Salmos

Salmos

Nekas Pengker Warastin

¹Aintsti Yus nintimsar pujuinautikia

pasé aints ainau pachiachu asar,

nekasar pengker nintimsar warastinuitji.

Tura tunau aints wekajina nuni wekaichau asar,

nekasar pengker nintimsar warastinuitji.

Tura Yusen umirchau ainauka wishikiartin asaramtai,

nu aints ainaujai iruntsuk pujuinau asar,

nekasar pengker nintimsar warastinuitji.

²Yus nintimsar pujuinautikia

Yuse chichame aneau asar,

tsawaisha tura kashisha nuke nintimsar pujustinuitji.1.2 Sal 119.1-3

³Tu pujakrikia numi entsa yantamen araamua nunisketji.

Nu numi neretiri jeamtaikia

nukap nerektinuitai.

Tura nukésha minarchartinuitai.

Tu pujakrikia nekasar pengker aa nu turuatnuitji.

⁴Antsu Yusen nintimchau ainauka tuuka pujuinatsui.

Nuka nase trigo saapen juwawa nunisarang

mengkakartin ainawai.

⁵Tura asar Yusen umirchau ainauka

Yuse umirin ainaujaingkia

nayaimpinmaka iruntrachartinuitai.

⁶Antsu ii Apuri ni umirin ainautinka mash nekarmaji.

Antsu Yusen nintimchau ainauka mengkaakartin ainawai.1.6 Mat 5.3-12

Ameka wina Uchiruitme

¹¿Waruka Yusen umirchau ainau Yusen kajerkar shininawa? ¿Tura warukaya nangkamiarsha nintiminawa? ²Mash nungkanmaya apu ainau aintsun inau ainaujai kaunkar

Yus ni Uchirin:

Apu ati tusa akupkamu waininayat kajerinawai.2.2 Hech 4.25, 26

³Turasha Yusen umirtan nakitinau asar

kakarar untsuminak:

“Yus iin jirujai jingkiatmamuringkia yamaikia atimiami,

turar nuniangka angkan wajasmi”,

nangkamiar tinawai.

⁴Tinau wainiat Apu Yus nayaimpinam pujus aints ainaun ina nuka

nuna antuk wishikiawai.2.4 Sal 59.8

⁵Nunia nu aints ainaunka kakarman kajerak

Yus awaakatnuitai.

Tura chicharak:

⁶“Wikia yanchuik wina akupkamurnaka Jerusalénnum mura pengkernum aints ainau Apuri ati tusan puusamiajai”, tawai.

⁷Yamaikia Yus ni uchirin pachis ta nuna etserkatjai.

Ni uchirin chicharak:

“Ameka wina nekas uchiruitme.

Ju kintati wina kakarmarun suajme”.2.7 Hech 13.32-34; Heb 1.5; 5.5

⁸“Mash nungkanmaya ainau winar arti tusam wina seattia.

Turakminkia wikia aminka susatnuitjame.

⁹Tura apu wajasam

aints kajek nangkijai muitsan awati tsayawa nunismek

apu ainauka mengkaktinuitme”,

Yus ni uchirin tawai.2.9 Ap 2.26, 27; 19.15

¹⁰Apu ainautiram,

aints inau ainautirmesha

ju chichamka antuktaram.

Tura tenapkesrum nuimiartaram.

^11-12Tura pengker nintimsaram Yus:

Ameketme Apum titaram.

Ni aneachmau atumnaka kajertamkatnuitai.

Tura asamtai wina kajertukai tusaram tsuntsumruataram.

Nu turachkurminkia Yus atumin kajertamkamtai,

atumka jintá wekaakuram aneachmau jakai tusaram aneartaram.

Antsu aints Yusen nintimsar:

Wina Yusruka wina uwemtikrurtinuitai tinauka warasartin ainawai.

David: Apuru yainkata tusa seamuri

¹Apuru wina nemasur untsuri ainawai.

Tura wina nakitrinausha untsuri ainawai.

²Aints untsuri wina pachitsar chichartinak:

“Yuska uwemtikramrashtinuitai”,

nangkamiar turutinawai.

³Antsu Apuru ameka wina tantaarua nunisketme.

Tura asam winaka tententam pujurtame.

Ameka wina kakarmaruitme.

Wikia napchau nintimsan pujaing,

ameka pengker nintimtikrurtinuitme.3.3 Ef 6.16

⁴Wikia amin untsukmaikiakun:

Yainkata tusan seam,

ami pujutiram timiá pengker aa nunia winaka airnuitme.

⁵Ame wina waitu asakmin,

tepesan nunia kanuran ataksha shintiaajai.

⁶Wina nemasur ainau untsuri wina nepetukartas tentatkar pujuinaksha winaka awaktukchartatui.

⁷Apuru jiirsata.

Tura wina Yusur asam uwemtikrurta.

Wina nemasur ainau aintsu yapiin awatinawa nunismek tura nain akarinawa nunismek nepetkatnuitme.

⁸Apuru aints ainau uwemtikratnumka ametme.

Tura asam aminu aintsrum ainautin pengker awajkartusta,

tusan seajme.

David: Yuska kajinmatsuk nintimratnuitji timiauri

¹Yusru wina ayamrutkatin asam wi untsuamka airkata.

Wi wake mesekan pujamtaisha,

ameka pengker awajtusmame.

Tura asam yamaikia wait anentrurta tura wi seamur anturtukta,

tusan seajme.

²Atumin miajuitjai tumamin ainautirmin tajarme:

¿Warutia wina pasé awajtutcha inaisatatrume? ¿Warutia nangkamrum nintimtairumsha inaisatatrume?

³Yus aints ainaun:

Wina umirtukarti tusa wakerawai.

Nuka nekaataram.

Wi untsuam winaka anturtuktatui tusaram nekaataram.

⁴Yus shamakrum kurartaram.

Tura tunaarum inaisataram.

Tura takamtaik atumi peakrin tepesrum:

Wina tunaar atsuash tusaram nintimrataram.

⁵Tura Yus wina tunaarun tsangkutrurat tusaram,

tangku maaram epeataram.

Turakrum Yus kajinmatsuk nintimrataram.

⁶Aints untsuri chichainak:

¿Yáki iincha nekas pengker aa nuna inakturmastinuitai? tinawai.

Apuru iincha pengker nintimkartusam jiikratsata.

⁷Aints trigon tura vinoncha nukap juukar waraina nuna nangkamasmek ame wina nintirun waramtikrusmame.

⁸Ame Apuru wina chichartakum:

Nekas shamtsuk pujusta tusam

nintimtikruru asakmin,

wikia tepesan

pengker nintimsan

wári kanurtatjai.

David: Kinta tsawaamujai metek Yus seatnuitji timiauri

^1-2Apuru wina Apur asam,

tura wina Yusur asam,

wina chichamur anturtukta.

Wi napchau nintimsan mayairukmaikiakun seajme.

Tura amin seajme nu amesha anturtukta tajame.

³Apuru kashik wina chichamur anturtuktatme.

Tura asan wisha amin airkat tusan nakastatjame.

⁴Yusru ameka pasé aa nuka nakitame.

Pasé aints ainauka amijai tsaniasarka pujuscharmin ainawai.

⁵Aints miajuitjai tumamin ainauka ami pujutirminka pujuschartin ainawai.

Tura asaramtai tunau takau ainauka ameka tsuutame.

⁶Turasha waitrin ainauka mengkaaktinuitme.

Tura tsanumin ainausha tura mangkartin ainausha nakitratnuitme.

⁷Antsu wina anentu asakmin,

ami jeemin wayaamnawaitjai.

Tura nuni wayaan amin nintimtusan:

Ameketme juuntam titinuitjai.

⁸Apuru wina nemasur ainau untsuri asaramtai,

ame pengker asam jintim inaktursata,

turasha nuni wekaamtikrusta tusan seajme.

⁹Wina nemasur ainauka nekas chichamnaka tuke chichachu ainawai.

Ni nintisha tuke paseetai.

Ni jangkengka jakau iwiarsamu urakmawa nunisarang pasé chichau ainawai.

Tura jimia chichamtin asar tuke anangminak chichainawai.5.9 Rom 3.13

¹⁰Yusru nu aints ainau ni wait wajaktintri susarta.

Turasha ni pasé nintimaurisha mengkatkarta.

Aminu nemasem asar,

aminu chichammin umirtan nakitin ainawai.

Tura asaramtai ame nu aints ainau jiikim utsangta.

^11-12Antsu amin nintimsar:

Ayamtikrurta tinu ainautikia mash warastinuitji.

Ame ayamtikramu asar tuke warasar kantamatatji.

Apuru amin umirkur pujuinautin pengker awajkartusu asakmin,

ame aneau asar amek nintimsar waraaji.

Ame pengker asam,

aints tantaaran takus ni nemase ainaun shamtsuk nakawa nunismek aminu aintsrum ainau tentakam wainu weame.5.11-12 Ef 6.16

David: Wake mesek Yusen seamuri

¹Apuru ame kajertukam jiyatkaip.

Tura aminu suwirumjai wait wajaktinka surusaip.6.1 Sal 38.1

²Apuru wikia kakarchamin nekapeau asamtai wait anentrurta.

Apuru wina namangkur kura kura wajau asamtai,

wait aneasam ataksha pengker wajasta tusam inantukta.

³Wina nintirjai shamakun kuraajai.

Tura asamtai Apuru ¿warutik yainkatnuitam?

⁴Apuru winita.

Tura jakai tusam uwemtikrurta.

Timiá wait anengkratin asam uwemtikrurta tajame.

⁵Jakaru ainauka kichkisha aminka nintimturminatsui.

¿Jakaru ainausha iwiarsamurin tepesar:

Ameketme juuntam turaminawak?6.5 Sal 88.10-12; 115.17

⁶Wikia juu juutkan pimpiran pujajai.

Kashijai metek juu juutkan neaikirjai tamrutirun chupran tepajai.

⁷Wina nemasur ainaun nintimtusan juutu asan,

jiirusha wainmakchamin mushatmari.

⁸Antsu Apurka wina juutmaurun anturtuku asamtai,

pasé takau ainauka wijaingkia iruntsuk yajá wearti.6.8 Mat 7.23; Luc 13.27

⁹Wina Apurka wi seamurnaka antukuitai.

Tura wi seaja nunaka mashiapi umiktatua tusan nekajai.

¹⁰Wina nemasur ainau shaminak jakaartas wakerinawai.

Turasha natsaaminak aints mitsum mitsum wajainawa nunisarang tupikiakiartinuitai.

David: Apuru waitkata tusa seamuri

¹Apuru ameka wina Yusruitme.

Tura asakmin ejarkata tusan amin seajme.

Tura wina papeetina nunia uwemtikrurta.

²Turachkumningkia juun yawaa kuntinun esai yuwina nunisarang winasha mantuwartatui.

Turutinamtaisha ¿yáki wina uwemtikrurat?

³Apuru ameka wina Yusruitme.

¿Wisha warí tunauna takasuitja? ¿Wikia kasakitaj?7.3 1 Sam 24.1-12; 26.1-25; Marc 14.48

⁴Wina amikur wina pengker awajtinaunka paseeka awajsachuitjai.

Tura wina nemasur wina nangkami wekaatursaru ainia nunasha paseeka awajsachuitjai.

⁵Wi aints ainaun pasé awajkun pujamtaikia,

wina nemasur wina pataaturak tura amantuk achirak nungkanam ajuntar wina japirkiti,

tura nuna turak inatsturti tajame.

⁶Apuru kakaram kajekam pasé aints ainau nepetkata.

Tura wina nemasur wina kakarman kajertina nu wainkam ayamrutkata.

Ame nekasam pasé aints ainau ni tunaarijai metek wait wajaktintri susam winaka yainkata.

⁷Aminu keemtairam nayaimpinam puusam nuni keemsakmin,

mash nungkanmaya ainau amin tentenmawartinuitai.

⁸Apuru mash nungkanmaya ainau tunaari itiura ainawa tusam wainuitme.

Tura asam pengker takaaja nu nekartuata.

Tura wina nintirun tunau atsuash tusam jiirtusta.

⁹Yusru ameka tunaarinchau asam,

aints ainau nintimauri pengké nekaachmin ainia nu nekame.

Tura asakmin pasé ainau ni turamuri inaisarti tusam mengkaakta.

Turasha anangmichu ainau tuke pengker pujusarti tusam wainkata.

¹⁰Wina waitkatnuka Yus nayaimpinam puja nuketai.

Nekas pengker nintintin ainaun uwemtikratnuka nuwaitai.

¹¹Yuska pengké tunaarinchau asa,

aints ainaun mash metek jiiawai.

Turasha tuke tunau ainaun wait wajaktiniun suwitai.

^12-13Aints ni nangkirin tsaka umisua nunisang

Yus niin umirkacharu ainaun

wait wajakartintrin wári umistinuitai.

Tura aints tishimkurin umis

wachin ketuktas wajawa nunisang

Yus niin umirkacharu ainaun wait wajakartintrin akuptuktas yanchuk umismawaitai.

¹⁴Tunau takau ainau itiur pujuinawa tusaram nintimrataram.

Nuka tunaun takasartas tuke nintiminawai.

Tura ni jangkenia jiinua nuka waitaitai.

¹⁵Aints nungkan tai nu waanam chikich aints aneachmau ayaarti tusa umisiat,

niyá kunanam ningki ayaawa nunisang pasé aints ainauka mengkaakartin ainawai.

¹⁶Ni tunaari tura ni mangkartutirisha untsuri asaramtai,

ningki wiasmatmamin ainawai.

¹⁷Antsu wina Apur nekas tunaarinchau asamtai,

ameketme pengkeram titatjai.

Tura Apur nayaimpinam puja nuna naarin pachisan

kantan kantamruatatjai.

Yuse kakarmari pachisar kantamruami

¹Apuru iinu Yusri asam,

mash ainia nu inawaitme.

Nayaimpinam ame najanamu ainauka mash shiiram asaramtai,

wikia ami naarmin pachisan:

Ameketme juuntam tajame.8.1 Sal 57.5, 11

²Ami nemasem ainau amin nakitraminak yapaijkiami tinu ainau itatmamtikiatasam,

uchi kuwirach ainausha amin nekasar pengker awajtamsartas maaketai turutiarti tusam tsangkatu weame.8.2 Mat 21.16

³Wikia nayaimpin ame najanamu ainaun jiisan,

nantuncha tura yaancha nuni ketinau jiisan amijai chichaakun:

⁴Aintsti mianchau arincha,

¿waruka timiá anengkratme? Aintsti jakatin arincha,

¿waruka timiatcha nintimturkartusmesha pujame?

⁵Aints ainautikia yamaik jakatin asakrin,

antsu ame awemamurmeka jakashtin asaramtai,

aintstin nangkamasmek pengker najanamiame.

Turayatum aintstinka amea tumau najakratau asam,

timiá pengker awajkartusmiame.

⁶Tura mash najanamuram ainaun aints ainauti inararti tusam tsangkamkamiame.

Tura mash najanamuram ainau aintsti ainautin umirkarmi tusam najanamiame.8.6 Heb 2.6-8; 1 Cor 15.27; Ef 1.22

⁷Uwija ainau tura waaka ainausha tura pachim ainausha,

⁸tura nanamtin yakí nanamin ainausha tura namak ainausha tura juun entsanmaya ainausha mash aints ainau inararti tusam tsangkamkamiame.

⁹Apuru iinu Yusri asam,

mash ainia nu inawaitme.

Tura asakmin ami naarmin pachisan:

Ameketme juuntam tajame.

Apuru tuke wina nintirjai amincha: Ameketme juuntam titasan wakerajme

¹Apuru tuke wina nintirjai amincha:

Ameketme juuntam titasan wakerajme.

Turasha ami turamurmin etserkatasan wakerajai.

²Apuru nayaimpinam pujame nu, amin pachisan pengker nintimsan kakaran chichaktasan wakerajai.

Turasha waraakun amin naarmin pachisan kantan kantamatasan wakerajai.

³Wina nemasur ainau amin shamraminak tupikinawai,

tura tupikinak ayaarar jainawai.

⁴Ame nekasam chicham iwiarin asam,

aints ainau tunaari nekaatasam,

tura winasha ayamtikrurtasam ami keemtairumin keemsam pujame.

⁵Ami chichammin umirtamchau ainau jiyakume.

Tura pasé aints ainausha nepetkamame.

Tura ni naarincha chikich aints ainau tuke nintimtsuk pujusarti tusam sakarume.

⁶Wina nemasur ainau jakaarmayi.

Turasha ni yaktari ainau nijai metek mengkaakarmayi.

Tura nu yakat ainauka mesramame.

Tura asam nu yakta naarincha aints ainau tuke nintimtsuk pujusarti tusam sakarume.

⁷Antsu wina Apur tuke aints ainaun inawaitai.

Tura asa aints ainau itiur pujuinawa tusa nekaatas wakerawai.

⁸Tura tunau nekamtikin asa,

mash nungkanmaya ainaun ni tunaarijai metek ni wait wajaktintrin suwitai.

⁹Aints wait wajainaunka wina Apur ejaktinuitai.

Nunia wake mesekar pujuinauncha ayamruktinuitai.

¹⁰Apuru amin eatmina nuka ameka ajapamka ukuatsme.

Tura asakmin amin umirtaminauka amincha nintimturminawai.

¹¹Ii Apuri Jerusalénnum ni aintsrin inawa nu nintimsaram kanta kantamataram.

Turasha ni turamuringkia aints ainau ujaktaram.

¹²Waitnasar pujuinaunka kajinmatsuk,

ni juutmaurincha Yuska kajinmatsui.

Antsu aints ainaun waitkina nuna ni wait wajaktintrin suwitai.

¹³Apuru wait anentrurta.

Wina kajertin ainau wina pasé awajtusartas pujuina nu amesha jiisarta.

Tura jakai tusam uwemtikrurta.

¹⁴Wikia Jerusalénka waitirin wajasan,

mash aints ainaun chicharkun,

amin naarmin pachisan Yus nekas juuntaitai titaram tusan,

wina uwemtikturu asakmin waraajai titatjai.

¹⁵Amin umirtamkacharu ainau aints ejatkanam napinawa nunisarang ainawai.

Aintsun achikmi tusar jintanam ningki ejatkan ukukiariat,

nuni wekaasar ejatkanam napiar ni nawen jingkiawarua nunisarang ainawai.

¹⁶Apur ningki pasé aints ainaun ni turamurijai metek wait wajaktiniun suwitai tusa nekamtikui.

Pasé aints ainau chikich aintsun ejatkanam achikmi tinayat,

ningki napinua nunisarang ainawai.

¹⁷Nu pasé aints ainauka Yusen umirkacharu asar,

nunia Yusen kajinmakiaru asar,

tuke jakatniunam weartin ainawai.

¹⁸Antsu kuikiartichu ainaun Yuska tuke kajinmatsui.

Turamtai Yusen nintimsar pujuinauka mengkakachartin ainawai.

¹⁹Apuru wajakim

aints miajuitjai tumamin ainia nuna turatniuringkia tsangkatkaip.

Tura amin umirtamchau ainauka ni tunau turamurijai metek ni wait wajaktintri susarta.

²⁰Apuru wina shamrukarti tusam nintimtikrarta.

Tura wisha aintsketjai turamiarat tusam nekamtikiawarta.

Apuru ¿waruka timiá aráksha pujame?

¹Apuru ¿waruka timiá aráksha pujame? ¿Wi wait wajaisha waruka anumkamsha pujame? ²Pasé aints ainau:

Wikia miajuitjai tusar,

mianchau ainaun kajerinak waitkinawai.

Tura ejatkan ningki puusar napinawa nunisarang ainawai.

³Pasé aints ainauka ningki nintimsar:

Wi wakeraknaka wina wakeramurun pachitsuk turamnawaitjai tinawai.

Tu nintiminauka Yusen nakitinau asar,

niin pachisar pasé chichainawai.

⁴Tura meemasar pajakiar chichainak:

Yuska atsawai.

Turasha ameka waruka aitkame turutinka atsawai,

tu nintiminawai.10.4 Sal 14.1

⁵Tu nintiminauka tuke ni takatrin takakminau asar yuumatsuk pujuinawai.

Tura ningki nintimsar:

Wait wajaktinnasha Yuska suruschatatui,

nangkamiar tinawai.

Nuniasha ni nemase ainaun pachisar wishikinawai.

⁶Tura ningki nintimtumasar:

“Wina nemasur ainauka ujuntrarchatnuitai.

Tura asamtai itiurkachminumka pengké pujuschatatjai”,

tinawai.

⁷Tuke inaitsuk chikich ainaun jiyainak pasé chicharin ainawai.

Tura waitrinak chikich ainaun pasé awajsartas anangkinak chichainawai.

Tu chichainau asar chikich ainaun waitkinak pasé awajinawai.10.7 Rom 3.13-18

⁸Nu pasé aints ainauka ayamrumichun nangkamiar maawartas anumkar,

yaktanmaya jiinkiti tusar nakainawai.

⁹Juun yawaa kuntinun esai yuwatas waanam nakawa nunisang mangkartin anumak aints mianchaun nakawai.

Tura wainak aneachmau nu aintsun achik japiki juwawai.

¹⁰Juun yawaa tsekengtias kaemua nunisang mangkartin aints ayamrumichun achiawai.

¹¹Pasé aints ainauka:

Yuska iinka nintimturmatsji.

Tura ni yapiin nukuku asa pengké wainmatsui,

tu nintiminawai.10.11 Sal 73.11

¹²Apuru wajakim uwejem yakí takuim ami aintsrum ainau ayamrukta.

Tura aints wait wajainauka kajinmakiip.

¹³Yusru ¿warukaya pasé aints ainau amin pachitmasar pasé chichainawa?

¿Waruka ningki nintimsar:

Yuska pachitmatsji tumaminawa?

¹⁴Antsu ameka nu aints ainau pasé turamuri wainkau asam,

nekasam ni wait wajaktintri suwitme.

Tura asakmin ayamrumichu ainauka aminak eatminawai.

Tura mitaik ainau yainmeka ametme.

¹⁵Ame pasé aints ainau kakarmari nepetkata.

Tura ni anumkar tunau turamurin pachisar mash uutsuk ujatkarti tusam chicharkata.

¹⁶Apuru ii Yusri asam,

aints ainautin tuke inakratnuitme.

Tura asam amin umirtamkacharu ainau tuke ninu nungkarinia jiiktinuitme.

¹⁷Apuru mianchau ainau seamuri antu weame.

Tura ni untsumauri antukam,

pengker nintimtakum yayaame.

¹⁸Apuru mitaik wait wajainausha ayamrukta.

Tura aints ainau nungka najanamu asaramtai,

chikich ainaun waitkawarai tusam suritkata.

David: Yuska tuke nekasaintai tusar nintimratnuitji timiauri

¹Wikia Apurun wina ayamrutkati tusan seajai.

Antsu chikich aints ainau wina chichartinak:

“Ame nanamtinua nunismek muranam tupikiakta”,

turutina nunaka pachiatsjai.

²Pasé aints ainau jiakuk ataram.

Nuka anumkar tishimkun achikiar,

tura wachin kunkar,

kuntinun maawartas tias akupinawa nunisarang nu pasé aints ainau anumkar pengker nintintin ainaun mainawai.

³Aints ainau umirkatin chichaman umitsuk pujuinamtaikia,

¿tunaarinchau ainausha warukawartinki?

⁴Antsu Yuska ni jeen nekas pengkernum pujawai.

Ni keemtairi nayaimpinam puusamuitai.

Tura nuni keemas aints ainaun mash jiij pujurui.

⁵Yuska pengke aints ainauncha tura pasé aints ainauncha wainui.

Antsu mangkartutan wakerin ainaun pengké nakitawai.

⁶Yus pasé ainaun ni tunau turamurijai metek ni wait wajaktintri tu ati tusa,

kaii azufrejai jijai pachimramun yakiiyan akuptuktinuitai.11.6 Ap 14.10

Tura nase tsuweran akupkamtai,

mash aints ainauncha keemaktinuitai.

⁷Yus nekas tunaarinchau asa,

tunaarinchau ainaun aneawai.

Tura asamtai pengke nintintin ainau

ni yapiin wainkartin ainawai.

David: Yus wait wajainaunka yaingtinuitai timiauri

¹Apuru aints pengker nintinuka ayá atsuinawai.

Tura amin nintimturmasar pujuinauka pengké atsau asamtai uwemtikiartukta.

²Pasé aints ainauka tsanumin ainawai.

Tura chikichan pengker chicharinayat jimia nintijai chichainawai.

³Apuru jimiá nintijai chichau ainauka turasha ningki nintimtumasar:

Miajuitjai tumamin ainauka ame utsangta.

⁴Nu aints ainauka ningki nintimtumasar:

¿Ii jangkengka iinuchukai? Ii jangkejaingkia aints ainau nepetkatatji.

¿Yáki iincha inatmartascha wakerit? tumaminawai.

⁵Tura asamtai Yus chichaak:

“Kakaichu ainau wait wajainawai.

Tura kuikiartichu ainau yuuminau asar,

mayairukar napchau nintiminawai.

Antsu wikia yamaikia timiá wait wajainaun yaingtatjai”, tawai.

⁶Yuse chichamengka tsuwatchau asar,

nekasar pengker ainawai.

Jiru kuik pengké pakuichau ati tusar,

ji tsutsakunam siete tseerar kuukar minaramtai,

pakuichaun juwina nunisarang Yuse chichamengka nekasar pengker ainawai.12.6 1 Pe 1.7

⁷Apuru iinka waikratkatnuitme.

Tura tunau ainau iincha pasé awajtamsarai tusam iinka tuke ayamkartuktinuitme.

⁸Pasé takau ainau pachitsuk pengke aints ainaun tentakar wekainawai.

Tura mash ni pasé turamurin pachisar pengkeraitai tinawai.12.8 Rom 1.29-32

David: Apuru ami anengkratairmin nintimsan pujajai timiauri

¹Apuru ¿waruka winasha nintimrutsume? ¿Winaka tuke kajinmatruktatmek? ¿Waruka anumrutkamsha pujame?

²Wina nintirka kintajai metek najamrutawai.

Wina nemasur wina itit awajtamurin warutik inaitusat tusan kintajai metek wake mesekan pujajai.

³Apuru wina Yusur asam jiirsam airkata.

Turam jakai tusam nintir paan nintimtikrurta.

⁴Wi mianchau wajamtai,

wina nemasur ainau warasarai tusam surimrukta.

Turakmin wi nepetkajai turutcharti.

⁵Ami anengkratairmin nintimsan wikia pengkerapita tajame.

Wina uwemtikruru asakmin,

wina nintirjai waraajai.

⁶Apuru wina pengker awajtusu asakmin amin kantamruatjame.

David: Aints ainau mash tunaarintin ainawai timiauri

¹Aints nintinchau ainauka:

Yuska atsawai tinawai.

Mash pasé nintimin ainawai.

Tura mash natsanpiaku aa nuna turin ainawai.

Turasha aints pengkeran turin kichkisha atsawai.14.1 Sal 10.4, 11; Rom 1.26-27

²Nayaimpinam pujus Yuska:

Aints pengker nintintin ainatsuash, tura winasha:

Ameketme juuntam turutinatsuash tusa jiiawai.

³Antsu mash tunau jintan amakar wekain armiayi.

Mash metek natsanpiaku ainia nuna turin armiayi.

Tura asamtai aints pengkeran turinka kichkisha atsawai.14.3 Rom 3.10-12

⁴Pasé takau ainauka paanka nintiminatsui.

Antsu pangkan yuwina nunisarang wina aintsur ainaun amuinawai.

Tura winasha seatchau ainawai,

Yus tawai.

⁵Antsu Yus ni chichamen umirkaru ainaujai pujau asamtai,

nu pasé ainauka nuna wainkar shaminak nukap kurarartinuitai.

⁶Nu pasé aints ainauka mianchau ainau chichamen pachisar wishikinawai.

Antsu Yus nu aints ainaun ningki ayamrawai.

⁷Wikia Israel ainauti uwemtikramratin Jerusalénka murarinia tati tusan Yusen seajai.

Tura ni aintsri ainautin uwemtikramramtai,

Israel ainautikia mash warasartin ainiaji.14.7 Ap 19.11-16; 22.6-7, 10-16

David: Yus aints ainau tu pujusarti tusa wakerawai timiauri

¹Apuru ¿ya aints ainawa amijaisha pujusartincha ainawa? ¿Ya aints ainawa ami murarmin pengker aa nunisha matsamsartincha ainawa? ²Aints amijai pujusartinka nu ainawai:

Amin miatrusarang umirtamkaru ainia nu,

tura pengkeran takau ainia nusha,

tura tuke nintijai waitrutsuk chichau ainia nu ainawai.15.2 Sal 24.3-4

³Tura chikichan pachisar pasé chicharinachu,

tura nijai tsaniasar pujuinaun pasé awajinachu,

tura ni irutkamurin inatsarchau ainia nuka nu ainawai.

⁴Yus nakita nuna nu aints ainauka nakitin ainawai.

Antsu Yusen umirinaunka pengker awajin ainawai.

Tura wi turatatjai tina nunasha yuuminayat mash timiatrusarang umiinawai.

⁵Tura kuikiarin chikich ainaun suinak:

Tumashnum akirkum nuna nangkamasmek nukap akirkata tinatsui.

Tura chikich aintsun tsanuminak,

amesha nunismek chichasta tusar,

kuikian susatasar wakerinamtaikia:

Tsa, nunaka turashtatjai tinawai.

Aints tu pujuinauka tuke pengké natsaarchatin ainawai.15.5 Sal 1.1-3

David: Apuru ameketme wina mash surus tinmeka timiauri

¹Yusru wina ayamrutkatin asakmin,

waitkata tusan seajme.

²Wikia amin chicharkun:

“Ametme wina Apur.

Ame timiá pengkeraitme.

Amijai metekka kichkisha atsawai”, timiajme.

³Ame wina chichartakum:

“Wina aintsur ju nungkanam umirtukaru asar,

pengker awajtu weenawai”,

turutmiame.

⁴Aints ainau Yuschau waininayat chikich yusen umirina nuka nukap wait wajakartin ainawai.

Ni yusrin:

Ameketme juuntam titasar tangkun mainamtaikia,

wikia nuningkia pengké pachinkashtatjai.

Tura ni yusri naarincha pengké inaikiashtatjai.16.4 Sal 115.4-8

⁵Apuru ameketme wina mash surustinmeka.

Nekas pengker ainia nuka winaka nukap surusuitme.

Wina pujutruka aminuitai.

⁶Yus wina pujutrun nekas pengker aa nunaka surusmiayi.

Wi pujustiniun Yus surusmia nuka nekas shiirmaitai.

⁷Yus: Tu pujusta tusa wina jintintrau asamtai,

wikia Yusrun:

Ameketme pengkeram titatjai.

Tura asamtai kashisha Yus wina nintirun nintimtikrawai.

⁸Wina Apurun tuke wijai pujaun wainuyajai.

Niisha wina untsurunini pujurtau asamtai,

wikia pengké mengkakashtatjai.

⁹Tura wina nintirun pujurtau asamtai waraajai.

Tura pengker nintimsan chichaaknasha warawarat chichaajai.

Nunia nantaktinuapitja tau asan,

jakancha pengker nintimsan ayamsatnuapitja tajai.

¹⁰Yusru wina wakantrusha jakatniunmaka ukurtuschatnuitme.

Tura ami inatiram nekas pengker asamtai,

ni namangkesha kaurti tusamka tsangkamrukchatnuitme.16.10 Hech 13.35

¹¹Tura jinta tuke iwiaaku pujustinnum jeatnuka inaktursatnuitme.

Tura tuke wijai pujau asam waramtikrustinuitme.16.11 Hech 2.25-28

David: Apuru tunaaruka atsau waitnuyame timiauri

¹Apuru wina chichamur nekas aa nu anturtukta.

Tura wi untsuamka amesha airkata.

Wikia waitrichu asamtai,

wi seamur anturtukta.

²Ame nekasam pengker aa nu nekau asam,

wina tunaar amataikia,

wait wajaktin surustasam wakerakmeka nusha turata.

^3-4Wina nintimaur ainia nuka nekawaitme.

Kashisha wina waitkatasam tarutnuyame.

Tura tunaari atsuash tusam nekaprakmesha tunaaruka atsau waitnuyame.

Chikich aints ainau chicham achamnaun chichaina nunisnaka chichachuyajai.

Tura ami chichamem aarmaun umiakun,

pasé aints ainau maanitan wakerin ainia nunisnaka turichuyajai.17.3-4 Sal 139.23

⁵Ami jintim nekas aa nuni amaktinuyajai.

Turasha aints ainau:

Nu jintanmaka wekaatsuk asata,

turutinau wainiatun pengké pachichuyajai.17.5 Mat 7.13-14

⁶Yusru ame wina airkata tusan amin untsuajme.

Wait aneasam wina chichamrusha anturtukam airkata.

⁷Aints: Wina nemasur ainamunam ami kakarmarmijai winasha ayamrutkata turaminauka ami anengkratairum nekamtikiata.

^8-9Aints ni jiin tenap wainina nunismek winasha waitkata.

Turakum pasé aints ainau wina jiiru pujuinauka nepetkam waitkata.

Wina nemasur ainau wina tentatkar mantuwartas wakerina nu nepetkam ayamtikrurta.

¹⁰Nu aints ainauka pasé chichainawai.

Tura ningki nintimtumasar:

Wikia miajuitjai tumaminawai.

¹¹Tura wi wekaamtai arakchichu nemartinawai.

Nunia nungká ujuarmi tusar nakarinawai.

¹²Nu aints ainau juun yawaaya nunisarang ainawai.

Tura juun yawaa kajewa nunisarang asar,

anumkar ni nanchikijai kuntinun achikiartas nakainawa nunisarang aints ainaun nakainawai.

¹³Apuru wajakim nu aints ainaujai ingkiunikiam tikishmamtikiawarta.

Nu aints ainau nepetkarai tusam,

ami nangkirmijai papeekam uwemtikrurta.

¹⁴Apuru ami kakarmarmijai nu aints ainamunmaya angkanmamtikruata.

Nu aints ainauka ju nungkanam ainia nuna wakerinak nunak nintimtinawai.

Tura asaramtai kuikiartin wajasarti,

tura ni uchiri yutan yuwinak ampuje pujakarti,

tura ni tirangki ainausha ni ampirmaurin yuwaarti tusam tsangkatkata.

¹⁵Antsu wikia nekasan yapimin wainkatasan wakerajai.

Tura kintajai metek shintaran amijai ingkiunikian nekasan maaketai titatjame.17.15 Ap 22.2-4

Apu David ni nemase ainaun nepetak kantamamuri18.0 2 Sam 22.1-51

¹Apuru wina kakarmarka ametme.

Tura asakmin wikia aneajme.

²Ametme wina ayamtikrurtin.

Ametme wina uwemtikrurtin.

Ametme wina angkanmamtikruatin.

Ametme wina Yusur.

Ameka pampa muchkachminua tumawaitme.

Tura asakmin amin jean ayamsamnawaitjai.

Ameka tantaara tumawaitme.

Tura asam ami kakarmarmijai wina uwemtikrurtinuitme.

Ame mash ainia nu nangkakau asam,

wina ejarkatnuitme.

³Apuru amin mash aints ainau:

Ameketme juuntam turamiartinuitai.

Wina nemasur wininamtai,

wi amin untsuam uwemtikrame.

⁴Mangkartin ainau timiá untsuri wina mantuwartas winitrinamtai,

wikia jakatatjapi tusan shamkamiajai.

⁵Jata achirkawa nunisnak,

tura kuntin ejatkanam achikmawa nunisnak nekapmamramiajai.

⁶Tura timiá shamakun Apurun:

Yainkata tusan untsukmiajai.

Tura ni pujamurinia wina Yusur untsumaurun anturtukmiayi.18.6 Sal 116.3-4

⁷Wi turamtai nungka kakar uurkamiayi.

Tura uurmatai mura ainau kakarman muchitkarmiayi.

Yus pasé aints ainaun kajerkau asa nungkan muchkamiayi.

⁸Ni nujinia mukunit shamai jiinua tumauyayi.

Tura ni jangkenia ji kairia nunisang meskartin jiinua tumauyayi.

⁹Nayaimpinam pujuutiat Yus kuanki mukunit shuwinnum wajawa tumauyayi.

¹⁰Tura ni awemamuri querubínnum keemas Yus nanamua tumauyayi.

Tura querubínkia nanapejai nasenam pachinak nanaamiayi.

¹¹Tura mukunit shuwinnum yumi jiturtas kajintramunam Yus anumkawa tumauyayi.

¹²Turasha Yus ni pujutirin keemas charim kakar etsantua tumauyayi.

Turamtai mukuntiunmaya micha kaya tumau ji kairi ainaujai pachimramu kakeerarmiayi.

¹³Yus nayaimpinam puja nu ipiamtajai ni chichaamurin antumtikiamiayi.

Turamtai mukuntiunmaya micha kaya tumau ji kairi keemakmau ainaujai kakeerarmiayi.18.13 Éx 9.13-26; 19.9, 16-19; 20.18-20; Ap 8.7

¹⁴Tura chaarim nangkia tumau ayaararti tusa akupkamiayi.

Turamtai wina nemasur ainauka shaminak atu atu tupikiararmiayi.

¹⁵Yus kakar chichaak nasen timiá kakarman umpumtikiam,

juun entsa kunari warukuita tusa paan wainmamtikiamiayi.

Turasha juun entsa nitkarinini nungka paan amiayi.18.15 Éx 15.8

¹⁶Nunia Yus nayaimpinam pujus tsuntsuma aints juun entsanam jakenaun achikiar juwina nunisang ni uwejen kutsmar wina achirak nemasur ainamunmaya uwemtikrurmiayi.18.16 Sal 144.5-8

¹⁷Tura nemasur ainauka timiá kakaram armia nuka wina kajertukar pujuinamunmaya uwemtikrurmiayi.

¹⁸Wina nemasur ainau nepetukartas wakerinamtai,

pengké uwemrachmin pujai,

Apurka winaka yainkamiayi.

¹⁹Tura angkanmamtikruamiayi,

tura wina anentu asa Yus uwemtikrurmiayi.

^20-21Wikia Yusrunka pengké ukukchamiajai.

Tura Yusnaka umirtan nakitajai pengké tichauyajai.

Wi pengker pujau asan,

tura Yuse jintin amaku asamtai,

Apur winaka pengker awajtusmiayi.

²²Ni umirkatin chichamnasha kajinmichuitjai.

Tura nu chichamnasha pengké inaisachuitjai.

²³Tura nekasan Yusen nintimsan tuke pengker pujuyajai.

Tura asan tunaunaka nakitnuyajai.

²⁴Wi Yusen nintimsan pengker pujau asamtai,

winaka pengker awajtusmiayi.

²⁵Apuru amin umirtaminauka amesha ajapamka ukuatsme.

Tura amin pengker awajtaminak pujuinauka amesha pengker awajme.

²⁶Tura ame pengké anangkartichu asam,

anangkartichu ainauka tuke yayaame.

Antsu anangkartin ainau aminu nekamtairumjai nepeteame.

²⁷Ameka mianchau ainau uwemtikratnuitme.

Antsu wikia miajuitjai tumamin ainau mianchau arti tusam inatsaartinuitme.

²⁸Apuru ame ji kapawa nunisketme.

Yusru wikia itiurkachminum pujamtai,

winaka paan nintimtikrurtinuitme.

²⁹Tura asakmin ami yaimkemjai wina nemasur ainaun nepetkatnuitjai.

Tura ni yaktari wenurmau wainiatnak wayaatnuitjai.

³⁰Yuse jintingkia nekas pengkeraitai.

Yuse chichamengka nekas waitchau ainawai.

Aints ainau niin nekasampita tusar nintiminaunka Yus ejaktinuitai.

³¹¿Chikich yus iin ayamrutmaktincha awak?

Atsa, chikich yuska ii Apurijai metekka pengké atsawai.

³²Wina kakarmarun surustinka Yusketai.

Wina pujutru iwiasmatrukchatnuka nuketai.

³³Japa tsekengki wekaawa nunisang wina kakamtikrurtinka Yusketai.

Tura mura wakancha ayaatsuk wekaamtikrustinka nuketai.

³⁴Wi mesetnum weamtai:

Tu maaniata tusa wina jintintruatnuka Yusketai.

Tura kunturun kakamtikrurtincha nuketai.

³⁵Yusru ame wina uwemtikrinuyame.

Tura untsur uwejmijai wina inantinuyame.

Tura wait anentruram wina pengker awajtinuyame.

³⁶Wi wekaamtai angkan wekaasata tusam waitkamiame.

Turasha nungkanam ayaaraim tusam nawer kakamtikrurume.

³⁷Tura asakmin wina nemasur ainaun papeekan amankiamiajai.

Tura mash amukan waketkimiajai.

³⁸Niin charukarmau asar pengké nantakcharmiayi.

Antsu wina nawerun ayaamsar ayaararmiayi.18.38 1 Sam 17.45-52

³⁹Yusru wi mesetnum weamtai ame kakamtikrurmiame.

Tura asakmin wina umirtutan nakitin ainau wina tsuntsumrutawarmiayi.

⁴⁰Wina nemasur ainau winiangka tupikiakiarti tusam tsangkamkamiame.

Nu tsangkamkau asakmin,

wina kajertin ainaun amukmiajai.

⁴¹Ayamrutkata tinamaitiatang,

aints kichkisha ayamrukcharmiayi.

Tura Yusnasha untsuinamaitiat niisha aikchamiayi.

⁴²Tura asamtai wikia nase umpuak nungka tsetserin juwawa nunisnak nu aints ainaun nepetkan turan nungka mirachia nunisnak najarmiajai.

⁴³Tura asamtai ame Apuru nu aints amin umirtamchau ainamunmaya uwemtikrurmiame.

Tura nu nungkanmaya ainau apuri ati tusam inaitukmiame.

Tura asakmin wainchati aints ainauka wina inatir ainawai.

⁴⁴Turasha wina chichamrun antukar umirtinawai.

Tura chikich nungkanmaya ainausha wina pengker awajtinawai.

⁴⁵Nu aints ainauka sapijminawai.

Tura kurainak ni anumkamurinia jiininawai.

⁴⁶Ii Apuringkia tuke pujuuwitai.

Iin Ayamtikiartin asa,

timiá pengkeraitai tajai.

Turasha wina Yusur wina uwemtikrurtin asamtai,

ameketme juuntam tajai.

⁴⁷Yus chikich nungkanmaya ainaun nepetkau asa,

wina nemasur ainaunka yapaijkiamiayi.

⁴⁸Wina nemasur ainau kajertinamunmaya Yus wina uwemtikrurmiayi.

Tura chichaman umichu ainau wina nepetukartas wakerutiarmia nu aintsnumia ayamtikrurmiayi.

Ame Apuru mangkartin ainamunmaya tuke uwemtikrame.

⁴⁹Tura asakmin mash nungkanmaya ainau iruntramunam amin:

Ameketme juuntam tajame.

Tura amin naarmin pachisan kantan kantamruatjame.

⁵⁰Ame apu ata tusam wina inaituku asam,

wina nemasur ainau nepetkata tusam kakamtikrinuyame.

Tura asam winasha tura wina wear ainausha tuke ami anengkratairumjai pengker awajnuyame.18.50 Sal 144.10-11

David: Yus najanamia nujai ni kakarmarin paan inakmawai timiauri

¹Nayaim jiisar Yuse kakarmari paan nekaamnawaitji.

Tura nayaim jiisar,

Yus najanamu pengkeraitai titinuitji.

²Kashincha kashincha tsawaarkur Yus juuntaitai titinuitji.

Tura kashincha kashincha kintamkur Yus kakarmaitai titinuitji.

^3-4Chichamengka anturchayatrik,

Yus ni najanamuri mash nungkanam nekamtikiamu asar,

mash nungkanmaya ainausha nuna wainkar antukarminuitai.19.3-4 Rom 10.18

⁵Nayaimpinam Yus tsaanka puusamiayi.

Aints yamai nuwan nuwatak ni kanutirinia nantawa nunisang tsaangka kashik taakui.

Tura aints kakaram ni nemase ainaun nepetkatas ni pujutirinia jiinua nunisang tsaangka jiinui.

⁶Tsaangka yakí waka nunia ataksha jeawai.

Tura tsaa timiá tsuwer asamtai,

pengké anumkachminuitji.

⁷Yus iin nuitamramuka nekas pengkeraitai.

Tura asa pujut yamarman suramsatnuitji.

Yus chichaman akupa nuka nekasaintai.

Tura asa nekachu ainaun nintimtikratnuitai.

⁸Yus turataram ta nuka pengkeraitai.

Tura asamtai nu chichaman antukaru ainauka nuna nintimsar warainawai.

Yuse chichamengka pengker asa,

aints ainaun paan nintimtikratnuitai.

⁹Yus umirmauka nekas pengkeraitai.

Tura ni chichamengka tuke nangkankashtin asamtai,

Yus umirtuktaram ta nuka nekas pengkeraitai.

¹⁰Yuse chichamengka kuri nangkamasang timiá pengkeraitai.

Tura wapasa nangkamasang timiá pengker asamtai nukap wakeruktinuitai.

¹¹Wikia ami inatiram asan,

ami chichamin nekaan,

tunaachawa nunisnak pujustasan wakerajai.

Tura nu chichaman umirkanka,

pengker pujustinuitjai.

¹²Aints ningki nintimsangka ni tunaarinka nekaachminuitai.

Apuru wi nekachu asan,

nuwakan tunaun turinuyaja nuka tsangkutrurta.

¹³Tura ami inatiram asamtai,

wikia miajuitjai tutairuka jurutkita.

Nu tunaun wakerutsuk pujusat tusam jurutrukin asakmin,

wikia juun tunau ayatnak tunaarinchau wajastinuitjai.

¹⁴Apuru wina ayamrutkatin asam,

tura wina uwemtikrurtin asam,

wina chichamur tura wina nintimtair nekas pengker arti tusam nintimtikrurta tajame.19.14 Sal 119

Ii nemase nepetkata seamu

¹Ame wait wajakmeka Apuram amin anturtamkati.

Tura Jacobo Yusri amincha ayamrutmakti.

²Tura Yus ni pujamurinian amincha yainmakti,

tura Jerusalénnumian amincha kakamtikramrati.

³Ame kuikiaram Yus susamame nunaka mash kajinmatsuk aneaku ati.

Tura tangku maam epeyame nunasha pachis:

Pengkeraitai turamti.20.3 Mal 3.6-12

⁴Ame wakerame nunaka Yus mash suramsati.

Tura ame:

Wikia turatasan wakerajai tame nunasha mash umikta tusa tsangkatramkati.

⁵Ami nemasem ainaun nepetkakmin iisha nu wainkar warastatji.

Tura ii Yusri naari nintimsar ii banderari yakí takuitatji.

Ami Yusrum seame nunaka mash metek umikti tusar seajai.

⁶Yus ningki amin ni kakarmarin susa apu inaikiau asa,

ni nemase ainaun nepetkatniun tsangkatkatatui,

tura ame seame nuna antuk Yus nayaimpinmaya airmaktatui tusan nekajai.

⁷Chikich aints ainauka mesetnum weenak:

Ii wekaatai ainaujai ii nemase nepetkatatji tu nintiminawai.

Antsu iikia Yuse kakarmarijai ii nemase ainau nepetkakatatji tu nintimsar pujaji.20.7 Sal 33.16-17

⁸Chikich ainauka tikishin ninukar iyainawai.

Antsu Yus iijai pujau asamtai,

iikia tuke ayaatsuk wajaji.

⁹Yusru ame apu inaikiamuram ni nemase ainau nepetkati tusam tsangkatkata.

Wait aneasam ii untsumkurin aikratkata tusan seajme.

David: Yusru amin kajertamin ainau nepetkata timiauri

^1-2Yusru ame apu kakamtikramu asa,

apuka pengker nintimias pujawai.

Tura ni nemase nepetkau asakmin nekas waraawai.

Tura ni wakeramuri mash umikume.

Tura amin seatmausha suritkachume.

³Tura apu nekasam pengker awajnuyame.

Tura tsengkruti kuri najanamu tsengkrukti tusam tsangkatkamiame.

⁴Apu amin untsuri musach pujustasan wakerajai tusa seatmimiayi.

Turamtai untsuri musach pujusti tusam tsangakatkamiame.

⁵Yusru ame apu yaingmau asa nekas kakarmaitai.

Tura niin pengker awajsamu asa,

nekas ni aintsri ainaun pengker inawai.

⁶Tura ni tuke yaingku asam,

ame nijai pujusam waramtiknuyame.

⁷Apu amin umirtamkau asamtai,

amesha ni ajapamka ukukchatnuitme.

Tura ame nayaimpinam pujau asakmin,

ami anengkratairmin nintimias pujawai.

⁸Ami nemasem ainauka ami kakarmarmijai nepetkamnawaitme.

Turasha amin kajertaminak pujuinauka ami untsur uwejmijai nepetkamnawaitme.

⁹Tura ami nemasem ainau nepetkam,

ni tunaarijai metek wait wajakarti tusam,

ji kapaamunam engkeatnuitme.

Ame turakmin nu aints ainauka ji timiá tsuwernum amukartin ainawai.

¹⁰Nu aints ainau uchiri tura ni weari ainausha mash amuktinuitme.

^11-12Tura tupikiakiarti tusam,

ami tishimkurmijai nu aints ainau awaakau asakmin,

amin pasé awajtamsartas wakerinayat,

turasha iisha turami tusar chichaman najanawariat,

nuna turatatkamawar tujinkartinuitai.

¹³Yusru wajakim amin kajertamin ainau ami kakarmarmijai nepetkau ata.

Ame nu aints ainau nepetkakminkia kanta kantamatatji.

David: Yusru Yusru ¿waruka ajapruamsha ukurme? timiauri

¹Yusru Yusru ¿waruka ajapruamsha ukurme? ¿Waruka uwemtikrurtasam winatsme? ¿Waruka wi juutmaursha pachiatsme?22.1 Mat 27.46; Marc 15.34

²Yusru tsawaisha tura kashisha amin untsuamsha

airu weatsme.

Tura asakmin ayamsatatkaman tujintajai.

³Antsu ameka pengkeraitme.

Ameka Israel ainau inawaitme.

Tura asakmin Israel ainau amincha:

Ameketme juuntam turaminawai.

⁴Ii juuntri ainauka amincha:

Nekasampitme tusar nintimturmin armiayi.

Tura asaramtai ameka ni angkanmamtiknuyame.

⁵Amincha yainkata tusar seatminamtai angkan pujusarti tusam yaingmiame.

Amin nekasampita tusar nintimraru asaramtai,

ameka ni ajapamka ukuchuyame.

⁶Antsu wikia aintsua tumauchuitjai,

antsu maachia tumau asan kakaichuitjai.

Tura asamtai aints ainau wina wishikrinawai.

⁷Tura wina waitkar muuken pearar etserar wishikrinawai.

⁸Tura chichainak:

“Yusnaka nekas nintimtinuyayi.

Watska Yus niin angkanmamtikiati.

Yus niin aneakka nekas uwemtikrati” tinawai.22.8 Mat 27.39-43; Luc 23.35

⁹Antsu wina pachitsam:

Ni nukuri ampujenia akiinati,

tura ni nukuri muntsuri muntsati tusam,

nuni nangkamsamek winaka waitnuyame.

¹⁰Wi akiintsaing ameka winaka waitnuyame.

Tura wina nukuru ampujen pujaisha tuke wina Yusruyame.

¹¹Wina waitkarawartin ainauka arakchichu wajainawai.

Tura wina yainkatnuka atsawai.

Tura asamtai wait aneasam winaka ajapruamka ukurkiip.

¹²Basan nungkanmaya waaka aishmangkri nekas kajeu ainia nunisarang wina nemasur ainau tentatkar pujuinawai.

¹³Juun yawaa kajeu kuntinun yuwatas winawa nunisarang wina nemasur ainausha winitrinawai.

¹⁴Wikia yumi nungkanam ukarmawa nunisketjai.

Tura wina ukunchruka kuitkamua nunisarang ainawai.

Tura macha tseeram yumia tumau wajawa nunisang wina nintirka kakarchamin nekapeawai.

¹⁵Wina suwerka nungka tsetseria nunisang mujuawai.

Tura inairusha muchikchamin mayatairun nepeturkayi.

Tura nungka tsetserin engketamua nunisnak wikia jakamin nekapeajai.

¹⁶Pasé aints iruntrar yawaaya nunisarang wina jiinkichmin tententawaru asaramtai,

wina uwejruncha tura nawernasha chingkiarawarua nunisnak nekapmamjai.

¹⁷Wina ukunchur ainauncha nekapmarminuitjai.

Tura asamtai wina kajertin ainauka tuke jiiru pujuinawai.

¹⁸Tura yáki entsatiri jukit tusar suerte nakurusar,

wina entsatirun jurutkiarmiayi.22.18 Mat 27.35; Marc 15.24-25; Luc 23.34; Juan 19.24

¹⁹Antsu ametme wina kakamtikrurtin.

¡Yusru ukurkiip! ¡Wina yainkatin asam wári tarata!

²⁰Wina kajertin ainauka ni nangkirijai maawarai tusam uwemtikrurta.

Tura yawaaya nunisarang maawarai tusam surimrukta.

²¹Nuka juun yawaaya nunisarang asaramtai,

nu aints ainamunmaya uwemtikrurta.

Tura waaka aishmangkri kajeu ni pupuntrijai aintsun maamnawa nunisarang asaramtai,

nu aints ainamunmaya ayamrutkata.

²²Ame turakminkia wina yatsur ainaun amin pachisan ujaktinuitjai.

Tura amin umirtamkaru ainaujai iruntran kantan kantamruatnuitjame.22.22 Heb 2.12

^23-24Aints mianchau ainau wait wajainau asaramtai,

Yuska ukutsuk wait anentawai.

Tura ni yainkata tusar untsumaurincha anturui.

Tura asamtai Jacobo weari ainautiram,

Yus nintimtau asaram:

Ameketme juuntam titaram.

Tura ameketme Apum titaram.

Tura Israela weari asaram:

Ameketme ii Yusrim titaram.

²⁵Yusru aints untsuri amin umirtaminak pujuinamunam wikia amin pachisan:

Ami chichammin nekasam umikume titatjai.

Amin ameketme juuntam turamin ainamunam wi turatatjai timiaja nunaka umiktatjai.

²⁶Wait wajau ainautiram,

nukap yuwaram atumsha tutuartaram.

Tura Yus eautiram Yus:

Ameketme juuntam titaram.

Turaram nukap musach pujustaram.

²⁷Mash nungkanmaya ainautiram,

tura niish niish chichau ainautiram,

Yus kajinmatsuk nintimraram ni seatasrum tikishmatrataram.

²⁸Ii Yusri mash nungkanmaya ainau Apuri asa,

mash aints ainaun inawai.22.28 Ap 5.9

²⁹Yamaikia yuumatsuk pujuinautirmincha tajarme:

Atumkeka iwiaakuka pujuschamnawaitrume.

Antsu jakaram nungka tsetseri najanartinuitrume.

Tura asaram atumsha tsuntsumaram:

Yus ningki mash aints ainau Apurintai titaram.

³⁰Wi wear ainau Yusen ameketme juuntam tiartin ainawai.

Tura iwiaaku pujuinauka tuke niin pachisar chichasartin ainawai.

³¹Tura ukunam akiinatin ainausha Yusen pachisar:

Nekas pengker asa,

ni aintsri ainaun uwemtiknuyayi tiartin ainawai.

David: Wina Apurka winaka waitui timiauri

¹Wina Apurka uwija wainua nunisang winaka waitui.

Tura asamtai wisha yuumakchatatjai.23.1 Juan 10.11

²Uwijan wainin ni uwijarin chirichrin yuwarat tusa weka wekaaka ayamsarti tusa,

nunia mikinnum juwawa nunisang wina Apursha winasha ayamtikrurtinuitai.

Tura yumin umurarat tusa,

uwija wainin ni uwijarin entsa miaakunam juwawa nunisang wina Apurka yuumamurnasha surustinuitai.23.2 Ap 7.17

³Tura nintirnasha

kakamtikrurtinuitai.

Tura ni naarin pachisar:

Yuska nekas juuntaitai tiarat tusa,

nekas pengker jintanam wekaasat tusa winaka nintimtikrurtinuitai.23.3 Juan 10.14

⁴Apuru wijai tuke puju asam,

uwijan wainin ni uwijarin ayamruktas numichin tura shukrutin takus naka wajawa nunismek winasha ayamrutkatasam waitkatnuitme.

Tura asakmin jakatin ayatnak,

tura wait wajaktin ayatnak shamkashtinuitjai.

⁵Wina nemasur ainau jimia wajainai wainiatmek,

ame pengker aa nu surusuitme.

Tura apun inaikiartas olivo macharijai muuken ukatinawa nunismek winaka pengker awajtusuitme.

Tura aints piningnum umutai yaraamun wainak waraawa nunismek nukap waramtikrustinuitme.

⁶Ame wina pengker awajtusu asakmin,

tura wait anengkratin asakmin,

wikia iwiaaku pujaknaka nunaka tuke nintimsan pujustinuitjai.

Tura wina Apur asakmin, jakancha tuke ami jeemin iwiaaku pujustinuitjai.

Inamin nekas pengker aa nu

^1-2Yus nungkan najanamiayi.

Tura juun entsancha tura

entsa kanaji ainauncha mash najanau asamtai,

mash Yus najanamu ainauka Yusnau ainawai.24.1-2 1 Cor 10.26

³¿Yuse murarin wakartin ainau warí aintsuk ainia? ¿Turasha ni jeen pengker aa nuni pujusartin ainia nusha warí aintsuk ainia?

⁴Tunau takachu ainau,

tura tunau nintimchau ainia nu Yuse pujutirin wayaawartin ainawai.

Tura Yuschau waininayat,

chikich yusen seachu ainau,

tura nangkamiar anangminak:

Wikia nunaka turatatjai tichau ainauk Yuse pujutirin wayaawartin ainawai.24.4 Sal 15.1-2

⁵Nu aintsu Apuri ni Yusri asa,

tura ni uwemtikrau asa,

ni turamuri tu ainawai tusa nekawai.

Tura asa ni turamurijai metek pengker awajsatnuitai.

⁶Jacobo Yusri ni Apuri asamtai,

niin eaina nuka tu pujusartin ainawai.

⁷Tuke pujustinnum wayaatin waiti aa nuka uraitaram.

Tura nuka epenchamu tuke atin asamtai,

Inamin nekas pengker aa nuka wayaatnuitai.

⁸¿Nu Inamin nekas pengker aa nusha yaachita? Nuka iinu Yusri kakaram aa nuwaitai.

Nuka nekas iinu Yusrintai,

nangkinam we ni nemase ainaunka

shamchau aa nuwaitai.

⁹Tuke pujustinnum wayaatin waiti aa nuka uraitaram.

Tura nuka epenchamu tuke atin asamtai,

Inamin nekas pengker aa nuka wayaatnuitai.

¹⁰¿Nu Inamin nekas pengker aa nusha yaachita? Ii Apuri timiá kakaram aa nuwaitai.

Inamin nekas pengker aa nuwaitai.24.10 Ap 21.10-27

David: Yus ni jintin inaktursat tusa seamuri

¹Apuru amin seajme.

²Yusru amin nintimtajme.

Tura asamtai wina nemasur ainau inatsturarai tura wishikrurarai tusam tsangkamrukaip.

³Tura amin nekasampita tinu ainaun kichkisha inatsararai tusam tsangkamkaip.

Antsu amin umirtamchau ainauka natsararti tusam tsangkamkata.

⁴Apuru ami jintim inaktursata.

Tura jintim wekaasata tusam jintintruata.

⁵Wina Yusur asam,

tura wina Uwemtikrurtin asam,

ami chichamim nekas aa nu nuiturta.

Kintajai metek amin nintimtajme.

⁶Apuru ame tuke wait anengkratin asam,

ame iin pengker awajkartusmauka kajinmakiip.

⁷Wi natsa asan,

pasé turamiaja nuka nintimtsuk asata.

Antsu nekasam wait anengkratin asam,

tura pengker asam wina kajinmatrukiip.

⁸Ii Apuringkia pengkeraitai,

tura nekas tunaarinchawaitai.

Tura asa tunaarintin ainaun:

Pengker pujustaram tusa chicharui.

⁹Tura jampechu ainaun:

Juwaitai wina jintarka tusa inaktawai.

Tura wina wakeramurka nuwaitai tusa nuikiartawai.

¹⁰Tura ni chichamen umirin ainaun Yuska tuke aneawai,

tura nekas pengker awajui.

¹¹Apuru wikia nekasan juun tunaawitjai.

Tura asamtai tunaar tsangkutrurta.

Amin naarmin pachisan Apuru seajme.

¹²Aints Yusen umirak pujaunaka Yus: Ju jinta wekaasata tusa inaktawai,

¹³tura pengker awajui.

Tura ni weari nu nungkanam pujuinauncha nu nungka ninu ati tusa suawai.

¹⁴Yus ni umirin ainautin amikrintai.

Tura nu aints ainautin

ni umiktin chichaman nintimtikramji.

¹⁵Wikia itiurkachmin pujamtaisha,

wina Apurka tuke angkanmamtikrurtin asamtai,

tuke niin nintimtusan pujajai.

¹⁶Apuru wiki pujakun waitnasan pujaing wait aneasam jiirsata,

turam wait anentrurta.

¹⁷Wina nintirka waurkamin nekapeawai.

Tura asamtai paan nintimrat tusam angkanmamtikruata.

¹⁸Wi wake mesekmaurusha ame jiirsata,

tura takatruncha yainkata.

Turakum wina tunaar ainau tsangkutrurta.

¹⁹Tura wina nemasur wina kajertinak mantuwartas wakerinau warutmak ainia tusam jiisarta.

²⁰Apuru waitkata tura uwemtikrurta.

Amin tuke nintimtajme.

Tura asamtai wina inatsararai tusam surimrukta.

²¹Apuru aminak nintimtau asan,

wi amin umirkun tunaarinchau pujamtaikia winaka waitkata.

²²Yusru itiurkachmin pujakrincha,

Israel ainautinka tuke uwemtikiartukta.

David: Apuru wi itiur pujaja tusam nekarata timiauri26.0 2 Sam 15.1-16

¹Yusru wikia tunaarinchau pujau asamtai,

wi itiur pujaja nusha nekarata.

Apuru tuke aminak nintimsan pujajai.

²Wi itiur pujaja tusam winasha nekaprutata.

Tura wina nintimaur itiur ainawa tusam nekamtikruata.

Tura wina nintirun nintimja nusha nekamtikruata.26.2 Sal 139.23-24

³Wikia aminu anengkratairumin pengké kajinmatsjai.

Tura amincha tuke nintimnuyajme.

⁴Tura wait chichaman etserin ainaujaisha pengké pujuchuyajai.

Tura mai nintim wajau ainaujaisha pengké iruntrachmiajai.

⁵Pasé aints ainaujai iruntanka pengké nakitnuyajai.

Tura amin umirtamtsuk pujuu ainaujaisha tsaningnasha pujuchuyajai.26.5 Sal 1.1-2

⁶Wina uwejrujaingkia tunaanaka pengké takachuyajai.

Apuru tu pujau asan amin:

Ameketme juuntam titasan tangku epetinam jeatasan wakerajai.

⁷Tura amin:

Ameketme pengkeram titasan kantan kantamruatasan wakerajme; tura ami turamurmincha etserkatasan wakerajai.

⁸Apuru ami pujutiram nekas pengker aa nuna wikia aneajai.

Ame paaniunam pujau asakmin,

paaniurmincha wainkatasan wakerajai.

⁹Wait aneasam,

pasé aints ainaujai tsaniasam amesha jakata turutiip.

Tura mangkartin ainau jainawa nunismek amesha jakata tusam pujutruka jurutkiip.

¹⁰Nu aints ainauka nekasar tunaunaka tuke takainawai.

Tura chikich ainaun kuikian suwinak:

Ame nu aints pachisam wait chicham ujakta tinu ainawai.

¹¹Antsu nu aints ainau pasé turinamunka pengké turichuitjai.

Tura asamtai wait aneasam uwemtikrurta.

¹²Yusru wikia nungka yumpunkachminnum wajaina nunisnak amin tuke nintimsan pujajai.

Tura amin umirtamin iruntramunam amincha:

Ameketme pengkeram titatjame.26.12 Jos 24.14-15

Apurka wina paantruitai, tura wina uwemtikrurtinuitai

¹Wina Apurka wina paantruitai.

Tura wina uwemtikrurtinuitai.

Tura asamtai ¿yanak shamkataj?

Wina Apurka wina ayamrutkatin asamtai ¿warinak shamkataj?

²Pasé aints ainauka wina nakitruraru asar,

wina mesturartas tura mantuwartas wakerutinawai.

Turinayat tukumkar ayainawa nunisarang ainawai.

³Suntar untsuri mesetan najanawartas kaunkar,

wina tententawarun wainiatnak,

wina nintirka kurarchatnuitai.

Antsu angkan napchauka nintimtsuk pujustinuitjai.

⁴Wina Apurnaka kichkinak seayajai.

Tura wi seayaja nuka nuwaitai:

Iwiaaku pujaknaka wikia aints Yuse jeen pujawa nunisnak kintajai metek Yusen maaketai titasan,

tura ni pengkerin wainkatasan

tuke wakerajai.27.4 Sal 23.6

⁵Itiurkachminum pujamtaisha wina Apurka winaka ejarkatnuitai.

Tura ni jeen jeamtaisha winaka pengker nintimtursatnuitai.

Wina Apurka tuke pujú asa,

pampa nunisketai.

Tumau asamtai wikia Apurun nintimsan aints pampanam yakí wajawa nunisnak uwemran angkan pujustinuitjai.

⁶Tu nintimsan pujaknaka,

wina nemasur ainau wina

tententawaru wainiatnak shamtsuk pangkain jiistinuitjai.

Tura asan Yuse jeen jean,

Yusen maaketai titasan

tangkun maan epeatnuitjai.

Tura warasan wina Apurun kantan kantamruatnuitjai.

⁷Apuru amin untsuajme.

Anturtukta.

Wait anentruram airkata.

⁸Apurun eaktaj tu nintimran,

wikia nekasan wina nintirjai amin tuke eajme.

⁹Apuru wait aneasam anumrutkaip turasha kajertukaip.

Ameketme wina yainkatnumka.

Wina Yusur asam,

tura wina uwemtikrurtin asam,

ajapruam ukurkiip.

¹⁰Wina apar tura wina nukursha ukurkiaramtaisha,

ame wina Apur asam,

winaka ajapruamka pengké ukurkishtinuitme.

¹¹Apuru jintim inaktursata.

Wina nemasur ainau eatinau asaramtai,

jintim nekas pengker aa nuni wekaasata tusam nekaprutata.

¹²Tsanukratin ainau nangkamiar wina pachitsar wait chichaman chichartinau asaramtai,

wina nemasur ainau ni wakeramurin najaninak,

wina mesturarai tusam tsangkamrukaip.

¹³Antsu wikia iwiaaku pujaknaka,

Apuru ami pengkeerumin nekasnapi wainkatnuitja tusan nekajai.

¹⁴Tura asan mash aints ainautirmin tajarme:

Atumsha Apuram nintimtustaram.

Tura kakartaram,

turasha atsantrataram.

Nekasan tajarme:

Apuram nintimtustaram.

David: Yus ii seamuri anturtamji timiauri

¹Yusru wina ayamrutkatin asakmin amin untsuajme.

Tura wi untsuam airkata.

Ame airtsuk pujakminkia,

wikia yanchuk jakawa nunisnak nintimramnawaitjai.

²Aminu jeem pengker aa nuni wina uwejrun Jerusalenumanini takuin amin:

Yainkata tusan untsumkun pujai,

wina untsummaur anturtukta.

³Pasé takau ainauka anangminak:

Amikmami tusar pengker chichainayat,

ni ninti pasé asaramtai,

tuke pasé nintiminawai.

Tura asaramtai nu aints ainaujai metek mengkaakatnunmaka akuptukaip.

⁴Ni tunau takaamurijai metek ameka yapaijkiata.

Tura ni turuwarmia nunisarang ni wait wajakartintri susarta.

⁵Nu aints ainauka Yuse turamurinka pachischaru asaramtai,

ningki nu aints ainaunka mengkaktinuitai.

Tura ataksha pengké inankishtinuitai.28.5 Ap 18.6

⁶Yus wina seamurun anturtuku asamtai:

Ameketme pengkeram tajai.

⁷Yus kakaram asa wina ejarnuitai.

Tura asamtai niin tuke nintimnuyajai.

Wi turamtai winaka yainuyayi.

Tura asamtai wina nintirjai waraakun kantan kantamatatjai.

Turasha Apurun maaketai titatjai.

⁸Yus ni aintsri ainautin kakamtikramratnuitji.

Tura asa ii apuri ningki inaikiamia nunaka yaingtinuitai, tura uwemtikratnuitai.

⁹Apuru ami aintsrum ainautinka uwemtikiartukta,

tura pengker awajkartusta.

Uwija wainin ni uwijarin tenapkes wainua nunismek iincha waitkratkata.

Tura uwija wainin uwija uchirin minakas juwawa nunismek tuke iincha jukartukta.28.9 Luc 15.4-7; Sal 23

Yuse chichaamuringkia kakarmaitai

¹Nayaimpinam pujuinautiram Yus: Ameketme juuntam

titaram.

Tura Yus nekas pengkeraitai tusaram:

Ameketme kakarmam titaram.

²Turasha Yuse naari pachisrum:

Yus juuntaitai titaram.

Tura ni jeen nekas pengker aa nuni jearam:

Ameketme Yusem titaram.29.2 Sal 96.7-9

³Yuse chichaamuringkia juun entsanmasha antuukamnawaitai.

Yus timiá kakaram asa,

ipiamtancha akupkamnawaitai,

tura juun entsancha inawaitai.

⁴Yuse chichaamuringkia nekas kakarmaitai.

Ni chichaamuri antukrikia,

ni kakarmari tu awai tusar nekaamnawaitji.

⁵Yus charpin tura nasencha akupak,

numi juun wajainauncha tsairminuitai.

Tura numi juun mura Líbanon tutainum wajainauncha tsairminuitai.

⁶Tura mura Líbanon tutaisha tura Sirión tutaisha muchitkarti tusa muchkamnawaitai.

Waaka aishmangkri tura waaka uchiri ainau tsekena nunisarang muchitkarti tusa muran peakminuitai.

⁷Yus chichaakka nayaimpinmaya ji kapaun akupkamnawaitai.

⁸Tura nungka Cades tutai entsa atsamunmasha

muchkamnawaitai.

⁹Yuse chichaamuringkia numi juun ainaun wainiat pearminuitai.

Tura numi ainauncha mash kupirminuitai.

Tura asamtai ni jeen kaunkaru ainau mash:

Ameketme Yusem tinawai.29.9 Sal 18.7-15

¹⁰Yus yumincha jiturti tusa akupawai.

Tura tuke pujuu asa,

mash ainia nuna tuke inartinuitai.

¹¹Yus ni aintsri ainautin ni kakarmarin suramji.

Tura ni aintsri ainautin:

Tuke angkan pengker nintimsaram pujustaram tusa pengker awajtamji.

David: Yusen maaketai timiauri

¹Apuru wina angkanmamtikruau asakmin,

maaketai tajame; tura wina nemasur ainau wishikrarai tusam surimruku asakmin maaketai tajame.

²Apuru wina Yusur asam,

wi seam tsuwaramiame.

³Apuru ame jakai tusam wina uwemtikrurmiame,

tura tsaarta tusam pujut surusmiame.

⁴Yus umirkau ainautiram,

Yus nintimsaram kantamataram.

Tura ni naari nekas pengker aa nu pachisrum:

Yus juuntaitai titaram.

⁵Yuska nukapka kajechu asamtai,

ni kajekmauri wári nangkankatnuitai.

Antsu ni wait anengkratairingkia tuke nangkankashtinuitai.

Kashi juutkur pujayatrik tsawaarkurkia warastinuitji.

^6-7Yusru wina pengker awajtusu asakmin,

wikia yaanchuik wiki nintimsanak:

Maj,

wikia tuke angkan pengker pujustinuapitja timiajai.

Turayatun ame yaintsuk pujakmin,

wikia sapijmiakun napchau nintimsan pujumiajai.

⁸Apuru amin seajme,

tura amin untsuajme.

⁹Wi jakamtaisha ¿winasha pengker awajtustinkitam? Tura wina namangkrun iwiartusaramtaikia,

¿wikia amincha maaketai titinuashitjam?

Jakaru ainauka aminka maaketai turamiarchatnuitai,

tura ameketme pengkeram turamiarchatnuitai.

¹⁰Apuru anturtukam,

tura wait anentruram yainkata.

¹¹Apuru wina juutmaur mengkatruku asakmin,

yamaikia waraajai.

Tura jakamin nintimaur yapaijturau asakmin,

yamaikia aints entsatin shiirman entsar,

fiestanam weawa nunisnak wikia waraajai.

¹²Tura Apuru wina Yusur asakmin,

yamaikia chichatsuk pujustatkaman tujintajai.

Antsu warasan kantan kantamruatjame,

tura amin tuke maaketai titatjame.

David: Yus nekasampita timiauri

¹Apuru ame ejarkata tusan seajme.

Nunia inatsturaip tusan seajme.

Ame nekas pengker asam uwemtikrurta.

²Wait aneasam tsuntsumaam tenap anturtukam,

wári angkanmamtikruata.

Aints pampanam wajas angkan wajawa nunismek wina ejarkata.

Tura aints jea wenurmaunum ni nemasen shamtsuk pujawa nunismek pujusta tusam uwemtikrurta.

³Ameka nekasam pampa muchikchamin aa nunisketme.

Turasha wenuk yumpunkachmin aa nunisketme.

Ame tame nuka tuke umiu asam jintintruata,

tura waitkata tusan,

ami naarmin pachisan seajme.

⁴Aints kuntinun achikiartas ajatinawa nunisarang aints ainau wina achirkartas wakerutinawai.

Tura asaramtai ame wina ejarkatin asam angkanmamtikruata.

⁵Wina wakantruka ame waitrukta.

Apuru ame nekasam Yus asam wina ayamrutkata.31.5 Luc 23.46; Hech 7.59

⁶Aints ainau Yuschau waininayat ni yusrin:

Ameketme yusem tinaunka pengké nakitajai.

Antsu wikia:

Nekasampita tau asan amin nintimtusan pujajme.

⁷Ame anenme nuna nekau asan,

pengker nintimsan waraajai.

Tura wi wake mesekan pujamur nekau asam,

ameka wait wajamursha waitme.

⁸Tura wina nemasur ainau maawarti tusamka tsangkamrukchamame.

Antsu aints nungka muchkachminum pujawa nunismek pujusta tusam winaka waitnuyame.

⁹Apuru wikia itiurkachminum pujau asamtai wait anentrurta.

Nukap juutu asamtai,

wina jiiruka najamrutak kusuri.

Turasha wina namangkruka mash pimpi pimpi nekapeajai.

¹⁰Wikia najaimiakun juutu pujau asamtai,

wina pujutruka kichik musachia nunisang wári amuawai.

Nukap wake mesekan pujau asan,

kakarchamin nekapeajai.

Tura wina namangkrusha pimpi pimpi nekapeajai.

¹¹Wina nemasur ainauka nukap wishikrinawai.

Tura wina irutkamur ainausha wishikrami tusar,

wina pachitsar pasé chichartinawai.

Tura wi jintanam wekaamtai,

wina waintair ainausha wina waitan nakitrinak ajapruwar ukurinawai.

¹²Aints jakaun kajinmina nunisarang winasha tuke kajinmatrinawai.

Tura asan wikia jakach ajapamua nunisketjai.

¹³Aints nangkamiar wina pachitsar shishkamsar chichartinaun anturmamjai:

“Atu atu yantame itiurkachmin shamrumtin awai”.

Tu tinau asar,

aints untsuri wina mantuwartas chichaman najatrinawai.

¹⁴Antsu wikia amin nintimsan pujajme.

Apuru wikia aminka tuke:

Ameketme Yusur tinuyajme.

¹⁵Wina pujutruka aminuitai.

Wina nemasur ainau wina papeetkar mantuwartas wakerutinamtaisha angkanmamtikruata.

¹⁶Wikia ami inatirmetjai.

Tura nekas pengker asam jiirsata.

Tura wait anentruram uwemtikrurta.

¹⁷Apuru amin untsuajme.

Wi seamsha inatsturaip.

Antsu pasé aints ainau inatsaarta.

Tura iwiarsamu ainau chichatsuk pujuinawa nunisarang pujusarti tusam itiatmamtikiata.

¹⁸Chikich wait chichaman chichau ainau anangkartichu ainaun pachisar wishikinak:

Nuka mianchawaitai tusar,

pasé chichaina nu amek itiatmamtikiata.

¹⁹Antsu amin umirtamin ainauka nekasam timiá aneame.

Mash aints ainau wainminamunum amin nekasampita turamin ainau anengkratairum nekamtikiatasam inaktusume.

²⁰Ame tuke pujau asam,

amin umirtamin ainaun chikich aints ainau pasé awajsarai tusam ejaktinuitme.

Ami aintsrum ainau wainkau asam,

ni nemase ainau niin pachisar pasé chicharkarai tusam surimiame.

²¹Apuru wi wake mesekan pujai,

wina wait anentrakum pengker awajtusu asakmin,

nekasam pengkeraitme tajame.

²²Yusru wikia itiurkachmin pujamtai,

ame winaka ajapruam ukurkimiame timiajai.

Antsu wi yainkata tusan untsummatai, wina untsummaur anturtukmame.

²³Yus umirkautiram atumi Apuri aneetaram.

Ni umirkau ainautinka ii Apuringkia waitmaji.

Antsu miajuitjai tumamin ainaunka ni wait wajaktintrin susatnuitai.

²⁴Atumi Yusri nekasampita tau asaram,

napchauka nintimtsuk antsu pengker nintimsaram pujustaram.

David: Yus tsangkutrurta titin nekas pengkeraitai timiauri

¹Yus aintsu tunaarin mash sakar tsangkuramu asa,

nu aintska waraawai.

²Tura nu aintsu tunaarin mash sakturu asa,

Yuska ni tunaarinka nintimtatsui.

Tura asamtai nu aintska nekas waraawai.

Tura wina tunaaruka atsawai tusa nekas pengker pujawai.32.2 Rom 4.6-8

³Antsu wina tunaarun uukan etsertsuk pujaknaka,

kintajai metek jakamin nekapeakun wake mesekan pujuyajai.

⁴Apuru tsawaisha tura kashisha napchau nintimrati tusam,

wi wait wajaktin surusu asakmin,

yangkur tsaa sukuam kaawa nunisnak nekapeakun,

wina kakarmarka pengké atsumiayi.

⁵Tura asamtai wikia nintimran:

Apurun tunaarun ujaktajai tusan,

wina tunaarunka mash uutsuk amin ujakmiajme.

Wi turamtai wina tunaaruka mash tsangkutrurmiame.32.5 Sal 51.1-4

⁶Tura asamtai Yus umirkau ainautikia wake mesekar nintimrar,

nujang nungkan amurmanum ujungmawa nunisrik jakatatjiapi tu nintimrar pujakrikia amek seamnawaitji.

Tura nujang aintsu pujutirin amurmawa nunisang nekapeayatrik ataksha entsa kuyuak ukukmiawa nunisrik uwemratnuitji.

⁷Ameketme wina ejarkatnumka.

Itiurkachmin pujamtaisha wina ayamrutkatnuitme.

Tura wina angkanmamtikruau asakmin, warasan kantan kantamruatnuitjame.

⁸Wina Apur chichartak:

Wikia amin wainjame,

tura amincha chicharjame,

tura amin nuiniartasan:

Juwaitai jinta tusan nekamtikiatjame turutui.

⁹Kawai tura burro nintinchau asamtai,

aints jirujai jangken jingkiawar,

mai japi mai japi awajmawa nunisrumka airap.

Antsu nu tangku ainauka

jingkiatskeka atumin winichartin ainawai.32.9 Stg 3.3

¹⁰Pasé aints ainauka nukap wait wajakartin ainawai.

Antsu Yus nekasampita tinu ainautinka ii Apuri tuke wait anentramak waitmaji.

¹¹Pengke aints ainautiram tura anangmichu ainautirmesha,

atumi Apuri turamuri nintimraram warastaram.

Tura pengker nintimu asaram,

waraakrum kanta kantamataram.

David Yusen: Ameketme pengkeram tusa maaketai timiauri

¹Pengke aints ainautiram,

ii Yusri ameketme juuntam titaram.

Pengke aints ainau Yusen:

Ameketme pengkeram timiauri nekas pengkeraitai.

²Kitarrum tuntuyakrumsha:

Yus maaketai takuram kantamataram.

Tura arpasha tuntuyakrum kantamataram.

³Tura yamaram kanta kantamkurmesha Yus juuntaitai titasrum nekasrum pengker tuntuyataram.33.3 Col 3.16

⁴Yuse chichamengka nekas waitchawaitai.

Tura ni najanamurisha mash wainu asar,

Yus nekas pengkeraitai titinuitji.

⁵Yuska nekas pengker aa nuna wakerawai.

Ni anengkratairi mash nungka ainamunam tinamtikui.

⁶Yus nayaimpincha tura nayaimpinam iruna nunasha mash ni chichamejai aya chichasang najanamiayi.

⁷Yus juun entsan najanak nekas kuna ati tusa,

yumi mash nuni yarakmawa nunisang najanamiayi.33.7 Gén 1.3-31; Juan 1.3

⁸Mash nungkanam pujuinautiram Yus maaketai titaram.

Tura mash nungkanam matsatutirmesha,

ii Apuri ameketme juuntam titaram.

⁹Yus aya chichasang mash najankamiayi.

Yus tu ati tinu asamtai,

ni najankamuri mash nunisarang armiayi.

¹⁰Yus niin umirkacharu ainau wakeramurin jiis,

turacharti tusa surimiawai.

¹¹Antsu ni wakeramurin ningki mash miatrusang umiktinuitai.

¹²Aints ii Apurin:

Nekas Yusketai tinu ainauka pengker nintimsar pujusartin ainawai.

Tura Yus nu aints ainaunka:

Nekasar wina aintsur ainawai timiau asar warasartin ainawai.33.12 Sal 144.15

¹³Yuska nayaimpinam pujus mash aints ainautin waitmaji.

¹⁴Ni pujutiriniang mash nungkanam pujuinaunka jiiawai.

¹⁵Ningki aintsti nintin najatramau asa,

ii takaamurincha mash nekawai.

¹⁶Ju nungkanam apu pujuinauka suntar timiá untsurin inainayat,

kichkisha ningkikia uwemrartatkamawar tujintinawai.

Tura aints kakaram ainayat,

kichkisha ningkikia uwemrachartin ainawai.

¹⁷Kawai ainauka kakaram ainayat,

aintsun kichkisha uwemtikrachartin ainawai.

¹⁸Antsu ii Apurin:

Ameketme Apum tinu ainaunka tura ni anengkratairin nintimsar pujuinauncha tuke wainkatnuitai.

¹⁹Nu aints ainau jakarai tusa,

tura tsukajai wait wajakarai tusa,

uwemtikratas wainkatnuitai.

²⁰Iikia ii Yusri nintimsar:

Ningki iin yainmaktinuitji,

tura ningki ejarmaktinuitji taji.

²¹Iikia ii Apuri nekas pengker aa nu nekasampita tusar,

ni naari nintimsar ii nintijai waraaji.

²²Yusru iikia tuke ame nintimsar pujau asakrin,

ami anengkratairum tuke iin sukartusta taji.

David: Yus pengkeraitai timiauri

¹Wikia Yusrun kintajai metek:

Ameketme pengkeram titatjai.

Wina jangkerjai tuke Yus juuntaitai titatjai.

²Wikia Yusrun nintimtusan:

Nekas kakarmaitai tajai.

Jampechu ainautirmeka nu antukrum warastaram.

³Iijai metek mash iruntrar ii Apuri naari pachisar:

Yuska nekas juuntaitai tiarmi.

⁴Wikia Yusrun seam ni anturtukmiayi.

Tura ni shamtsuk asata tusa angkanmamtikruamiayi.

⁵Wina Yusrun nintimsar pujuinauka nukap warainawai.

Tura pengké natsaamtsuk pujusartin ainawai.

⁶Wikia mianchau asan,

shamakun untsumkinij wajamiajai.

Wi turamtai wina Yusur anturtuk:

Shamtsuk pujusta tusa,

itiurkachminnum pujaing angkanmamtikruamiayi.

⁷Yuse awemamuri Yus nintimsar pujuinautin tuke waitmaku asamtai uwemtikramratnuitji.

⁸Yus pengkerashi tusaram nekaatasrum wakerakrumka,

tenap nintimsaram nekaataram.

Aints Yusen nintimsar pujuinauka nekasar pengker nintimsar pujusartin ainawai.

⁹Yus umirkautiram atumi Apuri nintimtusrum:

Ameketme juuntam titaram.

Iikia tuke nintijai ni umirkarkia yuumakchatnuitji.

¹⁰Kuikiartin ainauka kuikiartichu wajasar yuumakartin ainawai.

Antsu ii Apuri seautikia nekasar pengker pujustinka yuumakchatnuitji.

¹¹Uchir ainautiram,

wini winiram anturtitaram.

Itiur ii Yusri pengker awajsatnuitji tusan,

atumin nuiniartasan wakerajrume.

¹²Atumka pengker nintimsaram wara warat pujustasrum wakerakrumka,

¹³pasé chichamka chichatsuk asataram.

Tura wait chichamsha etsertsuk asataram.

¹⁴Tura pasé aa nuka mash inaisaram,

pengker aa nuke turin ataram.

Turakrum angkan pengker nintimsar pujut wakerin ataram.

¹⁵Ii Apuri Yuska nekas pengke nintintin ainaun wainin asa,

ni seamuncha anturui.

¹⁶Antsu tunau takau ainaunka nakitawai.

Tura nu aintsu naarin chikich aints ainau nintimtsuk asarti tusa kajinmamtikui.34.16 1 Pe 3.10-12

¹⁷Yuska pengker nintintin ainau seamurinka anturui.

Tura itiurkachminnum pujuinamtaikia,

shamtsuk pujusarti tusa angkanmamtikui.

¹⁸Ii Yusringkia arakchichuitai.

Tura asa aints:

Wikia mengkaakatnuapitja tusar,

napchau nintimsar pujuinaunka uwemtikratnuitai.

¹⁹Pengke nintintin itiurkachminnum nukap wait wajainau wainiat,

ii Yusri mash angkanmamtiknuitai.

²⁰Ni kunchincha kupirkacharti tusa wainuitai.

Tura asamtai kichkisha kupirkachartinuitai.34.20 Juan 19.36

²¹Pasé aints ainau ni tunaarijai jakartin ainawai.

Tura pengke nintintin ainaun tsuutinauka wait wajakartin ainawai.

²²Antsu ii Yusri ni inatiri ainaun uwemtikratnuitai.

Tura Yusen nekasampita tinu ainaunka wait wajaktintrinka susashtinuitai.

David Yusen: Yainkata tusa seamuri

¹Yusru wina nepetukartas wakerutina nuka amek nepeturkata.

Tura wijai maanitan wakerina nujaisha amek maanikta.

²Aminu tantaarum jukim wina yainkatasam winita.

³Tura nangkiram achikiam,

wina mantuwartas papeetkiar winina nuka maawarai tusam surimrukta.

Tura wiitjai amin uwemtikratnunka turuttia.35.3 Ef 6.16-17

⁴Yusru wina mantuwartas wakerutina nuka natsaarar tupikiakiarti.

Tura wina pasé awajtusartas wakerutinausha nunisarang natsaarar waketkiarti.

⁵Tura nase umpuak chirichri kaarun juwawa nunisang ami awemamuram ainau nu aints ainaunka jukiar arák ajapawarti.

⁶Turinamu asar ni teenam wekaasar jinta chungkap amaunum ayaararti.

Tura ami awemamuram niin papeekarti.

⁷Kuntinun achikiartas ejatkan ejatinawa nunisarang nu aints ainauka nangkamiar wina achirkartas ejatkan pujtursarmayi.

Tura ayaarti tusar waan tautriniarmayi.

⁸Turinau asaramtai aneachmau nu waanmaka ayaarar mengkakarti.

Tura ejatkan ningki puusarma nunisha achimkar,

wait wajakarti tusan amin seajme.

⁹Antsu wina uwemtikruru asakmin,

maaketai tusan warastatjai.

¹⁰Tura wina nintirjai warasan:

Amijai metek chikichkisha atsawai titatjai.

Nekas kakaram ainau mianchau ainaun tura yuuminauncha nangkamiar takamtikinawai.

Tura wainiatum nu aints ainamunmaya ame angkanmamtikiatnuitme.

¹¹Tsanumin aints ainauka wajakiar,

wi nekachmaun pachisar inintrinawai.

¹²Wikia niin pengker awajnuyajai.

Tura waitinayat winaka pasé awajtusarmayi.

Tura asar wina wake mesemtikrukarmayi.

¹³Yaanchuik nu aints ainau jaak tepeenamtai,

wikia wake mesekan yutsuk pujuyajai.

Tura amin tuke nintirjai nu aints ainaun pachisan seayajme.

¹⁴Aints ni nukuri,

tura ni amikri tura ni nekas yachí jakamtai,

wake mesek pujawa nunisnak wisha ni jaak tepaun wainkau asan,

napchau nintimsan pujuyajai.

¹⁵Antsu wi pasé pujau asamtai,

nu aints ainau mash iruntrar wishikrin armayi.

Tura wainchatiya nunisarang tuke inaitutsuk winaka pasé awajtusarmayi.

¹⁶Tura wina itit awajtusar tura wishikrinak tura kajertinak jiiru awajtiarmayi.

¹⁷Apuru ¿nu aints ainau warutam kinta jiiame?

Nu aints ainau juun yawaaya nunisarang shiniinak,

wina mantuwartas wakerutina nuniangka uwemtikrurta.

¹⁸Turakmin aminu aintsrum untsuri iruntramunam amincha maaketai titatjame.

¹⁹Wina nemasur ainau nangkamiar kajertina nuka warascharti tusan seajme.35.19 Juan 15.25

²⁰Nu aints ainauka maanitsuk pujusartatkamawar tujintinawai.

Antsu aints angkan pengker nintimsar pujuinaun pachisar anangkinak chichaman najatinawai.

²¹Tura jangken awarar:

“Iisha ni turamuri wainkawaitji.

Atumsha nekaataram”,

nangkamiar waitrinak tinawai.

²²Tu tinau wainiatum,

ame Apuru ni turamuringkia wainkawaitme.

Tura asam ame takamtaikia pujusaip.

Tura wina ajapruamka ukurkiip.

²³Yusru wina Apur asam,

anearam wajakim wina turamur nekartuam ayamrutkata.

²⁴Yusru ameka wina Apuruitme.

Tura pengké tunaarinchau asam,

wina tunaar atsuash tusam jiirtusta.

Tura wishikrarai tusam amek surimrukta.

²⁵Wina pachitsar:

Tu wait wajakti tusar iikia wakerukmaji.

Nuka yamaikia mesraji turutiarai tusam surimrukta.

²⁶Tura wi wait wajamtai,

wina jiirsar waraina nuka inatsarta.

Tura wina pachitsar:

Nuka mianchawaitai turutinauka tuke natsaaminak pujusarti tusam inatsaarta.

²⁷Antsu wina pengker nintimtursar:

Ni nemase ainaun nepetkati turutinauka warainak untsumkarti.

Turasha tuke Yus juuntaitai,

tura ni inatiri pengker pujusti tiarti.

²⁸Ni turutinamtai wikia ame pengker turamurmin pachisan chichastatjai.

Tura kintajai metek:

Ameketme pengkeram titatjame.

David: Aints ainau pasé nintimaurin tura Yuse pengkerin pachis kantamamuri

¹Pasé aints ainauka ni nintijai tuke pasé nintimin ainawai.

Antsu nekasar Yus umirkarmi tuuka nintiminatsui.36.1 Rom 3.18

²Nuka ningki nintimtumasar:

Wikia miajuitjai tumamin ainauka:

Wikia juun tunaawitjai tuuka pengké nintiminatsui.

³Ni chichamengka nekasar pasé ainawai.

Tura wait chichamtin ainawai.

Tura paanka nintiminatsui.

Tura pengker turatniuncha yanchuk ukukiarmiayi.

⁴Tura ni peakrin tepesar,

ni pasé turatniurin nintiminawai.

Tura ni tunau takatirin inaitan nakitinau asar,

aints waak wekaayat nu jintan tuke amaktas wakerawa nunisarang ainawai.

⁵Antsu aminu anengkratairum,

Apuru aintsu anengkratairin nangkamasketai.

Tura aminu penkeerumka aintsu pengkerin nangkamasketai.36.5 Sal 57.10

⁶Ame aints ainau tunaari nekatirmeka mura juun ainia nuna nangkamasketai.

Tura ame chicham akupamu ainauka juun entsa kunaarin nangkamasketai.

Ameka Yus asam,

aints ainau tura kuntin ainausha mash wainuitme.

⁷Yusru ami anengkratairumka timiá pengkeraitai.

Tura asamtai aints ainau amin seatmiar ejamkartin ainawai.

⁸Tura amin seatmina nuka ame suame nunaka aints yutan nukap yuwina nunisarang pengker nintimsar pujuinawai.

Tura aints umutin nukap uminak tutuarar pujuinawa nunisarang ami pengkeerumin nintimsar warainawai.

⁹Nekasam tuke pujut sukartinmeka ametme.

Tura ame paantin najanau asakmin,

iisha paan nintimsar pujustinuitji.36.9 Juan 4.14

¹⁰Ami aintsrum ainautikia pengke nintintin asakrin,

ami anengkratairum tura ami pengkeerumsha sukartusta.

¹¹Antsu ningki nintimsar:

Miajuitjai tumaminauka wina najatrarai tusam surimrukta.

Turasha pasé aints ainauka wina achirkarai tusam ayamrutkata.

¹²Nu paseen takau ainau nepeteamu asaramtai jiistaram.

Nu aints nepetkamu asar,

ataksha nantakiartatkamawar tuke tujintinawai.

David: Yusen nekasampita tusa kantamamuri

^1-2Pasé aints ainau chirichri charukmawa nunisarang wári mengkakartin ainawai.

Tura nupaa jajatua nunisarang wári mengkakartin ainawai.

Tura mengkaakartin asaramtai,

nu aints ainau kajerkaip.

Tura wisha nu aintsua nunisnak pujustasan wakerajai tiip.

³Antsu Yus nekasampita tusam nintimrata.

Turasha pengker aa nuke turata.

Tura ju nungkanam pujusam,

nekas aa nuke nintimsam pujusta.

⁴Apuram nukap aneamka,

ame warí timiá wakerame nunaka suramsatnuitai.

⁵Niin nekasampita tusam nintimsam:

Apuru wina pujutruka aminuitai tita.

Tu pujakminka aminka yainmaktinuitai.

⁶Tura tsaa yakí waakak etsantua nunisang ame pengker turamurmin tura ame tunaarinchau pujamurmin Yus chikich aints ainaun paan nekamtikiatnuitai.

⁷Tura asamtai Yusrum takamtaik nintimrata.

Turasha wina yainkati tusam jaimiasam nakasta.

Chikich aints yuumatsuk pujamtai,

suwirpiaku jiisam:

Wisha nu aintsua nunisnak pujustasan wakerajai tiip.

Tura pasé aints tunau takastas wakeramtai

¿waruka aitkawa? tiip.

⁸Ame kajekmaurumka inaisata.

Tura chikich aints suwirpiaku jiiamurmesha inaisata.

Ame chikich ainau kajeru pujakmeka pengkerka pujuschatnuitme.37.8 Stg 1.19-20

⁹Pasé aints ainauka mengkakartin ainawai.

Antsu Yusen umirkaru ainauka yamaram nungkanam pujusartin ainawai.37.9 Mat 5.5

¹⁰Jumchik arusar pasé aints ainau mengkaakartinuitai.

Tura asaramtai atum eaakrumsha pengké wainkashtinuitrume.

¹¹Antsu jampechu ainau yamaram nungkanam pujusar,

nuni angkan pengker nintimsar pujusartinuitai.37.11 Mat 5.5

¹²Pasé aints ainau pengke aints ainaun pasé awajsartas nintiminawai.

Tura asar suwirpiaku jiinawai.

¹³Antsu Yus pasé ainau mengkakartin kinta jeartinun nekau asa,

niin wishikiawai.

¹⁴Pasé aints ainau ni nangkirin jukiar,

tura tishimkurincha achikiar,

mianchau ainaun tura jampechu ainauncha pasé awajsartas wakerinawai.

Tura pengkeran takau ainaun maawartas wakerinawai.

¹⁵Turinayat ni nangkirijai ningki ni nintin ijumiar jakartin ainawai.

Tura ni tishimkurin ningki kupikiartin ainawai.

^16-17Yus pasé aints ainaun amuktin asamtai,

ni kuikiarin nukap kiaungkarmia nunaka mash ukukiartin ainawai.

Antsu pengke aints ainauka Yus wainmau asar,

ni warinchurin jumchik takakinayat kuikiartinun nangkamasarang pengker pujusartin ainawai.

¹⁸Yuska tunau takachu ainaun wainuitai.

Tura asa ukunam pujut nangkankashtinun susatnuitai.

¹⁹Tsuka amatikia,

chikich aints ainau yutairi atsau waininayat,

tunau takachu ainau yutairi nukap atin asamtai,

natsaarchartin ainawai.

²⁰Pasé aints ainau nupaa kaarua nunisarang keekartin ainawai.

Tura Yuse nemase ainauka ji mukuntiuri mengkawa nunisarang mengkaakartin ainawai.

²¹Pasé aints ainau kuikian ikiatsata tusar,

kuikian jurukiariat awangtutsuk pujuu ainawai.

Antsu pengke aints ainauka kuikiarin surimtsuk wait anengkratin ainawai.

²²Pengke aints ainaun Yuska pengker awajak,

yamaram nungkanam pujusarti tusa jeekatnuitai.

Antsu ni yumingkramu ainauka tuke mengkaakartin ainawai.

²³Yuska aints ainautin:

Wina jintar amakrum wekaasataram turamji.

Tura nu jintanam wekaasaram wi wakeraja nu umirtuktaram turamji.

²⁴Ii aintsti tunaunum ayaarakrincha,

Yus ii uwejen achirmak:

Ataksha nantakta tusa inantamkitnuitji.

Tura asamtai tunaanumka tukeka pujuschatnuitji.37.24 1 Juan 1.9

²⁵Wikia yaanchuik natsa pujaknasha,

tura yamai juunmatnumsha,

aints Yusen tuke umirinayat yuuminak pujuinaunka wainchawaitjai.

Tura ni uchiri ainau chikich aintsnum yutan seaminauncha wainchawaitjai.

²⁶Pengke aints ainau tuke wait anengkratin ainawai,

tura kuikiaram ikiatsata tinamsha suritinatsui.

Turinau asaramtai,

ni uchirisha chikich aints ainauncha pengker awajsartin ainawai.

²⁷Amesha tunaarumka inaisam,

pengker aa nuke turata.

Tu pujakmeka tuke ami pujustintrum wainkatnuitme.

²⁸Yuska nekas pengker aa nunak wakerawai.

Tura niin umirinaunka ajapangka ukukchatnuitai.

Antsu pasé aints ainaunka tura ni weari ainauncha amuktinuitai.

²⁹Pengke aints ainau yamaram nungkanam tuke pujusartin ainawai.

³⁰Nu aints ainauka ni nekaina nunaka antujamniun chichainawai.

Tura asar nekas pengker aa nunak chichainawai.

³¹Yus ni nekamtairincha ni nintin engketamu asar,

tuke Yuse jinti ayaatsuk wekaasartin ainawai.

³²Pasé aints ainau pengke aints ainaun maawartas anumkar wekaatinawai.

³³Antsu Yus pengke aints ainaun maawarti tusangka tsangkamkashtinuitai.

Tura asa nu pengke aints ainaunka chikich aints wiasmamtikiashti tusa surimkatnuitai.

³⁴Yus nekasampita tusam umirkata.

Ame turakminkia amin pengker awajtamak yamaram nungkanam jeetamkatnuitai.

Tura pasé aints ainau mengkaakatniuri amesha wainkatnuitme.

³⁵Pasé aints ainau numi juun wajawa nunisarang:

Wikia miajuitjai tusar,

jampesarang wajainaun wainkamiajai.

³⁶¿Antsu tutsuk wearia?

Wi eaknasha wainkatatkaman tujinkamiajai.

³⁷Aints anangkartichu tunaun pengké takachu asamtai jiij pujurtia.

Nu aintska ukunam angkan pengker nintimias pujustinuitai.

³⁸Antsu pasé aints ainauka tuke mengkaakartin asar,

ukunmasha tuke nantakchartin ainawai.

³⁹Yuska pengke aints ainia nuna yaingtinuitai.

Tura itiurkachminnum pujuinamtaisha,

nu aints ainaun ayamruktinuitai.

⁴⁰Nu aints ainau Yusen seainak:

Ejarkata tinu asaramtai,

Yus nu aints ainaun yaingmau asa,

pasé aints ainamunmaya angkanmamtikiatnuitai tura uwemtikratnuitai.

David: Wina tunaar ainau waurmamtikrinau asaramtai etserkatasan wakerajai timiauri

¹Yusru wina kajertakmesha wait aneasam jiyatkaip.

Tura wina kajertukam pujayatmek wait aneasam wait wajaktinka surusaip.38.1 Sal 6.1

²Aints tishimkurijai chikich aintsun kettuk ijumua

nunisnak nekapmamjai.

Tura ami uwejem yakairun meram patatua nunisnak nekapmamjai.

³Wina tunaar jiisam kajertuku asakmin namangkruka mash najamrutawai.

Tura wina ukunchrusha kupinakua nunisnak nekapmamjai.

⁴Tura wina tunaaruka piakuitai tu nekapmamu asan,

merman entsakua nunisnak tsantrachmin nekapmamjai.

