2 BEˬTUˆLUˆ

2 BEˬTUˆLUˆ

¹ Yeˬsuˇ Ka li-euˬ zaˬ k’aˆ hawˇ-eu g’aˬ k’ehˇ pyeu ̭-eu ngaˇ Siˇmoˬ Beˬtuˆluˆ, Miˬyehˇ hawˇ-eu Ka k’o ̭-eu g’aˬ pyeu ̭-eu Yeˬsuˇ Ka li-euˬ yaw tsaˬ yaw dawˇ jeˬ baˬ da neh nga ma ̭-euˬ jah-eu jeˬ-ahˇ duˇ-eu aˇ poeˬ k’aˆ dui dui-eu jah-eu jeˬ za taˬ-euˬ deuˬ jawˇ gaˇ sahˬ bo ̭ bo ̭ ahˇ la ̭-eu ma. ² Miˬyehˇ hawˇ-eu aˬ dui-euˬ Sahˬpaˬ Yeˬsuˇ-ahˇ naw ma ̭ siˬ nya-eu jeˬ baˬ da neh, guiˬ lahˬ yaw dzahˇ hawˇ-eu nui saˇ o ̭-eu jeˬ-ahˇ tiˬ byah tiˬ lo ̭ za lu ̭-uˇ. ³ Aˬ yaw ̭-euˬ yaw sheh ̭ k’ahˬ sehˇ hawˇ-eu muiˬ dui byah dui dui-eu jeˬ-ahˇ aˬ dui za nya ni, aˬ dui-ahˇ kuˇ-euˬ g’aˬ-ahˇ aˬ dui siˬ nya-eu la ̭ k’oeˇ, Miˬyehˇ-ahˇ yaw zeu baw-awˇ deh ̭ nya-eu g’aˇ duˬ, aˬ dui k’aˇ loˬ-eu jeˬ dawˬ tawˆ lu ̭ Miˬyehˇ-euˬ muiˬ-eu shawˇ-eu baoˬ aˬ dui-ahˇ bi ̭ la ̭-euˬ meh. ⁴ K’oeˇ lo ̭-ehˇ mˇ nehˬ la ̭-eu la ̭ k’oeˇ, aˬ yaw ̭ neh aˬ dui-ahˇ bi ̭ ma lehˇ saˇ jaˇ dzaˬ taˬ-euˬ huiˬ dui poeˬ dui dui-eu la ̭ sawˬ aˬ dui-ahˇ bi ̭ la ̭-euˬ meh. La ̭ sawˬ k’oeˇ deuˬ-aˬ, miˇ tsaˬ heu k’oeˇ taˆ jaˆ-eu shiˬ shaˬ jiˇ nui k’ahˇ baˬ da neh luˬ-iˇ seˇ-iˇ-eu jeˬ-ahˇ naw ma ̭ buˬ-iˇ law-iˇ-awˇ, Miˬyehˇ-euˬ yaw deh ̭ deh ̭-eu jeˬ-ahˇ naw ma ̭ bi za-eu g’aˇ duˬ bi ̭ laˬ-euˬ la ̭ sawˬ pyeu ̭-eu meh. ⁵ K’oeˇ miˇ neh, naw ma ̭ leh jeh dui dui-eu la ̭ k’oeˇ, jah-eu jeˬ k’oeˇ taˆ muiˬ-eu jaˬ-euˬ jeˬ bi lahˬ laˇ-awˬ. Muiˬ-eu jaˬ-eu jeˬ k’oeˇ taˆ zaˬ siˬ tsawˇ gahˇ bi lahˬ laˇ-awˬ. ⁶ Zaˬ siˬ tsawˇ gahˇ k’oeˇ taˆ yawˬ ha-euˬ nui ma-ahˇ g’aˬ leˇ-eu jeˬ bi lahˬ laˇ-awˬ. Yawˬ ha-euˬ nui ma-ahˇ g’aˬ leˇ-eu jeˬ k’oeˇ taˆ daˬ coeˇ oˇ coeˇ-eu jeˬ bi lahˬ laˇ-awˬ. Daˬ coeˇ oˇ coeˇ-eu jeˬ k’oeˇ taˆ Miˬyehˇ-ahˇ yaw zeu baw-eu jeˬ bi lahˬ laˇ-awˬ. ⁷ Miˬyehˇ-ahˇ yaw zeu baw-eu jeˬ k’oe taˆ Ka li zaˬ cawˬ cawˬ gaˬ-eu jeˬ bi lahˬ laˇ-awˬ. Ka li za cawˬ cawˬ gaˬ-euˬ jeˬ k’oeˇ taˆ g’oeˇ-eu gaˬ-eu jeˬ bi lahˬ laˇ-awˬ. ⁸ Heu deuˬ-aˬ, naw ma ̭ loˬ dui dui-eu jeˬ pyeu ̭-eu meh. Naw ma ̭ heu deuˬ tiˬ byah tiˬ lo ̭ ahˇ naˇ, gaˇ dahˇ tsoeˬ-eu tsawˇ haˬ pyeu ̭ laˇ-awˇ, aˬ dui-euˬ Sahˬpaˬ Yeˬsuˇ Ka li-ahˇ naw ma ̭ siˬ nya-eu jeˬ byah dzehˬ laˇ teh ̭-a. ⁹ Ehˇ k’aw ̭, heu deuˬ maˬ ahˇ-eu tsawˇ haˬ-aˬ, myaˆ nuiˆ maˬ haw mawˇ nya-ehˇ, dzeuˇ laˇ ngeh aˬ yaw ̭ neh mˇ ya ̭-euˬ iˬ baˇ deuˬ-ahˇ tsiˬ shawˇ nehˬ g’aˬ-euˬ gaˇ kawˆ ngehˇ jiˇ teh ̭-a. ¹⁰ K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, Miˬyehˇ neh naw ma ̭-ahˇ kuˇ-awˇ tseˇ doˆ nehˬ la ̭-euˬ jeˬ-ahˇ aˬ myah lu ̭ zi ̭ dah ni tuˆ tehˬ taˬ nya ni, yaw k’aˆ k’aˆ-ehˇ leh jeh-awˬ. K’oeˇ lo ̭-ehˇ mˇ naˇ, jah-eu jeˬ-ahˇ naw ma ̭ tiˬ jawˇ-iˬ maˬ byehˇ dzeh-aˇ. ¹¹ K’oeˇ lo ̭-ehˇ mˇ-eu la ̭ k’oeˇ, aˬ dui-ahˇ ka k’o ̭-eu g’aˬ pyeu ̭-eu Sahˬpaˬ Yeˬsuˇ Ka li-euˬ mˬ maˬ maˬ byaˆ zaˇ ziˇ Miˇk’ahˬ la ̭ k’oeˇ uˇ leˇ-eu aˬ kawˬ-aˬ naw ma ̭ tiˬ byah tiˬ lo ̭ za teh ̭-a. ¹² K’oeˇ miˇ neh, gaˇ kawˆ heu deuˬ-ahˇ naw ma ̭ siˬ nya jiˇ-awˇ, yawˬ ha za taˬ-euˬ yaw tsaˬ yaw dawˇ jeˬ la ̭ k’oeˇ naw ma ̭ zi ̭ dah ni jawˇ lu ̭-eu k’aw ̭, gaˇ kawˆ heu deuˬ ngaˇ naw ma ̭-ahˇ tiˬ k’ehˬ maˬ taˬ ni ja noeˬ nehˬ ma. ¹³ Gaˇ kawˆ heu deuˬ naw ma ̭ maˬ bi ngehˇ-eu g’aˇ duˬ, ngaˇ k’aˇ deh ̭ k’oeˇ keuˆ ni naw ma ̭-ahˇ laˆ noeˬ-eu tsaˬ meh lehˇ ngaˇ noeˬ-eu ma. ¹⁴ Aˬ dui-euˬ Sahˬpaˬ Yeˬsuˇ Ka li neh ngaˬ-ahˇ bya cehˆ ni ehˇ nehˬ la ̭-euˬ lo ̭-ehˇ, bu ̭-iˇ cehˇ-iˇ nya-eu ngaˬ-euˬ shiˬ shaˬ jiˇ g’awˇ mawˇ heu-ahˇ g’awˬ myahˇ maˬ g’eh-ehˇ ya lehˆ dzeh ya ̭ meh lehˇ ngaˇ siˬ nya ma. ¹⁵ Ngaˇ shiˇ dzeuˇ ngeh jawˇ, gaˇ kawˆ heu deuˬ-ahˇ naw ma ̭ maˬ bi ngehˇ ni aˬ myah lu ̭ bi noeˬ keuˆ-eu g’aˇ duˬ, ngaˇ k’aˇ g’eh nya-eu lo ̭-ehˇ leh jeh-awˇ ngehˬ g’eh nehˬ ya ̭ ma. ¹⁶ Aˬ dui-euˬ Sahˬpaˬ Yeˬsuˇ Ka li baoˬ tiˬ byah ni za ̭ le teh ̭-a lehˇ naw ma ̭-ahˇ nga ma ̭ bi siˬ-eu heu-aˬ, aˬ cawˬ neh noeˬ doˆ-awˇ ja-euˬ gaˇ kawˆ yuˇ-awˇ bi siˬ-eu maˬ ngeuˇ. Aˬ yaw ̭-euˬ huiˬ dui mahˇ dui dui-eu baoˬ-ahˇ nga ma ̭ myaˆ ya mawˇ duˬ-euˬ ma. ¹⁷ Dawˬ tawˆ k’oeˇ taˆ yaw sheh ̭ k’ahˬ sehˇ huiˬ-eu g’aˬ jawˇ gaˇ neh, "Heu-aˬ, ngaˇ nui k’ahˇ shiˇ-eu, ngaˇ gaˬ dui dui-eu ngaˬ Li ma" lehˇ ehˇ doˆ le ̭-awˇ, Aˬda Miˬyehˇ neh aˬ yaw ̭-ahˇ taˬ huiˬ taˬ mahˇ-eu jeˬ hawˇ-eu yaw sheh ̭ k’ahˬ sehˇ bi ̭ nehˬ ngeh, nga ma ̭ k’oeˇ gaˇ jawˇ lu ̭-eu ma. ¹⁸ Muiˬ-eu shawˇ-eu gawˬ jawˬ k’oeˇ taˆ aˬ yaw ̭ nehˬ-ehˇ nga ma ̭ ya jawˇ lu ̭ ngeh, teˇ saˇ k’oeˇ saˇ mˬ-ahˇ neh mahˇ doˆ le gaˇ nga ma ̭-euˬ naˬ bawˇ neh ya gaˬ-euˬ ma. ¹⁹ K’oeˇ miˇ neh, Miˬyehˇ g’aˇ duˬ ngeh dah-eu deuˬ neh ngehˬ ya ̭ tmˇ ya ̭-euˬ dawˬ deuˬ-ahˇ nga ma ̭ jah dzehˬ laˇ-euˬ ma. Dawˬ k’oeˇ deuˬ-ahˇ naw ma ̭ yaw muiˬ paˬ-ehˇ naˇ haˬ geu ̭-awˬ. Aˬ jeˬ miˇ neh ehˇ naˇ, k’oeˇ-aˬ, Aˇ nah k’oeˇ nah uˬ bya bya taw taw laˇ-awˇ naw ma ̭-euˬ nui ma la ̭ k’oeˇ shawˬ ga shawˬ muiˇ tsehˬ laˇ ngeh keuˆ ni, yaw zahˇ la ̭ k’oeˇ yaw sheh ̭ bya nehˬ la ̭-eu tsiˇ k’mˬ-ahˇ duˇ-eu meh. ²⁰ Ehˇ k’aw ̭, dawˬ tawˆ lu ̭ k’oeˇ taˆ heu lo ̭-ehˇ jeˬ hu siˬ nya taˬ-awˬ. Jaˇli ̭ la ̭ k’oeˇ Miˬyehˇ g’aˇ duˬ ngehˬ dah taˬ-euˬ dawˬ-ahˇ, tsawˇ haˬ tiˬ g’aˬ-iˬ yawˬ haˇ yawˬ ha dawˬ tsui ̭ maˬ yuˇ doˆ mehˬ nya-aˇ lehˇ siˬ nya taˬ-awˬ. ²¹ Aˬ jeˬ miˇ neh ehˇ naˇ, Miˬyehˇ g’aˇ duˬ ngehˬ dah-euˬ dawˬ aˬ geu dawˬ maˬ kaˬ, tsawˇ haˬ zaˬ-euˬ nui ma la ̭ k’oeˇ neh doˆ laˇ-euˬ jeˬ maˬ ngeuˇ-a. Ehˇ k’aw ̭, Miˬyehˇ jawˇ gaˇ neh doˆ le-euˬ dawˬ deuˬ-ahˇ tsawˇ haˬ zaˬ ngehˬ dah ngeh, aˬ yaw ̭ ma ̭-ahˇ Muiˬ-eu shawˇ-eu Yaw sahˇ Miˬyehˇ uˆ lahˇ-awˇ bi ngehˬ-eu meh.

¹ Aˇ hu ba-euˬ tsawˇ haˬ deuˬ jawˇ gaˇ maˬ ngeuˇ-eu Miˬyehˇ g’aˇ duˬ ngehˬ dah-eu deuˬ doˆ le haw-euˬ lo ̭-ehˇ, naw ma ̭ jawˇ gaˇ maˬ ngeuˇ-eu mehˬ-eu tsoˆ-eu saˬ laˬ deuˬ doˆ le teh ̭-a. Yaw cawˆ jeˬ hawˇ-eu maˬ tsaˬ-eu jah-eu jeˬ aˬ yaw ̭ ma ̭ hehˇ ahˇ la ̭-awˇ, aˬ yaw ̭ ma ̭-ahˇ ka k’o ̭ nehˬ-euˬ Sahˬpaˬ-ahˇ maˬ siˬ lehˇ ehˇ teh ̭-a. K’oeˇ miˇ neh, aˬ yaw ̭ ma ̭ k’oeˇ taˆ luˬ-iˇ seˇ-iˇ-eu jeˬ yaw kawˇ-ehˇ keuˆ le ni yawˬ haˇ yawˬ ha mˇ gaˇ duˇ-eu meh. ² Ehˇ k’aw ̭, aˬ yaw ̭ ma ̭ maˬ muiˬ maˬ jaˬ-eu jeˬ mˇ-eu mehˬ nah tsawˇ haˬ g’awˬ mya ni caw teh g’eh teh ̭-a. Aˬ yaw ̭ ma ̭ k’oeˇ lo ̭-ehˇ mˇ-eu baˬ da neh, yaw tsaˬ yaw dawˇ Gaˇma-ahˇ aˬ cawˬ ja doeˇ teh ̭-a. ³ Maˬ ngeuˇ-eu mehˬ-eu tsoˆ-eu saˬ laˬ k’oeˇ deuˬ pyuˇ shuiˇ myawˬ gahˬ-ahˇ nui k’ahˇ jaˆ-eu miˇ neh, naw ma ̭-ahˇ maˬ ngeuˇ gaˇ keuˆ ni ja mehˬ-awˇ aˬ yaw ̭ ma ̭ g’aˇ duˬ jiˇ jeuˬ ahˇ ni mˇ teh ̭-a. Aˬ yaw ̭ ma ̭-ahˇ Yaˇ k’aˬ daˇ nehˬ-eu g’aˬ aˇ hu ba neh lehˬ hmˬ dah taˬ-awˇ, aˬ yaw ̭ ma ̭-ahˇ laˆ cawˆ-eu g’aˬ maˬ yu ̭ k’aˆ ni yaw noeˬ-ehˇ jawˇ lu ̭ meh. ⁴ Aˬ jeˬ miˇ neh ehˇ naˇ, iˬ baˇ mˇ-eu mˬ taˆ g’aˬ k’ehˇ deuˬ-ahˇ keuˆ ni Miˬyehˇ maˬ taˬ nehˬ-ehˇ shiˬ buiˇ lah ma-ahˇ biˬ ahˇ-awˇ, Yaˇ k’aˬ daˇ-eu Aˇ nah-ahˇ dawˬ lu ̭-eu meh. ⁵ Aˇ hu ba miˇ tsaˬ k’oeˇ taˆ deh ̭-eu deuˬ-ahˇ k’aw ̭, Miˬyehˇ maˬ taˬ nehˬ-ehˇ, Miˬyehˇ-ahˇ yaw zeu maˬ baw-eu tsawˇ haˬ deuˬ-ahˇ iˇ cu ̭ bi dahˬ pymˬ-euˬ meh. Yaw tsaˬ yaw dawˇ jeˬ mehˬ-eu g’aˬ pyeu ̭-eu Noˇaˬ hawˇ-eu tsawˇ haˬ shi ̭ g’aˬ-ahˇ teh ̭-ehˇ aˬ yaw ̭ ka k’o ̭-euˬ meh. ⁶ Sawˇdoˬ meuˬ hawˇ-eu Gawˇmawˇlaˆ meuˬ-ahˇ k’aw ̭, miˬ dzaˬ bi puiˆ byoˆ-euˬ meh. K’oeˇ-aˬ, Miˬyehˇ-ahˇ yaw zeu maˬ baw-eu tsawˇ haˬ deuˬ k’oeˇ taˆ aˬ joˆ-ehˇ keuˆ le-eu gaˇ k’awˆ, aˬ yaw ̭ ma ̭ bi dzaw geu ̭-eu g’aˇ duˬ mˇ mehˬ-euˬ jeˬ pyeu ̭-eu meh. ⁷ Haiˬ-eu tsawˇ haˬ k’oeˇ deuˬ jaw ̭ dui dui-eu jeˬ mˇ gaˇ noeˬ shaˬ dui dui-euˬ tsawˇ muiˬ tiˬ g’aˬ pyeu ̭-eu Lawˇtaˬ-ahˇ teh ̭-ehˇ, aˬ yaw ̭ ka k’o ̭-euˬ meh. ⁸ Tsawˇ muiˬ k’oeˇ g’aˬ aˬ yaw ̭ ma ̭ nehˬ-ehˇ jawˇ-awˇ, aˬ yaw ̭ ma ̭ yaw haiˬ jeˬ mˇ gaˇ ya gaˬ yaw mawˇ-euˬ miˇ neh tiˬ nah saˇ-iˬ tiˬ nah nui ma shaˬ zahˬ mˇ dui dui-euˬ meh. ⁹ K’oeˇ miˇ neh, Yaˇ k’aˬ daˇ-eu Aˇ nah g’aˇ duˬ, Miˬyehˇ-ahˇ yaw zeu baw-eu tsawˇ haˬ deuˬ-ahˇ aˬ joˆ-ehˇ bi buˬ-iˇ-eu gaˇ kawˆ hawˇ-eu, haiˬ-eu tsawˇ haˬ deuˬ-ahˇ aˬ joˆ-ehˇ ya k’ehˬ ya k’aˆ nehˬ-eu gaˇ kawˆ, Miˬyehˇ siˬ nya meh. ¹⁰ Jaw ̭ dui dui-eu shiˬ shaˬ jiˇ-euˬ nui k’ahˇ mehˬ nah caw teh-awˇ Miˬyehˇ uˆ lahˇ-eu jeˬ-ahˇ yehˬ bawˬ sehˇ lu-ehˇ ehˇ-eu deuˬ-ahˇ-aˬ, aˬ cawˬ-ahˇ naˆ maˬ tseˇ aˬ joˆ-ehˇ ya k’ehˬ ya k’aˆ nehˬ-eu gaˇ kawˆ Miˬyehˇ siˬ nya meh. Maˬ ngeuˇ-eu mehˬ-eu tsoˆ-eu saˬ laˬ k’oeˇ deuˬ-aˬ, guˆ-eu nui ma maˬ ahˇ ni, k’aˬ duˬ ni mehˬ-eu tsoˆ-eu meh. Mˬ k’oeˇ taˆ yaw sheh ̭ k’ahˬ sehˇ huiˬ-eu deuˬ-ahˇ k’aw ̭ yaw zeu maˬ baw-eu uˬ ta ̭, yehˬ bawˬ sehˇ lu-ehˇ ehˇ-eu meh. ¹¹ A yaw ̭ ma ̭ naˆ maˬ tseˇ g’aˬ byah dzehˬ-awˇ baoˬ huiˬ dzehˬ-eu deuˬ pyeu ̭-eu mˬ taˆ g’aˬ k’ehˇ deuˬ k’aw ̭, Miˬyehˇ mehˬ shi mˬ k’oeˇ taˆ yaw sheh ̭ k’ahˬ sehˇ huiˬ-eu k’oeˇ deuˬ-ahˇ yaw lehˬ maˬ poˆ-a. ¹² Ehˇ k’aw ̭, maˬ ngeuˇ-eu mehˬ-eu