FILIP

Pↄl e lɛl ekʼawŋ Filip eyŋ

Ów ekʼit eke wɛl kʼuw any

Filip el Maseduan ecʼɛb nyam ekʼanŋ Grɛs wus af. Lʼel Rom e sɛb a eke ɛw es a e nyam. Filip eyŋ ntotŋ bʼok eke -lʼeel Rom ecʼes ɛw a ecʼagŋ. Ow sosiɛm, -li bi sus mob ɛsɛ Rom eyŋ af ɛtŋ -li bʼerur Latɛn eke el wɛl ecʼɛbr a ecʼɛbr. Filip ɛb ab ɛm, Jwifɛl ijm abi. -Lʼufum es yɛji -lʼijm agŋ lɛw a eke bʼↄŋ abusu ke -li bʼↄny Nyam nuŋ igŋ usu a. Eke Pↄl am ɛc ↄb Amani Mamn eci kokoba sakp yony ɛm ecʼa, ow ɛm li sigm Nyamel es Filip ɛb ɛm (ɛ̀kn Ob Kok 16.11-40). Nyamel ab ɛm, agŋ a eke elm Jwifɛl a ufu es nↄnↄ.

Pↄl eci juma kok ɛc ab ɛm, es ɛw ɛsɛl ɛwʼr abu af. Eke Filip eci Nyamel a iri eke Pↄl anŋ sobel ɛm a, -li kok ob ap -nʼↄŋ ɛl ɛm ecʼɛgŋ nyam eke wɛl bʼɛsŋ Epafrodit a im ↄŋ ow. Ow ↄŋ, Pↄl nↄn lɛl na eke kʼɛlu ɛl bia, ke nʼↄ́ŋ wɛl in e lís ecʼamani yɛji. Eke batŋ ow el sobel ɛm Pↄl anŋ nↄn lɛl a yɛji, in eci lɛl a eci liy a el kretiɛn eci sos ɛm iŋn eke bʼↄny eke ow el ses babur nↄnↄ ecʼany af bↄbↄ yɛji.

Sica Filip eci Nyamel ab ɛm, irirm nↄnↄ anŋ Nyam nuŋ igŋ ɛsɛl a ecʼaraŋn. Pↄl am dad ɛl eke -li kʼeb Krist eci es is a eci sɛwl a, ke -lʼebarir ɛl ↄfr. Yogŋ low yɛgm ɛsɛl ayadŋu yɛji anŋ. Ɛl ɛm eci bɛb erur eke kretiɛnɛl a, lɛc ɛm, kʼɛlum Jwifɛl ecʼol a. Ɛtŋ bɛb a am ir ɛb wus ecʼów aw a cɛ eci. Yadŋ ɛm ecʼów yony na e lís anake Pↄl am ↄm kretiɛnɛl a ów eke kʼↄsu sos a.

Lɛl na am yɛgm eke Pↄl ↄny Filip eci kretiɛnɛl a ecʼerur nↄnↄ.

Ɛsŋn

¹Pↄl lele Timote ab, ekʼel Jesu Krist ecʼↄbↄwi a, e lɛl ekʼam awŋ Filip baŋn e Nyam ecʼagŋ ekʼanŋ Jesu Krist ab, Nyamel ecʼidr ɛsɛl lele diakrɛl ab. ²Ke Nyam ɛy Ɛs lele Ɛs Kↄtↄkↄ Jesu Krist ab ɛ́dŋ ↄny ↄwrↄ ke ↄ́ŋ ↄny ɛrm es ɛy.

Pↄl am ɛlu Nyam bia

³Mi bʼↄŋ Nyam bia sakp sakp fɛŋ eke mi bʼↄkn ↄny e low a. ⁴Sɛgŋ a fɛŋ e Nyam eke mi bi ŋↄŋn mʼↄŋ ↄny a, sos ɛm iŋn ɛm mi bi ŋↄŋn, ⁵Amani Mamn a ecʼelel ekʼɛlumnʼm abu mi mↄmun es lɛgŋ krɛkrɛ ɛm ɛtŋ toŋ igŋ yɛfɛnyna ɛm a sosiɛm eci. 1.5 Ob Kok 16.13-16.⁶Mʼuw any tasi eke Nyam ekʼↄb nuŋ am kok juma mamn na ↄny ecʼɛrm ab ɛm a, bʼow ucu ↄny es toŋ ígŋ nuŋ, toŋ ow ók lɛgŋ eke Jesu Krist bʼow ow a. ⁷Mʼↄny low ij, eke mʼↄny tutr nɛnɛ ↄny fɛŋ e lís. Mʼoc ↄny ɛm ecʼɛrm fɛŋ ɛm, aŋke ke ow el ŋgbraka ɛm eke mʼanŋ, ke ow el lɛgŋ a eke mʼↄny abusu eke mi ki dogŋn, ke mʼↄmun Amani Mamn ab es a yɛji, ↄny a fɛŋ ɛŋan Nyam eci bibm a ɛsɛ ɛm af. ⁸Ɛtŋ Nyam ij ɛm e daŋku eke ↄny fɛŋ mʼerur ↄny tasi, ɛsʼelel eke Jesu Krist ↄny erur ligbɛl ↄny ecʼab af.

