JAK

Jak e lɛl ekʼawŋ

Ów ekʼit eke wɛl kʼuw any

Bwo el Jak ee? Lʼel ɛy Ɛs Kↄtↄkↄ Jesu lisijim (Matie 13.55, Mark 6.3, Galat 1.19, 1 Korɛnt 15.7). Lʼel Jerusalɛm e Nyamel a ecʼidr ɛsɛl ab ɛm e nyam (Ob Kok 15.13-21, Galat 2.9). Jak nↄn lɛl na awŋ Israɛl ecʼeb lɛw yony a, gbɛkↄ ow elm Amani Sig ɛm ecʼeb lɛw yony a. Aŋa ow el Jwifɛl a ekʼitŋn ɛrm ɛm el Jesu eci, ke gbre ijr a sosiɛm anŋ Palɛstin ok ↄkm ↄmu es im ir susu ɛjecʼa oglog, Krist eci jam us ɛsɛl fɛŋ ekʼel Nyamel ekʼusr Israɛl ekʼel Nyam ecʼagŋ a usu a. Jak ecʼa, agŋ amua anake el Nyam ecʼagŋ tasi a. In e lɛl ab ɛm, nʼam dad wɛl eke wɛl kʼusur ɛrm gbre ij ɛm, wɛl el ɛsɛwru, wɛl is es ke wɛl kok low ɛsɛ elel eke ↄmn bʼerur ab af. Nʼam ɛwar egbreŋgbi eke kʼocm ɛl ecʼos a ɛwrm sos ow af ɛtŋ nʼam atr ↄgbↄru sos es.

Nuŋ krɛkrɛ ab ɛm, Jak am ɛlu in e lɛl ab ɛm ecʼów a eke li bʼow li dad a e low ↄkm. Nuŋ yony ɛm a, nʼam dad agŋ lisijimɛl a eke kʼɛw sos ɛrm, yecʼɛtŋ ke -li kʼusrmn egbreŋgbi sos -lʼakamn ↄgbↄru. Kↄ tasi ɛm ow it eke -li kʼɛlum ↄgbↄru abu aŋke -lʼel agŋ eke egbreŋgbi a bʼeb ɛl ecʼabu ɛm ecʼob fɛŋ. Nuŋ 3.1 toŋ nuŋ 4.12 ɛm a, Jak am dad agŋ a eke bʼocr ɛl sosi ɛsɛwru, ke am erur eke ki yɛgm agŋ ɛjecʼa Nyam odad a, aru sos ɛw lele ów es atar ab ɛgb es, ke ɛw ɛrm sodad eke -li bʼow -li dad ab af. Nuŋ 4.13 toŋ nuŋ 5.6 ɛm a, nʼam ɛwar egbreŋgbi eke kʼɛw ɛrm sos ɛw lele ɛnyɛmbri yony yony owi ab e lís.

Lɛl a ecʼuwr ɛm a, nʼam ↄkn wɛl eke wɛl kʼinym es kikri gbre ijr ɛm, ke wɛl ŋↄ́ŋn Nyam agŋ a ekʼanŋ sos es ↄw ɛm a lele ↄ́lu ab eci.

Ɛsŋn

¹Ɛm Jak, Nyam lele Ɛs Kↄtↄkↄ Jesu Krist ab e juma kok ɛs, mʼam ɛsŋn ↄny fɛŋ ekʼeel eb lɛw yony a 1.1 Eb lɛw yony:Jak am nↄn lɛl awŋ Jwifɛl fɛŋ ekʼel Krist e jam us ɛsɛl krɛkrɛ ekʼanŋ Palɛstin ok ↄkm ↄmu es im anŋ susu ɛjecʼa, oglog Krist eci jam us ɛsɛl fɛŋ ekʼel Nyamel ekʼusr Israɛl, ekʼel Nyam ecʼagŋ a usu. eke ↄmu es wus na nimum af a.

