2 KORƐNT

Pↄl e lɛl yony ɛm ekʼawŋ Korɛnt eyŋ

Ów ekʼit eke wɛl kʼuw any

Ɛrm ɛs Pↄl ij akpo nyahan Efɛs ɛb ɛm, in e sakp nyahan ɛm ecʼusu im ab ɛm, ɛc a eke li bʼɛc susu susu nʼam ↄb Amani Mamn eci kokoba a. Yogŋ anake ni nↄn krɛkrɛ ɛm Korɛnt e lɛl a nʼawŋ Nyamel ekʼanŋ Korɛnt a. Eke ow ibn tɛl a, wuwal owi ɛy Efɛs ɛb ab ɛm, toŋ Pↄl tɛl cɛ ke írmn in e sel a (Ob Kok 19; 2 Korɛnt 1.8-10).

Ow e jam a, Timote anŋ Korɛnt ow lele amani eŋuŋ ab eke ɛm bubr owi a in anŋ cɛ ɛtŋ nyimn ɛsɛl bɛb in am cacak ow. Ow ↄŋ Pↄl in obi im yogŋ ɛtŋ ↄm ɛl ów eke -li kʼitŋn es an. In ecʼim na eke nʼim nʼam ɛkn wɛl ab ɛm anake Nyamel ab ɛm ecʼidr ɛs nyam kokʼr ɛ́s, ↄwrʼr sos es a (2.5-11; 7.12). Low na nuŋ af, Pↄl ɛwl kpra im Efɛs ɛtŋ ni nↄn lɛl ɛjeci nyam sos es ↄw nↄnↄ ab (2.4; 7.8); Tit anake oc lɛl a im a, kↄ lɛl ikŋ a, yɛfɛnyna ɛm a, sʼuwm usu nuŋ nyam ekʼow ɛy ab any. Ow e jam a, Pↄl ŋgboŋ Efɛs ɛtŋ us ejagb aam Korɛnt, gbɛkↄ lʼɛcr Maseduan eci eke li kʼɛkn Sinyamel ekʼanŋ Filip ɛb ɛm lele Tesaloni ɛb ɛm ab a. Yogŋ, lʼↄbr Tit (7.5-6) ekʼism amani amamn ab eke lɛl es abal el a in ↄsu ey amamn Korɛnt yogŋ (7.7).

Ɛbɛn yɛji, Pↄl uw any eke agŋ anŋ Korɛnt yogŋ eke am cacakʼr. Ɛtŋ ni nↄn lɛl na eke sʼɛsŋ Pↄl e lɛl yony ɛm eke awŋ Korɛnt eyŋ a. Lɛl na anake el silɛl a eke ni nↄn nʼawŋ Korɛnt e Nyamel a ecʼes abal el a.

Nuŋ 1 toŋ nuŋ 7 a, am otar low sosiɛm eke nʼↄny wɛl ecʼim ɛkn e low a eke li bɛbm lʼɛw es a lʼitŋn lele low nuŋ af eke ni nↄn lɛl lebl kpaŋkpaŋ nʼawŋ wɛl a. Gbɛkↄ, sos ɛm iŋnʼn eke lɛl ikŋ a ↄsu ey amamn a.

Pↄl am tutr eke kʼim anŋ ɛl ab ibn ɛtŋ nʼam atr wɛl sos es eke -li ki yibr ob ap a eke wɛl am kok Jerusalɛm ecʼↄgbↄru a sosiɛm ecʼa, ke -lʼɛlu ɛl ecʼɛrm mamn a ↄkm (Nuŋ 8 toŋ nuŋ 9).

Nuŋ 10 toŋ nuŋ 13 ɛm a, Pↄl agbr lebl es lɛl ab ɛm ɛtŋ nʼam dogŋn in ecʼɛrm ɛs e lʼel ecʼabusu eke nʼↄny a e low. Ɛtŋ li dad eke in e jam ecʼow eke in bʼow in ow wɛl ecʼaraŋn a, in bʼow in ɛlu in ecʼabusu ↄny a ↄkm eke owʼn it ekʼin ki kok ɛbɛn. Eke nʼawŋ lɛl a, ow ibnm ɛtŋ lʼow lʼɛy Korɛnt ɛtŋ nʼanŋ lɛfr lɛgŋ iy a nimum ɛsɛ elel eke li bɛbm lʼɛw es ab af (1 Korɛnt 16.5-6). In eci Korɛnt eke nʼim nʼam ɛkn a anake ni nↄn Rom eyŋ eci lɛl a.

Ɛsŋn

¹Ɛm Pↄl, mʼel Jesu Krist ecʼɛrm ɛs aŋke Nyam erur. Ɛy lisijim Timote ab e nin ɛm, mʼam awŋ Nyamel ekʼanŋ Korɛnt a lele Nyam ecʼagŋ a fɛŋ ekʼanŋ Akayi nimum ab a lɛl na. 1.1 Akayianŋ Grɛs esr ɛm a. Pↄl eci yogŋ eke ↄg es im ecʼa, ɛ̀kn Ob Kok 18.1-18.

²Ke Nyam ɛy Ɛs lele Ɛs Kↄtↄkↄ Jesu Krist ab ɛ́dŋ ↄny ↄwrↄ ke ↄ́ŋ ↄny ɛrm es ɛy!

Pↄl am ↄŋ Nyam bia

³Si kↄ́klm Nyam ekʼel ɛy Ɛs Kↄtↄkↄ Jesu Krist ecʼƐs a! Lʼel ɛgŋ Ɛs ekʼij gbreŋgbi sↄrŋ ikŋ ɛm ɛtŋ lʼel Nyam eke bʼatr ɛy sos es low low fɛŋ ɛm. ⁴Li bʼatr ɛy sos es ɛy e ses babur fɛŋ ɛm, yecʼɛtŋ ke ɛy yɛji sʼátr agŋ ekʼam ij gbre a sos es. Ɛtŋ ɛbɛn a, si bʼↄŋ ɛl yecʼa eke ɛy obi yɛji si bʼeb Nyam ogŋ a. ⁵Tasi ɛm a, elel a eke si bʼij gbre nↄnↄ Krist e nin a ecʼa, ɛbɛn nɛnyɛmbri nyam si bʼɛŋn sos es atr nↄnↄ in ɛm. ⁶Eke sʼanŋ es abur ɛm, ke ↄny e sos es atr lele ↄny e sↄg ab eci. Eke sʼam ɛŋn sos es atr, ke ↄny e sos eke si kʼatr ↄny es ɛ́gŋn gbre nɛnyɛmbri nyam a eke sʼam ij ɛsɛ ↄny af a ebr eci. ⁷Sʼↄny ↄmn tasi ɛy ɛm eke si bi tutr ↄny e lís owi a, aŋke sʼuw low nyam any: ekʼam ijr gbre ɛy ab a, ↄny yɛji sos es atr eke sʼɛŋn a el ↄny eci.

⁸Agŋ lisijimɛl, ow it e kʼuwr any eke Azi wus af a, 1.8 Azi wus af a:ɛ̀kn 1 Korɛnt 16.19 lel ow ecʼakr otar ab ab. sʼɛgŋ gbre ijr ɛgbɛl nↄnↄ sʼeb, gbre ijr ekʼɛl e leg a agb afŋn ɛy e lɛc ab es, toŋ ke sʼirmn owr anŋ ecʼↄmn fɛŋ. ⁹Ɛtŋ ɛy obi yɛji sʼuw any tasi eke si bʼow sʼuw. Ɛbɛn a, si kʼↄtum sʼocm ɛy ecʼↄmn sʼɛlum ɛy obi ɛm ij, kↄ Nyam eke bʼigbm agŋ luw ɛm a sↄny coco ɛm si kʼoc sʼɛlu. ¹⁰Nyam anake ↄny oc ɛy es luw na ɛm a ɛtŋ ɛmɛny li bʼow nʼↄny lʼoc ɛy es. Ɛɛ, sʼↄny ↄmn in ɛm eke ɛmɛny li bʼow nʼↄny lʼoc ɛy es. ¹¹Ɔny yɛji, eke bi ŋↄŋan Nyam ↄŋn ɛy, ke abu ɛlumn ɛy a. Ɛtŋ si bʼow sʼɛŋn bibm Nyam ɛm, agŋ nↄnↄ eci ŋↄŋn a sosiɛm. Ɛtŋ na sosiɛm agŋ nↄnↄ bʼow ↄtu ↄŋ Nyam bia ɛy eci.

Pↄl itŋn in ecʼusu im ecʼów a eke li bɛbm a

¹²Eke low nyam anŋ eke kʼↄŋ ntotŋ ok ɛy, ke ɛy ecʼów tutr a ecʼów eke ókm ɛy af a. Nʼam dad ɛy tasi eke si kok low ɛlum ɛm lele nɛnyɛmbri nyam ɛm ab agŋ fɛŋ ab, ab brobro ↄny e lís. Na low ekʼanŋ Nyam ogŋ ow, Nyam eci ɛrm mamn a anake nyimn ɛy a, kↄ ow elm agŋ e sɛwr a gbɛ. ^13-14Tasi ɛm a, awal yecʼa eke si nↄn ɛy e silɛl ab ɛm a, irir ɛtŋ si lↄlam ↄny low kaka es ɛm yogŋ. Low nyam gbɛ anŋ eke irimn okm ↄny es sos ɛm, kↄ mʼam ↄny ↄmn eke ow bʼow ok ↄny es sos ɛm tasi: lɛgŋ a eke Ɛs Kↄtↄkↄ Jesu bʼow ow a,1.13-14 lɛgŋ a eke Ɛs Kↄtↄkↄ Jesu bʼow ow a:ɛ̀kn 1 Tesaloni 2.19-20. ntotŋ bʼow ok ↄny ɛy eci, ɛsɛ elel eke ɛy yɛji ow bʼow ok ɛy ↄny ecʼab af.

^15-16Eke mʼuw ↄny eci ntotŋ ab any tasi a, mi bɛbm eke mi kʼikŋ anym mʼɛc ↄny ogŋ a, ke mʼanŋ yogŋ mʼim Maseduan, ba ɛm e mɛny ɛwl ow ɛm a, ke mi gbár es ↄny ogŋ yogŋ. Ɛbɛn a, ow bʼow ↄŋ ↄny abusu kokr sos ɛm iŋn sakp yony ɛtŋ bʼow ɛlumnʼm abu mʼim Jude. 1.16 Pↄl ↄny tutr eke kʼim Korɛnt (ɛ̀kn 1 Korɛnt 16.5-9); aŋa nʼam otar low a nuŋ af eke li kʼɛwlm li kʼowm li kʼɛknm wɛl a akr (ɛ̀kn akr 23-24 ɛm a).¹⁷Eke mi bɛbm low na a, kↄ mi tutrm ów ee? Oglog eke mi bi bɛbm ów a, kↄ ɛm obi ecʼerur a eke mi ki kok a sosiɛm mi bʼɛgŋ “ɛɛ”, ke ɛmɛny mʼítŋn mʼɛsɛ “njaŋ” ee? ¹⁸Mʼam eb Nyam daŋku, odad eke sʼam dad ↄny a, elm “ɛɛ” lele “njaŋ” ab. ¹⁹Silas, Timote lele ɛm ab, sʼↄb ↄny Nyam Jim Jesu Krist ecʼamani a. Ow akpl ke úwr any eke Jesu elm “ɛɛ” lele “njaŋ” ab, kↄ sɛgŋ fɛŋ “ɛɛ” cɛ li bʼel. ²⁰Tasi ɛm a, Jesu el ów a fɛŋ eke Nyam ɛwar ɛy ɛw es a eci “ɛɛ”. Ɛtŋ Jesu ɛm anake si bi dad ɛy eci “amɛn” a, ke si bi kↄklm Nyam ecʼanygbɛl a. ²¹Nyam in obi anake bʼↄŋ ke ↄny lele ɛy ab, si bʼↄny lɛc Krist ɛm a. In anake li sↄsum lʼot ɛy, ²²ke lʼɛw ɛy in e mɛny ɛwr a ekʼam yɛgm eke sʼel in ecʼa af a. Lʼoc Abŋ Lala lʼɛlu ɛy ɛrm ɛm, eke kʼel aja a eke li bʼow nʼↄŋ ɛy a eci asmanu.

