1 TIMOTE

Pↄl e lɛl krɛkrɛ ekʼawŋ Timote

Ów ekʼit eke wɛl kʼuw any

Timote el Lisr baŋn iy. Lisr el Likaoni wus af ecʼɛb (Ob Kok 14.6). Yɛfɛnyna ɛm a, Likaoni anŋ Turki ɛm. Timote ɛs a Grɛk iy, ɛtŋ lis el Jwif. Pↄl e juma eke kok Lisr baŋn a anake ↄŋ Timote, lis Enis lele la Lois ab itŋn ɛrm ɛm el Ɛs Kↄtↄkↄ ecʼa. Sica eke Pↄl im toŋ bake ɛwl mɛny ow Lisr a, Timote ɛlumʼn abu Ɛs Kↄtↄkↄ eci juma kok ab ɛm (Ob Kok 16.1-3).

Lɛl na ɛm, sʼam ɛkn eke Pↄl igb Efɛs ekʼel Azi wus af ecʼɛb ab ɛm, im Maseduan wus af. Gbɛkↄ in ecʼim ɛm a, lʼɛw Timote es Efɛs eke li kʼɛdŋn low yɛgm ɛsɛl ayadŋu a juma kok (nuŋ 1 toŋ nuŋ 3). Pↄl nↄn lɛl na eke kʼatr Timote sos es, ke nʼↄ́m ow ów Nyamel e juma eke ow am kok ab af.

Nuŋ 1, nuŋ 4 lele nuŋ 6 ɛm a, Pↄl am dad agŋ a eke am yɛgm ów yadŋ, ke am igŋ low yɛgm nawrɛ a ɛlu es a ecʼodad. -Li bi yɛgm agŋ low yadŋ ɛm Nyam ecʼol a lele ↄmn eke wɛl bʼↄny Jesu ɛm ab ab af. Nuŋ 2 ɛm a, Pↄl ibrm eke kretiɛnɛl a kí ŋↄŋn Nyam ɛtŋ li yɛgm wɛl low Nyam ŋↄŋn af. Nuŋ 3 ɛm a, li dad idr ɛsɛl ecʼelel eke kʼaan es a. Nuŋ 4.7 toŋ nuŋ 6.21 ɛm a, Pↄl am atr Timote sos es eke in e juma kok ab ɛm, li kʼↄb Amani Mamn a e kokoba. Nʼam dad ow elel eke ow ki kokr, ke ow ↄ́tu am ↄsu Nyamel ecʼagŋ abu abu a, ɛsɛ elel eke Jesu Krist e jam us ɛs mamn bi kok ab af a. Lɛl a ecʼuwr ɛm a, Pↄl am atr Timote sos es eke ow kʼogŋ ↄmn ɛm eci mum mamn a.

Ɛsŋn

¹Ɛm Pↄl, Jesu Krist ecʼɛrm ɛs, Nyam ɛy e Sↄg Ɛs lele Jesu Krist ɛy ecʼↄmn ob ab ecʼabusu ɛm, mʼam awŋʼŋ lɛl na. ²Ŋ Timote eke anŋ ɛsɛ ɛm ecʼiy lokm tasi af ↄmn ɛm, ke Nyam Ɛs lele Jesu Krist ɛy e Kↄtↄkↄ ab ɛ́dŋʼŋ ↄwrↄ, ↄ́ny ŋ e sↄrŋ ikŋ ke ↄ́ŋʼŋ ɛrm es ɛy.

Ɛrm ɛw low yɛgm ɛsɛl ayadŋu e lís

³Eke mʼaam Maseduan a, mʼijlʼŋ nɛny eke kʼanŋ Efɛs, yecʼɛtŋ ke agŋ a ekʼam yɛgm agŋ ów yadŋ a, ɛ́dŋn ɛl ke -li ki kokmn ij. ⁴Dàd ɛl -li wal ów a ekʼagŋ ɛl obi ↄkn dad lel ɛl lagŋɛl e mew ecʼes ↄsŋm owi e low a -lʼɛlu es, 1.4 ɛl lagŋɛl e mew ecʼes ↄsŋm owi:ów eke agŋ ɛl obi kʼↄkn a lele ɛl lagŋɛl e mew ecʼes ↄsŋm owi ab ab el nawrɛ ɛm a, Nuŋ Ɔb nuŋ 4 toŋ nuŋ 11 ɛm eci ów a eke anŋ a, (ɛsɛ agŋ lagŋɛl e mew ecʼes ↄsŋm lele Noe e mij gbɛl a e low ab ab) eke agŋ ot yiyibr ów toŋ ke ow ɛwl el yadŋ owi a. ow es atar cɛ ow bʼis, ow ɛluam Nyam ecʼes eb ɛlu e low a eke bɛbm ɛw es, ke wɛl uw any ↄmn ɛm a abu.

⁵Low na eke bʼow dad a, bʼow ↄŋ ɛl ecʼerur a agb: erur eke bʼanŋ ɛrm lala ɛm ow, tutr mamn ɛm lel ↄmn tasi ɛm ab a. ⁶Agŋ bɛb igŋ ejagb na ɛlu es ɛtŋ irm sodad ekʼↄnym any e dad ɛm. ⁷-Li bʼocr ɛl sosi ɛsɛ Nyam ecʼol a ecʼany uw ɛsɛl tasi af, gbɛkↄ -lʼirimn ɛl obi e sodad eke -nʼam dad a, ɛtŋ ów a ekʼow sosiɛm -li bʼatar ów es a yɛji -lʼirimn.