⁵Wikia timiá nintinchau asan tunaun takau asamtai,

wina namangkruka kuchap kawaawa nunisang mejeawai.

⁶Tura asamtai wikia kintajai metek wake mesekan tsuntsuman wekaajai.

Tura pengker nintimsan pujustatkaman tujintajai.

⁷Wi tsuweamtai,

wina tuntupruka ji kapawa nunisnak nekapmamkun,

wina namangkruka mash najamrutawai.

⁸Tura wina kakarmarka pengké atsau asamtai,

wikia napchau nintimsan juutmin nekapeajai.

⁹Apuru wina nintimauruka mash nekau asakmin,

wi chichaktatkaman mayairukan pujaja nusha waitme.

¹⁰Wina nintirka kakarman teetui.

Tura wina kakarmarka atsawai.

Tura jiirusha kusuawai.

¹¹Tura wina amikur pengker ainia nu tura wina wear ainausha kuchaprun wainkar,

winaka jiirtancha nakitrinawai.38.11 Sal 31.11; 88.18

¹²Tura wina mantuwartas wakerutinauka ejatkanam kuntinun achikiartas wakerina nunisarang achirkartas wakerutinawai.

Tura wina pasé awajtusartas wakerutinauka kintajai metek mesturartas chichaman najatrinawai.

¹³Antsu wikia aints antichua nunisnak pasé aints ainau chichamenka antutsuk pujajai.

Turasha chichachua nunisnak takamtaik pujajai.

¹⁴Wikia aints antichua tumau asan,

ayamrumaktatkaman chichaschamin nekapeajai.

¹⁵Apuru wina Yusur asakmin,

ameketme wina ayamrutkatnumka tusan,

wina nemasur ainau amek nepetkata tusan nakajme.

¹⁶Antsu wina nepetukar warasarai tura wishikrurarai tusan seajme.

¹⁷Wikia nekasan jatanak wajasjai.

Tura asan tuke najaimiamur mijantratsui.

¹⁸Wina tunaar ainau waurmamtikrinau asaramtai,

wikia etserkatasan wakerajai.

¹⁹Wina nemasur nukap yujarari.

Tura nangkamiar kajertin ainausha untsurintai.

²⁰Niinka wikia pengker awajinamaitiat,

winaka pasé awajtusarmayi.

Wi pengker aa nunak takastasan wakerai waitinayat,

wina nakitrinak pasé nintimtursar pujuinawai.

²¹Apuru winaka ajapruamka ukurkiip.

Yusru wijai tuke pujusta.

²²Yusru wina uwemtikrurtin asakmin,

wári yainkata tusan seajme.

David: Ii pujutringkia wári amukatnuitai timiauri

¹Pasé aints ainau wina jiiru pujuinaing,

wikia wiki nintimsan:

Nekasan pengker pujustatjai tau asan,

pasé chichamnasha pengké chichakchatatjai timiajai.

²Tura asan wikia pasé chichamnasha chichatsuk,

tura pengker chichamnasha chichatsuk takamtaik pujusmajai.

Turayatun atsantrachmin nekapeakun,

³wina nintir ji keawa nunisnak nekapeakun,

wina Yusrun kakarman untsuakun:

⁴“Apuru ¿wina jakatniur warutik at? tusam nekaamtikruata.

Turasha ¿warutam kintak iwiaaku pujustaj? tusan nekaatasan wakerajai”,

timiajai.

⁵Wina pujutruka ame surusmiame nuka wári mengkaakatnuitai.

Tura asamtai nukap kinta pujuschamin nekapeajai.

Aintsti pujutri kichik mayatmaujai metekaitai.

⁶Tura mash aints ainauti mikin wári mengkawa tumawaitji.

Tumau asar ii warinchuri untsuri kiaungkar pujayatrik,

ii jakaakrincha yáki nuna jukit tusarsha nekatsji.39.6 Sal 90.9-10

⁷Tu pujau asan ¿wisha itiurkatjak? tusan Apuru aminak nakajme.

⁸Wina tunaarunia angkanmamtikruata.

Tura nintinchau ainau wina wishikrurarai tusam surimrukta.

⁹Ami turamurmin nintimsan,

chichatsuk takamtaik pujusmajai.

¹⁰Wina wait wajaktin surusu asakmin,

wikia jakamin nekapeajai.

Tura asamtai wait aneasam winaka wait wajaktinka nukapka surusaip.

¹¹Aints ainauti tunau asakrin:

Tunaarum inaisataram tusam,

wait wajaktin sukartame.

Aintstikia mash nangkamir nintimsar pujau asakrin,

warí nukap wakeraji nuka nungka tsetseria tumau ati tusam tsairtinuitme.

¹²Tura asam wi seajme nu anturtukta Apuru.

Juutmaur antukam,

wina neaikir jiisam airkata.

Ameka chikich aints wainchatiya nunismek winaka jiirme.

Tura asakmin ii juuntri yaanchuik pujuarmia nunisketjai.

Tura asan chingki taa keemtsuk weawa nunisketjai.

¹³Wikia jaatsuk pujaing,

winaka kajertukaip.

Tura wi jaatsaing jumchik iwiaaku pujusti tusam tsangkatrukta.

David: Yusru aminu wakeramurmin turatasan wakerajai timiauri

¹Wikia Apurun nintimran:

Yainkata tusan untsukmiajai.

Wi tamati wina Yusur anturtukmiayi.

²Tura jakatniunmaya wina uwemtikrurmiayi.

Tura mengkaakai tusa ayamrutkamiayi.

Tura aints mura yakí ayaatsuk wajawa nunisang angkan pujusti tusa,

winaka angkanmamtikruamiayi.

³Tura yamaram kanta kantamata tusa,

winaka nintimtikrurmiayi.

Turamtai nu kantajai ii Yusrin:

Ameketme juuntam timiajai.

Wi tamatai aints untsuri nuna antukar nukap nintimrar ii Apurin nekasampita tiarmiayi.

⁴Aints Yusen nekasampita tinauka,

tura Yusen umirtan nakitin ainaujai pachintsuk pujuinauka,

tura wait chichamtin ainaujai tsaniitsuk pujuinauka nekasar warasartin ainawai.

⁵Apuru wina Yusur asam,

amijai metekka ju nungkanmaka kichkisha atsawai.

¿Ami wainchati takatrum warutmak ainia? tusanka nekaachminuitjai.

Timiá untsuri asaramtai,

ami najankamurmin pachisan chichastatkaman tujintajai.

⁶Aints amin chichartaminak:

Tunaar tsangkutrurta tusar,

tangku ainaun maawar,

wina surusarti tusamka ameka wakeratsme.

Antsu wina antutir kuwishur uratrukuitme.40.6 Sal 50.9; 51.16

^7-8Tura asakmin wisha amin timiajme:

Yusru wina pachitas papinum aarmawa nunisnak ami wakeramurmin umiktasan taawitjai.

Ami chichamem nintirun engkemawaitai tajame.40.7-8 Heb 10.5-7

^9-10Ami aintsrum untsuri iruntramunam wikia nekas chichaman nekamtikiamiajai.

Apuru wikia ami chichammin pengké uukchamiaja nusha nekame.

Wikia amin pachisan:

Ni tímia nunaka miatrusnak umikuitjai.

Nunia iincha tuke uwemtikramratnuitji timiajai.

Ami aintsrum untsuri iruntramunam aminu anengkratairmin tu awai tusan nekamtikiamiajai.

Turasha aminu chichamem nekas chicham asamtai,

pengké uukchamiajai.

^11-12Wina wait wajamurka untsuri asaramtai,

wikia nekapmartatkaman tujintajai.

Tura asamtai Apuru tajame:

Wait aneasam ami anengkratairum uutrukaip.

Ami anengkratairumjai tura ami chichamijai yainkata.

Wina tunaaruka wina intashru nangkamasang untsuri ainawai.

Tura asan napchau nintimran jakamin nekapeajai.

¹³Apuru wári tunaanumia angkanmamtikruata.

Tura wári yainkata.

¹⁴Aints wina mantuwartas wakerutinauka ame inatsaarta.

Tura ame inatsaarmau asar,

wina pasé awajtukartas wakerutina nuka natsaarar tupikiakiartinuitai.

¹⁵Wina wishikruraru ainauka natsaararu asar tupikiakiartinuitai.

¹⁶Antsu amin eatminauka amin nintimturmasar nukap warasartinuitai.

Tura uwemrartas wakerin ainauka tuke amin pachitmasar:

Yus juuntaitai turamiartinuitai.

¹⁷Antsu wi wait wajau asamtai,

Apuru kajinmatrukiip.

Yusru wina yainkatin asam,

tura wina angkanmamtikruatin asam,

wári yainkata tajame.

Aints jau Yusen seatin

¹Aints kakaichu tura mianchau ainausha pengker awajinaunka Yuska pengker awajsatnuitai.

Tura nisha wait wajamtaisha,

Yuska angkanmamtikiatnuitai.

²Tura niincha ejaktinuitai.

Turasha ju nungkanam pujus pengker nintimias pujusti tusa,

pujutan susatnuitai,

tura warastinnasha susatnuitai.

Tura ni nemase ainau niin itit awajsarai tusa surimkatnuitai.

³Tura najaimiak tepamtaisha,

Yus kakamtikratnuitai.

Tura ataksha tsaarti tusa inankitnuitai.

⁴Tura asamtai wikia Apurun chicharkun:

“Apuru wait anentruram wikia aminka umirchamaitiatmek,

ataksha pengker wajasta tusam tsuwaarata” timiajai.

⁵Wina nemasur ainau wina pachitsar pasé chichartinawai.

Tura inintrinak:

“¿Warutik jaka mengkakat?” turutinawai.

⁶Tura wina jiirsartas wininayat,

pengker nintimsarka wininatsui.

Antsu pasé chichaman antukar chikich aintsnum wayaawar aujmatrinawai.

⁷Wina kajertin ainauka iruntrar wina pachitsar chichainak:

“Ningki wiasmamak wait wajawai”,

turutinawai.

⁸Tura ataksha chichainak:

“Ni jatairingkia iwianchnumiayaintai.

Ni peakrin jaak tepa auka pengké nantakchatnuitai” tusar aujmatrinawai.

⁹Turutinai wina nekas amikruka wikia:

Wina nekas amikruitai tamaitiat,

wijai yuya nuka wina nemasur wajasi.41.9 Juan 13.18

¹⁰Antsu Apuru ame wait anentrurta,

tura ataksha inantukta.

Ame turakmin wina kajertin ainaun yapaijkiatnuitjai.

¹¹Tura wina nemasur ainau wina nepetukcharamtaikia,

amin pachisan Yusrun pengker awajnuyajai tusan nekaamnawaitjai.

¹²Tura wikia tunaun takatsuk pujau asamtai,

winaka tuke pengker awajtusta.

Tura tuke wijai pujusti tusam waitkata.

¹³Apuru ami aintsrum ainauti Yusri asakmin,

yamaisha tura tuke:

Ameketme pengkeram tajame.

Tu ati.

Wina nintimauruka Yusetai

¹Yusru japa kitamak entsan eaawa nunisnak amincha eajme.

²Yusru ameketme pujut sukartinmeka.

Tura asakmin aints kitakjai wait wajak entsan eawa nunisnak amincha eajme.

¿Warutik ataksha ami jeemnisha wayaatnuitja? tu nintimsan pujajai.42.2 Sal 63.1; 143.6

³Tura asan tsawaisha,

tura kashisha yutancha yutsuk juutkun pujajai.

Wi turamtai aints wina inintinak:

¿Yusrumsha pujawak? turutinawai.

⁴Tura nuna nintimsan,

nukap wake mesekan pujakun:

Yaanchuikia aints ainau warainak,

Yusen maaketai tiartas ni jeen wearti tusan jeemiajai.

Tura asamtai aints ainau fiestanam weenawa nunisrik Yus seati jeanam wemiaji.

⁵¿Warukanak napchau nintimrataj? ¿Warukanak wake meseknasha pujustaj?

Wikia Yusen nintimsan pujajai.

Tura asan: Ameketme Yusem titatjai.

Ningki wina Yusur asa uwemtikrurtinuitai.

⁶Wikia wake mesekan napchau nintimsan pujajai.

Tura asan amincha nukap nintimtusan pujakun,

mura Hermón tutainum tura mura Mizar tutainum Yus pujatsuash,

tura entsa Jordánka nujin

⁷túna uutmauri aa nuni Yus pujatsuash,

tu nintimsan pujajai.

Nu entsaka ame najanamiame nuni jakerua nunisnak wikia nekapmamjai.

⁸Antsu tsawai wina Apurka ni anengkratairin nekamtikiartawai.

Tura kashisha wina Yusur pujutan sukartinua nuna nintimtusan,

tuke kantan kantamrakun,

nuniasha Yusen seakun pujajai.

⁹Turayatun Yusrun chicharkun:

Wina ejarin ayatmesha,

¿warukamtaiya winasha kajinmatrukniume? Wina nemasur ainauka wina itit awajtusaru asaramtai,

¿warukanak timiá wake meseknasha pujustaj?

¹⁰Wina nemasur ainauka wina inatsturartas kintajai metek inintinak:

¿Ami Yusrumsha pujawak? turutinawai.

Tuke turutinau asaramtai,

wina ukunchrusha najamrutinawai.

¹¹¿Warukanak napchau nintimrataj? ¿Warukanak wake meseknasha pujustaj?

Wikia Yusen nintimsan pujajai.

Tura asan ameketme Yusem titatjai.

Ningki wina Yusur asa uwemtikrurtinuitai.

Wina ejarin asam angkanmamtikruata timiau

^1-2Apuru wina Yusur asam,

tura wina ejarin asam,

wikia tunau takatan nakitau asamtai,

aminu chichammin umirtamkacharu ainamunmaya ayamrutkata.

Tura anangkartin ainamunmaya tura chikich pasé aints ainamunmaya angkanmamtikruata.

Wina nemasur ainauka wina itit awajtusaru asaramtai,

¿warukanak timiá wake meseknasha pujustaj? ¿Warukamtaiya winasha kajinmatrukniume?

³Ami pujutirmin jeatnuka aminu jintim juwaitai tusam,

tura aminu chichamem nekas aa nu paan nekamtikruata.

⁴Yusru ame wina nukap waramtikrustin asakmin,

wikia ami jeemin jean amincha:

Ameketme Yusem tusan,

kitarran tuntuyakun kantamruatjame.

⁵¿Warukanak napchau nintimrataj? ¿Warukanak wake meseknasha pujustaj?

Wikia Yusen nintimsan pujajai.

Tura asan ameketme Yusem titatjai.

Ningki wina Yusur asa uwemtikrurtinuitai.

Yus yainkata tusar seamu

¹Yusru ii juuntri ainau iincha ame yaanchuik turamurmin pachisar ujatmakaru asaramtai,

iisha nuka antukuitji.

²Tura asakrin amin umirtamchau ainia nuka ami kakarmarmijai ni nungkarinia jiikim wait wajaktin susam,

ii juuntri ainau nuni pujusarti tusam,

nu nungkaka ni susawitme.

³Antsu ni kakarmarijaingkia tura ni nangkirijaingkia ni nemase ainaunka nepetchau armiayi.

Tura ningkikia ni nemase nungkarincha atankichu armiayi.

Antsu ii juuntri ainau aneau asam paaniunam pujusam,

ami kakarmarmijai turamiame.

⁴Apuru ameka wina Yusruitme.

Tura asam ami aintsrum ainauka ni nemase nepetkarti tusam,

ami kakarmaram suyame.

^5-6Tura asakmin iinu tishimkuri tura iinu nangkirisha nintimsar:

Nujaingkia ii nemase ainaunka nepetkatatjiapi,

tuuka nintimchau ayaji.

Antsu ame iinka yaingkratkau asakmin,

iin nepetamkartas wakeriarmia nuka ami chichammijai nepetnuyaji.

⁷Ii nemase ainau nepetnuyame nuka ametme.

Tura iin suwirpiaku jiirmin armia nu inatsartinmeka ametme.

⁸Iisha ame pachisar tuke:

Ameketme Yusem titinuitji.

Turasha tuke ami naaram pachisar:

Ameketme juuntam titinuitji.

⁹Antsu iinka nakikratkum inatskartame.

Tura yamaikia ii suntari ainaujaingkia mesetnumka weatsme.

¹⁰Tura asakmin ii nemase ainau jiisar shamakur tuntupear ukuaji.

Tura asakrin iin kajertaminak pujuinauka ii jeen wayaawar kasartaminak ni wakerina nuna juwinawai.

¹¹Tura asamtai uwijan maawartas juwina nunisarang iincha juramkiarti tusam tsangkamkartukmiame.

Turasha amin umirtamchau ainamunam pachinkaram pujustaram tusam iinka ukukratkimiame.

¹²Tura ami aintsrum ainautin ii nemase nepetkarti tusam tsangkamkartukmame.

Turayatum ameka aints ni warinchurin akikchaujai surawa nunismek iin surukratkamiame.

¹³Tura iin pachitmasar pasé chichasarti tusam tsangkamkartukmame.

Tura asakmin iin irutkau ainausha iincha itit awajtaminak wishikraminaji.

¹⁴Tura amin umirtamchau ainau iin wishikrarti tusam tsangkamkartukmame.

Tura asakmin nu aints ainau iin waitmakar muuken pearar wishikraminaji.

^15-16Tura wina nemasur ainau wina yapaijtukartas itit awajtusar pasé chichartinau asaramtai,

wikia tuke natsaamakun pujajai.

Tura nukap natsaamau asan,

yapirka kapantran pujajai.

¹⁷Antsu iikia aminu chichamem tuke umirnuyaji.

Tura ameka kajinmichuyaji.

Tura waininayat iinka pasé awajtamsarmiaji.

¹⁸Tura wainiatrik ame ukutka nakitnuyaji.

Tura asar aminu jintimin tuke wekainuyaji.

¹⁹Tura wainiatum ameka ajapkartuam ukukratkimiame.

Tura asakmin iikia teenam pujuinawa nunisrik pujumiaji.

²⁰Yusru iikia ame kajinmakir chikich yus,

Yuschau wainiatur seakrincha,

²¹ameka mash aints ainau nintimaurisha nekau asam,

nusha amek nekaamnawaitme.

²²Antsu ame nemarin asakrin,

uwijan maawartas juwinawa nunisarang kintajai metek iincha mantamawartas wakerutminaji.44.22 Rom 8.36

²³Apuru wait aneasam shintaram anturtukta.

¿Waruka kanurua nunismeksha pujame? Turam iincha tuke ajapkartuamka ukukratkiip.

²⁴¿Waruka aints anumak pujawa nunismeksha pujame? ¿Waruka ii timiá wait wajarnisha kajinmakratkinua nunismeksha pujame?

²⁵Iikia maach nungkanam tepawa nunisrik natsaamakur napchau nintimsar pujaji.

²⁶Apuru wajakim yaingkratkata.

Tura iin nukap anengkratau asam,

uwemtikiartukta tusan seajme.

Yus iijai pujawai

¹Yusketai iin ejarmaktinka.

Tura iin kakamtikramratnuka nuketai.

Ii shamakur pujakrincha,

iin yainmaktinka nuketai.

²Tura asamtai nungka yumpunmataisha,

tura mura ainau juun entsa kunarin ujungmau amataisha shamkashtinuitji.

³Tura juun entsa tampari timiá wej wajamtaisha,

tura mura ainau Yuse kakarmarijai muchitinamtaisha shamkashtinuitji.

⁴Kichik entsa ni kanaichirijai Yus ni yaktarin pujuinaun waramtikui.

Nu yaktaka chikich yakat ainaun nangkamasang nekas Yuse yaktarintai.

⁵Yuska nu yakta japen pujau asa,

chikich aints ainaun yumpungkai tusa wainui.

Kintajai metek tsawaaramtai,

Yuska ni aintsri ainaun yayaawai.46.5 Ap 22.1-2

⁶Yus chichaamtai,

chikich nungkanmaya ainauka nuna antukar shiniinawai.

Tura apu ainausha kurainawai.

Tura nungkaka ningki yumpuunui.

⁷Yus timiá kakaram aa nuka iijai pujawai.

Jacobo Yusringkia iin ejarmaktinuitji.

⁸Yus wainchati takatan mash nungkanam turamia nuka jiitaram.

⁹Mash nungka ainamunam meset inaisataram tusa surimrukmiayi.

Tura asa tishimuk ainaun kupikmiayi.

Tura nangki ainauncha charukmiayi.

Nuniasha mesetnum wekaatai ainauncha keemakmiayi.

¹⁰Nintimrataram.

Turasha juuwaitai Yus tusaram nekarataram.

Yus chichaak:

Wikia mash nungkanmaya ainaun inawaitjai tawai.

¹¹Yus timiá kakaram aa nuka iijai pujawai.

Jacobo Yusringkia iin ejarmaktinuitji.

Yuska mash nungka ainia nuna Apurintai

^1-2Yus nayaimpinam puja nuka nekas kakarmaitai.

Mash nungka ainia nuna Apurintai.

Tura asamtai mash yaktanmaya ainautiram atumi Yusri wararkuram uwejem awattitaram.

Turasha kakarum untsuakrum atumi Yusri warartustaram.

³Yuska chikich nungkanmaya ainaun nepetak iincha:

Atum inartaram tusa tsangkatramkamiayi.

⁴Yuska Jacobon aneau asa,

ni weari ainautinka:

Nungka nekas pengkernum pujustaram tusa suramsamiaji.

⁵Yuse aintsri ainau warainak tura untsuminak tura pupunan pupuntrinak pujuinai,

Yus ni keemtairin keemsamiayi.

⁶Yus pachisrum kanta kantamataram.

Ii Apuri pachisrum kanta kantamataram.

⁷Mash nungkanmaya ainau Apuri asamtai,

pengker nintimsaram Yus pachisrum kantamataram.

⁸Yuska mash nungkanmaya ainau Apuri asa,

ni keemtairin nekas pengkernum pujawai.

⁹Ju nungkanmaya apu ainauka Yusnau ainawai.

Tura asamtai mash ainia nuna Yuska inawai.

Tura asamtai chikich nungkanmaya apu ainauka Abrahama Yusri aintsri ainaujai iruninawai.

Yuse yaktari Sión tutai timiá pengkeraitai

¹Ii Apuringkia juuntaitai.

Ni yaktarin pujuinautikia tura ni murarin nekas pengker aa nuni kaunkarutikia ii Yusri:

Ameketme juuntam titinuitji.

²Yakta pajenini mura Sión tutai timiá pengkeraitai.

Apu nekas kakaram aa nuna yaktari asamtai,

mash nungka ainau warartutintai.

³Yuska yakat Jerusalénnumia ainau matsamtainum pujawai.

Turasha wikia atumin ejaktinuitjarme tusa,

ni aintsri ainautin nekamtikramamiaji.

⁴Apu ainau Jerusalén yumpungtai tusar kaunkarmiayi.

⁵Antsu nu yaktanka wainkar shaminak tupikiakiarmiayi.

⁶Tura sapijminak kurainiarmiayi.

Nuniasha nuwa uchin jateemawa nunisarang najaimin armiayi.

⁷Yus tsaa taakmanumanini nasen kakarman akupak,

yakat Tarsisnumia juun kanu ainaun kupiawa nunisang nu apu ainaunka kiishmakmiayi.

⁸Ii yaanchuik antukmiaji nunaka miatrusang umiku wainkamiaji:

Yuska timiá kakaram asa,

ni yaktarin Jerusalénnum pujuinaunka tuke inaitsuk wainkatnuitai.

⁹Yusru ami jeemin wayaarkia,

aminu anengkratairum tuke nintimu weaji.

¹⁰Yusru ame timiá juun asakmin,

mash nungkanmaya ainau amin naarmin pachisar:

Ameketme juuntam turaminawai.

Ame timiá kakaram asam,

aints ainausha tuke inawaitme.

¹¹Mura Sión tutainum pujuinauka warasarti.

Tura ame aints ainaun pengker inau asakmin,

Judá yaktarin pujuinauka nukap warasarti.

^12-14Ii Yusringkia tuke pujawai.

Ningki iinka jintintramak pujustinuitai.

Sión mura tentakrum jea jeamkamuri ainau tura kayajai wenurmaurisha jiisrum,

ukunam akiinawartin ainauka nekaawarti tusaram etserkatnuitrume.48.12-14 Heb 12.22-23

Kuikiaka itiurtukchatnuitai

^1-2Mash nungkanam pujuinautiram,

kuikiartin ainautiram tura kuikiartichu ainautirmesha,

nunia miajuitjai tumamin ainautiram tura mianchau ainautirmesha,

ju chichamka tenapkesrum antuktaram.

³Yamaikia Yuse nekamtairin pachisan chicham yumtin ainaun nekamtikiatjarme.

⁴Kitarran tuntuikiamaikiakun chichaman nekaachminun kantamkun nekamtikiatjarme.

⁵Pasé kinta jeamtaisha,

tura wina nemasur ainau tentatkaramtaisha ¿warukanak shamkataj? ⁶Nu aints ainauka ni kuikiarin nintimsar:

Wikia yuumakchatatjai tinawai.

Nuniasha wikia nukap warinchurtinuitjai tumaminawai.

⁷Antsu aints kichkisha ningkikia uwemrachartinuitai.

Tura Yus uwemtikrurti tusarka kuikianka kichkisha akiimiakchartinuitai.

^8-9Tuke jatsuk pujusmi tusarkia,

kuikiajaingkia pengké akiimiatmamkachminuitji.

¹⁰Aints nintip ainauka tura nintinchau ainausha mash metek jainawai.

Tura ni kuikiarinka chikichan ukurinawai tusar,

paan nekaamnawaitji.

¹¹Aints ni nungkarin tura ni yaktarin ni naarijai inaikiamu ainayat,

ni tuke iwiarsamurin matsamsartin ainawai.

Tura tuke mengkaakartin ainawai.

¹²Aints ainauka kuikiartin ainayat,

tukeka pujuschartin ainawai.

Antsu kuntin jaina nunisarang jakaartin ainawai.

¹³Aints ningki nintimtumasar:

Wikia kuikiartinuitjai tumamin ainauka tuke mengkaakartin ainawai.

Tura miajuitjai tumamin ainausha nunisarang tuke amukartin ainawai.

¹⁴Aints miajuitjai tumamin ainau kakarmaringkia yaitas mengkawai.

Tura asar tuke iwiarnastinnum jeainawai.

Uwija wainin ni uwijarin achik juwawa nunisang jataka nu aints ainaunka achiktinuitai.

Tura asamtai ukunam pengke aints ainau jakamunmaya nantakiar,

nu pasé aints ainaun inarartin ainawai.

¹⁵Antsu winaka Yus jakamunmaya uwemtikrurtinuitai.

Tura ni pujamurin juruktinuitai.

¹⁶Chikich aints kuikiartin asa,

ni jeen warinchu untsuri itau wainkurmesha napchauka nintimrairap.

¹⁷Nuna turinutiat ni jaakka,

ninu aa nunaka kichkisha jukichminuitai.

Tura ni warinchuri ainauncha ni iwiarnatniurinka jeekachminuitai.49.17 1 Tim 6.7

¹⁸Ni iwiaaku pujakka kuikiartin asa nukap waraawai.

Tura kuikiartin asamtai,

chikich aints ainau pengker nintimtuti ayat,

¹⁹ni jakatniuri kintaka jeartinuitai.

Turamtai nuniangka paaniunka pengké wainkashtinuitai.

²⁰Aints ainauka kuikiartin ainayat,

tukeka pujuschartin ainawai.

Antsu kuntin jaina nunisarang jakaartin ainawai.49.20 Stg 5.1-5

Mash nungkanmaya ainau turamuri jiistinka Yusketai

¹Ii Apuringkia mash aints ainau yusri Yusrintai.

Ni tsaa taakmanumaninisha tura tsaa jeamunmaninisha mash nungkanam pujuinaun chicharkamia nuketai.

²Yus ni yaktari Sión tutainum timiá pengker aa nuni pujus ni paaniurincha akupawai.

³Ii Yusringkia tatinuitai.

Antsu winakka takamtaikia winishtinuitai.

Tura ni tatintri jeatsaing,

ji tsuweran eemak akupkatnuitai.

Turamtai ipiamat kakaram niinka tenteatnuitai.

⁴Yuska yakiiya chichaak:

“Wina aintsur turamuri jiirmatai,

atumsha jiitaram” tusa,

nayaimpinam tura nungkanam pujuinauncha untsuktinuitai.

⁵Tura untsuak:

“Wina umirtukaru ainauka wina umirtukartas tangkurin main armia nuka irurtaram” titinuitai.

⁶Yus tamati nayaimpinam pujuinauka:

Yus aints ainaun tunaarin nekamtikin asa,

nekas pengkeraitai tiartinuitai.

⁷Yus Israel ainautin chichartamak:

“Wina aintsur ainautiram anturtuktaram.

Atumjaingkia tépaan chichastatjarme:

¡Wikia Yusetjai,

atumi Yusrinjai!

⁸Atumi tangkuri maaram tuke epee wearme nuna pachisnaka:

Nuka paseetai tatsujrume.

⁹Turasha wikia atumniaka:

Waaka uchiri maaram,

tura chipu aishmangkrisha maaram wina surustaram tatsujrume.50.9 Sal 40.6

¹⁰Kuntin ainau tura tangku ainau muranam irunuka mash winar ainawai.

¹¹Muranam nanamin ainausha tura paka nungkanam yujainausha mash winar ainawai.

¹²Mash nungka ainauka winar ainawai.

Tura mash nungkanam iruna nusha winar asaramtai,

wi tsukamakun pujaknasha atumniaka ujakchatnuitjarme.

¹³¿Wikia waaka namangken yuukitaj? ¿Tura chipu numpen uminkitaj?

¹⁴Nunaka pengké yuumatsjai.

Antsu winaka tuke maaketai turuttiaram tusan nunak wakerajai.

Tura wi turatatjai turutmiarume nuke umiktaram.

¹⁵Shamakrum pujakrumka wina seattiaram.

Turuakrumningkia wikia atumin angkanmamtikiatatjarme.

Wi turamtai atumka wina warartursataram”,

Yus turamji.

^16-17Antsu pasé aints ainaun Yus chicharak:

“Atumi tunaari inaisataram tamaitiatrum,

nu antut nakitau asaram,

wina chichamur tuntupearam ukuarme.

Tura asaram wina chichamur etserkachmin ayatrumsha ¿warukaya wina chichamrusha etserume? ¹⁸Atumka kasa ainau wainkaram nujai amikmaram,

tura kajmin ainausha wainkaram nujai iruntraram pujarme.

¹⁹Tura pasé chicham chichastasrum atumi jangke awaa wearme.

²⁰Tura atumi yachí pachisrum aujmatu wearme nunia jiyaa wearme.

²¹Nunaka mash nekayatun wikia chichakchamiajai.

Atumek nintimsaram:

Yuska iijai metekaitai tarume.

Tu nintimu asakrumin atumin wiasmatkatatjarme.

Tura atumi nintimaurincha tu awai tusan nekamtikiatatjarme.

²²Atum wina kajinmatrukrum pujau asaram,

tenapkesrum anturtuktaram.

Antsu wina anturtutsuk pujakrumningkia,

wikia atumin tsairtinuitjarme.

Wi turamtaisha ¿yáki atumnasha uwemtikramrarat?

²³Antsu wina maaketai turutinauka winaka waramtikrusartin ainawai.

Tura wina jintarun wekainaunka wikia uwemtikratnuitjai”,

Yus tawai.

David: Yusru wait anentrurta timiauri

David Betsabéjai tunau takasu asamtai, Yuse chichame etserin Natán naartin tari, Davidtan ni tunaarin pachis chichasu asamtai, David Salmon aarmia nuka nuwaitai:51.0 2 Sam 12.1-15

¹Yusru ame timiá wait anengkratin asam,

wait anentrurta.

Tura timiá pengker asam,

wina tunaaruka tsangkutrurta.

²Wi tunau asamtai nintir nijatrurta.

Tura pasé aints asamtai nintir japitrurta.

³Wikia ami chichamin umirkachuitjai tusan nekajai.

Tura wina tunaarunka tuke nintimsan pujajai.

⁴Ameka jiimia pujamning,

ame nakitame nuna takasmiajai.

Tura asan ame tunaawaitme turutme nunaka nekasaintai tajame.

Tura ame tunau asam wait wajaktatme turutme nunasha pengkeraitai tajame.51.4 Sal 32.5; Rom 3.4

⁵Wikia nekasan akiinamunmayang tunaawaitjai.

Tura nukuru muntsurin muntsuyaja nuning tunau ayajai.

⁶Tu ataing nekasam pengke nintintin ata tusam wakerutame.

Tura asam paan nintimratnusha surusuitme.

⁷Tura asamtai wisha seajme:

Wina nintir japitrurta.

Turutakminkia tunaarinchau wajastatjai.

Turasha tunaar tsangkutrurta.

Turutakminkia angkan wajastatjai.

⁸Tura tunaawitme turutiatmek ataksha waramtikrusta tusan seajme.

⁹Wina tunaar ainauka mengkaatrukta.

Tura wina pasé turutir ainausha mash sakturata.

¹⁰Yusru nintir tunaarinchau awajtursata.

Turasha yamaram nintimau tupin nintimratin aa nu surusta.

¹¹Aminka jiitnaka nakitajme turutiip.

Tura ami Wakanim pengker aa nu jurutrukiip.51.11 2 Cor 5.17

¹²Tura nekasan uwemrawaitjai,

tu nintimsan warastinka ataksha surusta.

Tura ami pengker Wakanmijai kakamtikrurta.

¹³Tura asakmin ami chichammin umirtan nakitinaunka ataksha ami jintimin wekaasarti tusan jintintawartinuitjai.

Tura asamtai tunaarintin ainau ni tunaarincha inaisar aminak umirtamkartinuitai.

¹⁴Yusru wina uwemtikruru asam,

aints maawaip tusam ame surimrukta.

Turakmin amin pachisan:

Aints pengker inawaitme tusan kantan kantamruatjame.

¹⁵Apuru wina jangker uratriniakminkia amin:

Ameketme pengkeram tusan kantan kantamruatjame.

¹⁶Ame tangku maata turutkumningkia,

nunaka umiktinuitjai.