⁹Ɛtŋ ow eke mʼam ibrm ɛm e ŋↄŋn ɛm a el: ke erur na ekʼↄnyn a ágb afŋn es, ke ow ↄ́ŋ ↄnyn low any uw lele nuŋ ɛm ↄny ab, ¹⁰yecʼɛtŋ ke úwr ów tasi eke el nawrɛ ab any. Ow bʼow ↄŋ ayal, abr ɛnym kʼánm ↄny lís, lɛgŋ a eke Jesu Krist bʼow ow a, ¹¹ɛtŋ ów amamn eci ey eke wɛl bʼɛŋn Jesu Krist ɛm a, bʼow ok ↄkm ↄny ɛm; ke ow él Nyam ecʼanygbɛl lele kↄklm ab.

Jesu Krist el sel ɛŋn

¹²Sica lisijimɛl, mʼerur eke kʼuwr any eke es abur na ekʼɛŋnʼm a, tasi ɛm a, ↄŋ Amani Mamn a imn anym eci, ¹³aŋke sica agŋ a fɛŋ ekʼanŋ es ɛw ɛs a e gbugŋ a lele susu ɛjecʼab a uw any eke Krist sosiɛm mʼanŋ ŋgbraka ɛm. 1.13 Ob Kok 28.30, Efɛs 3.1.¹⁴Ɛtŋ agŋ lisijimɛl nↄnↄ ecʼↄmn ekʼↄny Ɛs Kↄtↄkↄ ɛm a obn, ŋgbraka na ɛm eke mʼanŋ a; ow ↄŋ erŋn ↄnym ɛl ɛtŋ lokm susu ɛm -nʼam dad Nyam ecʼodad.

¹⁵Nawrɛ tasi ekʼɛl ɛm ecʼagŋ nyam nyam, ɛm sosiɛm, bʼↄb Krist ecʼAmani a ŋkre ɛm, ów es atar ɛm, ɛbɛn yɛji, likpr bʼↄb Krist ecʼAmani a erur ɛm tasi. ¹⁶Ɛl akpasu a, -li bʼↄb Krist ecʼAmani a erur ɛm, aŋke -lʼuw any eke ɛm eci sobel ɛm aŋa eke mʼanŋ a, el Amani Mamn a e dogŋn eci. ¹⁷Ɛtŋ ɛl a eke bʼↄb Krist ecʼamani a sow tutr eŋuŋ ɛm, ɛm eci ŋkre ogŋ ɛm a, ɛl e tutr a el, ke -lʼobn ɛm e gbre ij a sobel ɛm aŋa eke mʼanŋ a. ¹⁸Yɛji ↄfr ↄfr! Ekʼɛl eci sow tutr a el eŋuŋ oglog amamn yɛji, ɛm e sos ɛm iŋn a el: Krist ecʼamani a ecʼa, wɛl am ↄb ɛtŋ ow bʼow iŋnʼm sos ɛm sɛgŋ fɛŋ, ¹⁹aŋke mʼuw any eke ↄny e Nyam ŋↄŋn lele Jesu Krist ecʼAbŋ Lala ecʼabu ɛlum ab ab, bʼow el ɛm eci sↄg. ²⁰Sica ɛsɛ elel eke mʼam eku ke mʼam ↄmn tasi a, mi kʼɛknm low yecʼeke kʼↄnyʼm ɛ́s. Kↄ ke ow el sicaca oglog ke ow el sɛgŋ fɛŋ, mʼↄny ↄmn tasi ɛtŋ mi bʼow mʼɛlu Krist eci sagb a ↄkm ɛm ecʼɛgŋ el fɛŋ ɛm, ɛm ecʼowr anŋ ɛm oglog ɛm e luw ɛm bↄbↄ yɛji. ²¹Ɛm ecʼa, tasi ɛm a Krist anake el ɛm e sel a, ɛtŋ luw el ɛm eci ŋgrusiɛ. ²²Gbɛkↄ ekʼow it eke mi kʼanŋ owr ke mi kok juma mamn, ke mi kʼúwm low yecʼeke mi ki sↄsum mʼoc ab any. ²³Mʼanŋ sow tutr yony ecʼaraŋn: mʼam erur eke mi kʼuw ke mʼím mʼanŋ Krist ab, na anake akpl afŋn es a. ²⁴Gbɛkↄ ow it ke mʼánŋ owr sos megl ɛm ↄny e nimamn eci. ²⁵Ca mʼuw any tasi ŋ̂! Mʼow mʼanŋ owr, mi bʼow mʼir ↄny fɛŋ ab yecʼɛtŋ ke ow ɛ́lum ↄny abu iman anym eci, ke ↄ́nyn sos ɛm iŋn ↄmn ɛm. ²⁶Ke lɛgŋ eke ɛmɛny mi bʼɛwl mʼow mʼɛŋn ↄny a, ↄny e sos ɛm iŋn a eke ↄnyn Jesu Krist ab ecʼaf okr ɛm a, ágb nↄnↄ.

