Ów eke Jan ɛkn es ɛkn ɛm
Ów ekʼit eke wɛl kʼuw any
Jam us ɛs Jan nↄn Es Ɛkn eci lɛl na in eci susu ɛm. Lɛgŋ ab ɛm a, Rom ekʼɛw usu ab es a, bʼɛw lɛc ɛm ibrm eke agŋ kʼigŋ ɛl ecʼes ɛw ɛs Sesar nuŋ ɛsɛ Nyam af. Ow eci kok ɛm a, ow bʼow ↄŋ -li yɛgm ɛb a ecʼɛlum eke -nʼↄnyn a. Kretiɛnɛl a ɛgŋm ow e low ebm. -Lʼerurmn eke -li kʼigŋ Nyam ɛjeci nuŋ eke ow elm Jesu cɛ, ɛtŋ ow sosiɛm wɛl bʼijr ɛl gbre. Jan in obi yɛji, Rom ecʼes ɛw ɛs a ogŋʼn ɛb ɛm oc im ɛwʼr es lekr nyam ɛm eke wɛl bʼɛsŋ Patmↄs. Yogŋ, es ɛkn ɛm, Nyam yɛgmʼn ów nↄnↄ yecʼɛtŋ ke li bɛ́bm kretiɛnɛl sos gbre ij ekʼam ow a eci, lʼátr wɛl sos es ɛl ecʼↄmn a eke -nʼↄnyn a eci. Afr ɛrm ɛs nyam oc Jan abŋ ɛm im eke ow kʼɛkn ów a eke bʼow ɛy wus af aŋa a ɛsɛ elel eke Nyam am ɛkan ab af. Amani Sig ɛm eci mɛny ɛwr owi nↄnↄ anŋ ów a eke Nyam am yɛgm Jan ab ɛm. Jan eci lɛgŋ ab ɛm a, kretiɛnɛl a iri ow eci nyandrɛ a, kↄ agŋ ekʼijr ɛl gbre a gbɛ ↄtum uwm ow eci nyandrɛ ab any. Ɛy obi ɛy obi yɛji, yɛfɛnyna ɛm a, sʼírim mɛny ɛwr owi a okm ɛy es sos ɛm sɛnyn sɛnyn, gbɛkↄ ów nↄnↄ anŋ eke am ayl ɛy sos ɛm:
1) Low ŋuŋ am ɛy lɛc wus na af, kↄ toŋ ke ow ók wus eci nuŋ ɛdŋ ɛm a, Nyam bʼow akm in ecʼefnu ab es ar ogŋ ab ɛm.
2) Nyam bʼow jɛj agŋ fɛŋ e low ok. Agŋ a eke ub Jesu nawrɛ a, wɛl nↄn ɛl ecʼen sel ɛŋn eci lɛl ab ɛm, ɛtŋ -li bʼow -lʼij sel ekʼↄnym uwr a ecʼaja. Ɛmɛny Nyam bʼow jɛj ɛgŋ e low ok, es an a eke ɛgŋ a bʼow ↄny wus af aŋa ab ɛm (Es Ɛkn 20.11-15; bɛ̀bmn 1 Korɛnt 3.10-15).
3) Agŋ a eke bʼij nɛny nyam in e lís a, li bʼow lʼap wɛl ob.
4) Afr, sɛgŋ fɛŋ wɛl bi kↄklm Nyam.
Bibl eci lɛl es abal el na ɛm a, Nyam am ɛlul in sosi ↄkm ɛsɛ Nuŋ Ɔb lele Nuŋ Ɛdŋ ab af. Tasi ɛm a, in obi li kok wus na, ɛtŋ in obi li bʼow lʼɛwl ni ŋuŋn ow ke lʼóc wus owr a lele afr owr ab ab lʼow.
1Jesu am ɛlul in sosi ↄkm
1Ów eke lↄl es ke Jesu Krist ɛlu ↄkm kpata a anŋ lɛl na ɛm. Nyam ↄŋʼn lʼuw ów amua any, yecʼɛtŋ ke li yɛ́gm in e juma kok ɛsɛl a low eke bʼow ɛy lɛgŋ tɛl ɛm a. Krist ↄŋ in ecʼafr ɛrm ɛs im ɛlu low a ↄkm yɛgm in e juma kok ɛs Jan. 2Jan am ij daŋku eke ów a fɛŋ eke in ɛkn a in el Nyam ecʼodad lele low nɛnyɛmbri nyam ekʼin ɛy ↄkm Jesu Krist ɛm ab. 3Ehe él ɛgŋ eke bʼawl sodad amua eke Nyam ɛlu ↄkm ↄŋ agŋ a eci! Ɛtŋ ɛmɛny ehe él agŋ a eke bʼiri, ke bʼɛlum ów a eke wɛl nↄn lɛl na ɛm a eci! Ɛɛ, lɛgŋ a eke wɛl bɛbm ɛw es ów amua ecʼa ibnm ij.
Jan am ɛsŋn Nyamel lↄbŋ a
4Ɛm Jan, mʼam ɛsŋn Azi wus af 1.4 Azi wus af:Ɛ̀kn 2 Korɛnt 1.8 lel ow ecʼakr otar ab ab. eci Nyamel lↄbŋ a: ke Nyam ekʼanŋ godʼɛtŋ, anŋ yɛfɛnyna, ke am ow a,1.4 Nyam ekʼanŋ godʼɛtŋ, anŋ yɛfɛnyna, ke am ow a:nin na ɛw ɛsɛ Nyam eci nin eke yɛgm Mois af (Ɔkm Ok 3.14-15). Bɛ̀bmn Ebre 13.8. abŋ lↄbŋ a el Nyam ecʼAbŋ Lala a eke iy nɛny igŋ nuŋ a. ɛ́dŋ ↄny ↄwrↄ ke ↄ́ŋ ↄny ɛrm es ɛy. Ke abŋ lↄbŋ a ekʼanŋ in ecʼatufu lɛkpn a ecʼany af a yɛji ↄ́ŋ ↄny ów nɛnyɛmbri nyam a. 5Ke Jesu Krist ekʼel daŋku ij ɛs nɛny nyam ɛs a yɛji ↄ́ŋ ↄny ów amua. Lʼel iy krɛkrɛ ekʼigb agŋ ekʼuw ab ɛm, ɛtŋ ɛmɛny lʼel wus eci ɛ́b ebu fɛŋ ɛm ecʼɛb ebu. Jesu Krist erur ɛy ɛtŋ in eci mebl ab ɛm 1.5 Ɛ̀kn Kolↄs 1.20. li sↄg ɛy sikpl e lís. 6Li kok ɛy sʼel gbreŋgbi usu a ecʼagŋ, egb waw ɛsɛl eke ki kok juma Nyam ekʼel Ɛs a eci any af. Anygbɛl lele abusu ab él Jesu Krist eci sɛgŋ fɛŋ! Amɛn!
7Kin, nʼanŋ jru ɛm nʼam ow! Ɛtŋ nyamn nyamn fɛŋ bʼow ɛknʼn; agŋ a ekʼigŋʼn mpragb a yɛji bʼow ɛknʼn. 1.7 Ɛ̀kn Zakari 12.20; Jan 19.34-37. Wus ecʼagŋ eb eb a fɛŋ bʼow anŋ sↄrŋ ɛm in sosiɛm. Ɛɛ, ɛbɛn ow bʼow anŋ! Amɛn!
8Ɛs Kↄtↄkↄ Nyam Abusu Ɛs dad ninɛ: «Mʼel Nuŋ Ɔb lele Nuŋ Ɛdŋ ab, 1.8 Nuŋ Ɔb lele Nuŋ Ɛdŋ ab:Grɛk ɛm a, odad a eci iri tasi a el: Alfa lele Omega ab. Ow el Grɛkɛl eci lɛl mↄni krɛkrɛ a lele lɛl mↄni es abal el ab ab. mʼel Nyam a ekʼanŋ godʼɛtŋ, anŋ yɛfɛnyna, ke am ow a.»
Es ɛkn ɛm Jan ɛkn Jesu
9Ɛm, ↄny lisijim Jan, Jesu ab ecʼaf okr ɛm, mʼam mʼij gbre ↄny ab. Sʼel Nyam e gbreŋgbi usu a ecʼagŋ, sʼam usur ɛrm gbre ij ɛm. Wɛl oc im ɛwʼm es Patmↄs lekr, 1.9 Patmↄs lekr el Eje ecʼokij a e lekr gↄŋni ekʼↄwl es Efɛs ab kilo ekŋ yen. Wɛl bʼoc agŋ a ekʼɛl ecʼów ókm Rom ecʼes ɛw ab es sos ɛm a, im ɛw es yogŋ. aŋke mi dad Nyam ecʼodad lele low nɛnyɛmbri nyam ekʼɛy ↄkm Jesu ɛm ab ab. 10Ɛs Kↄtↄkↄ eci lɛgŋ a, Abŋ Lala owʼm af ɛtŋ mʼiri lebl tuↄtuↄ nyam ekʼam ikŋʼm jam ɛsɛ krↄkr af 11dad ɛsɛ: «Nↄn low yecʼa eke am ɛkn a lɛl nyam ɛm, ke óc awŋ Nyamel lↄbŋ a ekʼanŋ ɛb amua ɛm a: Efɛs, Simirna, Pɛrgam, Tiatir, Sardɛs, Filadɛlfi lele Laodise ab».
12Mʼɛdŋ mɛny eke mi kʼɛkn ɛgŋ a eke am dadʼm odad a, ɛtŋ mʼɛkn sika ɛm mun al ob lↄbŋ. 13Mun al ob amua ecʼaraŋn a, mʼɛkn ob nyam ekʼinym es ɛsɛ ɛgŋ af. Li sus mob kpakp ɛtŋ lʼucu ↄhↄny eke wɛl kok sika mij ɛm ɛr ɛm. 1.13 Ow el egb waw ɛs ligbɛl a ecʼob sos ɛw (Ɔkm Ok 28.4; 29.5).14In eci sin nuŋ a ufu pum pum pum ɛsɛ licɛb ufu e suw af, ɛsɛ nyamok af, ɛtŋ in ecʼanyamn a am jɛjn ɛsɛ al af. 15In ecʼakr a am jɛjn ɛsɛ jawie eke wɛl ɛtŋ ke al ayal af. Ɛtŋ in eci lebl a bʼil ɛsɛ okij e mra eke bʼɛlu ab af. 16In e lidr abu ab ɛm, lʼucu mílɛ́l lↄbŋ nʼↄny es, ɛtŋ lab ler ɛm ekʼany yony a bʼufu a am ɛyʼr ↄkm nɛnym. In ecʼany a am jɛjn ɛsɛ lɛgŋ uyu nuŋ e ligbn af. 17Eke mʼɛknʼn a, mʼɛy wus in ecʼakr ew a ɛsɛ ekʼɛm mʼuw cɛ af. Lʼoc in eci lidr abu a lʼɛwʼm af ɛtŋ li dad ninɛ: «Erŋn kʼↄ́nyʼŋ! Mʼel Nuŋ Ɔb lele Nuŋ Ɛdŋ ab. 1.17 Akr 13-15: ɛ̀kn Daniɛl 7.13; 10.5; 7.9; 10.6. Akr 16-17: ɛ̀kn Esayi 49.2; Ebre 4.12; Esayi 44.6; 48.12.18Mʼel ɛgŋ a ekʼanŋ owr a. Mʼuw, gbɛkↄ ca mʼanŋ owr godo godo fɛŋ eci; ɛtŋ mʼↄny abusu luw lele ↄŋnes baŋn ab af. 19Sica nↄn yecʼa ekʼɛkn a, yecʼa ekʼam ɛy caca ɛm a lele yecʼa eke bʼow ɛy ow eci jam ab ab. 20Kin mílɛ́l lↄbŋ a ekʼɛkn ɛm e lidr abu ab ɛm a lele sika ɛm mun al ob lↄbŋ ab ab eci nyandrɛ: mílɛ́l lↄbŋ a el Nyamel lↄbŋ a eci afr ɛrm ɛsɛl a, ɛtŋ kɛniɛ lↄbŋ a el Nyamel lↄbŋ a».
2Efɛs e Nyamel a e lɛl eke wɛl awŋ
1«Nↄn lɛl awŋ Efɛs e Nyamel a ecʼafr ɛrm ɛs a: “Kin odad yecʼeke ɛgŋ a ekʼↄnym mílɛ́l lↄbŋ ab in e lidr abu ab ɛm, ke am an es sika ɛm mun al ob lↄbŋ a ecʼaraŋn a am dad: 2Mʼuw juma fɛŋ eke kok ab any, mʼuw ŋ eci sos es atr a lele ŋ eci ɛrm susu ab ab any. Mʼuw any eke kʼↄtum ɛgŋm ów eŋuŋ ɛsɛl e low ebm; ɛtŋ agŋ a eke bi dad eke ɛl ɛrm ɛsɛl ke elm a, ↄny igbl ɛl ogŋ ɛkn, ɛtŋ ɛkn eke -lʼel ayadŋu. 3Ŋ, ↄny ɛrm susu, ij gbre ɛm e nin a sosiɛm ɛtŋ sos ↄwmʼŋ es kaka. 4Gbɛkↄ low a eke mʼↄny ŋ ab a cɛ el: ↄnym erur krɛkrɛ a ekʼↄny ɛm ecʼa ij. 5Sica ↄkn lɛgŋ ekʼɛc ab ɛm eci elel eke ↄnyn ɛm ecʼerur a, ìtŋn ɛrm ɛm, ke kók ɛsɛ nuŋ ↄb ɛm ecʼab af. Eke itŋnm, mi bʼow mʼow mʼɛŋnʼŋ, ke mʼↄ́ny ŋ eci mun al ob a mʼoc es yogŋ a eke ow anŋ a. 6Gbɛkↄ yecʼeke akpl ŋ ecʼa el: ɛsɛ ɛm af, ifn Nikolayitɛl 2.6 Nikolayitɛl:-lʼel low yɛgm ɛsɛl eke bʼirmn agŋ ecʼↄmn ɛl e low yɛgm ab ɛm. Es Ɛkn eci lɛl na ɛm cɛ wɛl dad agŋ amua e low. Ɛ̀kn Es Ɛkn 2.14,15,20,24. eci low kok a.
7Ke ɛgŋ yecʼeke ɛli ↄru a, íri yecʼa eke Abŋ am dad ok Sinyamel a. Ɛgŋ yecʼeke bʼow eb any a, mi bʼow mʼↄŋʼn sel ɛŋn eci likŋ a ekʼanŋ Nyam ecʼegb ↄgm a e liy a lʼij.” » 2.7 Ɛ̀kn Nuŋ Ɔb 2.8-9.
Simirna e Nyamel a e lɛl eke wɛl awŋ
8«Nↄn lɛl awŋ Simirna e Nyamel a ecʼafr ɛrm ɛs a: “Kin odad yecʼeke ɛgŋ a ekʼel Nuŋ Ɔb lele Nuŋ Ɛdŋ ab, ɛgŋ a ekʼuw ke ɛwl anŋ owr a am dad: 9Mʼuw ŋ e gbre lele gbↄr ab any, gbɛkↄ tasi ɛm a, ŋ gbreŋgbi! Mʼuw sos keskes ekʼagŋ a ekʼel Jwifɛl ke bʼocr ɛl sosi Nyam ecʼagŋ ke elm a bi kokrʼŋ ab any; -lʼel Satan eci nuŋ igŋ ɛsɛl. 10Bʼow ij gbre, gbɛkↄ kʼùru erŋn. Agn bʼow ot ↄny ɛm ecʼagŋ bɛb ok sobel ɛm ↄny eci ɛbm ɛkn eci, ɛtŋ bʼow ijr gbre toŋ sɛgŋ lɛw. 2.10 sɛgŋ lɛw:nyandrɛ ɛm odad ekʼam yɛgm eke gbre ij a likpr cɛ. Bɛ̀bmn Nuŋ Ɔb 24.55; Daniɛl 1.12. Ìj nɛny nyam toŋ luw ɛm, ke mʼↄ́ŋʼŋ sel ɛŋn e tufɛ a.
11Ke ɛgŋ yecʼeke ɛli ↄru a, íri yecʼa eke Abŋ am dad ok Sinyamel a. Ɛgŋ eke bʼow eb any a, kʼow ɛknm luw yony ɛm a e low ij.” » 2.11 Luw krɛkrɛ a, ow el sos megl af ecʼa; ɛtŋ yony ɛm ecʼa, ow ow el gbre ij ekʼↄnym uwr a. Ɛ̀kn Es Ɛkn 20.6,14; 21.8.
Pɛrgam e Nyamel a e lɛl eke wɛl awŋ
12«Nↄn lɛl awŋ Pɛrgam e Nyamel ecʼafr ɛrm ɛs a: “Kin odad yecʼeke ɛgŋ a ekʼↄnym lab ler ɛm ekʼany yony a bʼufu a am dad: 13Mʼuw usu a ekʼir ab any, yogŋ anake Satan ecʼatufu lɛkpn a anŋ a. 2.13 Pɛrgam el sinyam yadŋ a eci nuŋ igŋ usu gbɛl. Yogŋ Zes eci ŋↄŋn usu ligbɛl nyam anŋ; ow el ɛb krɛkrɛ eke ow ɛm wɛl igŋ Sesar nuŋ ɛsɛ nyàm af. Ucu ɛm e nin a ↄny es, ɛtŋ walm ↄmn ekʼↄny ɛm ɛm a ɛlum es, toŋ lɛgŋ ab ɛm eke wɛl ibi Antipas a yɛji, ɛm eci daŋku ij ɛs cɛcɛ ↄny ogŋ a, yogŋ a eke Satan ir a. 14Gbɛkↄ mʼↄny abr eke mi kʼɛnymʼŋ: ŋ ogŋ yogŋ, agŋ anŋ eke ucu Balam eci low yɛgm a ↄny es. Balam anake ↄŋ Balak nuŋ ɛm eke kʼuk Israɛl ecʼey meb a. Lʼitr wɛl eke wɛl kʼij mindey eke agŋ ibi kokr egb waw ↄŋ sinyam yadŋ, ke wɛl íj nfaci yɛji. 2.14 Ɛ̀kn Awl 31.16 lele 25.1-2 ab. Balam lele Balak ab: ɛ̀kn Awl 22 toŋ 24 ab ɛm.15Ɛtŋ ɛmɛny, ŋ ogŋ a cɛ, agŋ anŋ eke ucu Nikolayitɛl 2.15 Nikolayitɛl:ɛ̀kn Es Ɛkn 2.6 eci akr otar a. eci low yɛgm a ↄny es. 16Ow sosiɛm, ìtŋn ɛrm ɛm gↄŋ. Eke itŋnm, ow kʼow ibnm, mi bʼow mʼow ŋ ogŋ yogŋ ɛtŋ mi bʼow mʼogŋ agŋ amua ar, ɛm e lab ler ɛm any yony a eke anŋʼm nɛnym am ɛyʼm ↄkm ab ɛm.