Gbre ɛm ecʼↄmn ↄny lele sɛwr ab

²Krist ɛm ecʼagŋ lisijimɛl, eke bʼↄbar gbre, es abur akpasu akpasu a, ke sos ɛm íŋn ↄny, ánŋn ehe ɛm, ³aŋke ɛsɛ elel eke ↄny yɛji uwr any ab af, eke ↄny eci Nyam ecʼↄmn a eke ↄnyn a bʼakm ɛbm ɛkn es a, ow bʼↄŋ ↄny ɛrm susu ínymn es kikri. ⁴Ìnymn es kikri kpɛkŋ low low fɛŋ ɛm, yecʼɛtŋ ke ↄny e low kok fɛŋ ɛm íyr nɛny igŋn nuŋ, ke kʼↄ́nymn low kaka fɛŋ ecʼes abur. ⁵Kↄ eke ↄny ɛm ecʼɛgŋ nyam ↄnym sɛwr eke kʼuw elel eke li ki kokr ke nʼínym es kikri ɛbm ɛkn owi ɛm a, lʼíbrm Nyam, ke ow yɛ́gmʼn, aŋke Nyam el ɛrm mamnu ekʼↄ́ↄm ɛgŋ ob kaka ŋkpɛs ɛm. ⁶Gbɛkↄ ow akpl ke lʼíbrm ↄmn ɛm, ke bɛbar kʼánm ɛm. Ɛgŋ eke bi bɛbar a, anŋ ɛsɛ okij e mra eke lɛf bʼↄny didm es ab af. ^7-8Ɛgŋ ikŋ na kí tutr eke Ɛs Kↄtↄkↄ bʼow ↄŋʼn yecʼa eke nʼam ibrm a, aŋke lʼel ɛgŋ eke ucum low nyam ↄnym es ke bi cɛcm any in ecʼes an ɛm.

Gbↄr lele ob ↄny ab

⁹Ke Krist eci jam us ɛs ekʼↄnym ob a ntotŋ ók eke Nyam ↄny igblʼl ogŋ a sosiɛm. 1.9 Nyam ↄny igblʼl ogŋ:Krist eci jam us ɛs eke bi kok Nyam juma tasi a, it ekʼuw any eke, eke lʼel gbↄru wus af aŋa yɛji, ke Nyam anake sↄsum ocʼr a; afr ow bʼow ↄŋʼn ob ↄny ekʼel in ecʼehe. Ɛ̀kan 4.10; Efɛs 2.6-7.¹⁰Ke Krist eci jam us ɛs ekʼↄny ob a, yɛji sos ɛm íŋn eke Nyam ↄny isʼr es a sosiɛm. 1.10 Nyam ↄny isʼr es:ow it eke gbreŋgbi kʼúw any eke, wus af aŋa in ecʼob ↄny a bʼow ɛc. Eke lʼuw na any a, ke afr li bʼow nʼɛŋn ehe, ekʼel in ecʼob ↄny tasi. Ow it eke li kʼuw any eke in ecʼob ↄny a elm low kaka wus af aŋa, ɛtŋ in obi bʼow ɛc ɛsʼelel eke suw mamn bʼuw es kpab ɛy wus ab af. ¹¹Ɛsɛ elel eke ligbn bʼafŋ ↄnyn suw, ke bi wɛwr in e dↄdↄ ab es, ke suw eci sakpl a bʼirm a, ɛbɛn nɛnyɛmbri nyam gbreŋgbi yɛji bʼow uw digŋ in e sijuma ok es.

Ɛbm ɛkn lele mɛju ab

¹²Ehe él ɛgŋ eke bʼinym es kikri ɛbm ɛkn owi ɛm a eci. Eke nʼinym es kikri a sosiɛm Nyam bʼow ↄŋʼn sel a 1.12 Grɛk ɛm a sel a ke sel ɛŋn e tufɛ: ow el any eb e mɛny ɛwr, ekʼel ɛbm ɛkn eke wɛl bʼakm es ecʼob ap eke wɛl bʼɛŋn. eke lʼɛwar agŋ ekʼerur ir a. ¹³Eke mɛju ow ɛgŋ ɛm a, ke li kí dad li kʼɛsɛ: «Nyam anake ɛjuʼm a», aŋke Nyam mɛju owi anm in ɛm. Ow sosiɛm lʼɛ́jum ɛgŋ kaka. ¹⁴Sica eke ɛgŋ ɛy mɛju owi ɛm, ke in obi in obi ecʼów tutr eŋuŋ anake ↄŋʼn lʼↄgŋ meb a. ¹⁵Ɛtŋ ɛmɛny ów tutr eŋuŋ eke bʼanŋ ɛgŋ ɛm ow a, bʼis ɛgŋ sikpl. Ɛtŋ ca eke sikpl a bʼagb afŋn es a, ow bʼism ɛgŋ luw ab. ¹⁶Erur ɛm ecʼagŋ lisijimɛl, kʼɛ̀jurir ↄny sosi: ¹⁷sob ap amamn fɛŋ bʼanŋ Nyam ogŋ ow; Nyam ekʼel usuayl eci kok ɛs a ogŋ ow bʼanŋ ow; in ɛm low itŋn kaka anm; nʼam titŋnm ɛsɛ usuayl lele ncebn ab af. ¹⁸In obi lʼerur, ɛtŋ nʼↄŋ ɛy sel in ecʼodad ebl nawrɛ ab ɛm, yecʼɛtŋ ke sʼél mob mob fɛŋ eke li kok anŋ owr a e krɛkrɛ.