⁸Sʼuw any eke Nyam ecʼol a el ob mamn, eke wɛl uw any kok ow e low ekʼit a. ⁹Wɛl ↄ́kn eke wɛl ɛwm ol agŋ eke bi kok ów amamn a eci; kↄ ów eŋuŋ ɛsɛl lel agŋ ekʼɛ́luam ol ab ab sosiɛm wɛl bʼɛw ol, ɛsɛ: molokm eŋuŋ ɛsɛl, sikpl ɛsɛl, agŋ ekʼɛ́luam Nyam lel ob ekʼel lala ab ab, agŋ eke bʼibi ɛl ɛsɛl oglog ɛl lisɛl lel agŋ ibiu fɛŋ ab. ¹⁰Ɛmɛny wɛl bʼɛw ol agŋ eke bʼij nfaci a eci, egŋ eke bʼɛrum ɛl lawlɛl egŋ ab, agŋ eke bʼↄl madu ij, ayadŋu, agŋ eke bʼij daŋku yadŋ ɛm lel agŋ fɛŋ eke bi kok ów ekʼelm low yɛgm nawrɛ tasi ab ab eci. ¹¹Low yɛgm ikŋ na anŋ Amani Mamn a eke bʼↄŋ ɛy sʼuw Nyam ecʼanygbɛl ab any ab ɛm. Ɛɛ, Nyam eke el ehe fɛŋ eci nuŋ a anake abulʼm Amani Mamn na a.

Pↄl am ↄŋ Jesu Krist bia

¹²Mʼam ɛlu Jesu Krist ɛy Ɛs Kↄtↄkↄ eke ↄŋʼm lɛc, ɛm e juma kok ecʼa bia. Mʼam ɛluʼl bia eke nʼↄny ↄmn ɛm ɛm, ke lʼɛsŋʼm in e juma ab ɛm, ¹³eke lɛgŋ ekʼɛc ab ɛm, mi dad in e lís ecʼów eŋuŋ, mʼijrʼr gbre ɛtŋ mi wɛwrʼr yɛji. Gbɛkↄ Nyam ↄny ɛm e sↄrŋ ikŋ, aŋke mʼↄnym ↄmn in ɛm ɛtŋ mʼuwm low eke mʼam kok ab any. 1.13 Ob Kok 8.3; 9.4-5.¹⁴Ɛy Ɛs Kↄtↄkↄ ɛdŋʼm ↄwrↄ nↄnↄ, ɛtŋ nʼↄŋʼm ↄmn lel erur eke bʼanŋ Jesu Krist ɛm ow ab ab. ¹⁵Kin odad nawrɛ tasi ekʼit ekʼagŋ a fɛŋ kʼeb: Jesu Krist ow wus na af sikpl ɛsɛl fɛŋ e sↄg eci. Mʼel ɛl ɛm e ligbɛl tasi, ¹⁶gbɛkↄ ow sosiɛm anake Nyam ↄny ɛm e sↄrŋ ikŋ a: lʼerur eke Jesu Krist kʼɛcr ɛm eke mʼel sikpl ɛsɛl ab ɛm e ligbɛl tasi a yɛgm in e low eku eke nʼↄny, ke ow él sɛwl agŋ a eke lɛgŋ anym ɛm bʼow ubʼr nawrɛ, ke bʼow ɛŋn sel ekʼↄnym nuŋ a eci.

¹⁷Sos usr lele anygbɛl ab él Ɛb ebu a ekʼanŋ sɛgŋ fɛŋ,

ↄnym uw,

wɛl ɛ́knm

ke el Nyam nyam coco a eci! Amɛn.

¹⁸Ɛm jim Timote mʼam abulʼŋ low yɛgm na, ɛsɛ elel eke ŋ e Nyamel ab ɛm e kokoba ↄb ɛsɛl ikŋ anym dad ɛw es ŋ e lís ab af. Ke sodad amua átrʼŋ sos es ↄŋ ogŋ mum mamn a, ¹⁹ŋ ecʼↄmn a lele ŋ e tutr mamn ab ab ɛm. Agŋ nyam nyam ɛgŋm ↄsum ɛl e tutr mamn a, ow ↄŋ -lʼirmn ɛl ecʼↄmn a. ²⁰Agŋ ab ɛm Imene lele Alesandr ab yɛji anŋ; mʼot mʼok ɛl Satan abu ɛm 1.20 mʼot mʼok ɛl Satan abu ɛm:odad na anake wɛl ↄny ɛwl mɛny 1 Korɛnt 5.5 ɛm, ke am yɛgm ekʼɛgŋ kok low ŋuŋ a, wɛl bʼogŋʼn Nyam nuŋ igŋ ɛsɛl a ecʼaraŋn, wɛl ɛwʼr saw lɛgŋ tɛl eci eke li kʼitŋn, ów a eke li kok a sosiɛm. Sica, ekʼɛgŋ ikŋ na anm Nyamel ɛm ij a, ke Satan eke ↄnym wus ab a, ecʼów ɛm lʼɛwl nʼanŋ a (Jan 12.31; 16.11; Efɛs 2.2). yecʼɛtŋ ke lɛgŋ ɛjeci -li kʼↄbrmn Nyam any.

