta. Aˬ jeˬ miˇ neh miˇ k’ahˬ zaˬ deuˬ, gaˇ dahˇ maˬ tsoeˬ-eu jeˬ toˆ ta. ²⁶ Miˇ k’ahˬ sahˬ paˬ deuˬ lehˬ hmˬ-awˇ, miˇ k’ahˬ sahˬ ma deuˬ ymˬ leˇ-awˇ, Sahˬpaˬ Miˬyehˇ-ahˇ guiˇ mˇ-awˇ, aˬ yaw ̭ neh tsiˇ leh ̭-euˬ g’aˬ-ahˇ, guiˇ deuˆ-eu lehˇ laˆ dah lu ̭ meh.’ lehˇ, Daˬbiˇ neh ehˇ taˬ-euˬ meh. ²⁷ Nawˬ neh Ka li bi geu ̭-euˬ nawˬ-euˬ muiˬ-eu shawˇ-eu Zaˬ k’aˆ pyeu ̭-eu Yeˬsuˇ-ahˇ muiˇ-eu g’aˇ duˬ, Heˬloˆ hawˇ-eu Boˬtiˇ Piˇlaˆ aˬ nya ̭, lawˇ ci ̭ zaˬ deuˬ hawˇ-eu Iˇsaˬleˬlaˆ tsawˇ haˬ deuˬ nehˬ-ehˇ meuˬ heu meuˬ la ̭ k’oeˇ aˬ diˇ aˬ maˇ mehˬ bawˬ mˇ-euˬ meh. ²⁸ Nawˬ-euˬ baoˬ hawˇ-eu nawˬ-euˬ nui k’ahˇ-ahˇ g’oe-awˇ bi pyeu ̭ laˇ-eu g’aˇ duˬ aˇ hu ba neh nawˬ neh noeˬ tsehˆ taˬ-euˬ yawˬ jeˬ na lu ̭ keuˆ le ni mˇ-eu lehˇ aˬ yaw ̭ ma ̭ uiˬ leˇ-euˬ meh. ²⁹ Sahˬpaˬ Miˬyehˇ-oˇ, aˬ yaw ̭ ma ̭ nga ma ̭-ahˇ laˆ cawˆ-eu lehˇ g’eh lu ̭ gaˇ haw mawˇ-awˇ, nawˬ-euˬ zaˬ k’aˆ pyeu ̭-eu nga ma ̭ nawˬ-euˬ dawˬ k’aˬ duˬ ni mehˬ nehˬ nya ni caw ba nehˬ la ̭. ³⁰ Nawˬ-euˬ aˬ la ̭ cawˬ ja-eu la ̭ k’oeˇ, naˇ-eu gawˇ-eu tsawˇ haˬ deuˬ-ahˇ bi taˬ leˇ-awˇ, nawˬ-euˬ muiˬ-eu shawˇ-eu Zaˬk’aˆ pyeu ̭-eu Yeˬsuˇ-euˬ tsawˇ myahˇ-ahˇ g’oe-awˇ zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu jeˬ mˇ mehˬ la ̭." ³¹ Aˬ yaw ̭ ma ̭ guiˬ lahˬ shaˇ g’aˬ ngeh, aˬ yaw ̭ ma ̭ uiˬ leˇ-awˇ jawˇ-eu jawˇ duˬ k’oeˇ tsahˇ luˆ laˇ nyeh laˇ-awˇ, aˬ yaw ̭ ma ̭ dawˬ tawˆ lu ̭ Muiˬ-eu shawˇ-eu Yaw sahˇ Miˬyehˇ byah laˇ-awˇ, nui ma k’aˬ duˬ ni Miˬyehˇ dawˬ kawˬ mehˬ-euˬ meh. ³² Jah-eu tsawˇ haˬ-euˬ aˇ muˇ k’oeˇ muˇ-aˬ, nui ma tiˬ siˬ teh ̭-ehˇ taˬ-awˇ, nui noeˬ tiˬ gaˇ ta ̭-eu meh. Yawˬ ha k’aˇ jaˆ-eu myawˬ gahˬ-aˬ, yawˬ ha-euˬ teh ̭ ma lehˇ tiˬ g’aˬ-iˬ maˬ ehˇ ni, k’aˇ jaˆ-eu yawˬ jeˬ na lu ̭ tiˬ kawˆ lo ̭-ehˇ geu ̭-euˬ meh. ³³ G’aˬ k’ehˇ deuˬ baoˬ tiˬ byah ni ahˇ-eu la ̭ k’oeˇ, Sahˬpaˬ Yeˬsuˇ g’o ̭ deh ̭ laˇ-euˬ gaˇ kawˆ saˇ kiˇ kamˬ-awˇ, muiˬ dui dui-eu guiˬ lahˬ deuˬ, aˬ yaw ̭ ma ̭ dawˬ tawˆ lu ̭ k’oeˇ taˆ Miˬyehˇ shehˬ nehˬ lawˇ nehˬ-euˬ meh. ³⁴ Aˬ yaw ̭ ma ̭ aˇ muˇ la ̭ k’oeˇ shaˬ-eu zahˬ-eu tsawˇ haˬ maˬ jawˇ-a. Aˬ jeˬ miˇ neh ehˇ naˇ, deh ma hawˇ-eu nymˇ k’aˇ jaˆ-eu tsawˇ haˬ deuˬ ahˬ-awˇ, za-euˬ pyuˇ hehˇ uiˬ la ̭-euˬ meh. ³⁵ Pyuˇ k’oeˇ deuˬ g’aˬ k’ehˇ deuˬ-ahˇ a nehˬ-awˇ, yawˬ g’aˬ na lu ̭-ahˇ k’aˇ loˬ-eu lo ̭-ehˇ biˇ nehˬ-euˬ meh. ³⁶ Guˇbaˬluˇ iˇ jaw lahˇ miˇ k’ahˬ-ahˇ deh ̭ le-euˬ Leˬbiˇ tsawˇ jeuˬ Yoˇsehˆ lehˇ myahˇ-euˬ tiˬ g’aˬ jawˇ-eu meh. G’aˬ k’ehˇ deuˬ neh aˬ yaw ̭-ahˇ Baˬnaˬbaˇ lehˇ myahˇ paˇ nehˬ-euˬ meh. Baˬnaˬbaˇ lehˇ ehˇ-eu dawˬ tsui ̭-aˬ, "G’aˬ bi ̭-eu g’aˬ" lehˇ ehˇ maw ̭-eu meh. ³⁷ Aˬ yaw ̭ deh ma tiˬ kawˬ ahˬ-awˇ, za-euˬ pyuˇ g’aˬ k’ehˇ deuˬ-ahˇ a nehˬ laˇ-euˬ meh.

¹ Aˬnaˬniˇ hawˇ-eu Saˬpiˇla lehˇ myahˇ-euˬ nyiˬ dzeˇ zaˬ k’aw ̭, myawˬ gahˬ ui cuiˆ ahˬ-euˬ meh. ² Ehˇ k’aw ̭, miˬ zaˬ g’aˬ nehˬ-ehˇ bawˬ dzaˬ-awˇ, ahˬ za-euˬ pyuˇ tiˬ paˆ yuˇ taˬ ya ̭-awˇ, tiˬ paˆ teh ̭-ehˇ g’aˬ k’ehˇ deuˬ-ahˇ aˬ nehˬ-iˇ-euˬ meh. ³ Beˬtuˆluˆ ehˇ-eu, "Aˬnaˬniˇ-oˇ, aˬ jeˬ miˇ neh Saˬdaˬ nawˬ-ahˇ bi uˆ lahˇ-awˇ, Muiˬ-eu shawˇ-eu Yaw sahˇ Miˬyehˇ-ahˇ jaˬ myaw ̭ myaw ̭-eu la ̭ k’oeˇ, myawˬ gahˬ ahˬ za-euˬ pyuˇ tiˬ paˆ yuˇ doˆ taˬ ya ̭ teˬ. ⁴ Myawˬ gahˬ k’oeˇ maˬ ahˬ mi naˆ-ehˇ, nawˬ-euˬ maˬ ngeuˇ loˇ. Ahˬ g’aˬ-awˇ za-euˬ pyuˇ k’oeˇ k’aw ̭ nawˬ-euˬ maˬ ngeuˇ loˇ. Toˆ-ehˇ ngeuˇ naˇ, teu lo ̭-ehˇ jahˇ-eu g’aˇ duˬ aˬ joˆ-ehˇ noeˬ doˆ k’mˬ-eu nya. Nawˇ tsawˇ haˬ zaˬ-ahˇ jaˬ myaw ̭ myaw ̭-euˬ maˬ ngeuˇ-a. Miˬyehˇ-ahˇ jaˬ myaw ̭ myaw ̭-euˬ meh." ⁵ Dawˬ k’oeˇ dawˬ-ahˇ Aˬnaˬniˇ ya gaˬ-euˬ nehˬ-ehˇ, coˬ dzeh-awˇ shiˇ-euˬ meh. Gaˇ kawˆ k’oeˇ k’aˇ ya gaˬ-euˬ tsawˇ haˬ dawˬ tawˆ lu ̭ guˆ dui dui-iˇ-euˬ meh. ⁶ Zaˬ guˬ deuˬ uˇ laˇ-awˇ, aˬ yaw ̭-euˬ g’awˇ mawˇ-ahˇ mawˇ tawˆ tawˆ-awˇ ba ̭ pahˬ-iˇ-euˬ meh. ⁷ Naˬ liˬ smˇ la ̭ ehˇ g’aˬ ni kaˇ-iˇ-awˇ, miˬ zaˬ g’aˬ paˇ uˇ laˇ-euˬ meh. Pyeu ̭ dzeuˇ ya ̭-euˬ gaˇ kawˆ k’oeˇ miˬ zaˬ g’aˬ tiˬ paw ̭-iˬ maˬ siˬ nya-a. ⁸ Beˬtuˆluˆ aˬ yaw ̭-ahˇ ehˇ-eu, "Naw nya ̭ dzeˇ zaˬ neh myawˬ gahˬ ahˬ za-euˬ pyuˇ dawˬ tawˆ lu ̭ heu myaˆ teh ̭ ma loˇ." Aˬ yaw ̭ ehˇ-eu, "Heu myaˆ teh ̭ ma." ⁹ Ehˇ k’aw ̭, Beˬtuˆluˆ ehˇ-eu, "Aˬ jeˬ miˇ neh naw nya ̭ dzeˇ zaˬ nui ma tiˬ siˬ teh ̭-ehˇ taˬ-awˇ SahˬpaˬMiˬyehˇ-euˬ Yaw sahˇ-ahˇ lawˬ haw te. Nawˬ-euˬ k’aˬ dzeˇ zaˬ-ahˇ ba ̭ pahˬ-iˇ-euˬ tsawˇ haˬ deuˬ nymˬ-mˇ g’oˆ k’ehˬ-ahˇ g’o ̭ uˇ laˇ lu ̭ meh. Aˬ yaw ̭ ma ̭ nawˬ-ahˇ paˇ ya ba ̭ doˆ g’eh teh ̭-a." ¹⁰ K’oeˇ ngeh, aˬ yaw ̭ ja pyuˬ ni coˬ lah-awˇ shiˇ-euˬ meh. Zaˬ guˬ k’oeˇdeuˬ g’o ̭ uˇ laˇ ngeh, aˬ yaw ̭ shiˇ taˬ-awˇ ga gaˇ ya mawˇ-euˬ meh. Aˬ yaw ̭ ma ̭ aˬ yaw ̭-ahˇ ba ̭ doˆ g’eh-awˇ, aˬ yaw ̭-euˬ k’aˬ dzeˇ zaˬ gaˇ dzeˇ ba ̭ pahˬ nehˬ-euˬ meh. ¹¹ Ka li zaˬ aˇ muˇ muˇ lah ni maˬ ehˇ, gaˇ kawˆ k’oeˇ k’aˇ ya gaˬ-euˬ tsawˇ haˬ dawˬ tawˆ lu ̭ maˬ ehˇ, guˆ dui dui-iˇ-euˬ meh. ¹² Zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu g’awˬ mya jeˬ, tsawˇ haˬ g’awˬ mya ni-ahˇ g’aˬ k’ehˇ deuˬ mˇ mehˬ-euˬ meh. Jah-eu tsawˇ haˬ dawˬ tawˆ lu ̭, Sawˇlaˬmoˬ-euˬ Guiˇ ga ceuˬ lehˇ kuˇ-eu jawˇ duˬ-ahˇ uiˬ leˇ-euˬ meh. ¹³ Aˬ cawˬ aˬ yaw ̭ ma ̭-ahˇ yaw k’aˆ-ehˇ ja ceuˬ-awˇ taˬ huiˬ k’aw ̭, tsawˇ haˬ tiˬ g’aˬ-iˬ aˬ yaw ̭ ma ̭-euˬ aˇ muˇ-ahˇ maˬ gaw ̭ leˇ peuˬ-a. ¹⁴ Ehˇ k’aw ̭, Sahˬpaˬ Yeˬsuˇ-ahˇ jah-eu k’aˬ jeˇ zaˬ deuˬ hawˇ-eu zaˬ miˬ zaˬ deuˬ, aˇ muˇ la ̭ k’oeˇ ngehˬ jawˇ ngehˬ lahˬ laˇ lu ̭-eu meh. ¹⁵ G’aˬ k’ehˇ deuˬ-euˬ mˇ myawˬ shaˇ kawˆ-ahˇ aˬ cawˬ ya mawˇ ngeh, naˇ-eu gawˇ-eu tsawˇ haˬ deuˬ-ahˇ gaˇ ma-ahˇ ba ̭ doˆ le ̭-awˇ, gawˬ pu hawˇ-eu yu ̭ zaˇ k’oeˇ taˆ bi jawˇ-awˇ, Beˬtuˆluˆ oe tsehˆ ngeh, aˬ yaw ̭-euˬ g’awˇ mawˇ-euˬ naˇ shmˇ bi zaw le-eu g’aˇ duˬ lo ̭ lu ̭-eu meh. ¹⁶ Yeˬluˇsaˬlehˬ meuˬ-euˬ tahˬ g’o ̭ tahˬ jawˇ jaˆ-eu meuˬ deuˬ-ahˇ jawˇ-eu tsawˇ haˬ deuˬ neh naˇ-eu tsawˇ haˬ deuˬ hawˇ-eu neh ̭ yaw jaw ̭ uˇ-eu tsawˇ haˬ deuˬ sheuˬ la ̭-awˇ, baˬ ma ̭ puˇ jeˬ-ehˇ laˇ-euˬ meh. Aˬ yaw ̭ ma ̭ dawˬ tawˆ lu ̭ naˇ gawˇ taˬ leˇ jiˇ-euˬ meh. ¹⁷ K’oeˇ ngeh, Piˇ ma Yaw huiˬ g’aˬ hawˇ-eu aˬ yaw ̭-euˬ tsawˇ haˬ dawˬ tawˆ lu ̭ maˬ ehˇ, Saˬduˬgehˇ aˇ muˇ la ̭ k’oeˇ uˇ-eu tsawˇ haˬ deuˬ maˬ ehˇ, g’aˬ k’ehˇ deuˬ-ahˇ myaˆ naˆ dui dui laˇ-awˇ, yaw doeˇ jahˇ-eu g’aˇ duˬ noeˬ tsehˆ-euˬ meh. ¹⁸ Aˬ yaw ̭ ma ̭ g’aˬ k’ehˇ deuˬ-ahˇ nyeh ̭-awˇ, miˇ k’ahˬ zaˬ-euˬ tawˬ-ahˇ dawˆ-euˬ meh. ¹⁹ Ehˇ k’aw ̭, k’oeˇ ngeh miˇ Sahˬpaˬ Miˬyehˇ-euˬ mˬ taˆ g’aˬ k’ehˇ tiˬ g’aˬ pa ̭ kuˆ laˇ g’oˆ pah le-awˇ, g’aˬ k’ehˇ deuˬ-ahˇ sheuˬ doˆ nehˬ-awˇ, heu lo ̭-ehˇ ehˇ nehˬ-euˬ meh. ²⁰ "Uˬ duˬ tahˬ nymˇ nymˇ ma la ̭ k’oeˇ yaw ̭ leˇ-awˇ, yaw shui ̭ deh ̭ paˇ-euˬ gaˇ kawˆ heu tiˬ byah tiˬ lo ̭ ja mehˬ leˇ-awˬ." ²¹ Dawˬ k’oeˇ dawˬ-ahˇ g’aˬ k’ehˇ deuˬ naˇ haˬ-awˇ, uˬ bya bya laˇ ngeh Uˬ duˬ tahˬ nymˇ nymˇ ma la ̭ k’oeˇ uˇ leˇ-awˇ, gaˇ kawˆ k’oeˇ mehˬ nehˬ tsoˆ nehˬ-euˬ meh. Piˇ ma Yaw huiˬ g’aˬ hawˇ-eu aˬ yaw ̭-euˬ tsawˇ haˬ deuˬ neh, Yuˇdaˆ tsawˇ haˬ tsawˇ mawˬ tsawˇ k’aˆ dawˬ tawˆ lu ̭ kuˇ ymˬ jiˇ-awˇ, Ba ̭ dzah dzah ma dzah-euˬ meh. K’oeˇ naˇ, g’aˬ k’ehˇ deuˬ-ahˇ aˬ yaw ̭ ma ̭-euˬ mehˬ shi bi sheuˬ la ̭-eu g’aˇ duˬ dawˬ bi ̭-euˬ meh. ²² Ehˇ k’aw ̭, miˇ k’ahˬ gaˇ mˇ-eu yaw huiˬ yaw mahˇ deuˬ oe keuˆ ngeh, g’aˬ k’ehˇ deuˬ tawˬ-ahˇ maˬ paˇ jawˇ-euˬ gaˇ ya mawˇ-awˇ, Ba ̭ dzah-ahˇ paˇ g’o ̭ leˇ-awˇ, heu lo ̭-ehˇ tsa ̭ gaˬ leˇ-euˬ meh. ²³ "Nga ma ̭ tawˬ-ahˇ iˇ keuˆ ngeh, g’oˆ k’ehˬ zi ̭ dah ni taw ̭ tehˬ taˬ-awˇ, lo ̭-eu tsawˇ haˬ deuˬ k’aw ̭ yaw muiˬ paˬ-ehˇ lo ̭ lu ̭ gaˇ ya mawˇ-euˬ ma. Ehˇ k’aw ̭, nga ma ̭ g’oˆ k’ehˬ k’oeˇ pah haw ngeh, la ̭ k’oeˇ tiˬ g’aˬ-iˬ maˬ jawˇ-a." ²⁴ Piˇ ma aˬ yui ̭ deuˬ hawˇ-eu, Uˬ duˬ tahˬ nymˇ nymˇ ma-ahˇ lo ̭ piˇ-eu deuˬ k’oeˇ taˆ uˆ lahˇ-eu yaw huiˬ yaw mahˇ g’aˬ gaˇ kawˆ k’oeˇ ya gaˬ ngeh, g’aˬ k’ehˇ deuˬ aˬ joˆ-ehˇ jahˇ-euˬ gaˇ kawˆ noeˬ maˬ doˆ-ehˇ pyeu ̭-iˇ-euˬ meh. ²⁵ K’oeˇ ngeh, tsawˇ haˬ tiˬ g’aˬ uˇ laˇ-awˇ ehˇ-eu, "Naˇ haˬ sheˇ. Naw ma ̭ neh pa ̭ kuˆ-ahˇ dawˆ-euˬ tsawˇ haˬ k’oeˇ deuˬ Uˬ duˬ tahˬ nymˇ nymˇ ma la ̭ k’oeˇ mehˬ lu ̭ tsoˆ lu ̭ meh." ²⁶ Yaw huiˬ yaw mahˇ k’oeˇ g’aˬ aˬ yaw ̭-euˬ tsawˇ haˬ deuˬ sheuˬ-awˇ, g’aˬ k’ehˇ deuˬ-ahˇ sheuˬ laˬ-iˇ-euˬ meh. Tsawˇ haˬ aˇ ma ̭ k’oeˇ deuˬ aˬ yaw ̭ ma ̭-ahˇ k’aˬ lo biˬ laˇ gaˇ guˆ-eu miˇ neh, g’aˬ k’ehˇ deuˬ-ahˇ yehˬ bawˬ sehˇ lu-ehˇ maˬ jahˇ ni sheuˬ la ̭-euˬ meh. ²⁷ G’aˬ k’ehˇ deuˬ-ahˇ sheuˬ uˇ la ̭-awˇ, Ba ̭ dzah-euˬ mehˬ shi bi yaw ̭-awˇ, Piˇ ma Yaw huiˬ g’aˬ aˬ yaw ̭ ma ̭-ahˇ naˇ haˬ-eu la ̭ k’oeˇ, heu lo ̭-ehˇ ehˇ-eu meh. ²⁸ "Tsawˇ haˬ k’oeˇ g’aˬ-euˬ tsawˇ myahˇ uˬ moˆ mehˬ-eu tsoˆ-eu jeˬ taˬ mˇ lehˇ, nga ma ̭ neh naw ma ̭-ahˇ yaw k’aˆ k’aˆ-ehˇ ehˇ taˬ-euˬ jaˆ-eu maˬ ngeuˇ-a loˇ. Ehˇ k’aw ̭, Yeˬluˇsaˬlehˬ meuˬ meuˬ lah-ehˇ gaˬ byah jiˇ ni naw ma ̭ mehˬ-awˇ tsoˆ-awˇ, tsawˇ haˬ k’oeˇ g’aˬ shiˇ-euˬ gaˇ kawˆ nga ma ̭ k’oeˇ taˆ keuˆ le ni naw ma ̭ jahˇ-euˬ meh." ²⁹ K’oeˇ ngeh, Beˬtuˆluˆ hawˇ-eu g’aˬ k’ehˇ deuˬ heu lo ̭-ehˇ ehˇ k’o ̭ nehˬ-euˬ meh. "Tsawˇ haˬ-euˬ dawˬ-ahˇ naˇ haˬ-eu naˆ maˬ tseˇ, Miˬyehˇ-euˬ dawˬ-ahˇ nga ma ̭ ya naˇ haˬ meh. ³⁰ Naw ma ̭ neh la ̭ ya ̭ k’oeˇ taˆ ta ̭ tehˬ-awˇ bi shiˇ-euˬ Yeˬsuˇ-ahˇ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ neh paˇ bi g’o ̭ deh ̭ laˇ-euˬ meh. ³¹ Iˇsaˬleˬlaˆ tsawˇ haˬ deuˬ iˬ baˇ noeˬ poˆ-awˇ, iˬ baˇ pyehˬ nehˬ-eu jeˬ-ahˇ za nya ni, Miˬyehˇ-euˬ aˇ maˇ paw aˬ yaw ̭-ahˇ ciˬ huiˬ keuˆ nehˬ-awˇ, Sheuˬ g’eh-eu g’aˬ hawˇ-eu Ka k’o ̭-eu g’aˬ bi pyeu ̭ laˇ-euˬ meh. ³² Nga ma ̭-aˬ, gaˇ kawˆ heu-euˬ saˇ kiˇ pyeu ̭-eu ma. K’oeˇ lo ̭-ehˇ duˇ ni, Miˬyehˇ-euˬ ehˇ dawˬ naˇ haˬ geu ̭-eu deuˬ-ahˇ Miˬyehˇ neh bi ̭-euˬ Muiˬ-eu shawˇ-eu Yaw sahˇ Miˬyehˇ k’aw ̭, gaˇ kawˆ heu-euˬ saˇ kiˇ pyeu ̭-eu meh." ³³ Ba ̭ dzah-ahˇ uˇ-eu tsawˇ haˬ deuˬ dawˬ k’oeˇ dawˬ-ahˇ ya gaˬ ngeh, nui ma pehˇ dui dui laˇ-awˇ, g’aˬ k’ehˇ deuˬ-ahˇ seh ̭ maw ̭-eu meh. ³⁴ Ehˇ k’aw ̭, aˬ yaw ̭ ma ̭ la ̭ k’oeˇ aˬ cawˬ yaw zeu baw dui dui-eu Zahˇ dawˬ k’o ̭ dawˬ mehˬ-eu saˬ laˬ pyeu ̭-eu Gaˬmaˬleˬlaˇ lehˇ myahˇ-euˬ Paˬliˬsehˇ tiˬ g’aˬ Ba ̭ dzah la ̭ k’oeˇ tuˇ laˇ-awˇ, g’aˬ k’ehˇ deuˬ-ahˇ la ̭ nyiˇ tiˬ k’ehˬ bi sheuˬ doˆ g’eh-eu g’aˇ duˬ dawˬ bi ̭-euˬ meh. ³⁵ K’oeˇ naˇ, Ba ̭ dzah-ahˇ aˬ yaw ̭ heu lo ̭-ehˇ ehˇ nehˬ-euˬ meh. "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ-oˇ, tsawˇ haˬ heu deuˬ-ahˇ aˬ joˆ-ehˇ jahˇ nehˬ nmˇ lehˇ ehˇ-eu gaˇ kawˆ heu, yaw k’aˆ k’aˆ-ehˇ shaˇ noeˬ-awˬ. ³⁶ Aˇ hu Tuˇdaˆ lehˇ kuˇ-euˬ tiˬ g’aˬ doˆ le-euˬ naw ma ̭ siˬ lu ̭ meh. Aˬ yawˇ yaw ̭ yaw huiˬ tiˬ g’aˬ ma lehˇ ehˇ-awˇ, tsawˇ haˬ oeˬ yaˇ g’aˬ byah ni aˬ yaw ̭ nehˬ-ehˇ gm leˇ-euˬ meh. Ehˇ k’aw ̭, aˬ yaw ̭-ahˇ seh ̭ ngeh, aˬ yaw ̭ mehˬ nah caw teh-euˬ deuˬ cehˆ piˬ cehˆ byoˆ jiˇ-awˇ, gaˇ kawˆ k’oeˇ hmˬ co ̭-iˇ-euˬ meh. ³⁷ K’oeˇ naˇ, miˇ k’ahˬ zaˬ-euˬ tsawˇ myahˇ yuˇ ngeh, Gaˬliˬlehˇ miˇ k’ahˬ-ahˇ jawˇ-eu Yuˇdaˆ lehˇ kuˇ-eu tsawˇ haˬ tiˬ g’aˬ paˇ doˆ le-euˬ meh. Aˬ yaw ̭-euˬ mehˬ nah caw teh-eu tsawˇ haˬ k’aw ̭ tiˬ ma ̭ jawˇ-eu meh. Ehˇ k’aw ̭, aˬ yaw ̭ g’eh bi seh ̭-awˇ, aˬ yaw ̭ mehˬ nah caw tehˬ-euˬ tsawˇ haˬ deuˬ cehˆ piˬ cehˆ byoˆ jiˇ-euˬ meh. ³⁸ K’oeˇ miˇ neh, gaˇ kawˆ heu hmˬ-ahˇ ta ̭ leˇ-awˇ, naw ma ̭-ahˇ ngaˇ heu lo ̭-ehˇ ehˇ maw ̭ miˇ-a. Tsawˇ haˬ heu deuˬ-ahˇ do maˬ yuˇ ni bi jawˇ-awˬ. Aˬ yaw ̭ ma ̭ neh mˇ-euˬ gaˇ heu, tsawˇ haˬ zaˬ neh noeˬ doˆ-awˇ mˇ-euˬ jeˬ ngeuˇ naˇ, aˬ yawˇ yaw ̭ piˬ-iˇ byoˆ-iˇ teh ̭-a. ³⁹ Ehˇ k’aw ̭, Miˬyehˇ neh bi mˇ-euˬ jeˬ ngeuˇ lawˬ naˇ, naw ma ̭ maˬ zuiˆ g’aˬ nya-aˇ. Nymˬ-mˇ Miˬyehˇ-ahˇ guiˇ deuˆ cawˬ shaˇ gaˇ duˇ teh ̭-a." Ba ̭ dzah aˇ muˇ k’oeˇ, Gaˬmaˬleˬlaˇ-euˬ ehˇ dawˬ geu ̭-euˬ meh. ⁴⁰ G’aˬ k’ehˇ deuˬ-ahˇ la ̭ k’oeˇ paˇ kuˇ ahˇ-awˇ, yahˬ caˆ neh jui ̭-awˇ, Yeˬsuˇ-euˬ tsawˇ myahˇ uˬ moˆ maˬ ngehˬ maˬ tmˇ-eu g’aˇ duˬ yaw k’aˆ k’aˆ-ehˇ mehˬ-awˇ pyehˬ nehˬ-euˬ meh. ⁴¹ G’aˬ k’ehˇ deuˬ Ba ̭ dzah-ahˇ neh g’o ̭ doˆ le ngeh, laˬ k’aˬ cehˇ-eu meh. Aˬ jeˬ miˇ neh ehˇ naˇ, Yeˬsuˇ g’aˇ duˬ sha ̭ dawˇ-eu jeˬ-ahˇ daˬ geuˇ-eu tsawˇ haˬ lehˇ, aˬ yaw ̭ ma ̭-ahˇ Miˬyehˇ sawˇ nehˬ-euˬ aˬ yaw ̭ ma ̭ siˬ nya-eu meh. ⁴² K’oeˇ naˇ, Uˬ duˬ tahˬ nymˇ nymˇ ma la ̭ k’oeˇ maˬ ehˇ, nymˇ doe ni maˬ ehˇ, Yeˬsuˇ Ka li gaˇ kawˆ Laˬ k’aˬ cehˇ-eu Guiˬ lahˬ dawˬ mehˬ-eu hawˇ-eu mehˬ nehˬ tsoˆ nehˬ-eu jeˬ, yawˬ nah na lu ̭ maˬ tsehˆ leˇ ni mˇ daˆ le ̭-euˬ meh.

¹ Zaˬ lahˇ deuˬ myaˬ laˇ lu ̭-eu aˇ nah aˇ yamˬ k’oeˇ la ̭ k’oeˇ, Heˬlaˬsaˇ dawˬ ngehˬ-eu Yuˇdaˆ tsawˇ haˬ deuˬ hawˇ-eu, Yuˇdaˆ dawˬ ngehˬ-eu Yuˇdaˆ tsawˇ haˬ deuˬ yaw kaˬ dawˬ ja doˆ-euˬ meh. Aˬ jeˬ miˇ neh ehˇ naˇ, aˬ yaw ̭ nah yaw ̭ loˬ-eu jeˬ biˇ nehˬ ngeh, aˬ yaw ̭ ma ̭-euˬ miˬ coeˬ miˬ ma deuˬ-ahˇ yaw muiˬ paˬ-ehˇ maˬ biˇ o ̭ doe nehˬ nga lehˇ, Heˬlaˬsaˇ dawˬ ngehˬ-eu Yuˇdaˆ tsawˇ haˬ deuˬ ehˇ-eu meh. ² K’oeˇ miˇ neh, jah-eu tsawˇ haˬ dawˬ tawˆ lu ̭-ahˇ g’aˬ k’ehˇ tseˇ nyi ̭ g’aˬ neh kuˇ uiˬ-awˇ, heu lo ̭-ehˇ ehˇ nehˬ-euˬ meh. "Nga ma ̭ pyuˇ shuiˇ-ahˇ ta ̭ leˇ-eu gaˇ heu deuˬ mˇ-eu baˬ da neh Miˬyehˇ dawˬ kawˬ mehˬ-eu paw teˬ-iˇ naˇ, maˬ muiˬ-a. ³ K’oeˇ miˇ neh aˬ yui ̭ aˬ nyiˇ deuˬ-oˇ, naw ma ̭ la ̭ k’oeˇ Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-awˇ, tsawˇ gahˇ byah-eu tsawˇ haˬ shi ̭ g’aˬ tseˇ doˆ-awˬ. Aˬ yaw ̭ ma ̭-ahˇ gaˇ heu hmˬ bi mˇ ma. ⁴ Nga ma ̭-aˬ, guiˬ lahˬ shaˇ-eu hawˇ-eu dawˬ mehˬ mehˬ-eu jeˬ teh ̭-ehˇ aˇ yamˬ tiˬ byah ni mˇ ma." ⁵ G’aˬ k’ehˇ deuˬ k’oeˇ lo ̭-ehˇ ehˇ gaˇ, aˇ muˇ muˇ lah-ehˇ nui ma tsaˬ-awˇ, tsawˇ haˬ heu deuˬ-ahˇ tseˇ doˆ-euˬ meh. Jah-eu nui ma tiˬ byah ni ahˇ-awˇ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu Saˬteˬpaˬ, Piˇliˇpuˆ, Bawˇkawˬ, Niˇgaˬnawˬ, Tiˇmoˬ, Baˬmeˬnaˇ, Niˇgawˇla heu deuˬ meh. Niˇgawˇla-aˬ, yaw beh Aˬdiˇawˬ meuˬ-ahˇ jawˇ-euˬ lawˇ ci ̭ zaˬ pyeu ̭-awˇ, dzeuˇ laˇ ngeh Yuˇdaˆ tsawˇ haˬ-euˬ zahˇ tiˬ poˆ tawˬ haw-euˬ meh. ⁶ Aˇ muˇ neh aˬ yaw ̭ ma ̭-ahˇ g’aˬ k’ehˇ deuˬ jawˇ gaˇ sheuˬ g’eh-awˇ, g’aˬ k’ehˇ deuˬ guiˬ lahˬ shaˇ-awˇ, aˬ yaw ̭ ma ̭ k’oeˇ taˆ aˬ la ̭ ba ̭ daˆ nehˬ-euˬ meh. ⁷ K’oeˇ lo ̭-ehˇ jahˇ-eu la ̭ k’oeˇ, Miˬyehˇ-euˬ dawˬ kawˬ mehˬ hu paw maˬ naˬ leˇ ni gaˬ doe-iˇ lu ̭-eu meh. Yeˬluˇsaˬlehˬ meuˬ la ̭ k’oeˇ zaˬ lahˇ deuˬ tiˬ jawˇ saˇ-iˬ tiˬ jawˇ myaˬ laˇ lu ̭-awˇ, piˇ ma g’awˬ mya g’aˬ jah-eu tsawˇ haˬ pyeu ̭ laˇ-euˬ meh. ⁸ Miˬyehˇ neh guiˬ lahˬ tiˬ byah ni bi ̭ taˬ-awˇ, baoˬ tiˬ byah ni ahˇ-eu Saˬteˬpaˬ-aˬ, aˬ cawˬ-euˬ mehˬ shi zahˬ dui dui leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu jeˬ mˇ mehˬ-euˬ meh. ⁹ Kuˇleˬniˬ meuˬ hawˇ-eu Aˬleˬsaˬduˇ meuˬ-ahˇ jawˇ-eu Yuˇdaˆ tsawˇ haˬ deuˬ ahˇ leˇ taˬ-euˬ, Buˬ-iˇ-euˬ tsawˇ haˬ deuˬ -euˬ uˬ duˬ tahˬ nymˇ lehˇ ehˇ-eu aˇ muˇ k’oeˇ muˇ-ahˇ ta ̭-eu tsawˇ haˬ deuˬ hawˇ-eu, Giˇliˇciˆ miˇ k’ahˬ hawˇ-eu Aˬshaˆ miˇ k’ahˬ-ahˇ jawˇ-eu Yuˇdaˆ tsawˇ haˬ tiˬ paˆ na deuˬ tuˇ laˇ-awˇ, Saˬteˬpaˬ-ahˇ tsawˇ pyehˇ pyehˇ-euˬ meh. ¹⁰ Ehˇ k’aw ̭, Yaw sahˇ Miˬyehˇ neh Saˬteˬpaˬ-ahˇ tsawˇ gahˇ bi ̭ taˬ-euˬ miˇ neh, aˬ yaw ̭ ma ̭ maˬ pyehˇ g’aˬ nya-a. ¹¹ K’oeˇ miˇ neh, tsawˇ haˬ tiˬ paˆ na deuˬ-ahˇ aˬ yaw ̭ ma ̭ la ̭ nm ̭ nm ̭-awˇ, "Tsawˇ haˬ heu g’aˬ Moˇseˬ hawˇ-eu Miˬyehˇ-ahˇ bahˬ leˇ-eu dawˬ ngehˬ-euˬ nga ma ̭ gaˬ-euˬ ma" lehˇ bi ehˇ-euˬ meh. ¹² K’oeˇ lo ̭-ehˇ jahˇ-eu la ̭ k’oeˇ, miˇ k’ahˬ zaˬ deuˬ, tsawˇ mawˬ tsawˇ k’aˆ deuˬ hawˇ-eu, Zahˇ dawˬ k’o ̭ dawˬ mehˬ-eu saˬ laˬ deuˬ nui ma pehˇ laˇ ni kawˆ-euˬ meh. Aˬ yaw ̭ ma ̭ Saˬteˬpaˬ-ahˇ nyeh ̭-awˇ, Ba ̭ dzah mehˬ shi sheuˬ g’eh-euˬ meh. ¹³ K’oeˇ naˇ, jaˬ myaw ̭ myaw ̭-eu g’aˇ duˬ aˬ yaw ̭ ma ̭ neh mehˬ gahˇ taˬ-euˬ tsawˇ haˬ deuˬ sheuˬ ahˇ la ̭-awˇ, heu lo ̭-ehˇ bi ehˇ-euˬ meh. "Tsawˇ haˬ heu g’aˬ-aˬ, aˬ dui-euˬ muiˬ-eu shawˇ-eu Uˬ duˬ tahˬ nymˇ nymˇ ma hawˇ-eu Moˇseˬ-euˬ Zahˇ dawˬ k’o ̭ dawˬ-ahˇ bahˬ leˇ-eu dawˬ maˬ tsehˆ leˇ ni ngehˬ lu ̭ meh. ¹⁴ Naˬzaˬlehˇ tsawˇ haˬ Yeˬsuˇ heu g’aˬ, Uˬ duˬ tahˬ nymˇ nymˇ ma heu laˆ cawˆ-awˇ, Moˇseˬ neh bi ̭ la ̭-awˇ tawˬ ka le ̭-euˬ zahˇ sahˇ k’o ̭ dawˬ tawˆ lu ̭ laˆ paˇ jiˇ teh ̭-a lehˇ, tsawˇ haˬ heu g’aˬ ehˇ-eu nga ma ̭ gaˬ-euˬ ma." ¹⁵ Ba ̭ dzah-ahˇ k’aˇ nuiˇ lu ̭-eu tsawˇ haˬ dawˬ tawˆ lu ̭, Saˬteˬpaˬ-ahˇ haw tsoˆ taˬ-euˬ meh. K’oeˇ ngeh, aˬ yaw ̭-euˬ myaˆ pyawˬ k’oeˇ, mˬ taˆ g’aˬ k’ehˇ-euˬ myaˆ pyawˬ-ahˇ duˇ gaˇ aˬ yaw ̭ ma ̭ ya mawˇ-euˬ meh.

¹ Piˇ ma yaw huiˬ g’aˬ Saˬteˬpaˬ-ahˇ naˇ haˬ-eu, "Aˬ yaw ̭ ma ̭ ehˇ-eu ngeuˇ meh loˇ." ² Saˬteˬpaˬ ehˇ-eu, "Aˬ yui ̭ aˬ nyiˇ aˬ da aˬ ma deuˬ-oˇ, ngaˇ ehˇ gaˇ naˇ haˬ sheˇ. Aˬ dui-euˬ aˬ da yaw dzahˇ Aˬbyaˬhaˬ Haˬlaˬ meuˬ-ahˇ maˬ jawˇ-iˇ mi naˆ-ehˇ, Maˬsoˬpoˬtaˬmiˇ miˇ k’ahˬ la ̭ k’oeˇ yaw sheh ̭ k’ahˬ sehˇ huiˬ-eu Miˬyehˇ aˬ yaw ̭-euˬ mehˬ shi doˆ le-awˇ, ³ ’Nawˬ-euˬ aˬ yui ̭ aˬ nyiˇ deuˬ hawˇ-eu nawˬ-euˬ miˇ k’ahˬ-ahˇ byehˇ dzeh ya ̭-awˇ, ngaˬ neh mehˬ-euˬ miˇ k’ahˬ-ahˇ jawˇ-iˇ-awˬ’ lehˇ ehˇ le-euˬ meh. ⁴ K’oeˇ miˇ neh, aˬ yaw ̭-euˬ miˇ k’ahˬ-ahˇ aˬ yaw ̭ byehˇ dzeh ya ̭-awˇ, Haˬlaˬ meuˬ-ahˇ jawˇ-iˇ-euˬ meh. Aˬbyaˬhaˬ-euˬ aˬ da shiˇ dzeuˇ ngeh jawˇ, iˬ nah naw ma ̭ jawˇ lu ̭-eu miˇ k’ahˬ heu k’ahˬ la ̭ k’oeˇ, Miˬyehˇ neh aˬ yaw ̭-ahˇ paˇ bi jawˇ laˇ-euˬ meh. ⁵ K’oeˇ ngeh, Miˬyehˇ aˬ yaw ̭-ahˇ miˇ tsaˬ la ̭ zaˬ tiˬ daˬ hui ni k’aw ̭ maˬ bi ̭-aˬ. Ehˇ k’aw ̭, miˇ k’ahˬ k’oeˇ k’ahˬ aˬ yaw ̭-ahˇ bi ̭-awˇ, aˬ yaw ̭-euˬ miˇ k’ahˬ hawˇ-eu aˬ yaw ̭-euˬ zaˬ deuˬ uˆ deuˬ-euˬ miˇ k’ahˬ bi pyeu ̭ laˇ ma lehˇ, Miˬyehˇ neh saˇ jaˇ dzaˬ-euˬ meh. Miˬyehˇ k’oeˇ lo ̭-ehˇ saˇ jaˇ dzaˬ ngeh, Aˬbyaˬhaˬ zaˬ tiˬ g’aˬ-iˬ maˬ jawˇ le-aˬ siˬ. ⁶ Miˬyehˇ neh aˬ yaw ̭-ahˇ heu lo ̭-ehˇ ehˇ nehˬ-euˬ meh. ’Nawˬ-euˬ zaˬ nawˬ-euˬ uˆ deuˬ-aˬ, aˬ cawˬ tsawˇ jeuˬ-euˬ miˇ k’ahˬ-ahˇ ya jawˇ-iˇ-awˇ, aˬ cawˬ-euˬ zaˬ k’aˆ ya geu ̭-awˇ, aˬ cawˬ k’ehˬ nehˬ k’aˆ nehˬ gaˇ oeˬ yaˇ k’o ̭ byah ni ya daˬ teh ̭-a. ⁷ Ehˇ k’aw ̭, aˬ yaw ̭ ma ̭-ahˇ zaˬ k’aˆ bi geu ̭-euˬ tsawˇ jeuˬ k’oeˇ jeuˬ-ahˇ ngaˇ yaˇ k’aˬ daˇ-awˇ, aˬ yaw ̭ ma ̭-ahˇ miˇ k’ahˬ k’oeˇ k’ahˬ la ̭ k’oeˇ neh bi doˆ laˇ ma. K’oeˇ ngeh, jawˇ duˬ heu tsahˇ-ahˇ aˬ yaw ̭ ma ̭ ngaˬ-ahˇ uˬ duˬ tahˬ teh ̭-a.’ ⁸ K’oeˇ naˇ, Miˬyehˇ neh Aˬbyaˬhaˬ-ahˇ baˆ k’oˆ mehˬ dzaˬ yehˬ-eu zahˇ bi jahˇ-eu la ̭ k’oeˇ, dawˬ ma saˇ jaˇ dzaˬ-euˬ meh. K’oeˇ miˇ neh, Iˇtsaˆ deh ̭ le-awˇ tiˬ jaw byah laˇ ngeh, Aˬbyaˬhaˬ neh aˬ yaw ̭-euˬ aˬ li Iˇtsaˆ-ahˇ baˆ k’oˆ mehˬ dzaˬ yehˬ nehˬ-euˬ meh. K’oeˇ lo ̭-ehˇ duˇ ni, Iˇtsaˆ g’eh, aˬ yaw ̭-euˬ aˬ li Yaˬkoˆ-ahˇ baˆ k’oˆ mehˬ dzaˬ yehˬ nehˬ-euˬ meh. Yaˬkoˆ g’eh, aˬ yaw ̭-euˬ aˬ li tseˇ nyi ̭ li-ahˇ baˆ k’oˆ mehˬ dzaˬ yehˬ nehˬ-euˬ meh. Aˬ li k’oeˇ tseˇ nyi ̭ liˬ-aˬ, aˬ dui tsawˇ jeuˬ-euˬ tsawˇ myahˇ doˆ-eu aˬ poeˬ deuˬ pyeu ̭-eu meh. ⁹ "Yaˬkoˆ-euˬ aˬ li deuˬ-aˬ, aˬ yaw ̭ ha mehˇ nmˇ-euˬ aˬ nyiˇ Yoˇsehˆ-ahˇ myaˆ naˆ-eu miˇ neh, aˬ cawˬ-ahˇ ahˬ nehˬ-awˇ, aˬ cawˬ neh Iˇjiˇtuˆ miˆ k’ahˬ-ahˇ zaˬ k’aˆ bi geu ̭-iˇ-eu g’aˇ duˬ ahˬ dzaˬ-euˬ meh. Ehˇ k’aw ̭, Yoˇsehˆ-ahˇ Miˬyehˇ maˬ byehˇ dzeh-ehˇ, ¹⁰ shaˬ-eu zahˬ-eu jeˬ la ̭ k’oeˇ sheuˬ dzeuˇ nehˬ-euˬ meh. Iˇjiˇtuˆ sahˬ paˬ mehˬ shi Yoˇsehˆ ya le ngeh, Miˬyehˇ aˬ yaw ̭-ahˇ myaˆ pyawˬ pyuˇ-eu jeˬ hawˇ-eu zaˬ siˬ tsawˇ gahˇ bi ̭ neh-euˬ meh. Sahˬ paˬ k’oeˇ g’aˬ neh Yoˇsehˆ-ahˇ aˬ yaw ̭-euˬ miˇ k’ahˬ k’oeˇ taˆ hawˇ-eu sahˬ paˬ-euˬ hawˇ nymˇ k’oeˇ taˆ bi uˆ lahˇ-euˬ meh. ¹¹ K’oeˇ naˇ, Iˇjiˇtuˆ miˇ k’ahˬ k’ahˬ lah ni hawˇ-eu Kaˬnaˬ miˇ k’ahˬ la ̭ k’oeˇ meh ̭-eu shu ̭-eu jeˬ keuˆ le-awˇ, shaˬ dui dui laˇ taˬ-euˬ meh. A dui-euˬ aˬ poeˬ deuˬ k’aw ̭, dzaˬ-eu jeˬ maˬ jaˆ-ehˇ shaˬ laˇ taˬ-euˬ meh. ¹² K’oeˇ ngeh, Iˇjiˇtuˆ miˇ k’ahˬ-ahˇ cehˇ jaˆ-eu gaˇ kawˆ Yaˬkoˆ ya gaˬ ngeh. aˬ yaw ̭-euˬ aˬ li pyeu ̭-eu aˬ dui-euˬ aˬ poeˬ deuˬ-ahˇ pyehˬ g’eh-awˇ, yaw beh tiˬ doˆ bi iˇ haw-euˬ meh. ¹³ Nyiˬ doˆ tiˬ doˆ paˇ bi iˇ ngeh, aˬ yaw ̭ Yoˇ sehˆ pyeu ̭-eu gaˇ kawˆ, aˬ yaw ̭-euˬ mehˇ nmˇ deuˬ-ahˇ Yoˇsehˆ bi siˬ-awˇ, Yoˇsehˆ-euˬ aˬ yui ̭ aˬ nyiˇ gaˇ kawˆ Iˇjiˇtuˆ sahˬ paˬ ya siˬ-euˬ meh. ¹⁴ K’oeˇ naˇ, pehˬ zaˬ ma zaˬ dawˬ tawˆ lu ̭ sheuˬ-awˇ Iˇjiˇtuˆ miˇ k’ahˬ-ahˇ oe-eu g’aˇ duˬ, aˬ yaw ̭-euˬ aˬ da Yaˬkoˆ-ahˇ Yoˇsehˆ tsa ̭ ahˇ g’eh-euˬ meh. Pehˬ zaˬ ma zaˬ dawˬ tawˆ lu ̭ shi ̭ tseˇ ngaˬ g’aˬ byah-eu meh. ¹⁵ Iˇjiˇtuˆ miˇ k’ahˬ-ahˇ Yaˬkoˆ jawˇ-iˇ-awˇ, aˬ yaw ̭ hawˇ-eu aˬ yaw ̭-euˬ aˬ li dawˬ tawˆ lu ̭, k’oeˇ gaˇ ziˇ deh ̭ jiˇ-euˬ meh. ¹⁶ Aˬ yaw ̭ ma ̭-euˬ g’awˇ mawˇ-ahˇ Sheˬkmˬ meuˬ-ahˇ ba ̭ k’o ̭ g’eh-awˇ, Haˬmawˬ aˇ jeuˬ-ahˇ Aˬbyaˬhaˬ neh pyuˇ bi ̭-awˇ zeuˇ tsehˆ ya ̭-euˬ lmˬ bymˇ-ahˇ ba ̭ pahˬ-euˬ meh. ¹⁷ "Miˬyehˇ neh Aˬbyaˬhaˬ-ahˇ saˇ jaˇ dzaˬ taˬ-euˬ lo ̭-ehˇ bi byah laˇ-eu aˇ yamˬ tsaˬ laˇ ngeh, Iˇjiˇtuˆ miˇ k’ahˬ la ̭ k’oeˇ jawˇ lu ̭-eu aˬ dui-euˬ tsawˇ jeuˬ myaˬ dui dui laˇ taˬ-euˬ meh. ¹⁸ Aˇ saˬ saˬ laˇ ngeh, Yoˇsehˆ gaˇ kawˆ maˬ siˬ nya-eu sahˬ paˬ tiˬ g’aˬ daˆ laˇ-awˇ, Iˇjiˇtuˆ miˆ k’ahˬ-ahˇ uˆ lahˇ-euˬ meh. ¹⁹ Aˬ yaw ̭-aˬ, aˬ dui-euˬ aˬ poeˬ aˬ bawˇ k’oeˇ deuˬ-ahˇ tsawˇ gahˇ gahˇ-euˬ uˬ ta ̭, g’awˬ shaˬ tiˬ paw ̭-iˬ maˬ gaˬ-aˬ. Zaˬ nahˬ deuˬ bi shiˇ jiˇ-eu g’aˇ duˬ, iˇ kahˇ la ̭ k’oeˇ maˬ bi jawˇ ni, la ̭ nyiˇ bi ciˬ dzeh-euˬ meh. ²⁰ K’oeˇ ngeh yamˬ-ahˇ Moˇsehˬ deh ̭ le-euˬ meh. Aˬ yaw ̭-aˬ, muiˬ dui dui-eu aˬ li tiˬ li pyeu ̭-eu meh. Ba la smˇ siˬ byah ni aˬ yaw ̭-ahˇ iˇ kahˇ la ̭ k’oeˇ bo saˆ-awˇ cu-euˬ meh. ²¹ Aˬ yaw ̭-ahˇ la ̭ nyiˇ ciˬ dzeh ha-iˇ ngeh, sahˬ paˬ zaˬ miˬ neh ciˬ cu-awˇ, aˬ yaw ̭-eu ̭ aˬ li lo ̭-ehˇ cu huiˬ geu ̭-euˬ meh. ²² Iˇjiˇtuˆ tsawˇ jeuˬ-euˬ zaˬ siˬ tsawˇ gahˇ dawˬ tawˆ lu ̭ aˬ yaw ̭ ya dzaw-awˇ, ngehˬ-eu tmˇ-eu paw dzeˇ maˬ ehˇ, mˇ-eu shaˇ-eu paw dzeˇ maˬ ehˇ, nya dui dui-eu tsawˇ haˬ tiˬ g’aˬ pyeu ̭ laˇ-euˬ meh. ²³ "Moˇseˬ oeˬ tseˇ k’o ̭ k’awˆ laˇ ngeh, aˬ yaw ̭-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ aˬ cawˬ aˬ joˆ-ehˇ jahˇ nehˬ gaˇ cah haw-iˇ-eu lehˇ noeˬ doˆ leˇ-euˬ meh. ²⁴ Iˇsaˬleˬlaˆ tsawˇ haˬ tiˬ g’aˬ-ahˇ Iˇjiˇtuˆ tsawˇ haˬ neh k’ehˬ nehˬ-euˬ gaˇ mawˇ ngeh, aˬ yaw ̭ caw ba nehˬ-iˇ-awˇ, Iˇjiˇtuˆ tsawˇ haˬ k’oeˇ g’aˬ-ahˇ la ̭ poˆ poˆ-awˇ seh ̭-euˬ meh. ²⁵ Miˬyehˇ aˬ yaw ̭-ahˇ zmˬ-eu la ̭ k’oeˇ, aˬ yaw ̭-euˬ tsawˇ jeuˬ-ahˇ ka k’o ̭-eu lehˇ g’eh-eu gaˇ kawˆ aˬ yaw ̭-euˬ tsawˇ haˬ deuˬ noeˬ siˬ teh ̭-a lehˇ aˬ yaw ̭ noeˬ-euˬ meh. Ehˇ k’aw ̭, aˬ yaw ̭ ma ̭ maˬ noeˬ siˬ-a. ²⁶ Yawˬ nah yawˬ Iˇsaˬleˬlaˆ tsawˇ haˬ nyiˬ g’aˬ yaw kaˬ ceh lu ̭ gaˇ aˬ yaw ̭ mawˇ-awˇ, aˇ kaˬ piˇ nehˬ-eu la ̭ k’oeˇ, ’Naˇ haˬ sheˇ. Iˇsaˬleˬlaˆ tsawˇ haˬ cawˬ cawˬ aˬ jeˬ miˇ neh teu lo ̭-ehˇ ceh dzaˬ te’ lehˇ ehˇ nehˬ-euˬ meh. ²⁷ Ehˇ k’aw ̭, lehˬ dzehˬ-eu g’aˬ Moˇseˬ-ahˇ dehˬ dzeh-awˇ ehˇ-eu, ’Nga ma ̭-ahˇ uˆ lahˇ-awˇ yaˇ k’aˬ bi daˇ-eu lehˇ nawˬ-ahˇ aˬ suˇ g’aˬ neh k’ehˇ taˬ ta. ²⁸ Miˇ nah Iˇjiˇtuˆ tsawˇ haˬ k’oeˇ g’aˬ-ahˇ nawˇ seh ̭-euˬ lo ̭-ehˇ, ngaˬ-ahˇ paˇ seh ̭-eu g’eh te loˇ.’ ²⁹ Dawˬ k’oeˇ dawˬ-ahˇ Moˇseˬ ya gaˬ ngeh, Iˇjiˇtuˆ miˇ k’ahˬ-ahˇ neh cehˆ-awˇ, Miˇdiˬyaˬ miˇ k’ahˬ-ahˇ cehˆ jawˇ-iˇ-euˬ meh. Aˬ yaw ̭ k’oeˇ gaˇ jawˇ ngeh, aˬ li nyiˬ li jawˇ le-euˬ meh. ³⁰ Oeˬ tseˇ k’o ̭ dzeuˇ-iˇ geh, Siˇnaˆ gawˬ jawˬ dawˬ peh baw duˆ tiˬ duˆ-ahˇ do ̭ lu ̭-eu miˬ dzaˬ miˬ lmˇ la ̭ k’oeˇ, mˬ taˆ g’aˬ k’ehˇ tiˬ g’aˬ Moˇseˬ-euˬ mehˬ shi doˆ le-euˬ meh. ³¹ K’oeˇ gaˇ ya mawˇ ngeh, aˬ yaw ̭ zahˬ leˇ-awˇ, baw duˆ dawˬ peh le peh-awˇ haw duˬ leˇ-euˬ meh. K’oeˇ ngeh, SahˬpaˬMiˬyehˇ-euˬ teˇ saˇ aˬ yaw ̭ ya gaˬ-euˬ meh. ³² ’Ngaˇ-aˬ, naw ma ̭-euˬ aˬ poeˬ aˬ bawˇ pyeu ̭-eu Aˬbyaˬhaˬ, Iˇtsaˆ hawˇ-eu Yaˬkoˆ-euˬ Miˬyehˇ ma’ lehˇ ehˇ-eu meh. K’oeˇ ngeh, Moˇseˬ guˆ dui dui-eu miˇ neh yaw dzuˬ dzuˬ-awˇ, maˬ haw cawˬ peuˬ-a. ³³ Sahˬpaˬ Miˬyehˇ ehˇ-eu, ’Nawˬ-euˬ sehˬ nawˆ lehˆ-awˬ. Nawˇ yaw ̭ lu ̭-eu jawˇ duˬ teu tsahˇ muiˬ-eu shawˇ-eu pehˇ tsahˇ meh. ³⁴ Ngaˬ-euˬ tsawˇ haˬ deuˬ Iˇjiˇtuˆ miˇ k’ahˬ la ̭ k’oeˇ k’ehˬ-eu k’aˆ-eu jeˬ-ahˇ yaw k’aˆ-ehˇ ya daˬ lu ̭ gaˇ ngaˇ mawˇ-euˬ ma. Aˬ yaw ̭ ma ̭ shaˬ zahˬ na ̭ dui dui-eu la ̭ k’oeˇ mahˇ lu ̭-eu teˇ saˇ-ahˇ ngaˇ gaˬ-awˇ, aˬ yaw ̭ ma ̭-ahˇ bi buˬ bi law-iˇ-eu lehˇ ngaˇ za ̭ ka le-euˬ ma. Laˇ-awˬ. Ngaˇ nawˬ-ahˇ Iˇjiˇtuˆ miˇ k’ahˬ-ahˇ k’ehˇ g’eh-eu ma.’ ³⁵ "’Nga ma ̭ k’oeˇ taˆ uˆ lahˇ-awˇ yaˇ k’aˬ bi daˇ-eu lehˇ, aˬ suˇ g’aˬ nawˬ-ahˇ k’ehˇ taˬ ta’ lehˇ, aˬ yaw ̭ ma ̭ neh ehˇ nehˬ-awˇ byehˇ dzeh nehˬ-euˬ Moˇseˬ k’oeˇ g’aˬ-aˬ, aˬ yaw ̭-euˬ mehˬ shi baw duˆ la ̭ k’oeˇ ya mawˇ-euˬ mˬ taˆ g’aˬ k’ehˇ neh bi caw ba-eu la ̭ k’oeˇ, aˬ yaw ̭ ma ̭-ahˇ bi uˆ lahˇ-awˇ bi ka k’o ̭-eu g’aˇ duˬ Miˬyehˇ neh k’ehˇ le ̭-euˬ Moˇseˬ pyeu ̭-eu meh. ³⁶ Iˇjiˇtuˆ miˇ k’ahˬ la ̭ k’oeˇ maˬ ehˇ, Iˬ ma laˆ shaˆ Yaw neˇ g’ahˇ ceh maˬ ehˇ, bawˇ tsahˬ bawˇ dahˇ la ̭ k’oeˇ oeˬ tseˇ k’o ̭ oeˬ tseˇ myaˇ cah lu ̭ ngeh maˬ ehˇ, zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu g’awˬ mya jeˬ mˇ mehˬ-eu la ̭ k’oeˇ, Iˇsaˬleˬlaˆ tsawˇ haˬ deuˬ-ahˇ Iˇjiˇtuˆ miˇ k’ahˬ la ̭ k’oeˇ neh sheuˬ doˆ g’eh-euˬ meh. ³⁷ ’Ngaˬ-ahˇ k’ehˇ g’eh le ̭-euˬ lo ̭-ehˇ, Miˬyehˇ g’aˇ duˬ ngehˬ dah-eu tiˬ g’aˬ naw ma ̭ jawˇ gaˇ Miˬyehˇ paˇ k’ehˇ g’eh le ̭ teh ̭-a. Aˬ yaw ̭-aˬ, naw ma ̭-euˬ aˇ jeuˬ aˇ ca pyeu ̭ teh ̭-a’ lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-euˬ g’aˬ-aˬ, Moˇseˬ meh. ³⁸ Iˇsaˬleˬlaˆ tsawˇ haˬ deuˬ bawˇ tsahˬ bawˇ dahˇ k’aˇ shui ̭ deh yaˇ-ahˇ uiˬ leˇ-awˇ jawˇ ngeh, aˬ yaw ̭ ma ̭ nehˬ-ehˇ jawˇ-euˬ k’oeˇ g’aˬ Moˇseˬ meh. Aˬ dui-euˬ aˬ poeˬ aˬ bawˇ deuˬ nehˬ-ehˇ jawˇ-euˬ k’oeˇ g’aˬ aˬ yaw ̭ meh. Siˇnaˆ Gawˬ jawˬ-ahˇ mˬ taˆ g’aˬ k’ehˇ dawˬ ngehˬ cawˬ le ngeh jawˇ-euˬ g’aˬ k’aw ̭, aˬ yaw ̭ meh. Aˬ dui-ahˇ bi ̭-eu g’aˇ duˬ Miˬyehˇ dawˬ kawˬ za-euˬ g’aˬ k’aw ̭, aˬ yaw ̭ meh. ³⁹ "Ehˇ k’aw ̭, aˬ dui-euˬ aˬ poeˬ aˬ bawˇ deuˬ aˬ yaw ̭-euˬ ehˇ dawˬ maˬ naˇ haˬ ni, aˬ yaw ̭-ahˇ dehˬ dzeh-awˇ, Iˇjiˇtuˆ miˇ k’ahˬ-ahˇ g’o ̭-iˇ maw ̭-eu nui ma ahˇ-eu meh. ⁴⁰ K’oeˇ miˇ neh, ’Nga ma ̭-ahˇ mehˬ hu paw bi sheuˬ g’eh-eu g’aˇ duˬ, Miˬyehˇ tiˬ deuˬ tehˆ nehˬ la ̭-awˬ. Nga ma ̭-ahˇ Iˇjiˇtuˆ miˇ k’ahˬ la ̭ k’oeˇ neh sheuˬ doˆ nehˬ la ̭-euˬ Moˇseˬ k’oeˇ g’aˬ aˬ jeˬ g’eh-euˬ maˬ siˬ miˇ-a’ lehˇ, Aˬloˬ-ahˇ aˬ yaw ̭ ma ̭ ehˇ nehˬ-euˬ meh. ⁴¹ K’oeˇ ngeh, mawˇ neˇ mawˇ gaw mawˇ kawˇ tiˬ kawˇ aˬ yaw ̭ ma ̭ tehˆ-awˇ, lawˇ-eu shehˇ-eu jeˬ mˇ-awˇ, aˬ yaw ̭ ma ̭ neh tehˆ-euˬ mawˇ kawˇ k’oeˇ-ahˇ taˬ huiˬ-eu bawˬ-iˬ g’eh-euˬ meh. ⁴² K’oeˇ miˇ neh, Miˬyehˇ neh aˬ yaw ̭ ma ̭-ahˇ byehˇ dzeh nehˬ-awˇ, mˬ k’oeˇ taˆ jaˆ-eu nahˇ ma, ba la, aˬ guiˇ deuˬ-ahˇ uˬ duˬ tahˬ-eu tsawˇ haˬ deuˬ bi pyeu ̭ laˇ-euˬ meh. Miˬyehˇ g’aˇ duˬ ngehˬ dah-eu deuˬ-euˬ sahˬ bo ̭ la ̭ k’oeˇ, heu lo ̭-ehˇ bo ̭ taˬ-euˬ meh. ’Iˇsaˬleˬlaˆ tsawˇ haˬ deuˬ-oˇ, bawˇ tsahˬ bawˇ dahˇ k’aˇ shui ̭ deh-ahˇ, oeˬ tseˇ k’o ̭ oeˬ tseˇ myaˇ byah ni, naw ma ̭ jeˬ zaˬ seh ̭-awˇ lawˇ-euˬ, ngaˬ-ahˇ lawˇ-euˬ maˬ ngeuˇ-a de. ⁴³ Mawˇleh miˬ yehˇ sehˬ g’awˆ hawˇ-eu, aˬ guiˇ miˬ yehˇ Leˬpaˬ mawˇ kawˇ, naw ma ̭ ba ̭ ba ̭-ehˇ cah-euˬ meh. Tahˬ pahˬ aˬ ma k’oeˇ deuˬ tehˆ-awˇ, naw ma ̭ uˬ duˬ tahˬ-euˬ miˇ neh, Baˬbuˇloˬ miˇ k’ahˬ nya baˬ-ahˇ, naw ma ̭-ahˇ bi pa ̭ byoˆ g’eh ma.’ ⁴⁴ "Aˬ dui-euˬ aˬ poeˬ aˬ bawˇ deuˬ, bawˇ tsahˬ bawˇ dahˇ-ahˇ Dawˬ ma saˇ jaˇ Sehˬ g’awˆ jaˆ-euˬ meh. Miˬyehˇ neh Moˇseˬ-ahˇ ehˇ nehˬ-awˇ bi tsoˆ-euˬ lo ̭-ehˇ, Moˇseˬ neh ya mawˇ-euˬ hmˬ-ahˇ duˇ leˇ ni tsoˆ-euˬ meh. ⁴⁵ Aˬ dui ma ̭-euˬ aˬ poeˬ aˬ bawˇ k’oeˇ deuˬ, aˬ yaw ̭ ma ̭-euˬ aˬ da deuˬ-euˬ la ̭-ahˇ neh sehˬ g’awˆ k’oeˇ hmˬ za-awˇ, aˬ yaw ̭ ma ̭ mehˬ hu paw le g’eh le ̭-eu nehˬ-ehˇ Miˬyehˇ neh bi teh doˆ-euˬ tsawˇ jeuˬ deuˬ-euˬ miˇ k’ahˬ yuˇ geu ̭-eu lehˇ Yawˇshuˆ nehˬ-ehˇ aˬ yaw ̭ ma ̭ le ngeh jawˇ, sehˬ g’awˆ k’oeˇ g’awˆ ba ̭ g’eh-euˬ meh. K’oeˇ naˇ, sehˬ g’awˆ k’oeˇ Daˬbiˇ-euˬ ziˇ-ahˇ keuˆ ni k’oeˇ gaˇ jaˆ-euˬ meh. ⁴⁶ Daˬbiˇ-aˬ, Miˬyehˇ nui ma tsaˬ-eu tsawˇ haˬ tiˬ g’aˬ pyeu ̭-awˇ, Yaˬkoˆ-euˬ Miˬyehˇ bi jawˇ-eu g’aˇ duˬ aˬ yaw ̭ jawˇ duˬ tiˬ tsahˇ tsoˆ-eu aˬ kawˬ-aˬ bi ̭ la ̭ lehˇ, Miˬyehˇ-ahˇ shaˇ-euˬ meh. ⁴⁷ Ehˇ k’aw ̭, Miˬyehˇ g’aˇ duˬ nymˇ tsoˆ-euˬ g’aˬ-aˬ, Sawˇlaˬmoˬ meh. ⁴⁸ "Ehˇ k’aw ̭, Dawˬ tawˆ k’oeˇ taˆ Huiˬ-eu Sahˬpaˬ Miˬyehˇ-aˬ, tsawˇ haˬ zaˬ-euˬ aˬ la ̭ neh tsoˆ-euˬ nymˇ-ahˇ jawˇ-eu maˬ ngeuˇ-a lehˇ, Miˬyehˇ g’aˇ duˬ ngeh dah-eu tsawˇ haˬ neh ehˇ taˬ-euˬ heu lo ̭-ehˇ jaˆ-eu meh. ⁴⁹ ’Mˬ maˬ ngaˬ-euˬ dzoeˬ dzaˬ nuiˇ mahˬ, miˇ maˬ ngaˬ-euˬ kuiˇ nawˬ k’awˬ boˆ, Naw ma ̭ ngaˇ paˇ bi jawˇ-eu lehˇ, nymˇ aˬ joˆ-ehˇ tsoˆ-eu g’eh te. Ngaˇ jawˇ naˬ mˇ nya-eu jawˇ duˬ, nui gaˇ aˬ geu tsahˇ paˇ jaˆ ta. ⁵⁰ Mˬ ga miˇ nawˬ dawˬ tawˆ lu ̭-ahˇ, ngaˬ neh beh-euˬ maˬ ngeuˇ ta loˇ.’ ⁵¹ Naw ma ̭ nui ma aˇ naˆ naˆ-ehˇ g’ahˇ te. Naˬ bawˇ aˇ naˆ naˆ-ehˇ tuˇ te. Miˬyehˇ-ahˇ maˬ siˬ nya-eu tsawˇ haˬ deuˬ lo ̭-ehˇ aˇ naˆ naˆ-ehˇ dzawˬ te. Naw ma ̭-aˬ, naw ma ̭-euˬ aˬ poeˬ aˬ bawˇ deuˬ-ahˇ duˇ-awˇ, Muiˬ-eu shawˇ-eu Yaw sahˇ Miˬyehˇ-euˬ dawˬ-ahˇ tiˬ jawˇ-iˬ maˬ naˇ haˬ geu ̭-a. ⁵² Naw ma ̭-euˬ aˬ poeˬ aˬ bawˇ deuˬ neh maˬ bi k’ehˬ maˬ bi k’aˆ haw-euˬ Miˬyehˇ g’aˇ duˬ ngehˬ dah-eu tsawˇ haˬ tiˬ g’aˬ-iˬ maˬ jawˇ-a. Miˬyehˇ-euˬ tsaˬ-eu dawˇ-eu Zaˬk’aˆ oe teh ̭-a lehˇ aˇ hu ngehˬ dah-euˬ deuˬ-ahˇ aˬ yaw ̭ ma ̭ seh ̭-euˬ meh. Nymˬ-mˇ poˆ jawˇ-aˬ, naw ma ̭ yaw tsaˬ yaw dawˇ k’oeˇ g’aˬ-ahˇ aˬ cawˬ-euˬ aˬ la ̭ la ̭ k’oeˇ a nehˬ-awˇ seh ̭-euˬ meh. ⁵³ Mˬ taˆ g’aˬ k’ehˇ neh bi ̭ le-euˬ Miˬyehˇ-euˬ zahˇ dawˬ k’o ̭ dawˬ-ahˇ za-euˬ tsawˇ haˬ deuˬ-aˬ, naw ma ̭ meh. Ehˇ k’aw ̭, zahˇ dawˬ k’o ̭ dawˬ k’oeˇ-ahˇ naw ma ̭ maˬ naˇ haˬ geu ̭-a." ⁵⁴ Saˬteˬpaˬ k’oeˇ lo ̭-ehˇ ehˇ gaˇ ya gaˬ ngeh, Bah ̭dzah la ̭ k’oeˇ uˇ-eu tsawˇ haˬ deuˬ aˬ yaw ̭-ahˇ nui ma pehˇ dui dui laˇ-awˇ, seuˬ teu ̭-eu meh. ⁵⁵ Ehˇ k’aw ̭, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu Saˬteˬpaˬ-aˬ, mˬ-ahˇ g’awˇ leuˇ haw ngeh, Miˬyehˇ-euˬ yaw sheh ̭ k’ahˬ sehˇ-ahˇ maˬ ehˇ, Miˬyehˇ-euˬ aˇ maˇ paw Yeˬsuˇ yaw ̭ lu ̭ gaˇ maˬ ehˇ, ya mawˇ-euˬ meh. ⁵⁶ "Haw sheˇ. Mˬ pah taˬ-awˇ, Tsawˇhaˬ-euˬ Zaˬmaˇ k’oeˇ g’aˬ Miˬyehˇ-euˬ aˇ maˇ paw yaw ̭ lu ̭-eu mawˇ laˇ ngaˇ" lehˇ aˬ yaw ̭ ehˇ-eu meh. ⁵⁷ K’oeˇ ngeh, tsawˇ haˬ k’oeˇ deuˬ guˇ k’aˆ le ̭-awˇ, naˬ bawˇ dehˬ tsoeˬ-awˇ Saˬteˬpaˬ jawˇ gaˇ coeˬ g’eh-euˬ meh. ⁵⁸ K’oeˇ naˇ, aˬ yaw ̭-ahˇ meuˬ la ̭ nyiˇ biˬ doˆ-awˇ, k’aˬ lo neh biˬ-euˬ meh. Saˇ kiˇ geu ̭-awˇ haw le-euˬ tsawˇ haˬ deuˬ-aˬ, aˬ yaw ̭ ma ̭-euˬ pehˇ k’ahˬ lehˆ taˬ ya ̭-awˇ, Sawˇluˆ lehˇ kuˇ-eu zaˬ guˬ tiˬ g’aˬ neh bi haw ya ̭-euˬ meh. ⁵⁹ Aˬ yaw ̭ ma ̭ Saˬteˬpaˬ-ahˇ k’aˬ lo biˬ dui dui lu ̭ ngeh, "Sahˬpaˬ Yeˬsuˇ-oˇ, ngaˬ-euˬ sa ̭ laˇ-ahˇ ha geu ̭ nehˬ la ̭-awˬ" lehˇ, Saˬteˬpaˬ guiˬ lahˬ shaˇ-euˬ meh. ⁶⁰ Aˬ yaw ̭ pawˬ tsui ̭ pawˬ dmˬ ga dmˬ-awˇ, "Sahˬpaˬ-oˇ, aˬ yaw ̭ ma ̭ neh mˇ-euˬ yaw lehˬ heu, aˬ yaw ̭ ma ̭-ahˇ iˬ baˇ taˬ taˬ nehˬ." lehˇ ehˇ-eu meh. Aˬ yaw ̭ k’oeˇ lo ̭-ehˇ ehˇ g’aˬ-awˇ shiˇ tsehˆ-euˬ meh.

