2 TEˇSAˬLOˇNI

2 TEˇSAˬLOˇNI

¹ Ngaˇ Pawˇluˆ, Siˬlaˆ, Tiˆmoˇseˬ ngaˬ ha smˇ g’aˬ, Aˬda Miˬyehˇ hawˇ-eu Sahˬpaˬ Yeˬsuˇ Ka li-ahˇ ta ̭-eu tsawˇ haˬ deuˬ pyeu ̭-eu, Teˇsaˬloˇni meuˬ la ̭ k’oeˇ jawˇ-eu Ka li zaˬ aˇ muˇ-ahˇ sahˬ bo ̭ heu ta ̭ bo ̭ ahˇ la ̭-eu ma. ² Aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ o ̭-eu jeˬ, naw ma ̭ k’oeˇ taˆ jaˆ lu ̭-uˇ. ³ Aˬ yui ̭ aˬ nyiˇ Ka li zaˬ deuˬ-oˇ, naw ma ̭ g’aˇ duˬ nga ma ̭ Miˬyehˇ guiˬ lahˬ-ahˇ maˬ ja ceuˬ-ehˇ tiˬ k’ehˬ-iˬ maˬ jawˇ coeˇ nya. Naw ma ̭-euˬ jah-eu jeˬ huiˬ laˇ tehˇ tehˬ-awˇ, naw ma ̭ yaw kaˬ tiˬ g’aˬ tiˇ g’aˬ g’oeˇ-eu gaˬ-eu jeˬ myaˬ laˇ lu ̭-eu miˇ neh, nga ma ̭ Miˬyehˇ-euˬ guiˬ lahˬ-ahˇ ja ceuˬ paˬ-ehˇ g’eh-eu meh. ⁴ K’oeˇ miˇ neh, Miˬyehˇ-euˬ Ka li zaˬ aˇ muˇ deuˬ mehˬ shi, naw ma ̭ gaˇ kawˆ nga ma ̭ k’ahˬ sehˇ jehˆ-eu ma. Naw ma ̭ ya daˬ lu ̭-eu k’ehˬ-eu k’aˆ-eu jeˬ hawˇ-eu shaˬ-eu zahˬ-eu jeˬ dawˬ tawˆ lu ̭-ahˇ naw ma ̭ daˬ dzeuˇ oˇ dzeuˇ-eu la ̭ k’oeˇ, naw ma ̭ jah lu ̭-eu gaˇ kawˆ nga ma ̭ k’ahˬ sehˇ jehˆ-eu ma. ⁵ Miˬyehˇ-aˬ, dawˇ coe ni yaˇ k’aˬ daˇ-awˇ, naw ma ̭ k’oeˇ lo ̭-ehˇ ya daˬ-eu ba da neh aˬ yaw ̭-euˬ miˇ k’ahˬ-ahˇ geuˇ-eu tsawˇ haˬ pyeu ̭ laˇ-eu gaˇ kawˆ, naw ma ̭ daˬ lu ̭-eu k’oeˇ saˇ kiˇ pyeu ̭-eu meh. Aˬ jeˬ miˇ neh ehˇ naˇ, Miˬyehˇ Miˇk’ahˬ-ahˇ geuˇ-eu tsawˇ ha pyeu ̭ laˇ ni naw ma ̭ daˬ lu ̭-eu meh. ⁶ Yaw tsaˬ yaw dawˇ jeˬ keuˆ le ni Miˬyehˇ mˇ teh ̭-a. Naw ma ̭-ahˇ k’ehˬ-eu k’aˆ-eu tsawˇ haˬ deuˬ-ahˇ, k’ehˬ-eu k’aˆ-eu jeˬ paˇ bi daˬ poˆ teh ̭-a. ⁷ K’ehˬ-eu k’aˆ-eu jeˬ-ahˇ ya daˬ-eu naw ma ̭-ahˇ-aˬ, maˬ paˇ bi daˬ ni bi naˬ teh ̭-a. Nga ma ̭-ahˇ k’aw ̭ k’oeˇ lo ̭-ehˇ bi naˬ la ̭ teh ̭-a. Sahˬpaˬ Yeˬsuˇ Ka li aˬ yaw ̭-euˬ baoˬ huiˬ-eu mˬ taˆ g’aˬ k’ehˇ deuˬ nehˬ-ehˇ mˬ-ahˇ neh doˆ le ngeh, Miˬyehˇ aˬ dui-ahˇ k’oeˇ lo ̭-ehˇ bi naˬ la ̭ teh ̭-a. ⁸ Miˬyehˇ-ahˇ Miˬyehˇ meh lehˇ maˬ sawˇ-ehˇ, aˬ dui-euˬ Sahˬpaˬ Yeˬsuˇ Ka li-euˬ Laˬ k’aˬ cehˇ-eu Guiˬ lahˬ dawˬ-ahˇ maˬ naˇ haˬ geu ̭-eu tsawˇ haˬ deuˬ-ahˇ k’ehˬ-eu g’aˇ duˬ Sahˬpaˬ Yeˬsuˇ oe ngeh, miˬ dzaˬ miˬ lmˇ hehˇ le ̭ teh ̭-a. ⁹ Aˬ yaw ̭ oe ngeh nah, mˬ maˬ maˬ byaˆ zaˇ ziˇ luˬ-iˇ seˇ-iˇ-eu k’ehˬ-eu k’aˆ-eu jeˬ-ahˇ aˬ yaw ̭ ma ̭ ya daˬ-awˇ, Sahˬpaˬ Yeˬsuˇ hawˇ-eu aˬ yaw ̭-euˬ yaw sheh ̭ k’ahˬ sehˇ huiˬ-eu baoˬ-ahˇ aˬ yaw ̭ ma ̭ g’awˬ tsehˆ ya tsehˆ teh ̭-a. ¹⁰ Aˬ yaw ̭-ahˇ k’aˇ jah-eu aˬ yaw ̭-euˬ tsawˇ haˬ dawˬ tawˆ lu ̭ neh bi ̭-euˬ yaw sheh ̭ k’ahˬ sehˇ hawˇ-eu ciˬ huiˬ ciˬ mahˇ nehˬ-eu jeˬ-ahˇ ha geu ̭-eu lehˇ, Aˇ nah k’oeˇ nah-ahˇ aˬ yaw ̭ oe-eu meh. Sahˬpaˬ Yeˬsuˇ-ahˇ ciˬ huiˬ ciˬ mahˇ-eu tsawˇ haˬ k’oeˇ deuˬ la ̭ k’oeˇ, naw ma ̭ k’aw ̭ ahˇ leˇ teh ̭-a. Aˬ jeˬ miˇ neh ehˇ naˇ, nga ma ̭ neh saˇ kiˇ kamˬ-euˬ guiˬ lahˬ dawˬ-ahˇ naw ma ̭ jah-euˬ meh. ¹¹ K’oeˇ miˇ neh, naw ma ̭ g’aˇ duˬ nga ma ̭ aˬ myah lu ̭ guiˬ lahˬ shaˇ-eu ma. Miˬyehˇ neh naw ma ̭-ahˇ bi deh ̭ bi jawˇ-eu lehˇ kuˇ taˬ-euˬ aˇ tiˆ-ahˇ naw ma ̭ deh ̭ nya jawˇ nya ni, aˬ dui-euˬ Miˬyehˇ-ahˇ shaˇ-eu ma. Yaw muiˬ jeˬ mˇ maw ̭-eu naw ma ̭-euˬ nui k’ahˇ dawˬ tawˆ lu ̭ hawˇ-eu, naw ma ̭ jah-eu miˇ neh mˇ lu ̭-eu gaˇ-ahˇ, aˬ yaw ̭-euˬ baoˬ-ahˇ g’oe-awˇ aˬ yaw ̭ bi byah laˇ lu ̭-uˇ. ¹² K’oeˇ Lo ̭-ehˇ byah laˇ-eu la ̭ k’oeˇ, naw ma ̭ baˬ da neh Sahˬpaˬ Yeˬsuˇ-euˬ tsawˇ myahˇ yaw sheh ̭ k’ahˬ sehˇ za-awˇ, aˬ yaw ̭ baˬ da neh naw ma ̭ yaw sheh ̭ k’ahˬ sehˇ za teh ̭-a. Aˬ dui-euˬ Miˬyehˇ hawˇ-eu Sahˬpaˬ Yeˬsuˇ Ka li-euˬ g’awˬ shaˬ gaˬ-eu guiˬ lahˬ yaw dzahˇ baˬ da neh, k’oeˇ lo ̭-ehˇ pyeu ̭ laˇ teh ̭-a.