Ɛ̀gŋ Nyam ecʼodad eb ke án es af

¹⁹Erur ɛm ecʼagŋ lisijimɛl, sica ɛgŋ nyam nyam fɛŋ ígŋ lↄru es iri low ok es sos ɛm, nↄ́fr odad ke kʼéblm ɛrm fafa, ²⁰aŋke ɛrm bebl bʼↄŋ ɛgŋ am kokm low ekʼel nɛnyɛmbri nyam Nyam ecʼany af. ²¹Na sosiɛm, ìgŋn low ŋuŋ fɛŋ eke bi ŋuŋn ↄny ecʼes an a ɛlul es, ke ébr ɛrm es ɛy ɛm, Nyam ecʼodad eke wɛl dad ↄny ekʼↄtu eke kʼeb ↄny ecʼabŋ ɛlu es a.

²²Kʼɛ̀jurir ↄny sosi ki dadr kʼɛsrɛ: «Sʼírir Nyam ecʼodad a cɛ»; kↄ kòkr ɛsɛ elel eke irir ab af. ²³Kↄ ɛgŋ ekʼam iri odad a ke ↄ́sum a, anŋ ɛsɛ ɛgŋ ekʼam ɛkan in sosi akrↄŋnↄ ɛm elel eke nʼanŋn, ²⁴ke ca li bʼↄny any lʼoc es ke kpɛkŋ li bʼijl elel eke nʼanŋn ab es a. ²⁵Kↄ ɛgŋ eke bʼɛw ol sↄbↄ a eke bʼↄŋ ɛgŋ el lewi a 1.25 ol sↄbↄ a eke bʼↄŋ ɛgŋ el lewi a:ke Nyam ecʼodad a nimum ana. Ɛtŋ ekʼɛgŋ bʼɛlum Nyam ecʼodad a, ke nʼanm sikpl kok owi ɛm ij. ɛrm, ke bʼucu ↄny es, ke ám dadm ɛsmɛ: «mʼíri cɛ», ke bʼɛw ɛrm af kok a, bʼow ɛŋn Nyam ecʼↄwrↄ in ecʼów kok ɛm.

²⁶Eke ɛgŋ bi tutr eke lʼel Nyam nuŋ igŋ ɛs, ɛtŋ lʼɛ́wm ɛrm in ecʼodad dad ɛm a, nʼam ɛjur in sosi, ɛtŋ in e Nyam nuŋ igŋ a el ↄfr ↄfr. ²⁷Kin yeci ekʼel Nyam nuŋ igŋ nawrɛ tasi Nyam ɛy Ɛs ecʼany af a: ke ɛ́w uwiyŋɛl lele eŋnyↄw ekʼanŋ gbre ɛm a e low ɛrm, ke ↄ́su sos wus na e sikpl owi ɛm.

Agŋ es jɛj

¹Agŋ lisijimɛl, ↄny ekʼↄnyn ↄmn ɛy Ɛs Kↄtↄkↄ Jesu Krist anygbɛl Ɛs ɛm a, kì jɛjr agŋ es. ²Sʼóc low nyam si bɛbmn: eke gbreŋgbi nyam ok gbad mamn, ɛlu sika kpatrowa, ɛtŋ ow ɛy ↄny e luku as ecʼaraŋn, ɛtŋ gbↄru nyam yɛji ɛw mob ɛsn sos ow ɛy ↄny ecʼaraŋn, ³bʼow ↄnyn gbreŋgbi a ecʼɛlum ligbɛl ɛtŋ bʼow ↄŋn in li sig es any ɛsɛl ecʼusu a. Ɛtŋ sica bʼow dadr gbↄru a ɛsrɛ: «Ŋ, ìnym es afr, oglog sìg es wus.» ⁴Eke ow el ɛbɛn, ke ow elm agŋ am jɛjr es ab ee? Ow elm ów tutr eŋuŋ ana ee?

