KOLƆS

Pↄl e lɛl ekʼawŋ Kolↄs eyŋ

Ów ekʼit eke wɛl kʼuw any

Kolↄs el Azi Minɛr ecʼɛb nyam. Yɛfɛnyna ɛm a, Azi Minɛr anŋ Turki ɛm. Kolↄs lel Efɛs ab a, ow ↄwl es kilo ekŋ lɛw. Lɛgŋ ab ɛm eke Pↄl anŋ Efɛs a, Kolↄs eci ŋgbafrɛli nyam eke wɛl bʼɛsŋ Epafras, oc in ecʼↄmn a ɛlu Jesu ɛm, ɛtŋ Pↄl yɛgmʼn low. Eke lʼɛwl mɛny nʼim Kolↄs a, li sigm Nyamel es yogŋ. Pↄl nↄn lɛl na Kolↄs e Nyamel a eci, lɛgŋ a eke Epafras ow ɛŋnʼn sobel ɛm eke li kʼↄm ow ów a.

Kolↄs eyŋ bi kok ɛl obi e sinyam a e nuŋ igŋ e low ari at ɛm. Ɛl eci sinyam nuŋ igŋ ebr ab ɛm, wɛl bi yɛgm ɛl eke abŋ a fɛŋ eke bʼↄŋ agŋ am iririr Nyam ab a, es -lʼↄsŋ ɛtŋ ow it eke wɛl kʼigŋ ɛl nuŋ. Low yɛgm ikŋ na am wuwlm Amani Mamn ecʼa eke wɛl am yɛgm Nyam ecʼagŋ eke anŋ Kolↄs ab ab. Ow sosiɛm a, agŋ bɛb am yɛgm agŋ low dad eke Jesu in el abŋ ɛjecʼab ɛm e nyam ekʼin ↄny abusu. Pↄl am yɛgm ɛl eke Krist agb akm low fɛŋ, ɛtŋ in sↄny cɛ nʼↄny es ɛw wus na ecʼabŋ fɛŋ af. Agŋ a, ɛl e low yɛgm ab ɛm, am dad yɛjʼeke Nyam e nuŋ igŋ sɛnyn a, in anŋ ów bɛb eci ɛlum ɛm, ɛsɛ: likr es ubr af, sɛgŋ bɛb ecʼↄsu af, ob ij bɛb ecʼɛnŋ lele mar bɛb ecʼɛgŋm ɛm ab. Pↄl am ɛlu ↄkm eke owʼn elm ɛgŋ ecʼów eke in bi kok ab ɛm ow e sel ɛŋn a in ánm, ɛtŋ ɛmɛny nʼam dad agŋ a fɛŋ eke kʼɛwl mɛny lɛr Jesu cɛ eke in ɛm wɛl bʼↄny ↄmn ke wɛl bʼɛŋn sel a.

Lɛl a ecʼuwr ɛm a, Pↄl am ↄm agŋ ów dad kretiɛn ecʼes an mamn eke kʼↄny Nyamel ɛm, agŋ ɛm ecʼɛb ir ɛm lel in ecʼakŋ ɛm ab.

Ɛsŋn

¹Pↄl, eke Nyam ecʼerur ɛm, el Jesu Krist ecʼɛrm ɛs lel ɛy lisijim Timote ab, am awŋ ²Nyam ecʼagŋ ekʼir Kolↄs baŋn, ke el nɛny nyam ɛm ecʼɛy lisijimɛl eke okr af Krist ɛm a lɛl. Ke Nyam ɛy Ɛs ɛ́dŋ ↄny ↄwrↄ ke ↄ́ŋ ↄny ɛrm es ɛy.