Krist ecʼAmani Mamn ab af ecʼes an

²⁷Gbɛkↄ ow e tasi a cɛ el: ke áan es nyim nyim Krist ecʼAmani Mamn ab af, yecʼɛtŋ ke, eke mʼow mʼɛkn ↄny ɛtŋ mʼowm yɛji, mʼíri ekʼinymn es kikri ɛtŋ okar af ow tutr nyam ɛm, ɛtŋ am dogŋnin low abŋ nyam ɛm, ↄmn ekʼAmani Mamn ↄŋ ↄny a eci. ²⁸Kì yɛbr ↄny ecʼefnu a akunda kaka fɛŋ ɛm kʼↄ́ŋ erŋn kʼↄny ↄny; low na bʼow yɛgm ɛl eke -lʼirm ŋ̂, ke ↄny ecʼa, ow yɛgm ↄny ekʼanŋn ↄny e sↄg ecʼebr af; ɛtŋ ow el low ekʼanŋ Nyam ogŋ ow, ²⁹aŋke Nyam ↄŋ ↄny bibm eke kʼubr Krist nawrɛ, ɛtŋ ow elm na cɛ kↄ ke ɛmɛny íjr in e gbre yɛji. ³⁰Sicaca ɛm a, ↄny lel ɛm ab anake sʼokr af sʼam dogŋn low a. Low dogŋn nyam a cɛ eke lɛgŋ ekʼɛc ab ɛm 1.30 lɛgŋ ekʼɛc ab ɛm:Ob Kok 16.19-40. mi dogŋn, ke ɛmɛny mʼam dogŋn ɛsɛ elel ekʼuwr any ab af a.

Krist ecʼes is lel in e sagb ab

¹Ɔny ecʼↄmn ekʼↄnyn Krist ɛm a bʼↄŋ ↄny lɛc ee? In ecʼerur a bʼatr ↄny sos es ee? Bʼokar af in ecʼAbŋ Lala ab ab ee? Bʼↄnyn sↄrŋ ikŋ lel ɛrm mamn ab ↄny ↄfr ɛm ee? ²Eke ow el ɛbɛn, ke mʼam ibrm eke kʼↄŋnʼm sos ɛm iŋn tasi ↄny e nɛny af okr ɛm, ke ↄ́nyn erur nyam, ke ókar af ɛrm ɛm lel ow tutr ɛm ab. ³Kì kokr low kaka ɛm bubr ecʼabŋ ɛm oglog eke agŋ kʼɛkn ↄny eci, kↄ es is ɛm, òcr ↄny lawlɛl ɛsɛ agŋ eke igbl ogŋ akm ↄny af. ⁴Ke ɛgŋ kaka kʼↄ́lm in sↄny coco e nimamn es, kↄ ke ɛgŋ ɛgŋ ↄ́l lawlɛl yɛjʼecʼa es. ⁵Ɔny ↄfr ɛm a, ↄnyn es an ɛsɛ elel eke agŋ eke bʼuw Krist any a bi kok ab af.

⁶In, nʼanŋ ɛsɛ elel eke Nyam anŋn ab af,

aŋke godʼɛtŋ lʼel Nyam.

Gbɛkↄ lʼɛgŋm lʼatm bɛbmn ikŋ na e low any. 2.6 lʼatm bɛbmn ikŋ na e low any:odad na Grɛk ɛm wɛl ↄtu eke kʼitŋn ɛjecʼɛm dad ɛsɛ: lʼↄlm eke li kʼↄny lɛc nyam coco li bɛbmn Nyam ab.

⁷Kↄ in obi ɛm, li wal low fɛŋ eke nʼↄny a lʼɛlu es,

lʼocr in sosi libↄwi, 2.7 libↄwi:bɛ̀bmn Esayi 52.13; 53.12; Matie 20.28.

lʼel ɛgŋ ↄfr ↄfrli agŋ ecʼaraŋn,

ɛtŋ agŋ a fɛŋ ɛknʼn ɛsɛ ɛgŋ cɛ af.

⁸Lʼɛgŋ in obi ɛm lʼeb eke li kʼir ɛb es is ɛm,

ɛtŋ lʼɛlum Nyam toŋ lʼigŋ luw ɛm, olikŋ af 2.8 Jesu e lɛgŋ ab ɛm a, ów eŋuŋ kok ɛsɛl ɛgbɛl tasi a wɛl bʼɛw olikŋ af. e luw ɛm bↄbↄ yɛji.

⁹Es is na sosiɛm, Nyam ↄny igblʼl ogŋ,

ɛwʼr low fɛŋ e nuŋ af

ɛtŋ ↄŋʼn nin ekʼagb akm nin fɛŋ.

¹⁰Ow bʼow ↄŋ ob ob fɛŋ eke anŋ afr,

wus af aŋa lele ↄŋnes ab a,

ok ↄwrↄkp wus eke -li bʼiri Jesu e nin a.

¹¹Ke nɛny nɛny fɛŋ kↄ́klm eke Jesu Krist el Ɛs Kↄtↄkↄ,

Ɛs Nyam ecʼanygbɛl eci. 2.11 Akr 10 toŋ 11 ab a bʼotarir es Esayi 45.23 ab, Sɛptant ɛm ecʼodad eke wɛl oc; akr 6 toŋ 11 a, am ɛlu kretiɛnɛl ecʼɛj sig sig nyam e low ↄkm.

Jɛ̀jan ɛsɛ mrabri af wus af aŋa

¹²Na sosiɛm, erur ɛm ecʼagŋ lawlɛl, ɛsɛ elel eke sɛgŋ fɛŋ bʼɛlumn Nyam ab af, ùcur ↄnyn es ɛbɛn ke kókr juma ↄny e sel a eke ɛŋan a eci, muru ɛm lel ɛlum ɛm ab, ke ow kʼélm ɛm ecʼany af cɛ, kↄ ɛm e jam jam yɛji, ¹³aŋke Nyam in obi li bʼↄŋ ↄny low ɛgŋ eb lele ow e kok ab ecʼabusu ɛsɛ elel eke li bɛbm ab af.

¹⁴Low fɛŋ eke bʼow kokr a, kʼélm abr ɛny ɛm lele ów es kpakpab ɛm ab, ¹⁵yecʼɛtŋ ke éel agŋ eke abr ɛnym anm lís ke ayl, Nyam ecʼey eke ↄnym wɛwr, ke ir agŋ eke ↄny ɛnyɛmbri yony yony lele ów eŋuŋ ab ecʼaraŋn. Ow it ke ám jɛjan ɛl ecʼaraŋn ɛsɛ mrabri af, ¹⁶aŋke ↄnymn sel ɛŋn ecʼodad ab ab. Eke bi kokr ɛbɛn, mʼbʼow mʼↄny sos ɛm iŋn ↄny eci, lɛgŋ eke Krist bʼow ow a, aŋke ow bʼow yɛgmʼm eke ow elm ↄfr ↄfr mʼurum es, mʼijm gbre mi kokm juma.

¹⁷Ow kʼↄdm ke ɛm e mebl a ók es, él egb waw eke wɛl kok am igŋ ↄny ecʼↄmn eke ↄnyn Nyam ɛm ab af. Eke ow el ɛbɛn ow kʼɛcr a, sos ɛm am iŋnʼm ɛtŋ mʼam cɛc sos ɛm iŋn ikŋ na ↄny fɛŋ ab. ¹⁸Ɛbɛn nɛnyɛmbri nyam, ↄny yɛji ow it eke sos ɛm kʼiŋn ↄny ke cɛ́cr sos ɛm iŋn ikŋ na ɛm ab.

Pↄl am ɛrm Timote lel Epafrodit ab Filip baŋn

¹⁹Mʼam ↄny tutr eke Ɛs Kↄtↄkↄ Jesu e nin ɛm, lɛgŋ tɛl ɛm mi kʼↄŋ Timote ow ɛkn ↄny, yecʼɛtŋ ke mʼíri ↄny e lís e low, ke ow átrʼm sos es ɛm obi ɛm. ²⁰Tasi ɛm a, Timote cɛ anake el ɛgŋ eke ɛsɛ ɛm af, ↄny e low bʼokr ɛrmij, ke bi tutr ↄny e low tasi a. ²¹Agŋ likpr a fɛŋ ecʼa, ɛl obi e lís ecʼów ecʼɛrmij cɛ -li bʼebr, kↄ ow elm Jesu Krist ecʼów a gbɛ. ²²Timote ecʼa, uwr any yɛjʼeke lʼɛlu in e nawrɛ ij a ↄkm, elel eke li kokr juma ɛm ab ɛsɛ iy lele ɛs ab af, Amani Mamn sosiɛm ecʼa. ²³In anake mʼam tutr eke mi kʼɛrmʼn lʼow ↄny ogŋ yogŋ kpɛkŋ eke ɛm e lís owi a bʼow aylʼm sos ɛm a; ²⁴ɛtŋ mʼↄny ↄmn Ɛs Kↄtↄkↄ ɛm, eke lɛgŋ tɛl ɛm, mi bʼow mʼow mʼɛkn ↄny ɛm obi yɛji.

