Pol Uqa Jaqec Je Oso
Filipai Tamanec Jaqiaden
Aqunec Je
Pol uqa casac macas wana nuimei Grik hatuna calen saen euna uqa Masedonia hatuna taun ben Filipai ono me je qasali maaden. (Eu Aposel 16.8-15 feiga.) Odimei ono Kristen tamanec sanan men. Hibna Filipai tamanec eu age Pol uqa Rom ono gihacdoc jona bilia ec dumeig meen qaig cesuldocnu suldon. Aria, Pol uqa jaqec je i Filipai tamanec heteiga ec maadecnu jaqiadimei sulduaden. (Eu 1.5, 4.10-19 feiga.) Eu jaqec je i uqana gug bahic. Euqa Pol uqa je filha jaqen eu odi. Uqa adi bilina eunu madena. (Eu 1.12-26, 4.10-19 feiga.) Uqa Filipai tamanec age agena cadnu cain cucuiuwain. Euqa age gaid gagadic meigale, age gaid Krais Jisasna ceeleigale ec madena. (Eu 1.27-30 feiga.) Uqa Filipai tamanec age Krais Jisas uqana kobolnu cisdodoig age cotoga bisalu bilimeig cotoga uqana kobol me eu agena kobol me wooldoc ec cisdoigale ec madena. (Eu 2.1-11 feiga.) Uqa Filipai tamanec age wawaga osol bileigale ec madena. (Eu 4.2-5 feiga.) Uqa Timoti Epafrodaitasca ale cabi dana me bahic eunu sulaleceb Filipai ono belowasan ec madena. (Eu 2.19-30 feiga.) Uqa Juda dana leihnu mecii cuhadoiga ec madena. (Eu 3.2-11 feiga.) Dana eundec age Kristen dana dewenega cagu qocnu cesusadegina. Uqa dana leihnuha ulauladena. (Eu 3.17-4.1 feiga.) Dana eundec age Kristen uqa Kraisna besitoc bilina eunu uqa wain sabca geh bahic jecnu eu cois egina.
Jaqec je ina Pol uqa Kristen adi bilecnu madena. Kristen dana uqa cotugul bisalu bilina (2.1-4), uqa cebac bilec haun eu ocnu tutuc guguli qee mec gadacna nuina (3.13-14), uqa ceteh osonu jaen cain qoiaun (4.6), odocob uqa ceteh cunug odocnu ihoc (4.13). Odimei Pol uqa Kristen dana cajaca age ceelecca bilegina ec gaid madena. Kraisnu je oso eu 2.5-11 euna nijia eu Krais uqana kobol bahic.
Aria, ege jaqec je i sanijuquna saenna ege Pol uqa Filipai tamanecnu nalunuga bahic men ec doqan.
Je Dunuhnu Dado Mec
1. Feele adec je (1.1-2)
2. Pol uqa Filipai tamanecnu Anut hetaga dona, odimei Filipainu inondona (1.3-11)
3. Pol uqa adi bilina eunu madena (1.12-26)
4. Cesusadecnu je (1.27-2.18)
A. Agena coboc eu Kraisna me je toodoiale (1.27-30)
B. Age Krais Jisas ceban eu age oigale (2.1-18)
5. Pol uqana me je cabi hijagul (2.19-30)
A. Cabi hijag Timoti (2.19-24)
B. Cabi hijag Epafrodaitas (2.25-30)
6. Pol uqa dana leihnu ulauladena (3.1-4.1)
A. Juda dana leih age Kristen dana dewenega cagu qocnu cesusadegina eunu batut feigale (3.1-16)
B. Dana leih age Kristen uqa Kraisna besitoc bilina eunu uqa wain sabca geh bahic jecnu eu cois egina eunu batut feigale (3.17-4.1)
7. Cesusadecnu jeca, Hetaga ec jeca, Cit qoc jeca (4.2-23)
A. Kristen agena cobocnu je filfilnu madena (4.2-9)
B. Pol uqa Filipai tamanec haun heteiga ec madena (4.10-20)
C. Feele adecca, eeladec jeca (4.21-23)
11Ele Pol Timotica, ele Krais Jisasna cabi dana. Ele Anutna qagoc dana cajaca age Krais Jisasca gabanadecca, tamanec cofadecca cesuladecca ono Filipai bilegina eu jaqiadowona. 2Ege Memige Anutca egena Tibud Jisas Kraisca alena eelgec uum igecca malol bilecca adesiale.
