1 JAN

Jan e lɛl krɛkrɛ eke awŋ

Ów ekʼit eke wɛl kʼuw any

Agŋ dad eke Jan ekʼel Jesu ecʼɛrm ɛs a, in im in ir Efɛs ɛb ɛm. Pↄl anake sigm Sinyamel ekʼanŋ yogŋ ab es a. Gbɛkↄ eke ow ibn a, Jan im ir yogŋ ɛtŋ el Sinyamel a ecʼidr ɛs. Ow sosiɛm anake nʼam ɛsŋ kretiɛnɛl ekʼanŋ Sinyamel ab ɛm a, ɛm eci “ey”.

Jan anake nↄn silɛl nyahan na am awŋ a. Krɛkrɛ e lɛl na, ow elm Nyamel nuŋ nyam oglog ɛgŋ nuŋ nyam nʼawŋm, kↄ ke wɛl áwl lɛl a Sinyamel a nↄnↄ ɛm. Lɛl ab ɛm, ów yony anake nʼam dad ow ecʼodad a: krɛkrɛ ɛm a, nʼam dad wɛl eke wɛl kʼus ejagb nyim nyim a cɛ jam. Odad na e nyandrɛ el ke -nʼↄny ↄmn ɛy Ɛs Kↄtↄkↄ Jesu ɛm, ke -lʼerurir ɛl ↄfr. Yony ɛm a, nʼam dad wɛl eke wɛl kʼↄsu sos low yɛgm ɛsɛl ayadŋu e lís (nuŋ 2.18-29, nuŋ 4.1-6).

Jesu el sel ecʼodad

¹Ɛgŋ a ekʼin sosiɛm sʼam nↄn lɛl na a, lɛgŋ eke wɛl ki kokm wus na yɛjʼa, ke in nʼanŋ ŋ̂. Low yecʼeke sʼuw any in e lís a el: ɛy sʼiri in ecʼodad, sʼɛknʼn ɛy ecʼanyamn ɛm, sʼɛpr mɛny es gbiy sʼɛknʼn, ɛtŋ sʼitŋn in abu. In lʼel Odad eke bʼↄŋ agŋ sel. ²Odad a ekʼel sel a ɛy ↄkm, sʼɛknʼn ɛtŋ sʼij in e daŋku, ɛtŋ sʼam dad ↄny sel ɛŋn ekʼanŋ sɛgŋ fɛŋ a ecʼodad. Godʼɛtŋ nʼanŋ Nyam ab, ɛtŋ sica lʼɛy ↄkm sʼɛknʼn. ³Yecʼeke sʼiri ke sʼɛkn a, sʼam dad sʼok ↄny, yecʼɛtŋ ke ↄny yɛji ókar af ɛy ab, ke ↄny lel ɛy ab sʼókr af si lool sʼel nyam, Ɛs lele Jim Jesu Krist ab ɛm. ⁴Sʼam nↄn ów amua sʼↄŋ ↄny, yecʼɛtŋ ke ɛy e sos ɛm iŋn a él sos ɛm iŋn tasi.

Usuayl ɛm ecʼes an

⁵Amani e sʼiri in ogŋ ke sʼam dad ↄny a el: Nyam el usuayl, ncebn kaka anm in ɛm. ⁶Eke si bi dad sʼɛsɛ sʼokr af in ab, ɛtŋ si bʼan es ncebn ɛm a, ke sʼel ayadŋu ɛtŋ low nɛnyɛmbri nyam anm ɛy ɛm. ⁷Kↄ eke si bʼan es usuayl ɛm, ɛsɛ elel eke Nyam in obi el usuayl ab af a, ke ɛy fɛŋ sʼokr af ŋ̂, ɛtŋ Jim Jesu Krist e mebl a am yↄyↄg ɛy e sikpl fɛŋ es.

⁸Eke si bi dad sʼɛsɛ: sʼam kokm sikpl, ke ɛy ↄfr sʼam ɛjurir, ɛtŋ low nɛnyɛmbri nyam anm ɛy ɛm. ⁹Eke si bʼɛgŋ ɛy e sikpl sʼeb Nyam ecʼany af a, li bʼow lʼoc lʼap ɛy ke li yↄ́yↄg ɛy eci ŋgɛsi fɛŋ es, aŋke lʼel cɛcɛ, lʼel nɛny nyam ɛs. ¹⁰Eke si bi dad sʼɛsɛ: sʼam kokm sikpl, ke sʼɛw Nyam yadŋu, ɛtŋ in ecʼodad ebl a anm ɛy ɛm.

