1 TESALONI

Pↄl e lɛl krɛkrɛ ekʼawŋ Tesaloni Eyŋ

Ów ekʼit eke wɛl kʼuw any

Tesaloni el Maseduan wus af ecʼɛb ɛgbɛl ab ɛm e nyam eke anŋ Grɛk wus af. Silvɛn eke ɛmɛny wɛl bʼɛsŋ Silas a lele Timote ab anake ɛlum Pↄl abu sigm Nyamel es Tesaloni ɛb ab ɛm a. Pↄl ↄtum anm yogŋ ibnm nↄnↄ, aŋke Jwifɛl ekʼanŋ yogŋ a ↄↄmʼn ow ecʼabusu (Ob Kok 17). Pↄl ŋgboŋ Maseduan wus af ɛtŋ nʼim Akayi wus af. Gbɛkↄ eke nʼŋgboŋ Maseduan a, nʼↄŋ Timote im Tesaloni eke kʼɛkn ↄmn ɛsɛl a, eke -lʼigŋm ɛl ecʼↄmn a -lʼɛlum es gbre ijr ekʼanŋ yogŋ a sosiɛm.

Sica eke Timote anŋ yogŋ ow, ke ism Pↄl amani amamn ab a, ow ↄŋ sos ɛm iŋnʼn nↄnↄ ɛtŋ nʼawŋ wɛl lɛl na. (Na ke akpo 51 oglog 52 ɛm ana Jesu e mew e jam.) Lɛl ab ɛm, Pↄl ↄŋ Nyam bia ɛtŋ atr Tesaloni ecʼↄmn ɛsɛl a sos es eke -li kʼinym es kikri ↄmn ɛm, -nʼimn anym eci.

Nuŋ 1 toŋ nuŋ 3 ɛm a, Pↄl am ↄkn elel eke li kokr juma wɛl ecʼaraŋn a. Ɛtŋ nʼam ɛlu in e sos ɛm iŋn eke nʼↄny a ↄkm, aŋke eke gbre ijr anŋ bↄbↄ yɛji, -nʼinym es kikri ɛl ecʼↄmn ab ɛm. Ɛtŋ nʼam dad wɛl ecʼɛkn ecʼerur eke nʼam ↄny a e low. Nuŋ 4.1-12 ɛm a, Pↄl am at nɛny es ↄkn ɛl low yɛgm eke -nʼɛŋan es an nyim nyim af a e low, ɛtŋ nuŋ 4.13 toŋ nuŋ 5.11 ɛm a, nʼam dad wɛl eke wɛl kʼↄsu sos nfaci ij e lís. Yogŋ ɛm cɛ lʼayal luw ɛm anŋ igb lele ɛy Ɛs Kↄtↄkↄ Jesu Krist e mɛny ɛwl ow ab ab e low yɛji.

In e lɛl a ecʼuwr ɛm a, nʼↄm wɛl ów ɛtŋ lʼɛdŋ wɛl ↄwrↄ.

Ɛsŋn

¹Pↄl, Silas lele Timote 1.1 SilasOb Kok 15.22; Timote: Ob Kok 16.1. ab e lɛl ekʼam awŋ Nyamel ecʼagŋ ekʼanŋ Tesaloni baŋn, kʼel Nyam Ɛs lele Ɛs Kↄtↄkↄ Jesu Krist ab ecʼagŋ. Ke ↄwrↄ lel ɛrm es ɛy ab ánŋ ↄny ab.