Pol uqa Anut hetaga don
3Ija saen cunug ija agenu cisdugina eu agenu ijana Anut hetaga dugina. 4Odocob ija saen cunug age cunugnu inondugina ija ceelecca inondugina. 5Ija eetanu agenu ceeligina? Age me je wawaga meleen deel hahawannadec huhu qila ina me je qasali maadec cabinu cesultein. 6Odocob Anut uqa cabi me i age dunuh sanan men eu gahidodob lili Jisas Krais ceseli hoc deelna qee migiannu ija du cuhadugina. 7Age gaid ija wawi cisdocna bilegina! Eunu ija agenu odi tebandugina eu tutuc. Age cunug cabi i Anut ija ebenina miten eu osobenca om. Eu qila ija gihacdoc jona biligina, odocob wele me je sildiadecemin gagadic tawen saen euna ha cabi i ija osobenca om. 8Ge, ija Anut amegna mele je maadigina, ija wawi agenu geh hoolena eu Krais Jisas uqadodoc waugnadec hona.
9Odocob ija agenu inondugina, agena nalug mec eu gaid ben migiannu, odocob agena doc silecca cisdoc fecca euha ben migiannu eu odi inondugina. 10Eunu age ceteh eu me bahic eu age nesili cedoqagan. Odocob age Krais ceseli hoc deelna age gegehinca qee, cahuldocca qee biluqagan. 11Odocob agena coboc eu ceteh me bahic gehca Jisas Kraisnadec hona eu agenu am bigian. Odocob agena me coboc eu Anut binan uteceb binan suleqan.
Bilecnu eu Krais
12O wawige meleec cotiel, ija ceteteh ijaca calen eu me je cesuldocob gehca nuen eunu age doqagannu gale tena. 13Eu odocobnu han cadec dana cunug Sisana jo cofdoginaca dana cunug age ene bileginaca age ija Kraisnu gihacdoc jona biligina eunu wele doin. 14Odocob ija gihacdoc jona biligina eunu wawige meleec cotigeil mati age gagadic odoc umeig agena Tibudnu wawaga meleec eu gagadic tawena. Odocob age cucuiec culimeig Anutna je saluqi u maadecnu gehca gagadic mein.
15Eu mele, leih age ija cabi omnu wawaga me qee men, odocob age ija wooltecnu gale adena eunu age Kraisnu me je qasali maadegina. Euqa leih age wawaga meca eunu Kraisnu me je qasali maadegina. 16Dana i wawaga meca age Anut uqa me je sildiadecnu cabi ija ebenina mitennu dogina, age ijanu naluni megina eunu age odi odogina. 17Euqa dana leih age ija wooltecnu Kraisnu me je qasali maadegina eu agedodoc ijanaga ohis sulecnu cabi ogina. Age wawaga tutuc qee ninijen eunu odi odogina. Age ijana gihacdoc jona bilec eu culumen leih haun tubdutuqagan bili odogina. 18Eu odi fena! Ija eunu galeigina. Age jic leih cunugnana Kraisnu himec qasali maadegina. Age conogana himecfo, qee wawaganadecfo Kraisnu qasali maadegina eunu ija wawi ceelena.
19Ija eetanu wawi ceelena? Age Anut ijanu inondoginaca, odocob Jisas Kraisna Kis cesultenaca euna age besituqagannu ija dugina. 20Ija odoc tutuc qee odecemin qee majani teiaunnu gale ben tena. Euqa saen cunugnaca qila bahicca ija wawi duueceb kobol tutuc odigen eu odi ija gaid odiginawe eunu gale tena. Eunu ija cebac bilifig ija cal mifig ija dewenina Krais binan caligian. 21Cebac bilecna gug eu eeta? Ijanu gug eu ija Kraisca osoben cobowona. Ija cal mifig ija uqaca bilocohul catanigian. 22Euqa ija dewenina gaid cebac bilifig ijana cabi eu aig qugian. Euqa ija cel jic toodugen? ec qee dugina. 23Ija jic lecis gemo hewitina. Ija cebac bilec i culimig Kraisca bilecnu gale tena, eu me bahic. 24Euqa ija mahana gaid bilifig eu age cesuladecnu eu me bahic wooldoc. 25Ija inu du cuhadugina. Eunu ija biligen eu dugina. Ija age cunug cesuladigennu gami bileqan. Ija age wawaga meleec gagadic tawigiannuca, wawaga ceeligiannuca cesuladigen. 26Odocob ija ageca haun li caligen, eunu age ijanu culai Krais Jisas binan suluqagan.