¹Ɛm ecʼey, mʼam nↄn ów amua e lɛl mʼawŋ ↄny, yecʼɛtŋ ke kí kokmn sikpl. Kↄ eke batŋ ɛgŋ nyam kok sikpl, ke sʼↄny ɛy e dogŋn ɛs nyam, Jesu Krist, nɛny nyam Ɛs, ekʼanŋ Ɛs ecʼany af. ²In obi lʼocr in sosi li wawr egb ɛy sosiɛm, yecʼɛtŋ ke Nyam óc ɛy e sikpl ap ɛy. Ɛtŋ ow elm ɛy sↄny cɛ eci, kↄ wus na ecʼagŋ fɛŋ eci.

Erur ecʼol

³Eke si bʼɛlum Nyam ecʼol a, ke ow ɛm a, sʼuw any eke sʼuwʼr any. ⁴Ɛgŋ eke bi dad ɛsɛ: «Mʼuw Nyam any», ɛtŋ lʼɛ́luam ow ecʼol a, ke lʼel yadŋu ɛtŋ low nɛnyɛmbri nyam anm in ɛm. ⁵Kↄ ɛgŋ eke bʼɛlum Nyam ecʼodad ebl a, ɛgŋ a lʼerur Nyam iy nɛny. Eke sʼɛlumʼn ɛbɛn a, sʼuw any eke sʼokr af in ab. ⁶Ɛgŋ eke bi dad ɛsɛ: «Mʼanŋ Nyam ab», ke li kók ɛsɛ elel eke Jesu kok ab af.

⁷Erur ɛm ecʼagŋ lisijimɛl, ow elm ol owr mi nↄnm mʼawŋm ↄny, kↄ ol sig a ekʼɛŋan kpↄkpↄ ɛm ɛtŋ a; 2.7 Ɛ̀kn Jan 13.34. ol sig a ekʼel odad ekʼirir a. ⁸Gbɛkↄ ow anŋ ɛsɛ ol owr eke mʼam nↄn mʼawŋ ↄny af. Jesu ɛm a, sʼuw any eke ol a el nawrɛ, ɛtŋ ↄny e low kok ɛm yɛji ow el ɛbɛn. Tasi ɛm a, ncebn am oc es aŋke usuayl nawrɛ ɛy ↄkm ŋ̂. ⁹Ɛgŋ eke bi dad ɛsɛ: «Mʼanŋ usuayl ɛm», ɛtŋ nʼam ifn lisijim a, ke nʼanŋ ncebn ɛm cɛ. ¹⁰Kↄ ɛgŋ eke bʼerur lisijim a, nʼanŋ usuayl ɛm, low kaka anm in ɛm eke bʼow ↄŋʼn lʼɛy wus. 2.10 bʼↄŋʼn lʼɛy wus:oglog bʼow ok agŋ ɛjeci wus.¹¹Ɛtŋ ɛmɛny ekʼɛgŋ am ifn lisijim a, nʼanŋ ncebn ɛm, nʼam an es ncebn ɛm, lʼuwm usu eke nʼaam ab any, aŋke ncebn efal il any.

Ɔmn ɛs ecʼelel ekʼↄtu ekʼaan es wus af aŋa

¹²Ɛm ecʼey, mʼam awŋ ↄny ów amua e lɛl mi dad ↄny eke Nyam oc ↄny e sikpl ap ↄny Jesu Krist e nin a sosiɛm. ¹³Ɛsɛl,2.13-14 ɛsɛl, ŋgbafrɛ oto, lele etuey ab ael ↄmn ɛsɛl akpasu akpasu ekʼanŋ Nyamel ab ɛm. mʼam awŋ ↄny lɛl na, aŋke uwr ɛgŋ ekʼanŋ godʼɛtŋ ab any. Ŋgbafrɛ oto, mʼam awŋ ↄny lɛl na, aŋke ↄny akmn agn Low ŋuŋ ɛs es. ¹⁴Ɛm ecʼetuey, mʼam awŋ ↄny lɛl na, aŋke uwr Ɛs any. Ɛsɛl, mʼawŋ ↄny lɛl na, aŋke uwr ɛgŋ ekʼanŋ godʼɛtŋ ab any. Ŋgbafrɛ oto, mʼawŋ ↄny lɛl na, aŋke ↄnyn lɛc, Nyam ecʼodad anŋ ↄny ɛm, ɛtŋ akmn agn Low ŋuŋ ɛs es.

