2 GAWˇLIˬTU

¹ Miˬyehˇ nui k’ahˇ shiˇ-eu la ̭ k’oeˇ Yeˬsuˇ ka li-euˬ g’aˬ k’ehˇ pyeu ̭ laˇ-euˬ ngaˇ Pawˇluˆ hawˇ-eu, aˬ dui-euˬ aˬ yui ̭ aˬ nyiˇ Tiˆmoˇseˬ nga nya ̭, Gawˇliˬtu meuˬ-ahˇ jawˇ-eu Miˬyehˇ-euˬ Ka li zaˬ aˇ muˇ hawˇ-eu Aˬgaˬyaˇ miˇ k’ahˬ doe ni jawˇ-eu Miˬyehˇ-euˬ tsawˇ haˬ deuˬ jawˇ gaˇ sahˬ bo ̭ bo ̭ ahˇ le ̭-eu ma. ² Aˬ dui-euˬ Aˬda Miˬyehˇ hawˇ-eu, Sahˬpaˬ Yeˬsuˇ Ka li-euˬ guiˬ lahˬ yaw dzahˇ hawˇ-eu nui saˇ o ̭-eu jeˬ naw ma ̭ k’oeˇ taˆ jaˆ lu ̭-uˇ. ³ Aˬ dui-euˬ Sahˬpaˬ Yeˬsuˇ Ka li-euˬ Aˬda pyeu ̭-eu Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Aˬ yaw ̭-aˬ, g’awˬ shaˬ gaˬ nya-eu Aˬda pyeu ̭-awˇ, yawˬ jeˬ na lu ̭ ngehˬ g’eh dah teˬ nehˬ la ̭-eu Miˬyehˇ pyeu ̭-eu meh. ⁴ Aˬ yaw ̭ neh bi ̭ le ̭-euˬ ngehˬ g’eh dah teˬ-eu jeˬ-ahˇ aˬ dui g’oe-awˇ, shaˬ-eu zahˬ-eu yawˬ jeˬ na lu ̭-ahˇ ya tahˬ puˬ-eu tsawˇ haˬ deuˬ-ahˇ aˬ dui ngehˬ g’eh dah teˬ nehˬ nya ni, aˬ dui ya tahˬ puˬ-eu shaˬ zahˬ dawˬ tawˆ lu ̭ la ̭ k’oeˇ Miˬyehˇ aˬ dui-ahˇ ngehˬ g’eh dah teˬ nehˬ la ̭-euˬ meh. ⁵ Ka li ya daˬ-euˬ shaˬ zahˬ g’awˬ mya jeˬ-ahˇ aˬ dui caw daˬ-eu lo ̭-ehˇ, Miˬyehˇ-euˬ huiˬ dui dui-eu ngehˬ g’eh dah teˬ nehˬ la ̭-eu jeˬ-ahˇ Ka li la ̭ k’oeˇ aˬ dui za-euˬ ma. ⁶ Shaˬ-eu zahˬ-eu jeˬ-ahˇ nga ma ̭ ya daˬ naˇ, naw ma ̭-ahˇ ngehˬ g’eh dah teˬ-eu g’aˇ duˬ hawˇ-eu naw ma ̭ ka k’o ̭-eu jeˬ bi za-eu g’aˇ duˬ daˬ-eu ma. Ngehˬ g’eh dah teˬ nehˬ la ̭-eu jeˬ-ahˇ nga ma ̭ za naˇ, nga ma ̭ daˬ dzeuˇ oˇ dzeuˇ-euˬ shaˬ zahˬ-ahˇ naw ma ̭ daˬ dzeuˇ oˇ dzeuˇ coeˇ ni, g’aˬ za lahˬ laˇ teh ̭-a. ⁷ K’oeˇ miˇ neh, naw ma ̭-ahˇ nga ma ̭ noeˬ tmˬ taˬ-euˬ jeˬ zi ̭ dah ni jaˆ lu ̭ ma. Nga ma ̭ ya daˬ lu ̭-eu shaˬ zahˬ-ahˇ naw ma ̭ daˬ caw-eu lo ̭-ehˇ, nga ma ̭ za-euˬ ngehˬ g’eh dah teˬ nehˬ la ̭-eu jeˬ-ahˇ naw ma ̭ k’aw ̭ za meh lehˇ nga ma ̭ siˬ nya ma. ⁸ Aˬ yui ̭ aˬ nyiˇ ka li zaˬ deuˬ-oˇ, Aˬshaˆ miˇ k’ahˬ-ahˇ nga ma ̭ ya daˬ-euˬ shaˬ zahˬ naw ma ̭-ahˇ bi siˬ maw ̭ miˇ-a. Nga ma ̭ k’oeˇ taˆ keuˆ le teuˇ le-euˬ jeˬ aˇ dzehˬ dzeuˇ-eu miˇ neh, maˬ paˇ ya deh ̭-eu miˇ-a lehˇ noeˬ jiˇ-euˬ ma. ⁹ Nga ma ̭-ahˇ bi shiˇ-eu g’aˇ duˬ yaˇ k’aˬ daˇ tsehˆ g’aˬ-euˬ nga lehˇ nga ma ̭ noeˬ-euˬ ma. Ehˇ k’aw ̭, k’oeˇ lo ̭-ehˇ pyeu ̭ laˇ-euˬ k’oeˇ-aˬ, nga ma ̭ yawˬ haˇ yawˬ ha maˬ g’oe-ehˇ, shiˇ-euˬ tsawˇ haˬ-ahˇ bi g’o ̭ deh ̭ laˇ nya-eu Miˬyehˇ-ahˇ teh ̭-ehˇ g’oe nya laˇ-eu g’aˇ duˬ pyeu ̭-eu meh. ¹⁰ K’oeˇ naˆ naˆ-ehˇ g’eh-eu shiˇ gaˇ keuˆ leˇ taˬ-euˬ aˇ tiˆ-ahˇ, nga ma ̭-ahˇ ka k’o ̭ nehˬ la ̭-euˬ meh. Mehˬ hu paw k’aw ̭, aˬ yaw ̭ nga ma ̭-ahˇ ka k’o ̭ nehˬ la ̭ teh ̭-a. Naw ma ̭ guiˬ lahˬ shaˇ nehˬ la ̭-euˬ baˬ da neh, aˬ yaw ̭ nga ma ̭-ahˇ paˇ ka k’o ̭ nehˬ la ̭ teh ̭-a lehˇ nga ma ̭ jah duˬ taˬ-euˬ ma. Tsawˇ haˬ g’awˬ mya ni guiˬ lahˬ shaˇ-euˬ dawˬ Miˬyehˇ-ahˇ gaˬ leˇ-awˇ, nga ma ̭-ahˇ Miˬyehˇ guiˬ lahˬ bi ̭ la ̭ teh ̭-a. Tsawˇ haˬ g’awˬ mya ni nga ma ̭-euˬ g’aˇ duˬ Miˬyehˇ-euˬ guiˬ lahˬ-ahˇ ja ceuˬ teh ̭-a. ¹² Miˇ tsaˬ heu k’oeˇ taˆ nga ma ̭ yaw deh ̭ deh ̭ lu ̭-eu heu hawˇ-eu, k’aˆ k’aˆ ni naw ma ̭ nehˬ-ehˇ cawˬ ya cawˬ ta ̭ lu ̭-eu heu-aˬ, Miˬyehˇ neh bi ̭ le ̭-euˬ myaˆ pyawˬ bya cehˆ ni taˬ nya-eu jeˬ hawˇ-eu, nui ma dawˇ coe ni g’eh-eu jeˬ la ̭ k’oeˇ ya deh ̭ lu ̭-eu baˬ da neh maˬ ehˇ, tsawˇ haˬ zaˬ-euˬ zaˬ siˬ tsawˇ gahˇ-ahˇ maˬ g’oe-ehˇ Miˬyehˇ-euˬ guiˬ lahˬ yaw dzahˇ-euˬ baoˬ-ahˇ g’oe-awˇ ya deh ̭ lu ̭-eu baˬ da neh maˬ ehˇ, nga ma ̭ k’ahˬ sehˇ jehˆ k’aˇ za-eu ma. ¹³ Naw ma ̭ gui haw-awˇ g’oˆ shaw nya paˬ-ehˇ g’eh-eu gaˇ kawˆ deuˬ teh ̭-ehˇ nga ma ̭ bo ̭ ahˇ le ̭-euˬ ma. Naw ma ̭ yaw muiˬ paˬ-ehˇ g’oˆ shaw nya teh ̭-a lehˇ noeˬ tmˬ-eu ma. ¹⁴ Nga ma ̭-euˬ gaˇ kawˆ naw ma ̭ tsaˬ tsaˬ ni g’oˆ shaw g’aˬ taˬ-euˬ meh. K’oeˇ miˇ neh, aˬ dui-euˬ Sahˬpaˬ Yeˬsuˇ za ̭ le ngeh nah naw ma ̭ g’aˇ duˬ nga ma ̭ k’ahˬ sehˇ jehˆ k’aˇ za-eu lo ̭-ehˇ, nga ma ̭ g’aˇ duˬ k’aw ̭ naw ma ̭ k’ahˬ sehˇ jehˆ k’aˇ za teh ̭-a. ¹⁵ Nga ma ̭ g’aˇ duˬ naw ma ̭ k’ahˬ sehˇ jehˆ k’aˇ za meh lehˇ ngaˇ siˬ duˬ-eu miˇ neh, naw ma ̭ laˬ k’aˬ nyiˬ poˆ bi cehˇ-eu g’aˇ duˬ, naw ma ̭ jawˇ gaˇ oe ma lehˇ yaw beh ngaˇ lehˬ hmˬ taˬ-euˬ ma. ¹⁶ Ngaˇ Yuˇdaˆ miˇ k’ahˬ-ahˇ iˇ ngeh naw ma ̭ neh bi caw ba-eu g’aˇ duˬ, Maˬgeˬdawˇniˆ miˇ k’ahˬ-ahˇ le paw jaw naw ma ̭ jawˇ gaˇ uˇ le-awˇ, g’o ̭ le paw jaw k’aw ̭ naw ma ̭ jawˇ gaˇ paˇ uˇ le-eu lehˇ lehˬ hmˬ taˬ-euˬ ma. ¹⁷ Ngaˇ naw ma ̭ jawˇ gaˇ oe-eu lehˇ lehˬ hmˬ ngeh, ngaˬ-euˬ nui ma poˆ poˆ laˆ laˆ-ehˇ g’eh taˬ loˇ. Ngaˇ tiˬ jeˬ paˬ mˇ-eu lehˇ g’eh ngeh, miˇ tsaˬ zaˬ-euˬ nui noeˬ pi-awˇ, "Oe ma," "Maˬ oe" lehˇ, nyiˬ jeˬ lu ̭ tiˬ poˆ teh ̭-ehˇ ehˇ-euˬ ta loˇ. ¹⁸ Miˬyehˇ saˇ jaˇ zi ̭-eu yaw duˬ baw-eu lo ̭-ehˇ, "Oe-eu" hawˇ-eu "Maˬ oe-eu" nyiˬ jeˬ lu ̭ tiˬ poˆ teh ̭-ehˇ nga ma ̭ maˬ ehˇ-aˬ lehˇ ehˇ tsehˆ peuˬ ma. ¹⁹ Siˬlaˆ hawˇ-eu Tiˆmoˇseˬ ngaˬ ha smˇ g’aˬ naw ma ̭-ahˇ mehˬ lu ̭-eu Miˬyehˇ-euˬ Zaˬmaˇ Yeˬsuˇ Ka liˬ-aˬ, "Ngeuˇ-eu" hawˇ-eu "Maˬ ngeuˇ-eu" nui ma nyiˬ jeˬ pi lu ̭-eu maˬ ngeuˇ-a. Aˬ yaw ̭ la ̭ k’oeˇ aˬ myah lu ̭ "Ngeuˇ-eu" jeˬ teh ̭-ehˇ ahˇ-eu meh. ²⁰ Aˬ jeˬ miˇ neh ehˇ naˇ, Miˬyehˇ neh saˇ jaˇ k’aˇ dzaˬ taˬ-euˬ jeˬ dawˬ tawˆ lu ̭, aˬ yaw ̭-euˬ la ̭ k’oeˇ "Ngeuˇ meh" lehˇ ya mawˇ-eu meh. K’oeˇ miˇ neh, Miˬyehˇ-euˬ yaw sheh ̭ k’ahˬ sehˇ-ahˇ taˬ huiˬ-eu la ̭ k’oeˇ "Aˬ miˬ" lehˇ aˬ dui ehˇ ngeh, Yeˬsuˇ Ka li la ̭ k’oeˇ aˬ dui ehˇ-eu ma. ²¹ Nga ma ̭ hawˇ-eu naw ma ̭-ahˇ Ka li la ̭ k’oeˇ zi ̭ dah ni deh ̭ nya ni jahˇ nehˬ la ̭-euˬ g’aˬ-aˬ, Miˬyehˇ meh. Aˬ dui-ahˇ tseˇ doˆ-awˇ k’ehˇ g’eh-euˬ g’aˬ k’aw ̭, Miˬyehˇ aˬ yaw ̭ meh. ²² Aˬ dui-ahˇ aˬ yaw ̭-euˬ tsawˇ haˬ bi pyeu ̭-eu g’aˇ duˬ jmˬ diˬ nehˬ la ̭-awˇ, aˬ duiˬ-euˬ nui ma la ̭ k’oeˇ Muiˬ-eu Shawˇ-eu Yaw sahˇ Miˬyehˇ bi jawˇ le-eu la ̭ k’oeˇ, aˬ yaw ̭-euˬ tsawˇ haˬ ma lehˇ kamˬ tsehˆ taˬ-euˬ meh. ²³ Miˬyehˇ-ahˇ tsawˇ kaˬ bi geu ̭ ma. Ngaˬ-euˬ nui ma-ahˇ aˬ yaw ̭ siˬ nya meh. Ngaˇ Gawˇliˬtu meuˬ-ahˇ maˬ oe lehˇ ehˇ-eu-aˬ, naw ma ̭-ahˇ maˬ bi naˇ leˇ ni shaˇ noeˬ-awˇ ehˇ-eu ma. ²⁴ Naw ma ̭-euˬ jah-eu jeˬ-ahˇ nga ma ̭ tuˆ tehˬ-awˇ uˆ lahˇ-eu lehˇ maˬ ngeuˇ. Jah-eu jeˬ la ̭ k’oeˇ naw ma ̭ zi ̭ dah ni yaw ̭ lu ̭ meh lehˇ nga ma ̭ siˬ nya ma. Nga ma ̭-aˬ, naw ma ̭ laˬ k’aˬ cehˇ ni mˇ lu ̭-eu naw ma ̭-euˬ gaˇ mˇ cawˬ deuˬ pyeu ̭-eu ma.

¹ K’oeˇ miˇ neh, naw ma ̭ maˬ paˇ bi noeˬ shaˬ-eu g’aˇ duˬ, naw ma ̭ jawˇ gaˇ maˬ paˇ oe ma lehˇ ngaˇ noeˬ tsehˆ-euˬ ma. ² Ngaˇ laˬ k’aˬ cehˇ ni jahˇ-eu deuˬ pyeu ̭-eu naw ma ̭-ahˇ ngaˬ neh bi noeˬ shaˬ-euˬ ngeuˇ naˇ, ngaˬ-ahˇ laˬ k’aˬ cehˇ ni jahˇ nehˬ la ̭-eu aˬ suˇ g’aˬ paˇ jawˇ nmˇ. K’oeˇ miˇ neh, ngaˇ naw ma ̭-ahˇ sahˬ bo ̭ k’oeˇ ta ̭ bo ̭ ahˇ le ̭-euˬ jeˬ pyeu ̭-eu ma. ³ Ngaˇ laˬ k’aˬ cehˇ ni jahˇ nehˬ la ̭ paˬ-ehˇ g’eh-eu tsawˇ haˬ deuˬ neh ngaˇ ya noeˬ shaˬ ni paˇ bi jahˇ-eu lehˇ naw ma ̭ jawˇ gaˇ ngaˇ maˬ paˇ oe maw ̭ miˇ-a. Aˬ jeˬ miˇ neh ehˇ naˇ, ngaˇ laˬ k’aˬ cehˇ naˇ, naw ma ̭ dawˬ tawˆ lu ̭ k’aw ̭ laˬ k’aˬ cehˇ meh lehˇ ngaˇ jah-eu ma. ⁴ Ngaˇ nui ma cawˆ dui dui-awˇ shaˬ zahˬ mˇ-eu la ̭ k’oeˇ, myaˆ biˇ doˆ doˆ-ehˇ naw ma ̭-ahˇ sahˬ bo ̭ k’oeˇ ta ̭ bo ̭ ahˇ le ̭-euˬ ma. Ngaˬ-euˬ nui ma la ̭ k’oeˇ-aˬ, naw ma ̭-ahˇ bi noeˬ shaˬ maw ̭-eu maˬ ngeuˇ. Ngaˇ naw ma ̭-ahˇ aˇ naˆ ni gaˬ-eu gaˇ kawˆ bi siˬ duˬ maw ̭-eu ma. ⁵ Tsawˇ haˬ tiˬ g’aˬ na aˬ cawˬ bi noeˬ shaˬ-eu jeˬ mˇ naˇ, ngaˬ-ahˇ teh ̭-ehˇ coeˬ laˇ-eu maˬ ngeuˇ-a. Naw ma ̭-ahˇ k’aw ̭ ui cuiˆ na coeˬ leˇ-eu meh. (Gaˇ kawˆ heu aˇ dzehˬ maˬ ehˇ dzeuˇ maw ̭-eu miˇ neh, ngaˇ heu naˆ ni teh ̭-ehˇ ehˇ-eu ma.) ⁶ K’oeˇ lo ̭-ehˇ g’eh-eu tsawˇ haˬ-ahˇ Ka li zaˬ aˇ muˇ la ̭ k’oeˇ uˇ-eu tsawˇ haˬ myaˬ ni tiˬ paˆ nui ma tsaˬ-awˇ k’oeˇ lo ̭-ehˇ daˇ nehˬ-euˬ-aˬ, g’aˬ teh ̭-a. ⁷ Ehˇ k’aw ̭, aˬ yaw ̭ aˇ dzehˬ dzeuˇ ni noeˬ shaˬ-awˇ maˬ ya cawˆ-iˇ ni, nymˬ-mˇ naw ma ̭ aˬ yaw ̭-ahˇ iˬ baˇ pyehˬ nehˬ-awˇ g’aˬ bi ̭ nehˬ-eu tsaˬ teh ̭-a. ⁸ K’oeˇ miˇ neh, naw ma ̭ aˬ yaw ̭-ahˇ maˇ maˇ ni gaˬ-eu gaˇ kawˆ bi siˬ-eu g’aˇ duˬ, ngaˇ naw ma ̭-ahˇ shaˇ-eu ma. ⁹ Naw ma ̭ ngaˬ neh mehˬ-euˬ tsoˆ-euˬ dawˬ-ahˇ aˇ naˆ ni naˇ haˬ geu ̭-eu nga lehˇ ngaˇ siˬ duˬ maw ̭-eu miˇ neh, naw ma ̭-ahˇ lawˬ haw-eu la ̭ k’oeˇ sahˬ bo ̭ k’oeˇ ta ̭ bo ̭ ahˇ le ̭-euˬ jeˬ pyeu ̭-eu ma. ¹⁰ Tsawˇ haˬ tiˬ g’aˬ na mˇ lehˬ-euˬ gaˇ naw ma ̭ iˬ baˇ pyehˬ nehˬ naˇ, ngaˇ k’aw ̭ tsawˇ haˬ k’oeˇ g’aˬ-ahˇ iˬ baˇ pyehˬ-eu ma. Ngaˇ tiˬ jeˬ paˬ g’aˇ duˬ iˬ baˇ pyehˬ naˇ, ngaˬ neh iˬ baˇ pyehˬ-euˬ k’oeˇ-aˬ, naw ma ̭ g’aˇ duˬ Ka li-euˬ mehˬ shi iˬ baˇ pyehˬ-eu jeˬ pyeu ̭-eu ma. ¹¹ Neh ̭ Saˬdaˬ aˬ dui-ahˇ maˬ bi g’aˬ laˇ ni ngaˇ k’oeˇ lo ̭-ehˇ mˇ-eu ma. Aˬ jeˬ miˇ neh ehˇ naˇ, aˬ yaw ̭-euˬ bawˬ toˆ aˬ dui siˬ nya lu ̭ ma. ¹² Ka li gaˇ kawˆ Laˬ k’aˬ cehˇ-eu Guiˬ lahˬ dawˬ mehˬ-eu lehˇ Daˬloˇ meuˬ-ahˇ ngaˇ laˇ keuˆ ngeh, k’oeˇ gaˇ gaˇ mˇ nya ni Sahˬpaˬ Yeˬsuˇ ngaˬ-ahˇ gaˇ ma pah nehˬ la ̭ taˬ-euˬ gaˇ ya mawˇ-euˬ ma. ¹³ Ehˇ k’aw ̭, a nyiˇ Tiˇtuˆ-ahˇ k’oeˇ gaˇ maˬ ya mawˇ-euˬ miˇ neh nui ma tiˬ paw ̭-iˬ maˬ saˇ nya. K’oeˇ miˇ neh, k’oeˇ gaˇ jawˇ-eu tsawˇ haˬ deuˬ-ahˇ dawˬ cawˬ puˬ ya ̭-awˇ, Maˬgeˬdawˇniˆ miˇ k’ahˬ-ahˇ le g’eh le ̭-euˬ ma. ¹⁴ Ehˇ k’aw ̭, Miˬyehˇ-euˬ guiˬ lahˬ-ahˇ ja ceuˬ-eu ma. Aˬ jeˬ miˇ neh ehˇ naˇ, Ka li la ̭ k’oeˇ aˬ dui g’aˬ leˇ nya ni aˬ yaw ̭ sheuˬ g’eh nehˬ la ̭-awˇ, tsiˇ yaw saw jeˬ yawˬ gaˇ na lu ̭ saw keuˆ-iˇ-eu lo ̭-ehˇ, Ka li-ahˇ siˬ nya-eu jeˬ yawˬ gaˇ na lu ̭ byah-iˇ ni nga ma ̭-ahˇ aˬ yaw ̭ zmˬ nehˬ la ̭-euˬ meh. ¹⁵ Aˬ jeˬ miˇ neh ehˇ naˇ, nga ma ̭-aˬ, ka k’o ̭-eu jeˬ za g’aˬ-euˬ deuˬ jawˇ gaˇ maˬ ehˇ, piˬ-iˇ byoˆ-iˇ lu ̭-eu deuˬ jawˇ gaˇ maˬ ehˇ saw keuˆ-iˇ-euˬ, Ka li neh Miˬyehˇ-ahˇ lawˇ nehˬ-euˬ tsiˇ yaw saw jeˬ-ahˇ duˇ-eu ma. ¹⁶ Piˬ-iˇ byoˆ-iˇ lu ̭-eu deuˬ g’aˇ duˬ-aˬ, bi shiˇ-eu yaw bu ̭ beh ̭ la ̭ gaˇ duˇ-awˇ, ka k’o ̭-eu jeˬ za g’aˬ-euˬ deuˬ g’aˇ duˬ-aˬ, bi deh ̭ laˇ-eu yaw saw jeˬ-ahˇ duˇ-eu meh. Heu lo ̭-ehˇ g’eh-eu gaˇ mˇ nya-eu aˬ suˇ g’aˬ jawˇ ta. ¹⁷ Nga ma ̭-aˬ, aˬ cawˬ lo ̭-ehˇ yawˬ ha g’aˇ duˬ jiˇ jeuˬ ahˇ ni Miˬyehˇ dawˬ kawˬ mehˬ-eu tsawˇ haˬ maˬ ngeuˇ. Ehˇ k’aw ̭, Miˬyehˇ neh k’ehˇ g’eh le ̭-euˬ tsawˇ haˬ pyeu ̭-eu miˇ neh, Ka li-euˬ zaˬ k’aˆ lo ̭-ehˇ Miˬyehˇ mehˬ shi dawˇ coe ni ngehˬ-eu tmˇ-eu ma.

¹ Nga ma ̭ yawˬ haˇ yawˬ ha k’ahˬ sehˇ paˇ jehˆ gaˇ duˇ-eu nga loˇ. Aˬ cawˬ jahˇ lu ̭-eu lo ̭-ehˇ, nga ma ̭ g’eh naw ma ̭ jawˇ gaˇ laˇ ngeh naw ma ̭ ha geu ̭ nehˬ la ̭ ni aˬ cawˬ neh nga ma ̭-euˬ gaˇ kawˆ naw ma ̭-ahˇ bo ̭ nehˬ-euˬ sahˬ bo ̭ yuˇ le ̭-eu loˬ ta loˇ. Maˬ ngeuˇ naˇ, nga ma ̭ aˬ cawˬ jawˇ gaˇ iˇ ngeh, aˬ cawˬ nga ma ̭-ahˇ ha geu ̭ nehˬ la ̭ ni, naw ma ̭ neh nga ma ̭-euˬ gaˇ kawˆ bo ̭ nehˬ-euˬ sahˬ bo ̭ yuˇ g’eh-eu loˬ ta loˇ. ² Naw ma ̭-euˬ mawˇ do-aˬ, tsawˇ haˬ yawˬ g’aˬ na lu ̭ siˬ nya gui nya ni nga ma ̭-euˬ nui ma-ahˇ bo ̭ myahˬ taˬ-euˬ sahˬ bo ̭ pyeu ̭-eu ma. ³ Naw ma ̭-aˬ, Ka li neh bo ̭ ahˇ le ̭-awˇ nga ma ̭ neh hehˇ le ̭-euˬ sahˬ bo ̭ tiˬ dzeh pyeu ̭-eu meh. Sahˬ bo ̭ heu dzeh-ahˇ sahˬ uiˇ zmˬ-awˇ bo ̭ taˬ-euˬ maˬ ngeuˇ-a. Deh ̭ lu ̭-eu Miˬyehˇ-euˬ Yaw sahˇ-ahˇ zmˬ-awˇ bo ̭ taˬ-euˬ meh. K’aˬ lo teˇ bya ̭ k’oeˇ taˆ bo ̭ taˬ-euˬ maˬ ngeuˇ-a. Tsawˇ haˬ-euˬ nui ma teˇ bya ̭ k’oeˇ taˆ bo ̭ taˬ-euˬ meh. ⁴ Ka li-ahˇ g’oe-eu la ̭ k’oeˇ Miˬyehˇ-ahˇ nui ma huiˬ k’aˇ za-eu miˇ neh ngaˇ heu lo ̭-ehˇ ehˇ peuˬ-eu ma. ⁵ Gaˇ heu nga ma ̭ mˇ nya ma lehˇ ehˇ paˬ-ehˇ nga ma ̭ la ̭ k’oeˇ tiˬ jeˬ-iˬ maˬ ahˇ. Nga ma ̭ mˇ nya-eu k’oeˇ-aˬ, Miˬyehˇ neh bi ̭ la ̭-euˬ jeˬ pyeu ̭-eu meh. ⁶ Bo ̭ doˆ taˬ-euˬ zahˇ dawˬ k’o ̭ dawˬ-ahˇ maˬ ta ̭-ehˇ, Yaw sahˇ Miˬyehˇ-ahˇ ta ̭-eu dawˬ ma saˇ jaˇ yaw shui ̭ g’aˇ duˬ nga ma ̭ gaˇ mˇ nya ni Miˬyehˇ neh jahˇ nehˬ la ̭-euˬ meh. Bo ̭ doˆ taˬ-euˬ zahˇ dawˬ k’o ̭ dawˬ-aˬ, bi shiˇ-eu jeˬ pyeu ̭-eu meh. Ehˇ k’aw ̭ Yaw sahˇ Miˬyehˇ-aˬ, bi deh ̭ laˇ-eu jeˬ pyeu ̭-eu meh. ⁷ Zahˇ dawˬ k’o ̭ dawˬ k’oeˇ-aˬ, k’aˬ lo k’oeˇ taˆ ta ̭ bo ̭ taˬ-awˇ, Zahˇ dawˬ k’o ̭ dawˬ k’oeˇ bi ̭ le ngeh, Miˬyehˇ-euˬ yaw sheh ̭ k’ahˬ sehˇ doˆ le-euˬ meh. Moˇseˬ-euˬ myaˆ pyawˬ k’oeˇ taˆ bya-eu yaw sheh ̭ k’oeˇ-aˬ, tiˬ k’ehˇ laˇ k’ehˬ teh ̭-ehˇ gmˬ-eu yaw sheh ̭ pyeu ̭ k’aw ̭, yaw sheh ̭ aˇ dzehˬ-ehˇ k’aˆ-eu miˇ neh Iˇsaˬleˬlaˆ tsawˇ haˬ deuˬ Moˇseˬ-euˬ myaˆ pyawˬ-ahˇ maˬ haw peuˬ-a. Shiˇ-eu jeˬ bi keuˆ le-eu Zahˇ dawˬ k’o ̭ dawˬ k’aw ̭, k’oeˇ naˆ naˆ-ehˇ g’eh-eu yaw sheh ̭ k’ahˬ sehˇ la ̭ k’oeˇ oe-euˬ ngeuˇ naˇ, ⁸ Yaw sahˇ Miˬyehˇ neh mˇ-euˬ gaˇ deuˬ-ahˇ ta ̭ leˇ-eu yaw sheh ̭ k’ahˬ sehˇ-aˬ, aˇ naˆ ni paˇ k’aˆ dzehˬ nmˇ. ⁹ Iˬ baˇ ahˇ gaˇ k’ehˬ nehˬ k’aˆ nehˬ le-euˬ k’oeˇ jeˬ k’oeˇ naˆ ni yaw sheh ̭ k’ahˬ sehˇ ahˇ naˇ, tsawˇ haˬ zaˬ-ahˇ Miˬyehˇ mehˬ shi yaw tsaˬ yaw dawˇ tsawˇ haˬ bi pyeu ̭ laˇ ni mˇ-eu heu jeˬ aˇ naˆ ni yaw sheh ̭ k’ahˬ sehˇ paˇ ahˇ dzehˬ nmˇ. ¹⁰ Maˇ maˇ ni ehˇ naˇ, nymˬ-mˇ-euˬ yaw sheh ̭ k’ahˬ sehˇ heu hmˬ bya dzehˬ-eu miˇ neh, aˇ hu bya dui dui-euˬ yaw sheh ̭ k’ahˬ sehˇ k’oeˇ hmˬ miˆ-iˇ-euˬ gaˇ duˇ meh. ¹¹ Tiˬ k’ehˬ tiˬ yamˬ teh ̭-ehˇ gmˬ-eu jeˬ la ̭ k’oeˇ k’aw ̭ yaw sheh ̭ k’ahˬ sehˇ ahˇ-eu ngeuˇ naˇ, mˬ maˬ maˬ byaˆ zaˇ ziˇ gmˬ-eu jeˬ la ̭ k’oeˇ yaw sheh ̭ k’ahˬ sehˇ aˇ naˆ ni paˇ ahˇ paˬ nga. ¹² Nga ma ̭ heu lo ̭-ehˇ noeˬ tmˬ taˬ-euˬ miˇ neh, tiˬ paw ̭-iˬ maˬ guˆ ni ngehˬ peuˬ tmˇ peuˬ-eu ma. ¹³ Nga ma ̭-aˬ, Moˇseˬ-ahˇ maˬ duˇ. Moˇseˬ-aˬ, aˬ yaw ̭-euˬ myaˆ pyawˬ k’oeˇ taˆ bya-eu yaw sheh ̭ k’ahˬ sehˇ k’oeˇ byoˆ-iˇ gaˇ Iˇsaˬleˬlaˆ tsawˇ haˬ deuˬ maˬ bi mawˇ-eu g’aˇ duˬ, myaˆ pyawˬ-ahˇ saˬ paˇ dehˬ kaˬ-euˬ meh. ¹⁴ Ehˇ k’aw ̭, aˬ yaw ̭ ma ̭ nui ma g’ahˇ-eu meh. Iˬ nah keuˆ ni aˬ yaw ̭ ma ̭ dawˬ ma saˇ jaˇ yaw oeˇ-ahˇ k’aˇ gui ngeh, myaˆ pyawˬ-ahˇ saˬ paˇ dehˬ kaˬ taˬ-euˬ k’oeˇ maˬ yuˇ dzeh-aˬ siˬ. Aˬ jeˬ miˇ neh ehˇ naˇ, ka li-ahˇ maˬ ta ̭ naˇ myaˆ pyawˬ-ahˇ dehˬ kaˬ taˬ-euˬ saˬ paˇ k’oeˇ maˬ yuˇ dzeh nya-a. ¹⁵ Ngeuˇ meh. Iˬ nah keuˆ ni Moˇseˬ-euˬ Zahˇ dawˬ k’o ̭ dawˬ-ahˇ aˬ yaw ̭ ma ̭ k’aˇ gui ngeh, aˬ yaw ̭ ma ̭-euˬ nui ma-ahˇ saˬ paˇ k’oeˇ hmˬ dehˬ kaˬ taˬ-euˬ meh. ¹⁶ Ehˇ k’aw ̭, tsawˇ haˬ tiˬ g’aˬ Sahˬpaˬ Miˬyehˇ jawˇ gaˇ g’o ̭ k’o ̭ laˇ naˇ, saˬ paˇ k’oeˇ hmˬ-ahˇ yuˇ dzeh nehˬ-eu meh. ¹⁷ Nymˬ-mˇ Sahˬpaˬ Miˬyehˇ lehˇ ehˇ-eu heu-aˬ, Yaw sahˇ Miˬyehˇ-ahˇ ehˇ-eu meh. Sahˬpaˬ Miˬyehˇ-euˬ Yaw sahˇ-aˬ, aˬ dui-ahˇ bi buˬ bi law-iˇ la ̭-eu meh. ¹⁸ Aˬ dui dawˬ tawˆ lu ̭ myaˆ pyawˬ-ahˇ saˬ paˇ maˬ dehˬ kaˬ taˬ-ehˇ, Sahˬpaˬ Miˬyehˇ-euˬ yaw sheh ̭ k’ahˬ sehˇ aˬ dui-ahˇ tahˬ le lu ̭ meh. Sahˬpaˬ Miˬyehˇ-euˬ Yaw sahˇ jawˇ gaˇ neh oe-euˬ yaw sheh ̭ k’ahˬ sehˇ k’oeˇ aˬ dui-ahˇ tiˬ jawˇ saˇ-iˬ tiˬ jawˇ yaw sheh ̭ k’ahˬ sehˇ bi huiˬ dzehˬ laˇ-awˇ, aˬ yaw ̭-ahˇ duˇ leˇ ni aˬ dui-ahˇ bi paˇ laˇ lu ̭-eu meh.

