EBRE

Lɛl eke wɛl awŋ Ebre eyŋ

Ów ekʼit eke wɛl kʼuw any

Ɛgŋ a eke kok lɛl na a, ɛgŋm ɛwm sos nin. Gbɛkↄ ow el ɛgŋ nyam eke bʼɛbr Grɛk sɛnyn sɛnyn. Ɛtŋ ɛmɛny lʼuw Nyam Lɛl ɛm ecʼów a lele Jwifɛl ecʼol ab ɛm ecʼów ab ab any yɛji sɛnyn sɛnyn. Ow ibn eke wɛl oc Ebre e lɛl na ɛlu Pↄl e silɛl eke nↄn ab ɛm. Kʼaw ke ow él Apolↄs eke kok Ɛs Kↄtↄkↄ e juma Pↄl ab a, kʼel lɛl na e nↄn ɛs (ɛ̀kn Ob Kok 18.24-28, 1 Korɛnt 3.5-9; 4.1-2).

Ɛgŋ a nↄn lɛl na am dad Ebre eyŋ a ekʼitŋn ɛrm ɛm el Krist eci, ke wɛl am ijr gbre a eke kʼinym es kikri ↄmn ɛm. Nʼam dad wɛl eke batŋ wɛl igŋ ↄmn na eke wɛl ↄny Jesu ɛm a ɛlu es, im am us Jwifɛl ecʼol a jam, wɛl kʼow ɛŋnm ob ap kaka, aŋke Jesu Krist ɛm eci sel ɛŋn a eke wɛl ↄb ow e kokoba a anake el sel ɛŋn tasi a.

Lɛl ab ɛm ecʼów a cɛc sakp yony: krɛkrɛ ɛm a (nuŋ 1.4 toŋ nuŋ 10.18) am yɛgm ɛy eke Jesu agb nↄnↄ akm afr ɛrm ɛsɛl. Lʼagb nↄnↄ lʼakm Mois lele sinm sig ab ɛm ecʼegb waw ɛsɛl ɛgbɛl ab ab. Jesu anake el ɛy ecʼegb waw ɛs ligbɛl Nyam ecʼany af a. Nʼanŋ ɛsɛ Mɛlkisedɛk ekʼel ɛb ebu lele egb waw ɛs ab Abraham lɛgŋ ɛm ab af. Jesu ocr in sosi kokr egb waw ɛtŋ eb ɛy e sikpl a fɛŋ. Lɛgŋ sig ab ɛm e segb waw eke wɛl bi kok a, kʼↄtum tɛtŋm ɛy e sikpl ab es.

Yony ɛm a (nuŋ 10.19 toŋ 13.17 ɛm a), nʼam atr Ebre eyŋ a sos es eke kʼↄny ɛrm susu ↄmn ɛm, ɛsɛ elel eke lɛgŋ sig ɛm ecʼↄmn ɛsɛl a ekʼeb any a kok ab af.

Lʼuwar in e lɛl a ↄwrↄ ɛdŋ ɛm lele ɛsŋn ɛm ab.

Nyam ɛcr Jim ɛm dad ɛy odad

¹Lɛgŋ sig ɛm a, Nyam ɛcr kokoba ↄb ɛsɛl ɛm dad ɛy lagŋɛl odad, ɛtŋ li dad wɛl odad a sakp nↄnↄ lel akunda ɛrŋ ɛrŋ ɛm ab. ²Kↄ sica, sɛgŋ na ekʼel sɛgŋ es abal el ab ɛm, Nyam ɛcr Jim ɛm dad ɛy odad. Jim na ɛm lʼɛcr li kok afr lele wus ab, ɛtŋ in cɛ anake Nyam sↄsum ocʼr eke li kʼel ob a fɛŋ ecʼaja ij ɛs a. ³Iy na bʼɛlu in ecʼanygbɛl e jɛjn a ↄkm, ɛtŋ lʼel ow ecʼes otarir kpɛŋ, ɛtŋ in ecʼodad ebl ecʼabusu a ucu wus lel ob fɛŋ ab ↄny es. Li yↄyↄg agŋ e sikpl ab es, ɛtŋ nʼim li sig es afr Nyam ekʼↄny abusu ob fɛŋ af a e lidr abu af.

Nyam ecʼIy a ↄny any akm afr ɛrm ɛsɛl

⁴Iy na ↄny any nↄnↄ akm afr ɛrm ɛsɛl. Ɛɛ, ow ɛru es kpata, aŋke Nyam ↄŋʼn aja nin ekʼↄny any nↄnↄ akm afr ɛrm ɛsɛl ecʼa. ⁵Tasi ɛm a, lɛgŋ kaka Nyam dadm afr ɛrm ɛs kaka ɛsmɛ:

Ŋ el ɛm ecʼIy,

yɛfɛnyna, ɛm mʼewʼŋ.

Ɛtŋ ɛmɛny, li dadm afr ɛrm ɛs kaka yɛji lʼɛsmɛ:

Ɛm, mi bʼow mʼel Ɛs,

ɛtŋ in, li bʼow lʼel ɛm ecʼIy. 1.5 Bɛ̀bmn Selu 2.7; 2 Samiɛl 7.14; 1 Ów e Wɛl Nↄn 17.13.

⁶Gbɛkↄ, lɛgŋ a eke nʼↄŋ in e yɛfl Iy a ow wus na af a, li dad ninɛ:

Nyam ecʼafr ɛrm ɛsɛl a pupukpaŋ it eke kʼigŋʼn nuŋ. 1.6 Ol Ɔkn 32.43, Sɛptant ɛm ecʼodad eke wɛl oc.

⁷Kin low yecʼeke li dad afr ɛrm ɛsɛl e lís:

ŋ el ɛgŋ a ekʼↄŋ ke afr ɛrm ɛsɛl itŋn anŋ ɛsɛ lɛf af,

ke ŋ e juma kok ɛsɛl bi kok ŋ e low ɛsɛ al e bʼiri ab af a. 1.7 Selu 104.4, Sɛptant ɛm ecʼodad eke wɛl oc.

⁸Kↄ Nyam dad Jim e lís ninɛ:

ŋ el Nyam ɛtŋ ŋ ecʼɛb ebu ecʼatufu lɛkpn a anŋ sɛgŋ fɛŋ.

Ŋ e kpama ab ab, am nyimn ŋ ecʼagŋ a low nɛnyɛmbri nyam ɛm,

⁹bʼerur low nɛnyɛmbri nyam ɛtŋ bʼifn low ŋuŋ.

Na sosiɛm Nyam, ŋ e Nyam sↄsum ocʼŋ awlŋɛl ab ɛm

eke kʼel in eci, ɛtŋ lʼɛtm sos ɛm iŋn e mun lʼokʼŋ nuŋ.1.8-9 Selu 45.7-8.

¹⁰Ɛmɛny Nyam dad ninɛ:

Ɛs Kↄtↄkↄ, nuŋ ↄb ɛm a, ŋ anake kok wus a,

ɛtŋ afr el ob eke ŋ e sabu a ol.

¹¹Ów amua fɛŋ bʼow irm,

kↄ ŋ, bʼow anŋ sɛgŋ fɛŋ.

Afr lele wus ab bʼow ɛni ɛsɛ mob sus ɛm sig af,

¹²bʼow ↄny ar ɛl es ɛsɛ gbad af,

ɛɛ, -li bʼow -lʼitŋn any ɛsɛ mob sus ɛm af.

Gbɛkↄ ŋ, bʼanŋ sɛgŋ fɛŋ ŋ ecʼelel a cɛ,

ɛtŋ ŋ ecʼowr anŋ a úwrm.1.10-12 Selu 102.26-28, Sɛptant ɛm ecʼodad eke wɛl oc.

¹³Lɛgŋ kaka Nyam dadm afr ɛrm ɛs kaka ɛsmɛ:

Òw sig es ɛm e lidr abu af,

toŋ bake mʼót ŋ ecʼefnu mʼok ŋ ecʼakr ew a. 1.13 Selu 110.1.

¹⁴Tasi ɛm a, afr ɛrm ɛsɛl bla -lʼel ee? -Lʼel abŋ ekʼↄny juma ɛrŋ ɛrŋ, ke Nyam bʼɛrm im ɛlum agŋ a eke kʼij sel ekʼↄnym uwr ecʼaja a abu.

Sel ɛŋn a eke wɛl dad ow e low a ↄny any nↄnↄ

¹Low na sosiɛm a, ow it eke si kʼoc ɛrm sʼɛw sodad eke sʼiri ab af; eke ow elm ɛbɛn, si bʼow sʼitir ejagb any. ²Nyam ɛcr afr ɛrm ɛsɛl ɛm ↄŋ agŋ in ecʼodad a, ɛtŋ lʼɛlu odad a e nawrɛ ekʼel a ↄkm tasi. 2.2 Low na el ol a eke Sinayi lafɛny af, wɛl ↄŋ Israɛl eyŋ a. Agŋ bɛb ɛgŋm usrmʼn sos, ɛgŋm ɛluamʼn, ɛtŋ ɛl fɛŋ -nʼɛŋn gbre a ekʼit eke kʼɛŋn ɛl a. ³Sica ɛy, ayaf si bʼow sʼaru gbre na sʼɛgb es, eke si bʼigŋ sel ɛŋn ligbɛl na sʼɛlu es ee? Sel ɛŋn na, Ɛs Kↄtↄkↄ anake ikŋ anym ↄb in ecʼamani a. Ɛtŋ agŋ a eke iri wɛl dad sel ɛŋn na e low a, ɛlu in e low nawrɛ e lʼel a ↄkm. ⁴Nyam in obi yɛgm eke ɛl e sodad a el nawrɛ, mɛny ɛwr, ów ɛgbɛl, lele sakrowa ɛrŋ ɛrŋ eke bʼiti any ab ɛm. Ɛmɛny Nyam yɛgm eke ow el nawrɛ Abŋ Lala ecʼob ap ɛrŋ ɛrŋ a eke li cɛc agŋ ɛsɛ elel eke lʼerur ab af ab ɛm.

Jesu uw ɛy fɛŋ eci

⁵Sʼam dad wus eke kʼow a e low. Ow elm afr ɛrm ɛsɛl Nyam ↄↄm abusu eke kʼɛw wus na es. ⁶Tasi ɛm a, ow eke wɛl bʼɛŋn Nyam Lɛl ɛm a el:

Kↄ agŋ bla -lʼel eke kʼɛw ɛl e low ɛrm ee?

Bla -lʼel eke ki kok ɛl e lís owi ee?

⁷Ɛw ɛl afr ɛrm ɛsɛl ecʼew lɛgŋ tɛl eci,

ↄŋ ɛl anygbɛl lele sos usr ab ɛsɛ es ɛw tufɛ af,

⁸ot ów a fɛŋ ɛw es ɛl ecʼakr ew, ɛl ecʼes ɛw ew. 2.8 Selu 8.5-7.

Nyam ↄŋ agŋ abusu ob ob fɛŋ af. Lʼɛgbm ob kaka es eke anm wɛl ecʼabusu ab ɛm. Gbɛkↄ yɛfɛnyna, sʼam ɛkn tasi, agŋ kʼↄnym abusu ob ob fɛŋ af. ⁹Kↄ bla anake ɛy yɛji sʼam ɛkn ab ee? Jesu anŋ sɛgŋ bɛb afr ɛrm ɛsɛl ecʼew, kↄ sica, Nyam ↄŋʼn anygbɛl lele sos usr ab ɛsɛ es ɛw e tufɛ af. Bla ecʼee? Aŋke lʼij gbre ɛtŋ lʼuw yɛji. Ow ↄŋ ɛtŋ Nyam ecʼɛrm mamn ɛm, Jesu uw agŋ fɛŋ eci. ¹⁰Nyam anake kok wus a ɛtŋ wus anŋ in eci. Kↄ lʼerur ekʼin ecʼey ab ɛm e nↄnↄ ligbɛl kʼanŋ in ecʼanygbɛl a e low ɛm. Ɛtŋ ekʼow el Jesu ekʼam ot im ɛl sel ɛŋn a ogŋ a, ow it eke Nyam kʼoc gbre ijr ɛm ↄŋʼn lʼiy nɛny lʼigŋ nuŋ.

¹¹Jesu bʼↄny agŋ fɛŋ e sikpl a oc ɛl es lís. Ɛtŋ ɛbɛn a, ɛgŋ eke bʼayal agŋ a lele agŋ a eke wɛl ayal ab ab ɛl fɛŋ bʼↄny ɛgŋ Ɛs nyam. Na sosiɛm ow ↄnymʼn ɛ́s eke li kʼɛsŋ wɛl lisijimɛl. ¹²Tasi ɛm a, Jesu dad Nyam ninɛ:

Mi bʼow mʼↄb ŋ e nin a ecʼamani mʼok ɛm lisijimɛl.

Dedeku ecʼaraŋn, mi bʼow mi kↄklmʼŋ. 2.12 Selu 22.23.

¹³Ɛmɛny Jesu cɛ, li dad ninɛ:

Ɛm, mi bʼow mʼoc ɛm ecʼↄmn a nimum nimum mʼɛlu Nyam ɛm.

Ɛmɛny ninɛ:

Kin ɛm lele ey a eke Nyam ↄŋʼm ab ab. 2.13 Ɛ̀kn Esayi 8.17, Sɛptant ɛm ecʼodad eke wɛl oc.