¹⁵Kʼèrurir wus na, ob ekʼanŋ wus af aŋa yɛji kʼèrurir. Ekʼɛgŋ bʼerur wus na, ke lʼerurm Ɛs Nyam ana. ¹⁶Tasi ɛm a, low fɛŋ ekʼanŋ wus af aŋa ɛsɛ: sos megl ecʼɛrm es ɛyr owi, nyamn e low e bʼɛkn ecʼerur lele ob ↄny ecʼes ɛfu ab a; ów amua fɛŋ, kaka ánm Ɛs ogŋ owm, kↄ wus na af ow bʼanŋ ow. ¹⁷Ɔ̀kan eke wus na bʼow ɛc lel in ecʼów aw eŋuŋ ab ab. Kↄ ɛgŋ ekʼam kok Nyam ecʼerur a bʼow anŋ godo godo fɛŋ.

Krist ecʼefnu ayadŋu

¹⁸Ɛm ecʼey, sica wanci es abal el a ow ŋ̂. Irir eke Krist ecʼifnu nyam in am ow. Sica jam aŋa Krist ecʼefnu a ɛny nↄnↄ; na ɛm anake sʼuw any eke ow el wanci es abal el a. ¹⁹Ɛy ecʼaraŋn cɛ -nʼanŋ -lʼok ↄkm, gbɛkↄ -lʼelm ɛy ecʼagŋ. Blel -lʼeel ɛy ecʼagŋ ana, ke blel -nʼanŋ ɛy ab. Kↄ low na ɛy yecʼɛtŋ ke wɛl úw any ekʼɛl fɛŋ -lʼelm ɛy ecʼagŋ.

²⁰Ɔny ecʼa, Krist ↄŋ ↄny Abŋ Lala ekʼel ↄwrↄ e mun ekʼɛŋan. Na sosiɛm, ↄny amua fɛŋ uwr low nawrɛ any. ²¹Mʼam nↄn lɛl na mʼawŋ ↄny, ow elm low nawrɛ eke kʼuwmn any eci, kↄ ekʼuwr low nawrɛ any a sosiɛm. Ɛtŋ uwr any eke yadŋ owi kaka ánm low nawrɛ ɛm owm.

²²Kↄ bwo el yadŋu ee? Yadŋu el ɛgŋ a eke bʼɛgbr dad ɛsɛ: «Jesu elm Krist!» 2.22 Jesu elm Krist:ow ecʼiri el Jesu elm Mesi, Eb Ɛs eke Nyam ɛrm ow. Ɛgŋ na el Krist ecʼifnu eke bʼɛgbr Ɛs lele Jim ab. ²³Ɛgŋ eke bʼɛgbr Jim a, ɛgbr Ɛs yɛji; ɛgŋ ekʼɛgŋ Jim eb a, okr af Ɛs ab.

²⁴Ke yecʼa eke irir kpↄkpↄ ɛm ɛtŋ a, ánŋ ↄny ɛrm ɛm. Eke yecʼa eke irir kpↄkpↄ ɛm ɛtŋ a bʼanŋ ↄny ɛrm ɛm a, ↄny yɛji bʼow okar af Ɛs lele Jim ab. ²⁵Ɛtŋ kin ob a eke Jim ɛwar ɛy a; sel ekʼↄnym uwr.

²⁶Mi nↄn ów amua ↄny eci, agŋ ekʼam ↄl eke kʼirmn ↄny a sosiɛm. ²⁷Ɔny ecʼa, ↄkan eke Abŋ Lala ekʼel ↄwrↄ e mun eke Krist ↄŋ ↄny a, anŋ ↄny ɛm. Na sosiɛm, ow ibram eke kʼↄↄl low yɛgm ɛs ɛjecʼes ij, aŋke Abŋ Lala am yɛgm ↄny ów a fɛŋ. Ɛtŋ ów a eke nʼam yɛgm ↄny a el nawrɛ, yadŋ kaka anm ɛm. Ow sosiɛm a, ànŋn in ɛm ɛsɛ elel eke Abŋ Lala yɛgm ↄny ow e low ab af.