Tesaloni eyŋ ɛgŋ Nyam ecʼAmani Mamn a eb ↄmn ɛm

²Si bʼↄŋ Nyam bia sɛgŋ fɛŋ ↄny fɛŋ eci, ɛtŋ si bʼↄkn ↄny sɛgŋ fɛŋ, ɛy e Nyam ŋↄŋn ɛm. ³Nyam ɛy Ɛs ecʼany af si bʼↄkn ↄny e nawrɛ ekʼubr e juma e kokr, ↄny ecʼerur ekʼↄnyn e low e kokr, lel ɛrm ekʼusurir ɛy Ɛs Kↄtↄkↄ Jesu Krist ɛm ecʼↄmn ekʼↄnyn ab ab e low. ⁴Agŋ lisijimɛl, Nyam erur ↄny, ɛtŋ sʼuw any eke li sↄsum lʼot ↄny eel in eci. ⁵Tasi ɛm a, Amani Mamn ecʼodad eke si dad ↄny a, ow elm odad ebl nɛnym ɛm cɛ, kↄ Abŋ Lala ecʼabusu lele in ecʼabu ɛlum ɛm ab, ɛtŋ sʼuw any tasi ekʼow el low nawrɛ. Ɛtŋ uwr any eke, ɛy ecʼes an ↄny ecʼaraŋn a, ↄny e nimamn eci. ⁶Ɔny obi yɛji wewrmn ɛy lele Ɛs Kↄtↄkↄ ab ów. Gbre ijr nↄnↄ ecʼaraŋn yɛji, ɛgŋn Nyam ecʼodad a ebr, sos ɛm iŋn ekʼAbŋ Lala ↄŋ ↄny ab ɛm. ⁷Ow ↄŋ ↄny eel Maseduan lele Akayi wus ab ecʼagŋ ekʼub nawrɛ a e sɛwl mamn. ⁸Tasi ɛm a, Ɛs Kↄtↄkↄ ecʼodad a anŋ ↄny ogŋ Maseduan wus af a ɛtŋ ↄmun es im toŋ ok Akayi wus af. Ɛtŋ ow elm na cɛ, kↄ ↄny ecʼↄmn ekʼↄnyn Nyam ɛm a yɛji e low eb es susu a fɛŋ; ɛmɛny ow ɛbam eke si kʼↄb ow ecʼamani ij. ⁹Agŋ a fɛŋ am dad elel ekʼebr ɛy ↄny ogŋ a, ɛrm ɛm ekʼitŋnin eel Nyam eci, sɛkp e nuŋ igŋ ekʼigŋn ɛlul es, ke ɛgŋn Nyam ekʼanŋ owr ke el Nyam nawrɛ a eci low kok a e low ebr a. ¹⁰Ca am ekur in ecʼIy Jesu eke bʼow anŋ afr ow a. In eke Nyam igbmʼn luw ɛm nʼanŋ owr a, in anake lʼeb lʼɛlu ɛy es Nyam ecʼɛrm bebl ekʼam ow a e lís a.

Pↄl e juma eke kok Tesaloni baŋn

¹Agŋ lisijimɛl, ↄny obi yɛji uwr any ekʼↄny ogŋ a eke sʼow a ↄsu ey. ²Uwr any yɛjʼeke lɛgŋ anym ɛm a, wɛl ijr ɛy gbre, wɛwr ɛy Filip baŋn a. Gbɛkↄ ɛbɛn yɛji, Nyam ecʼɛrm susu ekʼↄŋ ɛy ab ɛm, si dad ↄny in ecʼAmani Mamn a ecʼodad, gbre ij nↄnↄ ecʼaraŋn. ³Tasi ɛm a, ɛy ecʼów ↄm a elm yadŋ ɛm, ow elm ów tutr eŋuŋ ɛm, ow elm kprakpr ɛm. ⁴Kↄ ɛy, Nyam ɛkn eke sʼↄtu ɛtŋ lʼabul ɛy in ecʼAmani Mamn a e dad. Sica sʼam dad Nyam ecʼodad, ɛtŋ sʼↄlm agŋ ɛm ecʼerur es, kↄ Nyam eke bʼɛkn ɛy e mɛrm ɛm a ecʼerur sʼam ↄl es. ⁵Ɔny obi uwr any eke lɛgŋ kaka si dadm mɛju ecʼodad; lɛgŋ kaka si kokm os ɛŋn e low. Nyam ij ow e daŋku. ⁶Sʼↄlm ekʼɛgŋ kʼaw ɛy, ke ow el ↄny oglog ke ow el agŋ ɛjeci.