²³Bla sosiɛm ɛtŋ mi kʼɛwlm mi kʼowm Korɛnt ee? Mʼam eb Nyam daŋku, lʼuwʼm any ɛtŋ lʼuw any eke mʼↄnym yadŋ. Mi kʼowm, aŋke mʼerurm eke mi kʼijr ↄny gbre. ²⁴Sʼↄlm eke si kʼↄŋ ↄny low lɛc ɛm ubr nawrɛ. Tasi ɛm a, ijr lɛc ↄmn ɛm, gbɛkↄ sʼam erur eke si kʼokr af si kok juma ↄny e sos ɛm iŋn a eci.

¹Kin low yecʼeke mi bɛbm a: mʼerurm eke mi kʼɛwl mʼow ↄny ogŋ yogŋ, eke ɛmɛny ow bʼow ↄwr ↄny sos es. 2.1 eke ɛmɛny ow bʼow ↄwr ↄny sos es:low any uw ɛsɛl bɛb tutr eke Pↄl im Korɛnt kok sɛgŋ abi ka eke ni nↄn 1 Korɛnt uwr a (ɛ̀kn 2 Korɛnt 13.1). Gbɛkↄ wɛl ebm Pↄl sɛnyn sɛnyn ɛtŋ Nyamel ecʼɛgŋ nyam kokʼr ɛ́s eke Nyamel dadm low kaka (ɛ̀kn akr 5 toŋ akr 11 ɛm a).²Eke ɛm mʼↄwr ↄny sos es, ke bwo ecʼɛgŋ bʼow ↄŋʼm sos ɛm iŋn, eke ow elm ↄny a cɛ eke mʼↄwr ↄny sos es ab ee? ³Mʼerurm eke mi kʼow mʼɛkn ↄny, ke mʼↄwr ↄny sos es. Ow akplm ekʼagŋ a ekʼit eke kʼↄŋʼm sos ɛm iŋn a, kʼel agŋ a eke bʼↄwrʼm sos es a. Na ecʼanake mʼawŋ ↄny lɛl es abal el a. 2.3 Pↄl am dad lɛl nyam eke nʼawŋ wɛl a e low. Lɛl a, sʼuwm yogŋ nuŋ nyam eke lʼɛy ab any. Mʼuw any tasi eke low yecʼeke bʼↄŋʼm sos ɛm iŋn a, ↄny yɛji bʼↄŋ ↄny sos ɛm iŋn. ⁴Ɛɛ, mikŋ ab mi nↄn lɛl a mʼawŋ ↄny, sos es ↄw lel ɛrm mij ab iyʼm ɛrm ɛm gbↄŋ. Gbɛkↄ mʼawŋm ↄny lɛl a eke mi kʼↄwr ↄny sos es, mʼawŋ ↄny yecʼɛtŋ ke ɛ́kan erur ligbɛl a eke mʼↄny ↄny ecʼa.

Pↄl am oc low ap ɛgŋ a eke wɛwrʼr a

⁵Nawrɛ, ɛgŋ na eke is sos es ↄw owi na a, ow elm ów a mʼerurm eke mi kʼagbr gbɛ, kↄ mʼam dad mʼɛsɛ li kok Nyamel low ŋuŋ lʼakm ɛm obi a. Ɛtŋ ekʼow elm ↄny fɛŋ yɛji, ↄny ɛm ecʼagŋ bɛb gbɛ low a ↄn es. ⁶Ɛgŋ ikŋ a ecʼa, abr a cɛ eke ↄny ɛm ecʼagŋ ɛnymʼn a ↄdŋ cɛ ŋ̂. ⁷Ow sosiɛm, caca ɛm a, ow akpl eke kʼocr apr ir ke atar ir sos es; ekʼow elm ɛbɛn, sos es ↄw ligbɛl ↄtu eke kʼↄwrʼr sos es nimum nimum. ⁸Sica mʼam ibrm eke kʼɛlul erur ↄkm in e lís. ⁹Tasi ɛm a, kin low a nuŋ af eke mʼawŋ ↄny lɛl a: mʼerur eke mi kʼɛkn eke bʼow ↄnyn ɛlumn low low fɛŋ ɛm. ¹⁰Eke bʼapr ɛgŋ low, ɛm yɛji mi bʼapʼr. Eke low anŋ eke mi kʼap yɛji, mi bʼoc mʼap ↄny sosiɛm, Krist ecʼany af. ¹¹Ɛtŋ nɛnɛ a, Satan ↄ́tum ɛjum ɛy. Ɛɛ, sʼuw in e sow tutr ab any tasi.

Pↄl im Troas ɛb ɛm

¹²Eke mʼim mʼɛy Troas ɛb ɛm, Krist ecʼAmani Mamn a ecʼↄb ecʼa, Ɛs Kↄtↄkↄ ↄŋʼm mʼɛŋn juma na e kok ecʼabusu mamn. ¹³Gbɛkↄ mʼↄny ɛrmij nↄnↄ, aŋke mʼↄtum mʼɛŋnm ɛy lisijim Tit. Na sosiɛm mʼibrm Troas ecʼagŋ a abusu ɛtŋ mʼeb ejagb mʼim Maseduan wus af.

Jesu Krist bʼeb any ↄŋ ɛy

¹⁴Sʼↄ́ŋn Nyam bia! Sɛgŋ fɛŋ, li bʼɛcr Krist ɛm lʼot lʼok ɛy in ecʼagŋ a ekʼeb any ke am ij facue ab ɛm, ɛtŋ li bʼɛcr ɛy ɛm nʼↄ́ŋ wɛl uw Krist any usu a fɛŋ. Ow anŋ ɛsɛ sↄsŋ mamn eke bʼeb es usu a fɛŋ af. 2.14 Ow anŋ ɛsɛ sↄsŋ mamn eke bʼeb es usu a fɛŋ af:eke wɛl bʼogŋ ar uwr a, ar ogŋ ɛsɛl a eke eb any a bʼↄsŋ es, ɛl e madu a eke -nʼↄnyn ar ɛm a anŋ ɛl jam, ke -nʼam ok baŋn. Ɛb eyŋ a sos ɛm iŋn ɛm, bi kpakpab suw amamn ám wↄwl ɛbɛrŋ ɛm a ke ám ofŋ sɛkp sŋↄsŋↄ. Sↄsŋ mamn a eke bʼↄsŋ ok ↄkm a akpl agŋ a ekʼeb any a eci; kↄ madu a ecʼa, ow bʼel luw e sↄsŋ.¹⁵Ɛɛ, ɛy sʼanŋ ɛsɛ mijey sŋↄsŋↄ eke Krist am ↄŋ Nyam af. Ɛtŋ ow eci sↄsŋ a ok sakp yony: agŋ a ekʼanŋ sel ɛŋn ecʼejagb ab af a lele ɛl a ekʼam irmn ɛl e sel ab ab eci. ¹⁶Agŋ a ekʼam irm ecʼa, ow el luw e sↄsŋ eke bʼism luw ab. Kↄ agŋ likpr a ecʼa, ow el owr anŋ e sↄsŋ eke bʼism owr anŋ ab. Ɛtŋ kↄ bwo ecʼɛgŋ ↄny abusu eke ki kok juma nɛnɛ ee? ¹⁷Ɛy sʼanm ɛsɛ agŋ nↄnↄ gbɛl eke bʼoc Nyam odad am ↄↄl an, os eke -li kʼɛŋn sosiɛm ecʼab af. Ɛy, Nyam am ɛkn eke sʼam dad odad eke bʼanŋ in ogŋ ow a nɛny nyam ɛm, ɛtŋ sʼam dad lele Krist ecʼabusu ab ab.

Sinm owr a e juma kok ɛsɛl

¹Nɛnɛ eke sʼam dad a, kↄ ɛy obi ɛy obi sʼam aw abusu sʼeb ab ee? Agŋ bɛb ecʼa ow it eke -li ki yɛgm ↄny ɛl ecʼabusu ↄny e silɛl oglog -lʼibrm ↄny e lís. Kↄ ɛy yɛji ɛbɛn si ki kok ab ee? ²Ɛy e lɛl a, ow ow el ↄny. Ɛy e mɛrm ab ɛm wɛl nↄn, agŋ a fɛŋ uw any ɛtŋ bʼawl. ³Ɛɛ, ow ayl, Krist in obi nↄn lɛl na, ɛtŋ ɛy anake sʼoc sʼow a. Nʼanm ɛsɛ lɛl eke wɛl oc lɛl mij nↄn ab af, kↄ Nyam ekʼanŋ owr ecʼAbŋ a lʼoc ni nↄn. Ow elm lebn af ni nↄnm, 3.3 Aŋa, Mois ecʼol a e low Pↄl am tutr. Ɛ̀kn Ɔkm Ok 24.12. Kokoba ↄb ɛs Jeremi dad eke Nyam in bʼow in nↄn ol owr a agŋ e mɛrm ab ɛm. Ɛ̀kn Jeremi 31.33; Ezekiɛl 11.19; 36.26-27. kↄ agŋ e mɛrm ab ɛm ni nↄn.

⁴Nyam ecʼany af a, sʼↄny ↄmn low na ɛm, aŋke Krist ↄŋ ɛy ↄmn ↄny ligbɛl. ⁵Si kí tutrm eke si kʼↄny abusu si kok low ɛy sↄny coco, kↄ Nyam anake ↄŋ ɛy sʼↄny abusu si kok low a eke sʼam kok a. ⁶In anake nʼↄŋ ɛy sʼↄny abusu sʼam kok sinm owr na e juma a. Sinm na anm ol eke wɛl nↄn a e low ɛm, kↄ Abŋ Lala e low ɛm nʼanŋ. Ol eke wɛl nↄn a bʼism luw ab, kↄ Abŋ Lala, in, bʼism sel ab.

⁷Ol a eci sodad a lebn af wɛl nↄn, ɛtŋ luw cɛ lʼism ab. Gbɛkↄ ɛbɛn yɛji, Nyam ecʼanygbɛl a jɛjn Mois ecʼany ab af. In ecʼany a am jɛjn afŋn es toŋ Israɛl ecʼey a ↄ́tum eke ki lɛrʼr, eke jɛjn a ↄb nuŋ am is es a bↄbↄ yɛji. 3.7 Ɛ̀kn Ɔkm Ok 34.29.⁸Gbɛkↄ Abŋ Lala e juma a eke am kok a bʼow ɛŋn anygbɛl agb akm na. ⁹Eke ol eke bʼism agŋ luw ab a e juma a ɛŋn anygbɛl ligbɛl, ow ayl tasi eke Abŋ Lala eke bʼↄŋ agŋ el nyim nyim a eci juma a, bʼow ɛŋn anygbɛl eke bʼow agb nↄnↄ ligbɛl. ¹⁰Ow ↄŋ a, anygbɛl a eke lɛgŋ sig ɛm a jɛjn a, elm low kaka ij anygbɛl liplemu na ecʼany af. ¹¹Eke ów a eke íbnm a anygbɛl iy ɛm gbↄŋ, ɛbɛn ke ɛl a eke bibn a, bʼow ɛŋn anygbɛl ekʼagb nↄnↄ ligbɛl.

¹²Low ↄmn na ab, sʼↄny ↄmn iy ɛy ɛm gbↄŋ. ¹³Ɛy si kókm ɛsɛ Mois eke oc gbad bubur any es, yecʼɛtŋ ke Israɛl ecʼey a kʼↄ́nym abusu ɛknm anygbɛl a e jɛjn a eke ibnm, ke am uwr a. ¹⁴Gbɛkↄ ɛl e nuŋ ɛm ↄny a ↄ́tum irim low kaka. Ɛtŋ toŋ yɛfɛnyna ɛm, eke -li bʼawl sinm sig e silɛl a, 3.14 sinm sig e silɛl a:ɛl -lʼel Amani Sig e silɛl a. gbad nyam a cɛ ɛmɛny bi bubur ów a es, aŋke gbad a, Krist ab ecʼaf okr a cɛ bʼↄny ocʼr es. ¹⁵Tasi ɛm a, toŋ yɛfɛnyna ɛm, sakp sakp fɛŋ eke Israɛl eyŋ bʼawl Mois e silɛl a, gbad nyam bi bubur ɛl e nuŋ ɛm ↄny ab es. ¹⁶Gbɛkↄ sakp sakp fɛŋ eke ɛgŋ nyam bʼɛwl ow Ɛs Kↄtↄkↄ ogŋ a, gbad a bʼoc es. 3.16 Ɛ̀kn Ɔkm Ok 34.34.¹⁷Odad na eke el “Ɛs Kↄtↄkↄ” a, ke Abŋ Lala ana. Ɛtŋ eke Ɛs Kↄtↄkↄ ecʼAbŋ a anŋ usu nyam, in anake li bʼↄŋ ɛy sʼŋgboŋ ɛy e madu el ab ɛm a. ¹⁸Ɛy fɛŋ ecʼany a gbɛ gbad anm buburm es, ɛtŋ Ɛs Kↄtↄkↄ ecʼanygbɛl a am ↄŋʼn li jɛjn ɛsɛ akrↄŋnↄ ɛm ɛs am lɛr af. Ɛtŋ Ɛs Kↄtↄkↄ ekʼel Abŋ a bʼitŋn ɛy. Li bʼↄŋ sʼanŋ ɛsɛ in af, anygbɛl ligbɛl nyam eke sɛgŋ fɛŋ anŋ ɛsɛ in ecʼab af ab ɛm.