¹ Aˬ yaw ̭-ahˇ k’oeˇ lo ̭-ehˇ seh ̭ gaˇ, Sawˇluˆ k’aw ̭ nui ma tsaˬ-euˬ meh. K’oeˇ ngeh nah, Yeˬluˇsaˬlehˬ meuˬ-ahˇ jawˇ-eu Ka li zaˬ aˇ muˇ, k’ehˬ-eu k’aˆ-eu jeˬ-ahˇ yaw k’aˆ-ehˇ ya daˬ-euˬ meh. G’aˬ k’ehˇ deuˬ maˬ ngeuˇ naˇ, jah-eu tsawˇ haˬ dawˬ tawˆ lu ̭ Yuˇdaˆ miˇ k’ahˬ hawˇ-eu Saˬmaˬliˆ miˇ k’ahˬ doe ni cehˆ byaˆ jiˇ-euˬ meh. ² Miˬyehˇ-ahˇ jah-eu g’aˬ k’aˆ-eu deuˬ Saˬteˬpaˬ-ahˇ duˬ pahˬ-iˇ-awˇ, tsawˇ ngoeˇ yaw k’aˆ-ehˇ ngoeˇ-euˬ meh. ³ Ehˇ k’aw ̭, Sawˇluˆ-aˬ, Ka li zaˬ aˇ muˇ-ahˇ laˆ byoˆ-eu lehˇ leh jeh-euˬ meh. Aˬ yaw ̭ tiˬ nymˇ saˇ-iˬ tiˬ nymˇ iˇ iˇ-ehˇ, jah-eu tsawˇ haˬ k’aˇ ngeuˇ-eu deuˬ-ahˇ, k’aˬ dzeˇ zaˬ maˬ ehˇ, zaˬ miˬ zaˬ maˬ ehˇ, nyeh ̭-awˇ tawˬ-ahˇ dawˆ-euˬ meh. ⁴ Cehˆ byaˆ taˬ-euˬ jah-eu tsawˇ haˬ k’oeˇ deuˬ, yawˬ gaˇ na lu ̭ guiˬ lahˬ dawˬ mehˬ mehˬ-ehˇ cah-euˬ meh. ⁵ Piˇliˇpuˆ k’aw ̭, Saˬmaˬliˆ miˇ k’ahˬ meuˬ tiˬ meuˬ-ahˇ le-awˇ, k’oeˇ gaˇ jawˇ-eu tsawˇ haˬ deuˬ-ahˇ Ka li gaˇ kawˆ dawˬ mehˬ mehˬ-euˬ meh. ⁶ Piˇliˇpuˆ dawˬ mehˬ mehˬ gaˇ ya gaˬ-awˇ zahˬ leˇ paˬ-ehˇ g’eh-eu jeˬ mˇ mehˬ gaˇ ya mawˇ ngeh, tsawˇ haˬ aˇ ma ̭ deuˬ aˬ yaw ̭ dawˬ mehˬ mehˬ gaˇ nui ma keuˆ-awˇ, yaw muiˬ paˬ-ehˇ naˇ haˬ-euˬ meh. ⁷ Tsawˇ haˬ g’awˬ mya g’aˬ la ̭ k’oeˇ uˇ-eu neh ̭ yaw jaw ̭ deuˬ guˇ guˇ-ehˇ doˆ-iˇ-awˇ, kuiˇ shiˇ la ̭ shiˇ shiˇ-eu tsawˇ haˬ g’awˬ mya ni taˬ leˇ-euˬ meh. ⁸ K’oeˇ miˇ neh, meuˬ k’oeˇ meuˬ la ̭ k’oeˇ jawˇ-eu tsawˇ haˬ deuˬ laˬ k’aˬ cehˇ dui dui-eu meh. ⁹ Siˇmoˬ lehˇ myahˇ-euˬ tsawˇ haˬ tiˬ g’aˬ k’oeˇ gaˇ jawˇ-eu meh. Aˬ yaw ̭ mah loˬ loˬ mehˬ nehˬ-awˇ, k’oeˇ gaˇ jawˇ-eu tsawˇ haˬ deuˬ-ahˇ laˆ zahˬ nehˬ-euˬ aˇ yamˬ ui cuiˆ myahˇ laˇ-euˬ meh. Aˬ yaw ̭-aˬ, huiˬ-eu tsawˇ haˬ tiˬ g’aˬ ma lehˇ yawˬ haˇ yawˬ ha ehˇ-eu meh. ¹⁰ Meuˬ la ̭ k’oeˇ k’aˇ jawˇ-eu huiˬ zaˬ nyiˇ zaˬ dawˬ tawˆ lu ̭, "Tsawˇ haˬ heu g’aˬ-aˬ, ’Huiˬ dui dui-eu Baoˬ’ lehˇ kuˇ-eu Miˬyehˇ k’oeˇ g’aˬ-euˬ baoˬ pyeu ̭-eu ngaˇ" lehˇ ehˇ-awˇ, aˬ yaw ̭-euˬ ehˇ dawˬ naˇ haˬ-euˬ meh. ¹¹ Aˬ yaw ̭ mah loˬ loˬ-eu la ̭ k’oeˇ, aˬ yaw ̭ ma ̭-ahˇ bi zahˬ leˇ-euˬ myahˇ laˇ-euˬ miˇ neh, aˬ yaw ̭-euˬ ehˇ dawˬ-ahˇ naˇ haˬ-euˬ meh. ¹² Ehˇ k’aw ̭, Miˬyehˇ Miˇk’ahˬ gaˇ kawˆ hawˇ-eu Yeˬsuˇ Ka li gaˇ kawˆ Laˬ k’aˬ cehˇ-eu Guiˬ lahˬ dawˬ-ahˇ Piˇliˇpuˆ mehˬ gaˇ aˬ yaw ̭ ma ̭ jah laˇ-awˇ, k’aˬ dzeˇ zaˬ maˬ ehˇ, zaˬ miˬ zaˬ maˬ ehˇ, iˇ cu ̭ shawˇ-euˬ meh. ¹³ Siˇmoˬ k’oeˇ g’aˬ k’aw ̭ jah laˇ-awˇ, iˇ cu ̭ shawˇ-awˇ Piˇliˇpuˆ-ahˇ maˬ g’awˬ-iˇ ni jawˇ-euˬ meh. K’aˆ jeˬ-ehˇ g’eh-eu jeˬ hawˇ-eu zahˬ leˇpaˬ-ehˇ g’eh-eu jeˬ mˇ gaˇ aˬ yaw ̭ ya mawˇ ngeh, zahˬ dui dui leˇ-euˬ meh. ¹⁴ Saˬmaˬliˆ miˇ k’ahˬ-ahˇ jawˇ-eu tsawˇ haˬ deuˬ Miˬyehˇ dawˬ kawˬ-ahˇ ha geu ̭-euˬ gaˇ kawˆ, Yeˬluˇsaˬlehˬ meuˬ-ahˇ jawˇ-eu g’aˬ k’ehˇ deuˬ ya gaˬ ngeh, Beˬtuˆluˆ hawˇ-eu Yoˇhaˬ-ahˇ k’oeˇ gaˇ bi le-euˬ meh. ¹⁵ Aˬ yaw ̭ nya ̭ le keuˆ ngeh, jah-eu tsawˇ haˬ k’oeˇ deuˬ Muiˬ-eu shawˇ-eu Yaw sahˇ Miˬyehˇ za ni guiˬ lahˬ shaˇ nehˬ-euˬ meh. ¹⁶ Aˬ jeˬ miˇ neh ehˇ naˇ, aˬ yaw ̭ ma ̭ k’oeˇ taˆ Muiˬ-eu shawˇ-eu Yaw sahˇ Miˬyehˇ maˬ za ̭ le dah-ehˇ, Sahˬpaˬ Yeˬsuˇ-euˬ tsawˇ myahˇ uˬ moˆ iˇ cu ̭ shawˇ-awˇ jawˇ tawˬ lu ̭-eu meh. ¹⁷ Beˬtuˆluˆ hawˇ-eu Yoˇhaˬ aˬ nya ̭ aˬ yaw ̭ ma ̭ k’oeˇ taˆ aˬ la ̭ ba ̭ daˆ ngeh, aˬ yaw ̭ ma ̭ Muiˬ-eu shawˇ-eu Yaw sahˇ Miˬyehˇ za-euˬ meh. ¹⁸ Jah-eu tsawˇ haˬ deuˬ k’oeˇ taˆ g’aˬ k’ehˇ k’oeˇ nyiˬ g’aˬ aˬ la ̭ ba ̭ daˆ nehˬ ngeh, Yaw sahˇ Miˬyehˇ za gaˇ Siˇmoˬ ya mawˇ-euˬ meh. K’oeˇ ngeh, Beˬtuˆluˆ hawˇ-eu Yoˇhaˬ aˬ nya ̭-ahˇ aˬ yaw ̭ pyuˇ naˇ haˬ bi ̭-awˇ heu lo ̭-ehˇ ehˇ-eu meh. ¹⁹ "Ngaˬ neh aˬ la ̭ k’aˇ ba ̭ daˆ nehˬ-euˬ tsawˇ haˬ deuˬ Muiˬ-eu shawˇ-eu Yaw sahˇ Miˬyehˇ za nya ni, ngaˬ-ahˇ k’aw ̭ baoˬ teu jeˬ bi ̭ nehˬ la ̭ sheˇ." ²⁰ Ehˇ k’aw ̭, aˬ yaw ̭-ahˇ Beˬtuˆluˆ heu lo ̭-ehˇ ehˇ k’o ̭ nehˬ-euˬ meh. "Miˬyehˇ neh bi ̭-euˬ la ̭ sawˬ-ahˇ pyuˇ neh zeuˇ tsehˆ nya meh lehˇ nawˇ noeˬ-eu miˇ neh, nawˇ hawˇ-eu nawˬ-euˬ pyuˇ, shiˬ buiˇ lah ma-ahˇ ga pu ̭-iˇ lu ̭-uˇ. ²¹ Miˬyehˇ-euˬ mehˬ shi nawˬ-euˬ nui ma maˬ dawˇ-eu miˇ neh, nga ma ̭ neh mˇ-euˬ gaˇ heu-ahˇ nawˇ maˬ ta ̭ laˇ nya-a. ²² Haiˬ dui dui-eu nawˬ-euˬ nui noeˬ teu hmˬ noeˬ paˇ-awˬ. K’oeˇ lo ̭-ehˇ noeˬ-eu jeˬ-ahˇ iˬ baˇ pyehˬ nehˬ la ̭ ni, SahˬpaˬMiˬyehˇ-ahˇ guiˬ lahˬ shaˇ-awˬ. ²³ Aˬ jeˬ miˇ neh lehˇ ehˇ naˇ, k’aˬ jaw ̭ ni g’eh-eu myaˆ naˆ-eu jeˬ nawˬ-euˬ la ̭ k’oeˇ tiˬ byah ni ahˇ-awˇ, iˬ baˇ neh nawˬ-ahˇ pa ̭ taw ̭ taˬ-euˬ ngaˇ mawˇ lu ̭ ma." ²⁴ Beˬtuˆluˆ hawˇ-eu Yoˇhaˬ aˬ nya ̭-ahˇ Siˇmoˬ ehˇ nehˬ-eu, "Naw nya ̭ neh k’aˇ ehˇ-euˬ jeˬ, ngaˬ-euˬ k’oeˇ taˆ tiˬ jeˬ-iˬ maˬ bi keuˆ le-eu g’aˇ duˬ, Sahˬpaˬ Miˬyehˇ-ahˇ guiˬ lahˬ shaˇ nehˬ la ̭-awˬ." ²⁵ Beˬtuˆluˆ hawˇ-eu Yoˇhaˬ aˬ nya ̭-aˬ, saˇ kiˇ kamˬ-eu jeˬ mˇ g’aˬ-awˇ, Sahˬpaˬ Miˬyehˇ-euˬ dawˬ mehˬ nehˬ g’aˬ ngeh, Yeˬluˇsaˬlehˬ meuˬ-ahˇ g’o ̭-iˇ-euˬ meh. Gaˇ pehˇ g’o ̭-iˇ lu ̭ ngeh, Saˬmaˬliˆ miˇ k’ahˬ la ̭ k’oeˇ jaˆ-eu pu g’awˬ mya pu-ahˇ, Laˬ k’aˬ cehˇ-eu Guiˬ lahˬ dawˬ mehˬ nehˬ ya ̭-euˬ meh. ²⁶ SahˬpaˬMiˬyehˇ-euˬ mˬ taˆ g’aˬ k’ehˇ tiˬ g’aˬ Piˇliˇpuˆ-ahˇ ehˇ-eu, "Lehˬ hmˬ-awˇ, la ̭ oˆ paw pyawˬ-ahˇ jaˆ-eu Yeˬluˇsaˬlehˬ meuˬ-ahˇ neh Gaˬzaˬ meuˬ-ahˇ iˇ-eu gaˇ ma k’oeˇ kahˇ-ahˇ iˇ-awˬ." (Gaˇ ma k’oeˇ kahˇ nymˬ-mˇ maˬ paˇ cah ni byehˇ-euˬ meh.) ²⁷ K’oeˇ ngeh, Piˇliˇpuˆ lehˬ hmˬ dah-awˇ iˇ-euˬ meh. Iˬdiˬyoˇbyaˇ sahˬ paˬ ma-euˬ pyuˇ shuiˇ myawˬ gahˬ deuˬ-ahˇ jeˬ hmˬ bo saˆ-eu yaw huiˬ yaw mahˇ tiˬ g’aˬ, Yeˬluˇsaˬlehˬ meuˬ-ahˇ uˬ duˬ tahˬ leˇ-euˬ g’o ̭ le lu ̭-eu meh. ²⁸ Aˬ yaw ̭-aˬ, mahˬ laˆ lawˬ-ahˇ dziˬ-awˇ, Miˬyehˇ g’aˇ duˬ ngehˬ dah-eu Iˇsaˬyaˇ neh bo ̭ taˬ-euˬ sahˬ bo ̭ gui gui-ehˇ g’o ̭ le lu ̭-eu meh. ²⁹ "Mahˬ laˆ lawˬ k’oeˇ laˇ-euˬ dawˬ peh tehˬ ni iˇ-awˬ" lehˇ, Muiˬ-eu shawˇ-eu Yaw sahˇ Miˬyehˇ Piˇliˇpuˆ-ahˇ ehˇ nehˬ-euˬ meh. ³⁰ Piˇliˇpuˆ cehˆ keuˆ g’eh ngeh, yaw huiˬ yaw mahˇ k’oeˇ g’aˬ Miˬyehˇ g’aˇ duˬ ngehˬ dah-eu Iˇsaˬyaˇ neh bo ̭ taˬ-euˬ sahˬ bo ̭-ahˇ gui lu ̭ gaˇ ya gaˬ-awˇ, "Nawˇ gui lu ̭-eu gaˇ kawˆ teu g’oˆ shaw laˇ miˇ-a loˇ" lehˇ naˇ haˬ-euˬ meh. ³¹ Yaw huiˬ yaw mahˇ k’oeˇ g’aˬ ehˇ-eu, "Dawˬ tsui ̭ ehˇ mehˬ nehˬ la ̭-eu g’aˬ maˬ jawˇ gaˇ, ngaˇ aˬ joˆ-ehˇ jahˇ-awˇ g’oˆ shaw nya nmˇ." k’oeˇ naˇ, Piˇliˇpuˆ-ahˇ mahˬ laˆ lawˬ k’oeˇ taˆ kuˇ daˆ-awˇ, aˬ yaw ̭ nehˬ-ehˇ bi dziˬ-euˬ meh. ³² Aˬ yaw ̭ gui lu ̭-eu Jaˇli ̭ aˇ deuˆ k’oeˇ deuˆ-aˬ, heu lo ̭-ehˇ meh. "Diˬ seh ̭-eu lehˇ bi tsahˇ g’eh-euˬ, yawˇ-ahˇ aˬ yaw ̭ duˇ leˇ-eu meh. Ca ̭ hm bi tehˬ lu ̭-eu yawˇ zaˬ, ciˬ cuˇ ni awˆ daˬ-eu lo ̭-ehˇ, aˬ yaw ̭ dawˬ maˬ ngehˬ doˆ laˇ-a. ³³ Yaw tsaˬ yaw dawˇ jeˬ maˬ geu ̭ ni, aˬ yaw ̭ sha ̭ dawˇ ni jahˇ-euˬ meh. A ̭ yaw ̭ miˇ k’oeˇ taˆ ya deh ̭-eu, aˇ nah aˇ yamˬ li-iˇ jiˇ-awˇ, tsui ̭ dahˬ dahˬ shaw-euˬ baˬ da neh, tsui ̭ toeˬ maˬ paˇ gui ka nya meh." ³⁴ Yaw huiˬ yaw mahˇ k’oeˇ g’aˬ Piˇliˇpuˆ-ahˇ naˇ haˬ-eu, "Miˬyehˇ g’aˇ duˬ ngehˬ dah-eu heu g’aˬ aˬ suˇ g’aˬ-euˬ gaˇ kawˆ ehˇ-eu nga. Aˬ yaw ̭-euˬ gaˇ kawˆ ehˇ-euˬ nga loˇ. Aˬ cawˬ-euˬ gaˇ kawˆ ehˇ-euˬ nga loˇ. Ngaˬ-ahˇ tiˬ poˆ ehˇ nehˬ la ̭ sheˇ." ³⁵ K’oeˇ ngeh, Piˇliˇpuˆ-aˬ, Jaˇli ̭ k’oeˇ deuˆ-ahˇ neh aˇ dahˬ beh-awˇ, Yeˬsuˇ gaˇ kawˆ Laˬ k’aˬ cehˇ-eu Guiˬ lahˬ dawˬ ja mehˬ-euˬ meh. ³⁶ Aˬ yaw ̭ nya ̭ gaˇ ma kahˇ li iˇ g’eh-awˇ, iˇ cu ̭ jaˆ-eu jawˇ duˬ tiˬ tsahˇ-ahˇ iˇ keuˆ ngeh, yaw huiˬ yaw mahˇ k’oeˇ g’aˬ ehˇ-eu, "Heu gaˇ iˇ cu ̭ jaˆ ngaˇ. Ngaˇ iˇ cu ̭ shawˇ gaˇ aˬ jeˬ laˆ tsoeˬ-eu jaˆ ta." ³⁸ Mahˬ laˆ lawˬ bi naˬ leˇ-eu g’aˇ duˬ, yaw huiˬ yaw mahˇ k’oeˇ g’aˬ dawˬ bi ̭-awˇ, Piˇliˇpuˆ aˬ yaw ̭ nya ̭ iˇ cu ̭-ahˇ uˇ-iˇ-awˇ, Piˇliˇpuˆ neh iˇ cu ̭ shawˇ nehˬ-euˬ meh. ³⁹ Aˬ yaw ̭ nya ̭ iˇ cu ̭ la ̭ k’oeˇ neh doˆ laˇ ngeh, Sahˬpaˬ Miˬyehˇ-euˬ Yaw sahˇ neh Piˇliˇpuˆ-ahˇ ciˬ k’o ̭ g’eh-euˬ meh. Yaw huiˬ yaw mahˇ k’oeˇ g’aˬ Piˇliˇpuˆ-ahˇ maˬ paˇ ya mawˇ-euˬ k’aw ̭, laˬ k’aˬ cehˇ dui dui-eu la ̭ k’oeˇ g’o ̭-iˇ-euˬ meh. ⁴⁰ Piˇliˇpuˆ-aˬ, Aˬzoˇtuˆ meuˬ-ahˇ bi ciˬ k’o ̭ keuˆ g’eh-euˬ meh. K’oeˇ naˇ, Geˇsaˬliˇ miˇ k’ahˬ-ahˇ aˬ yaw ̭ le-euˬ meh. Gaˇ pehˇ k’aˇ jaˆ-eu meuˬ yawˬ meuˬ na lu ̭-ahˇ aˬ yaw ̭ Laˬ k’aˬ cehˇ-eu Guiˬ lahˬ dawˬ mehˬ-euˬ meh.

¹ K’oeˇ ngeh, Sawˇluˆ-aˬ, Sahˬpaˬ Yeˬsuˇ-euˬ mehˬ nah k’aˇ caw teh-eu tsawˇ haˬ deuˬ-ahˇ seh ̭ ma lehˇ lmˬ lmˬ-ehˇ k’aˬ-euˬ meh. Piˇ ma Yaw huiˬ g’aˬ jawˇ gaˇ aˬ yaw ̭ le-awˇ, ² Daˬmaˬsehˇ meuˬ-ahˇ jaˆ-eu Yuˇdaˆ tsawˇ haˬ-euˬ uˬ duˬ tahˬ nymˇ deuˬ-ahˇ sahˬ bo ̭ bi bo ̭ nehˬ-eu g’aˇ duˬ shaˇ leˇ-euˬ meh. Sahˬpaˬ Yeˬsuˇ-euˬ Gaˇma -ahˇ cah-eu deuˬ-ahˇ k’oeˇ gaˇ ya mawˇ lawˬ naˇ, k’aˬ dzeˇ zaˬ maˬ ehˇ, zaˬ miˬ zaˬ maˬ ehˇ, Yeˬluˇsaˬlehˬ meuˬ-ahˇ nyeh ̭ ka le ̭ nya ni sahˬ bo ̭ bi bo ̭ nehˬ-eu lehˇ shaˇ leˇ-euˬ meh. ³ Aˬ yaw ̭ Daˬmaˬsehˇ meuˬ dawˬ peh le keuˆ ngeh, ja pyuˬ ni mˬ k’oeˇ taˆ neh aˬ yaw ̭-euˬ tiˬ jawˬ yaw sheh ̭ bya le-euˬ meh. ⁴ Aˬ yaw ̭ miˇ tsa coˬ dzeh-awˇ, heu lo ̭-ehˇ ehˇ-eu teˇ saˇ-ahˇ ya gaˬ-euˬ meh. "Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ k’ehˬ te." ⁵ Aˬ yaw ̭ ehˇ-eu, "Sahˬpaˬ-oˇ, nawˇ aˬ suˇ g’aˬ te." ⁶ Teˇ saˇ k’oeˇ saˇ aˬ yaw ̭-ahˇ ehˇ-eu, "Ngaˇ-aˬ, nawˇ k’ehˬ lu ̭-eu Yeˬsuˇ ma. Tuˇ-awˇ meuˬ-ahˇ le uˇ-awˬ. Nawˇ aˬ joˆ-ehˇ ya jahˇ-eu gaˇ kawˆ k’oeˇ gaˇ ehˇ nehˬ la ̭ teh ̭-a." ⁷ Sawˇluˆ nehˬ-ehˇ le lu ̭-eu tsawˇ haˬ k’oeˇ deuˬ, dawˬ maˬ ngehˬ ni tsoˆ leˇ jiˇ-euˬ meh. Aˬ yaw ̭ ma ̭ teˇ saˇ ya gaˬ-euˬ k’aw ̭, tsawˇ haˬ maˬ ya mawˇ-a. ⁸ Sawˇluˆ miˇ tsa coˬ dzeh-euˬ tuˇ laˇ-awˇ, myaˆ nuiˆ byeh haw-euˬ meh. Ehˇ k’aw ̭, myaˆ nuiˆ maˬ mawˇ nya-a. K’oeˇ miˇ neh, aˬ yaw ̭ ma ̭ aˬ yaw ̭-euˬ aˬ la ̭-ahˇ tsahˇ-awˇ, Daˬmaˬsehˇ meuˬ-ahˇ sheuˬ keuˆ g’eh-euˬ meh. ⁹ Smˬ nah keuˆ ni aˬ yaw ̭ myaˆ nuiˆ maˬ mawˇ nya-a. K’oeˇ smˬ nah la ̭ k’oeˇ, aˬ yaw ̭ maˬ dzaˬ maˬ dawˇ ni jawˇ-euˬ meh. ¹⁰ Daˬmaˬsehˇ meuˬ la ̭ k’oeˇ, Aˬnaˬniˇ lehˇ myahˇ-euˬ jah-eu tsawˇ haˬ tiˬ g’aˬ jawˇ-eu meh. Yaw sahˇ la ̭ k’oeˇ bi siˬ bi mawˇ-eu jeˬ la ̭ k’oeˇ, "Aˬnaˬniˇ-oˇ" lehˇ Sahˬpaˬ Yeˬsuˇ kuˇ ngeh, "Sahˬpaˬ-oˇ, ngaˇ heu gaˇ jawˇ ma" lehˇ, Aˬnaˬniˇ oˬ toˬ nehˬ-euˬ meh. ¹¹ Sahˬpaˬ Yeˬsuˇ ehˇ-eu, "Lehˬ hmˬ-awˇ, Gaˇdawˇ lehˇ kuˇ-eu gaˇ ma k’oeˇ kahˇ-ahˇ iˇ-awˇ, Yuˇdaˆ-euˬ nymˇ-ahˇ Daˬsuˆ meuˬ-ahˇ jawˇ-eu Sawˇluˆ lehˇ myahˇ-euˬ tsawˇ haˬ tiˬ g’aˬ maˬ jawˇ nga loˇ lehˇ haw-iˇ-awˬ. Aˬ yaw ̭ guiˬ lahˬ shaˇ shaˇ-ehˇ jawˇ meh. ¹² Aˬnaˬniˇ lehˇ myahˇ-euˬ tsawˇ haˬ tiˬ g’aˬ uˇ le-awˇ, aˬ yaw ̭ k’oeˇ taˆ aˬ la ̭ ba ̭ daˆ-awˇ, aˬ yaw ̭-euˬ myaˆ nuiˆ mawˇ laˇ nya ni guiˬ lahˬ shaˇ nehˬ le-euˬ gaˇ, yaw sahˇ la ̭ k’oeˇ aˬ yaw ̭ ya mawˇ-euˬ meh." ¹³ Aˬnaˬniˇ ehˇ-eu, "Sahˬpaˬ-oˇ, tsawˇ haˬ heu g’aˬ gaˇ kawˆ hawˇ-eu, Yeˬluˇsaˬlehˬ meuˬ-ahˇ jawˇ-eu nawˬ-euˬ tsawˇ haˬ deuˬ-ahˇ aˬ yaw ̭ neh k’ehˬ-euˬ k’aˆ-euˬ gaˇ kawˆ, tsawˇ haˬ g’awˬ mya g’aˬ ngaˬ-ahˇ ja mehˬ la ̭-euˬ meh. ¹⁴ Piˇ ma aˬ yui ̭ deuˬ neh aˬ yaw ̭-ahˇ baoˬ bi ̭ taˬ-euˬ lo ̭-ehˇ, nawˬ-ahˇ uˬ duˬ k’aˇ tahˬ-eu tsawˇ haˬ deuˬ-ahˇ nyeh ̭-eu g’aˇ duˬ, Daˬmaˬsehˇ meuˬ-ahˇ aˬ yaw ̭ laˇ-euˬ meh." ¹⁵ Sahˬpaˬ Yeˬsuˇ ehˇ-eu, "Iˇ-awˬ. Aˬ jeˬ miˇ neh ehˇ naˇ, Yuˇdaˆ tsawˇ haˬ maˬ ngeuˇ-eu deuˬ maˬ ehˇ, miˇ k’ahˬ sahˬ paˬ deuˬ maˬ ehˇ, Iˇsaˬleˬlaˆ tsawˇ haˬ deuˬ maˬ ehˇ, ngaˬ-euˬ tsawˇ myahˇ-ahˇ siˬ nya laˇ ni bi mˇ-eu g’aˇ duˬ, aˬ yaw ̭-ahˇ ngaˇ tseˇ doˆ taˬ-euˬ ma. ¹⁶ Ngaˬ-euˬ tsawˇ myahˇ g’aˇ duˬ k’ehˬ-eu k’aˆ-eu jeˬ-ahˇ aˬ yaw ̭ aˇ naˆ ni ya daˬ paˬ-ehˇ jaˆ-eu gaˇ kawˆ, aˬ yaw ̭-ahˇ ngaˇ bi mawˇ ma." ¹⁷ K’oeˇ naˇ, Aˬnaˬniˇ iˇ-awˇ, nymˇ k’oeˇ nymˇ-ahˇ uˇ-iˇ-awˇ, Sawˇluˆ k’oeˇ taˆ aˬ la ̭ ba ̭ daˆ-awˇ, heu lo ̭-ehˇ ehˇ nehˬ-euˬ meh. "Aˬ nyiˇ Sawˇluˆ-oˇ, nawˇ heu gaˇ laˇ lu ̭ ngeh gaˇ pehˇ-ahˇ nawˬ-ahˇ bi mawˇ le-euˬ Sahˬpaˬ Yeˬsuˇ k’oeˇ g’aˬ ngaˬ-ahˇ nawˇ jawˇ gaˇ k’ehˇ g’eh le ̭-euˬ meh. Nawˇ myaˆ nuiˆ paˇ mawˇ laˇ-awˇ, Muiˬ-eu shawˇ-eu Yaw sahˇ Miˬyehˇ za nya ni, aˬ yaw ̭ ngaˬ-ahˇ k’ehˇ g’eh le ̭-euˬ meh." ¹⁸ K’oeˇ ngeh, ngaˬ shaˬ ngaˬ g’aw lo ̭-ehˇ g’eh-eu jeˬ Sawˇluˆ-euˬ myaˆ nuiˆ-ahˇ neh tiˬ poˆ teh ̭-ehˇ ga doˆ le-awˇ, myaˆ nuiˆ mawˇ laˇ-euˬ meh. Aˬ yaw ̭ tuˇ-awˇ, iˇ cu ̭ shawˇ-euˬ meh. ¹⁹ K’oeˇ naˇ, aˬ yaw ̭ hawˬ dzaˬ-awˇ, g’aˬ k’o ̭ laˇ-euˬ meh. Sawˇluˆ-aˬ, Daˬmaˬsehˇ meuˬ-ahˇ jawˇ-eu jah-eu tsawˇ haˬ deuˬ nehˬ-ehˇ ui cuiˆ yaw myaˬ nah jawˇ-euˬ meh. ²⁰ Aˬ yaw ̭ tiˬ poˆ teh ̭-ehˇ Yuˇdaˆ tsawˇ haˬ-euˬ uˬ duˬ tahˬ nymˇ k’aˇ jaˆ gaˇ le-awˇ, Yeˬsuˇ-aˬ Miˬyehˇ-euˬ Zaˬ maˇ pyeu ̭-eu gaˇ kawˆ dawˬ mehˬ mehˬ-euˬ meh. ²¹ Aˬ yaw ̭ dawˬ mehˬ mehˬ gaˇ k’aˇ ya gaˬ-euˬ tsawˇ haˬ dawˬ tawˆ lu ̭ zahˬ leˇ-awˇ ehˇ-eu, "Tsawˇ haˬ teu g’aˬ Yeˬluˇsaˬlehˬ meuˬ la ̭ k’oeˇ Yeˬsuˇ lehˇ kuˇ-eu g’aˬ-ahˇ uˬ duˬ tahˬ-eu tsawˇ haˬ deuˬ-ahˇ seh ̭-euˬ k’oeˇ g’aˬ maˬ ngeuˇ nga loˇ. Heu gaˇ k’aw ̭ ni, k’oeˇ lo ̭-ehˇ g’eh-eu tsawˇ haˬ deuˬ-ahˇ nyeh ̭-awˇ, piˇ ma aˬ yui ̭ deuˬ jawˇ gaˇ sheuˬ k’o ̭ g’eh-eu lehˇ aˬ yaw ̭ laˇ-euˬ maˬ ngeuˇ-a loˇ." ²² Ehˇ k’aw ̭, Sawˇluˆ dawˬ mehˬ mehˬ-eu baoˬ ahˇ dzehˬ laˇ-awˇ, Yeˬsuˇ-aˬ, Ka li pyeu ̭-eu gaˇ kawˆ aˬ yaw ̭ saˇ kiˇ kamˬ-eu tsaˬ dui byah dui dui-eu miˇ neh, Daˬmaˬsehˇ meuˬ-ahˇ jawˇ-eu Yuˇdaˆ tsawˇ haˬ deuˬ tiˬ jeˬ-iˬ maˬ ehˇ nya-a. ²³ G’awˬ mya nah byah laˇ-awˇ, Sawˇluˆ-ahˇ seh ̭-eu g’aˇ duˬ Yuˇdaˆ tsawˇ haˬ deuˬ bawˬ k’oeˬ-euˬ meh. ²⁴ Ehˇ k’aw ̭, aˬ yaw ̭ ma ̭ k’oeˇ lo ̭-ehˇ bawˬ k’oeˬ-euˬ gaˇ kawˆ Sawˇluˆ ya siˬ-euˬ meh. Aˬ yaw ̭-ahˇ seh ̭-eu g’aˇ duˬ, uˬ ci ̭ nah g’ahˇ maˬ ehˇ meuˬ-euˬ lahˇ k’ehˬ deuˬ-ahˇ aˬ yaw ̭ ma ̭ lo ̭ lu ̭-eu meh. ²⁵ Ehˇ k’aw ̭, aˬ yaw ̭-euˬ mehˬ nah caw teh-eu tsawˇ haˬ deuˬ, uˬ ci ̭ paw aˬ yaw ̭-ahˇ k’aˆ kaˇ-ahˇ bi uˇ-iˇ-awˇ, meuˬ lahˇ k’oeˇ taˆ neh la ̭ nyiˇ paw aˬ za za-ehˇ pyehˬ ka nehˬ-euˬ meh. ²⁶ Sawˇluˆ Yeˬluˇsaˬlehˬ meuˬ-ahˇ g’o ̭-iˇ-awˇ, zaˬ lahˇ deuˬ nehˬ-ehˇ tiˬ kawˆ lo ̭-ehˇ jawˇ-eu lehˇ g’eh-euˬ meh. Ehˇ k’aw ̭, aˬ yaw ̭ zaˬ lahˇ pyeu ̭ laˇ-euˬ gaˇ aˬ yaw ̭ ma ̭ maˬ jah-ehˇ, dawˬ tawˆ lu ̭ aˬ yaw ̭-ahˇ guˆ-eu meh. ²⁷ K’oeˇ ngeh, Baˬnaˬbaˇ oe-awˇ, aˬ yaw ̭-ahˇ g’aˬ k’ehˇ deuˬ jawˇ gaˇ sheuˬ g’eh-euˬ meh. Sawˇluˆ gaˇ pehˇ-ahˇ Sahˬpaˬ Yeˬsuˇ-ahˇ aˬ joˆ-ehˇ ya tahˬ puˬ-awˇ, Sahˬpaˬ Yeˬsuˇ aˬ yaw ̭-ahˇ aˬ joˆ-ehˇ dawˬ ngehˬ cawˬ nehˬ-euˬ gaˇ kawˆ, Baˬnaˬbaˇ neh aˬ yaw ̭ ma ̭-ahˇ dzawˇ nehˬ-euˬ meh. Daˬmaˬsehˇ meuˬ la ̭ k’oeˇ, Yeˬsuˇ-euˬ tsawˇ myahˇ uˬ moˆ Sawˇluˆ k’aˬ duˬ ni dawˬ mehˬ mehˬ-euˬ gaˇ kawˆ k’aw ̭, aˬ yaw ̭ dzawˇ nehˬ-euˬ meh. ²⁸ K’oeˇ ngeh jawˇ, Sawˇluˆ aˬ yaw ̭ ma ̭ nehˬ-ehˇ ya jawˇ-awˇ, Yeˬluˇsaˬlehˬ meuˬ doe ni aˬ yaw ̭ ma ̭ nehˬ-ehˇ cah cah-ehˇ Sahˬpaˬ Yeˬsuˇ-euˬ tsawˇ myahˇ uˬ moˆ k’aˬ duˬ ni dawˬ mehˬ mehˬ-euˬ meh. ²⁹ Heˬlaˬsaˇ dawˬ ngehˬ-eu Yuˇdaˆ tsawˇ haˬ deuˬ nehˬ-ehˇ k’aw ̭, aˬ yaw ̭ dawˬ ja ja-awˇ tsawˇ pyehˇ pyehˇ-euˬ meh. Ehˇ k’aw ̭, aˬ yaw ̭ ma ̭ aˬ yaw ̭-ahˇ seh ̭-eu lehˇ g’eh-eu meh. ³⁰ Jah-eu tsawˇ haˬ deuˬ gaˇ kawˆ k’oeˇ-ahˇ ya siˬ ngeh, Sawˇluˆ-ahˇ Gehˇsaˬliˇ meuˬ-ahˇ sheuˬ g’eh-awˇ, Daˬsuˆ meuˬ-ahˇ bi g’o ̭ leˇ-euˬ meh. ³¹ K’oeˇ ngeh, Yuˇdaˆ miˇ k’ahˬ, Gaˬliˬlehˇ miˇ k’ahˬ hawˇ-eu, Saˬmaˬliˆ miˇ k’ahˬ doe ni jaˆ-eu Ka li zaˬ aˇ muˇ deuˬ, nui saˇ o ̭-eu la ̭ k’oeˇ co ̭ ngehˇ ni tiˬ k’ehˬ ya deh ̭-euˬ meh. SahˬpaˬMiˬyehˇ-ahˇ yaw zeu baw-awˇ deh ̭-eu lo ̭-ehˇ, Muiˬ-eu shawˇ-eu Yaw sahˇ Miˬyehˇ caw ba-eu la ̭ k’oeˇ myaˬ laˇ behˇ laˇ lu ̭-eu meh. ³² Beˬtuˆluˆ-aˬ, doe doe-ehˇ cah cah-ehˇ jawˇ-euˬ meh. Tiˬ poˆ-aˬ, Luˇda meuˬ-ahˇ jawˇ-eu Miˬyehˇ-euˬ tsawˇ haˬ deuˬ jawˇ gaˇ dawˬ deh g’a-iˇ-euˬ meh. ³³ K’oeˇ gaˇ, kuiˇ shiˇ la ̭ shiˇ shiˇ-eu miˇ neh yeh ̭ k’o ̭ keuˆ ni yu ̭ zaˇ la ̭ nyiˇ maˬ doˆ le nya-ehˇ jawˇ-eu Ehˇneˬ lehˇ myahˇ-euˬ tsawˇ haˬ tiˬ g’aˬ-ahˇ aˬ yaw ̭ mawˇ-euˬ meh. ³⁴ Beˬtuˆluˆ a ̭ yaw ̭-ahˇ ehˇ nehˬ-eu, "Ehˇneˬ-oˇ, Yeˬsuˇ Ka li nawˬ-ahˇ bi muiˬ laˇ-euˬ meh. Tuˇ-awˇ nawˬ-euˬ yu ̭ zaˇ laˆ luiˆ-awˬ." K’oeˇ ngeh, Ehˇneˬ ja pyuˬ ni tuˇ laˇ-euˬ meh. ³⁵ Luˇda meuˬ hawˇ-eu Shaˬloˬ miˇ k’ahˬ-ahˇ jawˇ-eu tsawˇ haˬ dawˬ tawˆ lu ̭ tsawˇ haˬ k’oeˇ g’aˬ-ahˇ ya mawˇ ngeh, Sahˬpaˬ Yeˬsuˇ jawˇ paw pyawˇ laˇ jiˇ-euˬ meh. ³⁶ Yuˇbeˬ meuˬ-ahˇ Daˬbiˇtaˆ lehˇ myahˇ-euˬ jah-eu tsawˇ haˬ tiˬ g’aˬ jawˇ-eu meh. (Aˬ yaw ̭-euˬ tsawˇ myahˇ k’oeˇ-aˬ, Heˬlaˬsaˇ dawˬ-ahˇ neh Dawˬka ̭ lehˇ kuˇ-awˇ, dawˬ tsui ̭-aˬ, "K’aˬ tsehˆ" lehˇ ehˇ maw ̭-eu meh.) Aˬ yaw ̭-aˬ, aˬ myah lu ̭ yaw muiˬ jeˬ mˇ-awˇ, shaˬ-eu zahˬ-eu tsawˇ haˬ deuˬ-ahˇ maˬ tsehˆ leˇ ni caw na nehˬ-eu meh. ³⁷ Aˇ yamˬ k’oeˇ yamˬ-ahˇ aˬ yaw ̭ naˇ-awˇ shiˇ-euˬ meh. Aˬ yaw ̭-euˬ g’awˇ mawˇ-ahˇ iˇ cu ̭ dzui ̭ nehˬ-awˇ, nymˇ la ̭ taˆ tiˆ-ahˇ jaˆ-eu kuˆ lawˆ tiˬ lawˆ la ̭ k’oeˇ ba ̭ taˬ-euˬ meh. ³⁸ Yuˇbeˬ meuˬ-aˬ, Luˇda meuˬ-ahˇ yaw k’aˆ-ehˇ maˬ kaˬ-a. Yuˇbeˬ meuˬ-ahˇ jawˇ-eu jah-eu tsawˇ haˬ deuˬ, Luˇdaˆ meuˬ-ahˇ Beˬtuˆluˆ jawˇ lu ̭-eu gaˇ kawˆ ya gaˬ ngeh, tsawˇ haˬ nyiˬ g’aˬ pyehˬ g’eh-awˇ, "Nga ma ̭ jawˇ Gaˇ yaw kawˇ-ehˇ tiˬ poˆ oe nehˬ la ̭ sheˇ" lehˇ bi ehˇ gaˬ leˇ-euˬ meh. ³⁹ Beˬtuˆluˆ lehˬ hmˬ-awˇ, aˬ yaw ̭ nya ̭ nehˬ-ehˇ iˇ-euˬ meh. Aˬ yaw ̭ iˇ keuˆ ngeh, aˬ yaw ̭-ahˇ nymˇ la ̭ taˆ tiˆ-ahˇ sheuˬ daˆ le ̭-euˬ meh. Miˬ coeˬ miˬ ma dawˬ tawˆ lu ̭ aˬ yaw ̭-euˬ tiˬ jawˬ uiˬ le-awˇ, Dawˬka ̭ yaw deh ̭ deh ̭ ngeh gu ̭ nehˬ ya ̭-euˬ mehˬ tsoeˬ deuˬ aˬ yaw ̭-ahˇ sheu haw sheu haw-ehˇ ngoeˇ-eu meh. ⁴⁰ Beˬtuˆluˆ-aˬ, aˬ yaw ̭ ma ̭ dawˬ tawˆ lu ̭-ahˇ la ̭ nyiˇ bi doˆ-iˇ jiˇ-awˇ, pawˬ tsui ̭ pawˬ dmˬ dmˬ-awˇ guiˬ lahˬ shaˇ-euˬ meh. K’oeˇ naˇ, shiˇ taˬ-euˬ g’awˇ mawˇ jaˆ gaˇ ciˬ pyawˇ-awˇ, "Daˬbiˇtaˆ-oˇ, tuˇ-awˬ" lehˇ ehˇ nehˬ-euˬ meh. Aˬ yaw ̭ myaˆ nuiˆ byeh haw laˇ-awˇ, Beˬtuˆluˆ-ahˇ mawˇ ngeh, tuˇ-awˇ nuiˇ-euˬ meh. ⁴¹ K’oeˇ naˇ, Beˬtuˆluˆ aˬ la ̭ cawˬ nehˬ-awˇ, aˬ yaw ̭-ahˇ g’eu tuˇ nehˬ-euˬ meh. K’oeˇ ngeh, jah-eu tsawˇ haˬ deuˬ hawˇ-eu miˬ coeˬ miˬ ma k’oeˇ deuˬ-ahˇ Beˬtuˆluˆ kuˇ-awˇ, zaˬ miˬ zaˬ k’oeˇ g’aˬ-ahˇ, yaw deh ̭-ehˇ aˬ yaw ̭ ma ̭-ahˇ a k’o ̭ nehˬ-euˬ meh. ⁴² Gaˇ kawˆ k’oeˇ Yuˇbeˬ meuˬ meuˬ lah-ehˇ gaˬ doe-iˇ-awˇ, tsawˇ haˬ g’awˬ mya ni Sahˬpaˬ Yeˬsuˇ-ahˇ jah laˇ-euˬ mehl. ⁴³ Beˬtuˆluˆ-aˬ, Yuˇbeˬ meuˬ la ̭ k’oeˇ Siˇmoˬ lehˇ myahˇ-euˬ shaˬ k’oˆ jahˇ-eu g’aˬ nehˬ-ehˇ g’awˬ mya nah jawˇ-euˬ meh.

¹ Gehˇsaˬliˇ miˇ k’ahˬ-ahˇ Gawˬ neˬ liˇ lehˇ myahˇ-euˬ tsawˇ haˬ tiˬ g’aˬ jawˇ-eu meh. Aˬ yaw ̭-aˬ, "Iˬtaˬliˬ guiˇ ma ̭" lehˇ kuˇ-eu Loˆmaˆ guiˇ ma ̭ tiˬ ma ̭ k’oeˇ taˆ uˆ lahˇ lu ̭-eu yaw huiˬyaw mahˇ tiˬ g’aˬ meh. ² Aˬ yaw ̭-aˬ, guiˬ lahˬ sa ̭ laˇ paw g’aˬ k’aˆ-awˇ, aˬ yaw ̭ hawˇ-eu miˬ sawˇ zaˬ dawˬ tawˆ lu ̭, Miˬyehˇ-ahˇ uˬ duˬ tahˬ-eu meh. Shaˬ-eu zahˬ-eu Yuˇdaˆ tsawˇ haˬ deuˬ-ahˇ aˬ yaw ̭ caw ba-awˇ, Miˬyehˇ-ahˇ maˬ tsehˆ leˇ ni guiˬ lahˬ shaˇ-eu meh. ³ Tiˬ nah-aˬ, uˬ ci ̭ uˬ taw paw naˬ liˬ smˇ la ̭ k’oeˇ yamˬ-ahˇ, yaw sahˇ la ̭ k’oeˇ aˬ yaw ̭ bya cehˆ ni heu lo ̭-ehˇ ya mawˇ duˬ-euˬ meh. Miˬyehˇ-euˬ mˬ taˆ g’aˬ k’ehˇ tiˬ g’aˬ aˬ yaw ̭ jawˇ gaˇ oe-awˇ, "Gawˬneˬliˇ-oˇ" lehˇ kuˇ le-euˬ meh. ⁴ Aˬ yaw ̭ guˆ dui dui-iˇ-awˇ, mˬ taˆ g’aˬ k’ehˇ k’oeˇ g’aˬ-ahˇ haw tsoˆ-awˇ, "Sahˬpaˬ-oˇ, aˬ jeˬ ehˇ te" lehˇ ehˇ k’o ̭ nehˬ-euˬ meh. Mˬ taˆ g’aˬ k’ehˇ k’oeˇ g’aˬ ehˇ-eu, "Nawˬ neh guiˬ lahˬ shaˇ-euˬ jeˬ-ahˇ maˬ ehˇ, nawˇ aˬ cawˬ-ahˇ caw ba nehˬ-euˬ jeˬ-ahˇ maˬ ehˇ, Miˬyehˇ nui k’ahˇ shiˇ-eu miˇ neh, nawˬ-euˬ shaˇ dawˬ-ahˇ naˇ haˬ nehˬ la ̭-euˬ meh. ⁵ Nymˬ-mˇ, Yuˇbeˬ meuˬ-ahˇ tsawˇ haˬ pyehˬ g’eh-awˇ, Beˬtuˆluˆ lehˇ kuˇ-eu Siˇmoˬ-ahˇ bi kuˇ laˬ-iˇ-awˬ. ⁶ Iˬ ma laˆ shaˆ lawˇ dzeˇ jawˇ-eu Siˇmoˬ lehˇ myahˇ-euˬ shaˬ k’oˆ jahˇ-eu tsawˇ haˬ tiˬ g’aˬ-euˬ nymˇ-ahˇ aˬ yaw ̭ ya ̭ lu ̭ meh." ⁷ K’oeˇ naˇ, mˬ taˆ g’aˬ k’ehˇ k’oeˇ g’aˬ g’o ̭ doˆ-iˇ-euˬ meh. Gawˬneˬliˇ-aˬ, aˬ yaw ̭-euˬ zaˬ k’aˆ nyiˬ g’aˬ hawˇ-eu yehˇ tiˬ g’aˬ-ahˇ kuˇ-euˬ meh. Yehˇ k’oeˇ g’aˬ-aˬ, guiˬ lahˬ sa ̭ laˇ paw g’aˬ k’aˆ-awˇ, aˬ yaw ̭-euˬ kuiˇ la ̭ geu ̭ lu ̭-eu yehˇ tiˬ g’aˬ meh. ⁸ K’aˇ pyeu ̭ laˇ-euˬ gaˇ kawˆ k’oeˇ aˬ ha smˇ g’aˬ-ahˇ dzawˇ nehˬ-awˇ, Yuˇbeˬ meuˬ-ahˇ k’ehˇ g’eh-euˬ meh. ⁹ Yawˬ nah yawˬ aˬ ha smˇ g’aˬ Yuˇbeˬ meuˬ dawˬ peh iˇ keuˆ ngeh, Beˬtuˆluˆ-aˬ, nah loˆ ceh laˇ-euˬ miˇ neh guiˬ lahˬ shaˇ leˇ-eu lehˇ, nymˇ mˬ -ahˇ daˆ leˇ-euˬ meh. ¹⁰ Aˬ yaw ̭ hawˬ meh ̭ laˇ-awˇ, tiˬ jeˬ paˬ dzaˬ maw ̭-eu meh. Aˬ yaw ̭ g’aˇ duˬ dzaˇ laˆ saˆ lu ̭ ngeh, yaw sahˇ la ̭ k’oeˇ heu lo ̭-ehˇ aˬ yaw ̭ ya mawˇ-euˬ meh. ¹¹ Mˬ pah le-awˇ, aˇ bui bui ma lo ̭-ehˇ g’eh-eu tiˬ hmˬ la ̭ coeˇ oeˬ coeˬ-ahˇ aˇ caˆ pa ̭-awˇ, miˇ tsaˬ k’oeˇ taˆ aˬ za za-ehˇ pyehˬ ka le ̭ lu ̭ gaˇ mawˇ-euˬ meh. ¹² Aˇ bui k’oeˇ-euˬ la ̭ k’oeˇ, oeˬ kuiˇ tso ̭-eu jeˬ zaˬ, joe joe-ehˇ cah-eu jeˬ zaˬ hawˇ-eu, aˇ jiˇ deuˬ tiˬ ku ̭ uˇ-eu meh. ¹³ Teˇ saˇ tiˬ saˇ ehˇ-eu, "Beˬtuˆluˆ-oˇ, tuˇ-awˇ seh ̭ dzaˬ-awˬ." ¹⁴ Ehˇ k’aw ̭, Beˬtuˆluˆ ehˇ k’o ̭ nehˬ-eu, "Sahˬpaˬ-oˇ, aˬ jeˬ keuˆ le k’aw ̭ ngaˇ maˬ dzaˬ. Zahˇ sahˇ k’o ̭-ahˇ ta ̭ leˇ-awˇ maˬ shawˇ-a lehˇ ehˇ taˬ-euˬ yaw jaw ̭ jeˬ-ahˇ tiˬ jawˇ-iˬ ngaˇ maˬ dzaˬ haw-aˬ." ¹⁵ Teˇ saˇ k’oeˇ saˇ aˬ yaw ̭-ahˇ paˇ ehˇ-eu, "Miˬyehˇ neh yaw shawˇ meh lehˇ k’aˇ ehˇ-euˬ jeˬ-ahˇ, maˬ shawˇ-a lehˇ nawˇ maˬ noeˬ k’mˬ-a." ¹⁶ K’oeˇ lo ̭-ehˇ smˬ poˆ keuˆ ni pyeu ̭ laˇ-awˇ, aˇ bui bui ma-ahˇ duˇ-eu k’oeˇ hmˬ mˬ-ahˇ g’eu daˆ k’o ̭ le ̭-euˬ meh. ¹⁷ Yaw sahˇ la ̭ k’oeˇ ya mawˇ-euˬ gaˇ kawˆ k’oeˇ-euˬ dawˬ tsui ̭-ahˇ Beˬtuˆluˆ zahˬ leˇ-awˇ jawˇ ngeh, Gawˬneˬliˇ neh k’ehˇ g’eh le ̭-euˬ tsawˇ haˬ k’oeˇ smˇ g’aˬ Siˇmoˬ-euˬ nymˇ-ahˇ naˇ haˬ ka le ̭-awˇ, nymˇ g’oˆ k’ehˬ-ahˇ oe keuˆ-awˇ yaw ̭ lu ̭-eu meh. ¹⁸ "Beˬtuˆluˆ lehˇ kuˇ-eu Siˇmoˬ k’oeˇ g’aˬ heu gaˇ maˬ ya ̭-a loˇ" lehˇ, aˬ yaw ̭ ma ̭ naˇ haˬ-eu meh. ¹⁹ Yaw sahˇ la ̭ k’oeˇ ya mawˇ-euˬ gaˇ kawˆ k’oeˇ-euˬ dawˬ tsui ̭-ahˇ Beˬtuˆluˆ shaˇ sawˇ haw lu ̭ ngeh, Yaw sahˇ Miˬyehˇ aˬ yaw ̭-ahˇ ehˇ-eu, "Naˇhaˬ sheˇ. Tsawˇ haˬ smˇ g’aˬ nawˬ-ahˇ poˆ le-euˬ meh. ²⁰ Lehˬ hmˬ-awˇ za ̭ ka-iˇ-awˇ, maˬ nyi naˬ ni aˬ yaw ̭ ma ̭ nehˬ-ehˇ le-awˬ. Aˬ jeˬ miˇ neh ehˇ naˇ, aˬ yaw ̭ ma ̭-ahˇ ngaˬ neh bi oe-euˬ ma." ²¹ K’oeˇ ngeh, Beˬtuˆluˆ za ̭ ka-iˇ-awˇ, aˬ ha smˇ g’aˬ-ahˇ ehˇ nehˬ-eu, "Naw ma ̭ poˆ lu ̭-eu g’aˬ ngaˇ ma. Aˬ jeˬ loˬ-eu oe teˬ." ²² Aˬ ha smˇ g’aˬ ehˇ-eu, "Guiˇ ma ̭-ahˇ uˆ lahˇ-eu yaw huiˬ yaw mahˇ pyeu ̭-eu Gawˬneˬliˇ neh nga ma ̭-ahˇ k’ehˇ le ̭-euˬ meh. Aˬ yaw ̭-aˬ, Miˬyehˇ-ahˇ uˬ duˬ tahˬ-eu tsawˇ haˬ yaw muiˬ tiˬ g’aˬ pyeu ̭-awˇ, Yuˇdaˆ tsawˇ haˬ dawˬ tawˆ lu ̭ aˬ yaw ̭-ahˇ yaw zeu baw-eu meh. Nawˬ-ahˇ aˬ yaw ̭-euˬ nymˇ-ahˇ kuˇ ahˇ-awˇ, nawˬ neh ngehˬ-euˬ tmˇ-euˬ dawˬ-ahˇ naˇ haˬ-eu g’aˇ duˬ, Miˬyehˇ-euˬ mˬ taˆ g’aˬ k’ehˇ tiˬ g’aˬ aˬ yaw ̭-ahˇ ehˇ le-euˬ meh." ²³ Aˬ ha smˇ g’aˬ-ahˇ Beˬtuˆluˆ kuˇ ahˇ-awˇ, uˬ ci ̭ bi ya ̭-euˬ meh. Yawˬ nah yawˬ aˬ yaw ̭ lehˬ hmˬ-awˇ, aˬ ha smˇ g’aˬ nehˬ-ehˇ le-euˬ meh. Yuˇbeˬ meuˬ-ahˇ jawˇ-eu jah-eu tsawˇ haˬ tiˬ paˆ na deuˬ k’aw ̭, aˬ yaw ̭-euˬ mehˬ nah caw teh g’eh-euˬ meh. ²⁴ Yawˬ nah yawˬ Geˇsaˬliˇ meuˬ-ahˇ le keuˆ-euˬ meh. Gawˬneˬliˇ-aˬ, aˬ yaw ̭-euˬ aˬ yui ̭ aˬ nyiˇ hawˇ-eu cawˬ deuˬ kuˇ uiˬ taˬ-awˇ, Beˬtuˆluˆ laˇ keuˆ gaˇ dawˬ lu ̭-eu meh. ²⁵ Beˬtuˆluˆ iˇ kahˇ la ̭ k’oeˇ uˇ leˇ-eu lehˇ g’eh ngeh, aˬ yaw ̭-euˬ aˬ kuiˇ dawˬ peh Gawˬneˬliˇ pawˬ tsui ̭ pawˬ dmˬ dmˬ-euˬ meh. ²⁶ Ehˇ k’aw ̭, Beˬtuˆluˆ neh aˬ yaw ̭-ahˇ g’eu tuˇ-awˇ, "Tuˇ-awˬ. Ngaˇ k’aw ̭ tsawˇ haˬ zaˬ teh ̭ ma" lehˇ ehˇnehˬ-euˬ meh. ²⁷ Beˬtuˆluˆ Gawˬneˬliˇ-ahˇ dawˬ ngehˬ cawˬ ngehˬ cawˬ-ehˇ iˇ kahˇ-ahˇ uˇ leˇ ngeh, tsawˇ haˬ g’awˬ mya ni uiˬ leˇ taˬ-euˬ gaˇ ya mawˇ-euˬ meh. ²⁸ Tsawˇ haˬ k’oeˇ deuˬ-ahˇ Beˬtuˆluˆ ehˇ nehˬ-eu, "Yuˇdaˆ tsawˇ haˬ tiˬ g’aˬ, aˬ cawˬ tsawˇ jeuˬ-ahˇ cawˬ cawˬ-eu maˬ ehˇ, dawˬ deh g’a ta ̭-eu maˬ ehˇ, maˬ mˇ k’mˬ-eu gaˇ kawˆ naw ma ̭ yaw muiˬ paˬ-ehˇ siˬ duˬ-eu meh. Ehˇ k’aw ̭, tsawˇ haˬ tiˬ g’aˬ-ahˇ-iˬ maˬ muiˬ maˬ shawˇ-eu tsawˇ haˬ lehˇ maˬ ya sawˇ-eu g’aˇ duˬ, Miˬyehˇ ngaˬ-ahˇ mehˬ nehˬ la ̭ g’aˬ-euˬ meh. ²⁹ K’oeˇ miˇ neh, ngaˬ-ahˇ bi kuˇ laˬ le ngeh, ngaˇ dawˬ maˬ tmˇ ni laˇ-euˬ ma. Nymˬ-mˇ poˆ jawˇ-aˬ, aˬ jeˬ miˇ neh ngaˬ-ahˇ bi kuˇ laˬ le teˬ lehˇ naˇ haˬ maw ̭ miˇ-a." ³⁰ Gawˬneˬliˇ ehˇ-eu, "Dzeuˇ ya ̭-euˬ smˬ nah-ahˇ, nymˬ-mˇ lo ̭-ehˇ uˬ ci ̭ uˬ taw naˬ liˬ smˇ la ̭ k’oeˇ kaˬ-ahˇ, ngaˬ-euˬ nymˇ la ̭ k’oeˇ ngaˇ guiˬ lahˬ shaˇ lu ̭-eu ma. Ja pyuˬ ni, yaw sheh ̭ bya-eu mehˬ tsoeˬ dm lu ̭-eu tsawˇ haˬ tiˬ g’aˬ ngaˬ-euˬ mehˬ shi yaw ̭ le-euˬ meh. ³¹ Aˬ yaw ̭ ehˇ-eu, ’Gawˬneˬliˇ-oˇ, nawˬ-euˬ shaˇ dawˬ-ahˇ Miˬyehˇ gaˬ-awˇ, nawˬ neh shaˬ zaˬ zahˬ zaˬ-ahˇ caw ba-euˬ aˬ yaw ̭ siˬ lu ̭ mawˇ lu ̭ meh. ³² Yuˇbeˬ meuˬ-ahˇ tsawˇ haˬ k’ehˇ g’eh-awˇ, Beˬtuˆluˆ lehˇ kuˇ-eu Siˇmoˬ k’oeˇ g’aˬ-ahˇ bi kuˇ laˬ-iˇ-awˬ. Iˬ ma laˆ shaˆ lawˇ dzeˇ jawˇ-eu, shaˬ k’oˆ jahˇ-eu Siˇmoˬ lehˇ myahˇ-euˬ g’aˬ-euˬ nymˇ-ahˇ aˬ yaw ̭ ya ̭ lu ̭ meh’ lehˇ ehˇ-eu meh. ³³ K’oeˇ miˇ neh, tiˬ poˆ teh ̭-ehˇ nawˬ-ahˇ bi kuˇ laˬ le-euˬ ma. Nawˇ nui ma keuˆ-awˇ laˇ nehˬ la ̭-euˬ guiˬ lahˬ huiˬ miˇ-a. Nymˬ-mˇ nga ma ̭ dawˬ tawˆ lu ̭, heu gaˇ Miˬyehˇ mehˬ shi uiˬ laˇ taˬ-awˇ, Sahˬpaˬ Miˬyehˇ neh nawˬ-ahˇ mehˬ nehˬ tsoˆ nehˬ-awˇ bi ngehˬ-euˬ dawˬ deuˬ-ahˇ naˇ haˬ-eu lehˇ dawˬ lu ̭-eu ma." ³⁴ K’oeˇ ngeh, Beˬtuˆluˆ dawˬ ngehˬ-eu aˇ dahˬ beh-awˇ heu lo ̭-ehˇ ehˇ-eu meh. "Miˬyehˇ myaˆ pyawˬ huiˬ nyiˇ maˬ tseˇ-eu gaˇ kawˆ nymˬ-mˇ ngaˇ siˬ duˬ-eu ma. ³⁵ Aˬ geu jeˬ tsawˇ jeuˬ pyeu ̭-eu maˬ kaˬ, aˬ yaw ̭-ahˇ guˆ-awˇ yaw tsaˬ yaw dawˇ jeˬ mˇ-eu tsawˇ haˬ-ahˇ aˬ yaw ̭ nui ma tsaˬ-eu meh. ³⁶ Dawˬ tawˆ k’oeˇ taˆ sahˬ paˬ pyeu ̭-eu Yeˬsuˇ Ka li baˬ da neh nui saˇ o ̭-eu jeˬ za-eu gaˇ kawˆ Laˬ k’aˬ cehˇ-eu Guiˬ lahˬ dawˬ heu-ahˇ, Iˇsaˬleˬlaˆ tsawˇ haˬ deuˬ jawˇ gaˇ bi mehˬ-iˇ-euˬ naw ma ̭ siˬ nya meh. ³⁷ Yoˇhaˬ iˇ cu ̭ shawˇ-eu gaˇ kawˆ dawˬ mehˬ mehˬ-euˬ k’oeˇ dzeuˇ naˇ, Gaˬliˬlehˇ miˇ k’ahˬ-ahˇ neh dahˬ beh-awˇ, Iˇsaˬleˬlaˆ miˇ k’ahˬ doe ni Laˬ k’aˬ cehˇ-eu Guiˬ lahˬ dawˬ gaˬ byah-iˇ-euˬ naw ma ̭ siˬ lu ̭ meh. ³⁸ Naˬzaˬlehˇ tsawˇ haˬ Yeˬsuˇ gaˇ kawˆ maˬ ehˇ, aˬ yaw ̭-euˬ k’oeˇ taˆ Miˬyehˇ neh Muiˬ-eu shawˇ-eu Yaw sahˇ Miˬyehˇ hawˇ-eu baoˬ aˬ joˆ-ehˇ shehˆ daˆ nehˬ-euˬ gaˇ kawˆ maˬ ehˇ, naw ma ̭ siˬ lu ̭ meh. Miˬyehˇ aˬ yaw ̭ nehˬ-ehˇ jawˇ-eu miˇ neh, aˬ yaw ̭ yawˬ gaˇ na lu ̭ iˇ doe-awˇ, yaw muiˬ jeˬ mˇ mˇ-ehˇ, Neh ̭-euˬ baoˬ uˬ moˆ shaˬ lu ̭-eu tsawˇ haˬ deuˬ-ahˇ naˇ gawˇ laˆ taˬ nehˬ-euˬ meh. ³⁹ Iˇsaˬleˬlaˆ miˇ k’ahˬ hawˇ-eu Yeˬluˇsaˬlehˬ meuˬ la ̭ k’oeˇ, aˬ yaw ̭ neh k’aˇ mˇ-euˬ yawˬ jeˬ na lu ̭-ahˇ mawˇ duˬ-euˬ tsawˇ kaˬ-aˬ, nga ma ̭ ma. K’oeˇ naˇ, aˬ cawˬ neh aˬ yaw ̭-ahˇ zeuˇ liˬ la ̭ ya ̭ k’oeˇ taˆ ta ̭ seh ̭-euˬ meh. ⁴⁰ Ehˇ k’aw ̭, smˬ nah byah laˇ ngeh, Miˬyehˇ neh paˇ bi g’o ̭ deh ̭ laˇ-awˇ, aˬ yaw ̭-euˬ g’awˇ mawˇ bi mawˇ le-euˬ meh. ⁴¹ Ehˇ k’aw ̭, tsawˇ haˬ dawˬ tawˆ lu ̭-ahˇ bi mawˇ le-euˬ maˬ ngeuˇ-a. Gaˇ kawˆ heu saˇ kiˇ bi kamˬ-eu g’aˇ duˬ yaw duˬ duˬ-ehˇ bi mawˇ duˬ-eu lehˇ, yaw beh neh Miˬyehˇ neh tseˇ doˆ taˬ-euˬ tsawˇ haˬ deuˬ pyeu ̭-eu nga ma ̭ heu myaˆ g’aˬ-ahˇ bi mawˇ la ̭-euˬ teh ̭ meh. Aˬ yaw ̭ g’o ̭ deh ̭ laˇ g’aˬ miˇ tsa, nga ma ̭ aˬ yaw ̭ nehˬ-ehˇ dzaˬ ta ̭ dawˇ ta ̭-euˬ ma. ⁴² Miˇ k’ahˬ zaˬ deuˬ-ahˇ dawˬ mehˬ mehˬ-awˇ, deh ̭ lu ̭-eu deuˬ-ahˇ maˬ ehˇ, shiˇ-euˬ deuˬ-ahˇ maˬ ehˇ, yaˇ k’aˬ bi daˇ-eu g’aˇ duˬ Miˬyehˇ neh tseˇ doˆ-euˬ g’aˬ-aˬ, aˬ yaw ̭ meh lehˇ saˇ kiˇ kamˬ-eu g’aˇ duˬ, nga ma ̭-ahˇ aˬ yaw ̭ dawˬ bi ̭ la ̭-euˬ meh. ⁴³ Aˬ yaw ̭-ahˇ k’aˇ jah-eu tsawˇ haˬ dawˬ tawˆ lu ̭, aˬ yaw ̭ tsawˇ myahˇ-euˬ baoˬ baˬ da neh iˬ baˇ pyehˬ-eu jeˬ-ahˇ za-eu gaˇ kawˆ, Miˬyehˇ g’aˇ duˬ ngehˬ dah-eu tsawˇ haˬ dawˬ tawˆ lu ̭ saˇ kiˇ kamˬ taˬ-euˬ jaˆ-eu meh." ⁴⁴ Beˬtuˆluˆ dawˬ ngehˬ lu ̭ ngeh, aˬ yaw ̭-euˬ dawˬ-ahˇ k’aˇ naˇ haˬ lu ̭-eu tsawˇ haˬ dawˬ tawˆ lu ̭ k’oeˇ taˆ, Muiˬ-eu shawˇ-eu Yaw sahˇ Miˬyehˇ za ̭ le-euˬ meh. ⁴⁵ Yuˇdaˆ tsawˇ haˬ maˬ ngeuˇ-eu deuˬ-ahˇ k’aw ̭, Miˬyehˇ neh Muiˬ-eu shawˇ-eu Yaw sahˇ Miˬyehˇ shehˆ daˆ nehˬ-euˬ gaˇ, Beˬtuˆluˆ nehˬ-ehˇ Yuˇbeˬ meuˬ-ahˇ neh laˇ-euˬ jah-eu Yuˇdaˆ tsawˇ haˬ deuˬ zahˬ leˇ-euˬ meh. ⁴⁶ Aˬ jeˬ miˇ neh ehˇ naˇ, tsawˇ haˬ k’oeˇ deuˬ dawˬ g’awˬ mya jeˬ ngehˬ-awˇ, Miˬyehˇ-ahˇ ciˬ huiˬ ciˬ mahˇ gaˇ aˬ yaw ̭ ma ̭ ya gaˬ-euˬ meh. Beˬtuˆluˆ ehˇ-eu, ⁴⁷ "Tsawˇ haˬ heu deuˬ k’aw ̭,aˬ dui ma ̭ lo ̭-ehˇ Muiˬ-eu shawˇ-eu Yaw sahˇ Miˬyehˇ za-euˬ meh. Aˬ yaw ̭ ma ̭ iˇ cu ̭ la ̭ k’oeˇ iˇ cu ̭ shawˇ gaˇ aˬ suˇ g’aˬ paˇ laˆ tsoeˬ nya ta." ⁴⁸ K’oeˇ miˇ neh, Yeˬsuˇ Ka li-euˬ tsawˇ myahˇ uˬ moˆ iˇ cu ̭ shawˇ-eu g’aˇ duˬ, tsawˇ haˬ k’oeˇ deuˬ-ahˇ aˬ yaw ̭ dawˬ bi ̭-euˬ meh. K’oeˇ naˇ, aˬ yaw ̭ ma ̭ nehˬ-ehˇ tiˬ k’ehˬ jawˇ nehˬ la ̭-eu g’aˇ duˬ, Beˬtuˆluˆ-ahˇ aˬ yaw ̭ ma ̭ shaˇ-euˬ meh.

¹ Yuˇdaˆ tsawˇ haˬ maˬ ngeuˇ-eu deuˬ k’aw ̭, Miˬyehˇ-euˬ dawˬ kawˬ-ahˇ ha geu ̭-euˬ gaˇ kawˆ, g’aˬ k’ehˇ deuˬ hawˇ-eu Yuˇdaˆ miˇ k’ahˬ-ahˇ jawˇ-eu jah-eu tsawˇ haˬ deuˬ ya gaˬ-euˬ meh. ² Beˬtuˆluˆ Yeˬluˇsaˬlehˬ meuˬ-ahˇ le ngeh, Yuˇdaˆ tsawˇ haˬ maˬ ngeuˇ-eu deuˬ-ahˇ k’aw ̭ baˆ k’oˆ mehˬ dzaˬ bi yehˬ maw ̭-eu nui ma ahˇ-eu deuˬ aˬ yaw ̭-ahˇ heu lo ̭-ehˇ iˬ baˇ taˬ-eu meh. ³ "Aˬ jeˬ miˇ neh nawˇ baˆ k’oˆ mehˬ dzaˬ maˬ yehˬ-euˬ aˬ cawˬ tsawˇ jeuˬ-euˬ nymˇ-ahˇ daˆ leˇ-eu uˬ ta ̭, aˬ yaw ̭ ma ̭ nehˬ-ehˇ dzaˬ ta ̭ dawˇ ta ̭ te." ⁴ K’oeˇ miˇ neh, Beˬtuˆluˆ neh aˬ yaw ̭ ma ̭-ahˇ k’aˇ pyeu ̭ laˇ-euˬ jeˬ dawˬ tawˆ lu ̭, aˇ dahˬ beh gaˇ neh heu lo ̭-ehˇ dzawˇ mehˬ nehˬ-euˬ meh. ⁵ "Yuˇbeˬ meuˬ-ahˇ ngaˇ guiˬ lahˬ shaˇ lu ̭ ngeh, yaw sahˇ la ̭ k’oeˇ heu lo ̭-ehˇ ya mawˇ-euˬ ma. Aˇ bui bui ma lo ̭-ehˇ g’eh-eu tiˬ hmˬ la ̭ coeˇ oeˬ coeˇ-ahˇ aˇ caˆ pa ̭-awˇ, mˬ-ahˇ neh aˬ za za-ehˇ pyehˬ ka le ̭-awˇ, ngaˬ-euˬ dawˬ peh naˬ le-euˬ meh. ⁶ La ̭ k’oeˇ paw yaw muiˬ paˬ-ehˇ haw duˬ ngeh, cu-eu jeˬ zaˬ maˬ ehˇ, bawˇ tsahˬ jeˬ zaˬ maˬ ehˇ, joe joe-ehˇ cah-eu jeˬ zaˬ maˬ ehˇ, aˇ jiˇ deuˬ maˬ ehˇ, ya mawˇ-euˬ ma. ⁷ K’oeˇ ngeh, ’Beˬtuˆluˆ-oˇ, tuˇ-awˇ seh ̭ dzaˬ-awˬ’ lehˇ, teˇ saˇ tiˬ saˇ ngaˬ-ahˇ ehˇ-eu meh. ⁸ Ehˇ k’aw ̭, ’Sahˬpaˬ-oˇ, aˬ jeˬ keuˆ le k’aw ̭ ngaˇ maˬ dzaˬ. Zahˇ sahˇ k’o ̭-ahˇ ta ̭ leˇ-awˇ maˬ muiˬ maˬ shawˇ-eu jeˬ lehˇ k’aˇ ehˇ taˬ-euˬ dzaˇ yaw jaw ̭ jeˬ, ngaˬ-euˬ k’aˬ meh la ̭ k’oeˇ tiˬ jawˇ-iˬ maˬ dawˆ ahˇ haw-aˬ’ lehˇ, ngaˇ ehˇ k’o ̭ nehˬ-euˬ ma. ⁹ ’Miˬyehˇ neh yaw shawˇ meh lehˇ ehˇ taˬ-euˬ jeˬ-ahˇ, maˬ shawˇ-a lehˇ maˬ noeˬ k’mˬ-a’ lehˇ, teˇ saˇ k’oeˇ saˇ mˬ k’oeˇ taˆ neh paˇ ehˇ-eu meh. ¹⁰ K’oeˇ lo ̭-ehˇ smˬ poˆ keuˆ ni pyeu ̭ laˇ g’aˬ-awˇ, aˇ saˬ saˬ laˇ ngeh, dawˬ tawˆ lu ̭ mˬ k’oeˇ taˆ g’eu daˆ k’o ̭ le ̭-euˬ meh. ¹¹ K’oeˇ ngeh k’a tseuˆ ni, Gehˇsaˬliˇ meuˬ-ahˇ neh ngaˇ jawˇ gaˇ k’ehˇ g’eh le ̭-euˬ tsawˇ haˬ smˇ g’aˬ, ngaˇ ya ̭ lu ̭-eu nymˇ-ahˇ oe keuˆ-euˬ meh. ¹² Maˬ nyi naˬ ni aˬ yaw ̭ ma ̭ nehˬ-ehˇ le-awˬ lehˇ, Yaw sahˇ Miˬyehˇ ngaˬ-ahˇ ehˇ-eu meh. Yuˇbeˬ meuˬ-ahˇ jawˇ-eu jah-eu tsawˇ haˬ aˬ yui ̭ aˬ nyiˇ heu ko ̭ g’aˬ k’aw ̭, ngaˬ-euˬ mehˬ nah caw teh laˇ-awˇ, nga ma ̭ dawˬ tawˆ lu ̭ Gawˬneˬliˇ-euˬ nymˇ-ahˇ uˇ leˇ-euˬ ma. ¹³ Aˬ yaw ̭-euˬ nymˇ la ̭ k’oeˇ yaw ̭ le-euˬ mˬ taˆ g’aˬ k’ehˇ-ahˇ aˬ yaw ̭ aˬ joˆ-ehˇ mawˇ-euˬ gaˇ kawˆ hawˇ-eu, mˬ taˆ g’aˬ k’ehˇ k’oeˇ g’aˬ heu lo ̭-ehˇ ehˇ-eu gaˇ kawˆ, aˬ yaw ̭ nga ma ̭-ahˇ dzawˇ nehˬ la ̭-euˬ meh. ’Yuˇbeˬ meuˬ-ahˇ tsawˇ haˬ pyehˬ g’eh-awˇ, Beˬtuˆluˆ lehˇ kuˇ-eu Siˇmoˬ-ahˇ biˬ kuˇ laˬ-iˇ-awˬ. ¹⁴ Nawˇ hawˇ-eu nawˬ-euˬ miˬ sawˇ zaˬ dawˬ tawˆ lu ̭ ka k’o ̭-eu jeˬ za nya ni, aˬ yaw ̭ dawˬ mehˬ mehˬ nehˬ la ̭ teh ̭-a’ lehˇ ehˇ-eu meh lehˇ, ngaˬ-ahˇ dzawˇ nehˬ la ̭-euˬ meh. ¹⁵ K’oeˇ naˇ, ngaˇ dawˬ ngehˬ dahˬ beh-eu nehˬ-ehˇ, yaw beh aˬ dui ma ̭ k’oeˇ taˆ pyeu ̭ beh beh laˇ ngeh poˆ lo ̭-ehˇ, aˬ yaw ̭ ma ̭ k’oeˇ taˆ Muiˬ-eu shawˇ-eu Yaw sahˇ Miˬyehˇ za ̭ le-euˬ meh. ¹⁶ K’oeˇ ngeh, ’Yoˇhaˬ-aˬ, iˇ cu ̭ la ̭ k’oeˇ iˇ cu ̭ shawˇ nehˬ-euˬ meh. Ehˇ k’aw ̭, naw ma ̭-aˬ, Muiˬ-eu shawˇ-eu Yaw sahˇ Miˬyehˇ la ̭ k’oeˇ iˇ cu ̭ ya shawˇ teh ̭-a’ lehˇ, Sahˬpaˬ Yeˬsuˇ neh ehˇ-euˬ dawˬ k’oeˇ dawˬ ngaˬ-ahˇ noeˬ doˆ laˇ-euˬ miˇ-a. ¹⁷ Aˬ dui ma ̭ Sahˬpaˬ Yeˬsuˇ Ka li-ahˇ jah ngeh, Miˬyehˇ neh aˬ dui-ahˇ bi ̭ la ̭-euˬ la ̭ sawˬ k’oeˇ, Yuˇdaˆ tsawˇ haˬ maˬ ngeuˇ-eu k’oeˇ deuˬ-ahˇ k’aw ̭ Miˬyehˇ bi ̭-euˬ ngaˇ lehˇ, bya cehˆ ni siˬ duˬ laˇ-euˬ meh. Miˬyehˇ-ahˇ ngaˇ aˬ joˆ-ehˇ paˇ laˆ tsoeˬ nya nmˇ tawˇ." ¹⁸ K’oeˇ lo ̭-ehˇ dzawˇ mehˬ nehˬ gaˇ aˬ yaw ̭ ma ̭ ya gaˬ ngeh, Beˬtuˆluˆ-ahˇ iˬ baˇ maˬ taˬ ni byehˇ-awˇ, heu lo ̭-ehˇ ehˇ-eu meh. "Miˬyehˇ-aˬ, Yuˇdaˆ tsawˇ haˬ maˬ ngeuˇ-eu aˬ cawˬ tsawˇ jeuˬ deuˬ-ahˇ k’aw ̭, iˬ baˇ noeˬ poˆ-awˇ deh ̭ nya ni aˬ kawˬ-aˬ bi ̭-euˬ nga." ¹⁹ Saˬteˬpaˬ-ahˇ seh ̭ ngeh poˆ k’ehˬ-eu k’aˆ-eu jeˬ-ahˇ ya daˬ-awˇ cehˆ byaˆ-euˬ jah-eu tsawˇ haˬ tiˬ paˆ na deuˬ-aˬ, Piˇniˇshaˆ miˇ k’ahˬ, Guˇbaˬluˇ iˇ jaw lahˇ hawˇ-eu, Aˬdiˇawˬ meuˬ-ahˇ keuˆ ni cehˆ keuˆ-euˬ meh. Aˬ yaw ̭ ma ̭-aˬ, Yuˇdaˆ tsawˇ haˬ deuˬ-ahˇ teh ̭-ehˇ guiˬ lahˬ dawˬ mehˬ-euˬ meh. ²⁰ Ehˇ k’aw ̭, Guˇbaˬluˇ iˇ jaw lahˇ hawˇ-eu Kuˇleˬniˬ miˇ k’ahˬ-ahˇ jawˇ-eu jah-eu tsawˇ haˬ tiˬ deuˬ-aˬ, Aˬdiˇawˬ meuˬ-ahˇ le-awˇ, Yuˇdaˆ tawˇ haˬ maˬ ngeuˇ-eu deuˬ-ahˇ k’aw ̭ guiˬ lahˬ dawˬ mehˬ-awˇ, Sahˬpaˬ Yeˬsuˇ Ka li gaˇ kawˆ Laˬ k’aˬ cehˇ-eu Guiˬ lahˬ dawˬ ja mehˬ-euˬ meh. ²¹ Sahˬpaˬ Miˬyehˇ-euˬ baoˬ aˬ yaw ̭ ma ̭ nehˬ-ehˇ jawˇ-eu miˇ neh, tsawˇ haˬ g’awˬ mya ni jah laˇ-awˇ, Sahˬpaˬ Miˬyehˇ jawˇ paw pyawˇ laˇ-euˬ meh. ²² Gaˇ kawˆ k’oeˇ Yeˬluˇsaˬlehˬ meuˬ-ahˇ jawˇ-eu Ka li zaˬ aˇ muˇ-ahˇ gaˬ keuˆ-iˇ-euˬ miˇ neh, Baˬnaˬbaˇ-ahˇ Aˬdiˇawˬ meuˬ-ahˇ aˬ yaw ̭ ma ̭ pyehˬ g’eh-euˬ meh. ²³ Aˬ yaw ̭ k’oeˇ gaˇ le keuˆ-awˇ, Miˬyehˇ neh tsawˇ haˬ k’oeˇ deuˬ-ahˇ guiˬ lahˬ bi ̭-euˬ gaˇ ya mawˇ ngeh, laˬ k’aˬ cehˇ dui dui-eu la ̭ k’oeˇ, Sahˬ paˬ Yeˬsuˇ-ahˇ nui ma la ̭ k’oeˇ keuˆ ni saˇ jaˇ zi ̭-eu g’aˇ duˬ aˬ yaw ̭ ma ̭ dawˬ tawˆ lu ̭-ahˇ g’aˬ bi ̭ nehˬ-euˬ meh. ²⁴ Baˬnaˬbaˇ-aˬ, muiˬ-eu jaˬ-eu tsawˇ haˬ tiˬ g’aˬ pyeu ̭-awˇ, Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-awˇ, jah-eu jeˬ k’aw ̭ tiˬ byah ni ahˇ-eu miˇ neh, tsawˇ haˬ g’awˬ mya ni Sahˬpaˬ Yeˬsuˇ jawˇ paw ahˇ laˇ-euˬ meh. ²⁵ K’oeˇ naˇ, Daˬsuˇ meuˬ-ahˇ Baˬnaˬbaˇ iˇ-awˇ, Pawˇluˆ-ahˇ poˆ-iˇ-euˬ meh. ²⁶ Aˬ yaw ̭-ahˇ poˆ mawˇ ngeh, Aˬdiˇawˬ meuˬ-ahˇ sheuˬ g’eh-awˇ, Ka li zaˬ aˇ muˇ la ̭ k’oeˇ jawˇ-eu tsawˇ haˬ deuˬ-ahˇ aˬ yaw ̭ nya ̭ k’o ̭ k’o ̭ lah ni tahˬ dzoeˇ-awˇ, tsawˇ haˬ g’awˬ mya ni-ahˇ mehˬ nehˬ tsoˆ nehˬ-euˬ meh. Jah-eu tsawˇ haˬ deuˬ-ahˇ Ka li zaˬ lehˇ kuˇ beh beh-euˬ k’oeˇ-aˬ, Aˬdiˇawˬ meuˬ-ahˇ meh. ²⁷ Aˇ yamˬ k’oeˇ yamˬ la ̭ k’oeˇ, Miˬyehˇ g’aˇ duˬ ngehˬ dah-eu tiˬ paˆ na deuˬ, Yeˬluˇsaˬlehˬ meuˬ-ahˇ neh Aˬdiˇawˬ meuˬ-ahˇ le-euˬ meh. ²⁸ Miˬyehˇ g’aˇ duˬ ngehˬ dah-eu k’oeˇ deuˬ la ̭ k’oeˇ, Aˬgaˬbuˇ lehˇ myahˇ-euˬ g’aˬ tuˇ laˇ-awˇ, "Miˇ tsaˬ heu dawˬ tawˆ lu ̭ k’oeˇ taˆ, meh ̭ dui shu ̭ dui dui-eu jeˬ keuˆ le teh ̭-a" lehˇ, Yaw sahˇ Miˬyehˇ-euˬ baoˬ-ahˇ g’oe-awˇ ehˇ-eu meh. (Meh ̭-eu shu ̭-eu k’oeˇ poˆ-aˬ, Loˇmaˆ sahˬ paˬ Gaˬlawˇdiˇ dzoeˬ dzaˬ ngeh keuˆ le-euˬ meh.) ²⁹ Zaˬ lahˇ deuˬ yawˬ g’aˬ na lu ̭, yawˬ ha k’aˇ g’eh nya-eu lo ̭-ehˇ, Yuˇdaˆ miˇ k’ahˬ-ahˇ jawˇ-eu jah-eu tsawˇ haˬ deuˬ-ahˇ caw ba-eu g’aˇ duˬ noeˬ tsehˆ-euˬ meh. ³⁰ Aˬ yaw ̭ ma ̭ k’oeˇ lo ̭-ehˇ jahˇ-awˇ, Baˬnaˬbaˇ hawˇ-eu Sawˇluˆ aˬ nya ̭-ahˇ neh tiˬ tiˆ, Ka li zaˬ aˇ muˇ-euˬ aˬ yui ̭ aˬ tsu deuˬ jawˇ gaˇ pyuˇ dawˆ ahˇ g’eh-euˬ meh.

¹ Aˇ yamˬ k’oeˇ yamˬ la ̭ k’oeˇ, Ka li zaˬ aˇ muˇ la ̭ k’oeˇ uˇ-eu tsawˇ haˬ tiˬ paˆ na deuˬ-ahˇ, sahˬ paˬ Heˬloˆ neh k’ehˬ-euˬ meh. ² Yoˇhaˬ nehˬ-ehˇ tiˬ mehˇ nmˇ pyeu ̭-eu Yaˬkoˆ-ahˇ aˬ yaw ̭ mi cehˇ neh seh ̭-euˬ meh. ³ Aˬ yaw ̭ k’oeˇ lo ̭-ehˇ jahˇ miˇ-ahˇ Yuˇdaˆ tsawˇ haˬ deuˬ nui ma tsaˬ gaˇ aˬ yaw ̭ ya mawˇ ngeh, tiˬ tiˆ paˇ k’aˬ dzehˬ laˇ-awˇ, Beˬtuˆluˆ-ahˇ nyeh ̭-euˬ meh. (K’oeˇ lo ̭-ehˇ pyeu ̭ laˇ-euˬ aˇ yamˬ k’oeˇ-aˬ, Dehˬ tseˬ maˬ dawˆ-euˬ Kaˬmuˇ dzaˬ-eu Bawˬ-iˬ g’eh ngeh yamˬ-ahˇ tsaˬ-eu meh.) ⁴ Beˬtuˆluˆ-ahˇ nyeh ̭ g’aˬ ngeh, pa ̭ kuˆ-ahˇ dawˆ-awˇ, tiˬ muˇ-euˬ oeˬ g’aˬ byah-eu yehˇ oeˬ muˇ neh bi lo ̭-euˬ meh. Baˬsaˬkaˬ Bawˬ-iˬ g’eh g’aˬ naˇ, miˇ k’ahˬ zaˬ-euˬ mehˬ shi tsahˇ doˆ-awˇ yaˇ k’aˬ daˇ-eu g’aˇ duˬ, Heˬloˆ lehˬ hmˬ taˬ-euˬ meh. ⁵ K’oeˇ miˇ neh, Beˬtuˆluˆ-ahˇ pa ̭ kuˆ-ahˇ dawˆ taˬ-euˬ jeˬ pyeu ̭-eu meh. Ehˇ k’aw ̭, Ka li zaˬ aˇ muˇ muˇ lah-ehˇ, Beˬtuˆluˆ g’aˇ duˬ nui ma keuˆ dui dui-eu la ̭ k’oeˇ Miˬyehˇ-ahˇ guiˬ lahˬ shaˇ-euˬ meh. ⁶ Aˬ yaw ̭-ahˇ miˇ k’ahˬ zaˬ mehˬ shi Heˬloˆ tsahˇ doˆ-eu lehˇ g’eh-eu aˇ nah keuˆ le-eu mehˬ hu uˬ ci ̭ k’oeˇ miˇ-ahˇ, a yaw ̭-ahˇ lo ̭ lu ̭-eu yehˇ nyiˬ g’aˬ-euˬ aˇ kaˬ-ahˇ, Beˬtuˆluˆ yu ̭ k’aˆ taˬ-euˬ meh. Aˬ yaw ̭-ahˇ shmˇ caˆ nyiˬ caˆ pa ̭ taw ̭ taˬ-awˇ, pa ̭ kuˆ-euˬ g’oˆ k’ehˬ-ahˇ k’aw ̭, yehˇ deuˬ lo ̭ lu ̭-eu meh. ⁷ Ja pyuˬ ni SahˬpaˬMiˬyehˇ-euˬ mˬ taˆ g’aˬ k’ehˇ tiˬ g’aˬ k’oeˇ gaˇ yaw ̭ le-awˇ, paˬ kuˆ aˇ lawˆ k’oeˇ lawˆ-ahˇ yaw sheh ̭ bya le-euˬ meh. Mˬ taˆ g’aˬ k’ehˇ k’oeˇ g’aˬ Beˬtuˆluˆ-euˬ ba ̭ pu-ahˇ ngawˬ zuˆ-awˇ, "Yaw kawˇ-ehˇ tuˇ-awˬ" lehˇ laˆ noeˬ-euˬ meh. Beˬtuˆluˆ-euˬ aˬ la ̭-ahˇ pa ̭ taˬ-euˬ shmˇ caˆ k’oeˇ deuˬ ga puiˇ-iˇ-euˬ meh. ⁸ "Jo ̭ pa ̭ pa ̭ zi ̭-awˇ, sehˬ nawˆ nawˆ-awˬ" lehˇ, mˬ taˆ g’aˬ k’ehˇ k’oeˇ g’aˬ ehˇ ngeh, k’aˇ ehˇ-eu lo ̭-ehˇ Beˬtuˆluˆ jahˇ-euˬ meh. "Nawˬ-euˬ mehˬ tsoeˬ tsahˇ lahˇ-awˇ ngaˬ-euˬ mehˬ nah laˇ-awˬ" lehˇ, mˬ taˆ g’aˬ k’ehˇ k’oeˇ g’aˬ ehˇ-eu meh. ⁹ K’oeˇ naˇ, mˬ taˆ g’aˬ k’ehˇ k’oeˇ g’aˬ-euˬ mehˬ nah caw caw-ehˇ pa ̭ kuˆ la ̭ nyiˇ caw teh doˆ g’eh-euˬ meh. Mˬ taˆ g’aˬ k’ehˇ k’oeˇ g’aˬ k’oeˇ lo ̭-ehˇ jahˇ le-euˬ k’oeˇ aˬ diˇ ngeuˇ meh lehˇ aˬ yaw ̭ maˬ siˬ duˬ-ehˇ, yaw sahˇ la ̭ k’oeˇ ya mawˇ-euˬ jeˬ nga lehˇ teh ̭-ehˇ noeˬ-euˬ meh. ¹⁰ Aˬ yaw ̭ nya ̭-aˬ, lo ̭ duˬ yaw beh tsahˇ maˬ ehˇ, nyiˬ tsahˇ tiˬ tsahˇ maˬ ehˇ, oe dzeuˇ jiˇ-awˇ,meuˬ paw dahˇ doˆ-eu shmˇ laˇ g’oˆ g’oˆ ma-ahˇ oe keuˆ-euˬ meh. Laˇ g’oˆ g’oˆ ma k’oeˇ aˬ yawˇ yaw ̭ pah-iˇ-awˇ, aˬ yaw ̭ nya ̭ la ̭ nyiˇ iˇ doˆ g’eh-euˬ meh. Aˬ yaw ̭ nya ̭ gaˇ ma tiˬ kahˇ law caw iˇ lu ̭ ngeh, mˬ taˆ g’aˬ k’ehˇ k’oeˇ g’aˬ ja pyuˬ ni Beˬtuˆluˆ-ahˇ g’awˬ-iˇ-euˬ meh. ¹¹ K’oeˇ ngeh, Beˬtuˆluˆ yaw muiˬ paˬ-ehˇ noeˬ gahˇ laˇ-awˇ, heu lo ̭-ehˇ ehˇ-eu meh. "Nymˬ-mˇ poˆ jawˇ-aˬ, yu ̭ maˆ maˆ-eu maˬ ngeuˇ-ehˇ aˬ diˇ aˬ maˇ pyeu ̭ lu ̭ law hawˇ ngaˬ tawˇ. Sahˬpaˬ Miˬyehˇ-aˬ, aˬ yaw ̭-euˬ mˬ taˆ g’aˬ k’ehˇ pyehˬ g’eh le ̭-awˇ, Heˬloˆ-euˬ baoˬ la ̭ k’oeˇ maˬ ehˇ, Yuˇdaˆ tsawˇ haˬ deuˬ neh ngaˬ-ahˇ jahˇ nehˬ-eu lehˇ noeˬ tmˬ taˬ-euˬ jeˬ la ̭ k’oeˇ maˬ ehˇ, ngaˬ-ahˇ bi ka k’o ̭ le-euˬ ngaˇ." ¹² Gaˇ kawˆ k’oeˇ deuˬ-ahˇ aˬ yaw ̭ siˬ duˬ g’aˬ ngeh, Maˬkuˆ lehˇ k’aw ̭ kuˇ-eu Yoˇhaˬ-euˬ aˬ ma pyeu ̭-eu Maˬliˇ-euˬ nymˇ-ahˇ iˇ-euˬ meh. Tsawˇ haˬ g’awˬ mya ni k’oeˇ gaˇ uiˬ leˇ-awˇ guiˬ lahˬ shaˇ lu ̭-eu meh. ¹³ Aˬ yaw ̭ laˇ g’oˆ la ̭ nyiˇ g’oˆ-ahˇ k’oˆ ngeh, Loˇdeˬ lehˇ myahˇ-euˬ aˬ buˇ zaˬ k’aˆ tiˬ g’aˬ naˇ haˬ le-euˬ meh. ¹⁴ Beˬtuˆluˆ-euˬ teˇ saˇ-ahˇ aˬ yaw ̭ g’oˆ siˬ-awˇ, laˬ k’aˬ cehˇ dui dui-eu miˇ neh laˇ g’oˆ pah nehˬ-eu maˬ noeˬ ni iˇ kahˇ la ̭ k’oeˇ paˇ cehˆ uˇ g’eh-awˇ, Beˬtuˆluˆ laˇ g’oˆ dawˬ peh yaw ̭ lu ̭ meh lehˇ ehˇ gaˬ nehˬ-euˬ meh. ¹⁵ Aˬ yaw ̭ ma ̭ aˬ yaw ̭-ahˇ, "Nawˇ uˬ-iˇ-euˬ nya loˇ" lehˇ ehˇ nehˬ-euˬ meh. Ehˇ k’aw ̭, "Aˬ diˇ aˬ maˇ ngeuˇ meh" lehˇ teh ̭-ehˇ aˬ yaw ̭ ehˇ-eu miˇ neh, "Aˬ yaw ̭-euˬ yaw sahˇ teh ̭-a" lehˇ aˬ yaw ̭ ma ̭ ehˇ-eu meh. ¹⁶ K’oeˇ ngeh, Beˬtuˆluˆ-aˬ, laˇ g’oˆ-ahˇ maˬ naˬ leˇ ni k’oˆ lu ̭-eu meh. Aˬ yaw ̭ ma ̭ laˇ g’oˆ pah-iˇ ngeh, Beˬtuˆluˆ-ahˇ ya mawˇ-awˇ, zahˬ dui dui leˇ-euˬ meh. ¹⁷ Aˬ yaw ̭ ma ̭ ciˬ cuˇ ni jawˇ-eu g’aˇ duˬ aˬ yaw ̭ la ̭ dzawˇ dzawˇ nehˬ-awˇ, Sahˬpaˬ Miˬyehˇ neh aˬ yaw ̭-ahˇ pa ̭ kuˆ la ̭ k’oeˇ aˬ joˆ-ehˇ sheuˬ doˆ laˬ le-euˬ gaˇ kawˆ dzawˇ mehˬ nehˬ-awˇ, "Gaˇ kawˆ heu Yaˬkoˆ hawˇ-eu jah-eu tsawˇ haˬ deuˬ-ahˇ dzawˇ mehˬ nehˬ-awˬ" lehˇ ehˇ nehˬ-euˬ meh. K’oeˇ naˇ, aˬ yaw ̭ doˆ-iˇ-awˇ, yawˬ gaˇ yawˬ iˇ-euˬ meh. ¹⁸ Uˬ bya bya laˇ ngeh, Beˬtuˆluˆ iˇ zaˇ laˇ zaˇ maˬ siˬ ni byoˆ-iˇ-euˬ miˇ neh, k’oeˇ gaˇ lo ̭-eu yehˇ k’oeˇ deuˬ bahˬ g’a dui dui-eu meh. ¹⁹ Heˬloˆ neh dawˬ bi ̭-awˇ aˬ yaw ̭-ahˇ bi poˆ k’aw ̭, maˬ poˆ mawˇ nya-a. K’oeˇ miˇ neh, lo ̭-eu yehˇ k’oeˇ deuˬ-ahˇ Beˬtuˆluˆ bi cehˆ doˆ-euˬ gaˇ kawˆ naˇ haˬ g’aˬ-awˇ seh ̭-eu g’aˇ duˬ, aˬ yaw ̭ dawˬ bi ̭-euˬ meh. ²⁰ Heˬloˆ-aˬ, Duˇlu meuˬ hawˇ-eu Siˇdoˬ meuˬ-ahˇ jawˇ-eu tsawˇ haˬ deuˬ-ahˇ nui ma pehˇ dui dui-eu meh. K’oeˇ miˇ neh, aˬ yaw ̭ ma ̭ nui maˬ tiˬ siˬ teh ̭-ehˇ taˬ-eu la ̭ k’oeˇ, baˬ ma ̭ puˇ jeˬ-ehˇ aˬ yaw ̭-ahˇ tahˬ puˬ laˇ-euˬ meh. Sahˬ paˬ-euˬ hawˇ nymˇ-ahˇ aˬ yui ̭ geu ̭-awˇ haw-eu pyaˆ-eu g’aˬ pyeu ̭-eu Baˬlaˬduˇ-ahˇ jeˬ huˬ ja cawˬ-awˇ, Heˬloˆ nehˬ-ehˇ ja tsaˬ geu ̭ leˇ-euˬ meh. Aˬ jeˬ miˇ neh ehˇ naˇ, sahˬ paˬ Heˬloˆ-euˬ miˇ k’ahˬ-ahˇ aˬ yaw ̭ ma ̭ dzaˬ dzaˬ dawˇ dawˇ g’oe lu ̭-eu meh. ²¹ Ngehˬ cawˬ taˬ-euˬ aˇ nah keuˆ laˇ ngeh, Heˬloˆ-aˬ, sahˬ paˬ-euˬ dm g’aˬ dm lmˇ dm-awˇ, aˬ yaw ̭-euˬ dzoeˬ dzaˬ nuiˇ mahˬ k’oeˇ taˆ nuiˇ-awˇ, miˇ k’ahˬ zaˬ deuˬ-ahˇ dawˬ ngehˬ nehˬ-euˬ meh. ²² "Tsawˇ haˬ zaˬ dawˬ ngehˬ gaˇ maˬ duˇ nya. Miˬyehˇ dawˬ ngehˬ gaˇ duˇ nya" lehˇ aˬ yaw ̭ ma ̭ guˇ-eu meh. ²³ Ja pyuˬ ni, Sahˬpaˬ Miˬyehˇ-euˬ g’aˬ k’ehˇ neh Heˬloˆ-ahˇ k’ehˬ-euˬ meh. Aˬ jeˬ miˇ neh ehˇ naˇ, Miˬyehˇ-ahˇ aˬ yaw ̭ maˬ taˬ huiˬ-a. K’oeˇ miˇ neh, aˇ boeˬ aˇ mawˇ neh bi dzaˬ seh ̭-euˬ meh. ²⁴ K’oeˇ ngeh, Miˬyehˇ-euˬ dawˬ kawˬ-aˬ, tiˬ gaˇ saˇ-iˬ tiˬ gaˇ gaˬ byah-iˇ lu ̭-eu meh. ²⁵ Baˬnaˬbaˇ hawˇ-eu Sawˇluˆ aˬ nya ̭-aˬ, aˬ yaw ̭ nya ̭ ya mˇ-eu saˬ saˬ naˬ gaˇ mˇ luiˆ ya ̭-awˇ, Maˬkuˆ lehˇ k’aw ̭ kuˇ-eu Yoˇhaˬ-ahˇ sheuˬ-awˇ, Yeˬluˇsaˬlehˬ meuˬ-ahˇ neh g’o ̭ daˆ leˇ-euˬ meh.