Anut uqa Filipai me madimei culadeceb dain adec gahidoin
27Ceteh oso ben nijia. Agena coboc eu Kraisna me je toodoiale. Age odi odocobilfi eu ceteh me bahic. Eunu ija li age feciadigenfo, qee ija qee ligaunfo ija agenu je dih suldocobil dah migale, age wawaga osolna taweginaca, age cisdoc osolna wawaga meleec uqana me jenu osoben eb li cabi gagadic oginaca ec dah migale. 28Ageha agena cadnu cain cucuiuwain, age gaid gagadic meigale. Odocob age odi odocobilfi agena cad age fadaloqagan ec doqagan. Odimeig agena cahahaadec eu Anutnadec eunu age Anut cahahaadigian echa doqagan. 29Eetanu? Anut uqa age Krais cewel utoc cabi aden. Odocob cewel utoc cabi eu odi. Age uqanu wawaga himec qee meleena qa age uqanu wawaga meleeceb age uqa ijannu dain adecha gahidogina. 30Qila age ijaca osoben han cadoqona. Han cadec eu wele ija han cacadigin age fein, qila ija han cadigina ec dah megina.
2Ege wawige osol bileceb wawige meleec cotigeilnu me odoqale
1Age Kraisca gabanadec bilegina eu odadeceb gagadic megina, odocob uqana nalunuga mec eu wahohogadena. Age Kisca wawaga osol bilegina, odocob age wawaga meleec cotogailnu wawaga qocob cesuladegina. 2Eunu ija niniaadi maadigina, age cisdoc osol bileigale, age nalug mec osol meigale, age wawaga cisdocca osol bileigale. Age odi odocobilfi ija ben bahic ceeligen. 3Age ija didih ii ceteh oso cain odowain, age ija didih ii cain deboowain. Agena kobol me eu cotoga uqana kobol me wooldoc ec cain cisdowain. Euqa age cotoga bisalu bilimeig cotoga uqana kobol me eu agena kobol me wooldoc ec cisdoqagan. 4Odocob age agena ceteteh dih cain cofdowain, age cotogail agena ceteteh ha cofdoigale, odocob ageha me biluqagan.
5Krais Jisas ceban nijia, uqa ceban eu ageha oigale.
6Uqa Anut ihoc bilen, euqa uqa Anutwe bilecnu hewihewidocnu waug qee bilel.
7Uqa Anut bilec culimei uqadodoc begabeg meh ibuldon.
Uqa dana ihicon qu cali hon.
8Uqa dana coboginawe odi cocobon fein.
Uqa lal qumei uqadodoc binan qee mumudi Memeg co toodu oodi cal men.
Mele, na babalecna cal men.
9Eunu Anut uqa ehudi ehi ti ohis bahic muden.
Uqa ijan oso uten, eu ijanaga cunug wooldoc tawena.
10Eunu Jisas ijan eu binanca bahic,
odimei cunug age saona gunnaca, mahanaca, maha dunuh nocnaca bilegina eu age gob cehimeig ijan eu binan suluqagan.
11Odimeig age cunug beilamaga osol mi Jisasnu madi madoqagan, Jisas Krais uqa egena Tibud, oqagan.
Age Memige Anut binan wasigiannu odi odoqagan.
Ege dana cajaca gemona fulacdocwe bileqan
12-13Eunu, ijana danah bahic, ija ageca ono bilom saenna age ija coni gaid toodoloigwe eu odi qilaha ija ageca qee biluquna saenna ija coni toodu bahic toodoigale. Anut uqa wele cahahaaden. Anut uqa age dunuh gaid cabi ona, age uqana cisdoc toodocnu gale adena eunu gaid cabi ona, odocob uqana cisdoc toodu odocnu ihoc eunu ha cabi ona. Eunu age cucuii qeleli agena me bilecnu cabi eu gagadic oiga.
