Proverbios

Proverbios

¿Ju nuikiartutai chicham aina juka warukuk aina?

¹Wikia Davida uchiri Salomónkaitjai. Israela apurinjai. Ju chicham ainaun aaran,

²aints ainau nekas chicham aa nuna nintimrarti, tura pengker aa nuna nuimiararti, tura nuikiartutai chichamnasha nekaawarti, ³tura pengker aa nuna nuimiarar, waurtsuk paan nintimrar, nekas pengker aa nuna turawarti, tura chikich ainauncha anangtsuk, pengker aa nuna awajsatniuncha nekamtikiatasan wakerajai. ⁴Tura natsa nekachu ainau nintip arti tusan, tura paan nintimrar nekau arti tusan wakerajai.

⁵Tura nekau ainau ju chichaman antukar, nuna nangkamasar nekawartinuitai. Tura nintip ainau

nuna nangkamasar nuimiarartinuitai. ⁶Tura nuikiartutai chichaman, tura metektaku chichamnasha,

tura nekashtai chichamnasha nintijai nekatniusha mash nuimiararti tusan ju chichamnasha aajai.

⁷Nekau ataj takurkia, iinu Apuri Yus miatrusrik umirkatnuitji. Antsu nintinchau ainau nekas aa nuna nintimratniuncha tura pengker aa nu nuimiatincha nakitinawai.

Pase aa nu nakitrataram tusar nuikiartamu

⁸Uchiru, aparmi chicharkatamauri antukta. Turasha nukuru nuikiartamuringkia pachiatsjai tiip. ⁹Pengker aa nu nuinakmeka, tawaaspajai shiiram etsengkrakua nunismek, turasha shaak shiiram nungkurtinua nunismek pengker nintimsam pujustinuitme. ^10-12Uchiru, pase aints ainau amin anangkraminak: Iin pachinkata. Iikia anumkar aints anearchau wekaamtai, nu maar waa taimunam ajuarar, nunia yukuarar ukuktatji, tinawai. ¹³Turakur iikia kuik tura warinchu ainausha waring achat mash jurukir, ii jeen chumpiami. ¹⁴Watska, iin pachinkata. Nunia iikia mash metek kuikiartin jaktatji, turaminamtaisha, ¹⁵uchiru, nu pase turin aina nujaingkia tsaningkaip. Tura ni tina nuka antukaip.

¹⁶Pase turin aina nuka mangkartuataj tusar, aya waurkamin ainawai.

¹⁷Nintimrata. ¿Chingki achiktai tusar, chingki ainaun wainkar, jiimiaj eketinai ejatkajai achikminkai? Atsa.

¹⁸Nu mangkartin ainauka aya ningki amuninawai. Tura ningki mengkakartin ainawai. ¹⁹Aints ainau aya warinchun achiktai tusar wakerina nuka ni wakeramurin umitsuk aya jakatniunam weenawai.

Paan nintimratniuka wakeruktinuitai

^20-21Paan nintimratniuka nekas wakeruktinuitai. Yus yaktanam aints untsuri wekaatinam wajas, untsuawa nunisang aints ainaun chicharak: ²²Nintinchau ainautiram ¿warutik nintinchau wajatisha inaisatrum? Wishikiartin ainautirmesha, ¿warutik chikich aints ainau pachisrum wishiktsuk pujustaram? Tura netse ainautirmesha ¿warutik nekas chicham antut nakitaisha inaisatrum? ²³Wi taja nuka antuktaram. Turakrumka wina wakantrunka atumi nintin engkean piatkatnuitjai. Tura wi nintimaurun paan nekamtikiatnuitjarme. ²⁴Wikia atumin: Winitaram tusan untsuamaitiatrum, atumka umirtuktinka nakitrurmarme. ²⁵Wi tamaitiatrum, nuikiartamur antukchamarme, tura chicharkartamursha nakitramarme. ^26-27Tura asamtai wina chichamur nakitrau asakrumin, atumi wait wajaktintri jeamtaikia,

wait anentrashtinuitjarme, antsu sapijmiakrum pujakrumin wishikratinuitjarme. Kame, juun nase, katurang meskartin shamarmena tumau nukap wait wajaktin jeamtaikia, wait anentrashtatjarme.

^28-29Nuniangka aints ainau untsurkartatui, turutinaunak wikia aikchatatjai. Turasha waurinak winaka

eatkartatui, antsu paan nintimratniunka nakitinak, wina umirtutan nakitruraru asar, winaka pengkej waitkachartatui. ³⁰Turasha wi nuikiartamurun nakitrar, wi chicharkartamurun pachischaru asar,

³¹ni turutairijaingkia aints ni yutairin nukap yuwinau asar, tangkar iniukmin nekapenawa nunisarang

ni pase nintimaurijai wait wajakartin ainawai. ³²Nintinchau ainauka ni turutairijai jakartin ainawai. Tura

netse ainauka nangkamiar: Iikia nekasar pengker pujaji, tinayat mengkakartin ainawai. ³³Antsu wina

chichamrun umiina nuka angkan pujusar, pasenasha shamtsuk matsamsartinuitai.

Paan nintimratniuka nekas pengkeraitai

^1-2Uchiru, wi tajame nu antukam, wina umirtuktin chichamsha kajinmatsuk aneakmeka, tura paan

nintimratasam wakerakmeka, turasha pengker aa nu nekatasam wakerakmeka, ³tuke nu wakerau asam, ¿itiur nekas pengker pujustaj? tusam, tu pujustincha seata. ^4-5Tura aints ainau kuikian tura kurincha timiá wakerinauka nunak eaina nunismek: ¿Yus warukuita? tusam nekatasam wakerakmeka, Yuska tu awai tusam nekaatnuitme, tura iinu Apuri miatrusrik umirkatnuitji tusam nintimratnuitme. ⁶Nekas paan nintimratniunka ii Apuri suramji. Tura ni chichamen nintimrar: Yus tu awai tusar nekaatnuitji. Turasha ¿itiur iinu Apuri umirkatnuitji tusar nintimratnuitji. ⁷Aints ainau Yusen miatrusarang umirina nunaka paan nintimrarti tusa iinu Apuri yainkatinuitai. Tura tunaunaka nakitajai tinu ainaun yamruktinuitai.

⁸Yus ni umirin ainaun nekas wainui. Tura pengkera nuna turatasan wakerina nunasha ejawitai.

⁹Turamtai: Mash pengker aa nunaapi nintimratatja, tusam tura: Tunaarinchawapi pujustatja

tusam, tura: Tupin nintimsanapi pujustatja titatme. ¹⁰Kame, tu pujakmeka paan nintimratnuitme,

turasha nekau aints wajastinuitme. ¹¹Tu pujakmeka itiurkachmintrumka atsutnuitai. Tura

nintip wajasam nuwakchatnuitme. ¹²Tu pujakmeka tunau jintanam wekasashtatme. Tura pase

chichainamunmasha pachinkashtatme. ¹³Nu aints ainauka tupin nintimtsuk pengker jintan ukukiar

teenam wekainawai. ¹⁴Tura tunaunaka turinak warainawai. Tura pase aa nunak wakerinak:

Maj, nuka nekas pengkeraitai tinawai. ¹⁵Tura tuni wekaina nuni tunau turin ainawai. Tura jinta tupin aa nuna ukukiar, waaktin jintanam wekainawai. ¹⁶Tura nuwa ainau kuntuji chichasar,

anangkramatasar wakerinamtaikia, nuna chichamen antutsuk angkanmamtikiatnuitme.

¹⁷Kame, nu nuwa natsan ninumkar, Yus wainmaka nuwatnaikiatin chichaman najana nunaka

umitsuk aishrin ukuinawai. ¹⁸Nu nuwa jeen wayawaru ainauka jakatniunam weenawai. ¹⁹Tura nuni wayawaru ainauka nunia jiintsuk tuke iwiaaku pujustinnum jintanmaka ataksha wekainatsui.

²⁰Tura asamtai pengker aints ainau pengker jintan amaina nuni amesha wekasata. Tura asam Yusen umirin ainau turina nusha turata. ²¹Yuse umirin ainau ju nungkanam pengker pujusar tura tunaarinchau pujusar, tuke pujusartin ainawai. ²²Antsu Yusen umirtsuk pujuinauka pase asaramtai, aints ainau nupaan uweenawa nunisarang ajapawartin ainawai.

Paan nintimratniuka nekas pengkeraitai

¹Uchiru, wi akupamurun unuiniajme nu kajinmatsuk tuke nintimin ukusta. ²Nuka timiatrusmek umirkumka, nukap musach pengker nintimsam pujusam warastinuitme. ³Tura nekas chicham ainauka tura wait anengkrataisha pengkej inaisaip. Antsu aints ainau shaak nungkurtinua nunismek kajinmatsuk nintinam nintimsam pujusta. ⁴Nu turakminka Yuscha aminka pengker nintimturmastinuitai, tura aints ainausha nunisarang amin pengker nintimturmasartinuitai. ⁵Ami Apuram Yus tuke nintimaurmijai nintimtusta. Antsu amek: Wikia nintipitjai, tuuka nintimtumasaip. ⁶Ame warí turame nuka Apuram nintimsam turata. Nu turakminkia ni jinti nekas tupin aa nuna inakturmastatui. ⁷Wikia mash nekajai. Witsukaitja chikich ainaun nangkamasnak timia nekauna tuuka nintimtumasaip. Antsu Apuram pengker awajsata, tura tunausha inaisata. 3.7 Rom 12.16⁸Nuka tsuwakan nangkamasang pengkeraitai. Tu pujakmeka namangkem

kakamtikratnuitme. ⁹Kuik juwame nuka tuu ajanmaya araka juwame nusha akankam Yus tuke susata.

¹⁰Nu turakmeka ajanmaya juuktatme nuka nukap yujartinuitai. Tura amutirmesha amukashtinuitai.

^11-12Uchiru, aints ni uchirin aneau asa, pengke aints ati tusa, wait wajaktinun susatnuitai. Tura asamtai,

uchiru, Apuram amin anenmau asa, wait wajaktinun suramsamtaisha nuka nakitraip. 3.11-12 Heb 12.5-6; Ap 3.19

^13-14Nekatniuka kuikian nangkamasang pengkeraitai, tura paan nintimratniuka kurin nangkamasang iin yainmaktinuitji. Aints paan nintimratniunka tura nekaatniunka juwawa nuka nekas warastinuitai.

¹⁵Paan nintimratnuka kaya nekas akik aina nuna nangkamasang paan nintimratniuka timiá wakerumaintia. Tura asamtai nuna nangkamaska timiá pengkerka atsawai. ¹⁶Apurka paan nintimratnunka nukap suramji.

Nunia nukap musach pujustinun, tura yuumatsuk pujustinun, turasha iin pengker awajtamsatniurincha suramji. ¹⁷Nujaingkia angkan nekas pengker pujusminuitji.

¹⁸Paan nintimratin iin pujurtamatinkia, tuke iwiaaku pujustinuitji. Tura nekasar warastinuitji.

¹⁹Ii Apuri Yuska ni nekatairijaingkia ningki nintimias nungkancha, tura nayaimpincha najanamiayi. 3.19 Gén 1.1²⁰Tura nekas timiá nekau asa: Yakiya yumi nungkaya entsajai akankamu ati tusa

akankamiayi. Tura yumin tura sanancha akupkamiayi. 3.20 Gén 1.6-7

²¹Uchiru, paan nintimram nintip wajasta. Kame, pengker aa nu jiisam, tura tunausha jiisam,

warí pengkeraita tura warí pengkerchawaita tusam nintimrata. ²²Tu pujakmeka nekas pengker

pujustinuitme, tura aints ainau amin waitmakar: “Nuka nintipitai” tusar, aints shaakun nungkurar

wekainawa nunisarang amin waitmakartinuitai. ²³Tura asamtai pengker nintimsam jintanam

angkan wekasatnuitme, turasha tukumkayatmek ayaarchatnuitme. ²⁴Tura kanakmesha shamkashtinuitme, tura sapijmiatsuk pengker kanurtinuitme. ²⁵Tura aneachmau itiurchat akungka, tura tunau aints

ainaun Yus wait wajaktinun akupkamtaikia, ameka shamkashtinuitme. ²⁶Nu kintia jeamtaikia,

itiurchatnum iyaaraim tusa Apuram: Shamkaip tusa waitmaktinuitai.

²⁷Aints ainau yuminamtaikia, ame yaingmin akumka, wait anentakum pachitsuk yaingta.

²⁸Tura ami irutkamuram yuminamtaikia, yamaik takakumka: Kashin winita, turakminka susamjinam

tutsuk, yamaik susata. ²⁹Amijai patas puja nuna pasen awajsataj tuuka nintimraip.

¿Nuka amin pengker nintimturmas pujatsuash? ³⁰Aints amin pase awajtamtsuk pujamtaikia,

ameka nangkami nijai maanitsuk asata. ³¹Pase aints wainkam: Wikia nijai metek kuikiartin wajasan, kakaram wajastasan wakerajai, tusam suwirpiaku nintimtusaip. Turasha ni tura nunasha

turatasan wakerajai tuuka nintimtusaip. ³²Ii Apuri pase nintintin ainaun nakitawai. Antsu pengker nintintin ainaun ni amikria nunisang pengker awajui. ³³Pase aints ainaun ni weari ainaujai ii Apuri kajerawai. Antsu pengker aints ainaun pengker awajui. ³⁴Wishikiartin ainaunka ii Apurisha wishikratnuitai. Antsu jampechu ainaun wait anentratnuitai. ³⁵Paan nintintin ainauka pengker

awajsamu ainawai. Antsu netse ainauka natsanpiaku asaramtai, jiitnasha nakitin ainawai.

Pengker jintanam wekasataram tusa chicharkamu

¹Uchitiram, wina chichamur pengker nintimsaram anturtuktaram. Nu antukrumka paan nintimin atinuitrume. ²Wikia atumin pengker nuiniartatjarme. Tura asaram wi nuikiartamur umirkuram inaisairap. ³Wikia uchi asan, aparu jeen pujain, nukuru uchiri chikichik asamtai, ⁴apar nuitiak: Wina chichamur tuke nintimtusam pujusta. Tura asam wi akupamur umirkumka, nekasam pengker pujustinuitme. ⁵Paan nintimratniuka tura pengker nekatniuka wakerukta. Wina chichamur kajinmakiip, turasha umirtsuk pujusaip. ⁶Paan nintimratniuka inaisaip. Tura nu aneakmeka, amin ayamrutmaktinutai. ⁷Mash pengker aina nuka nuna nangkamasmek paan nintimratniuka wakerukta. Kame, warinchu mash takakmena nuna nangkamasmek pengker nekatniuka wakerukta. ⁸Nekatniuka mash aina nuna nangkamasmek pengkeraitai tusam nintimtusta. Nu turakmeka pengker pujustinuitme. Kame, nuwa winiaksam pengker awajsatnua nunismek paan nintimratniuka nukap wakerukta. Turakminka amincha pengker

nintimturmastinuitai. ⁹Turakminka aints ainau tawaaspan shiirmachin etsengkrukar iwiarmamina nunismek pengker nintimsam pujustinuitme.

¹⁰Tura asamtai uchiru, wina chichamur antukta. Tura wi tajame nu miatrusmek turata.

Turakmeka untsuri musach iwiaaku pujustinuitme. ¹¹Wikia paan nintimratniun jintanmaka wekasata

tusan nuiniarjame, tura jinta tupin amaunmasha wekamtikjame. ¹²Nu jintanam wekakmeka tukumkashtinuitme. Tura ampuakmesha iyaarchatnuitme. ¹³Wi nuiniarmiajme nuka kajinmatkiip.

Tura mash umirkam pengker pujustinuitme. ¹⁴Tura asamtai, uchiru, tunau ainau wekaina nu jintanmaka wekaasaip. Tura ni turutirisha turawaip. ^15-16Yusen umirkacharu ainau tunaun takatsuk pujusar kanurchartin ainawai. Tura chikich aintsun tunaun takamtiksacharu asar, kanurtatkamawar tujintinawai. Tura asamtai Yusen umirkacharu ainau jinti wekatsuk asata. Pengké inaisata tajame. ¹⁷Aints ainauti yurumak tura umuti wakerajina nunisarang nu aints ainau tunaun wakerinawai.

¹⁸Antsu Yusen umirnu jintikia tsaa yamai jiinai, paan tsantua nunisang, tura tupnitak eketai, te paan tsantua nunisketai. ¹⁹Tura Yusen umirchau aina nuna jintikia teeyaitai. Tura asamtai aneachmau warinmak tukumkarang iyaina nunaka nekaminatsui. ²⁰Tura asamtai uchiru, wi tajame nuka tenapkesam antukta.

²¹Tura pengké kajinmatsuk wina chichamur tuke nintimin ukusta. ²²Nu chichaman antinauka tsuwakan kujarua nunisarang pengker pujusartinuitai. Turasha pengker pujustinnun wainkartinuitai.

²³Mash warinchu ainaun nangkamasmek nintim wainkata. ¿Waruka? Nujaingkia iwiaaku pujustinuitme tajame. ²⁴Pase chicham chichastinka inaisam, wait chichamsha pengké chichakaip. ²⁵Tura jiimkumka, tunau juninisha jiimtsuk, tura atuninisha jiimtsuk tupnik jiimsata. ²⁶Ame tuni wekame nuni mash pengker jiisam, tunaunum ayaaraim anearam wekasata. ²⁷Pengker jintanam wekame nunia jiinkip. Antsu tunau jintanam wekakmeka, nunia jiinkim pengker jintanam wekasata.

Kungkatip nuwa aishmangkun yupichuwach anangkatnuitai

¹Uchiru, wikia paan nintimratniunka nuiniajme nuka tenapkesam nintimram antukta.

²Wi tajame nu turutai pengkeraitai, antsu chikich turutai paseetai tusam nintimin ukusta.

Tura nu mash nekau asam, chichaakmeka nekas pengker chichastinuitme.

³Kungkatip nuwa aishmangkun nekas yuminchin chicharui, tura: Wi turaja nuka nekas pengkeraitai tusa anangkeawai. ⁴Antsu inangnamunam ni turamuri saapi ere etsakamua tumawaitai, tura yapauwa tumau nekapratnuitai.

⁵Nu nuwaka mengkakatniunam jeakui, tura niin nemarina nusha tuke jakatniunam wenawai.

⁶Nu nuwaka tuke iwiaaku pujustin jintanmaka pengke wekatsui. Mai nintim weau asa, pujutruka

jinta tuninua nunisketai tusangka nintimtsui.

⁷Tura asamtai uchitiram, anturtuktaram. Turaram wi tajarme nuka kajinmatkirap. ⁸Kungkatip nuwa pujamunmaka pengké jirasairap. Turaram ni jeenka wayawairap. ⁹Atumi kakarmari chikichan susairam tusan, tura atumi iwiaakmari mengkakchati tusan juna tajarme. Atum mengkakatatrume tusar nu nuwa ainauka pengké pachinatsui. ¹⁰Nuna jeen wayaakrumka, atum takakmakrum waitnasrum atumi kuikiari irumrarume nuka nangkamrum ajapatatrume. Turakrumka chikich kuikiartin wajasti tusaram atumi kuikiari susatatrume. ¹¹Turakrum ukunam atumi namangke yaitas amuki amuki weamtai, ¿warukanak timiá nintimtsuk aitkamiaja? tusaram eaartinuitrume. ¹²Nunia juutkuram: “Warukanak chicharmaitiatnasha, nintimtsuk pengké antukchaya? ¹³¿Warukanak nuikiartin ainau chichamen antutan pengké nakitnuyaja?