Jesu ab sʼam ijr gbre

¹Nyam, in ecʼɛrm mamn ab ɛm, abul ɛy juma na; ow sosiɛm anake sos ↄwm ɛy es a. ²Ɛy si wal yadŋ owi fɛŋ eke wɛl bʼoc kokr ɛ́s owi es lↄl ɛm a sʼɛlu es. Sʼam kok low nɛnyɛmbri nyam ɛm ɛtŋ sʼↄ́nym Nyam ecʼodad ebl a sʼitŋnm. Kↄ nana, si bʼɛlu low nawrɛ ↄkm kpata, ɛtŋ ɛbɛn a, ow bʼↄŋ agŋ fɛŋ ɛl e tutr ab ɛm, bʼuw agŋ yecʼeke sʼel ab any. ³Gbɛkↄ ɛbɛn yɛji, ɛy ecʼAmani Mamn a bʼel ob eke lↄl es agŋ bɛb a eke am irmn ɛl e sel a eci. ⁴-Nʼↄnymn ↄmn aŋke Satan, wus na e nyàm ŋuŋ a efal ɛl e nuŋ ɛm ↄny a any, ɛtŋ ow ↄŋ -lʼɛknmn Amani Mamn ab ɛm ecʼusuayl a eke am jɛjn ow a. Amani Mamn a am dad Krist ekʼin obi a el Nyam ecʼes otarir kpɛŋ ecʼanygbɛl a ecʼodad. ⁵Tasi ɛm a, amani a eke sʼam ↄb a, ow elm ɛy obi, kↄ Ɛs Kↄtↄkↄ Jesu Krist sʼam ↄb. Ɛtŋ ɛy, sʼel ↄny e juma kok ɛsɛl Jesu Krist sosiɛm. ⁶Nyam dad ninɛ: ke usuayl áfŋ ncebn ecʼaraŋn!4.6 Ɛ̀kn Nuŋ Ɔb 1.3. Ɛtŋ ow el in obi eke lʼafŋ ɛy e mɛrm ab ɛm ɛy ecʼes ɛkan eci, ke nʼↄŋ ɛy sʼɛkn in ecʼanygbɛl a ekʼam jɛjn Krist ecʼany a.

⁷Gbɛkↄ ɛy eke sʼam abu ob ↄny na a, sʼanŋ ɛsɛ kpeŋ ɛm mɛw af. Ow bʼↄŋ wɛl bʼuw any sɛnyn sɛnyn eke abusu gbɛl na ow elm ɛy ɛm ow ánm ɛym ↄkm, kↄ Nyam ogŋ a ow bʼanŋ ow. ⁸Ses babur bʼeb ɛy susu fɛŋ, gbɛkↄ -li kiknmn ɛy es. Ɛtŋ eke si bʼanŋ sel at ɛm a bↄbↄ yɛji, sʼígŋm low a sʼɛlum es. ⁹Wɛl bʼijr ɛy gbre ɛy ecʼↄmn a sosiɛm, gbɛkↄ Nyam ígŋm ɛlum ɛy es. Wɛl bʼↄny ok ɛy wus, kↄ sʼúwm gbɛ. ¹⁰Gbre ij na ɛm, si bʼuw Jesu e luw a ekʼanŋ ɛy sos megl ɛm ab any, yecʼɛtŋ ke sʼↄ́tu sʼuw in ecʼowr anŋ a ekʼanŋ ɛy sos megl ɛm a yɛji any. ¹¹Tasi ɛm a, sʼanŋ owr, gbɛkↄ sɛgŋ fɛŋ si bʼↄny low luw ab eke sʼam us Jesu jam a sosiɛm. Ɛtŋ ɛbɛn a yɛji, ow bʼↄŋ wɛl bʼɛkn eke Jesu anŋ owr ɛy e sos megl a eke bʼuw ab ɛm. ¹²Low eke wɛl bʼɛkn ɛm a el: luw eke am kok low ɛy ɛm, ke owr anŋ in am kok low ↄny ɛm a.

¹³Nyam Lɛl dad ninɛ: Mʼↄny ↄmn, ow sosiɛm mi dad.4.13 Ɛ̀kn Selu 116.10. Ɔmn nyam a cɛ bʼↄŋ ɛy si kok low. Ɛy yɛji sʼↄny ↄmn, ow sosiɛm sʼam dad. ¹⁴Ɛɛ, sʼuw any eke Nyam ekʼigbm Ɛs Kↄtↄkↄ Jesu luw ɛm a, ɛy yɛji bʼow igbm ɛy luw ɛm in ab, ɛtŋ ↄny lel ɛy ab, li bʼow lʼot lʼok ɛy es ow e saw. ¹⁵Gbre fɛŋ eke sʼam ij a ↄny sosiɛm, yecʼɛtŋ ke Nyam ecʼów amamn a eke am agb eb es a, ↄ́ŋ sɛgŋ fɛŋ am ɛnyn nↄnↄ ↄŋn in bia, ke ókar af ↄny fɛŋ kↄklmn in.

Sos ↄ́wm ɛy es luw ecʼany af

¹⁶Na sosiɛm anake sos ↄ́wm ɛy es a. Ɛtŋ eke ɛy e sos megl a am uŋ tɛl tɛl yɛji, yecʼa ekʼel ɛy ecʼabŋ ɛm ecʼa, lɛgŋni nyam nyam fɛŋ bʼel owr. ¹⁷Ɛɛ, ɛy e yɛfɛnyna ɛm e gbre ij nↄnↄ a ɛw fuɛfuɛ ɛtŋ bibn sɛgŋ tɛl cɛ, gbɛkↄ ow bi bɛbm anygbɛl liplemu nyam ɛy eci. Anygbɛl ikŋ a bʼanŋ sɛgŋ fɛŋ ɛtŋ lʼagb nↄnↄ lʼakm ɛy e yɛfɛnyna e gbre ij a fɛŋ. ¹⁸Ɛy, sʼↄ́lm yecʼa eke wɛl ↄtu eke kʼɛkn ab es, kↄ yecʼa eke wɛl ɛ́knm a sʼam ↄl es. Tasi ɛm a, yecʼa eke wɛl ↄtu eke kʼɛkn a íbnm nↄnↄ, kↄ yecʼa eke wɛl ɛ́knm a bʼanŋ sɛgŋ fɛŋ.

Afr e sos megl a e low

¹Wus af aŋa, sʼir sos megl nyam ekʼanŋ ɛsɛ ndey lɛl ɛm êl 5.1 ndey lɛl ɛm êl:ow el êl mum nyam eke wɛl bi kok ndey lɛl ɛm oglog gbad ɛm, eke wɛl kʼↄnym êl tasi eke kʼɛru ɛm a. Pↄl in obi yɛji, kok mel akpasu na e juma. eke lɛgŋ nyam bʼow ufŋ es ab ɛm. Gbɛkↄ sʼuw any eke afr Nyam ɛw ɛy êl nyam eke bʼow anŋ sɛgŋ fɛŋ ab es. Êl eke Nyam us in obi, ke ow elm agŋ ecʼabu usm. ²Sicaca ɛm a, sʼam ikŋn sↄmu, 5.2 sʼam ikŋ sↄmu:Bɛ̀bmn Rom 8.23. ɛtŋ sʼam ↄↄl ɛy e lɛc fɛŋ ɛm eke si kʼoc mob sus ɛm ɛjecʼa sʼɛw sos af, mob sus ɛm a ekʼel ɛy ecʼafr ecʼêl a. ³Ɛɛ, low na anake sʼam ↄↄl es a, yecʼɛtŋ ke si kʼélmn abŋ eke ↄnym sos megl. ⁴Lɛgŋ na ɛm eke sʼiir ɛy e wus aŋa ecʼêl ab ɛm a, sʼam ikŋn sↄmu ɛsɛ ɛrɛkp leg leg ecʼew ɛs anŋ af. Ow elm ke sʼam erur eke si kʼuw ke si kʼↄnymn sos megl eci. Njaŋ, sʼam erur eke si ki sus ɛy ecʼafr e sos megl a ɛsɛ mob sus ɛm af, yecʼɛtŋ ke sel ekʼↄnym uwr a ↄ́ny ɛy e sos megl a eke bʼuw a ɛmn. ⁵Nyam in obi anake bɛbm ɛy ɛb ir na eci sos a. Ɛtŋ nʼↄŋ ɛy Abŋ Lala eke el aja a eke li bʼow nʼↄŋ ɛy a eci asmanu.

⁶Ow sosiɛm a, sɛgŋ fɛŋ sos es atr iy ɛy ɛm gbↄŋ. Gbɛkↄ ɛy sʼuw any, lɛgŋ na ɛm eke sʼiir ɛy e sos megl na ɛm a, si kpab es Ɛs Kↄtↄkↄ e lís. ⁷Tasi ɛm a, ↄmn ɛm sʼam ir ɛb, kↄ ow elm es eke sʼam ɛkn ab ɛm. ⁸Ɛɛ, sos es atr iy ɛy ɛm gbↄŋ ɛtŋ sʼam erur tasi eke si kʼŋgboŋ sos megl na ɛm, sʼim sʼir ɛb Ɛs Kↄtↄkↄ eci saw. ⁹Gbɛkↄ low krɛkrɛ eke sʼam erur a el ke ɛy owi awʼr, eke sʼanŋ sos megl na ɛm ɛtŋ sʼanm ɛm yɛji. ¹⁰Ɛy fɛŋ ow ibrm eke si bʼow sʼimn Krist e jɛj ok a ecʼany af, yecʼɛtŋ ke ɛgŋ ɛgŋ ɛ́ŋn yecʼa ekʼit eke kʼɛbmn, in ecʼów amamn lel eŋuŋ eke li kok in e wus aŋa ecʼɛb ir ab ɛm a. 5.10 Bɛ̀bmn Rom 14.10.

Nyam ɛcr Krist ɛm ↄny okr ɛy ɛm in ab

¹¹Ɛ́lum Nyam ↄmn ɛm a, sʼuw low yecʼeke ow am dad ab any. Na sosiɛm anake sʼam ↄl elel eke si ki dadr ow e low ok agŋ es sos ɛm a. Nyam uw ɛy any igŋ nuŋ ɛtŋ lʼuw any eke sʼↄny nɛny nyam, ↄny yɛji mʼam ↄmn eke ↄny e mɛrm ab ɛm, uwr any ɛbɛn. ¹²Ɛy, ɛmɛny si kʼow sʼↄlm eke si kʼaw abusu sʼeb, kↄ sʼam erur eke si kʼↄŋ ↄny abusu ntotŋ ok ↄny ɛy eci, yecʼɛtŋ ke ↄ́nyn low dadr ↄŋn agŋ a eke bʼɛw sos ów eke wɛl bʼɛkn nyamn ɛm a eci, ke ow elm ów a eke bʼanŋ ɛgŋ ɛrm ɛm ecʼa. ¹³Eke agŋ am dad eke eŋ ɛm in uŋ ɛy, ke Nyam sosiɛm eci. Ɛtŋ eke wɛl am ot ɛy ány es oku, ke ↄny e low nimamn eci. ¹⁴Erur eke Krist ↄny ɛy ecʼa am ucu ↄny ɛy es, aŋke sʼuw any tasi eke ɛgŋ nyam cɛ uw agŋ fɛŋ eci; ɛgŋ a el Krist, ɛtŋ ɛy fɛŋ in e luw a el ɛy eci. ¹⁵Lʼuw ɛy fɛŋ eci, yecʼɛtŋ ke agŋ ekʼanŋ owr a kʼírm ɛb ɛl obi ɛl obi ecʼij, kↄ ke -lʼir ɛb Krist ekʼuw ke igb luw ɛm ɛl ecʼa eci.