¹ Aˬdiˇawˬ Ka li zaˬ aˇ muˇ la ̭ k’oeˇ, Miˬyehˇ g’aˇ duˬ ngehˬ dah-eu deuˬ hawˇ-eu mehˬ-eu tsoˆ-eu saˬ laˬ deuˬ jawˇ-eu meh. Tsawˇ haˬ k’oeˇ deuˬ-aˬ, Baˬnaˬbaˇ, Niˇgaˬ lehˇ kuˇ-eu Suˇmoˬ, Kuˇleˬniˬ miˇ k’ahˬ-ahˇ neh laˇ-euˬ Luˇgiˇ, sahˬ paˬ Heˬloˆ nehˬ-ehˇ tiˬ kawˆ lo ̭-ehˇ huiˬ laˇ-euˬ Maˬneˬ hawˇ-eu, Sawˇluˆ aˬ ha ma ̭ meh. ² Aˬ yaw ̭ ma ̭ maˬ dzaˬ-eu zahˇ jahˇ-awˇ Sahˬpaˬ Miˬyehˇ-ahˇ uˬ duˬ tahˬ tahˬ-ehˇ jawˇ ngeh, Muiˬ-eu shawˇ-eu Yaw sahˇ Miˬyehˇ aˬ yaw ̭ ma ̭-ahˇ ehˇ-eu, "Ngaˬ neh a yaw ̭ nya ̭-ahˇ bi mˇ-eu lehˇ kuˇ-euˬ gaˇ deuˬ-ahˇ bi mˇ-eu g’aˇ duˬ, Baˬnaˬbaˇ hawˇ-eu Sawˇluˆ aˬ ha nya ̭-ahˇ tseˇ doˆ-awˇ bi jawˇ-awˬ." ³ K’oeˇ ngeh, aˬ yaw ̭ ma ̭ maˬ dzaˬ-eu zahˇ jahˇ-awˇ guiˬ lahˬ shaˇ-eu la ̭ k’oeˇ, aˬ yaw ̭ nya ̭ k’oeˇ taˆ aˬ la ̭ ba ̭ daˆ nehˬ-awˇ k’ehˇ g’eh-euˬ meh. ⁴ Muiˬ-eu shawˇ-eu Yaw sahˇ Miˬyehˇ neh k’ehˇ g’eh-euˬ lo ̭-ehˇ Baˬnaˬbaˇ hawˇ-eu Sawˇluˆ aˬ nya ̭ Seˬluˇgiˇ meuˬ-ahˇ iˇ-awˇ, k’oeˇ gaˇ neh naˇ, Guˇbaˬluˇ iˇ jaw lahˇ-ahˇ lawˬ dziˬ-awˇ iˇ-euˬ meh. ⁵ Aˬ yaw ̭ nya ̭ Saˬlaˬmiˇ meuˬ-ahˇ iˇ keuˆ ngeh, uˬ duˬ tahˬ nymˇ doe ni Miˬyehˇ dawˬ kawˬ mehˬ nehˬ-euˬ meh. Aˬ yaw ̭ nya ̭-ahˇ caw ba-eu g’aˇ duˬ, Yoˇhaˬ k’aw ̭ jawˇ-eu meh. ⁶ Aˬ yaw ̭ ma ̭ iˇ jaw lahˇ k’oeˇ caw caw-ehˇ iˇ-awˇ, Baˬpuˇ meuˬ-ahˇ iˇ keuˆ ngeh, Baˬyeˬsuˇ lehˇ myahˇ-euˬ maw loˬ nya-eu Yuˇdaˆ tsawˇ haˬ tiˬ g’aˬ-ahˇ tahˬ puˬ-euˬ meh. Tsawˇ haˬ k’oeˇ g’aˬ aˬ yawˇ yaw ̭ Miˬyehˇ g’aˇ duˬ ngehˬ dah-eu Yuˇdaˆ tsawˇ haˬ ma lehˇ ehˇ-eu meh. ⁷ Seˬlaˬgiˇ Pawˇluˆ lehˇ myahˇ-euˬ iˇ jaw lahˇ miˇk’ahˬ k’oeˇ k’ahˬ-ahˇ uˆ lahˇ-eu sahˬ paˬ pyeu ̭-eu tsawˇ gahˇ ahˇ-eu tsawˇ haˬ k’oeˇ g’aˬ-ahˇ aˬ yaw ̭ g’oeˇ-eu meh. Sahˬ paˬ k’oeˇ g’aˬ Miˬyehˇ dawˬ kawˬ gaˬ maw ̭-eu miˇ neh, Baˬnaˬbaˇ hawˇ-eu Sawˇluˆ-ahˇ kuˇ-euˬ meh. ⁸ Ehˇ k’aw ̭, Heˬlaˬsaˇ dawˬ-ahˇ neh Eˇluˇma lehˇ myahˇ-euˬ maw loˬ nya-eu k’oeˇ g’aˬ aˬ yaw ̭ nya ̭-ahˇ laˆ tsoeˬ-awˇ, sahˬ paˬ k’oeˇ g’aˬ jah-eu tsawˇ haˬ maˬ bi pyeu ̭ laˇ ni leh jeh-eu meh. ⁹ K’oeˇ ngeh, Pawˇluˆ lehˇ kuˇ-eu Sawˇluˆ k’oeˇ g’aˬ Muiˬ-eu shawˇ-eu Yaw sahˇ Miˬyehˇ tiˬ byah ni ahˇ-eu la ̭ k’oeˇ, maw loˬ nya-eu k’oeˇ g’aˬ-ahˇ haw tsoˆ taˬ-awˇ, heu lo ̭-ehˇ ehˇ nehˬ-euˬ meh. ¹⁰ "Neh ̭sahˬpaˬ-euˬ zaˬ-oˇ, yaw muiˬ jeˬ dawˬ tawˆ lu ̭-ahˇ nawˇ muiˇ-eu meh. Nawˇ-aˬ, nui ma g’o ̭ dui dui-awˇ, SahˬpaˬMiˬyehˇ-euˬ yaw tsaˬ yaw dawˇ jeˬ-ahˇ jaˬ myaw ̭ mehˇ shuiˇ pyeu ̭-iˇ jiˇ ni leh jeh lu ̭-eu meh. ¹¹ SahˬpaˬMiˬyehˇ-euˬ aˬ la ̭ nawˬ-euˬ k’oeˇ taˆ nymˬ-mˇ keuˆ le-awˇ, nawˇ yaw sheh ̭-ahˇ maˬ mawˇ nya ni myaˆ beh ̭ beh ̭-iˇ-awˇ, tiˬ coeˬ tiˬ law ya shaˬ teh ̭-a." Tiˬ poˆ teh ̭-ehˇ, zahˇ tsui ni g’eh-eu juˬ k’oeˬ aˬ yaw ̭-euˬ myaˆ nuiˆ-ahˇ tmˬ tsoeˬ-awˇ, aˬ yaw ̭ jawˬ jawˬ-ehˇ cah cah-ehˇ, aˬ yaw ̭-euˬ aˬ la ̭-ahˇ tsahˇ-awˇ bi sheuˬ g’eh-eu tsawˇ haˬ-ahˇ poˆ-eu meh. ¹² K’oeˇ lo ̭-ehˇ pyeu ̭ laˇ-euˬ gaˇ sahˬ paˬ k’oeˇ g’aˬ ya mawˇ ngeh, Miˬyehˇ-ahˇ jah laˇ-euˬ meh. Aˬ jeˬ miˇ neh ehˇ naˇ, Sahˬpaˬ Miˬyehˇ-euˬ gaˇ kawˆ mehˬ nehˬ tsoˆ nehˬ gaˇ aˬ yaw ̭ zahˬ dui dui leˇ-euˬ meh. ¹³ Pawˇluˆ hawˇ-eu aˬ yaw ̭-euˬ cawˬ deuˬ lawˬ dziˬ-awˇ, Baˬpuˇ meuˬ-ahˇ neh Baˬpuˇliˇ miˇ k’ahˬ Beˬlaˬgeˬ meuˬ-ahˇ iˇ-euˬ meh. K’oeˇ gaˇ, Maˬkuˆ lehˇ k’aw ̭ kuˇ-eu Yoˇhaˬ k’oeˇ g’aˬ aˬ yaw ̭ nya ̭-ahˇ g’awˬ-iˇ-awˇ, Yeˬluˇsaˬlehˬ meuˬ-ahˇ g’o ̭ leˇ-euˬ meh. ¹⁴ Beˬlaˬgeˬ meuˬ-ahˇ neh tiˬ poˆ paˇ luˆ-iˇ-awˇ, Biˇsiˇdiˇ miˇ k’ahˬ Aˬdiˇawˬ meuˬ-ahˇ iˇ keuˆ-euˬ meh. K’oeˇ gaˇ, Jawˇ nah keuˆ laˇ ngeh, aˬ yaw ̭ nya ̭ uˬ duˬ tahˬ nymˇ-ahˇ daˆ leˇ-awˇ nuiˇ-euˬ meh. ¹⁵ Moˇseˬ-euˬ Zahˇ dawˬ k’o ̭ dawˬ sahˬ bo ̭ hawˇ-eu Miˬyehˇ g’aˇ duˬ ngehˬ dah-eu deuˬ neh bo ̭-euˬ sahˬ bo ̭ deuˬ-ahˇ gui g’aˬ ngeh, uˬ duˬ tahˬ nymˇ-ahˇ aˬ yui ̭ geu ̭-eu deuˬ aˬ yaw ̭ nya ̭-ahˇ heu lo ̭-ehˇ bi tsa ̭ gaˬ-iˇ-euˬ meh. "Tsawˇ haˬ heu deuˬ-ahˇ g’aˬ bi ̭ maw ̭-eu jeˬ jaˆ naˇ, naw nya ̭-ahˇ dawˬ ngehˬ-eu aˇ yamˬ bi ̭ maw ̭ miˇ-a." ¹⁶ K’oeˇ ngeh, Pawˇluˆ tsawˬ tuˇ laˇ-awˇ, la ̭ dzawˇ dzawˇ dzawˇ-ehˇ, heu lo ̭-ehˇ dawˬ ngehˬ ngehˬ-euˬ meh. "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ hawˇ-eu, Miˬyehˇ-ahˇ uˬ duˬ k’aˇ tahˬ-eu tsawˇ jeuˬ deuˬ-oˇ, ngaˇ ehˇ gaˇ tiˬ poˆ naˇ haˬ sheˇ. ¹⁷ Iˇsaˬleˬlaˆ tsawˇ jeuˬ-euˬ Miˬyehˇ-aˬ, aˬ dui-euˬ aˬ poeˬ aˬ bawˇ deuˬ-ahˇ tseˇ doˆ-awˇ, Iˇjiˇtuˆ miˇ k’ahˬ la ̭ k’oeˇ boeˇ miˬ siˬ k’aˬ geu ̭-awˇ ya deh ̭ lu ̭ ngeh, huiˬ-eu tsawˇ jeuˬ bi pyeu ̭ laˇ-euˬ meh. Miˬyehˇ-aˬ, huiˬ dui dui-eu aˬ yaw ̭-euˬ baoˬ-ahˇ g’oe-awˇ, aˬ yaw ̭ ma ̭-ahˇ Iˇjiˇtuˆ miˇ k’ahˬ la ̭ k’oeˇ neh sheuˬ doˆ nehˬ la ̭-euˬ meh. ¹⁸ K’oeˇ naˇ, oeˬ tseˇ k’o ̭ keuˆ ni bawˇ tsahˬ bawˇ dahˇ la ̭ k’oeˇ aˬ yaw ̭ ma ̭-ahˇ jeuˬ jeuˬ-ehˇ shaˬ-euˬ meh. ¹⁹ Kaˬnaˬ miˇ k’ahˬ la ̭ k’oeˇ jawˇ-euˬ tsawˇ jeuˬ shi ̭ jeuˬ-ahˇ aˬ yaw ̭ laˆ cawˆ nehˬ-awˇ, aˬ yaw ̭-euˬ tsawˇ haˬ deuˬ-ahˇ miˇ k’ahˬ k’oeˇ k’ahˬ bi ̭-euˬ meh. ²⁰ K’oeˇ lo ̭-ehˇ pyeu ̭ laˇ ngeh keuˆ ni, oeˬ yaˇ ngaˬ tseˇ k’o ̭ ga-euˬ meh. "K’oeˇ naˇ, Miˬyehˇ g’aˇ duˬ ngehˬ dah-eu g’aˬ pyeu ̭-eu Saˬmeuˬlaˆ-euˬ ziˇ maˬ keuˆ laˇ nmˇ kaˬ, yaˇ k’aˬ daˇ-eu tsawˇ haˬ deuˬ bi ̭ nehˬ-awˇ, aˬ yaw ̭ ma ̭-ahˇ bi uˆ lahˇ-euˬ meh. ²¹ K’oeˇ naˇ, aˬ yaw ̭ ma ̭ sahˬ paˬ shaˇ ngeh, Miˬyehˇ neh a yaw ̭ ma ̭-ahˇ Beˬyaˬmiˬ tsawˇ jeuˬ Giˇshaˆ-euˬ aˬ li Sawˇluˆ bi ̭ nehˬ-awˇ, aˬ yaw ̭ ma ̭ k’oeˇ taˆ sahˬ paˬ geu ̭-awˇ oeˬ tseˇ k’o ̭ bi uˆ lahˇ-euˬ meh. ²² Aˬ yaw ̭-ahˇ paˇ yuˇ dzeh ngeh jawˇ, Daˬbiˇ-ahˇ sahˬ paˬ paˇ bi geu ̭-euˬ meh. ’Yeˬshehˇ-euˬ aˬ li Daˬbiˇ-aˬ, ngaˇ k’aˇ bi mˇ maw ̭-eu jeˬ mˇ-eu, ngaˇ geu ̭ maw ̭-eu tsawˇ haˬ pyeu ̭ gaˇ ngaˇ ya mawˇ-euˬ ma’ lehˇ, Daˬbiˇ gaˇ kawˆ Miˬyeh neh ehˇ taˬ-euˬ jaˆ-eu meh. ²³ Daˬbiˇ-euˬ tsui ̭-ahˇ ta ̭-eu Yeˬsuˇ k’oeˇ g’aˬ, Miˬyehˇ neh saˇ jaˇ dzaˬ taˬ-euˬ jaˆ-eu lo ̭-ehˇ, Iˇsaˬleˬlaˆ tsawˇ jeuˬ-ahˇ Miˬyehˇ neh bi ̭ le ̭-euˬ ka k’o ̭-eu g’aˬ pyeu ̭-eu meh. ²⁴ Yeˬsuˇ gaˇ mˇ dahˬ maˬ beh mi naˆ-ehˇ, Iˇsaˬleˬlaˆ tsawˇ haˬ dawˬ tawˆ lu ̭ iˬ baˇ noeˬ poˆ-awˇ iˇ cu ̭ shawˇ-eu g’aˇ duˬ, Yoˇhaˬ dawˬ mehˬ mehˬ-euˬ meh. ²⁵ Yoˇhaˬ-aˬ, aˬ yaw ̭ ya mˇ-eu saˬ saˬ naˬ gaˇ aˇ saˬ saˬ-eu dawˬ peh peh laˇ ngeh, heu lo ̭-ehˇ ehˇ-eu meh. ’Ngaˇ aˬ suˇ g’aˬ nga lehˇ naw ma ̭ noeˬ te. Naw ma ̭ noeˬ tmˬ lu ̭-eu k’oeˇ g’aˬ ngaˇ maˬ ngeuˇ. Aˬ yaw ̭-aˬ, ngaˬ-euˬ jeˬ nah oe lu ̭ meh. Ngaˇ-aˬ, aˬ yaw ̭-euˬ sehˬ nawˆ aˇ caˆ puiˇ nehˬ-eu teh ̭-ehˇ k’aw ̭ mˇ-eu maˬ geuˇ nya.’ ²⁶ "Aˬbyaˬhaˬ-euˬ zaˬ deuˬ uˆ deuˬ pyeu ̭-eu ngaˬ-euˬ aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ hawˇ-eu, Miˬyehˇ-ahˇ uˬ duˬ k’aˇ tahˬ-eu aˬ cawˬ tsawˇ jeuˬ deuˬ-oˇ, ka k’o ̭-eu gaˇ kawˆ guiˬ lahˬ dawˬ heu-aˬ, aˬ dui-euˬ g’aˇ duˬ meh. ²⁷ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ hawˇ-eu aˬ yaw ̭ ma ̭-euˬ aˬ yui ̭ aˬ tsu deuˬ-aˬ, aˬ yaw ̭ Ka k’o ̭-eu g’aˬ pyeu ̭-eu gaˇ kawˆ siˬ nya-eu maˬ ngeuˇ-a. Jawˇ nah aˬ yaw ̭ nah yaw ̭ gui lu ̭-eu Miˬyehˇ g’aˇ duˬ ngehˬ dah-eu deuˬ-euˬ dawˬ-ahˇ k’aw ̭, aˬ yaw ̭ ma ̭ maˬ siˬ nya-a. Ehˇ k’aw ̭, aˬ yaw ̭ ma ̭ Yeˬsuˇ-ahˇ muiˇ-eu la ̭ k’oeˇ, Miˬyehˇ g’aˇ duˬ ngehˬ dah-eu deuˬ neh ehˇ taˬ-euˬ dawˬ byah laˇ ni jahˇ-euˬ meh. ²⁸ Aˬ yaw ̭-ahˇ seh ̭-eu lehˇ yaˇ k’aˬ bi daˇ paˬ-ehˇ huiˬ-eu yaw lehˬ maˬ poˆ doˆ nya k’aw ̭, aˬ yaw ̭-ahˇ seh ̭-eu g’aˇ duˬ sahˬ paˬ Piˇlaˆ-ahˇ aˬ yaw ̭ ma ̭ shaˇ-euˬ meh. ²⁹ Aˬ yaw ̭-euˬ gaˇ kawˆ Jaˇli ̭ la ̭ k’oeˇ k’aˇ ehˇ taˬ-euˬ lo ̭-ehˇ aˬ yaw ̭ ma ̭ mˇ byah g’aˬ jiˇ ngeh, aˬ yaw ̭-ahˇ la ̭ ya ̭ k’oeˇ taˆ neh ba ̭ ka-awˇ, lmˬ bymˇ la ̭ k’oeˇ ba ̭ pahˬ-iˇ-euˬ meh. ³⁰ Ehˇ k’aw ̭, Miˬyehˇ neh aˬ yaw ̭-ahˇ paˇ bi g’o ̭ deh ̭ laˇ-euˬ meh. ³¹ K’oeˇ naˇ, Gaˬliˬlehˇ miˇ k’ahˬ-ahˇ neh Yeˬluˇsaˬlehˬ meuˬ-ahˇ keuˆ ni aˬ yaw ̭ nehˬ-ehˇ k’aˇ cah-euˬ tsawˇ haˬ deuˬ-ahˇ, aˬ yaw ̭-euˬ g’awˇ mawˇ g’awˬ mya nah bi mawˇ-euˬ meh. Tsawˇ haˬ k’oeˇ deuˬ iˬ nah Iˇsaˬleˬlaˆ tsawˇ haˬ deuˬ-ahˇ saˇ kiˇ kamˬ lu ̭ meh. ³² Laˬ k’aˬ cehˇ-eu guiˬ lahˬ dawˬ heu, naw ma ̭ jawˇ gaˇ nga nya ̭ hehˇ la ̭-euˬ jeˬ pyeu ̭-eu ma. Aˬ dui-euˬ aˬ poeˬ aˬ bawˇ deuˬ-ahˇ Miˬyehˇ neh saˇ jaˇ dzaˬ taˬ-euˬ jeˬ, ³³ Yeˬsuˇ-ahˇ paˇ bi g’o ̭ deh ̭ laˇ-eu la ̭ k’oeˇ aˬ yaw ̭ ma ̭-euˬ zaˬ deuˬ pyeu ̭-eu aˬ dui-euˬ ziˇ-ahˇ bi byah laˇ-euˬ meh. Ja ceuˬ-eu sahˬ bo ̭ nyiˬ bymˇ tiˬ bymˇ la ̭ k’oeˇ, ’Nawˇ ngaˬ-euˬ zaˬ maˇ ma. Iˬ nah nawˬ-euˬ Aˬda, ngaˇ pyeu ̭ laˇ g’aˬ-euˬ ma’ lehˇ bo ̭ taˬ-euˬ meh. ³⁴ K’oeˇ naˇ, lmˬ bymˇ la ̭ k’oeˇ maˬ bi bu ̭-iˇ ni, shiˇ g’aˬ-euˬ gaˇ aˬ yaw ̭-ahˇ paˇ bi g’o ̭ deh ̭ laˇ-euˬ gaˇ kawˆ, Miˬyehˇ neh ehˇ taˬ-euˬ heu lo ̭-ehˇ jaˆ-eu meh. ’Daˬbiˇ-ahˇ ngaˇ saˇ jaˇ dzaˬ-euˬ, yaw duˬ baw-eu guiˬ lahˬ yaw shawˇ, naw ma ̭-ahˇ ngaˇ bi ̭ ma.’ ³⁵ Ja ceuˬ-eu sahˬ bo ̭ yawˬ tsahˇ yawˬ la ̭ k’oeˇ, ’Nawˬ-euˬ Muiˬ-eu shawˇ-eu G’aˬ-ahˇ, lmˬ bymˇ-ahˇ maˬ bi bu ̭-iˇ-aˇ’ lehˇ ehˇ taˬ-euˬ jaˆ-eu meh. ³⁶ Daˬbiˇ-aˬ, aˬ yaw ̭-euˬ tiˬ ziˇ Miˬyehˇ-euˬ nui k’ahˇ mˇ-awˇ, aˬ yaw ̭ shiˇ ngeh, aˬ yaw ̭-euˬ aˬ poeˬ aˬ bawˇ deuˬ nehˬ-ehˇ bi ba ̭ pahˬ-awˇ, aˬ yaw ̭-euˬ g’awˇ mawˇ lmˬ bymˇ la ̭ k’oeˇ bu ̭-iˇ-euˬ meh. ³⁷ Ehˇ k’aw ̭, shiˇ g’aˬ-euˬ gaˇ Miˬyehˇ neh paˇ bi g’o ̭ deh ̭ laˇ-euˬ g’aˬ-aˬ, k’oeˇ lo ̭-ehˇ maˬ ngeuˇ-a. ³⁸ K’oeˇ miˇ neh, aˬ yui ̭ aˬ nyiˇ deuˬ-oˇ, naw ma ̭ heu lo ̭-ehˇ siˬ duˬ-awˬ. Yeˬsuˇ baˬ da neh iˬ baˇ pyehˬ nehˬ-eu jeˬ-ahˇ za-eu gaˇ kawˆ naw ma ̭-ahˇ bya cehˆ ni bi gaˬ keuˆ le-awˇ, ³⁹ Moˇseˬ-euˬ Zahˇ dawˬ k’o ̭ dawˬ neh maˬ bi buˬ-iˇ nya-eu yawˬ jeˬ na lu ̭ la ̭ k’oeˇ, jah-eu tsawˇ haˬ deuˬ Yeˬsuˇ baˬ da neh buˬ-iˇ nya meh. ⁴⁰ Teu miˇ neh, Miˬyehˇ g’aˇ duˬ ngehˬ dah-eu deuˬ neh heu lo ̭-ehˇ ehˇ taˬ-euˬ k’oeˇ, naw ma ̭ k’oeˇ taˆ maˬ bi keuˆ le-eu g’aˇ duˬ yahˇ-awˬ. ⁴¹ ’Dawˬ doeˇ ngehˬ-eu deuˬ haw taˬ-awˬ. Zahˬ dui dui leˇ-awˇ shiˇ tsehˆ-awˬ. Aˬ jeˬ miˇ neh ehˇ naˇ, iˬ nah ngaˇ mˇ-eu g’eh-eu heu, aˬ cawˬ naw ma ̭-ahˇ ehˇ-euˬ k’aw ̭, naw ma ̭ ngeuˇ meh lehˇ maˬ duˇ-a’ lehˇ ehˇ taˬ-euˬ meh." ⁴² Pawˇluˆ hawˇ-eu Baˬnaˬbaˇ aˬ nya ̭ uˬ duˬ tahˬ nymˇ-ahˇ neh g’o ̭ le lu ̭ ngeh, Jawˇ nah-ahˇ tiˬ poˆ paˇ laˇ-awˇ gaˇ kawˆ k’oeˇ deuˬ ja mehˬ laˇ-eu g’aˇ duˬ, tsawˇ haˬ k’oeˇ deuˬ aˬ yaw ̭ nya ̭-ahˇ shaˇ-eu meh. ⁴³ Aˬ yaw ̭ ma ̭ uˬ duˬ tahˬ nymˇ-ahˇ daˆ laˇ-euˬ g’o ̭ ka-iˇ ngeh, Yuˇdaˆ tsawˇ haˬ g’awˬ mya ni hawˇ-eu Yuˇdaˆ tsawˇ haˬ pyeu ̭ laˇ-euˬ aˬ cawˬ tsawˇ jeuˬ g’awˬ mya ni, Pawˇluˆ hawˇ-eu Baˬnaˬbaˇ aˬ nya ̭-euˬ mehˬ nah caw teh laˇ-euˬ meh. Aˬ yaw ̭ nya ̭ aˬ yaw ̭ ma ̭-ahˇ dawˬ ngehˬ cawˬ-awˇ, Miˬyehˇ g’awˬ shaˬ gaˬ-eu jeˬ la ̭ k’oeˇ zi ̭ dah ni deh ̭ daˆ le ̭-eu g’aˇ duˬ g’aˬ bi ̭-euˬ meh. ⁴⁴ Jawˇ nah paˇ keuˆ laˇ ngeh, meuˬ la ̭ k’oeˇ jawˇ-eu tsawˇ haˬ yawˬ g’aˬ na lu ̭ ehˇ g’aˬ ni Miˬyehˇ dawˬ kawˬ naˇ haˬ laˇ-euˬ meh. ⁴⁵ Tsawˇ haˬ aˇ ma ̭ myaˬ dui dui gaˇ Yuˇdaˆ tsawˇ haˬ deuˬ ya mawˇ ngeh, myaˆ naˆ-awˇ, Pawˇluˆ ehˇ gaˇ tsawˇ pyehˇ pyehˇ pyehˇ-ehˇ, Pawˇluˆ-ahˇ yaˬ k’ehˇ yaˬ-euˬ meh. ⁴⁶ Ehˇ k’aw ̭, Pawˇluˆ hawˇ-eu Baˬnaˬbaˇ aˬ nya ̭ k’aˬ duˬ ni ngehˬ-eu la ̭ k’oeˇ, "Miˬyehˇ-euˬ dawˬ kawˬ heu naw ma ̭-ahˇ jeˬ huˬ ya ja mehˬ-eu ngeuˇ meh. Ehˇ k’aw ̭, naw ma ̭ maˬ naˇ haˬ geu ̭-ehˇ, mˬ maˬ maˬ byaˆ zaˇ ziˇ deh ̭-eu jeˬ-ahˇ za-eu geuˇ miˇ-a lehˇ maˬ shaˇ noeˬ-eu miˇ neh, naw ma ̭-ahˇ byehˇ-awˇ aˬ cawˬ tsawˇ jeuˬ-ahˇ mehˬ-iˇ-eu ma. ⁴⁷ Aˬ jeˬ miˇ neh ehˇ naˇ, SahˬpaˬMiˬyehˇ neh nga ma ̭-ahˇ bi ̭ taˬ-euˬ dawˬ-aˬ, heu lo ̭-ehˇ meh. ’Mˬ dzeˇ miˇ dzeˇ tuˆ gaˇ keuˆ ni, ka k’o ̭-eu jeˬ za-eu g’aˇ duˬ, aˬ cawˬ tsawˇ jeuˬ-ahˇ bya nehˬ ni, nawˬ-ahˇ yaw sheh ̭ bi pyeu ̭-eu ma"’ ⁴⁸ Aˬ cawˬ tsawˇ jeuˬ k’oeˇ deuˬ dawˬ k’oeˇ dawˬ-ahˇ ya gaˬ ngeh, Laˬ k’aˬ cehˇ-awˇ Miˬyehˇ-euˬ dawˬ kawˬ-ahˇ ja ceuˬ-euˬ meh. Mˬ maˬ maˬ byaˆ zaˇ ziˇ deh ̭-eu jeˬ za ni tseˇ doˆ taˬ-euˬ tsawˇ haˬ deuˬ, jah-eu tsawˇ haˬ pyeu ̭ laˇ-euˬ meh. ⁴⁹ Miˇ k’ahˬ k’oeˇ k’ahˬ-ahˇ Sahˬpaˬ Miˬyehˇ-euˬ dawˬ yawˬ gaˇ na lu ̭ gaˬ doe-iˇ-euˬ meh. ⁵⁰ Ehˇ k’aw ̭, meuˬ la ̭ k’oeˇ aˬ yui ̭ aˬ tsu geu ̭ lu ̭-eu deuˬ hawˇ-eu, Miˬyehˇ-ahˇ uˬ duˬ tahˬ-eu myaˆ pyawˬ naˇ mehˇ jaˆ-eu aˬ cawˬ tsawˇ jeuˬ zaˬ miˬ zaˬ deuˬ, Pawˇluˆ hawˇ-eu Baˬnaˬbaˇ-ahˇ nui ma pehˇ ni Yuˇdaˆ tsawˇ haˬ deuˬ kawˆ-awˇ, aˬ yaw ̭ nya ̭-ahˇ bi k’ehˬ-awˇ, miˇ k’ahˬ k’oeˇ k’ahˬ-ahˇ neh bi teh dzeh-euˬ meh. ⁵¹ G’aˬ k’ehˇ k’oeˇ nyiˬ g’aˬ-aˬ, aˬ yaw ̭ nya ̭-euˬ aˬ kuiˇ pehˬ zaˬ-ahˇ leh ̭-eu k’aˬ lehˇ aˬ yaw ̭ ma ̭-ahˇ sawˆ k’aˇ nehˬ ya ̭-awˇ Iˇgawˇniˇ meuˬ-ahˇ le-euˬ meh. ⁵² Aˬdiˇawˬ meuˬ-ahˇ jawˇ-eu jah-eu tsawˇ haˬ k’oeˇ deuˬ-aˬ, laˬ k’aˬ cehˇ-eu jeˬ hawˇ-eu Muiˬ-eu shawˇ-eu Yaw sahˇ Miˬyehˇ tiˬ byah ni ahˇ lu ̭-eu meh.

¹ Pawˇluˆ hawˇ-eu Baˬnaˬbaˇ aˬ nya ̭ Iˇgawˇniˇ meuˬ-ahˇ le keuˆ-awˇ jawˇ ngeh, Yuˇdaˆ tsawˇ haˬ-euˬ uˬ duˬ tahˬ nymˇ-ahˇ daˆ leˇ-awˇ dawˬ ngehˬ leˇ-euˬ meh. K’oeˇ gaˇ k’aw ̭, Yuˇdaˆ tsawˇ haˬ maˬ ehˇ, aˬ cawˬ tsawˇ jeuˬ maˬ ehˇ, g’awˬ mya ni jah-eu tsawˇ haˬ pyeu ̭ laˇ-euˬ meh. ² Ehˇ k’aw ̭, maˬ jah-eu Yuˇdaˆ tsawˇ haˬ deuˬ-aˬ, aˬ cawˬ tsawˇ jeuˬ-ahˇ kawˆ-awˇ, jah-eu tsawˇ haˬ deuˬ-ahˇ muiˇ laˇ ni jahˇ-euˬ meh. ³ G’aˬ k’ehˇ k’oeˇ nyiˬ g’aˬ k’oeˇ gaˇ g’awˬ myahˇ ni jawˇ-awˇ, Sahˬpaˬ Miˬyehˇ-euˬ gaˇ kawˆ k’aˬ duˬ ni mehˬ-euˬ meh. Sahˬpaˬ Miˬyehˇ neh aˬ yaw ̭ nya ̭-ahˇ zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu g’awˬ mya jeˬ jahˇ nya-eu baoˬ bi ̭-eu la ̭ k’oeˇ, aˬ yaw ̭-euˬ g’awˬ shaˬ gaˬ-eu jeˬ gaˇ kawˆ mehˬ-eu k’oeˇ tsaˬ-eu jeˬ pyeu ̭-eu saˇ kiˇ bi doˆ laˇ-euˬ meh. ⁴ Meuˬ k’oeˇ meuˬ-ahˇ jawˇ-eu tsawˇ haˬ deuˬ nyiˬ paˆ paˆ-iˇ-euˬ meh. Tiˬ paˆ na deuˬ Yuˇdaˆ tsawˇ haˬ deuˬ jawˇ paw pyawˬ-awˇ, tiˬ paˆ na deuˬ-aˬ, g’aˬ k’ehˇ k’oeˇ nyiˬ g’aˬ jawˇ paw pyawˬ-euˬ meh. ⁵ K’oeˇ naˇ, aˬ cawˬ tsawˇ jeuˬ tiˬ paˆ na deuˬ hawˇ-eu Yuˇdaˆ tsawˇ haˬ tiˬ paˆ na deuˬ-aˬ, aˬ yaw ̭ ma ̭-euˬ aˬ yui ̭ aˬ tsu deuˬ nehˬ-ehˇ gm leˇ-awˇ, g’aˬ k’ehˇ k’oeˇ nyiˬ g’aˬ-ahˇ yehˬ bawˬ sehˇ lu-ehˇ jahˇ nehˬ-awˇ k’aˬ lo biˬ-eu lehˇ g’eh-eu meh. ⁶ Gaˇ kawˆ k’oeˇ g’aˬ k’ehˇ k’oeˇ nyiˬ g’aˬ ya siˬ ngeh, Luˇdaˬlaˇ meuˬ, Deˬbeˬ meuˬ hawˇ-eu, dawˬ peh jaˆ-eu miˇ k’ahˬ-ahˇ cehˆ-euˬ meh. ⁷ K’oeˇ gaˇ, aˬ yaw ̭ ma ̭ Laˬ k’aˬ cehˇ-eu Guiˬ lahˬ dawˬ mehˬ-euˬ meh. ⁸ Luˇdaˬlaˇ meuˬ-ahˇ, deh ̭ le ngeh neh aˬ kuiˇ yaw cawˆ miˇ neh, gaˇ ma tiˬ to ̭-iˬ maˬ zoˬ haw-euˬ tsawˇ haˬ tiˬ g’aˬ jawˇ-eu meh. ⁹ Aˬ yaw ̭ nuiˇ-awˇ, Pawˇluˆ dawˬ ngehˬ gaˇ naˇ haˬ lu ̭-eu meh. Aˬ yaw ̭-aˬ, taˬ leˇ nya ni jah-eu nui ma ahˇ lu ̭ gaˇ Pawˇluˆ ya mawˇ-euˬ miˇ neh, aˬ yaw ̭-ahˇ haw tsoˆ-awˇ, ¹⁰ "Tuˇ-awˇ dawˇ coe ni yaw ̭-awˬ" lehˇ, teˇ saˇ yaw k’aˆ k’aˆ-ehˇ ehˇ nehˬ-euˬ meh. Tsawˇ haˬ k’oeˇ g’aˬ tsawˬ tuˇ laˇ-awˇ, gaˇ ma cah-euˬ meh. ¹¹ Pawˇluˆ k’oeˇ lo ̭-ehˇ mˇ-euˬ gaˇ tsawˇ haˬ aˇ ma ̭ ya mawˇ ngeh, "Miˬ yehˇ k’oeˇ deuˬ tsawˇ haˬ lo ̭-ehˇ pyeu ̭ le-awˇ, aˬ dui jawˇ gaˇ za ̭ le-euˬ ngaˇ" lehˇ, aˬ yaw ̭ ma ̭-euˬ Luˇgawˇni dawˬ-ahˇ neh guˇ-eu meh. ¹² Baˬnaˬbaˇ-ahˇ Juˇsaˆ lehˇ aˬ yaw ̭ ma ̭ myahˇ nehˬ-awˇ, Pawˇluˆ g’aˬ-aˬ ngehˬ zaˬ tmˇ zaˬ pyeu ̭-eu miˇ neh, Heˬmeˬ lehˇ myahˇ nehˬ-euˬ meh. ¹³ Meuˬ meuˬ dzeˇ jaˆ-eu Juˇsaˆ miˬ yehˇ-euˬ uˬ duˬ tahˬ nymˇ-ahˇ jawˇ-eu piˇ ma tiˬ g’aˬ, meuˬ-euˬ lahˇ k’ehˬ-ahˇ mawˇ neˇ mawˇ gaw hawˇ-eu aˇ yehˆ hehˇ la ̭-awˇ, aˬ yaw ̭ hawˇ-eu tsawˇ haˬ aˇ ma ̭ k’oeˇ deuˬ g’aˬ k’ehˇ k’oeˇ nyiˬ g’aˬ-ahˇ lawˇ nehˬ-eu lehˇ g’eh-eu meh. ¹⁴ Tsawˇ haˬ k’oeˇ deuˬ k’oeˇ lo ̭-ehˇ jahˇ-eu lehˇ g’eh-eu gaˇ kawˆ, Baˬnaˬbaˇ hawˇ-eu Pawˇluˆ aˬ nya ̭ ya gaˬ ngeh, aˬ yaw ̭ nya ̭ yawˬ ha dm lu ̭-eu mehˬ tsoeˬ g’eu pyaˬ-awˇ, heu lo ̭-ehˇ guˇ guˇ-ehˇ tsawˇ haˬ aˇ ma ̭ yaw kaˬ-ahˇ coeˬ uˇ g’eh-euˬ meh. ¹⁵ "Naw ma ̭ aˬ jeˬ miˇ neh teu lo ̭-ehˇ jahˇ te. Nga nya ̭ k’aw ̭ naw ma ̭ lo ̭-ehˇ tsawˇ haˬ zaˬ ma. Gaˇ dahˇ maˬ tsoeˬ-eu gaˇ kawˆ heu deuˬ-ahˇ naw ma ̭ byehˇ dzeh-awˇ, mˬ, miˇ, iˬ ma laˆ shaˆ hawˇ-eu k’oeˇ gaˇ k’aˇ jawˇ k’aˇ jaˆ-eu yawˬ jeˬ na lu ̭-ahˇ beh-euˬ g’aˬ pyeu ̭-eu deh ̭ lu ̭-eu Miˬyehˇ jawˇ paw bi g’o ̭ pyawˇ laˇ-eu g’aˇ duˬ, nga nya ̭ heu gaˇ Laˬ k’aˬ cehˇ-eu Guiˬ lahˬ dawˬ mehˬ laˇ-euˬ ma. ¹⁶ Dzeuˇlaˇ-euˬ aˇ yamˬ-ahˇ, tsawˇ jeuˬ dawˬ tawˆ lu ̭ yawˬ ha-euˬ zahˇ yawˬ ha tawˬ-awˇ bi deh ̭ tawˬ-euˬ meh. ¹⁷ Ehˇ k’aw ̭, aˬ yaw ̭ neh mˇ-euˬ yaw muiˬ jeˬ la ̭ k’oeˇ, aˬ yaw ̭ deh ̭ lu ̭ jawˇ lu ̭-eu gaˇ kawˆ aˬ myah lu ̭ bi siˬ bi mawˇ-euˬ meh. Aˬ yaw ̭ naw ma ̭-ahˇ mˬ k’oeˇ taˆ neh uˬ yehˇ bi yehˇ le-awˇ, aˇ yamˬ tsaˬ ngeh dzaˬ la g’o cehˇ bi keuˆ le-euˬ meh. Naw ma ̭-ahˇ dzaˬ dzaˬ dawˇ dawˇ bi ̭-awˇ, naw ma ̭-euˬ nui ma la ̭ k’oeˇ laˬ k’aˬ cehˇ-eu jeˬ bi byah laˇ-euˬ meh." ¹⁸ Aˬ yaw ̭ nya ̭ k’oeˇ naˆ ni ehˇ keuˆ-awˇ, aˬ yaw ̭ ma ̭ neh aˬ yaw ̭ nya ̭-ahˇ maˬ bi lawˇ-eu g’aˇ duˬ maˬ g’aˬ maˬ na-ehˇ ja g’aˬ-euˬ meh. ¹⁹ Biˇsiˇdiˇ miˇ k’ahˬ Aˬdiˇawˬ meuˬ hawˇ-eu Iˇgawˇniˇ meuˬ-ahˇ jawˇ-eu Yuˇdaˆ tsawˇ haˬ tiˬ deuˬ laˇ-awˇ, tsawˇ haˬ aˇ ma ̭-ahˇ aˬ yaw ̭ ma ̭ jawˇ paw pyawˬ ni mehˇ shuiˇ shuiˇ tawˆ-awˇ, Pawˇluˆ-ahˇ k’aˬ lo biˬ-awˇ, shiˇ-euˬ ngaˇ lehˇ noeˬ-awˇ, meuˬ la ̭ nyiˇ g’eu dzeh ha-iˇ-euˬ meh. ²⁰ Ehˇ k’aw ̭, jah-eu tsawˇ haˬ deuˬ aˬ yaw ̭ ga-eu tiˬ jawˬ uiˬ le ngeh, aˬ yaw ̭ tuˇ laˇ-awˇ, meuˬ-ahˇ g’o ̭ uˇ leˇ-euˬ meh. Yawˬ nah yawˬ, Baˬnaˬbaˇ aˬ yaw ̭ nya ̭-ehˇ Deˬbeˬ meuˬ-ahˇ iˇ-euˬ meh. ²¹ Pawˇluˆ hawˇ-eu Baˬnaˬbaˇ aˬ nya ̭ Deˬbeˬ meuˬ-ahˇ Laˬ k’aˬ cehˇ-eu Guiˬ lahˬ dawˬ mehˬ-awˇ, tsawˇ haˬ g’awˬ mya ni zaˬ lahˇ pyeu ̭ laˇ-euˬ meh. K’oeˇ naˇ, Luˇdaˬlaˇ meuˬ, Iˇgawˇniˇ meuˬ, Biˇsiˇdiˇ miˇ k’ahˬ-ahˇ jaˆ-eu Aˬdiˇawˬ meuˬ heu deuˬ-ahˇ, tiˬ meuˬ saˇ-iˬ tiˬ meuˬ g’o ̭ leˇ lu ̭-eu meh. ²² Jah-eu jeˬ la ̭ k’oeˇ zi ̭ ni, jah-eu tsawˇ haˬ deuˬ-ahˇ aˬ yaw ̭ nya ̭ g’aˬ bi ̭ ya ̭-euˬ meh. "Miˬyehˇ miˇ k’ahˬ-ahˇ uˇ leˇ-eu g’aˇ duˬ, shaˬ zahˬ g’awˬ mya jeˬ-ahˇ aˬ dui ya tahˬ puˬ teh ̭-a" lehˇ mehˬ nehˬ tsoˆ nehˬ ya ̭-euˬ meh. ²³ Ka li zaˬ aˇ muˇ yawˬ muˇ na lu ̭ la ̭ k’oeˇ, aˬ yui ̭ aˬ tsu tseˇ doˆ nehˬ-awˇ, maˬ dzaˬ-eu zahˇ jahˇ-awˇ guiˬ lahˬ shaˇ-eu la ̭ k’oeˇ, aˬ yaw ̭ ma ̭ jah lu ̭-eu Sahˬpaˬ Miˬyehˇ-euˬ aˬ la ̭ la ̭ k’oeˇ a nehˬ ya ̭-euˬ meh. ²⁴ Biˇsiˇdiˇ miˇ k’ahˬ doe ni cah g’aˬ-awˇ, Paˬbuˇliˇ miˇ k’ahˬ-ahˇ paˇ g’o ̭ ka le-euˬ meh. ²⁵ Beˬlaˬgeˬ meuˬ-ahˇ Miˬyehˇ dawˬ kawˬ mehˬ nehˬ ya ̭-awˇ, Aˬdaˬliˇ meuˬ-ahˇ iˇ-euˬ meh. ²⁶ K’oeˇ gaˇ neh naˇ, lawˬ dziˬ-awˇ Aˬdiˇawˬ meuˬ-ahˇ g’o ̭ keuˆ-iˇ-euˬ meh. Nymˬ-mˇ aˬ yaw ̭ nya ̭ neh mˇ g’aˬ-euˬ gaˇ heu deuˬ-ahˇ aˬ yaw ̭ nya ̭ mˇ-eu lehˇ g’eh ngeh, Aˬdiˇawˬ meuˬ la ̭ k’oeˇ aˬ yaw ̭ nya ̭-ahˇ Miˬyehˇ-euˬ aˬ la ̭ la ̭ k’oeˇ a nehˬ-euˬ meh. ²⁷ Aˬ yaw ̭ nya ̭ Aˬdiˇawˬ meuˬ-ahˇ g’o ̭ keuˆ le ngeh, Ka li zaˬ aˇ muˇ la ̭ k’oeˇ jawˇ-eu tsawˇ haˬ deuˬ-ahˇ kuˇ uiˬ-awˇ, aˬ yaw ̭ nya ̭ nehˬ-ehˇ Miˬyehˇ neh k’aˇ mˇ k’aˇ shaˇ-euˬ gaˇ kawˆ hawˇ-eu, aˬ cawˬ tsawˇ jeuˬ deuˬ jah-eu tsawˇ haˬ pyeu ̭ laˇ ni Miˬyehˇ gaˇ ma aˬ joˆ-ehˇ pah nehˬ la ̭-euˬ gaˇ kawˆ dzawˇ nehˬ-euˬ meh. ²⁸ K’oeˇ naˇ, jah-eu tsawˇ haˬ k’oeˇ deuˬ nehˬ-ehˇ, k’oeˇ gaˇ aˬ yaw ̭ nya ̭ g’awˬ myahˇ ni jawˇ-euˬ meh.

¹ Yuˇdaˆ miˇ k’ahˬ-ahˇ jawˇ-eu tsawˇ haˬ tiˬ paˆ na deuˬ Aˬdiˇawˬ meuˬ-ahˇ laˇ-awˇ, "Moˇseˬ-euˬ Zahˇ dawˬ k’o ̭ dawˬ la ̭ k’oeˇ ehˇ taˬ-euˬ lo ̭-ehˇ baˆ k’oˆ mehˬ dzaˬ maˬ yehˬ naˇ, naw ma ̭ ka k’o ̭-eu jeˬ-ahˇ maˬ za nya-aˇ" lehˇ, jah-eu tsawˇ haˬ deuˬ-ahˇ mehˬ laˇ-euˬ meh. ² Gaˇ kawˆ k’oeˇ-ahˇ ta ̭ leˇ-awˇ, Pawˇluˆ hawˇ-eu Baˬnaˬbaˇ aˬ nya ̭ tsawˇ haˬ k’oeˇ deuˬ nehˬ-ehˇ pyehˇ dui dui-euˬ meh. K’oeˇ miˇ neh, gaˇ kawˆ k’oeˇ hmˬ-ahˇ ta ̭ leˇ-awˇ, Pawˇluˆ hawˇ-eu Baˬnaˬbaˇ aˬ nya ̭-ahˇ, Aˬdiˇawˬ meuˬ-ahˇ jawˇ-eu tsawˇ haˬ tiˬ paˆ na deuˬ nehˬ-ehˇ Yeˬluˇsaˬlehˬ meuˬ-ahˇ bi iˇ-awˇ, g’aˬ k’ehˇ deuˬ hawˇ-eu aˬ yui ̭ aˬ tsu deuˬ nehˬ-ehˇ bi ja cawˬ-iˇ-eu g’aˇ duˬ ja tsehˆ-euˬ meh. ³ Aˬ yaw ̭ ma ̭-ahˇ Ka li zaˬ aˇ muˇ neh k’ehˇ-awˇ bi iˇ-euˬ meh. Piˇniˇshaˆ miˇ k’ahˬ hawˇ-eu Saˬmaˬliˆ miˇ k’ahˬ k’oeˇ deuˬ-ahˇ iˇ lu ̭ ngeh, aˬ cawˬ tsawˇ jeuˬ deuˬ Miˬyehˇ jawˇ paw g’o ̭ pyawˇ laˇ-euˬ gaˇ kawˆ ja mehˬ-euˬ meh. Gaˇ kawˆ k’oeˇ k’aˇ ya gaˬ-euˬ jah-eu tsawˇ haˬ dawˬ tawˆ lu ̭, laˬ k’aˬ cehˇ dui dui-euˬ meh. ⁴ Aˬ yaw ̭ ma ̭ Yeˬluˇsaˬlehˬ meuˬ-ahˇ iˇ keuˆ ngeh, Ka li zaˬ aˇ muˇ maˬ ehˇ, g’aˬ k’ehˇ deuˬ maˬ ehˇ, aˬ yui ̭ aˬ tsu deuˬ maˬ ehˇ, aˬ yaw ̭ ma ̭-ahˇ laˬ k’aˬ tiˬ cehˇ ha-euˬ meh. K’oeˇ ngeh, aˬ yaw ̭ nya ̭-ahˇ g’oe-awˇ Miˬyehˇ neh k’aˇ mˇ k’aˇ shaˇ-euˬ jeˬ dawˬ tawˆ lu ̭, aˬ yaw ̭ ma ̭-ahˇ dzawˇ mehˬ nehˬ-euˬ meh. ⁵ Ehˇ k’aw ̭, Paˬliˬsehˇ aˇ muˇ-ahˇ uˇ-eu jah-eu tsawˇ haˬ tiˬ paˆ na deuˬ tuˇ laˇ-awˇ, "Aˬ cawˬ tsawˇ jeuˬ g’eh baˆ k’oˆ mehˬ dzaˬ ya bi yehˬ-awˇ, Moˇseˬ-euˬ Zahˇ dawˬ k’o ̭ dawˬ-ahˇ ya bi caw teh teh ̭-a" lehˇ ehˇ-eu meh. ⁶ K’oeˇ ngeh, g’aˬ k’ehˇ deuˬ hawˇ-eu aˬ yui ̭ aˬ tsu deuˬ uiˬ leˇ-awˇ, gaˇ kawˆ k’oeˇ bawˬ dzaˬ-euˬ meh. ⁷ Gaˇ kawˆ k’oeˇ aˬ yaw ̭ ma ̭ ja dui dui-euˬ meh. G’awˬ myahˇ ni ja keuˆ la ̭ ngeh Beˬtuˆluˆ tuˇ laˇ-awˇ, heu lo ̭-ehˇ ehˇ-eu meh. "Aˬ yui ̭ aˬ nyiˇ deuˬ-oˇ, aˬ cawˬ tsawˇ jeuˬ g’eh Laˬ k’aˬ cehˇ-eu Guiˬ lahˬ dawˬ heu-ahˇ ya gaˬ-awˇ jah laˇ nya ni dawˬ mehˬ mehˬ-iˇ-eu g’aˇ duˬ, aˬ dui ma ̭ la ̭ k’oeˇ yaw beh ngeh neh Miˬyehˇ ngaˬ-ahˇ tseˇ doˆ-euˬ naw ma ̭ siˬ nya lu ̭ meh. ⁸ Tsawˇ haˬ zaˬ-euˬ nui ma-ahˇ siˬ jiˇ mawˇ jiˇ lu ̭-eu Miˬyehˇ-aˬ, aˬ dui-ahˇ Muiˬ-eu shawˇ-eu Yaw sahˇ Miˬyehˇ bi ̭ la ̭-euˬ lo ̭-ehˇ, aˬ cawˬ tsawˇ jeuˬ-ahˇ k’aw ̭ bi ̭ nehˬ-eu la ̭ k’oeˇ, aˬ yaw ̭ ma ̭-ahˇ k’aw ̭ aˬ yaw ̭ ha geu ̭-eu gaˇ kawˆ aˬ dui-ahˇ bya cehˆ ni bi mawˇ la ̭-euˬ meh. ⁹ Aˬ dui hawˇ-eu aˬ yaw ̭ ma ̭-ahˇ aˬ yaw ̭ tiˬ jeˬ-iˬ maˬ sawˇ beu-a. Aˬ yaw ̭ ma ̭ jah-eu miˇ neh, aˬ yaw ̭ iˬ baˇ pyehˬ nehˬ-euˬ meh. ¹⁰ Toˆ-ehˇ ngeuˇ naˇ, aˬ dui-euˬ aˬ poeˬ aˬ bawˇ deuˬ maˬ ehˇ, aˬ dui maˬ ehˇ, maˬ daˬ coeˇ-eu k’aˆ behˆ k’oeˇ-ahˇ jah-eu tsawˇ haˬ deuˬ-euˬ naˇ k’ah ciˬ pi nehˬ-eu la ̭ k’oeˇ, aˬ jeˬ miˇ neh naw ma ̭ Miˬyehˇ-ahˇ lawˬ haw-eu g’eh te. ¹¹ Sahˬpaˬ Yeˬsuˇ-euˬ guiˬ lahˬ yaw dzahˇ baˬ da neh aˬ dui ka k’o ̭-eu jeˬ za-euˬ ma lehˇ jah-eu ma. K’oeˇ lo ̭-ehˇ duˇ ni, aˬ yaw ̭ ma ̭ k’aw ̭ ka k’o ̭-eu jeˬ k’oeˇ lo ̭-ehˇ za teh ̭-a." ¹² Baˬnaˬbaˇ hawˇ-eu Pawˇluˆ aˬ nya ̭, Miˬyehˇ neh aˬ yaw ̭ nya ̭-ahˇ g’oe-awˇ aˬ cawˬ tsawˇ jeuˬ-euˬ mehˬ shi mˇ mehˬ-euˬ zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu jeˬ gaˇ kawˆ dzawˇ mehˬ ngeh, uiˬ laˇ taˬ-euˬ tsawˇ haˬ dawˬ tawˆ lu ̭ ciˬ cuˇ ni jawˇ-awˇ naˇ haˬ-euˬ meh. ¹³ Aˬ yaw ̭ nya ̭ dzawˇ mehˬ g’aˬ ngeh, Yaˬkoˆ heu lo ̭-ehˇ ehˇ-eu meh. "Aˬ yui ̭ aˬ nyiˇ deuˬ-oˇ, ngaˇ ehˇ gaˇ tiˬ poˆ naˇ haˬ sheˇ. ¹⁴ Aˬ cawˬ tsawˇ jeuˬ la ̭ k’oeˇ Miˬyehˇ-ahˇ ta ̭-eu aˇ muˇ tiˬ muˇ bi baw laˇ-euˬ la ̭ k’oeˇ, aˬ cawˬ tsawˇ jeuˬ-ahˇ g’eh Miˬyehˇ ha geu ̭ dahˬ beh-euˬ gaˇ kawˆ bya cehˆ ni bi siˬ bi mawˇ la ̭-euˬ k’oeˇ hmˬ, Siˇmoˬ neh naw ma ̭-ahˇ ja mehˬ g’aˬ-euˬ meh. ¹⁵ Gaˇ kawˆ heu Miˬyehˇ g’aˇ duˬ ngehˬ dah-eu deuˬ neh ehˇ taˬ ya ̭-euˬ dawˬ-ahˇ tsaˬ dui dui leˇ-eu meh. Jaˇli ̭ la ̭ k’oeˇ ehˇ taˬ-euˬ-aˬ, ¹⁶ ’Gaˇ kawˆ heu deuˬ pyeu ̭ laˇ g’aˬ ngeh, ngaˬ-euˬ g’awˇ mawˇ paˇ g’o ̭ le-awˇ, Daˬbiˇ-euˬ miˇ k’ahˬ laˆ zi ̭ ma. Yaw cawˆ deuˬ-ahˇ paˇ gawˬ muiˬ-awˇ, zi ̭ dah ni paˇ bi pyeu ̭ laˇ ma. ¹⁷ Dzeˇ-eu miˇ tsaˬ tsawˇ jeuˬ dawˬ tawˆ, ngaˇ jawˇ gaˇ g’o ̭ laˇ jiˇ teh ̭-a. Ngaˬ-euˬ tsawˇ haˬ bi pyeu ̭-eu lehˇ, ngaˬ neh kuˇ-euˬ aˬ cawˬ tsawˇ jeuˬ, dawˬ tawˆ g’o ̭ laˇ jiˇ teh ̭-a lehˇ, ¹⁸ gaˇ kawˆ heu deuˬ aˇ hu ba neh, bi siˬ la ̭-euˬ yaw sahˇ pyeu ̭-eu, SahˬpaˬMiˬyehˇ ehˇ taˬ-euˬ meh.’ ¹⁹ "K’oeˇ miˇ neh, Miˬyehˇ jawˇ paw g’o ̭ pyawˇ laˇ lu ̭-eu aˬ cawˬ tsawˇ jeuˬ deuˬ-ahˇ laˆ bahˬ-eu maˬ tsaˬ-a lehˇ ngaˇ ehˇ tsehˆ-eu ma. ²⁰ Ehˇ k’aw ̭, aˬ yaw ̭ ma ̭-ahˇ sahˬ bo ̭ bo ̭ nehˬ-awˇ, tahˬ pahˬ aˬ ma mawˇ kawˇ-ahˇ lawˇ nehˬ-euˬ maˬ shawˇ-eu dzaˇ deuˬ-ahˇ dzaˬ-eu, maˬ tsaˬ maˬ dawˇ-eu la ̭ k’oeˇ k’aˬ miˬ sheu ta ̭-eu, shiˬ maˬ seh ̭ dzeˇ ni pa ̭ seh ̭-euˬ shaˬ jiˇ hawˇ-eu shiˬ dzaˬ-eu, heu deuˬ-ahˇ maˬ mˇ ni ya yahˇ meh lehˇ ehˇ nehˬ-eu tsaˬ teh ̭-a. ²¹ Aˬ jeˬ miˇ neh ehˇ naˇ, Jawˇ nah aˬ yaw ̭ nah yaw ̭ uˬ duˬ tahˬ nymˇ la ̭ k’oeˇ aˇ hu ba neh Moˇseˬ-euˬ Zahˇ dawˬ k’o ̭ dawˬ gui mehˬ ka le ̭-awˇ, meuˬ yawˬ meuˬ na lu ̭ la ̭ k’oeˇ dawˬ k’oeˇ deuˬ mehˬ nehˬ-euˬ meh." ²² K’oeˇ naˇ, aˬ yaw ̭ ma ̭ la ̭ k’oeˇ tsawˇ haˬ tseˇ doˆ-awˇ, Pawˇluˆ hawˇ-eu Baˬnaˬbaˇ nehˬ-ehˇ Aˬdiˇawˬ meuˬ-ahˇ bi le-eu g’aˇ duˬ, g’aˬ k’ehˇ deuˬ hawˇ-eu aˬ yui ̭ aˬ tsu deuˬ Ka li zaˬ aˇ muˇ nehˬ-ehˇ bawˬ dzaˬ tsehˆ-euˬ meh. Jah-eu tsawˇ haˬ deuˬ yaw zeu baw dui dui-eu Baˬsaˬbaˆ lehˇ kuˇ-eu Yuˇdaˆ hawˇ-eu Siˬlaˆ aˬ nya ̭-ahˇ tseˇ doˆ-awˇ, ²³ sahˬ bo ̭ heu ta ̭ aˬ yaw ̭ nya ̭ nehˬ-ehˇ dawˆ caw g’eh-euˬ meh. "Aˬdiˇawˬ meuˬ, Suˇliˆ miˇ k’ahˬ hawˇ-eu, Giˇliˇciˆ miˇ k’ahˬ heu deuˬ-ahˇ jawˇ-eu Yuˇdaˆ tsawˇ haˬ maˬ ngeuˇ-eu aˬ yui ̭ aˬ nyiˇ deuˬ jawˇ gaˇ, naw ma ̭-euˬ aˬ yui ̭ aˬ nyiˇ pyeu ̭-eu nga ma ̭ g’aˬ k’ehˇ deuˬ hawˇ-eu aˬ yui ̭ aˬ tsu deuˬ, sahˬ bo ̭ bo ̭-awˇ dawˬ cawˬ puˬ ahˇ le ̭-eu ma. ²⁴ Nga ma ̭-euˬ tsawˇ haˬ tiˬ paˆ na deuˬ naw ma ̭ jawˇ gaˇ laˇ-awˇ, naw ma ̭-euˬ nui ma suˬ saˬ-awˇ poˆ poˆ laˆ laˆ-ehˇ noeˬ ni mehˬ laˇ-euˬ gaˇ kawˆ ya gaˬ g’aˬ-euˬ ma. Tsawˇ haˬ k’oeˇ deuˬ-ahˇ nga ma ̭ neh mehˬ-awˇ bi laˇ-euˬ maˬ ngeuˇ. ²⁵ K’oeˇ miˇ neh, nga ma ̭ bawˬ dzaˬ-awˇ dawˬ tawˆ lu ̭ nui ma tsaˬ-eu la ̭ k’oeˇ, naw ma ̭ jawˇ gaˇ bi laˇ-eu tsawˇ haˬ tseˇ doˆ-euˬ ma. Aˬ dui-euˬ Sahˬpaˬ Yeˬsuˇ Ka li g’aˇ duˬ yawˬ ha-euˬ g’awˇ mawˇ shiˇ gaˇ maˬ guˆ ni gaˇ mˇ-eu nga ma ̭ zawˇ gaˬ-eu Baˬnaˬbaˇ hawˇ-eu Pawˇluˆ aˬ nya ̭ nehˬ-ehˇ, nga ma ̭ neh tseˇ doˆ-euˬ tsawˇ haˬ bi laˇ caw ma. ²⁷ Yuˇdaˆ hawˇ-eu Siˬlaˆ aˬ nya ̭-ahˇ bi laˇ ma. Nga ma ̭ neh k’aˇ bo ̭ taˬ-euˬ gaˇ kawˆ heu, aˬ yaw ̭ nya ̭ dzawˇ nehˬ la ̭ teh ̭-a. ²⁸ Maˬ caw teh-ehˇ maˬ g’eh nya-eu zahˇ sahˇ k’o ̭ heu deuˬ maˬ ngeuˇ naˇ, naw ma ̭-ahˇ k’aˆ behˆ aˇ dzehˬ maˬ ciˬ pi nehˬ-eu g’aˇ duˬ, Muiˬ-eu shawˇ-eu Yaw sahˇ Miˬyehˇ hawˇ-eu nga ma ̭ nui ma tsaˬ-eu ma. ²⁹ Tahˬ pahˬ aˬ ma mawˇ kawˇ-ahˇ lawˇ nehˬ g’aˬ-euˬ jeˬ taˬ dzaˬ. Shiˬ taˬ dzaˬ. Shiˬ maˬ seh ̭ dzeˇ ni pa ̭ seh ̭-euˬ shaˬ jiˇ taˬ dzaˬ. Maˬ tsaˬ maˬ dawˇ-eu la ̭ k’oeˇ k’aˬ miˬ taˬ sheu. Heu deuˬ-ahˇ maˬ mˇ ni g’eh nya naˇ, muiˬ dui dui teh ̭-a. Guiˬ lahˬ huiˬ lu ̭-uˇ." ³⁰ K’ehˇ g’eh-euˬ tsawˇ haˬ k’oeˇ deuˬ Aˬdiˇawˬ meuˬ-ahˇ iˇ keuˆ ngeh, jah-eu tsawˇ haˬ dawˬ tawˆ lu ̭ kuˇ uiˬ-awˇ, sahˬ bo ̭ k’oeˇ ta ̭ bi ̭ nehˬ-euˬ meh. ³¹ Aˬ yaw ̭ ma ̭ sahˬ bo ̭ k’oeˇ ta ̭-ahˇ gui haw ngeh, aˬ yaw ̭ ma ̭-ahˇ g’aˬ bi ̭ nehˬ-eu gaˇ kawˆ bo ̭ taˬ-euˬ miˇ neh laˬ k’aˬ cehˇ dui dui-eu meh. ³² Yuˇdaˆ hawˇ-eu Siˬlaˆ aˬ nya ̭ k’aw ̭, Miˬyehˇ g’aˇ duˬ ngehˬ dah-eu tsawˇ haˬ pyeu ̭-eu lo ̭-ehˇ, aˬ yaw ̭ ma ̭-ahˇ dawˬ g’awˬ myahˇ ni ngehˬ-awˇ g’aˬ bi ̭ lahˬ nehˬ-euˬ meh. ³³ Aˬ yaw ̭ nya ̭ k’oeˇ gaˇ tiˬ k’ehˬ jawˇ g’aˬ ngeh, aˬ yaw ̭ nya ̭-ahˇ k’ehˇ g’eh la ̭-euˬ deuˬ jawˇ gaˇ bi g’o ̭-iˇ-eu g’aˇ duˬ, jah-eu tsawˇ haˬ k’oeˇ deuˬ aˬ yaw ̭ nya ̭-ahˇ laˬ k’aˬ cehˇ taˆ ni pyehˬ nehˬ-euˬ meh. ³⁵ Pawˇluˆ hawˇ-eu Baˬnaˬbaˇ aˬ nya ̭-aˬ, Aˬdiˇawˬ meuˬ la ̭ k’oeˇ tiˬ k’ehˬ tiˬ yamˬ jawˇ-awˇ, aˬ cawˬ g’awˬ mya g’aˬ nehˬ-ehˇ tiˬ kawˆ lo ̭-ehˇ Sahˬpaˬ Miˬyehˇ-euˬ dawˬ kawˬ mehˬ nehˬ tsoˆ nehˬ-euˬ meh. ³⁶ Aˇ nah aˇ yamˬ ui cuiˆ myahˇ laˇ ngeh, Baˬnaˬbaˇ-ahˇ Pawˇluˆ ehˇ nehˬ-eu, "Aˇ nya ̭ neh Sahˬpaˬ Miˬyehˇ-euˬ dawˬ kawˬ k’aˇ mehˬ ya ̭-euˬ meuˬ yawˬ meuˬ na lu ̭-ahˇ dawˬ deh g’o ̭ g’a-iˇ-awˇ, jah-eu tsawˇ haˬ pyeu ̭-eu aˬ yui ̭ aˬ nyiˇ k’oeˇ deuˬ aˬ joˆ-ehˇ jawˇ lu ̭ nga lehˇ haw-iˇ kaˇ-euˇ." ³⁷ Baˬnaˬbaˇ-aˬ, Maˬkuˆ lehˇ kuˇ-eu Yoˇhaˬ-ahˇ k’aw ̭ sheuˬ g’eh maw ̭-eu meh. ³⁸ Ehˇ k’aw ̭, aˬ yaw ̭-ahˇ sheuˬ g’eh-eu maˬ tsaˬ-a lehˇ Pawˇluˆ noeˬ-eu meh. Aˬ jeˬ miˇ neh ehˇ naˇ, yaw beh Miˬyehˇ dawˬ kawˬ mehˬ-eu cah ngeh jawˇ, aˇ saˬ saˬ ngeh keuˆ ni maˬ cah-ehˇ, Paˬbuˇliˇ miˇ k’ahˬ-ahˇ iˇ keuˆ ngeh aˬ yaw ̭ nya ̭-ahˇ byehˇ dzeh-awˇ aˬ yaw ̭ tiˬ g’aˬ teh ̭-ehˇ g’o ̭ le-euˬ meh. ³⁹ Aˬ yaw ̭ nya ̭ yaw kaˬ gaˇ kawˆ k’oeˇ yaw k’aˆ-ehˇ ja dzaˬ-awˇ g’awˬ-iˇ-euˬ meh. Baˬnaˬbaˇ g’aˬ Maˬkuˆ-ahˇ sheuˬ-awˇ, Guˇbaˬluˇ iˇ jaw lahˇ-ahˇ lawˬ dziˬ-awˇ iˇ-euˬ meh. ⁴⁰ Pawˇluˆ g’aˬ-aˬ, jah-eu tsawˇ haˬ deuˬ neh aˬ yaw ̭-ahˇ Sahˬpaˬ Miˬyehˇ-euˬ guiˬ lahˬ yaw dzahˇ la ̭ k’oeˇ bi a nehˬ g’aˬ miˇ tsa, Siˬlaˆ-ahˇ tseˇ doˆ-awˇ sheuˬ g’eh-euˬ meh. ⁴¹ Suˇliˆ miˇ k’ahˬ hawˇ-eu Giˇliˇciˆ miˇ k’ahˬ-ahˇ cah-iˇ-awˇ, Ka li zaˬ aˇ muˇ deuˬ zi ̭ laˇ ni g’aˬ bi ̭ nehˬ-iˇ-euˬ meh.