⁷Ke sʼↄtu cɛ eke si kʼↄŋ ↄny low ebr, eke sʼel Krist ecʼɛrm ɛsɛl a sosiɛm. Gbɛkↄ sʼel agŋ frↄrↄ ↄny ecʼaraŋn ɛsɛ elel eke ey lis, frↄrↄ ɛm bi kok in ecʼey e lís e low ab af. ⁸Ɔny ecʼerur eke sʼↄny a sosiɛm, sʼↄↄm ↄny Nyam ecʼAmani Mamn a sↄny cɛ, kↄ ɛy obi ɛy obi e sel a yɛji, aŋke ↄny iil an nↄnↄ ɛy eci. ⁹Agŋ lisijimɛl, am ↄkan elel eke si kokr juma lɛc ɛm a: ncok lele lɛgŋ owr ab abu anŋ ɛy juma kok ɛm, nɛnɛ anake si dad ↄny Nyam ecʼAmani Mamn a ecʼodad a, yecʼɛtŋ ke si kʼócm ɛy e lís e low sʼabulm ↄny ɛm ecʼɛgŋ kaka.

¹⁰Ɔny ekʼubr nawrɛ a, ɛy ecʼes an ↄny ecʼaraŋn a ayl, el nɛnyɛmbri nyam ɛm eci ekʼabr ɛnym kaka anm ɛm. Ɔny obi yɛji ijr daŋku, ɛtŋ Nyam yɛji ij daŋku. ¹¹Ɛmɛny uwr any eke si kok ↄny ɛm ecʼɛgŋ nyam nyam e lís low ɛsɛ elel ekʼey ɛs bi kok in ecʼey ab af. ¹²Sʼↄm ↄny ów, sʼatr ↄny sos es, sʼibrm ↄny sakp nↄnↄ eke kʼaan es ɛsɛ elel eke Nyam erur ab af. In anake lʼɛsŋ ↄny eke kʼokr in ecʼes ɛw ecʼanygbɛl ab ɛm a.

¹³Na sosiɛm sʼam ↄŋ Nyam bia sɛgŋ fɛŋ, eke ebmn odad eke si dad ↄny a ɛsɛ agŋ ɛm ecʼodad af, kↄ ke ebr ɛsɛ Nyam ecʼodad af a. Ɛɛ, nawrɛ Nyam ecʼodad ab ana! Ɛtŋ li bi kok juma ↄny ɛm lʼitŋn ↄny ekʼubr nawrɛ a. ¹⁴Agŋ lisijimɛl, sica ↄny yɛji ɛkan ów a ɛsɛ elel eke Nyam ecʼagŋ ekʼanŋ Jude e Sinyamel ɛm ke ub Jesu Krist nawrɛ a ɛkn ab af. Ɔny yɛji, ↄny e baŋn eyŋ ijr ↄny gbre ɛsɛ gbre ijr nyam a cɛ eke Jwifɛl ijr Sinyamel amua ecʼagŋ ab af. 2.14 Ob Kok 17.5-6.¹⁵Jwifɛl amua anake ibi Ɛs Kↄtↄkↄ Jesu lele kokoba ↄb ɛsɛl ab ab, ke ɛy yɛji ijr ɛy gbre a. -Nʼam kokmn Nyam ecʼerur, ɛtŋ -lʼel agŋ fɛŋ ecʼefnu. ¹⁶-Nʼam ɛdŋn ɛy eke si ki dad sel ɛŋn ecʼodad sʼok agŋ ekʼelm Jwifɛl a bake -nʼɛŋn sel. Ow ↄŋ sikpl a eke godʼɛtŋ -li kokr a obn afŋn es. Na sosiɛm anake ow e nuŋ ɛdŋ ɛm a Nyam ecʼɛrm bebl a ɛŋn ɛl a.

Pↄl am erur eke ɛmɛny kʼɛkn Tesaloni eyŋ

¹⁷Agŋ lisijimɛl, nawrɛ si kpab ↄny es lís sos megl ɛm ow ibn tɛl, kↄ ɛrm ɛm a sʼanŋ ↄny ab. Sʼerur tasi ɛtŋ sʼatr sos es eke ɛmɛny si kʼow sʼɛkn ↄny. ¹⁸Sʼerur eke si kʼow ɛy fɛŋ sʼɛkn ↄny, ɛtŋ ɛm Pↄl, ɛm sↄny ɛm a, mʼatr sos es sakp nↄnↄ eke mi kʼow, kↄ Satan ↄ́ↄm ɛy ow ecʼabusu. ¹⁹Ɔny kↄtↄkↄ eel ɛy e low ↄmn, ɛy e sos ɛm iŋn, ɛy ecʼanygbɛl tufɛ, ɛy Ɛs Kↄtↄkↄ Jesu ecʼany af, in e mowrer e lɛgŋ a. ²⁰Ɛɛ! ↄny anake eel ↄny e low kok ɛm, ɛy ecʼanygbeŋ lele ɛy e sos ɛm iŋn ab a.