¹⁶Low na sosiɛm anake jam aŋa, si kʼow si lɛrm ɛgŋ ɛsɛ elel ekʼagŋ bi lɛɛr ɛgŋ ab af a. Ɛtŋ ekʼow el ɛbɛn anake si lɛr Krist a, ke jam aŋa, ow elm ɛbɛn sʼam lɛrmʼn ij. ¹⁷Ow sosiɛm, eke ɛgŋ nyam okr af Krist ab, nʼanŋ ɛsɛ ɛgŋ eke Nyam kokr ɛm af. Low yecʼeke el lisig a uwr, ɛtŋ yecʼa ekʼel owr a eb usu. ¹⁸Amua fɛŋ Nyam ogŋ ow bʼanŋ ow. Lʼɛcr Krist ɛm nʼↄny lʼokr ɛy ɛm in obi in obi ab, ɛtŋ lʼabul ɛy agŋ ɛjecʼa lele in ab ecʼɛm okr a e juma. ¹⁹Nawrɛ, Nyam ɛrm Krist ow in lele agŋ ab ecʼɛm okr a eci, ɛtŋ lʼúsm wɛl ecʼów ↄbr in e lís a e low jam ij. Ɛtŋ lʼabul ɛy in ecʼɛm okr ecʼamani ↄb a.

²⁰Ɛy sʼanŋ ɛsɛ ɛ́rmu eke Krist am ɛrm af. Ɛtŋ Nyam bʼɛcr ɛy ɛm dad ↄny odad ɛsɛ: «Krist e nin ɛm, sʼam ok ↄny mɛrm sabu af, yɛ̀br Nyam ↄny ↄkr ↄny ɛm in ab!» ²¹Krist ↄnym sikpl kaka, gbɛkↄ Nyam ↄbʼr low luw eci ɛsɛ sikpl ɛs af ɛy usu iy, yecʼɛtŋ ke si bʼokr af Krist ab a, Nyam ót ɛy ɛsɛ agŋ nyim nyim af.

¹Sica ɛy eke sʼam kok juma Nyam ab a, sʼam dad ↄny eke kʼocr bibm a ekʼɛŋan in ecʼabu ɛm a kokar low sɛnyn. ²Tasi ɛm a, Nyam dad ninɛ:

Lɛgŋ mamn ɛm a, mʼɛgŋʼŋ nɛnym,

ɛtŋ sel ɛŋn e lɛgŋ a yɛji, mʼeb mʼɛluʼŋ es. 6.2 Ɛ̀kn Esayi 49.8.

Sica yɛfɛnyna tasi anake el lɛgŋ mamn a, yɛfɛnyna anake el sel ɛŋn e lɛgŋ a.

³Eke sʼerurm ekʼagŋ ki cak ɛy e juma a, ow ↄŋ ɛy e low fɛŋ ɛm, si kok elel eke si kʼelm lirikp ɛgŋ kaka fɛŋ eci. ⁴Kↄ nana, si bi yɛgm low fɛŋ ɛm eke sʼel Nyam e juma kok ɛsɛl. Ɛtŋ ɛbɛn a, si bʼɛgŋ ɛrm susu ɛm sos es ↄw, ses babur, ɛrm mij ebr, ⁵ↄr eke wɛl bʼↄr ɛy, sobel ɛm eke wɛl bʼok ɛy lele dedeku ecʼaf eke bʼok ɛy ab ab e low sʼeb. Si bʼɛgŋ sos es kikn ɛrŋ ɛrŋ, mɛmn ɛrum lele namn ab sʼeb. ⁶Si bʼir ɛb lala ɛm si yɛgm eke sʼuw Nyam e lís ecʼów any; sʼↄny low eku, sʼel ɛrm mamnu, Abŋ Lala anŋ ɛy ab, sʼↄny erur tasi, ⁷ɛtŋ si bʼↄb low nawrɛ e kokoba, Nyam ecʼabusu ab ɛm. Si bʼoc yecʼa ekʼel nyim nyim Nyam ecʼany af a, ɛsɛ ar ogŋn ob af, sʼim agŋ ar oglog si dogŋn sos. ⁸Wɛl bʼusr ɛy sos oglog wɛl bi kok ɛy ɛ́s. Wɛl bi dad ɛy e low ŋuŋ lel ɛy e low mamn ab. Wɛl bʼot ɛy ayadŋu, ke low nawrɛ cɛ si bi dad. ⁹Wɛl bi kok ɛy ɛsɛ agŋ eke wɛl uwm any af, ke wɛl uw ɛy any sɛnyn sɛnyn cɛ. Wɛl bi lɛr ɛy ɛsɛ agŋ ekʼam uw af, gbɛkↄ si bʼanŋ owr sɛgŋ fɛŋ. Wɛl bʼↄr ɛy ɛy ecʼↄmn a sosiɛm, gbɛkↄ wɛl íbim ɛy. ¹⁰Wɛl bʼɛkn ɛy ɛsɛ agŋ eke sos ↄw es af, gbɛkↄ sɛgŋ fɛŋ si bʼanŋ sos ɛm iŋn ɛm. Wɛl bʼot ɛy ↄgbↄru, gbɛkↄ si bʼↄŋ agŋ ɛjecʼa ↄny ob. Wɛl bi tutr eke sʼↄnym ob kaka, ke ɛy nana anake sʼↄny ob fɛŋ a.

¹¹Korɛnt ecʼagŋ lisijimɛl, nɛnyɛmbri nyam ɛm si fig ɛy ecʼɛrm a si dad ↄny odad. ¹²Sʼablm ɛy ecʼɛrm a ↄny e lís, kↄ ↄny anake bʼabal ↄny ecʼa ɛy e lís a. ¹³Sica mʼam dad ↄny odad ɛsɛ iy ɛs lel in ecʼey ab af mʼɛsɛ: kòkr ɛsɛ ɛy af, ↄny yɛji fìgr ɛy ↄny e mɛrm a foŋ.

Èel cɛcɛ Nyam e lís

¹⁴Kʼɛ̀wr mɛcrer agŋ a ekʼↄnym ↄmn Nyam ɛm ab ab, kʼↄtumn okrmn ɛb ir af ɛl ab. Kↄ low nɛnyɛmbri nyam ↄtu eke kʼokr af ɛnyɛmbri yony owi eke Nyam érurm ab ab ee? Kↄ usuayl lele ncebn ab bʼↄtu okr af ee? ¹⁵Kↄ Krist nɛny ↄtu eke kʼokr af Satan ab ee? 6.15 Satan:odad ebl na Grɛk ɛm a Bɛliar. Grɛk ɛm ecʼodad ebl na otarir es Ebre ɛm ecʼodad na ab: Bɛlial, ow e nyandrɛ el “ob ↄfr ↄfr”. Jwifɛl oc odad ebl na ɛsɛ Satan e nin nyam af. Kↄ nawrɛ ub ɛs nyam lele nawrɛ ubm ɛs nyam ab ecʼaraŋn a low ↄtu eke kʼanŋ ee? ¹⁶Bogŋ ecʼiririr kʼanŋ Nyam ecʼêl a lele sinyam yadŋ ecʼab ab ecʼaraŋn ee? Ɛy anake sʼel Nyam ekʼanŋ owr ecʼêl a, ɛsɛ elel eke in obi li dad ninɛ:

Mi bʼow mʼanŋ ɛl araŋn ke mʼír ɛb ɛl ab.

Mi bʼow mʼel ɛl e Nyam ɛtŋ -li bʼow -lʼel ɛm ecʼagŋ.

¹⁷Ow sosiɛm Ɛs Kↄtↄkↄ dad ninɛ:

Ŋ̀gbroŋn agŋ amua ecʼaraŋn ke kpábr ɛl es lís!

Kʼìtŋnin ob yecʼeke aylm a abu,

ɛtŋ ɛm, mi bʼow mʼeb ↄny.

¹⁸Ɛtŋ ɛmɛny Nyam Abusu Ɛs dad ninɛ:

Mi bʼow mʼel ↄny Ɛs,

ɛtŋ ↄny bʼow el ɛm ecʼey egŋ lel ↄyↄw ab.6.16-18 Ɛ̀kn Ob Ap 26.12; 2 Samiɛl 7.14; Esayi 43.6; 52.11; Jeremi 31.9; Ezekiɛl 20.34; 37.27; Ose 2.1.

¹Erur ɛm ecʼagŋ lisijimɛl, ów ɛwar amua fɛŋ el ɛy eci. Ow sosiɛm a, si yↄ́yↄg ob fɛŋ eke bʼibar ɛy e sos a lel ɛrm ab ab a es, ke sʼéel Nyam eci nimum nimum ɛlum ɛm.

Pↄl sos ɛm am iŋn Nyam ecʼagŋ a ecʼitŋn a eci

²Kòkr ɛy usu ↄny e mɛrm ab ɛm! Si kokm ɛnyɛmbri yony yony owi ɛgŋ kaka e lís, si ŋuŋnm ɛgŋ kaka ecʼↄmn, ɛtŋ sʼebm ɛgŋ kaka ecʼob sʼijm. ³Mi dadm odad nɛnɛ low e mi kʼↄb ↄny eci. Ɛsɛ elel eke mʼikŋ anym mi dad ab af: ↄny owi anŋ ɛy ɛrm ɛm, ɛtŋ sʼokr af owr anŋ ɛm toŋ luw ɛm. ⁴Mʼↄny ↄmn ligbɛl ↄny ɛm ɛtŋ ntotŋ bʼokʼm ↄny eci. Eke sʼↄny ses babur nↄnↄ yɛji, mʼↄny sos es atr nↄnↄ ɛtŋ sos ɛm iŋn iyʼm ɛm gbↄŋ.

⁵Tasi ɛm a, eke sʼim sʼok Maseduan a, sʼɛŋnm sel es ok kaka. Kↄ nana, gbre ɛrŋ ɛrŋ sʼɛŋn ɛsɛ: agŋ eke ok ɛy af lele ɛrm ɛm ecʼerŋn ab. ⁶Gbɛkↄ Nyam eke bʼatr agŋ eke sos bʼↄw es a sos es a, atr ɛy sos es Tit ecʼow a ekʼanŋ ow ab ɛm. ⁷Ɛtŋ ow elm Tit ecʼow a sↄny cɛ atrm ɛy sos es, kↄ ↄny e sos a eke atar ir es ecʼamani a eke nʼↄŋ ɛy a yɛji. Li dad eke ↄny ↄnyn ɛm ecʼɛkn ecʼerur nↄnↄ. Ɛtŋ li dad ɛy ↄny e sos ɛm ɛy owi low a ekʼɛy a eci lele ɛm e dogŋn eke dogŋninʼm gbragbra kok ɛm ab ab. Ów amua anake ↄŋ ɛm e sos ɛm iŋn a agb nↄnↄ a.

⁸Tasi ɛm a, eke ɛm e lɛl es abal el a ↄwr ↄny sos es, ke ɛm, ow e low ɛym im sos ɛm ij. 7.8 Lɛl na eke Pↄl awŋ Korɛnt e Nyamel a sʼↄnym ow anm usu kaka. Lɛl a eke si bʼɛsŋ 1 Korɛnt a e jam anake ni nↄn lɛl na ekʼirm a. Ɛ̀kn 2 Korɛnt 2.3 lel ow ecʼakr otar ab ab. Ɛɛ, mʼuw any tasi eke lɛl a ↄwr ↄny sos es lɛgŋ tɛl eci, ɛtŋ nawrɛ ow e low ɛyʼm sos ɛm, ⁹gbɛkↄ caca ɛm a, mʼanŋ sos ɛm iŋn ɛm. Ow elm ↄny e sos es ↄw a sosiɛm, kↄ eke ↄny e sos es ↄw a ↄŋ ↄny itŋnin es an a sosiɛm. Sos es ↄw a eke Nyam bʼerur in ecʼagŋ ecʼab ana, ɛtŋ nɛnɛ a, ow am yɛgm eke si kokm ↄny low ŋuŋ. ¹⁰Tasi ɛm a, sos es ↄw a eke bʼakpl Nyam sos ɛm a, bʼↄŋ ɛy sʼitŋn es an ɛtŋ bi nyimn ɛy sel ɛŋn ɛm. Sos es ↄw nɛnɛ a ↄtum eke kʼɛy ɛy sos ɛm. Gbɛkↄ wus ecʼów ecʼɛrm mij ebr a eci sos es ↄw a, ekʼítŋnm ɛgŋ ecʼes an a, bi nyimn ɛgŋ luw ɛm. ¹¹Ɔny eci sos es ↄw a akpl Nyam sos ɛm. Sica lɛ̀ɛr ow ecʼey eke ow ↄsu: ow ↄŋ ↄny low es ogŋ kok lele low oc ap ecʼibrm ab! Ow ↄŋ ↄny low sos ɛm ɛy lele low uru low kok ɛm ab! Ow ↄŋ ↄny ɛm ecʼɛkn ecʼaw lele ɛm e dogŋn gbragbra kok ɛm ab! Ɛtŋ ow ↄŋ ↄny low ŋuŋ kok ɛs a eci low ɛw ↄŋ! Low na ɛm a, yɛgmn eke ↄnymn low af ok kaka.