Elel eke wɛl ki ŋↄŋn Nyam

¹Low krɛkrɛ eke mʼam dad eke wɛl ki kok agŋ fɛŋ ecʼa el: ke wɛl ŋↄ́ŋn Nyam íbrmʼn low, kók sↄrŋ ke ɛ́luʼl bia. ²Ow it eke wɛl ki ŋↄŋn Nyam ↄŋ ɛ́b ebu fɛŋ lel agŋ fɛŋ ekʼↄnym es ɛw ab a, yecʼɛtŋ ke sʼↄ́tu sʼir ɛb ekʼɛrm mij anm ɛm, ɛrm es ɛy ɛm, sos us ɛm, Nyam ecʼes ucu ↄny tasi ɛm. ³Na anake akpl ke el sↄbↄ Nyam ɛy e Sↄg Ɛs, ⁴eke bʼerur ekʼagŋ fɛŋ kʼɛŋn sel, 2.4 Ezekiɛl 18.23. ke ↄ́tu uw low nɛnyɛmbri nyam any a.

⁵Tasi ɛm a Nyam nyam cɛ anŋ,

ɛtŋ in lel agŋ ab ecʼaraŋn a yɛji ɛgŋ nyam cɛ anŋ,

ɛgŋ a in lʼel Jesu Krist

⁶ekʼocr in sosi ɛw awoba agŋ a fɛŋ e sↄg eci. 2.6 Matie 20.28.

Ekʼow e lɛgŋ a ow a, lʼɛlu ↄkm li yɛgm eke Nyam erur ekʼagŋ fɛŋ kʼɛŋn sel. ⁷Na sosiɛm anake Nyam ɛwʼm lebl ɛlu ɛs lel ɛrm ɛs ab, ke mi yɛ́gm agŋ ekʼelm Jwifɛl yecʼeke el ↄmn lele low nɛnyɛmbri nyam ab a. Mʼↄnym yadŋ, low nɛnyɛmbri nyam mʼam dad.

Elel eke wɛl ki ŋↄŋn Nyam dedeku ɛm

⁸Mʼerur ekʼusu fɛŋ, egŋ ki gbigbl sabu ogŋ afr ŋↄŋn Nyam, gbɛkↄ Nyam ŋↄŋn a él ɛrm lala ɛm, ɛrm ekʼɛrm bebl lel ów es atar ab anm ɛm. ⁹Mʼerur yɛjʼeke ↄyↄw ki sʼus mob ekʼit, mob frafra cɛ, ke ow kʼelm low agbr ɛm; ke -li ki kokmn sin ekʼagŋ kʼɛkn ɛl, -li kʼokmn sika ɛm miyob, miyob ac lele mob sus ɛm eke bʼil an nↄnↄ ab, 2.9 Bɛ̀bmn 1 Piɛr 3.3.¹⁰kↄ ke ɛl e sakpl a él ów amamn e kok, ɛsɛ elel ekʼow it ekʼↄyↄw eke bi dad ɛsɛ ɛl bʼɛlum Nyam a, ki kok ab af. ¹¹Ow it ekʼↄyↄw kʼok es tiŋ iri low yɛgm a, ɛlum ligbɛl ɛm. ¹²Mʼɛlum abusu es eke yↄw ki yɛgm igŋ low oglog ɛw igŋ es; ow it eke li ki yewal tiŋ. ¹³Tasi ɛm a, Adam anake Nyam ikŋ anym kok a, ɛtŋ ow e jam a li kok Ɛv. ¹⁴Ɛtŋ ɛmɛny, ow elm Adam yɛbm wɛl ɛjumʼn, kↄ yↄw yɛb wɛl ɛjuʼr ɛtŋ ɛluam Nyam ecʼodad ebl a. 2.14 akr 13-14ɛ̀kn Nuŋ Ɔb 2.7, 21-22; 3.1-6.¹⁵Ɛbɛn yɛji, Nyam bʼow sↄgʼr in ecʼey eke li bʼow lʼew ab ɛm, 2.15 Nyam bʼow sↄgʼr in ecʼey eke li bʼow lʼew ab ɛm:aŋa Pↄl erur eke ki yɛgm yↄw eci low tasi eke Nyam erur eke kʼabul a. Ɛtŋ ɛmɛny lʼerur eke li kʼↄny agŋ bɛb eci tutr a eke el yↄw ecʼigŋ ɛbim owi a, lʼoc es. gbɛkↄ ow it eke li kʼↄny ↄmn, erur, ke lʼír ɛb eke elm low agbr ɛm ke bʼakpl Nyam sos ɛm.

