Piɛr e lɛl krɛkrɛ ekʼawŋ
Ów ekʼit eke wɛl kʼuw any
Bwo el Piɛr ee? Piɛr el Jesu ecʼɛrm ɛsɛl lɛw yony a eke sↄsum ot ab ɛm ecʼanymu. Piɛr, Grɛk ɛm a nin, ɛtŋ ow e nyandrɛ el “Lob”. Jesu in obi ↄŋʼn nin na. Ebre ɛm e nin e lʼij a el Simↄ. Piɛr el Galile wus af ecʼɛgŋ; in e baŋn a el Bɛtsayida (Jan 1.43). In lele lisijim Andre ab, Galile ecʼokij ab ɛm -li bʼok muw. Gbɛkↄ eke Jesu ɛsŋ ɛl a, -lʼigŋ muw ok a -lʼɛlu es ɛtŋ -lʼus ow jam. Sica eke Jesu uyu afr a, Piɛr ↄb in ecʼAmani Mamn a e kokoba Jerusalɛm, Jude wus ab af lele Samari wus ab af ab. Nʼim toŋ lʼok Rom; yogŋ anake wɛl ɛwʼr olikŋ af ke lʼuw a.
Lɛl na ɛm, Piɛr am dad eke Silvɛn eke ɛmɛny wɛl bʼɛsŋ Silas a anake in el in eci lɛl nↄn ɛs a (5.12). Piɛr nↄn lɛl na “Babilↄn” (5.13). Ke Rom ana. Ni nↄn lɛl a nʼam awŋ agŋ a fɛŋ eke ↄny ↄmn Krist ɛm, ke ↄmu es wus a eke yɛfɛnyna wɛl bʼɛsŋ Turki a ecʼɛb ɛb ab ɛm a (1.1).
Ke lɛgŋ na ɛm a, ↄmn ɛsɛl a ekʼanŋ yogŋ a ↄbr gbre ijr. Ow sosiɛm anake Piɛr nↄn lɛl na awŋ ɛl eke kʼatr ɛl sos es, gbre ijr a eke -lʼↄbar a sosiɛm a. Nuŋ 1.2-12 ɛm a, nʼam ↄkn wɛl eke Nyam bʼow eb ɛlu ɛl es ɛtŋ ow ɛw ɛl aja ligbɛl nyam es afr. Lɛgŋ es abal el ɛm a eke Jesu bʼow ɛwl ow a anake -li bʼow -nʼɛŋn aja na a. Ow sosiɛm nʼam dad wɛl eke wɛl kʼↄny ↄmn, ke wɛl ínym es kikri es abur fɛŋ ecʼany af.
Nuŋ 1.13 toŋ nuŋ 2.10 ɛm a, Piɛr am ↄkn ɛl eke Nyam in ibrm eke wɛʼn ki kok sayl owi. Nuŋ 2.11 toŋ nuŋ 5.19 ɛm a, nʼam ibrm eke wɛl kʼↄny es an mamn agŋ a ekʼↄnym ↄmn a ecʼaraŋn lele wɛl ↄfr ɛm ab. Nʼam ibrm eke wɛl kʼeb Krist eke kokm low ↄbr kaka, ke ɛbɛn yɛji wɛl ijr gbre a e lakr a.
Lɛl a ecʼuwr ɛm a (5.1-14), nʼam ↄm ↄmn ɛsɛl a lele idr ɛsɛl ab ab ów.
1Ɛsŋn
1Ɛm Piɛr, Jesu Krist ecʼɛrm ɛs, ɛm anake mʼam awŋ agŋ a eke Nyam sↄsum ot a lɛl na a, ɛl a eke ↄmu es, 1.1 ɛl a eke ↄmu es:lɛgŋ ab ɛm odad ebl a ekʼanŋ Grɛk eci silɛl ɛjecʼɛm a, bi yɛgm Jwifɛl ekʼirm Palɛstin wus af a. Kↄ aŋa ecʼa odad ebl na el Krist e jam us ɛsɛl ekʼↄmu es wus nimum af a eci. (Bɛ̀bmn Jak 1.1 lel ow ecʼakr otar ab ab.) ke am ir ɛb ɛsɛ etu agŋ af, Pↄŋ, Galasi, Kapadↄs, Azi lele Bitini wus ab af a. 2Nyam Ɛs, ikŋ anym sↄsum ot ↄny ɛsɛ elel eke li bɛbm lʼɛw es ab af. Lʼɛcr in ecʼAbŋ ab ɛm li kok ↄny eel agŋ lala, yecʼɛtŋ ke ɛ́lumn Jesu Krist, ke in eci mebl a áyal ↄny. 1.2 Ɛ̀kn Ɔkm Ok 24.3-8; Ob Ap 16.14-15; Ebre 9.22. Ke Nyam ecʼↄwrↄ a lel ɛrm es ɛy ab ab ɛ́ny bobn ↄny.