¹⁴“Yamaikia mash aints iruntramunmasha wi pase turamurun nekaawaru asaramtai, wikia natsaamakun jakatasan wakerajai titatrume”.

¹⁵Tura asamtai chikicha maatirinkia wetsuk, atumi maatirin werum, nuni maaitiaram. ¹⁶¿Warí, atumi kakarmari yaktanmasha ajapatniukaitrum? ¹⁷Atumi kakarmari atumnauk atinuitai, antsu chikichnau achatnuitai. ¹⁸Atumi nuwarijai nekasrum pengker pujustaram. Tumakrum atumi nuwarijaingkia wararnaisataram. ¹⁹Kame, atumi nuwaringkia tangkuchia nunisrumek minaksaramaneetaram.

Tura asakrumin atumi nuwari ni aneamurijaingkia tuke atumin waramtikramsarti.

²⁰Tura asamtai uchiru, ¿warukamtiya nuwa aminuchusha chikichnau wainiatum,

nujai minaknaisam tsanirmatatme? ²¹Warí, ii Apuringkia aintsu pujuntrin mash wainuitai.

Turasha ni turamuringkia mash nekaawaintai. ²²Pase aintsu tunaari ainauka angkan pujuschamnaun chapikjai jingkiamua nunisarang metawartin ainawai. ²³Tumau asaramtai ni namangke wakeramurin najaninauka pengké nintinchau asar, jakatnunam wenawai, tura timiá tunaarintin asar,

wait wajaktinnum jeainawai.

Tumashmiaktinun pachis nuikiartamu

¹Uchiru, ami irutkamuram chichartamak: Wikia tumashitjai. Antsu akiimiakchamin asamtai, ukunam akikmijinam tusan, ame tumaashruka akiimiaktrukta tamataikia, ²ame ayu takumka, ami chichammijiaing chapikjiai jingkiamua nunisketme. ³Turakmeka uchiru, chikich aintsu tumaashrin akiktatjai tinu asam, yamaik angkanmamtikiata. Turakum wake mesekam ami irutkamuram werim: Tumaashrum akimiakchamnau asamtai tsangkutrurta tita. ⁴Tura irutkamurmin wetsuk pujakmeka, kanutsuk asata.

Tura nijai chichatsuk pujakmeka pengké ayamraip. ⁵Angkan wajastaj takumka, japa waitmak tsekea nunismek, tura chingki ejatkan wainak nanaki yaja weawa nunismek angkanmamtikiata.

Naki ainaun pachis nuikiartamu

⁶Ame naki akumka, week ainau takakminak wekaina nu jiisam, takakmastin nuimiarta.

⁷Kame, takata apuri atsayat, tura juuntri: Tu takakmastai tachamaitiat, ⁸weekka ni wakeramurijai

kintajai metek takakminawai. Tura yumitin ayamsarmi tusa, esati takakmasar, nuka ainaun juukar ukuinawai. ⁹Maj, amesha naki akumka, ¿warutam arusmek nantaktiamek? ¿Warutam arusmek

shintaram takat nangkamatam? ^10-11Jumchiksha kanurtajai. Jumchiksha ayamsatjai tu nintimsam pujakminka, aneachmau tsuka mangkartinua nunisang nepetmaktinuitai. Tura kasa aints warinchurmin kasamkatas aneachmau jeemin wayaawa nunisang winamtai yuumaktinuitme. Tura asamtai kakaaram takakmasta tajame.

Pase nintintin warukuita tusa nuikiartamu

¹²Aints pase nintintin warukuita tusan nuiniajrume: Nu aintska nangkami chichaakka, wait chichaman

etserui. ¹³Tura aintsun anangkatas, jiijai mitsum wajaayi. Tura nawejai tura uwejejai inakmas wajaayi.

¹⁴Ni nintimauri pase asamtai, tuni wekaawa nunisha tuke aints ainaun anangkatas wakerawai. Turasha aints ainau chichainamtai, maaniawarti tu nintimias chichaawai. ¹⁵Tura asamtai nu aintsu waitnastintri aneachmau jeatnuitai. Tura pengké ayamrukchamin mengkakatnuitai.

Yus nakita nuna pachis nuikiartamu

¹⁶Yuse nakitamuringkia seisaitai. Kame, nekas siete ainawai:

¹⁷Aints: Wikia miajuitjai tusa, chikich aintsnaka: Mianchawaitai tusa suwirpiaku jiinaunka Yuska

naktitawai. Tura wait chichaman etserin ainauncha nakitawai. Tura anangmichu ainaun mainauncha

Yuska nakitawai. ¹⁸Tura aints tunau nintimsar pujuinauncha, tura chikich ainaun pase awajsartas

wakerina nunasha Yuska nakitawai. ¹⁹Tura chikich aints ainaun tsanuminak pujuinauncha, tura

aints chikich aintsun ni yachijai kajernaikiati tusa nintimtikniuncha Yuska nakitawai.

Natsa ainaun nuiniamu

²⁰Uchiru, wina chichamur umirkam, nukuram nuitamramia nusha kajinmatkiip. ²¹Nekasan kajinmatkii tusam, tuke nintimin ukusta. ²²Tsawaisha tuni wekaame nunisha nu chichamnaka nuitamrartinuitai.

Tura kashi tepakmincha nunisha aminka waitmakartinuitai. Nunia tsawaarkum shintaram

nunisha nu nuikiarturmauka nintimratnuitme.

²³Nu umirkatin chicham ainauka namparin kapawa nunisarang ainawai. Tura shirikip kea nunisarang ainawai. Nuka itiur timiá pengker pujusminuita tusar nuitamrartinuitai. ²⁴Tura kungkatip nuwa amin anangkramatas chichamtaisha, umirkatin chicham ainauka amin angkan awajtamsartinuitai.

Tura aishrintin amin anangkramatas wakeramtaikia, nunia kiishmaktinuitme. ²⁵Nuka shiirmachitai,

tuuka nintimraip. Kame, amin waitmak jimiaj wajamtaisha, ameka jiisaip.

²⁶Kungkatip nuwa ainauka aya kuikian wakerinak aishmangkun juinawai. Tura aishrintin ainauka amijai tsanirminak ami pujutrumka mesertin ainawai. ²⁷¿Ji kapaun aints minaksatas wakerakka, wejmakringka aesachminkai? ²⁸Tura ji kapamunam sapatrin wejtsuk aints najamtaikia ¿nawencha aesachminkai?

²⁹Aints aishrinujai kanurtas tepawa nunisketai. Aishrinun takau ainauka mash ni waitnastintrin jukiartin ainawai.

³⁰Aints yaparak tsukajai jakai tusa yurumkan kasamak juwa nunaka chikich aints ainauka tsuutinatsui.

³¹Turamaitiat chikich aints nuna wainak achik: Ame kasamkame nuka siete awangturkita

tawai. Nu atsamtaikia, ni jeen warinchu iruna nuna mash suruk, kichik kasamkamunam siete akiktinuitai.

³²Tura aints aishrinujai kanauka pengké nintinchawaitai. Ningki mestumawai.

³³Nuka natsanpiakun najanau asamtai, numijai katsumkartatui, tura aints ainauka

ni turamurin mash nekainau asar, nu aintsnasha jiitnasha nakitrartinuitai.

³⁴Nu nuwa aishri nekas timiá suwirpiaku nu aintsun kajerak wait anentsuk

pengké tsangkurashtinuitai. ³⁵Aints: Tsangkutrurta tamaitiat, pengké anturkashtinuitai.

Tura kuikian warinchuncha susatjame tamaitiat: Nunasha nakitajai, titinuitai.

Kungkatip nuwa anangkartutairi pachis nuikiartamu

¹Uchiru, ameka wina chichamur umikta, tura nintimin ukusta. ²Amin nuiniarmiajme nu umirkata. Aints ni jiin tenap wainina nunismek chichamur umirkumka, nekasam angkan nintimsam pujustinuitme.

³Tura asam uwejnum wejtai kuri najanamu tuke wejkar wekajina nunismek nu chicham inaitsuk umirkata. Tura nintimin aarmawa nunismek nintimrata. ⁴Tura paan nintimratnuka umaimia nunismek pengker nintimtusta. Tura nekatai aina nuka ami irutkamurmea nunismek pengker awajsata.

⁵Turakmeka kungkatip nuwa kiishmaktinuitme, tura aishrintin anangkramatas chichaamtaisha anturkashtinuitme.

⁶Chikich kintiati wikia jearun pujusan, jiimiaj pujumjai. ⁷Tura jimiaj pujai natsa ainau iruntrar wajainamunam natsa chikichkin pengké nintimchaun wainkamjai. ^8-9Nu natsaka jea tsukintrin

nangkaamak jintian amak, —kungkatip nuwa jeenini kintiamramtai wemayi.

¹⁰Turamtai nu kungkatip nuwaka shiiram iwiarmamas natsajai ingkiuniktas jiintukmiayi.

¹¹Nu nuwa ainauka natsaamtsuk chichainawai. Tura ni jeenka pujutan nakitinawai.

¹²Antsu jea tsukintrin wajasar, tura jintanmasha wekaasar, aints nangkaminaunka jiisar, tsanirmataj tusar nakamkini wajainawai. ¹³Kame, nu nuwaka natsan tapit achik minakas mejeas, yapin jiiras chicharak:

¹⁴Wikia Yusrun pengker awajsatasan tangku namangken susan yamai umikjai. Tura nu namangsha jeanam

ukusmawaitai. ¹⁵Tura asan amin eaktasan jeanmaya jiinkin, aneachmau wainkajme. ^16-17Tura

tarach kapantin Ejiptonmaya itamun nunajai peakrun ainkan, kungkuti nekas kungkurmajai

yakaran ukukjai. ¹⁸Tura asamtai winita. Iinu namangke wakeramu sunaisami. Tura minaknaisar

tepesar tsawaramtai ukunikmi. ¹⁹Aishruka jeanmaka pujatsu ai arák iramayi. ²⁰Kuikian nukap juki weak: Nantu pamaun yuwamtai tatajai, turutmiayi.

²¹Tura timiá yuminun chichaa chichaaka natsa nintin ikiajtukmayi. ^22-23Turamtai waaka uchiri: Yamai jakatjai tuuka nintimtsuk namang surutinam umainak, tura japa entsanam weamtai, maataj tusar nakainak, tura chingki ejatkan waintsuk wayaawa nunisang nu natsaka nuwan nemaras jeanam wayami.

²⁴Tura asamtai uchitiram anturtuktaram. Turaram wi tajarme nuka kajinmatkirap. ²⁵Nu nuwan

nintimtustaj, tuuka nintimrairap. Tura ni wekamunmasha wekasairap. ²⁶Nu nuwa ainauka

untsuri aintsun anangkawar tunaun takamtikinawai. Tura nu tunaujai jakaru ainauka untsurintai.

²⁷Nu nuwa ainau pujuinamunam wearuka jakar mengkakatniunam jeainawai.

Paan nintimratniun pachis nuikiartamu

¹¿Paan nintimrataram ta nuka kakarman untsuatsuash? ^2-3Tura muranam jinta tsengkeakunam

aints nangkaminaun, tura yakta waitirin untsuri aints wayawartin ainaun jiis untsuak: ⁴Aints ainautirmin

wikia untsuajrume. Tura mash antuktaram tusan chicharjarme. ⁵Nekachutiram, nintip ataj tusaram wakerakrumka nuimiartaram. Tura nintinchau ainautirmesha, paan nintimratniusha nekaataram.

⁶Wikia timiá pengker chichaman ujaktasan wakerajrume. Tura asamtai anturtuktaram.

⁷Wi tajarme nuke nekasaintai. Anangkartin chichamnaka arantak nakitajai. ⁸Wina chichamruka

mash nekas chicham ainawai. Kame, chichamruka mash wait chichamchau ainawai. ⁹Nintip ainau wina chichamrun antinauka mash: Nu chichamka nekasar paan ainawai, tura nekau ainausha: Nuka waitchau

ainawai tinawai. ¹⁰Tura asamtai wi nuikiartamur kuikian tura kurincha nangkamasrum wakeruktaram tajarme.

¹¹Kame, paan nintimratniuka kaya timiá akik aina nuna nangkamasang pengkeraitai.

Tura asamtai ju nungkanam aints ainau wakerina nujai metek chikichkisha atsawai tajarme.

¹²Wiitjai paan nintimtikiartinaka. Wikia chichakchamin ayatun, nunak titasan wakerajrume.

Wikia nekatijaingkia tsaniasan pengker pujajai. Tura asan paan chicharkartin ainauka winar ainawai.

¹³Iinu Apuri Yus umirkatniuka tunau nakitamujai metekaitai. Tura asan miajuitjai

tumamunka, tura pase turatniunka, tura tunau chichamnasha mash nakitajai. ¹⁴Chikich ainaun pengker

chicharkartinasha, tura nuka pengkeraitai, antsu nusha nekas paseetai titincha wini wininauka paan nekaawartin ainawai. ¹⁵Apu ainauka paan nintimtikrartin asar, ni aintsri ainaun inarartinuitiai.

Tura inakratin ainausha ni aintsri ainau umirkarti tusar, umirkatin chichaman najaninawai.

¹⁶Wijaingkia ju nungkanmaya juun ainau ni aintsri ainaun akupinawai. Tura chichaman

nekamtikin ainau wijai ni aintsri ainaun inainawai. ¹⁷Wina anentina nunaka wisha nunisnak aneajai.

Tura wina eatinauka waitkartin ainawai. ¹⁸Wikia aints ainaun kuikiartin wajasarti tusan

yaingtinuitjai. Tura chikich aints ainauncha iniararti tusan pengker awajsartinuitjai.

¹⁹Wikia aints ainaun suaja nuka kurin nangkamasang tura kuikian nangkamasang timiá pengkeraitai.

²⁰Wina jintarka tupin asamtai, aints ainau nu jintan amakar, nuni wekajinau asar,

nuka chikich aints ainaunka pengker awajsartas wakerinawai. ²¹Tura wina anentina nuka kuikiartin wajasarti tusan tsangkatkatnuitjai, tusa Yus turamji

²²Apu Yus nu nangkamtaik nungkan najantsuk wina najatamiayi. ²³Tura nungkanka najantsuk nekamtikin ata tusa eemak inaitukmiayi. ²⁴Tura juun entsa, nunia, mash entsa ainausha atsuinai,

wikia tuke pujuyajai. ²⁵Tura mura ainauncha najantsuk Yuska wina najatamiayi.

²⁶Tura nungkancha tura ajancha, tura nungka tsetserin najantsuk wina najatamiayi.

²⁷Yus nayaimpin najanamtai, juun entsa yakinini wikia nijai pujuyajai. ²⁸Tura yurangmincha mukuntiuncha najanak, juun entsa nekas kuna aina nuna najanamurincha wainak.

²⁹Tura Yuus chichaak: Entsa nungkan amuru kuyuati tura mujurti tusa, tura juun entsa

nujangkruashti tusa, nungka esantiri tura wangkantirisha nekapmarmia nuni

³⁰wisha ni chichamen antinuyajai. Tura kintiajai metek nuna mash wainkan,

nijai tsaniasan pujau asan wararnuyajai. ³¹Yus nungkan mash najanau asa,

aintsun najanau asamtai, nukap warasan pengker nintimnuyajai.

³²Tura asamtai uchitiram, yamaikia anturtuktaram. Wi tajarme nu umiakrumka warastinuitrume.

³³Wi unuiniarjarme nuka antukrum nintip wajasrum, nakitsuk umirtuktaram.

³⁴Aints wina anturtuk kintiajai metek wina jearun jea nakawa nuka nekas warastinuitai.

³⁵Tura, aints paan nintimratniurin eakka, tuke iwiaaku pujustinasha eawai. Tura asamtai

Apu Yus niin pengker awajsatnuitai. ³⁶Antsu aints wina eatsuk tuntupea nuka ningki

wiasmamkatnuitai. Tura, wina nakitrina nuka mash tuke jakatniunam wetasar wakerinawai.

Paan nintimratniun tura nintinchau wajasmaun pachis nuikiartamu

¹Paan nintimratniuka aints jean jeamin siete painin charuk nujai ni jeen jeamua nunisketai.

²Tura nu aintska nuna mash umis, kuntinu namangken inara, tura umutirincha najana, misanam keemsatniuncha umisi. ^3-4Tura nuna mash umik, ni inatirin akupak: Yakta yakiinini mura wakaram,

natsa nintimchau ainau untsukrum: Wini winiram jea wayataram. ⁵Wina yutair yuwamniuram, tura

umutir wi najanaja nu umurmintrum tusan untsuajrume. ⁶Nintimchau pujut inaisaram, nekau aints wajastasrum pengker nintimsaram pujustaram, tawai titaram timiayi.

⁷Aints wishikiartiniun nunia pase aintsun chicharkartas wakerinauka, aya ningki

katsekrukti turasha pajaki airkar pasenasha chichakarti tusar turinawai.

⁸Aints pase chichamtiniun chicharkatasam wakerakmeka, wina kajertukti tusam nuka turame.

Antsu pengker nintintiniun chicharinamtaikia, niisha pengker awajsatnuitai.

⁹Aints pengker nintiniun nuininamtaikia, nuka nuna nangkamas pengker nintimratnuitai.

¹⁰Paan nintimin ataj takurkia, iinu Apuri Yus miatrusrik umirkatnuitji. Yus nekas tunaarinchau asamtai, timiá pengkeraitai tu nintimtakrikia, nekasar nekau aints artinuitji.

¹¹Aints paan nintimniuka untsuri musaach iwiaaku pujustinuitai.

¹²Aints paan nintimin wajasamtaikia, ni paan nintimtairi niin yaingtinuitai.

Antsu wishiikiartin ningki wakerak wait wajaktinuitai.

¹³Aints nintimchau ainauka nuwa aujmakratinua nunisarang, tura nuwa nintinchawa nunisarang, turasha nuwa nekachua nunisarang ainawai. ¹⁴Nu nuwaka yakta yakiinini jea aarin keemtainam keemas, jiimiaj pujuwitai. ¹⁵Tura aishmang tupin jintanam nangkaminaunka untsuk: ¹⁶Natsa nintinchau ainautiram, juni winiram wayaataram tusa, nintimchau ainaun untsuawai. ¹⁷Yumi kasamkamuka nekas timiá yuminuitai. Tura yutai uukmau yuatniuka timiá pengkeraitai tawai. ¹⁸Tura ipiakratamun anturina nuka: Nu nuwaka

jakau matsamtainum jukartinuitai, tusarka pengké nekainatsui.

Salomonka nuikiartukmauri chicham ainau

¹Uchi pengkerka aparin waramtikui. Antsu uchi nintinchauka nukurin wake mesemtikui.

²Aints chikich aintsun anangka kuikiarin achiawa nuka waraschatnuitai. Antsu anangmichu

ainauka tuke jakatniunmaya uwemrartin ainawai.

³Apu Yus pengker nintinniunka tsukajai wait wajakti tusangka tsangkatkashtinuitai.

Turasha pase nintiniuka ni wakeramurinak najanati tusa suritkatnuitai.

⁴Naki aints takatan nakitakka kuikiartichu wajastinuitai. Antsu nakichuka nukap

takakmawa nuka ni takatrijai kuikian achiktinuitai.

⁵Aints nintip esat aing ajan takakmak pujakka ni araamurin ukunam juuktinuitai. Antsu chikich aints

esati ni araamuri tsamak yanchuk juukmin aing, tsawai kanú tepa nuka natsanpiakuitai.