Nyamel idr ɛsɛl ecʼów ↄm

¹Kin odad nawrɛ tasi: eke ɛgŋ nyam erur eke kʼel Nyamel ecʼidr ɛs, ke juma sɛnyn lʼerur a. ²Ow akpl eke Nyamel ecʼidr ɛs kʼel ɛgŋ ekʼabr ɛnym anm lís; yↄw nyam ecʼigŋ, 3.2 yↄw nyam ecʼigŋ:odad na Grɛk ɛm wɛl ↄtu eke kʼitŋn ɛjecʼɛm dad ɛsɛ: ke ow él akp nyam cɛ li kʼɛbi yↄw. ɛgŋ eke bʼok sos es low ɛm, ke bʼↄny any es ok. Ke nʼↄ́ny es an mamn, lʼél ɛgŋ eke bʼeb etu, ke ↄtu eke ki yɛgm agŋ low. ³Li kʼélm mar ɛgŋu, li kʼↄ́nym gaŋgaŋ, kↄ lʼél frↄrↄ lel ɛrm es ɛyr ɛs ab. Li kʼélm ɛgŋ e bʼerur os owi, ⁴kↄ lʼél ɛgŋ ekʼↄtu eke ki nyimn in obi ecʼakŋ a, ɛgŋ ekʼin ecʼey a bʼↄny in ecʼɛlum. ⁵Tasi ɛm a, ekʼɛgŋ nyam ↄ́tum nyimnm in obi ecʼakŋ a, ayaf lʼↄtu eke li ki nyimn Nyamel ee? ⁶Li kʼél ɛgŋ ekʼitŋn ɛrm ɛm owr owr; ekʼow el ɛgŋ ɛbɛn, li bʼow lʼeb sos ɛw abu ɛm ɛtŋ li bʼow nʼↄny es abur ɛsɛ agn ecʼab af. ⁷Ow it yɛji ekʼagŋ ekʼubm Krist nawrɛ a kʼɛlumʼn, yecʼɛtŋ ke li kʼↄ́nym cak, ke li kʼɛ́ym agn e simeb e bʼuk ab ɛm. 3.7 akr 2-7 bɛ̀bmn Tit 1.6-9.

Nyamel ɛm eci diakrɛl ecʼów ↄm

⁸Diakrɛl yɛji it ekʼel agŋ eke kʼus sos, ke ↄ́ny nɛnyɛmbri nyam yɛji; ow itm eke -li kʼɛgŋ mar nↄnↄ, -lʼↄl yadŋ ɛm eci os ↄny es; ⁹ke -lʼucu low nawrɛ ekʼɛy ↄkm Krist ecʼↄmn e -nʼↄnyn ab ɛm a -nʼↄny es tutr lala ɛm. ¹⁰Ow it ke wɛl íkŋ anym ɛbm ɛl ɛkn; ekʼow e jam a wɛl ɛknm low ↄbr ɛl e lís a, ke sica -li kok juma ɛsɛ diakrɛl af gↄŋ. ¹¹Ɔyↄw eke el diakrɛl a 3.11 Ɔyↄw eke el diakrɛl a:odad na Grɛk ɛm a wɛl ↄtu eke kʼitŋn ɛjecʼɛm dad ɛsɛ diakrɛl ecʼↄyↄw a yɛji... yɛji it eke kʼel agŋ eke kʼus sos. Ow itm eke -li ki dad ɛl lawlɛl e lís ecʼodad eŋuŋ; ow it ke -nʼↄny any es ok, ke -li kok cɛcɛ low low fɛŋ ɛm. ¹²Ow it eke diakr kʼel yↄw nyam ecʼigŋ, ke nʼↄ́ny abusu eke li ki nyimn in ecʼey a, lel in ecʼakŋ a nimum ab mɛwl ɛm. ¹³Diakrɛl eke bi kok ɛl e juma mɛwl ɛm a, agŋ a fɛŋ bʼow usr ɛl sos ɛtŋ -li bʼow -nʼↄny lokm susu ligbɛl ↄmn a ekʼↄny okr ɛy af Krist ab ab ɛm.

Low e lↄl es ke ɛy ↄkm

¹⁴Mʼam awŋʼŋ lɛl na, kↄ mʼam tutr eke mi kʼow mʼɛknʼŋ lɛgŋ tɛl ɛm. ¹⁵Gbɛkↄ eke mi kʼowm, bʼow ɛkn elel eke kʼaan es Nyam e bosu ab ɛm lɛl na e mʼam awŋʼŋ ab ɛm. Nyam e bosu a el Nyam ekʼanŋ owr ecʼagŋ a, ekʼucu low nawrɛ ↄny es a. ¹⁶Tasi, low a e lↄl es ke ɛy ↄkm ɛy ecʼↄmn ab ɛm a agb nↄnↄ! Low a el:

Krist ɛy ↄkm ɛsɛ ɛgŋ af,

Abŋ Lala ɛluʼl ↄkm ɛsɛ ɛgŋ nyim nyim af

ɛtŋ afr ɛrm ɛsɛl ɛknʼn. 3.16 Rom 1.4; 1 Piɛr 3.18: afr ɛrm ɛsɛl ɛknʼn: bɛ̀bmn 1 Piɛr 1.12.

Wɛl ↄb in ecʼamani ok sɛbr ɛjeci ecʼagŋ a,

ɛtŋ agŋ nↄnↄ ubʼr nawrɛ wus af aŋa,

ɛtŋ nʼim afr anygbɛl ɛm.

