1 YOˇHAˬ

1 YOˇHAˬ

¹ Aˇ dahˬ beh ngeh neh deh ̭ lu ̭ jawˇ lu ̭-eu dawˬ pyeu ̭-eu sa ̭ laˇ deh ̭-eu jeˬ bi ̭-eu dawˬ gaˇ kawˆ naw ma ̭ jawˇ gaˇ nga ma ̭ bo ̭ ahˇ la ̭-eu ma. Dawˬ k’oeˇ-ahˇ nga ma ̭ naˬ bawˇ ya gaˬ-awˇ, myaˆ ya mawˇ-euˬ ma. Myaˆ nuiˆ neh haw duˬ-euˬ uˬ ta ̭, aˬ la ̭ neh ya sawˆ duˬ-euˬ ma. ² Saˬ laˇ deh ̭-eu jeˬ k’oeˇ-ahˇ mawˇ nya ni pah mehˬ nehˬ la ̭ ngeh, nga ma ̭ ya mawˇ duˬ-euˬ ma. K’oeˇ miˇ neh, gaˇ kawˆ k’oeˇ nga ma ̭ ja-awˇ, yaw beh Aˬda Miˬyehˇ nehˬ-ehˇ jawˇ-euˬ mˬ maˬ maˬ byaˆ zaˇ ziˇ deh ̭-eu sa ̭ laˇ k’oeˇ nymˬ-mˇ aˬ dui-ahˇ bi siˬ bi mawˇ le-euˬ gaˇ kawˆ naw ma ̭-ahˇ ja mehˬ-eu ma. ³ Naw ma ̭ k’aw ̭, nga ma ̭ nehˬ-ehˇ tiˬ kawˆ lo ̭-ehˇ Aˬda Miˬyehˇ hawˇ-eu aˬ yaw ̭-euˬ Zaˬmaˇ Yeˬsuˇ Ka li-ahˇ cawˬ cawˬ ta ̭ nya laˇ ni, nga ma ̭ neh k’aˇ ya gaˬ k’aˇ ya mawˇ-euˬ jeˬ naw ma ̭-ahˇ dzawˇ nehˬ-eu ma. ⁴ Nga ma ̭ laˬ k’aˬ cehˇ-eu jeˬ byah laˇ ni, sahˬ bo ̭ heu ta ̭ naw ma ̭-ahˇ bo ̭ nehˬ-eu jeˬ pyeu ̭-eu ma. ⁵ Zaˬmaˇ-euˬ guiˬ lahˬ dawˬ nga ma ̭ ya gaˬ-awˇ naw ma ̭-ahˇ ja mehˬ-eu-aˬ, heu lo ̭-ehˇ ma. Miˬyehˇ-aˬ, yaw sheh ̭ pyeu ̭-awˇ, aˬ yaw ̭-euˬ la ̭ k’oeˇ yaw zahˇ tiˬ paw ̭-iˬ maˬ ahˇ-a. ⁶ Aˬ dui aˬ yaw ̭ nehˬ-ehˇ cawˬ cawˬ lu ̭-eu ma lehˇ ehˇ-awˇ, yaw zahˇ la ̭ k’oeˇ jawˇ lu ̭-eu ngeuˇ naˇ, aˬ dui ngehˬ-eu tmˇ-eu la ̭ k’oeˇ maˬ ehˇ, mˇ-eu shaˇ-eu la ̭ k’oeˇ maˬ ehˇ, aˬ yaw ̭-ahˇ jaˬ myaw ̭ myaw ̭ lu ̭ gaˇ duˇ-eu meh. ⁷ Ehˇ k’aw ̭, aˬ yaw ̭ yaw sheh ̭ la ̭ k’oeˇ jawˇ-eu lo ̭-ehˇ, aˬ dui k’aw ̭ yaw sheh ̭ la ̭ k’oeˇ jawˇ naˇ, aˬ dui tiˬ g’aˬ tiˇ g’aˬ cawˬ cawˬ ta ̭-awˇ, Zaˬmaˇ Yeˬsuˇ-euˬ shiˬ aˬ dui-euˬ iˬ baˇ dawˬ tawˆ lu ̭-ahˇ tsiˬ shawˇ nehˬ la ̭ teh ̭-a. ⁸ Aˬ dui iˬ baˇ maˬ ahˇ lehˇ ehˇ naˇ, yawˬ haˇ yawˬ ha jaˬ myaw ̭ myaw ̭-eu jeˬ pyeu ̭-awˇ, aˬ dui-euˬ la ̭ k’oeˇ yaw tsaˬ yaw dawˇ jeˬ maˬ ahˇ-a. ⁹ Ehˇ k’aw ̭, aˬ dui iˬ baˇ ahˇ-eu ngeuˇ ma lehˇ Miˬyehˇ-ahˇ ja doˆ nehˬ naˇ, aˬ yaw ̭ neh saˇ jaˇ dzaˬ taˬ-euˬ dawˬ-ahˇ zi ̭-awˇ yaw tsaˬ yaw dawˇ dawˇ-ehˇ mˇ-eu la ̭ k’oeˇ, aˬ dui-ahˇ iˬ baˇ pyehˬ nehˬ la ̭-awˇ, mˇ lehˬ mˇ ca taˬ-euˬ dawˬ tawˆ lu ̭-ahˇ tsiˬ shawˇ dzeh nehˬ la ̭ teh ̭-a. ¹⁰ Aˬ dui iˬ baˇ maˬ mˇ-aˬ lehˇ ehˇ naˇ, Miˬyehˇ jaˬ myaw ̭ myaw ̭-eu meh lehˇ aˬ dui ehˇ gaˇ duˇ-awˇ, aˬ yaw ̭-euˬ dawˬ aˬ dui-euˬ la ̭ k’oeˇ maˬ ahˇ-a.