17Ke ɛgŋ yecʼeke ɛli ↄru a, íri yecʼa eke Abŋ am dad ok Sinyamel a. Ɛgŋ yecʼa eke bʼow eb any a, mi bʼow mʼↄŋʼn afr eci futufutu eke lↄl es a. Mi bʼow mʼↄŋʼn lebn ufu nyam, ɛtŋ lebn ab af nin owr nyam eke wɛl nↄn a bʼow anŋ. 2.17 afr eci futufutu:Ɔkm Ok 16.14-15, 33-34; nin owr: Esayi 62.2; 65.15. Ɛgŋ kaka kʼow uwm nin na any, ekʼow elm ɛgŋ a cɛ ekʼɛŋn lebn a.” »
Tiatir e Nyamel a e lɛl eke wɛl awŋ
18«Nↄn lɛl awŋ Tiatir e Nyamel a ecʼafr ɛrm ɛs a. “Kin odad yecʼeke Nyam Jim a ekʼanyamn ɛm am jɛjn ɛsɛ al af, ke akr yɛji am jɛjn ɛsɛ jawie eke wɛl ɛtŋ af a, am dad: 19Mʼuw ŋ e sijuma a, ŋ ecʼerur a, ŋ ecʼↄmn a, ŋ e juma a eke bi kok ↄŋ agŋ a lele ŋ ecʼɛrm susu ab ab any. Ɛtŋ sica mʼuw any eke jam aŋa, ŋ e juma a eke am kok a ɛny akm krɛkrɛ ecʼa. 20Gbɛkↄ mʼↄny abr nyam eke mi kʼɛnymʼŋ: am yɛb Jesabɛl, 2.20 Jesabɛl:Ɛ̀kn 1 Ɛ́b Ebu 16.31; 19.1-2; 2 Ɛ́b Ebu 9.22,30. yↄw na eke am dad eke Nyam ecʼodad in am dad, ke am irmn ɛm e juma kok ɛsɛl, yɛgm ɛl eke -li kʼij nfaci, ke -lʼij mindey eke wɛl wawr egb ↄŋ sinyam yadŋ a. 21Mʼokʼr sɛgŋ es eke li kʼitŋn ɛrm ɛm, kↄ lʼerurm eke li kʼigŋ in eci nfaci ij na lʼɛlu es. 22Ow sosiɛm a, mi bʼow mʼɛrumʼn es gbre ij ecʼob ɛrur ob af, ɛtŋ eke agŋ a ekʼij nfaci in ab a itŋnm ɛrm ɛm a, -li bʼow -lʼij gbre nↄnↄ ɛsɛ ow af. 23Mi bʼow mʼibi in ecʼagŋ a yɛji, ɛtŋ Sinyamel a fɛŋ bʼow uw any eke mʼel ɛgŋ a ekʼuw agŋ e tutr lele ɛl ecʼerur ab a any a. Ɛtŋ mi bʼow mʼↄŋ ↄny ɛm ecʼɛgŋ nyam nyam yecʼa eke li kok a ecʼow ekʼit a.
24Sica ↄny Tiatir e Nyamel ab ɛm ecʼagŋ likpr a, ↄny eke ɛgŋmn ucumn low yɛgm yadŋ na ↄnymn es, ↄlmn eke kʼuwr yecʼa eke -lʼɛsŋn Satan eci low any uw eke lↄl es ab any a, 2.24 Satan eci low any uw eke lↄl es:aŋa ow el low yɛgm eke lↄl es, ke anŋ agŋ a cɛ eke el ɛl e nyàm nuŋ igŋ ebr ab ɛm a eci. mʼuyulm ↄny low ɛjeci kaka fɛŋ ij. 25Gbɛkↄ yecʼa ekʼɛŋan a, ùcur ↄnyn es toŋ ke mʼánŋ mʼow.
26-28Agŋ a eke bʼow kok ɛm ecʼerur a toŋ ók nuŋ a, ɛl anake -li bʼow -lʼeb any a. Mi bʼow mʼↄŋ ɛl abusu a eke mʼeb ɛm Ɛs ogŋ a. Mi bʼow mʼↄŋ ɛl -nʼↄny abusu ɛbr ɛbr fɛŋ af. -Li bʼow -lʼɛw wɛl es lɛc ɛm ɛtŋ -li bʼow -li bↄbm wɛl es ɛsɛ elel eke wɛl bi bↄbm ereŋ es ab af. Ɛmɛny mi bʼow mʼↄŋ ɛl ibribr eci lɛ́l a yɛji. 2.28 Bɛ̀bmn Selu 2.8-9; Awl 24.17; Es Ɛkn 22.16.
29Ke ɛgŋ yecʼeke ɛli ↄru a, íri yecʼa ekʼAbŋ am dad ok Sinyamel a.” »
3Sard e Nyamel a e lɛl eke wɛl awŋ
1«Nↄn lɛl awŋ Sard e Nyamel a ecʼafr ɛrm ɛs a: “Kin odad yecʼeke ɛgŋ a ekʼↄnym Nyam ecʼabŋ lↄbŋ a lele mílɛ́l lↄbŋ ab ab a am dad: Mʼuw juma fɛŋ eke kok ab any. Agŋ bi tutr eke anŋ owr, kↄ tasi ɛm a, uw! 2Ùfŋm es! Ke yecʼa eke anŋʼŋ ke kʼuwm a, ↄ́ŋʼn nʼanŋ kikri gbuŋ ke lʼúw nimum nimum. Mʼɛkn eke ŋ ecʼów a bɛbmnm tasi, ɛm e Nyam a ecʼa ekʼam erur ab ab. 3Ɔ̀kn yecʼa eke iri ke eb a, ùcu ↄny es ke ítŋn ɛrm ɛm. Eke ufŋam es, mi bʼow mʼow kpru ɛm ɛsɛ ulu af mʼocʼŋ, ɛtŋ kʼow uwm wanci ab af eke mi bʼow mʼow ab any. 4Gbɛkↄ Sard yogŋ, ↄny ɛm ecʼagŋ nyam nyam ibarm ɛl eci mob sus ɛm a. Agŋ amua bʼow anŋ mob efu ɛm ɛc ɛm ab, aŋke -lʼit. 5Ɛbɛn eke agŋ a eke bʼow eb any a bʼow sus mob efu ana. Mi kʼow mi tɛtŋm ɛl ecʼen ab es sel ɛŋn e lɛl ab ɛm, 3.5 sel ɛŋn e lɛl:agŋ a ekʼel Nyam ecʼa, afr, ɛl ecʼen anŋ lɛl ligbɛl nyam ɛm. ɛtŋ ɛm Ɛs lel in ecʼafr ɛrm ɛsɛl ab ab ecʼany af, mi bʼow mi dad eke agŋ amua el ɛm eci. 6Ke ɛgŋ yecʼeke ɛli ↄru a, íri yecʼa eke Abŋ am dad ok Sinyamel a.” »
Filadɛlfi eci Nyamel a e lɛl eke wɛl awŋ
7«Nↄn lɛl awŋ Filadɛlfi e Nyamel a ecʼafr ɛrm ɛs a: “Kin odad yecʼeke ɛgŋ a ekʼel lala lele low nawrɛ ab a, ɛgŋ a eke ↄnym ɛb ebu David eci safuɛ ab ab, bi fig ke ɛgŋ kaka ↄ́tum ablm, bʼabl ke ɛgŋ kaka ↄ́tum figm a am dad: 3.7 Bɛ̀bmn Esayi 22.22.8Mʼuw juma fɛŋ eke kok ab any; mi fig lisany nyam mʼɛwʼŋ es any af eke ɛgŋ kaka kʼↄtum ablm. Lɛc tɛl cɛ ↄny, gbɛkↄ ucu ɛm ecʼodad a ↄny es ɛtŋ dadm eke uwm im any. 9Kin low eke mi bʼow mi kok Jwifɛl ekʼel Satan ecʼogog ecʼagŋ a eke bʼocr ɛl sosi Nyam ecʼagŋ, ke ow bʼel yadŋ a: mi bʼow mʼↄny ɛl lɛc ɛm -lʼok ↄwrↄkp wus ŋ ecʼany af, ɛtŋ -li bʼow -lʼuw any eke mi bʼerurʼŋ. 3.9 Bɛ̀bmn Esayi 49.23; 60.14; 43.4.10Eke ↄsu ol a eke mʼↄŋʼŋ eke kʼusur ɛrm a, ɛm yɛji mi bʼow mʼↄsuʼŋ gbre eci lɛgŋ a eke bʼow ow wus nimum af ɛbm wus ecʼagŋ a fɛŋ a. 11Ow kʼow ibnm eke mi bʼow mʼow. Ow sosiɛm, yecʼa ekʼↄny a, ùcu ↄny es kikri yecʼɛtŋ ke ɛgŋ kaka kʼébm ŋ ecʼany eb e tufɛ a. 12Agŋ a eke bʼow eb any a, mi bʼow mʼↄsŋm ɛl es ɛm Ɛs eci Nyamel ab ɛm ɛsɛ êl ecʼakr ab af, ɛtŋ -li kʼow -lʼokmn ↄkm ij. Mi bʼow mi nↄn ɛm e Nyam a eci nin a lele in ecʼɛb a eci nin ab ab agŋ amua eke ɛŋn any ab af. Ɛb a, in lʼel Jerusalɛm owr a eke bʼow anŋ afr, ɛm e Nyam a ogŋ us es a. Mi bʼow mi nↄn nin owr a eke mʼɛŋn a yɛji ɛl af. 3.12 Bɛ̀bmn Esayi 62.2.
13Ke ɛgŋ yecʼeke ɛli ↄru a, íri yecʼa ekʼAbŋ am dad ok Sinyamel a.” »
Laodise e Nyamel a e lɛl eke wɛl awŋ
14«Nↄn lɛl awŋ Laodise ecʼafr ɛrm ɛs a: “Mʼel ɛgŋ a eke wɛl bʼɛsŋ Amɛn, 3.14 Amɛn:in e nyandrɛ el “ke ow él ɛbɛn.” Eke wɛl am ɛsŋ Krist “Amɛn”, ke in ɛm anake wɛl bʼɛkn eke Nyam ecʼów fɛŋ eke ɛwar ɛw es lele ów eke li dad lʼɛw es ab ab, el ów tasi a. Ɛ̀kn 2 Korɛnt 1.20. ɛgŋ a ekʼel daŋku ij ɛs cɛcɛ lele low nyim nyim ab a, ɛgŋ a eke anŋ ów fɛŋ eke Nyam kok a e nuŋ ↄb ɛm a. Kin ɛm eci odad a: 15Mʼuw juma fɛŋ eke kok ab any, ɛtŋ mʼɛkn eke ɛwm dra ɛtŋ ɛmɛny ɛwm gbagba yɛji. Blel ↄtu el ów yony ab ɛm e nyam yɛji, ow ɛ́w afanma. 16Kↄ sica ekʼel dede, ke elm dra oglog gbagba a, mi bʼow mʼɛgbl mʼɛluʼŋ es. 17Ŋ bi dad ɛsɛ: mʼↄny os nↄnↄ, mʼↄnym low kaka ecʼes abur. Kↄ tasi ɛm a, ŋ uwm any eke el gbre ɛs, ↄny sↄrŋ nↄnↄ, el gbↄru, el any eflu lele sos ↄfr ɛs ab. 18Ow sosiɛm a, kin ów eke mʼam ↄmʼŋ: òw ɛm ogŋ a, ↄl sika eke al ɛlu ow eci sayl a ↄkm a, ke él gbreŋgbi. Òw ↄl mob sus ɛm efu sus, yecʼɛtŋ ke kʼánm sos ↄfr ɛ́s ↄnymʼŋ. Òw ↄl sɛkp ok ŋ ecʼanyamn ab ɛm, ke ɛ́kn es. 19Agŋ a fɛŋ eke mi bʼerur a, mi bʼɛnym ɛl abr ɛtŋ mi bʼɛw low mʼↄŋ ɛl. 3.19 Bɛ̀bmn Nyandrɛ 3.12; Ebre 12.6. Ɛ̀lu lɛc ij ↄkm ke ítŋn ɛrm ɛm. 20Sica mʼinym es lisany ɛtŋ mʼam icm abu. Eke ɛgŋ nyam iriʼm lebl ɛtŋ figʼm lisany a, mi bʼow mʼɛyʼr akŋ, mi bʼow mʼus abu in ab ɛtŋ in yɛji li bʼow lʼus abu ɛm ab.
21Agŋ a eke bʼow eb any a, mi bʼow mʼↄŋ ɛl abusu -li sig es ɛm ab, ɛm eci atufu lɛkpn ab af, ɛsɛ elel eke ɛm yɛji eke mʼeb any a, ɛm Ɛs ↄŋʼm abusu mi sig es in ab, in eci atufu lɛkpn af ab af.
22Ke ɛgŋ yecʼekʼɛli ↄru a, íri yecʼa ekʼAbŋ am dad ok Sinyamel a.” »
4Afr e Nyam nuŋ igŋ
1Ɛmɛny ow e jam a, mʼɛkn low ɛjeci. Afr, mʼɛkn lisany nyam eke fig, ɛtŋ lebl a ekʼanŋ ɛsɛ krↄkr eci lebl af ke mʼikŋ anym mʼiri a, dadʼm ninɛ: «Ùyu af aŋa, ke mi yɛ́gmʼŋ ow e jam ecʼów eke bʼow ow a.»
2Kpɛkŋ Abŋ ocʼm ɛtŋ afr yogŋ, mʼɛkn atufu lɛkpn nyam ekʼɛgŋ nyam sig es af. 3Ɛgŋ a eke sig es af a eci jɛjn a am ot mebn sↄbↄ ɛrŋ ɛrŋ es ɛsɛ jasp lele sarduan ab af. Nyamgodi eke am jɛjn ɛsɛ lebn emerod af a iwr ɛlul atufu lɛkpn ab ɛm. 4.3 Bɛ̀bmn Ezekiɛl 1.26-28; 10.1.4Atufu lɛkpn likŋ lele yar ab did iwr ɛlul atufu lɛkpn ligbɛl ab ɛm, ɛtŋ agŋ ekpekp likŋ lele yar ab sig es af. -Li sus mob efu ɛtŋ -lʼus sika tufɛ. 5Afr eci ŋɛŋn lele nyamgbrany ab ab am anŋ atufu lɛkpn ab ɛm ok ↄkm. Mrabri lↄbŋ eke wɛl gigŋ a am iri any af yogŋ. Mrabri lↄbŋ a el Nyam ecʼabŋ lↄbŋ a. 6Atufu lɛkpn a ecʼany af a, okij ekʼayl toŋ am ɛkan es ke ot lebn ufu pum pum es anŋ.
Araŋn yogŋ, mindey yar eke ɛl ecʼanym lele jam ab a el anyamn ↄfr a, iwr did ɛlul atufu lɛkpn ab ɛm. 7Krɛkrɛ eci ndey a anŋ ɛsɛ kukuma af, yony ɛm ecʼa anŋ ɛsɛ id liy af, nyahan ɛm ecʼa ɛli any ɛsɛ ɛgŋ ecʼab af, ɛtŋ yar ɛm ecʼa anŋ ɛsɛ káká ekʼigb nyɛnyn ↄw es af. 4.7 Bɛ̀bmn Ezekiɛl 1.22; 1. 5-10; 10.14.8Mindey yar amua e nyam nyam ɛli ↄw nↄhↄn, ɛtŋ -lʼɛli anyamn eb ɛl ↄw a nimum, ew lele af ab. Ɛtŋ ncok lele lɛgŋ owr ab nɛny bʼanŋ ɛl ɛm -nʼam dad -lʼɛsɛ:
«Lala, lala, lala el Ɛs Kↄtↄkↄ Nyam Abusu Ɛs eci,
in eke nʼanŋ godʼɛtŋ, nʼanŋ yɛfɛnyna ke nʼam ow a eci.» 4.8 Bɛ̀bmn Ezekiɛl 1.18; 10.12; Esayi 6.2-3.
9-10Ɛgŋ a ekʼanŋ owr sɛgŋ fɛŋ eci ke sig es atufu lɛkpn ab af a, mindey yar a bi kↄklmʼn, bʼusrʼr sos ɛtŋ bʼↄŋʼn bia. Ɛtŋ sakp sakp fɛŋ eke -li bi kↄklm ow a, agŋ ekpekp likŋ lele yar ab ab a bʼok ↄwrↄkp wus ɛgŋ a eke sig es atufu lɛkpn ab af a ecʼany af. -Li bʼigŋ ɛgŋ a ekʼanŋ owr sɛgŋ fɛŋ ecʼa nuŋ. -Li bʼot ɛl eci sika tufɛ a -li wↄwl atufu lɛkpn a ecʼany af yogŋ ke -nʼam dad -lʼɛsɛ:
11«O, Ɛs Kↄtↄkↄ, ɛy e Nyam,
it eke kʼɛŋn anygbɛl,
es susm lel abusu ab,
aŋke ŋ kok ob fɛŋ ɛtŋ ŋ ecʼerur ɛm ob fɛŋ anŋ owr ɛtŋ bʼok sel.»
5Lɛl a lele licɛbli ab ab
1Sica mʼɛkn lɛl nyam eke wɛl ar es ke anŋ ɛgŋ a eke sig es atufu lɛkpn ab af a e lidr abu ab ɛm. Wɛl nↄn lɛl a any lele jam ab, ɛtŋ wɛl ↄnyn nɛnyɛmbri ab es, es ↄnyan ob lↄbŋ ab. 5.1 Es ↄnyan ob el kpeŋ prↄprↄ eke wɛl bʼoc ↄnyn lɛl eke wɛl bʼar es a nɛnyɛmbri es, yecʼɛtŋ ke ɛgŋ ekʼitm a kʼↄtum kpabm es. Wɛl bʼↄnyan es ɛtŋ wɛl bi fig adaŋku ecʼany af. Lɛgŋ ab ɛm a, aja e lɛl wɛl bʼↄnyn es es ↄnyan ob lↄbŋ ɛm.2Ɛtŋ mʼɛkn afr ɛrm ɛsɛl ab ɛm e lɛc ɛs nyam eke am ↄg lebl tuↄtuↄ ɛm ɛsɛ: «Bwo ecʼɛgŋ it eke ki bↄbm es ↄnyan ob amua es ke fíg lɛl na ee?» 3Ke ow el afr, wus af aŋa lele wus ew 5.3 Jwifɛl e tutr ɛm a, wus ew a, ↄŋnes baŋn. ab, ɛgŋ kaka anm eke kʼↄtu fig lɛl a bake lɛr ow e lokm a. 4Ow ↄŋ mʼikŋ ↄŋn nↄnↄ eke ɛgŋ kaka kʼanm itm eke ki fig lɛl a bake ↄtu lɛr ow e lokm a. 5Gbɛkↄ agŋ ekpekp ab ɛm e nyam dadʼm ninɛ: «Kʼìkŋ ↄŋn! Kin Juda ecʼeb ab ɛm e kukuma a, ɛb ebu David eci lilaw a eb any, 5.5 Nuŋ Ɔb 49.9 ɛm a, wɛl bʼɛsŋ Juda ecʼeb a “kukuma ewli”; eb na ɛm anake ɛb ebu David anŋ ɛy ↄkm a. David eci lilaw a: Grɛk ɛm a, odad a eci iri tasi a el David eci min; na ow el Mesi a eci nin nyam (Esayi 11.1,10). li bʼow li bↄbm es ↄnyan ob lↄbŋ ab es ke li fíg lɛl a.»
