JAN

Jan ecʼAmani Mamn eke nↄn

Ów ekʼit eke wɛl kʼuw any

Lɛl na, Jesu eci jam us ɛs Jan nↄn. In Jwif, Sebede jim, lʼel ↄcn ibi ɛs. Lɛl na ɛm, eke li bi dad in obi ecʼodad a, li bi dad lʼɛsɛ “jam us ɛs a eke Jesu bʼerur a”. Jesu ecʼAmani Mamn a eke Jan nↄn a otarm es Matie ecʼa, Mark ecʼa lele Luk ecʼab ab. Ów lele sodad ab anŋ eke anm Amani Mamn ɛjecʼab ɛm. Amani Mamn a eci nↄn ɛm a, Jan anake anŋ jam nↄn in ecʼa; ow kʼↄdm nʼam tutr eke agŋ ikŋ anym awl silɛl ɛjecʼa ŋ̂.

Sodad eke ow ecʼiri a lↄl es a, li bʼerur ow e low. Li bʼoc mob eke sɛgŋ a fɛŋ bʼanŋ ɛy any af sʼam ɛkn a ɛsɛ low nɛnyɛmbri nyam eke lↄl es eci mɛny ɛwr af. Usuayl lele ncebn ab, mij, viny, futufutu, mɛbob ↄsu ɛs, owr anŋ: amua na anake li bʼoc li yɛgm low nɛnyɛmbri nyam eke lↄl es a. Tasi Jan ecʼAmani Mamn na eke nↄn ab ɛm, nyandrɛ odad eke bi dad low ekʼɛy eci odad kaka anm ɛm. In ecʼa sↄny coco ɛm anake Jesu dad eke “Ɛm, anŋ anŋ”, eke el nyandrɛ ɛm mʼel Nyam. Jan eci lɛl ab ɛm, ow bʼel akrowa owi a, li bʼur “mɛny ɛwr” nin, aŋke in ecʼa ow elm ɛgŋ a eke ewl a e low cɛ ↄnym any, kↄ mɛny ɛwr a e low tasi eke am ɛlu ↄkm a: Mesi a anake am kok juma a.

Jan sↄny coco anake ↄb in e lɛl nↄn a nuŋ Nuŋ Ɔb owi ɛm a. Nʼam ɛlu ↄkm li yɛgm eke Jesu el Nyam Odad eke ow ɛm Nyam kok wus nimum ke sica odad a el ɛgŋ. Grɛkɛl eci nuŋ ɛm ↄny ɛsɛl a yɛji bi dad “odad” a eci lɛc ekʼij, ke ucu afr lele wus ab ↄny es a e low, ɛl eci low yɛgm ɛm; ow kʼↄdm Jan erur eke ki dad ɛl Jesu e lís e low odad eke -lʼuwr any ɛm, yecʼɛtŋ ke ow ɛm -lʼiri eke Jesu el ɛl eci Es Eb Ɛlu Ɛs yɛji. Jan am ayal low a sosiɛm eke ni nↄn Amani Mamn a nʼↄŋ in e lɛl awl ɛsɛl a, ke ow él Jwif oglog Grɛk: «Gbɛkↄ yecʼa eke anŋ lɛl na ɛm a, wɛl nↄn yecʼɛtŋ ke úbr nawrɛ eke Jesu el Mesi, Nyam ecʼIy. Ɛtŋ eke bʼↄnyn ↄmn in ɛm a, bʼow ɛŋan sel in ɛm (Jan 20.31).»

Jesu Krist el sel ecʼodad

¹Nuŋ ↄb ɛm e low fɛŋ e kok ɛm a, ke Odad anŋ ŋ̂. Ɛgŋ a eke el odad a okr af Nyam ab, ɛtŋ Odad a el Nyam. ²Nuŋ ↄb ɛm ɛtŋ Odad okr af Nyam ab.1.1-2 Bɛ̀bmn Nyandrɛ 8.22-26.³Nyam ocʼr kokrʼr ob fɛŋ; ob kaka anm eke wɛl kok ke nʼanm ɛm; ⁴fɛŋ a eke wɛl kok a ɛŋn sel in ɛm. Sel ikŋ na el agŋ eci usuayl. ⁵Usuayl am afŋ ncebn ɛm ɛtŋ ncebn ebmʼn. 1.5 ncebn ebmʼn:odad na Grɛk ɛm a, wɛl ↄtu ekʼitŋn ɛjecʼɛm dad ɛsɛ ncebn irmnmʼn es.

⁶Nyam ɛrm ɛgŋ nyam eke wɛl bʼɛsŋ Jan ow. ⁷Nʼam ow ɛsɛ daŋku af, ke lʼíj usuayl e daŋku yecʼɛtŋ ke in ɛm agŋ a fɛŋ úb nawrɛ. ⁸In obi a lʼelm usuayl, kↄ usuayl eci daŋku cɛ lʼij. ⁹Usuayl ikŋ na el usuayl tasi a ekʼam ow wus af aŋa ayal agŋ fɛŋ a.

¹⁰Odad a anŋ wus af aŋa. Nyam ocʼr kokrʼr wus, kↄ wus uwmʼn any. ¹¹Lʼow in ecʼagŋ ɛm, kↄ in ecʼagŋ ɛgŋm ebmʼn. ¹²Gbɛkↄ agŋ bɛb ebʼr ɛtŋ ↄny ↄmn in ɛm; nʼↄŋ wɛl abusu eke wɛl kʼel Nyam ecʼey. ¹³Ow elm sos megl af e mew ab ɛm, oglog ɛgŋ ecʼerur ɛm -lʼelm Nyam ecʼey, kↄ Nyam ecʼerur ɛm -lʼel Nyam ecʼey.

¹⁴Odad a ɛwl el ɛgŋ ɛtŋ ir ɛb ɛy ab; Nyam ecʼerur eke ítŋnm lele nɛny nyam ij ab iyʼr ɛm gbↄŋ. Sʼɛkn in ecʼanygbɛl a, anygbɛl eke Iy bʼɛŋn Ɛs ɛm. ¹⁵Jan ij in e daŋku. Lʼɛlu lebl ninɛ: «Lɛgŋ a eke mʼam dad mʼɛsɛ: “Ɛgŋ nyam anŋʼm jam am ow, kↄ nʼↄny any lʼakmʼm aŋke lʼikŋ anym nʼanŋ gbuŋ ɛtŋ mʼanŋ a,” ke in ecʼodad anake mʼam dad a.»

¹⁶Tasi ɛm a, ɛy fɛŋ sʼɛŋn in eci aja ab ɛm eci ↄwrↄ a, tasi li yibr ɛy ow bobn. ¹⁷Sʼɛŋn ol Mois ɛm, kↄ Nyam ecʼerur ekʼítŋnm a lele nɛny nyam ij ab a, anŋ Jesu Krist ɛm ow. ¹⁸Lɛgŋ kaka ɛgŋ ɛknm Nyam, kↄ Iy ekpↄbi a sↄny coco eke el Nyam ke anŋ Ɛs ab a cɛ ɛluʼl ↄkm.

Jan mij ok nuŋ ɛs eci daŋku ij

Matie 3.1-12; Mark 1.1-8; Luk 3.1-18

¹⁹Jwifɛl e nuŋ af ɛsɛl ekʼel Jerusalɛm ecʼa ɛrm egb waw ɛsɛl lele Leviɛl ab Jan ogŋ a eke -li kʼibrm ow -lʼɛsɛ: «Kↄ ŋ bwo el ŋ ee?» Kin Jan eci daŋku ekʼij. ²⁰Jan ↄnynm sos es odad a e dad ɛm ɛtŋ agŋ a fɛŋ eci any af li dad lʼɛrum mar ninɛ: «Ɛm, mʼelm Mesi a.» ²¹-Lʼibrm ow ninɛ: «Ɛtŋ ŋ bwo ee? Kↄ ŋ Eli ee?» Li dad ninɛ: «Njaŋ, mʼelm Eli.» -Lʼibrm ow ninɛ: «Kↄ ŋ Kokoba ↄb ɛs ab ee?» 1.21 Jwifɛl a am eku Kokoba ↄb ɛs nyam ɛsɛ Mois af, eke sɛgŋ es abal el ɛm a kʼow. Agŋ bɛb am tutr eke kokoba ↄb ɛs a bʼow el Mesi a. Ɛ̀kn Ɔkm Ok 18.15-18; Ob Kok 3.22. Ninɛ: «Njaŋ.» ²²Ɛmɛny -lʼibrm ow ninɛ: «Ke sica ŋ bwo el ŋ ee? Agŋ a ekʼɛrm ɛy a, odad si kʼↄny si dad ɛl. Kↄ ŋ ayaf am ocr ŋ sosi ee?» ²³Li dad ninɛ: «Ɛm, mʼel ɛgŋ a ekʼanŋ loj am ɛlu lebl dad ɛsɛ: Kòkr Ɛs Kↄtↄkↄ ecʼejagb a ínym sɛnyn sɛnyn a!»1.23 Esayi 40.3, Sɛptant ɛm ecʼodad a eke wɛl oc. (Kokoba ↄb ɛs Esayi ecʼodad eke dad ab ana.) ^24-25Ke ɛ́rmu ab ɛm Farisiɛl anŋ 1.24 ɛ́rmu ab ɛm Farisiɛl anŋ:Jan eci silɛl esig oglog ɛm a, ɛ́rmu a Farisiɛl. eke ɛmɛny am ibrmʼn ɛsɛ: «Eke batŋ elm Mesi a, elm Eli, elm Kokoba ↄb ɛs a, ke bla kʼↄŋ kʼam ok agŋ mij nuŋ ee?» ²⁶Jan dad ɛl ninɛ: «Ɛm, mʼam ok ↄny mij nuŋ mij ɛm; gbɛkↄ ↄny ecʼaraŋn a, ɛgŋ nyam anŋ eke uwmn any. ²⁷Nʼanŋʼm jam nʼam ow, ɛtŋ mʼitm bↄbↄ yɛji eke mi ki mↄmu in e cↄkrukpↄ meb ab es.» 1.27 Jwifɛl ogŋ a, ke éb utu ɛgŋ a, mↄmuʼn cↄkrukpↄ meb es, yↄyↄgʼr akr es. Juma ikŋ na elm Jwifɛl eci, kↄ madu eci.²⁸Ów amua fɛŋ am ɛy Betani ɛb ɛm Jurdɛn jam, yogŋ a eke Jan am ok agŋ mij nuŋ a.

Jesu, Nyam e licɛbli

²⁹Eke lɛgŋ ɛny akr af a, Jan ɛkn Jesu ekʼam ow in ogŋ ɛtŋ li dad ninɛ: «Kin Nyam e licɛbli a eke bʼow ↄny wus na e sikpl oc es a. 1.29 Nyam e licɛbli:Odad eke Jwifɛl ogŋ a, ow ecʼiri a ok nↄnↄ. Bɛ̀bmn Nuŋ Ɔb 22.8; Ɔkm Ok 12.21-27; Ob Ap 14.12; Awl 28.3-4; Esayi 53.6-7.³⁰Lɛgŋ a eke mʼam dad mʼɛsɛ: “Ɛgŋ nyam anŋʼm jam am ow, nʼↄny any lʼakmʼm, aŋke lʼikŋ anym nʼanŋ gbuŋ ɛtŋ mʼanŋ a,” ke in ecʼodad anake mʼam dad a. ³¹Mʼuwm ɛgŋ a ekʼow kʼel ab any, gbɛkↄ mʼow eke mi kʼok agŋ mij nuŋ mij ɛm, yecʼɛtŋ ke mʼↄ́ŋ Israɛl ecʼagŋ a uwʼr any.» ³²Ɛmɛny lʼij daŋku li dad ninɛ: «Mʼɛkn Abŋ Lala ekʼanŋ afr us es ɛsɛ kel af ke sigʼr es af. ³³Ke mi kʼuwm ɛgŋ eke lʼel ab any, gbɛkↄ Nyam eke ɛrmʼm mʼow eke mi kʼok agŋ mij nuŋ mij ɛm a dadʼm ninɛ: “Bʼow ɛkn Abŋ eke bʼow us es ke sig es ɛgŋ nyam af, in anake li bʼow lʼok agŋ mij nuŋ Abŋ Lala ɛm a.” ³⁴Mʼɛkn low na ɛtŋ mʼam ij daŋku eke ɛgŋ na el Nyam ecʼIy.»

Jesu eci jam ɛsɛl krɛkrɛ a

³⁵Eke lɛgŋ ɛny akr af a, ɛmɛny Jan lele in e jam ɛsɛl yony ab anŋ yogŋ. ³⁶Eke lʼɛkn Jesu ekʼam ɛc a, li dad ninɛ: «Kin Nyam eci licɛbli a ↄ!» ³⁷Eke Jan eci jam ɛsɛl yony a iri odad na a, -lʼus ow jam. ³⁸Jesu ɛwl sos mɛny, lʼɛkn eke agŋ yony am usʼr jam, ɛtŋ lʼibrm wɛl ninɛ: «Kↄ ↄny, bla am ↄↄl ee?» -Lʼibrm ow ninɛ: «Rabi, kↄ ŋ bogŋ ir ee?» (Rabi e nyandrɛ el “Low yɛgm agŋ ɛs.”) ³⁹Li dad wɛl ninɛ: «Òwr, bʼow ɛkan.» Ke ow am titm ncebles eci wanci yar. -Nʼim -lʼɛkn yogŋ a eke lʼir a, ɛtŋ -nʼanŋ ow ab lɛgŋ ikpr a.

⁴⁰Agŋ a ekʼiri Jan eci sodad a ke us Jesu jam a e nyam el Andre, Simↄ Piɛr lisijim. ⁴¹Lʼikŋ anym nʼim lʼɛkn lisijim Simↄ ɛtŋ li dad ow ninɛ: «Sʼɛŋn Mesi a.» (Mesi a e nyandrɛ el “Krist”.) ⁴²Andre ɛwl Simↄ Jesu ogŋ a. Jesu lɛrʼr seŋ ɛtŋ dadʼr ninɛ: «Ŋ Simↄ, Jan jim; wɛl bʼow ɛsŋʼŋ Kefas.» (Ow e nyandrɛ el “Lob”.) 1.42 Simↄ, Jan jim:Ɛ̀kn Matie 16.17 lele ow ecʼakr otar ab ab. Kefas: ke Arame ɛm ana. Grɛk ɛm a, Piɛr.

⁴³Eke lɛgŋ ɛny akr af a, Jesu ɛw eke kʼim Galile ɛtŋ lʼↄbr Filip. Li dad ow ninɛ: «Ùsʼm jam!» ⁴⁴(Filip a Bɛtsayida ɛb ɛm ecʼɛgŋ; ɛb na anake Andre lele Piɛr ab yɛji el ow ecʼagŋ a.) ⁴⁵Filip ↄbr Natanaɛl ɛtŋ dadʼr ninɛ: «Natanaɛl, ɛgŋ a eke Mois dad in ecʼodad ol e lɛl ab ɛm, 1.45 Ol e lɛl:nin eke Jwifɛl ɛw Bibl ɛm e silɛl yen krɛkrɛ a. Wɛl dad kokoba ↄb ɛs ecʼow a e low Ol Ɔkn 18.15-18 ɛm. ke kokoba ↄb ɛsɛl dad ow ecʼodad a,1.45 Bɛ̀bmn Ol Ɔkn 18.18; Esayi 9.5-6; Ezekiɛl 34.23. sʼɛŋnʼn. Ɛgŋ a, Nasarɛt e Jesu, Josɛf jim.» ⁴⁶Natanaɛl dadʼr ninɛ: «Kↄ Nasarɛt yɛji, low mamn ↄtu eke kʼanŋ ow ee?» 1.46 Nasarɛt:Ɛ̀kn Matie 2.23 ecʼakr otar a. Filip dadʼr ninɛ: «Òw, ke ɛ́kn.» ⁴⁷Eke Jesu ɛkn Natanaɛl ekʼam ow titmʼn a, nʼam dad ow e lís e low lʼɛsɛ: «Kin Israɛl iy tasi; in ɛm mɛju owi kaka anm.» 1.47 Israɛl iy... mɛju owi:Israɛl el Jakↄb e nin owr; Jakↄb e nyandrɛ nyam el ɛgŋ ɛju ɛs. Ɛ̀kn Nuŋ Ɔb 25.26 lele ow ecʼakr otar ab ab.⁴⁸Natanaɛl ibrmʼn ninɛ: «Kↄ ayaf uwrʼm any ee?» Li dad ninɛ: «Eke anŋ babm e likŋ a ecʼew a, 1.48 Babm e likŋ a ecʼew:likŋ a ecʼál a bibn es titm wus. Wɛl bʼocr sos es im yogŋ tutr ów Nyam odad ab af, ŋↄŋn Nyam, awl Nyam lɛl. gbuŋ ke Filip ɛ́sŋʼŋ a, ke mʼɛknʼŋ.» ⁴⁹Af yogŋ Natanaɛl dadʼr ninɛ: «Low yɛgm agŋ ɛs, ŋ Nyam ecʼIy tasi, ŋ Israɛl ecʼɛb ebu tasi!» ⁵⁰Jesu dadʼr ninɛ: «Mi bi dad mʼɛsɛ, mʼɛknʼŋ babm e likŋ a ecʼew a ekʼanŋ a, ke kpɛkŋ úbʼm nawrɛ ee? Bʼow ɛkn ów ekʼagb akm na!» ⁵¹Ɛtŋ lʼigŋ af li dad ninɛ: «Low nawrɛ mʼam dad ↄny: bʼow ɛkan afr eke bʼow fig ke Nyam ecʼafr ɛrm ɛsɛl ám uyu, ke ám us es ɛgŋ ecʼIy e nuŋ af.» 1.51 Jesu ɛm a, jam ɛsɛl a bʼow ɛkn Nyam ecʼanygbɛl a ɛsɛ Jakↄb ecʼes ɛkn ab af. Nuŋ Ɔb 28.12-13.

Kana e mɛbi es gbɛgbl a

¹Eke sɛgŋ yony ɛc a, mɛbi ecʼes gbɛgbl nyam ɛy Kana ɛb ɛm, Galile wus af; Jesu lis yɛji anŋ ɛm. ²Wɛl ɛw Jesu lele in e jam ɛsɛl ab ab yɛji abu. ³Eke ow bʼinŋn ebr a, mar uwr. Jesu lis am dad Jesu ɛsɛ: «Mar uwr ɛl.» ⁴Kↄ li dad ow ninɛ: «Ɛm lis, bla ɛtŋ am ɛluʼm low na ɛm ee? Ɛm e wanci a kʼowm.» ⁵Ɛbɛn yɛji lis dad juma kok ɛsɛl a ninɛ: «Kòkr low yecʼa eke li bʼow lʼibrm ↄny a.»

⁶Ke yogŋ mijel nↄhↄn eke wɛl kok lebn ɛm anŋ. Mijel amua eke nyam ↄtu eke kʼij litr ekŋ yen a anake Jwifɛl bʼoc kokr ɛl eci sayl owi Nyam ecʼany af a. 2.6 Gbuŋ ke -lʼij ob, eke ob ij anŋ ɛl abu ɛm lele ob ij ecʼuwr ɛm ab a, Jwifɛl bɛb bʼakpr mij sos yecʼɛtŋ ke -lʼayl Nyam ecʼany af. Na sosiɛm anake mij amua anŋ ɛl a.⁷Jesu dad juma kok ɛsɛl a ninɛ: «Òkr mij mijel amua ɛm ow íy.» -Lʼok ɛm ow iy ok ɛnyɛmbri a. ⁸Ɛtŋ Jesu dad ɛl ninɛ: «Sica àwr mij a tɛl ke ócr imn ↄŋn es gbɛgbl a e nyimn ɛs a.» Juma kok ɛsɛl a kok ɛbɛn. ⁹Li tat mij a ekʼitŋn el mar a anm, lʼuwm yogŋ eke mar a anŋ ow ab any, gbɛkↄ juma kok ɛsɛl a ekʼaw mij a gbɛ uw any. Lʼɛsŋ mɛbi ɛs a, ¹⁰lʼigbl ow abu ogŋ ɛtŋ sica ninɛ: «Agŋ a fɛŋ mar mamn -li bʼↄb nuŋ -nʼↄŋ agŋ ɛgŋ; eke agŋ a e wɛl ɛw abu a ɛgŋ mar nↄnↄ a, ke sica -nʼↄŋ wɛl mar mij mij a gↄŋ. Gbɛkↄ ŋ ecʼa, ɛw mar mamn a es toŋ it wanci na!» ¹¹Kin elel eke Kana ɛb ɛm Galile wus af, Jesu ɛlul in eci mɛny ɛwr krɛkrɛ a ↄkm. Lʼɛlu in ecʼany gbɛl ↄkm ɛtŋ jam ɛsɛl a ubʼr nawrɛ.

¹²Eke low na ɛy oc es a, in obi in obi, lis, lisijimɛl lele in e jam ɛsɛl ab ab -lʼus nuŋ es -nʼim Kapɛrnayum. -Nʼanŋ yogŋ -li kok sɛgŋ waa cɛ.

Jesu anŋ Nyamel gbɛl a e gbugŋ a

Matie 21.12-13; Mark 11.15-17; Luk 19.45-46

¹³Jwifɛl eci Pak ecʼes gbɛgbl a titm, ɛtŋ Jesu uyu im Jerusalɛm. ¹⁴Nyamel gbɛl a e gbugŋ a, lʼɛkn agŋ ekʼam ↄl sed, mɛcɛb lele prɛndrɛ ab ij; nʼɛŋn jɛtɛ titŋn ɛsɛl yɛji eke ok es ɛl eci an ↄl usu a. 2.14 Ɛ̀kn Matie 21.12 ecʼakr otar a.¹⁵Li kok say ɛtŋ ɛl fɛŋ eke -nʼanŋn Nyamel gbɛl a e gbugŋ a, lʼogŋ lʼok wɛl ↄkm, ɛl e mɛcɛb lele ɛl e sed ab ab; nʼↄny jɛtɛ titŋn ɛsɛl ecʼos a lele ɛl eci sitabl ab ab lʼok wus; ¹⁶ɛtŋ lʼɛwar prɛndrɛ ↄl ij ɛsɛl a ninɛ: «Kʼòcr ɛm Ɛs ecʼêl a ɛsɛ an ↄl êl af! Ɔ̀nyn mob amua fɛŋ otr es aŋa!» ¹⁷In eci jam ɛsɛl a ↄkn Nyam Lɛl ab ɛm e sodad amua: O Admaga, ŋ ecʼêl a ecʼerur eke mʼↄny a, bʼow ɛtulʼm ɛsɛ al eke bʼɛtul ob af.2.17 Selu 69.10.

¹⁸Af yogŋ, Jwifɛl ecʼes ɛwɛl a am ibrmʼn ɛsɛ: «Bogŋ e mɛny ɛwr ↄtu eke ki kok, ke ow yɛgm ɛy eke low na eke kok a, ↄny ow ecʼabusu eke ki kok ɛbɛn ee?» ¹⁹Jesu dad ɛl ninɛ: «Eke ŋuŋan Nyamel na, ow bi kok sɛgŋ nyahan mʼow mʼusr ɛm.» ²⁰-Li dad ow ninɛ: «Wɛl ɛw akpo ekŋ yony miy nↄhↄn us Nyamel gbɛl na, ɛtŋ ŋ am dad eke bʼow usr ɛm sɛgŋ nyahan ee?» ²¹Ke Nyamel a eke Jesu am dad ow ecʼodad a, in e sos megl ab ana. ²²Ow ↄŋ, lɛgŋ a eke Jesu igb agŋ ekʼuw ab ɛm a, in e jam ɛsɛl a ↄkn eke lʼikŋ anym li dad odad na; ɛtŋ ow ɛm -lʼub Nyam Lɛl lele Jesu eci sodad eke dad ab ab a nawrɛ.

Ɛgŋ ɛm e low fɛŋ eke anŋ a, Jesu uw any

²³Lɛgŋ ab ɛm a eke Jesu anŋ Jerusalɛm, Pak ecʼes gbɛgbl a ecʼa, agŋ nↄnↄ ubʼr nawrɛ simɛny ɛwr eke nʼam kok ab ɛm. ²⁴Gbɛkↄ Jesu ↄnym ↄmn ɛl ɛm aŋke ɛl fɛŋ lʼuw wɛl any sɛnyn sɛnyn. ²⁵Lʼibram eke wɛl kʼotar ɛgŋ kaka fɛŋ e lís e low akr okʼr, aŋke in obi ɛm li bʼuw ɛgŋ e low eke bʼanŋ ɛrm ɛm ab any.

Jesu lele Nikodɛm ab

¹Lɛgŋ ab ɛm a, Farisiɛl ɛm ecʼɛgŋ nyam anŋ eke wɛl bʼɛsŋ Nikodɛm, lʼel Jwifɛl ecʼanym ɛsɛl ab ɛm ecʼɛgŋ nyam. ²Ncok nyam, lʼow nʼɛŋn Jesu ɛtŋ nʼam ibrm ow lʼɛsɛ: «Low yɛgm agŋ ɛs, sʼuw any eke Nyam ɛrmʼŋ ow eke ki yɛgm ɛy low, aŋke ow it ke Nyam ánŋ ɛgŋ ab ab gbuŋ ke lʼↄ́tu li kok mɛny ɛwr amua ɛsɛ elel eke am kok ab af.» ³Jesu dadʼr ninɛ: «Low nawrɛ mʼam dadʼŋ: ɛgŋ kaka kʼↄtum ɛknm Nyam e gbreŋgbi usu a, eke ow elm afr ecʼabusu ɛm wɛl ewrmʼn ɛm.» 3.3 Jwifɛl bi tutr eke -li bʼow -lʼok Nyam e gbreŋgbi usu a eke -li bʼↄsu ol a sosiɛm. Jesu am ↄny tutr na oc ɛl es nuŋ ɛm. Ow it ke ɛgŋ a nimum ítŋn yɛ.⁴Nikodɛm ibrm Jesu ninɛ: «Ɛgŋ ekʼusu a, ayaf wɛl ↄtu eke kʼewar ɛm ee? Kↄ lʼↄtu eke li kʼim lʼɛy lis e lokm wɛl ewar ɛm ee?» ⁵Jesu dad ninɛ: «Ɛɛ, low nawrɛ mʼam dadʼŋ, ɛgŋ kaka kʼↄtum ɛym Nyam eci gbreŋgbi usu a eke wɛl ewmʼn mij ɛm lele abŋ ab ɛm. 3.5 Amani Sig a eke Nikodɛm uw any sɛnyn sɛnyn a, mij el ɛrm ɛm itŋn lele sayl ab eci mɛny ɛwr. Eke Jesu dad abŋ e low, ow el ɛgŋ ɛm ecʼitŋn owi. Ezekiɛl 36.25-27.⁶Lʼow yecʼeke bʼanŋ agŋ ɛm ow a, bʼel sos megl eci; ɛtŋ low yecʼeke bʼanŋ Nyam ecʼAbŋ ɛm ow a, bʼel Abŋ eci. ⁷Eke mi dadʼŋ eke ↄny fɛŋ wɛl kʼewr ↄny ɛm afr ecʼabusu ɛm, ke ow kʼítiʼŋ any. ⁸Yogŋ eke lɛf 3.8 Lɛf lele abŋ ab a, odad nyam coco Grɛk ɛm. Odad eke wɛl am wɛwlm mɛny. bʼerur a, li bʼɛlu nʼimn; bʼiri in ecʼɛlu a, gbɛkↄ úwm yogŋ eke li bʼanŋ lʼow lele yogŋ eke li bʼim ab any. Ɛgŋ fɛŋ eke wɛl ew Nyam ecʼAbŋ ɛm a, ɛbɛn ekʼow bʼɛcr ana.»

⁹Af yogŋ, Nikodɛm dadʼr ninɛ: «Kↄ ayaf ow ↄtu eke kʼɛcr ee?» ¹⁰Jesu dadʼr ninɛ: «Ŋ kʼel Israɛl wus af eci low yɛgm ɛs ligbɛl nyam, ke kʼúwm ów amua any ee? ¹¹Ɛɛ, low nawrɛ mʼam dadʼŋ: low yecʼa eke sʼuw any a, ow ecʼodad sʼam dad, ɛtŋ low yecʼa eke sʼɛkn a, sʼam ij ow eci daŋku; gbɛkↄ ɛy eci daŋku ij a, ɛ́gŋmn ebmn. ¹²Eke mi bi dad ↄny wus ecʼów a, úbmnʼm nawrɛ; eke sica mʼam dad ↄny Afr ecʼów, ke ayaf bʼow ubrʼm nawrɛ ab ee? ¹³Ɛgŋ kaka uyum afr ekʼow elm ɛgŋ ecʼIy sↄny cɛ ekʼanŋ afr us es a! 3.13 Jwifɛl bɛb bi tutr eke Mois uyu afr im eb ol.¹⁴Ɛsɛ elel eke Mois oc lowi ɛm lorŋn ucu likŋ kʼigbl ogŋ loj a, 3.14 Ɛ̀kn Awl 21.4-9. ɛbɛn ow it eke wɛl kʼigbl ɛgŋ ecʼIy yɛji ogŋ, ¹⁵yecʼɛtŋ ke ɛgŋ kaka fɛŋ eke bʼow ubʼr nawrɛ a, ɛ́ŋn sel ekʼↄnym uwr. ¹⁶Tasi ɛm a, Nyam erur wus ecʼagŋ a afŋn es toŋ nʼↄŋ wɛl in ecʼIy ekpↄbi a, yecʼɛtŋ ke ɛgŋ kaka fɛŋ ekʼↄny ↄmn in ɛm a kʼúwm, kↄ ke nʼɛ́ŋn sel ekʼↄnym uwr. ¹⁷Tasi ɛm a, Nyam ↄↄm in ecʼIy owm wus ecʼagŋ ogŋ eke li kʼↄb wɛl low, kↄ ke Jim ɛm a, li sↄ́g wɛl. ¹⁸Ɛgŋ ekʼub Iy a nawrɛ a, Nyam kʼow ↄbmʼn low; gbɛkↄ ɛgŋ ekʼubm nawrɛ a, ke Nyam ↄbʼr low ŋ̂, aŋke lʼubm Nyam ecʼIy ekpↄbi a nawrɛ. ¹⁹Sica kin elel eke low ↄb a bʼɛcr: usuayl ow wus ecʼagŋ ogŋ, ɛtŋ agŋ erur ncebn akm usuayl aŋke -li bi kok ów eŋuŋ. ²⁰Ɛgŋ kaka fɛŋ ekʼam kok low ŋuŋ a, ↄny usuayl eci sifn ɛtŋ am kpabʼr es lís, aŋke nʼam uru eke in ecʼów eŋuŋ a kʼok ↄkm usuayl ɛm. ²¹Gbɛkↄ agŋ a eke bi kok Nyam ecʼerur a, bʼim titm usuayl, yecʼɛtŋ ke agŋ ɛ́kn sɛnyn sɛnyn eke ɛl ecʼów a e kok a ɛcr Nyam ɛm.»

Jesu lele Jan ab

²²Sica eke ów amua ɛc a, Jesu lele in e jam ɛsɛl ab ab im Jude ecʼogog a. Nʼanŋ yogŋ wɛl ab lʼok agŋ mij nuŋ sɛgŋ bɛb. ²³Jan yɛji, Ayinↄn a eke titm Salim a, nʼam ok agŋ mij nuŋ aŋke yogŋ mij nↄnↄ anŋ. Agŋ am ow in ogŋ ok mij nuŋ. ²⁴Ke wɛl kʼɛlum Jan sobel ɛm.

