2 TIˆMOˇSEˬ

2 TIˆMOˇSEˬ

¹ Miˬyehˇ nui ma tsaˬ-eu la ̭ k’oeˇ Yeˬsuˇ Ka liˬ-euˬ g’aˬ k’ehˇ ya geu ̭ lu ̭-awˇ, Yeˬsuˇ Ka li la ̭ k’oeˇ aˬ dui za-euˬ saˇ jaˇ dzaˬ taˬ-euˬ deh ̭-eu jeˬ gaˇ kawˆ bi mehˬ-eu g’aˇ duˬ Miˬyehˇ neh bi k’ehˇ g’eh-euˬ g’aˬ pyeu ̭-eu ngaˇ Pawˇluˆ, ² Ngaˇ gaˬ-eu aˬ li Tiˆmoˇseˬ jawˇ gaˇ sahˬ bo ̭ bo ̭ ahˇ le ̭-eu ma. Aˬda Miˬyehˇ hawˇ-eu aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ maˬ ehˇ, g’awˬ shaˬ gaˬ-eu jeˬ maˬ ehˇ, nui saˇ o ̭-eu jeˬ maˬ ehˇ, nawˬ-euˬ k’oeˇ taˆ jaˆ lu ̭-uˇ. ³ Aˇ hu ngaˬ-euˬ aˬ poeˬ aˬ bawˇ deuˬ Miˬyehˇ-euˬ guiˬ lahˬ-ahˇ ja ceuˬ-euˬ lo ̭-ehˇ, ngaˬ-euˬ siˬ nya-eu nui ma shawˇ jehˆ ni taˬ-awˇ gaˇ mˇ nehˬ lu ̭-eu Miˬyehˇ-euˬ guiˬ lahˬ-ahˇ ngaˇ ja ceuˬ-eu ma. Uˬ ci ̭ nah g’ahˇ maˬ ehˇ ngaˇ guiˬ lahˬ k’aˇ shaˇ ngeh, nawˬ-ahˇ noeˬ keuˆ-awˇ Miˬyehˇ-euˬ guiˬ lahˬ-ahˇ ja ceuˬ-eu ma. ⁴ Nawˇ myaˆ biˇ ya doˆ gaˇ noeˬ mawˇ-awˇ, nawˬ-ahˇngaˇ mawˇ maw ̭ dui dui-eu ma. Nawˬ-ahˇ mawˇ naˇ, ngaˇ laˬ k’aˬ ya cehˇ dui dui teh ̭-a. ⁵ Shawˇ jehˆ ni g’eh-eu nawˬ-euˬ jah-eu jeˬ-ahˇ ngaˇ noeˬ mawˇ lu ̭ ma. Nawˬ-euˬ jah-eu jeˬ-aˬ, nawˬ piˬ Lawˇiˆ hawˇ-eu nawˬ ma Uˇniˇ-euˬ jah-eu jeˬ-ahˇ duˇ-eu meh. Jah-eu jeˬ k’oeˇ, nawˬ-euˬ la ̭ k’oeˇ k’aw ̭ ahˇ meh lehˇ ngaˇ siˬ duˬ ma. ⁶ K’oeˇ miˇ neh, nawˬ-euˬ k’oeˇ taˆ ngaˇ aˬ la ̭ ba ̭ daˆ-awˇ aˇ yaˬ bi ̭ nehˬ ngeh, Miˬyehˇ la ̭ sawˬ bi ̭ taˬ-euˬ jeˬ taˬ bi shiˇ tsehˆ lehˇ ngaˇ ehˇ-euˬ ma. ⁷ Aˬ jeˬ miˇ neh ehˇ naˇ, Miˬyehˇ neh aˬ dui-ahˇ bi ̭ la ̭-euˬ Yaw sahˇ-aˬ, aˬ dui-euˬ nui ma bi baˬ-iˇ-eu maˬ ngeuˇ-a. Yaw sahˇ k’oeˇ-aˬ, aˬ dui-euˬ nui ma la ̭ k’oeˇ, baoˬ maˬ ehˇ, g’oeˇ-eu gaˬ-eu jeˬ maˬ ehˇ, yawˬ ha-euˬ nui ma-ahˇ g’aˬ leˇ-eu jeˬ maˬ ehˇ, bi ahˇ laˇ-eu meh. ⁸ K’oeˇ miˇ neh, aˬ dui-euˬ Sahˬpaˬ Yeˬsuˇ g’aˇ duˬ saˇ kiˇ kamˬ-eu taˬ sha ̭ dawˇ. Ka li-euˬ g’aˇ duˬ tawˬ-ahˇ bi pa ̭ ahˇ-euˬ g’aˬ pyeu ̭-eu ngaˬ-ahˇ k’aw ̭ taˬ sha ̭ dawˇ. Ehˇ k’aw ̭, Miˬyehˇ neh nawˬ-ahˇ g’aˬ bi ̭ nehˬ taˬ-euˬ lo ̭-ehˇ, Laˬ k’aˬ cehˇ-eu Guiˬ lahˬ dawˬ g’aˇ duˬ shaˬ-eu zahˬ-eu jeˬ-ahˇ nawˬ-euˬ shaˬ bymˇ nawˇ daˬ-awˬ. ⁹ Aˬ dui neh mˇ-euˬ shaˇ-euˬ jeˬ baˬ da neh, aˬ yaw ̭ aˬ dui-ahˇ ka k’o ̭-awˇ aˬ yaw ̭-euˬ zaˬ bi pyeu ̭ laˇ-euˬ maˬ ngeuˇ-a. Aˬ yaw ̭ neh noeˬ taˬ-euˬ jeˬ hawˇ-eu aˬ yaw ̭-euˬ guiˬ lahˬ yaw dzahˇ baˬ da neh bi pyeu ̭ laˇ-euˬ meh. Mˬ hawˇ-eu miˇ maˬ seu le mi naˆ-ehˇ, Yeˬsuˇ Ka li-ahˇ g’oe-awˇ guiˬ lahˬ yaw dzahˇ k’oeˇ bi ̭ taˬ le ̭-euˬ meh. ¹⁰ Ehˇ k’aw ̭, nymˬ-mˇ-aˬ, aˬ dui-euˬ Ka k’o ̭-eu g’aˬ pyeu ̭-eu Yeˬsuˇ Ka li-ahˇ bi oe-eu la ̭ k’oeˇ, guiˬ lahˬ yaw dzahˇ k’oeˇ bya cehˆ ni pah mehˬ nehˬ la ̭-euˬ meh. Shiˇ-eu jeˬ-euˬ baoˬ-ahˇ aˬ yaw ̭ laˆ byoˆ-awˇ, Laˬ k’aˬ cehˇ-eu Guiˬ lahˬ dawˬ la ̭ k’oeˇ mˬ maˬ maˬ byaˆ zaˇ ziˇ deh ̭-eu jeˬ pah mehˬ la ̭-euˬ meh. ¹¹ Laˬ k’aˬ cehˇ-eu Guiˬ lahˬ dawˬ mehˬ-eu g’aˬ k’ehˇ hawˇ-eu mehˬ-eu tsoˆ-eu g’aˬ bi geu ̭-eu g’aˇ duˬ, Miˬyehˇ ngaˬ-ahˇ tseˇ doˆ-euˬ meh. ¹² K’oeˇ-euˬ g’aˇ duˬ, k’ehˬ-eu k’aˆ-eu heu deuˬ-ahˇ ngaˇ daˬ lu ̭-eu ma. Ehˇ k’aw ̭, ngaˇ tiˬ paw ̭-iˬ maˬ sha ̭ dawˇ. A jeˬ miˇ neh ehˇ naˇ, ngaˇ g’oe lu ̭-eu g’aˬ aˬ suˇ g’aˬ-a lehˇ ngaˇ siˬ nya-awˇ, aˬ yaw ̭ neh ngaˬ-ahˇ a nehˬ taˬ-euˬ jeˬ-ahˇ, Aˇ nah k’oeˇ nah keuˆ laˇ ngeh keuˆ ni aˬ yaw ̭ jeˬ hmˬ bo saˆ teh ̭-a lehˇ ngaˇ siˬ nya ma. ¹³ Ngaˬ neh nawˬ-ahˇ mehˬ nehˬ tsoˆ nehˬ-euˬ dawˬ k’oeˇ deuˬ-ahˇ nawˇ dzaw geu ̭-awˇ caw teh-eu la ̭ k’oeˇ, zi ̭ dah ni tuˆ tehˬ taˬ-awˇ, Yeˬsuˇ Ka li la ̭ k’oeˇ aˬ dui za taˬ-euˬ jah-eu jeˬ hawˇ-eu g’oeˇ-eu gaˬ-eu jeˬ la ̭ k’oeˇ jawˇ-awˬ. ¹⁴ Aˬ dui-euˬ la ̭ k’oeˇ jawˇ-eu Muiˬ-eu shawˇ-eu Yaw sahˇ Miˬyehˇ-euˬ baoˬ-ahˇ g’oe-awˇ, nawˬ-ahˇ a nehˬ taˬ-euˬ yaw muiˬ jeˬ-ahˇ jeˬ hmˬ geu ̭-awˬ. ¹⁵ Piˬgeˬluˇ hawˇ-eu Heˬlaˇmoˇjeˬ aˬ nya ̭ ahˇ leˇ-ehˇ, Aˬshaˆ miˇ k’ahˬ-ahˇ k’aˇ jawˇ-eu tsawˇ haˬ yawˬ g’aˬ na lu ̭ ngaˬ-ahˇ byehˇ dzeh ya ̭ jiˇ-euˬ nawˇ siˬ nya lu ̭ meh. ¹⁶ Awˬneˬsiˬpawˬ-euˬ nymˇ jiˇ-ahˇ Sahˬpaˬ Yeˬsuˇ g’awˬ shaˬ gaˬ nehˬ lu ̭-uˇ. Aˬ jeˬ miˇ neh ehˇ naˇ, aˬ yaw ̭ ngaˬ-euˬ nui ma-ahˇ g’awˬ mya poˆ laˬ k’aˬ bi cehˇ la ̭-euˬ meh. ¹⁷ Ngaˇ tawˬ-ahˇ uˇ gaˇ aˬ yaw ̭ maˬ sha ̭ dawˇ-a. Loˇ maˆ meuˬ-ahˇ aˬ yaw ̭ laˇ keuˆ-euˬ nehˬ-ehˇ ngaˬ-ahˇ maˬ mawˇ k’oeˇ mawˇ ni poˆ-euˬ meh. ¹⁸ Aˇ nah k’oeˇ nah keuˆ le ngeh, Sahˬpaˬ Yeˬsuˇ aˬ yaw ̭-ahˇ g’awˬ shaˬ gaˬ nehˬ lu ̭-uˇ. Ngaˇ Eˇpeˇsu meuˬ-ahˇ jawˇ lu ̭ ngeh, aˬ yaw ̭ ngaˬ-ahˇ aˇ naˆ ni caw ba nehˬ la ̭-euˬ nawˇ siˬ nya meh.