¹ Ngaˇ gaˬ dui dui-eu zaˬ deuˬ-oˇ, naw ma ̭ iˬ baˇ maˬ bi mˇ-eu g’aˇ duˬ, gaˇ kawˆ heu deuˬ naw ma ̭ jawˇ gaˇ ngaˇ bo ̭ ahˇ la ̭-eu jeˬ pyeu ̭-eu ma. Ehˇ k’aw ̭, tsawˇ haˬ tiˬ g’aˬ na iˬ baˇ mˇ lawˬ naˇ, aˬ dui-euˬ dah zaˇ Aˬda Miˬyehˇ-ahˇ tahˬ shaˇ leˇ-eu g’aˬ jawˇ ma. K’oeˇ-aˬ, yaw tsaˬ yaw dawˇ tsawˇ haˬ pyeu ̭-eu Yeˬsuˇ Ka li meh. ² Aˬ dui-ahˇ iˬ baˇ pyehˬ nehˬ la ̭-euˬ k’oeˇ-aˬ, Ka li baˬ da neh meh. Aˬ dui-euˬ iˬ baˇ teh ̭-ehˇ maˬ ngeuˇ-ehˇ, tsawˇ haˬ yawˬ g’aˬ na lu ̭-euˬ i baˇ pyehˬ nehˬ la ̭-euˬ meh. ³ Miˬyehˇ neh bi ̭ taˬ-euˬ dawˬ deuˬ-ahˇ aˬ dui naˇ haˬ geu ̭ naˇ, aˬ dui aˬ yaw ̭-ahˇ siˬ nya-eu yaw duˬ baw meh. ⁴ Tsawˇ haˬ tiˬ g’aˬ na aˬ yaw ̭-ahˇ siˬ nya ma lehˇ ehˇ-eu k’aw ̭, aˬ yaw ̭ neh bi ̭ taˬ-euˬ dawˬ deuˬ-ahˇ maˬ naˇ haˬ geu ̭ naˇ, jaˬ myaw ̭ myaw ̭-eu tsawˇ haˬ pyeu ̭-awˇ, aˬ yaw ̭-euˬ la ̭ k’oeˇ yaw tsaˬ yaw dawˇ jeˬ maˬ ahˇ-a. ⁵ Ehˇ k’aw ̭, Miˬyehˇ-euˬ ehˇ dawˬ k’aˇ naˇ haˬ geu ̭-eu tsawˇ haˬ-aˬ, aˬ yaw ̭-euˬ la ̭ k’oeˇ Miˬyehˇ-ahˇ gaˬ-eu jeˬ byah laˇ g’aˬ-euˬ meh. K’oeˇ lo ̭-ehˇ naˇ haˬ geu ̭-eu la ̭ k’oeˇ, aˬ dui aˬ yaw ̭ la ̭ k’oeˇ jawˇ-eu tsawˇ haˬ pyeu ̭-eu gaˇ kawˆ yaw duˬ yaw ciˇ baw-eu meh. ⁶ Miˬyehˇ la ̭ k’oeˇ jawˇ lu ̭ ma lehˇ ehˇ-eu tsawˇ haˬ aˬ geu g’aˬ maˬ kaˬ, Yeˬsuˇ Ka li deh ̭-eu lo ̭-ehˇ deh ̭-eu tsaˬ meh. ⁷ Ngaˇ gaˬ dui dui-eu cawˬ deuˬ-oˇ, ngaˇ naw ma ̭-ahˇ bo ̭ ahˇ la ̭-euˬ dawˬ heu deuˬ-aˬ, yaw shui ̭ maˬ ngeuˇ. Aˇ dahˬ beh ngeh neh naw ma ̭-ahˇ bi ̭-euˬ dawˬ yaw oeˇ k’oeˇ ma. Dawˬ yaw oeˇ k’oeˇ-aˬ, naw ma ̭-ahˇ mehˬ nehˬ-euˬ guiˬ lahˬ dawˬ k’oeˇ meh. ⁸ Ehˇ k’aw ̭, nymˬ-mˇ ngaˇ naw ma ̭ jawˇ gaˇ bo ̭ ahˇ la ̭-euˬ dawˬ heu-aˬ, yaw shui ̭ lehˇ ehˇ nya ma. Aˬ jeˬ miˇ neh ehˇ naˇ, dawˬ heu-euˬ yaw tsaˬ yaw dawˇ jeˬ-ahˇ Ka li-euˬ la ̭ k’oeˇ ya mawˇ-awˇ, naw ma ̭-euˬ la ̭ k’oeˇ k’aw ̭ ya mawˇ-eu meh. Aˬ jeˬ miˇ neh ehˇ naˇ, yaw zahˇ byoˆ-iˇ lu ̭-awˇ, maˇ jawˆ ni g’eh-eu yaw sheh ̭ nymˬ-mˇ bya doˆ le-euˬ meh. ⁹ Tsawˇ haˬ tiˬ g’aˬ na yaw sheh ̭ la ̭ k’oeˇ jawˇ lu ̭ ma lehˇ ehˇ k’aw ̭, Ka li zaˬ cawˬ cawˬ bye naˇ, yaw zahˇ la ̭ k’oeˇ jawˇ lu ̭-a siˬ. ¹⁰ Yawˬ ha-euˬ tsawˇ haˬ pyeu ̭-eu Ka li zaˬ deuˬ-ahˇ gaˬ-eu g’oeˇ-eu tsawˇ haˬ-aˬ, yaw sheh ̭ la ̭ k’oeˇ jawˇ lu ̭-awˇ, aˬ yaw ̭ baˬ da neh aˬ cawˬ iˬ baˇ mˇ-eu jeˬ maˬ jaˆ-a. ¹¹ Ehˇ k’aw ̭, yawˬ ha-euˬ cawˬ Ka li zaˬ deuˬ-ahˇ bye-eu tsawˇ haˬ-aˬ, yaw zahˇ la ̭ k’oeˇ jawˇ lu ̭-eu meh. Yaw zahˇ la ̭ k’oeˇ cah lu ̭-awˇ, yawˬ ha aˬ gaˇ iˇ lu ̭-eu gaˇ kawˆ maˬ siˬ nya-a. Aˬ jeˬ miˇ neh ehˇ naˇ, yaw zahˇ k’oeˇ aˬ yaw ̭-ahˇ myaˆ beh ̭ bi beh ̭-iˇ-euˬ meh. ¹² Ngaˇ gaˬ dui dui-eu zaˬ deuˬ-oˇ, Yeˬsuˇ Ka li baˬ da neh naw ma ̭-ahˇ iˬ baˇ pyehˬ nehˬ g’aˬ-euˬ miˇ neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu ma. ¹³ Aˬ da deuˬ-oˇ, mˬ beh miˇ beh ngeh neh deh ̭ lu ̭-eu g’aˬ-ahˇ naw ma ̭ siˬ nya-eu miˇ neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu ma. Zaˬ guˬ deuˬ-oˇ, Haiˬ dui dui-eu G’aˬ-ahˇ naw ma ̭ g’aˬ leˇ-euˬ miˇ neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu ma. ¹⁴ Ngaˇ gaˬ dui dui-eu zaˬ deuˬ-oˇ, Aˬ da Miˬyehˇ-ahˇ naw ma ̭ siˬ nya-eu miˇ neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu ma. Aˬ da deuˬ-oˇ, mˬ beh miˇ beh ngeh neh deh ̭ lu ̭ jawˇ lu ̭-eu g’aˬ-ahˇ naw ma ̭ siˬ nya-eu miˇ neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu ma. Zaˬ guˬ deuˬ-oˇ, naw ma ̭ nui ma g’aˬ k’aˆ-eu miˇ neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu ma. Miˬyehˇ-euˬ dawˬ naw ma ̭ la ̭ k’oeˇ ahˇ-awˇ, Haiˬ dui dui-eu G’aˬ-ahˇ naw ma ̭ g’aˬ leˇ-euˬ meh. ¹⁵ Miˇ tsaˬ heu hawˇ-eu miˇ tsaˬ k’oeˇ taˆ jaˆ-eu jeˬ-ahˇ gaˬ-eu nui ma taˬ bi ahˇ. miˇ tsaˬ heu-ahˇ gaˬ-eu tsawˇ haˬ-aˬ, Aˬda Miˬyehˇ-ahˇ maˬ gaˬ nya-a. ¹⁶ Miˇ tsaˬ heu k’oeˇ taˆ jaˆ-eu