²⁵Sica ów es atar ɛy Jan eci jam ɛsɛl bɛb lele Jwif nyam 3.25 Jwif nyam:Jan eci silɛl esig oglog ɛm ecʼa, Jwifɛl. ab ecʼaraŋn, ów eke wɛl bi kok Nyam ecʼany af sos ayal ecʼa sosiɛm. ²⁶-Nʼim -nʼɛŋn Jan ɛtŋ -nʼam dad ow -lʼɛsɛ: «Low yɛgm agŋ ɛs, Jurdɛn jam a ecʼɛgŋ a eke anŋ ŋ ab, ke ij in e daŋku a, kↄ am ↄkn in e low ee? Aŋ! Sicaca ɛm a, nʼam ok agŋ mij nuŋ ɛtŋ agŋ a fɛŋ bʼim am ɛknʼn!» ²⁷Jan dad ɛl ninɛ: «Ɛgŋ kaka kʼↄtum ɛŋnm low ecʼabusu eke Afr ↄↄmʼn. ²⁸Ɔtur eke ↄny obi yɛji kʼijr daŋku; mi dad mʼɛsɛ: “Mʼelm Mesi a, kↄ eke wɛl ikŋ anym ɛrmʼm cɛ.” ²⁹Mɛbi ɛs anake mɛbi lis bʼel in ecʼa; kↄ mɛbi ɛs e lawl a, mɛbi ɛs a e saw li bʼanŋ ke nʼám iri ow e low; ɛtŋ eke li bʼiri mɛbi ɛs a e lebl a, li bʼanŋ sos ɛm iŋn ɛm. Ɛm eci sos ɛm iŋn ab ana, ɛtŋ sicaca ɛm a, ow iy nɛny fɛŋ. ³⁰Ow it eke in ecʼany gbɛl a ám agb, ke ɛm ecʼa ís es.

³¹Ɛgŋ ekʼel Afr ecʼa, anŋ fɛŋ eci nuŋ af; ɛgŋ ekʼel wus ecʼa el wus eci, ɛtŋ bi dad wus ecʼów. Ɛgŋ ekʼow Afr eci nin ɛm a, [anŋ fɛŋ eci nuŋ af;] 3.31 Jan eci silɛl esig oglog ɛm a, wɛl ɛ́ŋnm sodad ekʼanŋ ob na [...] ecʼaraŋn a.³²li bʼij low eke lʼɛkn ke lʼiri a eci daŋku, kↄ ɛgŋ ɛ́gŋm in e daŋku ij a ebm. ³³Ɛgŋ eke bʼɛgŋ in e daŋku ij a eb a, am ɛgŋ eb eke Nyam el low nɛnyɛmbri nyam. ³⁴Ɛgŋ eke Nyam ɛrm a bi dad Nyam ecʼodad, aŋke Nyam bʼɛlu ɛgŋ a in ecʼAbŋ a nimum fɛŋ ɛm. ³⁵Nyam erur Iy a ɛtŋ nʼↄŋ ow abusu a fɛŋ. ³⁶Ɛgŋ yecʼeke ↄny ↄmn Iy ab ɛm a, ɛŋn sel ekʼↄnym uwr; ɛgŋ eke bi yayr Iy a kʼow ɛŋnm sel ikŋ na, ɛtŋ li bʼow nʼanŋ Nyam ecʼɛrm bebl a ecʼany af.»

Jesu lele Samari yↄwi ab ab

^1-3Farisiɛl iri wɛl am dad eke Jesu am ↄŋ wɛl am ok agŋ mij nuŋ nↄnↄ akm Jan, ɛtŋ nʼam ɛŋn jam ɛsɛl yɛji lʼakm ow. (Tasi ɛm a, Jesu in obi lʼokm ɛgŋ kaka mij nuŋ, kↄ in e jam ɛsɛl anake am ok agŋ mij nuŋ a.) Eke Jesu iri ów amua eke wɛl am dad a, nʼŋgboŋ Jude ɛtŋ lʼɛwl nʼim Galile. ⁴Ke nʼím a, ow it eke li kʼɛcr Samari wus af eci. ⁵Lʼow li titm Samari eci baŋn nyam eke wɛl bʼɛsŋ Sikar. Baŋn a titm Jakↄb ecʼↄgm a ekʼↄŋ jim Josɛf a. 4.5 Ɛ̀kn Nuŋ Ɔb 48.21-22; Joswe 24.32.⁶Yogŋ anake Jakↄb eci mijↄmu a anŋ a. Eke Jesu sos kikn es usu im ab ɛm a, li sig es mijↄmu a e saw. Ow ↄtu eke ki bɛbmn lɛgŋ uyu nuŋ ab.

⁷Samari yↄwi nyam ow am aw mij, ɛtŋ Jesu dadʼr ninɛ: «Yↄw na ee! Ɔ̀ŋʼm mij tɛl mʼɛ́gŋ.» ⁸(Ke in e jam ɛsɛl a im baŋn a eke kʼↄl ob ij.) ⁹Samari yↄwi a dad Jesu ninɛ: «Kↄ ŋ, eke el Jwif a, ayaf tasi ɛm eke mʼel Samari yↄwi a, am sus tasi ibrm im mij eke kʼɛgŋ ee?» (Tasi ɛm a, Samari eyŋ lele Jwifɛl ab nɛny ókrm af.) 4.9 Jwifɛl bʼoc Samari eyŋ ɛsɛ agŋ ekʼaylm Nyam ecʼany af af, brobro ↄyↄw a. Ow sosiɛm -lʼerurmn eke wɛl kʼitŋn ɛl, ɛtŋ -lʼɛgŋmn mij kpↄk nyam ɛm.¹⁰Jesu dadʼr ninɛ: «Blel uw Nyam ecʼob ap a, 4.10 Nyam ecʼob ap a:Jwif eci low yɛgm ɛsɛl bi dad Bibl ɛm eci krɛkrɛ ɛm e silɛl yen a ecʼodad ɛsɛ “Nyam ecʼob ap” af. lele ɛgŋ a ekʼam ibrmʼŋ mij eke kʼɛgŋ ab any ana, ke ŋ anake blel ɛ́wl ibrmʼn mij eke kʼɛgŋ, ke blel nʼↄ́ŋ mij ewl mij a.»4.10 Jesu eci mij ewl mij a ekʼam ur nin a el nyandrɛ ɛm odad. Abŋ Lala a eke bʼow anŋ ɛsɛ mij af, ke bʼow ↄny abŋ ɛm eci mijamn oc es, ke bʼow ↄŋ ɛgŋ Nyam ɛm e sel ekʼↄnym uwr a ecʼodad Jesu am dad. Ɛ̀kn Jan 7.38-39.

¹¹Yↄw a ↄdu eb dad ninɛ: «Ɛgŋ gbɛl, mijↄmu a im ɛm, ɛtŋ ɛmɛny sonu yɛji ↄnyam ab; bogŋ bʼow ɛŋn mij ewl mij ikŋ na ee? ¹²Mijↄmu na, ɛy lagŋ Jakↄb ↄŋ ɛy, in obi lʼɛgŋ mij a, in ecʼey lele in e mɛbob ab yɛji ɛgŋ mij na. Kↄ am tutr eke agb akm Jakↄb ee?» ¹³Jesu dadʼr ninɛ: «Ɛgŋ fɛŋ eke bʼow ɛgŋ mij na a, ɛmɛny mijamn bʼow ↄnyʼn; ¹⁴gbɛkↄ ɛgŋ eke bʼow ɛgŋ mij a eke mʼow mʼↄŋʼn a, mijamn kʼow ↄnymʼn lɛgŋ kaka. Mij a eke mʼow mʼↄŋʼn a bʼow ɛwl el mij ewl mij ekʼow ɛm sel ekʼↄnym uwr bʼow jɛjn ok ↄkm.» ¹⁵Yↄw a dadʼr ninɛ: «Ɛgŋ gbɛl, ↄŋʼm mij ikŋ na yecʼɛtŋ ke mijamn kʼↄ́nym im mʼowm aŋa mʼawm mij ij.»

¹⁶Jesu dadʼr ninɛ: «Ìm ɛsŋ acŋ ke ɛ́wl mɛny ow aŋa.» ¹⁷Yↄw a dadʼr ninɛ: «Mʼↄnym igŋ.» Jesu dadʼr ninɛ: «Ŋ e low ij eke dad ekʼↄnym igŋ a, ¹⁸aŋke ikŋ anym ↄny egŋ yen, ɛtŋ lɛgŋ na ɛm ecʼɛgŋ a ekʼin ab ir a yɛji elm ŋ ecʼigŋ. Dad low nɛnyɛmbri nyam.» ¹⁹Ɛtŋ yↄw a dadʼr ninɛ: «Ɛgŋ gbɛl, mʼam uw any eke ŋ kokoba ↄb ɛs. ²⁰Ɛy lagŋɛl Samari eyŋ igŋ Nyam nuŋ lafɛny na af, ɛtŋ ↄny Jwifɛl bi dadr eke yogŋ eke wɛl kʼigŋ Nyam nuŋ a el Jerusalɛm.» 4.20 Lafɛny a eke wɛl bʼɛsŋ Garisim a, Samari eyŋ bʼub eke yogŋ anake el Nyam nuŋ igŋ usu a. Jwifɛl gbɛ bʼub ekʼow el Jerusalɛm. Low na is ɛl ar ɛl ↄfr ɛm. Tasi ɛm a, lafɛny Garisim el Israɛl eyŋ e Nyam nuŋ igŋ usu (Nuŋ Ɔb 12.7; 33.20; Ol Ɔkn 11.29; 27.12), toŋ anake Nyam ↄŋ Salomↄ abusu us Jerusalɛm eci Nyamel gbɛl a Siↄn eci lafɛny af a (2 Ów e Wɛl Nↄn 7.11-12). Samari eyŋ bʼɛgŋ Mois eci silɛl a cɛ eci low eb ɛsɛ Nyam odad af. Ow bʼↄŋ -lʼɛgŋmn Salomↄ e low eke kok a -lʼebmn.²¹Jesu dadʼr ninɛ: «Yↄw, ùbʼm nawrɛ: lɛgŋ am ow ɛtŋ yogŋ eke bʼow igŋn Ɛs Nyam nuŋ a, ow kʼow elm lafɛny na af, ow kʼow elm Jerusalɛm yɛji. ²²Ɔny, Samari eyŋ, ↄny e Nyam eke bʼigŋn nuŋ a, uwmn in any; ɛy Jwifɛl, ɛy ecʼa eke si bʼigŋ nuŋ a, sʼuwʼr any, aŋke Jwifɛl ɛm es eb ɛlu anŋ ow. ²³Lɛgŋ am ow, ɛtŋ lɛgŋ a ow yɛjʼŋ̂, yogŋ, Nyam nuŋ igŋ ɛsɛl tasi a bʼow igŋ Ɛs nuŋ abŋ ɛm, ɛsɛ elel eke Jim ɛluʼl ↄkm ab af; tasi ɛm a, Nyam nuŋ igŋ ɛsɛl amua anake Ɛs am ↄl es a. 4.23 Ɛ̀kn Malaki 1.11.²⁴Nyam el abŋ, ow sosiɛm agŋ a eke kʼigŋʼn nuŋ a, -lʼit eke -li kʼigŋ ow nuŋ abŋ ɛm ɛsɛ elel eke Jim ɛluʼl ↄkm ab af.» ²⁵Yↄw a dadʼr ninɛ: «Mʼuw any eke Mesi a bʼow ow. (Mesi a ow e nyandrɛ el Krist.) Lɛgŋ a eke li bʼow lʼow a, li bʼow lʼotar ów a fɛŋ akr lʼok ɛy.» ²⁶Jesu dadʼr ninɛ: «Ɛm eke mʼam dadʼŋ odad a, ɛm ana.»

²⁷Ɛtŋ wanci ab af, Jesu eci jam ɛsɛl a ɛwl ow, ɛtŋ -nʼɛŋan ow eke ow am dad odad yↄw ab; eke -lʼɛkan ow a, ow e low iti ɛl any. 4.27 Jam ɛsɛl a low iti any aŋke Jwifɛl ecʼɛb ir ɛm a, low yɛgm ɛs itm eke ki dad odad yↄw ab lɛgŋ kaka; ɛtŋ ɛmɛny Samari eyŋ lele Jwifɛl ab ijarm. Gbɛkↄ ɛl ɛm ecʼɛgŋ kaka ↄtum ibramʼn low ɛsmɛ: «Kↄ bla am ↄl ee? Kↄ bla ɛtŋ am dad ów in ab ee?»

²⁸Yↄw a ɛw in e mijel a es yogŋ, ɛtŋ lʼɛwl nʼim baŋn a, nʼam dad agŋ lʼɛsɛ: ²⁹«Òwr ɛkan ɛgŋ eke dadʼm ɛm e low fɛŋ eke mi kok a. Kↄ ow kʼelm Mesi ab ee?» ³⁰Agŋ a ok ↄkm baŋn a ɛtŋ aam yogŋ a eke Jesu anŋ a.

³¹Ke ow eci wanci ab af, jam ɛsɛl a am ŋↄŋn Jesu ɛsɛ: «Ɛgŋ gbɛl, ìj ob tɛl ↄ!» ³²Kↄ li dad wɛl ninɛ: «Mʼↄny ob ij eke uwmn any.» ³³Jam ɛsɛl a am bibrmn in ɛl ↄfr ɛsɛ: «Kↄ ɛgŋ ka kʼisʼr ob ij ee?» ³⁴Jesu dad ɛl ninɛ: «Eke mi kok ɛgŋ a ekʼɛrmʼm a ecʼerur, ɛtŋ mʼuwar juma a eke lʼabulʼm a, ke ɛm ecʼob ij ab ana. ³⁵Ɔny, bʼewal egb a, bi dadr ɛsrɛ: “Ɛmɛny ow anŋ awl yar gbuŋ ke egb ub e lɛgŋ bɛ́bmn ab.” Gbɛkↄ ɛm, mʼam dad ↄny eke ki lɛɛr sↄgm a sɛnyn sɛnyn: egb a ebl, ow bɛbmn ub ab! ³⁶Ɛgŋ ekʼam ub egb a, kpɛkŋ bʼɛŋn in e labm sↄg a, ɛtŋ li bʼas egb a luku sel ekʼↄnym uwr eci; ow ɛm a, ɛgŋ ekʼam ewl lele ɛgŋ ekʼam ub ab ab bʼokr af kok sos ɛm iŋn. ³⁷Ɛɛ, nyandrɛ odad na ekʼam dad ɛsɛ: “Ɛgŋ nyam bʼewl, ke ɛgŋ ɛjeci nyam bʼub a,” el low nawrɛ. ³⁸Ɔgm nyam ɛm eke kokmn juma a, mʼɛrm ↄny imn ubr egb yogŋ; agŋ ɛjeci ikŋ anym kok juma yogŋ, ɛtŋ ↄny ɛŋan gbre eke -lʼijr a e liy.»

³⁹Yↄw a dad Samari eyŋ a ninɛ: «Ɛgŋ na dadʼm low fɛŋ eke mi kok a.» Ow ɛm a, agŋ a ub nawrɛ aŋke yↄw a dad ɛl. ⁴⁰Ow sosiɛm, eke Samari eyŋ a im ɛŋn Jesu a, -ni ŋↄŋn ow ekʼow kʼɛgŋ anŋ ɛl ab; ɛtŋ Jesu anŋ yogŋ sɛgŋ yony. ⁴¹Ɛtŋ sica Jesu, in obi ecʼodad eke nʼam dad a sosiɛm, agŋ a ekʼam ubʼr nawrɛ a am ɛny afŋn es; ⁴²ɛtŋ -nʼam dad yↄw a -lʼɛsɛ: «Sica ow elm ŋ ecʼodad a eke dad a sosiɛm cɛ sʼubm nawrɛ ij, kↄ ɛy obi sʼiriʼr nɛnym, ɛtŋ sʼuw any eke lʼel wus na ecʼEs Eb Ɛlu Ɛs tasi.»

Jesu ewlm juma idr ɛs ligbɛl nyam ecʼiy

⁴³Eke sica Jesu kok sɛgŋ yony usu a, lʼigb yogŋ nʼim Galile. ⁴⁴Tasi ɛm a, in obi lʼikŋ anym li dad ninɛ: «Kokoba ↄb ɛs ↄ́nym any in ecʼɛb tasi ab ɛm.» ⁴⁵Gbɛkↄ sica eke nʼim lʼɛy Galile wus af a, yogŋ ecʼagŋ a ebʼr sɛnyn sɛnyn, aŋke agŋ amua yɛji im Jerusalɛm Pak ecʼes gbɛgbl ab ɛm ɛtŋ -lʼɛkn ów a fɛŋ eke Jesu kok es gbɛgbl a e lɛgŋ a. ⁴⁶Sica ɛmɛny lʼɛwl lʼow Galile Kana baŋn, yogŋ a eke lʼoc mij li kokr mar a. Ɛb ebu a eci juma idr ɛs ligbɛl a anŋ yogŋ. In ecʼiy ekʼanŋ Kapɛrnayum a ↄl am ↄny. ⁴⁷Eke juma idr ɛs a iri eke Jesu anŋ Jude ow Galile a, nʼim nʼɛŋn ow ɛtŋ nʼam ŋↄŋn ow ekʼow kʼow Kapɛrnayum ewlm jim ekʼam uw a. ⁴⁸Jesu dadʼr ninɛ: «Ɔny gbɛ sɛgŋ fɛŋ, eke ɛknmn mɛny ɛwr lele ów any iti owi ab a, kʼↄtumn ubmn nawrɛ.» ⁴⁹Juma idr ɛs a dadʼr ninɛ: «Ɛgŋ gbɛl, òw ɛm ogŋ a gbuŋ ke ɛm ecʼiy a úw.» ⁵⁰Jesu dadʼr ninɛ: «Ɛ̀wl im ŋ ogŋ a, kↄ ejimŋ sos ok es.» Lʼub odad a eke Jesu dadʼr a nawrɛ ɛtŋ nʼim gbugŋ.

⁵¹Eke kpɛkŋ lʼus ejagb nʼaam a, in eci juma kok ɛsɛl a ekʼam usʼr jam ow a ↄbrʼr ɛtŋ dadʼr ninɛ: «Ejimŋ sos ok es!» ⁵²Kpɛkŋ nʼam ibrm wɛl wanci ab af eke in ecʼiy a sos ok es a, ɛtŋ -li dad ow ninɛ: «Efi ncebles eci wanci nyam ɛm, lɛgŋ na af anake lɛfr a ocʼr es lís a.» ⁵³Odad a ok iy ɛs a es sos ɛm ekʼow el wanci ab af a cɛ eke Jesu dadʼr eke ejimŋ sos ok es a, ɛtŋ in lele in ecʼakŋ ab ab a fɛŋ -nʼↄny ↄmn Jesu ɛm. ⁵⁴Sakp yony ɛm e mɛny ɛwr eke Jesu kok, Jude eke nʼanŋ nʼim Galile ab ana.

Jesu ewlm sos es wɛw ɛs nyam

¹Eke ów amua ɛc a, Jwifɛl am kok Nyam nuŋ igŋ ɛm ecʼes gbɛgbl nyam Jerusalɛm, ɛtŋ Jesu im yogŋ. ²Baŋn a e lakp a e lisany nyam eke wɛl bʼɛsŋ Mɛcɛb e lisany a, ow e saw a usu nyam anŋ eke wɛl kok ok mij ɛm, ke ↄny lɛf eb usu yen, usu a Ebre ɛm wɛl bʼɛsŋʼn Betɛsda. 5.2 Betɛsda:Jan eci silɛl esig oglog ɛm a, Bɛtsata.³Yogŋ, ↄ́lu nↄnↄ gbɛl ɛsɛ ány eflu, akr kpɛcɛ ɛsɛl, lele sos es wɛw ɛsɛl ab lɛru es. [ ⁴] 5.4 Jan eci silɛl esig bɛb ɛm a, wɛl ɛŋn sodad na: [p5.3b -Nʼam eku eke mij a kʼumu; p5.4 aŋke wanci bɛb anŋ eke Ɛs Kↄtↄkↄ ecʼɛrm ɛs a bʼus es mij ab ɛm umu mij a. Ɔlu krɛkrɛ a eke bʼɛy mij a ekʼam umu ab ɛm a, bʼewl in ecʼↄl ab ɛm ekʼow el ↄl gbɛl yɛji.]⁵Ɔlu nyam ekʼanŋ ↄl ɛm akpo likŋ lele lɛw lele niwn ab anŋ yogŋ. ⁶Eke Jesu ɛkn ↄlu a eke ɛgŋm es wus yogŋ, ke lʼiri eke owʼn anŋ ↄl ɛm lɛgŋ kpekpe ɛtŋ a, lʼibrm ow ninɛ: «Kↄ erur eke kʼewl ee?» ⁷Li dad ow ninɛ: «Ɛgŋ gbɛl, ɛm ecʼa mij a bʼumu a, mʼↄnym ɛgŋ eke kʼↄny ɛluʼm ɛm. Eke mi bʼↄl eke mi kʼim mʼɛy mij ab ɛm a, ɛgŋ ɛjeci bʼɛc afŋʼm es ɛy ɛm.» ⁸Li dad ow ninɛ: «Ìgb, òc ŋ eci ajraŋka a ke án es.» ⁹Kpɛkŋ ↄlu a ewl, lʼoc in ecʼajraŋka a ɛtŋ nʼam an es.

Ke low na, nɛnɛgŋ e lɛgŋ ow am ɛy. ¹⁰Jwifɛl ecʼes ɛwɛl a am ibrm ɛgŋ a eke wɛl ewlm a ɛsɛ: «Yɛfɛnyna nɛnɛgŋ e lɛgŋ, abusu ɛrumʼŋ es eke kʼoc ŋ ecʼajraŋka ↄnym ab.» 5.10 Jwifɛl ecʼol a ɛdŋn nɛnɛgŋ e juma kok. Eke batŋ oc ob ↄnym ab, ke juma kok a. Ɛ̀kn Matie 12.10 ecʼakr otar a.¹¹Li dad wɛl ninɛ: «Ɛgŋ a eke ewlm im a dadʼm eke mi kʼoc ɛm ecʼajraŋka a ke mʼán es.» ¹²Ɛtŋ -lʼibrm ow ninɛ: «Bwo ecʼɛgŋ dadʼŋ eke kʼoc ŋ ecʼajraŋka a ke án es ee?» ¹³Kↄ ɛgŋ a uwm ɛgŋ a ekʼewlmʼn ab any, aŋke Jesu irm agŋ a ekʼanŋ yogŋ ab ɛm.

¹⁴Eke ow bʼinŋn ebr a, Jesu ɛŋnʼn Nyamel gbɛl a e gbugŋ a ɛtŋ dadʼr ninɛ: «Sica kin eke ewl. Kì kok sikpl ij bake ɛ́ŋn low eke agb akm na.» ¹⁵Ɔlu a im ɛtŋ dad Jwifɛl ecʼes ɛwɛl a ekʼow el Jesu anake ewlmʼn a.

Iy lele Ɛs el nyam

¹⁶Ow sosiɛm Jwifɛl a at ɛŋn Jesu, low na eke li kok nɛnɛgŋ a eci. ¹⁷Gbɛkↄ Jesu dad ɛl ninɛ: «Sɛgŋ fɛŋ ɛm Ɛs abu anŋ juma kok ɛm 5.17 Nuŋ Ɔb 2.2-3 am dad ɛsɛ Nyam eb sel in e juma ab ɛm nɛnɛgŋ e lɛgŋ. Jwifɛl a ubm yadŋ, gbɛkↄ ɛl eci tutr ɛm a, -li bʼɛgŋ -lʼeb eke nɛnɛgŋ e lɛgŋ yɛji Nyam bi nyimn afr lel wus ab. Eke ow el ɛbɛn, ke ow itm eke -li kʼↄb Jesu low. ɛtŋ ɛm yɛji abu anŋʼm juma kok ɛm.» ¹⁸Odad na sosiɛm, sica ɛmɛny Jwifɛl ecʼes ɛwɛl a am at tasi eke kʼibi Jesu aŋke ow elm nɛnɛgŋ ecʼol a eke lʼↄb es a cɛ, kↄ ɛmɛny nʼam dad eke Nyam in el Ɛs tasi. Na ɛm a, nʼam ocr in sosi ɛsɛ Nyam af. ¹⁹Ow ɛm a, Jesu ɛwl eb odad ɛtŋ dad ninɛ: «Ɛɛ, low nawrɛ mʼam dad ↄny: Iy kʼↄtum kokm low kaka in obi ɛm; yecʼeke li bʼɛkn Ɛs kok a, ow li bi kok. Tasi ɛm a, low fɛŋ eke Ɛs a bi kok a, low nyam coco a cɛ Iy a yɛji bi kok, ²⁰aŋke Iy Ɛs a bʼerur Iy a ɛtŋ li bi yɛgm ow in obi e low eke li bi kok a. Ɛtŋ ɛmɛny li bʼow li yɛgm ow ów eke bʼow agb akm amua, ɛtŋ ow bʼow iti ↄny any. ²¹Tasi ɛm a, ɛsɛ elel eke Iy Ɛs a bʼigbm agŋ ekʼuw a ke bʼↄŋ ɛl sel a, ɛbɛn nyam coco Iy a yɛji bʼↄŋ ɛgŋ eke li bʼerur a sel. ²²Ɛtŋ ɛmɛny ɛgŋ fɛŋ e lís e jɛj ok owi a, Iy Ɛs a ɛ́knm ow e low, kↄ nʼↄŋ Iy a jɛj ok owi ecʼabusu a fɛŋ, ²³yecʼɛtŋ ke agŋ a fɛŋ ↄ́ny Iy a eci sos usr ɛsɛ elel eke -li bʼↄny Iy Ɛs a eci sos usr ab af. Ɛgŋ yecʼeke usrm Iy a sos a, usrm Iy Ɛs a ekʼɛrmʼn a yɛji sos.

²⁴Ɛɛ, low nawrɛ mʼam dad ↄny: ɛgŋ kaka fɛŋ eke bʼiri ɛm e sodad a, ke bʼub ɛgŋ a eke ɛrmʼm a nawrɛ a, nʼɛŋn sel ekʼↄnym uwr ŋ̂. Nʼↄnym jɛj ok ij, ɛtŋ ow ↄŋ lʼubr luw ɛm lʼɛy owr anŋ ɛm. ²⁵Ɛɛ, low nawrɛ mʼam dad ↄny: lɛgŋ am ow, ɛtŋ lɛgŋ a lʼow yɛjʼŋ̂; lɛgŋ na ɛm agŋ ekʼuw a bʼow iri Nyam ecʼIy e lebl, ɛtŋ agŋ a eke bʼow iri lebl a, bʼow anŋ owr. ²⁶Ɛsɛ elel eke tasi ɛm a Iy Ɛs a el sel e nuŋ a, ɛbɛn nyam coco nʼↄŋ Iy a yɛji abusu eke kʼel sel e nuŋ. ²⁷Ɛtŋ eke Iy a el ɛgŋ ecʼIy a sosiɛm a, 5.27 Ɛ̀kn Daniɛl 7.13-14. nʼↄŋ ow jɛj ok owi ecʼabusu. ²⁸Ow kʼíti ↄny any. Lɛgŋ am ow, ɛtŋ ow ɛm, agŋ a fɛŋ ekʼuw wɛl ot es a bʼow iri in e lebl, ²⁹ɛtŋ ɛgŋ ɛgŋ bʼow anŋ uwↄmu ɛm ɛy ↄkm. Agŋ a eke kok ów amamn a bʼow igb ke ɛ́ŋn sel, gbɛkↄ agŋ a eke kok ów eŋuŋ a, bʼow igb jɛj ok eci. 5.29 Ɛ̀kn Daniɛl 12.2.³⁰Ɛm obi ɛm, mi kʼↄtum mi kokm low kaka fɛŋ. Nyam e low eke bi dadʼm ab af mi bi jɛj ɛgŋ e low mʼok, ɛtŋ ɛm e jɛj ok a el nawrɛ, aŋke mʼↄlm ɛm e low eke mʼam erur ab es, kↄ ɛgŋ a eke ɛrmʼm a ecʼa eke bʼerur a, mʼam ↄl es.»

Iy a ecʼadaŋku

³¹«Eke ɛm, mʼam ij ɛm e nuŋ af e daŋku, liy kʼow anm ɛm e daŋku ij ab ɛm. ³²Kↄ ɛgŋ ɛjeci anake am ij ɛm e nuŋ af e daŋku a, ɛtŋ mʼuw any eke daŋku ij na el nawrɛ. ³³Ɔny, ɛrmn agŋ Jan ogŋ, 5.33 Ɛ̀kn Jan 1.19. ɛtŋ lʼij low nɛnyɛmbri nyam e daŋku. ³⁴Ɛm, mʼibram eke ɛgŋ kʼij ɛm e nuŋ af e daŋku, kↄ mʼam dad ɛbɛn yecʼɛtŋ ke Nyam sↄ́g ↄny. ³⁵Jan ɛw ɛsɛ kɛniɛ eke wɛl igŋ kʼam iri ayal usu af, ɛtŋ ɛgŋn ebr kokr sos ɛm iŋn in ecʼusuayl ab ab wanci tɛl eci cɛ. ³⁶Kↄ ɛm e daŋku ij a eke mʼↄny a, agb akm Jan ecʼa: ów amua eke mʼam kok a, amua tasi eke ɛm Ɛs ↄŋʼm eke mi ki kok a, am ij ɛm e nuŋ af e daŋku, ɛtŋ am yɛgm eke ɛm Ɛs ɛrmʼm. ³⁷Ɛtŋ ɛm Ɛs eke ɛrmʼm a yɛji am ij ɛm e nuŋ af e daŋku. Gbɛkↄ tasi lɛgŋ kaka irimn in e lebl ɛtŋ ɛmɛny lɛgŋ kaka ɛknmn in ecʼelel eke nʼanŋn a. ³⁸In eci sodad a írm ↄny ɛm, aŋke úbmn ɛgŋ a eke lʼɛrm a nawrɛ. ³⁹Bi wewar Nyam e Silɛl a mɛwl ɛm eke kʼuwr any, aŋke bi tutar eke kʼɛŋan sel ekʼↄnym uwr ɛl ɛm. Ke tasi ɛm a, sodad amua anake am ij ɛm e nuŋ af e daŋku a! ⁴⁰Ɛtŋ ɛbɛn yɛji, érurmn eke kʼowr ɛm ogŋ ɛŋan sel tasi a ekʼↄnym uwr a.

⁴¹Ɛm, mʼↄlm agŋ ecʼes susm ab es. ⁴²Kↄ ↄny ecʼa, mʼuw ↄny any: mʼuw any eke ↄnymn Nyam ecʼerur. ⁴³Mʼow ɛm Ɛs e nin ɛm ɛtŋ ɛgŋmn ebmnʼm. Gbɛkↄ ekʼɛgŋ ɛjeci nyam ow in obi e nin ɛm bʼow ebr ir! ⁴⁴Bʼerurir ↄny ↄfr ɛm ecʼes susmnin owi, ɛtŋ ↄ́lmn Nyam sↄny coco ogŋ ecʼes susm owi ab es; ke ayaf ↄtur eke kʼubrʼm nawrɛ ab ee? ⁴⁵Ɛm Ɛs ecʼany af a, kì tutar eke mʼow mʼok ↄny ów af; kↄ Mois anake bʼow ok ↄny ów af a, in ɛm eke ocr ↄny ecʼↄmn a ɛlul a. ⁴⁶Tasi ɛm a, eke ubr Mois nawrɛ ke ɛm yɛji bʼow ubrʼm nawrɛ, aŋke ɛm e lís e low anake Mois nↄn a. 5.46 Ɛ̀kn Ol Ɔkn 18.15.⁴⁷Kↄ eke sica yecʼa eke Mois nↄn ɛm e lís a ubmn nawrɛ, ke ayaf ↄtur eke kʼubr ɛm e sodad a nawrɛ ee?»