Agŋ eke bʼoc ów yadŋ yɛgmn agŋ low

¹Abŋ Lala dad ɛrum mar ninɛ: sɛgŋ es abal el ɛm a, agŋ bɛb bʼow igŋ ɛl ecʼↄmn a ɛlu es, ke ús sow tutr yadŋ lele low yɛgm eke bʼanŋ abŋ eŋuŋ ɛm ow a jam. ²Agŋ ɛnyɛmbri yony yony ɛsɛl lel ayadŋu ab bʼow irmn ɛl. Agŋ amua, el agŋ eke Nyam owi am dadm low kaka, ke ɛl e sow tutr a anŋ ɛsɛ ob eke wɛl oc lowi gbagba ɛwr mɛny af. 4.2 wɛl oc lowi gbagba ɛwr mɛny:el low ekʼanŋ wɛl bi kok lɛgŋ anym ɛm a ów eŋuŋ kok ɛsɛl lele madu e bʼuru es ab ab. Ob eke wɛl bʼoc lowi gbagba at a, el ob eke bʼitr, ob eke bʼuw.³Agŋ amua ɛl eci low yɛgm ab ɛm bʼow dad ekʼow itm ekʼagŋ kʼɛbirir, -li bʼow -lʼɛdŋn mob bɛb eke wɛl bʼij a. Kↄ Nyam kok ob ij amua yecʼɛtŋ ke agŋ a ekʼub nawrɛ, ke uw low nawrɛ any a, ↄ́ŋʼn bia ke íj. ⁴Ob fɛŋ eke Nyam kok a akpl; 4.4 Bɛ̀bmn Nuŋ Ɔb 1.31. kaka anm ɛm eke wɛl kʼigŋ ɛlu es, gbɛkↄ bʼeb a kʼↄ́pim eke kʼɛlu Nyam bia, ⁵aŋke Nyam odad lele Nyam ŋↄŋn ab bʼↄŋ ob fɛŋ el nimamn Nyam ecʼany af.

Él Krist e juma kok ɛs mamn

⁶Eke bʼoc low yɛgm na ɛlu ↄkm agŋ lisijimɛl ɛm, bʼow el Jesu Krist e juma kok ɛs mamn, ɛtŋ bʼow yɛgm ekʼↄmn e sodad ebl a lele low yɛgm tasi a ekʼɛŋn Abŋ ɛm a, bʼiyrʼŋ lok. ⁷Gbɛkↄ ìgŋ sawl odad eke low kaka anm ɛm ke ókrm af ↄmn ab a ɛ̀lu es, ke ↄ́tur sos akŋm Nyam ab ŋ ecʼɛb ir ɛm. ⁸Sos ↄtur sos megl af ecʼa el low akplu, kↄ low tɛl ɛm cɛ. Kↄ Nyam ecʼakŋm ab a el low ekʼakpl low fɛŋ ɛm, aŋke ow bʼↄŋ ɛy sʼir ɛb Nyam ab yɛfɛnyna ɛm ɛtŋ ow bʼɛwar ɛy lɛgŋ anym ɛm ecʼɛb ir a. ⁹Na el odad ebl tasi ekʼit eke agŋ fɛŋ kʼɛgŋ eb. ¹⁰Tasi ɛm a, sʼam ij gbre si kok juma ɛtŋ sʼam atr sos es, aŋke sʼoc ɛy e low ↄmn sʼɛlu Nyam ekʼanŋ owr ke el agŋ fɛŋ e Sↄg Ɛs ab ɛm, ab brobro agŋ a ekʼub nawrɛ a. ¹¹Kin ów eke kí dad ke yɛ́gm agŋ.

¹²Kì yɛb ɛgŋ kaka kʼiirʼŋ es aŋke el ŋgbafrɛli sosiɛm; kↄ èl agŋ ekʼub nawrɛ a e sɛwl: ŋ e sodad ebl ɛm, es an ɛm, erur ɛm, ↄmn ɛm lele ŋ e lala el tasi ɛm ab. ¹³Gbuŋ ke mʼów a, àt any awl Nyam e Silɛl a dedeku ecʼany af, ↄm ɛl ów ke yɛ́gm ɛl low. ¹⁴Kʼìjl Nyam ecʼob ap a ekʼↄny anŋʼŋ ɛm ab es, yecʼa ekʼɛŋn lɛgŋ a eke ŋ e Nyamel ab ɛm e kokoba ↄb ɛsɛl dad ow e low, ke agŋ ekpekp a atʼŋ abu nuŋ a. ¹⁵Àt any kok ów amua fɛŋ, òcr ŋ sosi nimum ɛlu juma eke wɛl abulʼŋ ab ɛm, yecʼɛtŋ ke agŋ a fɛŋ ɛ́kn ŋ ecʼanym imn a. ¹⁶Ɔ̀sur ŋ sosi lele ŋ e low yɛgm ab ab. Ìnym es kikri ow af. Tasi ɛm a, eke bi kok ɛbɛn, bʼow ebr ŋ sosi ɛlu es ɛtŋ bʼow eb agŋ a eke bʼiri ŋ e sodad a yɛji.

Ów eke Timote kʼↄm kretiɛnɛl a fɛŋ

¹Eke anŋ ɛgŋ likpekp ab, kì dadʼr odad lɛc ɛm, kↄ ↄmʼn ów lebl es ok ɛm ɛsɛ asŋ 5.1 Ob Ap 19.32. cɛ owʼn el af. Òc ŋgbafrɛ oto ɛsɛ esŋ jimɛl af, ²ↄyↄw ekpekp ɛsɛ esŋɛl af, ededyↄw oto ɛsɛ esŋ jↄwɛl af ɛrm lala tasi ɛm.