^1-2Na sosiɛm, eke si kʼↄtum sʼekum ij a, si bɛbm eke si kʼanŋ Atɛn 3.1 Atɛn:Ob Kok 17.15-16. ɛy sↄny, ɛtŋ sʼɛrm ɛy lisijim Timote eke bi kok Nyam juma ɛy ab, ke bi dad Krist ecʼAmani Mamn ecʼodad a. Sʼɛrmʼn eke li kʼow lʼusur ↄny ɛrm ke lʼátr ↄny sos es ↄny ecʼↄmn ab ɛm, ³yecʼɛtŋ ke ↄny ɛm ecʼɛgŋ kaka kʼɛ́ym wus gbre ijr na ekʼanŋ ↄny ecʼaraŋn ab ɛm, aŋke ↄny obi yɛji uwr any eke gbre ijr na, el low ekʼↄn ɛy es. ⁴Ow a eke sʼanŋ ↄny ogŋ a, sʼikŋ anym si dad ↄny eke wɛl bʼow ijr ɛy gbre. Ca ow anake ow ɛy a, ↄny uwr any. ⁵Na sosiɛm, eke mi kʼↄtum mʼekum a, mʼɛrm Timote eke kʼow otar ↄny ecʼↄmn a e low akr ókʼm, aŋke mʼam ebr ɛrmij, ekʼoglog ɛgŋ ɛju Ɛs a ɛju ↄny okr wus, ke juma eke si kok a el low ↄfr ↄfr ŋ̂.

⁶Sica Timote anŋ ↄny ogŋ a ow 3.6 Ob Kok 18.5. ɛtŋ ↄb ɛy ↄny ecʼↄmn lel erur ab ecʼamani, eke bʼↄkan ɛy e low sɛgŋ fɛŋ sɛnyn sɛnyn ɛtŋ am erurir eke kʼɛkan ɛy, ɛsɛ elel eke ɛy yɛji sʼam erur eke si kʼɛkn ↄny ab af. ⁷Ow sosiɛm a, lisijimɛl, ↄny ecʼↄmn ecʼamani e sʼiri ɛy e sos es ↄw na ɛm lel ɛy e gbre ijr na ɛm ab a, ɛyr ɛy ɛrm es, atr ɛy sos es. ⁸Sica sel ow ɛy ŋ̂, aŋke inymn es kikri Ɛs Kↄtↄkↄ ab ecʼaf okr ab ɛm. ⁹Kↄ ayaf tasi si kʼↄŋn Nyam bia sos ɛm iŋn na eke sʼↄny, ↄny sosiɛm Nyam ecʼany af ab ecʼee? ¹⁰Ncok lele lɛgŋ owr ab si bʼat lebl es si ŋↄŋn Nyam eke li kʼↄŋ ɛy abusu bake ɛmɛny blel sʼɛ́kanin, ke si yíbr low yecʼekʼanm ↄny ecʼↄmn ab ɛm a.

¹¹Ke blel ɛy Ɛs Nyam in obi lele ɛy Ɛs Kↄtↄkↄ Jesu ab kók ɛy ejagb bake sʼow sʼɛkn ↄny. ¹²Ke blel Ɛs Kↄtↄkↄ ↄ́ŋ erur ekʼↄnyn ↄny ↄfr ɛm lel agŋ ecʼɛjeci e lís ab a, ágb bubu af ɛsɛ elel ekʼↄny ecʼerur eke sʼↄny a agb ab af. ¹³Ke blel lʼúsur ↄny e mɛrm a, eel lala ke abr ɛnym kaka kʼánm ↄny ɛm Nyam ɛy Ɛs ecʼany af, lɛgŋ ekʼɛy Ɛs Kↄtↄkↄ Jesu bʼow ow lele in eci afr ɛrm ɛsɛl lala 3.13 Ɛrm ɛsɛl lalaoglog agŋ a fɛŋ ekʼel in ecʼa. Ɛ̀kn Mark 8.38; 13.27. a fɛŋ ab a.