Si kↄ́klmn Nyam ekʼɛcr Jesu Krist ɛm ɛlu sel ɛŋn ↄkm a
3Si kↄ́klmn Nyam, ɛy Ɛs Kↄtↄkↄ Jesu Krist ecʼƐs! In eci sↄrŋ ikŋ ligbɛl ab ɛm, nʼↄŋ wɛl ewr ɛy ɛm Jesu Krist eci luw ɛm ekʼanŋ igb a sosiɛm. Nɛnɛ ɛm anake sʼam ↄmn low a eke bʼↄŋ ɛy sʼanŋ owr a, 4ɛtŋ sʼↄtu eke sos ɛm iŋn ɛm, si kʼeku aja a eke Nyam ɛw es in ecʼagŋ ecʼa. Aja a, lʼoc lʼɛw ↄny es afr, yogŋ a eke ow kʼↄtum uŋm, ikpim, iram a. 5Ɛtŋ ↄny obi a, eke ubr nawrɛ a sosiɛm, Nyam ekʼↄny abusu a bʼↄsu ↄny, ↄny e sↄg eci. Sel ɛŋn ikŋ na, wɛl bʼow uwʼr any sɛgŋ es abal el ɛm a.
6Na sosiɛm sos ɛm iŋn iy ↄny ɛm gbↄŋ, ekʼow it eke yɛfɛnyna ɛm ses babur akpasu akpasu a kʼↄwr ↄny sos es sɛgŋ tɛl eci yɛji. 7Ses babur amua bʼɛlum ↄny ecʼↄmn e sakpl a abu ɛy ↄkm. Sika ↄtu eke kʼuŋ, ɛbɛn yɛji wɛl bʼoc ɛluʼl alm, wɛl ɛ́kn eke lʼel caŋ. Ɔny ecʼↄmn a ecʼa yɛji ɛbɛn. Lʼil an lʼakm sika, gbɛkↄ in yɛji li bʼɛcr ɛbm ɛkn ɛm. Na sosiɛm anake, lɛgŋ a eke Jesu Krist bʼow ɛy ↄkm a, bʼow ɛŋan es susm, kↄklm lel anygbɛl ab ↄny ecʼↄmn a e sakpl a sosiɛm a. 8Ɔny, Jesu ɛknmn in ɛtŋ ɛbɛn yɛji bʼerurir ir. Ɔny, ɛknmn in caca ɛm a ɛtŋ ɛbɛn yɛji bʼↄnyn ↄmn in ɛm. Na sosiɛm anake sos ɛm iŋn ligbɛliy ↄny ɛm a, sos ɛm iŋn ligbɛl eke wɛl kʼↄtum dadm ow e low. 9Sos ɛm iŋn ikŋ na ↄnyn aŋke wɛl sↄg ↄny. Na el ob ap a eke bʼɛŋan eke ubr Jesu nawrɛ a sosiɛm.
10Sel ɛŋn ikŋ na, kokoba ↄb ɛsɛl ↄl es ɛtŋ tutr in e lís e low. -Lʼikŋ anym -li dad ob ap a eke bʼow ɛŋan a e low. 11Krist ecʼAbŋ a anŋ ɛl ɛm, ɛtŋ ikŋ anym ɛwar Krist eci gbre fɛŋ eke bʼow ij a lel ow ecʼanygbɛl eke bʼow igŋ ab ab. 1.11 Ɛ̀kn Selu 22; Esayi 53; Luk 24.25-26. Kokoba ↄb ɛsɛl a ↄl eke kʼuw lɛgŋ ab af eke ów amua kʼɛy a, lel ow ecʼelel eke ow kʼowr ab ab any. 12Ɛtŋ Nyam yɛgm ɛl eke: odad a eke wɛʼn am ↄb ow e kokoba a, owʼn elm wɛl eci, kↄ ↄny eci. Sica, agŋ a ekʼam ↄb Amani Mamn a eci kokoba a, cɛc ↄny odad a Abŋ Lala a ekʼanŋ afr ow a ecʼabusu ɛm. Ɛtŋ odad na, afr ɛrm ɛsɛl ɛl obi yɛji erur eke kʼɛpi mɛny es ɛm.
Lala ɛm ecʼes an
13Ow sosiɛm, bɛ̀bmn sos low kok eci ke ánŋn any owr. Òcr ↄny eci low ↄmn a nimum ɛlul bibm a eke bʼow ɛŋan ab ɛm, lɛgŋ a eke Jesu Krist bʼow ɛy ↄkm a. 14Ɛ̀lumn Nyam ke kí kokmn lɛgŋ sig ɛm ecʼↄny ecʼów aw a ekʼanŋ ↄny ɛm, gbuŋ ke uwr Krist any a e low. 15Èel lala ↄny ecʼes an nimum ɛm, ɛsɛ elel eke Nyam ekʼɛsŋ ↄny a el lala ab af, 16aŋke Nyam Lɛl ɛm wɛl nↄn: Èel lala, aŋke mʼel lala.1.16 Ob Ap 19.2.