Eŋnyↄw eke ↄnym agŋ a

³Ɛ̀w eŋnyↄw ekʼↄnym agŋ a e low any. ⁴Gbɛkↄ eke iŋnyↄw nyam ↄny ey oglog alaw ekʼↄtu eke ki kok in e lís e low a, ke -li wewr -lʼɛlu ɛl ecʼↄmn a ↄkm ɛl obi ecʼakŋ a e lís, ke ow ↄ́ŋ -lʼↄwr ɛl ecʼagŋ a ecʼów eke kok ↄŋ ɛl a, aŋke ow el low eke Nyam erur. ⁵Iŋnyↄw ekʼↄnym ɛgŋ kaka eke ki kok in e lís e low a, oc in ecʼↄmn a ɛw Nyam af, ɛtŋ li bi ŋↄŋn Nyam ncok lele lɛgŋ owr ab lʼibrm ow abu ɛlum. ⁶Gbɛkↄ iŋnyↄw eke bʼus in ecʼów aw owi jam a, abŋ ɛm a lʼuw ŋ̂, eke nʼanŋ owr sos megl ɛm bↄbↄ yɛji. ⁷Low na anake it eke kʼↄkn ɛl a, yecʼɛtŋ ke wɛl kʼɛ́ŋnm abr ɛnym owi ɛl e lís. ⁸Eke ɛgŋ nyam ɛ́wm in ecʼagŋ e lís e low any, ab brobro in obi ecʼakŋ ecʼagŋ a, lʼɛgbr in ecʼↄmn a ɛtŋ nʼuŋ lʼakm ɛgŋ ekʼubm Krist nawrɛ a.

⁹Gbuŋ ke nↄ́n iŋnyↄw nyam e nin eŋnyↄw e lɛl ab ɛm a, ow it eke li kʼↄny akpo ekŋ nyahan. Ke lʼél yↄw ekʼↄny igŋ akp nyam cɛ, 5.9 Eŋnyↄw a ekʼit eke Nyamel kʼɛlum abu a ecʼen bʼanŋ lɛl ab ɛm. Ke lʼél yↄw ekʼↄny igŋ nyam cɛ: odad na Grɛk ɛm a wɛl ↄtu eke kʼitŋn ɛjeci ɛm dad ɛsɛ: lʼél yↄw ekʼↄny nɛny nyam in ecʼigŋ a e lís. Bɛ̀bmn 1 Timote 3.2 lele ow ecʼakr otar ab ab¹⁰ke wɛl úwʼr any in ecʼów amamn kok ɛm, ke lʼél yↄw eke gbagbl in ecʼey a mɛwl ɛm, ↄny ɛrm mamn etu ecʼeb ɛm, ↄŋ agŋ ekʼub Krist nawrɛ a mij yↄyↄg akr es, 5.10 mij yↄyↄg akr es:mij eke wɛl bʼↄŋ utu oglog etu agŋ yↄyↄg akr es a, el low ekʼucur Jwifɛl ogŋ ecʼetu eb a (Luk 7.44). Gbɛkↄ aŋa, Bibl any uw ɛsɛl bʼɛkn low na ɛrŋ yony: ɛsɛ low eke yↄw mamn bi kok agŋ lisijimɛl e lís af oglog ɛsɛ ów amamn fɛŋ eke li bi kok nʼↄŋ agŋ lisijimɛl ab af. atm gbre ɛsɛl abu ke kok ów amamn nↄnↄ gbɛl.

¹¹Eŋnyↄw ekʼanŋ ŋgbafrɛ a, kʼɛ̀lu ɛl nin lɛl ab ɛm, aŋke igŋ ɛbi owi bʼow ɛl nuŋ ɛm a, -li bʼigŋ Krist -lʼɛlu es, ¹²ɛtŋ ow bʼↄŋ ɛl -nʼↄny jɛj ok aŋke -lʼirmn ɛl e krɛkrɛ e nɛny ij a ow e lís. ¹³Ɛtŋ ɛmɛny, eke -nʼↄnym low kaka eke -li ki kok a, -li bʼeb akŋ akŋ ecʼɛc abu ɛm; ɛtŋ yecʼeke akplm tasi a el ke -nʼam cacak agŋ, -nʼam dad ów ekʼotm ɛl es, -nʼam bebar nɛnym low fɛŋ ɛm. ¹⁴Na sosiɛm mʼerur ekʼeŋnyↄw ŋgbafrɛ a kʼɛwl ɛbi egŋ, ew ey, ke nyímn ɛl ecʼakŋ a mɛwl ɛm, yecʼɛtŋ ke -li kʼↄↄmn ɛy ecʼefnu a abusu dadm ɛy ów eŋuŋ. ¹⁵Tasi ɛm a, eŋnyↄw ab ɛm nyam nyam ŋgboŋ ejagb nyim nyim ab af, am us Satan jam. ¹⁶Eke nawrɛ ub lis nyam ecʼagŋ ab ɛm eŋnyↄw anŋ, ow it eke li kʼɛlum wɛl abu, ke li kʼígŋm lʼɛlum wɛl es eke Nyamel kʼɛkn ɛl e lís owi. Ke ow ↄ́ŋ Nyamel ↄtu ɛlum eŋnyↄw ekʼanŋ ɛl sↄny a abu.