¹ Aˬ yui ̭ aˬ nyiˇ Ka li zaˬ deuˬ-oˇ, aˬ dui-euˬ Sahˬpaˬ Yeˬsuˇ Ka li za ̭ le-eu gaˇ kawˆ hawˇ-eu aˬ dui aˬ yaw ̭ jawˇ gaˇ ya uiˬ leˇ-eu gaˇ kawˆ-ahˇ ta ̭ leˇ-awˇ, naw ma ̭-ahˇ ngaˇ heu lo ̭-ehˇ shaˇ-eu ma. ² Sahˬpaˬ Yeˬsuˇ-euˬ Aˇnah keuˆ le g’aˬ-euˬ meh lehˇ aˬ cawˬ ehˇ gaˇ naw ma ̭ yaw awˇ la ̭-ehˇ taˬ noeˬ bahˬ. Nui ma taˬ tehˬ taˬ tsaˇ. Nga ma ̭ dawˬ mehˬ mehˬ ngeh k’oeˇ lo ̭-ehˇ ehˇ-eu meh lehˇ aˬ cawˬ naw ma ̭-ahˇ tsa ̭ nehˬ laˇ-eu baw teh ̭-a. Maˬ ngeuˇ naˇ, nga ma ̭ sahˬ bo ̭ bo ̭-awˇ k’oeˇ lo ̭-ehˇ ehˇ-eu meh lehˇ tsa ̭ laˇ teh ̭-a. ³ Aˬ geu g’aˬ aˬ joˆ-ehˇ mehˇ shuiˇ shuiˇ laˇ-eu maˬ kaˬ, maˬ bi shuiˇ tawˆ ni yahˇ-awˬ. Aˬ jeˬ miˇ neh ehˇ naˇ, tsawˇ haˬ g’awˬ mya ni Miˬyehˇ-ahˇ puiˬ-eu aˇ saˬ saˬ-eu poˆ keuˆ le g’aˬ-awˇ, shiˬ buiˇ lah ma-ahˇ ya iˇ-eu Haiˬ dui dui-eu G’aˬ doˆ le g’aˬ-awˇ miˇ tsa maˬ ngeuˇ naˇ Sahˬpaˬ Yeˬsuˇ-euˬ Aˇ nah maˬ keuˆ le-aˇ. ⁴ Tsawˇ haˬ zaˬ uˬ duˬ k’aˇ tahˬ-eu yaw sahˇ hawˇ-eu miˬ yehˇ deuˬ-ahˇ aˬ yaw ̭ muiˇ-awˇ, k’oeˇ deuˬ dawˬ tawˆ lu ̭ k’oeˇ taˆ aˬ yaw ̭ huiˬ dzehˬ-eu geu ̭ teh ̭-a. Miˬyehˇ-euˬ Uˬ duˬ tahˬ nymˇ nymˇ ma-ahˇ keuˆ ni aˬ yaw ̭ uˇ leˇ-awˇ nuiˇ-eu la ̭ k’oeˇ, yawˬ haˇ yawˬ ha Miˬyehˇ tsaˬ geu ̭ teh ̭-a. ⁵ Ngaˇ naw ma ̭ nehˬ-ehˇ jawˇ ngeh, gaˇ kawˆ heu deuˬ dawˬ tawˆ lu ̭ ehˇ nehˬ g’aˬ-euˬ ngehˇ jiˇ teˬ loˇ. ⁶ Nymˬ-mˇ mi naˆ-ehˇ k’oeˇ lo ̭-ehˇ maˬ pyeu ̭ laˇ-euˬ heu-aˬ, gaˇ kawˆ tiˬ hmˬ jaˆ-eu baˬ da neh