14Ceteteh cunug age odogina eu gonagona mecca jena fee dadanec eu culimeig odoigale. 15Eunu cahuldocca qee, cataniecca biluqagan, odocob age Anutna mel sim eu gegehinca qee eundecwe age silail dana cajaca kobol me qee odogina eu age gemona biluqagan. Age gemo fulacdocwe dana cajaca mahana bilegina eu cujawadeceb 16age cebac bilecnu je eu u adoqagan. Age odi odocobilfi ija agenu cabi gagadic om eu gauc qee cusdugaunnu ija Krais ceseli hoc deelna culunuga ugen.
17Agena wawaga meleec eu ihanecwe age Anut utegina. Euqa age ija golani wainwe ihanec euna basecdoqagannufi ija galeigina, ija ageca osoben ceeloqona. 18Eu odi himec ageha galeeiga, age ijaca osoben ceeleqan.
Pol uqa Timoti Epafrodaitasca sulaleceb Filipai belowasan ec maden
19Jisas Tibud uqa gale dufei nag odi ija Timoti suldocomin ageca ligian. Odocob uqa ceseli hu agenu je mateceb ija wawi ceeligian. 20Uqa himec ijaca osoben tebandowona eu uqa age adi bilegina ec cisdona. 21Dana leih cunug age agena ceteteh dih cofdogina. Odocob age Jisas Kraisna cabinu qee cofdogina. 22Euqa age Timoti uqa dana me ec dogina. Uqa ija me je cabina melah memeg cesuldonawe cesulten. 23Ceteh cunug ijaca adi calena eu casac dumig ija uqa ageca mahucwe suldocomin ageca ligian. 24Odocob Tibud uqa gale dufei ija jic qahiteceb nag odi ijaha ageca ligen.
25Ija Epafrodaitas suldocomin ageca ligiannu cisdom. Uqa ija wawige meleec cotica, uqa me jena cabi hijenica, uqa ijaca osoben han dana. Wele age Filipai uqa suldocobil ijaca hon, odocob uqa age ijanagana ija cesulten. 26Uqa age feciadecnu waug hoolena. Odocob age uqa hagca ec dah meinnu waug culumen dona. 27Mele, uqa wele hag qon, odocob uqa cal migiannu odon. Euqa Anut uqanu waug qon. Odocob uqa uqanu dih waug qee qol, uqa ijanu ha waug qon. Uqa ija culumen ben haun cain jahulteiaunnu waug qon. 28Eunu ija uqa suldocomin ageca leceb age uqa haun fecidumeig ceeloqagannu gale ben tena. Odocob ijana jaen qitec qee migian. 29-30Eunu age Tibud ijanna ceeli bahic ehudeiga. Odocob uqa Kraisna cabinu wele cal migiannu odon. Uqa cebac biligiannu qee cisdol. Age ija cesultecnu cabi ebenna mein eu u hedocnu cisdumei eu odi odon. Eunu age dana eundec binanaga suleigale.
3Dana uqa Kraisnu waug meleena eu dana ititom
1O wawige meleec cotiel, ija je i edi ijana jaqiadec qee mudigen. Age Tibudca gabanadec eunu ceeleigale. Ija wele jaqiadem eu haun jaqiadecnu wawi culumenca qee. Ija odi odocominfi age gagadic tawoqagan.
2Age dana qisol megina eunu mecii cuhadoiga. Dana eundec age qa cinigwe, age dana dewenega cagu qumeig me qee mudecnu cesusadegina.(3.2) Dana leih age dana cajaca odi maaden, “Age Kristen calegina saenna age Juda agena kobol toodu odimeig age dewenega cagu qoiga,” aden eu odi fena. Pol uqa dana eu qa en, odimei uqa dana cajaca age dana eundecnu ulauladen.3Ege dih dewenige cagocnu kobol mele bahic eu egeca. Ege Anutna Kisna Anutnu cuha fifi Jisas Krais binan suluquna. Dewenige cagu qoc kobol eu ege cesulgigian ec wawige qee meleel. 4Euqa dewenega cagu qoc kobol eu dana cesuladecnu ihocfi ijaha dewenige cagu qoc kobol eu ija cesultecnu ihoc bahic. Dana eundec leih age dewenega cagu qoc kobol eu ihoc cesuladigiannu wawaga meleena euqa dewenige cagu qoc kobol eu wooladi ben bahic cesultigiannu ihoc. 5Deel 8-peladocna age ija deweni cagu qoin. Ija Isrel agena dana cajacanadec sihul. Ija Benjamin sihulnadec. Ija Hibru dana bahic, Hibru golanaganadec. Loo jenu ija Farisi dana loo je toodoc dana bahic. 