Tura tangku epeata turutkumnisha wikia turamnawaitjai.

Turayatun nujaingkia pengkerka awajsachainjame.51.16 Sal 40.6; 50.9

¹⁷Antsu Yus asam,

ame nekasam wakerame nuka juwaitai:

Aints tunau asa,

miajuitjai tumamtsuk,

antsu napchau nintimias:

Tunaawapitja tusa ni tunaarin inais,

amin nintimturmas pujauka,

Yusru nu aintsnaka tsuutajai pengké tichatatme.51.17 Heb 9.13-14, 19-20

¹⁸Ame wakerau asam,

Sión yaktaka pengker awajsata.

Tura kayajai wenukri ataksha inankiarti tusam tsangkamkata.

¹⁹Turakmin tangkun maawar epee armia nuna ataksha turinamtai,

nuka pengkeraitai titatme.

Turasha amin suramsartas epeena nuka jiisam,

pengkeraitai titatme.

Nu turakminkia tangku epetinam ataksha waaka uchirin epetan nangkamawartinuitai.

David: Yusru ami turamurmin pachisan tuke maaketai titatjame timiauri

Saulo inatiri Davidtan sacerdote jeen wainak Saulon ujakmia nuna pachis Davidka ju kantan aarmiayi.52.0 1 Sam 22.5-23

¹¿Warukaya timiá kakaram autiatmesha pasé turamiame nu pachismesha wi aitkajai tame?

¡Yuse wait anengkratairingkia nangkaankashtinuitai!

²Ameka tuke tunau nintimsam pujau asam,

ami inaijmikia kuchí ere tsakamua tumawaitai.

Tumau asamtai anangkartutai chicham chichaame.

³Pengker aa nuka nintimtsuk pasé aa nuke timiá nintimme.

Turakum nekas chichamka wakerutsuk,

wait chichama nuke wakerame.

⁴Anangkartutai chicham chichau asam,

tuke pasé chicham aa nuke timiá wakerame.

⁵Tura asakmin Yus amincha tuke mengkaatmaktinuitai.

Tura amin achirmak ami jeemnia jiirmaki mantamaatnuitai.

⁶Yusen umirin ainau nuna wainkar shamkartin ainawai.

Antsu nu aintsun pachisar wishikinak:

⁷Au aintska jiistaram.

Nuka Yus ayamrukmaunka nintimtsuk,

antsu ni kuikiarin nintimias tuke tunaun nintimui tiartinuitai.

⁸Antsu wikia numi olivo samek wajawa nunisnak Yuse jeen pujajai.

Tura asan wikia tuke Yuse anengkratairin nintimratatjai.

⁹Yusru ami turamurmin pachisan tuke maaketai titatjame.

Ame pengker asakmin,

amin umirtaminak pujuinamunam tuke amincha nintimtustatjame.

David: Yus yainkati tusa seamuri

¹Yusru uwemtikrurta tusan,

amin naarmin pachisan seajme.

Tura ami kakarmarmijai ayamrutkata.

²Yusru wina seamur anturtukta.

Tura wina chichaamur tenapkesam anturtukta.

³Mangkartin ainau:

Wikia miajuitjai tumamina nuka wina mantuwartas wakerutinak aminka nintimturminatsui.

⁴Turutinau wainiatun wiki nintimsanak:

Wina Yusur winaka yaintui.

Tura wina Apur iwiaaku pujusti tusa winaka waitui,

tu nintimsan pujajai.

⁵Wina nemasur ainauka timiá pasé pujuinau asaramtai,

Yusur ningki yapaijkiatnuitai,

tu nintimsan pujajai.

^6-7Apuru ame tuke pengker asam,

nu aints ainau mengkaakarta.

Ameka wi shamrumtinnum pujai,

angkantin awajtusmame.

Nu turau asam,

wina nemasur nepetkamame nunasha wainkamjai.

Tura ame pengker asakmin,

wiki nimtimsanak tangkurun maan amin susatasan epeatatjai.

Nunia amin naarmin pachisan warartustatjame.

David: Wina nemasur ainaun Yus mengkatrukti tusa seamuri

¹Yusru wi seajme nu anturtukta.

Wi seamur anturtutskeka pujusaip.

^2-3Antsu pengker nintimtursam airkata.

Wi napchau nintimsan pujau asan tajame:

Wina nemasur ainau chichainamurin tura pasé aints ainau shiniinamurin antukan kuraajai.

Nu aints ainauka wait wajaktiniun untsuri surusar,

kajertukar nepetukartas wakerutinawai.

⁴Tura asamtai wina nintirka sapijmiakun nukap teetui.

Wikia jakatatjapi tu nintimsan pujajai.

⁵Tura tenukap shamau asan,

sapijmiakun kuraajai.

⁶Tura asan yapangkam nanamina nunisnak nanamin akunka,

nanaminapi ayamsainja tu nintimsan pujajai.

⁷Tura nanamnuitkunka arák wena aints atsamunam pujusminuitjai.

⁸Tura nase kakarman nasenmataikia,

tura ipiamtasha untsuri patinamtaisha,

nanamin akunka anumkatasan wári tupikiakminuitjai,

tu nintimsan pujajai.

⁹Apuru wikia mangkartin ainau turamurin wainkan,

tura ni maaniamurincha wainkau asamtai,

wina nemasur ainau mengkaakarta,

tura ni chichamesha nuwamtikiarta.

¹⁰Nu mangkartin ainau tsawaisha tura kashisha yaktanam wekajinawai.

Tura asar yaktanam tuke pasé aa nuna turinawai.

¹¹Nu yaktanmaka aya mangkartutiri tura waitrutiri nukap ainawai.

¹²Wina nemasruka winaka paseenaka awajtuscharmayi.

Nu pasé awajtinamtaisha wikia tsantramnauyajai.

Tura wina kajertin ainausha

winaka eatkacharmayi.

Wina eatinamtaisha wikia anumkamnauyajai.

¹³Antsu nuka nekas wina tsaniakmauruketai.

Turasha wina nekas amikur ayayi.

¹⁴Nijai pengker nintimsar chichasmi tusar,

tuke Yuse jeen irunnuyaji.

Tura nijai aints iruntramunmasha wekainuyaji.

¹⁵Wina nemasur ainau aneachmau jakaarti.

Ni ninti tunau piaku asaramtai,

iwiaaku ainayatang jakau iwiarsamunam ayaararti.

¹⁶Antsu wikia Yusen seatatjai.

Wi turamtai wina Apur uwemtikrurtatui.

¹⁷Kashiksha tura tsaa tupnisha tura kashisha Apurun untsukan seatatjai.

Wi untsuam wina chichamrun anturtuktatui.

¹⁸Wina nemasur untsuri au wainiatang wina Apurka angkan awajtustatui.

Tura maawarai tusa uwemtikrurtatui.

¹⁹Wina nemasur ainauka Yusnasha nintimtsuk pujuinau asar,

ni pujutrinka yapajiachartin ainawai.

Turinau wainiatang Yus aints ainaun tuke ina nuka wina nemasur ainaun inatsaartatui.

Turak winasha anturtuktatui.

²⁰Tura amikmami tinayat,

nu chichamnaka umiinatsui.

Antsu ni amikrinak maawartin ainawai.

²¹Ni chichamenka jaimiasar chichainayat,

mesetan nintimin ainawai.

Ni chichamenka antujamniau chichainayat,

nangki tsakamua tumau ainawai.

²²Aints Yusen umirak pujaunaka ayaarti tusangka,

Yuska pengké tsangkatkashtatui.

Tura asamtai ame napchau nintimsam pujamurminka ii Apuri jurutkiti tusam tsangkatkata.

Ame turakminka ukurmakchatatui.

²³Yusru mangkartin ainau tura wait chichaman chichau ainau chikich aints ainaujai metekka nukapka pujuschartin ainawai.

Ameka nu aints ainau jakaar iwiarsamunam ayaararti tusam akupkatnuitme.

Antsu wikia amin nintimtajme.

Yusrun nekasampita tau asan ni chichamen wararjai

¹Yusru aints ainau wina papeetinau asaramtai,

wait anentrurta.

Kintajai metek wina nepetukartas wakerutinawai.

Tura asar napchau nintimtikrinawai.

²Kintajai metek wina papeetinawai.

Untsuri aints miajuitjai tusar,

wina nepetukartas wakerutinawai.

³Tura asaramtai shamaknasha tuke amin nintimtajme.

⁴Yusrun nekasampita tau asan ni chichamen wararjai.

Yusrun nekasampita tau asan shamkartatsjai.

¿Aints ainausha winasha itiurtukarting?

⁵Wina nemasur ainauka kintajai metek ni chichamejai wina pasé nintimtikrinawai.

Nuka tuke wina pasemamtikrurartas nintiminawai.

⁶Tura anumkar tuke wekaaturinawai.

Tura wina mantuwartas nakarinawai.

⁷¿Ni pasé turamurin inaisartimpiash?

Yusru ame kajekmaurumjai nu tunau aints ainauka mengkaakarta.

⁸Wi tupikiakmiaurusha ameka mash nekaamame.

Turasha wina neaikirka mash nekapmame.

¿Wina neaikir ami papirumin mash aarchamukai?

⁹Wi yainkata tusan seamtai,

wina nemasur ainauka waketinawai.

Waketinau asaramtai Yuska wijai pujawai tusan nekajai.

¹⁰Yusur wina Apur asamtai,

nekasampita tau asan ni chichamen wararjai.

¹¹Yusrun nekasampita tau asan shamkartatsjai.

¿Aints ainausha winasha itiurtukarting?

^12-13Yusru wikia jakatniunam pujaing,

tuke ami paaniurmin iwiaaku pujustinnum pujusmi tusam uwemtikrurmame.

Turasha ayaartinnumiasha angkan awajtusmame.

Tura asamtai wi amin turatatjai timiaja nunaka amin wararkun umiktinuitjai tajame.

David Yusen: Yainkata tusa seamuri

¹Yusru wait anentrurta.

Tura ayamrutkata tusan seajme.

Shamrumtin ainau nangkamarti tusan ami kakarmarmin ejamkatasan wakerajai.

²Yus timiá juun aa nuna wina yainkatin asamtai untsuktatjai.

³Yus ni wait anengkratairin tura ni chichamen nekas aa nuna nayaimpinmayan akupkatatui.

Tura wina kajertinak papeetinamtaisha uwemtikrurtatui.

⁴Juun yawaa aintsun esai yuwinawa tumaunum wikia nungkanam ajuarmawaitjai.

Nu aints ainau naingkia nangkia tumau ainawai,

turasha wachia tumau ainawai.

Tura ni inajingkia saapi tsakamua tumau ainawai.

⁵Yusru ameka nayaimpisha nangkaikim pujuuwitme.

Aminu paaniurmeka mash nungka ainaun tinamui.57.5 Sal 8.1

⁶Wina nemasur ainau wina pasé nintimtikrurartas aints ejatkajai achikmi tinawa nunisarang armiayi.

Tura waanam ujuarmi tinawa nunisarang armiayi.

Turinayat waan wina tautriniarmia nuni ningki ayaararmiayi.

⁷Yusru wina nintirjai amincha kantan kantamruatasan wakerajai.

⁸Kinta yama tsawaa nuning wisha shintartatjai.

⁹Apuru aints untsuri iruntramunam kantan kantamkun amincha wararsatatjame.

¹⁰Ami anengkratairumka nayaimpinam jeawai.

Tura ami pengkeerumka nayaim kingkiaya nuni jeawai.57.10 Sal 36.5

¹¹Yusru ameka nayaimpisha nangkaikim pujuuwitme.

Aminu paaniurmeka mash nungka ainaun tinamui.57.11 Sal 8.1

David: Iin waitmaktinka ii Apurintai timiauri

¹Yusru wina nemasur ainamunmaya angkanmamtikruata.

Tura wina nepetukartas wakerutina nunia uwemtikrurta.

^2-3Aints kakaram ainau wina mantuwartas nakarinawai.

Tura asamtai pasé turina nunia angkanmamtikruata.

Turasha mangkartin ainamunmaya uwemtikrurta.

⁴Apuru wikia ami chichamminka umirtanka nakitchau ayajai.

Tura tunaanasha takachu ayajai.

Turai waitinayat wina nepetukartas wakerutinawai.

Apuru wajakim wina ingkiunkam jiirsata.

⁵Apuru ameka timiá kakaram asam,

tura ii Yusri asam,

amin umirtamchau ainau ni wait wajakartintri susarta.

Nu pasé aints ainau chikich ainaun anangkawar surukartas wakerina nuka wait anentsuk asarta.

⁶Kashi yawaa ainminawa nunisarang yaktan tentakar wekajinawai.

⁷Turasha kuchi kajeak sauran apawa nunisarang ainawai.

Turasha wishiinak:

“¿Yaachik iincha anturtamkataij?” tinawai.

⁸Tura wainiatum Apuru ameka nu amin umirtamchau ainauka wishiku pujame.59.8 Sal 2.4

⁹Yusru ameka wina kiakatratnuitme,

turasha wina ayamrutkatnuitme.

Tura asakmin wikia amin ejamkatnuitjai.

¹⁰Yusru wina anentu asam,

wijai ingkiuniktinuitme.

Turasha wina nemasur ainaun nepetkatin inaktursatnuitme.

¹¹Wina aintsur ainau kajinmakiarai tusam,

wina nemasur ainau maatka maawaip.

Antsu niish niish tupikiakiarti tusam,

ami kakarmarmijai akupkarta,

turasha inatsaarta.

Ii Apuri asam,

iin ayamrutmaktinmeka ametme.

¹²Nu pasé aints ainauka tuke tunau chichaman chichainak:

Wikia miajuitjai tumamsar wait chichaman chichainau asar,

achikmawa nunisarang arti.

¹³Yusru ame kajekmaurumjai nu aints ainauka wári amukarta.

Ame turakmin Jacobo Yusringkia ni nungkari Apurintai tusar nekaawarti.

Tura mash nungka ainau Apuringkia Yusketai tusar nekaawarti.

^14-15Nu pasé aints ainauka kashi yaktanam taar,

yawaa ainminawa nunisarang yaktanam yutain eainaksha wainkachar juutiartin ainawai.

¹⁶Apuru ameka wina yamrutin ayame.

Tura shamakun pujamtaisha,

wina waitin ayame.

Tura asakmin wikia kashik aminka kantan kantamruatjame.

Tura kakaran chichaakun ami anengkratairumin pachisan,

tura ami kakarmarmincha pachisan chichastatjai.

¹⁷Yusru wina kakamtikrurtinmeka ametme.

Tura ametme ejarkatnumka.

¡Yusru ameka winaka tuke anentin asakmin,

kantan kantamruatjame!

David: Yus nekas iin waitmaktnuitji timiauri

¹Yusru wi wait wajakun untsumaur anturtukta.

Turasha wi seamur anturtukta.

^2-3Jakamin nekapeakun timiá arák pujayatnak wina nintirjai amincha seajme.

Ame wina ayamrutkam ejarin asam,

turasha pampa juun yumpuunkachminua nunismek asam,

winaka waitkata.

Ameka jea murá jeamkamua nunisketme.

Tura asam wina nemasur ainau yamrutkatnumka ametme.

⁴Ami jeemin pujusan,

ami kakarmarmin ejamkan tuke pujustasan wakerajai.

⁵Yusru ameka wi turatatjai timiaja nuka mash anturtukmiame.

Tura amin naarmin pachisar:

Ameketme pengkeram turamin ainau ukunam jukitin aa nu:

Aminu ati tusam winasha surusmiame.

⁶Yusru ii apuri ju nungkanam inamak puja nu untsuri musach pujusti tusam tsangkatkata.

⁷Turasha ni aintsritin tuke pengker nintimias inatmarti tusam tsangkatkata.

Ami anengkratairumjai tura ami pengkeerumjai tuke ii apuri wainkata.

⁸Ame turakminkia amin naarmin pachisan tuke:

Ameketme pengkeram titatjame.

Turasha wi turatatjai timiaja nunaka mash kintajai metek umiktatjai.

David: Yusnau asan angkantaitjai timiauri

¹Yusnau asan angkantaitjai.

Iin uwemtikramratnuka nuketai.

²Ningki wina uwemtikrurtinuitai.

Ningki wina ejarkatnuitjai.

Ningkitai wina waitkatnuka.

Tura asamtai wikia natsaamtsuk pujusminuitjai.

³¿Wina nemasur ainausha waruka winasha nepetukartascha wakerutinawa? Wikia wenuk pukuutanak wajasua nunisketjai.

⁴Tuke nepetukartas nintimturinawai.

Turasha wait chichaman tuke wakerinawai.

Ni jangkejaingkia pengke aintsuitme turutinayat,

ni nintimaurijaingkia pasé nintimturinawai.

⁵Antsu Yus wina yainkati tusan nakajai.

Angkan pujustinka Yusnumiayaintai.

⁶Ningki wina uwemtikrurtinuitai.

Ningki ejarkatnuitai.

Ningkitai wina waitkatnuka.

Tura asamtai wikia natsaamtsuk pujusminuitjai.

⁷Yusketai wina uwemtikrurtinka.

Tura asa ningki wina pengker awajtustinuitai.

Tura ningkitai wina ejarkatnuka.

Turasha ningki winaka waitkatnuitai.

⁸Wi wear ainautiram,

Yus tuke nintimtustaram.

Tura Yus seakrumka,

pengker nintimsaram nijai chichastaram.

¡Ningkitai iin waitmaktinka!

⁹Aints kuikiartichu ainausha tura kuikiartin ainausha mash nangkamiar pujuinawai.

¹⁰Atumka mangkartutka tura chikich ainau jeen wayaaram warinchurin kasamkaram jukitnuka nintimsairap.

Tura kuikiartin wajakrumsha,

atumi kuikiaringkia wararsairap.

^11-12Yus tímia nunaka untsuri antinuyajai.

Wi anturnuyaja nuka nuwaitai:

Kakarmaka tura wait anengkrataisha Yusnumiayaintai.

Tura ningki aints ainautin ii turamurijai metek yapaijtamkiatnuitai.62.11-12 Mat 16.27; Rom 2.6

David: Yusru ameka wina Apuruitme timiauri

¹Yusru ameka wina Apuruitme.

Kashik amincha eajme.

Yumi jitachu asamtai,

yumi jiturat tusa,

nungka nukap yuumawa nunisnak wisha amincha nukap yuumajme.63.1 Sal 42.1-2; 143.6

²Ami jeemin wayaan kakarmarmin tura paaniurmincha wainkatasan wakerajai.

³Wikia iwiaaku pujustasan wakerayatun,

nuna nangkamasnak ami anengkratairum itiur awak tusan nekaatasan wakerajai.

Tura nuna nekaan wina jangkerjai warartustatjame.

⁴Tura iwiaaku pujaknaka:

Ameketme pengkeram titatjame.

Tura asan amin seakun uwejrun yakí takurtatjame.

⁵Aints yutan nekas kunturman nukap yuwa tutuarua nunisnak wikia naku nakut pujustatjai.

Tura asan wina jangkerjai warartakun:

Ameketme juuntam titatjame.

^6-7Yusru ameketme wina yainkatnumka.

Tura asakmin kashisha peaknum tepesnasha aminka nintimtusan pujajme.

Atashu uchichiri ni nukuri nanapen weamkar pujuinawa nunisnak pengker nintimsan pujajai.63.6-7 Sal 91.4

⁸Iwiaaku pujaknaka tuke amijai tsaniasan pujustasan wakerajai.

Ami untsur uwejmijai winaka akuptatsme.

⁹Antsu wina mantuwartas wakerutinauka aints jakau iwiartainum tepesartin ainawai.

¹⁰Tura nangkijai ijum jakaartin ainawai.

Tura asaramtai ni namangkenka yukartin ainau yuwaartin ainawai.

¹¹Tuminamtai wikia Yusen maaketai tusan warastinuitjai.

Wikia Yusnawaitjai tinu ainauka mash Yusen maaketai tiartas kantamawartin ainawai.

Antsu wait chichamrintin ainaunka Yus chichamtikiashtinuitai.

David Yusen: Ejarkata tusa seamuri

¹Yusru wi ujaajme nu anturtukta.

Wina nemasur kakaram ainia nunia ejarkata.

²Tura pasé aints ainau anumkar chichaman najatrina nunia uurkata.

Tura nu aints ainau chichaman najatrina nunia angkanmamtikruata.

³Ni inajingkia saapi tsakamua nunisarang ainawai.

Tura ni chichamengka tsentsak tseasjai paingmawa nunisarang ainawai.64.3 Rom 3.13-14

⁴Tura anumkar aints tunaarinchau ainaun nangkirin ketinawai.

Nuna turinak aneachmau shamtsuk turinawai.

⁵Tura mai nuwamtak pasé turami tusar nintimtiknainawai.

Tura anumkar ejatak puusami tinawai.

⁶Tura asar aints kichkisha iincha waitmakchatnuitji tu nintiminawai.

Antsu nu aintsu nintimaurinka uukmau wainiat,

Yusek ni pasé nintimaurincha nekaamnawaitai.

⁷Yus aneachmau nu pasé aints ainaunka ni nangkirijai ijutnuitai.

⁸Turamtai ni pasé chichatirijai

ningki wiasmatmamkartin ainawai.

Turinau asaramtai chikich aints ainau niin wainkar wishikrartin ainawai.

⁹Mash aints ainau Yusen:

Ameketme juuntam tiartinuitai,

tura Yuse turamurin pachisar chichainak:

Yus aitkayi tiartinuitai.

¹⁰Tura asaramtai pengke aints ainau ni Apurin warartusartinuitai.

Iin waitkartukta tusar,

Yusen seartin ainawai.

Tura aints anangmichu ainauka mash pengker nintimsar pujusartin ainawai.

David: Yusru aints ainauti warartustinmeka ametme timiauri

^1-2Yusru ameka ii Yusrinme.

Mash aints ainauti warartustinmeka ametme.

Ameka seamurka anturtau asakmin,

aints wikia pengker aa nuna turatatjai tinu ainauka ni timiaurinka umikiartinuitai.

Mash nungkanmaya ainauka amin winiartinuitai.

³Ii tunaaringkia iin inatminua nunisarang ainawai.

Turinau wainiatum ameka ii tunaaringkia tsangkukratkatnuitme.

⁴Yusru ame aints ainau winar arti tusam,

tura wina pujutirun wijai pujusarti takumningkia,

nu aints ainausha nekasar pengker nintimsar pujusartin ainawai.

Tura ami jeemin pujakrinkia,

ami pengkeerumjai ii nintin piatkartukta.

⁵Yusru ameka iin uwemtikiartuktin asam,

mash aints ainautin metek jiikratsam,

pasé aints ainauka wait wajaktin suwitme.

Tura amin umirtaminak pujuinauka pengker awajnuitme.

Tura asakmin mash nungkanam pujuinauka,

tura juun entsanam wekajinausha aminak nintimturmasartin ainawai.

⁶Ameka mura ainau muchitsuk wajasarti tusam ami kakarmarmijai wainuitme.

⁷Ameka juun entsa tampaaramurin:

Miaaku wajasti tusam inawaitme.

Tura aints ainau taetet wajainauka:

Titú pujustaram tusam itatmamtiknuitme.

⁸Aints timiá arák pujuinausha ami wainchati takatrumin wainkar kurarartin ainawai.

Tsaa taakmaunumanini tsaa jeamunmaninisha aints ainau amin pachitmasar warainak untsumkartin ainawai.

⁹Ame aja ainauka wainnuitme.

Tura yumisha jitumtiknuitme.

Tura arak ainausha tsapamtiknuitme.

Ameka entsa ainau nungkan chuprarat tusam najanawaitme,

turasha trigo nerekat tusam neremtiknuitme.

¹⁰Ameka nungka mujukash tsairmau aa nu chupratnuitme.

Tura nungka minarat tusam yumisha jitumtiknuitme.

Turasha árak ainau pengker nerekarat tusam neremtiknuitme.

¹¹Ameka aja ainau musaachjai metek nerekarat tusam,

yumi nukap jitumtiknuitme.

¹²Numi atsamunam tura mura ainamunam waaka ainau tura uwija ainausha chirichri nukap yuwaarat tusam samek najanuitme.

¹³Ame turau asakmin,

paka nungkanam waaka ainau tura uwija ainausha untsuri iruninawai.

Tura trigo arakmau ainausha untsuri ainawai.

Tura asaramtai aints ainau mash kantan kantamkamaikiak warainak untsuminawai.65.13 Sal 104.10-16

Mash nungkanmaya ainautiram warasrum Yus pachisrum kanta kantamruataram

¹Mash nungkanmaya ainautiram warasrum Yus pachisrum kanta kantamruataram.

²Yuse naari timiá pengker aa nu pachisrum kanta kantamruataram.

Tura Yus pachisrum:

Ameketme pengkeram tusaram kanta kantamruataram.

³Tura Yus chicharkuram:

“Aminu najanamuram ainauka nekasar shiiram ainawai.

Ame timiá kakaram asakmin,

ami nemasem ainau shamraminak amin eemkiar ayaarartin ainawai.

⁴Tura asaramtai mash nungkanmaya ainau amincha:

Ameketme juuntam turamiartin ainawai.

Nunia amin naarmin pachisar kantan kantamawartin ainawai” Yus titaram.

⁵Mash nungkanmaya ainautiram,

Yuse turamuri ainau wainkatasrum winitaram.

Turasha aints ainautin yainmaktas wainchatin shiirman najanamia nu wainkatasrum winitaram.

⁶Ningki juun entsa mujukash ati tusa najanamiayi.

Yus turamtai ii juuntri ainau yaanchuik nu juun entsanka kukarak katingkiarmiayi.

Tura asamtai ii Yusringkia warartusmi.

⁷Yus ni kakarmarijai tuke aints ainautin inatmartinuitji.

Tura niin umirtan nakitin ainauka umirtutsuk pujusarai tusa mash nungkanmaya ainaun jiij pujurtinuitai.

^8-9Yus iinka iwiaaku pujustaram tusa tura ayaarairap tusa waitkartukmiayi.

Tura asamtai mash nungkanmaya ainautiram,

ii Yusri pengker awajsataram.

Turasha Yus pachisrum kanta kantamkuram antumtikiataram.

¹⁰Ii Yusriya ameka tuke iinka nekapkartinuyame.

Aints ainau jiru kuik pakuichau at tusar,

jiinam jiyaar shiiram najaninawa nunismek iincha pengker awajkartustasam nekapkartinuyame.66.10 1 Pe 1.7

¹¹Aints ainau kuntinun kutrinawa nunismek iincha chikich ainau achikiarti tusam tuke tsangkamkartin ayame.

Tura asam aints ainau merman entsamtikina nunismek ameka iinka tuke nekapkartinuyame.

¹²Tura aints ainau pachitsuk najararti tusam tsangkamkartinuyame.

Ame turau asakmin,

iisha entsanam jakerua nunisrik tura jiinmasha epeamua nunisrik nekapmamnuyaji.

Turarin wainiatum ukunam nungka pengkernum pujusarti tusam pujkartusmiame.

^13-14Tura asakmin ami jeemin wayaan,

amin naarmin pachisan tangkurun maan epeatatjai.

Nuna turakun yaanchuik shamrumtinnum pujakun:

Wikia junia iwiaaku jiinkinka tangkurun maan susatatjame timiaja nunaka umiktatjai.

¹⁵Tangku epetinam ami jeem aa nuni tangkurun epeatatjai.

Waaka aishmangkri ainaun tura chipu ainauncha tura uwija aishmangkri kungkuram ainia nuna aminka susatatjame.

¹⁶Yus timiatrusrumek umirkau ainautiram mash winitaram.

Tura Yus wina pengker awajtusmaurun pachisan etsermatai nu antuitaram.

¹⁷Wina jangkerjai Yusrun seamiajai tura wararsamiajai.

¹⁸Wikia tunau nintimsan pujawaitmataikia,

wina Apurka winaka anturtukchamin ayayi.

¹⁹Turayat wi seamurnaka anturtinuyayi.

²⁰Tura wi seamurnaka anturtuk ni anengkratairin suritrukchau asamtai,

Yusrunka ameketme pengkeram tajai.

Mash nungkanmaya ainau Yusen: Ameketme juuntam tiartinuitai

^1-2Ii Yusriya wait anengkratkata,

tura pengker awajkartusta.

Mash nungkanmaya ainau ami wakeramurmin nekaawarti tusam,

tura ame uwemtikiartutai chichaman antukarti tusam pengker awajkartusta.

³Ii Yusri asakmin,

mash nungkanmaya ainau:

Ameketme pengkeram turamiarti.

Turasha ameketme juuntam turamiarti.

⁴Mash nungkanmaya ainau amek inawaitme.

Tura mash nungkanmaya ainau winak umirtukarti tusam jintinnuitme.

Tura asakmin mash nungkanmaya ainau amincha warartamsar untsurmakarti.

⁵Ii Yusri asakmin mash nungkanmaya ainau:

Ameketme pengkeram turamiarti.

Turasha ameketme juuntam turamiarti.

⁶Ajanam árak ainau nerekarti tusa,

ii Yusri iincha pengker awajtamsamji.

⁷¡Yus iincha pengker awajkartamtai,

mash nungkanmaya ainau niincha:

Ameketme Yusem tiarti!

Juuntach Yus seamu

¹Apuru wina ejarkat tusan amin seajme.

Wina ajapruam pengké ukurkiip.

²Tura angkanmamtikruata.

Tura timiá pengker asam uwemtikrurta.

Tura anturtukam yainkata.

³Wikia aints pampanam anuminawa nunismek anumkata tusam tsangkamrukta.

Ame wina uurkatin asam,

wina ejarkatin ata,

turasha wina uwemtikrurtin ata.

^4-5Yusru wikia natsa akuncha tuke aminka eayajme.

Tura wina Yusur asakmin,

pasé aints ainau tura mangkartin ainau amin umirtamchau asaramtai,

nu aints ainamunmaya angkanmamtikruata.

⁶Nukuru ampujenia wina jiirkimiame.

Tura akiinamunmayan winaka waitnuyame.

Tura asakmin amincha tuke:

Ameka wina Yusruitme titatjame.

⁷Aints ainau untsuri wina waitkar nukap nintiminawai.

Turinau wainiatum ame wina ejarkatin tuke ayame.

⁸Kintajai metek ami pengkeerumin nintimsan:

Ameketme pengkeram tinuyajai.

⁹Tura asamtai juuntach amatisha tuke waitkata.

Tura wina kakarmar atsamtaisha ajapruamka ukurkiip.

¹⁰Wina nemasur ainau mantuwartas iruntrar chichaman najatrinawai.

¹¹Nuka chichainak:

“Yus niin ajapa ukukin asamtai,

aints kichkisha ayamrukchatnuitai.

Tura asamtai papeekrum achiktaram”,

turutinawai.

¹²Yusru tu tinau asaramtai,

winaka ajapruam ukurkiip,

antsu wári yainkata.

¹³Wina nemasur ainau inatsaaram mengkaakta.

Wina pasé awajtusartas wakerutin ainaunka chikich aints ainau wishikrarti tusam inatsaarta.

¹⁴Antsu wikia amin kintajai metek ame tati tusan nakastatjame.

Turakun ameketme Yusem tuke titatjame.

¹⁵Kintajai metek aints ainaun ujaakun:

“Yuska iincha uwemtikramnuyaji,

turasha iincha pengker awajtamnuyaji”, titatjai.

Antsu ¿itiur uwemtikramrayajik? nunaka nintimratatkaman pengké tujintajai.

¹⁶Apuru amin pachisan:

Yus ni kakarmarijai ni nemase ainaun nepetnuyayi,

tusan aints ainaun ujaktatjai.

Turasha amin pachisan:

Ningki aints ainaun mash metek inawai,

tusan etserkatatjai.

¹⁷Yusru wi natsa amatikia,

tuke wina unuitinuyame.

Tura asakmin juuntach ayatun,

amin pengker turamurmin pachisan etseru weajai.

¹⁸Yusru wikia weamran tura jemperukan pujaing waitiatum winaka ajapruam ukurkiip.

Tuke ami kakarmarmin pachisan yamai pujuinaun tura ukunam akiinatin ainauncha ujakminuitjai.

¹⁹Yusru nayaimpinam pujau asam,

aints ainau mash metek inawaitme.

Tura ame wainchati takat timiá untsuri takaawitme.

Amijai metek kichkisha atsawai.

²⁰Winaka itit awajtukmaur tura wait wajaktincha wainmamtikrin ayame.

Turayatum wi jakamtai,

winaka inantukim tuke pujusti tusam, iwiarsamunmaya inantuktinuitme.

²¹Tura aints ainau wina pachitsar:

Pengke aintsuitai tiarti tusam,

tura wijai pengker nintimias pujusti tusam,

winaka pengker awajtustinuitme.

²²Tura asakmin Yusru wikia amin pachisan kantan kantamruatjame.

Turasha ameka tuke pengkeraitme titatjame.

Ameka Israela pengkerinme tusan,

amin kitarran tura arpancha tuntuikiamaikiakun kantan kantamruatjame.

²³Tura wina uwemtikruru asakmin,

jangkerjaingkia kantan kantamkun nintirjaingkia warastatjai.

²⁴Wina pasé awajtusartas wakerutin ainauka pengké natsaarar pujuu armiayi.

Turinau asaramtai wikia kintajai metek aints ainaun ame pengker turamurmin pachisan chichastatjai.

¿Pasé aints ainausha waruka yuumatskesha pujuinawa?

¹Yus pengke nintintin ainaun nekas pengker awajsatnuitai.

^2-3Antsu wikia jampesarang pujuinaun suwirpiaku jiakun,

tura pasé aints ainauncha suwirpiaku jiakun,

aints iyaachak wajawa nunisnak tunau jurumachak wajakjai.

⁴Pasé aints ainau najaimiatsuk pujuinau asar ni jakatniurinka nintiminatsui.

⁵Tura chikich aints wait wajaina nunisarka waitka wajainatsui.

Tura chikich aintska itiurkachminnum pujuina nunisarka pujuinatsui.

⁶Tura asar jampesarang pujuinawai,

tura chikich aints ainauncha pasé awajinawai.

⁷Ni namangkengka apuitai.

Turayat tuke ni nintijai tunau nintimin ainawai.

⁸Chikich aints ainaun wishikinawai.