⁵Ìgŋn lↄru es, erur ɛm ecʼagŋ lisijimɛl: Nyam sↄsum wus na ecʼↄgbↄru a ot yecʼɛtŋ ke -lʼel ↄmn ɛm ecʼegbreŋgbi, ke -lʼij gbreŋgbi usu a eke lʼɛwar agŋ ekʼerur ir a ecʼaja. ⁶Bla sosiɛm, bi kokr gbↄru sos keskes ee? Kↄ ow elm egbreŋgbi anake bʼijr ↄny gbre ke bʼot im ↄny jɛj ok usu ab ee? ⁷Kↄ ow elm ɛl anake -li bʼifn nin mamn na ekʼijr ab ee?

⁸Kin Nyam Lɛl ecʼodad eke am dad: Bʼow erur ɛgŋ kaka fɛŋ ɛsɛ ŋ obi af.2.8 Ob Ap 19.18. Na, Nyam e gbreŋgbi usu a ecʼol gbɛl ana. Eke bʼɛlumn ol na a, ke ekʼow akpl a. ⁹Eke ↄny ecʼów kok ɛm bi jɛjr agŋ es, ke sikpl anake am kokr a, ɛtŋ ol bʼow ↄb ↄny low. ¹⁰Eke ɛgŋ bʼↄsu ol a, ɛtŋ lʼↄb nyam es a, ke lʼↄb ol a fɛŋ es ŋ̂. ¹¹Ɛtŋ ɛgŋ a eke dad ninɛ: kʼíjm nfaci a, in cɛ li dad eke: kʼíbim ɛgŋ. 2.11 Ɔkm Ok 20.13-14; Ol Ɔkn 5.17-18. Na sosiɛm a, eke íjm nfaci ɛtŋ ibi ɛgŋ a, ke ɛluam ol a ana. ¹²Dàdr ke kókr ów amamn ɛsɛ agŋ eke ɛl yɛji wɛl bʼow jɛj ɛl ecʼów ok ol eke bʼↄŋ ɛgŋ el lewi 2.12 Bɛ̀bmn 1.25 ab ab. ecʼab af. ¹³Ɛgŋ eke ↄnym sↄrŋ ikŋ a, in yɛji Nyam kʼow ikŋmʼn sↄrŋ aŋke sↄrŋ ikŋ akpl akm jɛj ok. 2.13 sↄrŋ ikŋ akpl akm jɛj ok:ɛ̀kan Matie 5.7.

Ɔmn lele juma kok ab

¹⁴Lisijimɛl, eke ɛgŋ bi dad ɛsɛ: «Mʼↄny ↄmn», ɛtŋ nʼam kokm ow e low a, ke ↄmn na bʼow eb ɛluʼl es ee? ¹⁵Ɛtŋ eke ɛgŋ lisijim oglog lisijↄw nyam ↄnym ob sos ɛw lele ob ij ab, ¹⁶ɛtŋ ↄny ɛm ecʼɛgŋ nyam dad ɛl ninɛ: «Ìmn ɛrm es ɛy ɛm, ↄgbur al, lok íy ↄny!», eke ↄↄmn ɛl yecʼeke akpl sos megl ecʼa, ke na bla ow bʼow eel ɛl ee? ¹⁷Ɛbɛn nɛnyɛmbri nyam, ↄmn yɛji, eke lʼɛlum in e low kok ↄkm a, ke lʼuw ŋ̂.

¹⁸Kin ow eke wɛl ↄtu eke ki dad ɛgŋ na! «Ŋ ↄny ↄmn kↄ ɛm, wɛl bʼɛkn ɛm e juma kok a. Yɛ̀gm im ŋ ecʼↄmn a eke juma kok anm ɛm a; ɛtŋ ɛm, mʼow mi yɛgmʼŋ ɛm ecʼↄmn a juma kok ɛm. ¹⁹Ŋ yɛji ub nawrɛ eke Nyam nyam coco anŋ. Ow akpl! Abŋ eŋuŋ yɛji bʼubʼr nawrɛ ɛtŋ erŋn bʼↄny ɛl -lʼufŋ.»

²⁰Nyamb ɛgŋ, kↄ uwm any eke ↄmn eke juma kok anm ɛm a el ↄfr ↄfr ee? ²¹Kↄ Nyam ocm ɛy lagŋ Abraham ɛgŋ nyim nyim in e juma kok ɛm, eke lʼoc in ecʼiy Isak nʼim eke li ki kok egb waw ab ee? 2.21 Ɛ̀kn Nuŋ Ɔb 22.9.²²Ɛkn eke ↄmn lele juma ab bʼokr af juma kok ɛm, aŋke Abraham, in e juma kok a anake ↄŋ in ecʼↄmn a el ↄmn tasi a. ²³Ɛbɛn Nyam Lɛl ecʼodad eke dad a iy nɛny: Abraham ↄny ↄmn Nyam ɛm, ow ↄŋ Nyam ocʼr ɛsɛ ɛgŋ nyim nyim af, ɛtŋ ɛsŋʼn Nyam e lawl.2.23 Nuŋ Ɔb 15.6.²⁴Sica ɛkan eke Nyam bʼoc ɛgŋ ɛgŋ nyim nyim in e juma kok ɛm, kↄ ow elm ↄmn sↄny coco eke nʼↄny a sosiɛm.