jeˬ pyeu ̭-eu, shiˬ shaˬ jiˇ nui k’ahˇ, myaˆ nuiˆ-euˬ nui k’ahˇ, huiˬ maw ̭ mahˇ maw ̭-eu nui ma, heu deuˬ dawˬ tawˆ lu ̭ Aˬda Miˬyehˇ jawˇ gaˇ neh doˆ le-euˬ jeˬ maˬ ngeuˇ-a. Miˇ tsaˬ heu k’oeˇ taˆ jaˆ-eu jeˬ pyeu ̭-eu meh. ¹⁷ Miˇ tsaˬ heu hawˇ-eu miˇ tsaˬ heu k’oeˇ taˆ tsawˇ haˬ zaˬ nui k’ahˇ k’aˇ jaˆ-eu jeˬ dawˬ tawˆ lu ̭ ya byoˆ-iˇ jiˇ teh ̭-a. Ehˇ k’aw ̭, Miˬyehˇ-euˬ nui k’ahˇ mˇ-eu tsawˇ haˬ-aˬ, mˬ maˬ maˬ byaˆ zaˇ ziˇ ya deh ̭ teh ̭-a. ¹⁸ Ngaˇ gaˬ dui dui-eu zaˬ deuˬ-oˇ, aˇ saˬ saˬ-eu aˇ yamˬ peh le-euˬ meh. Ka li-ahˇ Muiˇ-eu G’aˬ oe lu ̭ meh lehˇ ehˇ-eu naw ma ̭ ya gaˬ taˬ-euˬ meh. Ka li-ahˇ muiˇ-eu g’awˬ mya g’aˬ nymˬ-mˇ doˆ le g’aˬ-euˬ meh. K’oeˇ miˇ neh, aˇ saˬ saˬ-eu aˇ yamˬ keuˆ le-euˬ gaˇ kawˆ aˬ dui siˬ nya-eu ma. ¹⁹ Tsawˇ haˬ heu deuˬ-aˬ, aˬ dui-euˬ aˇ ma ̭ aˇ muˇ-ahˇ maˇ maˇ ni ta ̭-eu deuˬ maˬ ngeuˇ-a. K’oeˇ miˇ neh, aˬ yaw ̭ ma ̭ aˬ dui-ahˇ g’awˬ-iˇ-eu meh. Aˬ yaw ̭ ma ̭ aˬ dui-euˬ aˇ ma ̭ aˇ muˇ-ahˇ ta ̭ law nmˇ-aˬ, aˬ dui-ahˇ maˬ g’awˬ-iˇ ni jawˇ teh ̭-a. Aˬ yaw ̭ ma ̭ aˬ dui-ahˇ maˬ ta ̭-eu gaˇ kawˆ bi siˬ duˬ laˇ-eu g’aˇ duˬ, aˬ dui-ahˇ g’awˬ-iˇ-euˬ jeˬ pyeu ̭-eu meh. ²⁰ Ehˇ k’aw ̭, Ka li neh naw ma ̭ k’oeˇ taˆ Muiˬ-eu shawˇ-eu Yaw sahˇ Miˬyehˇ shehˆ daˆ nehˬ g’aˬ-euˬ miˇ neh, naw ma ̭ dawˬ tawˆ lu ̭ yaw tsaˬ yaw dawˇ jeˬ-ahˇ siˬ nya meh. ²¹ Naw ma ̭ yaw tsaˬ yaw dawˇ jeˬ-ahˇ maˬ siˬ nya-eu baˬ da neh, ngaˇ naw ma ̭-ahˇ sahˬ bo bo ̭ ahˇ la ̭-eu maˬ ngeuˇ. Yaw tsaˬ yaw dawˇ k’oeˇ-ahˇ naw ma ̭ siˬnya-eu uˬ ta ̭, k’oeˇ-euˬ la ̭ k’oeˇ jaˬ myaw ̭ myaw ̭-eu jeˬ maˬ doˆ laˇ-a lehˇ naw ma ̭ siˬ nya-eu baˬ da neh, ngaˇ naw ma ̭-ahˇ sahˬ bo ̭ bo ̭ ahˇ la ̭-eu jeˬ pyeu ̭-eu ma. ²² Toˆ-ehˇ ngeuˇ naˇ, jaˬ myaw ̭ myaw ̭-eu aˬ suˇ g’aˬ-a. Yeˬsuˇ-ahˇ Ka li maˬ ngeuˇ-a lehˇ pyehˇ-eu g’aˬ-aˬ, jaˬ myaw ̭ myaw ̭-eu g’aˬ meh. K’oeˇ lo ̭-ehˇ pyehˇ-eu tsawˇ haˬ-aˬ, Aˬda Miˬyehˇ-ahˇ maˬ ehˇ, Zaˬmaˇ-ahˇ maˬ ehˇ, byehˇ dzeh-euˬ tsawˇ haˬ meh. ²³ A jeˬ miˇ neh ehˇ naˇ, Zaˬmaˇ-ahˇ k’aˇ byehˇ dzeh-eu tsawˇ haˬ-aˬ, Aˬda Miˬyehˇ-ahˇ byehˇ dzeh gaˇ duˇ-awˇ, Zaˬmaˬ-ahˇ k’aˇ ha geu ̭-eu tsawˇ haˬ-aˬ, Aˬda Miˬyehˇ-ahˇ ha geu ̭ gaˇ duˇ-eu meh. ²⁴ K’oeˇ miˇ neh, aˇ dahˬ beh ngeh neh naw ma ̭ ya gaˬ taˬ-euˬ guiˬ lahˬ dawˬ-ahˇ nui ma la ̭ k’oeˇ zi ̭ dah ni tuˆ tehˬ taˬ-awˬ. Guiˬ lahˬ dawˬ k’oeˇ-ahˇ naw ma ̭ tuˆ tehˬ taˬ naˇ, Zaˬmaˇ hawˇ-eu Aˬda Miˬyehˇ la ̭ k’oeˇ naw ma ̭ aˬ myah lu ̭ jawˇ teh ̭-a. ²⁵ Mˬ maˬ maˬ byaˆ zaˇ ziˇ deh ̭-eu jeˬ aˬ dui-ahˇ bi ̭ nehˬ la ̭-eu g’aˇ duˬ, Ka li neh saˇ jaˇ dzaˬ taˬ-euˬ jaˆ-eu meh. ²⁶ Naw ma ̭-ahˇ mehˇ shuiˇ shuiˇ geu ̭-eu lehˇ leh jeh lu ̭-eu tsawˇ haˬ deuˬ gaˇ kawˆ ngaˇ naw ma ̭-ahˇ bo ̭ ahˇ la ̭-eu jeˬ pyeu ̭-eu ma. ²⁷ Ehˇ k’aw ̭, Ka li neh naw ma ̭-euˬ k’oeˇ taˆ aˬ yaw ̭-euˬ Yaw sahˇ shehˆ daˆ nehˬ g’aˬ-euˬ meh. Aˬ yaw ̭-euˬ Yaw sahˇ k’oeˇ naw ma ̭ la ̭ k’oeˇ k’aˇ jawˇ k’oeˇ keuˆ ni, aˬ cawˬ naw ma ̭-ahˇ mehˬ nehˬ tsoˆ nehˬ-eu maˬ paˇ loˬ meh. Aˬ jeˬ miˇ neh ehˇ naˇ, aˬ yaw ̭-euˬ Yaw sahˇ k’oeˇ naw ma ̭-ahˇ yawˬ jeˬ na lu ̭ mehˬ nehˬ tsoˆ nehˬ la ̭ teh ̭-a. Aˬ yaw ̭-euˬ Yaw sahˇ k’aˇ mehˬ k’aˇ tsoˆ-eu jeˬ dawˬ tawˆ lu ̭, tsaˬ dui dui-eu meh. Tiˬ paw ̭-iˬ maˬ lehˬ-a. Yaw sahˇ k’oeˇ neh mehˬ nehˬ tsoˆ nehˬ la ̭-euˬ jeˬ-ahˇ naˇ haˬ geu ̭-awˇ, Ka li-euˬ la ̭ k’oeˇ jawˇ-awˬ. ²⁸ Ngaˇ gaˬ dui dui-eu zaˬ deuˬ-oˇ, Ka li za ̭ le-eu Aˇ nah keuˆ le-awˇ, aˬ yaw ̭-ahˇ bya cehˆ ni ya mawˇ ngeh, aˬ dui-euˬ nui ma maˬ ya baˬ-ehˇ, aˬ yaw ̭-ahˇ sha ̭ dawˇ-eu baˬ da neh cehˆ za ̭ cehˆ za ̭-ehˇ maˬ ya shaˬ ni, nymˬ-mˇ naw ma ̭ aˬ yaw ̭-euˬ la ̭ k’oeˇ jawˇ-awˬ. ²⁹ Ka li yaw tsaˬ yaw dawˇ meh lehˇ naw ma ̭ siˬ nya lu ̭-eu-aˬ, yaw tsaˬ yaw dawˇ jeˬ k’aˇ mˇ-eu tsawˇ haˬ yawˬ g’aˬ na lu ̭ Miˬyehˇ-euˬ zaˬ meh lehˇ naw ma ̭ siˬ nya-eu tsaˬ meh.

¹ Aˬda Miˬyehˇ aˬ dui-ahˇ aˇ naˆ ni gaˬ-eu gaˇ kawˆ shaˇ noeˬ haw sheˇ. Aˬ yaw ̭ aˬ dui-ahˇ gaˬ dui dui-eu miˇ neh Miˬyehˇ-euˬ zaˬ lehˇ myahˇ nehˬ la ̭-euˬ meh. Aˬ dui-aˬ, maˇ maˇ ni aˬ yaw ̭-euˬ zaˬ deuˬ ma. K’oeˇ miˇ neh, miˇ tsaˬ zaˬ deuˬ aˬ dui-ahˇ maˬ siˬ nya-a. Aˬ jeˬ miˇ neh ehˇ naˇ, aˬ yaw ̭ ma ̭ Miˬyehˇ-ahˇ maˬ siˬ nya-eu miˇ neh, aˬ dui-ahˇ maˬ siˬ nya-eu jeˬ pyeu ̭-eu meh. ² Ngaˇ gaˬ dui dui-eu cawˬ deuˬ-oˇ, nymˬ-mˇ aˬ dui Miˬyehˇ-euˬ zaˬ ma. Ehˇ k’aw ̭, aˬ dui mehˬ hu paw aˬ joˆ-ehˇ pyeu ̭ laˇ-eu maˬ duˬ-a siˬ. Ehˇ k’aw ̭, Yeˬsuˇ Ka li-ahˇ bya cehˆ ni ya mawˇ ngeh, aˬ dui aˬ yaw ̭ lo ̭-ehˇ pyeu ̭ laˇ teh ̭-a lehˇ siˬ duˬ taˬ-euˬ ma. Aˬ jeˬ miˇ neh ehˇ naˇ, aˬ yaw ̭ k’aˇ ngeuˇ-eu lo ̭-ehˇ aˬ dui aˬ yaw ̭-ahˇ ya mawˇ duˬ ma. ³ Ka li la ̭ k’oeˇ, k’oeˇ lo ̭-ehˇ k’aˇ noeˬ tmˬ taˬ-euˬ tsawˇ haˬ deuˬ-aˬ, Ka li muiˬ-eu shawˇ-eu lo ̭-ehˇ, yawˬ ha k’aw ̭ ya bi muiˬ ya bi shawˇ meh. ⁴ Iˬ baˇ mˇ-euˬ tsawˇ haˬ yawˬ g’aˬ na lu ̭ Miˬyehˇ-euˬ zahˇ dawˬ k’o ̭ dawˬ-ahˇ mˇ bahˬ-euˬ meh. Aˬ jeˬ miˇ neh ehˇ naˇ, iˬ baˇ ehˇ-eu jeˬ-aˬ, zahˇ dawˬ k’o ̭ dawˬ-ahˇ bahˬ leˇ-eu jeˬ pyeu ̭-eu meh. ⁵ Ka li oe-euˬ-aˬ, iˬ baˇ-ahˇ yuˇ dzeh-eu g’aˇ duˬ pyeu ̭-awˇ, aˬ yaw ̭-euˬ la ̭ k’oeˇ iˬ baˇ tiˬ paw ̭-iˬ maˬ ahˇ-eu gaˇ kawˆ naw ma ̭ siˬ duˬ lu ̭ meh. ⁶ K’oeˇ miˇ neh, Ka li la ̭ k’oeˇ k’aˇ jawˇ-eu tsawˇ haˬ-aˬ, iˬ baˇ maˬ paˇ mˇ meh. Ehˇ k’aw ̭, iˬ baˇ k’aˇ mˇ doˆ le ̭-eu tsawˇ haˬ-aˬ, Ka li-ahˇ tiˬ jawˇ-iˬ maˬ siˬ maˬ mawˇ haw-euˬ tsawˇ haˬ pyeu ̭-eu meh. ⁷ Ngaˇ gaˬ dui dui-eu zaˬ deuˬ-oˇ, tsawˇ haˬ tiˬ g’aˬ neh-iˬ naw ma ̭-ahˇ mehˇ shuiˇ taˬ bi shuiˇ tawˆ. Yaw tsaˬ yaw dawˇ jeˬ-ahˇ k’aˇ mˇ-eu tsawˇ haˬ-aˬ, Ka li tsaˬ-eu dawˇ-eu lo ̭-ehˇ yawˬ ha k’aw ̭ tsaˬ-eu dawˇ-eu meh. ⁸ Iˬ baˇ k’aˇ mˇ daˆ le ̭-eu tsawˇ haˬ-aˬ, Neh ̭ sahˬ paˬ-ahˇ ta ̭-eu tsawˇ haˬ meh. Aˬ jeˬ miˇ neh ehˇ naˇ, Neh ̭ sahˬ paˬ-aˬ, aˇ dahˬ beh ngeh neh iˬ baˇ mˇ daˆ la ̭-euˬ meh. K’oeˇ baˬ da neh, Miˬyehˇ-euˬ Zaˬmaˇ oe-euˬ meh. Neh ̭ sahˬ paˬ neh mˇ taˬ-euˬ jeˬ-ahˇ laˆ cawˆ-eu g’aˇ duˬ oe-euˬ jeˬ pyeu ̭-eu meh. ⁹ Miˬyehˇ-euˬ zaˬ pyeu ̭ laˇ-euˬ tsawˇ haˬ aˬ geuˬ g’aˬ maˬ kaˬ, iˬ baˇ maˬ paˇ mˇ meh. Aˬ jeˬ miˇ neh ehˇ naˇ, Miˬyehˇ-euˬ shehˆ dzeu ̭ aˬ yaw ̭-euˬ la ̭ k’oeˇ ahˇ-eu meh. Miˬyehˇ-aˬ, aˬ yaw ̭-euˬ aˬ da pyeu ̭-eu baˬ da neh, aˬ yaw ̭ iˬ baˇ maˬ paˇ mˇ daˆ le ̭ nya meh. ¹⁰ Miˬyehˇ-euˬ zaˬ hawˇ-eu Neh ̭ sahˬ paˬ-euˬ zaˬ yaw kaˬ k’oeˇ naˆ ni beu gaˇ-eu meh. Yaw tsaˬ yaw dawˇ jeˬ maˬ mˇ-ehˇ, Ka li zaˬ cawˬ cawˬ maˬ gaˬ-eu tsawˇ haˬ-aˬ, Miˬyehˇ-euˬ zaˬ maˬ ngeuˇ-a. ¹¹ Aˇ dahˬ beh ngeh neh naw ma ̭ ya gaˬ taˬ-euˬ guiˬ lahˬ dawˬ-aˬ, aˬ dui tiˬ g’aˬ tiˇ g’aˬ ya gaˬ meh lehˇ ehˇ-eu k’oeˇ dawˬ meh. ¹² Aˬ dui-aˬ, Gaˬiˇnaˆ lo ̭-ehˇ maˬ ya g’eh-a. Aˬ yaw ̭-aˬ, Haiˬ dui dui-eu G’aˬ-ahˇ ta ̭-eu tsawˇ haˬ pyeu ̭-awˇ, aˬ yaw ̭-euˬ aˬ nyiˇ tsi tsi ni g’eh-eu Aˬbeˬlaˆ-ahˇ se h ̭-euˬ meh. Aˬ jeˬ miˇ neh yawˬ ha-euˬ aˬ nyiˇ-ahˇ seh ̭-euˬ ta. Aˬ yaw ̭ neh mˇ-euˬ jeˬ lehˬ-awˇ, aˬ yaw ̭-euˬ aˬ nyiˇ neh mˇ-euˬ jeˬ tsaˬ-eu miˇ neh seh ̭-euˬ meh. ¹³ K’oeˇ miˇ neh aˬ yui ̭ aˬ nyiˇ Ka li zaˬ deuˬ-oˇ, miˇ tsaˬ zaˬ deuˬ naw ma ̭-ahˇ muiˇ gaˇ taˬ zahˬ leˇ. ¹⁴ Aˬ dui-aˬ, shiˇ-eu jeˬ la ̭ k’oeˇ neh doˆ dzeuˇ laˇ-awˇ, deh ̭-eu jeˬ la ̭ k’oeˇ uˇ keuˆ laˇ taˬ-euˬ ma lehˇ siˬ nya-eu ma. Aˬ dui Ka li zaˬ cawˬ cawˬ gaˬ lu ̭-eu miˇ neh, k’oeˇ lo ̭-ehˇ ehˇ tsehˆ nya-eu ma. G’oeˇ-eu gaˬ-eu jeˬ maˬ ahˇ-eu tsawˇ haˬ-aˬ, shiˇ-eu jeˬ-euˬ baoˬ uˬ moˆ jawˇ lu ̭-a siˬ. ¹⁵ Yawˬ ha-euˬ cawˬ pyeu ̭-eu Ka li zaˬ deuˬ-ahˇ bye-eu tsawˇ haˬ-aˬ, aˬ cawˬ-ahˇ seh ̭ gaˇ duˇ-eu meh. Aˬ cawˬ-ahˇ seh ̭-eu tsawˇ haˬ-aˬ, yawˬ ha la ̭ k’oeˇ mˬ maˬ maˬ byaˆ zaˇ ziˆ deh ̭-eu jeˬ-ahˇ maˬ za nya-a lehˇ naw ma ̭ siˬ nya meh. ¹⁶ Aˬ dui g’aˇ duˬ Ka li shiˇ dah-euˬ miˇ neh, g’oeˇ-eu gaˬ-eu jeˬ lehˇ ehˇ-eu-aˬ, k’oeˇ lo ̭-ehˇ g’eh gaˇ ehˇ-eu meh lehˇ aˬ dui siˬ nya-eu ma. Aˬ dui k’aw ̭, aˬ dui-euˬ tsawˇ haˬ pyeu ̭-eu jah-eu tsawˇ haˬ deuˬ g’aˇ duˬ shiˇ dah-eu tsaˬ meh. ¹⁷ Smˇ muiˬ smˇ baw tiˬ g’aˬ-aˬ, shaˬ-eu zahˬ-eu aˬ yui ̭ aˬ nyiˇ tiˬ g’aˬ-ahˇ mawˇ lu ̭ k’aw ̭, g’awˬ shaˬ gaˬ-eu nui ma maˬ ahˇ naˇ, Ka li zaˬ ma lehˇ aˬ joˆ-ehˇ ehˇ nya nmˇ. ¹⁸ Ngaˇ gaˬ dui dui-eu zaˬ deuˬ-oˇ, aˬ dui-euˬ g’oeˇ-eu gaˬ-eu heu-aˬ, mehˬ boeˬ neh teh ̭-ehˇ gaˬ-eu jeˬ taˬ bi pyeu ̭. Maˇ jawˆ ni g’eh-eu g’oeˇ-eu gaˬ-eu jeˬ bi pyeu ̭-awˇ, mˇ-eu shaˇ-eu la ̭ k’oeˇ bi doˆ laˇ-awˬ. ¹⁹ Aˬ dui-euˬ g’oeˇ-eu gaˬ-eu jeˬ heu maˇ jawˆ ni g’eh-eu baˬ da neh, yawˬ ha yaw tsaˬ yaw dawˇ jeˬ-ahˇ ta ̭-eu gaˇ kawˆ yawˬ haˇ yawˬ ha siˬ laˇ teh ̭-a. K’oeˇ baˬ da neh Miˬyehˇ mehˬ shi aˬ dui nui ma zi ̭ dah ni jaˆ teh ̭-a. ²⁰ Aˬ dui-euˬ nui ma aˬ dui-ahˇ iˬ baˇ taˬ k’aˇ za ngeh, Miˬyehˇ-aˬ, aˬ dui-euˬ nui ma naˆ maˬ tseˇ huiˬ dzehˬ mahˇ dzehˬ-awˇ dawˬ tawˆ lu ̭-ahˇ siˬ nya meh lehˇ aˬ dui noeˬ duˬ k’aˇ za-eu ma. ²¹ K’oeˇ miˇ neh ngaˇ gaˬ dui dui-eu cawˬ deuˬ-oˇ, aˬ dui-euˬ nui ma aˬ dui-ahˇ iˬ baˇ taˬ k’aˇ maˬ za naˇ, Miˬyehˇ mehˬ shi aˬ dui nui ma zi ̭ dah ni jaˆ-eu ma. ²² Aˬ yaw ̭-euˬ dawˬ-ahˇ aˬ dui naˇ ha ̭ geu ̭-awˇ, aˬ yaw ̭ nui k’ahˇ shiˇ-eu jeˬ aˬ dui mˇ-eu miˇ neh, aˬ yaw ̭-ahˇ k’aˇ shaˇ-eu jeˬ aˬ dui za-eu ma. ²³ Aˬ yaw ̭ neh aˬ dui-ahˇ bi ̭-euˬ dawˬ-aˬ, aˬ yaw ̭-euˬ Zaˬmaˇ Yeˬsuˇ Ka li-ahˇ jah-awˇ, Ka li neh dawˬ bi ̭ taˬ-euˬ lo ̭-ehˇ tiˬ g’aˬ tiˇ g’aˬ gaˬ-awˬ lehˇ ehˇ-eu k’oeˇ dawˬ meh. ²⁴ Miˬyehˇ neh bi ̭-euˬ dawˬ-ahˇ k’aˇ naˇ haˬ geu ̭-eu tsawˇ haˬ-aˬ, Miˬyehˇ-euˬ la ̭ k’oeˇ jawˇ-eu tsawˇ haˬ pyeu ̭-awˇ, Miˬyehˇ k’aw ̭, aˬ yaw ̭-euˬ la ̭ k’oeˇ jawˇ-eu meh. Miˬyehˇ neh bi ̭ le ̭-euˬ Yaw sahˇ Miˬyehˇ baˬ da neh, Miˬyehˇ a dui-euˬ la ̭ k’oeˇ jawˇ meh lehˇ aˬ dui siˬ duˬ-eu ma.