⁶Aints pengker nintiniun Yus ni pengkerin susatnuitai. Antsu pase aints tuke maanitan

wakerau asa wait wajastinuitai.

⁷Aints pengkeran turina nuna turamurin pachisar chikich aints ainau kajinmatsuk chichau

ainawai. Antsu pase aintsu naarin pachisar chikich aints ainauka namang kaurua

nunisarang kajinmaktasar wakerinawai.

⁸Aints paan nintimua nuka chikicha akupamurin umirkatnuitai. Antsu aints nintinchau

nangkami chichaa nuka itiurkachminnum jeatnuitai.

⁹Aints tumaashmiatsuk pujauka chikich ainaun shamtsuk: Akirkata turutiarti tusangka

pujatsui. Antsu aints pase nintimias pujauka wait wajaktinuitai.

¹⁰Aints pase nintimias mitsuma nuka chikich ainaun pase nintimtikratnuitai. Tura aints

nangkami chichaa nuka itiurkachminnum jeatnuitai.

¹¹Aints pengker chichaa nuka entsa pukuni tuke pujutan sukartinua tumawaitai.

Antsu aints pase chichaa nuka maaniatniun jukitnuitai.

¹²Aints chikich aintsun kajerak pujauka maanitan wakerawai. Antsu aints

chikich ainaun aneakka, chikicha tunaari untsuri au wainiat tsangkurui.

¹³Aints paan nintimua nuka pengker nintimias chichastinuitai.

Antsu aints paan nintimtsuk pujuinaunka nintimrarti tusar awatrartinuitai.

¹⁴Aints paan nintimina nuka nekau aints ainawai. Antsu aints nintimchau

chichaina nuka itiurkachminnum jeartinuitai.

¹⁵Kuikiartin ainauka ni kuikiarijai ayamrumakartinuitai. Tura kuikiartichu ainauka

itiurkachminum jear yamrumichu ainawai.

¹⁶Aints tunaun takachu ainauka tuke iwiaaku pujusartin ainawai. Antsu tunaun

takau ainauka ni tunau takasmaurijai metek wait wajakartin ainawai.

¹⁷Aints chikich aintsun chicharkam, nekas pengker antukka jinta tuke iwiaaku pujustinnum jeatnuitai. Antsu chikich aints chikich aintsun chicharkamsha, pengké antichua nuka jinta mengkakatniunam

wetinuitai.

¹⁸Waitrin ainauka nintijai kajeenayat, ni jangkejai pengker chichau ainawai.

Tura chikich ainaun nangkamiar tsanurmina nuka nintimchau ainawai.

¹⁹Aints nukap chichauka nukap nuwaktinuitai. Antsu aints paan nintimias pujauka jumchik chichastinuitai.

²⁰Pengker nintiniu chichamengka kuikian nangkamasang pengkeraitai.

Antsu pase aints ainau nintimina nuka pengké nangkamiar nintiminawai.

²¹Pengker nintintin ainauka untsuri aintsun nuininawai. Antsu nintinchau ainauka

paanka nintimtsuk pujuinau asar, jakatniunam weenawai.

²²Apu Yus ni pengkerijai aints ainaun nekas pengker awajsatnuitai.

Tura wake mesekmaunka susashtinuitai.

²³Aints nintimchauka pase takatan takaakka waraawai. Tura aints paan

nintiniuka ni nekaamurijai warastinuitai.

²⁴Sapij aints ainauka tuke sapijmiakar pujuinau asar, sapijjai wait wajakartinuitai.

Antsu tunaun takachu ainaun Yus ni wakerina nunaka susatnuitai.

²⁵Katurang wári nangkaamawa nunisang pase aints ainau wári mengkainawai.

Antsu Yusen umirin ainauka tuke pujusartin ainawai.

²⁶Aints nakia nuka akupkamaitiat wetan nakitau asa, churinun apawa nunisketai.

Tura ji mukuntiuri jiinam engkema najamniua nunisang niin akupniuka itit nintimui.

²⁷Yusen umirin ainauka untsuri musach pujusartin ainawai. Antsu pase aints ainau

musaach nukapka pujuschartin ainawai.

²⁸Pengker nintimin ainauka tuke warasar pujustiniun nakainawai. Tura pase aints ainauka

ni wakerina nunaka nangkamiar nakasar wait wajaktinnum weartinuitai.

²⁹Apu Yus pengkeran turinaunka ayamruktinuitai, antsu pasen turinaunka mengkaktinuitai.

³⁰Yusen nintimsar pujuinauka mengkakachartin ainawai.

Antsu pase ainauka ni nungkarin tuke pujuschartin ainawai.

³¹Yusen nintimsar pujuinauka tuke paan nintimsar chichainawai.

Tura pase nintintin ainau tuke pase chichainau asaramtai, chikich aints ainau

inajin charinawa nunisarang itiatkataram tusar, ni chichamen antutan nakitinawai.

³²Yusen nintimsar pujuinauka antujamniaun chichainawai. Tura pase nintitin

ainauka aya pase chichamnak chichainawai.

¹Meram nekapmatai ainau metekchau arti tusangka Apu Yuska nakitawai.

Antsu tuke metek arti tusa wakerawai.

²Wikia miajuitjai tumamin ainaun chikich aints ainau nakitinawai.

Tura jampechu ainauka paan nintimrartin ainawai.

³Aints pengker nintimsar pujuinauka ni turinamurinka tuke pengker nintimsar turinawai.

Antsu jimiar nintimtin ainauka jimiaran nintimu asaramtai, mengkakartin ainawai.

⁴Yus mash aints ainau takatrin tura nintimaurincha itiur ainawa tusa jiistin kintia jeamtai, nu aintsu kuikiaringkia niin pengké yaingchatnuitai. Antsu Yusen nintimsar pujuinauka tuke jakatniunam

wetsuk uwemrartin ainawai. 11.4 Rom 14.10-11

⁵Tunau takachu ainauka pengker nintimu asar, jinta tupin aa nuni wekaasartin ainawai. Antsu tunau takau ainauka ni tunaarijai iyainawai.

⁶Aints Yusen nintimsar pujuinauka tu nintimu asar, angkanmamtikiatin ainawai.

Antsu anangkartin ainauka ni pase wakeramurijai ejatkanam achikmawa nunisarang ainawai.

⁷Aints Yusen nintimtichu jakamtai, ni wakeramuri mash amukaru asaramtai, jakausha ¿warinak nakasat?

⁸Yusen nintimsar pujuinauka kuntuchu pujuinamtai, Yus niin angkan awajsartinuitai.

Tura Yusen nintimtichu ainauka kuntuchu pujusar wait wajaktinnum weartiniutai.

⁹Pase aints ni tunau chichaamurijai chikich aints ainaun meseawai. Tura pengker nintitin

ni nekaamurijai chikich aints ainaun angkanmamtikiatnuitai.

¹⁰Pengker nintintin ainau takatrijai emtikiar pengker wajainamtai, nu yaktanam pujuinauka warainawai. Antsu pase aints ainau jainamtaikia, aints mash warainawai.

¹¹Pengker nintintin ainau yayamujai aints ainau yaktan eemtikin ainawai.

Antsu pase aints ainau ni pase chichaamurijai nu yaktanka mesen ainawai.

¹²Aints nintimchauka ni irutkamurin pachis pase chichaayi. Tura pengker nintiniuka chichatsuk pujuuyi.

¹³Aints aujmakratin ainau chichaman jukiar, etserkaip tinamaitiat, pachitsuk etserkini wekain ainawai. Antsu aujmakartichau ainauka chichaman antukariat etserchau ainawai.

¹⁴Aintsu apuri ni aintsrin tu pujustaram tutsuk pujamtai, nu yaktanmangka itiurkachmin nukap atinuitai. Antsu chicharkartin nintip untsuri pujusar, ni yaktarin emtikiartinuitai.

¹⁵Aints wainchatai chikich aintsun chicharak: Wikia tumaashitjai. Antsu

akiimiakchamin asamtai, wina tumaashruka akiimiaktrukta, ukunam akikmijinam tamataikia,

ni ayu tinu asa, nekas itit nintimtuminiutia. Antsu chikich aints: Atsa, turashtatjai tusa

nakitnua nuka itit nintimtsuk angkan pujustinuitai. 11.15 Prov 6.1-5

¹⁶Tsangka nuwanka pengker nintimtusmin ainawai.

Tura aintsun takamtikin ainauka kuikian nukap achiinawai.

¹⁷Aints wait anengkratnuka ningki pengker awajmamui.

Antsu aints wait anengkratchauka ningki timiá pase awajmamui.

¹⁸Aints anangkartin asa, chikich ainaun anangkak kuikian achiawai. Antsu pengke aints

pengkeran takaawa nuka ukunam tuke pengker pujustinasha jukitnuitai.

¹⁹Aints pengker nintitin ainauka tuke iwiaaku pujusartin ainawai.

Antsu tuke pase turuki turuki weenauka tuke jakatniunam jeartinuitai.

²⁰Apu Yus pase nintintin ainaun nakitawai. Antsu tunaarinchau ainaun jiis waraawai.

²¹Pase aints ainauka nekasar ni wait wajaktintrin jukiartin ainawai.

Antsu pengker nintintin ainauka angkan pujusartin ainawai.

²²Nuwa shiirmawach ayat, nintinchau pujakka, uwejnum uwejtai kuri najanamun

kuchi nujin nujkamua nunisketai.

²³Aints pengker nintintiniu wakeramuri tuke pengker artinuitai.

Antsu pase aints ainau ni wakeramurijai tuke suwiran sumamtikinawai.

²⁴Aints surichu ni waririn suritsuk chikich aints ainaun suinayat,

ni waririn nuna nangkamasarang untsurin jukiartin ainawai.

²⁵Aints surichu kuikiartin wajastinuitai. Tura aints chikichan ni yuumamurin sua nusha

ni yuumamurincha tuke wainkatnuitai.

²⁶Aints trigon uuk ukuawa nunaka usukrartin ainawai. Antsu aints ainau: Wait aneasam

sumamtikrukta tinamtai, suritsuk surawa nu aintsnaka: Yus yainmakti tinawai.

²⁷Aints pengkeran turataj tusa tu nintimias pujaunka pachisar: Nuka nekas pengkeraitai tiartinuitai.

Antsu aints tunaun turatas wakerakka, nekas pase pujustinuitai.

²⁸Aints kuikiartin: Wina kuikiarjai yuumatsuk pujajai tauka itiurkachminnum iyaartinuitai.

Tura asa numi nukee kaarua nunisketai. Antsu pengker nintinniuka numi nukee samek aina nunisketai.

²⁹Aints ni jeen pujuinaun wait anentsuk pujauka ukunam ningki juwaktinuitai.

Tura aints nintinchauka tuke aints paan nintimniu inatiri atinuitai.

³⁰Pengker nintintin ainauka numi nerek wajawa nunisarang ainawai. Tura asar tuke iwiaaku

pujusartinuitai. Tura chikich ainaun: Yus umirkata. Turakmeka uwemratatme tinu ainauka

nekasar paan nintimsar pujuinawai.

³¹Yusen umirkaru ainauka ju nungkanam ni turamurijai metek pengkeran juwinamtai, Yusen

umirkacharu ainauka tunau asar, ni turamurijai metek wait wajakartiniun juinawai. 11.31 1 Pe 4.18

¹Aints nuimiartasar wakerina nuka nekaatniuncha nukap wakerinawai.

Antsu aints chicharmasha antutan nakitina nuka nintinchau ainawai.

²Pengkeran turina nunaka Apu Yuska: Ame turame nuka pengkeraitai tawai.

Antsu anangkartinun: Ame turame nuka paseetai tawai.

³Aints tunaun takaina nuka tuke iwiaaku pujuschartin ainawai. Antsu pengker

nintintin ainauka numi kangkaptuk uwerchamin wajaina nunisarang ainawai.

⁴Pengker nuwaka aishrin pengker awajui. Antsu nuwa paseka aishri kunchin kaamtikua nunisketai.

⁵Aints pengker nintintin ainauka tuke pengkeran nintiminawai. Antsu pase aints

ainauka chikich ainaun anangkataj tusar nintiminawai.

⁶Pase aints ainauka: Itiurkanak aintsun maatnuitja tu nintimsar chichainawai.

Antsu pengke aints ainau ni chichamejaingkia aints ainaun uwemtikratasar wakerinawai.

⁷Pase aints ainau tuke tunaun nintimin asar, mengkakartin ainawai.

Antsu Yusen nintimsar pujuinauka tuke pujusartin ainawai.

⁸Aints paan nintimratniunka ni nekamurijai metek pengker awajsartin ainawai.

Antsu nintimchau ainaunka aya tuke nakitin ainawai.

⁹Aints chikich aintsun pachis mianchawaitai tu nintimsar pujuinau wainiat,

nu aintsu inatiri niin pengker umirmataikia, nekas pengker pujawai. Tura chikich aints

miajuitjai tumamua nuka yutan yuumak pujakka nekas mianchawaitai.

¹⁰Pengker nintintin ni tangkuri warínia yuumina nunaka nekawai.

Antsu pase aints tangkurin pengké wait anentsuk pase awajui.

¹¹Aints ni ajarin pengker takakmak pujauka yurumkan nukap takakui.

Antsu aints nintimchauka ajarin takakmatsuk aya nangkami wekaakinij wajawitai.

¹²Pase aints ainau ejatkanam achikmawa nunisarang pasenak turatasar wakerinawai.

Antsu pengker nintintin ainau turamuringkia numi nerektinua nunisarang ainawai.

¹³Pase aints ainauka wait chicham ainaujaingkia jingkiamua nunisarang ainawai.

Antsu pengker nintintin ainauka itiurkachminumian jiinkiar angkan pujusartinuitai.

¹⁴Aints ni pengker chichaamurijai metek pengker aina nuna jukitnuitiai. Turasha ni takaamurijai metek, tura ni yuumamurijai metek waring achat mash jukitnuitiai.

¹⁵Aints nintimchauka ningki nintimias: Wi turaja nuka mash pengkeraitai tu nintimui. Tura aints paan nintimuka chikich aintsu chicharkartamurin anturui.

¹⁶Aints nintimchau te wári kajektinuitai. Antsu aints pengker nintimtikiartinka

chikich aints niin katsekeamtaikia: Ningki titi tusa pachiatsui.

¹⁷Aints tuke nekas chichaman etserniuka pachitsuk nekas chichaman etserniayi.

Antsu chikich aints wait chichaman etserin asa, tuke wait chichaman etserniayi.

¹⁸Aints wait chichaman chichaa nuka chikich ainaun nangkijai ijuawa nunisang

waitkatnuitai. Antsu paan nintimtikiartinu chichamengka tsuakan nunisketai.

¹⁹Aints nekas chichaman chichaa nuka tuke pujustinuitai.

Tura waitrin ainauka nukapka pujuschartin ainawai.

²⁰Pase nintintin ainauka tuke chikich ainaun anangkinawai.

Antsu maanichu ainauka pengker nintimsar pujuinawai.

²¹Pengker nintintin ainauka pasenaka wainkachartin ainawai. Antsu

pase aints ainauka tuke itiurkachminnum pujusartin ainawai.

²²Apu Yus waitrin ainaun kajerawai. Antsu tuke nekas aa nuna nintimsar pujuina nunaka jiis waraawai.

²³Aints ainau iniinam, nintipka ni nekamurin etserniayi. Tura aints nintimchawa nuka

iniinachmaitiatang pachitsuk nangkami chichaawitai.

²⁴Aints kakaram takakminak pujuinauka chikich aints ainaun nepetkartin ainawai.

Antsu naki ainauka chikich aintsu inatiri wajasartinuitai.

²⁵Aints napchau nintimias pujakka jakamin nekapeawai. Tura pengker nintintin ainauka

antujamniaun chichainau asar, chikich ainaun waramtikinawai.

²⁶Pengker nintintin ainauka chikich ainaun jintintiamin ainawai.

Antsu pase aints ainau waaktin jintan amainau asar mengkakartin ainawai.

²⁷Aints nakia nuka kuntinun maa itayat iniaratniunka nakitnuitai. Antsu aints asumpia nuka kakaram takakmau asa, nukap warirtin atinuitai.

²⁸Yusen umirinak pujuinauka, tuke Yusnum iwiaaku pujusartinuitai. Tura asar tuke jakatniunamka weenatsui. Antsu Yusen nintimtsuk pujuinauka tuke jakatniunam wenawai.

¹Uchi nintimuka ni apari chicharam antuktinuitai.

Antsu wishikiartinka chikich aints chicharmasha pachiatsui.

²Pengker chichamtin ainauka ni chichaamurijai metek pengker aa nuna wainkartin ainawai.

Antsu chikich ainaun anangkinauka aya mangkartutnak nintiminawai.

³Tunau chichamnaka nakitajai tinauka pengker awajmaminawai. Antsu aints

nintimtsuk nukap chichainauka, ningki mesmamrartin ainawai.

⁴Nakia nuka aya wakeru pujuwitai. Antsu asumpia nuka takakmak pujau asa,

yuumatsuk pujawai.

⁵Aints waitrichuka wait chichaman nakitnuitai. Tura pase aintsnaka chikich

aints ainau nakitinau asaramtai, nuka natsanpiaku pujuwitai.

⁶Pengker nintintin pase turatniunka nakitau asa, angkan pujuwitai.

Antsu pase aintsnaka ni tunaaringkia mesratnuitai.

⁷Aints kuikiartichu irunuka kuikiartinua tumau pujuinawai. Tura chikich aints ainau

kuikiartichua tumau pujuinayat, kuikiartin ainawai.

⁸Kuikiartinun ni kuikiari ayamruktinuitai. Tura kuikiartichu ainau kuikiari

atsau asamtai, itit awajsacham pujuinawai.

⁹Yusen umirinauka namparing kapaawa nunisarang ainawai.

Antsu pase aintska namparing keemakmaitiat wári kajinua tumawaitai.

¹⁰Wikia miajuitjai tumamaina nuka aya maanitan chichau ainawai. Antsu

paan nintimtikiartin ainauka chikich aintsu chichamen anturin ainawai.

¹¹Anangkartinu kuikiari wári mengkawai. Antsu aints tuke takakmak,

kuikiarin japtsuk yaitas irumrawa nuka ukunam kuikiartin wajasminuitai.

¹²Aints ni nakamurin wári wainchakka wake mesek pujuwitai.

Antsu aints ni nakamurin wankangka nukap waraawai.

¹³Aints chichaman umitan nakitakka, ningki wait wajaktinnun jukitnuitai.

Antsu aints chichaman antuk umiakka, pengkeran wainkatnuitai.

¹⁴Aints pengker nintintinu nuikiartamun antuk umiakka, tuke iwiaaku pujustinun wainkatnuitai.

Kame, jinta tuke jakatniunam jeatnua nuna amatsuk angkan wekasatnuitai.

¹⁵Aints chikich aintsjai pengker chichasar pujuinauka mai metek pengker nintimtunisar

pujuinawai. Antsu anangkartin ainauka itiurkachminnum wenawai.

¹⁶Nintipka ni nekaamurijai takakmawai. Antsu aints nintinchauka

ni nintimchau takaamurin paan wainmamtikui.

¹⁷Pase aints chicham akupkamun tenap etserchauka itiurkachminnum jeatnuitai. Antsu chichaman umiuka

chicham akupkamun tenap etseruka chikich ainaun pengker nintimtikratnuitai.

¹⁸Aints chicharmasha antichuka kuikiartichu asa, natsanpiaku pujuwitai. Antsu chikich aints chicharkam antukamtikia, aints ainauka: Nekas pengker aintsuitai tusar nintiminawai.