17Ɔny eci Nyam ŋↄŋn ɛm a, ↄny bʼɛsŋn Nyam ↄny Ɛs, in eke li bi jɛj ɛgŋ fɛŋ e low lʼok nɛnyɛmbri nyam ɛm, ɛgŋ ɛgŋ ecʼelel eke kokr ab ɛm a. Ow sosiɛm, ìir ɛb Nyam eci muru ɛm sɛgŋ a ekʼanŋ ↄny eke kʼanŋn wus af aŋa. 18Ɔny lagŋɛl ecʼelel eke bʼiir ɛb ke ebr a, low kaka anm ɛm. Gbɛkↄ ↄny uwr any eke Nyam ɛnm ob ligbɛl ɛtŋ oc sↄgr ↄny ɛb ir akpasu na ɛm. Ɛtŋ ow elm ob eke bʼuŋ ɛsɛ sika af oglog ɛsɛ jɛtɛ ɛm af li sↄgrm ↄny. 19Kↄ Jesu Krist eci mebl ekʼil an ab ɛm li sↄgr ↄny. In eke lʼel egb waw ekʼanŋ ɛsɛ licɛbli ekʼↄnym low ↄbr ke itam ɛm af a. 20Nyam ikŋ anym bɛbm ɛwʼr es gbuŋ ɛtŋ kok wus nimum ɛtŋ ↄny eci nimamn sosiɛm, lʼɛlu ow ↄkm sɛgŋ na ekʼel sɛgŋ es abal el ab ɛm. 21Krist ɛm anake bʼubr Nyam ekʼigbmʼn luw ɛm ke ↄŋʼn anygbɛl a nawrɛ a. Kin low a sosiɛm eke bʼocr ↄny eci nawrɛ ub a lel ↄny eci low ↄmn ab ab ɛlul Nyam ɛm a.
22Ɔny eci low nɛnyɛmbri nyam ecʼɛlum a ayal ↄny eke kʼeruririr nawrɛ ɛm tasi ɛsɛ ↄny lisijimɛl ↄfr cɛ af. Ow sosiɛm, èruririr tasi ɛm ↄny ↄfr ɛrm lala ɛm. 1.22 ɛrm lala ɛm1 Piɛr eci silɛl esig oglog ecʼa: ɛrm fɛŋ ɛm.23Ɔny wɛl ewr ↄny ɛm ɛtŋ ɛm ewr owr na anm ob eke bʼuw ɛm owm, kↄ ob eke kʼↄtum uwm ɛm. Ɛɛ! Ɔny wɛl ewr ↄny ɛm, Nyam ecʼodad ebl a eke bʼↄŋ ɛgŋ sel ke anŋ sɛgŋ fɛŋ ab ɛm. 24Nawrɛ, aŋke Nyam Lɛl dad ninɛ:
agŋ fɛŋ anŋ ɛsɛ suw af,
ɛtŋ low fɛŋ eke bʼↄŋ ɛl -nʼↄny any a,
anŋ ɛsɛ ↄgm suw dↄdↄ af.
Suw bʼuw es ɛtŋ suw dↄdↄ bi kpab ɛy,
25kↄ Ɛs Kↄtↄkↄ ecʼodad ebl a anŋ sɛgŋ fɛŋ.1.24-25 Esayi 40.6-8, Sɛptant ɛm ecʼodad eke wɛl oc.
Odad ebl na el Amani Mamn a eke wɛl ↄb ok ↄny a.
2Lebn a ekʼanŋ owr a lele Nyam ecʼagŋ ab
1Ògŋn low fɛŋ ekʼel low ŋuŋ, yadŋ ↄny, ɛnyɛmbri yony yony, nyamnɛyr lel ɛgŋ cak cak ab. 2Ɛsɛ ey abu ɛm eke wɛl ew af, èrurir Nyam odad ekʼel mɛny mij mamn a, yecʼɛtŋ ke in ecʼɛgŋ ɛm a, ágbr ke ɛ́ŋan sel. 3Tasi ɛm a, Nyam Lɛl dad ninɛ: ↄny, tatr Ɛs Kↄtↄkↄ anm ɛkan in e sided a.2.3 Selu 34.9.
4Òwr titmn Ɛs Kↄtↄkↄ ekʼel lebn a ekʼanŋ owr ke agŋ igŋ ɛlu es a, Nyam sↄsum ocʼr, lʼɛkn eke ow el sↄbↄ in ecʼany af. 5Ɔny yɛji, ɛsɛ mebn ekʼanŋ owr af, èbr usu Abŋ Lala ecʼêl a ecʼus ab ɛm. Ow bʼow ↄŋ okar af eel egb waw ɛsɛl ecʼeb eke wɛl ot ok saw, Nyam e juma kok eci, ɛtŋ bʼow kokr segb waw Nyam ecʼAbŋ a ecʼerur ɛm, ɛtŋ Nyam bʼow eb Jesu Krist sosiɛm. 6Ɛtŋ kin yecʼeke Nyam Lɛl dad:
Mi sↄsum lebn sↄbↄ ekʼil an mʼoc,
ɛtŋ mi bʼow mʼɛwʼr es Siↄn 2.6 Siↄn:el Jerusalɛm ecʼɛb a e nin. ɛb ɛm ɛsɛ lↄy ɛm eci lebn af;
ɛtŋ ɛgŋ yecʼeke bʼoc ↄmn ɛluʼl ɛm a,
sos kʼow ↄwm es lɛgŋ kaka.2.6 Esayi 28.16, Sɛptant ɛm ecʼodad eke wɛl oc.
7Ɔny ekʼubr nawrɛ ecʼa, lebn na il an nↄnↄ ligbɛl; kↄ agŋ ekʼubm nawrɛ ecʼa lebn ↄfr ↄfr cɛ ow el:
lebn a eke êl us ɛsɛl igŋ ɛlu es a
ɛwl mɛny el êl lↄy ɛm e lebn tasi,
8ɛtŋ lʼel lebn eke bʼeb agŋ akr
lob eke bʼɛlu ɛgŋ wus. 2.8 Selu 118.22; Esayi 8.14.