¹⁴Ey amua ↄny low nyam eke okr ɛl af: -lʼel agŋ ekʼↄny sos megl lele mebl ab. Agn ↄny abusu eke kʼibi ɛl. Na sosiɛm, Jesu, in yɛji itŋn el ɛgŋ, yecʼɛtŋ ke nʼↄny agn eci lɛc a lʼoc es in obi eci luw ab ɛm. ¹⁵Agŋ ekʼanŋ ɛsɛ madu af ɛl ecʼowr anŋ a nimum ɛm, luw eci muru eke -nʼↄnyn a sosiɛm a, Jesu sↄg ɛl in e luw ab ɛm. ¹⁶Tasi ɛm a, lʼowm afr ɛrm ɛsɛl eci abu ɛlum eci, kↄ lʼow agŋ ekʼel Abraham ecʼalaw a ecʼabu ɛlum eci. ¹⁷Na sosiɛm anake ow it eke li kʼitŋn nimum nimum lʼot lisijimɛl lele lisijↄwɛl ab es, yecʼɛtŋ ke lʼél wɛl ecʼegb waw ɛs ligbɛl, eke ɛrm mamn iy ɛm gbↄŋ ke el cɛcɛ Nyam e juma kok ab ɛm, ke bʼɛŋn agŋ e sikpl oc ap ecʼabusu a. ¹⁸Ɛtŋ eke Jesu in obi ij gbre ɛbm ɛkn ɛm a, lʼↄtu eke li kʼatm agŋ a fɛŋ eke ɛl yɛji wɛl bʼɛbm ɛkn a abu.

Jesu ɛŋn anygbeŋ akm Mois

¹Agŋ lisijimɛl, Nyam ekʼanŋ afr a ɛsŋ ↄny eke kʼeel in ecʼagŋ lala; ow sosiɛm, lɛ̀ɛr Jesu eke sʼam ɛgŋ sʼeb ɛsɛ ɛgŋ a eke Nyam ɛrm lele egb waw ɛs ligbɛl ab a. ²Lɛgŋ sig ɛm a, eke Mois nyimn Nyam ecʼagŋ a, 3.2 Ɛ̀kn Awl 12.7. Nyam ecʼagŋ: aŋa, Grɛk ɛm a, odad na e nyandrɛ el êl. lʼel cɛcɛ ow ecʼany af ow e juma e kok ab ɛm. Ɛbɛn cɛ, ɛsɛ Mois af, Jesu el cɛcɛ Nyam eke abul il in e juma a ecʼany af. ³Gbɛkↄ Jesu ɛbm eke kʼɛŋn anygbeŋ akm Mois, ɛsɛ elel eke ɛgŋ eke bʼus êl a bʼↄny sos usr akm êl ab af. ⁴Tasi ɛm a, êl nyam nyam fɛŋ ɛgŋ bʼus gbɛkↄ ɛgŋ a eke bʼus fɛŋ a el Nyam. ⁵Lɛgŋ sig ɛm a, Mois el cɛcɛ Nyam ecʼagŋ a ecʼaraŋn. Lʼel juma kok ɛs eke wɛl abul Nyam e lɛgŋ anym ɛm ecʼów a eke bʼow dad a e daŋku ij. ⁶Gbɛkↄ Krist el cɛcɛ, lʼel Iy tasi a ɛtŋ nʼanŋ Nyam ecʼagŋ a e nuŋ af. In ecʼagŋ a, ow ow el ɛy, gbɛkↄ ow it eke si kʼucu ɛy ecʼↄmn a, lele ntotŋ a ekʼɛy e low ↄmn a bʼↄŋ ɛy ab ab sʼↄny es.

Sʼókr Nyam eci sel eb ab ɛm

⁷Na sosiɛm, ɛsɛ elel eke Abŋ Lala am dad ab af:

Yɛfɛnyna, eke bʼirir Nyam e lebl a,

⁸kʼↄ̀turir ↄny ecʼɛrm a, ɛsɛ lɛgŋ sig ɛm ecʼelel

eke ↄny lagŋɛl kokr loj ab ɛm ab af.

-Lʼↄbrʼm any ɛtŋ -lʼɛbmʼm -lʼɛkn.

⁹Ɛɛ, lɛgŋ a, ↄny lagŋɛl ijrʼm gbre eke kʼɛkn

yecʼa eke mi bʼow mi kok a.

Ɛtŋ -lʼɛkn yecʼa eke mi kok a

toŋ akpo ekŋ yony.

¹⁰Na sosiɛm, mʼↄny ɛrm bebl agŋ na e lís

ɛtŋ mi dad mʼɛsɛ: ɛl ecʼɛrm a sɛgŋ fɛŋ bi kpab es ɛm e lís,

ɛtŋ -lʼↄtum -lʼuwm ɛm ecʼejagb ab any.

¹¹Ɛm ecʼɛrm bebl ab ɛm, mʼofn mʼɛsɛ:

-li kʼow -lʼokmn lɛgŋ kaka

ɛm e sel eb a eke mi bɛbm mʼɛw es ab ɛm!3.7-11 Selu 95.7-11, Sɛptant ɛm ecʼodad eke wɛl oc.

¹²Agŋ lisijimɛl ɛ̀wr ɛrm! Ɔny ɛm a, ɛgŋ kaka itm eke kʼↄny ɛrm ŋuŋ, ɛrm ekʼúbm nawrɛ, ɛrm eke bʼitrʼr lʼigŋ Nyam ekʼanŋ owr a lʼɛlu es. ¹³Nyam Lɛl dad ninɛ: “Yɛfɛnyna”. Ow sosiɛm, eke yɛfɛnyna na kʼuwrm a, àtarir sos es ɛgŋ ɛgŋ lɛgŋ fɛŋ. Ɛbɛn a, ɛgŋ kaka kʼow ↄnym ɛrm tuↄtuↄ, ɛtŋ sikpl kʼow ɛlum ɛgŋ kaka wus. ¹⁴Sica, sʼel Krist e lawlɛl, gbɛkↄ ow it eke si kʼucu ɛy ecʼↄmn a eke sʼↄny lɛgŋ a ɛtŋ eke sʼubʼr nawrɛ a sʼↄny es.

¹⁵Nyam Lɛl dad ninɛ:

Yɛfɛnyna, eke bʼirir Nyam e lebl a,

kʼↄ̀turir ↄny ecʼɛrm a

ɛsɛ lɛgŋ sig ɛm ecʼelel eke ↄny lagŋɛl ↄbrʼm any ab af. 3.15 Selu 95.7-8, Sɛptant ɛm ecʼodad eke wɛl oc.

¹⁶Bwo ecʼɛgŋ iri Nyam e lebl ab ee? Bwo ecʼɛgŋ ↄbrʼr any ee? Ɛl -lʼel agŋ a fɛŋ eke Mois ↄny ok ↄkm Ejipt a. ¹⁷Nyam ebl ɛrm toŋ ow ij akpo ekŋ yony. Bwo ecʼɛgŋ e lís ee? Agŋ a eke kok sikpl a e lís, ɛtŋ ɛl nɛny nyam a cɛ anake -lʼuwr loj ab ɛm a. ¹⁸Nyam ofn dad ninɛ: Li kʼow -lʼokmn lɛgŋ kaka sel eb a eke mi bɛbm mʼɛw es ab ɛm. Bwo sosiɛm lʼofn akpasu na ee? Agŋ a ekʼↄnym ɛlum a sosiɛm. 3.18 Ɛ̀kn Awl 14.11-35; Selu 95.11.¹⁹Tasi ɛm a, kin yecʼeke sʼam ɛkn a: -lʼↄtum -lʼokm Nyam e sel eb ab ɛm, aŋke -nʼↄnym ↄmn.

¹Gbɛkↄ Nyam ɛwar ɛy low ɛw es eke si bʼow sʼok in e sel eb ab ɛm, ɛtŋ low na eke lʼɛwar ɛy lʼɛw es a ɛcm okm es. Ow sosiɛm ɛ̀wr ɛrm, ke ɛgŋ kaka ↄny ɛm a kʼánm jam! ²Wɛl ↄb Amani Mamn a e kokoba ok ɛy ɛsɛ ɛy lagŋɛl ab af, gbɛkↄ odad a eke -lʼirir a elm ɛl low kaka. Eke -lʼirir ow e low a, -lʼebm ow ↄmn ɛm. ³Ɛy, sʼub nawrɛ, sʼↄtu eke si kʼok Nyam e sel eb ab ɛm. Nyam in obi dad ninɛ:

Ɛm ecʼɛrm bebl ab ɛm, mʼofn eke:

-Li kʼow -lʼokmn lɛgŋ kaka

ɛm e sel eb a eke mi bɛbm mʼɛw es ab ɛm.

Ke, Nyam uwar in e juma lɛgŋ a ɛtŋ eke li kok wus na nimum a. ⁴Tasi ɛm a, Nyam Lɛl ɛm, kin yecʼeke wɛl dad sɛgŋ lↄbŋ ɛm a e lís: Ɛtŋ eke li kok in e juma fɛŋ uwr a, lʼeb sel sɛgŋ lↄbŋ ɛm a.4.4 Ɛ̀kn Nuŋ Ɔb 2.2.⁵Nyam yɛji dad ow ecʼodad eke li bi dad lʼɛsɛ: -Li kʼow -lʼokmn lɛgŋ kaka ɛm e sel eb a eke mi bɛbm mʼɛw es ab ɛm a.⁶Agŋ a ekʼikŋ anym ɛŋn Amani Mamn a ɛgŋm ↄnym in ecʼɛlum. Ow sosiɛm, -lʼↄtum -lʼokm Nyam e sel eb ab ɛm. Agŋ ɛjeci gbɛ ↄtu eke ɛmɛny kʼok ɛm. ⁷Na sosiɛm Nyam ɛw lɛgŋ ɛjeci nyam ɛtŋ lʼɛsŋ ow yɛfɛnyna. Eke ow ibn a, Nyam dad David e nɛny ɛm lɛgŋ ikŋ na e low, odad a eke wɛl ikŋ anym dad lɛl na ecʼafr ɛm a:

Yɛfɛnyna, eke bʼirir Nyam e lebl a,

kʼↄturir ↄny ecʼɛrm a!

⁸Sica am ɛkan eke, blel Joswe nawrɛ tasi ↄtu ɛŋn sel eb na ↄŋ Nyam ecʼagŋ ab ana, Nyam blel dadm ow e jam a, lɛgŋ ɛjeci nyam ecʼodad. ⁹Ow am yɛgm eke sel eb ɛmɛny anŋ Nyam ecʼagŋ a eci. Ɛtŋ sel eb a ot sɛgŋ lↄbŋ ɛm ecʼab es. ¹⁰Tasi ɛm a, ɛgŋ a eke bʼɛy Nyam e sel eb ab ɛm a, in yɛji am eb in obi e juma a e sel, ɛsɛ elel eke Nyam eb in ecʼa e sel ab af. ¹¹Na sosiɛm sʼↄ́ↄl ɛy ecʼɛrm fɛŋ ɛm sel eb na ɛm ecʼɛy es, yecʼɛtŋ ke ɛgŋ kaka kʼébm ɛy lagŋɛl a ekʼɛgŋm ɛluam low a eci sɛwl a, ke ow ↄ́ŋ ɛgŋ kaka kʼɛ́ym wus.

¹²Ow it e si kʼuw any eke Nyam ecʼodad ebl a bʼism sel ab, lɛc iyʼr ɛm gbↄŋ. Li bʼɛdŋ lakm ler ɛm lab ekʼin ecʼany a yony mum bʼufu a. Nyam ecʼodad ebl a bʼɛy ɛgŋ ɛm im igŋ es. Li bʼɛy ow ɛm nʼim toŋ nʼɛŋn ow ecʼabŋ a lele liy ab ab, li bʼim toŋ nʼɛŋn ow e sos ŋgigŋnel a lele ew ab ab. Li bʼuw ɛgŋ e nuŋ ɛm ecʼów tutr lele ɛrm ɛm ecʼab ab any. ¹³Tasi ɛm a, low kaka lↄlm es Nyam ecʼany af. Ob fɛŋ eke li kok a ɛruʼr es any af kpata. In e nyamn a bʼɛkn fɛŋ, ɛtŋ in anake si kʼawl ɛy e lís ecʼów fɛŋ sʼokʼr a.

Sʼímn si titmn Nyam ↄmn ɛm

¹⁴Sʼↄny egb waw ɛs abusu ɛs ligbɛl nyam eke ubr afr ɛm im toŋ ok Nyam ogŋ yogŋ. In lʼel Jesu, Nyam ecʼIy a. Ow sosiɛm, sʼúcur ↄmn a eke sʼɛgŋn sʼebr a sʼↄnyn es. ¹⁵Egb waw ɛs ligbɛl na eke sʼↄny a, ↄtu eke kʼↄny ɛy e sos ↄnym a e sↄrŋ ikŋ, aŋke ɛsɛ ɛy af, in yɛji wɛl ɛbmʼn low low fɛŋ ɛm, gbɛkↄ in li kokm sikpl. ¹⁶Sʼímn si titmn ↄmn ɛm tasi ɛy e Nyam ɛrm mamnu ecʼes ɛw ecʼatufu lɛkpn a. In e lís si bʼow sʼɛŋn sↄrŋ ikŋ a eke bʼanŋ in ecʼɛrm mamn ab ɛm ow a, ɛtŋ ɛbɛn a, li bʼow lʼɛlum ɛy abu wanci ekʼit a.

Krist, ɛy ecʼegb waw ɛs ligbɛl lele sel ɛŋn e nuŋ ab

¹Egb waw ɛs ligbɛl fɛŋ, agŋ ecʼaraŋn wɛl bi sↄsumʼn ocʼr. In e juma el ke lʼɛ́lum agŋ abu ir ɛb Nyam ab, li kok ob ap lele egb waw ab agŋ e sikpl a ecʼoc ap eci. ²Egb waw ɛs ligbɛl a, in obi yɛji lʼel ɛgŋ ekʼↄny sikpl. Ow sosiɛm, lʼↄtu eke li kʼiri agŋ a ekʼuwm low any lel ɛl a ekʼam irm ab ab e ses babur a. ³In e sikpl e nʼↄny a sosiɛm, ow it eke li ki waw egb dedeku a e sikpl a eci, ɛtŋ ow elm dedeku a e sikpl a cɛ eci, kↄ in obi in obi ecʼa yɛjʼeci.