Nyam ecʼey

²⁸Sica, ɛm ecʼey, ànŋn Krist ab yecʼɛtŋ ke lɛgŋ eke li bʼow lʼɛwl lʼow a, sʼↄ́ny ɛrm susu, ke in ecʼow ɛm a ɛ́s kʼↄ́nym ɛy, si kpabm es in e lís. ²⁹Uwr any eke Jesu Krist el nɛny nyam ɛs. Ow sosiɛm, ɛgŋ eke bi kok low nɛnyɛmbri nyam a, úwr any eke lʼel Nyam ecʼiy.

¹Ɛ̀kan erur ligbɛl eke ɛy Ɛs Nyam ɛlu ↄkm ɛy e lís, bake ɛsŋ ɛy in ecʼey. Ɛtŋ nawrɛ tasi sʼel. Eke wus uwm ɛy any, ke lʼuwm ɛy Ɛs yɛji any ana. ²Erur ɛm ecʼagŋ lisijimɛl, sica sʼel Nyam ecʼey, ɛtŋ elel eke si kʼanŋn a, ow kʼɛym ↄkm; kↄ sʼuw any eke lɛgŋ eke Krist bʼow ɛwl ow a, si bʼow sʼɛknʼn gbeŋ, ɛtŋ si bʼow sʼanŋ ɛsɛ in af. ³Ɛgŋ ekʼam eku ↄmn ɛm low akpasu na Krist ɛm a, am ayal sos ɛsɛ elel eke Krist in obi ayl ab af.

⁴Ɛgŋ fɛŋ eke bi kok sikpl a ↄb ol es, sikpl e kok el ol es ↄb. ⁵Kↄ ↄny uwr any eke Jesu Krist ow ekʼↄny sikpl oc es, ɛtŋ in ɛm sikpl kaka anm. ⁶Ow sosiɛm, ɛgŋ eke bʼokr af in ab a, nʼam kokm sikpl owi ij; ɛgŋ eke bi kok sikpl a, ɛknmʼn ɛtŋ uwmʼn any yɛji.

⁷Ɛm ecʼey, ke ɛgŋ kaka kʼɛ́jum ↄny. Ɛgŋ eke bi kok low nɛnyɛmbri nyam a, lʼel nɛny nyam ɛs, ɛsɛ elel eke Jesu Krist in obi el nɛny nyam ɛs ab af. ⁸Ɛgŋ eke bi kok sikpl a, lʼel agn eci, aŋke godʼɛtŋ agn el sikpl ɛs. Na sosiɛm anake Nyam ecʼIy ow yecʼɛtŋ ke ni ŋúŋn agn e juma a.

⁹Ɛgŋ ekʼanŋ Nyam ab a, nʼam kokm sikpl owi, aŋke Nyam ecʼodad a anŋ in ɛm ɛsɛ egb eke wɛl ewl af. Lʼↄtum eke li ki kok sikpl owi ij aŋke lʼel Nyam ecʼiy. ¹⁰Kin low yecʼɛm eke wɛl bʼuw Nyam ecʼey lele agn ecʼey ab any a: ɛgŋ ekʼam kokm low nɛnyɛmbri nyam, ke ɛmɛny érurm lisijim yɛji a, lʼelm Nyam ecʼiy.

Ɔ̀nyn erur ɛsɛ Jesu af

¹¹Tasi ɛm a, kin yecʼeke wɛl dad ↄny irir kpↄkpↄ ɛm ɛtŋ a: ke sʼérurir ɛy ↄfr. ¹²Si kʼót Kayɛn ekʼagn Low ŋuŋ ɛs ↄŋ ibi lisijim ab es. Ɛtŋ kↄ bla sosiɛm lʼibi ow ee? Eke in ecʼów e li bi kok a ákplm ke lisijim ecʼa bʼakpl a sosiɛm.

¹³Agŋ lisijimɛl, ow kʼíti ↄny any eke wus bʼifn ↄny. ¹⁴Ɛy sʼuw any eke sʼubr luw ɛm sʼɛy owr anŋ ɛm, aŋke si bʼerur ɛy lisijimɛl. Ɛgŋ ekʼↄnym erur a, nʼanŋ luw ɛm. ¹⁵Ɛgŋ eke bʼifn lisijim a, lʼel ɛgŋ ibiu, ɛtŋ uwr any eke ɛgŋ ibiu, sel ekʼↄnym uwr a anm in ɛm.