-Lʼok wus aŋke -lʼɛgŋm -lʼubm Nyam ecʼodad a nawrɛ, ɛtŋ na el low a eke Nyam bɛbm ɛl ecʼa.
9Gbɛkↄ ↄny, eel agŋ a eke wɛl sↄsum ot a, Ɛb ebu a ecʼegb waw ɛsɛl a, agŋ a ekʼel Nyam ecʼa. Ɔny eel agŋ a eke Nyam sↄsum ot eke kʼↄb ów ɛgbɛl a e li kok a ecʼamani. In lʼɛsŋ ↄny eke kʼokr ↄkm ncebn ɛm, ke li nyímn ↄny in ecʼusuayl sↄbↄ ab ɛm. 2.9 Ɔkm Ok 19.5-6; Esayi 43.20; Ɔkm Ok 19.5; Ol Ɔkn 4.20; 7.6; Esayi 43.21; 9.1.10Lɛgŋ sig ɛm a, ↄny elmn Nyam ecʼagŋ, kↄ yɛfɛnyna ɛm a eel in ecʼagŋ ŋ̂. Lɛgŋ sig ɛm a, Nyam ↄnym ↄny eci sↄrŋ ikŋ, kↄ yɛfɛnyna ɛm a nʼↄny ↄny eci sↄrŋ ikŋ. 2.10 Ose 1.6,9; 2.1,23,25.
Ɔnyn es an nyim nyim agŋ eke elm nawrɛ ub ɛsɛl a ecʼaraŋn
11Erur ɛm ecʼagŋ lisijimɛl, ↄny eel etu agŋ ekʼir wus af aŋa lɛgŋ tɛl eci. Ow sosiɛm mʼam dad ↄny: kʼùsr ↄny ecʼów aw eŋuŋ a eke bʼogŋ ↄny eci liy mum a jam. 12Agŋ ekʼuwm Nyam any ecʼaraŋn a, ↄnyn es an nyim nyim, yecʼɛtŋ ke eke -li cicr ↄny yadŋ ɛm ekʼↄny kokr ów eŋuŋ, ke -lʼↄtu -lʼɛgŋ -lʼeb -lʼɛkn ↄny ecʼów amamn a, ke lɛgŋ a eke Nyam bʼow ow a, -li kↄklm ow ecʼanygbɛl a.
13Ɛ̀lumn abusu ɛsɛl Ɛs Kↄtↄkↄ sosiɛm, ke ɛ́lumn ɛb ebu a aŋke lʼel agŋ a fɛŋ ecʼes ɛw, 14ke ɛ́lumn in eci kpama ɛsɛl eke lʼabul ów eŋuŋ kok ɛsɛl eci low ↄb, lel agŋ amamn ecʼaw a yɛji. 2.14 Bɛ̀bmn Rom 13.1-7.15Yecʼekʼel Nyam ecʼerur a el ke ↄny ecʼów amamn kok a ábl agŋ ekʼuwm low any eci nyamb ij a nɛny es. 16Àan es ɛsɛ ewi af gbɛkↄ, ke ↄny eci lewi ij a kʼélm gbad eke bʼocr lↄↄl ów eŋuŋ es. Kↄ ↄnyn es an ekʼel Nyam ecʼↄbↄwi ecʼes an. 17Ɔ̀nyn ɛgŋ fɛŋ ecʼɛlum. Èrurir ↄmn ɛm ecʼↄny lisijimɛl a, ↄnyn Nyam eci muru ke ɛ́lumn ɛb ebu a. 2.17 Nyandrɛ 24.21.
Akŋ juma kok ɛsɛl lele es ɛw ɛsɛl ab
18Ɔny, akŋ juma kok ɛsɛl a, ɛ̀lumn es ɛw ɛsɛl eke bi kokr ɛl e juma a es is ɛm. Ɛtŋ ow elm ɛl a ekʼↄny ɛrm mamn ke el frↄrↄ a cɛ kʼɛluamn, kↄ ɛl a ekʼel agŋ tuↄtuↄ a yɛji. 19Kʼaw ke ↄny am ijr gbre ekʼitamn eke kʼijr a, aŋke erurir eke kʼeel cɛcɛ Nyam eci. Eke ów el ɛbɛn ke low sɛnyn sɛnyn ana. 20Tasi ɛm a, blel ow el low ŋuŋ kokr, ke bogŋ ecʼany ij bʼow ɛŋan ekʼɛgŋn ebr am ijr gbre ee? Kↄ ekʼam ijr gbre low eku ɛm, low mamn eke kokr a eci, ke ow el low sɛnyn Nyam ecʼany af. 21Tasi ɛm a, low na ecʼanake Nyam ɛsŋ ↄny a, aŋke Krist in obi yɛji lʼij gbre ↄny eci, ɛtŋ lʼɛw ↄny sɛwl es, yecʼɛtŋ ke ébr in e lakr a. 22In li kokm sikpl kaka ɛtŋ in e nɛnym mɛju owi anm ɛym ↄkm.2.22 Esayi 53.9. Akr 22 toŋ akr 25 ab, am ɛlu Esayi 53 ecʼodad eke dad libↄwi a eke bʼow ij gbre a e low ↄkm.23In, eke wɛl wɛwrʼr a, li wɛwrm ɛgŋ; eke lʼij gbre a, lʼijm luw lʼokm ɛgŋ kaka af, kↄ lʼoc in ecʼↄmn a lʼɛlu Nyam eke bi jɛj low ok nɛnyɛmbri nyam ɛm ab ɛm.