Jesu iyr agŋ ekʼafŋ fandi yen es lok

Matie 14.13-21; Mark 6.30-44; Luk 9.10-17

¹Eke low na ɛc a, Jesu imn Galile ogog a e mij lekpl a eke wɛl bʼɛsŋ Tiberiad yɛjʼa e jam. ²Agŋ nↄnↄ am usʼr jam aŋke -nʼam ɛkn mɛny ɛwr eke nʼam kok ↄ́lu a ecʼewlm ɛm. ³Ow ↄŋ Jesu uyu ligigl nyam af ɛtŋ sig es yogŋ jam ɛsɛl ab ab. ⁴Pak ekʼel Jwifɛl ecʼes gbɛgbl a e lɛgŋ titm. ⁵Eke Jesu bʼigbl any ogŋ a, lʼɛkn agŋ nↄnↄ ekʼam ow in ogŋ, ɛtŋ lʼibrm Filip ninɛ: «Bogŋ sʼↄtu eke si kʼↄl futufutu sʼↄŋ agŋ a fɛŋ ij ee?» ⁶Tasi ɛm a, low a eke Jesu am ow kok a, in obi lʼuw any, kↄ lʼibrm Filip low na eke li kʼɛbm ow a sosiɛm. ⁷Filip dadʼr ninɛ: «Eke ow el os ekŋ lɛw yɛji, 6.7 Os ekŋ lɛw:Os na ij juma kok ɛs nyam eci sɛgŋ ekŋ lɛw e labm sↄg. si kʼↄtum sʼɛŋnm futufutu ekʼɛgŋ ɛgŋ kʼɛŋn likpr liy nyam bↄbↄ yɛji.» ⁸Andre, Simↄ Piɛr lisijim ekʼel in e jam ɛsɛl ab ɛm ecʼɛgŋ nyam a dadʼr ninɛ: ⁹«Aŋa, iyli nyam ↄnym futufutu yen lele ↄcn yony ab. Gbɛkↄ na yɛji ow elm low kaka agŋ bubutɛ na ecʼany af.» ¹⁰Ɛtŋ Jesu dad ninɛ: «Ɔ̀ŋn agŋ a fɛŋ ok es.» (Ke usu a, suw owr anŋ nↄnↄ.) Sica ɛl fɛŋ -lʼok es; -lʼↄtu eke -li kʼij egŋ fandi yen. ¹¹Jesu ot futufutu a, lʼɛlu Nyam bia, ɛtŋ nʼↄŋ wɛl cɛc ↄŋ agŋ a ekʼok es yogŋ a. Li kok ɛbɛn ↄcn ab ab yɛji, nʼↄŋ wɛl ow a fɛŋ eke -nʼam ibrm a. ¹²Eke sica agŋ a fɛŋ ij ob lok iy a, Jesu dad in e jam ɛsɛl a ninɛ: «Kↄkŋn ekpr a eke wawal es a yecʼɛtŋ ke kaka kʼíram.» ¹³-Li kↄkŋ futufutu yen a eke -lʼijr a ecʼekpr eke wawal es a, ɛtŋ ow iy mulu ɛgbɛl lɛw yony. 6.13 Bɛ̀bmn 2 Ɛ́b Ebu 4.42-44.¹⁴Eke agŋ a ɛkn mɛny ɛwr na eke Jesu kok a, -li dad ninɛ: «Ɛgŋ na, Kokoba ↄb ɛs tasi a eke kʼow wus af aŋa ab ana.» 6.14 Jwifɛl a am eku Kokoba ↄb ɛs a eke wɛl ɛwar Ol Ɔkn e lɛl ab ɛm (Ol Ɔkn 18.15) ke bʼow el Mesi a. Bɛb eci low yɛgm ɛm a, -li bi dad eke Mesi a in bʼow in ↄŋ futufutu in anŋ afr in ok wus ɛsɛ Mois ecʼa eke in kok ab af.¹⁵Jesu uw any ekʼagŋ a bʼow ↄnyʼn lɛc ɛm ɛwʼr ɛb ebu. Ow sosiɛm ɛmɛny lʼɛwl mɛny nʼim ligigl ab af in sↄny.

Jesu am an es mij lekpl ab af

Matie 14.22-33; Mark 6.45-52

¹⁶Eke lɛgŋ ew es a, Jesu e jam ɛsɛl a us nuŋ es mij nɛny a, ¹⁷ɛtŋ ok mijɛtŋ nyam ɛm am ubr mij lekpl a imn Kapɛrnayum eci. Lɛgŋ yɛji am ukm ab, ɛtŋ Jesu yɛji kʼiim kʼɛŋnm ɛl. ¹⁸Lɛf am ɛlu lɛc ɛm ɛtŋ mra am ɛlu mij lekpl ab af. ¹⁹-Lʼↄr mij ba ow kʼij kilo yen oglog nↄhↄn ɛtŋ kpɛkŋ -lʼɛkn Jesu ekʼam an es mij ab af ow titm mijɛtŋ a, ɛtŋ erŋn am ↄny ɛl. ²⁰Gbɛkↄ Jesu dad ɛl ninɛ: «Erŋn kʼↄ́ny ↄny, kↄ ɛm!» ²¹Jam ɛsɛl a erur eke kʼↄny ɛluʼl mijɛtŋ ab ɛm, ɛtŋ kpɛkŋ mijɛtŋ a itr es yogŋ a eke -nʼaam a e nanu a. 6.21 Selu 107.23-32.

Agŋ am ↄl Jesu

²²Eke lɛgŋ ɛny akr af a, agŋ a ekʼanŋ mij lekpl a e jam a, ɛkn ekʼow el mijɛtŋ nyam cɛ anake anŋ yogŋ ncebles ɛm a; -lʼuw any eke jam ɛsɛl a im ɛl sↄny, eke Jesu ɛym ɛl e mijɛtŋ ab ɛm. ²³Gbɛkↄ simijɛtŋ ɛjeci ekʼanŋ Tiberiad am ow a, ow itr es usu a eke Ɛs Kↄtↄkↄ oc futufutu ɛlu Nyam bia ke -lʼijr a. ²⁴Eke agŋ a ɛkn eke Jesu lele in e jam ɛsɛl ab ab anm yogŋ a, -lʼok simijɛtŋ ab ɛm -nʼim Kapɛrnayum -nʼam ↄl Jesu.

Jesu el futufutu eke bʼↄŋ ɛgŋ sel

²⁵Ɛtŋ eke -nʼɛŋan Jesu mij lekpl a e jam a, -nʼam ibrm ow -lʼɛsɛ: «Low yɛgm agŋ ɛs, kↄ bogŋ eci wanci af ɛtŋ ow aŋa ee?» ²⁶Jesu dad ɛl ninɛ: «Low nawrɛ mʼam dad ↄny: am ↄↄlʼm ekʼijr futufutu molok iy ↄny a sosiɛm, kↄ ow elm ɛm e mɛny ɛwr a e nyandrɛ a eke irir a eci. ²⁷Kì kokr ob eke bʼugŋ es a e juma, kↄ kòkr yecʼa eke bʼibn ke el sel ekʼↄnym uwr a e juma. Ɛgŋ ecʼIy bʼow ↄŋ ↄny ob ij ikŋ na, aŋke tasi ɛm a, Ɛs Nyam in obi oc in ecʼabusu a e mɛny ɛwr a ɛwʼr af.» ²⁸Ɛtŋ sica -nʼam ibrm ow -lʼɛsɛ: «Kↄ juma a eke Nyam am erur a, ayaf si ki kokr ab ee?» ²⁹Jesu dad ɛl ninɛ: «Juma a eke Nyam am ibrm ↄny a el: ke ↄ́nyn ↄmn ɛgŋ a eke lʼɛrm ab ɛm.» 6.29 Bɛ̀bmn Rom 3.28.³⁰-Li dad ow ninɛ: «Bogŋ eci mɛny ɛwr ↄtu eke ki kok yɛgm ɛy ke ow af, sʼúbʼŋ nawrɛ ee? Ŋ eci juma ekʼam kok a el bogŋ ecʼee? ³¹Loj yogŋ, ɛy lagŋɛl ij futufutu ɛsɛ elel eke wɛl nↄn Nyam Lɛl ɛm ab af: nʼↄŋ wɛl futufutu ekʼanŋ afr ow a -lʼij.» 6.31 Ɔkm Ok 16.4,15; Selu 78.24.³²Ɛtŋ Jesu dad ɛl ninɛ: «Low nawrɛ, mʼam dad ↄny: afr eci futufutu a, ow elm Mois ↄↄm ↄny, kↄ ɛm Ɛs anake ↄŋ ↄny afr eci futufutu tasi a. ³³Tasi ɛm a, Nyam eci futufutu a eke bʼↄŋ ɛgŋ a, el ɛgŋ a eke bʼanŋ afr ow, ke bʼↄŋ wus na nimum ecʼagŋ a fɛŋ sel a.» ³⁴Ɛtŋ -li dad ow ninɛ: «Ɛgŋ gbɛl, sɛgŋ fɛŋ ↄŋ ɛy futufutu ikŋ na.» ³⁵Jesu dad ɛl ninɛ: «Mʼel sel e futufutu. 6.35 Futufutu el Jwifɛl ecʼob ij tasi ɛsɛ ↄ́jukru ecʼa eke egb el ɛl eci ob ij tasi ab af. Ɛgŋ yecʼeke bʼow ow ɛm ogŋ a, lɛgŋ kaka namn kʼow ↄnymʼn, ɛtŋ ɛgŋ yecʼeke bʼow ↄny ↄmn ɛm ɛm a, lɛgŋ kaka mijamn kʼow ↄnymʼn. ³⁶Gbɛkↄ mʼikŋ anym mi dad ↄny: ɛkanʼm ɛtŋ ubmn nawrɛ. ³⁷Ɛgŋ liy nyam nyam fɛŋ eke ɛm Ɛs bʼow ↄŋʼm a, bʼow ow ɛm ogŋ, ɛtŋ lɛgŋ kaka mi kʼow mʼogŋm ɛgŋ eke bʼow ow ɛm ogŋ a, ³⁸aŋke mʼanŋ afr mʼow wus af aŋa, ow elm ɛm ecʼerur kok eci, kↄ ɛgŋ ekʼɛrmʼm a ecʼerur mi ki kok. ³⁹Ɛtŋ kin ɛgŋ a ekʼɛrmʼm a e low ekʼam erur: ke mi kʼírmnm agŋ a fɛŋ a eke lʼabulʼm a e nyam, kↄ ke lɛgŋ es abal el ɛm a, mʼígbm ɛl luw ɛm. ⁴⁰Ɛɛ, tasi ɛm a, kin low ekʼɛm Ɛs am erur: ke agŋ a fɛŋ ekʼɛkn Iy a ke ↄny ↄmn in ɛm a, ɛ́ŋn sel ekʼↄnym uwr, ke lɛgŋ es abal el ɛm a, mʼígbm ɛl luw ɛm.»

⁴¹Jwifɛl a am ɛny abr ok Jesu af aŋke li dad ninɛ: «Mʼel futufutu ekʼanŋ afr us es.» ⁴²Ow sosiɛm -nʼam dad -lʼɛsɛ: «Kↄ ow elm Josɛf jim Jesu ee? Ɛs lele lis ab a, sʼuw ɛl any sɛnyn sɛnyn. Ke sica ayaf lʼↄtu eke li ki dad lʼɛsɛ: “Mʼanŋ afr mʼus es” ee?» ⁴³Jesu dad ɛl ninɛ: «Kʼɛ̀nyn abr ↄny ↄfr ɛm ↄ! ⁴⁴Ɛgŋ kaka kʼↄtum owm ɛm ogŋ eke ɛm Ɛs ekʼɛrmʼm a nyimnmʼn; ke sica ɛm, lɛgŋ es abal el ɛm a, mʼígbmʼn luw ɛm. ⁴⁵Kokoba ↄb ɛsɛl e silɛl ab ɛm e nyam ɛm wɛl nↄn: Nyam bʼow yɛgm ɛl fɛŋ low any uw.6.45 Esayi 54.13. Ɛgŋ fɛŋ ekʼiri ɛm Ɛs ecʼodad ke ɛgŋ in e low yɛgm a e low eb a, ke ɛm ogŋ nʼam ow a. ⁴⁶Ow elm ke ɛgŋ ɛkn ɛm Ɛs nyamn ɛm; ɛgŋ a cɛ eke Nyam ɛrm a cɛ ɛkn Ɛs. ⁴⁷Low nawrɛ mʼam dad ↄny: ɛgŋ ekʼↄny ↄmn ɛm ɛm a, ↄny sel ekʼↄnym uwr. ⁴⁸Ɛm anake mʼel futufutu a eke bʼↄŋ ɛgŋ sel a.

⁴⁹Ke loj yogŋ ↄny lagŋɛl ij futufutu cɛ ɛtŋ -lʼuw. ⁵⁰Gbɛkↄ futufutu a ekʼanŋ afr us es a, el futufutu ekʼɛgŋ bʼij ke úwm. ⁵¹Ɛm, mʼel owr anŋ eci futufutu ekʼanŋ afr us es. Ɛgŋ yecʼeke bʼow ij futufutu ikŋ na a, bʼow ɛŋn sel sɛgŋ fɛŋ. Futufutu a eke mʼam ↄŋ ↄny a, ke ɛm eci sos megl ana; mʼam oc mʼↄŋ ↄny yecʼɛtŋ ke wus nimum ɛ́ŋn sel.»

⁵²Ow sosiɛm, Jwifɛl a ɛl ↄfr ɛm am atar ów es lebl tuↄtuↄ ɛm dad ɛsɛ: «Kↄ ayaf ɛgŋ na kʼↄŋn ɛy in eci sos megl a sʼij ee?» ⁵³Jesu dad ɛl ninɛ: «Low nawrɛ mʼam dad ↄny: eke ijmn ɛgŋ ecʼIy eci sos megl, ɛtŋ ɛgŋmn in eci mebl a, sel ɛŋn kʼow anm ↄny ɛm. ⁵⁴Ɛgŋ yecʼeke bʼow ij ɛm eci sos megl ke bʼow ɛgŋ ɛm eci mebl a ↄny sel ekʼↄnym uwr, ɛtŋ lɛgŋ es abal el ɛm, mʼow mʼigbmʼn luw ɛm; ⁵⁵aŋke ɛm eci sos megl a el ob ij tasi, ɛtŋ ɛm eci mebl a el mar tasi eke wɛl bʼɛgŋ. ⁵⁶Ɛgŋ yecʼeke bʼij ɛm eci sos megl a, ke bʼɛgŋ ɛm eci mebl a okr af ɛm ab, ɛtŋ ɛm yɛji in yↄny sʼokr af. ⁵⁷Ɛm Ɛs ekʼɛrmʼm a anŋ owr ɛtŋ in ɛm, ɛm yɛji mʼanŋ owr; ɛbɛn nyam coco, ɛgŋ yecʼeke bʼow ocʼm gbagbal in sosi a, bʼow anŋ owr ɛm ɛm. ⁵⁸Futufutu a ekʼanŋ afr us es a, in ecʼelel eke nʼanŋn ana. Nʼanm ɛsɛ yecʼa ekʼↄny lagŋɛl ikŋ anym ij ke uw ab af. Gbɛkↄ ɛgŋ eke bʼow ij futufutu na a, bʼow anŋ owr sɛgŋ fɛŋ.» ⁵⁹Ke Kapɛrnayum eci Nyam nuŋ igŋ usu a eke nʼanŋ nʼam yɛgm agŋ low a anake nʼam dad sodad amua a.

Jam ɛsɛl bɛb igŋ Jesu ɛlu es

⁶⁰Eke -lʼirir Jesu ecʼodad a bake ow uwr a, jam ɛsɛl ab ɛm ecʼagŋ nↄnↄ am dad ɛsɛ: «Sica aŋa ow am ɛw low agbr ɛm! Bwo ecʼɛgŋ ↄtu eke kʼɛgŋ odad tuↄtuↄ na e low eb ee?» ⁶¹Jesu uw any eke jam ɛsɛl a am cacakʼr odad na af. Na sosiɛm anake nʼam dad wɛl lʼɛsɛ: «Kↄ low na gbre ow am ijr ↄny ee? ⁶²Kↄ sica lɛgŋ eke bʼow ɛkan ɛgŋ ecʼIy uyu im yogŋ a eke lʼikŋ anym nʼanŋ lʼow a, ke ayaf ow bʼow kokr ↄny ab ee? ⁶³Nyam ecʼAbŋ a anake bʼↄŋ ɛgŋ sel a; sos megl sↄny ↄnym low kaka ecʼabusu. Sodad a eke mi dad ↄny a el abŋ lele sel ab. 6.63 Bɛ̀bmn Jan 5.24 ab ab.⁶⁴Gbɛkↄ ↄny ɛm ecʼagŋ nyam nyam ubm nawrɛ.» (Ke tasi ɛm a, nuŋ ↄb ɛm ɛtŋ, Jesu uw agŋ a ekʼubm nawrɛ ab any, ɛtŋ lʼuw ɛgŋ a eke bʼow ↄl ijʼr ab any.) ⁶⁵Lʼigŋ af li dad ninɛ: «Na sosiɛm anake mi dad ↄny, eke ɛgŋ kaka kʼↄtum owm ɛm ogŋ eke Nyam ↄↄmʼn ow ecʼabusu.»

⁶⁶Ow eci wanci ab af, jam ɛsɛl nↄnↄ ocr sos es ɛtŋ ɛgŋm usmʼn jam ij. ⁶⁷Jesu am dad jam ɛsɛl lɛw yony a ɛsɛ: «Ɔny yɛji erurir eke kʼimn ee?» ⁶⁸Simↄ Piɛr dadʼr ninɛ: «Ɛgŋ gbɛl, kↄ bwo ecʼɛgŋ ogŋ si kʼim ee? Ŋ ↄny sodad eke bʼↄŋ ɛgŋ sel ekʼↄnym uwr a. ⁶⁹Sʼuw any ɛtŋ sʼub nawrɛ: ŋ el Ɛgŋ Lala eke Nyam ɛrm ow.» ⁷⁰Jesu dad ɛl ninɛ: «Kↄ ow elm ↄny lɛw yony mum mi sↄsuam mʼotm ↄny ee? Gbɛkↄ ↄny ɛm ecʼɛgŋ nyam el agn!» ⁷¹Ke Judas, Simↄ Iskariↄt iy a ecʼiy ecʼodad Jesu am dad, aŋke Judas, eke lʼel jam ɛsɛl lɛw yony ab ɛm ecʼɛgŋ yɛji, li bʼow lʼↄl Jesu lʼij.

Jesu lisijimɛl úbm Jesu nawrɛ

¹Ów amua e jam a, Jesu am ɛc ɛlul Galile ɛm; lʼerurm eke li kʼim Jude aŋke Jwifɛl ecʼes ɛw ɛsɛl a am ↄl eke kʼↄŋ wɛl ibiʼr. ²Jwifɛl eci Mɛf ecʼes gbɛgbl e lɛgŋ ow titm, 7.2 Es gbɛgbl na ɛm, wɛl bʼɛlu Nyam bia egb eke wɛl ub a eci lele Nyam ecʼɛrm mamn a ekʼↄnyn Israɛl eke -nʼanŋn loj a (Ob Ap 23.33-43; Ol Ɔkn 16.13-15; Zakari 14.16-19). Low na ecʼↄkn ɛm a, sɛgŋ lↄbŋ eke es gbɛgbl a bʼow ij a, agŋ bʼanŋ mɛf ew ɛsɛ elel eke ɛl ɛsɛl kok loj ab af.³ɛtŋ Jesu lisijimɛl am dadʼr ɛsɛ: «Ìgb im Jude yecʼɛtŋ ke ŋ e jam ɛsɛl a yɛji ɛ́kn ów a eke am kok a. ⁴Ɛgŋ ekʼam erur eke kʼil nin a, ↄ́tum kokm low es lↄl ɛm. Ɛsɛ elel eke am kok ów amua ab af a, ɛ̀lu sos ↄkm yecʼɛtŋ ke agŋ ɛ́knʼŋ.» ⁵Tasi ɛm a, lisijimɛl bↄbↄ yɛji ↄ́nym ↄmn in ɛm. ⁶Jesu dad ɛl ninɛ: «Ɛm ecʼes gbɛgbl ɛm a eke mi kʼim a e lɛgŋ tasi ki bɛbmnm ab. Ɔny ecʼa, sɛgŋ a fɛŋ akpl. ⁷Ɔny, wus ecʼagŋ kʼↄtum ↄnym ↄny e sifn; gbɛkↄ ɛm, -nʼↄny ɛm e sifn aŋke mi bi dad ɛl eci ów eŋuŋ a eke -li bi kok a ecʼodad. 7.7 Bɛ̀bmn Jan 15.19.⁸Ɔny, ìmn es gbɛgbl ab ɛm. Ɛm mi kʼowm yɛ 7.8 Mi kʼowm yɛ:Jan eci silɛl esig oglog ɛm a mi kʼow mʼowm. aŋke ɛm ecʼa, ow ki bɛbmnm ab.» ⁹Eke li dad odad na bake ow uwr a, in gbɛ nʼanŋ Galile.

Jesu im Mɛf ecʼes gbɛgbl ab ɛm

¹⁰Eke lisijimɛl a im es gbɛgbl ab ɛm a, Jesu yɛji im, gbɛkↄ lʼɛlum sos ↄkm ekʼagŋ kʼɛknʼn: ow ɛw es lↄl ɛm. ¹¹Jwifɛl ecʼes ɛw ɛsɛl a am ↄlʼl es gbɛgbl ab ɛm ɛtŋ am ibrm agŋ ɛsɛ: «Kↄ bogŋ nʼanŋ ee?» ¹²Bieku ab ɛm, wɛl am sɛsl ów nↄnↄ in e nuŋ af. Bɛb am dad ɛsɛ: «Lʼel nimamn kok ɛs.» Ɛtŋ likpr am dad ɛsɛ: «Njaŋ, li bʼirmn agŋ.» ¹³Gbɛkↄ ɛgŋ kaka ɛ́lum sos ↄkm dadm in ecʼodad aŋke ɛl fɛŋ -nʼam uru Jwifɛl ecʼes ɛw ɛsɛl a.

¹⁴Es gbɛgbl a ok araŋn, ɛtŋ ca Jesu ow ɛy Nyamel gbɛl a e gbugŋ a ɛtŋ am yɛgm agŋ low. ¹⁵Jwifɛl a low iti any ɛtŋ am dad ɛsɛ: «Ɛgŋ na eke wewrm low yɛjʼa, ayaf li bʼↄtu lʼuw ów amua any ee?» 7.15 Jwifɛl ecʼa, low yɛgm ɛs bʼɛŋn in ecʼabusu low yɛgm agŋ ɛs a eke yɛgmʼn low a ogŋ; ɛgŋ eke lɛgŋ kaka wɛl yɛgam low a, ↄnym abusu eke ki yɛgm agŋ ɛjeci low.¹⁶Jesu dad ɛl ninɛ: «Low a eke mi bi yɛgm agŋ a ánm ɛm ɛm owm, kↄ Nyam ekʼɛrmʼm a ogŋ ow bʼanŋ ow. ¹⁷Eke ɛgŋ am erur eke ki kok Nyam ecʼerur a, li bʼow lʼuw any eke ɛm e low yɛgm a bʼanŋ Nyam ɛm ow, oglog ɛm obi ɛm. ¹⁸Ɛgŋ eke bi dad in obi e nin ɛm ecʼodad a, bʼↄl in obi ecʼany gbɛl es. Gbɛkↄ ɛgŋ eke am kok juma ↄl ɛgŋ a ekʼɛrmʼn a ecʼany gbɛl es a am dad low nɛnyɛmbri nyam; yadŋ owi kaka anm in ɛm. ¹⁹Kↄ bla ɛtŋ am ↄↄl eke kʼibirʼm ee? Mois ↄↄm ↄny ol a ee? Gbɛkↄ ↄny ɛm ecʼɛgŋ kaka ánm es ol ab af.» ²⁰Agŋ a dadʼr ninɛ: «Abŋ ŋuŋ anŋʼŋ ɛm tasi, kↄ bwo am ↄl eke kʼibiʼŋ ee?» ²¹Jesu dad ɛl ninɛ: «Mɛny ɛwr nyam cɛ mi kok, ɛtŋ kin eke ↄny fɛŋ low a am iti ↄny any! 7.21 Jan 5.1-8.²²Mois ↄŋ abusu eke wɛl kʼubr agŋ likr es, ɛtŋ ɛgŋn ow e kok e low ebr nɛnɛgŋ e lɛgŋ yɛji. (Ke tasi ɛm a, low na anm Mois ɛm owm, kↄ lagŋɛl krɛkrɛ ab ɛm ow anŋ ow.) 7.22 Jesu am yɛgm ɛl eke nɛnɛgŋ e lɛgŋ a, ɛl yɛji -li bi kok ewlm owi. Ol a ibrm eke iy eke wɛl ew ow ij sɛgŋ niwn a, wɛl úbrʼr likr es. Ɛtŋ ɛmɛny ol a ibrm eke nɛnɛgŋ e lɛgŋ a, wɛl ki kokm juma. Eke likr es ubr eci sɛgŋ niwn a ɛy nɛnɛgŋ e lɛgŋ af a, wɛl kʼↄtum ɛluam sol a yony mum ij! Bla lowi wɛl ↄtu eke ki kok ee? Jwifɛl ogŋ a, ol yecʼeke wɛl bʼikŋ anym ɛw a bʼↄny any. Eke likr es ubr owi ↄb nuŋ Abraham ɛm ɛtŋ a (Nuŋ Ɔb 17.10-13), nʼↄny any lʼakm Mois ecʼol a ekʼam ɛdŋn nɛnɛgŋ e juma kok a (Ɔkm Ok 20.8-10). Ow it ke wɛl úbr etuey eke wɛl ew ow kok sɛgŋ niwn a likr es (Ob Ap 12.3), eke ow ɛy nɛnɛgŋ bↄbↄ yɛji.²³Eke wɛl bʼubr ɛgŋ likr es nɛnɛgŋ e lɛgŋ ɛtŋ ow ↄ́nym Mois ecʼol a ocm es, ke sica bla sosiɛm ɛtŋ am ebal ɛrm okrʼm af, ɛgŋ nimum eke mʼewlm nɛnɛgŋ e lɛgŋ ab ee? 7.23 Jwifɛl ogŋ a, eke iy ubr likr es, ke ow el ewlm mum; Nyam ecʼany af lʼuw es inym ŋ̂.²⁴Ɛ̀wr ↄny e sos af e jɛj ok ab es, kↄ jɛ̀jr okr low nɛnyɛmbri nyam ɛm.»

Kↄ Jesu Mesi ee?

²⁵Agŋ a ekʼir Jerusalɛm a eci bɛb am dad ɛsɛ: «Kↄ ow elm ɛgŋ a eke wɛl am ↄl eke kʼibi ab ana ee? ²⁶Ɛ̀kan, nʼam dad odad dedeku ecʼany af ɛtŋ wɛl ↄbm kpu yɛji ↄↄmʼn! Kↄ ɛy ecʼes ɛwɛl a kʼuw any ɛgŋ eb tasi eke lʼel Mesi ab ee? ²⁷Gbɛkↄ lɛgŋ a eke Mesi a bʼow ow a, ɛgŋ kaka kʼow uwm yogŋ eke li bʼow nʼanŋ lʼow ab any, 7.27 Jwifɛl bɛb bi tutr eke Mesi a bʼow ɛy ↄkm kpru ɛm eke ɛgŋ kʼow ↄtum uwm yogŋ eke li bʼow nʼanŋ lʼow ab any. kↄ ɛgŋ na ecʼa, sʼuw yogŋ eke nʼanŋ lʼow ab any.» ²⁸Jesu ekʼanŋ Nyamel gbɛl a e gbugŋ a am yɛgm agŋ low a, igbl lebl ogŋ dad ninɛ: «Uwr ɛgŋ a tasi eke mʼel ab any, ɛtŋ uwr yogŋ eke mʼanŋ mʼow ab any ee? Ow elm ɛm obi ɛm mʼowm, kↄ ɛgŋ a ekʼɛrmʼm a el nɛnyɛmbri nyam ɛs, kↄ uwmn in any. ²⁹Ɛm, mʼuwʼr any aŋke in ogŋ mʼanŋ mʼow ɛtŋ in lʼɛrmʼm yɛji.» ³⁰Ow sosiɛm, -nʼam ↄl eke -li kʼↄny Jesu, kↄ ɛgŋ ↄtum ↄnymʼn, aŋke in e wanci a ki bɛbmnm ab. ³¹Gbɛkↄ dedeku ab ɛm, agŋ nↄnↄ ubʼr nawrɛ ɛtŋ am dad ɛsɛ: «Lɛgŋ a eke Mesi a bʼow ow a, kↄ li bʼow li kok mɛny ɛwr lʼakm ɛgŋ na ecʼab ee?»

Wɛl ɛrm usu ↄsu ɛsɛl ow Jesu ecʼↄny ɛm

³²Farisiɛl a iri Jesu e lís ecʼów eke bieku ab ɛm wɛl am dad ów sɛsl ɛm. Ow sosiɛm, egb waw ɛsɛl ɛgbɛl a lele Farisiɛl ab ab ɛrm usu ↄsu ɛsɛl eke kʼim ↄnyʼn. ³³Jesu dad ninɛ: «Ɛmɛny mʼanŋ ↄny ab lɛgŋ tɛl eci gbuŋ ke mʼɛ́wl mʼim ɛgŋ a ekʼɛrmʼm a ogŋ. ³⁴Bʼow ↄↄlʼm ɛtŋ kʼow ɛŋnmnʼm, aŋke kʼow ↄtumn iimn yogŋ a eke mʼow mʼanŋ a.» ³⁵Jwifɛl a am ibrmn ɛl sosi ɛsɛ: «Kↄ bogŋ li bʼow nʼim ɛtŋ si kʼow sʼↄtum sʼɛŋnmʼn ee? Kↄ tutr nʼↄny eke li kʼim Jwifɛl a eke mↄmun es agŋ a ekʼelm Jwifɛl a ogŋ ee? Lʼerur eke li kʼim li yɛgm agŋ ekʼelm Jwifɛl a low ee? ³⁶Sodad amua eke li dad: “Bʼow ↄↄlʼm ɛtŋ kʼow ɛŋnmnʼm, kʼow ↄtumn iimn yogŋ a eke mʼow mʼanŋ a” e nyandrɛ el bogŋ ecʼee?»

Mij ewl mij

³⁷Es gbɛgbl a e lɛgŋ es abal el a, el es gbɛgbl a eci lɛgŋ ligbɛl. Ow e lɛgŋ a, Jesu igb inym es ɛtŋ igbl lebl ogŋ dad ninɛ: «Eke ɛgŋ mij amn am ↄny, lʼów ɛm ogŋ ke lʼɛ́gŋ mij. 7.37 Mɛf ecʼes gbɛgbl e lɛgŋ a, ów ɛgbɛl anŋ eke wɛl bi kok mij ab. Ow ↄny nyandrɛ nyahan: krɛkrɛ ɛm a, ow bʼↄkn loj ɛm eci mij eke Nyam ↄŋ ɛl (Ɔkm Ok 17.1-7; Awl 20.8-13); yony ɛm a, ow bʼibrm Nyam eke kʼan (Zakari 14.16-17); ɛtŋ nyahan ɛm a, ow bʼↄkn Abŋ Lala eke kʼow Mesi a e lɛgŋ a (Zakari 13.1; Esayi 44.3). Eke agŋ a fɛŋ am ɛkn mij ecʼob mamn ekʼel a, Jesu am dad eke in el mij ewl mij tasi, ɛtŋ in anŋ kokoba ↄb ɛsɛl ecʼɛwar owi a fɛŋ ɛm.³⁸Ɛgŋ eke bʼow ubʼm nawrɛ a, mij ewl mij bʼow ewlʼl ɛrm ɛm ok ↄkm ɛsɛ elel eke Nyam Lɛl dad ab af.» ³⁹Jesu am dad ɛbɛn yɛgm Abŋ Lala a eke agŋ a ekʼↄny ↄmn in ɛm a kʼɛŋn a ecʼodad. Tasi ɛm a, lɛgŋ ab ɛm, wɛl kʼɛ́ŋnm Abŋ Lala aŋke Jesu kʼɛym anygbɛl ɛm.