Nyamel nyimn ɛsɛl ecʼów ↄm

¹⁷Agŋ ekpekp a eke bi nyimn Nyamel mɛwl ɛm a it eke kʼɛŋn labm sↄg yony, 5.17 it eke kʼɛŋn labm sↄg yony:odad na Grɛk ɛm a wɛl ↄtu eke kʼitŋn ɛjecʼɛm dad ɛsɛ: wɛl ↄŋ ɛl any akm ɛl lawlɛl a. ab brobro ɛl a eke bʼij gbre dad Nyam odad, ke bi yɛgm agŋ low a. ¹⁸Low tasi eke Nyam Lɛl dad a el: Kʼow ocmn meb ↄnynmn id eke wɛl ucu meb am kikn may es a nɛny es, ɛtŋ: Juma kok ɛs it eke kʼɛŋn in e labm sↄg.5.18 Ol Ɔkn 25.4 lele 1 Korɛnt 9.9; Matie 10.10; Luk 10.7.¹⁹Eke wɛl oc ɛgŋ likpekp nyam eke wɛl am ok ów af ow ŋ ecʼany af, kʼɛ̀gŋ ow e low kʼeb, eke irim adaŋku yony oglog nyahan e nɛnym. 5.19 Ol Ɔkn 19.15.²⁰Agŋ yecʼeke kok sikpl owi a, ɛ̀nym ɛl abr dedeku a nimum ecʼany af, yecʼɛtŋ ke agŋ likpr a úru low.

²¹Kin low yecʼeke mʼam ibrmʼŋ tasi ɛm Nyam ecʼany af, Jesu Krist ecʼany af lele afr ɛrm ɛsɛl eke Nyam sↄsum ot ab ab ecʼany af: ɛ̀lum ów amua ke ow kʼelm ɛnyɛmbri yony yony ɛm, ke kʼánm ɛgŋ kaka jam. ²²Kʼògŋ es kʼat ɛgŋ abu nuŋ kʼabul il juma Nyamel ɛm. Kʼɛ̀lu abu awlŋɛl e sikpl owi ɛm; ŋ obi a ànŋ lala.

²³Kʼɛ̀gŋ mij sↄny coco cɛ, kↄ ɛ̀gŋ mar tɛl ŋ eci lokm a sosiɛm, aŋke ↄl ↄ́wmʼŋ ↄny. ²⁴Agŋ bɛb e sikpl a bʼɛru es kpata wɛl ɛkn gbuŋ eke wɛl ki jɛj ɛl e low ok a, kↄ agŋ likpr ecʼa, jɛj ok a bʼuwr gbuŋ ɛtŋ wɛl bʼɛkn ɛl e sikpl a. ²⁵Ów amamn yɛji wɛl bʼɛkn ɛl kpata, ɛtŋ ɛl a eke wɛl ɛ́knm kpɛkŋ a yɛji ánm es lↄl ɛm ibnm.

Madu lel ɛl eci es ɛw ɛsɛl ab ab ecʼów ↄm

¹Agŋ a fɛŋ eke el madu a it eke kʼↄny ɛlum nↄnↄ ligbɛl ɛl eci es ɛw ɛsɛl a e lís, yecʼɛtŋ ke ɛgŋ kaka kí dadm low ŋuŋ okm Nyam e nin a lel ɛy e low yɛgm ab ab af. ²Madu a eke ↄny es ɛw ɛsɛl eke el nawrɛ ub ɛsɛl a, wɛl el ɛl lisijimɛl. Ɛɛ nawrɛ! Gbɛkↄ ow elm na sosiɛm -li kʼↄbrmn wɛl any. Tasi ɛm a, wɛl e lís owi anake it eke -li ki kok tasi a, aŋke agŋ a eke -nʼam kok juma -nʼↄŋ a, el ↄmn ɛsɛl eke Nyam erur. 6.2 Bɛ̀bmn Kolↄs 3.22-25.

Low yɛgm yadŋ lel ob ↄny tasi ab

Kin low ekʼit eke ki yɛgm agŋ ke ↄ́ŋ ɛl -li kok a. ³Ekʼɛgŋ nyam am yɛgm agŋ low ɛjeci ɛtŋ nʼam igŋ ɛy Ɛs Kↄtↄkↄ Jesu Krist e sodad tasi a lele low yɛgm a eke el ɛy ecʼↄmn ecʼab ab lʼɛlu es, ⁴ke lʼel ɛgŋ eke es ɛfu iy ɛm gbↄŋ ɛtŋ lʼuwm low kaka any. Lʼel ɛgŋ e bʼerur ów es atar owi ke bʼogŋ mum odad ebl sosiɛm. Yogŋ ɛm ecʼów eke bʼanŋ ow a el: nyamn ɛyr, ów ɛsu, ɛgŋ wɛwr, sow tutr yadŋ ɛgŋ e lís, ⁵lel ów es atar eke úwrm, ke bʼanŋ agŋ eke nuŋ ɛm okm es, ke irmn low nɛnyɛmbri nyam e dad a ecʼaraŋn. -Li bi tutr ekʼↄmn eke wɛl bʼↄny Nyam ɛm a el ebr eke wɛl bʼeb ↄnyn ob af.