Pↄl am ↄŋ Nyam bia

³Sɛgŋ fɛŋ si bʼɛlu Nyam ɛy Ɛs Kↄtↄkↄ Jesu Krist ecʼƐs bia eke si bi ŋↄŋnʼn ↄny ecʼa, ⁴aŋke wɛl dad ɛy sʼiri ↄny ecʼↄmn ekʼↄnyn Jesu Krist ɛm lel ↄny ecʼerur ekʼↄnyn agŋ fɛŋ ekʼel Nyam ecʼagŋ a ecʼab ab e low. ⁵Eke low nɛnyɛmbri nyam ecʼamani ekʼel Amani Mamn, ↄg es ow ↄny ogŋ a, ↄny, irir low yecʼa eke Nyam bɛbm ɛw ↄny es afr a; ɛtŋ ↄny ecʼↄmn lel ↄny ecʼerur ab ucu low eku ikŋ na ↄny es. ⁶Amani Mamn a am eb es ɛtŋ am ↄsu ey wus nimum af, ɛsʼelel eke nʼam kokr ↄny ecʼaraŋn lɛgŋ a ɛtŋ eke ↄgr es irir Nyam ecʼↄwrↄ a e low, ke uwr ob tasi eke lʼel ab any a. ⁷Epafras ekʼel ɛy e juma kok ɛm e lawl eke sʼerur sɛnyn sɛnyn a anake yɛgm ↄny low ikŋ na a; nʼam usr ɛy usu li kok juma ɛsɛ Krist e juma kok ɛs nimamn tasi af; ⁸nʼↄŋ ɛy ↄny ecʼAbŋ Lala ecʼerur ekʼↄŋ ↄny a ecʼamani.

⁹Na sosiɛm anake ɛy yɛji, lɛgŋ a ɛtŋ eke sʼiri wɛl dad ɛy ↄny e lís e low a, sɛgŋ fɛŋ sʼam ŋↄŋn Nyam sʼↄŋ ↄny a. Sʼam ibrm Nyam eke li kʼↄŋ ↄny uwr in ecʼerur tasi ab any, nuŋ ɛm ↄny fɛŋ lel sɛwr fɛŋ ekʼin ecʼAbŋ a bʼↄŋ ↄny ab ɛm. ¹⁰Ow bʼow ↄŋ ɛtŋ bʼow ↄnyn es an eke bʼusr Ɛs Kↄtↄkↄ sos ɛtŋ bʼow kokr sɛgŋ fɛŋ yecʼeke bʼakplʼl sos ɛm a. Bʼow kokr ów amamn fɛŋ ɛtŋ bʼow iman anym eci, ↄny eci Nyam ecʼany uw ab ɛm. ¹¹Sʼam ibrm Nyam eke kʼucu ↄny ↄny es low low fɛŋ ɛm in ecʼanygbɛl ecʼabusu ab ɛm, yecʼɛtŋ kʼↄ́tur inymn es kikri, ke ↄ́nyn ɛrm susu low eku ɛm. ¹²Ɛ̀lul Ɛs Nyam bia sos ɛm iŋn ɛm: in eke nʼↄŋ ↄny abusu eke kʼɛŋan ów a fɛŋ eke li bɛbm lʼɛw es afr ecʼusuayl ab ɛm, agŋ a ekʼel in ecʼa ecʼa. ¹³Nʼↄny lʼoc ɛy es ncebn ecʼabusu ab ɛm ɛtŋ lʼoc lʼɛlu ɛy in ecʼIy e lʼerur a ecʼes ɛw ab ɛm. ¹⁴Jim ɛm anake li sↄg ɛy low ŋuŋ ɛm, ke lʼoc ɛy e sikpl a yɛji lʼap ɛy a.

Krist ecʼɛj eke wɛl ↄcu

¹⁵Krist el Nyam eke wɛl ɛ́knm a e mɛny ɛwr.

Lʼel Liy krɛkrɛ ekʼanŋ mob mob fɛŋ eke Nyam kok a e ŋuŋ af, 1.15 Bɛ̀bmn Nyandrɛ 8.22-31; Jan 1.1-3.

¹⁶aŋke in ɛm Nyam ɛcr kok ob fɛŋ ekʼanŋ afr lele wus af aŋa ab a:

mob e wɛl bʼɛkn lele yecʼeke wɛl ɛ́knm ab,

lɛc fɛŋ, es akm fɛŋ, es ɛw fɛŋ lele abusu fɛŋ ab. 1.16 Akr lɛw nↄhↄn am lulm jebr e sabusu eke wɛl ɛ́knm, ke agŋ bɛb bi tutr eke sabusu amua idr wus ecʼów lele agŋ ɛm e mob ab, ke ɛl -li bʼigŋ nuŋ a. Bɛ̀bmn Kolↄs 2.8, Galat 4.3 lele ow ecʼakr otar ab ab.

Nyam ɛcr in ɛm kok fɛŋ in eci.

¹⁷Krist ikŋ anym anŋ gbuŋ ɛtŋ ob fɛŋ anŋ,

ɛtŋ in ɛm ob fɛŋ ↄtu inym es ɛl e susu a.