meh. Gaˇ kawˆ k’oeˇ hmˬ-ahˇ naw ma ̭ siˬ nya meh. Aˇ yamˬ tsaˬ laˇ ngeh, Haiˬ dui dui-eu G’aˬ doˆ le teh ̭-a. ⁷ Yaw haiˬ jeˬ k’oeˇ-aˬ, nymˬ-mˇ mi naˆ-ehˇ gaˇ mˇ lu ̭-eu meh. Pyeu ̭ laˇ-eu lehˇ bymˬ lu ̭-eu k’oeˇ-ahˇ laˆ tsoeˬ taˬ-euˬ g’aˬ-ahˇ Miˬyehˇ maˬ yuˇ dzeh k’oeˇ keuˆ ni maˬ pyeu ̭ doˆ laˇ nya-aˇ. ⁸ K’oeˇ ngeh jawˇ, Haiˬ dui dui-eu g’aˬ-ahˇ bya cehˆ ni ya mawˇ teh ̭-a. Ehˇ k’aw ̭, Sahˬpaˬ Yeˬsuˇ oe ngeh a yaw ̭-euˬ k’aˬ meh-euˬ sa ̭ neh Haiˬ dui dui-eu G’aˬ-ahˇ baw seh ̭-awˇ, aˬ yaw ̭-euˬ yaw seh ̭ k’ahˬ sehˇ naˇ guiˇ guiˇ-eu k’oeˇ neh laˆ piˬ laˆ byoˆ nehˬ teh ̭-a. ⁹ Haiˬ dui dui-eu k’oeˇ G’aˬ neh ̭ Sahˬdaˬ-euˬ baoˬ pi le ̭-awˇ, maˬ ngeuˇ-eu zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu jeˬ dawˬ tawˆ lu ̭ jahˇ mehˬ teh ̭-a. ¹⁰ Maˬ tsaˬ maˬ dawˇ-eu jaˬ myaw ̭ mehˇ shuiˇ yawˬ jeˬ na lu ̭ aˬ yaw ̭ zmˬ-awˇ, ya luˬ ya seˇ-iˇ-eu yaw duˬ baw-eu tsawˇ haˬ deuˬ-ahˇ myaw ̭ za shuiˇ za teh ̭-a. Tsawˇ haˬ k’oeˇ deuˬ ya luˬ ya seˇ-iˇ teh ̭-a. Aˬ jeˬ miˇ neh ehˇ naˇ, ka k’o ̭-eu jeˬ bi ̭-eu yaw tsaˬ yaw dawˇ dawˬ-ahˇ aˬ yaw ̭ ma ̭ maˬ g’oeˇ-a. Maˬ ha geu ̭-a. ¹¹ K’oeˇ miˇ neh, Miˬ yehˇ neh maˬ ngeuˇ-eu baoˬ-ahˇ k’ehˇ g’eh-awˇ, maˬ ngeuˇ-eu jeˬ-ahˇ jah leˇ ni aˬ yaw ̭ ma ̭ la ̭ k’oeˇ gaˇ bi mˇ-euˬ meh. ¹² K’oeˇ ngeh jawˇ, yaw tsaˬ yaw dawˇ dawˬ-ahˇ maˬ jah ni iˬ baˇ mˇ gaˇ k’aˇ cehˇ g’a-euˬ tsawˇ haˬ deuˬ-aˬ, Miˬyehˇ yaˇ k’aˬ daˇ nehˬ gaˇ ya daˬ teh ̭-a. ¹³ Aˬ yui ̭ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ gaˬ-eu tsawˇ haˬ deuˬ pyeu ̭-eu naw ma ̭ g’aˇ duˬ Miˬyehˇ-euˬ guiˬ lahˬ-ahˇ nga ma ̭ maˬ ja ceuˬ-ehˇ tiˬ k’ehˬ-iˬ maˬ jawˇ coeˇ nya. Aˬ jeˬ miˇ neh ehˇ naˇ, Yaw sahˇ Miˬyehˇ-euˬ baoˬ baˬ da neh naw ma ̭-ahˇ bi muiˬ bi shawˇ laˇ-awˇ, yaw tsaˬ yaw dawˇ jeˬ-ahˇ naw ma ̭ jah-eu baˬ da neh ka k’o ̭-eu jeˬ bi za-eu g’aˇ duˬ, mˬ hawˇ-eu miˇ maˬ beh mi naˆ-ehˇ naw ma ̭-ahˇ Miˬyehˇ tseˇ doˆ taˬ-euˬ meh. ¹⁴ Naw ma ̭ k’oeˇ lo ̭-ehˇ bi pyeu ̭ laˇ-eu g’aˇ duˬ, nga ma ̭ neh naw ma ̭-ahˇ mehˬ-euˬ Laˬ k’aˬ cehˇ-eu Guiˬ lah dawˬ-ahˇ g’oe-awˇ naw ma ̭-ahˇ Miˬyehˇ kuˇ-euˬ meh. Aˬ dui-euˬ Sahˬpaˬ Yeˬsuˇ Ka li-euˬ yaw sheh ̭ k’ahˬ sehˇ-ahˇ naw ma ̭ za nya ni, Miˬyehˇ neh naw ma ̭-ahˇ kuˇ-euˬ jeˬ pyeu ̭-eu meh. ¹⁵ K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, jah-eu la ̭ k’oeˇ zi ̭ dah ni deh ̭-awˇ, nga ma ̭ dawˬ mehˬ mehˬ-awˇ maˬ ehˇ, sahˬ bo ̭ bo ̭-awˇ maˬ ehˇ, naw ma ̭-ahˇ mehˬ nehˬ tsoˆ nehˬ-euˬ yaw tsaˬ yaw dawˇ dawˬ-ahˇ zi ̭ dah ni tuˆ tehˬ taˬ-awˬ. ¹⁶ Aˬ dui-euˬ Sahˬpaˬ Yeˬsuˇ Ka li hawˇ-eu, aˬ myah lu ̭ nui ma k’aˬ duˬ ni g’eh-awˇ noeˬ tmˬ-eu jeˬ la ̭ k’oeˇ zi ̭ nya-eu guiˬ lahˬ yaw dzahˇ bi ̭ la ̭-eu g’aˬ pyeu ̭-eu aˬ dui-ahˇ gaˬ-eu Aˬda Miˬyehˇ, ¹⁷ naw ma ̭ yaw muiˬ jeˬ mˇ nya shaˇ nya ngehˬ nya tmˇ nya ni g’aˬ bi ̭-awˇ, naw ma ̭-euˬ nui ma zi ̭ dah ni jaˆ nya ni ngehˬ g’eh lu ̭-uˇ.