¹ Ngaˬ li-oˇ, Yeˬsuˇ Ka li la ̭ k’oeˇ aˬ dui za taˬ-euˬ guiˬ lahˬ yaw dzahˇ baˬ da neh g’aˬ ahˇ-awˬ. ² Tsawˇ kaˬ g’awˬ mya ni-euˬ mehˬ shi ngaˬ neh nawˬ-ahˇ mehˬ nehˬ tsoˆ nehˬ-euˬ dawˬ k’oeˇ deuˬ yuˇ-awˇ, aˬ cawˬ-ahˇ mehˬ nehˬ tsoˆ nehˬ nya-eu jah coeˇ paˬ-ehˇ g’eh-eu tsawˇ haˬ deuˬ-ahˇ a nehˬ-awˬ. ³ Yeˬsuˇ Ka li-euˬ saˇ jaˇ zi ̭-eu yehˇ tiˬ g’aˬ lo ̭-ehˇ, k’ehˬ-eu k’aˆ-eu jeˬ-ahˇ nawˬ-euˬ shaˬ bymˇ nawˇ daˬ-awˬ. ⁴ Guiˇ mˇ lu ̭-eu yehˇ aˬ geu g’aˬ maˬ kaˬ, guiˇ ma ̭ k’oeˇ taˆ uˆ lahˇ lu ̭-eu yaw huiˬ g’aˬ-euˬ nui k’ahˇ mˇ byah maw ̭-eu miˇ neh, miˇ k’ahˬ zaˬ deuˬ mˇ-eu shaˇ-eu lo ̭-ehˇ maˬ mˇ ni ya dzahˬ tehˬ-eu meh. ⁵ Cehˆ ceh ceh-eu tsawˇ haˬ tiˬ g’aˬ-aˬ, niˇ g’a-eu zahˇ sahˇ k’o ̭-ahˇ maˬ caw teh naˇ la ̭ sawˬ maˬ za nya-a. ⁶ Leh jeh dui dui-eu deh ma mˇ-eu tsawˇ haˬ tiˬ g’aˬ-aˬ, keuˆ le-euˬ cehˇ la ̭ k’oeˇ yawˬ ha-ahˇ o ̭-eu shaˬ bymˇ aˬ cawˬ jeˬ hu za-eu meh. ⁷ Ngaˇ ehˇ lu ̭-eu gaˇ kawˆ heu deuˬ-ahˇ yaw muiˬ paˬ-ehˇ shaˇ sawˇ haw-awˬ. Aˬ jeˬ miˇ neh ehˇ naˇ, k’oeˇ deuˬ dawˬ tawˆ lu ̭-ahˇ nawˇ g’oˆ shaw nya ni, Sahˬpaˬ Yeˬsuˇ caw ba teh ̭-a. ⁸ Ngaˬ neh mehˬ-euˬ Laˬ k’aˬ cehˇ-eu Guiˬ lahˬ dawˬ la ̭ k’oeˇ ehˇ taˬ-euˬ lo ̭-ehˇ, Daˬbiˇ-euˬ tsui ̭-ahˇ ta ̭-eu shiˇ-euˬ gaˇ g’o ̭ deh ̭ laˇ-euˬ g’aˬ pyeu ̭-eu Yeˬsuˇ Ka li-ahˇ noeˬ keuˆ-awˬ. ⁹ Laˬ k’aˬ cehˇ-eu Guiˬ lahˬ dawˬ mehˬ-eu baˬ da neh, k’ehˬ-eu k’aˆ-eu jeˬ-ahˇ ngaˇ ya daˬ-awˇ, smˇ k’oeˬ tahˇ joe lo ̭-ehˇ shmˇ caˆ neh bi pa ̭ gaˇ keuˆ-euˬ ma. Ehˇ k’aw ̭, Miˬyehˇ-euˬ dawˬ-ahˇ shmˇ caˆ neh maˬ pa ̭ taw ̭ nya-a. ¹⁰ K’oeˇ miˇ neh, Miˬyehˇ neh tseˇ doˆ-euˬ tsawˇ haˬ deuˬ g’aˇ duˬ, yawˬ jeˬ na lu ̭-ahˇ ngaˇ daˬ-eu ma. Yeˬsuˇ Ka li baˬ da neh aˬ dui za-euˬ ka k’o ̭-eu jeˬ-ahˇ aˬ yaw ̭ ma ̭ za-awˇ, mˬ maˬ maˬ byaˆ zaˇ ziˇ yaw sheh ̭ k’ahˬ sehˇ bi doˆ laˇ nya ni, k’oeˇ lo ̭-ehˇ daˬ-eu ma. ¹¹ Tsaˬ dui dui-eu dawˬ-aˬ, heu lo ̭-ehˇ meh. "Aˬ dui aˬ yaw ̭ nehˬ-ehˇ shiˇ naˇ, aˬ yaw ̭ nehˬ-ehˇ ya deh ̭ teh ̭-a. ¹² Aˬ dui daˬ dzeuˇ oˇ dzeuˇ coeˇ naˇ, aˬ yaw ̭ nehˬ-ehˇ ya dzoeˬ teh ̭-a. Aˬ dui aˬ yaw ̭-ahˇ byehˇ dzeh naˇ, aˬ yaw ̭ aˬ dui-ahˇ byehˇ teh ̭-a. ¹³ Aˬ dui saˇ jaˇ maˬ zi ̭ law k’aw ̭, aˬ yaw ̭ saˇ jaˇ zi ̭ dui dui meh. Aˬ jeˬ miˇ neh ehˇ naˇ, aˬ yaw ̭ saˇ jaˇ zi ̭-eu miˇ neh, yawˬ haˇ yawˬ ha maˬ byehˇ dzeh-a." ¹⁴ Nawˬ-euˬ tsawˇ haˬ deuˬ-ahˇ gaˇ kawˆ heu ja mehˬ nehˬ-awˇ, dawˬ-ahˇ ta ̭ leˇ-eu gaˇ kawˆ tsawˇ pyehˇ pyehˇ-awˇ maˬ ya ja dzaˬ-eu