¹²Sica mʼawŋm ↄny lɛl ɛgŋ a eke kok low ŋuŋ a sosiɛm oglog ɛgŋ a eke wɛl kok low ↄbr a sosiɛm. Kↄ mʼerur eke mi ki yɛgm ↄny Nyam ecʼany af, ɛkan eke bʼerurir ɛy owi tasi. ¹³Na anake el low ekʼatr ɛy sos es a.

Ɛtŋ sos es atr na e low ekʼigŋ af, ke obn ɛy e sos ɛm iŋn a el Tit eci sos ɛm iŋn a ekʼɛŋn a. Ɛɛ, ↄny fɛŋ ɛyar ir ɛrm es. ¹⁴Nawrɛ, in ecʼany af mi dad ↄny ecʼodad nɛny ij ɛm, ɛtŋ ↄↄmnʼm ɛ́s. Sɛgŋ fɛŋ si bi dad ↄny low nɛnyɛmbri nyam ɛm, ɛtŋ kin ow e low ekʼow ism ab: mʼↄny low ij eke mi dad ↄny e lís owi nɛny ij ɛm Tit ecʼany af. ¹⁵Nʼam ↄkn elel a eke ↄny fɛŋ ɛlumn low lele ↄny ecʼelel a eke ebr ir ɛlum ligbɛl ɛm lele sos ufŋ ɛm ab a. Ɛtŋ ow sosiɛm in ecʼerur a e nʼↄny ↄny ecʼa ɛmɛny agb obn. ¹⁶Sos ɛm am iŋnʼm eke mʼↄtu eke mi kʼↄmn ↄny low fɛŋ ɛm a.

Jerusalɛm ecʼↄmn ɛsɛl a ecʼabu ɛlum a

¹Agŋ lisijimɛl, kin yecʼeke sʼam erur eke kʼuwr any: Nyam ɛlu in ecʼɛrm mamn a ↄkm bibm eke nʼↄŋ Maseduan e Sinyamel ab ɛm. 8.1 Maseduan e Sinyamel:ow el Sinyamel ɛsɛ: Filip baŋn ecʼa, Tesaloni baŋn ecʼa lele oglog Bere baŋn ecʼab ab.²-Lʼↄbr ses babur nↄnↄ ɛsɛ ɛbm ɛkn af, gbɛkↄ ↄmn ɛsɛl a sos ɛm iŋn iy ɛm gbↄŋ. -Lʼij gbↄr nↄnↄ, gbɛkↄ -lʼɛlu ɛrm mamn ↄny nↄnↄ ↄkm ɛl ecʼob eke -lʼapr ab ɛm. ³-Nʼↄŋ yecʼa eke -lʼↄtur a, ɛtŋ -nʼↄŋ ow afŋ es yɛji, mʼij ow e daŋku. Ow elm lɛc ɛm wɛl ↄnym ɛl -nʼↄↄm; kↄ ɛl obi tasi ecʼerur ɛm -li kok. ⁴Tasi ɛm a, -lʼibrm ɛy atrm ɛm eke ɛl yɛji, ɛl ecʼabu kʼanŋ Jerusalɛm ecʼↄmn ɛsɛl a ecʼabu ɛlum owi ab ɛm. ⁵-Lʼikŋ anym -lʼocr ɛl sosi -nʼↄŋ Ɛs Kↄtↄkↄ, ɛtŋ ow e jam a, -lʼocr ɛl sosi -nʼↄŋ ɛy yɛji, ɛsɛ elel eke Ɛs Kↄtↄkↄ erur ab af. Ɛtŋ na el low eke sʼↄmnm kaka. ⁶Na sosiɛm anake sʼatr Tit sos es eke li kʼɛwl lʼow ↄny ogŋ yogŋ, ke lʼúwar ↄny ecʼɛrm mamn ↄny e juma mamn a eke lʼↄb nuŋ a. ⁷Ɔny ijr lɛc ów ów a fɛŋ ɛm: ijr lɛc ↄmn ɛm, Nyam odad dad ɛm, uwr Nyam ecʼów ab any, sɛgŋ fɛŋ bɛbmn sos low kok eci, ɛtŋ ↄnyn ɛy ecʼerur yɛji. Na sosiɛm, ow it eke ki yɛgmn ↄny e lɛc ij a, ↄny ecʼɛrm mamn ↄny ab ɛm yɛji.

⁸Ow elm ol mʼɛwm mʼↄↄm ↄny, kↄ Nyamel bɛb a ecʼelel eke gbragbra kok ɛm kokr low a cɛ mʼam dad ↄny. Nɛnɛ ke mʼↄ́ŋ ↄny abusu yɛgmn eke ↄny ecʼerur a el nawrɛ tasi. ⁹Tasi ɛm a, ↄny uwr ɛy Ɛs Kↄtↄkↄ Jesu Krist e bibm a lele ɛrm mamn ab ab any. Lʼel gbreŋgbi, gbɛkↄ ↄny sosiɛm lʼɛgŋ gbↄr lʼeb, yecʼɛtŋ ke in e gbↄr a ↄ́ŋ ↄny eel egbreŋgbi. ¹⁰Ɛm ecʼelel eke mʼam ɛkan low a el, ke kókr low a ekʼↄbr nuŋ lakpo jam a yibar, aŋke ↄny eel agŋ krɛkrɛ eke is ob ap na e tutr a, ɛtŋ ↄny cɛ eel ɛmɛny agŋ krɛkrɛ ekʼↄb nuŋ kok ow e low. ¹¹Eke isr ow e low a, yɛgmn ↄny ecʼerur ekʼↄnyn a. Ow sosiɛm erur nyam ab ɛm cɛ, ùcur low a ↄnyn es toŋ ke ígŋn nuŋ ɛgŋ ɛgŋ ecʼob ekʼↄny ab ɛm. ¹²Eke wɛl bʼↄŋ ɛrm frↄrↄ ɛm a, Nyam bʼɛkn ow e sʼↄny a ɛtŋ li bʼeb ow eke si bʼap a. Lʼíbram eke si kʼap ow eke sʼↄnym a.

¹³Ow elm ke wɛl ↄ́ŋ ↄny ijr gbↄr agŋ ɛjecʼa ecʼabu ɛlum a sosiɛm. Njaŋ, kpɛŋ kpɛŋ eke kʼeel a wɛl am ↄl. ¹⁴Lɛgŋ na ɛm a, ow a ekʼↄnyn bubu af a ↄtu eke kʼɛlum agŋ ɛjecʼa ekʼↄnym a abu, yecʼɛtŋ eke lɛgŋ nyam ↄnyn es abur ɛtŋ ɛl -nʼↄny ob nↄnↄ a, ke ɛl yɛji -lʼɛlum ↄny abu. Nɛnɛ ke ↄny fɛŋ éel kpɛŋ kpɛŋ. ¹⁵Nyam Lɛl dad ninɛ:

Ɛgŋ a eke ot nↄnↄ a, ↄnym ob ij afŋnm es.

Ɛgŋ a eke ot tɛl a, ↄpim ob ij lɛgŋ kaka. 8.15 Ɛ̀kn Ɔkm Ok 16.18.

Tit lele kretiɛnɛl ɛjecʼab im Korɛnt

¹⁶Mʼam ↄŋ Nyam bia, aŋke nʼↄŋ Tit gbragbra kok nyam a cɛ eke li kʼoc lʼɛlum ↄny abu, lʼakm ɛm obi ecʼa e mʼↄny a. ¹⁷Tit ɛgŋ ɛy ecʼɛrm a ekʼel ↄny ecʼow ɛkn a ɛmɛny eb, ɛtŋ nʼam ogŋ es eke kpɛkŋ li kʼow ↄny ogŋ yogŋ. ¹⁸Sʼam ↄŋʼn lʼow ɛgŋ lisijim nyam ab. Ɛgŋ lisijim a, Sinyamel a fɛŋ bʼawʼr, in ecʼAmani Mamn ecʼↄb e juma kok a sosiɛm. ¹⁹Ɛtŋ ow elm na cɛ! Sinyamel a sↄsum ocʼr, yecʼɛtŋ ke lʼígŋ ɛy ab sʼoc bibm na sʼim. Ow el juma eke si ki kok, ke ám ɛlu Ɛs Kↄtↄkↄ in obi ecʼanygbɛl ↄkm, ke ám yɛgm ɛy ecʼabu ɛlum ecʼerur e sʼↄny a. ²⁰Wɛl abul ɛy os nↄnↄ, ɛtŋ sʼam erur eke wɛl kí cakm ɛy ecʼelel eke sʼam kokr ow e juma a. ²¹Sʼam ↄl low yecʼeke akpl ab es, ɛtŋ ow elm Nyam ecʼany af cɛ, kↄ agŋ ecʼany af yɛji.

²²Sʼↄŋ ɛy lisijim nyam yɛji igŋ Tit lele ɛgŋ lisijim nyam a eke kʼɛwlʼl ab ab af. Ɛgŋ lisijim na yɛgm ɛy sakp nↄnↄ in ecʼelel eke li bʼerur tasi lʼɛlum agŋ ɛjeci abu a. Caca ɛm a, li bʼerur es ogŋ ɛm tasi lʼɛlum agŋ abu, aŋke nʼↄny ↄmn nↄnↄ ↄny ɛm. ²³Mʼam ↄŋ Tit ekʼel ɛm lawl ke bi kok juma ɛm ab ↄny sosiɛm ecʼa, lele agŋ lisijimɛl ɛjeci amua ekʼel Sinyamel ecʼɛrm ɛsɛl a ow ɛkn ↄny. Ɛl fɛŋ Krist ecʼanygbɛl a e juma -nʼam kok. ²⁴Ow sosiɛm yɛ̀gmn ɛl eke bʼerurir ɛl, yecʼɛtŋ ke ow ↄ́ŋ Sinyamel a úw any nawrɛ, ke -lʼɛkn yɛjʼeke ntotŋ ↄtu eke kʼok ɛy ↄny eci.

Nyam bʼerur ɛgŋ eke bʼↄŋ sos ɛm iŋn ɛm a

¹Jerusalɛm ecʼↄmn ɛsɛl a ecʼabu ɛlum eke wɛl kʼoc im ↄŋ ecʼa, 9.1 Ɛ̀kn Rom 15.25; 1 Korɛnt 16.1-4. ow ɛbam eke mi kʼawŋ ↄny ow e lɛl. ²Mʼuw ↄny e sow tutr amamn ab any. Maseduan ecʼagŋ lisijimɛl a ecʼany af, mʼij nɛny mi dad ɛl eke Akayi 9.2 Akayi:ɛ̀kn 2 Korɛnt 1.1 lel ow ecʼakr otar ab ab. ogog ecʼagŋ lisijimɛl a, lakpo jam ɛtŋ bɛbm sos abu ɛlum na ecʼos a eci. Ɛtŋ ↄny e low na eke ogŋn es ɛgŋn ebr a, atr agŋ nↄnↄ sos es. ³Ow sosiɛm mʼɛrm agŋ lisijimɛl amua, 9.3 agŋ lisijimɛl amua:aŋa Tit lele agŋ lisijimɛl yony ab ab e low wɛl am dad, ɛ̀kn 2 Korɛnt 8.17-24. yecʼɛtŋ ke -lʼɛkn tasi eke bɛbmn sos. Ow ↄ́ŋ ke wɛl ɛ́kn eke ɛy e nɛny a e sʼij ↄny ecʼa elm ↄfr ↄfr. ⁴Sica eke Maseduan ecʼagŋ igŋʼm ab ow ɛtŋ ɛkn eke bɛbamn sos, ow bʼow ↄny ɛy ɛ́s nↄnↄ eke sʼoc ↄmn sʼɛlu ↄny ɛm, ɛtŋ ↄny yɛji ow bʼow el ↄny ecʼɛ́s. ⁵Na sosiɛm mʼↄny tutr eke ow akpl ke mʼíkŋ anym mʼↄŋ agŋ lisijimɛl amua ów ↄny ecʼaraŋn bɛ́bm ob ap mamn a eke dadr ow e low ɛwr es a, ba mi bʼanŋ mʼow a, ke fɛŋ iy nɛny ŋ̂, ke wɛl ɛ́kn eke ow el ɛrm frↄrↄ ɛm ↄŋn, kↄ ow elm atrm ɛm.