Es an mamn eke Nyam bʼerur

¹Sica agŋ lisijimɛl, ow ekʼɛmɛny mi ki dad a el, ɛsɛ elel eke wewar ɛy e lís es an mamn ekʼakpl Nyam sos ɛm, ke am kokr ɛbɛn a, sʼam ŋↄŋn ↄny, sʼibrm ↄny atrm ɛm, ekʼƐs Kↄtↄkↄ Jesu e nin ɛm a, kʼúcur ↄnyn es ɛbɛn iman anym eci akm na e kokr a. ²Ɔny obi yɛji uwr low yecʼeke si yɛgm ↄny Ɛs Kↄtↄkↄ Jesu e nin ɛm ab any. ³Kin, ow eke Nyam am erur a: ke ↄny ecʼes an a él lala in ecʼany af; ke ↄ́sur sos nfaci ij e lís. ⁴Ke ↄny ɛm ecʼɛgŋ nyam nyam úw any ↄnyn sos es nfaci ij e lís, 4.4 Ke ↄny ɛm ecʼɛgŋ ɛgŋ nyam nyam úw any ↄnyn sos es nfaci ij e lís:agŋ bɛb bʼiri ɛsɛ, Ke ↄny ɛm ecʼɛgŋ... úw any oc yↄw lala ɛm lele anygbeŋ ɛm ab. án es lala ɛm lele sos us ɛm ab, ⁵ke kí yɛbm ów eŋuŋ ecʼaw akamʼn es ɛsɛ Nyam any uwm ɛsɛl af. ⁶Low na ɛm a, ɛgŋ kaka kʼɛ́ju lawl ki kokʼr low ↄbr, aŋke Ɛs Kↄtↄkↄ bʼow jɛj agŋ e bi kok ów amua a eci low ok, ɛsʼelel eke sʼikŋ anym si dad sʼayal sʼok ↄny ab af. ⁷Tasi ɛm a, Nyam ɛsŋm ɛy eke si kʼanŋ sikpl owi ɛm, kↄ ów lala kok ɛm. ⁸Na sosiɛm ɛgŋ ekʼɛgŋm low yɛgm na ebm a, ow elm ɛgŋ eci low yɛgm li digŋm lʼɛlum es, kↄ Nyam ekʼↄŋ ↄny in ecʼAbŋ Lala a eci low yɛgm li digŋ lʼɛlu es.

⁹Sica yecʼekʼel agŋ lisijimɛl ↄfr ecʼerur e low a, ow ɛbam eke wɛl ki nↄn lɛl awŋ ↄny, aŋke ↄny obi ɛm wewar Nyam ogŋ elel eke kʼerurir ↄny ↄfr a. ¹⁰Ɛtŋ erur ikŋ na e low anake am kokr Maseduan wus nimum af ecʼagŋ lisijimɛl a fɛŋ e lís a. Gbɛkↄ agŋ lisijimɛl, ɛmɛny sʼam ibrm eke ki kokr ow akpl obn. ¹¹Àtar sos es ke ánŋn ɛrm es ɛy ɛm, ke kʼɛ́ymn ɛgŋ e low ɛm, ke kókr juma ↄny obi ecʼabu ɛm, ɛsɛ elel eke si dad ↄny ab af, ¹²yecʼɛtŋ ke agŋ ekʼelm Krist e jam us ɛsɛl a, ↄ́ny ↄny ecʼɛlum. Ke ↄny ecʼes abur a kʼélm agŋ eci.