¹ K’oeˇ naˇ, Deˬbeˬ meuˬ hawˇ-eu Luˇdaˬlaˇ meuˬ-ahˇ Pawˇluˆ iˇ-euˬ meh. Luˇdaˬlaˇ meuˬ-ahˇ Tiˆmoˇseˬ lehˇ myahˇ-euˬ Ka li zaˬ tiˬ g’aˬ jawˇ-eu meh. Aˬ yaw ̭-euˬ aˬ ma-aˬ, Yuˇdaˆ tsawˇ jeuˬ Ka li zaˬ pyeu ̭-eu meh. Ehˇ k’aw ̭, aˬ yaw ̭-euˬ aˬ da-aˬ Heˬlaˬsaˇ tsawˇ jeuˬ meh. ² Luˇdaˬlaˇ meuˬ hawˇ-eu Iˇgawˇniˇ meuˬ-ahˇ jawˇ-eu Ka li zaˬ dawˬ tawˆ lu ̭, Tiˆmoˇseˬ-ahˇ ja ceuˬ-eu meh. ³ Pawˇluˆ-aˬ, Tiˆmoˇseˬ-ahˇ sheuˬ-awˇ cah maw ̭-eu miˇ neh, baˆ k’oˆ mehˬ dzaˬ yehˬ nehˬ-euˬ meh. K’oeˇ gaˇ jawˇ-eu Yuˇdaˆ tsawˇ haˬ dawˬ tawˆ lu ̭ Tiˆmoˇseˬ-euˬ aˬ da Heˬlaˬsaˇ tsawˇ jeuˬ pyeu ̭-eu gaˇ kawˆ siˬ nya jiˇ-eu miˇ neh, k’oeˇ lo ̭-ehˇ baˆ baˆ k’oˆ mehˬ dzaˬ yehˬ nehˬ-euˬ jeˬ pyeu ̭-eu meh. ⁴ Aˬ yaw ̭ nya ̭ tiˬ meuˬ saˇ-iˬ tiˬ meuˬ iˇ-awˇ, jah-eu tsawˇ haˬ deuˬ-ahˇ Yeˬluˇsaˬlehˬ meuˬ-ahˇ jawˇ-eu g’aˬ k’ehˇ deuˬ hawˇ-eu aˬ yui ̭ aˬ tsu deuˬ neh bawˬ tsehˆ taˬ-euˬ zahˇ sahˇ k’o ̭ deuˬ bi ̭ nehˬ-awˇ, zahˇ sahˇ k’o ̭ k’oeˇ deuˬ-ahˇ caw teh-eu g’aˇ duˬ mehˬ nehˬ-euˬ meh. ⁵ K’oeˇ miˇ neh, Ka li zaˬ aˇ muˇ deuˬ jah-eu paw g’aˬ k’aˆ dzehˬ laˇ-awˇ, tiˬ nah saˇ-iˬ tiˬ nah tsawˇ haˬ myaˬ laˇ lu ̭-eu meh. ⁶ Aˬshaˆ miˇ k’ahˬ-ahˇ guiˬ lahˬ dawˬ maˬ ya mehˬ-iˇ ni, Muiˬ-eu shawˇ-eu Yaw sahˇ Miˬyehˇ aˬ yaw ̭ ma ̭-ahˇ laˆ tsoeˬ-eu miˇ neh, Puˬgiˇ miˇ k’ahˬ hawˇ-eu Gaˬlaˬtiˆ miˇ k’ahˬ-ahˇ aˬ yaw ̭ ma ̭ le-euˬ meh. ⁷ Muˇsiˇ miˇ k’ahˬ-euˬ miˇ kaˬ-ahˇ le keuˆ ngeh, Beˬtuˇniˇ miˇ k’ahˬ-ahˇ uˇ leˇ-eu lehˇ tiˬ poˆ g’eh-euˬ meh. Ehˇ k’aw ̭, Yeˬsuˇ-euˬ Yaw sahˇ aˬ yaw ̭ ma ̭-ahˇ aˬ kawˬ-aˬ maˬ bi ̭-a. ⁸ K’oeˇ miˇ neh, Muˇsiˇ miˇk’ahˬ nyiˬ tsehˆ-ehˇ iˇ g’eh-awˇ, Daˬloˇ meuˬ-ahˇ iˇ keuˆ-euˬ meh. ⁹ K’oeˇ ngeh miˇ yaw sahˇ la ̭ k’oeˇ Pawˇluˆ heu lo ̭-ehˇ ya mawˇ-euˬ meh. Maˬgeˬdawˇniˆ tsawˇ haˬ tiˬ g’aˬ yaw ̭ le-awˇ, "Maˬgeˬdawˇniˆ miˇ k’ahˬ-ahˇ laˇ-awˇ, nga ma ̭-ahˇ tiˬ poˆ caw ba laˇ-awˬ" lehˇ shaˇ le-euˬ gaˇ aˬ yaw ̭ ya mawˇ-euˬ meh. ¹⁰ Yaw sahˇ la ̭ k’oeˇ Pawˇluˆ k’oeˇ lo ̭-ehˇ ya siˬ ya mawˇ g’aˬ-euˬ nehˬ-ehˇ, Maˬgeˬdawˇniˆ miˇ k’ahˬ-ahˇ le-eu g’aˇ duˬ nga ma ̭ tiˬ poˆ teh ̭-ehˇ lehˬ hmˬ-euˬ ma. Aˬ jeˬ miˇ neh ehˇ naˇ, k’oeˇ gaˇ jawˇ-eu tsawˇ haˬ deuˬ-ahˇ Laˬ k’aˬ cehˇ-eu Guiˬ lahˬ dawˬ bi mehˬ leˇ-eu g’aˇ duˬ, Miˬyehˇ nga ma ̭-ahˇ kuˇ le-euˬ ngaˇ lehˇ nga ma ̭ noeˬ tsehˆ-euˬ ma. ¹¹ Nga ma ̭ Daˬloˇ meuˬ-ahˇ neh saˇ baoˬ dziˬ-awˇ, Saˬmoˬdaˬlehˇ iˇ jaw lahˇ-ahˇ dawˇ coe ni iˇ-awˇ, yawˬ nah yawˬ Naˬbawˇliˇ meuˬ-ahˇ iˇ keuˆ-euˬ ma. ¹² K’oeˇ gaˇ neh naˇ, Piˇliˇpiˆ meuˬ-ahˇ nga ma ̭ le-euˬ ma. Meuˬ k’oeˇ meuˬ-aˬ, Loˇmaˆ tsawˇ haˬ uˆ lahˇ lu ̭-eu Maˬgeˬdawˇniˆ miˇ k’ahˬ la ̭ k’oeˇ aˬ cawˬ naˆ maˬ tseˇ huiˬ-eu meuˬ pyeu ̭-eu meh. K’oeˇ gaˇ nga ma ̭ g’awˬ mya nah jawˇ-euˬ ma. ¹³ Jawˇ nah keuˆ laˇ ngeh, nga ma ̭ meuˬ la ̭ nyiˇ iˇ doˆ-awˇ, Yuˇdaˆ tsawˇ haˬ deuˬ uiˬ leˇ-awˇ guiˬ lahˬ shaˇ-eu jawˇ duˬ tiˬ tsahˇ mawˇ le teh ̭-a lehˇ noeˬ-eu la ̭ k’oeˇ, lawˇ baˬ lawˇ dzeˇ iˇ-euˬ ma. nga ma ̭ nuiˇ-awˇ, k’oeˇ gaˇ uiˬ le taˬ-euˬ zaˬ miˬ zaˬ deuˬ-ahˇ dawˬ mehˬ mehˬ-euˬ ma. ¹⁴ Saˬdiˬlehˇ meuˬ-ahˇ jawˇ-awˇ aˇ poeˬ k’aˆ dui dui-eu neˇ naˆ naˆ-eu saˬ paˇ ga ̭-eu Lu diˇ lehˇ myahˇ-euˬ zaˬ miˬ zaˬ tiˬ g’aˬ k’aw ̭, nga ma ̭ mehˬ gaˇ naˇ haˬ-euˬ meh. Aˬ yaw ̭-aˬ, Miˬyehˇ-ahˇ uˬ duˬ tahˬ-eu zaˬ miˬ zaˬ tiˬ g’aˬ pyeu ̭-awˇ, Pawˇluˆ dawˬ mehˬ mehˬ gaˇ yaw muiˬ paˬ-ehˇ naˇ haˬ ni, SahˬpaˬMiˬyehˇ neh aˬ yaw ̭-euˬ nui ma laˇ g’oˆ pah nehˬ-euˬ meh. ¹⁵ Aˬ yaw ̭ hawˇ-eu aˬ yaw ̭-euˬ nymˇ k’ahˬ zaˬ dawˬ tawˆ lu ̭ iˇ cu ̭ shawˇ g’aˬ ngeh jawˇ, "Ngaˇ-aˬ, Sahˬpaˬ Miˬyehˇ-ahˇ aˬ diˇ jah-eu tsawˇ haˬ pyeu ̭-eu ngaˇ lehˇ naw ma ̭ noeˬ tsehˆ g’aˬ-euˬ ngeuˇ naˇ, ngaˬ-euˬ nymˇ-ahˇ ya ̭ laˇ-awˬ" lehˇ ehˇ-awˇ, nga ma ̭-ahˇ aˬ yaw ̭-euˬ nymˇ-ahˇ sheuˬ daˆ g’eh-euˬ meh. ¹⁶ Tiˬ nah-aˬ, uˬ duˬ tahˬ-eu jawˇ duˬ-ahˇ nga ma ̭ iˇ lu ̭ ngeh, ja maw maw nya-eu neh ̭ uˇ-eu aˬ buˇ zaˬ k’aˆ tiˬ g’aˬ tahˬ puˬ le-euˬ meh. Aˬ buˇ k’oeˇ buˇ ja maw maw nehˬ-eu pyuˇ g’awˬ mya ni za-eu miˇ neh, aˬ yaw ̭-euˬ baw leˬ deuˬ smˇ muiˬ muiˬ laˇ-euˬ meh. ¹⁷ Aˬ buˇ k’oeˇ g’aˬ Pawˇluˆ nga ma ̭-euˬ mehˬ nah caw teh-awˇ, "Tsawˇ haˬ heu deuˬ-aˬ, Huiˬ dui mahˇ dui dui-eu Miˬyehˇ-euˬ zaˬ k’aˆ pyeu ̭-awˇ, naw ma ̭ ka k’o ̭-eu jeˬ za nya-eu gaˇ ma mehˬ le-euˬ meh" lehˇ guˇ guˇ-ehˇ cah-eu meh. ¹⁸ Aˬ yaw ̭ k’oeˇ lo ̭-ehˇ guˇ guˇ-ehˇ caw teh-eu g’awˬ mya nah byah laˇ-euˬ miˇ neh, Pawˇluˆ maˬ oˇ o ̭ coeˇ laˇ-ehˇ, naˇ k’ah paw zeuˆ pyawˇ-awˇ, neh ̭ k’oeˇ mawˇ-ahˇ "Aˬ yaw ̭-euˬ la ̭ k’oeˇ neh doˆ-iˇ-awˬ lehˇ, Yeˬsuˇ Ka li-euˬ tsawˇ myahˇ uˬ moˆ ngaˇ nawˬ-ahˇ dawˬ bi ̭-eu ma" lehˇ ehˇ nehˬ ngeh, neh ̭ k’oeˇ mawˇ aˬ buˇ k’oeˇ buˇ-euˬ la ̭ k’oeˇ neh tiˬ poˆ teh ̭-ehˇ doˆ-iˇ-euˬ meh. ¹⁹ Aˬ buˇ k’oeˇ buˇ-euˬ baw leˬ k’oeˇ deuˬ-aˬ, aˬ yaw ̭ ma ̭ pyuˇ maˬ paˇ za nya ngaˇ lehˇ siˬ leˇ-awˇ, Pawˇluˆ hawˇ-eu Siˬlaˆ aˬ nya ̭-ahˇ nyeh ̭-awˇ, lehˆ lehˆ tsmˇ-ahˇ jaˆ-eu miˇ k’ahˬ zaˬ deuˬ ba ̭ dzah dzah duˬ-ahˇ sahˬ paˬ sahˬ ma deuˬ jawˇ gaˇ g’eu g’eh-euˬ meh. ²⁰ Loˇmaˆ tsawˇ haˬ yaw huiˬ yaw mahˇ deuˬ jawˇ gaˇ aˬ yaw ̭ nya ̭-ahˇ nyeh ̭ g’eh-awˇ heu lo ̭-ehˇ tsa ̭ nehˬ-euˬ meh. "Tsawˇ haˬ heu nyiˬ g’aˬ Yuˇdaˆ tsawˇ haˬ pyeu ̭-awˇ, aˬ duiˬ-euˬ meuˬ-ahˇ laˆ suˬ saˬ le-euˬ meh. ²¹ Aˬ dui-euˬ zahˇ sahˇ k’o ̭-ahˇ bahˬ-eu zahˇ deuˬ-ahˇ caw teh ni aˬ yaw ̭ nya ̭ mehˬ lu ̭ tsoˆ lu ̭-eu meh. Aˬ dui Loˇmaˆ miˇ k’ahˬ zaˬ deuˬ zahˇ heu deuˬ-ahˇ maˬ ha geu ̭ nya-a." ²² K’oeˇ naˇ, tsawˇ haˬ aˇ ma ̭ k’oeˇ deuˬ g’eh, Pawˇluˆ hawˇ-eu Siˬlaˆ aˬ nya ̭-ahˇ muiˇ-eu tsawˇ haˬ deuˬ jawˇ paw gm leˇ-awˇ tuˇ laˇ-euˬ meh. Yaw huiˬ yaw mahˇ k’oeˇ deuˬ Pawˇluˆ hawˇ-eu Siˬlaˆ aˬ nya ̭-euˬ mehˬ tsoeˬ g’eu paˆ dzeh jiˇ-awˇ, yahˬ caˆ neh bi jui ̭-eu g’aˇ duˬ dawˬ bi ̭-euˬ meh. ²³ Yaw k’aˆ-ehˇ diˬ naˇ diˬ gawˇ nehˬ g’aˬ ngeh, tawˬ-ahˇ nyeh ̭ ahˇ nehˬ-awˇ, aˬ yaw ̭ nya ̭-ahˇ yaw muiˬ paˬ-ehˇ lo ̭-eu g’aˇ duˬ tawˬ-ahˇ haw-eu g’aˬ-ahˇ dawˬ bi ̭ nehˬ-euˬ meh. ²⁴ Yaw huiˬ yaw mahˇ deuˬ neh dawˬ bi ̭ ya ̭-euˬ lo ̭-ehˇ, tawˬ-ahˇ haw-eu k’oeˇ g’aˬ aˬ yaw ̭ nya ̭-ahˇ la ̭ k’oeˇ paw jaˆ-eu pa ̭ kuˆ-ahˇ nyeh ̭ uˇ-awˇ, diˬ tm tm ma neh kuiˇ taw ̭ taw ̭-awˇ bi jawˇ-euˬ meh. ²⁵ Sehˇ g’ahˇ ceh laˇ ngeh, Pawˇluˆ hawˇ-eu Siˬlaˆ aˬ nya ̭ guiˬ lahˬ shaˇ shaˇ-ehˇ Miˬyehˇ-ahˇ ja ceuˬ-eu caˇ dawˬ caˇ lu ̭-awˇ, tawˬ-ahˇ uˇ-eu tsawˇ haˬ deuˬ naˇ haˬ lu ̭-eu meh. ²⁶ Ja pyuˬ ni, miˇ luˆ luˆ dui dui laˇ-awˇ, tawˬ-euˬ dawˬ pehˬ duˬ puˇ-ahˇ keuˆ ni nyeh laˇ-awˇ, laˇ g’oˆ deuˬ pah laˇ jiˇ-awˇ, tawˬ-ahˇ uˇ-eu tsawˇ haˬ deuˬ-ahˇ pa ̭ taw ̭ taˬ-euˬ shmˇ caˆ dawˬ tawˆ lu ̭ ga lehˆ jiˇ-euˬ meh. ²⁷ Tawˬ-ahˇ haw-eu g’aˬ tsawˬ noeˬ laˇ-awˇ, tawˬ laˇ g’oˆ deuˬ yaw pah-ehˇ jaˆ gaˇ ya mawˇ ngeh, tawˬ-ahˇ nyeh ̭ uˇ taˬ-euˬ tsawˇ haˬ deuˬ cehˆ doˆ jiˇ-euˬ ngaˇ lehˇ duˇ-awˇ, mi cehˇ g’eu doˆ-awˇ yawˬ haˇ yawˬ ha seh ̭-eu lehˇ g’eh-eu meh. ²⁸ Ehˇ k’aw ̭, Pawˇluˆ yaw k’aˆ-ehˇ guˇ-awˇ ehˇ nehˬ-eu, "Nawˬ-euˬ g’awˇ mawˇ-ahˇ tiˬ jeˬ-iˬ taˬ jahˇ. Nga ma ̭ dawˬ tawˆ lu ̭ heu gaˇ jawˇ jiˇ ma." ²⁹ K’oeˇ ngeh, tawˬ-ahˇ haw-eu k’oeˇ g’aˬ miˬ dzaˬ keuˬ le ̭-awˬ lehˇ guˇ-awˇ, tawˬ la ̭ k’oeˇ cehˆ uˇ g’eh-awˇ, guˆ-awˇ yaw dzuˬ dzuˬ-eu la ̭ k’oeˇ Pawˇluˆ hawˇ-eu Siˬlaˆ aˬ nya ̭-euˬ aˬ kuiˇ dawˬ peh pawˬ tsui ̭ pawˬ dmˬ ga dmˬ-euˬ meh. ³⁰ K’oeˇ naˇ, aˬ yaw ̭ nya ̭-ahˇ la ̭ nyiˇ sheuˬ doˆ g’eh-awˇ ehˇ-eu, "Saˬlaˬ-oˇ, ka k’o ̭-eu jeˬ za nya ni ngaˇ aˬ joˆ-ehˇ ya jahˇ ta." ³¹ Aˬ yaw ̭ nya ̭ ehˇ-eu, "Sahˬpaˬ Yeˬsuˇ-ahˇ jah-awˬ. Ka k’o ̭-eu jeˬ za teh ̭-a. Nawˇ hawˇ-eu nawˬ-euˬ miˬ sawˇ zaˬ dawˬ tawˆ lu ̭ za teh ̭-a." ³² K’oeˇ naˇ, aˬ yaw ̭ hawˇ-eu aˬ yaw ̭-euˬ nymˇ la ̭ k’oeˇ k’aˇ jawˇ-eu tsawˇ haˬ dawˬ tawˆ lu ̭-ahˇ, aˬ yaw ̭ nya ̭ Sahˬpaˬ Miˬyehˇ-euˬ dawˬ mehˬ nehˬ-euˬ meh. ³³ Uˬ ci ̭ k’oeˇ miˇ aˇ yamˬ k’oeˇ yamˬ-ahˇ, tawˬ-ahˇ haw-eu k’oeˇ g’aˬ aˬ yaw ̭ nya ̭-ahˇ sheuˬ g’eh-awˇ, maˇ k’ehˬ maˇ naˇ tsiˬ shawˇ nehˬ-euˬ meh. K’oeˇnaˇ, aˬ yaw ̭ hawˇ-eu aˬ yaw ̭-euˬ miˬ sawˇ zaˬ dawˬ tawˆ lu ̭ tiˬ poˆ teh ̭-ehˇ iˇ cu ̭ shawˇ-euˬ meh. ³⁴ Pawˇluˆ hawˇ-eu Siˬlaˆ aˬ nya ̭-ahˇ aˬ yaw ̭-euˬ nymˇ la ̭ k’oeˇ sheuˬ uˇ g’eh-awˇ, bi dzaˬ bi dawˇ-euˬ meh. Aˬ yaw ̭ hawˇ-eu aˬ yaw ̭-euˬ miˬ sawˇ zaˬ deuˬ laˬ k’aˬ cehˇ dui dui-eu meh. Aˬ jeˬ miˇ neh ehˇ naˇ, Miˬyehˇ-ahˇ jah-eu jeˬ aˬ yaw ̭ ma ̭ za g’aˬ-euˬ meh. ³⁵ Yawˬ shawˬ yawˬ, Loˇmaˆ tsawˇ haˬ sahˬ paˬ sahˬ ma deuˬ neh piˆ liˆ deuˬ-ahˇ dawˬ bi ̭-awˇ, "Tsawˇ haˬ k’oeˇ nyiˬ g’a-ahˇ pyehˬ nehˬ-awˬ" lehˇ bi ehˇ gaˬ-iˇ-euˬ meh. ³⁶ K’oeˇ miˇ neh, tawˬ-ahˇ haw-eu k’oeˇ g’aˬ Pawˇluˆ-ahˇ ehˇ nehˬ-eu, "Siˬlaˆ naw nya ̭-ahˇ pyehˬ nehˬ-eu g’aˇ duˬ yaw huiˬ yaw mahˇ deuˬ-euˬ dawˬ oe keuˆ g’aˬ-euˬ meh. Teu miˇ neh doˆ laˇ-awˇ laˬ k’aˬ tiˬ cehˇ g’o ̭ leˇ-awˬ." ³⁷ Ehˇ k’aw ̭, piˆ liˆ aˬ yui ̭ deuˬ-ahˇ Pawˇluˆ ehˇ nehˬ-eu, "Nga nya ̭ Loˇmaˆ miˇ k’ahˬ zaˬ pyeu ̭-eu ma. Ehˇ k’aw ̭, nga nya ̭-euˬ yaw lehˬ yaw ca tiˬ jeˬ-iˬ maˬ poˆ mawˇ-euˬ gaˇ, miˇ k’ahˬ zaˬ mehˬ shi nga nya ̭-ahˇ yahˬ caˆ neh jui ̭-awˇ tawˬ-ahˇ dawˆ nehˬ la ̭-euˬ meh. Ehˇ k’aw ̭, nymˬ-mˇ poˆ jawˇ-aˬ, aˬ cawˬ maˬ bi siˬ ni nga nya ̭-ahˇ ciˬ cuˇ ni pyehˬ-awˇ bi g’o ̭ leˇ-eu g’eh te loˇ. Ma geu ̭. Loˇmaˆ tsawˇ haˬ yaw huiˬ yaw mahˇ k’oeˇ deuˬ oe-awˇ nga nya ̭-ahˇ pyehˬ doˆ nehˬ le-eu maˬ ngeuˇ naˇ maˬ geu ̭." ³⁸ Piˆ liˆ aˬ yui ̭ k’oeˇ deuˬ Loˇmaˆ tsawˇ haˬ yaw huiˬ yaw mahˇ k’oeˇ deuˬ-ahˇ Pawˇluˆ neh ehˇ-euˬ dawˬ dzawˇ nehˬ leˇ-euˬ meh. Pawˇluˆ hawˇ-eu Siˬlaˆ aˬ nya ̭ Loˇmaˆ miˇ k’ahˬ zaˬ pyeu ̭-eu gaˇ kawˆ ya siˬ ngeh, guˆ-iˇ-euˬ meh. ³⁹ K’oeˇ miˇ neh, aˬ yaw ̭ ma ̭ iˇ-awˇ, aˬ yaw ̭ ma ̭ lehˬ-iˇ-euˬ gaˇ kawˆ ja mehˬ-awˇ aˬ yaw ̭ nya ̭-ahˇ tahˬ shaˇ-euˬ meh. K’oeˇ naˇ, aˬ yaw ̭ nya ̭-ahˇ pyehˬ nehˬ-awˇ, meuˬ k’oeˇ meuˬ-ahˇ neh doˆ-iˇ nehˬ la ̭ lehˇ shaˇ-euˬ meh. ⁴⁰ Pawˇluˆ hawˇ-eu Siˬlaˆ aˬ nya ̭ tawˬ-ahˇ neh doˆ-iˇ-awˇ, Lu diˇ-euˬ nymˇ-ahˇ le-euˬ meh. Jah-eu tsawˇhaˬ deuˬ-ahˇ k’oeˇ gaˇ tahˬ dzoeˇ-awˇ g’aˬ bi ̭ nehˬ ya ̭-euˬ meh. K’oeˇ naˇ, meuˬ k’oeˇ meuˬ-ahˇ neh aˬ yaw ̭ nya ̭ doˆ-iˇ-euˬ meh.

¹ Pawˇluˆ hawˇ-eu Siˬlaˆ-aˬ, Aˬpiˇbawˇliˇ meuˬ hawˇ-eu Aˬpawˇlawˇniˇ meuˬ-ahˇ neh iˇ g’eh-awˇ, Teˇsaˬloˇni meuˬ-ahˇ iˇ keuˆ-euˬ meh. Meuˬ k’oeˇ meuˬ la ̭ k’oeˇ Yuˇdaˆ tsawˇ haˬ-euˬ uˬ duˬ tahˬ nymˇ tiˬ nymˇ jaˆ-eu meh. ² Pawˇluˆ-aˬ, aˬ myah myah lo ̭-ehˇ uˬ duˬ tahˬ nymˇ-ahˇ le-euˬ meh. Jawˇ nah smˬ nah keuˆ ni, aˬ yaw ̭ ma ̭ nehˬ-ehˇ Jaˇli ̭ gaˇ kawˆ ja sawˇ-euˬ meh. ³ Jaˇli ̭ la ̭ k’oeˇ ehˇ taˬ-euˬ gaˇ kawˆ aˬ yaw ̭ ma ̭-ahˇ ja mehˬ-awˇ, Ka li shiˇ-awˇ g’o ̭ deh ̭ laˇ-euˬ k’oeˇ-aˬ, maˬ pyeu ̭ laˇ-ehˇ maˬ g’eh nya-eu gaˇ kawˆ tiˬ hmˬ meh lehˇ mehˬ duˬ nehˬ-euˬ meh. "Ngaˇ naw ma ̭-ahˇ ja mehˬ lu ̭-eu Yeˬsuˇ heu g’aˬ-aˬ, Ka li meh" lehˇ Pawˇluˆ ehˇ-eu meh. ⁴ Aˬ yaw ̭ ma ̭ tiˬ paˆ na deuˬ noeˬ peh ̭-awˇ, Pawˇluˆ hawˇ-eu Siˬlaˆ nehˬ-ehˇ gm leˇ-euˬ meh. Myaˆ pyawˬ naˇ mehˇ jaˆ-eu zaˬ miˬ zaˬ g’awˬ mya g’aˬ hawˇ-eu Heˬlaˬsaˇ tsawˇ haˬ g’awˬ mya ni Miˬyehˇ-ahˇ uˬ duˬ tahˬ-euˬ meh. ⁵ Ehˇ k’aw ̭, Yuˇdaˆ tsawˇ haˬ deuˬ myaˆ naˆ-eu miˇ neh, aˬ dzawˬ aˇ gah deuˬ deh uiˬ-awˇ aˇ muˇ tiˬ muˇ muˇ doˆ-eu la ̭ k’oeˇ, meuˬ meuˬ lah-ehˇ laˆ luiˬ-euˬ meh. Pawˇluˆ hawˇ-eu Siˬlaˆ aˬ nya ̭-ahˇ miˇ k’ahˬ zaˬ-euˬ mehˬ shi g’eu doˆ le ̭-eu g’aˇ duˬ, Yaˬsoˬ-euˬ nymˇ-ahˇ aˬ yaw ̭ ma ̭ ga jawˬ-iˇ-euˬ meh. ⁶ Ehˇ k’aw ̭, aˬ yaw ̭ nya ̭-ahˇ maˬ poˆ mawˇ nya-eu miˇ neh, Yaˬsoˬ hawˇ-eu jah-eu tsawˇ haˬ tiˬ paˆ na deuˬ-ahˇ, meuˬ-ahˇ uˆ lahˇ-eu sahˬ paˬ sahˬ ma deuˬ jawˇ gaˇ g’eu g’eh-awˇ, heu lo ̭-ehˇ ehˇ nehˬ leˇ-euˬ meh. "Miˇ tsaˬ tahˬ k’awˇ poˆ laˆ paˇ laˇ paˬ-ehˇ laˆ suˬ saˬ-eu tsawˇ haˬ deuˬ meuˬ heu meuˬ-ahˇ oe keuˆ taˬ-euˬ meh. ⁷ Yaˬsoˬ neh aˬ yaw ̭ ma ̭-ahˇ aˬ yaw ̭-euˬ nymˇ-ahˇ cu taˬ-euˬ meh. Yeˬsuˇ lehˇ myahˇ-eu sahˬ paˬ tiˬ g’aˬ jawˇ meh lehˇ aˬ yaw ̭ ma ̭ ehˇ ehˇ-ehˇ, sahˬ paˬ Gehˇsaˬ neh bi ̭ taˬ-euˬ zahˇ sahˇ k’o ̭ deuˬ-ahˇ laˆ cawˆ lu ̭ meh." ⁸ Aˬ yaw ̭ ma ̭ k’oeˇ lo ̭-ehˇ ehˇ-awˇ, tsawˇ haˬ aˇ ma ̭ hawˇ-eu meuˬ-ahˇ uˆ lahˇ-eu sahˬ paˬ sahˬ ma deuˬ-ahˇ laˆ luiˬ-euˬ meh. ⁹ Sahˬ paˬ sahˬ ma k’oeˇ deuˬ Yaˬsoˬ hawˇ-eu aˬ yaw ̭-euˬ cawˬ deuˬ-ahˇ pyuˇ bi doˆ-awˇ pyehˬ k’o ̭ g’eh-euˬ meh. ¹⁰ Uˬ ci ̭ ci ̭ le-eu nehˬ-ehˇ, jah-eu tsawˇ haˬ deuˬ Pawˇluˆ hawˇ-eu Siˬlaˆ-ahˇ Beˬliˇ meuˬ-ahˇ tiˬ poˆ teh ̭-ehˇ bi iˇ-euˬ meh. Aˬ yaw ̭ nya ̭ k’oeˇ gaˇ iˇ keuˆ ngeh, uˬ duˬ tahˬ nymˇ-ahˇ le-euˬ meh. ¹¹ K’oeˇ gaˇ jawˇ-eu tsawˇ haˬ deuˬ-aˬ, Teˇsaˬloˇni meuˬ-ahˇ jawˇ-eu tsawˇ haˬ deuˬ naˆ maˬ tseˇ nui ma laˇ g’oˆ pah taˬ-awˇ, guiˬ lahˬ dawˬ-ahˇ nui ma keuˆ-eu la ̭ k’oeˇ naˇ haˬ-awˇ, Pawˇluˆ neh ehˇ-euˬ k’oeˇ tsaˬ-eu maˬ tsaˬ-eu siˬ duˬ laˇ ni yawˬ nah na lu ̭ Jaˇli ̭-ahˇ gui haw lu ̭-eu meh. ¹² Aˬ yaw ̭ ma ̭ g’awˬ mya ni jah laˇ-euˬ meh. Myaˆ pyawˬ naˇ mehˇ jaˆ-eu Heˬlaˬsaˇ tsawˇ haˬ k’aˬ dzeˇ zaˬ deuˬ k’aw ̭, g’awˬ mya g’aˬ jah laˇ-euˬ meh. ¹³ Ehˇ k’aw ̭, Beˬliˇ meuˬ-ahˇ k’aw ̭ Pawˇluˆ Miˬyehˇ dawˬ kawˬ mehˬ lu ̭-eu gaˇ kawˆ-ahˇ Teˇsaˬloˇni meuˬ-ahˇ jawˇ-eu Yuˇdaˆ tsawˇ haˬ deuˬ ya gaˬ ngeh, aˬ yaw ̭ ma ̭ oe-awˇ tsawˇ haˬ aˇ ma ̭ nui ma zo laˇ ni ja-awˇ laˆ luiˬ-euˬ meh. ¹⁴ K’oeˇ ngeh, jah-eu tsawˇ haˬ deuˬ neh Pawˇluˆ-ahˇ iˬ ma laˆ shaˆ lawˇ deh paw bi iˇ doˆ-euˬ meh. Ehˇ k’aw ̭, Siˬlaˆ hawˇ-eu Tiˆmoˇseˬ aˬ nya ̭-aˬ, Beˬliˇ meuˬ-ahˇ jawˇ ya ̭-euˬ meh. ¹⁵ Pawˇluˆ-ahˇ sheuˬ ha-iˇ-euˬ tsawˇ haˬ k’oeˇ deuˬ Aˬteˬ meuˬ-ahˇ keuˆ ni sheuˬ ha keuˆ-iˇ-euˬ meh. K’oeˇ naˇ, Siˬlaˆ hawˇ-eu Tiˆmoˇseˬ aˬ nya ̭-ahˇ aˬ yaw ̭ jawˇ gaˇ yaw kawˇ-ehˇ bi oe-eu g’aˇ duˬ aˬ yaw ̭ ma ̭-ahˇ Pawˇluˆ dawˬ tsa ̭ tsa ̭ nehˬ-awˇ Beˬliˇ meuˬ-ahˇ bi g’o ̭ leˇ-euˬ meh. ¹⁶ Aˬteˬ meuˬ-ahˇ Siˬlaˆ hawˇ-eu Tiˆmoˇseˬ aˬ nya ̭-ahˇ Pawˇluˆ dawˬ lu ̭ ngeh, meuˬ k’oeˇ meuˬ la ̭ k’oeˇ tahˬ pahˬ aˬ ma mawˇ kawˇ tiˬ byah jaˆ gaˇ ya mawˇ-awˇ, nui ma maˬ saˇ-a. ¹⁷ K’oeˇ miˇ neh, Yuˇdaˆ tsawˇ haˬ deuˬ hawˇ-eu Miˬyehˇ-ahˇ uˬ duˬ tahˬ-eu aˬ cawˬ tsawˇ jeuˬ nehˬ-ehˇ uˬ duˬ tahˬ nymˇ la ̭ k’oeˇ ja uˇ-eu uˬ ta ̭, lehˆ lehˆ tsmˇ miˇ k’ahˬ zaˬ ba ̭ dzah dzah duˬ-ahˇ k’aw ̭, k’aˇ iˇ k’aˇ laˇ doˆ-eu tsawˇ haˬ deuˬ nehˬ-ehˇ ja uˇ haw-euˬ meh. ¹⁸ Iˇbiˇguˇlu zahˇ mehˬ-eu saˬ laˬ deuˬ hawˇ-eu, Saˬdawˇiˇ zahˇ mehˬ-eu saˬ laˬ deuˬ k’aw ̭, aˬ yaw ̭ nehˬ-ehˇ ja sawˇ haw-euˬ meh. Aˬ yaw ̭ ma ̭ tiˬ paˆ na deuˬ ehˇ-eu, "Yaw gahˇ jahˇ geu ̭-eu dawˇ ga teu g’aˬ aˬ jeˬ ehˇ-eu nga teu." Tiˬ paˆ na deuˬ-aˬ, "Yawˬ k’ahˬ yaw miˇ yawˬ-ahˇ-euˬ miˬ yehˇ deuˬ-euˬ gaˇ kawˆ mehˬ-eu tsawˇ haˬ ngeuˇ-eu jeˬ nga" lehˇ ehˇ-eu meh. Yeˬsuˇ-euˬ gaˇ kawˆ hawˇ-eu g’o ̭ deh ̭ laˇ-eu jeˬ gaˇ kawˆ Pawˇluˆ dawˬ mehˬ mehˬ-eu miˇ neh, aˬ yaw ̭ ma ̭ k’oeˇ lo ̭-ehˇ ehˇ-eu meh. ¹⁹ K’oeˇ miˇ neh, Aˬleˬpaˬguˇ lehˇ kuˇ-eu meuˬ-ahˇ uˆ lahˇ-eu deuˬ-euˬ ba ̭ dzah mehˬ shi Pawˇluˆ-ahˇ aˬ yaw ̭ ma ̭ sheuˬ g’eh-awˇ heu lo ̭-ehˇ ehˇ nehˬ-euˬ meh. "Nawˇ mehˬ lu ̭-eu gaˇ kawˆ yaw shui ̭ teu hmˬ nga ma ̭ siˬ duˬ maw ̭ miˇ-a. ²⁰ Nawˇ ehˇ-eu gaˇ kawˆ tiˬ paˆ na deuˬ nga ma ̭ tiˬ jawˇ-iˬ maˬ gaˬ haw-euˬ miˇ neh dawˬ tsui ̭ siˬ nya maw ̭ miˇ-a." ²¹ Aˬteˬ meuˬ-ahˇ jawˇ-eu tsawˇ haˬ dawˬ tawˆ lu ̭ maˬ ehˇ, aˬ cawˬ miˇ k’ahˬ-ahˇ neh laˇ-awˇ k’oeˇ gaˇ jawˇ lu ̭-eu deuˬ maˬ ehˇ, shui ̭ teˇ poˬ ni pyeu ̭ le keuˆ le-euˬ gaˇ kawˆ deuˬ ja-eu, naˇ haˬ-eu, heu-euˬ g’aˇ duˬ teh ̭-ehˇ aˇ yamˬ bi jiˇ lu ̭-eu meh. ²² Meuˬ-ahˇ uˆ lahˇ-eu deuˬ-euˬ ba ̭ dzah mehˬ shi Pawˇluˆ yaw ̭-awˇ heu lo ̭-ehˇ ehˇ-eu meh. "Naw ma ̭ Aˬteˬ meuˬ-ahˇ jawˇ-eu tsawˇ haˬ deuˬ-aˬ, yawˬ jeˬ na lu ̭ la ̭ k’oeˇ uˬ duˬ tahˬ-eu zahˇ sahˇ k’o ̭-ahˇ taˬ huiˬ dui dui lu ̭ gaˇ ngaˇ ya mawˇ-euˬ ma. ²³ Aˬ jeˬ miˇ neh ehˇ naˇ, meuˬ heu meuˬ doe ni ngaˇ cah-awˇ naw ma ̭ uˬ duˬ tahˬ-eu jawˇ duˬ deuˬ-ahˇ haw ngeh, ’Nga ma ̭ maˬ siˬ nya-eu Miˬyehˇ tiˬ g’aˬ-euˬ g’aˇ duˬ’ lehˇ bo ̭ myahˬ taˬ-euˬ lawˇ duˬ tiˬ tsahˇ mawˇ-euˬ ma. Naw ma ̭ maˬ siˬ nya k’aw ̭ uˬ duˬ tahˬ lu ̭-eu k’oeˇ-aˬ, nymˬ-mˇ ngaˇ naw ma ̭-ahˇ ja mehˬ le-euˬ heu meh. ²⁴ Miˇ tsaˬ tahˬ k’awˇ hawˇ-eu k’oeˇ-euˬ k’oeˇ taˆ k’aˇ jawˇ k’aˇ jaˆ-eu jeˬ dawˬ tawˆ lu ̭-ahˇ beh-euˬ yaw sahˇ Miˬyehˇ-aˬ, Mˬsahˇ Sahˬpaˬ Miˇsahˇ Sahˬma pyeu ̭-awˇ, tsawˇ haˬ zaˬ-euˬ aˬ la ̭ neh tsoˆ-euˬ uˬ duˬ tahˬ nymˇ-ahˇ uˇ-eu maˬ ngeuˇ-a. ²⁵ Aˬ dui tsawˇ haˬ zaˬ-euˬ aˬ la ̭ neh ngehˬ g’eh bo saˆ-awˇ mˇ cu nehˬ-eu jeˬ-ahˇ aˬ yaw ̭ maˬ loˬ-a. Aˬ jeˬ miˇ neh ehˇ naˇ, tsawˇ haˬ dawˬ tawˆ lu ̭-ahˇ, deh ̭-eu jeˬ, sa ̭ g’awˇ nya-eu jeˬ hawˇ-eu, yawˬ jeˬ na lu ̭ bi ̭-eu g’aˬ-aˬ, aˬ yaw ̭ meh. ²⁶ Tsawˇ haˬ tiˬ g’aˬ o neh miˇ k’ahˬ tsawˇ jeuˬ dawˬ tawˆ lu ̭-ahˇ aˬ yaw ̭ beh taˬ-euˬ jeˬ pyeu ̭-awˇ, miˇ tsaˬ tahˬ k’awˇ bi jawˇ byah taˬ-euˬ meh. Aˬ yaw ̭ ma ̭ yaw deh ̭ ya deh ̭-eu aˇ yamˬ hawˇ-eu jawˇ duˬ-ahˇ, aˇ dahˬ beh ngeh neh neh lehˬ hmˬ taˬ-awˇ to ̭ tsaˬ jiˆ tsaˬ jiˇ taˬ-euˬ meh. ²⁷ Miˬyehˇ-ahˇ la ̭ sawˆ sawˆ sawˆ-ehˇ poˆ naˇ, sawˆ zaˬ-awˇ poˆ mawˇ nya ni, k’oeˇ lo ̭-ehˇ beh taˬ nehˬ-euˬ jeˬ pyeu ̭-eu meh. K’oeˇ lo ̭-ehˇ ehˇ-eu k’aw ̭, Miˬyehˇ-aˬ, aˬ dui yawˬ g’aˬ na lu ̭ nehˬ-ehˇ gaˇ mahˇ kaˬ-eu maˬ ngeuˇ-a. ²⁸ ’Aˬ yaw ̭ la ̭ k’oeˇ aˬ dui deh ̭ lu ̭, jawˇ lu ̭, luˆ lu ̭, laˆ lu ̭-eu ma’ lehˇ, aˬ cawˬ neh ehˇ taˬ-euˬ jaˆ-eu lo ̭-ehˇ meh. Dawˬ caˇ bo ̭-eu naw ma ̭-euˬ tsawˇ haˬ deuˬ k’aw ̭,tiˬ tsahˇ na, ’Nga ma ̭ k’aw ̭ aˬ yaw ̭-euˬ zaˬ ma’ lehˇ ehˇ taˬ-euˬ gaˇ duˇ-eu meh. ²⁹ Aˬ dui-aˬ, Miˬyehˇ-euˬ zaˬ pyeu ̭-eu miˇ neh, Miˬyehˇ-aˬ, tsawˇ haˬ zaˬ-euˬ zaˬ siˬ tsawˇ gahˇ neh noeˬ doˆ-awˇ jahˇ taˬ-euˬ shuiˇ mawˇ kawˇ, pyuˇ mawˇ kawˇ, k’aˬ lo mawˇ kawˇ heu deuˬ-ahˇ duˇ teh ̭-a lehˇ aˬ dui noeˬ-eu maˬ tsaˬ-a. ³⁰ Aˇ hu tsawˇ haˬ deuˬ aˬ yaw ̭-ahˇ maˬ siˬ nya ngeh mˇ dzeuˇ shaˇ dzeuˇ ya ̭-euˬ jeˬ-ahˇ Miˬyehˇ iˬ baˇ maˬ taˬ-a. Ehˇ k’aw ̭, nymˬ-mˇ poˆ jawˇ-aˬ, yawˬ gaˇ na lu ̭ jawˇ-eu tsawˇ haˬ dawˬ tawˆ lu ̭ iˬ baˇ noeˬ poˆ-eu g’aˇ duˬ Miˬyehˇ neh dawˬ bi ̭ taˬ-euˬ meh. ³¹ Aˬ jeˬ miˇ neh ehˇ naˇ, aˬ yaw ̭ neh tseˇ doˆ-euˬ tsawˇ haˬ-ahˇ g’oe-awˇ, miˇ tsaˬ heu dawˬ tawˆ lu ̭-ahˇ yaw tsaˬ yaw dawˇ jeˬ neh yaˇ k’aˬ daˇ-eu g’aˇ duˬ, Miˬyehˇ neh to ̭ taˬ-euˬ aˇ nah tiˬ nah jaˆ meh. Tsawˇ haˬ k’oeˇ g’aˬ-ahˇ shiˇ-euˬ gaˇ paˇ bi g’o ̭ deh ̭ laˇ-eu la ̭ k’oeˇ, aˬ yaw ̭ neh k’oeˇ lo ̭-ehˇ lehˬ hmˬ taˬ-euˬ jaˆ-eu gaˇ kawˆ, tsawˇ haˬ dawˬ tawˆ lu ̭-ahˇ bi siˬ duˬ-euˬ meh." ³² Shiˇ-euˬ tsawˇ haˬ-ahˇ paˇ bi g’o ̭ deh ̭ laˇ-eu gaˇ kawˆ Pawˇluˆ ehˇ gaˇ ya gaˬ ngeh, tsawˇ haˬ tiˬ paˆ na deuˬ aˬ yaw ̭-ahˇ yehˬ bawˬ sehˇ lu-ehˇ ehˇ niˇ g’a-awˇ uiˇ-eu meh. Ehˇ k’aw ̭, tiˬ paˆ na deuˬ-aˬ, "Gaˇ kawˆ teu nawˇ ja gaˇ tiˬ poˆ paˇ naˇ haˬ maw ̭ nya siˬ" lehˇ ehˇ-eu meh. ³³ K’oeˇ naˇ, Pawˇluˆ-aˬ, ba ̭ dzah-ahˇ neh doˆ-iˇ-euˬ meh. ³⁴ Tsawˇ haˬ tiˬ paˆ na deuˬ aˬ yaw ̭ nehˬ-ehˇ nui ma gm-awˇ jah-euˬ meh. Jah laˇ-euˬ tsawˇ haˬ k’oeˇ deuˬ la ̭ k’oeˇ, meuˬ k’oeˇ meuˬ-ahˇ uˆ lahˇ-eu ba ̭ dzah aˇ muˇ-ahˇ ahˇ-eu Daˬyawˇnaˬsiˇ hawˇ-eu Daˬmaˬliˇ lehˇ myahˇ-euˬ zaˬ miˬ zaˬ tiˬ g’aˬ uˬ ta ̭, nui deuˬ k’aw ̭ ahˇ-eu meh.

¹ K’oeˇ naˇ, Aˬteˬ meuˬ-ahˇ neh Pawˇluˆ doˆ-iˇ-awˇ, Gawˇliˬtu meuˬ-ahˇ iˇ-euˬ meh. ² K’oeˇ gaˇ, Boˬtuˆ miˇ k’ahˬ-ahˇ deh ̭ le-euˬ Aˬguˇla lehˇ myahˇ-euˬ Yuˇdaˆ tsawˇ haˬ tiˬ g’aˬ-ahˇ aˬ yaw ̭ ya tahˬ puˬ-euˬ meh. Yuˇdaˆ tsawˇ haˬ dawˬ tawˆ lu ̭ Loˇmaˆ meuˬ-ahˇ neh ya doˆ-iˇ jiˇ meh lehˇ, Loˇmaˆ sahˬ paˬ Gaˬlawˇdiˇ dawˬ bi ̭-euˬ miˇ neh, aˬ yaw ̭-euˬ mi zaˬ Biˇgiˇla sheuˬ-awˇ Iˇdaˬliˬ miˇ k’ahˬ-ahˇ neh g’o ̭ doˆ le-euˬ tiˬ dehˬ pyeu ̭-eu meh. Aˬ nya ̭ dzeˇ zaˬ-ahˇ Pawˇluˆ tahˬ puˬ leˇ-euˬ meh. ³ Aˬ nya ̭ dzeˇ zaˬ nehˬ-ehˇ aˬ yaw ̭ jawˇ-awˇ gaˇ mˇ-euˬ meh. Aˬ jeˬ miˇ neh ehˇ naˇ, aˬ yaw ̭ k’aw ̭, aˬ nya ̭ dzeˇ zaˬ lo ̭-ehˇ saˬ paˇ sehˬ g’awˆ gu ̭ ahˬ-awˇ deh ̭-eu tsawˇ haˬ pyeu ̭-eu meh. ⁴ Yuˇdaˆ tsawˇ haˬ maˬ ehˇ, Heˬlaˬsaˇ tsawˇ haˬ maˬ ehˇ, jah-eu tsawˇ haˬ pyeu ̭ laˇ ni, Jawˇ nah aˬ yaw ̭ nah yaw ̭ uˬ duˬ tahˬ nymˇ la ̭ k’oeˇ Pawˇluˆ ja sawˇ-euˬ meh. ⁵ Siˬlaˆ hawˇ-eu Tiˆmoˇseˬ aˬ nya ̭ Maˬgeˬdawˇniˆ miˇ k’ahˬ-ahˇ neh oe keuˆ ngeh, Pawˇluˆ g’aˬ-aˬ, Miˬyehˇ dawˬ kawˬ mehˬ-eu gaˇ teh ̭-ehˇ aˇ yamˬ tiˬ byah ni mˇ-awˇ, Yeˬsuˇ Meˬsiˇya pyeu ̭-eu gaˇ kawˆ Yuˇdaˆ tsawˇ haˬ deuˬ-ahˇ saˇ kiˇ kamˬ-euˬ meh. ⁶ Aˬ yaw ̭ ma ̭ aˬ yaw ̭ mehˬ gaˇ maˬ naˇ haˬ ni aˬ yaw ̭-ahˇ yaw doeˇ ehˇ ngeh, aˬ yaw ̭ pehˇ k’ahˬ byuˬ k’aˇ-awˇ ehˇ nehˬ-eu, "Naw ma ̭ deh ̭-eu jeˬ-ahˇ smˬ naˇ, naw ma ̭-euˬ iˬ baˇ meh. Ngaˬ-ahˇ tiˬ jeˬ-iˬ maˬ ta ̭. Iˬ nah ta ̭ naˇ, aˬ cawˬ tsawˇ jeuˬ-ahˇ ngaˇ mehˬ-iˇ ma." ⁷ K’oeˇ naˇ, aˬ yaw ̭ ma ̭ jawˇ gaˇ neh aˬ yaw ̭ doˆ-iˇ-awˇ, Tiˇtuˆ Yuˇtuˬ lehˇ myahˇ-euˬ, Miˬyehˇ-ahˇ uˬ duˬ tahˬ-eu aˬ cawˬ tsawˇ jeuˬ tiˬ g’aˬ-euˬ nymˇ-ahˇ jawˇ-iˇ-euˬ meh. Tsawˇ haˬ k’oeˇ g’aˬ-euˬ nymˇ-aˬ, uˬ duˬ tahˬ nymˇ-ahˇ nymˇ kaˬ ta ̭-eu meh. ⁸ Gaˬliˇpuˆ lehˇ myahˇ-euˬ uˬ duˬ tahˬ nymˇ-ahˇ aˬ yui ̭ geu ̭-eu g’aˬ hawˇ-eu aˬ yaw ̭-euˬ miˬ sawˇ zaˬ dawˬ tawˆ lu ̭ Sahˬpaˬ Yeˬsuˇ-ahˇ jah-euˬ meh. Gawˇliˬtu meuˬ-ahˇ jawˇ-eu tsawˇ haˬ g’awˬ mya ni Miˬyehˇ dawˬ kawˬ ya gaˬ-awˇ, jah-eu la ̭ k’oeˇ iˇ cu ̭ shawˇ-euˬ meh. ⁹ Tiˬ miˇ-aˬ, yaw sahˇ la ̭ k’oeˇ ya siˬ ya mawˇ-eu jeˬ la ̭ k’oeˇ, Pawˇluˆ-ahˇ Sahˬpaˬ Yeˬsuˇ ehˇ-eu, "Taˬguˆ. Dawˬ mehˬ maˬ mehˬ-ehˇ ciˬ cuˇ ni taˬ jawˇ. ¹⁰ Ngaˇ nawˬ nehˬ-ehˇ jawˇ ma. Aˬ cawˬ nawˬ-ahˇ laˆ tahˬ laˆ naˇ-eu jeˬ maˬ mˇ nya-a. Aˬ jeˬ miˇ neh ehˇ naˇ, meuˬ heu meuˬ la ̭ k’oeˇ ngaˬ-euˬ tsawˇ haˬ g’awˬ mya ni jawˇ ma." ¹¹ K’oeˇ miˇ neh, Pawˇluˆ k’oeˇ gaˇ tiˬ k’o ̭ uˬ ta ̭ ba la ko ̭ siˬ jawˇ-awˇ, Miˬyehˇ dawˬ kawˬ mehˬ nehˬ-euˬ meh. ¹² Gaˬliˬoˬ lehˇ kuˇ-eu g’aˬ, Aˬgaˬyaˇ miˇ k’ahˬ-ahˇ uˆ lahˇ lu ̭ ngeh, Yuˇdaˆ tsawˇ haˬ deuˬ gm leˇ-awˇ Pawˇluˆ-ahˇ nyeh ̭-awˇ, yaˇ k’aˬ daˇ-eu saˇ naˇ-ahˇ sheuˬ g’eh-euˬ meh. ¹³ Aˬ yaw ̭ ma ̭ ehˇ-eu, "Tsawˇ haˬ heu g’aˬ-aˬ, zahˇ dawˬ k’o ̭ dawˬ-ahˇ maˬ tsaˬ ni yawˬ jeˬ yawˬ-ehˇ Miˬyehˇ-ahˇ uˬ duˬ tahˬ-eu g’aˇ duˬ aˬ cawˬ-ahˇ mehˇ shuiˇ shuiˇ lu ̭ meh." ¹⁴ Pawˇluˆ dawˬ ngehˬ-eu lehˇ g’eh ngeh, Yuˇdaˆ tsawˇ haˬ k’oeˇ deuˬ-ahˇ Gaˬliˬoˬ heu lo ̭-ehˇ ehˇ nehˬ-euˬ meh. "Yuˇ daˆ tsawˇ haˬ deuˬ-oˇ, gaˇ kawˆ teu hmˬ-aˬ, yaw haiˬ tiˬ jeˬ paˬ mˇ bahˬ-euˬ loˇ, yaw lehˬ tiˬ jeˬ na jahˇ-euˬ loˇ lehˇ ngeuˇ law nmˇ-aˬ, naw ma ̭ ehˇ gaˇ ngaˇ oˇ-awˇ naˇ haˬ nehˬ nya te siˬ. ¹⁵ Ehˇ k’aw ̭, dawˬ-euˬ gaˇ kawˆ, tsawˇ myahˇ-euˬ gaˇ kawˆ hawˇ-eu, naw ma ̭-euˬ zahˇ dawˬ k’o ̭ dawˬ gaˇ kawˆ tsawˇ pyehˇ pyehˇ-eu teh ̭ miˇ neh, naw ma ̭ yawˬ haˇ yawˬ ha jahˇ jiˇ-awˬ. Ngaˇ teu lo ̭-ehˇ g’eh gaˇ yaˇ k’aˬ daˇ-eu tsawˇ haˬ maˬ ngeuˇ." ¹⁶ K’oeˇ lo ̭-ehˇ ehˇ g’aˬ ngeh, aˬ yaw ̭ ma ̭-ahˇ yaˇ k’aˬ daˇ-eu nymˇ la ̭ nyiˇ paw teh doˆ nehˬ-euˬ meh. ¹⁷ K’oeˇ ngeh, aˬ yaw ̭ ma ̭ ga uiˬ-awˇ uˬ duˬ tahˬ nymˇ-ahˇ aˬ yui ̭ geu ̭ lu ̭-eu Suˇdeˬ-ahˇ nyeh ̭-awˇ, yaˇ k’aˬ daˇ-eu nymˇ-euˬ mehˬ shi diˬ-euˬ meh. Ehˇ k’aw ̭, Gaˬliˬoˬ-aˬ, gaˇ kawˆ k’oeˇ aˬ yaw ̭-ahˇ tiˬ jeˬ-iˬ maˬ ta ̭-eu lo ̭-ehˇ jawˇ-euˬ meh. ¹⁸ Pawˇluˆ-aˬ, Gawˇliˬtu meuˬ-ahˇ jawˇ-eu jah-eu tsawˇ haˬ deuˬ nehˬ-ehˇ g’awˬ mya nah paˇ jawˇ-euˬ meh. K’oeˇ naˇ, aˬ yaw ̭ ma ̭-ahˇ g’awˬ-iˇ-awˇ, Biˇgiˇla hawˇ-eu Aˬguˇla aˬ nya ̭ nehˬ-ehˇ tiˬ kawˆ lo ̭-ehˇ saˇ baoˬ dziˬ-awˇ, Suˇliˆ miˇ k’ahˬ-ahˇ iˇ-euˬ meh. Geˬjeˬ meuˬ-ahˇ iˇ keuˆ ngeh, aˬ yaw ̭ dawˬ ma saˇ jaˇ dzaˬ-eu la ̭ k’oeˇ uˬ jehˆ jehˆ dzeh-euˬ meh. ¹⁹ Aˬ yaw ̭ ma ̭ Eˇpeˇsu meuˬ-ahˇ iˇ keuˆ-awˇ, Biˇgiˇla hawˇ-eu Aˬguˇla aˬ nya ̭-ahˇ k’oeˇ gaˇ taˬ ya ̭-euˬ meh. Pawˇluˆ-aˬ, uˬ duˬ tahˬ nymˇ-ahˇ le-awˇ, Yuˇdaˆ tsawˇ haˬ deuˬ nehˬ-ehˇ ja sawˇ-euˬ meh. ²⁰ K’oeˇ gaˇ tiˬ k’ehˬ jawˇ-eu g’aˇ duˬ aˬ cawˬ aˬ yaw ̭-ahˇ shaˇ k’aw ̭, aˬ yaw ̭ maˬ jawˇ-a. ²¹ Aˬ yaw ̭ doˆ-iˇ ngeh, "Miˬyehˇ nui ma tsaˬ naˇ, naw ma ̭ jawˇ gaˇ ngaˇ tiˬ poˆ paˇ laˇ keuˆ ma" lehˇ ehˇ nehˬ ya ̭-awˇ, saˇ baoˬ dziˬ-awˇ Eˇpeˇsu meuˬ-ahˇ neh doˆ-iˇ-euˬ meh. ²² Gehˇsaˬliˇ meuˬ-ahˇ aˬ yaw ̭ iˇ keuˆ ngeh, Yeˬluˇsaˬlehˬ meuˬ-ahˇ le-awˇ Ka li zaˬ aˇ muˇ-ahˇ dawˬ cawˬ puˬ nehˬ ya ̭-awˇ, Aˬdiˇawˬ meuˬ-ahˇ g’o ̭-iˇ-euˬ meh. ²³ K’oeˇ gaˇ tiˬ k’ehˬ jawˇ g’aˬ ngeh, Gaˬlaˬtiˆ miˇ k’ahˬ hawˇ-eu Puˬgiˇ miˇ k’ahˬ-ahˇ cah leˇ-awˇ jah-eu tsawˇ haˬ deuˬ-ahˇ g’aˬ bi ̭ leˇ-euˬ meh. ²⁴ K’oeˇ ngeh, Aˬleˬsaˬduˇ meuˬ-ahˇ deh ̭ le-euˬ Aˬpawˇluˆ lehˇ myahˇ-euˬ Yuˇdaˆ tsawˇ haˬ tiˬ g’aˬ Eˇpeˇsu meuˬ-ahˇ oe-euˬ meh. Aˬ yaw ̭-aˬ, dawˬ ngehˬ-eu bym dui dui-awˇ, Jaˇli ̭ yaw muiˬ paˬ-ehˇ siˬ nya-eu tsawˇ haˬ tiˬ g’aˬ pyeu ̭-eu meh. ²⁵ Aˬ yaw ̭-aˬ, Sahˬpaˬ Yeˬsuˇ-euˬ Gaˇma gaˇ kawˆ ya dzaw haw-awˇ, nui ma keuˆ dui dui-eu la ̭ k’oeˇ, Yeˬsuˇ-euˬ gaˇ kawˆ tiˬ paw ̭-iˬ maˬ lehˬ ni mehˬ nya tsoˆ nya-eu meh. Ehˇ k’aw ̭, iˇ cu ̭ shawˇ-eu gaˇ kawˆ-ahˇ ta ̭ leˇ-awˇ, Yoˇhaˬ neh iˇ cu ̭ shawˇ-euˬ gaˇ kawˆ teh ̭-ehˇ aˬ yaw ̭ siˬ nya-eu meh. ²⁶ Uˬ duˬ tahˬ nymˇ la ̭ k’oeˇ aˬ yaw ̭ k’aˬ duˬ ni dawˬ ngehˬ dahˬ beh-euˬ meh. Biˇgiˇla hawˇ-eu Aˬguˇla aˬ nya ̭ dzeˇ zaˬ aˬ yaw ̭-euˬ gaˇ kawˆ ya gaˬ ngeh, aˬ yaw ̭-ahˇ iˇ kahˇ-ahˇ sheuˬ k’o ̭ la ̭-awˇ, Miˬyehˇ-euˬ Gaˇma gaˇ kawˆ yaw tsaˬ tsaˬ-ehˇ paˇ mehˬ lahˬ nehˬ-euˬ meh. ²⁷ K’oeˇ naˇ, Aˬgaˬyaˇ miˇ k’ahˬ-ahˇ iˇ-eu g’aˇ duˬ Aˬpawˇluˆ noeˬ tsehˆ-euˬ meh. K’oeˇ miˇneh, Aˬgaˬyaˇ miˇ k’ahˬ-ahˇ jawˇ-eu jah-eu tsawˇ haˬ deuˬ aˬ yaw ̭-ahˇ ha geu ̭ ni, Eˇpeˇsu meuˬ-ahˇ jawˇ-eu jah-eu tsawˇ haˬ deuˬ neh sahˬ bo ̭ bo ̭ ahˇ nehˬ-awˇ, aˬ yaw ̭-ahˇ caw ba nehˬ-euˬ meh. Aˬ yaw ̭ k’oeˇ gaˇ iˇ keuˆ ngeh, Miˬyehˇ-euˬ guiˬ lahˬ baˬ da neh jah-eu tsawˇ haˬ pyeu ̭ laˇ-euˬ deuˬ g’aˇ duˬ gaˇ dahˇ tsoeˬ dui dui leˇ-euˬ meh. ²⁸ Aˬ jeˬ miˇ neh ehˇ naˇ, miˇ k’ahˬ zaˬ g’awˬ mya ni-euˬ mehˬ shi aˬ yaw ̭ Jaˇli -ahˇ g’oe g’oe-ehˇ Yuˇdaˆ tsawˇ haˬ nehˬ-ehˇ yaw k’aˆ k’aˆ-ehˇ ja-awˇ, Yeˬsuˇ Meˬsiˇya pyeu ̭-eu gaˇ kawˆ ja g’aˬ-euˬ meh.