¹⁸Krist eci sos megl el Nyamel

ɛtŋ in obi lʼel ow e nuŋ.

Krist el nuŋ ↄb, lʼel Liy krɛkrɛ eke wɛl ew,

ɛtŋ lʼel krɛkrɛ ecʼɛgŋ ekʼigb agŋ ekʼuw ab ɛm,

yecʼɛtŋ ke lʼél krɛkrɛ nʼanŋ mob fɛŋ e nuŋ af,

¹⁹aŋke Nyam erur eke kʼir Jim ɛm nimum,

²⁰ɛtŋ lʼerur yɛjʼeke li kʼɛcr Jim ɛm

lʼokr wus nimum ecʼagŋ ɛm Jim eci.

Jim eci mebl a ekʼok es olikŋ af ab ɛm,

Nyam ɛw ɛrm es ɛy es wus af aŋa lel afr ab.

²¹Ɔny Kolↄs eyŋ, ↄny yɛji lɛgŋ eke ɛc ab ɛm a, kpabr es Nyam e lís, eel in ecʼefnu ów eŋuŋ a eke bʼↄnyn ow e tutr ke bi kokr a sosiɛm eci. ²²Gbɛkↄ lɛgŋ na ɛm, Nyam ↄny okr ↄny ɛm in ab, Jim e sos megl ɛm e luw a ekʼuw olikŋ af ab ɛm, yecʼɛtŋ ke ówr in ecʼany af ɛsɛ agŋ lala, agŋ ekʼↄnym low ↄbr, ke abr ɛnym anm lís af. ²³Gbɛkↄ ow it eke kʼinymn es kikri ke íjr lɛc ↄmn ɛm. Ke kí kpabmn es Amani Mamn a e lís, aŋke lʼel low eke sʼam ↄmn. Ɔny, irir in e low, aŋke wɛl ↄb amani a ok agŋ a fɛŋ ekʼanŋ wus af aŋa a, ɛtŋ ɛm Pↄl, mʼel ow e juma kok ɛs.

Pↄl e juma ekʼit e ki kok Nyamel eci

²⁴Sica sos ɛm am iŋnʼm eke mʼam mʼij ↄny e gbre. Tasi ɛm a, ɛm obi ɛm a, ɛbɛn mʼanŋ ɛm mʼam mʼij Krist e gbre ekʼij in e sos megl a ekʼel Nyamel ecʼa. ²⁵Mʼel Nyamel e juma kok ɛs, aŋke ow el juma eke Nyam abulʼm eke mi ki kok ↄny eci: lʼabulʼm eke mi kʼↄb in ecʼamani a ɛsɛ elel ekʼow it ab af. ²⁶Odad a eke el low eke lↄl es godʼɛtŋ sↄwↄrŋ ecʼany af, ke lɛgŋ na ɛm, Nyam ɛlu ↄkm kpata yɛgm agŋ a eke el in ecʼa. ²⁷Nyam erur eke ki yɛgm ɛl -lʼuw low na eke lↄl es ab any, ke el ob ↄny lele low sↄbↄ ab, eke li bɛbm lʼɛw es agŋ fɛŋ ecʼa. Ɛtŋ kin low a eke lↄl es a: Krist anŋ ↄny ɛm ɛtŋ nʼↄŋ ↄny ↄnyn ↄmn eke ↄny yɛji bʼow ɛŋan Nyam ecʼanygbɛl a. ²⁸Ow sosiɛm, sʼam ↄb Krist ecʼamani sʼok ɛgŋ fɛŋ. Sʼam ɛwar ɛtŋ sʼam yɛgm ɛgŋ ɛgŋ low sɛwr fɛŋ ɛm, yecʼɛtŋ ke ɛgŋ fɛŋ ɛ́y ↄkm Nyam ecʼany af ɛsɛ ɛgŋ eke uw low fɛŋ any Krist ab ecʼaf okr ab ɛm. ²⁹Na sosiɛm mʼam kok juma, ɛtŋ mʼam dogŋn low Krist e lɛc a ecʼabusu a ekʼanŋʼm ɛm ab ɛm.