tsoˆ-eu saˬ laˬ heu deuˬ-aˬ, nyeh ̭-awˇ bi seh ̭ dzaˬ-eu g’aˇ duˬ deh ̭ le-euˬ jeˬ zaˬ lo ̭-ehˇ, shaˇ noeˬ shaˇ sawˇ-eu jeˬ maˬ baw ni mˇ-eu shaˇ-eu meh. Yawˬ ha maˬ siˬ nya-eu jeˬ-ahˇ dawˬ doeˇ ngehˬ daˆ-awˇ ceh cawˬ cawˬ-eu meh. Aˬ yaw ̭ ma ̭-aˬ, bawˇ tsahˬ jeˬ zaˬ lo ̭-ehˇ laˆ cawˆ nehˬ gaˇ ya daˬ teh ̭-a. ¹³ Aˬ yaw ̭ ma ̭ neh aˬ cawˬ-ahˇ yaw doeˇ jahˇ-awˇ k’aˇ bi daˬ-euˬ lo ̭-ehˇ, aˬ yaw ̭ ma ̭ ya daˬ poˆ teh ̭-a. Nah g’ahˇ nah gaˆ-ehˇ yawˬ ha-euˬ shiˬ shaˬ jiˇ nui k’ahˇ ya mˇ byah-eu jeˬ-ahˇ laˬ k’aˬ cehˇ-eu jeˬ lehˇ aˬ yaw ̭ ma ̭ sawˇ-eu meh. Aˬ yaw ̭ ma ̭-aˬ, naw ma ̭ nehˬ-ehˇ dzaˬ ta ̭ dawˇ ta ̭ ngeh daˬ ga-awˇ sha ̭ dawˇ dui dui paˬ-ehˇ g’eh-eu, aˬ myah lu ̭ jaˬ myaw ̭ mehˇ shuiˇ-ahˇ laˬ k’aˬ cehˇ-eu tsawˇ haˬ deuˬ meh. ¹⁴ Aˬ yaw ̭ maˬ-euˬ myaˆ nuiˆ-aˬ, aˬ cawˬ nehˬ-ehˇ joe maw ̭-eu nui ma ahˇ-eu zaˬ miˬ zaˬ deuˬ-ahˇ teh ̭-ehˇ haw maw ̭-eu meh. Iˬ baˇ mˇ dehˆ-euˬ maˬ baw-a. G’aˬ baˬ-eu tsawˇ haˬ deuˬ-ahˇ lahˇ ju-ahˇ teh pa ̭-eu meh. Pyuˇ shuiˇ myawˬ gahˬ-ahˇ mehˇ juiˇ juiˇ dui dui-eu meh. Aˬ yaw ̭ ma ̭-aˬ, Miˬyehˇ neh yaˬ k’ehˇ bi yaˬ-euˬ tsawˇ haˬ meh. ¹⁵ Gaˇ ma yaw dawˇ-ahˇ byehˇ dzeh-awˇ, gaˇ bahˬ bahˬ-iˇ-euˬ tsawˇ haˬ pyeu ̭-eu meh. Maˬ tsaˬ-eu jeˬ mˇ-awˇ za-euˬ pyuˇ shuiˇ-ahˇ nui k’ahˇ jaˆ-eu g’aˬ pyeu ̭-eu Beˬyoˇ-euˬ aˬ li Baˬlamˬ-euˬ pehˬ zaˇ-ahˇ caw teh lu ̭-eu meh. ¹⁶ Aˬ yaw ̭-euˬ iˬ baˇ baˬ da neh aˬ yaw ̭ g’aˇ duˬ shaˬ laˇ-euˬ meh. Aˬ yaw ̭-euˬ mahˬ tahˬ laˆ dawˬ ngehˬ doˆ laˇ-awˇ, Miˬyehˇ g’aˇ duˬ ngehˬ dah-eu tsawˇ haˬ pyeu ̭-eu Baˬlamˬ neh aˬ yaw ̭ yaw uˬ lo ̭-ehˇ mˇ lu ̭ shaˇ lu ̭-eu jeˬ-ahˇ laˆ naˬ-euˬ meh. ¹⁷ Maˬ ngeuˇ-eu mehˬ-eu tsoˆ-eu saˬ laˬ k’oeˇ deuˬ-aˬ, iˇ cu ̭ gui-iˇ-euˬ lawˇ gawˆ hawˇ-eu, jaˬ lehˇ lehˇ ma neh bi hehˇ dzaˬ g’eh-euˬ mˬ dmˇ-ahˇ duˇ-eu meh. Zahˇ dui dui-eu yaw zahˇ la ̭ k’oeˇ aˬ yaw ̭ ma ̭ g’aˇ duˬ Miˬyehˇ jawˇ zaˇ laˆ saˆ taˬ-euˬ meh. ¹⁸ Aˬ yaw ̭ ma ̭ aˬ dzawˬ aˇ gah-euˬ dawˬ ngehˬ-awˇ k’ahˬ sehˇ jehˆ-eu la ̭ k’oeˇ, yaw lehˬ jeˬ mˇ mˇ-ehˇ deh ̭-eu tsawˇ haˬ deuˬ-euˬ ba ̭ dzah la ̭ k’oeˇ dzeuˇ-iˇ ni leh jeh dahˬ beh lu ̭-eu tsawˇ haˬ deuˬ-ahˇ, shiˬ shaˬ jiˇ-euˬ nui k’ahˇ mˇ-eu jeˬ-ahˇ g’oe-awˇ lahˇ ju k’mˇ-eu meh. ¹⁹ Yawˬ ha luˬ-iˇ seˇ-iˇ-eu jeˬ-euˬ zaˬ k’aˆ geu ̭ geu ̭-ehˇ shaˬ lu ̭ ngeh, aˬ cawˬ-ahˇ bi buˬ-iˇ nya ma lehˇ aˬ yaw ̭ ma ̭ saˇ jaˇ dzaˬ-eu meh. Aˬ jeˬ miˇ neh ehˇ naˇ, tsawˇ haˬ tiˬ g’aˬ-aˬ, yawˬ ha-ahˇ k’aˇ uˆ g’aˬ taˬ-euˬ jeˬ-euˬ zaˬ k’aˆ pyeu ̭-eu meh. ²⁰ Tsawˇ haˬ zaˬ-aˬ, ka k’o ̭-eu g’aˬ pyeu ̭-eu aˬ dui-euˬ Sahˬpaˬ Yeˬsuˇ Ka li-ahˇ siˬ nya-eu baˬ da neh, miˇ tsaˬ heu k’oeˇ taˆ g’aˬ k’aˆ lu ̭-eu jaw ̭ dui dui-eu jeˬ mˇ gaˇ ya buˬ-iˇ g’aˬ miˇ tsa, k’oeˇ neh tiˬ poˆ paˇ bi g’aˬ leˇ shaw naˇ, yaw beh poˆ naˆ maˬ tseˇ doeˇ dui dui teh ̭-a. ²¹ Yaw tsaˬ yaw dawˇ gaˇ ma-ahˇ siˬ nya g’aˬ miˇ tsa, aˬ yaw ̭ ma ̭-ahˇ bi ̭ taˬ-euˬ muiˬ-eu shawˇ-eu Miˬyehˇ-euˬ dawˬ-ahˇ byehˇ dzeh-euˬ k’oeˇ-aˬ, yaw tsaˬ yaw dawˇ gaˇ ma-ahˇ tiˬ poˆ-iˬ maˬ siˬ nya-ehˇ deh ̭ ngeh naˆ maˬ tseˇ doeˇ dzehˬ-eu meh. ²² Aˬ yaw ̭ ma ̭ k’oeˇ lo ̭-ehˇ pyeu ̭-eu k’oeˇ-aˬ, "Aˬ kuiˬ yawˬ ha uˬ peh ̭ dzaˬ poˆ-eu" lehˇ ehˇ-eu dawˬ daˬ hawˇ-eu, "Iˇ cu ̭ dzui ̭ shawˇ nehˬ-euˬ aˬ za ̭ lah shiˇ paˇ lah poˆ-eu" lehˇ ehˇ-eu dawˬ daˬ tsaˬ gaˇ duˇ-eu meh.

¹ Ngaˇ gaˬ dui dui-eu cawˬ deuˬ-oˇ, sahˬ bo ̭ heu ta ̭-aˬ, ngaˬ neh naw ma ̭ jawˇ gaˇ bo ̭ ahˇ la ̭-euˬ sahˬ bo ̭ nyiˬ ta ̭ tiˬ ta ̭ ma. Sahˬ bo ̭ nyiˬ ta ̭ lu ̭ la ̭ k’oeˇ, gaˇ kawˆ heu deuˬ ngaˇ naw ma ̭-ahˇ ja noeˬ nehˬ-awˇ, naw ma ̭-euˬ nui ma la ̭ k’oeˇ shawˇ jehˆ ni g’eh-eu nui noeˬ deh ̭ laˇ nya ni laˆ noeˬ-eu ma. ² Aˇ hu ba Miˬyehˇ g’aˇ duˬ ngehˬ dah ya ̭-euˬ muiˬ-eu shawˇ-eu tsawˇ haˬ deuˬ-euˬ dawˬ hawˇ-eu, naw ma ̭-ahˇ mehˬ-eu g’aˬ k’ehˇ deuˬ neh bi ̭-euˬ ka k’o ̭-eu g’aˬ pyeu ̭-eu SahˬpaˬYeˬsuˇ-euˬ dawˬ-ahˇ naw ma ̭ bi noeˬ mawˇ maw ̭ miˇ-a. ³ Aˇ saˬ saˬ-eu aˇ nah aˇ yamˬ heu la ̭ k’oeˇ, yawˬ ha-euˬ shiˬ shaˬ jiˇ nui k’ahˇ mehˬ nah caw teh-awˇ deh ̭-eu tsawˇ haˬ deuˬ doˆ le teh ̭-a lehˇ, naw ma ̭-ahˇ jeˬ huˬ bi siˬ nya taˬ-eu tsaˬ meh. Tsawˇ haˬ k’oeˇ deuˬ naw ma ̭-ahˇ yehˬ bawˬ sehˇ lu-ehˇ ehˇ niˇ g’a laˇ teh ̭-a. ⁴ Aˬ yaw ̭ ma ̭ naw ma ̭-ahˇ heu lo ̭-ehˇ naˇ haˬ laˇ teh ̭-a. "Aˬ yaw ̭ za ̭ le ma lehˇ saˇ jaˇ dzaˬ taˬ-euˬ maˬ ngeuˇ-a loˇ. Aˬ yaw ̭ za ̭ le-euˬ aˬ lehˬ. Aˬ dui-euˬ aˬ poeˬ aˬ bawˇ deuˬ shiˇ dzeuˇ jiˇ-euˬ k’aw ̭, miˇ tsaˬ tahˬ k’awˇ heu tiˬ jeˬ-iˬ maˬ paˇ laˇ nya ni, k’aˇ beh taˬ-euˬ lo ̭-ehˇ jaˆ lu ̭-eu maˬ ngeuˇ-a loˇ." ⁵ Aˇ hu ba Miˬyehˇ dawˬ bi ̭-awˇ mˬ hawˇ-eu miˇ-ahˇ beh-euˬ gaˇ kawˆ maˬ ehˇ, iˇ cu ̭ la ̭ k’oeˇ neh miˇ tsaˬ heu-ahˇ beh doˆ-awˇ, iˇ cu ̭-ahˇ g’oe-awˇ miˇ tsaˬ tahˬ k’awˇ heu bi pyeu ̭ doˆ laˇ-euˬ gaˇ kawˆ maˬ ehˇ, aˬ yaw ̭ ma ̭ diˇ daˬ-ehˇ maˬ siˬ nya-eu jahˇ geu ̭-eu meh. ⁶ K’oeˇ uˬ ta ̭, iˇ cu ̭ bi dahˬ pymˬ-eu la ̭ k’oeˇ, iˇ cu ̭-ahˇ g’oe-awˇ mi tsaˬ heu-ahˇ laˆ cawˆ-euˬ gaˇ kawˆ-ahˇ k’aw ̭, aˬ yaw ̭ ma ̭ maˬ siˬ nya-eu jahˇ geu ̭-eu meh. ⁷ Ehˇ k’aw ̭, nymˬ-mˇ jaˆ lu ̭-eu mˬ hawˇ-eu miˇ heu deuˬ k’aw ̭, Miˬyehˇ-euˬ dawˬ aˬ yaw ̭ tiˬ dawˬ neh maˬ bi cawˆ-iˇ ni jeˬ hmˬ daˆ la ̭-euˬ jeˬ pyeu ̭-eu meh. K’oeˇ-aˬ, miˬ dzaˬ neh paˇ bi laˆ cawˆ-eu g’aˇ duˬ jeˬ hmˬ daˆ la ̭-euˬ jeˬ pyeu ̭-eu meh. Miˬyehˇ-ahˇ yaw zeu maˬ baw-eu tsawˇ haˬ deuˬ-ahˇ yaˇ k’aˬ daˇ nehˬ-awˇ laˆ luˬ laˆ seˇ nehˬ-eu aˇ nah k’oeˇ nah g’aˇ duˬ jeˬ hmˬ daˆ la ̭-euˬ jeˬ pyeu ̭-eu meh. ⁸ Ehˇ k’aw ̭, ngaˇ gaˬ dui dui-eu cawˬ deuˬ-oˇ, naw ma ̭ maˬ ngehˇ k’mˬ-eu gaˇ kawˆ tiˬ hmˬ heu lo ̭-ehˇ jaˆ meh. Sahˬpaˬ Miˬyehˇ-euˬ mehˬ shi, tiˬ nah hawˇ-eu tiˬ heˇ k’o ̭ beu gaˇ duˬ maˬ jaˆ-a. Aˬ yaw ̭ tiˬ kawˆ meh. ⁹ Sahˬpaˬ Miˬyehˇ-aˬ, tsawˇ haˬ tiˬ paˆ na deuˬ noeˬ-eu lo ̭-ehˇ, aˬ yaw ̭ neh saˇ jaˇ dzaˬ taˬ-euˬ jeˬ maˬ mˇ byah ni nyi naˬ-eu Miˬyehˇ maˬ ngeuˇ-a. Ehˇ k’aw ̭, tsawˇ haˬ tiˬ g’aˬ-iˬ maˬ bi luˬ maˬ bi seˇ-iˇ maw ̭-eu miˇ neh, dawˬ tawˆ lu ̭ iˬ baˇ bi noeˬ poˆ-eu g’aˇ duˬ aˬ yaw ̭ oˇ lu ̭-eu jeˬ pyeu ̭-eu meh. ¹⁰ Ehˇ k’aw ̭, Miˬyehˇ-euˬ Aˇnah-aˬ,smˇ k’oeˬ tahˇ joe oe-eu lo ̭-ehˇ keuˆ le teh ̭-a. Aˇ nah k’oeˇ nah keuˆ le ngeh, teˇ saˇ yaw k’aˆ-ehˇ mahˇ laˇ-awˇ, mˬ byoˆ-iˇ teh ̭-a. Nahˇ ma, ba la, aˬ guiˇ dawˬ tawˆ lu ̭ puiˆ byoˆ guiˇ byoˆ jiˇ teh ̭-a. Miˇ tsaˬ heu hawˇ-eu miˇ tsaˬ k’oeˇ taˆ k’aˇ jawˇ k’aˇ jaˆ-eu jeˬ daw tawˆ lu ̭ bi puiˆ dzaˬ jiˇ teh ̭-a. ¹¹ Yawˬ jeˬ na lu ̭ k’oeˇ lo ̭-ehˇ bi laˆ cawˆ jiˇ gaˇ keuˆ-eu-aˬ, naw ma ̭ aˬ joˆ-ehˇ g’eh-eu tsawˇ haˬ pyeu ̭-eu tsaˬ nmˇ. Naw ma ̭ yaw