¹ Miˬyehˇ g’awˬ shaˬ gaˬ-eu la ̭ k’oeˇ nga ma ̭-ahˇ gaˇ heu bi mˇ la ̭-euˬ miˇ neh, nga ma ̭-euˬ nui ma g’aˬ maˬ baˬ. ² Sha ̭ dawˇ paˬ-ehˇ g’eh-eu za ̭ taˬ-euˬ jeˬ-ahˇ nga ma ̭ tiˬ jawˇ-iˬ maˬ mˇ. Mehˇ shuiˇ shuiˇ-eu jeˬ hawˇ-eu Miˬyehˇ dawˬ kawˬ-ahˇ yuˇ pyawˆ-eu jeˬ nga ma ̭ maˬ jahˇ. Yaw tsaˬ yaw dawˇ jeˬ-ahˇ bya cehˆ ni mehˬ-awˇ, nga ma ̭-ahˇ aˬ cawˬ jah coeˇ ni Miˬyehˇ-euˬ mehˬ shi deh ̭ lu ̭-eu ma. ³ Nga ma ̭ mehˬ lu ̭-eu Laˬ k’aˬ cehˇ-eu Guiˬ lahˬ dawˬ heu dehˬ kaˬ taˬ-euˬ ngeuˇ lawˬ naˇ, luˬ-iˇ seˇ-iˇ lu ̭-eu tsawˇ haˬ deuˬ-euˬ g’aˇ duˬ teh ̭-ehˇ dehˬ kaˬ taˬ-euˬ jeˬ pyeu ̭-eu ma. ⁴ Miˇ tsaˬ heu-ahˇ uˆ lahˇ lu ̭-eu miˬyehˇ pyeu ̭-eu neh ̭ Saˬdaˬ neh aˬ yaw ̭ ma ̭-euˬ nui ma-ahˇ yaw zahˇ la ̭ k’oeˇ piˬ lahˇ taˬ-euˬ miˇ neh, aˬ yaw ̭ ma ̭ maˬ jah-a. K’oeˇ miˇ neh, Miˬyehˇ-ahˇ duˇ duˇ deh ̭ deh ̭ pyeu ̭-eu Ka li-euˬ gaˇ kawˆ Laˬ k’aˬ cehˇ-eu Guiˬ lahˬ dawˬ-euˬ yaw sheh ̭ k’ahˬ sehˇ aˬ yaw ̭ ma ̭ k’oeˇ taˆ bya lu ̭ gaˇ aˬ yaw ̭ ma ̭ maˬ mawˇ nya-a. ⁵ Nga ma ̭-aˬ, yawˬ ha-euˬ gaˇ kawˆ mehˬ lu ̭-eu maˬ ngeuˇ. Yeˬsuˇ Ka li-aˬ, tsawˇ haˬ dawˬ tawˆ lu ̭-euˬ Sahˬpaˬ pyeu ̭-awˇ, nga ma ̭-aˬ, aˬ yaw ̭-euˬ g’aˇ duˬ naw ma ̭-euˬ zaˬ k’aˆ pyeu ̭-eu gaˇ kawˆ mehˬ-eu ma. ⁶ "Yaw zahˇ la ̭ k’oeˇ yaw sheh ̭ bya teh ̭-a" lehˇ ehˇ-eu Miˬyehˇ hawˇ-eu Ka li-euˬ myaˆ pyawˬ k’oeˇ taˆ bya doˆ le-euˬ Miˬyehˇ-euˬ yaw sheh ̭ k’ahˬ sehˇ-ahˇ nga ma ̭ siˬ nya laˇ ni nga ma ̭-euˬ nui ma la ̭ k’oeˇ yaw sheh ̭ bi bya la ̭-euˬ Miˬyehˇ-aˬ, aˬ yaw ̭ tiˬ g’aˬ teh ̭ meh. ⁷ Ehˇ k’aw ̭, huiˬ dui dui-eu baoˬ-aˬ, nga ma ̭-euˬ maˬ ngeuˇ-ehˇ, Miˬyehˇ-euˬ pyeu ̭-eu gaˇ kawˆ siˬ duˬ mawˇ duˬ laˇ ni, nga ma ̭-aˬ, sa ̭ laˇ paw ta ̭ leˇ-eu poeˬ dui dui-eu pyuˇ shuiˇ myawˬ gahˬ heu deuˬ dawˆ ahˇ taˬ-euˬ miˇ tsaˬ oeˬ lahˬ loˆ ni teh ̭ ma. ⁸ Shaˬ zahˬ g’awˬ mya jeˬ-ahˇ nga ma ̭ ya daˬ-euˬ ma. Ehˇ k’aw ̭, yaw li uˬ duˬ maˬ keuˆ le-aˬ siˬ. Tiˬ poˆ na noeˬ dui noeˬ duiˇ gaˇ keuˆ-euˬ ma. Ehˇ k’aw ̭, nui ma cawˆ gaˇ maˬ keuˆ-aˬ siˬ. ⁹ K’ehˬ-eu k’aˆ-eu jeˬ-ahˇ ya daˬ-euˬ ma. Ehˇ k’aw ̭, cawˬ tiˬ g’aˬ-iˬ maˬ baw ni bi byehˇ dzeh gaˇ maˬ keuˆ-aˬ siˬ. Diˬ lah nehˬ la ̭ gaˇ ya daˬ-euˬ ma. Ehˇ k’aw ̭, shiˇ tsehˆ gaˇ maˬ keuˆ-aˬ siˬ. ¹⁰ Yeˬsuˇ deh ̭ lu ̭-eu gaˇ kawˆ nga ma ̭-euˬ g’awˇ mawˇ la ̭ k’oeˇ aˬ cawˬ mawˇ nya ni, aˬ yaw ̭ shiˇ-euˬ k’oeˇ nga ma ̭-euˬ g’awˇ mawˇ la ̭ k’oeˇ aˬ myah lu ̭ pi lu ̭-eu ma. ¹¹ Nga ma ̭-euˬ bu ̭-iˇ cehˇ-iˇ nya-eu g’awˇ mawˇ heu la ̭ k’oeˇ Yeˬsuˇ deh ̭ lu ̭-eu gaˇ kawˆ aˬ cawˬ mawˇ nya ni, nga ma ̭ yaw deh ̭ deh ̭-eu heu aˬ yaw ̭ g’aˇ duˬ aˬ myah lu ̭ shiˇ paˬ-ehˇ tsaˬ laˇ-eu meh. ¹² Ehˇ maw ̭-eu-aˬ, sa ̭ laˇ deh ̭-eu jeˬ-ahˇ naw ma ̭ siˬ nya laˇ ni, shiˬ shaˬ jiˇ shiˇ-eu jeˬ-ahˇ nga ma ̭ maˬ tsehˆ leˇ ni ya tahˬ puˬ lu ̭ ma. ¹³ "Ngaˇ jah-eu miˇ neh dawˬ ngehˬ-eu ma" lehˇ, Jaˇli ̭ la ̭ k’oeˇ tsawˇ haˬ tiˬ g’aˬ neh ehˇ taˬ-euˬ jaˆ-eu meh. Jah-eu nui ma k’oeˇ siˬ-ahˇ duˇ ni nga ma ̭ jah-eu miˇ neh dawˬ ngehˬ-eu ma. ¹⁴ Sahˬpaˬ Yeˬsuˇ-ahˇ bi g’o ̭ deh ̭ laˇ-euˬ Miˬyehˇ-aˬ, nga ma ̭-ahˇ Yeˬsuˇ nehˬ-ehˇ bi g’o ̭ deh ̭ laˇ-awˇ, naw ma ̭ nehˬ-ehˇ tiˬ kawˆ lo ̭-ehˇ aˬ yaw ̭ mehˬ shi bi sheuˬ keuˆ la ̭ teh ̭-a lehˇ nga ma ̭ siˬ nya ma. ¹⁵ Nga ma ̭ k’aˇ ya daˬ-euˬ heu deuˬ dawˬ tawˆ lu ̭, naw ma ̭-euˬ g’aˇ duˬ pyeu ̭-eu ma. Miˬyehˇ-euˬ guiˬ lahˬ yaw dzahˇ za-euˬ tsawˇ haˬ tiˬ jawˇ saˇ-iˬ tiˬ jawˇ myaˬ laˇ lu ̭-eu lo ̭-ehˇ, Miˬyehˇ-euˬ yaw sheh ̭ k’ahˬ sehˇ hawˇ-eu aˬ yaw ̭-euˬ guiˬ lahˬ-ahˇ ja ceuˬ-eu jeˬ, tiˬ jawˇ saˇ-iˬ tiˬ jawˇ myaˬ laˇ teh ̭-a. ¹⁶ Heu miˇ neh, nga ma ̭-euˬ nui ma tiˬ jawˇ-iˬ g’aˬ maˬ baˬ. Nga ma ̭-euˬ shiˬ shaˬ jiˇ g’awˇ mawˇ tiˬ jawˇ saˇ-iˬ tiˬ jawˇ teˬ le byoˆ le lu ̭ k’aw ̭, nga ma ̭-euˬ sa ̭ laˇ g’awˇ mawˇ tiˬ nah saˇ-iˬ tiˬ nah g’aˬ yaw shui ̭ za lu ̭ ma. ¹⁷ Tiˬ k’ehˬ tiˬ yamˬ la ̭ k’oeˇ nga ma ̭ ya daˬ lu ̭-eu ehˇ nya ̭ maˬ nyeuˆ-eu shaˬ zahˬ heu-aˬ, maˬ shaˇ cehˆ nya gaˇ keuˆ ni huiˬ-eu mˬ maˬ maˬ byaˆ zaˇ ziˇ zi ̭-eu yaw sheh ̭ k’ahˬ sehˇ-ahˇ za nya ni lehˬ hmˬ lu ̭ gaˇ duˇ-eu ma. ¹⁸ Aˬ jeˬ miˇ neh ehˇ naˇ, myaˆ nuiˆ haw mawˇ nya-eu jeˬ-ahˇ aˬ dui noeˬ tsoˆ taˬ-euˬ maˬ ngeuˇ. Myaˆ nuiˆ maˬ haw mawˇ nya-eu jeˬ-ahˇ noeˬ tsoˆ taˬ-euˬ ma. Myaˆ nuiˆ haw mawˇ nya-eu jeˬ-aˬ, tiˬ k’ehˇ laˇ k’ehˬ gmˬ-eu teh ̭ meh. Ehˇ k’aw ̭, myaˆ nuiˆ maˬ haw mawˇ nya-eu jeˬ-aˬ, mˬ maˬ maˬ byaˆ zaˇ ziˇ gmˬ-eu meh.

¹ Aˬ jeˬ miˇ neh ehˇ naˇ, miˇ tsaˬ heu k’oeˇ taˆ aˬ dui jawˇ lu ̭-eu yaˇ cmˇ pyeu ̭-eu aˬ dui-euˬ g’awˇ mawˇ heu cawˆ-iˇ ngeh, aˬ dui bi jawˇ-eu g’aˇ duˬ Miˬyehˇ neh mˬ k’oeˇ taˆ tsoˆ taˬ-euˬ mˬ maˬ maˬ byaˆ zaˇ ziˇ zi ̭-eu nymˇ jaˆ ma lehˇ aˬ dui siˬ nya ma. ² Nymˬ-mˇ aˬ dui mehˬ tsoeˬ dm daˆ-eu lo ̭-ehˇ, mˬ taˆ-euˬ nymˇ k’oeˇ-ahˇ dm maw ̭ dui dui-eu miˇ neh mahˇ mahˇ-ehˇ shaˬ-eu la ̭ k’oeˇ noeˬ tmˬ lu ̭ ma. ³ Nymˇ k’oeˇ-ahˇ dm g’aˬ ngeh, aˬ dui neˇ myawˆ ni maˬ paˇ g’eh-aˇ. ⁴ Miˇ tsaˬ heu k’oeˇ taˆ jaˆ-eu yaˇ cmˇ la ̭ k’oeˇ aˬ dui k’aˆ behˆ kah-eu miˇ neh mahˇ lu ̭ ma. Ehˇ k’aw ̭, miˇ tsaˬ shiˬ shaˬ jiˇ g’awˇ mawˇ heu-ahˇ lehˆ dzeh maw ̭-eu miˇ neh mahˇ-eu maˬ ngeuˇ. Bu ̭-iˇ cehˇ-iˇ nya-eu jeˬ-ahˇ maˬ bu ̭ maˬ cehˇ-iˇ nya-eu jeˬ neh bi myo ̭ ahˇ-eu g’aˇ duˬ, mˬ taˆ-euˬ nymˇ dm daˆ maw ̭-eu miˇ neh mahˇ-eu ma. ⁵ Aˬ dui k’oeˇ lo ̭-ehˇ pyeu ̭ laˇ nya ni lehˬ hmˬ-euˬ g’aˬ-aˬ, Miˬyehˇ pyeu ̭-awˇ, aˬ yaw ̭ k’oeˇ lo ̭-ehˇ mˇ-eu lehˇ g’eh-eu k’oeˇ yaw duˬ yaw ciˇ baw ni, aˬ yaw ̭-euˬ Yaw sahˇ Miˬyehˇ aˬ dui-ahˇ bi ̭ le ̭-euˬ meh. ⁶ K’oeˇ miˇ neh, nga ma ̭ aˬ myah lu ̭ nui ma k’aˬ duˬ ni jaˆ ma. Miˇ tsaˬ shiˬ shaˬ jiˇ g’awˇ mawˇ heu la ̭ k’oeˇ k’aˇ jawˇ lu ̭ k’oeˇ keuˆ ni, Sahˬpaˬ Yeˬsuˇ Ka li-ahˇ gaˇ mahˇ kaˬ-a siˬ lehˇ nga ma ̭ siˬ nya ma. ⁷ Aˬ jeˬ miˇ neh ehˇ naˇ, jah-eu jeˬ-ahˇ g’oe-awˇ aˬ dui deh ̭ lu ̭-eu ma. Myaˆ nuiˆ haw mawˇ nya-eu jeˬ-ahˇ g’oe-awˇ deh ̭ lu ̭-eu maˬ ngeuˇ. ⁸ Nga ma ̭ nui ma k’aˬ duˬ ni jaˆ-eu la ̭ k’oeˇ shiˬ shaˬ jiˇ g’awˇ mawˇ heu-ahˇ byehˇ dzeh ya ̭ maw ̭-awˇ, Sahˬpaˬ Miˬyehˇ jawˇ gaˇ g’o ̭ leˇ maw ̭-eu ma. ⁹ Ehˇ k’aw ̭, nymˇ heu nymˇ-ahˇ ya jawˇ-eu maˬ kaˬ, k’oeˇ nymˇ-ahˇ ya jawˇ leˇ-eu maˬ kaˬ, nui jeˬ-ahˇ naˆ maˬ tseˇ Sahˬpaˬ Yeˬsuˇ nui k’ahˇ shiˇ-eu jeˬ-ahˇ dawˬ pehˬ taˬ-eu ma. ¹⁰ Aˬ jeˬ miˇ neh ehˇ naˇ, aˬ dui dawˬ tawˆ lu ̭ Ka li yaˇ k’aˬ daˇ-eu nuiˇ mahˬ mehˬ shi ya uiˬ leˇ jiˇ meh. Tsawˇ haˬ yawˬ g’aˬ na lu ̭ shiˬ shaˬ jiˇ g’awˇ mawˇ heu la ̭ k’oeˇ k’aˇ mˇ k’aˇ shaˇ dzeuˇ-euˬ lo ̭-ehˇ, muiˬ-eu maˬ ehˇ, doeˇ-eu maˬ ehˇ, yawˬ ha-ahˇ k’aˇ o ̭-eu jeˬ za teh ̭-a. ¹¹ Nga ma ̭ Sahˬpaˬ Miˬyehˇ-ahˇ yaw zeu baw-awˇ guˆ-eu siˬ nya-eu miˇ neh, tsawˇ haˬ yawˬ g’aˬ na lu ̭ aˬ yaw ̭ jawˇ paw pyawˇ laˇ ni g’aˬ bi ̭ lu ̭-eu ma. Nga ma ̭ aˬ joˆ-ehˇ g’eh-eu tsawˇ haˬ pyeu ̭-eu gaˇ kawˆ Miˬyehˇ siˬ duˬ meh. Naw ma ̭-euˬ nui ma la ̭ k’oeˇ k’aw ̭, ngaˬ-ahˇ siˬ nya lu ̭ meh lehˇ ngaˇ noeˬ tmˬ-eu ma. ¹² Nga ma ̭-ahˇ naw ma ̭ ha geu ̭ nehˬ la ̭ ni, yawˬ ha-euˬ gaˇ kawˆ naw ma ̭-ahˇ maˬ paˇ bo ̭ ahˇ la ̭ ma. Yawˬ ha nui ma aˬ joˆ-ehˇ taˬ-eu gaˇ kawˆ-ahˇ maˬ shaˇ sawˇ ni, aˬ cawˬ yawˬ ha-ahˇ noeˬ huiˬ laˇ gaˇ teh ̭-ehˇ k’ahˬ sehˇ jehˆ lu ̭-eu tsawˇ haˬ deuˬ mehˬ shi, nga ma ̭-euˬ gaˇ kawˆ naw ma ̭ k’ahˬ sehˇ bi jehˆ maw ̭ miˇ-a. ¹³ Nga ma ̭ uˬ-iˇ-euˬ nga loˇ. Uˬ-iˇ-euˬ ngeuˇ naˇ, Miˬyehˇ hawˇ-eu nga ma ̭-euˬ yaw kaˬ-ahˇ jaˆ lu ̭-uˇ. Nga ma ̭ maˬ uˬ-iˇ ngaˬ loˇ. Maˬ uˬ-iˇ-euˬ ngeuˇ naˇ k’aw ̭, naw ma ̭ g’aˇ duˬ guiˬ lahˬ baw lu ̭-uˇ. ¹⁴ Ka li-euˬ g’oeˇ-eu gaˬ-eu jeˬ nga ma ̭-ahˇ uˆ lahˇ lu ̭-eu meh. Tsawˇ haˬ dawˬ tawˆ lu ̭ g’aˇ duˬ tsawˇ haˬ tiˬ g’aˬ shiˇ dah-euˬ meh lehˇ nga ma ̭ jah duˬ taˬ-euˬ ma. K’oeˇ miˇ neh, dawˬ tawˆ lu ̭ aˬ yaw ̭ nehˬ-ehˇ shiˇ-euˬ gaˇ duˇ-eu meh. ¹⁵ Deh ̭ lu ̭-eu tsawˇ haˬ deuˬ k’aw ̭ yawˬ ha g’aˇ duˬ deh ̭ lu ̭-eu jeˬ maˬ bi pyeu ̭-ehˇ, aˬ yaw ̭ ma ̭ g’aˇ duˬ shiˇ dah-awˇ paˇ bi g’o ̭ deh ̭ laˇ-euˬ g’aˬ-euˬ g’aˇ duˬ teh ̭-ehˇ deh ̭ lu ̭-eu jeˬ bi pyeu ̭ ni, dawˬ tawˆ lu ̭ g’aˇ duˬ aˬ yaw ̭ shiˇ dah-euˬ meh. ¹⁶ Iˬ nah ta ̭ naˇ, shiˬ shaˬ jiˇ myaˆ nuiˆ neh aˬ cawˬ-ahˇ nga ma ̭ maˬ paˇ haw ma. Dzeuˇ laˇ ngeh Ka li-ahˇ shiˬ shaˬ jiˇ myaˆ nuiˆ neh haw-euˬ k’aw ̭, aˬ kaˇ naˇ k’oeˇ lo ̭-ehˇ maˬ paˇ haw ma. ¹⁷ Tsawˇ haˬ tiˬ g’aˬ Ka li la ̭ k’oeˇ jawˇ naˇ, yaw shui ̭ beh paˇ-euˬ tsawˇ haˬ pyeu ̭-eu meh. Yaw oeˇ byoˆ tsehˆ-awˇ, yaw shui ̭ paˇ laˇ-euˬ meh. ¹⁸ Heu deuˬ dawˬ tawˆ lu ̭ Miˬyehˇ neh mˇ-euˬ jeˬ pyeu ̭-eu meh. Ka li-ahˇ g’oe-eu la ̭ k’oeˇ aˬ dui aˬ yaw ̭-ahˇ tsaˬ leˇ tsahˇ leˇ nya ni aˬ yaw ̭ mˇ-awˇ, aˬ cawˬ aˬ yaw ̭-ahˇ tsaˬ leˇ tsahˇ leˇ ni mˇ-eu g’aˇ duˬ aˬ dui-ahˇ aˬ yaw ̭ gaˇ bi ̭ nehˬ la ̭-euˬ meh. ¹⁹ Nga ma ̭ ehˇ maw ̭-eu-aˬ, miˇ tsaˬ zaˬ dawˬ tawˆ lu ̭ Miˬyehˇ-ahˇ tsaˬ leˇ tsahˇ leˇ nya ni, Ka li-ahˇ g’oe-awˇ Miˬyehˇ mˇ lu ̭-eu meh. Aˬ yaw ̭ ma ̭-euˬ iˬ baˇ-ahˇ Miˬyehˇ maˬ juiˇ uiˬ taˬ ni, aˬ yaw ̭ ma ̭ aˬ yaw ̭-ahˇ tsaˬ leˇ tsahˇ leˇ nya ni mehˬ nehˬ-iˇ-eu g’aˇ duˬ, aˬ yaw ̭-euˬ dawˬ nga ma ̭-ahˇ bi ̭ la ̭-euˬ meh. ²⁰ K’oeˇ miˇ neh, nga ma ̭-aˬ, Ka li-euˬ dah zaˇ ngehˬ zaˬ tmˇ zaˬ geu ̭ lu ̭-eu ma. Nga ma ̭-ahˇ g’oe-eu la ̭ k’oeˇ naw ma ̭-ahˇ Miˬyehˇ shaˇ ju lu ̭ gaˇ duˇ meh. Miˬyehˇ-ahˇ tsaˬ leˇ tsahˇ leˇ-awˬ lehˇ, Ka li-euˬ dah zaˇ naw ma ̭-ahˇ shaˇ-eu ma. ²¹ Ka li-aˬ, iˬ baˇ tiˬ paw ̭-iˬ maˬ ahˇ-a. Ehˇ k’aw ̭, Ka li la ̭ k’oeˇ Miˬyehˇ-euˬ yaw tsaˬ yaw dawˇ jeˬ-ahˇ aˬ dui za nya ni, aˬ dui-euˬ g’aˇ duˬ Miˬyehˇ neh Ka li-ahˇ iˬ baˇ bi pyeu ̭-iˇ-euˬ meh.