g’aˇ duˬ Miˬyehˇ mehˬ shi yaw k’aˆ k’aˆ-ehˇ mehˬ nehˬ-awˬ. K’oeˇ lo ̭-ehˇ g’eh-eu jeˬ-aˬ, gaˇ dahˇ maˬ tsoeˬ-eu uˬ ta ̭, ya gaˬ-eu tsawˇ haˬ deuˬ-ahˇ bi luˬ bi seˇ-iˇ-eu teh ̭ meh. ¹⁵ Yawˬ ha-euˬ gaˇ mˇ-eu g’aˇ duˬ maˬ sha ̭ dawˇ-eu gaˇ mˇ zaˬ lo ̭-ehˇ maˬ ehˇ, Miˬyehˇ-euˬ yaw tsaˬ yaw dawˇ jeˬ gaˇ kawˆ dawˇ coe ni mehˬ-eu tsawˇ haˬ lo ̭-ehˇ maˬ ehˇ, Miˬyehˇ nui k’ahˇ shiˇ dui dui-eu tsawˇ haˬ tiˬ g’aˬ pyeu ̭ laˇ ni leh jeh dui dui-awˬ. ¹⁶ Gaˇ dahˇ maˬ tsoeˬ-eu gaˇ kawˆ ja uˇ-eu jeˬ-ahˇ gaˇ jaw jaw-awˬ. K’oeˇ-aˬ, tsawˇ haˬ zaˬ deuˬ Miˬyehˇ-ahˇ gaˇ mahˇ kaˬ-iˇ ni jahˇ gaˇ duˇ-eu meh. ¹⁷ K’oeˇ lo ̭-ehˇ mehˬ-eu tsoˆ-eu k’oeˇ-aˬ, shaˬ jiˇ-ahˇ dzaˬ joˆ dzeh-eu maˇ k’ehˬ maˇ naˇ-ahˇ duˇ-eu meh. K’oeˇ lo ̭-ehˇ mehˬ-eu tsoˆ-eu tsawˇ haˬ nyiˬ g’aˬ-aˬ, Huˬmiˬnehˇ hawˇ-eu Piˇlehˇ aˬ nya ̭ meh. ¹⁸ Aˬ dui g’o ̭ deh ̭ laˇ-eu jeˬ keuˆ le dzeuˇ-euˬ meh lehˇ ehˇ-eu la ̭ k’oeˇ, yaw tsaˬ yaw dawˇ gaˇ ma-ahˇ aˬ yaw ̭ ma ̭ byehˇ dzeh-awˇ, tsawˇ haˬ tiˬ paˆ na deuˬ-euˬ jah-eu nui ma bi cawˆ-iˇ-eu meh. ¹⁹ Ehˇ k’aw ̭, Miˬyehˇ neh dawˬ pehˬ zi ̭ dah ni gawˬ taˬ-euˬ jeˬ-ahˇ aˬ yaw ̭ ma ̭ maˬ laˆ luˆ nya-a. Dawˬ pehˬ k’oeˇ-euˬ k’oeˇ taˆ, "Yawˬ ha-euˬ tsawˇ haˬ deuˬ-ahˇ Sahˬpaˬ Miˬyehˇ siˬ nya meh" lehˇ bo ̭ taˬ-awˇ, "Sahˬpaˬ Miˬyehˇ-euˬ tsawˇ haˬ ma lehˇ k’aˇ ehˇ-eu deuˬ maˬ tsaˬ maˬ dawˇ-eu jeˬ maˬ mˇ ni ya byehˇ dzeh meh" lehˇ bo ̭ taˬ-euˬ meh. ²⁰ Nymˇ nymˇ ma tiˬ nymˇ la ̭ k’oeˇ k’mˬ maˬ oeˬ tsa ̭ g’awˬ mya ni jaˆ-eu meh. Tiˬ deuˬ na-aˬ, pyuˇ hawˇ-eu shuiˇ neh tehˆ taˬ-awˇ, tiˬ deuˬ na-aˬ, daˇ kawˬ hawˇ-eu miˇ tsaˬ neh jahˇ taˬ-euˬ meh. Tiˬ deuˬ na-aˬ, bawˬ-iˬ g’eh ngeh zmˬ-eu g’aˇ duˬ pyeu ̭-awˇ, tiˬ deuˬ na-aˬ, aˬ myah myah zmˬ-eu g’aˇ duˬ pyeu ̭-eu meh. ²¹ Tsawˇ haˬ tiˬ g’aˬ na, yaw haiˬ jeˬ k’oeˇ deuˬ dawˬ tawˆ lu ̭-ahˇ yawˬ haˇ yawˬ ha shawˇ dzeh jiˇ naˇ, huiˬ-eu gaˇ g’aˇ duˬ aˬ yaw ̭-ahˇ zmˬ teh ̭-a. Aˬ jeˬ miˇ neh ehˇ naˇ, aˬ yaw ̭-aˬ, yaw sahˇ g’aˬ-ahˇ g’awˇ mawˇ aˬ nehˬ taˬ-euˬ gaˇ dahˇ tsoeˬ-eu jeˬ pyeu ̭-awˇ, yaw muiˬ jeˬ mˇ-eu g’aˇ duˬ bi zmˬ-eu lehˇ lehˬ hmˬ dah taˬ-euˬ jeˬ pyeu ̭-eu meh. ²² Zaˬ guˬ deuˬ nui k’ahˇ jaˆ-eu jeˬ-ahˇ gaˇ jaw jaw-awˇ, Sahˬpaˬ Yeˬsuˇ-ahˇ caw ba nehˬ la ̭ lehˇ kuˇ lu ̭-eu nui ma shawˇ jehˆ ni g’eh-eu tsawˇ haˬ deuˬ nehˬ-ehˇ tiˬ kawˆ lo ̭-ehˇ, yaw tsaˬ yaw dawˇ jeˬ, jah-eu jeˬ, g’oeˇ-eu gaˬ-eu jeˬ, tsaˬ leˇ dzoeˇ leˇ-eu jeˬ, heu deuˬ g’aˇ duˬ leh jeh dui dui-awˬ. ²³ Ehˇ k’aw ̭, gaˇ dahˇ maˬ tsoeˬ-eu tsawˇ pyehˇ pyehˇ-eu jeˬ-ahˇ gaˇ mahˇ kaˬ gaˇ neh gaˇ jaw jaw-awˬ. K’oeˇ deuˬ-aˬ, iˬ dehˬ iˬ ceh-ahˇ uˬ duˬ duˬ leˇ meh lehˇ nawˇ siˬ nya meh. ²⁴ Sahˬpaˬ Yeˬsuˇ-euˬ zaˬ k’aˆ-aˬ, aˬ cawˬ nehˬ-ehˇ maˬ ya ceh dzaˬ-a. Aˬ yaw ̭-aˬ, tsawˇ haˬ yawˬ g’aˬ na lu ̭-ahˇ g’awˬ shaˬ ya gaˬ-awˇ, nui ma g’awˬ mahˇ ni taˬ nya-eu muiˬ dui dui-eu mehˬ-eu tsoˆ-eu saˬ laˬ ya bi pyeu ̭ meh. ²⁵ Yawˬ ha-ahˇ nui ma maˬ tsaˬ-eu tsawˇ haˬ deuˬ-ahˇ nui ma g’awˬ mahˇ ni taˬ-awˇ mehˬ paˇ tsoˆ paˇ nya-eu tsawˇ haˬ ya bi pyeu ̭ meh. Aˬ jeˬ miˇ neh ehˇ naˇ, Miˬyehˇ aˬ yaw ̭ ma ̭-ahˇ bi noeˬ paˇ-awˇ, yaw tsaˬ yaw dawˇ jeˬ-ahˇ bi siˬ nya laˇ gaˇ noeˬ tmˬ k’aˇ za-eu meh. ²⁶ K’oeˇ ngeh jawˇ, aˬ yaw ̭ ma ̭ nui ma-ahˇ noeˬ laˇ-awˇ, aˬ yaw ̭ ma ̭-ahˇ k’mˇ pa ̭-awˇ aˬ yaw ̭-euˬ nui noeˬ bi geu ̭-euˬ Neh ̭ sahˬ paˬ-euˬ lahˇ ju-ahˇ aˬ yaw ̭ ma ̭ teuˆ lehˆ doˆ nya teh ̭-a.

¹ Aˇ saˬ saˬ-eu aˇ nah a yamˬ la ̭ k’oeˇ shaˬ dui dui-eu aˇ yamˬ keuˆ le teh ̭-a lehˇ siˬ nya-awˬ. ² Tsawˇ haˬ zaˬ deuˬ-aˬ, yawˬ ha g’aˇ duˬ teh ̭-ehˇ shaˇ noe-eu, pyuˇ-ahˇ mehˇ juiˇ juiˇ-eu, k’ahˬ sehˇ jehˆ-eu, nui ma huiˬ-eu mahˇ-eu, aˬ cawˬ-ahˇ yehˬ bawˬ sehˇ lu-ehˇ ehˇ-eu, aˬ da aˬ ma-euˬ ehˇ dawˬ maˬ naˇ haˬ-eu, guiˬ lahˬ-ahˇ maˬ siˬ nya-eu, uˬ duˬ tahˬ-eu zahˇ sahˇ k’o ̭-ahˇ maˬ taˬ huiˬ-eu, ³ g’awˬ shaˬ gaˬ-eu maˬ siˬ nya-eu, aˬ cawˬ-ahˇ maˬ deh ̭ tsaˬ-eu, ja bu ja doeˇ-eu, daw ̭-eu ceh-eu, guˆ laˇ paˬ-ehˇ zuiˆ-eu, yaw muiˬ jeˬ-ahˇ muiˇ-eu, ⁴ saˇ jaˇ puiˬ-eu, nui ma-ahˇ maˬ noeˬ-eu, nui ma huiˬ-eu, Miˬyehˇ-ahˇ gaˬ-eu naˆ maˬ tseˇ byawˬ g’a mo g’a-eu jeˬ-ahˇ gaˬ-eu, ⁵ uˬ duˬ tahˬ-eu zahˇ sahˇ k’oˬ-ahˇ la ̭ nyiˇ paw teh ̭-ehˇ caw teh-awˇ k’oeˇ-euˬ baoˬ-ahˇ maˬ ha geu ̭-eu, heu lo ̭-ehˇ g’eh-eu tsawˇ haˬ deuˬ pyeu ̭ laˇ teh ̭-a. K’oeˇ lo ̭-ehˇ g’eh-eu tsawˇ haˬ deuˬ-ahˇ gaˇ jaw jaw-awˬ. ⁶ Aˬ yaw ̭ maˬ tiˬ paˆ na deuˬ aˬ cawˬ-euˬ nymˇ-ahˇ iˇ-awˇ, iˬ baˇ k’aˆ behˆ kah-awˇ shiˬ shaˬ jiˇ nui loˆ g’awˬ mya jeˬ mehˬ nah caw teh lu ̭-eu g’aˬ baˬ-eu zaˬ mi zaˬ deuˬ-ahˇ shuiˇ tawˆ geu ̭-eu meh. ⁷ Zaˬ miˬ zaˬ k’oeˇ deuˬ-aˬ, aˇ naˆ ni mehˬ nehˬ k’aw ̭ yaw tsaˬ yaw dawˇ jeˬ-ahˇ tiˬ jawˇ-iˬ maˬ siˬ nya laˇ-a. ⁸ Yaˬneˬ hawˇ-eu Yaˬbeˬ aˬ nya ̭ Moˇseˬ mehˬ gaˇ maˬ naˇ haˬ geu ̭-euˬ lo ̭-ehˇ, tsawˇ haˬ k’oeˇ deuˬ yaw tsaˬ yaw dawˇ jeˬ-ahˇ maˬ ha geu ̭-a. Aˬ yaw ̭ ma ̭-euˬ shaˇ noeˬ nya-eu nui ma gaˇ maˬ mˇ ni naˬ leˇ jiˇ-awˇ, jah-eu jeˬ-ahˇ smˬ-iˇ-euˬ tsawˇ haˬ pyeu ̭-eu meh. ⁹ Ehˇ k’aw ̭, aˬ yaw ̭ ma ̭ g’awˬ mahˇ ni iˇ g’eh k’aˇ maˬ za-a. Aˬ jeˬ miˇ neh ehˇ naˇ, aˬ yaw ̭ ma ̭ aˇ naˆ ni dzawˬ-eu gaˇ kawˆ tsawˇ haˬ yawˬ g’aˬ na lu ̭ siˬ duˬ mawˇ duˬ teh ̭-a. K’oeˇ-aˬ, Yaˬneˬ hawˇ-eu Yaˬbeˬ aˬ nya ̭ pyeu ̭ dzeuˇ ya ̭-euˬ gaˇ duˇ-eu meh. ¹⁰ Ehˇ k’aw ̭ nawˇ-aˬ, ngaˬ-euˬ mehˬ nah caw teh-awˇ dzaw geu ̭ lu ̭-eu tsawˇ haˬ pyeu ̭-eu meh. Ngaˬ neh mehˬ-euˬ tsoˆ-euˬ jeˬ, ngaˬ neh deh ̭ mehˬ jawˇ mehˬ-euˬ jeˬ, ngaˬ neh noeˬ-euˬ jeˬ, ngaˬ-euˬ jah-eu jeˬ, ngaˬ-euˬ nui ma mahˇ-eu jeˬ, ngaˬ-euˬ g’oeˇ-eu gaˬ-eu jeˬ, ngaˇ daˬ coeˇ oˇ coeˇ-eu jeˬ, ¹¹ k’ehˬ-eu k’aˆ-eu jeˬ-ahˇ ya daˬ-euˬ jeˬ, ya shaˬ ya zahˬ-euˬ jeˬ, heu deuˬ-ahˇ nawˇ dzaw geu ̭-euˬ meh. Aˬdiˇawˬ meuˬ, Iˇgawˇniˇ meuˬ, Loˇdaˬlaˇ meuˬ, heu deuˬ la ̭ k’oeˇ ngaˬ-euˬ k’oeˇ taˆ aˬ joˆ-ehˇ keuˆ le-awˇ, guˆ dui dui laˇ paˬ-ehˇ g’eh-eu k’ehˬ-eu k’aˆ-eu jeˬ-ahˇ ngaˇ aˇ naˆ ni daˬ dzeuˇ oˇ dzeuˇ-euˬ gaˇ kawˆ nawˇ siˬ nya meh. Yeˬsuˇ ngaˬ-ahˇ bi buˬ-iˇ la ̭-euˬ meh. ¹² Yeˬsuˇ Ka li la ̭ k’oeˇ Miˬyehˇ-ahˇ yaw zeu baw baw-ehˇ k’aˇ deh ̭-eu tsawˇ haˬ yawˬ g’aˬ na lu ̭ k’ehˬ-eu k’aˆ-eu jeˬ-ahˇ ya daˬ teh ̭-a. ¹³ Haiˬ-eu tsawˇ haˬ deuˬ hawˇ-eu jaˬ myaw ̭ mehˇ shuiˇ deuˬ-aˬ, ngehˬ jawˇ ngehˬ doeˇ dzehˬ laˇ-awˇ, aˬ cawˬ-ahˇ mehˇ shuiˇ shuiˇ-eu lo ̭-ehˇ yawˬ ha-ahˇ mehˇ shuiˇ bi shuiˇ gaˇ ya daˬ teh ̭-a. ¹⁴ Ehˇ k’aw ̭ nawˇ-aˬ, nawˬ-ahˇ mehˬ nehˬ-euˬ lo ̭-ehˇ zi ̭ dah ni jah duˬ taˬ-euˬ yaw tsaˬ yaw dawˇ jeˬ-ahˇ maˬ byehˇ dzeh ni tuˆ tehˬ taˬ-awˬ. Nawˬ-ahˇ mehˬ nehˬ tsoˆ nehˬ-euˬ tsawˇ haˬ deuˬ aˬ suˇ g’aˬ-a lehˇ nawˇ siˬ nya meh. ¹⁵ Nawˇ nyiˇ ngeh neh Muiˬ-eu shawˇ-eu Jaˇli ̭-ahˇ siˬ nya-euˬ gaˇ taˬ ngehˇ. Jaˇli ̭ k’oeˇ-aˬ, Yeˬsuˇ Ka li-ahˇ jah-eu la ̭ k’oeˇ ka k’o ̭-eu jeˬ za ni sheuˬ g’eh-eu zaˬ siˬ tsawˇ gahˇ nawˬ-ahˇ bi ̭ nehˬ la ̭-euˬ meh. ¹⁶ Jaˇli ̭ dawˬ kawˬ dawˬ tawˆ lu ̭ Miˬyehˇ neh bi noeˬ doˆ-eu la ̭ k’oeˇ bo ̭ doˆ taˬ-euˬ jeˬ pyeu ̭-awˇ, yaw tsaˬ yaw dawˇ jeˬ mehˬ-eu tsoˆ-eu g’aˇ duˬ maˬ ehˇ, iˬ baˇ-ahˇ toeˬ mehˬ-eu g’aˇ duˬ maˬ ehˇ, maˬ tsaˬ-eu jeˬ-ahˇ mehˬ paˇ tsoˆ paˇ-eu g’aˇ duˬ maˬ ehˇ, yaw tsaˬ yaw dawˇ dawˇ-ehˇ deh ̭ ni mehˬ-eu tsoˆ-eu g’aˇ duˬ maˬ ehˇ, gaˇ dahˇ tsoeˬ dui dui-eu meh. ¹⁷ K’oeˇ baˬ da neh, Miˬyehˇ gaˇ mˇ-eu tsawˇ haˬ-aˬ, byah dui nya dui dui-eu tsawˇ haˬ pyeu ̭-awˇ, yaw muiˬ jeˬ dawˬ tawˆ lu ̭-ahˇ mˇ nya ni Jaˇli ̭ dawˬ kawˬ-ahˇ g’oe-awˇ dzaw bym taˬ-euˬ tsawˇ haˬ pyeu ̭-eu meh.