¹ Aˬpawˇluˆ Gawˇliˬtu meuˬ-ahˇ jawˇ lu ̭ ngeh, Pawˇluˆ la ̭ taˆ paw k’ahˬ-ahˇ neh oe ka-awˇ, Eˇpeˇsu meuˬ-ahˇ oe keuˆ-euˬ meh. K’oeˇ gaˇ, zaˬ lahˇ tiˬ paˆ na deuˬ-ahˇ aˬ yaw ̭ tahˬ puˬ-euˬ meh. ² Aˬ yaw ̭ ma ̭-ahˇ aˬ yaw ̭ ehˇ nehˬ-eu, "Naw ma ̭ jah-eu tsawˇ haˬ pyeu ̭ laˇ ngeh Muiˬ-eu shawˇ-eu Yaw sahˇ Miˬyehˇ-ahˇ za maˬ loˇ." Aˬ yaw ̭ ma ̭ ehˇ-eu, "Muiˬ-eu shawˇ-eu Yaw sahˇ Miˬyehˇ jawˇ meh lehˇ ehˇ-eu nga ma ̭ tiˬ poˆ-iˬ maˬ gaˬ haw-aˬ." ³ Aˬ yaw ̭ ehˇ-eu, "Toˆ-ehˇ ngeuˇ naˇ, naw ma ̭ iˇ cu ̭ shawˇ-eu aˬ geu jeˬ shawˇ teˬ." Aˬ yaw ̭ ma ̭ ehˇ-eu, "Yoˇhaˬ neh shawˇ nehˬ la ̭-euˬ jeˬ shawˇ-euˬ ma." ⁴ K’oeˇ ngeh, Pawˇluˆ ehˇ-eu, "Yoˇhaˬ neh iˇ cu ̭ shawˇ-euˬ k’oeˇ-aˬ, iˬ baˇ noeˬ poˆ-euˬ tsawˇ haˬ deuˬ g’aˇ duˬ meh. K’oeˇ miˇ neh, aˬ yaw ̭-euˬ jeˬ nah oe lu ̭-eu g’aˬ-ahˇ jah-awˬ lehˇ, Iˇsaˬleˬlaˆ tsawˇ haˬ deuˬ-ahˇ Yoˇhaˬ ehˇ nehˬ-euˬ meh. Aˬ yaw ̭-euˬ jeˬ nah oe-eu g’aˬ lehˇ ehˇ-eu k’oeˇ-aˬ, Yeˬsuˇ-ahˇ ehˇ-eu meh." ⁵ Dawˬ k’oeˇ dawˬ-ahˇ aˬ yaw ̭ ma ̭ ya gaˬ ngeh, Sahˬpaˬ Yeˬsuˇ-euˬ tsawˇ myahˇ uˬ moˆ iˇ cu ̭ shawˇ-euˬ meh. ⁶ Aˬ yaw ̭ ma ̭-ahˇ Pawˇluˆ aˬ la ̭ ba ̭ daˆ nehˬ ngeh, Muiˬ-eu shawˇ-eu Yaw sahˇ Miˬyehˇ aˬ yaw ̭ ma ̭ k’oeˇ taˆ za ̭ le-awˇ, aˬ yaw ̭ ma ̭ dawˬ g’awˬ mya jeˬ ngehˬ-eu uˬ ta ̭, Miˬyehˇ g’aˇ duˬ ngehˬ dah-eu dawˬ k’aw ̭ ngehˬ-euˬ meh. ⁷ Aˬ yaw ̭ ma ̭ dawˬ tawˆ lu ̭ tseˇ nyi ̭ g’aˬ ehˇ g’aˬ ni byah-eu meh. ⁸ Pawˇluˆ uˬ duˬ tahˬ nymˇ-ahˇ le-awˇ, ba la smˇ siˬ byah ni k’aˬ duˬ ni ngehˬ-eu tmˇ-eu la ̭ k’oeˇ, Miˬyehˇ Miˇ k’ahˬ gaˇ kawˆ aˬ yaw ̭ ma ̭ siˬ duˬ laˇ ni ja sawˇ mehˬ nehˬ-euˬ meh. ⁹ Ehˇ k’aw ̭, tiˬ paˆ na deuˬ nui ma g’ahˇ-eu la ̭ k’oeˇ maˬ jah ni jawˇ-awˇ, aˬ cawˬ-euˬ mehˬ shi Sahˬpaˬ Yeˬsuˇ-euˬ Gaˇma-ahˇ ja bu ja doeˇ-euˬ meh. K’oeˇ miˇ neh, Pawˇluˆ jah-eu tsawˇ haˬ deuˬ-ahˇ sheuˬ-awˇ aˬ yaw ̭ ma ̭ jawˇ gaˇ neh iˇ doˆ-euˬ meh. K’oeˇ naˇ, Duˇlaˬnmˇ hawˇ nymˇ la ̭ k’oeˇ, yawˬ nah na lu ̭ Miˬyehˇ dawˬ kawˬ ja sawˇ mehˬ nehˬ-euˬ meh. ¹⁰ Nyiˬ k’o ̭ byah ni aˬ yaw ̭ k’oeˇ lo ̭-ehˇ mˇ daˆ le ̭-euˬ miˇ neh, Aˬshaˆ miˇ k’ahˬ-ahˇ jawˇ-eu tsawˇ haˬ dawˬ tawˆ lu ̭, Yuˇdaˆ tsawˇ haˬ maˬ ehˇ, aˬ cawˬ tsawˇ jeuˬ deuˬ maˬ ehˇ, Sahˬpaˬ Yeˬsuˇ-euˬ dawˬ ya gaˬ-euˬ meh. ¹¹ Pawˇluˆ-ahˇ g’oe-awˇ, huiˬ dui dui-eu zahˬ leˇ paˬ-ehˇ g’eh-eu jeˬ Miˬyehˇ mˇ mehˬ-euˬ meh. ¹² Pawˇluˆ neh zmˬ-euˬ paˇ jeh maˬ ehˇ, jo ̭ tsiˬ maˬ ehˇ, naˇ-eu tsawˇ haˬ deuˬ jawˇ gaˇ yuˇ g’eh nehˬ ngeh naˇ gawˇ taˬ leˇ-awˇ, neh ̭ yaw jaw ̭ uˇ-eu deuˬ k’aw ̭ neh ̭ doˆ-iˇ-euˬ meh. ¹³ Doe doe-ehˇ neh ̭ teh doˆ teh doˆ-ehˇ cah-eu Yuˇdaˆ tsawˇ haˬ tiˬ paˆ na deuˬ k’aw ̭, Sahˬpaˬ Yeˬsuˇ-euˬ tsawˇ myahˇ-ahˇ g’oe-awˇ teh doˆ-eu meh. "Pawˇluˆ dawˬ mehˬ mehˬ-eu Yeˬsuˇ k’oeˇ g’aˬ-euˬ tsawˇ myahˇ uˬ moˆ ngaˇ nawˬ-ahˇ dawˬ bi ̭-eu ma" lehˇ, neh ̭ yaw haiˬ deuˬ-ahˇ aˬ yaw ̭ ma ̭ ehˇ nehˬ-eu meh. ¹⁴ Geˬbaˇ lehˇ myahˇ-euˬ Yuˇdaˆ tsawˇ haˬ-euˬ Piˇ ma Yaw huiˬ g’aˬ-euˬ aˬ li shi ̭ li k’aw ̭, k’oeˇ lo ̭-ehˇ mˇ lu ̭-eu meh. ¹⁵ Neh ̭ yaw haiˬ k’oeˇ mawˇ aˬ yaw ̭ ma ̭-ahˇ ehˇ-eu, "Yeˬsuˇ-ahˇ ngaˇ siˬ nya ma. Pawˇluˆ-ahˇ k’aw ̭ siˬ nya ma. Ehˇ k’aw ̭, naw ma ̭ aˬ gaˇ-euˬ tsawˇ haˬ te." ¹⁶ Neh ̭ yaw haiˬ uˇ-eu tsawˇ haˬ k’oeˇ g’aˬ aˬ yaw ̭ ma ̭-ahˇ biˬ daw ̭ le ̭-awˇ, dawˬ tawˆ lu ̭-ahˇ daw ̭ g’aˬ-euˬ meh. Aˬ yaw ̭ ma ̭ bi diˬ naˇ bi diˬ gawˇ jiˇ-awˇ mehˬ tsoeˬ bi diˬ pyaˬ jiˇ-euˬ miˇ neh, tsawˇ haˬ k’oeˇ g’aˬ-euˬ nymˇ-ahˇ neh neˇ myawˆ ni coeˬ doˆ g’eh-euˬ meh. ¹⁷ Eˇpeˇsu meuˬ-ahˇ k’aˇ jawˇ-eu Yuˇdaˆ tsawˇ haˬdeuˬ hawˇ-eu aˬ cawˬ tsawˇ jeuˬ dawˬ tawˆ lu ̭ gaˇ kawˆ k’oeˇ ya gaˬ ngeh, guˆ dui dui-iˇ-awˇ, Sahˬpaˬ Yeˬsuˇ-euˬ tsawˇ myahˇ-ahˇ ciˬ huiˬ ciˬ mahˇ dui dui-euˬ meh. ¹⁸ Jah-eu tsawˇ haˬ deuˬ k’aw ̭ g’awˬ mya ni laˇ-awˇ, yawˬ ha neh k’aˇ mˇ lehˬ dzeuˇ-euˬ jeˬ maˬ za ̭ taˬ ni aˬ cawˬ mehˬ shi ja doˆ laˇ-euˬ meh. ¹⁹ Maw loˬ loˬ-eu tsawˇ haˬ deuˬ k’aw ̭, yawˬ ha-euˬ maw loˬ sahˬ bo ̭ deuˬ ba ̭ uiˬ jiˇ-awˇ, miˇ k’ahˬ zaˬ dawˬ tawˆ lu ̭ mehˬ shi miˬ dzaˬ keuˬ dzeh-euˬ meh. Sahˬ bo ̭ k’oeˇ deuˬ-euˬ aˇ poeˬ sawˇ jiˇ haw ngeh, pyuˇ maˇ byaˆ ngaˬ muiˇ byaˆ poeˬ-eu meh. ²⁰ SahˬpaˬMiˬyehˇ-euˬ dawˬ-aˬ, k’oeˇ lo ̭-ehˇ baoˬ huiˬ-eu la ̭ k’oeˇ miˇ k’ahˬ doe-iˇ-awˇ g’aˬ k’aˆ lu ̭-eu meh. ²¹ Gaˇ kawˆ k’oeˇ deuˬ pyeu ̭ laˇ g’aˬ ngeh, Maˬgeˬdawˇniˆ miˇ k’ahˬ hawˇ-eu Aˬgaˬyaˇ miˇ k’ahˬ-ahˇ cah-iˇ-awˇ, Yeˬluˇsaˬlehˬ meuˬ-ahˇ iˇ ma lehˇ Pawˇluˆ noeˬ tsehˆ-euˬ meh. "K’oeˇ gaˇ iˇ g’aˬ naˇ, Loˇmaˆ meuˬ-ahˇ k’aw ̭ ya iˇ haw nga siˬ" lehˇ aˬ yaw ̭ ehˇ-eu meh. ²² K’oeˇ miˇ neh, aˬ yaw ̭-ahˇ caw ba-eu tsawˇ haˬ deuˬ la ̭ k’oeˇ, Tiˆmoˇseˬ hawˇ-eu Eˇlaˬduˇ aˬ nya ̭-ahˇ Maˬgeˬdawˇniˆ miˇ k’ahˬ-ahˇ bi le-awˇ, aˬ yaw ̭ g’aˬ-aˬ, Aˬshaˆ miˇ k’ahˬ-ahˇ tiˬ k’ehˬ paˇ jawˇ tehˬ-euˬ meh. ²³ Aˇ yamˬ k’oeˇ yamˬ-ahˇ, Sahˬpaˬ Yeˬsuˇ-euˬ Gaˇma baˬ da neh Eˇpeˇsu meuˬ la ̭ k’oeˇ suˬ saˬ dui dui-eu jeˬ keuˆ le-euˬ meh. ²⁴ Deˬmeˬdeˬliˇ lehˇ myahˇ-euˬ pyuˇ tehˆ-eu tsawˇ haˬ tiˬ g’aˬ jawˇ-eu meh. Aˬ yaw ̭-aˬ, pyuˇ yuˇ-awˇ Aˬdeˬmiˇ miˬ yehˇ ma-euˬ uˬ duˬ tahˬ nymˇ mawˇ kawˇ tehˆ ahˬ-eu meh. Gaˇ k’oeˇ hmˬ baˬ da neh pyuˇ tehˆ dzaˬ-eu tsawˇ haˬ deuˬ pyuˇ za dui dui-eu meh. ²⁵ K’oeˇ ngeh, aˬ yaw ̭ ma ̭ dawˬ tawˆ lu ̭ hawˇ-eu aˬ yaw ̭ ma ̭ lo ̭-ehˇ mˇ dzaˬ-eu tsawˇ haˬ dawˬ tawˆ lu ̭ kuˇ uiˬ-awˇ, heu lo ̭-ehˇ ehˇ nehˬ-euˬ meh. "Cawˬ deuˬ-oˇ, gaˇ heu hmˬ ya mˇ lu ̭-eu baˬ da neh aˬ dui pyuˇ shuiˇ za laˇ-eu naw ma ̭ siˬ nya lu ̭ meh. ²⁶ Nymˬ-mˇ, Pawˇluˆ lehˇ kuˇ-eu tsawˇ haˬ k’oeˇ g’aˬ aˬ jeˬ ehˇ lu ̭-eu gaˇ kawˆ naw ma ̭ ya siˬ ya mawˇ lu ̭ meh. Tsawˇ haˬ zaˬ-euˬ aˬ la ̭ neh jahˇ-euˬ miˬ yehˇ-aˬ, miˬ yehˇ maˬ ngeuˇ-a lehˇ ehˇ ehˇ-ehˇ, Eˇpeˇsu meuˬ heu meuˬ la ̭ k’oeˇ teh ̭-ehˇ maˬ ngeuˇ-ehˇ, Aˬshaˆ miˇ k’ahˬ k’ahˬ lah ni ehˇ g’aˬ ni tsawˇ haˬ g’awˬ mya ni nui ma paˇ laˇ ni aˬ yaw ̭ neh laˆ jah jiˇ taˬ-euˬ meh. ²⁷ Aˬ dui-euˬ gaˇ heu hmˬ tsawˇ myahˇ cawˆ-iˇ gaˇ ya guˆ-eu uˬ ta ̭, Aˬshaˆ miˇ k’ahˬ hawˇ-eu miˇ tsaˬ zaˬ dawˬ tawˆ lu ̭ uˬ duˬ tahˬ-eu miˬ yehˇ pyeu ̭-eu Aˬdeˬmiˇ miˬ yehˇ ma-euˬ uˬ duˬ tahˬ nymˇ tiˬ jeˬ-iˬ gaˇ dahˇ maˬ tsoeˬ-ehˇ pyeu ̭-iˇ-awˇ, aˬ yaw ̭-euˬ yaw sheh ̭ k’ahˬ sehˇ piˬ-iˇ byoˆ-iˇ gaˇ k’ahˬ lahˇ dui dui paˬ-ehˇ g’eh-eu meh." ²⁸ Aˬ yaw ̭ ma ̭ dawˬ k’oeˇ dawˬ-ahˇ ya gaˬ ngeh nui ma pehˇ dui dui laˇ-awˇ, "Eˇpeˇsu tsawˇ haˬ-euˬ Aˬdeˬmiˇ miˬ yehˇ ma huiˬ dui mahˇ dui dui meh" lehˇ guˇ-eu meh. ²⁹ Meuˬ meuˬ lah-ehˇ luiˬ g’a laˇ-awˇ, Pawˇluˆ nehˬ-ehˇ cah-eu Maˬgeˬdawˇniˆ tsawˇ haˬ Gaˬyuˇ hawˇ-eu Aˬliˬdaˬguˇ aˬ nya ̭-ahˇ nyeh ̭-awˇ, Bawˬ-iˬ g’eh duˬ-ahˇ g’eu g’eh-euˬ meh. ³⁰ Pawˇluˆ-aˬ, tsawˇ haˬ aˇ ma ̭ k’oeˇ ma ̭-euˬ mehˬ shi le maw ̭-eu meh. Ehˇ k’aw ̭, jah-eu tsawˇ haˬ deuˬ aˬ yaw ̭-ahˇ maˬ bi le-a. ³¹ Pawˇluˆ-ahˇ siˬ nya-eu Aˬshaˆ miˇ k’ahˬ-ahˇ uˆ lahˇ-eu sahˬ paˬ sahˬ ma tiˬ paˆ na deuˬ neh, Pawˇluˆ-ahˇ Bawˬ-iˬ g’eh duˬ-ahˇ maˬ le ni jawˇ-eu g’aˇ duˬ tsa ̭ ahˇ le ̭-euˬ meh. ³² K’oeˇ ngeh, uiˬ laˇ bymˇ laˇ taˬ-euˬ tsawˇ haˬ aˇ ma ̭ law ̭ g’a dui dui lu ̭-eu meh. Tiˬ g’aˬ tiˇ g’aˬ maˬ naˇ haˬ ni, tiˬ g’aˬ tiˬ jeˬ guˇ-eu meh. Aˬ jeˬ miˇ neh k’oeˇ lo ̭-ehˇ ya uiˬ laˇ-euˬ gaˇ kawˆ-ahˇ tsawˇ haˬ myaˬ tiˬ paˆ maˬ siˬ nya-a. ³³ Tsawˇ haˬ tiˬ paˆ na deuˬ-aˬ, Aˬleˬsaˬduˇ lehˇ kuˇ-eu g’aˬ-ahˇ neh ahˇ-eu nga lehˇ noeˬ-eu meh. Aˬ jeˬ miˇ neh ehˇ naˇ, Yuˇdaˆ tsawˇ haˬ deuˬ neh aˬ yaw ̭-ahˇ aˬ cawˬ mehˬ shi dehˬ daˆ nehˬ-euˬ meh. K’oeˇ naˇ, ciˬ cuˇ ni jawˇ-eu g’aˇ duˬ, tsawˇ haˬ aˇ ma ̭-ahˇ Aˬleˬsaˬduˇ la ̭ dzawˇ dzawˇ nehˬ-awˇ, aˬ yaw ̭ tiˬ jeˬ-iˬ maˬ lehˬ-eu gaˇ kawˆ ja shaw nehˬ-eu lehˇ g’eh-eu meh. ³⁴ Ehˇ k’aw ̭, aˬ yaw ̭ Yuˇdaˆ tsawˇ haˬ pyeu ̭-eu nga lehˇ aˬ yaw ̭ ma ̭ haw siˬ ngeh, "Eˇpeˇsu tsawˇ haˬ-euˬ Aˬdeˬmiˇ miˬ yehˇ ma huiˬ dui mahˇ dui dui meh" lehˇ, yawˬ g’aˬ na lu ̭ tiˬ teˇ teh ̭-ehˇ naˬ liˬ nyiˬ la ̭ byah ni guˇ-euˬ meh. ³⁵ Aˇ saˬ saˬ laˇ ngeh, meuˬ-euˬ jeˇ leˇ loˇ neh tsawˇ haˬ aˇ ma ̭ k’oeˇ ma ̭-ahˇ laˆ co ̭-euˬ meh. Aˬ yaw ̭ heu lo ̭-ehˇ ehˇ nehˬ-euˬ meh. "Eˇpeˇsu meuˬ-ahˇ jawˇ-eu aˬ yui ̭ aˬ nyiˇ deuˬ-oˇ, Eˇpeˇsu meuˬ-aˬ, huiˬ-eu mahˇ-eu Aˬdeˬmiˇ miˬ yehˇ ma-euˬ uˬ duˬtahˬ nymˇ hawˇ-eu mˬ-ahˇ neh ga le-euˬ muiˬ-eu shawˇ-eu k’aˬ lo-ahˇ jeˬ hmˬ bo saˆ taˬ-euˬ meuˬ pyeu ̭-eu gaˇ kawˆ, tsawˇ haˬ yawˬ g’aˬ na lu ̭ siˬ nya meh. ³⁶ Gaˇ kawˆ heu maˬ ngeuˇ-a lehˇ tsawˇ haˬ tiˬ g’aˬ-iˬ maˬ pyehˇ nya-a. K’oeˇ miˇ neh, naw ma ̭ ciˬ cuˇ ni jawˇ-eu tsaˬ meh. Maˬ shaˇ noeˬ ni luiˬ g’a-eu maˬ tsaˬ-a. ³⁷ Tsawˇ haˬ heu nyiˬ g’aˬ uˬ duˬ tahˬ nymˇ-ahˇ tahˇ joe joe-euˬ k’aw ̭ maˬ ngeuˇ-ehˇ, aˬ dui ma ̭-euˬ miˬ yehˇ ma-ahˇ yehˬ bawˬ sehˇ lu-ehˇ ehˇ-euˬ k’aw ̭ maˬ ngeuˇ gaˇ, aˬ yaw ̭ nya ̭-ahˇ naw ma ̭ neh heu gaˇ sheuˬ la ̭ taˬ-euˬ meh. ³⁸ Deˬmeˬdeˬliˇ hawˇ-eu aˬ yaw ̭ nehˬ-ehˇ pyuˇ tehˆ-eu tsawˇ haˬ deuˬ, tsawˇ haˬ tiˬ g’aˬ na-ahˇ nui k’ahˇ maˬ shiˇ-ehˇ yaˇ k’aˬ ja maw ̭ naˇ, sahˬ paˬ sahˬ ma deuˬ jawˇ-awˇ, yaˇ k’aˬ daˇ-eu nymˇ pah-eu aˇ nah k’aw ̭ baw meh. K’oeˇ gaˇ daˬ leˇ-awˇ yaˇ k’aˬ ja nya teh ̭-a. ³⁹ Naw ma ̭ k’oeˇ naˆ maˬ tseˇ jahˇ maw ̭ te lehˇ ngeuˇ naˇ, miˇ k’ahˬ zaˬ deuˬ uiˬ le bymˇ le-awˇ yaˇ k’aˬ daˇ-eu aˇ nah-ahˇ bi daˇ tsehˆ nya teh ̭-a. ⁴⁰ Iˬ nah pyeu ̭ laˇ-euˬ gaˇ kawˆ heu baˬ da neh, miˇ k’ahˬ luiˬ g’a laˇ ni jahˇ-euˬ nga lehˇ aˬ dui-ahˇ do yuˇ laˇ gaˇ k’ahˬ lahˇ paˬ-ehˇ g’eh meh. Aˬ jeˬ miˇ neh heu lo ̭-ehˇ uiˬ leˇ-awˇ luiˬ g’a te lehˇ aˬ dui-ahˇ naˇ haˬ laˇ naˇ, aˬ dui yaw duˬ duˬ-ehˇ ehˇ k’o ̭ nehˬ nya-eu tiˬ jeˬ-iˬ maˬ jaˆ-a." ⁴¹ K’oeˇ lo ̭-ehˇ ehˇ g’aˬ ngeh, uiˬ laˇ taˬ-euˬ tsawˇ haˬ deuˬ-ahˇ bi g’o ̭-iˇ-euˬ meh.

¹ K’oeˇ ngeh poˆ uiˬ laˇ-euˬ k’oeˇ co ̭-iˇ ngeh, jah-eu tsawˇ haˬ deuˬ-ahˇ Pawˇluˆ kuˇ uiˬ-awˇ, g’aˬ bi ̭-eu la ̭ k’oeˇ g’o ̭ dawˬ tsa ̭ ya ̭-awˇ, Maˬgeˬdawˇniˆ miˇ k’ahˬ-ahˇ iˇ-euˬ meh. ² Miˇ k’ahˬ k’oeˇ k’ahˬ doe ni aˬ yaw ̭ iˇ g’eh ngeh, dawˬ mehˬ mehˬ mehˬ-ehˇ g’aˬ bi ̭ ya ̭-awˇ, Aˬgaˬyaˇ miˇ k’ahˬ-ahˇ iˇ keuˆ-euˬ meh. ³ K’oeˇ gaˇ ba la smˇ siˬ byah ni aˬ yaw ̭ jawˇ-euˬ meh. Suˇliˆ miˇ k’ahˬ-ahˇ g’o ̭ leˇ-eu lehˇ lehˬ hmˬ lu ̭ ngeh, Yuˇdaˆ tsawˇ haˬ deuˬ aˬ yaw ̭-ahˇ seh ̭-eu lehˇ nawˬ jawˬ lu ̭-eu gaˇ kawˆ siˬ leˇ-awˇ, Maˬgeˬdawˇniˆ miˇ k’ahˬ paw neh g’o ̭ leˇ-eu g’aˇ duˬ noeˬ tsehˆ-euˬ meh. ⁴ Beˬliˇ meuˬ-ahˇ jawˇ-eu Buˇluˆ-euˬ aˬ li Soˇbaˬdaˬluˇ, Teˇsaˬloˇni meuˬ-ahˇ jawˇ-eu Aˬliˬdaˬguˇ hawˇ-eu Seˬguˬduˇ, Deˬbeˬ meuˬ-ahˇ jawˇ-eu Gaˬyuˇ, Aˬshaˆ miˇ k’ahˬ-ahˇ jawˇ-eu Duˇjiˇ hawˇ-eu Daˬloˇbeˬ aˬ ha ma ̭ hawˇ-eu Tiˆmoˇseˬ k’aw ̭, Pawˇluˆ nehˬ-ehˇ iˇ-euˬ meh. ⁵ Tsawˇ haˬ k’oeˇ deuˬ jeˬ hu doˆ-iˇ-awˇ, nga ma ̭-ahˇ Daˬloˇ meuˬ-ahˇ dawˬ-euˬ meh. ⁶ Dehˬ tseˬ maˬ ahˇ-eu Kaˬ muˇ dzaˬ-eu Bawˬ-iˬ jahˇ g’aˬ miˇ tsa, Piˇliˇpiˆ meuˬ-ahˇ neh nga ma ̭ saˇ baoˬ dziˬ-awˇ doˆ-iˇ-euˬ ma. Ngaˬ nah byah laˇ ngeh Daˬloˇ meuˬ-ahˇ aˬ yaw ̭ ma ̭ jawˇ gaˇ iˇ keuˆ-awˇ, k’oeˇ gaˇ ngaˬ nah paˇ jawˇ-euˬ ma. ⁷ Tiˬ jaw la ̭ k’oeˇ aˇ dahˬ beh-eu nah uˬ ci ̭ paw, dzaˬ ta ̭ dawˇ ta ̭-eu g’aˇ duˬ nga ma ̭ uiˬ leˇ-euˬ ma. Pawˇluˆ-aˬ, yawˬ nah yawˬ doˆ-iˇ-eu lehˇ g’eh-eu miˇ neh, k’oeˇ ngeh miˇ uˬ ci ̭ sehˇ g’ahˇ keuˆ ni dawˬ mehˬ mehˬ-euˬ meh. ⁸ Nga ma ̭ uiˬ leˇ taˬ-euˬ k’oeˇ taˆ tiˆ aˇ lawˆ k’oeˇ lawˆ-ahˇ, tsiˇ k’mˬ g’awˬ mya ni do ̭ bya taˬ-euˬ meh. ⁹ Uˇduˇkuˇ lehˇ myahˇ-euˬ zaˬ guˬ tiˬ g’aˬ laˇ g’oˆ zaˬ-ahˇ nuiˇ lu ̭-eu meh. Pawˇluˆ dawˬ mehˬ g’awˬ myahˇ ni mehˬ-euˬ miˇ neh aˬ yaw ̭ yu ̭ yoeˇ ngeuˇ laˇ-awˇ, nymˇ k’oeˇ nymˇ-euˬ smˬ tiˆ tiˬ tiˆ-ahˇ neh ga ka-euˬ meh. Aˬ yaw ̭ ma ̭ aˬ yaw ̭-ahˇ ciˬ-iˇ ngeh, shiˇ tsehˆ taˬ-euˬ meh. ¹⁰ Ehˇ k’aw ̭, Pawˇluˆ za ̭ ka-iˇ-awˇ, zaˬ guˬ k’oeˇ g’aˬ-ahˇ awˆ k’o ̭-awˇ ciˬ-awˇ, "Taˬ noeˬ shaˬ. Aˬ yaw ̭ deh ̭ lu ̭ meh" lehˇ ehˇ nehˬ-euˬ meh. ¹¹ K’oeˇ naˇ, k’oeˇ taˆ tiˆ-ahˇ aˬ yaw ̭ paˇ g’o ̭ daˆ leˇ-awˇ, kaˬ muˇ ngawˬ pyehˬ-awˇ jah-eu tsawˇ haˬ deuˬ nehˬ-ehˇ dzaˬ-euˬ meh. Uˬ shawˬ paw nahˇ ma doˆ laˇ ngeh keuˆ ni, uˬ ci ̭ miˇ lah-ehˇ aˬ yaw ̭ ma ̭ nehˬ-ehˇ aˬ yaw ̭ dawˬ ja ja-euˬ meh. K’oeˇ naˇ, meuˬ k’oeˇ meuˬ-ahˇ neh aˬ yaw ̭ doˆ-iˇ-euˬ meh. ¹² Aˬ yaw ̭ ma ̭ aˬ li k’oeˇ li-ahˇ yaw deh ̭-ehˇ iˇ kahˇ-ahˇ sheuˬ k’o ̭ ha-iˇ-awˇ, ui cuiˆ teh ̭-ehˇ laˬ k’aˬ cehˇ-eu maˬ ngeuˇ-a. ¹³ Pawˇluˆ neh nga ma ̭-ahˇ ehˇ nehˬ la ̭-euˬ lo ̭-ehˇ, nga ma ̭ saˇ baoˬ dziˬ-awˇ Aˬtsoˆ meuˬ-ahˇ iˇ tawˬ-euˬ ma. Aˬ yaw ̭ g’aˬ-aˬ, k’oeˇ gaˇ keuˆ ni kuiˇ zoˬ cah-eu lehˇ lehˬ hmˬ taˬ-euˬ meh. ¹⁴ Aˬtsoˆ meuˬ-ahˇ paˇ tahˬ dzoeˇ ngeh, tiˬ kawˆ lo ̭-ehˇ saˇ baoˬ dziˬ-awˇ Meˬduˇleˬ meuˬ-ahˇ iˇ-euˬ ma. ¹⁵ K’oeˇ gaˇ neh saˇ baoˬ paˇ dziˬ g’eh-awˇ, yawˬ nah yawˬ Ciˇoˬ iˇ jaw lahˇ dawˬ peh iˇ keuˆ-euˬ ma. Yawˬ nah yawˬ-ahˇ Saˬmoˇ iˇ jaw lahˇ-ahˇ iˇ keuˆ-awˇ, dzaiˇ yawˬ nah yawˬ-ahˇ Meˬleˬduˇ meuˬ-ahˇ iˇ keuˆ-euˬ ma. ¹⁶ Aˬshaˆ miˇ k’ahˬ-ahˇ aˇ yamˬ maˬ bi jiˇ-eu g’aˇ duˬ, nyi naˬ nyi naˬ-ehˇ maˬ jawˇ ni Eˇpeˇsu meuˬ-ahˇ saˇ baoˬ dziˬ-awˇ iˇ-eu lehˇ Pawˇluˆ noeˬ tsehˆ-euˬ meh. G’eh nya naˇ, Beˬdeˬgoˇdeˬ bawˬ-iˬ g’eh ngeh nah Yeˬluˇsaˬlehˬ meuˬ-ahˇ ya jawˇ ni, aˬ yaw ̭ yaw kawˇ-ehˇ iˇ maw ̭-eu meh. ¹⁷ Pawˇluˆ Meˬleˬduˇ meuˬ-ahˇ jawˇ lu ̭ ngeh, Eˇpeˇsu Ka li zaˬ aˇ muˇ-euˬ aˬ yui ̭ aˬ tsu deuˬ aˬ yaw ̭-ahˇ tahˬ puˬ le-eu g’aˇ duˬ bi kuˇ leˇ-euˬ meh. ¹⁸ Aˬ yaw ̭ ma ̭ oe keuˆ ngeh, heu lo-ehˇ ehˇ nehˬ-euˬ meh. "Aˬshaˆ miˇ k’ahˬ-ahˇ laˇ keuˆ ngeh tiˬ nah neh, naw ma ̭ nehˬ-ehˇ ngaˇ aˬ joˆ-ehˇ deh ̭ ya ̭ jawˇ ya ̭-euˬ naw ma ̭ siˬ nya meh. ¹⁹ Yuˇdaˆ tsawˇ haˬ deuˬ ngaˬ-ahˇ seh ̭-eu lehˇ nawˬ jawˬ-eu miˇ neh shaˬ dui dui-euˬ aˇ yamˬ k’oeˇ yamˬ-ahˇ, nui nahˬ nui yu ahˇ-awˇ myaˆ biˇ doˆ-eu la ̭ k’oeˇ Sahˬpaˬ Miˬyehˇ-euˬ zaˬ k’aˆ geu ̭-awˇ gaˇ mˇ ya ̭-euˬ ma. ²⁰ Miˇ k’ahˬ zaˬ mehˬ shi maˬ ehˇ, nymˇ jiˇ la ̭ k’oeˇ maˬ ehˇ, naw ma ̭-ahˇ ngaˇ dawˬ mehˬ mehˬ ngeh, naw ma ̭ g’aˇ duˬ gaˇ dahˇ tsoeˬ-eu jeˬ tiˬ jeˬ-iˬ maˬ za ̭ taˬ ni mehˬ nehˬ-euˬ naw ma ̭ siˬ nya meh. ²¹ Yawˬ ha-euˬ iˬ baˇ noeˬ poˆ-awˇ Miˬyehˇ jawˇ paw g’o ̭ laˇ-eu la ̭ k’oeˇ aˬ dui-euˬ Sahˬpaˬ Yeˬsuˇ-ahˇ ya jah meh lehˇ, Yuˇdaˆ tsawˇ haˬ-ahˇ maˬ ehˇ, aˬ cawˬ tsawˇ jeuˬ-ahˇ maˬ ehˇ, tiˬ kawˆ lo ̭-ehˇ ngaˇ mehˬ-euˬ ma. ²² Nymˬ-mˇ, Muiˬ-eu shawˇ-eu Yaw sahˇ Miˬyehˇ-euˬ ehˇ dawˬ naˇ haˬ-eu la ̭ k’oeˇ Yeˬluˇsaˬlehˬ meuˬ-ahˇ iˇ lu ̭-eu ma. K’oeˇ gaˇ, ngaˬ-euˬ k’oeˇ taˆ aˬ joˆ-ehˇ g’eh-eu jeˬ keuˆ le-eu lehˇ g’eh-eu maˬ siˬ. ²³ Meuˬ yawˬ meuˬ na lu ̭ la ̭ k’oeˇ, tawˬ-ahˇ bi nyeh ̭ uˇ-eu jeˬ hawˇ-eu, ya shaˬ ya zahˬ dui dui-eu jeˬ ngaˬ-ahˇ lo ̭ lu ̭ meh lehˇ, Muiˬ-eu shawˇ-eu Yaw sahˇ Miˬyehˇ ngaˬ-ahˇ ehˇ nehˬ la ̭-euˬ k’oeˇ maˬ ngeuˇ naˇ, nui jeˬ ngaˇ maˬ siˬ nya nya. ²⁴ Ehˇ k’aw ̭, ngaˬ-euˬ g’awˇ mawˇ heu-aˬ, tiˬ jeˬ-iˬ maˬ poeˬ maˬ lawˬ-a lehˇ ngaˇ noeˬ jiˇ taˬ-euˬ ma. Ngaˇ ya mˇ-eu saˬ saˬ naˬ gaˇ heu mˇ jiˇ-awˇ, Sahˬpaˬ Yeˬsuˇ neh ngaˬ-ahˇ bi ̭ taˬ-euˬ Miˬyehˇ g’awˬ shaˬ gaˬ-eu jeˬ gaˇ kawˆ Laˬ k’aˬ cehˇ-eu Guiˬ lahˬ dawˬ mehˬ-eu gaˇ heu mˇ luiˆ ya ̭ nya ni noeˬ tsoˆ taˬ-euˬ ma. ²⁵ "Naw ma ̭ dawˬ tawˆ lu ̭ jawˇ gaˇ ngaˇ cah doe-awˇ, Miˬyehˇ Miˇk’ahˬ gaˇ kawˆ mehˬ ya ̭-euˬ ma. Aˬ kaˇ naˇ, naw ma ̭ ngaˬ-ahˇ tiˬ jawˇ-iˬ maˬ paˇ ya mawˇ-aˇ lehˇ ngaˇ siˬ duˬ-eu ma. ²⁶ K’oeˇ miˇ neh, naw ma ̭ tiˬ g’aˬ na deh ̭-eu sa ̭ laˇ smˬ-iˇ naˇ ngaˬ-euˬ baˬ da neh maˬ ngeuˇ lehˇ, na ̭ suiˇ ni g’eh-eu dawˬ iˬ nah ngaˇ ngehˬ-eu ma. ²⁷ Aˬ jeˬ miˇ neh ehˇ naˇ, Miˬyehˇ-euˬ nui noeˬ dawˬ tawˆ lu ̭, naw ma ̭-ahˇ ngaˇ maˬ za ̭ taˬ ni ja mehˬ jiˇ g’aˬ-euˬ ma. ²⁸ K’oeˇ miˇ neh, naw ma ̭-euˬ g’awˇ mawˇ yaw muiˬ paˬ-ehˇ yahˇ-awˇ deh ̭-eu uˬ ta ̭, Muiˬ-eu shawˇ-eu Yaw sahˇ Miˬyehˇ neh naw ma ̭-ahˇ a nehˬ-awˇ bi haw bi pyaˆ-euˬ yawˇ yawˇ ma ̭-ahˇ yaw muiˬ paˬ-ehˇ bo saˆ haw piˇ-awˬ. Miˬyehˇ neh aˬ yaw ̭-euˬ Zaˬmaˇ bi shiˇ dah-awˇ zeuˇ tsehˆ taˬ-euˬ aˬ yaw ̭-euˬ Ka li zaˬ aˇ muˇ-ahˇ yawˇ bo-eu lo ̭-ehˇ bo-awˬ. ²⁹ Ngaˇ doˆ-iˇ dzeuˇ naˇ guˆ laˇ paˬ-ehˇ g’eh-eu k’aˬ yehˇ deuˬ oe-awˇ, yawˇ yawˇ ma ̭-ahˇ g’awˬ shaˬ maˬ gaˬ ni laˆ cawˆ le teh ̭-a lehˇ ngaˇ siˬ nya ma. ³⁰ Naw ma ̭-euˬ la ̭ k’oeˇ tsawˇ haˬ tiˬ paˆ na deuˬ doˆ laˇ-awˇ, jah-eu tsawˇ haˬ deuˬ-ahˇ mehˇ shuiˇ shuiˇ-eu la ̭ k’oeˇ aˬ yaw ̭ ma ̭ jawˇ paw sheuˬ pyawˇ g’eh teh ̭-a. ³¹ K’oeˇ miˇ neh, smˇ k’o ̭ byah ni naw ma ̭ yawˬ g’aˬ na lu ̭-ahˇ ngaˇ myaˆ biˇ doˆ-eu la ̭ k’oeˇ mehˬ nehˬ-euˬ gaˇ maˬ ngehˇ ni, yahˇ yahˇ-ehˇ deh ̭-awˬ. ³² "Nymˬ-mˇ, Miˬyehˇ-euˬ aˬ la ̭ la ̭ k’oeˇ hawˇ-eu aˬ yaw ̭-euˬ g’awˬ shaˬ gaˬ-eu jeˬ la ̭ k’oeˇ naw ma ̭-ahˇ ngaˇ a nehˬ ya ̭-eu ma. Guiˬ lahˬ yaw dzahˇ bi ̭-eu dawˬ k’oeˇ-aˬ, naw ma ̭-ahˇ bi huiˬ bi mahˇ laˇ nya-awˇ, Miˬyehˇ neh aˬ yaw ̭-euˬ tsawˇ haˬ dawˬ tawˆ lu ̭ g’aˇ duˬ lehˬ hmˬ taˬ-euˬ guiˬ lahˬ bi ̭ nya-eu meh. ³³ Aˬ cawˬ-euˬ pyuˇ-ahˇ maˬ ehˇ, shuiˇ-ahˇ maˬ ehˇ, dm g’aˬ dm lmˇ-ahˇ maˬ ehˇ, mehˇ juiˇ juiˇ-eu nui ma ngaˇ maˬ ahˇ. ³⁴ Ngaˇ hawˇ-eu ngaˬ-euˬ cawˬ deuˬ k’aˇ loˬ-eu jeˬ za nya ni, ngaˬ-euˬ aˬ la ̭ heu neh gaˇ mˇ-awˇ pyuˇ poˆ-euˬ naw ma ̭ siˬ nya meh. ³⁵ ’Za-eu naˆ maˬ tseˇ bi ̭-eu guiˬ lahˬ huiˬ dzehˬ meh’ lehˇ Sahˬpaˬ Yeˬsuˇ neh ehˇ-euˬ dawˬ k’oeˇ dawˬ-ahˇ noeˬ keuˆ-eu la ̭ k’oeˇ, k’oeˇ lo ̭-ehˇ gaˇ yaw k’aˆ-ehˇ mˇ-awˇ g’aˬ baˬ-eu deuˬ-ahˇ ya caw ba meh lehˇ, yawˬ jeˬ na lu ̭ la ̭ k’oeˇ naw ma ̭-ahˇ ngaˇ mˇ mehˬ shaˇ mehˬ mehˬ-euˬ ma." ³⁶ Pawˇluˆ k’oeˇ lo ̭-ehˇ ngehˬ g’aˬ tmˇ g’aˬ ngeh, aˬ yaw ̭ ma ̭ nehˬ-ehˇ pawˬ tsui ̭ pawˬ dmˬ dmˬ-awˇ guiˬ lahˬ shaˇ-euˬ meh. ³⁷ Aˬ yaw ̭ ma ̭ ngoeˇ ngoeˇ-ehˇ, Pawˇluˆ-ahˇ byaˇ tehˬ-awˇ mehˬ cuˇ cuˇ nehˬ-euˬ meh. ³⁸ Aˬ yaw ̭ ma ̭ aˬ yaw ̭-ahˇ maˬ paˇ ya mawˇ-aˇ lehˇ Pawˇluˆ neh ehˇ-euˬ dawˬ k’oeˇ dawˬ baˬ da neh aˬ yaw ̭ ma ̭-euˬ nui ma-ahˇ yaw k’aˆ-ehˇ zaw leˇ-awˇ, noeˬ shaˬ dui dui-eu meh. K’oeˇ naˇ, aˬ yaw ̭ ma ̭ Pawˇluˆ-ahˇ saˇ baoˬ naˬ duˬ-ahˇ keuˆ ni sheuˬ ha keuˆ-iˇ-euˬ meh.

¹ Aˬ yaw ̭ ma ̭-ahˇ g’awˬ-iˇ g’aˬ ngeh, saˇ baoˬ dziˬ-awˇ Gawˇsaˆ iˇ jaw lahˇ-ahˇ dawˇ coe ni iˇ g’eh-euˬ ma. Yawˬ nah yawˬ Lawˇduˆ iˇ jaw lahˇ-ahˇ iˇ keuˆ-awˇ, k’oeˇ gaˇ neh naˇ, Baˬdaˬlaˇ meuˬ-ahˇ iˇ-euˬ ma. ² Piˇniˇshaˆ miˇ k’ahˬ-ahˇ iˇ-eu lehˇ g’eh-eu saˇ baoˬ tiˬ laˇ-ahˇ k’oeˇ gaˇ tahˬ puˬ-awˇ, dziˬ-awˇ iˇ g’eh-euˬ ma. ³ Guˇbaˬluˇ iˇ jaw lahˇ-ahˇ haw mawˇ laˇ gaˇ iˇ keuˆ ngeh, la ̭ oˆ paw pyawˬ-ahˇ Suˇliˆ miˇ k’ahˬ paw iˇ-euˬ ma. Saˇ baoˬ k’oeˇ laˇ Duˇlu meuˬ-ahˇ myawˬ ba ̭ doˆ-eu miˇ neh, nga ma ̭ k’oeˇ gaˇ naˬ-euˬ ma. ⁴ Jah-eu tsawˇ haˬ tiˬ deuˬ-ahˇ k’oeˇ gaˇ ya mawˇ-awˇ, aˬ yaw ̭ ma ̭ nehˬ-ehˇ tiˬ jaw jawˇ-euˬ ma. Yaw sahˇ Miˬyehˇ-ahˇ g’oe-eu la ̭ k’oeˇ, Pawˇluˆ-ahˇ "Yeˬluˇsaˬlehˬ meuˬ-ahˇ taˬ le" lehˇ aˬ yaw ̭ ma ̭ ehˇ-eu meh. ⁵ Ehˇ k’aw ̭, nga ma ̭ aˬ yaw ̭ ma ̭ nehˬ-ehˇ jawˇ-eu aˇ yamˬ jiˇ laˇ ngeh, mehˬ hu paw iˇ-euˬ ma. Aˬ yaw ̭ ma ̭ hawˇ-eu aˬ yaw ̭ ma ̭-euˬ miˬ sawˇ zaˬ dawˬ tawˆ lu ̭, meuˬ-ahˇ neh iˬ ma laˆ shaˆ lawˇ deh-ahˇ keuˆ ni nga ma ̭-ahˇ sheuˬ keuˆ ha le-awˇ, nga ma ̭ dawˬ tawˆ lu ̭ k’oeˇ gaˇ pawˬ tsui ̭ pawˬ dmˬ dmˬ-awˇ guiˬ lahˬ shaˇ-euˬ ma. ⁶ K’oeˇ naˇ, tiˬ g’aˬ tiˇ g’aˬ g’o ̭ dawˬ tsa ̭ ya ̭-awˇ, nga ma ̭ saˇ baoˬ la ̭ k’oeˇ uˇ-iˇ ngeh, aˬ yaw ̭ ma ̭ iˇ kahˇ paw g’o ̭ leˇ-euˬ meh. ⁷ Duˇlu meuˬ-ahˇ neh saˇ baoˬ dziˬ g’eh-awˇ Baˬdawˇleˬ meuˬ-ahˇ nga ma ̭ iˇ keuˆ-euˬ ma. K’oeˇ gaˇ jawˇ-eu jah-eu tsawˇ haˬ deuˬ-ahˇ tahˬ puˬ-awˇ, aˬ yaw ̭ ma ̭ nehˬ-ehˇ tiˬ nah jawˇ-euˬ ma. ⁸ Yawˬ nah yawˬ paˇ doˆ-iˇ-awˇ, Gehˇsaˬliˇ meuˬ-ahˇ iˇ keuˆ-euˬ ma. Piˇliˇpuˆ lehˇ myahˇ-euˬ Laˬ k’aˬ cehˇ-eu Guiˬ lahˬ dawˬ mehˬ-eu g’aˬ-euˬ nymˇ-ahˇ nga ma ̭ ya ̭-euˬ ma. Yeˬluˇsaˬlehˬ meuˬ la ̭ k’oeˇ gaˇ bi caw mˇ-eu g’aˇ duˬ tsawˇ haˬ shi ̭ g’aˬ tseˇ doˆ ngeh, aˬ yaw ̭ k’aw ̭ ahˇ-eu meh. ⁹ Aˬ yaw ̭-aˬ, Miˬyehˇ g’aˇ duˬ ngehˬ dah-eu smˇ miˇ maˬ iˇ-euˬ aˬ buˇ oeˬ buˇ jawˇ-eu meh. ¹⁰ Yuˇdaˆ miˇ k’ahˬ-ahˇ jawˇ-eu Aˬgaˬbuˇ lehˇ myahˇ-euˬ Miˬyehˇ g’aˇ duˬ ngehˬ dah-eu g’aˬ oe keuˆ ngeh, nga ma ̭ k’oeˇ gaˇ jawˇ-eu g’awˬ mya nah byah laˇ-euˬ ma. ¹¹ Nga ma ̭ jawˇ gaˇ aˬ yaw ̭ oe-awˇ, Pawˇluˆ-euˬ jo ̭ pa ̭ yuˇ-awˇ, aˬ yaw ̭-euˬ aˬ kuiˇ hawˇ-eu aˬ la ̭-ahˇ pa ̭-awˇ heu lo ̭-ehˇ ehˇ-eu meh. "Jo ̭ pa ̭ heu kahˇ-euˬ yaw sahˇ-ahˇ Yeˬluˇsaˬlehˬ meuˬ-ahˇ jawˇ-eu Yuˇdaˆ tsawˇ haˬ deuˬ heu lo ̭-ehˇ pa ̭-awˇ, aˬ cawˬ tsawˇjeuˬ-euˬ la ̭-ahˇ a ahˇ nehˬ teh ̭-a lehˇ, Muiˬ-eu shawˇ-eu Yaw sahˇ Miˬyehˇ ehˇ-eu meh." ¹² Dawˬ k’oeˇ dawˬ-ahˇ nga ma ̭ ya gaˬ ngeh, nga ma ̭ hawˇ-eu k’oeˇ gaˇ jawˇ-eu tsawˇ haˬ deuˬ Pawˇluˆ-ahˇ Yeˬluˇsaˬ lehˬ meuˬ-ahˇ taˬ iˇ lehˇ shaˇ-euˬ ma. ¹³ Ehˇ k’aw ̭, aˬ yaw ̭ ehˇ-eu, "Aˬ jeˬ miˇ neh naw ma ̭ ngoeˇ ngoeˇ-ehˇ ngaˬ-euˬ nui ma tsawˬ paˆ-iˇ ni jahˇ nehˬ la ̭ te. Yeˬluˇsaˬlehˬ meuˬ-ahˇ aˬ cawˬ neh bi pa ̭-eu teh ̭-ehˇ maˬ ngeuˇ ni, Sahˬpaˬ Yeˬsuˇ-euˬ g’aˇ duˬ k’oeˇ gaˇ shiˇ dah gaˇ keuˆ ni ngaˇ leh hmˬ taˬ-euˬ ma." ¹⁴ Nga ma ̭ aˬ yaw ̭-ahˇ maˬ ja pyawˇ nya-eu miˇ neh, "SahˬpaˬMiˬyehˇ nui ma tsaˬ-eu lo ̭-ehˇ pyeu ̭ laˇ lu ̭-uˇ" lehˇ ehˇ-awˇ ciˬ cuˇ ni jawˇ-euˬ ma. ¹⁵ K’oeˇ gaˇ ui cuiˆ g’awˬ myahˇ ni jawˇ g’aˬ ngeh, nga ma ̭ mˇ myawˬ lehˬ hmˬ-awˇ, Yeˬluˇsaˬlehˬ meuˬ-ahˇ iˇ-euˬ ma. ¹⁶ Gehˇsaˬliˇ meuˬ-ahˇ jawˇ-eu zaˬ lahˇ tiˬ paˆ na deuˬ nga ma ̭-euˬ mehˬ nah caw teh le-awˇ, nga ma ̭ ya ̭ leˇ-eu lehˇ g’eh-eu Maˬnaˬsoˬ lehˇ myahˇ-euˬ g’aˬ-euˬ nymˇ-ahˇ, nga ma ̭-ahˇ sheuˬ ha laˇ-euˬ meh. Aˬ yaw ̭-aˬ, Guˇbaˬluˇ iˇ jaw lahˇ-ahˇ jawˇ-euˬ tsawˇ haˬ pyeu ̭-awˇ, jah-eu tsawˇ haˬ pyeu ̭ laˇ-euˬ myahˇ laˇ-euˬ meh. ¹⁷ Nga ma ̭ Yeˬluˇsaˬlehˬ meuˬ-ahˇ iˇ keuˆ ngeh, jah-eu tsawˇ haˬ deuˬ nga ma ̭-ahˇ laˬ k’aˬ tiˬ cehˇ ha geu ̭ nehˬ la ̭-euˬ meh. ¹⁸ Yawˬ nah yawˬ, Pawˇluˆ nga ma ̭ Yaˬkoˆ jawˇ gaˇ dawˬ deh g’a-iˇ-euˬ ma. Ka li zaˬ aˇ muˇ k’oeˇ taˆ aˬ yui ̭ aˬ tsu geu ̭ lu ̭-eu deuˬ dawˬ tawˆ lu ̭, k’oeˇ gaˇ uiˬ laˇ-euˬ meh. ¹⁹ Aˬ yaw ̭ ma ̭-ahˇ Pawˇluˆ dawˬ cawˬ puˬ nehˬ-awˇ, aˬ yaw ̭-ahˇ g’oe-awˇ Miˬyehˇ aˬ cawˬ-euˬ tsawˇ jeuˬ tsawˇ ca deuˬ g’aˇ duˬ aˬ joˆ-ehˇ mˇ-euˬ shaˇ-euˬ gaˇ kawˆ, tiˬ jeˬ saˇ-iˬ tiˬ jeˬ dzawˇ nehˬ-euˬ meh. ²⁰ Aˬ yaw ̭ k’oeˇ lo ̭-ehˇ dzawˇ nehˬ gaˇ ya gaˬ ngeh, aˬ yaw ̭ ma ̭ dawˬ tawˆ lu ̭ Miˬyehˇ-ahˇ ja ceuˬ-euˬ meh. K’oeˇ naˇ, Pawˇluˆ-ahˇ aˬ yaw ̭ ma ̭ heu lo ̭-ehˇ ehˇ nehˬ-euˬ meh. "Aˬ nyiˇ Pawˇluˆ-oˇ, jah-eu tsawˇ haˬ pyeu ̭ laˇ-euˬ Yuˇdaˆ tsawˆ haˬ aˇ myaˆ ni jawˇ-eu hawˇ-eu, aˬ yaw ̭ ma ̭ Zahˇ dawˬ k’o ̭ dawˬ-ahˇ aˇ naˆ ni nui ma keuˆ lu ̭-eu nawˇ mawˇ lu ̭ meh. ²¹ Aˬ cawˬ tsawˇ jeuˬ-euˬ miˇ k’ahˬ deuˬ la ̭ k’oeˇ k’aˇ jawˇ-eu Yuˇdaˆ tsawˇ haˬ deuˬ-ahˇ, Moˇseˬ-euˬ Zahˇ dawˬ k’o ̭ dawˬ-ahˇ byehˇ dzeh ni nawˇ mehˬ nehˬ tsoˆ nehˬ-awˇ, aˬ yaw ̭ ma ̭-euˬ zaˬ deuˬ-ahˇ baˆ k’oˆ mehˬ dzaˬ maˬ yehˬ nehˬ-ehˇ, Yuˇdaˆ tsawˇ haˬ-euˬ zahˇ sahˇ k’o ̭-ahˇ maˬ caw teh ni deh ̭-eu g’aˇ duˬ nawˇ mehˬ lu ̭-eu gaˇ kawˆ, aˬ yaw ̭ ma ̭ ya gaˬ g’aˬ-euˬ meh. ²² Nawˇ oe keuˆ-euˬ gaˇ kawˆ aˬ yaw ̭ ma ̭ ya gaˬ-eu yaw duˬ baw teh ̭-a. Aˬ joˆ-ehˇ jahˇ nmˇ. ²³ Nga ma ̭ nawˬ-ahˇ heu lo ̭-ehˇ bi jahˇ maw ̭ miˇ-a. Dawˬ ma saˇ jaˇ dzaˬ lu ̭-eu tsawˇ haˬ oeˬ g’aˬ heu gaˇ jawˇ meh. ²⁴ Aˬ yaw ̭ ma ̭ nehˬ-ehˇ le-awˇ g’awˇ mawˇ shawˇ-eu zahˇ jahˇ leˇ-awˬ. Aˬ yaw ̭ ma ̭ uˬ jehˆ jehˆ dzeh nya ni aˬ yaw ̭ ma ̭ g’aˇ duˬ aˇ poeˬ bi ̭ nehˬ-awˬ. K’oeˇlo ̭-ehˇ jahˇ naˇ, nawˬ-euˬ gaˇ kawˆ aˬ cawˬ k’aˇ ehˇ-eu lo ̭-ehˇ maˬ ngeuˇ law hawˇ ngaˬ lehˇ yawˬ g’aˬ na lu ̭ ya siˬ duˬ-eu uˬ ta ̭, nawˇ k’aw ̭ Moˇseˬ-euˬ Zahˇ dawˬ k’o ̭ dawˬ-ahˇ caw teh-awˇ deh ̭ lu ̭ gaˇ aˬ yaw ̭ ma ̭ ya mawˇ teh ̭-a. ²⁵ Ehˇ k’aw ̭, jah-eu tsawˇ haˬ pyeu ̭ laˇ-euˬ aˬ cawˬ tsawˇ jeuˬ deuˬ-ahˇ nga ma ̭ sahˬ bo ̭ bo ̭ ahˇ g’eh-awˇ, tahˬ pahˬ aˬ ma mawˇ kawˇ-ahˇ lawˇ nehˬ g’aˬ-eu dzaˇ-ahˇ aˬ yaw ̭ ma ̭ maˬ dzaˬ-eu g’aˇ duˬ maˬ ehˇ, shiˬ maˬ dzaˬ-euˬ g’aˇ duˬ maˬ ehˇ, shiˬ maˬ seh ̭ doˆ-euˬ shaˬ jiˇ maˬ dzaˬ-eu g’aˇ duˬ maˬ ehˇ, maˬ tsaˬ maˬ dawˇ-eu k’aˬ miˬ sheu-eu jeˬ maˬ mˇ-eu g’aˇ duˬ maˬ ehˇ, nga ma ̭ bawˬ dzaˬ tsehˆ g’aˬ-euˬ gaˇ kawˆ ehˇ nehˬ-euˬ ma." ²⁶ K’oeˇ naˇ, tsawˇ haˬ k’oeˇ oeˬ g’aˬ-ahˇ Pawˇluˆ kuˇ-awˇ, yawˬ nah yawˬ aˬ yaw ̭ ma ̭ nehˬ-ehˇ g’awˇ mawˇ shawˇ-eu zahˇ jahˇ-euˬ meh. Uˬ duˬ tahˬ nymˇ nymˇ ma la ̭ k’oeˇ aˬ yaw ̭ uˇ leˇ-awˇ, aˬ yaw ̭ ma ̭ g’awˇ mawˇ shawˇ-eu zahˇ jahˇ-eu k’oeˇ aˇ myaˆ nah ga leˇ-eu, aˬ geu ngeh nah aˇ saˬ saˬ-eu hawˇ-eu, aˬ yaw ̭ g’aˬ yaw ̭ g’aˇ duˬ lawˇ-eu jeˬ aˬ joˆ-ehˇ lehˬ hmˬ taˬ-euˬ gaˇ kawˆ ehˇ nehˬ leˇ-euˬ meh. ²⁷ Ehˇ k’aw ̭, g’awˇ mawˇ shawˇ-eu zahˇ jahˇ-eu aˇ yamˬ shi ̭ nah k’oeˇ jiˇ-eu dawˬ peh peh laˇ ngeh, Aˬshaˆ miˆ k’ahˬ-ahˇ jawˇ-eu Yuˇdaˆ tsawˇ haˬ tiˬ paˆ na deuˬ, Uˬ duˬ tahˬ nymˇ nymˇ ma la ̭ k’oeˇ Pawˇluˆ-ahˇ haw mawˇ-euˬ meh. Aˬ yaw ̭ ma ̭ tsawˇ haˬ aˇ ma ̭ dawˬ tawˆ lu ̭-ahˇ laˆ luiˬ-awˇ, Pawˇluˆ-ahˇ tsuˆ tehˬ taˬ-euˬ meh. ²⁸ Aˬ yaw ̭ ma ̭ guˇ-awˇ ehˇ-eu, "Iˇsaˬleˬlaˆ tsawˇ haˬ deuˬ-oˇ, caw ba le-awˬ. Tsawˇ haˬ heu g’aˬ yawˬ gaˇ na lu ̭ iˇ doe-awˇ, Iˇsaˬleˬlaˆ tsawˇ haˬ maˬ ehˇ, Moˇseˬ-euˬ Zahˇ dawˬ k’o ̭ dawˬ maˬ ehˇ, Uˬ duˬ tahˬ nymˇ nymˇ ma heu maˬ ehˇ, maˬ tsaˬ-a lehˇ mehˬ mehˬ-ehˇ cah-eu meh. Nymˬ-mˇ poˆ jawˇ-aˬ, Uˬ duˬ tahˬ nymˇ nymˇ ma la ̭ k’oeˇ keuˆ ni aˬ cawˬ tsawˇ jeuˬ paˇ sheuˬ ahˇ la ̭-awˇ, muiˬ-eu shawˇ-eu jawˇ duˬ-ahˇ laˆ jaw ̭ laˇ-euˬ ngaˇ." ²⁹ (Eˇpeˇsu meuˬ-ahˇ jawˇ-eu Daˬloˇbeˬ lehˇ myahˇ-euˬ tiˬ g’aˬ Pawˇluˆ nehˬ-ehˇ meuˬ la ̭ k’oeˇ cah lu ̭ gaˇ yaw beh neh aˬ yaw ̭ ma ̭ mawˇ taˬ-euˬ miˇ neh, Pawˇluˆ neh aˬ yaw ̭-ahˇ Uˬ duˬ tahˬ nymˇ nymˇ ma la ̭ k’oeˇ sheuˬ la ̭-euˬ teh ̭-a lehˇ noeˬ-awˇ k’oeˇ lo ̭-ehˇ ehˇ-eu jeˬ pyeu ̭-eu meh.) ³⁰ Meuˬ meuˬ lah-ehˇ luiˬ g’a laˇ-awˇ, baˬ ma ̭ puˇ jeˬ-ehˇ cehˆ g’eh la ̭-awˇ, Pawˇluˆ-ahˇ tsuˆ tehˬ-awˇ Uˬ duˬ tahˬ nymˇ nymˇ ma la ̭ nyiˇ g’eu doˆ le ̭-euˬ meh. Uˬ duˬ tahˬ nymˇ nymˇ ma-euˬ laˇ g’oˆ deuˬ tiˬ poˆ teh ̭-ehˇ piˬ tehˬ-euˬ meh. ³¹ Tsawˇ haˬ aˇ ma ̭ k’oeˇ deuˬ Pawˇluˆ-ahˇ seh ̭-eu lehˇ leh jeh-eu meh. K’oeˇ ngeh, Yeˬluˇsaˬlehˬ meuˬ meuˬ lah-ehˇ luiˬ g’a lu ̭-eu gaˇ kawˆ, Loˇmaˆ guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ jawˇ gaˇ gaˬ keuˆ leˇ-euˬ meh. ³² Yaw huiˬ yaw mahˇ k’oeˇ g’aˬ, guiˇ ma ̭ k’oeˇ taˆ aˬ yui ̭ bi geu ̭-eu deuˬ hawˇ-eu yehˇ deuˬ-ahˇ sheuˬ-awˇ, tiˬ poˆ teh ̭-ehˇ tsawˇ haˬ aˇ ma ̭ uiˬ leˇ taˬ-euˬ gaˇ cehˆ g’eh-euˬ meh. Aˬ yaw ̭ yehˇ sheuˬ-awˇ oe keuˆ-euˬ gaˇ tsawˇ haˬ k’oeˇ deuˬ ya mawˇ ngeh, Pawˇluˆ-ahˇ diˬ lu ̭-eu naˬ leˇ-euˬ meh. ³³ Yaw huiˬ yaw mahˇ k’oeˇ g’aˬ Pawˇluˆ jawˇ gaˇ iˇ-awˇ, aˬ yaw ̭-ahˇ nyeh ̭-awˇ shmˇ caˆ nyiˬ caˆ yuˇ-awˇ pa ̭-eu g’aˇ duˬ dawˬ bi ̭-euˬ meh. K’oeˇ naˇ, "Tsawˇ haˬ heu g’aˬ aˬ suˇ g’aˬ-a. Aˬ yaw ̭ aˬ jeˬ jahˇ taˬ" lehˇ naˇ haˬ-euˬ meh. ³⁴ Tsawˇ haˬ aˇ ma ̭ k’oeˇ ma ̭ tiˬ g’aˬ tiˬ jeˬ ehˇ ehˇ-ehˇ law ̭ g’a-eu miˇ neh, yaw huiˬ yaw mahˇ k’oeˇ g’aˬ maˬ naˇ haˬ duˬ nya-ehˇ, Pawˇluˆ-ahˇ taˆ-ahˇ sheuˬ g’eh-eu g’aˇ duˬ aˬ yaw ̭-euˬ tsawˇ haˬ deuˬ-ahˇ dawˬ bi ̭-euˬ meh. ³⁵ Pawˇluˆ dawˬ dzm dawˬ teh ̭-ahˇ le keuˆ ngeh, tsawˇ haˬ aˇ ma ̭ k’oeˇ ma ̭ aˬ yaw ̭-ahˇ diˬ-eu lehˇ yaw k’aˆ-ehˇ leh jeh-eu miˇ neh, yehˇ k’oeˇ deuˬ neh aˬ yaw ̭-ahˇ ciˬ g’eh-euˬ meh. ³⁶ Tsawˇ haˬ aˇ ma ̭ k’oeˇ ma ̭ "Aˬ yaw ̭-ahˇ seh ̭-awˬ" lehˇ guˇ guˇ-ehˇ, aˬ yaw ̭-euˬ mehˬ nah caw teh g’eh la ̭-euˬ meh. ³⁷ Yehˇ k’oeˇ deuˬ Pawˇluˆ-ahˇ taˆ la ̭ k’oeˇ sheuˬ uˇ le ̭-eu lehˇ g’eh ngeh, yaw huiˬ yaw mahˇ k’oeˇ g’aˬ-ahˇ Pawˇluˆ ehˇ nehˬ-eu, "Ngaˇ nawˬ-ahˇ dawˬ ngehˬ cawˬ maw ̭ nya." Yaw huiˬ yaw mahˇ k’oeˇ g’aˬ ehˇ-eu, "Nawˇ Heˬlaˬsaˇ dawˬ siˬ nya hawˇ ngaˬ laˬ. ³⁸ Toˆ-ehˇ ngeuˇ naˇ, miˇ nah huˬ nah miˇ k’ahˬ-ahˇ puiˬ-awˇ, guiˇ deuˆ-eu keu ka ba ̭ lu ̭-eu aˬ cawˬ-ahˇ seh ̭-euˬ tsawˇ haˬ oeˬ heˇ g’aˬ sheuˬ-awˇ bawˇ tsahˬ bawˇ dahˇ-ahˇ iˇ doˆ taˬ-euˬ Iˇjiˇtuˆ tsawˇ haˬ k’oeˇ g’aˬ nawˇ maˬ ngeuˇ law hawˇ ngaˬ laˬ." ³⁹ Pawˇluˆ ehˇ-eu, "Ngaˇ-aˬ, Giˇliˇciˆ miˇ k’ahˬ Daˬsuˆ meuˬ-ahˇ deh ̭ le-euˬ Yuˇdaˆ tsawˇ haˬ pyeu ̭-awˇ, huiˬ-eu meuˬ k’oeˇ meuˬ-euˬ miˇ k’ahˬ zaˬ pyeu ̭-eu ma. Tsawˇ haˬ teu deuˬ-ahˇ dawˬ tiˬ poˆ bi ngehˬ la ̭ sheˇ." ⁴⁰ Yaw huiˬ yaw mahˇ k’oeˇ g’aˬ Pawˇluˆ-ahˇ dawˬ ngehˬ-eu aˬ kawˬ-aˬ bi ̭-euˬ meh. K’oeˇ ngeh, Pawˇluˆ dawˬ dzm k’oeˇ taˆ yaw ̭-awˇ, tsawˇ haˬ k’oeˇ deuˬ-ahˇ ciˬ cuˇ ni jawˇ-eu g’aˇ duˬ la ̭ dzawˇ dzawˇ nehˬ-euˬ meh. Aˬ yaw ̭ ma ̭ ciˬ cuˇ ni jawˇ ngeh, aˬ yaw ̭ Heˬbyehˇ dawˬ ngehˬ-awˇ heu lo ̭-ehˇ ehˇ nehˬ-euˬ meh.

¹ "Aˬ yui ̭ aˬ nyiˇ deuˬ-oˇ, ngaˬ-euˬ gaˇ kawˆ naw ma ̭-ahˇ ngaˇ ngehˬ k’o ̭ gaˇ tiˬ poˆ naˇ haˬ sheˇ" lehˇ ehˇ nehˬ-euˬ meh. ² Aˬ yaw ̭ Heˬbyehˇ dawˬ ngehˬ gaˇ aˬ yaw ̭ ma ̭ ya gaˬ ngeh, yaw beh naˆ maˬ tseˇ ciˬ cuˇ ni paˇ pyeu ̭-iˇ-euˬ meh. K’oeˇ ngeh, Pawˇluˆ heu lo ̭-ehˇ ehˇ-eu meh. ³ "Ngaˇ-aˬ, Giˇliˇciˆ miˇ k’ahˬ Daˬsuˆ meuˬ-ahˇ deh ̭ le-euˬ Yuˇdaˆ tsawˇ haˬ tiˬ g’aˬ pyeu ̭-awˇ, Yeˬluˇsaˬlehˬ meuˬ la ̭ k’oeˇ Gaˬmaˬleˬlaˇ jawˇ gaˇ tsawˇ gahˇ dzaw huiˬ la ̭-euˬ tsawˇ haˬ ma. Aˬ dui-euˬ aˬ poeˬ aˬ bawˇ deuˬ-euˬ Zahˇ dawˬ k’o ̭ dawˬ deuˬ-ahˇ ngaˇ yaw muiˬ paˬ-ehˇ dzaw duˬ-awˇ, iˬ nah heu gaˇ uiˬ laˇ taˬ-euˬ naw ma ̭ lo ̭-ehˇ Miˬyehˇ-ahˇ nui ma keuˆ dui dui-eu tsawˇ haˬ tiˬ g’aˬ ma. ⁴ Gaˇma heu kahˇ mehˬ nah caw teh-eu tsawˇ haˬ deuˬ-ahˇ shiˇ gaˇ keuˆ ni ngaˇ k’ehˬ nehˬ k’aˆ nehˬ-euˬ ma. K’aˬ dzeˇ zaˬ hawˇ-eu zaˬ miˬ zaˬ deuˬ-ahˇ nyeh ̭-awˇ tawˬ-ahˇ dawˆ nehˬ-euˬ ma. ⁵ Ngaˇ ehˇ lu ̭-eu gaˇ kawˆ heu aˬ diˇ ngeuˇ meh lehˇ, Piˇ ma Yaw huiˬ g’aˬ hawˇ-eu meuˬ-euˬ Ba ̭dzah aˬ yui ̭ aˬ tsu dawˬ tawˆ lu ̭ siˬ duˬ mawˇ duˬ taˬ-euˬ meh. Daˬmaˬsehˇ meuˬ-ahˇ jawˇ-eu aˬ yui ̭ aˬ nyiˇ Yuˇdaˆ tsawˇ haˬ deuˬ jawˇ gaˇ bo ̭ nehˬ-euˬ sahˬ bo ̭, aˬ yaw ̭ ma ̭ ngaˬ-ahˇ bi ̭ la ̭-euˬ meh. K’oeˇ miˇ neh, k’oeˇ gaˇ jawˇ-eu jah-eu tsawˇ haˬ k’oeˇ deuˬ-ahˇ pa ̭-awˇ, Yeˬluˇsaˬlehˬ meuˬ-ahˇ tsahˇ ka le ̭-awˇ k’ehˬ nehˬ-eu g’aˇ duˬ, Daˬmaˬsehˇ meuˬ-ahˇ ngaˇ le-euˬ ma. ⁶ "Ngaˇ Daˬmaˬsehˇ meuˬ dawˬ peh le keuˆ ngeh, nah loˆ ceh laˇ-euˬ k’oeˇ yamˬ-ahˇ ja pyuˬ ni mˬ k’oeˇ taˆ neh k’aˆ dui dui-eu yaw seh ̭ ngaˬ-euˬ tiˬ jawˬ bya le-euˬ meh. ⁷ Ngaˇ miˇ tsa coˬ lah g’eh-euˬ ma. K’oeˇ ngeh ’Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ k’ehˬ te’ lehˇ ehˇ-eu teˇ saˇ ngaˇ ya gaˬ-euˬ ma. ⁸ ’Sahˬpaˬ-oˇ, nawˇ aˬ suˇ g’aˬ te’ lehˇ ngaˇ naˇ haˬ ngeh, ’Ngaˇ-aˬ, nawˇ k’ehˬ lu ̭-eu Naˬzaˬlehˇ tsawˇ haˬ Yeˬsuˇ ma’ lehˇ aˬ yaw ̭ ngaˬ-ahˇ ehˇ-eu meh. ⁹ Ngaˬ nehˬ-ehˇ le-euˬ tsawˇ haˬ deuˬ yaw sheh ̭ k’oeˇ-ahˇ ya mawˇ-euˬ meh. Ehˇ k’aw ̭, ngaˬ-ahˇ dawˬ ngehˬ cawˬ le-euˬ g’aˬ-euˬ teˇ saˇ-ahˇ aˬ yaw ̭ ma ̭ maˬ ya gaˬ-aˬ. ¹⁰ ’Sahˬpaˬ-oˇ, ngaˇ aˬ joˆ-ehˇ ya jahˇ nmˇ’ lehˇ naˇ haˬ ngeh, ’Tuˇ-awˇ Daˬmaˬsehˇ meuˬ-ahˇ le-awˬ. Miˬyehˇ neh nawˬ-ahˇ k’aˇ bi mˇ-eu lehˇ lehˬ hmˬ taˬ-euˬ yawˬ jeˬ na lu ̭, k’oeˇ gaˇ nawˬ-ahˇ ehˇ nehˬ la ̭ teh ̭-a’ lehˇ Sahˬpaˬ Yeˬsuˇ ehˇ-eu meh. ¹¹ Yaw sheh ̭ k’oeˇ baˬ da neh ngaˬ-euˬ myaˆ nuiˆ maˬ mawˇ nya-ehˇ pyeu ̭-iˇ-awˇ, ngaˬ-euˬ cawˬ k’oeˇ deuˬ neh aˬ la ̭-ahˇ bi tsahˇ-awˇ Daˬmaˬsehˇ meuˬ-ahˇ le uˇ-euˬ ma. ¹² "Meuˬ k’oeˇ meuˬ la ̭ k’oeˇ Aˬnaˬniˇ lehˇ myahˇ-euˬ tsawˇ haˬ tiˬ g’aˬ jawˇ-eu meh. Aˬ yaw ̭-aˬ, guiˬ lahˬ sa ̭ laˇ paw g’aˬ k’aˆ dui dui-awˇ, aˬ dui-euˬ Zahˇ dawˬ k’o ̭ dawˬ-ahˇ yaw muiˬ-ehˇ caw teh-eu miˇ neh, k’oeˇ gaˇ jawˇ-eu Yuˇdaˆ tsawˇ haˬ deuˬ aˬ yaw ̭-ahˇ yaw zeu baw dui dui-eu meh. ¹³ Aˬ yaw ̭ ngaˇ jawˇ gaˇ laˇ-awˇ, ngaˬ-euˬ dawˬ peh yaw ̭-awˇ, ’Aˬ nyiˇ Sawˇluˆ-oˇ, myaˆ nuiˆ mawˇ laˇ-awˬ’ lehˇ ehˇ ngeh, ja pyuˬ ni myaˆ nuiˆ paˇ mawˇ laˇ-awˇ, aˬ yaw ̭-ahˇ haw-euˬ ma. ¹⁴ Aˬ yaw ̭ ehˇ-eu, ’Miˬyehˇ-euˬ nui k’ahˇ-ahˇ nawˇ siˬ nya laˇ ni maˬ ehˇ, aˬ yaw ̭-euˬ tsaˬ-eu dawˇ-eu Zaˬk’aˆ-ahˇ ya mawˇ ni maˬ ehˇ, aˬ yaw ̭-euˬ k’aˬ meh dawˬ ngehˬ gaˇ ya gaˬ ni maˬ ehˇ, aˬ dui-euˬ aˬ poeˬ aˬ bawˇ deuˬ-euˬ Miˬyehˇ nawˬ-ahˇ tseˇ doˆ-euˬ meh. ¹⁵ Aˬ jeˬ miˇ neh ehˇ naˇ, nawˬ neh k’aˇ ya gaˬ k’aˇ ya mawˇ-euˬ jeˬ tsawˇ haˬ yawˬ g’aˬ na lu ̭-ahˇ dzawˇ mehˬ nehˬ-eu la ̭ k’oeˇ, aˬ yaw ̭ g’aˇ duˬ nawˇ saˇ kiˇ ya kamˬ teh ̭-a. ¹⁶ Nymˬ-mˇ nyi naˬ nyi naˬ-ehˇ taˬ paˇ jawˇ. Tuˇ-awˇ iˇ cu ̭ shawˇ-awˇ, aˬ yaw ̭-ahˇ guiˬ lahˬ shaˇ-eu la ̭ k’oeˇ nawˬ-euˬ iˬ baˇ tsiˬ shawˇ-awˬ.’ ¹⁷ "Yeˬluˇsaˬlehˬ meuˬ-ahˇ ngaˇ g’o ̭ le-awˇ, Uˬ duˬ tahˬ nymˇ nymˇ ma la ̭ k’oeˇ guiˬ lahˬ shaˇ lu ̭ ngeh, yaw sahˇ la ̭ k’oeˇ heu lo ̭-ehˇ ya mawˇ-euˬ ma. ¹⁸ Sahˬpaˬ Yeˬsuˇ-ahˇ ngaˇ ya mawˇ-euˬ ma. Aˬ yaw ̭ ngaˬ-ahˇ ehˇ-eu, ’Yaw kawˇ-ehˇ lehˬ hmˬ-awˇ Yeˬluˇsaˬlehˬ meuˬ-ahˇ neh doˆ-iˇ-awˬ. Aˬ jeˬ miˇ neh ehˇ naˇ, heu gaˇ jawˇ-eu tsawˇ haˬ deuˬ-aˬ, nawˇ ngaˬ-euˬ gaˇ kawˆ saˇ kiˇ kamˬ gaˇ maˬ ha geu ̭-aˇ.’ ¹⁹ K’oeˇ ngeh, ngaˇ heu lo ̭-ehˇ ehˇ-euˬ ma. ’Sahˬpaˬ-oˇ, uˬ duˬ tahˬ nymˇ k’aˇ jaˆ gaˇ ngaˇ iˇ-awˇ, nawˬ-ahˇ jah-eu tsawˇ haˬ deuˬ-ahˇ nyeh ̭ nyeh ̭-ehˇ diˬ-euˬ gaˇ kawˆ aˬ yaw ̭ ma ̭ yaw muiˬ paˬ-ehˇ siˬ nya meh. ²⁰ K’oeˇ uˬ ta ̭, nawˬ-euˬ g’aˇ duˬ saˇ kiˇ kamˬ-eu g’aˬ pyeu ̭-eu Saˬteˬpaˬ-ahˇ seh ̭ ngeh, ngaˇ k’aw ̭ k’oeˇ gaˇ jawˇ-euˬ ma. A yaw ̭-ahˇ seh ̭ gaˇ ngaˇ g’aˬ ba ̭ ba ̭-awˇ, aˬ yaw ̭-ahˇ diˬ seh ̭ leˇ-euˬ deuˬ mehˬ tsoeˬ lehˆ taˬ ya ̭-euˬ gaˇ ngaˇ lo ̭ ya ̭-euˬ ma.’ ²¹ Aˬ yaw ̭ ngaˬ-ahˇ ehˇ-eu, ’Iˇ-awˬ. Gaˇ mahˇ kaˬ gaˇ jawˇ-eu aˬ cawˬ tsawˇ jeuˬ tsawˇ ca deuˬ jawˇ gaˇ ngaˇ nawˬ-ahˇ k’ehˇ g’eh-eu ma."’ ²² Dawˬ k’oeˇ dawˬ ngehˬ laˇ gaˇ keuˆ ni, Pawˇluˆ ehˇ gaˇ aˬ yaw ̭ ma ̭ ciˬ cuˇ ni naˇ haˬ lu ̭-eu meh. Ehˇ k’aw ̭, dawˬ k’oeˇ dawˬ-ahˇ ya gaˬ ngeh, aˬ yaw ̭ ma ̭ yaw k’aˆ-ehˇ guˇ-awˇ ehˇ-eu, "Tsawˇ haˬ teu g’aˬ-ahˇ taˬ paˇ bi deh ̭. Seh ̭-awˬ. Yaw deh ̭ bi deh ̭-eu maˬ paˇ geuˇ ngaˇ." ²³ Mehˬ tsoeˬ dzeh diˇ-eu deuˬ dzeh diˇ-awˇ, k’aˬ lehˇ byaˆ diˇ-eu deuˬ byaˆ diˇ byaˆ diˇ-ehˇ k’oeˇ lo ̭-ehˇ guˇ-eu meh. ²⁴ Loˇmaˆ guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ k’oeˇ g’aˬ, Pawˇluˆ-ahˇ taˆ la ̭ k’oeˇ sheuˬ ahˇ g’eh-eu g’aˇ duˬ aˬ yaw ̭-euˬ tsawˇ haˬ deuˬ-ahˇ dawˬ bi ̭-awˇ, aˬ jeˬ miˇ neh Yuˇdaˆ tsawˇ haˬ deuˬ aˬ yaw ̭-ahˇ k’oeˇ lo ̭-ehˇ guˇ-eu gaˇ kawˆ siˬ duˬ laˇ ni, Pawˇluˆ-ahˇ yahˬ caˆ neh jui ̭-awˇ pyehˆ tseˇ naˇ haˬ-eu g’aˇ duˬ ehˇ nehˬ-euˬ meh. ²⁵ Ehˇ k’aw ̭, aˬ yaw ̭-ahˇ yahˬ caˆ neh jui ̭-eu lehˇ pa ̭ taw ̭ g’aˬ ngeh, yehˇ k’oeˇ deuˬ k’oeˇ taˆ aˬ yui ̭ geu ̭-eu g’aˬ-ahˇ Pawˇluˆ ehˇ nehˬ-eu, "Loˇmaˆ miˇ k’ahˬ zaˬ tiˬ g’aˬ-ahˇ yaˇ k’aˬ maˬ daˇ tsehˆ ni teu lo ̭-ehˇ jui ̭-eu aˬ kawˬ-aˬ jaˆ ta loˇ." ²⁶ Yehˇ deuˬ k’oeˇ taˆ aˬ yui ̭ geu ̭ lu ̭-eu k’oeˇ g’aˬ dawˬ k’oeˇ dawˬ-ahˇ ya gaˬ ngeh, guiˇ ma ̭-ahˇ uˆ lahˇ-eu yaw huiˬ yaw mahˇ jawˇ gaˇ le-awˇ ehˇ nehˬ-eu, "Nawˇ aˬ joˆ-ehˇ jahˇ-eu g’eh te. Tsawˇ haˬ k’oeˇ g’aˬ Loˇmaˆ miˇ k’ahˬ zaˬ law hawˇ ngaˬ tawˇ." ²⁷ K’oeˇ ngeh, yaw huiˬ yaw mahˇ k’oeˇ g’aˬ Pawˇluˆ jawˇ gaˇ iˇ-awˇ, "Nawˇ Loˇmaˆ miˇ k’ahˬ zaˬ te loˇ" lehˇ naˇ haˬ ngeh, "Ngeuˇ ma" lehˇ Pawˇluˆ ehˇ k’o ̭ nehˬ-euˬ meh. ²⁸ Yaw huiˬ yaw mahˇ k’oeˇ g’aˬ ehˇ-eu, "Ngaˇ-aˬ, pyuˇ g’awˬ mya ni bi ̭-awˇ Loˇmaˆ miˇ k’ahˬ zaˬ pyeu ̭ laˇ-euˬ ma." Pawˇluˆ ehˇ-eu, "Ngaˇ law nmˇ-aˬ, deh ̭ le ngeh neh Loˇmaˆ miˇ k’ahˬ zaˬ ma." ²⁹ K’oeˇ ngeh jawˇ, Pawˇluˆ-ahˇ yahˬ caˆ neh jui ̭-awˇ naˇ haˬ-eu lehˇ g’eh-eu tsawˇ haˬ k’oeˇ deuˬ tiˬ poˆ teh ̭-ehˇ naˇ k’ah paw jiˆ k’o ̭ le-euˬ meh. Yaw huiˬ yaw mahˇ k’oeˇ g’aˬ-aˬ, aˬ yaw ̭ neh shmˇ caˆ pa ̭ taˬ-euˬ Pawˇluˆ k’oeˇ g’aˬ Loˇmaˆ miˇ k’ahˬ zaˬ pyeu ̭-eu siˬ duˬ leˇ ngeh, tsawˬ guˆ-iˇ-euˬ meh. ³⁰ Yuˇdaˆ tsawˇ haˬ deuˬ Pawˇluˆ-ahˇ aˬ joˆ-ehˇ iˬ baˇ taˬ lu ̭-eu gaˇ kawˆ, Loˇmaˆ guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ k’oeˇ g’aˬ siˬ duˬ maw ̭-eu meh. K’oeˇ miˇ neh, yawˬ nah yawˬ Pawˇluˆ-ahˇ pa ̭ taˬ-euˬ shmˇ caˆ bi puiˇ-awˇ, piˇ ma aˬ yui ̭ deuˬ hawˇ-eu Ba ̭ dzah-ahˇ uˇ-eu tsawˇ haˬ dawˬ tawˆ lu ̭ uiˬ laˇ-eu g’aˇ duˬ dawˬ bi ̭-euˬ meh. K’oeˇ naˇ, Pawˇluˆ-ahˇ sheuˬ la ̭-awˇ, aˬ yaw ̭ ma ̭-euˬ mehˬ shi bi yaw ̭-euˬ meh.

¹ K’oeˇ ngeh, Ba ̭ dzah-ahˇ Pawˇluˆ haw tsoˆ taˬ-awˇ ehˇ-eu, "Aˬ yui ̭ aˬ nyiˇ deuˬ-oˇ, iˬ nah keuˆ ni Miˬyehˇ mehˬ shi ngaˇ aˬ joˆ-ehˇ deh ̭ dzeuˇ jawˇ dzeuˇ la ̭-euˬ gaˇ kawˆ ngaˬ-euˬ nui ma la ̭ k’oeˇ shawˇ jehˆ ni jaˆ lu ̭ ma." ² Pawˇluˆ-euˬ mehˬ boeˬ-ahˇ tehˆ-eu g’aˇ duˬ, Pawˇluˆ-euˬ dawˬ peh yaw ̭ lu ̭-eu tsawˇ haˬ deuˬ-ahˇ Piˇ ma Yaw huiˬ g’aˬ pyeu ̭-eu Aˬnaˬniˇ neh dawˬ bi ̭ nehˬ-euˬ meh. ³ Aˬ yaw ̭-ahˇ Pawˇluˆ ehˇ nehˬ-eu, "Lu boeˬ leh ̭ pyuˇ taˬ-euˬ kaˇ pyawˇ-oˇ, nawˇ-aˬ Miˬyehˇ neh bi diˬ-eu yaw duˬ baw meh. Zahˇ dawˬ k’o ̭ dawˬ-ahˇ g’oe-awˇ ngaˬ-ahˇ yaˇ k’aˬ daˇ-eu lehˇ nawˇ teu gaˇ nuiˇ lu ̭-eu jeˬ maˇ-iˬ, aˬ jeˬ miˇ neh ngaˬ-ahˇ diˬ-awˬ lehˇ k’ehˇ-awˇ Zahˇ dawˬ k’o ̭ dawˬ-ahˇ bahˬ-eu jeˬ mˇ te." ⁴ Pawˇluˆ-euˬ dawˬ peh yaw ̭ lu ̭-eu tsawˇ haˬ tiˬ g’aˬ ehˇ-eu, "Miˬyehˇ-euˬ Piˇ ma Yaw huiˬ g’aˬ-ahˇ coeˬ leˇ ni nawˇ teu naˆ naˆ-ehˇ ehˇ k’mˬ te loˇ." ⁵ Pawˇluˆ ehˇ-eu, "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ-oˇ, aˬ yaw ̭ Piˇ ma Yaw huiˬ g’aˬ pyeu ̭-eu ngaˇ maˬ siˬ nya-aˬ. ’Nawˬ-euˬ tsawˇ jeuˬ-ahˇ uˆ lahˇ-eu g’aˬ-ahˇ dawˬ yaw doeˇ taˬ ngehˬ’ lehˇ, Jaˇli ̭ la ̭ k’oeˇ bo ̭ taˬ-euˬ jaˆ-eu meh." ⁶ Uiˬ laˇ taˬ-euˬ tsawˇ haˬ deuˬ la ̭ k’oeˇ, tiˬ paˆ deuˬ Paˬliˬsehˇ deuˬ pyeu ̭-awˇ tiˬ paˆ deuˬ Saˬduˬgehˇ deuˬ pyeu ̭-eu Pawˇluˆ haw siˬ ngeh, Ba ̭ dzah-ahˇ teˇ saˇ yaw k’aˆ k’aˆ-ehˇ guˇ-awˇ heu lo ̭-ehˇ ehˇ-eu meh. "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ-oˇ, ngaˇ Paˬliˬsehˇ ma. Ngaˬ da k’aw ̭ Paˬliˬsehˇ meh. Shiˇ-euˬ tsawˇ haˬ deuˬ g’o ̭ deh ̭ laˇ teh ̭-a lehˇ ngaˇ noeˬ tmˬ-euˬ tiˬ jeˬ baˬ da neh, aˬ cawˬ neh bi nyeh ̭-awˇ heu lo ̭-ehˇ bi naˇ haˬ gaˇ ya daˬ lu ̭-eu ma." ⁷ Aˬ yaw ̭ k’oeˇ lo ̭-ehˇ ehˇ g’aˬ-eu nehˬ-ehˇ, Paˬliˬsehˇ deuˬ hawˇ-eu Saˬduˬgehˇ deuˬ yaw kaˬ ja dzaˬ-awˇ, uiˬ laˇ taˬ-euˬ tsawˇ haˬ deuˬ aˇ muˇ nyiˬ muˇ paˆ-iˇ-euˬ meh. ⁸ (Aˬ jeˬ miˇ neh ehˇ naˇ, Saˬduˬgehˇ deuˬ-aˬ, shiˇ-euˬ tsawˇ haˬ g’o ̭ deh ̭ laˇ gaˇ maˬ jah-a. Mˬ taˆ g’aˬ k’ehˇ jawˇ meh lehˇ ehˇ gaˇ k’aw ̭ maˬ jah-a. Yaw sahˇ jawˇ meh lehˇ ehˇ-eu jeˬ-ahˇ k’aw ̭ maˬ jah-a. Ehˇ k’aw ̭, Paˬliˬsehˇ deuˬ-aˬ, k’oeˇ smˇ jeˬ lu ̭-ahˇ jah-eu meh.) ⁹ Paˬliˬsehˇ aˇ muˇ-ahˇ ta ̭-eu Zahˇ dawˬ k’o ̭ dawˬ mehˬ-eu saˬ laˬ tiˬ paˆ na deuˬ tsawˬ tuˇ laˇ-awˇ ehˇ-eu, "Tsawˇ haˬ heu g’aˬ-euˬ yaw lehˬ tiˬ jeˬ-iˬ aˬ dui maˬ mawˇ-aˬ. Yaw sahˇ neh maˬ ngeuˇ naˇ, mˬ taˆ g’aˬ k’ehˇ neh aˬ yaw ̭-ahˇ dawˬ ngehˬ cawˬ-euˬ maˬ siˬ tawˇ." ¹⁰ Aˬ yaw ̭ ma ̭ yaw kaˬ ja dzaˬ-eu k’oeˇ aˇ dzehˬ dzeuˇ-awˇ, Pawˇluˆ-ahˇ g’eu paˆ g’eu shaˆ paˬ-ehˇ pyeu ̭ laˇ taˬ-euˬ miˇ neh, Loˇmaˆ guiˇ ma ̭-ahˇ uˆ lahˇ-eu yaw huiˬ yaw mahˇ k’oeˇ g’aˬ k’ahˬ lahˇ laˇ-euˬ meh. K’oeˇ miˇ neh, tsawˇ haˬ aˇ ma ̭ jawˇ gaˇ iˇ ka-awˇ, Pawˇluˆ-ahˇ g’eu doˆ laˬ-iˇ-awˇ taˆ-ahˇ sheuˬ k’o ̭ g’eh-eu g’aˇ duˬ aˬ yaw ̭-euˬ yehˇ deuˬ-ahˇ dawˬ bi ̭-euˬ meh. ¹¹ K’oeˇ ngeh miˇ, Sahˬ paˬ Yeˬsuˇ Pawˇluˆ-euˬ dawˬ peh yaw ̭ le-awˇ ehˇ-eu, "Taˬ guˆ. Yeˬluˇsaˬlehˬ meuˬ la ̭ k’oeˇ ngaˬ-euˬ g’aˇ duˬ nawˇ saˇ kiˇ kamˬ g’aˬ-euˬ meh. Loˇmaˆ meuˬ la ̭ k’oeˇ k’aw ̭, k’oeˇ lo ̭-ehˇ ya kamˬ meh." ¹² Uˬ bya bya laˇ ngeh, Yuˇdaˆ tsawˇ haˬ tiˬ deuˬ tahˬ dzoeˇ-awˇ, Pawˇluˆ-ahˇ maˬ ya seh ̭ k’oeˇ keuˆ ni tiˬ jeˬ-iˬ maˬ dzaˬ maˬ dawˇ ni jawˇ ma lehˇ saˇ jaˇ dzaˬ-euˬ meh. ¹³ K’oeˇ lo ̭-ehˇ bawˬ k’oeˬ-euˬ tsawˇ haˬ oeˬ tseˇ g’aˬ dzehˬ-euˬ meh. ¹⁴ K’oeˇ naˇ, piˇ ma aˬ yui ̭ deuˬ hawˇ-eu aˬ yui ̭ aˬ tsu deuˬ jawˇ gaˇ aˬ yaw ̭ ma ̭ iˇ-awˇ ehˇ-eu, "Pawˇluˆ-ahˇ maˬ ya seh ̭ k’oeˇ keuˆ ni tiˬ jeˬ-iˬ maˬ dzaˬ maˬ dawˇ ni jawˇ ma nga ma ̭ tiˬ kawˆ lo ̭-ehˇ saˇ jaˇ dzaˬ g’aˬ taˬ-euˬ ma. ¹⁵ Nymˬ-mˇ poˆ jawˇ-aˬ, Pawˇluˆ gaˇ kawˆ naw ma ̭ yaw duˬ duˬ-ehˇ pyehˆ tseˇ duˬ maw ̭ nya lehˇ myahˇ-awˇ, aˬ yaw ̭-ahˇ naw ma ̭ jawˇ gaˇ bi sheuˬ ha laˇ-eu g’aˇ duˬ Loˇmaˆ guiˇ ma ̭-ahˇ uˆ lahˇ-eu yaw huiˬ yaw mahˇ k’oeˇ g’aˬ jawˇ gaˇ bi shaˇ leˇ-awˬ. Aˬ yaw ̭ heu gaˇ maˬ ya oe keuˆ mi naˆ-ehˇ seh ̭ dzeh-eu g’aˇ duˬ nga ma ̭ lehˬ hmˬ-awˇ lo ̭ ma." ¹⁶ Aˬ yaw ̭ ma ̭ k’oeˇ lo ̭-ehˇ bawˬ k’oeˬ-euˬ gaˇ kawˆ, Pawˇluˆ-euˬ zaˬ oeˇ tiˬ g’aˬ ya gaˬ-awˇ, taˆ-ahˇ le-awˇ Pawˇluˆ-ahˇ ehˇ nehˬ leˇ-euˬ meh. ¹⁷ K’oeˇ ngeh, Loˇmaˆ yehˇ k’oeˇ taˆ aˬ yui ̭ geu ̭-eu tiˬ g’aˬ-ahˇ Pawˇluˆ kuˇ-awˇ ehˇ nehˬ-eu, "Aˬ li heu g’aˬ-ahˇ guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ jawˇ gaˇ tiˬ poˆ sheuˬ ha nehˬ leˇ sheˇ. Aˬ yaw ̭ dzawˇ nehˬ leˇ paˬ-ehˇ g’eh-eu gaˇ kawˆ jaˆ te jeˇ." ¹⁸ Yehˇ k’oeˇ taˆ aˬ yui ̭ geu ̭-eu k’oeˇ g’aˬ, aˬ li k’oeˇ li-ahˇ yaw huiˬ yaw mahˇ k’oeˇ g’aˬ jawˇ gaˇ sheuˬ g’eh-awˇ ehˇ nehˬ-eu, "Aˬ li heu g’aˬ nawˬ-ahˇ dzawˇ nehˬ paˬ-ehˇ g’eh-eu gaˇ kawˆ jaˆ-eu miˇ neh, nawˇ jawˇ gaˇ tiˬ poˆ sheuˬ ha leˇ nehˬ la ̭ lehˇ tawˬ-ahˇ uˇ-eu Pawˇluˆ k’oeˇ g’aˬ ngaˬ-ahˇ kuˇ-awˇ ehˇ nehˬ la ̭-euˬ meh." ¹⁹ Yaw huiˬ yaw mahˇ k’oeˇ g’aˬ aˬ li k’oeˇ li-euˬ aˬ la ̭-ahˇ tsahˇ-awˇ, baˇ za ̭-ahˇ iˇ-awˇ ehˇ-eu, "Nawˇ ngaˬ-ahˇ aˬ jeˬ dzawˇ nehˬ maw ̭-eu jaˆ te." ²⁰ Aˬ li k’oeˇ li ehˇ-eu, "Pawˇluˆ-euˬ gaˇ kawˆ yaw muiˬ paˬ-ehˇ ya siˬ duˬ ni Ba ̭ dzah mehˬ shi pyehˆ tseˇ haw maw ̭ nya lehˇ myahˇ-awˇ, Pawˇluˆ-ahˇ Ba ̭ dzah-ahˇ bi sheuˬ ha le-eu g’aˇ duˬ ni shawˬ nah nawˬ-ahˇ bi shaˇ laˇ-eu lehˇ Yuˇdaˆ tsawˇ haˬ aˬ yui ̭ aˬ tsu deuˬ bawˬ dzaˬ tsaˬ taˬ-euˬ meh. ²¹ Ehˇ k’aw ̭, aˬ yaw ̭ ma ̭ ehˇ gaˇ taˬ naˇ haˬ. Aˬ jeˬ miˇ neh ehˇ naˇ, tsawˇ haˬ oeˬ tseˇ g’aˬ dzehˬ ni dzuˇ za ̭-awˇ lo ̭ lu ̭-eu meh. Pawˇluˆ-ahˇ maˬ ya seh ̭ k’oeˇ keuˆ ni tiˬ jeˬ-iˬ maˬ dzaˬ maˬ dawˇ ni jawˇ ma lehˇ aˬ yaw ̭ ma ̭ saˇ jaˇ dzaˬ tsehˆ taˬ-euˬ meh. Nymˬ-mˇ aˬ yaw ̭ ma ̭ lehˬ hmˬ dah jiˇ taˬ-awˇ nawˬ neh ngehˬ tsehˆ ehˇ tsehˆ-euˬ dawˬ-ahˇ lo ̭ lu ̭-eu teh ̭ meh." ²² K’oeˇ ngeh, yaw huiˬ yaw mahˇ k’oeˇ g’aˬ ehˇ-eu, "Nawˇ ngaˬ-ahˇ heu lo ̭-ehˇ dzawˇ nehˬ laˇ-euˬ gaˇ kawˆ aˬ cawˬ tiˬ g’aˬ-iˬ taˬ bi siˬ de." K’oeˇ naˇ, aˬ li k’oeˇ li-ahˇ bi g’o ̭-iˇ-euˬ meh. ²³ K’oeˇ ngeh, Loˇmaˆ guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ k’oeˇ g’aˬ, aˬ yaw ̭-euˬ yehˇ deuˬ k’oeˇ taˆ aˬ yui ̭ bi geu ̭-eu nyiˬ g’aˬ-ahˇ kuˇ-awˇ ehˇ nehˬ-eu, "Yehˇ nyiˬ yaˇ g’aˬ, mahˬ dziˬ-eu yehˇ shi ̭ tseˇ g’aˬ hawˇ-eu, gahˬ ba ̭-eu yehˇ nyiˬ yaˇ g’aˬ lehˬ hmˬ-awˇ, nymˇ ci ̭ naˬ liˬ g’oeˬ la ̭-ahˇ Gehˇsaˬliˇ meuˬ-ahˇ iˇ-eu g’aˇ duˬ lehˬ hmˬ dah taˬ-awˬ. ²⁴ Pawˇluˆ bi dziˬ-eu mahˬ k’aw ̭ lehˬ hmˬ nehˬ-awˇ, sahˬ paˬ Peˬliˇ jawˇ gaˇ yaw muiˬ paˬ-ehˇ sheuˬ keuˆ na nehˬ-iˇ-awˬ." ²⁵ Yaw huiˬ yaw mahˇ k’oeˇ g’aˬ sahˬ paˬ Peˬliˇ-ahˇ heu lo ̭-ehˇ sahˬ bo ̭ bo ̭ ahˇ g’eh-euˬ meh. ²⁶ "Huiˬ-eu mahˇ-eu sahˬ paˬ Peˬliˇ jawˇ gaˇ, ngaˇ Gaˬlawˇdiˇ Luˇsiˆ sahˬ bo ̭ bo ̭-awˇ dawˬ cawˬ puˬ ahˇ le ̭-eu ma. ²⁷ Yuˇdaˆ tsawˇ haˬ deuˬ tsawˇ haˬ heu g’aˬ-ahˇ nyeh ̭-awˇ seh ̭-eu lehˇ g’eh-eu meh. Aˬ yaw ̭ Loˇmaˆ miˇ k’ahˬ zaˬ pyeu ̭-eu gaˇ kawˆ ngaˇ ya siˬ-euˬ miˇ neh, ngaˬ-euˬ yehˇ deuˬ nehˬ-ehˇ iˇ-awˇ ka k’o ̭ laˬ-iˇ-euˬ ma. ²⁸ Aˬ yaw ̭ ma ̭ aˬ yaw ̭-ahˇ aˬ jeˬ iˬ baˇ taˬ k’aˇ za-eu nga lehˇ ngaˇ siˬ duˬ maw ̭-eu miˇ neh, aˬ yaw ̭-ahˇ aˬ yaw ̭ ma ̭-euˬ Ba ̭ dzah-ahˇ sheuˬ g’eh-euˬ ma. ²⁹ Aˬ yaw ̭-ahˇ seh ̭ paˬ-ehˇ maˬ ehˇ, tawˬ-ahˇ dawˆ paˬ-ehˇ maˬ ehˇ, aˬ yaw ̭ neh mˇ-euˬ yaw lehˬ tiˬ jeˬ-iˬ ngaˇ maˬ mawˇ-aˬ. Aˬ yaw ̭-ahˇ iˬ baˇ taˬ-eu gaˇ kawˆ-aˬ, aˬ yaw ̭ ma ̭-euˬ zahˇ dawˬ k’o ̭ dawˬ-ahˇ ta ̭ leˇ-eu gaˇ kawˆ teh ̭ meh. ³⁰ Aˬ yaw ̭-ahˇ aˬ cawˬ seh ̭ k’oeˬ-eu lehˇ g’eh-eu ngaˇ ya siˬ ngeh, tiˬ poˆ teh ̭-ehˇ nawˇ jawˇ gaˇ bi sheuˬ ha le-eu g’aˇ duˬ noeˬ tsehˆ-euˬ ma. Aˬ yaw ̭-ahˇ yaˇ k’aˬ ja maw ̭-eu tsawˇ haˬ deuˬ nawˬ-euˬ mehˬ shi ja-iˇ-awˬ lehˇ ngaˇ ehˇ nehˬ-euˬ ma." ³¹ Yehˇ k’oeˇ deuˬ-aˬ, aˬ yaw ̭ ma ̭-ahˇ dawˬ bi ̭ taˬ-euˬ lo ̭-ehˇ mˇ-euˬ meh. Aˬ yaw ̭ ma ̭ Pawˇluˆ-ahˇ sheuˬ-awˇ, uˬ ci ̭ k’oeˇ miˇ la ̭ k’oeˇ Aˬdiˇbaˬliˇ meuˬ-ahˇ keuˆ ni sheuˬ keuˆ g’eh-euˬ meh. ³² Yawˬ nah yawˬ, kuiˇ zoˬ cah-eu yehˇ deuˬ taˆ-ahˇ g’o ̭-iˇ-awˇ, mahˬ dziˬ-eu yehˇ deuˬ teh ̭-ehˇ aˬ yaw ̭-ahˇ sheuˬ ha-iˇ-euˬ meh. ³³ Aˬ yaw ̭ ma ̭ aˬ yaw ̭-ahˇ Gehˇsaˬliˇ meuˬ-ahˇ sheuˬ keuˆ g’eh-awˇ, sahˬ bo ̭ k’oeˇ ta ̭ sahˬ paˬ k’oeˇ g’aˬ-ahˇ bi ̭-awˇ, Pawˇluˆ-ahˇ k’aw ̭ aˬ yaw ̭-euˬ aˬ la ̭ la ̭ k’oeˇ a nehˬ-euˬ meh. ³⁴ Sahˬ paˬ k’oeˇ g’aˬ sahˬ bo ̭ k’oeˇ ta ̭ gui haw-awˇ, Pawˇluˆ-ahˇ miˇ k’ahˬ aˬ geu k’ahˬ-ahˇ jawˇ-eu gaˇ kawˆ naˇ haˬ ngeh, Giˇliˇciˆ miˇ k’ahˬ-ahˇ jawˇ-eu gaˇ kawˆ ya siˬ-euˬ meh. ³⁵ Aˬ yaw ̭ ehˇ-eu, "Nawˬ-ahˇ yaˇ k’aˬ ja maw ̭-eu tsawˇ haˬ deuˬ oe keuˆ ngeh hawˇ-eu nawˬ-ahˇ k’aˇ naˇ haˬ paˬ-ehˇ g’eh-eu jeˬ naˇ haˬ ma." K’oeˇ naˇ, Pawˇluˆ-ahˇ yaw muiˬ paˬ-ehˇ lo ̭-awˇ Heˬloˆ neh gawˬ taˬ ya ̭-euˬ sahˬ paˬ-euˬ hawˇ nymˇ lahˇ la ̭ k’oeˇ bi jawˇ-eu g’aˇ duˬ dawˬ bi ̭-euˬ meh.

¹ Ngaˬ nah byah laˇ ngeh, Piˇ ma Yaw huiˬ g’aˬ pyeu ̭-eu Aˬnaˬniˇ hawˇ-eu Yuˇdaˆ tsawˇ haˬ aˬ yui ̭ aˬ tsu deuˬ, dawˬ ngehˬ-eu bym dui dui-eu Deˬlaˬduˇluˆ lehˇ myahˇ-euˬ tsawˇ haˬ tiˬ g’aˬ sheuˬ-awˇ Gehˇsaˬliˇ meuˬ-ahˇ iˇ-euˬ meh. Sahˬ paˬ Peˬliˇ-euˬ mehˬ shi aˬ yaw ̭ ma ̭ le-awˇ, Pawˇluˆ gaˇ kawˆ daˬ leˇ-euˬ meh. ² K’oeˇ naˇ, Pawˇluˆ-ahˇ sheuˬ uˇ la ̭-awˇ, Deˬlaˬduˇluˆ lehˇ kuˇ-eu k’oeˇ g’aˬ Pawˇluˆ gaˇ kawˆ heu lo ̭-ehˇ ehˇ-eu meh. "Huiˬ-eu mahˇ-eu sahˬ paˬ-oˇ, nawˇ zaˬ siˬ tsawˇ gahˇ byah-eu la ̭ k’oeˇ miˇ k’ahˬ-ahˇ uˆ lahˇ-eu baˬ da neh, aˇ k’o ̭ aˇ la g’awˬ myahˇ ni nui saˇ o ̭-awˇ co ̭ ngehˇ ni nga ma ̭ ya deh ̭-eu uˬ ta ̭, nga ma ̭-euˬ miˇ k’ahˬ muiˬ laˇ jaˬ laˇ ni yaw shui ̭ g’awˬ mya jeˬ beˬ paˇ laˆ paˇ nehˬ la ̭ gaˇ ya mawˇ-euˬ ma. ³ Nawˬ neh mˇ-euˬ gaˇ heu deuˬ-ahˇ, yawˬ gaˇ na lu ̭, yawˬ jawˇ na lu ̭ nga ma ̭ ha geu ̭-awˇ, nawˬ-euˬ guiˬ lahˬ-ahˇ ja ceuˬ dui dui-eu ma. ⁴ Ehˇ k’aw ̭, ngaˇ dawˬ g’awˬ mya ni ngehˬ-eu la ̭ k’oeˇ nawˬ-euˬ aˇ yamˬ maˬ laˆ jiˇ maw ̭ nya. Teu miˇ neh, nga ma ̭-euˬ gaˇ kawˆ ngaˇ yaw nymˇ nymˇ-ehˇ ehˇ gaˇ, g’awˬ shaˬ gaˬ-eu la ̭ k’oeˇ tiˬ poˆ naˇ haˬ nehˬ la ̭ lehˇ nawˬ-ahˇ shaˇ-eu ma. ⁵ Tsawˇ haˬ heu g’aˬ-aˬ, guˆ laˇ paˬ-ehˇ g’eh-eu haiˬ dui dui-eu tsawˇ haˬ tiˬ g’aˬ pyeu ̭-eu nga ma ̭ ya mawˇ-euˬ ma. Miˇ tsaˬ k’oeˇ taˆ k’aˇ jawˇ-eu Yuˇdaˆ tsawˇ haˬ deuˬ suˬ saˬ laˇ ni g’aˬ bi ̭-eu Naˬzaˬlehˇ aˇ muˇ -euˬ aˬ yui ̭ tiˬ g’aˬ pyeu ̭-eu meh. ⁶ K’oeˇ uˬ ta ̭, Uˬ duˬ tahˬ nymˇ nymˇ ma-ahˇ aˬ yaw ̭ laˆ jaw ̭-eu lehˇ g’eh-eu miˇ neh, nga ma ̭ aˬ yaw ̭-ahˇ nyeh ̭-euˬ ma. ⁸ Tsawˇ haˬ heu g’aˬ-ahˇ nawˇ naˇ haˬ naˇ, nga ma ̭ aˬ yaw ̭-ahˇ iˬ baˇ k’aˇ taˬ-eu yawˬ jeˬ na lu ̭ nawˇ ya siˬ duˬ teh ̭-a." ⁹ K’oeˇ lo ̭-ehˇ ehˇ gaˇ Yuˇdaˆ tsawˇ haˬ dawˬ tawˆ lu ̭ tsaˬ meh lehˇ ehˇ-eu meh. ¹⁰ K’oeˇ naˇ, Pawˇluˆ dawˬ ngehˬ-eu g’aˇ duˬ sahˬ paˬ Peˬliˇ la ̭ dzawˇ dzawˇ nehˬ ngeh, Pawˇluˆ heu lo ̭-ehˇ ehˇ-eu meh. "Nawˇ-aˬ, miˇ k’ahˬ heu k’ahˬ k’oeˇ taˆ yaˇ k’aˬ daˇ-eu g’aˬ geu ̭ lu ̭-eu g’awˬ mya k’o ̭ byah laˇ-euˬ meh. K’oeˇ miˇ neh, nawˬ-euˬ mehˬ shi ngaˬ-euˬ gaˇ kawˆ ya dzawˇ mehˬ-eu nui k’ahˇ shiˇ dui dui nya. ¹¹ Ngaˇ Yeˬluˇsaˬlehˬ meuˬ-ahˇ uˬ duˬ tahˬ leˇ-euˬ tseˇ nyi ̭ nah maˬ byah laˇ-aˬ siˬ lehˇ nawˇ siˬ nya teh ̭-a. ¹² Uˬ duˬ tahˬ nymˇ nymˇ ma la ̭ k’oeˇ maˬ ehˇ, uˬ duˬ tahˬ nymˇ nui deuˬ la ̭ k’oeˇ maˬ ehˇ, meuˬ la ̭ k’oeˇ tiˬ gaˇ na maˬ ehˇ, ngaˇ aˬ cawˬ nehˬ-ehˇ tsawˇ pyehˇ pyehˇ gaˇ Yuˇdaˆ tsawˇ haˬ deuˬ neh mawˇ taˬ-euˬ maˬ jaˆ-a. Aˬ cawˬ luiˬ g’a laˇ ni ngaˇ jahˇ gaˇ aˬ yaw ̭ ma ̭ neh mawˇ taˬ-euˬ k’aw ̭ maˬ jaˆ-a. ¹³ Aˬ yaw ̭ ma ̭ nymˬ-mˇ ngaˬ-euˬ yaw lehˬ poˆ-awˇ ehˇ lu ̭-eu gaˇ kawˆ teu deuˬ k’aw ̭, nawˬ-ahˇ saˇ kiˇ tiˬ jeˬ-iˬ maˬ mehˬ duˬ nya-a. ¹⁴ Ehˇ k’aw ̭, nawˬ-euˬ mehˬ shi ngaˇ dawˇ coe ni heu lo ̭-ehˇ ja doˆ-eu ma. Aˬ yaw ̭ ma ̭ maˬ tsaˬ-a lehˇ ehˇ-eu Gaˇma k’oeˇ kahˇ-ahˇ ngaˇ caw teh-eu la ̭ k’oeˇ, nga ma ̭-euˬ aˬ poeˬ aˬ bawˇ deuˬ-euˬ Miˬyehˇ-ahˇ ngaˇ uˬ duˬ tahˬ lu ̭-eu ma. Ehˇ k’aw ̭, Moˇseˬ-euˬ Zahˇ dawˬ k’o ̭ dawˬ hawˇ-eu Miˬyehˇ g’aˇ duˬ ngehˬ dah-eu deuˬ-euˬ sahˬ bo ̭ la ̭ k’oeˇ k’aˇ bo ̭ taˬ-euˬ yawˬ jeˬ na lu ̭-ahˇ k’aw ̭ ngaˇ jah lu ̭ ma. ¹⁵ Tsawˇ muiˬ tsawˇ doeˇ dawˬ tawˆ lu ̭-ahˇ shiˇ-euˬ gaˇ paˇ bi g’o ̭ deh ̭ laˇ teh ̭-a lehˇ tsawˇ haˬ heu deuˬ Miˬyehˇ la ̭ k’oeˇ noeˬ tmˬ-eu lo ̭-ehˇ, ngaˇ k’aw ̭ noeˬ tmˬ-eu ma. ¹⁶ Miˬyehˇ mehˬ shi maˬ ehˇ, tsawˇ haˬ zaˬ mehˬ shi maˬ ehˇ, ngaˬ-euˬ nui ma aˬ myah lu ̭ shawˇ jehˆ ni jaˆ ni leh jeh lu ̭-eu ma. ¹⁷ "Ngaˇ Yeˬluˇsaˬlehˬ meuˬ-ahˇ maˬ iˇ-ehˇ jawˇ-eu g’awˬ mya k’o ̭ byah laˇ-euˬ miˇ neh, ngaˬ-euˬ tsawˇ haˬ deuˬ jawˇ gaˇ pyuˇ shuiˇ ui cuiˆ sha ha nehˬiˇ-awˇ, lawˇ-eu shehˇ-eu jeˬ mˇ-iˇ-eu g’aˇ duˬ, k’oeˇ gaˇ iˇ-euˬ ma. ¹⁸ Ngaˇ k’oeˇ lo ̭-ehˇ mˇ lu ̭-awˇ, g’awˇ mawˇ shawˇ-eu zahˇ jahˇ g’aˬ ngeh, Uˬ duˬ tahˬ nymˇ nymˇ ma la ̭ k’oeˇ aˬ yaw ̭ ma ̭ ngaˬ-ahˇ mawˇ-euˬ meh. Ngaˬ nehˬ-ehˇ tsawˇ haˬ aˇ ma ̭ maˬ jawˇ-euˬ uˬ ta ̭, law ̭ g’a-eu jeˬ k’aw ̭ maˬ jaˆ-aˬ. ¹⁹ Ehˇ k’aw ̭, Aˬshaˆ miˇ k’ahˬ-ahˇ jawˇ-eu Yuˇdaˆ tsawˇ haˬ tiˬ deuˬ k’oeˇ gaˇ jawˇ-eu meh. Aˬ yaw ̭ ma ̭ k’aw ̭ ngaˬ-ahˇ iˬ baˇ taˬ k’aˇ za naˇ, nawˬ-euˬ mehˬ shi oe-awˇ ja-eu tsaˬ teh ̭-a. ²⁰ Maˬ ngeuˇ naˇ, Ba ̭dzah mehˬ shi ngaˇ yaw ̭ leˇ ngeh, ngaˬ-euˬ yaw lehˬ aˬ geu jeˬ mawˇ taˬ-euˬ jaˆ te lehˇ, heu gaˇ oe taˬ-euˬ tsawˇ haˬ teu deuˬ-ahˇ bi ehˇ haw sheˇ. ²¹ Aˬ yaw ̭ ma ̭-euˬ mehˬ shi ngaˇ yaw ̭ ngeh ngaˬ neh guˇ guˇ-ehˇ ehˇ-euˬ gaˇ kawˆ k’oeˇ hmˬ-ahˇ toeˬ ceh k’aˇ za-eu teh ̭ meh. ’Shiˇ-euˬ tsawˇ haˬ deuˬ paˇ g’o ̭ deh ̭ laˇ teh ̭-a lehˇ ngaˇ jah-eu tiˬ jeˬ baˬ da neh, iˬ nah naw ma ̭ neh nyeh ̭-awˇ heu ̭ lo ̭-ehˇ bi naˇ haˬ gaˇ ya daˬ lu ̭-eu ma’ lehˇ ehˇ-euˬ k’oeˇ dawˬ-ahˇ toeˬ ceh k’aˇ za-eu teh ̭ meh." ²² K’oeˇ ngeh, Gaˇma k’oeˇ kahˇ gaˇ kawˆ siˬ nya taˬ-euˬ Peˬliˇ-aˬ, "Guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ pyeu ̭-eu Luˇsiˆ oe keuˆ ngeh, naw ma ̭-euˬ gaˇ kawˆ heu hmˬ ngaˇ daˇ tsehˆ nehˬ ma" lehˇ ehˇ-awˇ, gaˇ kawˆ k’oeˇ hmˬ piˬ tehˬ-euˬ meh. ²³ K’oeˇ naˇ, Pawˇluˆ-ahˇ yaw muiˬ paˬ-ehˇ haw lahˇ-eu g’aˇ duˬ, yehˇ tiˬ yaˇ g’aˬ k’oeˇ taˆ aˬ yui ̭ geu ̭-eu g’aˬ-ahˇ aˬ yaw ̭ dawˬ bi ̭-euˬ meh. Ehˇ k’aw ̭, aˇ dzehˬ-ehˇ maˬ ka lahˇ ni bi jawˇ-eu uˬ ta ̭, aˬ yaw ̭ loˬ-eu jeˬ-ahˇ aˬ yaw ̭-euˬ cawˬ deuˬ caw ba nehˬ le gaˇ taˬ laˆ tsoeˬ lehˇ ehˇ nehˬ taˬ-euˬ meh. ²⁴ Smˬ nah oeˬ nah byah laˇ ngeh, Peˬliˇ hawˇ-eu Duˇsiˇleˬ aˬ nya ̭ dzeˇ zaˬ oe-euˬ meh. Duˇsiˇleˬ-aˬ, Yuˇdaˆ tsawˇ jeuˬ pyeu ̭-eu meh. Pawˇluˆ-ahˇ bi kuˇ laˬ-iˇ-awˇ, Yeˬsuˇ Ka li-ahˇ jah-eu gaˇ kawˆ bi ja mehˬ-euˬ meh. ²⁵ Ehˇ k’aw ̭, yaw tsaˬ yaw dawˇ jeˬ gaˇ kawˆ, yawˬ ha-euˬ nui ma-ahˇ nyeh ̭ tehˬ g’aˬ-eu gaˇ kawˆ, Yaˇ k’aˬ daˇ-eu Aˇ nah keuˆ le lu ̭-eu gaˇ kawˆ heu deuˬ-ahˇ Pawˆluˆ ja keuˆ ngeh, Peˬliˇ noeˬ guˆ laˇ-awˇ ehˇ-eu, "Nawˇ g’o ̭-iˇ-awˬ. Aˬ kaˇ dah ngeh nawˬ-ahˇ ngaˇ paˇ bi kuˇ le ma." ²⁶ Peˬliˇ-aˬ, Pawˇluˆ aˬ yaw ̭-ahˇ pyuˇ bi ̭ nehˬ gaˇ k’aw ̭ noeˬ tmˬ-eu meh. K’oeˇ miˇ neh, Pawˇluˆ-ahˇ tiˬ k’ehˬ maˬ taˬ ni kuˇ kuˇ-ehˇ dawˬ ja ja cawˬ-euˬ meh. ²⁷ Nyiˬ k’o ̭ byah laˇ ngeh, Peˬliˇ-euˬ jawˇ duˬ-ahˇ Bawˇgiˇ Beˬtuˇ sahˬ paˬ paˇ geu ̭ le-euˬ meh. Peˬliˇ-aˬ, Yuˇdaˆ tsawˇ haˬ mehˬ shi tsawˇ myahˇ za maw ̭-eu miˇneh Pawˇluˆ-ahˇ tawˬ-ahˇ bi uˇ ya ̭-euˬ meh.

¹ Sahˬ paˬ Beˬtuˇ miˇ k’ahˬ k’oeˇ k’ahˬ-ahˇ oe keuˆ-euˬ smˬ nah byah laˇ ngeh, Gehˇsaˬliˇ meuˬ-ahˇ neh Yeˬluˇsaˬlehˬ meuˬ-ahˇ le-euˬ meh. ² K’oeˇ ngeh, piˇ ma aˬ yui ̭ deuˬ hawˇ-eu Yuˇdaˆ tsawˇ haˬ aˬ yui ̭ aˬ tsu deuˬ neh Pawˇluˆ-euˬ gaˇ kawˆ aˬ yaw ̭ jawˇ gaˇ daˬ leˇ-euˬ meh. Sahˬ paˬ Beˬtuˇ-ahˇ aˬ yaw ̭ ma ̭ heu lo ̭-ehˇ shaˇ-euˬ meh. ³ Aˬ yaw ̭ ma ̭-euˬ myaˆ pyawˬ-ahˇ haw-awˇ, Pawˇluˆ-ahˇ Yeˬluˇsaˬlehˬ meuˬ-ahˇ tiˬ poˆ bi sheuˬ ha laˇ-eu g’aˇ duˬ shaˇ-euˬ meh. Gaˇ pehˇ-ahˇ lo ̭-awˇ Pawˇluˆ-ahˇ seh ̭-eu g’aˇ duˬ aˬ yaw ̭ ma ̭ lehˬ hmˬ jiˇ taˬ-euˬ meh. ⁴ Beˬtuˇ ehˇ-eu, "Pawˇluˆ-ahˇ Gehˇsaˬliˇ meuˬ-euˬ tawˬ-ahˇ dawˆ taˬ-euˬ ma. Ngaˇ k’aw ̭, g’awˬ myahˇ maˬ g’eh-ehˇ k’oeˇ gaˇ g’o ̭-iˇ ma. ⁵ Tsawˇ haˬ k’oeˇ g’aˬ neh mˇ lehˬ taˬ-euˬ jeˬ jaˆ naˇ, naw ma ̭-euˬ aˬ yui ̭ aˬ tsu deuˬ ngaˬ nehˬ-ehˇ oe-awˇ ja le-awˬ." ⁶ Sahˬ paˬ Beˬtuˇ aˬ yaw ̭ ma ̭ nehˬ-ehˇ g’oeˬ nah tseˇ nah byah ni paˇ jawˇ-awˇ, Gehˇsaˬliˇ meuˬ-ahˇ g’o ̭ ka-iˇ-euˬ meh. Yawˬ nah yawˬ yaˇ k’aˬ daˇ-eu nymˇ-ahˇ aˬ yaw ̭ nuiˇ-awˇ, Pawˇluˆ-ahˇ k’oeˇ gaˇ bi sheuˬ uˇ la ̭-euˬ meh. ⁷ Pawˇluˆ laˇ keuˆ ngeh, Yeˬluˇsaˬlehˬ meuˬ-ahˇ neh oe-euˬ Yuˇdaˆ tsawˇ haˬ deuˬ aˬ yawˬ-euˬ tiˬ jawˬ yaw ̭-awˇ, aˬ yaw ̭ lehˬ dui dui-eu gaˇ kawˆ g’awˬ mya jeˬ ehˇ-eu meh. Ehˇ k’aw ̭, aˬ yaw ̭ ma ̭ ehˇ-eu k’oeˇ saˇ kiˇ maˬ jaˆ-eu uˬ ta ̭, yaw duˬ maˬ baw-a. ⁸ K’oeˇ naˇ, Pawˇluˆ ehˇ k’o ̭ nehˬ-eu, "Yuˇdaˆ tsawˇ jeuˬ-euˬ Zahˇ dawˬ k’o ̭ dawˬ-ahˇ maˬ ehˇ, Uˬ duˬ tahˬ nymˇ nymˇ ma-ahˇ maˬ ehˇ, Loˇmaˆ miˇ k’ahˬ-ahˇ maˬ ehˇ, ngaˬ neh mˇ bahˬ taˬ-euˬ tiˬ jeˬ-iˬ maˬ jaˆ." ⁹ Ehˇ k’aw ̭, Beˬtuˇ-aˬ, Yuˇdaˆ tsawˇ haˬ mehˬ shi tsawˇ myahˇ za maw ̭-eu miˇ neh, Pawˇluˆ-ahˇ ehˇ nehˬ-eu, "Nawˇ Yeˬluˇsaˬlehˬ meuˬ-ahˇ le-awˇ, ngaˬ-euˬ mehˬ shi gaˇ kawˆ heu hmˬ yaˇ k’aˬ ja maw ̭ miˇ-a loˇ." ¹⁰ Pawˇluˆ ehˇ-eu, "Sahˬpaˬ Gehˇsaˬ-euˬ yaˇ k’aˬ daˇ-eu nymˇ-ahˇ ngaˇ yaw ̭ lu ̭-eu ma. Ngaˬ-ahˇ heu gaˇ yaˇ k’aˬ ja-eu tsaˬ meh. Nawˇ siˬ lu ̭-eu lo ̭-ehˇ, Yuˇdaˆ tsawˇ haˬ deuˬ k’oeˇ taˆ ngaˬ neh mˇ lehˬ taˬ-euˬ tiˬ jeˬ-iˬ maˬ jaˆ. ¹¹ Zahˇ dawˬ k’o ̭ dawˬ-ahˇ ngaˇ puiˬ-awˇ shiˇ paˬ-ehˇ g’eh-eu yaw lehˬ tiˬ jeˬ na mˇ taˬ-euˬ jaˆ naˇ k’aw ̭, maˬ bi shiˇ ni bi dzeuˇ-iˇ la ̭ lehˇ ngaˇ maˬ ehˇ. Ehˇ k’aw ̭, aˬ yaw ̭ ma ̭ ngaˬ-euˬ yaw lehˬ poˆ-eu teu maˬ tsaˬ naˇ, tsawˇ haˬ tiˬ g’aˬ-iˬ aˬ yaw ̭ ma ̭-euˬ aˬ la ̭ la ̭ k’oeˇ ngaˬ-ahˇ maˬ a nehˬ nya-aˇ. Sahˬ paˬ Gehˇsaˬ neh yaˇ k’aˬ bi daˇ la ̭ lehˇ ngaˇ shaˇ-eu ma." ¹² K’oeˇ ngeh, sahˬ paˬ Beˬtuˇ-aˬ, aˬ yaw ̭-ahˇ nui noeˬ nui duˇ bi ̭-eu deuˬ nehˬ-ehˇ bawˬ dzaˬ-awˇ, heu lo ̭-ehˇ ehˇ k’o ̭ nehˬ-euˬ meh. "Sahˬ paˬ Gehˇsaˬ neh yaˇ k’aˬ bi daˇ la ̭ lehˇ nawˇ shaˇ-eu miˇ neh, nawˬ-ahˇ sahˬ paˬ Gehˇsaˬ jawˇ gaˇ bi le ma." ¹³ Aˇ nah ui cuiˆ myahˇ laˇ ngeh, miˇ k’ahˬ k’oeˇ k’ahˬ-ahˇ uˆ lahˇ le-euˬ sahˬ paˬ Beˬtuˇ-ahˇ dawˬ deh g’a mawˇ le-awˇ ha-eu g’aˇ duˬ, sahˬ paˬ Aˬgiˇpaˆ hawˇ-eu Beˬlaˬniˇ aˬ nya ̭ dzeˇ zaˬ Gehˇsaˬliˇ meuˬ-ahˇ oe-euˬ meh. ¹⁴ Aˬ nya ̭ dzeˇ zaˬ k’oeˇ gaˇ heu myaˆ nah jawˇ keuˆ la ̭ ngeh, sahˬ paˬ Beˬtuˇ neh sahˬ paˬ Aˬgiˇpaˆ-ahˇ Pawˇluˆ gaˇ kawˆ heu lo ̭-ehˇ dzawˇ nehˬ-euˬ meh. "Sahˬ paˬ Peˬliˇ neh heu gaˇ tawˬ-ahˇ dawˆ taˬ ya ̭-euˬ tsawˇ ha tiˬ g’aˬ jawˇ meh. ¹⁵ Ngaˇ Yeˬluˇsaˬlehˬ meuˬ-ahˇ le ngeh, Yuˇdaˆ tsawˇ haˬ piˇ ma aˬ yui ̭ deuˬ hawˇ-eu aˬ yui ̭ aˬ tsu geu ̭-eu deuˬ aˬ yaw ̭-euˬ gaˇ kawˆ ngaˬ-ahˇ ja nehˬ la ̭-awˇ, aˬ yaw ̭-ahˇ yaˇ k’aˬ daˇ-awˬ lehˇ ngaˬ-ahˇ shaˇ-eu meh. ¹⁶ Ehˇ k’aw ̭, aˬ yaw ̭ ma ̭-ahˇ ngaˇ heu lo ̭-ehˇ ehˇ nehˬ-euˬ ma. ’Nga ma ̭ Loˇmaˆ tsawˇ haˬ-aˬ, mˇ bahˬ-euˬ tsawˇ haˬ hawˇ-eu aˬ yaw ̭-ahˇ yaˇ k’aˬ ja maw ̭-eu tsawˇ haˬ yaw kaˬ bi tahˬ dzoeˇ-awˇ, nyiˬ paw lu ̭ yawˬ ha gaˇ kawˆ bi dzawˇ g’aˬ miˇ tsa maˬ ngeuˇ naˇ, mˇ bahˬ-euˬ tsawˇ haˬ k’oeˇ g’aˬ-ahˇ aˬ cawˬ-euˬ aˬ la ̭ la ̭ k’oeˇ a nehˬ-eu zahˇ sahˇ k’o ̭ maˬ jaˆ-a’ lehˇ ehˇ nehˬ-euˬ ma. ¹⁷ Aˬ yaw ̭ ma ̭ heu gaˇ oe keuˆ ngeh, ngaˇ aˇ yamˬ jiˆ jiˆ-ehˇ maˬ jawˇ ni yawˬ nah yawˬ yaˇ k’aˬ daˇ-eu nymˇ-ahˇ nuiˇ leˇ-awˇ, tsawˇ haˬ k’oeˇ g’aˬ-ahˇ bi sheuˬ laˬ-iˇ-eu g’aˇ duˬ dawˬ bi ̭-euˬ ma. ¹⁸ Aˬ yaw ̭-ahˇ yaˇ k’aˬ ja maw ̭-eu deuˬ tuˇ laˇ-awˇ ngehˬ-eu meh. Ehˇ k’aw ̭, ngaˬ neh noeˬ taˬ-euˬ yaw bahˬ jeˬ tiˬ hmˬ-iˬ maˬ ehˇ doˆ la ̭-a. ¹⁹ Aˬ yaw ̭ ma ̭ ehˇ-eu k’oeˇ-aˬ, aˬ yaw ̭ ma ̭-euˬ uˬ duˬ tahˬ-eu zahˇ sahˇ k’o ̭ gaˇ kawˆ hawˇ-eu, Yeˬsuˇ lehˇ myahˇ-euˬ tsawˇ haˬ tiˬ g’aˬ gaˇ kawˆ-ahˇ ta ̭ leˇ-awˇ aˬ yaw ̭ nehˬ-ehˇ maˬ tsaˬ leˇ-ehˇ ja dzaˬ-euˬ gaˇ kawˆ ehˇ-eu teh ̭ meh. ²⁰ Gaˇ kawˆ heu deuˬ-ahˇ aˬ joˆ-ehˇ pyehˆ tseˇ haw paˬ nga lehˇ ngaˇ maˬ noeˬ duˬ nya-eu miˇ neh, ’Yeˬluˇsaˬlehˬ meuˬ-ahˇ le-awˇ yaˇ k’aˬ ja leˇ ma loˇ’ lehˇ, Pawˇluˆ-ahˇ naˇ haˬ-euˬ ma. ²¹ Ehˇ k’aw ̭, aˬ yaw ̭-ahˇ yaw muiˬ paˬ-ehˇ lo ̭ piˇ nehˬ la ̭-awˇ, sahˬ paˬ Gehˇsaˬ neh yaˇ k’aˬ bi daˇ la ̭ lehˇ shaˇ-eu miˇ neh, sahˬ paˬ Gehˇsaˬ jawˇ gaˇ maˬ bi sheuˬ g’eh dah-euˬ k’oeˇ keuˆ ni aˬ yaw ̭-ahˇ yaw muiˬ paˬ-ehˇ lo ̭ piˇ-eu g’aˇ duˬ dawˬ bi ̭ taˬ-euˬ ma." ²² Aˬgiˇpaˆ ehˇ-eu, "Tsawˇ haˬ heu g’aˬ dawˬ ngehˬ gaˇ ngaˇ gaˬ maw ̭ nya." Beˬtuˆ ehˇ-eu, "Ni shawˬ nah ya gaˬ teh ̭-a" ²³ Yawˬ nah yawˬ, Aˬgiˇpaˆ hawˇ-eu Beˬlaˬniˆ aˬ nya ̭ dzeˇ zaˬ baoˬ k’ahˬ sehˇ tiˬ byah ni oe gaˇ bawˬ-iˬ g’eh-awˇ ha-awˇ, guiˇ ma ̭ k’oeˇ taˆ uˆ lahˇ-eu yaw huiˬ yaw mahˇ deuˬ hawˇ-eu meuˬ la ̭ k’oeˇ jawˇ-eu myaˆ pyawˬ naˇ mehˇ jaˆ-eu aˬ yui ̭ aˬ tsu deuˬ nehˬ-ehˇ mehˬ bawˬ g’eh-eu hawˇ nymˇ la ̭ k’oeˇ uˇ leˇ-euˬ meh. K’oeˇ ngeh, sahˬ paˬ Beˬtuˇ neh dawˬ bi ̭-awˇ Pawˇluˆ-ahˇ bi sheuˬ uˇ la ̭-euˬ meh. ²⁴ Sahˬ paˬ Beˬtuˇ ehˇ-eu, "Sahˬ paˬ Aˬgiˇpaˆ hawˇ-eu heu gaˇ uiˬ laˇ taˬ-euˬ cawˬ deuˬ-oˇ, tsawˇ haˬ heu g’aˬ-ahˇ haw sheˇ. Heu gaˇ jawˇ-eu Yuˇdaˆ tsawˇ haˬ deuˬ hawˇ-eu Yeˬluˇsaˬlehˬ meuˬ la ̭ k’oeˇ k’aˇ jawˇ-eu Yuˇdaˆ tsawˇ haˬ dawˬ tawˆ lu ̭, tsawˇ haˬ heu g’aˬ gaˇ kawˆ ngaˬ-ahˇ daˬ laˇ taˬ-euˬ meh. Aˬ yaw ̭-ahˇ yaw deh ̭ bi deh ̭-eu maˬ geuˇ-a lehˇ aˬ yaw ̭ ma ̭ guˇ dui dui-eu meh. ²⁵ Ehˇ k’aw ̭, aˬ yaw ̭ bi shiˇ-eu g’aˇ duˬ yaˇ k’aˬ daˇ nehˬ paˬ-ehˇ, aˬ yaw ̭ neh mˇ bahˬ taˬ-euˬ tiˬ jeˬ-iˬ ngaˇ maˬ poˆ doˆ nya-eu uˬ ta ̭, Huiˬ dui dui-eu Sahˬ paˬ Gehˇsaˬ neh yaˇ k’aˬ bi daˇ nehˬ la ̭ lehˇ aˬ yaw ̭ ngaˬ-ahˇ shaˇ-eu miˇ neh, aˬ yaw ̭-ahˇ bi sheuˬ ha leˇ-eu lehˇ ngaˇ noeˬ tsehˆ g’aˬ-euˬ ma. ²⁶ Ehˇ k’aw ̭, Huiˬ dui dui-eu Sahˬ paˬ jawˇ gaˇ aˬ yaw ̭-euˬ gaˇ kawˆ aˬ joˆ-ehˇ bo ̭ nehˬ paˬ nga lehˇ maˬ ya shaˇ noeˬ duˬ-aˬ siˬ. K’oeˇ miˇ neh, aˬ yaw ̭-ahˇ pyehˆ tseˇ g’aˬ ngeh jawˇ, aˬ yaw ̭-euˬ gaˇ kawˆ ngaˇ sahˬ bo ̭ bo ̭ nehˬ nya paˬ-ehˇ bi duˬ laˇ-eu g’aˇ duˬ, naw ma ̭-euˬ mehˬ shi, aˬ cawˬ naˆ maˬ tseˇ sahˬ paˬ Aˬgiˇpaˆ-euˬ mehˬ shi, aˬ yaw ̭-ahˇ bi sheuˬ la ̭ taˬ-euˬ jeˬ pyeu ̭-eu ma. ²⁷ Aˬ jeˬ miˇ neh ehˇ naˇ, daˬ taˬ-euˬ gaˇ kawˆ yaw duˬ duˬ-ehˇ maˬ ehˇ mehˬ nehˬ nya ni pa ̭ taˬ-euˬ tsawˇ haˬ tiˬ g’aˬ-ahˇ bi sheuˬ ha-iˇ-eu ehˇ-eu jeˬ-aˬ, maˬ muiˬ-a lehˇ ngaˇ noeˬ miˇ-a."