¹ Naw ma ̭ neh za taˬ-euˬ Miˬyehˇ-euˬ guiˬ lahˬ yaw dzahˇ k’oeˇ yaw ̭ ngeh ̭-ehˇ maˬ bi pyeu ̭-iˇ-eu g’aˇ duˬ, nga ma ̭ Miˬyehˇ nehˬ-ehˇ tiˬ kawˆ lo ̭-ehˇ gaˇ mˇ lu ̭-eu la ̭ k’oeˇ naw ma ̭-ahˇ shaˇ-eu ma. ² Jaˇli ̭ la ̭ k’oeˇ Miˬyehˇ heu lo ̭-ehˇ ehˇ-eu meh. "Aˇ yamˬ yaw muiˬ-ehˇ k’ehˬ laˇ ngeh, naw ma ̭ shaˇ dawˬ ngaˇ naˇ haˬ-awˇ, ka k’o ̭-eu aˇ nah keuˆ le ngeh, naw ma ̭-ahˇ ngaˇ ngehˬ g’eh-euˬ ma." Naˇ haˬ sheˇ. Nymˬ-mˇ aˇ yamˬ k’ehˬ laˇ taˬ-euˬ meh. Iˬ nah ka k’o ̭-eu jeˬ za-eu aˇ nah meh. ³ Nga ma ̭ Miˬyehˇ gaˇ mˇ-eu la ̭ k’oeˇ aˬ cawˬ iˬ baˇ taˬ k’aˇ maˬ bi za-eu g’aˇ duˬ, aˬ cawˬ sahˬ ti ̭ ti ̭ ni gaˇ ma-ahˇ laˆ tsoeˬ-eu jeˬ nga ma ̭ maˬ jahˇ. ⁴ Ehˇ k’aw ̭, k’aˇ mˇ k’aˇ shaˇ-eu yawˬ jeˬ na lu ̭ la ̭ k’oeˇ nga ma ̭ Miˬyehˇ-euˬ zaˬ k’aˆ pyeu ̭-eu gaˇ kawˆ aˬ cawˬ-ahˇ mawˇ leˇ ni, shaˬ-eu zahˬ-eu jeˬ, noeˬ dui noeˬ duiˇ-eu jeˬ, nui ma shaˬ zahˬ na ̭-eu jeˬ, heu deuˬ-ahˇ oˇ oˇ-ehˇ daˬ dui dui lu ̭ ma. ⁵ Aˬ cawˬ neh bi diˬ dui dui-euˬ, tawˬ-ahˇ bi dawˆ-euˬ, tsawˇ haˬ aˇ ma ̭ neh yehˬ bawˬ-ehˇ bi g’eh-euˬ, gaˇ aˇ dzehˬ mˇ dzeuˇ-euˬ, maˬ ya yu ̭ dehˆ-euˬ, maˬ ya dzaˬ maˬ ya dawˇ dehˆ-euˬ, heu deuˬ-ahˇ nga ma ̭ daˬ-euˬ ma. ⁶ Nga ma ̭-euˬ muiˬ-eu shawˇ-eu nui ma, zaˬ siˬ nui gahˇ, oˇ o ̭ coeˇ-eu jeˬ hawˇ-eu, g’awˬ shaˬ gaˬ nya-eu nui ma-ahˇ g’oe g’oe-ehˇ, nga ma ̭ Miˬyehˇ-euˬ zaˬ k’aˆ pyeu ̭-eu gaˇ kawˆ aˬ cawˬ-ahˇ bi mawˇ leˇ-euˬ ma. Muiˬ-eu Shawˇ-eu Yaw sahˇ miˬyehˇ-ahˇ g’oe-eu la ̭ k’oeˇ maˬ ehˇ, ⁷ maˇ jawˆ ni g’eh-eu g’oeˇ-eu gaˬ-eu jeˬ-ahˇ g’oe-eu la ̭ k’oeˇ maˬ ehˇ, Miˬyehˇ-euˬ baoˬ-ahˇ g’oe-eu la ̭ k’oeˇ maˬ ehˇ, k’oeˇ lo ̭-ehˇ bi mawˇ leˇ-euˬ ma. Nga ma ̭-euˬ guiˇ deuˆ-eu keu ka pyeu ̭-eu yaw tsaˬ yaw dawˇ jeˬ-ahˇ, aˇ caˇ aˇ maˇ nyiˬ la ̭ lu ̭ tuˆ tehˬ taˬ-euˬ ma. ⁸ Yaw zeu baw nehˬ la ̭-euˬ jeˬ-ahˇ maˬ ehˇ, daˬ laˆ ga nehˬ la ̭-euˬ jeˬ-ahˇ maˬ ehˇ, yehˬ bawˬ sehˇ lu-ehˇ ehˇ nehˬ la ̭-euˬ jeˬ-ahˇ maˬ ehˇ, ja ceuˬ nehˬ la ̭-euˬ jeˬ-ahˇ maˬ ehˇ, nga ma ̭ ya daˬ-euˬ ma. Nga ma ̭ yaw tsaˬ yaw dawˇ jeˬ ngehˬ-euˬ k’aw ̭, jaˬ myaw ̭ myaw ̭-eu tsawˇ haˬ ngaˇ lehˇ ehˇ laˇ gaˇ ya daˬ-euˬ ma. ⁹ Aˬ cawˬ tiˬ g’aˬ-iˬ maˬ siˬ nya-eu tsawˇ haˬ-ahˇ duˇ k’aw ̭, yawˬ g’aˬ na lu ̭ siˬ nya-eu tsawˇ haˬ ma. Shiˇ leˇ-eu tsawˇ haˬ-ahˇ duˇ k’aw ̭, deh ̭ lu ̭-eu tsawˇ haˬ ma. K’ehˬ dui k’aˆ dui dui nehˬ la ̭-euˬ k’aw ̭, shiˇ gaˇ maˬ keuˆ-euˬ tsawˇ haˬ ma. ¹⁰ Noeˬ shaˬ dui dui lu ̭ gaˇ duˇ k’aw ̭, aˬ myah lu ̭ laˬ k’aˬ cehˇ lu ̭-eu tsawˇ haˬ ma. Iˇ shaˬ shaˬ gaˇ duˇ k’aw ̭, aˬ cawˬ g’awˬ mya ni smˇ muiˬ muiˬ laˇ ni jahˇ nehˬ-euˬ tsawˇ haˬ ma. Tiˬ jeˬ-iˬ maˬ jaˆ gaˇ duˇ k’aw ̭, yawˬ jeˬ na lu ̭ jaˆ ku ̭-eu tsawˇ haˬ ma. ¹¹ Gawˇliˬtu meuˬ-ahˇjawˇ-eu aˬ yui ̭ aˬ nyiˇ deuˬ-oˇ, naw ma ̭-ahˇ bya cehˆ ni ngehˬ cawˬ-eu ma. Nga ma ̭-euˬ nui ma pah dzeh nehˬ-eu ma. ¹² Naw ma ̭ g’aˇ duˬ nga ma ̭-euˬ g’oeˇ-eu gaˬ-eu nui ma piˬ tehˬ taˬ-euˬ maˬ ngeuˇ. Nga ma ̭ g’aˇ duˬ naw ma ̭-euˬ g’oeˇ-eu gaˬ-eu nui ma piˬ tehˬ taˬ-euˬ meh. ¹³ Naw ma ̭-ahˇ ngaˬ-euˬ zaˬ lo ̭-ehˇ sawˇ-awˇ ngehˬ cawˬ lu ̭-eu ma. Naw ma ̭ k’oeˇ taˆ nga ma ̭ nui ma taˬ-eu lo ̭-ehˇ, nga ma ̭ k’oeˇ taˆ naw ma ̭ nui ma taˬ nehˬ la ̭-awˬ. Naw ma ̭-euˬ nui ma jeˇ lo ni pah nehˬ la ̭-awˬ. ¹⁴ Ka li-ahˇ maˬ jah-eu tsawˇ haˬ deuˬ nehˬ-ehˇ nui ma tiˬ gaˇ ta ̭-awˇ taˬ deh ̭. K’oeˇ lo ̭-ehˇ maˬ geu ̭ nya-a. Yaw tsaˬ yaw dawˇ jeˬ hawˇ-eu maˬ tsaˬ maˬ dawˇ-eu jeˬ aˬ joˆ-ehˇ tiˬ gaˇ ta ̭ nya nmˇ. Yaw sheh ̭ hawˇ-eu yaw zahˇ aˬ joˇ-ehˇ tiˬ gaˇ jawˇ nya nmˇ. ¹⁵ Ka li hawˇ-eu Neh ̭ sahˬ paˬ aˬ joˆ-ehˇ tiˬ gaˇ dzoeˇ leˇ nya nmˇ. Ka li-ahˇ jah-eu tsawˇ haˬ-aˬ, Ka li-ahˇ maˬ jah-eu tsawˇ haˬ nehˬ-ehˇ aˬ joˆ-ehˇ bawˆ leˇ nya nmˇ. ¹⁶ Miˬyehˇ-euˬ uˬ duˬ tahˬ nymˇ hawˇ-eu lawˇ ci ̭ zaˬ-euˬ tahˬ pahˬ aˬ ma mawˇ kawˇ aˬ joˆ-ehˇ tiˬ gaˇ jaˆ nya nmˇ. Aˬ dui-aˬ, deh ̭ lu ̭-eu Miˬyehˇ-euˬ uˬ duˬ tahˬ nymˇ pyeu ̭-eu ma. Jaˇli ̭ la ̭ k’oeˇ Miˬyehˇ heu lo ̭-ehˇ ehˇ taˬ-euˬ meh. "Ngaˬ-euˬ tsawˇ haˬ nehˬ-ehˇ jawˇ-awˇ, yaw ̭ ma ̭ nehˬ-ehˇ cah ma. Ngaˇ yaw ̭ ma ̭-euˬ Miˬyehˇ geu ̭-awˇ, yaw ̭ ma ̭ ngaˬ-euˬ tsawˇ haˬ geu ̭ ma." ¹⁷ "Aˬ yaw ̭ ma ̭-ahˇ naw ma ̭ g’awˬ-awˇ, byehˇ dzeh ya ̭-awˇ doˆ laˇ-awˬ" lehˇ, Sahˬpaˬ Miˬyehˇ ehˇ taˬ-euˬ meh. "Maˬ shawˇ-eu jeˬ-ahˇ taˬ toeˬ ciˆ. Naw ma ̭-ahˇ ngaˇ ha geu ̭ nehˬ ma. ¹⁸ Ngaˇ naw ma ̭-euˬ aˬ da geu ̭-awˇ, naw ma ̭ ngaˬ-euˬ zaˬ geu ̭ ma lehˇ, Baoˬ huiˬ Sahˬpaˬ Miˬyehˇ ehˇ meh."

¹ Ngaˇ gaˬ dui dui-eu cawˬ deuˬ-oˇ, Miˬyehˇ aˬ dui-ahˇ k’oeˇ lo ̭-ehˇ saˇ jaˇ dzaˬ taˬ-euˬ miˇ neh, aˬ dui-euˬ g’awˇ mawˇ hawˇ-eu sa ̭ laˇ-ahˇ bi jaw ̭-iˇ nya-eu yawˬ jeˬ na lu ̭-ahˇ tsiˬ shawˇ dzeh-awˇ, Miˬyehˇ-ahˇ yaw zeu baw-awˇ guˆ-eu la ̭ k’oeˇ yaw muiˬ yaw shawˇ shawˇ-ehˇ byah byah ni deh ̭ kaˇ-euˇ. ² Nga ma ̭ g’aˇ duˬ naw ma ̭-euˬ nui ma pah nehˬ la ̭-awˬ. Tsawˇ haˬ tiˬ g’aˬ-ahˇ-iˬ nga ma ̭ maˬ mˇ lehˬ haw-aˬ. Tsawˇ haˬ tiˬ g’aˬ-ahˇ-iˬ nga ma ̭ maˬ laˆ cawˆ haw-aˬ. Tsawˇ haˬ tiˬ g’aˬ-ahˇ-iˬ nga ma ̭ maˬ myaw ̭ maˬ shuiˇ haw-aˬ. ³ Ngaˇ heu lo ̭-ehˇ ehˇ-eu-aˬ, naw ma ̭ k’oeˇ taˆ iˬ baˇ taˬ-awˇ ehˇ-eu maˬ ngeuˇ. Ngaˬ neh ehˇ dzeuˇ ya ̭-euˬ lo ̭-ehˇ, deh ̭ ngeh maˬ ehˇ, shiˇ ngeh maˬ ehˇ, maˬ g’awˬ-iˇ ni naw ma ̭-ahˇ nga ma ̭ g’oeˇ lu ̭ gaˬ lu ̭ ma. ⁴ Naw ma ̭-ahˇ ngaˇ bya cehˆ ni ngehˬ cawˬ lu ̭-eu ma. Naw ma ̭-ahˇ ngaˇ nui k’ahˇ shiˇ dui dui nya. Nga ma ̭ shaˬ zahˬ ya tahˬ puˬ dui dui k’aw ̭, ngaˬ-euˬ nui ma k’aˬ duˬ ni jaˆ lu ̭ ma. Ngaˇ laˬ k’aˬ cehˇ-eu byah k’aˇ lu ̭ ma. ⁵ Nga ma ̭ Maˬgeˬdawˇniˆ miˇ k’ahˬ-ahˇ laˇ keuˆ-euˬ k’aw ̭, yaw saˇ maˬ o ̭ nya. Yawˬ paw na lu ̭ shaˬ zahˬ keuˆ le teuˇ le-awˇ, aˬ cawˬ nehˬ-ehˇ ya ja dzaˬ-eu uˬ ta ̭, nui ma la ̭ k’oeˇ guˆ-eu jeˬ pi lu ̭-eu ma. ⁶ Ehˇ k’aw ̭, nui ma cawˆ-eu deuˬ-ahˇ g’aˬ bi ̭-eu Miˬyehˇ-aˬ, Tiˇtuˆ-ahˇ bi laˇ-eu la ̭ k’oeˇ nga ma ̭-euˬ nui ma-ahˇ g’aˬ bi ̭ lahˬ la ̭-euˬ meh. ⁷ Aˬ yaw ̭ laˇ-euˬ baˬ da neh teh ̭-ehˇ nga ma ̭ g’aˬ ahˇ laˇ-euˬ maˬ ngeuˇ. Naw ma ̭ aˬ yaw ̭-ahˇ aˬ joˆ-ehˇ g’aˬ bi ̭-euˬ gaˇ kawˆ aˬ yaw ̭ ja mehˬ nehˬ la ̭-euˬ miˇ neh, nga ma ̭ g’aˬ ahˇ laˇ-euˬ ma. Naw ma ̭ ngaˬ-ahˇ aˇ naˆ ni mawˇ maw ̭-eu gaˇ kawˆ maˬ ehˇ, pyeu ̭ dzeuˇ ya ̭-euˬ gaˇ kawˆ-ahˇ naw ma ̭ aˇ naˆ ni noeˬ shaˬ lu ̭-eu gaˇ kawˆ maˬ ehˇ, naw ma ̭ ngaˇ jawˇ paw aˇ naˆ ni pyawˬ maw ̭-eu gaˇ kawˆ maˬ ehˇ, nga ma ̭-ahˇ aˬ yaw ̭ dzawˇ mehˬ la ̭-euˬ meh. K’oeˇ miˇ neh, ngaˇ laˬ k’aˬ cehˇ-eu maˬ ehˇ jiˇ coeˇ nya. ⁸ Ngaˬ neh bo ̭-euˬ sahˬ bo ̭ k’oeˇ ta ̭ naw ma ̭-ahˇ bi noeˬ shaˬ-euˬ k’aw ̭, sahˬ bo ̭ k’oeˇ ta ̭-ahˇ ngaˬ neh bo ̭-euˬ gaˇ ngaˇ nui ma maˬ saˇ-ehˇ maˬ g’eh. Sahˬ bo ̭ k’oeˇ ta ̭ baˬ da neh naw ma ̭ tiˬ k’ehˬ tiˬ yamˬ ya noeˬ shaˬ lu ̭ gaˇ ngaˇ ya mawˇ law nmˇ-aˬ, ngaˇ nui ma maˬ saˇ-eu k’aw ̭ baw teh ̭-a. ⁹ Ehˇ k’aw ̭, nymˬ-mˇ ngaˇ laˬ k’aˬ cehˇ-eu ma. Heu lo ̭-ehˇ ehˇ ngeh, naw ma ̭ noeˬ shaˬ ni ya bo ̭-euˬ miˇ neh laˬ k’aˬ cehˇ-eu ma lehˇ ehˇ maw ̭-eu maˬ ngeuˇ. Naw ma ̭ k’oeˇ lo ̭-ehˇ noeˬ shaˬ-euˬ k’oeˇ baˬ da neh, naw ma ̭ yaw deh ̭ deh ̭ paˇ-euˬ gaˇ ngaˇ laˬ k’aˬ cehˇ-eu ma lehˇ ehˇ maw ̭-eu ma. Nga ma ̭ baˬ da neh naw ma ̭ maˬ ya smˬ-iˇ-eu g’aˇ duˬ, Miˬyehˇ nui ma tsaˬ-eu la ̭ k’oeˇ naw ma ̭ k’oeˇ lo ̭-ehˇ ya noeˬ shaˬ-euˬ jeˬ pyeu ̭-eu meh. ¹⁰ Miˬyehˇ nui ma tsaˬ-eu la ̭ k’oeˇ ya noeˬ shaˬ-eu jeˬ-aˬ, nui ma-ahˇ bi noeˬ paˇ-awˇ, ka k’o ̭-eu jeˬ za ni sheuˬ g’eh-eu jeˬ pyeu ̭-eu meh. K’oeˇ baˬ da neh nui ma maˬ saˇ-ehˇ g’eh-eu maˬ loˬ-a. Ehˇ k’aw ̭, tsawˇ haˬ zaˬ-ahˇ ta ̭ leˇ-awˇ noeˬ shaˬ-eu jeˬ-aˬ, shiˇ-eu jeˬ-ahˇ uˬ duˬ duˬ leˇ-eu meh. ¹¹ Naw ma ̭ neh noeˬ shaˬ-euˬ k’oeˇ-ahˇ Miˬyehˇ aˬ joˆ-ehˇ jahˇ-euˬ gaˇ shaˇ noeˬ haw sheˇ. Naw ma ̭ guiˬ lahˬ sa ̭ laˇ paw nui ma keuˆ dui dui laˇ-euˬ meh. Naw ma ̭ yawˬ ha maˬ mˇ lehˬ-euˬ gaˇ kawˆ bi siˬ bi mawˇ maw ̭ dui dui laˇ-euˬ meh. Yaw tsaˬ yaw dawˇ la ̭ k’oeˇ nui ma pehˇ-eu, k’ahˬ lahˇ-eu, ngaˬ-ahˇ mawˇ maw ̭ dui dui-eu, ngaˬ-euˬ g’aˇ duˬ nui ma keuˆ dui dui-eu, yaw lehˬ mˇ gaˇ yaw k’aˆ-ehˇ daˇ nehˬ maw ̭-eu, heu deuˬ naw ma ̭-euˬ la ̭ k’oeˇ pyeu ̭ doˆ laˇ-euˬ meh. Yawˬ jeˬ na lu ̭ la ̭ k’oeˇ yawˬ ha maˬ lehˬ maˬ ca-eu gaˇ kawˆ bya cehˆ ni doˆ laˇ ni naw ma ̭ deh ̭-euˬ meh. ¹² K’oeˇ miˇ neh, sahˬ bo ̭ k’oeˇ ta ̭ ngaˇ bo ̭-euˬ k’aw ̭, aˬ cawˬ-ahˇ mˇ lehˬ-euˬ tsawˇ haˬ g’aˇ duˬ bo ̭-euˬ maˬ ngeuˇ. Aˬ cawˬ mˇ lehˬ gaˇ ya daˬ-euˬ tsawˇ haˬ g’aˇ duˬ bo ̭-euˬ k’aw ̭ maˬ ngeuˇ. Nga ma ̭ g’aˇ duˬ naw ma ̭ nui ma aˇ naˆ ni keuˆ-eu gaˇ kawˆ Miˬyehˇ mehˬ shi naw ma ̭ siˬ duˬ mawˇ duˬ nya ni bo ̭-euˬ ma. ¹³ K’oeˇ baˬ da neh, nga ma ̭-euˬ nui ma g’aˬ tiˬ tiˆ lahˬ laˇ-euˬ ma. Nga ma ̭-euˬ nui ma g’aˬ tiˬ tiˆ lahˬ laˇ-euˬ teh ̭ maˬ ngeuˇ-a siˬ. Tiˇ tuˆ-euˬ nui ma g’aˬ doeˇ dah k’aˇ za ni naw ma ̭ dawˬ tawˆ lu ̭ caw ba nehˬ-euˬ miˇ neh Tiˇtuˆ laˬ k’aˬ cehˇ-eu k’oeˇ, nga ma ̭-ahˇ laˬ k’aˬ cehˇ-eu jeˬ bi lahˬ laˇ gaˇ duˇ miˇ-a. ¹⁴ Naw ma ̭-euˬ gaˇ kawˆ Tiˇtuˆ-ahˇ ngaˇ k’ahˬ sehˇ jehˆ-euˬ ma. K’oeˇ lo ̭-ehˇ k’ahˬ sehˇ jehˆ-euˬ baˬ da neh ngaˇ daˬ ga k’aˇ maˬ za. Nga ma ̭ naw ma ̭-ahˇ aˬ myah lu ̭ k’aˇ ngeuˇ-eu lo ̭-ehˇ dawˇ coe ni ehˇ-euˬ ma. Tiˇtuˆ mehˬ shi nga ma ̭ k’ahˬ sehˇ jehˆ-euˬ k’oeˇ k’aw ̭, k’aˇ ngeuˇ-eu lo ̭-ehˇ naw ma ̭-ahˇ ehˇ-eu ma. ¹⁵ Aˬ yaw ̭ neh naw ma ̭-ahˇ mehˬ nehˬ tsoˆ nehˬ-euˬ jeˬ-ahˇ naw ma ̭ naˇ haˬ geu ̭ maw ̭-eu nui ma ahˇ-awˇ, Miˬyehˇ mehˬ shi naw ma ̭ guˆ-awˇ yaw dzuˬ dzuˬ-eu la ̭ k’oeˇ aˬ yaw ̭-ahˇ ha geu ̭ nehˬ-euˬ gaˇ aˬ yaw ̭ paˇ noeˬ mawˇ leˇ ngeh, aˬ yaw ̭-euˬ nui ma la ̭ k’oeˇ naw ma ̭-ahˇ gaˬ-eu jeˬ bi lehˬ lehˬ laˇ-euˬ meh. ¹⁶ Ngaˇ naw ma ̭-ahˇ nui ma taˬ coeˇ-eu miˇ neh laˬ k’aˬ cehˇ dui dui nya.