¹⁶Kin elel eke sʼuw erur any: Jesu Krist oc in e sel a ↄŋ ɛy; ow it eke ɛy yɛji si kʼoc ɛy e sel sʼↄŋ ɛy lisijimɛl. ¹⁷Ekʼɛgŋ nyam ↄny ob, ɛtŋ lʼɛkn lisijim ekʼanŋ es abur ɛm, ɛtŋ lʼikŋm ow sↄrŋ a, ke ayaf Nyam ecʼerur a anŋ in ɛm ab ee? ¹⁸Ɛm ecʼey, eke si bʼerurir ɛy ↄfr a, ke sʼↄtu eke si kʼɛlumnin abu, ke ow kʼélm anm af e dad ɛm sↄny.

¹⁹Eke si bʼerurir ɛy ↄfr, si bʼow sʼuw any eke sʼanŋ Nyam ekʼel low nawrɛ ɛs ab, ɛtŋ si bʼow sʼↄny ɛrm es ɛy in ecʼany af. ²⁰Ekʼɛy ecʼɛrm a bʼↄb ɛy low, ke Nyam agb akm ɛy ecʼɛrm a, ɛtŋ in lʼuw low fɛŋ any.

²¹Erur ɛm ecʼagŋ lisijimɛl, eke sica ɛy ecʼɛrm a ↄbm ɛy low ij a, ke sʼↄny ɛrm es ɛy Nyam ecʼany af. ²²Ob kaka fɛŋ eke si bʼibrmʼn a, li bʼow nʼↄŋ ɛy, aŋke si bʼↄsu in e sol a, ɛtŋ si bi kok yeci ekʼakplʼl sos ɛm a.

²³Ɛtŋ kin in ecʼol eke nʼam ↄŋ ɛy: sʼúb Jim Jesu Krist nawrɛ, ke sʼérurir ɛy ↄfr. ²⁴Ɛgŋ eke bʼↄsu Nyam e sol a, okr af in ab ɛtŋ Nyam yɛji anŋ in ab. Ɛtŋ in ecʼAbŋ eke nʼↄŋ ɛy ab ɛm, sʼuw any eke nʼanŋ ɛy ab.

Nyam ecʼAbŋ lele Nyam ecʼifnu ecʼabŋ ab

¹Erur ɛm ecʼagŋ lisijimɛl, ekʼɛgŋ bʼow ɛŋn ↄny ɛtŋ bi dad eke abŋ ecʼabusu ɛm in bi kok ów yɛji, kʼùbr ir nawrɛ kpɛkŋ. Kↄ òkr any es ɛkan eke nawrɛ ɛm ɛl ecʼabŋ a el Nyam ecʼAbŋ, aŋke kokoba ↄb ɛsɛl ayadŋu nↄnↄ gbɛl ok ↄkm wus af aŋa. ²Kin elel eke kʼuwar Nyam ecʼAbŋ ab any: ekʼɛgŋ bi dad ɛsɛ: «Jesu Krist el ɛgŋ ow wus af aŋa», ke ɛgŋ na ↄny Nyam ecʼAbŋ. ³Kↄ ɛgŋ ekʼɛ́gŋm ebm eke Jesu Krist el ɛgŋ eke wɛl ew sos megl ɛm a, elm Nyam eci. Lʼel Krist ecʼifnu a eke irir in eci mowrer e low a. Sica gbɛ lʼow wus af aŋa ŋ̂.

⁴Ɔny, ɛm ecʼey, eel Nyam eci, ɛtŋ akmn kokoba ↄb ɛsɛl ayadŋu ab es, aŋke Abŋ a ekʼanŋ ↄny ɛm a ↄny lɛc akm wus ecʼagŋ ecʼa. ⁵Ɛl, -lʼel wus na eci, na sosiɛm -li bi dad wus na ecʼów eke wɛl bi kok ecʼodad, ɛtŋ wus ecʼagŋ bʼiri ɛl e low, ɛgŋ eb. ⁶Ɛy, sʼel Nyam ecʼagŋ. Ɛgŋ ekʼuw Nyam any a, bʼiri ɛy e low. Ɛgŋ ekʼuwm Nyam any a írim ɛy e low. Na ɛm si bʼuw low nawrɛ ecʼAbŋ lele yadŋ ecʼabŋ ab any.