6Sica ɛmɛny mʼɛkn atufu lɛkpn a, mindey yar a lele agŋ ekpekp ab ab, ɛtŋ mʼɛkn licɛbli nyam eke wɛl ibi egb waw eci, ke inym es ɛl eci araŋn. Lʼɛli ↄcↄwr lↄbŋ lele anyamn lↄbŋ ab. Anyamn lↄbŋ a el abŋ lↄbŋ a eke Nyam ɛrm ow wus nimum af a. 7Licɛbli a ɛri im ɛtŋ oc lɛl a ɛgŋ a eke sig es atufu lɛkpn ab af a eci lidr abu ab ɛm. 8Kpɛkŋ mindey yar a lele agŋ ekpekp likŋ lele yar ab ab ok ↄwrↄkp wus licɛbli a ecʼany af. Ɛl ɛm ecʼɛgŋ ɛgŋ fɛŋ ↄnym saŋgo nyam ab lele sika ɛm kpↄk eke ogŋ iy ɛm gbↄŋ ab, ke el agŋ lala a eci nyam ŋↄŋn a. 9-Nʼam ɛgŋ ɛj owr nyam:
«Ŋ cɛ it eke kʼoc lɛl a ke bↄ́bm es ↄnyan ob lↄbŋ ab es,
aŋke wɛl ibiʼŋ ocʼŋ wawr ŋ egb ɛtŋ ow ɛm a,
eb eb fɛŋ ɛm, ɛbr ɛbr fɛŋ ɛm, agŋ agŋ fɛŋ ɛm lele ɛb ɛb fɛŋ ɛm ab,
ɛwl sↄg agŋ ↄŋ Nyam.
10Kok ɛl -lʼel gbreŋgbi usu a ecʼagŋ,
-lʼel egb waw ɛsɛl eke ki kok juma ɛy e Nyam a ecʼany af,
ɛtŋ -li bʼow -lʼɛw wus na nimum es.»
11Sica ɛmɛny mi lɛr ɛtŋ mʼam iri afr ɛrm ɛsɛl nↄnↄ gbɛl e lebl. -Nʼɛny nↄnↄ ligbɛl, -lʼiwr atufu lɛkpn a, mindey yar a lele agŋ ekpekp yar ab ab -lʼɛlul ɛm.
12-Nʼam ɛgŋ ɛj lebl gege ɛm -lʼɛsɛ:
«Licɛbli a eke wɛl wawr egb a cɛ it eke kʼɛŋn
abusu, ob ↄny, sɛwr lele lɛc ab;
es susm, anygbɛl lele kↄklm ab!»
13Ɛtŋ ɛmɛny mʼiri eke ob fɛŋ eke Nyam kok anŋ afr, wus af aŋa, wus ew lele okij ɛm ab a, ob fɛŋ eke anŋ owr a am ɛgŋ ɛj dad ɛsɛ:
«Sɛgŋ fɛŋ, kↄklm, anygbɛl lele abusu ab él
ɛgŋ a eke sig es atufu lɛkpn ab af a
lele licɛbli ab ab eci!»
14Ɛtŋ mindey yar a am ɛlu “Amɛn!” Ɛtŋ agŋ ekpekp a am ok ↄwrↄkp wus igŋ Nyam lele licɛbli ab ab nuŋ.
6Krɛkrɛ eci es ↄnyan ob a el any eb owi
1Ow e jam a, mʼɛkn licɛbli a ↄny es ↄnyan ob lↄbŋ a eci krɛkrɛ a ↄb es, 6.1 Ɛ̀kn Es Ɛkn 5.1 lele ow ecʼakr otar ab ab. ɛtŋ mʼiri mindey yar ab ɛm e nyam barm lebl ekʼanŋ ɛsɛ nyamgbrany ecʼikŋ ab af ninɛ: «Òw!» 2Mi bi lɛr a, mʼɛkn gbaŋkↄ ufu nyam. Ɛgŋ a eke uyu af a ↄnym bin ab, ɛtŋ wɛl ↄŋʼn any eb e tufɛ. Lʼikŋ anym lʼeb any ɛtŋ ɛmɛny nʼaam any eb eci.
Yony ɛm eci es ↄnyan ob a el ar ogŋ owi
3Eke licɛbli a bↄbm yony ɛm eci es ↄnyan ob ab es a, mʼiri mindey yar ab ɛm e yony ɛm ecʼa eke am dad ɛsɛ: «Òw!» 4Ɛtŋ gbaŋkↄ ɛjeci nyam ɛy ↄkm. Lʼebl es ɛsɛ al af. Ɛgŋ a eke uyu af a ɛŋn abusu eke kʼↄny ɛrm es ɛy oc es wus na af, yecʼɛtŋ ke ow ↄ́ŋ agŋ ibirir ɛl ↄfr. Ɛtŋ wɛl ↄŋʼn lab ler ɛm ligbɛl nyam.
Nyahan ɛm eci es ↄnyan ob a el lek owi
5Eke licɛbli a bↄbm nyahan ɛm eci es ↄnyan ob ab es a, mʼiri mindey yar a e nyahan ɛm ecʼa eke am dad ɛsɛ: «Òw!» Mi bi lɛr ɛtŋ mʼɛkn gbaŋkↄ ibr nyam. Ɛgŋ a eke uyu af a ↄnym toy ab. 6Mʼiri ob nyam am ikŋ ɛsɛ lebl nyam ekʼanŋ mindey yar a ecʼaraŋn af, ɛtŋ am dad ɛsɛ: «Ɛ̀wŋn ble kilo nyam lɛgŋ nyam e juma kok e labm sↄg eci; ke ɛ́wŋn ↄrj gbɛ kilo nyahan lɛgŋ nyam e juma kok e labm sↄg eci. Gbɛkↄ Lek, kʼìtŋn oliv e mun a lele viny e mar ab ab gbɛ abu.» 6.6 blea lele ↄrj ab ab el egb iju yony eke ow eci miy a anŋ ɛsɛ may af. Ekʼow elm lek e lɛgŋ a, ɛgŋ nyam bʼɛŋn ble kilo lɛw lɛgŋ nyam e juma kok e labm sↄg eci. Aŋa ɛgŋ a eke am ɛkn lek owi a am ɛwŋn ↄŋ agŋ a eke kʼij. Ble kilo nyam oglog ↄrj kilo nyahan ↄ́tum ɛbam akŋ nyam ecʼagŋ e lɛgŋ nyam ecʼob ij.
Yar ɛm eci es ↄnyan ob a el luw owi
7Eke licɛbli a bↄbm yar ɛm eci es ↄnyan ob ab es a, mʼiri mindey yar ab ɛm e yar ɛm ecʼa eke am dad ɛsɛ: «Òw!» 8Mi bi lɛr ɛtŋ mʼɛkn gbaŋkↄ nyam ekʼɛw mufu mufu. Ɛgŋ a eke uyu af a, wɛl bʼɛsŋʼn Luw, ɛtŋ ↄŋnes baŋn am usʼr jam. Wɛl ↄŋ ɛl abusu wus ecʼↄy yar ab ɛm e nyam ɛm ecʼagŋ ab af, eke -li kʼibi wɛl ar ogŋ ɛm, lek owi ɛm, ↄl ɛrŋ ɛrŋ ɛm lele mindey eŋuŋ ɛm ab.
Yen ɛm eci es ↄnyan ob a el agŋ ekʼuw Nyam odad sosiɛm a
9Eke licɛbli a bↄbm yen ɛm eci es ↄnyan ob ab es a, mʼɛkn egb waw usu a ecʼew a, agŋ agŋ eke wɛl ibi a eci liy a. Wɛl ibi ɛl nɛny nyam eke -lʼijr Nyam odad eci lele daŋku eke -lʼijr ow ecʼab ab sosiɛm. 10-Nʼam ↄg lɛc ɛm -li dad -lʼɛsɛ: «Es Ɛw Ɛs Lala, Es Ɛw Ɛs Nawrɛ, kↄ toŋ ba bogŋ lɛgŋ iy bʼow jɛj wus ecʼagŋ a e low ok, íbrm ɛl ɛy e luw a eci low ee?» 11Sica wɛl ↄŋ ɛgŋ nyam nyam mob sus ɛm ufu, ɛtŋ wɛl dad ɛl eke ɛmɛny -li kʼeku sɛgŋ tɛl, toŋ bake wɛl íbi ɛl lisijimɛl a eke am kok Ɛs Kↄtↄkↄ e juma a ɛsɛ elel eke wɛl ibi ɛl ab af a, ów yibr ɛl.
Nↄhↄn ɛm eci es ↄnyan ob a el ɛrm bebl e lɛgŋ a
12Ɛtŋ mʼɛkn licɛbli a eke am bↄbm nↄhↄn ɛm ecʼes ↄnyan ob ab es a, ɛtŋ kpɛkŋ wus umu lɛc ɛm; ligbn ibr pri pri pri ɛsɛ niŋn mob af, ɛtŋ awl ebl es kondoŋ ɛsɛ mebl af. 13Mílɛ́l anŋ afr am ok wus ɛsɛ babm ikŋ ecʼey a eke kʼeblm, ke lɛf tuↄtuↄ bʼɛlu ↄny ok wus ab af. 14Afr am oc es ɛsɛ ajraŋka eke wɛl bʼↄny ar es ab af; ɛtŋ mafɛny a lele silekr ab ab fɛŋ am ŋgboŋ ɛl e susu susu a. 15Ow ↄŋ ɛtŋ wus ecʼɛ́b ebu, agŋ any ɛsɛl, ar ogŋ ɛsɛl ɛm ecʼagŋ ɛgbɛl, egbreŋgbi, abusu ↄny ɛsɛl, agŋ ɛjecʼa fɛŋ ekʼel madu oglog agŋ ewi a, im lↄl es mafɛny ↄmu ɛm lele mób ɛm ab. 16-Nʼam dad mafɛny a lele mób ab ab -lʼɛsɛ: «Òkr ɛy af ke lↄ́ↄl ɛy es ɛgŋ a eke sig es atufu lɛkpn ab af a ecʼany a e lís, ke ↄ́ny kpabr ɛy es licɛbli a ecʼɛrm bebl a e lís, 17aŋke ɛl ecʼɛrm bebl a e lɛgŋ ligbɛl a ow ŋ̂. Sica bwo ecʼɛgŋ bʼow ↄtu anŋ owr ab ee?»
7Agŋ a eke ɛŋn Nyam e mɛny ɛwr a
1Sica ow e jam a, mʼɛkn afr ɛrm ɛsɛl yar ekʼinym es wus eci ↄy yar ab ɛm. -Nʼↄny ↄy yar a e lɛf a eke bʼɛlu wus na af ab es, yecʼɛtŋ ke lɛf kaka kʼɛ́lum wus na af, okij af lele ekŋ ɛm ab. 2Ɛtŋ mʼɛkn afr ɛrm ɛs ɛjeci nyam ɛy ↄkm yogŋ a eke ligbn bʼigb a. Nʼↄnym Nyam ekʼanŋ owr eci ob a eke bʼoc ɛwr ɛgŋ mɛny ab ab. Li barm lebl tuↄtuↄ lʼɛsŋ afr ɛrm ɛsɛl yar a eke ɛŋn abusu eke ki ŋuŋn wus lel okij ab a ninɛ: 3«Èkur yɛ! Kì kokr wus, okij lele ekŋ ab low ŋuŋ kaka. Ow it eke si kʼikŋ anym sʼɛw mɛny ɛwr nyam ɛy e Nyam a eci juma kok ɛsɛl a ecʼanyafr a.» 4Ɛtŋ mʼiri agŋ a eke wɛl ɛwr mɛny anyafr a e nɛny a. -Lʼij agŋ fandi ekŋ lↄbŋ, agŋ miy yar. Ow ow el Israɛl ecʼeb eb a fɛŋ ecʼagŋ a:
5Juda ecʼeb ab ɛm agŋ fandi lɛw yony,
Rubɛn ecʼab ɛm fandi lɛw yony,
Gad ecʼab ɛm fandi lɛw yony,
6Asɛr ecʼab ɛm fandi lɛw yony,
Nɛftali ecʼab ɛm fandi lɛw yony,
Manase ecʼab ɛm fandi lɛw yony,
7Simeↄn ecʼab ɛm fandi lɛw yony,
Levi ecʼab ɛm fandi lɛw yony,
Isakar ecʼab ɛm fandi lɛw yony,
8Zabulↄn ecʼab ɛm fandi lɛw yony,
Josɛf ecʼab ɛm fandi lɛw yony,
Bɛnjamɛ ecʼab ɛm fandi lɛw yony.
Ɛl fɛŋ, -nʼɛŋn Nyam e mɛny ɛwr a.
Agŋ nↄnↄ gbɛl am igŋ Nyam nuŋ
9Ow e jam a, mi bi lɛr ɛtŋ ɛmɛny mʼɛkn agŋ nↄnↄ gbɛl eke ɛgŋ kaka kʼↄtum awlm. Ow el ɛb ɛb fɛŋ, eb eb fɛŋ, agŋ agŋ fɛŋ lele ɛbr ɛbr fɛŋ ab ecʼagŋ. -Nʼinym es atufu lɛkpn a lele licɛbli ab ab ecʼany af, -li sus mob efu ɛtŋ arakp anŋ ɛl abu ɛm. 7.9 Arakp el sos ɛm iŋn lele any eb ab eci mɛny ɛwr. Wɛl bʼoc kokr Mɛf ecʼes gbɛgbl (Ob Ap 23.39-43). Kokoba ↄb ɛs Zakari dad eke lɛgŋ ekʼanŋ anym am ow ab ɛm, ɛb ɛb fɛŋ bʼow kok es gbɛgbl na ke ↄ́nym sarakp ab (Zakari 14.16).10-Nʼam ↄg lɛc ɛm -lʼɛsɛ: «Ɛy e sel ɛŋn a, ɛy e Nyam a eke sig es atufu lɛkpn af a lele licɛbli ab ab ogŋ ow bʼanŋ ow!» 11Afr ɛrm ɛsɛl a fɛŋ iwr did ɛlul atufu lɛkpn a, agŋ ekpekp a lele mindey yar ab ab ɛm. -Nʼam ok ↄwrↄkp wus atufu lɛkpn a ecʼany af ɛtŋ -nʼam igŋ Nyam nuŋ -li dad -lʼɛsɛ: 12«Nawrɛ! Kↄklm, anygbɛl, sɛwr, bia ɛlu lele sos usr ab, abusu ↄny lele lɛc ab él ɛy e Nyam a eci sɛgŋ fɛŋ! Amɛn.»
13Agŋ ekpekp ab ɛm e nyam ibrm im ninɛ: «Bwo ɛl el agŋ amua eke sus mob efu a, ɛtŋ bogŋ -nʼanŋ lʼow ee?» 14Mʼↄdu mʼeb mi dadʼr mʼɛsɛ: «Ɛgŋ gbɛl, ŋ anake uw any a.» Ɛtŋ lʼↄdu lʼeb li dadʼm ninɛ: «Amua, agŋ a eke ɛcr gbre ijr ligbɛl ab ɛm ab ana. 7.14 Ɛ̀kn Daniɛl 12.1; Matie 24.21. -Li yↄyↄg ɛl e mob sus ɛm ab es licɛbli a e mebl ab ɛm, ɛtŋ ow ↄŋ mob sus ɛm a ufu pum pum pum. 15Na sosiɛm anake -li bʼinym es Nyam ecʼatufu lɛkpn a ecʼany af, ke ncok lele lɛgŋ owr ab -li bʼigŋ ow nuŋ ow eci nuŋ igŋ usu a. Ɛgŋ a eke sig es atufu lɛkpn ab af a bʼow ot ok ɛl in eci gbad êl ab ɛm ke ↄ́su ɛl. 7.15 Ɛ̀kn Ob Ap 26.11-13; Esayi 4.5-6.16Namn lele mij amn ab kʼow ↄnym ɛl ij, ɛtŋ ligbn lele elubu ab yɛji kʼow ↄnynm ɛl ij. 17Nawrɛ, aŋke licɛbli a ekʼinym es atufu lɛkpn a e saw a, bʼow el ɛl e nyimn ɛs, ot im ɛl mij ewl mij eke bʼↄŋ ɛgŋ sel a e saw, ke Nyam tɛ́tŋ ɛl e mikŋ ab es.»
8Lↄbŋ ɛm ecʼes ↄnyan ob a el usu es irm owi
1Eke licɛbli a bↄbm lↄbŋ ɛm eci es ↄnyan ob ab es a, afr, usu a irm es tiŋ toŋ ow ↄtu ekʼij wanci ikpr mum. 2Ɛtŋ mʼɛkn afr ɛrm ɛsɛl lↄbŋ a eke bʼanŋ Nyam ecʼany af a; wɛl ↄŋ ɛl krↄkr lↄbŋ.
3Mʼɛkn afr ɛrm ɛs ɛjeci nyam ekʼow inym es egb waw usu a; nʼↄnym ogŋ ofŋn ob sika ɛm ab. Ɛtŋ wɛl ↄŋʼn ogŋ nↄnↄ eke li kʼoc, ke Nyam ecʼagŋ lala a e nyam ŋↄŋn ab ab li kokr egb waw sika ɛm egb waw usu a eke anŋ atufu lɛkpn a ecʼany af a. 4Afr ɛrm ɛs a ecʼabu ɛm a, ogŋ a e mregbn a eke wuwlm Nyam ecʼagŋ lala a e sinyam ŋↄŋn ab ab a am il Nyam ecʼany af. 5Ɛtŋ afr ɛrm ɛs a oc ogŋ ofŋn ob a, eb egb waw usu a ecʼal a ok ɛm ɛtŋ oc ↄwl wus. Ɛtŋ kpɛkŋ nyamgbrany am babarm, afr am ŋɛŋn ɛtŋ wus am umu.
Krɛkrɛ e krↄkr yar a
6Afr ɛrm ɛsɛl lↄbŋ a eke ↄnym krↄkr lↄbŋ ab ab a am bɛbm sos eke kʼafl krↄkr a.