6Cabi megameg mecnu eu ija Kraisna tamanec tootooadolig. Loo je bisalu ititom cobocnu eu ija cahuldocca qee. 7Euqa ija wele cel ceteh me oso om ec cisdugina eu Kraisnu ceteh gauc ec cisdom. 8-9Eu mele, ija Krais Jisas ijana Tibud ec dugina eu ceteh cunug wooladec bahic. Eunu ija ceteh cunug om eu tageladec igina. Ija Krais dih ocnuca ija uqaca gabanlec bilewannuca odigina. Eunu ija Kraisnu ceteh cunug tageldom, eu tetec gaucwe ec cisdugina. Ija qila ijanel ititom qee, ititom eu loo je toodu odigina euna om. Ijana ititom qila hewigina eu Kraisnu wawi meleena euna om. Ititom eu Anutnadec, dana cajaca age Kraisnu wawaga meleeceb Anut uqa agenu dana cajaca ititom ec madena. 10Ija Kraisnuca, uqana gagadic odocnuca du cuhadugennu odigina. Gagadic odoc eu uqana cal mecnadec tulidocob ceseli cajen. Odocob uqana waug sogoec eu ija uqaca osoben gahidowannu odigina. Odocob ija uqana cal mecna uqa cicilon ugennu odigina. 11Adi odocomin Anut uqa ija cal mecnadec tuliteceb ceseli cajimig cebac bilec haun ugen eunu cisdugina.
Age guguli nui qee mec gadacna calecnu temdoiga
12Euqa ija cal mecnadec tuliteceb cebac bilec haun eu wele om ec qee madigina. Odocob ija qila silailca qee biligina ec qee madigina. Euqa ija cebac bilec haun eu ugennu Krais Jisas ija uqadodocnu wele oiten. Eunu ija cebac bilec haun eu ocnu licdudu gaid nuigina. 13O wawige meleec cotiel, ija eu wele om ec qee cisdugina. Euqa ceteh osol ija odigina, eu ceteh ija hibilemi nijia eu dahini celeceb ceteh olanina nijia eu ocnu gagadic licdudu nuigina. 14Eunu ija cebac bilec haun eu ocnu tutuc guguli qee mec gadacna nuigina. Cebac bilec haun eu ameg me bahic Anut uqa ija Krais Jisasca gabanlec bilewannu utateceb ija jobon ohis euna ti cebac biligen.
15Ege cunug dana cisdoc sileccawe cisdoqona eundec ege ija cisduginawe odi cisdoqale. Euqa age leih agena cisdoc eu filfi Anut uqa agena cisdoc tutuc mudigian. 16Euqa ege ceteh wele dom eu gaid hewi toodu odoqale.
17O wawige meleec cotiel, age cunug ija ciciloni oigale. Dana eu age ege odoqonawe odi odogina eundec feciadi cuhadumeig tooadeiga. 18Ija je i saen mati wele maadem, odocob qila ija amulini nenen haun maadigina, dana mati agena bilec eu odadeceb age Kraisna na babalecna cal mecnu cad mudein. 19Age dewenega gale doc eu agena tibud. Age majanagaca qa agedodoc binanaga sulegina. Odocob age mahanadec cetehnu dih cisdogina. Eunu age hibna ja benna fadaloqagan. 20Euqa ege je hahunige uqana jobon eu saona nijia. Onodec ege Cahahagec Jisas Krais Tibud ege cahahagigiannu toni nigian imeb uqa susumudi biluquna. 21Uqa ege dewenige calua qila egena jo taweceb coboqona eu ibuldocob Krais uqadodoc deweg kobolkobolca nijina odiwe caligian. Eu odocnu gagadic odoc eu uqa ceteh cunug odadeceb uqa bisalu bilegina euna ihoc odigian.
4Ege wawige osol meceb ceelimeb cisdoc me oqale
1Eunu, ija wawige meleec cotiel, ija agenu nalunuga migina, ija feciadecnu hooligina! Ija agenu ceeligina, ija culunuga ugina. Ija cotiel, age Tibudca gabanadec bilegina euna odi gagadic taweigale.
2O Juodia Sintikica, ale Tibudca gabanadi wawala osol mesiale ec ninialigina. 3O Sisigus,(4.3) Ijan i uqana gug eu “cabi hijag bahic.” hinaha, ijana cabi hijeni bahic, hina caja lecis i cesulalagale ec ninihigina. Ge, ale me je fulusdugian bili ijaca cabi gagadic om. Aleca, Klementca, ija cabi hijeniel leihca age ijanaga Anutna cebac bilec bukna nijia eu age osoben cabi eu gagadic oin.