¹ Aˬ yui ̭ aˬ nyiˇ Ka li zaˬ deuˬ-oˇ, Maˬgeˬdawˇniˆ miˇ k’ahˬ-ahˇ jawˇ-eu Ka li zaˬ aˇ muˇ deuˬ k’oeˇ taˆ Miˬyehˇ guiˬ lahˬ keuˆ le-euˬ gaˇ kawˆ naw ma ̭-ahˇ bi si ̭ maw ̭ miˇ-a. ² Shaˬ-eu zahˬ-eu g’awˬ mya jeˬ lawˬ haw gaˇ aˬ yaw ̭ ma ̭ ya daˬ-euˬ k’aw ̭, maˬ ehˇ jiˇ coeˇ ni la ̭ k’aˬ cehˇ-eu meh. K’oeˇ miˇ neh aˬ yaw ̭ ma ̭ yaw shaˬ shaˬ dui dui k’aw ̭, damˬ nehˬ-eu paw tiˬ paw ̭-iˬ g’aˬ byehˆ maˬ byehˆ-a. ³ Aˬ yaw ̭ ma ̭ k’aˇ g’eh nya gaˇ keuˆ ni damˬ nehˬ-eu uˬ ta ̭, maˬ g’eh nya gaˇ keuˆ ni k’aw ̭ damˬ-eu meh lehˇ naw ma ̭-ahˇ ngaˇ ehˇ tsehˆ peuˬ ma. Aˬ yaw ̭ ma ̭ yawˬ haˇ yawˬ ha noeˬ siˬ noeˬ mawˇ-eu la ̭ k’oeˇ, ⁴ Yuˇdaˆ miˇ k’ahˬ-ahˇ jawˇ-eu Miˬyehˇ-euˬ tsawˇ haˬ-ahˇ caw ba nehˬ-eu g’aˇ duˬ bi damˬ nehˬ la ̭ lehˇ nga ma ̭-ahˇ shaˇ-eu meh. ⁵ K’oeˇ-aˬ, nga ma ̭ neh noeˬ tmˬ taˬ-euˬ ta ̭-ehˇ dzehˬ leˇ taˬ-euˬ jeˬ pyeu ̭-eu meh. Yaw beh tiˬ tiˆ, aˬ yaw ̭ ma ̭-euˬ g’awˇ mawˇ Sahˬpaˬ Yeˬsuˇ-ahˇ a nehˬ-euˬ meh. Nyiˬ tiˆ tiˬ tiˆ, Miˬyehˇ nui ma tsaˬ-eu lo ̭-ehˇ aˬ yaw ̭ ma ̭-euˬ g’awˇ mawˇ nga ma ̭-ahˇ a nehˬ la ̭-euˬ meh. ⁶ K’oeˇ miˇ neh, Tiˇtuˆ aˬ yaw ̭ naw ma ̭ jawˇ gaˇ g’oeˇ-eu gaˬ-eu jeˬ-ahˇ ta ̭-eu gaˇ heu hmˬ mˇ-eu g’aˇ duˬ dahˬ beh nehˬ le-euˬ g’aˬ pyeu ̭-eu lo ̭-ehˇ, aˇ saˬ saˬ ngeh keuˆ ni mˇ daˆ le ̭-eu g’aˇ duˬ aˬ yaw ̭-ahˇ nga ma ̭ g’aˬ bi ̭-euˬ ma. ⁷ Naw ma ̭-aˬ, yawˬ paw na lu ̭ maˬ gaˇ dui dui-eu meh. Jah-eu paw maˬ ehˇ, ngehˬ-eu tmˇ-eu paw maˬ ehˇ, zaˬ siˬ tsawˇ gahˇ paw maˬ ehˇ, caw ba nehˬ maw ̭-eu nui ma ahˇ-eu paw maˬ ehˇ, nga ma ̭-ahˇ g’oeˇ-eu gaˬ-eu paw maˬ ehˇ, maˬ gaˇ dzehˬ-eu meh. K’oeˇ miˇ neh, g’oeˇ-eu gaˬ-eu jeˬ-ahˇ ta ̭-eu gaˇ heu hmˬ la ̭ k’oeˇ k’aw ̭, nui ma keuˆ-awˇ bi damˬ maw ̭-eu ma. ⁸ Maˬ mˇ-ehˇ maˬ g’eh nya-a lehˇ naw ma ̭-ahˇ ciˬ pi nehˬ-eu maˬ ngeuˇ. Aˬ cawˬ caw ba maw ̭-eu nui ma aˇ naˆ ni ahˇ-eu gaˇ kawˆ naw ma ̭-ahˇ bi siˬ bi mawˇ-eu la ̭ k’oeˇ, naw ma ̭-euˬ g’oeˇ-eu gaˬ-eu jeˬ aˇ naˆ ni duˬ-eu ciˇ-eu gaˇ kawˆ ngaˇ siˬ duˬ maw ̭-eu ma. ⁹ Aˬ dui-euˬ Sahˬpaˬ Yeˬsuˇ Ka li neh mˇ nehˬ la ̭-euˬ guiˬ lahˬ-ahˇ naw ma ̭ siˬ nya lu ̭ meh. Aˬ yaw ̭ smˇ muiˬ muiˬ dui dui-eu k’aw ̭, naw ma ̭ g’aˇ duˬ iˇ shaˬ zaˬ pyeu ̭ le-euˬ meh. Aˬ yaw ̭ iˇ shaˬ shaˬ-euˬ baˬ da neh naw ma ̭ smˇ muiˬ bi muiˬ laˇ-eu g’aˇ duˬ, k’oeˇ lo ̭-ehˇ mˇ le-euˬ meh. ¹⁰ Gaˇ kawˆ heu hmˬ-ahˇ ta ̭ leˇ-awˇ, ngaˇ naw ma ̭-ahˇ heu lo ̭-ehˇ g’aˬ bi ̭-eu ma. Miˇ nui k’o ̭ naw ma ̭ neh beh-euˬ gaˇ heu hmˬ nymˬ-mˇ mˇ luiˆ jiˇ-eu tsaˬ meh. Naw ma ̭-aˬ, mˇ beh beh-euˬ deuˬ pyeu ̭-eu teh ̭-ehˇ maˬ ngeuˇ ni, nui ma keuˆ beh beh-euˬ deuˬ k’aw ̭ pyeu ̭-eu meh. ¹¹ Gaˇ heu hmˬ-ahˇ tiˬ poˆ paˇ daw ̭ leˇ-awˇ mˇ luiˆ-awˬ. Aˇ dahˬ beh ngeh nui ma keuˆ-euˬ lo ̭-ehˇ mˇ luiˆ-eu g’aˇ duˬ k’aw ̭ nui ma keuˆ-eu la ̭ k’oeˇ, naw ma ̭ k’aˇ g’eh nya-eu lo ̭-ehˇ damˬ-awˬ. ¹² Damˬ maw ̭-eu nui ma ahˇ naˇ, naw ma ̭ k’aˇ g’eh nya-eu lo ̭-ehˇ damˬ-euˬ gaˇ Miˬyehˇ ha geu ̭ nehˬ la ̭ teh ̭-a. Maˬ g’eh nya gaˇ keuˆ ni damˬ-awˬ lehˇ maˬ ehˇ-a. ¹³ Aˬ cawˬ-euˬ k’aˆ behˆ bi pyaˇ dzehˬ-awˇ naw ma ̭-euˬ k’aˆ behˆ bi kah dzehˬ-eu lehˇ ngaˇ jahˇ-eu maˬ ngeuˇ. ¹⁴ Ehˇ k’aw ̭, nymˬ-mˇ naw ma ̭ maˬ gaˇ dzehˬ-eu miˇ neh, shaˬ-eu deuˬ-ahˇ caw ba nehˬ-eu tsaˬ meh. Aˬ kaˇ aˬ cawˬ maˬ gaˇ dzehˬ laˇ-awˇ naw ma ̭ shaˬ le ngeh, aˬ cawˬ naw ma ̭-ahˇ paˇ caw ba nehˬ la ̭ teh ̭-a. K’oeˇ lo ̭-ehˇ mˇ-eu la ̭ k’oeˇ tiˬ paw tiˇ paw di laˇ teh ̭-a. ¹⁵ Jaˇli ̭ la ̭ k’oeˇ ehˇ taˬ-euˬ lo ̭-ehˇ, "G’awˬ mya ni g’oˆ uiˬ-euˬ g’aˬ maˬ jaˆ myaˬ dzehˬ-ehˇ, ui cuiˆ teh ̭-ehˇ g’oˆ uiˬ-euˬ g’aˬ maˬ jaˆ cuiˆ dzehˬ-aˇ." ¹⁶ Ngaˇ naw ma ̭ g’aˇ duˬ nui ma keuˆ-eu lo ̭-ehˇ, Tiˇtuˆ k’aw ̭ nui ma keuˆ ni Miˬyehˇ jahˇ-euˬ miˇ neh, Miˬyehˇ-euˬ guiˬ lahˬ-ahˇ ja ceuˬ ngeh maˬ jiˇ nya. ¹⁷ Nga ma ̭ neh shaˇ-euˬ dawˬ-ahˇ aˬ yaw ̭ geu ̭ nehˬ la ̭-euˬ teh ̭-ehˇ maˬ ngeuˇ ni, naw ma ̭-ahˇ caw ba nehˬ maw ̭-eu nui ma ahˇ-eu miˇ neh, aˬ yawˇ yaw ̭ noeˬ tsehˆ-awˇ naw ma ̭ jawˇ gaˇ oe-euˬ meh. ¹⁸ Laˬ k’aˬ cehˇ-eu Guiˬ lahˬ dawˬ mehˬ-eu gaˇ la ̭ k’oeˇ Ka li zaˬ aˇ muˇ dawˬ tawˆ lu ̭ yaw zeu baw dui dui-eu nga ma ̭-euˬ aˬ nyiˇ tiˬ g’aˬ-ahˇ k’aw ̭, aˬ yaw ̭ nehˬ-ehˇ bi oe caw-euˬ ma. ¹⁹ K’oeˇ uˬ ta ̭, nga ma ̭ la ̭ k’oeˇ caw ba nehˬ maw ̭-eu nui ma ahˇ-eu gaˇ kawˆ aˬ cawˬ-ahˇ bi siˬ bi mawˇ-eu g’aˇ duˬ, Sahˬpaˬ Yeˬsuˇ-euˬ yaw sheh ̭ k’ahˬ sehˇ doˆ laˇ ni g’oeˇ-eu gaˬ-eu jeˬ-ahˇ ta ̭-eu gaˇ heu hmˬ-ahˇ nga ma ̭ mˇ mˇ-ehˇ cah ngeh, nga ma ̭ nehˬ-ehˇ bi cah-eu lehˇ aˬ yaw ̭-ahˇ Ka li zaˬ aˇ muˇ deuˬ neh tseˇ doˆ taˬ-euˬ meh. ²⁰ Nui ma keuˆ-awˇ damˬ taˬ-euˬ pyuˇ heu deuˬ-ahˇ nga ma ̭ tuˆ tehˬ-awˇ gaˇ mˇ ngeh, aˬ cawˬ iˬ baˇ taˬ-eu jeˬ maˬ bi doˆ laˇ ni yahˇ lu ̭ ma. ²¹ Sahˬpaˬ Miˬyehˇ mehˬ shi teh ̭-ehˇ maˬ ngeuˇ ni, tsawˇ haˬ zaˬ-euˬ mehˬ shi k’aw ̭ dawˇ coe ni mˇ-eu g’aˇ duˬ nga ma ̭ noeˬ tsehˆ taˬ-euˬ ma. ²² K’oeˇ miˇ neh, nga ma ̭-euˬ aˬ nyiˇ heu g’aˬ-ahˇ aˬ yaw ̭ ma ̭ nehˬ-ehˇ k’ehˇ g’eh le ̭-euˬ ma. Nga ma ̭ aˬ yaw ̭-ahˇ g’awˬ mya poˆ lawˬ haw-eu la ̭ k’oeˇ, aˬ yaw ̭ aˬ myah lu ̭ caw ba maw ̭-eu nui ma ahˇ-eu gaˇ kawˆ siˬ duˬ taˬ-euˬ ma. Nymˬ-mˇ aˬ yaw ̭ naw ma ̭-ahˇ jah coeˇ-eu nui ma paˇ ahˇ-eu miˇ neh, yaw beh naˆ maˬ tseˇ nui ma keuˆ dui dui lu ̭ meh. ²³ Tiˇtuˆ g’aˬ-aˬ, ngaˬ-euˬ gaˇ mˇ cawˬ pyeu ̭-eu lo ̭-ehˇ, ngaˬ nehˬ-ehˇ tiˬ kawˆ lo ̭-ehˇ naw ma ̭-ahˇ caw ba-eu gaˇ mˇ lu ̭ meh. Aˬ yaw ̭ nehˬ-ehˇ oe caw-euˬ aˬ yui ̭ aˬ nyiˇ nui deuˬ-aˬ, Ka li-euˬ yaw sheh ̭ k’ahˬ sehˇ bi doˆ laˇ-eu g’aˇ duˬ Ka li zaˬ aˇ muˇ deuˬ-euˬ dah zaˇ oe-euˬ meh. ²⁴ Naw ma ̭-euˬ gaˇ kawˆ nga ma ̭ neh k’ahˬ sehˇ jehˆ-euˬ lo ̭-ehˇ ngeuˇ ngaˇ lehˇ, Ka li zaˬ aˇ muˇ dawˬ tawˆ lu ̭-ahˇ bi siˬ bi mawˇ duˬ leˇ-eu g’aˇ duˬ, naw ma ̭-euˬ g’oeˇ-eu gaˬ-eu jeˬ aˬ yaw ̭ ma ̭-ahˇ mehˬ nehˬ-awˬ.