²⁵Ɛbɛn ow ɛcr Rahab facyↄw a ecʼa yɛji. Nyam ocʼr ɛgŋ nyim nyim, lɛgŋ eke lʼeb Ebre eyŋ a eke wɛl ɛrm ow es lↄl ɛm eke kʼɛkn ɛb a, 2.25 Ɛ̀kn Josue 2:1-25. ke lʼɛlum wɛl abu wɛl eb ejagb ɛjeci im a. Low na el juma ekʼin ecʼↄmn a ↄŋʼn li kok. ²⁶Tasi ɛm a, ɛsɛ elel eke sos megl eke sel anm ɛm a el ob ekʼuw ab af a, ɛbɛn nɛnyɛmbri nyam, ↄmn yɛji, eke juma kok ánm ɛm a, lʼel ob ekʼuw.

Nɛny lele anm ab

¹Ɛm lisijimɛl, kʼèrurir ekʼagŋ nↄnↄ ↄny ɛm kʼel low yɛgm ɛsɛl. Uwr any eke ɛy low yɛgm ɛsɛl, wɛl bʼow jɛj ɛy ecʼów ok tuↄtuↄ akm agŋ fɛŋ ecʼa. ²Ɛy, ów nↄnↄ ɛm a si bʼirm. Ekʼɛgŋ iram in ecʼodad ebl ɛm, ke lʼel ɛgŋ tasi ekʼↄtu eke kʼↄsu in e sos. ³Si bʼoc lowili sʼucu meb sʼɛlu gbaŋkↄ nɛnym eke li kʼɛlum ɛy; ɛtŋ lowili ab ɛm cɛ, si bi nyimn gbaŋkↄ a nimum. ⁴Ɛtŋ mijɛtŋ ekʼagb bↄbↄ yɛji, lɛf e lɛc a bʼↄny didmn es; nyimn ob likekli a cɛ eke nyimn ɛs a bʼↄny es a, anake bʼoc imʼn yogŋ eke lʼerur a. ⁵Nɛny yɛji ɛbɛn. Anm el sos megl ecʼob likekli nyam eke bi dad ów ɛgbɛl.

Al mbɛbl yɛji bʼɛtul akp ligbɛl. ⁶Anm anŋ ɛsɛ al af. Anm ekʼanŋ ɛy e sos megl ɛm a, el low ŋuŋ kok fɛŋ ecʼob eke bi ŋuŋn ɛgŋ ecʼowr anŋ ecʼów fɛŋ. Ɛtŋ low ŋuŋ fɛŋ eke wɛl bi dad a bʼanŋ gbre ij usu ow. ⁷Ɛgŋ ↄtu eke ki yɛgm mindey fɛŋ low ɛlumʼn: ↄr o, mindey eke bʼɛri es lok lok o, lele ↄcn ab; ɛgŋ ↄtu ekʼakm ɛl es. ⁸Kↄ ɛgŋ kaka ↄtum eke kʼakm anm es; lʼel ob ŋuŋ ekʼɛgŋ kʼↄtum ↄnym es inyam es tiŋ sɛgŋ fɛŋ, lʼel sɛkp ŋuŋ eke bʼibi ɛgŋ. ⁹Si bʼoc anm ɛm sʼɛlu ɛy Ɛs Kↄtↄkↄ Nyam, ɛy Ɛs bia. Ɛtŋ anm ab ɛm cɛ, si bʼofn agŋ eke Nyam kok otʼr es a. ¹⁰Low mamn eci sodad lele ofn ab bʼanŋ nɛny nyam ab ɛm cɛ ok ↄkm. Lisijimɛl, ow kʼél ɛbɛn! ¹¹Mij nuŋ kaka anm eke in ɛm mij mamn lele mij ŋuŋ ab bʼanŋ am ok ↄkm. ¹²Kↄ likŋ nyam ↄtu eke kʼↄsu likŋ ɛjeci ecʼey ee? Kↄ okij ɛm ɛgŋ bʼɛŋn mij mamn ɛgŋ ee?