Sʼↄ̀ny erur aŋke Nyam ikŋ anym erur ɛy

⁷Erur ɛm ecʼagŋ lisijimɛl, sʼérurir ɛy ↄfr, aŋke Nyam ogŋ erur bʼanŋ ow; ɛtŋ ɛgŋ fɛŋ eke bʼↄny erur a, el Nyam ecʼiy ɛtŋ lʼuw Nyam any. ⁸Ɛgŋ ekʼérurm a uwm Nyam any, aŋke Nyam el erur. ⁹Kin elel eke Nyam ecʼerur a ɛy ↄkm ɛy e lís: lʼɛrm in ecʼIy ekpↄbi a ow wus af aŋa, yecʼɛtŋ ke sʼɛ́ŋn sel in ɛm. ¹⁰Ɛtŋ erur a el: ow elm ɛy eke sʼerur Nyam a eci, kↄ Nyam in obi lʼerur ɛy ɛtŋ lʼɛrm in ecʼIy a ow, ocr in sosi kokr egb waw uw ɛy e sikpl ecʼoc ap sosiɛm.

¹¹Erur ɛm ecʼagŋ lisijimɛl, eke Nyam erur ɛy ɛbɛn a, ɛy yɛji ow it ke sʼérurir ɛy ↄfr. ¹²Ɛgŋ kaka ɛknm Nyam; gbɛkↄ eke si bʼerurir ɛy ↄfr a, Nyam anŋ ɛy ab, ɛtŋ in ecʼerur a bʼɛy ↄkm tasi ɛy ɛm.

¹³Kin elel eke sʼuw any eke sʼanŋ in ab, ɛtŋ in yɛji nʼanŋ ɛy ab: nʼↄŋ ɛy in ecʼAbŋ a. ¹⁴Ɛtŋ ɛy sʼɛkn ɛtŋ sʼam dad eke nawrɛ, Ɛs ɛrm Jim ow el wus na ecʼagŋ ecʼEb Ɛs. ¹⁵Ɛgŋ eke bʼɛgŋ eb eke Jesu el Nyam ecʼIy a, Nyam anŋ in ab ɛtŋ in yɛji nʼanŋ Nyam ab.

¹⁶Ɛtŋ ɛy sʼuw erur eke Nyam ↄny ɛy ecʼab any, ɛtŋ sʼub erur a e low nawrɛ; Nyam el erur. Ɛgŋ ekʼↄny erur a anŋ Nyam ab, ɛtŋ in yɛji Nyam anŋ in ab. ¹⁷Eke erur iy nɛny igŋ nuŋ ɛy ɛm a, si bʼow sʼↄny ɛrm susu lɛgŋ a eke si bʼow sʼim Nyam ecʼany af jɛj ok ɛm a. Sʼↄtu eke si kʼↄny ɛrm susu ikŋ na, aŋke wus af aŋa, ɛy eci ɛb ir a otarir es Jesu Krist ecʼab ab. ¹⁸Ekʼɛgŋ bʼↄny erur a, lʼúrum erŋn ij. Erur tasi a bʼogŋ erŋn. Ekʼam tutr eke wɛl bʼow ↄbʼŋ low jɛj ok ɛm a, ke ám uru erŋn. Ɛtŋ ɛgŋ eke bʼuru erŋn a, ↄnym erur tasi.

¹⁹Kↄ ɛy sʼↄny erur aŋke Nyam ikŋ anym erur ɛy. ²⁰Ekʼɛgŋ bi dad ɛsɛ: «mʼerur Nyam» ɛtŋ nʼam ifn lisijim a, ke lʼel yadŋu; tasi ɛm a, ɛgŋ ekʼerurm lisijim eke nʼam ɛkn a, ayaf li bʼow lʼↄtu lʼerur Nyam eke lʼɛ́knm ab ee? ²¹Ɛtŋ kin ol eke Nyam ↄŋ ɛy: ɛgŋ eke bʼerur Nyam a, ke lʼérur lisijim yɛji.

Elel eke si kʼakmn wus es

¹Ɛgŋ fɛŋ ekʼub nawrɛ eke Jesu el Krist a, el Nyam ecʼiy. Ɛtŋ ɛgŋ fɛŋ ekʼam erur Ɛs Nyam a, am erur in ecʼey a yɛji. ²Eke sʼam erur Nyam ɛtŋ sʼam ↄsu in e sol a, ke sʼúw any eke sʼam erur Nyam ecʼey a yɛji. ³Nyam ecʼerur a anŋ in e sol a ecʼↄsu ɛm. Ɛtŋ in e sol a ↄ́tum, ⁴aŋke ɛgŋ fɛŋ ekʼel Nyam ecʼiy a akm wus es; ɛtŋ ɛy ecʼↄmn e sʼↄny Nyam ɛm a anake bʼakm wus es a.