Tura jampesarang:

Wi wakeraknaka pachitsuk pasé aa nunaka turamnawaitjai tinawai.

⁹Yusnasha pachisar pasé chichainawai,

tura aintsnasha pachisar tuke aujmatinawai.

¹⁰Tu pujuinau asaramtai,

chikich aints ainau niin pachisar:

Nekasar pengker pujuinawai tinawai.

¹¹Tura nintiminak:

¿Itiur pujuinawa nuna Yus nekawash? ¿Tura Yus nayaimpinam puja nuka nu aintsu turamurinka nekawash? tinawai.

Ni inintramuri tu awai.73.11 Sal 10.4, 11; 14.1

¹²Nu pasé aints ainau jiij pujurtaram.

Pachitsuk ni kuikiarin yujinawai tinawai.

¹³Tu tinau wainiatnak,

wikia nangkamnak nintir tunaarinchau ati tusan wakerukmajai.

Turasha nangkamnak tunau takatsuk pujustaj timiajai.

¹⁴Turayatnak pachitsuk kintajai metek wait wajajai,

tura kashincha kashincha wina katsumrinawai,

tu nintimsan pujumjai.

¹⁵Antsu tu chichaaknaka Yusen umirkaru ainaun pasé nintimtiknuyajai.

¹⁶¿Timiá tunau ainayat warukaya timiá yuumatskesha pujuinawa? tusan nuna tenapkesan nintimratatkaman pengké yumtin nintimsan pujuyajai.

¹⁷Antsu nuniangka Yuse jeen wayaan,

Yusen nintimran iniakun:

¿Nu pasé aints ainauka tuni pujusartinui? tu iniam,

Yus winaka nekamtikruamiayi.

¹⁸Nu aints ainauka iyaatnak wajainawai,

tura mengkaatanak wajainawai.

¹⁹Nuka aneachmau mengkaakartin ainawai.

Turasha sapijjai amukartin ainawai turutmiayi.

²⁰Apuru ame aints shintarua nunismek nu pasé aints ainauka amuktinuitme.

^21-22Wikia pasé aints ainau pujutrin wainkan,

tangku nintinchawa nunisnak katsurman nintimsan pujuyajai.

Turamtai nintir najamnuyayi.

²³Turayatnak tuke amijai pujuyajai.

Tura asamtai tunaanum ayaaraim tusam,

untsur uwejrun achirkamiame.

²⁴Wina chichamur umirtukta tusam,

chichamem akupturkamiame.

Tura wi jakamtaikia,

wina pengker awajtusam juruktinuitme.

²⁵¿Warukanak nayaimpinam winitnasha wakeraja? Nayaimpinam wininka aminak wainkatasan wakerajme.

Amijai pujaknaka ju nungkanam ainia nunaka pengké wakerukchatnuitjai.

²⁶Wina pujutruka amukatnuitai.

Antsu tuke Yusnum pujustin asamtai,

Yus wina nintirun kakamtikrurtinuitai.

²⁷Aints Yusen nintimtsuk pujuinauka tuke mengkakartin ainawai.

Tura asaramtai niin umirtsuk pujuinaunka Yus amuktinuitai.

²⁸Antsu wikia tuke Yusen nintimsan pujusminuitjai.

Kame tu pujaknaka timiá pengker pujustinuitjai.

Apuru wina Yusur asam,

wina ejarkatnumka ametme.

Tura asakmin ame turamurmin wikia aints ainaun mash nekamtikiatnuitjai tajame.

Yus wina anturtukat tusan kakarman untsuajai

¹Yus wina anturtukat tusan kakarman untsuajai.

²Tsawai wake mesekan pujakun,

Apurun seajai.

Tura kashisha tuke inaitsuk uwejrun takuin,

Yusnasha seajai.

Turayatun tuke napchau nintimsan pujajai.

³Wikia Yusen nintimsan pujakun juutjai.

Turasha nukap nintimsan pujaknaka katsurman nekapeajai.

⁴Apuru ameka kanurta tusamka tsangkamrukchamame.

Timiá wake mesekan pujau asan chichakchamin nekapeajai.

⁵Turayatun yaanchuik pujuyaja nuna nintimsan pujajai.

⁶Turasha kashi kantamnuyaja nunasha aneakjai.

Tura nintirjai nintimsan ininmamkun:

⁷¿Apurka iinka tuke kajertamkatatjik?

¿Tura iinka ataksha pengkerka awajtamkashtatjik?

⁸¿Turasha ni anengkratairingkia amukamkia?

¿Turasha Yus yaanchuik wi turatatjai tímia nunaka tuke umitsuk pujustatuak?

⁹¿Turasha Yuska ni pengkerinka kajinmarmakia?

¿Turasha iincha timiá kajertamkau asa,

wait anentramtsuk pujustatuak? tu nintimsan pujajai.

¹⁰Yus nayaimpinam puja nuka yamaikia iijaingkia pujatsui,

tu nintimsan pujakun nintir najamrutawai.

¹¹Antsu ii Apuri yaanchuik pengké wainchatin turinuya nunaka aneartatjai.

¹²Turasha ni turinamurin mash nintimratatjai.

¹³Yusru ami turamuram nekasar pengker ainawai.

Amijai metek Yuska pengké atsawai.

¹⁴Amek Yus asam,

wainchati takat untsuri turinuyame.

Tura mash nungkanmaya ainau ami kakarmaram nekamtiknuyame.

¹⁵Tura ami kakarmarmijai ami aintsrum ainau angkanmamtiknuyame.

¹⁶Yusru ame nase akupkam,

juun entsaka akankamiame.

Tura asakmin entsa timiá kuna ayat kukar wajasmiayi.

¹⁷Tura mukuntiuka yumin jitumtikramiayi.

Turasha nayaimpinam ipiamat untsuri chichaarmiayi.

Turasha chaarim untsuri ayaararmiayi.

¹⁸Tura katurang winamtai,

ipiamtancha antukarmiayi.

Tura chaarim ayainamtai,

nungka jiitsumir wajakmiayi.

Tura uu uurmatai,

nungkaka muchikmiayi.

¹⁹Yusru juun entsanam ame kukarak katingtaj tusam,

entsaka akankamiame.

Antsu ami nawemjai najamamunka wainkacharmiayi.

²⁰Uwija wainin ni uwijarin ayas wekaamtikua nunismek ami aintsrum ainau wekaamtiksarti tusam,

Moisés tura Aarónsha inarmiame.

Jerusalénka yumpungkaramtai wake mesekmauri

¹Yusru amin umirtamchau ainau Jerusalén yaktanam kaunkarmiayi.

Tura ami jeemnasha pasemamtikrarmiayi.

Tura ami yaktarmin yumpungkarmiayi.

²Tura ami inatiram ainaun chiwiang ainau yuwaarat tusar,

tura pachim ainausha yuwaarat tusar, kajengkar iwiartsuk ukukiarmiayi.

³Tura aintsu numpe yumi ukaawa nunisarang Jerusalénnum ukararmiayi.

Tura ni iwiaratniurisha atsuarmiayi.

⁴Tura asaramtai chikich aints ainau iincha tentatmakar pujusar wishikraminaji.

⁵Apuru ¿warutik suwirumsha inaisatam? ¿Ami suwirumka ji kapaawa nunisang tuke atatuak?

^6-7Amin umirtamchau ainauka aminka nekarminatsui.

Tura amincha seatmichu ainawai.

Nu aints ainauka Jacobo weari ainaun amukarmiayi.

Tura ii yaktarin mesraru asaramtai,

nu aints ainamunam ami suwirum akupkata.

⁸Ii juuntri yaanchuik pasé pujusarmaunum iinka wait wajaktinka sukartusaip.

Antsu iikia timiá wake mesekar pujuinau asakrin,

ami wait anengkratairum akupkartukta.

⁹Yusru iin uwemtikratkatin asam yaimkartukta.

Turasha angkanmamtikiartukta.

Turasha ii tunaaringkia tsangkukratkata.

Ame pengker asakmin,

ami naarmin pachisan seajme.

¹⁰Amin umirtamchau ainau wishikrinak:

¿Atumi Yusri tuwaita? turutiarai tusam yaimkartukta.

Ami inatiram ainau jakarmaurin ame yapaijkumin,

iisha nu wainkatasar wakeraji.

Tura amin umirtamchau ainausha Yus aitkarmaji tusar niisha nekaawarti.

¹¹Tura achikmau ainau juutinamurisha amesha antukta.

Tura achikmau ainaun:

Atumsha jakatatrume tinau wainiatmek nu aints ainausha ami kakarmarmijai angkanmamtikiata.

¹²Apuru aints amin pasé awajtamkarmia nu nukap yapaijkiata.

¹³Ame turakminkia,

iikia ami aintsrum asar,

tuke inaitsuk ameka maaketai titatji.

Tura ame warartakur kanta kantamatatji.

Tura ii uchiri ainausha tura ii tirangki ainausha tura nuna uchiri ainausha nunisarang tuke turuwartin ainawai.

Yuska iin kakamtikramratnuitji tusaram warasrum kantamataram

¹Yuska iin kakamtikramratnuitji tusaram,

warasrum kantamataram.

Tura Jacobo Yusri warartakrum kakarum chichaktaram.

²Tura tampurjai tura kitarrjai tura arpajaisha tuntuikiamaikiakrum kanta kantamataram.

³Tura nantu takaamtai pupun pupuntruataram.

Nuniasha nantu pamau yuwamtaisha,

ii fiestari kinta asamtai,

pupun pupuntruataram.

⁴Ii Yusri ni aintsri ainautin nu chichamka umiktaram tusa akupturmakmiaji.

⁵Tura Yus Ejiptonmaya ainaun nepetkatas nu chichamnaka Josén akuptukmiayi.

Nunia wi antushtain chichaman antukmiaja nu nuwaitai:

⁶“Atum meram entsakua nunisrumek pujarmin,

takatrum uyumtin amia nunia angkan awajsamiajrume.

⁷Atumka wait wajakrum pujau asaram,

wina untsurkamiarme.

Nu turakrumin wikia uwemtikramiajrume.

Tura mukuntiunmaya ipiamat chichamia nunian wikia aikmiajrume.

Tura juun entsa kaanmatkarin Meriba tutainum atumnasha nekapsamiajrume.

⁸Wina aintsur ainautiram anturtuktaram.

Wikia atumin chicharkatatjarme.

Israel ainautiram,

wina anturtuktaram tusan wakerajrume.

⁹Chikich nungkanmaya aints ainau yusringkia seairap.

Turasha chikich nungkanmaya aints ainau yusrin seatasrum tsuntsumruwairap.

¹⁰Wiitjai atumi Apuri.

Wiitjai atumi Yusri.

Wiki atumniaka Ejipto nungkanmaya jiikmiajrume.

Tura asamtai yamaikia atumi jangke awaartaram.

Turakrumin wi atumin yuratatjarme.

¹¹Wi tamaitiat wina aintsur ainau wina chichamrun antutnasha tura umirtutnasha nakitrarmiayi.

¹²Tuminau asaramtai tuuksha pujusarti tusan inaisamiajai.

Wi turam ni wakeramurin pujusarmiayi.

^13-14Wina aintsur ainau wina anturtukaruitmatikia,

aints mitsum mitsum wajawa nutiksanak ni nemase ainaunka mengkatkartinuyajai.

Tura Israela weari ainau wina jintarun amakaruitmatikia,

ni nemase ainaunka wait wajaktintrin susartinuyajai”,

Yus timiayi.

¹⁵Ii Yus umirkawaitkurningkia,

ii Apurin nakitina nuka

shamraminak ayaararmin ainawai.

Turasha tuke mengkaakarmin ainawai.

¹⁶Ii Yusri anturkamuitkungka,

ni aintsri ainautinka yuta nekas pengker aa nuna yurtamamnauyaji.

Tura kitaknasha mikturmamnauyaji.

Yuse jeen pujustasan wakerajai

¹¡Apuru ameketme kakarmam! Ami pujutirmeka nekas shiirmaitai tajame.

²Wikia ami jeemin tenukap pujustasan wakerajai.

Ame pujut sukartame nuna pachisan tuke nintirjai warasan kantamjai.

³Apuru ameketme kakarmam.

Tura wina Apur asam,

tura wina Yusur asakmin tajame:

Suwich tura shuwirpip ainau ami jeemin engkemawar pengker nintimsar pasungminawai.

Tura ni uchichirin pengker nintimsar tsakatminawai.

⁴Ami jeemin pujuinauka tuke inaitamtsuk amincha:

Ameketme juuntam tusar nekasar warasartin ainawai.

⁵Turasha aints aminian ni kakarmarin juwina nuka nekasar warasartin ainawai.

Tura tuke nintijai:

Wisha Yuse jintin wekaasatasan wakerajai tinu asar,

nekasar warasartin ainawai.

⁶Aints ainau yumi jitachmatai,

ni arakri mash kaar mengkainamtai,

juutu pujuinawai.

Antsu yumi jitamtaikia,

nuniangka warainawai.

Amin umirtaminak pujuinausha juutu pujuinayat,

aminak nintimsar ataksha warasartin ainawai.

⁷Tura ami kakarmarmijai tuke kakartin ainawai.

Turasha mura Sión tutainum jear,

amincha waitmakartin ainawai.

⁸Apuru ameketme kakarmam.

Jacobo Yusriya,

wi seamur anturtukta.

⁹Yusru iin ejakratin asam,

ami aintsrumi apuri ati tusam,

aints inaikiamiame nu pengker nintimsam wainkata.

^10-11Kichik kintak ami jeemin wayaar nuni pujustinka timiá pengkeraitai.

Antsu warang kintasha ami jeemin waaitsuk pujustinka paseetai.

Yus ii Apuri asa,

iincha paan nintimtikramji,

turasha iincha ejarmaji.

Tura asamtai wikia aminu jeemin wainin atasan timiá wakerajai.

Antsu pasé aints ainaujai tsaniasan pujutnaka nakitajai.

Ii Apuri timiatrusrik umirmaka iincha anenmaji turasha warartamji.

Turasha pengker aa nunaka kichkisha suritramtsuji.

¹²Apuru ameketme kakarmam.

Tura asakmin aints ainau amin nintimturmasar pujuinauka nekasar warasartin ainawai.

Apuru ami aintsrum ainauka pengker awajnuyame

¹Apuru ami aintsrum ainauka pengker awajnuyame.

Tura Jacobo weauri ainausha ataksha waramtiksamame.

²Tura ami aintsrum ainau tunaari tura ni pasé turamu risha mash tsangkuramame.

³Tura kajekartukmaurumsha tuke mash inaisamame.

⁴Yusru iin tunaanumia uwemtikiartin asam,

yamaisha tuke uwemtikiartukta.

Tura yamaikia iinka kajerkartutsuk pengker awajkartusta.

^5-6¿Iinka tuke paseeka awajkartutsuk wina aintsur ainau wina warartursarti tusamka,

pujut yamarmaka ataksha sukartuschatmeash?

⁷Apuru ami anengkratairam iwianturkata.

Turam tunaanumia uwemtikiartukta tusan seajme.

⁸Ataksha nintinchau pujusarai tusa,

ii Apuri umirkatin ainautin pengker nintimsar angkan pujusartinniun pachis chichartamkatatji.

Tura asamtai ii Apuri titata nunasha wisha antuktatjai.

⁹Yus ni kakarmarijai ii nungkarin pujustas wakerawai.

Tura ni umirkur pujuinautinka nekas uwemtikramratas wakerawai.

¹⁰Yus iijai pujamtaikia,

ni wait anengkratairi tura ni chichame nekas aa nunaka iin suramsatnuitji.

Tura angkantin pengker nintimsar pujustinasha tura tunaarinchau pujustinasha iin suramsatnuitji.

¹¹Tura asamtai ju nungkanam pujuinautisha nekas chicham aa nuke chichastinuitji.

Nu turakrin Yus nayaimpinam puja nu iincha pengker awajtamsatnuitji.

¹²Turasha ningki yumin jitumtikratnuitai.

Tura ii nungkarinian arakan tsapamtikiatnuitai.

¹³Tura ni pengker awajsamurin iin iwianturmak:

Atumsha tu pujustaram tusa jintintramatnuitji.

David Yusen: Wait anentrurta tusa seamuri

¹Apuru wikia wait wajakun yuumakun pujau asamtai,

wait aneasam anturtukta.

²Tura amin nintimtakun pujau asamtai,

wina yainkata.

Ameka wina Yusruitme.

Wikia aminu inatiram asan,

amin nintimtajme.

Tura asamtai uwemtikrurta.

³Apuru kintajai metek seajme.

Tura asamtai wait anentrurta.

⁴Yusru aminu inatiram asan,

amin tuke seajme.

Tura asamtai nintir waramtikrusta.

⁵Apuru ame nekas pengker asam,

aintsu tunaari tsangkuratnuitme.

Tura amin seatmin ainauka pengker awajsatnuitme.

⁶Yusru wi seamur anturtukta,

tura anturtukam nekartuata.

⁷Wi napchau nintimsan amin untsuam anturtuktinuitme.

⁸Apuru amijai metekka Yuska atsawai.

Tura aminu turamurmijai metekka kichkisha atsawai.

⁹Apuru mash nungkanmaya ainau najanamiame nuka amin jear:

Ameketme juuntam turamiartinuitai.86.9 Ap 15.4

¹⁰Amek Yus asam,

nekas juuntaitme.

Tura asam wainchati takatcha mash najanawaitme.

¹¹Yusru jintim nekamtikruata.

Nu turakminka tuke nemarsatnuitjame.

Tura ami naarmin pachisan:

Ameketme juuntam titin nintimtikrurta.

¹²Apuru wina Yusur asakmin,

tuke wina nintirjai:

Ameketme pengkeram titatjame.

Tura ami naarmin pachisan:

Ameketme kakarmam tuke titatjame.

¹³Wina nukap anentruru asam,

mengkakatnunam we tusam uwemtikrurmiame.

¹⁴Yusru jampesarang pujuinauka aminka nintimtsuk pujuinau asar,

wina pasé awajtinak mantuwartas winitrinawai.

¹⁵Antsu ameka Apuru nekasam Yus asam,

jaimiasam wait anengkratnuitme.

Tura asamtai anengkratairumka nangkankashtinuitai.

Tura ami chichamim nekas aa nuka tuke nangkankashtinuitai.

¹⁶Wina jiirsam wait anentrurta.

Turam kakarmaram surusta.

Wikia ami inatiram asamtai uwemtikrurta.

¹⁷Ami pengkeerum inaktursata.

Tura wina pengker awajtakmin,

wina kajertin ainauka nuna wainkar natsaarartinuitai.

Apuru ameka wina yainkau asam,

wina pengker nintimtikrurmiame.

Apuru ¿waruka winasha nakitrame?

¹Apuru wina Yusur asam,

turasha wina uwemtikrurtin asakmin,

tsawaisha tura kashisha yainkata tusan seajme.

²Tura wi seajme nu anturtukam airkata.

³Wikia timiá pasé pujau asan,

jakamin nekapeajai.

⁴Wina kakarmar atsau asamtai,

wina pachitsar wári jakatatui tiarminuitai.

⁵Wikia aints jakau iwiarsamunam ukusmawa tumawaitjai.

Tura aints maaniamunam maamua tumawaitjai.

Turasha aints amin ejamunka waintsuk kajinminawa tumawaitjai.

⁶Tura wikia waa jiitamranam tee amaunum ajuarmawa tumawaitjai.

⁷Ame kajekmaurum akupturkau asakmin,

aints entsa tampaaramunam ujungmawa tumawaitjai.

⁸Turamtai wina amikur ainau ajapruwar ukukiarti tura tsuutrarti tusam aitkaramame.

Tura asan wikia aints kársernum engkeamua tumawaitjai.

⁹Tura timiá juutu asan,

wainmichua nunisketjai.

Apuru kintajai metek amincha uwejrun takuin seajme.

¹⁰¿Jakaru ainau wainchati takat wainmamtikiatmeash?

¿Tura jakaru ainau amin maaketai turaminawak?

¹¹¿Jakaru ainau iwiarsamunam ami nekas chichammin pachisar,

tura ami anengkratairumin pachisar chichainawak?

¹²¿Tura jakaru ainamunam aints kichkisha ami pengker turamurmin tura ami wainchati takatrumin nintiminawak?88.12 Sal 6.5; 115.17

¹³Antsu wikia Apuru amin seajme.

Kashik amincha wina seamurnaka antumtikiajme.

¹⁴Apuru ¿waruka winasha nakitrame?

¿Waruka winasha anumrutme?

¹⁵Wikia natsa akunka wait wajayajai,

tura jatancha wakerin ayajai.

Tura ame wina itiurkachmin akupturkumnisha atsannuyajai.

Turayatun yamaikia atsantrachmin nekapeajai.

¹⁶Ami suwirum winaka nepetuki.

¹⁷Tura asamtai aints nujang nujangkruamunam japen wajawa tumawaitjai.

¹⁸Wina amikur ainau tura wina irutkamur ainausha yajá akupkamu ainawai.

Tura asaramtai wikia teenam pujuinawa nunisketjai.88.18 Sal 31.11; 38.11

Moisés: Yuska tuke pujayayi, antsu aintska jumchik musach pujustinuitai timiauri

¹Apuru ameka tuke iin ejakratin ayame.

²Ameka mash najanchayatmek,

tura murasha mash najanchayatmek,

Yus asam tuke pujayame,

tura tuke pujustinuitme.

^3-4Ame aintsti pachisam chichaakum:

Ataksha nungka ati takumningkia,

ataksha nungka wajastinuitji.

Ameka mil (1,000) musach wainiatum,

kinta yaau nangkamarua tumau nintime.

Tura mil (1,000) musach wainiatum,

jumchik hora tumau wári nangkamartin ainawai,

tu nintime.90.3-4 2 Pe 3.8

⁵Nujang aintsun jakatniunam juwawa nunisrik aji.

Tura ii karanam nintimu weaji nunisrik mengkakatin ainiaji.

⁶Tura nupaaya nunisrik ainiaji.

Nupaa tsapai kashik yangkurui.

Turayat kiaraikia jajatar kakarmachu minayi.90.6 Stg 1.10-11

⁷Ami suwirumjai aints ainautinka amukratme.

Tura kajekakminkia,

napchau nintimsar pujaji.90.7 Ap 19.15

⁸Ii tunaaringkia tura ii pasé nintimtairisha ameka paan nekame.

⁹Ame kajekakminkia,

ii iwiaakmauringkia aints mayairawa nunisang wári nangkaankatnuitai.

¹⁰Iikia setenta (70) musach pujusminuitji.

Tura kakaram akurkia ochenta (80) musach pujusminuitji.

Ii musachri wári nangkamartin asaramtai,

wári jakatnuitji.

Antsu sungkurjai wait wajayatrik,

tura najaimiayatrik jampesrik:

Miajuitjai taji.90.10 Sal 39.5-6; 102.11

¹¹Yusru ¿ame suwirumnasha yáki neka?

¿Tura ame kajekmaurumnasha yáki neka?

¹²Apuru jumchik musach iwiaaku pujarme tusam nintimtikiartukta.

Nu turakmin nekasar paan nintimratnuitji.

¹³Apuru yaimkartukta,

tura suwirum inaisata.

Iikia aminu inatiram asakrin,

ame wait anengkratairum nekamtikiartukta.

¹⁴Ame anengkratairum kashik ii nintin piaku ati tusam wakeruku ata.

Turakmin iisha tuke warasar kantamatatji.

¹⁵Iikia untsuri musach wait wajayaji nuna nangkamasmek untsuri musach warastaram tusam sukartusta.

¹⁶Iikia ami inatiram asar,

ami kakarmaram wainkatasar wakeraji.

Tura ii wearisha ame pengkeerumin wainkarti tusam nintimtikrarta.

¹⁷Apuru ii Yusri asam,

ame pengkeerum sukartusta.

Tura ii takatrin takakmakur pujakrincha,

nekasam pengker awajkartusta tusan seajme.

Ii Apuri iin ejarmaktinuitji

^1-2Aints Yus wina ejarkati tusa,

Yusen nekas juuntan tura nekas kakarman seatas wakerakka tu seatnuitai:

“Ameketme wina ayamrutkatnumka,

tura wina ejarkatnumka.

Tura wina Yusur asakmin,

wikia amin nintimtusan pujajme”.

³Yusek ningki amin ayamrutmaktinuitai.

Tura sungkur ainamunmasha ningki amin tsuwarmartinuitai.

⁴Atash ni uchichirin nanapejai tektuk pujawa nunisang waitmaktinuitai.

Tura ni wait anengkratairi tantaara tumau asamtai,

nekasam wina ejarkatnuitme tusam, pengker nintimsam pujustinuitme.91.4 Sal 61.4

⁵Tura kashisha mantuwarai tusam,

tura tsawaisha tsentsak wina tukuri tusam,

shamtsuk pujustinuitme.

⁶Tura teetisha iwianch achirkai tusam,

tura tsawai sungkur achirkai tusam,

nuka nintimtsuk shamtsuk pujustinuitme.

⁷Ame menarminini untsuri aints sungkurjai jainau wainiatmek,

tura ami untsurminini untsuri aintsun maainau wainiatmek,

ameka jakashtinuitme.

⁸Yus pasé ainaun wait wajaktiniun susatnuitai,

antsu ameka waitka wajakchatnuitme.

^9-10Yus nayaimpinam puja nuka wina ejarkatnuitai tusam,

tura wina ayamrutkatnuitai tau asam,

pasé aa nuka wainkashtinuitme,

turasha sungkursha jeemningkia utuashtinuitai.

¹¹Ame tuni wekaame nunisha Yus ni awemamuri irunun amin waitmakarat tusa inatmartatui.

¹²Tura nawemin kayan tukumkai tusar,

ni uwejejai achirmakartatui.91.12 Mat 4.6; Luc 4.10-11

¹³Tura asamtai juun yawaa tura napisha tura titingsha tura pachim ainamunmasha wekaasatnuitme.91.13 Luc 10.19

¹⁴Yus chichaak:

“Aints wina anentinak:

Ameketme Apum turutinaunka wikia uwemtikratnuitjai,

turan ayamruktinuitjai.

¹⁵Tura wina yainkata turutinamtaikia,

wikia yaingtinuitjai,

tura nijai tsaniasan pujustinuitjai.

Tura napchau nintimsar pujuinamtaikia angkanmamtikiatnuitjai.

Tura nu aintsnaka pachisan:

Nekas pengkeraitai titinuitjai.

¹⁶Tura nukap musach pujusti tusan wainkatnuitjai,

tura pujut nangkankashtinun susatnuitjai”,

Yus tawai.

Ii Yusrin warartakur kantamau

¹Apuru nayaimpinam pujame nu,

amin maaketai titasan wakerajme.

Tura ameketme juuntam tusan,

amincha kantan kantamruatasan wakerajme.

^2-3Tura kashiksha tura angkuanmataisha arawirjai tura arpajaisha tura kitarrjaisha ami wait anengkratairmin pachisan,

tura ami pengkeerumin pachisan aints ainaun ujakartasan wakerajai.

⁴Apuru ami turamurmijai winaka pengker awajtusuitme.

Tura asakmin ami takatrumin nintimsan pujaknaka waraajai.

⁵Apuru ami takatrum timiá pengker ainawai,

tura ami nintimaurumka nekasar paan ainawai.

⁶Aya nintinchau ainauka nunaka nekaachmin ainawai.

⁷Pasé aints ainau tura mangkartin ainau nupaaya nunisarang yujartin ainawai.

Tura yujainayat tuke mengkaakartin ainawai.

⁸Antsu ameka Apuru tuke nayaimpinam yakí pujuwitme.

⁹Apuru ami nemasem ainauka nekasar mengkaakartin ainawai.

Tura tunau takau ainausha mash niish niish tupikiakiar mengkaakartin ainawai tusan nekajai.

¹⁰Ami kakarmaram waaka aishmangkria nunisang ati tusam kakamtikruruitme.

Tura kungkutijai muukrun ukatrurua nunisketme.

¹¹Wina nemasur ainau ayainaun wainkatnuitjai.

Turasha nu mangkartin ainau juutmaurincha antuktinuitjai.

¹²Antsu pengke aints ainauka kungkuk nereawa nunisarang artinuitai.

Turasha kanu muranam shaung tsakainawa nunisarang artinuitai.

¹³Pengke aints ainauka Yuse jeen tu pujuinau asar pengker nintiminawai.

Tura ii Yusri pujutirin tsakararua nunisarang ainawai.

¹⁴Weamraru ainayat tuke numi nerekua nunisarang ainawai.

Tura asar natsa nunisarang tuke kakaram ainawai.

¹⁵Tura aints ainaun ujainak:

Apurka wina ejarnuitai.

Turasha pengker aa nunak tuke turawai.

Antsu tunaunaka pengké takachuitai tinawai.

Ii Apuringkia mash nungkanmaya ainaun inawai

¹Ii Apuringkia mash nungkanmaya ainaun inawai.

Turasha tuke paaniunam pujuwitai.

Tura timiá kakaram asa,

nungka muchikchati tusa tuke wainui.

²Apuru ameka tuke pujuu asam,

ami keemtairmin keemsam nayaimpinam pujuuwitme.

³Entsa tampaaramuri wej wajau ainawai.

⁴Antsu ameka Apuru nayaimpinam pujame nu,

entsa wej wajau nangkamasmek kakarmaitme.

Tura juun entsa tampaaramurin nangkamasmek kakarmaitme.

⁵Apuru ame chicham akupamurmeka yapajiachmin ainawai.

Tura asaramtai aminu aintsrum ainauka ami jeemin wayaawar,

tuke tunaarinchau arti tusam wakerame.

Ii Apuri warartakur kantamruami

¹Ii Apuri warartakur kantamruami tusaram winitaram.

Iin ejarmak uwemtikramin asamtai kantamruami.

^2-3Ii Apuringkia Yusketai tura juuntaitai.

Tura mash aints ainau yusri nangkamasketai.

Tura asamtai maaketai tusar ni pujamurin wayaawarmi.

Turasha ameketme juuntam tusar kantamruami.

⁴Nungka nitkarin ainia nusha mash niinu ainawai.

Tura mura timiá juun ainausha niinu ainawai.

⁵Tura juun entsancha tura nungkancha ningki ni uwejejai najanau asa niinuitai.

⁶Yus iinka najatmau asamtai,

tikishmatrar ii Yusri warartusmi tusaram winitaram.

Tura ii Apuri maaketai takur tikishmatrarmi.

⁷Ningki ii Yusrintai.

Tura asamtai iisha ni aintsri ainiaji.

Tura asakrin uwija wainin ni uwijarin wainua nunisang iincha waitmaji.

Yus atumin turama nuka yamaikia antuktaram:

⁸“Yamaikia wina chichamur antukrumka,

nakitsuk pengker anturtuktaram.

Atumi juuntri ainau yaanchuik nungka Meriba tutainum tura chikich nungka Masa tutainum aints atsamunam wekainak wina chichamrun nakitrarmia nunisrumka nakitrairap.95.8 Heb 3.15; 4.7-8

⁹Nuningkia wi turamurun waininayat,

atumi juuntri ainau winaka nekaprinak umirtukcharmiayi.

¹⁰Turinau asaramtai wikia cuarenta (40) musach nu aints ainaun kajerkaran:

Nuka tuke nintinchawa nunisarang asar,

wina chichamrun umirtutan nakitinawai timiajai.

¹¹Tura kajerkaran chicham yapajiachminun chichaarinakun:

Wi Yus asan,

pengke nungkanam tuke pujustinnaka tsangkatkashtatjarme timiajai”.95.11 Heb 3.7-11; 4.3, 5

Ii Apuri yamaram kanta kantamruami

¹Ii Apuri yamaram kanta kantamruami.

Mash nungkanmaya ainautiram,

ii Apuri pachisrum kanta kantamataram.

²Ii Apuri kantamrakrum ni naari pachisrum pengkeraitai titaram.

Tura Yus aints ainautin uwemtikramratas wakerutmaji tusaram,

kintajai metek etserkataram.

^3-4Ii Apuringkia juuntaitai.

Tura asamtai tuke ni:

Ameketme juuntam titinuitji.

Ii Yusringkia chikich nungkanmaya ainau yusri nangkamasang timiá kakarmaitai.

Tura asamtai mash nungkanmaya ainamunam Yuse kakarmari tura ni pengkeeri pachisrum chichastaram.

⁵Chikich nungkanmaya ainau yusringkia Yuschau ainawai.

Antsu ii Yusringkia nayaimpin najanamiayi.

⁶Yuse paaniuringkia jiitsumraitai.

Tura ni pujamurinka ni kakarmari tura ni pengkerisha ainawai.

⁷Mash nungkanmaya ainautiram,

ii Yusri: Ameketme kakarmam tura ameketme pengkeram titaram.

⁸Ii Yusringkia tuke warartakrum:

Ameketme juuntam titaram.

Tura Yuse jeen wayaaram,

Yus warí susatasrum wakerarme nu itataram.96.8 Sal 29.1-2

⁹Nunia Yuse jee timiá pengkernum wayaaram:

Ameketme Yusem titaram.

Mash nungkanmaya ainau niin shaminak kurarartin ainawai.

¹⁰Atumka mash nungkanmaya aints ainau chicharkuram:

Ii Apuringkia mash nungkanmaya aints ainaun metek inawai.

Tura atumnasha mash inatmak puja nuka nungka muchikai tusa wainui titaram.

¹¹¡Nayaim tura nungka ainausha ii Yusrin mash wararsarti! ¡Turasha juun entsa tampaarisha tura juun entsa nitkarin irunusha ii Yusrin mash wararsarti!

^12-13¡Tura nungkanam wekain ainausha ii Yusrin mash wararsarti!

¡Tura ii Apuri tatin asamtai,

numi ainausha mash ii Yusrin wararsarti!

Ii Apuringkia nekas ii nungkarin tatinuitai.

Tura taa aints ainaun mash nekas pengker inartinuitai.

Ii Apuringkia mash nungkanmaya ainau Apurintai

¹Mash nungkanmaya ainautiram warastaram.

Chikich nungkanmaya ainautirmesha arák pujayatrum atumsha warastaram.

Ii Apuringkia mash nungkanmaya ainau Apurintai.

²Mukunit shuwin ii Apurinka tentenawai.