¹ Ngaˇ gaˬ dui dui-eu cawˬ deuˬ-oˇ, Yaw sahˇ Miˬyehˇ za-euˬ tsawˇ haˬ ma lehˇ k’aˇ ehˇ laˇ gaˇ naw ma ̭ maˬ jah ni, aˬ yaw ̭ ma ̭ za-euˬ yaw sahˇ k’oeˇ Miˬyehˇ jawˇ gaˇ neh oe-euˬ nga loˇ lehˇ jeˬ huˬ lawˬ haw-awˬ. Aˬ jeˬ miˇ neh ehˇ naˇ, Miˬyehˇ g’aˇ duˬ ngehˬ dah-eu maˬ ngeuˇ-eu tsawˇ haˬ deuˬ miˇ tsaˬ doe ni iˇ byah taˬ-euˬ meh. ² Maˇ maˇ ni Miˬyehˇ-euˬ Yaw sahˇ ngeuˇ-eu maˬ ngeuˇ-eu naw ma ̭ heu lo ̭-ehˇ siˬ duˬ nya teh ̭-a. Yeˬsuˇ Ka li-aˬ, maˇ maˇ ni tsawˇ haˬ zaˬ-euˬ shiˬ shaˬ jiˇ pi-awˇ oe-euˬ meh lehˇ k’aˇ ehˇ-eu tsawˇ haˬ-aˬ, Miˬyehˇ jawˇ gaˇ neh oe-euˬ Yaw sahˇ za taˬ-euˬ tsawˇ haˬ pyeu ̭-eu meh. ³ Ehˇ k’aw ̭, k’oeˇ lo ̭-ehˇ maˬ ngeuˇ-a lehˇ ehˇ-eu tsawˇ haˬ-aˬ, Miˬyehˇ jawˇ gaˇ neh oe-euˬ Yaw sahˇ za-euˬ tsawˇ haˬ maˬ ngeuˇ-a. Aˬ yaw ̭ za-euˬ yaw sahˇ k’oeˇ-aˬ, Ka li-ahˇ Muiˇ-eu g’aˬ jawˇ gaˇ neh oe-euˬ yaw sahˇ pyeu ̭-eu meh. Aˬ yaw ̭ oe teh ̭-a lehˇ naw ma ̭ ya gaˬ taˬ-euˬ meh. Nymˬ-mˇ aˬ yaw ̭ miˇ tsaˬ heu k’oeˇ taˆ oe keuˆ taˬ-euˬ meh. ⁴ Ehˇ k’aw ̭, ngaˇ gaˬ dui dui-eu zaˬ deuˬ-oˇ, naw ma ̭-aˬ, Miˬyehˇ-ahˇ ta ̭-eu tsawˇ haˬ pyeu ̭-awˇ, Miˬyehˇ g’aˇ duˬ ngehˬ dah-eu maˬ ngeuˇ-eu tsawˇ haˬ k’oeˇ deuˬ-ahˇ g’aˬ leˇ-euˬ meh. Aˬ jeˬ miˇ neh ehˇ naˇ, naw ma ̭ la ̭ k’oeˇ jawˇ lu ̭-eu Yaw sahˇ-aˬ, miˇ tsaˬ heu-ahˇ ta ̭-eu tsawˇ haˬ deuˬ la ̭ k’oeˇ jawˇ lu ̭-eu yaw sahˇ naˆ maˬ tseˇ baoˬ ahˇ dzehˬ-eu meh. ⁵ Miˬyehˇ g’aˇ duˬ ngehˬ dah-eu maˬ ngeuˇ-eu tsawˇ haˬ k’oeˇ deuˬ miˇ tsaˬ heu-ahˇ ta ̭-eu gaˇ kawˆ ja gaˇ, miˇ tsaˬ zaˬ deuˬ naˇ haˬ geu ̭-eu meh. Aˬ jeˬ miˇ neh ehˇ naˇ, aˬ yaw ̭ ma ̭-aˬ, miˇtsaˬ heu-ahˇ ta ̭-eu tsawˇ haˬ deuˬ pyeu ̭-eu meh. ⁶ Ehˇ k’aw ̭, aˬ dui-aˬ, Miˬyehˇ-ahˇ ta ̭-eu ma. Miˬyehˇ-ahˇ k’aˇ siˬ nya-eu tsawˇ haˬ-aˬ, nga ma ̭-euˬ ehˇ dawˬ naˇ haˬ geu ̭-eu meh. Miˬyehˇ-ahˇ maˬ k’aˇ ta ̭-eu tsawˇ haˬ-aˬ, nga ma ̭-euˬ ehˇ dawˬ maˬ naˇ haˬ geu ̭-a. K’oeˇ gaˇ haw-awˇ, ngeuˇ-eu Yaw sahˇ hawˇ-eu maˬ ngeuˇ-eu yaw sahˇ-ahˇ aˬ dui tseˇ paˆ geu ̭ nya teh ̭-a. ⁷ Ngaˇ gaˬ dui dui-eu cawˬ deuˬ-oˇ, aˬ dui tiˬ g’aˬ tiˇ g’aˬ gaˬ kaˇ-euˇ. Aˬ jeˬ miˇ neh ehˇ naˇ, g’oeˇ-eu gaˬ-eu jeˬ-aˬ, Miˬyehˇ jawˇ gaˇ neh doˆ le-euˬ meh. G’oeˇ-eu gaˬ-eu jeˬ k’aˇ ahˇ-eu tsawˇ haˬ-aˬ, Miˬyehˇ-euˬ zaˬ pyeu ̭-awˇ, Miˬyehˇ-ahˇ siˬ nya-eu meh. ⁸ G’oeˇ-eu gaˬ-eu jeˬ maˬ k’aˇ ahˇ-eu tsawˇ haˬ-aˬ, Miˬyehˇ-ahˇ maˬ siˬ nya-a. Aˬ jeˬ miˇ neh ehˇ naˇ, Miˬyehˇ-aˬ g’oeˇ-eu gaˬ-eu jeˬ pyeu ̭-eu meh. ⁹ Miˬyehˇ-aˬ, aˬ yaw ̭-euˬ Zaˬmaˇ tiˬ g’aˬ teh ̭-ehˇ jawˇ-eu k’aw ̭, Zaˬmaˇ baˬ da neh aˬ dui deh ̭-eu jeˬ za nya ni miˇ tsaˬ k’oeˇ taˆ k’ehˇ g’eh le-awˇ, aˬ yaw ̭-euˬ g’oeˇ-eu gaˬ-eu jeˬ aˬ dui-ahˇ bi mawˇ la ̭-euˬ meh. ¹⁰ G’oeˇ-eu gaˬ-eu jeˬ-aˬ, heu lo ̭-ehˇ meh. Aˬ dui Miˬyehˇ-ahˇ gaˬ-euˬ maˬ ngeuˇ. Aˬ yaw ̭ aˬ dui-ahˇ gaˬ-awˇ, aˬ dui-euˬ iˬ baˇ bi pi dzeh le-eu g’aˇ duˬ aˬ yaw ̭-euˬ Zaˬmaˇ-ahˇ k’ehˇ g’eh le ̭-euˬ meh. ¹¹ Ngaˇ gaˬ dui dui-eu cawˬ deuˬ-oˇ, Miˬyehˇ aˬ dui-ahˇ k’oeˇ naˆ ni gaˬ gaˇ keuˆ-eu-aˬ, aˬ dui tiˬ g’aˬ tiˇ g’aˬ gaˬ-eu tsaˬ teh ̭-a. ¹² Tsawˇ haˬ tiˬ g’aˬ-iˬ Miˬyehˇ-ahˇ maˬ mawˇ haw-aˬ. Ehˇ k’aw ̭, aˬ dui tiˬ g’aˬ tiˇ g’aˬ gaˬ naˇ, aˬ dui la ̭ k’oeˇ Miˬyehˇ jawˇ-awˇ, aˬ yaw ̭-euˬ g’oeˇ-eu gaˬ-eu jeˬ aˬ dui la ̭ k’oeˇ byah laˇ teh ̭-a. ¹³ Miˬyehˇ-euˬ la ̭ k’oeˇ aˬ dui jawˇ lu ̭-awˇ, aˬ dui-euˬ la ̭ k’oeˇ k’aw ̭ aˬ yaw ̭ jawˇ lu ̭-eu yaw duˬ baw-eu ma. Aˬ jeˬ miˇ neh ehˇ naˇ, aˬ dui-ahˇ aˬ yaw ̭-euˬ Yaw sahˇ Miˬyehˇ bi ̭ la ̭-euˬ meh. ¹⁴ Miˬyehˇ neh aˬ yaw ̭-euˬ Zaˬmaˇ-ahˇ miˇ tsaˬ heu-ahˇ Ka k’o ̭-eu g’aˬ bi geu ̭-eu lehˇ k’ehˇ g’eh le ̭-euˬ gaˇ aˬ dui k’aˇ ya mawˇ-euˬ lo ̭-ehˇ aˬ cawˬ-ahˇ ja mehˬ-eu ma. ¹⁵ Yeˬsuˇ-aˬ, Miˬyehˇ-euˬ Zaˬmaˇ meh lehˇ k’aˇ ehˇ-eu tsawˇ haˬ-aˬ, Miˬyehˇ-euˬ la ̭ k’oeˇ jawˇ-eu tsawˇ haˬ pyeu ̭-awˇ, Miˬyehˇ k’aw ̭, aˬ yaw ̭-euˬ la ̭ k’oeˬ jawˇ-eu meh. ¹⁶ K’oeˇ miˇ neh, Miˬyehˇ neh aˬ dui-ahˇ gaˬ-euˬ g’oeˇ-eu gaˬ-eu jeˬ k’oeˇ-ahˇ aˬ dui siˬ nya-awˇ jah-eu ma. Miˬyehˇ-aˬ, g’oeˇ-eu gaˬ-eu jeˬ pyeu ̭-eu meh. G’oeˇ-eu gaˬ-eu jeˬ la ̭ k’oeˇ k’aˇ jawˇ-eu tsawˇ haˬ-aˬ, Miˬyehˇ-euˬ la ̭ k’oeˇ jawˇ-awˇ, Miˬyehˇ k’aw ̭, aˬ yaw ̭-euˬ la ̭ k’oeˇ jawˇ-eu meh. ¹⁷ Yaˇ k’aˬ daˇ-eu aˇ nah-ahˇ aˬ dui nui ma zi ̭ dah ni jaˆ ni, aˬ dui la ̭ k’oeˇ g’oeˇ-eu gaˬ-eu jeˬ bi byah laˇ-euˬ meh. Aˬ dui nui ma zi ̭ dah ni jaˆ ma. Aˬ jeˬ miˇ neh ehˇ naˇ, aˬ dui miˇ tsaˬ k’oeˇ taˆ deh ̭-eu heu-aˬ, Ka li aˬ yaw ̭ miˇ tsaˬ k’oeˇ taˆ deh ̭ ya ̭-euˬ lo ̭-ehˇ tiˬ kawˆ ma. ¹⁸ G’oeˇ-eu gaˬ-eu jeˬ la ̭ k’oeˇ, guˆ-eu jeˬ maˬ ahˇ-a. Byah-eu g’oeˇ-eu gaˬ-eu jeˬ-aˬ, guˆ-eu nui ma bi byoˆ-iˇ-eu meh. K’oeˇ miˇ neh, guˆ-eu nui ma ahˇ-eu tsawˇ haˬ la ̭ k’oeˇ g’oeˇ-eu gaˬ-eu jeˬ maˬ byah laˇ nya-a. Aˬ jeˬ miˇ neh ehˇ naˇ, guˆ-eu jeˬ-aˬ, k’ehˬ-eu k’aˆ-eu jeˬ-ahˇ ya daˬ lu ̭ gaˇ duˇ-eu meh. ¹⁹ Miˬyehˇ aˬ dui-ahˇ jeˬ hu gaˬ-euˬ miˇ neh, aˬ dui aˬ yaw ̭-ahˇ gaˬ-awˇ, tiˬ g’aˬ tiˇ g’aˬ gaˬ-eu ma. ²⁰ Tsawˇ haˬ tiˬ g’aˬ Miˬyehˇ-ahˇ gaˬ ma lehˇ ehˇ k’aw ̭, Ka li zaˬ cawˬ cawˬ maˬ gaˬ naˇ, jaˬ myaw ̭ myaw ̭-eu tsawˇ haˬ meh. Aˬ jeˬ miˇ neh ehˇ naˇ, yawˬ ha ya mawˇ lu ̭-eu Ka li zaˬ cawˬ cawˬ maˬ gaˬ naˇ, maˬ ya mawˇ-eu Miˬyehˇ-ahˇ aˬ joˆ-ehˇ gaˬ nmˇ. ²¹ Ka li neh aˬ dui-ahˇ bi ̭ taˬ ya ̭-euˬ dawˬ-aˬ, heu lo ̭-ehˇ meh. Miˬyehˇ-ahˇ gaˬ-eu tsawˇ haˬ-aˬ, Ka li zaˬ cawˬ cawˬ ya gaˬ meh.

¹ Yeˬsuˇ-ahˇ Ka li meh lehˇ k’aˇ jah-eu tsawˇ haˬ-aˬ, Miˬyehˇ-euˬ zaˬ pyeu ̭-eu meh. Aˬ da-ahˇ k’aˇ gaˬ-eu tsawˇ haˬ-aˬ, aˬ da-euˬ zaˬ-ahˇ k’aw ̭ gaˬ-eu meh. ² Aˬ dui Miˬyehˇ-ahˇ gaˬ-awˇ aˬ yaw ̭-euˬ ehˇ dawˬ naˇ haˬ-eu k’oeˇ-aˬ, Miˬyehˇ-euˬ zaˬ deuˬ-ahˇ aˬ dui gaˬ-eu jeˬ pyeu ̭-eu meh lehˇ siˬ nya-eu ma. ³ Aˬ dui Miˬyehˇ-ahˇ gaˬ-eu lehˇ ehˇ-eu k’oeˇ-aˬ, aˬ yaw ̭-euˬ dawˬ-ahˇ naˇ haˬ geu ̭ gaˇ ehˇ-eu meh. Aˬ yaw ̭-euˬ dawˬ-aˬ, aˬ dui maˬ caw teh nya paˬ-ehˇ shaˬ-eu jeˬ maˬ ngeuˇ-a. ⁴ Aˬ jeˬ miˇ neh ehˇnaˇ, Miˬyehˇ-euˬ zaˬ aˬ geu g’aˬ maˬ kaˬ, miˇ tsaˬ heu-ahˇ g’aˬ leˇ nya-eu meh. Aˬ dui-euˬ jah-eu jeˬ baˬ da neh miˇ tsaˬ heu-ahˇ aˬ dui g’aˬ leˇ-eu ma. ⁵ Miˇ tsaˬ heu-ahˇ g’aˬ leˇ-eu aˬ suˇ g’aˬ jawˇ ta. Yeˬsuˇ-ahˇ Miˬyehˇ-euˬ Zaˬmaˇ meh lehˇ jah-eu tsawˇ haˬ teh ̭-ehˇ miˇ tsaˬ-ahˇ g’aˬ leˇ-eu meh. ⁶ Iˇ cu ̭ hawˇ-eu shiˬ nehˬ-ehˇ oe-euˬ g’aˬ-aˬ, Yeˬsuˇ Ka li meh. Iˇ cu ̭ nehˬ-ehˇ teh ̭-ehˇ aˬ yaw ̭ oe-euˬ maˬ ngeuˇ-a. Iˇ cu ̭ hawˇ-eu shiˬ heu nyi jeˬ lu ̭ nehˬ-ehˇ oe-euˬ meh. K’oeˇ lo ̭-ehˇ oe-euˬ maˇ maˇ ni ngeuˇ meh lehˇ Yaw sahˇ Miˬyehˇ saˇ kiˇ kamˬ-eu meh. Aˬ jeˬ miˇ neh ehˇ naˇ, Yaw sahˇ Miˬyehˇ-aˬ yaw