Sɛwr eke bʼanŋ Nyam ogŋ ow

¹³Kↄ ↄny ɛm a ɛgŋ nyam anŋ ekʼel sɛwru, nuŋ ɛm ↄny ɛs ee? Ke lʼɛ́lu in ecʼes an mamn a ↄkm, sɛwr lele frↄrↄ el ab ecʼów kok ɛm. ¹⁴Kↄ ekʼↄny ecʼɛrm ɛm nyamnɛyr ŋuŋ lele ŋkre ecʼabŋ ab anŋ a, kʼɛ̀wr sos eke ↄnyn sɛwr, kʼↄ̀nyn low nawrɛ kʼitŋnin. ¹⁵Sɛwr akpasu na ánm afr Nyam ogŋ ówm; ow el wus na eci, ekʼel agŋ ɛm eci, ke el agn eci. ¹⁶Tasi ɛm a, yogŋ eke nyamnɛyr lele ŋkre ecʼabŋ ab anŋ a, nɛny af okr ánm, ɛtŋ ów eŋuŋ fɛŋ bʼanŋ yogŋ. ¹⁷Afr eci sɛwr a el sɛwr mamn eke bʼis ɛrm es ɛy, ↄ́nym low lɛc ɛm, ke bʼↄny agŋ okr af ɛrm es ɛy ɛm. Nʼↄny agŋ e sↄrŋ ikŋ ɛtŋ li bʼɛlu low kok mamn ↄkm. In lʼelm ɛnyɛmbri yony yony ɛs, nʼánm ogog nyam. ¹⁸Agŋ eke bi kok low fɛŋ ɛrm es ɛy ɛm a, bʼewl ɛrm es ɛy ɛl ɛm, ɛtŋ ow ecʼey eke wɛl bʼↄw a el es an mamn.

Òcr ŋ sosi ↄŋ Nyam ke ákm agn es

¹Bogŋ ów ɛsu lele mum ogŋ ab bʼanŋ ow ↄny ɛm ee? Kↄ ow elm ↄny ecʼɛrm ɛm eci sow tutr eŋuŋ ecʼerur ɛm ow bʼanŋ ow ee? ²Bʼɛwr ob ekʼelm ↄny ecʼa nyamn af ɛtŋ ɛ́ŋnmn; ob ekʼelm ↄny ecʼa bʼaw ↄny, ɛtŋ ↄ́tumn ɛŋnmn, ow bʼↄŋ ↄny eel agŋ ibiu. Bʼɛsur ów ogŋn mum, ɛtŋ yecʼekʼam ɛwr nyamn a, kʼow ɛŋnmn, aŋke íbramn Nyam. ³Ɛtŋ eke bʼibrmn yɛji ɛ́ŋnmn aŋke úwmn ibrm. Ɔny e tutr a bʼel tutr ŋuŋ; yecʼeke bʼibrmn a, ↄny e lís ecʼerur e kok eci. ⁴Ɛnyɛmbri yony yony ɛsɛl, 4.4 Ɛnyɛmbri yony yony ɛsɛlodad na Grɛk ɛm a: afacu; ow el ɛgŋ ekʼígŋm Nyam sↄny coco nuŋ, ke bʼigŋ ob ɛjeci ekʼelm Nyam yɛjʼa nuŋ; Matie 6:24. kↄ uwmn any eke, eke eel wus na e lawl, ke eel Nyam ecʼefnu ee? Ɛgŋ eke bʼerur eke kʼel wus na e lawl a, el Nyam ecʼifnu. ⁵Kì tutar eke ow el ↄfr ↄfr cɛ Nyam Lɛl am dad eke Nyam bʼogŋ uwerŋ abŋ a eke lʼɛlu ɛy ɛm a eci. ⁶Ɛbɛn yɛji ɛmɛny Nyam ɛlu in ecʼɛrm mamn ↄkm ɛtŋ nʼↄŋ ɛy abusu ekʼagb akm low fɛŋ, aŋke Nyam Lɛl dad ninɛ: Nyam bʼↄↄr agŋ eke bʼɛw sos a abr, ɛtŋ li bʼɛlu in ecʼɛrm mamn ↄkm agŋ eke bʼis es a e lís.4.6 Nyandrɛ 3.34; 1 Piɛr 5.5.