⁴Ɛtŋ ɛmɛny, ɛgŋ kaka áwm egb waw ɛs ligbɛl e juma a ebm in obi ɛm. Kↄ Nyam anake bʼɛsŋ ɛgŋ ow ecʼel ɛm, ɛsɛ elel eke lʼɛsŋ Arↄn el ab af a. ⁵Krist ecʼa yɛji, ɛbɛn ow ɛcr. Ow elm in obi lʼawm egb waw ɛs ligbɛl ecʼel a lʼebm. Nyam eke dadʼr odad a ogŋ ow anŋ ow. Kin odad a: Ŋ el ɛm ecʼIy, yɛfɛnyna, ɛm mʼewʼŋ.5.5 Selu 2.7; Ob Kok 13.33; Ebre 11.5.⁶Ɛmɛny Nyam dad ninɛ: Ŋ el egb waw ɛs sɛgŋ fɛŋ eci, ɛsɛ elel eke ow ↄb nuŋ Mɛlkisedɛk ɛm ab af.5.6 Selu 110.4.

⁷Krist, in e wus af aŋa ecʼɛb ir ab ɛm, ŋↄŋn Nyam ɛtŋ kok sↄrŋ ↄŋ Nyam, babarm ɛm lele ↄŋn ikŋ ɛm ab. Ni ŋↄŋn Nyam ekʼↄtu eke kʼↄny ocʼr es luw ɛm a. Ɛtŋ Nyam iriʼr lebl, aŋke lʼɛlum ow es is ɛm. ⁸Krist el Nyam ecʼIy, na low nawrɛ! Gbɛkↄ gbre ijr amua fɛŋ ɛm eke lʼɛcr a, li wewr ɛlum nawrɛ tasi. ⁹Ɛtŋ sica eke lʼiy nɛny lʼigŋ nuŋ a, lʼel sel ɛŋn e nuŋ agŋ fɛŋ eke bʼɛlumʼn a eci. ¹⁰Ɛtŋ ɛbɛn a, Nyam ɛwʼr egb waw ɛs ligbɛl ɛsɛ Mɛlkisedɛk ecʼab af.

Ɛ̀wr ɛrm, kʼìgŋn ↄny ecʼↄmn a kʼɛlul es

¹¹Low na af a, sʼↄny ów nↄnↄ eke si ki dad, kↄ ɛl e dad a ↄtu nↄnↄ, aŋke ↄny e low iri a ɛwl am ↄtu. ¹²Ɔny, ↄtur eke wanci na af a kʼeel low yɛgm ɛsɛl tasi gↄŋ! Kↄ kin eke ow am ibrm eke wɛl ki yɛgmn ↄny nuŋ ↄb ɛm e Nyam odad ecʼów ab ɛm. Ɔny, ↄnymn tɛri eke kʼijr ob ij leg leg, mɛny mij ow it eke wɛl kʼↄŋ ↄny. ¹³Ɛgŋ a eke bʼanŋ am ɛgŋ mɛny mij a, el iyli ↄmn ɛm. Li kʼↄtum lʼuwm yecʼa ekʼel low nyim nyim ab any. ¹⁴Gbɛkↄ ob ij leg leg el agŋ ɛgbɛl ↄmn ɛm eci. Ɛl e low es ɛkn ɛw a, ↄŋ ɛl e nuŋ ɛm ↄny a, bʼuw any ok ereb low mamn lele low ŋuŋ ab ecʼaraŋn.

¹Na sosiɛm si kʼow sʼɛwlm sʼowm nuŋ ↄb ɛm ecʼów a eke sʼuw any Krist e lís ab af ij, kↄ sʼíman anym eci low yɛgm ekʼot agŋ ɛgbɛl ↄmn ɛm ecʼab es. Ɛmɛny ow itm yɛjʼeke wɛl kʼɛwl ow ów a eke bi nyimn ɛgŋ luw ɛm a ecʼes igŋ ɛlu owi af lele ɛy ecʼↄmn a eke si kʼoc sʼɛlu Nyam ɛm a yɛji e low af ij. ²Ow ibram yɛjʼeke ɛmɛny wɛl ki yɛgm ↄny low sos es yↄyↄg ɛrŋ ɛrŋ e low af, ɛgŋ abu nuŋ at owi af, 6.2 ɛgŋ abu nuŋ at owi af:el es gbɛgbl ekʼow ɛm, Sinyamel ecʼidr ɛsɛl bʼot sabu at agŋ nuŋ af, ke yɛ́gm eke wɛl sↄsum ot ɛl juma mum nyam eci (ɛ̀kn 2 Timote 1.6). luw ɛm anŋ igb owi af, lele jɛj ok kpɛkŋ kpɛkŋ ab e low af. ³Ow sosiɛm a, eke Nyam ɛlu ɛy abusu es, si bʼow sʼimn anym eci ów a ekʼel Nyam e lís ecʼa ecʼany uw tasi ɛm.

⁴Sica, bla wɛl ↄtu eke ki dad agŋ a ekʼigŋ ɛl ecʼↄmn a ɛlu es a e lís ee? Nyam ecʼusuayl a ɛkan ɛl es, -li tat afr ecʼob ap a anm ɛtŋ -nʼɛŋn Abŋ Lala. ⁵-Li tat Nyam ecʼodad ebl mamn a lele sɛgŋ ekʼam ow e lɛc ab ab yɛji anm. ⁶Ɛtŋ ɛbɛn yɛji -lʼigŋ ɛl ecʼↄmn a -lʼɛlu es. Agŋ amua, kʼↄtum sakp yony ɛm itŋnm es an ij. Tasi ɛm a, ow anŋ ɛsɛ ɛbɛn Nyam ecʼIy a cɛ ɛmɛny wɛʼn am ɛw olikŋ af wɛl obi ɛm af ɛtŋ -li bʼↄŋ agŋ ɛjecʼa ow eci wɛwr ecʼabusu.

⁷Sʼócr ↄgm nyam e low sʼↄbar any: in e wus a bʼↄdu mij a fɛŋ eke nyàm bʼan ke bʼokʼr af a eb. Li bʼↄsu egb iju agŋ a eke kokʼr juma af a ecʼabu ɛlum eci. Ow bʼↄŋ Nyam bʼɛdŋ wus a ↄwrↄ. ⁸Kↄ eke li bʼↄsu kati lele njoj ab, lʼelm ob kaka. Ow kʼow ibnm Nyam bʼow digŋ ɛluʼl es ɛtŋ wɛl bʼow tɛtul il. 6.8 Bɛ̀bmn Esayi 5.1-7.

⁹Erur ɛm ecʼagŋ lisijimɛl sʼam dad nɛnɛ, gbɛkↄ ɛbɛn yɛji, sʼuw any tasi eke ↄny anŋn ejagb mamn a eke bi nyimn ɛgŋ sel ɛŋn ɛm ab af. ¹⁰Nyam elm ɛnyɛmbri yony yony ɛs. Li kʼↄtum lʼijlm ów amamn a eke kokr ab es, lʼijlm erur a eke ɛlul ↄkm in e lís ab es. Lɛgŋ ekʼɛc ab ɛm a, ɛlul erur ikŋ na ↄkm agŋ a ekʼel Nyam ecʼa ecʼabu ɛlum ɛm, ɛtŋ ɛmɛny sicaca ɛm yɛji ↄnyn es am kokr. ¹¹Sʼam erur cɛ ekʼↄny ɛm ecʼɛgŋni nyam nyam fɛŋ kʼanŋ gbragbra kok ab ɛm toŋ ok nuŋ, yecʼɛtŋ ke fɛŋ a eke am ↄman a ɛ́ŋan. ¹²Kʼèel ↄ́rŋu, kↄ ìir ɛb ɛsɛ agŋ a ekʼↄny ↄmn ke ↄny ɛrm susu ab af. Agŋ amua, -li bʼɛŋn aja a eke Nyam ɛwar ow e low ɛw es a.

Nyam ecʼob ekʼɛwar Abraham a

¹³Eke Nyam ɛwar Abraham ob a, nɛny ij ab lʼɛwar. Gbɛkↄ ɛgŋ kaka agbm akamʼn eke kʼel nɛny ij na e daŋku, ow ↄŋ Nyam ofn in obi e nin ɛm. ¹⁴Li dad Abraham ninɛ:

Mʼow mʼɛdŋʼŋ ↄwrↄ

ke mʼↄ́ŋ ŋ ecʼalaw ɛny bobn. 6.14 Bɛ̀bmn Nuŋ Ɔb 22.16-17.

¹⁵Abraham usur ɛrm toŋ ɛtŋ nʼɛŋn yecʼa eke Nyam ɛwar ir ow e low ɛw es a. ¹⁶Eke agŋ bʼij nɛny a, daŋku nyam eke agb akm ɛl a e nin ɛm li bʼij nɛny. Nɛny ij a bʼↄŋ ɛl e sodad a el tasi, ɛtŋ ɛbɛn a, wɛl ↄ́tum dadm low ɛjecʼij. ¹⁷Ɛtŋ Nyam yɛji kok low nɛnyɛmbri nyam a: lʼerur e li kʼɛlu ↄkm kpata eke low a e lʼɛwar in ecʼagŋ a, kʼↄtum itŋnm lɛgŋ kaka. Ow sosiɛm anake lʼij nɛny lʼigŋ in e low ɛwar ab af a. ¹⁸Low ɛwar lele nɛny ij ab, el ów yony eke wɛl kʼↄtum ↄnym itŋnm, aŋke Nyam kʼↄtum ↄnym yadŋ. Ów yony na sosiɛm, ɛy eke sʼigŋ fɛŋ sʼɛlu es a, si bʼow sʼɛŋn sos es atr ligbɛl, yecʼɛtŋ ke sʼúcu low ↄmn a eke wɛl ɛw ɛy es a sʼↄny es. ¹⁹Low ↄmn na, ɛy ecʼa ow anŋ ɛsɛ ob leg leg nyam ekʼↄↄm ɛy e liy a abusu eke ki mumu af. Low ↄmn na el nawrɛ tasi ɛtŋ li bʼɛpir Nyamel a ekʼanŋ afr a eci gbad 6.19 li bʼɛpir Nyamel a ekʼanŋ afr a eci gbad ab ɛm:agŋ a bʼigŋ Nyam nuŋ gbad êl ɛm eke ↄny gbad nyam eke bi cɛc usu lala a lele usu lala tasi ab ab. Egb waw ɛs ligbɛl a cɛ el ɛgŋ ekʼↄny abusu eke kʼɛy ɛm yogŋ. ab ɛm, lʼɛy usu lala tasi a. ²⁰Yogŋ anake Jesu ikŋ anym ɛy, ɛy ecʼa. Ɛtŋ lʼel egb waw ɛs ligbɛl sɛgŋ fɛŋ eci ɛsɛ Mɛlkisedɛk ecʼab af. 6.20 Selu 110.4.

Mɛlkisedɛk ecʼegb waw ɛs ekʼel a agb nↄnↄ akm Arↄn ecʼa

¹Mɛlkisedɛk na, Salɛm ecʼɛb ebu lele Nyam Afr Kpekpe ecʼegb waw ɛs ab. Lɛgŋ a eke Abraham anŋ ar ↄkr ɛm am ow yogŋ a eke lʼakm sɛb ebu ab es a, Mɛlkisedɛk im ↄbrʼr ɛtŋ ɛdŋʼn ↄwrↄ. ²Ɛtŋ Abraham ↄŋʼn ob fɛŋ eke lʼot a e lɛw ɛm a. Mɛlkisedɛk e nin a e nyandrɛ el “ɛb ebu eke bi nyimn agŋ low nɛnyɛmbri nyam ɛm”. Ɛtŋ ɛmɛny, lʼel Salɛm ecʼɛb ebu, ow e nyandrɛ el “ɛb ebu eke bʼism ɛrm es ɛy ab”.7.1-2 Nuŋ Ɔb 14.17-20.³Wɛl uwm ɛs, lis lele lagŋɛl ab any. Wɛl am dadm in e mew a lele luw ab ab ecʼodad. Gbɛkↄ li bʼot Nyam Jim es, aŋke lʼel egb waw ɛs sɛgŋ fɛŋ eci.

⁴Ɛ̀kan elel eke Mɛlkisedɛk ↄny any a! Ɛy lagŋ ligbɛl Abraham bↄbↄ yɛji ↄŋʼn ob a fɛŋ eke nʼɛŋn ar ab ɛm a eci lɛw ɛm a. ⁵Mois ecʼol a ↄŋ egb waw ɛsɛl ekʼel Levi ecʼeb ɛm ecʼa abusu eke -li kʼibrm Israɛl ecʼagŋ a ɛl ecʼob fɛŋ eke -nʼↄnyn a e lɛw ɛm. 7.5 Awl 18.21. -Li bibrm Israɛl ecʼagŋ a ecʼob fɛŋ e lɛw ɛm, ke agŋ amua, ɛl lisijimɛl ekʼɛl yɛji el Abraham ecʼeb ɛm ecʼagŋ cɛ. ⁶Ke Mɛlkisedɛk, in, lʼelm Levi ecʼeb ɛm ecʼɛgŋ. Ɛtŋ ɛbɛn yɛji, nʼɛŋn Abraham ecʼob fɛŋ ekʼɛŋn a e lɛw ɛm a. Ɛtŋ in, lʼɛdŋ ɛgŋ na eke Nyam ɛwar low ɛw es a ↄwrↄ. ⁷Bɛbar kaka anm ɛm, ɛgŋ ligbɛl a bʼɛdŋ likek a ↄwrↄ. ⁸Egb waw ɛsɛl a eke bʼɛŋn dedeku a e mob fɛŋ e lɛw ɛm a, el agŋ eke bʼuw. Mɛlkisedɛk yɛji ɛŋn mob fɛŋ e lɛw ɛm a, kↄ in, nʼanŋ owr sɛgŋ fɛŋ, ɛsɛ elel eke Nyam Lɛl am dad ab af. ⁹Levi ecʼeb ɛm ecʼey a anake bʼɛŋn dedeku a e mob fɛŋ e lɛw ɛm a. Gbɛkↄ wɛl ↄtu eke ki dad eke Levi, in yɛji, Abraham ɛm a, nʼɛnm ob lɛw ɛm na. ¹⁰Tasi ɛm a, lɛgŋ a eke Abraham ↄbr Mɛlkisedɛk a eke wɛl kʼewm Levi yɛji, lɛgŋ ab ɛm a, lʼikŋ anym nʼanŋ yogŋ lagŋ ɛm.