Nuni ni keemtairin keemas aints ainaunka mash metek inawai.

Pengke aints ainaun ni turamurijai metek pengker awajsatnuitai.

Tura pasé aints ainauncha ni pasé takasmaurijai metek wait wajaktiniun susatnuitai.

³Yus ni nemase ainaun niin tentakar wajainaun wainak jiin akuptuk aasatnuitai.

⁴Tura charpin akupak nungkan paan najanatnuitai.

Tura mash nungkanam pujuinau nuna jiisar kurarartinuitai.

⁵Ii Apuringkia mash nungka ainau nurinuri asa,

ni wakerakka mura ainau wapasa mikiaria nunisarang minararti tusa najanatnuitai.

⁶Nayaimpinmayang Yus aints ainaun iniartas mash metek jiiawai.

Tura asamtai mash nungkanam pujuinauka ni paaniurincha waininawai.

⁷Aints ainau ni yusrin Yuschau waininayat ningki najanawar jampesarang:

Juka ii yusrintai tinu ainaunka ii Yusringkia inatsaartinuitai.

Aints ainau ni yusrin najanamu asar,

ii nekas Yusrin tsuntsumruwartin ainawai.

^8-9Apuru nayaimpinam pujame nu,

mash nungkanmaya ainau inawaitme.

Tura mash nungkanmaya ainau yusri nangkawaitme.

Tura asakmin Jerusalén yaktanam pujuinauka tura Judá nungkanam pujuinausha ami chichammin nintimsar nukap warainawai.

¹⁰Ii Apuri aneetiri ainautiram,

pasé turutinkia nakitrataram.

Ningki ni umirin ainautinka waitmaktinuitji.

Tura pasé aints ainamunmaya angkanmamtikramatnuitji.

¹¹Pengke aints ainauka tura anangkartichu ainausha warasartin ainawai.

¹²¡Pengke aints ainautirmeka atumi Apuri warartustaram!

¡Tura ni naari pachisrum:

Ameketme Yusem titaram!

Ii Apuringkia ni nemase ainaun nepetkamiayi

¹¡Ii Apuringkia wainchati takatan untsuri takasu asamtai,

yamaram kanta kantamruami!

Ni nemase ainaun ni kakarmarijai nepetkamiayi.

²Ii Apuringkia ni aintsri ainautin ayamrutmakmaurin mash nungka ainamunam nekamtikiamiayi.

Pengke aints ainaun ayamruktinuitai,

tura pasé aints ainaunka nepetkatnuitai tusa nekamtikiamiayi.

³Tura Israela weari ainaun wait anentramia nunaka tura niin pengker awajsamia nunasha kajinmakchamiayi.

Tura asamtai mash nungka ainamunam ii Yusri ni aintsri ainautin uwemtikramramiaji nuna wainkarmiayi.

⁴Mash nungkanmaya ainautiram,

ii Yusrin wararsaram kantamruataram.

Tura ii Yusrin nukap wararsaram,

Yus kanta ainau kantamataram.98.4 Sal 100.1

⁵Tura ii Apurin kantamrakrum arpajaisha tura kitarrjaisha kantamataram.

⁶Turasha warasrum,

ii Apuri Yus kantamrakrum,

nangku umpungmaikiakrum kantamataram.

⁷Juun entsa tampaarisha,

tura juun entsanam nanaminausha tura mash nungkanam pujuinausha ii Yusrin mash wararsarti.

⁸Tura entsa wej wajainausha Yusnak mash wararsarti.

Tura mura ainausha mash iruntrar ii Apurin wararsarti.

⁹Ii Apuringkia mash nungkanmaya ainaun inartas winitnuitai.

Tura nekas pengker asa pengke aints ainaun ni turamurijai metek pengker awajas,

tura pasé aints ainauncha ni pasé takasmaurijai metek wait wajaktiniun susa inartinuitai.

Yuska pengké tunaarinchawaitai

¹Ii Apuringkia mash nungkanmaya ainau inawai.

Ni keemtairingkia Yuse awemamuri yakinini puusamuitai.

Tura asamtai mash nungkanmaya ainau shaminak kurarartinuitai.

Tura nungka ainausha muchitkartinuitai.

²Ii Apuri nekas juun aa nuka mura Sión tutainum pujuwitai.

Turasha mash nungkanmaya aints ainaun inawaitai.

³Tura asamtai mash nungkanmaya aints ainau:

Ameketme juuntam tura ameketme timiá kakarmam tiarti.

¡Yuska pengké tunaarinchawaitai!99.3 1 Pe 1.14-16

⁴Ame nekas kakaram inakratin asam,

aints ainausha mash metek iname.

Tura asam Jacobo weari ainau ni pengker turamurijai metek pengker awajnuyame.

Tura pasé aints ainausha ni pasé turamurijai metek wait wajaktin suyame.

⁵Ii Apuri ii Yusri asamtai,

warartustasrum tikishmatrataram.

¡Yuska pengké tunaarinchawaitai!

⁶Moisés tura Aarónsha Yuse chichame etserin armiayi.

Samuelsha chikich aints ainaujai Yuse naarin pachis:

Ameketme juuntam timiayi.

Tura Apuru yainkata tinamtai,

niisha anturak yainuyayi.

⁷Yus mukuntiunmaya niijai chichasmiayi.

Turamtai ni chicham akupkamuncha umirkarmiayi.

⁸Apuru ii Yusri asam,

ami chichammin etserin ainau amin seatminamtai anturnuyame.

Ame tsangkukratin asam,

ni tunaari ainausha tsangkurnuyame.

Antsu ami chichammin umirtan nakitin ainauka ni wait wajaktintrisha suyame.

⁹Ii Apuri ii Yusri asamtai,

warartusrum ni murarin nekas pengker aa nuni wakaram maaketai titasrum tikishmatrataram.

¡Ii Yusri, ii Apuri aa nuka pengké tunaarinchawaitai!

Yus iin najatmamiaji tura asamtai niinuitji

¹Mash nungkanmaya ainautiram,

warasrum Yus nintimsaram kanta kantamataram.100.1 Sal 98.4

²Ii Yusri nintimsaram warasrum ni umirkataram.

Tura warasrum ii Apuri:

Ameketme juuntam titaram.

³Yuska iinu Apurintai titaram.

Ni najatmamiaji.

Tura asamtai niinuitji.

Ni aintsri asakrin,

aints ni uwijarin wainua nunisang iincha waitmaji.

^4-5Ii Apuri pengkeraitai,

tura ni anengkratairi nangkankashtinuitai.

Tura ni timiaurinka tuke umiktinuitai.

Tura asamtai Yuse jeen wayaaram Yus maaketai takuram kanta kantamataram.

Tura ameketme juuntam tusaram wayaataram.

Tura ni naari pachisrum nekas pengkeraitai tusaram,

Yus maaketai titaram.

David Yusen: Wi tu pujustatjai tusa kantamamuri

¹Yusru wikia ami anengkratairmin tura ami pengkeerumnasha warartustasan wakerajai.

Tura asan amincha kantamruatasan wakerajme.

²Turasha tunaarinchau pujustasan wakerajai.

¿Amesha winisha warutik winitam?

Wina jearun pujaknasha pengké tunaarinchau pujustasan wakerajai.

³Tura pasé turutniunka wikia pengké nintimrashtatjai.

Yusen umirtan nakitinaunka wikia nakitajai.

Tura asan wini pengké winicharti tusan nakitratatjai.

⁴Tura pasé nintimtancha pengké nintimrashtatjai.

Tura pasé aa nunaka turutnasha nakitajai.

⁵Aints anumkar ni irutkamurin pachisar pasé chichari nauncha itatmamtikiatatjai.

Tura miajuitjai tumamin ainaunka jiitnasha nakitajai.

⁶Antsu aints anangmichu ainau wijai tsaniasar pujusarti titatjai.

Tura Yusen umirkaru ainau nuke wina inatir arti tusan tsangkatkatatjai.

⁷Anangkartin ainauka kichkisha wina jearningkia pujuschartin ainawai.

Tura wait chichamrintin ainausha kichkisha wijaingkia tsaningchartin ainawai.

⁸Kintajai metek wina nungkarun pasé aints ainaunka itatmamtikiatnuitjai.

Tura pasé takau ainaunka mash Yuse yaktarinian jiiktinuitjai.

Aints wait wajak Yusen seatin

¹Apuru wi seamur anturtukta.

Tura wi untsummataisha,

wait aneasam anturtukta.

²Wi shamakun pujamtaisha,

winaka anturtutskeka pujusaip.

Antsu wait aneasam anturtukta.

Tura wi seamsha wári airkata.

³Wina iwiaakmauruka mukuntinua nunisang mengkaawai.

Tura ukunchrusha kaii keenawa nunisarang kuntur awajtinawai.

⁴Tura wina nintirsha nupaa jaawa nunisang kakarchamin nekapeawai.

Tura asan yutancha nintimtsujai.

⁵Wi timiá juutuj pujau asamtai,

wina nuwaprusha ukunchrun nujatinawa nunisnak nekapmamjai.

⁶Tura asan ampush jea itarkanam pujawa nunisketjai.

Ampush jea yumpunkamunam pujus shinawa nunisnak nekapmamjai.

⁷Wikia kanutnasha kanatsjai.

Antsu suwich ningki jea tuntupen keemas pujawa nunisketjai.

⁸Wina nemasur ainauka tuke jiyatinawai.

Tura wina naarun pachisar pasé chichartinawai.

^9-10Ame wina kajertuku asam,

yakí wakata turutiatum,

nungka ajuarmawa nunisnak nekapmamjai.

Tura asan wikia pangkan yuwayatun,

yukuun yuwawa nunisnak nekapmamjai.

Tura umutirun umaknasha,

neaikirjai pachimran umajai.

¹¹Wina kintarka mukuntiua nunisang nangkaaminawai.

Tura asaramtai nupaa jajatua nunisnak nekapmamjai.102.11 Sal 39.5-6; 90.9-10

¹²Antsu Apuru ameka aints ainauka nekasam tuke inawaitme.

Tura asakmin amin naarminka tuke kajinmakchartin ainawai.

¹³Apuru ame tsangkukratkatin kintaka yanchuk jeau asamtai,

wári ami aintsrum ainau wait anentrarta.

¹⁴Ami inatiram ainauka ami jeem yumpunkaun nintimsar aneenawai.

Tura ami jeem yumpunkaun jiisar wake mesekar pujuinawai.

^15-17Ii Apuri ataksha mura Sión tutainum wina jear jeartuktaram tusa,

ni paaniurijai nuni wantintuk,

ayamrumichu ainau seamurin antuk pachistinuitai.

Turatin asamtai mash nungkanmaya aints ainau ii Apuri naari nekas pengker aa nuna pachisar:

Ameketme juuntam tiartinuitai.

Tura mash nungkanmaya apu ainausha ii Apuri pengkerin wainkar:

Ameketme pengkeram tiartinuitai.

¹⁸Ukunam akiinawartin ainausha ii Apurin warartusarti tusar ju chichamka aarmau atinuitai.

^19-20Ii Apuri kársernum achikmau pujuinau juutinamurin antuktas,

tura maawartin ainauncha angkanmamtikiatas,

nayaimpinmayang nungkan jiismayi.

^21-22Mash nungkanmaya aints ainau ii Apurin warartusartas iruntrarti,

tura Jerusalén yaktanam mura Sión tutainum ni naarin pachisar chichasarti tusa,

ii Apuri nayaimpinmayang nungkan jiismayi.

²³Wikia aints jinta wekaa wekaaka japening pimpirua nunisketjai.

Tura musaachrisha jumchik ati tusa Yus pujutrun jurutkinua nunisketjai.

²⁴Tura asan Yusrun chicharkun:

“Jumchik musaach pujusu asan,

wina pujutruka jurutkiip”, tajai.

¡Ameka tuke pujuwitme!

²⁵Apuru nu nangkamtaik nungkasha tura nayaimpisha najanamiame.

²⁶Nuka mai mengkaakartin ainawai.

Antsu ameka tuke pujustinuitme.

Nungkasha tura nayaimpisha tarach arut mamuawa nunisarang mengkaakartinuitai.

Aints wejmakan aik chikichan entsawa nunismek nayaimpisha tura nungkasha yapajiatnuitme.

²⁷Antsu ameka yapaijmiamashtinuitme.

Tura asam ami pujutrumka pengké nangkankashtinuitai.102.27 Heb 1.10-12

²⁸Ami inatirmi weari ainausha shamtsuk pujusarti tusam,

ameka pengker awaasatnuitme.

David: Wikia tuke nintirjai Apurun maaketai titatjai timiauri

¹Wikia tuke nintirjai Apurun maaketai titatjai.

Ni naarin pachisan tuke:

Yus pengkeraitai titatjai.

²Wikia tuke nintirjai Apurun maaketai titatjai.

Wina pengker awajtusmia nunaka pengké kajinmakchatnuitjai.

³Ningki wina tunaarunka mash tsangkutrurtinuitai.

Tura wina najaimiamurun mash tsuwaaratnuitai.

⁴Tura mengkakai tusa tuke uwemtikrurtinuitai.

Tura ni anengkratairijai tuke pengker awajtustinuitai.

⁵Tura pengker aa nuna mash surustinuitai.

Tura juunmaran pujayatnak,

kukui yakí nanamina nunisnak kakaram wajastinuitjai.

⁶Chikich aintsun pasé awajinamtaisha,

ii Yusri nekas tunaarinchau asa,

nu wait wajainaunka ayamruktinuitai.

⁷Moisésnasha tura Israel ainautincha ni wakeramurin tura ni turamurincha nekamtikramamiaji.

⁸Ii Yusri iin wait anentramji.

Tura asa wárikia kajechuitai.

Tura iincha nukap anenmaji.103.8 Stg 5.11

⁹Yuska iinka kintajai metekka paseetme turamtsuji,

tura asa tukeka kajertamkashtinuitji.

¹⁰Iikia tunau arining,

wait anentramu asa,

iinka amutmakchamiaji.

Tura ii pasé turamurincha yapaijtamtsuk tsangkutramramiaji.

¹¹Yus ni umirkautinka tuke anenmaji.

Nayaim nangkatkamurisha atsau asamtai,

Yuse anengkratairingkia pengké nangkankashtinuitai.

¹²Tura tsaa taakmau tsaa jeamujai pengké tsaningchamin aa nunisang Yuska atumi tunaaringkia pengké wainkashtinuitrume tusa yaja japrutmamiaji.

^13-14Yus iin itiur najanamiaja tusa paan nekawai.

Iinka nungka tsetseri najatmau asa,

aints ni uchirin wait anentawa nunisang Yus ni umirin ainautinka wait anentramaji.

¹⁵Aintsu pujutri nupaaya tumawaitai.

Nupaa tsapai yangkurui.

¹⁶Tura nase kakaram nasenmatai,

yangkurka mengkawai.

Tura tuning aya tusarsha aints kichkisha nekaacharminuitai.

^17-18Antsu ni chichamen kajinmatsuk umirinauka Yuse anengkratairi tuke nangkankashtinuitai tusar nekainawai.

Tura ni weari ainauncha Yus tuke wainkatnuitai.

¹⁹Ii Yusri keemtairi nayaimpinam pujawai.

Tura nuni keemas mash nungkanmaya ainauncha inawai.

²⁰Yuse awemamuri timiá kakaram ainautiram Yuse chichamen tuke antukrum umirkau asaram ii Apuri ameketme juuntam titaram.

²¹Yuse awemamuri ainautiram,

ni inatiri asaram,

tura ni wakeramuri umirkau asaram,

mash ii Apuri ameketme juuntam titaram.

²²Mash najanamu ainausha mash nungkanam pujuina nu ii Apurin ameketme pengkeram tiarti.

Wikia tuke nintirjai Apurun maaketai titatjai.

Nuke ati.

Yuse najanamuri pachisar maaketai titinuitji

¹Wina nintirjai tuke Yus pengkeraitai titatjai.

Yusru ameketme juuntam.

Ameketme kakarmam.

²Ameka paantin asam,

tarachia tumau nayaimpisha najanawaitme.104.2 1 Tim 6.16

^3-4Ameka entsa ainausha najanawaitme.

Tura mukuntiunam wekainuitme.

Tura nase najanau asam,

tuke nase akupnuitme.104.3-4 Heb 1.7

⁵Ameka nungka pengké muchikchati tusam metamiame.

⁶Tura juun entsa timiá kuna asa,

nungkan netkati tusam,

ame tsangkamkamiame.

Tura asakmin juun entsaka murancha netkamiayi.

⁷Tura wainiatum ameka juun entsa kuyuati tusam chicharkamiame.

Tura asakmin juun entsaka ami chichammin ipiamta tumaun antuk wári kuyuamiayi.

^8-9Juun entsa kuyuamtai,

mura ainau tsapuiniarmiayi.

Tura juun entsaka ataksha nungkanka mashkia netchau ati tusam surimkau asakmin,

ataksha ni nangkaankatniurin kuyuamiayi.

¹⁰Tura muranam pukuni ainia nu entsa arti tusam,

amek akupnuitme.

¹¹Tura pachim ainau yumin umurarat tusam,

entsa muranmasha tura paka nungkanmasha akupnuitme.

Pachim yupiram ainia nusha umurarmi tusam,

entsasha najanawaitme.

^12-13Nanamtin ainau entsa yantamen pujuinauka shiniinawai.

Yumi umurarat tusam mukuntiunmaya yumi akupnuitme.

Ameka mash najanau asam,

ni yutairisha suame.

^14-15Chirichri waaka ainau yuwaarat tusam najanawaitme.

Aints ainausha yutancha yuwaarti tusam,

ni yutairisha suame.

Tura yutai nereu ainau aints nungkanmaya uweniar yuwaarti tusam suame.

Nunia olivo macharijai ni namangken yakararti tusam suame.

Nunia ni yutairisha tuke suame.

Tura umutirincha umurarti tusam suame.104.14-15 Sal 65.9-13

¹⁶Numi ainau juun wajasarti tusam numpesha suame.

Kanu ainausha amek araawitme.

¹⁷Nanamtin ainauka numinam pasungminawai.

¹⁸Tura chipu yupiram ainau muranam yakí wekajinawai.

Chikich kuntin ainausha waanam matsatinawai.

¹⁹Aints ainau nantun nekaawarti tusam,

nantusha najanamiame.

Tura tsaasha ame najanamu asa,

kintajai metek jeawai.104.19 Gén 1.14-18

²⁰Ame tee ati tama tee wajawai.

Pachim ainau tura kuntin ainausha kashisha wekainawai.

²¹Juun yawaa ainau ni uchiri yutairincha eatinawai.

Turinamtai Yus ni yutairincha suawai.

²²Tura tsawaarmatai ataksha waanam wayaawar tepeenawai.

²³Aints ainau tsawaarar jeanmaya jiinkiar,

ni takatrin takakmasartas weenawai.

Nunia kiarai waketkiar,

ataksha ni jeen waketinawai.

²⁴Yusru ami takatrum timiá untsurintai.

Ame nekamtairumjai mash najanawaitme.

Ame najanamu asar mash nungkanam yujainawai.

²⁵Juun entsasha sarmaitai.

Nuni namak juuncha tura tuupchisha yujainawai.

²⁶Nuni kanu juunnum aints engkemawar wekainawai.

Apuupsha nuni wekainawai.

²⁷Ame mash yujaina nuna yutairisha suame.

²⁸Ame suam ni yutairincha juwinawai.

Ame uwejem yapaarakmin tutuarar pujuinawai.

²⁹Ame yuta suachmaka wake mesekar pujuinawai.

Ame mayatairisha juramka,

aints ainausha jakar ataksha nungka tsetseri najanartin ainawai.

³⁰Ame ni mayatairi suamu asar,

ataksha nungkanam yujarmi tusar pujuinawai.

³¹Yuse kakarmari tuke nangkankashtinuitai.

Ni takatri ainaujai Yuska waraawai.

³²Yus uurkat tama nungkaka muchiawai.

Tura muran takasamtai,

mukunit jiinui.

³³Tura asamtai Yusen tuke nintimsan kantamatajai.

Iwiaaku pujaknaka Yusrun Salmon kantamruatatjai.104.33 Sal 146.2

³⁴Wikia Yusrun tuke pengker nintimtusan pujajai.

Tura Yusnum tuke warastinuitjai.

³⁵Tunaarintin ju nungkanam matsatinau mengkakartin ainawai.

Tura Yusen umirtan nakitinausha mash mengkakartin ainawai.

Antsu wikia tuke nintirjai Yus pengkerapita tura Yus juuntapita titatjai.

Israel ainaun Yus pengker awajsamuri

¹Ii Apuri maaketai titaram.

Tura ni naari pachisrum aints ainau ujaktaram.

Turuaram ni turamurisha mash aints ainau nekamtikiataram.

²Ii Apuri pengker awajsatasrum kanta kantamataram.

Tura ni wainchati takatrin pachisrum chichastaram.

³Tura ni naari pachisrum:

Yus pengkeraitai titaram.

Tura ii Yusri seakrumka tuke nintimjai warartustaram.

⁴Tuke kintajai metek ii Apuri seataram.

Tura ni kakarmarisha wakerin ataram.

^5-6Atumka Yuse inatiri Abrahama weari ainiarme.

Tura Jacobo uchiri ainaun Yus wina umirtuktaram timiau asaram,

ni weari ainiarme.

Tura asaram Yus timiá kakaram asa,

wainchati takatan untsurin turamia nu nintimrau ataram.

⁷Ii Yusringkia iinu Apurintai.

Ningki mash nungkanmaya ainaunka inawaitai.

^8-9Warang musaach nangkamaru wainiat Yuska Abrahaman wi turatatjai tímia nunaka pengké kajinmakchatnuitai.

Nuniasha ni uchiri Isaacan:

“Wi Yus asan tajame” tímia nunasha pengké kajinmakchatnuitai.

^10-11Yus Jacobon chicharak:

“Wikia nungka Canaán tutai amincha tura ami wearmincha susartatjai”,

tímia nunaka tuke sakarchatin asamtai,

Israela weari ainauncha tuke atumnau ati tusa akatar akupkamiayi.105.10-11 Gén 28.13-15

¹²Israela weari jumchik armiayi.

Tura asar iraawa nunisarang Canaán nungkanam wekaasarmiayi.

¹³Tura chikich chikich nungkanam wekaa wekaakar,

nuni jear jumchik arusar ataksha chikich nungkanam jearmiayi.

¹⁴Tuminau wainiat Yus niin pasé awajsarai tusa surimkamiayi.

Tura apu ainauncha chicharak:

¹⁵“Wina umirtin ainauka paseeka awajkairap.

Tura wina chichamrun etserin ainauka wait wajaktinka susairap”, timiayi.

¹⁶Tura nu nungkanam tsuka ati tusa,

árak ainau mash nerekcharti tusa suritkamiayi.

¹⁷Turayat Josén chikich nungkanam surukarti tusa tsangkamkamiayi.

Tura asa Josén nuná eemak Ejiptonam akupkamiayi.

¹⁸Antsu Josénka kársernum engkeenak jirujai nawen chanuntawar kuntujen jirujai jingkiawarmiayi.

¹⁹Yus Josénka karanam tímia nuna umiatsaing,

¿wina chichamrun nekasash tiya? tusa nekapsatas nakasmiayi.

²⁰Nunia Ejipto apuri aintsun untsurin inarmia nu Joséncha angkanmamtikiamiayi.

²¹Tura José wina jear tura winar ainia nunaka mash wainkati tusa inaikiamiayi.

²²Tura ni nungkari apuri ainaun nuiniarti,

tura yakta juuntri ainauncha ni nekamtarin nekamtikiawarti tusa inaikiamiayi.

²³Nunia Jacob,

chikich naari Israel,

Ejipto nungkanam jeamiayi.

Tura chikich nungkanmaya ayat nuni pujumiayi.

²⁴Nuni pujamtai Yus niin nukap yujramiayi.

Tura Ejipto ainau nangkamasarang kakaram wajasarti tusa kakamtikrarmiayi.

²⁵Antsu Ejipto ainau Israel ainaun nakitrarti tusa,

Yus nintimtikramiayi.

Tura Yuse aintsri ainaun anangkawarti tusa tsangkamkamiayi.

²⁶Nunia Moisésan tura ni yachí Aarónnasha untsuk Ejiptonam akupkamiayi.

²⁷Tura Yus akupkamu asar,

Moisés Aarónjai numi atsamunam wainchati takatan untsuri turuwarmiayi.

²⁸Yus Ejiptonam tsawai wainiat teen akupkamiayi.

Tura waininayat Ejipto ainau Yuse chichamenka pachischarmiayi.

²⁹Tura ni entsarincha numpa najatamiayi.

Turamtai namaksha mash kajingkiarmiayi.

³⁰Turasha parungkach ainau ni nungkarin tinamturti tusa,

tura apu peakrincha tinamrarti tusa akupkamiayi.

³¹Tura Yus chichaamtai,

anchii tetejai pachinir mukuntiua nunisarang Ejipto nungkanam jearmiayi.

³²Nunia yumincha jitumtiktsuk micha kaya tumaun jijai pachimramun yakiiya kakeerarti tusa nungkanam akupkamiayi.

³³Yus turamtai Ejipto nungkanam uva naekri ainauncha mash tsurintrarmiayi.

Turamtai yurang higo tutaisha kakeekarmiayi.

Tura numi ainau kanawesha mash kupintrarmiayi.

³⁴Tura Yus ataksha chichaamtai,

manchi ainau kaunkarmiayi.

Timiá untsuri asaramtai nekapmartatkamawar tujinkarmiayi.

³⁵Tura asar ajanam arak arakmauncha mash amukarmiayi.

³⁶Nunia Yuse awemamuri kichik kichik jeanam waya Ejipto ainau uchiri eemkaurin maamiayi.

³⁷Nunia Yus ni aintsri ainaun Ejiptonmaya jiikmiayi.

Turamtai kurin takusar,

tura kuikiancha takusar,

timiá arák wekainayat juwicharmiayi.

³⁸Ni jiinkiaramtai Ejipto ainau sapijin wait wajainau asar warasarmiayi.

³⁹Nunia Yus mukuntiun ni aintsri ainaun uukat tusa akupkamiayi.

Tura kashi paan wekaasatniurinka ji kapaun akuptukmiayi.

⁴⁰Tura tsukaminak:

Iikia yuta yuumaji tinamtaisha,

nanamtin ainaun waachia tumaun akuptukmiayi.

Tura nayaimpinmaya maná pangka tumaun akuptukam yuwaar tutuararmiayi.

^41-42Nunia Moisés pampan awatiamtai,

pampanmaya yumi tsapuimiayi.

Tura entsa nunisang wej wajamiayi.

Yus yaanchuik ni inatiri Abrahaman chicharak:

“Ami wearam ainaun angkanmamtikiatnuitjai”,

tímia nunisang

⁴³ni aintsri ainaun Ejipto nungkanmaya jiikmiayi.

Yus turamtai mash warainak untsumkarmiayi.

^44-45Nunia Yus wina nuikiarturmaurun umirkarti tusa, ni aintsri ainaun chikich aints pujuarmia nuna nungkarin susarmiayi.

Tura ninu yaktari ainia nunasha mash susarmiayi.

¡Ii Apuri warartusmi!

Yus ni aintsri ainaunka wainui

¹¡Ii Apuri warartusmi!

Anangkartichu ainau iruntramunam tura mash aints ainau kawengmaunum Apurun tuke nintirjai maaketai titatjai.

²Ii Apuringkia timiá juun aa nuna takatringkia untsurintai.

Tura asamtai nuna nekaawartas wakerinauka nuna pachisar nuiminawai.

³Yuse turamuringkia ni kakarmarijai turamia nuka nekas shiiram ainawai.

Tura asaramtai Yus aints ainaun ni pengker turamurijai metek pengker awajsatnuitai.

Tura pasé aints ainauncha ni pasé turamurijai metek wait wajaktiniun susatnuitai.

⁴Yus wainchati takatrinka pengké kajinmakchatniun najanamiayi.

Ii Apuringkia aints ainautinka jaimias wait anentramji.

⁵Tura niin ameketme juuntam tinu ainaunka yutancha susatnuitai.

Tura Yus wi turatatjai tímia nunaka pengké kajinmakchatnuitai.

⁶Tura ni aintsri ainautinka ni kakarmarin inakturmasmiaji.

Tura asa niin umirkacharu ainau nungkarin ni aintsri ainautin suramsamiaji.

^7-8Ni tura nuka nekas pengkeraitai.

Ni chicham akupkamuringkia pengké yapajiachmin ainawai.

Tura nekasar pengker ainawai.

Tura asamtai ni chicham akupamuringkia tuke nintimrarminuitji.

⁹Ii Yusri ni aintsri ainautinka angkan awajtamsamiaji.

Tura Yus wi turatatjai tímia nunaka tuke umiktinuitai.

Ii Yusringkia pengké tunaarinchawaitai.

Tura timiá kakarmaitai.

¹⁰Tura asamtai nekasar nintip ainauka iinu Apurinka:

Ameketme juuntam tinu ainawai.

Aints tu nintimsar pujuinauka pengker nintimsar pujuinawai.

¡Ii Yusringkia tuke warartusmi!

Anangmichu ainaun pachisar etserkamu

¹¡Ii Apuri warartusmi!

Yusen pengkeraitme tinauka tura ni chicham akupamuri umirinak pujuinauka warasartin ainawai.

²Anangmichu ainau uchirinka chikich aints ainausha pengker awajsartin ainawai.

Tura anangmichu ainau chichamenka pengker anturkartin ainawai.

³Ni jeen warinchu untsuri iruninawai.

Tura tuke wait anengkratin ainawai.

⁴Tura nu aints ainau anangmichu asar,

chikich anangmichu ainaun pengker awajinamuri ji teeti tsantua nunisketai.

Nu aints ainau wait anengkratin tura jaimiasar nintimin tura anangmichu ainawai.

⁵Pengke aints ainauka ikiatsata tinamsha suriminatsui.

Tura chikich aints ainauncha anangtan nakitinawai.

⁶Tura asar mengkaakachartin ainawai.

Tura asamtai chikich ainausha anangmichu ainaunka tuke pachiu ainawai.

⁷Anangmichu ainauka shamarumtinun antukarsha shamchau ainawai.

Tura ni Apurin nintiminau asar,

ni nintisha kurarchartin ainawai.

⁸Ni nintisha kurarchartin asaramtai shaminatsui.

Tura asar ni nemase ainauncha pachinatsui.

⁹Tura aints yuuminak pujuinaun su asar,

tuke wait anengkratin ainawai.

Turin asar chikich aintsjai ingkiunikiar natsaamtsuk pangkainiar jiininawai.112.9 2 Cor 9.9

¹⁰Antsu pasé aints ainauka nuna suwirpiaku jiinak kajerinawai.

Turayat nu anangmichu ainaun pasé awajsatatkamawar tujinkartin ainawai.

Antsu ni pasé turamuringkia mengkaakatnuitai.

Yuuminak pujuinaunka Yus wait anentawai

¹¡Ii Apuri warartusmi!

Ii Apuri inatiri ainautiram,

ni naari pachisrum:

Yus juuntaitai titaram.

²Yamai nangkamsaram tuke ii Apuri naari pachisrum:

Yus pengkeraitai titaram.

³Tsaa taakmanumaninisha tura tsaa jeamunmaninisha ii Apuri naari pachisrum:

Yus kakarmaitai titaram.

⁴Ii Apuringkia mash nungkanmaya ainaun inawaitai.

Tura asa ni kakarmaringkia nayaimpincha nangkawai.

⁵Ii Yusringkia yakiiyang mash aints ainaun inawai.

Tura asamtai ii Apurijai metek kichkisha atsawai.

⁶Turayat tsuntsuma nayaimpincha tura nungkancha mash wainui.

^7-8Ii Apuringkia yuuminak pujuinaunka wait anentawai.

Turasha ni yakta apuri ainaujai turasha kuikiartin ainaujai iruntrar pujusarti tusa,

Yus niin pengker awajsartinuitai.113.7-8 Luc 1.48-53

⁹Nuwa kaa ainausha uchin jurerarti tusa,

tura ni uchiri ainaujai pujusarti tusa Yus waramtiksartinuitai.113.9 Gál 4.27

¡Ii Apuri warartusmi!

Ii Yusringkia nayaimpinam pujawai

¹Apuru timiá wait anengkratin asam,

tura nekas chicham nekamtikin asam,

aints ainauka iinka:

Pengkeraitme turamtsuk antsu aminak:

Pengkeraitme turamiarti.

²¿Warukaya aints ainau amin umirtamtsuk pujusarsha iincha:

Atumi Yusri tuwaita turaminaji? ³Ii Yusringkia nayaimpinam pujawai.

Tura ni wakera nunaka mash umiawai.

⁴Antsu Yusen umirkacharu ainau yusringkia kuritai nuniasha kuikaitai.

Ni yusri ainauka aints najanamu ainawai.

⁵Ni yusri nakumkamuri jangkentin ainayat chichachu ainawai.

Tura jiintin ainayat wainmichu ainawai.

⁶Tura kuwishtin ainayat antutnasha antichu ainawai.

Tura nujintin ainayat mayatchau ainawai.

⁷Tura uwejentin ainayat achimchau ainawai.

Tura nawentin ainayat wekaichau ainawai.

Tura chichatsuk aya takamtaik puju ainawai.

⁸Tura asaramtai aints ni yusrin najaninauka tura:

Ameka wina yusruitme tinu ainauka ni yusrijai metek ainawai.115.8 Ap 9.20

⁹Israel ainautiram,

Yusek nekasampita titaram.

Ningki iin yainmaktinuitji,

tura ejarmaktinuitji.

¹⁰Sacerdote ainautiram,

Yusek nekasampita titaram.

Ningki atumin yainmaktinuitai,

tura ejarmaktinuitai.

¹¹Mash aints ainautiram,

ii Apuri:

Ameketme Yusem tinu asaram,

nekasampita titaram.

Ningki iin yainmaktinuitji,

tura ejarmaktinuitji.

¹²Ii Apuri ni aintsri ainautin kajinmatramtsuk nekas pengker awajtamsatnuitji.

¹³Tura juun ainau tura uchi ainausha niin:

Ameketme Yusem tinaunka nekas pengker awajsatnuitai.