Ów yecʼɛm eke wɛl kʼub nawrɛ eke Jesu el Nyam ecʼIy

⁵Bwo ecʼɛgŋ akm wus es, ekʼow elm ɛgŋ a ekʼub nawrɛ eke Jesu el Nyam ecʼIy ab ee? ⁶Jesu Krist in obi ow wus af aŋa, wɛl okʼr mij nuŋ, ɛtŋ lʼuw lʼok mebl es; lʼɛcr mij ok nuŋ ɛm, lʼuw lʼok mebl es ɛsɛ ɛgŋ af; ów yony na ɛm, Abŋ Lala ij daŋku eke ów amua el nawrɛ, aŋke Abŋ Lala ↄ́nym yadŋ. ⁷Ów nyahan anŋ eke okr af am ij daŋku nyam: ⁸Abŋ Lala, mij lele mebl ab.

⁹Si bʼɛgŋ agŋ e daŋku ij a sʼeb, kↄ Nyam e daŋku ij a agb akm agŋ ecʼa, aŋke Nyam in obi ij daŋku Jim e nuŋ af. ¹⁰Ɛgŋ ekʼub Nyam Jim nawrɛ a, daŋku ij na anŋ in ɛm; ɛgŋ ekʼubm nawrɛ a bʼↄb Nyam yadŋ, aŋke lʼubm Nyam e daŋku ekʼij Jim e nuŋ af a nawrɛ. ¹¹Ɛtŋ daŋku ij a el: Nyam ↄŋ ɛy sel ekʼↄnym nuŋ, ɛtŋ sel a anŋ Jim ɛm.

¹²Ɛgŋ ekʼeb Jim a ɛŋn sel; ɛgŋ ekʼebm Jim a ɛŋnm sel.

¹³Mʼam nↄn ów amua mʼↄŋ ↄny, yecʼɛtŋ ke úwr any eke, ekʼam ubr Nyam ecʼIy a nawrɛ a, ke ɛŋan sel ekʼↄnym nuŋ.

Nyam ŋↄŋn e lɛc

¹⁴Eke si bʼim in ogŋ, ke sʼↄny lokm susu, aŋke low fɛŋ eke si bʼow sʼibrm in ecʼerur ɛm a, li bʼow lʼiri ɛy lebl. ¹⁵Ɛtŋ eke sʼuw any eke li bʼiri ɛy lebl a, ke ob fɛŋ eke si bʼow sʼibrmʼn a, sʼúw any eke sʼɛŋn ŋ̂.

¹⁶Ekʼɛgŋ nyam am ɛkn lisijim ekʼam kok sikpl ekʼelm luw ecʼa, ni ŋↄ́ŋn Nyam, ke Nyam ↄ́ŋ lisijim na sel. Na ow el agŋ eke bi kok sikpl ekʼelm luw ecʼa e lís e low. Gbɛkↄ sikpl nyam anŋ ekʼel luw eci; ow elm sikpl ikŋ na eci Nyam mʼɛsmɛ ŋↄŋan. ¹⁷Low ŋuŋ fɛŋ eke wɛl bi kok Nyam e lís a el sikpl. Gbɛkↄ ow elm sikpl fɛŋ ísam ɛgŋ luw ab.

¹⁸Sʼuw any eke ɛgŋ fɛŋ ekʼel Nyam ecʼiy a, am kokm sikpl, aŋke Nyam Jim Jesu Krist bʼↄsuʼr, ɛtŋ agn ɛ́ŋnmʼn. ¹⁹Sʼuw any eke sʼel Nyam ecʼey, kↄ wus af aŋa ecʼagŋ ɛjeci ekʼelm Nyam ecʼey a anŋ agn ecʼes ɛw ɛm.

²⁰Ɛmɛny sʼuw any eke Nyam ecʼIy ow wus af aŋa ɛtŋ nʼↄŋ ɛy nuŋ ɛm ↄny eke si kʼuw Nyam nawrɛ any. Sʼokr af Nyam nawrɛ ab, Jim Jesu Krist ɛm. Jim na anake el Nyam nawrɛ a, in lʼel sel ekʼↄnym nuŋ.

²¹Ɛm ecʼey, ↄsur sos ke kʼúsmn yecʼeke elm Nyam a jam.