¹¹Israɛl eyŋ ecʼol ɛm a, Levi ecʼeb ɛm ecʼey a anake wɛl ki sↄsum ot el egb waw ɛsɛl a. Ɛtŋ -li bʼel egb waw ɛsɛl ɛsɛ elel eke ow ↄb nuŋ Arↄn ɛm ab af. 7.11 Levi el eb ab ɛm eke wɛl bi sↄsum egb waw ɛsɛl lele ɛl ecʼabu ɛlum ɛsɛl ab ot a, ecʼɛl lagŋ. Arↄn anake el krɛkrɛ ecʼegb waw ɛs ligbɛl a. Gbɛkↄ ɛl ecʼelel eke -li bʼeel egb waw ɛsɛl a okm ɛm iym nɛny, blel ow iy nɛny, ke bla sosiɛm -li kʼↄny egb waw ɛs ɛjeci ɛsɛ elel eke ow ↄb nuŋ Mɛlkisedɛk ɛm ab af ee? Ow bʼow el low eke ↄnym any ij. ¹²Sica, eke egb waw ɛs ecʼel a itŋn a, ol a yɛji it eke kʼitŋn. ¹³Sodad amua, ɛy Ɛs Kↄtↄkↄ af wɛl dad ok. In, eke lʼel eb ɛjecʼɛm ecʼɛgŋ, ke eb ab ɛm a, lɛgŋ kaka, ɛgŋ anm ɛym ↄkm kokm egb waw ɛs eci juma a. ¹⁴Agŋ a fɛŋ uw any eke ɛy Ɛs Kↄtↄkↄ, Juda ecʼeb ab ɛm wɛl ewʼr. Ɛtŋ Mois dadm eb na e low lɛgŋ a eke li dad egb waw ɛsɛl ecʼodad a.

Jesu el egb waw ɛs ɛsɛ Mɛlkisedɛk af

¹⁵Ca gbɛ ów a fɛŋ am ayl, sica eke wɛl sigm egb waw ɛs ɛjeci nyam eke bʼot Mɛlkisedɛk es a. ¹⁶Lʼelm egb waw ɛs agŋ e mew ecʼol ecʼelel eke bʼɛkan ab ɛm. Tasi ɛm a, owr anŋ ekʼↄnym uwr a ecʼabusu ab anake sigmʼn es ɛsɛ egb waw ɛs af a. ¹⁷Nawrɛ tasi, Nyam Lɛl dad ninɛ:

Ŋ el egb waw ɛs sɛgŋ fɛŋ eci,

ɛsɛ elel eke ow ↄb nuŋ Mɛlkisedɛk ɛm ab af. 7.17 Selu 110.4.

¹⁸Ol sig a iym nɛny ɛtŋ elm low, ow ↄŋ wɛl ↄny fifnʼn es. ¹⁹Mois ecʼol a ↄsum liy sↄbↄ kaka. Gbɛkↄ wɛl ↄŋ ɛy low ↄmn nimamn tasi nyam, ɛtŋ si bʼɛcr in ɛm si titm Nyam.

²⁰Eke si bʼɛkn a ke Nyam ij nɛny sigm egb waw ɛs na es. Gbɛkↄ Levi ecʼeb ɛm ecʼa, -lʼel egb waw ɛsɛl, eke nɛny ij anm ɛm. ²¹Kↄ Jesu ecʼa, Nyam ij nɛny lɛgŋ a eke li dad ninɛ:

Ɛs Kↄtↄkↄ ij nɛny ɛtŋ li kʼow lʼitŋnm ɛbr:

El egb waw ɛs sɛgŋ fɛŋ eci. 7.21 Selu 110.4.

²²Ow am yɛgm ɛy eke Jesu anake el ɛgŋ a eke am ↄŋ ɛy sʼuw any tasi eke sinm a eke Nyam kok ɛy ab a, akpl akm lisig a.

²³Ɛmɛny low anŋ eke ok ereb: egb waw ɛsɛl ɛjecʼa ɛny nↄnↄ, aŋke luw ↄ́ↄm ɛl abusu eke -li kʼanŋ egb waw ɛs el ab ɛm sɛgŋ fɛŋ eci. ²⁴Kↄ Jesu gbɛ, in, nʼanŋ owr sɛgŋ fɛŋ eci, ɛtŋ lɛgŋ kaka ɛgŋ ɛjeci kʼow elm egb waw ɛs in usuiy a. ²⁵Na sosiɛm anake lʼↄtu eke sɛgŋ fɛŋ li kʼeb agŋ a eke bi titm Nyam a lʼɛlu es in ecʼabu ɛlum ɛm a. Eke sica Jesu anŋ owr sɛgŋ fɛŋ ecʼa, lʼↄtu eke li ki ŋↄŋn Nyam sɛgŋ fɛŋ wɛl eci.

²⁶Jesu el egb waw ɛs ligbɛl tasi a eke kʼel ɛy ecʼa. Lʼel lala, nʼↄnym low ↄbr, ɛtŋ lʼitam ɛm kaka, nʼanm ɛsɛ ɛy sikpl ɛsɛl af, ɛtŋ afr Nyam usrʼr sos ligbɛl. ²⁷Jesu anm ɛsɛ egb waw ɛsɛl ɛgbɛl ɛjecʼab af. Ow ibram eke lɛgŋni nyam nyam fɛŋ li ki waw egb in obi in obi e sikpl a eci, ke ɛmɛny li waw dedeku a eci. In sosi eke lʼocr li wawr egb a, ow el egb waw a eke li kok akp nyam coco sɛgŋ fɛŋ ecʼa. ²⁸Mois ecʼol a bi sigm agŋ eke iym nɛny ab es ɛsɛ egb waw ɛsɛl ɛgbɛl af. Kↄ Nyam e nɛny ij a eke anŋ ol e jam ow a, sigm Iy ab es ɛsɛ egb waw ɛs ligbɛl af, in eke lʼiy nɛny lʼigŋ nuŋ akpo akpo fɛŋ ecʼa.

Jesu el sinm owr a ecʼegb waw ɛs ligbɛl

¹Kin low a eke sʼam erur eke si ki dad a e liy a tasi: ɛy sʼↄny egb waw ɛs ligbɛl nyam ɛsɛ na eke si dad in e low ab af. Li sig es afr, Nyam ekʼↄny abusu a e lidr abu af. ²Li bi kok in e juma a usu lala a, afr eci nuŋ igŋ usu tasi a. Ɛɛ, afr eci gbad ɛm êl tasi a, ow elm Israɛl ecʼagŋ a usm, kↄ Ɛs Kↄtↄkↄ in obi anake usʼr a. 8.2 afr eci gbad ɛm êl tasi a:krɛkrɛ eci gbad ɛm êl a, wus af aŋa wɛl usʼr Nyam e nuŋ igŋ eci (Ɔkm Ok 25-27; 39.32–40.36), gbɛkↄ in, afr eci nuŋ igŋ usu tasi a eci sɛwl cɛ lʼel.

³Egb waw ɛs fɛŋ eke wɛl sigm es a e juma eke bi kok a el ob ap lele egb waw ab. Ow it eke ɛy ecʼa yɛji kʼↄny ob ap nyam ↄŋ Nyam. ⁴Blel Krist anŋ wus af aŋa yɛji, li kʼelm egb waw ɛs, aŋke egb waw ɛsɛl ikŋ anym anŋ eke am kok juma na ɛsɛ elel eke Mois ecʼol a ibrm ab af. ⁵Egb waw ɛsɛl amua am kok juma usu lala ekʼel afr ecʼusu lala tasi a e sɛwl a lele ow ecʼes otarir ab ab eci. Tasi ɛm a, lɛgŋ a eke Mois am ow us gbad ɛm êl a, Nyam dadʼr ninɛ: Lɛ̀r, bʼow kok fɛŋ ɛsɛ sɛwl a eke mi yɛgmʼŋ ɛkn lafɛny af ab af.8.5 Ɔkm Ok 25.40.

⁶Kↄ sica, ɛy ecʼegb waw ɛs ligbɛl Jesu, wɛl abul il juma ekʼagb nↄnↄ akm egb waw ɛsɛl ɛjecʼa ecʼa. Ɛbɛn nɛnyɛmbri nyam, nʼam ism sinm owr nyam ekʼel Nyam eci, ke ↄny any nↄnↄ akm sinm sig a. Ɛtŋ Nyam ɛwar ów amamn nↄnↄ eke li bʼow nʼↄŋ ɛy a, lʼɛw es sinm owr na ɛm.

Sinm owr a akpl akm sinm sig a

⁷Blel krɛkrɛ e sinm a itam ɛm ana, 8.7 Aŋa Sinayi lafɛny af e sinm a e low wɛl am dad. Ɛ̀kn Ɔkm Ok 24.3-8. blel ow ibram Nyam kokm yony ɛm eci usrmʼn usu. ⁸Gbɛkↄ, kin low a eke Nyam am ɛnym in ecʼagŋ a, ow ecʼabr a:

Ɛs Kↄtↄkↄ dad ninɛ:

Sɛgŋ am ow eke mi bʼow mi kok sinm owr

Israɛl ecʼagŋ a lele Juda ecʼagŋ ab ab.

⁹Sinm na kʼow anm ɛsɛ yecʼa eke mi kok ɛl lagŋɛl ab,

lɛgŋ a eke mʼↄny ɛl abu

mʼot mʼok ɛl ↄkm Ejipt a.

Ɛtŋ -lʼɛgŋm -lʼijm nɛny nyam ɛm e sinm a e lís;

ow ↄŋ, ɛm yɛji, mʼigŋ mʼɛlu ɛl es.

¹⁰Gbɛkↄ kin sɛgŋ na ɛm a,

sinm a eke mʼam mʼow mi kok Israɛl ecʼagŋ ab ab a:

Ɛm, Ɛs Kↄtↄkↄ, mi bʼow mʼoc ɛm e sol a

mʼɛlu ɛl e tutr ab ɛm,

mi bʼow mi nↄn sol a ɛl e mɛrm ab ɛm.

Mi bʼow mʼel ɛl e Nyam ɛtŋ -li bʼow -lʼel ɛm ecʼagŋ.

¹¹Ɛtŋ ow kʼow ibram eke ɛgŋ kaka fɛŋ ki yɛgm in ecʼɛb iy oglog lisijim ɛm ecʼany uw e low ij,

aŋke ɛl pupukpaŋ -li bʼow -lʼuwʼm any,

ɛl kpaŋ, igŋ ey toŋ ok ɛgbɛl.

¹²Low nawrɛ, aŋke mi bʼow mʼap ɛl e sikpl a

ɛtŋ mi kʼow mʼↄknm ow e low mru mru mru. 8.12 Jeremi 31.31-34, Sɛptant ɛm ecʼodad eke wɛl oc.

¹³Eke Nyam bi dad sinm owr e low, ke sinm krɛkrɛ a, lisig nʼↄŋ ow el a. Sica ob nyam ekʼel lisig ke am usu a, el ob eke in ecʼirm ibnm.

Wus af aŋa ecʼusu lala a ecʼów ekʼanŋ ɛm

¹Krɛkrɛ eci sinm a ↄny in ecʼów ekʼanŋʼn ɛm Nyam nuŋ igŋ a eci lele Nyam ecʼusu lala eke wɛl kok ab wus af aŋa. ²Ow sosiɛm a, wɛl us gbad ɛm êl nyam eke wɛl bubr oj yony ɛm yogŋ. Krɛkrɛ ecʼusu a wɛl ɛsŋʼn “usu lala”, yogŋ anake kɛniɛ nyam eke ok ál lↄbŋ lele tabl a eke futufutu a eke wɛl bʼap Nyam ab ab anŋ a. ³Sica, gbad yony ɛm a e jam a, el gbad ɛm êl a ecʼogog yony ɛm a. Yogŋ wɛl ɛsŋʼn “usu lala tasi”. ⁴Yogŋ, ogŋ ofŋ usu sika ɛm anŋ; ɛtŋ sinm araka eke sos af a el sika ɛm yɛji anŋ. Sinm araka ab ɛm, sika ɛm kpokpo nyam anŋ eke afr eci futufutu iy gbↄŋ; ɛtŋ Arↄn e kpama a eke gigŋ suw ↄdↄdↄ a yɛji anŋ ɛm. Ɛtŋ ɛmɛny, mebn a eke af yogŋ wɛl nↄn sinm e sodad a yɛji anŋ ɛm. 9.4 afr eci futufutu:ɛ̀kn Ɔkm Ok 16.11-18. Arↄn e kpama a: Awl e lɛl ab ɛm 17.1-11, Arↄn e kpama a gigŋ suw dↄdↄ ɛtŋ ↄsu ey, yɛgm eke Ɛs Kↄtↄkↄ ↄny sos ɛm iŋn Arↄn lele Mois ab eci.⁵Araka a e nuŋ af a, Serubɛnɛl 9.5 Serubɛnɛlel mindey eke ↄny mirer, -li bʼotarir es kukuma ab, -li bʼɛli ↄw ɛtŋ -li bʼɛli ɛgŋ ecʼany, ɛl anake li bʼↄsu sinm araka a. Ɛ̀kn Nuŋ Ɔb 3.24; Ezekiɛl 10.3-7. eke wɛl aku am yɛgm eke Nyam ecʼanygbɛl a anŋ aŋa. Ɛl ecʼↄw a e lↄw a am bubur araka a e nɛny ab es, yogŋ a eke wɛl bʼok sikpl oc ap e mebl ab es a. Gbɛkↄ aŋa si kʼow si dadm obli nyam nyam e lís ecʼodad.