¹Mʼerur eke kʼuwr gbre e mʼam ij ab any low na eke mʼam dogŋn ↄny ecʼab ɛm, ↄny lele Laodise ecʼagŋ ekʼub nawrɛ a lele agŋ ɛjecʼa fɛŋ ekʼuwm im any nyamn ɛm ab ab. ²Tasi ɛm a, mʼam erur eke -li kʼↄny ɛrm susu iy ɛl ɛrm ɛm gbↄŋ ke -lʼokr af erur ɛm, ke nuŋ ɛm ↄny íy ɛl ɛm gbↄŋ yecʼɛtŋ ke -lʼↄtu -lʼuw Nyam e low eke lↄl es ab any. Low a eke lↄl es a el: Krist, ³eke in ɛm ob ↄny ɛsɛ sɛwr af lele low any uw ab lↄl es a.

⁴Mʼam dad ↄny low na yecʼɛtŋ ke kí yɛbmn ɛgŋ kaka fɛŋ ɛjum ↄny sodad ebl amamn e dad ɛm. ⁵Eke mʼanm ↄny ab sos megl ɛm yɛji, mʼanŋ ↄny ab ow tutr ɛm, ɛtŋ mʼↄny sos ɛm iŋn ekʼↄnyn ɛrm susu inymn es kikri usu nyam Krist ecʼↄmn ekʼↄnyn ab ɛm.

Ìnymn es kikri ↄmn a eke wɛl yɛgm ↄny ab ɛm

⁶Ow sosiɛm, eke ɛgŋn Jesu Krist ebr ɛsɛ ↄny Ɛs Kↄtↄkↄ af a, ìir ɛb af okr ɛm in ab. ⁷Òkr min in ɛm, ùsr ↄny ecʼowr anŋ a in af. Sɛgŋ fɛŋ ìnymn es kikri ↄny ecʼↄmn ab ɛm, ɛsɛ elel eke wɛl yɛgmn ↄny ab af, ke ɛ́lul Nyam bia sɛgŋ fɛŋ.

⁸Ɛ̀wr ɛrm, ɛgŋ kaka ↄtum eke kʼↄny ↄgŋm ↄny meb agŋ e sow tutr yadŋ ab ɛm. Ow el yadŋ ↄny eke low kaka anm ɛm, ke bʼɛŋn lɛc agŋ ɛm ecʼow kok ɛm, wus aŋa e sabusu e lɛc ogŋ, 2.8 Ɛ̀kn Galat 4.3 ecʼakr otar a. ke elm Krist ecʼa. ⁹Nyam in nimum a, lʼir Krist e sos megl ab ɛm. ¹⁰Ɛtŋ ↄny nimum a ɛŋan Krist ecʼowr anŋ e low fɛŋ, in eke lʼel es ɛw eke anŋ es ɛw fɛŋ lel abusu fɛŋ eke wɛl ɛ́knm a e nuŋ af a.

¹¹Krist ab ecʼaf okr ɛm anake wɛl ubr ↄny likr es a, ɛtŋ likr es ubr ikŋ na elm ɛgŋ ecʼabu ɛm ecʼeke kok. Kↄ likr es ubr ekʼanŋ Krist ɛm ow, ke ↄny low a eke bʼitr ɛlu ɛy low ŋuŋ ɛm a oc es. ¹²Tasi ɛm a, lɛgŋ a eke wɛl ok ↄny mij nuŋ a, yogŋ ɛtŋ uwr Krist ab ɛtŋ anŋn luw ɛm igbr in ab, aŋke ubr Nyam ecʼabusu a ekʼigbm Krist luw ɛm a nawrɛ. 2.12 Rom 6.4.

¹³Lɛgŋ ekʼɛc ab ɛm,

ↄny eel agŋ ekʼuw abŋ ɛm ↄny e sikpl a nuŋ af

lele likr eke wɛl ubrm ↄny es,

ke eel Nyam any uwm ɛsɛl ab ab sosiɛm.

Kↄ lɛgŋ na ɛm a, Nyam ↄŋ ↄny anŋn owr Krist ab

ɛtŋ lʼap ɛy, ɛy ecʼów ↄbr a fɛŋ.

¹⁴Ɛy e labm e sʼↄny e lɛl a ekʼam ok ɛy ow af,

ke in ɛm e sol ekʼanŋ a am ↄb ɛy low a,

nʼↄny li tɛtŋ es.

Ɛtŋ ni ŋuŋn ow lʼↄb ow ecigbrↄ olikŋ af yogŋ.

¹⁵Ɛbɛn eke Nyam ↄny es ɛw fɛŋ

lele abusu fɛŋ eke wɛl ɛ́knm a e lɛc oc es ana;

ɛtŋ li kok wɛl sos keskes dedeku ɛm,

lʼot wɛl ɛsɛ sobel ɛm ɛsɛl af,

Jim ecʼany eb ecʼagŋ ekʼam us jam ab ɛm.

¹⁶Ow sosiɛm, kì yɛbr ɛgŋ kaka fɛŋ ki cak ↄny, ↄny ecʼob eke bʼijr oglog bʼɛgŋn ab ɛm, ses gbɛgbl e lɛgŋ ecʼↄsu sosiɛm, awl owr e bʼɛli ɛy ↄkm ecʼes gbɛgbl lele nɛnɛgŋ e lɛgŋ ecʼↄsu owi ɛm ab. ¹⁷Ów amua am yɛgm low tasi a eke bʼow ow a, kↄ ɛl -lʼelm low tasi a. Low tasi a el Krist. ¹⁸Ɛgŋ kaka itm eke kʼɛdŋn ↄny any eb. Mʼam tutr agŋ a eke bʼis es ɛw ekekey afr ɛrm ɛsɛl ecʼany af igŋ ɛl nuŋ a e low, -li bʼucu mɛmn ɛm ecʼów eke -li bʼɛkn a e low -nʼↄny es. -Lʼel agŋ ekʼɛl e sow tutr a el agŋ ɛm e sow tutr tasi, ow bʼↄŋ ɛl -lʼɛfu es, ¹⁹ɛtŋ -lʼakŋamn Krist ab. Ke Krist anake el sos megl e nuŋ a, in ɛm sos megl nimum bʼɛŋn in ecʼob ij. In ɛm sos ŋgigŋnel a lele mifn ab bʼokr af inym es kikri, ɛtŋ sos megl ikŋ na bʼagb ɛsɛ elel eke Nyam bʼerur ab af.

²⁰Sica ↄny uwr Krist ab, ɛtŋ wus aŋa e sabusu e lɛc 2.20 Ɛ̀kn 2.8. elm low kaka ↄny eci. Ɛtŋ bla sosiɛm ↄny am íir ɛb ɛsɛ ɛmɛny wus ecʼagŋ cɛ ↄny eel af ee? Bla sosiɛm am ɛgŋn ebr ekʼɛmɛny wɛl kʼↄŋ ↄny sol akpasu amua ɛsɛ: ²¹kʼòc ob na, kʼìj ob na, kʼìtŋn ob na abu ee? ²²Eke wɛl bʼↄb nuŋ am kok ɛl e low a, ów amua bʼirm. Ow el sol lele low yɛgm ab eke agŋ ɛl obi eci nuŋ ɛm ↄny ɛm ↄkn. ²³Tasi ɛm a, ígŋ ob nuŋ, ís es ɛw likekli afr ɛrm ɛsɛl ecʼany af, íjr ŋ e sos megl gbre, wɛl bʼɛkn ów amua fɛŋ ɛsɛ sɛwr ecʼów af. Gbɛkↄ -lʼel ów ↄfr ↄfr, sos megl owi cɛ ow bʼɛlum abu.

Ɔ̀ↄl afr ecʼów es

¹Sica Krist ab anake anŋn luw ɛm igbr a. Ow sosiɛm a, ↄↄl afr ecʼów es, yogŋ a eke Krist anŋ, ke ow el Nyam e lidr abu af a. 3.1 Selu 110.1.²Ow akpl eke kʼebar afr ecʼów ecʼɛrmij, ow a eke kʼebar wus af aŋa ecʼa ecʼɛrmij a. ³Tasi, ↄny ɛcar luw ɛm, ɛtŋ ↄny ecʼowr anŋ a lↄl es Krist eke anŋ Nyam ogŋ ab ɛm. ⁴Krist anake el ↄny ecʼowr anŋ tasi a, ɛtŋ lɛgŋ eke li bʼow lʼɛy ↄkm a, ↄny yɛji bʼow okr ↄkm in ab ɛtŋ in ecʼanygbɛl a, ↄny yɛji bʼow ɛŋan.