Dedeku a ubr ɛm Jesu sosiɛm

⁴⁰Sica eke dedeku ab ɛm ecʼagŋ iri sodad amua a, nyam nyam am dad ɛsɛ: «Ɛgŋ na Kokoba ↄb ɛs a tasi ana!» ⁴¹Bɛb am dad ɛsɛ: «Mesi ab ana!» Ɛtŋ likpr am dad ɛsɛ: «Kↄ Mesi a gbɛ ↄtu eke kʼanŋ Galile ow ee? ⁴²Kↄ Nyam Lɛl dadm eke Mesi a bʼow el David e bosu ɛm ecʼɛgŋ eke bʼow anŋ Bɛtlehɛm, David e baŋn a ow ee?» ⁴³Jesu sosiɛm dedeku a ubr ɛm. ⁴⁴Agŋ nyam nyam erur eke wɛl kʼↄnyʼn, gbɛkↄ ɛgŋ kaka ɛwmʼn abu af.

Jwifɛl eci nawrɛ ubm

⁴⁵Usu ↄsu ɛsɛl a ɛwl mɛny im egb waw ɛsɛl ɛgbɛl a lele Farisiɛl ab ab ogŋ, ɛtŋ wɛl am ibrm ɛl ɛsɛ: «Kↄ bla sosiɛm ɛtŋ ocmn Jesu ab owmn ee?» ⁴⁶Usu ↄsu ɛsɛl a dad ninɛ: «Lɛgŋ kaka ɛgŋ dadm odad ɛsɛ in ecʼab af!» ⁴⁷Farisiɛl a am ibrm ɛl ɛsɛ: «Ɔny yɛji, yɛbr lʼɛju ↄny ee? ⁴⁸Kↄ es ɛw ɛsɛl ab ɛm ecʼɛgŋ nyam oglog Farisiɛl ɛm ecʼɛgŋ nyam ubʼr nawrɛ ee? ⁴⁹Dedeku a ekʼubʼr nawrɛ a uwm ol ab any, -lʼel agŋ eke wɛl ofn!» 7.49 Farisiɛl bʼifn dedeku a aŋke -li wewrmn ol. -Li bi tutr eke ɛgŋ ekʼuwm ol e low any a kʼↄtum kokm low kaka fɛŋ, ɛtŋ wɛʼn kʼↄtum in ɛŋnm Nyam ecʼↄwrↄ. -Li bʼɛsŋ wɛl sikpl ɛsɛl.⁵⁰Nikodɛm eke lɛgŋ ekʼɛc ab ɛm im ɛkn Jesu a, el Farisiɛl ab ɛm ecʼɛgŋ ekʼanŋ low ab ɛm. Nʼam dad wɛl lʼɛsɛ: ⁵¹«Kↄ ɛy ecʼol a bʼↄb ɛgŋ low eke wɛl irimʼn nɛnym oglog wɛl uwm low a eke li kok ab any ee?» ⁵²-Li dad ow ninɛ: «Ŋ yɛji, kↄ Galile iy el ee? Àpl Nyam e Silɛl ab ɛm bʼow ɛkn eke lɛgŋ kaka kokoba ↄb ɛs ánm Galile owm.» 7.52 Tasi ɛm a, kokoba ↄb ɛsɛl ɛsɛ Jonas af, ɛsɛ Nahum af el Galile ecʼagŋ. Jwifɛl ecʼes ɛwɛl a am dad ɛbɛn aŋke -li bʼifn Galile ecʼagŋ a. [ ⁵³Ɛtŋ ɛgŋ ɛgŋ eb ejagb im gbugŋ.] 7.53 Jan eci silɛl esig tasi ab ɛm a, wɛl ɛ́ŋnm Jan 7.53–8.11a.

Facyↄw a e low

¹[Kↄ Jesu gbɛ im Olivie lafɛny af. ²Eke lɛgŋ ɛny akr af a, ibribr fafa ɛm a, lʼɛwl mɛny lʼow Nyamel gbɛl a e gbugŋ a ɛtŋ agŋ a fɛŋ ow ɛŋnʼn. Li sig es ɛtŋ nʼam yɛgm wɛl low. ³Ol e low yɛgm ɛsɛl lele Farisiɛl ab oc yↄw nyam eke wɛl okr es nfaci ↄkr ɛm a isʼr. -Nʼↄny -nʼinymn ow es dedeku a fɛŋ ecʼany af ⁴ɛtŋ -li dad Jesu ninɛ: «Low yɛgm agŋ ɛs, wɛl okr yↄw na es nfaci ↄkr ɛm. ⁵Mois dad ɛy ol ab ɛm eke ↄyↄw nɛnɛ a, wɛl kʼↄr ɛl mebn ɛm ibi ɛl. 8.5 Ob Ap 20.10; Ol Ɔkn 22.22-24. Ol ɛm a, ow it eke wɛl kʼibi yↄw a lele igŋ ab ab. Kↄ ŋ bʼɛsɛ ayaf ee?» ⁶-Nʼam dad ɛbɛn -lʼuk ow meb yecʼɛtŋ ke -lʼↄtu -lʼok ow ów af. Gbɛkↄ Jesu is any es ɛtŋ am nↄn wus abuli ɛm. ⁷Eke -nʼam at -lʼibrm ow lʼow a, Jesu igbl sos ogŋ ɛtŋ dad ɛl ninɛ: «Ke ↄny ɛm ecʼɛgŋ nyam eke lɛgŋ kaka kokm sikpl a, íkŋ anym ↄwlʼl lebn krɛkrɛ.» ⁸Ɛmɛny lʼɛwl lʼis any es ɛtŋ nʼam nↄn wus. ⁹Eke -lʼirir ów amua a, -nʼim nyam nyam, ow ↄb nuŋ agŋ ɛgbɛl ab ɛm toŋ batŋ Jesu anŋ in sↄny, yↄw a eke inymʼn es any af ab ab. ¹⁰Jesu ɛwl igbl sos ogŋ ɛtŋ dadʼr ninɛ: «Sica yↄw, bogŋ agŋ a im ee? Kↄ ɛgŋ kaka dadm ŋ ecʼibi e low ee?» ¹¹Li dad ninɛ: «Low yɛgm agŋ ɛs, ɛgŋ kaka dadm ɛm ecʼibi e low.» Jesu dadʼr ninɛ: «Ɛm yɛji mi dadm ŋ ecʼibi owi. Ɔtu eke kʼim, gbɛkↄ jam kì kok sikpl ij.»] 8.11 Jan eci silɛl esig tasi ab ɛm a, wɛl ɛ́ŋnm Jan 7.53–8.11a.

Jesu eci daŋku ij a el nawrɛ

¹²Ɛmɛny Jesu am dad dedeku a ɛsɛ: «Mʼel wus nimum ecʼusuayl. 8.12 Mɛf ecʼes gbɛgbl ɛm a, ów anŋ ekʼel al owi ecʼeke wɛl bi kok: wɛl bi gigŋ mrabri ɛgbɛl Nyamel gbɛl a e gbugŋ a, ke ncok nimum a, agŋ ↄnym mrabri ekekey ab am ub ɛj. Al amua bʼↄkn al a eke ↄsu ke nyimn Israɛl ecʼey loj a (Ɔkm Ok 13.21; 14.19-25; Selu 27.1); ow el Mesi a eci usu ayl a eke bʼow oc is wus na ecʼagŋ a eci mɛny ɛwr yɛji (Esayi 42.6; 49.6). Ɛgŋ eke bʼow usʼm jam a, bʼow ɛŋn owr anŋ eci usuayl ɛtŋ lɛgŋ kaka li kʼow nʼanm es ncebn ɛm.» ¹³Farisiɛl a dadʼr ninɛ: «Ŋ, am ij ŋ obi e daŋku; ŋ e daŋku ij na ↄnym any.» ¹⁴Jesu dad ɛl ninɛ: «Eke mʼam ij ɛm obi e daŋku yɛji, ɛm e daŋku ij a el nawrɛ, aŋke mʼuw yogŋ eke mʼanŋ mʼow ab any ɛtŋ mʼuw yogŋ eke mʼaam ab any; kↄ ↄny, uwmn yogŋ eke mʼanŋ mʼow ab any, ɛtŋ yogŋ eke mʼaam a yɛji uwmn any. ¹⁵Ɔny, bi jɛjr okr agŋ ɛm eci; ɛm, mi jɛ́jm ɛgŋ e low mʼokm ɛbɛn. ¹⁶Ɛtŋ eke batŋ mi jɛj low mʼok, ke ɛm e jɛj ok a bʼel nɛny nyam ɛm eci, aŋke mi jɛ́jm mʼokm ɛm sↄny, kↄ ɛm Ɛs eke ɛrmʼm a bʼanŋ ɛm ab. ¹⁷Ɔny ecʼol ab ɛm wɛl nↄn: ekʼagŋ yony nɛny okr af daŋku ij nyam ɛm, ke daŋku ij ekʼel nawrɛ ana. 8.17 Ɛ̀kn Ol Ɔkn 19.15; 17.6; Awl 35.30.¹⁸Mʼam ij ɛm obi e daŋku ɛtŋ ɛm Ɛs ekʼɛrmʼm a yɛji am ij ɛm e daŋku.» ¹⁹-Nʼam ibrm ow -lʼɛsɛ: «Kↄ bogŋ asŋ a ee?» Jesu dad ɛl ninɛ: «Uwmnʼm any, uwmn ɛm Ɛs yɛjʼany. Blel uwrʼm any, ke blel úwr ɛm Ɛs yɛjʼany.»

²⁰Nʼam dad sodad amua Nyamel gbɛl a e gbugŋ a, eke nʼanŋ nʼam yɛgm agŋ low a, yogŋ a eke kↄprↄ ebr mob anŋ a. Ɛtŋ ɛgŋ kaka ɛdŋnmʼn aŋke in e wanci a kʼowm.

Yogŋ a eke mʼaam a, kʼↄtumn iimn yogŋ

²¹Ɛmɛny Jesu am dad ɛl ɛsɛ: «Mʼow mʼim; bʼow ↄↄlʼm gbɛkↄ bʼow uwr ↄny e sikpl ab ɛm. Kʼↄtumn iimn yogŋ a eke mʼaam a.» ²²Jwifɛl a am dadarir ɛl ↄfr ɛsɛ: «Eke nʼam dad lʼɛsɛ ɛs kʼↄtum ɛs iim yogŋ a eke in aam a, kↄ ɛmn nʼam ow nʼim lʼɛdŋn ee?» ²³Jesu dad ɛl ninɛ: «Ɔny wus ecʼagŋ, kↄ ɛm afr mʼanŋ mʼow. Ɔny eel wus na eci, kↄ ɛm mʼelm wus na eci. ²⁴Na sosiɛm anake mi dad ↄny eke bʼow uwr ↄny e sikpl ab ɛm a. Tasi ɛm a, eke ubmn nawrɛ eke “Ɛm, anŋ anŋ” 8.24 Ɛm, anŋ anŋ:Eke batŋ Jesu bi dad ɛsɛ “Ɛm, anŋ anŋ,” ke in e Nyam eke lʼel a ecʼodad nʼam dad, aŋke ɛm, anŋ anŋ el odad eke Jwifɛl oc ɛw es saw. Lɛgŋ eke -li bʼerur eke -li kʼur Nyam nin a, yogŋ anake -li bʼoc a. Esayi 43.10; Ol Ɔkn 32.39; Ɔkm Ok 3.13-14. bʼow uwr ↄny e sikpl ab ɛm.» ²⁵-Nʼam ibrm ow -lʼɛsɛ: «Ke ŋ bwo el ŋ ee?» Jesu dad ɛl ninɛ: «In a eke mi dad ↄny in e low nuŋ ↄb ɛm ɛtŋ a. ²⁶Ɔny e lís a, mʼↄny ów nↄnↄ eke mi ki dad ke mi jɛ́j mʼok yɛji. Gbɛkↄ ɛgŋ a ekʼɛrmʼm mʼow a el nɛny nyam ɛs, yecʼa eke mi wewr in e lís a, mʼam ↄb ow ecʼamani mʼok ↄny ekʼeel wus ecʼagŋ a.» ²⁷-Lʼirim eke ow el Ɛs ecʼodad eke nʼam dad wɛl a. ²⁸Ɛtŋ Jesu dad ɛl ninɛ: «Lɛgŋ a eke bʼow igbal ɛgŋ ecʼIy ogŋ a, bʼow uwr any eke “Ɛm, anŋ anŋ”; bʼow uwr any yɛjʼeke mi kókm low kaka ɛm obi ɛm: yecʼa cɛ eke ɛm Ɛs yɛgmʼm a e low cɛ mi bi dad. ²⁹Ɛgŋ a ekʼɛrmʼm a anŋ ɛm ab; lʼɛ́lum im es ɛm sↄny aŋke sɛgŋ fɛŋ mi bi kok low yecʼa eke li bʼerur a.» ³⁰Eke Jesu am dad ɛbɛn a, agŋ nↄnↄ ubʼr nawrɛ.

Ewi lele madu ab

³¹Jesu am dad Jwifɛl a ekʼubʼr nawrɛ a ɛsɛ: «Eke bʼinymn es ɛm e sodad ab af a, bʼow eel ɛm e jam ɛsɛl tasi; ³²af yogŋ bʼow uwr low nɛnyɛmbri nyam any ɛtŋ low nɛnyɛmbri nyam a bʼow ↄŋ ↄny eel ewi.» 8.32 Jwifɛl bi tutr eke ol ecʼany uw anake bʼↄŋ ɛgŋ el lewi a.³³-Lʼↄdu -lʼeb -li dad ow ninɛ: «Ɛy, Abraham ecʼalaw; lɛgŋ kaka sʼelm ɛgŋ kaka e madu. 8.33 Tasi ɛm a, Israɛl eyŋ el madu Ejipt, Babilↄn, Pɛrs lele Siri ɛb ɛm ab. Lɛgŋ ab ɛm a, -nʼanŋ Rom ecʼes ɛw ɛm. Gbɛkↄ Nyam ecʼany af a, -li bi tutr eke -lʼel ɛbr eke wɛl sↄg (Ol Ɔkn 7.6). Ayaf ↄtu eke ki dad ɛy ɛsɛ si bʼow sʼel ewi ee?» ³⁴Jesu dad ɛl ninɛ: «Ɛɛ, low nawrɛ mʼam dad ↄny: ɛgŋ fɛŋ ekʼam kok sikpl a, el sikpl ecʼadu. ³⁵Adu élm akŋ a ecʼɛgŋ sɛgŋ fɛŋ eci; kↄ iy ecʼa, sɛgŋ a fɛŋ li bʼel akŋ a ecʼɛgŋ. ³⁶Eke Iy a bi sↄg ↄny, bʼow eel ewi tasi. ³⁷Mʼuw any eke eel Abraham ecʼalaw; gbɛkↄ am ↄↄl eke kʼibirʼm, aŋke ɛm e sodad a anm ↄny ɛrm ɛm. ³⁸Ɛm, mʼam dad low yecʼa eke mʼɛkn ɛm Ɛs ogŋ a, kↄ ↄny, am kokr low yecʼa eke ↄny ɛs dad ↄny a.» ³⁹-Lʼeb ow odad nɛnym ninɛ: «Ɛy ɛs a, Abraham.» Jesu dad ɛl ninɛ: «Blel eel Abraham ecʼey tasi ana, ke blel kókr ów eke li kok a. 8.39 Blel eel Abraham ecʼey tasi ana, ke blel kókr ów eke li kok a:odad na Grɛk ɛm, wɛl ↄtu ekʼitŋn ɛjecʼɛm dad ɛsɛ: Eke eel Abraham ecʼey, ke kókr Abraham ecʼów.⁴⁰Mi dad ↄny low nawrɛ a eke mʼuw any Nyam e lís a, ɛtŋ am ↄↄl eke kʼibirʼm. Lɛgŋ kaka Abraham kokm low nɛnɛ! ⁴¹Ɔny, bi kokr ów nyam a cɛ ɛsɛ ↄny ɛs af.» -Lʼↄdu -lʼeb li dad ow ninɛ: «Ɛy sʼelm egŋ ot iy. Sʼↄny ɛy ɛs nyam coco, in lʼel Nyam.» ⁴²Jesu dad ɛl ninɛ: «Blel Nyam el ↄny ɛs ana, ke blel érurirʼm, aŋke Nyam ogŋ mʼanŋ mʼow, ɛtŋ mʼanŋ aŋa in e nin ɛm. Ow elm ɛm obi ɛm mʼowm, kↄ in lʼɛrmʼm. ⁴³Bla sosiɛm ɛtŋ ↄ́tumn irimn odad a eke mi bi dad ab ee? Aŋke ijmn ɛm e sodad a ecʼiri e lɛc. ⁴⁴Ɔny ɛs a el agn, ɛtŋ bʼerurir eke ki kokr low yecʼa eke ↄny ɛs bʼerur a. Nuŋ ↄb ɛm ɛtŋ lʼel ɛgŋ ibiu. Lɛgŋ kaka nʼanm low nɛnyɛmbri nyam owi ɛm, aŋke low nɛnyɛmbri nyam anm in ɛm. Eke li bʼↄny yadŋ, ke in ecʼelel eke nʼanŋn ke ɛcmʼn ab a ana, aŋke lʼel yadŋu ɛtŋ lʼel yadŋ ecʼɛs. ⁴⁵Gbɛkↄ ɛm ecʼa, low nawrɛ eke mi bi dad a sosiɛm anake úbmnʼm nawrɛ a. ⁴⁶Ɔny ɛm aŋa, bwo ecʼɛgŋ ↄtu eke ki dad ɛlu ↄkm eke mi kok sikpl ee? Ɛtŋ sica eke mʼam dad ↄny low nɛnyɛmbri nyam, bla sosiɛm ɛtŋ úbmnʼm nawrɛ ee? ⁴⁷Ɛgŋ ekʼel Nyam ecʼa, bʼiri Nyam e sodad a. Gbɛkↄ ↄny, elmn Nyam eci, na sosiɛm anake írimn a.»

Jesu lele Abraham ab

⁴⁸Jwifɛl a dadʼr ninɛ: «Sʼam dad eke ŋ Samari iy 8.48 ŋ Samari iy:Jwifɛl am oc nin na wɛwar Jesu. -Li bʼifn Samari eyŋ -lʼakm Nyam any uwm ɛsɛl. ɛtŋ ↄny abŋ ŋuŋ yɛji. Kↄ yadŋ sʼↄny ee?» ⁴⁹Jesu dad ninɛ: «Mʼↄnym abŋ ŋuŋ, kↄ ɛm Ɛs mi bʼɛlum ɛtŋ ↄny, ɛ́gŋmn eke kʼɛlumnʼm. ⁵⁰Mʼↄlm ɛm obi ecʼanygbɛl es; ɛgŋ anŋ ekʼam kok ow e low ke am jɛj ok. ⁵¹Ɛɛ, low nawrɛ mʼam dad ↄny: ɛgŋ eke bʼɛlum ɛm e sodad a, lɛgŋ kaka li kʼow lʼuwm.» ⁵²Jwifɛl a dadʼr ninɛ: «Sica sʼuw any eke ↄny abŋ ŋuŋ tasi! Abraham uw, kokoba ↄb ɛsɛl a yɛji uw, ɛtŋ ŋ, am dad ɛsɛ: “Ɛgŋ eke bʼɛlum ɛm e sodad a, lɛgŋ kaka li kʼow lʼuwm.” ⁵³Ɛy ɛs Abraham uw. Kↄ am tutr eke ↄny any akmʼn ee? Kokoba ↄb ɛsɛl a yɛji uw. Kↄ ayaf bʼocr ŋ sosi ee?» ⁵⁴Jesu dad ninɛ: «Blel mʼam ↄŋn ɛm sosi any ana, ke blel ow elm low kaka. Ɛgŋ a eke am ↄŋʼm any a, ɛm Ɛs. In e lís e low eke bi dadr a el: “Lʼel ɛy e Nyam”, ⁵⁵ke uwmn in any. Kↄ ɛm, mʼuwʼr any. Blel mi dad eke mʼuwmʼn any, blel mʼél yadŋu ɛsɛ ↄny af. Gbɛkↄ mʼuwʼr any ɛtŋ mi bʼɛlum in e sodad a. ⁵⁶Ɔny ɛs Abraham in e tutr ɛm ɛlu sos ɛm iŋn ↄkm ɛm e mowrer a ecʼɛkn eci; lʼɛkn ɛtŋ nʼↄny sos ɛm iŋn.» ⁵⁷Ow ↄŋ Jwifɛl a dadʼr ninɛ: «Kↄ ŋ, kʼↄnym akpo ekŋ yony lele lɛw ab yɛji ke kpɛkŋ ɛ́kn Abraham ee?» ⁵⁸Jesu dad ɛl ninɛ: «Ɛɛ, low nawrɛ mʼam dad ↄny: gbuŋ ke wɛl éw Abraham a, “Ɛm, anŋ anŋ.” » 8.58 Ɛ̀kn Jan 1.1-3.⁵⁹Ow sosiɛm -lʼot mebn eke -li kʼↄↄr ow. 8.59 Jwifɛl ecʼol ɛm a, ekʼɛgŋ wɛwr Nyam, lʼit eke wɛl kʼↄrʼr mebn ɛm. Gbɛkↄ Jesu ɛy ↄkm Nyamel gbɛl a e gbugŋ a es lↄl ɛm.

Jesu ewlm any eflu nyam

¹Eke Jesu am ɛc a, lʼɛkn ɛgŋ nyam ekʼany efl mew ɛm ɛtŋ. ²In e jam ɛsɛl a am ibrmʼn ɛsɛ: «Low yɛgm agŋ ɛs, bla sosiɛm ɛtŋ ɛgŋ na any efl in e mew ɛm ɛtŋ ee? Kↄ in obi ɛm e sikpl, oglog ɛs lele lis ab e sikpl sosiɛm ee?» 9.2 Ɔkm Ok 20.5.³Jesu dad ninɛ: «Ow elm in obi ɛm e sikpl, oglog ɛs lele lis ab e sikpl sosiɛm. Kↄ any eflʼl yecʼɛtŋ ke Nyam e juma kok a e low ɛ́y ↄkm in ɛm. ⁴Eke lɛgŋ anŋ owr a, ow akpl eke si ki kokr ɛgŋ a ekʼɛrmʼm a e juma. Lɛgŋ uk am ow, ekʼɛgŋ kʼow ↄtum kokm juma. ⁵Eke mʼanŋ wus af aŋa a, mʼow mʼel wus na ecʼusuayl.» ⁶Eke li dad sodad amua bake uwr a, lʼifi sar lʼok wus ɛtŋ li kok kↄdↄg sar ab ab, lʼoc lʼudu any eflu a ecʼanyamn a, ⁷ɛtŋ li dad ninɛ: «Ìm yↄg any Silowe e mij ab ɛm.» 9.7 Silowe:Mij ewl mij ekʼanŋ Jerusalɛm. Mɛf ecʼes gbɛgbl ɛm a, mij na anake wɛl bʼaw kokr ów a. Ow el ↄwrↄ a eke bʼow anŋ Nyam e gbreŋgbi usu a e mɛny ɛwr. (Silowe e nyandrɛ el “ɛrmu”.) Any eflu a im yↄg any, ɛtŋ eke lʼɛwl lʼow a, nʼam ɛkn es!

⁸In e saw saw ecʼagŋ lele agŋ ɛjecʼeke lɛgŋ sig ɛm ɛknʼn nʼam sasm ob a am ibrm ɛsɛ: «We! Kↄ ow elm ɛgŋ a eke bi sig es am sasm ob ab ee?» ⁹Agŋ nyam nyam am dad eke ow in ana. Bɛb am dad ɛsɛ: Njaŋ, owʼn elm ow, kↄ es cɛ owʼn bʼot ow. Ɛtŋ ɛgŋ a dad ninɛ: «Tasi, ɛm ana.» ¹⁰-Nʼam ibrm ow -lʼɛsɛ: «Kↄ ayaf kokr ɛtŋ ŋ ecʼanyamn a ayl ee?» ¹¹Li dad ninɛ: «Ɛgŋ a eke wɛl bʼɛsŋ Jesu a kok kↄdↄg uduʼm anyamn ɛtŋ li dadʼm eke mi kʼim Silowe e mij ab ɛm mi yↄg any. Mʼim yogŋ, ɛtŋ eke mi yↄg any uwr a, mʼam ɛkn es.» ¹²-Lʼibrm ow ninɛ: «Ɛgŋ a, bogŋ in a!» Li dad ninɛ: «Mʼɛknmʼn.»

Farisiɛl am ibrm any eflu a ekʼewl a low

¹³Sica wɛl ɛwl ɛgŋ a eke wɛl ewlm a Farisiɛl ogŋ. ¹⁴Ke nɛnɛgŋ e lɛgŋ 9.14 Jwifɛl ecʼol a ɛdŋn nɛnɛgŋ e juma kok fɛŋ. -Li bi tutr eke éwlm ɛgŋ oglog ↄ́fr kↄdↄg a, el juma eke wɛl kok. Na wɛl ɛdŋn. anake Jesu oc kↄdↄg kok ewlmʼn anyamn a. ¹⁵Na sosiɛm Farisiɛl a yɛji am ibrm ɛgŋ a ɛsɛ: «Kↄ ayaf kokr ɛtŋ am ɛkn es ee?» Li dad ninɛ: «Lʼuduʼm kↄdↄg tɛl anyamn, mi yↄg any ɛtŋ mʼam ɛkn es.» ¹⁶Farisiɛl bɛb am dad ɛsɛ: «Ɛgŋ ikŋ na eke kok low na a kʼↄtum anm Nyam ogŋ owm, aŋke lʼɛluam nɛnɛgŋ e ecʼol a.» Gbɛkↄ agŋ likpr a ↄdu eb ɛtŋ am dad ɛsɛ: «Kↄ ayaf sikpl ɛs nyam ↄtu eke ki kok mɛny ɛwr amua ee?» Ɛtŋ ɛl ↄfr a -li bubr ɛm.

¹⁷Ɛmɛny Farisiɛl a am ibrm any eflu a ekʼewl a ɛsɛ: «Ɛtŋ kↄ ŋ eke lʼewlmʼŋ anyamn a, ayaf am dadr ee?» Li dad ninɛ: «Lʼel kokoba ↄb ɛs.» ^18-19Jwifɛl ecʼes ɛwɛl a kʼubm nawrɛ eke li kʼel any eflu ke sica lʼéwl nʼam ɛkn es. Ow sosiɛm -lʼɛsŋ ɛs lele lis ab low ibrm eci, ɛtŋ -nʼam ibrm wɛl -lʼɛsɛ: «Kↄ iy na ↄny ecʼiy ee? Am ɛgŋn ebr eke lʼel any eflu mew ɛm ɛtŋ ee? Ayaf ɛtŋ sica nʼam ɛkn es ee?» ²⁰In ecʼagŋ a dad ninɛ: «Sʼuw any cɛ eke lʼel ɛy jim ɛtŋ wɛl ewʼr any eflu. ²¹Gbɛkↄ elel eke ow ɛcr ke sica nʼam ɛkn es a sʼuwm any, ɛtŋ ɛgŋ a eke kʼewlmʼn anyamn a yɛji sʼuwmʼn any. Any atʼr es, ìbrmn in, in obi lʼↄtu eke li ki dad!» ²²-Nʼam dad ɛbɛn aŋke -nʼam uru Jwifɛl ecʼes ɛwɛl a. Tasi ɛm a, Jwifɛl ecʼes ɛwɛl a ikŋ anym iririr eke ɛgŋ fɛŋ eke bʼow ɛgŋ eb eke Jesu el Mesi a, -lʼogŋ ow ɛl e Nyam nuŋ igŋ usu a. 9.22 Eke wɛl ogŋ ɛgŋ Nyam nuŋ igŋ usu a, agŋ ɛjecʼa bʼocʼr ɛsɛ ɛgŋ ekʼuw af. Ɛgŋ ikŋ na, -lʼubmn ow ij.²³Low na sosiɛm anake iy ɛs a lele iy lis ab ab dad ninɛ: «Any atʼr es, ìbrmn in, in obi lʼↄtu eke li ki dad a.»

²⁴Ɛmɛny Farisiɛl ɛsŋ ɛgŋ a eke wɛl ewlm a sakp yony ɛm ɛtŋ am dadʼr ɛsɛ: «Ɛy sʼuw any eke ɛgŋ na sikpl ɛs! Dàd low nɛnyɛmbri nyam Nyam ecʼany af.» ²⁵Li dad ninɛ: «Ke lʼél sikpl ɛs oglog li kʼelm sikpl ɛs yɛji, mʼuwm any. Gbɛkↄ low nyam cɛ mʼuw any: mʼel any eflu, ɛtŋ sica mʼam ɛkn es.» ²⁶-Nʼam ibrm ow -lʼɛsɛ: «Kↄ ayaf li kokrʼŋ ee? Ayaf lʼewlmʼŋ anyamn ab ee?» ²⁷Li dad ninɛ: «Mʼikŋ anym mi dad ɛtŋ erurmn eke kʼirir. Kↄ bla ɛtŋ am erurir eke ɛmɛny mi ki dadr ɛm ee? Kↄ ↄny yɛji in e jam ɛsɛl am erurir eke kʼeel ee?» ²⁸-Nʼam wɛwr ow -li dad -lʼɛsɛ: «Ŋ el ɛgŋ nɛnɛ na e jam us ɛs! Ɛy Mois e jam us ɛsɛl sʼel. ²⁹Mois ecʼa Nyam dadʼr odad; kↄ ɛgŋ ikŋ na ecʼa, yogŋ eke nʼanŋ lʼow bↄbↄ yɛji sʼuwm any!» ³⁰Ɛgŋ a eke wɛl ewlm a dad ɛl ninɛ: «Kin low ekʼɛw any iti owi: uwmn yogŋ eke nʼanŋ lʼow ab any, gbɛkↄ lʼewlm im! ³¹Sʼuw any eke Nyam írim sikpl ɛsɛl e lebl; gbɛkↄ ɛgŋ fɛŋ eke bʼɛlum Nyam ke bi kok in ecʼerur a, Nyam bʼiriʼr lebl. ³²Lɛgŋ kaka wɛl dadm ɛy sʼirim eke ɛgŋ nyam ewlm ɛgŋ eke mew ɛm ɛtŋ el any eflu. ³³Blel ɛgŋ na anm Nyam ogŋ owm, blel lʼↄtum li kokm low kaka.» ³⁴-Lʼↄdu -lʼeb -li dad ow ninɛ: «Ŋ e mew ɛm ɛtŋ, ŋ nimum a anŋ sikpl ɛm ɛtŋ am erur eke ki yɛgm ɛy low ee?» Ɛtŋ -lʼogŋ ow Nyam nuŋ igŋ usu a.

Any efl tasi

³⁵Eke Jesu iri eke wɛl ogŋ any eflu a, nʼim nʼɛŋn ow ɛtŋ li dad ow ninɛ: «Kↄ ↄny ↄmn ɛgŋ ecʼIy ɛm ee?» ³⁶Ɛgŋ a dadʼr ninɛ: «Ɛgŋ gbɛl, dàdʼm ɛgŋ a yecʼɛtŋ ke mʼↄ́ny ↄmn in ɛm ↄ!» ³⁷Jesu dadʼr ninɛ: «Aah! Am ɛknʼn; caca ɛm a, in anake nʼam dadʼŋ odad a!» ³⁸Ɛgŋ a dadʼr ninɛ: «Ɛgŋ gbɛl, mʼↄny ↄmn.» Ɛtŋ lʼok ↄwrↄkp wus Jesu ecʼany af. ³⁹Ɛtŋ Jesu dad ninɛ: «Mʼow wus af aŋa jɛj ok eci: ke ány eflu ɛ́kn es, ke agŋ ekʼam ɛkn es a any éfl.» ⁴⁰Farisiɛl bɛb a eke anŋ in ab a iri sodad amua, ɛtŋ am ibrmʼn ɛsɛ: «Kↄ ɛy yɛji ány eflu si kʼel ee?» ⁴¹Jesu dad ɛl ninɛ: «Blel eel ány eflu, blel elmn sikpl ɛsɛl; gbɛkↄ eke am dadr eke am ɛkan es a, eel sikpl ɛsɛl.»