⁶Kin yecʼekʼit eke kʼuwr any: ɛgŋ eke bʼewl tɛl a, bʼub tɛl, ɛtŋ ɛgŋ eke bʼewl nↄnↄ a, bʼub nↄnↄ. ⁷Ow akpl ekʼɛgŋ ɛgŋ kʼↄŋ ɛsɛ elel eke li tutr in ecʼɛrm ɛm ab af, ow kʼelm sos es ↄw ɛm lele atrm ɛm ab. Tasi ɛm, Nyam bʼerur ɛgŋ eke bʼↄŋ sos ɛm iŋn ɛm a. ⁸Nyam ↄny abusu eke kʼↄŋ ↄny ów amamn fɛŋ ow afŋn ↄny es. Ow ↄ́ŋ sɛgŋ fɛŋ ↄnyn ow ekʼit a, ke ↄ́nyn ow bubu af, ócr kokr ów amamn. ⁹Nyam Lɛl dad Nyam ecʼɛgŋ e lís ninɛ:

Li bʼↄŋ ↄgbↄru ɛrm mamn ↄny ɛm,

ɛtŋ li bi kok sɛgŋ fɛŋ yecʼekʼel nyim nyim a. 9.9 Ɛ̀kn Selu 112.9.

¹⁰Nyam anake bʼↄŋ egb ewl ɛs egb ey lele futufutu eke li kʼij ab ab a. Ɔny yɛji in cɛ li bʼow nʼↄŋ ↄny egb ey, li kok ow ɛny ke nʼↄ́ŋ ow agb. Ɛtŋ ɛbɛn a, ↄny ecʼów nyim nyim e kok a bʼow ↄsu ey amamn nↄnↄ. ¹¹Kaka fɛŋ, Nyam bʼow ↄŋ ↄny ↄnyn ob, ɛtŋ bʼow ɛlul ↄny ecʼɛrm mamn ↄny a ↄkm. Ɛtŋ agŋ nↄnↄ bʼow ↄŋ Nyam bia sob ap amua eke si bʼow sʼↄŋ ɛl ↄny e nin ɛm a eci. ¹²Ob ap na ɛm, am ɛlumn Nyam ecʼagŋ lala a abu. Ɛtŋ ow elm ke ↄ́ŋn ɛl fɛŋ a eke -nʼↄnym a cɛ, kↄ ɛmɛny bʼatar ɛl sos es eke -li ki ŋↄŋn Nyam nↄnↄ -lʼɛlu ow bia. ¹³Ów amua fɛŋ sosiɛm, -li bʼow -lʼɛkn juma na e leg a ɛtŋ -li bʼow -li kↄklm Nyam, aŋke bi cɛcr ɛrm mamn ↄny ɛm yecʼa eke ↄnyn a, Jerusalɛm ecʼↄmn ɛsɛl a lele ɛjecʼa fɛŋ ab, ɛtŋ am yɛgmn eke bʼɛlumn Krist ecʼAmani Mamn a. ¹⁴Nyam in ecʼɛrm mamn ab ɛm ↄŋ ↄny in e bibm a ow bubu af. Ow sosiɛm, -li bʼow -li yɛgm ↄny ɛl ecʼerur a, Nyam eke -li bi ŋↄŋn -nʼↄŋ ↄny ab ɛm. ¹⁵Sʼↄ́ŋn Nyam bia in ecʼob ap mamn a eke wɛl kʼↄtum ocm bɛbmnm ab a eci.

Pↄl am dogŋn sos agŋ a ekʼam okr ów af a e lís

¹Ɛm Pↄl, ɛm anake mʼam ibrm ↄny low Krist ecʼɛrm frↄrↄ lel ɛrm mamn ab ab ɛm a. Wɛl am dad eke ɛm bʼanŋ tiŋ eke ɛm bʼanŋ ↄny ecʼany af a, kↄ ɛm bʼanŋ akpoj a, nɛny in bʼↄtuʼm nↄnↄ. ²Mʼam ŋↄŋn ↄny, kʼↄ̀ŋn mi kʼɛw gbagba lɛgŋ a eke mi bʼow mʼow ↄny ecʼaraŋn a! Agŋ bɛb bi tutr eke sʼam kok low ɛsɛ wus ecʼagŋ ɛs el af. Ɛɛ, agŋ nɛnɛ e lís a, mʼam tutr eke mi bʼow mʼɛlu ɛm ecʼɛrm susu a ↄkm ɛtŋ ekʼow it yɛji mi bʼow mʼɛw gbagba. ³Nawrɛ eke sʼel agŋ gↄŋ, kↄ mum a eke sʼam ogŋ a elm agŋ ɛm eci. ⁴Mum a e mob a eke sʼam ot sʼogŋn a elm agŋ ecʼa. Ɛl e lɛc a, Nyam ogŋ a ow bʼanŋ ow ŋuŋn ob fɛŋ eke bʼatar in ab a. Si bi ŋuŋn sow tutr yadŋ ɛm a fɛŋ. ⁵Si bʼↄny tutr fɛŋ e bʼↄl eke kʼɛdŋn agŋ Nyam ecʼany uw a sʼoc es. Tutr fɛŋ eke bʼatar Nyam ab a, si bʼↄnyʼn lɛc ɛm eke li kʼɛlum Krist. ⁶Ɛtŋ ɛbɛn a, sʼinym es eke low ɛluam fɛŋ ecʼa, si kʼɛw low sʼↄŋ ɛgŋ, gbɛkↄ ow akpl eke kʼↄnyn abusu ɛ́lul ↄny ecʼɛlum a nimum ↄkm yɛ.

⁷Lɛ̀ɛr ów a ecʼelel ekʼanŋn a sɛnyn sɛnyn! Eke ɛgŋ nyam ↄny tutr eke in sↄny cɛ lʼel Krist eci, ow it ke ɛmɛny li tútr sɛnyn sɛnyn: ɛy yɛji sʼel Krist eci ɛsɛ in af. ⁸Ɛs Kↄtↄkↄ ↄŋ ɛy abusu eke si kʼↄŋ ↄny e Nyamel a agb ↄmn ɛm, kↄ ow elm in e ŋuŋn eci. Nawrɛ eke low na ↄŋ ntotŋ okʼm nↄnↄ, gbɛkↄ mi kʼow mʼururm ɛ́s na sosiɛm. ⁹Mʼerurm eke kʼɛkanʼm ɛsɛ ɛgŋ eke bʼok agŋ erŋn lokm, in e silɛl e li bʼawŋ ab ɛm af. ¹⁰Tasi ɛm a, agŋ bɛb bi dad ɛsɛ: «Pↄl e silɛl a bʼɛw kpaŋ kpaŋ lele lɛc ɛm ab. Gbɛkↄ eke li bʼanŋ ɛy ecʼaraŋn a, li bʼɛw fuɛfuɛ ɛtŋ sodad eke li bi dad a élm low kaka.» ¹¹Ke ɛgŋ a ekʼam dad odad nɛnɛ a, úw low na gbɛ any: eke si bʼanŋ kpekpe a, si bʼawŋ silɛl kpaŋ kpaŋ. Lɛgŋ eke si bʼow sʼanŋ ↄny ecʼany af a, si bʼow si kok ɛbɛn kpɛŋ.

¹²Agŋ bɛb bʼawr ɛl sosi nↄnↄ, si kʼↄtum si bɛbmnm ɛl ab oglog sʼotm ɛl es. -Li bʼocr ɛl sosi ɛsɛ ob bɛbmn ob af -li bɛbmn ɛl sosi, ke -nʼↄnyn ɛl sosi -lʼigbl ogŋ -lʼɛkn. Na nuŋ ɛm ŋuŋ! ¹³Ɛy ecʼa, si kʼow si yɛbm ɛy eci ntotŋ ok a iim nↄnↄ nɛnɛ. Eke Nyam nyimn ɛy sʼow sʼɛŋn ↄny a, li yɛgm ɛy yogŋ ekʼɛy e juma e lʼabul ɛy a kʼim ok a, ɛtŋ si bʼow sʼoc ereb a ɛsɛ ɛy ecʼob bɛbmn ob af. ¹⁴Blel sʼowm toŋ sʼokm ↄny ogŋ aŋa ana, wɛl ↄtu e kʼↄny tutr dad eke sʼam afŋ ɛy ecʼabusu a ecʼereb ab es. Kↄ ɛy tasi anake sʼikŋ anym sʼoc Krist ecʼAmani Mamn a sʼism ↄny ab a. ¹⁵Ɛbɛn a, ɛy sʼɛwm sos ɛsɛ ɛbɛn agŋ ɛjeci e juma e kok a e low cɛ ɛs am ibrm af. Kↄ ɛy sʼam ↄmn eke ↄny ecʼↄmn a bʼow obn ɛtŋ ɛmɛny sʼↄtu eke si ki kok juma nↄnↄ ↄny ogŋ yogŋ. Gbɛkↄ sʼerurm eke si kʼafŋ ereb a eke Nyam ɛw ↄŋ ɛy ab es. 10.15 Ɛ̀kn Rom 15.17-21.¹⁶Ow e jam a, si bʼow sʼim sʼↄb Amani Mamn a e kokoba susu eke ibn akm ↄny ogŋ aŋa. Sʼerurm eke si ki kok juma agŋ ɛjeci e juma kok usu a, ke sʼɛw sos ów a eke -lʼikŋn anym -li kokr a eci.

¹⁷Eke ɛgŋ nyam erur eke kʼɛw sos, ke lʼɛ́w sos Ɛs Kↄtↄkↄ sosiɛm. 10.17 Ɛ̀kn Jeremi 9.23; 1 Korɛnt 1.31.¹⁸Tasi ɛm a, ow elm ɛgŋ a eke bʼawr in sosi a wɛl áwm, kↄ ɛgŋ a eke Ɛs Kↄtↄkↄ bʼaw a.

Pↄl lele ɛrm ɛsɛl ayadŋu ab ab

¹Oy! Blel kʼɛ́gŋn ebr ke ɛm yɛji mi dád ów ɛsɛ nuŋ ɛm ŋuŋ ɛs af! Ɛɛ, na ecʼa ɛ̀gŋn ebrʼm ɛbɛn! ²Erur eke mʼↄny ↄny ecʼa bʼogŋ uwerŋ, ɛtŋ el uwerŋ eke bʼanŋ Nyam ogŋ ow. Tasi ɛm a, igŋ ɛbiu nyam cɛ mʼɛwar ↄny in e low mʼɛw es: in lʼel Krist. Ɛɛ, mi bʼow mʼoc ↄny mi yɛgmʼn ɛsɛ dedyↄwli ekʼitam ɛm kaka af. 11.2 Bɛ̀bmn Efɛs 5.25-27 ab.³Gbɛkↄ ↄkan low na: lorŋn oc yadŋ ɛm ɛju Ɛv. Ow ↄŋ erŋn am ↄnyʼm ekʼↄny yɛji, wɛl ki dad ↄny sow tutr yadŋ, ke ow ↄ́ny kpab ↄny es ów cɛcɛ a lele lala ab ab eke ɛŋan Krist ab ecʼaf okr ab ɛm a e lís. ⁴Sʼↄb ↄny Jesu ecʼamani, ɛŋan Abŋ Lala ɛtŋ ubr Amani Mamn a nawrɛ. Kↄ sica bʼow ɛgŋn ebr fafa nɛnɛ eke ɛgŋ ɛjeci nyam kʼow dad ↄny Jesu ɛjeci nyam ecʼodad, abŋ ɛjeci nyam ecʼodad, ke ↄb ↄny amani ɛjeci nyam eke irimn ow e low lɛgŋ kaka ab ee?