²⁵Gbɛkↄ mi tutr yɛjʼeke ow akpl e mi kʼↄŋ ɛy lisijim Epafrodit 2.25 Epafroditel Filip e Nyamel a ecʼɛgŋ eke ɛrm im anŋ Pↄl saw. eke el ɛm lawl juma kok ɛm lele low dogŋn ɛm ab a, ów ɛkn ↄny, in eke ɛrmn in lʼow lʼisʼm abu ɛlum a eke mʼam eku a. ²⁶Nʼam erur tasi eke ɛmɛny li kʼɛkn ↄny fɛŋ ɛtŋ nʼam ↄny ɛrmij yɛji, aŋke irir in ecʼↄl a e low. ²⁷Nawrɛ, ↄl ↄnyʼn tasi toŋ ow anŋ tɛl cɛ ke blel lʼúw, kↄ Nyam ikŋʼn sↄrŋ; ɛtŋ ow elm in sosiɛm sʼↄny cɛ, kↄ ɛm sosiɛm yɛjʼeci, yecʼɛtŋ ke sos kʼↄ́wm im es ɛmɛny obnm na eke ↄwʼm es a. ²⁸Ow sosiɛm a, mʼam ogŋ es eke mi kʼↄŋʼn lʼow nʼɛŋn ↄny, yecʼɛtŋ ke ɛmɛny bʼɛkan in a, ow ↄ́ŋ ↄny sos ɛm iŋn, ke ɛm eci sos es ↄw a óc es. ²⁹Ow akpl eke kʼebr ir sos ɛm iŋn ɛm, ɛsɛ ɛgŋ lisijim af Ɛs Kↄtↄkↄ ɛm. Ow it ke ↄ́nyn agŋ akpasu nɛnɛ a eci sos usr, ³⁰aŋke Krist e juma sosiɛm anake blel lʼúw a. Ɛtŋ blel lʼírmn in ecʼowr anŋ a, abu ɛlum a eke ↄtumn eke ↄny obi kʼocr isrʼm, ke in lʼoc lʼisʼm ab ɛm.

Ɛgŋ eke bʼↄny ↄmn Krist ɛm a, el nɛny nyam ɛs

¹Sica ɛm lisijimɛl, sos ɛm iŋn ↄny eke okar af Ɛs Kↄtↄkↄ ab a. Ɛtŋ ow ɛymʼm sos ɛm eke mʼam ebr low yecʼa eke mʼikŋ anym mʼawŋ ↄny ow e lɛl ab ɛm; ↄny ecʼa ow akpl ɛbɛn. ²Ɛ̀wr sos ɛrm juma eŋuŋ kok ɛsɛl amua, mↄwr amua, 3.2 Jwifɛl ogŋ a ↄwr el ndey nyam ekʼaylm, ke el sikpl ecʼob. Ɛ̀kn Matie 7.6. Aŋa, wɛwr. eke am ucu yadŋ ɛm e likr es ubr owi ↄny es a e lís! ³Agŋ eke ɛl eci likr es ubr el tasi a, ow ow el ɛy, aŋke ɛy si bʼigŋ Nyam nuŋ in ecʼAbŋ a ecʼabu ɛlum ɛm, si bʼɛlu ɛy e sos ɛm iŋn ↄkm Jesu Krist sosiɛm ɛtŋ sʼocm ɛy ecʼↄmn a sʼɛlum ów amua eke el agŋ ɛm ecʼów ab ɛm. ⁴Ke mʼↄtu cɛ eke ɛm yɛji, mʼóc ɛm ecʼↄmn a mʼɛlu ów amua e kok ɛm. Ɛtŋ eke ɛgŋ nyam ↄny tutr eke ów amua e kok bʼism ɛgŋ bibm ab, ke ɛm tasi anake mʼↄtu eke mi kʼↄny tutr akpasu na a. ⁵Ɛm, wɛl ubrʼm likr es eke wɛl ewʼm bake ow ij sɛgŋ niwn a. Ɛm, Israɛl iyli tasi mew ɛm ɛtŋ, Bɛnjamɛ ecʼeb ɛm ecʼɛgŋ, Ebre e liy mebl ɛm ɛtŋ. Yecʼeke el Jwifɛl ecʼol ecʼɛlum ecʼa, ke ɛm Farisiɛl ecʼogog mʼanŋ; ⁶ɛtŋ ɛm ecʼol ecʼɛlum ligbɛl eke mʼↄny a, ↄŋʼm mʼijr agŋ ekʼel Krist ecʼa gbre. 3.6 Ob Kok 8.3; 22.4; 26.9-11. Sica yecʼeke el ol e jɛj ok nɛny nyam ɛm a, mʼↄnym abr ɛnym kaka.