¹⁹Aints ningki nintimias: Nuna turatasan wakerajai tusa, nuna mash umik warastinuitai.

Tura nintimchau ainauka ni pase turutirin inaitan arantak nakitinawai.

²⁰Aints nekau ainaujai tsanias pujauka nekau aints wajastinuitai.

Antsu netse ainaujai tsanias puja nuka wait wajaktinuitai.

²¹Tunaarintin ainauka pase pujusartin ainawai.

Antsu Yusen umirkaru ainauka pengker pujusartin ainawai.

²²Aints Yusen umirin jakauka, wariri ainaun ni tirangki jukiarti tusa ukuktinuitai.

Tura pase aints kuikiartin jakauka, wariri ainaun chichaman umiu jukiarti tusa ukuktinuitai.

²³Kuikiartichu ajarin árak ainau untsuri tsapainawai.

Antsu tunau nekamin atsau asamtai, kuikiarin pachitsuk atankiartin ainawai.

²⁴Aints ni uchirin chichartsuk pujakka, uchirin aneatsui.

Antsu uchirin aneakka, pengker pujusti tusa chicharkatnuitai. 13.24 Heb 12.7, 8

²⁵Aints tunaun turachuka ni yutairin wakerak pachitsuk yuawai.

Antsu pase nintiniuka ni yutairin tunau nintimias yuak tutuarchamnawaitai.

¹Nuwa pengker nintimtikiartin ni weari ainaun kiakartinuitai.

Antsu nuwa nintinchauka ni wearinka kiakaatsuk aya mesertinuitai.

²Aints tunaun nakitakka Apu Yusen pengker awajui. Antsu aints

tunau jintan amak wekaa nuka Yusnasha pengkerka awajtsui.

³Aints netse: Miajuitjai tumamui. Tura paan nintimtikiartin ainauka

ni chichamejaingkia chikich ainaun ayamrumakartin ainawai.

⁴Jacha atsamtaikia, yurumak atsutnuitai. Antsu jacha amatikia, yurumak nukap awai.

⁵Aints waitrichuka nekas aa nunak chichaawai. Antsu waitrinka aya tuke waitan etserniayi.

⁶Wishiikiartinka: Wikia nekau aints ataj tayat, nekau aints wajastatkama tujintawai.

Antsu nintipka: Wikia nekau aints ataj ta nuka kakarmachu nekau aints wajastinuitai.

⁷Aints nintimchau nekatiri atsau asamtai, nijai tsaningkiam pujakmeka,

nekau aintska wajaschatnuitme. Tura asamtai nijai tsaningkaip.

⁸Aints paan nintimnuka: ¿Wikia itiur pujaja? tusa paan nintimratnuitai.

Antsu aints nintimchauka nintimchau ayat: Wikia nintipitjai tusa anangmamui.

⁹Netse ainauka ni tunaarin pachisar wishikinawai. Tura anangmichu ainauka

mai nuamtak pengker nintimtunisar pujuinawai.

¹⁰Aints napchau nintimias pujakka, ningki ¿waruka tu pujaja? tusa nekamawai.

Kame, ni waraakka aints wainchati ¿waruka timiá waraawa? tusangka nekaachminuitai.

¹¹Pase aintsu jee wári mesertinuitai. Tura anangmichu kuikiari jumchik ayat,

anangtsuk irumramu asamtai, yaitas ekemkatnuitai.

¹²Yusen umirkacharu ainau ningki nintimsar: Ju jintan wekaaknaka nekasan tupnik jeatatjai tu nintiminayat,

nu jintaka jakatniunam jeakui tusarka nintiminatsui. 14.12 Prov 16.25

¹³Aintsu ninti najaimiayat, nangkami wishirtinuitai. Turasha aints ainau yamai warainayat, ukunam juutiartinuitai.

¹⁴Netse aints ainauka ni turamurijai metek wait wajakartinuitai.

Tura pengke aints ainauka ni turamurijai metek warasartinuitai.

¹⁵Aints uchia nunisang nintimuka ni antukma nunaka mash nekasaintai tawai.

Antsu nintipka: ¿Wikia tuning wekasataj? tusa nintimias wekasatnuitai.

¹⁶Aints paan nintimtin: Wikia tunaunaka nakitajai tusa, Yusen umirak pujawai. Antsu netseka:

Wi wakeramurnaka pachitsuk turamnawaitjai tu nintimtumas, chikich ainaunka pengké pachiatsui.

¹⁷Aints wári kajeakka paanka nintimtsuk pujuwitai. Turasha pase aints ainaunka nakitrartin ainawai.

¹⁸Aints nintimchau ainauka netse aints ainau turina nunasha turinawai. Tura nintip ainauka ni nekaina nuna nangkamasarang nukap nekaatasar wakerinawai.

¹⁹Yusen nintimtichu ainauka ukunam pengke aints wajainamunam tsuntsumruawartinuitai. Tura pase ainau Yusen umirkaru jeen jear, waitinam tsuntsumruawartinuitai.

²⁰Aints kuikiartichun ni irutkamuri ainau jiitnaka nakitinawai. Antsu kuikiartinu amikri untsuri ainawai.

²¹Aints ni irutkamurin nakitakka tunaun turawai.

Antsu kuikiartichu ainaun wait anenta nunaka Yus waramtiksatnuitai.

²²Aints: Wi paseen turatjai, tu nintiminauka nekasar mengkakartin ainawai. Antsu:

Wi pengkeran turatjai, tu nintiminaunka wait anentrartin tura pengker awajsartin ainawai.

²³Kakaram takakmin ainauka pengkeran wainkartin ainawai.

Aya chichaa pujuinauka kuikiartichu wajasartin ainawai.

²⁴Aints paan nintimsar pujuinauka tawaaspan tsengkrakina nunisarang wajainawai.

Antsu nintimchau ainauka tuke nintimchau asar, tu jakartin ainawai.

²⁵Aints waitrichuka chikich aints ainaun angkanmamtikratnuitai.

Antsu aints anangkartinka tuke wait chichaman etserniayi.

²⁶Apu Yusen umirkaru ainauka niin pengker awajsartin asaramtai, ni uchiri ainausha

nuna wainkau asar, nu nintimaurijai tuke sapijmiatsuk matsamsartin ainawai.

²⁷Apu Yusen umirkaru ainauka tuke pujusartin ainawai. Kame, aints ainau tuke sapijmiakar

jingkiamua nunisarang jakatniunam weenawa nuka tuuka pujutsuk, angkanmawaru ainawai.

²⁸Apu inamurin aints untsuri pujuinamtaikia, apuka pengker nintimias pujustinuitai.

Antsu aints jumchik iruninamtaikia, ni inamuri mengkakatnuitai.

²⁹Aints wári kajechunka wainkar, chikich aints ainau: Nuka nekas nekau aintsuitai tinawai.

Antsu aints tewari kajeuka ni netse nintaimtairin paan inakmawai.

³⁰Angkan pengker nintimias nekapratniuka aintsu namangken pengkermamtikui. Antsu aints chikichnaun waring achat wakerak puja nuka ni namangken, tura ukunchincha pasemamtikratnuitai.

³¹Aints kuikiartichun wait anentsuk puja nuka mash aintstin najatmamia nuna pengkerka awajtsui.

Antsu aints kuikiartichun wait anentak pengker awajuka Yusnasha pengker awajui.

³²Pase aints ainaun ni tunaari mesratnuitai. Tura Yusen umirkaru ainau jakatin kintiari jeamtai,

Nekasan Yusnumapi pujustinuitjai tusar pengker nintimsar jakartinuitai.

³³Aints paan nintimias puja nuna nintin nekati pujurui.

Tura nintimchau ainau nintinka nekati pengké atsawai.

³⁴Aints pengker nintintin ainauka nekasar ni nungkarin eemtikiatin ainawai.

Antsu aints ainau tunaun turina nuka natsanpiaku ainawai.

³⁵Apu inatiri pengker umiuka ni apurin pengker nintimtikui.

Tura inatiri natsanpiaku turamtaikia, apuri niin kajerkatnuitai.

¹Chicham kakaram atsamtaikia, kajeamuka mengkakatnuitai. Antsu pajaki aimkamu amataikia,

pajaki aimkamuka nuka nuna nangkamasang kajektinka nukap jurumaji.

²Aints paan nintimias puja nuka nekau aintsu chichameng chichaawai.

Tura aints nintinchawa nuka nintinchau chichaawai.

³Apu Yus mash nungkanmaya pase aints ainaun tura pengker aints ainauncha jiij pujurui.

⁴Aints pengker chichaawa nuka numi sameka nunisketai. Tura tsuakan nunisang asa, jau ainaun

pengker awajsatnuitai. Antsu anangkartinua chichamengka aintsu wakanin mesratnuitai.

⁵Uchi netse apari chichamen antutan nakitawai. Antsu chikich uchi

ni apari chichamen pengker antuk umirua nuka nekas nintipitai.

⁶Aints anangkartichu jeenka warinchuka untsuri irunui. Antsu pase aintska ni kuikiarin nangkami ajapui.

⁷Aints paan nintimuka ni pengker nekamurin chikich aints ainaun nekamtikiatnuitai. Antsu aints nintimchau pengker nekamuri atsau asamtai, chikich aints ainaun nekamtikiatatkama tujintawai.

⁸Apu Yus pase aints ainau ni tangkurin maawar surusarti tusangka wakeratsui.

Antsu niin umirkaru ainau seamurin antuktas wakerawai.

⁹Apu Yus pase aints ainau turutirin jiitnasha nakitawai, antsu tunaarinchau pujusartas wakerinaun aneawai.

¹⁰Aints Yuse jintin wekaayat, nunia ukuawa nunaka Yus antukat tusa, wait wajaktiniun susatnuitai.

Kame, aints Yuse chicharkartamurin nakita nuka tuke jakatniunam wetinuitai.

¹¹Jakau ainau iwiarsamurin tura ni wakani matsamtairisha Apu Yus paan wainui.

Tura asamtai ¿aintsu nintimtairincha itiur nekarashti?

¹²Aints katsekmin: Wina chichartukarti tusanka nakitajai tawai.

Tura asa paan nintintin ainaujaingka tsanitian nakitawai.

¹³Aints nintijai waraak pujamtaikia, chikich aints ainau yapiin jiisar: Nuka kuntu nintimias pujawai,

tusar nekaawartin ainawai. Tura wake mesekar pujuinauncha nunisarang nekaawartinuitai.

¹⁴Aints paan nintimias pujauka nukap nekaatas wakerawai.

Antsu nintimchau ainauka tuke nintinchau chichaman antuktasar wakerinawai.

¹⁵Aints kintajai metek wake mesek pujawa nuka tuke itiurkachmin nintimui.

Antsu aints tuke waraak puja nuka nampernum pujawa nunisang nekapeawai.

¹⁶Aints kuikiartichu kuikian nukap takakchau ayat, Apu Yusen umirkauka pengker nintimias pujustinuitai. Antsu aints kuikiartin ayat, tuke itiurkachminnum pujus, pengker nintimias pujustatkama pengké tujintawai.

¹⁷Aints ainau yurumkanak yuwinak, kajernaitsuk aneenisar pujuinauka nekasar pengker pujuinawai.

Antsu chikich aints ainau tuke namangken apatsuk yuwinayat, surimshim yuwinak kajernaikiar pujuinauka pengkerka pujuinatsui.

¹⁸Aints wári kajeuka maanitan wakerawai. Antsu aints wári kajechuka: Maanikairap tawai.

¹⁹Aints nakia nuna jintingkia jangki irumramua nunisang nekapeak takatan nakitnuitai.

Antsu nakichuka paka tura wangkaram jinta nunisang takatrin nekapeawai.

²⁰Uchi nintimniuka ni aparin waramtikui. Tura uchi nintimchauka nukurin waramtiktsui.

²¹Aints nintinchauka ni nintinchau turamurin nintimias wararsatnuitai. Tura

nintipkia ningki nintimias: ¿Itiur pujaja? tusa pase turamuri amataikia, nuna inaisatnuitai.

²²Jintinkartin atsamtaikia, aints ainau ni turatniurin umiktasar wakerina nunaka umikchartinuitai.

Antsu jintinkartin untsuri amataikia, aints ainau ni turatniurin umikiartin ainawai.

²³Aints ainau inintrinamtai, nekau aints nekas pengker aimkamurin antukar warasartinuitai.

Kame, aints aneachmau antujamnau chichaamtai, ¡nekas pengkerapita! timinuitai.

²⁴Aints paan nintimina nuka jinta tuke yakí iwiaaku pujustinnum wekainawai.

Tura asar jinta tuke jakatniunam jeatniun tuntupeawar ukuinawai.

²⁵Aints jampesarang: Miajuitjai tumamina nuna jeen Apu Yus mesratnuitai.

Antsu waje ajarin atankicharti tusa wainkatnuitai.

²⁶Pase aints ainau nintaimtairingka Apu Yus nakitnuitai.

Antsu aints ainau paseka nintimtsuk chichainamurin antuktas wakerawai.

²⁷Aints nukap warirtin wajastaj tu nintimias pujauka ni weari ainaun itit awajui. Antsu chikich aintsun kuikian suak: Ame nu aints pachisam wait chicham ujakta tamaitiat, nunaka nakitajai ta nuka Yusnum pujustinuitai.

²⁸Pengker nintintin ainauka inintramun aimkartas, nuna eemak nintimratjai tusar aimtsuk wajainawai. Antsu pase aints ainau nintimtsuk aya pase chichamnak chichainawai.

²⁹Apu Yus niin nintimtichu ainaun tuntupeawai. Antsu niin umirkaru ainau seamurin anturui.

³⁰Aints pengker nintimias jiimsatnuringkia aints ainaun waramtiksartin ainawai.

Turasha pengker chicham aina nuna antinaunka kiakar waramtiksartin ainawai.

³¹Chicharkartin iwiaaku pujustiniun chichaman chichaamtai,

aints nuna anturak pachiawa nuka nekas nekau atinuitai.

³²Aints chikich aintsun nuiniartas chicharmaitiat, antutan nakitniuka ningki wiasmamkatnuitai.

Antsu aints chichamtai, antuk pengker umirua nuka nekas anturnuitai.

³³Nekau aints wajastasar wakerinauka Yusen pengker awajsatniunka nuiminawai.

Turasha: Wina pengker awajtursarti tinu ainauka eemkar: Wikia mianchawaitjai tiartinuitai.

¹Aints ainautikia: Nunaka turatatjai tarining, Yuska aintsu turatniuri

tu ati tusa ningki tsangkatkatnuitai.

²Aints ningki nintimias: Wi turaja nuka mash pengkeraitai tau wainiat,

¿waruka tu nintimua? nuka Yusek nekawai.

³Waring achat mash ame turatasam wakerame nuka Yusrum ujakta.

Yus wakeramtaikia, ame turatasam wakerame nunaka mash tsangkatramkatnuitai.

⁴Yuska mash iwiaaku ainauka wina umirtukarti tusa najankauwitai.

Tura asa aints tunaun takainauka wait wajaktiniun susamij tusa umikuitai.

⁵Aints miajuitjai tu nintimtumasar pujuinaun Yus nakitawai.

Tura ni kintiari jeamtai, ni wait wajaktintrin susatnuitai.

⁶Nekas Yuse wait anengkratairijai aintsu tunaari tsangkuramuitai.

Tura asamtai aints Yusen umirak pujauka tunaun inaisatnuitai.

⁷Aints Yusen pengker umirmatai, ni nemase ainauka nu aintsjai kajernaitsuk pujusarti tusa nintimtikrartinuitai.

⁸Aints ni takatrin takakmak pujus, kuikian jumchik achia nuka nekas pengker nintimias pujustinuitai. Antsu aints chikich aints ainaun anangkak kuikian nukap juwauka pengker nintimsangka pujuschatnuitai.

⁹Aints ainautikia iik wakerakur: Nunaka turatatjai tarining, nuna turati ta nuka Yusketai.

¹⁰Yus ta nujai metek aintsu apuri umiktinuitai.

Tura nuna nangkamaska aintsun wait wajaktinun susashtinuitai.

¹¹Meram nekapmatai ainau Yuska metek arti tusa wakerawai.

Tura asa nekapmatai metekchau ainaunka arantak nakitawai.

¹²Apu ainau ni aintsri tunaun turuwarti tusarka wakerinatsui. Antsu pengker pujusarti tusar wakerinawai.

¹³Aints ainau nekas chichaman chichainamtai, aintsu apuri ainau warainawai.

Tura asar aints ainaun wainkar: Nuka pengker aintsuitai tinawai.

¹⁴Aintsu apuri kajerak: Nu aints maataram timinuitai. Tura asamtai apu kajerkamuri atsuti tusar, nekau aints ainau yaitasar: Nuka turuwaip tusar tiartinuitai.

¹⁵Aints ainau ni apuri waraamurin wainkar: Iikia jakashtatji tinawai.

Tura asamtai apu pengker nintimias pujakka, yumi arakan tsakatmawa nunisketai.

¹⁶Kuri akik aa nuna nangkamasang paan nintimratniuka timiá pengkeraitai. Tura kuik timiá wakerumi ayat, pengker nekatniuka nuna nangkamasang timiá pengkeraitai.

¹⁷Yusen umirkaru ainau tunaun tuntupeawartas wakerinawai.

Aints tumau ainauka ni pujutri itiurak aa tusar anearar pujuinawai.

¹⁸Aints: Miajuitjai ta nuka itiurkachminnum jeatnuitai. Tura meemin ainauka aneachmau tunaunum iyaarartin ainawai.

¹⁹Miajuitjai tumamin ainaujai tsaningkiar kuikiartin wajasaruka pengkerka pujuinatsui. Antsu kuikiartichu ainaujai tsaningtasar wakerinauka timiá pengker pujusartin ainawai.

²⁰Yuse chichamen nintiminauka pengker aa nuna wainkartin ainawai.

Tura Apu Yusen nintimsar pujuinauka nekasar warasartin ainawai.

²¹Aints paan nintimin ainaun pachisar: Nintipitai tinawai. Tura

yaitasar chichainauka aints ainaun pengker nuinin ainawai.

²²Aints paan nintimin ainauka entsa pukunia nunisarang ainawai.

Antsu nintinchau ainaun pengké jintintachminuitai.

²³Aints paan nintimin antujamniaun chichau asa, chikich ainaun pengker jintintatnuitai.

²⁴Aints yaitas chichaa nuna chichame wapasa yumiria tumawaitai.

Tura aintsu nintin kiakartin asamtai, tsuakan nunisang wakerumaintai.

²⁵Aints ainau ningki nintimsar: Ju jintan wekaaknaka, nekasan tupnik jeatatjai, tu nintiminayat,

nu jintiaka jakatniunam jeakui tusar nintiminatsui. 16.25 Prov 14.12

²⁶Aintsu tsukamamuri kakaram takakmasti tusa aintsun takamtikui.

²⁷Pase aintska tuke tunaun nintimias pujawai. Tura asa chichamesha jiya nunisketai. 16.27 Stg 3.5-6

²⁸Pase aintska aya maaniktas wakerawai. Turasha aujmakratin

amikrintin ainau kajernaikiarti tusa pase nintimtikratnuitai.

²⁹Maanin aintska ni irutkamurin pase jintan amakti tusa anangkatnuitai.

³⁰Aints tunaun turataj tu nintimias waja nuka ni jiin

mitsum mitsum wajaayi. Tura wenencha muchitu weawai.

³¹Aints pengker, juuntach wajas, jempeerintin pujak,

tawaspan etsengkruk pujawa nunisang pujuuyi.