Jesu el mɛcɛb ↄsu ɛs mamn

¹Jesu dad ninɛ: «Ɛɛ, low nawrɛ mʼam dad ↄny: ɛgŋ eke ɛ́crm lisany a eci ɛym mɛcɛb lakp ab ɛm, ke bʼuyu usu ɛjeci ɛy ɛm a, ɛgŋ a ulu, ów gaŋgaŋ ɛs. ²Gbɛkↄ ɛgŋ eke bʼɛcr lisany a ecʼa, el mɛcɛb a ecʼↄsu ɛs. ³Ɛgŋ a, usu ↄsu ɛs a bi figʼr lisany ɛtŋ mɛcɛb a bʼiriʼr lebl. Li bʼɛsŋ in e mɛcɛb a ecʼen nyam nyam ɛm, ɛtŋ li bʼok wɛl ↄkm. ⁴Eke li bʼok wɛl ↄkm fɛŋ a, li bʼikŋ wɛl anym ke wɛl ám usʼr jam, aŋke mɛcɛb a uwʼr lebl any. ⁵Gbɛkↄ ɛgŋ eke -lʼuwm any a, -lʼusmn ow jam. Eke -lʼɛkn ow, -li bʼuru -nʼↄmu es aŋke -lʼuwm ow lebl any.» ⁶Jesu oc nyandrɛ ɛm odad na am dad ɛl, kↄ low yecʼa eke nʼam erur eke li kʼɛlu ↄkm a kʼokm agŋ a es sos ɛm.

⁷Ɛmɛny Jesu dad ninɛ: «Ɛɛ, low nawrɛ mʼam dad ↄny: mʼel mɛcɛb lakp a e lisany. ⁸Agŋ a fɛŋ eke ikŋ anym ow a, elu, ów gaŋgaŋ ɛsɛl; 10.8 Ɛ̀kn Jeremi 23.1-8; Ezekiɛl 34. Odad na ɛm a, Israɛl ecʼidr ɛsɛl a anake el mɛcɛb ↄsu ɛsɛl eŋuŋ a. kↄ mɛcɛb a ɛgŋm irim ɛl ecʼodad a. ⁹Ɛm, mʼel lisany. Ɛgŋ eke bʼow ɛcr ɛm ɛm ɛy ɛm a, bʼow ɛŋn sel; lʼↄtu eke li kʼɛy ɛm lʼɛy ↄkm ɛtŋ li bʼow nʼɛŋn in ecʼob ij. ¹⁰Ulu ecʼa, li bʼow cɛ eke li kʼiy, lʼibi ke ni ŋúŋn. Ɛm, mʼow eke agŋ kʼɛŋn sel, ke -nʼɛŋn sel a nↄnↄ ɛm.

¹¹Ɛm, mʼel mɛcɛb ↄsu ɛs mamn. 10.11 Ɛ̀kn Selu 23; Esayi 40.11. Mɛcɛb ↄsu ɛs mamn bʼoc in e sel a ↄŋ in e mɛcɛb a. ¹²Ɛgŋ ekʼam kok juma ke ow el os sosiɛm cɛ ecʼa, elm mɛcɛb ↄsu ɛs tasi; mɛcɛb a elm in eci. Eke li bʼɛkn botimbo ekʼam ow a, li bʼigŋ lʼok wɛl es, ke lʼúru es nʼim. Ke sica botimbo a ↄ́ny mɛcɛb a bɛb ke ↄ́mun ɛl es. ¹³Ɛgŋ a ekʼam kok juma ke ow el os sosiɛm cɛ ecʼa, ɛbɛn eke ow bʼɛcr ana. Lʼútrm mɛcɛb a e low. ^14-15Ɛm, mʼel mɛcɛb ↄsu ɛs mamn a. Ɛsɛ elel eke ɛm Ɛs uwʼm any ke ɛm yɛji mʼuwʼr any ab af a, ɛbɛn nyam coco mʼuw ɛm e mɛcɛb ab any, ɛtŋ ɛl yɛji -lʼuwʼm any. Ɛm e sel a mʼɛgŋ mʼeb eke mi kʼoc mʼↄŋ ɛl. ¹⁶Ɛmɛny mʼↄny mɛcɛb ɛjeci eke anm lakp na ɛm. 10.16 Aŋa Jesu am dad agŋ a ekʼelm Jwifɛl ke bʼow ubʼr nawrɛ a ecʼodad. Ɛl yɛji ow it ke mi nyímn ɛl; -li bʼow -lʼiriʼm lebl ɛtŋ -li bʼow -lʼel mɛbob nyam eke bʼow ↄny ↄsu ɛs nyam coco. ¹⁷Ɛm Ɛs bʼerurʼm aŋke mʼɛgŋ mʼeb eke mi kʼoc ɛm e sel a mʼↄŋ ɛl, ke ɛmɛny mʼɛ́wl mʼoc. ¹⁸Ɛgŋ kaka ébm im sel a abu ɛm, kↄ ɛm obi mi bʼoc sel a mʼↄŋ ɛl; 10.18 Ɛ̀kn Ob Kok 4.27-28. mʼↄny abusu eke mi kʼoc sel a mʼↄŋ ɛl, ɛtŋ ɛmɛny mʼↄny abusu eke mi kʼeb. Ɛm Ɛs ecʼol a eke ↄŋʼm ab ana.»

¹⁹Sodad amua sosiɛm, ɛmɛny Jwifɛl a ubr ɛm. ²⁰Ɛl ɛm ecʼagŋ nↄnↄ am dad ɛsɛ: «Nʼↄny abŋ ŋuŋ! Nuŋ ɛm uŋʼn! Kↄ bla ɛtŋ am irir in ecʼodad ab ee?» ²¹Bɛb am dad ɛsɛ: «Ɛgŋ eke ↄny abŋ ŋuŋ a kʼↄtum dadm odad nɛnɛ. Abŋ ŋuŋ ɛs ↄtu eke kʼewlm ány eflu ee?»

Jwifɛl bɛb igŋ Jesu

²²Sica Nyamel gbɛl a e fig ecʼes gbɛgbl ɛy Jerusalɛm ɛtŋ ow el lɛfr lɛgŋ iy. 10.22 Nyamel gbɛl a e fig ecʼes gbɛgbl:Akpo 167 gbuŋ ke wɛl éw Jesu a, Jwifɛl ecʼefnu a eb Jerusalɛm eci Nyamel gbɛl a. -Lʼigŋ ɛl e nyàm a nuŋ Nyamel gbɛl ab ɛm ɛtŋ ow ↄŋ -nʼↄny ow e sayl a -lʼoc es. Eke ow bi kok akpo nyahan a, Jwifɛl a ogŋ ɛl, ɛtŋ ayal Nyamel gbɛl a ɛwl oc ↄŋ Nyam. Low na ecʼↄkm ɛlu a anake el es gbɛgbl a.²³Jesu am nyinymn es Nyamel gbugŋ a, lɛf eb usu a eke ij Salomↄ e nin a. ²⁴Jwifɛl a iwr did ɛlul il ɛm ɛtŋ am ibrmʼn ɛsɛ: «Kↄ bʼow ↄny ɛy es bɛbar na ɛm cɛ ee? Dàd ɛy nɛnyɛmbri nyam eke ow el ŋ el Mesi a.» ²⁵Jesu dad ɛl ninɛ: «Mʼikŋ anym mi dad ↄny, kↄ ubmnʼm nawrɛ. Ów a eke mʼam kok ɛm Ɛs e nin ɛm a am ij ɛm e daŋku. ²⁶Ɛtŋ ↄny, úbmn nawrɛ aŋke elmn mɛcɛb a ekʼel ɛm ecʼa. ²⁷Ɛm e mɛcɛb a bʼiriʼm lebl, mʼuw ɛl any ɛtŋ -li bʼusʼm jam. ²⁸Mi bʼↄŋ ɛl sel eke ↄnym uwr; lɛgŋ kaka -li kʼow -lʼuwmn ɛtŋ lɛgŋ kaka ɛgŋ kʼↄtum dↄgrm ebm ɛl ɛm ecʼabu ɛm. ²⁹Ɛm Ɛs a eke ot ɛl ↄŋʼm a, lʼagb lʼakm ob ob fɛŋ, ɛtŋ ɛgŋ kaka ↄnym abusu eke ki dↄgr ob eke anŋ ɛm Ɛs abu ɛm a eb. ³⁰Ɛm lele ɛm Ɛs ab a, sʼel nyam coco.»

³¹Ɛmɛny Jwifɛl a ot mebn as luku eke ki wↄwlʼl. ³²Kↄ Jesu dad ɛl ninɛ: «Ɛm Ɛs ɛm, mi kok ów amamn nↄnↄ mi yɛgm ↄny. Ów amua, bogŋ ecʼanake ow af am ↄↄl eke kʼibirʼm mebn ɛm ab ee?» ³³Jwifɛl a dadʼr ninɛ: «Ow elm ke bi kok low nimamn ke sʼíbiʼŋ mebn ɛm, kↄ Nyam eke am wɛwr a sosiɛm. Ɛgŋ cɛ elʼŋ, ɛtŋ am ocr ŋ sosi Nyam!» ³⁴Jesu dad ninɛ: «Nyam dad wɛl nↄn ↄny ecʼol ab ɛm ninɛ: Ɔny eel “sinyam”.10.34 Ɔny eel “sinyam”:Selu 82.6 ɛm a, Nyam am dad Israɛl ecʼes ɛw ɛsɛl a odad ɛsɛ “sinyam” wɛʼn el af, aŋke -li bi kok ow eci juma Israɛl ecʼes ɛw eci.³⁵Agŋ a eke Nyam odad a ot es a, Nyam ɛsŋ ɛl “sinyam”. Ke sʼuw any eke Nyam Lɛl ecʼodad eke dad a, wɛl kʼↄtum ↄnym ocm es. ³⁶Ɛtŋ ɛm, ɛm Ɛs usmʼm abu es ɛtŋ ɛrmʼm wus na af; ayaf ↄtur eke ki dadr ɛsrɛ mʼam wɛwr Nyam aŋke mi dad eke mʼel Nyam ecʼIy ee? ³⁷Eke mi kokm ɛm Ɛs ecʼów a, kʼùbrʼm nawrɛ. ³⁸Gbɛkↄ eke mi bi kok a, eke ubmn ɛm e sodad a nawrɛ yɛji, ùbr ów amua nawrɛ yecʼɛtŋ ke ow ók ↄny es sos ɛm kpɛkŋ kpɛkŋ eke ɛm Ɛs ir ɛm ɛm ɛtŋ ɛm yɛji mʼanŋ ɛm Ɛs ɛm.» ³⁹-Nʼam ↄl ekʼɛmɛny -li kʼɛw ow abu af, kↄ lʼakm wɛl.

⁴⁰Ɛmɛny Jesu ɛwl im mij ewl mij a ekʼel Jurdɛn a e jam a, yogŋ a eke Jan ikŋ anym ok agŋ mij nuŋ a, ɛtŋ nʼanŋ yogŋ. ⁴¹Agŋ nↄnↄ am ow in ogŋ ɛtŋ -nʼam dad -lʼɛsɛ: «Jan kokm mɛny ɛwr kaka, gbɛkↄ ɛgŋ a e low a eke li dad a el nawrɛ.» ⁴²Ɛtŋ sica agŋ nↄnↄ ubʼr nawrɛ.

Lasar e luw owi a

^1-2Ɛgŋ nyam eke wɛl bʼɛsŋ Lasar ↄny lisijↄwɛl yony, Mart lele Mari ab; -lʼir Betani baŋn. 11.1 Ɛ̀kn Luk 10.38-42. Mari a, ke yↄw a eke ok Ɛs Kↄtↄkↄ mijey akr ke oc in e sin nuŋ tɛtŋ es ab ana.11.2 Ɛ̀kn Jan 12.1-8. Lisijim Lasar ɛy ↄl tuↄtuↄ. ³Agŋ lisijↄwɛl yony a ɛrm ɛgŋ eke kʼim dad Jesu eke in ecʼɛgŋ a eke li bʼerur a ↄl am ↄny.

⁴Eke Jesu iri amani na a, li dad ninɛ: «Ɔl ikŋ na kʼow ibimʼn, ow el Nyam ecʼanygbɛl a eci, yecʼɛtŋ ke Nyam ecʼIy ecʼanygbɛl a ɛ́y ↄkm.» ⁵Ke Jesu bʼerur Mart, ow lisijↄw lele Lasar ab sɛnyn sɛnyn. ⁶Ow sosiɛm Lasar ecʼↄl owi a eke lʼiri a, nʼanŋ usu a eke nʼanŋ a li kok sɛgŋ yony lʼok af. 11.6 Ɛ̀kn Jan 11.15.⁷Ɛtŋ ca li dad in e jam ɛsɛl a ninɛ: «Sʼɛ́wal sʼimn Jude.» ⁸Jam ɛsɛl a dadʼr ninɛ: «Low yɛgm agŋ ɛs, yogŋ anake wɛl ↄl eke kʼibiʼŋ mebn ɛm a, ↄrↄfn kʼɛtum es yɛji ɛtŋ ɛmɛny am erur eke kʼɛwl im ee?» ⁹Jesu dad ɛl ninɛ: «Lɛgŋ mum ɛm a wanci lɛw yony bʼanŋ, kↄ yadŋ ee? Eke lɛgŋ owr ɛgŋ am an es, lʼuyuam ob ab aŋke nʼam ɛkn wus na ecʼusuayl a. ¹⁰Kↄ eke ɛgŋ am an es ncok ɛm, li bʼuyum ob ab aŋke usuayl anm in ɛm.»

¹¹Eke li dad ów amua bake ow uwr a, lʼigŋ af li dad ninɛ: «Ɛy lawl a mɛmn nʼam ɛru, kↄ mʼow mʼim mʼuwrʼr.» ¹²Jam ɛsɛl a dad ninɛ: «Ɛgŋ gbɛl, eke ow el mɛmn nʼam ɛru tasi, li bʼow lʼewl.» ¹³Tasi ɛm a, Lasar e luw a ecʼodad anake Jesu am dad a, ɛtŋ jam ɛsɛl a e tutr ɛm a, ow el mɛmn cɛ. ¹⁴Ow ↄŋ Jesu dad ulm ɛl es ninɛ: «Lasar uw. ¹⁵Eke mʼiim yogŋ a, sos ɛm am iŋnʼm ↄny eci yecʼɛtŋ ke úbrʼm nawrɛ. Gbɛkↄ ɛy fɛŋ sʼímn in ogŋ a.» ¹⁶Ɛtŋ Toma, eke wɛl igŋ nin af Oli a, dad jam ɛsɛl ɛjecʼa ninɛ: «Ɛy yɛji, sʼímn yogŋ ke sʼúwr in ab.»

Jesu el luw ɛm anŋ igb lele sel ab

¹⁷Eke Jesu im ok yogŋ a, lʼiri eke Lasar anŋ uwↄmu ɛm ij sɛgŋ yar. 11.17 Jwifɛl e low yɛgm ɛsɛl a bi tutr eke ɛgŋ ekʼuw a, in ecʼabŋ a bʼanŋʼn saw ow kok sɛgŋ nyahan. Eke sica sɛgŋ nyahan ɛc a, ke ɛgŋ a kʼↄtum igbm ij.¹⁸Eke Betani titm Jerusalɛm ke ow ijm kilo nyahan yɛjʼa, ¹⁹Jwifɛl nↄnↄ ow Mart lele Mari ab ogŋ eke kʼatr ɛl sos es ɛl lisijim e luw na sosiɛm. ²⁰Eke Mart iri eke Jesu am ow a, nʼim ow ecʼↄbr ɛm, kↄ Mari gbɛ sig es gbugŋ. ²¹Mart dad Jesu ninɛ: «Ɛgŋ gbɛl, blel anŋ aŋa, ɛm lisijim blel uwm. ²²Gbɛkↄ mʼuw any, eke caca ɛm yɛji, low fɛŋ eke bʼow ibrm Nyam a, li bʼow nʼↄŋʼŋ.» ²³Jesu dadʼr ninɛ: «Esŋ jim bʼow igb luw ɛm.» ²⁴Mart dad ninɛ: «Mʼuw any eke lɛgŋ es abal el ɛm a eke agŋ ekʼuw a bʼow igb luw ɛm a, in yɛji li bʼow lʼigb.» ²⁵Jesu dadʼr ninɛ: «Mʼel luw ɛm anŋ igb lele sel ab. Ɛgŋ ekʼↄny ↄmn ɛm ɛm a, eke lʼuw yɛji, li bʼow nʼanŋ owr abŋ ɛm; ²⁶ɛtŋ ɛgŋ ekʼanŋ owr ke ↄny ↄmn ɛm ɛm a, li kʼow lʼuwm lɛgŋ kaka. Kↄ ↄny ↄmn low na ɛm ee?» ²⁷Li dad ninɛ: «Ɛgŋ gbɛl, mʼub nawrɛ eke el Mesi a, Nyam ecʼIy eke kʼow wus na af a.»

²⁸Eke lʼɛw nɛny es a, nʼim lʼɛsŋ lisijↄw Mari ɛtŋ nʼam dad ow lebl es is ɛm lʼɛsɛ: «Low yɛgm agŋ ɛs a ow anŋ aŋa, ɛtŋ nʼam ɛsŋʼŋ.» ²⁹Eke Mari bʼiri sodad amua a, kpɛkŋ lʼigb es ogŋ ɛm nʼim nʼɛŋn Jesu. ³⁰Ke Jesu kʼɛym baŋn a yɛji, kↄ nʼanŋ usu a cɛ eke Mart ↄbrʼr a. ³¹Eke Jwifɛl a anŋ akŋ am atr Mari sos es, ke lʼigb es ogŋ ɛm lʼɛy ↄkm a, -lʼus ow jam. -Li tutr ekʼow aam uwↄmu af ikŋ ↄŋn. ³²Mari im ok yogŋ a eke Jesu anŋ a. Kpɛkŋ eke li bʼɛkn ow a, lʼok ↄwrↄkp wus ow ecʼany af ɛtŋ nʼam dad ow lʼɛsɛ: «Ɛgŋ gbɛl, blel anŋ aŋa, ɛm lisijim blel uwm.» ³³Jesu ɛkn eke nʼam ikŋ ↄŋn agŋ a ekʼigŋʼn ab ow ab ab. Ow e low a ↄwrʼr sos es afŋn es, ³⁴ɛtŋ nʼam ibrm wɛl lʼɛsɛ: «Kↄ bogŋ ɛwr ir ee?» -Li dad ow ninɛ: «Ɛgŋ gbɛl, òw cɛ bʼow ɛkn.» ³⁵Jesu ikŋ ↄŋn. ³⁶Jwifɛl a dad ninɛ: «Ɛ̀kan, lʼerur ow tasi!» ³⁷Gbɛkↄ ɛl ɛm ecʼagŋ nyam nyam am dad ɛsɛ: «In eke lʼewlm any eflu a, 11.37 Ɛ̀kn Jan 9.1-12. kↄ li kʼↄtum lʼɛdŋnm Lasar eke kʼúwm ee?»

Lasar igb luw ɛm

³⁸Ɛmɛny Jesu low ɛy sos ɛm toŋ ow afŋn es, ɛtŋ im uwↄmu ab af. Ow el nↄmu ekʼanŋ mób ɛm, ke wɛl oc lob abl ow ecʼɛm ɛy usu ab es. ³⁹Jesu dad ninɛ: «Ɔ̀nyn lob a ocr es.» Lɛgŋuw a e lisijↄw Mart dadʼr ninɛ: «Ɛgŋ gbɛl, sɛgŋ emum yar ɛtŋ anake nʼanŋ aŋa a, lʼit eke li kʼewŋ.» ⁴⁰Jesu dadʼr ninɛ: «Kↄ mi dadmʼŋ mʼɛsmɛ, eke ↄny ↄmn, bʼow ɛkn Nyam ecʼanygbɛl ab ee?»

⁴¹Sica wɛl ↄny lob a oc es, ɛtŋ Jesu igbl any ogŋ afr ɛtŋ dad ninɛ: «Ɛm Ɛs, mʼɛluʼŋ bia eke iri ɛm e lebl. ⁴²Mʼuw any eke sɛgŋ a fɛŋ bʼiriʼm lebl, gbɛkↄ mʼam dadʼŋ agŋ amua ekʼɛlulʼm ɛm a eci, yecʼɛtŋ ke -lʼub nawrɛ eke ɛrmʼm.» ⁴³Li bʼuwar odad a ɛtŋ li barm lebl tuↄtuↄ ɛm ninɛ: «Lasar, ɛ̀y ↄkm!» ⁴⁴Lɛgŋuw a ɛy ↄkm, gbad og wiwrmʼn sabu lele akr ab ɛtŋ gbad wiwrmʼn nuŋ ab. Jesu dad ɛl ninɛ: «Mↄmun in es, ke ɛ́gbar ir es nʼim.»

Es ɛw ɛsɛl am ut Jesu ecʼibi ecʼasre

⁴⁵Jwifɛl a ekʼow Mari ogŋ a ɛkn ów a eke Jesu kok a ɛtŋ ɛl ɛm e nↄnↄ ub nawrɛ. ⁴⁶Gbɛkↄ ɛl ɛm ecʼagŋ bɛb gbɛ im ɛŋn Farisiɛl a ɛtŋ otar ów a eke Jesu kok a e low akr ok ɛl. ⁴⁷Egb waw ɛsɛl ɛgbɛl lele Farisiɛl ab ɛsŋ Sanedrɛn ecʼagŋ a luku as ɛm, ɛtŋ am dad ɛsɛ: «Ɛgŋ na am kok mɛny ɛwr owi nↄnↄ! Kↄ ayaf si ki kokr ab ee? ⁴⁸Eke sʼam yɛbʼr li kok ɛbɛn, agŋ a fɛŋ bʼow ubʼr nawrɛ; ow bʼow ↄŋ Rom ecʼes ɛwɛl a ow ok low na ɛm ŋuŋn ɛy e Nyamel gbɛl na lele ɛy ecʼɛb na nimum ab!» ⁴⁹Ɛl ɛm ecʼɛgŋ nyam eke wɛl bʼɛsŋ Kayif, ke lakpo ab af el egb waw ɛs ligbɛl a am dad ɛl ɛsɛ: «Low na kʼokm ↄny es sos ɛm kaka! ⁵⁰Kʼuwmn any eke ow akpl ↄny eci ekʼɛgŋ nyam kʼuw dedeku a fɛŋ eci, ke ow ɛm a ɛb a nimum kʼuŋm ee?» ⁵¹Ke ow elm in ɛm li dadm odad na, gbɛkↄ eke lakpo ab af lʼel egb waw ɛs ligbɛl a, 11.51 Amani Sig ɛm a, egb waw ɛs ligbɛl bʼↄny ob ɛsɛ srigbi af eke bʼibrm low uw Nyam e low ekʼam erur ab any (Ɔkm Ok 28.30; 1 Samiɛl 14.36-44). Amani Owr ɛm a, wɛl ibram ob na ij, kↄ Jwifɛl a uw any eke Nyam bʼɛcr egb waw ɛs ɛm dad odad. nʼam ɛwar li dad eke owʼn it eke Jesu in kʼuw Jwifɛl fɛŋ eci, ⁵²ke owʼn kʼelm wɛl sↄny cɛ eci, kↄ ke in ás Nyam ecʼey a eke in mↄmun es a luku sos megl nyam ɛm.

⁵³Lɛgŋ a cɛ, Jwifɛl ecʼes ɛwɛl a bɛbm eke kʼibi Jesu. ⁵⁴Ow sosiɛm Jesu ɛ́cm Jwifɛl a ecʼany af ij. Nʼim wus ikpr nyam eke titm loj a, baŋn a eke wɛl bʼɛsŋ Efrayim ab ɛm; nʼanŋ yogŋ in e jam ɛsɛl ab ab.

⁵⁵Pak ecʼes gbɛgbl ekʼel Jwifɛl ecʼa e lɛgŋ titm, ɛtŋ wus ab af ecʼagŋ nↄnↄ im Jerusalɛm eke kʼayal sos gbuŋ ke es gbɛgbl a e lɛgŋ ów. ⁵⁶-Nʼam ↄl Jesu, ɛtŋ eke -nʼanŋn Nyamel gbɛl ab ɛm a, -nʼam ibrmnin ɛl ↄfr -lʼɛsɛ: «Kↄ ayaf am ɛkanin ee? Li bʼow lʼow, kↄ li kʼow lʼowm es gbɛgbl na ɛm ee?» ⁵⁷Ke egb waw ɛsɛl ɛgbɛl a lele Farisiɛl ab ab dad ekʼɛgŋ in uw yogŋ eke Jesu in anŋ any, owʼn yɛ́gm ɛl yecʼɛtŋ kʼɛl ↄ́ny ow.

Mari ok Jesu mijey akr

Matie 26.6-13; Mark 14.3-9

¹Sica ow anŋ sɛgŋ nↄhↄn ke Pak ɛ́y, ɛtŋ Jesu im Betani, yogŋ a eke Lasar eke lʼigbm luw ɛm a anŋ a. ²Yogŋ, Mart kok ob ij ↄŋʼn. Agŋ a ekʼanŋ ob ij lↄfu lís Jesu ab a, Lasar yɛji anŋ ɛm. ³Mari oc mijey litr ikpr ekʼil an ke wɛl kok nar tasi ɛm ok Jesu akr; 12.3 Ɛ̀kn Mark 14.3 ecʼakr otar a. ɛtŋ lʼoc in e sin nuŋ a li tɛtŋ ow akr es. Akŋ a nimum el mijey sↄsŋ ↄfr. ⁴Ɛtŋ Judas Iskariↄt, Jesu e jam ɛsɛl ab ɛm ecʼɛgŋ nyam, in a tasi eke bʼow ↄl ijʼr a dad ninɛ: ⁵«Wɛl ↄtu eke kʼↄl mijey na ij os ekŋ yen yen sakp nyahan, óc ow ecʼos a ↄŋ ↄgbↄru.» ⁶Nʼam dad odad na ow elm ↄgbↄru e sↄrŋ ikŋ eke li kʼↄny eci, kↄ eke lʼel ulu a sosiɛm eci, aŋke os ekpr a eke li bʼↄnym ab a, li bʼot os a eke wɛl bʼok ɛm a. ⁷Ɛtŋ Jesu dad ninɛ: «Ɛ̀gbʼr es tiŋ! Li kok low na lɛgŋ a eke wɛl bʼow ɛluʼm uwↄmu ɛm a eci. 12.7 Ɛ̀kn Matie 26.12 ecʼakr otar a.⁸Ɔgbↄru anŋ ↄny ab sɛgŋ fɛŋ, 12.8 Ɛ̀kn Ol Ɔkn 15.11. kↄ ɛm ecʼa, mi kʼow mʼanm ↄny ab sɛgŋ fɛŋ.»

⁹Jwifɛl a ecʼagŋ nↄnↄ iri eke Jesu anŋ Betani. -Nʼim yogŋ ow elm Jesu sosiɛm eci cɛ, kↄ Lasar yɛji eke Jesu igbm luw ɛm a sosiɛm eci. ¹⁰Egb waw ɛsɛl ɛgbɛl a ɛgŋ eb eke kʼibi Lasar yɛji, ¹¹aŋke Jwifɛl nↄnↄ am ŋgboŋ ɛl ɛm Lasar sosiɛm ɛtŋ am ub Jesu nawrɛ.

Jesu aam ɛy Jerusalɛm

Matie 21.1-11; Mark 11.1-11; Luk 19.28-40

¹²Eke lɛgŋ ɛny akr af a, agŋ nↄnↄ a eke ow Pak ecʼes gbɛgbl ab ɛm a iri eke Jesu am ow Jerusalɛm. ¹³Agŋ a fɛŋ ot sarikŋ ay ɛtŋ ok ↄkm baŋn a aam ↄbrʼr, -nʼam ↄg -li dad -lʼɛsɛ: «Hosana! Ke Nyam ɛ́dŋ ɛgŋ a ekʼam ow Ɛs Kↄtↄkↄ e nin ɛm a ↄwrↄ!12.13 Selu 118.25-26. Ɛ̀kn Matie 21.9 ecʼakr otar a. Ke Nyam ɛ́dŋ Israɛl ecʼɛb ebu a ↄwrↄ!» ¹⁴Jesu ɛŋn gbaŋkↄ kpɛtɛŋni nyam ɛtŋ sig es af ɛsɛ elel eke Nyam Lɛl dadr ab af: ¹⁵Siↄn eci dedyↄwli, erŋn kʼↄ́nyʼŋ! Ìs any lɛr, ŋ ecʼɛb ebu a am ow, li sig gbaŋkↄ kpɛtɛŋni e liy af.12.15 Zakari 9.9. Ɛ̀kn Matie 21.5 eci akr otar a.¹⁶Ke ów amua kʼokm in e jam ɛsɛl a es sos ɛm; gbɛkↄ eke Jesu ɛy in ecʼanygbɛl ɛm bake ow uwr a, -lʼↄkn eke Nyam Lɛl ikŋ anym dad in e lís e low na, ɛtŋ ow anake ow ɛy a.

¹⁷Bieku ab ɛm ecʼagŋ a eke ɛkn Jesu igbm Lasar luw ɛm a, am dad low a eke -lʼɛkan a ecʼodad. ¹⁸Bieku a iri mɛny ɛwr a e li kok a ecʼodad: na sosiɛm anake -lʼowr -nʼam ↄbr ow a. ¹⁹Ca Farisiɛl a am dad ɛl ↄfr ɛm ɛsɛ: «Am ɛkan, si kʼↄtumn low kaka fɛŋ ecʼij! Agŋ a fɛŋ am usʼr jam!»

Jesu am dad in ecʼanygbɛl lele in e luw ab ecʼodad

²⁰Es gbɛgbl a e lɛgŋ a, agŋ a ekʼuyu im Jerusalɛm eke kʼigŋ Nyam nuŋ a, Grɛkɛl a e bɛb anŋ ɛl ɛm. ²¹Ɛl, -nʼim -nʼɛŋn Filip ekʼel Bɛtsayida baŋn Galile wus af ecʼɛgŋ a, ɛtŋ -li dad ow ninɛ: «Ɛgŋ gbɛl, sʼam erur eke si kʼɛkn Jesu.» ²²Filip im dad ok Andre ɛtŋ ɛl yony mum -nʼim -li dad -lʼok ow. ²³Jesu dad ɛl ninɛ: «Wanci ow eke ɛgŋ ecʼIy bʼow ɛy in anygbɛl ɛm. ²⁴Low nawrɛ mʼam dad ↄny: likŋ e liy nyam eke wɛl ɛlu nↄmu ɛm ke anŋ tiŋ ugŋm es a bʼanŋ in ecʼelel a cɛ. Gbɛkↄ eke sel a ugŋ es, li bʼↄsu ey nↄnↄ. ²⁵Ɛgŋ eke bʼerur in e sel a, li bʼow lʼirmn ow; kↄ ɛgŋ eke wus af aŋa kʼow ebrm in e sel a e low ɛrm mij a, bʼow ɛŋn sel ekʼↄnym uwr. ²⁶Ɛgŋ eke am erur e ki kok ɛm e lís e low a, ow it ke lʼúsʼm jam; ow ɛm a, li bʼow nʼanŋ yogŋ a eke mʼow mʼanŋ a. Ɛgŋ a eke bʼow kok ɛm e lís e low a, ɛm Ɛs bʼow usrʼr sos. ²⁷Wanci na af ɛrmni ɛdŋʼm es. Ɛtŋ ayaf mi ki dadr ee? Mi dád mʼɛsɛ: ɛm Ɛs, ↄny ocʼm es gbre e wanci na af ee? Ke tasi ɛm a, wanci na ecʼanake mʼow a. ²⁸Ɛm Ɛs, ↄŋ ŋ e nin a anygbɛl!» Ɛtŋ kpɛkŋ lebl nyam anŋ afr dad ninɛ: «Mʼↄŋʼn anygbɛl lɛgŋ ɛtŋ, ɛtŋ ɛmɛny mʼow mʼↄŋʼn anygbɛl sakp yony ɛm.»