⁷Gbɛkↄ, ów amua fɛŋ eke mi lɛr ɛsɛ ob ↄny tasi af a, Krist sosiɛm a, sica mʼam lɛr ɛl ɛsɛ ów ↄfr ↄfr ekʼↄnym any af. ^8-9Jesu Krist ɛm Ɛs Kↄtↄkↄ ecʼany eke mi kʼuw a, anake el low tasi eke ↄny any a. Ɛm e tutr ɛm a, low fɛŋ eke wɛl bʼɛŋn a, elm low kaka Krist ecʼany uw a ecʼany af. Krist sosiɛm, mʼigŋ fɛŋ mʼɛlu es. Mʼↄ́ny Krist anŋ ɛm ab, ke mʼókr af in ab a sosiɛm, mʼam lɛr ów amua fɛŋ ɛsɛ lirŋ af e suw af. Ow elm ol e mʼam ɛlum a sosiɛm mʼelm low nɛnyɛmbri nyam ɛs, kↄ ↄmn eke mʼↄny Krist ɛm a sosiɛm. Nyam anake bʼↄŋ ɛgŋ el low nɛnyɛmbri nyam ɛs a, ɛtŋ ɛgŋ eke bʼↄny ↄmn in ɛm a, li bʼↄŋ ow ow el nɛny nyam ɛs. ¹⁰Low a cɛ eke mʼam erur a el: ke mʼúw Krist any, ke mʼúw abusu a yɛji ekʼↄŋʼn lʼigb luw ɛm ab any. Ɛtŋ ow eke ɛmɛny mʼam erur a el: ke mʼíj gbre in ab, ke mʼúw ɛsɛ in ecʼab af. ¹¹Ɛbɛn eke mʼam ↄny ↄmn eke batŋ mʼuw, ke ɛm yɛji mʼánŋ agŋ ekʼuw ab ɛm mʼigb ana.

Ùru es im ke ɛ́ŋn

¹²Mi dadm mʼɛsmɛ mʼɛŋn ow e mʼam ↄl ab ŋ̂, oglog ke mi kok ow iy nɛny ŋ̂! Gbɛkↄ mʼam uru es 3.12 Gbɛkↄ mʼam uru es:aŋa Pↄl oc es eke wɛl bʼuru eci labm sↄg eke wɛl bʼɛŋn e low am bɛbmn Krist ɛm e labm sↄg eke wɛl bʼɛŋn ab ab. mʼim cɛ eke mi kʼɛŋn es uru a eci labm sↄg a, aŋke Jesu Krist jɛj ↄnyʼm lɛgŋ a ɛtŋ. ¹³Njaŋ, agŋ lisijimɛl, mi dadm eke mʼɛŋn labm sↄg a ŋ̂; gbɛkↄ low nyam cɛ mʼam kok: mʼíjl low sig fɛŋ es, ke mʼátr sos es mʼim mʼɛŋn ow a ekʼanŋʼm anym a. ¹⁴Mʼam uru es mʼim eke mi kʼigŋ ow e nuŋ, yecʼɛtŋ ke mʼɛ́ŋn labm sↄg a eke Nyam, Jesu Krist ɛm, am ɛsŋ ɛy eke si kʼɛŋn afr a.

¹⁵Ɛy fɛŋ eke sʼↄny ↄmn eke usu a, sʼↄ́nyn tutr nyam coco na. Ow e jam a, ekʼↄny ɛm ecʼagŋ nyam nyam am ↄny tutr ɛjeci, Nyam bʼow ayal ow e low ↄŋ ↄny. ¹⁶Kↄ ca, aŋa eke sʼow bake sʼigŋ a, sʼébr ebr nyam a cɛ eke sʼeb toŋ ke sʼigŋ aŋa a.