7Krɛkrɛ ecʼa afl in e krↄkr a. Nyamok lele al eke wuwlm mebl ab a am ok wus. Wus ecʼog nyahan e nyam, ekŋ eke wɛl ok sakp nyahan eci akp nyam lele suw owr fɛŋ ab eb al iri ok es.
8Yony ɛm ecʼa afl in e krↄkr a. Ob ekʼanŋ ɛsɛ lafɛny ligbɛl nyam ekʼam iri al af ɛy okij ɛm; ɛtŋ okij ecʼog nyahan a e nyam itŋn el mebl. 9Mindey ekʼanŋ okij ɛm a eci sakp nyahan eci akp nyam uw, ɛtŋ simijɛtŋ eci sakp nyahan eci akp nyam uŋ.
10Nyahan ɛm ecʼa afl in e krↄkr a. Lɛ́l ligbɛl nyam ekʼam iri al ɛsɛ mrabri af a anŋ afr ɛy wus. Lʼɛy simij ewl mij a ecʼogog nyahan e nyam ɛm lele mij eŋ af ab. 11Lɛ́l a e nin el “Lolo”. Simij ogog nyahan e nyam itŋn am lol, ɛtŋ agŋ nↄnↄ a eke ɛgŋ mij a am uw, aŋke ow am lol nↄnↄ.
12Sica yar ɛm ecʼa afl in e krↄkr a. Wɛl iyr ligbn ecʼogog nyahan a e nyam a, awl yɛji ecʼogog nyahan a e nyam a lele mílɛ́l eci sakp nyahan eci akp nyam ab ab ob; ɛtŋ ow ↄŋ ɛl eci afŋ a e nyahan ɛm irm es. Lɛgŋ owr e nyahan ɛm a lele ncok eci nyahan ɛm ab ab irmn ɛl ecʼusuayl a.
13Ɛmɛny mi bi lɛr ɛtŋ mʼɛkn káká nyam eke igb im afr kpoŋ ɛm a ke am ɛlu lebl tuↄtuↄ dad ɛsɛ: «Musue! Musue! Musue bʼow el wus ecʼagŋ eci, lɛgŋ a eke afr ɛrm ɛsɛl nyahan a ekʼanŋ a bʼow afl ɛl e krↄkr a!»
9Yen ɛm e krↄkr a
1Sica yen ɛm ecʼafr ɛrm ɛs a afl in e krↄkr a, ɛtŋ mʼɛkn lɛ́l nyam ekʼanŋ afr ɛy wus, ke wɛl oc nↄmu croŋ gbɛl a e safuɛ a ɛlu abu ɛm. 2Lɛ́l a fig nↄmu croŋ gbɛl a ɛtŋ mregbn eke otarir es al gbɛl e mregbn ab am uyu ok ↄkm. Mregbn a ekʼam ok ↄkm a ibar ligbn lele lɛf ab. 3Ɛtŋ mregbn ab ɛm, tɛtɛ gbaŋgban anŋ ok ↄkm eb es wus na nimum af; ɛtŋ -nʼɛŋn abusu eke anŋ ɛsɛ sibↄban ecʼab af. 4Wɛl ɛdŋn ɛl eke -li ki ŋuŋnmn suw, ekŋ lele ob ɛjeci eke ɛli wus af ab. Gbɛkↄ abusu ɛru ɛl es eke -li kʼijr agŋ a eke Nyam e mɛny ɛwr anm anyafr a gbɛ gbre. 5Ɛtŋ agŋ amua e gbre ijr a eke -nʼɛŋan ow ecʼabusu a yɛji elm wɛl ecʼibi eci, kↄ ke -lʼijr wɛl gbre nↄnↄ toŋ ow íj awl yen. Ke gbre ijr a e dudu a ánŋ ɛsɛ bↄban ecʼɛgŋ eke bʼakŋ a e dudu ab af. 6Ɛtŋ awl yen ab ɛm, agŋ bʼow ↄl luw es, kↄ -li kʼow -nʼɛŋnmn ow; -li bʼow -lʼerur eke -li kʼuw, kↄ luw kʼow owrm ɛl.
7Tɛtɛ gbaŋgban amua anŋ ɛsɛ sigbaŋkↄ eke wɛl bɛbm sos ar ogŋ ecʼaf; ɛl e nuŋ ab af, wɛl bʼɛkn mob ekʼanŋ ɛsɛ sika tufɛ af, ɛtŋ ɛl e many a anŋ ɛsɛ agŋ e many af. 8Ɛl e sin nuŋ a anŋ ɛsɛ ↄyↄw ecʼab af, ɛtŋ ɛl ecʼan nɛnym a anŋ ɛsɛ sikukuma ecʼab af. 9Ɛl ecʼɛrmni a anŋ ɛsɛ erkpo lowi ɛm af, ɛtŋ ɛl ecʼↄw a ecʼikŋ a anŋ ɛsɛ ar ogŋn eci mɛtŋ a eke wɛl bʼot cucur sigbaŋkↄ nↄnↄ im ar ogŋ ɛm ab af. 10Tɛtɛ gbaŋgban amua ɛli ewl eke mbe anŋ ɛm ɛsɛ sibↄban ecʼab af. Ɛtŋ ɛl ecʼewl amua ab anake -li bʼow -li kok agŋ ów eŋuŋ toŋ ke ow íj awl yen a. 11Ɛl ecʼes ɛw ɛs a el nↄmu croŋ gbɛl a ecʼafr ɛrm ɛs a. Ebre ɛm a wɛl bʼɛsŋʼn “Abadↄn”, ɛtŋ Grɛk ɛm a wɛl bʼɛsŋʼn “Apoliↄn” (ekʼel nyandrɛ ɛm “Ŋuŋn Ɛs”).
12Sica krɛkrɛ ecʼabu ɛyr na ɛc ŋ̂. Gbɛkↄ ow e jam a, ɛmɛny abu ɛyr yony anŋ eke bʼow ow.
Nↄhↄn ɛm e krↄkr a
13Ɛtŋ nↄhↄn ɛm ecʼafr ɛrm ɛs a afl in e krↄkr a. Egb waw usu a ekʼel sika ɛm ke anŋ Nyam ecʼany af a ecʼↄy yar ab ɛm, mʼiri lebl nyam ekʼam ikŋ ow. 14Lebl a dad nↄhↄn ɛm ecʼafr ɛrm ɛs a eke ↄnym krↄkr ab ab a ninɛ: «Mↄmu afr ɛrm ɛsɛl yar a eke anŋ ŋgbraka ɛm, mij gbɛl a eke wɛl bʼɛsŋ Efrat a e saw ab es.» 15Wɛl mↄmu afr ɛrm ɛsɛl yar ab es. Nawrɛ ɛm a, wanci na af, lɛgŋ na af, awl na af lele lakpo na af ab anake wɛl bɛbm ɛl sos wus nimum ecʼagŋ sakp nyahan a ecʼakp nyam ecʼibi ecʼa. 16Mʼiri ɛl ecʼar ɛsɛl eke bʼuyu gbaŋkↄ af a eci nɛny a: -lʼij agŋ miliↄn ekŋ lɛw. 17Ɛtŋ kin elel eke mʼɛkan sigbaŋkↄ a lele ɛl ecʼaf uyu ɛsɛl ab ab a: -lʼɛw erkpo lowi ɛm sos. Erkpo a ebl es ɛsɛ al af, ɛw ble eke iir ɛm ɛsɛ safir lebn af, ɛtŋ ow e mij a yɛji anŋ ɛsɛ sika e mij ab af. Sigbaŋkↄ a ecʼeŋ a anŋ ɛsɛ sikukuma ecʼab af; ɛl e nɛnym a, al, mregbn lele mebn eke ler ab am ok ↄkm. 18Ów eŋuŋ nyahan amua ekʼel al, mregbn lele mebn eke ler ab ke anŋ sigbaŋkↄ a e nɛnym am ok ↄkm a anake ibi wus ecʼagŋ sakp nyahan a ecʼakp nyam a. 19Tasi ɛm a, sigbaŋkↄ a e lɛc a anŋ ɛl e nɛny a lel ɛl ecʼewl ab ab ɛm. Ɛl ecʼewl a bʼot morŋn es: -nʼↄny eŋ eke -li bʼot -nʼam kokr agŋ low ŋuŋ.
20Sica agŋ a eke ów eŋuŋ amua ibim ke anŋ a, itŋnm es an ɛl ecʼabu ɛm eci ekŋ ekpr eke -li kokr a e lís; -lʼigŋm abŋ eŋuŋ, sika ɛm sinyam, jɛtɛ efu ɛm eci, jawie ɛm eci, mebn ɛm eci lele ekŋ ɛm ecʼa e nuŋ igŋ a -lʼɛlum es; mob amua eke ↄ́tum ɛknm es, irim ów, anm es yɛjʼa. 21-Li walm ɛl ecʼagŋ ibi owi, ɛl e cam kok owi, ɛl eci nfaci ij lele ɛl e mil iy ab ab bↄbↄ yɛji -lʼɛlum es.
10Afr ɛrm ɛs a lele lɛl likekli ab ab
1Ow e jam a, mʼɛkn afr ɛrm ɛs lɛc ɛs ɛjeci nyam eke anŋ afr am us es. Jru wiwrmʼn ab ɛtŋ nyamgodi iwrʼr nuŋ af; in ecʼany a anŋ ɛsɛ ligbn af ɛtŋ in ecʼakr a anŋ ɛsɛ al ekʼam iri imn afr ecʼaf. 2Nʼↄnym lɛl likekli eke fig ab. Lʼoc in e lidr e lakr a lʼɛw okij af ɛtŋ lʼɛw nɛmn ecʼa wus af. 3Li barm lebl tuↄtuↄ ɛm ɛsɛ elel eke kukuma bi barm ab af. Ɛtŋ eke li barm lʼok es a, nyamgbrany lↄbŋ a ↄdu eb babarm. 4Mʼerur eke mi ki nↄn ów a eke nyamgbrany a dad a, kↄ mʼiri lebl nyam dadʼm ninɛ: «Òc nyamgbrany lↄbŋ a ecʼów a eke dad a ɛw es sos ɛm; kì nↄn.»
5Sica afr ɛrm ɛs a eke mʼɛkn inym es okij af lele wus af ab a, igbl lidr abu ogŋ, 6ɛtŋ ij nɛny Nyam ekʼanŋ owr sɛgŋ fɛŋ ke kok afr, wus, okij lele ob fɛŋ ab a e nin ɛm. Li dad ninɛ: «Ɛmɛny Nyam kʼow ekum ij! 7Kↄ wanci ab af eke lↄbŋ ɛm ecʼafr ɛrm ɛs a bʼow ↄb nuŋ am afl in e krↄkr a, yogŋ anake Nyam e low a eke lↄl es a bʼow iy nɛny ɛsɛ elel eke li dad ow e low lʼok in eci juma kok ɛsɛl ekʼel kokoba ↄb ɛsɛl ab af a.»
8Ɛtŋ ɛmɛny lebl a eke anŋ afr ikŋ mʼiri a, am dadʼm ɛsɛ: «Ìm oc lɛl likekli a eke fig anŋ afr ɛrm ɛs a ekʼinym es okij af lele wus af ab a ecʼabu ɛm a.»
9Mʼim mi titm afr ɛrm ɛs a ɛtŋ mʼibrmʼn eke li kʼoc lɛl likekli a nʼↄŋʼm. Li dadʼm ninɛ: «Òc ij. Li bʼow li dedʼŋ nɛnym ɛsɛ mow mun af, kↄ li bʼow li lolʼŋ lokm.» 10.9 Bɛ̀bmn Ezekiɛl 3.3.10Mʼoc lɛl a afr ɛrm ɛs a ecʼabu ɛm ɛtŋ mʼij. Nawrɛ, lʼɛw mrɛmrɛ ɛm e nɛnym a ɛsɛ mow mun af, kↄ eke mʼakŋ mʼɛmn a, lʼɛwʼm lolo lokm.
11Ɛtŋ sica wɛl dadʼm ninɛ: «Ow it ke ɛmɛny ím ↄb Nyam e kokoba ok agŋ, ɛb ɛb, ɛbr ɛbr, lele ɛ́b ebu fɛŋ ab.»
11Adaŋku yony a
1Ow e jam a, wɛl ↄŋʼm likŋ sreŋ nyam eke wɛl bʼoc bɛbmn ob, ɛtŋ wɛl dadʼm ninɛ: «Ìm bɛbmn Nyamel gbɛl a lele egb waw usu ab ab, ke áwl agŋ a eke bʼigŋ Nyam nuŋ ɛm yogŋ a yɛji. 2Gbɛkↄ ɛ̀w Nyamel gbɛl a e gbugŋ ab es, kì bɛbmn, aŋke wɛl oc ↄŋ Nyam any uwm ɛsɛl eke bʼow uyu ob fɛŋ af ŋuŋn ɛb lala ab ɛm toŋ awl ekŋ yony miy yony. 11.2 awl ekŋ yony miy yony:ow cɛ ow el sɛgŋ fandi sɛgŋ ekŋ lɛw nyahan a (Es Ɛkn 11.3), ekʼel akpo nyahan lele likpr ab (Es Ɛkn 12.14). Es Ɛkn e lɛl na ɛm, sɛgŋ na eke wɛl bi lulm ɛy a, ow bi yɛgm ɛy sɛgŋ abi a eke low ŋuŋ bʼow akm low mamn es, gbuŋ ke wus e nuŋ ɛdŋ e lɛgŋ a ów a. Es Ɛkn 12.6; Daniɛl 7.25; 12.7.3Ɛtŋ mi bʼow mʼɛrm ɛm ecʼadaŋku yony a sus niŋn mob ow. -Li bʼow -lʼↄb Nyam ecʼamani a toŋ sɛgŋ fandi sɛgŋ ekŋ lɛw nyahan.»
4Adaŋku yony a el oliv ekŋ yony a lele mun al yony a ekʼanŋ wus ecʼEs Ɛw a ecʼany af a. 11.4 Ɛ̀kn Zakari 4.1-14.5Ekʼɛgŋ nyam am erur eke ki kok ɛl low ŋuŋ, al bʼanŋ ɛl e nɛnym a am ok ↄkm tɛtul ɛl ecʼefnu a trɛ trɛ trɛ. Ɛɛ, ɛbɛn ekʼɛgŋ fɛŋ eke bʼow ↄl ɛl e low ŋuŋ kok es a bʼow uw ana. 6Adaŋku amua ↄny abusu eke kʼɛdŋn nyam eke kʼan ↄpar wus es a, sɛgŋ a nimum eke -nʼam ↄb agŋ Nyam ecʼamani a. -Nʼↄny abusu eke -li kʼitŋn mij el mebl, ɛtŋ -nʼↄny abusu yɛjʼeke -li kʼↄŋ abu ɛyr ɛrŋ ɛrŋ fɛŋ ów wus af, sakp abi a eke -li bʼerur a. 11.6 Bɛ̀bmn 1 Ɛ́b Ebu 17.1; Ɔkm Ok 7.17-19; 1 Samiɛl 4.8.
7Gbɛkↄ ba -li bʼuwar ɛl ecʼamani ↄb a, ndey a eke bʼanŋ nↄmu croŋ gbɛl ab ɛm ɛy ↄkm a, bʼow ogŋ ɛl ar, akm ɛl es ke ibi ɛl. 8Ɛl e sos megl ugŋn a bʼow anŋ ɛb gbɛl a ecʼɛjɛm araŋn a, yogŋ a eke wɛl ɛw ɛl Ɛs Kↄtↄkↄ olikŋ af a. Nyandrɛ ɛm e nin eke wɛl bʼɛsŋ ɛb a el Sodↄm oglog Ejipt. 11.8 Sodↄm:ɛb eke wɛl uw any ɛsɛ nfaci ij ecʼɛb af (Nuŋ Ɔb 19.4-11). Ejipt wus af ecʼagŋ a, wɛl uw ɛl any ɛsɛ Israɛl eyŋ eci efnu af; yogŋ anake -nʼanŋn madu ↄkr ɛm a.9Agŋ agŋ a fɛŋ, eb eb a fɛŋ, ɛbr ɛbr a fɛŋ lele ɛb ɛb a fɛŋ ab ecʼagŋ a bʼow lɛr ɛl e sos megl ugŋn a toŋ sɛgŋ nyahan lele likpr ab, ɛtŋ kʼow erurm eke wɛl kʼim ot ɛl es. 10Wus ecʼagŋ a sos ɛm bʼow iŋn, ɛl e luw a eci; -li bʼow -li kok sos ɛm iŋn ɛtŋ -li bʼow -lʼaparir ob, aŋke Nyam e kokoba ↄb ɛsɛl yony na ↄŋ ɛl -lʼɛkn gbre nↄnↄ.
11Gbɛkↄ eke sɛgŋ nyahan lele likpr ab ab ɛc a, Nyam fuf kokoba ↄb ɛsɛl yony a in ecʼowr anŋ e sel a, ɛtŋ ow igbm ɛl. Ow ↄŋ agŋ a fɛŋ eke am lɛr ɛl a erŋn ligbɛl ↄny. 12Kokoba ↄb ɛsɛl yony a iri lebl tuↄtuↄ nyam ekʼanŋ afr am ikŋ dad ɛl ɛsɛ: «Ùyur owr aŋa!» Ɛtŋ ɛl ecʼefnu a fɛŋ ekʼam lɛr ɛl a ecʼany af, -lʼuyu afr e jru ɛm. 13Wanci ab af cɛ, wus umu lɛc ɛm. Ɛb a ecʼogog lɛw ɛm e nyam bubm ok ɛtŋ agŋ fandi lↄbŋ ɛŋn luw wus a ekʼumu ab ɛm. Agŋ bɛb a ekʼanŋ owr a erŋn afŋn es toŋ ɛtŋ -nʼam ↄŋ Nyam ekʼanŋ afr a anygbɛl.
14Sica yony ɛm ecʼabu ɛyr a ɛc ŋ̂. Gbɛkↄ, ɛ̀wr ɛrm! Ow kʼow ibnm ɛtŋ nyahan ɛm ecʼa yɛji bʼow ow.
Lↄbŋ ɛm e krↄkr a
15Lↄbŋ ɛm ecʼafr ɛrm ɛs a afl in e krↄkr a. Ebl nↄnↄ anŋ afr am ikŋ lɛc ɛm dad ɛsɛ: «Sica wus eci es ɛw a e low anŋ ɛy Ɛs Kↄtↄkↄ lel in e Mesi ab ab ecʼabu ɛm, ɛtŋ es ɛw na bʼow anŋ sɛgŋ fɛŋ!» 16Agŋ ekpekp likŋ lele yar ab a ekʼɛgŋ ɛgŋ anŋ in e lɛkpn af Nyam ecʼany af a, ok ↄwrↄkp wus ɛtŋ am igŋʼn nuŋ dad ɛsɛ:
17«Ɛs Kↄtↄkↄ Nyam Abusu Ɛs,
ŋ eke anŋ yɛfɛnyna ke anŋ godʼɛtŋ a,
sʼam ɛluʼŋ bia eke oc ŋ ecʼabusu ligbɛl ab ɛm sigm ŋ ecʼes ɛw ab es a.