²⁹Bieku a eke anŋ yogŋ ke iri lebl a am dad ɛsɛ: «Na nyamgbrany!» Ɛtŋ agŋ bɛb am dad ɛsɛ: «Afr ɛrm ɛs nyam dadʼr odad!» ³⁰Ɛtŋ Jesu dad ɛl ninɛ: «Lebl na ikŋm ɛm sosiɛm, kↄ ↄny sosiɛm. ³¹Catŋ anake wus na e jɛj ok e wanci a ow a; sicaca ɛm a, wɛl bʼow ogŋ wus na ecʼes ɛw ɛs a. ³²Ɛtŋ ɛm ecʼa, lɛgŋ eke wɛl bʼow igblʼm ogŋ afr a, mʼow mʼↄdu agŋ a fɛŋ mʼeb.» ³³Sodad amua ɛm, Jesu am yɛgm in e luw a ecʼelel eke bʼow ɛcr.

³⁴Agŋ a dadʼr ninɛ: «Ɛy e sol a e silɛl ab ɛm sʼiri eke Mesi a bʼow anŋ owr sɛgŋ fɛŋ. 12.34 Ɛ̀kn Selu 89.36-37; Esayi 9.6; Daniɛl 7.14. Ayaf ↄtu eke ki dad eke ow it eke wɛl kʼigbl ɛgŋ ecʼIy ogŋ afr ee? Ɛgŋ ecʼIy a, ke bwo ecʼɛgŋ ana ee?» ³⁵Jesu am dad ɛl ɛsɛ: «Ɛmɛny usuayl anŋ ↄny ecʼaraŋn lɛgŋ tɛl eci cɛ. Eke ↄnyn usuayl a, àan es usuayl ɛm, yecʼɛtŋ ke ncebn kʼókrm ↄny es. Ɛgŋ eke am an es ncebn ɛm a úwm usu eke nʼaam ab any. ³⁶Eke ↄnyn ɛgŋ a eke el usuayl a, ↄnyn ↄmn in ɛm yecʼɛtŋ ke éel usuayl ecʼey.» Eke li dad sodad amua uwr a, Jesu ocr sos es agŋ a sosiɛm im kpekpe lↄl es.

Jwifɛl a ubm Jesu nawrɛ

³⁷Mɛny ɛwr nↄnↄ na eke li kok bieku a ecʼany af a yɛji ↄↄm ɛl -lʼubm ow nawrɛ. ³⁸Ow ɛm kokoba ↄb ɛs Esayi ecʼodad eke dad a iy nɛny: Ɛs Kↄtↄkↄ, kↄ bwo ecʼɛgŋ iri ɛy eci odad ab ee? Kↄ bwo ecʼɛgŋ Ɛs Kↄtↄkↄ okm sos ↄkm yɛgm ee?12.38 Esayi 53.1.³⁹Ɛtŋ ɛmɛny Esayi in cɛ li dad low a sosiɛm eke agŋ amua kʼↄtum ubm nawrɛ a:

⁴⁰Nyam efal ɛl any,

lʼirmn wɛl e nuŋ ɛm ↄny a

yecʼɛtŋ ke ɛl eci anyamn a kʼɛ́knm es,

ke -li kʼuwmn low any.

Ɛtŋ kin low a sosiɛm eke -li kʼɛwlmn -lʼowmn Nyam ogŋ

bake lʼéwlm wɛl a. 12.40 Esayi 6.9-10.

⁴¹Esayi dad odad na aŋke lʼɛkn Jesu ecʼanygbɛl a, ɛtŋ ow el ow ecʼodad anake nʼam dad a. ⁴²Gbɛkↄ, Jwifɛl ecʼes ɛwɛl a, ɛl ɛm a yɛji agŋ nↄnↄ ub Jesu nawrɛ. Gbɛkↄ Farisiɛl a sosiɛm, -lʼokamn sos ↄkm bake wɛl ogŋ ɛl Nyam nuŋ igŋ usu a. ⁴³-Li bʼerur sos usr a eke bʼanŋ agŋ ɛm ow a -lʼakm Nyam ɛm ecʼa.

Jesu Krist eci odad ab ɛm e jɛj ok

⁴⁴Jesu igbl lebl ogŋ dad ninɛ: «Ɛgŋ eke ↄny ↄmn ɛm ɛm a, ow elm ɛm ɛm sↄny cɛ nʼↄnym ↄmn, kↄ ɛgŋ a ekʼɛrmʼm ab ɛm yɛji. ⁴⁵Ɛgŋ eke am ɛknʼm a, am ɛkn ɛgŋ a eke ɛrmʼm a. ⁴⁶Ɛm, mʼel usuayl, mʼow wus af aŋa yecʼɛtŋ ke ɛgŋ kaka fɛŋ eke ↄny ↄmn ɛm ɛm a, kʼánm ncebn ɛm. ⁴⁷Eke batŋ ɛgŋ am iri ɛm e sodad a, ɛtŋ lʼↄ́sum a, ke ow elm ɛm mʼↄbmʼn low ij, aŋke tasi ɛm a, mʼow eke mi ki sↄg wus ecʼagŋ a, kↄ ow elm ɛl e low ↄb eci. ⁴⁸Ɛgŋ eke am igŋʼm, ke ébm ɛm e sodad a, bʼɛŋn in e low ↄb a ow ɛm; lɛgŋ es abal el ɛm a, ɛm e low yɛgm a anake bʼow ↄbʼr low a. ⁴⁹Tasi ɛm a, ow elm ɛm obi ɛm mi dadm, kↄ ɛm Ɛs eke ɛrmʼm a in obi, nʼↄŋʼm yecʼa eke mi ki dad ke mi yɛgm agŋ a ecʼabusu. ⁵⁰Ɛtŋ mʼuw any eke yecʼa eke li bi dad a bʼↄŋ ɛgŋ sel ekʼↄnym uwr. Yecʼa eke mʼam dad a, mʼam dad ɛsɛ elel eke ɛm Ɛs ↄŋʼm ow ecʼabusu ab af.»

Jesu am yↄyↄg in e jam ɛsɛl a akr es

¹Gbuŋ ke Pak ecʼes gbɛgbl a e lɛgŋ ɛ́y a, Jesu uw any eke lɛgŋ owʼr eke li kʼŋgboŋ wus af aŋa nʼim Ɛs ogŋ. Lʼerur in ecʼagŋ a eke anŋ wus af aŋa a, ɛtŋ sica li bʼow li yɛgm wɛl eke nʼↄny wɛl ecʼerur kpɛkŋ kpɛkŋ. ²Jesu lele in eci jam ɛsɛl ab ab am ij ncebles ecʼob; ke Judas, Simↄ Iskariↄt jim gbɛ, 13.2 Judas, Simↄ Iskariↄt jim:Jan eci silɛl esig oglog ɛm a, Judas Iskariↄt, Simↄ jim.agn ebʼr eke li kʼↄl Jesu lʼij. ³Jesu in obi lʼuw any eke nʼanŋ Nyam ogŋ lʼow eke li bʼow lʼɛwl nʼim ow ogŋ, ɛtŋ Ɛs ↄŋʼn low fɛŋ ecʼabusu. ⁴Lʼigb ob ij lↄfu lís yogŋ, nʼↄny in e mob af ɛw a lʼoc es, ɛtŋ lʼoc gbad lʼucu er. ⁵Ow e jam a, lʼoc mij lʼok kpokpo ɛm ɛtŋ nʼam yↄyↄg jam ɛsɛl a akr es; li bʼoc gbad a eke lʼucu er a li tɛtŋn wɛl akr es. 13.5 Jesu eci mob sus na el adu eci mob sus, ɛtŋ akr es yↄyↄg a yɛji el adu eci juma.⁶Li bʼok Simↄ Piɛr ogŋ a, ow dadʼr ninɛ: «Ɛgŋ gbɛl, kↄ ŋ ki yↄyↄgʼm akr es ee?» ⁷Jesu dadʼr ninɛ: «Caca ɛm e low eke mʼam kok a kʼirim, gbɛkↄ lɛgŋ ekʼam ow ab ɛm bʼow iri.» ⁸Piɛr ninɛ: «Kʼow yↄyↄgm im akr es lɛgŋ kaka!» Jesu ninɛ: «Eke mi yↄyↄgmʼŋ es, kʼow elm ɛm eci.» ⁹Simↄ Piɛr ninɛ: «Ɛgŋ gbɛl, ow kʼél akr sↄny ij, kↄ nuŋ lele sabu ab yɛji!» ¹⁰Jesu ninɛ: «Ow itm eke ɛgŋ eke ok mij a kʼok mij ij, ekʼow elm akr cɛ, 13.10 ekʼow elm akr cɛ:Jan eci silɛl esig oglog ɛm, wɛl ɛ́ŋnm sodad amua. aŋke lʼayl fɛŋ. Ɔny, ayal, gbɛkↄ ow elm ↄny fɛŋ gbɛ.» ¹¹Jesu uw ɛgŋ a eke bʼow ↄl ijʼr ab any sɛnyn sɛnyn; na sosiɛm anake li dad eke owʼn elm wɛl fɛŋ wɛʼn aylm a.

¹²Eke li yↄyↄg wɛl akr es bake ow uwr a, lʼus in e mob sus ɛm a, lʼɛwl nʼim ob ij lↄfu lís a li sig es ɛtŋ nʼam dad wɛl lʼɛsɛ: «Kↄ low a eke mi kok ↄny a, uwr ow e nyandrɛ ab any ee? ¹³Bʼɛsŋnʼm “Low yɛgm agŋ ɛs” lele “Ɛgŋ gbɛl” ab ɛtŋ ↄny e low yɛji ij aŋke mʼel. ¹⁴Eke batŋ ɛm eke mʼel Ɛgŋ gbɛl lele Low yɛgm agŋ ɛs ab a mi yↄyↄg ↄny akr es, ke ↄny yɛji, ↄny ↄfr a, ow it eke ki yↄyↄgr ir akr es. ¹⁵Mʼↄŋ ↄny sɛwl eke ki kokr ɛsɛ elel eke mi kok ab af. ¹⁶Ɛɛ, low nawrɛ mʼam dad ↄny: adu ágbm akam in ecʼes ɛw, ɛtŋ ɛrmu yɛji ágbm akam ɛgŋ a ekʼɛrmʼn a. ¹⁷Sica eke uwr ów amua any a, eke kokr ow e low, ehe bʼow el ↄny eci.

¹⁸Ow elm ↄny fɛŋ ecʼodad mi dadm; agŋ a eke mi sↄsum mʼot a, mʼuw ɛl any. Gbɛkↄ ow it ke Nyam Lɛl ecʼodad a íy nɛny: Ɛgŋ a eke in yↄny sʼij ob a ɛwl owʼm ar.13.18 Selu 41.10.¹⁹Sicaca ɛm a, mʼam dad ↄny kpɛkŋ gbuŋ ke low a ów, yecʼɛtŋ ke lɛgŋ a eke low a bʼow ɛy a, úbr nawrɛ eke ɛm, anŋ anŋ.13.19 Ɛ̀kn Jan 8.24 ecʼakr otar a.²⁰Ɛɛ, low nawrɛ mʼam dad ↄny: ɛgŋ kaka fɛŋ ekʼeb ɛgŋ eke mʼɛrm a, ɛm yɛji lʼebʼm; ɛtŋ ɛgŋ kaka fɛŋ eke ebʼm a, eb ɛgŋ a eke ɛrmʼm a.»

Jesu am dad in ecʼↄl ij a ecʼodad

Matie 26.20-25; Mark 14.17-21; Luk 22.21-23

²¹Eke Jesu dad ów amua bake ɛw nɛny es a, low ɛyʼr sos ɛm afŋn es. Li dad lʼɛrum mar ninɛ: «Ɛɛ, low nawrɛ mʼam dad ↄny: ↄny ɛm ecʼɛgŋ nyam bʼow ↄl ijʼm.» ²²Jam ɛsɛl a am lɛrir ɛl ↄfr ɛtŋ -lʼuwmn ɛgŋ yecʼa eke odad a ot es ab any. ²³Jam ɛsɛl ab ɛm e nyam a eke Jesu bʼerur a akŋmʼn ab. ²⁴Simↄ Piɛr ɛw sos nyam yɛgmʼn eke li kʼibrm Jesu ɛgŋ yecʼa ekʼow am dad ow ecʼodad a. ²⁵Jam ɛs a igŋ Jesu lↄru ɛtŋ am ibrmʼn ɛsɛ: «Ɛgŋ gbɛl, kↄ bwo ecʼɛgŋ ee?» ²⁶Jesu dad ninɛ: «Mʼow mʼubr futufutu mʼusm mredi ɛm; ɛgŋ a eke mʼow mʼoc mʼↄŋ a, ke in ana.» Lʼubr futufutu lʼusm mredi ɛm ɛtŋ nʼↄŋ Simↄ Iskariↄt jim Judas. ²⁷Eke kpɛkŋ Judas eb futufutu ikpr a, Satan ɛyʼr ɛm. 13.27 Jwifɛl ogŋ a, eke etu eb ɛs nyam, ob ij lↄfu lís itl ob ↄŋ etu ab ɛm ecʼɛgŋ nyam, ow el erur mum eke nʼↄny ɛgŋ a eci. Jesu ɛlu in ecʼerur es abal el ↄkm ↄŋ Judas. Gbɛkↄ Judas ↄtur ɛrm ɛtŋ ow ɛm anake Satan ɛyʼr ɛm a. Ow elm ke agn ecʼabusu mum nyam anŋ futufutu ab ɛm, oglog ke Judas kʼↄnym low ecʼabusu. Judas in obi nʼↄŋ sikpl abusu ɛy in ecʼɛb ir ab ɛm (Jan 12.6), ɛtŋ lʼiri Satan eci low yɛgm a yɛji (Jan 13.2). Jesu dadʼr ninɛ: «Low yecʼa eke ki kok a, kòk fafa.» ²⁸Low a sosiɛm eke li dad ow odad na a, agŋ a eke ok es ob ij lↄfu lís a, ɛgŋ kaka uwm any. ²⁹Eke ow el Judas anake bʼↄnym os ab ab a, agŋ nↄnↄ am tutr eke Jesu am ɛrmʼn eke li kʼim lʼↄl ob ekʼit es gbɛgbl a eci, oglog nʼím lʼap ↄgbↄru ob. 13.29 Pak eci ncok a, Nyamel gbɛl a eci masany a fɛŋ bʼanŋ froro yecʼɛtŋ ke ↄgbↄru a ánŋ yogŋ ke agŋ ów ap ɛl ob.³⁰Judas eb futufutu a ɛtŋ kpɛkŋ lʼɛy ↄkm. Ke lɛgŋ am uk.

Ol owr

³¹Eke sica Judas ɛy ↄkm a, Jesu dad ninɛ: «Sica ɛgŋ ecʼIy ecʼanygbɛl a e lisany a fig ɛtŋ Nyam ecʼanygbɛl a bʼow ɛy ↄkm in ɛm. ³²[Ɛtŋ eke Nyam ecʼanygbɛl a ɛy ↄkm in ɛm,] 13.32 Jan eci silɛl esig oglog ɛm a, wɛl ɛ́ŋnm sodad ekʼanŋ ob na [...] ecʼaraŋn a. Nyam yɛji in obi bʼow ɛlu Iy a ecʼanygbɛl ↄkm, ɛtŋ ow kʼow ibnm. ³³Ɛm ecʼey, mʼanŋ ↄny ab lɛgŋ tɛl cɛ eci. Bʼow ↄↄlʼm, kↄ mʼam mʼow mi dad ↄny low a eke mi dad mʼok Jwifɛl ɛjecʼa: “Kʼow ↄtumn iimn yogŋ a eke mʼaam a.” ³⁴Mʼam ↄŋ ↄny ol owr: èrurir ↄny ↄfr. Tasi ow it eke kʼerurir ↄny ↄfr ɛsɛ elel eke mʼerur ↄny ab af. ³⁵Eke erur anŋ ↄny ↄfr ɛm tasi, ke agŋ a fɛŋ bʼow uw any eke eel ɛm e jam us ɛsɛl.»

Piɛr bʼow ɛgbr Jesu

³⁶Simↄ Piɛr am ibrm Jesu ɛsɛ: «Ɛgŋ gbɛl, kↄ bogŋ aam ee?» Li dad ow ninɛ: «Sicaca ɛm kʼↄtum usm im jam owm yogŋ a eke mʼaam a; gbɛkↄ lɛgŋ ɛjecʼɛm bʼow usʼm jam ow.» ³⁷Piɛr dadʼr ninɛ: «Ɛgŋ gbɛl, kↄ bla sosiɛm ɛtŋ caca ɛm mi kʼↄtum mʼusmʼŋ jam mʼowm ee? Ɛm, mʼuw es inym eke mi kʼirmn ɛm e sel a ŋ eci!» ³⁸Jesu dad ninɛ: «Kↄ tasi uw es inym eke kʼirmn ŋ e sel a ↄŋʼm ee? Ɛɛ, low nawrɛ mʼam dadʼŋ: gbuŋ ke ŋgↄs íkŋ a, bʼow dad sakp nyahan eke uwmʼm any.»

Jesu el ejagb eke bʼɛwl ɛgŋ Ɛs ogŋ

¹Jesu dad in e jam ɛsɛl a ninɛ: «Ɛrm mij kʼók ↄny. Ɔ̀nyn ↄmn Nyam ɛm, ke ɛm yɛji ↄ́nyn ↄmn ɛm ɛm. ²Ɛb ir usu nↄnↄ anŋ ɛm Ɛs e gbugŋ a; kↄ blel ow anm tasi, ke mi dad mʼɛsɛ mʼaam mi kok ↄny usu eke kʼiir ee? ³Eke mʼow mʼim mi kok ↄny usu a, mʼow mʼɛwl mɛny mʼow ke mʼót ↄny, yecʼɛtŋ ke ↄny yɛji ánŋn yogŋ a eke mʼanŋ a. ⁴Yogŋ a eke mʼaam a ecʼejagb a uwr any.» ⁵Toma dadʼr ninɛ: «Ɛgŋ gbɛl, yogŋ a eke aam a, sʼuwm any, ke sica ayaf sʼↄtu eke si kʼuw ejagb ab any ee?» ⁶Jesu dadʼr ninɛ: «Mʼel ejagb, mʼel low nɛnyɛmbri nyam, mʼel sel. Ɛgŋ kaka kʼↄtum iim Ɛs ogŋ eke lʼɛcrm ɛm ɛm. ⁷Eke uwrʼm any, bʼow uwr ɛm Ɛs yɛjʼany. 14.7 Eke uwrʼm any, bʼow uwr ɛm Ɛs yɛjʼany:Jan eci silɛl esig oglog ɛm a, Blel uwrʼm any ana, úwr ɛm Ɛs yɛjʼany. Ɛtŋ sicaca ɛm a, uwr ir any ɛtŋ ɛkan in yɛji.»

⁸Filip dadʼr ninɛ: «Ɛgŋ gbɛl, yɛ̀gm ɛy Ɛs cɛ ke ow bʼow ɛyr ɛy ɛrm es.» ⁹Jesu dadʼr ninɛ: «Filip, mʼanŋ ↄny ab lɛgŋ ibn ɛtŋ uwm im any ee? Ɛgŋ eke ɛknʼm a, ɛkn ɛm Ɛs. Ɛtŋ kↄ bla sosiɛm am dad eke mi ki yɛgmʼŋ ɛm Ɛs ee? ¹⁰Mʼanŋ ɛm Ɛs ɛm ɛtŋ ɛm Ɛs yɛji anŋ ɛm ɛm; kↄ ub nawrɛ ee? Sodad a eke mʼam dad ↄny a, ow elm ɛm ɛm ow ánm owm. Ɛm Ɛs eke ir ɛm ɛm a anake bi kok in ecʼów fɛŋ a. ¹¹Eke mi bi dad mʼɛsɛ mʼanŋ ɛm Ɛs ɛm ɛtŋ ɛm Ɛs yɛji anŋ ɛm ɛm, ke ùbrʼm nawrɛ. Eke ɛgŋmn, ke ów amua sosiɛm gbɛ ùbr nawrɛ. ¹²Ɛɛ, low nawrɛ mʼam dad ↄny. Ów a eke mʼam kok a, ɛgŋ yecʼeke ↄny ↄmn ɛm ɛm a, in yɛji li bʼow li kok. Ɛtŋ li bʼow li kok ow agb afŋn es aŋke mʼaam ɛm Ɛs ogŋ. 14.12 Gbuŋ ke Jesu ígb uwↄmu ɛm a, Nyam eci es eb ɛlu owi ɛym ↄkm tasi. Jam ɛsɛl a bↄbↄ yɛji uwm any eke Jesu elm ɛgŋ cɛ, kↄ lʼafŋ ɛgŋ el es. Eke lʼigb luw ɛm a, ow ayl eke lʼel Nyam ecʼIy. In eci owr anŋ ɛm a, usu a eke li bʼanŋ a, yogŋ cɛ wɛl bʼɛknʼn; li bʼigb uwↄmu ɛm a, nʼↄŋ in ecʼAbŋ Lala a im wus na nimum ɛtŋ anŋ nawrɛ ub ɛs fɛŋ ɛm.¹³Low fɛŋ eke bʼow ibrmn ɛm e nin ɛm a, mʼow mi kok, yecʼɛtŋ ke Iy ɛ́lu Ɛs ecʼanygbɛl a ↄkm. ¹⁴Eke batŋ am ibrmnʼm low ɛm e nin ɛm a, mʼow mi kok.»

Abŋ Lala a eke Jesu ɛwar a

¹⁵«Eke bʼerurirʼm, bʼow ↄsur ɛm e sol a. ¹⁶Ɛtŋ mʼow mʼibrm ɛm Ɛs eke kʼↄŋ ↄny Abu Ɛlum Ɛs ɛjeci eke kʼanŋ ↄny ab sɛgŋ fɛŋ. 14.16 Abu Ɛlum Ɛs ɛjeci:Odad na ecʼiri Grɛk ɛm a ufu es nↄnↄ. Wɛl bʼiri ɛsɛ: ów ↄm ɛs, ɛrm es ɛyr ɛs, abu ɛdŋn any ɛs oglog sos es atr ɛs.¹⁷In lʼel low nɛnyɛmbri nyam ecʼAbŋ. Wus kʼↄtum ebmʼn, aŋke li kʼↄtum lʼɛknm ow, li kʼↄtum lʼuwm ow any. Gbɛkↄ ↄny, uwr ir any aŋke nʼanŋ ↄny ab ɛtŋ li bʼow nʼanŋ ↄny ɛm sɛgŋ fɛŋ. 14.17 li bʼow nʼanŋ ↄny ɛm sɛgŋ fɛŋ:odad na Grɛk ɛm a, wɛl ↄtu ekʼitŋn ɛjecʼɛm dad ɛsɛ nʼanŋ ↄny ɛm sɛgŋ fɛŋ.¹⁸Mi kʼow mʼɛlum ↄny es ↄny sↄny ɛsɛ uwiyŋɛl af, kↄ mʼow mʼɛwl mʼow ↄny ogŋ. ¹⁹Ow anŋ lɛgŋ tɛl eke wus kʼow ɛknm im ij; kↄ ↄny, bʼow ɛkanʼm, aŋke mʼow mʼɛwl mʼanŋ owr ɛtŋ ↄny yɛji bʼow anŋn owr. ²⁰Ow e lɛgŋ a, ow bʼow ok ↄny es sos ɛm eke mʼanŋ ɛm Ɛs ɛm, ɛtŋ ↄny yɛji anŋnʼm ɛm, ɛtŋ ɛm yɛji mʼanŋ ↄny ɛm. ²¹Ɛgŋ a eke bʼeb ɛm e sol a, ke bʼↄsu a, ke ɛgŋ a eke bʼerurʼm ab ana. Ɛgŋ eke bʼerurʼm a, ɛm Ɛs bʼow erur ir; ɛm yɛji mʼow mʼerur ir ɛtŋ mʼow mʼokm sos ↄkm in ecʼany af.» ²²Jud (ow elm Judas Iskariↄt) dadʼr ninɛ: «Ɛgŋ gbɛl, kↄ bla sosiɛm dad eke kʼokm sos ↄkm yɛgm ɛy ke ow kʼelm wus ecʼagŋ ab ee?» 14.22 Jwifɛl a am tutr eke Mesi a bʼow ow anygbɛl ɛm agŋ fɛŋ ecʼany af, li jɛj agŋ ekʼelm Jwifɛl a e low lʼok ke li kókr Israɛl ɛm.²³Jesu dadʼr ninɛ: «Low fɛŋ eke mʼam dad a, ɛgŋ eke bʼerurʼm a bʼow ↄsu. Ɛm Ɛs bʼow erur ir, ɛtŋ ɛm lele ɛm Ɛs ab si bʼow sʼim in ogŋ, ɛtŋ si bʼow sʼir in ɛm. ²⁴Ɛgŋ eke érurm im a, ↄ́sum ɛm e sodad a. Low na eke mʼam dad irir a, ow elm ɛm eci, kↄ ɛm Ɛs eke ɛrmʼm a ogŋ ow anŋ ow.

²⁵Eke mʼanŋ ↄny ab a, mʼam dad ↄny low na. ²⁶Abu Ɛlum Ɛs a, Abŋ Lala a eke ɛm Ɛs bʼow ↄŋ ow ɛm e nin ɛm a, bʼow yɛgm ↄny low a fɛŋ ɛtŋ bʼow ↄkn ↄny ów fɛŋ eke mi dad ↄny a. ²⁷Mʼam ɛw ↄny ɛrm es ɛy es, mʼam ↄŋ ↄny ɛm eci ɛrm es ɛy a. Mʼↄↄm ↄny ɛsɛ elel eke wus bʼↄŋn ɛgŋ ab af. Ɛrm mij kʼók ↄny, erŋn yɛji kʼↄ́ny ↄny. ²⁸Irir mi dad mʼɛsɛ: “Mʼaam kↄ mʼow mʼɛwl mɛny mʼow.” Blel bʼerurirʼm tasi ana, ow íŋn ↄny sos ɛm uwr any eke mʼaam ɛm Ɛs ogŋ, aŋke ɛm Ɛs agb akmʼm. ²⁹Mʼam dad ↄny caca ɛm gbuŋ ke ów amua ów, yecʼɛtŋ ke lɛgŋ a eke ów amua bʼow a, úbr nawrɛ. ³⁰Mi kʼow mi dadm ów nↄnↄ ↄny ab ij, aŋke wus na ecʼes ɛw ɛs a am ow. Ow elm ke nʼↄ́ny abusu ɛm e nuŋ af, ³¹kↄ ow it eke wus kʼuw any eke mʼↄny ɛm Ɛs ecʼerur. Ow sosiɛm low yecʼa eke ɛm Ɛs bʼibrm a, mi bi kok. Ìgbr, sʼŋ́gbroŋn aŋa!»

Jesu el viny likŋ lis tasi a

¹«Mʼel viny e likŋ lis tasi a, ɛtŋ ɛm Ɛs el ↄgm a e juma kok ɛs. ²Likŋ lal fɛŋ eke bʼucuʼm ke ↄ́sum ey a, li bʼubr ow es, gbɛkↄ lal fɛŋ eke bʼↄsu ey a, li bʼot ow ɛm es, lʼayal ow, yecʼɛtŋ ke ɛmɛny lʼↄ́su ey nↄnↄ lʼobn. ³Low yɛgm a eke mʼↄŋ ↄny a, ayal ↄny lɛgŋ a ɛtŋ. ⁴Ùcurʼm ɛsɛ elel eke mʼucu ↄny ab af. Likŋ lal kʼↄtum ↄsum ey in obi ɛm, eke lʼucum likŋ lis a; ɛbɛn nyam coco ↄny yɛji, kʼↄtumn ↄsumn ey eke ucumnʼm.

⁵Mʼel viny e likŋ a eci lis, ɛtŋ ↄny eel likŋ a ecʼál a. Ɛgŋ eke ucuʼm ke ɛm yɛji mʼucuʼr a bʼↄsu ey nↄnↄ. Tasi ɛm a, kʼↄtumn kokmn low kaka fɛŋ eke mʼanm ɛm. ⁶Ɛgŋ eke ucum im a, wɛl bʼoc ↄwlʼl gbeŋ ɛsɛ likŋ lal eke ↄ́sum ey af; li bi wɛw es, ɛtŋ wɛl bʼot ekŋ ál wɛwɛ a wↄwl alm iri ok es. ⁷Eke bʼanŋn ɛm ɛm ɛtŋ ɛm e sodad a yɛji bʼanŋ ↄny ɛm a, ìbrmn ɛm Ɛs low yecʼa eke erurir a, li bʼow nʼↄŋ ↄny. ⁸Eke bʼↄsur ey nↄnↄ a, bʼow yɛgmn eke eel ɛm e jam us ɛsɛl; ow ɛm anake ɛm Ɛs ecʼanygbɛl a bʼow ɛy ↄkm a.

⁹Ɛsɛ elel eke ɛm Ɛs bʼerurʼm ab af a, ɛm yɛji mi bʼerur ↄny ɛbɛn. Ànŋn ɛm ecʼerur ab ɛm. ¹⁰Bʼow anŋn ɛm ecʼerur ab ɛm eke bʼↄsur ɛm e sol a, ɛsɛ elel eke mʼↄsu ɛm Ɛs e sol a ke mʼanŋ in ecʼerur ab ɛm ab af.

¹¹Mi dad ↄny low na yecʼɛtŋ ke ɛm eci sos ɛm iŋn a ánŋ ↄny ɛm, ke ow ↄ́ŋ ↄny e sos ɛm iŋn a iy nɛny. ¹²Kin ɛm ecʼol a eke mʼam ↄŋ ↄny a: èruririr ↄny ↄfr ɛsɛ elel eke mʼerur ↄny ab af. ¹³Erur ligbɛl a eke ɛgŋ ↄtu eke kʼɛlu ↄkm a cɛ el ke lʼírmn in e sel a lawlɛl e nuŋ af. ¹⁴Eke bi kokr low yecʼa eke mʼam ibrm ↄny a, ke eel ɛm lawlɛl ŋ̂. ¹⁵Mi kʼow mʼɛsŋʼm ↄny madu ij, aŋke adu úwm in ecʼes ɛw ɛs e low eke bi kok ab any. Mʼam ɛsŋ ↄny ɛm lawlɛl aŋke ɛm Ɛs ɛm e low fɛŋ eke mi wewr a, mi yɛgm ↄny. ¹⁶Ow elm ↄny sↄsuamn ocmnʼm, kↄ ɛm mi sↄsum mʼot ↄny; mʼɛw ↄny eke kʼimn ↄsur ey, ↄ́sur ey eke bʼanŋ ibn. Ow bʼow ↄŋ ɛm Ɛs ↄŋ ↄny low fɛŋ eke am ibrmn ɛm e nin ɛm a. ¹⁷Low a eke mʼam ibrm ↄny a el: èruririr ↄny ↄfr.»