¹⁷Agŋ lisijimɛl, ↄny fɛŋ kòkr ɛsɛ ɛm af. Si yɛgm ↄny sɛwl; ow sosiɛm lɛ̀ɛr agŋ a fɛŋ eke bʼan es sɛwl ikŋ na af a. ¹⁸Mi dad ↄny sakp nↄnↄ yɛji ɛtŋ mʼam ebr ɛm mi dad ↄny ↄŋn ikŋ ɛm yɛfɛnyna yɛjʼeke: agŋ nↄnↄ anŋ eke ɛl ecʼes an a bi yɛgm eke -lʼel Krist ecʼolikŋ a ecʼefnu. 3.18 Krist ecʼolikŋ a ecʼefnu:agŋ amua ecʼa, Krist ecʼolikŋ af a eke uw a elm ɛl e low. -Lʼɛgŋmn eke -li kʼij gbre ɛsɛ ow ecʼab af.¹⁹Ɛl akpasu na, irm cɛ -li bʼow -lʼirm, aŋke ɛl e Nyam el ɛl eci lok a, 3.19 ɛl e Nyam el ɛl eci lok a:aŋa Pↄl, kʼaw ke ow él ob e wɛl dɛdŋn Mois ecʼol ab ɛm eke wɛl kʼijm a e low nʼam dad (Rom 16.18; Kolↄs 2.16, 20-21) oglog ke ow él likr es ubr owi. ɛtŋ low eke kʼel ɛ́s ↄny ɛl a, bʼiŋn ɛl sos ɛm. Ɛl, wus ecʼów cɛ bʼanŋ ɛl nuŋ ɛm. ²⁰Ɛy ecʼa gbɛ, ɛy ecʼɛb ir usu anŋ afr, ɛtŋ ɛgŋ a eke sʼam eku ɛsɛ ɛy e sↄg ɛs af, eke el Ɛs Kↄtↄkↄ Jesu Krist a, bʼow anŋ afr yogŋ ow. ²¹Ɛtŋ li bʼow lʼitŋn ɛy e sos megl a eke bʼugŋ es a, ke nʼↄ́ŋ ow anŋ ɛsɛ in ecʼanygbɛl e sos megl ab af, in ecʼabusu a eke ow ɛm li bʼↄŋ mob fɛŋ is es in ecʼes ɛw a ecʼany af a.

Ów ↄm

¹Na sosiɛm, erur ɛm ecʼagŋ lisijimɛl, mʼam erur tasi eke ɛmɛny mi kʼɛkn ↄny, ↄny eke eel ɛm e sos ɛm iŋn lel ɛm ecʼany eb tufɛ 4.1 any eb e tufɛ:el ob ap eke wɛl bʼↄŋ ɛgŋ eke bʼeb any a, na anake Pↄl am oc Filip e Nyamel ecʼagŋ a bɛbmn a. Ɛ̀kn 1 Tesaloni 2.19 yɛji. ab a; kin elel eke kʼinymn es kikri Ɛs Kↄtↄkↄ ab ↄny ecʼɛb ir ɛm.

²Evodi lele Sɛntis ab, mʼam ŋↄŋn ↄny, mʼok ↄny mʼɛrm sabu af, òkar af ↄny ecʼɛb ir ɛm Ɛs Kↄtↄkↄ e nin ɛm. ³Ɛtŋ ŋ, ɛm lawl 4.3 ɛm lawl:Pↄl am ↄwl Nyamel a ecʼidr ɛsɛl ab ɛm e nyam. Grɛk ɛm a, juma ɛm e lawl e nin el: susugↄs. Agŋ bɛb tutr eke nin na el ɛgŋ a eke Pↄl am ↄwl a e nin tasi. tasi juma kok ɛm, mʼam dadʼŋ eke kʼɛlum ↄyↄw yony na abu, aŋke ɛm ab -li dogŋn Amani Mamn a ecʼↄb e low, Klema yɛji, lele ɛm e juma kok ɛm ecʼagŋ lawlɛl ɛjecʼa fɛŋ eke ɛl ecʼen anŋ sel ɛŋn e lɛl4.3 sel ɛŋn e lɛl:ɛ̀kn Es Ɛkn 3.5. ab ɛm a.

⁴Sos ɛm íŋn ↄny sɛgŋ fɛŋ eke okar af Ɛs Kↄtↄkↄ ab a. Mʼam dadr ɛm, sos ɛm íŋn ↄny!

⁵Ɛ̀lul ↄny ecʼɛrm frↄrↄ ↄkm agŋ fɛŋ e lís, aŋke Ɛs Kↄtↄkↄ ecʼow a ibnm ij. ⁶Kʼèbar low kaka ecʼɛrmij, kↄ low low fɛŋ ɛm, ìbrmn Nyam ↄny e ŋↄŋn ɛm, low yecʼa eke ↄnyn ow ecʼes abur a, ìbrmn in ɛrm eke bʼↄkn in e low ab ɛm. ⁷Ɛtŋ Nyam ecʼɛrm es ɛy a eke agb akm nuŋ ɛm ↄny fɛŋ a, bʼow ↄsu ↄny e mɛrm a lele ↄny e sow tutr ab ab Jesu Krist ɛm.