24Olikŋ ab af,
Krist in obi oc ɛy e sikpl a ubu sos af,
yecʼɛtŋ ke sikpl ecʼa sʼúw,
ke sʼír ɛb nyim nyim eke bʼakpl Nyam sos ɛm.
In ecʼabi a anake ewlm ɛy a.
25Tasi ɛm a, ↄny anŋn ɛsɛ mɛcɛb ekʼirm af, kↄ sica ↄny ɛwal mɛny owr mɛcɛb ↄsu ɛs 2.25 mɛcɛb ↄsu ɛs:Luk 15.3-7; Jan 10.11; 1 Piɛr 5.4. a eke bʼɛw ↄny eci liy nyamn af a ogŋ.
3Ɔyↄw lel ɛl ɛcɛl ab
1Ɔyↄw, ↄny ecʼa, ↄnyn es is ↄny ɛcɛl e lís, yecʼɛtŋ ke ekʼɛl ɛm a agŋ nyam nyam anŋ ekʼubm Nyam ecʼodad a nawrɛ, ke ↄny ecʼes an mamn ɛm, -nʼↄny ↄmn, ow kʼelm odad ebl ɛm, 2aŋke -li bʼow -lʼɛkn elel ekʼↄny ecʼes an a el lala lele ɛlum ɛm ab a. 3Ɔny eci sakpl a itm eke kʼel sos af eci cɛ: ɛsɛ sin ecʼↄtu mɛwl ɛm, sika ɛm miyob lele mob sus ɛm ewi eci sus ab; 4kↄ ke ↄny eci sakpl a él yecʼa eke lↄl es ↄny ɛm a. Ɛrm frↄrↄ lele bɛtɛ ab anake el sakpl a ekʼil an nↄnↄ ligbɛl Nyam ecʼany af, ke íram a. 5Lɛgŋ sig ɛm a, ↄyↄw nawrɛ ub lisɛl ekʼↄny ↄmn Nyam ɛm a, ↄny sakpl ikŋ na aŋke -li bʼɛlum ɛl ɛcɛl. 6Ɛtŋ ɛsɛ Sara af, li bʼɛlum Abraham ɛtŋ li bʼɛsŋ ow: «Ɛm ɛgŋ gbɛliy.» Sica, ↄny eel in ecʼↄyↄw oto, eke bi kokr low mamn ɛtŋ ɛ́gbmn low kaka fɛŋ es ↄnym ↄny erŋn.
7Ɔyↄw ɛcɛl, ↄny yɛji, ↄny ecʼↄyↄw ab ab ecʼɛb eke bʼow ir usu nyam a, ɛ̀wr ɛl e lís e low any. Ow it eke kʼuwr any ekʼↄyↄw el ob fuɛfuɛ. Kòkr ɛl e low ɛlum ɛm 3.7 Efɛs 5.25; Kolↄs 3.19. aŋke ɛsɛ ↄny af, -li bʼow -nʼɛŋn sel ɛŋn a eke Nyam bʼow ap ↄny a. Eke bi kokr ɛbɛn a, low kaka kʼow ɛdŋnm ↄny e Nyam ŋↄŋn a fɛŋ.
Ìjr gbre low nimamn eci, kↄ ow kʼél low ŋuŋ eci
8Uwr ɛm ecʼa, ↄny fɛŋ ↄnyn nɛny af okr nyam, ìkŋnin sↄrŋ, èrurir ↄny ↄfr ɛsɛ agŋ lisijimɛl af, ↄnyanin ɛrm mamn, ke ɛgŋ ɛgŋ ís es lawl ecʼany af. 9Kʼòcr low ŋuŋ kʼↄbarir low ŋuŋ any; kʼòcr wɛwr kʼↄbarir wɛwr any. Ow eke ki kokr a el: ke íbrmn Nyam ecʼↄwrↄ a ɛgŋ a eci, aŋke na sosiɛm eci Nyam ɛsŋ ↄny eke kʼↄŋ ↄny ↄwrↄ ɛsɛ aja af. 10Kin yecʼeke Nyam Lɛl dad:
Ekʼɛgŋ nyam am erur eke kʼↄny ɛb ir mamn,
ke úw ehe e sɛgŋ any a,
ow it eke li kʼɛdŋn in ecʼanm a ów eŋuŋ e dad,
ke lʼɛ́dŋn in e nɛny a yadŋ ecʼↄny.
11Ow it eke li ki kpab es low ŋuŋ e lís,
li kok low nimamn ke lʼↄ́l ɛrm es ɛy es low any at ɛm.
12Li kók ɛbɛn, aŋke Ɛs Kↄtↄkↄ ecʼanyamn a anŋ in ecʼey a eke bʼↄny es an mamn ab af,
ɛtŋ in ecʼↄru a bʼiri ɛl eci ŋↄŋn ebl a;
gbɛkↄ agŋ a eke bi kok ów eŋuŋ a li bʼatar wɛl ab. 3.12 Selu 34.13-17, Sɛptant ɛm ecʼodad eke wɛl oc.