Ɛs Kↄtↄkↄ e mowrer

¹³Sica agŋ lisijimɛl, sʼerur eke kʼuwr Krist e jam us ɛsɛl ekʼuw a e lís e low any, yecʼɛtŋ ke kʼánmn sↄrŋ ɛm ɛsʼagŋ likpr a ekʼↄnym ↄmn ecʼab af. ¹⁴Eke sʼub nawrɛ eke Jesu uw ɛtŋ lʼɛwl nʼanŋ owr a, ɛbɛn nɛnyɛmbri nyam sʼub nawrɛ eke Nyam bʼow ↄŋ agŋ ekʼub Krist nawrɛ ke uw a ɛ́wl ow in ab.

¹⁵Sica kin yecʼeke Ɛs Kↄtↄkↄ in e low yɛgm ɛm dad ɛy, ke sʼam ɛlu ↄkm: Ɛs Kↄtↄkↄ e mowrer e lɛgŋ a, ɛy eke si bʼow sʼanŋ owr a, si kʼow sʼikŋm agŋ ekʼuw a ecʼanym. ¹⁶Lɛgŋ a, wɛl bʼow iri lebl nyam ikŋ ekʼel Nyam ecʼɛrm ɛsɛl ecʼes ɛw ɛs a e lebl lele Nyam e kↄkr e lebl ab ab, ɛtŋ Ɛs Kↄtↄkↄ bʼow anŋ afr us es. Agŋ ekʼub Krist nawrɛ ke uw a bʼow igb anŋ owr krɛkrɛ. 4.16 Jan 5.25.¹⁷Ke sica, ow e jam a, ɛy eke lɛgŋ a si bʼow sʼanŋ owr a, Nyam ↄ́ŋ ɛy sʼigb ɛl ab jru ɛm sʼím sʼↄbr Ɛs Kↄtↄkↄ afr. Nɛnɛ anake si bʼow sʼanŋ Ɛs Kↄtↄkↄ ab sɛgŋ fɛŋ a. 4.17 1 Korɛnt 15.51-52.¹⁸Ow sosiɛm, àtarir sos es ↄny ↄfr sodad amua ɛm.

¹Sica agŋ lisijimɛl, yecʼekʼel sɛgŋ lele wanci ab ecʼa, ow ibram eke wɛl ki nↄn lɛl awŋ ↄny, ²aŋke ↄny obi yɛji uwr any tasi eke Ɛs Kↄtↄkↄ e mowrer e lɛgŋ a bʼow okr ɛy es ɛsɛ elel eke ulu bʼow ncok ɛm ab af. 5.2 Matie 24.43; Luk 12.39; 2 Piɛr 3.10.³Lɛgŋ ab ɛm ekʼagŋ bʼow dad ɛsɛ: «Low kaka anm, fɛŋ el ɛrm es ɛy a!» 5.3 fɛŋ el ɛrm es ɛy a:Jeremi 6.14; 8.11. yogŋ anake lɛgŋ a bʼow okr ɛl es kpru ɛm ŋuŋn ɛl a. Ow bʼow anŋ ɛsɛ iy ↄnyn eke bʼokr lok ab lis es ab af; ɛtŋ ɛgŋ kaka kʼow ɛcm saw.

⁴Kↄ agŋ lisijimɛl, ↄny ecʼa anmn ncebn ɛm eke lɛgŋ na kʼokr ↄny es ɛsɛ ulu ecʼab af, ⁵aŋke ↄny fɛŋ eel lɛgŋ owr lele usu ayl ab ecʼey. Ɛy sʼelm lɛgŋ uk lele ncebn ab ecʼey. ⁶Na sosiɛm ow itm eke si kʼɛru mɛmn ɛsʼagŋ amua na ecʼab af, kↄ sʼánŋ any owr, ke low fɛŋ ɛm any ók ɛy es. ⁷Mɛmn ɛru ɛsɛl a, lɛgŋ uk ɛm -li bʼɛru mɛmn; ɛtŋ mar ɛgŋ ɛsɛl a, lɛgŋ uk ɛm bʼɛgŋ mar am ↄny. ⁸Kↄ ɛy eke sʼel usu ayl ecʼa, ow akpl eke si kʼók any es, ke sʼóc ɛy ecʼↄmn lel erur ab ɛsɛ ar mob eke sʼok sos af, ke ɛy e sel ɛŋn ecʼeku ánŋ ɛsɛ kpokpo tufɛ eke sʼus af, 5.8 Esayi 59.17.⁹aŋke Nyam ↄↄm ɛy eke si kʼim sʼɛy in ecʼɛrm bebl ab ɛm, kↄ ke ɛy Ɛs Kↄtↄkↄ Jesu Krist ↄ́ŋ ɛy sel ɛŋn. ¹⁰In lʼuw ɛy sosiɛm yecʼɛtŋ ke nʼↄŋ ɛy sʼanŋ owr in ab, eke sʼanŋ owr ɛtŋ sʼuw yɛji. ¹¹Na sosiɛm, ↄmanin ów ke átarir sos es ↄmn ɛm ɛsɛ elel eke am kokr godʼɛtŋ ab af.