⁶Tasi, ↄmn eke wɛl bʼↄny Nyam ɛm a el ob ↄny ligbɛl, eke wɛl bʼɛgŋ yecʼa cɛ eke wɛl ↄny a eb. ⁷Tasi ɛm a, sʼisam ob kaka ab wus na af ɛtŋ si kʼow sʼↄtum sʼɛwlam ob kaka ab. ⁸Na sosiɛm eke sʼↄny ob ij lele mob sus ɛm ab cɛ, ke ow ↄdŋ ɛy ŋ̂. ⁹Agŋ eke bʼerur eke kʼↄny ob a, bʼɛy mɛju owi ɛm ɛtŋ low aw nↄnↄ lele low ŋuŋ ab bʼↄgŋm ɛl meb ɛtŋ bʼↄny ok ɛl wus ŋuŋn ɛl. ¹⁰Tasi ɛm a os ecʼerur anake el ów eŋuŋ fɛŋ e min a. Agŋ bɛb ecʼa, os a ecʼↄny e low aw afŋn ɛl es toŋ ɛtŋ -li kpab es ↄmn e lís ɛtŋ -lʼijr ɛl ecʼɛrm a gbre ow sosiɛm.

Ɔmn ɛm e mum mamn ecʼogŋ

¹¹Gbɛkↄ ŋ eke el Nyam ecʼɛgŋ a, àru ów amua fɛŋ ɛgb es. Ɔ̀l nɛny nyam ij es, ùcu Nyam ↄny es, ìr ɛb ↄmn ɛm, erur ɛm, low eku ɛm lele frↄrↄ el ɛm ab. ¹²Ògŋ ↄmn ɛm e mum mamn a, ùcu sel ekʼↄnym uwr a ↄny es aŋke Nyam ɛsŋʼŋ eke kʼuw sel ɛŋn ikŋ na any, lɛgŋ a ekʼagŋ nↄnↄ ecʼany af ij ŋ ecʼↄmn tasi ekʼↄny e daŋku a. ¹³Mʼam ijlʼŋ nɛny Nyam eke bʼↄŋ ob fɛŋ sel ecʼany af lele Jesu Krist ekʼij ↄmn tasi e nʼↄny a e daŋku Pↄns Pilat 6.13 Jan 18.36-37; 19.11. ecʼany af a e nin ɛm. ¹⁴Ɛ̀lum ów a eke mi dadʼŋ a, ↄsu ów a lala ɛm ekʼabr ɛnym kʼánm ɛm toŋ bake igŋ lɛgŋ a ekʼɛy Ɛs Kↄtↄkↄ Jesu Krist bʼow ɛwl ow a. ¹⁵Ɛgŋ a eke bʼow ↄŋ Krist ɛwl ow lɛgŋ a eke li bɛbm lʼɛw es a el Nyam.

Lʼel ehe e nuŋ lel ob fɛŋ ecʼes ɛw ɛs ab,

ɛ́b ebu ɛm ecʼƐb ebu lele kↄtↄkↄɛl ɛm e Kↄtↄkↄ 6.15 Ol Ɔkn 10.17; Selu 136.3. ab.

¹⁶In cɛ li kʼↄtum lʼuwm.

Lʼir usuayl usu ekʼɛgŋ kʼↄtum titam.

Ɛgŋ kaka ɛknmʼn ɛtŋ ɛmɛny ɛgŋ kaka kʼↄtum ɛknmʼn.

Sos usr lele abusu ab él in eci sɛgŋ fɛŋ! Amɛn.

Egbreŋgbi ecʼów ↄm

¹⁷Dàd wus na af ecʼegbreŋgbi a, -li kʼɛwr sos, -li kʼocr ɛl ecʼↄmn a -li kʼɛwr ob ↄny na eke bʼuwr ab af, kↄ -lʼoc ɛl ecʼↄmn a -lʼɛlu Nyam ɛm, in eke li bʼↄŋ ɛy ob fɛŋ ɛrm mamn ɛm ɛy e low kok ecʼa. ¹⁸Dàd ɛl -li kok ów amamn, -lʼij gbreŋgbi ów amamn kok ɛm, -lʼel ɛ́rm mamnu ke -lʼel agŋ eke bi cɛc ob ɛl lawlɛl ab. ¹⁹Eke -li bi kok ɛbɛn, -li bʼow -lʼas ob ↄny mamn ekʼↄnym uwr a luku lɛgŋ anym ɛm eci, yecʼɛtŋ ke -nʼɛŋn owr anŋ nawrɛ tasi a.

Ów ↄm es abal el

²⁰Libↄwi Timote, ↄsu mɛwl ɛm yecʼa eke Nyam abulʼŋ a. Àru nɛnym ot eke low kaka anm ɛm, ke ókrm af ↄmn ab a lele sodad ekʼagŋ bʼub nuŋ ɛm ↄny e sodad a ɛgb es. ²¹Tasi ɛm a, agŋ bɛb ij nɛny dad eke ɛl ↄny nuŋ ɛm ↄny ikŋ na ɛtŋ -li kpab es ↄmn e lís.

Ke Nyam ecʼↄwrↄ a ánŋ ↄny ab.