4Age Tibudca gabanadi bibili wawaga ceeleiale. Ija haun maadigina, ceeleigale.
5Age dana cunug wawaga jocosaigca odadeigale. Eunu age agena kobol eu me bahic ec doqagan. Tibud ceseli hoia dodolgena. 6Age ceteh osonu jaen cain aqeiaun. Age Anut agena culumen wawaga hoolecca cunugnu gaid ninidudu inondoigale. Odimeig age Anut ceteh cunugnu cesuladecnu inondodoig hetaga doc madeigale. 7Odi odocobil Anutna malol bilec eu, ege dana cajaca uqana gug docnu ihoc qee, age wawaga cisdocca Jisasca gabanadi biligiannu cofdugian, odocob wawaga cisdocca jaen qee aqeiaun.
8Ija wawige meleec cotiel, ija cit qoc je oso maadigen. Age ceteteh eu mele, ceteteh eu binanca bahic, ceteteh eu tutuc, ceteteh eu cataniec, ceteteh eu fecnu galeca, ceteteh eu meca bahic, ceteteh eu binan sulecnu ihoc, ceteteh eundecnu gaid cisdoigale. 9Ceteh ija iwaladecemin oinca, ceteh ija odom ec doinca, ceteh ija odom ec feinca eu cunug odoigale. Odi odocobil Anut uqa malol bilecca eu ageca biligian.
Filipai age bagol utec oso Polca suldocobil hon eunu Pol ceelen
10Age saen cecelac gieceb qila agena cisdoc tulidocobil ijanu haun cisdoin. Eunu ija Tibudca gabanli bibili ceelowona. Age mele wele cistein euqa age cesultecnu jicca qee. 11Ija cetehnu gohic mitina imig qee madelem. Ija adi biligina ec figina eu cunug ija wawi cois ena. Kobol eu ija wele dom. 12Ija sawen bilecnu ihoc igina, odocob ija ceteteh mati hewecnu ihoc igina. Ija doc oso dugina eu odi. Ija sab gehcafo, ija sabca qeefo, ija ceteteh maticafo, ija cetetehca qeefo, eu saen cunugnana anaana biligina ija cunugnu cois igina. 13Ija Kraisca gabanli biluwuna eunu gagadic odoc Krais itina euna ceteh cunug odocnu ihoc.
14Euqa age ijana culumennu cesultecebil osoben gahidom eu kobol me bahic odoin. 15Saen hahawan ija me je mamadig ija Masedonia hatu culdem euna age Filipai agedodoc tamanec osooso ijana cabi cesultecnu meen qaig qee suldutelein ec dogina. Age himec ijana cabi cesultecnu meen qaig sultein. 16Eu mele, ija Tesalonaika taun ono bilem saen eunaha age ija saen osolna cesultec suldutein. Odocob hibna age ija haun cesultec suldutein. 17Ija bagol itec ocnu qee waligina. Euqa ija age agena kobol me eu gehca caligiannu gale tena, odocob Anut uqa ameg me bahic adigian. 18Ceteteh cunug ihocca geh bahic eu ija agenadec wele cedem. Ija wele am bem. Age bagol itec Epafrodaitas ebenna ija suldutein eu ija wele om. Bagol itec eu, eu ihanec dedeman me wasenawe age Anut utegina. Anut uqa ihanec i cois imei ona. Anut uqa ihanec i cinigwe ona eunu uqa waug ceelena. 19Odocob ijana Anut ege dana cajaca Krais Jisasca gabangec biluquna eu ceteteh kobolkobolca geh bahic igecnu wele men. Uqa eunadec wawaga hoolec cunug adeceb ihoc ligian. 20Ege Memige Anut binan sulocomun cataneiale! Mele.
21Age Krais Jisasna dana cajaca qagoc cunug eu feele adeigale. Wawige meleec cotiel age ijaca biluquna eu age feele adec sulduadegina. 22Anutna dana cajaca qagoc cunug age feele adec sulduadegina. Leih age Sisana jona cabi ogina eu ageha feele adec sulduadegina.
23Jisas Krais Tibud uqana eelgec uum igec eu age dolonogaca biliale.