¹⁴Ii Apuringkia atumin nukap yujtamratnuitai,

tura atumi uchirincha nunisang nukap yujratnuitai.

¹⁵Ii Apuri nayaimpin tura nungkancha najanamia nuka atumin pengker awajtamsati.

¹⁶Nayaimpikia iinu Apurinuitai.

Antsu nungkanka aints ainautin suramsamiaji.

¹⁷Yaanchuik jakaru ainauka chichakchamin asar,

iinu Apurinka maaketai tichartinuitai.115.17 Sal 6.5; 88.10-12

¹⁸Antsu iikia iinu Apuringka yamaikia tuke maaketai titatji.

¡Ii Apuri warartusmi!

Maaketai tiartas Yusen seamu

¹Wina Apurka wi seamurun anturtuku asamtai,

wikia Apurun aneajai.

²Wi seamurun anturtuku asamtai,

iwiaaku pujaknaka tuke niin seatnuitjai.

³Jata wina achirkamtai,

jakatatjapi tusan shamkamjai.

Tura timiá shamakun tura timiá najaimiakun achikmawa nunisnak nekapmamramjai.

⁴Tu nintimsan pujakun Apuru naarin pachisan uwemtikrurti tusan seamjai.116.4 Sal 18.5-6

⁵Ii Apuringkia mash aints ainaun:

Metek ainawai tu nintimui.

Tura asa ii Yusringkia iincha tuke wait anentramak pengker awajtamji.

⁶Ii Apuringkia mianchau ainauncha wainui.

Tura asa wikia pengké kakarchamin nekapeai wainiat winaka uwemtikrurmayi.

⁷Apurka wina pengker awajtusu asamtai,

yamaikia pengker nintimtusan pujusminuitjai.

⁸Yus jakatniunmaya wina uwemtikruru asamtai,

tura juutmauruncha jurutrukin asamtai,

yamaikia jakashtatjapi tusan,

pengker nintimsan pujustinuitjai.

⁹Yamaikia iwiaaku pujaknaka:

Apurun umirkatatjapi titatjai.

¹⁰Wikia timiá wait wajayatnak Apurun nekasampita timiajai.116.10 2 Cor 4.13

¹¹Waurkamin nekapeakun:

Mash aints ainau wait chichamrintin ainawai tu nintimmiajai.

¹²¿Apur wina timiá pengker awajtusuncha warinak susaintaj?

¹³Mash aints antinamunam:

Apurka uwemtikrurmayi titatjai.

Tura ni naarin pachisan:

Ameketme Yusem titatjai.

¹⁴Wina Apurun:

Nuna turatatjai timiaja nunaka mash aints antinamunam umiktatjai.

¹⁵Ni aneetiri ainau jakatniurinka ii Apuri nukap nintimtawai.

¹⁶Apuru wikia aminu inatirmetjai.

Wikia aminu nawantrumi uchirinjai.

Wikia jingkiamua nunisnak pujaing winaka atitamiame.

¹⁷Apuru amin maaketai titasan tangkurun maan epeatatjai.

Tura ami naarmin pachisan seatatjame.

^18-19Apuru Jerusalén yakta japen ami jeemin wayaan,

wi amincha nunaka turatatjai timiaja nunaka mash aints antinamunam umiktatjai.

¡Ii Apuri warartusmi!

Ii Apuri warartusmi

^1-2Ii Apuringkia iincha timiá anenmau asamtai,

mash nungkanmaya aints ainautiram,

ii Apuringkia:

Ameketme juuntam titaram.

Ningkia pengké yapaijmiamachminuitai.117.1-2 Rom 15.11

¡Ii Apuri warartusmi!

Yuse chichame pachisar warartustin

- 1 -

¹Aints tunaarinchau ainauka ii Apuri nuikiartamurin nintimtinau asar,

nekasar warasartin ainawai.

²Tura Yus chichaman akupamun páchina nuka tura tuke nintijai niin nintimtina nuka nekasar warasartin ainawai.

³Tura pasé aa nuna takatsuk pujusar,

ii Apuri jintin amainauka nekasar warasartin ainawai.119.3 Sal 1.1-2

⁴Apuru ame chichaakum:

Wina chichamur tuke umirtuktaram timiame.

⁵Tura asakmin wiki nintimsanka:

Tuke inaitsuk ame chicham akupamurmin umirkatasan wakerajai tajai.

⁶Wikia ami chichammin mash umirkanka pengké natsaarchatnuitjai.

⁷Tura ame chicham akupkamiame nuka timiá pengker ainia nuna nuimiarnaka,

amincha tuke nintirjai maaketai titatjame.

⁸Ame chicham akupkamiame nuna umiktasan wakerajai.

Tura asamtai ajapruamka pengké ukurkiip.

- 2 -

⁹¿Natsa ainausha itiur tunaarinchausha pujusarminuita?

Ami chichammin umirinak nekasar tunaarinchau pujusarminuitai.

¹⁰Wikia aminka tuke nintirjai nintimtajme.

Ameka wi chicham akupamurun

umitsuk pujusti tusamka tsangkamrukaip.

¹¹Wikia amin umirtsuk pujusai tusan,

ami chichammin nintirun tuke ukuyajai.

¹²¡Apuru aminka pengkeraitme tajame.

Tura asamtai ame chicham akupamuram nuiturta!

¹³Ame chicham akupame nunaka aints ainaun mash ujakartatjai.

¹⁴Ame chicham akupamurmin umirkunka,

chikich aints ainau ni kuikiarin nintimsar waraina nuna nangkamasnak wikia warastinuitjai.

¹⁵Ame chicham akupamurmin nintimsan pujakun,

ami wakeramurmin nintimsan pujustinuitjai.

¹⁶Tura ame umirkatin chichamnasha nintimsan warastinuitjai.

Tura ami chichamminka kajinmarchatnuitjai.

- 3 -

¹⁷Apuru wikia aminu inatiram asamtai ¡tuke pujut surusta! Turakminka ami chichammin umiktatjai.

¹⁸Ami unuikiartutiram timiá pengker aa nuna nintimratasan wakerau asamtai,

ame jiiru uratrita.

¹⁹Wikia ju nungkanmaka irawa nunisnak pujau asamtai,

amin umirkatin chichamka uutrukaip.

²⁰Wikia ame chicham akupamurmin nekaatasan timiá wakerau asan,

nekachkun kintajai metek napchau nintimsan pujajai.

²¹Aints miajuitjai tumamin ainauka ami chichammin umirtan nakitinau asar yumingkramu ainawai.

Tura asaramtai nu aints ainauka ni tunaari inaisarti tusam chicharkatnuitme.

²²Wikia ami chichammin umirkau asamtai,

wina jiyatkar pasé awajtusartin ainauka winiangka kiishmakta.

²³Aints timiá kakaram ainauka wina pasé awajtusartas wakerutinau wainiatun,

wikia aminu inatiram asan,

ami chichammin nintimratatjai.

²⁴Tura ame chicham akupkamu ainaun nintimran wikia waraajai.

Ame chicham akupamuram wina chichartuktin ainawai.

- 4 -

²⁵Yusru wikia jakamin nekapeajai.

Tura asamtai ame timiame nunismek yamaram pujut surusta.

²⁶Wikia itiur pujaja tusan amin ujakmajme.

Wi turamtai ameka airkamame.

¡Wait aneasam ami wakeramuram nuiturta!

²⁷Ami wainchati takatirmin nintimratasan wakerajai.

Tura asamtai wina umirtuktin chichaman umirtukat tusam nekamtairam surusta.

²⁸Wikia timiá wake mesekan pujau asan juutkamaikiakun pujajai.

Tura asamtai ame turutmiame nutiksamek kakamtikrurta.

²⁹Tura wait chichamtinu jintin amakai tusam surimrukta.

Antsu wait aneasam nuiturta.

³⁰Nekas chichamtinu jintin wekaasatasan wakerajai.

Turasha ami umirkatin chichammin umiktasan wakerajai.

³¹Apuru wikia ame chicham akupamurminka inaiyatsjai.

Tura asamtai winaka inatsatraip.

³²Wina nintir waramtikrusu asakmin,

ami umirkatin chichammin miatrusnak umiktasan wakerajai.

- 5 -

³³Apuru ami chichamem nuiturta.

Ame turakminkia iwiaaku pujaknaka tuke umiktasan wakerajai.

³⁴Ami nuikiartutirmin umiktasan wakerau asamtai,

nekamtairam surusta.

Tura asakmin tuke mash wina nintirjai umiktasan wakerajai.

³⁵Ame chicham akupamur umikiam,

wina jintiar amakta tusam nintimtikrurta.

Ame turakminkia,

wikia pengker nintimsan pujustatjai.

³⁶Apuru ame wina chichamrun wakerukat tusam nintimtikrurta.

Antsu kuikianka wakerutsuk asati tusam nusha nintimtikrurta.

³⁷Tura chikich aints ainau wakerina nuna nintimrai tusam surimrukta.

Antsu wina jintiar amakta tusam pujut surusta.

³⁸Wikia ami inatirmetjai.

Tura asamtai amin umirtaminak pujuinaun:

Wi turatnuitjai timiame nuka winasha turuttia.

³⁹Wikia ami chichammin umiktasan timiá wakerau asamtai,

inatsararai tusam ame pasé aa nuka kiishmakta.

⁴⁰Wikia ami chichammin wakerau asamtai,

ame pengker asam yamaram pujut surusta.

- 6 -

⁴¹Apuru ame timiame nunismek ami anengkratairam inaktursata,

turam uwemtikrurta.

⁴²Aints wina inatsatratas wishikrinamtaisha,

wikia ami chichammin nekasampita tau asan kajertsuk aiktinuitjai.

⁴³Wina chichamur umirtukta tame nuna nintimsan pujau asamtai,

nekas chicham aa nuka jurutrukiip.

⁴⁴Wikia ami chichammin tuke inaitsuk umiktasan wakerajai.

⁴⁵Tura ami chichammin umirkau asan,

angkan pujustinuitjai.

^46-47Wikia ame chicham akupamurmin aneau asan,

nuna nintimsan waraajai.

Tura asan ami chichammin apu ainauncha ujaaknasha natsaarchatatjai.

⁴⁸Wikia amin umirkatin chichaman timiá wakerau asan,

pengker nintimsan umiajai.

Tura ami chichammin nukap nintimsan pujajai.

- 7 -

⁴⁹Apuru wikia ami inatirmetjai.

Yaanchuik turutmiame nuka ame nintimrata.

Nu chichamka winaka nintimtikrurmiame.

⁵⁰Wi wake mesekan pujamtai:

Amin tuke pujutan susatnuitjame tusam turutmiame nu chichamjai kakamtikrurmiame.

⁵¹Aints miajuitjai tumamin ainauka winaka tuke inangnatsuk wishikrinawai.

Tura wainiatun ame nuiturmiame nunaka wikia tuke kajinmatsjai.

⁵²Apuru ame yaanchuik chicham akupkamiame nunaka kajinmatsjai.

Tura nuna nintimran pengker nintimsan pujajai.

Wina ejarkatnuka Yusketai

¹Wiki nintimsanak muran jiisan:

¿Tuniang wina yainkatnusha winitnuinta? tu nintimsan pujajai.

²Turayatun wina yainkatnuka muranmakeka pujatsui.

Antsu wina yainkatnuka nayaimpin tura nungkancha najanamia nuwaitai.

³Nuka tunaanum pujusta,

tusangka tsangkamramkashtinuitai.

Amin waitma nuka pengké kanurchatnuitai.

⁴Nekas amin waitma nuka Israel ainaun wainin asa,

pengké kanichuitai.

⁵Yusketai amin waitminka.

Tura amin ejarmaktincha nuketai.

Tura amin yainmaktincha amijai tsanias puja nuketai.

⁶Tsaangka tsawaingkia aminka ititka awajtamsashtinuitai.

Tura nantusha nunisang kashisha turutmashtinuitai.

⁷Shamrumtin amaunumiasha Apuram ejarmaktinuitai.

Tura ami pujutrumnasha pasemarai tusa waitramkatnuitai.

⁸Ame tuni wekaame nunisha ami Apuram yamaisha ejarma nu tuke ejarmaktinuitai.

Achikmau ainau waketkiarmauri

¹Achikmau ainautin Yus:

Ataksha Jerusalénnum

waketkitaram tusa,

angkanmamtikiamu asar iisha karanma nunisrik pujusmiaji.

²Tura asar wararkur wishirmiaji.

Tura wararkur kantamamiaji.

Turakrin Yusen umirchau ainau nuna wainkar chichainak:

“Ni Yusri niin nekas pengker awajsayi”, tiarmiayi.

³Nu tina nunaka nekasar tiarmiayi.

Ii Apuringkia nekas iin pengker awajtamsamiaji.

Tura asamtai iisha warasmiaji.

⁴Apuru yumi atsamunam ataksha yumi jitamtai,

entsa wej wajainawa nunismek iincha ataksha pengker awajkartusta.

⁵Aints ni arakri jumchik asamtai,

juutkamaikiak araamramia nunaka ukunam nerekamtai waras juuktinuitai.

⁶Ni arakrin araamratas jumchik asamtai juutkamaikiak ni jeenian jiinkiat,

nuniangka nukap juuku asa,

waras kantan kantamki ni jeen waketkitnuitai.

Iinu aa nunaka Yus mash suramji

¹Ii Apuri yaimkechujai ii jee jeamkurkia,

jea jeamin ainautisha nangkamir takakmastinuitji.

Tura ii Yusri ii yaktarin waintsuk pujamtaikia,

yakta wainin ainausha nangkamiar ii yaktarincha wainkartinuitai.

²Atumsha atumi yutairi wainkatasrum kashik nantakrum,

waitnasrum takaa takakmakrum tsaa jeamtai inangnakrumsha nangkamrum takakmastinuitrume.

Antsu Yus ni aneetiri ainautinka kanurarti tusa karan suramji.

^3-5Aints uchin untsuri yajutmaruka aints kuntinun tukutas tsentsakan untsuri takus wekaawa nunisketai.

Tura asamtai aints uchin untsuri yajutmarunka Yuska nekas pengker awajui.

Tura asamtai nu aintska pengker nintimias warastinuitai.

Tura ni uchiri ayamrukartinka untsuri asaramtai,

ni nemase ainau nu aintsun pachisar pasé chichainayat inatsarchartin ainawai.

Apuru ¿tunau tsangkutrachkumnisha yáki uwemtikrurat?

¹Apuru timiá napchau nintimsan pujau asan amin seajme.

²Apuru wina chichamur anturtukta.

Tura wait anentrurta tusan seamka tenap anturtukam airkata.

³Apuru ¿tunaur tsangkutrachkumnisha yáki uwemtikrurat?

⁴Antsu wina ameketme Yusem turutiarti tusam,

ii tunaaringkia tsangkukratnuitme.

⁵Wikia tuke wina nintirjai Apurun nintimtajai.

Tura ni chichamencha tuke nintimsan pujajai.

⁶Yakta wainin kashi iwiainak:

¿Warutik tsawaarat? tusar nakainawa nunisnak wikia Apurun:

¿Warutik tat? tusan nakajai.

⁷Ii Apuri timiá wait anengkratin asa, iinka tuke angkanmamtikramatnuitji.

Tura asamtai Israela weari ainautiram,

atumi Apuri nintimrataram.

⁸Ningki atumi tunaarinka mash tsangkutramratnuitai.

David: Apuru wikia miajuitjai tumamtanka nakitajai timiauri

¹Apuru wikia miajuitjai tumamtanka nakitajai.

Tura nuwancha jiijamniauka jiiatsjai.

Turasha wikia mash nekawitjai tatsujai.

²Antsu uchi muntsun tsurak muntsunka nintimtsuk pujawa nunisnak wikia tunaunaka nintimtsuk antsu aminak nintimsan pujajai.

³Israela weari ainautiram,

atumi Apuri yamaisha tuke nintimrataram.

Ii Apuri inatiri ainautiram ii Apuri: Ameketme pengkeram titaram

¹Ii Apuri inatiri ainautiram,

kashi kanutsuk iruntai jeanam Yus seatasrum kaunkau asaram,

ii Apuri ameketme pengkeram titaram.

²Tura atumi uweje takuiram ii Apuri ameketme pengkeram titaram.

³Turakrumningkia ii Apuri nayaimpin tura nungkancha najanamia nuka ni pujamuriniang atumin pengker awajtamsarti.

David: Yus mash nekawai timiauri

¹Yusru wina nintirka nekame.

²Wi itiur pujaja nusha waitme.

Ame arák pujayatum,

wi nintimaursha mash nekawitme.

³Wi wekaamtaisha tura ayamkun pujamtaisha,

nunismek waitme.

Wina jintarun wi wekaaja nusha mash waitme.

⁴Wina chichamrun tuke chichaaja nuka ameka mash anturtukuitme.

⁵Ame wina eemkim tura ukurninisha pujurtame.

Uwejmijaisha wina takarme.

⁶Nunaka mash nekayatun nintimratatkaman yuumatajai.

⁷Aminu Wakanim tuke pujurtau asamtai,

¿wisha tuki wetaj? Ame mash nungkanmaya ainau nekau asakmin ¿wisha itiur tupikiakminuitja?

⁸Wikia nayaimpinam waakmatisha,

ameka tuke nuni pujurtame.

Tura nungka taimunam nitak pujamtaisha winaka tuke waitme.

^9-10Wikia kashik nantakin,

nasejai juun entsa amajin wekaamtaisha,

ai wekaasata tusam uwejmijai tuke wina achirkatnuitme.

^11-12Antsu wikia teenam anumkatasan wakerai wainiatmek,

ameka tsawaisha tura kashisha tuke nunismek waitme.

^13-14Wina namangkur najanau asam,

tura wina nukuru ampujesha najatau asakmin,

amincha maaketai tajame.

Aminu itiurkachmintrum atsau asamtai, wikia:

Ame pengké tujinkachuitme tusan nekajme.

^15-16Wina mash nekaru asakmin,

wikia anumkachminuitjai.

Chikich ainau winaka waitinatsaing ameka najatamiame.

Wina nukuru ampujen pujai waitiatum,

wina kintarka warutmak at tusam mash nekaamiame.

Aminu papirumin wina kintarka warutmak at tusam mash aarmawaitai.

^17-18Ami takatrum nekas pengker aina nuka untsuri ainawai.

Tura asaramtai nuna nekapmartatkaman tujintajai.

^19-20Yusru aints ainau amin nakitramina nuna pujutringkia jurukiarta.

Nuka nangkamiar amin naarmin pachisar pasé chichainawai.

Tura asaramtai mangkartin ainau wina takarsacharti tusam waitkata.

²¹Apuru amin nakitramin ainaunka wikia nakitajai.

Tura amin umirtamtan nakitin ainaunka nakitajai.

²²Nu aints ainauka wina nemasrua nunisarang asaramtai,

tuke wina nintirjai nu aints ainaunka tsuutajai.

²³Yusru nintimaur nekame.

Tura asam nintirka jiirtusta.

Tura nintirun tunau atsuash tusam nekartuata.

²⁴Tura tunau jintanam wekaamtaisha tuke nekamtikruata.

Tura tuke pujut nangkankashtinnum pujusminam tusam jintintruata.139.24 Sal 17.3; 26.2

David: Apuru ametme wina ejarkatnumka timiauri

¹Wikia Apurun kakaran untsuakun:

Wait anentrurta tusan seajai.

^2-3Napchau nintimsan pujaknaka,

Apurun wake mesekmaurun nekamtikjai.

Tura wait wajamurnasha ujaajai.

Apuru wi pujamurka nekame.

Wi wekaasatniunam ejatkan puusarmayi.

⁴Tura pajaasan jiimkuncha,

wina yainkatnunka waintsujai.

Tura wina ayamrutkatnusha atsawai.

Tura wina nintimtursatcha kichkisha atsawai.

⁵Tura asamtai amincha Apuru untsuajme.

Ametme wina ejarkatnumka.

Nuniangka chikich wina ayamrutkatnuka aya atsawai.

⁶Wina kakarmar atsau asamtai,

wina untsumaur anturtukta.

Tura wina nemasur ainau wina nangkamasang kakaram ainamunmaya angkanmamtikruata.

⁷Amin waramtiksatasan wakerau asamtai,

wikia achikmawa nunisnak pujaing nuniangka jiirkita.

Ame winaka pengker awajtau asakmin,

anangmichu ainauka winaka tentatkartinuitai.

David: Apuru wi inintramur airkata timiauri

¹Apuru wi seamur anturtukta.

Turasha wi inintramur anturtukta.

Ame timiame nuka tuke umiktin asam,

wi seamur airkata.

²Mash aints ainau tunaarintin ainawai tusam nekame.

Antsu wikia aminu inatiram asamtai,

winaka wait wajaktinka surusaip.

³Wina nemasur ainauka wina papeetkar nungkanam ujuarmawa nutikruwarmayi.

Tura aints jakawa nunisang teenam pujusti tusar,

wina pasé awajtusarmayi.

⁴Wikia timiá napchau nintimsan pujau asamtai,

nintirsha kurawai.

⁵Wi yaanchuik pujuyaja nuna aneakjai.

Tura ami turamurmin mash nintimjai.

⁶Wikia nungka mujurua tumawaitjai.

Tura asan nungka mujuramtai,

aints ainau yumi jiturti tusar,

uwejen takuiniar amin seatmina nunisnak amincha seajme.143.6 Sal 42.1-2; 63.1

⁷Apuru wina mayatair nangkantanak jasi.

Tura asamtai wári airkata.

Ame yaimkem suritrukaip.

Nu turakminka wikia jakawa nunisnak pujustatjai.

⁸Wikia amin nintimsan pujau asamtai,

kashik shintaramtai,

ami anengkratairmin tu awai tusam nekamtikruata.

Tura ame nu jinta wekaasata tusam jintim nekamtikruata.

⁹Apuru ameka wina ejarin asam,

wina nemasur ainamunmaya angkanmamtikruata.

¹⁰Tura wina Yusur asam,

wina wakeramur najanata tusam nuiturta.

Ami Wakanim nekas pengker aa nu:

Ju jinta tupnik amakta tusa,

wina jintintruati tusan seajme.

¹¹Apuru pujut surusta tusan,

amin naarmin pachisan seajme.

Ame tuke pengker asam,

wi wait wajamunmayangka jiirkita.

¹²Wikia ami inatiram asamtai,

wait anentruram wina nemasur ainauka nepetkam mash mengkaakta.

David: Wina ejarkatnuka wina Apuruitai timiauri

¹Wina ejarkatnuka wina Apuruitai.

Tura asamtai ameketme pengkeram titatjai.

Ningki mesetnum wetinnaka nuiturtinuitai.

²Ningki wina amikur asa wina ejarkatnuitai.

Tura pampanam wi anumkatnua tumau asa,

winaka angkanmamtikruatnuitai.

Tura tantaara tumau asa,

wina ayamrutkatnuitai.

Tura chikich nungkanmaya ainaun nepetkata tusa kakamtikrurtinuitai.

³Apuru aintsti mianchau arincha ¿waruka timiá anengkratme? Aintsti jakatin arincha,

¿waruka timiatcha nintimkartusmesha pujame? ⁴Aintstikia aintsu mayatmauriya nunisrik wári mengkakatnuitji.

Tura asar mikinta nunisrik nangkamaji.144.4 Sal 8.4; Heb 2.6

⁵Apuru nayaimpinam mukunit shuwinnum pujuuwitiatum tarata.

Tura mura ainausha keekarti tusam takasta.

⁶Tura chaarim nangkia tumau akupkata.

Turasha nemasem ainau atu atu tupikiakiarti tusam awemata.

⁷Yakiiyang uwejem kutsmarta.

Tura aints juun entsanam jakeawa nunisnak pujaing uwemtikrurta.

Tura chikich nungkanmaya aints ainamunmaya angkanmamtikruata.

⁸Nu aints ainauka wait chichaman etserin ainawai.

Tura ni uwejen takuiniar anangminak Yusjai tajai tinawai.

Tuminau asaramtai nu aints ainamunmaya uwemtikrurta.144.8 Sal 18.7-16

⁹Apuru yamaikia yamaram kantan kantamruatjame.

Tura kitarran tuntuikiamaikiakun kantan kantamruatjame.

¹⁰Ame apu ainau nepetkatniuka surusuitme.

Tura asam winasha jakatniunmaya uwemtikrurmiame.

¹¹Tura yamaisha nunismek winasha jakatniunmaya uwemtikrurta.

Tura chikich nungkanmaya aints ainamunmaya angkanmamtikruata.

Nu aints ainauka wait chichaman etserin asar,

uwejen takuiniar anangminak:

Yusjai tajai tinawai.144.11 Sal 18.50

¹²Ii uchiri ainauka árak arakmawa nunisarang tsakainawai.

Tura ii nawantri ainausha Yuse jeen paini shaung wajainawa nunisarang ainawai.

¹³Ii jeesha árak juukmaujai piakaru ainawai.

Tura ii tangkurisha untsuri warang yujainawai.

¹⁴Ii waakarisha japrukaru ainayat ni uchirisha shimkimuka ainatsui.

Tura ii yaktarinka taetet wajamusha atsuyi.

¹⁵Tu pujakrikia nekasar warasartin ainiaji.

Yus ii Apuri aa nu iijai pujamtaikia,

nekasar warasartin ainiaji.144.15 Sal 33.12

David: Yusru ami kakarmarmin pachisan chichastatjai timiauri

¹Yusru wina Apur asakmin,

ami kakarmarmin pachisan chichastatjai.

Tura ami naarmin pachisan:

Ameketme juuntam titatjai.

²Aminka kintajai metek:

Ameketme pengkeram titatjai.

Tura tuke amin naarmin pachisan warartustatjame.

³Ii Apuri asam nekasam juuntaitme.

Tura asakmin mash aints ainau:

Ameketme juuntam turamiarti.

Tura timiá juun asakmin,

iikia warukuita tusar nintimratatkamar tujintaji.

⁴Aints ainau ni uchiri ainaun nuininak ami turamurmin pachisar:

Nuka nekas pengker ainawai tiartinuitai.

Nunia ami kakarmarmijai najanamiame nunasha pachisar ni uchiri ainaun ujakartin ainawai.

⁵Tura asaramtai aints ainau mash ami paaniurmin tura ami kakarmarmincha pachisar chichasartin ainawai.

Turinamtai wisha ami wainchati takatrumin pachisan chichastatjai.

⁶Tura ami kakarmarmijai ami nemasem ainau nepetnuyame nuna pachisar chichasartin ainawai.

Turinamtai wisha amin pachisan:

Yus juuntaitai tusan aints ainaun ujaktatjai.

⁷Wi ujaam,

aints ainau amin pachitmasar:

Yus timiá pengkeraitai tiartinuitai.

Tura kantan kantaminak:

Yuska pengké tunaachawaitai tiartinuitai.

⁸Ii Yusringkia jaimias aints ainautin wait anentramji.

Turasha wári kajechu asa iincha tuke anenmaji.145.8 Sal 103.8; Stg 5.11

⁹Ii Apuringkia mash aints ainautin pengker awajtamsatas wakerutmaji.

Tura ni najanamurinka mash jaimias wainui.

¹⁰Apuru ami najanamurmin pachisar aints ainau mash warasarti.

Tura amin umirtaminak pujuinauka mash amin warartamsarti.

^11-12Tura aints ainau mash ami kakarmarmin pachisar chichasarti,

turasha ame aints ainau timiá pengker inamurmin

pachisar warasarti.

Tura amin pachitmasar:

Mash nungkanmaya ainaun nekas pengker inawai turamiarti.

Nunia ami paaniurmincha pachisar chichasarti.

¹³Aminu inamtairumka pengké nangkankashtinuitai.

Tura asamtai ameka aints ainauka tuke inangnatsuk inartinuitme.

¹⁴Ii Apuringkia jakaartas wakerinauncha kiakartinuitai.

Tura mianchawaitjai tumamin ainauncha inankitnuitai.145.14 Sal 147.6

¹⁵Apuru mash iwiaaku ainauka yutairin yuuminak surusat tusar amin nakarminawai.

¹⁶Tura uwejem yapaarakminka,

mash iwiaaku ainau tutuarar pujuinawai.

¹⁷Ii Apuringkia aints ainautinka tuke mash metek jiirmaji.

Turasha ni tura nunaka iin wait anentramak tuke turawai.

¹⁸Ii Apuringkia ni seau ainautinka anturtamji.

Tura anangmichu ainau seamsha anturui.

¹⁹Tura ii Apurinka:

Ameketme Apum tinu ainau wakeramurin umiktinuitai.

Tura Apuru yainkata tinamtaikia,

ni seamurinka anturkatnuitai tura uwemtikratnuitai.

²⁰Ii Apuringkia niin aneenaunka ejaktinuitai.

Antsu pasé aints ainaunka mengkaaktinuitai.

²¹Wina jangkerjai wina Apurun tuke maaketai titatjai.

Tura mash nungkanmaya ainau ii Apuri naarin nekas pengker aa nuna pachisar:

Ameketme pengkeram tuke inangnatsuk tiartinuitai.

Tuke wina nintirjai Apurun maaketai titatjai

¹¡Ii Apuri warartusmi!

Tuke wina nintirjai Apurun maaketai titatjai.

²Tura iwiaaku pujaknaka tuke Apurun maaketai titatjai.

Tura wina Yusrun kantan kantamruatatjai.146.2 Sal 104.33

^3-4Atumka aints miajuitjai tumamin ainau timiá kakaram ainawai tiirap.

Nu ainauka áya aintsuk ainawai.

Tura jakaar nungka najanarar,

nu kintatik ni takaamurinka mash inaisartin ainawai.

Tura timiá kakaram ainau wina uwemtikrurartinuitai tuuka nintimsairap.

⁵Ii Yusri yayaamutirmeka warastaram.

Jacobo Yusri atumi Apuri asamtai,

niin nintimsaram pujuinautirmeka warastaram.

⁶Yuska nayaimpincha tura nungkancha tura juun entsancha tura numi mash iruna nunasha najanamiayi.

Tura asa ni chichamencha tuke umiktinuitai.

⁷Tura wait wajakartin ainaunka Yuska pengker awajsatnuitai.

Tura tsukaminak pujuinauncha ni yutairincha susatnuitai.

Tura achikmau ainauncha angkanmamtikiatnuitai.

⁸Ii Apuri wainmichu ainaun wainmamtikiatnuitai.

Tura iyaaru ainauncha inankitnuitai.

Tura anangmichu ainauncha aneetnuitai.

⁹Tura chikich nungkanmaya ainauncha wainkatnuitai.

Tura mitaik ainauncha tura waje ainauncha ni yuumamurincha susatnuitai.

Antsu pasé aints ainaunka mengkaaktinuitai.

¹⁰Yuse aintsri ainautirmin ii Apuri tuke inatmartinuitrume.

Tura atumi Yusri tuke inangnatsuk mash nungkanmaya ainaun inartinuitai.

¡Ii Apuri warartusmi!

Ii Apuri pengker nintimsaram kantamruataram

¹¡Ii Apuri warartusmi! Ii Yusri kantamruatnuka nekas shiirmaitai.

Tura ii Yusri warartustinka nekas pengkeraitai.

²Ii Apuri ni yaktarin Jerusalén tutain ataksha jeamkarti tusa,

ni aintsri ainautin kakamtikramji.

Tura Israela weari ainautin atu atu chikich nungkanam akuptamramiaji nunaka ataksha itarmimiaji.

³Tura napchau nintimsar pujuinauncha ataksha pengker nintimtikratnuitai.

Tura katsumkamu ainauncha tsuwartinuitai.

⁴Yuska yaa ainausha warutmak ainia tusa nekawai,

tura kichik kichik yaa ainauncha naarin inaiyawai.

⁵Ii Yusringkia juuntaitai,

tura kakarmaitai.

Tura asamtai ni nintimauringkia nekaachminuitji.

⁶Wikia mianchawaitjai tumamin ainaunka ii Apuringkia inankitnuitai.

Antsu pasé aints ainaunka tuke inatsartinuitai.147.6 Sal 145.14

⁷Ii Apuri maaketai tusaram kanta kantamruataram.

Tura ii Yusri warartakrum kitarrjai kanta tuntuyataram.

⁸Yuska nayaimpinam mukunit ati tusa akupawai.

Tura yumi jiturti tusa umiawai.

Tura muranam chirichri tsakarti tusa tsapamtikui.

⁹Kuntin ainauncha Yus yurui.

Tura kantserkapi uchiri juutinamtaisha Yus yurui.

¹⁰Kawai ainausha tura aints ainausha ni kakarmarijaingkia Yusnaka pengkerka awajinatsui.

¹¹Antsu niin umirin ainauka tura ni anengkratairin nintimsar pujuinauka Yusnaka pengker awajinawai.

¹²Jerusalénnum pujuinautiram,

ii Apuri warartustaram.

¹³Ni wakerau asamtai,

atum shamtsuk pengker nintimtusrum pujuyarme.

Tura asakrumin atumi uchiri ainauncha Yus pengker awajsamiayi.

¹⁴Atumi nungkari pengker nintimsaram angkan pujustaram tusa,

Yus atumin pengker awajtamrume.

Tura yutancha pengkeran atumin suramrume.

¹⁵Ningki ni chichamenka nungkanam akupawai.

Turamtai ni chichamengka wári mash nungka ainamunam jeawai.

¹⁶Yuscha michan yukuuya tumaun nungkanam akupawai.

¹⁷Tura kaya tumau micha yakiiya kakeerarti tusa akupawai.

Turasha entsa waininayat,

aints ainau nungkanam wekajina nunisarang katingkiarti tusa,

entsanka pisu najanui.

¹⁸Antsu ni chichamen akupak:

Entsa pisu amia nu ataksha yumi ati tusa najanui.

Tura nasen tsuweran akupak:

Entsa ataksha wej wajati tusa najanui.

¹⁹Yus ni chichamen Jacobo weari ainaun nekamtikiamiayi.

Tura ni umirkatin chichamnaka Israela weari ainau umirkarti tusa akupkamiayi.

²⁰Antsu chikich nungkanmaya ainaunka ni chichamenka nekamtikiachmiayi.

Tura asamtai ni umirkatin chichamnaka pengké nekaacharmiayi.147.20 Rom 1.16; 2.10-13

¡Ii Apuri warartusmi!