13Ekʼↄny ecʼɛrm fɛŋ ɛm am ↄↄl low nimamn eci kok es, ke bwo ecʼɛgŋ bʼow kok ↄny low ŋuŋ ee? 14Ɛtŋ eke, lɛgŋ nyam low nimamn eci kok sosiɛm am ijr gbre, ke ehe él ↄny eci! Kʼↄ̀nyn agŋ eci muru ɛtŋ kì yɛbr ɛrm mij kok ↄny!15Gbɛkↄ ↄny ecʼɛrm ɛm a, sùsmn Krist sↄny cɛ es, eke lʼel ↄny eci Kↄtↄkↄ a.3.14-15 Bɛ̀bmn Esayi 8.12-13. Sɛgŋ fɛŋ, bɛ̀bmn otarir ↄny e low ↄmn a ekʼↄnyn a e low akr ókr agŋ a eke bʼow ibrm ↄny a. 16Gbɛkↄ, ke ow él bɛtɛ bɛtɛ lel ɛlum ɛm ab. Ke ↄny ecʼów tutr ɛm a abr ɛnym kʼánm, yecʼɛtŋ ke agŋ a ekʼam ↄnyn ↄny yadŋ a, ↄny ecʼes an mamn Krist e jam us ɛm a, ɛ́s ók any. 17Ow akpl eke tasi ɛm a, kʼij gbre low nimamn e kok ɛm, eke ow el Nyam ecʼerur, ow a eke kʼij gbre low ŋuŋ e kok ɛm a.
Krist ij gbre eb any ↄŋ ɛy
18Tasi ɛm a, Krist in obi ij luw e gbre agŋ e sikpl a nuŋ af, akp nyam coco cɛ eci; in eke lʼel nɛny nyam ɛs a, lʼuw ów eŋuŋ ɛsɛl sosiɛm, yecʼɛtŋ ke lʼót nʼim ↄny Nyam ogŋ. In, lʼuw sos megl e luw, gbɛkↄ Abŋ Lala ɛwl mɛny ↄŋʼn owr anŋ. 19Ow ɛm a, nʼim nʼↄmun in ecʼany eb ecʼamani ab es 3.19 Ow ɛm a, nʼim nʼↄmun in ecʼany eb ecʼamani ab es lʼok abŋ a fɛŋ:odad na Grɛk ɛm a wɛl ↄtu eke kʼitŋn ɛjecʼɛm dad ɛsɛ: Abŋ na ab, nʼim toŋ li dad odad lʼok abŋ a fɛŋ... Ow ↄtu eke kʼel agŋ a ekʼɛgŋm irim Noe ecʼɛwar a, ke uw a ecʼabŋ; oglog agŋ bɛb bi tutr ekʼow el afr ɛrm ɛsɛl ekʼↄbr Nyam any, ke is ɛrm suŋ owi a ekʼↄŋ Nyam ŋuŋn wus mij gbɛl ab ɛm a, ecʼabŋ a. Bɛ̀bmn Nuŋ Ɔb 6.1-8; 2 Piɛr 2.4-5; Jud 6. lʼok abŋ a fɛŋ ekʼanŋ sobel ɛm a. 20Ow el ɛl a eke lɛgŋ sig ɛm a ↄbr Nyam any a. Nyam ↄŋ in e low eku a am ibn, lɛgŋ ab ɛm eke Noe am kok mijɛtŋ ligbɛl nyam a. Agŋ tɛl cɛ anake ok mijɛtŋ ab ɛm, ke ɛcr mij ɛm eci ɛŋn sel a; ɛl fɛŋ -lʼij agŋ niwn. 21Ów amua el mij ok nuŋ a eke bʼↄŋ ↄny sel yɛfɛnyna ɛm a eci mɛny ɛwr. Mij ok nuŋ na elm ɛy e sos megl af e sikpl a ecʼes yↄyↄg eci, kↄ ke ɛ́gŋ eb ocr ŋ nimum ɛlul Nyam ɛm, ów tutr ekʼↄnym abr ɛnym ɛm. 3.21 kↄ ke ɛ́gŋ eb ocr ŋ nimum ɛlul Nyam ɛm ów tutr ekʼↄnym abr ɛnym ɛm:odad na Grɛk ɛm a wɛl ↄtu eke kʼitŋn ɛjecʼɛm dad ɛsɛ: kↄ ke íbrm Nyam ayal ŋ ecʼów tutr a. Ɛtŋ mij ok nuŋ na ↄtu el, Jesu Krist e luw ɛm ekʼigb a sosiɛm. 22Lʼuyu afr, nʼanŋ Nyam e lidr abu af. Sica nʼↄny lɛc lʼakm afr ɛrm ɛsɛl fɛŋ, lele mob fɛŋ ekʼↄny es ɛw lel abusu ab a.