⁶Gbad ɛm êl ab ɛm, nɛnɛ anake wɛl sisigm ów a. Sɛgŋ fɛŋ, egb waw ɛsɛl a bʼok krɛkrɛ ecʼusu a kok ɛl e juma a. ⁷Kↄ egb waw ɛs ligbɛl a sↄny cɛ bʼɛy êl a ecʼogog yony ɛm a, akp nyam cɛ lakpo nimum eci. Yogŋ li bʼoc ndey e mebl ab nʼim li wawr egb nʼↄŋ Nyam in obi in obi e sikpl a eci lele dedeku a nimum ecʼab. ⁸Kin low yecʼeke Abŋ Lala am erur eke ki yɛgm a: eke krɛkrɛ eci gbad ɛm êl na anŋ a, usu lala tasi a ecʼejagb a ki figm. ⁹Ow el low ekʼel yɛfɛnyna ɛm eci. Ɛtŋ kin ow e nyandrɛ a: ɛgŋ ekʼam igŋ Nyam nuŋ ke am ibi mindey apʼr oglog am waw egb ↄŋʼn a, kʼow ↄtum ów amua e kok ɛm ↄnym ɛrm es ɛy Nyam ɛm in ecʼów tutr ɛm toŋ ow ok nuŋ. ¹⁰Ow el sol ekʼel sos megl af eci cɛ ɛsɛ: ob ij, mar lele sos ayal e mij ɛrŋ ɛrŋ eke wɛl bʼok ab ab. Sol amua fɛŋ ↄny any toŋ ow ok lɛgŋ a eke Nyam titŋn ɛl fɛŋ yecʼa eke ↄny any nↄnↄ akm ɛl ab ab a.

Krist ecʼegb waw a

¹¹Gbɛkↄ Krist ow ɛsɛ egb waw ɛs ligbɛl af ↄŋ ɛy ów amamn a eke anŋ a. Lʼɛcr gbad ɛm êl nyam ekʼagb el sↄbↄ akm wus af aŋa ecʼab ɛm. Êl a, el ob eke ow elm agŋ ecʼabu usm, ow e nyandrɛ el; ow elm ɛy e wus na eke wɛl kok a ecʼob. ¹²Krist ɛy usu lala tasi a ekʼel Nyam e saw a, akp nyam coco sɛgŋ fɛŋ eci. Lʼocm sican lele sed gↄŋ gↄŋ ey ab e mebl a li kokrm egb waw, kↄ in obi in obi e mebl a lʼoc li kokr egb waw ɛtŋ li sↄg ɛy sikpl ecʼabu ɛm sɛgŋ fɛŋ eci. ¹³Tasi ɛm a, wɛl bʼoc sican lele sed gↄŋ gↄŋ ey ab e mebl a lele id yↄw eke wɛl ofŋ e milakŋ a, ok agŋ a eke kok sikpl ab af. Ow bʼayal ɛl sos sikpl a e lís, ɛtŋ ow bʼↄŋ ɛl abusu owr eke -li kʼigŋ Nyam nuŋ. ¹⁴Eke na eke wɛl dad a el low nawrɛ, ke Krist eci mebl a, in ↄtu eke kʼↄny mbas nↄnↄ. Tasi ɛm a, Abŋ a ekʼanŋ sɛgŋ fɛŋ a ecʼabusu ɛm, Krist ocr in sosi ap Nyam, ɛsɛ ndey a eke ítam ɛm ke wɛl bʼoc kokr egb waw ab af. Ɛbɛn a, li bʼow lʼayal ɛy e tutr a, eke ów eŋuŋ eke bi nyimn ɛgŋ luw ɛm a ibar a, yecʼɛtŋ ke sʼↄ́tu si kok Nyam ekʼanŋ owr a e low.

Mebl el sinm a e mɛny ɛwr

¹⁵Na sosiɛm anake Krist el ɛgŋ a ekʼanŋ ɛy lele Nyam ab ecʼaraŋn, ke oc sinm owr a ism Nyam ecʼagŋ a. Lʼuw, agŋ ecʼes eb ɛlu sosiɛm, ɛl ecʼów eŋuŋ a eke -li kokr ow a eke -nʼanŋn krɛkrɛ e sinm a ecʼes ɛw ɛm a. Ɛbɛn ke agŋ eke Nyam ɛsŋ a, ↄ́tu ɛŋn ów a eke Nyam ɛwar ɛl ow e low ɛw es ke anŋ sɛgŋ fɛŋ a.

¹⁶Eke batŋ ɛgŋ nyam nↄn aja ij e lɛl ɛw es a, gbuŋ ke wɛl kók lɛl ab ɛm e low a, ow it ke wɛl yɛ́gm eke lɛl nↄn ɛs a uw. ¹⁷Tasi ɛm a, aja ij eci lɛl nɛnɛ eke wɛl bi nↄn ɛw es a, ɛgŋ a eke nↄn a bʼuw gbuŋ ɛtŋ wɛl bi kok ow e low. Sica ekʼɛgŋ a anŋ owr ke kʼuwm a, lɛl a elm low kaka. ¹⁸Ɛbɛn nyam coco, lɛgŋ sig ɛm a eke Nyam am bɛbm Israɛl ecʼagŋ ab ab sinm owi a, 9.18 sinm:Grɛk ɛm a, odad ebl nyam na cɛ wɛl bʼoc dadr aja ij e lɛl a yɛji ecʼodad. wɛl ikŋ anym ibi mindey ɛtŋ wɛl ok ɛl eci mebl ab es. ¹⁹Sica dedeku a nimum ecʼany af, Mois ikŋ anym awl sodad a pupukpaŋ, ɛsɛ elel eke wɛl bʼɛŋn ɛl ol ab ɛm ab af. Ɛtŋ ow e jam a, lʼot sed gↄŋ gↄŋ a lele sican ab ab e mebl a li wuwlm mij ab ɛtŋ lʼoc isↄp ikŋ 9.19 isↄp ikŋ:likŋni eke sos ayal e ses gbɛgbl nↄnↄ ɛm, wɛl bʼoc in e lal a usm mebl ɛm am fufŋ agŋ. Ɛ̀kn Ob Ap 14.4-7. eci lal nyam eke wɛl ucu licɛb suw nɛny af a, ɛtŋ nʼam usm mebl ab ɛm li fufŋ ol e lɛl ab af lele bieku a nimum ab. ²⁰Ɛtŋ li dad ninɛ: Na el sinm eci mebl a eke Nyam am ibrm ↄny eke kʼɛlumn a.9.20 Ɔkm Ok 24.3-8.

²¹Ɛbɛn cɛ Mois oc mebl ufŋ gbad ɛm êl a lele mob mob a fɛŋ eke wɛl bʼot kokr Nyam nuŋ igŋ e low ab ab. ²²Ɛtŋ ɛsɛ elel eke ol dadr ab af, mebl anake bʼayal ob fɛŋ a. Eke wɛl okm mebl es, ɛy e sikpl a ecʼoc ap anm.

Krist uyu afr ɛy sosiɛm

²³Sica eke ow el nɛnɛ wɛl kʼayal mob a eke el ɛl a ekʼanŋ afr a eci any ↄkŋnin, ɛbɛn ke ɛl tasi a ekʼanŋ afr a ibrm segb waw sↄbↄ tasi. ²⁴Tasi ɛm a, Krist ɛym usu lala nyam eke el agŋ ecʼabu ecʼeke us ab ɛm; usu lala a el afr ecʼusu lala tasi a ekʼanŋ a eci any ↄkŋnin cɛ. Kↄ afr nana anake Krist ɛy yogŋ a eke lʼuw es inym ɛy e ŋↄŋn ↄŋ eci Nyam ecʼany af a. 9.24 Bɛ̀bmn Ebre 7.25.²⁵Lakpo fɛŋ, Jwifɛl ecʼegb waw ɛs ligbɛl a bʼɛy usu lala tasi a mebl eke elm in ecʼab ab. Gbɛkↄ Krist, in, lʼuyum afr eke li ki wawr in sosi egb sakp nↄnↄ. ²⁶Blel ow el ɛbɛn ana, blel lʼij luw e gbre sakp nↄnↄ lɛgŋ a ɛtŋ eke wɛl kok wus nimum a. Nawrɛ ɛm a, ca sɛgŋ na ekʼel sɛgŋ es abal el ab ɛm, Nyam ɛluʼl ↄkm akp nyam coco sɛgŋ fɛŋ eci. Ɛtŋ ɛbɛn a, in sosi ecʼegb a eke li wawr ab ɛm, ni ŋuŋn sikpl. ²⁷Ow akpl e kʼuwr any eke Nyam bɛbm ɛgŋ fɛŋ ecʼakp nyam a eke kʼuw a e low ɛw es, ke sica ow e jam a li jɛ́j ow e low lʼok. ²⁸Ɛtŋ ɛbɛn nɛny nyam cɛ, Nyam oc Krist kokr egb waw akp nyam coco, agŋ nↄnↄ gbɛl e sikpl a ecʼoc ap eci. Li bʼow lʼɛlu sos ↄkm sakp yony ɛm eci, ow elm sikpl oc ap ecʼij, kↄ agŋ a ekʼam eku in e mɛny ɛwl ow a e sel ɛŋn ↄŋ eci.

Krist ecʼegb waw a ↄny lɛc akm Mois ecʼol a

¹Mois ecʼol a anŋ ɛsɛ ów amamn a eke bʼow ow a eci es otarir af. Gbɛkↄ ow elm na elm ów tasi a gbɛ. Ow bʼibrm eke lakpo fɛŋ abu kʼanŋ ɛm, wɛl ám kok segb waw nɛnyɛmbri nyam a cɛ. Na sosiɛm anake li kʼↄtum nʼↄↄm agŋ a eke bʼow Nyam saw a e low iym nɛny igŋm nuŋ a. ²Tasi ɛm a, blel segb waw a eke -li kokr a ↄtu ↄny ɛl e sikpl a tɛtŋ es akp nyam a cɛ ana, blel -lʼocrm ɛl sosi sikpl ɛsɛl ɛmɛny -nʼanm segb waw a cɛ e kok ɛm. ³Nawrɛ ɛm a, segb waw amua bʼↄkn lakpo fɛŋ ɛl e sikpl a e low, ⁴aŋke sed a lele sican ab ab eci mebl a kʼↄtum ↄnym sikpl tɛtŋm es.

⁵Ow sosiɛm, wanci ab af eke Krist am ow wus af aŋa a, li dad Nyam ninɛ:

Ŋ ibram segb waw lele sob ap ab

kↄ ŋ kok sos megl nyam ↄŋʼm. 10.5 Bɛ̀bmn Selu 40.7; ŋ kok sos megl nyam ↄŋʼm: ɛgŋ a eke nↄn Ebre e lɛl a, oc Selu e lɛl ɛm ecʼodad na, am bɛbmn Krist ab; aŋa wɛl am iri ɛsɛ: ŋ kok sos megl nyam ↄŋʼm eke mi kʼoc mi wawr egb mʼↄŋʼŋ. Ɛ̀kn akr 9 ɛm a.

⁶Mindey eke wɛl bʼofŋ lele mob ɛjeci fɛŋ

eke wɛl bʼot ow waw egb ↄŋʼŋ sikpl oc ap ecʼa,

ákplmʼŋ sos ɛm.

⁷Ɛtŋ mi dadʼŋ mʼɛsɛ:

Ɛm e Nyam, ɛm obi mʼam ow ŋ ogŋ

mi kok ŋ ecʼerur,

ɛsʼelel eke wɛl nↄn ɛm e lís ɛw es ol e lɛl ab ɛm ab af. 10.7 Selu 40.7-9, Sɛptant ɛm ecʼodad eke wɛl oc.

⁸Krist ikŋ anym dad ninɛ: segb waw, sob ap, mindey eke wɛl bʼofŋ lele sikpl oc ap e segb waw ab a e low in ákplmʼŋ sos ɛm. Ke ol ibrm eke wɛl ki kok segb waw amua fɛŋ cɛ. ⁹Ɛmɛny Krist usr af ninɛ: mʼam ow ɛm obi ŋ ogŋ mi kok ŋ ecʼerur. Odad na am yɛgm eke nʼam ↄny segb waw esig a lʼot es, ke lʼúsr in ecʼa usu. ¹⁰Nawrɛ ɛm a, Jesu Krist kok Nyam ecʼerur; lʼocr in sosi li wawr egb akp nyam coco sɛgŋ fɛŋ eci, ɛtŋ ow ɛm, li yↄyↄg ɛy e sikpl ab es.