Wus ecʼagŋ ifn Jesu lele in ecʼagŋ ab ab

¹⁸«Eke wus ↄny ↄny e sifn, ↄkan eke ɛm lʼikŋ anym lʼifnʼm. ¹⁹Blel eel wus ecʼana, wus ↄ́ny ↄny ecʼerur eke eel in ecʼa sosiɛm. Kↄ mi sↄsum mʼot mʼok ↄny saw, elmn wus ecʼij: na sosiɛm anake wus bʼifn ↄny a. ²⁰Ɔ̀kan low a eke mi dad ↄny a: “Adu ágbm akam in ecʼes ɛw a.” Eke agŋ ijrʼm gbre, ↄny yɛji -li bʼow -lʼijr ↄny gbre; eke -lʼɛlum ɛm e low yɛgm a, -li bʼow -nʼↄny ↄny ecʼa yɛji ecʼɛlum. ²¹Ɛtŋ ɛm sosiɛm -li bʼow -li kok ↄny ów amua fɛŋ, aŋke ɛgŋ a eke ɛrmʼm a, -lʼuwm ow any. ²²Blel mʼowm, ɛtŋ blel mi dadm ɛl odad ana, ke blel ow elm ɛl sikpl. Kↄ caca ɛm a, -nʼↄnym low eke -li ki dad -li dogŋn sos ij. ²³Ɛgŋ ekʼↄny ɛm e sifn a, ↄny ɛm Ɛs yɛji eci sifn. ²⁴Blel ɛl ecʼaraŋn a mi kokm ów eke ɛgŋ ɛjeci kʼↄtum kokm ana, ke blel ow elm ɛl sikpl. Kin, ca -lʼɛkn ɛm ecʼów a ɛtŋ ɛm lele ɛm Ɛs ab -nʼam ifn ɛy. ²⁵Gbɛkↄ ów amua am ɛy yecʼɛtŋ ke odad na eke wɛl nↄn ɛl ecʼol ab ɛm a íy nɛny: -Nʼↄny ɛm e sifn ów ↄbr ɛm.15.25 Selu 35.19; 69.5.²⁶Abu Ɛlum Ɛs a bʼow ow: in lʼel low nɛnyɛmbri nyam ecʼAbŋ eke anŋ ɛm Ɛs ogŋ am ow. Ɛm Ɛs bʼow ocʼr ↄŋʼm mʼↄŋ ↄny, ɛtŋ li bʼow lʼij ɛm e daŋku. 15.26 Ɛ̀kn Jan 14.16 lele ow ecʼakr otar ab ab.²⁷Ɛtŋ ↄny yɛji, bʼow ijr ɛm e daŋku aŋke anŋn ɛm ab nuŋ ↄb ɛm ɛtŋ.»

¹«Mʼam dad ↄny ów amua yecʼɛtŋ ke kʼↄ́wrmn ↄny ecʼↄmn a. ²Wɛl bʼow ogŋ ↄny Nyam nuŋ igŋ susu. Ɛtŋ ɛmɛny lɛgŋ anŋ anym am ow eke agŋ a eke bʼow ibi ↄny a bʼow tutr eke ow el Nyam juma anake -nʼam kok a. ³-Li bʼow -li kok ɛbɛn aŋke -lʼuwm ɛm Ɛs any, ɛtŋ ɛm obi ɛm obi yɛji -lʼuwmʼm any. ⁴Gbɛkↄ mi dad ↄny low na yecʼɛtŋ ke lɛgŋ a eke ow bʼow ow a, ↄ́kan eke mʼikŋ anym mi dad ↄny.»

Abŋ Lala e juma

«Mi dadm ↄny low na nuŋ ↄb ɛm ɛtŋ aŋke mʼanŋ ↄny ab. ⁵Sica mʼaam ɛgŋ a ekʼɛrmʼm a ogŋ, ɛtŋ ↄny ɛm ecʼɛgŋ kaka íbram im yogŋ a eke mʼaam a. ⁶Nɛnɛ eke mi dad a, sos ↄw ↄny es nimum. ⁷Gbɛkↄ mʼam dad ↄny tasi eke ow akpl ↄny eci eke mi kʼim; tasi ɛm a, eke mʼiim, Abu Ɛlum Ɛs a kʼow owm. Kↄ eke mʼim a, mʼow mʼↄŋʼn lʼow. ⁸Ɛtŋ lɛgŋ eke li bʼow lʼow a, li bʼow li yɛgm wus ecʼagŋ a ɛl eci wus ɛy sikpl owi ab ɛm, low nɛnyɛmbri nyam owi ab ɛm, lele Nyam e jɛj ok owi ab ɛm ab. ⁹-Lʼok wus sikpl owi ɛm aŋke -lʼubmnʼm nawrɛ; ¹⁰-lʼok wus low nɛnyɛmbri nyam owi ɛm aŋke mʼaam ɛm Ɛs ogŋ ɛtŋ -li kʼow -lʼɛknmnʼm ij; 16.10 Jwifɛl bi tutr eke ɛl eci ol a ecʼɛlum ɛm, Nyam bʼow eb ɛl. Abŋ Lala bʼow yɛgm ɛl eke Nyam bʼeb agŋ a eke bʼoc ɛl ecʼↄmn a ɛlu Jesu Krist ɛm, ke bʼocʼr ɛsɛ ɛl eci Sↄg Ɛs af a (Rom 1.17; 3.21-22). Jesu bʼim Ɛs ogŋ ba ow bʼuwr a, Abŋ bʼow ayal ow ok agŋ a es sos ɛm, eke low a eke nʼam dad a el nawrɛ tasi, lʼel Nyam ecʼIy.¹¹-lʼok wus jɛj ok owi ɛm aŋke wus ecʼabusu ɛs a, wɛl ↄbʼr low ŋ̂.

¹²Sicaca ɛm a, mʼↄny ów nↄnↄ eke mi ki dad ↄny, kↄ kʼow ↄtumn irimn ij. ¹³Gbɛkↄ lɛgŋ a eke low nɛnyɛmbri nyam ecʼAbŋ a bʼow ow a, li bʼow ni nyimn ↄny low nɛnyɛmbri nyam fɛŋ ɛm. Li kʼow li dadm in obi e nin ɛm ecʼodad, kↄ li bʼow li dad yecʼa eke lʼiri a, ɛtŋ li bʼow lʼɛwar ↄny low yecʼeke bʼow ɛy a. ¹⁴Li bʼow lʼɛlu ɛm ecʼanygbɛl a ↄkm, aŋke li bʼow lʼot yecʼa ekʼel ɛm ecʼa, ɛtŋ li bʼow li dad ↄny ow e low. ¹⁵Ɛm Ɛs ecʼob fɛŋ eke ↄny a, el ɛm eci; ow sosiɛm anake mi dad mʼɛsɛ: Abŋ bʼow eb yecʼekʼel ɛm ecʼa ɛtŋ li bʼow li dad ↄny ow e low.»

Sos es ↄw bʼow itŋn el sos ɛm iŋn

¹⁶«Ow kʼow ibnm eke kʼow ɛknmnʼm ij, ɛtŋ ɛmɛny eke ow bʼow kok sɛgŋ waa a, bʼow ɛwal ɛkanʼm.» ¹⁷Ɛtŋ in e jam ɛsɛl ab ɛm e bɛb am dad ɛl ↄfr ɛm ɛsɛ: «Ke na in e nyandrɛ el ayaf ee? Li dad ɛy eke owʼn kʼow in ibnm eke ɛs kʼow ɛs ɛknmʼn ij; ɛtŋ ɛmɛny owʼn bʼow in kok sɛgŋ waa, ɛs bʼow ɛs ɛwl ɛs ɛknʼn. Ɛtŋ ɛmɛny li dad eke in aam Ɛs ogŋ. ¹⁸Sɛgŋ waa a eke nʼam dad ow ecʼodad a e nyandrɛ el bogŋ ecʼee? Low yecʼa eke nʼam erur eke li ki dad a, si kʼirim!» ¹⁹Jesu am uw any eke jam ɛsɛl a am ↄl eke kʼibrmʼn low. Ow ↄŋ li dad wɛl ninɛ: «Mi dad ↄny eke ow kʼow ibnm eke kʼow ɛknmnʼm ij, ɛtŋ ɛmɛny eke ow bʼow kok sɛgŋ waa a, bʼow ɛwal ɛkanʼm. Kↄ na ecʼanake ↄny ↄfr ɛm a am ↄↄl ow e nyandrɛ ab ee? ²⁰Ɛɛ, low nawrɛ mʼam dad ↄny: bʼow ikŋn ↄŋn kokr sↄrŋ, kↄ wus gbɛ bʼow anŋ sos ɛm iŋn ɛm; bʼow anŋn sos es ↄw ɛm, kↄ ↄny eci sos es ↄw a bʼow itŋn el sos ɛm iŋn. ²¹Yↄw ám ew iy a, li bʼanŋ gbre ij ɛm, aŋke in e gbre ij e lɛgŋ a ow ŋ̂. Kↄ li bʼew iy a, li bʼijl gbre ij ab es, iy a eke lʼew a eci sos ɛm eke am iŋnʼn a sosiɛm. ²²Ɛbɛn eke sicaca ɛm a, anŋn gbre ij ɛm ana, gbɛkↄ ɛmɛny mʼow mʼɛwl mʼɛkn ↄny ɛtŋ bʼow anŋn sos ɛm iŋn ɛm; sos ɛm iŋn ikŋ na, ɛgŋ kaka kʼↄtum ebm ↄny abu ɛm. ²³Eke lɛgŋ ikŋ na bʼow a, kʼow ibramnʼm low kaka fɛŋ ij. Ɛɛ, low nawrɛ mʼam dad ↄny: ob fɛŋ eke bʼow ibrmn ɛm Ɛs ɛm e nin ɛm a, li bʼow nʼↄŋ ↄny. ²⁴Toŋ ke it yɛfɛnyna a, ibramn low kaka ɛm e nin ɛm. Ke ↄny e sos ɛm iŋn a ágb a, ìbrmn, bʼow ɛŋan.»

Jesu akm wus es

²⁵«Mʼoc nyandrɛ ɛm odad mi dad ↄny ów amua fɛŋ. Lɛgŋ am ow eke mi kʼow mi dadm ↄny ɛbɛn ij, kↄ yogŋ anake mʼow mi dad ↄny ɛm Ɛs e lís e low a lala ɛm a. ²⁶Ow e lɛgŋ ab ɛm a, bʼow ibrmn ɛm Ɛs low ɛm e nin ɛm; mi dadm ↄny eke mʼow mi ŋↄŋnʼn mʼↄŋ ↄny, ²⁷aŋke ɛm Ɛs in obi li bʼerur ↄny. Li bʼerur ↄny aŋke bʼerurirʼm ɛtŋ bʼubr nawrɛ eke mʼanŋ Nyam ogŋ mʼow. ²⁸Mʼanŋ ɛm Ɛs ogŋ mʼow mʼɛy wus af aŋa. Sica mʼam ɛlu wus es ke mʼɛ́wl mʼim ɛm Ɛs ogŋ a.» ²⁹In e jam ɛsɛl a am dadʼr ɛsɛ: «Sica am dad ów a ɛrum mar, ócm odad nyandrɛ ɛm dadrm odad ij. ³⁰Sica sʼuw any eke uw low low fɛŋ any, ɛtŋ bʼikŋ anym uw low yecʼa eke wɛl kʼibrm ŋ ab any. Ɛm aŋa anake sʼub nawrɛ eke anŋ Nyam ogŋ ow a.» ³¹Jesu dad ɛl ninɛ: «Catŋ ubr nawrɛ ee? ³²Ɛɛ, wanci am ow, ɛtŋ wanci a ow yɛji ŋ̂; yogŋ ↄny fɛŋ bʼow ↄmun es, ke ɛgŋ ɛgŋ ím in ogŋ ke ow ↄ́ŋ igŋn ɛlulʼm es ɛm sↄny. Njaŋ, tasi ɛm a, mʼanm ɛm sↄny aŋke ɛm Ɛs anŋ ɛm ab. ³³Mi dad ↄny ów amua fɛŋ yecʼɛtŋ ke ɛm ɛm a, ɛ́ŋan ɛrm es ɛy. Bʼow ijr gbre wus af aŋa, kↄ ɛrm úsu ↄny lokm aŋke mʼakm wus es.»

Jesu am ŋↄŋn Nyam in ecʼanygbɛl a ekʼɛy ↄkm a eci

¹Sica eke Jesu dad sodad amua bake ow uwr a, lʼigbl any ogŋ afr ɛtŋ li dad ninɛ: «Ɛm Ɛs, wanci a ow ŋ̂; ɛ̀lu Ejimŋ ecʼanygbɛl a ↄkm yecʼɛtŋ ke Ejimŋ yɛji ɛ́lu ŋ ecʼa ↄkm, ²ke nʼↄ́ŋ agŋ a eke ot abul il a sel ekʼↄnym uwr, abusu a eke ↄŋʼn agŋ e nuŋ af ab ɛm. ³Sel ekʼↄnym uwr a el: ke wɛl úwʼŋ any, ŋ eke el Nyam nawrɛ nyam coco a, ke wɛl úw Jesu Krist eke ɛrm a yɛjʼany. ⁴Mʼɛlu ŋ ecʼanygbɛl a ↄkm wus af aŋa, juma a eke ↄŋʼm eke mi ki kok ab ɛm. ⁵Sica ɛm Ɛs, anygbɛl a eke mʼɛŋn ŋ e lís gbuŋ ke wus anŋ a, ɛ̀luʼm anygbɛl ikŋ na ↄkm ŋ ecʼany af.»

Jesu am ŋↄŋn Nyam ↄŋ in e jam ɛsɛl a

⁶«Wus ecʼagŋ a eke ot abulʼm a, mʼocʼŋ mi yɛgm ɛl. -Lʼel ŋ eci ɛtŋ ot abulʼm ɛtŋ -lʼↄsu ŋ ecʼodad ebl a. ⁷Sica -lʼuw any eke ob fɛŋ eke mʼↄny a, ŋ ogŋ ow anŋ ow, ⁸aŋke mʼↄŋ ɛl odad a eke ↄŋʼm a, ɛtŋ -lʼeb. Tasi -lʼɛgŋ -lʼeb eke mʼanŋ ŋ ogŋ a mʼow, ɛtŋ -lʼub nawrɛ eke ɛrmʼm. ⁹Mʼam ŋↄŋnʼŋ ɛl eci; ow elm wus eci mi ŋↄŋnm, kↄ agŋ a eke abulʼm a sosiɛm aŋke -lʼel ŋ eci. ¹⁰Ob fɛŋ eke mʼↄny a ŋ eci, ɛtŋ ŋ ecʼeke ↄny a yɛji el ɛm eci, ɛtŋ ɛm ecʼanygbɛl a bʼɛy ↄkm ɛl ɛm.

¹¹Mi kʼow mʼanm wus ij, kↄ ɛl gbɛ -nʼanŋ; ɛm, mʼam ow ŋ ogŋ. Ɛm Ɛs lala, ↄsu ɛl ŋ e nin a ekʼↄŋʼm ab ɛm, yecʼɛtŋ ke -lʼel nyam, ɛsɛ elel eke ɛm lele ŋ ab sʼel nyam ab af. ¹²Eke mʼanŋ ɛl ab a, mʼↄsu ɛl ŋ e nin ɛm, nin a eke ↄŋʼm ab ɛm. Mi bʼɛw ɛl nyamn af, ɛtŋ ɛl ɛm ecʼɛgŋ kaka iram, ekʼow elm in a cɛ ekʼit eke kʼirm, ke Nyam Lɛl a íy nɛny a. 17.12 Selu 41.10; Jan 13.18.¹³Sica mʼam ow ŋ ogŋ, ɛtŋ ɛmɛny eke mʼanŋ wus a, mʼam dad ɛbɛn yecʼɛtŋ ke ɛl ɛm a, -nʼɛŋn ɛm e sos ɛm iŋn a, sos ɛm iŋn a nimum. ¹⁴Mʼↄŋ ɛl ŋ ecʼodad a ɛtŋ wus ↄny ɛl e sifn, aŋke -lʼelm wus eci ɛsɛ elel eke ɛm yɛji mʼelm wus ecʼab af. ¹⁵Mi ŋↄŋnm eke kʼↄny ot ɛl es wus af aŋa, kↄ eke kʼↄsu ɛl Low Ŋuŋ Ɛs e lís. ¹⁶-Lʼelm wus eci ɛsɛ elel eke mʼelm wus ecʼab af.

¹⁷Ŋ ecʼodad a el low nɛnyɛmbri nyam. Low nɛnyɛmbri nyam ab ɛm, kòk ɛl -lʼel ŋ eci kpɛkŋ kpɛkŋ. ¹⁸Mʼam ɛrm ɛl wus ecʼagŋ ɛm ɛsɛ elel eke ɛm yɛji ɛrmʼm wus ecʼagŋ ɛm ab af. ¹⁹Mʼam ocr ɛm sosi nimum mʼↄŋʼŋ ɛl eci, yecʼɛtŋ ke ɛl yɛji -lʼel ŋ eci kpɛkŋ kpɛkŋ.»

Jesu am ŋↄŋn Nyam ↄŋ agŋ a fɛŋ eke bʼow ubʼr nawrɛ a

²⁰«Ow elm ɛl sↄny cɛ eci Nyam mi ŋↄŋnm kↄ agŋ a eke ɛl yɛji bʼow ubʼm nawrɛ jam ɛsɛl a eci daŋku ij ab ɛm a. ²¹Mʼam ŋↄŋn eke ɛl fɛŋ -li kʼel nyam. Ɛm Ɛs, ow it eke -li kʼokr af ɛy ab ɛsɛ elel eke mʼanŋ ŋ ɛm ke ŋ yɛji anŋ ɛm ɛm ab af, yecʼɛtŋ ke wus ecʼagŋ a úb nawrɛ eke ow el ŋ ɛrmʼm. ²²Ɛtŋ mʼↄŋ ɛl anygbɛl a eke ↄŋʼm a yecʼɛtŋ ke -lʼel nyam ɛsɛ elel eke ŋ lele ɛm ab sʼel nyam ab af. ²³Mʼanŋ ɛl ɛm ɛtŋ ŋ yɛji anŋ ɛm ɛm; ow ɛm anake -li bʼow -lʼↄtu -lʼel nyam tasi a, yecʼɛtŋ ke wus úw any eke ɛrmʼm ɛtŋ bʼerur ɛl ɛsɛ elel eke bʼerurʼm ab af.

²⁴Ɛm Ɛs, ot ɛl ↄŋʼm, ɛtŋ mʼerur eke yogŋ a eke mʼanŋ a, ɛl yɛji -nʼanŋ ɛm ab yecʼɛtŋ ke -lʼɛkn ɛm ecʼanygbɛl a, anygbɛl a ekʼↄŋʼm a, aŋke erurʼm gbuŋ eke wɛl ki kok wus a. ²⁵Ɛm Ɛs, Low Nyim Nyim Ɛs, wus uwmʼŋ any, kↄ ɛm mʼuwʼŋ any ɛtŋ agŋ amua uw any eke ow el ŋ ɛrmʼm. ²⁶Mʼocʼŋ mi yɛgm ɛl ɛtŋ ɛmɛny mʼow mʼocʼŋ mi yɛgm ɛl yecʼɛtŋ ke ɛm ecʼerur a eke ↄny a ánŋ ɛl ɛm, ke ɛm obi yɛji mʼánŋ ɛl ɛm.»

Jesu ecʼↄny

Matie 26.47-56; Mark 14.43-50; Luk 22.47-53

¹Eke Jesu dad ów amua bake ow uwr a, in e jam ɛsɛl ab ab, -nʼim Sedrↄn eci mij ewl mij a e jam a. Yogŋ, egb lakp nyam anŋ eke in e jam ɛsɛl ab ab -nʼimn -lʼokr ɛm. ²Judas eke am ↄl Jesu ij a yɛji uw usu ab any, aŋke sakp nↄnↄ Jesu lele in e jam ɛsɛl ab ab bʼas luku yogŋ. ³Egb waw ɛsɛl ecʼagŋ ɛgbɛl a lele Farisiɛl ecʼogog ecʼagŋ ab ab ot srↄda eyŋ lele usu ↄsu ɛsɛl ab ↄŋ Judas, ɛtŋ lʼot wɛl ab nʼim egb lakp ab ɛm. Ar mob anŋ ɛl abu ɛm ɛtŋ -nʼↄnym es ɛkan mob lele mrabri ab. ⁴Ɛtŋ eke Jesu uw low a fɛŋ eke bʼow ɛŋnʼn ab any a, nʼim li titm wɛl ɛtŋ nʼam ibrm wɛl lʼɛsɛ: «Kↄ bwo am ↄↄl ee?» ⁵-Li dad ow ninɛ: «Nasarɛt e Jesu.» Jesu dad ɛl ninɛ: «Ɛm ana.» Ke Judas eke am ↄny Jesu ↄŋ ɛl a anŋ ɛl ab.

⁶Kpɛkŋ eke Jesu bi dad ɛl ekʼow el in a, -li kpukŋ -nʼim jam ɛtŋ -lʼok wus. ⁷Ɛmɛny Jesu am ibrm ɛl ɛsɛ: «Kↄ bwo am ↄↄl ee?» -Li dad ninɛ: «Nasarɛt e Jesu.» ⁸Jesu dad ɛl ninɛ: «Mʼikŋ anym mi dad ↄny eke ɛm ana. Eke ow el ɛm am ↄↄlʼm, ke ɛ̀gbr agŋ likpr a es im.» ⁹Elel eke odad a eke li dad a kʼiyr nɛny ana: «Ɛm Ɛs, mʼirmnm ŋ ecʼagŋ a eke abulʼm a e nyam yɛji.» 18.9 Jan 17.12.

¹⁰Sica Simↄ Piɛr ↄny lab ler ɛm eke nʼↄnym ab a lʼↄsm es, ɛtŋ lʼiyr egb waw ɛs ligbɛl a ecʼabu ɛlum ɛs a, ɛtŋ lʼubr ow lidr e lↄru ab es. (Abu ɛlum ɛs a e nin a el Malkus.) ¹¹Kↄ Jesu dad Piɛr ninɛ: «Òc ŋ e lab ler ɛm a ɛlu ow ecʼekpr ab ɛm. Kↄ am tutr eke mi kʼow mʼɛgŋm gbre e mij kpↄk a eke ɛm Ɛs ↄŋʼm ab ee?»

¹²Srↄda eyŋ a lele ɛl eci nyimn ɛs ab ab, Jwifɛl ecʼes ɛw ɛl a eci usu ↄsu ɛsɛl a okr af ↄny Jesu ɛtŋ -nʼawŋ ow. ¹³-Lʼikŋ anym -lʼoc ow -nʼim An ogŋ a. 18.13 Ɛ̀kn Luk 3.2 ecʼakr otar a. An el Kayif eke lakpo ab af el egb waw ɛs ligbɛl a eci anu. ¹⁴Ke Kayif anake ↄm Jwifɛl ecʼes ɛw ɛl a ów dad eke: owʼn akpl ↄny eci eke ɛgŋ nyam in kʼuw dedeku a fɛŋ ecʼa.

Piɛr ɛgbr Jesu

Matie 26.69-70; Mark 14.66-68; Luk 22.55-57

¹⁵Simↄ Piɛr lele jam ɛs ɛjeci nyam ab am us Jesu jam. Eke jam ɛs na el ɛgŋ eke egb waw ɛs ligbɛl a uw any a, ow ↄŋ lʼɛy ow e gbugŋ a Jesu ab. ¹⁶Kↄ Piɛr gbɛ anŋ gbeŋ lisany a. Ɛtŋ jam ɛs a eke egb waw ɛs ligbɛl a uw any a ɛy ↄkm ow dad yↄw a eke am ↄsu lisany a odad ɛtŋ nʼↄŋ Piɛr yɛji ɛy gbugŋ a. ¹⁷Yↄw a dad Piɛr ninɛ: «Kↄ ŋ yɛji, elm ɛgŋ na e jam ɛsɛl ab ɛm ecʼɛgŋ nyam ee?» Piɛr dadʼr ninɛ: «Mʼelm in e jam ɛs.» ¹⁸Ow el lɛfr lɛgŋ iy, ow sosiɛm anake madu a lele usu ↄsu ɛsɛl ab ab fuf al ke ok es am ↄgbu a. Piɛr yɛji anŋ ɛl ɛm ɛtŋ am ↄgbu al a.

Egb waw ɛs ligbɛl a am ibrm Jesu low

Matie 26.59-66; Mark 14.55-64; Luk 22.66-71

¹⁹Egb waw ɛs ligbɛl a am ibrm Jesu low eke ↄn in e jam ɛsɛl a lele in e low yɛgm ab ab es. ²⁰Jesu dadʼr ninɛ: «Mi dad agŋ a fɛŋ ecʼany af; sɛgŋ a fɛŋ mi bi yɛgm agŋ low Nyam nuŋ igŋ susu a lele Nyamel gbɛl ɛm ab, yogŋ eke Jwifɛl fɛŋ bʼas luku a ɛtŋ mi dádm low kaka es lↄl ɛm. ²¹Kↄ bla sosiɛm ɛtŋ am ibrm im low ee? Ìbrm agŋ a eke iri yecʼa eke mi dad ɛl a; ɛl, -lʼuw yecʼa eke mi dad ɛl ab any sɛnyn sɛnyn.» ²²Eke Jesu dad nɛnɛ a, usu ↄsu ɛsɛl ab ɛm e nyam ekʼanŋ yogŋ a ɛdŋ Jesu any af ɛtŋ am dad ɛsɛ: «Kↄ ɛbɛn eke am dad egb waw ɛs ligbɛl odad ana ee?» ²³Jesu dadʼr ninɛ: «Eke mi dad low eke akplm, ɛ̀lu ↄkm; sica eke low a eke mi dad a akpl, ke bla sosiɛm ɛtŋ am ↄrʼm ee?» ²⁴Ɛtŋ An ↄŋ wɛl oc Jesu eke anŋ meb ɛm a im egb waw ɛs ligbɛl Kayif ogŋ a.

Ɛmɛny Piɛr ɛgbr Jesu

Matie 26.71-75; Mark 14.69-72; Luk 22.58-62

²⁵Wanci ab af cɛ, Simↄ Piɛr gbɛ anŋ yogŋ a cɛ am ↄgbu al. Wɛl am ibrmʼn ɛsɛ: «Kↄ ŋ yɛji elm ɛgŋ na e jam ɛsɛl ab ɛm ecʼɛgŋ nyam ee?» Kↄ Piɛr ɛgbr dad ninɛ: «Mʼelm in e jam ɛsɛl ab ɛm ecʼɛgŋ.» ²⁶Egb waw ɛs ligbɛl a e madu ab ɛm e nyam, eke el ɛgŋ a eke Piɛr akpr lↄru es a ecʼɛgŋ a, dadʼr ninɛ: «Kↄ mʼɛknmʼŋ in ab egb lakp ab ɛm ee?» ²⁷Kↄ ɛmɛny Piɛr ɛgbr. Ɛtŋ ow e wanci ab af cɛ ŋgↄs ikŋ.

Wɛl oc Jesu im Pilat ecʼany af

Matie 27.1-2, 11-14; Mark 15.1-5; Luk 23.1-5

²⁸Ibribr fafa ɛm a, wɛl igŋ Kayif ogŋ a ɛtŋ oc Jesu im Pilat eke Rom ɛw Jude ecʼes ɛw ɛs a eci gbugŋ a. 18.28 Ɛ̀kn Matie 27.1 ecʼakr otar a. Jwifɛl ecʼes ɛwɛl a okm gbugŋ a bake -li kʼ uwmn anŋ, Pak ecʼob eke -li kʼↄtu -lʼij a sosiɛm.18.28 Jwifɛl ecʼol ɛm a, eke Jwif nyam ɛy ɛgŋ ekʼelm Jwif ecʼakŋ, ke lʼ uwm anŋ ij toŋ sɛgŋ lↄbŋ gↄŋ. Ow ↄŋ li kʼↄtum nʼanm Pak ecʼes gbɛgbl ab ɛm ij.²⁹Ow sosiɛm Pilat ow ɛŋn ɛl gbeŋ ɛtŋ am ibrm ɛl ɛsɛ: «Kↄ bla lowi af am cicar ɛgŋ na ee?» ³⁰-Li dad ow ninɛ: «Blel lʼelm low ŋuŋ kok ɛs, blel sʼocmʼn sʼismʼŋ.» ³¹Pilat dad ɛl ninɛ: «Òcr ir ↄny obi ke ↄny ecʼol ab ɛm, jɛ́jr in e low okr.» -Li dad ninɛ: «Sʼↄnym abusu eke si kʼↄb ɛgŋ low luw eci.» ³²Jesu eci luw owi a eke dad ow ecʼodad a ecʼelel eke kʼiyr nɛny ana. 18.32 Ɛ̀kn Jan 12.32-33.

³³Ɛtŋ Pilat ɛwl ɛy gbugŋ; nʼↄŋ wɛl ɛsŋ Jesu ow ɛtŋ nʼam ibrm ow lʼɛsɛ: «Kↄ ŋ, Jwifɛl ecʼɛb ebu ab ana ee?» ³⁴Jesu dad ninɛ: «Kↄ eke tutr ŋ obi ɛtŋ am dad, oglog agŋ dadʼŋ ɛm e lís e low ee?» ³⁵Pilat dad ninɛ: «Kↄ ɛm Jwif mʼel ee? Ŋ ecʼɛbr ecʼagŋ lele egb waw ɛsɛl ɛgbɛl ab ocʼŋ isʼm; kↄ bla kok ee?» ³⁶Jesu dad ninɛ: «Ɛm ecʼes ɛw a elm wus na eci; blel ɛm ecʼes ɛw a el wus na eci, ke blel ɛm eci juma kok ɛsɛl a ógŋ mum. -Li kʼɛgŋmn wɛl ocm im ↄↄm Jwifɛl ecʼes ɛwɛl a. Njaŋ, ɛm ecʼes ɛw a elm wus na eci.» ³⁷Ɛtŋ Pilat dadʼr ninɛ: «Njɛ ŋ, ɛb ebu ee?» Jesu dad ninɛ: «Ŋ dad eke mʼel ɛb ebu. Ɛm, wɛl ewʼm mʼow wus af aŋa eke mi kʼij low nɛnyɛmbri nyam e daŋku. Ɛgŋ fɛŋ eke el low nɛnyɛmbri nyam ecʼa bʼiri ɛm ecʼodad.» ³⁸Pilat dad ninɛ: «Low nɛnyɛmbri nyam, ke bla?»

Wɛl ↄb Jesu low luw eci

Matie 27.15-31; Mark 15.6-20; Luk 23.13-25

Eke Pilat dad ów amua bake ow uwr a, ɛmɛny lʼɛwl nʼim gbeŋ nʼɛŋn Jwifɛl a, ɛtŋ li dad wɛl ninɛ: «Mi kʼɛknm low sosiɛm eke mi kʼↄb ɛgŋ na low a. ³⁹Gbɛkↄ ↄny ecʼol a eke ↄnyn ab ɛm, sakp sakp fɛŋ Pak ecʼes gbɛgbl e lɛgŋ a, mi bʼɛlu ↄny sobel ɛm ɛs nyam es. Kↄ am erurir eke mi kʼɛlu Jwifɛl ecʼɛb ebu ab es mʼↄŋ ↄny ee?» ⁴⁰-Li dad ow sↄg ɛm ninɛ: «Njaŋ, ow elm in! Ɛy, Barabas sʼam erur!» Ke Barabas a ɛgŋ ŋuŋ.