¹ Yuˇdaˆ miˇ k’ahˬ-ahˇ jawˇ-eu Miˬyehˇ-euˬ tsawˇ haˬ deuˬ-ahˇ caw ba-eu pyuˇ daˬ gaˇ kawˆ naw ma ̭-ahˇ ngaˇ sahˬ bo ̭ bo ̭ nehˬ-eu maˬ paˇ loˬ meh. ² Naw ma ̭ caw ba maw ̭-eu nui ma ahˇ meh lehˇ ngaˇ siˬ nya-awˇ, Maˬgeˬdawˇniˆ miˇ k’ahˬ-ahˇ jawˇ-eu Ka li zaˬ deuˬ-ahˇ naw ma ̭-euˬ gaˇ kawˆ ngaˇ k’ahˬ sehˇ jehˆ mehˬ g’aˬ-euˬ ma. "Aˬgaˬyaˇ miˇ k’ahˬ-ahˇ jawˇ-eu Ka li zaˬ deuˬ-aˬ, miˇ nui k’o ̭ ba neh caw ba nehˬ-eu g’aˇ duˬ lehˬ hmˬ dah taˬ-euˬ meh" lehˇ ngaˇ ehˇ nehˬ-euˬ ma. Naw ma ̭ nui ma keuˆ-eu gaˇ kawˆ ya gaˬ ngeh, aˬ yaw ̭ ma ̭ dawˬ tawˆ lu ̭ ehˇ g’aˬ ni nui ma keuˆ laˇ-euˬ meh. ³ Naw ma ̭ gaˇ kawˆ nga ma ̭ neh k’ahˬ sehˇ jehˆ taˬ-euˬ k’oeˇ yaw ̭ ngeh ̭-ehˇ maˬ ya bi pyeu ̭-eu g’aˇ duˬ, aˬ nyiˇ heu deuˬ-ahˇ naw ma ̭ jawˇ gaˇ ngaˇ k’ehˇ g’eh le ̭-euˬ ma. Ngaˬ neh ehˇ dzeuˇ-euˬ lo ̭-ehˇ caw ba-eu g’aˇ duˬ naw ma ̭ lehˬ hmˬ dah taˬ-euˬ duˇ. ⁴ Ehˇ k’aw ̭, Maˬgeˬdawˇniˆ miˇ k’ahˬ-ahˇ jawˇ-eu tsawˇ haˬ deuˬ ngaˬ nehˬ-ehˇ oe ngeh, naw ma ̭ maˬ lehˬ hmˬ taˬ ni jawˇ gaˇ ya mawˇ naˇ, naw ma ̭ daˬ ga-eu gaˇ kawˆ ngaˇ maˬ paˇ ehˇ nahˇ miˇ-a. Naw ma ̭-ahˇ jah jah-ehˇ k’ahˬ sehˇ jehˆ-euˬ nga ma ̭ k’aw ̭ aˇ naˆ ni daˬ ga nmˇ. ⁵ K’oeˇ miˇ neh, ngaˬ-euˬ g’awˇ mawˇ naw ma ̭ jawˇ gaˇ maˬ oe mi naˆ-ehˇ, naw ma ̭ neh damˬ ma lehˇ ehˇ taˬ-euˬ lo ̭-ehˇ bi laˆ dah taˬ jiˇ-eu g’aˇ duˬ, aˬ nyiˇ heu deuˬ-ahˇ jeˬ huˬ k’ehˇ g’eh le ̭-eu tsaˬ-eu duˇ lehˇ ngaˇ noeˬ-eu ma. K’oeˇ miˇ neh, ngaˇ oe keuˆ ngeh naw ma ̭ laˆ uiˬ g’aˬ jiˇ-awˇ, aˬ cawˬ ehˇ-eu miˇ neh damˬ-eu maˬ ngeuˇ-ehˇ, yawˬ ha nui ma keuˆ-awˇ damˬ-euˬ jeˬ pyeu ̭-eu gaˇ kawˆ aˬ cawˬ-ahˇ mawˇ leˇ teh ̭-a. ⁶ Ngaˇ ehˇ maw ̭-eu-aˬ, heu lo ̭-ehˇ ma. Ui cuiˆ teh ̭-ehˇ sehˬ-euˬ tsawˇ haˬ-aˬ, ui cuiˆ teh ̭-ehˇ ya yehˬ teh ̭-a. G’awˬ mya ni sehˬ-euˬ tsawˇ haˬ-aˬ, g’awˬ mya ni ya yehˬ teh ̭-a. ⁷ K’oeˇ miˇ neh, aˬ yaw ̭ g’aˬ yaw ̭ yawˬ ha neh k’aˇ noeˬ tsehˆ taˬ-euˬ lo ̭-ehˇ damˬ-awˬ. Nui ma maˬ keuˆ ni damˬ-eu maˬ ehˇ, aˬ cawˬ ehˇ-eu miˇ neh damˬ-eu maˬ ehˇ, taˬ bi pyeu ̭. Aˬ jeˬ miˇ neh ehˇ naˇ, laˬ k’aˬ tiˬ cehˇ damˬ-eu tsawˇ haˬ-ahˇ Miˬyehˇ gaˬ-eu meh. ⁸ Naw ma ̭ yawˬ ha g’aˇ duˬ k’aˇ loˬ-eu jeˬ tiˬ byah ni jaˆ laˇ-awˇ, aˬ cawˬ-ahˇ caw ba nehˬ nya-eu g’aˇ duˬ aˇ dzehˬ k’aw ̭ tiˬ byah ni jaˆ laˇ ni, Miˬyehˇ naw ma ̭-ahˇ guiˬ lahˬ bi ̭ nehˬ nya-eu meh. ⁹ Jaˇli ̭ la ̭ k’oeˇ heu lo ̭-ehˇ ehˇ taˬ-euˬ meh. "Shaˬ zaˬ zahˬ zaˬ deuˬ-euˬ g’aˇ duˬ, g’awˬ mya ni damˬ nehˬ-eu tsawˇ haˬ, yawˬ ha neh g’awˬ shaˬ gaˬ-euˬ k’oeˇ, mˬ maˬ maˬ byaˆ zaˇ ziˇ zi ̭ meh." ¹⁰ Ka-eu g’aˇ duˬ siˬ yoeˬ hawˇ-eu dzaˬ-eu g’aˇ duˬ kaˬ muˇ bi ̭-eu Miˬyehˇ-aˬ, naw ma ̭ damˬ-eu jeˬ-ahˇ ta ̭ leˇ-eu loˬ-eu siˬ yoeˬ nuiˆ yoeˬ dawˬ tawˆ lu ̭ bi ̭ nehˬ la ̭-eu uˬ ta ̭, naw ma ̭ nui ma keuˆ-awˇ damˬ-eu jeˬ siˬ le loˆ le-awˇ g’awˬ mya ni za laˇ ni caw ba teh ̭-a. ¹¹ Naw ma ̭ neh damˬ-euˬ jeˬ-ahˇ nga ma ̭ sha miˇ nehˬ-eu baˬ da neh, aˬ cawˬ g’awˬ mya ni Miˬyehˇ-ahˇ ja ceuˬ ni naw ma ̭ aˬ myah lu ̭ damˬ nya-eu g’aˇ duˬ, Miˬyehˇ naw ma ̭-ahˇ smˇ muiˬ bi muiˬ laˇ teh ̭-a. ¹² Aˬ jeˬ miˇ neh ehˇ naˇ, naw ma ̭ heu lo ̭-ehˇ mˇ-eu heu-aˬ, Miˬyehˇ-euˬ tsawˇ haˬ loˬ lu ̭-eu tsahˇ-ahˇ gaˇ dahˇ tsoeˬ leˇ-eu teh ̭ maˬ ngeuˇ-a. Miˬyehˇ-euˬ guiˬ lahˬ-ahˇ ja ceuˬ-eu jeˬ k’aw ̭ maˬ ehˇ jiˇ coeˇ ni bi doˆ laˇ-eu meh. ¹³ Naw ma ̭ Ka li-euˬ Laˬ k’aˬ cehˇ-eu Guiˬ lahˬ dawˬ-ahˇ saˇ jaˇ zi ̭ gaˇ maˬ ehˇ, Miˬyehˇ-euˬ tsawˇ haˬ k’oeˇ deuˬ hawˇ-eu aˬ yaw ̭-ahˇ nui ma keuˆ-eu la ̭ k’oeˇ damˬ nehˬ gaˇ maˬ ehˇ, aˬ cawˬ ya mawˇ ngeh, naw ma ̭ neh mˇ-euˬ gaˇ heu-ahˇ haw-awˇ tsawˇ haˬ g’awˬ mya ni Miˬyehˇ-euˬ yaw sheh ̭ k’ahˬ sehˇ-ahˇ ja ceuˬ teh ̭-a. ¹⁴ Aˬ cawˬ naˆ maˬ tseˇ huiˬ-eu Miˬyehˇ-euˬ guiˬ lahˬ naw ma ̭ la ̭ k’oeˇ ahˇ-eu miˇ neh, aˬ yaw ̭ ma ̭ naw ma ̭-ahˇ gaˬ dui g’oeˇ dui dui-eu la ̭ k’oeˇ, naw ma ̭ g’aˇ duˬ guiˬ lahˬ shaˇ teh ̭-a. ¹⁵ Miˬyehˇ aˬ dui-ahˇ maˬ ehˇ jiˇ coeˇ-eu la ̭ sawˬ bi ̭ la ̭-euˬ miˇ neh, aˬ yaw ̭-euˬ guiˬ lahˬ-ahˇ ja ceuˬ kaˇ-euˇ.

¹ Naw ma ̭ nehˬ-ehˇ jawˇ naˇ nui ma nahˬ yu ni g’eh-awˇ, naw ma ̭-ahˇ gaˇ mahˇ kaˬ gaˇ jawˇ naˇ nui ma huiˬ-eu g’aˬ lehˇ naw ma ̭ kuˇ-eu ngaˇ Pawˇluˆ naw ma ̭-ahˇ heu lo ̭-ehˇ shaˇ-eu ma. Ka li-euˬ nui nahˬ nui yu hawˇ-eu g’awˬ shaˬ gaˬ-eu jeˬ la ̭ k’oeˇ shaˇ-eu jeˬ pyeu ̭-eu ma. ² Ngaˇ naw ma ̭ jawˇ gaˇ oe ngeh, nui ma huiˬ laˇ ni taˬ jahˇ nehˬ la ̭. Nga ma ̭-ahˇ shiˬ shaˬ jiˇ-euˬ nui noeˬ mehˬ nah caw teh-awˇ deh ̭-eu meh lehˇ ehˇ laˇ-eu deuˬ-euˬ mehˬ shi ngaˇ nui ma huiˬ-eu gaˇ kawˆ bi mawˇ ma lehˇ k’aˬ duˬ ni ehˇ tsehˆ-eu ma. ³ Nga ma ̭-aˬ, miˇ tsaˬ k’oeˇ taˆ jawˇ lu ̭-eu tsawˇ haˬ ngeuˇ ma. Ehˇ k’aw ̭, miˇ tsaˬ shiˬ shaˬ jiˇ-ahˇ ta ̭-eu guiˇ deuˆ lu ̭-eu maˬ ngeuˇ. ⁴ Nga ma ̭ zmˬ lu ̭-eu guiˇ deuˆ-eu keu ka-aˬ, miˇ tsaˬ k’oeˇ taˆ zmˬ lu ̭-eu guiˇ deuˆ-eu keu ka maˬ ngeuˇ. Nga ma ̭-euˬ guiˇ deuˆ-eu keu ka-aˬ, zi ̭ dah ni g’eh-eu taˆ deuˬ-ahˇ laˆ cawˆ nehˬ nya-eu Miˬyehˇ-euˬ baoˬ ma. Maˬ tsaˬ maˬ dawˇ gaˇ tsawˇ pyehˇ pyehˇ-eu jeˬ-ahˇ nga ma ̭ laˆ cawˆ-eu ma. ⁵ Miˬyehˇ-ahˇ siˬ nya-eu jeˬ-ahˇ k’aˇ laˆ tsoeˬ-eu nui ma huiˬ-eu mahˇ-eu jeˬ-ahˇ nga ma ̭ g’eu ka-eu ma. Nui noeˬ yawˬ hmˬ na lu ̭-ahˇ nga ma ̭ pa ̭ cu ̭-awˇ, Ka li-euˬ ehˇ dawˬ bi naˇ haˬ-eu ma. ⁶ Naw ma ̭ Ka li-ahˇ tiˬ byah tiˬ lo ̭ saˇ jaˇ zi ̭ laˇ-euˬ gaˇ nga ma ̭ ya mawˇ duˬ g’aˬ naˇ, saˇ jaˇ maˬ k’aˇ zi ̭-eu tsawˇ haˬ-ahˇ k’ehˬ-eu g’aˇ duˬ nga ma ̭ lehˬ hmˬ taˬ-euˬ ma. ⁷ Naw ma ̭-aˬ, myaˆ-ahˇ mawˇ laˇ-eu k’oeˇ taˆ paw-euˬ gaˇ kawˆ-ahˇ teh ̭-ehˇ haw-eu meh. Ngaˇ Ka li-euˬ tsawˇ haˬ ma lehˇ k’aˬ duˬ ni ehˇ tsehˆ peuˬ-eu tsawˇ haˬ jawˇ-eu ngeuˇ naˇ, yawˬ ha gaˇ kawˆ yawˬ ha yaw muiˬ paˬ-ehˇ paˇ bi shaˇ noeˬ duˬ-awˬ. Aˬ jeˬ miˇ neh ehˇ naˇ, nga ma ̭ k’aw ̭ aˬ yaw ̭ lo ̭-ehˇ Ka liˬ-euˬ tsawˇ haˬ pyeu ̭-eu ma. ⁸ Sahˬpaˬ Yeˬsuˇ neh nga ma ̭-ahˇ bi ̭ la ̭-euˬ baoˬ gaˇ kawˆ ngaˇ k’ahˬ sehˇ aˇ dzehˬ jehˆ dzeuˇ-euˬ baw law hawˇ k’aw ̭, ngaˇ maˬ sha ̭ dawˇ. Baoˬ k’oeˇ-aˬ, naw ma ̭-euˬ jah-eu jeˬ bi huiˬ bi mahˇ laˇ-eu g’aˇ duˬ meh. Naw ma ̭-ahˇ laˆ cawˆ-eu g’aˇ duˬ maˬ ngeuˇ-a. ⁹ Ngaˇ naw ma ̭-ahˇ sahˬ bo ̭ bo ̭-awˇ guˆ tsiˬ nyeh ̭-eu nga lehˇ maˬ bi g’oˆ pyawˆ maw ̭ nya. ¹⁰ "Pawˇluˆ neh bo ̭-euˬ sahˬ bo ̭-aˬ, kah dui dui-awˇ g’aˬ k’aˆ dui dui meh. Ehˇ k’aw ̭, aˬ yaw ̭-euˬ g’awˇ mawˇ nga ma ̭ nehˬ-ehˇ jawˇ naˇ, nahˬ yu ni g’eh-awˇ, aˬ yaw ̭ neh ngehˬ-euˬ dawˬ baoˬ tiˬ paw ̭-iˬ maˬ ahˇ-a" lehˇ, tsawˇ haˬ tiˬ paˆ na deuˬ ehˇ teh ̭-a. ¹¹ K’oeˇ lo ̭-ehˇ ehˇ-eu deuˬ bi g’oˆ shaw maw ̭-eu-aˬ, nga ma ̭ gaˇ mahˇ jawˇ ngeh naw ma ̭ jawˇ gaˇ bo ̭ ahˇ le ̭-euˬ sahˬ bo ̭ la ̭ k’oeˇ ehˇ taˬ-euˬ jeˬ hawˇ-eu, nga ma ̭ naw ma ̭ jawˇ gaˇ oe keuˆ-awˇ mˇ le-eu jeˬ-aˬ, nyiˬ jeˬ maˬ ngeuˇ de. Tiˬ jeˬ teh ̭ ma. ¹² Yawˬ haˇ yawˬ ha maˬ gaˇ ma lehˇ noeˬ-eu tsawˇ haˬ k’oeˇ deuˬ naˆ ni nga ma ̭ k’aw ̭ maˬ gaˇ ma lehˇ maˬ ehˇ peuˬ-eu uˬ ta ̭, aˬ yaw ̭ ma ̭-ahˇ maˬ ciˬ cehˆ leˇ peuˬ nya. Aˬ yaw ̭ ma ̭ aˇ naˆ ni dzawˬ-eu nga. Yawˬ haˇ yawˬ ha daˇ dza dza-awˇ, yawˬ haˇ yawˬ ha sawˇ poeˬ-eu meh. ¹³ Ehˇ k’aw ̭, nga ma ̭-aˬ, aˇ dzehˬ nui paw aˇ dzeuˇ dzeuˇ ni k’ahˬ sehˇ maˬ jehˆ. Miˬyehˇ neh bi mˇ la ̭-euˬ gaˇ la ̭ k’oeˇ k’ahˬ sehˇ jehˆ-eu teh ̭ ma. Naw ma ̭ nehˬ-ehˇ mˇ lu ̭-eu heu k’aw ̭, Miˬyehˇ neh bi mˇ la ̭-euˬ meh. ¹⁴ Naw ma ̭ k’aw ̭, Miˬyehˇ neh nga ma ̭-ahˇ bi mˇ la ̭-euˬ gaˇ la ̭ k’oeˇ ahˇ-eu teh ̭ miˇ neh, naw ma ̭ jawˇ gaˇ nga ma ̭ Ka li gaˇ kawˆ Laˬ k’aˬ cehˇ-eu Guiˬ lahˬ dawˬ yuˇ-awˇ oe ngeh, k’oeˇ uˬ ta ̭-ehˇ aˇ dzehˬ maˬ mˇ g’eh-aˬ. ¹⁵ K’oeˇ miˇ neh, nga ma ̭-ahˇ bi mˇ la ̭-euˬ ta ̭-ehˇ aˬ cawˬ mˇ dzehˬ g’eh-eu gaˇ nga ma ̭ k’ahˬ sehˇ maˬ jehˆ. Nga ma ̭-aˬ, naw ma ̭-euˬ jah-eu jeˬ huiˬ laˇ mahˇ laˇ gaˇ noeˬ tmˬ-awˇ, Miˬyehˇ neh bi mˇ la ̭-euˬ la ̭ k’oeˇ teh ̭-ehˇ naw ma ̭ jawˇ gaˇ k’oeˇ naˆ maˬ tseˇ huiˬ-eu gaˇ deuˬ-ahˇ ya mˇ gaˇ noeˬ tmˬ-eu ma. ¹⁶ K’oeˇ naˇ, naw ma ̭ jawˇ-eu miˇ k’ahˬ iˇ dzeuˇ g’eh-awˇ nga ma ̭ Laˬ k’aˬ cehˇ-eu Guiˬ lahˬ dawˬ mehˬ-iˇ nya teh ̭-a. K’oeˇ ngeh jawˇ, aˬ cawˬ-euˬ deh yaˇ-ahˇ mˇ taˬ-euˬ jeˬ-ahˇ nga ma ̭ k’ahˬ sehˇ maˬ paˇ ya jehˆ-aˇ. ¹⁷ Ehˇ k’aw ̭, "K’ahˬ sehˇ k’aˇ jehˆ maw ̭-eu tsawˇ haˬ deuˬ Sahˬpaˬ Yeˬsuˇ neh mˇ taˬ-euˬ gaˇ kawˆ jehˆ-awˬ" lehˇ Jaˇli ̭ la ̭ k’oeˇ ehˇ taˬ-euˬ meh. ¹⁸ Yawˬ haˇ yawˬ ha maˬ gaˇ ma lehˇ noeˬ-eu tsawˇ haˬ-aˬ, ja ceuˬ paˬ-ehˇ g’eh-eu tsawˇ haˬ maˬ ngeuˇ-a. Sahˬpaˬ Yeˬsuˇ neh maˬ gaˇ meh lehˇ noeˬ-euˬ tsawˇ haˬ teh ̭-ehˇ ja ceuˬ paˬ-ehˇ g’eh-eu tsawˇ haˬ pyeu ̭-eu meh.