18Ɛb ɛb ecʼagŋ a fɛŋ ebl ɛrm,
kↄ sica ŋ ecʼɛrm bebl a anake am ɛy ↄkm a.
Wanci a eke ki jɛj agŋ ekʼuw a e low ok ab ana.
Ŋ eci juma kok ɛsɛl ekʼel kokoba ↄb ɛsɛl eci wanci a eke kʼɛŋn ɛl ecʼob ap a anake ow a.
Agŋ a fɛŋ, ey lele ɛgbɛl ab ekʼel ŋ eci ke bʼɛlumʼŋ ↄmn ɛm a, yɛji bʼow ɛŋn ɛl eci.
Wanci a eke bʼow ŋuŋn agŋ a eke bi ŋuŋn wus ab ana.»
19Sica Nyamel gbɛl a ekʼanŋ afr a fig, ɛtŋ sinm araka a ɛy ↄkm. Afr am ŋɛŋn, nyamgbrany am babarm, wus am umu ɛtŋ nyamok am an ok wus.
12Yↄw a lele tamranji ab ab
1Ca ɛmɛny mɛny ɛwr ligbɛl nyam ɛy ↄkm afr: ow el yↄw nyam eke ligbn iwr ɛlul ɛm ɛsɛ mob sus ɛm af, ke awl anŋ in ecʼakr ew a. Lʼus es ɛw e tufɛ eke mílɛ́l lɛw yony anŋ af. 2Lok usuʼr bɛbmn iy ew ab, ɛtŋ iy a eke am ↄnynʼn a am ↄŋʼn li babarm.
3Ɛmɛny mɛny ɛwr ɛjeci nyam ɛy ↄkm afr: ow el tamranji nyam eke ebl es kondoŋ ke ɛli eŋ lↄbŋ lele ↄcↄwr lɛw ab. Nuŋ nyam nyam fɛŋ af a, es ɛw e tufɛ anŋ. 4In e luwl ab ɛm, li papl afr e mílɛ́l sakp nyahan eci akp nyam ɛm a es lʼok wus. Ɛtŋ lʼigb lʼow nʼinym es lʼↄbr yↄw a ekʼiy am ↄnyn ab any, ba ow bʼew iy a ke kpɛkŋ nʼↄ́ny nʼɛmn. 5Yↄw a ew iy igŋ nyam eke bʼow ɛw ɛbr ɛbr fɛŋ es abusu ligbɛl ɛm. 12.5 Ɛ̀kn Selu 2.8-9. Ɛtŋ kpɛkŋ wɛl oc iy a im ɛw es Nyam lele in ecʼatufu lɛkpn ab ab e saw. 6Kↄ yↄw a gbɛ, lʼuru es nʼim loj, yogŋ a eke Nyam kok usu nyam ɛwʼr es, eke wɛl kʼↄŋʼn ob lʼij toŋ sɛgŋ fandi sɛgŋ ekŋ lɛw nyahan a. 12.6 Ɛ̀kn Es Ɛkn 11.2 ecʼakr otar a.
7Ɛtŋ mum ɛy afr yogŋ; Mikaɛl lele in ecʼafr ɛrm ɛsɛl ab ab ogŋ mum tamranji a lele in ecʼafr ɛrm ɛsɛl ab ab. 8Kↄ tamranji a eb ɛ́s; ow ↄŋ in lel in ecʼɛrm ɛsɛl ab ab -nʼↄnym abusu eke -li kʼanŋ afr yogŋ ij. 9Wɛl ↄny tamranji a ↄwl gbeŋ. In anake lɛgŋ sig ab ɛm lʼel lorŋn a 12.9 Ɛ̀kn Nuŋ Ɔb 3.1; Luk 10.18. eke wɛl bʼɛsŋ agn oglog Satan, ke bʼɛju wus nimum ecʼagŋ a. Wɛl ↄny ↄwlʼl wus in lel in ecʼɛrm ɛsɛl ab ab.
10Ɛtŋ afr mʼiri lebl nyam barm tuↄtuↄ ɛtŋ am dad ɛsɛ: «Sica es eb ɛlu eci lɛgŋ a ow ŋ̂! Ɛy e Nyam a ɛlu in ecʼabusu a lele es ɛw ab ab ↄkm! Sica es ɛw a anŋ in e Mesi a abu ɛm, aŋke wɛl ↄny ɛy lisijimɛl a ecʼɛgŋ a eke bʼok ɛl ów af a ↄwl gbeŋ. Ncok lele lɛgŋ owr ab li bʼok wɛl ów af ɛy e Nyam a ecʼany af. 11Gbɛkↄ ɛy lisijimɛl a akmʼn es licɛbli a e mebl ab ɛm lel ow e daŋku a eke -lʼijr ab ɛm, aŋke -lʼerurm ɛl ecʼowr anŋ a toŋ -lʼurum luw bↄbↄ yɛji. 12Ow sosiɛm a, afr lele ↄny eke iir ɛm ab ab, kòkr sos ɛm iŋn! Gbɛkↄ wus lel okij ab, gbre él ↄny eci! Agn us es ow ɛŋn ↄny, ɛrm bebl iyʼr ɛm gbↄŋ, aŋke lʼuw any eke sɛgŋ tɛl cɛ anŋʼn.»
13Eke tamranji a bʼɛkn eke wɛl ↄny ↄwlʼl wus a, lʼigb nʼam ogŋ yↄw a eke ew iy igŋ ab es. 14Gbɛkↄ yↄw a ɛŋn káká ligbɛl nyam ecʼↄw yony eke li kʼoc ke lʼígb toŋ lʼók usu a eke wɛl kok ɛwʼr es loj a, yecʼɛtŋ ke li kpáb es lorŋn a e lís, ke yogŋ wɛl ↄ́ŋʼn ob lʼij toŋ akpo nyahan lele likpr ab. 12.14 Ɛ̀kn Ɔkm Ok 19.4; Ol Ɔkn 32.11.15Ɛtŋ lorŋn a am ɛgbl mij ok es ɛsɛ mij ewl mij gbɛl af, yecʼɛtŋ ke ow éb yↄw a. 16Gbɛkↄ wus ow ɛlum yↄw a abu: lʼↄdu mij bubutɛ a eke tamranji a ɛgbl ok es a fɛŋ lʼeb. 17Sica tamranji a ɛrm am ebl nↄnↄ yↄw a e lís, ɛtŋ nʼim nʼam ogŋ mum yↄw a ecʼey likpr ab ab, ɛl a eke bʼɛlum Nyam e sol a ke bʼucu low nɛnyɛmbri nyam eke Jesu ɛlu ↄkm a ↄny es a.
18Ɛtŋ tamranji a ɛc inym es okij nɛny e sɛc ab af.
13Ndey a ekʼanŋ okij ɛm ɛy ↄkm a
1Ow e jam a, mʼɛkn ndey nyam anŋ okij ɛm ɛy ↄkm. Lʼɛli ↄcↄwr lɛw lele eŋ lↄbŋ ab; in e licↄwr fɛŋ af a, es ɛw e tufɛ anŋ; ɛtŋ in e nuŋ fɛŋ af a, nin eke bi wɛwr Nyam anŋ. 2Ndey a eke mʼɛkn a ot fabn es, in ecʼakr a ɛw ɛgbɛl ɛsɛ urs 13.2 urs:ndey ligbɛl eke anm ɛy eci agŋ ebr wus af aŋa. ecʼab af, ɛtŋ in e nɛny a anŋ ɛsɛ kukuma ecʼab af. Tamranji a afl in e lɛc a, in ecʼes ɛw a lele in ecʼabusu ↄny ab ab es ↄŋʼn. 3Ndey a ecʼeŋ a e nyam ob kok ɛsɛ ekʼowʼn kʼuw af, gbɛkↄ ob a eke kokʼr luw ecʼa as. Ow ↄŋ wus nimum erur ow e low ɛtŋ am us ndey a jam. 4Ɛtŋ agŋ a fɛŋ am igŋ tamranji a nuŋ, aŋke ow afl abusu es ↄŋ ndey a. Ɛtŋ ɛmɛny ɛl a cɛ, -nʼam igŋ ndey a yɛji nuŋ -li dad -lʼɛsɛ: «Bwo ecʼɛgŋ ot ndey ab es ɛtŋ bwo ↄtu eke kʼakmʼn es ee?»
5Ɛtŋ ndey a ɛŋn abusu eke ki dad es ɛfu lele ɛgŋ wɛwr e sodad ab ok Nyam af; nʼɛŋn abusu eke li ki kok low toŋ awl ekŋ yony miy yony. 13.5 Ɛ̀kn Es Ɛkn 11.2 ecʼakr otar a.6Ɛtŋ ndey a am wɛwr Nyam; nʼam dad ow e nin, ow ecʼɛb ir usu a lele agŋ a ekʼir afr ab ab ecʼodad ŋuŋ. 7Abusu ɛruʼr es eke li kʼogŋ Nyam ecʼagŋ a ar ke lʼákm wɛl es; nʼɛŋn abusu a eb eb fɛŋ af, agŋ agŋ fɛŋ af, ɛbr ɛbr fɛŋ af lele ɛb ɛb fɛŋ af ab. 8Wus nimum ecʼagŋ a bʼow igŋʼn nuŋ, agŋ a eke wus e kok ɛm ɛtŋ ɛl ecʼen a anm sel ɛŋn e lɛl ab ɛm a. 13.8 sel ɛŋn e lɛl a:ɛ̀kn Es Ɛkn 3.5 lele ow ecʼakr otar ab ab. Sel ɛŋn e lɛl na, licɛbli a eke wɛl wawr egb a eci.
9Ke ɛgŋ ekʼɛli ↄru a íri sɛnyn sɛnyn! 10Ɛgŋ eke in ecʼa ow el eke wɛl kʼↄny ɛluʼl sobel ɛm a, wɛl bʼow ↄny ɛluʼl sobel ɛm; ɛgŋ eke in ecʼa ow el lab ler ɛm ɛm, li kʼuw a, lab ler ɛm ɛm li bʼow luw. Na sosiɛm anake agŋ a ekʼel Nyam ecʼa it eke kʼↄny ɛrm susu lele ↄmn ab a.
Ndey ekʼanŋ wus ɛm ɛy ↄkm
11Ɛtŋ mʼɛkn ndey ɛjeci nyam ekʼanŋ wus ɛm ɛy ↄkm. Lʼɛli ↄcↄwr yony ɛsɛ licɛb ecʼab af ɛtŋ nʼam dad odad ɛsɛ tamranji af. 12Ndey na ↄny abusu ɛsɛ krɛkrɛ ecʼa ekʼanŋ okij ɛm ɛy ↄkm ab af, ɛtŋ nʼam kok juma ow e nin ɛm. Nʼam ↄny wus nimum lel in ecʼagŋ a fɛŋ ab lɛc ɛm igŋ krɛkrɛ eci ndey a nuŋ, ndey a eke ob kok nuŋ ɛsɛ ekʼowʼn kʼuw af ke ow as a. 13Ndey na ekʼanŋ wus ɛm ɛy ↄkm a, am kok mɛny ɛwr ɛgbɛl; nʼam ↄŋ al bↄbↄ yɛji anŋ afr ok wus agŋ a pupukpaŋ ecʼany af. 14Ɛtŋ nʼam irmn wus ecʼagŋ a, mɛny ɛwr a eke nʼam ↄtu li kok krɛkrɛ eci ndey a eci nin ɛm a. Nʼam ɛju agŋ eke kʼaku likŋ ɛgŋ nyam, krɛkrɛ eci ndey a e sos usr eci, ndey a eke lab kok ob nuŋ ɛsɛ ekʼowʼn kʼuw af, ke ɛwl mɛny anŋ owr a. 15Ɛtŋ yony ɛm eci ndey a ɛŋn abusu eke kʼↄŋ ndey krɛkrɛ a eci likŋ ɛgŋ a sel, yecʼɛtŋ ke likŋ ɛgŋ a ↄ́tu dad odad ke ↄ́ŋ wɛl ibi agŋ a fɛŋ eke ɛ́gŋm igŋmʼn nuŋ a. 16Nʼↄny agŋ a fɛŋ, ey lele ɛgbɛl ab, egbreŋgbi lele ↄgbↄru ab, ewi lele madu ab lɛc ɛm eke kʼɛw mɛny ɛwr nyam lidr abu af oglog anyafr. 17Ow ↄŋ ɛtŋ ɛgŋ fɛŋ eke mɛny ɛwr anm af a ↄtum eke kʼↄl ob oglog ɛw ob an; mɛny ɛwr a el ndey a e nin oglog ob awl e mↄni ekʼel nin a ecʼa. 13.17 Sɛbr bɛb ɛm ɛsɛ Ebre ɛm af, ɛsɛ Grɛk ɛm af, ob awl owi ɛm a, nin fɛŋ eci mↄni a ↄny in ecʼabi eke ij.
18Aŋa anake ow am ibrm eke ɛgŋ kʼↄny sɛwr a. Ɛtŋ ɛgŋ yecʼeke ↄny nuŋ ɛm ↄny a ↄtu eke kʼuw ndey a e mↄni a ecʼabi a eke kʼij a e nyandrɛ ab any, aŋke ow el ɛgŋ e nin. Ob awl e mↄni a el ekŋ yen yen sakp nↄhↄn ekŋ nyahan miy nↄhↄn.
14Licɛbli a lele agŋ fandi ekŋ lↄbŋ miy yar a eke wɛl ↄl a
1Mi bi lɛr ɛtŋ mʼɛkn licɛbli a eke inym es Siↄn e lafɛny 14.1 Siↄn e lafɛny a el Jerusalɛm eci nin ɛjeci. ab af, in lele agŋ fandi ekŋ lↄbŋ miy yar eke wɛl nↄn in e nin a lele Ɛs ecʼab ab ɛw anyafr a. 2Mʼiri lebl nyam ekʼanŋ afr am ow, ke am ikŋ ɛsɛ okij e mra af, oglog ɛsɛ nyamgbrany ligbɛl ecʼikŋ ab af. Lebl a eke mʼiri a anŋ ɛsɛ saŋgo ↄny ɛsɛl e mob a eke bʼↄny ab af. 3Agŋ amua fɛŋ am ɛgŋ ɛj owr nyam atufu lɛkpn a, mindey yar a lele agŋ ekpekp ab ab ecʼany af. Ɛgŋ kaka ↄtum eke ki wewr ɛj a, eke ow elm agŋ fandi ekŋ lↄbŋ miy yar a eke el wus aŋa ecʼagŋ a eke wɛl ↄl a cɛ.
4Agŋ amua kokm sikpl owi ↄyↄw ab, -lʼayl. 14.4 Agŋ amua kokm sikpl owi ↄyↄw ab:ow el odad nyandrɛ ɛm eke am dad kretiɛnɛl eci nɛny nyam ij ekʼↄny Nyam eci, ke ánm sinyam yadŋ e nuŋ igŋ owi ɛm. Ɛ̀kn Ose 1.2; 2.16-25. Sɛgŋ ab ɛm a, sinyam yadŋ a e nuŋ igŋ owi ɛm a, afacyↄw bʼanŋ sinyam nuŋ igŋ susu a, ɛtŋ ow ibrm eke wɛl kʼɛrum ɛl ab. -Li bʼus licɛbli a jam usu fɛŋ eke ow bʼim a. Wɛl ↄl ɛl agŋ ecʼaraŋn eke -li kʼel agŋ krɛkrɛ eke wɛl kʼoc ap Nyam lele licɛbli ab ab.14.4 agŋ krɛkrɛ eke wɛl kʼoc ap Nyam lele licɛbli ab ab:Mois ecʼol ɛm a, ɛbob fɛŋ eci liy krɛkrɛ a lele egb owr fɛŋ eke wɛl am ub a eci krɛkrɛ a, wɛl bʼoc is Nyam. Ow bʼilʼl an nↄnↄ.5Lɛgŋ kaka -nʼↄnym yadŋ; -li kokm sikpl kaka.
Afr ɛrm ɛsɛl nyahan a ecʼamani a
6Ɛtŋ mʼɛkn afr ɛrm ɛs ɛjeci nyam ekʼam igb afr kpoŋ ɛm a ɛc. Nʼↄnym Amani Mamn a ekʼↄnym uwr ab ab eke li kʼↄb lʼok wus nimum, ɛb ɛb fɛŋ ecʼagŋ, eb eb fɛŋ, ɛbr ɛbr fɛŋ lele agŋ agŋ fɛŋ ab. 7Nʼam dad lebl gege lʼɛsɛ: «Ɛ̀lumn Nyam ke ↄ́ŋn in anygbɛl! Aŋke wanci ow eke li bʼow li jɛj wus nimum e low lʼok. Ìgŋn ɛgŋ a eke kok afr, wus, okij lele mij ewl mij fɛŋ ab a nuŋ!»
8Yony ɛm ecʼafr ɛrm ɛs a anŋ krɛkrɛ ecʼa e jam ow, ɛtŋ am dad ɛsɛ: «Babilↄn ɛb gbɛl a ɛy wus! 14.8 Aŋa ow elm Babilↄn ecʼodad tasi wɛl dadm, kↄ ow el nyandrɛ odad mum eke wɛl am dad ok ɛb ɛb a fɛŋ eke bʼim Nyam ar a. Lʼel ɛb a eke ɛju ɛb ɛb a fɛŋ ɛgŋ in e mar a eke bʼↄŋ ɛgŋ ij nfaci, ke bʼↄŋ ɛgŋ im ɛy Nyam ecʼɛrm bebl ab ɛm a.»
9Nyahan ɛm ecʼafr ɛrm ɛs a anŋ yony a e jam ow, ɛtŋ am dad lebl gege ɛsɛ: «Eke ɛgŋ nyam am igŋ ndey a lele in e likŋ ɛgŋ ab ab nuŋ, ɛtŋ nʼɛŋn ow eci mɛny ɛwr a anyafr lele abu af ab, 10in yɛji, li bʼow lʼɛgŋ mar a eke bʼↄŋ ɛgŋ im ɛy Nyam ecʼɛrm bebl ab ɛm a. Mar na bʼow ɛw tuↄtuↄ ɛtŋ Nyam bʼow ɛtm ok in ecʼɛrm bebl a e kpↄk ab ɛm. Agŋ amua bʼow ij gbre nↄnↄ al ɛm lele mebn eke ler ecʼal ab ɛm, afr ɛrm ɛsɛl lala lele licɛbli ab ab ecʼany af. 11Al a eci mregbn a eke am ↄŋ ɛl -lʼij gbre nↄnↄ a, am uyu afr akpo akpo fɛŋ eci. Agŋ amua eke am igŋ ndey a lele in e likŋ ɛgŋ ab ab nuŋ, ke ɛŋn in e nin a e mɛny ɛwr a ↄnym sel eb ncok lele lɛgŋ owr ab.»
12Na sosiɛm anake agŋ a ekʼel Nyam eci, bʼɛlum in e sol a, ke ↄny ↄmn Jesu ɛm a kʼↄny ɛrm susu a.
13Ɛtŋ mʼiri lebl nyam ekʼanŋ afr am dadʼm ɛsɛ: «Nↄn odad na: ehe él agŋ a eke caca ɛm am uw Ɛs Kↄtↄkↄ e juma kok ɛm a eci! Ɛɛ, Abŋ am dad eke agŋ amua in anŋ ehe ɛm. Sica wɛʼn ↄtu eke wɛʼn kʼeb sel juma a fɛŋ eke wɛʼn kok a eci, aŋke wɛl eci juma a e liy a in am us wɛl jam.»
Wus aŋa ecʼegb ub owi
14Ow e jam a, mi bi lɛr ɛtŋ mʼɛkn jru ufu nyam. Jru ab af, ob nyam ekʼanŋ ɛsɛ ɛgŋ af sig es. In e nuŋ af a sika tufɛ anŋ ɛtŋ egb ubr lab fufu kↄnↄ nyam anŋʼn abu ɛm. 15Ɛmɛny mʼɛkn afr ɛrm ɛs ɛjeci nyam ekʼanŋ Nyamel ab ɛm ɛy ↄkm ke barm lebl tuↄtuↄ ɛm am dad in a eke sig es jru ab af a ɛsɛ: «Òc ŋ ecʼegb ubr lab a ke úb gↄŋ, aŋke wus eci egb a ekʼebl ub ecʼa e wanci ow.» 16Ɛtŋ ɛgŋ a eke sig es jru ab af a oc in ecʼegb ubr lab a ɛtŋ lʼɛw abu lʼub wus nimum ecʼegb a.
17Ɛmɛny afr ɛrm ɛs ɛjeci nyam anŋ afr e Nyamel gbɛl ab ɛm ɛy ↄkm; in yɛji, nʼↄnym egb ubr lab fufu kↄnↄ nyam ab.
18Ɛtŋ ɛmɛny afr ɛrm ɛs ɛjeci nyam eke ɛw al es a anŋ egb waw usu a ɛy ↄkm. Li barm lɛc ɛm nʼam dad yecʼa ekʼↄnym egb ubr lab fufu ab ab a lʼɛsɛ: «Òc ŋ e lab fufu a ke úb wus e viny egbekl a, aŋke in ecʼey a ebl.» 19Afr ɛrm ɛs a oc in ecʼegb ubr lab a ɛtŋ ɛw abu ub wus e viny egbekl a ɛtŋ ot ok ɛl es ifir ob gbɛl ab ɛm eke -li kʼɛkn Nyam ecʼɛrm bebl a. 20Wɛl ifi viny ey ab es es ifir ob ab ɛm baŋn a e jam a; ɛtŋ es ifir ob ab ɛm mebl nↄnↄ ewl ok ↄkm. Mebl a ewl toŋ im igŋ kilo ekŋ yen yen sakp nyahan, ɛtŋ uyu toŋ ok sigbaŋkↄ a e nɛnɛkp a e nɛny nɛny.
15Es abal el ɛm ecʼabu ɛyr lↄbŋ a e mɛny ɛwr
1Ɛtŋ afr mʼɛkn mɛny ɛwr ligbɛl ɛjeci nyam eke in e low am itiʼm any: afr ɛrm ɛsɛl lↄbŋ eke ↄnym es abal el ɛm ecʼabu ɛyr lↄbŋ ab, eke ɛl ɛm Nyam ecʼɛrm bebl a bʼow ɛdŋ nuŋ a.
2Ɛtŋ mʼɛkn okij eke ayl toŋ am ɛkan es, ke al wuwlm ab. Agŋ a fɛŋ eke eb any ndey a, in e likŋ ɛgŋ a lele in e nin a e mↄni a ecʼabi a eke kʼij ab af a, inym es afr okij na eke ayl toŋ am ɛkan es ab af. Ɛtŋ -nʼↄnym sisaŋgo a eke Nyam ↄŋ ɛl ab ab. 3-Nʼam ɛgŋ Nyam e juma kok ɛs Mois 15.3 Mois ecʼɛj a (Ɔkm Ok 15.1-18), wɛl bʼɛgŋ nɛnɛgŋ e lɛgŋ ók Nyam en es, in eke li sↄg Israɛl Ejipt ecʼabu ɛm a. Ɛ̀kn Ɔkm Ok 15 lele Ol Ɔkn 32 ab. lele licɛbli ab ab ecʼɛj a:
«Ɛs Kↄtↄkↄ Nyam Abusu Ɛs, ɛbɛn eke ŋ e sijuma a agb ke akpl ana!
Ɛb ɛb ecʼƐb Ebu, ɛbɛn eke ŋ ecʼów a eke bɛbm ok es a el nyim nyim
ke el nawrɛ ana!
4Ɛs Kↄtↄkↄ, bwo ecʼɛgŋ tasi ↄtu eke kʼɛluamʼŋ ee?
Bwo ecʼɛgŋ ↄtu eke ki kↄklamʼŋ ee?
Ŋ sↄny coco el lala.
Ɛb ɛb a fɛŋ bʼow igŋʼŋ nuŋ,
aŋke ŋ ecʼów nyim nyim a ok ↄkm kpata -lʼɛkn.»
5Ow e jam a, afr, mʼɛkn Nyamel gbɛl a fig. Ɛm yogŋ Nyam eci sinm a eci gbad ɛm êl a anŋ. 6Afr ɛrm ɛsɛl lↄbŋ a ekʼↄnym abu ɛyr lↄbŋ ab ab a anŋ Nyamel ab ɛm ok ↄkm. -Li sus mob eke ufu pum pum pum ke am jɛjn, ɛtŋ -lʼucu ↄhↄny eke wɛl kok sika mij ɛm ɛr ɛm. 15.6 Ow el egb waw ɛs ligbɛl a ecʼob sos ɛw (Ɔkm Ok 28.4; 29.5).7Mindey yar ab ɛm eci nyam ↄŋ afr ɛrm ɛsɛl lↄbŋ a sika ɛm kpↄk lↄbŋ. Ɛm yogŋ, Nyam ekʼanŋ godʼɛtŋ a ecʼɛrm bebl a iy ɛm gbↄŋ. 8Mregbn iy Nyamel ab ɛm gbↄŋ; ow el Nyam ecʼanygbɛl a lele in ecʼabusu ab ab. Ow ↄŋ ɛgŋ kaka kʼↄtum ɛym Nyamel ab ɛm, eke afr ɛrm ɛsɛl lↄbŋ a eci abu ɛyr owi a eke ot ow a e low kʼiym nɛny.
16Nyam ecʼɛrm bebl e kpↄk lↄbŋ a
1Ow e jam a, mʼiri lebl ligbɛl nyam anŋ Nyamel gbɛl ab ɛm am ikŋ dad afr ɛrm ɛsɛl lↄbŋ a ɛsɛ: «Ìmn wus ke ɛ́wal Nyam ecʼɛrm bebl a ekʼanŋ kpↄk lↄbŋ ab ɛm a es!»
2Krɛkrɛ ecʼafr ɛrm ɛs a im ɛtŋ ɛwl in e kpↄk ab ɛm ecʼa es ok wus af, ɛtŋ abi ɛgbɛl eke bi dudu a ok agŋ a eke ndey a e mɛny ɛwr anŋ af, ke bʼigŋ in e likŋ ɛgŋ a nuŋ a.
3Yony ɛm ecʼafr ɛrm ɛs a im ɛtŋ ɛwl in e kpↄk ab ɛm ecʼa es ok okij ɛm. Mij a itŋn anŋ ɛsɛ lɛgŋuw e mebl ab af, ɛtŋ ob fɛŋ ekʼanŋ owr okij ɛm a uw.
4Nyahan ɛm ecʼafr ɛrm ɛs a im ɛtŋ ɛwl in e kpↄk ab ɛm ecʼa es ok simij ewl mij lele mij eŋ ɛm ab, ɛtŋ simij a titŋn el mebl. 5Ɛtŋ mʼiri afr ɛrm ɛs a ekʼɛw mij es a am dad ɛsɛ: «Ŋ ekʼanŋ yɛfɛnyna ke anŋ godʼɛtŋ, ŋ ekʼel lala a, eke ow el nɛnɛ anake jɛj ok a, ke el jɛj ok ɛs nyim nyim. 6Tasi ɛm a, agŋ amua ibi agŋ lala a ekʼel ŋ ecʼa lele kokoba ↄb ɛsɛl ab ab ok mebl es, ɛtŋ sica ɛl yɛji ↄŋ ɛl mebl -lʼɛgŋ. Ow ekʼit ɛl ecʼab ana!» 7Ɛtŋ mʼiri lebl nyam anŋ egb waw usu a am ikŋ dad ɛsɛ: «Ɛɛ, Ɛs Kↄtↄkↄ Nyam Abusu Ɛs, ŋ e jɛj ok fɛŋ el nawrɛ lele nyim nyim ab!»
8Yar ɛm ecʼafr ɛrm ɛs a ɛwl in e kpↄk ab ɛm ecʼa es ok ligbn af, ɛtŋ ligbn ɛŋn abusu eke ki kakŋ wus ecʼagŋ a in ecʼal ab ɛm. 9Agŋ al am kakŋ sos, ɛtŋ -nʼam wɛwr Nyam a ekʼↄny abusu abu ɛyr amua af a e nin a. Gbɛkↄ -lʼɛgŋm eke -li kʼitŋn ɛrm ɛm bake -nʼↄŋ ow any.
10Yen ɛm ecʼafr ɛrm ɛs a ɛwl in e kpↄk ab ɛm ecʼa es ok ndey a ecʼatufu lɛkpn ab af, ɛtŋ in ecʼes ɛw a ɛy ncebn ɛm. Agŋ a fɛŋ am akŋn anm gbre eke -nʼam ij a eci. 11-Nʼam wɛwr afr e Nyam a ɛl e gbre e -nʼam ij lele abi ab ab sosiɛm. Gbɛkↄ -lʼigŋm ɛl ecʼów eŋuŋ a -lʼokm es.
12Nↄhↄn ɛm ecʼafr ɛrm ɛs a ɛwl in e kpↄk ab ɛm ecʼa es ok mij ligbɛl a eke wɛl bʼɛsŋ Efrat ab ɛm. Mij a mam es ɛtŋ ɛw ɛ́b ebu a eke bʼanŋ yogŋ a eke ligbn bʼigb a ejagb es ow. 13Tamranji a, ndey a lele kokoba ↄb ɛs yadŋu ab ab e nɛnym a, mʼɛkn abŋ eŋuŋ nyahan ekʼanŋ ɛsɛ betibↄm af am ok ↄkm. 14-Lʼel abŋ eŋuŋ eke bi kok simɛny ɛwr. -Nʼaam -nʼɛŋn wus ecʼɛ́b ebu a fɛŋ, yecʼɛtŋ ke -lʼas wɛl luku Nyam Abusu Ɛs e lɛgŋ ligbɛl a e mum ogŋ a eci.
15Ɛs Kↄtↄkↄ dad ninɛ: «Kin, mʼam ow ɛsɛ ulu af. Ehe él ɛgŋ yecʼa eke anŋ any owr ke sus mob am eku, yecʼɛtŋ ke li kʼíim sos ↄfr agŋ ɛknm in ecʼɛ́s a eci!»
16Abŋ eŋuŋ a as ɛ́b ebu a luku usu nyam eke Ebre ɛm a wɛl bʼɛsŋ Armagedↄn. 16.16 Armagedↄn:usu eke lɛgŋ sig ɛm a, wɛl ogŋ ar ɛgbɛl ɛgbɛl af (Jɛj Ok 5.19; 2 Ɛ́b Ebu 23.39).
17Lↄbŋ ɛm ecʼafr ɛrm ɛs a ɛwl in e kpↄk ab ɛm ecʼa es ok lɛf ɛm. Lebl nyam anŋ Nyamel ab ɛm barm tuↄtuↄ; ow el lebl ekʼanŋ atufu lɛkpn a ogŋ am ow. Ɛtŋ lebl a dad ninɛ: «Sica ow uwr ŋ̂!» 18Ɛtŋ ɛbɛn a, afr am ŋɛŋn, nyamgbrany am babarm ɛtŋ wus am umu. Wus ecʼumu ikŋ a, lɛgŋ a ɛtŋ eke agŋ anŋ wus a, -lʼɛknm ɛbɛn. 19Baŋn gbɛl a ufŋ es ok sakp nyahan ɛtŋ ɛb ɛb a e baŋn baŋn a fɛŋ bubm ok. Nyam ijlm Babilↄn gbɛl ab es; nʼↄŋ eke ow kʼɛgŋ mar kpↄk gbↄŋ a ekʼel in ecʼɛrm bebl ligbɛl a. 20Lekr a fɛŋ irm ɛtŋ wɛl ɛ́knm mafɛny ij. 21Ɛtŋ nyamok eku eku anŋ afr am an ok agŋ af; ɛtŋ agŋ am wɛwr Nyam, nyamok na sosiɛm, aŋke ow el ob eke ↄny lɛc nↄnↄ.
17Facyↄw gbɛl
1Ɛtŋ afr ɛrm ɛsɛl lↄbŋ a ekʼↄnym kpↄk lↄbŋ ab a eci nyam ow dadʼm ninɛ: «Òw, mi bʼow mi yɛgmʼŋ abu ɛyr a eke Nyam bʼow ↄŋ facyↄw gbɛl a eke inym es simij ewl mij nↄnↄ e nɛny a. 2Wus na eci ɛ́b ebu a ij nfaci in ab, ɛtŋ agŋ a eke ir wus na af a ɛgŋ in eci nfaci owi a e mar am ↄny.»
3Abŋ ɛm a, afr ɛrm ɛs a ocʼm im loj. Yogŋ, mʼɛkn yↄw nyam eke sig es ndey ebl kondoŋ af. Nyam eci wɛwr ecʼen eb ndey a e sos a fɛŋ; ɛtŋ lʼɛli eŋ lↄbŋ lele ↄcↄwr lɛw ab. 4Yↄw a ok gbad ebl mamn, lʼok sika ɛm miyob nↄnↄ, mebn amamn ɛm e miyob lele ayrɛ ɛm e miyob ab. Nʼↄnym sika ɛm kpↄk ab. Ɛm yogŋ, in eci nfaci ij a eci kpↄtↄm owi a fɛŋ iy ɛm gbↄŋ. 5In ecʼanyafr a, wɛl nↄn nin eke ow eci nyandrɛ a lↄl es: “Babilↄn gbɛl, afacyↄw lele wus na nimum ab eci musue owi fɛŋ ecʼɛl lis.” 6Mʼɛkn yↄw a eke Nyam ecʼagŋ a lele agŋ a ekʼij Jesu eci daŋku ke wɛl ibi a eci mebl am ɛc any.
Mi bʼɛknʼn a, low ebʼm sos. 7Ɛtŋ afr ɛrm ɛs a dadʼm ninɛ: «Kↄ bla sosiɛm ɛtŋ ow am itiʼŋ any ee? Mi bʼow mʼɛlu yↄw a eke sig es ndey ab af a lele ndey na eke ɛli eŋ lↄbŋ lele ↄcↄwr lɛw ab a e low eke lↄl es ɛm a ↄkm mi yɛgmʼŋ. 8Ndey a eke ɛkn a, lɛgŋ ekʼɛc ab ɛm a, wɛl ɛknʼn nʼanŋ owr, ɛtŋ yɛfɛnyna nʼanm owr ij. Gbɛkↄ li bʼow nʼanŋ nↄmu croŋ gbɛl ab ɛm lʼɛy ↄkm nʼim in eci ŋuŋn eci. Ɛtŋ wus na ecʼagŋ a eke wus eci nuŋ ↄb ɛm ɛtŋ wɛl nↄnm ɛl ecʼen sel ɛŋn e lɛl ab ɛm a, low bʼow iti any ndey a ecʼɛkn ɛm, aŋke lɛgŋ ekʼɛc a, nʼanŋ owr, ɛtŋ yɛfɛnyna nʼanm owr ij, kↄ li bʼow lʼɛwl lʼow.
9Sica wɛl ↄ́ny nuŋ ɛm ↄny lele sɛwr ab gↄŋ! Eŋ lↄbŋ a el egigl lↄbŋ eke yↄw a sig es af a; ow el ɛ́b ebu lↄbŋ yɛji: 10ɛl ɛm eci yen ok wus, nyam ɛw usu es, lↄbŋ ɛm ecʼa kʼowm. Lɛgŋ eke li bʼow lʼow a, ow bʼow el lɛgŋ tɛl cɛ eci. 11Ndey ebl kondoŋ a eke lɛgŋ ekʼɛc ab ɛm anŋ owr, ke yɛfɛnyna anm owr ij a, in obi ɛm a, lʼel niwn ɛm ecʼɛb ebu; ɛtŋ ɛsɛ lↄbŋ ab af, in yɛji nʼaam in ecʼibi eci.
12Ɔcↄwr lɛw a eke ɛkn a el ɛ́b ebu lɛw eke kʼↄbm nuŋ kʼɛwm usu es; gbɛkↄ ndey ab ab -li bʼow -nʼɛŋn abusu -lʼɛw usu es wanci nyam eci. 13Ɛ́b ebu lɛw amua eci tutr a okr af; tutr a el ke -lʼot ɛl e lɛc a lele ɛl ecʼabusu ab ab -lʼɛlu ndey a e lís e low kok ɛm. 14-Li bʼow -lʼogŋ licɛbli a ar, gbɛkↄ licɛbli a bʼow akm ɛl es, aŋke lʼel kↄtↄkↄ ɛm e Kↄtↄkↄ lele ɛ́b ebu fɛŋ ɛm ecʼƐb Ebu ab; ɛtŋ in ecʼagŋ nɛny nyam ɛsɛl a eke li sↄsum lʼot ke lʼɛsŋ ab ab, -li bʼow -lʼakm wɛl es.»
15Ɛmɛny afr ɛrm ɛs a dadʼm ninɛ: «Simij a eke ɛkn yogŋ a eke facyↄw a sig es a el agŋ agŋ, bieku bieku, ɛb ɛb lele ɛbr ɛbr ab. 16Ɔcↄwr lɛw a eke ɛkn a lele ndey ab ab bʼow ↄny facyↄw a eci sifn: -li bʼow -lʼeb ow ecʼob fɛŋ eke ow ↄny a, -nʼↄŋ ow anŋ sos ↄfr. -Li bʼow -lʼot ow eci megl a fɛŋ -lʼij ke -lʼofŋ ow eci likpr a, 17aŋke Nyam ↄŋ eke ɛl ecʼɛrm ab ɛm, -li ki kok low yecʼa eke Nyam am erur a. Nɛny bʼow okr ɛl af -lʼoc ɛl ecʼes ɛw eci abusu a -li kok ndey a e lís e low toŋ ke Nyam eci sodad a fɛŋ íy nɛny.