³²Aints wári kajechuka aints kakarma nuna nangkamasang pengkeraitai. Tura aints ni

kajetirin nepetkauka untsuri aintsun nepetina nuna nangkamasang pengkeraitai.

³³Aints ainau ¿yáki juna jukit? Tusar, “suerten” nakurinawai.

Tura wainiat Yus ni wakeramurin tuke umiktinuitai.

¹Aints yutan jumchik yuwayat, angkan pengker nintimias pujakka, nekas pengker pujawai.

Antsu chikich aints ainauka fiestan tuke najaninak, namperar maani pujuinauka pengkerka pujuinatsui.

²Aintsu inatiri asump ni inámniu uchirin nangkamasang pengker nintintin asa, inámniu uchiri

ainaujai metek inámniu waririn jukitnuitai.

³Aints ainau: Kurisha tura kuikiasha pengkerashi tusar, jinum jiyamin ainawai. Yuscha nunisang aintsu ninti pengkerashi tusa ningki nekawai.

⁴Pase ainau tura waitrin ainausha pase chichaman anturin ainawai.

⁵Aints kuikiartichu ainaun wishikina nuka niin najanamia nuna wishikinawai.

Turasha yuuminak pujuinaun wishikinak waraina nuka wait wajakartin ainawai.

⁶Junntach ainauka tirangkin wainkar warainawai. Tura uchi ainausha

aparin tura nukurincha pachisar pengker chichainawai.

⁷Nintimchau ainauka pengkeran chichatnaka nuimiarchau ainawai.

Tura aintsu juuntri ainauka wait chichamnaka chichakchartin ainawai.

⁸Aints chikich ainaun kuikian nangkami suakka, pachitsuk waring achat mash kiaungkatnuitai.

⁹Aints chikich aintsu tunaarin etsertsuk pujamtaikia, tunaarinnuka niin nukap aneetnuitai.

Antsu aintsu tunaarin chikichan etsermatikia, amikri ainauka niin kiishminawai.

¹⁰Aints uchirin paan nintiniunka antukti tusar chicharkartinuitai. Turamtai pengker antuktinuitai.

Antsu aints nintinchaun antukti tusar kichik pachak awatrarmaitiat, pengké antatsui.

¹¹Aints chichaman umichuka aya maanitian wakerawai. Tura asamtai apuri

ni inatirin akupkamtai, nuka maanin aintsnaka pengké wait anentrashtinuitai.

¹²Juun yawaa ni uchirin jurukmiaujai ingkiuniktinka shamrumtinuitai.

Tura netse aintsjai ingkiuniktincha timiá shamrumtinuitai.

¹³Aints chikich aintsun pengker awajmaitiat, nuka nu aintsun pengkerka awajtsuk

pase awajsatniua nuna kajinmatsuk ni weari ainaunka tuke mash pase awajsartin ainawai.

¹⁴Jiyaniamuka entsa nujangkrak nungkan amuawa umurtinua nunisketai.

Tura asamtai nukap kajernaikiaij tusar chichatsuk inaisartinuitai.

¹⁵Aints pase takaun pachis: Nuka pengkeran turayi tusar tsangkuratin, tura tunaun takaschaun pachis: Nuka paseen turayi tusar wiasmamtikiatnunka mai metek Yus arantak nakitawai.

¹⁶Aints nekachuka nuimiartas akikmaksha ¿timiá nintimchausha itiur nuimiarti?

¹⁷Ii amikrijai tuke anenin atinuitji. Tura itiurkachminnum pujakrikia,

ii amikrikia ii yachia nunisang yainmaktinuitji.

¹⁸Aints nintimchauka ni irutkamu tumaashrin akimiatak iiksang tumaashmiak pujustinuitai.

¹⁹Aints jiyaanitan wakera nuka maaniatniuncha wakerawai. Tura miajuitjai tumamuka ningki mestumawai.

²⁰Aints aya tunaun nintimniuka pengkera nuna pengké wainkashtinuitai.

Tura anangkartinka itiurkachminnum iyaartinuitai.

²¹Uchi netseka aparin wake mesemtikniayi. Uchi nintinchau pujamtaikia, apari wararsashtinuitai.

²²Aints inintijai waraawa nuka tsuaka nunisketai.

Tura napchau nintimsar pujuinauka kakarchamin nekapenawai.

²³Aints tunaun takasua nuka chichaman nekamtiknujai kanak pujus chicharak:

Nu aintska pengkeraitai, tunaunaka turichuitai tita. Turakminka kuikian susatjame tamataikia,

nu pase chichaman nekamtikniuka kuikianka juki, wait wajaktinka sutsuk akupawai.

²⁴Nekau aintska tuke paan nintimias pujustinuitai.

Tura nekachuka paanka nintimtsuk nangkami nintimnuitai.

²⁵Uchi netseka aparin kajkatnuitai. Turamtai nukuri:

Nu uchinka wikia nangkamin jerermiajai titinuitai.

²⁶Aints tunaun turichu ainaun wait wajaktincha susashtinuitai.

Tura juun ainau pengker aints ainau wainiatang awatratniuka paseetai.

²⁷Nekau ainauka jumchik chichainayat, antujamin chichasartinuitai.

Tura nintip ainauka waurtsuk anturin artinuitai.

²⁸Aints nintimchausha nukapka chichatsuk pujamtai, chikich aints ainau: Nintipchawashi tu nintiminawai.

¹Surikia aya ninunak eatmamui. Tura asa chikich ainau

chicharnaikiar pujuinamtaikia, tuke itit awajsatnuitai.

²Aints nintimchauka nuimiartaska wakerichuitai. Antsu ni nintimaurinak chikich ainaun ujaktas wakerawai.

³Pase aints chicham natsanpiakun chichawitai. Turasha ningki nintimtumas:

Miajuitjai ta nuna chichamenka chikich aints ainauka antutan arantak nakitinawai.

⁴Aintsu chichamengka entsa kunaria tumawaitai. Tura ni nekatiringkia

entsa pukuni nungkanmaya jiinua nunisketai.

⁵Aints tunaun takasua nuna chichamen nekamtikin ainau antukar: Nuka tunaunaka

turichuitai tichamin ainawai. Tura chikich aints tunaun takachun pachisar:

Nuka tunaawitai tusar nangkamiar wiasmamtikiatniuka paseetai.

⁶Aints netse chichaa nuka maanitan wakerawai. Tura ni chichaamtai,

chikich aints ainau awatrartas wakerukartinuitai.

⁷Aints netsea nuka ni chichamejaingkia ningki mestumawai.

Tura asa chapikjai kuntujnum jingkiamua nunisketai.

⁸Aujmakratniu chichamengka yuta yumínua nunisarang ainawai.

Turasha nuna antinauka nintinam ukusar kajinmakchartin ainawai.

⁹Takatan nakimshim takainauka meskartinua nunisarang ainawai.

¹⁰Apu Yuse naaringkia jea kaya jeamkamua nunisketai. Timianu asa

niin umirkaru ainauka nu jeanam wayaawarua nunisarang uwemraru ainawai.

¹¹Kuikiartin ainauka: Iikia kuikiartin asar, yakat pengker wenurmawa nunisrik pujaji.

Tura asakrin ii kuikiarinka pengké atantramkichartinuitai, tu nintiminawai.

¹²Aints ningki nintimias: Miajuitjai tumamin aneachmau itiurkachminnum jeatnuitai. Antsu aints ainau: Wina pengker awajtursarti tinu ainauka eemkar: Wikia mianchawaitjai tiartinuitai. 18.12 Prov 15.33

¹³Aints chikicha chichamen antutsuk ningki aimua nuka nintimchau asa, natsanpiaku chichaawai.

¹⁴Aints jau pengker nintimias pujakka, jatan nepetkatnuitai.

Antsu jau napchau nintimias pujakka, jatanka nepetkashtinuitai. ¿Yáki inankit?

¹⁵Paan nintimin ainauka nukap nuimiartasar wakerinawai. Tura nintip ainausha aya antukar nuiminawai.

¹⁶Aints apu ainaujai chichastas wakerakka, warinchun takus winamtai,

apu ainauka wári waitin uratinawai.

¹⁷Chichaman nekamtikniunam aints taa, ni turamurin pachis: Tu awai tusa etsermatai,

¿nekasash taj? tusa tenapkeska nekaachminuitai. Turamaitiat ni nemase taa,

nu aintska waitaitai tusa, ni inintramurijai paan nekaawartinuitai.

¹⁸¿Jimiar kakaram aintsu kajernaikiamurin itiur iwiaaratnuita? Yáki nepetmakat tusar nakuruti “suerte” tutain nakurusartinuitai. Tura asaramtai mai metek kakarma waininayat tu akankartin ainawai.

¹⁹Aints ni yachijai kajernai pujuinakka, juun yakat kaya wenurmawa tumawaitai.

Tura asa nu yakta waitiri jiru najanamua nunisketai. Tura nu jimiar yachi ainau suwiri

waiti epenmiawa nunisang asamtai, chichaman pengké iwiaarachminuitai.

²⁰Aints ainau ni chichaamurijai tutuarua nunisarang ainawai.

²¹Tunau chichamnaka nakitajai tinauka pengker awajmaminawai. Antsu aints nintimtsuk nukap chichainauka ningki mesmamrartin ainawai. 18.21 Prov 13.3

Turasha napchau nintimrarti tusar maamnawaitji. Tura asar ii chichamengka

árak araamua nunisarang ainawai. Ii turaji nunasha iincha turutmatnuitji. 18.21 Gál 6.7

²²Aints nuwan nuwatkatas wakerakka, nuwan eaktinuitai. Yus nuka pengkeraitai tawai. 18.22 Gén 2.18-24

²³Kuikiartichuka ni tumaashrin akiktatkama tujintak: Wait anentrata tusa seamnuitai.

Antsu kuikiartin wait anentsuk kakaram chichaak aimkatnuitai.

²⁴Aintsu amikri untsuri pujuinamtaikia, itiurkachminnum jeartinuitai.

Antsu nekas amikringkia ni yachia nuna nangkamasang pengker awajsatnuitai.

¹Aints kuikiartichu ayat, anangmichuka nekas pengkeraitai. Antsu netse aints chikich aints ainaun tsanumak puja nuka nekas paseetai. ²Aints nuimiarchauka waurak takatrin wári umistas wakerakka,

nukap nuwaktinuitai.

³Aints ainau ningki wakerinak pase pujuinauka Apu Yusen wiasmatkatin— ainawai.

⁴Kuikiartinu amikingkia untsuri ainawai. Tura kuikiartichu amikringka niin ajapawar ukukiartinuitai.

⁵Aints nekas aa nuna nekayat, anangkak chicham nekaschaun etsera nuka ni wait wajaktintrin

nekas jukitnuitai. Tura waitrin ainauka angkanka pujuschartinuitai. 19.5 Prov 19.9

⁶Aints tsangka nuna aints untsuri eainawai. Tura tsangkamin asamtai,

aints ainau mash ni amikri wajasartas wakerinawai.

⁷Aints kuikiartichun ni yachii ainauka jiitnasha nakitinawai. Tura asaramtai ¿ni amikri ainausha iturak niin ajapawar ukukcharting? Tura yainkata tusa untsukmasha mash ukukmiausha ¿yáki yainkat?

⁸Aints pengker nintimniuka nangkamikia anenmamakapujatsui. Antsu nintip wajastaj tusa, nukap nuimiaru asa, nekas pengker pujustinuitai.

⁹Aints nekas aa nuna nekayat, chicham nekaschaun anangkak etsera nuka

ni wait wajaktintrin nekas jukitnuitai. Turasha waitrinka nekas jakatnuitai.

¹⁰Aints nintinchauka kuikian tura warinchuchin nukap achik nuna inakmaschatnuitai.

¿Tura aintsu inatirisha iturak apu ainaun iniartinuita?

¹¹Aints paan nintimniuka wárikia kajekchatnuitai. Tura chikich aints ainau

niin pachisar pase chichainamtai, ningki titi tusa pachischatnuitai.

¹²Aintsu apuri kajetiri juun yawaa kajeawa nunisketai.

Tura ni wait anengkratairi sana chirichrinam tepawa nunisketai.

¹³Uchi nintinchauka aparin wake mesemtikui. Tura nuwa katsekmin

kichkitiat itit awajkartinua nunisketai.

¹⁴Uchirtin ainauka ni uchirin jeancha, tura kuikiancha susartin ainawai. Antsu nuwa pengker nintinniuka Yusnumiayaintai.

¹⁵Aints nakia nuka aya kanú tepestas wakerawai. Tura aints takakmichuka tsukajai waitjaktinuitai.

¹⁶Aints umiktin chichaman Apu Yus akupkamia nuna umirak pujakka,

wikia itur pujaja tusa wainkatnuitai. Antsu nuna umirtan nakitniuka jakatnuitai.

¹⁷Aints kuikiartichun waring achat susatata nuka Apu Yusen ikiastinuitai.

Tura asamtai Apu Yus ni ikiasmaurin awangtuktinuitai.

¹⁸Uchiram anturtamchamtaikia chicharkata. Tura mesrai tu nintaimsam waurtsuk turata.

¹⁹Aints nukap kajeunka ni wait wajaktintrin susatnuitai.

Nu turachmaka nuna nangkamasang pase wajastinuitai.

²⁰Aints ainau amin chichartaminamtaikia umirkata. Turasha nuitaminamtaikia

pengker anturkata. Nu turakmeka ukunam paan nintimin atinuitme.

²¹Aints ainau ningki wakerinak: Wikia nuna turatatjai tusar nukap nintimsar pujuinawai.

Antsu Apu Yus ningki wakerak: Tu ati tusa tsangkatkatnuitai.

²²Aints ainau wait anengkratin arti tusar timiá wakeruktinuitai.

Turasha anangkartin wajatsuk kuikiartichu wajastinka nekas pengkeraitai.

²³Apu Yusen umirinak pujuinauka tuke iwiaaku pujusartin ainawai. Tura asar

aints tu pujuinauka pengker nintimsar pujusar iturkachminaka waintsuk ayamsartin ainawai.

²⁴Aints nakia nuka tachaun achiayat, yutairin yuatniunka pachis: Nuka takataintai tawai.

²⁵Wishiikiartiniun awatraramtai, nintinchau ainauka nuna jiisar: Winasha turutawarai tusar nuimiarartinuitai. Tura paan nintimin ainauka aya chicharam nuimiarartinuitai.

²⁶Aints ni apariniun kasamak puja nuka tura ni nukurin ni jeenian jiiki akupkauka

nekas paseetai, turasha natsanpiakuitai.

²⁷Uchiru, wi chicharkartamur antutsuk pujakmeka, nekatai chichamka nuimiarchatnuitme.

²⁸Aints waitrina nuka wait chichaman etserin asa, chichaman nekamtikniunka anangkatnuitai.

Tura pase nintiniuka aya pase chichamnak chichaawai.

²⁹Wishiikiartin ainaun tura nintinchau ainauncha antukarat tusar awatrartinuitai.

¹Umuti kariau aina nuna aints ainau uminakka, nampekar pase chichau ainawai.

Nunia natsamchau ainawai. Aints nampek pujakka, paanka nintimrachminuitai.

²Aintsu apuri kajetiringkia juun yawaa shaamai chichaawa nunisketai.

Tura asamtai niin kajkartin ainauka mantamawai tusar shamkartin ainawai.

³Aints jiyaanitan nakitinauka nekasar pengker nintimsar pujuinawai.

Antsu netse ainauka pachitsuk chikich ainaun jiyaktasar wakerinawai.

⁴Nakia nuka takakmastin ayat takakmatsui. Nunia ukunam juuktaj takusha pengké wainkashtinuitai.

⁵Aintsu nintimtairingkia entsa timiá kunanam iruna tumawaitai.

Tumau wainiatang aints nintip: ¿Itiur nintimua? tusa nekaatnuitai.

⁶Aints untsuri chichainak: Amin ajapanka pengké ukukchatatjame nangkamiar tinawai.

Antsu nekas chichaman chichainaunka ¿yáki wainkamnawaita?

⁷Aints tunaarinchau nekas pengker pujakka ni uchiri ainaun waramtiksatnuitai.

⁸Aintsu apuri ni aintsri tunaarin nekaatas apu ekemtainam ekemas pujus,

nu aintsun aya jimiaj pujus ni tunaurin nekaatnuitai.

⁹Wikia pengké tunaarinchawaitjai. ¿Wina nintirka tunau nekas atsawai tusa, anangtsuk yáki titinuita?

¹⁰Meram nekapmatai tura esanti nekapkesha metekchau aina nunaka Apu Yus tsuutawai.

¹¹Uchi umiu tura pengker nintiniuka yáki tusar ni turamurijai paan nekamawartin ainawai.

¹²Aintsu kuwishin antutirin tura jiijai jiimtairincha Apu Yus mai metek najankauwitai.

¹³Aya karap wajasaip. Tu pujakmeka yuumaktatme. Antsu shintaram takakmakmeka yuumakchatnuitme.

¹⁴Warinchu sumin warinchun jiis chichaak: Nuka pengké paseetai tayat,

nunia majachik sumak ukuki: Maj, nekasan nintipitjai tumamui.

¹⁵Kuri nekas akikaitai. Tura kaya akiksha sumakmin ainawai. Antsu paan nintimin ainauka jumchik irunui. Nu aints ainauka kurin nangkamasarang tura kaya akikian nangkamasarang timiá pengker ainawai.

¹⁶Aints nekashtai tumashmamtai, chikich aints: Wi akimiatkatatjai tamataikia, nuna wejmakri aitkam jurukim ukusta. Tura nekashtai tumashrin akimiatkamtaikia, wejmakrinka ataksha susata. 20.16 Prov 6.1-5

¹⁷Anangkartin chikich aintsun anangka yutan majachikjai sumak nuna yuwak:

Nuka nekas yuminuitai tayat, ukunam nungka tsetserin apakua nunisketai.

¹⁸Aints ainau ni nintimauringkia itiur aina tusar aujnaisar, chichaman najanawartin ainawai.

Turinau asaramtai aints ainau mesetnum wetasar, nunaa eemkar ni nintimaurin pachisar

chichainak, mesetnasha najanawartin ainawai.

¹⁹Aujmakratniuka chikicha chichamen uurkashtinuitai.

Tura asamtai aujmakratin ainaujaingkia tsaningkaip.

²⁰Aints aparin tura nukurincha numingkia nuka ukunam kirit teenam pujuinawa nunisang jakatnuitai.

²¹Aints ainau kakarmachu kuikian irumina nuka ukunmaka nu kuikiajaingkia wararsachartinuitai.

²²Nu aintska wina pase awajtusmiana nunaka wikia yapaijkiatatjai tiip.

Antsu Apu Yus turati tusam, jaimiasam nakasta. Ningki yapaijkiatnuitai. 20.22 Rom 12.19

²³Meram nekapmatai metekchau ainaunka Apu Yus tsuutawai. Tura meram nekapmataijai

aints ainaun anangkinauncha arantak nakitawai. 20.23 Prov 20.10

²⁴Apu Yus aints ainautin: Ju jinta amakrum wekaasataram turamji. Tura asamtai aints ningki nintimias:

Wikia ju jintan amakan wekaasatjai tayat, Yus tsangkatachmataikia pengké turachminuitai. 20.24 Sal 37.23-24

²⁵Aints tenap nintimtsuk: Yusjai tajai: Juka Yusnau ati tayat, nunia wake nintimiar.

Yusnau achati ta nuka itiurkachminum pujustinuitai.