deh ̭ deh ̭-eu jeˬ-aˬ, muiˬ-awˇ shawˇ-awˇ, Miˬyehˇ-ahˇ a nehˬ taˬ-euˬ jeˬ bi pyeu ̭-eu tsaˬ meh. ¹² Mˬ dawˬ tawˆ lu ̭ puiˆ byoˆ jiˇ-awˇ, nahˇ ma, ba la, aˬ guiˇ dawˬ tawˆ lu ̭ guiˇ byoˆ jiˇ-eu aˇ nah pyeu ̭-eu Miˬyehˇ-euˬ Aˇ nah k’oeˇ nah yaw kawˇ-ehˇ keuˆ le ni naw ma ̭ dawˬ lu ̭-eu-aˬ, k’oeˇ lo ̭-ehˇ deh ̭-eu tsaˬ meh. ¹³ Ehˇ k’aw ̭, aˬ dui-aˬ, Miˬyehˇ neh saˇ jaˇ dzaˬ taˬ-euˬ jeˬ-ahˇ dawˬ lu ̭-eu ma. Iˇ kahˇ la ̭ k’oeˇ yaw tsaˬ yaw dawˇ jeˬ jaˆ-eu mˬ yaw shui ̭ miˇ yaw shui ̭-ahˇ dawˬ lu ̭-eu ma. ¹⁴ K’oeˇ miˇ neh cawˬ deuˬ-oˇ, Aˇnah k’oeˇ nah-ahˇ naw ma ̭ dawˬ lu ̭-eu lo ̭-ehˇ, Miˬyehˇ mehˬ shi iˬ baˇ taˬ k’aˇ maˬ za-eu Miˬyehˇ-ahˇ tsaˬ leˇ tsahˇ leˇ g’aˬ-euˬ muiˬ-eu shawˇ-eu tsawˇ haˬ pyeu ̭ ni leh jeh-awˬ. ¹⁵ Miˬyehˇ neh bi ̭-euˬ zaˬ siˬ nui gahˇ-ahˇ g’oe-awˇ, aˬ dui gaˬ dui dui-eu aˬ yui ̭ aˬ nyiˇ pyeu ̭-eu Pawˇluˆ neh naw ma ̭-ahˇ sahˬ bo ̭ bo ̭ ahˇ la ̭-euˬ lo ̭-ehˇ, naw ma ̭ ka k’o ̭-eu jeˬ bi za-eu g’aˇ duˬ Sahˬpaˬ Yeˬsuˇ oˇ oˇ-ehˇ dawˬ lu ̭ meh lehˇ noeˬ siˬ noeˬ mawˇ-awˬ. ¹⁶ Aˬ yaw ̭ neh k’aˇ bo ̭ ahˇ g’eh-euˬ sahˬ bo ̭ dawˬ tawˆ lu ̭ la ̭ k’oeˇ, gaˇ kawˆ heu hmˬ-ahˇ ta ̭ leˇ-awˇ aˬ myah lu ̭ k’oeˇ lo ̭-ehˇ aˬ yaw ̭ ehˇ-eu meh. Jaˇli ̭ aˇ deuˆ nui deuˬ-ahˇ dawˬ tsui ̭ yuˇ pyawˆ nya-eu lo ̭-ehˇ, Pawˇluˆ neh bo ̭ ahˇ g’eh-euˬ sahˬ bo ̭ deuˬ la ̭ k’oeˇ dawˬ tsui ̭ na ̭-awˇ g’oˆ shaw-eu g’aˇ duˬ shaˬ-eu pehˇ tsahˇ deuˬ-ahˇ, maˬ siˬ nya-eu deuˬ hawˇ-eu nui ma maˬ zi ̭-eu deuˬ dawˬ tsui ̭ yawˬ jeˬ yawˬ-ehˇ yuˇ pyawˇ geu ̭-eu meh. K’oeˇ-aˬ, yawˬ ha ya luˬ ya seˇ-iˇ ni yawˬ haˇ yawˬ ha mˇ gaˇ duˇ-eu meh. ¹⁷ Ehˇ k’aw ̭ cawˬ deuˬ oˇ, naw ma ̭-aˬ, gaˇ kawˆ heu siˬ nya taˬ-euˬ tsawˇ haˬ meh. K’aˇ deh ̭ maw ̭-eu deh ̭-eu tsawˇ haˬ deuˬ neh bi tsahˇ pyawˇ-awˇ, yawˬ ha zi ̭ dah ni yaw ̭ lu ̭-eu maˬ ya coˬ-iˇ ni yaw k’aˆ k’aˆ-ehˇ yahˇ-awˬ. ¹⁸ Ehˇ k’aw ̭, ka k’o ̭-eu g’aˬ pyeu ̭-eu aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ la ̭ k’oeˇ hawˇ-eu aˬ yaw ̭-ahˇ siˬ nya-eu jeˬ la ̭ k’oeˇ huiˬ laˇ mahˇ laˇ lu ̭-eu jeˬ taˬ bi tsehˆ-iˇ. Nymˬ-mˇ hawˇ-eu mˬ maˬ maˬ byaˆ zaˇ ziˇ aˬ yaw ̭ yaw sheh ̭ k’ahˬ sehˇ huiˬ lu ̭-uˇ. Aˬ miˬ