Ów ↄm es abal el lele ɛsŋn ab

¹²Agŋ lisijimɛl, sʼam dad ↄny eke kʼↄ́nyn agŋ ekʼam kok juma ↄny ecʼaraŋn, yɛgm ↄny low, ke nyimn ↄny Ɛs Kↄtↄkↄ e nin ɛm a ecʼɛlum. ¹³Ɔ̀nyn ɛl e sos usr nↄnↄ lele erur ab, juma eke -nʼam kok a sosiɛm. Ànŋn ɛrm es ɛy ɛm ↄny ↄfr.

¹⁴Agŋ lisijimɛl, sʼam ŋↄŋn ↄny, ɛ̀nymn ↄkpↄrŋu abr; àtar agŋ eke sos ↄw es a sos es, ɛ̀lumn abŋ ɛm ecʼↄgbↄru a abu, ke ↄ́nyn low eku ɛgŋ fɛŋ e lís. ¹⁵Ɛ̀wr ɛrm ke ɛgŋ kaka kʼócm low ŋuŋ ↄbarm low ŋuŋ any. Kↄ sɛgŋ fɛŋ ↄↄl low nimamn e kok es ↄny ↄfr ɛm lel agŋ fɛŋ eci lís ab.

¹⁶Sɛgŋ fɛŋ ànŋn sos ɛm iŋn ɛm. ¹⁷Sakp sakp fɛŋ kʼↄ̀pir Nyam ŋↄŋn. ¹⁸Ɔ̀ŋn Nyam bia low low fɛŋ ɛm. Na el low eke Nyam am ibrm eke ki kokr, ↄny ekʼokar af Jesu Krist ab a. ¹⁹Kʼìrmnin Abŋ Lala ecʼal ekʼanŋ ↄny ɛm ab es. ²⁰Kʼìfan odad eke Nyam bʼↄŋ ↄny ecʼaraŋn e kokoba ↄb ɛsɛl dad ↄny a, ²¹kↄ ìgbal low fɛŋ ogŋ ɛkan, ke úcur yecʼekʼakpl a ↄnyn es. ²²Ke ↄ́nyan sos es low ŋuŋ fɛŋ e kok ɛm.

²³Ke Nyam ekʼel ɛrm es ɛy e nuŋ a in obi áyal ↄny nimum; ke nʼↄ́ŋ ↄny ecʼɛgŋ el a nimum ekʼel abŋ, liy, lele sos megl ab a él lala, ekʼabr ɛnym kaka anm ɛm toŋ bake ɛy Ɛs Kↄtↄkↄ Jesu Krist e mowrer e lɛgŋ a ów. ²⁴In eke nʼam ɛsŋ ↄny a, li bʼow li kok ów amua fɛŋ iy nɛny, aŋke lʼel cɛcɛ.

²⁵Agŋ lisijimɛl, ɛy yɛji ŋↄ́ŋan ↄŋn ɛy. ²⁶Bìbrmnin ↄny ↄfr ɛsʼagŋ lisijimɛl af Krist ɛm. ²⁷Mʼam ŋↄŋn ↄny mʼok ↄny mɛrm sabu af, ekʼƐs Kↄtↄkↄ e nin ɛm a, kʼáwal lɛl na ókr agŋ lisijimɛl a fɛŋ. ²⁸Ke ɛy Ɛs Kↄtↄkↄ Jesu Krist ecʼↄwrↄ a ánŋ ↄny fɛŋ ab!