²⁶Aints ainau trigon juukar jingkiajincha tura saapencha akankartas su su umpuinawa nunisang

aintsu apuri nekauka pase aints ainaun arák akupkatnuitai. 20.26 Luc 3.17

²⁷Apu Yus aintsun ni wakanin susau asamtai, nuka aintsu paaniurintai. Tura asa aintsu wakani

ni nintimauri pengker arti tusa pengker awajsatnuitai.

²⁸Aintsu apuri nekas chichaman aneak, wait anengkratin asa, ni aintsri ainaun tuke pengker inartinuitai.

²⁹Natsa ainau kakaram asar, wikia warimpitja tumaminawai.

Tura juuntach ainausha nekainau asar, wikia jemperinuitjai tumamainawai.

³⁰Pase ainau pengker wajasarat tusar awatinamtaikia, nuka tsuaka nunisketai. Tura asamtai ni tunaarin nintimrarti tusar awatratnuitai.

¹Apu Yus entsa tu weti tusa inawa nunisang aintsu apuri

ni wakeramurin timiatrusang umirtukti tusa nintimtikui.

²Aints ningki nintimias: Wi turaja nuka mash pengkeraitai tayat,

Apu Yus: Waruka tu nintimua tusa nekawai.

³Aints ainau tangkun Yusen susartas maina nuna nangkamasarang pengker nintimsar

ni wakeramurin umirkarti tusa, Apu Yus timiá wakerawai.

⁴Ni jiijai suwirpiaku jiimsatin, tura wikia miajuitjai tumamtin,

tura aintsu pase nintimtairisha mash tunau ainawai. 21.4 1 Juan 2.15-17

⁵Aints nunaa eemak pengker nintimiar: Tu takakmastajai tusa, takatan nangkamawa nuka nukap eemtikiatnuitai.

Antsu chikich aints waurak: Wári takatan umistajai tusa, takatrin tu nangkamawa nuka nukap nuwaktinuitai.

⁶Anangkartin ainau warinchurin nukap kiaungkarmia nuka yurangkim tsaa sukuamunam

mengkawa nunisketai. Aints wári kuikiartin wajastasar wakerinauka wári jakatasar wakerinawai.

⁷Pase aints ainau pengkeran turatniun nakitinawai.

Antsu tuke maanitan wakerinau asar mengkakartin ainawai.

⁸Aints wait chichaman etsera nuka mengkakatnuitai.

Antsu anangmichu aina nuna turutiringkia jinta tupnik jeatnua nunisarang ainawai.

⁹Juun jea shiiram iwiaramunam katsekmin nuwajai pujustinka mianchawaitai.

Antsu jea tiupchinam ningki pujustinka timiá pengkeraitai.

¹⁰Aints paseka tuke pase turatniunka nintimias pujawai.

Tura asa ni irutkamuri ainaunka mash wait anentsuk pujawai.

¹¹Wishiikiartinun awatraramtai, nintinchau ainau nuna jiisar: Turunawai tusar

nuimiarartinuitai. Tura paan nintimniunka aya chicharinam, wári nuimiartinuitai. 21.11 Prov 19.25

¹²Yus nekas tunaarinchawa nuka pase aintsu pujutrin jii pujurui.

Tura asa pase aints ainau itiurkachminnum wearti tusa akupkatnuitai.

¹³Yuuminak pujuinauka yainkata tinamaitiat, chikich aints ainau antutsuk pujuinauka

ukunam yuuminak yainkata tinamtaikia, chikich ainauka pengké pachischartin ainawai.

¹⁴Kajeu aintsun chikich aints warinchun nangkami suamtai, warinchun shishkamsang

susamun jukitata nuka timiá kajeu pujayat, kajekmaurin wári inaisatnuitai.

¹⁵Chichaman nekamtikin pase turinaun pachis: Achikrum karsernum akupkataram tamatai,

tunau turichu ainau warainawai. Antsu pase turin ainauka shaminak kurainawai.

¹⁶Aints paan nintimratniun jintanmaya jiinki weakka, wári jakau iwiartainium ayamsatnuitai.

¹⁷Aints nampetan wakerak, nangkami pujus, perfumen akikian sumaktas wakerakka, kuikiartichu atinuitai.

¹⁸Anangkartin tura pase aints ainauka wait wajakartin ainawai.

Antsu anangmichu tura pengkeran turin ainauka uwemrartin ainawai.

¹⁹Nuwa kajeu tura katsekminjai pujustinka mianchawaitai. Tura asamtai

aints atsamunam ningki pujustinka timiá pengkeraitai. 21.19 Prov 21.9

²⁰Paan nintimniu jeenka kuik tura yutaisha nukap irunui.

Antsu aints nintinchauka ni takaka nuna mash nangkami ajapui.

²¹Aints tupin nintimias tura wait anenkartin pujakka, chikich ainauka: Nuka

pengker aintsuitai tiartinuitai. Tura jakayat tuke Yusnum iwiaaku pujustinuitai.

²²Aints timiá paan nintimniuka ni nekamurijai chikich ainaun nepetkatnuitai.

Tura nekasan kakarmaitjai taunka ni pase nintimaurincha ni nekamurijai nepetkatnuitai.

²³Aints nangkamikia chichatsuk tuke yaitas chichawa nuka itiurkachminumka jeashtinuitai.

²⁴Aints miajuitjai tumamin meemas tura katsekmak pujau asamtai, ni naaringkia wishikiartin naartinuitai.

^25-26Aints nakikia aya tuke wakerinuitai. Tura takakmastinasha nintimchau asa,

waring achat mash wakerinuitai. Turayat jukichu asa kintajai metek jakamin nekapeawai.

Antsu asumkia takatan shamtsuk pujus, surimtsuk tuke chikich aints ainaun yayaawai.

²⁷Pase aints ainau pase nintimsar tangkun maawar Yusen susartas epeena nunaka Apu Yus tsuutawai.

²⁸Aints wait chichaman etsera nuka jakatnuitai. Antsu aints antuj puja nuna inininamtaikia,

antujamniaun chichastinuitai.

²⁹Pase aints ainauka: Wikia nekau aintsuitjai tusar chikich aints ainaun anangkawartinuitai.

Antsu aints anangmichuka: ¿Itiur pujaja? tusa paan nintimias pujuwitai.

³⁰Aintstikia nekau akurkia, tura nintip akurkia, turasha paan nintimsar pujakrikia,

Apu Yuse pengké anangkashtinuitji.

³¹Suntar ainau mesetnum weartas ni kawairin tenapkesar iwiarinawai.

Antsu ni nemase ainaun nepetkatniun Yusek ningki tsangkatkatnuitai.

¹Aints ainau iin pachitmasar: Nuka pengke aintsuitai tiartinka

kurin tura kuikian nangkamasang timiá pengkeraitai.

²Aints kuikiartin ainauncha tura kuikiartichu ainauncha mai metek Apu Yuska najanamiayi.

³Aints paan nintimua nuka itiurchatnaka wári nekaa kiishmaktinuitai.

Antsu aints nintinchauka itiurchatnaka nekaatsuk wait wajaktinuitai.

⁴Aints: Wikia mianchawaitjai tumaminauka Apu Yusen umirkar pujusar yumakchartin ainawai. Turinamtai chikich aints ainauka niin pachisar: Pengke aintsuitai tiartin ainawai.

Tura asaramtai untsuri musach pujusartin ainawai.

⁵Pase aintsu nintinka jinta jangki irunmaunum tura ejatak untsuri ukusmauwa tumawaitai.

Antsu aints tuke Yusnum pujustas wakerakka nu jintanam wekaasatniunka arantak nakitawai.

⁶Uchi pengker pujusti tusam nuiniarta. Tura nunia juunmar

ame chicharkamurmin pengké kajinmakchatnuitai.

⁷Kuikiartin ainauka kuikiartichu ainau apuri ainawai. Tura aints tumaashmiaunka

niin tumaashin susamia nuna inatairi wajawai.

⁸Aints pasen turauka ukunam itiurkachminnum jeatnuitai.

Tura tuke paseen takau asamtai, Apu Yus ni suirijai mengkaktinuitai.

⁹Aints wait anengkratniuka yuuminak pujuinaun yurumkan ajamin asamtai, pengker awajsamu atinuitai.

¹⁰Aints katsekminiun jiikiar awemaru asaramtai, katsumnaikiatniusha,

tura jiyaniktincha tura maaniktincha atsutnuitai.

¹¹Aints pengker nintiniuka yaitas chichau asamtai, ni apuri amikri atinuitai.

¹²Apu Yus paan nintimniun wainui. Antsu anangkartinka antujachminun chichasti tusa nintimtikui.

¹³Aints nakia nuka takatan nakitau asa: Juun yawaa jinta wajas yuruawai tusan jea pujajai, tu pujuwitai.

¹⁴Kungkatip nuwa chichamengka waa kuna taurmawa tumawaitai.

Aints Yus yumingkramu ainauka nu waanam iyarartin ainawai.

¹⁵Uchi nintimchau chichaman antutan nakitau asamtai, jumchik awatratnuitai.

Tura asamtai paan nintimiar tunau turutin inaisatnuitai.

¹⁶Kuikiartin nukap kiauntumkataj tusa, kuikiartichu waririn atanta nuka tura aints

kuikiartiniun kuikian nangkami sua nusha mai metek kuikiartichu wajasartin ainawai.

Paan nintimin ainau chichame

¹⁷Paan nintimin aina nuna chichame tenapkesam antukta.

Tura wi nuiniartatjame nuka nintimin ukusam tenapkesam nuimiarta.

¹⁸Nu turakmeka pengker nintimtin atinuitme, tura nu chichama nintimin ukusu asam,

chichaakmesha nusha etserkatnuitme.

¹⁹Tura Apu Yus timiatrusmek nintimtusta tusan, yamai amincha ujaktajme.

²⁰¿Nuikiartin chichaman tura nekaatin chichamnasha nekas pengkera nuna treintan aatrachmakjam?

²¹Nu nekas chicham ainaun pengker nekaamka, chikich aints ainau amin ininminamtaikia,

nu chichamsha ujaktinuitme.

- 1 -

²²Aints kuikiartichu asamtai, ni warinchurin pengké atankiip. Tura yamrumichu ainaun

chicham nekamtikniunam jukimka waitkasaip. ²³Kame, Apu Yus kuikiartichu ainaun

ayamrin asa, yamrumichu ainaun waitkina nunasha nunisang waitkatnuitai.

- 2 -

²⁴Aints suir nekapniujai tsaningkaip. Turasha aints kajeu aina nujaisha iruntsuk asata.

²⁵Tura ni turamurin jiisam, wisha nunisnak aitkataj tu nintimsaip. Turakmeka chapikjai jingkiamua nunismek wait wajaktinuitme.

- 3 -

²⁶Aints tumaashmiau wainkam: Wi tumaashrumnaka akimiatkatjame tiip. ²⁷Takumka

akimiaktin kinta jeamtai, akimiakchakminka apamrumnasha atantramkartinuitai.

- 4 -

²⁸Juuntrum ainau yanchuik nungka akankamunam:

Juka wina nungkaruitai tusar, painin jintawarmia nuka kuinkaip.

- 5 -

²⁹¿Aints ni takatrin pengker takakmawa nu wainukitam? Nu aintska takatrin nekamtikin asa,

aints mianchau takarnuri wajaschatnuitai, antsu apu ainau takarniuri wajastinuitai.

- 6 -

¹Aintsu apurijai yuwatasam keemsamka, warí yutaina itainawa nu anearam yuwata. ²Tura

nukap yaparayatmek jumchik yuwata. ³Nu yutai kungkuram au wainiatum: Anangkruwartimpiash

tusam anearta.

- 7 -

⁴Wikia kuikiartin wajastaj, tuuka nintimraip. ⁵Antsu paan nintimsam: Kuikiartinu kuikiaringkia

nanamtin wári nanamina nunisang mengkawai tusam nekaamnawaitme.

- 8 -

⁶Aints suria nuna yutairingka yuwaip. Turamka ni yutairi nekas pengker iwiaaramun au wainiatum nuka wakerukaip. ⁷Nu aintska tuke yutai akikaitai tuu nintimui. Amin: Yuwata turasha murta tayat, suri asa

pengker nintimsangka nunaka turamtsui. ⁸Tura asamtai yurumak yuwamame nuka arumak iniuktatme. Tura asam: Pengker yuwajai tayatum, nuka nangkami timiame.

- 9 -

⁹Aints nintimchau antamunam chichakaip.

Ame paan nintimsam chichasume nuna antuk amin wishikramratnuitai.

- 10 -

¹⁰Yanchuik juuntrum ainau nungkan akankamunam painin jintawarmia nuka kuinkaip. 23.10 Prov 22.28 Tura mitaikia nungkarisha atankiip. ¹¹Warí, uchi mitaik aina nuna ayamrinka nekas kakarmaitai. Tura asa mitaik ainaun ayamruktas amin nepetamkatnuitai.

- 11 -

¹²Amin nuitaminamtai nintimjai pengker nintimtusta. Tura paan nintimram,

nuikiartamu antukume nuka kajinmakiip.

- 12 -

^13-14Uchi chicharkatniuka inaisaip. Uchi jumchik awatramka jakashtatui. Kame, antukat tusam awatramka, Yusen umirak pujus tuke jakatniunam wetsuk uwemtikratnuitme.

- 13 -

¹⁵Uchiru, ame paan nintimramka, winasha nukap waramtikrame.

¹⁶Tura nekas pengker chichaakminkia, nuna antukan nukap warastinuitjai.

- 14 -

¹⁷Tunaarintin ainauka nekasar pengker pujuinawai, tuuka nintimraip.

Antsu ami Apuram Yus tuke pengker awajsata. ¹⁸Nu turakmeka ukunam

jakamin nekapeakmeka: Yusnumapi wetatja tu nintimratnuitme.

Nunia jakamsha nekasam Yusnum tuke iwiaaku pujustinuitme.

- 15 -

¹⁹Uchiru, anturtukta turakum pengker nuimiarta. Tura jinta Yusnum jeatniunam tuke wekasata.23.19 Juan 14.4-6²⁰Antsu nampeu ainaujaingkia tura ushu yutancha nukap wakerin ainaujaisha

iruntsuk asata. ²¹Nampeu ainauka tura ushu ainausha wait wajakartin ainawai. Tura naki ainau kuikiartichu asar, mamurar pujuinawai.

- 16 -

²²Aparam amin yajutmarmia nu anturkata. Tura nukuram juuntach wajasamtaisha nakitraip.

²³Chicham nekas aina nuka, tura paan nintimratniusha, tura nuimiartincha, tura pengker nekatniusha

nukap wakerukta. Antsu nunaka nakitajai tiip. ²⁴Aintsu uchiri pengker tura nintip pujakka aparin nukap waramtiksatnuitai. Tura ni yajutmaru asa: Maj, uchirka nekas pengkerapita titinuitai. ²⁵Tura asamtai aparam tura nukurmesha amin jeretmarmia nuka mai metek waramtiksarta.

- 17 -

²⁶Uchiru, wina tuke nintimtursata, tura wi turaja nu jiista. ²⁷Kungkatip nuwaka waa taimu nitak wangkarmachua nunisketai. ²⁸Nu nuwaka kasa aints aneachmau aintsu waririn kasamkatas

naka wajawa nunisketai. Tura asa aishmangkun untsurin mengkakatniunam juawai.

- 18 -

²⁹¿Ya aintsua wait wajaktinuita? ¿Tura ya aintsua najaimiatnuita? ¿Turasha ya aintsua nangkami juutnuita? ¿Tura ya aintsua maanitan wakeruktinuita? ¿Turasha ya aintsua nangkami numpartinuita?

¿Tura ya aintsua mushatminun jiimsatnuita? ³⁰Nampetan pengke inaichau ainau tura umutain wainchatain timiá kariaun nekapin ainau tu pujuinawai. ³¹Umutai nampetai ainaun tenapkesan jiistaj tiip.

¿Warí, yarakmasha timiá kapanniuchukai? ¿Tura shiirmachukai? ¿Nuna umuran suwerka nekas tsuwer jakchatpiash? tiip. ³²Antsu jumchik arus napi esatma nunisang najaimiakum wait wajaktinuitme.

³³Nu umutaingkia nekaachminun jiimtikramratnuitai. Tura nintinchau wajasam, natsanpiaku chichastinuitme. ³⁴Tura timiá nampekam karamramuram kanú tsakarin tepamin, ukantinua

nunismek tunau nekapratnuitme. ³⁵Tura shintaram chichaakum: Katsumrinaunak najaimiarchamjai.

Tura chapikjai awatinaunak nekaprachmajai. Turayatun tsaarnaka ataksha umuki wetatjai titinuitme.

- 19 -

¹Pase aints ainauka pengker pujuinawai, tuuka nintimraip. Tura niijai iruntratasan wakerajai

tuusha nintimraip. ²Kame, pase aints ainauka tuke maaniatnun nintimsar pujuinawai. Tura asar

pase turatniun pachisar tuke chichainawai.

- 20 -

³Jea jeamin ainau nekau asar jean jeaminawai. Tura paan nintimsar painin jintatin ainawai.

⁴Tura ni nekamurijai jea tesakmauri mash pengker arti tusar tesawar, warinchu shiiram iruna

nuna piirkanam kentsartin ainawai.

- 21 -

⁵Aints paan nintimniuka aints kakarman nepetkatnuitai. Turasha aints nekamtikiartinka aints kakarmanka nangkamaktinuitai. ⁶Tura asamtai mesetan najanawartas: Itiurkamnawaita tusar nintip ainaun yuuminawai. Tura ni nemase ainaun nepetkartas chichaman najanin ainaun untsuri wakerinawai.

- 22 -

⁷Aints nintinchauka nekau ataj tayat jeachminuitai. Tura asa juun ainau iruntramunam chichaktatkama tujintawai.

- 23 -

⁸Aints chikich ainaun tuke pase awajsatas wakerina nuna pachisar: Nuka pase nintintinuitai tinawai.

⁹Aints netsea nuka aya tunaanak nintimratnuitai. Tura asamtai aints ainau katsekmin ainaun arantak nakitinawai.

- 24 -

¹⁰Itiurkachminnum atsantrachmin nekapeakmeka, kakarmarka jumchikita tusam paan nekaatnuitme.

- 25 -

¹¹Nangkamiar maawartinnum jukimu ainauka angkanmamtikiata. Tura nangkamiar:

Nu aints maataram tinu ainaunmaya nu aintska uwemtikrata. ¹²Wikia nekaachmajai takumningkia,

aintsu nintin mash nekawa nuka: ¿Ameka nekaachmashum tusa, nekas a nuka nekarmashtatuak?

¿Tura amin jakai tusa wainu weawa nuka nekaashtatuak? Yus aintsti ainauti turamurinka mash jiirmastinuitji. Tura asa pengker aa nuna turinauka pengker aa nuna jukiartin ainawai. Antsu pase aa nuna turinauka pase aa nuna jukiartin ainawai. 24.12 2 Cor 5.10

- 26 -

¹³Uchiru, wapasa yumiri mukunata. Wapasa jee jukimka, nuka nekas yuminuitai tusam nekapsatnuitme.

¹⁴Paan nintimratniuka tura nukap nekaatniuka wapasa yumiria tumawaitai. Nu wainkamka ukunam pengker pujustinuitme. Tura: Nuna turatasan wakerajai takumka, nukap arusam nusha turatnuitme.

- 27 -

¹⁵Aints anangmichu pachisam: Pase awajsatatjai tu nintimraip. Tura ni pujutirin mesraip.

¹⁶Kame, pengker turin aina nuka sieten iyainayat, ataksha nantakiartin ainawai.