¹ Ngaˇ aˬ dzawˬ aˇ gah-euˬ dawˬ ui cuiˆ ngehˬ gaˇ naw ma ̭ bi oˇ maw ̭ miˇ-a. Tiˬ poˆ oˇ nehˬ la ̭-awˬ de. ² Miˬyehˇ naw ma ̭-ahˇ nui ma maˬ shiˇ-eu lo ̭-ehˇ, ngaˇ k’aw ̭ naw ma ̭-ahˇ nui ma maˬ shiˇ nya. Naw ma ̭ miˬ shui ̭ tiˬ g’aˬ lo ̭-ehˇ Ka li tiˬ g’aˬ-ahˇ teh ̭-ehˇ bi dahˬ dzaˬ-iˇ-eu g’aˇ duˬ saˇ jaˇ dzaˬ nehˬ-euˬ g’aˬ ngaˇ ma. ³ Eˇbaˆ-ahˇ aˇ lawˇ neh mehˇ shuiˇ bi shuiˇ tawˆ-euˬ lo ̭-ehˇ, Ka li-ahˇ maˇ maˇ ni shawˇ jehˆ ni gaˬ-eu naw ma ̭-euˬ nui ma bi tsahˇ pyawˇ gaˇ ngaˇ k’ahˬ lahˇ dui dui nya. ⁴ Naw ma ̭ jawˇ gaˇ k’aˇ laˇ-eu tsawˇ haˬ-ahˇ naw ma ̭ ha geu ̭-awˇ, nga ma ̭ neh mehˬ-euˬ Yeˬsuˇ maˬ ngeuˇ-eu Yeˬsuˇ yawˬ g’aˬ yawˬ-euˬ gaˇ kawˆ mehˬ gaˇ naˇ haˬ-eu la ̭ k’oeˇ, nga ma ̭ neh naw ma ̭-ahˇ bi ̭-euˬ Yaw sahˇ Miˬyehˇ hawˇ-eu Laˬ k’aˬ cehˇ-eu Guiˬ lahˬ dawˬ-ahˇ beu gaˇ dui dui-eu yaw sahˇ yawˬ g’aˬ yawˬ hawˇ-eu laˬ k’aˬ cehˇ-eu guiˬ lahˬ dawˬ yawˬ jeˬ yawˬ-ahˇ naw ma ̭ laˬ k’aˬ cehˇ taˆ ni ha geu ̭-euˬ meh. ⁵ Huiˬ dzehˬ mahˇ dzehˬ-eu g’aˬ k’ehˇ deuˬ lehˇ naw ma ̭ kuˇ-eu g’aˬ k’ehˇ k’oeˇ deuˬ naˆ maˬ tseˇ ngaˇ tiˬ paw ̭-iˬ maˬ nyiˇ teˬ lehˇ noeˬ-eu ma. ⁶ Ngaˇ-aˬ, dawˬ ngehˬ-eu paw aˬ cawˬ naˆ-ehˇ maˬ bym law hawˇ k’aw ̭, zaˬ siˬ tsawˇ gahˇ paw aˬ cawˬ ta ̭-ehˇ teˬ-eu tsawˇ haˬ maˬ ngeuˇ. Nga ma ̭ naw ma ̭-ahˇ cawˬ cawˬ ta ̭ lu ̭-eu la ̭ k’oeˇ, aˬ joˆ-ehˇ pyeu ̭-euˬ maˬ kaˬ, aˬ geu ngeh yamˬ-ahˇ maˬ kaˬ, gaˇ kawˆ heu bya cehˆ ni bi mawˇ-euˬ ma. ⁷ Miˬyehˇ-euˬ Laˬ k’aˬ cehˇ-eu Guiˬ lahˬ dawˬ mehˬ nehˬ-euˬ aˇ poeˬ, ngaˇ naw ma ̭-ahˇ tiˬ jeˬ-iˬ maˬ shaˇ haw-aˬ. Naw ma ̭-ahˇ taˬ huiˬ-eu g’aˇ duˬ, ngaˬ-euˬ g’awˇ mawˇ-ahˇ ngaˇ taˬ nyiˇ-euˬ ma. Ngaˇ k’oeˇ lo ̭-ehˇ mˇ-euˬ lehˬ ta loˇ. ⁸ Ngaˇ naw ma ̭ nehˬ-ehˇ gaˇ mˇ ngeh, Ka li zaˬ aˇ muˇ nui deuˬ neh caw ba nehˬ la ̭-euˬ pyuˇ zmˬ-awˇ mˇ-euˬ ma. Maˇ maˇ ni ehˇ naˇ, naw ma ̭-ahˇ caw ba-eu g’aˇ duˬ aˬ cawˬ-ahˇ tahˇ joe joe-euˬ gaˇ duˇ nya. ⁹ Naw ma ̭ nehˬ-ehˇ ngaˇ jawˇ ngeh, pyuˇ loˬ laˇ k’aw ̭ naw ma ̭-ahˇ maˬ shaˇ haw-aˬ. Maˬgeˬdawˇniˆ miˇ k’ahˬ-ahˇ neh oe-euˬ aˬ yui ̭ aˬ nyiˇ Ka li zaˬ deuˬ ngaˇ k’aˇ loˬ-eu jeˬ sha ha le-euˬ meh. Dzeuˇ laˇ ngeh naw ma ̭-ahˇ tiˬ jeˬ-iˬ maˬ shaˇ haw-euˬ lo ̭-ehˇ, aˬ kaˇ mehˬ hu paw k’aw ̭ maˬ shaˇ ni mˇ daˆ le ̭ ma. ¹⁰ Ka li-euˬ yaw tsaˬ yaw dawˇ jeˬ ngaˬ-euˬ la ̭ k’oeˇ ahˇ-eu lo ̭-ehˇ, Aˬgaˬyaˇ miˇ k’ahˬ byah-iˇ ni ngaˇ heu lo ̭-ehˇ k’ahˬ sehˇ jehˆ gaˇ tiˬ g’aˬ-iˬ maˬ laˆ tsoeˬ laˇ nya-aˇ lehˇ ehˇ tsehˆ peuˬ ma. ¹¹ Ngaˇ naw ma ̭-ahˇ maˬ gaˬ-eu miˇ neh heu lo ̭-ehˇ ehˇ-eu nga loˇ. Ngaˇ naw ma ̭-ahˇ aˇ naˆ ni gaˬ-eu Miˬyehˇ siˬ nya lu ̭ meh. ¹² G’aˬ k’ehˇ k’oeˇ deuˬ g’eh nga ma ̭ k’aˇ mˇ-eu lo ̭-ehˇ mˇ lu ̭-eu ma lehˇ ehˇ-awˇ k’ahˬ sehˇ jehˆ k’aˇ maˬ bi za ni, nymˬ-mˇ ngaˇ k’aˇ mˇ lu ̭-eu jeˬ-ahˇ maˬ byehˇ dzeh ni mˇ daˆ le ̭ ma. ¹³ Tsawˇ haˬ k’oeˇ deuˬ-aˬ, maˬ ngeuˇ-eu g’aˬ k’ehˇ deuˬ meh. Ka li-euˬ g’aˬ k’ehˇ jahˇ geu ̭-eu mehˇ shuiˇ shuiˇ-eu tsawˇ haˬ deuˬ meh. ¹⁴ Aˬ yaw ̭ ma ̭ k’oeˇ lo ̭-ehˇ g’eh gaˇ zahˬ leˇ duˬ maˬ jaˆ-a. Neh ̭ Saˬdaˬ k’aw ̭ yaw sheh ̭ bya-eu mˬ taˆ g’aˬ k’ehˇ jahˇ geu ̭ nya-eu meh. ¹⁵ K’oeˇ miˇ neh, aˬ yaw ̭-euˬ zaˬ k’aˆ deuˬ k’aw ̭ yaw tsaˬ yaw dawˇ jeˬ-euˬ zaˬ k’aˆ jahˇ geu ̭ gaˇ zahˬ lehˇ k’aˇ maˬ za-a. Aˇ saˬ saˬ laˇ ngeh, aˬ yaw ̭ ma ̭ neh k’aˇ mˇ k’aˇ shaˇ-euˬ jeˬ aˬ yaw ̭ ma ̭ k’oeˇ taˆ keuˆ le teh ̭-a. ¹⁶ Ngaˇ tiˬ poˆ paˇ ehˇ-eu ma. Tsawˇ haˬ tiˬ g’aˬ-iˬ ngaˬ-ahˇ aˬ dzawˬ nga lehˇ taˬ noeˬ nehˬ la ̭. Naw ma ̭ k’oeˇ lo ̭-ehˇ maˇ diˇ noeˬ naˇ k’aw ̭, ngaˇ g’eh aˬ cawˬ lo ̭-ehˇ k’ahˬ sehˇ ui cuiˆ jehˆ nya paˬ-ehˇ aˬ dzawˬ tiˬ g’aˬ lo ̭-ehˇ ha geu ̭ nehˬ la ̭-awˬ. ¹⁷ Nymˬ-mˇ ngaˇ ehˇ lu ̭-eu heu-aˬ, Sahˬpaˬ Miˬyehˇ ngaˬ-ahˇ bi ngehˬ maw ̭-eu jeˬ law nmˇ-aˬ maˬ ngeuˇ-a. K’ahˬ sehˇ jehˆ-eu gaˇ kawˆ heu-ahˇ ta ̭ leˇ-awˇ, maˇ maˇ ni aˬ dzawˬ aˇ gah tiˬ g’aˬ lo ̭-ehˇ ngaˇ ngehˬ lu ̭-eu ma. ¹⁸ Ehˇ k’aw ̭, miˇ tsaˬ shiˬ shaˬ jiˇ gaˇ kawˆ tsawˇ haˬ g’awˬ mya g’aˬ k’ahˬ sehˇ jehˆ lu ̭-eu miˇ neh, ngaˇ g’eh k’oeˇ lo ̭-ehˇ k’ahˬ sehˇ jehˆ ma. ¹⁹ Naw ma ̭-aˬ, zaˬ siˬ tsawˇ gahˇ ahˇ-eu miˇ neh aˬ dzawˬ aˇ gah deuˬ-euˬ dawˬ-ahˇ daˬ coeˇ oˇ coeˇ meh ehˇ lawˬ laˬ. ²⁰ Aˬ cawˬ naw ma ̭-ahˇ k’ehˇ dzaˬ laˇ gaˇ maˬ ehˇ, nawˬ dzaˬ k’aˆ dzaˬ laˇ gaˇ maˬ ehˇ, zuiˆ laˇ gaˇ maˬ ehˇ, daˆ dziˬ laˇ gaˇ maˬ ehˇ, baˬ ba-ahˇ tehˆ laˇ gaˇ maˬ ehˇ, naw ma ̭ daˬ coeˇ meh ehˇ lawˬ laˬ. ²¹ Nga ma ̭-aˬ, aˬ cawˬ-ahˇ k’oeˇ naˆ naˆ-ehˇ daˬ coeˇ oˇ coeˇ gaˇ keuˆ ni maˬ g’ahˇ keuˆ nya lehˇ sha ̭ dawˬ zahˇ dawˬ ngehˬ-eu ma. Aˬ dzawˬ aˇ gah-euˬ dawˬ ngehˬ-awˇ ya ehˇ naˇ, aˬ cawˬ k’ahˬ sehˇ k’aˇ jehˆ-eu jeˬ ngaˇ k’aw ̭ jehˆ peuˬ ma. ²² Aˬ yaw ̭ ma ̭ Heˬbyehˇ tsawˇ haˬ ngeuˇ naˇ, ngaˇ k’aw ̭ Heˬbyehˇ tsawˇ haˬ ma. Aˬ yaw ̭ ma ̭ Iˇsaˬleˬlaˆ tsawˇ haˬ ngeuˇ naˇ, ngaˇ k’aw ̭ Iˇsaˬleˬlaˆ tsawˇ haˬ ma. Aˬ yaw ̭ ma ̭ Aˬbyaˬhaˬ-euˬ zaˬ ngeuˇ naˇ, ngaˇ k’aw ̭ ngeuˇ ma. ²³ Ngaˇ tsawˇ uˬ lo ̭-ehˇ ngehˬ la de. Aˬ yaw ̭ ma ̭ Ka li-euˬ zaˬ k’aˆ ngeuˇ naˇ, ngaˇ-aˬ, aˬ yaw ̭ ma ̭ naˆ maˬ tseˇ bym dzehˬ-eu Ka li-euˬ zaˬ k’aˆ ma. Aˬ yaw ̭ ma ̭ naˆ maˬ tseˇ ngaˇ mˇ taˬ shaˇ taˬ-euˬ jaˆ ma. Aˬ yaw ̭ ma ̭ naˆ maˬ tseˇ tawˬ-ahˇ uˇ haw-euˬ ma. Aˬ yaw ̭ ma ̭ naˆ maˬ tseˇ yahˬ caˆ neh bi jui ̭ haw-euˬ ma. Aˬ yaw ̭ ma ̭ naˆ maˬ tseˇ shiˇ taw tehˬ ni g’awˬ mya poˆ bi k’ehˬ bi k’aˆ haw-euˬ ma. ²⁴ Yuˇdaˆ tsawˇ haˬ deuˬ yahˬ caˆ neh smˬ tseˇ g’oeˬ la ̭ jui ̭ nehˬ la ̭ gaˇ, ngaˬ poˆ keuˆ ni ngaˇ ya daˬ haw-euˬ ma. ²⁵ Loˇmaˆ tsawˇ haˬ deuˬ daˇ kawˬ neh diˬ laˇ gaˇ, smˬ poˆ keuˆ ni ya daˬ haw-euˬ ma. K’aˬ lo neh biˬ laˇ gaˇ k’aw ̭, tiˬ poˆ ya daˬ-euˬ ma. Saˇ baoˬ cawˆ-iˇ-awˇ ya shaˬ haw-euˬ smˬ poˆ byah-eu ma. Tiˬ poˆ-aˬ, tiˬ nah uˬ ta ̭ uˬ ci ̭ tiˬ miˇ iˬ ma laˆ shaˆ-ahˇ bu-euˬ ma. ²⁶ Ngaˇ tiˬ k’ehˬ maˬ taˬ ni gaˇ ma doˆ-iˇ-eu la ̭ k’oeˇ, g’awˬ mya jeˬ-ahˇ guˆ k’aˇ za za-ehˇ cah-euˬ ma. Lawˇ baˬ huiˬ le gaˇ maˬ ehˇ, tahˇ joe joe laˇ gaˇ maˬ ehˇ, Yuˇdaˆ tsawˇ haˬ maˬ ngeuˇ-eu deuˬ k’ehˬ laˇ gaˇ maˬ ehˇ, guˆ guˆ-ehˇ cah-euˬ ma. Meuˬ la ̭ k’oeˇ maˬ ehˇ, bawˇ tsahˬ bawˇ dahˇ-ahˇ maˬ ehˇ, iˬ ma laˆ shaˆ k’oeˇ taˆ maˬ ehˇ, guˆ-eu gaˆ-eu jeˬ-ahˇ ya tahˬ puˬ-eu uˬ ta ̭, maˬ ngeuˇ-eu Ka li zaˬ deuˬ yehˬ bawˬ-ehˇ jahˇ laˇ gaˇ guˆ guˆ-ehˇ shaˬ haw-euˬ ma. ²⁷ Gaˇ mˇ dui dui-awˇ shaˬ dui dui-eu la ̭ k’oeˇ, uˬ ci ̭ maˬ yu ̭ ni g’awˬ mya poˆ leh jeh haw-euˬ ma. Hawˬ meh ̭-eu, iˇ cu ̭ meh ̭-eu, dzaˬ dzaˬ dawˇ dawˇ maˬ jaˆ-ehˇ ya dzahˬ-eu, dm g’aˬ dm lmˇ maˬ jaˆ-ehˇ yaw gaˆ gaˆ-eu, heu deuˬ-ahˇ daˬ dzeuˇ ya ̭-euˬ ma. ²⁸ Nui deuˬ gaˇ kawˆ ya shaˬ-euˬ deuˬ-ahˇ taˬ paˇ ehˇ siˬ. Ka li zaˬ aˇ muˇ dawˬ tawˆ lu ̭ g’aˇ duˬ k’ahˬ lahˇ-eu jeˬ yawˬ nah na lu ̭ ngaˬ-euˬ nui ma-ahˇ ciˬ tehˬ taˬ-euˬ meh. ²⁹ Tsawˇ haˬ tiˬ g’aˬ na g’aˬ baˬ ngeh, ngaˬ-ahˇ g’aˬ baˬ laˇ-eu miˇ-a. Tsawˇ haˬ tiˬ g’aˬ na iˬ baˇ la ̭ k’oeˇ coˬ-iˇ ngeh, ngaˬ-ahˇ noeˬ shaˬ miˇ-a. ³⁰ Ngaˇ k’ahˬ sehˇ ya jehˆ naˇ, ngaˇ g’aˬ baˬ-eu gaˇ kawˆ k’ahˬ sehˇ jehˆ ma. ³¹ Ngaˇ jaˬ myaw ̭ maˬ myaw ̭-eu gaˇ kawˆ Sahˬpaˬ Yeˬsuˇ-euˬ Aˬda pyeu ̭-eu Miˬyehˇ siˬ nya lu ̭ meh. Aˬ yaw ̭-euˬ tsawˇ myahˇ mˬ maˬ maˬ byaˆ zaˇ ziˇ guiˬ lahˬ huiˬ lu ̭-uˇ. ³² Ngaˇ Daˬmaˬsehˇ meuˬ la ̭ k’oeˇ jawˇ lu ̭ ngeh, sahˬ paˬ Aˬleˬdaˇ-euˬ la ̭ oˆ uˆ lahˇ lu ̭-eu g’aˬ neh ngaˬ-ahˇ bi nyeh ̭-eu g’aˇ duˬ meuˬ-euˬ lahˇ k’ehˬ-ahˇ bi lo ̭ tsoeˬ jiˇ taˬ-euˬ meh. ³³ Ehˇ k’aw ̭, meuˬ meuˬ lahˇ-euˬ kaˇ pyawˇ-ahˇ dahˇ-eu laˇ g’oˆ zaˬ-ahˇ k’aˆ kaˇ neh bi pyehˬ ka-awˇ, aˬ yaw ̭-euˬ la ̭-ahˇ ya dzeuˇ-iˇ-euˬ ma.

