1 TEˇSAˬLOˇNI
11 Ngaˇ Pawˇluˆ, Siˬlaˆ, Tiˆmoˇseˬ ngaˬ ha smˇ g’aˬ, Aˬda Miˬyehˇ hawˇ-eu Sahˬpaˬ Yeˬsuˇ Ka li-ahˇ ta ̭-eu tsawˇ haˬ deuˬ pyeu ̭-eu, Teˇsaˬloˇni meuˬ-ahˇ jaˆ-eu Ka li zaˬ aˇ muˇ la ̭ k’oeˇ jawˇ-eu tsawˇ haˬ deuˬ-ahˇ, sahˬ bo ̭ heu ta ̭ bo ̭ ahˇ la ̭-eu ma. Guiˬ lahˬyaw dzahˇ hawˇ-eu nui saˇ o ̭-eu jeˬ naw ma ̭ k’oeˇ taˆ jaˆ lu ̭-uˇ. 2 Naw ma ̭ dawˬ tawˆ lu ̭ g’aˇ duˬ nga ma ̭ Miˬyehˇ-ahˇ aˬ myah lu ̭ ja ceuˬlu ̭-awˇ, guiˬ lahˬ k’aˇ shaˇ ngeh naw ma ̭ g’aˇ duˬ shaˇ lu ̭ ma. 3 Aˬ jeˬ miˇ neh ehˇ naˇ, jah-eu baˬ da neh naw ma ̭ aˬ joˆ-ehˇ mˇ doˆ shaˇ doˆ la ̭ lu ̭-eu gaˇ kawˆ maˬ ehˇ, g’oeˇ-eu gaˬ-eu jeˬ baˬ da neh naw ma ̭ aˇ naˆ ni leh jeh-awˇ mˇ lu ̭-eu gaˇ kawˆ maˬ ehˇ, aˬ dui-euˬ Sahˬpaˬ Yeˬsuˇ Ka li-ahˇ naw ma ̭ noeˬ tmˬ taˬ-euˬ jeˬ aˇ naˆ ni zi ̭ lu ̭-eu gaˇ kawˆ maˬ ehˇ, aˬ dui-euˬ Aˬda pyeu ̭-eu Miˬyehˇ mehˬ shi nga ma ̭ noeˬ keuˆ lu ̭-eu ma. 4 Aˬ yui ̭ a ̭ nyiˇ Ka li zaˬ deuˬ-oˇ, Miˬyehˇ naw ma ̭-ahˇ gaˬ-awˇ aˬ yaw ̭-euˬ tsawˇ haˬ bi pyeu ̭ laˇ-eu g’aˇ duˬ tseˇ doˆ taˬ-euˬ gaˇ kawˆ nga ma ̭ siˬ nya-eu ma. 5 Aˬ jeˬ miˇ neh ehˇ naˇ, naw ma ̭ jawˇ gaˇ nga ma ̭ Laˬ k’aˬ cehˇ-eu Guiˬ lahˬ dawˬ hehˇ le ̭ ngeh, k’aˬ meh mehˬ boeˬ neh teh ̭-ehˇ hehˇ le ̭-euˬ maˬ ngeuˇ. Baoˬ hawˇ-eu Muiˬ-eu shawˇ-eu Yaw sahˇ Miˬyehˇ la ̭ k’oeˇ maˬ ehˇ, maˇ maˇ ni ngeuˇ meh lehˇ siˬ duˬ jah duˬ-eu la ̭ k’oeˇ maˬ ehˇ, hehˇ le ̭-euˬ jeˬ pyeu ̭-eu ma. Naw ma ̭ nehˬ-ehˇ jawˇ-euˬ aˇ yamˬ la ̭ k’oeˇ nga ma ̭ aˬ joˆ-ehˇ deh ̭ ya ̭ jawˇ ya ̭-euˬ gaˇ kawˆ naw ma ̭ siˬ nya meh. K’oeˇ-aˬ, naw ma ̭-euˬ g’aˇ duˬ pyeu ̭-eu ma. 6 Nga ma ̭-ahˇ maˬ ehˇ, Sahˬpaˬ Yeˬsuˇ-ahˇ maˬ ehˇ, naw ma ̭ dzaw geu ̭-euˬ meh. Shaˬ-eu zahˬ-eu jeˬ-ahˇ naw ma ̭ ya daˬ dui dui-euˬ k’aw ̭, Muiˬ-eu shawˇ-eu Yaw sahˇ Miˬyehˇ neh bi ̭-euˬ laˬ k’aˬ cehˇ-eu jeˬtiˬ byah ni ahˇ-eu la ̭ k’oeˇ, guiˬ lahˬ dawˬ-ahˇ naw ma ̭ ha geu ̭-euˬ meh. 7 K’oeˇ miˇ neh naw ma ̭-aˬ, Maˬgeˬdawˇniˆ miˇ k’ahˬ hawˇ-eu Aˬgaˬyaˇ miˇ k’ahˬ-ahˇ jawˇ-eu tsawˇ haˬ deuˬ g’aˇ duˬ dzaw geu ̭ duˬ pyeu ̭ laˇ-euˬ meh. 8 Aˬ jeˬ miˇ neh ehˇ naˇ, Maˬgeˬdawˇniˆ miˇ k’ahˬ hawˇ-eu Aˬgaˬyaˇ miˇ k’ahˬ doe ni, Sahˬpaˬ Yeˬsuˇ gaˇ kawˆ guiˬ lahˬ dawˬ gaˬ keuˆ-iˇ-euˬ k’oeˇ-aˬ, naw ma ̭ baˬ da neh gaˬ keuˆ-iˇ-euˬ uˬ jeˬ jeˬ-eu jeˬ pyeu ̭-eu uˬ ta ̭, naw ma ̭ Miˬyehˇ-ahˇ jah-eu gaˇ kawˆ yawˬ gaˇ na lu ̭ gaˬ doe-iˇ-euˬ meh. K’oeˇ miˇ neh, nga ma ̭ tiˬ jeˬ-iˬ ehˇ k’aˇ maˬ paˇ za miˇ-a. 9 Nga ma ̭ naw ma ̭ jawˇ gaˇ oe ngeh naw ma ̭ neh nga ma ̭-ahˇ aˬ joˆ-ehˇ ha geu ̭ nehˬ la ̭-euˬ gaˇ kawˆ hawˇ-eu, maˇ maˇ ni