Antsu pase aints ainauka wait wajaktinnum iyarartinuitai.

- 28 -

¹⁷Ami nemasem itiurkachminnum pujamtai warasaip. Tura tukumak iyaramtaikia pengkeraitai tiip.

¹⁸Apu Yus nunaka jiitnaka nakitawai. Antsu wait anentak ami nemasem tsangkuratnuitai.

- 29 -

¹⁹Pase aints ainau jiisam kajerkaip. Tura ni pachisam: Maj, wisha nijai metek yuumatsuk pujustasan wakerajai tiip. ²⁰Pase aints ainau tuke pengkerka pujuschartin ainawai, antsu ni iwiaakmari namparing kajinua nunisang amuktinuitai.

- 30 -

²¹Uchiru, Apu Yus tura aintsu apurisha umirkata. Tura ni chichamen umirtan nakitin ainaujai pachinkaip. ²²Pase aints ainau aneachmau itiurchatniunam waitnasar pujusartin ainawai. Turasha Apu Yus aintsu apurijai ¿warí wait wajaktinnasha akupkartinuita tusar yáki nekaat?

Chikich Nekau Ainau Nuikiartamuri

^23-24Jusha nukap nekau aina nuna chichamentai:

Aintsu apuri ainau tunau turamun nekaawartas eketinauka tunaun turaun chicharinak:

Ame pengke aints asam jiinkita tinamtaikia, nuka paseetai. Chikich aints ainau nuna antukar

nu apun pachisar pase chichasartin ainawai. Tura chikich nungkanmaya ainausha niin nakitrartinuitai.

²⁵Antsu apu ainau tunau ainaun ni wait wajaktintrin suina nuka nekasar pengker pujusartin ainawai.

Tura asaramtai aints ainau mash niin: Yus yainmakti tiartinuitai.

²⁶Aints chikich aintsun pengker aimu wea nuna chichamenka

chikich aints ainau pengker nintimsar anturin ainawai.

²⁷Numi ajaktin umisam, tura árak tenapkesam araam, nuniangka jeemin jeamkata.

²⁸Ami irutkamuram pachisam nangkami wait chichaman chichaakum wiasmakaip.

Tura wait chichamjai chikich aints tsanuraip.

²⁹Chikich aints amin pase awajtamak pujumia nu pachisam: Maj, wikia yapaijkiatjai tiip. 24.29 Rom 12.19

³⁰Nuik aints nakia nuna ajarin tura nintinchawa nuna saakarincha nangkamakmajai.

³¹Tura ajarin jangkik nupak, tura wenukrisha yumpungkaun wainkamjai. Tura nuna wainkan

nukap nintimramjai. ³²Tura nuna wainkau asan wi nuimiarja nuka nuwaitai: ³³Ame tamrukam

kánakum, karamin asam, pengker kanurtasam minakmamsam tepamin, ³⁴ami yuumaktintrum yaitas

kasa aintsua nunisang amin kuikiartichun awajtamsatas aneachmau winitramtinuitai.

Chikich nuikiartamu chicham ainau Salomón etserkamu

¹Ju chicham ainauka Salomónka chichamentai.

Tura wainiat Juda apuri Ezequías naartin ni inatiri ainaun aamtikramiayi.

²Yus mash nekawa nuka ni nintimtairinka uuktinuitai. Tura aintsu apuri ainau: Tenapkesan nekaatasan wakerajai tusar nekaamawartin ainawai. ³¿Nayaim warutam yakingkit? ¿Tura nungka

nitkaringkia warutam kunaita? tusar aints ainau nekaachmin ainawai. Turinau asaramtai apu nintimtairisha nunisarang ainawai.

⁴Jiru wincha ati tusar, tseerar saurin utsanin ainiawai, nunia nu jirun piningkian shiirman najanin ainawai.

⁵Turasha apu pujamunmayangka pase aints ainau jiikim akupakmeka, apu inamuri pujuinauka mash

apun timiatrusarang umirkartinuitai.

⁶Apu pujamunam wayaakmeka: Wikia miajuitjai tuuka nintimtumasaip. Tura aints kakaram iruna nujaingkia pachinkaip. ⁷Antsu apu chichartamak: Winim juni keemsata turamat, ame pengker nintimtusam nuni keemsatnuitme. Antsu apu tichamtaikia, kakaram irunu jiiminamunam natsanpiaku

wajastinuitme. 25.7 Luc 14.10-11

⁸Aints turachminun turau wainkamka, wárikia chichaman nekamtikniunam nuna etserkataj

tusamka weep. Turakmeka chikich aints amin pachitmas: Nuka waitaitai tamataikia, ame

itiurkachmin nekapeakum natsaartinuitme.

⁹Amin pachitmasar wait chichaman etserinamtaikia, nuchawaitai tusam chichaman iwiaarata.

Antsu chikich aints ainau chichaman uukar amin etsertaminamtaikia, un pachisam chichakaip.

¹⁰Turachkumka chikich aints ami chichakmaurmin antuk amin pachitmas natsanpiakun etserkatnuitai. Turamtai ame iwiaarachmin asam, itiurkachmin pujakum natsaartinuitme.

¹¹Pengker chichaman antujamniaun etsermauka pining shiiram iwiaaramua tumawaitai.

¹²Aints paan nintimniuka chikich aintsu chicharkamurin takamtaik antawa nuka nungkutai

nekas pengker kuri najanamua tumawaitai. Turasha uwejnum uwejtai kuri najanamua tumawaitai.

¹³Aints anangmichuka arák wekaas, pengker chichaman itiawa nuka ni akupamurin waramtiksatnuitai. Turasha esat amaunum aints entsa atsamunam arák wekaas yaweru pujamtai, chikich aints entsa michan itawa nunisang ni akupamurin waramtiksatnuitai. 25.13 Prov 25.25

¹⁴Aints nangkami waitrak: Ukunam susamjinam tayat, sutsuk puja nuka nase nasentak kintuim, yumi jitutsuk pujaa nunisketai.

¹⁵Aints ni apurin jaimiasar chicharinamtai, apu ni kajekmaurin inaisatnuitai. Turasha yaitasar chichainauka katsuram nintiniunka pengker nintimtikrartniutia.

¹⁶Wapasa yumirin wainkamka, jumchik mukunata. Nukap mukunamka iniuktinuitme. ¹⁷Ame irutkamurmin jiistasam ni jeen nukapka wayaawaip. Nukap wayaakminka yawetramar nakitramratnuitai.

¹⁸Aints ni irutkamurin pachis wait chichaman etsera nuka kuchí erea tumawaitai, turasha nangki erea tumawaitai, turasha weartaia tumawaitai. ¹⁹Itiurkachminum pujakur, chikich aintsu chicharkur: Ayamrukta takurkia, ni ayu tayat, yaingkratchau asa, nai shuki yuamua tumawaitai, turasha nawe muunkamua tumawaitai. ²⁰Aints yaweru pujamtai wararkur kantamtai kantamruatnuka aints tsetsemak wejmakrin aik misu pujawa tumawaitai, turasha charumakmaunam ween yakaawa tumawaitai.

^21-22Atumi nemase yaparinamtaikia yurataram, tura kitaminamtaisha umutisha artaram. Tu pujakrumka

pase awajtamina nuna inatsartinuitrume. Turasha Yus atumin pengker awajtamsatnuitrume. 25.21-22 Rom 12.20

²³Nase arakia nasentak yumin itaawa nunisang aujmatkartinka aints ainaun napchau nintimtikratnuitai.

²⁴Jea shiiram iwiaaramunam jiyanin nuwajai maaniniak pujustinka mianchawaitai. Antsu jea tuupchinam ningki pujustinka timiá pengkeraitai. 25.24 Prov 21.9

²⁵Yajaya pengker chicham akupkamu antuktinka nekas kitamamunam entsa micha umurtinka mai metek

nekas pengkeraitai. 25.25 Prov 25.13

²⁶Aints anangmichuka pase aintsun shamak un chichamen antuk kurawa nuka nungka taimunmaya entsa pakui jinua nunisketai.

²⁷Wapasa yumirin nukap mukunatniuaka napchawaitai. Tura wikia miajuitjai tumamtinka nunisketai.

²⁸Aints ni wakeramurin tuke najanatas wakerakka, yakta wenukri meseawa tumawaitai.

Yakta wenukri meseramtai, nemase ainau nu yaktanmaka tuke pachitsuk wayaawartinuitai.

¹¿Esat amaunum micha kaya tumau ayaartin pengkerkai? ¿Tura juuktin kintia jeamtai,

yumi jiturti timinkai? ¿Turasha aints netsen wainkar tikishmatrar: Ameka juuntaitme timinkai?

²Chingki tura chinim nangkami juni we tura atu we: ¿Tuning wetaj? tusa nintimtsui.

Tura aints chikich aintsun tichamin ayat: Usukiajme ta nuka nangkami tawai.

³Kawai umirtukti tusar chapikjai awatrartin ainawai. Tura burro tupikiaki tusar jingkiawartin ainawai.

Tura aints netsenka antukat tusar numijai katsumkartin ainawai.

⁴Aints nintimchawa nuka amin nintinchau chichartamak pujamtaikia, ni chichaawa nunismeka aimkaip.

⁵Aints nintimchawa nuka chichartamak: pujamtaikia, amesha nunismek aimkakminkia, nuka: Wisha nintipitjai tu nintimias pujusminuitai.

⁶Aints nintimchaun: Ame tawai tusam tita tusa chichaman akupua nuka aints ni nawen

awatmamak pujawa nunisketai. Turasha aints umutai jatan umawa nunisketai.

⁷Aints nintimchau nuikiar tutai chichaman etsera nuka

aints makuin kupinak ashua ashua wekaawa tumawaitai.

⁸Aints ainau netse aintsun wainkar: Ame nintipitme tinu ainauka kaya merman jukiar,

chingki maatainam engkear nangkimina nunisarang ainawai.

⁹Aints nintinchau nuikiar tutai chichaman etsera nuka aints nampek jangkin pachitsuk achiawa tumawaitai.

¹⁰Aints netsen chicharak: Wijai takakmasta tauka aints tishimkun achik aints nangkaminaun pachitsuk ekettuk tukuawa nunisketai.

¹¹Aints nintinchau tuke nintimtsuk chichak pujawa nuka yawaa inukiat ataksha wakeki ni iniukmaurinak

yuwawa nunisketai. 26.11 2 Pe 2.22

¹²Aints ningki nintimtumas: Nintipitjai tumamua nuka pengké yapajiachminuitai.

Antsu aints nintinchaun Yus wakerakka yapajiamnawaitai.

¹³Aints nakia nuka takatan nakitau asa, juun yawaa nekas kajeu jintanam wekaawai, tu pujuwaitai. 26.13 Prov 22.13

¹⁴Waiti epentairi uraimua nuka mai yantá mai yantá muchiawa nujai metek

naki aints ni peakrin tepes mai yantá mai yantá tepes kánawai.

¹⁵Aints nakia nuka tachaun achiayat, yutairin yuatniunka takataitai tawai.

¹⁶Aints nakia nuka ningki nintimtumas: Wikia siete nekau aints aina nuna nangkamasnak nintipitjai tumamui.

¹⁷Aints jimiar jiyanikiar wajainamtai, chikich aints untsuachmaitiat nuni pachinkauka

yawaa kuwishnum achikiar takutnua nunisketai.

^18-19Aints ni irutkamurin anangkayat: Wikia aya nakurusan nangkami timiajai ta nuka, waurin nangkin ekettuk aintsnum nangkimua nunisketai. Turasha aints nangkin jinum kiaparti tusa jeanam nangkimua nunisketai.

²⁰Ji keemaktin atsamtaikia, ji kajintratnuitai. Turasha aujmakratin atsamtaikia, kajernaiyamuka atsutnuitai.

²¹Ji kairi amataikia, ji wári kiapartinuitai. Tura keemaktinka atsamtaikia, jikia kapaichminuitai.

Turasha aints maaniktas wakerin pujamtaikia, aints ainau wári kajernaikiartin ainawai.

²²Aujmakratniu chichamengka yuta yuuminua nunisketai.

Turasha nu chichaman nintinam ukusartin ainawai.

²³Aints chikich ainaun pase awajsatas wakerayat antujamniun chichauka

muits jakukutiat shiiram ati tusa patatkeng ipiakjai yakarmawa nunisketai.

^24-25Aints chikich ainaun kajerak pujauka nekaaracharti tusa pengker chichaayat, pase nintimias pujawai. Tura: Wikia aneajme tau wainiatum, nekasashi tiip. ²⁶Nu aintska ni kajekmaurinka uuktas wakerau wainiat, aints ainau mash paan nekaawartin ainawai.

²⁷Aints chikich aintsun pase awajsatas wakerakka, nu aintska waa taimunam ayaarti tusa, waan taimia nuni ningki ayaartinuitai. Tura aints chikich aintsun mesratas pampa wakenam kankekati tusa wakerakka, ningki nekemaktinuitai.

²⁸Aints tsanumniuka chikich aints ainaun pase awajsatas wakerau asa, nekas chichaman nakitawai.

Tura aints nangkami anangkak: Aneajme ta nuka aints ainaun pachimian nintimtikratnuitai.

¹Kashin wi warukatjak tusam nekachu asam: Wikia kashin nunaka turatatjai tuuka nintimraip 27.1 Stg 4.13-15; Luc 12.16-21

²Amek anenmamsam: Wikia pengke aintsuitjai tiip. Antsu chikich aints ainau turutiarti tita.

³Kaya ainau tura yaikmisha meram asar, aints ainauka nuna entsakaramtai itit awajsartin ainawai.

Tura netse kajetirisha aints ainaun nuna nangkamasarang itit awajsartin ainawai.

⁴Aintsu kajetirisha aints ainaun mesrartin ainawai. Tura aints nuwan kasmatina nunasha ¿yáki atsantrat?

⁵Aints ainaun chichaman uutsuk chicharkatniuka niin uukar aneetniunka nangkamasang pengkeraitai.

⁶Ii amikri iin anenmau asa, paan chichartamak: Ame turame nuka paseetai turama nuka pengkeraitai. Antsu ii nemase anangmak: Ameka pengke aintsuitme tayat ¿nekasash taj? tusam nekaachminuitme.

⁷Aints tutuaruka wapasa yumirincha nakitawai. Tura aints yaparak pujus,

yapaunasha yuwayat, yuminua nunisketai tusa nekapratnuitai.

⁸Chingki ni pasungkenia jiinki yaja weawa nuka aints ni nungkenia jiinki wekaakini wajawa nunisketai.

⁹Kungkutin ukatmamkar pengker awajmamsartinuitji. Turasha ii amikri iin chichartaminak:

Pengker pujusatasam wakerakmeka tu pujusta tina nuka ii nintincha kiakatmartin ainawai.

¹⁰Amikrumsha tura aparmi amikrisha pengke ukukiip. Tura itiurkachminnum pujakmeka yachimi jeenka weep. Ii irutkamuri arakchichu pujuina nuka ii yachi arak puja nuna nangkamasarang kakarmachu iin yaingkratin ainawai.

¹¹Uchiru, nekau ata. Turakmeka waramtikrustinuitme. Tura asakmin

wina pase chichartin ainaunka natsamtsuk aimkatnuitjai.

¹²Aints nintipkia nuka itiurkachminiun wainak ayamrumaktinuitai.

Antsu aints nintimchauka iturkachminiun waintsuk wait wajaktinnum wetinuitai.

¹³Aints nekashtai tumashmamtai, chikich aints: Wi akimiakatatjai tamatikia, nuna wejmakrin aitkam,

jurukim ukusta. 27.13 Prov 6.1-5; 20.16

¹⁴Aints kashik ni amikri jeen we kakaram untsumak: ¿Tsawaarumek? tamataikia,

nuka itit awajtustas tatsuash tu nintimratnuitai.

¹⁵Nuwa jiyakratnuka kinta yumi tsawaamunam makis kitiak itit awajkartinua tumawaitai.27.15 Prov 19.13¹⁶¿Nasengka metatniukai? ¿Tura uwejjai asaitisha achikminkai? Atsa.

Turasha nu nuwa jangkenka pengke metachminuitai.

¹⁷Aints ainau jirun chikich jirujai tsakatin ainawai.

Turasha jimiar aints mai nuwamtak chichasar pujusar yainikiartin ainawai.

¹⁸Aints arakan araak pengker wainua nuka nerencha yuatnuitai.

Tura ni juuntrincha pengker wainua nuka niincha pengker awajsartin ainawai.

¹⁹Aints ainau ni yapiin entsanam paan wainu wenawa nunisarang aints anturnaikiar

itiur nintimina nunasha paan nekaamawartin ainawai.

²⁰Aints ainauka mash jakartin ainawai. Tura asaramtai iwiartainum tuke ukusartin ainawai.

Antsu aints ainau ni wakeramuringkia: Nuke ati tusar metachartin ainawai.

²¹Aya kurik juwakat tusar, turasha aya jiruk juwakat tusar, kurisha tura jirusha pengkerashi tusar,

aints ainau jiinum tseerar, jiyamun sumin ainawai. Aints ainau chikich aintsun pachisar:

Warukuita tusar nekaatasar wakerinauka, aya chicharinak: Ameka pengker aintsuitme

tinu ainauka kakarmachu nekaamawartin ainawai.

²²Netse aintsun trigo neketainam engkeawar, nekea nekea awajinamaitiat tuke netsek juwaktinuitai.

^23-24Kuikiartin ainauka tukeka kuikiartinka wajasarchartin ainawai. Tura apu uchirisha tura tirangki ainausha tukeka apuka wajaschartin ainawai. Tura asaramtai ami tangkuram ainausha tenapkesam wainkata. ^25-26Muranmaya saak mash juukakmin, yamaram saak ataksha tsapaitnuitai. Turamtai uwija uree awaram, nuwa ainau ureen kutaminak entsartintrumin wantawartin ainawai.

Turinamtai chipu ainau surukam aja sumaktinuitme. ²⁷Tura amesha tura uchiram ainausha

tura amijai takakminak pujuinauka kapra muntsurin umurartin ainawai.

¹Papeachmaitiat pase aintska nukap sapijmiaku asa tupikiaktinuitai.

Antsu pengkera nuna turinauka juun yawaaya nunisarang sapijmiatsuk wajainawai.

²Pase aints yujainamtaikia, aints untsuri chikich ainaun inarartas wakerinawai. Antsu apu paan nintimniuka tura nekauka aints ainau taetet wajascharti tusa pengker inartinuitai.

³Pase aints kuikiartichu ainaun itit awajea nuka yumi nukap jitur arakan meseawa nunisketai.

⁴Umiktin chichaman umirchau ainauka pase aintsun pachisar: Nuke pengkeraitai tinawai.

Antsu umiktin chichaman umirinauka pase aints ainaun kiishmakartin ainawai.

⁵Pase aints ainauka pengker turatniunka nekainatsui. Antsu Apu Yusen seaina nuka

pengker turatniuka warimpita tusar mash nekaawartin ainawai.

⁶Aints kuikiartichu ayat, anangmichuka nekas pengkeraitai.

Antsu kuikiartin pase nintimias puja nuka nekas paseetai.

⁷Aintsu uchiri Yusen umiktin chichaman umirkauka, nekas paan nintimias pujawai.

Antsu chikich aints aya yurumkanak wakerin ainaujai tsanias pujakka, aparin inatsartinuitai.

⁸Aints kuikian ikiasuka niin tumaashmawaru ainaun chicharak: Atum akirkamarume nuna nangkamasrumek akirkataram taa nuka jakamtai, kuikian nukap ikiauntukmia nuna

chikich aints wait anenkartin kuikiartichu ainaun susati tusa ukuktinuitai.