¹Ɛtŋ Pilat ↄŋ abusu wɛl oc Jesu ow eke wɛl kʼↄrʼr ŋgbre ɛm. ²Srↄda eyŋ a ol mirŋ tufɛ ɛtŋ usʼr; -lʼus ow mob sus ɛm ebl yɛji. ³-Lʼow -li titm ow ɛtŋ -li dad ow ninɛ: «Jwifɛl ecʼɛb ebu, sʼam ibrmʼŋ!» 19.3 Ɛ̀kn Matie 27.29 ecʼakr otar a. Ɛtŋ -nʼam dɛdŋ ow any af. ⁴Ɛmɛny Pilat ɛwl ɛy ↄkm ɛtŋ am dad dedeku a ɛsɛ: «Mʼow mʼocʼr mʼis ↄny gbeŋ aŋa yecʼɛtŋ ke úwr any eke mʼɛŋnm low eke mi kʼↄbr ɛgŋ na low.» ⁵Ca Jesu ɛy ↄkm; lʼus mirŋ tufɛ a lele mob sus ɛm ebl ab ab. Pilat dad ɛl ninɛ: «Kin ɛgŋ a!» ⁶Gbɛkↄ kpɛkŋ eke egb waw ɛsɛl ecʼes ɛwɛl a lele usu ↄsu ɛsɛl ab ab ɛknʼn a, -nʼam ↄg -li dad -lʼɛsɛ: «Ɛ̀wʼr olikŋ af! Ɛ̀wʼr olikŋ af!» Pilat dad ɛl ninɛ: «Ìmn ↄny obi ɛwr ir olikŋ af, 19.6 Ìmn ↄny obi ɛwr ir olikŋ af:odad na ɛm Pilat am kokr ɛl miyɛr; lʼuw any sɛnyn sɛnyn eke Rom eyŋ ↄ́ↄm Jwifɛl abusu eke kʼↄb ɛgŋ low luw eci. kↄ ɛm ɛm tasi a, mʼɛŋnm low kaka eke mi kʼoc mʼↄbrʼr low.» ⁷Jwifɛl a dadʼr ninɛ: «Ɛy sʼↄny ol, ɛtŋ ol ab ɛm lʼit eke li kʼuw, aŋke lʼurum ɛtŋ li dad ekʼin Nyam ecʼIy.» 19.7 Ob Ap 24.16.

⁸Eke Pilat iri sodad amua a, in eci erŋn a obn. ⁹Lʼɛwl lʼɛy gbugŋ ɛtŋ nʼam ibrm Jesu lʼɛsɛ: «Kↄ ŋ, bogŋ iy ee?» Kↄ Jesu cicm sar okmʼn es. 19.9 Ɛ̀kn Esayi 53.7.¹⁰Ɛtŋ Pilat dadʼr ninɛ: «Erurm eke ki dadʼm odad ee? Kↄ uwm any eke mʼↄny abusu eke mi kʼɛluʼŋ es, ɛtŋ ɛmɛny mʼↄny abusu yɛji eke mi kʼↄŋ wɛl ɛwʼŋ olikŋ af ee?» ¹¹Jesu dadʼr ninɛ: «Ŋ obi ɛm a, ↄnym abusu kaka ɛm af eke ow elm yecʼa eke Nyam ↄŋʼŋ a. Na sosiɛm anake ɛgŋ a eke oc owʼm ŋ ogŋ a 19.11 Ɛ̀kn Mark 15.1. kok sikpl akm ŋ a.»

¹²Wanci ab af cɛ Pilat am ↄl elel eke kʼɛlul Jesu es. Gbɛkↄ Jwifɛl a am ↄg dad ɛsɛ: «Eke ɛlu ɛgŋ na es, kʼow elm Sesar e lawl ij! 19.12 Sesar e lawl:nin eke wɛl bʼↄŋ ɛgŋ eke bi kok low ligbɛl ↄŋ Sesar. Ɛl ɛm ecʼɛgŋ eke in e low ókm Sesar es sos ɛm a, li bʼijr ow gbre luw eci. Ɛgŋ fɛŋ eke urum ke am ocr in sosi ɛb ebu a, el Sesar ecʼifnu!» ¹³Eke Pilat iri sodad amua a, nʼↄŋ wɛl oc Jesu ow gbeŋ; nʼↄŋ ow ow sig es jɛj ok usu a eke wɛl bʼɛsŋ “Usu eke wɛl kok mebn ɛm” 19.13 Usu eke wɛl kok mebn ɛm:yogŋ anake Pilat bʼↄŋ dedeku a jɛj ok ɛgbɛl ecʼamani a. (ke Ebre ɛm wɛl bʼɛsŋ “Gabata”). ¹⁴Ow el Pak ecʼes gbɛgbl a e nɛnɛgŋ krɛkrɛ a e sos bɛbm e lɛgŋ. Eke lɛgŋ am uyu nuŋ a, Pilat dad Jwifɛl a ninɛ: «Kin ↄny eci ɛb ebu a!» ¹⁵Gbɛkↄ -nʼam ↄg -li dad -lʼɛsɛ: «Wɛl íbiʼr! Wɛl íbiʼr! Ɛ̀wʼr olikŋ af!» Pilat dad ɛl ninɛ: «Kↄ ow it eke mi kʼɛw ↄny ecʼɛb ebu a olikŋ af ee?» Egb waw ɛsɛl ɛgbɛl a dad ninɛ: «Sʼↄnym ɛb ebu ɛjeci eke ow elm Sesar cɛ.» 19.15 Jwifɛl ɛ́gŋm ebm eke Nyam any uwm ɛs kʼel ɛl ecʼɛb ebu. Odad na ɛm -nʼam titŋn anm.¹⁶Ɛtŋ sica Pilat ɛlu Jesu es ↄŋ ɛl eke -li kʼɛw ow olikŋ af.

Wɛl ɛw Jesu olikŋ af

Matie 27.32-44; Mark 15.21-32; Luk 23.26-43

Ɛtŋ -nʼↄny Jesu -lʼoc ab -nʼim. ¹⁷Lʼabu in ecʼolikŋ a in obi 19.17 Rom eyŋ ecʼol ɛm a, wɛl bʼↄr ɛgŋ a eke wɛl ↄb low a say eke mowi ey anŋ ɛnyɛmbri a, ba ow bʼuwr, ke wɛl ↄŋʼn lʼabu in obi ecʼolikŋ a toŋ lʼok usu a eke wɛl bʼow kokʼr low ŋuŋ a. ɛtŋ lʼɛy ↄkm baŋn a nʼim usu nyam eke wɛl bʼɛsŋ “Nuŋ kpↄk ecʼusu” (ke Ebre ɛm wɛl bʼɛsŋ “Gↄlgota”). ¹⁸Yogŋ anake srↄda eyŋ a ɛw Jesu olikŋ af a. -Lʼɛw agŋ ɛjeci yony yɛji olikŋ af, ɛtŋ Jesu anŋ ɛl araŋn. ¹⁹Pilat ↄŋ wɛl nↄn lɛl aru olikŋ a; kin ow eke wɛl nↄn: “Nasarɛt e Jesu, Jwifɛl ecʼɛb ebu”. ²⁰Jwifɛl nↄnↄ awl lɛl a aŋke yogŋ a eke wɛl ɛw Jesu olikŋ af a titm baŋn a, 19.20 Rom eyŋ bi kok nyandrɛ ɛw ɛgŋ olikŋ af baŋn saw yecʼɛtŋ ke agŋ ɛ́kn ke -nʼↄny tutr. ɛtŋ lɛl a eke wɛl nↄn a el Ebre ɛm, Latɛn ɛm lele Grɛk ɛm ab. ²¹Ow ↄŋ Jwifɛl ecʼegb waw ɛsɛl ecʼes ɛwɛl a im am dad Pilat ɛsɛ: « “Jwifɛl ecʼɛb ebu a” eke wɛl nↄn a, kʼɛ̀w es, kↄ nↄn dad ɛsɛ: “Ɛgŋ na ninɛ: mʼel Jwifɛl ecʼɛb ebu”.» ²²Pilat dad ninɛ: «Ow a eke mi ki nↄn a ow mi nↄn a.»

²³Eke srↄda eyŋ a ɛw Jesu olikŋ af a, -lʼoc ow eci mob sos ɛw a, ɛtŋ -li cɛc sakp yar; ɛgŋ ɛgŋ akp nyam ɛbm. 19.23 Rom eci srↄda eyŋ a, gbuŋ ke -lʼibi ɛgŋ eke wɛl ↄb low a, -li bʼot ow mob es sos, ke mob a él ɛl eci. -Lʼoc ow eci mob sus ɛm gbɛl a ekʼel mrumru, ke ow el ol ɛm wɛl ol a. ²⁴Srↄda eyŋ a am dadarir ɛsɛ: «Si kʼↄnyn mob sus ɛm gbɛl na si ki gbagbrmn ɛm, kↄ si kókr sↄsum oc, sʼuwr ɛgŋ eke ow kʼel in ecʼab any.» Ow ↄŋ Nyam Lɛl a íy nɛny: -Li cɛc ɛm ecʼob sos ɛw a ɛl ↄfr ɛtŋ -li kok ɛm e mob sus ɛm gbɛl a eci sↄsum oc.19.24 Selu 22.19. Srↄda eyŋ a e low a eke kok ab ana.

²⁵Jesu lis ena, lis lisijↄw, Klopas ɛy Mari lele Mari Magdala baŋn yↄwi ab ab anŋ olikŋ a e saw. ²⁶Jesu ɛkn lis ɛtŋ lʼɛkn jam ɛs a eke li bʼerur a ekʼanŋ lis saw. Li dad ow ninɛ: «Ɛm lis, kin ejimŋ.» ²⁷Ɛtŋ li dad jam ɛs a ninɛ: «Kin esŋ.» Ow e lɛgŋ a ɛtŋ anake jam ɛs a eb ɛwʼr es in ogŋ a.

Jesu eci luw a

Matie 27.45-56; Mark 15.33-41; Luk 23.44-49

²⁸Eke low na bʼɛc a, Jesu uw any eke low fɛŋ uwr ŋ̂. Ke sica Nyam Lɛl ecʼodad a íy nɛny a, li dad ninɛ: «Mij amn am ↄnyʼm.» 19.28 Selu 69.22b.²⁹Mijel nyam anŋ yogŋ eke srↄda eyŋ a eci mar anŋ ɛm, ɛtŋ -lʼoc mbra -lʼusm mar ab ɛm, -lʼoc -lʼucur likŋ ɛtŋ -lʼigŋ Jesu nɛny. ³⁰Eke lʼɛgŋ mar a, li dad ninɛ: «Fɛŋ iy nɛny ŋ̂.» Li bʼis any es, ɛtŋ lʼok sel es.

Srↄda eyŋ a upr Jesu mɛnɛgb ɛm

³¹Lɛgŋ a el nɛnɛgŋ e sos bɛbm e lɛgŋ; Jwifɛl érurm eke lɛgŋuw kʼanŋ olikŋ af nɛnɛgŋ e lɛgŋ, 19.31 Nɛnɛgŋ e lɛgŋ:ɛ̀kn Matie 27.58 ecʼakr otar a. ɛtŋ ɛmɛny nɛnɛgŋ e lɛgŋ na yɛji el nɛnɛgŋ ligbɛl; ow sosiɛm, -lʼibrm eke Pilat kʼↄŋ wɛl bubm agŋ a eke anŋ olikŋ af a akr19.31 Agŋ eke wɛl bʼɛw olikŋ af a, sel bʼat ɛl toŋ ke -lʼuw. Ke sel kʼátm ɛl a, -li bʼot ɛl ecʼakr a -li tat likŋ a ke ow ↄŋ -lʼɛgŋm tɛl. -Li bi kok ɛbɛn a, ow bʼↄŋ -lʼok sel, -lʼuwmn fafa. Gbɛkↄ eke wɛl bubm ɛl akr a, -lʼↄtumn -li kokmn ij, ow bʼↄŋ -li bʼuw fafa. ke wɛl ↄ́ny ot ɛl es. ³²Srↄda eyŋ a im ɛtŋ bubm agŋ a eke wɛl ɛw olikŋ af Jesu ab a akr. ³³Eke -li bʼok Jesu ogŋ a, -lʼɛkn eke ow uw ŋ̂; ow sosiɛm anake -li bubam ow akr a. ³⁴Gbɛkↄ srↄda eyŋ ab ɛm e nyam oc in eci mpragb a igŋ Jesu mɛnɛgb ɛm ɛtŋ kpɛkŋ mebl lele mij ab am ok es. ³⁵Ɛgŋ a ekʼam ij ów amua e daŋku a ɛkn ów a ɛtŋ in e daŋku ij a el nawrɛ; in, lʼuw any eke low nawrɛ nʼam dad. Nʼam ij ow e daŋku yecʼɛtŋ ke ↄny yɛji úbr nawrɛ. ³⁶Tasi ɛm a, ów amua ɛy yecʼɛtŋ ke Nyam Lɛl ecʼodad a íy nɛny: Wɛl kʼow ubmʼn luw kaka es.19.36 Ɔkm Ok 12.46; Awl 9.12. Lakpo lakpo fɛŋ eci Pak a, Israɛl ecʼey a bi gbɛgbl Ejipt eke -lʼokr ↄkm madu ↄkr ɛm a ecʼes. Es gbɛgbl ab ɛm -li bʼibi licɛbli -li kokr egb waw ɛl e sikpl a eci. Ow itm eke licɛbli a eci luw kaka kʼub es. Ow anŋ ɛsɛ Jesu ecʼa eke Nyam ↄↄm abusu eke in e luw kʼub es ab af. Ow el Jesu eke eb licɛbli a ecʼusu a.³⁷Ɛtŋ ɛmɛny Nyam Lɛl ɛjecʼam dad ɛsɛ: -Li bʼow -li lɛr ɛgŋ a eke -lʼupar mɛnɛgb ɛm a.19.37 Zakari 12.10.

Jesu ecʼes oc owi

Matie 27.57-61; Mark 15.42-47; Luk 23.50-56

³⁸Ów amua bʼɛc a, Josɛf, Arimate baŋn iy a ow ibrm Pilat abusu eke kʼoc Jesu eci sos megl a. 19.38 Ɛ̀kn Matie 27.58 ecʼakr otar a. Ke Josɛf a, Jesu eci jam ɛs kↄ es lↄl ɛm, aŋke li bʼuru Jwifɛl ecʼes ɛwɛl a. Pilat ↄŋʼn abusu lʼoc Jesu eci sos megl ab ab nʼim. ³⁹Nikodɛm a eke ncok nyam im ɛŋn Jesu a yɛji ow. Lʼism kpey eke wɛl wuwlm mijey ɛjecʼab ke ow eci leg a ↄtu eke kʼij kilo likŋ lele lɛw ab. ⁴⁰Agŋ a yony mum oc Jesu eci sos megl a, ok sɛkp sŋↄsŋↄ sigbad og ab af ɛtŋ oc wiwrmʼn sos ab ɛsɛ elel eke Jwifɛl bi kok ɛgŋ es oc ɛm ab af. ⁴¹Usu a eke wɛl ɛw Jesu olikŋ af a, egb lakp nyam anŋ; ɛm yogŋ, uwↄmu owr nyam anŋ eke wɛl ocm ɛgŋ es ɛm. ⁴²Eke ow el Jwifɛl a eci nɛnɛgŋ eci sos bɛbm e lɛgŋ, ke uwↄmu a yɛji titm a, -lʼoc ow es ɛm yogŋ.

Jesu eci luw ɛm anŋ igb owi

Matie 28.1-8; Mark 16.1-8; Luk 24.1-12

¹Dimas ibribr fafa a, ekʼusu kʼotm es a, Mari, Magdala yↄwi a im uwↄmu ab af. Lʼɛkn uwↄmu nɛny a eci lob a ekʼoc es anŋ saw. ²Ow ↄŋ lʼuru es nʼim nʼɛŋn Simↄ Piɛr lele jam ɛs a eke Jesu bʼerur ab ab, ɛtŋ li dad wɛl ninɛ: «Wɛl ↄny Ɛgŋ gbɛl a oc es uwↄmu ab ɛm, ɛtŋ sʼuwm yogŋ eke wɛl oc ɛwʼr ab any.» ³Ɛtŋ Piɛr lele jam ɛs yecʼab ab im yogŋ a eke uwↄmu a anŋ a. ⁴Agŋ a yony mum okr af am uru es im, gbɛkↄ jam ɛs yecʼa uru es fafa akm Piɛr ɛtŋ ikŋ anym im ok uwↄmu ab af. ⁵Lʼis es li lɛr uwↄmu ab ɛm, ɛtŋ lʼɛkn sigbad og eke ok es wus, kↄ lʼɛym uwↄmu ab ɛm gbɛ. ⁶Simↄ Piɛr eke am usʼr jam a yɛji im ok yogŋ ɛtŋ ɛy uwↄmu ab ɛm. Lʼɛkn sigbad og eke ok es wus yogŋ, ⁷lele gbad a eke wiwrm Jesu nuŋ ab a; gbad na anm sigbad og ab ab, kↄ wɛl ar es ɛw es usu ɛjeci. ⁸Ɛtŋ jam ɛs ɛjecʼa, in a eke ikŋ anym im uwↄmu ab af a yɛji ɛy uwↄmu ab ɛm. Lʼɛkn ɛtŋ lʼub nawrɛ. ⁹(Ke tasi ɛm a, toŋ wanci ab af a, jam ɛsɛl a kʼirim Nyam Lɛl ecʼodad ekʼam dad eke Jesu in bʼow in igb agŋ ekʼin uw ab ɛm a e low.) ¹⁰Ɛtŋ jam ɛsɛl yony a ɛwl im ɛl ogŋ a.

Jesu ɛlu sos ↄkm yɛgm Mari, Magdala baŋn yↄwi a

Matie 28.9-10; Mark 16.9-11

¹¹Mari anŋ gbeŋ uwↄmu a saw, ɛtŋ am ikŋ ↄŋn. Ɔŋn ikŋ ab ab, lʼis any es eke li kʼɛkn uwↄmu ab ɛm; ¹²lʼɛkn afr ɛrm ɛsɛl yony eke sus mob efu ok es usu a eke wɛl ɛw Jesu eci sos megl a: nyam anŋ nuŋ af ɛtŋ nyam anŋ akr esr a. ¹³Afr ɛrm ɛsɛl a am ibrmʼn ɛsɛ: «Yↄw, kↄ bla ɛtŋ am ikŋ ↄŋn ee?» Li dad wɛl ninɛ: «Wɛl ↄny ɛm Ɛgŋ gbɛliy oc es ɛtŋ mʼuwm yogŋ eke wɛl ɛwʼr es ab any.» ¹⁴Eke nʼam dad ɛbɛn a, lʼɛwl sos mɛny ɛtŋ lʼɛkn Jesu ekʼanŋ yogŋ, kↄ lʼuwm any eke ow el ow. ¹⁵Jesu ibrmʼn ninɛ: «Yↄw, kↄ bla ɛtŋ am ikŋ ↄŋn ee? Kↄ bwo am ↄl ee?» Nʼam tutr eke ow el egb lakp a eci juma kok ɛs a, na sosiɛm li dad ow ninɛ: «Ɛgŋ gbɛl, eke ow el ŋ ocʼr ab im, ke yɛ̀gmʼm usu eke ɛwʼr a, ke mʼím mʼocʼr.» ¹⁶Jesu ɛsŋʼn: «Mari!» Lʼɛwl sos mɛny ɛtŋ li dad ow Ebre ɛm ninɛ: «Rabuni!» (ekʼel nyandrɛ ɛm “Low yɛgm agŋ ɛs”). ¹⁷Jesu dadʼr ninɛ: «Njaŋ, kʼùcu kʼↄnyʼm es! Mi kʼiim ɛm Ɛs ogŋ a, kↄ ìm dad ɛm lisijimɛl a eke mʼaam ɛm Ɛs a eke ↄny yɛji el ↄny Ɛs a ogŋ, mʼaam ɛm e Nyam a eke ↄny yɛji el ↄny e Nyam a ogŋ.» ¹⁸Ɛtŋ Mari, Magdala yↄwi a im ɛŋn jam ɛsɛl a ɛtŋ am ↄb ɛl amani dad ɛsɛ: «Mʼɛkn Ɛgŋ gbɛl a!» Ɛtŋ nʼam dad wɛl low yecʼa eke ow dadʼr a.

Jesu yɛgm in e jam ɛsɛl a sos

Matie 28.16-20; Mark 16.14-18; Luk 24.36-49

¹⁹Dimas a cɛ eci ncebles a, jam ɛsɛl a as luku êl nyam ɛm. -Li babl masany a fɛŋ safuɛ ɛm aŋke -nʼam uru Jwifɛl ecʼes ɛwɛl a. Jesu ɛy ↄkm ɛl ecʼaraŋn inym es ɛtŋ am dad ɛl ɛsɛ: «Ɛrm ɛs ɛy ánŋ ↄny ab!» ²⁰Li bʼok odad ab es a, nʼam yɛgm wɛl in e sabu a lele in eci mɛnɛgb ɛm ab ab. Jam ɛsɛl a sos ɛm am iŋn, Ɛs Kↄtↄkↄ eke -lʼɛkan a sosiɛm eci. ²¹Ɛmɛny Jesu am dad ɛl ɛsɛ: «Ɛrm es ɛy ánŋ ↄny ab! Ɛsɛ elel eke ɛm Ɛs ɛrmʼm ab af a, ɛm yɛji mʼam ɛrm ↄny.» ²²Sodad amua bʼuwr a, li fuf wɛl sel ɛtŋ li dad wɛl ninɛ: «Ɛ̀ŋan Abŋ Lala! ²³Agŋ a eke bʼow ocr sikpl apr a, bʼow ɛŋn oc ap; agŋ a eke kʼow ocmn sikpl apmn a, kʼow ɛŋnm oc ap.»

Jesu lele Toma ab

²⁴Lɛgŋ a eke Jesu ow ɛl ecʼaraŋn a, jam ɛsɛl lɛw yony ab ɛm ecʼɛgŋ nyam, Toma (eke wɛl igŋ nin af Oli a) anm ɛl ab. ²⁵Jam ɛsɛl ɛjecʼa am dadʼr ɛsɛ: «Sʼɛkn Ɛs Kↄtↄkↄ!» Kↄ Toma dad ɛl ninɛ: «Eke mʼɛknm ecigbrↄ ɛnyɛmbri in e sabu araŋn a, eke mʼocm ɛm ecʼabuli a mʼɛlum ecigbrↄ a ecʼↄmu a eke kok ab ɛm, ɛtŋ mʼocm ɛm ecʼabu a mʼujrmʼn mɛnɛgb ɛm, mi kʼow mʼubm nawrɛ.»

²⁶Dimas gber mum bʼɛc a, ɛmɛny Jesu eci jam ɛsɛl a as luku êl ab ɛm, ɛtŋ na ecʼa, Toma yɛji anŋ ɛl ɛm. Wɛl babl mel a safuɛ ɛm, kↄ Jesu ɛy ↄkm inym es ɛl ecʼaraŋn ɛtŋ am dad ɛsɛ: «Ɛrm es ɛy ánŋ ↄny ab!» ²⁷Ɛtŋ li dad Toma ninɛ: «Ɛ̀w ŋ ecʼabuli a aŋa ke lɛ́r ɛm e sabu a; ɛ̀gŋm ŋ ecʼabu ab es ujrʼm mɛnɛgb ɛm. Kì bɛbar, kↄ ùb nawrɛ.» ²⁸Toma dadʼr ninɛ: «Ɛm Ɛs Kↄtↄkↄ ɛm e Nyam!» ²⁹Jesu dadʼr ninɛ: «Eke ɛknʼm a anake ub nawrɛ ab ee? Ehe bʼow el agŋ a eke kʼow ɛknm im ke bʼow ubʼm nawrɛ a eci!»

Lɛl a e liy a

³⁰Jesu kok mɛny ɛwr nↄnↄ jam ɛsɛl a ecʼany af eke wɛl dadm ow ecʼodad lɛl na ɛm. ³¹Gbɛkↄ yecʼa eke anŋ lɛl na ɛm a, wɛl nↄn yecʼɛtŋ ke úbr nawrɛ 20.31 yecʼɛtŋ ke úbr nawrɛ:Jan eci silɛl esig oglog ɛm ecʼa, yecʼɛtŋ ke abu ánŋ ↄny ɛm am ubr nawrɛ. eke Jesu el Mesi, Nyam ecʼIy. Ɛtŋ eke bʼↄnyn ↄmn in ɛm a, bʼow ɛŋan sel in ɛm.

Jesu okm sos ↄkm yɛgm in e jam ɛsɛl

¹Eke sɛgŋ bɛb ɛc a, ɛmɛny Jesu okm sos ↄkm yɛgm in e jam ɛsɛl a, Tiberiad eci mij lekpl a 21.1 Galile eci mij lekpl a eci nin ɛjeci nyam el Tiberiad. e nanu a. Kin elel eke Jesu okm sos ↄkm a: ²Simↄ Piɛr, Toma (eke wɛl igŋ nin af Oli a), Natanaɛl (Kana baŋn Galile wus af ecʼa), Sebede ecʼey a, lele Jesu eci jam ɛsɛl ɛjeci yony ab anake anŋ usu nyam a. ³Simↄ Piɛr dad ɛl ninɛ: «Mʼaam mij af.» -Li dad ow ninɛ: «Ɛy yɛji sʼam ow ŋ ab.» -Nʼim -lʼok mijɛtŋ ab ɛm ɛtŋ -nʼim mij af. Gbɛkↄ ncok a gbɛ, -nʼↄnym ↄcn kaka.

⁴Eke lɛgŋ am ɛny ow a, Jesu inym es nanu yogŋ, kↄ jam ɛsɛl a uwm any eke ow el in. ⁵Ɛtŋ Jesu dad ɛl ninɛ: «Ɛm jimɛl, kↄ ↄnyn ↄcn tɛl ee?» -Li dad ow ninɛ: «Njaŋ o.» ⁶Li dad wɛl ninɛ: «Òkr muw a mijɛtŋ a eci lidr ogog a, bʼow ↄnyn ↄcn.» -Lʼok muw a, ɛtŋ -lʼↄtumn -nʼↄnymn -lʼɛlumn ↄkm mij ab ɛm aŋke ↄcn nↄnↄ iy ɛm. ⁷Jam ɛs a eke Jesu bʼerur a dad Piɛr ninɛ: «Ɛgŋ a Ɛs Kↄtↄkↄ!» Eke Simↄ Piɛr iri eke ɛgŋ a Ɛs Kↄtↄkↄ a, lʼus in e mob sus ɛm a eke nʼↄny lʼoc es a, ɛtŋ lʼɛy mij ab ɛm. ⁸Jam ɛsɛl likpr a am ↄdu muw a eke ↄcn iy ɛm a, ɛtŋ -nʼam owr nanu eci mijɛtŋ ab ɛm. -Lʼibnm nanu ab; ow ↄtu eke kʼij abu ekŋ yen.

⁹Eke -li bʼus es wus a, yogŋ -lʼɛkn malel eke wɛl ok ↄcn lele futufutu ab es af. ¹⁰Jesu dad ɛl ninɛ: «Òtr ↄcn a eke caca ↄnyn a eci bɛb owr.» ¹¹Simↄ Piɛr ɛwl ɛy mijɛtŋ ab ɛm, ɛtŋ usm muw a eke ↄcn ɛgbɛl nↄnↄ anŋ ɛm ab es. Ɔcn a ij ekŋ lↄbŋ lele lɛw lele nyahan ab. Ɔcn a ekʼiy ɛm a bↄbↄ yɛji, ↄↄm muw a gbagbram es. ¹²Jesu dad ɛl ninɛ: «Òwr ijr ob.» Jam ɛsɛl ab ɛm ecʼɛgŋ kaka ócm any tuↄtuↄ ɛm dadm ɛsmɛ: «Kↄ ŋ, bwo elʼŋ ee?» Tasi ɛm a, -lʼuw any sɛnyn sɛnyn eke Ɛs Kↄtↄkↄ ana. ¹³Jesu kpukŋ im ɛŋn ɛl, oc futufutu a ɛtŋ cɛc ɛl; nʼↄŋ wɛl ↄcn a yɛji. ¹⁴Luw ɛm a eke Jesu igb a ɛtŋ a, sakp nyahan ɛm eke nʼam yɛgm in e jam ɛsɛl a sos ana.

Jesu ɛwl ↄŋ Piɛr abusu Nyam e juma kok eci

¹⁵Eke -lʼijr ob ow uwr a, Jesu ibrm Simↄ Piɛr ninɛ: «Jan jim Simↄ, kↄ ɛm eci erur a eke ↄny a agb akm agŋ amua ecʼa ee?» Li dad ninɛ: «Ɛɛ, Ɛs Kↄtↄkↄ, mi bʼerurʼŋ, uw any.» Jesu dadʼr ninɛ: «Ɔ̀su ɛm e mɛcɛb ey a.» ¹⁶Ɛmɛny lʼibrm ow sakp yony ɛm ninɛ: «Jan jim Simↄ, kↄ erurʼm ee?» Li dad ninɛ: «Ɛɛ, Ɛs Kↄtↄkↄ, mi bʼerurʼŋ, uw any.» Jesu dadʼr ninɛ: «Ɔ̀su ɛm e mɛcɛb a.» ¹⁷Ɛmɛny lʼibrm ow sakp nyahan ɛm ninɛ: «Jan jim Simↄ, kↄ erurʼm ee?» Piɛr sos ↄw es eke Jesu kʼibrmʼn odad nyam a cɛ sakp nyahan. Ɛtŋ li dad ow ninɛ: «Ɛs Kↄtↄkↄ, ŋ uw low fɛŋ any; uw any eke mi bʼerurʼŋ!» Jesu dadʼr ninɛ: «Ɔ̀su ɛm e mɛcɛb a. ¹⁸Ɛɛ, low nawrɛ mʼam dad ↄny: eke anŋ ŋgbafrɛ a, ŋ obi bi sus ŋ e mob, 21.18 ŋ obi bi sus ŋ e mob:Grɛk ɛm odad a ecʼiri tasi a el ŋ obi bʼɛgŋ ŋ e meb er ɛm a. ɛtŋ bʼim yogŋ eke bʼerur a; gbɛkↄ susu bʼowʼŋ sos a bʼow gɛgŋm sabu es,21.18 Gɛgŋm sabu es:nyandrɛ ɛm odad mum eke am yɛgm olikŋ af ɛw owi. ɛgŋ ɛjeci bʼow susʼŋ mob ɛtŋ bʼow oc im ŋ yogŋ eke kʼow erurm eke kʼim a.» ¹⁹Sodad amua ɛm, Jesu am yɛgm Piɛr ecʼelel eke bʼow uwr ke ow ɛm nʼↄ́ŋ Nyam anygbɛl a. Sica Jesu dadʼr ninɛ: «Ùsʼm jam!»

Jesu e jam ɛs a eke bʼerur a e low

²⁰Piɛr bʼɛdŋ sos mɛny a, lʼɛkn jam ɛs a eke Jesu bʼerur a ekʼanŋ ɛl jam. (Ke ɛgŋ a eke ub nuŋ ɛw Jesu af, ob ij lↄfu lís a eke -nʼanŋn, ke am ibrmʼn ɛgŋ a eke bʼow ↄlʼl ijʼr a e low a, in ana.) ²¹Piɛr ɛknʼn ɛtŋ dad Jesu ninɛ: «Ɛs Kↄtↄkↄ, ɛtŋ kↄ in, bla lowi bʼow ɛŋnʼn ee?» ²²Jesu dadʼr ninɛ: «Ɛtŋ eke mʼerur eke li kʼanŋ owr toŋ ke mʼɛ́wl mʼow, ke ŋ e low ee? Ŋ ecʼa, ùsʼm jam cɛ!» ²³Amani a eb es agŋ lisijimɛl ab ɛm eke jam ɛs na in kʼow in uwm ij. Ke tasi ɛm a, Jesu dadm Piɛr eke owʼn kʼow in uwm, kↄ li dad: ɛtŋ eke in erur eke owʼn kʼanŋ owr toŋ ke in ɛ́wl in ow, ke ow e low ee? ²⁴Jam ɛs nyam na cɛ anake am ij ów amua e daŋku ke nↄn yɛjʼa, ɛtŋ sʼuw any eke in e daŋku ij a el nawrɛ.

Es abal el ɛm ecʼodad

²⁵Ɛmɛny Jesu kok ów ɛjeci nↄnↄ. Blel wɛl am nↄn ów amua nyam nyam, ke ɛm e tutr ɛm a, blel yecʼa eke wɛl nↄn a íy wus na nimum wal es.