¹ K’ahˬ sehˇ jehˆ-eu jeˬ gaˇ dahˇ maˬ tsoeˬ k’aw ̭, ngaˇ k’ahˬ sehˇ ya jehˆ meh. Nymˬ-mˇ ngaˇ Sahˬpaˬ Yeˬsuˇ neh pah mehˬ nehˬ la ̭-euˬ yaw sahˇ la ̭ k’oeˇ ya siˬ ya mawˇ-euˬ gaˇ kawˆ ja ma. ² Dzeuˇ laˇ-euˬ tseˇ oeˬ k’o ̭-ahˇ, mˬ k’oeˇ taˆ goˇ dui dui-eu tiˆ-ahˇ bi ciˬ daˆ le ̭-euˬ Ka li zaˬ tiˬ g’aˬ-ahˇ ngaˇ siˬ nya ma. (Gaˇ kawˆ k’oeˇ maˇ maˇ ni pyeu ̭ dzeuˇ ya ̭-euˬ jeˬ ngeuˇ-eu maˬ siˬ. Yaw sahˇ la ̭ k’oeˇ ya siˬ ya mawˇ-euˬ jeˬ pyeu ̭-eu maˬ siˬ. Ngaˬ-ahˇ maˬ ehˇ duˬ nya nya. Miˬyehˇ tiˬ g’aˬ teh ̭-ehˇ siˬ duˬ-eu meh.) ³ Ngaˇ tiˬ poˆ paˇ ehˇ-eu ma. Tsawˇ haˬ k’oeˇ g’aˬ-ahˇ Baˬlaˬdiˇsuˆ miˇ k’ahˬ-ahˇ bi ciˬ daˆ keuˆ-euˬ ngaˇ siˬ nya ma. (Heu hmˬ k’aw ̭, gaˇ kawˆ k’oeˇ maˇ maˇ ni pyeu ̭ dzeuˇ ya ̭-euˬ jeˬ ngeuˇ-eu maˬ siˬ. Yaw sahˇ la ̭ k’oeˇ ya siˬ ya mawˇ-euˬ jeˬ pyeu ̭-eu maˬ siˬ. Ngaˬ-ahˇ maˬ ehˇ duˬ nya nya. Miˬyehˇ tiˬ g’aˬ teh ̭-ehˇ siˬ duˬ-eu meh.) ⁴ K’oeˇ gaˇ, tsawˇ haˬ zaˬ maˬ ehˇ mehˬ nya-eu maˬ ja doˆ peuˬ-eu jeˬ-ahˇ, tsawˇ haˬ k’oeˇ g’aˬ ya gaˬ-euˬ meh. ⁵ K’oeˇ miˇ neh, tsawˇ haˬ k’oeˇ g’aˬ-euˬ gaˇ kawˆ ja-eu maˬ ngeuˇ naˇ, ngaˬ-euˬ gaˇ kawˆ ngaˇ k’ahˬ sehˇ maˬ paˇ jehˆ ma. ⁶ Ngaˇ k’ahˬ sehˇ jehˆ maw ̭ lawˬ naˇ k’aw ̭, aˬ dzawˬ aˇ gah miˇ neh maˬ ngeuˇ. Aˬ jeˬ miˇ neh ehˇ naˇ, ngeuˇ gaˇ keuˆ ni teh ̭-ehˇ jehˆ-eu ma. Ehˇ k’aw ̭, ngaˇ k’ahˬ sehˇ maˬ jehˆ. Aˬ jeˬ miˇ neh ehˇ naˇ, ngaˬ neh mˇ-euˬ jeˬ-ahˇ ya mawˇ-awˇ ngaˬ neh ngehˬ-euˬ dawˬ-ahˇ ya gaˬ-euˬ uˬ ta ̭-ehˇ, tsawˇ haˬ tiˬ g’aˬ-iˬ ngaˬ-ahˇ maˬ bi noeˬ huiˬ maw ̭ nya. ⁷ Yaw sahˇ la ̭ k’oeˇ pah mehˬ nehˬ la ̭-euˬ g’awˬ mya jeˬ-ahˇ ngaˇ ya mawˇ-euˬ baˬ da neh, ngaˇ nui ma maˬ ya huiˬ maˬ ya mahˇ ni, ngaˬ-euˬ shiˬ shaˬ jiˇ g’awˇ mawˇ-ahˇ daˇ ceh tsawˆ ahˇ nehˬ la ̭-euˬ meh. K’oeˇ-aˬ, ngaˇ nui ma maˬ ya huiˬ maˬ ya mahˇ ni neh ̭ Saˬdaˬ-euˬ g’aˬ k’ehˇ neh ngaˬ-ahˇ k’ehˬ nehˬ k’aˆ nehˬ la ̭-euˬ jeˬ pyeu ̭-eu meh. ⁸ Shaˬ zahˬ k’oeˇ yuˇ dzeh nehˬ la ̭-eu g’aˇ duˬ, smˬ poˆ keuˆ ni Sahˬpaˬ Yeˬsuˇ-ahˇ ngaˇ shaˇ-euˬ ma. ⁹ Ehˇ k’aw ̭, aˬ yaw ̭ ngaˬ-ahˇ ehˇ-eu, "Ngaˬ-euˬ guiˬ lahˬ yaw dzahˇ nawˬ-euˬ g’aˇ duˬ lo ̭ lu ̭ meh. Aˬ jeˬ miˇ neh ehˇ naˇ, nawˇ g’aˬ baˬ lu ̭ ngeh, ngaˬ-euˬ baoˬ nawˬ-euˬ g’aˇ duˬ byah dzehˬ-eu meh." Ka li-euˬ baoˬ ngaˬ-ahˇ haw piˇ nehˬ la ̭ nya ni, ngaˇ g’aˬ baˬ-eu gaˇ kawˆ laˬ k’aˬ cehˇ cehˇ-ehˇ k’ahˬ sehˇ jehˆ ma. ¹⁰ K’oeˇ miˇ neh, g’aˬ baˬ-eu jeˬ, yehˬ bawˬ sehˇ lu-ehˇ g’eh nehˬ la ̭-eu jeˬ, shaˬ-eu zahˬ-eu jeˬ, k’ehˬ-eu k’aˆ-eu jeˬ, nui ma shaˬ zahˬ ya mˇ-eu jeˬ, heu deuˬ-ahˇ Ka li g’aˇ duˬ ngaˇ laˬ k’aˬ cehˇ cehˇ-ehˇ daˬ-eu ma. Aˬ jeˬ miˇ neh ehˇ naˇ, ngaˇ g’aˬ baˬ-eu k’oeˇ-aˬ, g’aˬ k’aˆ-eu jeˬ pyeu ̭-eu ma. ¹¹ Ngaˇ aˬ dzawˬ aˇ gah-euˬ dawˬ ngehˬ la. K’oeˇ lo ̭-ehˇ ngehˬ ni naw ma ̭ neh teh su ̭ nehˬ la ̭-euˬ meh. Naw ma ̭ ngaˬ-ahˇ noeˬ muiˬ nehˬ la ̭ paˬ-ehˇ g’eh-eu meh. Ngaˇ-aˬ, gaˇ dahˇ tsoeˬ leˇ-eu tsawˇ haˬ maˬ ngeuˇ k’aw ̭, naw ma ̭-euˬ huiˬ dzehˬ mahˇ dzeuˬ-eu g’aˬ k’ehˇ k’oeˇ deuˬ ta ̭-ehˇ tiˬ paw ̭-iˬ maˬ nyiˇ teˬ. ¹² Ngaˇ maˇ maˇ ni g’aˬ k’ehˇ pyeu ̭-eu gaˇ kawˆ bi siˬ bi mawˇ duˬ-euˬ zahˬ leˇ paˬ-ehˇ g’eh-eu jeˬ hawˇ-eu k’aˆ jeˬ-ehˇ g’eh-eu jeˬ-ahˇ, nui ma g’awˬ mahˇ ni taˬ-eu la ̭ k’oeˇ naw ma ̭-ahˇ mˇ mehˬ-euˬ ma. ¹³ Pyuˇ shuiˇ caw ba nehˬ la ̭ lehˇ naw ma ̭-ahˇ ngaˇ maˬ shaˇ-euˬ k’oeˇ tiˬ jeˬ maˬ ngeuˇ naˇ, Ka li zaˬ aˇ muˇ nui deuˬ-ahˇ naˆ maˬ tseˇ naw ma ̭-ahˇ ngaˬ neh jahˇ doeˇ nehˬ-euˬ aˬ jeˬ jaˆ ta. Ehˇ k’aw ̭, ngaˬ-euˬ yaw lehˬ-ahˇ aˬ joˆ-ehˇ g’eh-awˇ neh k’aw ̭ iˬ baˇ tiˬ poˆ pyehˬ nehˬ la ̭ lehˇ shaˇ-eu ma. ¹⁴ Ngaˇ naw ma ̭ jawˇ gaˇ smˬ poˆ tiˬ poˆ oe-eu lehˇ lehˬ hmˬ dah taˬ-euˬ ma. Naw ma ̭-ahˇ ngaˇ tiˬ jeˬ-iˬ maˬ shaˇ. Aˬ jeˬ miˇ neh ehˇ naˇ, ngaˇ geu ̭ maw ̭-eu-aˬ, naw ma ̭ ma. Naw ma ̭-euˬ pyuˇ shuiˇ maˬ ngeuˇ. Zaˬ deuˬ-aˬ, aˬ da aˬ ma g’aˇ duˬ pyuˇ shuiˇ maˬ ya poˆ-a. Aˬ da aˬ ma teh ̭-ehˇ zaˬ deuˬ g’aˇ duˬ pyuˇ shuiˇ ya poˆ-eu meh. ¹⁵ Ngaˇ k’aˇ jaˆ-eu jeˬ dawˬ tawˆ lu ̭ hawˇ-eu ngaˬ-euˬ g’awˇ mawˇ dawˬ tawˆ lu ̭, naw ma ̭-ahˇ caw ba-eu g’aˇ duˬ laˬ k’aˬ tiˬ cehˇ damˬ-eu ma. Ngaˇ naw ma ̭-ahˇ gaˬ dui dui-eu miˇneh naw ma ̭ ngaˬ-ahˇ ui cuiˆ teh ̭-ehˇ gaˬ te loˇ. ¹⁶ Ngaˬ-euˬ g’aˇ duˬ naw ma ̭-ahˇ maˬ bi shaˬ-aˬ lehˇ ehˇ gaˇ keuˆ ni naw ma ̭ nui ma tsaˬ teh ̭-a. Ehˇ k’aw ̭, naw ma ̭ tiˬ g’aˬ na ngaˬ neh yaw gahˇ zmˬ-awˇ naw ma ̭-ahˇ k’mˇ pa ̭-euˬ nya lehˇ ehˇ teh ̭-a. ¹⁷ Ngaˇ naw ma ̭ jawˇ gaˇ tsawˇ haˬ k’ehˇ g’eh le ̭-awˇ mehˇ shuiˇ shuiˇ dzaˬ-euˬ jaˆ ta loˇ. ¹⁸ Tiˇtuˆ-ahˇ naw ma ̭ jawˇ gaˇ iˇ-eu g’aˇ duˬ ngaˇ shaˇ-awˇ, aˬ yui ̭ aˬ nyiˇ Ka li zaˬ k’oeˇ g’aˬ-ahˇ aˬ yaw ̭ nehˬ-ehˇ bi oe caw-euˬ ma. Tiˇtuˆ naw ma ̭-ahˇ mehˇ shuiˇ shuiˇ dzaˬ le-euˬ nga lehˇ ehˇ maw ̭-eu nya loˇ. Tiˇtuˆ nga nya ̭ nui ma tiˬ gaˇ ta ̭-awˇ, kuiˇ to ̭ tiˬ gaˇ ciˬ-euˬ maˬ ngeuˇ-a loˇ. ¹⁹ Naw ma ̭-euˬ mehˬ shi nga ma ̭ yawˬ haˇ yawˬ ha ja muiˬ-eu nga lehˇ teh ̭-ehˇ naw ma ̭ noeˬ lu ̭ te loˇ. Gaˬ-eu aˬ yui ̭ aˬ nyiˇ deuˬ-oˇ, k’oeˇ lo ̭-ehˇ maˬ ngeuˇ. Miˬyehˇ-euˬ mehˬ shi Ka li bi ngehˬ maw ̭-eu dawˬ teh ̭-ehˇ nga ma ̭ ngehˬ-awˇ, nga ma ̭ k’aˇ mˇ k’aˇ shaˇ-euˬ jeˬ dawˬ tawˆ lu ̭, naw ma ̭ bi huiˬ bi mahˇ laˇ-eu g’aˇ duˬ teh ̭-ehˇ pyeu ̭-eu ma. ²⁰ Ngaˇ naw ma ̭ jawˇ gaˇ oe keuˆ ngeh, ngaˇ bi deh ̭ maw ̭-eu lo ̭-ehˇ naw ma ̭ maˬ deh ̭-ehˇ, naw ma ̭ bi deh ̭ maw ̭-eu lo ̭-ehˇ ngaˇ maˬ deh ̭ ni pyeu ̭-iˇ gaˇ k’ahˬ lahˇ miˇ-a. Iˬ dehˬ iˬ ceh doˆ-eu, tiˬ g’aˬ tiˇ g’aˬ myaˆ naˆ-eu, nui ma pehˇ-eu, yawˬ ha g’aˇ duˬ teh ̭-ehˇ toˆ-eu, aˬ cawˬ-ahˇ dawˬ doeˇ ngehˬ daˆ-eu, aˬ cawˬ gaˇ kawˆ ja bu ja doeˇ-eu, nui ma huiˬ-eu mahˇ-eu, aˇ muˇ muˇ-awˇ suˬ saˬ-eu la ̭ k’oeˇ law ̭ g’a-eu, heu deuˬ-ahˇ ya mawˇ-eu baw le lehˇ ngaˇ k’ahˬ lahˇ miˇ-a. ²¹ Ngaˇ paˇ oe ngeh, ngaˬ-euˬ Miˬyehˇ ngaˬ-ahˇ naw ma ̭-euˬ mehˬ shi tiˬ poˆ paˇ bi sha ̭ dawˇ la ̭-awˇ, dzeuˇ laˇ ngeh maˬ muiˬ maˬ shawˇ-eu jeˬ hawˇ-eu maˬ tsaˬ maˬ dawˇ-eu la ̭ k’oeˇ k’aˬ miˬ sheu-eu jeˬ mˇ-euˬ tsawˇ haˬ deuˬ iˬ baˇ maˬ noeˬ poˆ-ehˇ jawˇ-eu baˬ da neh ngaˇ myaˆ biˇ ya doˆ le gaˇ k’ahˬ lahˇ dui dui nya.

¹ Nymˬ-mˇ jawˇ poˆ naw ma ̭ jawˇ gaˇ ngaˇ oe-eu lehˇ g’eh-eu heu-aˬ, smˬ poˆ tiˬ poˆ ma. "Aˬ cawˬ-ahˇ yaˇ k’aˬ ja ngeh tsawˇ kaˬ nyiˬ g’aˬ smˇ g’aˬ ya bi jawˇ meh" lehˇ Jaˇli ̭ la ̭ k’oeˇ ehˇ taˬ-euˬ jaˆ-eu meh. ² Naw ma ̭ la ̭ k’oeˇ dzeuˇ laˇ ngeh iˬ baˇ mˇ-euˬ deuˬ hawˇ-eu nui deuˬ dawˬ tawˆ lu ̭-ahˇ ngaˇ heu lo ̭-ehˇ ehˇ maw ̭-eu ma. Ngaˇ naw ma ̭ jawˇ gaˇ nyiˬ poˆ tiˬ poˆ oe ngeh, gaˇ kawˆ heu naw ma ̭-ahˇ ehˇ nehˬ g’aˬ-euˬ ma. Nymˬ-mˇ ngaˇ naw ma ̭ nehˬ-ehˇ maˬ jawˇ ngeh k’aw ̭, tiˬ poˆ paˇ ehˇ poˆ-eu ma. Ngaˇ yawˬ poˆ yawˬ paˇ oe ngeh, tiˬ g’aˬ-ahˇ-iˬ maˬ paˇ taˬ nehˬ ma lehˇ ehˇ taˬ-euˬ ma. ³ Ngaˬ-ahˇ g’oe-awˇ Ka li dawˬ ngehˬ-eu gaˇ kawˆ naw ma ̭ siˬ maw ̭-eu lo ̭-ehˇ ya siˬ ya mawˇ duˬ teh ̭-a. Naw ma ̭-euˬ gaˇ kawˆ-ahˇ ta ̭ leˇ-awˇ aˬ yaw ̭ nahˬ yu ni g’eh-eu maˬ ngeuˇ-a. Aˬ yaw ̭-euˬ baoˬ naw ma ̭-ahˇ bi mawˇ-eu meh. ⁴ Aˬ jeˬ miˇ neh ehˇ naˇ, nahˬ yu ni g’eh-eu la ̭ k’oeˇ aˬ yaw ̭-ahˇ la ̭ ya ̭ k’oeˇ taˆ bi ta ̭ seh ̭-euˬ k’aw ̭, Miˬyehˇ-euˬ baoˬ baˬ da neh nymˬ-mˇ aˬ yaw ̭ deh ̭ lu ̭ meh. Aˬ yaw ̭-ahˇ ta ̭-eu la ̭ k’oeˇ nga ma ̭ k’aw ̭ nahˬ jawˆ ni g’eh-eu ma. Ehˇ k’aw ̭, naw ma ̭ nehˬ-ehˇ nga ma ̭ deh ̭ ta ̭ lu ̭-eu heu-aˬ, Miˬyehˇ-euˬ baoˬ-ahˇ g’oe-awˇ Ka li nehˬ-ehˇ deh ̭ lu ̭-eu miˇ neh deuˇ geuˆ ni jaˆ lu ̭ ma. ⁵ Naw ma ̭ jah-eu jeˬ-ahˇ zi ̭ dah ni tuˆ tehˬ lu ̭ ma loˇ lehˇ yawˬ haˇ yawˬ ha pyehˆ tseˇ haw-awˬ. Yawˬ haˇ yawˬ ha lawˬ haw-awˬ. Yeˬsuˇ Ka li naw ma ̭ la ̭ k’oeˇ jawˇ meh lehˇ maˬ siˬ duˬ te loˇ. Maˬ ngeuˇ naˇ, lawˬ haw-eu jeˬ la ̭ k’oeˇ naw ma ̭ smˬ-iˇ teˬ loˇ. ⁶ Lawˬ haw-eu jeˬ-ahˇ nga ma ̭ g’aˬ leˇ-euˬ gaˇ kawˆ naw ma ̭ siˬ nya meh lehˇ ngaˇ jah-eu ma. ⁷ Naw ma ̭ yaw lehˬ jeˬ maˬ ya mˇ ni nga ma ̭ Miˬyehˇ-ahˇ guiˬ lahˬ shaˇ lu ̭ ma. Lawˬ haw-eu jeˬ-ahˇ nga ma ̭ g’aˬ leˇ-euˬ gaˇ kawˆ bi doˆ laˇ-eu lehˇ heu lo ̭-ehˇ shaˇ-eu maˬ ngeuˇ. Lawˬ haw-eu jeˬ-ahˇ nga ma ̭ smˬ-iˇ-euˬ gaˇ duˇ leˇ law hawˇ k’aw ̭, tsaˬ-eu jeˬ-ahˇ naw ma ̭ mˇ nya ni shaˇ-eu jeˬ pyeu ̭-eu ma. ⁸ Aˬ jeˬ miˇ neh ehˇ naˇ, yaw tsaˬ yaw dawˇ jeˬ-ahˇ bahˬ leˇ-eu jeˬ nga ma ̭ maˬ mˇ nya-a. Yaw tsaˬ yaw dawˇ jeˬ g’aˇ duˬ teh ̭-ehˇ nga ma ̭ ya mˇ meh. ⁹ Nga ma ̭ g’aˬ baˬ-awˇ naw ma ̭ g’aˬ k’aˆ gaˇ nga ma ̭ laˬ k’aˬ cehˇ-eu ma. Nga ma ̭ guiˬ lahˬ shaˇ-eu-aˬ, naw ma ̭ bi huiˬ bi mahˇ dzehˬ laˇ-eu g’aˇ duˬ ma. ¹⁰ Ngaˇ naw ma ̭ jawˇ gaˇ oe keuˆ ngeh, Sahˬpaˬ Ka li neh ngaˬ-ahˇ bi ̭ la ̭-euˬ baoˬ zmˬ-awˇ, naw ma ̭-ahˇ yaw k’aˆ k’aˆ-ehˇ maˬ ya jahˇ nehˬ-eu g’aˇ duˬ, gaˇ mahˇ kaˬ gaˇ jawˇ ngeh neh heu lo ̭-ehˇ bo ̭ ahˇ le ̭-euˬ jeˬ pyeu ̭-eu ma. Baoˬ k’oeˇ-aˬ, naw ma ̭-ahˇ bi laˆ cawˆ-eu g’aˇ duˬ bi ̭ la ̭-euˬ maˬ ngeuˇ-a. Naw ma ̭ bi huiˬ bi mahˇ laˇ ni mˇ-eu g’aˇ duˬ bi ̭ laˬ-euˬ meh. ¹¹ Aˬ yui ̭ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu lo ̭-ehˇ ehˇ ma. Laˬ k’aˬ cehˇ-eu jeˬ o ̭ lu ̭-uˇ. Naw ma ̭ deh ̭ paˇ-awˬ. Ngaˬ-euˬ shaˇ dawˬ naˇ haˬ nehˬ la ̭-awˬ. Tiˬ g’aˬ tiˇ g’aˬ tsaˬ leˇ dzoeˇ leˇ-awˬ. G’oeˇ-eu gaˬ-eu jeˬ hawˇ-eu nui saˇ o ̭-eu jeˬ bi ̭-eu Miˬyehˇ naw ma ̭ nehˬ-ehˇ jawˇ teh ̭-a. ¹² Naw ma ̭ tiˬ g’aˬ tiˇ g’aˬ yaw muiˬ yaw shawˇ la ̭ k’oeˇ mehˬ cuˇ cuˇ-awˇ ha-awˬ. Miˬyehˇ-euˬ tsawˇ haˬ dawˬ tawˆ lu ̭, naw ma ̭-ahˇ dawˬ cawˬ puˬ ahˇ le ̭-euˬ meh. ¹³ Sahˬpaˬ Yeˬsuˇ Ka liˬ-euˬ guiˬ lahˬ yaw dzahˇ, Miˬyehˇ-euˬ g’oeˇ-eu gaˬ-eu jeˬ hawˇ-eu, Muiˬ-eu Shawˇ-eu Yaw sahˇ Miˬyehˇ-euˬ cawˬ cawˬ-eu jeˬ, naw ma ̭ dawˬ tawˆ lu ̭ k’oeˇ taˆ jaˆ lu ̭-uˇ.