¹ Sahˬ paˬ Aˬgiˇpaˆ Pawˇluˆ-ahˇ ehˇ-eu, "Nawˬ-euˬ gaˇ kawˆ nawˇ ngehˬ-eu aˬ kawˬ-aˬ jaˆ meh." K’oeˇ ngeh, Pawˇluˆ aˬ la ̭ caw ja-awˇ, aˬ yaw ̭-euˬ gaˇ kawˆ heu lo ̭-ehˇ ehˇ-eu meh. ² "Sahˬ paˬ Aˬgiˇpaˆ-oˇ, Yuˇdaˆ tsawˇ haˬ neh ngaˬ-euˬ gaˇ kawˆ k’aˇ daˬ taˬ-euˬ yawˬ jeˬ na lu ̭-ahˇ, iˬ nah nawˬ-euˬ mehˬ shi ngaˇ ya ngehˬ k’o ̭-eu heu-aˬ, ngaˬ-euˬ g’aˇ duˬ guiˬ lahˬ huiˬ-eu tiˬ jeˬ meh lehˇ noeˬ miˇ-a. ³ Aˬ jeˬ miˇ neh ehˇ naˇ, Yuˇdaˆ tsawˇ haˬ-euˬ zahˇ sahˇ k’o ̭ hawˇ-eu aˬ yaw ̭ ma ̭ tiˬ k’ehˬ maˬ taˬ ni ja dzaˬ-eu gaˇ kawˆ nawˇ yaw muiˬ paˬ-ehˇ siˬ nya-eu meh. K’oeˇ miˇ neh, nui ma g’awˬ mahˇ ni taˬ-awˇ ngaˇ ja gaˇ tiˬ poˆ naˇ haˬ nehˬ la ̭ lehˇ shaˇ-eu ma. ⁴ "Ngaˇ nyiˇ ngeh neh aˬ joˆ-ehˇ deh ̭ daˆ jawˇ daˆ la ̭-euˬ gaˇ kawˆ, Yuˇdaˆ tsawˇ haˬ deuˬ siˬ nya jiˇ meh. Yaw beh ngaˬ-euˬ miˇ k’ahˬ-ahˇ aˬ joˆ-ehˇ deh ̭ ya ̭-awˇ, aˇ nah Yeˬluˇsaˬlehˬ meuˬ-ahˇ aˬ joˆ-ehˇ deh ̭-euˬ aˬ yaw ̭ ma ̭ siˬ nya jiˇ meh. ⁵ Aˬ yaw ̭ ma ̭ ehˇ doˆ maw ̭ law nmˇ-aˬ, aˬ dui-euˬ uˬ duˬ tahˬ-eu zahˇ sahˇ k’o ̭ la ̭ k’oeˇ aˬ cawˬ naˆ maˬ tseˇ zahˇ sahˇ k’o ̭-ahˇ caw teh byah dui dui-eu aˇ muˇ pyeu ̭-eu Paˬliˬsehˇ aˇ muˇ la ̭ k’oeˇ, yaw beh neh ngaˇ uˇ leˇ-euˬ aˬ yaw ̭ ma ̭ siˬ nya jiˇ meh. ⁶ Nymˬ-mˇ ngaˇ heu gaˇ heu lo ̭-ehˇ bi pa ̭-awˇ bi naˇ haˬ lu ̭-eu heu k’aw ̭ ni, aˬ dui-euˬ aˬ poeˬ aˬ bawˇ deuˬ-ahˇ Miˬyehˇ neh dzaˬ taˬ ya ̭-euˬ saˇ jaˇ-ahˇ ngaˇ noeˬ tmˬ-eu baˬ da neh ya daˬ-eu jeˬ pyeu ̭-eu ma. ⁷ Aˬ dui-euˬ tsawˇ jeuˬ tseˇ nyi ̭ jeuˬ lu ̭, uˬ ci ̭ nah g’ahˇ maˬ ehˇ, Miˬyehˇ-ahˇ uˬ duˬ tahˬ tahˬ-ehˇ noeˬ tmˬ lu ̭-eu k’oeˇ k’aw ̭, nymˬ-mˇ ngaˇ noeˬ tmˬ lu ̭-eu heu hmˬ meh. Sahˬ paˬ-oˇ, k’oeˇ lo ̭-ehˇ noeˬ tmˬ-eu heu hmˬ baˬ da neh Yuˇdaˆ tsawˇ haˬ deuˬ ngaˬ-ahˇ yaˇ k’aˬ ja-eu meh. ⁸ Aˬ jeˬ miˇ neh naw ma ̭ heu gaˇ uiˬ laˇ taˬ-euˬ tsawˇ haˬ deuˬ, shiˇ-euˬ tsawˇ haˬ-ahˇ Miˬyehˇ bi g’o ̭ deh ̭ laˇ nya meh lehˇ ehˇ gaˇ maˬ jah coeˇ te." ⁹ "Naˬzaˬlehˇ tsawˇ haˬ Yeˬsuˇ-euˬ tsawˇ myahˇ-ahˇ k’aˇ coeˬ k’aˇ ciˆ-eu jeˬ dawˬ tawˆ lu ̭ mˇ-eu tsaˬ teh ̭-a lehˇ ngaˇ noeˬ-euˬ ma. ¹⁰ Yeˬluˇsaˬlehˬ meuˬ-ahˇ ngaˇ maˇ maˇ ni k’oeˇ lo ̭-ehˇ mˇ-euˬ ma. Piˇ ma aˬ yui ̭ deuˬ-ahˇ aˬ kawˬ-aˬ shaˇ-awˇ, Miˬyehˇ-euˬ tsawˇ haˬ g’awˬ mya ni nyeh ̭-awˇ tawˬ-ahˇ dawˆ-euˬ uˬ ta ̭, aˬ yaw ̭ ma ̭-ahˇ seh ̭-eu g’aˇ duˬ bawˬ dzaˬ tsehˆ gaˇ ngaˇ k’aw ̭ ahˇ leˇ-euˬ ma. ¹¹ Aˬ yaw ̭ ma ̭-ahˇ uˬ duˬ tahˬ nymˇ la ̭ k’oeˇ g’awˬ mya poˆ bi k’ehˬ bi k’aˆ ni ngaˇ jahˇ-awˇ, aˬ yaw ̭ ma ̭-euˬ jah-eu jeˬ-ahˇ bi byehˇ dzeh-eu g’aˇ duˬ ngaˇ leh jeh dui dui-euˬ ma. Aˬ yaw ̭ ma ̭-ahˇ ngaˇ nui ma pehˇ dui dui-euˬ miˇ neh, aˬ cawˬ miˇ k’ahˬ-ahˇ jaˆ-eu meuˬ deuˬ-ahˇ keuˆ ni le le-ehˇ aˬ yaw ̭ ma ̭-ahˇ k’ehˬ haw k’aˆ haw-euˬ ma. ¹² "K’oeˇ lo ̭-ehˇ mˇ leˇ-eu g’aˇ duˬ, piˇ ma aˬ yui ̭ deuˬ-ahˇ aˬ kawˬ-aˬ shaˇ-awˇ, Daˬmaˬsehˇ meuˬ-ahˇ ngaˇ le-euˬ ma. ¹³ Sahˬ paˬ-oˇ, gaˇ pehˇ-ahˇ nah loˆ ceh laˇ ngeh, nahˇ ma naˆ maˬ tseˇ k’aˆ dui dui-eu yaw sheh ̭ mˬ-ahˇ neh tahˬ tehˬ le ̭-awˇ, ngaˇ hawˇ-eu ngaˬ nehˬ-ehˇ le lu ̭-eu tsawˇ haˬ deuˬ-euˬ tiˬ jawˬ bya le-euˬ meh. ¹⁴ Nga ma ̭ yawˬ g’aˬ na lu ̭ miˇ tsa coˬ dzeh-euˬ ma. K’oeˇ naˇ, Heˬbyehˇ dawˬ-ahˇ neh, ngaˬ-ahˇ heu lo ̭-ehˇ ehˇ-eu teˇ saˇ-ahˇ ngaˇ ya gaˬ-euˬ ma. ’Sawˇluˆ-oˇ, Sawˇluˆ-oˇ, aˬ jeˬ miˇ neh nawˇ ngaˬ-ahˇ k’ehˬ te. Mawˇ neˇ-ahˇ tsawˆ-eu daˇ ceh-ahˇ behˆ-eu mawˇ neˇ lo ̭-ehˇ, yawˬ haˇ yawˬ ha laˆ tahˬ laˆ naˇ-eu jeˬ nawˇ mˇ-eu nga’ lehˇ ehˇ-eu meh. ¹⁵ ’Sahˬpaˬ-oˇ, nawˇ aˬ suˇ g’aˬ te’ lehˇ ngaˇ naˇ haˬ ngeh, heu lo ̭-ehˇ ehˇ k’o ̭ nehˬ la ̭-euˬ meh. ’Ngaˇ-aˬ, nawˇ k’ehˬ lu ̭-eu Yeˬsuˇ ma. ¹⁶ Tuˇ-awˇ gawˬ yaw ̭ yaw ̭-awˬ. Nawˬ-ahˇ ngaˬ-euˬ gaˇ bi mˇ-eu lehˇ, nawˬ-euˬ mehˬ shi ngaˇ doˆ le-euˬ ma. Iˬ nah ngaˬ-ahˇ nawˇ ya mawˇ-euˬ gaˇ kawˆ heu hawˇ-eu, mehˬ hu paw ngaˬ neh nawˬ-ahˇ bi mawˇ-euˬ gaˇ kawˆ deuˬ, aˬ cawˬ-ahˇ nawˇ ya dzawˇ mehˬ nehˬ meh. ¹⁷ Iˇsaˬleˬlaˆ tsawˇ haˬ deuˬ hawˇ-eu aˬ cawˬ tawˇ jeuˬ deuˬ jawˇ gaˇ nawˬ-ahˇ ngaˇ k’ehˇ g’eh-awˇ, aˬ yaw ̭ ma ̭-euˬ aˬ la ̭ la ̭ k’oeˇ nawˬ-ahˇ ngaˇ bi buˬ-iˇ ma. ¹⁸ Aˬ yaw ̭ ma ̭ jah-eu la ̭ k’oeˇ iˬ baˇ pyehˬ nehˬ-euˬ jeˬ-ahˇ za-awˇ, Miˬyehˇ neh tseˇ doˆ-euˬ tsawˇ haˬ deuˬ nehˬ-ehˇ jawˇ duˬ za nya ni aˬ yaw ̭ ma ̭-euˬ myaˆ nuiˆ nawˇ pah nehˬ-awˇ, yaw zahˇ la ̭ k’oeˇ neh yaw sheh ̭-ahˇ ya sheuˬ k’o ̭ la ̭ nehˬ-awˇ, Saˬdaˬ-euˬ baoˬ uˬ moˆ jawˇ lu ̭-eu deuˬ-ahˇ Miˬyehˇ jawˇ paw ya sheuˬ k’o ̭ la ̭ nehˬ meh’ lehˇ ehˇ-eu meh. ¹⁹ "K’oeˇ miˇ neh, sahˬ paˬ Aˬgiˇpaˆ-oˇ, mˬ k’oeˇ taˆ neh oe-euˬ yaw sahˇ la ̭ k’oeˇ bi siˬ bi mawˇ-le-euˬ jeˬ-ahˇ ngaˇ maˬ naˇ haˬ geu ̭ ni maˬ byehˇ-aˬ. ²⁰ Daˬmaˬsehˇ meuˬ-ahˇ neh aˇ dahˬ beh-awˇ, Yeˬluˇsaˬlehˬ meuˬ-ahˇ maˬ ehˇ, Iˇsaˬleˬlaˆmiˇ k’ahˬ k’ahˬ lah ni-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, iˬ baˇ noeˬ poˆ-awˇ Miˬyehˇ jawˇ paw g’o ̭ k’o ̭ laˇ-eu uˬ ta ̭, aˬ yaw ̭ ma ̭ iˬ baˇ noeˬ poˆ-euˬ ngaˇ lehˇ siˬ duˬ laˇ ni mˇ-awˬ shaˇ-awˬ lehˇ ngaˇ dawˬ mehˬ mehˬ-euˬ ma. ²¹ Ngaˇ k’oeˇ lo ̭-ehˇ mehˬ-euˬ baˬ da neh, Uˬ duˬ tahˬ nymˇ nymˇ ma la ̭ k’oeˇ Yuˇdaˆ tsawˇ haˬ deuˬ ngaˬ-ahˇ nyeh ̭-awˇ seh ̭-eu lehˇ leh jeh-euˬ meh. ²² Ehˇ k’aw ̭, iˬ nah keuˆ ni Miˬyehˇ ngaˬ-ahˇ caw ba nehˬ la ̭-eu miˇ neh, heu gaˇ yaw ̭-awˇ, huiˬ zaˬ nyiˇ zaˬ heu myaˆ ni g’eh-eu mehˬ shi saˇ kiˇ ya kamˬ lu ̭-eu ma. Nymˬ-mˇ ngaˇ ehˇ lu ̭-eu gaˇ kawˆ heu-aˬ, Miˬyehˇ g’aˇ duˬ ngehˬ dah-eu deuˬ hawˇ-eu Moˇseˬ neh aˬ kaˇ heu lo ̭-ehˇ pyeu ̭ laˇ teh ̭-a lehˇ ehˇ taˬ ya ̭-euˬ gaˇ kawˆ aˬ yaw ̭ tiˬ hmˬ ma. ²³ Ka li-aˬ, shiˇ-euˬ jeˬ-ahˇ ya daˬ-awˇ, g’o ̭ deh ̭ beh beh laˇ-euˬ g’aˬ pyeu ̭-awˇ Yuˇ daˆ tsawˇ haˬ-ahˇ maˬ ehˇ, aˬ cawˬ tsawˇ jeuˬ deuˬ-ahˇ maˬ ehˇ, ka k’o ̭-eu yaw sheh ̭ gaˇ kawˆ tahˇ k’awˬ teh ̭-a lehˇ ehˇ-eu gaˇ kawˆ k’oeˇ hmˬ meh." ²⁴ Pawˇluˆ aˬ yaw ̭-euˬ gaˇ kawˆ ngehˬ k’o ̭-awˇ k’oeˇ lo ̭-ehˇ dzawˇ lu ̭ ngeh, sahˬ paˬ Beˬtuˇ aˬ yaw ̭-ahˇ guˇ-awˇ ehˇ-eu, "Pawˇluˆ-oˇ, nawˇ uˬ tsehˆ-euˬ ngaˇ. Nawˇ tsawˇ gahˇ aˇ dzehˬ dzaw dzeuˇ-awˇ dzaw uˬ-euˬ ngaˇ." ²⁵ Pawˇluˆ ehˇ-eu, "Sahˬ paˬ Beˬtuˇ-oˇ, ngaˇ uˬ-iˇ-euˬ maˬ ngeuˇ. Aˬ diˇ aˬ maˇ ngeuˇ-eu jeˬ-ahˇ ngaˇ ehˇ lu ̭-eu ma. ²⁶ Sahˬ paˬ Aˬgiˇpaˆ-oˇ, gaˇ kawˆ heu deuˬ nawˬ-euˬ mehˬ shi k’aˬ duˬ ni ngaˇ ehˇ peuˬ ma. Aˬ jeˬ miˇ neh ehˇ naˇ, gaˇ kawˆ heu nawˇ siˬ lu ̭-eu meh. Gaˇ kawˆ heu baˇ za ̭-ahˇ pyeu ̭ laˇ-euˬ maˬ ngeuˇ-eu miˇ neh, yawˬ jeˬ na lu ̭ nawˇ siˬ jiˇ meh lehˇ ngaˇ ehˇ tsehˆ peuˬ ma. ²⁷ Sahˬ paˬ Aˬgiˇpaˆ-oˇ, Miˬyehˇ g’aˇ duˬ ngehˬ dah-eu deuˬ-ahˇ nawˇ maˬ jah loˇ. Nawˇ jah meh lehˇ ngaˇ siˬ nya ma." ²⁸ Sahˬ paˬ Aˬgiˇpaˆ Pawˇluˆ-ahˇ ehˇ-eu, "Aˇ yamˬ heu myah teh ̭ la ̭ k’oeˇ, ngaˇ Ka li zaˬ pyeu ̭ laˇ ni nawˇ jahˇ nya ma lehˇ noeˬ te loˇ." ²⁹ Pawˇluˆ ehˇ-eu, "Aˇ yamˬ yaw nymˇ yaw myahˇ taˬ ehˇ. Nawˇ hawˇ-eu iˬ nah ngaˇ ehˇ gaˇ k’aˇ naˇ haˬ lu ̭-eu tsawˇ haˬ heu deuˬ dawˬ tawˆ lu ̭, ngaˇ shmˇ caˆ daˬ lu ̭-eu heu tiˬ hmˬ maˬ ngeuˇ naˇ, ngaˬ lo ̭-ehˇ jah-eu tsawˇ haˬ pyeu ̭ laˇ ni, Miˬyehˇ-ahˇ ngaˇ guiˬ lahˬ shaˇ lu ̭ ma." ³⁰ K’oeˇ naˇ, sahˬ paˬ Aˬgiˇpaˆ maˬ ehˇ, sahˬ paˬ Beˬtuˇ maˬ mehˇ, Beˬlaˬniˇ maˬ ehˇ, aˬ yaw ̭ ma ̭ nehˬ-ehˇ k’aˇ nuiˇ lu ̭-eu deuˬ maˬ ehˇ, g’o ̭-iˇ-eu lehˇ tuˇ laˇ jiˇ-euˬ meh. ³¹ Aˬ yaw ̭ ma ̭ g’o ̭ doˆ le-awˇ tiˬ g’aˬ tiˇ g’aˬ ehˇ-eu, "Tsawˇ haˬ heu g’aˬ-ahˇ seh ̭ paˬ-ehˇ, maˬ ngeuˇ naˇ tawˬ-ahˇ dawˆ paˬ-ehˇ mˇ lehˬ taˬ-euˬ tiˬ jeˬ-iˬ maˬ jaˆ law hawˇ ngaˬ laˬ." ³² Beˬtuˇ-ahˇ Aˬgiˇpaˆ ehˇ nehˬ-eu, "Tsawˇ haˬ heu g’aˬ sahˬ paˬ Gehˇsaˬ neh yaˇ k’aˬ bi daˇ la ̭ lehˇ maˬ shaˇ law nmˇ-aˬ, aˬ yaw ̭-ahˇ pyehˬ nehˬ nya lawˇ hawˇ nga."

¹ Nga ma ̭-ahˇ Iˇdaˬliˬ miˇ k’ahˬ-ahˇ bi iˇ-eu lehˇ ehˇ tsehˆ g’aˬ ngeh jawˇ, Pawˇluˆ hawˇ-eu tawˬ-ahˇ dawˆ taˬ-euˬ tsawˇ haˬ nui deuˬ-ahˇ, "Awˇguˆtuˆ guiˇ ma ̭" lehˇ kuˇ-eu Loˇmaˆ guiˇ ma ̭ tiˬ ma ̭-ahˇ aˬ yui ̭ geu ̭ lu ̭-eu Yuˇluˆ lehˇ myahˇ-euˬ g’aˬ-euˬ aˬ la ̭ la ̭ k’oeˇ a nehˬ-euˬ meh. ² Aˬshaˆ miˇ k’ahˬ saˇ baoˬ naˬ duˬ jaˆ-eu meuˬ deuˬ-ahˇ iˇ-eu lehˇ lehˬ hmˬ dah taˬ-euˬ, Aˬdaˬmuˇdiˇ meuˬ-ahˇ neh oe-euˬ saˇ baoˬ tiˬ laˇ-ahˇ nga ma ̭ dziˬ leˇ-awˇ iˇ g’eh-euˬ ma. Maˬgeˬdawˇniˆ miˇ k’ahˬ Teˇsaˬloˇni meuˬ-ahˇ jawˇ-eu Aˬliˬdaˬguˇ lehˇ myahˇ-euˬ g’aˬ k’aw ̭, nga ma ̭ nehˬ-ehˇ tiˬ kawˆ lo ̭-ehˇ iˇ-euˬ ma. ³ Yawˬ nah yawˬ, Siˇdoˬ meuˬ-ahˇ nga ma ̭ iˇ keuˆ-euˬ ma. Yuˇluˆ lehˇ kuˇ-eu yaw huiˬ k’oeˇ g’aˬ Pawˇluˆ-ahˇ g’awˬ shaˬ gaˬ-eu miˇ neh, cawˬ deuˬ-ahˇ tahˬ puˬ leˇ-awˇ k’aˇ loˬ-eu jeˬ bi caw ba nehˬ-eu g’aˇ duˬ, Pawˇluˆ-ahˇ aˬ kawˬ-aˬ bi ̭-euˬ meh. ⁴ Nga ma ̭ k’oeˇ gaˇ neh paˇ luˆ-iˇ-awˇ, jaˬ lehˇ pyawˬ maˬ tsaˬ-ehˇ nga ma ̭ jawˇ paw baw k’o ̭ la ̭-eu miˇ neh, Guˇbaˬluˇ iˇ jaw lahˇ-ahˇ baˇ shmˇ-awˇ, jaˬ lehˇ maˬ zaw-eu paw dzeˇ pyawˬ-ahˇ neh iˇ-euˬ ma. ⁵ Giˇliˇciˆ miˇ k’ahˬ hawˇ-eu Paˬbuˇliˇ miˇ k’ahˬ dawˬ peh jaˆ-eu iˬ ma laˆ shaˆ iˇ tsehˆ g’eh-awˇ, Luˇgiˇ miˇ k’ahˬ Muˬlaˇ meuˬ-ahˇ iˇ keuˆ-euˬ ma. ⁶ K’oeˇ gaˇ iˇ keuˆ ngeh, Aˬleˬsaˬduˇ meuˬ-ahˇ neh oe-awˇ, Iˇdaˬliˬ miˇ k’ahˬ-ahˇ le-eu lehˇ g’eh-eu saˇ baoˬ tiˬ laˇ-ahˇ yaw huiˬ k’oeˇ g’aˬ poˆ mawˇ-awˇ, nga ma ̭-ahˇ bi dziˬ la ̭-euˬ meh. ⁷ Nga ma ̭ lehˇ baw saˬ paˇ taw-awˇ, aw lawˆ lawˆ-ehˇ g’awˬ mya nah shaˬ shaˬ-ehˇ iˇ-eu la ̭ k’oeˇ, Gaˬniˇ meuˬ dawˬ peh shaˬ keuˆ g’eh-euˬ ma. Nga ma ̭ mehˬ hu paw tiˬ paw ̭-iˬ maˬ iˇ jiˆ nya ni jaˬ lehˇ neh dehˬ tehˬ taˬ-euˬ miˇ neh, Saˬmoˬneˬ meuˬ paw za ̭ ahˇ-iˇ-awˇ, meuˬ k’oeˇ meuˬ-euˬ k’oeˇ paw k’aˇ iˇ dzeuˇ g’eh-awˇ, Gaˬleˬdeˬ iˇ jaw lahˇ-ahˇ baˇ shmˇ-awˇ iˇ-euˬ ma. ⁸ Iˬ ma laˆ shaˆ lawˇ dzeˇ paw k’aˇ laˆ peh nya-eu laˆ peh-awˇ, Laˬsehˇ meuˬ-ahˇ maˬ kaˬ maˬ kaˇ-ehˇ jaˆ-eu Muiˬ dui dui-eu Naˬ duˬ lehˇ ehˇ-eu tsahˇ-ahˇ shaˬ keuˆ-euˬ ma. ⁹ Nga ma ̭ k’oeˇ gaˇ aˇ dzehˬ jawˇ myahˇ dzeuˇ-awˇ, mehˬ hu paw gaˇ ma doˆ-iˇ-eu g’aˇ duˬ guˆ k’aˇ za-eu aˇ yamˬ keuˆ laˇ shaw-iˬ-eu meh. Aˬ jeˬ miˇ neh ehˇ naˇ, Iˬ baˇ shaˇ pyehˬ-eu Aˇ nah k’aw ̭, dzeuˇ-iˇ g’aˬ-euˬ meh. K’oeˇ miˇ neh, aˬ yaw ̭ ma ̭-ahˇ Pawˇluˆ heu lo ̭-ehˇ ehˇ nehˬ-euˬ meh. ¹⁰ "Cawˬ deuˬ-oˇ, aˬ dui heu gaˇ neh mehˬ hu paw gaˇ ma paˇ doˆ-iˇ-eu-aˬ, guˆ k’aˇ za meh lehˇ ngaˇ haw mawˇ-eu ma. Tawˬ lu ̭-eu myawˬ deuˬ maˬ ehˇ, saˇ baoˬ maˬ ehˇ, yaw k’aˆ-ehˇ cawˆ-iˇ-awˇ, tsawˇ haˬ k’aw ̭ ca laˇ nya teh ̭-a." ¹¹ Ehˇ k’aw ̭, guiˇ ma ̭ k’oeˇ taˆ aˬ yui ̭ geu ̭-eu yaw huiˬ k’oeˇ g’aˬ, Pawˇluˆ ehˇ gaˇ naˇ haˬ-eu naˆ maˬ tseˇ, saˇ baoˬ teh-eu g’aˬ hawˇ-eu saˇ baoˬ-euˬ yaw sahˇ g’aˬ ehˇ gaˇ naˇ haˬ-euˬ meh. ¹² K’oeˇ uˬ ta ̭, aˬ yaw ̭ ma ̭ naˬ lu ̭-eu saˇ baoˬ naˬ duˬ k’oeˇ tsahˇ-aˬ, tsahˬ gaˆ yamˬ-ahˇ maˬ jawˇ muiˬ-eu jawˇ duˬ tiˬ tsahˇ pyeu ̭-eu meh. K’oeˇ miˇ neh, g’eh nya naˇ, Piˇniˇ meuˬ-ahˇ k’aˇ keuˆ maˬ keuˆ iˇ-awˇ, tsahˬ gaˆ yamˬ-ahˇ k’oeˇ gaˇ jawˇ naˬ mˇ-eu g’aˇ duˬ tsawˇ haˬ myaˬ ni nui ma tsaˬ-eu meh. Piˇniˇ meuˬ-aˬ, Gaˬlaˬdeˬ iˇ jaw lahˇ-ahˇ jaˆ-eu, nahˇ ma ga k’ehˬ la ̭ taˆ paw hawˇ-eu nahˇ ma ga k’ehˬ-euˬ la ̭ oˆ paw dzeˇ-ehˇ pyawˇ-eu saˇ baoˬ naˬ duˬ tiˬ tsahˇ pyeu ̭-eu meh. ¹³ La ̭ oˆ paw neh baw la ̭-euˬ jaˬ lehˇ k’oeˇ, aˬ za za-ehˇ teh ̭-ehˇ baw-eu meh. K’oeˇ ngeh, aˬ yaw ̭ ma ̭ neh noeˬ-euˬ lo ̭-ehˇ geu ̭ nya teh ̭-a lehˇ noeˬ-awˇ, saˇ baoˬ naˬ ngeh pyehˬ ka-euˬ shmˇ kuˆ seuˬ g’eu k’o ̭ daˆ-awˇ, lehˇ baw saˬ paˇ taw-awˇ, Gaˬlaˬdeˬ iˇ jaw lahˇ paw saˇ baoˬ k’aˇ laˆ peh nya-eu laˆ peh laˆ peh-ehˇ mehˬ hu paw doˆ-iˇ-euˬ ma. ¹⁴ Ehˇ k’aw ̭, g’awˬ myahˇ maˬ g’eh-ehˇ, "La ̭ taˆ nahˇ ma doˆ k’ehˬ jaˬ lehˇ" lehˇ kuˇ-eu jaˬ lehˇ lehˇ ma k’oeˬ bahˬ, dahˇ taˆ paw neh baw ka g’eh le ̭-euˬ meh. ¹⁵ Jaˬ lehˇ lehˇ ma k’oeˇ saˇ baoˬ-ahˇ ciˬ tahˬ le ̭ ngeh, saˇ baoˬ k’oeˇ jaˬ lehˇ-ahˇ maˬ ciˬ daˬ coeˇ-ehˇ, nga ma ̭ ngehˬ maˬ g’eh nya ni pyeu ̭-iˇ-awˇ, jaˬ lehˇ k’aˇ hehˇ-eu paw bi bu g’eh-euˬ ma. ¹⁶ Gawˇdaˬ lehˇ kuˇ-eu iˇ jaw lahˇ lahˇ zaˬ-euˬ la ̭ oˆ pyawˬ-ahˇ nga ma ̭ bu g’eh ngeh, jaˬ lehˇ-ahˇ ui cuiˆ baˇ shmˇ k’aˇ za-eu miˇ neh, saˇ baoˬ nehˬ-ehˇ caw-eu lawˬ maˬ ya cawˆ-iˇ ni ngehˬ g’eh dah-euˬ ma. ¹⁷ Aˬ yaw ̭ ma ̭ lawˬ k’oeˇ laˇ-ahˇ saˇ baoˬ k’oeˇ taˆ g’eu daˆ-awˇ, saˇ baoˬ paˆ-iˇ gaˇ guˆ-eu miˇ neh, saˇ baoˬ-euˬ tiˬ jawˬ aˇ caˆ neh gahˇ dzahˬ-euˬ meh. K’oeˇ uˬ ta ̭, Liˆbyaˇ lawˇ deh paw jaˆ-eu k’aˇ shui ̭ deh-ahˇ coeˬ tahˬ-iˇ gaˇ guˆ-eu miˇ neh, lehˇ baw saˬ paˇ k’oeˇ yuˇ ka-awˇ, saˇ baoˬ-ahˇ jaˬ lehˇ mehˬ nah pyehˬ g’eh-euˬ meh. ¹⁸ Jaˬ lehˇ lehˇ ma k’oeˇ maˬ naˬ leˇ ni baw dui dui-eu miˇ neh, yawˬ nah yawˬ saˇ baoˬ la ̭ k’oeˇ tawˬ lu ̭-eu myawˬ tiˬ paˆ na deuˬ-ahˇ aˬ yaw ̭ ma ̭ ba ̭ dzeh-euˬ meh. ¹⁹ Dzaiˇ yawˬ nah yawˬ-ahˇ, saˇ baoˬ-euˬ keu ka tiˬ paˆ na deuˬ paˇ ba ̭ dzeh-euˬ meh. ²⁰ G’awˬ mya nah g’awˬ mya miˇ, nahˇ ma hawˇ-eu aˬ guiˇ-ahˇ maˬ ya mawˇ ni jaˬ lehˇ lehˇ ma baw dui dui gaˇ ya daˬ-euˬ miˇ neh, ya buˬ-iˇ-eu gaˇ ma maˬ paˇ dahˇ ngaˇ lehˇ noeˬ jiˇ-euˬ ma. ²¹ Tiˬ jeˬ-iˬ maˬ dzaˬ ni dzahˬ lu ̭-eu myahˇ laˇ-euˬ meh. K’oeˇ miˇ neh, aˬ yaw ̭ ma ̭-euˬ mehˬ shi Pawˇluˆ yaw ̭-awˇ, heu lo ̭-ehˇ ehˇ-eu meh. "Cawˬ deuˬ-oˇ, naw ma ̭ ngaˇ ehˇ gaˇ naˇ haˬ-awˇ, Gaˬlaˬdeˬ iˇ jaw lahˇ-ahˇ neh maˬ doˆ le ni jawˇ law nmˇ-aˬ, luˬ-iˇ seˇ-iˇ-eu heu-ahˇ maˬ paˇ ya daˬ-aˇ. ²² Ehˇ k’aw ̭, nui ma taˬ baˬ lehˇ naw ma ̭-ahˇ ngaˇ shaˇ-eu ma. Saˇ baoˬ heu laˇ cawˆ-iˇ teh ̭-a. Ehˇ k’aw ̭, naw ma ̭ tiˬ g’aˬ-iˬ shiˇ gaˇ maˬ keuˆ-aˇ. ²³ Aˬ jeˬ miˇ neh ehˇ naˇ, ngaˇ uˬ duˬ tahˬ lu ̭-eu ngaˬ-ahˇ uˆ lahˇ-eu Miˬyehˇ-euˬ mˬ taˆ g’aˬ k’ehˇ tiˬ g’aˬ, miˇ ci ̭ ngaˇ jawˇ gaˇ oe-awˇ heu lo ̭-ehˇ ehˇ le-euˬ meh. ²⁴ ’Pawˇluˆ-oˇ, taˬ guˆ. Sahˬ paˬ Gehˇsaˬ mehˬ shi nawˇ ya yaw ̭ leˇ teh ̭-a. Nawˬ-euˬ myaˆ pyawˬ-ahˇ Miˬyehˇ haw-awˇ, nawˬ nehˬ-ehˇ saˇ baoˬ k’aˇ dziˬ lu ̭-eu tsawˇ haˬ dawˬ tawˆ lu ̭-ahˇ maˬ shiˇ ni bi dzeuˇ-iˇ teh ̭-a’ lehˇ ehˇ le-euˬ meh. ²⁵ K’oeˇ miˇ neh cawˬ deuˬ-oˇ, nui ma k’aˬ duˬ ni jawˇ-awˬ. Ngaˬ-ahˇ k’aˇ ehˇ nehˬ le-euˬ lo ̭-ehˇ aˬ diˇ aˬ maˇ pyeu ̭ laˇ teh ̭-a lehˇ Miˬyehˇ-ahˇ ngaˇ jah ma. ²⁶ Ehˇ k’aw ̭, aˬ dui ma ̭ dziˬ lu ̭-eu saˇ baoˬ heu laˇ iˇ jaw lahˇ tiˬ tsahˇ na k’oeˇ taˆ bi tahˬ daˆ g’eh teh ̭-a." ²⁷ K’oeˇ lo ̭-ehˇ shaˬ lu ̭-eu tseˇ oeˬ miˇ aˬ yaw ̭ miˇ-ahˇ, jaˬ lehˇ lehˇ ma k’oeˇ bahˬ G’ahˇ ceh-euˬ iˬ ma laˆ shaˆ la ̭ k’oeˇ nga ma ̭-ahˇ hehˇ g’eh lu ̭-eu meh. Sehˇ g’ahˇ ceh laˇ ngeh, saˇ baoˬ la ̭ k’oeˇ gaˇ mˇ-eu tsawˇ haˬ deuˬ, dahˇ taˆ peh le-euˬ duˇ lehˇ noeˬ-euˬ meh. ²⁸ Aˇ caˆ-ahˇ yaw kah pa ̭ taw ̭-awˇ iˇ cu ̭-ahˇ pyehˬ ka haw ngeh, nyiˬ tseˇ lmˇ teh ̭-ehˇ na ̭ gaˇ ya mawˇ-euˬ meh. Tiˬ k’ehˬ g’eh-awˇ tiˬ poˆ paˇ pyehˬ ka haw ngeh, tseˇ ngaˬ lmˇ teh ̭-ehˇ na ̭ gaˇ paˇ ya mawˇ-euˬ meh. ²⁹ Saˇ baoˬ k’oeˇ laˇ k’aˬ lo lo guˇ-ahˇ ciˬ tahˬ-iˇ gaˇ aˬ yaw ̭ ma ̭ guˆ-eu miˇ neh, saˇ baoˬ bi naˬ leˇ-eu g’aˇ duˬ, saˇ baoˬ-euˬ naˇ k’ah paw pyawˬ-ahˇ shmˇ kuˆ seuˬ oeˬ hmˬ pyehˬ ka-awˇ, uˬ bya yaw kawˇ-ehˇ bya laˇ ni guiˬ lahˬ shaˇ lu ̭-eu meh. ³⁰ K’oeˇ ngeh, saˇ baoˬ la ̭ k’oeˇ gaˇ mˇ-eu tsawˇ haˬ deuˬ, saˇ baoˬ-ahˇ byehˇ dzeh-awˇ yawˬ ha k’aˇ buˬ maˬ buˬ cehˆ-eu lehˇ g’eh-eu meh. Saˇ baoˬ-euˬ uˬ duˬ paw pyawˬ-ahˇ shmˇ kuˆ seuˬ pyehˬ ka-iˇ-eu jahˇ geu ̭-awˇ, saˇ baoˬ k’oeˇ taˆ jaˆ-eu lawˬ k’oeˇ laˇ-ahˇ iˇ cu ̭-ahˇ pyehˬ ka lu ̭-eu meh. ³¹ Ehˇ k’aw ̭, yehˇ-euˬ aˬ yui ̭ k’oeˇ g’aˬ hawˇ-eu yehˇ deuˬ-ahˇ Pawˇluˆ ehˇ nehˬ-eu, "Saˇ baoˬ la ̭ k’oeˇ gaˇ mˇ-eu tsawˇ haˬ teu deuˬ saˇ baoˬ heu laˇ la ̭ k’oeˇ maˬ jawˇ ni cehˆ jiˇ naˇ, naw ma ̭ deh ̭-iˇ-eu gaˇ ma maˬ paˇ dahˇ meh." ³² K’oeˇ ngeh, yehˇ k’oeˇ deuˬ lawˬ-ahˇ pa ̭ taˬ-euˬ aˇ caˆ deuˆ tsehˆ-awˇ, bi bu byoˆ g’eh-euˬ meh. ³³ Uˬ bya bya taw taw laˇ ngeh, aˬ yaw ̭ ma ̭ dawˬ tawˆ lu ̭ tiˬ jeˬ paˬ dzaˬ-eu g’aˇ duˬ Pawˇluˆ g’aˬ bi ̭-euˬ meh. Aˬ yaw ̭ ehˇ-eu, "Naw ma ̭ tiˬ jeˬ-iˬ maˬ dzaˬ ni heu lo ̭-ehˇ dzahˬ lu ̭-eu tseˇ oeˬ nah byah laˇ-euˬ meh. ³⁴ K’oeˇ miˇ neh, tiˬ jeˬ paˬ dzaˬ-awˬ lehˇ, naw ma ̭-ahˇ ngaˇ shaˇ-eu ma. Naw ma ̭ maˬ ya shiˇ-eu g’aˇ duˬ dzaˬ-eu loˬ meh. Naw ma ̭-euˬ uˬ duˬ tsehˇ kahˇ tiˬ kahˇ teh ̭-ehˇ k’aw ̭ maˬ byoˆ maˬ laˆ-iˇ-aˇ." ³⁵ K’oeˇ lo ̭-ehˇ ehˇ g’aˬ naˇ, Pawˇluˆ kaˬ muˇ yuˇ-awˇ, aˬ yaw ̭ ma ̭ dawˬ tawˆ lu ̭-euˬ mehˬ shi Miˬyehˇ guiˬ lahˬ-ahˇ ja ceuˬ-awˇ, ngawˬ pyehˬ-awˇ dzaˬ-euˬ meh. ³⁶ Aˬ yaw ̭ ma ̭ k’aw ̭, nui ma g’aˬ ahˇ laˇ-awˇ, yawˬ g’aˬ na lu ̭ tiˬ jeˬ paˬ dzaˬ-euˬ meh. ³⁷ Nga ma ̭ saˇ baoˬ dziˬ lu ̭-eu tsawˇ haˬ dawˬ tawˆ lu ̭, nyiˬ yaˇ shi ̭ tseˇ ko ̭ g’aˬ byah-eu ma. ³⁸ Yawˬ g’aˬ na lu ̭ dzaˬ g’aˬ ngeh, saˇ baoˬ yaw pyaˇ bi pyaˇ laˇ-eu g’aˇ duˬ, k’aˇ tawˬ lu ̭-eu cehˇ dawˬ tawˆ lu ̭ iˬ ma laˆ shaˆ-ahˇ shehˆ pu ̭ jiˇ-euˬ meh. ³⁹ Uˬ bya bya laˇ-euˬ k’aw ̭, saˇ baoˬ la ̭ k’oeˇ gaˇ mˇ-eu tsawˇ haˬ deuˬ iˬ ma laˆ shaˆ lawˇ deh-ahˇ yaw muiˬ paˬ-ehˇ maˬ mawˇ duˬ nya-a. Ehˇ k’aw ̭, iˬ ma laˆ shaˆ lawˇ g’o ̭ lawˇ deh tiˬ tsahˇ haw mawˇ-awˇ, g’eh nya naˇ, saˇ baoˬ-ahˇ k’oeˇ gaˇ bi coeˬ daˆ g’eh ma lehˇ aˬ yaw ̭ ma ̭ noeˬ tsehˆ-euˬ meh. ⁴⁰ K’oeˇ naˇ, saˇ baoˬ-ahˇ g’eu naˬ taˬ-euˬ shmˇ kuˆ seuˬ deuˬ-euˬ aˇ caˆ deuˆ tsehˆ jiˇ-awˇ, iˬ ma laˆ shaˆ-ahˇ bi ga pu ̭ ya ̭-euˬ meh. Saˇ baoˬ-ahˇ yeu ̭ pyawˇ-eu daˇ laˆ deuˬ-ahˇ pa ̭ taw ̭ taˬ-euˬ aˇ caˆ deuˬ k’aw ̭ puiˇ dzeh jiˇ-euˬ meh. K’oeˇnaˇ, saˇ baoˬ-ahˇ jaˬ lehˇ neh mehˬ hu paw bi baw g’eh-eu g’aˇ duˬ, saˇ baoˬ uˬ duˬ paw-euˬ lehˇ baw saˬ paˇ taw-awˇ, laˆ shaˆ lawˇ deh paw nga ma ̭ iˇ-euˬ ma. ⁴¹ Ehˇ k’aw ̭, saˇ baoˬ k’oeˇ laˇ k’aˇ shui ̭-ahˇ coeˬ tahˬ k’aˆ le ̭-awˇ naˬ leˇ-euˬ meh. Saˇ baoˬ-euˬ uˬ duˬ paw pyawˬ k’oeˇ gaˇ coeˬ tsmˬ-awˇ, maˬ luˆ nya-a. Dawˬ dahˬ paw pyawˬ-aˬ, iˇ k’awˇ neh tahˬ pyaˆ tahˬ shaˆ jiˇ-euˬ meh. ⁴² Yehˇ deuˬ-aˬ, aˬ yaw ̭ ma ̭ neh sheuˬ la ̭-euˬ tawˬ-ahˇ uˇ-eu tsawˇ haˬ deuˬ iˇ cu ̭ iˇ diˬ diˬ doˆ-awˇ maˬ bi cehˆ dzeuˇ ni seh ̭ jiˇ-eu lehˇ g’eh-eu meh. ⁴³ Ehˇ k’aw ̭, yehˇ deuˬ k’oeˇ taˆ aˬ yui ̭ geu ̭-eu g’aˬ Pawˇluˆ-ahˇ bi dzeuˇ-iˇ maw ̭-eu miˇ neh, k’oeˇ lo ̭-ehˇ maˬ bi jahˇ ni laˆ tsoeˬ-euˬ meh. Iˇ diˬ diˬ nya-eu tsawˇ haˬ deuˬ jeˬ huˬ tsawˬ ka-awˇ, iˇ diˬ diˬ doˆ g’eh-eu g’aˇ duˬ aˬ yawˬ dawˬ bi ̭-euˬ meh. ⁴⁴ Dzeˇ-eu deuˬ-aˬ, teˇ bya ̭ doe ni, saˇ baoˬ pyaˆ-iˇ-awˇ k’eh ̭-iˇ k’oeˆ-iˇ-euˬ daˇ kawˬ hawˇ-eu mˇ myawˬ doe ni daw ̭ teh ̭-awˇ, lawˇ deh-ahˇ teuˆ doˆ g’eh-eu g’aˇ duˬ aˬ yaw ̭ dawˬ bi ̭-euˬ meh. K’oeˇ lo ̭-ehˇ jahˇ-awˇ, nga ma ̭ tiˬ g’aˬ-iˬ maˬ ca laˇ ni lawˇ dzeˇ tsehˆ doˆ jiˇ-euˬ ma.

¹ Nga ma ̭ buˬ-iˇ law-iˇ-awˇ dahˇ taˆ le doˆ g’aˬ ngeh, iˇ jaw lahˇ k’oeˇ lahˇ Meˬleˬdeˬ lehˇ kuˇ-eu gaˇ kawˆ ya siˬ-euˬ ma. ² Iˇ jaw lahˇ k’oeˇ lahˇ-ahˇ jawˇ-eu tsawˇ haˬ deuˬ nga ma ̭-ahˇ g’awˬ shaˬ gaˬ dui dui-eu meh. Uˬ yehˇ ga doˆ le-awˇ, yaw tseh ̭ tseh ̭-eu miˇ neh, aˬ yaw ̭ ma ̭ miˬ dzaˬ baw do ̭-awˇ nga ma ̭-ahˇ ha nehˬ la ̭-euˬ meh. ³ Pawˇluˆ g’eh, miˬ dzaˬ kawˬ pyaˇ ya uiˬ-awˇ, miˬ dzaˬ jehˆ bymˇ k’oeˇ taˆ ba ̭ do ̭-euˬ meh. Miˬ dzaˬ yaw lahˇ lahˇ-eu miˇ neh, do ̭ k’aˆ dui dui-eu aˇ lawˇ tiˬ mawˇ doˆ laˇ-awˇ, Pawˇluˆ-euˬ aˬ la ̭-ahˇ kaw ̭ tsoˆ taˬ-euˬ meh. ⁴ Iˇ jaw lahˇ k’oeˇ lahˇ-ahˇ jawˇ-eu tsawˇ haˬ k’oeˇ deuˬ Pawˇluˆ-euˬ aˬ la ̭-ahˇ aˇ lawˇ k’oeˇ mawˇ ga g’eu gaˇ mawˇ ngeh, tiˬ g’aˬ tiˇ g’aˬ ehˇ-eu, "Tsawˇ haˬ teu g’aˬ aˬ cawˬ-ahˇ seh ̭-euˬ tsawˇ haˬ ngaˇ. Iˬ ma laˆ shaˆ la ̭ k’oeˇ maˬ shiˇ ni ya dzeuˇ-iˇ-euˬ k’aw ̭, yaw tsaˬ yaw dawˇ jeˬ aˬ yaw ̭-ahˇ maˬ paˇ bi deh ̭-eu yaw duˬ baw ngaˇ ehˇ lawˬ." ⁵ Ehˇ k’aw ̭, Pawˇluˆ tiˬ jeˬ-iˬ maˬ g’eh ni, aˇ lawˇ k’oeˇ mawˇ-ahˇ miˬ dzaˬ-ahˇ jui ̭ ahˇ-euˬ meh. ⁶ Pawˇluˆ-euˬ g’awˇ mawˇ puˬ laˇ-euˬ loˇ, maˬ ngeuˇ naˇ ja pyuˬ ni coˬ lah-awˇ shiˇ-eu loˇ lehˇ pyeu ̭ laˇ gaˇ aˬ yaw ̭ ma ̭ haw tsoˆ taˬ-euˬ meh. Ehˇ k’aw ̭, aˬ yaw ̭ ma ̭ g’awˬ myahˇ ni lo ̭ keuˆ la ̭ k’aw ̭ tiˬ jeˬ-iˬ maˬ g’eh gaˇ ya mawˇ ngeh, aˬ yaw ̭ ma ̭ yawˬ jeˬ yawˬ-ehˇ noeˬ laˇ-awˇ, "Tsawˇ haˬ teu g’aˬ miˬ yehˇ ngaˇ" lehˇ ehˇ-eu meh. ⁷ K’oeˇ gaˇ neh g’awˬ mahˇ ni maˬ kaˬ-ehˇ, iˇ jaw lahˇ k’oeˇ lahˇ-ahˇ aˬ yui ̭ geu ̭ lu ̭-eu Buˬbaˬliˇ lehˇ myahˇ-euˬ g’aˬ-euˬ deh yaˇ miˇ tsaˬ g’awˬ loe ni jaˆ-eu meh. Aˬ yaw ̭ nga ma ̭-ahˇ yaw muiˬ paˬ-ehˇ ha le-awˇ, smˬ nah keuˆ ni aˬ yaw ̭-euˬ nymˇ-ahˇ daˬ yah geu ̭-euˬ ma. ⁸ Buˬbaˬliˇ-euˬ aˬ da-aˬ, pyaˬ-awˇ uˬ maˆ uˬ neˇ iˇ iˇ-ehˇ yu ̭ zaˇ k’oeˇ taˆ ga-eu meh. Pawˇluˆ-aˬ, aˬ yaw ̭ yu ̭-eu kuˆ lawˆ-ahˇ uˇ leˇ-awˇ, guiˬ lahˬ shaˇ nehˬ-eu la ̭ k’oeˇ, aˬ yaw ̭-euˬ k’oeˇ taˆ aˬ la ̭ ba ̭ daˆ-awˇ naˇ gawˇ laˆ taˬ nehˬ-euˬ meh. ⁹ K’oeˇ lo ̭-ehˇ pyeu ̭ laˇ-euˬ gaˇ ya mawˇ ngeh, iˇ jaw lahˇ k’oeˇ lahˇ la ̭ k’oeˇ k’aˇ jawˇ-eu naˇ-eu tsawˇ haˬ dawˬ tawˆ lu ̭ oe-awˇ, naˇ gawˇ bi laˆ taˬ jiˇ-euˬ meh. ¹⁰ K’oeˇ ngeh, aˬ yaw ̭ ma ̭ nga ma ̭-ahˇ la ̭ sawˬ g’awˬ mya ni bi ̭ laˬ-euˬ meh. Nga ma ̭ saˇ baoˬ dziˬ-awˇ paˇ doˆ-iˇ ngeh k’aw ̭, gaˇ pehˇ-ahˇ k’aˇ loˬ-eu yawˬ jeˬ na lu ̭ shaˇ dawˆ nehˬ la ̭-euˬ meh. ¹¹ Ba la smˇ siˬ byah laˇ ngeh, "miˬ yehˇ nyiˬ g’aˬ" lehˇ myahˇ-euˬ saˇ baoˬ dziˬ-awˇ doˆ-iˇ-euˬ ma. Saˇ baoˬ k’oeˇ laˇ-aˬ, Aˬleˬsaˬduˇ meuˬ-ahˇ-euˬ saˇ baoˬ pyeu ̭-awˇ, tsahˬ gaˆ yamˬ-ahˇ iˇ jaw lahˇ k’oeˇ lahˇ-ahˇ naˬ lu ̭-eu meh. ¹² Suˇlaˬguˇ meuˬ-ahˇ nga ma ̭ iˇ keuˆ ngeh, smˬ nah naˬ-euˬ ma. ¹³ K’oeˇ gaˇ neh paˇ doˆ-iˇ-awˇ, Leˬjiˬoˬ meuˬ-ahˇ iˇ keuˆ-euˬ ma. Yawˬ nah yawˬ, la ̭ oˆ paw pyawˬ-ahˇ-euˬ jaˬ lehˇ baw daˆ la ̭-eu miˇ neh, nyiˬ nah la ̭ k’oeˇ Bawˇdaˬyawˇliˇ meuˬ-ahˇ nga ma ̭ iˇ keuˆ-euˬ ma. ¹⁴ Meuˬ k’oeˇ meuˬ la ̭ k’oeˇ, jah-eu tsawˇ haˬ ti deuˬ-ahˇ nga ma ̭ mawˇ-awˇ, aˬ yaw ̭ ma ̭ nehˬ-ehˇ jawˇ nah tiˬ jaw jawˇ nehˬ la ̭ lehˇ nga ma ̭-ahˇ shaˇ-eu meh. K’oeˇ naˇ, Loˇmaˆ meuˬ-ahˇ nga ma ̭ le keuˆ-euˬ ma. ¹⁵ Loˇmaˆ meuˬ-ahˇ jawˇ-eu jah-eu tsawˇ haˬ deuˬ nga ma ̭ gaˇ kawˆ ya gaˬ-awˇ, Aˬbiˇ-euˬ Lehˆ lehˇ kuˇ-eu meuˬ hawˇ-eu Saˆlaˬ Smˇlaˬ lehˇ kuˇ-eu meuˬ-ahˇ keuˆ ni oe-awˇ, nga ma ̭-ahˇ tahˬ puˬ le-euˬ meh. Aˬ yaw ̭ ma ̭-ahˇ Pawˇluˆ ya mawˇ ngeh, nui ma g’aˬ tiˬ tiˆ paˇ ahˇ laˇ-awˇ, Miˬyehˇ-euˬ guiˬ lahˬ-ahˇ ja ceuˬ-euˬ meh. ¹⁶ Loˇmaˆ meuˬ-ahˇ le keuˆ ngeh, Pawˇluˆ-ahˇ yehˇ tiˬ g’aˬ teh ̭-ehˇ bi lo ̭-awˇ, aˬ yawˇ yaw ̭ jawˇ-eu aˬ kawˬ-aˬ bi ̭ nehˬ-euˬ meh. ¹⁷ Smˬ nah byah laˇ ngeh, k’oeˇ gaˇ jawˇ-eu Yuˇdaˆ tsawˇ haˬ aˬ yui ̭ aˬ tsu deuˬ-ahˇ Pawˇluˆ kuˇ uiˬ-euˬ meh. Aˬ yaw ̭ ma ̭ uiˬ laˇ ngeh, Pawˇluˆ heu lo ̭-ehˇ ehˇ nehˬ-euˬ meh. "Aˬ yui ̭ aˬ nyiˇ Iˇsaˬleˬlaˆ tsawˇ haˬ deuˬ-oˇ, aˬ duiˬ-euˬ tsawˇ jeuˬ-ahˇ maˬ ehˇ, aˬ dui-euˬ aˬ poeˬ aˬ bawˇ ziˇ neh tawˬ ka le ̭-euˬ zahˇ sahˇ k’o ̭ deuˬ-ahˇ maˬ ehˇ, ngaˬ neh mˇ bahˬ-euˬ tiˬ jeˬ-iˬ maˬ jaˆ gaˇ, Yeˬluˇsaˬlehˬ meuˬ-ahˇ ngaˬ-ahˇ pa ̭-awˇ, Loˇmaˆ tsawˇ haˬ deuˬ-euˬ aˬ la ̭ la ̭ k’oeˇ a ahˇ nehˬ la ̭-euˬ meh. ¹⁸ Loˇmaˆ tsawˇ haˬ deuˬ teh ̭ law nmˇ-aˬ, ngaˬ-ahˇ pyehˆ tseˇ-awˇ naˇ haˬ g’aˬ ngeh, ya shiˇ gaˇ keuˆ ni mˇ lehˬ taˬ-euˬ tiˬ jeˬ-iˬ maˬ jaˆ-eu miˇ neh, ngaˬ-ahˇ pyehˬ nehˬ maw ̭-eu meh. ¹⁹ Ehˇ k’aw ̭, ngaˬ-ahˇ pyehˬ nehˬ-eu g’aˇ duˬ Yuˇdaˆ tsawˇ haˬ deuˬ nui ma maˬ tsaˬ-eu miˇ neh, ngaˬ-euˬ tsawˇ jeuˬ-ahˇ ngaˇ iˬ baˇ tiˬ jeˬ-iˬ taˬ k’aˇ maˬ za k’aw ̭, sahˬ paˬ Gehˇsaˬ neh ngaˬ-ahˇ yaˇ k’aˬ bi daˇ la ̭ lehˇ maˬ shaˇ-ehˇ maˬ g’eh nya ni su ̭ laˇ taˬ-euˬ meh. ²⁰ K’oeˇ miˇ neh, naw ma ̭-ahˇ ngaˇ tahˬ puˬ-awˇ ja cawˬ maw ̭-eu ma. Dawˇ coe ni ya ehˇ naˇ, Iˇsaˬleˬlaˆ tsawˇ haˬ deuˬ noeˬ tmˬ lu ̭-eu g’aˬ-euˬ g’aˇ duˬ ngaˇ heu lo ̭-ehˇ shmˇ caˆ daˬ-awˇ jawˇ lu ̭-eu ma." ²¹ Aˬ yaw ̭ ma ̭ ehˇ-eu, "Nawˬ-euˬ gaˇ kawˆ-ahˇ ta ̭ leˇ-awˇ Yuˇdaˆ miˇ k’ahˬ-ahˇ neh bo ̭ la ̭-euˬ sahˬ bo ̭ tiˬ ta ̭-iˬ nga ma ̭ maˬ za-aˬ. K’oeˇ gaˇ neh laˇ-euˬ nga ma ̭-euˬ tsawˇ haˬ deuˬ k’aw ̭, nawˬ-euˬ gaˇ kawˆ yaw doeˇ tiˬ g’aˬ-iˬ maˬ ja-a. ²² Ehˇ k’aw ̭, iˬ nah nawˇ uˇ lu ̭-eu aˇ muˇ heu muˇ-ahˇ, yawˬ gaˇ na lu ̭ aˬ cawˬ ja doeˇ-awˇ iˬ baˇ taˬ lu ̭-eu nga ma ̭ ya siˬ duˬ taˬ-euˬ ma. K’oeˇ miˇ neh, nawˬ neh noeˬ taˬ-euˬ gaˇ kawˆ ja gaˇ nga ma ̭ naˇ haˬ maw ̭ miˇ-a." ²³ K’oeˇ naˇ, aˬ yaw ̭ ma ̭ aˇ nah tiˬ nah laˆ duˬ-awˇ, aˇ nah k’oeˇ nah keuˆ laˇ ngeh, tsawˇ haˬ g’awˬ mya ni Pawˇluˆ jawˇ gaˇ uiˬ laˇ-euˬ meh. Uˬ shawˬ paw neh uˬ ci ̭ paw keuˆ ni, Pawˇluˆ neh aˬ yaw ̭ ma ̭-ahˇ Miˬyehˇ Miˇk’ahˬ gaˇ kawˆ ja mehˬ-awˇ, Moˇseˬ-euˬ Zahˇ dawˬ k’o ̭ dawˬ hawˇ-eu Miˬyehˇ g’aˇ duˬ ngehˬ dah-eu deuˬ neh bo ̭ taˬ-euˬ gaˇ kawˆ-ahˇ g’oe g’oe-ehˇ, Yeˬsuˇ-euˬ gaˇ kawˆ-ahˇ jah laˇ ni leh jeh-awˇ mehˬ nehˬ-euˬ meh. ²⁴ Tiˬ paˆ na deuˬ aˬ yaw ̭ mehˬ gaˇ jah laˇ-euˬ meh. Ehˇ k’aw ̭, tiˬ paˆ na deuˬ maˬ jah-a. ²⁵ Pawˇluˆ neh ngehˬ-euˬ dawˬ baˬ da neh, aˬ yaw ̭ ma ̭ tiˬ g’aˬ tiˇ g’aˬ maˬ tsaˬ leˇ ni g’o ̭-iˇ-euˬ meh. Aˬ jeˬ miˇ neh ehˇ naˇ, aˬ yaw ̭ ma ̭-ahˇ Pawˇluˆ neh ehˇ nehˬ-euˬ k’oeˇ-aˬ, heu lo ̭-ehˇ meh. "Miˬyehˇ g’aˇ duˬ ngehˬ dah-eu Iˇsaˬyaˇ-ahˇ g’oe-awˇ, naw ma ̭-euˬ aˬ poeˬ aˬ bawˇ deuˬ-ahˇ Muiˬ-eu shawˇ-eu Yaw sahˇ Miˬyehˇ neh ehˇ nehˬ-euˬ dawˬ heu dawˬ aˇ naˆ ni tsaˬ-eu nga. ²⁶ Aˬ yaw ̭ ehˇ-eu, ’Tsawˇ haˬ heu deuˬ jawˇ gaˇ iˇ-awˇ, heu lo ̭-ehˇ ehˇ nehˬ-awˬ. Gaˬ dehˆ-euˬ k’aw ̭ maˬ g’oˆ shaw-ehˇ, haw dehˆ-euˬ k’aw ̭ maˬ mawˇ leˇ-aˇ. ²⁷ Aˬ jeˬ miˇ neh ehˇ naˇ, yaw ̭ ma ̭ nui ma g’ahˇ-awˇ, naˬ bawˇ pa ̭ tsoeˬ tsoeˬ-awˇ, myaˆ nuiˆ miˆ tehˬ-euˬ meh. K’oeˇ lo ̭-ehˇ maˬ g’eh law nmˇ-aˬ, myaˆ nuiˆ-ahˇ mawˇ leˇ-awˇ, naˬ bawˇ-ahˇ gaˬ leˇ-awˇ, nui ma-ahˇ noeˬ leˇ-awˇ, ngaˇ jawˇ gaˇ g’o ̭ laˇ ngeh, naˇ gawˇ yaˇ taˬ nehˬ ma."’ ²⁸ K’oeˇ naˇ, Pawˇluˆ aˇ saˬ saˬ-eu dawˬ ngehˬ-eu, "Naw ma ̭ heu lo ̭-ehˇ siˬ nya-awˬ. Miˬyehˇ-euˬ ka k’o ̭-eu guiˬ lahˬ dawˬ heu-ahˇ, aˬ cawˬ tsawˇ jeuˬ deuˬ-ahˇ bi mehˬ-iˇ-euˬ meh. Aˬ yaw ̭ ma ̭ naˇ haˬ geu ̭ teh ̭-a lehˇ siˬ nya-awˬ." ³⁰ Pawˇluˆ-aˬ, aˬ yaw ̭ neh ngaˬ taˬ-euˬ nymˇ-ahˇ nyiˬ k’o ̭ byah ni jawˇ-awˇ, aˬ yaw ̭ jawˇ gaˇ k’aˇ laˇ-eu tsawˇ haˬ deuˬ-ahˇ yaw muiˬ paˬ-ehˇ ha-euˬ meh. ³¹ Miˬyehˇ Miˇk’ahˬ gaˇ kawˆ dawˬ mehˬ mehˬ-awˇ, Sahˬpaˬ Yeˬsuˇ Ka li gaˇ kawˆ mehˬ nehˬ tsoˆ nehˬ-euˬ meh. Laˆ tsoeˬ-eu tiˬ jeˬ-iˬ maˬ jaˆ ni, k’aˬ duˬ ni k’oeˇ lo ̭-ehˇ mˇ-euˬ meh.