tsaˬ yaw dawˇ meh. ⁷ Gaˇ kawˆ heu-ahˇ saˇ kiˇ kamˬ-eu smˇ jeˬ jaˆ-eu meh. ⁸ Yaw sahˇ Miˬyehˇ, iˇ cu ̭, shiˬ, heu smˇ jeˬ meh. Heu smˇ jeˬ lu ̭ saˇ kiˇ kamˬ-eu tiˬ hmˬ teh ̭ meh. ⁹ Tsawˇ haˬ zaˬ saˇ kiˇ kamˬ gaˇ aˬ dui jah-eu-aˬ, Miˬyehˇ saˇ kiˇ kamˬ gaˇ aˇ naˆ ni paˇ jah paˬ nga. Aˬ yaw ̭-euˬ Zaˬmaˇ gaˇ kawˆ Miˬyehˇ-euˬ mawˇ do saˇ kiˇ kamˬ taˬ-euˬ meh. ¹⁰ Miˬyehˇ-euˬ Zaˬmaˇ-ahˇ k’aˇ jah-eu tsawˇ haˬ-euˬ nui ma la ̭ k’oeˇ, Miˬyehˇ neh saˇ kiˇ kamˬ taˬ-euˬ jeˬ ahˇ-eu meh. Ehˇ k’aw ̭, Miˬyehˇ-ahˇ maˬ jah-eu tsawˇ haˬ-aˬ, Miˬyehˇ jaˬ myaw ̭ myaw ̭-euˬ meh lehˇ bi doˆ laˇ ni jahˇ gaˇ duˇ-eu meh. Aˬ jeˬ miˇ neh ehˇ naˇ, Miˬyehˇ neh aˬ yaw ̭-euˬ Zaˬmaˇ gaˇ kawˆ ehˇ taˬ-euˬ dawˬ-ahˇ aˬ yaw ̭ maˬ jah-a. ¹¹ Saˇ kiˇ kamˬ-euˬ dawˬ k’oeˇ-aˬ, heu lo ̭-ehˇ meh. Miˬyehˇ aˬ dui-ahˇ mˬ maˬ maˬ byaˆ zaˇ ziˇ deh ̭-eu jeˬ bi ̭ laˬ-euˬ meh. Mˬ maˬ maˬ byaˆ zaˇ ziˇ deh ̭-eu jeˬ k’oeˇ-aˬ, Zaˬmaˇ-ahˇ neh oe-euˬ meh. ¹² Zaˬ maˇ-ahˇ k’aˇ ha geu ̭-euˬ tsawˇ haˬ-aˬ, deh ̭-eu jeˬ za-eu meh. Miˬyehˇ-euˬ Zaˬ maˇ-ahˇ maˬ k’aˇ ha geu ̭-eu tsawˇ haˬ-aˬ, deh ̭-eu jeˬ maˬ za-a. ¹³ Miˬyehˇ-euˬ Zaˬmaˇ-ahˇ jah-eu tsawˇ haˬ deuˬ pyeu ̭-eu naw ma ̭, yawˬ ha mˬ maˬ maˬ byaˆ zaˇ ziˇ deh ̭-eu jeˬ za-euˬ gaˇ kawˆ siˬ nya ni, ngaˇ naw ma ̭-ahˇ sahˬ bo ̭ bo ̭ ahˇ la ̭-euˬ jeˬ pyeu ̭-eu ma. ¹⁴ Miˬyehˇ mehˬ shi aˬ dui-euˬ nui ma zi ̭ dah ni jaˆ lu ̭ ma. Aˬ jeˬ miˇ neh ehˇ naˇ, aˬ yaw ̭ nui ma tsaˬ-eu lo ̭-ehˇ aˬ dui shaˇ naˇ, aˬ dui k’aˇ shaˇ-eu jeˬ-ahˇ aˬ yaw ̭ naˇ haˬ nehˬ la ̭ teh ̭-a lehˇ aˬ dui jah duˬ taˬ-euˬ ma. ¹⁵ Aˬ dui k’aˇ shaˇ ngeh aˬ yaw ̭ naˇ haˬ nehˬ la ̭ meh lehˇ aˬ dui siˬ duˬ taˬ-euˬ miˇ neh, aˬ dui neh aˬ yaw ̭-ahˇ k’aˇ shaˇ-euˬ jeˬ bi ̭ la ̭ meh lehˇ aˬ dui siˬ nya-eu ma. ¹⁶ Yawˬ ha-euˬ cawˬ Ka li zaˬ tiˬ g’aˬ na shiˇ gaˇ maˬ keuˆ-eu iˬ baˇ mˇ-euˬ ya mawˇ naˇ, Miˬyehˇ-ahˇ guiˬ lahˬ shaˇ-eu tsaˬ meh. Miˬyehˇ aˬ yaw ̭-ahˇ deh ̭-eu sa ̭ laˇ bi ̭ nehˬ teh ̭-a. Heu-aˬ, shiˇ gaˇ maˬ keuˆ-eu iˬ baˇ mˇ-euˬ jeˬ-ahˇ ehˇ-eu ma. Shiˇ gaˇ keuˆ-eu iˬ baˇ mˇ-euˬ jeˬ k’aw ̭ jaˆ-eu meh. K’oeˇ-euˬ g’aˇ duˬ naw ma ̭ Miˬyehˇ-ahˇ guiˬ lahˬ shaˇ-awˬ lehˇ ngaˇ maˬ ehˇ. ¹⁷ K’aˇ mˇ k’aˇ shaˇ lehˬ-euˬ jeˬ dawˬ tawˆ lu ̭ iˬ baˇ meh. Ehˇ k’aw ̭, shiˇ gaˇ maˬ keuˆ-eu iˬ baˇ lehˇ baw-eu meh. ¹⁸ Miˬyehˇ-euˬ zaˬ tiˬ g’aˬ-iˬ iˬ baˇ mˇ mˇ-ehˇ maˬ deh ̭-a lehˇ aˬ dui siˬ nya meh. Aˬ jeˬ miˇ neh ehˇ naˇ, Miˬyehˇ-euˬ Zaˬmaˇ aˬ yaw ̭-ahˇ haw teˬ haw piˇ lu ̭-eu miˇ neh, Haiˬ dui dui-eu G’aˬ aˬ yaw ̭-ahˇ maˬ laˆ ciˆ leˇ nya-a. ¹⁹ Miˇ tsaˬ zaˬ dawˬ tawˆ lu ̭ Haiˬ dui dui-eu G’aˬ uˆ lahˇ-eu uˬ moˆ jawˇ lu ̭ k’aw ̭, aˬ dui-aˬ Miˬyehˇ-ahˇ ta ̭-eu tsawˇ haˬ ma lehˇ aˬ dui siˬ nya-eu ma. ²⁰ Maˇ maˇ ni g’eh-eu Miˬyehˇ-ahˇ aˬ dui siˬ nya laˇ ni, Miˬyehˇ-euˬ Zaˬmaˇ oe-awˇ noeˬ siˬ noeˬ mawˇ nya-eu tsawˇ gahˇ bi ̭ la ̭-euˬ meh lehˇ aˬ dui siˬ nya ma. Aˬ yaw ̭-euˬ Zaˬmaˇ Yeˬsuˇ Ka li la ̭ k’oeˇ aˬ dui jawˇ lu ̭-eu miˇ neh, maˇ maˇ ni g’eh-eu Miˬyehˇ la ̭ k’oeˇ aˬ dui jawˇ lu ̭-eu ma. Heu-aˬ, maˇ maˇ ni g’eh-eu Miˬyehˇ hawˇ-eu mˬ maˬ maˬ bya ̭ zaˇ ziˇ deh ̭-eu jeˬ pyeu ̭-eu meh. ²¹ Ngaˇ gaˬ dui dui-eu zaˬ deuˬ-oˇ, maˬ ngeuˇ-eu miˬ yehˇ deuˬ jawˇ paw maˬ ya pyawˇ-iˇ ni, yawˬ haˇ yawˬ ha yahˇ dui dui-awˬ.