4Ìgŋn sikpl owi ɛlul es
1Eke Krist ij gbre in e sos megl ɛm a, ↄny yɛji bɛ̀bmn sos tutr nɛnyɛmbri nyam ab ɛm, aŋke ɛgŋ yecʼekʼij gbre in e sos megl ɛm a ↄnym low sikpl ab. 2Sɛgŋ ekʼanŋ ↄny eke kʼiir ɛb wus af aŋa a, kʼùsr agŋ ecʼów aw eŋuŋ a jam, kↄ ùsr Nyam e low e bʼerur a jam. 3Ɛɛ, lɛgŋ ekʼɛc ab ɛm a, kokr sakp nↄnↄ agŋ ekʼuwm Nyam any a e low e bʼerur a. Ɔny iir ɛb ɛsɛ elel ekʼerurir ab af, ↄnyn ów aw eŋuŋ, eel mar ɛgŋu. Eel ob iju ɛtŋ bʼigŋn sinyam yadŋ ekʼel nɛnŋn e mob a nuŋ. 4Jam aŋa, agŋ amua low am iti any. Úsmn ɛl jam ij, ánmn ɛl e ecʼɛb ir suksuk owi ab ɛm ij, ɛtŋ -li bi wɛwr ↄny. 5Gbɛkↄ -li bʼow -lʼayal ɛl ecʼów amua fɛŋ -lʼok Nyam ekʼinym es eke ki jɛj agŋ ekʼanŋ owr lel agŋ ekʼuw ab ab e low ok a. 6Na sosiɛm anake wɛl ↄb Amani Mamn a ok agŋ a eke caca ɛm uw a yɛjʼa. Ɛbɛn a, eke -lʼuw ɛsɛ agŋ fɛŋ af sos megl e luw a yɛji, ke sica -lʼↄtu -lʼir ɛb, ɛsɛ elel eke Nyam am erur ekʼagŋ kʼir ɛb ab af, Abŋ Lala ecʼabu ɛlum ɛm.
Ànŋn ɛsɛ Nyam e juma kok ɛsɛl amamn af
7Ow kʼow ibnm ɛtŋ ow bʼow el low fɛŋ e nuŋ. Ow sosiɛm íir ɛb sos es ok ɛm, ke any ok ↄny es, yecʼɛtŋ ke ↄ́tur ŋↄŋan Nyam. 8Low tasi eke kʼikŋn anym kokr a el, éruririr ↄny ↄfr ↄny ecʼɛrm fɛŋ ɛm, aŋke erur bi tɛtŋ sikpl nↄnↄ es.4.8 Nyandrɛ 10.12; Jak 5.20.9Èbr agŋ eke bʼow ↄny akŋ a, ke ow kakl kʼánm ɛm. 10Ke ɛgŋ ɛgŋ ecʼob ap ekʼɛŋn Nyam e lís a, lʼóc li kokr lawlɛl a fɛŋ e low. Ànŋn ɛsɛ juma kok ɛsɛl amamn eke bʼↄsu Nyam ecʼob ap eŋ eŋ ab af. 4.10 Nyam ecʼob ap eŋ eŋ:bɛ̀bmn Rom 12.4-8; 1 Korɛnt 12.4-11, 27-31.11Ke ɛgŋ ekʼɛŋn ob ap ekʼel Nyam odad ecʼa, él Nyam e nɛny af odad ɛs. Ke ɛgŋ ekʼɛŋn ob ap ekʼel abu ɛlum ecʼa, kók abu ɛlum ɛs e juma lɛc a eke Nyam bʼↄŋʼn ab ab. Ɛtŋ Nyam bʼow ɛŋn anygbɛl low fɛŋ ɛm Jesu Krist sosiɛm. In ecʼél anygbɛl lel abusu ↄny ab sɛgŋ fɛŋ! Amɛn.
Sos ɛm iŋn gbre ij ɛm
12Erur ɛm ecʼagŋ lisijimɛl, ow kʼɛ́w ↄny any iti, ɛsɛ low ekʼokr ↄny es af! Ekʼanŋn ɛbm ɛkn eke bʼotarir es ɛsɛ al ɛm eci ɛcr ab af. Al na anake bʼow ɛlu ↄny ecʼob ekʼeel a ↄkm a. 13Eke tasi ɛm anŋn Krist eci gbre ij a e low ɛm, ke ànŋn sos ɛm iŋn ɛm, yecʼɛtŋ ke lɛgŋ a eke bʼow ɛkan in ecʼanygbɛl a yɛji, ánŋn ehe lele sos ɛm iŋn ligbɛl ab ɛm. 14Eke wɛl bi wɛwr ↄny eke eel Krist eci jam us ɛsɛl a sosiɛm, ke ↄny ecʼa ehe ligbɛl ana! Aŋke Nyam ecʼanygbɛl ecʼAbŋ a anŋ ↄny af!
15Ke ↄny ɛm ecʼɛgŋ kaka kʼíjm gbre ɛgŋ e lʼibi, mil e liy, low ŋuŋ e li kok oglog ɛgŋ ecʼów eke lʼigb lʼɛy ɛm sosiɛm eci. 16Kↄ ekʼɛgŋ nyam am ij gbre kretiɛn e lʼel a sosiɛm eci, ow itm eke ɛ́s kʼↄnyʼn; kↄ ke nana nʼↄ́ŋ Nyam bia eke li kʼↄtu lʼij nin na. 17Aŋa anake el jɛj ok a e nuŋ ↄb a, ɛtŋ ow ↄb nuŋ Nyam ecʼagŋ ɛm. Sica eke lʼↄb nuŋ ɛy ɛm, ke agŋ a ekʼɛgŋm ubm Nyam ecʼAmani Mamn a nawrɛ ecʼa, ayaf ow bʼow ɛcr ab ee? 18Ɛsɛ elel eke Nyam Lɛl dad ab af: Ekʼow ɛw tuↄtuↄ eke ɛgŋ nyim nyim kʼɛŋn sel, ke ayaf ow bʼow ɛcr ów eŋuŋ ɛsɛl lele sikpl ɛsɛl ab ecʼab ee?4.18 Nyandrɛ 11.31, Sɛptant ɛm ecʼodad eke wɛl oc.