¹ Aˬ yui ̭ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ-aˬ, heu lo ̭-ehˇ ma. Sahˬpaˬ Yeˬsuˇ-euˬ guiˬ lahˬ dawˬ naw ma ̭ jawˇ gaˇ yaw kawˇ-ehˇ gaˬ doe-iˇ-awˇ taˬ huiˬ taˬ mahˇ-eu la ̭ k’oeˇ ha geu ̭-eu lo ̭-ehˇ, nui gaˇ k’aw ̭ k’oeˇ lo ̭-ehˇ gaˬ doe-iˇ-awˇ ha geu ̭ ni guiˬ lahˬ shaˇ nehˬ la ̭-awˬ. ² Maˬ muiˬ maˬ jaˬ-eu tsawˇ haˬ deuˬ hawˇ-eu haiˬ-eu tsawˇ haˬ deuˬ-euˬ la ̭-ahˇ, Miˬyehˇ nga ma ̭-ahˇ haw piˇ nehˬ la ̭ ni guiˬ lahˬ shaˇ nehˬ la ̭-awˬ. Aˬ jeˬ miˇ neh ehˇ naˇ, tsawˇ haˬ yawˬ g’aˬ na lu ̭ guiˬ lah dawˬ-ahˇ ha geu ̭-eu maˬ ngeuˇ-a. ³ Ehˇ k’aw ̭, Sahˬpaˬ Yeˬsuˇ saˇ jaˇ zi ̭-eu meh. Aˬ yaw ̭ naw ma ̭-ahˇ g’aˬ bi ̭ nehˬ la ̭-awˇ, Haiˬ dui dui-eu G’aˬ-euˬ aˬ la ̭ la ̭ k’oeˇ haw piˇ nehˬ la ̭ teh ̭-a. ⁴ Nga ma ̭ naw ma ̭-ahˇ nui ma taˬ coeˇ ni Sahˬpaˬ Yeˬsuˇ caw ba nehˬ la ̭-awˇ, nga ma ̭ neh k’aˇ ehˇ nehˬ-euˬ lo ̭-ehˇ naw ma ̭ mˇ daˆ shaˇ daˆ le ̭ teh ̭-a lehˇ jah-eu ma. ⁵ Miˬyehˇ-euˬ g’oeˇ-eu gaˬ-eu jeˬ-ahˇ naw ma ̭ siˬ duˬ mawˇ duˬ dzehˬ laˇ gaˇ maˬ ehˇ, Ka li neh bi ̭-euˬ daˬ coeˇ oˇ coeˇ-eu jeˬ la ̭ k’oeˇ maˬ ehˇ, Sahˬpaˬ Yeˬsuˇ naw ma ̭-ahˇ sheuˬ uˇ nehˬ la ̭ lu ̭-uˇ. ⁶ Aˬ yui ̭ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ Ka li-euˬ tsawˇ myahˇ uˬ moˆ, nga ma ̭ naw ma ̭-ahˇ heu lo ̭-ehˇ dawˬ bi ̭-eu ma. Aˬ yui ̭ aˬ nyiˇ Ka li zaˬ deuˬ la ̭ k’oeˇ, maˬ mˇ maˬ shaˇ nahˇ-eu deuˬ hawˇ-eu nga ma ̭ neh mehˬ-euˬ tsoˆ-euˬ dawˬ-ahˇ maˬ caw teh-eu deuˬ nehˬ-ehˇ cawˬ taˬ cawˬ. ⁷ Nga ma ̭ k’aˇ mˇ-euˬ lo ̭-ehˇ naw ma ̭ k’aw ̭ ya mˇ meh lehˇ naw ma ̭ siˬ duˬ lu ̭ meh. Nga ma ̭ naw ma ̭ nehˬ-ehˇ jawˇ ngeh yaw doeˇ maˬ doeˇ-aˬ. ⁸ Nga ma ̭-ahˇ k’aˇ caw ba nehˬ la ̭-euˬ jeˬ, aˇ poeˬ maˬ bi ̭ ni nga ma ̭ maˬ ha geu ̭-aˬ. Nga ma ̭ leh jeh dui dui-eu la ̭ k’oeˇ gaˇ mˇ-euˬ ma. Nga ma ̭ g’aˇ duˬ naw ma ̭ pyuˇ maˬ bi jiˇ maw ̭-eu miˇneh, uˬ ci ̭ nah g’ahˇ maˬ ehˇ nga ma ̭ gaˇ mˇ-euˬ ma. ⁹ Naw ma ̭ neh caw ba nehˬ la ̭-euˬ jeˬ-ahˇ nga ma ̭ maˬ ha geu ̭ k’mˬ-eu miˇ neh k’oeˇ lo ̭-ehˇ mˇ-euˬ maˬ ngeuˇ. Naw ma ̭ dzaw geu ̭ k’aˇ za ni mˇ-euˬ jeˬ pyeu ̭-eu ma. ¹⁰ Nga ma ̭ naw ma ̭ nehˬ-ehˇ jawˇ ngeh, "Maˬ mˇ nahˇ-eu tsawˇ haˬ-ahˇ hawˬ taˬ bi dzaˬ" lehˇ ehˇ-euˬ ma. ¹¹ Naw ma ̭ la ̭ k’oeˇ tsawˇ haˬ tiˬ paˆ na deuˬ yaw doeˇ doeˇ-awˇ, yawˬ ha ya dzaˬ ya dawˇ ni maˬ mˇ-eu uˬ ta ̭, aˬ cawˬ mˇ dzaˬ k’aw ̭ dawˇ gaˇ teh kawˆ lu ̭-eu meh lehˇ nga ma ̭ ya gaˬ taˬ-euˬ miˇ neh heu lo ̭-ehˇ ehˇ-eu ma. ¹² Tsawˇ haˬ k’oeˇ deuˬ yaw muiˬ muiˬ-ehˇ deh ̭-awˇ yawˬ ha ya dzaˬ ya dawˇ laˇ ni mˇ-eu shaˇ-eu g’aˇ duˬ, Sahˬpaˬ Yeˬsuˇ Ka li-euˬ tsawˇ myahˇ uˬ moˆ nga ma ̭ dawˬ bi ̭-eu ma. ¹³ Ehˇ k’aw ̭ aˬ yui ̭ aˬ nyiˇ Ka li zaˬ deuˬ-oˇ, naw ma ̭-aˬ, yaw muiˬ jeˬ mˇ-eu g’aˬ byehˆ maˬ ya byehˆ-a. ¹⁴ Naw ma ̭ jawˇ gaˇ bo ̭ ahˇ la ̭-euˬ sahˬ bo ̭ heu ta ̭ la ̭ k’oeˇ, nga ma ̭ neh mehˬ-euˬ dawˬ heu deuˬ-ahˇ maˬ naˇ haˬ geu ̭-eu tsawˇ haˬ k’aw ̭ jawˇ-eu baw teh ̭-a. K’oeˇ lo ̭-ehˇ g’eh-eu tsawˇ haˬ-ahˇ noeˬ taˬ-awˇ, cawˬ maˬ cawˬ nehˬ ni bi sha ̭ dawˇ-awˬ. ¹⁵ Ehˇ k’aw ̭, naw ma ̭-ahˇ muiˇ-eu tsawˇ haˬ lo ̭-ehˇ maˇ diˇ-aˬ maˬ sawˇ dzeh nehˬ ni, mehˇ nmˇ tiˬ g’aˬ lo ̭-ehˇ sawˇ-awˇ yaw k’aˆ k’aˆ-ehˇ mehˬ nehˬ-awˬ. ¹⁶ Aˬ dui-ahˇ nui saˇ o ̭-eu jeˬ bi ̭ nehˬ la ̭-eu g’aˬ pyeu ̭-eu Sahˬpaˬ Yeˬsuˇ-aˬ, naw ma ̭ k’oeˇ taˆ aˬ geu ngeh yamˬ-ahˇ maˬ kaˬ, aˬ geu jeˬ keuˆ le-eu maˬ kaˬ, nui saˇ o ̭-eu jeˬ bi ̭ lu ̭-uˇ. Naw ma ̭ dawˬ tawˆ lu ̭ nehˬ-ehˇ Sahˬpaˬ Yeˬsuˇ jawˇ lu ̭-uˇ. ¹⁷ Ngaˬ-euˬ aˬ la ̭ neh heu lo ̭-ehˇ bo ̭-eu ma. Ngaˇ Pawˇluˆ naw ma ̭-ahˇ dawˬ cawˬ puˬ ahˇ la ̭-eu ma. Ngaˬ neh k’aˇ bo ̭-euˬ sahˬ bo ̭ aˬ yaw ̭ ta ̭ yaw ̭ la ̭ k’oeˇ, ngaˬ-euˬ tsawˇ myahˇ heu lo ̭-ehˇ bo ̭-eu ma. ¹⁸ Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw ma ̭ dawˬ tawˆ lu ̭ k’oeˇ taˆ jaˆ lu ̭-uˇ.