g’eh-eu deh ̭ lu ̭-eu Miˬyehˇ-ahˇ uˬ duˬ tahˬ-eu g’aˇ duˬ, tahˬ pahˬ aˬ ma mawˇ kawˇ deuˬ-ahˇ naw ma ̭ aˬ joˆ-ehˇ byehˇ dzeh-euˬ gaˇ kawˆ, tsawˇ haˬ k’oeˇ deuˬ dawˬ tawˆ lu ̭ ja lu ̭-eu meh. 10 Miˬyehˇ neh shiˇ-euˬ gaˇ bi g’o ̭ deh ̭ laˇ-euˬ g’aˬ pyeu ̭-awˇ, aˬ dui k’oeˇ taˆ keuˆ le-eu lehˇ g’eh-eu Miˬyehˇ-euˬ nui ma pehˇ-eu jeˬ la ̭ k’oeˇ aˬ dui-ahˇ ka k’o ̭ nehˬ la ̭-euˬ g’aˬ pyeu ̭-eu aˬ yaw ̭ -euˬ Zaˬmaˇ Yeˬsuˇ mˬ k’oeˇ taˆ neh za ̭ ka le gaˇ naw ma ̭ aˬ joˆ-ehˇ noeˬ tmˬ lu ̭-eu gaˇ kawˆ, a ̭ yaw ̭ ma ̭ ja lu ̭-eu meh.
21 Aˬ yui ̭ aˬ nyiˇ Ka li zaˬ deuˬ-oˇ, naw ma ̭ jawˇ gaˇ nga ma ̭ oe-euˬ-aˬ, yaw ̭ ngeh ̭ maˬ ngeuˇ-a lehˇ naw ma ̭ siˬ nya meh. 2 Naw ma ̭ jawˇ-eu Teˇsaˬloˇni meuˬ-ahˇ nga ma ̭ maˬ oe mi naˆ-ehˇ, Piˇliˇpiˆ meuˬ la ̭ k’oeˇ aˬ cawˬ nga ma ̭-ahˇ k’ehˬ nehˬ k’aˆ nehˬ la ̭-awˇ yehˬ bawˬ sehˇ lu-ehˇ ehˇ nehˬ la ̭ gaˇ ya daˬ-euˬ naw ma ̭ siˬ nya meh. Laˆ tsoeˬ-eu g’awˬ mya jeˬ jaˆ k’aw ̭, Miˬyehˇ-euˬ Laˬ k’aˬ cehˇ-eu Guiˬ lahˬ dawˬ naw ma ̭-ahˇ mehˬ nehˬ nya ni, aˬ dui-euˬ Miˬyehˇ nga ma ̭-ahˇ g’aˬ bi ̭ la ̭-euˬ meh. 3 Naw ma ̭ Laˬ k’aˬ cehˇ-eu Guiˬ lahˬ dawˬ-ahˇ jah laˇ ni nga ma ̭ mehˬ-eu heu-aˬ, jaˬ myaw ̭ myaw ̭-eu la ̭ k’oeˇ mehˬ-eu maˬ ngeuˇ. Nui ma maˬ shawˇ-eu la ̭ k’oeˇ mehˬ-eu maˬ ngeuˇ. Mehˇ shuiˇ shuiˇ-eu la ̭ k’oeˇ mehˬ-eu maˬ ngeuˇ. 4 Miˬyehˇ neh bi ngehˬ bi tmˇ la ̭-euˬ jeˬ-ahˇ teh ̭-ehˇ nga ma ̭ ngehˬ-eu tmˇ-eu ma. Aˬ jeˬ miˇ neh ehˇ naˇ, nga ma ̭ Laˬ k’aˬ cehˇ-eu Guiˬ lahˬ dawˬ mehˬ geuˇ meh lehˇ, Miˬyehˇ neh daˇ tsehˆ taˬ-euˬ jeˬ pyeu ̭-eu meh. Tsawˇ haˬ zaˬ nui k’ahˇ shiˇ ni nga ma ̭ mˇ lu ̭-eu maˬ ngeuˇ. Nga ma ̭-euˬ nui ma-ahˇ lawˬ haw-eu g’aˬ pyeu ̭-eu Miˬyehˇ nui k’ahˇ shiˇ ni mˇ lu ̭-eu ma. 5 Naw ma ̭-ahˇ nga ma ̭ maˬ ja poeˬ-ehˇ, yawˬ ha g’aˇ duˬ jiˇ jeuˬ doˆ laˇ ni maˬ ngehˬ maˬ tmˇ-euˬ gaˇ kawˆ naw ma ̭ siˬ duˬ lu ̭ meh. Miˬyehˇ-aˬ, nga ma ̭-euˬ saˇ kiˇ ma. 6 Aˬ cawˬ neh bi ciˬ poeˬ-eu lehˇ nga ma ̭ mˇ-euˬ maˬ ngeuˇ. Naw ma ̭ neh maˬ ehˇ, aˬ cawˬ neh maˬ ehˇ, bi ja ceuˬ-eu lehˇ mˇ-euˬ maˬ ngeuˇ. 7 Maˇ maˇ ni ehˇ naˇ, nga ma ̭ Ka li-euˬ g’aˬ k’ehˇ pyeu ̭-eu miˇ neh nga ma ̭ neh mˇ-euˬ aˇ poeˬ shaˇ-eu a kawˬ-aˬ jaˆ ma. Ehˇ k’aw ̭, naw ma ̭ nehˬ-ehˇ nga ma ̭ jawˇ ngeh, aˬ ma tiˬ g’aˬ zaˬ nahˬ-ahˇ bo saˆ-eu lo ̭-ehˇ nahˬ yu ni mˇ-euˬ ma. 8 Naw ma ̭-ahˇ nga ma ̭ g’oeˇ dui gaˬ dui dui-eu miˇ neh, Miˬyehˇ-euˬ Laˬ k’aˬ cehˇ-eu Guiˬ lahˬ dawˬ teh ̭-ehˇ maˬ ngeuˇ ni, nga ma ̭-euˬ g’awˇ mawˇ k’aw ̭ naw ma ̭ g’aˇ duˬ shiˇ dah nehˬ coeˇ ma. Naw ma ̭-ahˇ nga ma ̭ gaˬ dui dui-eu ma. 