⁵Kↄ ɛm e tutr ɛm a gbɛ, mi kʼɛknm eke ↄny eci “ɛrm ɛsɛl ɛgbɛl” a kʼↄny any akm im. 11.5 “ɛrm ɛsɛl ɛgbɛl”:aŋa Korɛnt e Nyamel ab ɛm eci low yɛgm ɛsɛl bɛb a eke am yɛgm agŋ amani mamn ɛjecʼa e low Pↄl am dad.⁶Nawrɛ eke nɛnym okm im es odad dad ɛm ɛsɛ ɛl af, gbɛkↄ Nyam ecʼany uw ecʼa, in yɛji low ɛjeci! Ɛtŋ na, lɛgŋ fɛŋ si yɛgm ↄny kpata low fɛŋ eke si kok ab ɛm.

⁷Eke mʼↄb ↄny Nyam ecʼAmani Mamn a, ɛm mʼis es aŋke mʼibram ↄny os kaka. Gbɛkↄ ow el sos eke mi kʼusr ↄny eci. Kↄ na low ɛyr e mi kok ana ee? ⁸Eke mʼam kok juma ↄny ogŋ a, Sinyamel ɛjeci anake ↄŋʼm os a, ɛtŋ mʼoc ɛl ecʼos a mʼɛlum ↄny abu. ⁹Ke ↄny ecʼaraŋn eke mʼanŋ a, mʼↄny os ecʼes abur cɛ, gbɛkↄ mʼibram ↄny low kaka. Maseduan ecʼagŋ lisijimɛl ekʼanŋ ow a ismʼm fɛŋ a eke mʼↄny ow ecʼes abur ab ab. Sɛgŋ fɛŋ mi kok elel eke mi ki legm ↄny ɛtŋ mʼerur eke lɛgŋ kaka mi ki legm ↄny. ¹⁰Ntotŋ am okʼm ow eci ɛtŋ Akayi wus ogog a ecʼɛgŋ kaka kʼↄtum ↄbm im yadŋ ↄnym ɛm eci ntotŋ na ocm es. 11.10 Akayi:Korɛnt baŋn a Akayi wus af ow anŋ; ɛ̀kn 2 Korɛnt 1.1 lel ow eci akr otar ab ab. Low nawrɛ tasi mʼam dad aŋke mʼↄny low nɛnyɛmbri nyam ekʼanŋ Krist ɛm a. ¹¹Bla sosiɛm mʼam dad odad nɛnɛ ee? Eke mʼerurm ↄny a sosiɛm ecʼee? Njaŋ, Nyam uw any eke mi bʼerur ↄny. ¹²Ɛtŋ mi bʼow mʼucu mʼↄny es mʼam kok ɛbɛn, ow ↄ́ŋ agŋ ekʼam ↄl abusu eke kʼɛru es ke ij nɛny eke ɛl ɛrŋ ɛm si bɛbmn a, kʼɛ́ŋnm abusu na kaka! ¹³Agŋ amua el ɛrm ɛsɛl ayadŋu lele juma kok ɛsɛl ekʼↄny ɛnyɛmbri yony yony ab. -Li bi kok nyandrɛ ɛsɛ Krist ecʼɛrm ɛsɛl cɛ wɛʼn el af. ¹⁴Nawrɛ, low kaka ↄnym any iti aŋa, aŋke Satan in obi yɛji bi kok nyandrɛ ɛsɛ usuayl ecʼafr ɛrm ɛs cɛ owʼn el af. ¹⁵Ɛtŋ in e juma kok ɛsɛl ecʼa yɛji ɛbɛn cɛ. Ow ɛwm any iti eke -nʼam kok nyandrɛ -lʼel juma kok ɛsɛl ekʼam kok yecʼekʼel nyim nyim Nyam ecʼany af a. Gbɛkↄ ɛl ecʼowr anŋ a bʼow uwr ɛsɛ elel ekʼow it eke kʼɛbm ɛl ab af, ɛl ecʼelel eke -li kokr ab ɛm.

Pↄl e gbre ɛrŋ ɛrŋ ekʼij

¹⁶Mʼam ebr ɛm mʼɛsɛ: kì tutar eke nuŋ ɛm uŋʼm! Oglog ɛ̀gŋn ebr eke nuŋ ɛm uŋʼm, yecʼɛtŋ ke ɛm yɛji mʼↄ́tu mʼij nɛny tɛl. ¹⁷Sica odad na eke mʼam ow mi dad a, mi dadm ɛsɛ elel eke Ɛs Kↄtↄkↄ erur ab af, kↄ ɛsɛ nuŋ ɛm ŋuŋ ɛs af. Gbɛkↄ mʼↄny ów tasi e mʼↄtu eke mi kʼeb ow af mʼam ij nɛny. ¹⁸Agŋ nↄnↄ bʼij nɛny agŋ ɛm ecʼów sosiɛm, ow sosiɛm ɛm yɛji mi bʼow mʼij nɛny. ¹⁹Ɔny eke bʼocar ↄny sosi ɛsɛwru a, ↄny obi ɛm bʼɛgŋn eŋ ɛm eŋuŋ ɛsɛl ebr! ²⁰Bʼɛgŋn ebr wɛl kok ↄny ɛsɛ madu af, wɛl eb ↄny ob fɛŋ ekʼↄnyn a, wɛl iy ↄny mil! Bʼɛgŋn ebr wɛl itar ↄny any, wɛl dɛdŋ ↄny any af! ²¹Ɛ́s am ↄnyʼm eke mi ki dad, eke sʼↄnym sos si kokm ɛbɛn a!

Eke ɛgŋ nyam am ɛgŋ eb ij nɛny low nyam eci, aŋa mʼam dad odad ɛsɛ nuŋ ɛm ŋuŋ ɛs af, ɛm yɛji mi bʼow mʼɛgŋ mʼeb mi kok ɛbɛn. ²²-Lʼel Ebre eyŋ, ɛm yɛji mʼel! -Lʼel Israɛl eyŋ, ɛm yɛji mʼel! -Lʼel Abraham ecʼalaw, ɛm yɛji mʼel! ²³-Lʼel Krist e juma kok ɛsɛl, ɛm mʼel mʼakm ɛl fɛŋ! Ɛtŋ low na eke aŋa mʼam mʼow mi dad mʼusr af a yɛji, anŋ ɛsɛ nuŋ ɛm ŋuŋ owi af: mi kok juma mʼakm ɛl fɛŋ, mʼɛy sobel ɛm sakp nↄnↄ mʼakm ɛl. Ɔr yɛji, ɛm wɛl ↄrʼm sakp nↄnↄ akm ɛl, ɛtŋ sakp nↄnↄ ar okrʼm es akm ɛl. ²⁴Sakp yen eke Jwifɛl iyrʼm ŋgbre likŋ lele lɛw libarm ab. 11.24 Ɛ̀kn Ol Ɔkn 25.3. Jwifɛl iyrʼm ŋgbre likŋ lele lɛw libarm ab a: ol ɛdŋn eke wɛl kʼiyr ɛgŋ eke kok low a ŋgbre ow afŋ ekŋ yony es. Ke ow áylʼŋ sos ɛm tasi eke iyrm ow afŋm es a, Jwifɛl am iyr ɛgŋ a ŋgbre a ba ow bʼij likŋ lele lɛw libarm ab a ke -lʼɛw abu es. Ow sosiɛm anake wɛl bi dad ekŋ yony ke ↄ́ny nyam oc es ɛm a.²⁵Sakp nyahan eke Rom eyŋ ↄrʼm lɛc ɛm lɛc ɛm, akp nyam eke wɛl wↄwlʼm mebn ɛm ecʼibi eci. Sakp nyahan eke mij blel ocʼm, ɛtŋ akp nyam ecʼa, mʼanŋ lɛgŋ owr nyam lele ncok nyam ab mij ɛm. 11.25 Rom eyŋ ↄrʼm:bɛ̀bmn Ob Kok 16.22-23 ab; wɛl wↄwlʼm mebn: Ob Kok 14.19-20; mij blel ocʼm: Ob Kok 27.39-44 ɛm a, si bʼawl mijɛtŋ nyam eke mij oc im e low, gbɛkↄ Pↄl nↄn lɛl na oc es gbuŋ ɛtŋ low a ɛy. Aŋa ow am yɛgm ɛy eke ow elm Ob Kok 27.39-44 ɛm e low a li dadm, kↄ sakp ɛjeci nyahan eke mij blel ocʼr a e low anake nʼam dad a.²⁶Ɛm eci usu im nↄnↄ ab ɛm, ar okrʼm es sakp nↄnↄ: simij ecʼany af, agŋ ibiu ecʼany af, ɛm lisijimɛl Jwifɛl ɛm oglog ɛl ekʼelm Jwifɛl ɛm. Mʼↄbr ar ɛb ɛb ɛm, loj ɛm, okij af lele agŋ lisijimɛl ayadŋu ab e lís. ²⁷Mi kok juma eke kiknʼm sos es ɛtŋ sakp oglog mʼↄtum mʼɛrum mɛmn. Namn lele mij amn ab ↄnyʼm ɛtŋ sakp oglog mʼↄtum mʼɛŋnm ob mʼijm. Lɛfr ↄnyʼm ɛtŋ mʼↄnym mob mi susm. ²⁸Ɛtŋ mi dadm low a tasi ekʼↄny any a ecʼodad: sɛgŋ fɛŋ mi bʼebr ɛm e Sinyamel a fɛŋ e low ecʼɛrm mij. ²⁹Eke ɛgŋ nyam cɛ ɛw fuɛfuɛ, ɛm yɛji kpɛkŋ mʼɛ́w fuɛfuɛ. Eke ɛgŋ nyam cɛ ɛy sikpl owi ɛm, ow e low ám ɛyʼm sos ɛm nↄnↄ.

³⁰Ekʼow it nɛny ij, mi bʼow mʼij nɛny eke mʼel fuɛfuɛ. ³¹Mʼↄ́nym yadŋ, Nyam ɛy Ɛs Kↄtↄkↄ Jesu ecʼƐs uw any. Si kↄ́klmʼn akpo akpo fɛŋ! ³²Eke mʼanŋ Damas ɛb ɛm a, ɛb ↄsu ɛs ekʼam kok es ɛw ɛs Aretas e juma a, ↄŋ wɛl am ↄsu ɛb a e masany a fɛŋ ɛm ecʼɛdŋn eci. ³³Gbɛkↄ agŋ lisijimɛl a ↄŋ wɛl ↄny ɛluʼm ulu ligbɛl nyam ɛm, ɛtŋ usmʼm es finɛtr ɛm, ɛb a e lakp ogog kpakp a e jam a, ɛtŋ mʼↄtu mʼakmʼn. 11.33 Ɛ̀kn Ob Kok 9.23-25.

Pↄl sos ɛm am iŋn eke li kʼij Krist eci gbre

¹Kↄ ow it eke mi kʼij nɛny ee? Ow kʼow elm im low kaka. Gbɛkↄ mʼam mʼow mi dad ów eke Ɛs Kↄtↄkↄ yɛgmʼm mʼɛkn lele ow eke nʼↄny lʼok ↄkm ab ab e low. ²Mʼuw Krist e jam us ɛs nyam any, 12.2 Krist e jam us ɛs nyam any:Pↄl, in obi e low nʼam dad. afr kpekpe: odad ebl na Grɛk ɛm a afr nyahan ɛm. Jwifɛl e nawrɛ ub ɛm a, ow el usu a eke Nyam ir ke wɛl bʼɛsŋ Paradis a (ɛ̀kn akr 4 ɛm a). Yogŋ cɛ anake agŋ a ekʼel Nyam e lawlɛl a bʼanŋ a. ɛtŋ ow ij akpo lɛw yar ŋ̂, Nyam ↄny ɛgŋ na uyum afr kpekpe. Kↄ in e sos megl ab ab ee? Mʼuwm any. Kↄ ow elm in e sos megl ab ab ee? Mʼuwm any, kↄ Nyam gbɛ uw any. ^3-4Mʼuw any gbɛ eke Nyam oc ɛgŋ a im afr ecʼusu mamn a. Kↄ in e sos megl ab ab oglog ow elm ow ab ee? Mʼuwm any, kↄ Nyam gbɛ uw any. Yogŋ, lʼiri sodad eke ɛgŋ e nɛny kʼↄtum dadm. Ow el sodad eke ɛgŋ kaka ↄnym abusu eke ki dad. ⁵Ɛgŋ nɛnɛ na eci gbɛ mi bʼow mʼij nɛny. Gbɛkↄ ɛm ecʼa, elel eke mʼanŋn a sosiɛm mi bʼow mʼij nɛny ɛm e fuɛfuɛ el a eci. ⁶Eke batŋ mʼerur nɛny eke mi kʼij a, mi kʼow mʼijm nyamb, low eke el nawrɛ a cɛ mi bʼow mi dad. Gbɛkↄ mʼijm nɛny, yecʼɛtŋ ke wɛl dád ɛm e lís owi, ow a cɛ eke wɛl am ɛknʼm mi kok lele ow a cɛ eke wɛl am iri mi dad ab ab af, ke low ɛjeci kaka kʼígŋm af.