⁷Ca gbɛ òcar ↄny sosi ↄŋn Nyam, ògŋn agn ar; ɛtŋ li bʼow lʼuru lʼɛgb ↄny es. ⁸Ɛ̀rir owr titmn Nyam, ɛtŋ li bʼow lʼɛri lʼow li titm ↄny. Sikpl ɛsɛl, yↄyↄgr sabu ŋgbroŋn sikpl ɛm; ↄny eke bi cɛcmn any a, àyalil ↄny e mɛrm a! ⁹Low dúdu ↄny, ìkŋn ↄŋn, ànŋn sↄrŋ ɛm; ke ↄny e miyɛr ifi ítŋn el ↄŋn ikŋ, ke ↄny e sos ɛm iŋn él sos es ↄw. ¹⁰Ìsr es Ɛs Kↄtↄkↄ ecʼany af, ɛtŋ li bʼow nʼↄny lʼigbl ↄny ogŋ.

Kí jɛjm ɛgŋ kaka fɛŋ e low okm

¹¹Agŋ lisijimɛl, kì dadr ów eŋuŋ kʼokarir af; ɛgŋ eke bi dad low ŋuŋ ok lisijim af, oglog bʼↄbʼr low kpɛkŋ a, bi dad ol ecʼów eŋuŋ, ɛtŋ bʼↄb ol low. Ekʼam jɛj ol e low ok ke elm ɛgŋ eke bʼɛlum ol, kↄ in e jɛj ok ɛs anake am el a. ¹²Nyam sↄny cɛ eke bʼↄŋ ol a, in cɛ lʼel Jɛj Ok Ɛs; in sↄny coco lʼↄtu eke li kʼeb lʼɛlu es ke lʼíbi yɛji. Ŋ eke am dad ɛgŋ kaka fɛŋ e low ŋuŋ a, ayaf bʼocr ŋ sosi ee?

Kʼɛ̀w sos

¹³Sica ɛ̀wr ɛrm, ↄny eke bi dadr ɛsrɛ: «Yɛfɛnyna, ow kʼↄdm efi, si bʼow sʼim ɛb na ɛm sʼij lakpo nyam, sʼↄ́l an sʼɛŋn os.» ¹⁴Uwmn ↄny ecʼefi ecʼowr anŋ a ecʼelel eke bʼow ɛcr ab any! Ɔny anŋn ɛsɛ jru eke bʼɛy, ke kpɛkŋ bʼoc es ab af. ¹⁵Kin elel eke ↄtur eke ki dadr a: «Eke Ɛs Kↄtↄkↄ ɛgŋ ɛtŋ sʼanŋ owr a, si bʼow si kok ów a eke sʼam aw sʼeb a.» ¹⁶Ow eke ki kokr a anŋ, ɛtŋ am ɛwr sos, ↄbr nɛnym. Sos ɛw akpasu na akplm. ¹⁷Na sosiɛm a, ekʼɛgŋ uw low mamn any eke ki kok ɛtŋ li kokm a, li kok sikpl.

Egbreŋgbi ecʼɛwar

¹Sica egbreŋgbi, ìgŋn lↄru es. Low dúdu ↄny, ìkŋn ↄŋn gbre a eke bʼow owr ↄny a sosiɛm! ²Ɔny ecʼob ↄny a ugŋ es, ɛtŋ sisŋ ij ↄny ecʼob sos ɛw a. ³Ɔny e sika lele ↄny e jɛtɛ ab ab ok adagra; adagra ikŋ na bʼow ij ↄny e daŋku ɛtŋ bʼow ŋuŋn ↄny e sos megl a ɛsɛ al af. Kↄ uwmn any eke sɛgŋ uwr, ɛtŋ am asr ↄny ecʼob ↄny luku ee? ⁴Ɛgŋmn eke ki sↄgr ↄny e sↄgm juma kok ɛsɛl a labm. Ìgŋn lↄru es irir dedeku eke -nʼam ↄŋ ↄny a: juma ɛsɛl eke bʼub ↄny ecʼegb a eci ↄŋn ikŋ a, Ɛs Kↄtↄkↄ ekʼel afr lele wus ab ecʼar ɛs ligbɛl a iri. ⁵Anŋn wus na ijr ɛb, kokr ów ekʼerurir. Ɛtŋ ɛsɛ mindey af ijr mob agbr, iir sinↄn ↄny e luw e lɛgŋ eci. ⁶Agŋ eke kokm low ŋuŋ kaka a, ↄbr ɛl low, -li dogŋnm sos ɛtŋ ibir ɛl.