⁵Na sosiɛm a, ìbir ↄny ɛm low fɛŋ ekʼel wus ecʼów ɛsɛ: nfaci ij af, sikpl owi af, ów aw eke ɛw fɛfɛdi lele ów aw eŋuŋ ab lele lokm suŋ ekʼin ɛw ɛsɛ sinyam yadŋ e nuŋ igŋ ab af. ⁶Ɛtŋ ów ↄbr ↄbr amua na sosiɛm anake Nyam ecʼɛrm bebl a, [bʼow ok agŋ a ekʼɛgŋm eke kʼↄny in ecʼɛlum ab af a]. 3.6 Kolↄs eyŋ eci silɛl esig bɛb ɛm a, wɛl ɛ́ŋnm sodad ekʼanŋ ob na [...] ecʼaraŋn a.⁷Lɛgŋ ekʼɛc ab ɛm, ↄny yɛji ow a ekʼam iir ɛb sikpl ɛm a, ɛbɛn eke kokr ana.

⁸Kↄ jam aŋa, ìgŋn ów amua fɛŋ ekʼel: ɛrm bebl, ɛrm wewe lele ɛrm suŋ ab a okr es. Ke wɛwr lel odad ebl kpↄm kpↄm ab kʼánm ↄny nɛnym ɛym ↄkm. ⁹Kʼↄ̀nyn yadŋ kʼↄŋanin ↄny ↄfr ɛm ij, aŋke ↄny ecʼelel eke aan es lɛgŋ sig ɛm a, waal ɛlul es ɛsɛ mob sus ɛm sig af, ¹⁰ɛtŋ ɛsɛ mob sus ɛm owr af, ɛwal mɛny anŋn ɛsɛ ɛgŋ owr af. Ɔny eci ɛb ir owr ab ɛm sɛgŋ fɛŋ am otr Nyam ekʼel ↄny e kok Ɛs ab es, 3.10 Nuŋ Ɔb 1.26. yecʼɛtŋ ke ↄ́tur uwr ir any ok ↄny es sos ɛm. ¹¹Jam aŋa agŋ a fɛŋ el kpɛŋ kpɛŋ, ow ↄnym Jwif lel ɛgŋ ekʼelm Jwif ab, ɛgŋ eke wɛl ubrm likr es lel ɛgŋ eke wɛl ubr likr es ab, ɛbr ɛjeci ecʼagŋ lele mɛbɛy ab, 3.11 mɛbɛy:agŋ eke wɛl am ɛsŋ mɛbɛy lɛl na ɛm a, el agŋ eke wɛl bʼɛsŋ Siyitɛl, ke ir ɛb Okij Ibr ecʼafr ɛm a, ke agŋ ɛm ecʼɛb ir owi ɛm, anŋ jam nↄnↄ. madu lel ewi ab. Gbɛkↄ low tasi a: el Krist ekʼel low fɛŋ, ke anŋ agŋ fɛŋ ekʼubʼr nawrɛ ab ɛm a.

¹²Nyam sↄsum ot ↄny eke kʼeel in ecʼagŋ ɛtŋ li bʼerur ↄny. Ow sosiɛm a, ow akpl eke kʼↄnyn ɛrm ekʼerur lele sↄrŋ ikŋ ab iy ɛm gbↄŋ, ɛrm mamn, es is ecʼɛrm, ɛrm frↄrↄ lele low eku ecʼɛrm ab. ¹³Ɛ̀gŋn ɛgŋ ɛgŋ ecʼelel eke anŋn a ebr ke áparir low yɛji, sakp sakp fɛŋ ekʼↄny ɛm ecʼɛgŋ nyam bʼow ↄny low lawl ab a. Ow it eke kʼaparir low ɛsɛ elel eke Ɛs Kↄtↄkↄ ap ↄny ab af. 3.13 Matie 6.12-14.¹⁴Ɛtŋ low eke ki kokr tasi a el erur eke kʼↄnyn ↄny ↄfr ɛm a, aŋke erur el low eke bʼↄny agŋ okr af. ¹⁵Ke Krist ecʼɛrm es ɛy a nyímn ↄny ecʼɛrm a; tasi ɛm a, ɛrm es ɛy ikŋ na ɛm anake Nyam ɛsŋ ↄny eke kʼokar af éel nyam ɛsɛ sos megl nyam coco af a. Sɛgŋ fɛŋ ↄŋan in bia. ¹⁶Ke Krist ecʼodad ebl a, ɛ́ŋn usu ↄny ecʼɛrm ab ɛm in ecʼob ↄny a fɛŋ ab. Yɛ̀gmnin low ke ↄ́manin ów ↄny ↄfr ɛm sɛwr fɛŋ ɛm. Ɛ̀lul Nyam bia ↄny ecʼɛrm fɛŋ ɛm, ɛ̀gŋn selu, ɛ̀gŋn Nyam e sɛj ɛjeci lele sɛj eke Abŋ Lala 3.16 Efɛs 5.19-20. bʼↄŋ ↄny ab ab. ¹⁷Low fɛŋ eke bi kokr oglog bi dadr ab ɛm, kòkr Ɛs Kↄtↄkↄ Jesu e nin ɛm, ke in ɛm ɛ̀lul Ɛs Nyam bia.