18Ca yↄw a eke ɛkn a el ɛb gbɛl a eke ɛw wus na nimum eci ɛ́b ebu a fɛŋ es a.»
18Babilↄn eci wus ɛy
1Na bʼɛc a, mʼɛkn afr ɛrm ɛs ɛjeci nyam ekʼanŋ afr am us es. Nʼↄny abusu ligbɛl nyam, ɛtŋ in ecʼanygbɛl a ayal wus na nimum. 2Lʼɛlu lebl tuↄtuↄ li dad ninɛ: «Lʼɛy wus, Babilↄn gbɛl a ɛy wus! Sica ow el abŋ eŋuŋ ɛrŋ ɛrŋ a ecʼusu ekʼir, ɛl ecʼes lↄl usu; aŋa anake ↄr ɛrŋ ɛrŋ lele mindey ekʼaylm ke wɛl bʼifn ab ir a. 3Ɛb ɛb a fɛŋ ecʼagŋ a ɛgŋ in eci mar a eke bʼↄŋ ɛgŋ ij nfaci, ke bʼↄŋ ɛgŋ im ɛy Nyam ecʼɛrm bebl ab ɛm a. Wus na eci ɛ́b ebu a igŋʼn af -lʼok nfaci ij owi ab ɛm, ɛtŋ wus na eci án ↄlu a el egbreŋgbi in ecʼob eke nʼↄny afŋn es a sosiɛm.»
4Ɛtŋ ɛmɛny mʼiri lebl ɛjeci nyam ekʼanŋ afr am ikŋ ow dad ɛsɛ: «Ɛm ecʼagŋ, òkr ↄkm ɛb ab ɛm yecʼɛtŋ ke kʼánmn in e sikpl a e low ɛm, in eci abu ɛyr ɛgbɛl a eke bʼow ɛŋnʼn a kʼɛ́ŋnm ↄny. 5Tasi ɛm a, in eci sikpl a tatakŋ toŋ im ok afr, ɛtŋ Nyam ijlm in ecʼów ɛnyɛmbri yony yony owi amua es. 6Kòkr ɛb a low ɛsɛ elel eke li kokr agŋ ɛjecʼab af. Low yecʼa eke li kok a, in yɛji kòkr ir ow eci sakp yony. Mij kpↄk a eke li bi wuwlm mar tuↄtuↄ ab nʼↄŋ agŋ ɛgŋ a, in yɛji mar eke ɛw tuↄtuↄ a, wùwlmn ow eci ↄtu sakp yony ab ↄŋn in lʼɛ́gŋ. 7Anygbɛl owi a eke li kok lele ɛb sɛnyn a eke lʼij ab ab a, ↄwar ow eci dudu a lele ow eci gbre ab ab eke bɛbmn ab a ↄŋn in. Li bi dadr in ɛm lʼɛsɛ: “Mʼir aŋa ɛsɛ ɛb eb yↄw af, mʼelm iŋnyↄw ɛtŋ lɛgŋ kaka mi kʼow mʼɛknm niŋn owi.” 8Low na sosiɛm anake gbre owi a fɛŋ eke wɛl bɛbm ɛwʼr es a bʼow ɛŋnʼn a: ↄl ekʼel luw eci, niŋn owi lele lek ab. Lɛgŋ nyam coco af fɛŋ bʼow ɛŋnʼn ɛtŋ wɛl bʼow ɛtul il. Tasi ɛm a, Ɛs Kↄtↄkↄ eke jɛj in e low a ok a ij lɛc nↄnↄ.»
9Eke wus eci ɛ́b ebu a eke in ab kok nfaci owi ke ir ɛb mɛwl ɛm a bʼow ɛkn ɛb a ekʼɛtu a eci mregbn a, -li bʼow -lʼikŋ ↄŋn -li kok sↄrŋ. 10Ke in eci gbre owi a kʼɛ́ŋnm ɛl a, -li bʼow -li kpab ow es lís -nʼim akpoj ke -nʼam dad -lʼɛsɛ: «Bogŋ e gbre ana ee? Oy Babilↄn! Ɛb gbɛl ekʼij lɛc! Wanci liy nyam af cɛ anake wɛl ↄbʼŋ low a.»
11Wus na ecʼán ↄlu a yɛji am ikŋ ↄŋn ɛtŋ am kok in eci sↄrŋ aŋke sica wɛl ↄ́lm ɛl ecʼan ob a ij: 12sika, jɛtɛ ufu, mebn amamn lele ayrɛ ab; gbad fuɛfuɛ, gbad ebl amamn, gbad frɛfrɛ; ekŋ sŋↄsŋↄ ɛrŋ ɛrŋ a fɛŋ, ɛyr nɛn ɛm ecʼob fɛŋ eke wɛl kok, ekŋ ekʼil an, jawie, lowi oglog lebn mamn; 13ekŋ sel sŋↄsŋↄ lele mob sↄsŋn mob ɛjecʼab, mijey, kpey lele ogŋ ab; mar, mun, ble mpupu lele miy ab; sed, mɛcɛb, sigbaŋkↄ lele ow eci mɛtŋ ab toŋ agŋ eci sos megl lele ow eci liy bↄbↄ yɛjʼab. 14Wɛl am dad ɛsɛ: «Mob mob a fɛŋ ekʼam erur a anm ŋ ogŋ a ij, ŋ ecʼob ↄny fɛŋ lele ŋ ecʼɛb ij sɛnyn ab ab irm; lɛgŋ kaka wɛl kʼow ɛŋnm ɛl ij!» 15Án ↄlu a eke ↄl an ɛb ab ɛm ke ↄny ob a, -li bʼow -nʼinym es akpoj, ɛb a eci gbre owi eke kʼɛŋn ɛl a sosiɛm. -Li bʼow -lʼikŋ ↄŋn -li kok sↄrŋ, 16-li dad -lʼɛsɛ: «Kↄ bogŋ eci gbre anake ɛŋn ɛb gbɛl na ab ee? Lʼɛw ob fuɛfuɛ sos, gbad ebl amamn, lʼok sika ɛm miyob, mebn amamn ɛm e miyob lele ayrɛ ɛm e miyob ab. 17Ɛtŋ wanci liy nyam af cɛ anake mob amua fɛŋ irm a!»
Simijɛtŋ a eci idr ɛsɛl a, agŋ a ekʼus mij ɛl ab a, ɛm yogŋ eci juma kok ɛsɛl a, agŋ a fɛŋ eke bʼɛŋn ob ij mij af yogŋ a bʼow inym es akpoj. 18Eke -lʼɛkan ɛb a ekʼam ɛtu a eci mregbn a, -li bʼow -lʼɛlu lebl -li dad -lʼɛsɛ: «Ɛb kaka anm eke agb ot ɛb na es!» 19-Nʼam ok siflefl nuŋ, -nʼam ikŋ ↄŋn -li kok sↄrŋ ɛtŋ -nʼam ɛlu lebl -li dad -lʼɛsɛ: «Kↄ bogŋ eci gbre anake ɛŋn ɛb gbɛl na ab ee? In ecʼob ↄny ab ɛm anake agŋ a fɛŋ eke ↄny simijɛtŋ okij na af a el egbreŋgbi a. Ɛtŋ wanci liy nyam af cɛ anake amua fɛŋ irm a!»
20Afr, sos ɛm íŋnʼŋ Babilↄn eci wus eke ɛr ok a eci! Nyam ecʼagŋ, ɛrm ɛsɛl lele kokoba ↄb ɛsɛl ab, sos ɛm íŋn ↄny aŋke Nyam jɛj okʼr low ŋuŋ a eke li kok ↄny a eci!
21Ɛtŋ afr ɛrm ɛs nyam ekʼↄny lɛc a oc ma ↄlul lob legleg nyam ↄwl okij ɛm ɛtŋ am dad ɛsɛ: «Ɛbɛn eke wɛl bʼow oc Babilↄn ɛb gbɛl a ↄwl lɛc ɛm ana, ɛtŋ lɛgŋ kaka wɛl kʼow ɛknmʼn ij. 22Lɛgŋ kaka ŋ ogŋ a wɛl kʼow irim saŋgo ↄny ɛsɛl ecʼɛj, ɛj ɛgŋ ɛsɛl, kete afl ɛsɛl, krↄkr afl ɛsɛl e lebl ij. Wɛl kʼow ɛŋnm mɛwl ɛs kaka fɛŋ ij; wɛl kʼow irim ob iny usu eci likekr ij. 23Mun al a kʼow ayalm ŋ ogŋ a ij; wɛl kʼow irim ↄyↄw ɛcɛl owr owr eci sↄ́g ij. Ŋ eci án ↄlu a ↄny any akm wus na nimum ecʼa, ɛtŋ ŋ eci cam owi ab ɛm, irmn ɛbr ɛbr a fɛŋ ecʼagŋ a.»
24Babilↄn yogŋ anake kokoba ↄb ɛsɛl, Nyam ecʼagŋ a lele wus na nimum ecʼagŋ a fɛŋ eke wɛl ibi ab ab eci mebl a ok es a.
19Afr ecʼany eb ecʼɛj
1Low na bʼoc es a, afr mʼiri lebl tuↄtuↄ nyam ekʼot agŋ nↄnↄ eci likekr es, ke am dad ɛsɛ: «Lili! Lili! Kↄklmn Ɛs Kↄtↄkↄ! Aŋke es eb ɛlu, anygbɛl lele lɛc fɛŋ ab a el ɛy e Nyam a eci! 2In eci jɛj ok owi a fɛŋ bʼel nawrɛ lele nyim nyim ab! Ɛtŋ ow ɛm a, lʼↄb facyↄw gbɛl a eke bʼↄny wus ecʼagŋ a ok in eci nfaci ij owi ɛm a low. Nyam eci juma kok ɛsɛl a eke lʼibi a, Nyam kok li sↄg ow e labm.» 3Ɛtŋ ɛmɛny -nʼam dad -lʼɛsɛ: «Lili! Lili! Kↄklmn Ɛs Kↄtↄkↄ! Ɛb gbɛl a eke wɛl ɛtul a eci mregbn a am il godo godo fɛŋ eci!» 4Agŋ ekpekp likŋ lele yar ab a lele mindey yar ab ab ok ↄwrↄkp wus ɛtŋ am igŋ Nyam eke sig es atufu lɛkpn af a nuŋ, ɛtŋ am dad ɛsɛ: «Amɛn! Lili! Lili! Kↄklmn Ɛs Kↄtↄkↄ!»
5Lebl nyam anŋ atufu lɛkpn ab af am ikŋ dad ɛsɛ: «Ɔny a fɛŋ a eke eel Nyam eci juma kok ɛsɛl a, ey lele ɛgbɛl ab, ↄny eke bʼↄnyn in ecʼɛlum a, kↄklmn ɛy e Nyam a!» 6Ɛmɛny mʼiri lebl ekʼot agŋ nↄnↄ eci lebl es; ow am ikŋ ɛsɛ okij eci mra eke bʼɛlu ab af, ɛsɛ nyamgbrany af. Kin lebl a ecʼodad eke am dad: «Lili! Lili! Kↄklmn Ɛs Kↄtↄkↄ! Aŋke ɛy Ɛs Kↄtↄkↄ Nyam Abusu Ɛs sigm in ecʼes ɛw ab es! 7Sʼɛ́lul sos ɛm iŋn e lili, sʼánŋn sos ɛm iŋn ɛm, si kↄ́klmn in! Aŋke licɛbli a eci mɛbi a ecʼes gbɛgbl a e lɛgŋ ow ŋ̂, in e yↄw a bɛbm sos inym es. 8Nyam ↄŋʼn ob sos ɛw ufu fuɛfuɛ ekʼam jɛjn eke li kʼɛw sos.» (Ob sos ɛw ufu fuɛfuɛ a el Nyam ecʼagŋ a ecʼów nyim nyim a.)
9Afr ɛrm ɛs a dadʼm ninɛ: «Nↄn dad ɛsɛ: Ehe él agŋ a eke wɛl ɛsŋ licɛbli a e mɛbi a ecʼes gbɛgbl ab ɛm a eci.» Ɛtŋ lʼigŋ af li dad ninɛ: «Amua, ow el Nyam ecʼodad ebl tasi.» 10Mʼok ↄwrↄkp wus in ecʼakr esr a eke mi kʼigŋʼn nuŋ, kↄ li dadʼm ninɛ: «Kì kok! Ɛm yɛji, juma kok ɛs ɛsɛ ŋ af, ɛsɛ esŋ jimɛl a eke ij Jesu eci low nɛnyɛmbri nyam a eke ɛlu ↄkm a eci daŋku ab af. Nyam anake it eke kʼigŋ nuŋ a! Low nɛnyɛmbri nyam a eke Jesu ij ow eci daŋku a, el kokoba ↄb ɛsɛl eci odad a eke dad a eci liy tasi.»
Ɛgŋ ekʼuyu gbaŋkↄ ufu af
11Ɛtŋ ɛmɛny mʼɛkn afr ekʼagbr ɛm, ke gbaŋkↄ ufu nyam ɛy ↄkm. Ɛgŋ a ekʼuyu gbaŋkↄ ab af a, wɛl bʼɛsŋʼn Nɛny Nyam Ij Ɛs lele Low Nawrɛ Ɛs ab; in e jɛj ok a lele ar ogŋ ab ab bʼel nɛnyɛmbri nyam ɛm eci. 12In ecʼanyamn a am iri ɛsɛ al af, ɛtŋ es ɛw eci tufɛ nↄnↄ anŋʼn nuŋ. Wɛl nↄn nin nyam in af ekʼɛgŋ kaka uwm ow e low any, ekʼow elm in sↄny coco cɛ. 13In eci mob af ɛw a eke li sus a el mebl ↄfr. Ɛgŋ a wɛl bʼɛsŋʼn Nyam Odad. 19.13 Ɛ̀kn Jan 1.1-5.14Afr eci ar ɛsɛl a sus mob efu fuɛfuɛ ekʼayl ɛtŋ uyu sigbaŋkↄ efu af am usʼr jam. 15Lab ler ɛm fufu nyam ɛyʼr ↄkm nɛnym agŋ ecʼↄr eci. Li bʼow ni nyimn wɛl lɛc ɛm ɛtŋ li bʼow li yɛgm Nyam Abusu Ɛs ecʼɛrm bebl ligbɛl a. Li bʼow lʼifi wɛl es lɛc ɛm ɛsɛ elel eke wɛl bʼifi viny ey es es ifir ob ɛm ab af. 19.15 Ɛ̀kn Es Ɛkn 14.18-20.16Kin nin a eke wɛl nↄn in e mob af ɛw ab af lele in eci im ab ab af a: “Ɛ́b ebu fɛŋ ɛm ecʼƐb Ebu lele kↄtↄkↄ ɛm e Kↄtↄkↄ ab.”
17Ɛtŋ ɛmɛny mʼɛkn afr ɛrm ɛs nyam ekʼigb inym es ligbn ab ɛm. Nʼam ɛlu lebl tuↄtuↄ lʼɛsŋ ↄr a fɛŋ eke bʼigb im afr kpoŋ ɛm a lʼɛsɛ: «Òwr, àsr luku Nyam eci ob ij gbɛl a eci! 18Òwr ijr ɛ́b ebu a eci megl a, ìjr srↄda eyŋ ecʼes ɛw ɛsɛl a lele ar ɛsɛl ab ab eci megl a, ìjr sigbaŋkↄ a lele ɛl ecʼaf uyu ɛsɛl ab eci megl a, ìjr agŋ fɛŋ eci megl a, ewi lele madu ab eci megl a, ìjr ey lele ɛgbɛl ab eci megl a.»
19Ɛtŋ ɛmɛny mʼɛkn ndey a, mʼɛkn wus eci ɛ́b ebu a lele ɛl eci ar ɛsɛl ab ab eke as luku, eke kʼogŋ ɛgŋ a eke uyu gbaŋkↄ af a lele in eci ar ɛsɛl ab ab ar. 20Wɛl ↄny ndey a lele kokoba ↄb ɛs yadŋu a eke kok mɛny ɛwr owi eke kʼirmn agŋ a eke ↄny ndey a eci mɛny ɛwr a, ke am igŋ likŋ ɛgŋ a nuŋ a. Wɛl ↄny ndey a lele kokoba ↄb ɛs yadŋu ab ab ow ↄwl mebn eke ler faf es am iri al ab ɛm. 21Lab ler ɛm a eke anŋ ɛgŋ a eke uyu gbaŋkↄ ab af a e nɛnym am ɛy ↄkm a, ibi ɛl eci ar ogŋ ɛsɛl a fɛŋ, ɛtŋ ↄr a fɛŋ am ij ɛl e megl a.
20Akpo fandi a
1Ɛtŋ ɛmɛny mʼɛkn afr ɛrm ɛs nyam ekʼanŋ afr am us es. Nʼↄnym nↄmu croŋ gbɛl a eci safuɛ a lele ŋgbraka ligbɛl nyam ab. 2-3Nʼↄny tamranji a, lorŋn sig a ekʼel agn oglog Satan a, lʼok ow ŋgbraka ɛtŋ lʼoc lʼↄwl ow nↄmu croŋ gbɛl ab ɛm akpo fandi eci. Lʼabl nↄmu croŋ gbɛl a safuɛ ɛm yecʼɛtŋ ke tamranji a kʼírmnm ɛb ɛb ecʼagŋ a toŋ ke akpo fandi a ɛc ok es. Ow bʼow uwr a, ow it ke wɛl ɛ́luʼl es lɛgŋ tɛl eci.
4Ɛmɛny mʼɛkn atufu mɛkpn: agŋ a eke ok es af a ɛŋn abusu eke ki jɛj agŋ e low ok. Mʼɛkn agŋ a eke wɛl ibi a yɛji eci abŋ a; wɛl ibi ɛl Jesu eci low nɛnyɛmbri nyam a ekʼɛlu ↄkm a lele Nyam odad ab ab eci daŋku eke -lʼijr a sosiɛm. -Lʼigŋm ndey a nuŋ, -lʼigŋm ow eci likŋ ɛgŋ a nuŋ, ɛtŋ -nʼɛŋnm ndey a eci mɛny ɛwr a anyafr, -nʼɛŋnm ow anm ɛl abu af yɛji. -Lʼigb luw ɛm ɛtŋ Krist ab -lʼɛw usu es toŋ akpo fandi. 5Na krɛkrɛ eci luw ɛm anŋ igb ab ana. Agŋ ɛjecʼa eke uw a kʼow igbm luw ɛm eke akpo fandi a kʼɛcm kʼokm es. 6Ehe él agŋ a eke anŋ krɛkrɛ eci luw ɛm anŋ igb ab ɛm a! -Lʼel Nyam eci agŋ lala ɛtŋ yony ɛm eci luw a ↄnym abusu ɛl af; 20.6 Ɛ̀kn Es Ɛkn 2.11 lele ow ecʼakr otar ab ab. -li bʼow -lʼel Nyam lele Krist ab eci egb waw ɛsɛl, ɛtŋ Krist ab -li bʼow -lʼɛw usu es toŋ akpo fandi a.