9 Aˬ yui ̭ aˬ nyiˇ Ka li zaˬ deuˬ-oˇ, nga ma ̭ aˇ naˆ ni shaˬ shaˬ-ehˇ mˇ dui dui-euˬ gaˇ kawˆ naw ma ̭ siˬ duˬ lu ̭ meh. Naw ma ̭-ahˇ Miˬyehˇ-euˬ Laˬ k’aˬ cehˇ-eu Guiˬ lahˬ dawˬ mehˬ ngeh, nga ma ̭ g’aˇ duˬ naw ma ̭ pyuˇ shuiˇ maˬ bi jiˇ maw ̭-eu miˇ neh, uˬ ci ̭ nah g’ahˇ maˬ ehˇ maˬ naˬ ni nga ma ̭ leh jeh-euˬ ma. 10 Naw ma ̭ jawˇ gaˇ nga ma ̭ neh mˇ ya ̭ shaˇ ya ̭-euˬ k’oeˇ-aˬ, muiˬ-eu shawˇ-eu tsaˬ-eu dawˇ-eu jeˬ pyeu ̭-awˇ, iˬ baˇ taˬ k’aˇ maˬ za-eu gaˇ kawˆ naw ma ̭ hawˇ-eu Miˬyehˇ siˬ duˬ mawˇ duˬ-euˬ meh. 11 Aˬ da tiˬ g’aˬ yawˬ ha-euˬ zaˬ deuˬ-ahˇ hehˇ tehˇ-eu lo ̭-ehˇ, naw ma ̭ aˬ yaw ̭ g’aˬ yaw ̭-ahˇ nga ma ̭ hehˇ tehˇ-euˬ naw ma ̭ siˬ nya meh. 12 Nga ma ̭ naw ma ̭-ahˇ g’aˬ bi ̭-awˇ nui saˇ bi za-euˬ ma. Aˬ yaw ̭-euˬ Miˇk’ahˬ hawˇ-eu yaw sheh ̭ k’ahˬ sehˇ la ̭ k’oeˇ uˇ laˇ ni naw ma ̭-ahˇ kuˇ lu ̭-eu Miˬyehˇ nui ma tsaˬ ni yaw deh ̭ deh ̭-eu g’aˇ duˬ, naw ma ̭-ahˇ nga ma ̭ maˬ tsehˆ leˇ ni g’aˬ bi ̭-euˬ ma. 13 Miˬyehˇ-euˬ guiˬ lahˬ-ahˇ nga ma ̭ maˬ tsehˆ leˇ ni ja ceuˬ lu ̭-eu gaˇ kawˆ yawˬ hmˬ yawˬ-aˬ, heu lo ̭-ehˇ ma. Naw ma ̭ jawˇ gaˇ nga ma ̭ Miˬyehˇ dawˬ kawˬ hehˇ le ̭ ngeh, tsawˇ haˬ-euˬ dawˬ lo ̭-ehˇ sawˇ-awˇ naw ma ̭ ha geu ̭-euˬ maˬ ngeuˇ-a. Maˇ maˇ ni Miˬyehˇ-euˬ dawˬ pyeu ̭-eu miˇ neh, Miˬyehˇ-euˬ dawˬ lo ̭-ehˇ sawˇ-awˇ ha geu ̭-euˬ meh. Aˬ jeˬ miˇ neh ehˇ naˇ, jah-eu tsawˇ haˬ pyeu ̭-eu naw ma ̭-euˬ la ̭ k’oeˇ Miˬyehˇ gaˇ mˇ lu ̭-eu meh. 14 Nga ma ̭-euˬ aˬ yui ̭ aˬ nyiˇ Ka li zaˬ deuˬ-oˇ, Yuˇdaˆ miˇk’ahˬ la ̭ k’oeˇ jawˇ-eu Ka li zaˬ aˇ muˇ deuˬ hawˇ-eu k’oeˇ gaˇ jawˇ-eu Yeˬsuˇ Ka li-euˬ tsawˇ haˬ deuˬ koeˇ taˆ keuˆ le-euˬ jeˬ, nymˬ-mˇ naw ma ̭ k’oeˇ taˆ keuˆ le-euˬ meh. Yuˇdaˆ tsawˇ haˬ deuˬ neh k’ehˬ nehˬ k’aˆ nehˬ-euˬ jeˬ-ahˇ aˬ yaw ̭ ma ̭ ya daˬ-euˬ lo ̭-ehˇ, naw ma ̭ k’aw ̭, yawˬ ha nehˬ-ehˇ tiˬ k’ahˬ-ahˇ jawˇ lu ̭-eu tsawˇ haˬ deuˬ neh k’ehˬ nehˬ k’aˆ nehˬ-euˬ jeˬ-ahˇ ya daˬ-euˬ meh. 15 Yuˇdaˆ tsawˇ haˬ k’oeˇ deuˬ-aˬ, Sahˬpaˬ Yeˬsuˇ hawˇ-eu Miˬyehˇ g’aˇ duˬ ngehˬ dah-eu tsawˇ haˬ deuˬ-ahˇ seh ̭-awˇ, nga ma ̭-ahˇ k’aw ̭ k’ehˬ nehˬ k’aˆ nehˬ la ̭-euˬ meh. Aˬ yaw ̭ ma ̭-aˬ, Miˬyehˇ nui ma pehˇ dui dui-eu jeˬ mˇ-awˇ, tsawˇ haˬ yawˬ g’aˬ na lu ̭-ahˇ muiˇ-eu meh. 16 Aˬ cawˬ tsawˇ jeuˬ ka k’o ̭-eu jeˬ bi za-eu lehˇ nga ma ̭ Miˬyehˇ dawˬ kawˬ mehˬ nehˬ gaˇ keuˆ ni laˆ tsoeˬ-eu lehˇ leh jeh-eu meh. K’oeˇ lo ̭-ehˇ g’eh-eu la ̭ k’oeˇ, aˬ yaw ̭ ma ̭ aˬ myah lu ̭ mˇ lu ̭-eu iˬ baˇ dawˬ tawˆ lu ̭ byah jiˇ laˇ ni ka ̭ g’a-eu meh. Nymˬ-mˇ aˇ saˬ saˬ laˇ ngeh, Miˬyehˇ nui ma pehˇ-eu jeˬ aˬ yaw ̭ ma ̭ k’oeˇ taˆ keuˆ le teuˇ le-euˬ meh. 17 Aˬ yui ̭ aˬ nyiˇ Ka li zaˬ deuˬ-oˇ, nga ma ̭ naw ma ̭-ahˇ tiˬ k’ehˬ tiˬ yamˬ teh ̭-ehˇ ya g’awˬ-iˇ-euˬ k’aw ̭, naw ma ̭-ahˇ noeˬ mawˇ lu ̭-awˇ, paˇ ya mawˇ dzoeˇ ni leh jeh dui dui lu ̭ ma. G’awˇ mawˇ naw ma ̭-ahˇ ya g’awˬ-iˇ-euˬ k’aw ̭, nui ma naw ma ̭ jawˇ gaˇ jaˆ lu ̭ ma. 18 Naw ma ̭ jawˇ gaˇ nga ma ̭ g’o ̭ laˇ maw ̭-eu ma. Naw ma ̭ jawˇ gaˇ g’o ̭ laˇ-eu lehˇ ngaˇ g’awˬ mya poˆ leh jeh-euˬ ma. Ehˇ k’aw ̭, neh ̭ Saˬdaˬ nga ma ̭-ahˇ laˆ tsoeˬ nehˬ la ̭-euˬ meh. 19 Ehˇ k’aw ̭, nga ma ̭-euˬ noeˬ tmˬ duˬ, nga ma ̭-euˬ laˬ k’aˬ cehˇ duˬ hawˇ-eu, Sahˬpaˬ Yeˬsuˇ oe ngeh aˬ yaw ̭ mehˬ shi nga ma ̭ g’aˬ leˇ-euˬ gaˇ kawˆ k’ahˬ sehˇ jehˆ duˬ-aˬ, aˬ cawˬ maˬ ngeuˇ. Naw ma ̭ ma. 20 Naw ma ̭-aˬ, maˇ maˇ ni nga ma ̭-euˬ nui ma huiˬ duˬ hawˇ-eu laˬ k’aˬ cehˇ duˬ pyeu ̭-eu ma.
31 Nga ma ̭ naw ma ̭-ahˇ maˬ ya mawˇ-ehˇ maˬ jawˇ tehˬ coeˇ ni pyeu ̭ laˇ-euˬ miˇ neh, nga ma ̭ teh ̭-ehˇ Aˬteˬ meuˬ-ahˇ jawˇ ya ̭-eu g’aˇ duˬ noeˬ tsehˆ-awˇ, 2 nga ma ̭ nehˬ-ehˇ tiˬ kawˆ lo ̭-ehˇ Laˬ k’aˬ cehˇ-eu Guiˬ lahˬ dawˬ mehˬ-eu gaˇ mˇ lu ̭-eu aˬ nyiˇ Tiˆmoˇseˬ-ahˇ k’ehˇ g’eh la ̭-euˬ ma. Naw ma ̭ jah-eu nui ma zi ̭ ni g’aˬ bi bi ̭-eu g’aˇ duˬ aˬ yaw ̭-ahˇ k’ehˇ g’eh la ̭-euˬ jeˬ pyeu ̭-eu ma. 3 K’ehˬ-eu k’aˆ-eu heu jeˬ baˬ da neh jah-eu jeˬ-ahˇ naw ma ̭ maˬ ya byehˇ dzeh-eu g’aˇ duˬ bi laˇ-euˬ ma. K’ehˬ-eu k’aˆ-eu jeˬ-ahˇ aˬ dui ya daˬ-eu heu-aˬ, Miˬyehˇ nui ma tsaˬ-eu tiˬ jeˬ meh lehˇ naw ma ̭ siˬ nya meh. 4 K’oeˇ miˇ neh, naw ma ̭ nehˬ-ehˇ nga ma ̭ jawˇ ngeh neh, k’ehˬ-eu k’aˆ-eu jeˬ-ahˇ aˬ dui ya daˬ teh ̭-a lehˇ naw ma ̭-ahˇ ehˇ nehˬ-euˬ ma. K’aˇ ehˇ-euˬ lo ̭-ehˇ keuˆ le teuˇ le lu ̭-eu naw ma ̭ siˬ duˬ mawˇ duˬ lu ̭ meh. 5 K’oeˇ baˬ da neh, Tiˆmoˇseˬ-ahˇ ngaˇ k’ehˇ g’eh la ̭-euˬ jeˬ pyeu ̭-eu ma. Ngaˇ naw ma ̭-euˬ gaˇ kawˆ siˬ maw ̭-eu maˬ jawˇ tehˬ coˇ ni pyeu ̭ laˇ-euˬ miˇ neh, naw ma ̭ jah-eu aˬ joˆ-ehˇ pyeu ̭ lu ̭-eu bi haw laˇ-eu lehˇ, aˬ yaw ̭-ahˇ k’ehˇ g’eh la ̭-euˬ ma. Neh ̭ sahˬ paˬ naw ma ̭-ahˇ muˇ juˇ juˇ-awˇ, nga ma ̭ neh mˇ ya ̭-euˬ gaˇ deuˬ yaw ̭ ngeh ̭-ehˇ pyeu ̭-iˇ-eu baw le lehˇ ngaˇ k’ahˬ lahˇ dui dui lu ̭ ma. 6 Nymˬ-mˇ Tiˆmoˇseˬ g’o ̭ keuˆ le-awˇ, naw ma ̭-euˬ jah-eu jeˬ hawˇ-eu g’oeˇ-eu gaˬ-eu jeˬ gaˇ kawˆ, laˬ k’aˬ cehˇ laˇ paˬ-ehˇ dzawˇ gaˬ le-euˬ meh. Naw ma ̭ nga ma ̭-ahˇ aˬ myah lu ̭ noeˬ keuˆ lu ̭-awˇ, nga ma ̭ naw ma ̭-ahˇ mawˇ maw ̭ dui dui-eu lo ̭-ehˇ, naw ma ̭ k’aw ̭ nga ma ̭-ahˇ mawˇ maw ̭ dui dui lu ̭-eu gaˇ kawˆ dzawˇ nehˬ la ̭-euˬ meh. 7 K’oeˇ miˇ neh aˬ yui ̭ a ̭ nyiˇ Ka li zaˬ deuˬ-oˇ, shaˬ-eu zahˬ-eu jeˬ hawˇ-eu k’ehˬ-eu k’aˆ-eu jeˬ-ahˇ nga ma ̭ ya daˬ lu ̭ ngeh, naw ma ̭-euˬ gaˇ kawˆ ya gaˬ-awˇ, g’aˬ tiˬ tiˆ paˇ lahˬ laˇ-euˬ miˇ-a. Naw ma ̭-euˬ jah-eu jeˬ k’oeˇ, nga ma ̭-ahˇ g’aˬ bi lahˬ laˇ-euˬ meh. 8 Naw ma ̭ Sahˬpaˬ Yeˬsuˇ la ̭ k’oeˇ zi ̭ dah ni jawˇ lu ̭ naˇ, nga ma ̭ yaw deh ̭ deh ̭ mahˇ tsahˇ ma. 9 Naw ma ̭ g’aˇ duˬ Miˬyehˇ-euˬ guiˬ lahˬ-ahˇ nymˬ-mˇ nga ma ̭ ja ceuˬ-eu ma. Naw ma ̭ baˬ da neh aˬ yaw ̭-euˬ mehˬ shi nga ma ̭ laˬ k’aˬ ya cehˇ-eu miˇ neh, aˬ yaw ̭-euˬ guiˬ lahˬ-ahˇ ja ceuˬ-eu ma. 10 Naw ma ̭-ahˇ nga ma ̭ paˇ ya mawˇ dzoeˇ-awˇ, naw ma ̭ jah-eu la ̭ k’oeˇ maˬ byah-eu jeˬ bi byah laˇ ni bi caw ba nehˬ-eu g’aˇ duˬ, uˬ ci ̭ nah g’ahˇ maˬ ehˇ nui ma keuˆ dui dui-eu la ̭ k’oeˇ aˬ yaw ̭-ahˇ guiˬ lahˬ shaˇ lu ̭ ma. 11 Naw ma ̭ jawˇ gaˇ nga ma ̭ laˇ nya ni, aˬ dui-euˬ Aˬda Miˬyehˇ hawˇ-eu Sahˬpaˬ Yeˬsuˇ gaˇ ma laˆ dahˇ nehˬ la ̭ lu ̭-uˇ. 12 Naw ma ̭ tiˬ g’aˬ tiˇ g’aˬ g’oeˇ-eu gaˬ-eu jeˬ hawˇ-eu tsawˇ haˬ dawˬ tawˆ lu ̭-ahˇ g’oeˇ-eu gaˬ-eu jeˬ tiˬ jawˇ saˇ-iˬ tiˬ jawˇ myaˬ laˇ-awˇ, nga ma ̭ naw ma ̭-ahˇ g’oeˇ lu ̭ gaˬ lu ̭-eu naˆ ni byah laˇ lu ̭-uˇ. 13 Aˬ dui-euˬ Sahˬpaˬ Yeˬsuˇ aˬ yaw ̭-euˬ tsawˇ haˬ dawˬ tawˆ lu ̭ nehˬ-ehˇ oe ngeh, aˬ dui-euˬ Aˬda Miˬyehˇ mehˬ shi naw ma ̭ iˬ baˇ taˬ k’aˇ maˬ za-eu muiˬ-eu shawˇ-eu tsawˇ haˬ pyeu ̭ ni, aˬ yaw ̭ naw ma ̭-ahˇ k’oeˇ lo ̭-ehˇ g’aˬ bi ̭ lahˬ nehˬ lu ̭-uˇ.
41 Aˬ yui ̭ aˬ nyiˇ Ka li zaˬ deuˬ-oˇ, aˇ saˬ saˬ-eu dawˬ heu lo ̭-ehˇ ehˇ maw ̭-eu ma. Miˬyehˇ nui k’ahˇ shiˇ ni aˬ joˆ-ehˇ ya deh ̭ ya jawˇ-eu gaˇ kawˆ, naw ma ̭-ahˇ nga ma ̭ deh ̭ mehˬ jawˇ mehˬ g’aˬ-euˬ ma. Naw ma ̭ k’oeˇ lo ̭-ehˇ deh ̭ lu ̭ jawˇ lu ̭-eu meh. K’oeˇ naˆ maˬ tseˇ leh jeh-awˇ deh ̭ daˆ le ̭-eu g’aˇ duˬ Sahˬpaˬ Yeˬsuˇ-euˬ tsawˇ myahˇ uˬ moˆ naw ma ̭-ahˇ nga ma ̭ shaˇ-eu ma. 2 Nga ma ̭ Sahˬpaˬ Yeˬsuˇ-euˬ baoˬ-ahˇ g’oe-awˇ naw ma ̭-ahˇ mehˬ nehˬ-euˬ deh ̭-eu jawˇ-eu gaˇ kawˆ naw ma ̭ siˬ nya meh. 3 Naw ma ̭ yaw muiˬ yaw shawˇ shawˇ-ehˇ jawˇ-awˇ, aˬ cawˬ-euˬ miˬ zaˬ yo zaˬ-ahˇ maˬ bahˬ maˬ muˆ ni deh ̭ gaˇ Miˬyehˇ geu ̭ maw ̭-eu meh. 4 Naw ma ̭ yawˬ g’aˬ na lu ̭, yawˬ ha-euˬ miˬ zaˬ nehˬ-ehˇ muiˬ-eu shawˇ-eu la ̭ k’oeˇ hawˇ-eu aˬ cawˬ yaw zeu baw paˬ-ehˇ aˬ joˆ-ehˇ ya deh ̭ ta ̭-eu gaˇ kawˆ siˬ nya-eu tsaˬ meh. 5 Miˬyehˇ-ahˇ maˬ siˬ nya-eu tsawˇ haˬ lo ̭-ehˇ, yawˬ ha-euˬ nui k’ahˇ laˆ shiˇ-eu g’aˇ duˬ teh ̭-ehˇ miˬ zaˬ sheuˬ taˬ-euˬ jeˬ maˬ ya bi pyeu ̭-a. 6 Gaˇ kawˆ heu hmˬ-ahˇ ta ̭ leˇ-awˇ, tsawˇ haˬ tiˬ g’aˬ-iˬ aˬ yui ̭ aˬ nyiˇ Ka li zaˬ-euˬ nymˇ jiˇ-ahˇ coeˬ-eu ciˆ-eu bahˬ-eu muˆ-eu jeˬ maˬ mˇ k’mˬ-a. Gaˇ Kawˆ heu naw ma ̭-ahˇ nga ma ̭ mehˬ nehˬ dzeuˇ g’aˬ-euˬ ma. K’oeˇ lo ̭-ehˇ g’eh-eu tsawˇ haˬ-ahˇ Sahˬpaˬ Yeˬsuˇ k’ehˬ nehˬ k’aˆ nehˬ teh ̭-a lehˇ, nga ma ̭ yaw k’aˆ k’aˆ-ehˇ ehˇ-euˬ ma. 7 Aˬ jeˬ miˇ neh ehˇ naˇ, aˬ cawˬ nehˬ-ehˇ joe joe-ehˇ bi deh ̭-eu g’aˇ duˬ aˬ dui-ahˇ Miˬyehˇ neh kuˇ taˬ-euˬ maˬ ngeuˇ-a. Muiˬ-eu shawˇ-eu la ̭ k’oeˇ bi deh ̭-eu g’aˇ duˬ kuˇ taˬ-euˬ meh. 8 K’oeˇ miˇ neh, mehˬ-eu tsoˆ-eu dawˬ heu-ahˇ maˬ naˇ haˬ geu ̭-eu tsawˇ haˬ-aˬ, tsawˇ haˬ zaˬ-euˬ dawˬ maˬ naˇ haˬ geu ̭-eu maˬ ngeuˇ-a. Naw ma ̭-ahˇ Muiˬ-eu shawˇ-eu Yaw sahˇ Miˬyehˇ bi ̭ nehˬ la ̭-euˬ g’aˬ pyeu ̭-eu Miˬyehˇ-euˬ ehˇ dawˬ maˬ naˇ haˬ geu ̭-eu jeˬ pyeu ̭-eu meh. 9 Ka li zaˬ cawˬ cawˬ ya gaˬ ya g’oeˇ-eu gaˇ kawˆ naw ma ̭-ahˇ bo ̭ nehˬ-eu maˬ paˇ loˬ meh. Naw ma ̭ tiˬ g’aˬ tiˇ g’aˬ aˬ joˆ-ehˇ ya gaˬ ya g’oeˇ-eu gaˇ kawˆ, Miˬyehˇ neh naw ma ̭-ahˇ mehˬ nehˬ tsoˆ nehˬ g’aˬ-euˬ meh. 10 Maˇ maˇ ni ehˇ naˇ, Maˬgeˬdawˇniˆ miˇ k’ahˬ la ̭ k’oeˇ k’aˇ jawˇ-eu aˬ yui ̭ aˬ nyiˇ Ka li zaˬ dawˬ tawˆ lu ̭-ahˇ, naw ma ̭ k’oeˇ lo ̭-ehˇ g’oeˇ-euˬ gaˬ-euˬ meh. K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, naw ma ̭-euˬ g’oeˇ-eu gaˬ-eu jeˬ k’oeˇ naˆ maˬ tseˇ myaˬ laˇ ni leh jeh siˬ lehˇ nga ma ̭ shaˇ-eu ma. 11 Nga ma ̭ neh naw ma ̭-ahˇ ehˇ nehˬ ya ̭-euˬ lo ̭-ehˇ, yawˬ ha-euˬ k’aˬ boeˬ yawˬ ha boeˬ-awˇ, yawˬ haˬ-euˬ gaˇ yawˬ ha mˇ mˇ-ehˇ ciˬ cuˇ ni deh ̭ daˆ le ̭-awˬ. 12 K’oeˇ lo ̭-ehˇ deh ̭ naˇ, Sahˬpaˬ Yeˬsuˇ-ahˇ maˬ jah-eu tsawˇ haˬ deuˬ naw ma ̭-ahˇ yaw zeu baw-awˇ, yawˬ ha loˬ-eu jeˬ g’aˇ duˬ aˬ cawˬ-ahˇ maˬ k’awˬ daˇ ni deh ̭ nya teh ̭-a. 13 Aˬ yui ̭ aˬ nyiˇ Ka li zaˬ deuˬ-oˇ, noeˬ tmˬ k’aˇ maˬ za-eu la ̭ nyiˇ paw-euˬ tsawˇ haˬ deuˬ noeˬ shaˬ-eu lo ̭-ehˇ naw ma ̭ maˬ ya noeˬ shaˬ-eu g’aˇ duˬ, shiˇ-euˬ tsawˇ haˬ deuˬ aˬ joˆ-ehˇ pyeu ̭-eu gaˇ kawˆ bi siˬ maw ̭ miˇ-a. 14 Yeˬsuˇ shiˇ-awˇ paˇ g’o ̭ deh ̭ laˇ-euˬ meh lehˇ aˬ dui jah-eu ma. K’oeˇ miˇ neh, Yeˬsuˇ-ahˇ jah jah-ehˇ shiˇ-euˬ tsawˇ haˬ deuˬ-ahˇ Yeˬsuˇ nehˬ-ehˇ tiˬ kawˆ lo ̭-ehˇ Miˬyehˇ sheuˬ k’o ̭ la ̭ teh ̭-a lehˇ aˬ dui jah-eu ma. 15 Nymˬ-mˇ naw ma ̭-ahˇ nga ma ̭ mehˬ lu ̭ tsoˆ lu ̭-eu dawˬ heu-aˬ, Sahˬpaˬ Yeˬsuˇ-euˬ dawˬ ma. Sahˬpaˬ Yeˬsuˇ oe ngeh deh ̭ lu ̭-eu aˬ dui ma ̭-aˬ, shiˇ dzeuˇ-euˬ tsawˇ haˬ deuˬ-euˬ aˬ hu aˬ yaw ̭ nehˬ-ehˇ ya jawˇ-eu maˬ ngeuˇ-a. 16 Miˬyehˇ guˇ-awˇ dawˬ bi ̭-eu teˇ saˇ maˬ ehˇ, mˬ taˆ g’aˬ k’ehˇ yaw huiˬ g’aˬ-euˬ teˇ saˇ maˬ ehˇ, Miˬyehˇ-euˬ daˇ heh teˇ saˇ maˬ ehˇ, ya gaˬ-awˇ, Sahˬpaˬ Yeˬsuˇ mˬ-ahˇ neh za ̭ le teh ̭-a. K’oeˇ ngeh, Ka li-ahˇ jah jah-ehˇ shiˇ-euˬ tsawˇ haˬ deuˬ aˬ hu g’o ̭ deh ̭ laˇ teh ̭-a. 17 K’oeˇ naˇ, k’oeˇ ngeh deh ̭ lu ̭-eu aˬ dui ma ̭ k’aw ̭, aˬ yaw ̭ ma ̭ nehˬ-ehˇ mˬ dmˇ la ̭ k’oeˇ tiˬ kawˆ lo ̭-ehˇ uiˬ leˇ-awˇ, mˬ taˆ yaw goˇ-ahˇ Sahˬpaˬ Yeˬsuˇ-ahˇ ya tahˬ puˬ leˇ teh ̭-a. K’oeˇ naˇ, aˬ myah lu ̭ Sahˬpaˬ Yeˬsuˇ nehˬ-ehˇ ya jawˇ teh ̭-a. 18 K’oeˇ miˇ neh, tiˬ g’aˬ tiˇ g’aˬ gaˇ kawˆ heu ja ja-ehˇ g’aˬ bi ̭-awˬ.
51 Aˬ yui ̭ aˬ nyiˇ Ka li zaˬ deuˬ-oˇ, Sahˬpaˬ Yeˬsuˇ za ̭ le-eu aˇ yamˬ aˇ law gaˇ kawˆ naw ma ̭-ahˇ bo ̭ nehˬ-eu maˬ paˇ loˬ meh. 2 Aˬ jeˬ miˇ neh ehˇ naˇ, Sahˬpaˬ Yeˬsuˇ-euˬ Aˇ nah-aˬ, uˬ ci ̭ sehˇ g’ahˇ smˇ k’oeˬ tahˇ joe oe-eu lo ̭-ehˇ maˬ noeˬ maˬ duˇ-ehˇ jawˇ ngeh keuˆ le teh ̭-a lehˇ naw ma ̭ siˬ duˬ taˬ-euˬ meh. 3 Miˇ k’ahˬ saˇ-awˇ guˆ k’aˇ maˬ za-a lehˇ aˬ cawˬ ja lu ̭ ngeh, luˬ-iˇ seˇ-iˇ-eu jeˬ aˬ yaw ̭ ma ̭ k’oeˇ taˆ keuˆ le teh ̭-a. Zaˬ ciˬ deˇ le-euˬ aˬ ma tiˬ g’aˬ uˬ maˆ naˇ doˆ laˇ-eu lo ̭-ehˇ ja pyuˬ ni ga keuˆ le-awˇ, aˬ yaw ̭ ma ̭ maˬ dzeuˇ-i nya-aˇ. 4 Ehˇ k’aw ̭ aˬ yui ̭ aˬ nyiˇ deuˬ-oˇ, naw ma ̭-aˬ, yaw zahˇ la ̭ k’oeˇ jawˇ lu ̭-eu maˬ ngeuˇ-eu miˇ neh, Aˇ nah k’oeˇ nah naw ma ̭ k’oeˇ taˆ smˇ k’oeˬ tahˇ joe oe-eu lo ̭-ehˇ ja pyuˬ ni maˬ ga keuˆ le-aˇ. 5 Aˬ jeˬ miˇ neh ehˇ naˇ, naw ma ̭ dawˬ tawˆ lu ̭ yaw sheh ̭-euˬ zaˬ meh. Nah g’ahˇ-euˬ zaˬ meh. Aˬ dui-aˬ, uˬ ci ̭-euˬ zaˬ maˬ ngeuˇ. Yaw zahˇ-euˬ zaˬ maˬ ngeuˇ. 6 K’oeˇ miˇ neh, aˬ cawˬ yu ̭ k’aˆ-eu lo ̭-ehˇ maˬ yu ̭ k’aˆ ni jawˇ kaˇ-euˇ. 7 Yu ̭ k’aˆ-eu tsawˇ haˬ deuˬ uˬ ci ̭ paw yu ̭ k’aˆ-awˇ, jiˇ baˬ dawˇ yeh ̭-eu tsawˇ haˬ deuˬ k’aw ̭, uˬ ci ̭ paw dawˇ yeh ̭-eu meh. 8 Ehˇ k’aw ̭, aˬ dui-aˬ, nah g’ahˇ-euˬ zaˬ pyeu ̭-eu miˇ neh, yawˬ ha-euˬ nui ma-ahˇ nyeh ̭ tehˬ taˬ-eu tsaˬ meh. Jah-eu jeˬ hawˇ-eu g’oeˇ-eu gaˬ-eu jeˬ-ahˇ guiˇ deuˆ ngeh k’ahˬ-ahˇ dehˬ daˬ-eu shmˇ byaˆ dm-eu lo ̭-ehˇ dm-awˇ, noeˬ tmˬ-eu jeˬ-ahˇ uˬ duˬ-ahˇ tsahˬ-eu shmˇ uˬ k’oˆ lo ̭-ehˇ tsahˬ kaˇ-euˇ. 9 Miˬyehˇ aˬ dui-ahˇ tseˇ doˆ-euˬ-aˬ, aˬ yaw ̭-euˬ nui ma pehˇ-eu jeˬ-ahˇ bi daˬ-eu g’aˇ duˬ maˬ ngeuˇ-a. Aˬ dui-euˬ Sahˬpaˬ Yeˬsuˇ Ka li baˬ da neh ka k’o ̭-eu jeˬ bi za-eu lehˇ tseˇ doˆ-euˬ meh. 10 Aˬ yaw ̭ za ̭ le ngeh, aˬ dui deh ̭-eu maˬ kaˬ, shiˇ-euˬ maˬ kaˬ, aˬ yaw ̭ nehˬ-ehˇ tiˬ kawˆ lo ̭-ehˇ ya jawˇ ni aˬ dui g’aˇ duˬ aˬ yaw ̭ shiˇ dah-euˬ meh. 11 K’oeˇ miˇ neh, nymˬ-mˇ naw ma ̭ tiˬ g’aˬ tiˇ g’aˬ g’aˬ bi ̭-awˇ caw dehˬ caw toˆ lu ̭-eu lo ̭-ehˇ, mehˬ hu paw k’aw ̭ k’oeˇ lo ̭-ehˇ deh ̭ daˆ le ̭-awˬ. 12 Aˬ yui ̭ aˬ nyiˇ Ka li zaˬ deuˬ-oˇ, naw ma ̭-ahˇ Ka li zaˬ-euˬ deh ̭ jeˬ deh ̭ kawˆ la ̭ k’oeˇ sheuˬ g’eh-awˇ mehˬ nehˬ tsoˆ nehˬ lu ̭-eu naw ma ̭ nehˬ-ehˇ Miˬyehˇ gaˇ mˇ lu ̭-eu tsawˇ haˬ deuˬ-ahˇ yaw zeu baw-awˬ lehˇ, naw ma ̭-ahˇ nga ma ̭ shaˇ-eu ma. 13 Aˬ yaw ̭ ma ̭ Miˬyehˇgaˇ mˇ-eu baˬ da neh g’oeˇ-eu gaˬ-eu la ̭ k’oeˇ taˬ huiˬ taˬ mahˇ nehˬ-awˬ. Naw ma ̭ yaw kaˬ k’aw ̭, tsaˬ leˇ dzoeˇ leˇ-eu jeˬ bi jaˆ-awˬ. 14 Aˬ yui ̭ aˬ nyiˇ Ka li zaˬ deuˬ-oˇ, naw ma ̭-ahˇ nga ma ̭ heu lo ̭-ehˇ g’aˬ bi ̭-eu ma. Maˬ mˇ maˬ shaˇ nahˇ-eu tsawˇ haˬ-ahˇ yaw k’aˆ k’aˆ-ehˇ mehˬ nehˬ tsoˆ nehˬ-awˬ. Nui ma baˬ-eu tsawˇ haˬ-ahˇ g’aˬ bi ̭ nehˬ-awˬ. G’aˬ byehˆ byehˆ-eu tsawˇ haˬ-ahˇ caw ba nehˬ-awˬ. Tsawˇ haˬ yawˬ g’aˬ na lu ̭ k’oeˇ taˆ nui ma g’awˬ mahˇ ni taˬ-awˬ. 15 Naw ma ̭ tiˬ g’aˬ-iˬ aˬ cawˬ yaw doeˇ jahˇ laˇ gaˇ yaw doeˇ maˬ ya jahˇ k’o ̭ nehˬ ni yahˇ-awˬ. Ehˇ k’aw ̭, tiˬ g’aˬ tiˇ g’aˬ yaw muiˬ jeˬ mˇ nehˬ-eu uˬ ta ̭, tsawˇ haˬ dawˬ tawˆ lu ̭-ahˇ yaw muiˬ jeˬ mˇ nehˬ-eu g’aˇ duˬ, aˬ myah lu ̭ noeˬ gahˇ taˬ-awˬ. 16 Aˬ myah lu ̭ laˬ k’aˬ cehˇ-awˬ. 17 Maˬ tsehˆ leˇ ni guiˬ lahˬ shaˇ-awˬ. 18 Aˬ geu jeˬ keuˆ le-eu maˬ kaˬ, Miˬyehˇ-euˬ guiˬ lahˬ-ahˇ ja ceuˬ-awˬ. Yeˬsuˇ Ka li la ̭ k’oeˇ naw ma ̭ k’oeˇ lo ̭-ehˇ deh ̭ gaˇ Miˬyehˇ geu ̭ maw ̭-eu meh. 19 Muiˬ-eu shawˇ-eu Yaw sahˇ Miˬyehˇ-ahˇ taˬ laˆ tsoeˬ. 20 Miˬyehˇ neh bi mehˬ-euˬ lo ̭-ehˇ dawˬ mehˬ mehˬ gaˇ yehˬ bawˬ sehˇ lu-ehˇ taˬ ehˇ. 21 Dawˬ mehˬ k’aˇ mehˬ nehˬ la ̭-euˬ dawˬ tawˆ lu ̭-ahˇ pyehˆ tseˇ haw-awˬ. 22 Yaw muiˬ deuˬ-ahˇ jeˬ hmˬ geu ̭-awˬ. Maˬ muiˬ-eu yawˬ jeˬ na lu ̭-ahˇ gaˇ jaw jaw-awˬ. 23 Aˬ dui-ahˇ nui saˇ o ̭-eu jeˬ bi ̭ nehˬ la ̭-eu Miˬyehˇ naw ma ̭-ahˇ tiˬ byah tiˬ lo ̭ bi muiˬ bi shawˇ laˇ-awˇ, aˬ dui-euˬ Sahˬpaˬ Yeˬsuˇ Ka li za ̭ le ngeh, naw ma ̭-euˬ nui ma, g’awˇ mawˇ, sa ̭ laˇ dawˬ tawˆ lu ̭, iˬ baˇ taˬ k’aˇ maˬ bi za ni Miˬyehˇ bo saˆ lu ̭-uˇ. 24 Naw ma ̭-ahˇ kuˇ-euˬ g’aˬ pyeu ̭-eu Miˬyehˇ-aˬ, naw ma ̭-ahˇ k’oeˇ lo ̭-ehˇ bo saˆ nehˬ la ̭ teh ̭-a. Aˬ jeˬ miˇ neh ehˇ naˇ, aˬ yaw ̭-aˬ, saˇ jaˇ zi ̭-eu g’aˬ pyeu ̭-eu meh. 25 Aˬ yui ̭ aˬ nyiˇ Ka li zaˬ deuˬ-oˇ, nga ma ̭ g’aˇ duˬ k’aw ̭ guiˬ lahˬ shaˇ nehˬ la ̭-awˬ. 26 Aˬ yui ̭ aˬ nyiˇ Ka li zaˬ dawˬ tawˆ lu ̭-ahˇ muiˬ-eu shawˇ-eu la ̭ k’oeˇ mehˬ cuˇ cuˇ-awˇ ha-awˬ. 27 Aˬ yui ̭ aˬ nyiˇ Ka li zaˬ dawˬ tawˆ lu ̭-ahˇ sahˬ bo ̭ heu ta ̭ gui mehˬ-eu g’aˇ duˬ, Sahˬpaˬ Yeˬsuˇ-euˬ baoˬ-ahˇ g’oe-awˇ naw ma ̭-ahˇ ngaˇ yaw k’aˆ k’aˆ-ehˇ g’aˬ bi ̭-eu ma. 28 Aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ naw ma ̭ k’oeˇ taˆ jaˆ lu ̭-uˇ.