⁹Aints Yusen umiktin chichaman umitan nakitamtaikia, Yus ni seamurincha antukchatnuitai.

¹⁰Aints pengke aintsun tunaun takamtikin asa, kuntin ejatkanam niapua nunisang mengkakatnuitai.

Antsu tunaun nakitin ainau Yusnum pujusartin ainawai.

¹¹Aints kuikiartin ningki nintimtumas: Wikia nintipitjai tumamui. Antsu kuikiartichuka nintip asa,

nu kuikiartinka paanka nintimtsui tusa nekamtikiatnuitai.

¹²Pengker turin ainauka pase aints ainaun nepetinamtai, aints mash warasartinuitai.

Antsu pase aints ainauka pengker ainaun nepetinamtai, aints mash anumkartinuitai. 28.12 Prov 28.28

¹³Aints ni tunaarin uwauka pengkerka pujuschamnawaitai.

Antsu ni tunaarin ujaak nunia inaiyamtaikia, Yus tsangkuratnuitai.

¹⁴Yusen tuke umirak puja nuka nukap warastinuitai.

Antsu Yusen umiitan nakitauka itiurkachminnum wait wajaktinuitai.

¹⁵Apu pase nintiniuka ni aintsri kuikiartichu ainaun wait anentsuk inawa nuka

juun yawaa kajeu tura yaparak pujawa nunisketai.

¹⁶Apu wait anengkratchauka: Aintsur kuikiartichu ainawai tusa nekayat, kuikian nukap akirkarti ta nuka nintinchawaitai. Antsu aints kuikian nukapka nakitauka untsuri musach angkan pujustinuitai.

¹⁷Aints mangkartinka ni turamurin tuke kajinmatsuk nintimua nuka wekaakini waja wajaka jakatnuitai. Tura mangkartin asamtai, chikich aints ainau: Iijai pujusmi tichartin ainawai.

¹⁸Aints anangmichuka itiurkachminnum pujayat, angkan wajastinuitai.

Antsu pase nintiniuka itiurkachminnum aneachmau mengkakatnuitai.

¹⁹Aints ni ajarin takakmawa nuka tsukamashtinuitai.

Antsu naki ainaujai tsanias wekawa nuka kuikiartichu wajastinuitai.

²⁰Aints anangmichun pachisar chikich aints ainau: Nuke pengke aintsuitai tiartin ainawai. Tura chikich aints waurak wári kuikiartin wajastas wakerakka, wait wajaktinuitai.

²¹Aints ainauti mash metek ainaji. Turayatrik aints yaparak tantan kasamak juwawa nuna pachis:

Nu aintska paseetai tichamin ainaji.

²²Aints wári kuikiartin wajastas wakerayat: Ukunmaka kuikiartichu wajastinuitjai tusangka nekaachminuitai.

²³Aints chikich aintsun chicharkamia nuna pachis ukunam: Nuka pengke aintsuitai titinuitai.

Tura chikich aints anangkak: Ameka pengke aintsuitme ta nuna chichamenka wári kajinmaktinuitai.

²⁴Aints ni aparin tura nukurincha kasarkayat: Wi turaja nuka tunaachawaitai tauka meskartinu amikrintai.

²⁵Wikia miajuitjai tumamtinka maaniktas wakerawai. Antsu Apu Yusen nintimtina nuka

waring achat ni turina nuka mash pengker turinawai.

²⁶Aints ningki nintimtumas: Nintipitjai ta nuka nintimchawaitai.

Antsu paan nintimniuka angkan pujustinuitai.

²⁷Aints kuikiartichun yayaa nuka pengké yuumakchatnuitai.

Antsu kuikiartichun yaaitan nakitina nuka nukap usukramu ainawai.

²⁸Pase aints ainauka pengker aints ainaun nepetinamtai, aints ainau anumrukartin ainawai. Antsu

pase aints ainau mengkakaramtai, pengker nintintin ainauka eemkartin ainawai. 28.28 Prov 28.12

¹Aints chikich aintsun chicharak: Tunaarum inaisata tusa nukap chicharmaitiat,

nu aintska antutsuk, tunaun inaitsuk turakka, aneachmau mengkakatnuitai.

²Pengker nintintin ainau ni yaktarin eemtikinamtaikia, aints ainau warainawai.

Antsu pase aints ainau chikich ainaun ínainamtaikia, chikich aints ainau wait wajainawai.

³Natsa nekas paan nintimias pujakka, aparin waramtikui.

Antsu natsa kungkatpijai tsanias pujauka apari kuikiarin nangkami ajapui.

⁴Inakratin ni aintsri ainaun nekas pengker inauka ni yaktarin eemtikiatnuitai.

Antsu chikich inakratniuka ni aintsri ainaun tuke: Akirkataram ta nuka ni yaktarin mesratnuitai.

⁵Aints tuke nangkami anangkak chikich aintsun chicharak: Ameka pengke aintsuitme tauka

aints kuntinun achiktas ejatkan ejatua nunisketai.

⁶Aintsu tunaari ainauka aints kuntinun achiktas ejatkan najanawarua nunisarang ainawai.

Antsu anangmichu ainauka pengker nintimsar warasartin ainawai.

⁷Aints pengker nintintin ainauka kuikiartichu ainau yuumamurin nintimsar pujuinawai.

Antsu pase aints ainauka nunaka pengké pachinatsui.

⁸Aints taetet awajsartin ainauka yaktanam pujuinaun itit awajsartin ainawai.

Tura paan nintimtin ainauka aints ainau kajernaiyamuri atsuti tusar pengker chichasartin ainawai.

⁹Aints paan nintimniuka netse aintsjai chichaman nakuirtas chicham iwiaaratniunam weak, netseka niin wishiku pujamt kajerkatnuitai. Antsu nuniangka chichaman iwiaaratatkama pengké tujintawai.

¹⁰Mangkartin aints ainauka aints anangmichun wainkar nukap kajerkatin ainawai.

¹¹Aints netseka pachitsuk ni wakeramurin najanui.

Antsu paan nintintin ainauka ni wakeramurin metatin ainawai.

¹²Aintsu apuri wait chichaman pachitsuk anturak pujakka, ni inatiri ainaun mash pasemamtikiatnuitai.

¹³Aints yamrumichun tura niin itit awajniuncha Apu Yuska mai metek ni jiijai ni turamurin jiisarti tusa najanamiayi. 29.13 Prov 22.3; Mat 5.45

¹⁴Inakratin kuikiartichu ainaun mash metek pengker awajua nuka tuke ni aintsri ainaun pengker inartinuitai.

¹⁵Uchi ainaun paan nintimin arti tusar chicharkartinuitai. Tura chicharmasha antichu ainaunka awatrartinuitai. Tura waininayat uchi pachishtai ainauka nukurin inatsartin ainawai.

¹⁶Pase aints ainau yujainamtaikia, tunausha nukap yujaawai.

Antsu anangmichu ainauka pase aints ainau mengkakatniurin wainkartin ainawai.

¹⁷Uchiram chicharkumka amin pengker nintimtikramratnuitai. Turamtai ni jiisam warastinuitme.

¹⁸Yuse chichame etserin atsamtaikia, aints ainau pachitsuk tunaun takainawai.

Antsu Yuse chichamen umirinauka nekasar pengker nintimsar pujuinawai.

¹⁹Aints ni inatirinka aya chichasang nuiniarchatnuitai. Kame, antayatang umirkashtinuitai.

²⁰¿Aints wárik chichaun wainukaitam? Kame, aints nintimchau ainauka

niin nangkamasarang nuimiartin ainawai. 29.20 Prov 26.12

²¹Aints ni inatirin uchichinak tsakatmaruka ukunam ni tsakatkaringkia ni wakeramurinak najanatnuitai.

²²Aints kajeuka tuke maaniktas wakerawai. Tura nu aintska tunaun nukap turatnuitai.

²³Aints ningki nintimtumasang: Miajuitjai taunka Yuska: Ameka mianchawaitme tawai.

Antsu aints: Mianchawaitjai tumamunka Yuska: Miajuitme tawai. 29.23 Mat 23.12; Luc 14.11; 18.14

²⁴Aints kasa aintsjai tsanias wekaas kasamua nuka ninki wiasmamkatnuitai. Tura aints ainau niin chicharinak: Ame nekame nuka Yusjai tajai tusam etserkata tinamaitiat pengké etsertsui.

²⁵Aints ainaun shaminauka chingki ejatkanam achikmawa nunisarang ainawai.

Antsu Apu Yusen nintimratin ainauka ejamkaru ainawai.

²⁶Aints untsuri aya apurinak wait anentrurti tusar seainawai.

Antsu Apu Yusen seaina nuka angkan pujusartin ainawai.

²⁷Pengke aints ainauka pase aints ainaunka nakitinawai.

Tura pase aints ainauka anangmichu ainaunka nakitinawai.

Juwaitai Agura chichamentai.

¹Jakeh uchiri Agurka Ithielan, tura Ucalnasha ju chicham ainaun ujakmiayi. Nuka Masanmaya aintsuyayi.

²Wikia nekasan chikich aints ainaun nangkamasnak timiá nekachuitjai. Aintsu nintimtairingkia winaruka atsawai. ³Wikia paan nintimratniuncha nuimiatrachuitjai. Turasha Yuse nekatiringkia nekachuitjai. ⁴¿Ya nayaimpinam waka, ataksha taramiayi? ¿Ya ni uwejejai nasen metamnawaita? ¿Ya juun entsanka tarachjai pempeawa? ¿Nungka mash irunina nuna najankauka yáki? ¿Ni naarisha yaita? ¿Tura uchirisha yaachita? ¿Ameka nuka nekamek?

⁵Yuse chichamengka nekasaintai. Tura asamtai aints ainau niin nintiminaunka Apu Yus ejaktinuitai.30.5 Sal 18.30⁶Yus ta nuke ati tusam chikich chicham patatkashtinuitme. Ame turakmeka Yus amin chichartamak: Waitaitme turamtinuitai. Turamatai waitrin wajastinuitme. 30.6 Ap 22.18

⁷Yusru, aya jimiarchinak seajme. Wikia jaatsain wait aneasam nuka surusta.

⁸Anangkartin wajasai tura wait chichaman etserin wajasai tusam nuka tsangkatrukta.

Turasha kuikiartinka tura kuikiartichusha wajasai tusam nusha tsangkatrukta. Tura asam

yurumak wi yuumaja nuke surusta. ⁹Kame, yurumkar ampintramtaikia wikia: Maj, Yusnaka yuumatsjai timinuitjai. Tura yurumkan yuumaknaka chikichnaun kasarkatnuitjai. Tura nuna turaknaka chikich aints ainau amin naarmin pachisar natsanpiakun chichasarai tusan nunaka seajme. 30.9 Mat 6.11

¹⁰Aintsu inatiri antuj wajamtai, takamtikniuri antamunam ni pachisam pase chichakaip. Nu turakminkia nuka amincha pachitmas pase chichastinuitai. Turamtai amek wiasmatramkatnuitme.

¹¹Aints aparin usukratniuka irunui. Turasha nukurin pengker awajchausha irunui.

¹²Kame, aints ni pase turutirin inaisachariat, ningki nintimtumasar: Wikia nekasan pengke

aintsuitjai tumamin ainawai. ¹³Tura chikich aints ainau jampesarang: Miajuitjai tumamsar

chikich aints ainaun suwirpiaku jiisar: Nuka mianchawaitai tinawai. ¹⁴Chikich aints ainau naingkia

saapia nunisarang ainawai. Tura juun nai ainausha kuchii ere tsakamua nunisarang ainawai.

Tura asar ni nungkarin kuikiartichu ainaun tura yuuminak pujuinauncha amukartas wakerinawai.

¹⁵Ichachi nawantri jimiaraitai. Nuka tuke: Surusta, surusta tinawai.

Tutuarchatin kampatam ainawai. Kame, nekas cuatroitai. Nuka tuke maaketai tinatsui.

¹⁶Ju ainawai: Jakau iwiarsamuka, nunia nuwa kaamauka, nunia nungka entsa pajamrachuka, nunia ji kiapamuka, nu ainauka tuke maaketai tichamin ainawai.

¹⁷Apartin niin yajutmarmaitiat nuna: Mianchawaitai tusa jiia nuna jiin kukui kuinkartin ainawai.

Tura chiwiangku uchiri kautkar ni namangken yuwar amukartinka nekas pengker atinuitai. Turasha nukuri

juuntach: Antukta tamaitiat pajaki aikratniunka nunisarang turuwaramtaikia nekas pengker atinuitai.

¹⁸Ju cuatro ainaun antukan, nintir jearchawitai:

¹⁹Kukui itiur yakí nanamua nuka, tura napi nawe atsayat, ¿itiur pampanam wekaawa? nunasha,

tura ¿juun entsanam kanu itiur nasejai wekaawa? nunasha,

tura ¿aishmang itiur nuwanam tsakaawa? nunasha nintir jearchawitai.

²⁰Nuwa aishrintin aishrin ajapu ukuki, chikich aintsjai kanauka yutancha yuwa, jangken japirua nunisang natsamtsuk:

Wikia tunaanaka turachmajai tawai.

²¹Ju cuatro iruna nuka tsantrachminuitai. Mash nungkanmaya ainau nuna pachisar: Nuka turachminuitai tinawai. ²²Ju ainawai: Aintsu inatiri apu wajasua nuka, turasha aints nintimchautiat ushuitai.

²³Turasha nuwa aints mash tsuutina nuka aintsun ninurtuk pujauka,

turasha nuwa inatiri ni inaun kintruk inawa nu ainawai.

²⁴Nunia ju nungkanam cuatro timiá tuupich aina nuka aints nintip aina nuna nangkamasarang nintip ainawai. ²⁵Ju ainawai:

Week ainauka kakaichu ainayat ni yuwatniurin esati juukar ukuinawai.

²⁶Kushi ainausha untsurinchu asar, waanam anumkar kaninawai.

²⁷Manchi ainau apuri atsau waininayat pekaankar nanaminawai.

²⁸Shampiusha timiá yupichuwach asaramtai, uwejjai achikmin ainayat,

pachitsuk apu jeen wayaawartin ainawai.

²⁹Tura cuatro meemasar: Miajuitjai tumamsar wekainauka ju ainawai:

³⁰Juun yawaa kajeuka aintsnaka tura pachim ainauncha shamchawa nuka,

³¹tura atashu aishmangkri jampe jampet wekainuitai.

Tura chivoka aintsun paperkuta ni kuwishijai shitaktinuitai.

Turasha aintsu apuri ni suntarin timiá untsuri ainaun inartinuitai.

³²Ameka nintimchau akumka, wikia miajuitjai tumamsam pujakum, aints ainau pase awajsatasam wakerakmeka nintimrata. ³³Waaka muntsuri macharati tusam, nukap shitakmeka muntsu machari jukitnuitme. Tura kakaram shiikmakmeka nujim numpartinuitai. Tura aints kajerkam jiyakmeka maaniktinuitme.

Apu Lemuela Chichame

¹Masanmaya apu Lemuel naartinu chichame ni nukuri nuiniarmia nuka juwaitai:

²Uchiru, amin jerermiajme. Wi Yusen seamtai akiinamiame. Nuna nangkamasnak ¿warinak

titajak? ³Uchiru, ami kakarmaram nuwanam ajapawaip. Warí, nuwa ainauka aintsu apuri pimpiru wajasti tusar mesratin ainawai. ⁴Uchiru Lemuela, apu ainauka umuti nekas kariau aina nuna umurchartin ainawai. ⁵Tuminamtai nampekar umiktin chichaman kajinmakiar ayamrumichu ainau wait wajainamtai, itiurchat awajkarai tusan tajame.

⁶Aints pimpiru ainauka tura wake mesekaru ainauka umuti kariaun umurarti tusam tsangkatkata.

⁷Nu aints ainauka nuna umurar ni yuumamurin tura ni wait wajakmaurincha kajinmakiartin ainawai.

^8-9Yamrumichu ainau tura yuuminak pujuinausha, tura kuikiartichu ainausha angkan pujusarti tusam

nu aints ainaun pachisam chichasta turasha yamrukta.

Nuwa pengkeran pachis nuikiartamu

¹⁰¿Nuwa nekas pengkera nuna yáki wainkat? Nu nuwa ainauka kaya ákik aina nuna nangkamasarang

timiá wakeruktinuitai.

¹¹Nu nuwa ainauka nekasar timiá pengker asaramtai, aishrisha niin pengker nintimtumasar pujuinawai. Tura asar kuikian tura wariri ainauncha nangkami ajaptsuk tenapkesar jeanam ukuinawai.

¹²Turinamtai kintajai metek aishrin paseka awajtsuk pujuinau asaramtai, aishri ainau tuke pengker

awajsartin ainawai.

¹³Nu nuwa ainauka uwija ureen sumakar, tura uruchnasha sumakar, tura kutamrar, kanetinam pujusar, tarachin najanin ainawai.

¹⁴Nu nuwa ainauka asum asar, arakia yurumkan tura warinchu ainaun ikiaaninawai.

¹⁵Tura tsawaatsaing nantakiar ni uchirin tura ni jeen pujuinauncha yuratin ainawai.

¹⁶Tura aja pengkeran wainkaru asar, nuna sumakar arak ainaun arawartin ainawai.

¹⁷Ni kunturi kakaram ainawai. Tura asaramtai kakaram takakminawai.

¹⁸Tura waririn surukar, kuikian irumramun wainkar, warutmaita tusar nekainawai.

Tura kashisha lamparingkian ikianatsuk takakminawai.

¹⁹Kashisha kutaminawai, turasha tarachin najanatin ainawai.

²⁰Tura kuikiartichu ainaun tura yuuminak pujuinauncha ni yuumamurin suwinawai.

²¹Micha amataikia ni weari ainauka entsati uwija uren najanamun entsarinau asar

tsetseminatsui. Turinau asar warinak entsarat tusar nintimtsuk pujuinawai.

²²Tura sekmati ainaun ningki najaninawai.

Turasha kuikiartin entsarina nujai metek entsatin entsarartin ainawai.

²³Turinau asaramtai aishrisha yaktanam chichamrin aina nujai irunin

asaramtai, mash aints ainau: Nuna aishrintai tusar nekawartin ainawai.

²⁴Nu nuwa ainauka entsatai ainaun tura senta ainauncha najaninak tarachin surin ainamunam surinawai.

²⁵Tura kakaram asar, kashin wi warukatjak tusar nintiminatsui.

²⁶Chichainaksha paan nintimsar chichainawai. Tura wait anengkratin asar,

chikich ainaun nuikiartinak, yaitasar nuikiartin ainawai.

²⁷Tura ni jeen pujuinauka itiur pujuinawa tusar wainu weenawai.

Turasha takakmatskeka pujuschartin ainawai.

^28-29Ni uchiri ainau tura aishri ainausha niin pengker nintiminau asar nuwarin chicharinak:

aina nuka untsuri irunui. Antsu ameka mash nuwa ainau nangkamasmek timiá pengkeraitme tinawai.

³⁰Nuwa shiiram ainau anangmaminak: Wikia chikich nuwa ainaun nangkamasnak timiá shiirmaitjai

tumamina nuka nangkamiar tinawai. Antsu nuwa Apu Yusen umirkauka timiá pengkeraitai.

³¹¡Yaktanam pujuinautiram, mash nu nuwa ainaun pachisrum: Nekasar pengker ainawai titaram!

¡Tura ni turamurijai metek pengker awajsataram!

Maaketai.