Elel eke kretiɛnɛl kʼir ɛb af okr ɛm

¹⁸Ɔyↄw, ↄny, ìsr es ↄny ɛcɛl ecʼany af, ɛsɛ elel ekʼow it eke ki kokr Ɛs Kↄtↄkↄ ecʼany af ab af.

¹⁹Ɔyↄw ɛcɛl, èrurir ↄny ɛyɛl ke kʼↄ́nymn ɛl lokm yony ɛm.

²⁰Ey, ↄnyn agŋ ekʼew ↄny a ecʼɛlum low low fɛŋ ɛm, aŋke ow el low eke Ɛs Kↄtↄkↄ bʼerur.

²¹Ey ɛsɛl, kʼìjar ↄny ecʼey a gbre, yecʼɛtŋ ke sos kʼↄ́wm ɛl es.

²²Madu, low low fɛŋ ɛm ɛ̀lumn ↄny e wus af aŋa eci es ɛw ɛsɛl a. Ow elm eke -li bʼɛw ↄny nyamn af cɛ ki kokmn ɛl e lís e low mɛwl ɛm, yecʼɛtŋ ke -lʼaw ↄny. Kↄ ɛ̀lumn ɛl ɛrm nyam ɛm tasi, ɛlum ekʼↄnyn Ɛs Kↄtↄkↄ ecʼa sosiɛm. ²³Juma fɛŋ eke bi kokr a, kòkr ɛrm nyam ɛm, ɛsɛ Ɛs Kↄtↄkↄ eci juma ↄny am kokr af, ke ow kʼélm ɛsɛ agŋ ecʼaf. ²⁴Ow sosiɛm a, madu, ↄkan eke Ɛs Kↄtↄkↄ bʼow ↄŋ ↄny ow ecʼob ap, ob ap a eke lʼɛdŋn lʼɛw in ecʼagŋ es a. Tasi ɛm a, Es Ɛw Ɛs a ekʼam kokr in eci juma a, in lʼel Krist. ²⁵Gbɛkↄ ɛgŋ yecʼeke am kok low ŋuŋ a, bʼow ɛŋn yecʼekʼel in ecʼa, ɛsɛ elel eke li kokr low ŋuŋ ab af, aŋke Nyam eci low eke bʼow kok ab ɛm, li kʼow li jɛjm agŋ es.

¹Agŋ eke el madu eci es ɛw ɛsɛl a, kòkr ↄny e madu a e low nɛnyɛmbri nyam ɛm, ke ŋkoprɛ kʼánm ɛm. Ke ↄkan ekʼↄny yɛji ↄnyn Es ɛw ɛs nyam ekʼanŋ afr.

Ów ↄm

²Sɛgŋ fɛŋ ànŋn Nyam ŋↄŋn ɛm, ke ↄny e Nyam e bia eke bʼↄŋn Nyam ŋↄŋn ɛm a él ɛrm ɛw ɛm. ³Nyam ŋↄŋn ab ɛm, ɛy yɛji ŋↄŋan ɛy eci, yecʼɛtŋ ke Nyam kók sʼɛŋn abusu sʼↄmun in ecʼodad ab es, ke si dád Krist eci lís e low eke lↄl es a. Tasi ɛm a, low na eke lↄl es a sosiɛm anake mʼanŋ sobel ɛm a. ⁴Ŋↄŋan Nyam yecʼɛtŋ ke mʼↄ́tu mʼotar odad a akr ayl, ok agŋ es sos ɛm, ɛsɛ elel ekʼow it eke mi ki kok ab af.

⁵Àan es nuŋ ɛm ↄny ɛm agŋ ekʼuwm Krist any a e lís, ke abusu fɛŋ eke bʼɛru ↄny es a kʼírmnmn. ⁶Ke sɛgŋ fɛŋ ↄny ecʼodad ebl él amamn, ke mok ánŋ ɛm, ke uwr any dádr ɛgŋ fɛŋ odad ɛsɛ elel ekʼow it ab af.