¹¹Sica, sɛgŋ fɛŋ egb waw ɛs fɛŋ bʼow Nyam ecʼany af kok juma; ɛtŋ li bi kok segb waw nɛny nyam a cɛ, gbɛkↄ ow el segb waw eke kʼↄtum ↄnym sikpl ocm es. ¹²Krist ecʼa gbɛ ow elm ɛbɛn, egb waw akp nyam a cɛ eke li kok a, el egb waw eke bi tɛtŋ sikpl es sɛgŋ fɛŋ eci. Sica li sig es Nyam e lidr abu af a ¹³ɛtŋ nʼam eku eke Nyam kʼot in ecʼefnu a okʼr es akr ew. ¹⁴Ob ap nyam ɛm cɛ, Krist ↄŋ agŋ a eke wɛl yↄyↄg sikpl es a, iy nɛny igŋ nuŋ sɛgŋ fɛŋ eci. ¹⁵Abŋ Lala yɛji am ɛlu ↄkm yɛgm ɛy dad ɛsɛ:

¹⁶Ɛs Kↄtↄkↄ dad ninɛ:

Kin sinm a eke mi bʼow mi kok ɛl ab sɛgŋ amua e jam a:

Mi bʼow mʼoc ɛm e sol a mʼɛlu ɛl ɛrm ɛm,

ɛtŋ mi bʼow mi nↄn ɛl e sow tutr ab ɛm.

¹⁷Ɛmɛny lʼigŋ af ninɛ:

Mi kʼow mʼↄknm ɛl ecʼów ↄbr ↄbr a lel ɛl e sikpl ab ab e low ij. 10.17 Jeremi 31.33-34.

¹⁸Sica eke wɛl oc sikpl ap a, ow ibram eke wɛl kʼim kok ow ecʼoc ap ecʼegb waw ij.

Si títmn Nyam ke si kí lɛrm jam ij

¹⁹Agŋ lisijimɛl, Jesu e mebl a eke ok es ɛy ecʼa usur ɛy ɛrm eke si kʼↄwl abu sʼim sʼok Nyam ecʼusu lala tasi a. ²⁰Ɛɛ, li kikn in e sos megl ab es, yecʼɛtŋ ke li fíg ɛy ebr owr ekʼel sel ɛŋn ecʼebr a. Ɛtŋ low na eke li kok a, otarir es ɛsʼelel eke lɛgŋ sig ɛm, Nyamel ab ɛm e gbad a ekʼam ɛdŋn agŋ eke kʼim Nyam ecʼany af a, agbr ɛm oc es ab af. ²¹Ɛy, sʼↄny egb waw ɛs ligbɛl nyam ekʼanŋ Nyam ecʼagŋ a e nuŋ af. ²²Sica wɛl yↄyↄg ɛy ecʼɛrm ab ɛm ecʼów fɛŋ eke kʼok ɛy ów af ab es, ɛtŋ wɛl ok ɛy e sos megl a mij, mij lala tasi ɛm. Ow sosiɛm, si títmn Nyam ɛrm ekʼij nɛny nyam ke inym es kikri ɛy ecʼↄmn ab ɛm. ²³Sʼúcur ɛy e low ↄmn a eke sʼɛgŋ ow e low sʼeb a sʼↄnyn es kikri, aŋke Nyam ɛwar ɛy ów ɛw es ɛtŋ sʼuw any eke lʼel cɛcɛ. ²⁴Sʼɛ́warir nyamn af, yecʼɛtŋ ke ow átr ɛy sos es sʼↄ́ny erur tasi ke si kók ów amamn. ²⁵Si kʼígŋn ɛy e luku a eke si bʼas usu nyam a si kʼɛlul es, ɛsɛ elel eke ow ɛcm agŋ bɛb ab am kok ab af. Ow tasi eke si ki kok a el, ke sʼátarir sos es ɛy ↄfr, eke Ɛs Kↄtↄkↄ eci lɛgŋ a ow titm a sosiɛm.

²⁶Sica eke sʼuw low nawrɛ any a, eke abu anŋ ɛy ɛm sʼam ɛkn piↄ si kok sikpl, ke egb waw ɛjeci kaka anm eke bʼow ↄny ɛy e sikpl a oc es ij. ²⁷Low cɛ eke si ki kok a el, ke erŋn ab sʼanŋ sʼam eku eke Nyam e jɛj ok a kʼow lele al gbɛl a eke bʼow ŋuŋn Nyam ecʼany ↄbr ɛsɛl ab ab. ²⁸Ɔ̀kan eke lɛgŋ sig ɛm a, ɛgŋ kaka fɛŋ eke ɛluam Mois ecʼol a batŋ agŋ yony oglog nyahan ij daŋku dad eke nawrɛ ɛgŋ a in ɛluam ol a, wɛl ócm apmʼn, eke wɛl bʼibiʼr. 10.28 Ol Ɔkn 19.15.²⁹Sica ɛgŋ yecʼeke bʼow yayr Nyam ecʼIy a, kↄ li kʼow nʼɛŋnm low agbm akm na ee? Tasi ɛm a, ɛgŋ na ɛluam mebl a eke wɛl oc kokr sinm a eke yↄyↄg in e sikpl ab es a. Ɛtŋ li wɛwr Abŋ Lala a eke bʼↄŋ ɛy sʼuw Nyam ecʼɛrm mamn ab any a. ³⁰Ɛɛ, sʼuw ɛgŋ a eke dad ninɛ: Ɛm, mi bʼusr ɛgŋ usu mi kok low ŋuŋ eke wɛl kokʼr a, ɛtŋ mi bʼow mʼↄŋ ɛgŋ ɛgŋ ecʼekʼit eke kʼɛbm a! Li dad yɛjʼeke: Ɛs Kↄtↄkↄ bʼow jɛj in ecʼagŋ a e low ok.10.30 Ol Ɔkn 32.35-36.³¹Odad na am yɛgm ɛgŋ a eke bi yayr Nyam ekʼanŋ owr a, e gbre ligbɛl eke bʼow ɛŋn a.

³²Sica ↄkan yecʼa ekʼɛy lɛgŋ sig ɛm a eke ɛŋan Nyam ecʼusuayl a. Kpɛkŋ cɛ ↄbar gbre ijr nↄnↄ ɛtŋ inymn es kikri ↄmn ɛm itarir lɛc ɛm. ³³Sakp oglog, wɛl ↄny ow ↄny agŋ ecʼany af wɛwr ↄny, kokr ↄny akpoto. Sakp bɛb ecʼa, ɛgŋn ebr anŋn agŋ eke wɛl am ijr gbre akpasu na a jam. ³⁴Tasi ɛm a, ijr gbre agŋ a ekʼanŋ sobel ɛm ab ab. Ɛgŋn ebr sos ɛm iŋn ɛm eke wɛl ki dↄgr ↄny ecʼob ekʼↄnyn a eb ↄny abu ɛm, aŋke ↄny uwr any eke ↄnyn ob ↄny ligbɛl ekʼanŋ sɛgŋ fɛŋ. ³⁵Ow sosiɛm a, àtar sos es! Ɔmn ɛm, bʼow ɛŋan ob ap ligbɛl. ³⁶Ow am ibrm eke kʼↄnyn ɛrm susu yecʼɛtŋ ke ↄ́tur kokr yecʼa eke Nyam am erur a, ke ɛ́ŋan yecʼa eke lʼɛwar lʼɛw es a. ³⁷Tasi ɛm a, Nyam Lɛl dad ninɛ:

ɛmɛny ow anŋ lɛgŋ tɛl, lɛgŋ tɛɛli cɛ,

ɛtŋ Ɛgŋ a eke kʼow a, bʼow ow;

li kʼow nʼinŋnm ów ij.

³⁸Nyam dad ninɛ:

Ɛgŋ yecʼekʼel nyim nyim ɛm ecʼany af a bʼow anŋ owr in ecʼↄmn a eke lʼoc lʼɛluʼm ɛm a sosiɛm.

Gbɛkↄ eke li bʼɛwl mɛny li lɛr jam,

mi kʼow mʼocm ɛm ecʼɛrm a mʼɛwmʼn af ij.10.37-38 Abakuk 2.3-4, Sɛptant ɛm ecʼodad eke wɛl oc.

³⁹Ɛy ecʼa gbɛ, sʼanm agŋ a eke bʼɛwl mɛny lɛr jam ke bʼirm ab ɛm. Njaŋ, ɛy obi sʼoc ɛy ecʼↄmn a sʼɛlu Krist ɛm yecʼɛtŋ ke li sↄ́g ɛy.

Sinm sig ab ɛm ecʼagŋ a ecʼↄmn a

¹Ɔmn el elel nyam eke wɛl bʼuw any tasi eke low a eke wɛl am ↄmn a, wɛl bʼow ɛŋn; elel nyam eke wɛl bʼɛkn ów tasi eke wɛl ɛ́knm a. ²Eke Nyam aw lɛgŋ sig ɛm ecʼagŋ a, ke ɛl ecʼↄmn a eke -nʼↄnyn a sosiɛm cɛ eci.

³Ɔmn ɛm, si bʼuw any eke odad ebl ɛm Nyam kok wus. Ɛtŋ ɛbɛn a, mob a eke wɛl bʼɛkn a el mob eke wɛl ot mob a eke wɛl ɛ́knm a kokr.

⁴Ɔmn ɛm, Abɛl kok egb waw ekʼakpl akm lisijim Kayɛn ecʼa, ↄŋ Nyam. Ow ↄŋ Nyam ocʼr ɛgŋ nyim nyim in ecʼↄmn a sosiɛm, aŋke ow ɛgŋ in ecʼegb waw a eb. Ɛtŋ ↄmn a sosiɛm cɛ anake eke Abɛl uw a yɛji, in e low anŋ cɛ a. 11.4 Ɛ̀kn Nuŋ Ɔb 4.3-10.

⁵Ɔmn ɛm, Enↄk uwm agŋ e luw ɛtŋ ŋgboŋ wus af aŋa im afr. Ɛgŋ kaka ↄtum ɛknmʼn, aŋke Nyam oc ɛwʼr in e saw a. Nyam Lɛl dad eke gbuŋ ke Enↄk in ím afr a, Nyam in íkŋ anym in oc ow ɛgŋ mamn.11.5 Ɛ̀kn Nuŋ Ɔb 5.18-24. Akr 24 a, el Sɛptant ɛm ecʼodad eke wɛl oc.⁶Tasi ɛm a, ɛgŋ kaka kʼↄtum elm ɛgŋ mamn Nyam ecʼany af eke nʼↄnym ↄmn. Ɛgŋ eke bi titm Nyam a, it eke kʼub nawrɛ eke Nyam anŋ ɛtŋ agŋ eke bʼↄlʼl es a, li bʼap wɛl ob.

⁷Ɔmn ɛm, Noe ɛgŋ ów a eke wɛl ɛ́knm ke Nyam ikŋ anym dadʼr ow e low a eb. Ɛtŋ li kok mijɛtŋ ligbɛl in ecʼagŋ a ecʼes eb ɛlu eci. Ɛbɛn a eke li kok a, ow yɛgm elel eke wus nimum ecʼagŋ a akplm, ɛtŋ in ecʼↄmn a sosiɛm, Nyam ocʼr ɛsɛ ɛgŋ nyim nyim af.

⁸Ɔmn ɛm, Abraham ɛlum Nyam ecʼɛsŋ a eke ɛsŋʼn a. Ɛtŋ nʼim usu nyam eke ow kʼↄŋʼn, él in ecʼa; lʼigb nʼaam eke lʼuwm yogŋ a eke nʼaam ab any. ⁹Ɔmn ɛm, nʼim lʼir wus a eke Nyam ɛwar ir ow e low ɛw es ab af, ɛsɛ utu ɛgŋ af. Lʼir ndey lɛl ɛm mel ɛm, ɛsɛ elel eke Isak lele Jakↄb ab eke ɛl yɛji, Nyam ɛwar low nyam a cɛ ɛw es a ir ab af. ¹⁰Abraham am eku ɛb a ekʼin eci misigrer a inym es kikri a. Ɛb a, Nyam in obi bɛbm in e low ɛtŋ usʼr.

¹¹Ɔmn ɛm, Sara ekʼel itr yↄw ke in ecʼakpo a im anym nↄnↄ a yɛji, ↄtu ew iy, aŋke lʼucu low nyam gbɛ nʼↄny es tasi: Nyam e nɛny e bʼij a, li bi kok ow e low. ¹²Abraham el ɛgŋ nyam eke usu toŋ luw ab yɛji ibnm. Gbɛkↄ ↄmn sosiɛm ɛgŋ nyam na ɛm, alaw nↄnↄ ↄtu ok ↄkm. Ɛtŋ in ecʼalaw a ɛny ɛsɛ mílɛ́l ekʼanŋ afr ab af, oglog ɛsɛ okij any e mirici ab af, toŋ wɛl kʼↄtum awlm ɛl.

¹³Agŋ amua fɛŋ ↄny ↄmn Nyam ɛm toŋ uw. -Lʼↄtum -nʼɛŋnm ów a eke Nyam ɛwar ɛl ow e low ɛw es a, gbɛkↄ -lʼɛkn wɛl akpoj ɛm toŋ ow iŋn ɛl sos ɛm eke -lʼɛkan wɛl a. Ɛtŋ -lʼɛgŋ -lʼeb tasi eke -lʼel etu agŋ, usu im ɛsɛl wus af aŋa. 11.13 Ɛ̀kn Nuŋ Ɔb 23.4.¹⁴Low ɛgŋ eb na ɛm, -nʼam yɛgm kpata eke -nʼam ↄl ɛb ir usu tasi ab es. ¹⁵-Li tutrm ɛl ecʼɛb a eke -lʼigŋn -lʼɛlul es a e low. Blel -li tutar ow e low ana, ke -lʼↄtu eke -li kʼɛwl mɛny nʼim ɛm. ¹⁶Nawrɛ ɛm a, usu sↄbↄ tasi a -nʼam ↄl es, afr ecʼusu a ekʼanŋ a. Na sosiɛm, Nyam ɛ́s ↄnym eke wɛl kʼɛsŋʼn ɛl e Nyam. Tasi ɛm a, li kok ɛb nyam lʼɛw wɛl es.