19Ow sosiɛm agŋ a ekʼam ij gbre Nyam ecʼɛlum sosiɛm a, it eke kʼocr ɛl sosi ɛlul Nyam ɛl e Kok Ɛs ekʼel cɛcɛ a abu ɛm, ke -lʼucu low mamn kok -nʼↄny es.
5Agŋ ekpekp a lele kretiɛnɛl a fɛŋ ab ecʼów ↄm
1Sica, agŋ ekpekp a ekʼanŋ ↄny ab ke bi nyimn Nyamel a anake mʼam dad odad a. Ɛm obi yɛji mʼel ɛgŋ likpekp ɛsɛ ↄny af. Mʼel Krist e gbre ij a e daŋku, ɛtŋ mi bʼow mʼanŋ anygbɛl a eke bʼow ɛy ↄkm a e low ɛm. 2Ɛtŋ kin yecʼeke mʼam dad a: ɛ̀wr mɛbob eke Nyam abul ↄny a e low any. Kʼɛ̀wr ɛl e low any ɛsɛ atrm ɛm af, kↄ erur tasi ɛm, ɛsɛ elel eke Nyam erur ab af. Kʼɛ̀wr ɛl e low any os ɛŋn sosiɛm eci, kↄ eke ɛgŋn ebr a sosiɛm. 3Agŋ a eke Nyam abul ↄny a, kʼɛ̀wr es ɛw lɛc lɛc ɛl ab; kↄ èel mɛbob a e sɛwl, 4yecʼɛtŋ ke lɛgŋ a eke mɛcɛb ↄsu ɛsɛl ecʼEs Ɛw Ɛs a bʼow ow a, 5.4 mɛcɛb ↄsu ɛs:Luk 15.3-7; Jan 10.11; 1 Piɛr 2.25. ɛ́ŋan ob ap ekʼel anygbɛl e tufɛ eke írmnm in eci jɛjn a.
5Ŋgbafrɛ, ↄny yɛji, ɛ̀lumn agŋ ekpekp a. Ɔny fɛŋ, ìsr es ɛwr ekekey ↄny lawlɛl ecʼany af, aŋke Nyam Lɛl dad ninɛ: Nyam bʼↄↄr agŋ eke bʼɛw sos a abr, kↄ li bʼɛlu in ecʼɛrm mamn ↄkm agŋ eke bʼis es a e lís.5.5 Nyandrɛ 3.34, Sɛptant ɛm ecʼodad eke wɛl oc.6Ow sosiɛm, ìsr es ɛwr ekekey Nyam e lɛc a ecʼew, yecʼɛtŋ ke lɛgŋ a eke lʼɛw ab af, nʼↄ́ny lʼigbl ↄny ogŋ. 7Òcr ↄny ecʼɛrm mij ebr fɛŋ ɛlulil Nyam abu ɛm, aŋke li bʼɛw ↄny e low ɛrm.
8Ɔ̀sur sos, ke ánŋn any owr. Agn ekʼel ↄny ecʼifnu a, ɛsɛ kukuma eke am awŋn af, am did ↄny ɛtŋ am ɛc ↄl ɛgŋ eke kʼɛmn es. 9Ìnymn es kikri ↄmn ɛm ke ákmn in es. Ke úwr any ekʼↄny lisijimɛl ekʼanŋ wus nimum af a, am ij gbre nɛnyɛmbri nyam ɛsɛ ↄny af. 10Ɔny e gbre ij a bʼow ibn sɛgŋ tɛl cɛ eci. Kↄ Nyam ekʼin ɛm bibm fɛŋ anŋ a, ɛsŋ ↄny eke kʼowr anŋn in ecʼanygbɛl a ekʼↄnym uwr ab ɛm, Krist ab ecʼaf okr ab ɛm. Ɛtŋ li bʼow li kok ↄny eel sↄbↄ, eel leg leg ke ↄ́nyn lɛc, ke sica wɛl kʼↄtum ↄnym ɛlum ↄny wus ij. 11In ecʼél abusu ↄny sɛgŋ fɛŋ. Amɛn!
Ɛsŋn es abal el
12Silas el ɛgŋ lisijim ekʼel cɛcɛ. Mʼɛcr in ɛm mi nↄn lɛl ikprli na, eke mi kʼatr ↄny sos es ke mi yɛ́gm ↄny tasi eke Nyam ecʼↄwrↄ a tasi anake ucur ↄnyn es a.
13Agŋ a fɛŋ ekʼanŋ Babilↄn aŋa, ke Nyam sↄsum ot ɛsɛ ↄny af a, ɛl fɛŋ am ɛsŋn ↄny, ɛm jim Mark yɛji. 5.13 Babilↄn:agŋ bɛb bi tutr ke Rom ecʼɛb a. Mark: Piɛr ecʼa, Mark el in ecʼↄmn ɛm ecʼiy.14Ɛ̀sŋninin ↄny ↄfr, af ɛyarir ɛm lel erur ɛm ab.
Ɛrm es ɛy él ↄny fɛŋ ekʼokar af Krist ɛm a eci!