Ɛsŋn es abal el

⁷Erur ɛm ecʼɛy lisijim Tisik, 4.7 Tisik:Ob Kok 20.4; Efɛs 6.21-22; 2 Timote 4.12; Tit 3.12. abu ɛlum ɛs nimamn ekʼel ɛm lawl Nyam e juma kok ab ɛm, bʼow ↄŋ ↄny ɛm e lís ecʼamani fɛŋ. ⁸Mʼam ɛrmʼn tasi eke li kʼow li dad ↄny ɛy e lís ecʼamani, ke lʼátr ↄny sos es yɛji. ⁹Onesim 4.9 Onesim:Filemↄ 10,15. ekʼel ↄny ɛm ecʼɛgŋ, ke el erur ɛm ecʼɛgŋ lisijim a anake am ɛwlʼl a. -Li bʼow -lʼↄb ↄny ów a fɛŋ ekʼam ɛy aŋa a ecʼamani. ¹⁰Aritak 4.10 Aritak:Ob Kok 19.29; 27.2; Filemↄ 23 Mark: Ob Kok 12.12-25; 13.13; 15.37-39. Barnabas: Ob Kok 9.27; 11.20,30. ekʼanŋ sobel ɛm ɛm ab a, am ɛsŋn ↄny, ɛbɛn nɛny nyam Mark ekʼanŋ ɛsɛ Barnabas e lisijim af a, in yɛji am ɛsŋn ↄny. (Mark ecʼa, ikŋn anym irir in e lís e low. Eke lʼow ↄny ogŋ yogŋ, èbr ir sɛnyn sɛnyn.) ¹¹Igŋ a eke wɛl bʼɛsŋ Jesu ke wɛl bʼok en es Justus a yɛji am ɛsŋn ↄny. Jwifɛl ekʼɛgŋ Krist e low eb a, ɛl ɛm a, agŋ nyahan na cɛ anake am kok juma ɛm ab Nyam e gbreŋgbi usu a ecʼa. Ɛtŋ -lʼatrʼm sos es nↄnↄ ligbɛl.

¹²Epafras, 4.12 Epafras:ɛ̀kn 1.7. ekʼin yɛji el ↄny ɛm e nyam a, am ɛsŋn ↄny; Krist e libↄwi na sɛgŋ fɛŋ bʼatr sos es ŋↄŋn Nyam ↄny eci, yecʼɛtŋ ke ↄ́tur inymn es kikri, ánŋn ɛsɛ agŋ ekʼagb ↄmn ɛm, ke bɛbm sos eke ki kok low fɛŋ eke Nyam bʼerur ab af. ¹³Mʼↄtu eke mi kʼij in e nuŋ af e daŋku low na eci: li bʼij gbre nↄnↄ ↄny lele Laodise ecʼagŋ lele Iyerapolis 4.13 Laodise lele Iyerapolis ab:el ɛb yony ekʼir titm Kolↄs. ecʼagŋ a ecʼab. ¹⁴Luk 4.14 Luk:2 Timote 4.11; Filemↄ 24. ekʼel erur ɛm ecʼɛy lawl ke el sɛkp kok ɛs lele Demas ab am ɛsŋn ↄny.

¹⁵Ɛ̀sŋnin ɛy lisijimɛl ekʼanŋ Laodise a, lele ɛy lisijↄw Nɛnfa lele Nyam ecʼagŋ eke bʼas luku in ecʼakŋ ab ab ↄŋn ɛy. ¹⁶Sica lɛgŋ eke bʼawal lɛl na ba ow bʼuwr a, kókr elel eke ki kokr ke wɛl ↄ́tu awl Laodise eci Nyamel ab ɛm yɛji. Ke ↄny yɛji áwal yecʼa eke bʼow anŋ ɛl ogŋ a ow a. ¹⁷Ow ecʼuwr ɛm a, dàdr Arkip 4.17 Arkip:Filemↄ 2. kok Ɛs Kↄtↄkↄ e juma ekʼabul il a sɛnyn sɛnyn.

¹⁸Ɛm Pↄl, ɛm obi ecʼabu ɛm mi nↄn ɛsŋn na lɛl na ecʼuwr ɛm. Sica kʼìjal es eke mʼanŋ sobel ɛm.

Ke Nyam ecʼↄwrↄ a ánŋ ↄny af.