¹ Miˬyehˇ-euˬ mehˬ shi hawˇ-eu, deh ̭ lu ̭-eu tsawˇ haˬ hawˇ-eu shiˇ dzeuˇ-euˬ tsawˇ haˬ deuˬ-ahˇ yaˇ k’aˬ daˇ nehˬ-eu Sahˬpaˬ geu ̭-awˇ uˆ lahˇ le-eu lehˇ g’eh-eu Yeˬsuˇ Ka li-euˬ mehˬ shi, ngaˇ nawˬ-ahˇ heu lo ̭-ehˇ dawˬ bi ̭-eu ma. ² Miˬyehˇ dawˬ kawˬ mehˬ-awˬ. Aˇ yamˬ tsaˬ ngeh maˬ ehˇ, maˬ tsaˬ ngeh maˬ ehˇ, leh jeh-awˇ mehˬ-awˬ. Yaw lehˬ-ahˇ toeˬ mehˬ-awˬ. Yaw k’aˆ k’aˆ-ehˇ mehˬ paˇ tsoˆ paˇ-awˬ. G’aˬ bi ̭-awˬ. Nui ma g’awˬ mahˇ ni taˬ-awˇ mehˬ nehˬ tsoˆ nehˬ-awˬ. ³ Tsaˬ-eu muiˬ-eu jah-eu jeˬ-ahˇ tsawˇ haˬ zaˬ maˬ naˇ haˬ geu ̭-ehˇ, yawˬ ha-euˬ nui noeˬ nui loˆ mehˬ nah iˇ-eu la ̭ k’oeˇ, yawˬ ha naˇ haˬ maw ̭-eu jeˬ mehˬ nehˬ la ̭-eu saˬ laˬ g’awˬ mya ni aˬ yaw ̭ ma ̭ poˆ uiˬ teh ̭-a. ⁴ Yaw tsaˬ yaw dawˇ jeˬ-ahˇ aˬ yaw ̭ ma ̭ maˬ naˇ haˬ-ehˇ, aˬ poeˬ dawˬ oeˇ ja gaˇ teh ̭-ehˇ naˇ haˬ teh ̭-a. ⁵ Ehˇ k’aw ̭ nawˇ-aˬ, aˬ jeˬ pyeu ̭ k’aw ̭ yawˬ ha-euˬ nui ma-ahˇ g’aˬ leˇ-awˇ, shaˬ-eu zahˬ-eu jeˬ-ahˇ daˬ-eu la ̭ koeˇ Laˬ k’aˬcehˇ-eu Guiˬ lahˬ dawˬ mehˬ mehˬ-ehˇ, Miˬyehˇ-euˬ zaˬ k’aˆ tiˬ g’aˬ lo ̭-ehˇ nawˬ-euˬ gaˇ-ahˇ yaw muiˬ paˬ-ehˇ mˇ-awˬ. ⁶ Ngaˇ-aˬ, ngaˬ-euˬ g’awˇ mawˇ ya lawˇ nehˬ-eu aˇ yamˬ keuˆ le-euˬ meh. Miˇ tsaˬ k’oeˇ taˆ yaw deh ̭ deh ̭-eu jeˬ-ahˇ byehˇ ya ̭-awˇ ya g’o ̭ leˇ-eu aˇ yamˬ nymˬ-mˇ keuˆ le taˬ-euˬ meh. ⁷ Cehˆ ceh ceh-eu heu la ̭ k’oeˇ, ngaˇ k’aˇ g’eh nya-eu lo ̭-ehˇ cehˆ-euˬ ma. Aˇ saˬ saˬ ngeh keuˆ ni cehˆ-awˇ, jah-eu jeˬ-ahˇ zi ̭ dah ni tuˆ tehˬ lu ̭-eu ma. ⁸ Cehˆ ceh ceh gaˇ g’aˬ leˇ-euˬ deuˬ-ahˇ bi ̭-eu la ̭ sawˬ, ngaˬ-euˬ g’aˇ duˬ lehˬ hmˬ taˬ-euˬ meh. La ̭ sawˬ k’oeˇ-aˬ, Miˬyehˇ-ahˇ tsaˬ leˇ tsahˇ leˇ-euˬ la ̭ sawˬ pyeu ̭-eu meh. Aˇ nah k’oeˇ nah keuˆ le ngeh, tsaˬ-eu dawˇ-eu Yaˇ k’aˬ daˇ-eu g’aˬ pyeu ̭-eu Sahˬpaˬ Yeˬsuˇ ngaˬ-ahˇ la ̭ sawˬ k’oeˇ bi ̭ nehˬ la ̭ teh ̭a. Ngaˬ-ahˇ teh ̭-ehˇ maˬ ngeuˇ ni, aˬ yaw ̭ g’o ̭ doˆ le gaˇ g’oeˇ-eu gaˬ-eu la ̭ k’oeˇ k’aˇ lo ̭ lu ̭-eu tsawˇ haˬ dawˬ tawˆ lu ̭-ahˇ bi ̭ teh ̭-a. ⁹ Ngaˇ jawˇ gaˇ yaw kawˇ-ehˇ laˇ keuˆ nya ni leh jeh-awˬ. ¹⁰ Deˬmaˆ-aˬ, heu ziˇ-ahˇ ta ̭-eu miˇ tsaˬ heu-ahˇ gaˬ-eu miˇ neh, ngaˬ-ahˇ byehˇ dzeh ya ̭-awˇ Teˇsaˬloˇni meuˬ-ahˇ iˇ-euˬ meh. Gaˬleˬgeˬ g’aˬ-aˬ, Gaˬlaˬtiˆ miˇ k’ahˬ-ahˇ iˇ-awˇ, Tiˇtuˆ g’aˬ-aˬ, Daˬlaˬmaˬdiˇ miˇ k’ahˬ-ahˇ iˇ-euˬ meh. ¹¹ Luˇka ̭ tiˬ g’aˬ teh ̭-ehˇ ngaˬ nehˬ-ehˇ jawˇ ya ̭-euˬ meh. Nawˇ laˇ ngeh Maˬkuˆ-ahˇ sheuˬ la ̭-awˬ. Aˬ jeˬ miˇ neh ehˇ naˇ, ngaˇ gaˇ mˇ gaˇ aˬ yaw ̭ caw ba nya-eu meh. ¹² Duˇjiˇ-ahˇ Eˇpeˇsu meuˬ-ahˇ k’ehˇ g’eh-euˬ ma. ¹³ Nawˇ laˇ ngeh, Daˬloˇ meuˬ-ahˇ Gaˬpuˆ jawˇ gaˇ bi jaˆ-euˬ ngaˬ-euˬ pehˇ k’ahˬ k’oeˇ kahˇ tiˬ poˆ yuˇ la ̭-awˬ. Sahˬ bo ̭ paˇ yoˆ k’oeˇ deuˬ k’aw ̭ yuˇ la ̭-awˬ. Shaˬ k’oˆ sahˬ bo ̭ paˇ yoˆ k’oeˇ deuˬ maˬ ngehˇ ni yuˇ la ̭-awˬ. ¹⁴ Ba jiˬ geu ̭-eu Aˬleˬsaˬduˇ k’oeˇ g’aˬ ngaˬ-ahˇ yaw k’aˆ-ehˇ jahˇ doeˇ nehˬ la ̭-euˬ meh. Aˬ yaw ̭ neh k’aˇ jahˇ nehˬ la ̭-euˬ lo ̭-ehˇ, Sahˬpaˬ Yeˬsuˇ aˬ yaw ̭-ahˇ jahˇ k’o ̭ nehˬ teh ̭-a. ¹⁵ Aˬ yaw ̭-ahˇ yaw k’aˆ-ehˇ yahˇ-awˬ. Aˬ jeˬ miˇ neh ehˇ naˇ, aˬ dui Miˬyehˇ dawˬ kawˬ mehˬ gaˇ aˬ yaw ̭ muiˇ-eu meh. ¹⁶ Yaˇ k’aˬ daˇ duˬ-ahˇ ngaˬ-euˬ gaˇ kawˆ yaw beh poˆ ngaˇ ciˬ daˬ leˇ ngeh, yawˬ g’aˬ na lu ̭ ngaˬ-ahˇ byehˇ dzeh nehˬ la ̭-euˬ meh. Aˬ yaw ̭ ma ̭-ahˇ Miˬyehˇ iˬ baˇ pyehˬ lu ̭-uˇ. ¹⁷ Ehˇ k’aw ̭, Sahˬpaˬ Yeˬsuˇ ngaˬ nehˬ-ehˇ jawˇ-awˇ, ngaˬ-ahˇ g’aˬ bi ̭ nehˬ la ̭-euˬ meh. K’oeˇ miˇ neh, Yuˇdaˆ tsawˇ haˬ maˬ ngeuˇ-eu deuˬ-ahˇ Miˬyehˇ dawˬ kawˬ nui k’ahˇ tiˬ shiˇ ya mehˬ ya ̭-euˬ ma. K’oeˇ uˬ ta ̭, ngaˬ-ahˇ seh ̭-eu g’aˇ duˬ yaˇ k’aˬ maˬ daˇ nehˬ la ̭ ni ya dzeuˇ-iˇ-euˬ ma. ¹⁸ Yaw haiˬ jeˬ dawˬ tawˆ lu ̭ la ̭ k’oeˇ Sahˬpaˬ Yeˬsuˇ ngaˬ-ahˇ ka k’o ̭ nehˬ la ̭-awˇ, aˬ yaw ̭-euˬ mˬ taˆ Miˇk’ahˬ-ahˇ sheuˬ k’o ̭ daˆ le ̭ teh ̭-a. Mˬ maˬ maˬ byaˆ zaˇ ziˇ aˬ yaw ̭ yaw sheh ̭ k’ahˬ sehˇ huiˬ lu ̭-uˇ. Aˬ miˬ. ¹⁹ Biˇgiˇla hawˇ-eu Aˬguˇla-ahˇ maˬ ehˇ, Awˬneˬsiˬpawˬ-euˬ nymˇ jiˇ-ahˇ maˬ ehˇ, ngaˇ dawˬ cawˬ puˬ ahˇ le ̭-eu ma. ²⁰ EˇLaˬduˇ-aˬ, Gawˇliˬtu meuˬ-ahˇ jawˇ ya ̭-euˬ meh. Tawˇpiˇmuˆ g’aˬ-aˬ, jawˇ saˇ maˬ doˆ-eu miˇ neh Meˬleˬduˇ meuˬ-ahˇ bi jawˇ ya ̭-euˬ ma. ²¹ Tsahˬ gaˆ maˬ ahˇ le mi naˆ-ehˇ laˇ keuˆ nya ni leh jeh-awˬ. Uˇbuˇluˇ, Puˇbeˬ, Liˇnmˇ, Gaˬlawˇdiˇ aˬ ha ma ̭ nawˬ-ahˇ dawˬ cawˬ puˬ ahˇ le ̭-euˬ meh. Aˬ yui ̭ aˬ nyiˇ Ka li zaˬ dawˬ tawˆ lu ̭ k’aw ̭, dawˬ cawˬ puˬ ahˇ le ̭-euˬ meh. ²² Nawˬ-euˬ nui ma la ̭ k’oeˇ Sahˬpaˬ Yeˬsuˇ jawˇ lu ̭-uˇ. Miˬyehˇ-euˬ guiˬ lahˬ yaw dzahˇ naw ma ̭ dawˬ tawˆ lu ̭ k’oeˇ taˆ jaˆ lu ̭-uˇ.