^17-18Ɔmn ɛm, Abraham oc Isak eke ki kokr egb waw ↄŋ Nyam, lɛgŋ a eke Nyam erur eke kʼɛkn in ecʼↄmn a. Ow ikŋ anym dadʼr ninɛ: Isak ɛm anake bʼow ɛŋn alaw eke bʼow ɛlu ŋ e nin a ↄkm a.11.18 Nuŋ Ɔb 21.12; Nuŋ Ɔb 22.1-14. Ɛtŋ eke Nyam ɛwar ir low na ɛw es a yɛji, Abraham ɛgŋ eb eke kʼoc in ecʼiy ekpↄbi a kokr egb waw ↄŋ Nyam. ¹⁹Tasi ɛm a, li tutr lʼuw any eke Nyam ↄny abusu eke kʼigbm ɛgŋ luw ɛm; na sosiɛm, Nyam ↄwr jim ↄŋʼn, ɛtŋ ow anŋ ɛsɛ luw ɛm cɛ owʼn igb af.

²⁰Ɔmn ɛm, Isak ɛdŋ Jakↄb lele Esayu ab ↄwrↄ, ów eke anŋ anym bʼow ow a eci.

²¹Ɔmn ɛm, Jakↄb in e luw e wanci af, ɛdŋ Josɛf ecʼey yony a ↄwrↄ. Ɛtŋ lʼucu in e kpama a nʼↄny es, lʼok ↄwrↄkp wus lʼigŋ Nyam nuŋ.

²²Ɔmn ɛm, Josɛf in e sel ecʼuwr ɛm, ɛwar eke Israɛl ecʼey bʼow ok ↄkm Ejipt, ɛtŋ li dad wɛl low yecʼeke wɛl ki kok in eci ew ab ab a.

²³Ɔmn ɛm, Mois ɛs lele lis ab, oc ɛl ecʼiy a eke -lʼewr ke akpl nↄnↄ a, lↄl es toŋ ow ij awl nyahan. Erŋn ↄnym ɛl eke -li kʼↄb ɛb ebu ecʼol a ekʼɛw ab es.

²⁴Sica eke Mois agb a, ↄmn ɛm anake lʼerurm eke wɛl kʼocʼr ɛsɛ Faraↄn jↄw ecʼiy af a. ²⁵Lʼↄtu cɛ eke li kʼij sikpl e sos ɛm iŋn ecʼɛb a sɛgŋ bɛb, kↄ lʼɛgŋ lʼeb eke li kʼij gbre Nyam ecʼagŋ ab ab. ²⁶Mois uw any eke Ejipt ecʼob ↄny a agb nↄnↄ. Gbɛkↄ, ɛ́gŋ eb wɛl ifnʼŋ ɛsɛ elel eke wɛl bʼow ifn Mesi ab af a, el low eke agb nↄnↄ ligbɛl akm Ejipt ecʼob ↄny a. Tasi ɛm a, lɛgŋ anym ɛm eci ob ap tasi a eke li kʼɛŋn a, nʼam lɛr.

²⁷Ɔmn ɛm, Mois ŋgboŋ Ejipt ɛb ɛm, ɛtŋ lʼurum Ejipt ecʼɛb ebu a ecʼɛrm bebl a. Nʼinym es kikri ɛsɛ ɛgŋ ekʼam ɛkn Nyam a eke wɛl ɛ́knm ab af. ²⁸In ecʼↄmn ab ɛm, nʼↄŋ wɛl kok Pak ecʼes gbɛgbl a, ɛtŋ nʼↄŋ wɛl ibi mɛcɛb eb ow eci mebl a udu masany. Ow ↄŋ ɛtŋ afr ɛrm ɛs a ekʼow eke kʼibi agŋ a, itŋnm Israɛl eyŋ ecʼey egŋ krɛkrɛ a abu. 11.28 Ɔkm Ok 12.12-13.²⁹Ɔmn ɛm, Israɛl eyŋ ubr okij ebl a ɛsɛ wus wɛwɛ cɛ owʼn el af. Ɛtŋ eke Ejipt eyŋ a wewrm ɛl ów eke ɛl yɛji kʼubr a, mij a ɛman ɛl.

³⁰Ɔmn ab ɛm cɛ, eke -lʼiwar Jeriko ɛb a -lʼɛlulil ɛm sakp lↄbŋ a, ɛb a e mebn ɛm lakp a ɛr ok. ³¹Ɔmn ɛm, Rahab egŋ ot yↄw a uwm Nyam ecʼefnu ab ab, aŋke lʼeb agŋ a eke wɛl ɛrm im es lↄl ɛm eke kʼuw ɛb ab any a. 11.31 Ɛ̀kn Joswe 6.12-21.

³²Ɛmɛny bla lowi mʼↄtu eke mi ki dad ee? Abusu kʼow ɛrum im es eke mi kʼawl kpɛ kpɛ kpɛ Jedeↄn, Barak, Samsↄn, Jɛfite, David, Samiɛl lele kokoba ↄb ɛsɛl ab ab ecʼɛgŋni nyam nyam ecʼa. ³³Agŋ amua ↄny ↄmn Nyam ɛm ɛtŋ ow ɛm, nↄnↄ ogŋ ar eb sɛb anŋ ɛl ecʼes ɛw ɛm. Bɛb kok yecʼeke el nyim nyim a ɛtŋ -nʼɛŋn yecʼa eke Nyam ɛwar ɛl ɛw es a, -li bʼabl sikukuma nɛny es. ³⁴-Li rirmn sal gbagba es, ɛtŋ lab ler ɛm ↄtum ibim ɛl. -Lʼok ↄl kↄ -nʼɛŋn lɛc. Ar ogŋ e lɛgŋ ɛm a, -lʼɛlu ɛl e gbawru ij a ↄkm, -lʼitr áru ɛjecʼa imn jam eci. ³⁵Ɔyↄw ↄny ↄmn Nyam ɛm. Ow ↄŋ -nʼɛŋn ɛl ecʼagŋ a ekʼuw a, aŋke agŋ amua igb luw ɛm.

Wɛl ↄnyn agŋ ɛjeci bɛb milↄlu ɛl ecʼↄmn a sosiɛm kↄ -lʼɛgŋm eke wɛl kʼɛlu ɛl es. Tasi ɛm a, -lʼerur eke -li kʼuw, ke -nʼanŋ luw ab ɛm, -lʼigb -lʼɛy sel ɛŋn tasi ab ɛm. ³⁶Agŋ likpr ɛgŋ wɛwr lele ŋgbre ɛm ecʼↄr a eb. Wɛl awŋ bɛb ŋgbraka ɛm ɛtŋ wɛl ↄny ok ɛl sobel ɛm. ³⁷Bɛb ecʼa, wɛl ibi ɛl mebn ɛm, oglog wɛl ubr ɛl ɛm ekpr yony suku ɛm, oglog wɛl ibi ɛl lab ler ɛm. Bɛb bʼanŋ aŋa ewl im ok yogŋ a, sus mob eke wɛl gigŋ mɛcɛb lɛl ɛm oglog sican lɛl ɛm, -nʼↄnym ob kaka; wɛl ijr ɛl gbre nↄnↄ ɛtŋ wɛl kok ɛl ów eŋuŋ nↄnↄ. ³⁸Wus ecʼagŋ akplm eke agŋ kpasu na kʼir ɛl ɛm. -Li bʼanŋ aŋa -lʼewl -nʼim -lʼok yogŋ a, loj ɛm, mafɛny ɛm, mób lokm lele wus ↄmu ɛm ab.

³⁹Agŋ amua fɛŋ ↄny ↄmn Nyam ɛm; ow sosiɛm anake ow ij ɛl e nuŋ af e daŋku nimamn a. Gbɛkↄ, low a eke ow ɛwar ɛl ow e low ɛw es a -nʼɛŋnm, ⁴⁰aŋke ow bɛbm low sↄbↄ mamn nyam eke agb nↄnↄ ɛy fɛŋ ecʼa ɛw es. Ɛtŋ ow erurm eke -li kʼim toŋ -lʼok ɛl ecʼↄmn a e nuŋ eke si kʼanm ɛm.

Sos kʼↄ́w ↄny es gbre ij owi fɛŋ ɛm

¹Agŋ amua na fɛŋ eke mʼam dad ɛl e low a am ɛlu ɛl ecʼↄmn e daŋku ij ↄkm yɛgm ɛy. Ow anŋ ɛsɛ dedeku ligbɛl nyam eke ow iwr ɛlul ɛy ɛm cɛ af. Ow sosiɛm a, ɛy yɛji sʼígŋ low fɛŋ eke am ɛdŋn ɛy eci anym imn a sʼɛlu es, sʼígŋ sikpl a eke wiwrm ɛy ab a sʼↄwl. Sʼúrur es ɛrm susu ɛm es uru a ekʼanŋ ɛy anym a. ²Sɛgŋ fɛŋ si lɛ́ɛr Jesu. In anake li bʼↄŋ ɛgŋ ↄny ↄmn a, ɛtŋ li bʼↄŋ ↄmn a iy nɛny igŋ nuŋ. Lʼɛgŋ olikŋ af e luw a lʼeb lʼuw ɛtŋ li lɛrm ɛ́s a ekʼanŋ luw nɛnɛ ɛm a, aŋke nʼam lɛr sos ɛm iŋn a eke wɛl bɛbm ɛwʼr es a; ɛtŋ sica li sig es Nyam e lidr abu af yogŋ.

³Ɛɛ, tùtar Jesu ecʼelel a eke ɛgŋ sikpl ɛsɛl e sifn a ekʼↄny in e lís a e low eb a. Ow bʼow ↄŋ abŋ ɛm a sos kʼow ↄwm ↄny es ɛtŋ sos kʼow aam ↄny. ⁴Tasi ɛm a, ↄny lele sikpl ab eci itarir ab ɛm, kʼiimn toŋ kʼokmn luw ɛm! ⁵Kↄ ów ↄm e sodad a eke Nyam dad ↄny ɛsɛ in ecʼey af a, es jijal ee? Kin odad a:

Ɛm Jim, eke Ɛs Kↄtↄkↄ bʼɛnymʼŋ abr,

kʼòc ow e low a kʼɛ̀w ow ↄnyn!

Sos kʼↄ́wʼŋ es eke li bʼɛnymʼŋ abr!

⁶Tasi ɛm a, Ɛs Kↄtↄkↄ, ɛgŋ eke li bʼerur a li bʼɛnym abr,

ɛtŋ li bʼɛnym agŋ a fɛŋ eke li bʼoc ɛsɛ in ecʼey af a abr. 12.6 Nyandrɛ 3.11-12, Sɛptant ɛm ecʼodad eke wɛl oc.

⁷Eke am ijr gbre, ke ↄny e low yɛgm eci, aŋke Nyam bʼot ↄny ɛsɛ in ecʼey af. Bogŋ ecʼiy anake ɛs ɛ́nyam abr ab ee? ⁸Eke Nyam ɛ́nyam ↄny abr ɛsɛ in ecʼey a pupukpaŋ af, ke ow anŋ ɛsɛ owʼn elm ↄny Ɛs ɛtŋ ↄny elmn ow ecʼey lokm af. ⁹Wus af aŋa sʼↄny ɛy ɛsɛl, -li bʼɛnym ɛy abr ɛtŋ ɛbɛn yɛji si bʼɛlum ɛl. Sica ayaf si kʼↄtum sʼɛluam Nyam ɛy Ɛs ekʼanŋ afr a nana, 12.9 ɛy Ɛs ekʼanŋ afr:Grɛk ɛm ecʼelel eke wɛl bʼiri a el: abŋ eci ɛl ɛs. bake sʼↄ́tu sʼɛŋn sel ee? ¹⁰Nawrɛ, ɛy ɛsɛl a eci abr ɛnym a el sɛgŋ tɛl eci ɛl ecʼelel eke -li bʼɛkan ów ab ɛm. Kↄ Nyam ecʼa, ɛy e low nimamn eci li bʼɛnym ɛy abr, nʼↄ́ŋ ɛy sʼel lala sʼanŋ ɛsɛ in af. ¹¹Eke wɛl bʼↄb nuŋ am ɛnym ɛy abr a, ow íŋnm ɛy sos ɛm, sos nana ow bʼↄwr ɛy es. Gbɛkↄ ow bʼim lɛgŋ anym ɛm a, agŋ a eke wɛl ɛnym abr ɛbɛn a, bʼanŋ ɛrm es ɛy ɛm ɛtŋ bʼir ɛb nyim nyim.

¹²Ow sosiɛm a, sabu kʼám ↄny, ɛtŋ ↄny ecʼakr a yɛji kʼúfŋ ↄny; kↄ àtar sos es nana, ke íman anym eci cɛ. ¹³Ɛtŋ ɛmɛny, kòkr ejagb a eke bʼow ebar a inym nyim nyim, yecʼɛtŋ ke lakr ↄbr fɛŋ kʼúŋm, kↄ ke nana lʼɛ́wl nʼinym.

Èel cɛcɛ

¹⁴Ɔ̀ↄl agŋ fɛŋ ab ecʼɛrm es ɛy ɛm ecʼɛb ir es, ke íir ɛb nyim nyim eke bʼakpl Nyam sos ɛm. Ɛgŋ fɛŋ eke kʼow kokm ɛbɛn a kʼow ɛknm Ɛs Kↄtↄkↄ. ¹⁵Ɛ̀wr ɛrm ke ɛgŋ kaka kʼígŋm bibm eke Nyam bʼↄŋʼn a. Ɔny ɛm a, ɛgŋ kaka kʼɛ́w low es lokm kʼɛli ɛsɛ likŋ lolo af ki ŋuŋn agŋ nↄnↄ in e lol ab ab. ¹⁶Ke ɛbirir marɛm marɛm owi kʼánm ↄny ecʼaraŋn! Kʼìfan Nyam ecʼów a ɛsɛ elel eke Esayu kok ab af. In eke ob ij lↄfu nyam sosiɛm, lʼↄl in e sigbɛl a lʼij a! 12.16 Nuŋ Ɔb 25.29-34.¹⁷Ɔ̀kan eke ow bʼibn a, lʼerur eke li kʼɛŋn ɛs ecʼↄwrↄ a, kↄ ow itr ↄwlʼl. Li kok sↄrŋ, lʼikŋ ↄŋn eke ɛs kʼitŋn ɛbr, kↄ lʼↄtum nʼↄↄm ow ow itŋnm ɛbr.