⁷Ów a eke Ɛs Kↄtↄkↄ yɛgmʼm mʼɛkn a agb nↄnↄ. Gbɛkↄ lʼerurm eke mi kʼij nɛny na eci. Ow sosiɛm lʼoc ɛbm ɛkn nyam lʼɛluʼm sos ɛm, bʼijrʼm gbre ɛsɛ mirŋ eke bʼub es anŋ ɛgŋ sos ɛm ab af. Ɛtŋ ow anŋ ɛsɛ Satan ecʼɛrm ɛs nyam eke wɛl ↄŋ eke kʼↄrʼm ke ɛ́dŋnʼm nɛny ij af. ⁸Sakp nyahan eke mi ŋↄŋn Ɛs Kↄtↄkↄ eke kʼↄny ocʼm es gbre ij na ɛm, ⁹kↄ li dadʼm ninɛ: «Ɛm ecʼɛrm mamn a cɛ ↄdŋʼŋ. Eke bʼanŋ fuɛfuɛ a, yogŋ ɛm tasi anake ɛm e lɛc a bʼɛy ↄkm a.» Ow sosiɛm, ɛm e nɛny ij a tasi bʼow el ɛm e fuɛfuɛ el a, yecʼɛtŋ ke Krist e lɛc a ánŋʼm af. ¹⁰Na sosiɛm mʼam ɛgŋ fɛŋ mʼeb sos ɛm iŋn ɛm: lɛc ↄnym, wɛwr, ses babur, ɛm ecʼↄmn a sosiɛm e gbre ijr lele ɛrm mij ebr fɛŋ ab. Mʼam ɛgŋ fɛŋ mʼeb Krist sosiɛm eci, aŋke eke mi bʼanŋ fuɛfuɛ a, yogŋ ɛm anake mi bʼij lɛc a.

Pↄl am ebr Korɛnt ecʼↄmn ɛsɛl a ecʼɛrm ij

¹¹Sica am ɛkan eke mʼam kok nuŋ ɛm ŋuŋ owi a! Ɔny anake ↄŋn ke mʼam kok ɛbɛn a. Ɔny anake blel dadr ɛm ecʼów amamn ekʼanŋʼm ɛm a, aŋke eke mʼelm low kaka yɛji, low kaka anm eke ↄny eci “ɛrm ɛsɛl ɛgbɛl” a ↄny akmʼm! ¹²Ɔny ogŋ yogŋ ɛkan ɛm ecʼɛrm susu ligbɛl a, simɛny ɛwr a, ów any iti owi a lele sakrowa ab ab. Ów amua fɛŋ am yɛgm eke mʼel ɛrm ɛs wɛwɛ tasi. ¹³Bla obi Sinyamel ɛjecʼa ↄny eke ↄny ↄnymn ee? Ɛɛ, nawrɛ gbɛ, mʼↄↄm ↄny labm kaka! Kↄ na anake el low ŋuŋ ab ee? Ɛbɛn ke òc aprʼm ↄ!

¹⁴Mi bɛbm ↄny ogŋ yogŋ e sakp nyahan ɛm ecʼow e sos 12.14 Ɛ̀kn 2 Korɛnt 13.1 ɛm a lele ow ecʼakr otar ab ab. ɛtŋ mi kʼow mʼↄↄm ↄny labm kaka. Ɛm, ow elm ↄny ecʼos a mʼↄlm es, kↄ ↄny obi ↄny obi. Nawrɛ ɛm a, ow elm etuey am kokm os ↄↄm ɛl ɛsɛl, kↄ ey ɛsɛl anake it eke ki kok os ↄŋ ɛl ecʼey a. ¹⁵Ɛm gbɛ, sos ɛm bʼow iŋnʼm eke mi kí ŋuŋn os ↄny eci, ke mʼóc ɛm obi e sel a nimum yɛji mʼigŋ af. Kↄ eke mʼerur ↄny nↄnↄ nɛnɛ a sosiɛm anake ↄny kʼow erurmnʼm nↄnↄ ab ee?

¹⁶Nawrɛ eke mʼↄↄm ↄny labm kaka, gbɛkↄ agŋ bɛb dad eke yadŋ ɛm am ↄny ɛtŋ ɛm e kprakpr ab ɛm, ɛm ɛju ↄny. ¹⁷Kↄ eke bʼɛwr nyamn ɛkan agŋ a fɛŋ eke mʼↄŋ ow ↄny ecʼaraŋn a, ɛl ɛm ecʼɛgŋ nyam anŋ eke mʼɛcr in ɛm mʼij ↄny os ee? ¹⁸Mi dad toŋ Tit ɛgŋ eb eke kʼow ɛkn ↄny, ɛtŋ mʼↄŋ ɛgŋ lisijim nyam igŋʼn ab ow. 12.18 Pↄl dad ɛgŋ lisijim na e low nuŋ 8 ecʼakr 22 ɛm a. Kↄ Tit ij ↄny os ee? Kↄ in lel ɛm ab, sʼↄnym tutr nyam coco ejagb nyam a eke sʼↄkŋ any ab ɛm ee?

¹⁹Ow ibn ekʼam tutar eke sʼam dogŋn sos ↄny ecʼany af. Njaŋ! Nyam ecʼany af sʼam dogŋn sos ɛsɛ Krist e jam us ɛsɛl af. Erur ɛm ecʼagŋ lisijimɛl, sʼam kok ɛbɛn eke si kʼɛlum ↄny abu agbr ↄmn ɛm. ²⁰Lɛgŋ a eke mi bʼow mʼow ↄny ogŋ yogŋ a, ow am ↄnyʼm erŋn eke mi kʼɛ́ŋnm ↄny ɛsɛ elel eke mʼam erur eke kʼanŋn ab af. Ke oglog ɛm yɛji, kʼérurmn ɛm eci elel eke mi bʼow mi kokr a. Erŋn am ↄnyʼm eke yogŋ mi kʼuyum ów ɛsu, nyamnɛyr, ɛrm bebl, agŋ ecʼów ↄnyanin, agŋ wɛwr owi, agŋ cacak owi, mɛgŋel lele suksuk owi ab. ²¹Ɛmɛny low nyam ecʼerŋn yɛji am ↄnym: ɛm ecʼow ab ɛm, oglog ke Nyam kókʼm ɛ́s ↄny ecʼany af. Mʼam uru eke mi kʼikŋ ↄŋn ↄny ɛm ecʼagŋ nↄnↄ eke abu anŋ ɛm am kok lɛgŋ sig ɛm e sikpl a eci. Tasi ɛm a, yɛfɛnyna yɛji -li kʼɛwlm -li ki lɛrm Nyam. -Nʼam ir ɛb eke ↄ́ↄm ɛl -lʼaylmn, -nʼam ij nfaci ɛtŋ -nʼam ɛbirir marɛm marɛm.

Ów ↄm es abal el

¹Mʼam bɛbm sos eke mi kʼow ↄny ogŋ yogŋ sakp nyahan ɛm, 13.1 Sakp nyahan ɛm:krɛkrɛ e Korɛnt eke nʼim a, yogŋ anake li sigm yogŋ e Nyamel ab es a (Ob Kok 18); yony ɛm e Korɛnt e nʼim ke nʼam dad ow ecʼodad akr 2 ɛm a, el ubr eke lʼubr yogŋ sɛgŋ abi cɛ, lɛgŋ ab ɛm eke nʼanŋ Efɛs a (Ob Kok 19). ɛtŋ ɛsɛ elel eke Nyam Lɛl dad ab af: Gbuŋ ke wɛl jɛ́j odad fɛŋ ok a, ow it eke wɛl kʼiri adaŋku yony oglog nyahan nɛnym.13.1 Ɛ̀kn Ol Ɔkn 19.15; Matie 18.16; 1 Timote 5.19; Ebre 10.28.²Sica lɛgŋ sig ɛm ecʼagŋ a eke kok sikpl a lele agŋ ɛjecʼab ab anake mʼam dad odad a. Yɛfɛnyna mʼanm ↄny araŋn, gbɛkↄ ɛmɛny mʼam ebr low a eke mi dad eke mʼow ↄny ogŋ yogŋ sakp yony ɛm a mʼɛsɛ: lɛgŋ a eke mi bʼow mʼɛwl mʼow a, mi bʼow mi kok lɛc owi ↄny fɛŋ ab, ³aŋke am erurir eke kʼɛkan low ekʼam yɛgm eke Krist bʼɛcr ɛm ɛm dad odad a. Eke li bi kok low nʼↄŋ ↄny a, lʼelm sos ↄnymu, kↄ nana, li bʼɛlu in ecʼabusu ↄny a ↄkm ↄny ecʼaraŋn. ⁴Nawrɛ, wɛl ɛw Krist olikŋ af, eke nʼↄnym sos a sosiɛm, gbɛkↄ nʼanŋ owr Nyam ecʼabusu ab ɛm. Ɛy yɛji, in ab eke sʼokr af a anake sʼↄnym sos a; gbɛkↄ si bʼow si yɛgm ↄny eke sʼanŋ owr in ab Nyam ecʼabusu ab ɛm.

⁵Sica ìbrmn ↄny sosi low eke am iir ɛb ɛsɛ ↄmn ɛsɛl af, ìgbal ↄny sosi ogŋ ɛkan. Kↄ kʼɛknmn eke Krist anŋ ↄny ab ee? Eke ow ɛcrm ɛbɛn, ke es ↄwal okr a. ⁶Gbɛkↄ ɛy ecʼa, mʼam ↄny ↄmn eke bʼow ɛgŋn uwr any eke ɛy sʼↄwlm sʼokm es. ⁷Ɛy sʼam ŋↄŋn Nyam eke kí kokmn low ŋuŋ kaka. Ɛtŋ ow elm ke si yɛ́gm ↄny eke sʼↄny low ij. Njaŋ, low mamn cɛ sʼerur eke ki kokr. Ɛtŋ ↄfr ↄfr eke low a am yɛgm eke sʼↄny lↄbr. ⁸Tasi ɛm a, si kʼↄtum si kokm low kaka low nawrɛ ecʼany af, in e juma cɛ sʼↄtu eke si ki kok. ⁹Ɛɛ, sos ɛm bʼiŋn ɛy sakp sakp fɛŋ eke si bʼanŋ sos ↄnym ɛm ke ↄny bʼↄnyn lɛc a. Ow sosiɛm yecʼeke sʼam ibrm ɛy e ŋↄŋn ɛm a el: ke ɛmɛny ɛ́wal ijr lɛc ↄmn ɛm. ¹⁰Low na sosiɛm anake mʼam awŋ ↄny lɛl eke mʼanŋ kpekpe a. Mʼerurm eke mi kʼɛlu lɛc ↄkm lɛgŋ eke mi bʼow mʼanŋ ↄny ecʼaraŋn a. Tasi ɛm a, Ɛs Kↄtↄkↄ ↄŋʼm abusu eke mi kʼɛlum Nyamel a abu agb ↄmn ɛm, kↄ ow elm in e ŋuŋn eci.

¹¹Sica agŋ lisijimɛl, ànŋn sos ɛm iŋn ɛm. Ɔ̀ↄl ↄmn ɛm e lɛc eke kʼↄnyn es, àtarir sos es ke nɛny ókr ↄny af ↄny ↄfr ɛm. Ìir ɛb ɛrm es ɛy ɛm, ɛtŋ erur lele ɛrm es ɛy ab e Nyam a bʼow anŋ ↄny ab.

¹²Ɛ̀sŋninin ↄny ↄfr, ke ɛ́yarir af ɛsɛ Krist ɛm ecʼagŋ lisijimɛl lele agŋ lisijↄwɛl ab af. Agŋ lala a fɛŋ am ɛsŋn ↄny.

¹³Ke ɛy Ɛs Kↄtↄkↄ Jesu Krist ecʼↄwrↄ, Nyam ecʼerur lel Abŋ Lala ecʼaf okr a ánŋ ↄny fɛŋ ab.