Satan ɛŋnm ar a
7Lɛgŋ a eke akpo fandi a bʼow ɛc ok es a, wɛl bʼow ɛlu Satan es sobel ɛm, 8ɛtŋ li bʼow nʼim lʼɛju ɛb ɛb a ekʼel Gↄg lele Magↄg ab ekʼanŋ wus na eci susu kpekpe a. 20.8 Gↄg lele Magↄg ab el nin eke wɛl ↄŋ ɛb ɛb a eke sɛgŋ es abal el ɛm a bʼow im Nyam ecʼagŋ ar a. Ɛ̀kn Ezekiɛl 38-39. Li bʼow lʼas wɛl luku ar ogŋ eci, ɛtŋ -li bʼow -nʼɛny ɛsɛ okij any eci mrici af. 9-Nʼanŋ susu a fɛŋ -lʼow -lʼiwr Nyam ecʼɛb lala a eke erur ke in ecʼagŋ ir a -lʼɛlul ɛm eke -li kʼeb. Gbɛkↄ al bʼow anŋ afr ow ŋuŋn ɛl. 10Ɛtŋ agn eke bʼɛju ɛl a, wɛl bʼow oc ↄwlʼl mebn eke ler faf es a eci al ab ɛm, yogŋ a eke ndey a lele kokoba ↄb ɛs yadŋu ab ab anŋ a. -Li bʼow -lʼij gbre nↄnↄ ncok lele lɛgŋ owr ab godo godo fɛŋ eci.
Jɛj ok es abal el
11Ɛtŋ ɛmɛny mʼɛkn atufu lɛkpn ufu nyam lele ɛgŋ a eke sig es af ab ab. Wus lele afr ab kpabʼr es lís im kpekpe ɛtŋ wɛl ɛwlm ɛknm ɛl ij. 12Ɛmɛny mʼɛkn agŋ ekʼuw a, ey lele ɛgbɛl ab, eke inym es atufu lɛkpn a ecʼany af. Silɛl nↄnↄ fifig ok es, ɛtŋ lɛl ɛjeci nyam yɛji fig ɛru es, ke sel ɛŋn eci lɛl ab ana. 20.12 Ɛ̀kn Es Ɛkn 3.5 lele ow ecʼakr otar ab a. Agŋ a ekʼuw a, wɛl jɛj ɛl e lís e low ok low a eke -li kokr ab ɛm, yecʼa eke wɛl nↄn anŋ silɛl ab ɛm a. 13Okij ɛlu agŋ a ekʼuw ke nʼↄnym ab a es. Luw lele ↄŋnes baŋn ab yɛji ok ɛl ecʼagŋ a ekʼuw ke -nʼↄnymn ab a es, ɛtŋ wɛl jɛj ɛgŋ ɛgŋ e lís e low ok in e juma a eke li kok ab ɛm. 14Wɛl itr luw lele ↄŋnes baŋn ab ok al a eke faf es ab ɛm. Al na eke faf es a el luw sakp yony ɛm a. 15Wɛl bʼoc ɛgŋ fɛŋ eke wɛl nↄnm in e nin sel ɛŋn eci lɛl ab ɛm a ↄwl al a eke faf es ab ɛm.
21Afr owr a lele wus owr ab ab
1Ɛmɛny mʼɛkn afr owr nyam lele wus owr nyam ab; krɛkrɛ ecʼafr a lele krɛkrɛ eci wus ab ab irm ɛtŋ okij a yɛji anm ij. 2Ɛtŋ ɛmɛny mʼɛkn Jerusalɛm owr a, ɛb lala a eke Nyam ↄŋ anŋ in ogŋ a am ow a. Li bɛbm sos ɛsɛ yↄw eke kpɛkp sos eke kʼim ↄbr ɛc af. 3Mʼiri lebl tuↄtuↄ nyam ekʼanŋ atufu lɛkpn a ogŋ am ikŋ ow dad ɛsɛ: «Sica Nyam ecʼɛb ir usu a ow agŋ ecʼaraŋn! Li bʼow lʼir wɛl ab ɛtŋ -li bʼow -lʼel Nyam ecʼagŋ. Nyam in obi bʼow anŋ ɛl ab ɛtŋ li bʼow lʼel wɛl e Nyam. 4Li bʼow li tɛtŋ wɛl e mikŋ a fɛŋ es; luw owi, niŋn owi, likekr owi lele gbre ij owi ab kʼow anm ij. Lɛgŋ sig ɛm ecʼów a fɛŋ ot es ŋ̂.»
5Ɛtŋ sica ɛgŋ a eke sig es atufu lɛkpn ab af a dad ninɛ: «Sica mʼam ↄŋ ów a fɛŋ itŋn el owr.» Ɛtŋ ɛmɛny lʼigŋ af li dad ninɛ: «Nↄn low na aŋke ɛm eci sodad a el nawrɛ, wɛl ↄtu eke kʼↄny ↄmn ow ɛm.» 6Ɛmɛny lʼigŋ af li dad ninɛ: «Sica fɛŋ uwr ŋ̂! Mʼel Krɛkrɛ lele Es Abal El ab, Nuŋ Ɔb lele Nuŋ Ɛdŋ ab. Ɛgŋ yecʼeke mijamn am ↄny a, mi bʼow mʼↄŋʼn mij ewl mij a eke bʼↄŋ ɛgŋ sel a ↄfr ɛm lʼɛgŋ. 7Ɛgŋ kaka fɛŋ eke bʼow eb any a, bʼow ɛŋn aja ikŋ na; mʼow mʼel in e Nyam ɛtŋ in li bʼow lʼel ɛm ecʼiy. 8Érŋnu, ów ɛnyɛmbri yony yony ɛsɛl, agŋ eŋuŋ, agŋ ibiu, afacu, cam kok ɛsɛl, agŋ a eke bʼigŋ sɛkp nuŋ lele ayadŋu fɛŋ ab ecʼa, ɛl ecʼusu bʼow anŋ mebn eke ler faf es a eci al ab ɛm. Ke luw sakp yony ɛm ab ana.»
Jerusalɛm owr a
9Sica mʼɛkn afr ɛrm ɛsɛl lↄbŋ a, eke ↄnym kpↄk lↄbŋ a eke abu ɛyr es abal el lↄbŋ a anŋ ɛm a eci nyam. Lʼow nʼam dadʼm lʼɛsɛ: «Òw, mi bʼow mi yɛgmʼŋ yↄw ɛc a, licɛbli a eci yↄw a.» 10Abŋ ɛm a, afr ɛrm ɛs a ocʼm im lafɛny gege ligbɛl nyam eci nuŋ af. Li yɛgmʼm Jerusalɛm, ɛb lala a eke Nyam ↄŋ anŋ in ogŋ a am ow a. 11Nyam ecʼanygbɛl a am ↄŋ li jɛjn ɛsɛ lebn mamn af, ɛsɛ jasp eci lebn eke bʼɛkan es af. 12Nʼↄny lakp sisil gege nyam eke ↄny masany lɛw yony lele afr ɛrm ɛsɛl lɛw yony ekʼam ↄsu ab. Masany ab af a, wɛl nↄn Israɛl ecʼeb lɛw yony a ecʼen a anŋ. 13Baŋn ecʼogog nyam nyam fɛŋ bʼↄny masany nyahan: nyahan bʼanŋ yogŋ eke ligbn bʼigb a, nyahan bʼanŋ yogŋ eke ligbn bʼɛru a, nyahan bʼanŋ afr ogog a, ɛtŋ nyahan bʼanŋ esr ɛm a. 14Baŋn a eci lakp a sigr mób lɛw yony eke wɛl ok ↄmu ɛm, ɛtŋ af yogŋ, wɛl nↄn licɛbli a ecʼɛrm ɛsɛl a ecʼen a.
15Afr ɛrm ɛs a eke am dadʼm odad a ↄnym ob bɛbmn ob ab, sika ɛm eci likŋ soŋni eke ki bɛbmn baŋn a, in eci masany a lele in eci lakp ab ab. 16Baŋn a eci ogog yar a bɛbmn; sↄfu a lele es ar ab ab bɛbmn. Afr ɛrm ɛs a oc in eci sika ɛm likŋ soŋni a bɛbmn baŋn a; ow ij sↄfu fandi lɛw yony, 21.16 sↄfu fandi lɛw yony:ow bɛbmn 2220 kilo ab. es ar a, sigb a lele sↄfu ab ab bɛbmn. 17Li bɛbmn lakp a yɛji. Ob bɛbmn ob a eke lʼoc li bɛbmn ab ɛm, nʼɛŋn sigb a eci sↄfu a ekŋ lↄbŋ miy yar, 21.17 sↄfu a ekŋ lↄbŋ miy yar:Ow bɛbmn 65 kilo ab.18wɛl awŋ lakp a jasp ɛm, ɛtŋ ɛb a in obi a wɛl usʼr sika tasi ɛm ɛtŋ ow bʼayl ɛkan es ɛsɛ akrↄŋnↄ af. 19Mób a eke wɛl ok ↄmu ɛm awŋ baŋn a eci lakp a, wɛl ot mebn amamn ekʼↄny mij ɛrŋ ɛrŋ ijr mɛwl: krɛkrɛ eci lob a jasp ɛm, yony ɛm ecʼa safir ɛm, nyahan ɛm ecʼa agat ɛm, yar ɛm ecʼa emerod ɛm, 20yen ɛm ecʼa onis ɛm, nↄhↄn ɛm ecʼa sarduan ɛm, lↄbŋ ɛm ecʼa krisolit ɛm, niwn ɛm ecʼa beril ɛm, libarm ɛm ecʼa topas ɛm, lɛw ɛm ecʼa krisopras ɛm, lɛw nyam ɛm ecʼa turkuas ɛm, ɛtŋ lɛw yony ɛm ecʼa ametis ɛm. 21Masany lɛw yony a el ayrɛ lɛw yony; lisany nyam eci kok ɛm a, wɛl bʼoc ayrɛ ligbɛl nyam coco. Ɛjɛm a el sika tasi ↄfr eke ayl am ɛkan es ɛsɛ akrↄŋnↄ af.
22Mʼɛknm Nyamel ɛb ab ɛm, aŋke ɛb a eci Nyamel a el Ɛs Kↄtↄkↄ Nyam Abusu Ɛs lele licɛbli ab ab. 23Ɛb a ↄlm ligbn es, ↄlm awl es eke kʼayal il, aŋke Nyam ecʼanygbɛl a am ayal il ɛtŋ licɛbli a el in eci mun al. 24Ɛb ɛb a fɛŋ ecʼagŋ a bʼow an es in eci usuayl ab ɛm, ɛtŋ wus eci ɛ́b ebu a bʼow ot ɛl eci ob ↄny a ow yogŋ. 25Lɛgŋ owr nimum a, baŋn a eci masany a bʼow fifig ok es; lɛgŋ kaka wɛl kʼow bablm, aŋke yogŋ lɛgŋ uk kʼow anm ij. 26Wɛl bʼow ot ɛb ɛb a eci sagb a lele ob ↄny ab ab ow yogŋ. 27Ob fɛŋ eke aylm Nyam ecʼany af lele agŋ eke bi kok musue owi ke bʼↄny yadŋ a kʼow okm baŋn a. Agŋ a sↄny coco a eke bʼow ok ɛm a el, ɛl a eke wɛl nↄn ɛl ecʼen licɛbli a eci sel ɛŋn e lɛl ab ɛm a.
221-2Ɛmɛny afr ɛrm ɛs a yɛgmʼm sel ɛŋn eci mij ewl mij ekʼam jɛjn ɛsɛ akrↄŋnↄ af, ke anŋ Nyam lele licɛbli ab ab ecʼatufu lɛkpn a ogŋ am jɛjn ok ↄkm ewl im ɛb a ecʼusu araŋn a. Mij a ecʼál yony a eke ok a ecʼaraŋn a, sel ɛŋn eci likŋ a anŋ. Lakpo nyam af a, li bʼↄsu ey sakp lɛw yony, awl nyam akp nyam. In eci suw a bʼewlm ɛb ɛb ecʼagŋ a. 3Ofn owi kaka kʼow anm ij.
Nyam lele licɛbli ab ab eci atufu lɛkpn a bʼow anŋ ɛb ab ɛm, ɛtŋ Nyam eci juma kok ɛsɛl a bʼow igŋʼn nuŋ. 4-Li bʼow -lʼɛkn ow ecʼany a, ɛtŋ ow eci nin a bʼow nↄn ɛl ecʼanyafr a. 5Lɛgŋ uk kʼow anm ij, ɛtŋ -li kʼow -lʼibramn mun al ecʼusuayl a lele ligbn ecʼab ab, aŋke Ɛs Kↄtↄkↄ Nyam in obi li bʼow lʼok wɛl in ecʼusuayl ab af, ɛtŋ -li bʼow -lʼel es ɛw ɛsɛl godo godo fɛŋ eci.
Krist eci mowrer
6Ɛmɛny afr ɛrm ɛs a dadʼm ninɛ: «Sodad amua el nawrɛ, wɛl ↄtu eke kʼↄny ↄmn ow ɛm; ɛtŋ Ɛs Kↄtↄkↄ Nyam a eke bi nyimn kokoba ↄb ɛsɛl eci abŋ a, ɛrm in ecʼafr ɛrm ɛs ow yecʼɛtŋ ke li yɛ́gm in e juma kok ɛsɛl a low eke bʼow ɛy lɛgŋ tɛl ɛm a.» 7Jesu dad ninɛ: «Ìri, ow kʼow ibnm mʼow mʼow! Ehe él agŋ a eke bʼoc kokoba ↄb e sodad ekʼanŋ lɛl na ɛm a sɛnyn sɛnyn a eci!»
8Ɛm Jan, mʼiri ɛtŋ mʼɛkn ów amua. Ɛtŋ eke mʼiri ke mʼɛkn a, mʼok ↄwrↄkp wus afr ɛrm ɛs a eke yɛgmʼm ów amua a ecʼany af eke mi kʼigŋʼn nuŋ. 9Gbɛkↄ li dadʼm ninɛ: «Kì kok ɛbɛn! Ɛm yɛji juma kok ɛs ɛsɛ ŋ af, ɛsɛ esŋ jimɛl kokoba ↄb ɛsɛl ab af, ɛsɛ agŋ a fɛŋ eke bʼoc lɛl na ɛm eci sodad a sɛnyn sɛnyn ab af. Nyam anake it eke kʼigŋ nuŋ a, kↄ ow elm ɛm!»
10Ɛmɛny li dadʼm ninɛ: «Kokoba ↄb e sodad ekʼanŋ lɛl na ɛm a, kʼòc ki lↄl es, aŋke ów amua fɛŋ eci sɛgŋ a eke wɛl bɛbm ok es a titm. 11Ke ɛgŋ eke akplm a, nʼánŋ in ecʼakplm ab ɛm; ɛgŋ eke aylm Nyam ecʼany af a, nʼánŋ in ecʼaylm ab ɛm; ɛgŋ eke bi kok low mamn a, nʼánŋ low mamn kok ab ɛm; ɛgŋ ekʼel lala a, nʼánŋ lala el ab ɛm.»
12Jesu dad ninɛ: «Kin, ɛm ecʼow ibnm ij! Mi bʼow mʼism ob ap ab, ɛtŋ mi bʼow mʼↄŋ ɛgŋ ɛgŋ, juma a eke li kok a eci. 13Mʼel Nuŋ Ɔb lele Nuŋ Ɛdŋ ab, mʼel Krɛkrɛ lele Es Abal El ab, Kpↄkpↄ lele Uwar ab.» 14Ehe él agŋ a eke am ɛfn ɛl ecʼob sos ɛw es eke kʼɛŋn abusu ij sel ɛŋn e likŋ a ecʼey a eci. -Li bʼow -nʼɛŋn abusu -lʼɛ́cr masany a eci -lʼok ɛb ab ɛm. 15Sica baŋn a eci jam a, agŋ eŋuŋ a, cam kok ɛsɛl, afacu, agŋ ibiu, sɛkp nuŋ igŋ ɛsɛl lele ayadŋu ab ecʼusu ekʼanŋ ana!
16«Ɛm Jesu, mʼɛrm ɛm ecʼafr ɛrm ɛs a ow ij ów amua e daŋku Nyamel fɛŋ ecʼany af. Ɛm, mʼel David ecʼeb ab ɛm eci lilaw, 22.16 Ɛ̀kn Es Ɛkn 5.5 ecʼakr otar a. ibribr eci lɛ́l ekʼam jɛjn. 17Abŋ a lele yↄw a eke wɛl ɛbi ab ab am dad ɛsɛ: “Òw!” Ke ɛgŋ yecʼeke in yɛji am iri low na a dád ɛsɛ: “Òw!” Ke ɛgŋ eke mijamn am ↄny a ów; ke ɛgŋ eke am erur sel ɛŋn eci mij a, éb ↄfr ɛm.»
Nuŋ ɛdŋ ecʼodad
18Ɛm, Jan, kin low eke mʼam igbl ow eci lebl ogŋ mi dad ɛgŋ fɛŋ eke bʼow iri kokoba ↄb owi a ekʼanŋ lɛl na ɛm a: eke batŋ ɛgŋ kaka fɛŋ am oc low ɛjeci nyam ɛlu ɛm a, ke abu ɛyr owi a fɛŋ eke wɛl dad ow e low lɛl na ɛm a, Nyam bʼow ot ↄŋʼn. 19Ɛtŋ eke batŋ ɛgŋ kaka fɛŋ am ↄny kokoba ↄb e sodad a ekʼanŋ lɛl na ɛm a ecʼob nyam oc es, ke sel ɛŋn eci likŋ a ecʼey a lele ɛb lala a eke wɛl dad ow ecʼodad lɛl na ɛm a, Nyam bʼow ↄny ocʼr es abu ɛm. 20Ɛgŋ a eke ij low nɛnyɛmbri nyam na ecʼasmanu a dad ninɛ: «Mʼam ow caca!» Amɛn! Ɛs Kↄtↄkↄ Jesu, òw gↄŋ!
21Ke sica Ɛs Kↄtↄkↄ Jesu ecʼↄwrↄ a ánŋ ↄny fɛŋ ab.