¹⁸Ɔny, lɛgŋ na ɛm a, owr titmn Nyam, gbɛkↄ ow anm ɛsɛ ↄny lagŋɛl e low any af a eke ɛkn lɛgŋ sig ɛm ab af. Eke -li titmn Sinayi lafɛny a, yogŋ -lʼɛkn al ligbɛl a, ncebn ibr a, nyamgbrany a, ¹⁹-lʼiri krↄkr nyam ikŋ ɛtŋ lebl nyam yɛji ikŋ. Eke Israɛl eyŋ iri lebl na a, -ni ŋↄŋn Nyam eke ow kí dadm ɛl odad ow obi ij. ²⁰Nawrɛ, Nyam ɛdŋn eke wɛl kʼítŋnm lafɛny a abu,

ɛtŋ eke ɛgŋ nyam itŋn abu a, ke wɛl ↄ́rʼr mebn ɛm ibiʼr,

eke ow el ndey kprↄↄ itŋn abu yɛji, wɛl kókʼr low nyam coco a.

²¹Low a ↄny erŋn toŋ Mois in obi yɛji dad ninɛ: «erŋn ↄnyʼm toŋ sos am ufŋʼm.»12.20-21 Ɔkm Ok 19.12-13; Ol Ɔkn 9.19.

²²Gbɛkↄ ↄny ecʼa ow elm ɛbɛn, ↄny imn titmn Siↄn e lafɛny a, 12.22 Siↄn:Jerusalɛm e nin ɛjeci nyam ana. Nyam ekʼanŋ owr ecʼɛb a, Jerusalɛm a ekʼel afr eci ke yogŋ afr ɛrm ɛsɛl bubutɛ aam kok es gbɛgbl a. ²³Ɔny, imn titmn Nyam ecʼey krɛkrɛ a eke as luku, 12.23 Ɔkm Ok 4.22 ɛm a, yogŋ ey krɛkrɛ a el Israɛl nimum a. Gbɛkↄ aŋa Ebre e lɛl na ɛm, ow el Krist eci jam us ɛsɛl a fɛŋ, egŋ lele ↄyↄw ab eke ir ɛb Nyam ab a. ke el agŋ a eke wɛl nↄn ɛl ecʼen afr a. Owr Nyam eke bi jɛj wus nimum e low ok a ecʼany af. Imn titmn agŋ nyim nyim a ekʼiy nɛny igŋ nuŋ a. ²⁴Ɔny, imn titmn Jesu eke ok in e mebl ab es ɛy e sayl ecʼa. Nyam ɛcr in ɛm ↄŋ ɛy sinm owr nyam, ɛtŋ Jesu e mebl a ↄny mbas nↄnↄ akm Abɛl ecʼa. 12.24 Abɛl:el Adam lel Ɛv ab ecʼiy. Lisijim likpekp Kayɛn ibiʼr. Nuŋ Ɔb 4.8.

²⁵Sica ɛ̀wr ɛrm, ke írir Nyam eke am dad odad a e low! Eke wus af aŋa Mois ɛwar Israɛl eyŋ, ke -lʼɛgŋm -lʼirim a, -nʼɛŋn ow e gbre ekʼanŋ ɛm a. Ɛy ecʼa, afr ɛtŋ Nyam anŋ am dad ɛy odad. Eke sʼam dad sʼɛsɛ ɛy e low anm ɛm, sʼúw any tasi eke li bʼow li kok ɛy ow e low! ²⁶Lɛgŋ sig ɛm a, Nyam e lebl a ↄŋ wus ufŋ. Yɛfɛnyna ɛm ecʼa, kin yecʼeke nʼam dad lʼɛw es eke li bʼow li kok: Ɛmɛny lɛgŋ ɛjeci, mi bʼow mʼↄŋ wus ufŋ, ɛtŋ ow kʼow elm wus cɛ, kↄ afr yɛji.12.26 Aje 2.6, Sɛptant ɛm ecʼodad eke wɛl oc.²⁷Odad na eke el: ɛmɛny lɛgŋ ɛjecʼa, kin ow e nyandrɛ: mob a eke wɛl kok ke ↄtu eke kʼuŋ a, bʼow irm. Ɛtŋ ow bʼow ↄŋ ɛl a cɛ eke kʼↄtum uŋm a abusu anŋ sɛgŋ fɛŋ.

²⁸Sica ɛy, sʼam ɛŋn gbreŋgbi usu a eke kʼↄtum ufŋm a. Ow sosiɛm sʼↄ́ŋ Nyam bia, ke si kók in owi sɛwl a eke li bʼerur ab ɛm, es is ɛm lele ɛlum ɛm ab. ²⁹Tasi ɛm a, ɛy e Nyam a el al eke bi ŋuŋn ob. 12.29 Ɛ̀kn Ol Ɔkn 4.24.

Elel eke ɛgŋ e low kʼakpal Nyam sos ɛm; es abal el ɛm ecʼów ↄm

¹Sica ow akpl eke abu kʼanŋ ↄny ɛm ám eruririr ɛsɛ Krist ɛm ecʼagŋ lisijimɛl af. ²Kʼìjal etu eb e low es, aŋke agŋ bɛb eb etu toŋ batŋ eb afr ɛrm ɛsɛl any uwm ɛm. ³Ɔ̀kan ↄny lisijimɛl ekʼanŋ sobel ɛm a e low, 13.3 ↄny lisijimɛl ekʼanŋ sobel ɛm:ɛ̀kn Ebre 10.32-34. ɛsɛ sobel ɛm cɛ ↄny yɛji ↄny anŋn wɛl ab af. Ɔ̀kan ɛl a eke wɛl am ↄnyn milↄlu a e low, ɛsɛ ↄny cɛ anake wɛʼn am ↄnyn ↄny milↄlu ab af.

⁴Ke agŋ a fɛŋ ↄ́ny mɛbi ecʼɛlum. Ke igŋ lel yↄw ab ecʼes ɛru usu a nfaci ij owi kʼɛ́ym. 13.4 Grɛk ɛm a odad a el: ke igŋ lel yↄw ab ecʼob ɛrur ob ab af sikpl owi kʼánm. Nyam bʼow jɛj agŋ a eke bʼɛbirir marɛm marɛm a lele agŋ a eke ɛbirir ke bʼij nfaci ab ab e low ok.

⁵Kʼòcr os owi kʼucur any, sos ɛm iŋn ↄny yecʼa cɛ ekʼↄnyn a eci. Tasi ɛm a, Nyam in obi li dad ninɛ:

Mi kʼow mi walm mʼɛlumʼŋ es lɛgŋ kaka,

mi kʼow mʼigŋm mʼɛlumʼŋ es lɛgŋ kaka. 13.5 Ol Ɔkn 31.6,8; Joswe 1.5.

⁶Ow ↄŋ sʼↄtu eke si ki dad ↄmn ɛm tasi sʼɛsɛ:

Ɛs Kↄtↄkↄ el ɛm ecʼabu ɛlum ɛs,

mi kʼúrum erŋn kaka,

ɛgŋ kaka kʼↄtum kokm im low ŋuŋ. 13.6 Selu 118.6, Sɛptant ɛm ecʼodad eke wɛl oc.

⁷Ɔ̀kan ↄny ecʼanym ɛm ecʼidr ɛsɛl a eke ↄb ↄny Nyam ecʼodad a e kokoba a. Ɛ̀kan elel a eke -lʼiir ɛb toŋ ke -lʼuwr a, ke ébr ɛl ecʼↄmn a e lakr a. ⁸Ow akpl e kʼuwr any eke Jesu Krist ítŋnm: lɛgŋ ekʼɛc ab ɛm, yɛfɛnyna lele sɛgŋ fɛŋ ab, in ecʼelel a cɛ li bʼanŋ.

⁹Ki yɛ̀br low yɛgm mramra kʼirmn ↄny. Sol ekʼel ob ij ecʼa éelm agŋ a eke bʼɛlum a low lɛgŋ kaka. Eke ow el bibm e si bʼɛŋn Nyam ɛm a bʼↄŋ ɛy sʼij lɛc, ke yecʼanake akpl a.

¹⁰Ɛy, sʼↄny egb waw usu, 13.10 Aŋa, afr ecʼegb waw usu lala tasi a e low, yogŋ a eke Krist ɛy a; ɛ̀kn Ebre 9.11-14; 23-26; 10.19-21. ɛtŋ egb waw ɛsɛl a ↄ́nym abusu eke kʼij ob eke bʼanŋ egb waw usu yogŋ ow a. Tasi ɛm a, ɛl, Nyamel gbɛl ab ɛm -li bi kok juma. ¹¹Yogŋ, Jwifɛl ecʼegb waw ɛs ligbɛl a bʼoc mindey a e mebl a im ɛy usu lala tasi a sikpl es ↄny oc eci, ɛtŋ wɛl bʼot mindey a ok ↄkm im gbeŋ ofŋ. 13.11 Bɛ̀bmn Ob Ap 16.27; Awl 19.3.¹²Na sosiɛm anake Jesu yɛji uwm Jerusalɛm, 13.12 Jan 19.17-20. ke nʼim lʼuw ɛb a e saw a, yecʼɛtŋ ke in e mebl ab ɛm, li yↄ́yↄg agŋ e sikpl ab es a. ¹³Ow sosiɛm a, sʼókr ↄkm sʼimn sʼɛŋan in gbeŋ yogŋ, 13.13 gbeŋ yogŋ:Jwifɛl amua eke wɛl nↄn lɛl na am awŋ a ecʼa, Jesu e jam us a ibrm eke wɛl kʼigŋ ɛb ir sig a ɛlu es ke wɛl ɛ́kn Krist ab ecʼɛb ir owr a. sʼɛ́gŋn wɛl ijr ɛy gbre nɛnyɛmbri nyam a ɛsɛ in ecʼab af. ¹⁴Wus af aŋa, sʼir ɛb nyam eke kʼow anm sɛgŋ fɛŋ ab ɛm, gbɛkↄ ɛy, ɛb a eke bʼow anŋ lɛgŋ anym ɛm a sʼam ↄl es. 13.14 Ɛ̀kn Ebre 11.13-16.¹⁵Eke ow el ɛbɛn a, ow akpl eke lɛgŋni nyam nyam fɛŋ, si kʼɛcr Jesu ɛm sʼↄŋ ɛy e kↄklm fɛŋ uyu im Nyam ecʼany af. Na anake el ɛy ecʼegb eke sʼam waw a. Ɛɛ, ke ɛy e nɛny ɛm e bia fɛŋ eke bʼow anŋ ɛy ↄkm a, ↄ́ŋ in e nin a agb. ¹⁶Gbɛkↄ kʼìjal es eke ki kokr low mamn ke cɛ́cr yecʼa eke ↄnyn a, aŋke amua anake el segb waw eke bʼakpl Nyam sos ɛm a.

¹⁷Ɛ̀lumn ↄny ecʼidr ɛsɛl a ke ísr es ɛl ecʼany af. -Nʼam ɛw ↄny nyamn af aŋke ow it eke -li kʼawl ↄny ecʼów -lʼok Nyam. Ow sosiɛm a, eke bʼɛlumn ɛl, -li bʼow -li kok ɛl e juma a sos ɛm iŋn ɛm. Eke ow elm ɛbɛn, -li bʼow -li kok juma a abr ɛny ɛm ɛtŋ kʼow ɛŋnmn low kaka.

¹⁸Ŋↄŋan Nyam ↄŋn ɛy. Ɛy sʼuw any tasi eke si kʼɛknm low eke kʼↄŋ sʼokr ɛy sosi ów af. Tasi ɛm a, sɛgŋ fɛŋ si bʼↄl low sɛnyn sɛnyn e kok es. ¹⁹Mʼam ibrm ↄny atrm ɛm, ŋↄŋan eke mi kʼɛwl fafa mʼow ↄny ecʼaraŋn.

Nyam ŋↄŋn lele ɛsŋn es abal el ab

²⁰Nyam anake bʼↄŋ ɛy ɛrm es ɛy a. Lʼigbm ɛy Ɛs Kↄtↄkↄ Jesu ekʼel mɛcɛb ↄsu ɛs ligbɛl a luw ɛm. Ɛtŋ in e mebl a ecʼegb waw a ↄŋ ɛy sinm nyam ekʼↄnym uwr. ²¹Ke Nyam na sɛgŋ fɛŋ ↄ́ŋ ↄny ↄtur kokr low mamn, kókr yecʼa eke li bʼerur a! Ke lʼɛ́cr Jesu Krist ɛm li kok ɛy ɛm, low yecʼeke bʼawʼr a! In ecʼel anygbɛl sɛgŋ fɛŋ! Amɛn!

²²Agŋ lisijimɛl, mʼam dad ↄny eke kʼirir ɛrm ɛw ɛm, sos es atr e sodad amua. Tasi ɛm a, lɛl a eke mi nↄn a ↄfum nↄnↄ. ²³Sica kin amani nyam: ɛy lisijim Timote anŋ sobel ɛm ɛy ↄkm. Eke lʼow fafa, in yↄny si bʼow sʼow sʼɛkn ↄny.

²⁴Ɛ̀sŋnin ↄny ecʼidr ɛsɛl a fɛŋ lele Nyam ecʼagŋ lala ab ab. Itali ecʼagŋ a ekʼanŋ aŋa a yɛji am ɛsŋn ↄny. ²⁵Ke Nyam ɛ́dŋ ↄny fɛŋ ↄwrↄ!