⁸Sica agŋ lisijimɛl, kin yecʼekʼit eke kʼɛwr ɛrm af: low fɛŋ eke el nawrɛ ke it eke wɛl kʼɛlum, low fɛŋ eke el low nɛnyɛmbri nyam lele lala ab, low fɛŋ eke wɛl ↄtu eke wɛl kʼerur ke wɛl ɛ́gŋ eb, low nimamn fɛŋ lele low fɛŋ ekʼit eke wɛl kʼaw ab. ⁹Kòkr yecʼa eke wewar ke ebr lele ow eke irir mi dad, ke ɛkanʼm mi kok ab ab. Ɛtŋ Nyam a eke bʼↄŋ agŋ ɛrm es ɛy a, bʼow anŋ ↄny ab.

Pↄl e bia ekʼam ɛlu Filip eyŋ

¹⁰Mʼɛŋn sos ɛm iŋn ligbɛl ɛm lel Ɛs Kↄtↄkↄ ab ecʼɛb ir ab ɛm, aŋke ɛwal mɛny ↄnyn ɛm ecʼabu ɛlum ecʼerur. Abu ɛlum ecʼerur ikŋ na ↄnyn, kↄ abusu anake ↄtumn ↄnymn eke kʼɛlul il ↄkm a. ¹¹Ow elm es abur ɛm eke mʼanŋ a sosiɛm mi dadm nɛnɛ. Tasi ɛm a, ɛm mʼuw any eke ow a cɛ eke mʼↄny a ↄdŋʼm ŋ̂. ¹²Ɛm mʼuw gbre ɛm ecʼɛb ir any ɛtŋ mʼuw ehe ɛm ecʼɛb ir yɛjʼany. Mi wewr elel eke low fɛŋ ɛm lele susu fɛŋ ab, mi kʼɛgŋ elel eke mʼanŋn a mʼeb; ke mʼↄ́ny mʼij oglog ke mʼánŋ namn, ke mʼↄ́ny nↄnↄ oglog ke mʼↄ́ny tɛl. ¹³Mʼↄtu eke mi kʼↄbr ses babur amua fɛŋ, Krist e lɛc a eke bʼↄŋʼm ab ɛm. ¹⁴Gbɛkↄ, uwr kok eke ɛlumnʼm abu ɛm e gbre na ɛm a.

¹⁵Ɔny Filip eyŋ, uwr any tasi eke lɛgŋ a eke mʼŋgboŋ Maseduan a, lakpo ab af eke wɛl ↄb nuŋ am ↄmun Amani Mamn ab es a, ↄny cɛ eel Nyamel eke ɛlum im abu, ↄŋʼm os mʼↄtu mi kok ɛm e lís e low a. ¹⁶Ow a eke mʼanŋ Tesaloni baŋn a ɛtŋ, sakp nↄnↄ isrʼm abu ɛlum ekʼit a. 4.16 abu ɛlum ekʼit a:Ob Kok 17.1; 2 Korɛnt 11.9.¹⁷Ow elm ke mʼám ↄl ob eke wɛl kʼapʼm es; kↄ ow eke mʼam ↄl es a el, ke ɛ́ŋan ↄny eci ŋgrusiɛ. ¹⁸Mʼɛŋn mob a fɛŋ ekʼit a; ow ɛny afŋn es yɛji. Mʼɛŋn mob a fɛŋ eke ↄŋn Epafrodit eke kʼoc isʼm a, ɛtŋ sica mʼↄny fɛŋ iyʼm nɛny. Ɔny ecʼabu ɛlum a anŋ ɛsɛ ob ap sŋↄsŋↄ af, 4.18 ob ap sŋↄsŋↄ:Ɔkm Ok 29.18; Efɛs 5.2. ɛsɛ egb waw eke Nyam ɛgŋ eb, ke akplʼl sos ɛm af. ¹⁹Ɛm e Nyam a bʼow kok ↄny e lís e low fɛŋ, in e gbreŋgbi ij a ekʼɛy ↄkm Jesu Krist ɛm a sosiɛm. ²⁰Anygbɛl él Nyam ɛy Ɛs eci, akpo akpo fɛŋ. Amɛn!

Ɛsŋn es abal el

²¹Ɛ̀sŋnin Jesu Krist ɛm, agŋ a fɛŋ eke el Nyam ecʼa. Agŋ lisijimɛl a fɛŋ eke anŋ ɛm ab a yɛji am ɛsŋn ↄny. ²²Nyam ɛm ecʼagŋ a fɛŋ eke anŋ aŋa a, ab brobro agŋ a eke bi kok Sesar e juma a, 4.22 agŋ a eke bi kok Sesar e juma a:Sesar, Rom eyŋ ecʼɛgŋ fɛŋ eke bʼɛw ɛb es a e nin. Agŋ eke anŋ in ecʼakŋ a, el agŋ eke bi kok in e juma. am ɛsŋn ↄny.

²³Ke Ɛs Kↄtↄkↄ Jesu Krist ecʼↄwrↄ a ánŋ ↄny fɛŋ ab!