Gbre ij ɛm eci low eku

⁷Na sosiɛm agŋ lisijimɛl, ùsurir ɛrm toŋ bake Ɛs Kↄtↄkↄ ów. Ɛsɛ elel eke egb ewl ɛs bʼeku toŋ nyam krɛkrɛ lele es abal el ab bʼan, yecʼɛtŋ ke lʼúb egbey amamn a, ↄny yɛji èkur ɛbɛn. ⁸Ɔny yɛji ùsurir ɛrm, ìnymn es kikri aŋke Ɛs Kↄtↄkↄ eci mowrer a titm.

⁹Agŋ lisijimɛl, kʼèbal ɛrm kʼokarir af, yecʼɛtŋ ke Nyam kí jɛjm ↄny e low okm. Jɛj ok ɛs a ow inym es lisany. ¹⁰Agŋ lisijimɛl, ↄkan kokoba ↄb ɛsɛl eke dad odad Ɛs Kↄtↄkↄ e nin ɛm a e gbre ekʼij ɛrm susu ɛm a, ke ↄny yɛji kókr ɛbɛn. ¹¹Si bʼaw ɛl eke Nyam ɛdŋ ɛl ↄwrↄ, ɛl ecʼɛrm susu a sosiɛm. Irir elel eke Job ij gbre ɛrm susu ɛm, ke ow e nuŋ ɛdŋ ɛm a Ɛs Kↄtↄkↄ Nyam ɛdŋʼn ↄwrↄ a. Nawrɛ, Ɛs Kↄtↄkↄ Nyam ↄny agŋ e sↄrŋ ikŋ, ɛtŋ li bi kok wɛl low mamn.

¹²Sica agŋ lisijimɛl, ów a fɛŋ e mi dad ↄny a e nyam ekʼↄny any el: ke ↄny eci “ɛɛ” él “ɛɛ” ke ↄny eci “njaŋ” él “njaŋ”; kↄ kʼòcr afr lele wus ab e nin ɛm, oglog akunda ɛjecʼɛm kʼijal kʼokr ↄny sosi af, yecʼɛtŋ ke kʼɛ́ymn Nyam e jɛj ok ab ɛm.

Gbre ij ɛm e Nyam ŋↄŋn

¹³Sica ekʼↄny ɛm ecʼɛgŋ nyam anŋ gbre ɛm a, ni ŋↄ́ŋn Nyam. Ɛtŋ ekʼↄny ɛm ecʼɛgŋ nyam anŋ sos ɛm iŋn ɛm a, lʼɛ́gŋ ɛj li kↄklm Nyam. ¹⁴Ekʼↄny ɛm ecʼɛgŋ nyam anŋ ↄl ɛm, lʼɛ́sŋ Nyamel ɛm ecʼagŋ ekpekp a, ke wɛl ŋↄ́ŋn Nyam ↄŋʼn, ókʼr mun nuŋ Ɛs Kↄtↄkↄ e nin ɛm. ¹⁵Ɔmn ɛm eci ŋↄŋn ikŋ na bʼow eb ↄlu a ɛlu es ewlmʼn; Ɛs Kↄtↄkↄ bʼow ↄny igblʼl ogŋ, ɛtŋ eke li kok sikpl yɛji, ow bʼow oc apʼr. ¹⁶Ɛ̀gŋn ↄny e sikpl ebr ↄny ↄfr ɛm, ke ŋↄ́ŋan Nyam ↄŋanin, yecʼɛtŋ ke éwal. Nɛny nyam ɛs e ŋↄŋn mamn a bʼↄny lɛc nↄnↄ. ¹⁷Kokoba ↄb ɛs Eli yɛji, ɛgŋ ɛsɛ ɛy af. Ni ŋↄŋn Nyam tuↄtuↄ in ecʼɛrm fɛŋ ɛm eke nyam kʼánm, ɛtŋ wus ab af nyam anm toŋ ow ij akpo nyahan lele likpr ab. ¹⁸Ɛtŋ ɛmɛny ni ŋↄŋn Nyam, ɛtŋ nyam an ↄŋ egb ↄsu. ¹⁹Agŋ lisijimɛl, ekʼↄny ɛm ecʼɛgŋ nyam irm low nawrɛ ecʼejagb af, ɛtŋ ↄny ɛm ecʼɛgŋ nyam oc owʼr a, ²⁰ↄkan low na: ɛgŋ eke bʼow ↄny sikpl ɛs nyam oc es ejagb ŋuŋ af a, bʼow eb sikpl ɛs a ecʼabŋ a ɛlu es luw ɛm; ɛtŋ sikpl nↄnↄ a eke ɛgŋ a kok a bʼow ↄny oc ap.